ܣܦܪܐ ܕܫܡܘܐܝܠ: ܐ

ܩܹܦܵܠܹܐܘܿܢ: ܐ.

1: ܘܲܗܘ̤ܵܐ ܓܲܒ̣ܪܵܐ ܡ̣ܢ ܪܵܡܬ̣ܵܐ ܕܕ݂ܵܘܩܹ̈ܐ ܡ̣ܢ ܛܘܼܪܵܐ ܕܐܲܦܪܹܝܡ: ܘܲܫܡܹܗ ܗܲܠܩܵܢܵܐ: ܒܲܪ ܝܲܪܚܘܿܡ: ܒܲܪ ܐܹܠܝܼܗܘܿ: ܒܲܪ ܬܲܚܘܿ: ܒܲܪ ܨܘܿܦ ܐܵܦܪܬ̣ܵܝܵܐ. 2: ܘܐܝܼܬ̣ ܗ̄ܘܼ̈ܝܼ ܠܹܗ ܬܲܪܬܹ̇ܝܢ ܢܸܫ̈ܝܼܢ: ܫܡܵܗ̇ ܕ݂ܵܚܕ݂ܵܐ ܚܲܢܵܐ: ܘܲܫܡܵܗ̇ ܕܐܲܚܪܹܬ̣ܵܐ ܦܲܢܵܐ. ܘܲܗܘ̤ܵܘ ܒܦܲܢܢܵܐ ܒ̈ܢܲܝܵܐ: ܘܲܠܚܲܢܵܐ ܠܲܝܬ̇ ܠܵܗ̇ ܒ̈ܢܲܝܵܐ. 3: ܘܣܵܠܹܩ ܗ̄ܘܼܵܐ ܓܲܒ̣ܪܵܐ ܗܵܘ̇ ܡ̣ܢ ܩܪܝܼܬܹܗ ܡ̣ܢ ܥܸܕܵܢ ܠܥܸܕܵܢ: ܠܡܸܣܓܲܕ݂ ܘܠܲܡܕܲܒܵܚܘܼ ܠܡܵܪܝܵܐ ܨܒ̣ܵܐܘܼܬ̣ ܒܫܝܼܠܘܿ. ܘܬܲܡܵܢ ܐܝܼܬ̣ ܗ̄ܘܼܵܘ ܬܪܹܝܢ ܒܢܵܘ̈ܗܝ ܕܥܹܠܝܼ: ܚܲܦܢܝܼ ܘܦܝܼܢܚܸܣ ܟܵܗ̈ܢܹܐ ܠܡܵܪܝܵܐ. 4: ܘܲܗܘ̤ܵܐ ܝܵܘܡܵܐ ܘܕܲܒܲܚ ܗܲܠܩܵܢܵܐ: ܘܝܲܗ̄ܒ̣ ܠܦܲܢܢܵܐ ܐܲܢ̄ܬ̇ܬܹܗ: ܘܲܠܟ݂ܠܗܘܿܢ ܒܢܹ̈ܝܗ̇ ܘܲܒ̣̈ܢܵܬܵܗ̇ ܝܲܗ̄ܒ̣ ܡܢ̈ܵܘܵܬ̣ܵܐ. 5: ܘܲܠܚܲܢܵܐ ܝܲܗ̄ܒ̣ ܡܢܵܬ̣ܵܐ ܚܕ݂ܵܐ ܐܲܥܦܵܐ: ܡܸܛܠ ܕܲܠܚܲܢܵܐ ܪܵܚܹܡ. ܘܡܵܪܝܵܐ ܐܸܚܲܕ݂ ܪܲܚܡܵܗ̇. 6: ܘܡܲܪܓ̇ܙܵܐ ܗ̄ܘ̣ܵܬ̣ ܠܵܗ̇ ܥܲܪܬ̣ܵܗ̇ ܐܵܦ ܡܲܪܓܵܙܘ ܡܸܛܠ: ܕܬܲܟ݂ܪܸܐ ܠܵܗ̇: ܡܸܛܠ ܕܐܸܚܲܕ݂ ܡܵܪܝܵܐ ܒܐܲܦܲܝ̈ ܡܲܪܒ̇ܥܵܗ̇. 7: ܘܗܵܟܲܢܵܐ ܥܵܒ̣ܕܵܐ ܗ̄ܘܼܵܬ̣ ܦܲܢܢܵܐ ܟ̇ܠ ܫܢܵܐ ܒܲܫܢܵܐ: ܒܙܲܒ̣ܢܵܐ ܕܣܵܠܩܵܐ ܗ̄ܘ̣ܵܬ̣ ܠܒܲܝܬܹ̇ܗ ܕܡܵܪܝܵܐ: ܗܵܟܲܢܵܐ ܡܲܪܓ̇ܙܵܐ ܗ̄ܘ̣ܵܬ̣ ܠܵܗ̇: ܘܲܒ̣ܟ݂ܵܬ̤ ܚܢܵܐ ܘܠܵܐ ܠܸܥܣܲܬ̤. 8: ܘܐܸܡܲܪ ܠܵܗ̇ ܗܲܠܩܵܢܵܐ ܒܲܥܠܵܗ̇: ܚܲܢܵܐ ܠܡܵܢܵܐ ܒܵܟ݂ܝܵܐ ܐܲܢ̄ܬ̇ܝ: ܘܐܲܝܟܵܘ ܠܵܐ ܠܵܥܣܲܬ̇ܝ: ܘܲܠܡܵܢܵܐ ܒܝܼܫ ܠܸܒܹ̇ܟ݂ܝ: ܗܵܐ ܐܸܢܵܐ ܛܵܒ̣ ܐ̄ܢܵܐ ܠܹܟ݂ܝ ܡ̣ܢ ܥܸܣܪܵܐ ܒܢ̈ܝܼܢ. 9: ܘܩܵܡܲܬ̤ ܚܲܢܵܐ ܡ̣ܢ ܒܵܬܲܪ ܕܠܸܥܣܲܬ̤ ܒܫܝܼܠܘܿ: ܘܡ̣ܢ ܒܵܬܲܪ ܕܐܸܫܬ̇ܝܲܬ̤. ܘܥܹܠܝܼ ܟܵܗܢܵܐ ܝܵܬܹܒ̣ ܗ̄ܘ̣ܵܐ ܥܲܠ ܟܘܼܪܣܝܵܐ ܥܲܠ ܐܸܣܟ̇ܘܼܦܬ̣ܵܐ ܕܗܲܝܟ̇ܠܹܗ ܕܡܵܪܝܵܐ. 10: ܘܕ݂ܝܼܠܵܗ̇ ܡܲܪܝܼܪܵܐ ܢܲܦ̮ܫܵܗ̇: ܘܲܡܨܲܠܝܵܐ ܗ̄ܘ̣ܵܬ̣ ܩܕ݂ܵܡ ܡܵܪܝܵܐ: ܘܡܸܒ̣ܟ݂ܵܐ ܒܵܟ݂ܝܵܐ ܗ̄ܘ̣ܵܬ̣. 11: ܘܢܸܕ݂ܪܵܐ: ܘܐܸܡܪܲܬ̤: ܡܵܪܝܵܐ ܨܒ̣ܵܐܘܼܬ̣: ܐܸܢ ܡܸܚܙܵܐ ܬܸܚܙܹܐ ܒܫܘܼܥܒܵܕ݂ܵܗ̇ ܕܐܲܡܬ̣ܵܟ݂: ܘܬܸܬ̇ܕܲܟ݂ܪܲܝܢܝ ܘܠܵܐ ܬܸܛܥܸܐ ܠܐܲܡܬ̣ܵܟ݂: ܘܬܸܬܸ̇ܠ ܠܐܲܡܬ̣ܵܟ݂ ܙܲܪܥܵܐ ܕܐ̄ܢܵܫܵܐ: ܐܸܬ̇ܠܝܼܘܗܝ ܠܡܵܪܝܵܐ ܟܠ ܝܵܘ̈ܡܲܝ ܚܲܝܵܘ̈ܗܝ: ܘܲܡܕܲܟ̇ܝܵܐ ܢܸܣܲܩ ܥܲܠ ܪܹܫܹܗ. 12: ܘܲܗܘ̤ܵܐ ܕܟܲܕ݂ ܐܲܣܓ̇ܝܲܬ̤ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ: ܘܥܹܠܝܼ ܢܵܛܲܪ ܗ̄ܘ̣ܵܐ ܠܦܘܼܡܵܗ̇. 13: ܘܚܲܢܵܐ ܒܠܸܒܵܗ̇ ܗ̄ܘ̣ ܡܡܲܠܠܵܐ ܗ̄ܘ̣ܵܬ̣ ܒܲܠܚܘܿܕ݂: ܘܣܸܦ̈ܘܵܬ̣ܵܗ̇ ܗ̄ܘ̣ ܙܵܝ̈ܥܵܢ ܗ̄ܘܲܝ̈: ܘܩܵܠܵܗ̇ ܠܵܐ ܡܸܫܬ̇ܡܲܥ ܗ̄ܘ̣ܵܐ. ܘܚܲܫܒܵܗ̇ ܥܹܠܝܼ ܐܲܝܟ݂ ܪܲܘܝܵܐ. 14: ܘܐܸܡܲܪ ܠܵܗ̇ ܥܹܠܝܼ: ܥܕܲܡܵܐ ܠܐܸܡܲܬ̣ܝ ܡܸܬ̣ܪܵܘܝܵܐ ܐܲܢ̄ܬ̇ܝ: ܐܲܦܝܼܓ̇ܝ ܚܲܡܪܹܟ݂ܝ ܡܸܢـܹܟ݂ܝ. 15: ܥܢܵܬ̤ ܚܲܢܵܐ ܘܐܸܡܪܲܬ̤ ܠܹܗ: ܠܵܐ ܡܵܪܝ: ܐܲܢ̄ܬ̇ܬ̣ܵܐ ܐ̄ܢܵܐ ܥܲܚܩܲܬ̣ ܪܘܼܚܵܐ: ܘܚܲܡܪܵܐ ܘܫܲܟ݂ܪܵܐ ܠܵܐ ܐܸܫܬ̇ܝܼܬ̣: ܘܐܸܫܕܹܬ̣ ܢܲܦ̮ܫܝ ܩܕ݂ܵܡ ܡܵܪܝܵܐ. 16: ܠܵܐ ܬܸܚܫܒ̣ܝܼܗ̇ ܠܐܲܡܬ̣ܵܟ݂ ܩܕ݂ܵܡܲܝܟ ܒܲܪܬ̣ ܚܛܵܗܵܐ: ܡܸܛܠ ܕܡ̣ܢ ܣܘܿܓ̣ܵܐܐ ܗ̄ܘ̣ ܕܥܵܩܲܬ̣ܝ ܘܲܕ݂ܪܘܼܓ̣ܙܝ ܡܲܠܠܹܬ̣ ܥܕܲܡܵܐ ܠܗܵܫܵܐ. 17: ܘܲܥܢܵܐ ܥܿܠܝܼ ܘܐܸܡܲܪ ܠܵܗ̇: ܙܸܠܝ ܒܲܫܠܵܡܵܐ: ܘܐܵܠܵܗܵܐ ܕܝܼܣܪܵܝܹܠ ܢܸܬܸ̇ܠ ܠܹܟ݂ܝ ܫܸܐܠܬܹܟ݂ܝ ܕܲܫܐܸܠܬ̇ܝ ܡܸܢܹܗ. 18: ܘܐܸܡܪܲܬ̤ ܬܸܫܟܲܚ ܐܲܡܬ̣ܵܟ݂ ܪ̈ܲܚܡܹܐ ܒܥܲܝܢܲܝ̈ܟ. ܘܐܸܙܲܠ̄ܬ̤ ܐܲܢ̄ܬ̇ܬ̣ܵܐ ܠܐܘܼܪܚܵܗ̇: ܘܐܲܦܹ̈ܝܗ̇ ܠܵܐ ܙܵܥ ܠܵܗ̇ ܬܘܼܒ̣. 19: ܘܩܲܕܸܡܘܼ ܒܨܲܦܪܵܐ ܘܲܣܓܸܕ݂ܘ ܩܕ݂ܵܡ ܡܵܪܝܵܐ: ܘܲܗܦܲܟ݂ܘ ܘܐܸܙܲܠܘ ܠܒܲܝܬ̇ܗܘܿܢ ܠܪܵܡܬ̣ܵܐ. ܘܲܚܟܲܡ ܗܲܠܩܵܢܵܐ ܠܚܲܢܵܐ ܐܲܢ̄ܬ̇ܬܹܗ: ܘܐܸܬ̇ܕܲܟ݂ܪܵܗ̇ ܡܵܪܝܵܐ. 20: ܘܲܗܘ̤ܵܐ ܠܙܲܒ̣ܢܵܐ ܕܝܵܘ̈ܡܵܬ̣ܵܐ: ܘܒܸܛܢܲܬ̤ ܚܲܢܵܐ ܘܝܸܠܕܲܬ̤ ܒܪܵܐ: ܘܲܩܪܵܬ̤ ܫܡܹܗ ܫܡܘܼܐܹܝܠ: ܡܸܛܠ ܕܡ̣ܢ ܡܵܪܝܵܐ ܫܐܸܠܬܹܗ. 21: ܘܲܣܠܸܩ ܓܲܒ̣ܪܵܐ ܗܲܠܩܵܢܵܐ ܘܟ݂ܠܹܗ ܒܲܝܬܹܗ: ܠܲܡܕܲܒܵܚܘܼ ܠܡܵܪܝܵܐ ܕܸܒ̣ܚܹ̈ܐ ܕܝܵܘ̈ܡܵܬ̣ܵܐ ܕܢܸܕ݂ܪܹܗ. 22: ܘܚܲܢܵܐ ܠܵܐ ܣܸܠܩܲܬ̤: ܡܸܛܠ ܕܐܸܡܪܲܬ̤ ܠܒܲܥܠܵܗ̇: ܥܕܲܡܵܐ ܕܢܸܬ̣ܚ̄ܣܹܠ ܛܲܠܝܵܐ: ܘܐܲܝܬܹܝܘܗܝ ܘܢܸܬ̣ܚ̄ܙܸܐ ܩܕ݂ܵܡ ܡܵܪܝܵܐ: ܘܢܸܬܸܒ̣ ܬܲܡܵܢ ܠܥܵܠܲܡ. 23: ܘܐܸܡܲܪ ܠܵܗ̇ ܗܲܠܩܵܢܵܐ ܒܲܥܠܵܗ̇: ܥܒܸܕ݂ܝ ܐܲܝܟ݂ ܕܫܲܦܝܼܪ ܒܥܲܝܢܲܝ̈ܟ̇ܝ: ܬܸܒ̣ܝ ܥܕܲܡܵܐ ܕܬܸܚܣ̄ܠܝܼܢܹܗ: ܒܪܲܡ ܢܲܫܲܪ ܡܵܪܝܵܐ ܡܸܠܬܹܟ݂ܝ. ܘܝܼܬ̣ܒܲܬ̤ ܐܲܢ̄ܬ̇ܬ̣ܵܐ ܐܲܝܢܩܲܬ̤ ܒܪܵܗ̇ ܥܕܲܡܵܐ ܕܲܚܣܲܠܬܹܗ. 24: ܘܐܲܣܸܩܬܹܗ ܥܲܡܵܗ̇ ܟܲܕ݂ ܚܣܲܠܬܹܗ ܒܬ̣ܵܘܪܵܐ ܬܘܼܠܬܵܐ: ܘܣܲܐܬ̣ܵܐ ܚܕ݂ܵܐ ܕܩܲܡܚܵܐ: ܘܲܓ̣ܪܵܒ̣ܵܐ ܚܲܕ݂ ܕܚܲܡܪܵܐ. ܘܐܲܝܬ̇ܝܵܬܹܗ ܠܒܲܝܬܹܗ ܕܡܵܪܝܵܐ ܠܫܝܼܠܘܿ. ܘܛܲܠܝܵܐ ܛܠܸܐ ܗ̄ܘ̣ܵܐ. 25: ܘܲܢܟܲܣܘ ܬܵܘܪܵܐ: ܘܐܲܝܬ̇ܝܘܼ ܠܛܲܠܝܵܐ ܠܥܹܠܝܼ. 26: ܘܐܸܡܪܲܬ̤ ܚܲܢܵܐ ܠܥܹܠܝܼ: ܒܵܥܝܵܐ ܐ̄ܢܵܐ ܡܸܢܵܟ݂ ܡܵܪܝ: ܚܲܢܵܐ ܗ̄ܝܼ ܢܲܦ̮ܫܵܟ݂ ܡܵܪܝ: ܐܸܢܵܐ ܗ̄ܝ̇ ܐܲܢ̄ܬ̇ܬ̣ܵܐ ܕܩܵܝܡܵܐ ܗ̄ܘܹܝܬ̣ ܥܲܡܵܟ݂ ܗܵܪܟܵܐ: ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܥܲܠ ܛܲܠܝܵܐ ܗܵܢܵܐ. 27: ܘܨܲܠܝܼܬ̣ ܘܝܲܗ̄ܒ̣ ܠܝܼ ܡܵܪܝܵܐ ܫܸܐܠܲܬ̣ܝ ܕܫܸܐܵܠܹܬ̣ ܡܸܢܹܗ. 28: ܘܐܵܦ ܬܸܢܵܐ ܐܲܫܐܸܠܬܹܗ ܠܡܵܪܝܵܐ: ܟܠܗܘܿܢ ܝܵܘ̈ܡܵܬ̣ܵܐ ܕܗ̤ܘ ܚܲܝ: ܕܲܫܐܝܼܠ ܠܝܼ ܡ̣ܢ ܡܵܪܝܵܐ. ܘܲܣܓܸܕ݂ܘ ܬܲܡܵܢ ܠܡܵܪܝܵܐ.

ܩܹܦܵܠܹܐܘܿܢ: ܒ.

1: ܘܨܲܠܝܲܬ̤ ܚܲܢܵܐ ܘܐܸܡܪܲܬ̤: ܥܫܸܢ ܠܹܒ̇ܝ ܒܡܵܪܝܵܐ: ܘܐܸܬ̇ܬ̇ܪܝܼܡܲܬ̤ ܩܲܪܢܝ: ܘܐܸܬ̣ܦܬܲܚ ܦܘܼܡܝ ܥܲܠ ܒܥܸܠܕܒ̣ܵܒܲܝ̈: ܡܸܛܠ ܕܚܲܕܝܼܬܵܢܝ ܒܦܘܼܪܩܵܢܵܟ݂. 2: ܠܲܝܬ̇ ܕܩܕ̇ܝܼܫ ܐܲܝܟ݂ ܡܵܪܝܵܐ: ܡܸܛܠ ܕܠܲܝܬ̇ ܠܒܲܪ ܡܸܢܵܟ݂: ܘܠܲܝܬ̇ ܕܬܲܩܝܼܦ ܐܲܝܟ݂ ܐܲܠܵܗܲܢ. 3: ܠܵܐ ܬܲܣܓ̇ܘܿܢ ܠܲܡܡܲܠܵܠܘܼ ܪܵܘܪ̈ܒ̣ܵܬ̣ܵܐ: ܘܠܵܐ ܢܸܦܘܿܩ ܛܠܘܼܡܝܵܐ ܡ̣ܢ ܦܘܼܡܟ݂ܘܿܢ. ܡܸܛܠ ܕܕ݂ܝܼܕܲܥܬ̣ܵܐ ܗ̄ܘ̣ ܡܵܪܝܵܐ: ܘܠܵܐ ܬܲܩ̈ܢܵܢ ܨܸܢ̈ܥܵܬ̣ܵ ܩܕ݂ܵܡܵܘܗܝ. 4: ܩܸܫ̈ܬܵܬ̣ܵܐ ܕܓܲܢ̄ܒܵܪܹ̈ܐ ܢܸܬ̇ܬܲܒ̇ܪܵܢ: ܘܲܟ݂ܪ̈ܝܼܗܹܐ ܐܸܬ̣ܥܲܫܲܢܘ ܒܚܲܝܠܵܐ. 5: ܘܣܒ̣̈ܥܹܐ ܒܠܲܚܡܵܐ ܐܸܬ̣̱ܐܓܲܪܘ: ܘܟܲܦܢܹ̈ܐ ܐܵܘܬܲܪܘ. ܥܩܲܪܬ̣ܵܐ ܝܸܠܕܲܬ̣ ܘܣܸܒ̣ܥܲܬ̤: ܘܣܲܓܝܲܐܬ̣ ܒ̈ܢܲܝܵܐ ܨܸܕ݂ܝܲܬ̤. 6: ܡܵܪܝܵܐ ܗ̄ܘ̣ ܡܡܝܼܬ̣ ܘܡܲܚܸܐ: ܘܡܲܚܸܬ̣ ܠܲܫܝܘܿܠ ܘܡܲܣܸܩ. 7: ܡܵܪܝܵܐ ܗ̄ܘ̣ ܡܡܲܣܟܸ̇ܢ ܘܡܲܥܬܲܪ: ܘܲܡܫܲܦܸܠ ܘܐܵܦ ܡܪܝܼܡ.

8: ܡܪܝܼܡ ܡ̣ܢ ܥܲܦܪܵܐ ܠܡܸܣܟܹ̇ܢܵܐ: ܘܡ̣ܢ ܩܸܩ̱ܠܬܵܐ ܡܩܝܼܡ ܠܒ̣ܵܝܫܵܐ: ܠܡܵܘܬܵܒ̣ܘܼܬܹܗ ܥܲܡ ܤܵܘ̱ܪ̈ܒ̣ܵܢܹܐ: ܘܟ݂ܘܼܪܣܝܵܐ ܕܐܝܼܩܵܪܵܐ ܢܵܘܪܸܬ̣ ܐܸܢܘܿܢ. ܛܲܠܸܠ ܡܵܪܝܵܐ ܥܘܼܡ̈ܩܹܝܗ̇ ܕܐܲܪܥܵܐ: ܘܣܵܡ ܥܠܲܝܗܘܿܢ ܬܹܒܹܝܠ. 9: ܪܸ̈ܓ̃ܠܹܐ ܕܚܲܣܝܵܘ̈ܗܝ ܢܢܲܛܪ: ܘܪ̈ܲܫܝܼܥܹܐ ܒܚܸܫܘܿܟ݂ܵܐ ܢܸܫܬܲܬ̇ܩܘܼܢ: ܡܸܛܠ ܕܠܵܐ ܗ̄ܘ̣ܵܐ ܒܚܲܝܠܹܗ ܡܸܬ̣ܓܲܢ̄ܒܲܪ ܓܲܢ̄ܒܵܪܵܐ. 10: ܡܵܪܝܵܐ ܢܸܬܒܲܪ ܡܡܲܪܡܪ̈ܵܢܵܘܗܝ: ܘܲܥܠܲܝܗܘܿܢ ܒܲܫܡܲܝܵܐ ܢܸܪܥܲܡ. ܡܵܪܝܵܐ ܢܕ݂ܘܼܢ ܥܸܒ̣ܪܹ̈ܝܗ̇ ܕܐܲܪܥܵܐ: ܘܢܸܬܸܠ ܥܘܼܫܢܵܐ ܠܡܲܠܟܹ̇ܗ: ܘܲܢܪܝܼܡ ܩܲܪܢܵܐ ܕܲܡܫܝܼܚܹܗ. 11: ܘܐܸܙܲܠ ܗܲܠܩܵܢܵܐ ܠܪܵܡܬ̣ܵܐ ܠܒܲܝܬܹ̇ܗ: ܗ̤ܘ ܘܚܲܢܵܐ ܐܲܢ̄ܬ̇ܬܹܗ. ܘܛܲܠܝܵܐ ܫܡܘܼܐܹܝܠ ܡܫܲܡܸܫ ܗ̄ܘ̣ܵܐ ܩܕ݂ܵܡ ܡܵܪܝܵܐ ܩܕ݂ܵܡ ܥܹܠܝܼ ܟܵܗܢܵܐ. 12 ܘܲܒ̣̈ܢܲܝ ܥܹܠܝܼ ܒ̈ܢܲܝ ܚܛܵܐ: ܠܵܐ ܝܵܕ݂ܥܝܼܢ ܗ̄ܘ̣ܵܐ ܠܡܵܪܝܵܐ. 13: ܘܲܥܒܲܕ݂ܘ ܠܗܘܿܢ ܡܲܫ̱ܠܝܵܐ ܕܲܬ̣ܵܠܬ̣ ܫܸܢ̈ܝܵܢ. ܘܙܸܕ݂ܩܵܐ ܕܟ݂ܵܗ̈ܢܹܐ ܢܵܣܒ̇ܝܼܢ ܡ̣ܢ ܥܲܡܵܐ: ܘܡ̣ܢ ܟܠ ܓܒܲܪ ܕܕ݂ܵܒܲܚ ܕܸܒ̣ܚܬ̣ܵܐ. ܘܐܵܬܹܐ ܗ̄ܘ̣ܵܐ ܛܲܠܝܵܐ ܕܟ݂ܵܗܢܵܐ ܡܵܐ ܕܡܸܬ̣ܒܲܫܲܠ ܒܸܣܪܵܐ: ܘܡܲܫܠܝܵܐ ܕܲܬ̣ܠܵܬ̣ ܫܸܢ̈ܢܵܢ ܒܐܝܼܕܹܗ. 14: ܘܡܵܘܫܸܛ ܗ̄ܘ̣ܵܐ ܠܩܲܕ݂ܣܵܐ: ܐܵܘ ܠܐܝܼܪܵܐ: ܐܵܘ ܠܩܲܪܕ݂ܵܠܵܐ: ܐܵܘ ܠܩܸܕ݂ܪܵܐ. ܘܟ݂ܠ ܕܡܲܣܸܩ ܡܲܫܠܝܵܐ: ܢܵܣܹܒ̣ ܠܹܗ ܟܵܗܢܵܐ. ܗܵܟܲܢܵܐ ܥܵܒ̣ܕܝܼܢ ܗ̄ܘ̣ܵܘ ܠܟ݂ܠܹܗ ܝܼܣܪܵܝܹܠ: ܕܐܵܬܹܝܢ ܗ̄ܘ̣ܘ ܠܬܲܡܵܢ ܠܫܝܼܠܘܿ. 15: ܘܐܵܦ ܥܲܕ݂ܠܵܐ ܢܲܣܩܘܼܢ ܕܸܒ̣ܚܲܝ̈ ܕܸܒ̣ܚܬ̣ܵܐ: ܐܵܬܹܐ ܗ̄ܘ̣ܵܐ ܛܲܠܝܵܐ ܕܟ݂ܵܗܢܵܐ: ܘܐܵܡܲܪ ܠܓܲܒ̣ܪܵܐ ܕܕ݂ܵܒܲܚ: ܗܲܒ̣ ܒܸܣܪܵܐ ܠܲܡܛܵܘܵܝܘܼ ܠܟ݂ܵܗܢܵܐ. ܠܵܐ ܢܵܣܹܒ̣ ܐ̄ܢܵܐ ܡܸܢܵܟ݂ ܒܸܣܪܵܐ ܡܒܲܫܠܵܐ: ܬܸܠܵܐ ܚܲܝܵܐ. 16: ܐܵܡܲܪ ܠܹܗ ܓܲܒ̣ܪܵܐ: ܡܲܣܵܩܘܼ ܢܲܣܩܘܼܢ ܝܵܘܡܵܢܵܐ: ܘܣܲܒ̣ ܠܵܟ݂ ܡܵܐ ܕܪܵܓܵܐ ܢܲܦ̮ܫܵܟ݂. ܘܐܵܡܲܪ ܠܹܗ: ܗܵܫܵܐ ܗ̄ܘ̣ ܝܵܗܹ̇ܒ̣ ܐܲܢ̄ܬ̇ܘ ܘܐܸܢ ܠܵܐ: ܢܵܣܹܒ̣ ܐ̄ܢܵܐ ܒܲܩܛܝܼܪܵܐ. 17: ܘܲܗܘ̤ܵܬ̣ ܚܛܝܼܬ̣ܵܐ ܕܲܛ̈ܠܵܝܹܐ ܪܲܒܵܐ ܛܵܒ̣ ܩܕ݂ܵܡ ܡܵܪܝܵܐ: ܕܐܲܪܓܸܙܘ ܓܲܒ̣ܪܹ̈ܐ ܩܕ݂ܵܡ ܡܵܪܝܵܐ. 18: ܘܲܫܡܘܼܐܹܝܠ ܛܲܠܝܵܐ ܡܫܲܡܸܫ ܗ̄ܘ̣ܵܐ ܩܕ݂ܵܡ ܡܵܪܝܵܐ: ܘܲܠܒ̣ܝܼܫ ܗ̄ܘ̣ܵܐ ܦܸܕܬ̣ܵܐ ܕܒ̣ܘܼܨܵܐ. 19: ܘܲܦܪܝܼܣܵܐ ܙܥܘܿܪܵܐ ܥܸܒ̣ܕܲܬ̤ ܠܹܗ ܐܸܡܹܗ: ܘܐܲܣܩܲܬ̤ ܠܹܗ ܡ̣ܢ ܥܸܕܵܢ ܠܥܸܕܵܢ: ܟܲܕ݂ ܣܸܠܩܲܬ̤ ܥܲܡ ܒܲܥܠܵܗ̇ ܠܲܡܕܲܒܵܚܘܼ ܕܸܒ̣ܚܹ̈ܐ ܕܢܕ݂ܪܵܗ̇. 20: ܘܒܲܪܲܟ ܥܹܠܝܼ ܠܗܲܠܩܵܢܵܐ ܘܠܲܐܢ̄ܬ̇ܬܹܗ: ܘܐܸܡܲܪ: ܢܸܬܸ̇ܠ ܠܵܟ݂ ܡܵܪܝܵܐ ܙܲܪܥܵܐ ܡ̣ܢ ܐܲܢ̄ܬ̇ܬ̣ܵܐ ܗܵܕܹܐ: ܚܠܵܦ ܫܸܐܠܬ̣ܵܐ ܕܲܫܐܸܠܬ̇ ܠܡܵܪܝܵܐ. ܘܐܸܙܲܠܘ ܠܐܲܬ̣ܪܗܘܿܢ. 21: ܘܡܵܪܝܵܐ ܦܩܲܕ݂ ܠܚܲܢܵܐ: ܘܒܸܛܢܲܬ̤ ܘܝܼܠܕܲܬ̤ ܬܠܵܬ̣ܵܐ ܒܢ̈ܝܼܢ ܘܬܲܪܬܹܝܢ ܒ̈ܢܵܢ. ܘܲܪܒ̣ܵܐ ܛܲܠܝܵܐ ܫܡܘܼܐܹܝܠ ܩܕ݂ܵܡ ܡܵܪܝܵܐ. 22: ܘܥܹܠܝܼ ܣܐܸܒ̣ ܛܵܒ̣. ܘܲܫܡܲܥ ܟܠ ܕܥܵܒ̣ܕܲܝ̣ܢ ܒܢܵܘ̈ܗܝ ܠܟ݂ܠܹܗ ܝܼܣܪܵܝܹܠ: ܘܕ݂ܡܨܲܥܪܝܼܢ ܢܸܫܹ̈ܐ ܕܲܡܨܲܠ̈ܝܵܢ ܒܡܲܫܟܲܢ ܙܲܒ̣ܢܵܐ. 23: ܘܐܸܡܲܪ ܠܗܘܿܢ: ܠܡܵܢܵܐ ܥܵܒ̣ܕܲܝܼܢ ܐ̄ܢܬ̇ܘܿܢ ܐܲܝܟ݂ ܡܸܠܹ̈ܐ ܗܵܠܹܝܢ: ܕܫܵܡܲܥ ܐ̄ܢܵܐ ܛܲܒ̇ܟ݂ܘܿܢ ܒܝܼܫܵܐ ܡ̣ܢ ܟܠܹܗ ܥܲܡܵܐ ܗܵܢܵܐ. 24: ܠܵܐ ܒ̈ܢܲܝ: ܡܸܛܠ ܕܠܵܐ ܗ̄ܘ݂ܵܐ ܫܲܦܝܼܪ ܫܸܡܥܵܐ ܗܵܢܵܐ: ܕܫܵܡܲܥ ܐ̄ܢܵܐ ܕܲܡܒܲܛܠܝܼܢ ܐ̄ܢܬ̇ܘܿܢ ܠܥܲܡܹܗ ܕܡܵܪܝܵܐ. 25: ܐܸܢ ܢܸܚܛܸܐ ܓܲܒ̣ܪܵܐ ܒܓܲܒ̣ܪܵܐ: ܢܸܒ̣ܥܸܐ ܡ̣ܢ ܩܕ݂ܵܡ ܡܵܪܝܵܐ. ܘܐܸܢ ܒܡܵܪܝܵܐ ܢܸܚܛܸܐ ܓܲܒ̣ܪܵܐ: ܡ̣ܢ ܡ̇ܢ ܢܸܒ̣ܥܸܐ. ܘܠܵܐ ܫܡܲܥܘ ܠܩܵܠܵܐ ܕܐܲܒ̣ܘܼܗܘܿܢ: ܡܸܛܠ ܕܲܨܒ̣ܵܐ ܡܵܪܝܵܐ ܕܲܢܡܝܼܬ̣ ܐܸܢܘܿܢ.

26: ܘܛܲܠܝܵܐ ܫܡܘܼܐܹܝܠ ܐܵܙܹܠ ܘܝܵܪܹܒ̣ ܛܵܒ̣: ܘܛܵܐܹܒ̣ ܩܕ݂ܵܡ ܡܵܪܝܵܐ: ܘܐܵܦ ܩܕ݂ܵܡ ܒܢܲܝ̈ܢܵܫܵܐ. 27: ܘܐܸܬ̣ܵܐ ܓܲܒ̣ܪܵܐ ܕܡܵܪܝܵܐ ܠܘܵܬ̣ ܥܹܠܝܼ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܡܸܬ̣ܓ̇ܠܵܝܘܼ ܐܸܬ̣ܓ̇ܠܝܼܬ̣ ܥܲܠ ܒܹܝܬ̣ ܐܲܒ̣ܘܼܟ݂: ܟܲܕ݂ ܗܘ̤ܵܐ ܒܡܸܨܪܹܝܢ ܕܒܹܝܬ̣ ܦܸܪܥܘܿܢ. 28: ܘܲܓ̣ܒܹܝܬܹܗ ܠܝܼ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܠܟ݂ܵܗܢܵܐ: ܕܢܸܣܲܩ ܥܲܠ ܡܲܕ݂ܒܲܚ: ܘܲܢܣܝܼܡ ܒܸܣܪܵܐ ܩܕ݂ܵܡܲܝ: ܘܢܸܫܩܘܿܠ ܦܸܕܬ̣ܵܐ. ܘܝܸܗ̄ܒܹܬ̇ ܠܒܹܝܬ̣ ܐܲܒ̣ܘܼܟ݂: ܟܠܗܘܿܢ ܩܘܼܪ̈ܒܵܢܹܐ ܕܲܒ̣̈ܢܲܝ ܝܼܣܪܵܝܹܠ. 29: ܠܡܵܢܵܐ ܐܲܥܠܝܼܬ̇ܘܿܢ ܒܕܸܒ̣̈ܚܲܝ ܘܲܒ̣ܩܘܼܪ̈ܒܵܢܲܝ ܕܦܲܩܕܹܬ̣ ܡ̣ܢ ܡܲܕ݂ܒ̇ܪܵܐ: ܘܝܲܩܲܪܬ̇ ܒܢܲܝ̈ܟ ܡܹܢܝ: ܕܬܸܓ̣ܒ̇ܘܿܢ ܡ̣ܢ ܪܹܫ ܟܠܗܘܿܢ ܩܘܼܪ̈ܒܵܢܹܐ: ܕܲܒ̣̈ܢܲܝ ܝܼܣܪܵܝܹܠ ܥܲܡܝ. 30: ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܹܐܡܲܪ ܐܸܡܪܹܬ̣: ܕܒܲܝܬܵܟ݂ ܘܒܹܝܬ̣ ܐܲܒ̣ܘܼܟ݂ ܢܫܲܡܫܘܼܢ ܩܕ݂ܵܡܝ ܥܕܲܡܵܐ ܠܥܵܠܲܡ. ܘܗܵܫܵܐ ܐܵܡܲܪ ܡܵܪܝܵܐ ܚܵܣ ܠܝܼ: ܡܸܛܠ ܕܲܡܝܲܩܪ̈ܵܢܲܝ ܐܹܝܲܩܲܪ: ܘܫܵܝܘܿܛܲܝ̈ ܢܸܨܛܲܥܪܘܼܢ. 31: ܗܵܐ ܝܵܘ̈ܡܵܬ̣ܵܐ ܐܵܬܹܝܢ: ܐܵܡܲܪ ܡܵܪܝܵܐ: ܘܐܸܓ̣ܕܘܿܢ ܕܪܵܥܵܟ݂ ܘܲܕ݂ܪܵܥܹܗ ܕܐܲܒ̣ܘܼܟ݂. ܘܠܵܐ ܢܸܗܘܸܐ ܣܵܒ̣ܵܐ ܒܒܲܝܬܵܟ݂. 32: ܘܕ݂ܵܐܚܸܕ݂ ܬܲܩܕܵܐ ܒܡܲܥܡܪܵܟ݂: ܘܟ݂ܠ ܕܡܲܛܸܐܒ̣ ܒܝܼܣܪܵܝܹܠܘ ܘܠܵܐ ܢܸܗܘܸܐ ܣܵܒ̣ܵܐ ܒܒܲܝܬܵܟ݂ ܟܠܗܘܿܢ ܝܵܘ̈ܡܵܬ̣ܵܐ. 33: ܘܓܲܒ̣ܪܵܐ ܠܵܐ ܐܲܥܢܸܕ݂ ܠܵܟ݂ ܡ̣ܢ ܡܲܕ݂ܒܲܚܝ: ܠܡܲܚܫܵܟ݂ܘܼ ܥܲܝܢܲܝ̈ܟ: ܘܠܲܡܕܲܝܵܒ̣ܘܼ ܢܲܦ̮ܫܵܟ݂. ܘܟ݂ܠܵܗ̇ ܡܲܪܒ̇ܝܼܬ̣ܵܐ ܕܒܲܝܬܵܟ݂ ܢܡܘܼܬ̣ܘܼܢ ܓܲܒ̣ܪܹ̈ܐ. 34: ܘܗܵܕܹܐ ܠܵܟ݂ ܐܵܬ̤ܵܐ ܕܐܵܬ̣ܝܵܐ ܥܲܠ ܬܪܹܝܢ ܒܢܲܝ̈ܟ: ܥܲܠ ܚܵܦܢܝܼ ܘܥܲܠ ܦܝܼܢܚܸܣ: ܒܝܵܘܡܵܐ ܚܲܕ݂ ܢܡܘܼܬ̣ܘܼܢ ܬܪ̈ܲܝܗܘܿܢ. 35: ܘܠܲܩܝܼܡ ܠܝܼ ܟܵܗܢܵܐ ܕܲܡܗܲܝܡܲܢ ܐܲܝܟ݂ ܠܹܒ̇ܝ: ܘܐܲܝܟ݂ ܕܲܒ̣ܠܹܒ̇ܝ ܘܲܒ̣ܢܲܦ̮ܫܝ ܢܸܥܒܸ̇ܕ݂: ܘܐܸܒ̣ܢܸܐ ܠܹܗ ܒܲܝܬܵܐ ܡܗܲܝ̱ܡܢܵܐ: ܘܲܢܗܲܠܸܟ݂ ܩܕ݂ܵܡܲܝ ܡܫܝܼܚܝ ܟܠܗܘܿܢ ܝܵܘ̈ܡܵܬ̣ܵܐ. 36: ܘܢܸܗܘܸܐ ܟܠ ܕܡܸܫܬ̇ܚܲܪ ܒܒܲܝܬܵܟ݂: ܬܹܐܬܸܐ ܠܡܸܣܓܲܕ݂ ܠܹܗ: ܠܐܲܓ̣ܝܼܪܬܵܐ ܕܟܸܣܦܵܐ: ܘܠܲܓ̣ܪܝܼܨܬܵܐ ܕܠܲܚܡܵܐ: ܘܢܹܐܡܲܪ ܫܲܕܲܪܲܝܢܝ ܠܘܵܬ̣ ܚܲܕ݂ ܡ̣ܢ ܟܵܗ̈ܢܹܐ ܕܐܸܠܥܲܣ ܥܘܼܡܨܵܐ ܕܠܲܚܡܵܐ.

ܩܹܦܵܠܹܐܘܿܢ: ܓ.

1: ܘܛܲܠܝܵܐ ܫܡܘܼܐܹܝܠ ܡܫܲܡܸܫ ܗ̄ܘ̣ܵܐ ܩܕ݂ܵܡ ܡܵܪܝܵܐ ܩܕ݂ܵܡ ܥܹܠܝܼ ܟܵܗܢܵܐ: ܘܦܸܬ̣ܓ̣ܵܡܹܗ ܕܡܵܪܝܵܐ ܝܲܩܝܼܤ ܗ̄ܘ̣ܵܐ ܒܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܚܸܙܘܵܐ ܕ݂ܓ̣ܠܸܐ. 2: ܘܲܗܘ̤ܵܐ ܒܗܵܢܘܿܢ ܝܵܘ̈ܡܵܬ̣ܵܐ: ܘܥܹܠܝܼ ܕܡܸܟ݂ ܒܕ݂ܘܼܟ̇ܬܹܗ: ܘܥܲܝܢܵܘ̈ܗܝ ܫܲܪܝܼ ܝܵܩܪ̈ܵܢ: ܘܠܵܐ ܡܸܫܟܲܚ ܗ̄ܘ̣ܵܐ ܠܡܸܚܙܵܐ. 3: ܘܲܫܪܵܓܹܗ ܕܡܵܪܝܵܐ ܥܕܲܟܹ̇ܝܠ ܠܵܐ ܕܥܸܟ݂. ܘܲܫܡܘܼܐܹܝܠ ܕܡܸܟ݂ ܒܗܲܝܟ̇ܠܹܗ ܕܡܵܪܝܵܐ ܕܬܲܡܵܢ ܩܹܒ̣ܘܿܬܹܗ ܕܐܲܠܵܗܵܐ. 4: ܘܲܩܪܵܐ ܡܵܪܝܵܐ ܠܲܫܡܘܼܐܹܝܠ: ܘܐܸܡܲܪ ܗܵܐ ܐܸܢܵܐ. 5: ܘܲܪܗܸܛ ܠܘܵܬ̣ ܥܹܠܝܼ: ܘܐܸܡܲܪ ܗܵܐ ܐܸܢܵܐ ܕܲܩܪܲܝܬܵܢܝ. ܘܐܸܡܲܪ ܠܵܐ ܩܪܹܝܬ̣: ܙܸܠ ܕܡܲܟ݂. ܘܐܸܙܲܠ ܕܡܸܟ݂. 6: ܘܐܵܘܣܸܦ ܬܘܼܒ̣ ܡܵܪܝܵܐ ܠܡܸܩܪܵܐ ܠܲܫܡܘܼܐܹܝܠ: ܘܩܵܡ ܫܡܘܼܐܹܝܠ ܘܐܸܙܲܠ ܠܘܵܬ̣ ܥܹܠܝܼ: ܘܐܸܡܲܪ ܗܵܐ ܐܸܢܵܐ ܕܲܩܪܲܝܬܵܢܝ. ܘܐܸܡܲܪ ܠܵܐ ܩܪܹܝܬ̣ ܒܹܪܝ: ܙܸܠ ܕܡܲܟ݂.

7: ܘܲܫܡܘܼܐܹܝܠ ܥܕܲܟܹ̇ܝܠ ܠܵܐ ܝܕܲܥ ܠܡܵܪܝܵܐ: ܘܲܥܕܲܟܹ̇ܝܠ ܠܵܐ ܐܸܬ̣ܓ̇ܠܝܼ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ.

8: ܘܐܵܘܣܸܦ ܬܘܼܒ̣ ܡܵܪܝܵܐ ܠܡܸܩܪܵܐ ܠܲܫܡܘܼܐܹܝܠ ܕܲܬ̣ܠܵܬ̣ ܙܲܒ̣̈ܢܝܼܢ. ܘܩܵܡ ܫܡܘܼܐܹܝܠ ܘܐܸܙܲܠ ܠܘܵܬ̣ ܥܹܠܝܼ: ܘܐܸܡܲܪ ܗܵܐ ܐܸܢܵܐ ܕܲܩܪܲܝܬܵܢܝ. ܘܐܸܬ̣ܒܲܝܲܢ ܥܹܠܝܼ ܕܡܵܪܝܵܐ ܩܪܵܐ ܠܛܲܠܝܵܐ. 9: ܘܐܸܡܲܪ ܥܹܠܝܼ ܠܲܫܡܘܼܐܹܝܠ: ܙܸܠ ܕܡܲܟ݂. ܘܐܸܢ ܢܸܩܪܹܝܢ ܐܸܡܲܪ: ܡܲܠܸܠ ܡܵܪܝܵܐ ܡܸܛܠ ܕܫܵܡܲܥ ܥܲܒ̣ܕܵܟ݂. ܘܐܸܙܲܠ ܫܡܘܼܐܹܝܠ ܘܲܕ݂ܡܸܟ݂ ܒܕ݂ܘܼܟ̇ܬܹܗ. 10: ܘܐܸܬ̣ܵܐ ܡܵܪܝܵܐ ܘܩܵܡ ܘܲܩܪܵܐ ܬܲܪܬܹܝܢ ܙܲܒ̣ܢ̈ܝܼܢ: ܫܡܘܼܐܹܝܠ: ܫܡܘܼܐܹܝܠ. ܘܐܸܡܲܪ ܫܡܘܼܐܹܝܠ: ܡܲܠܸܠ ܡܵܪܝܵܐ ܕܫܵܡܲܥ ܥܲܒ̣ܕܵܟ݂. 11: ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܗܵܐ ܥܵܒܹܕ݂ ܐ̄ܢܵܐ ܦܸܬ̣ܓ̣ܵܡܵܐ ܒܝܼܣܪܵܝܹܠ: ܕܟ݂ܠ ܕܢܸܫܡ̱ܥܝܼܘܗܝ. ܢܸܨ̈ܠܵܢ ܬܲܪ̈ܬܲܝܗܹܝܢ ܐܸܕ݂ܢܵܘ̈ܗܝ. 12: ܒܝܵܘܡܵܐ ܗܵܘ̇ ܐܲܩܝܼܡ ܥܲܠ ܥܹܠܝܼ ܟܠ ܕܐܸܡ̇ܪܹܬ̣ ܥܲܠ ܒܲܝܬܹܗ: ܫܘܼܪܵܝܵܐ ܘܲܓ̣ܡܘܼܪܝܵܐ. 13: ܘܐܹܚܵܘܹܝܘܗܝ ܕܕ݂ܵܐܹܢ ܐ̄ܢܵܐ ܠܒܲܝܬܹܗ ܠܥܵܠܲܡ: ܒܥܵܘ̣ܠܵܐ ܕܝܵܕܲܥ ܗ̄ܘ̣ܵܐ ܕܲܡܨܲܥܪܝܼܢ ܗ̄ܘ̣ܵܐ ܗܵܠܹܝܢ ܒܢܘ̈ܗܝ ܠܥܲܡܵܐ. ܘܠܵܐ ܟ݂ܐܵܐ ܒܗܘܿܢ. 14: ܡܸܛܠ ܗܵܢܵܐ ܐܲܡܝܼܬ̣ ܠܲܕ݂ܒܹܝܬ̣ ܥܹܠܝܼ: ܘܠܵܐ ܢܸܬ̣ܚܲܣܸܐ ܥܵܘ̣ܠܵܐ ܕܒܹܝܬ̣ ܥܹܠܝܼ: ܒܕܸܒ̣ܚܹ̈ܐ ܘܲܒ̣ܩܘܼܪ̈ܒܵܢܹܐ ܥܕܲܡܵܐ ܠܥܵܠܲܡ. 15: ܘܲܕ݂ܡܸܟ݂ ܫܡܘܼܐܹܝܠ ܥܕܲܡܵܐ ܠܨܲܦܪܵܐ: ܘܲܦܬܲܚ ܬܲܪܥܵܐ ܕܒܲܝܬܹܗ ܕܡܵܪܝܵܐ: ܘܲܫܡܘܼܐܹܝܠ ܕܚܸܠ ܕܲܢܚܵܘܸܐ ܚܸܙܘܵܐ ܠܥܹܠܝܼ. 16: ܘܲܩܪܵܐ ܥܹܠܝܼ ܠܲܫܡܘܼܐܹܝܠ ܘܐܸܡܲܪ: ܫܡܘܼܐܹܝܠ ܒܹܪܝ: ܘܐܸܡܲܪ ܗܵܐ ܐܸܢܵܐ. 17: ܘܐܸܡܲܪ ܠܹܗ: ܡܵܢܵܐ ܗ̄ܘ݂ ܦܸܬ̣ܓ̣ܵܡܵܐ ܕܐܸܡܲܪ ܠܵܟ݂ ܡܵܪܝܵܐ: ܠܵܐ ܬܸܒ̣ܗܲܬ̣ ܡܹܢܝ. ܗܵܟܲܢܵܐ ܢܸܥܒܸ̇ܕ݂ ܠܵܟ݂ ܐܲܠܵܗܵܐ: ܘܗܵܟܲܢܵܐ ܢܵܘܣܸܦ ܠܵܟ݂: ܐܸܢ ܬܟܲܣܸܐ ܡܹܢܝ ܡܸܠܬ̣ܵܐ ܡ̣ܢ ܟܠ ܦܸܬ̣ܓ̣ܵܡܵܐ ܕܐܸܡܲܪ ܠܵܟ݂ ܡܵܪܝܵܐ. 18: ܘܚܵܘܝܹܗ ܫܡܘܼܐܹܝܠ ܟܠܗܹܝܢ ܡܸܠܹ̈ܐ: ܘܠܵܐ ܟܲܣܝܼ ܡܸ̤ܢܹܗ. ܘܐܸܡܲܪ ܥܹܠܝܼ: ܡܵܪܝܵܐ ܗ̄ܘ̣: ܟܠ ܕܫܲܦܝܼܪ ܒܥܲܝܢܵܘ̈ܗܝ ܢܸܥܒܸ̇ܕ݂. 19: ܘܝܼܕܲܥ ܫܡܘܼܐܹܝܠ ܕܡܵܪܝܵܐ ܗ̄ܘ̣ܵܐ ܥܲܡܹܗ: ܘܠܵܐ ܐܲܪܡܝܼ ܡ̣ܢ ܟܠܗܹܝܢ ܡܸܠܵܘ̈ܗܝ ܥܲܠ ܐܲܪܥܵܐ. 20: ܘܝܼܕܲܥ ܟܠܹܗ ܝܼܣܪܵܝܹܠ ܡ̣ܢ ܕܵܢ ܘܲܥܕܲܡܵܐ ܠܒܹܪܫܒܲܥ: ܕܐܸܬ̣ܗܲܝܡܲܢ ܫܡܘܼܐܹܝܠ ܢܒ̣ܝܼܵܐ ܠܐܲܠܵܗܵܐ. 21: ܘܐܵܘܣܸܦ ܬܘܼܒ̣ ܡܵܪܝܵܐ ܠܡܸܬ̣ܓ̇ܠܵܝܘܼ ܒܫܝܼܠܘܿ ܒܦܸܬ̣ܓ̣ܵܡܵܘ̈ܗܝ: ܘܲܗܘ̤ܵܐ ܦܸܬ̣ܓ̣ܵܡܹܗ ܕܲܫܡܘܼܐܹܝܠ ܥܲܠ ܟܠܹܗ ܝܼܣܪܵܝܹܠ.

ܩܹܦܵܠܹܐܘܿܢ: ܕ.

1: ܘܲܢܦܲܦ ܝܼܣܪܵܝܹܠ ܠܐܘܼܪܥܵܐ ܕܲܦܠܸܫܬܵܝܹ̈ܐ ܠܲܩܪܵܒ̣ܵܐ: ܘܲܫܪܵܘ ܥܲܠ ܟܹܐܦܵܐ ܕܥܘܼܕ݂ܪܵܢܵܐ ܘܲܦܠܸܫܬܵܝܹ̈ܐ ܫܪܵܘ ܒܐܵܦܵܩ. 2: ܘܐܸܣܬ̇ܕܲܪܘ ܦܠܸܫܬܵܝܹ̈ܐ ܠܘܼܩܒܲܠ ܝܼܣܪܵܝܹܠ: ܘܲܗܘ̤ܵܐ ܩܪܵܒ̣ܵܐ: ܘܐܸܬ̇ܬ̇ܒܲܪܘ ܝܼܣܪܵܝܹܠ ܩܕ݂ܵܡ ܦܠܸܫܬܵܝܹ̈ܐ: ܘܐܸܬ̣ܩܲܛܲܠܘ ܒܣܸܕ݂ܪܵܐ ܒܚܲܩܠܵܐ: ܐܲܝܟ݂ ܐܲܪܒ̇ܥܵܐ ܐܲܠܦ̈ܝܼܢ ܓܲܒ̣ܪ̈ܝܼܢ. 3: ܘܐܸܬ̣ܵܐ ܥܲܡܵܐ ܠܡܲܫܪܝܼܬ̣ܵܐ. ܘܐܸܡܲܪܘ ܣܵܒܹ̈ܐ ܕܝܼܣܪܵܝܹܠ: ܠܡܵܢܵܐ ܬܲܒ̣ܪܲܢ ܡܵܪܝܵܐ ܝܵܘܡܵܢܵܐ ܩܕ݂ܵܡ ܦܠܸܫܬܵܝܹ̈ܐ. ܢܸܕ݂ܒܲܪ ܠܲܢ ܡ̣ܢ ܫܝܼܠܘܿ ܠܩܹܒ̣ܘܿܬ̣ܵܐ ܕܲܩܝܵܡܹܗ ܕܡܵܪܝܵܐ ܨܒ̣ܵܐܘܼܬ̣: ܘܬܹܐܙܲܠ ܒܲܝܢܵܬܲܢ: ܘܬܸܩܪ̱ܩܲܢ ܡ̣ܢ ܬܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܢ. 4: ܘܫܲܕܲܪܘ ܥܲܡܵܐ ܠܫܝܼܠܘܿ: ܘܲܫܩܲܠܘ ܡ̣ܢ ܬܲܡܵܢ ܠܩܹܒ̣ܘܿܬ̣ܵܐ ܕܲܩܝܵܡܹܗ ܕܡܵܪܝܵܐ ܨܒ̣ܵܐܘܼܗܝ ܝܵܬܹܒ̣ ܥܲܠ ܟܪ̈ܘܿܒܹܐ: ܘܬܲܡܵܢ ܬܪܹܝܢ ܒܢܵܘ̈ܗܝ ܕܥܹܠܝܼ ܥܲܡ ܩܹܒ̣ܘܿܬ̣ܵܐ ܕܲܩܝܵܡܹܗ ܕܡܵܪܝܵܐ ܚܵܦܢܝܼ ܘܦܝܼܢܚܸܣ. 5: ܘܲܗܘ̤ܵܐ ܕܟܲܕ݂ ܐܸܬ̣ܵܐܬ̤ ܩܹܒ̣ܘܿܬ̣ܵܐ ܕܲܩܝܵܡܹܗ ܕܡܵܪܝܵܐ ܠܡܲܫܪܝܼܬ̣ܵܐ: ܝܲܒܸ̇ܒ̣ܘ ܟܠܹܗ ܝܼܣܪܵܝܹܠ ܝܘܼܒܵܒ̣ܵܐ ܪܲܒܵܐ: ܘܐܸܫܬܲܓ̣ܫܲܬ̤ ܐܲܪܥܵܐ. 6: ܘܲܫܡܲܥܘ ܦܠܸܫܬܵܝܹ̈ܐ ܩܵܠܵܐ ܕܝܘܼܒܵܒ̣ܵܐ: ܘܐܸܡܲܪܘ: ܡܵܢܵܐ ܗ̄ܘ̣ ܩܵܠܵܐ ܗܵܢܵܐ ܕܝܘܼܒܵܒ̣ܵܐ ܒܡܲܫܪܝܼܬ̣ܵܐ ܕܥܸܒ̣ܪ̈ܵܝܹܐ: ܘܝܼܕܲܥܘ ܕܩܹܒ̣ܘܿܬܹܗ ܕܡܵܪܝܵܐ ܐܸܬ̣ܵܬ̤ ܠܡܲܫܪܝܼܬ̣ܵܐ. 7: ܘܲܕ݂ܚܠܘ ܦܠܸܫ̈ܬܵܝܹܐ: ܡܸܛܠ ܕܐܵܡܪܝܼܢ: ܕܐܸܬ̣ܵܐ ܐܲܠܵܗܵܐ ܠܡܲܫܪܝܼܬ̣ܵܐ: ܘܐܸܡܲܪܘ: ܘܵܝ ܠܲܢ: ܕܠܵܐ ܗܘ̤ܵܬ̣ ܐܲܝܟ݂ ܗܵܕܹܐ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ. 8: ܘܵܝ ܠܲܢ: ܡܲܢܘܼ ܢܦܲܨܹܝܢ ܡ̣ܢ ܐܝ̈ܕܲܝ ܐܲܠܵܗܵܐ ܥܲܫܝܼܢܵܐ: ܗܵܢܵܘ ܐܲܠܵܗܵܐ ܕܲܡܚܵܐ ܠܟ݂ܠܵܗ̇ ܡܸܨܪܹܝܢ ܒܟ݂ܠ ܡܲܚ̈ܘܵܢ: ܘܲܒ̣ܡܲܕ݂ܒ̇ܪܵܐ. 9: ܐܸܬ̣ܚܲܝܲܠܘ ܘܲܗܘ̤ܵܘ ܓܲܒ̣ܪܹ̈ܐ: ܦܠܸܫܬܵܝܹܐ: ܕܲܠܡܵܐ ܬܸܦ̱ܠܚܘܼܢ ܠܥܸܒ̣ܪ̈ܵܝܹܐ ܐܲܝܟ݂ ܕܦܲܠܚܘܼܟ݂ܘܿܢ: ܘܲܗܘ̤ܵܘ ܓܲܒ̣ܪܹ̈ܐ ܘܐܸܬ̣ܟܲܬܲܫܘ ܥܲܡܗܘܿܢ.

10: ܘܐܸܬ̣ܟܲܬܲܫܘ ܦܠܸܫ̈ܬܵܝܹܐ ܥܲܡ ܝܼܣܪܵܝܹܠ: ܘܐܸܬ̇ܬ̇ܒܲܪ ܝܼܣܪܵܝܹܠ: ܘܲܥܪܲܩܘ ܐ̄ܢܵܫ ܠܡܲܫܟ̇ܢܹܗ: ܘܲܗܘ̤ܵܬ̣ ܡܚܘܿܬ̣ܵܐ ܪܲܒ̇ܬ̣ܵܐ ܕܛܵܒ̣ ܒܝܼܣܪܵܝܹܠ: ܘܲܢܦܲܠܘ ܡ̣ܢ ܝܼܣܪܵܝܹܠ ܒܝܵܘܡܵܐ ܗܵܘ̇ ܬܠܵܬ̣ܝܼܢ ܐܲܠܦ̈ܝܼܢ ܪܸ̈ܓ̣ܠܵܝܝܼܢ.

11: ܘܩܹܒ̣ܘܿܬܹܗ ܕܡܵܪܝܵܐ ܐܸܬ̇ܕܲܒ̣ܪܲܬ̤: ܘܲܬ̣ܪܹܝܢ ܒܢܵܘ̈ܗܝ ܕܥܹܠܝܼ ܡܝܼܬ̣ܘ: ܚܵܦܢܝܼ ܘܦܝܼܢܚܸܣ. 12: ܘܲܪܗܸܛ ܓܲܒ̣ܪܵܐ ܡ̣ܢ ܕܒܹܝܬ̣ ܒܸܢܝܵܡܹܝܢ ܡ̣ܢ ܣܸܕ݂ܪܵܐ: ܘܐܸܬ̣ܵܐ ܠܫܝܼܠܘܿ ܒܝܵܘܡܵܐ ܗܵܘ̇: ܟܲܕ݂ ܡܨܲܪܹܝܢ ܢܲܚ̈ܬܵܘܗܝ ܘܐܲܕ݂ܡ̱ܬ̣ܵܐ ܒܪܹܫܹܗ. 13: ܘܥܹܠܝܼ ܝܵܬܹܒ̣ ܗ̄ܘ̣ܵܐ ܥܲܠ ܟܘܼܪܣܝܵܐ ܥܲܠ ܝܲܕ݂ ܐܘܼܪܚܵܐ ܘܚܵܐܲܪ ܗ̄ܘ̣ܵܐ: ܡܸܛܠ ܕܙܵܐܲܥ ܗ̄ܘ̣ܵܐ ܠܸܒܹܗ ܥܲܠ ܩܹܒ̣ܘܿܬܹܗ ܕܐܲܠܵܗܵܐ. ܘܓܲܒ̣ܪܵܐ ܐܸܬ̣ܵܐ ܠܲܡܚܵܘܵܝܘܼ ܒܲܩܪܝܼܬ̣ܵܐ. ܘܐܲܝܠܠܲܬ̤ ܟܠܵܗ̇ ܩܪܝܼܬ̣ܵܐ. 14: ܘܲܫܡܲܥ ܥܹܠܝܼ ܩܵܠܵܐ ܕܝܼܠܲܠܬܵܐ: ܘܐܸܡܲܪ: ܡܵܢܵܐ ܗ̄ܘ̣ ܩܵܠܵܐ ܕܲܕ݂ܠܘܼܚܝܵܐ ܗܵܢܵܐ. ܘܓܲܒ̣ܪܵܐ ܣܲܪܗܸܒ̣ ܘܐܸܬ̣ܵܐ: ܘܚܵܘܝܼ ܠܥܹܠܝܼ. 15: ܘܥܹܠܝܼ ܒܲܪ ܫܲܒ̣ܥܝܼܢ ܗ̄ܘ̣ܵܐ ܘܲܬ̣ܡܵܢܹܐ ܫܢ̈ܝܼܢ: ܘܥܲܝܢܵܘ̈ܗܝ ܝܼܩܲܪ ܘܠܵܐ ܡܸܫܟܲܚ ܗ̄ܘ̣ܵܐ ܠܡܸܚܙܵܐ. 16: ܘܐܸܡܲܪ ܓܲܒ̣ܪܵܐ ܗܵܘ̇ ܠܥܹܠܝܼ: ܐܸܢܵܐ ܐܸܬܹܝܬ̣ ܡ̣ܢ ܣܸܕ݂ܪܵܐ: ܘܐܸܢܵܐ ܡ̣ܢ ܣܸܕ݂ܪܵܐ ܥܸܪܩܹܬ̣ ܐܸܬܹܝܬ̣ ܝܵܘܡܵܢܵܐ. ܘܐܸܡܲܪ ܠܹܗ: ܡܵܢܵܐ ܗ̄ܘ̣ ܦܸܬ̣ܓ̣ܵܡܵܐ: ܒܹܪܝ. 17: ܘܲܥܢܵܐ ܡܣܲܒ̇ܪܵܢܵܐ: ܘܐܸܡܲܪ: ܥܪܲܩ ܝܼܣܪܵܝܹܠ ܡ̣ܢ ܩܕ݂ܵܡ ܦܠܸܫܬܵܝܹ̈ܐ: ܘܐܵܦ ܡܚܘܿܬ̣ܵܐ ܪܲܒ̇ܬ̣ܵܐ ܗܘ̤ܵܬ̣ ܒܥܲܡܵܐ: ܘܐܵܦ ܬܪܹܝܢ ܒܢܲܝ̈ܟ ܡܝܼܬ̣ܘ: ܚܵܦܢܝܼ ܘܦܝܼܢܚܸܣ: ܘܩܹܒ̣ܘܿܬܹܗ ܕܐܲܠܵܗܵܐ ܐܸܬ̇ܕܲܒ̣ܪܲܬ̤. 18: ܘܲܗܘ̤ܵܐ ܕܟܲܕ݂ ܐܸܬ̇ܕܲܟ݂ܪܵܗ̇ ܥܹܠܝܼ ܠܩܹܒ̣ܘܿܬܹܗ ܕܐܲܠܵܗܵܐ: ܢܦܲܠ ܡ̣ܢ ܟܘܼܪܣܝܵܐ ܠܒܸܣܬ̇ܪܹܗ ܥܲܠ ܝܲܕ݂ ܬܲܪܥܵܐ: ܘܐܸܬ̇ܬܲܒ̣ܪܲܬ̤ ܦܵܪܲܩܬܹܗ ܘܡܝܼܬ̣: ܡܸܛܠ ܕܲܣܐܸܒ̣ ܗ̄ܘ̣ܵܐ ܓܲܒ̣ܪܵܐ ܘܝܼܩܲܪ. ܘܗ̤ܘ ܕܵܢ ܠܝܼܣܪܵܝܹܠ ܐܲܪܒ̇ܥܝܼܢ ܫܢ̈ܝܼܢ. 19: ܘܟܲܠܬܹܗ ܐܲܢ̄ܬ̇ܬ̣ ܦܝܼܢܚܸܣ ܒܲܛܢܵܐ ܗ̄ܘ̣ܵܬ̣: ܘܩܲܪܝܼܒ̣ܵܐ ܗ̄ܘ̣ܵܬ̣ ܠܡܹܐܠܲܕ݂. ܘܟܲܕ݂ ܫܸܡܥܲܬ̤ ܫܸܡܥܵܐ ܕܐܸܬ̇ܕܲܒ̣ܪܲܬ̤ ܩܹܒ̣ܘܿܬܹܗ ܕܐܲܠܵܗܵܐ: ܘܲܕ݂ܡܝܼܬ̣ ܚܡܘܼܗ̇ ܘܒܲܥܠܵܗ̇: ܒܸܪܟܲܬ̤ ܘܝܸܠܕܲܬ̤: ܡܸܛܠ ܕܐܸܬ̣ܗ̱ܦܸܟ݂ܘ ܥܠܹܝܗ̇ ܚܸܒ̣̈ܠܹܝܗ̇. 20: ܘܲܒ̣ܫܵܥܬ̣ܵܐ ܕܡܵܘܬܵܗ̇ ܐܸܡܲܪ ܐܲܝܠܹܝܢ ܕܩܵܝ̈ܡܵܢ ܠܥܸܠ ܡܸܢܵܗ̇. ܠܵܐ ܬܸܕ݂ܚ̄ܠܝܼܢ ܡܸܛܠ ܕܕܸܟ݂ܪܵܐ ܝ̣ܠܸܕܬ̇ܝ. ܘܠܵܐ ܥܢܵܬ̤ ܘܠܵܐ ܐܲܝܬ̇ܝܲܬ̤ ܥܲܠ ܒܵܠܵܗ̇. 21: ܘܲܩܪܵܬ̤ ܫܡܹܗ ܕܛܲܠܝܵܐ ܝܘܼܟ݂ܵܒ̣ܵܪ: ܘܐܸܡܪܲܬ̤: ܥܒܲܪ ܐܝܼܩܵܪܵܐ ܡ̣ܢ ܝܼܣܪܵܝܹܠ: ܡܸܛܠ ܕܐܸܬ̇ܕܲܒ̣ܪܲܬ̤ ܩܹܒ̣ܘܿܬܹܗ ܕܐܲܠܵܗܵܐ: ܘܥܲܠ ܚܡܘܼܗ̇ ܘܥܲܠ ܒܲܥܠܵܗ̇. 22: ܘܐܸܡܪܲܬ̤: ܥܒܲܪ ܐܝܼܩܵܪܵܐ ܡ̣ܢ ܝܼܣܪܵܝܹܠ: ܡܸܛܠ ܕܐܸܬ̇ܕܲܒ̣ܪܲܬ̤ ܩܹܒ̣ܘܿܬܹܗ ܕܐܲܠܵܗܵܐ ܕܝܼܣܪܵܝܹܠ.

ܩܹܦܵܠܹܐܘܿܢ: ܗ.

1: ܘܲܦܠܸܫ̈ܬܵܝܹܐ ܕܒܲܪܘ ܩܹܒ̣ܘܿܬܹܗ ܕܐܲܠܵܗܵܐ: ܘܐܲܝܬ̇ܝܘܼܗ̇ ܡ̣ܢ ܟܹܐܦܵܐ ܕܥܘܼܕ݂ܪܵܢܵܐ ܠܐܲܫܕܘܿܕ݂. 2: ܘܲܕ݂ܒܲܪܘ ܦܠܸܫ̈ܬܵܝܹܐ ܠܩܹܒ̣ܘܿܬܹܗ ܕܐܲܠܵܗܵܐ: ܘܐܲܝܬ̇ܝܘܼܗ̇ ܠܒܹܝܬ̣ ܕܵܓ̣ܘܿܢ: ܘܐܲܩܝܼܡܘܼܗ̇ ܥܲܠ ܓܹܢ̄ܒ̣ ܕܵܓ̣ܘܿܢ. 3: ܘܩܲܕܸܡܘ ܐܲܫܕܘܿܕ݂ܵܝܹ̈ܐ ܠܝܵܘܡܵܐ ܕܒ̣ܵܬ̣ܪܹܗ: ܘܐܸܫܟ̇ܚܘܼܗܝ ܠܕܵܓ̣ܘܿܢ ܟܲܕ݂ ܪܡܸܐ ܥܲܠ ܐܲܦܘ̈ܗܝ ܥܲܠ ܐܲܪܥܵܐ ܩܕ݂ܵܡ ܩܹܒ̣ܘܿܬܹܗ ܕܐܲܠܵܗܵܐ: ܘܢܲܣܒ̇ܘܼܗܝ ܠܕ݂ܵܓ̣ܘܿܢ ܘܐܲܬ̣ܩܢܘܼܗܝ ܥܲܠ ܕܘܼܟ̇ܬܹܗ. 4: ܘܩܲܕ݂ܡܘ ܒܨܲܦܪܵܐ ܠܝܵܘܡܵܐ ܐ̄ܚܪܹܢܵܐ: ܘܗܵܐ ܕܵܓ̣ܘܿܢ ܪܡܸܐ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ: ܘܪܫܹܗ ܕܕ݂ܵܓ̣ܘܿܢ ܘܬܲܪ̈ܬܲܝܗܹܝܢ ܦܲܣܹ̈ܐ ܕܐܝܼܕ݂ܵܘ̈ܗܝ ܦܣܝܼ̈ܩܵܢ ܥܲܠ ܐܸܣܟ̇ܘܿܦܬ̣ܵܐ ܕܬܲܪܥܵܐ: ܘܓ̣ܘܼܫܡܹܗ ܕܕ݂ܵܓ̣ܘܿܢ ܐܸܫܬ̇ܚܲܪ. 5: ܡܸܛܠ ܗܵܢܵܐ ܠܵܐ ܕܵܪܟ̇ܝܼܢ ܟܘܼܡܪܹ̈ܐ ܕܕ݂ܵܓ̣ܘܿܢ: ܘܟ݂ܠ ܕܥܵܐܠܝܼܢ ܥܲܠ ܐܸܣܟ̇ܘܿܦܬ̣ܵܐ ܕܕ݂ܵܓ̣ܘܿܢ ܠܐܲܫܕܘܿܕ݂ ܥܕܲܡܵܐ ܠܝܵܘܡܵܢܵܐ. 6: ܘܥܸܫܢܲܬ̤ ܐܝܼܕܹܗ ܕܡܵܪܝܵܐ ܥܲܠ ܐܲܫ̈ܕܘܿܕ݂ܵܝܹܐ: ܘܲܚܪܒ̣ ܐܸܢܘܿܢ: ܘܲܡܚܵܐ ܐܸܢܘܿܢ ܒܲܛܚܘܿܪ̈ܲܝܗܘܿܢ: ܠܐܲܫܕܘܿܕ݂ ܘܠܲܬ̣ܚܘܼܡܹ̈ܝܗ̇. 7: ܘܲܚܙܵܘ ܒ̈ܢܲܝ ܐܲܫܕܘܿܕ݂ ܕܗܵܟܲܢܵܐ ܗܘ̤ܵܐ ܐܸܢܘܿܢ: ܘܐܸܡܲܪܘ ܠܵܐ ܬܸܬܸ̇ܒ̣ ܩܹܒ̣ܘܿܬܹܗ ܕܐܲܠܵܗܵܐ ܕܝܼܣܪܵܝܹܠ ܥܲܡܲܢ: ܡܸܛܠ ܕܥܸܫܢܲܬ̤ ܐܝܼܕܹܗ ܥܠܲܝܢ ܘܥܲܠ ܕܵܓ̣ܘܿܢ ܐܲܠܵܗܲܢ. 8: ܘܫܲܕܲܪܘ ܘܟܲܢܸܫܘ ܠܟ݂ܠܗܘܿܢ ܛܪ̈ܘܼܢܹܐ ܕܲܦܠܸܫ̈ܬܵܝܹܐ ܠܘܵܬ̣ܗܘܿܢ: ܘܐܸܡܲܪܘ: ܡܵܢܵܐ ܢܸܥܒܸ̇ܕ݂ ܠܩܹܒ̣ܘܿܬܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܘܐܸܡܲܪܘ: ܠܓ̣ܵܬ̣ ܬܸܗܦܘܿܟ݂ ܩܹܒ̣ܘܿܬܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. 9: ܘܐܲܗܦܟ݂ܘܼܗ̇ ܠܩܹܒ̣ܘܿܬܹܗ ܕܡܵܪܝܑܵ ܐܲܠܵܗܵܐ ܕܝܼܣܪܵܝܹܠ. ܘܡ̣ܢ ܒܵܬܲܪ ܕܐܲܗܦܟ݂ܘܼܗ̇: ܗܘ̤ܵܬ̣ ܐܝܼܕܹܗ ܕܡܵܪܝܵܐ ܒܲܩܪܝܼܬ̣ܵܐ ܡܚܘܿܬ̣ܵܐ ܪܲܒܬ̣ܵܐ ܕܛܵܒ̣. ܘܲܡܚܵܐ ܠܐ̄ܢܵܫܹ̈ܗ̇ ܕܲܩܪܝܼܬ̣ܵܐ: ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ. ܘܐܸܣܬܲܬܲܪܘ ܥܠܲܝܗܘܿܢ ܛܚܘܿܪ̈ܲܝܗܘܿܢ. 10: ܘܫܲܕܪܘܼܗ̇ ܠܩܹܒ̣ܘܿܬܹܗ ܕܐܲܠܵܗܵܐ ܠܥܸܩܪܘܿܢ: ܘܐܲܝܠܸܠܘ ܥܸܩܪ̈ܘܿܢܵܝܹܐ: ܐܲܗܦܸܟ݂ܘ ܥܠܲܝܢ ܩܹܒ̣ܘܿܬܹܗ ܕܐܲܠܵܗܵܐ ܕܝܼܣܪܵܝܹܠ: ܕܬܸܩܛܠܲܢ ܠܲܢ ܘܲܠܥܲܡܲܢ. 11: ܘܫܲܕܲܪܘ ܘܟܲܢܸܫܘ ܠܟ݂ܠܗܘܿܢ ܛܪ̈ܘܼܢܹܐ ܕܲܦܠܸܫ̈ܬܵܝܹܐ: ܘܐܸܡܲܪܘ: ܫܲܕܪܘܼܗ̇ ܠܩܹܒ̣ܘܿܬܹܗ ܕܐܲܠܵܗܵܐ ܕܝܼܣܪܵܝܹܠ: ܘܬܸܗܦܘܿܟ݂ ܠܕ݂ܘܼܟ̇ܬ̣ܵܗ̇: ܕܠܵܐ ܬܸܩܛܠܲܢ ܠܲܢ ܘܲܠܥܲܡܲܢ: ܡܸܛܠ ܕܲܗܘ̤ܵܬ̣ ܫܓ̣ܝܫܬܵܐ ܕܡܵܘܬܵܐ ܒܟ݂ܠܵܗ̇ ܩܪܝܼܬ̣ܵܐ. ܘܥܸܫܢܲܬ̤ ܛܵܒ̣ ܐܝܼܕܹܗ ܕܐܲܠܵܗܵܐ ܬܲܡܵܢ. 12: ܘܐ̄ܢܵܫܵܐ ܕܠܵܐ ܡܝܼܬ̣ܘ: ܐܸܬ̱ܡܚܝܼܘ ܒܲܚܘܿܪ̈ܲܝܗܘܿܢ: ܘܣܸܠܩܲܬ̤ ܓܥܵܬ̣ܵܐ ܕܲܩܪܝܼܬ̣ܵܐ ܥܕܲܡܵܐ ܠܲܫܡܲܝܵܐ.

ܩܹܦܵܠܹܐܘܿܢ: ܘ.

1: ܘܲܗܘ̤ܵܬ̣ ܩܹܒ̣ܘܿܬܹܗ ܕܡܵܪܝܵܐ ܒܚܲܩܠܵܐ ܕܲܦܠܸܫ̈ܬܵܝܹܐ ܫܲܒ̣ܥܵܐ ܝܲܪ̈ܚܝܼܢ. 2: ܘܲܩܪܵܘ ܦܠܸܫ̈ܬܵܝܹܐ ܠܟ݂ܘܼܡܪܹ̈ܐ ܘܠܲܛܪ̈ܘܼܢܹܐ: ܘܐܸܡܲܪ: ܡܵܢܵܐ ܠܩܹܒ̣ܘܿܬܹܗ ܕܡܵܪܝܵܐ: ܚܵܘܵܐܘܼܢ ܒܡܵܢܵܐ ܢܫܲܕܪܝܼܗ̇ ܠܕ݂ܘܼܟ̇ܬ̣ܵܗ̇. 3: ܘܐܸܡܲܪܘ: ܐܸܢ ܡܫܲܕܪܝܼܢ ܐ̄ܢܬ̇ܘܿܢ ܠܩܹܒ̣ܘܿܬܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܠܵܐ ܬܫܲܕܪܘܼܢܵܗ̇ ܣܪܝܼܩܵܐܝܼܬ̣. ܐܸܠܵܐ ܡܲܝܬܵܝܘܼ ܐܲܝܬܵܘ ܠܵܗ̇ ܩܘܼܪ̈ܒܵܢܹܐ: ܘܗܵܝܕܹܝܢ ܬܸܬ̣ܐܲܣܘܿܢ: ܘܢܸܬ̣̱ܝܼܕܲܥ ܠܟ݂ܘܿܢ. ܕܲܠܡܵܐ ܠܵܐ ܬܸܗܦܘܿܟ݂ ܐܝܼܕܹܗ ܕܡܵܪܝܵܐ ܡܸܢܟ݂ܘܿܢ. 4: ܘܐܸܡܲܪܘ: ܡܵܢܵܐ ܩܘܼܪ̈ܒܵܢܹܐ ܢܲܝܬܸ̇ܐ ܠܵܗ̇: ܘܐܸܡܲܪܘ: ܡܸܢܝܵܢܵܐ ܕܲܛܪ̈ܘܼܢܹܐ ܕܲܦܠܸܫ̈ܬܵܝܹܐ: ܚܲܡܫܵܐ ܛܚܘܿܪ̈ܝܼܢ ܕܕܲܗܒ̣ܵܐ: ܘܚܲܡܫܵܐ ܥܘܼܩܒ̇ܪ̈ܝܼܢ ܕܕܲܗܒ̣ܵܐ: ܡܸܛܠ ܕܲܡܚܘܿܬ̣ܵܐ ܚܕ݂ܵܐ ܗ̄ܝܼ ܠܟ݂ܘܿܢ: ܘܠܲܛܪ̈ܘܼܢܲܝܟ̇ܘܿܢ. 5: ܘܬܸܥܒ̇ܕ݂ܘܼܢ ܨܲܠܡܹ̈ܐ ܕܲܛܚܘܿܪ̈ܲܝܟ̇ܘܿܢ: ܘܨܲܠܡܹ̈ܐ ܕܥܘܼܩܒܲܪ̈ܲܝܟ̇ܘܿܢ: ܕܲܡܚܲܒ̇ܠܝܼܢ ܠܐܲܪܥܵܐ: ܘܬܸܬ̇ܠܘܼܢ ܠܐܲܠܵܗܵܐ ܕܝܼܣܪܵܝܹܠ ܐܝܼܩܵܪܵܐ. ܛܵܟ݂ ܢܲܩܸܠ ܐܝܼܕܹܗ ܡܸܢܟ݂ܘܿܢ: ܘܡ̣ܢ ܐܲܠܵܗܟ݂ܘܿܢ: ܘܡ̣ܢ ܐܲܪܥܟ݂ܘܿܢ. 6: ܘܠܵܐ ܬܲܥܫܢܘܼܢ ܠܸܒܟ݂ܘܿܢ: ܐܲܝܟ݂ ܕܐܲܥܫܸܢܘ ܡܸܨܪ̈ܵܝܹܐ ܘܦܸܪܥܘܿܢ ܠܸܒ̇ܗܘܿܢ: ܐܲܝܟ݂ ܕܒܲܙܲܚ ܒܗܘܿܢ ܘܠܵܐ ܫܲܕܲܪܘ ܐܸܢܘܿܢ ܘܐܸܙܲܠܘ. 7: ܘܗܵܫܵܐ ܣܲܒ̣ܘ ܘܲܥܒܸܕ݂ܘ ܥܵܓܹܠܬܵܐ ܚܕ݂ܵܐ ܚܕܲܬܵܐ: ܘܬܲܪܬܹܝܢ ܬܵܪ̈ܵܢ ܕܡܲܝܢ̈ܩܵܢ: ܕܠܵܐ ܢܦܲܠ ܥܠܲܝܗܹܝܢ ܢܝܼܪܵܐ. ܘܐܲܣܘܿܪܘ ܬܵܘܪ̈ܵܬ̣ܵܐ ܒܥܵܓ̣ܠܬܵܐ: ܘܐܲܗܦܸܟ݂ܘ ܒܢܲܝ̈ܗܹܝܢ ܡ̣ܢ ܒܵܬܲܪܗܹܝܢ ܠܒܲܝܬܵܐ. 8: ܘܣܲܒ̣ܘ ܩܹܒ̣ܘܿܬܹܗ ܕܡܵܪܝܵܐ ܘܣܝܼܡܘ ܒܥܵܓܹܠܬܵܐ: ܘܡܵܐܢܹ̈ܐ ܕܕܲܗܒ̣ܵܐ ܕܐܲܝܼܬ̇ܝܼܬ̇ܘܢ ܠܵܗ̇ ܩܘܼܪ̈ܒܵܢܹܐ. ܘܣܝܼܡܘ ܒܲܪܓ̣ܵܙܬܵܐ ܡ̣ܢ ܣܸܛܪܵܗ̇: ܘܫܲܕܪܘܼܗ̇ ܘܬܹܙܲܠ. 9: ܘܲܚܙܵܘ ܐܸܢ ܒܐܘܼܪܚܵܐ ܕܲܬ̣ܚܘܼܡܵܐ ܕܣܵܠܹܩ ܠܒܹܝܬ̣ ܫܡܸܫ ܐܵܙܵܠ̄ܐ: ܡܵܪܝܵܐ ܗ̄ܘ̣ ܥܒܲܕ݂ ܠܲܢ ܒܝܼܫܬܵܐ ܗܵܕܹܐ ܪܲܒ̇ܬܵܐ. ܘܐܸܢ ܠܵܐ: ܢܸܕܲܥ ܕܠܵܐ ܗ̄ܘ̣ܵܐ ܐܝܼܕܹܗ ܩܸܪܒܲܬ̤ ܠܲܢ: ܐܸܠܵܐ ܣܘܼܩܒܵܠܵܐ ܗ̄ܘ̣ ܗܘ̤ܵܐ ܠܲܢ. 10: ܘܲܥܒܲܕ݂ܘ ܓܲܒ̣ܪܹ̈ܐ ܗܵܟܲܢܵܐ: ܘܲܕ݂ܒܲܪܘ ܬܲܪܬܹܝܢ ܬܵܘܪ̈ܵܢ ܕܡܲܝ̈ܢ̱ܩܵܢ: ܘܐܸܣܲܪܘ ܐܸܢܹܝܢ ܒܥܵܓܹܠܬܵܐ: ܘܲܒ̣ܢܲܝ̈ܗܹܝܢ ܚܒܲܫܘ ܒܒܲܝܬܵܐ. 11: ܘܣܵܡܘܼܗ̇ ܠܩܹܒ̣ܘܿܬܹܗ ܕܐܲܠܵܗܵܐ ܒܥܵܓܹܠܬܵܐ: ܘܠܲܪܓ̣ܵܙܬܵܐ ܘܲܠܥܘܼܩܒ̇ܪܹ̈ܐ ܕܕܲܗܒ̣ܵܐ: ܘܲܠܨܲܠܡܹ̈ܐ ܕܲܛܚܘܿܪ̈ܲܝܗܘܿܢ. 12: ܘܐܸܫܬܲܕܲܪ ܬܵܘܪ̈ܵܬ̣ܵܐ ܒܐܘܼܪܚܵܐ ܕܥܲܠ ܬܚܘܼܡܵܐ ܕܒܹܝܬ̣ ܫܡܸܫ: ܒܲܫܒ̣ܝܼܠܵܐ ܚܲܕ݂ ܡܗܲܠ̈ܟܲܢ ܘܐܵܙܵܠ̄ܢ ܘܓ̣ܵܥ̈ܝܵܢ: ܘܠܵܐ ܣܵܛ̈ܝܼܢ ܠܝܲܡܝܼܢܵܐ ܘܲܠܣܸܡܵܠܵܐ. ܘܲܛܪ̈ܘܼܢܹܐ ܕܲܦܠܸܫ̈ܬܵܝܹܐ ܐܵܙܠ̄ܝܼܢ ܒܵܬܲܪܗܹܝܢ: ܥܕܲܡܵܐ ܠܲܬ̣ܚܘܼܡܵܐ ܕܒܹܝܬ̣ ܫܡܸܫ. 13: ܘܐ̄ܢܵܫܵܐ ܕܲܩܪܝܼܬܵܐ ܕܒܹܝܬ̣ ܫܡܸܫ: ܚܵܨܕܝܼܢ ܗ̄ܘ̣ܵܘ ܚܨܵܕ݂ܵܐ ܕܚܸܛܹ̈ܐ ܒܥܘܼܡܩܵܐ. ܘܐܲܪܝܼܡܘ ܥܲܝܢܲܝ̈ܗܘܿܢ ܘܲܚܙܵܐܘܼܗܝ ܠܐܵܪܘܿܢܵܐ: ܘܲܚܕ݂ܝܼܘ ܟܲܕ݂ ܚܙܵܐܘܼܗܝ. 14: ܘܥܵܓܹܠܬܵܐ ܐܸܬ̣ܵܬ̤ ܠܚܲܩܠܹܗ ܕܝܼܫܘܿܥ ܕܡ̣ܢ ܒܹܝܬ̣ ܫܡܸܫ: ܘܩܵܡܲܬ̤ ܬܲܡܵܢ. ܘܬܲܡܵܢ ܟܹܐܦܵܐ ܪܲܒ̇ܬ̣ܵܐ: ܘܨܲܠܲܚܘ ܩܲܝ̈ܣܹܐ ܕܥܵܓܹܠܬܵܐ: ܘܬ̣ܵܘܪ̈ܵܬ̣ܵܐ ܐܲܣܩܸܘ ܥܠܵܬ̣ܵܐ ܠܡܵܪܝܵܐ. 15: ܘܠܹܘܵܝܹ̈ܐ ܐܲܚܸܬ̣ܘ ܠܐܵܪܘܿܢܹܗ ܕܡܵܪܝܵܐ: ܘܠܲܪܓ̣ܵܙܬܵܐ ܕܥܲܡܹܗ: ܕܐܝܼܬ̣ ܒܵܗ̇ ܡܵܐܢܲܝ̈ ܕܲܗܒ̣ܵܐ: ܘܣܵܡܘ ܥܲܠ ܟܹܐܦܵܐ ܪܲܒ̇ܬ̣ܵܐ. ܘܐ̄ܢܵܫܵܐ ܕܒܹܝܬ̣ ܫܡܸܫ ܐܲܣܸܩܘ ܥܠܵܬ̣ܵܐ: ܘܕܲܒ̇ܚܘ ܕܸܒ̣ܚܹ̈ܐ ܒܝܵܘܡܵܐ ܗܵܘ̇ ܠܐܲܠܵܗܵܐ. 16: ܘܚܲܡܫܵܐ ܛܪ̈ܘܼܢܹܐ ܕܲܦܠܸܫ̈ܬܵܝܹ ܚܙܵܘ: ܘܲܗܦܲܟ݂ܘ ܠܥܸܩܪܘܿܢ ܒܝܵܘܡܵܐ ܗܵܘ̇. 17: ܘܗܵܠܹܝܢ ܛܚܘܿܪܹ̈ܐ ܕܕܲܗܒ̣ܵܐ ܕܐܲܝܬ̇ܝܼܘ ܦܠܸܫ̈ܬܵܝܹܐ ܩܘܼܪ̈ܒܵܢܹܐ ܠܐܲܠܵܗܵܐ. ܕܐܲܫܕܲܘܿܕ݂ ܚܲܕ݂: ܘܲܕ݂ܥܵܐܙܵܐ ܚܲܕ݂: ܘܕܲܐܫܩܵܠܘܿܢ ܚܲܕ݂: ܘܲܕ݂ܓ̣ܵܬ̣ ܚܲܕ݂: ܘܲܕ݂ܥܸܩܪܘܿܢ ܚܲܕ݂. 18: ܘܚܲܕ݂ ܚܲܕ݂ ܥܘܼܩܒ̇ܪܵܐ ܕܕܲܗܒ̣ܵܐ: ܡܸܢܝܵܢܵܐ ܕܟ݂ܠܗܹܝܢ ܩܘܼܪ̈ܝܵܐ ܕܲܦܠܸܫ̈ܬܵܝܹܐ: ܘܚܲܡܫܵܐ ܛܪ̈ܘܼܢܹܐ ܡ̣ܢ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ: ܘܲܥܕܲܡܵܐ ܠܟܲܦܪܵܐ ܕܦܲܪ̈ܙܵܝܹܐ: ܘܥܕܲܡܵܐ ܠܐܵܒ̣ܵܠ ܪܲܒ̇ܬ̣ܵܐ ܘܣܵܡܘ ܥܠܹܝܗ̇ ܐܵܪܘܿܢܹܗ ܕܡܵܪܝܵܐ ܥܕܲܡܵܐ ܠܝܵܘܡܵܢܵܐ: ܒܚܲܩܠܹܗ ܕܝܼܫܘܿܥ ܕܡ̣ܢ ܒܹܝܬ̣ ܫܡܸܫ. 19: ܘܲܡܚܵܐ ܡܵܪܝܵܐ ܠܐ̄ܢܵܫܵܐ ܕܒܹܝܬ̣ ܫܡܸܫ: ܥܲܠ ܕܲܕ݂ܚܸܠܘ ܒܐܵܪܘܿܢܹܗ ܕܡܵܪܝܵܐ. ܘܲܡܚܵܐ ܡܵܪܝܵܐ ܒܥܲܡܵܐ: ܚܲܡܫܵܐ ܐܲܠܦܝܼ̈ܢ ܘܫܲܒ̣ܥܝܼܢ: ܘܐܸܬ̣̱ܐܒܸܠܘ ܥܲܡܵܐ ܥܲܠ ܕܲܡܚܵܐ ܡܵܪܝܵܐ ܒܥܲܡܵܐ ܡܚܘܿܬ̣ܵܐ ܪܲܒܬ̣ܵܐ. 20: ܘܐܸܡܲܪܘ ܐ̄ܢܵܫܵܐ ܕܒܹܝܬ̣ ܫܡܸܫ: ܡܲܢܘ̣ ܡܸܫܟܲܚ ܠܲܡܩܵܡ ܩܕ݂ܵܡ ܡܵܪܝܵܐ ܐܲܠܵܗܵܐ ܩܕ̇ܝܼܫܵܐ ܗܵܢܵܐ: ܘܡܲܢܘܼ ܢܲܣܩܝܼܘܗܝ ܡܸܢܲܢ ܠܐܵܪܘܿܢܵܐ. 21: ܘܫܲܕܲܪܘ ܬܝܼ̈ܙܓܲܕܹܐ ܠܘܵܬ̣ ܝܵܬ̣ܒܲܝ̈ ܩܘܼܪܝܲܬ̣ ܢܲܥܪܹܝܢ: ܘܐܸܡܲܪܘ: ܐܲܗܦܸܟ݂ܘ ܦܠܸܫ̈ܬܵܝܹܐ ܠܐܵܪܘܿܢܹܗ ܕܡܵܪܝܵܐ: ܚܘܿܬ̣ܘ ܐܲܣܩܘܼܗܝ ܠܘܵܬ̣ܟ݂ܘܿܢ.

ܩܹܦܵܠܹܐܘܿܢ: ܙ.

1: ܘܐܸܬ̣ܵܘ ܐ̄ܢܵܫܲܝ̈ ܩܘܼܪܝܲܬ̣ ܢܲܥܪܹܝܢ: ܘܐܲܣܩܘܼܗܝ ܠܐܵܪܘܿܢܹܗ ܕܡܵܪܝܵܐ: ܘܐܲܝܬ̇ܝܼܘܼܗܝ ܠܒܹܝܬ̣ ܐܲܒ̣ܝܼܢܵܕ݂ܵܒ̣ ܕܒܲܓ̣ܥܬ̣ܵܐ. ܘܩܲܕܸܫܘ ܠܐܹܠܝܼܥܵܙܲܪ ܒܪܹܗ: ܘܲܢܛܲܪ ܐܵܪܘܿܢܹܗ ܕܡܵܪܝܵܐ. 2: ܘܲܗܘ̤ܵܐ ܡ̣ܢ ܝܵܘܡܵܐ ܕܝܼܬܸܒ̣ ܐܵܪܘܿܢܵܐ ܒܩܘܼܪܝܲܬ̤ ܢܲܥܪܹܝܢ: ܘܲܣܓ̣ܝܼܘ ܝܵܘ̈ܡܵܬ̣ܵܐ: ܘܲܗ̤ܘܲܝ̈ ܐܲܝܟ݂ ܥܸܣܪܝܼܢ ܫܢ̈ܝܼܢ: ܘܐܸܫܬ̇ܕ݂ܝܼܘ ܟܠܗܘܿܢ ܕܒܹܝܬ̣ ܝܼܣܪܵܝܹܠ ܒܵܬܲܪ ܡܵܪܝܵܐ. 3: ܘܐܸܡܲܪ ܫܡܘܼܐܹܝܠ ܠܟ݂ܠܹܗ ܒܹܝܬ̣ ܝܼܣܪܵܝܹܠ: ܐܸܢ ܒܟ݂ܠܹܗ ܠܸܒ̇ܟ݂ܘܿܢ ܡܸܬ̣ܦܢܹܝܢ ܐ̄ܢܬ̇ܘܿܢ ܠܘܵܬ̣ ܡܵܪܝܵܐ: ܐܲܥܒܲܪܘ ܐܲܠܵܗܹ̈ܐ ܢܘܼܟ݂ܪ̈ܵܝܹܐ ܡ̣ܢ ܒܲܝܢܵܬ̣ܟ݂ܘܿܢ ܘܚܸܢ̈ܝܵܬ̣ܵܐ: ܘܐܲܬ̣ܩܸܢܘ ܠܸܒ̇ܟ݂ܘܿܢ ܠܘܵܬ̣ ܡܵܪܝܵܐ. ܘܦܘܼܠܚܘܼܗܝ ܠܹܗ ܒܲܠܚܘܿܕ݂ܵܘܗܝ: ܘܲܢܨܲܨܝܟ݂ܘܿܢ ܡ̣ܢ ܬܝܼܕ݂ܵܐ ܕܲܦܠܸܫ̈ܬܵܝܹܐ. 4: ܘܐܲܥܒܲܪܘ ܒ̈ܢܲܝ ܝܼܣܪܵܝܹܠ ܒܲܥܠܵܐ ܘܓܸܢ̈ܝܵܬ̣ܵܐ: ܘܲܦܠܚܘܼ ܠܡܵܪܝܵܐ ܒܲܠܚܘܿܕ݂ܵܘܗܝ. 5: ܘܐܸܡܲܪ ܫܡܘܼܐܹܝܠ: ܟܲܢܸܫܘ ܠܟ݂ܠܹܗ ܝܼܣܪܵܝܹܠ ܠܡܲܨܦܝܵܐ: ܘܐܹܨܲܠܸܐ ܥܠܲܝܟ̇ܘܿܢ ܩܕ݂ܵܡ ܡܵܪܝܵܐ. 6: ܘܐܸܬ̣ܟܲܢܲܫܘ ܠܡܲܨܦܝܵܐ: ܘܲܡܠܵܘ ܡܲܝ̈ܵܐ ܘܐܸܫܲܕ݂ܘ ܩܕ݂ܵܡ ܡܵܪܝܵܐ. ܘܨܵܡܘ ܒܝܵܘܡܵܐ ܗܵܘ̇: ܘܐܸܡܲܪܘ ܡܸܛܠ ܕܲܚܛܲܝܢ ܠܡܵܪܝܵܐ. ܘܕ݂ܵܢ ܫܡܘܼܐܹܝܠ ܠܲܒ̣̈ܢܲܝ ܝܼܣܪܵܝܹܠ ܒܡܲܨܩܝܵܐ. 7: ܘܲܫܡܲܥܘ ܦܠܸܫ̈ܬܵܝܹܐ ܕܐܸܬ̣ܟܲܢܲܫܘ ܒ̈ܢܲܝ ܝܼܣܪܵܝܹܠ ܠܡܲܨܦܝܵܐ: ܘܲܣܠܸܩܘ ܛܪ̈ܘܼܢܹܐ ܕܲܦܠܸܫ̈ܬܵܝܹܐ ܥܲܠ ܝܼܣܪܵܝܹܠ: ܘܲܫܡܲܥܘ ܒ̈ܢܲܝ ܝܼܣܪܵܝܹܠ ܘܲܕ݂ܚܸܠܘ ܡ̣ܢ ܩܕ݂ܵܡ ܦܠܸܫ̈ܬܵܝܹܐ. 8: ܘܐܸܡܲܪܘ ܒ̈ܢܲܝ ܝܼܣܪܵܝܹܠ ܠܲܫܡܘܼܐܹܝܠ. ܠܵܐ ܬܸܫܬ̇ܘܿܩ ܡܸܢܲܢ ܠܲܡܨܲܠܵܝܘ ܩܕ݂ܵܡ ܡܵܪܝܵܐ ܐܲܠܵܗܲܢ: ܕܢܸܩܪ̱ܩܲܢ ܡ̣ܢ ܐܝܼܕ݂ܵܐ ܕܲܦܠܸܫ̈ܬܵܝܹܐ. 9: ܘܲܢܣܲܒ̣ ܫܡܘܼܐܹܝܠ ܐܸܡܪܵܐ ܚܲܕ݂ ܕܚܲܠܒ̣ܵܐ: ܘܐܲܣܩܹܗ ܥܠܵܬ̣ܵܐ ܓܡܝܼܪܬܵܐ ܠܡܵܪܝܵܐ. ܘܨܲܠܝܼ ܫܡܘܼܐܹܝܠ ܩܕ݂ܵܡ ܡܵܪܝܵܐ ܥܲܠ ܒ̈ܢܲܝ ܝܼܣܪܵܝܹܠ: ܘܲܥܢܵܝܗܝ ܡܵܪܝܵܐ. 10: ܘܲܗܘ̤ܵܐ ܫܡܘܼܐܹܝܠ ܡܲܣܸܩ ܥܠܵܬ̣ܵܐ. ܘܲܦܠܸܫ̈ܬܵܝܹܐ ܩܪܸܒ̣ܘ ܠܡܸܬ̣ܟܲܬܵܫܘܼ ܥܲܡ ܝܼܣܪܵܝܹܠ: ܘܲܪܥܸܡ ܡܵܪܝܵܐ ܒܩܵܠܵܐ ܪܵܡܵܐ ܒܝܵܘܡܵܐ ܗܵܘ̇ ܥܲܠ ܦܠܸܫ̈ܬܵܝܹܐ: ܘܕܲܠܲܚ ܐܸܢܘܿܢ: ܘܐܸܬ̇ܬ̇ܒܲܪܘ ܩܕ݂ܵܡ ܝܼܣܪܵܝܹܠ. 11: ܘܲܢܦܲܩܘ ܐ̄ܢܵܫܵܐ ܕܝܼܣܪܵܝܹܠ ܡ̣ܢ ܡܲܨܦܝܵܐ: ܙܲܪܕܲܦܘ ܠܲܦܠܸܫ̈ܬܵܝܹܐ ܘܲܚܪܲܒ̣ܘ ܐܸܢܘܿܢ: ܥܕܲܡܵܐ ܠܬܲܚܬ̇ ܡ̣ܢ ܒܹܝܬ̣ ܝܵܫܵܢ. 12: ܘܲܢܣܲܒ̣ ܫܡܘܼܐܹܝܠ ܟܹܐܦܵܐ ܚܕ݂ܵܐ: ܘܣܵܡ ܒܹܝܬ̣ ܡܲܨܦܝܵܐ ܠܒܹܝܬ̣ ܝܵܫܵܢ: ܘܲܩܪܵܐ ܫܡܵܗ̇ ܟܹܐܦܵܐ ܕܥܘܼܕ݂ܪܵܢܵܐ: ܘܐܸܡܲܪ ܥܕܲܡܵܐ ܠܗܵܪܟܵܐ ܥܲܕ݂ܪܲܢ ܡܵܪܝܵܐ. 13: ܘܐܸܬ̇ܬ̇ܒܲܪܘ ܦܠܸܫ̈ܬܵܝܹܐ: ܘܠܵܐ ܐܵܘܣܸܦܘ ܬܘܼܒ̣ ܦܠܸܫ̈ܬܵܝܹܐ ܠܡܹܐܬ̣ܵܐ ܠܲܬ̣ܚܘܼܡܵܐ ܕܝܼܣܪܵܝܹܠ. ܘܲܗܘ̤ܵܬ̣ ܐܝܼܕܹܗ ܕܡܵܪܝܵܐ ܒܲܦܠܸܫ̈ܬܵܝܹܐ: ܟܠܗܘܿܢ ܝܵܘ̈ܡܵܬܹܗ ܕܲܫܡܘܼܐܹܝܠ. 14: ܘܐܲܗܦܟ݂ܘ ܩܘܼܪ̈ܝܵܐ ܕܲܢܣܲܒ̣ܘ ܦܠܸܫ̈ܬܵܝܹܐ ܡ̣ܢ ܝܼܣܪܵܝܹܠ ܠܝܼܣܪܵܝܹܠ: ܡ̣ܢ ܥܸܩܪܘܿܢ ܘܲܥܕܲܡܵܐ ܠܓܵܬ̣: ܘܲܬ̣ܚܘܼ̈ܡܲܝܗܹܝܢ. ܘܦܲܨܝܼ ܡܵܪܝܵܐ ܠܝܼܣܪܵܝܹܠ ܡ̣ܢ ܐܝܼܕ݂ܵܐ ܕܲܦܠܸܫ̈ܬܵܝܹܐ. ܘܲܗܘ̤ܵܐ ܫܠܵܡܵܐ ܒܹܝܬ̣ ܝܼܣܪܵܝܹܠ ܠܐܵܡܘܿܪ̈ܵܝܹܐ. 15: ܘܕ݂ܵܢ ܫܡܘܼܐܹܝܠ ܠܲܒ̣̈ܢܲܝ ܝܼܣܪܵܝܹܠ ܟܠ ܝܵܘ̈ܡܲܝ ܚܲܝܵܘ̈ܗܝ. 16: ܘܐܵܙܹܠ ܗ̄ܘ̣ܵܐ ܡ̣ܢ ܫܢܵܐ ܠܲܫܢܵܐ: ܘܡܸܬ̣ܟܲܪܸܟ݂ ܠܒܹܝܬ̣ ܐܹܝܠ: ܘܲܠܓܠܥܵܠܵܐ: ܘܲܠܡܲܨܦܝܵܐ: ܘܕ݂ܵܐܹܢ ܠܝܼܣܪܵܝܹܠ ܘܲܠܟ݂ܠܗܘܿܢ ܐܲܬ̣ܪ̈ܵܘܵܬ̣ܵܐ ܗܵܠܹܝܢ. 17: ܘܗܵܦܹܟ݂ ܗ̄ܘ̣ܵܐ ܠܪܵܡܬ̣ܵܐ. ܡܸܛܠ ܕܬܲܡܵܢ ܗ̄ܘ̣ܵܐ ܒܲܝܬܹܗ: ܘܬܲܡܵܢ ܕܵܐܹܢ ܗ̄ܘ̣ܵܐ ܠܝܼܣܪܵܝܹܠ. ܘܲܒ̣ܢܵܐ ܬܲܡܵܢ ܡܲܕ݂ܒ̇ܚܵܐ ܠܡܵܪܝܵܐ.

ܩܹܦܵܠܹܐܘܿܢ: ܚ.

1: ܘܲܗܘ̤ܵܐ ܕܟܲܕ݂ ܣܐܸܒ̣ ܫܡܘܼܐܹܝܠ: ܥܒܲܕ݂ ܠܲܒ̣ܢܵܘ̈ܗܝ ܕܲܝ̣ܵܢܹ̈ܐ: ܥܲܠ ܝܼܣܪܵܝܹܠ. 2: ܘܲܗܘ̤ܵܐ ܫܸܡ ܒܪܹܗ ܒܘܼܟ݂ܪܹܗ ܝܘܼܐܹܝܠ: ܘܫܸܡ ܬܸܢܝܵܢܹܗ ܐܲܒ̣ܝܼܵܐ: ܕܲܝܼܵܢܹ̈ܐ ܒܒܹܪ ܫܒܲܥ. 3: ܘܠܵܐ ܗܲܠܸܟ݂ܘ ܒܢܵܘ̈ܗܝ ܒܐܘܼܪ̈ܚܵܬܹܗ: ܘܐܸܨܛܠܝܼܘ ܒܵܬܲܪ ܢܸܟ݂ܠܵܐ: ܘܲܢܣܲܒ̣ܘ ܫܘܼܚܕܵܐ ܘܲܨܠܵܘ ܕܝܼܢܵܐ. 4: ܘܐܸܬ̣ܟܲܢܲܫܘ ܟܠܗܘܿܢ ܣܵܒܹ̈ܐ ܕܲܒ̣̈ܢܲܝ ܝܼܣܪܵܝܹܠ: ܘܐܸܬ̣ܵܘ ܠܘܵܬ̣ ܫܡܘܼܐܹܝܠ ܠܪܵܡܬ̣ܵܐ. 5: ܘܐܸܡܲܪ ܠܹܗ: ܗܵܐ ܐܲܢ̄ܬ̇ ܣܐܸܒ̣ܬ̇: ܘܲܒ̣ܢܲܝ̈ܟ ܠܵܐ ܡܗܲܠܟ݂ܝܼܢ ܒܐܘܼܪ̈ܚܵܬ̣ܵܟ݂: ܗܵܫܵܐ ܗܲܒ̣ ܠܲܢ ܡܲܠܟܵܐ ܕܲܢܕ݂ܘܼܢܲܢ ܐܲܝܟ݂ ܟܠܗܘܿܢ ܥܲܡܡܹ̈ܐ. 6: ܘܐܸܬ̣ܒ̇ܐܸܫ ܦܬ̣ܓ̣ܵܡܵܐ ܒܥܲܝܢܵܘ̈ܗܝ ܕܲܫܡܘܼܐܹܝܠ: ܟܲܕ݂ ܐܸܡܲܪ ܠܹܗ ܗܲܒ̣ܠܲܢ ܡܲܠܟܵܐ ܕܲܢܕ݂ܘܼܢܲܢ ܐܲܝܟ݂ ܟܠܗܘܿܢ ܥܲܡܡܹ̈ܐ: ܘܨܲܠܝܼ ܫܡܘܼܐܹܝܠ ܩܕ݂ܵܡ ܡܵܪܝܵܐ. 7: ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ ܫܡܲܥ ܒܩܵܠܹܗ ܕܥܲܡܵܐ: ܠܟ݂ܠ ܕܐܵܡܪܝܼܢ ܠܵܟ݂: ܡܸܛܠ ܕܠܵܐ ܗ̄ܘ̣ܵܐ ܠܵܟ݂ ܐܲܣܠܝܼܘ. ܐܸܠܵܐ ܠܝܼ ܐܲܣܠܝܼܘ ܕܠܵܐ ܐܲܡܠܸܟ݂ ܥܠܲܝܗܘܿܢ. 8: ܐܲܝܟ݂ ܟܠ ܥܒ̣ܵܕܹ̈ܐ ܕܲܥܒܲܕ݂ܘ: ܡ̣ܢ ܝܵܘܡܵܐ ܕܐܲܣܩܹܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܝܼܢ ܘܲܥܕܲܡܵܐ ܠܝܵܘܡܵܢܵܐ: ܘܫܲܒ̣ܩܘܼܢܝ ܘܲܦܠܲܚܘ ܠܐܲܠܵܗܵܐ ܐ̄ܚܪ̈ܵܢܹܐ. ܗܵܟܲܢܵܐ ܗܸܢܘܿܢ ܥܵܒ̣ܕܝܼܢ ܘܐܵܦ ܠܵܟ݂. 9: ܘܗܵܫܵܐ ܫܡܲܥ ܒܩܵܠܗܘܿܢ. ܒܪܲܡ ܡܣܲܗܵܕ݂ܘ ܣܲܗܸܕ݂ ܒܗܘܿܢ: ܘܚܵܘܵܐ ܐܸܢܘܿܢ ܢܵܡܘܿܣܹܗ ܕܡܲܠܟܵܐ ܕܡܲܡܠܸܟ݂ ܥܠܲܝܗܘܿܢ. 10: ܘܐܸܡܲܪ ܫܡܘܼܐܹܝܠ ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܡܵܪܝܵܐ ܠܥܲܡܵܐ: ܕܲܫܐܸܠܘ ܡܸܢܹܗ ܡܲܠܟܵܐ. 11: ܘܐܸܡܲܪ: ܗܵܢܵܐ ܢܸܗܘܸܐ ܬܵܡܘܿܣܹܗ ܕܡܲܠܟܵܐ ܕܡܲܡܠܸܟ݂ ܥܠܲܝܟ̇ܘܿܢ: ܒܢܲܝ̈ܟܘܿܢ ܢܸܕ݂ܒܲܪ: ܘܢܸܥܒܸ̇ܕ݂ ܠܹܗ ܒܡܲܪ̈ܟ̇ܒ̣ܵܬܹܗ ܘܲܒ̣ܦܲܪ̈ܵܫܵܘܗܝ: ܘܢܸܪܗ̱ܛܘܼܢ ܩܕ݂ܵܡ ܡܲܪ̈ܟ̇ܒ̣ܵܬܹܗ. 12: ܘܢܸܥܒܸ̇ܕ݂ ܠܹܗ ܪ̈ܲܒܲܝ ܐܲܠܦܹ̈ܐ: ܘܪ̈ܲܒܲܝ ܡܲܐ̈ܘܵܬ̣ܵܐ: ܘܪܲܒܲܝ ܚܲܡܫܝܼܢ: ܘܪ̈ܲܒܲܝ ܥܸܣܪܵܐ. ܘܢܸܕ݂ܒ̇ܪܘܼܢ ܕܒ̣ܵܪܹܗ: ܘܢܸܨܕ݂ܘܼܢ ܚܨܵܕܹܗ: ܘܢܸܥܒ̇ܕ݂ܘܼܢ ܡܵܐܢܲܝ̈ ܩܪܵܒܹܗ: ܘܡܲܐܢܲܝ̈ ܡܲܪ̈ܟ̇ܒ̣ܵܬܹܗ. 13: ܘܲܒ̣̈ܢܵܬ̣ܟ݂ܘܿܢ ܢܸܕ݂ܒܲܪ: ܠܙܲܩܵܪ̈ܵܬ̣ܵܐ ܘܲܠܛܲܚܵܢ̈ܬ̣ܵܐ ܘܠܲܐܦܝܵ̈ܬ̣ܵܐ. 14: ܘܚܲܩ̈ܠܵܬ̣ܟ݂ܘܿܢ: ܘܟܲܪ̈ܡܲܝܟ̇ܘܿܢ: ܘܙܲܝܬܲܝ̈ܟ̇ܘܿܢ ܛܵܒܹ̈ܐ: ܢܣܲܒ̣ ܘܢܸܬܸ̇ܠ ܠܥܲܒ̣ܕܵܘ̈ܗܝ. 15: ܘܙܲܪܥܟ݂ܘܿܢ ܘܟܲܪ̈ܡܲܝܟ̇ܘܿܢ ܢܥܲܣܲܪ: ܘܢܸܬܸ̇ܠ ܠܲܡܗܲܝܡܢܵܘ̈ܗܝ ܘܲܠܥܲܒ̣ܕܵܘ̈ܗܝ. 16: ܘܥܲܒ̣ܕܲܝ̈ܟ̇ܘܿܢ ܘܐܲܡܗܵܬ̣̈ܟ݂ܘܿܢ ܘܓܲܕܘܼܕܲܝ̈ܟ݂ܘܿܢ ܫܲܦܝܼܪܹ̈ܐ: ܘܚܸܡܪܟ݂ܘܿܢ ܢܸܕ݂ܒܲܪ: ܘܢܸܥܒܸ̇ܕ݂ ܥܒ̣ܵܕܹܗ. 17: ܘܥܵܢ̈ܟ݂ܘܿܢ ܢܥܲܣܲܪ: ܘܐܲܢ̄ܬ̇ܘܿܢ ܬܸܗܘܘܿܢ ܠܹܗ ܥܲܒ̣̈ܕܹܐ. 18: ܘܬܲܝܠܠܘܼܢ ܒܝܵܡܵܐ ܗܵܘ̇ ܡ̣ܢ ܩܕ݂ܵܡ ܡܲܠܟ̇ܟ݂ܘܿܢ ܕܲܓ̣ܒܲܝܬ̇ܘܿܢ ܠܟ݂ܘܿܢ: ܘܠܵܐ ܢܸܥܢܹܝܟ݂ܘܿܢ ܡܵܪܝܵܐ ܒܝܵܘܡܵܐ ܗܵܘ̇. 19ܝܛ: ܘܠܵܐ ܨܒ̣ܵܘ ܥܲܡܵܐ ܠܡܸܫܡܲܥ ܒܩܵܠܹܗ ܕܲܫܡܘܼܐܹܝܠ: ܘܐܸܡܲܪܘ ܠܵܐ ܗܵܟܲܢܵܐ: ܐܸܠܵܐ ܡܲܠܟܵܐ ܢܸܗܘܸܐ ܥܠܲܝܢ. 20: ܘܢܸܗܘܸܐ ܐܵܦ ܚܢܲܢ ܐܲܝܟ݂ ܟܠܗܘܿܢ ܥܲܡܡܹ̈ܐ: ܘ̤ܲܕ݂ܘܼܢܲܢ ܡܲܠܟܲܢ: ܘܢܸܦܘܿܩ ܩܕ݂ܵܡܲܝܢ: ܘܢܸܬ̣ܟܲܬܲܫ ܬܲܟ݂ܬ̇ܘܼܫܲܢ. 21: ܘܲܫܡܲܥ ܫܡܘܼܐܹܝܠ ܟܠܗܹܝܢ ܡܸܠܵܘ̈ܗܝ ܕܥܲܡܵܐ: ܘܡܲܠܸܠ ܐܸܢܹܝܢ ܩܕ݂ܵܡ ܡܵܪܝܵܐ. 22: ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܫܡܲܥ ܒܩܵܠܗܘܿܢ: ܘܐܲܡܠܸܟ݂ ܠܗܘܿܢ ܡܲܠܟܵܐ. ܘܐܸܡܲܪ ܫܡܘܼܐܹܝܠ ܠܐ̄ܢܵܫܵܐ ܕܝܼܣܪܵܝܹܠ: ܙܸܠܘ ܐ̄ܢܵܫ ܠܲܩܪܝܼܬܹܗ.

ܩܹܦܵܠܹܐܘܿܢ: ܛ.

1: ܘܲܗܘ̤ܵܐ ܓܲܒ̣ܪܵܐ ܡ̣ܢ ܒܸܢܝܵܡܹܝܢ: ܘܲܫܡܹܗ ܩܝܼܫ ܒܲܪ ܐܲܒ̣ܝܼܐܹܠ: ܒܲܪ ܨܪܘܿܪ: ܒܲܪ ܒܟ݂ܵܪܘܼܬ̣: ܒܲܪ ܐܲܦܝܼܚ: ܓܲܒ̣ܪܵܐ ܡ̣ܢ ܒܸܢܝܵܡܹܝܢ ܓܲܢ̄ܒܵܪ ܚܲܝܠܵܐ. 2: ܘܠܹܗ ܗܘ̤ܵܐ ܒܪܵܐ ܘܲܫܡܹܗ ܫܵܐܘܿܠ: ܓܒܸܐ ܘܛܵܒ̣. ܘܠܲܝܬ̇ ܓܲܒ̣ܪܵܐ ܡ̣ܢ ܒ̈ܢܲܝ ܝܼܣܪܵܝܹܠ ܕܛܵܒ̣ ܡܸܢܹܗ: ܘܡ̣ܢ ܟܲܬ̣ܦܹܗ ܘܲܠܥܸܠ ܪܵܡ ܗ̄ܘ̣ܵܐ ܡ̣ܢ ܟܠܹܗ ܥܲܡܵܐ. 3: ܘܐܸܒܲܕ݂ ܐܲܬܵܢܹ̈ܐ ܕܩܝܼܫ ܐܲܒ̣ܘܼܗܝ ܕܫܵܐܘܿܠ: ܘܐܸܡܲܪ ܩܝܼܫ ܠܫܵܐܘܿܠ ܒܪܹܗ: ܕܒܲܪ ܥܲܡܵܟ݂ ܠܚܲܕ݂ ܡ̣ܢ ܛܠܵܝܹ̈ܐ: ܩܘܼܡ ܙܸܠ ܒܥܝܼ ܐܲܬܵܢܹ̈ܐ. ܘܩܵܡ ܫܵܐܘܿܠ ܘܐܸܙܲܠ: ܘܲܕ݂ܒܲܪ ܥܲܡܹܗ ܠܚܲܕ݂ ܡ̣ܢ ܛܠܵܝܹ̈ܐ: ܘܐܸܙܲܠ ܠܡܸܒ̣ܥܵܐ ܐܲܬܵܢܹ̈ܐ ܕܐܲܒ̣ܘܼܗܝ. 4: ܘܲܥܒܲܪ ܒܛܘܼܪܵܐ ܕܐܲܦܪܹܝܡ: ܘܲܥܒܲܪ ܒܐܲܪܥܵܐ ܕܓ̣ܘܼܡܪܹ̈ܐ: ܘܠܵܐ ܐܸܫܟܲܚܘ. ܘܲܥܒܲܕܪ ܒܐܲܪܥܵܐ ܕܬܲܥ̈ܠܹܐ ܘܠܲܝܬ̇: ܘܲܥܒܲܪ ܒܐܲܪܥܵܐ ܕܒܸܢܝܵܡܹܝܢ ܘܠܵܐ ܐܸܫܟܲܚܘ. 5: ܘܐܸܬ̣ܵܘ ܠܗܘܿܢ ܠܐܲܪܥܵܐ ܕܨܘܿܪ. ܘܐܸܡܲܪ ܫܵܐܘܿܠ ܠܛܲܠܝܵܐ ܕܥܲܡܹܗ. ܬܵܐ ܢܸܗܦܘܿܟ݂: ܕܲܠܡܵܐ ܢܸܫܒ̇ܘܿܦ ܐܵܒ̣ܝ ܪܸܢܝܵܐ ܕܐܲܬܵܢܹ̈ܐ ܘܢܸܕ݂ܚܲܠ ܥܠܲܝܢ. 6: ܘܐܸܡܲܪ ܠܹܗ ܛܲܠܝܹܗ: ܗܵܐ ܓܲܒ̣ܪܵܐ ܚܲܕ݂ ܕܐܲܠܵܗܵܐ ܒܲܩܪܝܼܬ̣ܵܐ ܗܵܕܹܐ. ܘܓܲܒ̣ܪܵܐ ܝܲܩܝܼܪ ܒܥܲܝ̈ܢܲܝ ܥܲܡܵܐ: ܘܟ݂ܠ ܕܐܵܡܲܪ ܡܹܐܬ̣ܵܐ ܐܵܬܹܐ. ܗܵܫܵܐ ܢܹܐܙܲܠ ܠܬܲܡܵܢ: ܛܵܟ݂ ܢܚܵܘܹܝܢ ܐܘܼܪܚܵܐ ܕܐܸܬܲܝܢ ܥܠܹܝܗ̇. 7: ܘܐܸܡܲܪ ܫܵܐܘܿܠ ܠܛܲܠܝܹܗ. ܗܵܐ ܐܵܙܠ̄ܝܼܢ ܚ̄ܢܲܢ. ܡܵܢܵܐ ܢܵܘܒܸ̇ܠ ܠܓܲܒ̣ܪܵܐ ܕܐܲܠܵܗܵܐ. ܡܸܛܠ ܕܠܲܚܡܵܐ ܛܠܸܩ ܡ̣ܢ ܡܵܐܢܲܝ̈ܢ: ܘܲܙܘܵܕܹ̈ܐ ܠܲܝܬ̇ ܕܢܵܘܒܸ̇ܠ ܠܓܲܒ̣ܪܵܐ ܕܐܲܠܵܗܵܐ: ܡܸܛܠ ܕܠܲܝܬ̇ ܠܲܢ. 8: ܘܐܵܘܣܸܦ ܛܲܠܝܵܐ ܘܲܥܢܵܐ ܠܡܵܪܹܗ ܘܐܸܡܲܪ: ܗܵܐ ܐܸܫܬ̇ܟܲܚ ܒܐܝܼܕ݂ܝ ܪܘܼܒ̣ܥܹܗ ܕܡܲܬ̣ܩܵܠܵܐ ܕܟܸܣܦܵܐ ܠܓܲܒ̣ܪܵܐ ܕܐܲܠܵܗܵܐ ܘܲܢܚܵܘܹܝܢ ܐܘܼܪܚܲܢ. 9: ܡܸܛܠ ܕܡ̣ܢ ܠܘܼܩܕܲܡ ܒܝܼܣܪܵܝܹܠ: ܗܵܟܲܢܵܐ ܐܵܡܲܪ ܗ̄ܘ̣ܵܐ ܓܲܒ̣ܪܵܐ: ܡܵܐ ܕܐܵܙܹܠ ܗ̄ܘ̣ܵܐ ܠܡܸܒ̣ܥܵܐ ܡ̣ܢ ܐܲܠܵܗܵܐ: ܬܵܘ ܢܹܐܙܲܠ ܥܕܲܡܵܐ ܠܚܲܙܵܝܵܐ: ܡܸܛܠ ܕܲܢܒ̣ܝܼܵܐ ܕܝܵܘܡܵܢܵܐ: ܡ̣ܢ ܩܕ݂ܝܼܡ ܚܲܙܵܝܵܐ ܡܸܬ̣ܩܪܸܐ ܗ̄ܘ̣ܵܐ. 10: ܘܐܸܡܲܪ ܫܵܐܘܿܠ ܠܛܲܠܝܹܗ. ܛܵܒ̣ ܦܸܬ̣ܓ̣ܵܡܵܟ݂: ܬܵܐ ܢܹܐܙܲܠܘ ܘܐܸܙܲܠܘ ܠܲܩܪܝܼܬ̣ܵܐ ܕܬܲܡܵܢ ܓܲܒ̣ܪܵܐ ܕܐܲܠܵܗܵܐ. 11: ܗܸܢܘܿܢ ܣܵܠܩܝܼܢ ܒܡܲܣܩܵܢܵܐ ܕܲܩܪܝܼܬ̣ܵܐ: ܘܐܸܫܟܲܚܘ ܥܠܲܝ̈ܡܵܬ̣ܵܐ ܕܢܵܦ̈ܩܵܢ ܠܡܸܡܠܵܐ ܡܲܝ̈ܵܐ. ܘܐܸܡܲܪ ܠܗܹܝܢ ܫܵܐܘܿܠ: ܐܝܼܬ̣ ܗܵܪܟܵܐ ܚܲܙܝܵܐ.

12: ܘܲܥܢܲܝ̈ ܘܐܵܡܪ̈ܵܢ: ܐܝܼܬ̣ ܗܵܐ ܩܕ݂ܵܡܲܝܟ: ܣܲܩܘ ܗܵܫܵܐ ܒܲܥܓܲܠ: ܡܸܛܠ ܕܝܵܘܡܵܢܵܐ ܐܸܬ̣ܵܐ ܠܲܩܪܝܼܬ̣ܵܐ: ܡܸܛܠ ܕܕܸܒ̣ܚܬ̣ܵܐ ܝܵܘܡܵܢܵܐ ܠܥܲܡܵܐ ܒܒܹܝܡ. 13: ܘܡܵܐ ܕܥܲܠܬ̇ܘܿܢ ܠܲܩܪܝܼܬ̣ܵܐ: ܗܵܟܲܢܵܐ ܬܸܫܟ̇ܚܘܼܢܹܗ: ܥܕܲܠܵܐ ܣܵܠܹܩ ܠܒܹܝܡ ܠܡܸܠܥܲܣ. ܡܸܛܠ ܕܠܵܐ ܠܵܥܹܣ ܥܲܡܵܐ ܥܕܲܡܵܐ ܕܐܵܬܹܐ: ܡܸܛܠ ܕܗ̤ܘ ܡܒܲܪܸܟ݂ ܕܸܒ̣ܚܹ̈ܐ: ܘܒܵܬܲܪܟܸ̇ܢ ܐܵܟ݂ܠܝܼܢ ܐܲܝܠܹܝܢ ܕܲܩܪܹܝܢ. ܘܗܵܫܵܐ ܣܲܩܘ ܡܸܛܠ ܕܝܵܘܡܵܢܵܐ ܡܸܫܟ̇ܚܝܼܢ ܐ̄ܢܬ̇ܘܿܢ ܠܹܗ. 14: ܘܲܣܠܸܩܘ ܠܲܩܪܝܼܬ̣ܵܐ. ܗܸܢܘܿܢ ܥܵܐܠܝܼܢ ܒܡܲܥܠܵܢܵܐ ܕܲܩܪܝܼܬ̣ܵܐ: ܘܗܵܐ ܫܡܘܼܐܹܝܠ ܢܵܦܹܩ ܠܐܘܼܪܥ̱ܗܘܿܢ ܠܡܸܣܲܩ ܠܒܹܝܡ. 15: ܘܡܵܪܝܵܐ ܐܸܡܲܪ ܠܲܫܡܘܼܐܹܝܠ: ܝܵܘܡܵܐ ܚܲܕ݂ ܩܕ݂ܵܡ ܕܢܹܐܬܸܐ ܫܵܐܘܿܠ ܠܡܹܡܲܪ. 16: ܠܙܲܒ̣ܢܵܐ ܕܲܡܚܵܪ ܐܸܫܕܲܪ ܠܘܵܬ̣ܵܟ݂ ܓܲܒ̣ܪܵܐ ܡ̣ܢ ܐܲܪܥܵܐ ܕܒܸܢܝܵܡܹܝܢ: ܡܫܘܿܚܲܝܗܝ ܠܲܡܕܲܒ̇ܪܵܢܵܐ ܥܲܠ ܥܲܡܝ ܝܼܣܪܵܝܹܠ: ܘܢܸܦܪܩܝܼܘܗܝ ܠܥܲܡܝ ܡ̣ܢ ܐܝܼܕ݂ܵܐ ܕܲܦܠܸܫܬܵܝܹ̈ܐ. ܡܸܛܠ ܕܲܚܙܹܝܬܹܗ ܠܥܲܡܝ: ܘܥܸܠܲܬ̤ ܓܥܵܬ̣ܗܘܿܢ ܠܘܵܬ̣ܝ. 17: ܘܲܫܡܘܼܐܹܝܠ ܚܙܵܝܗܝ ܠܫܵܐܘܿܠ: ܕܡܵܪܝܵܐ ܓܒ̣ܵܝܗܝ: ܘܡܵܪܝܵܐ ܐܸܡܲܪ ܠܲܫܡܘܼܐܹܝܠ: ܗܵܐ ܓܲܒ̣ܪܵܐ ܕܐܸܡܪܹܬ̣ ܠܵܟ݂: ܗܵܢܵܐ ܢܹܐܚܘܿܕ݂ ܒܥܲܡܝ. 18: ܘܲܩܪܸܒ̣ ܫܵܐܘܿܠ ܠܘܵܬ̣ ܫܡܘܼܐܹܝܠ ܒܓ̣ܵܘ ܬܲܪܥܵܐ: ܘܐܸܡܲܪ: ܚܵܘ ܐܲܝܟܵܘ ܒܹܝܬ̣ ܚܲܙܝܵܐ. 19: ܘܲܥܢܵܐ ܫܡܘܼܐܹܝܠ ܘܐܸܡܲܪ ܠܫܵܐܘܿܠ: ܐܸܢܵܐ ܗ̄ܘ̣ ܚܲܙܝܵܐ: ܣܲܩ ܩܕ݂ܵܡܲܝ ܠܒܹܝܡ: ܘܐܲܟ݂ܘܿܠ ܥܲܡܝ ܝܵܘܡܵܢܵܐ: ܘܐܹܫܲܕܪܵܟ݂ ܒܨܲܦܪܵܐ: ܘܟ݂ܠ ܕܲܒ̣ܠܸܒܵܟ݂ ܐܹܚܵܘܹܝܟ݂. 20: ܘܗܲܠ ܐܲܬܵܢܹ̈ܐ ܕܐܸܒܲܕ݂ ܠܵܟ݂: ܝܵܘܡܵܢܵܐ ܗܵܐ ܬܠܵܬ̣ܵܐ ܝܵܘ̈ܡܝܼܢ: ܠܵܐ ܬܣܝܼܡ ܠܸܒܵܟ݂ ܥܠܲܝܗܹܝܢ: ܡܸܛܠ ܕܐܸܫܬ̇ܟܲܚ. ܘܲܕ݂ܡ̇ܢ ܗ̄ܝ̣ ܟܠܵܗ̇ ܪܸܓ̇ܬ̣ܵܐ ܕܒܹܝܬ̣ ܝܼܣܪܵܝܹܠ: ܐܸܠܵܐ ܐܸܢ ܕܝܼܠܵܟ݂ ܘܲܕ݂ܒܹܝܬ̣ ܐܲܒ̣ܘܼܟ݂. 21: ܘܲܥܢܵܐ ܫܵܐܘܿܠ ܘܐܸܡܲܪ ܠܲܫܡܘܼܐܹܝܠ: ܗܵܐ ܒܲܪ ܒܸܢܝܵܡܹܝܢ ܐ̄ܢܵܐ: ܡ̣ܢ ܙܥܘܿܪܵܐ ܕܫܲܒ̣ܛܹ̈ܐ ܕܝܼܣܪܵܝܹܠ: ܘܫܲܪܒܲܬ̣ܝ ܙܥܘܿܪܝܵܐ ܗ̄ܝܼ ܡ̣ܢ ܟܠܗܹܝܢ ܫܲܪ̈ܒ̣ܵܬ̣ܵܐ ܕܫܲܒ̣ܛܵܐ ܕܒܸܢܝܵܡܹܝܢ: ܘܲܠܡܵܢܵܐ ܐܸܡܲܪܬ̇ ܠܝܼ ܡܸܠܬ̣ܵܐ ܗܵܕܹܐ. 22: ܘܲܕ݂ܒܲܪ ܫܡܘܼܐܹܝܠ ܠܫܵܐܘܿܠ ܘܲܠܛܲܠܝܹܗ: ܘܐܲܥܸܠ ܐܸܢܘܿܢ ܠܒܲܝܬܵܐ: ܘܝܲܗ̄ܒ̣ ܠܗܘܿܢ ܕܘܼܟ̇ܬ̣ܵܐ ܒܪܹܫ ܩܪ̈ܲܝܵܐ: ܘܗܸܢܘܿܢ ܐܲܝܟ݂ ܬܠܵܬ̣ܝܼ ܓܲܒ̣ܪ̈ܝܼܢ. 23: ܘܐܸܡܲܪ ܫܡܘܼܐܹܝܠ ܠܛܲܒܵܚܵܐ: ܗܲܒ̣ ܡܢܵܬ̣ܵܐ ܕܝܼܗ̄ܒܹܬ̣ ܠܵܟ݂ ܘܐܸܡܪܹܬ̣ ܠܵܟ݂ ܣܝܼܡ ܠܘܵܬ̣ܵܟ݂. 24: ܘܐܲܪܝܼܡ ܛܲܒܵܚܵܐ ܫܵܩܵܐ ܘܥܸܠܵܝܬܵܐ: ܘܣܵܡ ܩܕ݂ܵܡ ܫܵܐܘܿܠ: ܘܐܸܡܲܪ ܗܵܐ ܕܐܸܫܬ̇ܚܲܪ: ܣܝܼܡ ܩܕ݂ܵܡܲܝܟ ܘܐܲܟ݂ܘܿܠ: ܡܸܛܠ ܕܡ̣ܢ ܙܲܒ̣ܢܵܐ ܢܛܝܼܪ ܠܵܟ݂. ܘܐܸܟܲܠ ܫܵܐܘܿܠ ܥܲܡ ܫܡܘܼܐܹܝܠ ܒܝܵܘܡܵܐ ܗܵܘ̇. 25: ܘܲܢܚܸܬ̣ ܡ̣ܢ ܒܹܝܡ ܠܲܩܪܝܼܬ̣ܵܐ: ܘܡܲܠܸܠ ܥܲܡ ܫܵܐܘܿܠ ܥܲܠ ܐܸܓܪܵܐ. 26: ܘܩܲܕ݂ܡ ܗ̄ܘ̣ܵܐ ܟܲܕ݂ ܣܠܸܩ ܨܲܦܪܵܐ: ܘܲܩܪܵܐ ܫܡܘܼܐܹܝܠ ܠܫܵܐܘܿܠ ܠܐܸܓܵܪܵܐ: ܘܐܸܡܲܪ ܩܘܼܡ ܐܸܫܲܕܪܵܟ݂. ܘܩܵܡ ܫܵܐܘܿܠ: ܘܲܢܦܲܩܘ ܬܪ̈ܲܝܗܘܿܢ: ܗ̤ܘ ܘܲܫܡܘܼܐܹܝܠ ܠܒܲܪ. 27: ܗܢܘܿܢ ܢܵܚܬ̇ܝܼܢ ܒܣܵܘܦܵܗ̇ ܕܲܩܪܝܼܬ̣ܵܐ: ܘܲܫܡܘܼܐܹܝܠ ܐܸܡܲܪ ܠܫܵܐܘܿܠ: ܐܸܡܲܪ ܠܛܲܠܝܵܐ ܕܢܸܥܒܲܪ ܩܕ݂ܵܡܲܝܢ: ܘܐܲܢ̄ܬ̇ ܩܘܼܡ ܐܲܝܟ݂ ܕܝܵܘܡܵܢܵܐ: ܘܐܲܫ̱ܡܥܵܟ݂ ܦܸܬ̣ܓ̣ܵܡܹܗ ܕܐܲܠܵܗܵܐ.

ܩܹܦܵܠܹܐܘܿܢ: ܝ.

1: ܘܲܢܣܲܒ̣ ܫܡܘܼܐܹܝܠ ܩܲܪܢܵܐ ܕܡܸܫܚܵܐ ܘܲܢܣܲܟ݂ ܒܪܹܫܹܗ: ܘܢܲܫܩܹܗ: ܘܐܸܡܲܪ ܠܹܗ: ܗܵܐ ܡܲܫܚܵܟ݂ ܡܵܪܝܵܐ ܥܲܠ ܝܵܪܬ̇ܘܼܬܹܗ ܠܲܡܕܲܒ̇ܪܵܢܵܐ. 2: ܘܡܵܐ ܕܐܸܙܲܠܬ̇ ܝܵܘܡܵܢܵܐ ܡ̣ܢ ܠܘܵܬ̣ܝ: ܗܵܐ ܡܸܫܟܲܚ ܐܲܢ̄ܬ̇ ܬܪܹܝܢ ܓܲܒ̣ܪ̈ܝܼܢ ܥܲܠ ܩܲܒ̣ܪܵܗ̇ ܕܪܵܚܹܠ: ܒܲܬ̣ܚܘܼܡܵܐ ܕܒܸܢܝܵܡܹܝܢ ܒܨܸܠܨܚ. ܘܢܹܐܡܪܘܿܢ ܠܵܟ݂: ܐܸܫܬ̇ܟ̇ܚ ܐܲܬܵܢܹ̈ܐ ܕܐܸܙܲܠܬ̇ ܠܡܸܒ̣ܥܵܐ: ܘܗܵܐ ܫܒܲܩ ܐܲܒ̣ܘܼܟ݂ ܪܸܢܝܵܐ ܕܐܲܬܵܢܹ̈ܐ ܘܲܕ݂ܚܸܠ ܥܠܲܝܟ̇ܘܿܢ: ܘܐܸܡܲܪ ܡܵܢܵܐ ܐܸܥܒܸ̇ܕ݂ ܠܒܹܪܝ. 3: ܘܡܵܐ ܕܲܥܒܲܪܬ̇ ܬܘܼܒ̣ ܠܗܲܠ: ܘܡܲܛܝܸܬ̇ ܠܘܵܬ̣ ܒܸܛܡ̱ܬ̣ܵܐ ܕܬ̣ܵܒ̣ܘܿܪ: ܗܵܐ ܡܸܫܟܲܚ ܐܲܢ̄ܬ̇ ܬܲܡܵܢ ܬܠܵܬ̣ܵܐ ܓܲܒ̣ܪ̈ܝܼܢ: ܣܵܠܩܝܼܢ ܠܘܵܬ̣ ܐܲܠܵܗܵܐ ܠܒܹܝܬ̣ ܐܹܝܠ: ܚܲܕ݂ ܫܩܝܼܠ ܬܠܵܬ̣ܵܐ ܓܕ݂ܝܼ̈ܢ: ܘܚܲܕ݂ ܫܩܝܼܠ ܬܠܵܬ̣ ܓܪ̈ܝܼܨܵܢ ܕܠܲܚܡܵܐ: ܘܚܲܕ݂ ܫܩܝܼܠ ܓܪܵܒ̣ܵܐ ܕܚܲܡܪܵܐ. 4: ܘܢܸܫ̱ܐܠܘܼܢ ܒܲܫܠܵܡܵܟ݂: ܘܢܸܬ̇ܠܘܼܢ ܠܵܟ݂ ܬܲܪܬܹܝܢ ܕܠܲܚܡܵܐ: ܘܬܸܣܲܒ̣ ܡ̣ܢ ܐܝܼܕܲܝ̈ܗܘܿܢ. 5: ܘܒܵܬܲܪܟܸ̇ܢ ܬܹܐܬܸܐ ܠܪܵܡܬ̣ܵܐ ܕܐܲܠܵܗܵܐ: ܕܬܲܡܵܢ ܩܵܝܹܡܬ̣ܵܐ ܕܲܦܠܸܫ̈ܬܵܝܹܐ. ܘܡܵܐ ܕܡܲܛܝܸܬ̇ ܠܬܲܡܵܢ ܠܲܩܪܝܼܬ̣ܵܐ: ܗܵܐ ܦܵܓ̣ܥ ܐܲܢ̄ܬ̇ ܒܚܲܒ̣ܠܵܐ ܕܲܢܒ̣̈ܝܹܐ ܕܢܵܚܬܝܼܢ ܡ̣ܢ ܒܹܝܡ: ܘܲܩܕ݂ܵܡܲܝܗܘܿܢ ܩܝܼܬ̣ܵܪܹ̈ܐ ܘܟܸܢܵܪܹ̈ܐ ܘܲܦ̈ܠܓܹܐ ܘܲܪ̈ܒ̣ܝܼܥܹܐ: ܘܗܸܢܘܿܢ ܡܸܬ̣ܢܲܒܹܝܢ. 6: ܘܬܲܨܠܲܝ ܥܠܲܝܟ ܪܘܼܚܹܗ ܕܡܵܪܝܵܐ: ܘܬܸܬ̣ܢܲܒܸ̇ܐ ܥܲܡܗܘܿܢ: ܘܬܸܫܬܲܓܢܸܐ ܐܲܝܟ݂ ܓܲܒ̣ܪܵܐ ܐ̄ܚܪܹܢܵܐ. 7: ܘܢܸܗܘܸܐ ܟܲܕ݂ ܢܹܐܬ̣̈ܵܝܵܢ ܥܠܲܝܟ ܐܵܬ̣̈ܘܵܬ̣ܵܐ ܗܵܠܹܝܢ: ܥܒܸܕ݂ ܠܵܟ݂ ܡܸܕܸܡ ܕܣܵܦܩܵܐ ܒܐܝܼܕܲܝ̈ܟ: ܡܸܛܠ ܕܐܲܠܵܗܵܐ ܥܲܡܵܟ݂. 8: ܘܚܘܿܬ̣ ܩܕ݂ܵܡܲܝ ܠܓܲܠܓܵܠܵܐ. ܘܗܵܐ ܐܸܢܵܐ ܢܵܚܹܬ̣ ܐ̄ܢܵܐ ܠܘܵܬܵܟ݂: ܠܡܲܣܵܩܘܼ ܥ̈ܠܵܘܵܬ̣ܵܐ: ܘܲܠܡܸܕ݂ܒܲܚ ܕܸܒ̣ܚܹ̈ܐ ܫܲܠܡܹ̈ܐ. ܫܲܒ̣ܥܵܐ ܝܵܘ̈ܡܝܼܢ ܬܟܲܬܲܪ ܥܕܲܡܵܐ ܕܐܵܬܹܐ ܐ̄ܢܵܐ ܠܘܵܬ̣ܵܟ݂: ܘܐܵܘܕܥܵܟ݂ ܡܸܕܸܡ ܕܬܸܥܒܸ̇ܕ݂. 9: ܘܲܗܘ̤ܵܐ ܕܟܲܕ݂ ܐܲܦܢܝܼ ܟܲܬ̣ܦܹܗ ܠܡܹܐܙܲܠ ܡ̣ܢ ܠܘܵܬ̣ ܫܡܘܼܐܹܝܠ: ܫܲܚܠܸܦ ܠܹܗ ܐܲܠܵܗܵܐ ܠܸܒܵܐ ܐ̄ܚܪܹܢܵܐ: ܘܐܸܬܲܝ̈ ܟܠܗܹܝܢ ܐܵܬ̣̈ܘܵܬ̣ܵܐ ܗܵܠܹܝܢ ܒܝܵܘܡܵܐ ܗܵܘ̇. 10: ܘܐܸܬ̣ܵܐ ܥܕܲܡܵܐ ܠܪܵܡܬ̣ܵܐ: ܘܗܵܐ ܚܲܒ̣ܠܵܐ ܕܲܢܒ̣̈ܝܹܐ ܐܲܪܥܹܗ: ܘܐܲܨܠܚܲܬ̤ ܥܠܵܘܗܝ ܪܘܼܚܹܗ ܕܐܲܠܵܗܵܐ: ܘܐܸܬ̇ܢܲܒ̇ܝܼ ܒܲܝܢܵܬ̇ܗܘܿܢ. 11: ܘܲܗܘ̤ܵܐ ܕܟ݂ܠ ܕܚܵܕ݂ܥ ܗ̄ܘ̣ܵܐ ܠܹܗ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ: ܚܙܵܘ ܘܗܵܐ ܥܲܡ ܢܒ̣̈ܝܹܐ ܡܸܬ̣ܢܲܒܸ̇ܐ: ܘܐܸܡܲܪ ܥܲܡܵܐ ܓܒܲܪ ܠܚܲܒ̣ܪܹܗ: ܡܵܢܵܐ ܗ̄ܘ̣ ܗܵܢܵܐ ܕܲܗܘ̤ܵܐ ܠܒܲܪ ܩܝܼܫ: ܕܗܵܐ ܐܵܦ ܫܵܐܘܿܠ ܒܲܢܒ̣̈ܝܹܐ. 12: ܘܲܥܢܵܐ ܓܲܒ̣ܪܵܐ ܡ̣ܢ ܬܲܡܵܢ ܘܐܸܡܲܪ: ܡܲܢܘܼ ܐܲܒ̣ܘܼܗܝ: ܡܸܛܠ ܗܘ̤ܵܬ̣ ܠܡܲܬ̣ܠܵܐ: ܕܗܵܐ ܐܵܦ ܫܵܐܘܿܠ ܒܲܢܒ̣̈ܝܹܐ. 13: ܘܲܓ̣ܡܲܪܘ ܠܡܸܬ̣ܢܲܒܵܝܘ. ܘܐܸܬ̣ܵܐ ܫܵܐܘܿܠ ܡ̣ܢ ܒܹܝܡ. 14: ܘܐܸܡܲܪ ܠܹܗ ܕܵܪܹܗ ܠܫܵܐܘܿܠ ܘܲܠܛܲܠܝܹܗ: ܠܐܲܝܟܵܐ ܐܸܙܲܠܬ̇ܘܿܢ. ܘܐܸܡܲܪܘ ܠܡܸܒ̣ܥܵܐ ܐܲܬܵܢܹ̈ܐ: ܘܲܚܙܲܝܢ ܕܠܲܝܬ̇ ܘܐܸܬܲܝܢ ܠܘܵܬ̣ ܫܡܘܼܐܹܝܠ. 15: ܘܐܸܡܲܪ ܠܹܗ ܕܵܪܹܗ ܠܫܵܐܘܿܠ: ܚܵܘܵܢܝ ܡܵܢܵܐ ܐܸܡܲܪ ܠܟ݂ܘܿܢ ܫܡܘܼܐܹܝܠ. 16: ܘܐܸܡܲܪ ܫܵܐܘܿܠ ܠܕ݂ܵܕܹܗ: ܡܚܵܘܵܝܘܼ ܚܵܘܝܲܢܝ ܕܐܸܫܬ̇ܟܲܚ ܐܲܬܵܢܹ̈ܐ. ܘܲܨܒ̣ܘܼܬ̣ܵܐ ܕܡܲܠܟ̇ܘܼܬ̣ܵܐ ܠܵܐ ܚܵܘܝܹܗ: ܕܐܸܡܲܪ ܠܹܗ ܫܡܘܼܐܹܝܠ. 17: ܘܟܲܢܸܫ ܫܡܘܼܐܹܝܠ ܠܥܲܡܵܐ ܩܕ݂ܵܡ ܡܵܪܝܵܐ ܠܡܲܨܦܝܵܐ. 18: ܘܐܸܡܲܪ ܠܲܒ̣̈ܢܲܝ ܝܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢܵܐ ܐܲܣܩܹܬ̣ ܠܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ: ܘܦܲܨܝܼܬ̇ܟ݂ܘܿܢ ܡ̣ܢ ܐܝܼܕ݂ܵܐ ܕܲܦܠܸܫ̈ܬܵܝܹܐ: ܘܡ̣ܢ ܐܝܼܕ݂ܵܐ ܕܟ݂ܠܗܹܝܢ ܡܲܠܟ̈ܘܵܬ̣ܵܐ ܕܐܵܠ̈ܨܵܢ ܠܟ݂ܘܿܢ. 19: ܘܐܲܢ̄ܬ̇ܘܿܢ ܝܵܘܡܵܢܵܐ ܐܲܣܠܝܼܬ̇ܘܿܢ ܠܐܲܠܵܗܟ݂ܘܿܢ: ܕܗ̤ܘ ܦܵܪܹܩ ܠܟ݂ܘܿܢ ܡ̣ܢ ܟܠܗܹܝܢ ܒܝܼ̈ܫܵܬ̣ܟ݂ܘܿܢ ܘܥܵܩܵܬ̣̈ܟ݂ܘܿܢ: ܘܐܸܡܲܪܬ̇ܘܿܢ ܠܵܐ ܗܵܟܲܢܵܐ: ܐܸܠܵܐ ܡܲܠܟܵܐ ܐܲܩܝܼܡ ܥܠܲܝܢ. ܗܵܫܵܐ ܢܩܘܼܡܘܼܢ ܩܕ݂ܵܡ ܡܵܪܝܵܐ ܫܲܒ̣ܛܲܝ̈ܟ̇ܘܿܢ ܘܐܲܠܦܲܝ̈ܟ̇ܘܿܢ.

20: ܘܩܲܪܸܒ̣ ܫܡܘܼܐܹܝܠ ܠܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܘܐܸܬ̇ܬ̇ܚܸܕ݂ ܫܲܒ̣ܛܵܐ ܕܒ̣ܢܝܵܡܹܝܢ. 21: ܘܩܲܪܸܒ̣ ܫܲܒ̣ܛܵܐ ܕܒܸܢܝܵܡܹܝܢ ܠܫܲܪ̈ܒ̣ܵܬ̣ܵܐ: ܘܐܸܬ̇ܬܲܚܕܲܬ̤ ܫܲܪܒ̇ܬ̣ܵܐ ܕܡܲܛܪܝܼ: ܘܐܸܬ̇ܬ̇ܚܸܕ݂ ܫܵܐܘܿܠ ܒܲܪ ܩܝܼܫ. ܘܲܒ̣ܥܵܐܘܼܗܝ ܘܠܵܐ ܐܸܫܬ̇ܟܲܚ. 22: ܘܲܫܐܸܠ ܬܘܼܒ̣ ܫܡܘܼܐܹܝܠ ܒܡܵܪܝܵܐ: ܘܐܸܡܲܪ ܐܲܝܟ̇ܘ ܓܲܒ̣ܪܵܐ ܗܵܢܵܐ. ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܗܵܐ ܗ̤ܘ ܡܸܬ̇ܛܲܫܹܐ ܒܹܝܬ̣ ܡܵܐܢܹ̈ܐ. 23: ܘܲܪܗܸܛܘ ܘܕܲܒ̣ܪܘܗܝ ܡܸܢܵܟ݂ ܬܲܡܵܢ: ܘܩܵܡ ܒܓ̣ܵܘ ܥܲܡܵܐ ܘܪܵܡ ܗ̄ܘ̣ܵܐ ܡ̣ܢ ܟܠܹܗ ܥܲܡܵܐ ܡ̣ܢ ܟܲܬ̣ܦܹܗ ܘܲܠܥܸܠ. 24: ܘܐܸܡܲܪ ܫܡܘܼܐܹܝܠ ܠܟ݂ܠܹܗ ܥܲܡܵܐ: ܚܙܲܝܬ̇ܘܿܢ ܕܲܨܒ̣ܵܐ ܒܹܗ ܐܲܠܵܗܵܐ: ܡܸܛܠ ܕܠܲܝܬ̇ ܐܲܟ݂ܘܵܬܹܗ ܒܟ݂ܠܹܗ ܥܲܡܵܐ. ܘܝܲܒܸ̇ܒ̣ܘ ܟܠܹܗ ܥܲܡܵܐ ܘܐܸܡܲܪܘ: ܢܸܚܸܐ ܡܲܠܟܵܐ. 25: ܘܐܸܡܲܪ ܫܡܘܼܐܹܝܠ ܠܥܲܡܵܐ ܢܵܡܘܿܣܹܗ ܕܡܲܠܟܵܐ: ܘܲܟ݂ܬܲܒ̣ ܒܣܸܦܪܵܐ ܘܣܵܡ ܩܕ݂ܵܡ ܡܵܪܝܵܐ. ܘܫܲܕܲܪ ܫܡܘܼܐܹܝܠ ܠܟ݂ܠܹܗ ܥܲܡܵܐ: ܘܐܸܙܲܠܘ ܐ̄ܢܵܫ ܠܒܲܝܬܹܗ.

26: ܘܐܵܦ ܫܵܐܘܿܠ ܐܸܙܲܠ ܠܒܲܝܬܹܗ ܠܪܵܡܬ̣ܵܐ: ܘܐܸܙܲܠ ܥܲܡܹܗ ܚܲܝܠܵܐ ܕܐܸܬ̣ܩܲܪܲܒ̣ ܐܲܠܵܗܵܐ ܒܠܸܒ̇ܗܘܿܢ.

27: ܘܲܒ̣̈ܢܲܝ ܚܛܵܐ ܐܵܡܪܝܼܢ: ܒܡܵܢܵܐ ܢܸܦ̱ܪܩܲܢ ܗܵܢܵܐ: ܘܫܵܛܘܼܗܝ ܘܠܵܐ ܐܲܝܬ̇ܝܼܘ ܠܹܗ ܩܘܼܪ̈ܒܵܢܹܐ. ܘܲܗܘ̤ܵܐ ܐܲܝܟ݂ ܫܲܬ̇ܝܼܩ.

ܩܹܦܵܠܹܐܘܿܢ: ܝܐ.

1: ܘܲܣܠܸܩ ܢܵܚܵܫ ܥܲܡܘܿܢܵܝܵܐ: ܘܲܫܪܵܐ ܥܲܠ ܠܟ݂ܝܼܫ ܕܓܸܠܥܵܕ݂. ܘܐܸܡܲܪܘ ܟܠܗܘܿܢ ܐ̄ܢܵܫܵܐ ܕܲܠܟ݂ܝܼܫ ܠܢܵܚܵܫ: ܐܲܩܝܼܡ ܠܲܢ ܩܝܵܡܵܐ ܘܢܸܦ̱ܠܚܵܟ݂. 2: ܘܐܸܡܲܪ ܠܗܘܿܢ ܢܵܚܵܫ ܥܲܡܘܿܢܵܝܵܐ: ܒܗܵܕܹܐ ܐܲܩܝܼܡ ܠܟ݂ܘܿܢ ܩܝܵܡܵܐ: ܡܵܐ ܕܥܵܘܲܪܬ̇ܘܿܢ ܟܠ ܥܲܝ̱ܢܟ݂ܘܿܢ ܕܝܲܡܝܼܢܵܐ. ܘܐܸܥܒ̇ܕ݂ܝܼܘܗܝ ܚܸܣܕܵܐ ܥܲܠ ܟܠܹܗ ܝܼܣܪܵܝܹܠ. 3: ܘܐܸܡܲܪܘ ܠܹܗ ܣܵܒܹ̈ܐ ܕܲܠܟ݂ܝܼܫ: ܐܲܪܦܵܐ ܠܲܢ ܫܲܒ̣ܥܵܐ ܝܵܘ̈ܡܝܼܢ ܘܲܢܫܲܕܲܪ ܐܝܼܙ̈ܓܲܕܹܐ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ: ܘܢܸܚܙܸܐ ܐܸܢ ܐܝܼܬ̣ ܠܲܢ ܦܵܪܘܿܩܵܐ. ܘܐܸܢ ܠܵܐ: ܗܵܝܕܹܝܢ ܢܸܦܘܿܩ ܠܘܵܬ̣ܵܟ݂. 4: ܘܐܸܬ̣ܵܘ ܐܝܼܙ̈ܓܲܕܹܐ ܠܪܵܡܬ̣ܵܐ ܕܫܵܐܘܿܠ: ܘܡܲܠܸܠܘ ܡܸܠܹ̈ܐ ܗܵܠܹܝܢ ܩܕ݂ܵܡ ܥܲܡܵܐ: ܘܐܲܪܝܼܡܘ ܟܠܹܗ ܥܲܡܵܐ ܩܵܠܗܘܿܢ ܘܲܒ̣ܟ݂ܵܘ. 5: ܘܗܵܐ ܫܵܐܘܿܠ ܐܵܬܹܐ ܒܵܬܲܪ ܬܵܘܪܹ̈ܐ ܡ̣ܢ ܚܲܩܠܵܐ. ܘܐܸܡܲܪ ܫܵܐܘܿܠ: ܡܵܐ ܠܹܗ ܠܥܲܡܵܐ ܕ݂ܒ݂ܵܟܹܝܢ. ܘܐܸܫܬܲܥܘ ܠܹܗ ܡܠܹ̈ܐ ܕܐ̄ܢܵܫܲܝ̈ ܠܟ݂ܝܼܫ. 6: ܘܐܲܨܠܚܲܬ̤ ܪܘܼܚܹܗ ܕܐܲܠܵܗܵܐ ܥܲܠ ܫܵܐܘܿܠ: ܟܲܕ݂ ܫܡܲܥ ܡܸܠܹ̈ܐ ܗܵܠܹܝܢ: ܘܐܸܬ̣ܚܲܡܲܬ̣ ܪܘܼܓ̣ܙܹܗ ܛܵܒ̣. 7: ܘܢܲܣܒ̣ܵܗ̇ ܠܦܲܕܵܢܵܐ ܕܬ̣ܵܘܪܹ̈ܐ: ܘܦܲܫܲܚ ܐܸܢܘܿܢ. ܘܫܲܕܲܪ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ ܒܝܲܕ݂ ܐܝܼܙܓ̣̈ܕܹܐ ܠܡܹܐܡܲܪ: ܟܠ ܕܠܵܐ ܢܵܦܹܩ ܒܵܬܲܪ ܫܵܐܘܿܠ ܘܒ̣ܵܬܲܪ ܫܡܘܼܐܹܝܠ: ܗܵܟܲܢܵܐ ܢܸܬ̣ܥ̱ܒܸܕ݂ ܠܬ̣ܵܘܪ̈ܵܘܗܝ. ܘܢܸܦܠܲܬ̣ ܕܸܚ̱ܠܬܹܗ ܕܐܲܠܵܗܵܐ ܥܲܠ ܥܲܡܵܐ: ܘܲܢܦܲܩܘ ܟܠܗܘܿܢ ܐܲܝܟ݂ ܓܲܒ̣ܪܵܐ ܚܲܕ݂. 8: ܘܲܡܢܵܐ ܐܸܢܘܿܢ ܒܒ̣ܵܙܵܩ: ܘܲܗܘ̤ܵܘ ܒ̈ܢܲܝ ܝܼܣܪܵܝܹܠ ܬܠܵܬ̣ܡܵܐܐ ܐܲܠܦ̈ܝܼܢ: ܘܓܲܒ̣ܪܹ̈ܐ ܕܲܝܗܘܼܕ݂ܵܐ ܬܠܵܬ̣ܝܼܢ ܐܲܠܦ̈ܝܼܢ. 9: ܘܐܸܡܲܪ ܠܐܝܼܙ̈ܓܲܕܹܐ ܕܐܸܬ̣ܵܘ ܡ̣ܢ ܠܟ݂ܝܼܫ ܐܸܡܲܪܘ ܠܓܲܒ̣ܪܹ̈ܐ ܕܲܠܟ݂ܝܼܫ ܘܲܕ݂ܓܸܠܥܵܕ݂: ܡܚܵܪ ܢܸܗܘܸܐ ܠܟ݂ܘܿܢ ܦܘܼܪܩܵܢܵܐ ܡܵܐ ܕܚܲܡ ܫܸܡܫܵܐ. ܘܐܸܬ̣ܵܘ ܐܝܼܙ̈ܓܲܕܹܐ ܘܚܵܘܝܼܘ ܠܐ̄ܢܵܫܲܝ̈ ܠܟ݂ܝܼܫ: ܘܲܚܕ݂ܝܼܘ. 10: ܘܐܸܡܲܪܘ ܐ̄ܢܵܫܲܝ̈ ܠܟ݂ܝܼܫ: ܡܚܵܪ ܢܸܦܘܿܩ ܠܘܵܬ̣ܟ݂ܘܿܢ: ܘܬܸܥܒ̇ܕ݂ܘܼܢ ܠܲܢ ܟܠ ܕܫܲܦܝܼܪ ܒܥܲܝܢܲܝ̈ܟ̇ܘܿܢ. 11: ܘܲܗܘ̤ܵܐ ܠܝܵܘܡܵܐ ܕܒܟܵܬ̣ܪܹܗ: ܘܦܲܠܸܓ̣ ܫܵܐܘܿܠ ܠܥܲܡܵܐ ܠܲܬ̣ܠܵܬ̣ܵܐ ܪܹ̈ܫܝܼܢ. ܘܥܲܠܘ ܒܓ̣ܵܘ ܡܲܫܪܝܼܬ̣ܵܐ ܒܡܲܛܲܪܬܐ ܕܨܲܦܪܵܐ: ܘܲܚܪܲܒ̣ܘ ܠܲܒ̣̈ܢܲܝ ܥܲܡܘܿܢ ܥܕܲܡܵܐ ܕܚܲܡ ܝܵܘܡܵܐ. ܘܕܐܸܫܬ̇ܚܲܪܘ ܐܸܬ̣ܒܲܕ݂ܪܘ: ܘܠܵܐ ܐܸܫܬ̇ܟܲܚܘ ܒܗܘܿܢ ܬܪܹܝܢ ܐܲܟ݂ܚ̄ܕ݂ܵܐ. 12: ܘܐܸܡܲܪܘ ܥܲܡܵܐ ܠܲܫܡܘܼܐܹܝܠ: ܡܲܢܘܼ ܐܸܡܲܪ ܕܫܵܐܘܿܠ ܠܵܐ ܢܲܡܠܸܟ݂ ܥܠܲܝܢ: ܗܲܒ̣ ܠܲܢ ܓܲܒ̣ܪܹ̈ܐ ܢܡܝܼܬ̣ ܐܸܢܘܿܢ. 13: ܘܐܸܡܲܪ ܫܵܐܘܿܠ: ܠܵܐ ܢܸܬ̣ܩܛܸܠ ܓܒܲܪ ܒܝܵܘܡܵܐ ܗܵܢܵܐ: ܡܸܛܠ ܕܝܵܘܡܵܢܵܐ ܥܒܲܕ݂ ܡܵܪܝܵܐ ܦܘܼܪܩܵܢܵܐ ܠܝܼܣܪܵܝܹܠ. 14: ܘܐܸܡܲܪ ܫܡܘܼܐܹܝܠ ܠܥܲܡܵܐ: ܬܵܘ ܢܹܐܙܲܠ ܠܓܲܠܓܵܠܵܐ: ܘܲܢܚܲܕܸܬ̣ ܬܲܡܵܢ ܡܲܠܟ̇ܘܼܬ̣ܵܐ. 15: ܘܐܸܙܲܠ ܟܠܹܗ ܥܲܡܵܐ ܠܓܲܠܓܵܠܵܐ: ܘܐܲܡܠܟ݂ܘ ܬܲܡܵܢ ܠܫܵܐܘܿܠ ܩܕ݂ܵܡ ܡܵܪܝܵܐ ܒܓܲܠܓܵܠܵܐ: ܘܕܲܒܲܚܘ ܬܲܡܵܢ ܕܸܒ̣ܚܹ̈ܐ ܫܲܠܡܹ̈ܐ ܩܕ݂ܵܡ ܡܵܪܝܵܐ: ܘܲܚܕ݂ܝܘ ܬܲܡܵܢ ܫܵܐܘܿܠ ܘܟ݂ܠܗܘܿܢ ܐ̄ܢܵܫܵܐ ܕܝܼܣܪܵܝܹܠ ܛܵܒ̣.

ܩܹܦܵܠܹܐܘܿܢ: ܝܒ.

1: ܘܐܸܡܲܪ ܫܡܘܼܐܹܝܠ ܠܟ݂ܠܹܗ ܝܼܣܪܵܝܹܠ: ܗܵܐ ܫܸܡ̇ܥܹܬ̣ ܒܩܵܠܟ݂ܘܿܢ ܟܠ ܕܐܸܡܲܪܬ̇ܘܿܢ ܠܝܼ: ܘܐܲܡ̱ܠܟܹ̇ܬ̣ ܥܠܲܝܟ̇ܘܿܢ ܡܲܠܟܵܐ. 2: ܘܗܵܫܵܐ ܗܵܐ ܡܲܠܟܵܐ ܩܕ݂ܵܡܲܝܟ̇ܘܿܢ. ܘܐܸܢܵܐ ܣܸܐܒܹ̇ܬ̣ ܘܩܸܫܹܬ̣: ܘܲܒ̣̈ܢܲܝ ܗܵܐ. ܥܲܡܟ݂ܘܿܢ. ܘܐܸܢܵܐ ܗܲܠܟܹ̇ܬ̣ ܩܕ݂ܵܡܲܝܟ̇ܘܿܢ: ܡ̣ܢ ܛܲܠܝܘܼܬ̣ܝ ܘܲܥܕܲܡܵܐ ܠܝܵܘܡܵܢܵܐ. 3: ܗܵܐ ܩܵܐܹܡ ܐ̄ܢܵܐ ܩܕ݂ܵܡܲܝܟ̇ܘܿܢ. ܣܲܗܸܕܘ ܒܝܼ ܩܕ݂ܵܡ ܡܵܪܝܵܐ ܘܲܩܕ݂ܵܡ ܡܫܝܼܚܹܗ: ܬܵܘܪܵܐ ܕܡ̇ܢ ܕܸܒ̣ܪܹܬ̣: ܘܲܚܡܵܪܵܐ ܕܡ̇ܢ ܕܸܒܪܹܬ̣: ܐܵܘ ܠܡ̇ܢ ܛܸܠܡܹܬ̣: ܐܵܘ ܠܡ̇ܢ ܐܲܠܨܹܬ̣: ܐܵܘ ܡ̣ܢ ܐܝܼܕ݂ܵܐ ܕܡ̇ܢ ܢܸܣܒܹ̇ܬ̣ ܫܘܼܚܕܵܐ ܘܐܲܨܕܹܬ̣ ܥܲܝ̈ܢܲܝ ܒܹܗ: ܘܐܸܡܲܪܘ ܠܝܼ ܘܐܸܢܵܐ ܐܸܦܪܘܿܥܟ݂ܘܿܢ. 4: ܐܵܡܪܝܼܢ ܠܹܗ: ܠܵܐ ܛܠܲܡܬܵܢ: ܘܠܵܐ ܐܲܠܲܨܬܵܢ: ܘܠܵܐ ܡ̣ܢ ܐ̄ܢܵܫ ܡܸܢܲܢ ܡܸܕܸܡ. 5: ܐܵܡܲܪ ܠܗܘܿܢ ܣܵܗܸܕ݂ ܒܟ݂ܘܿܢ ܐܲܠܵܗܵܐ: ܘܣܵܗܸܕ݂ ܒܟ݂ܘܿܢ ܡܫܝܼܚܹܗ ܝܵܘܡܵܢܵܐ: ܕܠܵܐ ܐܸܫܟܲܚܬ̇ܘܿܢ ܒܐܝܼ̈ܕܲܝ ܡܸܕܸܡ. ܘܐܵܡܪܝܼܢ ܣܵܗܹܕ݂. 6: ܘܐܸܡܲܪ ܫܡܘܼܐܹܝܠ ܠܥܲܡܵܐ: ܡܵܪܝܵܐ ܗ̄ܘ̣ ܒܲܠܚܘܿܕ݂ ܐܲܠܵܗܵܐ: ܕܲܥܒܲܕ݂ ܠܡܘܼܫܹܐ ܘܠܐܲܗܪܘܿܢ: ܘܐܲܣܸܩ ܠܐܲܒ̣ܵـ̈ܗܵܬ̣ܲܢ ܡ̣ܢ ܐܲܪܥܵܐ ܕܡܸܨܪܹܝܢ. 7: ܩܘܼܡܘ ܗܵܫܵܐ ܘܐܹܕܘܼܢܟ݂ܘܿܢ ܩܕ݂ܵܡ ܡܵܪܝܵܐ: ܒܟ݂ܠܵܗ̇ ܙܲܕܝܼܩܘܼܬܹܗ ܕܲܥܒܲܕ݂ ܥܲܡܟ݂ܘܿܢ ܘܥܲܡ ܐܲܒ̣ܵܗܲܝ̈ܟ̇ܘܿܢ. 8: ܟܲܕ݂ ܥܲܠ ܝܲܥܩܘܿܒ̣ ܠܡܸܨܪܹܝܢ: ܘܨܲܠܝܼܘ ܐܲܒ̣ܵܗܲܝ̈ܟ̇ܘܿܢ ܩܕ݂ܵܡ ܡܵܪܝܵܐ. ܘܫܲܕܲܪ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ: ܘܐܲܣܸܩ ܠܐܲܒ̣ܗܲܝ̈ܟ̇ܘܿܢ ܡ̣ܢ ܐܲܪܥܑܵܐ ܕܡܸܨܪܹܝܢ: ܘܐܵܘܬܸܒ̣ ܐܸܢܘܿܢ ܒܐܲܬ̣ܪܵܐ ܗܵܢܵܐ. 9: ܘܲܛܥܵܘ ܠܡܵܪܝܵܐ ܐܲܠܵܗܗܘܿܢ. ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܣܝܼܣܪܵܐ ܪܲܒ ܚܲܝܠܵܐ ܕܚܵܨܘܿܪ: ܘܒ̣ܐܝܼܕ݂ܵܐ ܕܲܦܠܸܫ̈ܬܵܝܹܐ: ܘܒ̣ܐܝܼܕ݂ܵܐ ܕܡܲܠܟܵܐ ܕܡܘܼܐܵܒ̣. ܘܐܸܬ̣ܟܲܬ̇ܫܘ ܥܲܡܗܘܿܢ. 10: ܘܨܲܠܝܼܘ ܩܕ݂ܵܡ ܡܵܪܝܵܐ: ܘܐܸܡܲܪܘ: ܚܸܛܲܝܢ ܥܲܠ ܕܲܫܒܲܩ̄ܢ ܠܡܵܪܝܵܐ ܐܲܠܵܗܲܢ: ܘܲܦܠܲܚ̄ܢ ܠܒܲܥܠܵܐ ܘܲܠܓܸܢ̈ܝܵܬ̣ܵܐ: ܗܵܫܵܐ ܦܲܨܵܢ ܡ̣ܢ ܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܢ: ܘܢܸܦ̱ܠܚܵܟ݂. 11: ܘܫܲܕܲܪ ܡܵܪܝܵܐ ܠܲܕ݂ܒ̣ܘܿܪܵܐ: ܘܲܠܒ̣ܵܪܵܩ: ܘܲܠܓܕ݂ܥܘܿܢ ܘܲܠܢܲܦ̮ܬܲܚ: ܘܲܠܫܡܫܘܿܢ: ܘܦܲܨܝܼܟ݂ܘܿܢ ܡ̣ܢ ܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܟ̇ܘܿܢ ܕܡ̣ܢ ܚܕ݂ܵܪܲܝܟ̇ܘܿܢ: ܘܝܼܬܸܒ̣ܬ̇ܘܿܢ ܒܫܸܠܝܵܐ. 12: ܘܲܚܙܲܝܬ̇ܘܿܢ ܠܢܵܚܵܫ ܡܲܠܟܵܐ ܕܲܒ̣̈ܢܲܝ ܥܲܡܘܿܢ: ܕܐܸܬ̣ܵܐ ܥܠܲܝܟ̇ܘܿܢ: ܘܐܸܡܲܪܬ̇ܘܿܢ ܠܵܐ ܗܵܟܲܢܵܐ: ܐܸܠܵܐ ܡܲܠܟܵܐ ܥܠܲܝܢ: ܘܡܵܪܝܵܐ ܐܲܠܵܗܟ݂ܘܿܢ ܡܲܠܟ̇ܟ݂ܘܿܢ. 13: ܘܗܵܫܵܐ ܗܵܐ ܡܲܠܟܵܐ ܕܲܓ̣ܒܲܝܬ̇ܘܿܢ ܘܲܫܐܸܠܸܬ̇ܘܿܢ: ܗܵܐ ܝܲܗ̄ܒ̣ ܠܟ݂ܘܿܢ ܡܵܪܝܵܐ ܡܲܠܟܵܐ. 14: ܘܐܸܢ ܬܸܕ݂ܚ̄ܠܘܼܢ ܡ̣ܢ ܡܵܪܝܵܐ ܘܐܸܦ̱ܠܚܘܼܢܹܗ: ܘܬܸܫ̱ܡܥܘܿܢ ܒܩܵܠܹܗ ܘܠܵܐ ܬܡܲܪ̱ܡܪܘܼܢܹܗ: ܬܸܗܘܘܿܢ ܐܵܦ ܐܲܢ̄ܬ̇ܘܿܢ ܐܵܦ ܡܲܠܟ̇ܟ݂ܘܿܢ ܕܐܲܡܠܸܟ݂ ܥܠܲܝܟ̇ܘܿܢ: ܒܵܬܲܪ ܡܵܪܝܑܵ ܐܲܠܵܗܟ݂ܘܿܢ. 15: ܘܐܸܢ ܠܵܐ ܬܸܫܡܥܘܼܢ ܒܩܵܠܹܗ ܕܡܵܪܝܵܐ ܐܲܠܵܗܟ݂ܘܿܢ: ܘܬ̣ܡܲܪ̱ܡܪܘܼܢܹܗ: ܬܸܗܘܸܐ ܐܝܼܕܹܗ ܕܡܵܪܝܵܐ ܒܟ݂ܘܿܢ ܐܲܝܟ݂ ܕܲܗܘ̤ܵܬ̣ ܒܐܲܒ̣ܵܗܲܝ̈ܟ̇ܘܿܢ. 16: ܘܗܵܫܵܐ ܐܸܬ̇ܛܲܝܲܒ̣ܘ ܘܲܚܙܵܘ ܦܸܬ̣ܓ̣ܵܡܵܐ ܗܵܢܵܐ ܪܲܒܵܐ ܕܥܵܒܹܕ݂ ܡܵܪܝܵܐ ܥܠܲܝܟ̇ܘܿܢ. 17: ܗܵܐ ܚܨܵܕ݂ܵܐ ܗ̄ܙ̣ ܕܚܸܛܹ̈ܐ ܝܵܘܡܵܢܵܐ: ܐܸܩܪܸܐ ܠܡܵܪܝܵܐ ܘܢܸܬܸ̇ܠ ܩܵܠܵܐ ܘܡܸܛܪܵܐ. ܘܕܲܥܘ ܘܲܚܙܵܘ ܕܒ̣ܝܼܫܬ̇ܟ݂ܘܿܢ ܪܲܒܵܐ ܗ̄ܝܼ: ܕܲܫܐܸܠܬ̇ܘܿܢ ܠܟ݂ܘܿܢ ܡܲܠܟܵܐ. 18: ܗܵܝܕܹܝܢ ܩܪܵܐ ܫܡܘܼܐܹܝܠ ܠܡܵܪܝܑܵ: ܘܝܲܗ̄ܒ̣ ܡܵܪܝܵܐ ܩܵܠܵܐ ܘܡܸܛܪܵܐ ܒܐܲܬ̣ܪܵܐ ܗܵܘ̇. ܘܲܕ݂ܚܸܠܘ ܟܠܹܗ ܥܲܡܵܐ ܛܵܒ̣ ܡ̣ܢ ܡܵܪܝܵܐ ܘܡ̣ܢ ܫܡܘܼܐܹܝܠ. 19: ܘܐܸܡܲܪܘ ܟܠܹܗ ܥܲܡܵܐ ܠܲܫܡܘܼܐܹܝܠ: ܨܲܠܵܐ ܥܲܠ ܥܲܒ̣̈ܕܲܝܟ ܩܕ݂ܵܡ ܡܵܪܝܵܐ ܐܲܠܵܗܵܟ݂ ܘܠܵܐ ܢܡܘܼܬ̣: ܡܸܛܠ ܕܐܵܘܣܸܦ̄ܢ ܥܲܠ ܟܠܗܘܿܢ ܚܛܵܗܲܝ̈ܢ ܒܝܼܫܬܵܐ ܪܲܒ̇ܬ̣ܵܐ: ܕܲܫܐܸܠ̄ܢ ܠܲܢ ܡܲܠܟܵܐ. 20: ܘܐܸܡܲܪ ܫܡܘܼܐܹܝܠ ܠܥܲܡܵܐ ܠܵܐ ܬܸܕ݂ܚ̄ܠܘܼܢ: ܐܲܢ̄ܬ̇ܘܿܢ ܥܒܲܕܬ̇ܘܿܢ ܗܵܕܹܐ ܟܠܵܗ̇ ܒܝܼܫܬܵܐ. ܒܪܲܡ ܠܵܐ ܬܸܣܛܘܿܢ ܡ̣ܢ ܒܵܬ̣ܪܹܗ ܕܡܵܪܝܵܐ: ܐܸܠܵܐ ܦܘܼܠܚܘܼܗܝ ܠܡܵܪܝܵܐ ܒܟ݂ܠܹܗ ܠܸܒܟ݂ܘܿܢ. 21: ܘܠܵܐ ܬܸܣܛܘܿܢ ܒܵܬܲܪ ܣܪ̈ܝܼܩܵܬ̣ܵܐ: ܕܠܵܐ ܬܡܘܼܬ̣ܘܼܢ. ܘܠܵܐ ܡܦܲܨ̈ܝܵܢ ܠܟ݂ܘܿܢ ܡܸܛܠ ܕܲܣܪ̈ܝܼܩܵܬ̣ܵܐ ܐܸܢܹܝܢ. 22: ܡܸܛܠ ܕܠܵܐ ܫܵܒܹܩ ܡܵܪܝܵܐ ܠܥܲܡܹܗ ܡܸܛܠ ܫܡܹܗ ܪܲܒܵܐ: ܡܸܛܠ ܕܐܸܬ̇ܛܦܝܼܣ ܠܡܸܥܒܲܕ݂ܟ݂ܘܿܢ ܠܹܗ ܥܲܡܵܐ. 23: ܘܐܸܢܵܐ ܚܵܣ ܠܝܼ ܕܐܸܚܛܹܐ ܠܡܵܪܝܵܐ ܘܠܵܐ ܐܲܨܲܠܸܐ ܥܠܲܝܗܘܿܢ: ܘܐܲܠܸܦܟ݂ܘܿܢ ܐܘܼܪܚܵܐ ܛܵܒ̣ܬ̣ܵܐ ܘܲܬ̣ܪܝܼܨܬܵܐ. 24: ܐܸܠܵܐ ܕܚܲܠܘ ܠܡܵܪܝܵܐ: ܘܦܘܼܠܚܘܼܗܝ ܒܩܘܼܫܬܵܐ ܒܟ݂ܠܹܗ ܠܸܒ̇ܟ݂ܘܿܢ ܘܲܒ̣ܟ݂ܠܵܗ̇ ܢܲܦ̮ܫܟ݂ܘܿܢ: ܘܲܚܙܵܘ ܕܡܵܘܪܸܒ̣ ܥܲܡܟ݂ܘܿܢ. 25: ܘܐܸܢ ܡܲܒ̣ܐܵܫܘ ܬܲܒ̣ܐ̱ܫܘܼܢ: ܐܵܦ ܐܲܢ̄ܬ̇ܘܿܢ ܐܵܦ ܡܲܠܟ̇ܟ݂ܘܿܢ ܬܡܘܼܬ̣ܘܼܢ.

ܩܹܦܵܠܹܐܘܿܢ: ܝܓ.

1: ܘܟܲܕ݂ ܫܲܢ̄ܬܵܐ ܚܕ݂ܵܐ ܘܬܲܪܬܹܝܢ ܐܲܡܠܸܟ݂ ܫܵܐܘܿܠ ܒܡܲܠܟ̇ܘܼܬܹܗ ܥܲܠ ܝܼܣܪܵܝܹܠ. 2: ܓܲܒ̇ܝܼ ܠܹܗ ܫܵܐܘܿܠ ܬܠܵܬ̣ܵܐ ܐܲܠܦܝܼ̈ܢ ܓܲܒ̣ܪ̈ܝܼܢ ܡ̣ܢ ܝܼܣܪܵܝܹܠ. ܘܲܗܘ̤ܵܐ ܥܲܡ ܫܵܐܘܿܠ ܬܪܹܝܢ ܐܲܠܦܝܼ̈ܢ ܒܡܲܟ݂ܡܲܣ: ܘܲܒ̣ܛܘܼܪܵܐ ܕܒܹܝܬ̣ ܐܹܝܠ. ܘܐܵܠܹܦ ܗܘ̤ܵܘ ܥܲܡ ܝܘܿܢܵܬܲܢ ܒܪܹܗ ܒܪܵܡܬ̣ܵܐ ܕܒܸܢܝܵܡܹܝܢ: ܘܫܲܪܟܹ̇ܗ ܕܥܲܡܵܐ ܫܪܵܐ ܐܸܢܘܿܢ ܐ̄ܢܵܫ ܠܒܲܝܬܹ̇ܗ. 3: ܘܲܡܚܵܐ ܝܘܿܢܵܬ̣ܵܢ ܠܲܩܝܵܡܵܐ ܕܲܦܠܸܫܬܵܝܹ̈ܐ ܒܲܓ̣ܒܲܥ. ܘܲܫܡܲܥܘ ܦܠܸܫܬܵܝ̈ـܹܐ: ܘܫܵܐܘܿܠ ܩܪܵܐ ܒܫܝܼܦܘܿܪܵܐ ܒܟ݂ܠܵܗ̇ ܐܲܪܥܵܐ ܠܡܹܡܲܪ: ܢܸܫ̱ܡܥܘܼܢ ܥܸܒ̣ܪ̈ܵܝܵܐ ܘܟ݂ܠܹܗ ܝܼܣܪܵܝܹܠ. 4: ܕܲܡܚܵܐ ܫܵܐܘܿܠ ܠܲܩܝܵܡܵܐ ܕܲܦܠܸܫܬܵܝܹ̈ܐ: ܘܲܚܣܲܢ ܝܼܣܪܵܝܹܠ ܠܲܦܠܸܫܬܵܝܹ̈ܐ. ܘܐܸܬ̣ܟܲܢܲܫܘ ܥܲܡܵܐ ܒܵܬܲܪ ܫܵܐܘܿܠ ܠܓܲܠܓܵܠܵܐ. 5: ܘܲܦܠܸܫ̈ܬܵܝܹܐ ܐܸܬ̣ܟܲܢܲܫܘ ܠܡܸܬ̣ܟܲܬܲܫܘܼ ܥܲܡ ܝܼܣܪܵܝܹܠ: ܬܠܵܬ̣ܵܐ ܐܲܠܦ̈ܝܼܢ ܡܲܪ̈ܟ̇ܒ̣ܵܢ: ܘܸܫܬܵܐ ܐܲܠܦ̈ܝܼܢ ܦܲܪ̈ܫܝܼܢ. ܘܥܲܡܵܐ ܐܲܝܟ݂ ܚܵܠܵܐ ܕܥܲܠ ܣܸܦܬ̣ܝܲܡܵܐ ܣܘܿܓ̣ܵܐܐ ܕܛܵܒ̣: ܘܲܣܠܸܩܘ ܘܲܫܪܵܘ ܒܡܲܟ݂ܡܲܣ ܡ̣ܢ ܡܲܕ݂ܢ̱ܚܵܝܵܗ̇ ܕܒܹܝܬ̣ ܐܹܝܠ. 6: ܘܲܚܙܵܘ ܓܲܒ̣ܪܹ̈ܐ ܕܝܼܣܪܵܝܹܠ ܘܲܕ݂ܚܸܠܘ: ܘܐܸܬ̣ܛܲܫܝܼܘ ܠܗܘܿܢ ܒܲܡܥܲܪܹ̈ ܘܒܲܚ̈ܠܹܠܹܐ: ܘܒܲܫܩ̈ܝܼܦܹܐ ܘܲܒ̣ܦܲܥܪܹ̈ܐ: ܘܲܒ̣ܓ̣ܘܼ̈ܒܹ̇ܐ. 7: ܘܥܸܒ̣ܪ̈ܵܝܹܐ ܥܒܲܪܘ ܝܘܿܪܕܢܵܢ ܠܐܲܪܥܵܐ ܕܓ̣ܵܕ݂ ܘܲܕ݂ܓܸܠܥܵܕ݂. ܘܫܵܐܘܿܠ ܥܕܲܟ̇ܝܠ ܒܓ̣ܠܓܵܠܵܐ ܗ̄ܘ̣ܵܐ. ܘܟ݂ܠܹܗ ܥܲܡܵܐ ܥܲܡܹܗ. 8: ܘܦܵܫ ܫܲܒ̣ܥܵܐ ܝܵܘ̈ܡܝܼܢ ܠܙܲܒ̣ܢܵܐ ܕܲܫܡܘܼܐܹܝܠ. ܘܠܵܐ ܐܸܬ̣ܵܐ ܫܡܘܼܐܹܝܠ ܐܓ̣ܠܓܵܠܵܐ. ܘܐܸܬ̣ܒܲܕܲܪܘ ܥܲܡܵܐ ܡ̣ܢ ܠܘܵܬ̣ ܫܵܐܘܿܠ. 9: ܘܐܸܡܲܪ ܫܵܐܘܿܠ: ܩܲܪܸܒ̣ܘ ܠܝܼ ܥܠܵܬ̣ܵܐ. ܘܐܲܣܸܩ ܕܸܒ̣ܚܹ̈ܐ ܫܲܠܡܹ̈ܐ ܠܲܥܠܵܬ̣ܵܐ. 10: ܘܟܲܕ݂ ܫܲܠܸܡ ܠܡܲܣܵܩܘܼ ܥܠܵܬ̣ܵܐ: ܐܸܬ̣ܵܐ ܫܡܘܼܐܹܝܠ: ܘܲܢܦܲܩ ܫܵܐܘܿܠ ܠܐܘܼܪܥܹܗ̇ ܠܲܡܒܲܪܵܟ݂ܘܼܬܹܗ. 11: ܘܐܸܡܲܪ ܫܡܘܼܐܹܝܠ: ܡܵܢܵܐ ܥܒܲܕܲܬ̇. ܘܐܸܡܲܪ ܫܵܐܘܿܠ: ܚܙܹܝܬ̣ ܕܐܸܬ̣ܒܲܕܲܪ ܠܹܗ ܥܲܡܵܐ ܡܹܢܝ: ܘܐܲܢ̄ܬ̇ ܠܵܐ ܐܸܬܲܝܬ̇ ܠܙܲܒ̣ܢܵܐ ܕܝܵܘ̈ܡܵܬ̣ܵܐ: ܘܲܦܠܸܫ̈ܬܵܝܹܐ ܟܢܝܼܫܝܼܢ ܒܡܲܟ݂ܡܲܣ. 12: ܘܐܸܡܲܪܹܬ̣: ܕܲܠܡܵܐ ܢܸܚܬ̣ܘܼܢ ܦܠܸܫ̈ܬܵܝܹܐ ܥܠܲܝ ܠܓ̣ܠܓܵܠܵܐ: ܘܐܲܦܲܝ̈ ܡܵܪܝܵܐ ܠܵܐ ܚܙܹܝܬ̣: ܘܐܲܡܪ̱ܚܹܬ̣ ܘܐܲܣܩܹܬ̣ ܥܠܵܬ̣ܵܐ. 13: ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܐܲܣܟܸ̇ܠܬ̇ ܕܠܵܐ ܢܛܲܪܬ̇ ܦܘܼܩܕܵܢܹܗ ܕܡܵܪܝܵܐ ܕܦܲܩܕ݂ܵܟ݂. ܡܸܛܠ ܕܗܵܫܵܐ ܐܲܬ̣ܩܸܢ ܡܵܪܝܵܐ ܐܲܠܵܗܵܟ݂ ܡܲܠܟ̇ܘܼܬ̣ܵܟ݂ ܥܲܠ ܝܼܣܪܵܝܹܠ: ܘܐܸܡܲܪ ܕܢܲܬ̣ܩܢܵܟ݂ ܥܕܲܡܵܐ ܠܥܵܠܲܡ. 14: ܡܸܟܹܝܠ ܡܲܠܟ̇ܘܼܬ̣ܵܟ݂ ܠܵܐ ܬܩܘܼܡ: ܡܸܛܠ ܕܲܓ̣ܒ̣ܵܐ ܠܹܗ ܡܵܪܝܵܐ ܓܲܒ̣ܪܵܐ ܐܲܝܟ݂ ܠܸܒܹܗ: ܘܦܲܩܕܹܗ ܡܵܪܝܵܐ ܠܲܡܕܲܒܵܪܘܼ ܠܥܲܡܹܗ. ܡܸܛܠ ܕܠܵܐ ܢܛܲܪܬ̇ ܟܠ ܕܦܲܩܕ݂ܵܟ݂ ܡܵܪܝܵܐ ܐܲܠܵܗܵܟ݂. 15: ܘܩܵܡ ܫܡܘܼܐܹܝܠ ܘܲܣܠܸܩ ܡ̣ܢ ܓܲܠܓܵܠܵܐ ܠܪܵܡܬ̣ܵܐ ܕܒܸܢܝܵܡܹܝܢ: ܘܲܡܢܵܐ ܫܵܐܘܿܠ ܠܥܲܡܵܐ ܕܐܸܫܬ̇ܟܲܚ ܥܲܡܹܗ ܐܲܝܟ݂ ܫܸܬ̣ܡܵܐܐ ܓܲܒ̣ܪ̈ܝܼܢ. 16: ܘܫܵܐܘܿܠ ܘܝܘܿܢܵܬ̣ܵܢ ܒܪܹܗ: ܝܵܬ̣ܒ̇ܝܼܢ ܒ̇ܓܸܒܲܥܬ̣ܵܐ ܕܒܸܢܝܵܡܹܝܢ: ܘܲܦܠܸܫ̈ܬܵܝܹܬ ܫܪܹܝܢ ܒܡܲܟ݂ܡܲܣ. 17: ܘܲܢܦܲܩܘ ܡܚܲܒ̈ܠܵܢܹܐ ܡ̣ܢ ܡܲܫܪܝܼܬ̣ܵܐ ܕܲܦܠܸܫ̈ܬܵܝܹܐ ܬܠܵܬ̣ܵܐ ܪܹ̈ܫܝܼܢ: ܪܸܫܵܐ ܚܲܕ݂ ܡܸܢܗܘܿܢ ܐܵܙܹܠ ܠܐܘܼܪܚܵܐ ܕܥܵܦܲܪ ܥܲܠ ܐܲܪܥܵܐ ܕܲܫܓ̣ܘܼܐܹܝܠ. 18: ܘܪܹܫܵܐ ܐ̄ܚܪܹܢܵܐ ܐܵܙܹ̈ܠ ܠܐܘܼܪܚܵܐ ܕܒܹܝܬ̣ ܚܵܘܪܵܢ: ܘܪܹܫܵܐ ܐ̄ܚܪܹܢܵܐ ܦܵܢܹܐ ܠܐܘܼܪܚܵܐ ܕܲܬ̣ܚܘܼܡܵܐ ܕܚܵܐܲܪ ܠܢܲܚܠܵܐ ܕܨܸܒ̣ܥܘܿܢ ܘܲܠܡܲܕ݂ܒ̇ܪܵܐ. 19: ܘܐܘܼܡܵܢܵܐ ܠܵܐ ܐܸܫܟܲܚ ܠܟ݂ܠܵܗ̇ ܐܲܪܥܵܐ ܕܝܼܣܪܵܝܹܠ: ܡܸܛܠ ܕܐܸܡܲܪܘ ܦܠܸܫܬܵܝܹ̈ܐ ܕܠܵܐ ܢܸܥܒ̇ܕ݂ܘܼܢ ܥܸܒ̣ܪ̈ܵܝܹܐ ܣܲܝ̈ܦܹܐ ܘܡܘܿܪ̈ܵܢܝܵܬ̣ܵܐ. 20: ܘܲܢܚܬ̣ܘ ܟܠܹܗ ܝܼܣܪܵܝܹܠ ܡ̣ܢ ܠܘܵܬ̣ ܦܠܸܫ̈ܬܵܝܹܐ: ܠܡܸܠܛܲܫ ܐ̄ܢܵܫ ܡܲܓ̇ܠܹܗ: ܘܣܸܟ̇ܬܹܗ: ܘܟ݂ܘܼܠܒܹ̇ܗ: ܘܡܲܣܵܣܹܗ. 21: ܘܗܵܘܹܐ ܫܘܿܦܝܼܢܵܐ ܕܲܦܬܸܐ ܠܡܲܓ̇ܠܑܵ: ܘܲܠܣܸܟ̇ܬ̣ܵܐ: ܘܠܵܐܒ̣ܘܿܬ̣ܵܐ: ܘܲܠܟ݂ܘܼܠܒܵܐ: ܘܲܠܩܵܝܹܡܬ̣ܵܐ ܕܡܲܣܵܣܵܐ. 22: ܘܲܒ̣ܝܵܘܡܵܐ ܕܲܩܪܵܒ̣ܵܐ ܠܵܐ ܐܸܫܬ̇ܟܲܚ ܣܲܝܦܵܐ ܐܵܘ ܡܘܿܪܵܢܝܼܬ̣ܵܐ: ܒܐܝܼܕ݂ܵܐ ܕܟ݂ܠܹܗ ܥܲܡܵܐ ܕܥܲܡ ܫܵܐܘܿܠ: ܘܥܲܡ ܝܘܿܢܵܬ̣ܵܢ. ܘܐܸܫܬ̇ܟܲܚ ܠܫܵܐܘܿܠ ܘܲܠܝܘܿܢܵܬ̣ܵܢ ܒܪܹܗ. 23: ܘ̤ܲܦܲܩ ܩܝܵܡܵܐ ܕܲܦܠܸܫ̈ܬܵܝܹܐ. ܠܥܸܒ̣ܪܵܐ ܕܡܲܟ݂ܡܲܣ.

ܩܹܦܵܠܹܐܘܿܢ: ܝܕ.

1: ܘܲܗܘ̤ܵܐ ܝܵܘܡܵܐ: ܘܐܸܡܲܪ ܝܘܿܢܵܬ̣ܵܢ ܒܲܪ ܫܵܐܘܿܠ ܠܛܲܠܝܵܐ ܕܲܫܩܝܼܠ ܡܵܐ̈ܢܵܘܗܝ: ܬܵܐ ܢܸܥܒܲܪ ܠܲܩܝܵܡܵܐ ܕܲܦܠܸܫ̈ܬܵܝܹܐ ܠܥܸܒ̣ܪܵܐ ܕܲܠܗܲܠ. ܘܠܲܐܒ̣ܘܼܗܝ ܠܵܐ ܚܵܘܝܼ. 2: ܘܫܵܐܘܿܠ ܝܵܬܹܒ̣ ܒܣܵܘܦܵܗ̇ ܕܪܵܘܬ̣ܵܐ ܬܚܹܝܬ̣ ܪܘܼܡܵܢܵܐ ܕܲܒ̣ܓܸܒ̣ܥܘܿܢ: ܘܥܲܡܵܐ ܐܝܼܬ̣ ܗ̄ܘ̣ܵܐ ܥܲܡܹܗ ܐܲܝܟ݂ ܫܸܬܡܵܐܐ ܓܲܒ̣ܪ̈ܝܼܢ. 3: ܘܐܲܚܝܵܐ ܒܲܪ ܐܲܚܛܝܘܿܒ̣: ܐܲܚܘܼܗܝ ܕܝܘܼܟ݂ܵܒ̣ܵܪ ܒܲܪ ܦܝܼܢܚܸܣ ܒܲܪ ܥܹܠܝܼ ܟܵܗܢܹܗ ܕܡܵܪܝܵܐ ܕܲܒ̣ܫܝܼܠܘܿ: ܘܫܵܩܹܠ ܦܸܕ̇ܬ̣ܵܐ. ܘܥܲܡܵܐ ܠܵܐ ܝܼܕܲܥܘ ܕܐܸܙܲܠ ܝܘܿܢܵܬ̣ܵܢ ܠܒܹܝܬ̣ ܡܲܥܒܲܪܬܵܐ. 4: ܘܲܒ̣ܥܵܐ ܕܢܸܥܒܲܪ ܠܲܩܝܵܡܵܐ ܕܲܦܠܸܫ̈ܬܵܝܹܐ: ܘܫܸܢܵܐ ܕܟܹܐܦܵܐ ܡ̣ܢ ܥܸܒ̣ܪܵܐ ܡܸܟܵܐ: ܘܫܸܢܵܐ ܐ̄ܚܪܹܬ̣ܵܐ ܕܟܹܐܦܵܐ ܡܸܟܵܐ. ܫܡܵܗ̇ ܕܲܚܕ݂ܵܐ ܒܵܨܘܿܨ: ܘܲܫܡܵܗ̇ ܕܐܲܚܪܹܬ̣ܵܐ ܣܝܼܥܵܐ. 5: ܫܸܢܵܐ ܚܕ݂ܵܐ ܢܵܓ̣ܕܵܐ ܡ̣ܢ ܓܲܪܒ̇ܝܵܐ ܠܘܼܩܒܲܠ ܡܲܟ݂ܡܲܣ: ܘܐܲܚܪܹܬ̣ܵܐ ܡ̣ܢ ܬܲܝܡܢܵܐ ܠܘܼܩܒܲܠ ܓܒܲܥ. 6: ܘܐܸܡܲܪ ܝܘܿܢܵܬ̣ܵܢ ܠܛܲܠܝܵܐ ܕܲܫܩܝܼܠ ܡܵܐܢܵܘ̈ܗܝ: ܬܵܐ ܢܸܥܒܲܪ ܠܲܩܝܵܡܵܐ ܕܥܘܼܪ̈ܠܹܐ ܗܵܠܹܝܢ: ܛܵܟ݂ ܢܥܲܕܪܲܢ ܡܵܪܝܵܐ: ܡܸܛܠ ܕܠܲܝܬ̇ ܟܵܠܝܼܬ̣ܵܐ ܠܡܵܪܝܵܐ: ܠܡܸܦܪܲܩ ܒܣܲܓ̇ܝܼ ܐܵܘ ܒܲܙܥܘܿܪ. 7: ܘܐܸܡܲܪ ܠܹܗ ܫܵܩܹܠ ܡܵܐܢܵܘ̈ܗܝ: ܥܒܸܕ݂ ܟܠ ܕܲܒ̣ܠܸܒܵܟ݂: ܘܲܣܛܝܼ ܙܸܠ: ܗܵܐ ܐܸܢܵܐ ܥܲܡܵܟ݂: ܟܠ ܕܲܒ̣ܠܸܒܵܟ݂ ܥܒܸܕ݂. 8: ܘܐܸܡܲܪ ܠܹܗ ܝܘܿܢܵܬ̣ܵܢ: ܗܵܐ ܚܢܲܢ ܥܵܒ̣ܪܝܼܢܲܢ ܥܲܠ ܓܲܒ̣ܪܹ̈ܐ: ܘܢܸܬ̣ܓ̇ܠܸܐ ܠܗܘܿܢ. 9: ܐܸܢ ܗܵܟܲܢܵܐ ܢܹܐܡܪܘܿܢ ܠܲܢ ܫܬ̣ܘܿܩܘ ܥܲܕ݂ ܢܸܡܛܸܐ ܠܘܵܬ̣ܟ݂ܘܿܢ: ܢܩܘܼܡ ܒܕ݂ܘܼܟ݂ܬܲܢ: ܘܠܵܐ ܢܸܣܲܩ ܥܠܲܝܗܘܿܢ.

10: ܘܐܸܢ ܗܵܟܲܢܵܐ ܢܹܐܡܪܘܼܢ ܠܲܢ ܣܲܩܘ ܠܘܵܬܲܢ. ܢܸܣܲܩ: ܡܸܛܠ ܕܐܲܫܠܸܡ ܐܸܢܘܿܢ ܡܵܪܝܵܐ ܐܲܠܵܗܲܢ ܒܐܝܼܕܲܢ: ܗܵܕܹܐ ܠܲܢ ܐܵܬ̤ܵܐ. 11: ܘܐܸܬ̣ܓ̇ܠܝܼܘ ܬܪ̈ܲܝܗܘܿܢ ܥܲܠ ܩܝܵܡܵܐ ܕܲܦܠܸܫ̈ܬܵܝܹܐ: ܘܐܸܡܲܪܘ ܦܠܸܫ̈ܬܵܝܹܐ: ܗܵܐ ܥܸܒ̣ܪ̈ܝܹܐ ܢܵܦܩܝܼܢ ܡ̣ܢ ܚ̈ܠܹܠܹܐ ܕܐܸܬ̇ܛܲܫܝܼܘ ܬܲܡܵܢ. 12: ܘܲܥܢܵܘ ܐ̄ܢܵܫܲܝ̈ ܩܝܵܡܵܐ ܠܝܘܿܢܵܬ̣ܵܢ ܘܲܠܫܵܩܹܠ ܡܵܐܢܵܘ̈ܗܝ ܘܐܸܡܲܪܘ: ܣܲܩܘ ܠܘܵܬܲܢ ܘܢܵܘܕܲܥܟ݂ܘܿܢ ܦܸܬ̣ܓ̣ܵܡܵܐ. ܘܐܸܡܲܪ ܝܘܿܢܵܬ̣ܵܢ ܠܫܵܩܹܠ ܡܵܐܢܵܘ̈ܗܝ: ܣܲܩ ܒܵܬܲܪܝ: ܡܸܛܠ ܕܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕ݂ܵܐ ܕܝܼܣܪܵܝܹܠ. 13: ܘܲܣܠܸܩ ܝܘܿܢܵܬ̣ܵܢ ܥܲܠ ܐܝܼܕ݂ܵܘ̈ܗܝ ܘܥܲܠ ܪܸ̈ܓ̣ܠܵܘܗܝ: ܘܫܵܩܹܠ ܡܵܐܢܵܘ̈ܗܝ ܒܵܬ̣ܪܹܗ. ܘܲܢܦܲܠ ܩܝܵܡܵܐ ܕܲܦܠܸܫ̈ܬܵܝܹܐ ܩܕ݂ܵܡ ܝܘܿܢܵܬ̣ܵܢ: ܘܫܵܩܹܠ ܡܵܐܢܵܘ̈ܗܝ ܡܩܲܛܸܠ ܗ̄ܘ̣ܵܐ ܒܵܬ̣ܪܹܗ. 14: ܘܲܗܘ̤ܵܬ̣ ܡܚܘܿܬ̣ܵܐ ܩܲܕ݂ܡܵܝܬܵܐ ܕܲܡܚܵܐ ܝܘܿܢܵܬܲܢ ܘܫܵܩܹܠ ܡܵܐܢܵܘ̈ܗܝ: ܐܲܝܟ݂ ܥܸܣܪܝܼܢ ܓܲܒ̣ܪ̈ܝܼܢ: ܐܲܝܟ݂ ܦܵܣ̈ܘܿܠܹܐ ܘܐܲܝܟ݂ ܕܲܒ̣ܪ̈ܲܝ ܦܲܕܵܢܹ̈ܐ ܒܚܲܩܠܵܐ. 15: ܘܲܗܘ̤ܵܬ̣ ܙܵܘܥܬ̣ܵܐ ܡ̣ܢ ܡܲܫܪܝܼܬ̣ܵܐ ܕܲܒ̣ܚܲܩܠܵܐ: ܘܲܒ̣ܟ݂ܠܹܗ ܥܲܡܵܐ ܕܩܵܐܹܡ. ܘܲܡܚܲـ̈ܒ̇ܠܵܢܹܐ ܙܵܥܘ ܐܵܦ ܗܸܢܘܿܢ: ܘܙܵܥܲܬ̤ ܐܲܪܥܵܐ. ܘܲܗܘ̤ܵܬ̣ ܥܠܲܝܗܘܿܢ ܕܸܚܠܬܹܗ ܕܡܵܪܝܵܐ. 16: ܘܲܚܙܵܘ ܕܵܘܩܹ̈ܐ ܕܫܵܐܘܿܠ ܕܒܲܓ̣ܥܬ̣ܵܐ ܕܒܸܢܝܵܡܹܝܢ. ܘܗܵܐ ܚܲܝܠܵܐ ܕܲܦܠܸܫ̈ܬܵܝܹܐ ܙܵܥ ܘܐܸܙܲܠ ܘܐܸܬ̇ܬ̇ܒܲܪ. 17: ܘܐܸܡܲܪ ܫܵܐܘܿܠ ܠܥܲܡܵܐ ܕܥܲܡܹܗ: ܦܩܘܿܕ݂ܘ ܘܲܚܙܵܘ ܡܲܢܘܼ ܐܸܙܲܠ ܡܸܢܲܢ. ܘܲܦܩܲܕ݂ܘ ܘܲܚܙܵܘ: ܘܗܵܐ ܠܲܝܬ̇ ܝܘܿܢܵܬ̣ܵܢ ܘܫܵܩܹܠ ܡܵܐܢܵܘ̈ܗܝ. 18: ܘܐܸܡܲܪ ܫܵܐܘܿܠ ܠܐܲܚܝܼܵܐ: ܩܲܪܒ̣ ܐܵܪܘܿܢܹܗ ܕܐܲܠܵܗܵܐ. ܡܸܛܠ ܕܬܲܡܵܢ ܗ̄ܘ̣ܵܐ ܐܵܪܘܿܢܹܗ ܕܡܵܪܝܵܐ: ܒܝܵܘܡܵܐ ܗܵܘ̇ ܥܲܡ ܒ̈ܢܲܝ ܝܼܣܪܵܝܹܠ. 19: ܘܗܘ̤ܵܐ ܕܟܲܕ݂ ܐܸܡܲܪ ܫܵܐܘܿܠ ܠܟ݂ܵܗܢܵܐ: ܚܲܝܠܵܐ ܕܲܒ̣ܡܲܫܪܝܼܬ̣ܵܐ ܕܲܦܠܸܫ̈ܬܵܝܹܐ ܐܸܙܲܠ ܣܘܿܓ̣ܵܐܐ. ܘܐܸܡܲܪ ܫܵܐܘܿܠ ܠܟ݂ܵܗܢܵܐ ܟܢܘܿܫ ܐܝܼܕ݂ܵܟ݂. 20: ܘܲܩܥܵܐ ܫܵܐܘܿܠ ܘܟ݂ܠܹܗ ܥܲܡܵܐ ܕܥܲܡܹܗ: ܘܐܸܬ̣ܵܐܘ ܥܕܲܡܵܐ ܠܲܩܪܵܒ̣ܵܐ: ܘܗܵܐ ܥܘ̤ܬ̣ ܬܲܡܵܢ ܚܲܪܒܹ̇ܗ ܕܓܲܒ̣ܪܵܐ ܒܚܲܒ̣ܪܹܗ: ܫܓ̣ܝܼܫܬܵܐ ܪܲܒ̇ܬ̣ܵܐ ܕܛܵܒ̣. 21: ܥܸܒ̣ܪ̈ܵܝܹܐ ܘܲܦܠܸܫ̈ܬܵܝܹܐ: ܐܲܝܟ݂ ܕܐܸܬ̣ܡܵܠܝ ܘܐܲܝܟ݂ ܕܡ̣ܢ ܡܢܵܬ̣ܡܵܠܝ. ܘܲܣܠܸܩܘ ܥܲܡܗܘܿܢ ܠܡܲܫܪܝܼܬ̣ܵܐ: ܘܲܚܕ݂ܝܼܪܝܼܢ ܐܵܦ ܗܸܢܘܿܢ ܠܡܸܗܘܵܐ ܥܲܡ ܒ̈ܢܲܝ ܝܼܣܪܵܝܹܠ: ܘܥܲܡ ܫܵܐܘܿܠ ܘܥܲܡ ܝܘܿܢܵܬ̣ܵܢ. 22: ܘܟ݂ܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ ܕܲܡܛܲܫܹܝܢ ܒܛܘܼܪܵܐ ܕܐܲܦܪܹܝܡ: ܫܡܲܥܘ ܕܲܥܪܲܩܘ ܦܠܸܫ̈ܬܵܝܹܐ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ: ܘܐܸܙܕܲܝܲܢܘ ܐܵܦ ܗܸܢܘܿܢ ܒܵܬܲܪܗܘܿܢ ܠܲܩܪܵܒ̣ܵܐ. 23: ܘܲܦܪܲܩ ܡܵܪܝܵܐ ܠܝܼܣܪܵܝܹܠ ܒܝܵܘܡܵܐ ܗܵܘ̇. ܘܲܩܪܵܒ̣ܵܐ ܥܒܲܪ ܠܗܘܿܢ ܒܹܝܬ̣ ܐܘܿܢ ܠܓܲܒ̣ܪܹ̈ܐ ܕܝܼܣܪܵܝܹܠ. 24: ܘܲܩܪܒ̣ ܫܵܐܘܿܠ ܒܝܵܘܡܵܐ ܗܵܘ̇ ܘܐܸܡܲܪ ܠܥܲܡܵܐ: ܠܝܼܛ ܗ̄ܘ̣ ܓܲܒ̣ܪܵܐ ܕܢܹܐܟ݂ܘܿܠ ܠܲܚܡܵܐ ܥܕܲܡܵܐ ܠܪܲܡܫܵܐ: ܥܕܲܡܵܐ ܕܐܸܬ̣ܦܪܲܥ ܡ̣ܢ ܒܥܸܠܕܒ̣ܵܒܲܝ̈. ܘܠܵܐ ܛܥܸܡܘ ܟܠܹܗ ܥܲܡܵܐ ܠܲܚܡܵܐ. 25: ܘܐܸܙܲܠܘ ܒܟ݂ܠܵܗ̇ ܐܲܪܥܵܐ: ܘܥܲܠܘ ܒܥܵܒ̣ܵܐ. ܘܗܵܐ ܕܸܒ̣ܫܵܐ ܒܥܵܒ̣ܵܐ ܥܲܠ ܐܲܦܲܝ̈ ܚܲܩܠܵܐ: ܘܥܲܠܘ ܥܲܡܵܐ ܒܥܵܒ̣ܵܐ. ܘܪܵܕܹܐ ܗ̄ܘ̣ܵܐ ܕܸܒ̣ܫܵܐ. 26: ܘܠܲܝܬ̇ ܕܡܵܛܘܫܸܛ ܐܝܼܕܹܗ ܠܦܘܼܡܹܗ: ܡܸܛܠ ܕܲܕ݂ܚܸܠܘ ܥܲܡܵܐ ܡ̣ܢ ܡܵܘܡܵܬ̣ܵܐ. 27: ܘܝܘܿܢܵܬ̣ܵܢ ܠܵܐ ܫܸܡܲܥ ܟܲܕ݂ ܐܵܘܡܝܼ ܐܲܒ̣ܘܼܗܝ ܠܥܲܡܵܐ: ܘܐܵܘܫܸܛ ܗ̤ܘ ܒܪܹܫ ܚܘܼܛܪܵܐ ܕܒ̣ܐܝܼܕܹܗ: ܘܛܲܡܫܹܗ ܒܟܲܟܵܪܝܼܬ̣ܵܐ ܕܕܸܒ̣ܫܵܐ: ܘܐܲܗܦܸܟ݂ ܐܝܼܕܹܗ ܠܦܘܼܡܹܗ: ܘܲܢܗܲܪ ܥܲܝܢܵܘ̈ܗܝ. 28: ܘܲܥܢܵܐ ܓܲܒ̣ܪܵܐ ܥܲܡܵܐ ܘܐܸܡܲܪ ܠܝܘܿܢܵܬ̣ܵܢ: ܡܵܘܡܵܝܘܼ ܐܵܘܡܝܼ ܐܲܒ̣ܘܼܟ݂ ܠܥܲܡܵܐ ܘܐܸܡܲܪ: ܠܝܼܛ ܗ̄ܘ̣ ܓܲܒ̣ܪܵܐ ܕܢܹܟ݂ܘܿܠ ܠܲܚܡܵܐ ܝܵܘܡܵܢܵܐ: ܘܐܸܬ̇ܛܲܪܲܦ ܥܲܡܵܐ. 29: ܘܐܸܡܲܪ ܝܘܿܢܵܬ̣ܵܢ: ܕܲܠܚܵܗ̇ ܐܵܒ̣ܝ ܠܐܲܪܥܵܐ: ܚܙܵܘ ܕܲܢܗܲܪ ܥܲܝܢܲܝ̈ ܕܛܸܥܡܹܬ̣ ܩܲܠܝܼܠ ܡ̣ܢ ܕܸܒ̣ܫܵܐ ܗܵܢܵܐ. 30: ܘܐܵܦ ܡܸܛܠ ܕܠܵܐ ܐܸܟܲܠ ܥܲܡܵܐ ܝܵܘܡܵܢܵܐ ܡ̣ܢ ܒܸܙܬ̣ܵܐ ܕܲܒ̣ܥܸܠܕܒ̣ܵܒ̣ܵܘ̈ܗܝ ܕܐܸܫܟܲܚ: ܡܸܛܠ ܗܵܘ̇ ܠܵܐ ܣܲܓܝܼܐܵܐ ܡܚܘܿܬ̣ܵܐ ܒܲܦܠܸܫ̈ܬܵܝܹܐ. 31: ܘܲܚܪܲܒ̣̄ܢ ܝܵܘܡܵܢܵܐ ܒܲܦܠܸܫ̈ܬܵܝܹܐ ܡ̣ܢ ܡܲܟ݂ܡܲܣ ܐܲܝܠܘܿܢ. ܘܐܸܬ̣ܛܲܪܲܦ ܥܲܡܵܐ ܛܵܒ̣. 32: ܘܐܸܬ̣ܠܲܥܲܒ̣ܘ ܥܲܡܵܐ ܥܲܠ ܒܸܙܬ̣ܵܐ: ܘܲܕ݂ܒܲܪܘ ܥܵـ̈ܢܵܐ: ܘܬ̣ܵܘܪܹ̈ܐ: ܘܥܸܓ̣̈ܠܹܐ: ܘܲܢܟܲܣܘ ܥܲܠ ܐܲܪܥܵܐ: ܘܐܸܟܲܠܘ ܥܲܡܵܐ ܥܲܠ ܕܡܵܐ. 33: ܘܚܵܘܝܼܘ ܠܫܵܐܘܿܠ ܘܐܸܡܲܪܘ ܠܹܗ: ܗܵܐ ܥܲܡܵܐ ܚܛܵܘ ܠܡܵܪܝܵܐ ܘܐܵܟ݂ܠܝܼܢ ܥܲܠ ܕܡܵܐ: ܘܐܸܡܲܪ ܫܵܐܘܿܠ ܐܲܥܠܝܼܬ̇ܘܿܢ: ܓܙܘܿܪܘ ܠܝܼ ܝܵܘܡܵܢܵܐ ܟܹܐܦܵܐ ܪܲܒ̇ܬ̣ܵܐ. 34: ܘܐܸܡܲܪ ܫܵܐܘܿܠ: ܐܸܬ̣ܟܲܪܟ̇ܘ ܒܥܲܡܵܐ ܘܐܸܡܲܪܘ ܠܗܘܿܢ: ܩܲܕܒ̣ܘ ܓܒܲܪ ܬܵܘܪܹܗ: ܘܲܓ̣ܒܲܪ ܥܸܪܒܹ̇ܐ. ܘܟ݂ܘܿܣܘ ܗܵܪܟܵܐ. ܘܠܵܐ ܬܸܚܛܘܿܢ ܠܡܵܪܝܵܐ: ܘܬܹܟ݂ܠܘܼܢ ܥܲܠ ܕܡܵܐ. ܘܩܲܪܒ̣ܘ ܟܠܹܗ ܥܲܡܵܐ ܓܒܲܪ ܬܵܘܪܹܗ ܒܐܝܼܕܹܗ ܒܠܸܠܝܵܐ: ܘܢܲܟܲܣܘ ܬܲܡܵܢ. 35: ܘܲܒ̣ܢܵܐ ܬܲܡܵܢ ܫܵܐܘܿܠ ܡܲܕ݂ܒ̇ܚܵܐ ܠܡܵܪܝܵܐ: ܘܫܸܪܝܼ ܠܡܸܒ̣ܢܵܐ ܡܲܕ݂ܒ̇ܚܵܐ ܠܡܵܪܝܵܐ. 36: ܘܐܸܡܲܪ ܫܵܐܘܿܠ: ܢܸܚܘܿܬ̣ ܒܵܬܲܪ ܦܠܸܫ̈ܬܵܝܹܐ: ܘܢܸܒ̇ܘܿܙ ܒܗܘܿܢ: ܥܕܲܡܵܐ ܕܢܵܗܲܪ ܨܲܦܪܵܐ: ܘܠܵܐ ܢܸܫܒ̇ܘܿܩ ܡܸܢܗܘܿܢ ܓܒܲܪ. ܘܐܸܡܲܪܘ: ܟܠ ܕܫܲܦܝܼܪ ܒܥܲܝܢܲܝ̈ܟ ܢܸܥܒܸ̇ܕ݂. 37: ܘܐܸܡܲܪ ܫܵܐܘܿܠ ܠܐܲܠܵܗܵܐ: ܐܸܚܘܿܬ̣ ܒܵܬܲܪ ܦܠܸܫ̈ܬܵܝܹܐ: ܡܲܫܠܸܡ ܠܗܘܿܢ ܒܐܝܼܕ݂ܵܐ ܕܝܼܣܪܵܝܹܠ. ܘܠܵܐ ܥܢܵܝܗܝ ܡܵܪܝܵܐ ܒܝܵܘܡܵܐ ܗܵܘ̇. 38: ܘܐܸܡܲܪ ܫܵܐܘܿܠ: ܩܲܪܸܒ̣ܘ ܠܝܼ ܠܗܵܪܟܵܐ ܠܟ݂ܠܗܹܝܢ ܫܲܪ̈ܒ̣ܵܬܹܗ ܕܥܲܡܵܐ. ܘܕܲܥܘ ܘܲܚܙܵܘ ܒܡܵܢܵܐ ܗܘ̤ܵܬ̣ ܚܛܝܼܬ̣ܵܐ ܗܵܕܹܐ ܝܵܘܡܵܢܵܐ. 39: ܡܸܛܠ ܕܚܲܝ ܗ̄ܘ̣ ܡܵܪܝܵܐ ܕܲܦܪܲܩ ܠܝܼܣܪܵܝܹܠ: ܕܐܸܢ ܐܝܼܬ̣ ܒܝܘܿܢܵܬ̣ܵܢ ܒܹܪܝ: ܐܸܠܵܐ ܡܡܵܬ̣ ܢܡܘܼܬ̣. ܘܠܲܝܬ̇ ܕܲܥܢܵܝܗܝ ܡ̣ܢ ܟܠܹܗ ܥܲܡܵܐ. 40: ܘܐܸܡܲܪ ܠܟ݂ܠܹܗ ܝܼܣܪܵܝܹܠ: ܐܲܢ̄ܬ̇ܘܿܢ ܗܘ̤ܵܘ ܒܣܸܛܪܵܐ ܚܲܕ݂: ܘܐܸܢܵܐ ܘܝܘܿܢܵܬ̣ܵܢ ܒܹܪܝ ܢܸܗܘܸܐ ܒܣܸܛܪܵܐ ܚܲܕ݂. ܘܐܸܡܲܪ ܥܲܡܵܐ ܠܫܵܐܘܿܠ: ܟܠ ܕܫܲܦܝܼܪ ܒܥܲܝܢܲܝ̈ܟ ܠܡܸܥܒܲܕ݂ ܥܒܸܕ݂. 41: ܘܐܸܡܲܪ ܫܵܐܘܿܠ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܲܒ̣ ܫܲܠܡܘܼܬ̣ܵܐ. ܘܐܸܬ̇ܬ̇ܚܸܕ݂ ܫܵܐܘܿܠ ܘܝܘܿܢܵܬ̣ܵܢ: ܘܲܢܦܲܩܘ ܥܲܡܵܐ. 42: ܘܐܸܡܲܪ ܫܵܐܘܿܠ: ܐܲܪܡܵܘ ܒܲܝܢܲܝ ܘܲܠܝܘܿܢܵܬ̣ܵܢ ܒܹܪܝ: ܘܐܸܬ̇ܬ̇ܚܸܕ݂ ܝܘܿܢܵܬ̣ܵܢ. 43: ܘܐܸܡܲܪ ܫܵܐܘܿܠ ܠܝܘܿܢܵܬ̣ܵܢ: ܚܵܘܵܢܝ ܡܵܢܵܐ ܥܒܲܕܲܬ̇. ܘܚܵܘܝܹܗ ܝܘܿܢܵܬ̣ܵܢ: ܘܐܸܡܲܪ ܠܹܗ: ܒܪܹܫ ܚܘܼܛܪܵܐ ܕܒ̣ܐܝܼܕ݂ܝ ܩܲܠܝܼܠ ܛܸܥܡܹ̇ܬ̣ ܕܸܒ̣ܫܵܐ: ܡܸܛܠ ܗܵܘ̇ ܡܵܐܬ̣ ܐ̄ܢܵܐ. 44: ܘܐܸܡܲܪ ܫܵܐܘܿܠ: ܗܵܟܲܢܵܐ ܢܸܥܒܸ̇ܕ݂ ܠܝܼ ܐܲܠܵܗܵܐ ܘܗܵܟܲܢܵܐ ܢܵܘܣܸܦ ܠܝܼ. ܕܲܡܡܵܬ̣ ܬܡܘܼܬ̣ ܝܘܿܢܵܬ̣ܵܢ. 45: ܘܐܸܡܪܘ ܥܲܡܵܐ ܠܫܵܐܘܿܠ: ܝܘܿܢܵܬ̣ܵܢ ܢܡܘܼܬ̣ ܕܲܥܒܲܕ݂ ܦܘܼܪܩܵܢܵܐ ܠܝܼܣܪܵܝܹܠ: ܚܵܣ: ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢ ܢܸܦܠ ܡ̣ܢ ܣܲܥܪܵܐ ܕܪܹܫܹܗ ܥܲܠ ܐܲܪܥܵܐ: ܡܸܛܠ ܕܥܲܡܹܗ ܕܐܲܠܵܗܵܐ ܦܪܲܩ ܝܵܘܡܵܢܵܐ. ܘܦܲܨܝܹܗ ܥܲܡܵܐ ܠܝܘܿܢܵܬ̣ܵܢ. ܘܠܵܐ ܡܝܼܬ̣. 46: ܘܲܗܦܲܟ݂ ܫܵܐܘܿܠ ܡ̣ܢ ܒܵܬܲܪ ܦܠܸܫ̈ܬܵܝܹܐ. ܘܲܦܠܸܫ̈ܬܵܝܹܐ ܐܸܙܲܠܘ ܠܐܲܬ̣ܪ̱ܗܘܿܢ. 47: ܘܐܸܚܲܕ݂ ܫܵܐܘܿܠ ܡܲܠܟ̇ܘܼܬ̣ܵܐ ܕܝܼܣܪܵܝܹܠ: ܘܐܸܬ̣ܟܲܬ̇ܫ ܒܲܚܕ݂ܵܪ̈ܵܘܗܝ: ܘܲܒ̣ܟ݂ܠܗܘܿܢ ܒܥܸܠܕ̇ܒ̣ܵܒ̣ܵܘ̈ܗܝ: ܒܡܘܼܐܵܒ̣ ܘܲܒ̣ܒ̣̈ܢܲܝ ܥܲܡܘܿܢ: ܘܒܲܐܕ݂ܘܿܡ: ܘܲܒ̣ܡܲܠܟ̇ܘܼܬ̣ܵܐ ܕܨܘܿܒ̣ܵܐ: ܘܒܲܦܠܸܫ̈ܬܵܝܹܐ. ܘܠܲܐܝܟܵܐ ܕܡܸܬ̣ܦܢܸܐ ܗ̄ܘ̣ܵܐ: ܙܵܟܹ̇ܐ ܗ̄ܘ̣ܵܐ.

48: ܘܟܲܢܸܫ ܚܲܝܠܵܐ: ܘܲܚܪܲܒ̣ ܠܲܥܡܵܠܹܝܩ: ܘܦܲܨܝܼ ܠܝܼܣܪܵܝܹܠ ܡ̣ܢ ܐܝܼܕ݂ܵܐ ܕܒ̣ܵܙܘܿܙܵܘ̈ܗܝ. 49: ܘܗܵܠܹܝܢ ܗ̄ܘ̣ܵܘ ܒܢܵܘ̈ܗܝ ܕܫܵܐܘܿܠ: ܝܘܿܢܵܬ̣ܵܢ: ܘܝܲܫܘܝܼ: ܘܡܲܠܟ̇ܝܼܫܘܿܥ: ܘܐܲܫܒܵܫܘܿܠ. ܘܲܫܡܵܗ̈ܐ ܕܬܲܪܬܹܝܢ ܒ̈ܢܵܬܹܗ: ܫܡܵܗ̇ ܕܩܲܫܝܼܫܬܵܐ ܢܵܕ݂ܵܒ̣: ܘܲܫܡܵܗ̇ ܕܲܙܥܘܿܪܬܵܐ ܡܲܠܟܸ̇ܠ. 50: ܘܲܫܡܵܗ̇ ܕܐܲܢ̄ܬ̇ܬ̣ܗ ܕܫܵܐܘܿܠ ܐܲܚܝܼܢܥܵܡ ܒܲܪܬ̣ ܐܲܚܝܼܡܥܵܨ. ܘܫܸܡ ܪܲܒ̇ ܚܲܝܠܹܗ: ܐܲܒ̣ܢܝܼܪ ܒܲܪ ܢܝܼܪ ܕܵܕܹܗ ܕܫܵܐܘܿܠ. 51: ܘܩܝܼܫ ܐܲܒ̣ܘܼܗܝ ܕܫܵܐܘܿܠ: ܘܢܝܼܪ ܒܲܪ ܐܲܒ̣ܝܼܠ ܐܲܒ̣ܘܼܗܝ ܕܐܲܒ̣ܢܝܼܪ. 52: ܘܲܗܘ̤ܵܐ ܩܪܵܒ̣ܵܐ ܥܲܫܝܼܢܵܐ ܥܲܡ ܦܠܸܫ̈ܬܵܝܹܐ: ܟܠܗܘܿܢ ܝܵܘ̈ܡܵܬܹܗ ܕܫܵܐܘܿܠ: ܘܚܵܙܹ̈ܐ ܗ̄ܘ̣ܵܐ ܫܵܐܘܿܠ ܟܠ ܓܲܒ̣ܪܵܐ ܕܓܲܢ̄ܒܵܪ: ܘܟ݂ܠ ܓܲܒ̣ܪܵܐ ܕܐܝܼܬ̣ ܒܹܗ ܚܲܝܠܵܐ: ܘܟ݂ܵܢܹܫ ܗ̄ܘ̣ܵܐ ܠܹܗ ܠܘܵܬܹܗ.

ܩܹܦܵܠܹܐܘܿܢ: ܝܗ.

1: ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܠܝܼ ܫܲܕܲܪ ܡܵܪܝܵܐ ܠܡܸܡ̄ܫܚܵܟ݂: ܕܬܲܡܠܸܟ݂ ܥܲܠ ܝܼܣܪܵܝܹܠ ܥܲܡܹܗ. ܗܵܫܵܐ ܫܡܲܥ ܠܩܵܠ ܦܸܬ̣ܓ̣ܵܡܵܘ̈ܗܝ ܕܡܵܪܝܵܐ. 2: ܗܵܟܲܢܵܐ ܐܵܡܲܪ ܡܵܪܝܵܐ ܨܒ̣ܵܐܘܼܬ̣: ܕܟ݂ܝܼܪ ܬ̄ܢܵܐ ܟܠܡܸܕܸܡ ܕܲܥܒܲܕ݂ ܥܡܵܠܹܝܩ ܠܝܼܣܪܵܝܹܠ ܒܐܘܼܪܚܵܐ: ܟܲܕ݂ ܣܵܠܩܝܼܢ ܗ̄ܘ̣ܵܘ ܡ̣ܢ ܡܸܨܪܹܝܢ. 3: ܗܵܫܵܐ ܙܸܠ ܚܪܘܿܒ̣ ܠܲܥܡܵܠܹܝܩ: ܘܐܵܘܒܸܕ݂ ܠܟ݂ܠ ܕܐܝܼܬ̣ ܠܗܘܿܢ: ܘܠܵܐ ܬܚܘܼܣ ܥܠܝܗܘܿܢ: ܘܩܲܛܸܠ ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܡ̣ܢ ܥܠܲܝܡܹ̈ܐ ܘܲܥܕܲܡܵܐ ܠܝܲܠܘܼܕܹ̈ܐ: ܘܡ̣ܢ ܘܬܵܘܪܹ̈ܐ ܘܲܥܕܲܡܵܐ ܠܐܸܡܪܹ̈ܐ: ܘܡ̣ܢ ܓܲܡ̈ܠܹܐ ܘܲܥܕܲܡܵܐ ܠܚܸܡܪܵܐ. 4: ܘܐܲܫܡܲܥ ܫܵܐܘܿܠ ܠܟ݂ܠܹܗ ܥܲܡܵܐ ܠܲܩܪܵܒ̣ܵܐ: ܘܲܡܢܵܐ ܐܸܢܘܿܢ ܒܲܛ̈ܠܵܝܹܐ: ܡܲܐܬܹܝܢ ܐܲܠܦ̈ܝܼܢ ܪܸ̈ܓ̣ܵܠܵܝܝܼܢ: ܘܥܸܣܪܵܐ ܐܲܠܦ̈ܝܼܢ ܥܲܡ ܓܲܒ̣ܪܹ̈ܐ ܕܲܝܗܘܼܕ݂ܵܐ. 5: ܘܐܸܬ̣ܵܐ ܫܵܐܘܿܠ ܥܕܲܡܵܐ ܠܲܩܪܝܼܬ̣ܵܐ ܕܲܥܵܠܹܝܩ: ܘܕ݂ܵܢ ܒܢܲܚܠܵܐ. 6: ܘܐܸܡܲܪ ܫܵܐܘܿܠ ܠܩ̈ܝܼܢܵܝܹܐ: ܣܛܵܘ ܘܙܸܠܘ ܘܚܘܿܬ̣ܘ ܡ̣ܢ ܓܵܘ ܥܡܵܠ̈ܩܵܝܹܐ: ܕܠܵܐ ܐܵܘܒܸܕ݂ܟ݂ܘܿܢ ܥܲܡܗܘܿܢ. ܘܐܲܢ̄ܬ̇ܘܿܢ ܥܒܲܕܬ̇ܘܿܢ ܛܲܝܒ̇ܘܼܬ̣ܵܐ ܥܲܡ ܟܠܗܘܿܢ ܕܒܹܝܬ̣ ܝܼܣܪܵܝܹܠ: ܟܲܕ݂ ܣܵܠܩܝܼܢ ܗ̄ܘܼܵܘ ܡ̣ܢ ܡܸܨܪܹܝܢ: ܘܲܣܛܵܐ ܩ̈ܝܼܢܵܝܹܐ ܡ̣ܢ ܓܵܘ ܥܡܵܠ̈ܩܵܝܹܐ. 7: ܘܲܡܚܵܐ ܫܵܐܘܿܠ ܠܲܥܡܵܠܹܝܩ: ܡ̣ܢ ܚܘܝܼܠܵܐ ܕܲܒ̣ܡܲܥܠܵܢܵܐ ܕܫܘܿܕ݂ ܕܲܩܕ݂ܵܡ ܡܸܨܪܹܝܢ. 8: ܘܐܸܚܲܕ݂ ܠܐܵܓ̣ܵܓ̣ ܡܲܠܟܵܐ ܕܲܥܡܵܠܹܝܩ ܟܲܕ݂ ܚܲܝ: ܘܲܠܟ݂ܠܹܗ ܥܲܡܵܐ ܐܵܘܒܸܕ݂ ܒܦܘܼܡܵܐ ܕܚܲܪܒܵܐ. 9: ܘܚܲܣ ܫܵܐܘܿܠ ܘܥܲܡܵܐ ܥܲܠ ܐܵܓ̣ܵܓ̣ ܡܲܠܟܵܐ: ܘܥܲܠ ܫܘܼܦܪܵܐ ܕܥܵـ̈ܢܵܐ: ܘܲܕܬ̣ܵܘܪܹ̈ܐ: ܘܲܕ݂ܫܲܡܝܼܢܹ̈ܐ: ܘܕܲܡܦܲܛܡܹ̈ܐ: ܘܥܲܠ ܟܠܵܗ̇ ܛܵܒ̣ܬ̣ܵܐ: ܘܠܵܐ ܨܒ̣ܵܘ ܕܢܸܚ̱ܪܒ̣ܘܼܢ ܐܸܢܘܿܢ. ܘܟ݂ܠܵܗ̇ ܥܒܲܝܼܕܬܵܐ ܕܫܝܼܛܵܐ ܘܡܲܣܠܝܵܐ ܒܥܲܝܢܲܝ̈ܗܘܿܢ: ܠܵܗ̇ ܐܵܘܒܸܕ݂ܘ. 10: ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܫܡܘܼܐܹܝܠ ܠܡܹܡܲܪ. 11: ܐܸܬ̇ܬ̇ܘ̇ܝܼܬ̣ ܕܐܲܡ̱ܠܟܹ̇ܬ̣ ܠܫܵܐܘܿܠ ܡܲܠܟܵܐ: ܕܲܗܦܲܟ݂ ܡ̣ܢ ܒܵܬܲܪܝ: ܘܡܸܠ̈ܝ ܠܵܐ ܐܲܩܝܼܡ. ܘܐܸܬ̣ܒ̇ܐܸܫ ܠܲܫܡܘܼܐܹܝܠ: ܘܨܲܠܝܼ ܩܕ݂ܵܡ ܡܵܪܝܵܐ ܟܠܹܗ ܠܸܠܝܵܐ. 12: ܘܩܲܕܸܡ ܫܡܘܼܐܹܝܠ ܒܨܲܦܪܵܐ ܠܐܘܼܪܥܹܗ ܕܫܵܐܘܿܠ: ܘܐܸܬ̣ܚܵܘܝܼ ܠܲܫܡܘܼܐܹܝܠ ܕܐܸܬ̣ܵܐ ܫܵܐܘܿܠ ܠܟܲܪܡܠܵܐ: ܘܗܵܐ ܡܲܬ̣ܩܸܢ ܠܹܗ ܐܲܬ̣ܪܵܐ: ܘܐܸܬ̣ܦܢܝܼ ܘܲܥܒܲܪ ܘܲܢܚܸܬ̣ ܠܓ̇ܠܓܵܠܵܐ. 13: ܘܐܸܬ̣ܵܐ ܫܡܘܼܐܹܝܠ ܠܘܵܬ̣ ܫܵܐܘܿܠ: ܘܐܸܡܲܪ ܠܹܗ ܫܵܐܘܿܠ: ܒܪܝܼܟ݂ ܗ̄ܘ̣ ܡܵܪܝܵܐ ܕܐܲܩܝܼܡ ܦܸܬ̣ܓ̣ܵܡܹܗ. 14: ܘܐܸܡܲܪ ܫܡܘܼܐܹܝܠ: ܡܵܢܵܘ ܩܵܠܵܐ ܗܵܢܵܐ ܕܥܵـ̈ܢܵܐ ܒܐܸܕ݂ܢܲܝ̈: ܘܩܵܠܵܐ ܕܬ̣ܵܘܪܹ̈ܐ ܕܫܵܡܲܥ ܐ̄ܢܵܐ. 15: ܘܐܸܡܲܪ ܫܵܐܘܿܠ: ܡ̣ܢ ܥܡܵܠܹܝܩ ܐܲܝܬ̇ܝܼܘ ܐܸܢܘܿܢ. ܡܸܛܠ ܕܚܵܣ ܥܲܡܵܐ ܥܲܠ ܫܘܼܦܪܵܐ ܕܥܵـ̈ܢܵܐ: ܘܲܕ݂ܬ̣ܵܘܪܹ̈ܐ: ܘܐܲܝܬ̇ܝܼܘ ܕܲܢܕܲܒ̇ܚܘܼܢ ܠܡܵܪܝܵܐ ܐܲܠܵܗܵܟ݂. ܘܫܲܪܟܵܐ ܚܪܲܒ̣̄ܢ. 16: ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܫܬ̣ܘܿܩ ܘܐܹܚܵܘܹܝܟ݂ ܡܸܕܸܡ ܕܐܸܡܲܪ ܠܝܼ ܡܵܪܝܵܐ ܒܠܸܠܝܵܐ ܘܐܸܡܲܪ ܠܹܗ ܐܸܡܲܪ. 17: ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܗܵܐ ܐܸܢ ܙܥܘܿܪ ܐܲܢ̄ܬ̇ ܒܥܲܝܢܲܝ̈ܟ: ܪܹܫ ܫܲܒ̣ܛܹ̈ܐ ܐܲܢ̄ܬ̇ ܕܝܼܣܪܵܝܹܠ: ܘܡܲܫܚܵܟ݂ ܡܵܪܝܵܐ ܕܬܲܡܠܸܟ݂ ܥܲܠ ܝܼܣܪܵܝܹܠ. 18: ܘܫܲܕܲܪܵܟ݂ ܡܵܪܝܵܐ ܒܬܘܼܪܚܵܐ ܘܐܸܡܲܪ: ܙܸܠ ܚܪܘܿܒ̣ ܠܚܲܛܵܝܵܐ ܥܡܵܠܹܝܩ: ܘܐܸܬ̣ܟܲܬ̇ܫ ܥܲܡܗܘܿܢ ܥܕܲܡܵܐ ܕܲܬ̣ܓܲܡܲܪ ܐܸܢܘܿܢ. 19: ܐܲܝܟܵܘ ܠܵܐ ܫܡܲܥܬ̇ ܒܩܵܠܹܗ ܕܡܵܪܝܵܐ: ܐܸܠܵܐ ܐܸܬ̣ܦܢܝܼܬ̣ ܥܲܠ ܒܸܙܬ̣ܵܐ: ܘܲܥܒܲܕܬ̇ ܕܒ̣ܝܼܫ ܩܕ݂ܵܡ ܡܵܪܝܵܐ. 20: ܘܐܸܡܲܪ ܫܵܐܘܿܠ ܠܲܫܡܘܼܐܹܝܠ: ܫܸܡ̇ܥܹܬ̣ ܒܩܵܠܹܗ ܕܡܵܪܝܵܐ ܘܐܸܙܹܠ̄ܬ̣ ܒܐܘܼܪܚܵܐ ܕܫܲܕܪܲܢܝ: ܘܐܲܝ̇ܬ̇ܝܼܬ̣ ܠܐܵܓ̣ܵܓ̣ ܡܲܠܟܵܐ ܕܲܥܡܵܠܹܝܩ: ܘܲܥܕܵܠܩܵܝܹ̈ܐ ܐܵܘܒ̇ܕܹܬ̣. 21: ܘܲܕ݂ܒ̇ܪܘ ܥܲܡܵܐ ܡ̣ܢ ܒܸܙܬ̣ܵܐ ܥܵܢܹ̈ܐ ܘܬ̣ܵܘܪܹ̈ܐ ܪܹܫܝܼܬ̣ܵܐ ܕܚܸܪܡܵܐ: ܕܲܢܕܲܒ̇ܚܘܼܢ ܠܡܵܪܝܵܐ ܐܲܠܵܗܵܟ݂ ܒܓ̣ܠܓܵܠܵܐ. 22: ܘܐܸܡܲܪ ܫܡܘܼܐܹܝܠ: ܠܵܐ ܨܵܒܹܐ ܡܵܪܝܵܐ ܒܲܥܵܠ̈ܘܵܬ̣ܵܐ ܘܲܒ̣ܕܸܒ̣ܚܹ̈ܐ ܐܲܝܟ݂ ܡ̣ܢ ܕܫܵܡܲܥ ܒܩܵܠܹܗ. ܗܵܐ ܫܸܡܥܵܐ ܡ̣ܢ ܕܸܒ̣ܚܹ̈ܐ ܛܵܒ̣: ܘܠܲܡܨܵܬ̣ ܡ̣ܢ ܬܲܪܒܵܐ ܕܕܸܟ݂ܪܹ̈ܐ. 23: ܡܸܛܠ ܕ݂ܚܛܝܼܬܹܗ ܕܩܸܨܡܵܐ ܡܡܲܪ̱ܡܪܵܢܘܼܬ̣ܵܐ: ܘܩܸܨܡܵܐ ܥܵܘܠܵܐ ܡܲܥܫܢܵܐ. ܥܲܠ ܕܐܲܣܠܝܼܬ̇ ܠܡܸܠܬܹܗ ܕܡܵܪܝܵܐ: ܢܲܣܠܹܝܟ݂ ܡ̣ܢ ܡܲܠܟ̇ܘܼܬ̣ܵܐ. 24: ܘܐܸܡܲܪ ܫܵܐܘܿܠ ܠܲܫܡܘܼܐܹܝܠ: ܚܛܹܝܬ̣ ܥܲܠ ܕܥܸܒ̣ܪܹܬ̣ ܥܲܠ ܡܸܠܬ̣ ܦܘܼܡܹܗ ܕܡܵܪܝܵܐ: ܘܥܲܠ ܡܸܠܲܝ̈ܟ: ܡܸܛܠ ܕܕܸܚܠܹܬ̣ ܡ̣ܢ ܥܲܡܵܐ ܘܫܸܡ̇ܥܹܬ̣ ܒܩܵܠܗܘܿܢ. 25: ܗܵܫܵܐ ܫܒ̣ܘܿܩ ܠܲܚܛܝܼܬ̣ܝ: ܘܲܗܦܘܿܟ݂ ܥܲܡܝ: ܘܐܸܣܓ̇ܘܿܕ݂ ܠܡܵܪܝܑܵ. 26: ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܠܵܐ ܐܸܗܦܘܿܟ݂ ܥܲܡܵܟ݂. ܥܲܠ ܕܐܲܣܠܝܼܬ̇ ܡܸܠܬܹܗ ܕܡܵܪܝܵܐ: ܐܲܣ̱ܠܝܵܟ݂ ܡܵܪܝܵܐ ܕܠܵܐ ܬܸܗܘܸܐ ܡܲܠܟܵܐ ܥܲܠ ܝܼܣܪܵܝܹܠ. 27: ܘܐܸܬ̣ܦܢܝܼ ܫܡܘܼܐܹܝܠ ܠܡܹܐܙܲܠ: ܘܐܸܚܲܕ݂ ܫܵܐܘܿܠ ܒܟܸܢܦܵܐ ܕܲܦܪܝܼܣܹܗ ܘܲܨܪܵܝܗܝ. 28: ܘܐܸܡܲܪ ܠܹܗ ܫܡܘܼܐܹܝܠ. ܨܪܵܗ̇ ܡܵܪܝܵܐ ܡܲܠܟ̇ܘܼܬ̣ܵܐ ܕܝܼܣܪܵܝܹܠ ܡܸܢܵܟ݂ ܝܵܘܡܵܢܵܐ: ܘܝܲܗ̄ܒܵܗ̇ ܠܚܲܒ̣ܪܵܟ݂ ܕܛܵܒ̣ ܡܸܢܵܟ݂. 29: ܘܐܵܦ ܢܲܨܝܼܚܹܗ ܕܝܼܣܪܵܝܹܠ: ܠܵܐ ܡܕܲܓܸܠ ܘܐܵܦܠܵܐ ܡܸܬ̣ܡ̱ܠܸܟ݂: ܡܸܛܠ ܕܠܵܐ ܗ̄ܘ̣ܵܐ ܒܲܪܢܵܫܵܐ ܕܢܸܬ̣ܡ̱ܠܸܟ݂. 30: ܘܐܸܡܲܪ ܫܵܐܘܿܠ: ܚܛܹ̈ܝܬ̣: ܗܵܫܵܐ ܝܲܩܲܪܲܝܢܝ ܩܕ݂ܵܡ ܣܵܒܹ̈ܐ ܕܥܲܡܝܼ: ܘܲܩܕ݂ܵܡ ܝܼܣܪܵܝܹܠ: ܘܲܗܦܘܿܟ݂ ܥܲܡܝ: ܘܐܸܣܓ̇ܘܿܕ݂ ܠܡܵܪܝܵܐ ܐܲܠܵܗܵܟ݂. 31: ܘܲܗܦܲܟ݂ ܫܡܘܼܐܹܝܠ ܒܵܬܲܪ ܫܵܐܘܿܠ: ܘܲܣܓܸܕ݂ ܫܵܐܘܿܠ ܠܡܵܪܝܵܐ. 32: ܘܐܸܡܲܪ ܫܡܘܼܐܹܝܠ ܩܲܪܸܒܲܝܗܝ ܠܝܼ ܠܐܵܓ̣ܵܓ̣ ܡܲܠܟܵܐ ܕܲܥܡܵܠܹܝܩ: ܘܐܸܡܲܪ ܐܵܓ̣ܵܓ̣ ܫܲܪܝܼܪܵܐܝܼܬ̣ ܡܲܪܝܼܪ ܡܵܘܬܵܐ. 33: ܘܐܸܡܲܪ ܫܡܘܼܐܹܝܠ: ܐܲܝܟܲܢܵܐ ܕܓܲܙܝܲܬ̤ ܢܸܫܹ̈ܐ ܚܲܪܒܵܟ݂: ܗܵܟܲܢܵܐ ܬܸܬ̣ܓܲܙܸܐ ܐܸܡܵܟ݂ ܡ̣ܢ ܢܸܫܹ̈ܐ. ܘܦܲܫܲܚ ܫܡܘܼܐܹܝܠ ܠܐܵܓ̣ܵܓ̣ ܡܲܠܟܵܐ ܩܕ݂ܵܡ ܡܵܪܝܵܐ ܒܓܲܠܓܵܠܵܐ. ܘܐܸܙܲܠ ܫܡܘܼܐܹܝܠ ܠܪܵܡܬ̣ܵܐ. 34: ܘܫܵܐܘܿܠ ܣܠܸܩ ܠܒܲܝܬܹ̇ܗ ܠܪܵܡܬ̣ܵܐ ܕܫܵܐܘܿܠ. ܘܠܵܐ ܐܵܘܣܸܦ ܬܘܼܒ̣ ܫܡܘܼܐܹܝܠ: ܠܡܸܚܙܹܝܗ ܠܫܵܐܘܿܠ ܥܕܲܡܵܐ ܠܝܵܘܡܵܐ ܕܡܝܼܬ̣: ܡܸܛܠ ܕܐܸܬ̣ܐ̱ܒܸܠ ܫܡܘܼܐܹܝܠ ܥܲܠ ܫܵܐܘܿܠ. 35: ܘܡܵܪܝܵܐ ܐܸܬ̇ܬ̇ܘܝܼ ܥܲܠ ܕܐܲܡܠܸܟ݂ ܠܫܵܐܘܿܠ ܥܲܠ ܝܼܣܪܵܝܹܠ.

ܩܹܦܵܠܹܐܘܿܢ: ܝܘ.

1: ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܥܕܲܡܵܐ ܠܐܸܡܲܬ̣ܝ ܡܸܬ̣ܐ̱ܒܸܠ ܐܲܢ̄ܬ̇ ܥܲܠ ܫܵܐܘܿܠ: ܘܐܸܢܵܐ ܐܲܣܠܝܼܬܹ̇ܗ ܕܠܵܐ ܢܲܡܠܸܟ݂ ܥܲܠ ܝܼܣܪܵܝܹܠ. ܡܠܝܼ ܩܲܪܢܵܟ݂ ܡܸܫܚܵܐ: ܘܬ̣ܵܐ ܐܹܫܲܕܪܵܟ݂ ܠܘܵܬ̣ ܐܝܼܫܲܝ ܕܡ̣ܢ ܒܹܝܬ̣ ܠܚܸܡ: ܡܸܛܠ ܕܲܚܙܵܝܬ̣ ܠܝܼ ܒܲܒ̣ܢܵܘ̈ܗܝ ܡܲܠܟܵܐ. 2: ܘܐܸܡܲܪ ܫܡܘܼܐܹܝܠ: ܐܲܝܟܲܢܵܐ ܐܹܙܲܠ: ܘܢܸܫܡܲܥ ܫܵܐܘܿܠ ܘܢܸܩܛܠܲܢܝ. ܘܐܸܡܲܪ ܡܵܪܝܵܐ ܠܫܡܘܼܐܹܝܠ: ܥܓܸܠܬܵܐ ܕܬ̣ܵܘܪܹ̈ܐ ܐܲܚܘܿܕ݂ ܒܐܝܼܕ݂ܵܟ݂: ܘܐܸܡܲܪ ܠܲܡܕܲܒܵܚܘ ܠܡܵܪܝܵܐ ܐܸܬ̣ܝܬ̣. 3: ܘܲܩܪܝܼ ܠܐܝܼܫܲܝ ܠܕܸܒ̣ܚܵܐ: ܘܐܸܢܵܐ ܐܹܚܵܘܹܝܟ݂ ܡܸܕܸܡ ܕܬܸܥܒܸ̇ܕ݂. ܘܲܡܫܘܿܚ ܠܝܼ ܠܡ̇ܢ ܕܐܹܡܲܪ ܠܵܟ݂. 4: ܘܲܥܒܲܕ݂ ܫܡܘܼܐܹܝܠ ܐܲܝܟ݂ ܕܦܲܩܕܹܗ ܡܵܪܝܵܐ. ܘܐܸܬ̣ܵܐ ܠܒܹܝܬ̣ ܠܚܸܡ ܕܲܝܗܘܼܕ݂ܵܐ: ܘ̤ܲܦܲܩܘ ܣܵܒܹ̈ܐ ܕܲܩܪܝܼܬ̣ܵܐ ܠܐܘܼܪܥܹܗ. 5: ܘܐܸܡܲܪ ܫܠܵܡ ܡܹܐܬ̣ܝܵܟ݂. ܘܐܸܡܲܪ ܫܠܵܡ: ܠܲܡܕܲܒܵܚܘܼ ܠܡܵܪܝܵܐ ܐܸܬܹܝ̇ܬ̣: ܐܸܬ̣ܩܲܕܲܫܘ ܘܬ̣ܵܘ ܥܲܡܝ ܠܕܸܒ̣ܚܵܐ. ܘܩܲܕܸܫ ܠܐܝܼܫܲܝ ܘܠܲܒ̣ܢܵܘ̈ܗܝ: ܘܲܩܪܵܐ ܐܸܢܘܿܢ ܠܕܸܒ̣ܚܵܐ. 6: ܘܟܲܕ݂ ܐܸܬ̣ܵܘ ܚܙܵܐ ܠܐܸܠܝܵܒ̣: ܘܐܸܡܲܪ ܐܲܟ݂ܘܿܬܹܗ ܕܡܵܪܝܵܐ ܡܫܝܼܚܹܗ. 7: ܘܐܸܡܲܪ ܡܵܪܝܵܐ ܠܲܫܡܘܼܐܹܠ: ܠܵܐ ܬܚܘܼܪ ܒܚܸܙܘܹܗ ܘܲܒ̣ܪܵܘܡܵܐ ܘܩܵܘܡܬܹܗ. ܡܸܛܠ ܕܐܲܣܠܝܼܬܹ̇ܗ. ܠܵܐ ܗܘܹ̇ܝܬ̣ ܓܹܝܪ ܐܲܝܟ݂ ܕܚܵܙܹܐ ܐ̄ܢܵܫܵܐ: ܡܸܛܠ ܕܐ̄ܢܵܫܵܐ ܚܵܙܹܐ ܒܥܲܝ̈ܢܹܐ: ܘܡܵܪܝܵܐ ܚܵܙܹܐ ܒܠܸܒܵܐ. 8: ܘܲܩܪܵܐ ܐܝܼܫܲܝ ܠܐܲܒ̣ܝܼܢܵܕ݂ܵܒ̣: ܘܐܲܥܒ̇ܪܹܗ ܩܕ݂ܵܡ ܫܡܘܼܐܹܝܠ: ܘܐܸܡܲܪ ܠܵܐ ܨܵܒܹ̇ܐ ܡܵܪܝܵܐ ܒܗܵܢܵܐ. 9: ܘܐܲܥܒܲܪ ܐܝܼܫܲܝ ܠܫܲܡܵܐ: ܘܐܸܡܲܪ ܐܵܦܠܵܐ ܒܗܵܢܵܐ ܨܵܒܹ̇ܐ ܡܵܪܝܵܐ. 10: ܘܐܲܥܒܲܪ ܐܝܼܫܲܝ ܠܫܲܒ̣ܥܵܐ ܒܢܵܘ̈ܗܝ ܩܕ݂ܵܡ ܫܡܘܼܐܹܝܠ. ܘܐܸܡܲܪ ܫܡܘܼܐܹܝܠ ܠܐܝܼܫܲܝ: ܠܵܐ ܨܵܒܹ̇ܐ ܡܵܪܝܵܐ ܒܗܵܠܹܝܢ. 11: ܘܐܸܡܲܪ ܫܡܘܼܐܹܝܠ ܠܐܝܼܫܲܝ ܫܸܠܡܘ ܛܠܵܝܹ̈ܐ: ܘܐܸܡܲܪ ܠܹܗ: ܙܥܘܿܪܵܐ ܐܸܫܬ̇ܚܲܪ: ܘܗܵܐ ܪܵܥܹܐ ܥܵـ̈ܢܵܐ. ܘܐܸܡܲܪ ܫܡܘܼܐܹܝܠ ܠܐܝܼܫܲܝ: ܫܲܕܲܪ ܕܒܲܪܝܗܝ: ܡܸܛܠ ܕܠܵܐ ܐܸܗܦܘܿܟ݂ ܥܕܲܡܵܐ ܕܐܵܬܹܐ ܠܗܵܪܟܵܐ. 12: ܘܫܲܕܲܪ ܐܲܝܬ̇ܝܹܗ: ܘܗ̤ܘ ܣܡܲܩܪܵܝ: ܘܫܲܦܝܼܪ̈ܵܢ ܥܲܝܢܵܘ̈ܗܝ: ܘܫܲܦܝܼܪ ܚܸܙܘܹܗ. ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܩܘܼܡ ܡܫܘܿܚܲܝܗܝ ܡܸܛܠ ܕܗܵܢܵܐ ܗ̄ܘ̣. 13: ܘܲܢܣܲܒ̣ ܫܡܘܼܐܹܝܠ ܩܲܪܢܵܐ ܕܡܸܫܚܵܐ: ܘܡܲܫܚܹܗ ܒܓ̣ܵܘ ܐܲܚܵܘ̈ܗܝ. ܘܐܲܨܠܚܲܬ̤ ܪܘܼܚܹܗ ܕܡܵܪܝܵܐ ܥܲܠ ܕܵܘܝܼܕ݂ ܡ̣ܢ ܗܵܘ̇ ܝܵܘܡܵܐ. ܘܩܵܡ ܫܡܘܼܐܹܝܠ ܘܐܸܙܲܠ ܠܪܵܡܬ̣ܵܐ ܠܒܲܝܬܹ̇ܗ. 14: ܘܪܘܼܚܹܗ ܕܐܲܠܵܗܵܐ ܥܸܒ̣ܪܲܬ̤ ܡ̣ܢ ܫܵܐܘܿܠ. ܘܲܡܕܲܝܒ̣ܵܐ ܠܹܗ ܪܘܼܚܵܐ ܒܝܼܫܬܵܐ: ܡ̣ܢ ܩܕ݂ܵܡ ܡܵܪܝܵܐ. 15: ܘܐܸܡܲܪܘ ܠܹܗ ܥܲܒ̣ܕܵܘ̈ܗܝ ܠܫܵܐܘܿܠ.

16: ܗܵܐ ܥܲܒ̣ܕܲܝ̈ܟ ܩܕ݂ܵܡܲܝܟ: ܢܸܒ̣ܥܘܿܢ ܓܲܒ̣ܪܵܐ ܕܝܵܕܲܥ ܠܡܸܩܲܫ ܒܟܸܢܵܪܵܐ. ܘܡܵܐ ܕܗܵܘܝܵܐ ܥܠܲܝܟ ܪܘܼܚܵܐ ܒܝܼܫܬܵܐ: ܢܸܩܘܿܫ ܒܐܝܼܕ݂ܵܘ̈ܗܝ ܘܢܲܛܐܸܒ̣ ܠܵܟ݂. 17: ܘܐܸܡܲܪ ܫܵܐܘܿܠ ܠܥܵܒ̣ܕܵܘ̈ܗܝ: ܚܙܵܘ ܠܝܼ ܓܲܒ̣ܪܵܐ ܕܫܲܦܝܼܪ ܢܵܩܹܫ: ܘܐܲܝܬܵܐܘܼܗܝ ܠܘܵܬ̣ܝ. 18: ܘܲܥܢܵܐ ܚܲܕ݂ ܡ̣ܢ ܥܠܲܝܡܹ̈ܐ ܘܐܸܡܲܪ. ܗܵܐ ܚܙܹܝܬ̣ ܒܪܵܐ ܠܐܝܼܫܲܝ ܕܡ̣ܢ ܒܹܝܬ̣ ܠܚܸܡ: ܘܝܵܕܲܥ ܠܡܸܩܲܫ: ܘܓܲܢ̄ܒܵܪ ܚܲܝܠܹܗ: ܘܓܲܒ̣ܪܵܐ ܩܪܲܒ̣ܬ̣ܵܢܵܐ ܗ̄ܘ̣: ܘܡܸܬ̣ܒܲܝܲܢ ܒܡܸܠܬ̣ܵܐ: ܘܚܸܙܘܹܗ ܫܲܦܝܼܪ: ܘܡܵܪܝܵܐ ܥܲܡܹܗ. 19: ܘܫܲܕܲܪ ܫܑܵܘܿܠ ܡܲܠܟܵܐ ܠܘܵܬ̣ ܐܝܼܫܲܝ: ܘܐܸܡܲܪ ܠܹܗ: ܫܲܕܲܪ ܠܝܼ ܠܕ݂ܵܘܝܼܕ݂ ܒܪܵܟ݂: ܚܵܫܲܚ ܠܝܼ. 20: ܘܲܕ݂ܒܲܪ ܐܝܼܫܲܝ ܚܡܵܪܵܐ: ܘܐܲܛܥܸܢ ܠܲܚܡܵܐ ܘܙܸܩܵܐ ܕܚܲܡܪܵܐ: ܘܓܲܕ݂ܝܵܐ ܚܲܕ݂ ܕܥܸܙܹ̈ܐ: ܘܫܕܲܪ ܒܐܝܼܕܹܗ ܕܕ݂ܵܘܝܼܕ݂ ܒܪܹܗ ܠܫܵܐܘܿܠ. 21: ܘܐܸܬ̣ܵܐ ܕܵܘܝܼܕ݂ ܠܘܵܬ̣ ܫܵܐܘܿܠ: ܘܩܵܡ ܩܕ݂ܵܡܵܘܗܝ. ܘܪܲܚܡܹܗ ܛܵܒ̣: ܘܲܗܘ̤ܵܐ ܠܹܗ ܫܵܩܹܠ ܡܵܐܢܹ̈ܐ. 22: ܘܲܫܠܲܚ ܫܵܐܘܿܠ ܠܐܝܼܫܲܝ: ܘܐܸܡܲܪ ܠܹܗ: ܢܩܘܼܡ ܕܵܘܝܼܕ݂ ܩܕ݂ܵܡܲܝ: ܡܸܛܠ ܕܐܸܫܟܲܚ ܪ̈ܲܚܡܹܐ ܒܥܲܝ̈ܢܲܝ. 23: ܘܡܵܐ ܕܗܵܘ̇ܝܵܐ ܪܘܼܚܹܗ ܕܡܵܪܝܵܐ ܒܝܼܬܵܐ ܥܲܠ ܫܵܐܘܿܠ: ܢܵܣܹܒ̣ ܕܵܘܝܼܕ݂ ܘܢܵܩܹܫ ܒܟܸܢܵܪܵܐ: ܘܡܲܪܘܲܚ ܠܫܵܐܘܿܠ: ܘܡܲܛܐܸܒ̣ ܠܹܗ: ܘܥܵܒ̣ܪܵܐ ܡܸܢܹܗ ܪܘܼܚܵܐ ܒܝܼܫܬܵܐ.

ܩܹܦܵܠܹܐܘܿܢ: ܝܙ.

1: ܘܟܲܢܸܫܘ ܦܠܸܫ̈ܬܵܝܹܐ ܡܲܫ̱ܪ̈ܝܵܬ̣ܗܘܿܢ ܠܲܩܪܵܒ̣ܵܐ: ܘܐܸܬ̣ܟܲܬܲܫܘ ܒܣܵܘܦܵܐ ܕܲܝܗܘܼܕ݂ܵܐ: ܘܲܫܪܵܘ ܒܹܝܬ̣ ܣܵܘܦܵܐ ܠܒܹܝܬ̣ ܥܲܪܩܵܐ ܒܐܲܦܲܪܣܡܝܼܢ. 2: ܘܫܵܐܘܿܠ ܘܓܲܒ̣ܪܹ̈ܐ ܕܝܼܣܪܵܝܹܠ ܐܸܬ̣ܟܲܢܲܫܘ: ܘܲܫܪܵܘ ܒܥܘܼܡܩܵܐ ܕܒܸܛ̱ܡܬ̣ܵܐ. ܘܲܣܕܲܪܘ ܩܪܵܒ̣ܵܐ ܠܘܼܩܒܲܠ ܦܠܸܫ̈ܬܵܝܹܐ. 3: ܘܲܦܠܸܫ̈ܬܵܝܹܐ ܩܵܝܡܝܼܢ ܛܘܼܪܵܐ ܡܸܟܵܐ: ܘܝܼܣܪܵܝܹܠ ܩܵܝܡܝܼܢ ܛܘܼܪܵܐ ܡܸܟܵܐ: ܘܢܲܚܠܵܐ ܒܲܝܢܵܬ̣ܗܘܿܢ. 4: ܘܲܢܦܲܩ ܓܲܒ̣ܪܵܐ ܓܲܢ̄ܒܵܪܵܐ ܡ̣ܢ ܡܲܫܪܝܼܬ̣ܵܐ ܕܲܦܠܸܫ̈ܬܵܝܹܐ: ܓܘܼܠܝܵܕ݂ ܫܡܹܗ: ܡ̣ܢ ܓܵܬ̣: ܪܵܘܡܹܗ ܫܸܬ̣ ܐܲܡ̈ܝܼܢ ܘܲܙܪܸܬ̣. 5: ܘܣܲܢܘܵܪܬܵܐ ܕܲܢܚܵܫܵܐ ܒܪܹܫܹܗ: ܘܫܸܪܝܵܢܵܐ ܕܛܲܣܵܐ ܠܒ̣ܝܼܫ: ܘܡܲܬ̣ܩܵܠܵܐ ܕܫܸܪܝܵܢܹܗ ܚܲܡܫܵܐ ܐܲܠܦ̈ܝܼܢ ܢܲܬ̣̈ܩܵܠܝܼܢ ܕܲܢܚܵܫܵܐ. 6: ܘܒܲܪ̈ܙܵܢܩܹܐ ܕܲܢܚܵܫܵܐ ܒܪܸ̈ܓ̣ܠܵܘܗܝ: ܘܛܲܪܦܵܢܣܵܐ ܕܲܢܚܵܫܵܐ ܒܹܝܬ̣ ܟܲܬ̣ܦܵܬܹ̈ܗ. 7: ܘܩܲܝܣܵܐ ܕܢܲܝܙܟܹܗ ܐܲܝܟ݂ ܢܵܘܠܵܐ ܕܓܲܪ̈ܕܝܵܝܹܐ: ܘܲܫܢܵܢܵܐ ܕܢܲܝܙܟܹܗ ܡ̣ܢ ܫܸܬܡܵܐܐ ܡܲܬ̣̈ܩܵܠܝܼܢ ܕܦܲܪܙܠܵܐ: ܘܫܵܩܹܠ ܣܲܟ̇ܪܵܐ ܐܵܙܹܠ ܩܕ݂ܵܡܵܘܗܝ. 8: ܘܩܵܡ ܘܲܩܪܵܐ ܠܣܸܕ݂ܪܹ̈ܐ ܕܝܼܣܪܵܝܹܠ: ܘܐܸܡܲܪ ܠܗܘܿܢ: ܠܡܵܢܵܐ ܢܵܦܩܝܼܢ ܐ̄ܬ̇ܘܿܢ ܠܡܸܣܕܲܪ ܩܪܵܒ̣ܵܐ: ܗܵܐ ܐܸܢܵܐ ܦܠܸܫܬܵܝܵܐ: ܘܐܲܢ̄ܬ̇ܘܿܢ ܥܲܒ̣ܕܵܘ̈ܗܝ ܕܫܵܐܘܿܠ: ܓܒ̣ܵܘ ܠܟ݂ܘܿܢ ܓܲܒ̣ܪܵܐ ܕܢܸܦܘܿܩ ܥܠܲܝ. 9: ܐܸܢ ܐܸܫܟܲܚ ܠܡܸܬ̣ܟܲܬܵܫܘܼ ܥܲܡܝ: ܘܢܸܩܛܠܲܢܝ: ܢܸܗܘܸܐ ܠܟ݂ܘܿܢ ܥܲܒ̣̈ܕܹܐ. ܘܐܸܢ ܐܸܢܵܐ ܐܸܙܟܹ̇ܝܘܗܝ ܘܐܸܩܛܠܝܼܘܗܝ: ܬܗܘܘܿܢ ܠܲܢ ܥܲܒ̣̈ܕܹܐ ܘܬܸܦ̱ܠܚܘܼܢܵܢ. 10: ܘܐܸܡܲܪ ܦܠܸܫܬܵܝܵܐ: ܐܸܢܵܐ ܚܲܣܕܹܬ̣ ܠܣܸܕ݂ܪ̈ܵܘܗܝ ܕܝܼܣܪܵܝܹܠ ܝܵܘܡܵܢܵܐ: ܗܲܒ̣ܘ ܠܝܼ ܓܲܒ̣ܪܵܐ ܢܸܬ̣ܟܲܬܲܫ ܐܲܟ݂ܚ̄ܕ݂ܵܐ. 11: ܘܲܫܡܲܥ ܫܵܐܘܿܠ ܘܟ݂ܠܹܗ ܝܼܣܪܵܝܹܠ ܡܸܠܵܘ̈ܗܝ ܕܲܦܠܸܫܬܵܝܵܐ. ܘܙܵܥܘ ܘܲܕ݂ܚܸܠܘ ܛܵܒ̣. 12: ܘܕ݂ܵܘܝܼܕ݂ ܒܲܪ ܓܲܒ̣ܪܵܐ ܗ̄ܘ̣ܵܐ ܐܵܦܪܬ̣ܵܝܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕ݂ܵܐ: ܘܲܫܡܹܗ ܐܝܼܫܲܝ: ܘܠܹܗ ܬܡܵܢܝܵܐ ܒܢ̈ܝܼܢ. ܘܓܲܒ̣ܪܵܐ ܒܝܵܘܡܵܘ̈ܗܝ ܕܫܵܐܘܿܠ: ܣܐܸܒ̣ ܘܥܲܠ ܒܲܫ̈ܢܲܝܵܐ. 13: ܘܐܸܙܲܠܘ ܬܠܵܬ̣ܵܐ ܒܢܵܘ̈ܗܝ ܕܐܝܼܫܲܝ ܪܵܘܪ̈ܒܹܐ ܒܵܬܲܪ ܫܵܐܘܿܠ ܠܲܩܪܵܒ̣ܵܐ: ܘܲܫܡܵܗܲܝ̈ܗܘܿܢ ܐܸܠܝܵܒ̣ ܒܘܼܟ݂ܪܹܗ: ܘܬܸܢܝܵܢܹܗ ܐܲܒ̣ܝܼܢܵܕ݂ܵܒ̣: ܘܲܬ̣ܠܝܼܬ̣ܵܝܵܐ ܫܲܡܵܐ. 14: ܘܕ݂ܵܘܝܼܕ݂ ܗܘ̤ܵܐ ܙܥܘܿܪܵܐ. 15: ܘܗ̤ܘ ܕܵܘܝܼܕ݂ ܗܦܲܟ݂ ܗ̄ܘ̣ܵܐ ܡ̣ܢ ܠܘܵܬ̣ ܫܵܐܘܿܠ: ܘܐܸܙܲܠ ܠܡܸܥܒܲܪ ܥܵܢܹ̈ܐ ܕܐܲܒ̣ܘܼܗܝ ܒܒܹܝܬ̣ ܠܚܸܡ. 16: ܘܲܩܪܸܒ̣ ܦܠܸܫܬܵܝܵܐ ܡܩܲܕܸܡ ܘܲܡܚܲܫܸܟ݂: ܘܩܵܡ ܐܲܪܒܥܝܼܢ ܝܵܘ̈ܡܝܼܢ. 17: ܘܐܸܡܲܪ ܐܝܼܫܲܝ ܠܕ݂ܵܘܝܼܕ݂ ܒܪܹܗ: ܐܵܘܒܸ̇ܠ ܠܐܲܚܲܝ̈ܟ ܣܐܵܐ ܩܲܠ̈ܝܵܬ̣ܵܐ: ܘܲܥܣܲܪ ܕܠܲܚܡܵܐ: ܘܐܲܪܗܸܛ ܠܡܲܫܪܝܼܬ̣ܵܐ ܠܐܲܚܲܝ̈ܟ. 18: ܘܲܥܣܲܪ ܓܘܼܒ̣̈ܢܹܗ ܗܵܠܹܝܢ ܕܚܠܒ̣ܵܐ: ܐܵܘܒܸ̇ܠ ܠܪܲܒ̇ ܐܲܠܦܵܐ. ܘܐܲܚܲܝ̈ܟ ܦܩܘܿܕ݂ ܒܲܫܠܵܡܵܐ: ܘܲܣܒܲܪܬ̣ܗܘܿܢ ܐܲܝܬܵܐ ܠܝܼ. 19: ܘܫܵܐܘܿܠ ܘܟ݂ܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ: ܒܥܘܼܡܩܵܐ ܕܒܸܛܡ̱ܬ̣ܵܐ ܡܸܬ̣ܟܲܬ̇ܫܝܼܢ ܥܲܡ ܦܠܸܫ̈ܬܵܝܹܐ. 20: ܘܩܲܕܸܡ ܕܵܘܝܼܕ݂ ܒܨܲܦܪܵܐ: ܘܲܫܒܲܩ ܥܵـ̈ܢܵܐ ܥܲܠ ܢܵܛܘܿܪܵܐ: ܘܲܫܩܲܠ ܘܐܸܙܲܠ ܐܲܝܟ݂ ܕܦܲܩܕܹܗ ܐܝܼܫܲܝ. ܘܐܸܬ̣ܵܐ ܠܡܲܫܪܝܼܬ̣ܵܐ ܠܢܲܚܠܵܐ ܕܢܵܦܹܩ ܠܣܸܕ݂ܪܵܐ: ܘܝܲܒܸ̇ܒ̣ܘ ܠܲܩܪܵܒ̣ܵܐ. 21: ܘܐܸܣܬ̇ܕ݂ܪܘ ܝܼܣܪܵܝܹܠ ܘܲܦܠܸܫ̈ܬܵܝܹܐ ܣܸܕܪܵܐ ܠܘܼܩܒܲܠ ܣܸܕܪܵܐ. 22: ܘܐܲܢܝܼܚ ܕܵܘܝܼܕ݂ ܡܵܐܢܹ̈ܐ ܡܸܢܹܗ ܥܲܠ ܓܹܢ̄ܒ̣ ܡܵܐܢܹ̈ܐ: ܘܲܪܗܸܛ ܠܣܸܕܪܵܐ: ܘܲܫܐܸܠ ܒܲܫܠܵܡܵܐ ܕܐܲܚܵܘ̈ܗܝ. 23: ܘܥܲܕ݂ ܗ̤ܘ ܡܡܲܠܸܠ ܥܲܡܗܘܿܢ: ܘܗܵܐ ܓܲܒ̣ܪܵܐ ܓܲܢ̄ܒܵܪܵܐ ܣܠܸܩ: ܓܘܼܠܝܵܕ݂ ܦܠܸܫܬܵܝܵܐ ܫܡܹܗ ܡ̣ܢ ܓܵܬ̣: ܡ̣ܢ ܣܸܕܪܵܐ ܕܲܦܠܸܫ̈ܬܵܝܹܐ: ܘܐܸܡܲܪ ܡܸܠܹ̈ܐ ܗܵܠܹܝܢ: ܘܲܫܡܲܥ ܕܵܘܝܼܕ݂. 24: ܘܟ݂ܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ: ܟܲܕ݂ ܚܙܵܐܘܼܗܝ ܠܓܲܢ̄ܒܵܪܵܐ: ܕܚܸܠܘ ܘܲܥܪܲܩܘ ܡ̣ܢ ܩܕ݂ܵܡܵܘܗܝ. 25: ܘܐܸܡܲܪ ܓܲܒ̣ܪܹ̈ܐ ܕܝܼܣܪܵܝܹܠ: ܚܙܲܝܬ̇ܘܿܢ ܓܲܒ̣ܪܵܐ ܗܵܢܵܐ ܕܠܲܡܚܲܣܵܕ݂ܘܼܬܹܗ ܠܝܼܣܪܵܝܹܠ ܣܠܸܩ. ܓܲܒ̣ܪܵܐ ܕܢܸܩܛܠܝܼܘܗܝ: ܢܲܥܬ̇ܪܝܼܘܗܝ ܡܲܠܟܵܐ ܥܘܼܬ̣ܪܵܐ ܪܲܒܵܐ: ܘܒܲܪܬܹܗ ܢܸܬ̇ܠ ܠܹܗ: ܘܲܠܒܹܝܬ̣ ܐܲܒ̣ܘܼܗܝ ܢܸܥܒ̇ܕ݂ ܡܚܲܪܪܵܐ ܒܝܼܣܪܵܝܹܠ. 26: ܘܐܸܡܲܪ ܕܵܘܝܼܕ݂ ܠܓܲܒ̣ܪܹ̈ܐ ܕܩܵܝܡܝܼܢ ܠܘܵܬܹܗ: ܡܵܢܵܐ ܢܸܬ̣ܥ̱ܒܸܕ݂ ܠܓܲܒ̣ܪܵܐ ܕܢܸܩܛܠܝܼܘܗܝ ܠܲܦܠܸܫܬܵܝܵܐ ܗܵܢܵܐ ܥܘܼܪܠܵܐ: ܘܢܲܥܒܲܪ ܚܸܣܕܵܐ ܡ̣ܢ ܝܼܣܪܵܝܹܠ: ܡܸܛܠ ܕܡܵܢܵܐ ܗ̄ܘ̣ ܦܠܸܫܬܵܝܵܐ ܗܵܢܵܐ ܥܘܼܪܠܵܐ: ܕܲܡܚܲܣܸܕ݂ ܠܣܸܕ݂ܪ̈ܵܘܗܝ ܕܐܲܠܵܗܵܐ ܚܲܝܵܐ. 27: ܘܐܸܡܲܪ ܠܹܗ ܥܲܡܵܐ ܐܲܝܟ݂ ܡܸܠܬ̣ܵܐ ܗܵܕܹܐ: ܕܗܵܟܲܢܵܐ ܢܸܬ̣ܥ̱ܒܸܕ݂ ܠܓܲܒ̣ܪܵܐ ܕܢܸܩܛܠܝܼܘܗܝ. 28: ܘܲܫܡܲܥ ܐܸܠܝܵܒ̣ ܐܲܚܘܼܗܝ ܩܲܫܝܼܫܵܐ ܟܲܕ݂ ܐܵܡܲܪ ܠܗܘܿܢ ܠܓܲܒ̣ܪܹ̈ܐ: ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܐܸܠܝܵܒ̣ ܥܲܠ ܕܵܘܝܼܕ݂: ܘܐܸܡܲܪ ܠܹܗ: ܡܵܢܵܐ ܢܸܚܬ̇ܬ̇: ܘܥܲܠ ܡ̇ܢ ܫܒܲܩܬ̇ ܥܵـ̈ܢܵܐ ܗܵܠܹܝܢ ܩܲܠܝܼܠ ܕܲܒ̣ܡܲܕ݂ܒ̇ܪܵܐ. ܐܸܢܵܐ ܝܵܕ݂ܥ ܐ̄ܢܵܐ ܡܲܪܵܚܘܿܬ̣ܵܟ݂ ܘܒ̣ܝܼܫܘܼܬ̣ ܠܸܒܵܟ݂: ܕܲܠܡܸܚܙܵܐ ܗ̄ܘ̣ ܩܪܵܒ̣ܵܐ ܢܸܚܬ̇ܬ̇. 29: ܘܐܸܡܲܪ ܕܵܘܝܼܕ݂ ܡܵܢܵܐ ܥܸܒ̣ܕܹܬ̣: ܗܵܫܵܐ ܗܵܐ ܡܸܠܬ̣ܵܐ ܗ̄ܝ̣. 30: ܘܐܸܬ̣ܦܢܝܼ ܡ̣ܢ ܠܘܵܬ̣ ܠܓܲܒܵܐ ܐ̄ܚܪܹܢܵܐ: ܘܐܸܡܲܪ ܐܲܝܟ݂ ܡܸܠܬ̣ܵܐ ܗܵܕܹܐ: ܘܐܲܬ̣ܝܼܒ̣ܘܼܗܝ ܥܲܡܵܐ ܦܸܬ̣ܓ̣ܵܡܵܐ ܐܲܝܟ݂ ܦܸܬ̣ܓ̣ܵܡܵܐ ܩܲܕ݂ܡܵܝܵܐ. 31: ܘܐܸܫܬ̇ܡܲܥ ܡܸܠܹ̈ܐ ܕܡܲܠܸܠ ܕܵܘܝܼܕ݂ ܩܕ݂ܵܡ ܫܵܐܘܿܠ: ܘܕܲܒ̣ܪܹܗ. 32: ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܠܵܐ ܢܸܦܸܠ ܠܸܒܹ̇ܗ ܕܐܵܕ݂ܵܡ ܥܠܵܘܗܝ: ܥܲܒ̣ܕܵܟ݂ ܐܵܙܹܠ ܘܡܸܬ̣ܟܲܬܲܫ ܥܲܡ ܦܠܸܫܬܵܝܵܐ ܗܵܢܵܐ. 33: ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܠܵܐ ܡܸܫܟܲܚ ܐܲܢ̄ܬ̇ ܠܡܹܐܙܲܠ ܥܲܠ ܦܠܸܫܬܵܝܵܐ ܗܵܢܵܐ ܠܡܸܬ̣ܟܲܬܵܫܘܼ ܥܲܡܹܗ: ܡܸܛܠ ܕܛܲܠܝܵܐ ܐܲܢ̄ܬ̇: ܘܗ̤ܘ ܓܲܒ̣ܪܵܐ ܗ̄ܘ̣ ܩܪܲܒ̣ܬܵܢܵܐ ܡ̣ܢ ܛܲܠܝܘܼܬܹܗ. 34: ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܪܵܥܹܐ ܗ̄ܘ̣ܵܐ ܥܲܒ̣ܕܵܟ݂ ܠܐܵܒ̣ܝ ܥܵـ̈ܢܵܐ: ܘܐܸܬ̣ܵܐ ܐܲܪܝܵܐ ܘܕܹܒ̣ܵܐ: ܘܲܫܩܲܠܘ ܐܸܡܪܵܐ ܡ̣ܢ ܓܵܙܵܪܵܐ. 35: ܘܢܸܦܩܹܬ̣ ܒܵܬ̣ܪܹܗ ܘܲܡܚܹܝܬܹܗ: ܘܐܲܥܕܲܝܼܬܹܗ ܡ̣ܢ ܦܘܼܡܹܗ. ܘܐܸܬ̣ܡܲܪܡܲܪ ܥܠܲܝ: ܘܐܸܚܲܕܬܹ̇ܗ ܒܕܲܩܢܹܗ ܘܲܡܚܹܝܬܹܗ: ܘܲܩܠܹܝܬܹܗ. 36: ܘܐܵܦ ܐܲܪܝܵܐ ܘܐܵܦ ܕܸܐܒ̣ܵܐ ܩܛܲܠ ܥܲܒ̣ܕܵܟ݂: ܢܸܗܘܸܐ ܦܠܸܫܬܵܝܵܐ ܗܵܢܵܐ ܥܘܼܪܠܵܐ ܐܲܝܟ݂ ܚܲܕ݂ ܡܸܢܗܘܿܢ. ܡܸܛܠ ܕܚܲܣܸܕ݂ ܠܣܸܕ݂ܪ̈ܵܘܗܝ ܕܐܲܠܵܗܵܐ ܚܲܝܵܐ. 37: ܘܐܸܡܲܪ ܕܵܘܝܼܕ݂: ܡܵܪܝܵܐ ܕܦܲܨܣܲܢܝ ܡ̣ܢ ܐܝܼܕ݂ܵܐ ܕܐܲܪܝܵܐ ܘܡ̣ܢ ܐܝܼܕ݂ܵܐ ܕܕܹܐܒ̣ܵܐ: ܗ̤ܘ ܢܦܲܨܹܝܢܝ ܡ̣ܢ ܐܝܼܕ݂ܵܘ̈ܗܝ ܕܲܦܠܸܫܬܵܝܵܐ ܗܵܢܵܐ ܥܘܼܪܠܵܐ. ܘܐܸܡܲܪ ܫܵܐܘܿܠ ܠܕܵܘܝܼܕ݂. ܙܸܠ ܘܡܵܪܝܵܐ ܢܸܗܘܸܐ ܥܲܡܵܟ݂. 38: ܘܐܲܠܒܸ̇ܫ ܫܵܐܘܿܠ ܠܕ݂ܵܘܝܼܕ݂ ܡܵܐܢܵܘ̈ܗܝ: ܘܣܵܡ ܣܲܢܘܵܪܬܵܐ ܕܲܢܚܵܫܵܐ ܒܪܹܫܹܗ: ܘܐܲܠܒ̇ܫܹܗ ܫܸܪܝܵܢܵܐ. 39: ܘܐܸܣܲܪ ܕܵܘܝܼܕ݂ ܣܲܝܦܹܗ ܠܥܸܠ ܡ̣ܢ ܡܵܐܢܵܘ̈ܗܝ. ܘܠܵܐ ܨܒ̣ܵܐ ܠܡܹܐܙܲܠ ܡܸܛܠ ܕܠܑܵ ܢܲܣܝܼ ܐܸܢܘܿܢ: ܘܐܲܥܒܲܪ ܐܸܢܘܿܢ ܕܵܘܝܼܕ݂ ܡܸܢܹܗ. 40: ܘܲܢܣܲܒ̣ ܚܘܼܛܪܹܗ ܒܐܝܼܕܹܗ. ܘܲܓ̣ܒ̣ܵܐ ܠܹܗ ܚܲܡܫܵܐ ܫܥܵܥ̈ܝܼܢ ܕܟܹܐܦܵܐ ܡ̣ܢ ܚܵܠܵܐ: ܘܣܵܡ ܐܸܢܘܿܢ ܒܡܵܐܢܵܐ ܕܝܼܠܹܗ ܕܪ̈ܵܥܵܘܵܬ̣ܵܐ: ܒܬܲܪܡܵܠܹܗ: ܘܩܸܠܥܹܗ ܒܐܝܼܕܹܗ. ܘܲܩܪܒ̣ ܠܘܵܬ̣ ܦܠܸܫܬܵܝܵܐ. 41: ܘܗܵܐ ܦܠܸܫܬܵܝܵܐ ܐܸܬ̣ܵܐ ܘܲܩܪܸܒ̣ ܠܘܵܬ̣ ܕܵܘܝܼܕ݂. ܘܓܲܒ̣ܪܵܐ ܫܵܩܹܠ ܣܲܟ̇ܪܵܐ ܩܕ݂ܵܡܵܘܗܝ. 42: ܘܐܵܕ݂ܝܼܩ ܦܠܸܫܬܵܝܵܐ ܘܲܚܙܵܐ ܠܕ݂ܵܘܝܼܕ݂ ܘܒܲܣܲܪ ܥܠܵܘܗܝ: ܡܸܛܠ ܕܛܲܠܝܵܐ ܗ̄ܘ̣ܵܐ ܘܲܣܡܲܩܪܵܝ: ܘܫܲܦܝܼܪ ܚܹܙܘܵܐ. 43: ܘܐܸܡܲܪ ܦܠܸܫܬܵܝܵܐ ܠܕ݂ܵܘܝܼܕ݂: ܟܲܠܒܵܐ ܐ̄ܢܵܐ ܕܐܵܬܹܐ ܐܲܢ̄ܬ̇ ܥܠܲܝ ܒܚܘܼܛܪܵܐ: ܘܨܲܚܝܼ ܦܠܸܫܬܵܝܵܐ ܠܕ݂ܵܘܝܼܕ݂ ܒܐܲܠܵܗܵܘ̈ܗܝ. 44: ܘܐܸܡܲܪ ܦܠܸܫܬܵܝܵܐ ܠܕ݂ܵܘܝܼܕ݂: ܬܵܐ ܠܘܵܬ̣ܝ: ܘܐܸܬ̇ܠܝܼܘܗܝ ܒܸܣܪܵܟ݂ ܠܥܵܘܦܵܐ ܕܲܫܡܲܝܵܐ: ܘܲܠܚܲܝ̄ܘܬ̣ܵܐ ܕܕܲܒ̣ܪܵܐ. 45: ܘܐܸܡܲܪ ܕܵܘܝܼܕ݂ ܠܲܦܠܸܫܬܵܝܵܐ: ܐܲܢ̄ܬܹܐ ܐܲܢ̄ܬ̇ ܥܠܲܝ ܒܣܲܝܦܵܐ ܕܲܒ̣ܢܲܝܙܟ݂ܵܐ: ܘܲܒ̣ܣܲܟ̇ܪܵܐ: ܘܐܸܢܵܐ ܐܵܬܹܐ ܐ̄ܢܵܐ ܥܠܲܝܟ ܒܲܫܡܹܗ ܕܡܵܪܝܵܐ ܐܲܠܵܗܵܐ ܨܒ̣ܵܐܘܼܬ̣. ܕܣܸܕܪܹ̈ܐ ܕܝܼܣܪܵܝܹܠ ܚܲܣܸܕܬ̇. 46: ܝܵܘܡܵܢܵܐ ܢܲܫ̱ܠܡܵܟ݂ ܡܵܪܝܵܐ ܒܐܝܼܕܲܝ̈: ܘܐܸܩܛܠܵܟ݂ ܘܐܸܣܲܒ̣ ܪܹܫܵܟ݂ ܡܸܢܵܟ݂: ܘܐܸܬܸܠ ܫܠܲـ̈ܕܹܐ ܕܡܲܫ̱ܪ̈ܝܵܬ̣ܵܐ ܕܲܦܠܸܫ̈ܬܵܝܹܐ ܝܵܘܡܵܢܵܐ: ܠܚܲܝ̄ܘܬ̣ܵܐ ܕܕܲܒ̣ܪܵܐ: ܘܲܠܥܵܘܦܵܐ ܕܲܫܡܲܝܵܐ. 47: ܘܢܸܕܲܥܘܼܢ ܟܠܵܗ̇ ܐܲܪܥܵܐ: ܕܐܝܼܬ̣ ܐܲܠܵܗܵܐ ܒܝܼܣܪܵܝܹܠ. ܘܢܸܕܲܥܘܼܢ ܟܠܹܗ ܟܸܢܫܵܐ ܗܵܢܵܐ: ܕܠܵܐ ܗ̄ܘ̣ܵܐ ܒܣܲܝܦܵܐ ܘܲܒ̣ܢܲܝܙܟ݂ܵܐ ܦܵܪܹܩ ܡܵܪܝܵܐ: ܡܸܛܠ ܕܲܕ݂ܡܵܪܝܵܐ ܗ̄ܘ̣ ܩܪܵܒ̣ܵܐ: ܘܢܲܫܠܸܡܟ݂ܘܿܢ ܒܐܝܼܕܲܝ̈ܢ. 48: ܘܗܵܐ ܦܠܸܫܬܵܝܵܐ ܐܸܬ̣ܵܐ ܘܲܩܪܸܒ̣ ܠܐܘܼܥܹܗ ܕܕ݂ܵܘܝܼܕ݂. ܘܐܸܣܬܲܪܗܲܒ̣ ܕܵܘܝܼܕ݂: ܘܲܪܗܸܛ ܠܣܸܕ݂ܪܵܐ ܠܐܘܼܪܥܹܗ ܕܲܦܠܸܫܬܵܝܵܐ. 49: ܘܐܵܘܫܸܛ ܕܵܘܝܼܕ݂ ܐܝܼܕܹܗ ܠܡܵܐܢܹܗ: ܘܲܢܣܲܒ̣ ܡ̣ܢ ܬܲܡܵܢ ܟܹܐܦܵܐ: ܘܐܲܟ݂ܪܸܟ݂ ܘܲܡܚܵܝܗܝ ܠܲܦܠܫܬܵܝܵܐ ܒܹܝܬ̣ ܥܲܝܢܵܘ̈ܗܝ: ܘܛܸܒ̣ܥܲܬ̤ ܟܹܐܦܵܐ ܒܹܝܬ̣ ܥܲܝܢܵܘ̈ܗܝ: ܘܲܢܦܲܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ. 50: ܘܲܥܫܸܢ ܕܵܘܝܼܕ݂ ܡ̣ܢ ܦܠܸܫܬܵܝܵܐ ܒܩܸܠܥܵܐ ܘܲܒ̣ܟܹܐܦܵܐ: ܘܲܡܚܵܝܗܝ ܠܲܦܠܸܫܬܵܝܵܐ ܘܩܲܛܠܹܗ. ܘܣܲܝܦܵܐ ܠܲܝܬ̇ ܒܐܝܼܕܹܗ ܕܕ݂ܵܘܝܼܕ݂.

51: ܘܲܪܗܸܛ ܕܵܘܝܼܕ݂ ܘܩܵܡ ܥܲܠ ܦܠܸܫܬܵܝܵܐ: ܘܲܢܣܲܒ̣ ܣܲܝܦܹܗ ܘܫܲܡܛܹܗ ܡ̣ܢ ܚܸܠܬܹܗ: ܘܩܲܛܠܹܗ: ܘܲܦܣܲܩ ܪܹܫܹܗ. ܘܲܚܙܵܘ ܦܠܸܫ̈ܬܵܝܹܐ ܕܡܝܼܬ̣ ܓܲܢ̄ܒܵܪܗܘܿܢ ܘܲܥܪܲܩܘ. 52: ܘܩܵܡܘ ܐ̄ܢܵܫܵܐ ܕܝܼܣܪܵܝܹܠ: ܘܕܲܝܗܘܼܕ݂ܵܐ: ܘܐܸܬ̣ܠܲܒܲܒ̣ܘ ܘܲܪܕܲܦܘ ܠܲܦܠܸܫ̈ܬܵܝܹܐ: ܥܕܲܡܵܐ ܠܡܲܥܠܵܢܵܐ ܕܢܲܚܠܵܐ: ܘܲܥܕܲܡܵܐ ܠܢܲܚܠܵܐ ܕܥܸܩܪܘܿܢ. ܘܲܢܦܲܠܘ ܩܛܝܼ̈ܠܹܐ ܕܲܦܠܸܫ̈ܬܵܝܹܐ ܒܐܘܼܪܚܵܐ ܕܲܫܪܝܼܢ: ܘܲܥܕܲܡܵܐ ܠܓ̣ܵܬ̣: ܘܲܥܕܲܡܵܐ ܠܥܸܩܪܘܿܢ.

53: ܘܲܗܦܲܟ݂ܘ ܒ̈ܢܲܝ ܝܼܣܪܵܝܹܠ ܕܪܵܕ݂ܦܝܼܢ ܗ̄ܘ̣ܵܘ ܒܵܬܲܪ ܦܠܸܫ̈ܬܵܝܹܐ: ܘܒܲܙܘ ܡܲܫܪ̈ܝܵܬ̣ܗܘܿܢ. 54: ܘܲܢܣܲܒ̣ ܕܵܘܝܼܕ݂ ܪܹܫܹܗ ܕܲܦܠܸܫܬܵܝܵܐ ܘܐܲܝـܬ̇ܝܹܗ ܠܐܘܿܪܸܫܠܸܡ: ܘܡܵܐܢܵܘ̈ܗܝ ܣܵܡ ܒܡܲܫܟ̇ܢܹܗ. 55: ܘܟܲܕ݂ ܚܙܵܝܗܝ ܫܵܐܘܿܠ ܠܕ݂ܵܘܝܼܕ݂ ܕܲܢܦܲܩ ܠܐܘܼܪܥܹܗ ܕܲܦܠܸܫܬܵܝܵܐ: ܐܸܡܲܪ ܠܐܲܒ̣ܢܝܼܪ ܪܲܒ ܚܲܝܠܹܗ: ܒܲܪ ܡܲܢܘܼ ܛܲܠܝܵܐ ܗܵܢܵܐ. 56: ܘܐܸܡܲܪ ܐܲܒ̣ܢܝܼܪ: ܚܲܝܵܐ ܗ̄ܝ̣ ܢܲܦ̮ܫܵܟ݂ ܡܲܠܟܵܐ ܕܠܵܐ ܝܵܕܲܥ ܐ̄ܢܵܐ. ܘܐܸܡܲܪ ܡܲܠܟܵܐ: ܫܲܐܸܠ ܐܲܢ̄ܬ̇ ܒܲܪ ܡܲܢܘܼ ܥܠܲܝܡܵܐ ܗܵܢܵܐ. 57: ܘܟܲܕ݂ ܗܦܲܟ݂ ܕܵܘܝܼܕ݂ ܟܲܕ݂ ܩܲܛܠܹܗ ܠܲܦܠܸܫܬܵܝܵܐ: ܕܲܒ̣ܪܹܗ ܐܲܒ̣ܢܝܼܪ: ܘܐܲܥܠܹܗ ܩܕ݂ܵܡ ܫܵܐܘܿܠ: ܘܪܸܫܹܗ ܕܲܦܠܸܫܬܵܝܵܐ ܒܐܝܼܕܹܗ. 58: ܘܐܸܡܲܪ ܠܹܗ ܫܵܐܘܿܠ: ܒܲܪ ܡ̇ܢ ܐܲܢ̄ܬ̇ ܛܲܠܝܵܐ. ܘܐܸܡܲܪ ܠܹܗ ܕܵܘܝܼܕ݂: ܒܲܪ ܥܲܒ̣ܕܵܟ݂ ܐܝܼܫܲܝ ܕܡ̣ܢ ܒܹܝܬ̣ ܠܚܸܡ.

ܩܹܦܵܠܹܐܘܿܢ: ܝܚ.

1: ܘܟܲܕ݂ ܫܲܠܸܡ ܕܵܘܝܼܕ݂ ܠܡܹܐܡܲܪ ܠܫܵܐܘܿܠ: ܢܲܦ̮ܫܹܗ ܕܝܘܿܢܵܬ̣ܵܢ ܢܸܩܦܲܬ̤ ܠܢܲܦ̮ܫܹܗ ܕܕ݂ܵܘܝܼܕ݂: ܘܪܲܚܡܹܗ ܝܘܿܢܵܬ̣ܵܢ ܐܲܝܟ݂ ܢܲܦ̮ܫܹܗ. 2: ܘܕܲܒ̣ܪܹܗ ܫܵܐܘܿܠ ܒܝܵܘܡܵܐ ܗܵܘ̇: ܘܠܵܐ ܫܲܒ̣ܩܹܗ ܠܡܸܗܦܲܟ݂ ܠܒܹܝܬ̣ ܐܒ̣ܘܼܗܝ.

3: ܘܐܲܩܝܼܡܘ ܝܘܿܢܵܬ̣ܵܢ ܘܕ݂ܵܘܝܼܕ݂ ܩܝܵܡܵܐ: ܡܸܛܠ ܕܲܪܚܸܡ ܗ̄ܘ̣ܵܐ ܝܘܿܢܵܬ̣ܵܢ ܠܕ݂ܵܘܝܼܕ݂ ܐܲܝܟ݂ ܢܲܦ̮ܫܹܗ. 4: ܘܲܫܠܲܚ ܝܘܿܢܵܬ̣ܵܢ ܦܪܝܼܣܵܐ ܕܲܥܠܵܘܗܝ ܘܝܲܗ̄ܒܹ̇ܗ ܠܕ݂ܵܘܝܼܕ݂: ܘܡܵܐܢܹ̈ܐ ܕܲܥܠܵܘܗܝ: ܥܕܲܡܵܐ ܠܣܲܝܦܹܗ: ܘܩܸܫܬܹ̇ܗ: ܘܗܸܡܝܵܢܹܗ. 5: ܘܢܵܦܹܩ ܗ̄ܘ̣ܵܐ ܕܵܘܝܼܕ݂ ܠܐܲܝܟܵܐ ܕܲܡܫܲܕܲܪ ܗ̄ܘ̣ܵܐ ܠܹܗ ܫܵܐܘܿܠ: ܘܙܵܟܹ̇ܐ ܗ̄ܘ̣ܵܐ. ܘܐܲܩܝܼܡܹܗ ܫܵܐܘܿܠ ܥܲܠ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ. ܘܲܫܦܲܪ ܒܥܲܝ̈ܢܲܝ ܥܲܡܵܐ: ܘܐܵܦ ܒܥܲܝ̈ܢܲܝ ܥܲܒ̣ܕܵܘ̈ܗܝ ܕܫܵܐܘܿܠ.

6: ܘܲܗܘ̤ܵܐ ܕܟܲܕ݂ ܐܸܬ̣ܵܘ: ܟܲܕ݂ ܗܦܲܟ݂ ܕܵܘܝܼܕ݂ ܟܲܕ݂ ܫܲܩܠܹܗ ܠܲܦܠܸܫܬܵܝܵܐ: ܢܦܲܩ ܢܸܫܹ̈ܐ ܡ̣ܢ ܟܠܗܹܝܢ ܩܘܼܪ̈ܝܵܐ ܕܝܼܣܪܵܝܹܠ: ܠܲܡܫܲܒܵܚܘ ܒܲܪ̈ܒ̣ܝܼܥܵܐ ܠܐܘܼܪܥܹܗ ܕܫܵܐܘܿܠ ܡܲܠܟܵܐ: ܒܲܦ̈ܠܲܓܹܐ: ܘܲܒ̣ܨܸܨ̈ܠܹܐ: ܘܲܒ̣ܚܲܕ݂ܘܼܬ̣ܵܐ. : 7ܘܲܡܥܲܢ̈ܝܵܢ ܗ̄ܘܲܝ̈ ܢܸܫܹܐ: ܘܓ̣ܵܚ̈ܟܵܢ: ܘܐܵܡܪܵܢ: ܩܛܲܠ ܫܵܐܘܿܠ ܒܐܲܠܦܹ̈ܐ: ܘܕ݂ܵܘܝܼܕ݂ ܒܪܸ̈ܒ̇ܘܵܬ̣ܵܐ. 8: ܘܐܸܬ̣ܚܲܡܲܬ̣ ܫܵܐܘܿܠ ܛܵܒ̣: ܘܐܸܬ̣ܒ̇ܐܸܫ ܒܥܲܝܢܵܘ̈ܗܝ ܦܸܬ̣ܓ̣ܵܡܵܐ ܗܵܢܵܐ: ܘܐܸܡܲܪ ܝܲܗ̄ܒ̣ ܠܕ݂ܵܘܝܼܕ݂ ܪܸ̈ܒ̇ܘܵܬ̣ܵܐ: ܘܠܝܼ ܝܲܗ̄ܒ̣ ܐܲܠܦܹ̈ܐ: ܘܬ̣ܘܼܒ̣ ܕܝܼܠܹܗ ܗ̄ܝ̣ ܡܲܠܟ̇ܘܼܬ̣ܵܐ. 9: ܘܫܲܪܝܼ ܫܵܐܘܿܠ ܠܡܸܣܩܪܹܗ ܠܕ݂ܵܘܝܼܕ݂ ܡ̣ܢ ܗܵܘ̇ ܝܵܘܡܵܐ. 10: ܘܲܗܘ̤ܵܐ ܡ̣ܢ ܒܵܬܲܪ ܝܵܘ̈ܡܵܬ̣ܵܐ: ܘܐܲܨܠ̱ܚܲܬ̤ ܪܘܼܚܹܗ ܕܐܲܠܵܗܵܐ ܒܝܼܫܬܵܐ ܥܲܠ ܫܵܐܘܿܠ: ܘܐܸܬ̣ܢܲܒ̇ܝܼ ܒܓܘ ܒܲܝܬܹ̇ܗ: ܘܕ݂ܵܘܝܼܕ݂ ܢܵܩܹܫ ܩܕ݂ܵܡܵܘܗܝ ܐܲܝܟ݂ ܕܟ݂ܠܝܘܿܡ: ܘܡܘܿܪܵܢܝܼܬ̣ܵܐ ܒܐܝܼܕܹܗ ܕܫܵܐܘܿܠ. 11: ܘܲܫܕ݂ܵܐ ܫܵܐܘܿܠ ܡܘܿܪܵܢܝܼܬ̣ܵܐ ܘܐܸܡܲܪ: ܐܸܡܚܸܐ ܒܕ݂ܵܘܝܼܕ݂: ܘܒܸܐܣܬ̣ܵܐ. ܘܐܸܬ̣ܟܲܪܲܟ݂ ܕܵܘܝܼܕ݂ ܡ̣̤ܢ ܩܕ݂ܵܡܵܘܗܝ ܬܲܪܬܹ̇ܝܢ ܙܲܒ̣ܢ̈ܝܼܢ 12: ܘܲܕ݂ܚܸܠ ܫܵܐܘܿܠ ܡ̣ܢ ܩܕ݂ܵܡ ܕܵܘܝܼܕ݂: ܡܸܛܠ ܕܡܵܪܝܵܐ ܗ̄ܘ̣ܵܐ ܥܲܡܹܗ: ܘܡ̣ܢ ܫܵܐܘܿܠ ܥܒܲܪ. 13: ܘܐܲܦܪ̱ܩܹܗ ܫܵܐܘܿܠ ܡ̣ܢ ܠܘܵܬܹܗ: ܘܥܲܒ̣ܕܹܗ ܠܹܗ ܪܲܒ̇ ܐܲܠܦܵܐ: ܘܲܗܘ̤ܐ ܢܵܦܹܩ ܘܥܵܐܹܠ ܩܕ݂ܵܡ ܥܲܡܵܐ. 14: ܘܲܗܘ̤ܵܐ ܕܵܘܝܼܕ݂ ܒܟ݂ܠܗܹܝܢ ܐܘܼܪ̈ܚܵܬܹܗ ܣܲܟ̇ܘܼܠܬ̣ܵܢ: ܘܡܵܪܝܵܐ ܥܲܡܹܗ. 15: ܘܲܚܙܵܐ ܫܵܐܘܿܠ ܕܣܲܟ̇ܘܼܠܬ̣ܵܢ ܗ̄ܘ̣ ܛܵܒ̣: ܘܲܕ݂ܚܸܠ ܡ̣ܢ ܩܕ݂ܵܡܵܘܗܝ. 16: ܘܟ݂ܠܹܗ ܝܼܣܪܵܝܹܠ ܘܲܝܗܘܼܕ݂ܵܐ ܪܚܸܡ̣ܘ ܠܕ݂ܵܘܝܼܕ݂: ܡܸܛܠ ܕܗ̤ܘ ܢܵܦܹܩ ܗ̄ܘ̣ܵܐ ܘܥܵܐܹܠ ܩܕ݂ܵܡܲܝܗܘܿܢ. 17: ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂. ܗܵܐ ܒܪܲܬ̣ܝ ܩܲܫܝܼܫܬܵܐ ܢܵܕ݂ܵܒ̣: ܐܸܬ̇ܠܝܼܗ̇ ܠܵܟ݂ ܐܲܢ̄ܬ̇ܬ̣ܵܐ: ܒܪܲܡ ܗܘ̤ܝܼ ܠܝܼ ܪܲܒ̇ ܚܲܝܠܵܐ: ܘܐܸܬ̣ܟܲܬܲܫ ܒܲܩܪ̈ܵܒ̣ܵܘܗܝ ܕܡܵܪܝܵܐ. ܘܫܵܐܘܿܠ ܐܸܡܲܪ: ܠܵܐ ܬܸܗܘܸܐ ܒܹܗ ܐܝܼܕ݂ܵܝ: ܐܸܠܵܐ ܬܸܗܘܸܐ ܒܹܗ ܐܝܼܕ݂ܵܐ ܕܲܦܠܸܫ̈ܬܵܝܹܐ. 18: ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܡ̇ܢ ܐܸܢܵܐ: ܘܡܵܢܵܐ ܥܸܒ̣ܕܹܬ̣: ܘܡܵܢܑܵ ܐܸܢܘܿܢ ܚܲܝܲܝ̈: ܘܫܲܪܒ̇ܬܹܗ ܕܐܵܒ̣ܝ ܒܝܼܣܪܵܝܹܠ: ܕܒܲܪܬܹܗ ܕܡܲܠܟܵܐ ܐܸܣܲܒ̣. 19: ܘܲܗܘ̤ܵܐ ܙܲܒ̣ܢܵܐ ܠܡܸܬܲܠ ܠܢܵܕ݂ܵܒ̣ ܒܪܬ ܫܵܐܘܿܠ ܠܕ݂ܵܘܝܼܕ݂: ܘܗ̤ܝ ܐܸܬ̣ܝܲܗ̄ܒܲܬ̤ ܠܥܲܙܪܵܐܹܝܠ ܕܡܢ ܡܚܘܿܠܵܐ ܐܲܢ̄ܬ̇ܬ̣ܵܐ. 20: ܘܪܸܚܡܲܬ̣ ܡܲܠܟܸ̇ܠ ܒܲܪܬ̣ ܫܵܐܘܿܠ ܠܕ݂ܵܘܝܼܕ݂: ܘܚܵܘܝܼܘ ܠܫܵܐܘܿܠ: ܘܲܫܦܲܪ ܦܸܬ̣ܓ̣ܵܡܵܐ ܒܥܲܝܢܵܘ̈ܗܝ. 21: ܘܐܸܡܲܪ ܫܵܐܘܿܠ: ܐܸܬ̇ܠܝܼܗ̇ ܠܹܗ: ܘܬܸܗܘܸܐ ܠܹܗ ܬܘܼܩ̱ܠܬ̣ܵܐ: ܘܬܸܗܘܸܐ ܒܹܗ ܐܝܼܕ݂ܵܐ ܕܲܦܠܸܫ̈ܬܵܝܹܐ. ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܒܬܲܪ̈ܬܲܝܗܹܝܢ ܬܸܗܘܸܐ ܠܝܼ ܚܲܬ̣ܢܵܐ ܝܵܘܡܵܢܵܐ. 22: ܘܦܲܩܸܕ݂ ܫܵܐܘܿܠ ܠܥܲܒ̣ܕܵܘ̈ܗܝ: ܕܐܸܡܲܪܘ ܠܕ݂ܵܘܝܼܕ݂ ܒܲܪ ܐܝܼܫܲܝ: ܗܵܐ ܨܒ̣ܵܐ ܒܵܟ݂ ܡܲܠܟܵܐ: ܘܟ݂ܠܗܘܿܢ ܥܲܒ̣ܕܵܘ̈ܗܝ ܪܲܚܡܘܼܟ݂: ܗܵܫܵܐ ܗܘ̤ܝܼ ܚܲܬ̣ܢܵܐ ܠܡܲܠܟܵܐ. 23: ܘܐܸܡܲܪܘ ܥܲܒ̣ܕܵܘ̈ܗܝ ܕܫܵܐܘܿܠ ܠܕ݂ܵܘܝܼܕ݂ ܡܸܠܹ̈ܐ ܗܵܠܹܝܢ: ܘܐܸܡܲܪ ܕܵܘܝܼܕ݂: ܒܨܝܼܪܵܐ ܗ̄ܝܼ ܗܵܕܹܐ ܒܥܲܝܢܲܝ̈ܟ̇ܘܿܢ: ܕܐܸܗܘܸܐ ܚܬ̣ܢܵܐ ܠܡܲܠܟܵܐ: ܘܐܸܢܵܐ ܓܲܒ̣ܪܵܐ ܐ̄ܢܵܐ ܡܸܣܟܹ̇ܢܵܐ ܘܲܡܨܲܥܪܵܐ. 24: ܘܚܵܘܝܘܼܗܝ ܥܲܒ̣ܕܵܘ̈ܗܝ ܠܫܵܐܘܿܠ: ܘܐܸܡܲܪܘ ܠܹܗ ܡܸܠܹ̈ܐ ܗܵܠܹܝܢ ܕܐܸܡܲܪ ܕܵܘܝܼܕ݂. 25: ܘܐܸܡܲܪ ܫܵܐܘܿܠ: ܗܵܟܲܢܵܐ ܐܹܡܪܘܼܢ ܠܕ݂ܵܘܝܼܕ݂: ܠܵܐ ܨܵܒܹܐ ܡܲܠܟܵܐ ܒܡܲܗܪܵܐ: ܐܸܠܵܐ ܒܡܲܐܬܹ̇ܝܢ ܥܘܼܪ̈ܠܵܘܵܬ̣ܵܐ ܕܲܦܠܸܫ̈ܬܵܝܹܐ: ܠܡܸܬ̣ܦܪܵܥܘ ܡ̣ܢ ܒܥܸܠܕܒ̣ܵܒ̣ܵܘ̈ܗܝ. ܘܡܲܠܟܵܐ ܫܵܐܘܿܠ ܐܸܬ̣ܚܲܫܲܒ̣ ܠܡܲܪܡܵܝܘܼܬܹܗ ܠܕ݂ܵܘܝܼܕ݂ ܒܐܝܼܕ݂ܵܐ ܕܲܦܠܸܫ̈ܬܵܝܹܐ. 26: ܘܚܵܘܝܘܼܗܝ ܥܲܒ̣ܕܵܘ̈ܗܝ ܕܫܵܐܘܿܠ ܠܕ݂ܵܘܝܼܕ݂ ܡܸܠܹ̈ܐ ܗܵܠܹܝܢ: ܘܲܫܦܲܪ ܦܸܬ̣ܓ̣ܵܡܵܐ ܒܥܲܝܢܵܘ̈ܗܝ ܕܕܲܘܝܼܕ݂ ܠܡܸܗܘܵܐ ܚܲܬ̣ܢܵܐ ܠܡܲܠܟܵܐ. ܘܠܵܐ ܫܠܸܡܘ ܝܵܘ̈ܡܵܬ̣ܵܐ. 27: ܘܩܵܡ ܕܵܘܝܼܕ݂ ܘܐܸܙܲܠ ܗ̤ܘ ܘܓܲܒ̣ܪ̈ܵܘܗܝ: ܘܩܲܛܸܠ ܡ̣ܢ ܦܠܸܫ̈ܬܵܝܹܐ ܡܲܐܬܹ̇ܝܢ ܓܲܒ̣ܪ̈ܝܼܢ: ܘܐܲܝܬ̇ܝܼ ܕܵܘܝܼܕ݂ ܥܘܼܪ̈ܠܵܘܵܬ̣ܗܘܿܢ: ܘܩܲܪܸܒ̣ ܐܸܢܹܝܢ ܠܡܲܠܟܵܐ ܕܢܸܗܘܸܐ ܚܲܬ̣ܢܵܐ ܠܡܲܠܟܵܐ. ܘܝܲܗ̄ܒ̣ ܠܹܗ ܫܵܐܘܿܠ ܠܡܲܠܟܸ̇ܠ ܒܲܪܬܹܗ ܐܲܢ̄ܬ̇ܬ̣ܵܐ. 28: ܘܲܚܙܵܬ ܫܵܐܘܿܠ ܘܝܼܕܲܥ ܕܡܵܪܝܵܐ ܗܘ̤ܵܐ ܥܲܡ ܕܵܘܝܼܕ݂. ܘܡܲܠܟܸ̇ܠ ܒܲܪܬ̣ ܫܵܐܘܿܠ ܪܚܸܡܸܬܹܗ ܠܕ݂ܵܘܝܼܕ݂ ܛܵܒ̣. 29: ܘܐܵܘܣܸܦ ܬܘܼܒ̣ ܫܵܐܘܿܠ ܠܡܸܕ݂ܚܲܠ ܡ̣ܢ ܩܕ݂ܵܡ ܕܵܘܝܼܕ݂: ܘܲܗܘ̤ܵܐ ܫܵܐܘܿܠ ܠܕ݂ܵܘܝܼܕ݂ ܒܥܸܠܕܒ݂ܵܒ݂ܵܐ ܟܠܗܘܿܢ ܝܵܘ̈ܡܵܬ̣ܵܐ. 30: ܘܲܢܦܲܩܘ ܪܵܘܪ̈ܒ̣ܵܢܹܐ ܕܲܦܠܸܫ̈ܬܵܝܹܐ: ܘܲܗܘ̤ܵܐ ܒܙܲܒ̣ܢܵܐ ܕܲܢܦܲܩܘ: ܐܲܨܠܲܚ ܕܵܘܝܼܕ݂ ܡ̣ܢ ܟܠܗܘܿܢ ܥܲܒ̣ܕܵܘ̈ܗܝ ܕܫܵܐܘܿܠ: ܘܐܸܬ̣ܝܲܩܲܪ ܫܡܹܗ ܛܵܒ̣.

ܩܹܦܵܠܹܐܘܿܢ: ܝܛ.

1: ܘܐܸܡܲܪ ܫܵܐܘܿܠ ܠܝܘܿܢܵܬ̣ܵܢ ܒܪܹܗ ܘܲܠܟ݂ܠܗܘܿܢ ܥܲܒ̣ܕܵܘ̈ܗܝ ܠܡܸܩܛܠܹܗ ܠܕ݂ܵܘܝܼܕ݂: ܘܝܘܿܢܵܬ̣ܵܢ ܒܲܪ ܫܵܐܘܿܠ ܨܵܒܹܐ ܗ̄ܘ̣ܵܐ ܒܕ݂ܵܘܝܼܕ݂ ܛܵܒ̣. 2: ܘܚܵܘܝܼ ܝܘܿܢܵܬ̣ܵܢ ܠܕ݂ܵܘܝܼܕ݂: ܘܐܸܡܲܪ ܠܹܗ: ܒܵܥܹܐ ܫܵܐܘܿܠ ܐܵܒ̣ܝ ܠܡܸܩܛܠܵܟ݂: ܐܸܙܕܲܗ̄ܪ ܘܬܸܒ̣ ܒܛܘܼܫܝܵܐ: ܘܐܸܬ̇ܛܲܫܵܐ. 3: ܘܐܸܢܵܐ ܗܵܐ ܢܵܦܸܩ ܐ̄ܢܵܐ ܘܩܵܐܹܡ ܐ̄ܢܵܐ ܥܲܠ ܓܹܢ̄ܒ̣ ܐܵܒ̣ܝ ܒܚܲܩܠܵܐ: ܕܐܲܢ̄ܬ̇ ܒܵܗ̇: ܘܐܸܢܵܐ ܐܹܡܲܪ ܥܠܲܝܟ ܠܐܵܒ̣ܝ: ܘܐܸܚܙܸܐ ܡܵܢܵܘ ܒܪܸܥܝܵܢܹܗ: ܘܐܹܚܵܘܹܝܟ݂.

4: ܘܐܸܡܲܪ ܝܘܿܢܵܬ̣ܵܢ ܥܲܠ ܕܵܘܝܼܕ݂ ܛܵܒ̣ܬ̣ܵܐ ܠܫܑܵܘܿܠ ܐܲܒ̣ܘܼܗܝ: ܘܐܸܡܲܪ ܠܹܗ: ܠܵܐ ܢܸܚܛܸܐ ܡܲܠܟܵܐ ܒܥܲܒ̣ܕܹܗ ܕܵܘܝܼܕ݂: ܡܸܛܠ ܕܠܵܐ ܚܛܵܐ ܠܵܟ݂: ܘܐܵܦ ܥܒ̣ܵܕ݂ܵܘ̈ܗܝ ܣܵܦܩܝܼܢ ܠܵܟ݂. 5: ܕܣܵܡ ܢܲܦ̮ܫܹܗ ܒܐܝܼܕܲܝ̈ܟ: ܘܲܩܛܲܠ ܠܲܦܠܸܫܬܵܝܵܐ: ܘܲܥܒܲܕ݂ ܡܵܪܝܵܐ ܦܘܼܪܩܵܢܵܐ ܪܲܒܵܐ ܠܟ݂ܠܹܗ ܝܼܣܪܵܝܹܠ ܒܐܝܼܕܹܗ: ܘܲܚܙܲܝܬ̇ ܘܲܚܕ݂ܝܼܬ̇. ܘܗܵܫܵܐ ܠܡܵܢܵܐ ܚܵܛܹܐ ܐܲܢ̄ܬ̇ ܒܲܕ݂ܡܵܐ ܙܲܟܵܝܵܐ: ܘܩܵܛܹܠ ܐܲܢ̄ܬ̇ ܠܹܗ ܠܕ݂ܵܘܝܼܕ݂ ܡܲܓܵܢ. 6: ܘܲܫܡܲܥ ܫܵܐܘܿܠ ܒܩܵܠܹܗ ܕܝܘܿܢܵܬ̣ܵܢ ܒܪܹܗ: ܘܝܼܡܵܐ ܫܵܐܘܿܠ ܘܐܸܡܲܪ: ܚܲܝ ܗ̄ܘ̣ ܡܵܪܝܵܐ ܐܸܢ ܢܡܘܡܼܬ̣. 7: ܘܲܩܪܵܐ ܝܘܿܢܵܬ̣ܵܢ ܠܕ݂ܵܘܝܼܕ݂: ܘܚܵܘܝܹܗ ܟܠܗܹܝܢ ܡܸܠܹ̈ܐ ܗܵܠܹܝܢ. ܘܐܥܠܹܗ ܠܘܵܬ̣ ܫܵܐܘܿܠ: ܘܲܗܘ̤ܵܐ ܠܘܵܬܹܗ ܐܲܝܟ݂ ܕܐܸܬ̣ܡܵܠܝ ܘܐܲܝܟ݂ ܕܲܡܢܵܬ̣ܡܵܠܝ. 8: ܘܐܵܘܣܸܦ ܩܪܵܒ̣ܵܐ ܠܡܸܗܘܵܐ: ܘܲܢܦܲܩ ܕܵܘܝܼܕ݂ ܘܐܸܬ̣ܟܲܬܲܫ ܥܲܡ ܦܠܸܫ̈ܬܵܝܹܐ: ܘܲܡܚܵܐ ܒܗܘܿܢ ܡܚܘܿܬ̣ܵܐ ܪܲܒ̇ܬ̣ܵܐ: ܘܲܥܪܲܩܘ ܡ̣ܢ ܩܕ݂ܵܡܵܘܗܝ. 9: ܘܲܗܘ̤ܵܐ ܪܘܼܚܹܗ ܕܡܵܪܝܵܐ ܒܝܼܫܬܵܐ ܥܲܠ ܫܵܐܘܿܠ: ܘܗ̤ܘ ܝܵܬܹܒ̣ ܒܒܲܝܬܹܗ: ܘܡܘܿܪܵܢܝܼܬܹܗ ܒܐܝܼܕܹܗ: ܘܕ݂ܵܘܝܼܕ݂ ܢܵܩܹܫ ܩܕ݂ܵܡܵܘܗܝ. 10: ܘܲܒ̣ܥܵܐ ܫܵܐܘܿܠ ܠܡܸܡ̱ܚܝܵܗ̇ ܠܡܘܿܪܵܢܝܼܬ̣ܵܐ ܒܕ݂ܵܘܝܼܕ݂ ܘܒܸܐܣܬ̣ܵܐ: ܘܲܥܪܲܩ ܠܹܗ ܡ̣ܢ ܩܕ݂ܵܡ ܫܵܐܘܿܠ: ܘܲܡܚܵܗ̇ ܠܡܘܿܪܵܢܝܼܬ̣ܵܐ ܒܐܸܣܬ̣ܵܐ: ܕܵܘܝܼܕ݂ ܥܪܲܩ ܘܐܸܫܬܵܘܙܲܒ̣ ܒܠܸܠܝܵܐ ܗܵܘ. 11: ܘܫܲܕܲܪ ܫܵܐܘܿܠ ܐܝܼܙܓ̈ܕܹܐ ܠܒܲܝܬܹܗ ܕܕ݂ܵܘܝܼܕ݂: ܠܡܸܛܪܹܗ ܘܲܠܡܸܛܠܹܗ ܒܨܲܦܪܵܐ: ܘܚܵܘܝܲܬ̤ ܠܕ݂ܵܘܝܼܕ݂ ܡܲܠܟܸ̇ܠ ܐܲܢ̄ܬ̇ܬܹܗ: ܘܐܸܡܪܲܬ̤ ܠܹܗ: ܕܐܸܢ ܡܦܲܨܸܐ ܐܲܢ̄ܬ̇ ܢܲܦ̮ܫܵܟ݂: ܡܚܵܪ ܡܵܐܹܬ̣ ܐܲܢ̄ܬ̇. 12: ܘܐܲܚܸܬ̣ܬܹܗ ܡܲܠܟܸ̇ܠ ܠܕ݂ܵܘܝܼܕ݂ ܡ̣ܢ ܟܵܘܬ̣ܵܐ: ܘܲܥܪܲܩ ܘܐܸܙܲܠ ܘܐܸܬ̣ܦܲܨܝܼ. 13: ܘܢܸܣܒܲܬ̤ ܡܲܠܟܸ̇ܠ ܨܲܠܡܵܐ ܘܐܲܪܡܝܲܬ̤ ܒܥܲܪܣܵܐ: ܘܡܸܫܟܵܐ ܕܥܸܙܹ̈ܐ ܣܵܡܲܬ̤ ܐܸܣܵܕ݂ܵܘ̈ܗܝ: ܘܟܲܣܝܲـܬ̤ ܒܡܲܪܛܘܼܛܵܐ. 14: ܘܫܲܕܲܪ ܫܵܐܘܿܠ ܐܝܼܙܓܲـ̈ܕܹܐ ܠܡܸܕ݂ܒ̇ܪܹܗ ܠܕ݂ܵܘܝܼܕ݂: ܘܐܸܡܪܲܬ̤ ܟܪܝܼܗ ܗ̄ܘ̣. 15: ܘܫܲܕܲܪ ܫܵܐܘܿܠ ܐܝܼܙܓܲـ̈ܕܹܐ ܠܡܸܚܙܝܹܗ ܠܕ݂ܵܘܝܼܕ݂: ܘܐܸܡܲܪ ܐܲܣܩܘܼܗܝ ܠܘܵܬ̣ ܒܥܲܪܣܵܐ ܠܡܸܩܛܠܹܗ. 16: ܘܐܸܬ̣ܵܘ ܐܝܼܙܓܲـ̈ܕܹܐ ܘܗܵܐ ܨܲܠܡܵܐ ܒܥܲܪܣܵܐ: ܘܡܸܫܟܵܐ ܕܥܸܙܹ̈ܐ ܐܸܣܵܕ݂ܵܘ̈ܗܝ. 17: ܘܚܵܘܝܼܘ ܠܫܵܐܘܿܠ: ܘܐܸܡܲܪ ܫܵܐܘܿܠ ܠܡܲܟܸ̇ܠ. ܠܡܵܢܵܐ ܗܵܟܲܢܵܐ ܢܟܲܠܬ̇ܝܼܢܝ: ܘܫܕܲܪܬ̇ܝ ܒܥܸܠܕܒ̣ܵܒ̣ܝ ܘܐܸܬ̣ܦܲܠܲܛ. ܘܐܸܡܪܲܬ̤ ܡܲܠܟܸ̇ܠ ܠܫܵܐܘܿܠ: ܗ̤ܘ ܐܸܡܲܪ ܠܝܼ ܫܲܕܪܝܼܢܝ ܕܠܵܐ ܐܸܩܛܠܹܟ݂ܝ. 18: ܘܕ݂ܵܘܝܼܕ݂ ܥܪܲܩ ܘܐܸܬ̣ܦܲܠܲܛ: ܘܐܸܬ̣ܵܐ ܠܘܵܬ̣ ܫܡܘܼܐܹܝܠ ܠܪܵܡܬ̣ܵܐ: ܘܚܵܘܝܹܗ ܟܠ ܕܲܥܒܲܕ݂ ܠܹܗ ܫܵܐܘܿܠ: ܘܐܸܙܲܠ ܗ̤ܘ ܘܲܫܡܘܼܐܹܝܠ: ܘܝܼܬ̤ܒ̣ܘ ܒܝܘܿܢܲܬ̣ ܕܲܒ̣ܪܵܡܬ̣ܵܐ. 19: ܘܚܵܘܝܼܘ ܠܫܵܐܘܿܠ: ܘܐܸܡܪܘ ܠܹܗ: ܗܵܐ ܕܵܘܝܼܕ݂ ܒܝܘܿܢܵܬ̣ ܕܲܒ̣ܪܵܡܬ̣ܵܐ.

20: ܘܫܲܕܲܪ ܫܵܐܘܿܠ ܐܝܼܙܓܲـ̈ܕܹܐ ܠܡܸܕ݂ܒ̇ܪܹܗ ܠܕ݂ܵܘܝܼܕ݂. ܘܲܚܙܵܘ ܕܲܢܒ̣ܝܹ̈ܐ ܕܡܸܬ̣ܢܲܒܹ̇ܝܢ: ܘܲܫܡܘܼܐܹܝܠ ܩܵܐܹܡ ܥܠܲܝܗܘܿܢ: ܘܲܗܘ̤ܵܬ̣ ܥܲܠ ܐܝܼܙܓܲܕܵܘ̈ܗܝ ܕܫܵܐܘܿܠ ܪܘܼܚܹܗ ܕܐܲܠܵܗܵܐ: ܘܐܸܬ̣ܢܲܒ̇ܝܼܘ ܐܵܦ ܗܸܢܘܿܢ. 21: ܘܚܵܘܝܼܘ ܠܫܵܐܘܿܠ. ܘܫܲܕܲܪ ܬܘܼܒ̣ ܐܝܼܙܓܲـ̈ܕܹܐ ܐ̄ܚܪ̈ܵܢܹܐ: ܘܐܸܬ̣ܢܲܒ̇ܝܼܘ ܐܵܦ ܗܸܢܘܿܢ. ܘܐܵܦ ܫܵܐܘܿܠ ܘܫܲܕܲܪ ܐܝܼܙܓـ̈ܕܹܐ ܬܠܝܼܬ̣ܵܝܹ̈ܐ: ܘܐܸܬ̣ܢܲܒ̇ܝܼܘ ܐܵܦ ܗܸܢܘܿܢ. 22: ܘܐܸܙܲܠ ܐܵܦ ܗ̤ܘ ܠܪܵܘܬ̣ܵܐ: ܘܡܲܛܝܼ ܠܓ̣ܘܼܒܵܐ ܪܲܒܵܐ ܕܲܒ̣ܣܵܘܦܵܐ: ܘܫܵܐܘܿܠ ܐܸܡܲܪ: ܐܲܝܟܵܘ ܫܡܘܼܐܹܝܠ ܘܕ݂ܵܘܝܼܕ݂. ܘܐܸܡܲܪܘ ܠܹܗ: ܗܵܐ ܒܝܘܿܢܲܬ̣ ܕܲܒ̣ܪܵܡܬ̣ܵܐ. 23: ܘܐܸܙܲܠ ܠܬܲܡܵܐ ܠܝܘܿܢܲܬ̣ ܕܲܒ̣ܪܵܡܬ̣ܵܐ: ܘܲܗܘ̤ܵܬ̣ ܐܵܦ ܥܠܵܘܗܝ ܪܘܼܚܹܗ ܕܐܲܠܵܗܵܐ: ܘܐܵܙܹܠ ܡܹܐܙܲܠ. ܘܡܸܬ̣ܢܲܒܸ̇ܐ: ܥܕܲܡܵܐ ܕܲܡܛܵܐ ܠܝܘܿܢܲܬ̣ ܕܲܒ̣ܪܵܡܬ̣ܵܐ. 24: ܘܲܫܠܲܚ ܐܵܦ ܗ̤ܘ ܡܵܐܢܵܘ̈ܗܝ: ܘܐܸܬ̣ܢܲܒ̇ܝܼ ܩܕ݂ܵܡ ܫܡܘܼܐܹܝܠ: ܘܲܢܦܲܠ ܥܲܪܛܸܠ ܟܠܹܗ ܐܝܼܡܵܡܵܐ ܗܵܘ̇ ܘܟ݂ܠܹܗ ܠܸܠܝܵܐ: ܡܸܛܠ ܗܵܢܵܐ ܐܵܘܪܝܼܢ ܕܗܵܐ ܐܵܦ ܫܵܐܘܿܠ ܒܲܢܒ̣ܝܹ̈ܐ.

ܩܹܦܵܠܹܐܘܿܢ: ܟ.

: 1 ܘܲܥܪܲܩ ܕܵܘܝܼܕ݂ ܡ̣ܢ ܝܘܿܢܵܬ̣ ܕܲܒ̣ܪܵܡܬ̣ܵܐ: ܘܐܸܬ̣ܵܐ ܘܐܸܡܲܪ ܩܕ݂ܵܡ ܝܘܿܢܵܬܲܢ: ܡܵܢܵܐ ܥܸܒ̣ܕܹܬ̣: ܘܡܵܢܲܐܗ̄ܝܼ ܣܲܟ݂ܠܘܼܬ̣ܝ: ܘܡܵܢܵܐ ܗ̄ܘ̣ ܣܘܼܪܚܵܡܢܝ: ܩܕ݂ܵܡ ܐܲܒ̣ܘܼܟ݂ ܕܒܟܵܥܹܐ ܢܲܦ̮ܫܝ. 2: ܘܐܸܡܲܪ ܠܹܗ ܝܘܿܢܵܬ̣ܵܢ: ܚܵܣ ܠܵܟ݂: ܠܵܐ ܬܡܘܼܬ̣: ܗܵܐ ܠܵܐ ܥܵܒܹܕ݂ ܐܵܒ̣ܝ ܡܸܠܬ̣ܵܐ ܪܲܒ̇ܬ̣ܵܐ ܘܡܸܠܬ̣ܵܐ ܙܥܘܿܪܬܵܐ ܕܠܵܐ ܓܵܠܹܐ ܠܝܼ: ܘܡܸܛܠ ܡܵܢܵܐ ܛܲܫܝܼ ܐܵܒ̣ܝ ܡܸܠܬ̣ܵܐ ܗܵܕܹܐ: ܠܝܬ̇ ܗܵܕܹܐ. 3: ܘܝܼܡܵܐ ܠܹܗ ܕܵܘܝܼܕ݂: ܘܐܸܡܲܪ: ܡܸܛܠ ܕܝܼܕܲܥ ܐܲܒ̣ܘܼܟ݂ ܕܐܸܫܟ̇ܚܹܬ̣ ܪܲܚܡܹܐ ܒܥܲܝ̈ܢܲܝܟ: ܐܸܡܲܪ ܕܠܵܐ ܢܸܕܲܥ ܝܘܿܢܵܬ̣ܵܢ ܒܗܵܕܹܐ ܕܠܵܐ ܬܸܟ݂ܪܸܐ ܠܹܗ. ܒܪܲܡ ܚܲܝ ܗ̄ܘ̣ ܡܵܪܝܵܐ ܘܚܲܝܵܐ ܗ̄ܝ̣ ܢܲܦ̮ܫܵܟ݂: ܐܸܢܵܐ ܐܸܢ ܦܣܵܥܬ̣ܵܐ ܚܕ݂ܵܐ ܗܘ̤ܵܬ̣ ܒܲܝܢܲܝ ܠܡܵܘܬܵܐ. 4: ܘܐܸܡܲܪ ܝܘܿܢܵܬ̣ܵܢ ܠܕ݂ܵܘܝܼܕ݂: ܡܵܐ ܕܐܵܡܪܵܐ ܢܲܦ̮ܫܵܟ݂ ܐܸܥܒܸ̇ܕ݂ ܠܵܟ݂. 5: ܘܐܸܡܲܪ ܕܵܘܝܼܕ݂ ܠܝܘܿܢܵܬ̣ܵܢ: ܗܵܐ ܪܹܫ ܝܲܪܚܵܐ ܗ̄ܘ̣ ܡܚܵܪ: ܘܐܸܢܵܐ ܡܸܣܬ̇ܡܵܟ݂ܘܼ ܡܸܣܬ̇ܡܸܟ݂ ܐ̄ܢܵܐ ܩܕ݂ܵܡ ܐܲܒ̣ܘܼܟ݂ ܠܡܸܠܥܲܣ: ܘܲܬ̣ܫܲܕܪܲܢܝ ܠܡܸܛܫܵܐ ܒܚܲܩܠܵܐ: ܥܕܲܡܵܐ ܠܪܲܡܫܵܐ ܬܠܝܼܬ̣ܵܝܵܐ. 6: ܐܸܢ ܡܸܦܩܕܲܢܝ ܐܲܒ̣ܘܼܟ݂: ܐܸܡܲܪ ܠܹܗ: ܡܸܫܬ̇ܐܵܠܘ ܐܸܫܬ̇ܐܸܠ ܡܹܢܝ ܕܵܘܝܼܕ݂: ܕܢܹܐܙܲܠ ܠܒܹܝܬ̣ ܠܚܸܡ ܩܪܝܼܬܹܗ: ܡܸܛܠ ܕܕܸܒ̣ܚܹ̈ܐ ܕܝܵܘ̈ܡܵܬ̣ܵܐ ܬܲܡܵܢ ܠܟ݂ܠܵܗ̇ ܫܲܪܒ̇ܬ̣ܵܐ. 7: ܐܸܢ ܗܵܟܲܢܵܐ ܢܹܐܡܲܪ: ܛܵܒ̣ ܫܲܦܝܼܪ: ܫܠܵܡܵܐ ܗ̄ܘ̣ ܠܥܲܒ̣ܕܵܟ݂. ܘܐܸܢ ܡܸܬ̣ܒ̇ܐܵܫܘܼ ܢܸܬ̣ܒܐܸܫ ܠܹܗ: ܕܲܥ ܕܓܸܪܡܲܬ̤ ܒܝܼܫܬܵܐ ܡ̣ܢ ܠܘܵܬܹܗ. 8: ܘܲܥܒܸܕ݂ ܛܲܝܒ̇ܘܼܬ̣ܵܐ ܗܵܕܹܐ ܥܲܡ ܥܲܒ̣ܕܵܟ݂: ܡܸܛܠ ܕܒܲܩܝܵܡܹܗ ܕܡܵܪܝܵܐ ܐܲܥܸܠܬ̇ ܠܥܲܒ̣ܕܵܟ݂ ܥܲܡܵܟ݂. ܘܐܸܢ ܐܝܼܬ̣ ܠܝܼ ܣܲܟ݂ܠܘܼܬ̣ܵܐ: ܩܛܘܿܠܲܝܢܝ ܐܲܢ̄ܬ̇: ܘܲܠܘܵܬ̣ ܐܲܒ̣ܘܼܟ݂ ܠܵܐ ܬܵܘܒܠܲܢܝ. 9: ܘܐܸܡܲܪ ܝܘܿܢܵܬ̣ܵܢ ܚܵܣ ܠܵܟ݂. ܡܸܛܠ ܕܐܸܢ ܡܸܕܲܥ ܐܸܕܲܥ ܕܓܸܪܡܲܬ̤ ܠܵܗ̇ ܒܝܼܫܬܵܐ ܡ̣ܢ ܠܘܵܬ̣ ܐܵܒ̣ܝ: ܐܹܬܸܐ ܠܘܵܬ̣ܵܟ݂ ܘܐܹܚܵܘܹܝܟ݂. 10: ܘܐܸܡܲܪ ܕܵܘܝܼܕ݂ ܠܝܘܿܢܵܬ̣ܵܢ: ܡܲܢܘܼ ܢܚܵܘܹܝܢܝ : ܕܲܠܡܵܐ ܢܸܥܢܹܝܟ݂ ܐܲܒ̣ܘܼܟ݂ ܩܲܫܝܵܐܝܼܬ̣. 11: ܘܐܸܡܲܪ ܠܹܗ ܝܘܿܢܵܬ̣ܵܢ ܠܕ݂ܵܘܝܼܕ݂: ܬܵܐ ܢܸܦܘܿܩ ܠܚܲܩܠܵܐ. ܘܲܢܦܲܩܘ ܬܪ̈ܲܝܗܘܿܢ ܠܚܲܩܠܵܐ. 12: ܘܐܸܡܲܪ ܝܘܿܢܵܬ̣ܵܢ ܠܕ݂ܵܘܝܼܕ݂: ܢܸܣܗܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢ ܠܵܐ ܐܸܒ̣ܕܲܩܝܼܘܗܝ ܠܐܵܒ̣ܝ ܐܲܝܟ݂ ܗܵܢܵܐ: ܡܚܵܪ ܠܲܬ̣ܠܵܬ̣ ܫܵܥ̈ܝܼܢ: ܐܸܢ ܛܵܒ̣ ܠܵܟ݂: ܘܗܵܝܕܹ̇ܝܢ ܐܸܫܠܘܿܚ ܠܵܟ݂ ܘܐܸܓ̣ܠܸܐ ܠܵܟ݂. 13: ܗܵܟܲܢܵܐ ܢܸܥܒܸ̇ܕ݂ ܡܵܪܝܑܵ ܠܝܘܿܢܵܬ̣ܵܢ: ܘܗܵܟܲܢܵܐ ܢܵܘܣܸܦ ܠܹܗ: ܐܸܢ ܐܸܛܲܒ̣ ܡ̣ܢ ܐܵܒ̣ܝ ܒܝܼܫܬܵܐ ܕܲܥܠܲܝܟ: ܐܸܓ̣ܠܸܐ ܠܵܟ݂: ܘܐܹܫܲܕܪܲܟ݂ ܘܬܹܐܙܲܠ ܒܲܫܠܵܡܵܐ: ܘܢܸܗܘܸܐ ܡܵܪܝܵܐ ܥܲܡܵܟ݂ ܐܲܝܟ݂ ܕܲܗܘ̤ܵܐ ܥܲܡ ܐܵܒ̣ܝ. 14: ܘܲܠܘܲܝ ܕܹܝܢ ܟܲܕ݂ ܐܸܢܵܐ ܚܲܝ: ܐܸܠܵܐ ܥܒܸܕ݂ ܥܲܡܝ ܛܲܝܒ̇ܘܼܬܹܗ ܕܐܲܠܵܗܑܵ ܥܲܕ݂ܠܵܐ ܐܹܡܘܼܬ̣. 15: ܘܠܵܐ ܬܸܥܢܲܕ݂ ܛܲܝܒ̇ܘܼܬ̣ܵܟ݂ ܡ̣ܢ ܒܲܝܬ̇ܝ ܠܥܵܠܲܡ. ܘܟܲܕ݂ ܢܵܘܒܸܕ݂ ܡܵܪܝܵܐ ܠܲܒ̣ܠܕܒ̣ܵܒ̣ܵܘ̈ܗܝ ܕܕ݂ܵܘܝܼܕ݂ ܡ̣ܢ ܐܲܦܲܝ̈ ܐܲܪܥܑܵܐ. 16: ܢܩܘܼܡ ܝܘܿܢܵܬ̣ܵܢ ܥܲܡ ܕܒܹܝܬ̣ ܕܵܘܝܼܕ݂: ܘܢܸܬ̣ܒܲܥ ܡܵܪܝܵܐ ܡ̣ܢ ܒܥܸܠܕܒ̣ܵܒ̣ܵܘ̈ܗܝ ܕܕ݂ܵܘܝܼܕ݂. 17: ܘܐܵܘܣܸܦ ܝܘܿܢܵܬ̣ܵܢ ܠܡܵܘܡܵܝܘܼܬܹܗ ܠܕ݂ܵܘܝܼܕ݂ ܒܲܕ݂ܪܵܚܹܡ ܗ̄ܘ̣ܵܐ ܠܹܗ: ܡܸܛܠ ܕܪܸܚ̱ܡܬ̣ܵܐ ܕܢܦ̮ܫܹܗ ܪܲܚܡܹܵܗ. 18: ܘܐܸܡܲܪ ܠܹܗ ܝܘܿܢܵܬ̣ܵܢ: ܡܚܵܪ ܪܹܫ ܝܲܪܚܵܐ ܗ̄ܘ̣: ܘܡܸܬ̣ܦܩܸܕ݂ ܐܲܢ̄ܬ̇ ܡܸܛܠ ܕܡܸܬ̣ܦܩܸܕ݂ ܡܵܘܬ̇ܒ̣ܵܟ݂. 19: ܘܠܲܬ̣ܠܵܬ̣ ܫܵܥ̈ܝܼܢ ܡܸܬ̣ܒ̇ܥܑܸ ܐܲܢ̄ܬ̇ ܛܵܒ̣ ܘܬܹܐܬܹܐ ܠܕ݂ܘܼܟ̇ܬ̣ܵܐ ܬܲܡܵܢ ܒܝܵܘܡܵܐ ܕܲܡܚܵܪ: ܘܬܸܬܸ̇ܒ̣ ܥܲܠ ܓܹܢ̄ܒ̣ ܟܹܐܦܵܐ ܗܵܝ̇. 20: ܘܐܸܢܵܐ ܗܵܐ ܬܵܪܹܨ ܐ̄ܢܵܐ ܬܠܵܬ̣ܵܐ ܓܹܐܪ̈ܝܼܢ: ܠܡܸܫܕܵܐ ܠܡܲܪܡܵܝܘܼ ܢܝܼܫܵܐ. 21: ܘܗܵܐ ܡܫܲܕܲܪ ܐ̄ܢܵܐ ܛܲܠܝܵܐ ܐܵܙܹܠ ܠܵܩܹܛ ܓܹܐܪܹ̈ܐ. ܐܸܢ ܐܹܡܲܪ ܠܛܲܠܝܵܐ ܕܗܵܐ ܓܹܐܪܹ̈ܐ ܡܸܢܵܟ݂ ܘܲܠܟ݂ܵܐ: ܣܲܒ̣ ܐܸܢܘܿܢ ܘܬ̣ܵܐ: ܕܲܥ ܘܲܚܙܝܼ ܕܲܫܠܵܡ ܠܵܟ݂: ܘܠܲܝܬ̇ ܡܸܠܵܐ ܒܝܼܫܵܐ: ܚܲܝ ܗ̄ܘ̣ ܡܵܪܝܵܐ. 22: ܘܐܸܢ ܗܵܟܲܢܵܐ ܐܹܡܲܪ ܠܛܲܠܝܵܐ: ܕܗܵܐ ܓܹܐܪܹ̈ܐ ܡܸܢܵܟ݂ ܘܲܠܗܲܠ: ܙܸܠ: ܡܸܛܠ ܕܫܲܕܪܵܟ݂ ܡܵܪܝܵܐ. 23: ܒܦܸܬ̣ܓ̣ܵܡܵܐ ܕܡܲܠܸܠ̄ܢ ܐܸܢܵܐ ܘܐܲܢ̄ܬ̇: ܗܵܐ ܡܵܪܝܵܐ ܐܲܠܵܗܑܵܐ ܒܲܝܢܲܝ ܘܠܵܟ݂ ܥܕܲܡܵܐ ܠܥܵܠܲܡ. 24: ܘܐܸܬ̇ܛܲܫܝܼ ܕܵܘܝܼܕ݂ ܒܚܲܩܠܵܐ: ܘܲܗܘ̤ܵܐ ܪܹܫ ܝܲܪܚܵܐ: ܘܐܸܣܬ̇ܡܸܟ݂ ܡܲܠܟܵܐ ܥܲܠ ܠܲܚܡܵܐ ܠܡܸܠܥܲܣ. 25: ܘܐܸܣܬ̇ܡܸܟ݂ ܡܲܠܟܵܐ ܥܲܠ ܣܡܵܟܹܗ ܐܲܝܟ݂ ܕܲܒ̣ܟ݂ܠܙܒܲܢ: ܥܲܠ ܓܹܢ̄ܒ̣ ܐܸܣܬ̣ܵܐ. ܘܩܵܡ ܝܘܿܢܵܬ̣ܵܢ ܘܐܸܣܬ̇ܡܸܟ݂: ܘܐܲܒ̣ܢܝܼܪ ܥܲܠ ܓܹܢ̄ܒ̣ ܫܑܵܘܿܠ: ܘܐܸܬ̣ܦܲܩܕܲܬ̤ ܕܘܼܟ̇ܬܹܗ ܕܕ݂ܵܘܝܼܕ݂. 26: ܘܠܵܐ ܐܸܡܲܪ ܫܵܐܘܿܠ ܡܸܕ݂ܡ ܒܝܵܘܡܵܐ ܗܵܘ̇: ܡܸܛܠ ܕܐܸܡܲܪ ܕܓܸܕ݂ܫܵܐ ܗ̄ܘ̣: ܕܲܠܡܵܐ ܕܟܸܐ ܗ̄ܘ̣: ܐܵܘ ܕܲܠܡܵܐ ܠܵܐ ܗ̄ܘ̣ܵܐ ܕܟܸܐ. 27: ܘܲܗܘ̤ܵܐ ܠܝܵܘܡܵܐ ܐ̄ܚܪܹܢܵܐ ܕܪܹܫ ܝܲܪܚܵܐ: ܘܐܸܬ̣ܦܲܩܕܲܬ̤ ܕܘܼܟ̇ܬܹܗ ܕܕ݂ܵܘܝܼܕ݂. ܘܐܸܡܲܪ ܫܵܐܘܿܠ ܠܝܘܿܢܵܬ̣ܵܢ ܒܪܹܗ: ܡܸܛܠ ܡܵܢܵܐ ܠܵܐ ܐܸܬ̣ܵܐ ܒܲܪ ܐܝܼܫܲܝ: ܠܵܐ ܐܸܬ̣ܡܵܠܝ ܘܠܵܐ ܝܵܘܡܵܢܵܐ: ܠܠܲܚܡܵܐ. 28: ܘܲܥܢܵܐ ܝܘܿܢܵܬ̣ܵܢ ܘܐܸܡܲܪ ܠܫܵܐܘܿܠ ܐܲܒ̣ܘܼܗܝ: ܡܸܫܬ̇ܐܵܠܘܼ ܐܸܫܬ̇ܐܸܠ ܡܹܢܝ ܕܵܘܝܼܕ݂ ܥܕܲܡܵܐ ܠܒܹܝܬ̣ ܠܚܸܡ ܩܪܝܼܬܹܗ. 29: ܘܐܸܡܲܪ ܫܲܕܲܪܝܢܝ ܡܸܛܠ ܕܕܸܒ̣ܚܬܵܐ ܕܫܲܪܒ̇ܬ̣ܵܐ ܐܝܼܬ̣ ܠܲܢ ܒܲܩܪܝܼܬ̣ܵܐ: ܘܦܩܕܲܢܝ ܘܐܸܡܲܪ ܠܝܼ: ܐܵܚܝ: ܐܸܢ ܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ: ܐܹܙܲܠ ܐܸܚܙܸܐ ܠܐܲܚܲܝ̈: ܡܸܛܠ ܗܵܢܵܐ ܠܵܐ ܐܸܬ̣ܵܐ ܠܦܵܬ̣ܘܿܪܵܐ ܕܡܲܠܟܵܐ. 30: ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܫܵܐܘܿܠܘܐܸܡܲܪ ܠܹܗ: ܒܲܪ ܚܲܣܝܼܪܲܬ̣ ܡܲܪܕܘܼܬ̣ܵܐ: ܠܵܐ ܝܵܕ݂ܵܥ ܐ̄ܢܵܐ: ܕܨܵܒܹ̇ܐ ܐܲܢ̄ܬ̇ ܒܲܒ̣ܪܹܗ ܕܐܝܼܫܲܝ: ܠܒܸܗܬ̇ܬ̣ܵܟ݂ ܘܲܠܒܸܗܬܲܬ̣ ܦܘܼܪܣܵܝܗ̇ ܕܐܸܡܵܟ݂. 31: ܡܸܛܠ ܕܟ݂ܠܗܘܿܢ ܝܵܘ̈ܡܵܬ̣ܵܐ ܕܒܲܪ ܐܝܼܫܲܝ ܚܲܝ ܥܲܠ ܐܲܪܥܵܐ: ܠܵܐ ܬܸܬ̣ܩܲܢ ܐܲܢ̄ܬ̇ ܘܡܲܠܟ̇ܘܼܬ̣ܵܟ݂. ܗܵܫܵܐ ܐܹܫܲܕܲܪ ܐܸܕ݂ܒ̇ܪܝܼܘܗܝ ܠܝܼ: ܡܸܛܠ ܕܒܲܪ ܡܵܘܬܵܐ ܗ̄ܘ̣. 32: ܘܲܥܢܵܐ ܝܘܿܢܵܬ̣ܵܢ ܘܐܸܡܲܪ ܠܫܵܐܘܿܠ ܐܲܒ̣ܘܼܗܝ: ܥܲܠ ܡܢܵܐ ܡܵܐܹܬ̣: ܡܵܢܵܐ ܥܒܲܕ݂. 33: ܘܐܲܪܝܼܡ ܫܵܐܘܿܠ ܡܘܿܪܵܢܝܼܬ̣ܵܐ ܥܠܵܘܗܝ ܠܡܸܡܚܝܹܗ: ܘܝܼܕܲܥ ܝܘܿܢܵܬ̣ܵܢ ܕܓܸܪܡܲܬ̤ ܡ̣ܢ ܠܘܵܬ̣ ܐܲܒ̣ܘܼܗܝ ܠܡܸܫܛܠܹܗ ܠܕ݂ܵܘܝܼܕ݂. 34: ܘܩܵܡ ܝܘܿܢܵܬ݂ܵܢ ܡ̣ܢ ܦܵܬ̣ܘܿܪܑܵܐ ܒܚܸܡܬ̣ܵܐ ܥܲܫܝܼܢܬܵܐ: ܘܠܵܐ ܐܸܟܲܠ ܒܝܵܘܡܵܐ ܗܵܘ̇ ܕܲܬ̣ܪܹܝܢ ܕܪܹܫ ܝܲܪܚܵܐ: ܡܸܛܠ ܕܟܸܪܝܲܬ̤ ܠܹܗ ܥܲܠ ܕܵܘܝܼܕ݂: ܕܓܲܪܡܵܗ̇ ܐܲܒ̣ܘܼܗܝ ܥܠܵܘܗܝ. 35: ܘܲܗܘ̤ܵܐ ܨܲܦܪܵܐ ܘܲܢܦܲܩ ܝܘܿܢܵܬ̣ܵܢ ܠܚܲܩܠܵܐ ܠܐܘܼܪܥܹܗ ܕܕ݂ܵܘܝܼܕ݂: ܘܛܲܠܝܵܐ ܙܥܘܿܪܵܐ ܥܲܡܹܗ. 36: ܘܐܸܡܲܪ ܠܛܲܠܝܵܐ: ܗܲܪ̄ܛ ܠܲܩܸܛ ܓܹܐܪܹ̈ܐ ܕܫܵܕܹܐ ܐ̄ܢܵܐ. ܛܲܠܝܵܐ ܪܗܸܛ: ܘܗ̤ܘ ܫܕ݂ܵܐ ܓܹܐܪܵܐ ܠܡܲܥܒܵܪܘܼܬܹܗ. 37: ܘܲܡܛܵܐ ܛܲܠܝܵܐ ܥܕܲܡܵܐ ܠܕ݂ܘܼܟ̇ܬ̣ܵܐ ܕܹ̃ܐܪܵܐ ܕܲܫܕ݂ܵܐ ܝܘܿܢܵܬ̣ܵܢ: ܘܲܩܪܵܐ ܝܘܿܢܵܬ̣ܵܢ ܠܛܲܠܝܵܐ ܘܐܸܡܲܪ: ܗܵܐ ܓܹܐܪܵܐ ܡܸܢܵܟ݂ ܘܲܠܗܲܠ. 38: ܘܲܩܪܵܐ ܝܘܿܢܵܬ̣ܵܢ ܒܵܬܲܪ ܛܲܠܝܵܐ: ܐܸܣܬܲܪܗܲܒ̣ ܒܲܥܓܲܠ ܘܠܵܐ ܬܩܘܼܡ. ܘܠܲܩܸܛ ܛܲܠܝܵܐ ܕܝܘܿܢܵܬ̣ܵܢ ܓܹܐܪܹ̈ܐ: ܘܐܲܝܬ̇ܝܼ ܠܡܵܪܹܗ. 39: ܘܠܵܐ ܝܼܕܲܥ ܛܲܠܝܵܐ ܡܸܕܸܡ: ܐܸܠܵܐ ܝܘܿܢܵܬ̣ܵܢ ܘܕ݂ܵܘܝܼܕ݂ ܕܝܵܕ݂ܥܝܼܢ ܗ̄ܘ̣ܵܘ ܦܸܬ̣ܓ̣ܵܡܵܐ. 40: ܘܝܲܗ̄ܒ̣ ܝܘܿܢܵܬ̣ܵܢ ܡܵܐܢܵܘ̈ܗܝ ܠܛܲܠܝܹܗ: ܘܐܸܡܲܪ ܠܹܗ ܙܸܠ ܐܲܥܸܠ ܠܲܩܪܝܼـܬ̣ܵܐ. 41: ܛܲܠܝܵܐ ܥܲܠ: ܘܕ݂ܵܘܝܼܕ݂ ܩܵܡ ܡ̣ܢ ܠܘܵܬ̣ ܟܹܐܦܵܐ: ܘܐܸܬ̣ܵܐ ܠܘܵܬ̣ ܝܘܿܢܵܬ̣ܵܢ: ܘܲܢܦܸܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܘܲܣܓܸܕ݂ ܙܲܒ̣ܢ̈ܝܼܢ: ܘܢܲܫܩܘ ܓܒܲܪ ܠܚܲܒ̣ܪܹܗ: ܘܲܒ̣ܟ݂ܵܘ ܓܒܲܪ ܥܲܠ ܚܲܒ̣ܪܹܗ: ܒܪܲܡ ܕܵܘܝܼܕ݂ ܐܲܣܓܝܼ. 42: ܘܐܸܡܲܪ ܝܘܿܢܵܬ̣ܵܢ ܠܕ݂ܵܘܝܼܕ݂ ܙܸܠ ܒܲܫܠܵܡܵܐ: ܝܵܡܹܝܢ ܚ̄ܢܲܢ ܕܹܝܢ ܬܪ̈ܲܝܢ ܒܲܫܡܹܗ ܕܡܵܪܝܵܐ ܠܡܹܐܡܲܪ: ܡܵܪܝܵܐ ܒܲܝܢܲܝ ܘܠܵܟ݂: ܘܒܹܝܬ̣ ܙܲܪܥܝ ܠܙܲܪܥܵܟ݂: ܥܕܲܡܵܐ ܠܥܵܠܲܡ.

ܩܹܦܵܠܹܐܘܿܢ: ܟܐ.

1: ܘܩܵܡ ܝܘܿܢܵܬ̣ܵܢ ܘܥܲܠ ܠܲܩܪܝܼܬ̣ܵܐ. 2: ܘܐܸܬ̣ܵܐ ܕܵܘܝܼܕ݂ ܠܲܢܟ݂ܵܚ ܠܘܵܬ̣ ܐܲܚܝܼܡܲܠܟ ܟܵܗܢܵܐ: ܘܲܬ̣ܘܲܗ ܐܲܚܝܼܡܲܠܟ ܠܐܘܼܪܥܹܗ ܕܕ݂ܵܘܝܼܕ݂: ܘܐܸܡܲܪ ܠܹܗ: ܡܵܢܵܐ ܗ̄ܘ̣ ܕܐܲܢ̄ܬ̇ ܒܲܠܚܘܿܕܲܝܟ ܐܸܬܲܝ̣ܬ̇ ܘܐ̄ܢܵܫ ܠܲܝܬ̇ ܥܲܡܵܟ݂. 3: ܘܐܸܡܲܪ ܕܵܘܝܼܕ݂ ܠܐܲܚܝܼܡܲܠܟ ܟܵܗܢܵܐ: ܡܲܠܟܵܐ ܦܲܩܕܲܢܝ ܦܸܬ̣ܓ̣ܵܡܵܐ: ܘܐܸܡܲܪ ܠܝܼ: ܕܐ̄ܢܵܫ ܠܵܐ ܢܕܲܥ ܡܸܕܸܡ ܕܲܡܫܲܕܲܪ ܐ̄ܢܵܐ ܠܵܟ݂: ܘܲܡܦܲܩܸܕ݂ ܐ̄ܢܵܐ ܠܵܟ݂: ܘܠܲܛܠܵܝܹ̈ܐ ܚܵܘܝܼܬ̣ ܐܲܬ̣ܪܵܐ ܕܲܓܢܸܐ ܘܲܡܛܲܫܲܝ. 4: ܘܗܵܫܵܐ ܡܵܢܑܵ ܐܝܼܬ̣ ܬܚܹܝܬ̣ ܐܝܼܕܵܟ݂: ܚܲܡܸܫ ܕܠܲܚܡܵܐ ܗܲܒ̣ ܒܐܝܼܕܲܝ̈: ܐܵܘ ܡܸܕܸܡ ܕܡܸܫܬ̇ܟܲܚ. 5: ܘܲܥܢܵܐ ܟܵܗܢܵܐ ܠܕ݂ܵܘܝܼܕ݂ ܘܐܸܡܲܪ ܠܹܗ: ܠܲܝܬ̇ ܠܲܚܡܵܐ ܫܲܪܝܵܐ ܬܚܹܝܬ̣ ܐܝܼܕ݂ܝ: ܐܸܠܵܐ ܠܲܚܡܵܐ ܕܩܘܼܕ݂ܫܵܐ ܐܝܼܬ̣: ܐܸܢ ܢܛܲܪܘ ܛܠܵܝܹ̈ܐ ܡ̣ܢ ܩܘܼܪܒܵܢܵܐ. 6: ܘܲܥܢܵܐ ܕܵܘܝܼܕ݂ ܘܐܸܡܲܪ ܠܟ݂ܵܗܢܵܐ: ܩܘܼܪܒܵܢܵܐ ܡܫܲܠܲܛ ܗ̄ܘ̣ ܠܲܢ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ ܟܲܕ݂ ܢܸܦܩܹܬ̣: ܘܗܵܐ ܡܵܐܢܹ̈ܐ ܕܲܛܠܵܝܹ̈ܐ ܩܲܕܝܼܫܝܼܢ: ܘܗ̤ܝ ܐܘܼܪܚܵܐ ܫܲܪܝܵܐ: ܘܐܵܦ ܝܵܘܡܵܢܵܐ ܐܸܬ̣ܩܲܕܲܫܘ ܒܡܵܐܢܹ̈ܐ. 7: ܘܝܲܗ̄ܒ̣ ܠܹܗ ܟܵܗܢܵܐ ܩܘܼܕ݂ܫܵܐ: ܡܸܛܠ ܕܠܵܐ ܗ̄ܘ̣ܵܐ ܬܲܡܵܢ ܠܲܚܡܵܐ: ܐܸܠܵܐ ܐܸܢ ܠܲܚܡܵܐ ܕܐܲܦܹ̈ܐ ܕܡܲܥܒ̇ܪܝܼܢ ܡ̣ܢ ܩܕ݂ܵܡ ܡܵܪܝܵܐ ܠܲܡܣܵܡ ܠܲܚܡܵܐ ܚܲܡܝܼܡܵܐ ܒܝܵܘܡܵܐ ܕܡܸܬ̣ܢ̱ܣܸܒ̣. 8: ܘܬ̣ܵܡܵܢ ܓܲܒ̣ܪܵܐ ܡ̣ܢ ܥܲܒ̣ܕܵܘ̈ܗܝ ܕܫܵܐܘܿܠ: ܒܝܵܘܡܵܐ ܗܵܘ ܟܠܹܗ ܗ̄ܘ̣ܵܐ ܩܕ݂ܵܡ ܡܵܪܝܵܐ: ܘܲܫܡܹܗ ܕܘܿܐܵܓ̣ ܐܲܕ݂ܘܿܡܵܝܵܐ: ܥܲܫܝܼܢܵܐ ܕܪ̈ܵܥܵܘܵܬ̣ܵܐ ܕܫܵܐܘܿܠ. 9: ܘܐܸܡܲܪ ܕܵܘܝܼܕ݂ ܠܐܲܚܝܼܡܲܠܟ ܠܲܝܬ̇ ܗܵܪܟܵܐ ܬܚܹܝܬ̣ ܐܝܼܕ݂ܵܟ݂ ܣܲܝܦܵܐ ܐܵܘ ܡܘܿܪܵܢܝܼܬ̣ܵܐ: ܡܸܛܠ ܕܐܵܦ ܣܲܝܦܝ ܐܵܦ ܡܘܿܪܵܢܝܼܬ̣ܝ ܠܵܐ ܢܹܣܒܹ̇ܬ̣ ܒܐܝܼܕ݂ܝ: ܡܸܛܠ ܕܲܗܘ̤ܵܐ ܦܸܬ̣ܓ̣ܵܡܹܗ ܕܡܲܠܟܵܐ ܡܣܲܪܗܲܒ̣. 10: ܘܐܸܡܲܪ ܟܵܗܢܵܐ: ܣܲܝܦܹܗ ܕܓ̣ܘܼܠܝܵܕ݂ ܦܠܸܫܬܵܝܵܐ ܗܵܘ̇ ܕܲܩܛܲܒܬ̇ ܒܥܘܼܡܩܵܐ ܕܒܸܛܡ̱ܬ̣ܵܐ: ܗܵܐ ܟܪܝܼܟ݂ ܒܫܘܿܫܸܦܵܐ ܒܸܣܬܲܪ ܦܸܕܬ̣ܵܐ: ܐܸܢܗ̤ܘ ܕܢܵܣܹܒ̣ ܐܲܢ̄ܬ̇ ܠܹܗ ܣܲܒ̣: ܡܸܛܠ ܕܠܲܝܬ ܠܒܲܪ ܡܸܢܹܗ ܐ̄ܚܪܹܝܢ ܗܵܪܟܵܐ. ܘܐܸܡܲܪ ܕܵܘܝܼܕ݂: ܠܲܝܬ̇ ܐܲܟ݂ܘܵܬܹܗ: ܗܲܒܲܝܗܝ ܠܝܼ. 11: ܘܩܵܡ ܕܵܘܝܼܕ݂ ܘܲܥܪܲܩ ܡ̣ܢ ܩܕ݂ܵܡ ܫܵܐܘܿܠ: ܒܝܵܘܡܵܐ ܗܵܘ̣: ܘܐܸܬ̣ܵܐ ܠܘܵܬ̣ ܐܲܟ݂ܝܼܫ ܡܲܠܟܵܐ ܕܓ̣ܵܬ̣. 12: ܘܐܸܡܲܪܘ ܠܹܗ ܥܲܒ̣ܕܵܘ̈ܗܝ ܠܐܲܟ݂ܝܼܫ: ܗܵܢܵܘ ܡܲܠܟܵܐ ܕܐܲܪܥܵܐ ܕܝܼܣܪܵܝܹܠ: ܠܗܵܢܵܐ ܡܣܲܓ̈ܝܵܢ ܗ̄ܘܲܝ̈ ܒ̈ܢܲܝ ܝܼܣܪܵܝܹܠ ܘܐܵܡܪ̈ܵܢ: ܩܛܲܠ ܫܵܐܘܿܠ ܒܐܲܠܦܹ̈ܐ: ܘܕ݂ܵܘܝܼܕ݂ ܒܪܸ̈ܒ̇ܘܵܬ̣ܵܐ. 13: ܘܣܵܡ ܕܵܘܝܼܕ݂ ܡܸܠܹ̈ܐ ܗܵܠܹܝܢ ܒܠܸܒܹ̇ܗ: ܘܲܕ݂ܚܸܠ ܛܵܒ̣ ܡ̣ܢ ܩܕ݂ܵܡ ܐܲܟ݂ܝܼܫ ܡܲܠܟܵܐ ܕܓ̣ܵܬ̣. 14: ܘܫܲܢܝܼ ܛܲܥܡܹܗ ܒܥܲܝܢܵܘ̈ܗܝ: ܘܐܸܫܬܲܟܲܪ ܒܥܲܝܬܵܝ̈ܗܘܿܢ. ܘܝܼܬܸܒ̣ ܥܲܠ ܐܸܣܟ̇ܘܿܦܬ̣ܵܐ ܕܬܲܪܥܵܐ: ܘܐܲܪܡܝܼ ܪܝܼܪܹܗ ܥܲܠ ܕܲܩܢܹܗ. 15: ܘܐܸܡܲܪ ܐܲܟ݂ܝܼܫ ܠܥܲܒ̣̈ܕܵܘܗܝ: ܗܵܐ ܚܙܲܝܼܬ̇ܘܿܢ ܠܓܲܒ̣ܪܵܐ ܕܫܵܢܝܵܐ ܗ̄ܘ̱: ܠܡܵܢܵܐ ܐܲܝܬ̇ܝܼܬ̇ܘܿܢܵܝܗܝ ܠܘܵܬ̣ܝ. 16: ܚܲܣܝܼܪ ܛܲܥܡܵܐ ܐ̄ܢܵܐ ܕܐܲܝܬ̇ܝܼܬ̇ܘܿܢ ܗܵܢܵܐ ܕܫܵܛܹܐ ܥܠܲܝ: ܗܵܢܵܐ ܢܸܥܘܿܠ ܠܒܲܝܬ̇ܝ.

ܩܹܦܵܠܐܹܘܿܢ: ܟܒ.

1: ܘܐܸܙܲܠ ܕܵܘܝܼܕ݂ ܡ̣ܢ ܬܲܡܵܢ: ܘܐܸܬ̣ܦܲܠܲܛ ܠܲܡܥܲܪܲܬ̣ ܥܲܪܠܲܡ. ܘܲܫܡܲܥ ܐܲܚܵܘ̈ܗܝ ܘܟ݂ܠܹܗ ܒܹܝܬ̣ ܐܲܒ̣ܘܼܗܝ: ܘܲܢܚܸܬ̣ܘ ܠܘܵܬܹܗ ܠܬܲܡܵܢ. 2: ܘܐܸܬ̣ܟܲܢܲܫܘ ܠܘܵܬܹܗ ܟܠ ܓܲܒ̣ܪܵܐ ܕܲܡܥܵܩ: ܘܟ݂ܠ ܓܲܒ̣ܪܵܐ ܕܐܝܼܬ̣ ܠܹܗ ܡܵܪܹܐ ܚܵܘܒܵܐ: ܘܟ݂ܠ ܓܲܒ̣ܪܵܐ ܡܲܪܝܼܪ ܢܲܦ̮ܫܵܐ. ܘܲܗܘ̤ܵܐ ܥܠܲܝܗܘܿܢ ܪܹܫܵܐ: ܘܲܗܘ̤ܵܐ ܥܲܡܹܗ ܐܲܝܟ݂ ܐܲܪܒܲܥܡܵܐܐ ܓܲܒ̣ܪܹ̈ܝܢ. 3: ܘܐܸܙܲܠ ܕܵܘܝܼܕ݂ ܡ̣ܢ ܬܲܡܵܢ ܠܡܲܨܦܝܵܐ ܕܡܘܼܐܵܒ̣: ܘܐܸܡܲܪ ܠܡܲܠܟܵܐ ܕܡܘܼܐܵܒ̣: ܢܸܬܸ̇ܒ̣ ܐܵܒ̣ܝ ܘܐܹܡܝ ܥܲܡܟ݂ܘܿܢ: ܥܕܲܡܵܐ ܕܐܸܕܲܥ ܡܵܢܵܐ ܥܵܒܸܕ݂ ܠܝܼ ܐܲܠܵܗܵܐ. 4: ܘܲܫܒܲܩ ܐܸܢܘܿܢ ܠܘܵܬ̣ ܡܲܠܟܵܐ ܕܡܘܼܐܵܒ̣: ܘܝܼܬܸܒ̣ܘ ܥܲܡܹܗ ܟܠ ܝܵܘ̈ܡܵܬ̣ܵܐ ܕܲܗܘ̤ܵܐ ܕܵܘܝܼܕ݂ ܒܡܲܨܦܝܵܐ. 5: ܘܐܸܡܲܪ ܓܵܕ݂ ܢܒ̣ܝܼܵܐ ܠܕ݂ܵܘܝܼܕ݂: ܠܵܐ ܬܸܬܸ̇ܒ̣ ܒܡܲܨܦܝܵܐ: ܙܸܠ ܥܘܿܠ ܠܵܟ݂ ܠܐܲܪܥܵܐ ܕܲܝܗܘܼܕ݂ܵܐ: ܘܐܸܙܲܠ ܕܵܘܝܼܕ݂ ܘܥܲܠ ܠܹܗ ܠܥܵܒ̣ܵܐ ܕܚܸܙܝܘܿܬ̣. 6: ܘܲܫܡܲܥ ܫܵܐܘܿܠ ܕܐܸܬ̣ܓ̇ܠܝܼ ܕܵܘܝܼܕ݂ ܘܓܲܒ̣ܪܹ̈ܐ ܕܥܲܡܹܗ: ܘܫܵܐܘܿܠ ܝܵܬܹܒ̣ ܗ̄ܘ̣ܵܐ ܒܲܓ̣ܒܲܥ ܬܚܹܝܬ̣ ܠܘܼܙܵܐ ܕܲܒ̣ܪܵܡܬ̣ܵܐ: ܘܡܘܿܪܵܢܝܼܬܹܗ ܩܐܝܼܕܹܗ: ܘܟ݂ܠܗܘܿܢ ܥܲܒ̣̈ܕܵܘܗܝ ܩܵܝܡܝܼܢ ܠܥܸܠ ܡܸܢܹܗ. 7: ܘܐܸܡܲܪ ܫܵܐܘܿܠ ܠܥܲܒ̣ܕܵܘ̈ܗܝ ܕܩܵܝܡܝܼܢ ܠܥܸܠ ܡܸܢܹܗ: ܫܡܲܥ ܒ̈ܢܲܝ ܒܸܢܝܵܡܹܝܢ: ܗܵܐ ܠܟ݂ܠܟ݂ܘܿܢ ܢܸܬܸ̇ܠ ܒܲܪ ܐܝܼܫܲܝ ܚܲܩ̈ܠܵܬ̣ܵܐ ܘܟܲܪ̈ܡܹܐ: ܘܲܠܟ݂ܠܟ݂ܘܿܢ ܢܸܥܒܸ̇ܕ݂ ܪܵܘܪ̱̈ܒ̣ܵܢܲܝ ܐܲܠܦܹ̈ܐ ܘܡܲܐ̈ܘܵܬ̣ܵܐ. 8: ܡܸܛܠ ܕܲܡܪܲܕܬ̇ܘܿܢ ܟܠܟ݂ܘܿܢ ܥܠܲܝ: ܘܠܲܝܬ̇ ܕܓܵܠܹܐ ܠܝܼ ܒܲܩܝܵܡܵܐ ܕܒܹܪܝ ܕܥܲܡ ܒܲܪ ܐܝܼܫܲܝ: ܘܠܲܝܬ̇ ܕܟ݂ܵܐܹܒ̣ ܠܹܗ ܡܸܢܟ݂ܘܿܢ ܥܠܲܝ ܘܓ̣ܵܠܹܐ ܠܝ. ܡܸܛܠ ܕܐܲܩܝܼܡ ܒܹܪܝ ܠܥܲܒ̣ܕܲܝ ܥܠܲܝ ܟܡܹܐܢܵܐ ܐܲܝܟ݂ ܕܝܵܘܡܵܐ. 9: ܘܲܥܢܵܐ ܕܘܿܐܵܓ̣ ܐܲܕ݂ܘܿܡܵܝܵܐ: ܘܗ̤ܘ ܩܵܐܹܡ ܥܲܠ ܥܲܒ̣ܕܵܘ̈ܗܝ ܕܫܵܐܘܿܠ: ܘܐܸܡܲܪ: ܚܙܹܝܬܹܗ ܠܕ݂ܵܘܝܼܕ݂ ܕܐܸܬ̣ܵܐ ܠܲܢܟ݂ܵܚ: ܠܘܵܬ̣ ܐܲܚܝܼܡܲܠܟ ܒܲܪ ܐܲܚܝܼܛܘܿܒ̣ ܟܵܗܢܵܐ. 10: ܘܲܫܐܸܠ ܠܹܗ ܒܐܲܠܵܗܵܐ: ܘܡܵܐܢܹ̈ܐ ܘܲܙܘܵܕܹ̈ܐ ܝܲܗ̄ܒ̣ ܠܹܗ: ܘܣܲܝܦܹܗ ܕܓ̣ܘܼܠܝܵܕ݂ ܦܠܸܫܬܵܝܵܐ ܝܲܗ̄ܒ̣ ܠܹܗ. 11: ܘܫܲܕܲܪ ܡܲܠܟܵܐ ܠܡܸܩܪܵܐ ܠܐܲܚܝܼܡܲܠܟ ܒܲܪ ܐܲܚܛܘܿܒ̣ ܟܵܗܢܵܐ: ܘܲܠܟ݂ܠܹܗ ܒܹܝܬ̣ ܐܲܒ̣ܘܼܗܝ ܟܵܗܢܹ̈ܐ ܕܲܒ̣ܢܟ݂ܵܚ: ܘܐܸܬ̣ܵܘ ܟܠܗܘܿܢ ܠܘܵܬ̣ ܡܲܠܟܵܐ. 12: ܘܐܸܡܲܪ ܫܵܐܘܿܠ: ܫܡܲܥ ܢܹܐ ܒܲܪ ܐܲܚܝܼܛܘܿܒ̣: ܘܐܸܡܲܪ ܗܵܐ ܐܸܢܵܐ ܡܵܪܝ. 13: ܘܐܸܡܲܪ ܠܹܗ ܫܵܐܘܿܠ: ܠܡܵܢܵܐ ܐܸܬ̣ܢ̱ܟ݂ܠܬ̇ܘܿܢ ܥܠܲܝ ܐܲܢ̄ܬ̇ ܘܒܲܪ ܐܝܼܫܲܝ: ܟܲܕ݂ ܝܲܗ̄ܒ̣ܬ̇ ܠܹܗ ܠܲܚܡܵܐ ܘܣܲܝܦܵܐ: ܘܲܫܐܸܠܬ̇ ܠܹܗ ܒܐܲܠܵܗܵܐ: ܕܲܬ̣ܩܝܼܡ ܥܠܲܝ ܟܡܹܐܢܵܐ ܐܲܝܟ݂ ܕܝܵܘܡܵܐ. 14: ܘܲܥܢܵܐ ܐܲܚܝܼܡܲܠܟ ܟܵܗܢܵܐ ܠܡܲܠܟܵܐ: ܘܐܸܡܲܪ: ܡܲܢܘ ܒܟ݂ܠܗܘܿܢ ܥܲܒ̣ܕܲܝ̈ܟ ܐܲܝܟ݂ ܕܵܘܝܼܕ݂ ܕܲܡܗܲܝܡܲܢ: ܘܚܲܬ̣ܢܵܐ ܕܡܲܠܟܵܐ ܘܢܵܕܲܪ ܦܘܼܩܕܵܢܲܝ̈ܟ: ܘܝܲܩܝܼܪ ܒܒܲܝܬܵܟ݂. 15: ܝܵܘܡܵܢܵܐ ܗ̄ܘ̣ ܫܲܪܝܼܬ̣ ܠܡܸܫܐܲܠ ܠܹܗ ܒܐܲܠܵܗܵܐ: ܚܵܣ ܠܝܼ: ܠܵܐ ܢܣܝܼܡ ܡܲܠܟܵܐ ܥܲܠ ܥܲܒ̣ܕܹܗ ܡܸܠܬ̣ܵܐ ܗܵܕܹܐ ܘܥܲܠ ܟܠܹܗ ܒܹܝܬ̣ ܐܵܒ̣ܝ. ܡܸܛܠ ܕܠܵܐ ܝܼܕܲܥ ܥܲܒ̣ܕܵܟ݂ ܒܟ݂ܠܹܗ ܦܸܬ̣ܓ̣ܵܡܵܐ ܗܵܢܵܐ ܪܲܒܵܐ ܘܲܙܥܘܿܪܵܐ. 16: ܘܐܸܡܲܪ ܡܲܠܟܵܐ: ܡܡܵܬ̣ ܬܡܘܼܬ̣ ܐܲܚܝܼܡܲܠܟ: ܐܲܢ̄ܬ̇ ܘܟ݂ܠܹܗ ܒܹܝܬ̣ ܐܲܒ̣ܘܼܟ݂. 17: ܘܐܸܡܲܪ ܡܲܠܟܵܐ ܠܪ̈ܲܗܵܛܹܐ ܕܩܵܝܡܝܼܢ ܠܥܸܠ ܡܸܢܹܗ: ܐܸܬ̣ܟܲܪ̄ܟܘ ܘܩܲܛܸܠܘ ܐܸܢܘܿܢ ܠܟ݂ܵܗܢܵܘ̈ܗܝ ܕܐܲܠܵܗܵܐ: ܡܸܛܠ ܕܐܝܼܕܲܝ̈ܗܘܿܢ ܥܲܡ ܕܵܘܝܼܕ݂: ܘܝܼܕܲܥܘ ܕܥܲܪܝܼܩ ܗ̄ܘ̣ܵܐ ܘܠܵܐ ܠܝܼ. ܘܠܵܐ ܨܒ̣ܵܘ ܥܲܒ̣ܕܲܝ̈ ܡܲܠܟܵܐ ܕܢܵܘܫܛܘܼܢ ܐܝܼܕܲܝ̈ܗܘܿܢ ܘܢܲܗܪܘܼܢ ܠܟ݂ܵܗܢܵܘ̈ܗܝ ܕܐܲܠܵܗܵܐ. 18: ܘܐܸܡܲܪ ܡܲܠܟܵܐ ܠܕ݂ܘܐܵܓ̣: ܐܸܬ̣ܟܲܪ̄ܟ݂ ܐܲܢ̄ܬ̇ ܘܲܦܓܲܥ ܒܗܘܿܢ ܒܟ݂ܵܗ̈ܢܹܐ. ܘܲܦܓܲܥ ܕܘܿܐܵܓ̣ ܒܟ݂ܵܗ̈ܢܹܐ: ܘܐܲܡܝܼܬ̣ ܒܝܵܘܡܵܐ ܗܵܘ̇ ܬܡܵܢܐܝܼܢ ܘܚܲܡܫܵܐ ܓܲܒ̣ܪ̈ܝܼܢ ܕܲܫܩܝܼܠܝܼܢ ܗ̄ܘ̣ܵܘ ܦܸܕܬ̣ܵܐ ܕܒ̣ܘܼܨܵܐ. 19: ܘܝܲܗ̄ܒ̣ ܠܹܗ ܩܪܝܼܬ̣ܵܐ ܕܟ݂ܵܗ̈ܢܹܐ: ܘܩܲܛܸܠ ܒܦܘܼܡܵܐ ܕܚܲܪܒܵܐ: ܡ̣ܢ ܓܲܒ̣ܪܵܐ ܘܲܥܕܲܡܵܐ ܠܐܲܢ̄ܬ̇ܬ̣ܵܐ: ܘܡ̣ܢ ܥܠܲܝܡܹ̈ܐ ܘܲܥܕܲܡܵܐ ܠܝܲܠܘܼܕܹ̈ܐ: ܘܬ̣ܵܘܪܹ̈ܐ ܘܚܸܡܪܵܐ ܘܥܵـ̈ܢܵܐ: ܒܦܘܼܡܵܐ ܕܚܲܪܒܵܐ. 20: ܘܐܸܬ̣ܦܲܠܲܛ ܒܪܵܐ ܚܲܕ݂ ܠܐܲܚܝܼܡܲܠܟ ܒܲܪ ܐܲܚܝܼܛܘܿܒ̣ ܘܲܫܡܹܗ ܐ̣ܲܝܼܬܲܪ: ܘܲܥܪܲܩ ܠܹܗ ܒܵܬܲܪ ܕܵܘܝܼܕ݂. 21: ܘܚܵܘܝ ܐܲܒ̣ܝܼܬܲܪ ܠܕ݂ܵܘܝܼܕ݂: ܘܲܩܛܸܠ ܐܸܢܘܿܢ ܫܵܐܘܿܠ ܠܟ݂ܵܗܢܵܘ̈ܗܝ ܕܐܲܠܵܗܵܐ. 22: ܘܐܸܡܲܪ ܕܵܘܝܼܕ݂ ܠܐܲܒ̣ܝܼܬܲܪ: ܝܵܕܲܥ ܗ̄ܘܹܝܬ̣ ܒܝܵܘܡܵܐ ܗܵܘ̇ ܕܬܲܡܵܢ ܗ̄ܘ̣ܵܐ ܕܘܿܐܵܓ̣ ܐܲܕ݂ܘܿܡܵܝܵܐ: ܕܲܡܚܵܘܵܝܘܼ ܡܚܵܘܸܐ ܠܫܵܐܘܿܠ: ܘܐܸܢܵܐ ܐܸܬ̣ܚܲܝܒܹܬ̣ ܒܟ݂ܠܵܗ̇ ܢܲܦ̮ܫܵܐ ܕܒܹܝܬ̣ ܐܲܒ̣ܘܼܟ݂. 23: ܬܸܒ̣ ܠܘܵܬ̣ܝ ܘܠܵܐ ܬܸܕ݂ܚܲܠ: ܡܸܛܠ ܕܡ̇ܢ ܕܒ̣ܵܥܑܹ ܢܲܦ̮ܫܝ: ܒܵܥܹܐ ܐܵܦ ܢܲܦ̮ܫܵܟ݂: ܡܸܛܠ ܕܢܵܛܘܿܪܵܐ ܐܲܢ̄ـܬ̇ ܥܲܡܝ.

ܩܹܦܵܠܹܐܘܿܢ: ܟܓ.

1: ܘܚܵܘܝܼܘ ܠܕ݂ܵܘܝܼܕ݂: ܘܐܸܡܲܪܘ ܠܹܗ: ܗܵܐ ܦܠܸܫ̈ܬܵܝܹܐ ܡܸܬ̣ܟܲܬ̇ܫܝܼܢ ܒܲܩܥܝܼܠܵܐ: ܘܗܸܢܘܿܢ ܒܵܙܝܼܢ ܐܼܕܪܹ̈ܐ.

2: ܘܲܫܸܠ ܕܵܘܝܼܕ݂ ܒܡܵܪܝܵܐ: ܘܐܸܡܲܪ: ܐܹܙܲܠ ܐܸܚܪܘܿܒ̣ ܠܲܦܠܫ̈ܬܵܝܹܐ ܗܵܠܹܝܢ. ܘܐܸܡܲܪ ܠܹܗ ܡܵܪܝܵܐ: ܙܸܠ ܚܪܘܿܒ̣ ܠܲܦܠܸܫ̈ܬܵܝܹܐ: ܘܲܦܪܘܿܩ ܠܲܩܥܝܼܠܵܐ. 3: ܘܐܸܡܲܪܘ ܠܹܗ ܐ̄ܢܵܫܵܘ̈ܗܝ ܠܕ݂ܵܘܝܼܕ݂: ܡ̣ܢ ܡܚܵܪ ܚܢܲܢ ܗܵܪܟܵܐ: ܚܢܵܢ ܕܵܚܠܝܼܢܲܢ: ܐܲܝܟܲܢܵܐ ܢܹܐܙܲܠ ܠܲܩܥܝܼܠܵܐ ܠܣܸܕܪܹ̈ܐ ܕܲܦܠܸܫ̈ܬܵܝܹܐ. 4: ܘܐܵܘܣܸܦ ܬܘܼܒ̣ ܕܵܘܝܼܕ݂ ܠܡܸܫܐܲܠ ܒܐܲܠܵܗܵܐ: ܘܲܥܢܵܝܗܝ ܡܵܪܝܵܐ ܘܐܸܡܲܪ ܠܹܗ: ܩܘܼܡ ܚܘܿܬ̣ ܠܲܩܥܝܼܠܵܐ: ܡܸܛܠ ܕܐܸܢܵܐ ܡܲܫܠܸܡ ܐ̄ܢܵܐ ܡܲܫܸܠܡ ܐ̄ܢܵܐ ܠܗܘܿܢ ܠܲܦܠܸܫ̈ܬܵܝܹܐ ܒܐܝܼܕܲܝ̈ܟ. 5: ܘܐܸܙܲܠ ܕܵܘܝܼܕ݂ ܘܓܲܒ̣ܪ̈ܵܘܗܝ ܠܲܩܥܝܼܠܵܐ: ܘܐܸܬ̣ܟܲܬܲܫܘ ܥܲܡ ܦܠܸܫ̈ܬܵܝܹ: ܘܲܕ݂ܒܲܪܘ ܒܥܝܼܪܗܘܿܢ. ܘܲܡܚܵܐ ܒܗܘܿܢ ܡܚܘܿܬ̣ܵܐ ܪܲܒ̇ܬ̣ܵܐ: ܘܲܦܪܲܩ ܕܵܘܝܼܕ݂ ܠܥܵܡܘܿܪܹ̈ܝܗ̇ ܕܲܩܥܝܼܠܵܐ. 6: ܘܟܲܕ݂ ܥܪܲܩ ܐܲܒ̣ܝܼܬܲܪ ܒܲܪ ܐܲܚܝܼܡܲܠܟ ܠܘܵܬ̣ ܕܵܘܝܼܕ݂ ܠܲܩܥܝܼܠܵܐ: ܦܸܕܬ̣ܵܐ ܢܸܚܬܲܬ̤ ܒܐܝܼܕܹܗ. 7: ܘܚܵܘܝܼܘ ܠܫܵܐܘܿܠ ܕܥܲܠ ܕܵܘܝܼܕ݂ ܠܲܩܥܝܼܠܵܐ: ܘܐܸܡܲܪ ܫܵܐܘܿܠ ܐܲܫ̱ܠܡܹܗ ܐܲܠܵܗܵܐ ܒܐܝܼܕܲܝ̈: ܡܸܛܠ ܕܐܸܬ̇ܬ̇ܚܸܕ݂ ܕܥܲܠ ܠܲܩܪܝܼܬ̣ܵܐ ܕܬܲܪ̈ܥܹܐ ܘܣܘܼܟ̇ܪܹ̈ܐ. 8: ܘܐܲܫܡܵܥ ܫܵܐܘܿܠ ܠܟ݂ܠܹܗ ܥܲܡܵܐ ܠܲܩܪܵܒ̣ܵܐ ܠܡܸܚܲܬ̣ ܠܲܩܥܝܼܠܵܐ: ܠܡܸܚܒܲܫ ܠܕ݂ܵܘܝܼܕ݂: ܘܲܠܓܲܒ̣ܪܹ̈ܐ ܕܥܲܡܹܗ. 9: ܘܝܼܕܲܥ ܕܵܘܝܼܕ݂ ܕܲܚܫܲܠ ܫܵܐܘܿܠ ܥܠܵܘܗܝ ܒܝܼܫܬܵܐ: ܘܐܸܡܲܪ ܠܐܲܒ̣ܝܼܬܲܪ ܟܵܗܢܵܐ: ܩܲܪܸܒ̣ ܠܝܼ ܦܸܕܬ̣ܵܐ. 10: ܘܐܸܡܲܪ ܕܵܘܝܼܕ݂ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܸܫܡܲܥ ܫܡܲܥ ܥܲܒ̣ܕܵܟ݂: ܕܒ̣ܵܥܹܐ ܫܵܐܘܿܠ ܠܡܹܐܬ̣ܵܐ ܠܲܩܥܝܼܠܵܐ: ܠܲܡܚܲܒܵܠܘܼ ܠܲܩܪܝܼܬ̣ܵܐ ܡܸܛܠܵܬ̣ܝ. 11: ܡܲܫܠ̱ܡܝܼܢ ܠܝܼ ܡܵܪܹ̈ܝܗ̇ ܕܲܩܪܝܼܬ̣ܵܐ ܘܲܠܓܲܒ̣ܪܹ̈ܐ ܕܥܲܡܝ ܒܐܝܼܕܹܗ ܕܫܵܐܘܿܠ. 12: ܘܐܸܡܲܪ ܡܵܪܝܵܐ ܡܲܫܠ̱ܡܝܼܢ ܠܵܟ݂: ܩܘܼܡ ܦܘܿܩ ܡ̣ܢ ܩܪܝܼܬ̣ܵܐ. 13: ܘܩܵܡ ܕܵܘܝܼܕ݂ ܘܓܲܒ̣ܪܹ̈ܐ ܕܥܲܡܹ̈ ܐܲܝܟ݂ ܫܸܬ̣ܡܵܐܐ ܓܲܒ̣ܪ̈ܝܼܢ: ܘܲܢܦܲܩܘ ܡ̣ܢ ܩܥܝܼܠܵܐ. ܘܲܗܦܲܟ݂ܘ ܘܚܵܘܝܼܘ ܠܫܵܐܘܿܠ ܕܲܥܪܲܩ ܕܵܘܝܼܕ݂ ܡ̣ܢ ܩܥܝܼܠܵܐ: ܘܦܵܫ ܠܹܗ ܡ̣ܢ ܕܲܠܡܸܦܲܩ. 14: ܘܝܼܬܸܒ̣ ܕܵܘܝܼܕ݂ ܒܡܲܕ݂ܒ̇ܪܵܐ ܕܡܸܨܪܘܿܬ̣ܵܐ: ܘܝܼܬܸܒ̣ ܒܛܘܼܪܵܐ ܒܡܲܕ݂ܒ̇ܪܵܐ ܕܙܝܼܦ: ܘܲܒ̣ܥܵܝܗܝ ܫܵܐܘܿܠ ܟܠܗܘܿܢ ܝܵܘ̈ܡܵܬ̣ܵܐ: ܘܠܵܐ ܐܲܫܠ̱ܡܹܗ ܐܲܠܵܗܵܐ ܒܐܝܼܕܹܗ. 15: ܘܲܚܙܵܐ ܕܵܘܝܼܕ݂ ܕܲܢܦܲܩ ܫܵܐܘܿܠ ܠܡܸܒ̣ܥܵܐ ܢܲܦ̮ܫܹܗ: ܘܕ݂ܵܘܝܼܕ݂ ܒܡܲܕ݂ܒ̇ܪܵܐ ܕܙܝܼܦ ܒܥܵܒ̣ܵܐ. 16: ܘܩܵܡ ܝܘܿܢܵܬ̣ܵܢ ܒܲܪ ܫܵܐܘܿܠ: ܘܐܸܙܲܠ ܠܘܵܬ̣ ܕܵܘܝܼܕ݂ ܠܥܵܒ̣ܵܐ: ܘܚܲܡܣܸܢ ܐܝܼܕ݂ܵܘ̈ܗܝ ܒܐܲܠܵܗܵܐ. 17: ܘܐܸܡܲܪ ܠܹܗ ܠܵܐ ܬܸܕ݂ܚܲܠ: ܡܸܛܠ ܕܠܵܐ ܡܸܫܟ̇ܚܵܐ ܠܵܟ݂ ܐܝܼܕܹܗ ܕܫܵܐܘܿܠ ܐܵܒ̣ܝ: ܘܐܲܢ̄ܬ̇ ܬܲܡܠܸܟ݂ ܥܲܠ ܝܼܣܪܵܝܹܠ: ܘܐܸܢܵܐ ܐܸܗܘܸܐ ܥܲܡܵܟ݂ ܘܬܸܚܸܐ. ܘܐܵܦ ܫܵܐܘܿܠ ܐܵܒ̣ܝ ܝܵܕܲܥ ܕܗܵܟܲܢܵܐ ܗ̄ܘ̣. 18: ܘܐܲܩܝܼܡܘ ܬܪ̈ܲܝܗܘܿܢ ܩܝܵܡܵܐ ܩܕ݂ܵܡ ܡܵܪܝܵܐ: ܝܵܬܹܒ̣ ܟܪ̈ܘܿܒܹܐ ܒܥܘܼܡܩܵܐ. ܘܝܘܿܢܵܬ̣ܵܢ ܐܸܙܲܠ ܠܒܲܝܬܹܗ. 19: ܘܲܣܠܸܩܘ ܙܝܼܦܵܝܹ̈ܐ ܠܘܵܬ̣ ܫܵܐܘܿܠ ܠܲܓ̣ܒܲܥ: ܘܐܸܡܲܪܘ ܠܹܗ: ܗܵܐ ܕܵܘܝܼܕ݂ ܡܸܬ̇ܛܲܫܸܐ ܥܲܡܲܢ ܒܡܸܨܪܘܿܬ̣: ܒܥܵܒ̣ܵܐ ܒܓܸܒ̣ܥܘܿܬ̣ ܒܢܲܚܠܵܐ ܕܡ̣ܢ ܝܲܡܝܼܢܵܐ ܕܐܲܫܝܼܡܘܿܢ. 20: ܘܗܵܫܵܐ ܐܲܝܟ݂ ܟܠ ܪܸܓ̇ܬ̣ܵܐ ܕܢܲܦ̮ܫܵܟ݂ ܚܘܿܬ̣ ܥܠܲܝܢ: ܘܲܚܢܲܢ ܢܲܫܠ̱ܡܝܼܘܗܝ ܒܐܝܼܕ݂ܵܐ ܕܡܲܠܟܵܐ. 21: ܘܐܸܡܲܪ ܠܗܘܿܢ ܫܵܐܘܿܠ: ܒܪܝܼܟ݂ܝܼܢ ܐ̄ܢܬ̇ܘܿܢ ܠܐܲܠܵܗܵܐ ܕܚܵܣܬ̇ܘܿܢ ܥܠܲܝ. 22: ܙܸܠܘ ܬܸܒ̣ܘ ܛܲܒ̣ܘ ܝܲܬ̣ܒܹ̇ܗ: ܘܕܲܥܘ ܘܲܚܙܵܘ ܕܘܼܟ̇ܬܹܗ: ܕܬܸܗܘܸܐ ܪܸܓ̣ܠܹܗ ܕܡ̇ܢ ܕܲܚܙܵܝܗܝ ܬܲܡܵܢ: ܡܸܛܠ ܕܐܸܡܲܪܘ ܠܝܼ ܕܲܡܥܲܪܵܡܘܼ ܡܥܲܪܲܡ. 23: ܘܕܲܥܘ ܘܲܚܙܵܘ ܡ̣ܢ ܟܠܗܹܝܢ ܡܲܛܫ̈ܝܵܬ̣ܵܐ ܕܲܡܛܲܫܲܝ ܬܲܡܵܢ: ܘܲܗܦܘܿܟ݂ܘ ܠܘܵܬ̣ܝ ܠܡܲܬ̣ܩܵܢܘܼܬܲܢܝ: ܘܐܹܙܲܠ ܥܲܡܟ݂ܘܿܢ. ܕܐܸܢ ܐܝܼܬ̣ܵܘܗܝ ܒܐܲܪܥܵܐ: ܐܸܒ̣ܨܝܘܗܝ ܒܟ݂ܠܗܘܿܢ ܐܲܠܦܹ̈ܐ ܕܲܝܗܘܼܕ݂ܵܐ. 24: ܘܩܵܡܘ ܘܐܸܙܲܠܘ ܠܙܝܼܦ: ܩܕ݂ܵܡ ܫܵܐܘܿܠ: ܘܕ݂ܵܘܝܼܕ݂ ܘܓܲܒ̣ܪ̈ܵܘܗܝ ܒܡܲܕ݂ܒ̇ܪܵܐ ܕܡܵܥܘܿܢ: ܒܥܵܪܵܒ̣ܵܐ ܥܲܠ ܓܹܢ̄ܒ̣ ܐܲܫܝܼܡܘܿܢ. 25: ܘܐܸܙܲܠ ܫܵܐܘܿܠ ܘܥܲܒ̣̈ܕܵܘܗܝ ܠܡܸܒ̣ܥܵܐ ܠܕ݂ܵܘܝܼܕ݂: ܘܚܵܘܝܼܘ ܠܕ݂ܵܘܝܼܕ݂ ܘܲܢܚܸܬ̣ ܠܹܗ ܠܲܥܣܠܲܥ: ܘܝܼܬܸܒ̣ ܒܡܲܕ݂ܒ̇ܪܵܐ ܕܡܵܥܘܿܢ: ܘܲܫܡܲܥ ܫܵܐܘܿܠ ܘܲܪܕܲܦ ܒܵܬܲܪ ܕܵܘܝܼܕ݂ ܠܡܲܕ݂ܒ̇ܪܵܐ ܕܡܵܥܘܿܢ. 26: ܘܐܸܙܲܠ ܫܵܐܘܿܠ ܡ̣ܢ ܓܲܒܹ̇ܗ ܕܛܘܼܪܵܐ: ܘܕ݂ܵܘܝܼܕ݂ ܘܓܲܒ̣ܪ̈ܵܘܗܝ ܡ̣ܢ ܓܲܒܹ̇ܗ ܐ̄ܚܪܹܢܵܐ. ܘܲܗܘ̤ܵܐ ܕܵܘܝܼܕ݂ ܡܸܣܬܲܪܗܲܒ̣ ܠܡܸܥܪܲܩ ܡ̣ܢ ܩܕ݂ܵܡ ܫܵܐܘܿܠ: ܘܫܵܐܘܿܠ ܘܥܲܒ̣ܕܵܘ̈ܗܝ ܡܸܬ̣ܟܲܪܟ̇ܝܼܢ ܥܲܠ ܕܵܘܝܼܕ݂ ܘܥܲܠ ܓܲܒ̣ܪ̈ܵܘܗܝ ܠܡܹܐܚܲܕ݂ ܐܸܢܘܿܢ. 27: ܘܐܝܼܙܓܲܕܵܐ ܐܸܬ̣ܵܐ ܠܘܵܬ̣ ܫܵܐܘܿܠ ܘܐܸܡܲܪ ܠܹܗ: ܒܲܥܓܲܠ ܬܵܐ: ܡܸܛܠ ܕܲܫܪܵܘ ܦܠܸܫ̈ܬܵܝܹܐ ܒܟ݂ܠܵܗ̇ ܐܲܪܥܵܐ. 28: ܘܲܗܦܲܟ݂ ܫܵܐܘܿܠ ܡ̣ܢ ܒܵܬܲܪ ܕܵܘܝܼܕ݂: ܘܐܸܙܲܠ ܠܐܘܼܪܥܵܐ ܕܲܦܠܸܫ̈ܬܵܝܹܐ: ܡܸܛܠ ܗܵܢܵܐ ܩܪܵܐܘܗ̇ ܠܐܲܪܥܐ ܗܵܝ ܣܸܢܥܵܪ ܦܵܠܓ̇ܘܼܬ̣ܵܐ.

ܩܹܦܵܠܹܐܘܿܢ: ܟܕ.

1: ܘܲܣܠܸܩ ܕܵܘܝܼܕ݂ ܡ̣ܢ ܬܲܡܵܢ ܘܝܼܬܸܒ̣ ܒܡܸܨܪܵܘܿܬ̣ ܕܲܒ̣ܓܸܒ̣ܥܘܿܬ̣. 2: ܘܲܗܘ̤ܵܐ ܕܟܲܕ݂ ܗܦܲܟ݂ ܫܵܐܘܿܠ ܡ̣ܢ ܒܵܬܲܪ ܦܠܸܫ̈ܬܵܝܹܐ: ܚܵܘܝܘܼܗܝ: ܘܐܸܡܲܪܘ ܠܹܗ: ܗܵܐ ܕܵܘܝܼܕ݂ ܒܡܸܨܪܘܿܬ̣ ܕܲܒ̣ܓܸܒ̣ܥܘܿܬ̣. 3: ܘܲܕ݂ܒܲܪ ܫܵܐܘܿܠ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܓܲܒܲـ̈ܝܵܐ ܡ̣ܢ ܟܠܹܗ ܝܼܣܪܵܝܹܠ: ܘܐܸܙܲܠ ܠܡܸܒ̣ܥܵܐ ܠܕ݂ܵܘܝܼܕ݂ ܘܲܠܓܲܒ̣ܪ̈ܵܘܗܝ ܥܲܠ ܐܲܦܲܝ̈ ܛܘܼܪܵܐ ܕܕܲܝܨܹ̈ܐ. 4: ܘܐܸܬ̣ܵܐ ܠܡܲܪܒ̇ܥܵܐ ܕܥܵـ̈ܢܵܐ ܕܒ̣ܐܘܼܪܚܵܐ. ܘܬܲܡܵܢ ܐܝܼܬ̣ ܡܥܲܪܬ̣ܵܐ: ܘܥܲܠ ܫܵܐܘܿܠ ܠܲܡܥܲܪܬ̣ܵܐ ܘܲܕ݂ܡܸܟ݂ ܬܲܡܵܢ: ܘܕ݂ܵܘܝܼܕ݂ ܘܓܲܒ̣ܪܵܘܗܝ ܒܲܫܦ̈ܘܿܠܲܝ ܡܥܲܪܬ̣ܵܐ ܝܵܬ̣ܒ̇ܝܼܢ. 5: ܘܐܸܡܲܪܘ ܠܹܗ ܓܲܒ̣ܪܵܘܗܝ ܠܕ݂ܵܘܝܼܕ݂: ܗܵܢܵܐ ܗ̄ܘ̣ ܝܵܘܡܵܐ ܕܐܸܡܲܪ ܠܵܟ݂ ܡܵܪܝܵܐ: ܗܵܐ ܡܲܫܠܸܡ ܐ̄ܢܵܐ ܒܥܸܠܕܒ̣ܵܒ̣ܵܟ݂ ܒܐܝܼܕܲܝ̈ܟ: ܥܒܸܕ݂ ܠܹܗ ܐܲܝܟ݂ ܕܫܲܦܝܼܪ ܒܥܲܝܢܲܝ̈ܟ. ܘܩܵܡ ܕܵܘܝܼܕ݂ ܘܦܣܲܩ ܟܸܢܦܵܐ ܕܲܦܪܝܼܣܹܗ ܕܫܵܐܘܿܠ ܪܲܟ̇ܝܼܟ݂ܵܐܝܼܬ̣. 6: ܘܡ̣ܢ ܒܵܬܲܪܟܸ̇ܢ ܬܘ̣ܵܝܗܝ ܠܸܒܹ̇ܗ ܠܕ݂ܵܘܝܼܕ݂: ܥܲܠ ܕܲܦܣܲܩ ܟܸܢܦܵܐ ܕܲܦܪܝܼܣܹܗ ܕܫܵܐܘܿܠ. 7: ܘܐܸܡܲܪ ܕܵܘܝܼܕ݂ ܠܓܲܒ̣ܪܹ̈ܐ ܕܥܲܡܹܗ: ܚܵܣ ܠܝܼ ܡ̣ܢ ܡܵܪܝܵܐ ܐܸܢ ܐܸܥܒܸ̇ܕ݂ ܦܸܬ̣ܓ̣ܵܡܵܐ ܗܵܢܵܐ ܠܡܵܪܝ ܠܲܡܫܝܼܚܹܗ ܕܡܵܪܝܵܐ: ܘܐܵܘܫܸܛ ܐܝܼܕ݂ܝ ܒܹܗ: ܡܸܛܠ ܕܲܡܫܝܼܚܹܗ ܗ̄ܘ̣ ܕܡܵܪܝܵܐ. 8: ܘܬ̣ܵܘܝܼ ܕܵܘܝܼܕ݂ ܠܓܲܒ̣ܪܹ̈ܐ ܕܥܲܡܹܗ ܒܡܸܠܹ̈ܐ ܗܵܠܹܝܢ: ܘܠܵܐ ܫܒܲܩ ܐܸܢܘܿܢ ܠܲܡܩܵܡ ܥܲܠ ܫܵܐܘܿܠ. ܘܫܵܐܘܿܠ ܩܵܡ ܡ̣ܢ ܡܥܲܪܬ̣ܵܐ ܘܐܸܙܲܠ ܒܐܘܼܪܚܵܐ. 9: ܘܩܵܡ ܕܵܘܝܼܕ݂ ܡ̣ܢ ܒܵܬܲܪܟܸ̇ܢ: ܘܲܢܦܲܩ ܡ̣ܢ ܡܥܲܪܬ̣ܵܐ: ܘܲܩܪܵܐ ܒܵܬܲܪ ܫܵܐܘܿܠ ܘܐܸܡܲܪ. ܡܵܪܝ ܡܲܠܟܵܐ: ܘܐܸܬ̣ܦܢܝ ܫܵܐܘܿܠ ܠܒܸܣܬ̇ܪܹܗ. ܘܲܢܦܲܠ ܕܵܘܝܼܕ݂ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓ̣ܕ݂. 10: ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܠܵܐ ܬܸܫܡܲܥ ܡܸܠܹ̈ܐ ܕܐ̄ܢܵܫܹܐ ܕܐܵܡܪܝܼܢ: ܕܗܵܐ ܕܵܘܝܼܕ݂ ܒܵܥܹܐ ܠܒ̣ܝܼܫܬܵܟ݂. 11: ܗܵܐ ܚܙܝܼ ܝܵܘܡܵܢܵܐ ܒܥܲܝܢܲܝ̈ܟ: ܕܐܲܫ̱ܠܡܵܟ݂ ܡܵܪܝܵܐ ܒܐܝܼܕܲܝ̈ ܝܵܘܡܵܢܵܐ ܒܲܡܥܲܪܬ̣ܵܐ. ܘܐܸܡܲܪܘ ܓܲܒ̣ܪܹ̈ܐ ܕܥܲܡܝ ܠܡܸܩܛܠܵܟ݂: ܘܚܵܣܹܬ ܥܠܲܝܟ: ܘܐܸܡ̇ܪܹܬ̣ ܠܵܐ ܐܵܘܫܸܛ ܐܝܼܕ݂ܝ ܒܡܵܪܝ: ܡܸܛܠ ܕܲܡܫܝܼܚܹܝܗ ܗ̄ܘ̣ ܕܡܵܪܝܵܐ. 12: ܘܐܸܬ̣ܦܲܢܝ̄ ܘܲܚܙܝܼ ܐܵܦ ܟܸܢܦܵܐ ܕܲܦܪܝܼܣܵܟ݂ ܒܐܝܼܕ݂ܝ: ܡܸܛܠ ܕܟܲܕ݂ ܦܸܣܩܹܬ̣ ܟܸܢܦܵܐ ܕܲܦܪܝܼܣܵܟ݂ ܠܵܐ ܩܛܲܠܬܵܟ݂. ܕܲܥ ܘܲܚܙܝܼ ܕܠܲܝܬ̇ ܒܐܝܼܕܲܝ̈ ܒܝܼܫܬܵܐ ܘܣܲܟ݂ܠܘܼܬܑ̣ܵܐ: ܘܠܵܐ ܚܛܹܝܬ̣ ܠܵܟ݂: ܘܐܲܢ̄ܬ̇ ܡܨܲܝܼܕ݂ ܐܲܢ̄ܬ̇ ܠܡܸܣܲܒ̣ ܢܲܦ̮ܫܝ. 13: ܢܕ݂ܘܼܢ ܡܵܪܝܵܐ ܒܲܝܢܲܝ ܘܠܵܟ݂: ܘܢܸܬ̣ܒ̇ܥܲܢܝ ܡܵܪܝܵܐ ܒܐܝܼܕܲܝ̈ܟ: ܘܐܝܼܕ݂ܝ ܠܵܐ ܬܸܗܘܸܐ ܒܵܟ݂. 14: ܐܲܝܟ݂ ܕܐܲܡܝܼܪ ܒܡܲܬ̣ܠܵܐ ܩܲܕ݂ܡܵܝܵܐ: ܕܡ̣ܢ ܪܲܫܝܼܥܵܐ ܢܸܦܘܿܩ ܪܘܼܫܥܵܐ: ܘܐܝܼܕ݂ܝ ܠܵܐ ܬܸܗܘܸܐ ܒܵܟ݂. 15: ܒܵܬܲܪ ܡܲܢܘܼ ܢܦܲܩܬ̇ ܡܲܠܟܵܐ ܕܝܼܣܪܵܝܹܠ: ܘܒ̣ܵܬܲܪ ܡܲܢܘܼ ܪܵܕܹܦ ܐܲܢ̄ܬ̇. ܒܵܬܲܪ ܟܲܠܒܵܐ ܡܝܼܬ̣ܵܐ: ܘܒ̣ܵܬܲܪ ܦܘܼܪܬܹܥܢܵܐ ܚܲܕ݂.

16: ܢܸܗܘܸܐ ܡܵܪܝܵܐ ܕܲܝܵܢܵܐ: ܘܲܢܕ݂ܘܼܢ ܒܲܝܢܲܝ ܘܠܵܟ݂: ܘܢܸܚܙܸܐ ܘܲܢܕ݂ܘܼܢ ܕܝܼܢܝ: ܘܢܸܬ̣ܒ̇ܥܲܢܝ ܒܐܝܼܕܲܝ̈ܟ.

17: ܘܟܲܕ݂ ܓܲܡܲܪ ܕܵܘܝܼܕ݂ ܠܡܹܐܡܲܪ ܡܸܠܹ̈ܐ ܗܵܠܹܝܢ ܠܫܵܐܘܿܠ: ܐܸܡܲܪ ܠܹܗ ܫܵܐܘܿܠ. ܩܵܠܵܟ݂ ܗ̄ܘ̣ ܗܵܢܵܐ: ܒܹܪܝ ܕܵܘܝܼܕ݂. ܘܐܲܪܝܼܡ ܫܵܐܘܿܠ ܩܵܠܹܗ ܘܲܒ̣ܟ݂ܵܐ. 18: ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܙܲܕܝܼܩ ܐܲܢ̄ܬ̇ ܡܹܢܝ ܡܸܛܠ ܕܐܲܢ̄ܬ̇ ܦܪܲܥܸܬܵܢܝ ܛܵܒ̣ܬ̣ܵܐ: ܘܐܸܢܵܐ ܦܪܲܥܬܵܟ݂ ܒܝܼܫܬܵܐ. 19: ܘܐܲܢ̄ܬ̇ ܚܵܘܝܼܬ̇ ܝܵܘܡܵܢܵܐ ܕܲܥܒܲܕܬ̇ ܠܝܼ ܛܵܒ̣ܬ̣ܵܐ: ܕܐܲܫ̱ܠܡܲܢܝ ܡܵܪܝܵܐ ܒܐܝܼܕܲܝ̈ܟ ܘܠܵܐ ܩܛܲܠܬܵܢܝ. 20: ܘܟܲܕ݂ ܢܸܫܟܲܚ ܓܲܒ̣ܪܵܐ ܠܲܒ̣ܥܸܠܕܒ̣ܵܒܹܗ: ܘܲܢܫܲܕܪܝܼܘܗܝ ܒܐܘܼܪܚܵܐ ܛܲܒ̣ܬ̣ܵܐ: ܡܵܪܝܵܐ ܢܸܦܪ̱ܥܝܼܘܗܝ ܛܵܒ̣ܬ̣ܵܐ. ܢܸܦܪ̱ܥܵܟ݂ ܡܵܪܝܵܐ ܚܠܵܦܲܝ ܛܵܒ̣ܬ̣ܵܐ ܝܵܘܡܵܢܵܐ ܕܲܥܒܲܕ̇ܬ̇ ܠܝܼ. 21: ܘܗܵܫܵܐ ܗܵܐ ܝܼܕ݂ܥܹـܬ̣ ܕܡܲܡܠܵܟ݂ܘܼ ܡܲܡܠܸܟ݂ ܐܲܢ̄ܬ̇: ܘܡܸܬ̣ܩܲܝܡܵܐ ܒܐܝܼܕܲܝ̈ܟ ܡܲܠܟ̇ܘܼܬ̣ܵܐ ܕܝܼܣܪܵܝܹܠ. 22: ܝܼܡܝܼ ܠܝܼ ܒܡܵܪܝܵܐ ܕܠܵܐ ܬܵܘܒܸ̇ܕ݂ ܙܲܪܥܝ ܡ̣ܢ ܒܵܬܲܪܝ: ܘܠܵܐ ܬܵܘܒܸܕ݂ ܫܹܡܝ ܡ̣ܢ ܒܹܝܬ̣ ܐܵܒ̣ܝ. 23: ܘܝܼܡܵܐ ܕܵܘܝܼܕ݂ ܠܫܵܐܘܿܠ: ܘܐܸܙܲܠ ܫܵܐܘܿܠ ܠܒܲܝܬܹ̇ܗ: ܘܕ݂ܵܘܝܼܕ݂ ܘܓܲܒ̣ܪܹ̈ܐ ܕܥܲܡܹܗ ܣܠܸܩܘ ܠܡܲܨܦܝܵܐ.

ܩܹܦܵܠܹܐܘܿܢ: ܟܗ.

1: ܘܡܝܼܬ̣ ܫܡܘܼܐܹܝܠ: ܘܐܸܬ̣ܟܲܢܲܫܘ ܟܠܹܗ ܝܼܣܪܵܝܹܠ: ܘܐܲܪܩܸܕ݂ܘ ܥܠܵܘܗܝ: ܘܩܲܒ̣ܪܘܼܗܝ ܒܩܲܒ̣ܪܹܗ ܒܪܵܡܬ̣ܵܐ. ܘܩܵܡ ܕܵܘܝܼܕ݂ ܘܲܢܚܸܬ̣ ܠܡܲܕ݂ܒ̇ܪܵܐ ܕܦܵܪܵܢ. 2: ܘܓܲܒ̣ܪܵܐ ܐܝܼܬ̣ ܗ̄ܘ̣ܵܐ ܒܡܵܥܘܿܢ: ܘܲܥܒ̣ܵܕܹܗ ܒܟܲܪܡ̄ܠܵܐ: ܘܓܲܒ̣ܪܵܐ ܪܲܒ̇ ܗ̄ܘ̣ܐ ܛܵܒ̣: ܘܐܝܼܬ̣ ܗ̄ܘ̣ܵܐ ܠܹܗ ܥܵܢܵܐ ܬܠܵܬ̣ܵܐ ܐܲܠܦ̈ܝܼܢ: ܘܐܵܠܹܦ ܥܸܙ̈ܝܼܢ. ܘܲܗܘ̤ܵܐ ܕܟܲܕ݂ ܓܵܐܹܙ ܥܵܢܹ̈ܗ ܒܟܲܪܡ̄ܠܵܐ. 3: ܘܲܫܡܹܗ ܕܓܲܒ̣ܪܵܐ ܢܵܒ̣ܵܠ: ܘܲܫܡܵܗ̇ ܕܐܲܢ̄ܬ̇ܬܹܗ ܐܲܒ̣ܝܼܓܸܠ: ܘܐܲܢ̄ܬ̇ܬ̣ܵܐ ܫܲܦܝܼܪ ܗ̄ܘ̣ܵܐ ܚܸܙܘܵܗ̇ ܘܩܘܼܒ̣ܠ̱ܠܵܗ̇: ܘܓܲܒ̣ܪܵܐ ܢܵܒ̣ܵܠ ܩܫܸܐ ܗ̄ܘܑ̣ܵܐ: ܘܒ̣ܝܼܫ ܒܨܸܢ̈ܥܵܬܹܗ ܘܲܟ݂ܠܸܒ̣.

4: ܘܲܫܡܲܥ ܕܵܘܝܼܕ݂ ܒܡܲܕ݂ܒ̇ܪܵܐ ܕܓ̣ܵܐܹܙ ܢܵܒ̣ܵܠ ܥܵܢܹ̈ܐ. 5: ܘܫܲܕܲܪ ܕܵܘܝܼܕ݂ ܥܸܣܪܵܐ ܥܠܲܝܡ̈ܝܼܢ: ܘܐܸܡܲܪ ܕܵܘܝܼܕ݂ ܠܲܥܠܲܝܡܹܐ: ܣܲܩܘ ܠܟܲܪܡ̄ܠܵܐ ܘܙܸܠܘ ܠܘܵܬ̣ ܢܵܒ̣ܵܠ: ܘܲܫܐܲܠܘ ܒܲܫܠܵܡܹܗ ܒܫܹܡܝ. 6: ܘܐܸܡܲܪܘ ܠܹܗ: ܗܵܟܲܢܵܐ ܡ̇ܢ ܕܢܸܗܘܸܐ ܚܲܝ ܘܐܲܢ̄ܬ̇ ܫܠܵܡ ܘܒܲܝܬܵܟ݂. 7: ܪ̈ܵܥܵܘܵܬ̣ܵܐ ܕܝܼܠܵܟ݂ ܗܘ̤ܵܘ ܥܲܡܲܢ: ܘܠܵܐ ܐܲܗܲܪ̄ܢ ܐܸܢܘܿܢ: ܘܠܵܐ ܛܸܥܵܐ ܠܗܘܿܢ ܡܸܕܸܡ: ܟܠ ܝܵܘ̈ܡܵܬ̣ܵܐ ܕܲܗܘ̤ܵܐ ܒܡܲܕ݂ܒ̇ܪܵܐ. 8: ܫܲܐܸܠ ܠܥܲܒ̣ܕܲܝ̈ܟ ܘܲܢܚܵܘܘܿܢܵܟ݂: ܘܗܵܫܵܐ ܢܸܫܟ̇ܚܘܼܢ ܪ̈ܲܚܡܹܐ ܒܥܲܝܢܲܝ̈ܟ: ܡܸܛܠ ܕܥܲܠ ܝܵܘܡܵܐ ܛܵܒ̣ܵܐ ܐܸܬܲܝܢ: ܗܲܒ̣ ܡܸܕܸܡ ܕܨܵܒܹ̇ܐ ܐܲܢ̄ܬ̇ ܠܥܲܒ̣ܕܲܝ̈ܟ ܘܠܲܒ̣ܪܵܟ݂ ܕܵܘܝܼܕ݂. 9: ܘܐܸܬ̣ܵܘ ܥܠܲܝܡܵܘ̈ܗܝ ܕܕ݂ܵܘܝܼܕ݂: ܘܐܸܡܲܪܘ ܠܢܵܒ̣ܵܠ ܟܠܗܹܝܢ ܡܸܠܹ̈ܐ ܗܵܠܹܝܢ ܒܲܫܡܹܗ ܕܕ݂ܵܘܝܼܕ݂. 10: ܘܲܥܢܵܐ ܢܵܒ̣ܵܠ ܘܐܸܡܲܪ ܠܥܲܒ̣ܕܵܘ̈ܗܝ ܕܕ݂ܵܘܝܼܕ݂: ܡܲܢܘܼ ܒܪܹܗ ܕܐܝܼܫܲܝ: ܝܵܘܡܵܢܵܐ ܣܓ̣ܝܼܘ ܥܲܒ̣̈ܕܹܐ ܕܡܲܪܝܼܕ݂ܝܼܢ ܐ̄ܢܵܫ ܡ̣ܢ ܩܕ݂ܵܡ ܡܵܪܹܗ. 11: ܐܸܣܲܒ̣ ܠܲܚ̄ܡܝ ܘܡܲܝ̈: ܘܢܸܟ݂ܣܬ̣ܵܐ ܕܢܸܟ݂ܣܹܬ̣ ܠܓܵܙ̈ܘܿܙܲܝ: ܘܐܸܬܸܠ ܠܓܲܒ̣ܪܹ̈ܐ ܕܠܵܐ ܝܵܕ݂ܥ ܐ̄ܢܵܐ ܡ̣ܢ ܐܲܝܡܸܟܵܐ ܐܸܢܘܿܢ. 12: ܘܲܗܦܲܟ݂ܘ ܥܠܲܝܡܵܘ̈ܗܝ ܕܕ݂ܵܘܝܼܕ݂ ܠܐܘܼܪܚܗܘܿܢ: ܘܚܵܘܝܼܘ ܠܕ݂ܵܘܝܼܕ݂ ܟܠܗܹܝܢ ܡܸܠܹ̈ܐ ܗܵܠܹܝܢ. 13: ܘܐܸܡܲܪ ܕܵܘܝܼܕ݂ ܠܓܲܒ̣ܪܹ̈ܐ ܕܥܲܡܹܗ: ܐܲܣܘܿܪܘ ܐ̄ܢܵܫ ܣܲܝܦܹܗ: ܘܐܸܣܲܪܘ ܣܲܝܦܲܝ̈ܗܘܿܢ: ܘܐܵܦ ܕܵܘܝܼܕ݂ ܐܸܣܲܪ ܣܲܝܦܹܗ. ܘܲܣܠܸܩܘ ܒܵܬܲܪ ܕܵܘܝܼܕ݂ ܐܲܝܟ݂ ܐܲܪܒܲܥܡܵܐܐ ܓܲܒ̣ܪ̈ܝܼܢ: ܘܡܲܐܬܹܝܢ ܦܵܫܘ ܠܘܵܬ̣ ܡܵܐܢܹ̈ܐ. 14: ܘܠܲܐܒ̣ܝܼܓܸܠ ܐܲܢ̄ܬ̇ܬܹܗ ܕܢܵܒ̣ܵܠ: ܚܵܘܝܼ ܛܲܠܝܵܐ ܚܲܕ݂ ܡ̣ܢ ܥܠܲܝܡܹ̈ܐ ܘܐܸܡܲܪ: ܫܲܕܲܪ ܕܵܘܝܼܕ݂ ܐܝܼܙ̈ܓܲܕܹܐ ܡ̣ܢ ܡܲܕ݂ܒ̇ܪܵܐ ܠܲܡܒܲܪܵܟ݂ܘܼܬܹ̈ ܠܡܵܪܲܢ ܘܡܸܐܢܲܬ̤ ܠܹܗ ܒܗܘܿܢ. 15: ܘܓܲܒ̣ܪܹ̈ܐ ܛܵܒ̣ܝܼܢ ܗ̄ܘ̣ܵܘ ܠܲܢ ܛܵܒ̣: ܘܠܵܐ ܐܲܗܪܘܼܢ: ܘܠܵܐ ܐܲܛܥܝܼܘ ܠܲܢ ܡܸܕܸܡ: ܟܠ ܝܵܘ̈ܡܵܬ̣ܵܐ ܕܗܲܠܸܟ݂ܢ ܥܲܡܗܘܿܢ. 16: ܟܲܕ݂ ܗܸܘܲܝܢ ܒܡܲܕ݂ܒ̇ܪܵܐ ܫܘܼܪܵܐ ܗܘ̤ܘܵܐ ܠܲܢ: ܐܵܦ ܒܠܸܠܝܵܐ ܐܵܦ ܒܐܝܼܡܵܡܵܐ: ܟܠ ܝܵܘ̈ܡܵܬ̣ܵܐ ܕܲܗ̤ܘܲܝܢ ܥܲܡܗܘܿܢ: ܘܪܵܥܹܝܢ ܗ̄ܘܲܝܢ ܥـܢ̈ܵܐ. 17: ܗܵܫܵܐ ܕܲܥܝ ܘܲܚܙܵܝ ܡܵܢܵܐ ܥܵܒ̣ܕܵܐ ܐܲܢ̄ܬ̇ܝ. ܡܸܛܠ ܕܓܸܪܡܲܬ̤ ܒܝܼܫܬܵܐ ܥܲܠ ܡܵܪܲܢ ܘܥܲܠ ܟܠܹܗ ܒܲܝܬܹ̇ܗ: ܘܢܵܒ̣ܵܠ ܠܘܵܬ̣ ܪܵܥـ̈ܘܵܬ̣ܵܐ ܗ̄ܘܼܵܐ. 18: ܘܐܸܣܬܲܪ̱ܗܒܲܬ̤ ܐܲܒ̣ܝܼܓܸܠ: ܘܢܸܣܒܲܬ̤ ܡܲܐܬܹܝܢ ܕܠܲܚܡܵܐ: ܘܲܬ̣ܪܹܝܢ ܓܪ̈ܵܒ̣ܝܼܢ ܕܚܲܡܪܵܐ: ܘܚܲܡܸܫ ܥـܵ̈ܢܵܐ ܟܲܕ݂ ܡܲܬ̣ܩ̈ܢܵܢ: ܘܚܲܡܸܫ ܣܐ̈ܝܼܢ ܩܲܠܝܵܬ̣ܵܐ: ܘܲܡܐܵܐ ܓܘܼܒ̣̈ܝܼܢ ܘܡܵܐܬܹܝܢ ܕܸܒ̣̈ܠܝܼܢ: ܘܣܵܡܲܬ̤ ܥܲܠ ܚܡܵܪܹ̈ܐ. 19: ܘܐܸܡܪܲܬ̤ ܠܲܥܠܲܝܡܹ̈ܐ: ܥܒܲܪܘ ܩܕ݂ܵܡܲܝ: ܗܵܐ ܐܸܢܵܐ ܐܵܬ̣ܝܵܐ ܐ̄ܢܵܐ. ܘܲܠܢܵܒ̣ܵܠ ܒܲܥܠܵܗ̇ ܠܵܐ ܚܵܘܝܲܬ̤. 20: ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܥܲܠ ܚܡܵܪܵܐ ܘܢܵܚܬܵܐ ܒܓܸܢܝܵܐ ܕܛܘܼܪܵܐ. ܘܕ݂ܵܘܝܼܕ݂ ܘܓܲܒ̣ܪܹ̈ܐ ܕܥܲܡܹܗ ܣܵܠܩܝܼܢ ܠܐܘܼܪܥܵܗ̇: ܘܦܸܓ̣ܥܲܬ̤ ܒܗܘܿܢ. 21: ܘܕ݂ܵܘܝܼܕ݂ ܐܸܡܲܪ: ܕܲܓܵܠܵܐܝܼܬ̣ ܢܛܲܪܢ ܟܠ ܕܐܝܼܬ̣ ܗ̄ܘ̣ܵܐ ܠܹܗ ܒܡܲܕ݂ܒ̇ܪܵܐ: ܘܠܵܐ ܐܲܛܥܝܼܢ ܡܸܕܸܡ ܡ̣ܢ ܟܠ ܕܐܝܼܬ̣ ܗ̄ܘ̣ܵܐ ܠܹܗ: ܘܦܲܪܥܲܢ ܒܝܼܫܬܵܐ ܚܠܵܦ ܛܵܒ̣ܬ̣ܵܐ. 22: ܗܵܟܲܢܵܐ ܢܸܥܒܸ̇ܕ݂ ܡܵܪܝܵܐ ܠܥܲܒ̣ܕܹܗ ܕܵܘܝܼܕ݂ ܘܗܵܟܲܢܵܐ ܢܵܘܣܸܦ ܠܹܗ: ܐܸܢ ܢܸܫܬ̇ܒܸܩ ܡܸܕܸܡ ܕܐܝܼܬ̣ ܠܹܗ ܥܕܲܡܵܐ ܠܨܲܦܪܵܐ ܕܡܲܬ̣ܩܲܢ ܒܐܸܣܬ̣ܵܐ. 23: ܘܲܚܙܵܬ̤ ܐܲܒ̣ܝܼܓܸܠ ܠܕ݂ܵܘܝܼܕ݂: ܘܐܸܣܬܲܪ̱ܗܒܲܬ̤ ܘܢܸܚܬܲܬ̤ ܡ̣ܢ ܚܡܵܪܵܐ: ܘܢܸܦܠܲܬ̤ ܩܕ݂ܵܡ ܕܵܘܝܼܕ݂ ܥܲܠ ܐܲܦܹܝ̈ܗ̇: ܘܣܸܓ̣ܕܲܬ̤ ܠܹܗ ܥܲܠ ܐܲܪܥܵܐ.

24: ܘܢܸܦܠܲܬ̤ ܥܲܠ ܪܸ̈ܓ̣ܠܵܘܗܝ ܘܐܸܡܪܲܬ̤: ܒܵܥܝܵܐ ܐ̄ܢܵܐ ܡܸܢܵܟ݂ ܡܵܪܝ: ܥܠܲܝ ܡܵܪܝ ܣܲܟ݂ܠܘܼܬ̣ܵܐ: ܬܡܲܠܸܠ ܐܲܡܬ̣ܵܟ݂ ܩܕ݂ܵܡܲܝܟ ܥܲܠ ܓܲܒ̣ܪܵܐ ܗܵܢܵܐ ܢܵܒ̣ܵܠ. 25: ܡܸܛܠ ܕܐܲܝܟ݂ ܫܡܹܗ ܗܵܟܲܢܵܐ ܗ̄ܘ̣: ܢܵܒ̣ܵܠ ܫܡܹܗ: ܘܲܡܨܲܥܪܵܢܘܼܬܹܗ ܥܲܡܹܗ. ܘܐܸܢܵܐ ܐܲܡܬ̣ܵܐ ܠܵܐ ܚܙܹܝܬ̣ ܠܲܥܠܲܝܡܹ̈ܐ ܕܫܲܕܲܪ ܡܵܪܝ. 26: ܘܗܵܫܵܐ ܡܵܪܝ: ܗ̄ܘ̣ ܡܵܪܝܵܐ ܘܚܲܝܵܐ ܗ̄ܝ̣ ܢܲܦ̮ܫܵܟ݂ ܕܝܼܠܵܟ݂ ܡܵܪܝ: ܕܠܵܐ ܬܸܬ̣ܩܲܪܲܒ̣ ܠܲܕ݂ܡܵܐ ܘܦܲܪܩܵܟ݂ ܡܵܪܝܵܐ. ܗܵܫܵܐ ܡܵܪܝ ܢܸܗܘܘܿܢ ܒܥܸܠܕܒ̣ܵܒܲܝ̈ܟ ܐܲܝܟ݂ ܢܵܒ̣ܵܠ: ܘܲܕ݂ܒ̣ܵܥܹܝܢ ܠܵܟ݂ ܒܝܼܫܬܵܐ. 27: ܗܵܫܵܐ ܒܘܼܪܟ̇ܬ̣ܵܐ ܗܵܕܹܐ ܐܲܝܬ̇ܝܲܬ̤ ܐܲܡܬ̣ܵܟ݂ ܠܡܵܪܝ: ܒܘܼܪܟ̇ܬ̣ܵܐ ܗܲܒ̣ ܠܲܥܠܲܝܡܹ̈ܐ ܕܲܡܗܲܠܟ݂ܝܼܢ ܠܲܪܓܸܠ ܡܵܪܝ. 28: ܘܲܫܒ̣ܘܿܩ ܣܘܼܪܚܵܢܵܐ ܠܐܲܡܬ̣ܵܟ݂: ܡܸܛܠ ܕܡܸܥܒܲܕ݂ ܥܵܒܹܕ݂ ܡܵܪܝܵܐ ܠܡܵܪܝ ܒܲܝܬܵܐ ܡܗܲܝܡܢܵܐ. ܡܸܛܠ ܕܬܲܟ݂ܬ̇ܫܵܘ̈ܗܝ ܕܡܵܪܝܵܐ: ܡܵܪܝ ܡܸܬ̣ܟܲܬܲܫ: ܘܒ̣ܝܼܫܬܵܐ ܠܵܐ ܐܸܫܟ̇ܚܲܬ̤ ܒܵܟ݂ ܡ̣ܢ ܝܵܘ̈ܡܲܝܟ. 29: ܘܒܲܪܢܵܫܵܐ ܣܵܡ ܠܡܸܪܕܦܵܟ݂ ܘܲܠܡܸܒ̣ܥܵܐ ܢܲܦ̮ܫܵܟ݂. ܘܲܗܘ̤ܵܬ̣ ܢܲܦ̮ܫܹܗ ܕܡܵܪܝ: ܨܪܝܼܪܵܐ ܒܲܨܪܵܪܑܵ ܕܚܲܝܹ̈ܐ ܥܲܡ ܡܵܪܝܵܐ ܐܲܠܵܗܵܟ݂. ܘܢܲܦ̮ܫܵܐ ܕܲܒ̣ܥܸܠܕܒ̣ܵܒܲܝ̈ܟ ܢܸܫܕܹܝܗ̇ ܡܵܪܝܵܐ ܒܓ̣ܵܘ ܟܲܦܬ̣ܵܐ ܕܩܸܠܥܵܐ. 30: ܘܢܸܗܘܸܐ ܕܟܲܕ݂ ܢܸܥܒܸ̇ܕ݂ ܡܵܪܝܵܐ ܠܡܵܪܝ ܛܵܒ̣ܬ̣ܵܐ ܥܠܲܝܟ: ܘܢܸܦܩܕ݂ܵܟ݂ ܠܲܡܕܲܒܪܵܢܵܐ ܥܲܠ ܝܼܣܪܵܝܹܠ. 31: ܠܵܐ ܬܸܗܘܸܐ ܠܵܟ݂ ܗܵܕܹܐ ܠܙܵܘܸܥܬ̣ܵܐ: ܘܲܠܬ̣ܘܼܩ̱ܠܬ̣ܵܐ ܕܠܸܒܵܟ݂: ܠܡܹܐܫܲܕ݂ ܕܡܵܐ ܕܡܲܓܵܢ. ܘܟܲܕ݂ ܢܲܛܐܸܒ̣ ܠܵܟ݂ ܡܵܪܝܵܐ: ܐܸܬ̣ܕܲܟ݂ܪܝܼܗ̇ ܠܐܲܡܬ̣ܵܟ݂. 32: ܘܐܸܡܲܪ ܕܵܘܝܼܕ݂ ܠܐܲܒ̣ܝܼܓܸܠ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܫܲܕܲܪܹܟ݂ܝ ܝܵܘܡܵܢܵܐ ܠܐܘܼܪܥ̄ܝ. 33: ܒܪܝܼܟ݂ ܛܲܥܡܹܟ݂ܝ: ܘܲܒ̣ܪܝܼܟ݂ܵܐ ܐܲܢ̄ܬ̇ܝ: ܕܲܟ݂ܠܲܝܬ̇ܝܼܢܝ ܝܵܘܡܵܢܵܐ ܠܡܸܥܲܠ ܒܲܕ݂ܡܵܐ: ܘܲܦܪܲܩܬܲܝ ܐܝܼ̈ܕܲܝ ܝܵܘܡܵܢܵܐ ܡ̣ܢ ܕܡܵܐ. 34: ܒܪܲܡ ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܲܟ݂ܠܵܢܝ ܕܠܵܐ ܐܲܒ̣ܐܸܫ ܠܹܟ݂ܝ: ܕܐܸܠܘܼ ܠܵܐ ܐܸܣܬܲܪܗܲܒ̣ܬ̇ܝ ܐܸܬ̇ܝ̣ܬ̇ܝ ܠܐܘܼܪܥ̄ܝ: ܐܸܢ ܐܸܫܬ̇ܚܲܪ ܠܢܵܒ̣ܵܠ: ܥܕܲܡܵܐ ܕܢܵܗܲܪ ܨܲܦܪܵܐ: ܕܡܲܬ̣ܩܲܢ ܒܐܸܣܬ̣ܵܐ. 35: ܘܲܢܣܲܒ̣ ܕܵܘܝܼܕ݂ ܡ̣ܢ ܐܝܼܕܹܝ̈ܗ̇ ܡܸܕܸܡ ܕܐܲܝܬ̇ܝܲܬ̤: ܘܠܵܗ̇ ܐܸܡܲܪ: ܣܲܩܝ ܠܒܲܝܬܹ̇ܟ݂ܝ ܒܲܫܠܵܡܵܐ: ܚܙܵܝ ܕܫܸܡܥܹܬ̣ ܒܩܵܠܹܟ݂ܝ: ܘܢܸܣܒܹܬ̣ ܒܐܲܦܲܝ̈ܟ̇ܝ. 36: ܘܐܸܬ̣ܵܬ̤ ܐܲܒ̣ܝܼܓܸܠ ܠܘܵܬ̣ ܢܵܒ̣ܵܠ: ܘܗܵܐ ܐܝܼܬ̣ ܠܹܗ ܡܲܫܬ̇ܝܵܐ ܒܒܲܝܬܹ̇ܗ: ܐܲܝܟ݂ ܡܲܫܬ̇ܝܵܐ ܕܡܲܠܟܵܐ: ܘܠܸܒܹ̇ܗ ܕܢܵܒ̣ܵܠ ܛܵܒ̣ ܥܠܵܘܗܝ: ܘܗ̤ܘ ܪܘܸܐ ܛܵܒ̣. ܘܠܵܐ ܚܵܘܝܵܬܹܗ ܦܸܬ̣ܓ̣ܵܡܵܐ ܥܕܲܡܵܐ ܕܢܸܓ̣ܗܲܬ̤. 37: ܘܲܗܘ̤ܵܐ ܕܟܲܕ݂ ܢܸܓ̣ܗܲܬ̤: ܘܢܲܦܨܹܗ ܚܲܡܪܹܗ: ܚܵܘܝܵܬܹܗ ܐܲܢ̄ܬ̇ܬܹܗ ܦܸܬ̣ܓ̣ܵܡܹ̈ܐ ܗܵܠܹܝܢ: ܘܡܝܼܬ̣ ܠܸܒܹ̇ܗ ܒܓ̣ܵܘܹܗ: ܘܲܗܘ̤ܵܐ ܐܲܝܟ݂ ܟܹܐܦܵܐ. 38: ܘܲܗܘ̤ܵܘ ܐܲܝܟ݂ ܥܸܣܪܵܐ ܝܵܘܡ̈ܝܼܢ: ܘܲܡܚܵܐ ܡܵܪܝܵܐ ܠܢܵܒ̣ܵܠ ܘܡܝܼܬ̣. 39: ܘܲܫܡܲܥ ܕܵܘܝܼܕ݂ ܕܡܝܼܬ̣ ܢܵܒ̣ܵܠ ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܕܕ݂ܵܢ ܕܝܼܢܵܐ ܕܚܸܣܕܲܝ ܡ̣ܢ ܐܝܼܕܲܝ̈ ܢܵܒ̣ܵܠ: ܘܲܠܥܲܒ̣ܕܹܗ ܚܣܲܟ݂ ܡ̣ܢ ܒܝܼܫܬܵܐ: ܘܒ̣ܝܼܫܬܹ̇ܗ ܕܢܵܒ̣ܵܠ ܐܲܗܦܸܟ݂ ܡܵܪܝܵܐ ܒܪܹܫܹܗ. ܘܫܲܕܲܪ ܕܵܘܝܼܕ݂ ܘܡܲܠܸܠ ܒܐܲܒ̣ܝܼܓܸܠ: ܕܢܸܣܒ̣ܝܼܗ̇ ܠܹܗ ܐܲܢ̄ܬ̇ܬ̣ܵܐ. 40: ܘܐܸܬ̣ܵܘ ܥܲܒ̣ܕܵܘ̈ܗܝ ܕܕ݂ܵܘܝܼܕ݂ ܠܘܵܬ̣ ܐܲܒ̣ܝܼܓܸܠ ܠܟܲܪ̄ܡܠܵܐ: ܘܐܸܡܲܪܘ ܠܵܗ̇: ܕܵܘܝܼܕ݂ ܫܲܕܪܲܢ ܥܠܲܝܟ̇ܝ ܕܢܸܣܒܹܟ݂ܝ ܠܹܗ ܐܲܢ̄ܬ̇ܬ̣ܵܐ. 41: ܘܩܵܡܲܬ̤ ܥܲܠ ܐܲܦܹܝ̈ܗ̇ ܥܲܠ ܐܲܪܥܵܐ: ܘܐܸܡܪܲܬ̤ ܗܵܐ ܐܲܡܬ̣ܵܐ ܠܲܡܫܵܓ̣ܘܼ ܪܸ̈ܓ̣ܠܹܐ ܕܥܲܒ̣ܕܵܘ̈ܗܝ ܕܡܵܪܝ. 42: ܘܐܸܣܬܲܪ̱ܗܒܲܬ̤ ܘܩܵܡܲܬ̤ ܐܲܒ̣ܝܼܓܸܠ: ܘܝܸܬ̣ܒܲܬ̤ ܥܲܠ ܚܡܵܪܵܐ. ܘܚܲܡܸܫ ܥܠܲܝ̈ܡܵܬ̣ܵܗ̇ ܐܵܙܵܠ̈̄ܢ ܠܪܸܓ̣ܠܵܗ̇: ܘܐܸܙܲܠ̄ܬ̤ ܥܲܡ ܡܲܠܲܐܟ݂ܵܘ̈ܗܝ ܕܕ݂ܵܘܝܼܕ݂: ܘܲܗܘ̤ܵܬ̣ ܠܹܗ ܐܲܢ̄ܬ̇ܬ̣ܵܐ. 43: ܘܠܲܐܚܝܼܢܥܸܡ ܢܣܲܒ̣ ܕܵܘܝܼܕ݂ ܡ̣ܢ ܐܝܼܙܲܪܥܹܝܠ: ܘܲܗ̤ܘܲܝ̈ ܠܹܗ ܬܲܪ̈ܬܲܝܗܹܝܢ ܢܸܫܹ̈ܐ. 44: ܘܝܲܗ̄ܒ̣ ܫܵܐܘܿܠ ܠܡܲܠܟܸܠ ܒܲܪܬܹܗ ܐܲܢ̄ܬܲܬ̣ ܕܵܘܝܼܕ݂ ܠܦܲܠܛܝܼ ܒܲܪ ܠܝܼܫ ܕܡ̣ܢ ܓܲܠܝܵܡ.

ܩܹܦܵܠܹܐܘܿܢ: ܟܘ.

1: ܘܐܸܬ̣ܵܘ ܙܝܼܦܵܝܹ̈ܐ ܠܘܵܬ̣ ܫܵܐܘܿܠ ܠܲܓ̣ܒܲܥ: ܘܐܸܡܲܪܘ ܠܹܗ: ܗܵܐ ܕܵܘܝܼܕ݂ ܡܸܬ̇ܛܲܫܸܐ ܒܓ̣ܒ̣ܥܘܿܬ̣ ܚܘܝܼܠܵܐ ܕܲܩܕ݂ܵܡ ܐܲܫܝܼܡܘܿܢ. 2: ܘܩܵܡ ܫܵܐܘܿܠ ܘܲܢܚܸܬ̣ ܠܡܲܕ݂ܒ̇ܪܵܐ ܕܙܝܼܦ: ܘܥܲܡܹܗ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܓܒܲܝܵܐ ܕܝܼܣܪܵܝܹܠ: ܠܡܸܒ̣ܥܵܐ ܠܕ݂ܵܘܝܼܕ݂ ܒܡܲܕ݂ܒ̇ܪܵܐ ܕܙܝܼܦ. 3: ܘܲܫܪܵܐ ܫܵܐܘܿܠ ܒܓ̣ܒ̣ܥܘܿܬ̣ ܚܘܝܼܠܑܵ ܕܲܩܕ݂ܵܡ ܐܲܫܝܼܡܘܿܢ ܒܐܘܼܪܚܵܐ: ܘܕ݂ܵܘܝܼܕ݂ ܝܵܬܹܒ̣ ܒܡܲܕ݂ܒ̇ܪܵܐ. ܘܲܚܙܵܐ ܕܐܸܬ̣ܵܐ ܫܵܐܘܿܠ ܒܵܬ̣ܪܹܗ ܠܡܲܕ݂ܒ̇ܪܵܐ. 4: ܘܫܲܕܲܪ ܕܵܘܝܼܕ݂ ܓܵܫܘܿܫܹ̈ܐ: ܘܝܼܕܲܥ ܕܐܸܬ̣ܵܐ ܫܵܐܘܿܠ ܒܵܬ̣ܪܹܗ. 5: ܘܩܵܡ ܕܵܘܝܼܕ݂ ܘܐܸܬ̣ܵܐ ܠܐܲܬ̣ܪܵܐ ܕܲܫܪܸܐ ܬܲܡܵܢ ܫܵܐܘܿܠ: ܘܲܚܙܵܐ ܕܵܘܝܼܕ݂ ܕܘܼܟ̇ܬ̣ܵܐ ܕܲܕ݂ܡܸܟ݂ ܬܲܡܵܢ ܫܵܐܘܿܠ: ܘܐܲܒ̣ܢܹܝܪ ܒܲܪ ܢܹܝܪ ܪܲܒ ܚܲܝܠܹܗ ܕܫܵܐܘܿܠ ܕܡ̣ܢ ܒܲܫܒ̣ܝܼܠܵܐ: ܘܥܲܡܵܐ ܫܪܸܐ ܚܕ݂ܵܪ̈ܵܘܗܝ. 6: ܘܲܥܢܵܐ ܕܵܘܝܼܕ݂ ܘܐܸܡܲܪ ܠܐܲܚܝܼܡܲܠܟ ܚܹܬ̣ܵܝܵܐ: ܘܠܲܐܒ̣ܝܼܫܲܝ ܒܲܪ ܨܘܿܪܝܵܐ ܐܲܚܘܼܗܝ ܕܝܘܿܐܵܒ̣: ܘܐܸܡܲܪ: ܡ̇ܢ ܢܵܚܹܬ̣ ܥܲܡܝ ܠܘܵܬ̣ ܫܵܐܘܿܠ ܠܡܲܫܪܝܼܬ̣ܵܐ. ܘܐܸܡܲܪ ܐܲܒ̣ܝܼܫܲܝ: ܐܸܢܵܐ ܢܵܚܹܬ̣ ܐ̄ܢܵܐ ܥܲܡܵܟ݂. 7: ܘܐܸܬ̣ܵܐ ܕܵܘܝܼܕ݂ ܘܐܲܒ̣ܝܼܫܲܝ ܠܘܵܬ̣ ܥܲܡܵܐ ܒܠܸܠܝܵܐ: ܘܗܵܐ ܫܵܐܘܿܠ ܕܡܸܟ݂ ܒܲܫܒ̣ܝܼܠܵܐ: ܘܡܘܿܪܵܢܝܼܬܹܗ ܣܝܼܡܵܐ ܥܲܠ ܐܸܣܵܕ݂ܵܘ̈ܗܝ: ܘܐܲܒ̣ܢܹܝܪ ܘܥܲܡܵܐ ܕܵܡܟ̇ܝܼܢ ܚܕ݂ܵܪ̈ܵܘܗܝ. 8: ܘܐܸܡܲܪ ܐܲܒ̣ܝܼܫܲܝ ܠܕ݂ܵܘܝܼܕ݂: ܐܲܫܠܸܡ ܝܵܘܡܵܢܵܐ ܐܲܠܵܗܵܟ݂ ܒܥܸܠܕܒ̣ܵܒ̣ܵܟ݂ ܒܐܝܼܕܲܝ̈ܟ: ܗܵܫܵܐ ܐܸܡܚܹܝܘܗܝ ܒܡܘܿܪܵܢܝܼܬ̣ܵܐ ܗܵܕܹܐ ܕܒܐܲܪܥܵܐ ܙܒܲܢ̄ܬܵܐ ܚܕ݂ܵܐ: ܘܠܵܐ ܐܸܬ̣ܢܹܝܘܗܝ. 9: ܘܐܸܡܲܪ ܕܵܘܝܼܕ݂ ܠܐܲܒ̣ܝܼܫܲܝ ܠܵܐ ܬܚܲܒܸ̇ܠ: ܡܸܛܠ ܕܠܲܝܬ̇ ܕܡܵܘܫܸܛ ܐܝܼܕܹܗ ܥܲܠ ܡܫܝܼܚܹܗ ܕܡܵܪܝܵܐ ܘܙܵܟܹ̇ܐ. 10: ܘܐܸܡܲܪ ܕܵܘܝܼܕ݂: ܚܲܝ ܗ̄ܘ̣ ܡܵܪܝܵܐ: ܐܸܠܵܐ ܐܸܢ ܡܵܪܝܵܐ ܢܸܡܚܹܘܗܝ: ܐܵܘ ܝܵܘܡܹܗ ܢܹܐܬܹܐ ܘܲܢܡܘܼܬ̣: ܐܵܘ ܒܲܩܪܵܒ̣ܵܐ ܢܸܒ̣ܠܲܝ ܘܲܢܡܘܼܬ̣. 11: ܚܵܣ ܠܝܼ ܡ̣ܢ ܡܵܪܝܵܐ ܕܐܵܘܫܸܛ ܐܝܼܕ݂ܝ ܒܲܡܫܝܼܚܹܗ ܕܡܵܪܝܵܐ. ܗܵܫܵܐ ܣܲܒ̣ ܡܘܼܪܵܢܝܼܬ̣ܵܐ ܕܐܸܣܵܕ݂ܵܘ̈ܗܝ: ܘܩܘܼܩܬ̣ܵܐ ܕܡܲܝ̈ܵܐ: ܘܢܹܐܙܲܠ ܠܲܢ. 12: ܘܲܢܣܲܒ̣ ܕܵܘܝܼܕ݂ ܡܘܿܪܵܢܝܼܬ̣ܵܐ: ܘܩܘܼܩܬ̣ܵܐ ܕܡܲܝ̈ܵܐ: ܡ̣ܢ ܐܸܣܵܕ݂ܵܘ̈ܗܝ ܕܫܵܐܘܿܠ: ܘܐܸܙܲܠܘ ܠܗܘܿܢ. ܘܐ̄ܢܵܫ ܠܵܐ ܚܙܵܐ ܘܠܵܐ ܝܼܕܲܥ ܘܠܵܐ ܐܸܬ̇ܬ̇ܥܝܼܪ: ܡܸܛܠ ܕܟ݂ܠܗܘܿܢ ܕܵܡܟ̇ܝܼܢ ܗ̄ܘ̣ܵܘ: ܘܫܸܢܬ̣ܵܐ ܕܡܵܪܝܵܐ ܢܸܦܠܲܬ̤ ܥܠܲܝܗܘܿܢ. 13: ܘܲܥܒܲܪ ܕܵܘܝܼܕ݂ ܡ̣ܢ ܠܘܵܬ̣ ܫܵܐܘܿܠ: ܘܩܵܡ ܥܲܠ ܪܹܫܹܗ ܕܛܘܼܪܵܐ ܡ̣ܢ ܪܘܼܚܩܵܐ ܣܲܓܝܼܵܐܐ. 14: ܘܲܩܪܵܐ ܕܵܘܝܼܕ݂ ܠܡܲܠܟܵܐ: ܘܠܲܐܒ̣ܢܹܝܪ ܒܲܪ ܢܹܝܪ: ܘܐܸܡܲܪ ܠܵܐ ܥܵܢܹܐ ܐܲܢ̄ܬ̇ ܐܲܒ̣ܢܹܝܪ. ܘܲܥܢܵܐ ܐܲܒ̣ܢܹܝܪ ܘܐܸܡܲܪ: ܡ̇ܢ ܐܲܢ̄ܬ̇ ܕܩܵܪܹܐ ܐܲܢ̄ܬ̇ ܠܡܲܠܟܵܐ. 15: ܘܐܸܡܲܪ ܕܵܘܝܼܕ݂ ܠܐܲܒ̣ܢܹܝܪ: ܗܵܐ ܓܲܢ̄ܒܵܪܵܐ ܐܲܢ̄ܬ̇: ܘܡܲܢܘܼ ܐܲܟ݂ܘܵܬ̣ܵܟ݂ ܒܟ݂ܠܹܗ ܝܼܣܪܵܝܹܠ. ܬܲܝܟܵܘ ܠܵܐ ܢܛܲܪܬ̇ ܠܡܵܪܵܟ݂ ܡܲܠܟܵܐ: ܕܐܸܬ̣ܵܐ ܚܲܕ݂ ܝܵܘܡܵܢܵܐ ܕܲܢܚܲܒ̇ܠܝܼܘܗܝ ܠܡܲܠܟܵܐ ܡܵܪܵܟ݂. 16: ܠܵܐ ܫܲܦܝܼܪ ܥܒܲܕܲܬ̇. ܚܲܝ ܗ̄ܘ̣ ܡܵܪܝܵܐ ܕܲܒ̣̈ܢܲܝ ܡܵܘܬܵܐ ܐܲܢ̄ܬ̇ܘܿܢ: ܕܠܵܐ ܢܛܲܪܬ̇ܘܿܢ ܠܡܵܪܟ݂ܘܿܢ ܠܲܡܫܝܼܚܹܗ ܕܡܵܪܝܵܐ. ܗܵܫܵܐ ܚܙܝܼ ܐܲܝܟܵܐ ܗ̄ܝܼ ܡܘܿܪܵܢܝܼܬܹܗ ܕܡܲܠܟܵܐ: ܘܩܘܼܩܬ̣ܵܐ ܕܡܲܝ̈ܵܐ ܕܐܸܣܵܕ݂ܵܘ̈ܗܝ. 17: ܘܲܫܡܲܥ ܫܵܐܘܿܠ ܩܵܠܹܗ ܕܕ݂ܵܘܝܼܕ݂: ܘܐܸܡܲܪ ܠܹܗ: ܩܵܠܵܟ݂ ܗ̄ܘ̣ ܗܵܢܵܐ: ܒܹܪܝ ܕܵܘܝܼܕ݂. ܘܐܸܡܲܪ: ܩܵܠܝ ܗ̄ܘ̣ ܡܵܪܝ ܡܲܠܟܵܐ. 18: ܘܐܸܡܲܪ ܕܵܘܝܼܕ݂: ܠܡܵܢܵܐ ܪܵܕܹܦ ܐܲܢ̄ܬ̇ ܡܵܪܝ ܒܵܬܲܪ ܥܲܒ̣ܕܵܟ݂: ܡܵܢܵܐ ܥܸܒ̣ܕܹܬ̣: ܘܡܵܢܲܐ ܗ̄ܝ̣ ܒܝܼܫܬܵܐ ܕܒ̣ܐܝܼܕܲܝ̈. 19: ܗܵܫܵܐ ܢܸܫܡܲܥ ܡܵܪܝ ܡܲܠܟܵܐ ܡܸܠܵܘ̈ܗܝ ܕܥܲܒ̣ܕܹܗ. ܘܐܸܢ ܡܵܪܝܵܐ ܓܲܪܝܵܟ݂ ܒܝܼ: ܢܩܲܪܸܒ̣ ܩܘܼܪܒܵܢܵܐ. ܘܐܸܢ ܒܢܲܝ̈ܢܵܫܵܐ: ܠܝܼܛܝܼܢ ܐܸܢܘܿܢ ܩܕ݂ܵܡ ܡܵܪܝܵܐ: ܡܸܛܠ ܕܛܲܪܕܘܼܢܝ ܕܠܵܐ ܐܸܬ̇ܛܲܦܸܐ ܒܝܵܪܬ̇ܘܼܬܹܗ ܕܡܵܪܝܵܐ: ܠܡܹܐܡܲܪ ܙܸܠ ܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ. 20: ܗܵܫܵܐ ܠܵܐ ܢܸܦܸܠ ܕܹܡܝ ܥܲܠ ܐܲܪܥܵܐ ܡ̣ܢ ܩܕ݂ܵܡ ܡܵܪܝܵܐ: ܡܸܛܠ ܕܲܢܦܲܩ ܡܲܠܟܵܐ ܕܝܼܣܪܵܝܹܠ ܠܡܸܒ̣ܥܵܐ ܠܦܘܼܪܬܲܥܢܵܐ ܚܲܕ݂: ܐܲܝܟ݂ ܕܪܵܕܹܦ ܚܲܓ̣ܠܵܐ ܒܛܘܼܪܵܐ. 21: ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܚܛܹܝܬ̣: ܗܦܘܿܟ݂ ܒܹܪܝ ܕܵܘܝܼܕ݂: ܡܸܛܠ ܕܠܵܐ ܐܲܒ̣ܐܸܫ ܠܵܟ݂ ܬܘܼܒ̣. ܚܠܵܦ ܕܝܼܩܲܬ̤ ܢܲܦ̮ܫܝ ܒܥܲܝܢܲܝ̈ܟ ܝܵܘܡܵܢܵܐ: ܗܵܐ ܐܲܣܟ̇ܠܹܬ̣ ܘܲܚܛܹܝܬ̣ ܛܵܒ̣ ܣܲܓ̇ܝܼ. 22: ܘܲܥܢܵܐ ܕܵܘܝܼܕ݂ ܘܐܸܡܲܪ ܗܵܐ ܡܘܿܪܵܢܝܼܬܹܗ ܕܡܲܠܟܵܐ: ܢܸܥܒܲܪ ܚܲܕ݂ ܡ̣ܢ ܥܠܲܝܡܹ̈ܐ ܢܸܣܒ̣ܝܼܗ̇. 23: ܘܡܵܪܝܵܐ ܢܲܗܦܸܟ݂ ܠܓܲܒ̣ܪܵܐ ܙܲܕܝܼܩܘܼܬܹܗ ܘܗܲܝܡܵܢܘܼܬܹܗ. ܕܐܲܫ̱ܠܡܵܟ݂ ܡܵܪܝܵܐ ܝܵܘܡܵܢܵܐ ܒܐܝܼܕܲܝ̈: ܘܠܵܐ ܨܒܹܝܬ̣ ܠܡܵܘܫܵܛܘܼ ܐܝܼܕ݂ܝ ܒܲܡܫܝܼܚܹܗ ܕܡܵܪܝܵܐ. 24: ܐܲܝܟ݂ ܕܝܸܪܒܲܬ̤ ܢܲܦ̮ܫܵܟ݂ ܝܵܘܡܵܢܵܐ ܒܥܲܝܢܲܝ̈: ܗܵܟܲܢܵܐ ܬܹܐܪܲܒ̣ ܢܲܦ̮ܫܝ ܒܥܲܝܢܲܝ̈ ܡܵܪܝܵܐ. 25: ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܒܪܝܼܟ݂ ܐܲܢ̄ܬ̇ ܒܹܪܝ: ܐܵܦ ܡܸܥܒܲܕ݂ ܥܒܲܕܬ̇: ܐܵܦ ܡܸܙܟܵܐ ܙܟܲܝܬ̇. ܘܐܸܙܲܠ ܕܵܘܝܼܕ݂ ܠܐܘܼܪܚܹܗ: ܘܐܵܦ ܫܵܐܘܿܠ ܗܦܲܟ݂ ܠܒܲܝܬܹ̇ܗ.

ܩܹܦܵܠܹܐܘܿܢ: ܟܙ.

1: ܘܐܸܡܲܪ ܕܵܘܝܼܕ݂ ܒܠܸܒܹ̇ܗ: ܗܵܫܵܐ ܐܸܢ ܢܵܦܹܠ ܐ̄ܢܵܐ ܚܲܕ݂ ܝܘܿܡ ܒܐܝܼܕ݂ܵܘ̈ܗܝ ܕܫܵܐܘܿܠ: ܠܲܝܬ̇ ܠܝܼ ܛܵܒ̣ܬ̣ܵܐ: ܐܸܠܵܐ ܐܸܬ̣ܦܲܠܲܛ ܠܝܼ ܠܐܲܪܥܵܐ ܕܲܦܠܸܫ̈ܬܵܝܹܐ. ܘܢܸܠܐܸܐ ܫܵܐܘܿܠ ܠܡܸܒ̣ܥܝܲܢܝ ܬܘܼܒ̣: ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ: ܘܐܸܫܬܵܘܙܲܒ̣ ܡ̣ܢ ܐܝܼܕ݂ܵܘ̈ܗܝ. 2: ܘܩܵܡ ܕܵܘܝܼܕ݂ ܘܲܥܒܲ ܗ̤ܘ ܘܫܸܬ̣ܡܵܐܐ ܓܲܒ̣ܪ̈ܝܼܢ ܕܥܲܡܹܗ: ܠܘܵܬ̣ ܐܲܟ݂ܝܼܫ ܒܲܪ ܡܲܥܟܵܐ ܡܲܠܟܵܐ ܕܓ̣ܵܬ̣. 3: ܘܝܼܬܸܒ̣ ܕܵܘܝܼܕ݂ ܥܲܡ ܐܲܟ݂ܝܼܫ ܒܓ̣ܵܬ̣ ܗ̤ܘ ܘܓܲܒ̣ܪ̈ܵܘܗܝ ܘܐ̄ܢܵܫܲܝ̈ ܒܲܝܬܹ̇ܗ ܕܕ݂ܵܘܝܼܕ݂: ܘܬܲܪܬܹܝܢ ܢܸܫܵܘ̈ܗܝ: ܐܲܚܝܼܢܥܸܡ ܕܡ̣ܢ ܐܝܼܙܲܪܥܹܝܠ: ܘܐܲܒ̣ܝܼܓܸܠ ܐܲܢ̄ܬ̇ܬܹܗ ܕܢܵܒ̣ܵܠ ܡ̣ܢ ܟܲܪܡ̄ܠܵܐ. 4: ܘܚܵܘܝܼܘ ܠܫܵܐܘܿܠ ܕܲܢܚܸܬ̣ ܕܵܘܝܼܕ݂ ܠܓ̣ܵܬ̣: ܘܠܵܐ ܐܵܘܣܸܦ ܬܘܼܒ̣ ܠܡܸܒ̣ܥܝܹܗ.

5: ܘܐܸܡܲܪ ܕܵܘܝܼܕ݂ ܠܐܲܟ݂ܝܼܫ: ܐܸܢ ܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ: ܢܸܬ̇ܠܘܼܢ ܠܝܼ ܕܘܼܟ̇ܬ̣ܵܐ ܒܲܚܕ݂ܵܐ ܡ̣ܢ ܩܘܼܪ̈ܝܵܐ ܕܲܒ̣ܡܲܕ݂ܒ̇ܪܵܐ: ܘܐܸܬܸ̇ܒ̣ ܬܲܡܵܢ: ܘܠܵܐ ܢܸܬܸ̇ܒ̣ ܥܲܒ̣ܕܵܟ݂ ܒܲܩܪܝܼܬ̣ܵܐ ܕܡܲܠܟ̇ܘܼܬ̣ܵܐ ܥܲܡܵܟ݂. 6: ܘܝܲܗ̄ܒ̣ ܠܹܗ ܐܲܟ݂ܝܼܫ ܒܝܵܘܡܵܐ ܗܵܘ̇ ܠܨܸܢܩܠܲܓ̣: ܡܸܛܠ ܗܵܢܵܐ ܗܘ̤ܵܬ̣ ܨܸܢܩܠܲܓ̣ ܠܡܲܠܟܵܐ ܕܲܝܗܘܼܕ݂ܵܐ: ܥܲܕܲܡܵܐ ܠܝܵܘܡܵܢܵܐ. 7: ܘܲܗܘ̤ܵܐ ܡܸܢܝܵܢܵܐ ܕܝܵܘ̈ܡܵܬ̣ܵܐ ܕܝܼܬ̣ܒ̣ ܕܵܘܝܼܕ݂ ܒܐܲܪܥܵܐ ܕܲܦܠܸܫ̈ܬܵܝܹܐ: ܥܸܕܵܢ ܘܐܲܪܒ̇ܥܵܐ ܝܲܪ̈ܚܝܼܢ.

8: ܘܲܣܠܸܩܘ ܕܵܘܝܼܕ݂ ܘܓܲܒ̣ܪ̈ܵܘܗܝ ܘܗܲܠܸܟ݂ܘ ܥܲܠ ܓܵܫܘܿܪ: ܘܥܲܠ ܓܕ݂ܘܿܠܵܐ: ܘܥܲܠ ܥܡܵܠܹܝܩ: ܡܸܛܠ ܕܗܵܠܹܝܢ ܗ̄ܘ̣ܵܘ ܝܲܬܵܒܹ̈ܐ ܕܐܲܪܥܵܐܜ ܕܡ̣ܢ ܥܵܠܲܡ: ܘܗܲܠܸܟ݂ܘ ܥܲܠ ܓܵܫܘܿܪ ܘܲܥܕܲܡܵܐ ܠܐܲܪܥܵܐ ܕܡܸܨܪܝܼܢ.

9: ܘܲܚܪܲܒ̣ ܕܵܘܝܼܕ݂ ܠܐܲܪܥܵܐ: ܘܠܵܐ ܐܲܚܝܼ ܓܲܒ̣ܪܵܐ ܐܵܘ ܐܲܢ̄ܬ̇ܬ̣ܵܐ. ܘܲܢܣܲܒ̣ ܥܵܢܑ̈ܵܐ: ܘܬ̣ܵܘܪܹ̈ܐ: ܘܚܸܡܪ̈ܵܐ: ܘܓܲܡܠܹ̈ܐ: ܘܡܵܐܢܹ̈ܐ. ܘܲܗܦܲܟ݂ ܕܵܘܝܼܕ݂ ܘܐܸܬ̣ܵܐ ܠܘܵܬ̣ ܐܲܟ݂ܝܼܫ. 10: ܘܐܸܡܲܪ ܐܲܟ݂ܝܼܫ ܠܕ݂ܵܘܝܼܕ݂: ܐܲܝܟܵܐ ܗ̤ܘܲܝܬ̇ܘܿܢ ܝܵܘܡܵܢܵܐ. ܘܐܸܡܲܪ ܕܵܘܝܼܕ݂: ܥܲܠ ܢܓܲܒ̣ ܕܲܝܗܘܼܕ݂ܵܐ: ܘܥܲܠ ܢܓܲܒ̣ ܕܝܲܪܚ̄ܡܸܠ: ܘܥܲܠ ܢܓܲܒ̣ ܕܲܩܥܝܼܠܵܐ. 11: ܘܓܲܒ̣ܪܵܐ ܘܐܲܢ̄ܬ̇ܬ̣ܵܐ ܠܵܐ ܐܲܚܝܼ ܕܵܘܝܼܕ݂ ܕܢܹܐܬܸܐ ܠܓ̣ܵܬ̣ ܠܡܹܐܡܲܪ: ܕܠܵܐ ܢܚܵܘܘܿܢ ܥܠܲܝܢ ܘܢܹܐܡܪܘܿܢ: ܗܵܟܲܢܵܐ ܥܒܲܕ݂ ܕܵܘܝܼܕ݂. ܘܗܵܟܲܢܵܐ ܗܘ̤ܵܐ ܢܵܡܘܿܣܹܗ ܟܠܗܘܿܢ ܝܵܘ̈ܡܵܬ̣ܵܐ ܕܝܼܬ̣ܒ̣ ܒܐܲܪܥܵܐ ܕܲܦܠܸܫ̈ܬܵܝܹܐ. 12: ܘܗܲܝ̣ܡܸܢ ܐܲܟ݂ܝܼܫ ܠܕ݂ܵܘܝܼܕ݂: ܘܐܸܡܲܪ: ܡܲܒܟܵܐܫܘܼ ܐܲܒ̣ܐܸܫ ܒܥܲܡܹܗ ܒܝܼܣܪܵܝܹܠ: ܗܵܐ ܗܘ̤ܵܐ ܠܝܼ ܥܲܒ̣ܕܵܐ ܠܥܵܠܲܡ.

ܩܹܦܵܠܹܐܘܿܢ: ܟܚ.

1: ܘܲܗܘ̤ܵܐ ܒܝܵܘ̈ܡܵܬ̣ܵܐ ܗܵܢܘܿܢ: ܘܟܲܢܸܫܘ ܦܠܸܫ̈ܬܵܝܹܐ ܡܲܫܪ̈ܝܵܬ̣ܗܘܿܢ ܠܲܩܪܵܒ̣ܵܐ ܠܢܲܚܠܵܐ: ܠܡܸܬ̣ܟܲܬܵܫܘܼ ܥܲܡ ܝܼܣܪܵܝܹܠ. ܘܐܸܡܲܪ ܐܲܟ݂ܝܼܫ ܠܕ݂ܵܘܝܼܕ݂: ܡܸܕܲܥ ܬܸܕܲܥ ܕܥܲܡܝ ܬܸܦܘܿܩ ܠܡܲܫܪܝܼܬ̣ܵܐ: ܐܲܢ̄ܬ̇ ܘܓܲܒ̣ܪܹ̈ܐ ܕܥܲܡܵܟ݂.

2: ܘܐܸܡܲܪ ܕܵܘܝܼܕ݂ܕ ܠܐܟ݂ܝܼܫ: ܡܸܛܠ ܗܵܢܵܐ ܐܲܢ̄ܬ̇ ܬܸܕܲܥ ܡܸܕܸܡ ܕܢܸܥܒܸ̇ܕ݂ ܥܲܒ̣ܕܵܟ݂: ܘܐܸܡܲܪ ܐܲܟ݂ܝܼܫ ܠܕ݂ܵܘܝܼܕ݂: ܡܸܛܠ ܗܵܢܵܐ ܢܵܛܘܿܪܵܐ ܐܸܥܒ̇ܕ݂ܵܟ݂ ܠܪܹܫ ܟܠܗܘܿܢ ܝܵܘ̈ܡܵܬ̣ܵܐ. 3: ܘܲܫܡܘܼܐܹܝܠ ܡܝܼܬ̣: ܘܐܲܪܩܸܕ݂ܘ ܥܠܵܘܗܝ ܟܠܹܗ ܝܼܣܪܵܝܹܠ: ܘܲܩܒ̣ܪܘܼܗܝ ܒܪܵܡـܟܵܐ ܒܩܲܒ̣ܪܹܗ. ܘܫܵܐܘܿܠ ܐܲܥܒܲܪ ܙܲܟ̇ܘܼܪܹ̈ܐ ܘܝܲܕܘܼܥܹ̈ܐ ܡ̣ܢ ܐܲܪܥܵܐ. 4: ܘܐܸܬ̣ܟܲܢܲܫܘ ܦܠܸܫ̈ܬܵܝܹܐ: ܘܐܸܬ̣ܵܐܘ ܫܪܵܘ ܒܲܫܟܹܝܡ. ܘܟܲܢܸܫ ܫܵܐܘܿܠ ܠܟ݂ܠܹܗ ܝܼܣܪܵܝܹܠ: ܘܲܫܪܵܘ ܒܓܲܠܓܵܠܵܐ. 5: ܘܲܚܙܵܐ ܫܵܐܘܿܠ ܠܡܫܪܝܼܬ̣ܵܐ ܕܲܦܠܸܫ̈ܬܵܝܹܐ ܘܲܕ݂ܚܸܠ: ܘܙܵܥ ܠܸܒܹܗ ܛܵܒ̣. 6: ܘܲܫܐܸܠ ܒܡܵܪܝܵܐ ܘܠܵܐ ܥܢܵܝܗܝ: ܘܐܵܦ ܒܚܸܠܡܵܐ: ܘܐܵܦ ܒܢܘܼܪܑܵ: ܘܐܵܦ ܒܲܢܒ̣̈ܝܹܐ. 7: ܘܐܸܡܲܪ ܫܵܐܘܿܠ ܠܥܲܒ̣̈ܕܵܘܗܝ: ܒܥܵܘ ܠܝܼ ܐܲܢ̄ܬ̇ܬ̣ܵܐ ܕܡܲܣܩܵܐ ܙܲܟ̇ܘܼܪܹ̈ܐ: ܘܐܹܙܲܠ ܠܘܵܬ̣ܵܗ̇: ܘܐܸܫܐܲܠ ܒܵܗ̇. ܐܵܡܪܝܼܢ ܠܹܗ ܥܲܒ̣ܕܵܘ̈ܗܝ: ܗܵܐ ܐܲܢ̄ܬ̇ܬ̣ܵܐ ܕܡܲܣܩܵܐ ܙܲܟ̇ܘܼܪܹ̈ܐ ܒܥܲܕ݂ܘܵܥܝܼܪ. 8: ܘܐܸܫܬܲܠܲܚ ܫܵܐܘܿܠ ܢܲܚܬܵܘ̈ܗܝ: ܘܲܠܒܸܫ ܢܲܚ̈ܬܹܐ ܐ̄ܚܪ̈ܵܢܹܐ: ܘܐܸܙܲܠ ܗ̤ܘ ܘܲܬ̣ܪܹܝܢ ܓܲܒ̣ܪ̈ܝܼܢ ܥܲܡܹܗ: ܘܐܸܬ̣ܵܐܘ ܠܘܵܬ̣ ܐܲܢ̄ܬ̇ܬ̣ܵܐ ܒܠܸܠܝܵܐ. ܘܐܸܡܲܪ ܠܵܗ̇ ܫܵܐܘܿܠ: ܩܨܘܿܡܝ ܠܝܼ ܒܙܲܟ̇ܘܼܪܵܐ: ܘܐܲܣܸܩܝ ܠܝܼ ܠܡ̇ܢ ܕܐܹܡܲܪ ܠܹܟ݂ܝ. 9: ܘܐܸܡܲܪܲܬ̤ ܠܹܗ ܐܲܢ̄ܬ̇ܬ̣ܵܐ: ܗܵܐ ܐܲܢ̄ܬ̇ ܝܵܕܲܥ ܐܲܢ̄ܬ̇ ܡܸܕܸܡ ܕܲܥܒܲܕ݂ ܫܵܐܘܿܠ: ܕܐܲܥܒܲܪ ܙܲܟ̇ܘܼܪܹ̈ܐ ܘܝܲܕܘܼܥܹ̈ܐ ܡ̣ܢ ܐܲܪܥܵܐ: ܠܡܵܢܵܐ ܡܨܲܝܸܕ݂ ܢܲܦ̮ܫܝ ܠܲܡܡܵܬ̣ܘܼܬܲܢܝ. 10: ܘܝܼܡܵܐ ܠܵܗ̇ ܫܵܐܘܿܠ ܒܡܵܪܝܵܐ: ܘܐܸܡܲܪ: ܚܲܝ ܗ̄ܘ̣ ܡܵܪܝܵܐ ܕܠܵܐ ܢܸܗܘܸܐ ܠܹܟ݂ܝ ܣܘܼܪܚܵܢ ܒܦܸܬ̣ܓ̣ܵܡܵܐ ܗܵܢܵܐ. 11: ܘܐܸܡܪܲܬ̤ ܐܲܢ̄ܬ̇ܬ̣ܵܐ: ܠܡ̇ܢ ܐܲܣܸܩ ܠܵܟ݂: ܘܐܸܡܲܪ ܠܲܫܡܘܼܐܹܝܠ ܐܲܣܸܩܝ ܠܝܼ. 12: ܘܲܚܙܵܬܹܗ ܐܲܢ̄ܬ̇ܬ̣ܵܐ ܠܲܫܡܘܼܐܹܝܠ: ܘܐܲܝܠܲܬ̤ ܒܩܵܠܵܐ ܪܵܡܵܐ: ܘܐܸܡܪܲܬ̤ ܠܫܵܐܘܿܠ: ܡܢܵܘ ܗܵܢܵܐ ܕܲܥܒܲܕܬ̇ ܠܝܼ: ܠܡܵܢܵܐ ܢܟܲܠܬܵܢܝ: ܘܐܲܢ̄ܬ̇ ܫܵܐܘܿܠ ܐܲܢ̄ܬ̇. 13: ܘܐܸܡܲܪ ܠܵܗ̇ ܡܲܠܟܵܐ ܠܵܐ ܬܸܕ݂ܚ̄ܠܝܼܢ: ܡܵܢܵܐ ܚܙܲܝܬ̇ܝ: ܘܐܸܡܪܲܬ̤ ܐܲܢ̄ܬ̇ܬ̣ܵܐ ܠܫܵܐܘܿܠ: ܐܲܠܵܗܹ̈ܐ ܚܙܹܝܬ̣ ܕܣܵܠܩܝܼܢ ܡ̣ܢ ܐܲܪܥܵܐ. 14: ܘܐܸܡܲܪ ܠܵܗ̇ ܡܵܢܵܘ ܚܸܙܘܹܗ: ܐܵܘܪܵܐ ܠܹܗ: ܓܲܒ̣ܪܵܐ ܣܵܒ̣ܵܐ ܣܵܠܹܩ ܘܲܡܥܲܛܲܦ ܒܲܦܪܝܼܣܵܐ. ܘܝܼܕܲܥ ܫܵܐܘܿܠ ܕܲܫܡܘܼܐܹܝܠ ܗ̄ܘ̣: ܘܲܢܦܲܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓܸܕ݂. 15: ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܠܡܵܢܵܐ ܐܲܙܝܼܥܬܵܢܝ ܠܡܲܣܵܩܘܼܬܲܢܝ. ܘܐܸܡܲܪ ܫܵܐܘܿܠ: ܥܵܩܲܬ̤ ܠܝܼ ܛܵܒ̣: ܘܲܦܠܸܫ̈ܬܵܝܹܐ ܡܸܬ̣ܟܲܬ̇ܫܝܼܢ ܥܲܡܝ: ܘܐܲܠܵܗܵܐ ܥܒܲܕܪ ܡܹܢܝ: ܘܠܵܐ ܥܢܵܢܝ ܬܘܼܒ̣: ܘܐܵܦ ܒܐܝܼܕ݂ܵܐ ܕܲܢܒ̣̈ܝܹܐ ܘܐܵܦ ܒܚܸܠܡܵܐ ܒܥܹܝܬ̣. ܘܲܩܪܹܝܬ̣ܵܟ݂ ܕܲܬ̣ܚܵܘܹܝܢܝ ܡܵܢܵܐ ܐܸܥܒܸ̇ܕ݂. 16: ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܡܵܢܵܐ ܡܫܐܲܐܸܠ ܐܲܢ̄ܬ̇ ܠܝܼ ܕܡܵܪܝܵܐ ܥܒܲܪ ܠܹܗ ܡܸܢܵܟ݂: ܘܲܗܘ̤ܵܐ ܥܲܡ ܚܲܒ̣ܪܵܟ݂. 17: ܘܲܥܒܲܕ݂ ܠܹܗ ܡܵܪܝܵܐ ܐܲܝܟܲܢܵܐ ܕܐܸܡܲܪ ܒܐܝܼܕ݂ܝ: ܘܲܨܪܵܐ ܡܲܠܟ̇ܘܼܬ̣ܵܐ ܡ̣ܢ ܐܝܼܕ݂ܵܟ݂: ܘܝܲܗ̄ܒܵܗ̇ ܠܚܲܒ̣ܪܵܟ݂ ܕܵܘܝܼܕ݂. 18: ܥܲܠ ܕܠܵܐ ܫܡܲܥܬ̇ ܒܩܵܠܹܗ ܕܡܵܪܝܵܐ: ܘܠܵܐ ܥܒܲܕܬ̇ ܚܸܡܬ̣ܵܐ ܕܪܘܼܓ̣ܙܹܗ ܒܲܥܡܵܠܹܝܩ. ܡܸܛܠ ܗܵܢܵܐ ܦܸܬ̣ܓ̣ܵܡܵܐ ܥܒܲܕ݂ ܠܵܟ݂ ܡܵܪܝܵܐ ܝܵܘܡܵܢܵܐ. 19: ܘܢܲܫܠܸܡ ܡܵܪܝܵܐ ܐܵܦ ܝܼܣܪܵܝܹܠ ܥܲܡܵܟ݂ ܒܐܝܼܕ݂ܵܐ ܕܲܦܠܸܫ̈ܬܵܝܹܐ: ܘܲܡܚܵܪ ܐܲܢ̄ܬ̇ ܘܲܒ̣ܢܲܝ̈ܟ ܠܘܵܬ̣. ܘܐܵܦ ܠܡܲܫܪܝܼܬ̣ܵܐ ܕܝܼܣܪܵܝܹܠ: ܢܲܫ̱ܠܡܝܼܗ̇ ܡܵܪܝܵܐ ܒܐܝܼܕ݂ܵܐ ܕܲܦܠܸܫ̈ܬܵܝܹܐ. 20: ܘܐܸܣܬ̇ܪܗܲܒ̣ ܫܵܐܘܿܠ: ܘܲܢܦܲܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܘܲܕ݂ܚܸܠ ܛܵܒ̣ ܡ̣ܢ ܡܸܠܵܘ̈ܗܝ ܕܲܫܡܘܼܐܹܠ: ܘܐܵܦ ܚܲܝܠܵܐ ܠܲܝܬ̇ ܗ̄ܘ̣ܵܐ ܒܹܗ: ܡܸܛܠ ܕܟ݂ܠܹܗ ܐܝܼܡܵܡܵܐ ܗܵܘ̇ ܘܟ݂ܠܹܗ ܠܸܠܝܵܐ ܠܵܐ ܐܸܟܲܠ ܗ̄ܘ̣ܵܐ ܠܲܚܡܵܐ. 21: ܘܐܸܬ̣ܵܬ̤ ܐܲܢ̄ܬ̇ܬ̣ܵܐ ܠܘܵܬ̣ ܫܵܐܘܿܠ ܘܲܚܙܵܬ̤ ܕܲܕ݂ܚܸܠ ܛܵܒ̣: ܘܐܸܡܪܲܬ̤ ܠܹܗ: ܗܵܐ ܫܸܡܥܲܬ̤ ܐܲܡܬ̣ܵܟ݂ ܠܩܵܠܵܟ݂: ܘܣܵܡܹܬ̣ ܢܲܦ̮ܫܝ ܒܐܝܼܕܲܝ̈ܟ: ܘܫܸܡ̇ܥܹܬ̣ ܡܸܠܲܝ̈ܟ ܕܐܸܡܲܪܬ̇ ܠܝܼ. 22: ܗܵܫܵܐ ܫܡܲܥ ܐܵܦ ܐܲܢ̄ܬ̇ ܒܩܵܠܵܐ ܕܐܲܡܬ̣ܵܟ݂: ܘܐܹܣܝܼܡ ܩܕ݂ܵܡܲܝܟ ܩܲܨܝܵܐ ܕܠܲܚܡܵܐ: ܘܐܲܟ݂ܘܿܠ ܘܢܸܗܘܸܐ ܒܵܟ݂ ܚܲܝܠܵܐ: ܡܸܛܠ ܕܐܵܙܹܠ ܐܲܢ̄ܬ̇ ܒܐܘܼܪܚܵܐ. 23: ܘܠܵܐ ܨܒ̣ܵܐ: ܘܐܸܡܲܪ ܠܵܗ̇ ܠܵܐ ܐܵܟܹܠ ܐ̄ܢܵܐ. ܘܲܒ̣ܥܵܘ ܡܸܢܹܗ ܥܲܒ̣ܕܵܘ̈ܗܝ ܘܐܵܦ ܐܲܢ̄ܬ̇ܬ̣ܵܐ: ܘܲܫܡܲܥ ܒܩܵܠܗܘܿܢ: ܘܩܵܡ ܡ̣ܢ ܐܲܪܥܵܐ ܘܝܼܬܸܒ̣ ܥܲܠ ܥܲܪܣܵܐ. 24: ܘܠܲܐܢ̄ܬ̇ܬ̣ܵܐ ܥܸܓ̣ܠܵܐ ܡܪܲܒܲܝ ܗ̄ܘ̣ܵܐ ܠܵܗ̇ ܒܒܲܝܬܵܗ̇: ܘܐܸܣܬܲܪ̱ܗܒܲܬ̤ ܢܟܲܣܬܹܗ. ܘܢܸܣܒܲܬ̤ ܩܲܡܚܵܐ ܠܵܫܲܬ̤ ܘܐܲܦܵܬ̤ ܦܲܛܝܼܪܵܐ. 25: ܘܩܲܪܒܲܬ̤ ܩܕ݂ܵܡ ܫܵܐܘܿܠ ܘܲܩܕ݂ܵܡ ܥܲܒ̣ܕܵܘ̈ܗܝ: ܘܲܠܥܸܣܘ ܘܩܵܡܘ ܗܲܠܸܟ݂ܘ ܒܠܸܠܝܵܐ ܗܵܘ̇.

ܩܹܦܵܠܹܐܘܿܢ: ܟܛ.

1: ܘܟܲܢܸܫܘ ܦܠܸܫ݁ܬܵܝܹܐ ܟܠܗܹܝܢ ܡܲܫܪ̈ܝܵܬ̣ܗܘܿܢ ܠܐܵܦܵܩ: ܘܝܼܣܪܵܝܹܠ ܫܪܹܝܢ ܒܥܹܝܢ ܕܒ̣ܐܝܼܙܲܪܥܹܝܠ. 2: ܘܲܛܪ̈ܘܼܢܹܐ ܕܲܦܠܸܫ̈ܬܵܝܹܐ ܥܵܒ̣ܪܝܼܢ ܥܲܠ ܡܲܐ̈ܘܵܬ̣ܵܐ ܘܥܲܠ ܐܲܠܦܹ̈ܐ: ܘܕ݂ܵܘܝܼܕ݂ ܘܓܲܒ̣ܪܹ̈ܐ ܕܥܲܡܹܗ ܥܵܒ̣ܪܝܼܢ ܒܐܲܚܪܵܝܬܵܐ ܥܲܡ ܐܲܟ݂ܝܼܫ. 3: ܘܐܸܡܲܪܘ ܪܵܘܪ̈ܒ̣ܵܢܹܐ ܕܲܦܠܸܫ̈ܬܵܝܹܐ ܠܐܲܟ݂ܝܼܫ: ܡܵܢܵܐ ܥܵܒ̣ܪܝܼܢ ܗܵܠܹܝܢ. ܘܐܸܡܲܪ ܐܲܟ݂ܝܼܫ ܠܪܵܘ̱ܪ̈ܒ̣ܵܢܹܐ ܕܲܦܠܸܫ̈ܬܵܝܹܐ: ܗܵܢܵܐ ܗ̄ܘ̣ ܕܵܘܝܼܕ݂ ܥܲܒ̣ܕܹܗ ܕܫܵܐܘܿܠ ܡܲܠܟܵܐ ܕܝܼܣܪܵܝܹܠ: ܕܲܗܘ̤ܵܐ ܠܘܵܬܲܢ ܗܵܐ ܥܸܕܵܢ ܒܥܸܕܵܢ ܘܝܲܪ̈ܚܹܐ: ܘܠܵܐ ܐܸܫܟ̇ܚܹܬ̣ ܒܹܗ ܡܸܕܸܡ: ܡ̣ܢ ܝܵܘܡܵܐ ܕܐܸܬ̣ܵܐ ܠܘܵܬ̣ܝ ܘܲܥܕܲܡܵܐ ܠܝܵܘܡܵܐ. 4: ܘܲܪܓܸܙܘ ܥܠܵܘܗܝ ܪܵܘ̱ܪ̈ܒ̣ܵܢܹܐ ܕܲܦܠܸܫ̈ܬܵܝܹܐ: ܘܐܵܡܪܝܼܢ ܠܹܗ: ܐܲܦܸܩ ܠܓܲܒ̣ܪܵܐ: ܘܢܹܐܙܲܠ ܠܕ݂ܘܟ̇ܬܹܗ ܕܐܲܫܠܸܛܬܵܐܝܗܝ ܬܲܡܵܢ: ܘܠܵܐ ܢܹܐܙܲܠ ܥܲܡܲܢ ܠܲܩܪܵܒ̣ܵܐ: ܘܠܵܐ ܢܸܗܘܸܐ ܠܲܢ ܫܦܵܝܵܐ ܒܲܩܪܵܒ̣ܵܐ. ܒܡܵܢܵܐ ܓܹܝܪ ܡܸܬ̣ܪܲܥܸܐ ܓܲܒ̣ܪܵܐ ܗܵܢܵܐ ܥܲܡ ܡܵܪܹܗ: ܐܸܠܵܐ ܐܸܢ ܒܪܹܫܵܐ ܕܝܼܠܲܢ. 5: ܠܵܐ ܗ̄ܘ̣ܵܐ ܗܵܢܵܐ ܕܵܘܝܼܕ݂ ܗܵܘ̇ ܕܲܡܥܲܢ̈ܝܵܢ ܗ̄ܘܲܝ̈ ܠܹܗ ܒ̈ܢܵܬ̣ ܝܼܣܪܵܝܹܠ ܒܲܪ̈ܒ̣ܝܼܥܹܐ: ܘܐܵܡܪ̈ܵܢ: ܩܛܲܠ ܫܵܐܘܿܠ ܒܐܲܠܦܹ̈ܐ: ܘܕ݂ܵܘܝܼܕ݂ ܒܪܸ̈ܒ̇ܘܵܬ̣ܵܐ. 6: ܘܲܩܪܵܐ ܐܲܟ݂ܝܼܫ ܠܕ݂ܵܘܝܼܕ݂: ܘܐܸܡܲܪ ܠܹܗ: ܚܲܝ ܗ̄ܘ̣ ܡܵܪܝܵܐ ܕܲܬ̣ܪܝܼܨ ܐܲܢ̄ܬ̇: ܘܛܵܒ̣ ܒܥܲܝܢܲܝ̈ ܡܲܠܵܟ݂ ܘܡܲܦܩܵܟ݂ ܕܥܲܡܝ ܒܲܩܪܵܒ̣ܵܐ: ܘܠܵܐ ܐܸܫܟ̇ܚܹـܬ̣ ܒܵܟ݂ ܒܝܼܫܬܵܐ: ܡ̣ܢ ܝܵܘܡܵܐ ܕܐܸܬܲܝܬ̇ ܠܘܵܬܲܢ: ܘܲܥܕܲܡܵܐ ܠܝܵܘܡܵܢܵܐ. ܘܲܒ̣ܝܢܲܝ̈ܗܘܿܢ ܕܲܛܪ̈ܘܼܢܹܐ ܠܵܐ ܛܵܒ̣ ܐܲܢ̄ܬ̇. 7: ܗܵܫܵܐ ܗܦܘܿܟ݂ ܙܸܠ ܒܲܫܠܵܡܵܐ: ܘܠܵܐ ܬܸܥܒܸܕ݂ ܒܝܼܫܬܵܐ ܒܥܲܝܢܲܝ̈ ܛܪ̈ܘܼܢܲܝܗܘܿܢ ܕܲܦܠܸܫ̈ܬܵܝܹܐ. 8: ܘܐܸܡܲܪ ܕܵܘܝܼܕ݂ ܠܐܲܟ݂ܝܼܫ: ܡܵܢܵܐ ܥܸܒ̣ܵܕܹܬ̣: ܘܡܵܢܵܐ ܐܸܫܟܲܚܬ̇ ܒܥܸܒ̣ܕܵܟ݂: ܡ̣ܢ ܝܵܘܡܵܐ ܕܲܗܘܹܝܬ̣ ܩܕ݂ܵܡܲܝܟ ܘܲܥܕܲܡܵܐ ܠܝܵܘܡܵܢܵܐ: ܐܸܠܵܐ ܐܵܙܸܠ ܐ̄ܢܵܐ ܘܡܸܬ̣ܟܲܬܲܫ ܐ̄ܢܵܐ ܥܲܡ ܒܥܸܠܕܒ̣ܵܒ̣ܵܘ̈ܗܝ ܕܡܵܪܝ ܡܲܠܟܵܐ. 9: ܘܲܥܢܵܐ ܐܲܟ݂ܝܼܫ ܘܐܸܡܲܪ ܠܕ݂ܵܘܝܼܕ݂: ܝܵܕܲܥ ܐ̄ܢܵܐ ܕܛܵܒ̣ ܐܲܢ̄ܬ̇ ܒܥܲܝܢܲܝ̈ ܐܲܝܟ݂ ܡܲܠܲܐܟܹܗ ܕܐܲܠܵܗܵܐ: ܒܪܲܡ ܪܵܘ̱ܪ̈ܒ̣ܵܢܹܐ ܕܲܦܠܸܫ̈ܬܵܝܹܐ ܐܵܡܪܝܼܢ: ܠܵܐ ܢܹܐܙܲܠ ܥܲܡܵܢ ܠܲܩܪܵܒ̣ܵܐ. 10: ܗܵܫܵܐ ܩܕܸܡ ܒܨܲܦܪܵܐ: ܘܥܲܒ̣̈ܕܹܐ ܕܡܵܪܵܟ݂ ܕܐܸܬ̣ܵܘ ܥܲܡܵܟ݂ ܠܐܘܼܪܚܵܐ: ܘܢܸܢܗܲܪ ܠܟ݂ܘܿܢ ܘܙܸܠܘ.

11: ܘܩܲܕܸܡܘ ܕܵܘܝܼܕ݂ ܘܓܲܒ̣ܪ̈ܵܘܗܝ ܠܡܹܐܙܲܠ ܠܐܲܪܥܵܐ ܕܲܦܠܸܫ̈ܬܵܝܹܐ: ܘܲܦܠܸܫ̈ܬܵܝܹܐ ܣܠܸܩܘ ܠܐܝܼܙܲܪܥܹܝܠ.

ܩܹܦܵܠܹܐܘܿܢ: ܠ.

1: ܘܟܲܕ݂ ܐܸܬ̣ܵܐ ܕܵܘܝܼܕ݂ ܘܓܲܒ̣ܪ̈ܵܘܗܝ ܠܨܸܢܩܠܲܓ̣ ܒܝܵܘܡܵܐ ܬܠܝܼܬ̣ܵܝܵܐ: ܘܲܥܡܵܠܩܵܝܹ̈ܐ ܗܲܠܸܟ݂ܘ ܥܲܠ ܢܓܲܒ̣ ܘܥܲܠ ܨܸܢܩܠܲܓ̣: ܘܐܵܘܩܸܕ݂ܘ ܐܸܢܹܝܢ ܒܢܘܼܪܵܐ. 2: ܘܲܫܒ̣ܵܘ ܐ̄ܢܵܐ ܕܲܒ̣ܗܹܝܢ: ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ. ܘܐܲܡܝܼܬ̣ܘ ܓܲܒ̣ܪܹ̈ܐ: ܘܲܕ݂ܒܲܪܘ ܘܐܸܙܲܠܘ ܠܐܘܼܪܚܗܘܿܢ. 3: ܘܐܸܬ̣ܵܐ ܕܵܘܝܼܕ݂ ܘܓ̣ܪܗܵܘܗܝ ܠܲܩܪܝܼܬ̣ܵܐ: ܘܗܵܐ ܡܵܘܩܕ݂ܵܐ ܒܢܘܼܪܵܐ: ܘܢܸܫܲܝ̈ܗܘܿܢ ܘܲܒ̣ܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ ܐܸܫܬ̇ܒ̣ܝܼܘ. 4: ܘܐܲܪܝܼܡ ܕܵܘܝܼܕ݂ ܘܥܲܡܵܐ ܩܵܠܗܘܿܢ ܘܲܒ̣ܟ݂ܵܘ: ܥܕܲܡܵܐ ܕܠܐܵܗ̄ܘ̣ܵܐ ܒܗܘܿܢ ܚܲܝܠܵܐ ܠܡܸܒ̣ܟܵܐ. 5: ܘܬܲܪܬܹܝܢ ܢܸܫܵܘ̈ܗܝ ܕܕ݂ܵܘܝܼܕ݂ ܐܸܫܬ̇ܒ̣ܝܼ: ܐܲܚܝܼܢܥܸܡ ܕܡ̣ܢ ܐܝܼܙܲܪܥܹܝܠ: ܘܐܲܒ̣ܝܼܓܸܠ ܐܲܢ̄ܬ̇ܬܹܗ ܕܢܵܒ̣ܵܠ ܟܲܪܡ̄ܠܵܝܵܐ. 6: ܘܥܵܩܲܬ̤ ܠܕ݂ܵܘܝܼܕ݂ ܛܵܒ̣: ܡܸܛܠ ܕܐܸܡܲܪ ܥܲܡܵܐ ܠܡܸܪܓܡܹܗ: ܡܸܛܠ ܕܡܝܼܬܲܬ̤ ܢܲܦ̮ܫܹܗ ܕܟ݂ܠܹܗ ܥܲܡܵܐ ܥܲܠ ܒ̈ܢܲܝܗܘܿܢ ܘܥܲܠ ܒ̈ܢܵـܟܗܘܿܢ. ܘܚܲܡܣܸܢ ܕܵܘܝܼܕ݂ ܒܡܵܪܝܵܐ ܐܲܠܵܗܹܗ. 7: ܘܐܸܡܲܪ ܕܵܘܝܼܕ݂ ܠܐܲܒ̣ܝܼܬܲܪ ܟܵܗܢܵܐ ܒܲܪ ܐܲܚܝܼܡܲܠܟ: ܩܲܪܒ̣ ܦܸܕܬ̣ܵܐ. ܘܩܲܪܒ̣ ܠܲܒ̣ܝܼܬܲܪ ܦܸܕܬ̣ܵܐ ܠܕ݂ܵܘܝܼܕ݂. 8: ܘܲܫܐܸܠ ܕܵܘܝܼܕ݂ ܒܡܵܪܝܵܐ ܘܐܸܡܲܪ: ܐܸܪܕܘܿܦ ܒܵܬܲܪ ܓܲܝܣܵܐ ܗܵܢܵܐ: ܡܲܕ݂ܪܸܟ݂ ܐ̄ܢܵܐ ܠܹܗ. ܘܐܸܡܲܪ ܠܹܗ: ܪܕ݂ܘܿܦ: ܡܸܛܠ ܕܒܲܥܓܲܠ ܡܲܕ݂ܪܸܟ݂ ܐܲܢ̄ܬ̇ ܠܹܗ: ܘܲܡܦܲܨܸܐ ܐܲܢܬ̇. 9: ܘܐܸܙܲܠ ܕܵܘܝܼܕ݂ ܗ̤ܘ ܘܫܸܬ̣ܡܵܐܐ ܓܲܒ̣ܪ̈ܝܼܢ ܕܥܲܡܹܗ: ܘܐܸܬ̣ܵܘ ܥܕܲܡܵܐ ܠܢܲܚܠܵܐ ܕܒ̣ܘܼܨܵܪ. ܘܲܫܒܲܩ ܕܵܘܝܼܕ݂ ܡܲܐܬܹܝܢ ܓܲܒ̣ܪ̈ܝܼܢ. 10: ܘܩܵܡ ܪܕܲܦ ܕܵܘܝܼܕ݂ ܗ̤ܘ ܘܐܲܪܒܲܥܡܵܐ ܓܲܒ̣ܪ̈ܝܼܢ ܘܩܵܡܘ ܡܲܐܬܹܝܢ ܓܲܒ̣ܪ̈ܝܼܢ ܕܦܵܫܘ: ܘܲܢܛܲܪܘ ܕܠܵܐ ܢܸܥܒ̇ܪܘܼܢ ܢܲܚܠܵܐ ܕܒܟܘܼܨܵܪ. 11: ܘܐܸܫܟܲܚܘ ܓܲܒ̣ܪܵܐ ܡܸܨܪܵܝܵܐ ܒܚܲܩܠܵܐ: ܘܐܲܝܬ̇ܝܘܼܗܝ ܠܘܵܬ̣ ܕܵܘܝܼܕ݂: ܘܝܲܗ̄ܒ̣ ܠܹܗ ܠܲܚܡܵܐ ܘܲܠܥܸܣ: ܘܐܲܫܩܝܘܼܗܝ ܡܲܝ̈ܵܐ. 12: ܘܬܲܪܬܹܝܢ ܓܘܼܒ̣̈ܢܝܼܢ: ܘܐܸܟܲܠ ܘܗܸܦܟܲܬ̤ ܥܠܵܘܗܝ ܪܘܼܚܹܗ. ܡܸܛܠ ܕܲܬ̣ܠܵܬ̣ܵܐ ܝܵܘ̈ܡܝܼܢ ܘܲܬ̣ܠܵܬ̣ܵܐ ܠܲܝ̈ܠܵܘܵܢ: ܠܵܐ ܐܸܟܲܠ ܠܲܚܡܵܐ: ܘܠܵܐ ܐܸܫܬ̇ܝܼ ܡܲܝ̈ܵܐ. 13: ܐܵܡܲܪ ܠܹܗ ܕܵܘܝܼܕ݂: ܕܡ̇ܢ ܐܲܢ̄ܬ̇ ܘܡ̣ܢ ܐܲܝܡܸܟ̇ܐ ܐܸܬܲܝܬ̇. ܘܐܸܡܲܪ: ܥܠܲܝܡܵܐ ܡܸܨܪܵܝܵܐ ܐ̄ܢܵܐ: ܥܲܒ̣ܕܵܐ ܐ̄ܢܵܐ ܕܓܲܒ̣ܪܵܐ ܥܡܵܠܩܵܝܵܐ: ܘܫܲܒ̣ܩܲܢܝ ܡܵܪܝ ܡܸܛܠ ܕܐܸܬ̣ܟܲܪܗܹܬ̣. ܗܵܐ ܬܠܵܬ̣ܵܐ ܝܵܘ̈ܡܝܼܢ. 14: ܗܵܐ ܡ̣ܢ ܕܐܸܬܲܝܢ ܡ̣ܢ ܢܓܲܒ̣ ܕܲܝܗܘܼܕ݂ܵܐ: ܘܡ̣ܢ ܢܓܲܒ̣ ܕܟ݂ܵܠܵܒ̣: ܘܡ̣ܢ ܨܸܢܩܠܲܓ̣: ܕܐܵܘܩܸܕܢ ܐܸܢܹܝܢ ܒܢܘܼܪܵܐ. 15: ܐܵܡܪ ܠܹܗ ܕܵܘܝܼܕ݂: ܡܲܚܸܬ̣ ܐܲܢ̄ܬ̇ ܠܝܼ ܥܲܠ ܓܲܝܣܵܐ ܗܵܢܵܐ. ܐܵܡܲܪ ܠܹܗ: ܝܼܡܝܼ ܠܝܼ ܒܡܵܪܝܵܐ ܕܠܵܐ ܬܸܩܛܠܲܢܝ ܘܠܑܵ ܬܲܫ̱ܠܡܲܢܝ ܒܐܝܼܕ݂ܵܐ ܕܡܵܪܝ: ܘܐܸܢܵܐ ܐܹܚܵܘܹܝܟ݂ ܓܲܝܣܵܐ ܗܵܢܵܐ. 16: ܘܝܼܡܵܐ ܠܹܗ ܕܵܘܝܼܕ݂ ܘܐܲܚܬܹܗ: ܘܗܵܐ ܗܸܢܘܿܢ ܫܪܹܝܢ ܥܲܠ ܐܲܦܲܝ̈ ܐܲܪܥܵܐ ܠܵܥܣܝܼܢ ܘܫܵܬܹܝܢ: ܘܚܵܕܹܝܢ ܒ̣ܟ݂ܠܵܗ̇ ܒܙܬ̣ܵܐ ܪܲܒ̇ܬ̣ܵܐ: ܕܲܢܣܲܒ̣ܘ ܡ̣ܢ ܐܵܪܥܵܐ ܕܲܝܗܘܼܕ݂ܵܐ. 17: ܘܲܡܚܵܐ ܐܸܢܘܿܢ ܕܵܘܝܼܕ݂: ܡ̣ܢ ܨܲܦܪܵܐ ܘܲܥܕܲܡܵܐ ܠܪܲܡܫܵܐ ܡ̣ܢ ܒܸܣܬܲܪܗܘܿܢ. ܘܠܵܐ ܐܸܬ̣ܦܲܠܲܛܘ ܡܸܢܗܘܿܢ: ܐܸܠܵܐ ܐܸܢ ܐܲܪܒ̇ܥܡܵܐܐ ܓܲܒ̣ܪ̈ܝܼܢ ܕܲܪܟ݂ܒ̣ܘ ܥܲܠ ܓܲܡ̈ܠܹܗ ܘܲܥܪܲܩܘ. 18: ܘܦܲܨܝܼ ܕܵܘܝܼܕ݂ ܠܟ݂ܠ ܕܲܢܣܲܒ̣ܘ ܥܡܵܠܩܵܝܹ̈ܐ: ܘܬܲܪܬܹܝܢ ܢܸܫܵܘ̈ܗܝ ܒܝܵܘܡܵܐ ܗܵܘ̇. 19: ܘܠܵܐ ܛܥܵܐ ܠܗܘܿܢ ܡܸܕܸܡ: ܐܸܠܵܐ ܟܠ ܡܸܕܸܡ ܐܲܗܦܸܟ݂ ܕܵܘܝܼܕ݂.

20: ܘܲܕ݂ܒܲܪ ܕܵܘܝܼܕ݂ ܟܠܵܗ̇ ܥܵܢ̈ܵܐ ܘܬ̣ܵܘܪܹ̈ܐ: ܠܦܘܼܬ̣ ܩܸܢܝܵܢܵܐ ܗܵܘ̇: ܘܐܸܡܲܪܘ ܗܵܢܵܐ ܡܕܸܡ ܕܐܲܥܕܲܝܼ ܕܵܘܝܼܕ݂.

21: ܘܐܸܬ̣ܵܐ ܕܵܘܝܼܕ݂ ܠܘܵܬ̣ ܡܲܐܬܹܝܢ ܓܲܒ̣ܪ̈ܝܼܢ ܕܦܵܫܘ ܠܡܸܛܲܪ ܡܵܐܢܹ̈ܐ: ܕܐܵܘܬܸܒ̣ܘ ܐܸܢܘܿܢ ܠܡܸܛܲܪ ܒܐܘܼܪܚܵܐ ܕܒ̣ܘܼܨܵܪ: ܘܲܢܦܲܩܘ ܠܐܘܼܪܥܹܗ ܕܕ݂ܵܘܝܼܕ݂ ܘܠܐܘܼܪܥܵܐ ܕܥܲܡܵܐ ܕܥܲܡܹܗ. ܘܲܩܪܸܒ̣ܘ ܕܵܘܝܼܕ݂ ܘܥܲܡܵܐ ܘܲܫܐܸܠܘ ܒܲܫܠܵܡܗܘܿܢ. 22: ܘܲܥܢܵܘ ܓܲܒ̣ܪܹ̈ܐ ܒܝܼܫܹ̈ܐ ܘܥܵܘܵܠܹ̈ܐ ܡ̣ܢ ܓܲܒ̣ܪܹ̈ܐ ܕܐܸܙܲܠܘ ܥܲܡ ܕܵܘܝܼܕ݂: ܘܐܸܡܲܪܘ: ܥܲܠ ܕܠܵܐ ܐܸܙܲܠܘ ܥܲܡܲܢ: ܠܵܐ ܬܸܬ̣ܝܼܗܸܒ̣ ܠܗܘܿܢ ܡܢܵܬ̣ܵܐ ܡ̣̱ܢ ܒܸܙܬ̣ܵܐ ܕܦܲܨܝܼܢ: ܐܸܠܵܐ ܢܸܕ݂ܒ̇ܪܘܼܢ ܓܒܲܪ ܐܲܢ̄ܬ̇ܬܹܗ ܘܲܒ̣ܢܵܘ̈ܗܝ. 23: ܘܐܸܡܲܪ ܕܵܘܝܼܕ݂: ܠܵܐ ܬܸܥܒ̇ܕ݂ܘܼܢ ܗܵܟܲܢܵܐ ܐܲܚܝ̈ܢ: ܕܝܲܗ̄ܒ̣ ܠܲܢ ܡܵܪܝܵܐ ܘܢܲܛܪܲܢ: ܘܐܲܫܠܸܡ ܒܐܝܼܕܲܝ̈ܢ ܓܲܝܣܵܐ ܕܐܸܬ̣ܵܐ ܥܠܲܝܢ. 24: ܡܲܢܘܼ ܢܸܫܡܲܥ ܠܡܸܠܲܬ̣ܟ݂ܘܿܢ ܗܵܕܹܐ: ܡܸܛܠ ܕܲܡܢܵܬܹܗ ܕܡ̇ܢ ܕܢܵܚܹܬ̣ ܠܲܩܪܵܒ̣ܵܐ: ܐܲܝܟ݂ ܡܢܵܬܹܗ ܕܡ̇ܢ ܕܝܵܬܹܒ̣ ܓܹܢ̄ܒ̣ ܡܵܐܢܹ̈ܐ: ܘܐܲܟ݂ܚ̄ܕ݂ܵܐ ܡܦܲܠܓ̣ܝܼܢ. 25: ܘܲܗܘ̤ܵܐ ܡ̣ܢ ܝܵܘܡܵܐ ܗܵܘ̇. ܘܣܵܡܹܗ ܕܵܘܝܼܕ݂ ܩܝܵܡܵܐ ܗܵܢܵܐ: ܘܙܸܕ݂ܩܵܐ ܥܕܲܡܵܐ ܠܝܵܘܡܵܢܵܐ. 26: ܘܐܸܬ̣ܵܐ ܕܵܘܝܼܕ݂ ܠܨܸܢܩܠܲܓ̣: ܘܫܲܕܲܪ ܡ̣ܢ ܒܸܙܬ̣ܵܐ ܠܣܵܒܹ̈ܐ ܕܲܝܗܘܼܕ݂ܵܐ ܘܲܠܚܲܒ̣ܪ̈ܲܝܗܘܿܢ: ܘܐܸܡܲܪ: ܗܵܐ ܠܟ݂ܘܿܢ ܒܘܼܪܟ̇ܬ̣ܵܐ: ܡ̣ܢ ܒܸܙܬ̣ܵܐ ܕܲܒ̣ܥܠܕܒ̣ܵܒܵܘ̈ܗܝ ܕܡܵܪܝܵܐ. 27: ܘܫܲܕܲܪ ܠܲܕܒܹܝܬ̣ ܐܹܝܠ: ܘܠܲܕ݂ܒܹܝܬ̣ ܪܵܡܘܼܬ̣ ܢܓܲܒ̣: ܘܠܲܕ݂ܒܹܝܬ̣ ܥܵܢ. 28: ܘܠܲܕ݂ܒܹܝܬ̣ ܥܲܕ݂ܘܵܥܝܼܪ: ܘܲܠܕܲܒ̣ܣܲܦ̮ܡܘܼܬ̣: ܘܲܠܕܲܒ̣ܫܸܬ̇ܡܘܿܥ. 29: ܘܲܠܕܲܒ̣ܪܲܟܹܝܠ: ܘܲܠܕܲܒ̣ܩܘܼܪ̈ܝܵܐ ܕܝܲܪܚ̄ܡܹܠ: ܘܲܠܕܲܒ̣ܘܼܪ̈ܝܵܐ ܕܩܝܼ̈ܢܵܝܹܐ. 30: ܘܲܠܕܲܒ̣ܚܸܪܡܵܐ: ܘܠܲܕ݂ܒ̣ܵܪܥܵܫܵܢ: ܘܲܠܕܲܒ̣ܥܢܵܟ݂: ܘܲܠܕܲܒ̣ܚܸܒ̣ܪܘܿܢ: ܘܲܠܟ݂ܠܗܘܿܢ ܐܲܬ̣ܪ̈ܵܘܵܬ̣ܵܐ ܕܗܲܠܸܟ݂ ܬܲܡܵܢ ܕ݂ܵܘܝܼܕ݂: ܗ̤ܘ ܘܓܲܒ̣ܪܗܵܘܗܝ.

ܩܹܦܵܠܹܐܘܿܢ: ܠܐ.

1: ܘܲܦܠܸܫ̈ܬܵܝܹܐ ܡܸܬ̣ܟܲܬ̇ܫܝܼܢ ܥܲܡ ܝܼܣܪܵܝܹܠ: ܘܲܥܪܲܩܘ ܐ̄ܢܵܫܵܐ ܕܝܼܣܪܵܝܹܠ ܡ̣ܢ ܩܕ݂ܵܡ ܦܠܸܫ̈ܬܵܝܹܐ: ܘܲܢܦܲܠܘ ܩܛ̈ܝܼܠܹܐ ܒܛܘܼܪܵܐ ܕܲܓ̣ܠܲܒ̇ܘܿܥ. 2: ܘܐܲܕ݂ܪܸܟ݂ܘ ܦܠܸܫ̈ܬܵܝܹܐ ܠܫܵܐܘܿܠ ܘܠܲܒ̣ܢܵܘ̈ܗܝ. ܘܩܲܛܸܠܘ ܦܠܸܫܬܵܝܹ̈ܐ ܠܝܘܿܢܵܬ̣ܵܢ ܘܲܠܝܲܫܘܝܼ: ܘܲܠܡܲܠ̣ܝܼܫܘܿܥ ܒܢܵܘ̈ܗܝ ܕܫܵܐܘܿܠ. 3: ܘܲܥܫܸܢ ܩܪܵܒ̣ܵܐ ܥܲܠ ܫܵܐܘܿܠ. ܘܐܲܕ݂ܪ̱ܟ݂ܘܼܗܝ ܓܲܒ̣ܪܹ̈ܐ ܩܲܫܵـ̈ـܬܹܐ ܒܩܸܫ̈ܬܵܬ̣ܵܐ. ܘܲܕ݂ܚܸܠ ܛܵܒ̣ ܡ̣ܢ ܩܲܫܵܬܹ̈ܐ. 4: ܘܐܸܡܲܪ ܫܵܐܘܿܠ ܠܫܵܩܹܠ ܡܵܐܢܵܘ̈ܗܝ: ܫܡܘܿܛ ܣܲܝܦܵܟ݂ ܘܲܕ݂ܩܘܿܪܲܝܢܝ ܒܹܗ: ܕܠܵܐ ܢܹܐܬ̣ܘܿܢ ܥܘܼܪ̈ܠܹܐ ܗܵܠܹܝܢ ܢܸܩܛܠܘܼܢܵܢܝ: ܘܲܢܒܲܙܚܘܼܢ ܒܝܼ. ܘܠܵܐ ܨܒ̣ܵܐ ܫܵܩܹܠ ܡܵܐܢܵܘ̈ܗܝ: ܡܸܛܠ ܕܲܕ݂ܚܸܠ ܛܵܒ̣: ܘܲܢܣܲܒ̣ ܫܵܐܘܿܠ ܣܲܝܦܹܗ ܘܲܢܦܲܠ ܥܠܵܘܗܝ. 5: ܘܲܚܙܵܐ ܫܵܩܹܠ ܡܵܐܢܵܘ̈ܗܝ ܕܡܝܼܬ̣ ܫܵܐܘܿܠ: ܘܲܢܦܲܠ ܐܵܦ ܗ̤ܘ ܥܲܠ ܣܲܝܦܹܗ ܘܡܝܼܬ̣. 6: ܘܡܝܼܬ̣ ܫܵܐܘܿܠ ܘܲܬ̣ܠܵܬ̣ܵܐ ܒܢܵܘ̈ܗܝ ܘܫܵܩܹܠ ܡܵܐܢܵܘ̈ܗܝ: ܘܐܵܦ ܟܠܗܘܿܢ ܥܲܒ̣̈ܕܵܘ̈ܗܝ ܒܝܵܘܡܵܐ ܗܵܘ̇ ܐܲܟ݂ܚ̄ܕܵܐ. 7: ܘܲܚܙܵܘ ܐ̄ܢܵܫܵܐ ܕܝܼܣܵܝܹܠ ܕܲܒ̣ܥܸܒ̣ܪܵܐ ܕܲܒ̣ܥܘܼܡܩܵܐ ܕܝܘܿܪܕܢܵܢ: ܕܲܥܪܲܩܘ ܐ̄ܢܵܫܵܐ ܕܝܼܣܪܵܝܹܠ ܘܲܕ݂ܡܝܼܬ̣ ܫܵܐܘܿܠ ܘܲܒ̣ܢܵܘ̈ܗܝ: ܘܲܫܒܲܩܘ ܩܘܼܪ̈ܝܵܐ ܘܲܥܪܲܩܘ: ܘܐܸܬ̣ܵܘ ܦܠܸܫ̈ܬܵܝܹܐ ܘܝܼܬܸܒ̣ܘ ܒܗܹܝܢ. 8: ܘܲܠܝܵܘܡܵܐ ܐ̄ܚܪܹܢܵܐ: ܐܸܬ݂ܵܘ ܦܠܸܫ̈ܬܵܝܹܐ ܠܲܡܫܲܠܵܚܘܼ ܩܛ̈ܝܼܠܹܐ: ܘܐܸܫܟܲܚܘ ܠܫܵܐܘܿܠ ܘܠܲܬ̣ܠܵܬ̣ܵܐ ܒܢܵܘ̈ܗܝ: ܟܲܕ݂ ܪܡܹܝܢ ܒܛܘܼܪܵܐ ܕܲܓ̣ܠܒ̇ܘܿܥ. 9: ܘܲܦܣܲܩܘ ܪܹܫܹܗ: ܘܫܲܠܲܚܘ ܡܵܐܢܵܘ̈ܗܝ: ܘܫܲܕܲܪܘ ܠܲܡܣܲܒܵܪܘܼ ܒܐܲܪܥܵܐ ܕܲܦܠܸܫ̈ܬܵܝܹܐ: ܘܲܒ̣ܥܲܡܵܐ ܘܒܹܝܬ̣ ܦܬܲܟ݂ܪ̈ܝܗܘܿܢ. 10: ܘܣܵܡܘ ܡܵܐܘܵܘ̈ܗܝ ܒܹܝܬ̣ ܓܸܢ̈ܝܵܬ̣ܵܐ: ܘܓ̣ܘܼܫܡܹܗ ܩܒܲܥܘ ܒܫܘܼܪܵܐ ܕܒܹܝܬ̣ ܝܵܫܵܢ. 11: ܘܲܫܡܲܥܘ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕ݂: ܡܸܕܸܡ ܕܲܥܒܲܕ݂ܘ ܦܠܸܫ̈ܬܵܝܹܐ ܒܫܵܐܘܿܠ ܘܒܲܒ̣ܢܵܘ̈ܗܝ. 12: ܘܩܵܡܘ ܟܠ ܓܒܲܪ ܚܲܝܠܬ̣ܵܢ: ܘܐܸܙܲܠܘ ܟܠܹܗ ܠܸܠܝܵܐ: ܘܲܢܣܲܒ̣ܘ ܦܲܓ̣ܪܹܗ ܕܫܵܐܘܿܠ: ܘܦܲܓ̣ܪܹ̈ܐ ܕܲܒ̣̈ܢܵܘܗܝ ܡ̣ܢ ܫܘܼܪܵܐ ܕܒܹܝܬ̣ ܝܵܫܵܢ: ܘܐܲܝܬ̇ܝܘ ܠܝܵܒ̣ܝܼܫ ܘܐܵܘܩܸܕ݂ܘ ܐܸܢܘܿܢ ܬܲܡܵܢ. 13: ܘܲܢܣܲܒ̣ܘ ܓܲܪ̈ܡܲܝܗܘܿܢ: ܘܲܩܒܲܪܘ ܬܚܹܝܬ̣ ܠܘܼܙܵܐ ܕܲܒ̣ܝܵܒ̣ܝܼܫ: ܘܨܵܡܘ ܫܲܒ̣ܥܵܐ ܝܘ̈ܡܝܼܢ.