ܣܦܪܐ ܕܡܦܩܢܐ

ܩܦܠܐܘܢ : ܐ.

1 ܘܗܵܠܹܝܢ ܫܡܵܗܹ̈ܐ ܕܲܒ݂ܢܲܝ̈ ܝܼܣܪܵܝܹܠ ܕܥܲܠܘ ܠܡܸܨܪܹܝܢ ܥܲܡ ܝܲܥܩܘܿܒ݂: ܓܒܲܪ ܘܒܲܝܬܹܿܗ ܥܲܠܘ. 2 ܪܘܼܒܹܝܠ: ܘܫܸܡܥܘܿܢ: ܘܠܹܘܝܼ: ܘܝܼܗܘܼܕ݂ܵܐ. 3 ܘܐܝܼܣܵܟ݂ܵܪ: ܘܲܙܒ݂ܘܼܠܘܼܢ: ܘܒܸܢܝܵܡܹܝܢ. 4 ܘܕ݂ܵܢ: ܘܢܲܦ̮ܬܵܠܝܼ: ܘܓܵܕ݂: ܘܐܵܫܝܼܪ. 5 ܘܲܗܘ̤̈ܝ ܟܠ ܢܲܦ̮̈ܫܵܬ݂ܵܐ ܕܲܢܦܲܩ ܡܼܢ ܚܲܨܹܗ ܕܝܲܥܩܘܿܒ݂: ܫܲܒ݂ܥܝܼܢ ܢܲܦ̮̈ܫܲܢ: ܘܝܵܘܣܸܦ ܗܘܵܐ ܒܡܸܨܪܹܝܢ. 6 ܘܡܝܼܬ݂ ܝܵܘܣܸܦ ܘܟ݂ܠܗܘܿܢ ܐܲܚܵܘ̈ܗܝ: ܘܟ݂ܠܹܗ ܕܵܪܵܐ ܗܵܘ. 7 ܘܲܒ݂̈ܢܲܝ ܝܼܣܪܵܝܹܠ ܟܒܲܪܘ ܘܐܵܘܠܸܕ݂ܘ ܘܲܣܓ݂ܝܼܘ: ܘܲܬ݂ܩܸܦ ܛܵܒ݂ ܛܵܒ݂: ܘܐܸܬ݂ܡܲܠܝܲܬ݂ ܐܲܪܥܵܐ ܡܸܢܗܘܿܢ. 8 ܘܩܵܡ ܡܲܠܟܵܐ ܚܲܕ݂ܬ݂ܵܐ ܥܲܠ ܡܸܨܪܹܝܢ: ܕܠܵܐ ܝܵܕܲܥ ܗ̄ܘܵܐ ܠܹܗ ܠܝܵܘܣܸܦ. 9 ܘܐܸܡܲܪ ܠܥܲܡܹܗ: ܗܵܐ ܥܲܡܵܐ ܒ̈ܢܲܝ ܝܼܣܪܵܝܹܠ: ܣܲܓܝܼܐܝܼܢ ܘܬܲܩܝܼܦܝܼܢ ܡܸܢܲܢ. 10 ܗܲܒ݂ܘ ܢܸܬ݂ܚܲܟܲܡ ܠܗܘܿܢ ܥܲܕ݂ܠܵܐ ܣܵܓܹܝܢ: ܕܲܠܡܵܐ ܢܸܡܛܹܝܢ ܩܵܪܒ݂ܵܐ: ܘܢܸܬܿܬܵܘܣܦܘܼܢ ܐܵܦ ܗܸܢܘܿܢ ܥܲܠ ܣܲܢܐܲܝܢ: ܘܢܸܬ݂ܟܲܬܿܫܘܼܢ ܥܲܡܲܢ: ܘܢܲܣܩܘܼܢܵܢ ܡܼܢ ܐܲܪܥܵܐ. 11 ܘܣܵܡܘ ܥܠܲܝܗܘܿܢ ܫܲܠܝܼܛܹ̈ܐ: ܒܝܼܫܹ̈ܐ ܕܲܢܫܲܥܒܿܕ݂ܘܼܢ ܐܸܢܘܿܢ ܒܫܘܼܥܒܵܕ݂ܗܘܿܢ: ܘܒ݂ܵܢܹܝܢ ܗ̄ܘܵܘ ܩܘܼܪ̈ܝܵܐ ܒܹܝܬ݂ ܩܦܵܣܹ̈ܐ ܠܦܸܪܥܘܿܢ: ܠܦܝܼܬ݂ܘܿܡ ܘܲܠܪܲܥܡܣܝܼܣ. 12 ܘܲܟ݂ܡܵܐ ܕܗܸܢܘܿܢ ܡܫܲܥܒܿܕ݂ܝܼܢ ܗ̄ܘܵܘ ܠܗܘܿܢ: ܗܵܟܲܢܵܐ ܣܵܓܹܝܢ ܗ̄ܘܵܘ ܘܗܵܟܲܢܵܐ ܬܲܩܦܝܼܢ ܗ̄ܘܵܘ: ܘܥܵܩܲܬ݂ ܠܗܘܿܢ ܡܼܢ ܩܕ݂ܵܡ ܒ̈ܢܲܝ ܝܼܣܪܵܝܹܠ. 13 ܘܲܡܫܲܥܒܿܕ݂ܝܼܢ ܗ̄ܘܵܘ ܡܸܨܪܵܝܹܐ ܠܲܒ݂̈ܢܲܝ ܝܼܣܪܵܝܹܠ ܒܩܲܫܝܘܼܬ݂ܵܐ. 14 ܘܡܲܡܪܝܼܢ ܗ̄ܘܵܘ ܚܲܝܲܝ̈ܗܘܿܢ ܒܦܘܼܠܚܵܢܵܐ ܩܲܫܝܵܐ: ܒܛܝܼܢܵܐ ܘܲܒ݂ܠܸܒ݂ܢܹ̈ܐ ܘܲܒ݂ܟ݂ܠ ܥܒ݂ܵܕ݂ ܕܚܲܩܠܵܐ: ܟܠ ܫܘܼܥܒܵܕ݂ܵܐ ܕܲܡܫܲܥܒܿܕ݂ܝܢ ܗ̄ܘܵܘ ܠܗܘܿܢ ܒܩܲܫܝܘܼܬ݂ܵܐ. 15 ܘܐܸܡܲܪ ܡܲܠܟܵܐ ܕܡܸܨܪܹܝܢ ܠܚܲܝ̈ܵܬ݂ܵܐ ܥܸܒ݂ܪ̈ܵܝܵܬ݂ܵܐ: ܕܲܫܡܵܗ ܕܲܚܕ݂ܵܐ ܦܘܿܥܵܐ: ܘܲܫܡܵܗ ܕܐ̄ܚܪܹܬ݂ܵܐ ܫܘܼܦܪܵܐ. 16 ܘܐܸܡܲܪ ܠܗܹܝܢ: ܡܵܐ ܕܗܵܘ̈ܝܵܢ ܐܲܢ̄ܬܹܿܝܢ ܡܵܘ̈ܠܕ݂ܵܢ ܠܥܸܒ݂ܪܵܝܵܬ݂ܵܐ: ܗܘܲܝܬܹܿܝܢ ܚܲܙ̈ܝܵܢ ܡܵܐ ܕܒ݂ܵܪ̈ܟܵܢ: ܐܸܢ ܕܸܟ݂ܪܵܐ ܗ̄ܘܼ: ܗܘܲܝܬܹܿܝܢ ܩܲܛ̈ܠܵܢ ܠܹܗ: ܘܐܸܢ ܢܸܩܒܿܬ݂ܵܐ ܗ̄ܝܼ: ܗܘܲܝܬܹܿܝܢ ܡܲܚ̈ܝܵܢ ܠܵܗ. 17 ܘܲܕ݂ܚܲܠ ܚܲܝܵܬ݂ܵܐ ܡܼܢ ܐܲܠܵܗܵܐ: ܘܠܵܐ ܥܒܲܕ݂ ܐܲܝܟ݂ ܕܐܸܡܲܪ ܠܗܹܝܢ ܡܲܠܟܵܐ ܕܡܸܨܪܝܹܢ: ܘܡܲܚ̈ܝܲܢ ܗ̄ܘܲܝ ܛܠܵܝܹ̈ܐ. 18 ܘܲܩܪܵܐ ܡܲܠܟܵܐ ܕܡܸܨܪܹܝܢ ܠܚܲܝ̈ܵܬ݂ܵܐ ܘܐܸܡܲܪ ܠܗܹܝܢ: ܡܸܛܠ ܡܵܢܵܐ ܥܒܲܕܿܬܹܿܝܢ ܦܸܬ݂ܓ݂ܵܡܵܐ ܗܵܢܵܐ: ܘܐܲܚ̈ܝܼܬܹܿܝܢ ܛܠܵܝܹ̈ܐ. 19 ܘܐܸܡܲܪ ܚܲܝ̈ܵܬ݂ܵܐ ܠܦܸܪܥܘܿܢ: ܠܵܐ ܗܘ̤̈ܝ ܐܲܝܟ݂ ܢܸܫܹ̈ܐ ܡܸܨܪܵܝܵܬ݂ܵܐ ܥܸܒ݂ܪܵܝܵܬ݂ܵܐ: ܡܸܛܠ ܕܚܲܝܵܬ݂ܵܐ ܐܸܢܝܹܢ: ܘܥܲܕ݂ܠܵܐ ܥܵܐܠܵܐ ܥܠܲܝܗܹܝܢ ܚܲܝܬ݂ܵܐ ܝܵܠܕܵܢ. 20 ܘܐܲܛܐܸܒ݂ ܐܲܠܵܗܵܐ ܠܚܲܝܵܬ݂ܵܐ: ܡܸܛܠ ܕܲܥܒܲܕ݂ ܦܸܬ݂ܓ݂ܵܡܵܐ ܗܵܢܵܐ: ܘܲܣܓ݂ܝܼ ܥܲܡܵܐ ܘܲܬ݂ܩܸܦ ܛܵܒ݂. 21 ܘܲܗܘܵܐ ܕܟܲܕ݂ ܕܚܸܠ ܚܲܝܵܬ݂ܵܐ ܡܼܢ ܐܲܠܵܗܵܐ: ܥܒܲܕ݂ ܠܗܹܝܢ ܒܵܬܹ̈ܐ. 22 ܘܲܦܩܲܕ݂ ܦܸܪܥܘܿܢ ܠܟ݂ܠܹܗ ܥܲܡܵܐ ܘܐܸܡܲܪ: ܟܠ ܒܪܵܐ ܕܡܸܬ݂ܝܼܠܸܕ݂: ܒܢܲܗܪܵܐ ܬܸܫܕܿܘܼܢܹܗ: ܘܟ݂ܠ ܒܲܪܬ݂ܵܐ ܬܲܚܘܿܢ.

********

ܩܦܠܐܘܢ : ܒ.

1 ܘܐܸܙܲܠ ܓܲܒ݂ܪܵܐ ܡܼܢ ܒܹܝܬ݂ ܠܹܘܝܼ: ܘܲܢܣܲܒ݂ ܠܒܲܪܬ݂ ܠܹܘܝܼ. 2 ܘܒܸܛܢܲܬ݂ ܐܲܢ̄ܬܿܬ݂ܵܐ ܘܝܸܠܕܲܬ݂ ܒܪܵܐ: ܘܲܚܙܵܬܹܗ ܕܫܲܦܝܼܪ ܗ̄ܘܼ: ܘܛܲܫܝܵܬܹܗ ܬܠܵܬ݂ܵܐ ܝܲܪܚܝܼܢ. 3 ܘܠܵܐ ܐܸܫܟܿܚܲܬ݂ ܬܘܼܒ݂ ܠܲܡܛܲܫܵܝܘܼܬܹܗ: ܘܢܸܣܒܲܬ݂ ܠܵܗ ܩܹܒ݂ܘܼܬ݂ܵܐ ܕܩܲܝܣܵܐ ܕܥܲܪܩܵܐ: ܘܫܲܥܬܹܗ ܒܟ݂ܘܼܦܪܵܐ ܘܲܒ݂ܙܸܦ̮ܬܵܐ: ܘܣܵܡܲܬ݂ ܒܹܗ ܠܛܲܠܝܵܐ: ܘܣܵܡܬܹܗ ܒܲܪܩܵܩܵܐ ܥܲܠ ܣܸܦܬܹܗ ܕܢܲܗܪܵܐ. 4 ܘܩܵܡܲܬ ܚܵܬܹܗ ܡܼܢ ܪܘܼܚܩܵܐ: ܕܬܸܕܲܥ ܡܵܢܵܐ ܡܸܬ݂ܥܒܸܕ݂ ܠܹܗ. 5 ܘܢܸܚܬܲܬ݂ ܒܲܪܬ݂ ܦܸܪܥܘܿܢ ܕܬܸܣܚܹܐ ܒܢܲܗܪܵܐ: ܘܐܲܡܗܵܬ݂ܵܗ ܡܗܲܠܟ݂ܵܢ ܗ̄ܘܲܝ ܥܲܠ ܝܵܕ݂ ܢܲܗܪܵܐ: ܘܲܚܙܵܬܵܗ ܠܩܹܒ݂ܘܼܬ݂ܵܐ ܒܲܪܩܵܩܵܐ: ܘܫܲܕܪܲܬ݂ ܠܐܲܡܗܵܬ݂ܵܗ ܘܲܢܣܲܒ݂ܬܵܗ. 6 ܘܦܸܬ݂ܚܲܬ݂ ܘܲܚܙܵܬܹܗ ܠܛܲܠܝܵܐ: ܘܗܵܐ ܛܲܠܝܵܐ ܒܵܟܹܐ: ܘܚܵܣܲܬ݂ ܥܠܵܘܗܝ ܘܐܸܡܪܲܬ݂: ܡܼܢ ܒ̈ܢܲܝ ܥܸܒ݂ܪܵܝܹܐ ܗ̄ܘܼ ܗܵܢܵܐ. 7 ܘܐܸܡܪܲܬ݂ ܚܵܬܹܗ ܠܒܲܪܬ݂ ܦܸܪܥܘܿܢ: ܐܹܙܲܠ ܐܸܩܪܸܐ ܠܹܟ݂ܝ ܐܲܢ̄ܬܿܬ݂ܵܐ ܡܲܝܢܲܩܬ݂ܵܐ ܡܼܢ ܥܸܒ݂ܪܵܝܵܬ݂ܵܐ: ܘܬܲܝܢܸܩ ܠܹܟ݂ܝ ܛܲܠܝܵܐ ܗܵܢܵܐ. 8 ܘܐܸܡܪܲܬ݂ ܠܵܗ ܒܲܪܬ݂ ܦܸܪܥܘܿܢ ܙܸܠܝ: ܘܐܸܙܲܠ̄ܬ݂ ܥܠܲܝܡܬ݂ܵܐ: ܘܲܩܪܲܬ݂ ܠܐܸܡܹܗ ܕܛܲܠܝܵܐ. 9 ܘܐܸܡܪܲܬ݂ ܠܵܗ ܒܲܪܬ݂ ܦܸܪܥܘܿܢ: ܗܵܐ ܠܹܟ݂ܝ ܛܲܠܝܵܐ ܗܵܢܵܐ: ܐܲܝܢܸܩܝܘܼܗܝ ܠܝܼ: ܘܐܸܢܵܐ ܝܵܗ̄ܒܵܐ ܠܹܟ݂ܝ ܐܲܓ݂ܪܹܟ݂ܝ: ܘܢܸܣܒܲܬ݂ ܐܲܢ̄ܬܿܬ݂ܵܐ ܠܛܲܠܝܵܐ ܘܐܲܝܢܸܩܬܹܗ. 10 ܘܲܪܒ݂ܵܐ ܛܲܠܝܵܐ: ܘܐܲܝܬܿܝܵܬܹܗ ܠܒܲܪܬ݂ ܦܸܪܥܘܿܢ: ܘܲܗܘܵܐ ܠܵܗ ܒܪܵܐ: ܘܲܩܪܲܬ݂ ܫܡܹܗ ܡܘܼܫܹܐ: ܡܸܛܠ ܕܐܸܡܪܲܬ݂ ܕܡܼܢ ܡܲܝܵܐ ܫܠܹܝܬܹܗ. 11 ܘܲܗܘܵܐ ܒܝܵܘܡܵܬ݂ܵܐ ܗܸܢܘܿܢ: ܘܲܪܒ݂ܵܐ ܡܘܼܫܹܐ: ܘܲܢܦܲܩ ܠܘܵܬ݂ ܐܲܚܵܘܵܗܝ: ܘܲܚܙܵܐ ܒܫܘܼܥܒܵܕ݂ܗܘܿܢ: ܘܲܚܙܵܐ ܓܲܒ݂ܪܵܐ ܡܸܨܪܵܝܵܐ ܟܲܕ݂ ܡܵܚܹܐ ܠܓܲܒ݂ܪܵܐ ܥܸܒ݂ܪܵܝܵܐ: ܡܼܢ ܐܲܚܵܘܵܗܝ ܡܼܢ ܒ̈ܢܲܝ ܝܼܣܪܵܝܹܠ. 12 ܘܐܸܬ݂ܦܢܝܼ ܠܟ݂ܵܐ ܘܲܠܟ݂ܵܐ: ܘܲܚܙܵܐ ܕܠܲܝܬ ܐ̄ܢܵܫ: ܘܩܲܛܠܹܗ ܠܡܸܨܪܵܝܵܐ: ܘܛܲܡܪܹܗ ܒܚܵܠܵܐ. 13 ܘܲܢܦܲܩ ܠܝܵܘܡܵܐ ܐ̄ܚܪܹܢܵܐ: ܘܲܚܙܵܐ ܘܗܵܐ ܬܪܹܝܢ ܓܲܒ݂ܪܝܼܢ ܥܸܒ݂ܪܵܝܹܐ ܢܵܨܹܝܢ: ܘܐܸܡܲܪ ܠܡܲܣܟܿܠܵܢܵܐ: ܠܡܵܢܵܐ ܡܵܚܹܐ ܐܲܢ̄ܬ ܠܚܲܒ݂ܪܵܟ݂. 14 ܘܐܸܡܲܪ ܠܹܗ: ܡܲܢܘܼ ܥܲܒ݂ܕܵܟ݂ ܓܒܲܪ ܪܲܒ ܘܕܲܝܵܢ ܥܠܲܝܢ: ܠܡܸܩܛܠܲܢܝ ܐܵܡܲܪ ܐܲܢ̄ܬ: ܐܲܝܟ݂ ܕܲܩܛܲܠܬ ܐܸܬ݂ܡܵܠܝ ܠܡܸܨܪܵܝܵܐ ܗܵܘܼ: ܘܲܕ݂ܚܸܠ ܡܘܼܫܹܐ ܘܐܸܡܲܪ: ܫܲܪܵܝܪܵܐܝܼܬ݂ ܐܸܬ݂ܝܲܕ݂ܥܲܬ݂ ܡܸܠܬ݂ܵܐ. 15 ܘܲܫܡܲܥ ܦܸܪܥܘܿܢ ܦܸܬ݂ܓ݂ܵܡܵܐ ܗܵܢܵܐ: ܘܲܒ݂ܥܵܐ ܠܡܸܩܛܠܹܗ ܠܡܘܼܫܹܐ: ܘܲܥܪܲܩ ܡܘܼܫܹܐ ܡܼܢ ܩܕ݂ܵܡ ܦܸܪܥܘܿܢ: ܘܐܸܙܲܠ ܠܐܲܪܥܵܐ ܕܡܸܕ݂ܝܲܢ: ܘܝܼܬܸܒ݂ ܥܲܠ ܒܹܪܵܐ. 16 ܘܲܠܟ݂ܘܼܡܪܵܐ ܕܡܸܕ݂ܝܲܢ ܫܒܲܥ ܒ̈ܢܵܢ ܐܝܼܬ݂ ܗ̄ܘܲܝ: ܘܐܵܬ݂ܝܵܢ ܘܕ݂ܵܠ̈ܝܵܢ ܘܡܵܠ̈ܝܵܢ ܪܲܗܛܹ̈ܐ: ܠܡܲܫܩܵܝܼܘܼ ܥ̈ܵܢܵܐ ܕܐܲܒ݂ܘܼܗܹܝܢ. 17 ܘܐܵܬܹܝܢ ܪܵܥܵܘܵܬ݂ܵܐ ܘܛܵܪܕܿܝܼܢ ܠܗܹܝܢ: ܘܩܵܡ ܡܘܼܫܹܐ ܘܲܦܪܲܩ ܐܸܢܹܝܢ ܘܐܲܫܩܝܼ ܥܵܢܗܹܝܢ. 18 ܘܐܸܬܲܝ ܠܘܵܬ݂ ܪܥܘܼܐܹܝܠ ܐܲܒ݂ܘܼܗܹܝܢ: ܘܐܸܡܲܪ ܠܗܹܝܢ: ܡܸܛܠ ܡܵܢܵܐ ܐܲܫܩܝܼܬܹܿܝܢ ܒܲܥܓܲܠ ܝܵܘܡܵܢܵܐ. 19 ܐܵܡܪ̈ܲܢ ܠܹܗ: ܓܲܒ݂ܪܵܐ ܡܸܨܪܵܝܵܐ ܦܲܨܝܲܢ ܡܼܢ ܐܝܼܕ݂ܵܐ ܕܪ̈ܵܥܵܘܵܬ݂ܵܐ: ܘܐܵܦ ܡܸܕ݂ܠܵܐ ܕܠܵܐ ܠܲܢ: ܘܐܲܫܩܝܼ ܥܵܢܲܢ. 20 ܘܐܸܡܲܪ ܠܲܒ݂ܢܵܬܹܗ: ܐܲܝܟܵܐ ܗ̄ܘܼ: ܠܡܵܢܵܐ ܫܒܲܩ̈ܬܹܿܝܢܵܝܗܝ ܠܓܲܒ݂ܪܵܐ: ܙܸܠܝܹ̈ܢ ܩܪܲܝܢܵܝܗܝ ܘܢܹܐܟ݂ܘܿܠ ܠܲܚܡܵܐ. 21 ܘܐܸܨܛܒ݂ܝܼ ܡܘܼܫܹܐ ܠܡܸܬܲܒ݂ ܥܲܡ ܓܲܒ݂ܪܵܐ: ܘܝܲܗ̄ܒ݂ ܠܹܗ ܠܨܸܦܘܿܪܵܐ ܒܲܪܬܹܗ ܐܲܢ̄ܬܿܬ݂ܵܐ. 22 ܘܝܸܠܕܲܬ݂ ܒܪܵܐ: ܘܲܩܪܵܐ ܫܡܹܗ ܓܸܪܫܘܿܢ: ܡܸܛܠ ܕܐܸܡܲܪ ܕܬ݂ܵܘܬܵܒ݂ܵܐ ܗ̄ܘܹܝܬ݂ ܒܐܲܪܥܵܐ ܢܘܼܟ݂ܪܲܝܬܵܐ: ܘܝܸܠܕܲܬ݂ ܬܘܼܒ݂ ܒܪܵܐ ܕܲܬ݂ܪܹܝܢ ܠܡܘܼܫܹܐ: ܘܲܩܪܵܐ ܫܡܹܗ ܐܹܠܝܼܥܵܙܵܪ: ܡܸܛܠ ܕܐܲܠܵܗܵܐ ܕܐܲܒ݂ܵܗܲܝ̈ ܒܥܸܕ݂ܪܝ: ܘܦܲܨܝܲܢܝ ܡܼܢ ܚܲܪܒܹܿܗ ܕܦܸܪܥܘܿܢ. 23 ܘܲܗܘܵܐ ܠܝܵܘܡܵܬ݂ܵܐ ܣܲܓܿܝܼܐܹܐ ܗܵܢܘܿܢ: ܘܡܝܼܬ݂ ܡܲܠܟܵܐ ܕܡܸܨܪܹܝܢ: ܘܐܸܬܿܬܲܢܲܚܘ ܒ̈ܢܲܝ ܝܼܣܪܵܝܹܠ ܡܼܢ ܫܘܼܥܒܵܕ݂ܵܐ ܩܲܫܝܵܐ: ܘܨܲܠܝܼܘ ܘܣܸܠܩܲܬ݂ ܓܥܵܬ݂ܗܘܿܢ ܠܘܵܬ݂ ܐܲܠܵܗܵܐ ܡܼܢ ܫܘܼܥܒܵܕ݂ܵܐ. 24 ܘܲܫܡܲܥ ܐܲܠܵܗܵܐ ܐܸܢܲܩܬ݂ܗܘܿܢ: ܘܐܸܬܿܕܿܟܲܪ ܐܲܠܵܗܵܐ ܩܝܵܡܹܗ ܕܥܲܡ ܐܲܒ݂ܪܵܗܵܡ: ܘܥܲܡ ܐܝܼܣܚܵܩ: ܘܥܲܡ ܝܲܥܩܘܿܒ݂. 25 ܘܲܚܙܵܐ ܐܲܠܵܗܵܐ ܠܲܒ݂̈ܢܲܝ ܝܼܣܪܵܝܹܠ: ܘܝܼܕܲܥ ܐܲܠܵܗܵܐ.

********

ܩܦܠܐܘܢ : ܓ.

1 ܘܡܘܼܫܹܐ ܪܵܥܹܐ ܗ̄ܘܵܐ ܥܵܢܵܐ ܕܝܲܬ݂ܪܘܿܢ ܚܡܘܼܗܝ: ܟܘܼܡܪܵܐ ܕܡܸܕ݂ܝܲܢ: ܘܕܲܒ݂ܪܵܗ ܠܥܵܢܵܐ ܠܡܲܕ݂ܒܿܪܵܐ: ܘܐܸܬ݂ܵܐ ܠܛܘܼܪܹܗ ܕܐܲܠܵܗܵܐ ܠܚܘܿܪܝܼܒ݂. 2 ܘܐܸܬ݂ܚܙܝܼ ܠܹܗ ܡܲܠܲܐܟܹܗ ܕܡܵܪܝܵܐ: ܒܫܲܠܗܹܒ݂ܝܼܬ݂ܵܐ ܕܢܘܼܪܵܐ ܡܼܢ ܓܵܘ ܣܲܢܝܵܐ: ܘܲܚܙܵܐ ܣܲܢܝܵܐ ܕܡܸܬ݂ܓܵܘܙܠܵܐ ܒܹܗ ܢܘܼܪܵܐ: ܘܣܲܢܝܵܐ ܠܵܐ ܝܵܩܹܕ݂. 3 ܘܐܸܡܲܪ ܡܘܼܫܹܐ: ܐܸܣܛܸܐ ܘܐܸܚܙܸܐ ܚܸܙܘܵܐ ܗܵܢܵܐ ܪܲܒܵܐ: ܡܸܛܠ ܡܵܢܵܐ ܠܵܐ ܝܵܩܹܕ݂ ܣܲܢܝܵܐ. 4 ܘܲܚܙܵܐ ܡܵܪܝܵܐ ܕܲܣܛܵܐ ܠܡܸܚܙܵܐ: ܘܲܩܪܵܐ ܠܹܗ ܐܲܠܵܗܵܐ ܡܼܢ ܓܵܘ ܣܲܢܝܵܐ ܘܐܸܡܲܪ: ܡܘܼܫܹܐ ܡܘܼܫܹܐ: ܘܐܸܡܲܪ ܗܵܐ ܐܸܢܵܐ. 5 ܘܐܸܡܲܪ ܠܹܗ: ܠܵܐ ܬܸܬ݂ܩܲܪܲܒ݂ ܠܗܵܪܟܵܐ: ܫܪܝܼ ܡܣܵܐܢܲܝܟ ܡܼܢ ܪܸ̈ܓ݂ܠܲܝܟ: ܡܸܛܠ ܕܐܲܬ݂ܪܵܐ ܕܩܵܐܹܡ ܐܲܢ̄ܬ ܥܠܵܘܗܝ ܐܲܬ݂ܪܵܐ ܗ̄ܘܼ ܩܲܕܝܼܫܵܐ. 6 ܘܐܸܡܲܪ: ܐܸܢܵܐ ܐ̄ܢܵܐ ܐܲܠܵܗܹܗ ܕܐܲܒ݂ܘܼܟ݂: ܐܲܠܵܗܹܗ ܕܐܲܒ݂ܪܵܗܵܡ: ܘܐܲܠܵܗܹܗ ܕܐܝܼܣܚܵܩ: ܘܐܲܠܵܗܹܗ ܕܝܲܥܩܘܿܒ݂: ܘܛܲܫܝܼ ܐܸܢܘܿܢ ܡܘܼܫܹܐ ܐܲܦܵܘܗܝ: ܡܸܛܠ ܕܲܕ݂ܚܸܠ ܠܲܡܚܲܪ ܠܘܵܬ݂ ܐܲܠܵܗܵܐ. 7 ܘܐܸܡܲܪ ܡܵܪܝܵܐ: ܡܸܚܙܵܐ ܚܙܹܝܬ݂ ܫܘܼܥܒܵܕܹܗ ܕܥܲܡܝ ܕܲܒ݂ܡܸܨܪܹܝܢ: ܘܲܓ݂ܥܵܬ݂ܗܘܿܢ ܫܸܡܥܹܬ݂ ܡܼܢ ܩܕ݂ܵܡ ܡܫܲܥܒܿܕ݂ܵܢܲܝ̈ܗܘܿܢ: ܡܸܛܠ ܕܝܵܕܲܥ ܐ̄ܢܵܐ ܠܹܗ ܠܟܹܐܒ݂ܗܘܿܢ. 8 ܘܢܸܚܬܹܬ݂ ܠܲܡܦܲܨܵܝܘܼܬܹܗ ܡܼܢ ܐܝܼܕ݂ܵܐ ܕܡܸܨܪܵܝܹܐ: ܘܲܠܡܲܣܵܩܘܼܬܹܗ ܡܼܢ ܐܲܪܥܵܐ ܗܵܝ: ܠܐܲܪܥܵܐ ܕܲܪܘܝܼܚܵܐ ܘܛܵܒ݂ܵܐ: ܠܐܲܪܥܵܐ ܕܡܲܪܕܿܝܵܐ ܚܲܠܒ݂ܵܐ ܘܕܸܒ݂ܫܵܐ: ܠܐܲܪܥܵܐ ܕܲܟ݂ܢܲܥܢܵܝܹ̈ܐ: ܘܲܕ݂ܚܹܬ݂ܵܝܹ̈ܐ: ܘܕ݂ܵܐܡܘܼܪ̈ܵܝܹܐ: ܘܲܕ݂ܦܲܪ̈ܙܵܝܹܐ: ܘܲܕ݂ܚܵܘܵܝܹ̈ܐ: ܘܲܕ݂ܝܵܒ݂ܘܼܣܵܝܹ̈ܐ. 9 ܘܗܵܫܵܐ ܗܵܐ ܓܥܵܬ݂ܵܐ ܕܲܒ݂̈ܢܲܝ ܝܼܣܪܵܝܹܠ ܥܸܠܲܬ݂ ܠܘܵܬ݂ܝ: ܘܐܵܦ ܚܙܹܝܬ݂ ܐܘܼܠܨܵܢܹܐ: ܕܡܸܨܪ̈ܵܝܹܐ ܐܵܠܨܝܼܢ ܠܗܘܿܢ. 10 ܗܵܫܵܐ ܬܵܐ ܐܹܫܕܲܪܵܟ݂ ܠܘܵܬ݂ ܦܸܪܥܘܿܢ: ܘܐܲܦܸܩ ܠܥܲܡܝ ܒ̈ܢܲܝ ܝܼܣܪܵܝܹܠ ܡܼܢ ܡܸܨܪܝܹܢ. 11 ܘܐܸܡܲܪ ܡܘܼܫܹܐ ܠܐܲܠܵܗܵܐ: ܡܿܢ ܐܸܢܵܐ ܕܐܹܙܲܠ ܠܘܵܬ݂ ܦܸܪܥܘܿܢ ܘܐܲܦܸܩ ܠܲܕ݂ܒܹܝܬ݂ ܝܼܣܪܵܝܹܠ ܡܼܢ ܡܸܨܪܹܝܢ. 12 ܘܐܸܡܲܪ ܠܹܗ: ܐܸܢܵܐ ܐܸܗܘܸܐ ܥܲܡܵܟ݂: ܘܗܵܕܹܐ ܐܵܬ݂ܵܐ ܕܐܸܢܵܐ ܫܲܕܲܪܬܵܟ݂: ܡܵܐ ܕܐܲܦܸܩܬܿ ܠܥܲܡܵܐ ܡܼܢ ܡܸܨܪܹܝܢ: ܬܸܦܠܚܘܼܢ ܩܕ݂ܵܡ ܐܲܠܵܗܵܐ ܥܲܠ ܛܘܼܪܵܐ ܗܵܢܵܐ. 13 ܘܐܸܡܲܪ ܡܘܼܫܹܐ ܠܐܲܠܵܗܵܐ: ܗܵܐ ܐܸܢܵܐ ܐܹܙܲܠ ܠܘܵܬ݂ ܒ̈ܢܲܝ ܝܼܣܪܵܝܹܠ ܘܐܸܡܲܪ ܠܗܘܿܢ: ܡܵܪܝܵܐ ܐܲܠܵܗܵܐ ܕܐܲܒ݂ܵܗܲܝܟܿܘܿܢ ܫܲܕܪܲܢܝ ܥܠܲܝܟܘܿܢ: ܘܢܹܐܡܪܘܼܢ ܠܝܼ ܡܵܢ ܫܡܹܗ: ܘܡܵܢܵܐ ܐܹܡܲܪ ܠܗܘܿܢ. 14 ܘܐܸܡܲܪ ܐܲܠܵܗܵܐ ܠܡܘܼܫܹܐ: ܐܵܗܝܼܵܗ ܐܵܫܵܪܵܗܝܼܵܗ: ܘܐܸܡܲܪ ܗܵܟܲܢܵܐ ܬܹܐܡܲܪ ܠܲܒ݂̈ܢܲܝ ܝܼܣܪܵܝܹܠ: ܐܵܗܝܼܵܗ ܫܲܕܪܲܢܝ ܥܠܲܝܟܘܿܢ. 15 ܘܐܸܡܲܪ ܬܘܼܒ݂ ܐܲܠܵܗܵܐ ܠܡܘܼܫܹܐ: ܗܵܟܲܢܵܐ ܬܹܐܡܲܪ ܠܲܒ݂̈ܢܲܝ ܝܼܣܪܵܝܹܠ: ܡܵܪܝܵܐ ܐܲܠܵܗܵܐ ܕܐܲܒ݂ܵܗܲܝܟܿܘܿܢ: ܐܲܠܵܗܹܗ ܕܐܲܒ݂ܪܵܗܵܡ: ܘܐܲܠܵܗܹܗ ܕܐܝܼܣܚܵܩ: ܘܐܲܠܵܗܹܗ ܕܝܲܥܩܘܿܒ݂: ܫܲܕܪܲܢܝ ܥܠܲܝܟܘܿܢ: ܗܵܢܵܘ ܫܹܡܝ ܠܥܵܠܲܡ: ܘܗܵܢܵܘ ܕܘܼܟ݂ܪܵܢܝ ܠܕ݂ܵܪܕܵܪܝܼܢ. 16 ܙܸܠ ܟܲܢܸܫ ܠܣܵܒܹ̈ܐ ܕܲܒ݂̈ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܡܵܪܝܵܐ ܐܲܠܵܗܵܐ ܕܐܲܒ݂ܵܗܲܝܟܘܿܢ ܐܸܬ݂ܓܠܝܼ ܥܠܲܝ: ܐܲܠܵܗܹܗ ܕܐܲܒ݂ܪܵܗܵܡ ܘܕ݂ܐܝܼܣܚܵܩ ܘܲܕ݂ܝܲܥܩܘܿܒ݂: ܠܡܹܐܡܲܪ: ܡܸܬܿܕܿܟ݂ܵܪܘܼ ܐܸܬܿܕܿܟܲܪܬܿܟ݂ܘܿܢ: ܘܡܸܕܸܡ ܕܐܸܬ݂ܥܒܸܕ݂ ܠܟ݂ܘܿܢ ܒܡܸܨܪܹܝܢ. 17 ܘܐܸܡܪܹܬ݂ ܕܐܲܣܸܩܟ݂ܘܿܢ ܡܼܢ ܫܘܼܥܒܵܕ݂ܵܐ ܕܡܸܨܪ̈ܵܝܹܐ: ܠܐܲܪܥܵܐ ܕܲܟ݂ܢܲܥܢܵܝܹ̈ܐ: ܘܲܕ݂ܚܹܝܬ݂ܵܝܹ̈ܐ: ܘܕ݂ܵܐܡܘܼܪ̈ܵܝܹܐ: ܘܲܕ݂ܦܲܪ̈ܙܵܝܹܐ: ܘܲܕ݂ܚܵܘ̈ܵܝܹܐ: ܘܲܕ݂ܝܵܒ݂ܘܿܣܵܝܹ̈ܐ: ܠܐܲܪܥܵܐ ܕܡܲܪܕܿܝܵܐ ܚܲܠܒ݂ܵܐ ܘܕܸܒ݂ܫܵܐ. 18 ܘܢܸܫܡܥܘܼܢ ܠܩܵܠܵܟ݂: ܘܬܸܥܘܿܠ ܐܲܢ̄ܬ ܘܣܵܒܹ̈ܐ ܕܲܒ݂̈ܢܲܝ ܝܼܣܪܵܝܹܠ ܠܘܵܬ݂ ܡܲܠܟܵܐ ܕܡܸܨܪܹܝܢ: ܘܬܹܐܡܪܘܼܢ ܠܹܗ: ܡܵܪܝܵܐ ܐܲܠܵܗܵܐ ܕܥܸܒ݂ܪܵܝܹܐ ܐܸܬ݂ܓܠܝܼ ܥܠܲܝܢ: ܗܵܫܵܐ ܢܹܐܙܲܠ ܡܲܪܕܹܿܐ ܬܠܵܬ݂ܵܐ ܝܵܘܡܝܼܢ ܒܡܲܕ݂ܒܿܪܵܐ: ܘܲܢܕܲܒܲܚ ܠܡܵܪܝܵܐ ܐܲܠܵܗܲܢ. 19 ܘܐܸܢܵܐ ܝܵܕܲܥ ܐ̄ܢܵܐ ܕܠܵܐ ܫܵܒܹܩ ܠܟ݂ܘܿܢ ܡܲܠܟܵܐ ܕܡܸܨܪܹܝܢ ܠܡܹܐܙܲܠ: ܘܠܵܐ ܗ̄ܘܵܐ ܒܐܝܼܕ݂ܵܐ ܬܲܩܝܼܦܬܵܐ. 20 ܘܐܵܘܫܸܛ ܐܝܼܕ݂ܝ ܘܐܸܡܚܹܐ ܠܡܸܨܪܵܝܹܐ: ܒܟ݂ܠ ܬܸܕ݂ܡܪܵܬ݂ܵܐ ܕܐܸܥܒܸܿܕ ܒܲܝܢܵܬ݂ܗܘܿܢ: ܘܒ݂ܵܬܲܪܟܸܿܢ ܢܫܲܕܲܪܟ݂ܘܿܢ. 21 ܘܐܸܬܿܠܝܼܘܗܝ ܠܥܲܡܵܐ ܠܪܲܚܡܹܐ ܒܥܲܝܢܲܝܗܘܿܢ ܕܡܸܨܪܵܝܹܐ: ܘܟܲܕ݂ ܬܹܐܙܠ̄ܘܼܢ: ܠܵܐ ܬܹܐܙܠ̄ܘܿܢ ܣܪܝܼܩܵܐܝܼܬ݂. 22 ܬܸܫܐܲܠ ܐܲܢ̄ܬܿܬ݂ܵܐ ܡܼܢ ܫܒ݂ܵܒ݂ܬܵܗ ܘܡܼܢ ܬܵܘܬܵܒܲܬ݂ ܒܲܝܬܵܗ: ܡܵܐܢܹ̈ܐ ܕܕܲܗܒ݂ܵܐ: ܘܡܵܐܢܹ̈ܐ ܕܣܹܐܡܵܐ: ܘܲܠܒ݂ܘܼܫܹ̈ܐ: ܘܐܲܠܒܸܿܫܘ ܠܲܒ݂ܢܲܝ̈ܟܘܿܢ ܘܠܲܒ݂̈ܢܵܬ݂ܟ݂ܘܿܢ: ܘܢܲܦܸܨܘ ܠܡܸܨܪܵܝܹܐ.

*******

ܩܦܠܐܘܢ : ܕ.

1 ܘܲܥܢܵܐ ܡܘܼܫܹܐ ܘܐܸܡܲܪ: ܗܵܐ ܠܵܐ ܡܗܲܝܡܢܝܼܢ ܠܝܼ: ܘܠܵܐ ܫܵܡܥܝܼܢ ܠܩܵܠܝ: ܡܸܛܠ ܕܐܵܡܪܝܼܢ ܠܵܐ ܐܸܬ݂ܚܙܝܼ ܠܵܟ݂ ܡܵܪܝܵܐ. 2 ܘܐܸܡܲܪ ܠܹܗ ܡܵܪܝܵܐ: ܡܵܢܵܘ ܗܵܢܵܐ ܕܒ݂ܐܝܼܕ݂ܵܟ݂: ܘܐܸܡܲܪ ܚܘܼܛܪܵܐ. 3 ܘܐܸܡܲܪ ܐܲܪܡܵܝܗܝ ܒܐܲܪܥܵܐ: ܘܐܲܪܡܵܝܗ ܒܐܲܪܥܵܐ: ܘܲܗܘܵܐ ܚܸܘܝܵܐ: ܘܲܥܪܲܩ ܡܘܼܫܹܐ ܡܼܢ ܩܕ݂ܵܡܵܘܗܝ. 4 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܵܘܫܸܛ ܐܝܼܕ݂ܵܟ݂ ܘܐܲܚܘܿܕ݂ ܒܕ݂ܘܼܢܒܹܿܗ: ܘܐܵܘܫܸܛ ܐܝܼܕܹܗ ܘܚܲܡܣܸܢ ܒܹܗ: ܘܲܗܘܵܐ ܚܘܼܛܪܵܐ ܒܐܝܼܕܹܗ. 5 ܡܸܛܠ ܕܲܢܗܲܝܡܢܘܼܢ ܕܐܸܬ݂ܚܙܝܼ ܠܵܟ݂ ܡܵܪܝܵܐ ܐܲܠܵܗܵܐ ܕܐܲܒ݂ܵܗܲܝܗܘܿܢ: ܐܲܠܵܗܹܗ ܕܐܲܒ݂ܪܵܗܵܡ : ܐܲܠܵܗܹܗ ܕܐܝܼܣܚܵܩ: ܐܲܠܵܗܹܗ ܕܝܲܥܩܘܿܒ݂. 6 ܘܐܸܡܲܪ ܠܹܗ ܡܵܪܝܵܐ ܬܘܼܒ݂: ܐܲܥܸܠ ܐܝܼܕ݂ܵܟ݂ ܠܥܘܼܒܵܟ݂: ܘܐܲܥܸܠ ܐܝܼܕܹܗ ܠܥܘܼܒܹܿܗ ܘܐܲܦܩܵܗ: ܘܗܵܐ ܐܝܼܕܹܗ ܡܲܓܪܒ݂ܵܐ ܐܲܝܟ݂ ܬܲܠܓܵܐ. 7 ܘܐܸܡܲܪ ܠܹܗ ܡܵܪܝܵܐ ܐܲܗܦܸܟ݂ ܐܝܼܕ݂ܵܟ݂ ܠܥܘܼܒܵܟ݂: ܘܐܲܗܦܸܟ݂ ܐܝܼܕܹܗ ܠܥܘܼܒܹܿܗ: ܘܐܲܦܩܵܗ ܡܼܢ ܥܘܼܒܹܗ: ܘܲܗܘܵܬ ܠܵܗ ܐܲܝܟ݂ ܒܸܣܪܹܗ. 8 ܘܐܸܢ ܠܵܐ ܢܗܲܝܡܢܘܼܢ: ܘܠܵܐ ܢܸܫܡܥܘܼܢ ܠܩܵܠܵܐ ܕܐܵܬ݂ܵܐ ܩܲܕ݂ܡܲܝܬܵܐ: ܢܗܲܝܡܢܘܼܢ ܠܩܵܠܵܐ ܕܐܵܬ݂ܵܐ ܐ̄ܚܪܹܝܬ݂ܵܐ. 9 ܘܐܸܢ ܠܵܐ ܢܗܲܝܡܢܘܼܢ ܠܗܵܠܹܝܢ ܬܲܪܬܹܿܝܢ ܐܵܬ݂ܘܵܬ݂ܵܐ: ܘܠܵܐ ܢܸܫܡܥܘܼܢ ܠܩܵܠܵܟ݂: ܣܲܒ݂ ܡܼܢ ܡܲܝܵܐ ܕܢܲܗܪܵܐ ܘܐܲܫܘܿܕ݂ ܒܝܲܒ݂ܫܵܐ: ܘܗܵܢܘܿܢ ܡܲܝܵܐ ܕܲܢܣܲܒ݂ ܐܲܢ̄ܬ ܡܼܢ ܢܲܗܪܵܐ: ܢܸܗܘܘܿܢ ܕܡܵܐ ܒܝܲܒ݂ܫܵܐ. 10 ܘܐܸܡܲܪ ܡܘܼܫܹܐ ܠܡܵܪܝܵܐ: ܒܵܥܹܐ ܐ̄ܢܵܐ ܡܸܢܵܟ݂ ܡܵܪܝ: ܠܵܐ ܗ̄ܘܹܝܬ݂ ܓܲܒ݂ܪܵܐ ܕܡܲܡܠܠܵܐ ܐܵܦ ܡܼܢ ܐܸܬ݂ܡܵܠܝ: ܘܐܵܦ ܡܼܢ ܡܢܵܬ݂ܡܵܠܝ: ܘܐܵܦ ܡܼܢ ܥܸܕܵܢܵܐ ܕܡܲܠܸܠܬܿ ܥܲܡ ܥܲܒ݂ܕܵܟ݂: ܡܸܛܠ ܕܲܠܥܸܓ݂ܝ ܡܲܡܲܠܠܝ: ܘܲܥܛܸܠ ܠܸܫܵܢܵܐ ܐ̄ܢܵܐ. 11 ܘܐܸܡܲܪ ܠܹܗ ܡܵܪܝܵܐ: ܡܲܢܘܼ ܥܒܲܕ݂ ܦܘܼܡܵܐ ܠܐ̄ܢܵܫܵܐ: ܐܵܘ ܡܲܢܘܼ ܥܒܲܕ݂ ܦܹܐܩܵܐ: ܐܵܘ ܚܲܪܫܵܐ: ܐܵܘ ܦܬ݂ܝܼܚܵܐ: ܐܵܘ ܥܘܝܼܪܵܐ: ܠܵܐ ܗ̄ܘܵܐ ܐܸܢܵܐ ܡܵܪܝܵܐ. 12 ܘܗܵܫܵܐ ܙܸܠ: ܘܐܸܢܵܐ ܐܸܗܘܹܐ ܥܲܡ ܦܘܼܡܵܟ݂: ܘܐܲܠܦܵܟ݂ ܡܸܕܸܿܡ ܕܲܬ݂ܡܲܠܸܠ. 13 ܘܐܸܡܲܪ ܠܹܗ ܡܘܼܫܹܐ: ܒܵܥܹܐ ܐ̄ܢܵܐ ܡܸܢܵܟ݂ ܡܵܪܝ: ܫܲܕܲܪ ܒܝܲܕ݂ ܡܵܢ ܕܲܡܫܲܕܲܪ ܐܲܢ̄ܬ. 14 ܘܐܸܬ݂ܚܲܡܲܬ݂ ܪܘܼܓ݂ܙܹܗ ܕܡܵܪܝܵܐ ܥܲܠ ܡܘܼܫܹܐ: ܘܐܸܡܲܪ ܠܹܗ: ܗܵܐ ܐܲܗܪܘܿܢ ܐܲܚܘܼܟ݂ ܠܹܘܵܝܵܐ: ܝܵܕܲܥ ܐ̄ܢܵܐ ܕܲܡܲܡܠܵܠܘܼ ܡܡܲܠܸܠ ܗ̄ܘܼ: ܗܵܐ ܐܵܦ ܗܘܼ ܢܸܦܘܿܩ ܠܐܘܼܪܥܵܟ݂: ܘܢܸܚܙܹܝܟ݂: ܘܢܸܚܕܸܐ ܒܠܸܒܹܗ. 15 ܘܬܹܐܡܲܪ ܠܹܗ: ܘܲܬ݂ܣܝܼܡ ܦܸܬ݂ܓ݂ܵܡܲܝ̈ ܒܦܘܼܡܹܗ: ܘܐܸܢܵܐ ܐܸܗܘܸܐ ܥܲܡ ܦܘܼܡܵܟ݂ ܘܥܲܡ ܦܘܼܡܹܗ: ܘܐܲܠܸܦܟ݂ܘܿܢ ܡܸܕܸܿܡ ܕܬܸܥܼܒܿܕ݂ܘܼܢ. 16 ܗܘܼ ܢܡܲܠܸܠ ܥܲܡ ܥܲܡܵܐ: ܘܗܘܼ ܢܸܗܘܸܐ ܠܵܟ݂ ܡܬܲܪܓܿܡܵܢܵܐ: ܘܐܲܢ̄ܬ ܬܸܗܘܸܐ ܠܹܗ ܠܐܲܠܵܗ. 17 ܘܚܘܼܛܪܵܐ ܗܵܢܵܐ ܣܲܒ݂ ܒܐܝܼܕ݂ܵܟ݂: ܕܬܸܥܒܸܿܕ݂ ܒܹܗ ܐܵܬ݂ܘܵܬ݂ܵܐ. 18 ܘܲܗܦܲܟ݂ ܡܘܼܫܹܐ: ܘܐܸܙܲܠ ܠܘܵܬ݂ ܝܵܬ݂ܪܘܿܢ ܚܡܘܼܗܝ: ܘܐܸܡܲܪ ܠܹܗ: ܐܸܗܦܘܿܟ݂ ܐܹܙܲܠ ܠܘܵܬ݂ ܐܲܚܲܝ̈ ܕܲܒ݂ܡܸܨܪܹܝܢ: ܘܐܸܚܙܸܐ ܐܸܢ ܥܕܲܟܹܿܝܠ ܚܲܝܝܼܢ: ܘܐܸܡܲܪ ܝܵܬ݂ܪܘܿܢ ܠܡܘܼܫܹܐ: ܙܸܠ ܒܲܫܠܵܡܵܐ. 19 ܘܐܸܡܲܪ ܡܵܪܝܵܐ ܠܡܘܼܫܹܐ ܒܡܸܕ݂ܝܵܢ: ܗܦܘܿܟ݂ ܙܸܠ ܠܡܸܨܪܹܝܢ: ܡܸܛܠ ܕܡܝܼܬ݂ܘ ܠܗܘܿܢ ܟܠܗܘܿܢ ܓܲܒ݂ܪܹܐ ܕܒ݂ܵܥܹܝܢ ܗ̄ܘܵܘ ܢܲܦ̮ܫܵܟ݂. 20 ܘܲܕ݂ܒܲܪ ܡܘܼܫܹܐ ܠܐܲܢ̄ܬܿܬܹܗ ܘܠܲܒ݂̈ܢܵܘܗܝ: ܘܐܲܪܟܸܿܒ݂ ܐܸܢܘܿܢ ܥܲܠ ܚܡܵܪܵܐ: ܘܲܗܦܲܟ݂ ܠܡܹܐܙܲܠ ܠܡܸܨܪܹܝܢ: ܘܲܢܣܲܒ݂ ܡܘܼܫܹܐ ܚܘܼܛܪܵܐ ܕܐܲܠܵܗܵܐ ܒܐܝܼܕܹܗ. 21 ܘܐܸܡܲܪ ܡܵܪܝܵܐ ܠܡܘܼܫܹܐ: ܡܵܐ ܕܲܗܦܲܟ݂ܬ ܠܡܹܐܙܲܠ ܠܡܸܨܪܹܝܢ: ܚܙܝܼ ܟܠ ܬܸܕ݂ܡܪܵܬ݂ܵܐ ܕܲܥܒܲܕ݂ܬ ܒܐܝܼܕܲܝܟ: ܥܒܸܕ݂ ܐܸܢܘܿܢ ܩܕ݂ܵܡ ܦܸܪܥܘܿܢ: ܘܐܸܢܵܐ ܐܹܥܲܫܸܢ ܠܸܒܹܗ: ܘܠܵܐ ܢܫܲܕܿܪܝܼܘܗܝ ܠܥܲܡܵܐ. 22 ܘܐܸܡܲܪ ܠܦܸܪܥܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ: ܒܹܪܝ ܒܘܼܟ݂ܪܝ ܝܼܣܪܵܝܹܠ. 23 ܐܹܡܪܹܬ݂ ܠܵܟ݂ ܕܲܬ݂ܫܲܕܲܪ ܠܒܹܪܝ ܘܢܸܦܠܚܲܢܝ: ܘܐܸܢ ܠܵܐ ܨܵܒܹܐ ܐܲܢ̄ܬ ܠܡܲܫܲܕܵܪܘܼ ܠܒܹܪܝ ܗܵܐ ܩܵܛܹܠ ܐ̄ܢܵܐ ܠܲܒ݂ܪܵܟ݂ ܒܘܼܟ݂ܪܵܟ݂. 24 ܘܲܗܘܵܐ ܡܘܼܫܹܐ ܒܐܘܼܪܚܵܐ ܒܹܝܬ݂ ܒܵܘܬ݂ܵܐ: ܘܲܦܓܲܥ ܒܹܗ ܡܵܪܝܵܐ: ܘܲܒ݂ܥܵܐ ܠܡܸܩܛܠܹܗ ܠܡܘܼܫܹܐ. 25 ܘܢܸܣܒܲܬ݂ ܨܸܦܘܿܪܵܐ ܛܲܪܵܢܵܐ: ܘܓܸܙܪܲܬ݂ ܥܘܼܪܠܘܼܬ݂ܵܐ ܕܲܒ݂ܪܵܗ: ܘܐܸܚܕܲܬ݂ ܒܪܸܓ݂ܠܵܘܗܝ ܘܐܸܡܪܲܬ݂: ܚܲܬ݂ܢܵܐ ܕܲܕ݂ܡܵܐ ܐܲܢ̄ܬ ܠܝܼ. 26 ܘܐܲܪܦܝܼ ܡܸܢܹܗ: ܗܵܝܕܹܿܝܢ ܐܸܡܪܲܬ݂: ܚܲܬ݂ܢܵܐ ܕܲܕ݂ܡܵܐ ܠܲܓ݂ܙܘܼܪܬܵܐ. 27 ܘܐܸܡܲܪ ܡܵܪܝܵܐ ܠܐܲܗܪܘܿܢ: ܙܸܠ ܠܐܘܼܪܥܹܗ ܕܡܘܼܫܹܐ ܐܲܚܘܼܟ݂ ܠܡܲܕ݂ܒܿܪܵܐ: ܘܐܸܙܲܠ ܘܲܦܓܲܥ ܒܹܗ ܒܛܘܼܪܹܗ ܕܐܲܠܵܗܵܐ ܒܚܘܿܪܝܼܒ݂: ܘܢܲܫܩܹܗ. 28 ܘܚܵܘܝܼ ܡܘܼܫܹܐ ܠܐܲܗܪܘܿܢ ܟܠܗܘܿܢ ܦܸܬ݂ܓ݂ܵܡܵܘܗܝ ܕܡܵܪܝܵܐ ܕܫܲܕܪܹܗ: ܘܟ݂ܠ ܐܵܬ݂ܘܵܬ݂ܵܐ ܕܦܲܩܕܹܗ ܠܡܸܥܒܲܕ݂. 29 ܘܐܸܙܲܠܘ ܡܘܼܫܹܐ ܘܐܲܗܪܘܿܢ: ܘܟܲܢܸܫܘ ܠܟ݂ܠܗܘܿܢ ܣܵܒܹ̈ܐ ܕܲܒ݂̈ܢܲܝ ܝܼܣܪܵܝܹܠ. 30 ܘܐܸܡܲܪ ܐܲܗܪܘܿܢ ܟܠܗܘܿܢ ܦܸܬ݂ܓ݂ܵܡܹܐ ܕܐܸܡܲܪ ܡܵܪܝܵܐ ܠܡܘܼܫܹܐ: ܘܲܥܒܲܕ݂ ܐܵܬ݂ܘܵܬ݂ܵܐ ܩܕ݂ܵܡ ܥܲܡܵܐ. 31 ܘܗܲܝܡܸܢܘ ܥܲܡܵܐ: ܘܲܫܡܲܥܘ ܕܐܸܬܿܕܿܟܲܪ ܡܵܪܝܵܐ ܠܲܒ݂̈ܢܲܝ ܝܼܣܪܵܝܹܠ: ܘܕܲܚܙܵܐ ܫܘܼܥܒܵܕ݂ܗܘܿܢ: ܘܲܩܥܲܕ݂ܘ ܥܲܡܵܐ ܘܲܣܓܸܕ݂ܘ ܩܕ݂ܵܡ ܡܵܪܝܵܐ.

********

ܩܦܠܐܘܢ : ܗ.

1 ܘܒ݂ܵܬܲܪ ܗܵܝܕܹܿܝܢ: ܥܲܠܘ ܡܘܼܫܹܐ ܘܐܲܗܪܘܿܢ: ܘܐܸܡܲܪܘ ܠܦܸܪܥܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܫܲܕܲܪ ܠܥܲܡܝ ܘܲܢܚܲܓܿܘܿܢ ܠܝܼ ܒܡܲܕ݂ܒܿܪܵܐ. 2 ܘܐܸܡܲܪ ܦܸܪܥܘܿܢ: ܡܲܢܘܼ ܡܵܪܝܵܐ ܕܐܸܫܡܲܥ ܒܩܵܠܹܗ ܠܲܡܫܲܕܵܪܘܼ ܠܝܼܣܪܵܝܹܠ: ܠܵܐ ܝܵܕܲܥ ܐ̄ܢܵܐ ܠܡܵܪܝܵܐ: ܘܐܵܦ ܠܝܼܣܪܵܝܹܠ ܠܵܐ ܡܫܲܕܲܪ ܐ̄ܢܵܐ. 3 ܘܐܸܡܲܪܘ: ܡܵܪܝܵܐ ܐܲܠܵܗܵܐ ܕܥܸܒ݂ܪܵܝܹܐ ܐܸܬ݂ܓܿܠܝܼ ܥܠܲܝܢ: ܢܹܐܙܲܠ ܡܲܪܕܹܿܐ ܬܠܵܬ݂ܵܐ ܝܵܘܡܝܼܢ ܒܡܲܕ݂ܒܿܪܵܐ: ܘܲܢܕܲܒܲܚ ܠܡܵܪܝܵܐ ܐܲܠܵܗܲܢ: ܕܲܠܡܵܐ ܢܹܐܪܥܲܢ ܒܚܲܪܒܵܐ ܐܵܘ ܒܡܵܘܬܵܐ. 4 ܘܐܸܡܲܪ ܠܗܘܿܢ ܡܲܠܟܵܐ ܕܡܸܨܪܝܹܢ: ܠܡܵܢܵܐ ܡܘܼܫܹܐ ܘܐܲܗܪܘܿܢ ܡܒܲܛܠܝܼܢ ܐܲܢ̄ܬܿܘܿܢ ܠܥܲܡܵܐ ܡܼܢ ܥܒ݂ܵܕ݂ܗܘܿܢ: ܙܸܠܘ ܠܫܘܼܥܒܵܕ݂ܟ݂ܘܿܢ. 5 ܘܐܸܡܲܪ ܠܗܘܿܢ ܦܸܪܥܘܿܢ: ܗܵܐ ܣܲܓܿܝܼܐܝܼܢ ܗܵܫܵܐ ܥܲܡܵܐ ܕܐܲܪܥܵܐ: ܡܒܲܛܠܝܼܢ ܐܲܢ̄ܬܿܘܿܢ ܠܗܘܿܢ ܥܒ݂ܵܕ݂ܗܘܿܢ. 6 ܘܦܲܩܸܕ݂ ܦܸܪܥܘܿܢ ܒܝܵܘܡܵܐ ܗܵܘ ܠܫܲܠܝܼܛܵܘܗܝ ܕܥܲܡܵܐ: ܘܲܠܣܲܦܪܵܘܗܝ: ܘܐܸܡܲܪ ܠܗܘܿܢ. 7 ܠܵܐ ܬܵܘܣܦܘܼܢ ܠܡܸܬܲܠ ܬܸܒ݂ܢܵܐ ܠܥܲܡܵܐ ܠܡܲܪܡܵܝܘܼ ܠܸܒ݂ܢܹ̈ܐ: ܐܲܝܟ݂ ܕܐܸܬ݂ܡܵܠܝ ܘܐܲܝܟ݂ ܕܲܡܢܲܬ݂ܡܵܠܝ: ܗܸܢܘܿܢ ܢܹܐܙܠ̄ܘܼܢ ܢܲܩܫܘܼܢ ܠܗܘܿܢ ܬܸܒ݂ܢܵܐ. 8 ܘܚܘܼܫܒܵܢܵܐ ܕܠܸܒܹܢܹ̈ܐ ܕܥܵܒ݂ܕܝܼܢ ܗ̄ܘܵܘ: ܐܲܝܟ݂ ܕܡܼܢ ܐܸܬ݂ܡܵܠܝ ܘܐܲܝܟ݂ ܕܡܼܢ ܡܢܵܬ݂ܡܵܠܝ: ܬܲܪܡܘܼܢ ܥܠܲܝܗܘܿܢ: ܘܠܵܐ ܬܒܲܨܪܘܼܢ ܡܸܢܗܘܿܢ: ܡܸܛܠ ܕܒܲܛܵܠܹ̈ܐ ܐܸܢܘܿܢ: ܡܸܛܠ ܗܵܢܵܐ ܡܒܲܓܿܢܝܼܢ ܘܐܵܡܪܝܼܢ: ܢܹܐܙܲܠ ܢܕܲܒܲܚ ܠܐܲܠܵܗܲܢ. 9 ܬܸܥܫܲܢ ܥܒ݂ܝܼܕܿܬܵܐ ܥܲܠ ܓܲܒ݂ܪܹܐ ܘܢܸܪܢܘܿܢ ܒܵܗ: ܘܠܵܐ ܢܸܪܢܘܿܢ ܒܡܸܠܹ̈ܐ ܣܪܝܼܩܵܬ݂ܵܐ. 10 ܘܲܢܦܲܩܘ ܫܲܠܝܼܛܵܢܵܘܗܝ ܕܥܲܡܵܐ ܘܣܲܦܪܵܘܗܝ: ܘܐܸܡܲܪܘ ܠܥܲܡܵܐ: ܗܵܟܲܢܵܐ ܐܸܡܲܪ ܦܸܪܥܘܿܢ: ܠܵܐ ܝܵܗܹܒ݂ ܐ̄ܢܵܐ ܠܟ݂ܘܿܢ ܬܸܒ݂ܢܵܐ. 11 ܐܲܢ̄ܬܘܿܢ ܙܸܠܘ ܣܲܒ݂ܘ ܠܟ݂ܘܿܢ ܬܸܒ݂ܢܵܐ ܡܼܢ ܐܲܝܡܸܟܵܐ ܕܡܸܫܟܚܝܼܢ ܐܲܢ̄ܬܘܿܢ: ܘܡܸܕܸܡ ܠܵܐ ܢܸܬ݂ܒܲܨܲܪ ܡܼܢ ܥܒ݂ܵܕ݂ܟ݂ܘܿܢ. 12 ܘܐܸܬ݂ܒܲܕܲܪ ܥܲܡܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ: ܠܡܸܩܲܫ ܩܸܫܬܵܐ ܕܬܸܒ݂ܢܵܐ. 13 ܘܫܲܠܝܼܛܹ̈ܐ ܐܵܠܨܝܼܢ ܘܐܵܡܪܝܼܢ: ܐܲܫܠܸܡܘ ܥܒ݂ܵܕ݂ܟ݂ܘܢ ܐܲܝܟ݂ ܕܲܒ݂ܟ݂ܠܙܒܲܢ: ܐܲܝܟ݂ ܕܡܸܬ݂ܝܗܸܒ݂ ܗ̄ܘܵܐ ܠܟ݂ܘܢ ܬܸܒ݂ܢܵܐ. 14 ܘܐܸܬ݂ܪܕ݂ܝܘ ܣܵܦܪܹܐ ܕܲܒ݂̈ܢܲܝ ܝܼܣܪܵܝܹܠ: ܕܐܲܩܝܼܡܘ ܥܠܲܝܗܘܿܢ ܫܲܠܝܼܛܵܢܵܘܗܝ ܕܦܸܪܥܘܿܢ: ܘܐܵܡܪܝܼܢ: ܠܡܵܢܵܐ ܠܵܐ ܐܲܫܠܸܡܬܘܿܢ ܚܘܼܫܒܵܢܼܟ݂ܘܿܢ ܕܠܸܒ݂ܢܹ̈ܐ: ܐܲܝܟ݂ ܕܐܸܬ݂ܡܵܠܝ ܘܐܲܝܟ݂ ܕܲܡܢܲܬ݂ܡܵܠܝ: ܘܐܵܦ ܐܸܬ݂ܡܵܠܝ ܘܝܵܘܡܵܢܵܐ. 15 ܘܐܸܬ݂ܵܘ ܣܵܦܪܹ̈ܐ ܕܲܒ݂̈ܢܲܝ ܝܼܣܪܵܝܹܠ: ܘܲܡܒܲܓܿܢܝܼܢ ܩܕ݂ܵܡ ܦܸܪܥܘܿܢ ܘܐܵܡܪܝܼܢ: ܠܡܵܢܵܐ ܡܸܬ݂ܥܒܸܕ ܗܵܟܲܢܵܐ ܠܥܲܒ݂ܕܲܝܟ. 16 ܬܸܒ݂ܢܵܐ ܠܵܐ ܡܸܬ݂ܝܗܸܒ݂ ܠܥܲܒ݂ܕܲܝܟ: ܘܠܸܒ݂ܢܹܐ ܐܵܡܪܝܼܢ ܠܲܢ ܐܵܪܡܵܘ ܘܗܵܐ ܥܲܒܕܲܝܟ ܒܵܠܥܝܼܢ: ܘܚܵܛܹܐ ܐܲܢ̄ܬ ܥܲܠ ܥܲܡܵܟ݂. 17 ܘܐܸܡܲܪ ܠܗܘܿܢ ܦܸܪܥܘܿܢ: ܡܸܒ݂ܛܲܠ ܗ̄ܘܼ ܒܲܛܵܠܝܼܢ ܐܲܢ̄ܬܘܿܢ: ܡܸܛܠ ܗܵܢܵܐ ܐܵܡܪܝܼܢ ܐܲܢ̄ܬܘܿܢ ܢܹܐܙܲܠ ܢܕܲܒܲܚ ܠܡܵܪܝܵܐ. 18 ܗܵܫܵܐ ܙܸܠܘ ܘܲܥܒܸܕܘ: ܘܬܸܒ݂ܢܵܐ ܠܵܐ ܢܸܬ݂ܝܗܸܒ݂ ܠܟ݂ܘܢ: ܘܚܘܼܫܒܵܢܵܐ ܕܠܸܒ݂ܢܹ̈ܐ ܬܸܬܿܠܘܼܢ. 19 ܘܲܚܙܵܘ ܐܸܢܘܿܢ ܣܵܦܪܹܐ ܠܲܒ݂̈ܢܲܝ ܝܼܣܪܵܝܹܠ ܒܝܼܫܵܐܝܼܬ݂: ܘܐܵܡܪܝܼܢ ܠܗܘܿܢ: ܠܵܐ ܡܒܲܨܪܝܼܢ ܐܲܢ̄ܬܘܿܢ ܡܼܢ ܠܸܒ݂ܢܲܝܟܘܿܢ: ܐܸܠܵܐ ܐܲܝܟ݂ ܕܲܒ݂ܟ݂ܠܝܘܿܡ. 20 ܘܲܦܓܲܥܘ ܒܡܘܼܫܹܐ ܘܐܲܗܪܘܿܢ ܟܲܕ݂ ܩܵܝܡܝܼܢ ܠܘܼܩܒܲܠܗܘܿܢ: ܟܲܕ݂ ܢܦܲܩܘ ܡܼܢ ܩܕ݂ܵܡ ܦܸܪܥܘܿܢ. 21 ܘܐܸܡܲܪܘ ܠܗܘܿܢ: ܢܸܚܙܸܐ ܥܠܲܝܟܘܿܢ ܡܵܪܝܵܐ ܘܲܢܕ݂ܘܼܢ: ܕܐܲܒ݂ܐܸܫܬܘܿܢ ܠܪܘܼܚܲܢ ܒܥܲܝܢܲܝ ܦܸܪܥܘܿܢ ܘܲܒ݂ܥܲܝܢܲܝ ܥܲܒ݂ܕܵܘܗܝ: ܠܡܸܬܿܠܲܢ ܠܚܲܪܒܵܐ ܒܐܝܼܕܲܝܗܘܿܢ ܘܲܠܡܸܚܪܒܲܢ. 22 ܘܲܗܦܲܟ݂ ܡܘܼܫܹܐ ܠܘܵܬ݂ ܡܵܪܝܵܐ ܘܐܸܡܲܪ: ܡܵܪܝ: ܠܡܵܢܵܐ ܐܲܒ݂ܐܸܫܬܿ ܠܥܲܡܵܐ ܗܵܢܵܐ: ܘܲܠܡܵܢܵܐ ܫܲܕܲܪܬܵܢܝ. 23 ܕܡܼܢ ܫܵܥܬ݂ܵܐ ܕܐܸܬܹܝܬ݂ ܠܘܵܬ݂ ܦܸܪܥܘܿܢ ܠܲܡܡܲܠܠܘܼ ܒܲܫܡܵܟ݂: ܒܐܸܫ ܠܥܲܡܵܐ ܗܵܢܵܐ: ܘܡܸܦܪܲܩ ܠܵܐ ܦܪܲܩܬ ܠܥܲܡܵܟ݂.

********

ܩܦܠܐܘܢ : ܘ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܫܵܐ ܬܸܚܙܸܐ ܡܸܕܸܿܡ ܕܐܸܥܒܸܿܕ ܠܦܸܪܥܘܿܢ: ܡܸܛܠ ܕܒ݂ܐܝܼܕ݂ܵܐ ܬܲܩܝܼܦܬܵܐ ܢܫܲܕܲܪ ܐܸܢܘܿܢ: ܘܒܲܕ݂ܪܵܥܵܐ ܪܵܡܵܐ ܢܲܦܸܩ ܐܸܢܘܿܢ ܡܼܢ ܐܲܪܥܹܗ. 2 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ ܘܐܸܡܲܪ ܠܹܗ: ܐܸܢܵܐ ܐ̄ܢܵܐ ܡܵܪܝܵܐ. 3 ܕܐܸܬ݂ܓܠܝܼܬܿ ܠܐܲܒ݂ܪܵܗܵܡ ܘܠܐܝܼܣܚܵܩ ܘܲܠܝܲܥܩܘܿܒ݂ ܒܐܹܝܠܫܲܕܲܝ ܐܲܠܵܗܵܐ: ܘܫܹܡ ܡܵܪܝܵܐ ܠܵܐ ܚܵܘܝܼܬ݂ ܐܸܢܘܿܢ. 4 ܘܐܵܦ ܐܲܩܝܼܡܬܿ ܩܝܵܡܝ ܥܲܡܗܘܿܢ: ܠܡܸܬܲܠ ܠܗܘܿܢ ܐܲܪܥܵܐ ܕܲܟ݂ܢܲܥܢ: ܐܲܪܥܵܐ ܕܬ݂ܵܘܬܵܒ݂ܘܼܬ݂ܗܘܿܢ ܕܲܥܡܲܪܘ ܒܵܗ. 5 ܘܐܵܦ ܐܸܢܵܐ ܫܸܡܥܹܬ݂ ܐܸܢܲܩܬ݂ܵܐ ܕܲܒ݂̈ܢܲܝ ܝܼܣܪܵܝܹܠ: ܕܡܸܨܪܵܝܹܐ ܡܫܲܥܒܿܕ݂ܝܼܢ ܠܗܘܿܢ: ܘܐܸܬܿܕܲܟ݂ܪܹܬ݂ ܩܝܵܡܝ. 6 ܡܸܛܠ ܗܵܢܵܐ ܐܸܡܲܪ ܠܲܒ݂̈ܢܲܝ ܝܼܣܪܵܝܹܠ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ: ܘܡܲܦܸܩ ܐ̄ܢܵܐ ܠܟ݂ܘܿܢ ܡܼܢ ܫܘܼܥܒܵܕ݂ܵܐ ܕܡܸܨܪܵܝܹܐ: ܘܲܡܦܲܨܸܐ ܐ̄ܢܵܐ ܠܟ݂ܘܿܢ ܡܼܢ ܥܒ݂ܵܕ݂ܗܘܿܢ: ܘܐܸܦܪܘܿܩܟ݂ܘܿܢ ܒܐܝܼܕ݂ܵܐ ܬܲܩܝܼܦܬܵܐ ܘܒܲܕ݂ܪܵܥܵܐ ܪܵܡܵܐ: ܘܲܒ݂ܕ݂ܝܼܢܹܐ ܪܵܘܪܒܹܐ. 7 ܘܐܸܣܲܒ݂ܟ݂ܘܿܢ ܠܝܼ ܥܲܡܵܐ: ܘܐܸܗܘܸܐ ܠܟ݂ܘܿܢ ܐܲܠܵܗܵܐ: ܘܬܸܕܿܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ: ܕܡܲܦܸܩ ܐ̄ܢܵܐ ܠܟ݂ܘܿܢ ܡܼܢ ܫܘܼܥܒܵܕ݂ܵܐ ܕܡܸܨܪܵܝܹܐ. 8 ܘܐܲܝܬܹܿܝܟ݂ܘܿܢ ܠܐܲܪܥܵܐ ܕܐܲܪܝܼܡܹܬ݂ ܐܝܼܕ݂ܝ ܠܡܸܬܿܠܵܗ ܠܐܲܒ݂ܪܵܗܵܡ ܘܠܐܝܼܣܚܵܩ ܘܲܠܝܲܥܩܘܿܒ݂: ܘܐܸܬܿܠܝܼܗ ܠܟ݂ܘܿܢ ܝܵܪܬܘܼܬ݂ܵܐ: ܐܸܢܵܐ ܡܵܪܝܵܐ. 9 ܘܐܸܡܲܪ ܗܵܟܲܢܵܐ ܡܘܼܫܹܐ ܠܲܒ݂̈ܢܲܝ ܝܼܣܪܵܝܹܠ: ܘܠܵܐ ܫܲܡܥܘܼܗܝ ܠܡܘܼܫܹܐ: ܡܼܢ ܟܲܪܝܘܼܬ݂ ܪܘܼܚܵܐ ܘܡܼܢ ܫܘܼܥܒܵܕ݂ܵܐ ܩܲܫܝܵܐ. 10 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ ܠܡܹܐܡܲܪ. 11 ܙܸܠ ܐܸܡܲܪ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܲܢܫܲܕܲܪ ܠܲܒ݂̈ܢܲܝ ܝܼܣܪܵܝܹܠ ܡܼܢ ܐܲܪܥܹܗ. 12 ܘܐܸܡܲܪ ܡܘܼܫܹܐ ܠܡܵܪܝܵܐ: ܗܵܐ ܒ̈ܢܲܝ ܝܼܣܪܵܝܹܠ ܠܵܐ ܫܵܡܥܝܼܢ ܠܝܼ: ܐܲܝܟܲܢܵܐ ܢܸܫܡܥܲܢܝ ܦܸܪܥܘܿܢ: ܕܲܠܥܸܓ݂ ܠܸܫܵܢܝ. 13 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ ܘܥܲܡ ܐܲܗܪܘܿܢ: ܘܲܦܩܲܕ݂ ܐܸܢܘܿܢ ܠܘܵܬ݂ ܒ̈ܢܲܝ ܝܼܣܪܵܝܹܠ ܘܲܠܘܵܬ݂ ܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܠܡܲܦܵܩܘܼ ܠܲܒ݂̈ܢܲܝ ܝܼܣܪܵܝܹܠ ܡܼܢ ܐܲܪܥܵܐ ܕܡܸܨܪܹܝܢ. 14 ܘܗܵܠܹܝܢ ܪܹܫܹܐ ܕܒܹܝܬ݂ ܐܲܒ݂ܵܗܲܝܗܘܿܢ: ܒܢܲܝ ܪܘܼܒܹܝܠ ܒܘܼܟ݂ܪܹܗ ܕܝܼܣܪܵܝܹܠ: ܚܢܘܿܟ݂ ܘܦܲܠܘܿ: ܘܚܸܨܪܘܿܢ ܘܟܲܪܡܝܼ: ܗܵܠܝܹܢ ܫܲܪܒ݂ܵܬܹܗ ܕܪܘܼܒܹܝܠ. 15 ܘܲܒ݂ܢܲܝ ܫܸܡܥܘܿܢ: ܝܲܡܘܼܐܹܝܠ: ܘܝܲܡܝܼܢ: ܘܐܵܗܵܪ: ܘܝܲܟ݂ܝܼܢ: ܘܨܵܚܵܪ: ܘܫܵܐܘܿܠ ܒܲܪ ܟܢܲܥܢܲܝܬܵܐ: ܗܵܠܹܝܢ ܫܲܪܒ݂ܵܬ݂ܵܐ ܕܫܸܡܥܘܿܢ. 16 ܘܗܵܠܹܝܢ ܫܡܵܗܹܐ ܕܲܒ݂ܢܲܝ ܠܹܘܝܼ ܠܫܲܪܒ݂ܵܬ݂ܗܘܿܢ ܓܸܪܫܘܿܢ ܘܩܵܗܲܬ ܘܲܡܪܵܪܝܼ: ܘܲܫܢܲܝܵܐ ܕܲܚܝܵܐ ܠܹܘܝܼ: ܡܵܐܐ ܘܲܬ݂ܠܵܬ݂ܝܼܢ ܘܲܫܒܲܥ ܫܢܝܼܢ. 17 ܘܲܒ݂ܢܵܘܗܝ ܕܓܸܪܫܘܿܢ: ܠܲܒ݂ܢܝܼ ܘܫܲܡܥܝܼ ܠܫܲܪܒ݂ܵܬ݂ܗܘܿܢ. 18 ܘܲܒ݂ܢܵܘܗܝ ܕܩܵܗܵܬ݂: ܥܲܡܪܲܡ ܘܝܲܨܗܵܪ: ܘܚܸܒ݂ܪܘܿܢ: ܘܥܘܼܙܹܝܠ: ܘܲܫܢܲܝܵܐ ܕܲܚܝܵܐ ܩܵܗܵܬ݂: ܡܵܐܐ ܘܲܬ݂ܠܵܬ݂ܝܼܢ ܘܲܬ݂ܠܵܬ݂ ܫܢܝܼܢ. 19 ܘܲܒ݂ܢܵܘܗܝ ܕܲܡܪܵܪܝܼ: ܡܲܚܠܝܼ: ܘܡܘܼܫܝܼ: ܗܵܠܹܝܢ ܫܲܪܒ݂ܵܬ݂ܵܐ ܕܠܹܘܵܝܹ̈ܐ ܠܫܲܪܒ݂ܵܬ݂ܵܗܘܿܢ. 20 ܘܲܢܣܲܒ݂ ܥܲܡܪܲܡ ܐܲܢ̄ܬܿܬ݂ܵܐ ܠܝܘܼܟ݂ܵܒ݂ܵܪ ܒܲܪܬ ܕܵܕܹܗ: ܘܝܸܠܕܲܬ݂ ܠܹܗ ܠܐܲܗܪܘܿܢ ܘܲܠܡܘܼܫܹܐ ܘܲܠܡܲܪܝܲܡ: ܘܲܫܢܲܝܵܐ ܕܲܚܝܵܐ ܥܲܡܪܲܡ ܡܵܐܐ ܘܲܬ݂ܠܵܬ݂ܝܼܢ ܘܲܫܒܲܥ ܫܢܝܼܢ. 21 ܘܲܒ݂ܢܵܘܗܝ ܕܝܲܨܗܵܪ: ܩܘܼܪܚ ܘܲܢܦܲܓ݂ ܘܙܲܟ݂ܪܝܼ. 22 ܘܲܒ݂ܢܵܘܗܝ ܕܥܘܼܙܹܝܠ: ܡܲܢܫܵܐܹܝܠ ܘܐܹܠܝܼܨܦܲܢ: ܘܣܲܬ݂ܪܝܼ. 23 ܘܲܢܣܲܒ݂ ܐܲܗܪܘܿܢ ܠܐܹܠܝܼܫܒܲܥ ܒܲܪܬ݂ ܥܲܡܝܼܢܵܕ݂ܵܒ݂ ܚܵܬܹܗ ܕܢܸܚܫܘܿܢ ܐܲܢ̄ܬܿܬ݂ܵܐ: ܘܝܸܠܕܲܬ݂ ܠܹܗ ܠܢܵܕ݂ܵܒ݂ ܘܠܲܐܒ݂ܝܼܗܘܿ: ܘܠܹܐܠܝܼܥܵܙܵܪ ܘܠܐܝܼܬ݂ܵܡܵܪ. 24 ܘܲܒ݂ܢܲܝ ܩܘܼܪܚ: ܐܵܣܝܼܪ ܘܗܲܠܩܵܢܵܐ ܘܐܲܟܸܿܢܣܵܦ: ܗܵܠܹܝܢ ܫܲܪܒ݂ܵܬ݂ܵܐ ܕܩܘܼܪܚ. 25 ܘܐܹܠܝܼܥܵܙܲܪ ܒܲܪ ܐܲܗܪܘܿܢ ܢܣܲܒ݂ ܠܹܗ ܐܲܢ̄ܬܿܬ݂ܵܐ ܡܼܢ ܒܢܵܬܹܗ ܕܦܲܢܛܝܼܠ: ܘܝܸܠܕܲܬ݂ ܠܹܗ ܠܦܝܼܢܚܸܣ: ܗܵܠܹܝܢ ܪܹܫܹܐ ܕܫܲܪܒ݂ܵܬ݂ܵܐ ܕܠܹܘܵܝܹ̈ܐ ܠܫܲܪܒ݂ܵܬ݂ܵܗܘܿܢ. 26 ܗܵܢܵܘ ܡܘܼܫܹܐ ܘܐܲܗܪܘܿܢ ܕܐܸܡܲܪ ܠܗܘܿܢ ܡܵܪܝܵܐ: ܐܲܦܸܩܘ ܠܲܒ݂̈ܢܲܝ ܝܼܣܪܵܝܹܠ ܡܼܢ ܐܲܪܥܵܐ ܕܡܸܨܪܹܝܢ ܟܠ ܚܲܝܠܵܘܵܬ݂ܗܘܿܢ. 27 ܗܸܢܘܿܢ ܐܸܡܲܪܘ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܠܡܲܦܵܩܘܼ ܠܲܒ݂̈ܢܲܝ ܝܼܣܪܵܝܹܠ ܡܼܢ ܐܲܪܥܵܐ ܕܡܸܨܪܹܝܢ: ܡܘܼܫܹܐ ܘܐܲܗܪܘܿܢ. 28 ܘܲܗܘܵܐ ܒܝܵܘܡܵܐ ܕܡܲܠܸܠ ܡܵܪܝܵܐ ܥܲܡ ܡܘܼܫܹܐ ܒܐܲܪܥܵܐ ܕܡܸܨܪܹܝܢ. 29 ܡܲܠܸܠ ܡܵܪܝܵܐ ܥܲܡ ܡܘܼܫܹܐ ܘܐܸܡܲܪ ܠܹܗ: ܐܸܢܵܐ ܐ̄ܢܵܐ ܡܵܪܝܵܐ: ܐܸܡܲܪ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܟܠ ܡܸܕܸܿܡ ܕܐܵܡܲܪ ܐ̄ܢܵܐ ܠܵܟ݂. 30 ܘܐܸܡܲܪ ܡܘܼܫܹܐ ܠܡܵܪܝܵܐ: ܕܝܼܠܝ ܠܥܸܓ݂ ܠܸܫܵܢܝ: ܐܲܝܟܲܢܵܐ ܢܸܫܡܥܲܢܝ ܦܸܪܥܘܿܢ.

********

ܩܦܠܐܘܢ : ܙ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܚܙܝܼ ܕܝܲܗ̄ܒ݂ܬܵܟ݂ ܐܲܠܵܗܵܐ ܠܦܸܪܥܘܿܢ: ܘܐܲܗܪܘܿܢ ܐܲܚܘܼܟ݂ ܢܸܗܘܸܐ ܢܒ݂ܝܼܵܟ݂. 2 ܐܲܢ̄ܬܿ ܬܹܐܡܲܪ ܟܠ ܡܸܕܸܿܡ ܕܲܡܦܲܩܸܕ݂ ܐ̄ܢܵܐ ܠܵܟ݂: ܘܐܲܗܪܘܿܢ ܐܲܚܘܼܟ݂ ܢܹܐܡܲܪ ܠܦܸܪܥܘܿܢ: ܘܠܲܒ݂̈ܢܲܝ ܝܼܣܪܵܝܹܠ ܢܫܲܕܲܪ ܡܼܢ ܐܲܪܥܹܗ. 3 ܘܐܸܢܵܐ ܐܹܩܲܫܸܐ ܠܸܒܹܿܗ ܕܦܸܪܥܘܿܢ: ܘܐܲܣܓܹܿܐ ܐܵܬ݂ܘܵܬ݂ܝ ܘܬܸܕ݂ܡܪܵܬ݂ܝ ܒܐܲܪܥܵܐ ܕܡܸܨܪܹܝܢ. 4 ܘܠܵܐ ܢܸܫܡܲܥܟ݂ܘܿܢ ܦܸܪܥܘܿܢ: ܘܐܸܬܸܿܠ ܐܝܼܕ݂ܝ ܒܡܸܨܪܹܝܢ: ܘܐܲܦܸܩ ܚܲܝܠܵܘܵܬ݂ܝ ܘܥܲܡܝ ܒ̈ܢܲܝ ܝܼܣܪܵܝܹܠ ܡܼܢ ܐܲܪܥܵܐ ܕܡܸܨܪܹܝܢ ܒܕ݂ܝܼܢܹ̈ܐ ܪܵܘܪܒܹܐ. 5 ܘܢܸܕܥܘܼܢ ܡܸܨܪܵܝܹܐ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܐܵܪܝܼܡܹܬ݂ ܐܝܼܕ݂ܝ ܥܲܠ ܡܸܨܪܵܝܹܐ: ܘܐܲܦܩܹܬ݂ ܠܲܒ݂̈ܢܲܝ ܝܼܣܪܵܝܹܠ ܡܼܢ ܒܲܝܢܵܬ݂ܗܘܿܢ. 6 ܘܲܥܒܲܕ݂ܘ ܡܘܼܫܹܐ ܘܐܲܗܪܘܿܢ ܐܲܝܟ݂ ܕܦܲܩܸܕ݂ ܐܸܢܘܿܢ ܡܵܪܝܵܐ: ܗܵܟܲܢܵܐ ܥܒܲܕ݂ܘ. 7 ܘܡܘܼܫܹܐ ܒܲܪ ܬܡܵܢܐܝܼܢ ܗ̄ܘܵܐ ܫܢܝܼܢ: ܘܐܲܗܪܘܿܢ ܒܲܪ ܬܡܵܢܐܝܼܢ ܗ̄ܘܵܐ ܘܲܬ݂ܠܵܬ݂ ܫܢܝܼܢ: ܟܲܕ݂ ܡܲܠܸܠܘ ܥܲܡ ܦܸܪܥܘܿܢ. 8 ܘܐܸܡܲܪ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ. 9 ܐܸܢ ܐܸܡܲܪ ܠܟ݂ܘܿܢ ܦܸܪܥܘܿܢ: ܗܲܒ݂ܘ ܠܝܼ ܐܵܬ݂ܵܐ: ܐܸܡܲܪ ܠܐܲܗܪܘܿܢ ܣܲܒ݂ ܚܘܼܛܪܵܟ݂ ܘܐܲܪܡܵܐ ܩܕ݂ܵܡ ܦܸܪܥܘܿܢ: ܘܢܸܗܘܸܐ ܬܲܢܝܼܢܵܐ. 10 ܘܐܸܬ݂ܵܘ ܡܘܼܫܹܐ ܘܐܲܗܪܘܿܢ ܠܘܵܬ݂ ܦܸܪܥܘܿܢ: ܘܲܥܒܲܕ݂ܘ ܗܵܟܲܢܵܐ: ܐܲܝܟܲܢܵܐ ܕܦܲܩܸܕ݂ ܐܸܢܘܿܢ ܡܵܪܝܵܐ: ܘܐܲܪܡܝܼ ܐܲܗܪܘܿܢ ܚܘܼܛܪܹܗ ܩܕ݂ܵܡ ܦܸܪܥܘܿܢ: ܘܲܩܕ݂ܵܡ ܚܹܐܪܵܘܗܝ: ܘܲܗܘܵܐ ܬܲܢܝܼܢܵܐ. 11 ܘܲܩܪܵܐ ܦܸܪܥܘܿܢ ܠܚܲܟܝܼܡܹ̈ܐ ܘܲܠܚܲܪ̈ܵܫܹܐ: ܘܲܥܒܲܕ݂ܘ ܐܵܦ ܗܸܢܘܿܢ ܚܲܪܵܫܹܐ ܕܡܸܨܪܹܝܢ ܒܚܲܪܵܫܲܝܗܘܿܢ ܗܵܟܲܢܵܐ. 12 ܘܐܲܪܡܝܼܘ ܓܒܲܪ ܚܘܼܛܪܹܗ ܩܕ݂ܵܡ ܦܸܪܥܘܿܢ ܘܲܗܘܵܘ ܬܲܢܝܼܢܹܐ: ܘܲܒ݂ܠܲܥ ܚܘܼܛܪܵܐ ܕܐܲܗܪܘܿܢ ܠܚܘܼܛܪܲܝܗܘܿܢ. 13 ܘܐܸܬ݂ܥܲܫܲܢ ܠܸܒܹܿܗ ܕܦܸܪܥܘܿܢ ܘܠܵܐ ܫܲܕܲܪ ܐܸܢܘܿܢ: ܐܲܝܟܲܢܵܐ ܕܐܸܡܲܪ ܡܵܪܝܵܐ. 14 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܬ݂ܥܲܫܲܢ ܠܸܒܹܿܗ ܕܦܸܪܥܘܿܢ: ܘܠܵܐ ܨܒ݂ܵܐ ܠܲܡܫܲܕܵܪܘܼ ܠܥܲܡܵܐ. 15 ܙܸܠ ܠܘܵܬ݂ ܦܸܪܥܘܿܢ ܒܨܲܦܪܵܐ: ܗܵܐ ܢܵܦܹܩ ܠܡܲܝܵܐ: ܩܘܼܡ ܠܩܘܼܒ݂ܠܹܗ ܥܲܠ ܣܸܦܬܹܗ ܕܢܲܗܪܵܐ: ܘܚܘܼܛܪܵܐ ܕܲܗܘܵܐ ܚܸܘܝܵܐ ܣܲܒ݂ ܒܐܝܼܕ݂ܵܟ݂. 16 ܘܐܸܡܲܪ ܠܹܗ: ܡܵܪܝܵܐ ܐܲܠܵܗܵܐ ܕܥܸܒ݂ܪܵܝܹܐ ܫܲܕܪܲܢܝ ܠܘܵܬ݂ܵܟ݂: ܘܐܸܡܲܪ: ܫܲܕܲܪ ܠܥܲܡܝ: ܘܢܸܦܠܚܲܢܝ ܒܡܲܕ݂ܒܿܪܵܐ: ܘܗܵܐ ܥܕܲܡܵܐ ܠܗܵܫܵܐ ܠܵܐ ܫܵܡܲܥ ܐܲܢ̄ܬ. 17 ܗܵܟܲܢܵܐ ܐܵܡܲܪ ܡܵܪܝܵܐ: ܒܗܵܕܹܐ ܕܐܸܢܵܐ ܐ̄ܢܵܐ ܡܵܪܝܵܐ: ܗܵܐ ܡܵܚܹܐ ܐ̄ܢܵܐ ܒܚܘܼܛܪܵܐ ܕܒ݂ܐܝܼܕܲܝ ܥܲܠ ܡܲܝܵܐ ܕܲܒ݂ܢܲܗܪܵܐ: ܘܢܸܬ݂ܗܲܦܟܿܘܼܢ ܘܢܸܗܘܘܿܢ ܕܡܵܐ. 18 ܘܢܘܼܢܹܐ ܕܲܒ݂ܢܲܗܪܵܐ ܢܡܘܼܬ݂ܘܼܢ: ܘܢܸܣܪܹܐ ܢܲܗܪܵܐ: ܘܢܸܬܿܛܲܪܦܘܼܢ ܡܸܨܪܵܝܹܐ ܠܡܸܫܬܵܐ ܡܲܝܵܐ ܡܼܢ ܢܲܗܪܵܐ. 19 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܡܲܪ ܠܐܲܗܪܘܿܢ: ܣܲܒ݂ ܚܘܼܛܪܵܟ݂: ܘܐܲܪܝܼܟ݂ ܐܝܼܕ݂ܵܟ݂ ܥܲܠ ܡܲܝܵܐ ܕܡܸܨܪܵܝܹܐ: ܥܲܠ ܢܲܗܪܵܘܵܬ݂ܗܘܿܢ ܘܥܲܠ ܩܲܒ݂ܝܵܬ݂ܗܘܿܢ: ܘܥܲܠ ܐܵܓ݂ܡܲܝܗܘܿܢ: ܘܥܲܠ ܪܵܡܹܐ ܕܡܲܝܲܝܗܘܿܢ: ܘܢܸܗܘܘܿܢ ܕܡܵܐ: ܘܢܸܗܘܸܐ ܕܡܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ: ܘܲܒ݂ܩܲܝܣܹ̈ܐ ܘܲܒ݂ܟܹܐܦܹ̈ܐ. 20 ܘܲܥܒܲܕ݂ܘ ܗܵܟܲܢܵܐ ܡܘܼܫܹܐ ܘܐܲܗܪܘܿܢ: ܐܲܝܟܲܢܵܐ ܕܦܲܩܸܕ݂ ܐܸܢܘܿܢ ܡܵܪܝܵܐ: ܘܐܵܪܝܼܡ ܐܲܗܪܘܿܢ ܒܚܘܼܛܪܵܐ ܕܒ݂ܐܝܼܕܹܗ: ܘܲܡܚܵܐ ܠܡܲܝܵܐ ܕܲܒ݂ܢܲܗܪܵܐ ܠܥܹܝܢ ܦܸܪܥܘܿܢ: ܘܲܠܥܹܝܢ ܥܲܒ݂ܕܵܘܗܝ: ܘܲܗܘܵܘ ܠܗܘܿܢ ܟܠܗܘܿܢ ܡܲܝܵܐ ܕܲܒ݂ܢܲܗܪܵܐ ܕܡܵܐ. 21 ܘܢܘܼܢܹ̈ܐ ܕܲܒ݂ܢܲܗܪܵܐ ܡܝܼܬ݂ܘ: ܘܲܣܪܝܼ ܢܲܗܪܵܐ: ܘܠܵܐ ܐܸܫܟܲܚܘ ܡܸܨܪܵܝܹܐ ܠܡܸܫܬܵܐ ܡܲܝܵܐ ܡܼܢ ܢܲܗܪܵܐ: ܘܲܗܘܵܐ ܕܡܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ. 22 ܘܲܥܒܲܕ݂ܘ ܗܵܟܲܢܵܐ ܚܲܪܵܫܹܐ ܕܡܸܨܪܹܝܢ ܒܚܲܪܵܫܲܝܗܘܿܢ: ܘܐܸܬ݂ܥܲܒܿܝܼ ܠܸܒܹܿܗ ܕܦܸܪܥܘܿܢ ܘܠܵܐ ܫܡܲܥ ܐܸܢܘܿܢ: ܐܲܝܟ݂ ܕܐܸܡܲܪ ܡܵܪܝܵܐ. 23 ܘܲܗܦܲܟ݂ ܦܸܪܥܘܿܢ ܘܥܲܠ ܠܒܲܝܬܹܿܗ: ܘܗܵܕܹܐ ܠܵܐ ܐܲܝܬܿܝܼ ܥܲܠ ܒܵܠܹܗ. 24 ܘܲܚܦܲܪܘ ܟܠܗܘܿܢ ܡܸܨܪܵܝܹܐ ܚܕ݂ܵܪܵܘܗܝ ܕܢܲܗܪܵܐ ܡܲܝܵܐ ܠܡܸܫܬܵܐ: ܡܸܛܠ ܕܠܵܐ ܡܸܫܟܿܚܝܼܢ ܗ̄ܘܵܘ ܠܡܸܫܬܵܐ ܡܼܢ ܡܲܝܵܐ ܕܢܲܗܪܵܐ. 25 ܘܲܫܠܸܡܘ ܫܲܒ݂ܥܵܐ ܝܵܘܡܝܼܢ ܡܼܢ ܒܵܬܲܪ ܕܲܡܚܵܐ ܡܵܪܝܵܐ ܠܢܲܗܪܵܐ.

********

ܩܦܠܐܘܢ : ܚ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܙܸܠ ܠܘܵܬ݂ ܦܸܪܥܘܿܢ ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܫܲܕܲܪ ܠܥܲܡܝ ܘܢܸܦܠܚܲܢܝ. 2 ܘܐܸܢ ܠܵܐ ܨܵܒܹܐ ܐܲܢ̄ܬ ܠܲܡܫܲܕܵܪܘܼ: ܗܵܐ ܡܵܚܹܐ ܐ̄ܢܵܐ ܠܟ݂ܠܹܗ ܬܚܘܼܡܵܟ݂ ܒܐܘܼܪ̈ܕܿܥܹܐ. 3 ܘܢܲܪܚܸܫ ܢܲܗܪܵܐ ܐܘܼܪ̈ܕܥܹܐ: ܘܢܸܣ̈ܩܵܢ ܘܢܸܥ̈ܠܵܢ ܠܒܲܝܬܵܟ݂ ܘܲܠܩܲܝܛܘܼܢܵܟ݂: ܘܲܠܒܹܝܬ݂ ܡܲܫܟܿܒ݂ܵܟ݂: ܘܲܠܥܲܪܣܵܬ݂ܵܟ݂: ܘܲܒ݂ܒܹܝܬ݂ ܥܲܒ݂ܕܲܝܟ ܘܲܒ݂ܥܲܡܵܟ݂: ܘܲܒ݂ܬ݂ܵܘܵܢܲܝܟ ܘܒܲܐܨ̈ܘܵܬ݂ܵܟ݂. 4 ܘܒ݂ܵܟ݂ ܘܲܒ݂ܟ݂ܠܹܗ ܥܲܡܵܟ݂ ܢܸܣܩ̈ܵܢ ܐܘܼܪ̈ܕܿܥܹܐ. 5 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܡܲܪ ܠܐܲܗܪܘܿܢ ܐܲܚܘܼܟ݂: ܐܵܪܝܼܡ ܐܝܼܕ݂ܵܟ݂ ܒܚܘܼܛܪܵܐ ܥܲܠ ܢܲܗܪ̈ܵܘܵܬ݂ܵܐ: ܘܥܲܠ ܪ̈ܵܡܹܐ ܘܥܲܠ ܐܵܓ݂ܡܹ̈ܐ: ܘܐܲܣܸܩ ܐܘܼܪ̈ܕܥܹܐ ܥܲܠ ܐܲܪܥܵܐ ܕܡܸܨܪܹܝܢ. 6 ܘܐܵܪܝܼܡ ܐܲܗܪܘܿܢ ܐܝܼܕܹܗ ܥܲܠ ܡܲܝܵܐ ܕܡܸܨܪ̈ܵܝܹܐ: ܘܲܣܠܸܩ ܐܘܼܪܕܥܹܐ: ܘܟܲܣ̈ܝܵܗ ܠܐܲܪܥܵܐ ܕܡܸܨܪܹܝܢ. 7 ܘܲܥܒܲܕ݂ܘ ܗܵܟܲܢܵܐ ܐܵܦ ܚܲܪܵܫܹܐ ܒܚܲܪܵܫܲܝܗܘܢ: ܘܐܲܣܸܩܘ ܐܘܼܪܕܥܹܐ ܥܲܠ ܐܲܪܥܵܐ ܕܡܸܨܪܹܝܢ. 8 ܘܲܩܪܵܐ ܦܸܪܥܘܿܢ ܠܡܘܼܫܹܐ ܘܠܲܐܗܪܘܿܢ: ܘܐܸܡܲܪ ܠܗܘܿܢ: ܨܲܠܵܘ ܩܕ݂ܵܡ ܡܵܪܝܵܐ: ܘܢܲܦܪܸܩ ܐܘܼܪ̈ܕܥܹܐ ܡܹܢܝ ܘܡܼܢ ܥܲܡܝ: ܘܐܹܫܲܕܲܪ ܠܥܲܡܵܐ ܘܢܲܕܲܒܿܚܘܼܢ ܩܕ݂ܵܡ ܡܵܪܝܵܐ. 9 ܘܐܸܡܲܪ ܡܘܼܫܹܐ ܠܦܸܪܥܘܿܢ: ܫܐܲܠ ܠܵܟ݂ ܙܲܒ݂ܢܵܐ ܠܐܸܡܲܬ݂ܝ ܐܹܨܲܠܹܐ ܥܠܲܝܟ: ܘܥܲܠ ܥܲܒ݂ܕܲܝܟ ܘܥܲܠ ܥܲܡܵܟ݂: ܘܢܲܦܪܸܩ ܐܘܼܪܕܥܹܐ ܡܸܢܵܟ݂ ܘܡܼܢ ܒܲܝܬܵܟ݂. 10 ܘܐܸܡܲܪ ܠܹܗ ܡܚܵܪ: ܘܐܸܡܲܪ ܠܹܗ ܐܲܝܟ݂ ܡܸܠܬ݂ܵܟ݂: ܡܸܛܠ ܕܬܸܕܲܥ ܕܠܲܝܬ ܐܲܝܟ݂ ܡܵܪܝܵܐ: ܐܲܠܵܗܲܢ. 11 ܘܢܸܦܪܩܲܢ ܐܘܼܪܕܥܹܐ ܡܸܢܵܟ݂ ܘܡܼܢ ܒܲܝܬܵܟ݂: ܘܡܼܢ ܥܲܒ݂ܕܲܝܟ ܘܡܼܢ ܥܲܡܵܟ݂: ܒܲܠܚܘܿܕ ܕܲܒ݂ܢܲܗܪܵܐ ܢܸܫܬܲܚܪܲܢ. 12 ܘܲܢܦܲܩܘ ܡܘܼܫܹܐ ܘܐܲܗܪܘܿܢ ܡܼܢ ܠܘܵܬ݂ ܦܸܪܥܘܿܢ: ܘܨܲܠܝܼ ܡܘܼܫܹܐ ܩܕ݂ܵܡ ܡܵܪܝܵܐ ܡܸܛܠ ܐܘܼܪܕܥܹܐ ܕܐܵܝܬܿܝܼ ܥܲܠ ܦܸܪܥܘܿܢ. 13 ܘܲܥܒܲܕ݂ ܡܵܪܝܵܐ ܐܲܝܟ݂ ܡܸܠܬܹܗ ܕܡܘܼܫܹܐ: ܘܡܝܼܬ݂ ܐܘܼܪܕܥܹܐ ܡܼܢ ܒܵܬܹ̈ܐ ܘܡܼܢ ܕܵܪܹ̈ܐ ܘܡܼܢ ܚܲܩܵܠܵܬ݂ܵܐ. 14 ܘܟܲܢܸܫܘ ܐܸܢܹܝܢ ܟܪܵܘܵܢ ܟܪܵܘܵܢ: ܘܣܸܪܝܲܬ݂ ܐܲܪܥܵܐ. 15 ܘܲܚܙܵܐ ܦܸܪܥܘܿܢ ܕܲܗܘܲܬ݂ ܪܘܲܚܬ݂ܵܐ: ܘܥܲܒܿܝܼ ܠܸܒܹܿܗ ܘܠܵܐ ܫܡܲܥ ܐܸܢܘܿܢ: ܐܲܝܟ݂ ܕܐܸܡܲܪ ܡܵܪܝܵܐ ܠܡܘܼܫܹܐ. 16 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܡܲܪ ܠܐܲܗܪܘܿܢ: ܐܵܪܝܼܡ ܚܘܼܛܪܵܟ݂ ܘܲܡܚܝܼ ܠܥܲܦܪܵܐ ܕܐܲܪܥܵܐ: ܘܢܸܗܘܸܐ ܩܲܠܡܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ. 17 ܘܲܥܒܲܕ݂ ܗܵܟܲܢܵܐ: ܘܐܵܪܝܼܡ ܐܲܗܪܘܿܢ ܐܝܼܕܹܗ ܒܚܘܼܛܪܹܗ: ܘܲܡܚܵܐ ܠܥܲܦܪܵܐ ܕܐܲܪܥܵܐ: ܘܲܗܘܵܬ݂ ܩܲܠܡܵܐ ܒܲܒ݂ܢܲܝܢܵܫܵܐ ܘܒܲܒ݂ܥܝܼܪܵܐ: ܘܟ݂ܠܹܗ ܥܲܦܪܵܐ ܕܐܲܪܥܵܐ ܗܘܵܐ ܠܹܗ ܩܲܠܡܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ. 18 ܘܲܥܒܲܕ݂ܘ ܗܵܟܲܢܵܐ ܐܵܦ ܚܲܪܵܫܹܐ ܒܚܲܪܵܫܲܝܗܘܿܢ: ܘܠܵܐ ܐܸܫܟܲܚܘ ܠܲܡܦܲܪܵܩܘܼܬ݂ܵܗ ܠܩܲܠܡܵܐ: ܘܲܗܘܵܬ݂ ܩܲܠܡܵܐ ܒܲܒ݂ܢܲܝܢܵܫܵܐ ܘܒܲܒ݂ܥܝܼܪܵܐ. 19 ܘܐܸܡܲܪܘ ܚܲܪܵܫܹܐ ܠܦܸܪܥܘܿܢ: ܨܸܒ݂ܥܵܗ ܗ̄ܝܼ ܕܐܲܠܵܗܵܐ: ܘܐܸܬ݂ܩܲܫܝܼ ܠܸܒܹܿܗ ܕܦܸܪܥܘܿܢ: ܘܠܵܐ ܫܡܲܥ ܐܸܢܘܿܢ: ܐܲܝܟܲܢܵܐ ܕܐܸܡܲܪ ܡܵܪܝܵܐ. 20 ܘܐܸܡܲܪ ܡܵܪܝܵܐ ܠܡܘܼܫܹܐ: ܩܲܕܸܿܡ ܒܨܲܦܪܵܐ ܘܩܘܼܡ ܩܕ݂ܵܡ ܦܸܪܥܘܿܢ: ܗܵܐ ܢܵܦܹܩ ܠܡܲܝܵܐ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܫܲܕܲܪ ܠܥܲܡܝ ܘܢܸܦܠܚܲܢܝ. 21 ܘܐܸܢ ܠܵܐ ܨܵܒܹܐ ܐܲܢ̄ܬ ܠܲܡܫܲܕܵܪܘܼ ܠܥܲܡܝ: ܗܵܐ ܡܫܲܕܲܪ ܐ̄ܢܵܐ ܥܠܲܝܟ: ܘܥܲܠ ܥܲܡܵܟ݂: ܘܥܲܠ ܒܲܝܬܵܟ݂: ܥܲܪܘܼܒ݂ܵܐ ܕܟ݂ܠ ܓܢܸܣ: ܘܢܸܬ݂ܡܠܘܿܢ ܒܵܬܹ̈ܐ ܕܡܸܨܪܵܝܹܐ ܥܲܪܘܼܒ݂ܵܐ: ܐܲܝܟ݂ ܐܲܪܥܵܐ ܕܗܸܢܘܿܢ ܥܠܹܝܗܿ. 22 ܘܐܸܦܪܘܿܫ ܒܝܵܘܡܵܐ ܗܵܘ ܠܐܲܪܥܵܐ ܕܓܹܫܵܢ: ܕܥܲܡܝ ܝܵܬ݂ܒܿܝܼܢ ܒܵܗ: ܕܠܵܐ ܢܸܗܘܸܐ ܬܲܡܵܢ ܥܲܪܘܼܒ݂ܵܐ: ܡܸܛܠ ܕܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ ܒܓ݂ܵܘܵܗ ܕܐܲܪܥܵܐ. 23 ܘܐܸܥܒܸܿܕ ܦܘܼܪܫܵܢܵܐ ܒܹܝܬ݂ ܥܲܡܝ ܠܥܲܡܵܟ݂: ܘܲܡܚܵܪ ܬܸܗܘܸܐ ܐܵܬ݂ܵܐ ܗܵܕܹܐ. 24 ܘܲܥܒܲܕ ܡܵܪܝܵܐ ܗܵܟܲܢܵܐ: ܘܐܲܝܬܿܝܼ ܥܲܪܘܼܒ݂ܵܐ ܕܬܲܩܝܼܦ ܠܒܹܝܬ݂ ܦܸܪܥܘܿܢ ܘܲܠܒܹܝܬ݂ ܥܲܒ݂ܕܵܘܗܝ: ܘܲܒ݂ܟ݂ܠܵܗ ܐܲܪܥܵܐ ܕܡܸܨܪܹܝܢ: ܘܐܸܬ݂ܚܲܒܿܠܲܬ݂ ܐܲܪܥܵܐ ܡܸܛܠ ܥܲܪܘܼܒ݂ܵܐ. 25 ܘܲܩܪܵܐ ܦܸܪܥܘܿܢ ܠܡܘܼܫܹܐ ܘܠܲܐܗܪܘܿܢ: ܘܐܸܡܲܪ ܠܗܘܿܢ: ܙܸܠܘ ܕܲܒܲܚܘ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ ܒܐܲܪܥܵܐ. 26 ܘܐܸܡܲܪ ܡܘܼܫܹܐ: ܠܵܐ ܫܲܦܝܼܪ ܠܡܸܥܒܲܕ ܗܵܟܲܢܵܐ: ܡܸܛܠ ܕܡܼܢ ܛܲܢܦܘܼܬ݂ܵܐ ܕܡܸܨܪܵܝܹܐ ܡܕܲܒܿܚܝܼܢܲܢ ܠܡܵܪܝܵܐ ܐܲܠܵܗܲܢ: ܘܐܸܢ ܕܵܒ݂ܚܝܼܢܲܢ ܕܸܚܠܵܬ݂ܵܐ ܕܡܸܨܪܵܝܹܐ ܠܥܹܝܢܲܝܗܘܿܢ: ܪܵܓܿܡܝܼܢ ܠܲܢ. 27 ܡܲܪܕܹܿܐ ܬܠܵܬ݂ܵܐ ܝܵܘܡܝܼܢ ܢܹܐܙܲܠ ܒܡܲܕ݂ܒܿܪܵܐ: ܘܲܢܕܲܒܲܚ ܠܡܵܪܝܵܐ ܐܲܠܵܗܲܢ: ܐܲܝܟ݂ ܕܢܹܐܡܲܪ ܠܲܢ. 28 ܘܐܸܡܲܪ ܦܸܪܥܘܿܢ: ܐܸܢܵܐ ܐܹܫܲܕܲܪܟ݂ܘܿܢ: ܘܲܬܿܕܲܒܿܚܘܼܢ ܠܡܵܪܝܵܐ ܐܲܠܵܗܟ݂ܘܿܢ ܒܡܲܕ݂ܒܿܪܵܐ: ܒܲܠܚܘܿܕ݂ ܡܲܪܚܵܩܘܼ ܠܵܐ ܬܲܪܚܩܘܿܢ ܠܡܹܐܙܲܠ: ܘܨܲܠܵܘ ܐܵܦ ܥܠܲܝ. 29 ܘܐܸܡܲܪ ܡܘܼܫܹܐ ܠܦܸܪܥܘܿܢ: ܗܵܐ ܢܵܦܹܩ ܐ̄ܢܵܐ ܡܼܢ ܠܘܵܬ݂ܵܟ݂: ܘܐܹܨܲܠܸܐ ܩܕ݂ܵܡ ܡܵܪܝܵܐ: ܘܢܸܦܪܲܩ ܥܲܪܘܼܒ݂ܵܐ ܡܼܢ ܦܸܪܥܘܿܢ: ܘܡܼܢ ܥܲܒ݂ܕܵܘܗܝ: ܘܡܼܢ ܥܲܡܹܗ ܡܚܵܪ: ܒܲܠܚܘܿܕ݂ ܕܠܵܐ ܢܵܘܣܸܦ ܦܸܪܥܘܿܢ ܠܲܡܕܲܓܵܠܘܼ: ܕܠܵܐ ܢܫܲܕܲܪ ܠܥܲܡܵܐ ܘܲܢܕܲܒܿܚܘܼܢ ܠܡܵܪܝܵܐ. 30 ܘܲܢܦܲܩ ܡܘܼܫܹܐ ܡܼܢ ܠܘܵܬ݂ ܦܸܪܥܘܿܢ: ܘܨܲܠܝܼ ܩܕ݂ܵܡ ܡܵܪܝܵܐ. 31 ܘܲܥܒܲܕ݂ ܡܵܪܝܵܐ ܐܲܝܟ݂ ܡܸܠܬܹܗ ܕܡܘܼܫܹܐ: ܘܲܦܪܲܩ ܥܲܪܘܼܒ݂ܵܐ ܡܼܢ ܦܸܪܥܘܿܢ: ܘܡܼܢ ܥܲܒ݂ܕܵܘܗܝ: ܘܡܼܢ ܥܲܡܹܗ: ܘܠܵܐ ܐܸܫܬܚܲܪ ܐܵܦܠܵܐ ܚܲܕ݂. 32 ܘܩܲܫܝܼ ܦܸܪܥܘܿܢ ܠܸܒܹܿܗ ܐܵܦ ܒܙܲܒ݂ܢܵܐ ܗܵܢܵܐ: ܘܠܵܐ ܫܲܕܪܹܗ ܠܥܲܡܵܐ.

********

ܩܦܠܐܘܢ : ܛ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܙܸܠ ܠܘܵܬ݂ ܦܸܪܥܘܿܢ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܥܸܒ݂ܪܵܝܹܐ: ܫܲܕܲܪ ܠܥܲܡܝ ܘܢܸܦܠܚܲܢܝ. 2 ܘܐܸܢ ܠܵܐ ܨܵܒܹܐ ܠܲܡܫܲܕܵܪܘܼ: ܘܲܥܕܲܡܵܐ ܠܗܵܫܵܐ ܡܚܲܡܣܸܢ ܐܢ̄ܬ ܒܗܘܿܢ. 3 ܗܵܐ ܐܝܼܕܹܗ ܕܡܵܪܝܵܐ ܗܵܘܝܵܐ ܒܩܸܢܝܵܢܵܟ݂ ܕܲܒ݂ܡܲܕ݂ܒܿܪܵܐ: ܒܪܲܟ݂ܫܵܐ: ܘܲܒ݂ܚܸܡܪ̈ܵܐ: ܘܲܒ݂ܓܲܡܠܹ̈ܐ: ܘܲܒ݂ܬ݂ܵܘܪܹ̈ܐ: ܘܲܒ݂ܥܵܢ̈ܵܐ: ܡܵܘܬܵܢܵܐ ܕܚܲܣܝܼܢ ܛܵܒ݂. 4 ܘܢܸܦܪܘܿܫ ܡܵܪܝܵܐ ܒܹܝܬ݂ ܒܥܝܼܪܵܐ ܕܝܼܣܪܵܝܹܠ ܠܒܹܝܬ݂ ܒܥܝܼܪܵܐ ܕܡܸܨܪܵܝܹܐ: ܘܠܵܐ ܢܡܘܼܬ݂ ܡܼܢ ܟܠ ܒܥܝܼܪܵܐ ܕܒܹܝܬ݂ ܝܼܣܪܵܝܹܠ: ܐܵܦܠܵܐ ܚܲܕ. 5 ܘܝܲܗ̄ܒ݂ ܡܵܪܝܵܐ ܙܲܒ݂ܢܵܐ ܡܚܵܪ: ܕܢܸܥܒܸܿܕ ܡܵܪܝܵܐ ܦܸܬ݂ܓ݂ܵܡܵܐ ܗܵܢܵܐ ܒܐܲܪܥܵܐ. 6 ܘܲܥܒܲܕ݂ ܡܵܪܝܵܐ ܦܸܬ݂ܓ݂ܵܡܵܐ ܗܵܢܵܐ ܠܝܵܘܡܵܐ ܕܒ݂ܵܬ݂ܪܹܗ: ܘܡܝܼܬܲܬ݂ ܟܠܵܗ ܒܥܝܼܪܵܐ ܕܡܸܨܪܵܝܹܐ: ܘܡܼܢ ܒܥܝܼܪܵܐ ܕܒܹܝܬ݂ ܝܼܣܪܵܝܹܠ ܠܵܐ ܡܝܼܬ݂ ܐܵܦܠܵܐ ܚܲܕ. 7 ܘܫܲܕܲܪ ܦܸܪܥܘܿܢ ܘܲܚܙܵܐ ܕܠܵܐ ܡܝܼܬ݂ ܡܼܢ ܒܥܝܼܪܵܐ ܕܒܹܝܬ݂ ܝܼܣܪܵܝܹܠ ܐܵܦܠܵܐ ܚܲܕ݂: ܘܐܸܬ݂ܩܲܫܝܼ ܠܸܒܹܿܗ ܕܦܸܪܥܘܿܢ: ܘܠܵܐ ܫܲܕܪܹܗ ܠܥܲܡܵܐ. 8 ܘܐܸܡܲܪ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ: ܣܲܒ݂ܘ ܡܠܸܐ ܚܘܼܦܲܢܝܟܿܘܿܢ ܩܸܛܡܵܐ ܕܐܲܬܿܘܿܢܵܐ: ܘܢܸܕ݂ܪܹܝܘܗܝ ܡܘܼܫܹܐ ܠܐܲܦܲܝ ܫܡܲܝܵܐ ܠܥܹܢܵܘܗܝ ܕܦܸܪܥܘܿܢ. 9 ܘܢܸܗܘܸܐ ܚܸܠܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ: ܘܢܸܗܘܸܐ ܥܲܠ ܒܢܲܝܢܵܫܵܐ ܘܥܲܠ ܒܥܝܼܪܵܐ: ܫܘܼܚܢܵܐ ܕܢܘܼܦܚܹ̈ܐ ܕܣܲܓܿܝܼ ܒܟ݂ܠܵܗ ܐܲܪܥܵܐ ܕܡܸܨܪܹܝܢ. 10 ܘܢܲܣܒܿܘܼܗܝ ܠܩܸܛܡܵܐ ܕܐܲܬܿܘܿܢܵܐ: ܘܩܵܡܘ ܩܕ݂ܵܡ ܦܸܪܥܘܿܢ: ܘܲܕ݂ܪܵܝܗܝ ܡܘܼܫܹܐ ܠܲܫܡܲܝܵܐ ܠܥܹܢܵܘܗܝ ܕܦܸܪܥܘܿܢ: ܘܲܗܘܵܐ ܫܘܼܚܢܵܐ ܕܢܘܼܦܚܹ̈ܐ: ܘܲܦܪܲܚ ܒܲܒ݂ܢܲܝܢܵܫܵܐ: ܘܲܒ݂ܥܝܼܪܵܐ. 11 ܘܠܵܐ ܐܸܫܟܲܚܘ ܚܲܪܵܫܹܐ ܠܲܡܩܵܡ ܩܕ݂ܵܡ ܡܘܼܫܹܐ: ܡܸܛܠ ܫܘܼܚܢܵܐ ܕܲܣܓ݂ܝܼ ܒܚܲܪܵܫܹܐ: ܘܲܒ݂ܟ݂ܠܵܗ ܡܸܨܪܹܝܢ. 12 ܘܩܲܫܝܼ ܡܵܪܝܵܐ ܠܸܒܹܿܗ ܕܦܸܪܥܘܿܢ: ܘܠܵܐ ܫܡܲܥ ܐܸܢܘܿܢ ܐܲܝܟ݂ ܕܐܸܡܲܪ ܡܵܪܝܵܐ ܠܡܘܼܫܹܐ. 13 ܘܐܸܡܲܪ ܡܵܪܝܵܐ ܠܡܘܼܫܹܐ: ܩܲܕܸܿܡ ܒܨܲܦܪܵܐ: ܘܩܘܼܡ ܩܕ݂ܵܡ ܦܸܪܥܘܿܢ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܥܸܒ݂ܪܵܝܹܐ: ܫܲܕܲܪ ܠܥܲܡܝ: ܘܢܸܦܠܚܲܢܝ. 14 ܡܸܛܠ ܕܲܒ݂ܙܲܒ݂ܢܵܐ ܗܵܢܵܐ ܡܫܲܕܲܪ ܐ̄ܢܵܐ ܡܲܚܘܵܬ݂ܝ ܥܲܠ ܠܸܒܵܟ݂: ܘܥܲܠ ܥܲܒ݂ܕܲܝܟ ܘܥܲܠ ܥܲܡܵܟ݂: ܡܸܛܠ ܕܬܸܕܲܥ ܕܠܲܝܬܿ ܐܲܟ݂ܘܵܬ݂ܝ ܒܟ݂ܠܵܗܿ ܐܲܪܥܵܐ. 15 ܡܸܛܠ ܕܗܵܫܵܐ ܡܵܘܫܸܛ ܐ̄ܢܵܐ ܐܝܼܕ݂ܝ: ܘܡܵܚܹܐ ܐ̄ܢܵܐ ܠܵܟ݂ ܘܲܠܥܲܡܵܟ݂ ܒܡܵܘܬܵܢܵܐ: ܘܬܹܐܒܲܕ݂ ܡܼܢ ܐܲܪܥܵܐ. 16 ܘܲܒ݂ܪܲܡ ܡܸܛܠ ܗܵܕܹܐ ܗ̄ܘܼ ܐܲܩܝܼܡܬܵܟ݂: ܡܸܛܠ ܕܐܹܚܵܘܹܝܟ݂ ܚܲܝܠܝ: ܘܡܸܛܠ ܕܢܸܬ݂ܟܿܪܸܙ ܫܹܡܝ ܒܟ݂ܠܵܗܿ ܐܲܪܥܵܐ. 17 ܘܲܥܕܲܡܵܐ ܠܗܵܫܵܐ ܡܚܲܡܣܸܢ ܐܲܢ̄ܬ ܒܹܗ ܒܥܲܡܵܐ: ܘܠܵܐ ܨܵܒܹܐ ܐܲܢ̄ܬ ܕܲܬ݂ܫܲܕܿܪܝܼܘܗܝ. 18 ܡܚܵܪ ܒܗܵܢܵܐ ܥܸܕܵܢܵܐ ܡܲܝܬܹܿܐ ܐ̄ܢܵܐ ܒܲܪܕ݂ܵܐ ܕܬܲܩܝܼܦ ܛܵܒ݂: ܕܠܵܐ ܗ̄ܘܵܐ ܐܲܟ݂ܘܵܬܹܗ ܒܡܸܨܪܹܝܢ: ܡܼܢ ܝܵܘܡܵܐ ܕܐܸܬ݂ܒܲܢܝܲܬ݂ ܘܲܥܕܲܡܵܐ ܠܗܵܫܵܐ. 19 ܘܗܵܫܵܐ ܫܲܕܲܪ ܚܡܘܿܠ ܒܥܝܼܪܵܟ݂: ܘܟ݂ܠ ܡܸܕܸܿܡ ܕܐܝܼܬ݂ ܠܵܟ݂ ܒܕܲܒ݂ܪܵܐ: ܟܠ ܒܲܪܢܵܫܵܐ ܘܲܒ݂ܥܝܼܪܵܐ ܕܢܸܫܬܿܟܲܚ ܒܕܲܒ݂ܪܵܐ: ܘܠܵܐ ܢܸܬ݂ܚܡܸܠ ܒܓ݂ܵܘ ܒܲܝܬܵܐ: ܢܸܚܘܿܬ݂ ܥܠܲܝܗܘܿܢ ܒܲܪܕ݂ܵܐ ܘܲܢܡܘܼܬ݂ܘܼܢ. 20 ܐܲܝܢܵܐ ܕܕ݂ܵܚܸܠ ܡܼܢ ܡܸܠܬܹܗ ܕܡܵܪܝܵܐ ܡܼܢ ܥܲܒ݂ܕܵܘܗܝ ܕܦܸܪܥܘܿܢ: ܚܡܲܠ ܥܲܒ݂ܕܵܘܗܝ ܘܲܒ݂ܥܝܼܪܹܗ ܒܒܲܝܬܵܐ. 21 ܘܲܕ݂ܠܵܐ ܐܲܝܬܿܝܼ ܡܸܠܬܹܗ ܕܡܵܪܝܵܐ ܥܲܠ ܒܵܠܹܗ: ܫܒܲܩ ܥܲܒ݂ܕܵܘܗܝ ܘܲܒ݂ܥܝܼܪܹܗ ܒܚܲܩܠܵܐ. 22 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܲܪܝܼܡ ܐܝܼܕ݂ܵܟ݂ ܠܐܲܦܲܝ ܫܡܲܝܵܐ: ܘܢܸܗܘܸܐ ܒܲܪܕ݂ܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ: ܥܲܠ ܒܢܲܝܢܵܫܵܐ: ܘܥܲܠ ܒܥܝܼܪܵܐ: ܘܥܲܠ ܟܠܹܗ ܥܸܣܒܵܐ ܕܲܒ݂ܕܲܒ݂ܪܵܐ ܕܒܲܐܪܥܵܐ ܕܡܸܨܪܹܝܢ. 23 ܘܐܲܪܝܼܡ ܡܘܼܫܹܐ ܚܘܼܛܪܹܗ ܠܐܲܦܲܝ ܫܡܲܝܵܐ: ܘܡܵܪܝܵܐ ܝܲܗ̄ܒ݂ ܩܵܠܹ̈ܐ ܘܒܲܪܕ݂ܵܐ: ܘܲܡܗܲܠܟ݂ܵܐ ܗ̄ܘܵܬ݂ ܢܘܼܪܵܐ ܥܲܠ ܐܲܪܥܵܐ: ܘܐܲܚܸܬ݂ ܡܵܪܝܵܐ ܒܲܪܕ݂ܵܐ ܥܲܠ ܐܲܪܥܵܐ ܕܡܸܨܪܹܝܢ. 24 ܘܢܵܚܸܬ݂ ܗ̄ܘܵܐ ܒܲܪܕ݂ܵܐ: ܘܢܘܼܪܵܐ ܡܸܬ݂ܓܵܘܙܠܵܐ ܗ̄ܘܵܬ݂ ܒܓ݂ܵܘ ܒܲܪܕ݂ܵܐ: ܚܲܣܝܼܢ ܗ̄ܘܵܐ ܛܵܒ݂ ܕܠܵܐ ܗܘܵܐ ܐܲܟ݂ܘܵܬܹܗ ܒܟ݂ܠܵܗ ܐܲܪܥܵܐ ܕܡܸܨܪܹܝܢ: ܡܼܢ ܝܵܘܡܵܐ ܕܲܗܘܵܬ݂ ܠܥܲܡܵܐ. 25 ܘܲܡܚܵܐ ܒܲܪܕ݂ܵܐ ܠܟ݂ܠܵܗ ܐܲܪܥܵܐ ܕܡܸܨܪܹܝܢ ܠܟ݂ܠ ܕܐܝܼܬ݂ ܒܕܲܒ݂ܪܵܐ: ܡܼܢ ܒܢܲܝܢܵܫܵܐ ܘܲܥܕܲܡܵܐ ܠܲܒ݂ܥܝܼܪܵܐ: ܘܟ݂ܠܹܗ ܥܸܣܒܵܐ ܕܚܲܩܠܵܐ ܐܵܘܒܸܿܕ ܒܲܪܕ݂ܵܐ: ܘܟ݂ܠܗܘܿܢ ܐܝܼܠܵܢܹ̈ܐ ܕܚܲܩܠܵܐ ܬܲܒܲܪ. 26 ܒܲܠܚܘܿܕ݂ ܒܐܲܪܥܵܐ ܕܓܹܫܵܢ ܕܝܵܬ݂ܒܿܝܼܢ ܗ̄ܘܵܘ ܒܵܗ ܒܢܲܝ ܝܼܣܪܵܝܹܠ ܠܵܐ ܢܚܸܬ݂ ܒܲܪܕ݂ܵܐ. 27 ܘܫܲܕܲܪ ܦܸܪܥܘܿܢ ܘܲܩܪܵܐ ܠܡܘܼܫܹܐ ܘܠܲܐܗܪܘܿܢ: ܘܐܸܡܲܪ ܠܗܘܿܢ: ܚܛܹܝܬ݂ ܙܒܲܢ̄ܬܵܐ ܗܵܕܹܐ: ܡܵܪܝܵܐ ܙܲܕܿܝܼܩ: ܘܐܸܢܵܐ ܘܥܲܡܝ ܪܲܫܝܼܥܝܼܢ. 28 ܨܲܠܵܘ ܩܕ݂ܵܡ ܡܵܪܝܵܐ: ܘܐܝܼܬ݂ ܐܲܬ݂ܪܵܐ ܣܲܓܿܝܼ ܩܕ݂ܵܡܵܘܗܝ: ܕܠܵܐ ܢܸܗܘܘܿܢ ܩܵܠܵܘܗܝ ܕܐܲܠܵܗܵܐ: ܘܒܲܪܕ݂ܵܐ: ܘܐܹܫܲܕܲܪܟ݂ܘܿܢ: ܘܠܵܐ ܬܵܘܣܦܘܼܢ ܠܲܡܦܵܫ. 29 ܘܐܸܡܲܪ ܡܘܼܫܹܐ ܠܦܸܪܥܘܿܢ: ܡܵܐ ܕܢܸܦܩܹܬ݂ ܡܼܢ ܩܪܝܼܬ݂ܵܐ: ܐܸܦܫܘܿܛ ܐܝܼܕܲܝ ܠܘܵܬ݂ ܡܵܪܝܵܐ: ܩܵܠܹ̈ܐ ܢܸܦܪܩܘܿܢ: ܘܒܲܪܕ݂ܵܐ ܬܘܼܒ݂ ܠܵܐ ܢܸܚܘܿܬ݂: ܡܸܛܠ ܕܬܸܕܲܥ ܕܲܕ݂ܡܵܪܝܵܐ ܗ̄ܝܼ ܐܲܪܥܵܐ. 30 ܘܐܲܢ̄ܬ ܘܥܲܒ݂ܕܲܝܟ ܝܵܕܲܥ ܐ̄ܢܵܐ ܕܲܥܕܲܡܵܐ ܠܗܵܫܵܐ ܠܵܐ ܕܚܸܠܬܘܿܢ ܡܼܢ ܩܕ݂ܵܡ ܡܵܪܝܵܐ ܐܲܠܵܗܵܐ. 31 ܘܟܸܬܵܢܵܐ ܘܲܣܥܵܪܹ̈ܐ ܐܸܒܲܕ݂ܘ: ܡܸܛܠ ܕܲܣܥܵܪܹ̈ܐ ܡܚܲܝ ܟܲܢܵܐ: ܘܟܸܬܵܢܵܐ ܟܦܲܬ݂. 32 ܘܚܸܛܹ̈ܐ ܘܟ݂ܘܼܢܵܬܹ̈ܐ ܠܵܐ ܐܸܒܲܕ݂: ܡܸܛܠ ܕܲܠܩܝܼܫܵܝܝܼܢ ܗ̄ܘܵܘ. 33 ܘܲܢܦܲܩ ܡܘܼܫܹܐ ܡܼܢ ܩܪܝܼܬ݂ܵܐ ܡܼܢ ܠܘܵܬ݂ ܦܸܪܥܘܿܢ: ܘܲܦܪܲܣ ܐܝܼܕ݂ܵܘܗܝ ܠܲܫܡܲܝܵܐ ܠܘܵܬ݂ ܡܵܪܝܵܐ: ܘܲܦܪܲܩܘ ܩܵܠܹ̈ܐ ܘܒܲܪܕ݂ܵܐ: ܘܡܸܛܪܵܐ ܠܵܐ ܣܡܲܟ݂ ܠܐܲܪܥܵܐ. 34 ܘܲܚܙܵܐ ܦܸܪܥܘܿܢ ܕܲܦܪܲܩ ܡܸܛܪܵܐ ܘܒܲܪܕ݂ܵܐ ܘܩܵܠܹ̈ܐ: ܘܐܵܘܣܸܦ ܠܡܸܚܛܵܐ: ܘܐܸܬ݂ܩܲܫܝܼ ܠܸܒܹܿܗ ܕܦܸܪܥܘܿܢ ܘܲܕ݂ܥܲܒ݂ܕܵܘܗܝ. 35 ܘܐܸܬ݂ܥܲܒܿܝܼ ܠܸܒܹܿܗ ܕܦܸܪܥܘܿܢ: ܘܠܵܐ ܫܲܕܲܪ ܠܲܒ݂ܢܲܝ ܝܼܣܪܵܝܹܠ: ܐܲܝܟ݂ ܕܲܫܠܲܚ ܡܵܪܝܵܐ ܒܐܝܼܕ݂ܵܐ ܕܡܘܼܫܹܐ.

********

ܩܦܠܐܘܢ : ܝ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܙܸܠ ܠܘܵܬ݂ ܦܸܪܥܘܿܢ: ܡܸܛܠ ܕܐܸܢܵܐ ܩܲܫܝܼܬ݂ ܠܸܒܹܿܗ: ܘܠܸܒܵܐ ܕܥܲܒ݂ܕܵܘܗܝ: ܡܸܛܠ ܕܐܸܥܒܸܿܕ ܐܵܬ݂ܘܵܬ݂ܵܐ ܗܵܠܹܝܢ ܒܲܝܢܵܬ݂ܗܘܿܢ. 2 ܘܡܸܛܠ ܕܬܸܫܬܲܥܸܐ ܩܕ݂ܵܡ ܒܪܵܟ݂ ܘܒܲܪ ܒܪܵܟ݂: ܡܸܕܸܿܡ ܕܥܸܒ݂ܕܹܬ݂ ܒܡܸܨܪܵܝܹܐ: ܘܐܵܬ݂ܘܵܬ݂ܵܐ ܕܥܸܒ݂ܕܹܬ݂ ܒܗܘܿܢ: ܘܬܸܕܿܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ. 3 ܘܐܸܬ݂ܵܘ ܡܘܼܫܹܐ ܘܐܲܗܪܘܿܢ ܠܘܵܬ݂ ܦܸܪܥܘܿܢ: ܘܐܸܡܲܪܘ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܥܸܒ݂ܪܵܝܹܐ: ܥܕܲܡܵܐ ܠܐܸܡܲܬ݂ܝ ܠܵܐ ܨܵܒܹܐ ܐܲܢ̄ܬ ܠܡܸܕ݂ܚܲܠ ܡܹܢܝ: ܫܲܕܲܪ ܠܥܲܡܝ ܘܢܸܦܠܚܲܢܝ. 4 ܘܐܸܢ ܠܵܐ ܨܵܒܹܐ ܐܲܢ̄ܬ ܠܲܡܫܲܕܵܪܘܼ ܠܥܲܡܝ: ܗܵܐ ܡܲܝܬܹܿܐ ܐ̄ܢܵܐ ܡܚܵܪ ܩܲܡܨܵܐ ܥܲܠ ܟܠܹܗ ܬܚܘܼܡܵܟ݂. 5 ܘܲܢܟܲܣܹܐ ܥܲܝܢܹܗ ܕܐܲܪܥܵܐ: ܘܠܵܐ ܢܸܫܟܲܚ ܒܲܪܢܵܫܵܐ ܠܡܸܚܙܝܵܗ ܠܐܲܪܥܵܐ: ܘܢܹܐܟ݂ܘܿܠ ܫܲܪܟܵܐ ܕܡܸܕܸܿܡ ܕܲܫܒܲܩ ܠܟ݂ܘܿܢ ܒܲܪܕ݂ܵܐ: ܘܢܹܐܟ݂ܘܿܠ ܟܠܗܘܿܢ ܐܝܼܠܵܢܹ̈ܐ ܐܲܝܠܹܝܢ ܕܝܼܥܵܘ ܠܟ݂ܘܿܢ ܒܚܲܩܠܵܐ. 6 ܘܢܸܬ݂ܡܠܘܿܢ ܒܵܬܲܝܟ: ܘܒ݂ܵܬܹ̈ܐ ܕܥܲܒ݂ܕܲܝܟ: ܘܒ݂ܵܬܲܝܗܘܿܢ ܕܟ݂ܠܗܘܿܢ ܡܸܨܪܵܝܹܐ: ܕܠܵܐ ܚܙܵܘ ܐܲܒ݂ܵܗܲܝܟ: ܘܐܲܒ݂ܵܗܹܐ ܕܐܲܒ݂ܵܗܲܝܟ ܗܵܟܲܢܵܐ: ܡܼܢ ܝܵܘܡܵܐ ܕܲܗܘܵܘ ܥܲܠ ܐܲܪܥܵܐ ܘܲܥܕܲܡܵܐ ܠܝܵܘܡܵܢܵܐ: ܘܲܗܦܲܟ݂ܘ ܘܲܢܦܲܩܘ ܡܼܢ ܩܕ݂ܵܡ ܦܸܪܥܘܿܢ. 7 ܘܐܸܡܲܪܘ ܠܹܗ ܥܲܒ݂ܕܵܘܗܝ ܠܦܸܪܥܘܿܢ: ܥܕܲܡܵܐ ܠܐܸܡܲܬ݂ܝ ܬܸܗܘܸܐ ܠܲܢ ܗܵܕܹܐ ܬܘܼܩܠܬ݂ܵܐ: ܫܲܕܲܪ ܠܓܲܒ݂ܪܹܐ ܘܢܸܦܠܚܘܿܢ ܠܡܵܪܝܵܐ ܐܲܠܵܗܗܘܿܢ: ܥܕܲܡܵܐ ܠܗܵܫܵܐ ܠܵܐ ܝܵܕܲܥ ܐܲܢ̄ܬ ܕܐܸܒ݂ܕܲܬ݂ ܠܵܗ ܡܸܨܪܹܝܢ. 8 ܘܐܲܗܦܸܟ݂ܘ ܐܸܢܘܿܢ ܠܡܘܼܫܹܐ ܘܠܲܐܗܪܘܿܢ ܠܘܵܬ݂ ܦܸܪܥܘܿܢ: ܘܐܸܡܲܪ ܠܗܘܿܢ ܙܸܠܘ ܦܠܘܿܚܘ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ: ܐܸܠܵܐ ܡܿܢ ܘܡܿܢ ܐܵܙܠ̄ܝܼܢ. 9 ܐܸܡܲܪ ܠܹܗ ܡܘܼܫܹܐ: ܒܲܥܠܲܝܡܲܝܢ ܘܲܒ݂ܩܲܫܝܼܫܲܝܢ ܢܹܐܙܲܠ: ܒܲܒ݂ܢܲܝܢ ܘܲܒ݂ܢܵܬܲܢ: ܒܥܵܢܲܢ ܘܲܒ݂ܬ݂ܵܘܪܲܝܢ ܢܹܐܙܲܠ: ܡܸܛܠ ܕܥܲܕ݂ܥܹܕ݂ܵܐ ܗ̄ܘܼ ܠܲܢ ܕܡܵܪܝܵܐ. 10 ܘܐܸܡܲܪ ܠܗܘܿܢ: ܢܸܗܘܸܐ ܗܵܟܲܢܵܐ: ܡܵܪܝܵܐ ܥܲܡܟ݂ܘܿܢ: ܡܵܐ ܕܫܲܕܲܪܬܿܟ݂ܘܿܢ ܘܠܐܝܼܩܲܪܬܿܟ݂ܘܿܢ: ܚܙܵܘ ܕܝܹܢ ܕܲܠܡܵܐ ܒܝܼܫܬܵܐ ܠܘܼܩܒܲܠ ܐܲܦܲܝ̈ܟܿܘܿܢ. 11 ܠܵܐ ܗܵܟܲܢܵܐ: ܙܸܠܘ ܗܵܫܵܐ ܓܲܒ݂ܪܹܐ: ܘܲܦܠܘܿܚܘ ܩܕ݂ܵܡ ܡܵܪܝܵܐ: ܡܸܛܠ ܕܲܢܝܵܚܬܵܐ ܗ̄ܘܼ ܒܵܥܹܝܢ ܐܲܢ̄ܬܿܘܿܢ: ܘܐܲܦܸܩܘ ܐܸܢܘܿܢ ܡܼܢ ܩܕ݂ܵܡ ܐܲܦܵܘܗܝ ܕܦܸܪܥܘܿܢ. 12 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܲܪܝܼܡ ܐܝܼܕ݂ܵܟ݂ ܥܲܠ ܐܲܪܥܵܐ ܕܡܸܨܪܹܝܢ ܒܩܲܡܨܵܐ: ܘܢܸܣܲܩ ܥܲܠ ܐܲܪܥܵܐ ܕܡܸܨܪܹܝܢ: ܘܢܹܐܟ݂ܘܿܠ ܥܸܣܒܵܐ ܕܐܲܪܥܵܐ: ܘܟ݂ܠ ܡܸܕܸܿܡ ܕܲܫܒܲܩ ܒܲܪܕ݂ܵܐ. 13 ܘܐܲܪܝܼܡ ܡܘܼܫܹܐ ܚܘܼܛܪܹܗ ܥܲܠ ܐܲܪܥܵܐ ܕܡܸܨܪܹܝܢ: ܘܡܵܪܝܵܐ ܐܲܦܸܩ ܪܘܼܚܵܐ ܕܫܵܘܒܵܐ ܥܲܠ ܐܲܪܥܵܐ: ܟܠܵܗ ܐܝܼܡܵܡܵܐ ܗܵܘ: ܘܟ݂ܠܹܗ ܠܸܠܝܵܐ: ܫܲܦܪܵܐ ܗܘܵܐ: ܘܪܘܼܚܵܐ ܕܫܵܘܒܵܐ ܫܸܩܠܲܬ݂ ܩܲܡܨܵܐ. 14 ܘܲܣܠܸܩ ܩܲܡܨܵܐ ܥܲܠ ܟܠܵܗ ܐܲܪܥܵܐ ܕܡܸܨܪܹܝܢ: ܘܲܫܪܵܐ ܒܟ݂ܠܹܗ ܬܚܘܼܡܵܐ ܕܡܸܨܪܵܝܹܐ: ܬܲܩܝܼܦ ܗ̄ܘܵܐ ܛܵܒ݂: ܘܐܲܟ݂ܘܵܬܹܗ ܠܵܐ ܗ̄ܘܵܐ ܩܲܡܨܵܐ ܩܕ݂ܵܡܵܘܗܝ: ܐܵܦܠܵܐ ܒܵܬ݂ܪܹܗ ܢܸܗܘܸܐ ܐܲܟ݂ܘܵܬܹܗ. 15 ܘܟܲܣܝܼ ܥܲܝܢܹܗ ܕܟ݂ܠܵܗ ܐܲܪܥܵܐ: ܘܚܸܫܟܲܬ݂ ܐܲܪܥܵܐ: ܘܐܸܟܲܠ ܟܠܹܗ ܥܸܣܒܵܐ ܕܐܲܪܥܵܐ: ܘܟ݂ܠܗܘܿܢ ܦܹܐܪܹ̈ܐ ܕܐܝܼܠܵܢܹ̈ܐ ܕܲܫܒܲܩ ܒܲܪܕ݂ܵܐ: ܘܠܵܐ ܐܸܫܬܿܚܲܪ ܛܲܪܦܵܐ ܒܐܝܼܠܵܢܵܐ: ܐܵܦܠܵܐ ܥܸܣܒܵܐ ܒܚܲܩܠܵܐ: ܒܟ݂ܠܵܗ ܐܲܪܥܵܐ ܕܡܸܨܪܹܝܢ. 16 ܘܣܲܪܗܸܒ݂ ܦܸܪܥܘܿܢ ܠܡܸܩܪܵܐ ܠܡܘܼܫܹܐ ܘܠܲܐܗܪܘܿܢ: ܘܐܸܡܲܪ ܠܗܘܿܢ: ܚܛܹܝܬ݂ ܠܡܵܪܝܵܐ ܐܲܠܵܗܟ݂ܘܿܢ ܘܲܠܟ݂ܘܿܢ. 17 ܘܐܵܦ ܗܵܫܵܐ ܫܒ݂ܘܿܩܘ ܣܘܼܪܚܵܢܝ ܗܵܢܵܐ ܙܲܒ݂ܢܵܐ: ܘܨܲܠܵܘ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ: ܘܢܲܦܪܸܩ ܡܹܢܝ ܡܵܘܬܵܐ ܗܵܢܵܐ. 18 ܘܲܢܦܲܩ ܡܘܼܫܹܐ ܡܼܢ ܩܕ݂ܵܡ ܦܸܪܥܘܿܢ: ܘܨܲܠܝܼ ܩܕ݂ܵܡ ܡܵܪܝܵܐ. 19 ܘܲܗܦܲܟ݂ ܡܵܪܝܵܐ ܐܲܝܬܿܝܼ ܪܘܼܚܵܐ ܕܡܲܥܪܒ݂ܵܐ ܕܬܲܩܝܼܦܵܐ ܛܵܒ݂: ܘܲܫܩܲܠܬܹܿܗ ܠܩܲܡܨܵܐ ܘܐܲܪܡܝܵܬܹܗ ܒܝܲܡܵܐ ܕܣܘܿܦ: ܘܠܵܐ ܐܸܫܬܿܚܲܪ ܐܵܦܠܵܐ ܚܲܕ݂ ܩܲܡܨܵܐ ܒܟ݂ܠܹܗ ܬܚܘܼܡܵܐ ܕܡܸܨܪܵܝܹܐ. 20 ܘܩܲܫܝܼ ܡܵܪܝܵܐ ܠܸܒܹܿܗ ܕܦܸܪܥܘܿܢ: ܘܠܵܐ ܫܲܕܲܪ ܠܲܒ݂ܢܲܝ ܝܼܣܪܵܝܹܠ. 21 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܲܪܝܼܡ ܐܝܼܕ݂ܵܟ݂ ܠܘܵܬ݂ ܫܡܲܝܵܐ: ܘܢܸܗܘܸܐ ܚܸܫܟܵܐ ܒܐܲܪܥܵܐ ܕܡܸܨܪܹܝܢ: ܘܢܲܥܡܸܛ ܚܸܫܟܵܐ. 22 ܘܐܲܪܝܼܡ ܡܘܼܫܹܐ ܐܝܼܕܹܗ ܠܘܵܬ݂ ܫܡܲܝܵܐ: ܘܲܗܘܵܐ ܚܸܫܟܵܐ ܘܥܲܡܛܵܢܵܐ ܒܟ݂ܠܵܗ ܐܲܪܥܵܐ ܕܡܸܨܪܹܝܢ: ܬܠܵܬ݂ܵܐ ܝܵܘܡܝܼܢ. 23 ܘܠܵܐ ܚܙܵܐ ܐ̄ܢܵܫ ܐܲܚܘܼܗܝ: ܘܠܵܐ ܩܵܡ ܐ̄ܢܵܫ ܡܼܢ ܕܘܼܟܿܬܹܗ ܬܠܵܬ݂ܵܐ ܝܵܘܡܝܼܢ: ܘܲܠܟ݂ܠܗܘܿܢ ܒܢܲܝ ܝܼܣܪܵܝܹܠ ܗܘܵܐ ܢܘܼܗܪܵܐ ܒܹܝܬ݂ ܡܵܘܬܲܒ݂ܗܘܿܢ24 ܘܲܩܪܵܐ ܦܸܪܥܘܿܢ ܠܡܘܼܫܹܐ ܘܐܸܡܲܪ ܠܹܗ: ܙܸܠܘ ܦܠܘܿܚܘ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ: ܒܲܠܚܘܿܕ݂ ܥܵܢܟ݂ܘܿܢ ܘܬ݂ܵܘܪܲܝܟܿܘܿܢ ܫܒ݂ܘܿܩܘ: ܘܐܵܦ ܝܼܩܲܪܬܿܟ݂ܘܿܢ ܬܹܐܙܲܠ ܥܲܡܟ݂ܘܿܢ. 25 ܐܵܡܲܪ ܠܹܗ ܡܘܼܫܹܐ ܠܦܸܪܥܘܿܢ: ܘܐܵܦ ܐܲܢ̄ܬ ܬܸܬܸܿܠ ܒܐܝܼܕܲܝܢ ܕܸܒ݂ܚܹ̈ܐ ܘܲܥܠܵܘܵܬ݂ܵܐ ܘܲܢܕܲܒܲܚ ܠܡܵܪܝܵܐ ܐܲܠܵܗܲܢ. 26 ܘܐܵܦ ܒܥܝܼܪܲܢ ܬܹܐܙܲܠ ܥܲܡܲܢ: ܘܠܵܐ ܬܸܫܬܿܚܲܪ ܡܸܢܲܢ ܐܵܦܠܵܐ ܚܕ݂ܵܐ ܛܸܦܪܵܐ ܬܢܵܢ: ܡܸܛܠ ܕܡܸܢܵܗ ܢܵܣܒܿܝܼܢܲܢ ܠܡܸܦܠܲܚ ܩܕ݂ܵܡ ܡܵܪܝܵܐ ܐܲܠܵܗܲܢ: ܘܲܚܢܲܢ ܠܵܐ ܝܵܕ݂ܥܝܼܢܲܢ ܡܵܢܵܐ ܢܸܦܠܘܿܚ ܠܡܵܪܝܵܐ ܡܵܐ ܕܡܲܛܝܼܢ ܠܬܲܡܵܢ. 27 ܘܩܲܫܝܼ ܡܵܪܝܵܐ ܠܸܒܹܿܗ ܕܦܸܪܥܘܿܢ: ܘܠܵܐ ܨܒ݂ܵܐ ܕܲܢܫܲܕܲܪ ܐܸܢܘܿܢ. 28 ܘܐܸܡܲܪ ܦܸܪܥܘܿܢ ܠܡܘܼܫܹܐ: ܙܸܠ ܠܵܟ݂ ܡܼܢ ܠܘܵܬ݂ܝ: ܐܸܙܕܲܗܪ ܠܵܐ ܬܵܘܣܸܦ ܬܘܼܒ݂ ܕܬܸܬ݂ܚܙܸܐ ܠܝܼ: ܡܸܛܠ ܕܵܒ݂ܝܵܘܡܵܐ ܕܡܸܬ݂ܚܙܸܐ ܐܲܢ̄ܬܿ ܠܝܼ ܬܡܘܼܬ݂. 29 ܐܸܡܲܪ ܠܹܗ ܡܘܼܫܹܐ: ܫܲܦܝܼܪ ܐܸܡܲܪܬܿ: ܬܘܼܒ݂ ܠܵܐ ܡܵܘܣܸܦ ܐ̄ܢܵܐ ܠܡܸܚܙܵܐ ܐܲܦܲܝܟ.

********

ܩܦܠܐܘܢ : ܝܐ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܬܘܼܒ݂ ܡܚܘܿܬ݂ܵܐ ܚܕ݂ܵܐ ܡܲܝܬܸܿܐ ܐ̄ܢܵܐ ܥܲܠ ܦܸܪܥܘܿܢ ܘܥܲܠ ܡܸܨܪܵܝܹܐ: ܘܗܵܝܕܹܝܢ ܐܹܫܲܕܲܪܟ݂ܘܿܢ ܡܸܟܵܐ: ܘܡܵܐ ܕܫܲܕܲܪܬܿܟ݂ܘܿܢ ܟܠܟ݂ܘܿܢ: ܦܘܿܩܘ ܠܟ݂ܘܿܢ ܡܸܟܵܐ. 2 ܘܐܸܡܲܪ ܩܕ݂ܵܡ ܥܲܡܵܐ ܢܸܫܐܠܘܼܢ ܐ̄ܢܵܫ ܡܼܢ ܚܲܒ݂ܪܹܗ: ܘܐܲܢ̄ܬܿܬ݂ܵܐ ܡܼܢ ܚܒܲܪܬ݂ܵܗ: ܡܵܐܢܹ̈ܐ ܕܣܹܐܡܵܐ: ܘܡܵܐܢܹ̈ܐ ܕܕܲܗܒ݂ܵܐ. 3 ܘܝܲܗ̄ܒ݂ ܐܸܢܘܿܢ ܡܵܪܝܵܐ ܠܥܲܡܵܐ ܠܪܲܚܡܹ̈ܐ ܒܥܲܝܢܲܝܗܘܿܢ ܕܡܸܨܪܵܝܹܐ: ܐܵܦ ܓܲܒ݂ܪܵܐ ܡܘܼܫܹܐ ܝܲܩܝܼܪ ܗ̄ܘܵܐ ܛܵܒ݂ ܒܐܲܪܥܵܐ ܕܡܸܨܪܹܝܢ: ܒܥܲܝܢܲܝ ܥܲܒ݂ܕܵܘܗܝ ܕܦܸܪܥܘܿܢ: ܘܲܒ݂ܥܲܝܢܲܝ ܥܲܡܵܐ. 4 ܘܐܸܡܲܪ ܡܘܼܫܹܐ: ܗܵܟܲܢܵܐ ܐܵܡܲܪ ܡܵܪܝܵܐ: ܒܦܸܠܓܹܿܗ ܕܠܸܠܝܵܐ ܢܵܦܹܩ ܐ̄ܢܵܐ ܒܓ݂ܵܘ ܡܸܨܪܹܝܢ. 5 ܘܲܢܡܘܼܬ݂ܘܼܢ ܟܠܗܘܿܢ ܒܘܼܟ݂ܪܹ̈ܐ ܕܐܲܪܥܵܐ ܕܡܸܨܪܹܝܢ: ܡܼܢ ܒܘܼܟܪܹܗ ܕܦܸܪܥܘܿܢ ܕܝܵܬܸܒ݂ ܥܲܠ ܟܘܼܪܣܝܹܗ: ܘܲܥܕܲܡܵܐ ܠܒ݂ܘܼܟ݂ܪܵܐ ܕܐܲܡܬ݂ܵܐ ܕܐܝܼܬ݂ ܒܹܝܬ݂ ܪܲܚܝܵܐ: ܘܟ݂ܠܗܘܿܢ ܒܘܼܟ݂ܪܹ̈ܐ ܕܥܵܢܵܐ. 6 ܘܬܸܗܘܸܐ ܝܼܠܲܠܬܵܐ ܪܲܒܬ݂ܵܐ ܒܐܲܪܥܵܐ ܕܡܸܨܪܹܝܢ: ܕܐܵܟ݂ܘܵܬ݂ܵܗ ܠܵܐ ܗܘܵܬ݂: ܘܐܲܟ݂ܘܵܬ݂ܵܗ ܠܵܐ ܢܸܗܘܸܐ. 7 ܘܡܼܢ ܕܒܹܝܬ݂ ܝܼܣܪܵܝܹܠ ܠܵܐ ܢܲܗܲܪ ܐܵܦܠܵܐ ܟܲܠܒܵܐ ܒܠܸܫܵܢܹܗ: ܐܵܦܠܵܐ ܒܢܲܝܢܵܫܵܐ: ܐܵܦܠܵܐ ܒܥܝܼܪܵܐ: ܡܸܛܠ ܕܬܸܕܿܥܘܿܢ ܕܲܦܪܲܫ ܡܵܪܝܵܐ ܒܹܝܬ݂ ܡܸܨܪܵܝܹܐ ܠܲܕ݂ܒܹܝܬ݂ ܝܼܣܪܵܝܹܠ. 8 ܘܢܸܚܬ݂ܘܼܢ ܟܠܗܘܿܢ ܥܲܒ݂ܕܲܝܟ ܗܵܠܹܝܢ ܠܘܵܬ݂ܝ: ܘܢܸܣܓܿܕ݂ܘܼܢ ܠܝܼ ܘܢܹܐܡܪܘܼܢ ܠܝܼ: ܦܘܿܩ ܐܲܢ̄ܬ ܘܥܲܡܵܐ ܗܵܢܵܐ ܟܠܹܗ ܕܥܲܡܵܟ݂. ܘܗܵܝܕܹܿܝܢ ܐܸܦܘܿܩ: ܘܲܢܦܲܩ ܡܘܼܫܹܐ ܡܼܢ ܩܕ݂ܵܡ ܦܸܪܥܘܿܢ ܒܚܸܡܬ݂ܵܐ ܪܲܒܿܬ݂ܵܐ. 9 ܘܐܸܡܲܪ ܡܵܪܝܵܐ ܠܡܘܼܫܹܐ: ܠܵܐ ܢܸܫܡܲܥܟ݂ܘܿܢ ܦܸܪܥܘܿܢ: ܡܸܛܠ ܕܐܲܣܓܸܿܐ ܦܪܝܼܫܵܬ݂ܝ ܒܐܲܪܥܵܐ ܕܡܸܨܪܹܝܢ. 10 ܘܡܘܼܫܹܐ ܘܐܲܗܪܘܿܢ ܥܒܲܕ݂ܘ ܦܪܝܼܫܵܬ݂ܵܐ ܗܵܠܹܝܢ ܩܕ݂ܵܡ ܦܸܪܥܘܿܢ: ܘܩܲܫܝܼ ܡܵܪܝܵܐ ܠܸܒܹܿܗ ܕܦܸܪܥܘܿܢ: ܘܠܵܐ ܫܲܕܲܪ ܠܲܒ݂ܢܲܝ ܝܼܣܪܵܝܹܠ ܡܼܢ ܐܲܪܥܹܗ.

********

ܩܦܠܐܘܢ : ܝܒ.

1 ܘܐܸܡܲܪ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ ܒܐܲܪܥܵܐ ܕܡܸܨܪܹܝܢ. 2 ܝܲܪܚܵܐ ܗܵܢܵܐ ܢܸܗܘܸܐ ܠܟ݂ܘܿܢ ܪܹܫ ܝܲܪܚܹܐ: ܩܲܕ݂ܡܵܝ ܢܸܗܘܸܐ ܠܟ݂ܘܿܢ ܠܟ݂ܠܗܘܿܢ ܝܲܪܚܹܐ ܕܫܲܢ̄ܬܵܐ. 3 ܐܸܡܲܪܘ ܠܟ݂ܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ: ܒܲܥܣܲܪܬܵܐ ܒܝܲܪܚܵܐ ܗܵܢܵܐ: ܢܸܗܘܘܿܢ ܢܵܣܒܿܝܼܢ ܠܗܘܿܢ ܓܒܲܪ ܐܸܡܪܵܐ ܠܒܲܝܬܵܐ: ܘܐܸܡܪܵܐ ܠܒܹܝܬ݂ ܐܲܒ݂ܘܼܗܝ. 4 ܘܐܸܢ ܙܥܘܿܪ ܗ̄ܘܼ ܒܲܝܬܵܐ ܕܢܸܦܘܿܩ ܒܹܗ ܐܸܡܪܵܐ: ܢܸܣܲܒ݂ ܗܘܼ ܘܲܫܒ݂ܵܒܹܗ ܕܩܲܪܝܼܒ݂ ܠܒܲܝܬܹܿܗ ܒܡܸܢܝܵܢܵܐ ܕܢܲܦ̮ܫܵܬ݂ܵܐ: ܐ̄ܢܵܫ ܡܸܣܲܬ݂ ܡܹܐܟ݂ܠܹܗ ܬܸܡܢܘܿܢ ܥܲܠ ܐܸܡܪܵܐ. 5 ܐܸܡܪܵܐ ܕܠܲܝܬܿ ܒܹܗ ܡܘܼܡܵܐ: ܕܸܟ݂ܪܵܐ ܒܲܪ ܫܲܢ̄ܬܵܐ ܢܸܗܘܸܐ ܠܟ݂ܘܿܢ: ܡܼܢ ܐܸܡܪܹ̈ܐ ܘܡܼܢ ܓܕܲܝ̈ܵܐ ܬܸܣܒ݂ܘܼܢ. 6 ܘܢܸܗܘܸܐ ܢܛܝܼܪ ܠܟ݂ܘܿܢ: ܥܕܲܡܵܐ ܠܐܲܪܒܲܥܸܣܪܹܐ ܒܝܲܪܚܵܐ ܗܵܢܵܐ: ܘܢܸܟ݂ܣܘܼܢܹܗ ܟܠܹܗ ܥܲܡܵܐ ܕܲܟ݂ܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ: ܒܡܲܥܪܵܒܲܝ ܫܸܡܫܵܐ. 7 ܘܢܸܣܒ݂ܘܼܢ ܡܼܢ ܕܡܹܗ: ܘܢܸܪܣܘܼܢ ܥܲܠ ܬܪܲܝܗܘܿܢ ܦܪܘܼܣܬܿܕܹܐ: ܘܥܲܠ ܐܸܣܟܦܵܬ݂ܵܐ: ܘܥܲܠ ܒܵܬܹ̈ܐ: ܕܢܹܐܟ݂ܠܘܼܢܹܗ ܒܗܘܿܢ. 8 ܘܢܹܐܟ݂ܠܘܼܢܹܗ ܠܒܸܣܪܵܐ ܒܠܸܠܝܵܐ ܗܵܢܵܐ: ܟܲܕ݂ ܡܛܵܘܲܝ ܒܢܘܼܪܵܐ: ܘܦܲܛܝܼܪܵܐ ܥܲܡ ܡܪܵܪܹܐ ܢܹܐܟ݂ܠܘܼܢܹܗ. 9 ܠܵܐ ܬܹܐܟ݂ܠܘܿܢ ܡܸܢܹܗ ܟܲܕ݂ ܚܲܝ: ܐܵܦܠܵܐ ܟܲܕ ܡܒܲܫܵܠܘܼ ܡܒܲܫܸܠ ܒܡܲܝܵܐ: ܐܸܠܵܐ ܟܲܕ ܡܛܵܘܲܝ ܒܢܘܼܪܵܐ: ܘܪܹܫܹܗ ܘܟ݂ܪܵܥܵܘܗܝ ܘܲܓ݂ܘܵܝܹܗ. 10 ܘܠܵܐ ܬܵܘܬܿܪܘܼܢ ܡܸܢܹܗ ܠܨܲܦܪܵܐ: ܘܡܸܕܸܿܡ ܕܝܵܬܲܪ ܡܸܢܹܗ ܠܨܲܦܪܵܐ: ܒܢܘܼܪܵܐ ܬܵܘܩܕ݂ܘܢܹܗ. 11 ܘܗܵܟܲܢܵܐ ܬܹܐܟ݂ܠܘܼܢܹܗ: ܟܲܕ݂ ܚܲܨܲܝܟܿܘܿܢ ܐܲܣܝܼܪܝܼܢ: ܘܲܡܣܵܐܢܲܝܟܿܘܿܢ ܒܪܸܓ݂ܠܲܝܟܿܘܿܢ: ܘܚܘܼܛܪܲܝܟܿܘܿܢ ܒܐܝܼܕܲܝܟܿܘܿܢ: ܘܐܘܼܟ݂ܠܘܼܗܝ ܡܣܲܪܗܒ݂ܵܐܝܼܬ݂: ܡܸܛܠ ܕܦܸܨܚܵܐ ܗ̄ܘܼ ܠܡܵܪܝܵܐ. 12 ܘܐܸܥܒܲܪ ܒܐܲܪܥܵܐ ܕܡܸܨܪܹܝܢ ܒܠܸܠܝܵܐ ܗܵܢܵܐ ܘܲܢܡܘܼܬ݂ܘܼܢ ܟܠܗܘܿܢ ܒܘܼܟܪܹ̈ܐ ܕܐܲܪܥܵܐ ܕܡܸܨܪܹܝܢ: ܡܼܢ ܒܢܲܝܢܵܫܵܐ ܘܲܥܕܲܡܵܐ ܠܲܒ݂ܥܝܼܪܵܐ: ܘܲܒ݂ܟ݂ܠܗܹܝܢ ܕܸܚܠܵܬ݂ܗܘܿܢ ܕܡܸܨܪܵܝܹܐ: ܐܸܥܒܸܿܕ݂ ܕܝܼܢܵܐ: ܐܸܢܵܐ ܡܵܪܝܵܐ. 13 ܘܢܸܗܘܸܐ ܠܟ݂ܘܿܢ ܕܡܵܐ ܗܵܢܵܐ ܠܐܵܬ݂ܵܐ ܥܲܠ ܒܵܬܹ̈ܐ ܕܐܲܢ̄ܬܿܘܿܢ ܒܗܘܿܢ: ܘܐܸܚܙܹܝܘܗܝ ܠܲܕ݂ܡܵܐ ܘܐܲܦܨܲܚ ܥܠܲܝܟܿܘܿܢ: ܘܠܵܐ ܢܸܗܘܸܐ ܒܟ݂ܘܿܢ ܡܵܘܬܵܐ ܠܲܡܚܲܒܵܠܘܼ: ܡܵܐ ܕܲܡܩܲܛܸܠ ܐ̄ܢܵܐ ܒܐܲܪܥܵܐ ܕܡܸܨܪܹܝܢ. 14 ܘܢܸܗܘܸܐ ܠܟ݂ܘܿܢ ܝܵܘܡܵܐ ܗܵܢܵܐ ܠܕ݂ܘܼܟ݂ܪܵܢܵܐ: ܘܥܘܼܒ݂ܕܘܼܗܝ ܥܲܕ݂ܥܹܕ݂ܵܐ ܠܡܵܪܝܵܐ: ܥܲܕ݂ܥܹܕ݂ܵܐ ܠܕ݂ܵܪܲܝܟܿܘܿܢ: ܢܵܡܘܿܣܵܐ ܠܥܵܠܲܡ ܗܘܲܝܬܿܘܿܢ ܥܵܒ݂ܕܿܝܼܢ ܠܹܗ. 15 ܫܲܒ݂ܥܵܐ ܝܵܘܡܝܼܢ ܦܲܛܝܼܪܵܐ ܬܹܐܟ݂ܠܘܼܢ: ܘܡܼܢ ܝܵܘܡܵܐ ܩܲܕ݂ܡܵܝܵܐ ܬܒܲܛܠܘܼܢ ܚܡܝܼܪܵܐ ܡܼܢ ܒܵܬܲܝܟܿܘܿܢ: ܡܸܛܠ ܕܠܵܐ ܢܹܐܟ݂ܘܿܠ ܚܲܡܝܼܥܵܐ ܡܼܢ ܒܵܬܲܝܟܿܘܿܢ: ܬܹܐܒܲܕ݂ ܢܲܦ̮ܫܵܐ ܗܵܝ ܡܼܢ ܝܼܣܪܵܝܹܠ: ܡܼܢ ܝܵܘܡܵܐ ܩܲܕ݂ܡܵܝܵܐ ܘܲܥܕܲܡܵܐ ܠܝܵܘܡܵܐ ܫܒ݂ܝܼܥܵܝܵܐ. 16 ܝܵܘܡܵܐ ܩܲܕ݂ܡܵܝܵܐ ܩܪܸܐ ܘܩܲܕܝܼܫ: ܘܝܵܘܡܵܐ ܫܒ݂ܝܼܥܵܝܵܐ ܩܪܸܐ ܘܩܲܕܿܝܼܫ ܢܸܗܘܸܐ ܠܟ݂ܘܿܢ: ܘܟ݂ܠ ܥܒ݂ܵܕ݂ܵܐ ܠܵܐ ܢܸܬ݂ܥܒܸܕ݂ ܒܗܘܿܢ: ܐܸܠܵܐ ܡܸܕܸܿܡ ܕܐܵܟܸܠ ܒܲܪܢܵܫܵܐ: ܒܲܠܚܘܿܕ݂ ܗ̄ܘܼ ܢܸܬ݂ܥܒܸܕ݂ ܠܟ݂ܘܿܢ. 17 ܘܬܸܛܪܘܼܢ ܦܲܛܝܼܪܵܐ: ܡܸܛܠ ܕܒܹܗ ܒܝܵܘܡܵܐ ܗܵܢܵܐ ܐܲܦܩܹܬ݂ ܚܲܝܠܵܘܵܬ݂ܟ݂ܘܿܢ ܡܼܢ ܐܲܪܥܵܐ ܕܡܸܨܪܹܝܢ: ܘܬܸܛܪܘܼܢ ܝܵܘܡܵܐ ܗܵܢܵܐ ܠܕ݂ܵܪܲܝܟܿܘܿܢ ܢܵܡܘܿܣܵܐ ܕܲܠܥܵܠܲܡ. 18 ܒܝܲܪܚܵܐ ܩܲܕ݂ܡܵܝܵܐ: ܒܐܲܪܒܲܥܸܣܪܹܐ ܒܝܲܪܚܵܐ ܒܪܲܡܫܵܐ: ܬܹܐܟ݂ܠܘܼܢ ܦܲܛܝܼܪܵܐ: ܘܲܥܕܲܡܵܐ ܠܝܘܿܡ ܚܲܕ݂ ܘܥܸܣܪܝܼܢ ܒܝܲܪܚܵܐ ܒܪܲܡܫܵܐ. 19 ܫܲܒ݂ܥܵܐ ܝܵܘܡܝܼܢ ܚܲܡܝܼܥܵܐ ܠܵܐ ܢܸܫܬܿܟܲܚ ܒܒ݂ܵܬܲܝܟܿܘܿܢ: ܡܸܛܠ ܕܟ݂ܠ ܕܢܹܐܟ݂ܘܿܠ ܚܲܡܝܼܥܵܐ: ܬܹܐܒܲܕ݂ ܢܲܦ̮ܫܵܐ ܗܵܝ ܡܼܢ ܟܢܘܼܫܬܵܐ ܕܝܼܣܪܵܝܹܠ: ܡܼܢ ܒܘܼܟ݂ܢܹ̈ܐ : ܘܡܼܢ ܥܵܡܘܿܪܹ̈ܐ ܕܐܲܪܥܵܐ. 20 ܘܟ݂ܠ ܚܲܡܝܼܥܵܐ ܠܵܐ ܬܹܐܟ݂ܠܘܿܢ: ܒܟ݂ܠܹܗ ܒܹܝܬ݂ ܡܲܥܡܲܪܟ݂ܘܿܢ ܬܹܐܟ݂ܠܘܿܢ ܦܲܛܝܼܪܵܐ. 21 ܘܲܩܪܵܐ ܡܘܼܫܹܐ ܠܟ݂ܠܗܘܿܢ ܣܵܒܹ̈ܐ ܕܲܒ݂ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܒܲܥܓܲܠ ܣܲܒ݂ܘ ܠܟ݂ܘܿܢ ܥܵܢܵܐ ܠܫܲܪܒ݂ܵܬ݂ܟ݂ܘܿܢ: ܘܟ݂ܘܼܣܘ ܦܸܨܚܵܐ. 22 ܘܬܸܣܒ݂ܘܿܢ ܡܹܐܣܲܪܬܵܐ ܕܙܘܿܦܵܐ: ܘܬܸܨܒܿܥܘܼܢ ܒܲܕ݂ܡܵܐ ܕܐܸܡܪܵܐ: ܘܬܸܪܣܘܿܢ ܥܲܠ ܐܸܣܟܦܵܬ݂ܵܐ ܘܥܲܠ ܬܪܲܝܗܘܿܢ ܦܪܘܼܣܬܿܕܹܐ ܡܼܢ ܕܡܵܐ ܕܐܝܼܬ݂ ܒܡܵܢܵܐ: ܘܐܲܢ̄ܬܿܘܿܢ ܠܵܐ ܬܲܦܩܘܼܢ ܐ̄ܢܵܫ ܡܼܢ ܬܪܲܥ ܒܲܝܬܹܿܗ: ܥܕܲܡܵܐ ܠܨܲܦܪܵܐ. 23 ܘܢܸܥܒܲܪ ܡܵܪܝܵܐ ܠܡܸܡܚܵܐ ܠܡܸܨܪܵܝܹܐ: ܘܢܸܚܙܹܝܘܗܝ ܠܲܕ݂ܡܵܐ ܕܥܲܠ ܐܸܣܟܦܵܬ݂ܵܐ: ܘܥܲܠ ܬܪܲܝܗܘܿܢ ܦܪܘܼܣܬܿܕܹܐ: ܘܢܲܦܨܲܚ ܡܵܪܝܵܐ ܥܲܠ ܬܲܪܥܹܐ: ܘܠܵܐ ܢܸܫܒܘܿܩ ܠܲܡܚܲܒܿܠܵܢܵܐ ܕܢܸܥܘܿܠ ܠܒ݂ܵܬܲܝܟܿܘܿܢ ܘܲܢܚܲܒܸܿܠ. 24 ܘܬܸܛܪܘܼܢ ܦܸܬ݂ܓ݂ܵܡܵܐ ܗܵܢܵܐ ܘܢܵܡܘܿܣܵܐ ܗܵܢܵܐ: ܠܟ݂ܘܿܢ ܘܠܲܒ݂ܢܲܝܟܘܿܢ ܥܕܲܡܵܐ ܠܥܵܠܲܡ. 25 ܘܡܵܐ ܕܥܲܠܬܿܘܼܢ ܠܐܲܪܥܵܐ ܕܢܸܬܸܠ ܠܟ݂ܘܿܢ ܡܵܪܝܵܐ ܐܲܝܟ݂ ܕܐܸܡܲܪ: ܬܸܛܪܘܿܢ ܦܘܼܠܚܵܢܵܐ ܗܵܢܵܐ. 26 ܘܢܸܗܘܸܐ ܟܲܕ݂ ܢܹܐܡܪܘܼܢ ܠܟ݂ܘܿܢ ܒܢܲܝܟܘܿܢ: ܗܵܢܵܐ ܦܘܼܠܚܵܢܵܐ ܡܵܢܵܐ ܗ̄ܘܼ. 27 ܬܹܐܡܪܘܼܢ ܠܗܘܿܢ: ܕܕܸܒ݂ܚܬܵܐ ܗ̄ܘܼ ܕܦܸܨܚܹܗ ܕܡܵܪܝܵܐ ܕܐܲܦܨܲܚ ܥܲܠ ܒܵܬܹ̈ܐ ܕܲܒ݂ܢܲܝ ܝܼܣܪܵܝܹܠ ܒܡܸܨܪܝܹܢ: ܟܲܕ݂ ܡܚܵܐ ܠܡܸܨܪܵܝܹܐ ܘܲܠܒ݂ܵܬܲܝܢ ܦܲܨܝܼ: ܘܲܩܥܲܕ݂ܘ ܥܲܡܵܐ ܘܲܣܓܸܕ݂ܘ ܠܡܵܪܝܵܐ. 28 ܘܐܸܙܲܠܘ ܘܲܥܒܲܕ݂ܘ ܒܢܲܝܼ ܝܼܣܪܵܝܹܠ: ܐܲܝܟܲܢܵܐ ܕܲܦܩܲܕ݂ ܐܸܢܘܿܢ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ: ܗܵܟܲܢܵܐ ܥܒܲܕ݂ܘ. 29 ܘܲܗܘܵܐ ܒܦܸܠܓܹܿܗ ܕܠܸܠܝܵܐ: ܘܡܵܪܝܵܐ ܩܲܛܸܠ ܟܠܗܘܿܢ ܒܘܼܟܪܹ̈ܐ ܕܐܲܪܥܵܐ ܕܡܸܨܪܹܝܢ: ܡܼܢ ܒܘܼܟ݂ܪܹܗ ܕܦܸܪܥܘܿܢ ܕܝܵܬܸܒ݂ ܥܲܠ ܟܘܼܪܣܝܹܗ: ܘܲܥܕܲܡܵܐ ܠܒ݂ܘܼܟ݂ܪܵܐ ܕܫܲܒ݂ܝܵܐ ܕܐܝܼܬ݂ ܒܝܹܬ݂ ܐܲܣܝܼܪܹ̈ܐ: ܘܟ݂ܠܗܘܿܢ ܒܘܼܟ݂ܪܹ̈ܐ ܕܲܒ݂ܥܝܼܪܵܐ. 30 ܘܩܵܡ ܦܸܪܥܘܿܢ ܒܠܸܠܝܵܐ ܗܵܘ: ܘܟ݂ܠܗܘܿܢ ܥܲܒ݂ܕܵܘܗܝ: ܘܟ݂ܠܗܘܿܢ ܡܸܨܪܵܝܹܐ: ܘܲܗܘܵܬ݂ ܝܼܠܲܠܬܵܐ ܪܲܒܬ݂ܵܐ ܒܐܲܪܥܵܐ ܕܡܸܨܪܹܝܢ: ܘܠܲܝܬ ܒܲܝܬܵܐ ܕܠܲܝܬ ܗ̄ܘܵܐ ܒܹܗ ܡܝܼܬ݂ܵܐ. 31 ܘܲܩܪܵܐ ܦܸܪܥܘܿܢ ܠܡܘܼܫܹܐ ܘܠܲܐܗܪܘܿܢ ܒܠܸܠܝܵܐ ܗܵܘ: ܘܐܸܡܲܪ ܠܗܘܿܢ ܩܘܼܡܘ ܦܘܿܩܘ ܡܼܢ ܓܵܘ ܥܲܡܝ: ܘܐܵܦ ܐܲܢ̄ܬܘܢ ܘܐܵܦ ܒܢܲܝ ܝܼܣܪܵܝܹܠ: ܘܙܸܠܘ ܦܠܘܿܚܘ ܩܕ݂ܵܡ ܡܵܪܝܵܐ: ܐܲܝܟܲܢܵܐ ܕܐܸܡܲܪܬܿܘܢ. 32 ܐܵܦ ܥܵܢܟ݂ܘܿܢ ܐܵܦ ܬܵܘܪܲܝܟܿܘܢ ܕܒܲܪܘ: ܐܲܝܟ݂ ܕܐܸܡܲܪܬܘܿܢ: ܘܙܸܠܘ ܘܲܬ݂ܒܲܪܟ݂ܘܼܢ ܐܵܦ ܠܝܼ. 33 ܘܐܲܠܸܨܘ ܡܸܨܪܵܝܹܐ ܠܥܲܡܵܐ ܡܣܲܪܗܒ݂ܵܐܝܼܬ݂: ܕܢܲܦܩܘܼܢ ܐܸܢܘܿܢ ܡܼܢ ܐܲܪܥܵܐ: ܡܸܛܠ ܕܐܵܡܪܝܼܢ ܟܠܲܢ ܡܲܝܬܿܝܼܢ ܚ̄ܢܲܢ. 34 ܘܲܫܩܲܠܘ ܥܲܡܵܐ ܠܲܝܫܗܘܿܢ ܟܲܕ݂ ܠܵܐ ܚܡܲܥ: ܩܲܪܝܼܪܗܘܿܢ ܨܪܝܼܪ ܒܫܘܼܫܲܦܲܝܗܘܿܢ ܘܲܪܡܹܐ ܥܲܠ ܟܲܬ݂ܦܵܬ݂ܗܘܿܢ. 35 ܘܲܒ݂ܢܲܝ ܝܼܣܪܵܝܹܠ ܥܒܲܕ݂ܘ ܐܲܝܟ݂ ܡܸܠܬܹܗ ܕܡܘܼܫܹܐ: ܘܲܫܐܸܠܘ ܡܼܢ ܡܸܨܪܵܝܹܐ ܡܵܐܢܹ̈ܐ ܕܣܹܐܡܵܐ: ܘܡܵܐܢܹ̈ܐ ܕܕܲܗܒ݂ܵܐ: ܘܲܠܒ݂ܘܼܫܹ̈ܐ. 36 ܘܝܲܗ̄ܒ݂ ܐܸܢܘܿܢ ܡܵܪܝܵܐ ܠܥܲܡܵܐ ܠܪܲܚܡܹܐ ܒܥܲܝܢܲܝܗܘܿܢ ܕܡܸܨܪܵܝܹܐ: ܘܲܫܐܸܠܘ ܐܸܢܘܿܢ: ܘܚܲܠܸܨܘ ܠܡܸܨܪܵܝܹܐ. 37 ܘܲܫܩܲܠܘ ܒܢܲܝ ܝܼܣܪܵܝܹܠ ܡܼܢ ܪܲܥܡܣܝܼܣ ܠܣܵܟ݂ܘܼܬ݂: ܫܸܬ݂ܡܵܐܐ ܐܲܠܦܝܼܢ ܓܲܒ݂ܪܹ̈ܐ ܪܸܓ݂ܠܵܝܹܐ: ܣܛܲܪ ܡܼܢ ܝܼܩܲܪܬܵܐ. 38 ܘܐܵܦ ܥܲܪܼܘܼܒ݂ܵܐ ܣܲܓܝܼܐܵܐ ܣܠܸܩ ܥܲܡܗܘܿܢ: ܘܥܵܢܵܐ ܘܬ݂ܵܘܪܹܐ ܘܩܸܢܝܵܢܵܐ ܕܣܲܓܿܝܼ ܛܵܒ݂. 39 ܘܐܲܦܵܐܘܼܗܝ ܠܠܲܝܫܵܐ ܕܐܲܦܸܩܘ ܡܼܢ ܡܸܨܪܹܝܢ ܪܲܥܦܵܐ ܦܲܛܝܼܪܵܐ: ܡܸܛܠ ܕܠܵܐ ܚܡܲܥ: ܡܸܛܠ ܕܐܲܦܸܩܘ ܐܸܢܘܿܢ ܡܸܨܪܵܝܹܐ: ܘܠܵܐ ܐܸܫܟܲܚܘ ܠܡܸܬ݂ܟܲܪܵܟ݂ܘܼ: ܘܐܵܦ ܙܘܵܐܕܹܐ ܠܵܐ ܥܒܲܕ݂ܘ ܠܗܘܿܢ. 40 ܘܡܵܘܬܲܒ݂ܗܘܿܢ ܕܝܼܬܸܒ݂ܘ ܒܢܲܝ ܝܼܣܪܵܝܹܠ ܒܐܲܪܥܵܐ ܕܡܸܨܪܹܝܢ: ܐܲܪܒܲܥܡܐܵܐ ܘܲܬ݂ܠܵܬ݂ܝܼܢ ܫܢܝܼܢ. 41 ܘܲܗܘܵܐ ܡܼܢ ܒܵܬܲܪ ܐܲܪܒܲܥܡܵܐܐ ܘܲܬ݂ܠܵܬ݂ܝܼܢ ܫܢܝܼܢ: ܒܹܗ ܒܝܵܘܡܵܐ ܗܵܢܵܐ ܢܦܲܩܘ ܟܠܗܘܿܢ ܚܲܝܠܵܘܵܬܹܗ ܕܡܵܪܝܵܐ ܡܼܢ ܐܲܪܥܵܐ ܕܡܸܨܪܝܹܢ. 42 ܠܸܠܝܵܐ ܢܛܝܼܪ ܗ̄ܘܵܐ ܠܡܵܪܝܵܐ: ܠܡܲܦܵܩܘܼܬ݂ܗܘܿܢ ܡܼܢ ܐܲܪܥܵܐ ܕܡܸܨܪܝܹܢ: ܗܘܼ ܠܸܠܝܵܐ ܗܵܢܵܐ ܠܡܵܪܝܵܐ ܢܛܝܼܪ ܗ̄ܘܵܐ ܠܟ݂ܠܗܘܿܢ ܒܢܲܝ ܝܼܣܪܵܝܹܠ ܠܕ݂ܵܪܲܝܗܘܢ. 43 ܘܐܸܡܲܪ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ: ܗܵܢܵܘ ܢܵܡܘܿܣܵܐ ܕܦܸܨܚܵܐ: ܟܠ ܒܲܪ ܢܘܼܟ݂ܪܵܝܵܐ ܠܵܐ ܢܹܐܟ݂ܘܿܠ ܡܸܢܹܗ. 44 ܘܟ݂ܠ ܥܲܒ݂ܕܵܐ ܕܓܲܒ݂ܪܵܐ ܙܒ݂ܝܼܢ ܟܸܣܦܵܐ: ܡܵܐ ܕܲܓ݂ܙܲܪܬܵܝܗܝ: ܗܵܝܕܹܿܝܢ ܢܹܐܟ݂ܘܿܠ ܡܸܢܹܗ. 45 ܬܵܘܬܵܒ݂ܵܐ ܘܐܲܓ݂ܝܼܪܵܐ ܠܵܐ ܢܹܐܟ݂ܘܿܠ ܡܸܢܹܗ. 46 ܒܒܲܝܬܵܐ ܚܲܕ݂ ܢܸܬ݂ܐܟܸܠ: ܘܠܵܐ ܬܲܦܩܘܿܢ ܡܸܢܹܗ ܡܼܢ ܒܸܣܪܵܐ ܠܒܲܪ ܡܼܢ ܒܲܝܬܵܐ: ܘܓܲܪܡܵܐ ܠܵܐ ܬܸܬ݂ܒܿܪܘܼܢ ܒܹܗ. 47 ܟܠܵܗ ܟܢܘܼܫܬܵܐ ܕܝܼܣܪܵܝܹܠ ܢܸܥܒܿܕ݂ܘܼܢܹܗ. 48 ܘܟܲܕ݂ ܢܸܥܡܲܪ ܥܲܡܟ݂ܘܿܢ ܬܵܘܬܵܒ݂ܵܐ: ܘܢܸܥܒܸܿܕ݂ ܦܸܨܚܵܐ ܠܡܵܪܝܵܐ: ܡܵܐ ܕܓ݂ܵܙܲܪ ܟܠ ܕܸܟ݂ܪܵܐ: ܗܵܝܕܹܿܝܢ ܢܸܬ݂ܩܲܪܲܒ݂ ܠܡܸܥܒܿܕܹܗ: ܘܢܸܗܘܸܐ ܐܲܝܟ݂ ܒܘܼܟ݂ܢܹ̈ܐ ܕܐܲܪܥܵܐ: ܘܟ݂ܠ ܥܘܼܪܠܵܐ ܠܵܐ ܢܹܐܟ݂ܘܿܠ ܡܸܢܹܗ. 49 ܢܵܡܘܿܣܵܐ ܚܲܕ݂ ܢܸܗܘܸܐ ܠܒ݂ܘܼܟ݂ܢܹ̈ܐ: ܘܲܠܥܡܵܘܿܪܹ̈ܐ ܕܥܵܡܪܝܼܢ ܒܲܝܢܵܬ݂ܟ݂ܘܿܢ. 50 ܘܲܥܒܲܕ݂ܘ ܟܠܗܘܿܢ ܒܢܲܝ ܝܼܣܪܵܝܹܠ: ܐܲܝܟ݂ ܕܲܦܩܸܕ݂ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ: ܗܵܟܲܢܵܐ ܥܒܲܕ݂ܘ. 51 ܘܲܗܘܵܐ ܒܹܗ ܒܝܵܘܡܵܐ ܗܵܢܵܐ ܐܲܦܸܩ ܡܵܪܝܵܐ ܠܲܒ݂ܢܲܝ ܝܼܣܪܵܝܹܠ ܡܼܢ ܐܲܪܥܵܐ ܕܡܸܨܪܹܝܢ: ܟܠ ܚܲܝܠܵܘܵܬ݂ܗܘܿܢ.

********

ܩܦܠܐܘܢ : ܝܓ.

1 ܘܐܸܡܲܪ ܡܵܪܝܵܐ ܠܡܘܼܫܹܐ. 2 ܩܲܕܸܿܫ ܠܝܼ ܟܠ ܒܘܼܟ݂ܪܵܐ ܕܦܵܬܲܚ ܟܠ ܪܵܚܡܵܐ: ܕܲܒ݂ܢܲܝ ܝܼܣܪܵܝܹܠ: ܕܐ̄ܢܵܫܵܐ ܘܕܲܒ݂ܥܝܼܪܵܐ: ܕܝܼܠܝ ܐܸܢܘܿܢ. 3 ܘܐܸܡܲܪ ܡܘܼܫܹܐ ܠܥܲܡܵܐ: ܐܸܬܿܕܲܟܲܪܘ ܝܵܘܡܵܐ ܗܵܢܵܐ ܕܲܢܦܲܩܬܿܘܿܢ ܒܹܗ ܡܼܢ ܐܲܪܥܵܐ ܕܡܸܨܪܹܝܢ: ܡܼܢ ܒܹܝܬ݂ ܥܲܒ݂ܕܘܼܬ݂ܵܐ: ܡܸܛܠ ܕܒ݂ܐܝܼܕ݂ܵܐ ܬܲܩܝܼܦܬܵܐ ܐܲܦܸܩܟ݂ܘܿܢ ܡܵܪܝܵܐ ܡܸܟܵܐ: ܘܠܵܐ ܢܸܬ݂ܐܟܸܠ ܚܲܡܝܼܥܵܐ. 4 ܒܝܵܘܡܵܐ ܗܵܢܵܐ ܕܢܵܦܩܝܼܬܿܘܿܢ: ܒܝܲܪܚܵܐ ܕܗܲܒܵܒܹܐ. 5 ܘܢܸܗܘܸܐ ܟܲܕ݂ ܢܲܥܸܠܟ݂ܘܿܢ ܡܵܪܝܵܐ ܠܐܲܪܥܵܐ ܕܲܟ݂ܢܲܥܢܵܝܹܐ: ܘܲܕ݂ܚܹܬ݂ܵܝܹܐ: ܘܕ݂ܵܐܡܘܿܪܵܝܹܐ: ܘܲܕ݂ܚܵܘܵܝܹܐ: ܘܲܕ݂ܝܵܒ݂ܘܿܣܵܝܹܐ: ܘܲܕ݂ܦܲܪܙܵܝܹܐ: ܐܲܝܟ݂ ܕܝܼܡܵܐ ܠܐܲܒ݂ܵܗܲܝܟܿܘܿܢ: ܕܢܸܬܸܿܠ ܠܟ݂ܘܿܢ ܐܲܪܥܵܐ ܕܡܲܪܕܿܝܵܐ ܚܲܠܒ݂ܵܐ ܘܕܸܒ݂ܫܵܐ: ܬܸܦܠܚܘܼܢ ܦܘܼܠܚܵܢܵܐ ܗܵܢܵܐ ܒܹܗ ܒܝܲܪܚܵܐ ܗܵܢܵܐ. 6 ܫܲܒ݂ܥܵܐ ܝܵܘܡܝܼܢ ܬܹܐܟ݂ܠܘܿܢ ܦܲܛܝܼܪܵܐ: ܘܲܒ݂ܝܵܘܡܵܐ ܫܒ݂ܝܼܥܵܝܵܐ ܥܲܕ݂ܥܹܕ݂ܵܐ ܗ̄ܘܼ ܠܡܵܪܝܵܐ. 7 ܦܲܛܝܼܪܵܐ ܬܹܐܟ݂ܠܘܿܢ ܫܲܒ݂ܥܵܐ ܝܵܘܡܝܼܢ: ܘܠܵܐ ܢܸܬ݂ܚܙܸܐ ܒܟ݂ܘܿܢ ܚܲܡܝܼܥܵܐ: ܒܟ݂ܠܹܗ ܬܚܘܼܡܟ݂ܘܿܢ. 8 ܘܲܬ݂ܚܵܘܘܼܢ ܠܲܒ݂ܢܲܝܟܿܘܿܢ ܒܝܵܘܡܵܐ ܗܵܘ: ܕܡܸܛܠ ܗܵܢܵܐ ܥܒܲܕ݂ ܠܝܼ ܐܲܠܵܗܝ ܟܲܕ݂ ܢܸܦܩܹܬ݂ ܡܼܢ ܡܸܨܪܹܝܢ. 9 ܘܢܸܗܘܸܐ ܠܵܟ݂ ܐܵܬ݂ܵܐ ܥܲܠ ܐܝܼܕ݂ܵܟ݂: ܘܕ݂ܘܼܟ݂ܪܵܢܵܐ ܒܹܝܬ݂ ܥܲܝܢܲܝܟ: ܡܸܛܠ ܕܢܸܗܘܸܐ ܢܵܡܘܿܣܹܗ ܕܡܵܪܝܵܐ ܒܦܘܼܡܵܟ݂: ܡܸܛܠ ܕܒ݂ܐܝܼܕ݂ܵܐ ܬܲܩܝܼܦܬܵܐ ܐܲܦܩܵܟ݂ ܡܵܪܝܵܐ ܡܼܢ ܡܸܨܪܹܝܢ. 10 ܘܛܲܪ ܦܘܼܩܕܵܢܵܐ ܗܵܢܵܐ ܘܢܵܡܘܿܣܵܐ ܗܵܢܵܐ ܠܙܲܒ݂ܢܹܗ: ܡܼܢ ܥܸܕܵܢ ܠܥܸܕܵܢ. 11 ܘܟܲܕ݂ ܢܲܥܠܵܟ݂ ܡܵܪܝܵܐ ܠܐܲܪܥܵܐ ܕܲܟ݂ܢܲܥܢܵܝܹܐ: ܐܲܝܟ݂ ܕܝܼܡܵܐ ܠܵܟ݂ ܘܠܐܲܒ݂ܵܗܲܝܟ: ܘܢܸܬܿܠܝܼܗܿ ܠܵܟ݂. 12 ܬܸܦܪܘܿܫ ܟܠ ܒܘܼܟ݂ܪܵܐ ܦܵܬܲܚ ܪܵܚܡܵܐ ܠܡܵܪܝܵܐ: ܘܟ݂ܠ ܦܵܬܲܚ ܪܵܚܡܵܐ ܕܲܒ݂ܥܝܼܪܵܐ: ܕܢܸܗܘܸܐ ܠܵܟ݂ ܕܸܟ݂ܪܵܐ ܠܡܵܪܝܵܐ. 13 ܘܟ݂ܠ ܒܘܼܟ݂ܪܵܐ ܕܸܟ݂ܪܵܐ ܦܵܬܲܚ ܪܵܚܡܵܐ ܕܲܒ݂ܥܝܼܪܵܐ: ܒܐܸܡܪܵܐ ܬܸܦܪܩܝܼܘܗܝ: ܘܐܸܢ ܠܵܐ ܬܸܦܪܩܝܼܘܗܝ ܬܸܩܛܠܝܼܘܗܝ: ܘܟ݂ܠ ܒܘܼܟ݂ܪܵܐ ܕܒܲܪܢܵܫܵܐ ܕܲܒ݂ܢܲܝܟ ܬܸܦܪܘܿܩ. 14 ܘܟܲܕ݂ ܢܫܲܐܠܵܟ݂ ܒܪܵܟ݂ ܡܚܵܪ ܘܢܹܐܡܲܪ ܠܵܟ݂: ܡܵܢܵܐ ܗ̄ܘܼ ܗܵܢܵܐ: ܘܬܹܐܡܲܪ ܠܹܗ: ܕܒ݂ܐܝܼܕ݂ܵܐ ܬܲܩܝܼܦܬܵܐ ܐܲܦܩܲܢ ܡܵܪܝܵܐ ܡܼܢ ܡܸܨܪܹܝܢ: ܡܼܢ ܒܹܝܬ݂ ܥܲܒ݂ܕܿܘܼܬ݂ܵܐ. 15 ܘܟܲܕ݂ ܐܸܬ݂ܩܲܫܝܼ ܦܸܪܥܘܿܢ ܠܲܡܫܲܕܵܪܘܼܬܲܢ: ܩܲܛܸܠ ܡܵܪܝܵܐ ܟܠ ܒܘܼܟ݂ܪܹ̈ܐ ܕܒܲܐܪܥܵܐ ܕܡܸܨܪܹܝܢ: ܡܼܢ ܒܘܼܟܪܵܐ ܕܒܲܪܢܵܫܵܐ ܘܲܥܕܲܡܵܐ ܠܒ݂ܘܼܟ݂ܪܵܐ ܕܲܒ݂ܥܝܼܪܵܐ ܡܸܛܠ ܗܵܢܵܐ ܡܕܲܒܲܚ ܐ̄ܢܵܐ ܠܡܵܪܝܵܐ ܟܠ ܦܵܬܲܚ ܪܵܚܡܵܐ ܕܸܟ݂ܪܵܐ: ܘܟ݂ܠ ܒܘܼܟ݂ܪܵܐ ܕܲܒ݂ܢܲܝ ܐܸܦܪܘܿܩ. 16 ܘܢܸܗܘܸܐ ܠܵܟ݂ ܐܵܬ݂ܵܐ ܥܲܠ ܐܝܼܕ݂ܵܟ݂ ܘܕ݂ܘܼܟ݂ܪܵܢܵܐ ܒܹܝܬ݂ ܥܲܝܢܲܝܟ: ܡܸܛܠ ܕܒ݂ܐܝܼܕ݂ܵܐ ܬܲܩܝܼܦܬܵܐ ܐܲܦܩܵܟ݂ ܡܵܪܝܵܐ ܡܼܢ ܡܸܨܪܹܝܢ. 17 ܘܟܲܕ݂ ܫܲܕܲܪ ܦܸܪܥܘܿܢ ܠܥܲܡܵܐ: ܠܵܐ ܐܵܘܒܸܿܠ ܐܸܢܘܿܢ ܐܲܠܵܗܵܐ ܒܐܘܼܪܚܵܐ ܕܐܲܪܥܵܐ ܕܲܦܠܸܫܬܵܝܹܐ: ܡܸܛܠ ܕܩܲܪܝܼܒ݂ܵܐ ܗ̄ܘܵܬ݂: ܡܸܛܠ ܕܐܸܡܲܪ ܐܲܠܵܗܵܐ: ܕܲܠܡܵܐ ܢܸܕ݂ܚܠܘܼܢ ܥܲܡܵܐ ܡܵܐ ܕܲܚܙܵܘ ܩܪܵܒ݂ܵܐ: ܘܢܸܗܦܟ݂ܘܿܢ ܠܡܸܨܪܹܝܢ. 18 ܘܲܕ݂ܒܲܪ ܐܲܠܵܗܵܐ ܠܥܲܡܵܐ ܒܐܘܼܪܚܵܐ ܕܡܲܕ݂ܒܪܵܐ ܒܝܲܡܵܐ ܕܣܘܿܦ: ܘܲܡܙܲܝܢܝܼܢ ܣܠܸܩܘ ܗ̄ܘܵܘ ܒܢܲܝܼ ܝܼܣܪܵܝܹܠ ܡܼܢ ܐܲܪܥܵܐ ܕܡܸܨܪܹܝܢ. 19 ܘܲܢܣܲܒ݂ ܡܘܼܫܹܐ ܓܲܪܡܵܘܗܝ ܕܝܵܘܣܸܦ ܥܲܡܹܗ: ܡܸܛܠ ܕܡܵܘܡܵܝܘܼ ܐܵܘܡܝܼ ܠܲܕ݂ܒܹܝܬ݂ ܝܼܣܪܵܝܹܠ: ܘܐܸܡܲܪ: ܡܸܬܿܕܿܟ݂ܵܪܘܼ ܡܸܬܿܕܿܟܲܪ ܠܟ݂ܘܿܢ ܐܲܠܵܗܵܐ: ܐܲܣܸܩܘ ܓܲܪܡܲܝ ܡܸܟܵܐ ܥܲܡܟ݂ܘܿܢ. 20 ܘܲܫܩܲܠܘ ܡܼܢ ܣܵܟ݂ܘܼܬ݂: ܘܲܫܪܵܘ ܒܐܵܬ݂ܵܡ ܕܲܒ݂ܣܵܘܦܲܝ ܡܲܕ݂ܒܪܵܐ. 21 ܘܡܵܪܝܵܐ ܐܵܙܹܠ ܩܕ݂ܵܡܲܝܗܘܿܢ ܒܐܝܼܡܵܡܵܐ ܒܥܲܡܘܼܕ݂ܵܐ ܕܲܥܢܵܢܵܐ: ܠܡܲܫܪܵܝܘܼ ܐܸܢܘܿܢ ܒܐܘܼܪܚܵܐ: ܘܲܒ݂ܠܸܠܝܵܐ ܒܥܲܡܘܼܕ݂ܵܐ ܕܢܘܼܪܵܐ: ܠܡܲܢܗܵܪܘܼ ܠܗܘܿܢ: ܠܡܹܐܙܲܠ ܒܐܝܼܡܵܡܵܐ ܘܲܒ݂ܠܸܠܝܵܐ. 22 ܠܵܐ ܦܵܪܹܩ ܗ̄ܘܵܐ ܥܲܡܘܼܕ݂ܵܐ ܕܲܥܢܵܢܵܐ ܒܐܝܼܡܵܡܵܐ: ܘܥܲܡܘܼܕ݂ܵܐ ܕܢܘܼܪܵܐ ܒܠܸܠܝܵܐ: ܡܼܢ ܩܕ݂ܵܡ ܥܲܡܵܐ.

********

ܩܦܠܐܘܢ : ܝܕ.

1 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ. 2 ܐܸܡܲܪ ܠܲܕ݂ܒܹܝܬ݂ ܝܼܣܪܵܝܹܠ: ܢܸܗܦܟ݂ܘܿܢ ܘܢܸܫܪܘܿܢ ܥܲܠ ܦܘܼܡܵܗ ܕܚܹܐܪܝܼܬ݂ܵܐ: ܒܹܝܬ݂ ܡܲܓ݂ܕܿܘܿܠ ܠܒܹܝܬ݂ ܝܲܡܵܐ: ܩܕ݂ܵܡ ܒܥܸܠܨܦܘܿܢ: ܠܩܘܼܒ݂ܠܹܗ ܬܸܫܪܘܿܢ ܥܲܠ ܝܲܡܵܐ. 3 ܘܐܸܡܲܪ ܦܸܪܥܘܿܢ ܥܲܠ ܒܢܲܝ ܝܼܣܪܵܝܹܠ: ܕܢܘܼܟ݂ܪܵܝܼܝܢ ܐܸܢܘܿܢ ܒܐܲܪܥܵܐ: ܐܸܬܿܬܿܚܸܕ݂ ܥܠܲܝܗܘܿܢ ܡܲܕ݂ܒܪܵܐ. 4 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܢܵܐ ܐܹܩܲܫܸܐ ܠܸܒܹܿܗ ܕܦܸܪܥܘܿܢ ܘܢܸܪܕܘܿܦ ܒܵܬܲܪܟ݂ܘܿܢ: ܘܐܸܫܬܲܒܲܚ ܒܦܸܪܥܘܿܢ ܘܲܒ݂ܟ݂ܠܹܗ ܚܲܝܠܹܗ: ܘܢܸܕܥܘܿܢ ܡܸܨܪܵܝܹܐ ܕܐܸܢܵܐ ܐ̄ܢܵܐ ܡܵܪܝܵܐ: ܘܲܥܒܲܕ݂ܘ ܗܵܟܲܢܵܐ. 5 ܘܐܸܬ݂ܚܵܘܝܼ ܠܡܲܠܟܵܐ ܕܡܸܨܪܹܝܢ ܕܐܸܙܲܠ ܠܹܗ ܥܲܡܵܐ: ܘܐܸܬ݂ܗܦܸܟ݂ ܠܸܒܸܿܗ ܕܦܸܪܥܘܿܢ ܘܲܕ݂ܥܲܒ݂ܕܵܘܗܝ ܥܲܠ ܥܲܡܵܐ: ܘܐܵܡܪܝܼܢ: ܡܵܢܵܐ ܥܒܲܕܲܢ ܕܫܲܕܲܪܢ ܠܝܼܣܪܵܝܹܠ ܡܼܢ ܫܘܼܥܒܵܕܲܢ. 6 ܘܦܲܓܸܿܕ݂ ܩܵܪܘܿܟ݂ܵܘܗܝ: ܘܥܲܡܹܗ ܕܒܲܪ ܥܲܡܹܗ. 7 ܘܲܕ݂ܒܲܪ ܫܸܬ݂ܡܵܐܐ ܡܲܪܟܿܒ݂ܵܬ݂ܵܐ ܕܓ݂ܵܒ݂ܝܲܢ: ܘܟ݂ܠܗܹܝܢ ܕܡܸܨܪܵܝܹܐ: ܘܓܲܒ݂ܪܹ̈ܐ ܥܲܠ ܟܠܗܹܝܢ. 8 ܘܩܲܫܝܼ ܡܵܪܝܵܐ ܠܸܒܹܿܗ ܕܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܲܪܕܲܦ ܒܵܬܲܪ ܒܢܲܝ ܝܼܣܪܵܝܹܠ: ܘܲܒ݂ܢܲܝ ܝܼܣܪܵܝܹܠ ܢܦܲܩܘ ܒܐܝܼܕ݂ܵܐ ܪܵܡܬ݂ܵܐ. 9 ܘܲܪܕܲܦܘ ܡܸܨܪܵܝܹܐ ܒܵܬܲܪܗܘܿܢ: ܘܐܲܕ݂ܪܸܟ݂ܘ ܐܸܢܘܿܢ ܟܲܕ݂ ܫܪܹܝܢ ܥܲܠ ܝܲܡܵܐ: ܟܠ ܪܲܟ݂ܫܹܗ ܕܦܸܪܥܘܿܢ: ܘܡܲܪܟܿܒ݂ܵܬܹܗ ܘܦܲܪܵܫܵܘܗܝ ܘܚܲܝܠܹܗ: ܫܪܹܝܢ ܥܲܠ ܦܘܼܡܵܗ ܕܚܹܐܪܝܼܬ݂ܵܐ ܠܘܼܩܒܲܠ ܒܥܸܠܨܦܘܿܢ. 10 ܘܲܩܪܸܒ݂ ܦܸܪܥܘܿܢ : ܘܐܲܪܝܼܡܘ ܕܒܹܝܬ݂ ܝܼܣܪܵܝܹܠ ܥܲܝܢܲܝܗܘܿܢ: ܘܲܚܙܵܘ ܠܡܸܨܪܵܝܹܐ ܟܲܕ݂ ܐܵܬܹܝܢ ܒܵܬܲܪܗܘܿܢ: ܘܲܕ݂ܚܸܠܘ ܛܵܒ݂: ܘܨܲܠܝܼܘ ܒܢܲܝ ܝܼܣܪܵܝܹܠ ܩܕ݂ܵܡ ܡܵܪܝܵܐ. 11 ܘܐܸܡܲܪܘ ܠܡܘܼܫܹܐ: ܡܸܛܠ ܕܠܲܝܬ ܩܲܒ݂ܪܹ̈ܐ ܒܡܸܨܪܹܝܢ: ܕܒܲܪܬܲܢ ܕܲܢܡܘܼܬ݂ ܒܡܲܕ݂ܒܿܪܵܐ: ܠܡܵܢܵܐ ܥܒܲܕܿܬ ܠܲܢ ܗܵܟܲܢܵܐ: ܘܐܲܦܸܩܬܲܢ ܡܼܢ ܡܸܨܪܹܝܢ. 12 ܠܵܐ ܗ̄ܘܵܐ ܗܵܢܵܐ ܦܸܬ݂ܓ݂ܵܡܵܐ ܕܐܸܡܲܪܢ ܗ̄ܘܲܝܢ ܠܵܟ݂ ܒܡܸܨܪܹܝܢ: ܕܲܫܒ݂ܘܿܩܲܝܢ ܕܢܸܦܠܘܿܚ ܠܡܸܨܪܵܝܹܐ: ܡܸܛܠ ܕܛܵܒ݂ ܗ̄ܘܵܐ ܠܲܢ ܕܢܸܦܠܘܿܚ ܠܡܸܨܪܵܝܹܐ: ܡܼܢ ܕܲܢܡܘܼܬ݂ ܒܡܲܕ݂ܒܪܵܐ ܗܵܢܵܐ. 13 ܘܐܸܡܲܪ ܡܘܼܫܹܐ ܠܥܲܡܵܐ ܠܵܐ ܬܸܕ݂ܚܠܘܿܢ: ܟܲܬܲܪܘ ܘܲܚܙܵܘ ܦܘܼܪܩܵܢܹܗ ܕܡܵܪܝܵܐ ܕܥܵܒܹܕ݂ ܠܟ݂ܘܿܢ ܝܵܘܡܵܢܵܐ: ܕܐܲܝܟܲܢܵܐ ܕܲܚܙܲܝܬܿܘܿܢ ܠܡܸܨܪܵܝܹܐ ܝܵܘܡܵܢܵܐ: ܬܘܼܒ݂ ܠܵܐ ܬܵܘܣܦܘܼܢ ܠܡܸܚܙܵܐ ܐܸܢܘܿܢ ܠܥܵܠܲܡ. 14 ܡܵܪܝܵܐ ܢܸܬ݂ܟܲܬܲܫ ܥܲܠ ܐܲܦܲܝܟܿܘܿܢ: ܟܲܕ݂ ܐܲܢ̄ܬܿܘܿܢ ܬܸܗܘܘܿܢ ܫܠܹܝܢ: ܘܨܲܠܝܼ ܡܘܼܫܹܐ ܩܕ݂ܵܡ ܡܵܪܝܵܐ. 15 ܘܐܸܡܲܪ ܡܵܪܝܵܐ ܠܡܘܼܫܹܐ: ܡܵܢܵܐ ܡܨܲܠܹܐ ܐܲܢ̄ܬ ܩܕ݂ܵܡܲܝ ܐܸܡܲܪ ܠܲܕ݂ܒܹܝܬ݂ ܝܼܣܪܵܝܹܠ ܢܸܫܩܠܘܿܢ. 16 ܘܐܲܢ̄ܬ ܐܲܪܝܼܡ ܚܘܼܛܪܵܟ݂: ܘܐܲܪܟܸܿܢ ܐܝܼܕ݂ܵܟ݂ ܥܲܠ ܝܲܡܵܐ ܘܲܦܠܘܿܓ݂ܵܝܗܝ: ܘܢܸܥܠܘܿܢ ܒܢܲܝ ܝܼܣܪܵܝܹܠ ܒܓ݂ܵܘ ܝܲܡܵܐ ܒܝܲܒ݂ܫܵܐ. 17 ܘܐܸܢܵܐ ܗܵܐ ܡܥܲܒܸܿܐ ܐ̄ܢܵܐ ܠܸܒܗܘܿܢ ܕܡܸܨܪܵܝܹܐ ܕܢܸܥܠܘܿܢ ܒܵܬܲܪܗܘܿܢ: ܘܐܸܫܬܲܒܲܚ ܒܦܸܪܥܘܿܢ ܘܲܒ݂ܟ݂ܠܹܗ ܚܲܝܠܹܗ: ܘܲܒ݂ܡܲܪܟܿܒ݂ܵܬܹܗ: ܘܲܒ݂ܦܲܪܵܫܵܘܗܝ. 18 ܘܢܸܕܥܘܿܢ ܡܸܨܪܵܝܹܐ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܐܸܫܬܲܒܿܚܹܬ݂ ܒܦܸܪܥܘܿܢ ܘܲܒ݂ܟ݂ܠܹܗ ܚܲܝܠܹܗ: ܘܲܒ݂ܡܲܪܟܿܒ݂ܵܬܹܗ: ܘܲܒ݂ܦܲܪܵܫܵܘܗܝ. 19 ܘܲܫܩܲܠ ܡܲܠܲܐܟܹܗ ܕܡܵܪܝܵܐ ܕܐܵܙܹܠ ܩܕ݂ܵܡ ܡܲܫܪܝܼܬ݂ܵܐ ܕܝܼܣܪܵܝܹܠ: ܘܐܸܙܲܠ ܡܼܢ ܒܵܬܲܪܗܘܢ: ܘܲܫܩܲܠ ܥܲܡܘܼܕ݂ܵܐ ܕܲܥܢܵܢܵܐ ܡܼܢ ܩܕ݂ܵܡܲܝܗܘܿܢ: ܘܩܵܡ ܡܼܢ ܒܸܣܬܲܪܗܘܿܢ. 20 ܘܥܲܠ ܒܹܝܬ݂ ܡܲܫܪܝܼܬ݂ܵܐ ܕܡܸܨܪܵܝܹܐ ܠܡܲܫܪܝܼܬ݂ܵܐ ܕܝܼܣܪܵܝܹܠ: ܘܲܗܘܵܬ݂ ܥܢܵܢܵܐ ܘܚܸܫܘܿܟ݂ܵܐ ܟܠܹܗ ܠܸܠܝܵܐ: ܘܲܢܗܲܪ ܟܠܹܗ ܠܸܠܝܵܐ ܠܲܒ݂ܢܲܝ ܝܼܣܪܵܝܹܠ: ܘܠܵܐ ܩܪܸܒ݂ܘ ܗܵܠܹܝܢ ܠܘܵܬ݂ ܗܵܠܹܝܢ ܟܠܹܗ ܠܸܠܝܵܐ. 21 ܘܐܲܪܝܼܡ ܡܘܼܫܹܐ ܐܝܼܕܹܗ ܥܲܠ ܝܲܡܵܐ: ܘܕܲܒ݂ܪܹܗ ܡܵܪܝܵܐ ܠܝܲܡܵܐ ܒܪܘܼܚܵܐ ܕܫܵܘܒܵܐ ܥܲܙܝܼܙܬܵܐ ܟܠܹܗ ܠܸܠܝܵܐ: ܘܣܵܡܹܗ ܠܝܲܡܵܐ ܒܝܲܒ݂ܫܵܐ: ܘܐܸܬ݂ܦܲܠܲܓ݂ܘ ܡܲܝܵܐ. 22 ܘܥܲܠܘ ܒܢܲܝ ܝܼܣܪܵܝܹܠ ܒܓ݂ܵܘ ܝܲܡܵܐ ܒܝܲܒ݂ܫܵܐ: ܘܡܲܝܵܐ ܗܘܵܘ ܠܗܘܿܢ ܐܲܝܟ݂ ܫܘܼܪܵܐ ܡܼܢ ܝܲܡܝܼܢܗܘܿܢ ܘܡܼܢ ܣܸܡܵܠܗܘܿܢ. 23 ܘܲܪܕܲܦܘ ܡܸܨܪܵܝܹܐ ܘܥܲܠܘ ܒܵܬܲܪܗܘܿܢ: ܟܠ ܪܲܟ݂ܫܹܗ ܕܦܸܪܥܘܿܢ ܘܡܲܪܟܿܒ݂ܵܬܹܗ ܘܦܲܪܵܫܵܘܗܝ ܒܓ݂ܵܘ ܝܲܡܵܐ. 24 ܘܲܗܘܵܐ ܒܡܲܛܲܪܬܵܐ ܕܨܲܦܪܵܐ: ܘܐܸܬ݂ܚܙܝܼ ܡܵܪܝܵܐ ܠܡܲܫܪܝܼܬ݂ܵܐ ܕܡܸܨܪܵܝܹܐ ܒܥܲܡܘܼܕ݂ܵܐ ܕܢܘܼܪܵܐ ܘܕܲܥܢܵܢܵܐ: ܘܲܫܓܲܫ ܠܡܲܫܪܝܼܬ݂ܵܐ ܕܡܸܨܪܵܝܹܐ. 25 ܘܐܸܣܲܪ ܓܝܼܓ݂ܠܹܐ ܕܡܲܪܟܿܒ݂ܵܬ݂ܗܘܿܢ: ܘܗܸܢܘܿܢ ܡܕܲܒܿܪܝܼܢ ܠܗܹܝܢ ܒܬܲܩܝܼܦܘܼܬ݂ܵܐ: ܘܐܵܡܪܝܼܢ ܡܸܨܪܵܝܹܐ: ܢܸܥܪܘܿܩ ܡܼܢ ܩܕ݂ܵܡ ܕܒܹܝܬ݂ ܝܼܣܪܵܝܹܠ: ܡܸܛܠ ܕܡܵܪܝܵܐ ܥܒܲܕ݂ ܠܗܘܿܢ ܩܪܵܒ݂ܵܐ ܒܡܸܨܪܹܝܢ. 26 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܲܪܟܸܿܢ ܐܝܼܕ݂ܵܟ݂ ܥܲܠ ܝܲܡܵܐ: ܘܢܸܗܦܟ݂ܘܿܢ ܡܲܝܵܐ ܥܲܠ ܡܸܨܪܵܝܹܐ: ܥܲܠ ܡܲܪܟܿܒ݂ܵܬ݂ܗܘܿܢ: ܘܥܲܠ ܦܲܪܵܫܲܝܗܘܿܢ. 27 ܘܐܲܪܝܼܡ ܡܘܼܫܹܐ ܐܝܼܕܹܗ ܥܲܠ ܝܲܡܵܐ: ܘܲܗܦܲܟ݂ ܝܲܡܵܐ ܠܥܸܕܵܢ ܨܲܦܪܵܐ ܠܕ݂ܘܼܟܿܬܹܗ: ܘܡܸܨܪܵܝܹܐ ܥܵܪܩܝܼܢ ܠܩܘܼܒ݂ܠܹܗ: ܘܛܲܪܸܦ ܡܵܪܝܵܐ ܠܡܸܨܪܵܝܹܐ ܒܓ݂ܵܘ ܝܲܡܵܐ. 28 ܘܲܗܦܲܟ݂ܘ ܡܲܝܵܐ ܘܟܲܣܝܼܘ ܠܡܲܪܟܿܒ݂ܵܬ݂ܵܐ ܘܲܠܦܲܪܵܫܹܐ: ܘܲܠܟ݂ܠܹܗ ܚܲܝܠܹܗ ܕܦܸܪܥܘܿܢ ܕܥܲܠܘ ܒܵܬܲܪܗܘܿܢ ܠܝܲܡܵܐ: ܘܠܵܐ ܐܸܫܬܿܚܲܪ ܡܸܢܗܘܿܢ ܐܵܦܠܵܐ ܚܲܕ݂. 29 ܘܲܒ݂ܢܲܝ ܝܼܣܪܵܝܹܠ ܗܲܠܸܟ݂ܘ ܒܝܲܡܵܐ ܐܲܝܟ݂ ܕܲܒ݂ܝܲܒ݂ܫܵܐ: ܘܡܲܝܵܐ ܗܘܵܘ ܠܗܘܿܢ ܐܲܝܟ݂ ܫܘܼܪܵܐ ܡܼܢ ܝܲܡܝܼܢܗܘܿܢ ܘܡܼܢ ܣܸܡܵܠܗܘܿܢ. 30 ܘܲܦܪܲܩ ܡܵܪܝܵܐ ܒܝܵܘܡܵܐ ܗܵܘ ܠܝܼܣܪܵܝܹܠ ܡܼܢ ܐܝܼܕ݂ܵܐ ܕܡܸܨܪܵܝܹܐ: ܘܲܚܙܵܐ ܝܼܣܪܵܝܹܠ ܠܡܸܨܪܵܝܹܐ ܟܲܕ ܡܝܼܬ݂ܝܼܢ ܥܲܠ ܣܸܦܬܹܗ ܕܝܲܡܵܐ. 31 ܘܲܚܙܵܐ ܝܼܣܪܵܝܹܠ ܐܝܼܕ݂ܵܐ ܪܲܒܬ݂ܵܐ ܕܲܥܒܲܕ݂ ܡܵܪܝܵܐ ܒܡܸܨܪܵܝܹܐ: ܘܲܕ݂ܚܸܠܘ ܥܲܡܵܐ ܡܼܢ ܡܵܪܝܵܐ: ܘܗܲܝܡܸܢܘ ܒܡܵܪܝܵܐ ܘܲܒ݂ܡܘܼܫܹܐ ܥܲܒ݂ܕܹܿܗ.

********

ܩܦܠܐܘܢ : ܝܗ.

1 ܗܝܕܝܢ ܫܒܚ. . . . . . . . . . . . . . . . . .

22 ܘܐܲܫܩܸܠ ܡܘܼܫܹܐ ܠܲܕ݂ܒܹܝܬ݂ ܝܼܣܪܵܝܹܠ ܡܼܢ ܝܲܡܵܐ ܕܣܘܿܦ: ܘܲܢܦܲܩܘ ܠܡܲܕ݂ܒܪܵܐ ܕܫܘܿܕ݂: ܘܐܸܬ݂ܵܘ ܡܲܪܕܹܿܐ ܬܠܵܬ݂ܵܐ ܝܵܘܡܝܼܢ ܒܡܲܕ݂ܒܿܪܵܐ: ܘܠܵܐ ܐܸܫܟܲܚܘ ܡܲܝܵܐ. 23 ܘܐܸܬ݂ܵܘ ܠܡܘܼܪܲܬ݂ ܘܠܵܐ ܐܸܫܟܲܚܘ ܠܡܸܫܬܵܐ ܡܲܝܵܐ ܡܼܢ ܡܘܼܪܲܬ݂: ܡܸܛܠ ܕܡܲܪܝܼܪܝܼܢ ܗ̄ܘܵܘ: ܡܸܛܠ ܗܵܢܵܐ ܩܪܵܐ ܫܡܹܗ ܕܐܲܬ݂ܪܵܐ ܗܵܘ ܡܘܼܪܲܬ݂. 24 ܘܐܸܬ݂ܪܲܥܲܡܘ ܥܲܡܵܐ ܥܲܠ ܡܘܼܫܹܐ ܘܐܵܡܪܝܼܢ ܠܹܗ: ܡܵܢܵܐ ܢܸܫܬܸܿܐ. 25 ܘܨܲܠܝܼ ܡܘܼܫܹܐ ܩܕ݂ܵܡ ܡܵܪܝܵܐ: ܘܚܵܘܝܹܗ ܡܵܪܝܵܐ ܩܲܝܣܵܐ: ܘܐܲܪܡܝܹܗ ܒܡܲܝܵܐ: ܘܲܚܠܝܼܘ ܡܲܝܵܐ: ܬܲܡܵܢ ܐܲܠܦܹܗ ܢܵܡܘܿܣܹ̈ܐ ܘܕ݂ܝܼܢܹ̈ܐ: ܘܬܲܡܵܢ ܢܲܣܝܹܗ. 26 ܘܐܸܡܲܪ ܠܹܗ: ܐܸܢ ܡܸܫܡܲܥ ܬܸܫܡܲܥ ܒܩܵܠܹܗ ܕܡܵܪܝܵܐ ܐܲܠܵܗܵܟ݂: ܘܡܸܕܸܿܡ ܕܫܲܦܝܼܪ ܩܕ݂ܵܡܵܘܗܝ ܬܸܥܒܸܿܕ݂: ܘܲܬ݂ܨܘܼܬ݂ ܠܦܘܼܩܕܵܢܵܘܗܝ: ܘܬܸܛܲܪ ܟܠܗܘܿܢ ܩܝܵܡܵܘܗܝ: ܟܠ ܡܲܚܘܵܬ݂ܵܐ ܕܐܲܝܬܿܝܬ݂ ܥܲܠ ܡܸܨܪܵܝܹܐ: ܠܵܐ ܐܲܝܬܸܿܐ ܐܸܢܹܝܢ ܥܠܲܝܟ: ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܐܵܣܝܵܟ݂. 27 ܘܐܸܬ݂ܵܘ ܠܐܵܠܝܼܡ: ܘܬܲܡܵܢ ܐܝܼܬ݂ ܗ̄ܘܲܝ ܬܲܪܬܲܥܸܣܪܹܐ ܥܲܝܢܵܬ݂ܵܐ ܕܡܲܝܵܐ: ܘܫܲܒ݂ܥܝܼܢ ܕܸܩܠܝܼܢ: ܘܲܫܪܵܘ ܬܲܡܵܢ ܥܲܠ ܡܲܝܵܐ.

********

ܩܦܠܐܘܢ : ܝܘ.

1 ܘܲܫܩܲܠܘ ܡܼܢ ܐܵܠܝܼܡ: ܘܐܸܬ݂ܵܘ ܟܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ ܠܡܲܕ݂ܒܪܵܐ ܕܣܝܼܢ: ܕܐܝܼܬ݂ ܒܝܹܬ݂ ܐܵܠܝܼܡ ܠܒܹܝܬ݂ ܣܝܼܢܲܝ: ܒܚܲܡܫܲܥܸܣܪܹܐ ܒܝܲܪܚܵܐ ܬܸܢܝܵܢܵܐ: ܒܙܲܒ݂ܢܵܐ ܕܲܢܦܲܩܘ ܒܹܗ ܒܢܲܝ ܝܼܣܪܵܝܹܠ ܡܼܢ ܡܸܨܪܹܝܢ. 2 ܘܲܪܛܲܢܘ ܟܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ ܥܲܠ ܡܘܼܫܹܐ ܘܥܲܠ ܐܲܗܪܘܿܢ ܒܡܲܕ݂ܒܪܵܐ. 3 ܘܐܸܡܲܪܘ ܠܗܘܿܢ ܒܢܲܝ ܝܼܣܪܵܝܹܠ: ܨܵܒܹܝܢ ܗ̄ܘܲܝܢ ܕܹܝܢ ܕܡܝܼܬ݂ܢ ܒܐܝܼܕܹܗ ܕܡܵܪܝܵܐ ܒܐܲܪܥܵܐ ܕܡܸܨܪܹܝܢ: ܟܲܕ݂ ܝܵܬ݂ܒܿܝܼܢ ܗ̄ܘܲܝܢ ܥܲܠ ܩܲܕ݂ܣܹ̈ܐ ܕܒܸܣܪܵܐ ܘܐܵܟ݂ܠܝܼܢ ܗ̄ܘܲܝܢ ܠܲܚܡܵܐ ܘܣܵܒ݂ܥܝܼܢ: ܕܐܲܦܸܩܬܿܘܼܢܲܢ ܠܡܲܕ݂ܒܿܪܵܐ ܗܵܢܵܐ: ܠܡܸܚܪܲܒ݂ ܠܟ݂ܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ ܒܟܲܦܢܵܐ. 4 ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܐ ܡܲܡܛܲܪ ܐ̄ܢܵܐ ܠܟ݂ܘܿܢ ܠܲܚܡܵܐ ܡܼܢ ܫܡܲܝܵܐ: ܘܢܲܦܩܘܼܢ ܥܲܡܵܐ ܘܢܸܠܩܛܘܿܢ ܡܹܐܟ݂ܘܼܠܬܵܐ ܕܝܵܘܡܵܐ ܒܝܵܘܡܵܐ: ܡܸܛܠ ܕܐܹܢܲܣܸܐ ܐܸܢܘܿܢ: ܐܸܢ ܡܗܲܠܟ݂ܝܼܢ ܒܢܵܡܘܿܣܲܝ ܐܵܘ ܠܵܐ. 5 ܘܢܸܗܘܸܐ ܒܝܵܘܡܵܐ ܫܬܿܝܼܬ݂ܵܝܵܐ: ܢܛܲܝܼܒ݂ܘܿܢ ܡܸܕܸܿܡ ܕܢܲܝܬܿܘܿܢ: ܘܢܸܗܘܸܐ ܚܲܕ݂ ܬܪܹܝܢ ܥܲܠ ܡܸܕܸܿܡ ܕܠܲܩܛܝܼܢ ܒܟ݂ܠܝܘܿܡ. 6 ܘܐܸܡܲܪܘ ܡܘܼܫܹܐ ܘܐܲܗܪܘܿܢ: ܠܟ݂ܠܗܘܿܢ ܒܢܲܝ ܝܼܣܪܵܝܹܠ: ܒܪܲܡܫܵܐ ܬܸܕܿܥܘܿܢ ܕܡܵܪܝܵܐ ܐܲܦܸܩܟ݂ܘܿܢ ܡܼܢ ܡܸܨܪܹܝܢ. 7 ܘܲܒ݂ܨܲܦܪܵܐ ܬܸܚܙܘܿܢ ܫܘܼܒ݂ܚܹܗ ܕܡܵܪܝܵܐ: ܡܸܛܠ ܕܐܸܫܬܡܲܥ ܪܸܛܢܼܟ݂ܘܿܢ ܩܕ݂ܵܡ ܡܵܪܝܵܐ: ܘܲܚܢܲܢ ܡܵܢܵܐ ܚܢܲܢ ܕܪܵܛܢܝܼܢ ܐܲܢ̄ܬܿܘܿܢ ܥܠܲܝܢ. 8 ܘܐܸܡܲܪ ܠܗܘܿܢ ܡܘܼܫܹܐ: ܡܵܐ ܕܝܲܗ̄ܒ݂ ܠܟ݂ܘܿܢ ܡܵܪܝܵܐ ܒܸܣܪܵܐ ܒܪܲܡܫܵܐ ܠܡܹܐܟܲܠ: ܘܲܒ݂ܨܲܦܪܵܐ ܠܲܚܡܵܐ ܠܡܸܣܒܲܥ: ܡܸܛܠ ܕܲܫܡܲܥ ܡܵܪܝܵܐ ܪܸܛܢܼܟ݂ܘܿܢ ܕܪܵܛܢܝܼܢ ܐܲܢ̄ܬܿܘܿܢ ܥܠܵܘܗܝ: ܘܲܚܢܲܢ ܡܵܢܵܐ ܚܢܲܢ: ܠܵܐ ܗ̄ܘܵܐ ܥܠܲܝܢ ܡܪܲܛܢܝܼܢ ܐܲܢ̄ܬܿܘܿܢ: ܐܸܠܵܐ ܥܲܠ ܡܵܪܝܵܐ. 9 ܘܐܸܡܲܪ ܡܘܼܫܹܐ ܠܐܲܗܪܘܿܢ: ܐܸܡܲܪ ܠܟ݂ܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ: ܩܪܘܿܒ݂ܘ ܩܕ݂ܵܡ ܡܵܪܝܵܐ ܡܸܛܠ ܕܲܫܡܲܥ ܡܵܪܝܵܐ ܪܸܛܢܟ݂ܘܿܢ. 10 ܘܲܗܘܵܐ ܕܟܲܕ݂ ܐܸܡܲܪ ܐܲܗܪܘܿܢ ܠܟ݂ܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ: ܐܸܬ݂ܦܢܝܼܘ ܠܡܲܕ݂ܒܪܵܐ: ܘܗܵܐ ܫܘܼܒ݂ܚܹܗ ܕܡܵܪܝܵܐ ܐܸܬ݂ܚܙܝܼ ܒܲܥܢܵܢܵܐ. 11 ܘܐܸܡܲܪ ܡܵܪܝܵܐ ܠܡܘܼܫܹܐ. 12 ܫܸܡܥܹܬ݂ ܪܸܛܢܵܐ ܕܲܒ݂ܢܲܝ ܝܼܣܪܵܝܹܠ: ܐܸܡܲܪ ܠܗܘܿܢ: ܒܡܲܥܪܵܒܲܝ ܫܸܡܫܵܐ ܗܘܲܝܬܿܘܿܢ ܐܵܟ݂ܠܝܼܢ ܒܸܣܪܵܐ: ܘܲܒ݂ܨܲܦܪܵܐ ܬܸܗܘܘܿܢ ܣܵܒ݂ܥܝܼܢ ܠܲܚܡܵܐ: ܘܬܸܕܿܥܘܿܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ. 13 ܘܲܗܘܵܐ ܒܪܲܡܫܵܐ: ܘܣܸܠܩܲܬ݂ ܣܲܠܘܲܝ ܘܟܲܣܝܲܬ݂ ܠܡܲܫܪܝܼܬ݂ܵܐ: ܘܲܒ݂ܨܲܦܪܵܐ ܗܵܘܝܵܐ ܗ̄ܘܵܬ݂ ܕܝܼܡܬ݂ܵܐ ܕܛܲܠܵܐ ܚܕ݂ܵܪܹܝܗ ܕܡܲܫܪܝܼܬ݂ܵܐ. 14 ܘܣܸܠܩܲܬ݂ ܕܝܼܡܬ݂ܵܐ ܕܛܲܠܵܐ: ܘܗܵܐ ܥܲܠ ܐܲܦܲܝ ܡܲܕ݂ܒܪܵܐ ܪܩܝܼܩ ܘܡܸܬ݂ܩܠܸܦ: ܘܲܩܪܝܼܡ ܐܲܝܟ݂ ܓܠܝܼܕ݂ܵܐ ܥܲܠ ܐܲܪܥܵܐ. 15 ܘܲܚܙܵܘ ܒܢܲܝ ܝܼܣܪܵܝܹܠ: ܘܐܸܡܲܪܘ ܓܒܲܪ ܠܐܲܚܘܼܗܝ ܡܵܢܵܐ ܗ̄ܘܼ: ܡܸܛܠ ܕܠܵܐ ܝܵܕ݂ܥܝܼܢ ܗ̄ܘܵܘ ܡܵܢܵܐ ܗ̄ܘܼ: ܐܸܡܲܪ ܠܗܘܿܢ ܡܘܼܫܹܐ: ܗܵܢܵܘ ܠܲܚܡܵܐ ܕܝܲܗ̄ܒ݂ ܠܟ݂ܘܿܢ ܡܵܪܝܵܐ ܠܡܹܐܟܲܠ. 16 ܘܗܵܢܵܐ ܦܸܬ݂ܓ݂ܵܡܵܐ ܕܦܲܩܸܕ݂ ܡܵܪܝܵܐ: ܠܩܘܿܛܘ ܡܸܢܹܗ ܐ̄ܢܵܫ ܡܸܣܲܬ݂ ܡܹܐܟ݂ܠܹܗ: ܟܲܝܠܵܐ ܠܪܹܫܵܐ ܡܸܢܝܵܢ ܢܲܦ̮ܫܲܬ݂ܟ݂ܘܿܢ: ܐ̄ܢܵܫ ܠܕܲܒ݂ܡܲܫܟܿܢܹܗ ܬܸܣܒ݂ܘܿܢ. 17 ܘܲܥܒܲܕ݂ܘ ܗܵܟܲܢܵܐ ܒܢܲܝ ܝܼܣܪܵܝܹܠ: ܘܠܲܩܸܛܘ: ܐܝܼܬ݂ ܕܐܲܣܓܿܝܼ: ܘܐܝܼܬ݂ ܕܲܙܥܲܪ. 18 ܘܐܲܟܿܝܼܠܘܼܗܝ ܒܟܲܝܠܵܐ: ܘܠܵܐ ܐܵܘܬܲܪ ܕܐܲܣܓܿܝܼ: ܘܕܲܐܙܥܲܪ ܠܵܐ ܐܲܚܣܲܪ: ܐ̄ܢܵܫ ܡܸܣܲܬ݂ ܡܹܐܟ݂ܠܹܗ ܠܩܲܛܘ. 19 ܐܸܡܲܪ ܠܗܘܿܢ ܡܘܼܫܹܐ ܐ̄ܢܵܫ ܠܵܐ ܢܵܘܬܲܪ ܡܸܢܹܗ ܠܨܲܦܪܵܐ. 20 ܘܠܵܐ ܫܲܡܥܘܼܗܝ ܠܡܘܼܫܹܐ: ܘܐܵܘܬܲܪܘ ܡܸܢܹܗ ܓܲܒ݂ܪܹܐ ܠܨܲܦܪܵܐ: ܘܐܲܪܚܸܫܘ ܬܵܘܠܥܹ̈ܐ ܘܲܣܪܝܼ: ܘܲܪܓܸܙ ܥܠܲܝܗܘܿܢ ܡܘܼܫܹܐ. 21 ܘܠܵܩܛܝܼܢ ܗ̄ܘܵܘ ܠܹܗ ܒܨܲܦܪܵܐ: ܒܨܲܦܪܵܐ ܐ̄ܢܵܫ ܡܸܣܲܬ݂ ܡܹܐܟ݂ܠܹܗ: ܘܡܵܐ ܕܚܵܡܵܐ ܗ̄ܘܵܬ݂ ܫܸܡܫܵܐ ܦܵܫܲܪ ܗ̄ܘܵܐ. 22 ܘܲܗܘܵܐ ܒܝܵܘܡܵܐ ܫܬܿܝܼܬ݂ܵܝܵܐ: ܠܩܲܛܘ ܠܲܚܡܵܐ ܚܲܕ݂ ܬܪܹܝܢ: ܬܪܹܝܢ ܟܲܝܠܝܼܢ ܠܚܲܕ݂: ܘܐܸܬ݂ܵܘ ܟܠܗܘܿܢ ܩܲܫܝܼܫܹ̈ܐ ܕܲܟ݂ܢܘܼܫܬܵܐ ܘܚܵܘܝܼܘ ܠܡܘܼܫܹܐ. 23 ܐܵܡܲܪ ܠܗܘܿܢ ܡܘܼܫܹܐ: ܗܵܢܵܘ ܕܐܸܡܲܪ ܡܵܪܝܵܐ: ܫܲܒܿܬ݂ܵܐ ܢܝܵܚܵܐ ܩܘܼܕ݂ܫܵܐ ܠܡܵܪܝܵܐ ܡܚܵܪ: ܡܸܕܸܿܡ ܕܐܵܦܝܼܢ ܐܲܢ̄ܬܿܘܿܢ ܐܲܦܵܘ: ܘܡܸܕܸܡ ܕܲܡܒܲܫܠܝܼܢ ܐܲܢ̄ܬܘܿܢ ܒܲܫܸܠܘ: ܡܸܕܸܡ ܕܝܵܬܲܪ ܛܲܪܘ ܠܟ݂ܘܿܢ ܩܲܪܝܼܪܵܐ ܠܨܲܦܪܵܐ. 24 ܘܲܫܒܲܩܘ ܡܸܢܹܗ ܠܨܲܦܪܵܐ ܐܲܝܟ݂ ܕܲܦܩܲܕ݂ ܐܸܢܘܿܢ ܡܘܼܫܹܐ: ܘܠܵܐ ܣܪܝܼ: ܘܪܲܚܫܵܐ ܠܵܐ ܗܘܵܐ ܒܹܗ. 25 ܐܵܡܲܪ ܠܗܘܿܢ ܡܘܼܫܹܐ: ܐܘܼܟ݂ܠܘܼܗܝ ܝܵܘܡܵܢܵܐ: ܡܸܛܠ ܕܫܲܒܬ݂ܵܐ ܗ̄ܝ ܝܵܘܡܵܢܵܐ ܠܡܵܪܝܵܐ: ܝܵܘܡܵܢܵܐ ܠܵܐ ܡܸܫܟܿܚܝܼܢ ܐܢ̄ܬܿܘܿܢ ܠܹܗ ܒܚܲܩܠܵܐ. 26 ܫܬܵܐ ܝܵܘܡܝܼܢ ܗܘܲܝܬܿܘܿܢ ܠܵܩܛܝܼܢ ܠܹܗ: ܘܝܵܘܡܵܐ ܫܒ݂ܝܼܥܵܝܵܐ ܫܲܒܬ݂ܵܐ ܗ̄ܝܼ : ܠܵܐ ܗܵܘܹܐ ܒܵܗܿ. 27 ܘܲܗܘܵܐ ܒܝܵܘܡܵܐ ܫܒ݂ܝܼܥܵܝܵܐ ܢܦܲܩܘ ܡܼܢ ܥܲܡܵܐ ܠܡܸܠܩܲܛ: ܘܠܵܐ ܐܸܫܟܲܚܘ. 28 ܘܐܸܡܲܪ ܡܵܪܝܵܐ ܠܡܘܼܫܹܐ: ܥܕܲܡܵܐ ܠܐܸܡܲܬ݂ܝ ܠܵܐ ܨܵܒܹܝܢ ܐܢ̄ܬܿܘܿܢ ܠܡܸܛܲܪ ܦܘܼܩܕܵܢܲܝ ܘܢܵܡܘܿܣܲܝ. 29 ܚܙܵܘ ܕܡܵܪܝܵܐ ܝܲܗ̄ܒ݂ ܠܟ݂ܘܿܢ ܫܲܒܬ݂ܵܐ: ܡܸܛܠ ܗܵܢܵܐ ܝܲܗ̄ܒ݂ ܠܟ݂ܘܿܢ ܡܵܪܝܵܐ ܒܝܵܘܡܵܐ ܫܬܿܝܼܬ݂ܵܝܵܐ ܠܲܚܡܵܐ ܕܲܬ݂ܪܹܝܢ ܝܵܘܡܝܼܢ: ܬܸܒ݂ܘ ܐ̄ܢܵܫ ܒܐܲܬ݂ܪܹܗ: ܘܠܵܐ ܢܸܦܘܿܩ ܐ̄ܢܵܫ ܡܼܢ ܬܪܲܥ ܒܲܝܬܹܿܗ ܒܝܵܘܡܵܐ ܫܒ݂ܝܼܥܵܝܵܐ. 30 ܘܐܸܬܿܬܿܢܝܼܚܘ ܥܲܡܵܐ ܒܝܵܘܡܵܐ ܫܒ݂ܝܼܥܵܝܵܐ. 31 ܘܲܩܪܵܘ ܒܢܲܝ ܝܼܣܪܵܝܹܠ ܫܡܹܗ ܡܲܢܢܵܐ: ܘܗܘܼ ܐܲܝܟ݂ ܙܲܪܥܵܐ ܕܟܘܼܣܒܲܪܬܵܐ: ܚܸܘܵܪ: ܘܛܲܥܡܹܗ ܐܲܝܟ݂ ܟܲܟܵܪܝܼܬ݂ܵܐ ܕܕܸܒ݂ܫܵܐ. 32 ܘܐܸܡܲܪ ܡܘܼܫܹܐ: ܗܵܢܵܐ ܦܸܬ݂ܓ݂ܵܡܵܐ ܕܦܲܩܸܕ݂ ܡܵܪܝܵܐ: ܡܠܹܐ ܟܲܝܠܵܐ ܡܸܢܹܗ ܢܸܬ݂ܢܛܲܪ ܠܕ݂ܵܪܲܝܟܿܘܿܢ: ܡܸܛܠ ܕܢܸܚܙܘܿܢ ܠܲܚܡܵܐ ܕܐܵܘܟܸܿܠܬܿܟ݂ܘܿܢ ܒܡܲܕ݂ܒܿܪܵܐ ܟܲܕ݂ ܐܲܦܸܩܬܿܟ݂ܘܿܢ ܡܼܢ ܡܸܨܪܹܝܢ. 33 ܘܐܸܡܲܪ ܡܘܼܫܹܐ ܠܐܲܗܪܘܿܢ: ܣܲܒ݂ ܩܸܣܛܵܐ ܚܕ݂ܵܐ: ܘܐܲܪܡܵܐ ܒܵܗ ܡܠܹܐ ܟܲܝܠܵܐ ܡܲܢܢܵܐ: ܘܣܝܼܡܲܝܗܝ ܩܕ݂ܵܡ ܡܵܪܝܵܐ: ܕܢܸܬ݂ܢܛܲܪ ܠܕ݂ܵܪܲܝܟܿܘܿܢ. 34 ܐܲܝܟܲܢܵܐ ܕܦܲܩܕܲܢܝ ܡܵܪܝܵܐ: ܘܣܵܡܹܗ ܐܲܗܪܘܿܢ ܠܣܵܗܕܿܘܼܬ݂ܵܐ ܕܢܸܬ݂ܢܛܲܪ. 35 ܘܲܒ݂ܢܲܝ ܝܼܣܪܵܝܹܠ ܐܸܟܲܠܘ ܡܲܢܢܵܐ ܐܲܪܒܿܥܝܼܢ ܫܢܝܼܢ: ܥܕܲܡܵܐ ܕܲܡܛܵܘ ܠܐܲܪܥܵܐ ܝܵܬܸܒ݂ܬܵܐ: ܡܲܢܢܵܐ ܐܸܟܲܠܘ: ܥܕܲܡܵܐ ܕܲܡܛܵܘ ܠܣܵܘܦܵܐ ܕܐܲܪܥܵܐ ܕܲܟ݂ܢܲܥܢ. 36 ܘܟܲܝܠܵܐ ܚܲܕ݂ ܡܼܢ ܥܸܣܪܵܐ ܗ̄ܘܵܐ ܠܣܲܐܬ݂ܵܐ.

********

ܩܦܠܐܘܢ : ܝܙ.

1 ܘܲܫܩܲܠܘ ܟܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ ܡܼܢ ܡܲܕ݂ܒܪܵܐ ܕܣܝܼܢ: ܠܡܲܫܩܠܵܢܲܝܗܘܿܢ ܥܲܠ ܡܸܠܲܬ݂ ܦܘܼܡܹܗ ܕܡܵܪܝܵܐ: ܘܲܫܪܵܘ ܒܲܪܦܝܼܕ݂ܝܼܢ: ܘܠܲܝܬܿ ܗ̄ܘܵܘ ܡܲܝܵܐ ܕܢܸܫܬܸܐ ܥܲܡܵܐ. 2 ܘܲܢܨܵܘ ܥܲܡܵܐ ܥܲܡ ܡܘܼܫܹܐ: ܘܐܸܡܲܪܘ ܠܹܗ: ܗܲܒ݂ܠܲܢ ܡܲܝܵܐ ܕܢܸܫܬܸܐ: ܐܸܡܲܪ ܠܗܘܿܢ ܡܘܼܫܹܐ: ܡܵܢܵܐ ܢܵܨܹܝܢ ܐܢ̄ܬܿܘܿܢ ܥܲܡܝ: ܘܡܵܢܵܐ ܡܢܲܣܹܝܢ ܐܢ̄ܬܿܘܿܢ ܠܡܵܪܝܵܐ. 3 ܘܲܨܗܝܼܘ ܬܲܡܵܢ ܥܲܡܵܐ ܠܡܲܝܵܐ: ܘܲܪܛܲܢܘ ܥܲܡܵܐ ܥܲܠ ܡܘܼܫܹܐ ܘܐܸܡܲܪܘ ܠܹܗ: ܠܡܵܢܵܐ ܐܲܣܸܩܬܲܢ ܡܼܢ ܡܸܨܪܹܝܢ: ܠܡܸܩܛܠܲܢ ܠܲܢ ܘܠܲܒ݂ܢܲܝܢ ܘܠܲܒ݂ܥܝܼܪܲܢ ܒܨܲܗܝܵܐ. 4 ܘܨܲܠܝܼ ܡܘܼܫܹܐ ܩܕ݂ܵܡ ܡܵܪܝܵܐ: ܘܐܸܡܲܪ: ܡܵܢܵܐ ܐܸܥܒܸܿܕ݂ ܠܹܗ ܠܥܲܡܵܐ ܗܵܢܵܐ: ܕܥܲܕ݂ ܩܲܠܝܼܠ ܪܵܓܡܝܼܢ ܗ̄ܘܵܘ ܠܝܼ. 5 ܘܐܸܡܲܪ ܡܵܪܝܵܐ ܠܡܘܼܫܹܐ: ܥܒܲܕ݂ ܩܕ݂ܵܡ ܥܲܡܵܐ: ܘܲܕ݂ܒܲܪ ܥܲܡܵܟ݂ ܡܼܢ ܩܲܫܝܼܫܹ̈ܐ ܕܝܼܣܪܵܝܹܠ: ܘܚܘܼܛܪܵܟ݂ ܕܲܡܚܲܝܬ ܒܹܗ ܠܢܲܗܪܵܐ: ܣܲܒ݂ ܒܐܝܼܕ݂ܵܟ݂ ܘܙܸܠ. 6 ܘܗܵܐ: ܐܸܢܵܐ ܩܵܐܹܡ ܐ̄ܢܵܐ ܬܲܡܵܢ ܩܕ݂ܵܡܲܝܟ ܥܲܠ ܛܲܪܵܢܵܐ ܒܚܘܿܪܝܼܒ݂: ܘܬܸܡܚܸܐ ܠܛܲܪܵܢܵܐ: ܘܢܸܦܩܘܿܢ ܡܸܢܹܗ ܡܲܝܵܐ ܘܢܸܫܬܸܐ ܥܲܡܵܐ: ܘܲܥܒܲܕ݂ ܡܘܼܫܹܐ ܗܵܟܲܢܵܐ ܠܥܹܝܢ ܣܵܒܹ̈ܐ ܕܲܒ݂ܢܲܝ ܝܼܣܪܵܝܹܠ. 7 ܘܲܩܪܵܐ ܫܡܹܗ ܕܐܲܬ݂ܪܵܐ ܗܵܘ ܢܲܣܵܐ: ܘܲܡܪܝܼܒ݂ܵܐ: ܥܲܠ ܕܲܢܨܵܘ ܒܢܲܝ ܝܼܣܪܵܝܹܠ: ܘܥܲܠ ܕܢܲܣܝܼܘ ܠܡܵܪܝܵܐ ܘܐܸܡܲܪܘ: ܕܐܸܢ ܐܝܼܬ݂ ܡܵܪܝܵܐ ܒܲܝܢܵܬܲܢ: ܐܵܘ ܠܵܐ. 8 ܘܐܸܬ݂ܵܐ ܥܡܵܠܹܝܩ ܠܡܸܥܒܲܕ݂ ܩܪܵܒ݂ܵܐ ܥܲܡ ܝܼܣܪܵܝܹܠ ܒܲܪܦܝܼܕ݂ܝܼܢ. 9 ܘܐܸܡܲܪ ܡܘܼܫܹܐ ܠܝܼܫܘܿܥ: ܓܒ݂ܝܼ ܠܵܟ݂ ܓܲܒ݂ܪܹ̈ܐ: ܘܦܘܿܩ ܢܸܥܒܸܿܕ݂ ܩܪܵܒ݂ܵܐ ܥܲܡ ܥܡܵܠܹܝܩ ܡܚܵܪ: ܘܐܸܢܵܐ ܗܵܐ ܩܵܐܹܡ ܐ̄ܢܵܐ ܥܲܠ ܪܹܫܵܗܿ ܕܪܵܡܬ݂ܵܐ: ܘܚܘܼܛܪܵܐ ܕܐܲܠܵܗܵܐ ܒܐܝܼܕܲܝ. 10 ܘܲܥܒܲܕ݂ ܝܼܫܘܿܥ ܐܲܝܟ݂ ܕܐܸܡܲܪ ܠܹܗ ܡܘܼܫܹܐ: ܘܐܸܙܲܠ ܠܡܸܥܒܲܕ݂ ܩܪܵܒ݂ܵܐ ܥܲܡ ܥܡܵܠܹܝܩ: ܘܡܘܼܫܹܐ ܘܐܲܗܪܘܿܢ ܘܚܘܿܪ ܣܠܸܩܘ ܠܪܹܫ ܪܵܡܬ݂ܵܐ. 11 ܘܟܲܕ݂ ܡܪܝܼܡ ܗ̄ܘܵܐ ܡܘܼܫܹܐ ܐܝܼܕ݂ܵܘܗܝ: ܬܵܩܹܦ ܗ̄ܘܵܐ ܝܼܣܪܵܝܹܠ: ܘܟܲܕ݂ ܡܢܝܼܚ ܗ̄ܘܵܐ ܐܝܼܕ݂ܵܘܗܝ: ܬܵܩܹܦ ܗ̄ܘܵܐ ܥܡܵܠܹܝܩ. 12 ܘܐܝܼܕ݂ܵܘܗܝ ܕܡܘܼܫܹܐ ܠܐܝܼ: ܘܲܢܣܲܒ݂ܘ ܟܹܐܦܵܐ: ܘܣܵܡܘ ܬܚܘܿܬ݂ܵܘܗܝ: ܘܝܼܬܸܒ݂ ܥܠܹܝܗܿ: ܘܐܲܗܪܘܿܢ ܘܚܘܿܪ ܡܣܲܡܟ݂ܝܼܢ ܗ̄ܘܵܘ ܐܝܼܕ݂ܵܘܗܝ: ܚܲܕ݂ ܡܸܟܵܐ : ܘܚܲܕ݂ ܡܸܟܵܐ: ܘܲܗܘ̤ܝ ܐܝܼܕ݂ܵܘܗܝ ܒܗܲܝܡܵܢܘܼܬ݂ܵܐ: ܥܕܲܡܵܐ ܕܥܸܪܒܲܬ݂ ܫܸܡܫܵܐ. 13 ܘܲܬ݂ܒܲܪ ܝܼܫܘܿܥ ܠܲܥܡܵܠܹܝܩ ܘܲܠܥܲܡܹܗ ܒܦܘܼܡܵܐ ܕܚܲܪܒܵܐ. 14 ܘܐܸܡܲܪ ܡܵܪܝܵܐ ܠܡܘܼܫܹܐ: ܟܬ݂ܘܿܒ݂ ܕܘܼܟ݂ܪܵܢܵܐ ܗܵܢܵܐ ܒܣܸܦܪܵܐ: ܘܣܝܼܡ ܩܕ݂ܵܡ ܝܼܫܘܿܥ ܒܲܪܢܘܿܢ: ܡܸܛܠ ܕܡܸܥܛܵܐ ܥܵܛܹܐ ܐ̄ܢܵܐ ܕܘܼܟ݂ܪܵܢܹܗ ܕܲܥܡܵܠܹܝܩ ܡܼܢ ܬܚܹܝܬ݂ ܫܡܲܝܵܐ. 15 ܘܲܒ݂ܢܵܐ ܡܘܼܫܹܐ ܡܲܕ݂ܒܚܵܐ: ܘܲܩܪܵܐ ܫܡܹܗ ܡܵܪܝܵܐ ܢܲܣܝܼ. 16 ܘܐܸܡܲܪ ܗܵܐ ܐܝܼܕ݂ܵܐ ܥܲܠ ܟܘܼܪܣܝܵܐ: ܩܪܵܒ݂ܵܐ ܠܡܵܪܝܵܐ ܒܲܥܡܵܠܹܝܩ ܡܼܢ ܕܵܪܕܵܪܝܼܢ.

********

ܩܦܠܐܘܢ : ܝܚ.

1 ܘܲܫܡܲܥ ܝܲܬ݂ܪܘܿܢ ܟܘܼܡܪܵܐ ܕܡܸܕ݂ܝܲܢ: ܚܡܘܼܗܝ ܕܡܘܼܫܹܐ: ܟܠ ܡܸܕܸܿܡ ܕܲܥܒܲܕ݂ ܐܲܠܵܗܵܐ ܠܡܘܼܫܹܐ: ܘܠܝܼܣܪܵܝܹܠ ܥܲܡܹܗ ܘܕܲܐܦܸܩ ܡܵܪܝܵܐ ܠܲܒ݂ܢܲܝ ܝܼܣܪܵܝܹܠ ܡܼܢ ܡܸܨܪܹܝܢ. 2 ܘܲܕ݂ܒܲܪ ܝܲܬ݂ܪܘܿܢ ܚܡܘܼܗܝ ܕܡܘܼܫܹܐ ܠܨܸܦܘܿܪܵܐ ܒܲܪܬܹܗ ܐܲܢ̄ܬܿܬܹܗ ܕܡܘܼܫܹܐ: ܡܼܢ ܒܵܬܲܪ ܕܫܲܒ݂ܩܵܗ. 3 ܘܠܲܬ݂ܪܹܝܢ ܒܢܹܝܗ: ܕܲܫܡܹܗ ܕܚܲܕ݂ ܓܸܪܫܘܿܢ: ܡܸܛܠ ܕܐܸܡܲܪ ܕܬ݂ܵܘܬܵܒ݂ܵܐ ܗ̄ܘܹܝܬ݂ ܒܐܲܪܥܵܐ ܢܘܼܟ݂ܪܲܝܬܵܐ. 4 ܘܲܫܡܹܗ ܕܐ̄ܚܪܹܢܵܐ ܐܹܠܝܼܥܵܙܵܪ: ܡܸܛܠ ܕܐܲܠܵܗܵܐ ܕܐܲܒ݂ܵܗܲܝ ܒܥܸܕ݂ܪܝ: ܘܦܲܨܝܲܢܝ ܡܼܢ ܚܲܪܒܹܿܗ ܕܦܸܪܥܘܿܢ. 5 ܘܐܸܬ݂ܵܐ ܝܲܬ݂ܪܘܿܢ ܚܡܘܼܗܝ ܕܡܘܼܫܹܐ: ܘܲܒ݂ܢܵܘܗܝ ܘܐܲܢ̄ܬܿܬܹܗ ܠܘܵܬ݂ ܡܘܼܫܹܐ ܠܡܲܕ݂ܒܪܵܐ: ܕܲܫܪܹܐ ܗ̄ܘܵܐ ܬܲܡܵܢ: ܠܛܘܼܪܵܐ ܕܐܲܠܵܗܵܐ. 6 ܘܐܸܬ݂ܐܡܲܪ ܠܡܘܼܫܹܐ: ܕܗܵܐ ܚܡܘܼܟ݂ ܝܲܬ݂ܪܘܿܢ ܐܸܬ݂ܵܐ ܠܘܵܬ݂ܵܟ݂: ܘܐܲܢ̄ܬܿܬ݂ܵܟ݂ ܘܲܬ݂ܪܲܝܗܘܿܢ ܒܢܲܝܟ ܥܲܡܹܗ. 7 ܘܲܢܦܲܩ ܡܘܼܫܹܐ ܠܐܘܼܪܥܹܗ ܕܲܚܡܘܼܗܝ: ܘܲܣܓܸܿܕ݂ ܠܹܗ ܘܢܲܫܩܹܗ: ܘܲܫܐܲܠܘ ܐ̄ܢܵܫ ܒܲܫܠܵܡܵܐ ܕܚܲܒ݂ܪܹܗ: ܘܥܲܠܘ ܠܡܲܫܟܿܢܵܐ. 8 ܘܐܸܫܬܲܥܝܼ ܡܘܼܫܹܐ ܠܲܚܡܘܼܗܝ ܟܠ ܡܸܕܸܿܡ ܕܲܥܒܲܕ݂ ܡܵܪܝܵܐ ܠܦܸܪܥܘܿܢ ܘܲܠܡܸܨܪܵܝܹܐ: ܥܲܠ ܨܒ݂ܘܼܬ݂ܵܐ ܕܲܒ݂ܢܲܝ ܝܼܣܪܵܝܹܠ ܘܟ݂ܠ ܠܐܹܘܬ݂ܵܐ ܕܲܠܐܝܼܘ ܒܐܘܼܪܚܵܐ: ܘܦܲܨܝܼ ܐܸܢܘܿܢ ܡܵܪܝܵܐ. 9 ܘܲܚܕ݂ܝܼ ܝܲܬ݂ܪܘܿܢ ܥܲܠ ܟܠ ܛܵܒ݂ܵܬ݂ܵܐ ܕܲܥܒܲܕ݂ ܡܵܪܝܵܐ ܠܝܼܣܪܵܝܹܠ: ܘܦܲܨܝܼ ܐܸܢܘܿܢ ܡܼܢ ܐܝܼܕ݂ܵܐ ܕܡܸܨܪܵܝܹܐ: ܘܡܼܢ ܐܝܼܕܹܗ ܕܦܸܪܥܘܿܢ. 10 ܘܐܸܡܲܪ ܝܲܬ݂ܪܘܿܢ: ܒܪܝܼܟ݂ ܗ̄ܘܼ ܡܵܪܝܵܐ ܕܦܲܨܝܼܟ݂ܘܿܢ ܡܼܢ ܐܝܼܕ݂ܵܐ ܕܡܸܨܪܵܝܹܐ: ܘܡܼܢ ܐܝܼܕܹܗ ܕܦܸܪܥܘܿܢ: ܘܦܲܨܝܼ ܠܥܲܡܹܗ ܡܼܢ ܬܚܹܝܬ݂ ܐܝܼܕ݂ܵܐ ܕܡܸܨܪܵܝܹܐ. 11 ܗܵܫܵܐ ܝܸܕ݂ܥܹܬ݂ ܕܪܲܒ ܗ̄ܘܼ ܡܵܪܝܵܐ ܡܼܢ ܟܠܗܘܿܢ ܐܲܠܵܗܹ̈ܐ: ܡܸܛܠ ܬܲܪܥܝܼܬ݂ܵܐ ܕܐܸܬ݂ܪܲܥܝܼܘ ܥܠܲܝܗܘܿܢ. 12 ܘܩܲܪܸܒ݂ ܝܲܬ݂ܪܘܿܢ ܚܡܘܼܗܝ ܕܡܘܼܫܹܐ: ܝܲܩܕܹ̈ܐ ܫܲܠܡܹܐ ܘܕ݂ܒ݂̈ܚܹܐ ܠܡܵܪܝܵܐ: ܘܐܸܬ݂ܵܐ ܐܲܗܪܘܿܢ ܘܟ݂ܠܗܘܿܢ ܣܵܒܹ̈ܐ ܕܲܒ݂ܢܲܝ ܝܼܣܪܵܝܹܠ ܠܡܹܐܟܲܠ ܠܲܚܡܵܐ: ܥܲܡ ܚܡܘܼܗܝ ܕܡܘܼܫܹܐ ܩܕ݂ܵܡ ܐܲܠܵܗܵܐ. 13 ܘܲܗܘܵܐ ܠܒ݂ܵܬܲܪ ܝܵܘܡܵܐ: ܘܝܼܬܸܒ݂ ܡܘܼܫܹܐ ܠܲܡܕ݂ܵܢ ܠܥܲܡܵܐ: ܘܩܵܝܡܝܼܢ ܗ̄ܘܵܘ ܥܲܡܵܐ ܠܥܸܠ ܡܼܢ ܡܘܼܫܹܐ: ܡܼܢ ܨܲܦܪܵܐ ܘܲܥܕܲܡܵܐ ܠܪܲܡܫܵܐ. 14 ܘܲܚܙܵܐ ܚܡܘܼܗܝ ܕܡܘܼܫܹܐ ܟܠ ܡܸܕܸܿܡ ܕܲܥܒܲܕ݂ ܠܥܲܡܵܐ: ܘܐܸܡܲܪ ܠܹܗ: ܡܲܢܘܼ ܦܸܬ݂ܓ݂ܵܡܵܐ ܗܵܢܵܐ ܕܥܵܒܹܕ݂ ܐܲܢ̄ܬ ܠܥܲܡܵܐ: ܠܡܵܢܵܐ ܝܵܬܸܒ݂ ܐܲܢ̄ܬ ܒܲܠܚܘܿܕܲܝܟ: ܘܟ݂ܠܹܗ ܥܲܡܵܐ ܩܵܐܹܡ ܠܥܸܠ ܡܸܢܵܟ݂: ܡܼܢ ܨܲܦܪܵܐ ܘܲܥܕܲܡܵܐ ܠܪܲܡܫܵܐ. 15 ܘܐܸܡܲܪ ܡܘܼܫܹܐ ܠܲܚܡܘܼܗܝ: ܕܐܵܬܹܝܢ ܠܘܵܬ݂ܝ ܥܲܡܵܐ ܠܡܸܫܐܲܠ ܡܸܠܬ݂ܵܐ ܡܼܢ ܐܲܠܵܗܵܐ. 16 ܘܡܵܐ ܕܗܵܘܹܐ ܠܗܘܿܢ ܦܸܬ݂ܓ݂ܵܡܵܐ: ܐܵܬܹܝܢ ܠܘܵܬ݂ܝ: ܘܕ݂ܵܐܹܢ ܐ̄ܢܵܐ ܒܹܝܬ݂ ܓܲܒ݂ܪܵܐ ܠܚܲܒ݂ܪܹܗ: ܘܲܡܚܵܘܹܐ ܐ̄ܢܵܐ ܠܗܘܿܢ ܦܘܼܩܕܵܢܵܘܗܝ ܕܐܲܠܵܗܵܐ ܘܢܵܡܘܿܣܵܘܗܝ. 17 ܘܐܸܡܲܪ ܠܹܗ ܚܡܘܼܗܝ ܠܡܘܼܫܹܐ: ܠܵܐ ܫܲܦܝܼܪ ܥܵܒܹܕ݂ ܐܲܢ̄ܬܿ. 18 ܡܸܨܛܲܥܵܪܘܼ ܡܸܨܛܲܥܲܪ ܐܲܢ̄ܬܿ: ܐܵܦ ܐܲܢ̄ܬܿ ܐܵܦ ܟܠܹܗ ܥܲܡܵܐ ܗܵܢܵܐ ܕܥܲܡܵܟ݂: ܡܸܛܠ ܕܝܲܩܝܼܪ ܗ̄ܘܼ ܡܸܢܵܟ݂ ܦܸܬ݂ܓ݂ܵܡܵܐ: ܘܠܵܐ ܡܸܫܟܲܚ ܐܲܢ̄ܬ ܠܡܸܥܒܿܕܹܗ ܒܲܠܚܘܿܕܲܝܟ. 19 ܗܵܫܵܐ ܫܡܲܥ ܒܩܵܠܝ: ܘܐܸܡܠܟ݂ܵܟ݂: ܘܢܸܗܘܸܐ ܐܲܠܵܗܵܐ ܥܲܡܵܟ݂: ܗܘܝܼ ܐܲܢ̄ܬ ܡܲܠܦܵܢܵܐ ܠܥܲܡܵܐ ܡܼܢ ܐܲܠܵܗܵܐ: ܘܲܗܘܲܝܬ ܡܲܥܸܠ ܦܸܬ݂ܓ݂ܵܡܲܝܗܘܢ ܩܕ݂ܵܡ ܐܲܠܵܗܵܐ. 20 ܘܲܬ݂ܙܲܗܲܪ ܐܸܢܘܿܢ ܕܢܸܛܪܘܼܢ ܦܘܼܩܵܕܵܢܹ̈ܐ ܘܢܵܡܘܿܣܹ̈ܐ: ܘܲܬ݂ܚܵܘܹܐ ܐܸܢܘܿܢ ܐܘܼܪܚܵܐ ܕܢܹܐܙܠ̄ܘܼܢ ܒܵܗ ܘܲܥܒ݂ܵܕܹ̈ܐ ܕܢܸܥܒܿܕ݂ܘܼܢ. 21 ܘܐܲܢ̄ܬ ܬܸܚܙܸܐ ܡܼܢ ܟܠܹܗ ܥܲܡܵܐ ܓܲܒ݂ܪܹ̈ܐ ܕܚܲܝܠܵܐ: ܕܕ݂ܵܚܠܝܼܢ ܡܼܢ ܐܲܠܵܗܵܐ: ܓܲܒ݂ܪ̈ܝܼܢ ܫܲܪܝܼܪܝܼܢ: ܘܣܵܢܹܝܢ ܫܘܼܚܕܵܐ ܘܢܸܟ݂ܠܵܐ: ܘܐܲܩܝܼܡ ܥܠܲܝܗܘܿܢ ܪܹܫܲܝ ܐܠܦܹ̈ܐ: ܘܪܹܫܲܝ ܡܵܐܘܵܬ݂ܵܐ: ܘܪܹܫܲܝ ܚܲܡܫܝܼܢ: ܘܪܹܫܲܝ ܥܸܣܪܵܐ. 22 ܘܢܸܗܘܘܿܢ ܕܵܝܢܝܼܢ ܠܥܲܡܵܐ ܒܟ݂ܠܥܕܵܢ: ܘܟܲܕ݂ ܢܸܗܘܸܐ ܠܗܘܿܢ ܦܸܬ݂ܓ݂ܵܡܵܐ ܪܲܒܵܐ: ܢܹܐܬ݂ܘܿܢ ܠܘܵܬ݂ܵܟ݂: ܘܟ݂ܠ ܦܸܬ݂ܓ݂ܵܡܵܐ ܙܥܘܿܪܵܐ ܗܸܢܘܿܢ ܢܕ݂ܘܼܢܘܼܢ: ܘܐܲܩܸܠ ܡܸܢܵܟ݂: ܘܢܸܫܩܠܘܼܢ ܥܲܡܵܟ݂. 23 ܘܐܸܢ ܦܸܬ݂ܓ݂ܵܡܵܐ ܗܵܢܵܐ ܬܸܥܒܸܿܕ݂: ܡܦܲܩܸܕ݂ ܠܵܟ݂ ܐܲܠܵܗܵܐ: ܘܡܸܫܟܲܚ ܐܲܢ̄ܬ ܠܲܡܩܵܡ: ܘܐܵܦ ܟܠܹܗ ܥܲܡܵܐ ܗܵܢܵܐ: ܐ̄ܢܵܫ ܠܒܲܝܬܹܿܗ ܢܹܐܙܠ̄ܘܼܢ ܒܲܫܠܵܡܵܐ. 24 ܘܲܫܡܲܥ ܡܘܼܫܹܐ ܒܩܵܠܹܗ ܕܲܚܡܘܼܗܝ: ܘܲܥܒܲܕ݂ ܟܠ ܡܸܕܸܿܡ ܕܐܸܡܲܪ ܠܹܗ. 25 ܘܲܓ݂ܒ݂ܵܐ ܡܘܼܫܹܐ ܓܲܒ݂ܪܹ̈ܐ ܕܚܲܝܠܵܐ ܡܼܢ ܟܠܹܗ ܝܼܣܪܵܝܹܠ: ܘܐܲܩܝܼܡ ܐܸܢܘܿܢ ܪܹܫܵܐ ܥܲܠ ܥܲܡܵܐ: ܪܹܫܲܝ ܐܲܠܦܹ̈ܐ: ܘܪܹܫܲܝ ܡܵܐܘܵܬ݂ܵܐ: ܘܪܹܫܲܝ ܚܲܡܫܝܼܢ: ܘܪܹܫܲܝ ܥܸܣܪܵܐ. 26 ܘܕ݂ܵܝܢܝܼܢ ܗ̄ܘܵܘ ܠܥܲܡܵܐ ܒܟ݂ܠܥܕܵܢ: ܘܦܸܬ݂ܓ݂ܵܡܵܐ ܕܲܩܫܹܐ ܡܵܝܬܿܝܼܢ ܗ̄ܘܵܘ ܠܘܵܬ݂ ܡܘܼܫܹܐ: ܘܦܸܬ݂ܓ݂ܵܡܵܐ ܙܥܘܿܪܵܐ ܕܵܝܢܝܼܢ ܗ̄ܘܵܘ ܗܸܢܘܿܢ. 27 ܘܫܲܕܲܪ ܡܘܼܫܹܐ ܠܲܚܡܘܼܗܝ ܘܐܸܙܲܠ ܠܐܲܪܥܹܗ.

********

ܩܦܠܐܘܢ : ܝܛ.

1 ܒܝܲܪܚܵܐ ܬܠܝܼܬ݂ܵܝܵܐ ܒܵܬܲܪ ܡܲܦܩܵܢܵܐ ܕܲܒ݂ܢܲܝ ܝܼܣܪܵܝܹܠ ܡܼܢ ܡܸܨܪܹܝܢ: ܒܹܗ ܒܝܵܘܡܵܐ ܗܵܢܵܐ ܐܸܬ݂ܵܘ ܠܡܲܕ݂ܒܿܪܵܐ ܕܣܝܼܢ. 2 ܘܲܫܩܲܠܘ ܡܼܢ ܪܦܝܼܕ݂ܝܼܢ: ܘܐܸܬ݂ܵܘ ܠܡܲܕ݂ܒܿܪܵܐ ܕܣܝܼܢܲܝ: ܘܲܫܪܵܘ ܒܡܲܕ݂ܒܿܪܵܐ: ܘܲܫܪܵܐ ܬܲܡܵܢ ܝܼܣܪܵܝܹܠ ܠܘܼܩܒܲܠ ܛܘܼܪܵܐ. 3 ܘܡܘܼܫܹܐ ܣܠܸܩ ܠܘܵܬ݂ ܐܲܠܵܗܵܐ: ܘܲܩܪܵܐ ܠܹܗ ܐܲܠܵܗܵܐ ܡܼܢ ܛܘܼܪܵܐ: ܘܐܸܡܲܪ: ܗܵܟܲܢܵܐ ܬܹܐܡܲܪ ܠܲܕ݂ܒܹܝܬ݂ ܝܲܥܩܘܿܒ݂: ܘܲܬ݂ܚܵܘܹܐ ܠܲܒ݂ܢܲܝ ܝܼܣܪܵܝܹܠ. 4 ܐܲܢ̄ܬܿܘܿܢ ܚܙܲܝܬܿܘܿܢ ܡܸܕܸܿܡ ܕܥܸܒ݂ܕܹܬ݂ ܠܡܸܨܪܵܝܹܐ: ܘܲܫܩܲܠܬܿܟ݂ܘܿܢ ܐܲܝܟ݂ ܕܥܲܠ ܓܸܦܲܝ ܢܸܫܪܵܐ: ܘܐܲܝܬܿܝܼܬܿܟ݂ܘܿܢ ܠܘܵܬ݂ܝ. 5 ܘܗܵܫܵܐ ܐܸܢ ܡܸܫܡܲܥ ܬܸܫܡܥܘܿܢ ܒܩܵܠܝ: ܘܬܸܛܪܘܼܢ ܩܝܵܡܝ: ܬܸܗܘܘܿܢ ܚܲܒܿܝܼܒ݂ܝܼܢ ܠܝܼ ܡܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܡܸܛܠ ܕܕ݂ܝܼܠܝ ܗ̄ܝܼ ܐܲܪܥܵܐ. 6 ܘܐܲܢ̄ܬܿܘܢ ܬܸܗܘܘܿܢ ܠܝܼ ܡܲܠܟܿܘܼܬ݂ܵܐ: ܘܟ݂ܵܗܢܹ̈ܐ ܘܥܲܡܵܐ ܩܲܕܿܝܼܫܵܐ: ܗܵܠܹܝܢ ܦܸܬ݂ܓ݂ܵܡܹܐ ܬܹܐܡܲܪ ܠܲܕ݂ܒܹܝܬ݂ ܝܼܣܪܵܝܹܠ. 7 ܘܐܸܬ݂ܵܐ ܡܘܼܫܹܐ ܘܲܩܪܵܐ ܠܩܲܫܝܼܫܹ̈ܐ ܕܥܲܡܵܐ: ܘܐܸܡܲܪ ܩܕ݂ܵܡܲܝܗܘܿܢ ܟܠܗܘܿܢ ܦܸܬ݂ܓ݂ܵܡܹ̈ܐ ܗܵܠܹܝܢ ܕܦܲܩܕܹܗ ܡܵܪܝܵܐ. 8 ܘܲܥܢܵܘ ܟܠܹܗ ܥܲܡܵܐ ܐܲܟ݂ܚ̄ܕ݂ܵܐ: ܘܐܸܡܲܪܘ: ܟܠ ܡܸܕܸܿܡ ܕܐܵܡܲܪ ܡܵܪܝܵܐ ܢܸܥܒܸܿܕ݂: ܘܐܲܗܦܸܟ݂ ܡܘܼܫܹܐ ܦܸܬ݂ܓ݂ܵܡܵܘܗܝ ܕܥܲܡܵܐ ܠܘܵܬ݂ ܡܵܪܝܵܐ. 9 ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܐ ܐܵܬܹܐ ܐ̄ܢܵܐ ܠܘܵܬ݂ܵܟ݂ ܒܥܲܡܛܵܢܵܐ ܕܲܥܢܵܢܵܐ: ܡܸܛܠ ܕܢܸܫܡܥܘܼܢ ܥܲܡܵܐ ܟܲܕ݂ ܡܲܡܠܸܠ ܐ̄ܢܵܐ ܥܲܡܵܟ݂: ܘܐܵܦ ܠܵܟ݂ ܢܗܲܝܡܢܘܼܢ ܠܥܵܠܲܡ: ܘܚܵܘܝܼ ܡܘܼܫܹܐ ܦܸܬ݂ܓ݂ܵܡܵܘܗܝ ܕܥܲܡܵܐ ܩܕ݂ܵܡ ܡܵܪܝܵܐ. 10 ܘܐܸܡܲܪ ܡܵܪܝܵܐ ܠܡܘܼܫܹܐ: ܙܸܠ ܠܘܵܬ݂ ܥܲܡܵܐ: ܘܩܲܕܸܿܫ ܐܸܢܘܿܢ ܝܵܘܡܵܢܵܐ ܘܲܡܚܵܪ: ܘܲܢܚܵܘܪܘܼܢ ܠܒ݂ܘܼܫܲܝܗܘܿܢ. 11 ܘܢܸܗܘܘܿܢ ܡܛܲܝܼܒ݂ܝܼܢ ܠܝܵܘܡܵܐ ܬܠܝܼܬ݂ܵܝܵܐ: ܡܸܛܠ ܕܲܒ݂ܝܵܘܡܵܐ ܬܠܝܼܬ݂ܵܝܵܐ ܢܵܚܹܬ݂ ܡܵܪܝܵܐ ܠܥܹܝܢ ܟܠܹܗ ܥܲܡܵܐ ܠܛܘܼܪܵܐ ܕܣܝܼܢܲܝ. 12 ܘܐܲܪܡܵܐ ܣܵܗܕܿܘܼܬ݂ܵܐ ܒܥܲܡܵܐ ܘܐܸܡܲܪ ܠܗܘܿܢ: ܐܸܙܕܲܗܪܘ ܠܵܐ ܬܸܣܩܘܼܢ ܠܛܘܼܪܵܐ: ܘܠܵܐ ܬܸܬ݂ܩܲܪܒ݂ܘܼܢ ܠܲܫܦܘܿܠܵܘ̈ܗܝ: ܘܟ݂ܠ ܡܿܢ ܕܢܸܩܪܘܿܒ݂ ܠܛܘܼܪܵܐ ܢܸܬ݂ܩܛܸܠ. 13 ܠܵܐ ܬܸܩܪܘܿܒ݂ ܒܹܗ ܐܝܼܕ݂ܵܐ: ܐܸܠܵܐ ܡܸܬ݂ܪܓܵܡܘܼ ܢܸܬ݂ܪܓܸܡ ܘܡܸܫܬܿܕ݂ܵܝܘܼ ܢܸܫܬܿܕܹܐ: ܐܸܢ ܒܥܝܼܪܵܐ ܗ̄ܝܼ ܘܐܸܢ ܒܲܪܢܵܫܵܐ ܠܵܐ ܢܸܚܸܐ: ܘܡܵܐ ܕܫܸܬ݂ܩܲܬ݂ ܩܲܪܢܵܐ: ܫܪܹܐ ܠܟ݂ܘܿܢ ܠܡܸܣܲܩ ܠܛܘܼܪܵܐ. 14 ܘܲܢܚܸܬ݂ ܡܘܼܫܹܐ ܡܼܢ ܛܘܼܪܵܐ ܠܘܵܬ݂ ܥܲܡܵܐ: ܘܩܲܕܸܿܫ ܠܥܲܡܵܐ: ܘܚܵܘܲܪ ܠܒ݂ܘܼܫܲܝܗܘܿܢ. 15 ܘܐܸܡܲܪ ܡܘܼܫܹܐ ܠܥܲܡܵܐ: ܗܘܲܝܬܿܘܿܢ ܡܛܲܝܼܒ݂ܝܼܢ ܠܝܵܘܡܵܐ ܬܠܝܼܬ݂ܵܝܵܐ: ܠܵܐ ܬܸܬ݂ܩܲܪܒ݂ܘܼܢ ܠܐܲܢ̄ܬܿܬ݂ܵܐ. 16 ܘܲܗܘܵܐ ܒܝܵܘܡܵܐ ܬܠܝܼܬ݂ܵܝܵܐ ܟܲܕ݂ ܗܘܵܐ ܫܲܦܪܵܐ: ܗܘܵܘ ܩܵܠܹ̈ܐ ܘܒܲܪ̈ܩܹܐ: ܘܲܥܢܵܢܵܐ ܬܲܩܝܼܦܬܵܐ ܗܘܵܬ݂ ܥܲܠ ܛܘܼܪܵܐ: ܘܩܵܠܵܐ ܕܩܲܪܢܵܐ ܚܲܣܝܼܢ ܗ̄ܘܵܐ ܛܵܒ݂: ܘܙܵܥܘ ܟܠܹܗ ܥܲܡܵܐ ܕܐܝܼܬ݂ ܒܡܲܫܪܝܼܬ݂ܵܐ. 17 ܘܐܲܦܸܩ ܡܘܼܫܹܐ ܠܥܲܡܵܐ ܠܐܘܼܪܥܹܗ ܕܐܲܠܵܗܵܐ ܡܼܢ ܡܲܫܪܝܼܬ݂ܵܐ: ܘܩܵܡܘ ܒܲܫܦܘܿܠܵܘ̈ܗܝ ܕܛܘܼܪܵܐ. 18 ܘܛܘܼܪܵܐ ܕܣܝܼܢܲܝ ܬܵܐܹܢ ܗ̄ܘܵܐ ܟܠܹܗ: ܡܸܛܠ ܕܲܢܚܸܬ݂ ܥܠܵܘܗܝ ܡܵܪܝܵܐ ܒܢܘܼܪܵܐ: ܘܲܣܠܸܩ ܬܸܢܵܢܹܗ ܐܲܝܟ݂ ܬܸܢܵܢܵܐ ܕܐܲܬܘܿܢܵܐ: ܘܙܵܥ ܟܠܹܗ ܛܘܼܪܵܐ ܛܵܒ݂. 19 ܘܲܗܘܵܐ ܩܵܠܵܐ ܕܩܲܪܢܵܐ ܐܵܙܹܠ ܗ̄ܘܵܐ ܘܬ݂ܵܩܹܦ ܛܵܒ݂: ܘܡܘܼܫܹܐ ܡܡܲܠܸܠ ܗ̄ܘܵܐ: ܘܐܲܠܵܗܵܐ ܥܵܢܹܐ ܠܹܗ ܒܩܵܠܵܐ. 20 ܘܲܢܚܸܬ݂ ܡܵܪܝܵܐ ܠܛܘܼܪܵܐ ܕܣܝܼܢܲܝ: ܠܪܹܫܹܗ ܕܛܘܼܪܵܐ: ܘܲܩܪܵܐ ܡܵܪܝܵܐ ܠܡܘܼܫܹܐ ܠܪܹܫܹܗ ܕܛܘܼܪܵܐ: ܘܲܣܠܸܩ ܡܘܼܫܹܐ. 21 ܘܐܸܡܲܪ ܡܵܪܝܵܐ ܠܡܘܼܫܹܐ: ܚܘܿܬ݂ ܣܲܗܸܕ݂ ܒܥܲܡܵܐ ܕܠܵܐ ܢܲܪܚܩܘܼܢ ܩܕ݂ܵܡ ܡܵܪܝܵܐ ܠܡܸܚܙܵܐ: ܘܢܸܦܸܠ ܡܸܢܗܘܿܢ ܣܲܓܿܝܼ. 22 ܘܐܵܦ ܟܵܗܢܹ̈ܐ ܕܩܲܪܝܼܒ݂ܝܼܢ ܠܡܵܪܝܵܐ ܢܸܬ݂ܩܲܕܿܫܘܼܢ: ܕܠܵܐ ܢܸܫܠܲܛ ܒܗܘܿܢ ܡܵܪܝܵܐ. 23 ܘܐܸܡܲܪ ܡܘܼܫܹܐ ܠܡܵܪܝܵܐ: ܠܵܐ ܡܸܫܟܿܚܝܼܢ ܥܲܡܵܐ ܠܡܸܣܲܩ ܠܛܘܼܪܵܐ ܕܣܝܼܢܲܝ: ܡܸܛܠ ܕܐܲܢ̄ܬ ܣܲܗܸܕܬ ܒܲܢ ܘܐܸܡܲܪܬ ܠܝܼ: ܕܬܲܚܸܡܲܝܗܝ ܠܛܘܼܪܵܐ: ܘܩܲܕܸܿܫܲܝܗܝ. 24 ܘܐܸܡܲܪ ܠܹܗ ܡܵܪܝܵܐ: ܙܸܠ ܚܘܿܬ݂: ܘܣܲܩ ܐܲܢ̄ܬ ܘܐܲܗܪܘܿܢ ܐܲܚܘܼܟ݂ ܥܲܡܵܟ݂: ܘܟܵܗܢܹ̈ܐ ܘܥܲܡܵܐ ܠܵܐ ܢܲܪܚܩܘܼܢ ܠܡܸܣܲܩ ܩܕ݂ܵܡ ܡܵܪܝܵܐ: ܕܲܠܡܵܐ ܢܩܲܛܸܠ ܡܸܢܗܘܿܢ. 25 ܘܲܢܚܸܬ݂ ܡܘܼܫܹܐ ܠܘܵܬ݂ ܥܲܡܵܐ: ܘܐܸܡܲܪ ܠܗܘܿܢ.

********

ܩܦܠܐܘܢ : ܟ.

1 ܘܐܸܡܲܪ ܐܲܠܵܗܵܐ ܟܠܗܘܿܢ ܦܸܬ݂ܓ݂ܵܡܹ̈ܐ ܗܵܠܹܝܢ. 2 ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ݂ ܕܐܲܣܸܩܬܵܟ݂ ܡܼܢ ܐܲܪܥܵܐ ܕܸܡܨܪܹܝܢ: ܡܼܢ ܒܹܝܬ݂ ܥܲܒ݂ܕܘܼܬ݂ܵܐ. 3 ܠܵܐ ܢܸܗܘܘܿܢ ܠܵܟ݂ ܐܲܠܵܗܝܼܢ ܐ̄ܚܪܵܢܝܼܢ ܠܒܲܪ ܡܹܢܝ. 4 ܠܵܐ ܬܸܥܒܸܿܕ݂ ܠܵܟ݂ ܟܠ ܨܠܸܡ ܘܟ݂ܠ ܕܡܘܼ: ܕܐܝܼܬ݂ ܒܲܫܡܲܝܵܐ ܠܥܸܠ: ܘܕ݂ܐܝܼܬ݂ ܒܐܲܪܥܵܐ ܡܼܢ ܠܬܲܚܬ: ܘܕ݂ܐܝܼܬ݂ ܒܡܲܝܵܐ ܠܬܲܚܬ ܡܼܢ ܐܲܪܥܵܐ. 5 ܠܵܐ ܬܸܣܓܘܿܕ݂ ܠܗܘܿܢ: ܘܠܵܐ ܬܸܦܠܘܿܚ ܐܸܢܘܿܢ: ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܵܟ݂: ܐܲܠܵܗܵܐ ܛܲܢܵܢܵܐ: ܦܵܪܲܥ ܚܵܘܒܹ̈ܐ ܕܐܲܒ݂ܵܗܹ̈ܐ ܥܲܠ ܒܢܲܝܵܐ: ܥܲܠ ܬܠܵܬ݂ܵܐ ܘܥܲܠ ܐܲܪܒܥܵܐ ܕܵܪܝܼܢ ܠܣܵܢ̈ܐܲܝ. 6 ܘܥܵܒܹܕ݂ ܐ̄ܢܵܐ ܛܲܝܒܿܘܼܬ݂ܵܐ ܠܐܲܠܦܹ̈ܐ ܕܕ݂ܵܪܹ̈ܐ ܠܪܵܚܡܲܝ: ܘܲܠܢܵܛܪܲܝ ܦܘܼܩܕܵܢܲܝ. 7 ܠܵܐ ܬܹܐܡܹܐ ܒܲܫܡܹܗ ܕܡܵܪܝܵܐ ܐܲܠܵܗܵܟ݂ ܒܕܲܓܵܠܘܼܬ݂ܵܐ: ܡܸܛܠ ܕܠܵܐ ܡܙܲܟܹܿܐ ܡܵܪܝܵܐ ܠܡܵܢ ܕܝܵܡܹܐ ܒܲܫܡܹܗ ܒܕܲܓܵܠܘܼܬ݂ܵܐ. 8 ܐܸܬܿܕܲܟ݂ܪ ܝܵܘܡܵܐ ܕܫܲܒܬ݂ܵܐ ܠܲܡܩܲܕܵܫܘܼܬܹܗ. 9 ܫܬܵܐ ܝܵܘܡܝܼܢ ܬܸܦܠܘܿܚ: ܘܬܸܥܒܸܿܕ ܟܠ ܥܒ݂ܵܕ݂ܵܟ݂. 10 ܘܝܵܘܡܵܐ ܫܒ݂ܝܼܥܵܝܵܐ ܫܲܒܬ݂ܵܐ ܠܡܵܪܝܵܐܐܲܠܵܗܵܟ݂: ܠܵܐ ܬܸܥܒܸܿܕ ܒܹܗ ܟܠ ܥܒ݂ܵܕ݂: ܐܲܢ̄ܬ: ܘܲܒ݂ܪܵܟ݂: ܘܒܲܪܬ݂ܵܟ݂: ܘܥܲܒ݂ܕܵܟ݂: ܘܐܲܡܬ݂ܵܟ݂: ܘܲܒ݂ܥܝܼܪܵܟ݂: ܘܬ݂ܵܘܬܵܒ݂ܵܐ ܕܲܒ݂ܩܘܼܪܝܵܟ݂. 11 ܡܸܛܠ ܕܒܸܫܬܵܐ ܝܵܘܡܝܼܢ ܥܒܲܕ݂ ܡܵܪܝܵܐ ܫܡܲܝܵܐ ܘܐܲܪܥܵܐ: ܘܝܲܡܡܹ̈ܐ ܘܟ݂ܠ ܕܐܝܼܬ݂ ܒܗܘܿܢ: ܘܐܸܬܿܬܿܢܝܼܚ ܒܝܵܘܡܵܐ ܫܒ݂ܝܼܥܵܝܵܐ: ܡܸܛܠ ܗܵܢܵܐ ܒܲܪܸܟ݂ ܐܲܠܵܗܵܐ ܠܝܵܘܡܵܐ ܫܒ݂ܝܼܥܵܝܵܐ ܘܩܲܕܿܫܹܗ. 12 ܝܲܩܲܪ ܠܐܲܒ݂ܘܼܟ݂ ܘܠܸܐܡܵܟ݂: ܕܢܸܣܓܿܘܿܢ ܝܵܘܡܲܝܟ ܒܐܲܪܥܵܐ: ܕܡܵܪܝܐ ܐܲܠܵܗܵܟ݂ ܝܵܗܹܒ݂ ܠܵܟ݂. 13 ܠܵܐ ܬܸܩܛܘܿܠ. 14 ܠܵܐ ܬܓ݂ܘܼܪ. 15 ܠܵܐ ܬܸܓ݂ܢܘܿܒ݂. 16 ܠܵܐ ܬܣܲܗܸܕ݂ ܥܲܠ ܚܲܒ݂ܪܵܟ݂ ܣܵܗܕܘܼܬ݂ܵܐ ܕܲܓܵܠܬܵܐ. 17 ܠܵܐ ܬܸܪܲܓ݂ ܒܲܝܬܹܿܗ ܕܚܲܒ݂ܪܵܟ݂: ܠܵܐ ܬܸܪܲܓ݂ ܐܲܢ̄ܬܿܬܹܗ ܕܚܲܒ݂ܪܵܟ݂: ܘܥܲܒ݂ܕܹܿܗ: ܘܐܲܡܬܹܗ: ܘܬ݂ܵܘܪܹܗ: ܘܲܚܡܵܪܹܗ: ܘܟ݂ܠ ܡܸܕܸܿܡ ܕܐܝܼܬ݂ ܠܚܲܒ݂ܪܵܟ݂. 18 ܘܟ݂ܠܹܗ ܥܲܡܵܐ ܚܵܙܹܝܢ ܩܵܠܹ̈ܐ: ܘܠܲܡܦܹܝܕܹ̈ܐ: ܘܩܵܠܵܐ ܕܩܲܪܢܵܐ: ܘܛܘܼܪܵܐ ܕܬ݂ܵܐܹܢ: ܘܲܚܙܵܘ ܥܲܡܵܐ ܘܲܕ݂ܚܸܠܘ: ܘܩܵܡܘ ܡܼܢ ܪܘܼܚܩܵܐ. 19 ܘܐܸܡܲܪܘ ܠܡܘܼܫܹܐ: ܡܲܠܸܠ ܐܲܢ̄ܬ ܥܲܡܲܢ: ܘܢܸܫܡܲܥ، ܘܠܵܐ ܢܡܲܠܸܠ ܥܲܡܲܢ ܐܲܠܵܗܵܐ: ܕܠܵܐ ܢܡܘܼܬ݂. 20 ܘܐܸܡܲܪ ܡܘܼܫܹܐ ܠܥܲܡܵܐ: ܠܵܐ ܬܸܕ݂ܚܠܘܼܢ ܡܸܛܠ ܕܠܲܡܢܲܣܵܝܘܼܬ݂ܟ݂ܘܿܢ ܐܸܬ݂ܵܐ ܐܲܠܵܗܵܐ: ܡܸܛܠ ܕܬܸܗܘܸܐ ܕܸܚܠܬܹܗ ܩܕ݂ܵܡ ܐܲܦܲܝܟܿܘܿܢ: ܘܲܕ݂ܠܵܐ ܬܸܚܛܘܿܢ. 21 ܘܩܵܡܘ ܥܲܡܵܐ ܡܼܢ ܪܘܼܚܩܵܐ: ܘܡܘܼܫܹܐ ܩܪܸܒ݂ ܠܘܵܬ݂ ܥܲܪܦܸܠܵܐ ܕܬܲܡܵܢ ܐܲܠܵܗܵܐ. 22 ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܟܲܢܵܐ ܬܹܐܡܲܪ ܠܲܕ݂ܒܹܝܬ݂ ܝܼܣܪܵܝܹܠ: ܐܲܢ̄ܬܿܘܿܢ ܚܙܲܝܬܿܘܿܢ ܕܡܸܢ ܫܡܲܝܵܐ ܡܲܠܠܹܬ݂ ܥܲܡܟ݂ܘܿܢ. 23 ܠܵܐ ܬܸܥܒܿܕ݂ܘܼܢ ܠܟ݂ܘܿܢ ܥܲܡܝ ܐܲܠܵܗܹ̈ܐ ܕܕܲܗܒ݂ܵܐ: ܘܐܲܠܵܗܹ̈ܐ ܕܣܹܐܡܵܐ ܠܵܐ ܬܸܥܒܿܕ݂ܘܼܢ ܠܟ݂ܘܿܢ. 24 ܡܲܕ݂ܒܚܵܐ ܕܐܲܕ݂ܡܬ݂ܵܐ ܬܸܥܒܸܿܕ݂ ܠܝܼ: ܘܲܬܿܕܲܒܲܚ ܥܠܵܘܗܝ ܥܠܵܘܵܬ݂ܵܟ݂ ܘܩܘܼܪܒܵܢܲܝܟ: ܘܥܵܢܵܟ݂ ܘܬ݂ܵܘܪܲܝܟ: ܒܟ݂ܠ ܐܲܬܲܪ ܕܬܲܕ݂ܟܲܪ ܫܹܡܝ: ܐܹܬܹܐ ܠܘܵܬ݂ܵܟ݂ ܘܐܹܒܲܪܟ݂ܵܟ݂. 25 ܘܐܸܢ ܡܲܕ݂ܒܚܵܐ ܕܟܹܐܦܹ̈ܐ ܠܵܐ ܬܸܥܒܸܿܕ݂ ܠܝܼ: ܠܵܐ ܬܸܒ݂ܢܹܝܘܗܝ ܒܲܦ̮ܣܝܼܠܬܵܐ: ܡܸܛܠ ܕܦܲܪܙܠܵܐ ܐܲܢܝܼܦܬܿ ܥܠܵܘܗܝ ܘܛܵܘܸܫܬܵܗܝ. 26 ܘܠܵܐ ܬܸܣܲܩ ܒܕܲܪ̈ܓܹܐ ܠܡܲܕ݂ܒܲܚܝ: ܕܠܵܐ ܢܸܬ݂ܓܿܠܹܐ ܦܘܼܪܣܵܝܵܟ݂ ܥܠܵܘܗܝ.

********

ܩܦܠܐܘܢ : ܟܐ.

1 ܘܗܵܠܹܝܢ ܕܝܼܢܹ̈ܐ ܕܲܬ݂ܣܝܼܡ ܩܕ݂ܵܡܲܝܗܘܿܢ. 2 ܟܲܕ݂ ܬܸܙܒܲܢ ܥܲܒ݂ܕܵܐ ܝܗ̄ܘܼܕ݂ܵܝܵܐ: ܫܸܬ݂ ܫܢܝܼܢ ܢܸܦܠܚܵܟ݂: ܘܲܒ݂ܕܲܫܒܲܥ ܢܸܦܘܿܩ ܒܲܪ ܚܹܐܪܹ̈ܐ ܡܼܢ ܠܘܵܬ݂ܵܟ݂. 3 ܐܸܢ ܒܲܠܚܘܿܕ݂ܵܘܗܝ ܢܸܥܘܿܠ: ܒܲܠܚܘܿܕ݂ܵܘܗܝ ܢܸܦܘܿܩ: ܘܐܸܢ ܒܥܸܠ ܐܲܢ̄ܬܿܬ݂ܵܐ ܗ̄ܘܼ: ܬܸܦܘܿܩ ܐܲܢ̄ܬܿܬܹܗ ܥܲܡܹܗ. 4 ܘܐܸܢ ܡܵܪܹܗ ܢܸܬܸܠ ܠܹܗ ܐܲܢ̄ܬܿܬ݂ܵܐ: ܘܬܹܐܠܲܕ݂ ܠܹܗ ܒܢܲܝܵܐ ܘܲܒ݂ܢܵܬ݂ܵܐ: ܐܲܢ̄ܬܿܬ݂ܵܐ ܘܲܒ݂ܢܹܝܗ ܬܸܗܘܸܐ ܕܡܵܪܹܗ: ܘܗܘܼ ܢܸܦܘܿܩ ܒܲܠܚܘܿܕ݂ܵܘܗܝ. 5 ܘܐܸܢ ܢܹܐܡܲܪ ܥܲܒ݂ܕܵܐ ܕܪܵܚܹܡ ܐ̄ܢܵܐ ܠܡܵܪܝ ܘܠܲܐܢ̄ܬܲܬ݂ܝ ܘܠܲܒ݂ܢܲܝ: ܠܵܐ ܢܵܦܹܩ ܐ̄ܢܵܐ ܒܲܪ ܚܹܐܪܹ̈ܐ. 6 ܢܩܲܪܒ݂ܝܼܘܗܝ ܡܵܪܹܗ ܠܘܵܬ݂ ܕܲܝܵܢܵܐ: ܘܲܢܩܲܪܒ݂ܝܼܘܗܝ ܠܘܵܬ݂ ܬܲܪܥܵܐ: ܐܵܘ ܠܘܵܬ݂ ܐܸܣܟܿܘܿܦܬ݂ܵܐ: ܘܢܸܩܘܿܒ݂ ܡܵܪܹܗ ܐܸܕ݂ܢܹܗ ܒܡܲܩܒ݂ܵܐ: ܘܢܸܗܘܸܐ ܠܹܗ ܥܒܸܕ݂ ܦܲܠܵܚ ܠܥܵܠܲܡ. 7 ܘܟܲܕ݂ ܢܙܲܒܸܿܢ ܓܲܒ݂ܪܵܐ ܒܲܪܬܹܗ ܠܐܲܡܬ݂ܵܐ: ܠܵܐ ܬܸܦܘܿܩ ܐܲܝܟ݂ ܕܢܵܦܩܝܼܢ ܥܲܒ݂ܕܹ̈ܐ. 8 ܐܸܢ ܣܲܢܝܵܐ ܗ̄ܝܼ ܒܥܲܝܢܲܝ ܡܵܪܵܗ ܕܠܵܐ ܢܸܣܒ݂ܝܼܗ: ܢܸܦܪܩܝܼܗ: ܠܥܲܡ ܢܘܼܟ݂ܪܵܝ ܠܵܐ ܫܠܝܼܛ ܠܹܗ ܠܲܡܙܲܒܵܢܘܼܬ݂ܵܗ: ܡܸܛܠ ܕܕܲܓܸܿܠ ܒܵܗ. 9 ܘܐܸܢ ܠܲܒ݂ܪܹܗ ܢܸܣܒ݂ܝܼܗ: ܐܲܝܟ݂ ܢܵܡܘܿܣܵܐ ܕܡܸܬ݂ܥܒܸܕ݂ ܠܲܒ݂ܢܵܬ݂ܵܐ ܢܸܥܒܸܿܕ݂ ܠܵܗ. 10 ܘܐܸܢ ܐ̄ܚܪܹܬ݂ܵܐ ܢܸܣܲܒ݂ ܠܹܗ: ܬܘܼܪܣܵܝܵܗ ܘܲܠܒ݂ܘܼܫܵܗ ܘܡܲܫܟܿܒ݂ܵܗ ܠܵܐ ܢܒܲܨܲܪ. 11 ܘܐܸܢ ܗܵܠܹܝܢ ܬܠܵܬ݂ ܠܵܐ ܢܸܥܒܸܿܕ݂ ܠܵܗ: ܬܸܦܘܿܩ ܡܲܓܵܢ ܕܠܵܐ ܟܣܸܦ. 12 ܕܢܸܡܚܸܐ ܠܓܲܒ݂ܪܵܐ: ܘܲܢܡܘܼܬ݂: ܡܸܬ݂ܩܛܵܠܘܼ ܢܸܬ݂ܩܛܸܠ. 13 ܘܲܕ݂ܠܵܐ ܟܡܸܢ ܠܹܗ: ܘܐܲܠܵܗܵܐ ܐܲܫܠܡܹܗ ܒܐܝܼܕܹܗ: ܥܒܸܕ݂ ܠܵܟ݂ ܐܲܬ݂ܪܵܐ ܕܢܸܥܪܘܿܩ ܠܬܲܡܵܢ. 14 ܘܐܸܢ ܢܲܡܪܲܚ ܓܲܒ݂ܪܵܐ ܥܲܠ ܒܪܹܗ: ܘܢܸܩܛܠܝܼܘܗܝ ܒܢܸܟ݂ܠܵܐ: ܡܼܢ ܠܘܵܬ݂ ܡܲܕ݂ܒܲܚܝ ܕܒܲܪܲܝܗܝ ܠܡܸܩܛܠܹܗ. 15 ܕܢܸܡܚܸܐ ܠܐܲܒ݂ܘܼܗܝ: ܘܠܸܐܡܹܗ: ܡܸܬ݂ܩܛܵܠܘܼ ܢܸܬ݂ܩܛܸܠ. 16 ܕܢܸܓ݂ܢܘܿܒ݂ ܢܲܦ̮ܫܵܐ ܘܲܢܙܲܒܿܢܝܼܗ: ܘܬܸܫܬܿܟܲܚ ܒܐܝܼܕ݂ܵܘܗܝ: ܡܸܬ݂ܩܛܵܠܘܼ ܢܸܬ݂ܩܛܸܠ. 17 ܕܲܢܨܲܚܸܐ ܠܐܲܒ݂ܘܼܗܝ ܘܠܸܐܡܹܗ: ܡܸܬ݂ܩܛܵܠܘܼ ܢܸܬ݂ܩܛܸܠ. 18 ܘܟܲܕ݂ ܢܸܨܘܿܢ ܬܪܹܝܢ ܓܲܒ݂ܪܝܼܢ: ܘܢܸܡܚܸܐ ܓܲܒ݂ܪܵܐ ܠܚܲܒ݂ܪܹܗ ܒܟܹܐܦܵܐ: ܐܵܘ ܒܲܩܛܝܼܪܵܐ: ܘܠܵܐ ܢܡܘܼܬ݂: ܘܢܸܦܸܠ ܠܡܲܪܥܵܐ. 19 ܐܸܢ ܢܩܘܼܡ: ܘܲܢܗܲܠܸܟ݂ ܒܫܘܼܩܵܐ ܥܲܠ ܚܘܼܛܪܹܗ: ܢܸܙܟܸܿܐ ܡܿܢ ܕܲܡܚܵܝܗܝ: ܒܲܠܚܘܿܕ݂ ܒܸܛܠܵܢܹܗ ܘܐܲܓܲܪ ܐܵܣܝܵܐ ܢܸܬܸܿܠ. 20 ܘܟܲܕ݂ ܢܸܡܚܸܐ ܓܲܒ݂ܪܵܐ ܠܥܲܒ݂ܕܹܿܗ: ܐܵܘ ܠܐܲܡܬܹܗ ܒܚܘܼܛܪܵܐ: ܘܲܢܡܘܼܬ݂ ܬܚܹܝܬ݂ ܐܝܼܕܹܗ: ܡܸܬܿܬܿܕܵܢܘܼ ܢܸܬܿܬܿܕܝܼܢ. 21 ܒܪܲܡ ܕܹܝܢ ܐܸܢ ܚܲܕ݂ ܝܘܿܡ: ܐܵܘ ܬܪܹܝܢ ܝܵܘܡܝܼܢ ܢܸܚܸܐ: ܠܵܐ ܢܸܬܿܬܿܕܝܼܢ: ܡܸܛܠ ܕܟܸܣܦܸܗ ܗ̄ܘܼ. 22 ܘܟܲܕ݂ ܢܸܨܘܿܢ ܬܪܹܝܢ ܓܲܒ݂ܪܝܼܢ: ܘܢܸܡܚܘܿܢ ܐܲܢ̄ܬܿܬ݂ܵܐ ܕܒܲܛܢܵܐ ܘܢܲܦܩܘܼܢ ܥܘܼܠܵܗ: ܘܠܵܐ ܢܸܗܘܸܐ ܩܹܐܪܣܵܐ: ܡܸܬ݂ܚܲܣܵܪܘܼ ܢܸܬ݂ܚܲܣܲܪ: ܐܲܝܟ݂ ܕܪܵܡܹܐ ܥܠܵܘܗܝ ܒܲܥܠܵܗ ܕܐܲܢ̄ܬܿܬ݂ܵܐ: ܘܢܸܬܸܿܠ ܐܲܝܟ݂ ܕܦܵܣܩܝܼܢ ܕܲܝܵܢܹ̈ܐ. 23 ܘܐܸܢ ܩܹܐܪܣܵܐ ܗ̄ܘܼ: ܢܸܬܸܿܠ ܢܲܦ̮ܫܵܐ ܚܠܵܦ ܢܲܦ̮ܫܵܐ. 24 ܥܲܝܢܵܐ ܚܠܵܦ ܥܲܝܢܵܐ: ܫܸܢܵܐ ܚܠܵܦ ܫܸܢܵܐ: ܐܝܼܕ݂ܵܐ ܚܠܵܦ ܐܝܼܕ݂ܵܐ: ܪܸܓ݂ܠܵܐ ܚܠܵܦ ܪܸܓ݂ܠܵܐ. 25 ܟܘܵܝܵܐ ܚܠܵܦ ܟܘܵܝܵܐ: ܨܘܼܠܦܬ݂ܵܐ ܚܠܵܦ ܨܘܼܠܦܬ݂ܵܐ: ܦܲܟܵܐ ܚܠܵܦ ܦܲܟܵܐ. 26 ܘܟܲܕ݂ ܢܸܡܚܸܐ ܓܲܒ݂ܪܵܐ ܠܥܲܝܢܵܐ ܕܥܲܒ݂ܕܹܿܗ: ܐܵܘ ܠܥܲܝܢܵܐ ܕܐܲܡܬܹܗ: ܘܲܢܣܲܪܚܝܼܗܿ: ܒܲܪ ܚܹܐܪܹ̈ܐ ܢܸܫܒܿܩܝܼܘܗܝ ܚܠܵܦ ܥܲܝܢܹܗ. 27 ܘܐܸܢ ܫܸܢܵܐ ܕܥܲܒ݂ܕܹܿܗ: ܐܵܘ ܫܸܢܵܐ ܕܐܲܡܬܹܗ ܢܲܪܡܹܐ: ܒܲܪ ܚܹܐܪܹ̈ܐ ܢܸܫܒܿܩܝܼܘܗܝ ܚܠܵܦ ܫܸܢܹܗ. 28 ܘܟܲܕ݂ ܢܸܕ݂ܩܘܿܪ ܬܵܘܪܵܐ ܠܓܲܒ݂ܪܵܐ: ܐܵܘ ܠܐܲܢ̄ܬܿܬ݂ܵܐ: ܘܲܢܡܘܼܬ݂: ܡܸܬ݂ܪܓܵܡܘܼ ܢܸܬ݂ܪܓܸܡ ܬܵܘܪܵܐ: ܘܠܵܐ ܢܸܬ݂ܐܟܸܠ ܒܸܣܪܹܗ: ܘܡܵܪܹܗ ܕܬ݂ܵܘܪܵܐ ܢܸܗܘܸܐ ܙܲܟܵܝ. 29 ܘܐܸܢ ܬܵܘܪܵܐ ܥܵܓ݂ܘܿܫܵܐ ܗ̄ܘܵܐ ܡܼܢ ܐܸܬ݂ܡܵܠܝ ܘܡܼܢ ܝܵܘܡܵܐ ܕܲܩܕ݂ܵܡܵܘܗܝ: ܘܐܲܣܗܸܕ݂ܘ ܒܡܵܪܹܗ ܘܠܵܐ ܢܲܛܪܹܗ: ܘܢܸܩܛܘܿܠ ܠܓܲܒ݂ܪܵܐ ܐܵܘ ܠܐܲܢ̄ܬܿܬ݂ܵܐ: ܬܵܘܪܵܐ ܢܸܬܪܓܸܡ: ܘܐܵܦ ܡܵܪܹܗ ܢܸܬ݂ܩܛܸܠ. 30 ܘܐܸܢ ܡܵܡܘܿܢܵܐ ܢܲܪܡܘܼܢ ܥܠܵܘܗܝ: ܢܸܬܸܿܠ ܦܘܼܪܩܵܢܵܐ ܕܢܲܦ̮ܫܹܗ: ܟܡܵܐ ܕܫܵܐܠܝܼܢ ܠܹܗ. 31 ܘܐܸܢ ܠܲܒ݂ܪܵܐ: ܐܵܘ ܠܒܲܪܬ݂ܵܐ ܢܸܕ݂ܩܘܿܪ ܬܵܘܪܵܐ: ܐܲܝܟ݂ ܕܝܼܢܵܐ ܗܵܢܵܐ ܢܸܬ݂ܥܒܸܕ݂ ܠܹܗ. 32 ܘܐܸܢ ܠܥܲܒ݂ܕܵܐ ܐܵܘ ܠܐܲܡܬ݂ܵܐ ܢܸܕܩܘܿܪ ܬܵܘܪܵܐ: ܬܠܵܬ݂ܝܼܢ ܐܸܣܬܹܝܪܝܼܢ ܕܟܸܣܦܵܐ ܢܸܬܸܿܠ ܠܡܵܪܹܗ: ܘܬ݂ܵܘܪܵܐ ܢܸܬ݂ܪܓܸܡ. 33 ܘܟܲܕ݂ ܢܲܦ̮ܬܲܚ ܓܲܒ݂ܪܵܐ ܓܘܼܒܵܐ: ܐܵܘ ܢܸܚܦܘܿܪ ܓܲܒ݂ܪܵܐ ܒܹܪܵܐ: ܘܠܵܐ ܢܟܲܣܸܐ ܐܸܢܘܿܢ: ܘܢܸܦܸܠ ܬܲܡܵܢ ܬܵܘܪܵܐ ܐܵܘ ܚܡܵܪܵܐ. 34 ܡܵܪܹܗ ܕܓܘܼܒܵܐ ܢܸܦܪܘܿܥ ܟܸܣܦܵܐ ܠܡܵܪܵܘܗܝ: ܘܡܝܼܬ݂ܵܐ ܢܸܗܘܸܐ ܕܝܼܠܹܗ. 35 ܘܟܲܕ݂ ܢܸܕ݂ܩܘܿܪ ܬܵܘܪܵܐ ܕܓܲܒ݂ܪܵܐ ܠܬ݂ܵܘܪܵܐ ܕܓܲܒ݂ܪܵܐ ܚܲܒ݂ܪܹܗ ܘܲܢܡܘܼܬ݂: ܢܙܲܒܿܢܘܼܢ ܠܬ݂ܵܘܪܵܐ ܚܲܝܵܐ: ܘܢܸܦܠܓ݂ܘܿܢ ܟܸܣܦܹܗ: ܘܐܵܦ ܕܡܝܼܬ݂ܵܐ ܢܦܲܠܓ݂ܘܼܢ. 36 ܘܐܸܢ ܐܸܬ݂ܝܼܕܲܥ ܕܬ݂ܵܘܪܵܐ ܥܵܓ݂ܘܿܫܵܐ ܗ̄ܘܵܐ ܡܼܢ ܐܸܬ݂ܡܵܠܝ ܘܡܼܢ ܡܢܵܬ݂ܡܵܠܝ: ܘܠܵܐ ܢܲܛܪܹܗ ܡܵܪܹܗ: ܢܸܬܸܿܠ ܬܵܘܪܵܐ ܚܠܵܦ ܬܵܘܪܵܐ: ܘܡܝܼܬ݂ܵܐ ܢܸܗܘܸܐ ܕܝܼܠܹܗ.

********

ܩܦܠܐܘܢ : ܟܒ.

1 ܘܟܲܕ݂ ܢܸܓ݂ܢܘܿܒ݂ ܓܲܒ݂ܪܵܐ ܬܵܘܪܵܐ: ܐܵܘ ܢܸܩܝܵܐ: ܘܢܸܟܿܘܿܣ ܐܸܢܘܿܢ: ܐܵܘ ܢܙܲܒܸܿܢ ܐܸܢܘܿܢ: ܚܲܡܫܵܐ ܬܵܘܪܝܼܢ ܢܸܬܸܿܠ ܚܠܵܦ ܬܵܘܪܵܐ: ܘܐܲܪܒܲܥ ܢܩܵܘܵܢ ܢܸܬܸܿܠ ܚܠܵܦ ܢܸܩܝܵܐ. 2 ܘܐܸܢ ܒܦܘܼܠܫܬ݂ܵܐ ܢܸܫܬܿܟܲܚ ܓܲܢܵܒ݂ܵܐ: ܘܢܸܒ݂ܠܲܥ ܕܲܢܡܘܼܬ݂: ܠܲܝܬܿ ܠܹܗ ܥܝܵܪܬܵܐ. 3 ܘܐܸܢ ܕܸܢܚܲܬ݂ ܥܠܵܘܗܝ ܫܸܡܫܵܐ: ܐܝܼܬ݂ ܠܹܗ ܥܝܵܪܬܵܐ: ܘܡܸܦܪܲܥ ܢܸܦܪܘܿܥ: ܘܐܸܢ ܠܲܝܬܿ ܠܹܗ: ܢܸܙܕܲܒܲܢ ܒܲܓ݂ܢܘܼܒ݂ܬܹܗ. 4 ܘܐܸܢ ܡܸܫܬܿܟ݂ܵܚܘܼ ܬܸܫܬܿܟܲܚ ܒܐܝܼܕ݂ܵܘܗܝ ܓܢܘܼܒ݂ܬܵܐ: ܡܼܢ ܬܵܘܪܵܐ: ܘܠܲܚܡܵܪܵܐ: ܘܲܥܕܲܡܵܐ ܠܢܸܩܝܵܐ ܟܲܕ݂ ܚܲܝܝܼܢ: ܚܲܕ݂ ܒܲܬ݂ܪܹܝܢ ܢܫܲܠܸܡ. 5 ܘܟܲܕ݂ ܢܵܘܟܸܿܠ ܓܲܒ݂ܪܵܐ ܚܲܩܠܵܐ ܐܵܘ ܟܲܪܡܵܐ: ܘܲܢܫܲܡܲܪ ܒܥܝܼܪܹܗ ܘܢܵܘܟܸܿܠ ܒܚܲܩܠܵܐ ܐ̄ܚܪܹܬ݂ܵܐ ܡܼܢ ܛܵܒ݂ܵܐ ܕܚܲܩܠܹܗ: ܘܡܼܢ ܛܵܒ݂ܵܐ ܕܟܲܪܡܹܗ ܢܸܦܪܘܿܥ. 6 ܘܟܲܕ ܬܸܦܘܿܩ ܢܘܼܪܵܐ ܘܬܸܫܟܲܚ ܟܘܼܒܹ̈ܐ: ܘܬܹܐܟ݂ܘܿܠ ܓܕ݂ܝܼܫܵܐ: ܐܵܘ ܩܵܝܡܵܬ݂ܵܐ: ܐܵܘ ܚܲܩܠܵܐ: ܡܫܲܠܵܡܘܼ ܢܫܲܠܸܡ ܡܿܢ ܕܐܵܘܩܸܕ݂ ܝܲܩܕܵܢܵܐ. 7 ܘܟܲܕ݂ ܢܸܬܸܿܠ ܓܲܒ݂ܪܵܐ ܠܚܲܒ݂ܪܹܗ ܟܸܣܦܵܐ: ܐܵܘ ܡܵܐܢܹ̈ܐ ܠܡܸܛܲܪ: ܘܢܸܬ݂ܓ݂ܢܸܒ݂ ܡܼܢ ܒܹܝܬ݂ ܓܲܒ݂ܪܵܐ: ܐܸܢ ܢܸܫܬܿܟܲܚ ܓܲܢܵܒ݂ܵܐ: ܢܫܲܠܸܡ ܚܲܕ݂ ܬܪܹܝܢ. 8 ܘܐܸܢ ܠܵܐ ܢܸܫܬܿܟܲܚ ܓܲܢܵܒ݂ܵܐ: ܢܸܩܪܘܿܒ݂ ܡܵܪܹܗ ܕܒܲܝܬܵܐ ܠܘܵܬ݂ ܕܲܝܵܢܹ̈ܐ: ܐܸܢ ܠܵܐ ܐܵܘܫܸܒ݂ ܐܝܼܕܹܗ ܒܲܥܒ݂ܝܼܕܬܵܐ ܕܚܲܒ݂ܪܹܗ. 9 ܥܲܠ ܟܠ ܡܸܕܸܿܡ ܕܲܚܛܵܐ ܥܲܠ ܬܵܘܪܵܐ: ܘܥܲܠ ܚܡܵܪܵܐ: ܘܥܲܠ ܐܸܡܪܵܐ: ܘܥܲܠ ܠܒ݂ܘܼܫܵܐ: ܘܥܲܠ ܟܠ ܐܸܒܲܕܿܬܵܐ: ܕܢܹܐܡܲܪ ܗܵܕܲܐ ܗ̄ܝܼ : ܩܕ݂ܵܡ ܕܲܝܵܢܹ̈ܐ ܢܸܥܠܵܢ ܡܸܠܹܐ ܕܲܬ݂ܪܲܝܗܘܿܢ ܘܲܠܡܵܢ ܕܲܢܚܲܝܼܒ݂ܘܼܢ ܕܲܝܵܢܹ̈ܐ: ܢܫܲܠܸܡ ܚܲܕ݂ ܬܪܹܝܢ ܠܚܲܒ݂ܪܹܗ. 10 ܘܟܲܕ݂ ܢܸܬܸܿܠ ܓܲܒ݂ܪܵܐ ܠܚܲܒ݂ܪܹܗ ܚܡܵܪܵܐ: ܐܵܘ ܬܵܘܪܵܐ: ܐܵܘ ܐܸܡܪܵܐ: ܐܵܘ ܟܠ ܒܥܝܼܪܵܐ: ܠܡܸܛܲܪ: ܘܲܢܡܘܼܬ݂: ܐܵܘ ܢܸܬܿܬܿܒܲܪ: ܐܵܘ ܢܸܫܬܿܒܸܐ: ܘܠܲܝܬ ܐ̄ܢܵܫ ܕܲܚܙܵܐ. 11 ܡܵܘܡܵܬܹܗ ܕܡܵܪܝܵܐ ܬܸܗܘܸܐ ܒܹܝܬ݂ ܬܪܲܝܗܘܿܢ: ܘܐܸܢ ܠܵܐ ܐܵܘܫܸܒ݂ ܐܝܼܕܹܗ ܒܲܥܒ݂ܝܼܕܬܵܐ ܕܚܲܒ݂ܪܹܗ ܘܲܢܩܲܒܸܿܠ ܡܵܪܗܘܿܢ ܡܵܘܡܵܬ݂ܵܐ: ܘܠܵܐ ܢܫܲܠܸܡ. 12 ܘܐܸܢ ܡܸܬ݂ܓܢܵܒ݂ܘܼ ܢܸܬ݂ܓܿܢܸܒ݂ ܡܸܢܹܗ: ܢܫܲܠܸܡ ܠܡܵܪܵܘܗܝ. 13 ܘܐܸܢ ܡܸܬܿܬܿܒ݂ܵܪܘܼ ܢܸܬܿܬܿܒܲܪ: ܘܢܲܝܬܝܹܘܗܝ ܠܣܵܗܕܿܘܼܬ݂ܵܐ: ܕܲܬ݂ܒ݂ܝܼܪܵܐ ܠܵܐ ܢܫܲܠܸܡ. 14 ܘܟܲܕ݂ ܢܸܫܐܲܠ ܓܲܒ݂ܪܵܐ ܡܼܢ ܚܲܒ݂ܪܹܗ ܒܥܝܼܪܵܐ: ܘܲܢܡܘܼܬ݂: ܐܵܘ ܢܸܬܿܬܿܒܲܪ: ܘܡܵܪܹܗ ܠܵܐ ܗ̄ܘܵܐ ܥܲܡܹܗ ܡܫܲܠܵܡܘܼ ܢܫܲܠܸܡ. 15 ܘܐܸܢ ܡܵܪܹܗ ܥܲܡܹܗ: ܠܵܐ ܢܫܲܠܸܡ: ܘܐܸܢ ܐܲܓ݂ܝܼܪܵܐ ܗ̄ܘܼ: ܒܠܲܥ ܒܐܲܓ݂ܪܹܗ. 16 ܘܟܲܕ݂ ܢܫܲܕܸܿܠ ܓܲܒ݂ܪܵܐ ܒܬ݂ܘܼܠܬܵܐ ܕܠܵܐ ܗ̄ܘܵܬ݂ ܡܟ݂ܝܼܪܵܐ: ܘܢܸܕܡܲܟ݂ ܥܲܡܵܗ: ܡܸܣܲܒ݂ ܢܸܣܒ݂ܝܼܗ ܠܹܗ ܐܲܢ̄ܬܿܬ݂ܵܐ. 17 ܘܐܸܢ ܠܵܐ ܨܵܒܹܐ ܐܲܒ݂ܘܼܗ ܕܢܸܬܿܠܝܼܗ ܠܹܗ: ܟܸܣܦܵܐ ܢܸܬ݂ܩܘܿܠ ܐܲܝܟ݂ ܡܲܗܪܵܗ ܕܲܒ݂ܬ݂ܘܼܠܬܵܐ. 18 ܚܲܪܵܫܵܐ ܠܵܐ ܬܲܚܸܐ. 19 ܘܟ݂ܠ ܡܿܢ ܕܢܸܕ݂ܡܲܟ݂ ܥܲܡ ܒܥܝܼܪܵܐ: ܡܸܬ݂ܩܛܵܠܘܼ ܢܸܬ݂ܩܛܸܠ. 20 ܕܲܢܕܲܒܲܚ ܠܕܸܚܠܵܬ݂ܵܐ ܢܹܐܒܲܕ: ܐܸܠܵܐ ܠܡܵܪܝܵܐ ܒܲܠܚܘܿܕ݂ܵܘܗܝ. 21 ܘܲܠܥܵܡܘܿܪܵܐ ܠܵܐ ܬܲܗܪܘܿܢ: ܘܠܵܐ ܬܥܝܼܩܘܿܢ: ܡܸܛܠ ܕܥܵܡܘܿܪܹ̈ܐ ܗܘܲܝܬܿܘܿܢ ܒܐܲܪܥܵܐ ܕܡܸܨܪܹܝܢ. 22 ܘܟ݂ܠ ܐܲܪܡܲܠܬܵܐ ܘܝܵܬ݂ܡܵܐ ܠܵܐ ܬܲܗܪܘܿܢ. 23 ܘܐܸܢ ܡܲܗܪܝܼܢ ܐܢ̄ܬܿܘܿܢ ܠܗܘܿܢ: ܘܲܡܨܲܠܹܝܢ ܩܕ݂ܵܡܲܝ: ܡܸܫܡܲܥ ܐܸܫܡܲܥ ܨܠܘܿܬ݂ܗܘܿܢ. 24 ܘܢܸܬ݂ܩܲܦ ܪܘܼܓ݂ܙܝ: ܘܐܹܩܲܛܸܠܟ݂ܘܿܢ ܒܚܲܪܒܵܐ: ܘܢܸܗܘܝܵܢ ܢܸܫܲܝܟܿܘܿܢ ܐܲܪܡܠܲܢ: ܘܲܒ݂ܢܲܝܟܘܿܢ ܢܸܗܘܘܿܢ ܝܵܬ݂ܡܝܼܢ. 25 ܘܐܸܢ ܟܸܣܦܵܐ ܬܵܘܙܸܦ ܒܥܲܡܝ ܠܡܸܣܟܹܿܢܵܐ ܕܥܲܡܵܟ݂: ܠܵܐ ܬܸܗܘܸܐ ܠܹܗ ܐܲܝܟ݂ ܡܵܪܹܐ ܚܵܘܒܵܐ: ܘܠܵܐ ܬܸܣܲܒ݂ ܡܸܢܹܗ ܪܸܒܿܝܼܬ݂ܵܐ. 26 ܘܐܸܢ ܬܸܣܲܒ݂ ܡܸܫܟܵܢܵܐ ܠܒ݂ܵܫܹܗ ܕܚܲܒ݂ܪܵܟ݂: ܒܡܲܥܪܵܒܲܝ ܫܸܡܫܵܐ ܗܲܒܲܝܗܝ ܠܹܗ. 27 ܡܸܛܠ ܕܗ̤ܘܼܝܘܼ ܠܒ݂ܵܫܹܗ ܒܲܠܚܘܿܕ݂ܵܘܗܝ: ܘܗ̤ܘܝܘܼ ܬܲܟ݂ܣܝܼܬܹܗ ܠܒܸܣܪܹܗ ܒܡܵܢܵܐ ܢܸܕ݂ܡܲܟ݂: ܘܐܸܢ ܢܨܲܠܸܐ ܩܕ݂ܵܡܲܝ: ܐܸܫܡܥܝܼܘܗܝ: ܡܸܛܠ ܕܲܡܪܲܚܡܵܢܵܐ ܐ̄ܢܵܐ. 28 ܠܕܲܝܵܢܵܐ ܠܵܐ ܬܨܲܚܸܐ: ܘܲܠܪܹܫܵܐ ܕܥܲܡܵܟ݂ ܠܵܐ ܬܠܘܼܛ. 29 ܪܹܫ ܥܲܠܠܵܬܹܗ ܕܐܸܕ݂ܪܵܟ݂ ܘܪܹܫ ܡܲܥܨܲܪܬܵܟ݂ ܠܵܐ ܬܫܵܘܚܲܪ: ܒܘܼܟܪܵܐ ܕܲܒ݂ܢܲܝܟ ܬܸܬܸܿܠ ܠܝܼ. 30 ܘܗܵܟܲܢܵܐ ܬܸܥܒܸܿܕ ܠܬ݂ܵܘܪܲܝܟ ܘܲܠܥܵܢܵܟ݂: ܫܲܒ݂ܥܵܐ ܝܵܘܡܝܼܢ ܢܸܗܘܸܐ ܥܲܡ ܐܸܡܹܗ: ܘܲܒ݂ܝܵܘܡܵܐ ܬܡܝܼܢܵܝܵܐ ܬܸܬܿܠܝܼܘܗܝ ܠܝܼ. 31 ܘܐ̄ܢܵܫܝܼܢ ܩܲܕܿܝܼܫܝܼܢ ܬܸܗܘܘܿܢ ܠܝܼ: ܘܒܸܣܪܵܐ ܕܲܢܬ݂ܝܼܫ ܡܼܢ ܚܲܝܘܬ݂ܵܐ ܚܲܝܬ݂ܵܐ ܠܵܐ ܬܹܐܟ݂ܠܘܿܢ: ܠܟܲܠܒܵܐ ܬܹܫܕܿܘܿܢܹܗ.

********

ܩܦܠܐܘܢ : ܟܓ.

1 ܠܵܐ ܬܲܫܲܪ ܫܸܡܥܵܐ ܟܲܕܵܒ݂ܵܐ: ܠܵܐ ܬܵܘܫܸܛ ܐܝܼܕ݂ܵܟ݂ ܥܲܡ ܚܲܝܵܒ݂ܵܐ ܠܡܸܗܘܵܐ ܠܹܗ ܣܵܗܕܵܐ ܟܲܕܵܒ݂ܵܐ. 2 ܠܵܐ ܬܸܗܘܸܐ ܒܵܬܲܪ ܣܲܓܿܝܼܐܹܐ ܠܡܲܒ݂ܐܵܫܘܼ: ܘܠܵܐ ܬܸܥܢܸܐ ܥܲܠ ܕܝܼܢܵܐ ܠܡܸܨܠܵܐ ܒܵܬܲܪ ܣܲܓܿܝܼܐܹܐ ܕܨܵܠܹܝܢ. 3 ܘܲܠܡܸܣܟܹܢܵܐ ܠܵܐ ܬܥܲܕܲܪ ܒܕ݂ܝܼܢܹܗ. 4 ܘܟܲܕ݂ ܬܸܦ̮ܓܲܥ ܒܬ݂ܵܘܪܹܗ ܕܲܒ݂ܥܸܠܕܿܒ݂ܵܒ݂ܵܟ݂ ܐܵܘ ܒܲܚܡܵܪܹܗ ܟܲܕ݂ ܛܥܹܝܢ: ܡܲܗܦܵܟ݂ܘܼ ܐܲܗܦܸܟ݂ ܐܸܢܘܿܢ ܠܹܗ. 5 ܘܟܲܕ݂ ܬܸܚܙܸܐ ܚܡܵܪܹܗ ܕܲܒ݂ܥܸܠܕܿܒ݂ܵܒ݂ܵܟ݂ ܕܲܪܒ݂ܝܼܥ ܬܚܹܝܬ݂ ܛܲܥܢܹܗ: ܘܒ݂ܵܥܹܐ ܐܲܢ̄ܬ ܕܠܵܐ ܬܸܫܩܘܿܠ ܥܲܡܹܗ: ܡܸܫܩܲܠ ܫܩܘܿܠ ܥܲܡܹܗ. 6 ܠܵܐ ܬܸܨܠܸܐ ܕܝܼܢܵܐ ܕܡܸܣܟܹܿܢܵܐ ܒܕ݂ܝܼܢܹܗ. 7 ܘܡܼܢ ܡܸܠܬ݂ܵܐ ܟܲܕܵܒ݂ܬܵܐ ܗܘܲܝܬ ܡܲܪܚܸܩ: ܘܙܲܟܵܝܵܐ ܘܙܲܕܝܼܩܵܐ ܠܵܐ ܬܸܩܛܘܿܠ: ܡܸܛܠ ܕܠܵܐ ܡܙܲܟܸܿܐ ܐ̄ܢܵܐ ܠܚܲܝܵܒ݂ܵܐ. 8 ܫܘܼܚܕܵܐ ܠܵܐ ܬܸܣܲܒ݂: ܡܸܛܠ ܕܫܘܼܚܕܵܐ ܡܥܵܘܲܪ ܥܲܝܢܲܝܗܘܿܢ ܕܚܲܟܿܝܼܡܹ̈ܐ ܒܕ݂ܝܼܢܵܐ: ܘܡܲܗܦܸܟ݂ ܡܸܠܲܝܗܘܿܢ ܕܙܲܟܵܝܹ̈ܐ. 9 ܘܲܠܥܡܵܘܿܪܹ̈ܐ ܠܵܐ ܬܥܝܼܩܘܼܢ: ܐܲܢ̄ܬܿܘܿܢ ܓܹܝܪ ܝܵܕ݂ܥܝܼܬܿܘܿܢ ܢܲܦ̮ܫܵܐ ܕܥܵܡܘܿܪܹ̈ܐ: ܡܸܛܠ ܕܥܵܡܘܿܪܹ̈ܐ ܗܘܲܝܬܿܘܿܢ ܒܐܲܪܥܵܐ ܕܡܸܨܪܹܝܢ. 10 ܫܸܬ݂ ܫܢܝܼܢ ܬܸܙܪܘܿܥ ܐܲܪܥܵܟ݂: ܘܬܸܚܡܘܿܠ ܥܲܠܠܵܬ݂ܵܗ. 11 ܘܒܲܫܒ݂ܝܼܥܲܝܬܵܐ ܬܸܟ݂ܪܒ݂ܝܼܗܿ ܘܬܸܫܒܿܩܝܼܗܿ: ܕܢܹܐܟ݂ܠܘܼܢ ܡܸܣܟܹܿܢܹ̈ܐ ܕܥܲܡܵܟ݂: ܘܫܲܪܟܗܘܿܢ ܬܹܐܟ݂ܘܿܠ ܚܲܝܘܬ݂ܵܐ ܕܕܲܒ݂ܪܵܐ: ܘܗܵܟܲܢܵܐ ܬܸܥܒܸܿܕ ܠܟܲܪܡܲܝܟ ܘܲܠܙܲܝܬܲܝܟ. 12 ܫܬܵܐ ܝܵܘܡܝܼܢ ܬܸܥܒܸܿܕ ܥܒ݂ܵܕ݂ܵܟ݂ ܘܲܒ݂ܝܵܘܡܵܐ ܫܒ݂ܝܼܥܵܝܵܐ ܬܸܬܿܢܝܼܚ: ܡܸܛܠ ܕܢܸܬܿܬܿܢܝܼܚ ܬܵܘܪܵܟ݂ ܘܲܚܡܵܪܵܟ݂: ܘܢܸܬܿܬܿܢܝܼܚ ܒܲܪ ܐܲܡܬ݂ܵܟ݂: ܘܥܲܡܘܿܪܵܐ ܕܲܒ݂ܩܘܼܪܝܵܟ݂. 13 ܘܟ݂ܠ ܡܸܕܸܿܡ ܕܐܸܡܪܹܬ݂ ܠܟ݂ܘܿܢ ܬܸܙܕܲܗܪܘܼܢ: ܘܫܸܡ ܕܸܚܠܵܬ݂ܵܐ ܐ̄ܚܪܵܢܝܵܬ݂ܵܐ ܠܵܐ ܬܸܬܿܕܲܟ݂ܪܘܼܢ: ܘܠܵܐ ܢܸܣܩܵܢ ܥܲܠ ܠܸܒܿܟ݂ܘܿܢ. 14 ܬܠܵܬ݂ ܙܲܒ݂ܢܝܼܢ ܥܒܸܕ݂ܘ ܠܝܼ ܥܲܕ݂ܥܹܕ݂ܵܐ ܒܫܲܢ̄ܬܵܐ. 15 ܥܲܕ݂ܥܹܕ݂ܵܐ ܕܦܲܛܝܼܪܹܐ ܬܸܛܲܪ: ܫܲܒ݂ܥܵܐ ܝܵܘܡܝܼܢ ܦܲܛܝܼܪܵܐ ܬܹܐܟ݂ܘܿܠ ܐܲܝܟ݂ ܕܲܦܩܲܕܬܵܟ݂: ܒܝܲܪܚܵܐ ܕܲܗܲܒܵܒܹܐ: ܡܸܛܠ ܕܒܹܗ ܢܦܲܩܬܘܿܢ ܡܼܢ ܡܸܨܪܹܝܢ: ܘܠܵܐ ܬܸܬ݂ܚܙܘܼܢ ܩܕ݂ܵܡܲܝ ܣܪܝܼܩܵܐܝܼܬ݂. 16 ܘܥܲܕ݂ܥܹܕ݂ܵܐ ܕܲܚܨܵܕܵܐ: ܪܹܫ ܥܒ݂ܘܼܪܟ݂ܘܿܢ ܕܬܸܙܪܥܘܼܢ ܒܚܲܩܠܵܐ: ܘܥܲܕ݂ܥܹܕ݂ܵܐ ܕܲܚܡܵܠܵܐ ܒܡܲܦܩܵܗ ܕܫܲܢ̄ܬܵܐ: ܡܵܐ ܕܟ݂ܵܢܹܫ ܐܲܢ̄ܬ ܥܲܠܠܵܬ݂ܵܟ݂ ܡܼܢ ܚܲܩܠܵܐ. 17 ܬܠܵܬ݂ ܙܲܒ݂ܢܝܼܢ ܒܫܲܢ̄ܬܵܐ ܢܸܬ݂ܚܙܸܐ ܟܠ ܕܘܼܟ݂ܪܵܢܵܟ݂ ܩܕ݂ܵܡ ܡܵܪܝܵܐ ܐܲܠܵܗܵܐ. 18 ܠܵܐ ܬܕܲܒܲܚ ܥܲܠ ܚܲܡܝܼܥܵܐ ܕܡܵܐ ܕܕܸܒ݂ܚܬ݂ܵܐ: ܘܠܵܐ ܢܒ݂ܘܼܬ݂ ܬܲܪܒܵܐ ܕܥܲܕ݂ܥܹܕ݂ܵܐ ܥܕܲܡܵܐ ܠܨܲܦܪܵܐ. 19 ܪܹܫ ܥܲܠܠܵܬ݂ܵܗ ܕܐܲܪܥܵܟ݂ ܬܲܝܬܸܿܐ ܠܒܲܝܬܹܿܗ ܕܡܵܪܝܵܐ ܐܲܠܵܗܵܟ݂: ܠܵܐ ܬܒܲܫܹܠ ܓܲܕ݂ܝܵܐ ܒܚܲܠܒ݂ܵܐ ܕܐܸܡܹܗ. 20 ܗܵܐ ܡܫܲܕܲܪ ܐ̄ܢܵܐ ܡܲܠܲܐܟ݂ܵܐ ܩܕ݂ܵܡܲܝܟ: ܕܲܢܢܲܛܪܵܟ݂ ܒܐܘܼܪܚܵܐ: ܘܲܕܢܲܥܠܵܟ݂ ܠܐܲܪܥܵܐ ܕܬܲܩܸܢܬܿ. 21 ܐܸܙܕܲܗܪ ܡܸܢܹܗ: ܘܲܫܡܲܥ ܒܩܵܠܹܗ: ܠܵܐ ܬܸܬ݂ܚܪܸܐ ܠܩܘܼܒ݂ܠܹܗ: ܕܲܠܡܵܐ ܠܵܐ ܢܸܫܒܿܘܿܩ ܠܚܵܘܒܲܝܟܿܘܿܢ: ܡܸܛܠ ܕܫܹܡܝ ܥܠܵܘܗܝ. 22 ܘܐܸܢ ܡܸܫܡܲܥ ܬܸܫܡܲܥ ܒܩܵܠܹܗ: ܘܬܸܥܒܸܿܕ݂ ܠܵܟ݂ ܟܠ ܡܸܕܸܿܡ ܕܐܵܡܲܪ ܠܵܟ݂: ܐܸܣܢܸܐ ܠܣܵܢܐܲܝܟ: ܘܐܲܥܝܼܩ ܠܲܒ݂ܥܸܠܕܿܒ݂ܵܒܲܝ̈ܟ. 23 ܡܸܛܠ ܕܢܹܐܙܲܠ ܡܲܠܲܐܟ݂ܝ ܩܕ݂ܵܡܲܝܟ: ܘܢܲܥܠܲܟ݂ ܥܲܠ ܐܵܡܘܿܪܵܝܹܐ: ܘܚܹܝܬ݂ܵܝܹܐ: ܘܦܲܪܙܵܝܹܐ: ܘܲܟ݂ܢܲܥܢܵܝܹܐ: ܘܚܵܘܵܝܹܐ: ܘܝܵܒ݂ܘܿܣܵܝܹܐ: ܘܐܸܚܪܘܿܒ݂ ܐܸܢܘܿܢ. 24 ܠܵܐ ܬܸܣܓܿܘܿܕ݂ ܠܐܲܠܵܗܲܝܗܘܿܢ: ܘܠܵܐ ܬܸܦܠܘܿܚ ܐܸܢܘܿܢ: ܘܠܵܐ ܬܸܥܒܸܿܕ݂ ܐܲܝܟ݂ ܥܒ݂ܵܕܲܝܗܘܿܢ: ܐܸܠܵܐ ܡܣܲܚܵܦܘܼ ܣܲܚܸܦ ܐܸܢܘܿܢ: ܘܲܡܬܲܒܵܪܘܼ ܬܲܒܲܪ ܩܵܝܡܵܬ݂ܗܘܿܢ. 25 ܘܬܸܦܠܚܘܼܢ ܠܡܵܪܝܵܐ ܐܲܠܵܗܟ݂ܘܿܢ: ܘܲܢܒܲܪܸܟ݂ ܠܲܚܡܟ݂ܘܿܢ: ܘܡܲܝܟܿܘܿܢ: ܘܢܲܥܒܲܪ ܡܲܚܘܵܬ݂ܵܐ ܡܼܢ ܒܵܬܲܝܟܿܘܿܢ. 26 ܘܠܵܐ ܬܸܗܘܸܐ ܕܲܡܓܲܙܝܵܐ ܘܲܕ݂ܥܲܩܪܵܐ ܒܐܲܪܥܟ݂ܘܿܢ: ܘܡܸܢܝܵܢ ܝܵܘܡܵܬ݂ܟ݂ܘܿܢ ܐܹܫܲܠܸܡ. 27 ܘܕܸܚܠܲܬ݂ܝ ܐܹܫܲܕܲܪ ܩܕ݂ܵܡܲܝܟ: ܘܐܸܚܪܘܿܒ݂ ܠܟ݂ܠ ܥܲܡܡܹ̈ܐ ܕܬܹܐܙܠ̄ܘܼܢ ܥܠܲܝܗܘܿܢ: ܘܐܸܬܸܿܠ ܠܲܒ݂ܥܸܠܕܿܒ݂ܵܒܲܝܟ ܕܢܲܦܢܘܿܢ ܩܕ݂ܵܠܗܘܿܢ ܩܕ݂ܵܡܲܝܟ. 28 ܘܐܹܫܲܕܲܪ ܕܸܒܿܘܿܪܝܵܬ݂ܵܐ ܩܕ݂ܵܡܲܝܟ: ܘܐܸܚܪܘܿܒ݂ ܠܲܟ݂ܢܲܥܢܵܝܹܐ ܘܲܠܚܹܝܬ݂ܵܝܹܐ ܡܼܢ ܩܕ݂ܵܡܲܝܟ. 29 ܠܵܐ ܐܸܚܪܘܿܒ݂ ܐܸܢܘܿܢ ܡܼܢ ܩܕ݂ܵܡܲܝܟ ܒܫܲܢ̄ܬܵܐ ܚܕ݂ܵܐ: ܕܠܵܐ ܬܸܗܘܸܐ ܐܲܪܥܵܐ ܚܲܪܒܵܐ: ܘܬܸܣܓܸܿܐ ܥܠܲܝܟ ܚܲܝܘܲܬ݂ ܒܲܪܵܐ. 30 ܒܩܲܠܝܼܠ ܩܲܠܝܼܠ ܐܸܚܪܘܿܒ݂ ܐܸܢܘܿܢ ܡܼܢ ܩܕ݂ܵܡܲܝܟ: ܥܕܲܡܵܐ ܕܬܸܬ݂ܩܲܦ ܘܬܹܐܪܲܬ݂ ܐܲܪܥܵܐ. 31 ܘܐܸܥܒܸܿܕ݂ ܬܚܘܼܡܵܟ݂ ܡܼܢ ܝܲܡܵܐ ܕܣܘܿܦ ܘܲܥܕܲܡܵܐ ܠܝܲܡܵܐ ܕܲܦܠܸܫܬܵܝܹܐ: ܘܡܼܢ ܡܲܕ݂ܒܪܵܐ ܘܲܥܕܲܡܵܐ ܠܢܲܗܪܵܐ: ܡܸܛܠ ܕܡܲܫܠܸܡ ܐ̄ܢܵܐ ܒܐܝܼܕܲܝܟܿܘܿܢ ܝܵܬ݂ܒܲܝ ܐܲܪܥܵܐ: ܘܬܸܚܪܒ݂ܘܿܢ ܐܸܢܘܿܢ. 32 ܠܵܐ ܬܩܝܼܡ ܠܗܘܿܢ ܘܲܠܕܸܚܠܵܬ݂ܗܘܿܢ ܩܝܵܡܵܐ. 33 ܘܠܵܐ ܢܸܬܿܒ݂ܘܿܢ ܒܐܲܪܥܵܟ݂: ܕܲܠܡܵܐ ܢܲܚܛܘܼܢܵܟ݂ ܩܕ݂ܵܡܲܝ: ܘܠܵܐ ܬܸܦܠܘܿܚ ܠܐܲܠܵܗܲܝܗܘܿܢ: ܕܠܵܐ ܢܸܗܘܘܿܢ ܠܵܟ݂ ܬܘܼܩܠܬ݂ܵܐ.

********

ܩܦܠܐܘܢ : ܟܕ.

1 ܘܲܠܡܘܼܫܹܐ ܐܸܡܲܪ ܡܵܪܝܵܐ: ܣܲܩ ܠܘܵܬ݂ ܡܵܪܝܵܐ: ܐܲܢ̄ܬ ܘܐܲܗܪܘܿܢ: ܘܢܵܕ݂ܵܒ݂ ܘܐܲܒ݂ܝܼܗܘܿ: ܘܫܲܒ݂ܥܝܼܢ ܓܲܒ݂ܪܹ̈ܐ ܡܼܢ ܣܵܒܹ̈ܐ ܕܝܼܣܪܵܝܹܠ: ܘܬܸܣܓܿܕ݂ܘܼܢ ܡܼܢ ܪܘܼܚܩܵܐ. 2 ܘܢܸܩܪܘܿܒ݂ ܡܘܼܫܹܐ ܒܲܠܚܘܿܕ݂ܵܘܗܝ ܩܕ݂ܵܡ ܡܵܪܝܵܐ: ܘܗܸܢܘܿܢ ܠܵܐ ܢܩܲܪܒ݂ܘܼܢ: ܘܥܲܡܵܐ ܠܵܐ ܢܸܣܩܘܼܢ ܥܲܡܹܗ. 3 ܘܐܸܬ݂ܵܐ ܡܘܼܫܹܐ ܘܐܸܫܬܲܥܝܼ ܠܥܲܡܵܐ ܟܠܗܘܿܢ ܦܸܬ݂ܓ݂ܵܡܵܘܗܝ ܕܡܵܪܝܵܐ: ܘܟ݂ܠܗܘܿܢ ܕܝܼܢܹ̈ܐ: ܘܲܩܥܵܐ ܟܠܹܗ ܥܲܡܵܐ ܒܩܵܠܵܐ ܚܲܕ݂: ܘܐܸܡܲܪܘ: ܟܠ ܡܸܕܸܿܡ ܕܐܵܡܲܪ ܡܵܪܝܵܐ ܢܸܥܒܸܿܕ݂. 4 ܘܲܟ݂ܬܲܒ݂ ܡܘܼܫܹܐ ܟܠܗܘܿܢ ܦܸܬ݂ܓ݂ܵܡܵܘܗܝ ܕܡܵܪܝܵܐ: ܘܩܲܕܸܿܡ ܒܨܲܦܪܵܐ: ܘܲܒ݂ܢܵܐ ܡܲܕ݂ܒܚܵܐ ܒܲܫܦܘܿܠܲܝ ܛܘܼܪܵܐ: ܘܬܲܪܬܲܥܸܣܪܹܐ ܩܵܝܡܵܬ݂ܵܐ ܠܲܬ݂ܪܸܥܣܲܪ ܫܲܒ݂ܛܹ̈ܐ ܕܝܼܣܪܵܝܹܠ. 5 ܘܫܲܕܲܪ ܠܲܥܠܲܝܡܹ̈ܐ ܕܲܒ݂ܢܲܝ ܝܼܣܪܵܝܹܠ: ܘܐܲܣܸܩܘ ܝܲܩܕܹ̈ܐ ܫܲܠܡܹ̈ܐ: ܘܕܲܒܲܚܘ ܕܸܒ݂ܚܹ̈ܐ ܫܲܠܡܹ̈ܐ ܬܵܘܪܹ̈ܐ ܠܡܵܪܝܵܐ. 6 ܘܲܢܣܲܒ݂ ܡܘܼܫܹܐ ܦܸܠܓܹܿܗ ܕܲܕ݂ܡܵܐ: ܘܐܲܪܡܝܼ ܒܠܲܩܢܵܐ: ܘܦܸܠܓܹܿܗ ܕܲܕ݂ܡܵܐ ܐܸܫܲܕ݂ ܥܲܠ ܡܲܕ݂ܒܚܵܐ. 7 ܘܲܢܣܲܒ݂ ܣܸܦܪܵܐ ܕܲܩܝܵܡܵܐ: ܘܲܩܪܵܐ ܩܕ݂ܵܡ ܥܲܡܵܐ: ܘܐܸܡܲܪܘ: ܟܠ ܡܸܕܸܿܡ ܕܐܸܡܲܪ ܡܵܪܝܵܐ ܢܸܫܡܲܥ ܘܢܸܥܒܸܿܕ݂. 8 ܘܲܢܣܲܒ݂ ܡܘܼܫܹܐ ܕܡܵܐ: ܘܲܪܙܲܦ ܥܲܠ ܥܲܡܵܐ: ܘܐܸܡܲܪ: ܗܵܢܵܘ ܕܡܵܐ ܕܲܩܝܵܡܵܐ ܕܐܲܩܝܼܡ ܡܵܪܝܵܐ ܥܲܡܟ݂ܘܿܢ: ܥܲܠ ܟܠܗܘܿܢ ܦܸܬ݂ܓ݂ܵܡܹ̈ܐ ܗܵܠܹܝܢ. 9 ܘܲܣܠܸܩܘ ܡܘܼܫܹܐ ܘܐܲܗܪܘܿܢ: ܘܢܵܕ݂ܵܒ݂ ܘܐܲܒ݂ܝܼܗܘܿ: ܘܫܲܒ݂ܥܝܼܢ ܡܼܢ ܣܵܒܹ̈ܐ ܕܝܼܣܪܵܝܹܠ. 10 ܘܲܚܙܵܘ ܠܐܲܠܵܗܵܐ ܕܝܼܣܪܵܝܹܠ: ܘܲܬ݂ܚܹܝܬ݂ ܪܸܓ݂ܠܵܘܗܝ ܐܲܝܟ݂ ܥܒ݂ܵܕ݂ܵܐ ܕܲܠܒܸܬܵܐ ܕܣܲܦܝܼܠܵܐ: ܘܐܲܝܟ݂ ܟܪܘܿܡܵܐ ܕܲܫܡܲܝܵܐ ܒܕܲܟ݂ܝܘܼܬ݂ܵܐ. 11 ܘܥܲܠ ܣܵܒܹ̈ܐ ܕܲܒ݂ܢܲܝ ܝܼܣܪܵܝܹܠ ܠܵܐ ܐܵܘܫܸܒ݂ ܐܝܼܕܹܗ: ܘܲܚܙܵܘ ܠܐܲܠܵܗܵܐ ܘܐܸܟܲܠܘ ܘܐܸܫܬܿܝܼܘ. 12 ܘܐܸܡܲܪ ܡܵܪܝܵܐ ܠܡܘܼܫܹܐ: ܣܲܩ ܠܘܵܬ݂ܝ ܠܛܘܼܪܵܐ: ܘܲܗܘܝܼ ܬܲܡܵܢ: ܘܐܸܬܸܿܠ ܠܵܟ݂ ܠܘܼܚܹ̈ܐ ܕܟܹܐܦܵܐ: ܘܢܵܡܘܿܣܹ̈ܐ ܘܦܘܼܩܕܵܢܹ̈ܐ ܕܟܸܬ݂ܒܹܿܬ݂: ܠܡܲܠܵܦܘܼ ܐܸܢܘܿܢ. 13 ܘܩܵܡ ܡܘܼܫܹܐ: ܘܗܘܿܫܲܥ ܡܫܲܡܫܵܢܹܗ: ܘܲܣܠܸܩ ܡܘܼܫܹܐ ܠܛܘܼܪܹܗ ܕܐܲܠܵܗܵܐ. 14 ܘܲܠܣܵܒܹ̈ܐ ܐܸܡܲܪ: ܟܲܬܲܪܘ ܠܲܢ ܗܵܪܟܵܐ ܥܕܲܡܵܐ ܕܢܸܗܦܘܿܟ݂ ܠܘܵܬ݂ܟ݂ܘܿܢ: ܘܗܵܐ ܐܲܗܪܘܿܢ ܘܚܘܿܪ ܥܲܡܟ݂ܘܿܢ: ܡܿܢ ܕܐܝܼܬ݂ ܠܹܗ ܡܸܠܬ݂ܵܐ: ܢܸܬ݂ܩܲܪܲܒ݂ ܩܕ݂ܵܡܲܝܗܘܿܢ. 15 ܘܲܣܠܸܩ ܡܘܼܫܹܐ ܠܛܘܼܪܵܐ: ܘܟܲܣܝܵܬܹܗ ܥܢܵܢܵܐ. 16 ܘܲܫܪܵܐ ܫܘܼܒ݂ܚܹܗ ܕܡܵܪܝܵܐ ܥܲܠ ܛܘܼܪܵܐ ܕܣܝܼܢܲܝ: ܘܟܲܣܝܵܬܹܗ ܥܢܵܢܵܐ ܫܬܵܐ ܝܵܘܡܝܼܢ: ܘܲܩܪܵܐ ܡܵܪܝܵܐ ܠܡܘܼܫܹܐ ܒܝܵܘܡܵܐ ܫܒ݂ܝܼܥܵܝܵܐ ܡܼܢ ܓܵܘ ܥܢܵܢܵܐ. 17 ܘܲܚܙܵܐ ܫܘܼܒ݂ܚܹܗ ܕܡܵܪܝܵܐ: ܐܲܝܟ݂ ܢܘܼܪܵܐ ܕܝܵܩܕܵܐ ܒܪܹܫܹܗ ܕܛܘܼܪܵܐ: ܠܥܹܝܢ ܟܠܗܘܿܢ ܕܒܹܝܬ݂ ܝܼܣܪܵܝܹܠ. 18 ܘܥܲܠ ܡܘܼܫܹܐ ܒܓ݂ܵܘ ܥܢܵܢܵܐ: ܘܲܣܠܸܩ ܠܛܘܼܪܵܐ: ܘܲܗܘܵܐ ܡܘܼܫܹܐ ܒܛܘܼܪܵܐ ܐܲܪܒܿܥܝܼܢ ܐܝܼܡܵܡܝܼܢ: ܘܐܲܪܒܿܥܝܼܢ ܠܲܝܠܵܘܵܢ.

********

ܩܦܠܐܘܢ : ܟܗ.

1 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ. 2 ܐܸܡܲܪ ܠܲܕ݂ܒܹܝܬ݂ ܝܼܣܪܵܝܹܠ: ܘܢܸܦܪܫܘܼܢ ܠܝܼ ܦܘܼܪܫܵܢܵܐ: ܡܼܢ ܟܠ ܓܲܒ݂ܪܵܐ ܕܐܸܬ݂ܚܲܫܲܒ݂ ܒܠܸܒܹܿܗ ܬܸܣܒ݂ܘܼܢ ܦܘܼܪܫܵܢܵܐ. 3 ܘܗܵܢܵܐ ܦܘܼܪܫܵܢܵܐ ܕܬܸܣܒ݂ܘܼܢ ܡܸܢܗܘܿܢ: ܕܲܗܒ݂ܵܐ: ܘܣܹܐܡܵܐ: ܘܲܢܚܵܫܵܐ. 4 ܘܬܸܟ݂ܠܬ݂ܵܐ: ܘܐܲܪܓܘܵܢܵܐ: ܘܲܙܚܘܿܪܝܼܬ݂ܵܐ: ܘܒ݂ܘܼܨܵܐ: ܘܣܲܥܪܵܐ ܕܥܸܙܹ̈ܐ. 5 ܘܡܸܫܟܵܐ ܕܕ݂ܟ݂ܪܹ̈ܐ ܕܐܸܣܦܲܝܢܝܼܩܵܐ: ܘܡܸܫܟܵܐ ܕܣܵܣܵܓܘܿܢܵܐ: ܘܩܲܝܣܵܐ ܕܐܸܫܟܵܪܥܵܐ. 6 ܘܡܸܫܚܵܐ ܠܡܲܢܗܵܪܘܼ: ܘܒܸܣܡܹ̈ܐ ܠܡܸܫܚܵܐ ܕܲܡܫܝܼܚܘܼܬ݂ܵܐ: ܘܲܠܥܸܛܪܵܐ ܕܒܸܣܡܹ̈ܐ. 7 ܘܟܹܐܦܹ̈ܐ ܕܒܹܪܘܼܠܵܐ: ܘܟܹܐܦܹ̈ܐ ܛܵܒ݂ܵܬ݂ܵܐ: ܠܦܸܕܬ݂ܵܐ ܘܠܲܦܪܝܼܣܵܐ. 8 ܘܢܸܥܒܿܕ݂ܘܼܢ ܠܝܼ ܡܲܩܕܫܵܐ: ܘܐܸܫܪܸܐ ܒܲܝܢܵܬ݂ܗܘܿܢ. 9 ܟܠ ܡܸܕܸܿܡ ܕܲܡܚܵܘܹܐ ܐ̄ܢܵܐ ܠܵܟ݂: ܕܡܘܼܬ݂ܵܐ ܕܡܲܫܟܢܵܐ: ܘܲܕ݂ܟ݂ܠܗܘܿܢ ܡܵܐܢܵܘܗܝ: ܗܵܟܲܢܵܐ ܬܸܥܒܿܕ݂ܘܼܢ. 10 ܘܢܸܥܒܿܕ݂ܘܼܢ ܩܹܒ݂ܘܼܬ݂ܵܐ ܕܩܲܝܣܵܐ ܕܐܸܫܟܵܪܥܵܐ: ܬܲܪܬܹܿܝܢ ܐܲܡܝܼ̈ܢ ܘܲܦܠܸܓ݂ ܐܘܼܪܟܵܗ: ܘܐܲܡܵܐ ܘܲܦܠܸܓ ܦܬ݂ܵܝܵܗ: ܘܐܲܡܵܐ ܘܲܦܠܸܓ݂ ܪܵܘܡܵܗ. 11 ܘܲܩܪܘܿܡܲܝܗ ܕܲܗܒ݂ܵܐ ܕܲܟ݂ܝܵܐ: ܡܼܢ ܠܓ݂ܵܘ ܘܡܼܢ ܠܒܲܪ ܬܸܩܪܡܝܼܗ: ܘܬܸܥܒܸܿܕ݂ ܠܵܗ ܟܠܝܼܠܵܐ ܕܕܲܗܒ݂ܵܐ ܟܲܕ݂ ܚܵܕ݂ܪܵܐ. 12 ܘܬܸܚܫܘܿܠ ܠܵܗ ܐܲܪܒܲܥ ܙܲܩܙܩܲܢ ܕܕܲܗܒ݂ܵܐ: ܘܬܸܬܸܿܠ ܒܐܲܪܒܲܥ ܙܲܘܝܵܬ݂ܵܗ: ܬܲܪܬܹܿܝܢ ܙܲܩܙܩܲܢ ܒܣܸܛܪܵܐ ܚܲܕ݂ : ܘܬܲܪܬܹܿܝܢ ܙܲܩܙܩܲܢ ܥܲܠ ܣܸܛܪܵܐ ܐ̄ܚܪܹܢܵܐ. 13 ܘܬܸܥܒܸܿܕ ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܬܸܩܪܘܿܡ ܐܸܢܘܿܢ ܕܲܗܒ݂ܵܐ. 14 ܘܬܲܥܸܠ ܩܘܼܦܹ̈ܐ ܒܙܲܩܙܩܵܬ݂ܵܐ ܥܲܠ ܣܸܛܪܹܝܗ ܕܩܹܒ݂ܘܼܬ݂ܵܐ: ܕܬܸܫܬܿܩܲܠ ܒܗܘܿܢ ܩܹܒ݂ܘܼܬ݂ܵܐ. 15 ܒܙܲܩܙܩܵܬ݂ܵܐ ܕܩܹܒ݂ܘܼܬ݂ܵܐ ܢܸܗܘܘܿܢ ܩܘܼܦܹ̈ܐ: ܘܠܵܐ ܢܸܥܢܕ݂ܘܼܢ ܡܸܢܗܹܝܢ. 16 ܘܲܬ݂ܣܝܼܡ ܒܩܹܒ݂ܘܼܬ݂ܵܐ ܣܵܗܕܿܘܼܬ݂ܵܐ ܕܐܸܬܸܿܠ ܠܵܟ݂. 17 ܘܲܥܒܸܕ݂ ܚܘܼܣܵܝܵܐ ܕܕܲܗܒ݂ܵܐ ܕܲܟ݂ܝܵܐ: ܬܲܪܬܹܿܝܢ ܐܲܡܝܼܢ ܘܲܦܠܸܓ݂ ܐܘܼܪܟܹܿܗ: ܘܐܲܡܵܐ ܘܲܦܠܸܓ݂ ܦܬ݂ܵܝܹܗ. 18 ܘܲܥܒܸܕ݂ ܬܪܹܝܢ ܟܪܘܼܒܹ̈ܐ ܕܕܲܗܒ݂ܵܐ: ܕܢܸܣܟܬ݂ܵܐ ܥܒܸܕ݂ ܐܸܢܘܿܢ: ܡܼܢ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ. 19 ܘܲܥܒܸܕ ܟܪܘܼܒ݂ܵܐ ܚܼܲܕ ܡܼܢ ܣܸܛܪܹܗ ܡܸܟܵܐ: ܘܲܟ݂ܪܘܼܒ݂ܵܐ ܐ̄ܚܪܹܢܵܐ ܡܼܢ ܣܸܛܪܹܗ ܐ̄ܚܪܹܢܵܐ ܕܚܘܼܣܵܝܵܐ: ܘܬܸܥܒܸܕ ܬܪܹܝܢ ܟܪܘܼܒܹܐ ܥܲܠ ܬܪܹܝܢ ܣܸܛܪܵܘܗܝ. 20 ܘܢܸܗܘܘܿܢ ܟܪܘܼܒܹ̈ܐ ܦܪܝܼܣܝܼܢ ܓܸܦܲܝܗܘܿܢ ܡܼܢ ܠܥܸܠ: ܘܲܡܟܲܣܹܝܢ ܒܟܸܢܦܲܝܗܘܿܢ ܥܲܠ ܚܘܼܣܵܝܵܐ: ܘܐܲܦܲܝܗܘܿܢ ܚܲܕ݂ ܠܘܼܩܒܲܠ ܚܲܕ݂: ܠܥܸܠ ܡܼܢ ܚܘܼܣܵܝܵܐ ܢܸܗܘܝܵܢ ܐܲܦܲܝܗܘܿܢ ܕܲܟ݂ܪܘܼܒܹ̈ܐ. 21 ܘܲܬ݂ܣܝܼܡ ܚܘܼܣܵܝܵܐ ܥܲܠ ܩܹܒ݂ܘܼܬ݂ܵܐ ܡܼܢ ܠܥܸܠ: ܘܲܬ݂ܣܝܼܡ ܒܩܹܒ݂ܘܼܬ݂ܵܐ ܣܵܗܕܘܼܬ݂ܵܐ ܕܐܸܬܸܿܠ ܠܵܟ݂. 22 ܘܐܸܬ݂ܘܲܥܲܕ݂ ܠܵܟ݂ ܬܲܡܵܢ: ܘܐܹܡܲܠܸܠ ܥܲܡܵܟ݂ ܡܼܢ ܠܥܸܠ ܡܼܢ ܚܘܼܣܵܝܵܐ: ܡܼܢ ܒܲܝܢܵܬ݂ ܬܪܹܝܢ ܟܪܘܼܒܹ̈ܐ: ܕܐܝܼܬ݂ ܠܥܸܠ ܡܼܢ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ: ܟܠ ܡܸܕܸܿܡ ܕܲܡܦܲܩܸܕ݂ ܐ̄ܢܵܐ ܠܵܟ݂ ܥܲܠ ܒܢܲܝ ܝܼܣܪܵܝܹܠ. 23 ܘܲܥܒܸܕ݂ ܦܵܬ݂ܘܿܪܵܐ ܕܩܲܝܣܵܐ ܕܐܸܫܟܵܪܥܵܐ: ܬܲܪܬܹܿܝܢ ܐܲܡܝܼܢ ܐܘܼܪܟܹܿܗ: ܘܐܲܡܵܐ ܦܬ݂ܵܝܹܗ: ܘܐܲܡܵܐ ܘܲܦܠܸܓ ܪܵܘܡܹܗ. 24 ܘܲܩܪܘܿܡܲܝܗܝ ܕܲܗܒ݂ܵܐ ܕܲܟ݂ܝܵܐ: ܘܲܥܒܸܕ݂ ܠܹܗ ܟܠܝܼܠܵܐ ܕܕܲܗܒ݂ܵܐ ܟܲܕ݂ ܚܵܕܲܪ. 25 ܘܲܥܒܸܕ݂ ܠܹܗ ܣܸܦܬ݂ܵܐ: ܘܬܸܗܘܸܐ ܪܵܡܵܐ ܦܫܸܟ݂ ܟܲܕ݂ ܚܵܕܲܪ: ܘܲܥܒܸܕ݂ ܠܹܗ ܟܠܝܼܠܵܐ ܕܕܲܗܒ݂ܵܐ ܥܲܠ ܣܸܦܬܹܗ ܟܲܕ݂ ܚܵܕܲܪ. 26 ܘܲܥܒܸܕ ܠܹܗ ܐܲܪܒܲܥ ܙܲܩܙܩܲܢ ܕܕܲܗܒ݂ܵܐ: ܘܬܸܥܒܸܿܕ ܙܲܩܙܩܵܬ݂ܵܐ ܐܲܪܒܲܥ ܕܕܲܗܒ݂ܵܐ: ܥܲܠ ܐܲܪܒܲܥ ܙܵܘܝܵܬܹܗ: ܠܥܸܠ ܡܼܢ ܐܲܪܒܲܥ ܪܸܓ݂ܠܵܘܗܝ. 27 ܠܘܼܩܒܲܠ ܣܸܦܬܹܗ ܢܸܗܘܝܵܢ ܙܲܩܙܩܵܬܹܗ: ܐܲܬ݂ܪܵܐ ܠܩܘܼܦܹ̈ܐ ܠܡܸܫܩܠܹܗ ܠܦܵܬ݂ܘܿܪܵܐ. 28 ܘܲܥܒܸܕ ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܲܩܪܘܿܡ ܐܸܢܘܿܢ ܕܲܗܒ݂ܵܐ: ܕܢܸܗܘܘܿܢ ܫܵܩܠܝܼܢ ܒܗܘܿܢ ܦܵܬ݂ܘܿܪܵܐ. 29 ܘܲܥܒܸܕ ܦܝܼܠܵܣܹ̈ܐ: ܘܟܲܦܹ̈ܐ: ܘܙܵܒ݂ܘܿܪܹ̈ܐ: ܘܲܡܢܹܩܝܵܬ݂ܵܐ ܕܡܸܬ݂ܢܲܩܸܐ ܒܗܹܝܢ: ܕܕܲܗܒ݂ܵܐ ܕܲܟ݂ܝܵܐ ܬܸܥܒܸܕ ܐܸܢܹܝܢ. 30 ܘܲܬ݂ܣܝܼܡ ܥܲܠ ܦܵܬ݂ܘܿܪܵܐ ܠܚܸܡ ܐܲܦܹ̈ܐ ܩܕ݂ܵܡܲܝ ܐܲܡܝܼܢܵܐܝܼܬ݂. 31 ܘܲܥܒܸܕ ܡܢܵܪܬܵܐ ܕܕܲܗܒ݂ܵܐ ܕܲܟ݂ܝܵܐ: ܕܢܸܣܟܿܬ݂ܵܐ ܬܸܥܒܿܕ݂ܝܼܗ ܠܲܡܢܵܪܬܵܐ: ܒܵܣܸܣ ܕܝܼܠܵܗ ܘܲܩܢܹܝܗܿ ܘܐܸܣܩܦܹܝܗܿ: ܘܚܲܙܘܼܪܹܝܗܿ ܘܫܘܼܫܲܢܹܝܗܿ ܡܸܢܵܗܿ ܢܸܗܘܘܿܢ. 32 ܘܸܫܬܵܐ ܩܢܝܼܢ ܕܢܵܦܩܝܼܢ ܡܼܢ ܣܸܛܪܝܹܗ: ܬܠܵܬ݂ܵܐ ܩܢܝܼܢ ܡܼܢ ܣܸܛܪܵܐ ܚܲܕ݂ ܕܲܡܢܵܪܬܵܐ: ܘܲܬ݂ܠܵܬ݂ܵܐ ܩܢܝܼܢ ܡܼܢ ܣܸܛܪܵܗ ܐ̄ܚܪܹܢܵܐ. 33 ܬܠܵܬ݂ܵܐ ܐܸܣܩܦܝܼܢ ܩܒ݂ܝܼܥܝܼܢ ܒܩܲܢܝܵܐ ܚܲܕ݂: ܘܲܚܙܘܼܪܹ̈ܐ ܘܫܘܿܫܲܢܹ̈ܐ: ܘܲܬ݂ܠܵܬ݂ܵܐ ܐܸܣܩܦܝܼܢ ܩܒ݂ܝܼܥܝܼܢ ܒܩܲܢܝܵܐ ܚܲܕ݂: ܘܚܲܙܘܼܪܹ̈ܐ ܘܫܘܿܫܲܢܹ̈ܐ: ܗܵܟܲܢܵܐ ܒܸܫܬܵܐ ܩܢܝܼܢ ܕܢܵܦܩܝܼܢ ܡܸܢܵܗ ܡܼܢ ܡܢܵܪܬܵܐ. 34 ܘܒܲܡܢܵܪܬܵܐ ܢܸܗܘܘܿܢ ܐܲܪܒܥܵܐ ܐܸܣܩܦܝܼܢ: ܘܚܲܙܘܼܪܹ̈ܐ ܘܫܘܿܫܲܢܹ̈ܐ. 35 ܚܲܙܘܼܪܵܐ ܬܚܹܝܬ݂ ܬܪܹܝܢ ܩܢܝܼܢ ܕܡܸܢܵܗ: ܘܚܲܙܘܼܪܵܐ ܬܚܹܝܬ݂ ܬܪܹܝܢ ܩܢܝܼܢ ܕܡܸܢܵܗ: ܘܚܲܙܘܼܪܵܐ ܬܚܹܝܬ݂ ܬܪܹܝܢ ܩܢܝܼܢ ܕܡܸܢܵܗ: ܗܵܟܲܢܵܐ ܒܸܫܬܵܐ ܩܢܝܼܢ ܕܢܵܦܩܝܼܢ ܡܸܢܵܗ ܡܼܢ ܡܢܵܪܬܵܐ. 36 ܘܚܲܙܘܼܪܹܝܗܿ ܘܲܩܢܝܹܗܿ ܡܸܢܵܗ ܢܸܗܘܘܿܢ: ܟܠܵܗ ܕܢܸܣܟܿܬ݂ܵܐ ܚܕ݂ܵܐ ܕܕܲܗܒ݂ܵܐ ܕܲܟ݂ܝܵܐ. 37 ܘܲܥܒܸܕ ܫܪܵܓܹܝܗ ܫܲܒ݂ܥܵܐ: ܘܐܲܢܗܲܪ ܫܪܵܓܹܝܗ: ܕܢܸܗܘܘܿܢ ܡܲܢܗܪܝܼܢ ܠܘܼܩܒܲܠ ܐܲܦܝܹܗܿ. 38 ܘܲܥܒܸܕ ܡܲܠܩܛܹܝܗܿ: ܘܡܲܙܡܟܹܝܗܿ: ܕܕܲܗܒ݂ܵܐ ܕܲܟ݂ܝܵܐ. 39 ܡܼܢ ܟܲܟܿܪܵܐ ܕܕܲܗܒ݂ܵܐ ܕܲܟ݂ܝܵܐ ܬܸܥܒܿܕ݂ܝܼܗܿ: ܠܵܗ ܘܲܠܟ݂ܠܗܘܿܢ ܡܵܐܢܹ̈ܐ ܗܵܠܹܝܢ. 40 ܘܲܚܙܝܼ ܘܲܥܒܸܕ ܒܲܕ݂ܡܘܼܬ݂ܵܐ ܗܵܝ ܕܲܡܚܵܘܸܐ ܐ̄ܢܵܐ ܠܵܟ݂ ܒܛܘܼܪܵܐ.

********

ܩܦܠܐܘܢ : ܟܘ.

1 ܘܲܠܡܲܫܟܢܵܐ ܬܸܥܒܸܕ ܥܣܲܪ ܝܵܪܝܼܥܵܢ ܕܒ݂ܘܼܨܵܐ ܥܙܝܼܠܵܐ: ܘܬܸܟ݂ܠܬ݂ܵܐ ܘܐܲܪܓܿܘܵܢܵܐ ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܟܪܘܼܒ݂ܵܐ ܥܒ݂ܵܕ݂ܵܐ ܕܐܘܼܡܵܢܵܐ ܬܸܥܒܸܕ ܐܸܢܹܝܢ. 2 ܐܘܼܪܟܿܗܵ ܕܝܵܪܝܼܥܬܵܐ ܚܕ݂ܵܐ: ܥܸܣܪܝܼܢ ܘܲܬ݂ܡܵܢܹܐ ܐܲܡܝܼܢ: ܘܲܦܬ݂ܵܝܵܗ ܐܲܪܒܲܥ ܐܲܡܝܼܢ: ܕܝܵܪܝܼܥܬܵܐ ܚܕ݂ܵܐ: ܡܫܘܼܚܬܵܐ ܚܕ݂ܵܐ ܠܟ݂ܠܗܹܝܢ ܝܵܪܝܼܥܵܬ݂ܵܐ. 3 ܚܲܡܸܫ ܝܵܪܝܼܥܵܢ ܢܸܗܘܝܵܢ ܡܕܲܒܿܩܵܢ ܚܕ݂ܵܐ ܒܲܚܕ݂ܵܐ: ܘܚܲܡܸܫ ܝܵܪܝܼܥܵܢ ܢܸܗܘܝܵܢ ܡܕܲܒܿܩܵܢ ܚܕ݂ܵܐ ܒܲܚܕ݂ܵܐ. 4 ܘܲܥܒܸܕ ܬܵܢܐܵܬ݂ܵܐ ܕܬܸܟ݂ܠܬ݂ܵܐ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܚܕ݂ܵܐ ܒܣܸܛܪܵܗ ܕܕܸܒ݂ܩܵܐ: ܘܗܵܟܲܢܵܐ ܬܸܥܒܸܕ ܠܣܸܦܬ݂ܵܗ ܕܝܵܪܝܼܥܬܵܐ ܡܼܢ ܣܸܛܪܵܐ ܕܕܸܒ݂ܩܵܐ ܐ̄ܚܪܹܢܵܐ. 5 ܚܲܡܫܝܼܢ ܬܵܢܵܐܢ ܬܸܥܒܸܕ ܒܣܸܦܬ݂ܵܗ ܕܝܵܪܝܼܥܬܵܐ ܚܕ݂ܵܐ: ܘܚܲܡܫܝܼܢ ܬܵܢܵܐܢ ܬܸܥܒܸܕ ܒܣܸܦܬ݂ܵܗ ܕܝܵܪܝܼܥܬܵܐ ܐ̄ܚܪܹܬ݂ܵܐ ܒܕܸܒ݂ܩܵܐ ܐ̄ܚܪܹܢܵܐ: ܘܢܸܗܘܝܵܢ ܬܪܝܼܨܵܢ ܬܵܢܐܵܬ݂ܵܐ ܚܕ݂ܵܐ ܠܘܼܩܒܲܠ ܚܕ݂ܵܐ. 6 ܘܲܥܒܸܕ ܚܲܡܫܝܼܢ ܩܘܼܪܩܣܝܼܢ ܕܕܲܗܒ݂ܵܐ: ܘܕܲܒܸܿܩ ܝܵܪܝܼܥܬܵܐ ܚܕ݂ܵܐ ܒܲܚܕ݂ܵܐ ܒܩܘܼܪ̈ܩܣܹܐ: ܘܢܸܗܘܸܐ ܡܲܫܟܢܵܐ ܚܼܲܕ. 7 ܘܲܥܒܸܕ ܝܵܪܝܼܥܵܬ݂ܵܐ ܕܣܲܥܪܵܐ ܠܲܦܪܵܣܵܐ ܕܡܲܫܟܢܵܐ: ܚܕܲܥܸܣܪܹ̈ܐ ܝܵܪܝܼܥܵܢ ܬܸܥܒܸܕ ܐܸܢܹܝܢ. 8 ܐܘܼܪܟܵܗ ܕܝܵܪܝܼܥܬܵܐ ܚܕ݂ܵܐ ܡܸܢܗܹܝܢ ܬܠܵܬ݂ܝܼܢ ܐܲܡܝܼܢ: ܘܲܦܬ݂ܵܝܵܗ ܐܲܪܒܲܥ ܐܲܡܝܼܢ ܕܝܵܪܝܼܥܬܵܐ ܚܕ݂ܵܐ: ܡܫܘܼܚܬܵܐ ܚܕ݂ܵܐ ܠܟ݂ܠܗܹܝܢ ܝܵܪܝܼܥܵܬ݂ܵܐ ܗܵܠܹܝܢ ܚܕܲܥܸܣܪܹ̈ܐ. 9 ܘܕܲܒܸܿܩ ܚܲܡܸܫ ܝܵܪܝܼܥܵܢ ܐܲܟ݂ܚ̄ܕ݂ܵܐ: ܘܫܸܬ݂ ܝܵܪܝܼܥܵܢ ܐܲܟ݂ܚ̄ܕ݂ܵܐ: ܘܐܲܥܸܦ ܝܵܪܝܼܥܬܵܐ ܫܬܿܝܼܬܲܝܬܵܐ ܠܘܼܩܒܲܠ ܐܲܦܲܝ ܡܲܫܟܢܵܐ. 10 ܘܲܥܒܸܕ ܚܲܡܫܝܼܢ ܬܵܢܵܐܢ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܚܕ݂ܵܐ: ܡܼܢ ܣܸܛܪܵܗ ܕܕܸܒ݂ܩܵܐ: ܘܚܲܡܫܝܼܢ ܬܵܢܵܐܢ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܐ̄ܚܪܹܬܵܐ ܒܕܸܒ݂ܩܵܐ ܐ̄ܚܪܹܢܵܐ. 11 ܘܲܥܒܸܕ ܩܘܼܪ̈ܩܣܹܐ ܕܲܢܚܵܫܵܐ ܚܲܡܫܝܼܢ: ܘܐܲܥܸܠ ܩܘܼܪ̈ܩܣܹܐ ܒܬܵܢܐܵܬ݂ܵܐ ܘܕܲܒܸܩܲܝܗܝ ܠܡܲܫܟܢܵܐ: ܘܢܸܗܘܸܐ ܚܲܕ݂. 12 ܘܡܸܕܸܿܡ ܕܝܵܬܲܪ ܡܼܢ ܝܵܪ̈ܝܼܥܵܬ݂ܵܐ ܕܡܲܫܟܢܵܐ: ܦܸܠܓܵܗܿ ܕܝܵܪܝܼܥܬܵܐ ܕܝܵܬ݂ܵܪ: ܬܲܪܡܸܐ ܠܒܸܣܬܿܪܹܗ ܕܡܲܫܟܢܵܐ. 13 ܘܐܲܡܬ݂ܵܐ ܡܼܢ ܚܲܕ݂ ܓܲܒܵܐ: ܘܐܲܡܬ݂ܵܐ ܡܼܢ ܓܲܒܵܐ ܐ̄ܚܪܹܢܵܐ: ܕܝܵܬ݂ܵܪ ܒܐܘܼܪܟܵܐ ܕܝܵܪܝܼܥܬܵܐ ܕܡܲܫܟܢܵܐ: ܢܸܗܘܸܐ ܪܡܹܐ ܥܲܠ ܣܸܛܪܵܘܗܝ ܕܡܲܫܟܢܵܐ: ܡܼܢ ܗܵܢܵܐ ܓܲܒܵܐ ܘܡܼܢ ܗܵܢܵܐ ܓܲܒܵܐ ܠܲܡܟܲܣܵܝܘܼܬܹܗ. 14 ܘܲܥܒܸܕ ܦܪܵܣܵܐ ܠܡܲܫܟܢܵܐ ܡܸܫܟܵܐ ܕܕܸܟ݂ܪܹ̈ܐ ܕܐܸܣܦܲܝܢܝܼܩܵܐ: ܘܡܸܫܟܵܐ ܕܕܸܟ݂ܪܹ̈ܐ ܕܣܵܣܵܓܿܘܿܢܵܐ: ܡܼܢ ܠܥܸܠ. 15 ܘܲܥܒܸܕ ܕܲܦܹ̈ܐ ܠܡܲܫܟܢܵܐ ܕܩܲܝܣܵܐ ܕܐܸܫܟܵܪܥܵܐ ܩܵܝܡܹ̈ܐ. 16 ܥܣܲܪ ܐܲܡܝܼܢ ܐܘܼܪܟܹܗ ܕܕܲܦܵܐ ܚܲܕ݂: ܘܐܲܡܵܐ ܘܲܦܠܸܓ ܦܬ݂ܵܝܹܗ ܕܕܲܦܵܐ ܚܲܕ݂. 17 ܘܬܲܪܬܹܿܝܢ ܨܵܝܪܵܬ݂ܵܐ ܠܕܲܦܵܐ ܚܲܕ݂: ܬܪܝܼܨܵܢ ܠܘܼܩܒܲܠ ܚܕ݂ܵܐ: ܗܵܟܲܢܵܐ ܬܸܥܒܸܕ ܠܟ݂ܠܗܘܿܢ ܕܲܦܵܘܗܝ ܕܡܲܫܟܢܵܐ. 18 ܘܲܥܒܸܕ ܕܲܦܵܐ ܠܡܲܫܟܢܵܐ: ܥܸܣܪܝܼܢ ܕܲܦܝܼܢ ܠܣܸܛܪܵܐ ܕܪܘܼܚܵܐ ܕܬܲܝܡܢܵܐ. 19 ܘܐܲܪܒܿܥܝܼܢ ܣܵܡܟܹ̈ܐ ܕܣܹܐܡܵܐ ܬܸܥܒܸܕ ܬܚܹܝܬ݂ ܥܸܣܪܝܼܢ ܕܲܦܝܼܢ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂ ܠܬܲܪܬܹܿܝܢ ܨܵܝܪܵܬܹܗ: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ ܠܬܲܪܬܹܿܝܢ ܨܵܝܪܵܬܹܗ. 20 ܘܲܠܣܸܛܪܵܐ ܐ̄ܚܪܹܢܵܐ ܕܡܲܫܟܢܵܐ ܡܼܢ ܪܘܼܚܵܐ ܕܓܲܪܒܿܝܵܐ ܥܸܣܪܝܼܢ ܕܲܦܝܼܢ. 21 ܘܐܲܪܒܿܥܝܼܢ ܣܵܡܟ݂ܝܼܢ ܕܣܹܐܡܵܐ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ. 22 ܡܼܢ ܫܦܘܿܠܵܘܗܝ ܕܡܲܫܟܢܵܐ ܡܼܢ ܡܲܥܪܒ݂ܵܐ ܥܒܸܕ ܫܬܵܐ ܕܲܦܝܼܢ. 23 ܘܲܬ݂ܪܹܝܢ ܕܲܦܝܼܢ ܬܸܥܒܸܕ ܠܙܵܘܝܵܬ݂ܵܐ ܕܡܲܫܟܢܵܐ ܡܼܢ ܫܦܘܿܠܲܝܗܘܿܢ. 24 ܘܢܸܗܘܘܿܢ ܫܘܹܝܢ ܡܼܢ ܠܬܲܚܬ: ܘܐܲܟ݂ܚ̄ܕ݂ܵܐ ܢܸܗܘܘܿܢ ܓܵܦܝܼܢ ܡܼܢ ܪܹܫܵܗ ܥܲܠ ܙܲܩܙܲܩܬ݂ܵܐ ܚܕ݂ܵܐ: ܗܵܟܲܢܵܐ ܠܲܬܪܲܝܗܘܿܢ ܣܵܡܟܹ̈ܐ: ܠܬܲܪܬܹܿܝܢ ܙܵܘܝܵܬ݂ܵܐ ܢܸܗܘܘܿܢ. 25 ܘܢܸܗܘܘܿܢ ܬܡܵܢܝܵܐ ܕܲܦܝܼܢ: ܘܣܵܡܟܲܝܗܘܿܢ ܕܣܹܐܡܵܐ ܫܸܬܿܬܲܥܣܲܪ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ. 26 ܘܲܥܒܸܕ ܡܘܼܟ݂ܠܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܚܲܡܫܵܐ ܠܕܲܦܵܐ ܕܣܸܛܪܹܗ ܚܲܕ݂ ܕܡܲܫܟܢܵܐ. 27 ܘܚܲܡܫܵܐ ܡܘܼܟ݂ܠܝܼܢ ܠܕܲܦܵܘܗܝ ܕܣܸܛܪܵܐ ܐ̄ܚܪܹܢܵܐ ܕܡܲܫܟܢܵܐ: ܘܚܲܡܫܵܐ ܡܘܼܟ݂ܠܝܼܢ ܠܕܲܦܵܘܗܝ ܕܣܸܛܪܵܐ ܐ̄ܚܪܹܢܵܐ ܡܼܢ ܫܦܘܿܠܵܘܗܝ ܕܡܲܫܟܢܵܐ ܡܼܢ ܡܲܥܪܒ݂ܵܐ. 28 ܘܡܘܼܟ݂ܠܵܐ ܡܸܨܥܵܝܵܐ ܒܓ݂ܵܘ ܕܲܦܵܐ ܡܲܥܒܲܪ ܡܼܢ ܗܵܢܵܐ ܓܲܒܵܐ ܠܗܵܢܵܐ. 29 ܘܕܲܦܹ̈ܐ ܩܪܘܿܡ ܕܲܗܒ݂ܵܐ: ܘܙܲܩܙܩܵܬ݂ܵܐ ܥܒܸܕ ܕܕܲܗܒ݂ܵܐ ܕܘܼܟܿܬ݂ܵܐ ܠܡܘܼܟ݂ܠܹ̈ܐ: ܘܲܩܪܘܿܡ ܠܡܘܼܟ݂ܠܹ̈ܐ ܕܲܗܒ݂ܵܐ. 30 ܘܐܲܩܝܼܡܲܝܗܝ ܠܡܲܫܟܢܵܐ ܒܙܸܕ݂ܩܹܗ ܐܲܝܟ݂ ܕܚܵܘܝܼܬܵܟ݂ ܒܛܘܼܪܵܐ. 31 ܘܲܥܒܸܕ ܦܪܵܣܵܐ ܬܸܟ݂ܠܬ݂ܵܐ ܘܐܲܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܐܘܼܡܵܢܵܐ ܥܒܸܕܲܝܗܝ ܟܪܘܼܒ݂ܵܐ. 32 ܘܣܝܼܡܲܝܗܝ ܥܲܠ ܐܲܪܒܥܵܐ ܥܲܡܘܼܕܹ̈ܐ ܕܐܸܫܟܵܪܥܵܐ ܕܲܩܪܝܼܡܝܼܢ ܕܲܗܒ݂ܵܐ ܘܩܘܼܒ݂ܥܲܝܗܘܿܢ ܕܲܗܒ݂ܵܐ: ܥܲܠ ܐܲܪܒܿܥܵܐ ܣܵܡܟܹ̈ܐ ܕܣܹܐܡܵܐ. 33 ܘܗܲܒ݂ ܦܪܵܣܵܐ ܬܚܹܝܬ݂ ܕܲܦܵܐ: ܘܐܲܥܸܠ ܠܬܲܡܵܢ ܠܓ݂ܵܘ ܡܼܢ ܦܪܵܣܵܐ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ: ܘܬܸܦܪܘܿܣ ܠܟ݂ܘܿܢ ܦܪܵܣܵܐ ܒܹܝܬ݂ ܩܘܼܕ݂ܫܵܐ: ܘܒܹܝܬ݂ ܩܕ݂ܘܿܫ ܩܘܼܕ݂ܫܹܐ. 34 ܘܲܬ݂ܣܝܼܡ ܚܘܼܣܵܝܵܐ ܥܲܠ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ ܒܲܩܕ݂ܘܿܫ ܩܘܼܕܫܹܐ. 35 ܘܲܬ݂ܣܝܼܡ ܦܵܬ݂ܘܿܪܵܐ ܠܒܲܪ ܡܼܢ ܦܪܵܣܵܐ: ܘܲܡܢܵܪܬܵܐ ܠܘܼܩܒܲܠ ܦܵܬ݂ܘܿܪܵܐ ܥܲܠ ܣܸܛܪܵܐ ܕܡܲܫܟܢܵܐ ܡܼܢ ܬܲܝܡܢܵܐ ܘܦܵܬ݂ܘܿܪܵܐ ܬܣܝܼܡ ܥܲܠ ܣܸܛܪܵܐ ܕܓܲܪܒܝܵܐ. 36 ܘܲܥܒܸܕ ܦܪܵܣܵܐ ܠܬܲܪܥܵܐ ܕܡܲܫܟܢܵܐ: ܬܟܸܠܬ݂ܵܐ: ܘܐܲܪܓܿܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܨܘܼܪܬܵܐ. 37 ܘܲܥܒܸܕ ܠܲܦܪܵܣܵܐ ܚܲܡܫܵܐ ܥܲܡܘܼܕܹ̈ܐ ܕܐܸܫܟܵܪܥܵܐ: ܘܲܩܪܘܿܡ ܐܸܢܘܿܢ ܕܲܗܒ݂ܵܐ: ܘܩܘܼܒ݂ܥܲܝܗܘܿܢ ܕܲܗܒ݂ܵܐ: ܘܲܥܒܸܕ݂ ܠܗܘܿܢ ܚܲܡܫܵܐ ܣܵܡܟܹ̈ܐ ܕܲܢܚܵܫܵܐ.

********

ܩܦܠܐܘܢ : ܟܙ.

1 ܘܲܥܒܸܕ ܡܲܕ݂ܒܚܵܐ ܕܩܲܝܣܵܐ ܕܐܸܫܟܵܪܥܵܐ: ܚܲܡܸܫ ܐܲܡܝܼܢ ܐܘܼܪܟܹܗ: ܘܚܲܡܸܫ ܐܲܡܝܼܢ ܦܬ݂ܵܝܹܗ: ܡܪܲܒܲܥ ܢܸܗܘܸܐ ܡܲܕ݂ܒܚܵܐ: ܘܲܬ݂ܠܵܬ݂ ܐܲܡܝܼܢ ܪܵܘܡܹܗ2 ܘܲܥܒܸܕ ܩܲܪܢܵܬܹܗ ܥܲܠ ܐܲܪܒܲܥ ܙܵܘܝܵܬܹܗ: ܡܸܢܹܗ ܢܸܗܘܝܵܢ ܩܲܪܢܵܬܹܗ: ܘܲܩܪܘܿܡܲܝܗܝ ܢܚܵܫܵܐ. 3 ܘܲܥܒܸܕ ܩܲܕ݂ܣܵܘܗܝ ܠܬܸܫܡܸܫܬܹܿܗ: ܘܐܝܼܕ݂ܵܘܗܝ ܘܩܲܪ̈ܕ݂ܵܠܵܘܗܝ ܘܡܲܫܠܵܘ̈ܵܬܹܗ: ܘܦܝܼܪܡܵܘܗܝ: ܘܟ݂ܠܗܘܿܢ ܡܵܐܢܵܘܗܝ ܬܸܥܒܸܕ ܕܲܢܚܵܫܵܐ. 4 ܘܲܥܒܸܕ ܩܲܪܩܸܠ ܐܲܝܟ݂ ܥܒ݂ܵܕ݂ܵܐ ܕܲܡܨܝܼܕܿܬܵܐ ܕܲܢܚܵܫܵܐ: ܘܲܥܒܸܕ ܥܲܠ ܩܲܪܩܸܠ ܐܲܪܒܲܥ ܙܲܩܙܩܲܢ ܕܲܢܚܵܫܵܐ ܥܲܠ ܐܲܪܒܥܵܐ ܣܸܛܪܵܘܗܝ. 5 ܗܲܒܹܿܝܗܿ ܬܚܹܝܬ݂ ܫܦܘܿܠܵܘܗܝ ܕܡܲܕ݂ܒܚܵܐ ܡܼܢ ܠܬܲܚܬ: ܘܬܸܗܘܸܐ ܩܲܪܩܸܠ ܥܕܲܡܵܐ ܠܦܸܠܓܹܿܗ ܕܡܲܕ݂ܒܚܵܐ. 6 ܘܲܥܒܸܕ ܩܘܼܦܹ̈ܐ ܠܡܲܕ݂ܒܚܵܐ: ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܲܩܪܘܿܡ ܐܸܢܘܿܢ ܢܚܵܫܵܐ. 7 ܘܐܲܥܸܠ ܩܘܼܦܹ̈ܐ ܒܙܲܩܙܩܵܬ݂ܵܐ: ܘܢܸܗܘܘܿܢ ܥܲܠ ܬܪܹܝܢ ܣܸܛܪܵܘܗܝ ܕܡܲܕ݂ܒܚܵܐ ܡܵܐ ܕܫܵܩܠܝܼܢ ܠܹܗ. 8 ܚܠܝܼܠܵܐ ܕܕܲܦܹ̈ܐ ܬܸܥܒܿܕ݂ܝܼܘܗܝ: ܐܲܝܟ݂ ܕܚܵܘܝܼܬܵܟ݂ ܒܛܘܼܪܵܐ: ܗܵܟܲܢܵܐ ܢܸܥܒܕ݂ܘܼܢ. 9 ܘܲܥܒܸܕ ܕܵܪܬܵܐ ܠܡܲܫܟܢܵܐ ܠܲܣܛܲܪ ܪܘܼܚܵܐ ܕܬܲܝܡܢܵܐ: ܣܸܕ݂ܪܹ̈ܐ ܕܕ݂ܵܪܬܵܐ ܕܒ݂ܘܼܨܵܐ ܥܙܝܼܠܵܐ: ܡܵܐܐ ܐܲܡܝܼܢ ܐܘܼܪܟܹܗ ܕܣܸܕ݂ܪܵܐ ܚܲܕ. 10 ܘܥܲܡܘܼܕ݂ܵܘܗܝ ܥܸܣܪܝܼܢ: ܘܣܵܡܟܲܝܗܘܿܢ ܥܸܣܪܝܼܢ ܕܲܢܚܵܫܵܐ: ܘܩܘܼܒ݂ܥܲܝܗܘܿܢ ܕܥܲܡܘܼܕܹ̈ܐ ܘܲܩܪܵܡܗܘܿܢ ܕܣܹܐܡܵܐ. 11 ܘܗܵܟܲܢܵܐ ܠܣܸܛܪܵܐ ܕܓܲܪܒܿܝܵܐ: ܒܐܘܼܪܟܵܐ ܣܸܕ݂ܪܹ̈ܐ ܡܵܐܐ ܐܲܡܝܼܢ: ܘܥܲܡܘܼܕ݂ܵܘܗܝ ܥܸܣܪܝܼܢ: ܘܣܵܡܟܲܝܗܘܿܢ ܥܸܣܪܝܼܢ ܕܲܢܚܵܫܵܐ: ܘܩܘܼܒ݂ܥܲܝܗܘܿܢ ܕܥܲܡܘܼܕܹ̈ܐ ܘܲܩܪܵܡܗܘܿܢ ܕܣܹܐܡܵܐ. 12 ܘܲܦܬ݂ܵܝܵܗ ܕܕܲܪܬܵܐ ܠܣܸܛܪܵܐ ܕܡܲܥܪܒ݂ܵܐ: ܣܸܕ݂ܪܹ̈ܐ ܚܲܡܫܝܼܢ ܐܲܡܝܼܢ: ܘܥܲܡܘܼܕܲܝܗܘܿܢ ܥܸܣܪܵܐ: ܘܣܵܡܟܲܝܗܘܿܢ ܥܸܣܪܵܐ. 13 ܘܲܦܬ݂ܵܝܵܗ ܕܕܲܪܬܵܐ ܠܣܸܛܪܵܐ ܕܪܘܼܚܵܐ ܕܡܲܕ݂ܢܚܵܐ ܚܲܡܫܝܼܢ ܐܲܡܝܼܢ. 14 ܘܚܲܡܫܲܥܸܣܪܹܐ ܐܲܡܝܼܢ ܠܣܸܕ݂ܪܹ̈ܐ ܕܣܸܛܪܵܐ: ܥܲܡܘܼܕܲܝܗܘܿܢ ܬܠܵܬ݂ܵܐ: ܘܣܵܡܟܲܝܗܘܿܢ ܬܠܵܬ݂ܵܐ. 15 ܘܲܠܣܸܛܪܵܐ ܬܸܢܝܵܢܵܐ ܚܲܡܸܫܬܲܥܣܲܪ ܣܸܕ݂ܪܝܼܢ: ܥܲܡܘܼܕܲܝܗܘܿܢ ܬܠܵܬ݂ܵܐ ܘܣܵܡܟܲܝܗܘܿܢ ܬܠܵܬ݂ܵܐ. 16 ܘܲܠܬܲܪܥܵܐ ܕܕ݂ܵܪܬܵܐ ܦܪܵܣܵܐ ܥܸܣܪܝܼܢ ܐܲܡܝܼܢ: ܬܸܟ݂ܠܬ݂ܵܐ: ܘܐܲܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܨܘܼܪܬܵܐ: ܥܲܡܘܼܕܲܝܗܘܿܢ ܐܲܪܒܥܵܐ: ܘܣܵܡܟܲܝܗܘܿܢ ܐܲܪܒܥܵܐ. 17 ܟܠܗܘܿܢ ܥܲܡܘܼܕܹ̈ܐ ܕܕ݂ܵܪܬܵܐ ܟܲܕ݂ ܚܲܕ݂ܪܵܐ ܩܪܝܼܡܝܼܢ ܣܹܐܡܵܐ: ܘܩܘܼܒ݂ܥܲܝܗܘܿܢ ܕܣܹܐܡܵܐ: ܘܣܵܡܟܲܝܗܘܿܢ ܕܲܢܚܵܫܵܐ. 18 ܘܐܼܘܪܟܵܗ ܕܕ݂ܵܪܬܵܐ ܡܵܐܐ ܐܲܡܝܼܢ: ܘܲܦܬ݂ܵܝܵܗ ܚܲܡܫܝܼܢ ܒܚܲܡܫܝܼܢ: ܘܪܵܘܡܵܗ ܚܲܡܸܫ ܐܲܡܝܼܢ: ܕܒ݂ܘܼܨܵܐ ܥܙܝܼܠܵܐ: ܘܣܵܡܟܲܝܗܘܿܢ ܕܲܢܚܵܫܵܐ. 19 ܟܠܗܘܿܢ ܡܵܐܢܹ̈ܐ ܕܡܲܫܟܢܵܐ: ܘܟ݂ܠܹܗ ܦܘܼܠܚܵܢܹܗ: ܘܟ݂ܠܗܘܿܢ ܣܸܟܵܘܗܝ: ܘܟ݂ܠܗܹܝܢ ܣܸܟܹ̈ܐ ܕܕ݂ܵܪܬܵܐ: ܕܲܢܚܵܫܵܐ. 20 ܘܐܲܢ̄ܬ ܦܲܩܸܕ݂ ܠܲܒ݂ܢܲܝ ܝܼܣܪܵܝܹܠ: ܘܢܸܣܒ݂ܘܿܢ ܠܵܟ݂ ܡܸܫܚܵܐ ܕܲܟ݂ܝܵܐ ܕܙܲܝܬܵܐ ܥܨܝܼܪܵܐ: ܠܡܲܢܗܵܪܘܼ ܫܪܵܓ݂ܵܐ ܐܲܡܝܼܢܵܐܝܼܬ݂. 21 ܒܡܲܫܟܲܢ ܙܲܒ݂ܢܵܐ ܠܒܲܪ ܡܼܢ ܦܪܵܣܵܐ ܕܥܲܠ ܣܵܗܕܘܼܬ݂ܵܐ: ܘܢܸܣܕ݂ܘܿܪ ܐܸܢܘܿܢ ܐܲܗܪܘܿܢ ܘܲܒ݂ܢܵܘܗܝ ܡܼܢ ܪܲܡܫܵܐ ܘܲܥܕܲܡܵܐ ܠܨܲܦܪܵܐ ܩܕ݂ܵܡ ܡܵܪܝܵܐ: ܢܵܡܘܿܣܵܐ ܠܥܵܠܲܡ ܠܕ݂ܵܪܲܝܟܿܘܿܢ ܡܼܢ ܠܘܵܬ݂ ܒܢܲܝ ܝܼܣܪܵܝܹܠ.

********

ܩܦܠܐܘܢ : ܟܚ.

1 ܘܐܲܢ̄ܬ ܩܲܪܸܒ݂ ܠܵܟ݂ ܠܐܲܗܪܘܿܢ ܐܲܚܘܼܟ݂: ܘܠܲܒ݂ܢܵܘܗܝ ܥܲܡܹܗ ܡܼܢ ܓܵܘ ܒܢܲܝ ܝܼܣܪܵܝܹܠ ܠܲܡܟܲܗܵܢܘܼ ܠܝܼ: ܐܲܗܪܘܿܢ: ܘܢܵܕ݂ܵܒ݂: ܘܐܲܒ݂ܝܼܗܘܿ: ܘܐܹܠܝܼܥܵܙܵܪ: ܘܐܝܼܬ݂ܵܡܵܪ: ܒܢܲܝ ܐܲܗܪܘܿܢ. 2 ܘܲܥܒܸܕ ܠܒ݂ܘܼܫܲܝ ܩܘܼܕ݂ܫܵܐ ܠܐܲܗܪܘܿܢ ܐܲܚܘܼܟ݂: ܠܐܝܼܩܵܪܵܐ ܘܲܠܬܸܫܒܿܘܿܚܬܵܐ. 3 ܘܐܲܢ̄ܬ ܐܸܡܲܪ ܠܟ݂ܠܗܘܿܢ ܚܲܟܿܝܼܡܲܝ ܠܸܒܵܐ: ܕܲܡܠܹܝܬ݂ ܐܸܢܘܿܢ ܪܘܼܚܵܐ ܕܚܸܟ݂ܡܬ݂ܵܐ: ܘܢܸܥܒܿܕ݂ܘܼܢ ܠܒ݂ܘܼܫܲܝ ܩܘܼܕܫܵܐ ܠܐܲܗܪܘܿܢ ܠܲܡܩܲܕܵܫܘܼܬܹܗ: ܠܲܡܟܲܗܵܢܘܼ ܠܝܼ. 4 ܘܗܵܠܹܝܢ ܠܒ݂ܘܼܫܹ̈ܐ ܕܢܸܥܒܿܕ݂ܘܼܢ ܠܗܘܿܢ: ܦܪܵܙܘܿܡܵܐ: ܘܦܸܕܿܬ݂ܵܐ: ܘܲܦܪܝܼܣܵܐ: ܘܟ݂ܘܬܿܝܼܢܵܐ ܕܒ݂ܘܼܨܵܐ: ܘܡܲܨܢܲܦܬ݂ܵܐ: ܘܗܸܡܝܵܢܵܐ: ܘܢܸܥܒܿܕ݂ܘܼܢ ܠܒ݂ܘܼܫܲܝ ܩܘܼܕ݂ܫܵܐ ܠܐܲܗܪܘܿܢ ܐܲܚܘܼܟ݂: ܘܠܲܒ݂ܢܵܘܗܝ: ܠܲܡܟܲܗܵܢܘܼ ܠܝܼ. 5 ܘܗܸܢܘܿܢ ܢܸܣܒ݂ܘܿܢ ܕܲܗܒ݂ܵܐ: ܘܬܸܟ݂ܠܬ݂ܵܐ: ܘܐܲܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ. 6 ܘܢܸܥܒܿܕ݂ܘܼܢ ܦܸܕܿܬ݂ܵܐ ܕܕܲܗܒ݂ܵܐ: ܬܸܟ݂ܠܬ݂ܵܐ: ܘܐܲܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܐܘܼܡܵܢܵܐ. 7 ܬܲܪܬܹܿܝܢ ܟܲܬ݂ܦܵܢ ܡܕܲܒܿܩܲܢ ܢܸܗܘܝܵܢ ܠܵܗ: ܥܲܠ ܬܪܹܝܢ ܣܸܛܪܹܝܗܿ: ܘܢܸܕ݂ܒܲܩ. 8 ܗܸܡܝܵܢܵܐ ܕܦܸܕܿܬ݂ܵܐ ܕܲܥܠܹܝܗ: ܡܸܢܵܗ ܢܸܗܘܸܐ ܐܲܝܟ݂ ܥܒ݂ܵܕ݂ܵܗܿ: ܕܲܗܒ݂ܵܐ: ܘܬܸܟ݂ܠܬ݂ܵܐ: ܘܐܲܪܓܿܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ. 9 ܘܣܲܒ݂ ܬܲܪܬܹܿܝܢ ܟܹܐܦܹ̈ܐ ܕܒܹܪܘܼܠܵܐ: ܘܲܓ݂ܠܘܿܦ ܥܠܲܝܗܹܝܢ ܫܡܵܗܹ̈ܐ ܕܲܒ݂ܢܲܝ ܝܼܣܪܵܝܹܠ. 10 ܫܬܵܐ ܡܼܢ ܫܡܵܗܲܝܗܘܿܢ ܓܠܘܿܦ ܥܲܠ ܟܹܐܦܵܐ ܚܕ݂ܵܐ: ܘܸܫܬܵܐ ܫܡܵܗܹ̈ܐ ܕܐܸܫܬܿܚܲܪܘ ܓܠܘܿܦ ܥܲܠ ܟܹܐܦܵܐ ܐ̄ܚܪܹܬ݂ܵܐ: ܐܲܝܟ݂ ܬܵܘܠܕ݂ܵܬ݂ܗܘܿܢ. 11 ܥܒ݂ܵܕ݂ܵܐ ܕܐܘܼܡܵܢܵܐ ܟܹܐܦܹ̈ܐ ܓܠܝܼܦܵܬ݂ܵܐ: ܓܠܵܦܵܐ ܕܚܵܬ݂ܡܵܐ: ܓܠܘܿܦ ܬܲܪܬܹܿܝܢ ܟܹܐܦܹ̈ܐ ܥܲܠ ܫܡܵܗܹ̈ܐ ܕܲܒ݂ܢܲܝ ܝܼܣܪܵܝܹܠ: ܘܡܵܘܚܕ݂ܵܢ ܘܡܲܫܪܵܢ ܒܕܲܗܒ݂ܵܐ ܥܒܸܕ ܐܸܢܹܝܢ. 12 ܘܣܝܼܡ ܬܲܪܬܹܿܝܢ ܟܹܐܦܹ̈ܐ ܥܲܠ ܟܲܬ݂ܦܵܬ݂ܵܗ ܕܦܸܕܬ݂ܵܐ: ܟܹܐܦܹ̈ܐ ܕܕ݂ܘܼܟ݂ܪܵܢܵܐ ܠܲܒ݂ܢܲܝ ܝܼܣܪܵܝܹܠ: ܘܢܸܗܘܸܐ ܫܵܩܹܠ ܐܲܗܪܘܿܢ ܫܡܵܗܲܝܗܘܿܢ ܩܕ݂ܵܡ ܡܵܪܝܵܐ: ܥܲܠ ܬܲܪܬܹܿܝܢ ܟܲܬ݂ܦܵܬܹܗ ܠܕ݂ܘܼܟ݂ܪܵܢܵܐ. 13 ܘܲܥܒܸܕ݂ ܡܵܘܚܕ݂ܵܬ݂ܵܐ ܕܕܲܗܒ݂ܵܐ. 14 ܘܬܲܪܬܹܿܝܢ ܫܸܫܠܵܬ݂ܵܐ ܕܕܲܗܒ݂ܵܐ ܕܲܟ݂ܝܵܐ: ܡܲܬ݂ܐܡܵܬ݂ܵܐ ܥܒܸܕ݂ ܐܸܢܝܹܢ ܥܒ݂ܵܕ݂ܵܐ ܓܕ݂ܝܼܠܵܐ: ܘܣܝܼܡ ܬܲܪܬܹܿܝܢ ܫܸܫܠܵܬ݂ܵܐ ܡܲܬ݂ܐܡܵܬ݂ܵܐ ܥܲܠ ܡܵܘܚܕ݂ܵܬ݂ܵܐ. 15 ܘܲܥܒܸܕ ܦܪܝܼܣܵܐ ܕܕ݂ܝܼܢܵܐ ܥܒ݂ܵܕ݂ܵܐ ܕܐܘܼܡܵܢܵܐ: ܐܲܝܟ݂ ܥܒ݂ܵܕ݂ܵܐ ܕܦܸܕܬ݂ܵܐ ܥܒܸܕܲܝܗܝ: ܕܲܗܒ݂ܵܐ: ܘܬܸܟ݂ܠܬ݂ܵܐ: ܘܐܲܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ ܥܒܸܕܲܝܗܝ. 16 ܡܪܲܒܲܥ ܢܸܗܘܸܐ ܟܲܕ ܐܲܥܝܼܦ: ܙܪܸܬ݂ ܐܘܼܪܟܹܗ: ܘܲܙܪܸܬ݂ ܦܬ݂ܵܝܹܗ. 17 ܘܬܸܫܠܲܡ ܒܹܗ ܫܲܠܡܘܼܬ݂ܵܐ ܕܟܹܐܦܹ̈ܐ: ܐܲܪܒܥܵܐ ܣܸܕ݂ܪܝܼܢ ܕܟܹܐܦܹ̈ܐ: ܣܸܕ݂ܪܵܐ ܩܲܕ݂ܡܵܝܵܐ ܣܘܼܡܵܣܵܐ: ܘܙܲܪܓܵܐ: ܘܒܲܪܩܵܐ: ܣܸܕ݂ܪܵܐ ܚܲܕ݂. 18 ܘܣܸܕ݂ܪܵܐ ܐ̄ܚܪܹܢܵܐ: ܨܕ݂ܝܼܕ݂ܵܐ: ܘܣܲܦܝܼܠܵܐ: ܘܢܸܩܥܬ݂ܵܐ. 19 ܘܣܸܕ݂ܪܵܐ ܬܠܝܼܬ݂ܵܝܵܐ ܩܵܢܟܹܿܢܘܿܢ: ܘܩܲܪܟܸܿܕ݂ܢܵܐ: ܘܥܹܝܢ ܥܸܓ݂ܠܵܐ. 20 ܘܣܸܕ݂ܪܵܐ ܪܒ݂ܝܼܥܵܝܵܐ ܬܵܪܫܝܼܫ: ܘܒܹܪܘܼܠܵܐ: ܘܝܲܫܦܹܗ: ܡܵܘܚܕ݂ܵܢ ܘܡܲܫܪܵܢ ܒܕܲܗܒ݂ܵܐ ܥܒܸܕ݂ ܐܸܢܹܝܢ: ܢܸܗܘܝܵܢ ܒܫܲܠܡܘܼܬ݂ܗܹܝܢ. 21 ܘܟܹܐܦܹ̈ܐ ܢܸܗܘܝܵܢ ܥܲܠ ܫܡܵܗܹ̈ܐ ܕܲܒ݂ܢܲܝ ܝܼܣܪܵܝܹܠ: ܬܲܪܬܲܥܸܣܪܹ̈ܐ ܥܲܠ ܫܡܵܗܲܝܗܘܿܢ: ܓܠܝܼܦܵܢ ܓܠܵܦܵܐ ܕܚܵܬ݂ܡܵܐ. 22 ܓܒܲܪ ܥܲܠ ܫܡܹܗ ܢܸܗܘܝܵܢ ܠܲܬ݂ܪܸܥܣܲܪ ܫܲܒ݂ܛܝܼܢ: ܘܲܥܒܸܕ ܥܲܠ ܦܪܝܼܣܵܐ ܫܸܫܠܵܬ݂ܵܐ ܡܲܬ݂ܐܡܵܬ݂ܵܐ ܥܒ݂ܵܕ݂ܵܐ ܓܕ݂ܝܼܠܵܐ ܕܕܲܗܒ݂ܵܐ ܕܲܟ݂ܝܵܐ. 23 ܘܲܥܒܸܕ ܠܚܘܼܣܵܝܵܐ ܬܪܹܝܢ ܩܘܼܪܩܣܹܐ ܕܕܲܗܒ݂ܵܐ ܕܲܟ݂ܝܵܐ: ܘܗܲܒ݂ ܬܪܹܝܢ ܩܘܼܪܩܣܝܼܢ ܥܲܠ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ. 24 ܘܗܲܒ݂ ܬܲܪܬܹܿܝܢ ܓܕ݂ܝܼܠܵܬ݂ܵܐ ܕܕܲܗܒ݂ܵܐ: ܥܲܠ ܬܪܹܝܢ ܩܘܼܪܩܣܝܼܢ: ܕܥܲܠ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ. 25 ܘܬܲܪܬܹܿܝܢ ܓܕ݂ܝܼܠܵܬ݂ܵܐ ܬܸܬܸܿܠ ܥܲܠ ܬܲܪܬܹܿܝܢ ܡܵܘܚܕ݂ܵܬ݂ܵܐ ܘܬܸܬܸܿܠ ܥܲܠ ܟܲܬ݂ܦܵܬ݂ܵܗ ܕܦܸܕܬ݂ܵܐ ܠܘܼܩܒܲܠ ܐܲܦܹܝܗܿ. 26 ܘܲܥܒܸܕ ܬܪܹܝܢ ܩܘܼܪ̈ܩܣܹܐ ܕܕܲܗܒ݂ܵܐ: ܘܣܝܼܡ ܐܸܢܘܿܢ ܥܲܠ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ: ܥܲܠ ܣܸܛܪܵܐ ܕܥܲܠ ܣܸܦܬ݂ܵܗ ܕܦܸܕܬ݂ܵܐ ܡܼܢ ܠܓ݂ܵܘ. 27 ܘܲܥܒܸܕ ܬܪܹܝܢ ܩܘܼܪܩܣܹܐ ܕܕܲܗܒ݂ܵܐ: ܘܣܝܼܡ ܐܸܢܘܿܢ ܥܲܠ ܬܲܪܬܹܿܝܢ ܟܲܬ݂ܦܵܬ݂ܵܗ ܕܦܸܕܬ݂ܵܐ ܡܼܢ ܠܬܲܚܬ: ܡܼܢ ܠܘܼܩܒܲܠ ܐܲܦܹܝܗܿ: ܠܘܼܩܒܲܠ ܕܸܒ݂ܩܵܗ ܠܥܸܠ ܡܼܢ ܗܸܡܝܵܢܵܐ ܕܦܸܕܬ݂ܵܐ. 28 ܘܲܢܕܲܒܿܩܘܼܢܹܗ ܠܲܦܪܝܼܣܵܐ ܡܼܢ ܙܲܩܙܩܵܬܹܗ ܠܙܲܩܙܩܵܬ݂ܵܗ ܕܦܸܕܬ݂ܵܐ ܒܚܘܼܛܵܐ ܕܬܸܟ݂ܠܬ݂ܵܐ: ܠܡܸܗܘܵܐ ܥܲܠ ܗܸܡܝܵܢܵܐ ܕܦܸܕܬ݂ܵܐ: ܕܠܵܐ ܢܸܗܘܸܐ ܥܵܒܲܪ ܥܲܠ ܦܪܝܼܣܵܐ ܡܼܢ ܦܸܕܬ݂ܵܐ. 29 ܘܢܸܗܘܸܐ ܫܵܩܹܠ ܐܲܗܪܘܿܢ ܫܡܵܗܹ̈ܐ ܕܲܒ݂ܢܲܝ ܝܼܣܪܵܝܹܠ ܒܲܦܪܝܼܣܵܐ ܕܕ݂ܝܼܢܵܐ ܥܲܠ ܚܲܕ݂ܝܹܗ ܡܵܐ ܕܥܵܐܹܠ ܠܩܘܼܕ݂ܫܵܐ: ܕܘܼܟ݂ܪܵܢܵܐ ܩܕ݂ܵܡ ܡܵܪܝܵܐ ܐܲܡܝܼܢܵܐܝܼܬ݂. 30 ܘܣܝܼܡ ܥܲܠ ܦܪܝܼܣܵܐ ܕܕ݂ܝܼܢܵܐ ܢܲܗܝܼܪܵܐ ܘܫܲܠܡܵܐ: ܘܢܸܗܘܘܿܢ ܥܲܠ ܚܲܕ݂ܝܹܗ ܡܵܐ ܕܥܵܐܹܠ ܩܕ݂ܵܡ ܡܵܪܝܵܐ: ܘܢܸܫܩܘܿܠ ܐܲܗܪܘܿܢ ܕܝܼܢܹ̈ܐ ܕܲܒ݂ܢܲܝ ܝܼܣܪܵܝܹܠ ܥܲܠ ܚܲܕ݂ܝܹܗ: ܩܕ݂ܵܡ ܡܵܪܝܵܐ ܐܲܡܝܼܢܵܐܝܼܬ݂. 31 ܘܲܥܒܸܕ ܦܪܵܙܘܿܡܵܐ ܕܦܸܕܬ݂ܵܐ ܓܡܝܼܪܵܐ ܕܬܸܟ݂ܠܬ݂ܵܐ. 32 ܘܢܸܗܘܸܐ ܦܘܼܡܹܗ ܕܪܹܫܹܗ ܒܓ݂ܵܘܹܗ: ܘܣܸܦܬ݂ܵܐ ܬܸܗܘܸܐ ܠܦܘܼܡܹܗ ܟܲܕ݂ ܚܵܕܲܪ: ܥܒ݂ܵܕ݂ܵܐ ܙܩܝܼܪܵܐ: ܐܲܝܟ݂ ܦܘܼܡ ܣܝܼܪܵܣ ܢܸܗܘܸܐ ܠܹܗ ܕܠܵܐ ܢܸܨܛܪܸܐ. 33 ܘܲܥܒܸܕ ܥܲܠ ܫܦܘܿܠܵܘܗܝ ܪܘܼܡܵܢܹ̈ܐ ܕܬܸܟ݂ܠܬ݂ܵܐ: ܘܕܲܐܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܥܲܠ ܫܦܘܿܠܵܘܗܝ ܟܲܕ ܚܵܕܲܪ: ܘܙܲܓܹ̈ܐ ܕܕܲܗܒ݂ܵܐ ܒܲܝܢܵܬ݂ܗܘܿܢ ܟܲܕ݂ ܚܵܕܲܪ. 34 ܘܙܲܓܵܐ ܙܲܓܵܐ ܕܕܲܗܒ݂ܵܐ: ܘܪܘܼܡܵܢܹ̈ܐ ܥܲܠ ܫܦܘܿܠܵܘܗܝ ܕܲܦܪܵܙܘܿܡܵܐ ܟܲܕ ܚܵܕܲܪ. 35 ܘܢܸܗܘܸܐ ܥܲܠ ܐܲܗܪܘܿܢ ܠܬܸܫܡܸܫܬܵܐ: ܘܢܸܫܬܿܡܲܥ ܩܵܠܹܗ ܡܵܐ ܕܥܵܐܹܠ ܠܩܘܼܕ݂ܫܵܐ ܩܕ݂ܵܡ ܡܵܪܝܵܐ: ܘܡܵܐ ܕܢܵܦܹܩ: ܕܠܵܐ ܢܡܘܼܬ݂. 36 ܘܲܥܒܸܕ ܟܠܝܼܠܵܐ ܕܕܲܗܒ݂ܵܐ ܕܲܟ݂ܝܵܐ: ܘܲܓ݂ܠܘܿܦ ܥܠܵܘܗܝ ܓܠܵܦܵܐ ܕܚܵܬ݂ܡܵܐ: ܩܘܼܕܫܵܐ ܠܡܵܪܝܵܐ. 37 ܘܣܝܼܡܲܝܗܝ ܥܲܠ ܚܘܼܛܵܐ ܕܬܸܟ݂ܠܬ݂ܵܐ: ܘܢܸܗܘܸܐ ܥܲܠ ܡܲܨܢܲܦܬ݂ܵܐ: ܘܠܘܼܩܒܲܠ ܐܲܦܲܝ ܡܲܨܢܲܦܬ݂ܵܐ ܢܸܗܘܸܐ. 38 ܘܢܸܗܘܸܐ ܥܲܠ ܒܹܝܬ݂ ܥܲܝܢܵܘܗܝ ܕܐܲܗܪܘܿܢ: ܘܢܸܗܘܸܐ ܫܵܩܹܠ ܐܲܗܪܘܿܢ ܚܛܵܗܹ̈ܐ ܕܩܘܼܕ݂ܫܹ̈ܐ ܕܲܡܩܲܕܫܝܼܢ ܒܢܲܝ ܝܼܣܪܵܝܹܠ: ܠܟ݂ܠ ܡܵܘܗܒܲܬ݂ ܩܘܼܕ݂ܫܲܝܗܘܿܢ: ܘܢܸܗܘܸܐ ܥܲܠ ܒܹܝܬ݂ ܥܲܝܢܵܘܗܝ ܐܲܡܝܼܢܵܐܝܼܬ݂: ܠܨܸܒ݂ܝܵܢܵܐ ܠܗܘܿܢ ܩܕ݂ܵܡ ܡܵܪܝܵܐ. 39 ܘܲܥܒܸܕ ܟܘܼܬܿܝܼܢܵܐ ܕܒ݂ܘܼܨܵܐ: ܘܲܥܒܸܕ ܡܲܨܢܲܦܬ݂ܵܐ ܕܒ݂ܘܼܨܵܐ: ܘܗܸܡܝܵܢܵܐ ܥܒܸܕ ܥܒ݂ܵܕ݂ܵܐ ܕܨܲܝܵܪܵܐ. 40 ܘܠܲܒ݂ܢܲܝ ܐܲܗܪܘܿܢ ܥܒܸܕ ܟܘܿܬܿܝܼܢܵܬ݂ܵܐ: ܘܲܥܒܸܕ ܠܗܘܿܢ ܗܸܡܝܵܢܹ̈ܐ: ܘܟܲܠܵܘܹ̈ܐ ܬܸܥܒܸܿܕ ܠܗܘܿܢ ܠܐܝܼܩܵܪܵܐ ܘܲܠܫܘܼܒ݂ܚܵܐ. 41 ܘܐܲܠܒܸܿܫ ܐܸܢܘܿܢ ܠܐܲܗܪܘܿܢ ܐܲܚܘܼܟ݂: ܘܠܲܒ݂ܢܵܘܗܝ ܥܲܡܹܗ: ܘܲܡܫܘܿܚ ܐܸܢܘܿܢ ܘܫܲܡܠܵܐ ܐܝܼܕܲܝܗܘܿܢ: ܘܩܲܕܸܿܫ ܐܸܢܘܿܢ ܠܝܼ ܘܲܢܟܲܗܢܘܼܢ ܠܝܼ. 42 ܘܲܥܒܸܕ݂ ܠܗܘܿܢ ܦܪ̈ܵܙܘܿܡܹܐ ܕܒ݂ܘܼܨܵܐ: ܠܲܡܟܲܣܵܝܘܼ ܒܸܣܪܵܐ ܕܥܲܪܛܸܠܵܝܘܼܬ݂ܵܐ: ܡܼܢ ܚܲܨܲܝܗܘܿܢ ܘܲܥܕܲܡܵܐ ܠܥܲܛܡܵܬ݂ܗܘܿܢ ܢܸܗܘܘܿܢ. 43 ܘܢܸܗܘܘܿܢ ܥܲܠ ܐܲܗܪܘܿܢ ܘܥܲܠ ܒܢܵܘܗܝ ܡܵܐ ܕܥܵܐܠܝܼܢ ܠܡܲܫܟܲܢ ܙܲܒ݂ܢܵܐ: ܘܡܵܐ ܕܩܵܪܒܿܝܼܢ ܠܡܲܕ݂ܒܚܵܐ ܠܲܡܫܲܡܵܫܘܼ ܒܩܘܼܕܫܵܐ: ܕܠܵܐ ܢܩܲܒܿܠܘܼܢ ܚܛܵܗܵܐ ܘܲܢܡܘܼܬ݂ܘܼܢ: ܢܵܡܘܿܣܵܐ ܠܥܵܠܲܡ ܠܹܗ ܘܲܠܙܲܪܥܹܗ ܡܼܢ ܒܵܬ݂ܪܹܗ.

********

ܩܦܠܐܘܢ : ܟܛ.

1 ܘܗܵܟܲܢܵܐ ܥܒܸܕ݂ ܠܗܘܿܢ ܘܩܲܕܸܿܫ ܐܸܢܘܿܢ ܠܝܼ ܠܟ݂ܵܗܢܘܼܬ݂ܵܐ: ܘܣܲܒ݂ ܬܵܘܪܵܐ ܚܲܕ݂ ܒܲܪ ܒܲܩܪܵܐ: ܘܕܸܟ݂ܪܹ̈ܐ ܬܪܹܝܢ ܕܠܵܐ ܡܘܼܡ. 2 ܘܠܲܚܡܵܐ ܦܲܛܝܼܪܵܐ: ܚܵܚܪܵܬ݂ܵܐ ܦܲܛܝܼܪܵܬ݂ܵܐ ܕܦܝܼܠܵܢ ܒܡܸܫܚܵܐ: ܘܠܸܓ݂ܢܹ̈ܐ ܦܲܛܝܼܪܹ̈ܐ ܕܦܝܼܠܝܼܢ ܒܡܸܫܚܵܐ: ܕܲܢܫܝܼܦܵܐ ܕܚܸܛܹܐ ܬܸܥܒܸܿܕ ܐܸܢܘܿܢ. 3 ܘܲܬ݂ܣܝܼܡ ܐܸܢܘܿܢ ܒܣܲܠܵܐ ܚܲܕ݂: ܘܲܬ݂ܩܲܪܸܒ݂ ܐܸܢܘܿܢ ܒܣܲܠܵܐ: ܘܲܠܬ݂ܵܘܪܵܐ ܘܠܲܬ݂ܪܹܝܢ ܕܸܟ݂ܪܝܼܢ. 4 ܘܠܲܐܗܪܘܿܢ ܘܠܲܒ݂ܢܵܘܗܝ ܩܲܪܸܒ݂ ܠܬܲܪܥܵܐ ܕܡܲܫܟܲܢ ܙܲܒ݂ܢܵܐ: ܘܐܲܣܚܵܐ ܐܸܢܘܿܢ ܒܡܲܝܵܐ. 5 ܘܣܲܒ݂ ܠܒ݂ܘܼܫܹ̈ܐ ܘܐܲܠܒܸܿܫ ܠܐܲܗܪܘܿܢ ܟܘܿܬܝܼܢܵܐ: ܘܲܦܪܵܙܘܿܡܵܐ: ܘܡܲܨܢܲܦܬ݂ܵܐ: ܘܦܸܕܬ݂ܵܐ: ܘܲܦܪܝܼܣܵܐ: ܘܬܲܩܸܢܲܝܗܝ ܒܗܸܡܝܵܢܵܐ ܕܦܸܕܬ݂ܵܐ. 6 ܘܣܝܼܡ ܡܲܨܢܲܦܬ݂ܵܐ ܒܪܹܫܹܗ: ܘܣܝܼܡ ܟܠܝܼܠܵܐ ܕܩܘܼܕ݂ܫܵܐ ܥܲܠ ܡܲܨܢܲܦܬ݂ܵܐ. 7 ܘܣܲܒ݂ ܡܸܫܚܵܐ ܕܲܡܫܝܼܚܘܼܬ݂ܵܐ: ܘܣܘܿܟ݂ ܒܪܹܫܹܗ ܘܲܡܫܘܿܚܲܝܗܝ. 8 ܘܩܲܪܸܒ݂ ܠܲܒ݂ܢܵܘܗܝ: ܘܐܲܠܒܸܿܫ ܐܸܢܘܿܢ ܟܘܿܬܿܝܼܢܵܬ݂ܵܐ. 9 ܘܐܲܣܘܿܪ ܐܸܢܘܿܢ ܗܸܡܝܵܢܵܐ ܠܐܲܗܪܘܿܢ ܘܠܲܒ݂ܢܵܘܗܝ: ܘܣܝܼܡ ܠܗܘܿܢ ܟܲܠܵܘܹ̈ܐ: ܘܬܸܗܘܸܐ ܠܗܘܿܢ ܟܵܗܢܘܼܬ݂ܗܘܿܢ ܠܲܩܝܵܡܵܐ ܕܲܠܥܵܠܲܡ: ܘܲܬ݂ܫܲܡܠܹܐ ܐܝܼܕܹܗ ܕܐܲܗܪܘܿܢ: ܘܐܝܼܕܹ̈ܐ ܕܲܒ݂ܢܵܘܗܝ. 10 ܘܩܲܪܸܒ ܬܵܘܪܵܐ ܩܕ݂ܵܡ ܡܲܫܟܲܢܙܲܒ݂ܢܵܐ: ܘܢܸܣܡܘܿܟ݂ ܐܲܗܪܘܿܢ ܘܲܒ݂ܢܵܘܗܝ ܐܝܼܕܲܝܗܘܿܢ ܥܲܠ ܪܹܫܹܗ ܕܬ݂ܵܘܪܵܐ. 11 ܘܟ݂ܘܿܣܲܝܗܝ ܠܬ݂ܵܘܪܵܐ ܩܕ݂ܵܡ ܡܵܪܝܵܐ ܒܬܲܪܥܵܐ ܕܡܲܫܟܲܢ ܙܲܒ݂ܢܵܐ. 12 ܘܣܲܒ݂ ܡܼܢ ܕܡܹܗ ܕܬ݂ܵܘܪܵܐ: ܘܪܘܿܣ ܥܲܠ ܩܲܪܢܵܬܹܗ ܕܡܲܕ݂ܒܿܚܵܐ ܒܨܸܒ݂ܥܵܟ݂: ܘܟ݂ܠܹܗ ܕܡܵܐ ܐܲܫܘܿܕ ܥܲܠ ܫܦܘܿܠܲܝ ܡܲܕ݂ܒܿܚܵܐ. 13 ܘܣܲܒ݂ ܟܠܹܗ ܚܸܠܒܵܐ ܕܲܩܪܝܼܡ ܠܲܓ݂ܘܵܝܵܐ: ܘܲܚܨܵܪ ܟܵܒ݂ܕܵܐ: ܘܬܲܪܬܹܿܝܢ ܟܘܼܠܝܵܢ ܘܬܲܪܒܿܗܹܝܢ: ܘܐܲܣܸܩ ܠܡܲܕ݂ܒܚܵܐ. 14 ܘܒܸܣܪܹܗ ܕܬ݂ܵܘܪܵܐ ܘܡܸܫܟܹܿܗ: ܘܦܲܪܬܹܿܗ: ܬܵܘܩܸܕ݂ ܒܢܘܼܪܵܐ ܠܒܲܪ ܡܼܢ ܡܲܫܪܝܼܬ݂ܵܐ: ܚܛܵܗܵܐ ܗ̄ܘܼ. 15 ܘܕܸܟ݂ܪܵܐ ܚܲܕ ܬܸܣܲܒ݂: ܘܲܢܣܲܡܟ݂ܘܼܢ ܐܲܗܪܘܿܢ ܘܲܒ݂ܢܵܘܗܝ ܐܝܼܕܲܝܗܘܿܢ ܥܲܠ ܪܹܫܹܗ ܕܕܸܟ݂ܪܵܐ. 16 ܘܟ݂ܘܿܣܲܝܗܝ ܠܕܸܟ݂ܪܵܐ: ܘܣܲܒ݂ ܡܼܢ ܕܡܹܗ: ܘܪܘܿܣ ܥܲܠ ܡܲܕ݂ܒܚܵܐ ܟܲܕ݂ ܚܵܕܲܪ. 17 ܘܕܸܟ݂ܪܵܐ ܦܲܫܲܚ ܗܲܕܵܡܵܘܗܝ: ܘܐܲܫܝܼܓ݂ ܓܘܵܝܹܗ ܘܲܟ݂ܪܵܥܵܘܗܝ: ܘܬܸܬܸܿܠ ܥܲܠ ܗܲܕܵܡܵܘܗܝ ܘܥܲܠ ܪܹܫܹܗ. 18 ܘܬܲܣܸܩ ܟܠܹܗ ܕܸܟ݂ܪܵܐ ܠܡܲܕ݂ܒܚܵܐ: ܥܠܵܬ݂ܵܐ ܗ̄ܘܼ ܠܡܵܪܝܵܐ ܠܪܹܝܚ ܢܝܵܚܵܐ ܩܘܼܪܒܵܢܵܐ ܠܡܵܪܝܵܐ. 19 ܘܬܸܣܲܒ݂ ܕܸܟ݂ܪܵܐ ܬܸܢܝܵܢܵܐ: ܘܲܢܣܲܡܟ݂ܘܼܢ ܐܲܗܪܘܿܢ ܘܲܒ݂ܢܵܘܗܝ ܐܝܼܕܲܝܗܘܿܢ ܥܲܠ ܪܹܫܹܗ ܕܕܸܟ݂ܪܵܐ. 20 ܘܟ݂ܘܿܣܲܝܗܝ ܠܕܸܟ݂ܪܵܐ: ܘܣܲܒ݂ ܡܼܢ ܕܡܹܗ: ܘܪܘܿܣ ܥܲܠ ܛܲܪܦܵܐ ܕܐܸܕ݂ܢܹܗ ܕܐܲܗܪܘܿܢ ܕܝܲܡܝܼܢܵܐ: ܘܥܲܠ ܛܲܪܦܹܐ ܕܐܸܕ݂ܢܹ̈ܐ ܕܲܒ݂ܢܵܘܗܝ ܕܝܲܡܝܼܢܵܐ: ܘܥܲܠ ܟܪܵܘܵܬ݂ܵܐ ܕܐܝܼܕܲܝܗܘܿܢ ܕܝܲܡܝܼܢܵܐ: ܘܥܲܠ ܟܪܵܘܵܬ݂ܵܐ ܕܪܸܓ݂ܠܲܝܗܘܿܢ ܕܝܲܡܝܼܢܵܐ: ܘܬܸܪܘܿܣ ܕܡܵܐ ܥܲܠ ܡܲܕ݂ܒܚܵܐ ܟܲܕ݂ ܚܵܕܲܪ. 21 ܘܬܸܣܲܒ݂ ܡܼܢ ܕܡܵܐ ܕܥܲܠ ܡܲܕ݂ܒܚܵܐ: ܘܡܼܢ ܡܸܫܚܵܐ ܕܲܡܫܝܼܚܘܼܬ݂ܵܐ: ܘܬܸܪܘܿܣ ܥܲܠ ܐܲܗܪܘܿܢ: ܘܥܲܠ ܠܒ݂ܘܼܫܵܘܗܝ: ܘܥܲܠ ܒܢܵܘܗܝ: ܘܥܲܠ ܠܒ݂ܘܼܫܹ̈ܐ ܕܲܒ݂ܢܵܘܗܝ ܥܲܡܹܗ: ܘܢܸܬ݂ܩܲܕܲܫ ܗܘܼ ܘܲܠܒ݂ܘܼܫܵܘܗܝ: ܘܲܒ݂ܢܵܘܗܝ ܘܲܠܒ݂ܘܼܫܹ̈ܐ ܕܲܒ݂ܢܵܘܗܝ ܥܲܡܹܗ. 22 ܘܣܲܒ݂ ܡܼܢ ܕ݂ܟ݂ܪܵܐ ܬܲܪܒܵܐ ܘܐܲܠܝܼܬ݂ܵܐ: ܘܚܸܠܒܵܐ ܕܲܩܪܝܼܡ ܠܲܓ݂ܘܵܝܵܐ: ܘܲܚܨܵܪ ܟܵܒ݂ܕܵܐ ܘܬܲܪܬܹܿܝܢ ܟܘܼܠܝܵܢ: ܘܬܲܪܒܵܐ ܕܲܥܠܲܝܗܹܝܢ: ܘܫܵܩܵܐ ܕܝܲܡܝܼܢܵܐ: ܡܸܛܠ ܕܕܸܟ݂ܪܵܐ ܗ̄ܘܼ ܕܫܘܼܡܠܵܝܵܐ. 23 ܘܲܓ݂ܪܝܼܨܬܵܐ ܚܕ݂ܵܐ ܕܠܲܚܡܵܐ: ܘܲܓ݂ܪܝܼܨܬܵܐ ܚܕ݂ܵܐ ܕܠܲܚܡܵܐ ܕܡܸܫܚܵܐ: ܘܠܲܓ݂ܢܵܐ ܚܲܕ ܡܼܢ ܣܲܠܵܐ ܕܦܲܛܝܼܪܵܐ ܕܲܩܕ݂ܵܡ ܡܵܪܝܵܐ. 24 ܘܲܬ݂ܣܝܼܡ ܟܠܗܘܿܢ ܥܲܠ ܐܝܼܕ݂ܵܐ ܕܐܲܗܪܘܿܢ: ܘܥܲܠ ܐܝܼܕܹ̈ܐ ܕܲܒ݂ܢܵܘܗܝ: ܘܬܸܦܪܘܿܫ ܐܸܢܘܿܢ ܦܘܼܪܫܵܢܵܐ ܩܕ݂ܵܡ ܡܵܪܝܵܐ. 25 ܘܬܸܣܲܒ݂ ܡܼܢ ܐܝܼܕܲܝܗܘܿܢ: ܘܬܲܣܸܩ ܚܲܕ݂ܝܵܐ ܡܼܢ ܕܸܟ݂ܪܵܐ ܥܲܠ ܡܲܕ݂ܒܚܵܐ ܠܲܥܠܵܬ݂ܵܐ: ܠܪܹܝܚ ܢܝܵܚܵܐ ܩܕ݂ܵܡ ܡܵܪܝܵܐ: ܩܘܼܪܒܵܢܵܐ ܗ̄ܘܼ ܠܡܵܪܝܵܐ. 26 ܘܬܸܣܲܒ݂ ܚܲܕ݂ܝܵܐ ܡܼܢ ܕܸܟ݂ܪܵܐ ܕܫܘܼܡܠܵܝܵܐ ܕܐܲܗܪܘܿܢ: ܘܬܸܦܪܫܝܼܘܗܝ ܦܘܼܪܫܵܢܵܐ ܩܕ݂ܵܡ ܡܵܪܝܵܐ: ܘܬܸܗܘܸܐ ܠܵܟ݂ ܠܲܡܢܵܬ݂ܵܐ. 27 ܘܩܲܕܸܿܫ ܚܲܕ݂ܝܵܐ ܕܦܘܼܪܫܵܢܵܐ: ܘܫܵܩܵܐ ܕܦܘܼܪܫܵܢܵܐ: ܕܐܸܬ݂ܦܪܸܫ ܘܐܸܬܿܬܿܪܝܼܡ ܡܼܢ ܕܸܟ݂ܪܵܐ ܕܫܘܼܡܠܵܝܵܐ: ܡܼܢ ܕܐܲܗܪܘܿܢ ܘܡܼܢ ܕܲܒ݂ܢܵܘܗܝ. 28 ܘܢܸܗܘܸܐ ܠܐܲܗܪܘܿܢ ܘܠܲܒ݂ܢܵܘܗܝ ܩܝܵܡܵܐ ܠܥܵܠܲܡ ܡܼܢ ܠܘܵܬ݂ ܒܢܲܝ ܝܼܣܪܵܝܹܠ: ܡܸܛܠ ܕܦܘܼܪܫܵܢܵܐ ܗ̄ܘܼ: ܘܦܘܼܪܫܵܢܵܐ ܢܸܗܘܸܐ ܡܼܢ ܠܘܵܬ݂ ܒܢܲܝ ܝܼܣܪܵܝܹܠ: ܡܼܢ ܕܸܒ݂ܚܲܝ ܫܲܠܡܲܝܗܘܿܢ ܦܘܼܪܫܵܢܵܐ ܠܡܵܪܝܵܐ. 29 ܘܲܠܒ݂ܘܼܫܲܝ ܩܘܼܕ݂ܫܵܐ ܕܐܲܗܪܘܿܢ ܢܸܗܘܘܿܢ ܠܲܒ݂ܢܵܘܗܝ ܡܼܢ ܒܵܬ݂ܪܹܗ: ܠܡܸܡܫܲܚ ܒܗܘܿܢ: ܘܠܲܡܫܲܡܠܵܝܘܼ ܒܗܘܿܢ ܐܝܼܕܲܝܗܘܿܢ. 30 ܫܲܒ݂ܥܵܐ ܝܵܘܡܝܼ̈ܢ ܢܸܠܒܲܫ ܐܸܢܘܿܢ ܟܵܗܢܵܐ ܒܵܬ݂ܪܹܗ ܡܼܢ ܒܢܵܘܗܝ: ܕܢܸܥܘܿܠ ܠܡܲܫܟܲܢ ܙܲܒ݂ܢܵܐ ܠܲܡܫܲܡܵܫܘܼ ܒܩܘܼܕ݂ܫܵܐ. 31 ܘܕܸܟ݂ܪܵܐ ܕܫܘܼܡܠܵܝܵܐ ܬܸܣܲܒ݂: ܘܲܬ݂ܒܲܫܸܠ ܒܸܣܪܹܗ ܒܐܲܬ݂ܪܵܐ ܩܲܕܝܼܫܵܐ. 32 ܘܢܹܐܟ݂ܘܿܠ ܐܲܗܪܘܿܢ ܘܲܒ݂ܢܵܘܗܝ ܒܸܣܪܵܐ ܕܕܸܟ݂ܪܵܐ: ܘܠܲܚܡܵܐ ܕܲܒ݂ܣܲܠܵܐ ܒܬܲܪܥܵܐ ܕܡܲܫܟܲܢ ܙܲܒ݂ܢܵܐ. 33 ܢܹܐܟ݂ܠܘܼܢ ܐܸܢܘܿܢ ܕܡܸܬ݂ܚܲܣܹܝܢ ܒܗܘܿܢ: ܠܲܡܫܲܡܠܵܝܘܼ ܐܝܼܕܲܝ̈ܗܘܿܢ ܘܠܲܡܩܲܕܵܫܘܼ ܐܸܢܘܿܢ: ܘܢܘܼܟ݂ܪܵܝܵܐ ܠܵܐ ܢܹܐܟ݂ܘܿܠ ܡܸܛܠ ܕܩܘܼܕ݂ܫܵܐ ܐܸܢܘܿܢ. 34 ܘܐܸܢ ܢܸܫܬܿܚܲܪ ܡܼܢ ܒܸܣܪܵܐ ܕܫܘܼܡܠܵܝܵܐ: ܘܡܼܢ ܠܲܚܡܵܐ ܥܕܲܡܵܐ ܠܨܲܦܪܵܐ: ܐܵܘܩܸܕ݂ ܡܸܕܸܿܡ ܕܡܸܫܬܿܚܲܪ ܒܢܘܼܪܵܐ: ܘܠܵܐ ܢܸܬ݂ܐܟܸܠ: ܡܸܛܠ ܕܩܘܼܕ݂ܫܵܐ ܐܸܢܘܿܢ. 35 ܘܲܥܒܸܕ ܠܐܲܗܪܘܿܢ ܘܠܲܒ݂ܢܵܘܗܝ ܗܵܟܲܢܵܐ ܐܲܝܟܲܢܵܐ ܕܲܦܩܲܕܬܵܟ݂: ܫܲܒ݂ܥܵܐ ܝܵܘܡܝܼܢ ܬܫܲܡܠܸܐ ܐܝܼܕܲܝܗܘܿܢ. 36 ܘܬ݂ܵܘܪܵܐ ܕܲܚܛܵܗܵܐ ܬܸܥܒܸܕ ܒܝܵܘܡܵܐ ܥܲܠ ܚܘܼܣܵܝܵܐ: ܘܬܸܪܘܿܣ ܥܲܠ ܡܲܕ݂ܒܚܵܐ ܡܵܐ ܕܲܡܚܲܣܸܐ ܐܲܢ̄ܬ ܥܠܵܘܗܝ: ܘܬܸܡܫܚܝܼܘܗܝ ܠܲܡܩܲܕܵܫܘܼܬܹܗ. 37 ܫܲܒ݂ܥܵܐ ܝܵܘܡܝܼܢ ܬܚܲܣܸܐ ܥܲܠ ܡܲܕ݂ܒܚܵܐ ܘܲܬ݂ܩܲܕܿܫܝܼܘܗܝ: ܘܢܸܗܘܸܐ ܡܲܕ݂ܒܚܵܐ ܩܕ݂ܘܿܫ ܩܘܼܕ݂ܫܝܼܢ: ܘܟ݂ܠ ܕܢܸܩܪܘܿܒ݂ ܠܡܲܕ݂ܒܚܵܐ ܢܸܬ݂ܩܲܕܲܫ. 38 ܘܗܵܟܲܢܵܐ ܬܸܥܒܸܕ ܥܲܠ ܡܲܕ݂ܒܚܵܐ: ܐܸܡܪܹ̈ܐ ܒܢܲܝ ܫܲܢ̄ܬܵܐ ܬܪܹܝܢ ܐܲܡܝܼܢܵܐܝܼܬ݂ ܒܝܵܘܡܵܐ. 39 ܐܸܡܪܵܐ ܚܲܕ݂ ܥܒܸܕ݂ ܒܨܲܦܪܵܐ: ܘܐܸܡܪܵܐ ܐ̄ܚܪܹܢܵܐ ܬܸܥܒܸܿܕ ܥܸܕܵܢ ܪܲܡܫܵܐ. 40 ܘܥܸܣܪܘܿܢܵܐ ܕܲܢܫܝܼܦܵܐ ܕܦܝܼܠ ܒܡܸܫܚܵܐ ܥܨܝܼܪܵܐ ܪܘܼܒ݂ܥܹܗ ܕܗܸܡܝܵܢܵܐ: ܘܢܘܼܩܵܝܵܐ ܪܘܼܒ݂ܥܹܗ ܕܗܸܡܝܵܢܵܐ ܕܚܲܡܪܵܐ ܠܐܸܡܪܵܐ ܚܲܕ݂. 41 ܐܸܡܪܵܐ ܬܸܢܝܵܢܵܐ ܬܸܥܒܸܿܕ ܥܸܕܵܢ ܪܲܡܫܵܐ: ܐܲܝܟ݂ ܩܘܼܪܒܵܢܵܐ ܕܨܲܦܪܵܐ: ܘܐܲܝܟ݂ ܢܘܼܩܵܝܹܗ ܬܸܥܒܸܿܕ ܠܹܗ: ܠܪܹܝܚ ܢܝܵܚܵܐ ܩܘܼܪܒܵܢܵܐ ܠܡܵܪܝܵܐ. 42 ܥܠܵܬ݂ܵܐ ܐܲܡܝܼܢܵܐܝܼܬ݂ ܠܕ݂ܵܪܲܝܟܘܿܢ: ܒܬܲܪܥܵܐ ܕܡܲܫܟܲܢܙܲܒ݂ܢܵܐ: ܩܕ݂ܵܡ ܡܵܪܝܵܐ: ܕܐܸܬ݂ܘܲܥܲܕ ܠܟ݂ܘܿܢ ܬܲܡܵܢ ܠܲܡܡܲܠܵܠܘܼ ܥܲܡܟ݂ܘܿܢ. 43 ܕܐܸܬ݂ܘܲܥܲܕ ܬܲܡܵܢ ܠܲܒ݂ܢܲܝ ܝܼܣܪܵܝܹܠ: ܘܐܸܬ݂ܩܲܕܲܫ ܒܐܝܼܩܵܪܝ. 44 ܘܐܹܩܲܕܸܿܫ ܡܲܫܟܲܢܙܲܒ݂ܢܵܐ ܘܡܲܕ݂ܒܚܵܐ: ܘܠܲܐܗܪܘܿܢ ܘܠܲܒ݂ܢܵܘܗܝ ܐܹܩܲܕܸܿܫ ܠܝܼ ܠܟ݂ܵܗܢܘܼܬ݂ܵܐ. 45 ܘܐܸܫܪܸܐ ܒܓ݂ܵܘ ܒܢܲܝ ܝܼܣܪܵܝܹܠ: ܘܐܸܗܘܸܐ ܠܗܘܿܢ ܐܲܠܵܗܵܐ. 46 ܘܢܸܕܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܗܘܿܢ: ܕܐܲܦܩܹܬ݂ ܐܸܢܘܿܢ ܡܼܢ ܐܲܪܥܵܐ ܕܡܸܨܪܹܝܢ: ܘܐܸܫܪܸܐ ܒܲܝܢܵܬ݂ܗܘܿܢ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܗܘܿܢ.

********

ܩܦܠܐܘܢ : ܠ.

1 ܘܲܥܒܸܕ ܡܲܕ݂ܒܚܵܐ ܕܡܲܥܛܲܪ ܥܸܛܪܵܐ: ܕܩܲܝܣܵܐ ܕܐܸܫܟܵܪܥܵܐ ܬܸܥܒܕ݂ܝܼܘܗܝ. 2 ܐܲܡܵܐ ܐܘܼܪܟܹܗ: ܘܐܲܡܵܐ ܦܬ݂ܵܝܹܗ: ܡܪܲܒܲܥ ܢܸܗܘܸܐ: ܘܬܲܪܬܹܿܝܢ ܐܲܡܝܼܢ ܪܵܘܡܹܗ: ܡܸܢܹܗ ܢܸܗܘܝܵܢ ܩܲܪܢܵܬܹܗ. 3 ܘܲܩܪܘܿܡܲܝܗܝ ܕܲܗܒ݂ܵܐ ܕܲܟ݂ܝܵܐ: ܐܸܓܵܪܹܗ ܘܐܸܣܵܘܗܝ ܟܲܕ݂ ܚܵܕܲܪ: ܘܩܲܪܢܵܬܹܗ: ܘܲܥܒܸܕ ܠܹܗ ܟܠܝܼܠܵܐ ܕܕܲܗܒ݂ܵܐ ܟܲܕ݂ ܚܵܕܲܪ. 4 ܘܬܲܪܬܹܿܝܢ ܙܲܩܙܩܵܬ݂ܵܐ ܕܕܲܗܒ݂ܵܐ ܬܸܥܒܸܿܕ ܠܹܗ ܠܬܲܚܬ ܡܼܢ ܟܠܝܼܠܹܗ: ܥܲܠ ܬܲܪܬܹܿܝܢ ܙܵܘܝܵܬܹܗ ܬܸܥܒܸܿܕ ܥܲܠ ܬܪܹܝܢ ܣܸܛܪܵܘܗܝ: ܘܢܸܗܘܝܵܢ ܕܘܼܟܬ݂ܵܐ ܠܩܘܼܦܹ̈ܐ ܠܡܸܫܩܠܹܗ ܒܗܘܿܢ. 5 ܘܲܥܒܸܕ݂ ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܲܩܪܘܿܡ ܐܸܢܘܿܢ ܕܲܗܒ݂ܵܐ. 6 ܘܣܝܼܡܲܝܗܝ ܩܕ݂ܵܡ ܦܪܵܣܵܐ ܕܥܲܠ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ: ܩܕ݂ܵܡ ܚܘܼܣܵܝܵܐ ܕܥܲܠ ܣܵܗܕܘܼܬ݂ܵܐ: ܘܐܸܬ݂ܘܲܥܲܕ ܠܵܟ݂ ܬܲܡܵܢ. 7 ܘܢܸܗܘܸܐ ܡܲܥܛܲܪ ܥܠܵܘܗܝ ܐܲܗܪܘܿܢ ܥܸܛܪܵܐ ܕܒܸܣܡܹ̈ܐ ܡܼܢ ܨܦܲܪ ܠܲܨܦܲܪ: ܡܵܐ ܕܲܡܛܲܝܸܒ ܫܪܵܓܹ̈ܐ ܢܲܥܛܪܝܼܘܗܝ. 8 ܘܡܵܐ ܕܡܲܕ݂ܠܸܩ ܐܲܗܪܘܿܢ ܫܪܵܓܹ̈ܐ ܒܹܝܬ݂ ܫܸܡ̈ܫܹܐ ܢܲܥܛܪܝܼܘܗܝ: ܥܸܛܪܵܐ ܐܲܡܝܼܢܵܐܝܼܬ݂ ܩܕ݂ܵܡ ܡܵܪܝܵܐ ܠܕ݂ܵܪܲܝܟܘܿܢ. 9 ܠܵܐ ܬܲܣܩܘܼܢ ܥܠܵܘܗܝ ܥܸܛܪܵܐ ܢܘܼܟ݂ܪܵܝܵܐ: ܘܲܥܠܵܬ݂ܵܐ: ܘܩܘܼܪܒܵܢܵܐ: ܘܢܘܼܩܵܝܵܐ ܠܵܐ ܬܢܲܩܘܿܢ ܥܠܵܘܗܝ. 10 ܘܲܢܚܲܣܸܐ ܐܲܗܪܘܿܢ ܥܲܠ ܩܲܪܢܵܬܹܗ ܕܡܲܕ݂ܒܚܵܐ ܚܕ݂ܵܐ ܒܫܲܢ̄ܬܵܐ: ܡܼܢ ܕܡܵܐ ܕܲܚܛܵܗܵܐ ܕܚܘܼܣܵܝܵܐ: ܚܕ݂ܵܐ ܒܫܲܢ̄ܬܵܐ ܢܚܲܣܸܐ ܥܠܵܘܗܝ ܠܕ݂ܵܪܲܝܟܘܿܢ ܩܕ݂ܘܿܫ ܩܘܼܕ݂ܫܝܼܢ ܗ̄ܘܼ ܠܡܵܪܝܵܐ. 11 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ. 12 ܟܲܕ݂ ܬܩܲܒܸܿܠ ܚܘܼܫܒܵܢܵܐ ܕܲܒ݂ܢܲܝ ܝܼܣܪܵܝܹܠ ܠܡܸܢܝܵܢܗܘܿܢ: ܢܸܬܸܿܠܘܼܢ ܓܒܲܪ ܦܘܼܪܩܵܢ ܢܲܦ̮ܫܹܗ ܠܡܵܪܝܵܐ: ܡܵܐ ܕܲܡܢܲܝܬܿ ܐܸܢܘܿܢ: ܕܠܵܐ ܢܸܗܘܸܐ ܒܗܘܿܢ ܡܵܘܬܵܐ ܡܵܐ ܕܲܡܢܲܝܬܿ ܐܸܢܘܿܢ. 13 ܗܵܟܲܢܵܐ ܢܸܬܿܠܘܼܢ ܟܠ ܕܥܵܒܲܪ ܒܡܸܢܝܵܢܵܐ: ܦܸܠܓܘܼܬ݂ ܡܲܬ݂ܩܵܠܵܐ ܒܡܲܬ݂ܩܵܠܲܝ ܩܘܼܕ݂ܫܵܐ: ܥܸܣܪܝܼܢ ܙܘܼܙܝܼܢ ܡܲܬ݂ܩܵܠܵܐ: ܦܸܠܓܿܘܼܬ݂ ܡܲܬ݂ܩܵܠܵܐ ܦܘܼܪܫܵܢܵܐ ܠܡܵܪܝܵܐ. 14 ܟܠ ܕܥܵܒܲܪ ܒܸܡܢܝܵܢܵܐ ܡܼܢ ܒܲܪ ܥܸܣܪܝܼܢ ܫܢܝܼܢ ܘܲܠܥܸܠ: ܢܸܬܸܿܠ ܦܘܼܪܫܵܢܵܐ ܠܡܵܪܝܵܐ. 15 ܕܥܲܬܿܝܼܪ ܠܵܐ ܢܲܣܓܸܿܐ: ܘܲܕ݂ܡܸܣܟܹܿܝܢ ܠܵܐ ܢܲܙܥܲܪ ܡܼܢ ܦܸܠܓܿܘܼܬ݂ ܡܲܬ݂ܩܵܠܵܐ: ܠܡܸܬܲܠ ܦܘܼܪܫܵܢܵܐ ܠܡܵܪܝܵܐ: ܠܲܡܚܲܣܵܝܘܼ ܥܲܠ ܢܲܦ̮ܫܵܬ݂ܟ݂ܘܿܢ. 16 ܘܬܸܣܲܒ݂ ܟܸܣܦܵܐ ܕܚܘܼܣܵܝܵܐ ܡܼܢ ܒܢܲܝ ܝܼܣܪܵܝܹܠ: ܘܬܸܬܸܿܠ ܠܦܘܼܠܚܵܢܵܐ ܕܡܲܫܟܲܢ ܙܲܒ݂ܢܵܐ: ܘܢܸܗܘܸܐ ܠܲܒ݂ܢܲܝ ܝܼܣܪܵܝܹܠ ܕܘܼܟ݂ܪܵܢܵܐ ܩܕ݂ܵܡ ܡܵܪܝܵܐ: ܠܲܡܚܲܣܵܝܘܼ ܥܲܠ ܢܲܦ̮ܫܵܬ݂ܗܘܿܢ. 17 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ. 18 ܥܒܸܕ݂ ܠܲܩܢܵܐ ܕܲܢܚܵܫܵܐ: ܘܟܲܢܵܐ ܕܲܢܚܵܫܵܐ ܠܲܫܝܵܓ݂ܬܵܐ: ܘܣܝܼܡܲܝܗ ܒܹܝܬ݂ ܡܲܫܟܲܢܙܲܒ݂ܢܵܐ ܘܒܹܝܬ݂ ܡܲܕ݂ܒܚܵܐ: ܘܗܲܒ݂ ܬܲܡܵܢ ܡܲܝܵܐ. 19 ܘܲܢܫܝܼܓ݂ܘܿܢ ܐܲܗܪܘܿܢ ܘܲܒ݂ܢܵܘܗܝ ܡܸܢܵܗ ܐܝܼܕܲܝܗܘܿܢ ܘܪܸܓ݂ܠܲܝܗܘܿܢ. 20 ܡܵܐ ܕܥܵܐܠܝܼܢ ܠܡܲܫܟܲܢ ܙܲܒ݂ܢܵܐ: ܢܫܝܼܓ݂ܘܿܢ ܒܡܲܝܵܐ ܘܠܵܐ ܢܡܘܼܬ݂ܘܼܢ: ܘܡܵܐ ܕܩܲܪܒܿܝܼܢ ܠܡܲܕ݂ܒܚܵܐ ܠܲܡܫܲܡܵܫܘܼ ܘܲܠܡܲܥܛܵܪܘܼ ܩܘܼܪܒܵܢܵܐ ܠܡܵܪܝܵܐ. 21 ܢܫܝܼܓ݂ܘܼܢ ܐܝܼܕܲܝܗܘܿܢ ܘܪܸܓ݂ܠܲܝܗܘܿܢ: ܘܠܵܐ ܢܡܘܼܬ݂ܘܼܢ: ܘܬܸܗܘܸܐ ܠܗܘܿܢ ܠܲܩܝܵܡܵܐ ܕܲܠܥܵܠܲܡ: ܠܹܗ ܘܲܠܙܲܪܥܹܗ ܠܕ݂ܵܪܲܝܗܘܿܢ. 22 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ: ܘܐܸܡܲܪ ܠܹܗ. 23 ܐܲܢ̄ܬ ܣܲܒ݂ ܠܵܟ݂ ܒܸܣܡܵܐ ܪܹܫܵܝܵܐ: ܡܘܼܪܵܐ ܕܲܟ݂ܝܵܐ ܚܲܡܸܫܡܵܐܐ: ܘܩܹܘܢܵܡܘܿܢ ܒܸܣܡܵܐ ܦܸܠܓܿܘܼܬܹܗ ܡܵܐܬܹܿܝܢ ܘܚܲܡܫܝܼܢ: ܘܩܲܢܝܵܐ ܕܒܸܣܡܵܐ ܡܵܐܬܹܿܝܢ ܘܚܲܡܫܝܼܢ. 24 ܘܩܲܣܝܵܐ ܚܲܡܸܫܡܵܐܐ ܒܡܲܬ݂ܩܵܠܲܝ ܩܘܼܕ݂ܫܵܐ: ܘܡܸܫܚܵܐ ܕܙܲܝܬܵܐ ܗܸܡܝܵܢܵܐ. 25 ܘܲܥܒܸܕܲܝܗܝ ܡܸܫܚܵܐ: ܡܫܝܼܚܘܼܬ݂ ܩܘܼܕ݂ܫܵܐ: ܘܒܸܣܡܵܐ ܡܒܲܣܡܵܐ ܥܒܸܕ: ܡܒܲܣܸܡ ܡܸܫܚܵܐ ܕܲܡܫܝܼܚܘܼܬ݂ܵܐ: ܘܩܘܼܕܫܵܐ ܢܸܗܘܸܐ. 26 ܘܬܸܡܫܘܿܚ ܒܹܗ ܡܲܫܟܲܢ ܙܲܒ݂ܢܵܐ: ܘܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ. 27 ܘܦܵܬ݂ܘܿܪܵܐ ܘܟ݂ܠܗܘܿܢ ܡܵܐܢܵܘܗܝ: ܘܠܲܡܢܵܪܬܵܐ ܘܲܠܡܵܐܢܹܝܗܿ: ܘܲܠܡܲܕ݂ܒܚܵܐ ܕܥܸܛܪܵܐ. 28 ܘܲܠܡܲܕܒܚܵܐ ܕܲܥܠܵܬ݂ܵܐ ܘܲܠܟ݂ܠܗܘܿܢ ܡܵܐܢܵܘܗܝ: ܘܲܠܠܲܩܢܵܐ ܘܲܠܟܲܢܵܐ. 29 ܘܩܲܕܸܿܫ ܐܸܢܘܿܢ: ܘܢܸܗܘܘܿܢ ܩܕ݂ܘܿܫ ܩܘܼܕ݂ܫܝܼܢ: ܘܟ݂ܠ ܕܢܸܩܪܘܿܒ݂ ܠܗܘܿܢ ܢܸܬ݂ܩܲܕܲܫ. 30 ܘܠܲܐܗܪܘܿܢ ܘܠܲܒ݂ܢܵܘܗܝ ܬܸܡܫܘܿܚ: ܘܲܬ݂ܩܲܕܸܿܫ ܐܸܢܘܿܢ ܠܲܡܟܲܗܵܢܘܼ ܠܝܼ. 31 ܘܥܲܡ ܕܒܹܝܬ݂ ܝܼܣܪܵܝܹܠ ܡܲܠܸܠ: ܘܐܸܡܲܪ: ܡܸܫܚܵܐ ܕܲܡܫܝܼܚܘܼܬ݂ܵܐ ܠܩܘܼܕ݂ܫܵܐ ܢܸܗܘܸܐ ܠܝܼ ܗܵܢܵܐ ܠܕ݂ܵܪܲܝܟܘܿܢ. 32 ܥܲܠ ܒܸܣܪܵܐ ܕܐ̄ܢܵܫܵܐ ܠܵܐ ܢܸܬܿܬܿܫܝܼܦ: ܘܒܲܕ݂ܡܘܼܬܹܗ ܠܵܐ ܬܸܥܒܿܕ݂ܘܼܢ: ܡܸܛܠ ܕܩܘܼܕ݂ܫܵܐ ܗ̄ܘܼ: ܘܩܘܼܕ݂ܫܵܐ ܢܸܗܘܸܐ ܠܟ݂ܘܿܢ. 33 ܘܓܲܒ݂ܪܵܐ ܕܲܢܒܲܣܸܡ ܐܲܟ݂ܘܵܬܹܗ: ܘܲܕ݂ܢܸܬܸܿܠ ܡܸܢܹܗ ܠܢܘܼܟ݂ܪܵܝܵܐ: ܢܹܐܒܲܕ ܡܼܢ ܥܲܡܹܗ. 34 ܘܐܸܡܲܪ ܡܵܪܝܵܐ ܠܡܘܼܫܹܐ: ܣܲܒ݂ ܠܵܟ݂ ܒܸܣܡܵܐ ܢܛܵܦܬܵܐ: ܘܛܸܦܪܵܐ: ܘܚܸܠܒܵܢܝܼܬ݂ܵܐ ܒܸܣܡܵܐ: ܘܲܠܒ݂ܘܿܢ̄ܬܵܐ ܕܟ݂ܝܼܬ݂ܵܐ: ܡܲܬ݂ܩܵܠ ܡܲܬ݂ܩܵܠ ܢܸܗܘܸܐ. 35 ܘܲܥܒܸܕܲܝܗܝ ܥܸܛܪܵܐ ܕܒܸܣܡܹ̈ܐ ܥܒ݂ܵܕ݂ܵܐ ܡܒܲܣܡܵܐ: ܦܝܼܠܹ̈ܐ ܕܲܕ݂ܟܹܝܢ ܠܩܘܼܕ݂ܫܵܐ. 36 ܘܲܫܚܘܿܩ ܡܸܢܹܗ ܘܐܲܕܸܩ: ܘܗܲܒ݂ ܡܸܢܹܗ ܩܕ݂ܵܡ ܣܵܗܕܘܼܬ݂ܵܐ ܒܡܲܫܟܲܢ ܙܲܒ݂ܢܵܐ: ܕܐܸܬ݂ܘܲܥܲܕ݂ ܠܵܟ݂ ܬܲܡܵܢ: ܩܕ݂ܘܿܫ ܩܘܕ݂ܫܝܼܢ ܢܸܗܘܸܐ ܠܟ݂ܘܿܢ. 37 ܘܥܸܛܪܵܐ ܕܬܸܥܒܿܕ݂ܘܼܢ: ܒܲܕ݂ܡܘܼܬܹܗ ܠܵܐ ܬܸܥܒܿܕ݂ܘܼܢ ܠܟ݂ܘܿܢ: ܩܘܼܕ݂ܫܵܐ ܢܸܗܘܸܐ ܠܵܟ݂ ܠܡܵܪܝܵܐ. 38 ܘܓܲܒ݂ܪܵܐ ܕܢܸܥܒܸܿܕ ܐܲܟ݂ܘܵܬܹܗ ܠܲܡܪܵܚܘܼ ܒܹܗ: ܢܹܐܒܲܕ ܡܼܢ ܥܲܡܹܗ.

********

ܩܦܠܐܘܢ : ܠܐ.

1 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ ܘܐܸܡܲܪ ܠܹܗ. 2 ܚܙܝܼ ܕܲܩܪܹܝܬ݂ ܒܫܸܡ ܠܒܲܨܠܝܼܐܹܝܠ ܒܲܪ ܐܘܼܪܝܼ: ܒܲܪ ܚܘܿܪ: ܡܼܢ ܫܲܒ݂ܛܵܐ ܕܲܝܗܘܼܕ݂ܵܐ. 3 ܘܲܡܠܹܝܬܹܗ ܪܘܼܚܵܐ ܕܐܲܠܵܗܵܐ: ܒܚܸܟ݂ܡܬ݂ܵܐ: ܘܲܒ݂ܒ݂ܘܼܝܵܢܵܐ: ܘܒ݂ܝܼܕܲܥܬ݂ܵܐ: ܘܲܒ݂ܟ݂ܠ ܥܒ݂ܵܕ݂. 4 ܠܡܲܠܵܦܘܼ ܐܘܼܡܵܢܘܼܬ݂ܵܐ: ܠܡܸܥܒܲܕ݂ ܒܕܲܗܒ݂ܵܐ: ܘܲܒ݂ܣܹܐܡܵܐ ܒܲܢܚܵܫܵܐ. 5 ܘܒ݂ܐܘܼܡܵܢܘܼܬ݂ܵܐ ܕܟܹܐܦܹ̈ܐ ܠܲܡܫܲܠܵܡܘܼ: ܘܲܒ݂ܢܲܓܵܪܘܼܬ݂ܵܐ ܕܩܲܝܣܹ̈ܐ: ܠܡܸܥܒܲܕ ܟܠ ܥܒ݂ܵܕ݂. 6 ܘܐܸܢܵܐ ܗܵܐ ܝܸܗ̄ܒܹܿܬ݂ ܥܲܡܹܗ: ܠܐܹܠܝܼܗܲܒ݂ ܒܲܪ ܐܲܚܝܼܣܡܵܟ݂ ܡܼܢ ܫܲܒ݂ܛܵܐ ܕܕ݂ܵܢ: ܘܲܒ݂ܠܸܒܵܐ ܕܟ݂ܠ ܚܲܟܝܼܡܲܝ ܠܸܒܵܐ ܝܸܗ̄ܒܹܿܬ݂ ܚܸܟ݂ܡܬ݂ܵܐ: ܘܢܸܥܒܕ݂ܘܼܢ ܟܠ ܡܸܕܸܿܡ ܕܦܲܩܸܕܬܵܟ݂. 7 ܡܲܫܟܲܢ ܙܲܒ݂ܢܵܐ: ܘܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ: ܘܚܘܼܣܵܝܵܐ ܕܲܥܠܹܝܗ: ܘܟ݂ܠ ܡܵܐܢܲܝ ܡܲܫܟܢܵܐ. 8 ܘܦܵܬ݂ܘܿܪܵܐ ܘܟ݂ܠ ܡܵܐܢܵܘܗܝ: ܘܲܡܢܵܪܬܵܐ ܕܟ݂ܝܼܬ݂ܵܐ: ܘܟ݂ܠܗܘܿܢ ܡܵܐܢܹܝܗ: ܘܡܲܕ݂ܒܚܵܐ ܕܥܸܛܪܵܐ. 9 ܡܲܕ݂ܒܚܵܐ ܕܲܥܠܵܬ݂ܵܐ ܘܟ݂ܠ ܡܵܐܢܵܘܗܝ: ܘܠܲܩܢܵܐ ܘܟܲܢܵܐ. 10 ܘܲܠܒ݂ܘܼܫܲܝ ܬܸܫܡܸܫܬܵܐ: ܘܲܠܒ݂ܘܼܫܲܝ ܩܘܼܕ݂ܫܵܐ ܠܐܲܗܪܘܿܢ ܟܵܗܢܵܐ: ܘܲܠܒ݂ܘܼܫܹ̈ܐ ܠܲܒ݂ܢܵܘܗܝ: ܠܲܡܟܲܗܵܢܘܼ ܠܝܼ. 11 ܘܡܸܫܚܵܐ ܕܲܡܫܝܼܚܘܼܬ݂ܵܐ: ܘܥܸܛܪܵܐ ܕܒܸܣܡܹ̈ܐ ܠܩܘܼܕ݂ܫܵܐ ܟܠ ܡܸܕܸܿܡ ܕܦܲܩܸܕܬܵܟ݂ ܢܸܥܒܿܕ݂ܘܼܢ. 12 ܘܐܸܡܲܪ ܡܵܪܝܵܐ ܠܡܘܼܫܹܐ. 13 ܐܲܢ̄ܬ ܐܸܡܲܪ ܠܲܒ݂ܢܲܝ ܝܼܣܪܵܝܹܠ: ܫܲܒܹܿܐ ܗܘܲܝܬܿܘܿܢ ܢܵܛܪܝܼܢ: ܡܸܛܠ ܕܐܵܬ݂ܵܐ ܗ̄ܝܼ ܒܲܝܢܲܝ ܘܲܠܟ݂ܘܿܢ ܠܕ݂ܵܪܲܝܟܘܿܢ: ܕܬܸܕܿܥܘܿܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ ܕܲܡܩܲܕܸܿܫ ܐ̄ܢܵܐ ܠܟ݂ܘܿܢ. 14 ܛܲܪܘ ܫܲܒܬ݂ܵܐ: ܡܸܛܠ ܕܩܘܼܕ݂ܫܵܐ ܗ̄ܝܼ ܠܟ݂ܘܿܢ: ܟܠܡܵܢ ܕܢܲܚܠܝܼܗܿ: ܡܸܬ݂ܩܛܵܠܘܼ ܢܸܬ݂ܩܛܸܠ: ܘܟ݂ܠ ܡܿܢ ܕܢܸܥܒܸܿܕ ܒܵܗ ܥܒ݂ܵܕ݂ܵܐ: ܢܹܐܒܲܕ݂ ܐ̄ܢܵܫܵܐ ܗܵܘ ܡܼܢ ܥܲܡܹܗ. 15 ܫܬܵܐ ܝܵܘܡܝܼܢ ܬܸܥܒܕ݂ܘܼܢ ܥܒ݂ܵܕ݂ܵܐ: ܘܲܒ݂ܝܵܘܡܵܐ ܫܒ݂ܝܼܥܵܝܵܐ ܫܲܒܬ݂ܵܐ ܢܝܵܚܵܐ: ܩܘܼܕ݂ܫܵܐ ܗ̄ܝܼ ܠܡܵܪܝܵܐ: ܟܠ ܡܿܢ ܕܢܸܥܒܸܕ ܥܒ݂ܵܕ݂ܵܐ ܒܝܵܘܡܵܐ ܕܫܲܒܬ݂ܵܐ: ܡܸܬ݂ܩܛܵܠܘܼ ܢܸܬ݂ܩܛܸܠ. 16 ܘܢܸܛܪܘܼܢ ܒܢܲܝ ܝܼܣܪܵܝܹܠ ܫܲܒܬ݂ܵܐ ܠܡܵܪܝܵܐ: ܠܡܸܥܒܲܕ ܫܲܒܬ݂ܵܐ ܠܕ݂ܵܪܲܝܗܘܿܢ ܩܝܵܡܵܐ ܕܲܠܥܵܠܲܡ. 17 ܒܲܝܢܲܝ ܠܲܕ݂ܒܹܝܬ݂ ܝܼܣܪܵܝܹܠ ܐܵܬ݂ܵܐ ܗ̄ܝܼ ܠܥܵܠܲܡ: ܡܸܛܠ ܕܠܸܫܬܵܐ ܝܵܘܡܝܼܢ ܥܒܲܕ ܡܵܪܝܵܐ ܫܡܲܝܵܐ ܘܐܲܪܥܵܐ: ܘܝܲܡܡܹ̈ܐ ܘܟ݂ܠ ܕܐܝܼܬ݂ ܒܗܘܿܢ: ܘܲܒ݂ܝܵܘܡܵܐ ܫܒ݂ܝܼܥܵܝܵܐ ܫܠܝܼ ܘܐܸܬܿܬܿܢܝܼܚ. 18 ܘܝܲܗ̄ܒ݂ ܠܡܘܼܫܹܐ ܟܲܕ݂ ܫܲܠܸܡ ܠܲܡܡܲܠܵܠܘܼ ܥܲܡܹܗ ܒܛܘܼܪܵܐ ܕܣܝܼܢܲܝ: ܬܲܪܬܹܿܝܢ ܠܘܼܚܹ̈ܐ ܕܣܵܗܕܘܼܬ݂ܵܐ: ܠܘܼܚܹ̈ܐ ܕܟܹܐܦܵܐ: ܕܲܟ݂ܬ݂ܝܼܒ݂ܵܢ ܒܨܸܒ݂ܥܹܗ ܕܐܲܠܵܗܵܐ.

********

ܩܦܠܐܘܢ : ܠܒ.

1 ܘܲܚܙܵܘ ܥܲܡܵܐ ܕܐܵܘܚܲܪ ܡܘܼܫܹܐ ܕܢܸܚܘܿܬ݂ ܡܼܢ ܛܘܼܪܵܐ: ܘܐܸܬ݂ܟܲܢܲܫܘ ܥܲܡܵܐ ܥܲܠ ܐܲܗܪܘܿܢ: ܘܐܵܡܪܝܼܢ ܠܹܗ: ܩܘܼܡ ܥܒܲܕ݂ ܠܲܢ ܐܲܠܵܗܹ̈ܐ ܕܢܹܐܙܠ̄ܘܼܢ ܩܕ݂ܵܡܲܝܢ: ܡܸܛܠ ܕܗܵܢܵܐ: ܓܲܒ݂ܪܵܐ ܡܘܼܫܹܐ ܕܐܲܣܩܲܢ ܡܼܢ ܐܲܪܥܵܐ ܕܡܸܨܪܹܝܢ: ܠܵܐ ܝܵܕ݂ܥܝܼܢܲܢ ܡܵܢܵܐ ܗܘ̤ܵܝܗܝ. 2 ܐܸܡܲܪ ܠܗܘܿܢ ܐܲܗܪܘܿܢ: ܦܪܲܩܘ ܩܕ݂ܵܫܹ̈ܐ ܕܕܲܗܒ݂ܵܐ ܕܐܝܼܬ݂ ܒܐܸܕ݂ܢܹ̈ܐ ܕܢܸܫܲܝܟܘܿܢ: ܘܕܲܒ݂ܢܲܝܟܘܿܢ: ܘܕܲܒ݂ܢܵܬ݂ܟ݂ܘܿܢ: ܘܐܲܝܬܵܘ ܠܝܼ. 3 ܘܲܦܪܲܩܘ ܟܠܹܗ ܥܲܡܵܐ ܩܕ݂ܵܫܹ̈ܐ ܕܐܝܼܬ݂ ܒܐܸܕ݂ܢܲܝܗܘܿܢ: ܘܐܲܝܬܿܝܼܘ ܠܐܲܗܪܘܿܢ. 4 ܘܢܲܣܒܹܿܗ ܡܸܢܗܘܿܢ: ܘܨܵܪܹܗ ܒܛܘܼܦ̮ܣܵܐ: ܘܥܲܒ݂ܕܹܿܗ ܥܸܓ݂ܠܵܐ ܕܢܸܣܟܿܬ݂ܵܐ: ܘܐܸܡܲܪܘ ܗܵܢܵܘ ܐܲܠܵܗܵܟ݂ ܝܼܣܪܵܝܹܠ: ܕܐܲܣܩܲܟ݂ ܡܼܢ ܐܲܪܥܵܐ ܕܡܸܨܪܹܝܢ. 5 ܘܲܕ݂ܚܸܠ ܐܲܗܪܘܿܢ: ܘܲܒ݂ܢܵܐ ܡܲܕ݂ܒܚܵܐ ܩܕ݂ܵܡܵܘܗܝ: ܘܲܩܪܵܐ ܐܲܗܪܘܿܢ: ܘܐܸܡܲܪ: ܚܲܓܵܐ ܗ̄ܘܼ ܠܡܵܪܝܵܐ ܡܚܵܪ. 6 ܘܩܲܕܸܿܡܘ ܠܝܵܘܡܵܐ ܕܒ݂ܵܬ݂ܪܹܗ: ܘܐܲܣܸܩܘ ܥܠܵܘܵܬ݂ܵܐ: ܘܕܲܒܲܚܘ ܫܲܠܡܹ̈ܐ: ܘܩܲܪܸܒ݂ܘ ܩܘܼܪ̈ܒܵܢܹܐ: ܘܝܼܬܸܒ݂ܘ ܥܲܡܵܐ ܠܡܹܐܟܲܠ ܘܲܠܡܸܫܬܵܐ: ܘܩܵܡܘ ܠܡܸܓ݂ܚܵܟ݂ ܘܲܠܡܸܫܬܲܥܵܝܘܼ. 7 ܘܐܸܡܲܪ ܡܵܪܝܵܐ ܠܡܘܼܫܹܐ: ܚܘܿܬ݂ ܙܸܠ ܠܵܟ݂ ܡܸܟܵܐ: ܡܸܛܠ ܕܚܲܒܸܿܠ ܥܲܡܵܟ݂ ܕܐܲܦܸܩܬܿ ܡܼܢ ܡܸܨܪܹܝܢ. 8 ܣܛܵܘ ܒܲܥܓܲܠ ܡܼܢ ܐܘܼܪܚܵܐ ܕܦܲܩܸܕܬܿ ܐܸܢܘܿܢ: ܘܲܥܒܲܕ݂ܘ ܠܗܘܿܢ ܥܸܓ݂ܠܵܐ ܕܢܸܣܟܿܬ݂ܵܐ: ܘܲܣܓܸܕ݂ܘ ܠܹܗ: ܘܕܲܒܲܚܘ ܠܹܗ: ܘܐܸܡܲܪܘ: ܗܵܢܵܘ ܐܲܠܵܗܵܟ݂ ܝܼܣܪܵܝܹܠ: ܕܐܲܣܩܲܟ݂ ܡܼܢ ܐܲܪܥܵܐ ܕܡܸܨܪܹܝܢ. 9 ܘܐܸܡܲܪ ܡܵܪܝܵܐ ܠܡܘܼܫܹܐ: ܚܙܹܝܬܹܗ ܠܥܲܡܵܐ ܗܵܢܵܐ: ܘܗܵܐ ܥܲܡܵܐ ܩܫܹܐ ܩܕ݂ܵܠܵܐ ܗ̄ܘܼ. 10 ܗܵܫܵܐ ܫܒ݂ܘܿܩܲܝܢܝ ܘܢܸܬ݂ܩܲܦ ܪܘܼܓ݂ܙܝ ܒܗܘܿܢ: ܘܐܸܚܪܘܿܒ݂ ܐܸܢܘܿܢ: ܘܐܹܥܒܿܕ݂ܵܟ݂ ܠܥܲܡܵܐ ܪܲܒܵܐ. 11 ܘܨܲܠܝܼ ܡܘܼܫܹܐ ܩܕ݂ܵܡ ܡܵܪܝܵܐ ܐܲܠܵܗܹܗ: ܘܐܸܡܲܪ: ܠܵܐ ܡܵܪܝܵܐ: ܠܵܐ ܢܸܬ݂ܩܲܦ ܪܘܼܓ݂ܙܵܟ݂ ܒܥܲܡܵܟ݂ ܕܐܲܦܸܩܬ ܡܼܢ ܡܸܨܪܹܝܢ: ܒܚܲܝܠܵܟ݂ ܪܲܒܵܐ: ܘܒܲܕ݂ܪܵܥܵܟ݂ ܪܵܡܵܐ. 12 ܘܠܵܐ ܢܹܐܡܪܘܼܢ ܡܸܨܪܵܝܹܐ ܕܲܠܒ݂ܝܼܫܬܿܗܘܿܢ ܐܲܦܸܩ ܐܸܢܘܿܢ: ܕܲܢܩܲܛܸܠ ܐܸܢܘܿܢ ܒܲܝܢܲܝ ܛܘܼܪܹ̈ܐ: ܘܲܕ݂ܢܸܚܪܘܿܒ݂ ܐܸܢܘܿܢ ܡܼܢ ܐܲܦܲܝ ܐܲܪܥܵܐ: ܐܸܬܿܬܿܢܝܼܚ ܡܼܢ ܚܸܡܬ݂ܵܐ ܕܪܘܼܓ݂ܙܵܟ݂: ܘܐܸܬ݂ܪܲܥܵܐ ܥܲܠ ܒܝܼܫܬܹܿܗ ܕܥܲܡܵܟ݂. 13 ܐܸܬܿܕܲܟ݂ܪ ܠܐܲܒ݂ܪܵܗܵܡ: ܘܠܐܝܼܣܚܵܩ: ܘܠܝܼܣܪܵܝܹܠ ܥܲܒ݂ܕܵܟ݂: ܕܝܼܡܲܝܬܿ ܠܗܘܿܢ ܒܵܟ݂: ܘܐܸܡܲܪܬ ܠܗܘܿܢ: ܕܐܲܣܓܹܿܐ ܙܲܪܥܟ݂ܘܿܢ ܐܲܝܟ݂ ܟܵܘܟܿܒܹ̈ܐ ܕܒܲܫܡܲܝܵܐ: ܘܟ݂ܠܵܗ ܐܲܪܥܵܐ ܕܐܸܡܲܪܬ ܐܸܬܸܿܠ ܠܙܲܪܥܟ݂ܘܿܢ ܘܢܹܐܪܬ݂ܘܼܢܵܗ ܠܥܵܠܲܡ. 14 ܘܐܸܬ݂ܪܲܥܝ ܡܵܪܝܵܐ ܥܲܠ ܒܝܼܫܬܵܐ ܕܐܸܡܲܪ ܠܡܸܥܒܲܕ݂ ܠܥܲܡܹܗ. 15 ܘܐܸܬ݂ܦܢܝܼ ܡܘܼܫܹܐ: ܘܲܢܚܸܬ݂ ܡܼܢ ܛܘܼܪܵܐ: ܘܬܲܪܬܹܿܝܢ ܠܘܼܚܹ̈ܐ ܕܣܵܗܕܘܼܬ݂ܵܐ ܒܐܝܼܕܹܗ: ܠܘܼܚܹ̈ܐ ܕܲܟ݂ܬ݂ܝܼܒ݂ܵܢ ܡܼܢ ܬܪܲܝܗܘܿܢ ܣܸܛܪܲܝܗܹܝܢ: ܡܸܟܵܐ ܘܡܸܟܵܐ ܟܬ݂ܝܼܒ݂ܵܢ. 16 ܘܠܘܼܚܹ̈ܐ ܥܒ݂ܵܕ݂ܵܐ ܐܸܢܹܝܢ ܕܐܲܠܵܗܵܐ: ܘܲܟ݂ܬ݂ܵܒ݂ܵܐ ܟܬ݂ܵܒܹܗ ܗ̄ܘܼ ܕܐܲܠܵܗܵܐ ܪܫܝܼܡ ܗ̄ܘܵܐ ܥܲܠ ܠܘܼܚܹ̈ܐ. 17 ܘܲܫܡܲܥ ܝܼܫܘܿܥ ܩܵܠܹܗ ܕܥܲܡܵܐ ܟܲܕ ܡܸܬ݂ܟܲܬܲܫ: ܘܐܸܡܲܪ ܠܡܘܼܫܹܐ: ܩܵܠܵܐ ܕܲܩܪܵܒ݂ܵܐ ܒܡܲܫܪܝܼܬ݂ܵܐ. 18 ܐܸܡܲܪ ܠܹܗ ܡܘܼܫܹܐ: ܠܵܐ ܩܵܠܵܐ ܕܡܲܡܠܠܵܐ ܕܓܲܢ̄ܒܵܪܹ̈ܐ: ܘܐܵܦܠܵܐ ܩܵܠܵܐ ܕܚܲܠܵܫܹ̈ܐ: ܩܵܠܵܐ ܕܹܝܢ ܕܲܚܛܝܼܬ݂ܵܐ ܫܵܡܲܥ ܐ̄ܢܵܐ. 19 ܘܟܲܕ݂ ܩܪܸܒ݂ ܠܡܲܫܪܝܼܬ݂ܵܐ: ܚܙܵܝܗܝ ܠܥܸܓ݂ܠܵܐ ܘܲܠܨܸܨ̈ܠܹܐ: ܘܐܸܬܿܬܿܦܝܼܪ ܡܘܼܫܹܐ: ܘܲܫܕ݂ܵܐ ܠܘܼܚܹ̈ܐ ܡܼܢ ܐܝܼܕܹܗ: ܘܬܲܒܲܪ ܐܸܢܝܹܢ ܒܲܫܦܘܿܠܵܘܗܝ ܕܛܘܼܪܵܐ. 20 ܘܢܲܣܒܹܿܗ ܠܥܸܓ݂ܠܵܐ ܕܲܥܒܲܕ݂ܘ: ܘܐܵܘܩܕܹܗ ܒܢܘܼܪܵܐ: ܘܫܵܦܹܗ ܒܫܘܿܦܝܼܢܵܐ: ܥܕܲܡܵܐ ܕܐܸܬܿܕܿܩܸܩ ܐܲܝܟ݂ ܥܲܦܪܵܐ: ܘܒܲܙܩܵܗ ܕܸܩܬܹܗ ܥܲܠ ܐܲܦܲܝ ܡܲܝܵܐ: ܘܐܲܫܩܝܼ ܠܲܕ݂ܒܹܝܬ݂ ܝܼܣܪܵܝܹܠ. 21 ܘܐܸܡܲܪ ܡܘܼܫܹܐ ܠܐܲܗܪܘܿܢ: ܡܵܢܵܐ ܥܒ݂ܵܕ݂ ܠܵܟ݂ ܥܲܡܵܐ ܗܵܢܵܐ: ܕܐܲܝܬܿܝܼܬܿ ܥܠܵܘܗܝ ܚܛܝܼܬ݂ܵܐ ܪܲܒܬ݂ܵܐ. 22 ܘܐܸܡܲܪ ܐܲܗܪܘܿܢ: ܠܵܐ ܢܸܬ݂ܚܲܡܲܬ݂ ܪܘܼܓ݂ܙܹܗ ܕܡܵܪܝ: ܐܲܢ̄ܬ ܝܵܕܲܥ ܐܲܢ̄ܬ ܠܹܗ ܠܥܲܡܵܐ ܗܵܢܵܐ ܕܒ݂ܝܼܫ ܗ̄ܘܼ. 23 ܘܐܸܡܲܪܘ ܠܝܼ: ܥܒܸܕ݂ ܠܲܢ ܐܲܠܵܗܹ̈ܐ ܕܢܹܐܙܠ̄ܘܼܢ ܩܕ݂ܵܡܲܝܢ: ܡܸܛܠ ܕܗܵܢܵܐ ܡܘܼܫܹܐ ܕܐܲܣܩܲܢ ܡܼܢ ܐܲܪܥܵܐ ܕܡܸܨܪܹܝܢ : ܠܵܐ ܝܵܕ݂ܥܝܼܢܲܢ ܡܵܢܵܐ ܗܘ̤ܵܝܗܝ. 24 ܘܐܸܡܪܹܬ݂ ܠܗܘܿܢ: ܡܿܢ ܕܐܝܼܬ݂ ܠܹܗ ܕܲܗܒ݂ܵܐ: ܐܲܝܬܵܘ ܠܝܼ: ܘܐܲܝܬܿܝܼܘ ܠܝܼ: ܘܐܲܪܡܝܼܬܹܗ ܒܢܘܼܪܵܐ: ܘܲܗܘܵܐ ܥܸܓ݂ܠܵܐ ܗܵܢܵܐ. 25 ܘܲܚܙܵܐ ܡܘܼܫܹܐ ܠܥܲܡܵܐ ܕܲܚܛܵܘ ܠܗܘܿܢ: ܕܐܲܚܛܝܼ ܐܸܢܘܿܢ ܐܲܗܪܘܿܢ: ܕܢܸܗܘܘܿܢ ܫܡܵܐ ܣܲܪܝܵܐ ܒܐܲܚܪܵܝܬܿܗܘܿܢ. 26 ܘܩܵܡ ܠܹܗ ܡܘܼܫܹܐ ܒܬܲܪܥܵܐ ܕܡܲܫܟܿܢܵܐ: ܘܐܸܡܲܪ: ܡܲܢܘܼ ܡܼܢ ܡܵܪܝܵܐ: ܢܹܐܬܹܐ ܠܘܵܬ݂ܝ: ܘܐܸܬ݂ܟܲܢܲܫܘ ܠܘܵܬܹܗ ܟܠܗܘܿܢ ܒܢܵܘܗܝ ܕܠܹܘܝܼ. 27 ܘܐܸܡܲܪ ܠܗܘܿܢ ܡܘܼܫܹܐ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܲܪܡܵܘ ܐ̄ܢܵܫ ܣܲܝܦܹܗ ܒܚܲܨܵܘܗܝ: ܥܒܲܪܘ ܘܬ݂ܘܼܒ݂ܘ ܡܼܢ ܬܪܲܥ ܠܲܬ݂ܪܲܥ ܒܡܲܫܪܝܼܬ݂ܵܐ: ܘܲܩܛܘܿܠܘ ܐ̄ܢܵܫ ܠܐܲܚܘܼܗܝ: ܘܐ̄ܢܵܫ ܠܚܲܒ݂ܪܹܗ: ܘܐ̄ܢܵܫ ܠܩܲܪܝܼܒܹܗ. 28 ܘܲܥܒܲܕ݂ܘ ܒܢܲܝ ܠܹܘܝܼ ܐܲܝܟ݂ ܡܸܠܬܹܗ ܕܡܘܼܫܹܐ: ܘܲܢܦܲܠܘ ܡܼܢ ܥܲܡܵܐ ܒܝܵܘܡܵܐ ܗܵܘ: ܐܲܝܟ݂ ܬܠܵܬ݂ܵܐ ܐܲܠܦܝܼܢ ܓܲܒ݂ܪ̈ܝܼܢ. 29 ܘܐܸܡܲܪ ܠܗܘܿܢ ܡܘܼܫܹܐ: ܡܠܵܘ ܐܝܼܕܲܝܟܘܿܢ ܝܵܘܡܵܢܵܐ ܠܡܵܪܝܵܐ: ܐ̄ܢܵܫ ܒܲܒ݂ܪܹܗ ܘܒܲܐܚܘܼܗܝ: ܡܸܛܠ ܕܬܹܐܬܸܐ ܥܠܲܝܟܘܿܢ ܒܘܼܪܟܿܬ݂ܵܐ ܝܵܘܡܵܢܵܐ. 30 ܘܲܗܘܵܐ ܠܝܵܘܡܵܐ ܕܒ݂ܵܬ݂ܪܹܗ: ܘܐܸܡܲܪ ܡܘܼܫܹܐ ܠܥܲܡܵܐ: ܐܲܢ̄ܬܿܘܿܢ ܚܛܲܝܬܿܘܿܢ ܚܛܝܼܬ݂ܵܐ ܗܵܕܹܐ ܪܲܒܿܬ݂ܵܐ: ܗܵܫܵܐ ܐܸܣܲܩ ܠܘܵܬ݂ ܡܵܪܝܵܐ: ܛܵܟ݂ ܢܸܫܒܿܘܿܩ ܠܚܵܘܒܲܝܟܘܿܢ. 31 ܘܲܗܦܲܟ݂ ܡܘܼܫܹܐ ܠܘܵܬ݂ ܡܵܪܝܵܐ ܘܐܸܡܲܪ: ܒܒ݂ܵܥܘܼ ܡܵܪܝܵܐ ܐܲܠܵܗܵܐ: ܫܲܪܝܼܪܵܐܝܼܬ݂ ܚܛܵܐ ܥܲܡܵܐ ܗܵܢܵܐ ܚܛܝܼܬ݂ܵܐ ܪܲܒܿܬ݂ܵܐ: ܘܲܥܒܲܕ݂ܘ ܠܗܘܿܢ ܐܲܠܵܗܹ̈ܐ ܕܕܲܗܒ݂ܵܐ. 32 ܗܵܫܵܐ ܐܸܢ ܫܵܒܹܩ ܐܲܢ̄ܬ ܠܲܚܛܵܗܲܝܗܘܿܢ: ܘܐܸܢ ܠܵܐ: ܥܛܝܼܢܝ ܡܼܢ ܣܸܦܪܵܟ݂ ܕܲܟ݂ܬ݂ܒ݂ܬܿ. 33 ܘܐܸܡܲܪ ܡܵܪܝܵܐ ܠܡܘܼܫܹܐ: ܡܿܢ ܕܲܚܛܵܐ ܠܝܼ ܐܸܥܛܹܝܘܗܝ ܡܼܢ ܣܸܦܪܝ. 34 ܗܵܫܵܐ ܙܸܠ ܐܵܘܒܸܠܵܝܗܝ ܠܥܲܡܵܐ ܗܵܢܵܐ ܠܐܲܝܟܵܐ ܕܐܵܡܲܪ ܐ̄ܢܵܐ ܠܵܟ݂: ܘܗܵܐ ܡܲܠܲܐܟ݂ܝ ܢܹܐܙܲܠ ܩܕ݂ܵܡܲܝܟ: ܘܲܒ݂ܝܵܘܡܵܐ ܕܦܘܼܩܕܵܢܝ ܐܸܦܩܘܿܕ݂ ܥܠܲܝܗܘܿܢ ܚܛܵܗܲܝܗܘܿܢ. 35 ܘܲܡܚܵܐ ܡܵܪܝܵܐ ܠܥܲܡܵܐ: ܥܲܠ ܕܲܦܠܲܚܘ ܠܥܸܓ݂ܠܵܐ ܕܲܥܒܲܕ݂ ܐܲܗܪܘܿܢ.

********

ܩܦܠܐܘܢ : ܠܒ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܣܲܩ ܙܸܠ ܡܸܟܵܐ: ܐܲܢ̄ܬ ܘܥܲܡܵܟ݂ ܕܐܲܦܸܩܬܿ ܡܼܢ ܡܸܨܪܹܝܢ: ܠܐܲܪܥܵܐ ܕܝܼܡܝܼܬ݂ ܠܐܲܒ݂ܪܵܗܵܡ: ܘܠܐܝܼܣܚܵܩ: ܘܲܠܝܲܥܩܘܿܒ݂: ܘܐܸܡܪܹܬ݂ ܠܗܘܿܢ ܕܲܠܙܲܪܥܵܟ݂ ܐܸܬܿܠܝܼܗܿ. 2 ܘܐܹܫܲܕܲܪ ܩܕ݂ܵܡܲܝܟ ܡܲܠܲܐܟ݂ܵܐ: ܘܢܸܚܪܘܿܒ݂ ܠܲܟ݂ܢܲܥܢܵܝܹ̈ܐ: ܘܠܐܵܡܘܿܪ̈ܵܝܹܐ: ܘܲܠܚܹܝܬ݂ܵܝܹ̈ܐ: ܘܲܠܦܲܪ̈ܙܵܝܹܐ: ܘܲܠܚܵܘܵܝܹ̈ܐ: ܘܲܠܝܵܒ݂ܘܿܣܵܝܹ̈ܐ. 3 ܠܐܲܪܥܵܐ ܕܡܲܪܕܿܝܵܐ ܚܲܠܒ݂ܵܐ ܘܕܸܒ݂ܫܵܐ: ܡܸܛܠ ܕܠܵܐ ܣܵܠܹܩ ܐ̄ܢܵܐ ܒܲܝܢܵܬ݂ܟ݂ܘܿܢ: ܡܸܛܠ ܕܥܲܡܵܐ ܐܲܢ̄ܬܿܘܿܢ ܩܫܹܐ ܩܕ݂ܵܠܵܐ: ܕܲܠܡܵܐ ܐܵܘܒܿܕ݂ܟ݂ܘܿܢ ܒܐܘܼܪܚܵܐ. 4 ܘܲܫܡܲܥܘ ܥܲܡܵܐ ܦܸܬ݂ܓ݂ܵܡܵܐ ܗܵܢܵܐ ܒܝܼܫܵܐ: ܘܟܸܪܝܲܬ݂ ܠܗܘܿܢ: ܘܠܵܐ ܫܩܲܠܘ ܓܒܲܪ ܙܲܝܢܹܗ ܥܠܵܘܗܝ. 5 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܸܡܲܪ ܠܲܕ݂ܒܹܝܬ݂ ܝܼܣܪܵܝܹܠ: ܐܲܢ̄ܬܿܘܿܢ ܥܲܡܵܐ ܐܲܢ̄ܬܿܘܿܢ ܩܫܹܐ ܩܕ݂ܵܠܵܐ: ܫܵܥܬ݂ܵܐ ܚܕ݂ܵܐ ܐܸܣܲܩ ܒܲܝܢܵܬ݂ܟ݂ܘܿܢ: ܘܐܵܘܒܿܕ݂ܟ݂ܘܿܢ: ܗܵܫܵܐ ܐܲܥܒܲܪ ܙܲܝܢܟ݂ܘܿܢ ܡܸܢܟ݂ܘܿܢ: ܘܐܸܕܲܥ ܡܵܢܵܐ ܐܸܥܒܸܿܕ݂ ܠܟ݂ܘܿܢ. 6 ܘܲܫܩܲܠܘ ܒܢܲܝ ܝܼܣܪܵܝܹܠ ܙܲܝܢܗܘܿܢ ܡܸܢܗܘܿܢ: ܡܼܢ ܛܘܼܪܵܐ ܕܚܘܿܪܝܼܒ݂. 7 ܘܡܘܼܫܹܐ ܢܣܲܒ݂ ܡܲܫܟܿܢܹܗ: ܘܢܲܩܫܹܗ ܠܹܗ ܠܒܲܪ ܡܼܢ ܡܲܫܪܝܼܬ݂ܵܐ: ܐܲܪܚܩܹܗ ܡܼܢ ܡܲܫܪܝܼܬ݂ܵܐ: ܘܲܩܪܵܝܗܝ ܡܲܫܟܲܢ ܙܲܒ݂ܢܵܐ: ܘܟ݂ܠ ܡܿܢ ܕܫܵܐܹܠ ܗ̄ܘܵܐ ܡܼܢ ܡܵܪܝܵܐ: ܢܵܦܹܩ ܠܡܲܫܟܲܢܙܲܒ݂ܢܵܐ: ܠܒܲܪ ܡܼܢ ܡܲܫܪܝܼܬ݂ܵܐ. 8 ܘܡܵܐ ܕܢܵܦܹܩ ܡܘܼܫܹܐ ܠܡܲܫܟܢܵܐ: ܩܵܝܡܝܼܢ ܟܠܹܗ ܥܲܡܵܐ: ܘܡܸܬܿܛܲܝܒ݂ܝܼܢ ܐ̄ܢܵܫ ܒܲܬ݂ܪܲܥ ܡܲܫܟܿܢܹܗ: ܘܚܵܝܪܝܼܢ ܒܵܬ݂ܪܹܗ ܕܡܘܼܫܹܐ ܥܕܲܡܵܐ ܕܥܵܐܹܠ ܠܡܲܫܟܿܢܵܐ. 9 ܘܡܵܐ ܕܥܵܐܹܠ ܡܘܼܫܹܐ ܠܡܲܫܟܢܵܐ: ܢܵܚܹܬ݂ ܥܲܡܘܼܕ݂ܵܐ ܕܲܥܢܵܢܵܐ: ܘܩܵܐܹܡ ܒܬܲܪܥܵܐ ܕܡܲܫܟܢܵܐ: ܘܡܸܬ݂ܡܲܠܸܠ ܥܲܡ ܡܘܼܫܹܐ. 10 ܘܲܚܙܵܐ ܟܠܹܗ ܥܲܡܵܐ ܥܲܡܘܼܕ݂ܵܐ ܕܲܥܢܵܢܵܐ ܕܩܵܐܹܡ ܒܬܲܪܥܵܐ ܕܡܲܫܟܢܵܐ: ܘܩܵܝܡܝܼܢ ܟܠܹܗ ܥܲܡܵܐ: ܘܣܵܓ݂ܕܿܝܼܢ ܐ̄ܢܵܫ ܒܲܬ݂ܪܲܥ ܡܲܫܟܿܢܹܗ. 11 ܘܡܲܠܸܠ ܡܵܪܝܵܐ ܥܲܡ ܡܘܼܫܹܐ ܐܲܦܝܼܢ ܠܘܼܩܒܲܠ ܐܲܦܝܼܢ: ܐܲܝܟ݂ ܕܲܡܡܲܠܸܠ ܓܲܒ݂ܪܵܐ ܥܲܡ ܚܲܒ݂ܪܹܗ: ܘܲܗܦܲܟ݂ ܠܡܲܫܪܝܼܬ݂ܵܐ: ܘܲܡܫܲܡܫܵܢܹܗ ܗܘܼܫܵܥ ܒܲܪ ܢܘܿܢ ܛܲܠܝܵܐ: ܠܵܐ ܥܵܢܹܕ ܗ̄ܘܵܐ ܡܼܢ ܓܵܘ ܡܲܫܟܿܢܵܐ. 12 ܘܐܸܡܲܪ ܡܘܼܫܹܐ ܠܡܵܪܝܵܐ: ܚܙܝܼ: ܕܐܲܢ̄ܬ ܐܸܡܲܪܬܿ ܠܝܼ ܐܲܣܸܩܵܝܗܝ ܠܥܲܡܵܐ ܗܵܢܵܐ: ܘܐܲܢ̄ܬ ܠܵܐ ܚܵܘܝܼܬܵܢܝ ܡܿܢ ܕܲܡܫܲܕܲܪ ܐܲܢ̄ܬ ܥܲܡܝ: ܘܐܲܢ̄ܬ ܐܸܡܲܪܬ: ܝܼܕܲܥܬܵܟ݂ ܒܲܫܡܵܐ: ܘܐܵܦ ܐܸܫܟܲܚܬܿ ܪܲܚܡܹܐ ܒܥܲܝܢܲܝ. 13 ܗܵܫܵܐ ܐܸܢ ܐܸܫܟܿܚܹܬ݂ ܪܲܚܡܹܐ ܒܥܲܝܢܲܝܟ: ܚܵܘܵܢܝ ܐܘܼܪܚܵܟ݂ ܘܐܸܕܿܥܵܟ݂ ܡܸܛܠ ܕܐܸܫܟܲܚ ܪܲܚܡܹܐ ܒܥܲܝܢܲܝܟ: ܘܲܚܙܝܼ ܕܥܲܡܵܟ݂ ܗܵܢܵܐ ܥܲܡܵܐ ܗ̄ܘܼ ܪܲܒܵܐ. 14 ܘܐܸܡܲܪ ܡܵܪܝܵܐ ܠܡܘܼܫܹܐ: ܩܕ݂ܵܡܲܝ ܙܸܠ: ܘܐܲܢܝܼܚ ܠܵܟ݂. 15 ܐܸܡܲܪ ܠܹܗ: ܐܸܢ ܐܲܢ̄ܬ ܠܵܐ ܐܵܙܹܠ ܐܲܢ̄ܬ ܥܲܡܲܢ: ܠܵܐ ܬܲܣܩܲܢ ܡܸܟܵܐ. 16 ܘܲܒ݂ܡܵܢܵܐ ܢܸܬ݂ܝܼܕܲܥ ܗܵܪܟܵܐ ܕܐܸܫܟܿܚܹܬ݂ ܪܲܚܡܹܐ ܒܥܲܝܢܲܝܟ: ܐܸܢܵܐ ܘܥܲܡܵܟ݂: ܐܸܠܵܐ ܡܵܐ ܕܐܸܙܲܠܬܿ ܥܲܡܲܢ: ܘܲܗܘܲܝܢ ܦܪܝܼܫܝܼܢ ܐܸܢܵܐ ܘܥܲܡܵܟ݂ ܡܼܢ ܟܠܗܘܿܢ ܥܲܡܡܹ̈ܐ ܕܐܝܼܬ݂ ܥܲܠ ܐܲܦܲܝ ܐܲܪܥܵܐ. 17 ܘܐܸܡܲܪ ܡܵܪܝܵܐ ܠܡܘܼܫܹܐ: ܐܲܝܟ݂ ܡܸܠܬ݂ܵܐ ܗܵܕܹܐ ܕܐܸܡܲܪܬܿ ܐܸܥܒܸܿܕ: ܡܸܛܠ ܕܐܸܫܟܲܚܬ ܪܲܚܡܹܐ ܒܥܲܝܢܲܝ: ܘܐܸܕܥܵܟ݂ ܒܲܫܡܵܐ. 18 ܘܐܸܡܲܪ ܚܵܘܵܢܝ ܫܘܼܒ݂ܚܵܟ݂. 19 ܘܐܸܡܲܪ: ܐܸܢܵܐ ܐܲܥܒܲܪ ܟܠܹܗ ܛܘܼܒ݂ܝ ܩܕ݂ܵܡܲܝܟ: ܘܐܸܩܪܸܐ ܒܲܫܡܵܐ ܕܡܵܪܝܵܐ ܩܕ݂ܵܡܲܝܟ: ܘܐܸܚܘܿܢ ܠܡܿܢ ܕܐܸܚܘܿܢ: ܘܐܹܪܲܚܸܡ ܠܡܿܢ ܕܐܹܪܲܚܸܡ. 20 ܘܐܸܡܲܪ: ܠܵܐ ܡܸܫܟܲܚ ܐܲܢ̄ܬ ܠܡܸܚܙܵܐ ܐܲܦܲܝ: ܡܸܛܠ ܕܠܵܐ ܚܵܙܹܐ ܠܝܼ ܒܲܪܢܵܫܵܐ ܘܚܵܝܹܐ. 21 ܘܐܸܡܲܪ ܡܵܪܝܵܐ ܠܡܘܼܫܹܐ: ܗܵܐ ܐܲܬ݂ܪܵܐ ܩܕ݂ܵܡܲܝ: ܩܘܼܡ ܥܲܠ ܛܲܪܵܢܵܐ. 22 ܘܡܵܐ ܕܥܵܒܲܪ ܐܝܼܩܵܪܝ: ܐܹܣܝܼܡܵܟ݂ ܒܲܡܥܲܪܬ݂ܵܐ ܕܛܲܪܵܢܵܐ: ܘܐܲܓܸܿܢ ܐܝܼܕ݂ܝ ܥܠܲܝܟ ܥܕܲܡܵܐ ܕܐܸܥܒܲܪ. 23 ܘܐܲܥܒܲܪ ܐܝܼܕ݂ܝ: ܘܬܸܚܙܸܐ ܒܸܣܬܲܪܝ: ܘܐܲܦܲܝ ܠܵܐ ܢܸܬ݂ܚܲܙܝܵܢ.

********

ܩܦܠܐܘܢ : ܠܕ.

1 ܘܐܸܡܲܪ ܡܵܪܝܵܐ ܠܡܘܼܫܹܐ: ܦܣܘܿܠ ܠܵܟ݂ ܬܲܪܬܹܿܝܢ ܠܘܼܚܹ̈ܐ ܕܟܹܐܦܵܐ ܐܲܝܟ݂ ܩܲܕ݂ܡܵܝܵܬ݂ܵܐ: ܘܲܟ݂ܬ݂ܘܿܒ݂ ܥܲܠ ܠܘܼܚܹ̈ܐ ܦܸܬ݂ܓ݂ܵܡܹ̈ܐ ܕܐܝܼܬ݂ ܗ̄ܘܵܘ ܥܲܠ ܠܘܼܚܹ̈ܐ ܩܲܕ݂ܡܵܝܵܬ݂ܵܐ ܕܬܲܒܲܪܬܿ. 2 ܘܲܗܘܝܼ ܡܛܲܝܲܒ݂ ܒܨܲܦܪܵܐ: ܘܣܲܩ ܒܨܲܦܪܵܐ ܠܛܘܼܪܵܐ ܕܣܝܼܢܲܝ: ܘܩܘܼܡ ܬܲܡܵܢ ܒܪܹܫ ܛܘܼܪܵܐ. 3 ܘܐ̄ܢܵܫ ܠܵܐ ܢܸܣܲܩ ܥܲܡܵܟ݂: ܘܐ̄ܢܵܫ ܠܵܐ ܢܸܬ݂ܚܙܸܐ ܒܟ݂ܠܹܗ ܛܘܼܪܵܐ: ܐܵܦܠܵܐ ܥܵܢܵܐ ܘܬ݂ܵܘܪܹ̈ܐ ܢܸܪܥܘܿܢ ܠܩܘܼܒ݂ܠܹܗ ܕܛܘܼܪܵܐ ܗܵܘ. 4 ܘܲܦܣܲܠ ܬܲܪܬܹܿܝܢ ܠܘܼܚܹ̈ܐ ܕܟܹܐܦܵܐ ܐܲܝܟ݂ ܩܲܕ݂ܡܵܝܵܬ݂ܵܐ: ܘܩܲܕܸܿܡ ܡܘܼܫܹܐ ܒܨܲܦܪܵܐ: ܘܲܣܠܸܩ ܠܛܘܼܪܵܐ ܕܣܝܼܢܲܝ ܐܲܝܟܲܢܵܐ ܕܦܲܩܕܹܗ ܡܵܪܝܵܐ: ܘܲܢܣܲܒ݂ ܬܲܪܬܹܿܝܢ ܠܘܼܚܹ̈ܐ ܕܟܹܐܦܵܐ ܒܐܝܼܕܹܗ. 5 ܘܲܢܚܸܬ݂ ܡܵܪܝܵܐ ܒܲܥܢܵܢܵܐ: ܘܩܵܡ ܥܲܡܹܗ ܬܲܡܵܢ: ܘܲܩܪܵܐ ܒܲܫܡܵܐ: ܡܵܪܝܵܐ. 6 ܘܲܥܒܲܪ ܡܵܪܝܵܐ ܩܕ݂ܵܡܵܘܗܝ: ܘܲܩܪܵܐ ܡܵܪܝܵܐ ܡܵܪܝܵܐ: ܐܲܠܵܗܵܐ ܡܪܲܚܡܵܢܵܐ ܘܲܡܪܲܚܦܵܢܵܐ: ܕܢܲܓܝܼܪܵܐ ܪܘܼܚܹܗ: ܘܣܲܓܿܝܼܐܵܐ ܛܲܝܒܿܘܼܬܹܗ ܘܩܘܼܫܬܹܿܗ. 7 ܢܵܛܲܪ ܛܲܝܒܿܘܼܬ݂ܵܐ ܠܐܲܠܦܲܝ ܕܵܪܹ̈ܐ: ܫܵܒܹܩ ܚܛܵܗܹ̈ܐ ܘܚܵܘܒܹ̈ܐ: ܘܲܡܙܲܟܵܝܘܼ ܠܵܐ ܡܙܲܟܸܿܐ: ܦܵܩܹܕ݂ ܚܵܘܒܹ̈ܐ ܕܐܲܒ݂ܵܗܹ̈ܐ ܥܲܠ ܒܢܲܝܵܐ: ܘܥܲܠ ܒܢܲܝ ܒܢܲܝܵܐ: ܥܲܠ ܬܠܵܬ݂ܵܐ ܘܥܲܠ ܐܲܪܒܥܵܐ ܕܵܪܝܼܢ. 8 ܘܐܸܣܬܲܪܗܲܒ݂ ܡܘܼܫܹܐ: ܘܲܢܦܲܠ ܥܲܠ ܐܲܪܥܵܐ ܘܲܣܓܸܿܕ݂. 9 ܘܐܸܡܲܪ: ܐܸܢ ܐܸܫܟܿܚܹܬ݂ ܪܲܚܡܹܐ ܒܥܲܝܢܲܝ̈ܟ ܡܵܪܝ: ܢܹܐܙܲܠ ܗܵܫܵܐ ܡܵܪܝ ܒܲܝܢܵܬܲܢ: ܡܸܛܠ ܕܥܲܡܵܐ ܐܸܢܘܿܢ ܩܫܹܐ ܩܕ݂ܵܠܵܐ: ܘܲܫܒ݂ܘܿܩ ܠܚܵܘܒܲܝܢ ܘܠܲܚܛܵܗܲܝܢ ܘܬܹܐܪܬܲܢ. 10 ܘܐܸܡܲܪ: ܗܵܐ ܡܩܝܼܡ ܐ̄ܢܵܐ ܩܝܵܡܵܐ ܠܘܼܩܒܲܠ ܟܠܹܗ ܥܲܡܵܟ݂: ܘܐܸܥܒܸܿܕ ܦܪܝܼܫܵܬ݂ܵܐ: ܕܠܵܐ ܐܸܬ݂ܥܒܸܕ݂ ܐܲܟ݂ܘܵܬ݂ܗܹܝܢ ܒܟ݂ܠܵܗ ܐܲܪܥܵܐ: ܘܲܒ݂ܟ݂ܠܗܘܿܢ ܥܲܡܡܹ̈ܐ: ܘܢܸܚܙܸܐ ܟܠܹܗ ܥܲܡܵܐ ܗܵܢܵܐ ܕܐܲܢ̄ܬ ܒܓ݂ܵܘܹܗ ܥܒ݂ܵܕܹܗ ܕܡܵܪܝܵܐ ܕܕܲܚܝܼܠ ܗ̄ܘܼ ܕܥܵܒܹܕ݂ ܐ̄ܢܵܐ ܥܲܡܵܟ݂. 11 ܛܲܪ ܡܸܕܸܿܡ ܕܲܡܦܲܩܸܕ݂ ܐ̄ܢܵܐ ܠܵܟ݂ ܝܵܘܡܵܢܵܐ: ܗܵܐ ܚܵܪܸܒ݂ ܐ̄ܢܵܐ ܡܼܢ ܩܕ݂ܵܡܲܝܟ: ܟܢܲܥܢܵܝܹ̈ܐ: ܘܐܵܡܘܿܪ̈ܵܝܹܐ: ܘܚܹܝܬ݂ܵܝܹ̈ܐ ܘܦܲܪ̈ܙܵܝܹܐ: ܘܚܵܘܵܝܹ̈ܐ ܘܝܵܒ݂ܘܿܣܵܝܹ̈ܐ. 12 ܐܸܙܕܲܗܪ ܠܵܐ ܬܩܝܼܡ ܩܝܵܡܵܐ ܠܝܲܬ݂ܒܲܝ ܐܲܪܥܵܐ ܕܐܵܙܹܠ ܐܲܢ̄ܬ ܠܘܵܬ݂ܗܘܿܢ: ܕܠܵܐ ܢܸܗܘܘܿܢ ܠܵܟ݂ ܠܬ݂ܘܼܩܠܬ݂ܵܐ. 13 ܡܲܕ݂ܒܿܚܲܝܗܘܿܢ ܥܲܩܲܪ: ܘܩܵܝܡܵܬ݂ܗܘܿܢ ܬܲܒܲܪ: ܘܕܸܚܠܵܬ݂ܗܘܿܢ ܦܲܣܸܩ. 14 ܠܵܐ ܬܸܣܓܿܘܿܕ݂ ܠܐܲܠܵܗ ܐ̄ܚܪܹܝܢ: ܡܸܛܠ ܕܡܵܪܝܵܐ ܛܲܢܵܢܵܐ ܫܡܹܗ: ܐܲܠܵܗܵܐ ܗ̄ܘܼ ܛܲܢܵܢܵܐ. 15 ܠܵܐ ܬܩܝܼܡ ܩܝܵܡܵܐ ܥܲܡ ܝܲܬ݂ܒܲܝ ܐܲܪܥܵܐ: ܕܠܵܐ ܢܸܛܥܘܿܢ ܒܵܬܲܪ ܕܸܚܠܵܬ݂ܗܘܿܢ: ܘܲܢܕܲܒܿܚܘܼܢ ܠܐܲܠܵܗܲܝܗܘܿܢ: ܘܢܸܩܪܘܿܢܵܟ݂ ܘܬܹܐܟ݂ܘܿܠ ܡܼܢ ܕܸܒ݂ܚܲܝܗܘܿܢ. 16 ܘܬܸܣܲܒ݂ ܡܼܢ ܒܢܵܬ݂ܗܘܿܢ ܠܲܒ݂ܢܲܝܟ: ܘܲܒ݂ܢܵܬ݂ܵܟ݂ ܬܸܬܸܿܠ ܠܲܒ݂ܢܲܝܗܘܿܢ: ܘܢܸܛܥܝܵܢ ܒܢܵܬ݂ܟ݂ܘܿܢ ܒܵܬܲܪ ܐܲܠܵܗܲܝܗܘܿܢ: ܘܢܲܛܥܝܵܢ ܠܲܒ݂ܢܲܝ̈ܟ ܒܵܬܲܪ ܐܲܠܵܗܲܝܗܹܝܢ. 17 ܐܲܠܵܗܹ̈ܐ ܕܢܸܣܟܿܬ݂ܵܐ ܠܵܐ ܬܸܥܒܸܿܕ݂ ܠܵܟ݂. 18 ܥܲܕ݂ܥܹܕ݂ܵܐ ܕܦܲܛܝܼܪܹ̈ܐ ܬܸܛܲܪ: ܫܲܒ݂ܥܵܐ ܝܵܘܡܝܼܢ ܬܹܐܟ݂ܘܿܠ ܦܲܛܝܼܪܵܐ ܐܲܝܟ݂ ܕܦܲܩܸܕ݂ܬܵܟ݂: ܒܙܲܒ݂ܢܵܐ ܕܝܲܪܚܵܐ ܕܗܲܒܵܒܹ̈ܐ: ܡܸܛܠ ܕܲܒ݂ܝܲܪܚܵܐ ܕܗܲܒܵܒܹ̈ܐ ܢܦܲܩܬܿ ܡܼܢ ܡܸܨܪܹܝܢ. 19 ܟܠ ܕܦܵܬܲܚ ܪܵܚܡܵܐ ܠܝܼ ܢܸܗܘܸܐ: ܘܟ݂ܠ ܒܘܼܟ݂ܪܵܐ ܕܲܒ݂ܥܝܼܪܵܟ݂: ܕܬ݂ܵܘܪܹ̈ܐ ܘܕܸܐܡܪܹ̈ܐ. 20 ܘܟ݂ܠ ܒܘܼܟ݂ܪܵܐ ܕܲܒ݂ܥܝܼܪܵܐ ܬܸܦܪܘܿܩ ܒܐܸܡܪܵܐ: ܘܐܸܢ ܠܵܐ ܬܸܦܪܩܝܼܘܗܝ ܬܸܩܛܠܝܼܘܗܝ: ܟܠ ܒܘܼܟ݂ܪܵܐ ܕܲܒ݂ܢܲܝ̈ܟ ܬܸܦܪܘܿܩ: ܘܠܵܐ ܬܸܬ݂ܚܙܘܿܢ ܩܕ݂ܵܡܲܝ ܣܪܝܼܩܵܐܝܼܬ݂. 21 ܫܬܵܐ ܝܵܘܡܝܼܢ ܬܸܦܠܘܿܚ: ܘܲܒ݂ܝܵܘܡܵܐ ܫܒ݂ܝܼܥܵܝܵܐ ܬܸܬܸܿܢܝܼܚ: ܒܙܲܪܥܵܐ ܘܒܲܚܨܵܕܵܐ ܬܸܬܸܿܢܝܼܚ. 22 ܘܥܲܕ݂ܥܹܕ݂ܵܐ ܕܫܵܒ݂ܘܿܥܵܐ ܬܸܥܒܸܿܕ ܠܵܟ݂: ܪܹܫ ܚܨܵܕܵܐ ܕܚܸܛܹ̈ܐ: ܘܚܲܓܵܐ ܕܲܚܡܵܠܵܐ ܒܡܲܦܩܵܗ ܕܫܲܢ̄ܬܵܐ. 23 ܬܠܵܬ݂ ܙܲܒ݂ܢܝܼܢ ܒܫܲܢ̄ܬܵܐ ܢܸܬ݂ܚܙܸܐ ܟܠ ܕܘܼܟ݂ܪܵܢܵܟ݂ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. 24 ܡܸܛܠ ܕܐܸܚܪܘܿܒ݂ ܥܲܡܡܹ̈ܐ ܡܼܢ ܩܕ݂ܵܡܲܝܟ: ܘܐܲܦ̮ܬܸܿܐ ܬܚܘܼܡܵܟ݂: ܘܠܵܐ ܢܸܪܲܓ݂ ܐ̄ܢܵܫ ܐܲܪܥܵܟ݂: ܡܵܐ ܕܣܵܠܹܩ ܐܲܢ̄ܬ ܠܡܸܬ݂ܚܙܵܝܘܼ ܩܕ݂ܵܡ ܡܵܪܝܵܐ ܐܲܠܵܗܵܟ݂ ܬܠܵܬ݂ ܙܲܒ݂ܢܝܼܢ ܒܫܲܢ̄ܬܵܐ. 25 ܠܵܐ ܬܸܟܿܘܿܣ ܥܲܠ ܚܲܡܝܼܥܵܐ ܕܡܵܐ ܕܕܸܒ݂ܚܬ݂ܵܐ: ܘܠܵܐ ܢܒ݂ܘܼܬ݂ ܠܨܲܦܪܵܐ ܕܸܒ݂ܚܵܐ ܕܥܲܕ݂ܥܹܕ݂ܵܐ ܕܦܸܨܚܵܐ. 26 ܪܹܫ ܥܲܠܠܵܬ݂ܵܗ ܕܐܲܪܥܵܟ݂ ܬܲܝܬܸܿܐ ܠܒܲܝܬܹܿܗ ܕܡܵܪܝܵܐ ܐܲܠܵܗܵܟ݂ ܠܵܐ ܬܒܲܫܸܠ ܓܲܕ݂ܝܵܐ ܒܚܲܠܒ݂ܵܐ ܕܐܸܡܹܗ. 27 ܘܐܸܡܲܪ ܡܵܪܝܵܐ ܠܡܘܼܫܹܐ: ܟܬ݂ܘܿܒ݂ ܠܵܟ݂ ܗܵܠܹܝܢ ܦܸܬ݂ܓ݂ܵܡܹ̈ܐ: ܕܡܸܛܠ ܗܵܠܹܝܢ ܦܸܬ݂ܓ݂ܵܡܹ̈ܐ ܐܲܩܝܼܡܬ ܥܲܡܵܟ݂ ܩܝܵܡܵܐ: ܘܥܲܡ ܟܠܹܗ ܝܼܣܪܵܝܹܠ. 28 ܘܲܗܘܵܐ ܬܲܡܵܢ ܥܲܡ ܡܵܪܝܵܐ ܐܲܪܒܿܥܝܼܢ ܐܝܼܡܵܡܝܼܢ ܘܐܲܪܒܿܥܝܼܢ ܠܲܝܠܵܘܵܢ: ܠܲܚܡܵܐ ܠܵܐ ܐܸܟܲܠ ܘܡܲܝܵܐ ܠܵܐ ܐܸܫܬܿܝܼ: ܘܲܟ݂ܬܲܒ݂ ܥܲܠ ܠܘܼܚܹ̈ܐ ܕܟܹܐܦܵܐ ܡܸܠܲܝ ܩܝܵܡܵܐ: ܥܸܣܪܵܐ ܦܸܬ݂ܓ݂ܵܡܝܼܢ. 29 ܘܟܲܕ݂ ܢܚܸܬ݂ ܡܘܼܫܹܐ ܡܼܢ ܛܘܼܪܵܐ ܕܣܝܼܢܲܝ: ܬܲܪܬܹܿܝܢ ܠܘܼܚܹ̈ܐ ܕܣܵܗܕܿܘܼܬ݂ܵܐ ܒܐܝܼܕܹܗ ܕܡܘܼܫܹܐ: ܟܲܕ݂ ܢܚܸܬ݂ ܡܼܢ ܛܘܼܪܵܐ: ܘܡܘܼܫܹܐ ܠܵܐ ܝܼܕܲܥ ܕܐܸܙܕܲܗܝܼ ܡܸܫܟܵܐ ܕܐܲܦܵܘܗܝ ܟܲܕ݂ ܡܲܠܸܠ ܥܲܡܹܗ. 30 ܘܲܚܙܵܐ ܐܲܗܪܘܿܢ ܘܟ݂ܠܹܗ ܝܼܣܪܵܝܹܠ ܐܲܦܵܘܗܝ ܕܡܘܼܫܹܐ: ܕܐܸܙܕܲܗܝܼ ܡܸܫܟܵܐ ܕܐܲܦܵܘܗܝ ܕܡܘܼܫܹܐ: ܘܲܕ݂ܚܸܠܘ ܠܡܸܩܪܲܒ݂ ܠܘܵܬܹܗ. 31 ܘܲܩܪܵܐ ܐܸܢܘܿܢ ܡܘܼܫܹܐ: ܘܐܸܬ݂ܵܘ ܠܘܵܬܹܗ ܐܲܗܪܘܿܢ ܘܟ݂ܠܗܘܿܢ ܪܵܘܪ̈ܒ݂ܵܢܹܐ ܕܲܟ݂ܢܘܼܫܬܵܐ: ܘܡܲܠܸܠ ܡܘܼܫܹܐ ܥܲܡܗܘܿܢ. 32 ܘܗܵܝܕܹܿܝܢ ܩܪܸܒ݂ܘ ܠܘܵܬܹܗ ܟܠܗܘܿܢ ܒܢܲܝ ܝܼܣܪܵܝܹܠ: ܘܦܲܩܸܕ݂ ܐܸܢܘܿܢ ܟܠܡܸܕܸܿܡ ܕܡܲܠܸܠ ܡܵܪܝܵܐ ܥܲܡܹܗ ܒܛܘܼܪܵܐ ܕܣܝܼܢܲܝ. 33 ܘܟܲܕ݂ ܫܲܠܸܡ ܡܘܼܫܹܐ ܕܲܢܡܲܠܸܠ ܥܲܡܗܘܿܢ: ܐܲܪܡܝܼ ܥܲܠ ܐܲܦܵܘܗܝ ܫܘܿܫܸܦܵܐ. 34 ܘܟܲܕ݂ ܥܵܐܹܠ ܗ̄ܘܵܐ ܡܘܼܫܹܐ ܩܕ݂ܵܡ ܡܵܪܝܵܐ ܕܲܢܡܲܠܸܠ ܥܲܡܹܗ: ܫܵܩܹܠ ܗ̄ܘܵܐ ܠܹܗ ܠܫܘܿܫܸܦܵܐ ܥܕܲܡܵܐ ܕܢܵܦܹܩ: ܘܢܵܦܹܩ ܗ̄ܘܵܐ ܘܐܵܡܲܪ ܠܲܕ݂ܒܹܝܬ݂ ܝܼܣܪܵܝܹܠ ܡܸܕܸܿܡ ܕܡܸܬ݂ܦܲܩܲܕ݂. 35 ܘܚܵܙܹܝܢ ܗ̄ܘܵܘ ܒܢܲܝ ܝܼܣܪܵܝܹܠ ܐܲܦܵܘܗܝ ܕܡܘܼܫܹܐ: ܕܐܸܙܕܲܗܝܼ ܡܸܫܟܵܐ ܕܐܲܦܵܘܗܝ ܕܡܘܼܫܹܐ: ܫܵܩܹܠ ܗ̄ܘܵܐ ܡܘܼܫܐ ܠܫܘܿܫܸܦܵܐ ܡܼܢ ܐܲܦܵܘܗܝ: ܡܵܐ ܕܥܵܐܹܠ ܗ̄ܘܵܐ ܕܲܢܡܲܠܸܠ ܥܲܡܹܗ.

********

ܩܦܠܐܘܢ : ܠܗ.

1 ܘܟܲܢܸܫ ܡܘܼܫܹܐ ܠܟ݂ܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ: ܘܐܸܡܲܪ ܠܗܘܿܢ: ܗܵܠܹܝܢ ܦܸܬ݂ܓ݂ܵܡܹ̈ܐ ܕܦܲܩܸܕ݂ ܡܵܪܝܵܐ ܠܡܸܥܒܲܕ. 2 ܫܬܵܐ ܝܵܘܡܝܼܢ ܬܸܥܒܸܿܕ ܥܒ݂ܵܕ݂ܵܐ: ܘܝܵܘܡܵܐ ܫܒ݂ܝܼܥܵܝܵܐ ܢܸܗܘܸܐ ܩܲܕܿܝܼܫ: ܫܲܒܬ݂ܵܐ: ܢܝܵܚܵܐ: ܩܘܼܕ݂ܫܵܐ ܠܡܵܪܝܵܐ: ܟܠ ܡܿܢ ܕܢܸܥܒܸܕ ܒܵܗ ܥܒ݂ܵܕ݂ܵܐ ܢܸܬ݂ܩܛܸܠ. 3 ܠܵܐ ܬܵܘܚܕ݂ܘܼܢ ܢܘܼܪܵܐ ܒܟ݂ܠܹܗ ܒܹܝܬ݂ ܡܲܥܡܲܪܟ݂ܘܿܢ ܒܝܵܘܡܵܐ ܕܫܲܒܬ݂ܵܐ. 4 ܘܐܸܡܲܪ ܡܘܼܫܹܐ ܠܟ݂ܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ: ܗܵܢܵܘ ܦܸܬ݂ܓ݂ܵܡܵܐ ܕܦܲܩܸܕ݂ ܡܵܪܝܵܐ ܠܡܸܥܒܲܕ݂. 5 ܣܲܒ݂ܘ ܡܸܢܟ݂ܘܿܢ ܦܘܼܪܫܵܢܵܐ ܠܡܵܪܝܵܐ: ܟܠ ܓܲܒ݂ܪܵܐ ܕܐܸܬ݂ܚܲܫܲܒ݂ ܒܠܸܒܹܿܗ: ܢܲܝܬܸܿܐ ܦܘܼܪܫܵܢܵܐ ܠܡܵܪܝܵܐ: ܕܲܗܒ݂ܵܐ: ܘܣܹܐܡܵܐ: ܘܲܢܚܵܫܵܐ. 6 ܘܬܸܟ݂ܠܬ݂ܵܐ: ܘܐܲܪܓܿܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܘܣܲܥܪܵܐ ܕܥܸܙܹܐ. 7 ܘܡܸܫܟܹ̈ܐ ܕܕܸܟ݂ܪܹ̈ܐ ܕܐܸܣܦܲܝܢܝܼܩܵܐ: ܘܡܸܫܟܹ̈ܐ ܕܣܵܣܵܓܿܘܿܢܵܐ: ܘܩܲܝܣܵܐ ܕܐܸܫܟܵܪܥܵܐ. 8 ܘܡܸܫܚܵܐ ܠܡܲܢܗܵܪܘܼ: ܘܒܸܣܡܹ̈ܐ ܠܡܸܫܚܵܐ ܕܲܡܫܝܼܚܘܼܬ݂ܵܐ: ܘܲܠܥܸܛܪܵܐ ܕܒܸܣܡܹ̈ܐ. 9 ܘܟܹܐܦܹ̈ܐ ܕܒܹܪܘܼܠܵܐ: ܘܟܹܐܦܹ̈ܐ ܕܫܲܠܡܘܼܬ݂ܵܐ: ܠܦܸܕܬ݂ܵܐ ܘܠܲܦܪܝܼܣܵܐ. 10 ܘܟ݂ܠܗܘܿܢ ܚܲܟܿܝܼܡܲܝ ܠܸܒܵܐ ܕܐܝܼܬ݂ ܒܟ݂ܘܿܢ: ܢܹܐܬ݂ܘܼܢ ܘܢܸܥܒܿܕ݂ܘܼܢ ܟܠ ܡܸܕܸܿܡ ܕܦܲܩܸܕ݂ ܡܵܪܝܵܐ. 11 ܡܲܫܟܿܢܵܐ ܘܲܦܪܵܣܹܗ: ܘܲܟ݂ܣܵܝܹܗ: ܘܦܸܪ̈ܦܵܘܗܝ: ܘܕܲܦܵܘܗܝ: ܘܡܘܼܟ݂ܠܵܘܗܝ: ܘܥܲܡܘܼܕ݂ܵܘܗܝ: ܘܣܵܡܟ݂ܵܘܗܝ. 12 ܘܩܹܒ݂ܘܼܬ݂ܵܐ ܘܩܘܼܦܹܝܗ: ܘܚܘܼܣܵܝܵܐ: ܘܐܲܦܲܝ ܬܲܪܥܵܐ ܕܲܦܪܵܣܵܐ. 13 ܘܦܵܬ݂ܘܿܪܵܐ ܘܩܘܼܦܵܘܗܝ: ܘܟ݂ܠܗܘܢ ܡܵܐܢܵܘܗܝ: ܘܠܲܚܡܵܐ ܕܐܲܦܹ̈ܐ. 14 ܘܲܡܢܵܪܬܵܐ ܕܡܲܢܗܪܝܼܢ ܒܵܗ: ܘܡܵܐܢܹܝܗ: ܘܲܫܪܵܓܹܝܗ: ܘܡܸܫܚܵܐ ܕܡܲܢܗܪܝܼܢ ܒܹܗ. 15 ܘܡܲܕ݂ܒܚܵܐ ܕܥܸܛܪܵܐ: ܘܩܘܼܦܵܘܗܝ: ܘܡܸܫܚܵܐ ܕܲܡܫܝܼܚܘܼܬ݂ܵܐ: ܘܥܸܛܪܵܐ ܕܒܸܣܡܹ̈ܐ: ܘܲܦܪܵܣܵܐ ܕܬܲܪܥܵܐ ܕܡܲܫܟܿܢܵܐ. 16 ܘܡܲܕ݂ܒܿܚܵܐ ܕܝܲܩܕܵܐ: ܘܒ݂ܵܣܹܣ ܕܝܼܠܹܗ ܕܲܢܚܵܫܵܐ: ܘܩܘܼܦܵܘܗܝ ܘܟ݂ܠܗܘܿܢ ܡܵܐܢܵܘܗܝ: ܘܠܲܩܢܵܐ ܘܟܲܢܵܐ. 17 ܘܣܸܕ݂ܪܹ̈ܐ ܕܕ݂ܵܪܬܵܐ: ܘܥܲܡܘܼܕܹܝܗ: ܘܣܵܡܟܹܝܗ: ܘܲܦܪܵܣܵܐ ܕܬܲܪܥܵܐ ܕܕ݂ܵܪܬܵܐ. 18 ܣܸܟܹ̈ܐ ܕܡܲܫܟܿܢܵܐ ܘܣܸܟܹ̈ܐ ܕܕ݂ܵܪܬܵܐ: ܘܚܲܒ݂ܠܲܝܗܹܝܢ. 19 ܘܲܠܒ݂ܘܼܫܲܝ ܬܸܫܡܸܫܬܵܐ ܠܲܡܫܲܡܵܫܘܼ ܒܩܘܼܕ݂ܫܵܐ: ܘܲܠܒ݂ܘܼܫܲܝ ܩܘܼܕ݂ܫܵܐ ܠܐܲܗܪܘܿܢ ܟܵܗܢܵܐ: ܘܲܠܒ݂ܘܼܫܹ̈ܐ ܠܲܒ݂ܢܵܘܗܝ ܠܟ݂ܵܗܢܘܼܬ݂ܵܐ. 20 ܘܲܢܦܲܩܘ ܟܠܵܗ ܟܢܘܼܫܬܵܐ ܕܲܒ݂ܢܲܝ ܝܼܣܪܵܝܹܠ ܡܼܢ ܩܕ݂ܵܡ ܡܘܼܫܹܐ. 21 ܘܐܲܝܬܿܝܼܘ ܟܠ ܓܒܲܪ ܕܐܸܬ݂ܚܲܫܲܒ݂ ܒܠܸܒܹܿܗ: ܘܟ݂ܠ ܓܒܲܪ ܕܐܸܬ݂ܚܲܫܲܒ݂ ܒܪܘܼܚܹܗ: ܐܲܝܬܿܝܼܘ ܦܘܼܪܫܵܢܵܐ ܠܡܵܪܝܵܐ: ܠܲܥܒ݂ܵܕ݂ܵܐ ܕܡܲܫܟܲܢ ܙܲܒ݂ܢܵܐ: ܘܲܠܟ݂ܠܹܗ ܦܘܼܠܚܵܢܹܗ: ܘܠܲܠܒ݂ܘܼܫܲܝ ܩܘܼܕ݂ܫܵܐ. 22 ܘܡܲܝܬܿܝܼܢ ܗ̄ܘܵܘ ܓܲܒ݂ܪܹ̈ܐ ܥܲܡ ܢܸܫܹ̈ܐ: ܟܠ ܕܐܸܬ݂ܚܲܫܲܒ݂ ܒܠܸܒܹܿܗ: ܐܲܝܬܿܝܼܘ ܫܹܐܪܹ̈ܐ: ܘܲܩܕ݂ܵܫܹ̈ܐ ܘܥܹܙܩܵܬ݂ܵܐ: ܘܗܸܡܢܝܼܟܹ̈ܐ: ܘܟ݂ܠ ܡܵܐܢܹ̈ܐ ܕܕܲܗܒ݂ܵܐ: ܘܟ݂ܠ ܓܒ݂ܵܪ ܕܐܲܦܪܸܫ ܦܘܼܪܫܵܢܵܐ ܕܕܲܗܒ݂ܵܐ ܠܡܵܪܝܵܐ. 23 ܘܟ݂ܠ ܓܲܒ݂ܪܵܐ ܕܐܸܫܬܿܟܲܚ ܠܹܗ ܬܸܟ݂ܠܬ݂ܵܐ: ܘܐܵܪܓܿܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ: ܘܣܲܥܪܵܐ ܕܥܸܙܹ̈ܐ: ܘܡܸܫܟܹ̈ܐ ܕܕܸܟ݂ܪܹ̈ܐ ܕܐܸܣܦܲܝܢܝܼܩܵܐ: ܘܡܸܫܟܹ̈ܐ ܕܣܵܣܵܓܿܘܿܢܵܐ ܐܲܝܬܿܝܼܘ. 24 ܟܠ ܕܐܲܦܪܸܫ ܦܘܼܪܫܵܢܵܐ ܕܣܹܐܡܵܐ ܘܕܲܢܚܵܫܵܐ: ܐܲܝܬܿܝܼܘ ܦܘܼܪܫܵܢܵܐ ܠܡܵܪܝܵܐ: ܘܟ݂ܠ ܕܐܸܫܟܲܚ ܠܹܗ ܩܲܝܣܵܐ ܕܐܸܫܟܵܪܥܵܐ: ܠܟ݂ܠ ܥܒ݂ܵܕ݂ܵܐ ܕܦܘܼܠܚܵܢܵܐ: ܐܲܝܬܿܝܼܘ. 25 ܘܟ݂ܠ ܐܲܢ̄ܬܿܬ݂ܵܐ ܚܲܟܿܝܼܡܲܬ݂ ܠܸܒܵܐ ܒܐܝܼܕܹܝܗ ܥܸܙܠܲܬ݂: ܘܡܲܝܬܿܝܼܢ ܗ̄ܘܵܘ ܟܲܕ݂ ܥܙܝܼܠ: ܬܸܟ݂ܠܬ݂ܵܐ: ܘܐܵܪܓܿܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ. 26 ܘܟ݂ܠ ܢܸܫܹ̈ܐ ܕܐܸܬ݂ܚܲܫܲܒ݂ ܒܠܸܒܿܗܹܝܢ: ܒܚܸܟ݂ܡܬ݂ܵܐ ܥܙܲܠ ܣܲܥܪܵܐ. 27 ܘܪܵܘܪ̈ܒ݂ܵܢܹܐ ܐܲܝܬܿܝܼܘ ܟܹܐܦܹ̈ܐ ܕܒܹܪܘܼܠܵܐ: ܘܟܹܐܦܹ̈ܐ ܕܫܲܠܡܘܼܬ݂ܵܐ: ܠܦܸܕܬ݂ܵܐ ܘܠܲܦܪܝܼܣܵܐ. 28 ܘܒܸܣܡܹ̈ܐ ܘܡܸܫܚܵܐ ܠܡܲܢܗܵܪܘܼ: ܘܲܠܡܸܫܚܵܐ ܕܲܡܫܝܼܚܘܼܬ݂ܵܐ: ܘܲܠܥܸܛܪܵܐ ܕܒܸܣܡܹ̈ܐ. 29 ܟܠ ܓܲܒ݂ܪܵܐ ܘܐܲܢ̄ܬܿܬ݂ܵܐ ܕܐܸܬ݂ܚܲܫܲܒ݂ܘ ܒܠܸܒܗܘܿܢ: ܠܡܲܝܬܵܝܼܘܼ ܠܟ݂ܠ ܥܒ݂ܵܕ ܕܲܦܩܲܕ ܡܵܪܝܵܐ: ܠܡܸܥܒܲܕ݂ ܒܐܝܼܕ݂ܵܐ ܕܡܘܼܫܹܐ: ܐܲܝܬܿܝܼܘ ܒܢܲܝ ܝܼܣܪܵܝܹܠ ܦܘܼܪܫܵܢܵܐ ܠܡܵܪܝܵܐ. 30 ܘܐܸܡܲܪ ܡܘܼܫܹܐ ܠܲܒ݂ܢܲܝ ܝܼܣܪܵܝܹܠ: ܚܙܵܘ ܕܲܩܪܵܐ ܡܵܪܝܵܐ ܒܫܹܡ ܠܒܲܨܠܝܼܐܹܝܠ: ܒܲܪ ܐܘܿܪܝܼ: ܒܲܪ ܚܡܘܿܪ: ܡܼܢ ܫܲܒ݂ܛܵܐ ܕܲܝܗܘܼܕ݂ܵܐ. 31 ܘܲܡܠܵܝܗܝ ܪܘܼܚܵܐ ܕܐܲܠܵܗܵܐ: ܒܚܸܟ݂ܡܬ݂ܵܐ: ܘܲܒ݂ܣܘܼܟܵܠܵܐ: ܘܒ݂ܝܼܕܲܥܬ݂ܵܐ: ܘܲܒ݂ܟ݂ܠ ܥܒ݂ܵܕ. 32 ܠܡܸܬ݂ܚܲܫܵܒ݂ܘܼ ܡܲܚܫܲܒ݂ܬܵܐ: ܠܡܸܥܒܲܕ ܒܕܲܗܒ݂ܵܐ: ܘܲܒ݂ܣܹܐܡܵܐ: ܘܒܲܢܚܵܫܵܐ. 33 ܘܒܲܐܪܕܲܟ݂ܠܘܼܬ݂ ܟܹܐܦܹ̈ܐ ܠܲܡܫܲܠܵܡܘܼ: ܘܢܲܓܵܪܘܼܬ݂ ܩܲܝܣܹ̈ܐ: ܠܡܸܥܒܲܕ݂ ܟܠ ܥܒ݂ܵܕ ܐܘܼܡܵܢܘܼ. 34 ܘܲܠܡܲܠܵܦܘܼ ܝܲܗ̄ܒ݂ ܒܠܸܒܹܿܗ: ܗܘܼ ܘܐܹܠܝܼܗܲܒ݂ ܒܲܪ ܐܲܚܝܼܣܡܲܟ݂: ܡܼܢ ܫܲܒ݂ܛܵܐ ܕܕ݂ܵܢ. 35 ܡܠܵܐ ܐܸܢܘܿܢ ܚܸܟ݂ܡܲܬ݂ ܠܸܒܵܐ: ܠܡܸܥܒܲܕ ܟܠ ܥܒ݂ܵܕ݂: ܢܲܓܵܪ: ܘܐܘܼܡܵܢ: ܘܨܲܝܵܪ: ܒܬܸܟ݂ܠܬ݂ܵܐ ܘܒܲܐܪܓܿܘܵܢܵܐ: ܘܲܒ݂ܒ݂ܘܼܨܵܐ: ܘܲܒ݂ܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒܲܙܩܘܿܪܵܐ: ܥܲܒ݂ܕܲܝ ܟܠ ܥܒ݂ܵܕ݂: ܡܸܬ݂ܚܲܫܒܲܝ ܡܲܚܫ̈ܒ݂ܵܬ݂ܵܐ.

********

ܩܦܠܐܘܢ : ܠܘ.

1 ܘܲܥܒܲܕ݂ܘ ܒܲܨܠܝܼܐܹܝܠ: ܘܐܹܠܝܼܗܲܒ݂: ܘܟ݂ܠ ܓܒܲܪ ܚܲܟܿܝܼܡ ܠܸܒܵܐ: ܕܝܲܗ̄ܒ݂ ܡܵܪܝܵܐ ܚܸܟ݂ܡܬ݂ܵܐ ܘܣܘܼܟܵܠܵܐ ܒܗܘܿܢ ܠܡܸܕܲܥ ܘܲܠܡܸܥܒܲܕ ܟܠܹܗ ܥܒ݂ܵܕ݂ܵܐ ܕܦܘܼܠܚܵܢܵܐ ܕܩܘܼܕ݂ܫܵܐ: ܐܲܝܟ݂ ܡܵܐ ܕܦܲܩܸܕ݂ ܡܵܪܝܵܐ. 2 ܘܲܩܪܵܐ ܡܘܼܫܹܐ ܠܒܲܨܠܝܼܐܹܝܠ ܘܠܹܐܠܝܼܗܲܒ݂: ܘܲܠܟ݂ܠ ܓܒܲܪ ܚܲܟܿܝܼܡ ܠܸܒܵܐ: ܕܝܲܗ̄ܒ݂ ܡܵܪܝܵܐ ܚܸܟ݂ܡܬ݂ܵܐ ܒܠܸܒܹܿܗ: ܟܠ ܕܐܸܬ݂ܚܲܫܲܒ݂ ܒܠܸܒܹܿܗ: ܠܡܸܩܪܲܒ݂ ܠܲܥܒ݂ܵܕ݂ܵܐ ܠܡܸܥܒܿܕܹܗ. 3 ܘܲܢܣܲܒ݂ܘ ܡܼܢ ܩܕ݂ܵܡ ܡܘܼܫܹܐ: ܟܠܹܗ ܦܘܼܪܫܵܢܵܐ ܕܐܲܝܬܿܝܼܘ ܒܢܲܝ ܝܼܣܪܵܝܹܠ ܠܲܥܒ݂ܵܕ݂ܵܐ ܕܡܲܫܟܲܢܙܲܒ݂ܢܵܐ ܠܡܸܥܒܿܕܹܗ: ܘܗܸܢܘܿܢ ܡܲܝܬܿܝܼܢ ܗ̄ܘܵܘ ܠܹܗ: ܬܘܼܒ݂ ܦܘܼܪܫܵܢܵܐ ܡܼܢ ܨܦܲܪ ܠܲܨܦܲܪ. 4 ܘܐܲܝܬܿܝܼܘ ܟܠܗܘܿܢ ܚܲܟܿܝܼܡܹ̈ܐ ܕܥܵܒ݂ܕܿܝܼܢ ܥܒ݂ܵܕ݂ܵܐ ܕܩܘܼܕ݂ܫܵܐ: ܐ̄ܢܵܫ ܐ̄ܢܵܫ ܡܼܢ ܥܒ݂ܵܕܹ̈ܐ ܕܗܸܢܘܿܢ ܥܵܒ݂ܕܿܝܼܢ. 5 ܘܐܸܡܲܪܘ ܠܡܘܼܫܹܐ ܡܲܣܓܹܿܐ ܥܲܡܵܐ ܠܡܲܝܬܵܝܘܼ: ܟܲܕܿܘܼ ܥܒ݂ܵܕ݂ܵܐ ܠܲܥܒ݂ܝܼܕܬܵܐ ܕܦܲܩܸܕ݂ ܡܵܪܝܵܐ ܠܡܸܥܒܲܕ. 6 ܘܦܲܩܸܕ ܡܘܼܫܹܐ ܘܲܩܪܵܘ ܟܵܪ̈ܘܿܙܹܐ ܒܡܲܫܪܝܼܬ݂ܵܐ: ܘܐܸܡܲܪܘ: ܓܲܒ݂ܪܵܐ: ܐܵܘ ܐܲܢ̄ܬܿܬ݂ܵܐ: ܠܵܐ ܢܸܥܒܿܕ݂ܘܼܢ ܬܘܼܒ݂ ܥܒ݂ܵܕ݂ܵܐ ܠܦܘܼܪܫܵܢܵܐ ܕܩܘܼܕ݂ܫܵܐ: ܘܐܸܬ݂ܟܿܠܝܼܘ ܥܲܡܵܐ ܡܼܢ ܕܲܠܡܲܝܬܵܝܘܼ. 7 ܘܲܥܒ݂ܵܕ݂ܵܐ ܗܘܵܐ ܡܸܣܲܬ݂ ܟܠܹܗ ܥܒ݂ܵܕ݂ܵܐ ܠܡܸܥܒܿܕܹܗ: ܘܐܵܘܬܲܪ. 8 ܘܲܥܒܲܕ݂ܘ ܟܠ ܚܲܟܿܝܼܡܲܝ ܠܸܒܵܐ: ܘܥܲܒ݂ܕܲܝ ܥܒ݂ܵܕ݂ܵܐ: ܡܲܫܟܿܢܵܐ ܕܲܥܣܲܪ ܝܵܪܝܼܥܵܢ ܕܒ݂ܘܼܨܵܐ ܥܙܝܼܠܵܐ: ܬܸܟ݂ܠܬ݂ܵܐ: ܘܐܵܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܟܪܘܼܒ݂ܵܐ ܥܒ݂ܵܕ݂ܵܐ ܕܐܘܼܡܵܢܵܐ: ܥܒܲܕ݂ܘ ܐܸܢܹܝܢ. 9 ܐܘܼܪܟܵܗ ܕܝܵܪܝܼܥܬܵܐ ܚܕ݂ܵܐ: ܥܸܣܪܝܼܢ ܘܲܬ݂ܡܵܢܹܐ ܐܲܡܝܼܢ: ܘܲܦܬ݂ܵܝܵܗ ܐܲܪܒܲܥ ܐܲܡܝܼܢ ܕܝܵܪܝܼܥܬܵܐ ܚܕ݂ܵܐ: ܡܫܘܼܚܬ݂ܵܐ ܚܕ݂ܵܐ ܠܟ݂ܠܗܹܝܢ ܝܵܪܝܼܥܵܬ݂ܵܐ. 10 ܘܕܲܒܸܿܩܘ ܚܲܡܸܫ ܝܵܪܝܼܥܵܢ ܐܲܟ݂ܚܕ݂ܵܐ: ܘܚܲܡܸܫ ܝܵܪܝܼܥܵܢ ܕܲܒܸܿܩܘ ܚܕ݂ܵܐ ܒܲܚܕ݂ܵܐ. 11 ܘܲܥܒܲܕ݂ܘ ܬܵܢܵܐܬ݂ܵܐ ܕܬܸܟ݂ܠܬ݂ܵܐ: ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܚܕ݂ܵܐ: ܡܼܢ ܣܸܛܪܵܗ ܕܕܸܒ݂ܩܵܐ: ܘܗܵܟܲܢܵܐ ܥܒܲܕ݂ܘ ܒܣܸܦܬ݂ܵܗ ܕܝܵܪܝܼܥܬܵܐ ܡܼܢ ܣܸܛܪܵܐ ܕܕܸܒ݂ܩܵܐ ܐ̄ܚܪܹܢܵܐ. 12 ܚܲܡܫܝܼܢ ܬܵܢܵܐܢ ܥܒܲܕ݂ܘ ܠܝܵܪܝܼܥܬܵܐ ܚܕ݂ܵܐ: ܘܚܲܡܫܝܼܢ ܬܵܢܵܐܢ ܥܒܲܕ݂ܘ ܒܣܸܛܪܵܗ ܕܝܵܪܝܼܥܬܵܐ ܚܕ݂ܵܐ ܒܕܸܒ݂ܩܵܐ ܐ̄ܚܪܹܢܵܐ: ܘܡܲܩܒܿܠܲܢ ܬܵܢܵܐܬ݂ܵܐ ܚܕ݂ܵܐ ܠܘܼܩܒܲܠ ܚܕ݂ܵܐ. 13 ܘܲܥܒܲܕ݂ܘ ܚܲܡܫܝܼܢ ܩܘܼܪ̈ܩܣܝܼܢ ܕܕܲܗܒ݂ܵܐ: ܘܕܲܒܸܿܩܘ ܝܵܪܝܼܥܬܵܐ ܚܕ݂ܵܐ ܒܲܚܕ݂ܵܐ ܒܩܘܼܪ̈ܩܣܹܐ: ܘܲܗܘܵܐ ܡܲܫܟܢܵܐ ܚܲܕ݂. 14 ܘܲܥܒܲܕ݂ܘ ܝܵܪܝܼܥܬܵܐ ܕܣܲܥܪܵܐ: ܠܡܸܦܪܲܣ ܥܲܠ ܡܲܫܟܢܵܐ: ܚܕܲܥܸܣܪܹܐ ܝܵܪܝܼܥܵܢ ܥܒܲܕ݂ܘ ܐܸܢܹܝܢ. 15 ܐܘܼܪܟܵܗ ܕܝܵܪܝܼܥܬܵܐ ܚܕ݂ܵܐ: ܬܠܵܬ݂ܝܼܢ ܐܲܡܝܼܢ: ܘܲܦܬ݂ܵܝܵܗ ܐܲܪܒܲܥ ܐܲܡܝܼܢ: ܕܝܵܪܝܼܥܬܵܐ ܚܕ݂ܵܐ: ܡܫܘܼܚܬܵܐ ܚܕ݂ܵܐ ܠܲܚܕܲܥܸܣܪܹܐ ܝܵܪܝܼܥܵܢ. 16 ܘܕܲܒܸܿܩܘ ܚܲܡܸܫ ܝܵܪܝܼܥܵܢ ܐܲܟ݂ܚܕ݂ܵܐ ܘܫܸܬ݂ ܝܵܪܝܼܥܵܢ ܐܲܟ݂ܚܕ݂ܵܐ. 17 ܘܲܥܒܲܕ݂ܘ ܬܵܢܵܐܬ݂ܵܐ: ܚܲܡܫܝܼܢ ܬܵܢܵܐܢ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܡܼܢ ܣܸܛܪܵܐ ܕܕܸܒ݂ܩܵܐ: ܘܚܲܡܫܝܼܢ ܬܵܢܵܐܢ ܥܒܲܕ݂ܘ ܥܲܠ ܣܸܦܬ݂ܵܗ ܕܝܵܪܝܼܥܬܵܐ ܒܕܸܒ݂ܩܵܐ ܐ̄ܚܪܹܢܵܐ. 18 ܘܲܥܒܲܕܘ ܩܘܼܪ̈ܩܣܹܐ ܕܲܢܚܵܫܵܐ ܚܲܡܫܝܼܢ: ܠܲܡܕܲܒܵܩܘܼܬܹܗ ܠܡܲܫܟܿܢܵܐ: ܕܢܸܗܘܸܐ ܚܲܕ݂. 19 ܘܲܥܒܲܕ݂ܘ ܦܪܵܣܵܐ ܠܡܲܫܟܿܢܵܐ: ܡܸܫܟܹ̈ܐ ܕܕܸܟ݂ܪܹ̈ܐ ܕܐܸܣܦܲܝܢܝܼܩܵܐ: ܘܲܩܪܵܡܵܐ ܕܡܸܫܟܹ̈ܐ ܕܣܵܣܵܓܿܘܿܢܵܐ ܡܼܢ ܠܥܸܠ. 20 ܘܲܥܒܲܕ݂ܘ ܕܲܦܹ̈ܐ ܠܡܲܫܟܿܢܵܐ ܕܩܲܝܣܵܐ ܕܐܸܫܟܵܪܥܵܐ ܩܵܝܡܵܐ. 21 ܥܣܲܪ ܐܲܡܝܼܢ ܐܘܼܪܟܹܗ ܕܕܲܦܵܐ ܚܲܕ݂: ܘܐܲܡܵܐ ܘܦܸܠܓܿܘܿܬ݂ ܐܲܡܵܐ ܦܬ݂ܵܝܹܗ ܕܕܲܦܵܐ ܚܲܕ݂. 22 ܬܲܪܬܹܿܝܢ ܨܵܝܪܵܢ ܠܕܲܦܵܐ ܚܲܕ݂: ܘܬܲܪܬܹܿܝܢ ܨܵܝܪܵܢ ܠܕܲܦܵܐ ܐ̄ܚܪܹܢܵܐ: ܬܪܝܼܨܵܢ ܚܕ݂ܵܐ ܠܘܼܩܒܲܠ ܚܕ݂ܵܐ: ܗܵܟܲܢܵܐ ܥܒܲܕ݂ܘ ܠܟ݂ܠܗܘܿܢ ܕܲܦܹ̈ܐ ܕܡܲܫܟܢܵܐ. 23 ܘܲܥܒܲܕ݂ܘ ܕܲܦܹ̈ܐ ܠܡܲܫܟܿܢܵܐ: ܥܸܣܪܝܼܢ ܕܲܦܝܼܢ ܠܣܸܛܪܵܐ ܕܪܘܼܚܵܐ ܕܬܲܝܡܢܵܐ. 24 ܘܐܲܪܒܿܥܝܼܢ ܣܵܡܟܹ̈ܐ ܕܣܹܐܡܵܐ ܥܒܲܕ݂ܘ ܬܚܹܝܬ݂ ܥܸܣܪܝܼܢ ܕܲܦܝܼܢ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂ ܠܲܬ݂ܪܹܝܢ ܨܵܝܪܵܬܹܗ: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂ ܠܲܬ݂ܪܹܝܢ ܨܵܝܪܵܬܹܗ ܥܒܲܕ݂ܘ. 25 ܘܲܠܣܸܛܪܵܐ ܐ̄ܚܪܹܢܵܐ ܕܡܲܫܟܢܵܐ: ܠܣܸܛܪܵܐ ܕܪܘܼܚܵܐ ܕܓܲܪܒܿܝܵܐ: ܥܒܲܕ݂ܘ ܥܸܣܪܝܼܢ ܕܲܦܝܼܢ. 26 ܘܐܲܪܒܿܥܝܼܢ ܣܵܡܟܹ̈ܐ ܕܣܹܐܡܵܐ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ. 27 ܘܠܲܫܦܘܿܠܲܝ ܡܲܫܟܿܢܵܐ ܡܼܢ ܡܲܥܪܒ݂ܵܐ: ܥܒܲܕ݂ܘ ܫܬܵܐ ܕܲܦܝܼܢ. 28 ܘܲܬ݂ܪܹܝܢ ܕܲܦܝܼܢ ܥܒܲܕ݂ܘ ܠܙܵܘܝܵܬ݂ܵܐ ܕܡܲܫܟܢܵܐ ܒܲܫܦܘܿܠܲܝܗܘܿܢ. 29 ܘܲܗܘܵܘ ܡܲܬ݂ܐܡܝܼܢ ܡܼܢ ܠܬܲܚܬܿ: ܘܐܲܟ݂ܚܕ݂ܵܐ ܓܵܦܝܼܢ ܪܹܫܲܝܗܘܿܢ ܥܲܠ ܙܲܩܙܲܩܬ݂ܵܐ ܚܕ݂ܵܐ: ܗܵܟܲܢܵܐ ܥܒܲܕ݂ܘ ܠܲܬ݂ܪܲܝܗܘܿܢ ܠܬܲܪܬܹܿܝܢ ܙܵܘܝܵܢ. 30 ܘܲܗܘܵܘ ܬܡܵܢܝܵܐ ܕܲܦܝܼܢ: ܘܣܵܡܟܲܝܗܘܿܢ ܕܣܹܐܡܵܐ ܫܸܬܿܬܲܥܣܲܪ: ܬܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܚܲܕ݂: ܘܲܬ݂ܪܹܝܢ ܣܵܡܟ݂ܝܼܢ ܬܚܹܝܬ݂ ܕܲܦܵܐ ܐ̄ܚܪܹܢܵܐ. 31 ܘܲܥܒܲܕ݂ܘ ܡܘܼܟ݂ܠܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܚܲܡܫܵܐ ܠܕܲܦܲܝ ܣܸܛܪܹܗ ܚܲܕ݂ ܕܡܲܫܟܢܵܐ. 32 ܘܚܲܡܫܵܐ ܡܘܼܟ݂ܠܝܼܢ ܠܕܲܦܲܝ ܣܸܛܪܹܗ ܐ̄ܚܪܹܢܵܐ ܕܡܲܫܟܢܵܐ: ܘܚܲܡܫܵܐ ܡܘܼܟ݂ܠܝܼܢ ܠܕܲܦܵܘܗܝ ܕܡܲܫܟܢܵܐ ܠܲܫܦܘܿܠܲܝܗܘܿܢ ܡܼܢ ܡܲܥܪܒ݂ܵܐ. 33 ܘܲܥܒܲܕ݂ܘ ܡܘܼܟ݂ܠܵܐ ܡܸܨܥܵܝܵܐ ܠܡܲܥܒܵܪܘܼ ܒܓ݂ܵܘ ܕܲܦܹ̈ܐ: ܡܼܢ ܗܵܢܵܐ ܣܸܛܪܵܐ ܠܗܵܢܵܐ. 34 ܘܕܲܦܹ̈ܐ ܩܪܲܡܘ ܕܲܗܒ݂ܵܐ: ܘܙܲܩܙܩܵܬ݂ܗܘܿܢ ܥܒܲܕ݂ܘ ܕܲܗܒ݂ܵܐ ܐܲܬ݂ܪܵܐ ܠܡܘܼܟ݂ܠܹ̈ܐ: ܘܲܩܪܲܡܘ ܐܸܢܘܿܢ ܠܡܘܼܟ݂ܠܹ̈ܐ ܕܲܗܒ݂ܵܐ. 35 ܘܲܥܒܲܕ݂ܘ ܦܪܵܣܵܐ ܕܬܸܟ݂ܠܬ݂ܵܐ: ܘܐܵܪܓܿܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܐܘܼܡܵܢܵܐ: ܥܲܒ݂ܕܹܿܗ ܟܪܘܼܒ݂ܵܐ. 36 ܘܲܥܒܲܕ݂ܘ ܠܹܗ ܐܲܪܒܥܵܐ ܥܲܡܘܼܕܹ̈ܐ ܕܐܸܫܟܵܪܥܵܐ: ܘܲܩܪܲܡܘ ܐܸܢܘܿܢ ܕܲܗܒ݂ܵܐ: ܘܲܠܩܘܼܒ݂ܥܲܝܗܘܿܢ ܕܲܗܒ݂ܵܐ: ܘܲܥܒܲܕ ܠܗܘܿܢ ܐܲܪܒܥܵܐ ܣܵܡܟ݂ܝܼܢ ܕܣܹܐܡܵܐ. 37 ܘܲܥܒܲܕ݂ܘ ܦܪܵܣܵܐ ܠܬܲܪܥܵܐ ܕܡܲܫܟܢܵܐ: ܬܸܟ݂ܠܬ݂ܵܐ: ܘܐܵܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܨܘܼܪܬܵܐ. 38 ܥܲܡܘܼܕ݂ܵܘܗܝ ܚܲܡܫܵܐ: ܘܩܘܼܒ݂ܥܲܝܗܘܿܢ ܚܲܡܫܵܐ: ܘܲܩܪܵܡܵܐ ܕܪܹܫܲܝܗܘܿܢ: ܘܲܩܪܵܡܗܘܿܢ ܕܕܲܗܒ݂ܵܐ: ܘܣܵܡܟܲܝܗܘܿܢ ܚܲܡܫܵܐ ܕܲܢܚܵܫܵܐ.

********

ܩܦܠܐܘܢ : ܠܙ.

1 ܘܲܥܒܲܕ݂ ܒܲܨܠܝܼܐܹܝܠ ܩܹܒ݂ܘܼܬ݂ܵܐ ܕܩܲܝܣܵܐ ܕܐܸܫܟܵܪܥܵܐ: ܬܲܪܬܹܿܝܢ ܐܲܡܝܼܢ ܘܲܦܠܸܓ݂ ܐܘܼܪܟܵܗ: ܘܐܲܡܵܐ ܘܲܦܠܸܓ ܦܬ݂ܵܝܵܗ: ܘܐܲܡܵܐ ܘܲܦܠܸܓ ܪܵܘܡܵܗ. 2 ܘܩܲܪܡܵܗ ܕܲܗܒ݂ܵܐ ܕܲܟ݂ܝܵܐ ܡܼܢ ܠܓ݂ܵܘ ܘܡܼܢ ܠܒܲܪ: ܘܲܥܒܲܕ݂ ܠܵܗ ܟܠܝܼܠܵܐ ܕܕܲܗܒ݂ܵܐ ܟܲܕ ܚܵܕ݂ܪܵܐ. 3 ܘܲܚܫܲܠ ܠܵܗ ܐܲܪܒܲܥ ܙܲܩܙܩܵܬ݂ܵܐ ܕܕܲܗܒ݂ܵܐ ܥܲܠ ܐܲܪܒܲܥ ܙܵܘܝܵܬ݂ܵܗ: ܬܲܪܬܹܿܝܢ ܙܲܩܙܩܲܢ ܥܲܠ ܣܸܛܪܵܗ ܚܲܕ݂: ܘܬܲܪܬܹܿܝܢ ܙܲܩܙܩܲܢ ܥܲܠ ܣܸܛܪܵܗ ܐ̄ܚܪܹܢܵܐ. 4 ܘܲܥܒܲܕ݂ ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܲܩܪܲܡ ܐܸܢܘܿܢ ܕܲܗܒ݂ܵܐ. 5 ܘܐܲܥܸܠ ܩܘܼܦܹ̈ܐ ܒܙܲܩܙܩܵܬ݂ܵܐ: ܥܲܠ ܣܸܛܪܹܝܗ ܕܩܹܒ݂ܘܼܬ݂ܵܐ: ܠܡܸܫܩܠܵܗ ܠܩܹܒ݂ܘܼܬ݂ܵܐ. 6 ܘܲܥܒܲܕ݂ ܚܘܼܣܵܝܵܐ ܕܕܲܗܒ݂ܵܐ ܕܲܟ݂ܝܵܐ: ܬܲܪܬܹܿܝܢ ܐܲܡܝܼܢ ܘܲܦܠܸܓ ܐܘܼܪܟܹܗ: ܘܐܲܡܵܐ ܘܲܦܠܸܓ ܦܬ݂ܵܝܹܗ. 7 ܘܲܥܒܲܕ ܬܪܹܝܢ ܟܪܘܼܒܹ̈ܐ ܕܕܲܗܒ݂ܵܐ: ܕܢܸܣܟܿܬ݂ܵܐ ܥܒܲܕ݂ ܐܸܢܘܿܢ: ܡܼܢ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ. 8 ܟܪܘܼܒ݂ܵܐ ܚܲܕ݂ ܡܼܢ ܣܸܛܪܵܗ ܡܸܟܵܐ: ܘܲܟ݂ܪܘܼܒ݂ܵܐ ܐ̄ܚܪܹܢܵܐ ܡܼܢ ܣܸܛܪܵܗ ܐ̄ܚܪܹܢܵܐ: ܠܥܸܠ ܡܼܢ ܚܘܼܣܵܝܵܐ ܥܒܲܕ݂ ܟܪ̈ܘܼܒܹܐ ܡܼܢ ܬܪܹܝܢ ܣܸܛܪܵܘܗܝ. 9 ܘܲܗܘܵܘ ܟܪ̈ܘܼܒܹܐ ܦܪܝܼܣܝܼܢ ܓܸܦܲܝܗܘܿܢ ܡܼܢ ܠܥܸܠ: ܘܡܲܛܠܠܝܼܢ ܒܓܸܦܲܝܗܘܿܢ ܥܲܠ ܚܘܼܣܵܝܵܐ: ܘܐܲܦܲܝܗܘܿܢ ܚܲܕ݂ ܠܘܼܩܒܲܠ ܚܲܕ݂: ܥܲܠ ܚܘܼܣܵܝܵܐ ܗܘܲܝ ܐܲܦܲܝܗܘܿܢ ܕܲܟ݂ܪ̈ܘܼܒܹܐ. 10 ܘܲܥܒܲܕ݂ ܦܵܬ݂ܘܿܪܵܐ ܕܩܲܝܣܵܐ ܕܐܸܫܟܵܪܥܵܐ: ܬܲܪܬܹܿܝܢ ܐܲܡܝܼܢ ܐܘܼܪܟܹܗ: ܘܐܲܡܵܐ ܦܬ݂ܵܝܹܗ: ܘܐܲܡܵܐ ܘܲܦܠܸܓ ܪܵܘܡܹܗ. 11 ܘܩܲܪܡܹܗ ܕܲܗܒ݂ܵܐ ܕܲܟ݂ܝܵܐ: ܘܲܥܒܲܕ݂ ܠܹܗ ܟܠܝܼܠܵܐ ܕܕܲܗܒ݂ܵܐ ܥܲܠ ܣܸܦܬܹܗ ܟܲܕ݂ ܚܵܕܲܪ. 12 ܘܲܥܒܲܕ݂ ܠܹܗ ܣܸܦܬ݂ܵܐ ܦܫܸܟ݂ ܟܲܕ݂ ܚܵܕܲܪ: ܘܲܥܒܲܕ݂ ܠܹܗ ܟܠܝܼܠܵܐ ܕܕܲܗܒ݂ܵܐ ܥܲܠ ܣܸܦܬܹܗ ܟܲܕ݂ ܚܵܕܲܪ. 13 ܘܲܚܫܲܠ ܠܹܗ ܐܲܪܒܲܥ ܙܲܩܙܩܲܢ ܕܕܲܗܒ݂ܵܐ: ܘܝܲܗ̄ܒ݂ ܙܲܩܙܩܵܬ݂ܵܐ ܥܲܠ ܐܲܪܒܲܥ ܙܵܘܝܵܬ݂ܵܐ ܥܲܠ ܐܲܪܒܲܥ ܪܸܓ݂ܠܵܘܗܝ. 14 ܠܘܼܩܒܲܠ ܣܸܦܬܹܗ ܗܘܲܝ ܙܲܩܙܩܵܬ݂ܵܐ: ܕܘܼܟܬ݂ܵܐ ܠܩܘܼܦܹ̈ܐ ܠܡܸܫܩܠܹܗ ܠܦܵܬ݂ܘܿܪܵܐ. 15 ܘܲܥܒܲܕ݂ ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܲܩܪܲܡ ܐܸܢܘܿܢ ܕܲܗܒ݂ܵܐ: ܠܡܸܫܩܲܠ ܒܗܘܿܢ ܦܵܬ݂ܘܿܪܵܐ. 16 ܘܲܥܒܲܕ݂ ܡܵܐܢܹ̈ܐ ܕܥܲܠ ܦܵܬ݂ܘܿܪܵܐ: ܡܲܓܿܣܵܘ̈ܗܝ: ܘܟܲܦܵܘ̈ܗܝ: ܘܙܵܒ݂ܘܿܪ̈ܵܘܗܝ: ܘܲܡܢܹܩܝܵܬ݂ܵܐ ܕܡܸܬ݂ܢܲܩܸܐ ܒܗܹܝܢ: ܕܕܲܗܒ݂ܵܐ ܕܲܟ݂ܝܵܐ. 17 ܘܲܥܒܲܕ ܡܢܵܪܬܵܐ ܕܕܲܗܒ݂ܵܐ ܕܲܟ݂ܝܵܐ: ܕܢܸܣܟܿܬ݂ܵܐ ܥܲܒ݂ܕܵܗ ܠܲܡܢܵܪܬܵܐ: ܒܵܣܹܣ ܕܝܼܠܵܗ: ܘܲܩܢܹܝܗ: ܘܐܸܣܩܦܹܝܗ: ܘܲܚܙܘܼܪܹ̈ܝܗ: ܘܫܘܼ̈ܫܲܢܹܝܗ: ܡܸܢܵܗ ܗ̄ܘܵܘ. 18 ܘܸܫܬܵܐ ܩܢܝܼܢ ܕܢܵܦܩܝܼܢ ܡܼܢ ܣܸܛܪܹܝܗ: ܬܠܵܬ݂ܵܐ ܩܢܲܝ̈ ܡܢܵܪܬܵܐ ܡܼܢ ܣܸܛܪܵܗ ܚܲܕ݂: ܘܲܬ݂ܠܵܬ݂ܵܐ ܩܢܲܝ̈ ܡܢܵܪܬܵܐ ܡܼܢ ܣܸܛܪܵܗ ܐ̄ܚܪܹܢܵܐ. 19 ܬܠܵܬ݂ܵܐ ܐܸܣܩܦܝܼܢ ܩܒ݂ܝܼܥܝܼܢ ܒܩܲܢܝܵܐ ܚܲܕ݂: ܘܚܲܙܘܼܪܹ̈ܐ ܘܫܘܿܫܲܢܹ̈ܐ: ܘܲܬ݂ܠܵܬ݂ܵܐ ܐܸܣܩܦܝܼܢ ܩܒ݂ܝܼܥܝܼܢ ܒܩܲܢܝܵܐ ܚܲܕ݂: ܘܚܲܙܘܼܪܹ̈ܐ ܘܫܘܿܫܲܢܹ̈ܐ: ܗܵܟܲܢܵܐ ܒܸܫܬܵܐ ܩܢܝܼܢ ܕܢܵܦܩܝܼܢ ܡܸܢܵܗ ܡܼܢ ܡܢܵܪܬܵܐ. 20 ܘܒܲܡܢܵܪܬܵܐ ܐܲܪܒܥܵܐ ܐܸܣܩܦܝܼܢ ܩܒ݂ܝܼܥܝܼܢ: ܘܚܲܙܘܼܪܹ̈ܐ ܘܫܘܿܫܲܢܹ̈ܐ. 21 ܚܲܙܘܼܪܵܐ ܬܚܹܝܬ݂ ܬܪܹܝܢ ܩܢܝܼܢ ܕܡܸܢܵܗ: ܘܚܲܙܘܼܪܵܐ ܬܚܹܝܬ݂ ܬܪܹܝܢ ܩܢܝܼܢ ܕܡܸܢܵܗ: ܘܚܲܙܘܼܪܵܐ ܬܚܹܝܬ݂ ܬܪܹܝܢ ܩܢܝܼܢ ܕܡܸܢܵܗ: ܗܵܟܲܢܵܐ ܠܸܫܬܵܐ ܩܢܝܼܢ ܕܢܵܦܩܝܼܢ ܡܸܢܵܗ ܡܼܢ ܡܢܵܪܬܵܐ. 22 ܘܚܲܙܘܼܪܹܝܗ ܘܲܩܢܹܝܗ ܡܸܢܵܗ ܗܘܵܘ: ܟܠܵܗ ܕܢܸܣܟܿܬ݂ܵܐ ܚܕ݂ܵܐ ܕܕܲܗܒ݂ܵܐ ܕܲܟ݂ܝܵܐ. 23 ܘܲܥܒܲܕ݂ ܫܪܵܓܹܝܗ ܫܲܒ݂ܥܵܐ: ܘܡܲܠܩܛܹܝܗܿ: ܘܟܲܦܹܝܗܿ: ܕܕܲܗܒ݂ܵܐ ܕܲܟ݂ܝܵܐ. 24 ܡܼܢ ܟܲܟܿܪܵܐ ܕܕܲܗܒ݂ܵܐ ܕܲܟ݂ܝܵܐ ܥܲܒ݂ܕܵܗ: ܠܵܗ ܘܲܠܟ݂ܠܗܘܿܢ ܡܵܐܢܹܝܗ. 25 ܘܲܥܒܲܕ݂ ܡܲܕ݂ܒܚܵܐ ܕܥܸܛܪܵܐ ܕܩܲܝܣܵܐ ܕܐܸܫܟܵܪܥܵܐ: ܐܲܡܵܐ ܐܘܼܪܟܹܗ: ܘܐܲܡܵܐ ܦܬ݂ܵܝܹܗ ܡܪܲܒܲܥ: ܘܬܲܪܬܹܿܝܢ ܐܲܡܝܼܢ ܪܵܘܡܹܗ: ܡܸܢܹܗ ܗܘܲܝ ܩܲܪܢܵܬܹܗ. 26 ܘܩܲܪܡܹܗ ܕܲܗܒ݂ܵܐ ܕܲܟ݂ܝܵܐ: ܠܐܸܓܵܪܹܗ ܘܠܸܐܣܵܘܗܝ ܟܲܕ݂ ܚܵܕܲܪ: ܘܲܠܩܲܪܢܵܬܹܗ: ܘܲܥܒܲܕ݂ ܠܹܗ ܟܠܝܼܠܵܐ ܕܕܲܗܒ݂ܵܐ ܟܲܕ݂ ܚܵܕܲܪ. 27 ܘܬܲܪܬܹܿܝܢ ܙܲܩܙܩܲܢ ܕܕܲܗܒ݂ܵܐ ܥܒܲܕ݂ ܠܹܗ: ܠܬܲܚܬܿ ܡܼܢ ܟܠܝܼܠܹܗ ܥܲܠ ܬܲܪܬܹܿܝܢ ܙܵܘܝܵܬܹܗ: ܥܲܠ ܬܪܹܝܢ ܣܸܛܪܵܘܗܝ: ܕܘܼܟܬ݂ܵܐ ܠܩܘܼܦܹ̈ܐ ܠܡܸܫܩܠܹܗ ܒܗܘܿܢ. 28 ܘܲܥܒܲܕ݂ ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܲܩܪܲܡ ܐܸܢܘܿܢ ܕܲܗܒ݂ܵܐ. 29 ܘܲܥܒܲܕ ܡܸܫܚܵܐ ܕܲܡܫܝܼܚܘܼܬ݂ ܩܘܼܕ݂ܫܵܐ: ܘܥܸܛܪܵܐ ܕܒܸܣܡܹ̈ܐ ܕܲܟ݂ܝܵܐ: ܥܒ݂ܵܕ݂ܵܐ ܡܒܲܣܡܵܐ.

********

ܩܦܠܐܘܢ : ܠܚ.

1 ܘܲܥܒܲܕ ܡܲܕ݂ܒܚܵܐ ܕܝܲܩܕܵܐ ܕܩܲܝܣܵܐ ܕܐܸܫܟܵܪܥܵܐ: ܚܲܡܸܫ ܐܲܡܝܼܢ ܐܘܼܪܟܹܗ: ܘܚܲܡܸܫ ܐܲܡܝܼܢ ܦܬ݂ܵܝܹܗ: ܡܪܲܒܲܥ: ܘܲܬ݂ܠܵܬ݂ ܐܲܡܝܼܢ ܪܵܘܡܹܗ. 2 ܘܲܥܒܲܕ ܩܲܪܢܵܬܹܗ ܥܲܠ ܐܲܪܒܲܥ ܙܵܘܝܵܬܹܗ: ܡܸܢܹܗ ܗܘܲܝ ܩܲܪܢܵܬܹܗ: ܘܩܲܪܡܹܗ ܢܚܵܫܵܐ. 3 ܘܲܥܒܲܕ݂ ܟܠܗܘܿܢ ܡܵܐܢܵܘܗܝ ܕܡܲܕ݂ܒܚܵܐ: ܩܲܕ݂ܣܹ̈ܐ: ܘܐܝܼܕܹ̈ܐ: ܘܩܲܪ̈ܕܵܠܹܐ: ܘܫܵܚܠܹ̈ܐ: ܘܡܲܫ̈ܠܵܘܵܬ݂ܵܐ: ܘܦܝܼܪ̈ܡܹܐ: ܘܟ݂ܠܗܘܿܢ ܡܵܐܢܵܘܗܝ ܥܒܲܕ݂ ܕܲܢܚܵܫܵܐ. 4 ܘܲܥܒܲܕ ܠܡܲܕ݂ܒܚܵܐ ܩܲܪܩܸܠ ܥܒ݂ܵܕ݂ܵܐ ܕܲܡܨܝܼܕܿܬܵܐ ܕܲܢܚܵܫܵܐ ܬܚܹܝܬ݂ ܫܦܘܿܠܵܘܗܝ ܡܼܢ ܠܬܲܚܬܿ ܘܲܥܕܲܡܵܐ ܠܦܸܠܓܹܿܗ. 5 ܘܲܚܫܲܠ ܠܹܗ ܐܲܪܒܲܥ ܙܲܩܙܩܲܢ ܒܐܲܪܒܲܥ ܙܵܘܝܵܬܹܗ: ܠܒ݂ܵܣܹܣ ܕܲܢܚܵܫܵܐ: ܕܘܼܟܿܬ݂ܵܐ ܠܩܘܼܦܹ̈ܐ. 6 ܘܲܥܒܲܕ ܩܘܼܦܹ̈ܐ ܕܩܲܝܣܵܐ ܕܐܸܫܟܵܪܥܵܐ: ܘܲܩܪܲܡ ܐܸܢܘܿܢ ܢܚܵܫܵܐ. 7 ܘܐܲܥܸܠ ܩܘܼܦܹ̈ܐ ܒܙܲܩܙܩܵܬ݂ܵܐ: ܥܲܠ ܣܸܛܪܵܘܗܝ ܕܡܲܕ݂ܒܚܵܐ: ܠܡܸܫܩܠܹܗ ܒܗܘܿܢ: ܚܠܝܼܠܵܐ ܕܕܲܦܹ̈ܐ ܥܲܒ݂ܕܹܿܗ. 8 ܘܲܥܒܲܕ ܠܲܩܢܵܐ ܕܲܢܚܵܫܵܐ: ܘܟܲܢܵܗ ܕܝܼܠܵܗ ܕܲܢܚܵܫܵܐ: ܒܹܝܬ݂ ܡܲܚܙܝܵܐ ܕܢܸܫܹ̈ܐ ܕܐܵܬܹܝܢ ܠܲܡܨܲܠܵܝܘܼ ܒܬܲܪܥܵܐ ܕܡܲܫܟܲܢܙܲܒ݂ܢܵܐ. 9 ܘܲܥܒܲܕ݂ ܕܵܪܬܵܐ ܠܣܸܛܪܵܐ ܕܪܘܼܚܵܐ ܕܬܲܝܡܢܵܐ: ܣܸܕ݂ܪܹ̈ܐ ܕܕ݂ܵܪܬܵܐ ܕܒ݂ܘܼܨܵܐ ܥܙܝܼܠܵܐ ܡܵܐܐ ܐܲܡܝܼܢ. 10 ܥܲܡܘܼܕܲܝܗܘܿܢ ܥܸܣܪܝܼܢ: ܘܣܵܡܟܲܝܗܘܿܢ ܥܸܣܪܝܼܢ ܕܲܢܚܵܫܵܐ: ܘܩܘܼܒ݂ܥܲܝܗܘܿܢ ܕܥܲܡܘܼܕܹ̈ܐ ܘܲܩܪܵܡܗܘܿܢ ܕܣܹܐܡܵܐ. 11 ܘܲܠܣܸܛܪܵܐ ܕܓܲܪܒܝܵܐ ܡܵܐܐ ܐܲܡܝܼܢ: ܥܲܡܘܼܕܲܝܗܘܿܢ ܥܸܣܪܝܼܢ: ܘܣܵܡܟܲܝܗܘܿܢ ܥܸܣܪܝܼܢ ܕܲܢܚܵܫܵܐ: ܘܩܘܼܒ݂ܥܲܝܗܘܿܢ ܕܥܲܡܘܼܕܹ̈ܐ ܘܲܩܪܵܡܗܘܿܢ ܕܣܹܐܡܵܐ. 12 ܘܲܠܣܸܛܪܵܐ ܕܡܲܥܪܒ݂ܵܐ ܣܸܕ݂ܪܹ̈ܐ ܚܲܡܫܝܼܢ ܐܲܡܝܼܢ: ܥܲܡܘܼܕܲܝܗܘܿܢ ܥܸܣܪܵܐ: ܘܣܵܡܟܲܝܗܘܿܢ ܥܸܣܪܵܐ: ܘܩܘܼܒ݂ܥܲܝܗܘܿܢ ܕܥܲܡܘܼܕܹ̈ܐ ܘܲܩܪܵܡܗܘܿܢ ܕܣܹܐܡܵܐ. 13 ܘܲܠܣܸܛܪܵܐ ܕܪܘܼܚܵܐ ܕܡܲܕ݂ܢܚܵܐ ܚܲܡܫܝܼܢ ܐܲܡܝܼܢ ܣܸܕ݂ܪܝܼܢ. 14 ܘܚܲܡܫܲܥܸܣܪܹܐ ܐܲܡܝܼܢ ܠܣܸܛܪܵܐ: ܥܲܡܘܼܕܲܝܗܘܿܢ ܬܠܵܬ݂ܵܐ: ܘܣܵܡܟܲܝܗܘܿܢ ܬܠܵܬ݂ܵܐ. 15 ܘܲܠܣܸܛܪܵܐ ܐ̄ܚܪܹܢܵܐ: ܡܸܟܵܐ ܘܡܸܟܵܐ ܠܬܲܪܥܵܐ ܕܕ݂ܵܪܬܵܐ: ܣܸܕ݂ܪܹ̈ܐ ܚܲܡܫܲܥܸܣܪܹܐ ܐܲܡܝܼܢ ܠܣܸܛܪܵܐ: ܥܲܡܘܼܕܲܝܗܘܿܢ ܬܠܵܬ݂ܵܐ: ܘܣܵܡܟܲܝܗܘܿܢ ܬܠܵܬ݂ܵܐ. 16 ܟܠܗܘܿܢ ܣܸܛܪܹ̈ܐ ܕܕ݂ܵܪܬܵܐ ܟܲܕ݂ ܚܵܕ݂ܪܵܐ: ܕܒ݂ܘܼܨܵܐ ܥܙܝܼܠܵܐ. 17 ܘܣܵܡܟܹ̈ܐ ܠܥܲܡܘܼܕܹ̈ܐ ܕܲܢܚܵܫܵܐ: ܘܩܘܼܒ݂ܥܲܝܗܘܿܢ ܕܥܲܡܘܼܕܹ̈ܐ: ܘܲܩܪܵܡܗܘܿܢ ܕܣܹܐܡܵܐ: ܘܲܩܪܵܡܵܐ ܕܪܹܫܲܝܗܘܿܢ ܕܣܹܐܡܵܐ: ܘܗܸܢܘܿܢ ܩܪܝܼܡܝܼܢ ܣܹܐܡܵܐ: ܟܠܗܘܿܢ ܥܲܡܘܼܕܹ̈ܐ ܕܕ݂ܵܪܬܵܐ. 18 ܘܲܦܪܵܣܵܐ ܕܬܲܪܥܵܐ ܕܕ݂ܵܪܬܵܐ: ܥܒ݂ܵܕ݂ܵܐ ܕܨܵܝܵܪܵܐ: ܬܸܟ݂ܠܬ݂ܵܐ: ܘܐܵܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܸܣܪܝܼܢ ܐܲܡܝܼܢ ܐܘܼܪܟܵܐ: ܘܪܵܘܡܵܐ ܘܲܦܬ݂ܵܝܵܐ ܚܲܡܸܫ ܐܲܡܝܼܢ: ܠܘܼܩܒܲܠ ܣܸܕ݂ܪܹ̈ܐ ܕܕ݂ܵܪܬܵܐ. 19 ܥܲܡܘܼܕܲܝܗܘܿܢ ܐܲܪܒܥܵܐ: ܘܣܵܡܟܲܝܗܘܿܢ ܐܲܪܒܥܵܐ ܕܲܢܚܵܫܵܐ: ܘܩܘܼܒ݂ܥܲܝܗܘܢ ܕܣܹܐܡܵܐ: ܘܲܩܪܵܡܵܐ ܕܪܹܫܲܝܗܘܿܢ: ܘܲܩܪܵܡܗܘܿܢ ܕܣܹܐܡܵܐ. 20 ܘܟ݂ܠܗܘܿܢ ܣܸܟܹ̈ܐ ܕܡܲܫܟܢܵܐ ܘܲܕܿܕ݂ܵܪܬܵܐ ܟܲܕ݂ ܚܵܕ݂ܪܵܐ ܕܲܢܚܵܫܵܐ. 21 ܗܵܠܹܝܢ ܡܸܢܝܵܢܹ̈ܐ ܕܡܲܫܟܢܵܐ: ܡܲܫܟܢܵܐ ܕܣܵܗܕܘܼܬ݂ܵܐ: ܕܐܸܬ݂ܡܢܝܼܘ ܥܲܠ ܡܸܠܲܬ݂ ܦܘܼܡܹܗ ܕܡܘܼܫܹܐ: ܘܦܘܼܠܚܵܢܵܐ ܕܠܹܘܵܝܹ̈ܐ: ܒܐܝܼܕ݂ܵܐ ܕܐܝܼܬ݂ܵܡܲܪ ܒܪܹܗ ܕܐܲܗܪܘܿܢ ܟܵܗܢܵܐ. 22 ܘܒܲܨܠܝܼܐܹܝܠ ܒܲܪ ܐܘܿܪܝܼ ܒܲܪ ܚܘܿܪ: ܡܼܢ ܫܲܒ݂ܛܵܐ ܕܲܝܗܘܼܕ݂ܵܐ: ܥܒܲܕ ܟܠ ܡܸܕܸܡ ܕܦܲܩܸܕ ܡܵܪܝܵܐ ܠܡܘܼܫܹܐ. 23 ܘܥܲܡܹܗ ܐܹܠܝܼܗܲܒ݂ ܒܲܪ ܐܲܚܝܼܣܡܵܟ݂ ܡܼܢ ܫܲܒ݂ܛܵܐ ܕܕ݂ܵܢ: ܢܲܓܵܪ: ܘܐܘܼܡܵܢ: ܘܨܲܝܵܪ ܒܬܸܟ݂ܠܬ݂ܵܐ: ܘܒܲܐܪܓܘܵܢܵܐ: ܘܲܒ݂ܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܲܒ݂ܒ݂ܘܼܨܵܐ. 24 ܟܠܹܗ ܕܲܗܒ݂ܵܐ ܕܐܸܬ݂ܥܒܸܕ ܠܲܥܒ݂ܵܕ݂ܵܐ: ܒܟ݂ܠܹܗ ܥܒ݂ܵܕ݂ܵܐ ܕܩܘܼܕ݂ܫܵܐ: ܗܘܵܐ ܕܲܗܒ݂ܵܐ ܕܦܘܼܪܫܵܢܵܐ ܥܸܣܪܝܼܢ ܘܲܬ݂ܫܲܥ ܟܲܟܿܪܝܼܢ: ܘܲܫܒܲܥ ܡܵܐܐ ܘܲܬ݂ܠܵܬ݂ܝܼܢ ܡܲܬ݂ܩܵܠܝܼܢ: ܒܡܲܬ݂ܩܵܠܵܐ ܕܩܘܼܕ݂ܫܵܐ. 25 ܘܣܹܐܡܵܐ ܕܡܸܢܝܵܢܵܐ ܕܲܟ݂ܢܘܼܫܬܵܐ ܡܵܐܐ ܟܲܟܿܪܝܼܢ: ܘܐܵܠܹܦ ܘܲܫܒܲܥܡܵܐܐ ܘܫܲܒ݂ܥܝܼܢ ܡܲܬ݂ܩܵܠܝܼܢ: ܒܡܲܬ݂ܩܵܠܵܐ ܕܩܘܼܕ݂ܫܵܐ. 26 ܡܲܬ݂ܩܵܠܵܐ ܠܪܹܫܵܐ: ܦܸܠܓܘܿܬ݂ ܡܲܬ݂ܩܵܠܵܐ ܒܡܲܬ݂ܩܵܠܲܝ ܩܘܼܕ݂ܫܵܐ: ܟܠ ܕܲܥܒܲܪ ܒܡܸܢܝܵܢܵܐ: ܡܼܢ ܒܲܪ ܥܸܣܪܝܼܢ ܫܢܝܼܢ ܘܲܠܥܸܠ: ܫܸܬ݂ܡܵܐܐ ܐܲܠܦܝܼܢ: ܘܲܬ݂ܠܵܬ݂ܵܐ ܐܲܠܦܝܼܢ: ܘܚܲܡܸܫܡܵܐܐ ܘܚܲܡܫܝܼܢ. 27 ܘܲܗܘܲܝ ܡܵܐܐ ܟܲܟܿܪܝܼܢ ܕܣܹܐܡܵܐ: ܠܡܸܚܫܲܠ ܣܵܡܟܹ̈ܐ ܕܩܘܼܕ݂ܫܵܐ: ܘܣܵܡܟܹ̈ܐ ܕܲܦܪܵܣܵܐ: ܡܵܐܐ ܣܵܡܟ݂ܝܼܢ: ܡܼܢ ܡܵܐܐ ܟܲܟܿܪܝܼܢ: ܟܲܟܿܪܵܐ ܠܣܵܡܟ݂ܵܐ. 28 ܘܐܵܠܹܦ ܘܲܫܒܲܥ ܡܵܐܐ ܘܫܲܒ݂ܥܝܼܢ ܘܚܲܡܫܵܐ: ܥܒܲܕ݂ ܩܘܼܒ݂ܥܹ̈ܐ ܠܥܲܡܘܼܕܹ̈ܐ: ܘܲܩܪܵܡܵܐ ܠܪܹܫܲܝܗܘܿܢ: ܘܲܩܪܲܡ ܐܸܢܘܿܢ ܣܹܐܡܵܐ. 29 ܟܠܹܗ ܢܚܵܫܵܐ ܕܦܘܼܪܫܵܢܵܐ ܫܲܒ݂ܥܝܼܢ ܟܲܟܿܪܝܼܢ: ܘܲܬ݂ܪܹܝܢ ܐܲܠܦܝܼܢ: ܘܐܲܪܒܲܥܡܵܐܐ ܡܲܬ݂ܩܵܠܝܼܢ. 30 ܘܲܥܒܲܕ ܒܹܗ ܣܵܡܟܹ̈ܐ ܕܬܲܪܥܵܐ ܕܡܲܫܟܲܢ ܙܲܒ݂ܢܵܐ: ܘܡܲܕ݂ܒܚܵܐ ܕܲܢܚܵܫܵܐ: ܘܩܲܪܩܸܠ ܕܝܼܠܹܗ ܕܲܢܚܵܫܵܐ: ܘܟ݂ܠܗܘܿܢ ܡܵܐܢܹ̈ܐ ܕܡܲܕ݂ܒܚܵܐ: ܘܣܵܡܟܹ̈ܐ ܕܕ݂ܵܪܬܵܐ ܟܲܕ݂ ܚܵܕ݂ܪܵܐ. 31 ܘܣܵܡܟܹ̈ܐ ܕܬܲܪܥܵܐ ܕܕ݂ܵܪܬܵܐ: ܘܟ݂ܠܗܹܝܢ ܣܸܟܹ̈ܐ ܕܡܲܫܟܿܢܵܐ ܘܟ݂ܠܗܹܝܢ ܣܸܟܹ̈ܐ ܕܕ݂ܵܪܬܵܐ ܟܲܕ݂ ܚܵܕ݂ܪܵܐ.

********

ܩܦܠܐܘܢ : ܠܛ.

1 ܘܡܼܢ ܬܸܟ݂ܠܬ݂ܵܐ: ܘܡܼܢ ܐܲܪܓܘܵܢܵܐ: ܘܡܼܢ ܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܥܒܲܕ݂ܘ ܠܒ݂ܘܼܫܲܝ ܬܸܫܡܸܫܬܵܐ ܠܲܡܫܲܡܵܫܘܼ ܒܩܘܼܕ݂ܫܵܐ: ܘܲܥܒܲܕ݂ܘ ܠܒ݂ܘܼܫܲܝ ܩܘܼܕ݂ܫܵܐ ܠܐܲܗܪܘܿܢ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ. 2 ܘܲܥܒܲܕܘ ܦܸܕܬ݂ܵܐ ܕܕܲܗܒ݂ܵܐ: ܬܸܟ݂ܠܬ݂ܵܐ: ܘܐܲܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ. 3 ܘܐܲܪܸܩܘ ܛܲܣܹ̈ܐ ܕܕܲܗܒ݂ܵܐ: ܘܲܦܣܲܩܘ ܚܘܼ̈ܛܹܐ ܠܡܲܥܒܵܪܘܼ ܒܓ݂ܵܘ ܬܸܟ݂ܠܬ݂ܵܐ: ܘܲܒ݂ܓ݂ܵܘ ܐܵܪܓܘܵܢܵܐ: ܘܲܒ݂ܓ݂ܵܘ ܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܲܒ݂ܓ݂ܵܘ ܒܘܼܨܵܐ: ܥܒ݂ܵܕ݂ܵܐ ܕܐܘܼܡܵܢܵܐ. 4 ܟܲܬ݂ܦܵܬ݂ܵܐ ܥܒܲܕ݂ܘ ܠܵܗ ܡܕܲܒܿܩܵܬ݂ܵܐ: ܥܲܠ ܬܪܹܝܢ ܣܸܛܪܹܝܗܿ ܡܕܲܒܿܩܲܢ. 5 ܘܗܸܡܝܵܢܵܐ ܕܦܸܕܬ݂ܵܐ: ܡܸܢܵܗ ܗܘܵܐ ܐܲܝܟ݂ ܥܒ݂ܵܕ݂ܵܗ: ܕܲܗܒ݂ܵܐ: ܬܸܟ݂ܠܬ݂ܵܐ: ܘܐܵܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ. 6 ܘܲܥܒܲܕ݂ܘ ܟܹܐܦܹ̈ܐ ܕܒܹܪܘܼܠܵܐ: ܡܵܘܚܕ݂ܵܢ ܘܡܲܫܪܵܢ ܒܕܲܗܒ݂ܵܐ: ܓܠܝܼܦܵܢ ܓܠܵܦܵܐ ܕܚܵܬ݂ܡܵܐ: ܥܲܠ ܫܡܵܗܹ̈ܐ ܕܲܒ݂ܢܲܝ ܝܼܣܪܵܝܹܠ. 7 ܘܣܵܡܘ ܐܸܢܹܝܢ ܥܲܠ ܟܲܬ݂ܦܵܬ݂ܵܗ ܕܦܸܕܬ݂ܵܐ: ܟܹܐܦܹ̈ܐ ܕܕ݂ܘܼܟ݂ܪܵܢܵܐ ܠܲܒ݂ܢܲܝ ܝܼܣܪܵܝܹܠ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ. 8 ܘܲܥܒܲܕ݂ܘ ܦܪܝܼܣܵܐ ܥܒ݂ܵܕ݂ܵܐ ܕܐܘܼܡܵܢܵܐ: ܐܲܝܟ݂ ܥܒ݂ܵܕ݂ܵܐ ܕܦܸܕܬ݂ܵܐ: ܕܲܗܒ݂ܵܐ ܬܸܟ݂ܠܬ݂ܵܐ: ܘܐܵܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ. 9 ܡܪܲܒܲܥ ܗ̄ܘܵܐ ܘܐܲܥܝܼܦ: ܘܲܥܒܲܕܘ ܚܘܼܣܵܝܵܐ: ܙܪܸܬ ܐܘܼܪܟܹܗ: ܘܲܙܪܸܬ ܦܬ݂ܵܝܹܗ ܟܲܕ ܐܲܥܝܼܦ. 10 ܘܫܲܠܸܡܘ ܒܹܗ ܐܲܪܒܥܵܐ ܣܸܕ݂ܪܝܼܢ ܕܟܹܐܦܹ̈ܐ ܣܸܕ݂ܪܵܐ ܩܲܕ݂ܡܵܝܵܐ: ܣܘܼܡܵܩܵܐ: ܘܙܵܪܓܵܐ: ܘܒܲܪܩܵܐ: ܣܸܕ݂ܪܵܐ ܚܲܕ݂. 11 ܘܣܸܕ݂ܪܵܐ ܐ̄ܚܪܹܢܵܐ: ܨܕ݂ܝܼܕ݂ܵܐ: ܘܣܲܦܝܼܠܵܐ: ܘܢܸܩܥܬ݂ܵܐ. 12 ܘܣܸܕ݂ܪܵܐ ܬܠܝܼܬ݂ܵܝܵܐ: ܩܵܢܟܹܿܢܘܿܢ: ܘܩܲܪܟܸܕ݂ܢܵܐ: ܘܥܹܝܢ ܥܸܓ݂ܠܵܐ. 13 ܘܣܸܕ݂ܪܵܐ ܪܒ݂ܝܼܥܵܝܵܐ: ܬܵܪܫܝܼܫ: ܘܒܹܪܘܼܠܵܐ: ܘܝܲܫܦܹܗ: ܡܵܘܚܕ݂ܵܢ ܘܡܲܫܪܵܢ ܒܕܲܗܒ݂ܵܐ ܒܫܲܠܡܘܼܬ݂ܗܹܝܢ. 14 ܘܟܹܐܦܹ̈ܐ ܥܲܠ ܫܡܵܗܹ̈ܐ ܐܸܢܹܝܢ ܕܲܒ݂ܢܲܝ ܝܼܣܪܵܝܹܠ: ܬܲܪܬܲܥܸܣܪܹܐ ܥܲܠ ܫܡܵܗܲܝܗܘܿܢ ܓܠܝܼܦܵܢ ܓܠܵܦܵܐ ܕܚܵܬ݂ܡܵܐ: ܓܒܲܪ ܥܲܠ ܫܡܹܗ ܗܘܲܝ ܠܲܬ݂ܪܸܥܣܲܪ ܫܲܒ݂ܛܝܼܢ. 15 ܘܲܥܒܲܕ݂ܘ ܥܲܠ ܚܘܼܣܵܝܵܐ ܫܸܫܠܵܬ݂ܵܐ ܡܲܬ݂ܐܡܵܬ݂ܵܐ ܥܒ݂ܵܕ݂ܵܐ ܓܕ݂ܝܼܠܵܐ: ܕܕܲܗܒ݂ܵܐ ܕܲܟ݂ܝܵܐ. 16 ܘܲܥܒܲܕ݂ܘ ܬܲܪܬܹܿܝܢ ܡܵܘܚܕ݂ܵܬ݂ܵܐ ܕܕܲܗܒ݂ܵܐ: ܘܬܲܪܬܹܿܝܢ ܙܲܩܙܩܵܬ݂ܵܐ ܕܕܲܗܒ݂ܵܐ: ܘܝܲܗ̄ܒ݂ܘ ܬܲܪܬܹܿܝܢ ܙܲܩܙܩܲܢ ܥܲܠ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ. 17 ܘܝܲܗ̄ܒ݂ܘ ܬܲܪܬܹܿܝܢ ܓܕ݂ܝܼܠܵܬ݂ܵܐ ܕܕܲܗܒ݂ܵܐ: ܥܲܠ ܬܲܪܬܹܿܝܢ ܙܲܩܙܩܲܢ ܕܥܲܠ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ. 18 ܘܬܲܪܬܹܿܝܢ ܓܕ݂ܝܼܠܵܢ ܕܥܲܠ ܬܪܹܝܢ ܣܸܛܪܝܼܢ: ܝܲܗ̄ܒ݂ܘ ܥܲܠ ܬܲܪܬܹܿܝܢ ܡܵܘܚܕ݂ܵܢ: ܘܝܲܗ̄ܒܘ ܐܸܢܹܝܢ ܥܲܠ ܬܲܪܬܹܿܝܢ ܟܲܬ݂ܦܵܬ݂ܵܗ ܕܦܸܕܬ݂ܵܐ: ܠܘܼܩܒܲܠ ܐܲܦܹܝܗܿ. 19 ܘܲܥܒܲܕܘ ܬܲܪܬܹܿܝܢ ܙܲܩܙܩܲܢ ܕܕܲܗܒ݂ܵܐ: ܘܣܵܡܘ ܥܲܠ ܬܪܹܝܢ ܣܸܛܪܵܘܗܝ ܕܚܘܼܣܵܝܵܐ: ܥܲܠ ܣܸܦܬ݂ܵܐ ܕܥܲܠ ܣܸܛܪܵܐ ܕܦܸܕܬ݂ܵܐ: ܡܼܢ ܠܓ݂ܵܘ. 20 ܘܲܥܒܲܕܘ ܬܲܪܬܹܿܝܢ ܙܲܩܙܩܲܢ ܕܕܲܗܒ݂ܵܐ: ܘܝܲܗ̄ܒ݂ܘ ܐܸܢܹܝܢ ܥܲܠ ܬܲܪܬܹܿܝܢ ܟܲܬ݂ܦܵܬ݂ܵܗ ܕܦܸܕܬ݂ܵܐ: ܡܼܢ ܠܓ݂ܵܘ ܡܼܢ ܠܘܼܩܒܲܠ ܐܲܦܹܝܗܿ: ܠܘܼܩܒܲܠ ܕܸܒ݂ܩܵܗ: ܠܥܸܠ ܡܼܢ ܗܸܡܝܵܢܵܐ ܕܦܸܕܬ݂ܵܐ. 21 ܘܕܲܒܸܿܩܘ ܚܘܼܣܵܝܵܐ: ܡܼܢ ܙܲܩܙܩܵܬܹܗ ܠܙܲܩܙܩܵܬ݂ܵܗ ܕܦܸܕܬ݂ܵܐ ܒܚܘܼܛܵܐ ܕܬܸܟ݂ܠܬ݂ܵܐ: ܠܡܸܗܘܵܐ ܥܲܠ ܗܸܡܝܵܢܵܐ ܕܦܸܕܬ݂ܵܐ: ܘܠܵܐ ܦܵܪܹܩ ܗ̄ܘܵܐ ܚܘܼܣܵܝܵܐ ܡܼܢ ܥܸܠܵܘܲܝ ܦܸܕܬ݂ܵܐ: ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 22 ܘܲܥܒܲܕܘ ܦܪܵܙܘܿܡܵܐ ܕܦܸܕܬ݂ܵܐ: ܥܒ݂ܵܕ݂ܵܐ ܙܩܝܼܪܵܐ ܓܡܝܼܪܵܐ ܕܬܸܟ݂ܠܬ݂ܵܐ. 23 ܘܦܘܼܡܹܗ ܕܲܦܪܵܙܘܿܡܵܐ ܒܓ݂ܵܘܹܗ: ܐܲܝܟ݂ ܦܘܼܡ ܣܝܼܪܵܣ: ܘܣܸܦܬ݂ܵܐ ܡܲܣܩܵܐ ܠܦܘܼܡܹܗ ܟܲܕ݂ ܚܵܕܲܪ: ܕܠܵܐ ܢܸܨܛܪܸܐ. 24 ܘܲܥܒܲܕ݂ܘ ܥܲܠ ܫܦܘܿܠܵܘܗܝ ܕܲܦܪܵܙܘܿܡܵܐ: ܪܘܼܡܵܢܹ̈ܐ ܕܬܸܟ݂ܠܬ݂ܵܐ: ܘܐܵܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ. 25 ܘܲܥܒܲܕ݂ܘ ܙܲܓܹ̈ܐ ܕܕܲܗܒ݂ܵܐ ܕܲܟ݂ܝܵܐ: ܘܲܩܒܲܥܘ ܙܲܓܹ̈ܐ ܒܓ݂ܵܘ ܪܘܼܡܵܢܹ̈ܐ: ܥܲܠ ܫܦܘܿܠܘܵܗܝ ܕܲܦܪܵܙܘܿܡܵܐ ܟܲܕ݂ ܚܵܕܲܪ ܒܓ݂ܵܘ ܪܘܼܡܵܢܹ̈ܐ. 26 ܙܲܓܵܐ ܕܕܲܗܒ݂ܵܐ ܘܪܘܼܡܵܢܹ̈ܐ ܥܲܠ ܫܦܘܿܠܵܘܗܝ ܕܲܦܪܵܙܘܿܡܵܐ ܟܲܕ݂ ܚܵܕܲܪ: ܠܲܡܫܲܡܵܫܘܼ ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 27 ܘܲܥܒܲܕ݂ܘ ܟܘܼܬܿܝܼܢܵܐ ܕܒ݂ܘܼܨܵܐ: ܥܒ݂ܵܕ݂ܵܐ ܙܩܝܼܪܵܐ ܠܐܲܗܪܘܿܢ ܘܠܲܒ݂ܢܵܘܗܝ. 28 ܘܡܲܨܢܲܦܬ݂ܵܐ ܕܒ݂ܘܼܨܵܐ: ܘܫܘܼܒ݂ܚܵܐ ܕܟܲܠܵܘܹ̈ܐ ܕܒ݂ܘܼܨܵܐ: ܘܲܦܪܵܙܘܿܡܵܐ ܕܒ݂ܘܼܨܵܐ. 29 ܘܗܸܡܝܵܢܵܐ ܕܒ݂ܘܼܨܵܐ ܥܙܝܼܠܵܐ: ܬܸܟ݂ܠܬ݂ܵܐ: ܘܐܵܪܓܘܵܢܵܐ: ܘܨܘܼܒ݂ܥܵܐ ܕܲܙܚܘܿܪܝܼܬ݂ܵܐ: ܘܒ݂ܘܼܨܵܐ ܥܙܝܼܠܵܐ: ܥܒ݂ܵܕ݂ܵܐ ܕܨܲܝܵܪܵܐ: ܐܲܝܟܲܢܵܐ ܕܦܲܩܸܕ ܡܵܪܝܵܐ ܠܡܘܼܫܹܐ. 30 ܘܲܥܒܲܕ݂ܘ ܟܠܝܼܠܵܐ ܕܲܢܙܝܼܪܘܼܬ݂ܵܐ ܕܩܘܼܕ݂ܫܵܐ ܕܕܲܗܒ݂ܵܐ ܕܲܟ݂ܝܵܐ: ܘܲܟܬܲܒ݂ܘ ܥܠܵܘܗܝ ܟܬ݂ܵܒ݂ܵܐ ܓܠܵܦܹ̈ܐ ܕܚܵܬ݂ܡܵܐ: ܩܘܼܕ݂ܫܵܐ ܠܡܵܪܝܵܐ. 31 ܘܐܲܪܡܝܼܘ ܒܹܗ ܚܘܼܛܵܐ ܕܬܸܟ݂ܠܬ݂ܵܐ: ܠܡܸܗܘܵܐ ܥܲܠ ܡܲܨܢܲܦܬ݂ܵܐ ܡܼܢ ܠܥܸܠ: ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 32 ܘܲܫܠܸܡ ܟܠܹܗ ܥܒ݂ܵܕ݂ܵܐ ܕܡܲܫܟܲܢܙܲܒ݂ܢܵܐ: ܘܲܥܒܲܕ݂ܘ ܒܢܲܝ ܝܼܣܪܵܝܹܠ ܟܠ ܕܦܲܩܸܕ ܡܵܪܝܵܐ ܠܡܘܼܫܹܐ: ܗܵܟܲܢܵܐ ܥܒܲܕ݂ܘ. 33 ܘܐܲܝܬܿܝܼܘ ܠܡܲܫܟܢܵܐ ܠܘܵܬ݂ ܡܘܼܫܹܐ: ܡܲܫܟܢܵܐ ܘܟ݂ܠ ܡܵܐܢܵܘܗܝ: ܘܙܲܩܙܩܵܬܹܗ: ܘܩܘܼܪ̈ܩܣܵܘܗܝ: ܘܕܲܦܵܘ̈ܗܝ: ܘܣܸܟܵܘ̈ܗܝ: ܘܡܘܼܟ݂ܠܵܘ̈ܗܝ: ܘܥܲܡܘܼܕ݂ܵܘ̈ܗܝ: ܘܣܵܡܟ݂ܵܘ̈ܗܝ. 34 ܘܲܦܪܵܣܵܐ ܕܡܸܫܟܹ̈ܐ ܕܕܸܟ݂ܪܹ̈ܐ ܕܐܸܣܦܲܝܢܝܼܩܵܐ: ܘܲܦܪܵܣܵܐ ܕܡܸܫܟܹ̈ܐ ܕܕܸܟ݂ܪܹ̈ܐ ܕܣܵܣܵܓܘܿܢܵܐ: ܘܐܲܦܲܝ ܬܲܪܥܵܐ ܕܲܦܪܵܣܵܐ. 35 ܘܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ: ܘܩܘܼܦܹܝܗ: ܘܚܘܼܣܵܝܵܐ. 36 ܘܦܵܬ݂ܘܿܪܵܐ: ܘܟ݂ܠ ܡܵܐܢܵܘܗܝ: ܘܠܲܚܡܵܐ ܕܐܲܦܹ̈ܐ. 37 ܘܲܡܢܵܪܬܵܐ ܕܟ݂ܝܼܬ݂ܵܐ ܘܲܫܪܵܓܹܝܗ: ܘܲܫܪܵܓܹܐ ܕܣܸܕ݂ܪܹ̈ܐ: ܘܟ݂ܠܗܘܿܢ ܡܵܐܢܹܝܗ: ܘܡܸܫܚܵܐ ܕܡܲܢܗܪܝܼܢ. 38 ܘܡܲܕ݂ܒܚܵܐ ܕܕܲܗܒ݂ܵܐ: ܘܡܸܫܚܵܐ ܕܲܡܫܝܼܚܘܼܬ݂ܵܐ: ܘܥܸܛܪܵܐ ܕܒܸܣܡܹ̈ܐ: ܘܲܦܪܵܣܵܐ ܕܬܲܪܥܵܐ ܕܡܲܫܟܢܵܐ. 39 ܘܡܲܕ݂ܒܚܵܐ ܕܲܢܚܵܫܵܐ: ܘܩܲܪܩܸܠ ܕܝܼܠܹܗ ܕܲܢܚܵܫܵܐ: ܘܩܘܼܦܵܘܗܝ: ܘܟ݂ܠܗܘܿܢ ܡܵܐܢܵܘܗܝ: ܘܠܲܩܢܵܐ ܘܒ݂ܵܣܹܣ ܕܝܼܠܵܗ. 40 ܘܣܸܕ݂ܪܹ̈ܐ ܕܕ݂ܵܪܬܵܐ: ܘܥܲܡܘܼܕܹܝܗ: ܘܣܵܡܟܹܝܗ: ܘܲܦܪܵܣܵܐ ܕܬܲܪܥܵܐ ܕܕ݂ܵܪܬܵܐ: ܘܚܲܒ݂ܠܹܝܗ: ܘܣܸܟܹܿܝܗ: ܘܟ݂ܠܗܘܿܢ ܡܵܐܢܹ̈ܐ ܕܦܘܼܠܚܵܢܵܐ ܕܡܲܫܟܲܢ ܙܲܒ݂ܢܵܐ. 41 ܘܲܠܒ݂ܘܼܫܲܝ ܬܸܫܡܸܫܬܵܐ ܠܲܡܫܲܡܵܫܘܼ ܒܩܘܼܕ݂ܫܵܐ: ܘܲܠܒ݂ܘܼܫܲܝ ܩܘܼܕ݂ܫܵܐ ܠܐܲܗܪܘܿܢ ܟܵܗܢܵܐ: ܘܲܠܒ݂ܘܼܫܹ̈ܐ ܠܲܒ݂ܢܵܘܗܝ ܠܟ݂ܵܗܢܘܼܬ݂ܵܐ. 42 ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ: ܗܵܟܲܢܵܐ ܥܒܲܕܘ ܒܢܲܝ ܝܼܣܪܵܝܹܠ ܟܠܹܗ ܦܘܼܠܚܵܢܵܐ. 43 ܘܲܚܙܵܐ ܡܘܼܫܹܐ ܟܠܹܗ ܥܒ݂ܵܕ݂ܵܐ: ܘܗܵܐ ܥܲܒ݂ܕܿܘܼܗܝ ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ: ܗܵܟܲܢܵܐ ܥܒܲܕ݂ܘ: ܘܒܲܪܸܟ݂ ܐܸܢܘܿܢ ܡܘܼܫܹܐ.

********

ܩܦܠܐܘܢ : ܡ.

1 ܘܐܸܡܲܪ ܡܵܪܝܵܐ ܠܡܘܼܫܹܐ. 2 ܒܚܲܕ݂ ܒܝܲܪܚܵܐ ܩܲܕ݂ܡܵܝܵܐ ܐܲܩܝܼܡܲܝܗܝ ܠܡܲܫܟܲܢ ܙܲܒ݂ܢܵܐ. 3 ܘܣܝܼܡ ܬܲܡܵܢ ܩܹܒ݂ܘܼܬ݂ܵܐ ܕܣܵܗܕܿܘܼܬ݂ܵܐ: ܘܲܦܪܘܿܣ ܥܲܠ ܩܹܒ݂ܘܼܬ݂ܵܐ ܦܪܵܣܵܐ. 4 ܘܐܲܥܸܠ ܦܵܬ݂ܘܿܪܵܐ: ܘܲܣܕ݂ܘܿܪ ܣܸܕ݂ܪܹ̈ܐ: ܘܐܲܥܸܠ ܡܢܵܪܬܵܐ: ܘܐܲܢܗܲܪ ܫܪܵܓܹܝܗܿ. 5 ܘܣܝܼܡ ܡܲܕ݂ܒܚܵܐ ܕܕܲܗܒ݂ܵܐ ܠܥܸܛܪܵܐ ܩܕ݂ܵܡ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܪܐ: ܘܐܲܪܡܵܐ ܦܪܵܣܵܐ ܥܲܠ ܬܲܪܥܵܐ ܕܡܲܫܟܢܵܐ. 6 ܘܣܝܼܡ ܡܲܕ݂ܒܚܵܐ ܕܲܥܠܵܬ݂ܵܐ ܩܕ݂ܵܡ ܬܲܪܥܵܐ ܕܡܲܫܟܲܢ ܙܲܒ݂ܢܵܐ. 7 ܘܣܝܼܡ ܠܲܩܢܵܐ ܒܹܝܬ݂ ܡܲܫܟܲܢ ܙܲܒ݂ܢܵܐ ܠܡܲܕ݂ܒܚܵܐ: ܘܐܲܪܡܵܐ ܒܵܗ ܡܲܝܵܐ. 8 ܘܩܘܼܫ ܕܲܪܬܵܐ ܟܲܕ݂ ܚܵܕ݂ܪܵܐ: ܘܐܲܪܡܵܐ ܦܪܵܣܵܐ ܥܲܠ ܬܲܪܥܵܐ ܕܕ݂ܵܪܬܵܐ. 9 ܘܣܲܒ݂ ܡܸܫܚܵܐ ܕܲܡܫܝܼܚܘܼܬ݂ܵܐ: ܘܲܡܫܘܿܚ ܠܡܲܫܟܢܵܐ ܘܲܠܟ݂ܠ ܕܐܝܼܬ݂ ܒܹܗ: ܘܩܲܕܸܫܲܝܗܝ: ܘܲܠܟ݂ܠܗܘܿܢ ܡܵܐܢܵܘܗܝ: ܘܢܸܗܘܸܐ ܩܲܕܿܝܼܫ. 10 ܘܲܡܫܘܿܚ ܠܡܲܕ݂ܒܚܵܐ ܕܲܥܠܵܬ݂ܵܐ ܘܲܠܟ݂ܠ ܡܵܐܢܵܘܗܝ: ܘܩܲܕܸܫܲܝܗܝ ܠܡܲܕ݂ܒܚܵܐ: ܘܢܸܗܘܸܐ ܡܲܕ݂ܒܚܵܐ ܩܕ݂ܘܿܫ ܩܘܼܕ݂ܫܝܼܢ. 11 ܘܲܡܫܘܿܚ ܠܠܲܩܢܵܐ ܘܲܠܟܲܢܵܗ: ܘܩܲܕܸܿܫ ܐܸܢܘܿܢ. 12 ܘܩܲܪܸܒ݂ ܠܐܲܗܪܘܿܢ ܘܠܲܒ݂ܢܵܘܗܝ ܠܬܲܪܥܵܐ ܕܡܲܫܟܲܢ ܙܲܒ݂ܢܵܐ: ܘܐܲܣܚܵܐ ܐܸܢܘܿܢ ܒܡܲܝܵܐ. 13 ܘܐܲܠܒܸܿܫ ܠܐܲܗܪܘܿܢ ܠܒ݂ܘܼܫܲܝ ܩܘܼܕܫܵܐ: ܘܲܡܫܘܿܚܲܝܗܝ: ܘܩܲܕܸܿܫܲܝܗܝ: ܘܲܢܟܲܗܸܢ ܠܝܼ. 14 ܘܠܲܒ݂ܢܵܘܗܝ ܩܲܪܸܒ݂: ܘܐܲܠܒܸܿܫ ܐܸܢܘܿܢ ܟܘܼܬܿܝܼܢܵܬ݂ܵܐ. 15 ܘܲܡܫܘܿܚ ܐܸܢܘܿܢ ܐܲܝܟ݂ ܕܲܡܫܲܚܬܿ ܠܐܲܗܪܘܿܢ ܐܲܚܘܼܟ݂: ܘܲܢܟܲܗܢܘܼܢ ܠܝܼ: ܘܬܸܗܘܸܐ ܠܗܘܿܢ ܡܫܝܼܚܘܼܬ݂ܗܘܿܢ ܠܟ݂ܵܗܢܘܼܬ݂ܵܐ ܠܥܵܠܲܡ ܠܕ݂ܵܪܲܝܗܘܿܢ. 16 ܘܲܥܒܲܕ݂ ܡܘܼܫܹܐ ܟܠ ܕܦܲܩܕܹܗ ܡܵܪܝܵܐ: ܗܵܟܲܢܵܐ ܥܒܲܕ. 17 ܘܲܗܘܵܐ ܒܚܲܕ݂ ܒܝܲܪܚܵܐ ܩܲܕ݂ܡܵܝܵܐ: ܒܲܫܢܲܬ݂ ܬܲܪܬܹܿܝܢ: ܒܚܲܕ݂ܒܿܫܲܒܵܐ ܩܵܡ ܡܲܫܟܢܵܐ. 18 ܘܐܲܩܝܼܡ ܡܘܼܫܹܐ ܠܡܲܫܟܢܵܐ: ܘܲܢܩܲܫ ܣܸܟܵܘܗܝ: ܘܣܵܡ ܕܲܦܵܘܗܝ: ܘܲܩܒܲܥ ܡܘܼܟ݂ܠܵܘܗܝ: ܘܐܲܩܝܼܡ ܥܲܡܘܼܕ݂ܵܘܗܝ. 19 ܘܲܦܪܲܣ ܦܪܵܣܵܐ ܥܲܠ ܡܲܫܟܢܵܐ: ܘܐܲܪܡܝܼ ܦܪܵܣܵܐ ܕܡܸܫܟܵܐ ܥܠܵܘܗܝ ܡܼܢ ܠܥܸܠ: ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 20 ܘܲܢܣܲܒ݂ ܘܣܵܡ ܣܵܗܕܘܼܬ݂ܵܐ ܒܩܹܒ݂ܘܼܬ݂ܵܐ: ܘܣܵܡ ܩܘܼܦܹ̈ܐ ܥܲܠ ܩܹܒ݂ܘܼܬ݂ܵܐ: ܘܣܵܡ ܚܘܼܣܵܝܵܐ ܥܲܠ ܩܹܒ݂ܘܼܬ݂ܵܐ ܡܼܢ ܠܥܸܠ. 21 ܘܐܲܥܸܠ ܩܹܒ݂ܘܼܬ݂ܵܐ ܠܡܲܫܟܢܵܐ: ܘܲܢܣܲܒ݂ ܐܲܦܲܝ ܬܲܪܥܵܐ ܕܲܦܪܵܣܵܐ: ܘܲܦܪܲܣ ܥܲܠ ܩܹܒ݂ܘܼܬ݂ܵܐ ܕܣܵܗܕܘܼܬ݂ܵܐ: ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 22 ܘܣܵܡ ܦܵܬ݂ܘܿܪܵܐ ܒܡܲܫܟܲܢ ܙܲܒ݂ܢܵܐ: ܥܲܠ ܫܦܘܿܠܵܘܗܝ ܕܡܲܫܟܢܵܐ ܡܼܢ ܓܲܪܒܿܝܵܐ ܠܒܲܪ ܡܼܢ ܦܪܵܣܵܐ. 23 ܘܲܣܕܲܪ ܥܠܵܘܗܝ ܣܸܕ݂ܪܹ̈ܐ ܕܠܲܚܡܵܐ ܩܕ݂ܵܡ ܡܵܪܝܵܐ: ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 24 ܘܣܵܡ ܡܢܵܪܬܵܐ ܒܡܲܫܟܲܢ ܙܲܒ݂ܢܵܐ ܠܘܼܩܒܲܠ ܦܵܬ݂ܘܿܪܵܐ: ܥܲܠ ܫܦܘܿܠܲܝ ܡܲܫܟܢܵܐ ܡܼܢ ܬܲܝܡܢܵܐ. 25 ܘܐܲܢܗܲܪ ܫܪܵܓܹܝܗܿ ܩܕ݂ܵܡ ܡܵܪܝܵܐ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ. 26 ܘܣܵܡ ܡܲܕ݂ܒܚܵܐ ܕܕܲܗܒ݂ܵܐ ܒܡܲܫܟܲܢ ܙܲܒ݂ܢܵܐ ܩܕ݂ܵܡ ܦܪܵܣܵܐ. 27 ܘܐܲܣܸܩ ܥܠܵܘܗܝ ܥܸܛܪܵܐ ܕܒܸܣܡܹ̈ܐ: ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 28 ܘܣܵܡ ܦܪܵܣܵܐ ܕܬܲܪܥܵܐ ܕܡܲܫܟܢܵܐ. 29 ܘܡܲܕ݂ܒܚܵܐ ܕܲܥܠܵܬ݂ܵܐ ܣܵܡ ܒܬܲܪܥܵܐ ܕܡܲܫܟܲܢ ܙܲܒ݂ܢܵܐ: ܘܐܲܣܸܩ ܥܠܵܘܗܝ ܥܠܵܬ݂ܵܐ: ܘܲܣܡܝܼܕ݂ܵܐ: ܐܲܝܟ݂ ܕܦܲܩܸܕ ܡܵܪܝܵܐ ܠܡܘܼܫܹܐ. 30 ܘܣܵܡ ܠܲܩܢܵܐ ܒܹܝܬ݂ ܡܲܫܟܲܢ ܙܲܒ݂ܢܵܐ ܠܒܹܝܬ݂ ܡܲܕ݂ܒܚܵܐ: ܘܐܲܪܡܝܼ ܬܲܡܵܢ ܡܲܝܵܐ ܠܲܡܫܵܓ݂ܘܼ. 31 ܘܲܡܫܝܼܓ݂ܝܼܢ ܡܸܢܵܗ ܡܘܼܫܹܐ ܘܐܲܗܪܘܿܢ ܘܲܒ݂ܢܵܘܗܝ ܐܝܼܕܲܝܗܘܿܢ ܘܪܸܓ݂ܠܲܝܗܘܿܢ. 32 ܡܵܐ ܕܥܵܐܠܝܼܢ ܠܡܲܫܟܲܢ ܙܲܒ݂ܢܵܐ: ܘܡܵܐ ܕܩܵܪܒܿܝܼܢ ܠܡܲܕ݂ܒܚܵܐ ܡܫܝܼܓ݂ܝܼܢ: ܐܲܝܟ݂ ܕܦܲܩܸܕ݂ ܡܵܪܝܵܐ ܠܡܘܼܫܹܐ. 33 ܘܐܲܩܝܼܡ ܕܵܪܬܵܐ ܟܲܕ݂ ܚܵܕ݂ܪܵܐ ܠܡܲܫܟܢܵܐ ܘܲܠܡܲܕ݂ܒܚܵܐ: ܘܝܲܗ̄ܒ݂ ܦܪܵܣܵܐ ܒܬܲܪܥܵܐ ܕܕ݂ܵܪܬܵܐ: ܘܫܲܠܸܡ ܡܘܼܫܹܐ ܥܒ݂ܵܕ݂ܵܐ. 34 ܘܟܲܣܝܲܬ݂ ܥܢܵܢܵܐ ܠܡܲܫܟܲܢ ܙܲܒ݂ܢܵܐ: ܘܐܝܼܩܵܪܹܗ ܕܡܵܪܝܵܐ ܐܸܬ݂ܡܠܝܼ ܡܲܫܟܢܵܐ. 35 ܘܠܵܐ ܐܸܫܟܲܚ ܡܘܼܫܹܐ ܠܡܸܥܲܠ ܠܡܲܫܟܲܢ ܙܲܒ݂ܢܵܐ: ܡܸܛܠ ܕܫܸܟ݂ܢܲܬ ܥܠܵܘܗܝ ܥܢܵܢܵܐ: ܘܐܝܼܩܵܪܹܗ ܕܡܵܪܝܵܐ ܡܠܵܐ ܡܲܫܟܢܵܐ. 36 ܘܡܵܐ ܕܡܸܣܬܲܠܩܵܐ ܥܢܵܢܵܐ ܡܼܢ ܥܸܠܵܘܲܝ ܡܲܫܟܢܵܐ: ܫܵܩܠܝܼܢ ܒܢܲܝ ܝܼܣܪܵܝܹܠ ܒܟ݂ܠ ܡܲܫܩܠܵܢܲܝܗܘܿܢ. 37 ܘܐܸܢ ܠܵܐ ܡܸܣܬܲܠܩܵܐ ܥܢܵܢܵܐ: ܠܵܐ ܫܵܩܠܝܼܢ ܥܕܲܡܵܐ ܠܝܵܘܡܵܐ ܕܡܸܣܬܲܠܩܵܐ. 38 ܡܸܛܠ ܕܥܢܵܢܹܗ ܕܡܵܪܝܵܐ ܥܲܠ ܡܲܫܟܢܵܐ ܒܐܝܼܡܵܡܵܐ: ܘܢܘܼܪܵܐ ܗܵܘܝܵܐ ܒܹܗ ܒܠܸܠܝܵܐ: ܠܥܹܝܢ ܟܠܗܘܿܢ ܕܒܹܝܬ݂ ܝܼܣܪܵܝܹܠ ܒܟ݂ܠ ܡܲܫܩܠܵܢܲܝ̈ܗܘܿܢ.

ܫܠܸܡ ܣܸܦܪܵܐ ܕܡܲܦܩܵܢܵܐ

ܘܲܠܝܵܗ ܫܘܼܒ݂ܚܵܐ ܐܲܡܝܼܢܵܐܝܼܬ݂ ܐܵܡܹܝܢ