ܪܥܘܿܬ̣
ܩܹܦܵܠܹܐܘܿܢ: ܐ.
ܐ: ܘܲܗ̤ܘܵܐ ܒܝܵܘ̈ܡܲܝ ܕܲܝܵܢܹ̈ܐ: ܗܘܸܐ ܟܲܦܢܵܐ ܠܐܲܪܥܵܐ. ܘܐܸܙܲܠ ܓܲܒ̣ܪܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ ܠܡܸܥܡܲܪ ܒܐܲܪܥܵܐ ܕܡܘܼܐܵܒ̣: ܗܸܘ ܘܐܲܢ̄ܬ̇ܬܹܗ ܘܲܒ̣ܢܵܘ̈ܗܝ: ܡܸܛܠ ܕܲܥܫܸܢ ܟܲܦܢܵܐ ܠܐܲܪܥܵܐ.
ܒ: ܘܲܫܡܹܗ ܠܓܲܒ̣ܪܵܐ ܐܹܠܝܼܡܲܠܟ: ܘܲܫܡܵܗ̇ ܕܐܲܢ̄ܬ̇ܬܹܗ ܢܲܥܡܝܼ. ܘܫܵܡܵܗܹ̈ܐ ܕܲܒ̣ܢܵܘ̈ܗܝ: ܡܲܠܝܘܿܢ ܘܟ̣ܠܝܘܿܢ: ܐܲܦܲܪ̈ܬ̣ܵܐܝܹܐ ܡ̣ܢ ܒܹܝܬ̣ ܠܚܸܡ ܕܲܝܼܗܘܼܕܼܵܐ. ܘܐܸܬ̣ܵܐܘ ܠܐܲܪܥܵܐ ܕܡܘܼܐܵܒ̣ ܠܡܸܥܡܲܪ ܬܲܡܵܢ.
ܓ: ܘܡܝܼܬ̣ܼ ܐܹܠܝܼܡܲܠܟ ܒܲܥܠܵܗ̇ ܕܢܲܥܡܝܼ: ܘܐܸܫܬܲܚܪܲܬ̤ ܗ̤ܝ ܘܲܬ̣ܪܹܝܢ ܒܢܹܝ̈ܗ̇.
ܕ: ܘܲܢܣܲܒ̣ܘ ܠܗܘܿܢ ܢܸܫܹ̈ܐ ܡܘܼ̈ܐܵܒ̣ܵܝܵܬ̣ܵܐ: ܫܡܵܗ̇ ܕܲܚܕܼܵܐ ܥܲܪܦܵܐ: ܘܲܫܡܵܗ̇ ܕܐܲܚܪܹܬ̣ܐ ܪܥܘܿܬ̣. ܘܲܥܡܲܪܘ ܬܲܡܵܢ ܐܲܝܟ ܫ̈ܢܲܝܵܐ ܥܝܲܪ.
ܗ: ܘܡܝܼܬ̣ܘ ܬܪ̈ܲܝܗܘܿܢ ܒܢܹܝ̈ܗ̇: ܡܲܠܝܘܿܢ ܘܟ̣ܠܝܘܿܢ: ܘܐܸܬ̣ܓܲܙܝܲܬ̤ ܐܲܢ̄ܬ̇ܬ̣ܵܐ ܡ̣ܢ ܒܲܥܠܵܗ̇ ܘܡ̣ܢ ܬܪܲܝܗܘܿܢ ܒܢܹܝ̈ܗ̇.
ܘ: ܘܗܸܦܟܲܬ̤ ܗ̤ܝ ܘܬܲܪܬܹܝܢ ܟܲܠ̈ܠܵܬ̣ܵܐ ܥܲܡܵܗ̇ ܡ̣ܢ ܐܲܪܥܵܐ ܕܡܘܼܐܵܒ̣. ܡܸ̰ܠ ܕܲܫܡܲܥ ܒܐܲܪܥܵܐ ܕܡܘܼܐܵܒ̣: ܕܲܣܥܲܪ ܡܵܪܝܵܐ ܠܥܲܡܹܗ ܠܡܸܬܲܠ ܠܗܘܿܢ ܡܵܙܘܿܢܵܐ.
ܙ: ܘܲܢܦܲܩ ܡ̣ܢ ܐܲܪܥܵܐ ܕܡܲܥܡܲܪܗܹܝܢ ܗ̤ܝ ܘܬܲܪܬܹܝܢ ܟܲܠ̈ܠܵܬ̣ܵܗ̇ ܥܲܡܵܗ̇: ܠܡܸܗܦܲܟ ܘܲܠܡܹܐܙܲܠ ܠܐܲܪܥܵܐ ܕܲܝܗܘܿܕܼܵܐ.
ܚ: ܘܐܸܡܪܲܬ̤ ܢܲܥܡܝܼ ܠܟܲܠ̈ܠܵܬ̣ܵܗ̇: ܗܦܘܿܟܹܝ̈ܢ ܙܸܠܹܝ̈ܢ ܠܐܲܬ̣ܪ̱ܟܹܝܢ ܘܲܠܒܹܝܬ̣ ܐ̄ܢܵܫܲܝ̈ܟܹܝܢ. ܘܡܵܪܝܵܐ ܢܸܥܒܸܕܼ ܥܲܡܟܹܢ ܪ̈ܲܚܡܹܐ: ܐܲܝܟ ܕܲܥܒܲܕܼܬܹܝ̈ܢ ܥܲܡܝ: ܘܥܲܡ ܬܪ̈ܲܝܗܘܿܢ ܒ̈ܢܲܝ ܕܡܝܼܬ̣ܘ.
ܛ: ܘܢܸܬܸܠܟܹܝܢ ܡܵܪܝܵܐ ܠܚܸܣܕܼܵܐ: ܘܬܸܫ̈ܟ̇ܚܵܢ ܢܚܵܚܵܐ ܒܹܝܬ̣ ܐܲܒ̣ܵܗܲܝ̈ܟܹ̇ܝܢ. ܘܢܸܫܩܲܬ̤ ܐܸܢܹܝܢ: ܘܐܲܪܝܼܡ ܩܵܠܗܹܝܢ ܘܲܒ̣̈ܟܲܝ.
ܝ: ܘܐܵܡܪ̈ܵܢ ܠܵܗ̇ ܠܵܐ: ܐܸܠܵܐ ܥܲܡܹܟ̣ܝ ܢܹܐܙܲܠ: ܠܐܲܪܥܹܟ̣ܝ ܘܲܠܥܲܡܹܟ̣ܝ.
ܝܐ: ܘܐܸܡܪܲܬ̤ ܠܗܹܝܢ ܢܲܥܡܝܼ: ܗܦܘܿܟܹ̈ܝܢ ܒ̈ܢܵܬ̣ܝ: ܐܵܙܠ̈ܢ ܬܢ̄ܬܹܝܢ ܥܲܡܝ. ܕܲܠܡܵܐ ܬܘܼܒ̣ ܢܸܗܘܘܿܢ ܠܝܼ ܒܢܲܝ̈ܵܐ ܘܐܸܬܸܠܟܹܝܢ ܠܗܘܿܢ.
ܝܒ: ܗܦܘܿܟܹܝ̈ܢ ܒܢܵܬ̣̈ܝ: ܡܸܛܠ ܕܐܸܢܵܐ ܣܸܐܒܹܬ̣ ܠܝܼ ܡ̣ܢ ܕܲܠܡܸܗܘܵܐ ܠܓܲܒ̣ܪܵܐ: ܕܐܹܡܲܪ ܕܬ̣ܘܼܒ̣ ܢܸܗܘܸܐ ܠܝܼ ܣܲܒ̣ܪܵܐ: ܘܐܸܗܘܸܐ ܠܓܲܒ̣ܪܵܐ ܘܐܵܘܠܸܕܼ ܒܢܲܝ̈ܵܐ.
ܝܓ: ܘܐܲܢ̄ܬܹܝܢ ܬܣܲܟ̈ܝܵܢ ܠܗܘܿܢ ܥܕܲܡܵܐ ܕܢܸܪܒ̇ܘܿܢ: ܘܬܸܬ̣ܥܲܟ̇ܪ̈ܵܢ ܡ̣ܢ ܕܲܠܡܸܗܘܵܐ ܠܓܲܒ̣ܪܵܐ. ܠܵܐ ܒܢܵܬ̣̈ܝ: ܡܸܛܠ ܕܡܸܪܲܬ̤ ܠܝܼ ܛܵܒ̣ ܥܠܲܝܟܹ̇ܝ: ܘܠܝܼ ܡܲܪܝܼܪܵܐ ܝܲܬ̇ܝܼܪ ܡܸܢܟܹܢ: ܡܸܛܠ ܕܐܝܼܕܹܗ ܕܡܵܪܝܵܐ ܢܸܦܩܲܬ̤ ܒܵܬܲܪܝ.
ܝܕ: ܘܐܲܪܝܼܡ ܬܘܼܒ̣ ܩܵܠܗܹܝܢ ܘܲܒ̣̈ܟ̣ܝ. ܘܢܸܫܩܲܬ̤ ܥܲܪܦܵܐ ܠܲܚܡܵܬ̣ܵܗ̇ ܘܗܸܦܟܲܬ̤̱ ܘܐܸܙܲܠ̄ܬ̤: ܪܥܘܿܬ̣ ܕܹܝܢ ܢܩܸܦܬ̣ܵܗ̇.
ܝܗ: ܘܐܸܡܪܲܬ̤ ܠܵܗ̇ ܚܡܵܬ̣ܵܗ̇: ܗܵܐ ܝܼܒܲܡܬܹܟ̣ܝ ܗܸܦܟܲܬ̤ ܠܥܲܡܵܗ̇ ܘܲܠܒܹܝܬ̣ ܐ̄ܢܵܫܹ̈ܗ̇: ܗܦܘܿܟ̣ܝ ܐܵܦ ܐܲܢ̄ܬ̇ܝ ܒܵܬܲܪ ܝܼܒܲܡܬܹܟ̣ܝ.
ܝܘ: ܘܐܸܡܪܲܬ̤ ܠܵܗ̇ ܪܥܘܿܬ̣: ܚܵܣ ܠܝܼ ܕܐܸܗܦܘܿܟ ܡ̣ܢ ܠܘܵܬܹܟ̣ܝ ܘܐܸܫܒ̇ܩܹܟ̣ܝ: ܡܸܛܠ ܕܠܲܐܬܲܪ ܕܬܹܐܙܠ̄ܝܼܢ ܐܹܙܲܠ: ܘܐܲܝܟܵܐ ܕܬܸܥܡܪܝܼܢ ܐܸܥܡܲܪ. ܥܲܡܹܟ̣ܝ ܥܲܡܝ: ܘܐܲܠܵܗܹܟ̣ܝ ܐܲܠܵܗܝ.
ܝܙ: ܘܐܲܬܲܪ ܕܲܬ̣ܡܘܼܬ̣ܝܼܢ: ܐܹܡܘܼܬ̣ ܐܵܦ ܬܸܢܵܐ ܘܐܸܬ̣ܩܒܲܪ. ܗܵܟܲܢܵܐ ܢܸܥܒܸ̇ܕܼ ܠܝܼ ܐܲܠܵܗܵܐ ܘܗܵܟܲܢܵܐ ܢܵܘܣܸܦ ܠܝܼ: ܐܸܠܵܐ ܐܸܢ ܡܵܘܬܵܐ ܒܲܠܚܘܿܕܼ ܢܸܦܪܘܿܫ ܒܲܝܢܲܝ ܘܠܹܟ̣ܝ.
ܝܚ: ܟܲܕܼ ܚܙܵܬ̤ ܕܹܝܢ ܢܲܥܡܝܼ ܕܫܲܪܝܼܪܵܐܝܼܬ̣ ܐܸܨܛܲܒ̣ܝܲܬ̤ ܠܡܹܐܙܲܠ ܥܲܡܵܗ̇: ܫܸܠܝܲܬ̤ ܡ̣ܢ ܕܲܠܡܹܐܡܲܪ ܠܵܗ̇ ܠܡܸܗܦܲܟ.
ܝܛ: ܘܐܸܬܲܝ̈ ܐܲܟ̣ܚ̄ܕܼܵܐ ܥܕܲܡܵܐ ܠܒܹܝܬ̣ ܠܚܸܡ ܕܲܝܗܘܼܕܼܵܐ: ܘܲܗܘ̤ܵܐ ܕܟܲܕܼ ܐܸܬܲܝ̈ ܠܒܹܝܬ̣ܠܚܸܡ: ܚܸܕܼܝܲܬ̤ ܒܗܹܝܢ ܟܠܵܗ̇ ܡܕܼܝܼܢ̄ܬܵܐ: ܘܐܵܡܪܝܼܢ ܗܵܕܐ ܗ̄ܝܼ ܢܲܥܢܝܼ.
ܟ: ܘܐܸܡܪܲܬ̤ ܠܗܹܝܢ ܠܵܐ ܬܸܩܪ̈ܝܵܢܵܢܝ ܢܲܥܢܝܼ: ܐܸܠܵܐ ܩܪ̈ܵܝܹܢܵܢܝ ܡܲܪܝܼܪܲܬ̣ ܢܲܦ̮ܫܵܐ: ܡܸܛܠ ܕܐܹܝܠܫܲܕܼܝ ܡܲܪܡܪܲܢܝ ܛܵܒ̣.
ܟܐ: ܡܲܠܝܵܐܝ̣ܬ̣ ܓܹܝܪ ܐܸܙܹܠ̄ܬ̣ ܡܸܟܵܐ: ܘܡܵܪܝܵܐ ܐܲܗܦܟܲܢܝ ܣܪܝܼܩܵܐܝܼܬ̣. ܘܲܠܡܵܢܵܐ ܡܸܟܹܝܠ ܩܵܪ̈ܝܵܢ ܐ̄ܢܬܹܝܢ ܠܝܼ ܢܲܥܡܝܼ ܕܡܵܪܝܵܐ ܡܲܟܟܲܢܢ: ܘܡ̇ܢ ܕܡܵܛܹܐ ܒܐܝܼܕܼܵܘ̈ܗܝ ܐܲܒ̣ܐܸܫ ܠܝܼ.
ܟܒ: ܘܗܸܦܟܲܬ̤ ܢܲܥܡܝܼ ܘܲܪܥܘܿܬ̣ ܡܘܼܐܵܒ̣ܵܝܬܵܐ ܟܲܠܬ̣ܵܗ̇ ܥܲܡܵܗ̇: ܕܐܸܨܛܲܒ̣ܝܲܬ̤ ܠܡܸܗܦܲܟ ܥܲܡܵܗ̇ ܒܠܸܒܵܐ ܫܲܠܡܵܐ. ܘܐܸܬܲܝ̈ ܡ̣ܢ ܐܲܪܥܵܐ ܕܡܘܼܐܵܒ̣ ܒܪܹܫ ܚܨܵܕܼܵܐ ܕܲܣܥܵܪܹ̈ܐ.
---------------------
ܩܹܦܵܠܹܐܘܿܢ: ܒ.
ܐ: ܘܲܠܢܲܥܡܝܼ ܐܝܼܬ̣ ܗ̄ܘܼܵܐ ܓܲܒ̣ܪܵܐ ܚܲܕܼ ܡܵܘܕܼܥܬ̣ܵܐ: ܡ̣ܢ ܫܲܪܒ̇ܬܹܗ ܕܐܹܠܝܼܡܲܠܟ ܒܲܥܠܵܗ̇: ܓܲܒ̣ܪܵܐ ܝܼܕܼܝܼܥܵܐ: ܘܲܫܡܹܗ ܒܵܥܵܙ.
ܒ: ܘܐܸܡܲܪܲܬ̤ ܪܥܘܿܬ̣ ܡܘܼܐܒ̣ܵܝܬܵܐ ܠܢܲܥܡܝܼ ܚܡܵܬ̣ܵܗ̇ ܐܹܙܲܠ ܠܚܲܩܠܵܐ: ܘܐܸܠܩܘܿܛ ܠܩܵܛܵܐ ܒܵܬܲܪ ܦܵܥ̈ܠܹܐ ܡ̣ܢ ܕܐܸܫܟܲܚ ܪ̈ܲܚܡܹܐ ܒܥܲܝܬܵܘ̈ܗܝ. ܘܐܸܡܪܲܬ̤ ܠܵܗ̇ ܚܡܵܬ̣ܵܗ̇ ܙܸܠܝ ܒܪܲܬ̣ܝ.
ܓ: ܘܐܸܙܲܠ̄ܬ̤ ܪܥܘܿܬ̣ ܠܡܸܠܩܲܛ ܠܩܵܛܵܐ ܒܬܲܪ ܚܵܨܘܿܕܹ̈ܐ: ܘܐܸܣܬܲܩܒ̇ܠܲܬ̤ ܒܦܵܠܓ̇ܘܼܬ̣ܵܐ ܕܚܲܩܠܹܗ ܕܒ̣ܵܥܵܙ ܒܲܪ ܫܲܪܒ̇ܬܹܗ ܕܐܹܠܝܼܡܲܠܟ.
ܕ: ܘܗܵܐ ܒܵܥܵܙ ܐܵܬܹܐ ܡ̣ܢ ܒܹܝܬ̣ ܠܚܸܡ: ܘܐܸܡܲܪ ܠܚܵܨܘܿܕܹ̈ܐ ܫܠܵܡܵܐ ܥܲܡܟ̣ܘܿܢ: ܘܐܵܡܪܝܼܢ ܠܹܗ ܡܵܪܝܵܐ ܢܒܲܪܟ̣ܵܟ.
ܗ: ܘܐܸܡܲܪ ܒܵܥܵܙ ܠܛܲܠܝܵܐ ܕܩܵܐܹܡ ܥܲܠ ܦܵܥ̈ܠܹܐ: ܡܵܐ ܛܸܒܵܗ̇ ܕܲܥܠܲܝܡܬ̣ܵܐ ܗܵܕܹܐ.
ܘ: ܘܲܥܢܵܐ ܛܲܠܝܵܐ ܘܐܸܡܲܪ ܠܹܗ: ܐܲܢ̄ܬ̇ܬ̣ܵܐ ܗ̄ܝ̣ ܡܘܼܐܵܒ̣ܵܝܬܵܐ: ܗܵܝ̇ ܕܐܸܬ̣ܵܬ̤ ܥܲܡ ܢܲܥܡܝܼ ܡ̣ܢ ܐܲܪܥܵܐ ܕܡܘܼܐܵܒ̣.
ܙ: ܘܐܵܡܪܵܐ ܐܸܠܩܘܿܛ ܠܩܵܛܵܐ ܒܵܬܲܪ ܦܵܥ̈ܠܹܐ. ܘܠܸܩܛܲܬ̤ ܡ̣ܢ ܨܲܦܪܵܐ ܘܲܥܕܲܡܵܐ ܠܲܢܝܵܚܬܵܐ.
ܚ: ܘܐܸܡܲܪ ܒܵܥܵܙ ܠܲܪܥܘܿܬ̣: ܒܪܲܬ̣ܝ: ܠܵܐ ܫܡܝܼܥ ܠܹܟ̣ܝ ܒܡܲܬ̣ܵܠܵܐ: ܕܲܒ̣ܚܲܩܠܵܐ ܕܠܵܐ ܕܝܼܠܵܟ ܠܵܐ ܬܸܠܩܘܿܛ: ܡܸܛܠ ܗܵܢܵܐ ܩܵܘܿܝ ܘܒ̣ܘܼܬ̣ܝ ܬܢܵܢ ܥܲܡ ܛܲܠܝܵܬ̣̈ܝ.
ܛ: ܘܲܗ̤ܘܲܝܬ̇ܝ ܚܵܙܝܵܐ ܐܲܝܟܵܐ ܚܵܨܕܝܼܢ: ܘܲܗ̤ܘܲܝܬ̇ܝ ܐܵܙܵܠ̄ܐ ܒܵܬܲܪܗܘܿܢ: ܗܵܐ ܦܩܕܹܬ̣ ܠܲܛܠܵܝܹ̈ܐ ܕܐ̄ܢܵܫ ܠܵܐ ܢܲܗܪܹܟ̣ܝ. ܘܐܸܢ ܨܵܗ̇ܝܵܐ ܐܲܢ̄ܬ̇ܝ: ܙܸܠܝ ܘܐܸܫܬܵܝ ܡ̣ܢ ܡܵܐܢܹ̈ܐ ܕܡܵܠܹܝܢ ܛܠܵܝܹ̈ܐ.
ܝ: ܘܢܸܦܠܲܬ̤ ܥܲܠ ܐܲܦܹܝ̈ܗ̇ ܐܲܪܥܵܐ ܘܣܸܓ̣ܕܲܬ̣ ܠܹܗ: ܘܐܸܡܪܲܬ̤: ܡܸܛܠ ܕܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ ܠܡܸܕܲܥܲܢܝ ܕܐܲܟ̣ܣܢܵܝܬܵܐ ܐ̄ܢܵܐ.
ܝܐ: ܐܵܡܲܪ ܠܵܗ̇ ܒܵܥܵܙ: ܡܸܬ̣ܐܡܵܪܘܼ ܐܸܬ̣ܐܡܲܪ ܠܝܼ ܡܸܕܸܡ ܕܲܥܒܲܕܬ̇ܝ ܥܲܡ ܚܡܵܬܹܟ̣ܝ ܡ̣ܢ ܒܵܬܲܪ ܕܡܝܼܬ̣ ܒܲܥܠܹܟ̣ܝ: ܕܲܫܒܲܩܬ̇ܝ ܐܲܒ̣ܘܼܟ̣ܝ ܘܐܸܡܹܟ̣ܝ ܘܫܲܒ̇ܬܹܟ̣ܝ: ܘܐܸܬܲܝܬ̇ܝ ܠܥܲܡܵܐ ܕܠܵܐ ܝܵܕܼܥܵܐ ܗ̄ܘܲܝܬ̇ܝ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ.
ܝܒ: ܢܸܦ̱ܪܥܹܟ̣ܝ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܢܸܬܸ̇ܠ ܐܲܓ̣ܪܹܟ̣ܝ ܗܵܘ̇ ܕܐ̤ܬܲܝܬ̇ܝ ܠܡܸܣܬܲܬܵܪܘܼ ܬܚܹܝܬ̣ ܟܸܢܦܵܘ̈ܗܝ.
ܝܓ: ܘܐܸܡܪܲܬ̤ ܠܹܗ: ܡܸܛܠ ܕܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ ܡܵܪܝ: ܘܒܲܝܲܐܬܵܢܝ ܘܲܡܠܲܝܬ̇ ܒܠܸܒܵܗ̇ ܕܐܲܡܬ̣ܵܟ: ܘܐܸܢܵܐ ܐܸܗܘܸܐ ܐܲܝܟ ܚܕܼܵܐ ܡ̣ܢ ܐܲܡ̈ܗܵܬ̣ܵܟ.
ܝܕ: ܘܐܸܡܲܪ ܠܵܗ̇ ܒܵܥܵܙ ܒܥܸܕܵܢܵܐ ܘܫܵܪܘܼܬ̣ܵܐ: ܩܪܘܿܒ̣ܝ ܘܐܲܟ̣ܘܿܠܝ ܡ̣ܢ ܠܲܚܡܵܐ: ܘܐܵܘܬ̇ܒ̣ܵܗ̇ ܥܲܠ ܓܹܢ̄ܒ̣ ܚܵܨܘܿܕܹ̈ܐ: ܘܝܲܗ̄ܒ̣ ܠܵܗ̇ ܫܲܚܬ̇ܝܼܬ̣ܵܐ: ܘܲܨܒܲܥ ܠܲܚܡܵܐ ܒܚܲܠܒ̣ܵܐ: ܘܐܲܪܡܝܼ ܦܸܬܹ̈ܐ ܕܲܦܪ̈ܝܼܟ̣ܵܬ̣ܵܐ. ܘܝܲܗ̣̄ܒ̣ ܠܵܗ̇: ܘܐܸܟ̣ܠܲܬ̤ ܘܣܸܒ̣ܥܲܬ̤ ܘܐܵܘܬ̇ܪܲܬ̤.
ܝܗ: ܘܩܵܡܲܬ̤ ܠܡܸܠܩܲܛ: ܘܦܲܩܸܕܼ ܒܵܥܵܙ ܠܥܲܒ̣ܕܵܘ̈ܗܝ: ܘܐܸܡܲܪ: ܬܸܠܩܘܿܛ ܡ̣ܢ ܒܲܝܢܵܬ̣ ܟܲܦܹ̈ܐ ܘܠܵܐ ܬܲܗܪܘܼܢܵܗ̇.
ܝܘ: ܘܚܲܠܨܘ ܠܵܗ̇ ܐܵܦ ܡ̣ܢ ܒܲܝܢܵܬ̣ ܟܲܦܹ̈ܐ. ܘܫܘܼܒ̣ܩܘܼܗ̇ ܠܵܩܵܛܵܐ: ܘܠܵܐ ܬܲܗܪܘܼܢܵܗ̇.
ܝܙ: ܘܲܗܘ̤ܵܬ̣ ܠܵܩܵܛܵܐ ܒܚܲܩܠܵܐ ܥܕܲܡܵܐ ܠܪܲܡܫܵܐ: ܘܚܲܒ̇ܛܲܬ̤ ܐܸܢܹܝܢ: ܐܸܫܟ̇ܚܲܬ̤ ܒܗܹܝܢ ܐܲܝܟ ܡܠܸܐ ܟܲܝܠܵܐ ܕܲܣܥܵܪܹ̈ܐ.
ܝܚ: ܘܫܸܩܠܲܬ̤ ܐܸܢܹܝܢ ܘܥܸܠܲܬ̤ ܠܲܡܕܼܝܼܢ̄ܬܵܐ: ܘܚܵܘܝܲܬ̤ ܠܲܚܡܵܬ̣ܵܗ̇ ܠܩܵܛܵܐ ܕܠܸܩܛܲܬ̤: ܘܝܸܗ̄ܒܲܬ̤ ܠܵܐ ܡ̣ܢ ܗܵܘ̇ ܡܵܐ ܕܠܸܥܣܲܬ̤ ܘܐܵܘܬ̇ܪܲܬ̤.
ܝܛ: ܘܐܸܡܪܲܬ̤ ܠܵܗ̇ ܚܡܵܬ̣ܵܗ̇: ܐܲܝܟܵܐ ܠܵܩܛܵܐ ܗ̣̄ܘܲܝܬ̇ܝ ܝܵܘܡܵܢܵܐ: ܘܐܲܬܲܪ ܕܲܗ̤ܘܲܝܬ̇ܝ ܢܸܗܘܸܐ ܒܪܝܼܟ: ܘܗܵܘ̇ ܡ̇ܢ ܕܐܸܫܟܲܚܬ̇ܝ ܪ̈ܲܚܡܹܐ ܒܥܲܝܢܵܘ̈ܗܝ. ܘܐܸܫܬܲܥܝܲܬ̤ ܠܲܚܡܵܬ̣ܵܗ̇ ܐܲܝܟܵܐ ܗܘ̤ܵܬ̣: ܘܐܵܡܪܵܐ ܠܵܗ̇: ܒܵܥܵܙ ܫܡܹܗ ܠܓܲܒ̣ܪܵܐ ܕܠܵܩܛܵܐ ܗ̄ܘܹܝܬ̣ ܒܚܲܩܠܹܗ ܝܵܘܡܵܢܵܐ.
ܟ: ܘܐܸܡܪܲܬ̤ ܢܲܥܡܝܼ ܠܟܲܠܬ̣ܵܗ̇: ܒܪܝܼܟ ܗ̄ܘ̣ ܡܵܪܝܵܐ ܕܠܵܐ ܐܲܥܒܲܪ ܚܸܣܕܹܗ ܡ̣ܢ ܚܲܝܹ̈ܐ ܘܡ̣ܢ ܡܝܼܬܹ̈ܐ. ܘܐܸܡܪܲܬ̤ ܠܵܗ̇ ܢܲܥܡܝܼ: ܩܲܪܝܼܒܲܢ ܗ̄ܘ̣ ܓܲܒ̣ܪܵܐ: ܘܡ̣ܢ ܬܵܒ̣ܥܝ̈ ܥܝܵܪܬܲܢ ܗ̄ܘ̣.
ܟܐ: ܘܐܸܡܪܲܬ̤ ܪܥܘܿܬ̣ ܠܲܚܡܵܬ̣ܵܗ̇: ܘܐܸܡܲܪ ܠܝܼ ܬܘܼܒ̣: ܕܲܕܼܒܲܩܝ ܠܥܲܒ̣̈ܕܲܝ ܥܕܲܡܵܐ ܕܢܸܓ̣ܡܲܪ ܚܨܵܕܼܵܐ ܟܠܹܗ.
ܟܒ: ܘܐܸܡܪܲܬ̤ ܢܲܥܡܝܼ ܠܲܪܥܘܿܬ̣ ܟܲܠܬ̣ܵܗ̇: ܛܘܼܒܲܝܟ̇ܝ ܒܪܲܬ̣ܝ ܕܲܕܼܒܸܩܬ̇ܝ ܠܲܥܠܲܝ̈ܡܵܬܹܗ: ܘܠܵܐ ܐ̄ܢܵܫ ܐܲܗܪܹܟ̣ܝ ܒܚܲܩܠܵܐ ܕܠܵܐ ܝܼܕܲܥܬ̇ܝ.
ܟܓ: ܐܸܠܵܐ ܢܩܸܦܬ̇ܝ ܠܐܲܡ̈ܗܵܬܹܗ ܕܒ̣ܵܥܵܙ ܠܡܸܠܩܲܛ: ܥܕܲܡܵܐ ܕܢܸܫܠܲܡ ܚܨܵܕܼܵܐ ܕܲܣܥܵܪܹ̈ܐ ܕܘܲܕܼܚܸܛܹ̈ܐ.
--------------
ܩܹܦܵܠܹܐܘܿܢ: ܓ.
ܐ: ܘܝܼܬ̣ܒܲܬ̤ ܪܥܘܿܬ̣ ܥܲܡ ܚܡܵܬ̣ܵܗ̇: ܘܐܸܡܪܲܬ̤ ܠܵܗ̇ ܢܲܥܡܝܼ: ܒܪܲܬ̣ܝ: ܠܵܐ ܐܸܒ̣ܥܸܐ ܠܹܟ̣ܝ ܢܝܵܚܵܐ ܘܢܸܛܐܲܒ̣ ܠܹܟ̣ܝ.
ܒ: ܘܗܵܐ ܒܵܥܵܙ ܡܲܚܟ̇ܘܼܡܬ̣ܵܢ ܗ̄ܘ̣: ܗܵܘ̇ ܕܲܗ̤ܘܲܝܬ̇ܝ ܥܲܡ ܥܠܲܝ̈ܡܵܬܹܗ: ܘܗܵܐ ܒܗܵܢܵܐ ܠܸܠܝܵܐ ܐܸܕܼܪܵܐ ܕܲܣܥܵܪܹ̈ܐ ܟܵܫܹܐ.
ܓ: ܣܚܵܝ ܗܵܟܹܝܠ ܘܲܡܫܘܿܚܝ: ܘܐܸܨܛܲܒܲܬ̣ܝ ܒܲܠܒ̣ܘ̈ܫܲܝܟܝ: ܘܚܘܿܬ̣ܝ ܠܐܲܕ̇ܪܵܐ: ܘܠܵܐ ܬ̣ܬ̣ܚ̄ܙܹܝܢ ܠܹܗ: ܥܕܲܡܵܐ ܕܠܵܥܹܣ ܘܫܵܬܹܐ.
ܕ: ܘܢܸܗܘܸܐ ܡܵܐ ܕܕܵܡܹܟ: ܬܣܝܼܡܝܼܢ ܠܒ̣ܵܠܹܟ̣ܝ ܒܕܼܘܼܟ̇ܬ̣ܵܐ ܕܼܵܡܹܟ ܒܵܗ̇. ܘܬ̣ܩ̱ܪܒ̣ܝܼܢ ܘܬܸܕܼܡ̱ܟ̣ܝܼܢ ܠܘܵܬ̣ ܪܸ̈ܓ̣ܠܵܘܗܝ: ܘܗ̤ܘ ܢܹܐܡܲܪ ܠܹܟ̣ܝ ܡܵܐ ܕܬ̣ܥܒ̇ܕܼܝܼܢ.
ܗ: ܘܐܸܡܪܲܬ̤ ܠܵܗ̇: ܟܠܡܵܐ ܕܐܵܡܪܵܐ ܐܲܢ̄ܬ̇ܝ ܠܝܼ: ܐܸܥܒܸ̇ܕܼ.
ܘ: ܘܢܸܚܬ̣ܬ̣ ܠܐܸܕ̇ܪܵܐ: ܘܥܸܒ̣ܕܲܬ̤ ܟܠ ܡܵܐ ܕܦܲܩܸܕܼܬ̣ܵܗ̇ ܚܡܵܬ̣ܵܗ̇.
ܙ: ܘܟܲܕܼ ܐܸܟܲܠ ܒܵܙܵܥ ܘܐܸܫܬ̇ܝܼ: ܘܲܛܐܸܒ̣ ܠܸܒܹ̇ܗ: ܘܐܸܬ̣ܵܐ ܘܲܕܼܡܸܟ ܒܓܲܒܹ̇ܗ ܕܐܸܕ̇ܪܵܐ: ܘܲܒ̣ܡܲܚ̱ܠܝܵܐ ܕܫܸܢܬ̣ܵܐ ܟܲܕܼ ܕܵܡܹܟ ܒܸܐܕ̇ܪܵܐ: ܐܸܬ̣ܵܬ̤ ܗ̤ܝ ܒܛܘܼܫܝܵܐ: ܘܲܓ̣ܠܵܬ̤ ܠܟܸܢܦܵܐ ܕܡܲܪܛܘܼܛܹܗ: ܘܢܸܦܠܲܬ̤ ܠܘܿܬ̣ ܪܸ̈ܓ̣ܠܵܘܗܝ.
ܚ: ܘܲܗܘ̤ܵܐ ܒܦܸܠܓܹ̇ܗ ܕܠܸܠܝܵܐ: ܓܲܒ̣ܪܵܐ ܡ̣ܢ ܫܸܢܬܹܗ: ܘܲܬ̣ܘܲܗ ܕܲܚܙܵܐ ܐܲܢ̄ܬ̇ܬ̣ܵܐ ܕܕܲܡܟܵܐ ܠܘܵܬ̣ ܪܸ̈ܓ̣ܠܵܘܗܝ.
ܛ: ܘܐܸܡܲܪ ܠܵܗ̇ ܡܵܐ ܛܸܒܹ̇ܟ̣ܝ: ܘܐܸܡܪܲܬ̤ ܠܹܗ: ܐܸܢܵܐ ܐ̄ܬܵܐ ܪܥܘܿܬ̣ ܐܲܡܬ̣ܵܟ: ܐܸܠܵܐ ܟܲܣܵܐ ܠܐܲܡܬ̣ܵܟ ܒܟܸܢܦܵܐ ܕܡܲܪܛܘܼܛܵܟ: ܡܸܛܠ ܕܐܲܢ̄ܬ̇ ܗ̄ܘ̣ ܬܵܒܲܥ ܝܵܪܬ̇ܘܼܬ̣ܵܐ.
ܝ: ܘܬܸܡܲܪ ܠܵܗ̇ ܒܵܥܵܙ. ܒܪܝܼܟ̣ܵܐ ܐܲܢ̄ܬ̇ܝ ܠܐܲܠܵܗܵܐ ܒܪܲܬ̣ܝ: ܡܸܛܠ ܕܐܵܛܐܸܒ̣ܬ̇ܝ ܚܸܣܕܹܟ̣ܝ ܐ̄ܚܪܵܝܵܐ ܛܵܒ̣ ܡ̣ܢ ܩܲܕܼܡܵܝܵܐ: ܕܠܵܐ ܐܸܙܲܠܬ̇ܝ ܒܵܬܲܪ ܥܠܲܝܡܹ̈ܐ ܕܥܲܬ̇ܝܼܪܝܼܢ ܐܵܘ ܕܡܸܣܟܹܢܝܼܢ.
ܝܐ: ܘܗܵܫܵܐ ܒܪܲܬ̣ܝ ܠܵܐ ܬܸܕܼܚ̄ܠܝܼܢ: ܡܸܛܠ ܕܟ̣ܠ ܕܬܹܐܡܪܝܼܢ ܠܝܼ ܐܸܟܒܸܕܼ ܠܹܟ̣ܝ. ܝܵܕܼܥܵܐ ܓܹܝܪ ܟܠܵܗ̇ ܫܲܪܒ̇ܬ̣ܵܐ ܕܥܲܡܲܢ: ܕܐܲܢ̄ܬ̇ܬ̣ܵܐ ܐܲܢ̄ܬ̇ܝ ܕܥܘܼܫܢܵܐ.
ܝܒ: ܘܗܵܫܵܐ ܒܩܘܼܫܬܵܐ ܐܸܢܵܐ ܐ̄ܢܵܐ ܬܵܒܲܥ ܝܵܪܬ̇ܘܼܬ̣ܵܐ: ܒܪܲܡ ܕܹܝܢ ܐܝܼܬ̣ ܗ̄ܘ̣ ܐ̄ܚܪܹܢܵܐ ܬܵܒܲܥ ܝܵܪܬ̇ܘܼܬ̣ܵ ܕܗ̤ܘ ܩܲܪܝܼܒ̣ ܝܲܬ̇ܝܼܪ ܡܹܢܝ.
ܝܓ: ܘܗܵܫܵܐ ܟܲܬܲܪܝ ܝܵܘܡܵܢܵܐ ܘܒ̣ܘܼܬ̣ܝ ܥܲܕܼ ܢܵܓܸܗ̇ܐ. ܘܢܸܗܘܸܐ ܒܨܲܦܪܵܐ: ܐܸܢ ܬܲܒ̣ܥܹܟ̣ܝ: ܫܲܦܝܼܪ ܢܸܬ̣ܒܲܥ. ܘܐܸܢ ܕܹܝܢ ܠܵܐ ܢܸܨܒܸ̇ܐ ܕܢܸܬ̣ܒ̇ܥܹܟ̣ܝ: ܚܲܝ ܗ̄ܘ̣ ܡܵܪܝܵܐ ܐܸܢܵܐ ܐܸܬ̣ܒ̇ܥܹܟ̣ܝ. ܘܐܸܡܲܪ ܠܵܗ̇ ܕܡܲܟ̣ܝ ܥܲܕܼ ܨܲܦܪܵܐ.
ܝܕ: ܘܕܸܡܟ̇ܬ̤ ܠܘܵܬ̣ ܪܸ̈ܓ̣ܠܵܘܗܝ ܥܕܲܡܵܐ ܕܢܸܓ̣ܗܲܬ̤: ܘܩܵܡܲܬ̤ ܒܨܲܦܪܵܐ ܟܲܕܼ ܥܲܡܘܼܛ: ܥܲܕܼ ܠܵܐ ܐ̄ܢܵܫ ܢܸܕܲܥ ܠܚܲܒ̣ܪܹܗ: ܘܐܸܡܪܲܬ̤ ܠܹܗ: ܕܠܵܐ ܐ̄ܢܵܫ ܢܸܕܲܥ ܕܢܸܚܬܹ̇ܬ̣ ܠܘܵܬ̣ܵܟ ܠܐܸܕ̇ܪܵܐ.
ܝܗ: ܐܵܡܲܪ ܠܵܗ̇ ܒܵܥܵܙ: ܦܪܘܿܣܝ ܡܲܪܛܘܼܛܹܟ̣ܝ: ܘܦܸܪܣܲܬ̤: ܘܐܲܟ̇ܝܼܠ ܐܲܪܡܝܼ ܠܵܗ̇ ܫܬܵܐ ܟܲܝ̈ܠܝܼܢ ܕܲܣܥܵܪܹ̈ܐ: ܘܐܲܪܝܼܡ ܥܠܹܝܗ̇: ܘܫܸܩܠܲܬ̤ ܘܐܸܬ̣ܵܬ̤ ܠܲܡܕܼܝܼܢ̄ܬܵܐ.
ܝܘ: ܘܥܸܠܲܬ̤ ܠܘܵܬ̣ ܚܡܵܬ̣ܵܗ̇: ܬܵܡܪܵܐ ܠܵܗ̇ ܚܡܵܬ̣ܵܗ̇ ܡ̇ܢ ܐܲܢ̄ܬ̇ܝ ܒܪܲܬ̣ܝ. ܐܵܡܪܵܐ ܠܵܗ̇: ܐܸܢܵܐ ܐ̄ܢܵܐ ܪܥܘܿܬ̣: ܘܐܸܡܪܲܬ̣ ܠܵܗ̇ ܟܠܡܵܐ ܕܲܥܒܲܕܼ ܠܵܗ̇ ܒܵܥܵܙ.
ܝܙ: ܘܲܕܼܝܲܗ̄ܒ̣ ܠܵܗ̇ ܫܬܵܐ ܟܲܝ̈ܠܝܼܢ ܕܲܣܥܵܪܹ̈ܐ: ܘܕܐܸܡܲܪ ܠܵܗ̇ ܕܠܵܐ ܬܸܥܠܝܼܢ ܠܘܵܬ̣ ܚܡܵܬܹܟ̣ܝ ܣܪܝܼܩܵܐܝܼܬ̣.
ܝܚ: ܐܵܡܪܵܐ ܠܵܗ̇ ܚܡܵܬ̣ܵܗ̇: ܬܸܒ̣ܝ ܒܪܲܬ̣ܝ ܥܲܕܼ ܬܸܚܙܹܝܢ: ܠܵܐ ܓܹܝܪ ܫܵܠܹܐ ܓܲܒ̣ܪܵܐ ܥܕܲܡܵܐ ܕܲܡܩܲܪܸܒ ܠܹܗ ܕܝܼܢܵܐ ܝܵܘܡܵܢܵܐ.
---------------
ܩܹܦܵܠܹܐܘܿܢ: ܕ.
ܐ: ܘܲܣܠܸܩ ܒܵܥܵܙ: ܘܝܼܬܸܒ̣ ܥܲܠ ܬܲܪܥܵܐ ܕܲܡܕܼܝܼܢ̄ܬܵܐ: ܘܗܵܐ ܬܵܒܲܥ ܥܝܵܪܬܵܐ ܥܵܒܲܪ: ܗܵܘ̇ ܕܐܸܡܲܪ ܥܠܵܘܗܝ ܒܵܥܵܙ: ܘܐܸܡܲܪ ܠܹܗ ܬܵܐ ܐܸܒ̣ ܗܵܪܟܵܐ: ܗ̤ܘ ܕܹܝܢ ܐܸܡܲܪ ܠܹܗ ܡܵܢܵܘ: ܘܝܼܬܸܒ̣ ܠܘܵܬܹܗ.
ܒ: ܘܲܓ̣ܒ̣ܵܐ ܠܹܗ ܥܸܣܪܵܐ ܓܲܒ̣ܪ̈ܝܼܢ: ܡ̣ܢ ܣܵܒܹ̈ܐ ܕܲܡܕܼܝܼܢ̄ܬܵܐ: ܘܐܵܘܬܸܒ̣ ܐܸܢܘܿܢ ܠܘܵܬܹܗ.
ܓ: ܘܐܸܡܲܪ ܠܬ̣ܵܒܲܥ ܝܵܪܬ̇ܘܼܬ̣ܵܐ: ܦܵܠܓ̇ܘܼܬ̣ܵܐ ܕܚܲܩܠܵܐ ܐܹܠܝܼܡܲܠܟ ܙܲܒ̇ܢܲܬ̤ ܠܝܼ ܢܲܥܡܝܼ.
ܕ: ܘܐܸܢܵܐ ܐܸܡܪܹܬ̣ ܕܐܸܓ̣ܠܸܐ ܘܐܵܘܕܲܥܵܟ: ܘܐܹܡܲܪ ܠܵܟ ܕܲܩܢܝܼ ܐܲܢ̄ܬ̇ ܩܕܼܵܡ ܗܵܠܹܝܢ ܕܝܵܬ̣ܒ̇ܝܼܢ: ܘܐܸܢܵܐ ܐ̄ܢܵܐ ܕܚܵܘܝܼܬ̣ ܢܲܦ̮ܫܝ ܠܡܹܐܡܲܪ ܘܲܠܡܸܩܢܵܐ ܩܕܼܵܡ ܗܵܠܹܝܢ ܣܵܒܹ̈ܐ ܕܥܲܡܝ ܕܝܵܬ̣ܒ̇ܝܼܢ. ܘܗܵܫܵܐ ܐܸܢܗ̤ܘ ܕܬ̣ܵܒܲܥ ܐܲܢ̄ܬ̇ ܬܒܲܥ. ܘܐܸܢ ܠܵܐ ܬܵܒܲܥ ܐܲܢ̄ܬ̇: ܐܸܡܲܪ ܠܝܼ: ܘܐܸܕܲܥ ܗ̤ܘܲܝܬ̇ ܬܵܒ̣ܘܿܥܵܐ: ܘܐܸܢܵܐ ܐܸܬ̣ܒܲܥ. ܘܐܸܡܲܪ ܬܵܒܲܥ ܐ̄ܢܵܐ.
ܗ: ܘܐܸܡܲܪ ܒܵܥܵܙ: ܒܝܵܘܡܵܐ ܕܙܵܒܹܢ ܐܲܢ̄ܬ̇ ܚܲܩܠܵܐ ܡ̣ܢ ܢܲܥܡܝܼ ܘܡ̣ܢ ܪܥܘܿܬ̣ ܡܘܼܐܵܒ̣ܵܝܬܵܐ ܐܲܢ̄ܬ̇ܬܹܗ ܕܗܵܘ̇ ܕܡܝܼܬ̣: ܩܢܝܼ ܥܕܲܡܵܐ ܕܲܬ̣ܩܝܼܡ ܫܡܹܗ ܕܡܝܼܬ̣ܵܐ ܥܲܠ ܝܵܪܬ̇ܘܼܬܹܗ.
ܘ: ܘܐܸܡܲܪ ܬܵܒ̣ܘܿܥܵܐ: ܠܵܐ ܡܸܫܟܲܚ ܐ̄ܢܵܐ ܕܐܸܬ̣ܒܲܥ: ܕܲܠܡܵܐ ܐܹܚܲܒܸ̇ܠ ܝܵܪܬ̇ܘܼܬ̣ܝ. ܬܒܲܥ ܐܲܢ̄ܬ̇: ܡܸܛܠ ܚܲܣܝܼܪܘܼܬ̣ ܗܲܝܡܵܢܘܼܬ̣ܝ ܕܝܼܠܝ ܕܠܵܐ ܡܸܫܟܲܚ ܐ̄ܢܵܐ ܕܐܸܬ̣ܒܲܥ.
ܙ:ܘܗܵܕܹܐ ܬܒܲܥܬ̣ܵܐ: ܗܵܐ ܩܘܼܕܼܡܲܬ̣ ܒ̈ܢܲܝ ܝܼܣܪܵܝܹܠ: ܘܫܘܼܚܠܵܦܵܐ ܕܲܬ̣ܒܲܥܬ̣ܵܐ ܠܲܡܩܵܡܘܼ: ܫܵܪܹܐ ܓܲܒ̣ܪܵܐ ܡܣܵܢܹܗ. ܘܝܵܗܹܒ̣ ܠܚܲܒ̣ܪܹܗ. ܘܗܵܕܼܐ ܗ̄ܝܼ ܣܵܗܕ̇ܘܼܬ̣ܵܐ ܒܝܼܣܪܵܝܹܠ.
ܚ: ܘܐܸܡܲܪ ܗܵܘ̇ ܬܵܒ̣ܘܿܥܵܐ ܠܒ̣ܵܥܵܙ: ܩܢܝܼ ܠܢܲܦ̮ܫܵܟ: ܘܲܫܪܵܐ ܡ̣ܢ ܪܸ̈ܓ̣ܠܵܘܗܝ.
ܛ: ܘܐܸܡܲܪ ܒܵܥܵܙ ܠܣܵܒܹ̈ܐ ܘܲܠܟ̣ܠܹܗ ܥܲܡܵܐ: ܐܲܢ̄ܬ̇ܘܿܢ ܣܵܗܕܝܼܢ ܝܵܘܡܵܢܵܐ: ܕܲܩܢܹܝܬ̣ ܟܠ ܡܵܐ ܕܐܝܼܬ̣ ܗ̄ܘܼܵܐ ܠܐܹܝܠܝܼܡܲܠܟ: ܘܟ̣ܠ ܡܵܐ ܕܐܝܼܬ̣ ܗ̄ܘܼܵܐ ܠܡܲܠܝܘܿܢ ܘܲܠܟ̣ܠܝܘܿܢ ܡ̣ܢ ܐܝܼܕܼܵܐ ܕܢܲܥܡܝܼ.
ܝ: ܘܠܹܟ̣ܝ ܪܥܘܿܬ̣ ܡܘܼܐܵܒ̣ܵܝܬܵܐ ܐܵܢ̄ܬܲܬ̣ ܡܲܠܝܘܿܢ ܢܣܲܒ̣ܬܹܟ̣ܝ ܠܝܼ ܐܲܢ̄ܬ̇ܬ̣ܵܐ: ܠܡܩܵܡܘܼ ܫܡܹܗ ܕܡܝܼܬ̣ܵܐ ܥܲܠ ܝܵܪܬ̇ܘܼܬܹܗ: ܕܠܵܐ ܢܸܬ̇ ܛܥܸܐ ܕܘܼܟ̣ܪܵܬܹܗ ܕܡܝܼܬ̣ܵܐ ܡ̣ܢ ܒܲܝܢܵܬ̣ ܐܲܚܵܘ̈ܗܝ ܘܡ̣ܢ ܫܲܪܒ̇ܬܹܗ: ܐܲܢ̄ܬ̇ܘܿܢ ܣܵܗܕܝܼܢ ܝܵܘܡܵܐ.
ܝܐ: ܘܲܥܢܵܘ ܣܵܒܹ̈ܐ ܘܟ̣ܠܹܗ ܥܲܡܵܐ ܕܲܒ̣ܬܲܪܥܵܐ ܕܲܩܪܝܼܬ̣ܵܐ ܘܐܵܡܪܝܼܢ: ܣܵܗܕܲܝܼܢ ܚ̄ܢܲܢ. ܘܒܲܪܟ̣ܘܼܗܝ: ܘܐܸܡܲܪܘ ܠܹܗ: ܢܸܥܒܸ̇ܕܼ ܡܵܪܝܵܐ ܐܲܢ̄ܬ̇ܬ̣ܵܐ ܗܵܕܹܐ ܩܕܼܵܡܲܝܟ: ܐܲܝܟ ܪܵܚܹܝܠ ܘܐܲܝܟ ܠܲܝܵܐ: ܗܵܠܹܝܢ ܕܗܸܢܹܝܢ ܬܲܪ̈ܬܲܝܗܹܝܢ ܒ̈ܢܲܝ ܒܲܝܬܵܐ ܠܝܼܣܪܵܝܹܠ: ܘܲܥܒܲܕܼ ܚܲܝ̈ܠܹܐ ܒܐܵܦܲܪܬ̣ܵܐ: ܘܲܩܪ̈ܲܝ ܫܡܵܗ̇ ܒܹܝܬ̣ ܠܚܸܡ.
ܝܒ: ܘܢܸܗܘܸܐ ܒܲܝܬܵܟ ܐܲܝܟ ܒܲܝܬܹܗ ܕܦܲܪܨ: ܗܵܘ̇ ܕܝܼܠܕܼ̇ܬ̤ ܬܵܡܵܪ ܠܲܝܗܘܼܕܼܵܐ. ܘܢܸܬܸ̇ܠ ܠܵܟ ܡܵܪܝܵܐ ܙܲܪܥܵܬ ܡ̣ܢ ܐܲܢ̄ܬ̇ܬ̣ܵܐ ܗܵܕܹܐ.
ܝܓ: ܘܬܲܣܒܵܗ̇ ܒܵܥܵܙ ܠܲܪܥܘܿܬ̣ ܘܲܗܘ̤ܵܬ̣ ܠܹܗ ܐܲܢܬ̇ܬ̣ܵܐ: ܘܥܲܠ ܠܘܵܬ̣ܵܗ̇. ܘܝܲܗ̄ܒ̣ ܠܵܗ̇ ܡܵܪܝܵܐ ܘܒܸܛܢܲܬ̤ ܘܝܸܠܕܲܬ̤ ܒܪܵܐ.
ܝܕ: ܘܐܵܡܪ̈ܢ ܢܸܫܹ̈ܐ ܠܢܲܥܡܝܼ: ܒܪܝܼܟ ܗ̄ܘ̣ ܡܵܪܝܵܐ ܕܠܵܐ ܐܲܥܢܸܕܼ ܠܹܟ̣ܝ ܬܵܒ̣ܘܿܥܵܐ ܝܵܘܡܵܢܵܐ: ܘܬܸܩܪܹܝܢ ܫܡܹܗ ܒܝܼܣܪܵܝܹܠ.
ܝܗ: ܘܬܸܗܘܸܐ ܡܒܲܝܐܵܢܵܐ ܠܢܲܦ̮ܫܹܟ̣ܝ: ܘܲܡܬܲܪܣܝܵܢܵܐ ܠܲܡܕܼܝܼܢ̄ܬܹܟ̣ܝ. ܡܸܛܠ ܕܟܲܠܬܹܟ̣ܝ ܕܐܲܚܸܒ̣ܬܹܟ̣ܝ ܝܼܠܸܕܼܬܹܗ: ܗܵܝ̇ ܕܛܸܐܒܲܬ̤ ܒܥܲܝܢܲܝ̈ܟ̇ܝ ܝܲܬ̇ܝܼܪ ܡ̣ܢ ܫܲܒ̣ܥܵܐ ܒܢ̈ܝܼܢ.
ܝܘ: ܘܲܫܩܲܠܬܹܗ ܢܲܥܡܝܼ ܠܛܲܠܝܵܐ ܘܣܵܡܬܹܗ ܒܚܲܢܵܗ̇: ܘܲܗܘ̤ܵܬ̣ ܠܹܗ ܡܪܲܒ̇ܝܵܢܝܼܬ̣ܵܐ.
ܝܙ: ܘܐܸܡܲܪ ܫ̈ܒ̣ܵܒ̣ܵܗ̇ ܐܸܬ̣̱ܝܼܠܕܼ ܒܪܵܐ ܠܢܲܥܡܝܼ: ܘܲܩܪܲܝ ܫܡܹܗ ܥܘܿܒ̣ܝܼܕܼ: ܗܘ̤ܝܘܼ ܐܲܒ̣ܘܼܗܝ ܕܐܝܼܫܲܝ ܐܲܒ̣ܘܼܗܝ ܕܕܼܵܘܝܼܕܼ.
ܝܚ: ܘܗܵܠܹܝܢ ܬܵܘ̈ܠ̱ܕܼܵܬܹܗ ܕܦܲܪܨ: ܦܲܪܨ ܐܵܘܠܸܕܼ ܠܚܸܨܪܘܿܢ.
ܝܛ: ܚܸܨܪܘܿܢ ܐܵܘܠܸܕܼ ܠܐܵܪܵܡ: ܐܵܪܵܡ ܐܵܘܠܸܕܼ ܠܥܲܡܝܼܢܵܕܼܵܒ̣.
ܟܟ: ܥܲܡܝܼܢܵܕܼܵܒ̣ ܐܵܘܠܸܕܼ ܠܢܸܚܫܘܿܢ: ܢܸܚܫܘܿܢ ܐܵܘܠܸܕܼ ܠܫܸܠܵܐ.
ܟܐ: ܘܫܸܠܵܐ ܘܵܘܠܸܕܼ ܠܒ̣ܵܥܵܙ: ܙܒ̣ܵܥܵܙ ܐܵܘܠܸܕܼ ܠܥܘܿܒ̣ܝܼܕܼ.
ܟܒ: ܘܥܘܿܒ̣ܝܼܕܼ ܐܵܘܠܸܕܼ ܠܐܝܼܫܲܝ: ܘܐܝܼܫܲܝ ܐܵܘܠܸܕܼ ܠܕܼܵܘܝܼܕܼ ܡܲܠܟܵܐ.
|
|