ܣܦܪ ܡܠܟ̈ܐ : ܐ :

ܩܹܦܵܠܹܐܘܿܢ: ܐ.

1: ܘܡܲܠܟܵܐ ܕܵܘܝܼܕ݂ ܣܐܸܒ̣ ܘܥܲܠ̣ ܒܲܫܢܲـ̈ـܝܵܐ: ܘܲܡܟܲܣܹܝܢ ܗ̄ܘ̣ܵܘ ܠܹܗ ܒܲܠܒ̣ܘܼܫܹ̈ܐ ܘܠܵܐ ܫܵܚܹ̇ܢ. 2: ܘܐܸܡܲܪܘ ܠܹܗ ܥܲܒ̣ܕܵܘ̈ܗܝ: ܗܵܐ ܥܲܒ̣ܕܲܝ̈ܟ ܩܕ݂ܵܡܲܝܟ: ܢܸܒ̣ܥܘܼܢ ܠܡܵܪܝ ܡܲܠܟܵܐ ܥܠܲܝܡܬ̣ܵܐ ܒܬ̣ܘܼܠܬܵܐ: ܘܲܬ̣ܩܘܼܡ ܩܕ݂ܵܡ ܡܲܠܟܵܐ: ܘܬܸܗܘܹܐ ܠܹܗ ܡܫܲܡܫܵܢܝܼܬ̣ܵܐ: ܘܬܸܫܟܲܒ̣ ܒܥܘܼܒܵܟ݂: ܘܢܸܫܚܲܢ ܠܡܵܪܲܢ ܡܲܠܟܵܐ.

3: ܘܲܒ̣ܥܵܘ ܥܠܲܝܡܘܼܬ̣ܵܐ ܕܫܲܦܝܼܪܵܐ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ: ܘܐܸܫܟܲܚܘ ܠܐܲܒ̣ܝܼܫܲܓ̤ ܫܝܼܠܘܿܡܵܝܬܵܐ: ܘܐܲܝܬ̇ܝܘܼܗ̇ ܠܡܲܠܟܵܐ. 4: ܘܲܥܠܲܝܡܬܐ ܫܲܦܝܼܪܵܐ ܗ̄ܘ̣ܵܬ̣ ܛܵܒ̣: ܘܲܗܘܵܬ̣ ܠܡܲܠܟܵܐ ܡܫܲܡܫܵܢܝܼܬܐ ܘܲܡܫܲܡܫܵܐ ܠܹܗ ܠܡܲܠܟܵܐ: ܘܠܵܐ ܝܲܕ݂ܥܵܗ. 5: ܘܐܲܕ݂ܘܿܢܝܼܵܐ ܒܲܪ ܚܲܓ̇ܝܼܬ̣ ܡܸܬ̣ܪܵܘܪܲܒ̣ ܘܐܵܡܲܪ: ܐܸܢܵܐ ܐܲܡܠܸܟ݂ ܘܲܥܒܲܕ݂ ܠܹܗ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ: ܘܚܲܡܫܝܼܢ ܓܲܒ̣ܪ̈ܝܼܢ ܕܪܵܗ̇ܛܝܼܢ ܗ̄ܘ̣ܵܘ ܩܕ݂ܵܡܵܘܗܝ. 6: ܘܠܵܐ ܟܐܵܐ ܒܹܗ ܐܲܒ̣ܘܼܗܝ ܡ̣ܢ ܝܵܘܡܵܘ̈ܗܝ: ܘܐܸܡܲܪ ܠܹܗ: ܡܸܛܠ ܡܵܢܵܐ ܗܵܟܲܢܵܐ ܥܵܒܹܕ݂ ܐܲܢ̄ܬ̇. ܘܐܵܦ ܗ̤ܘ ܫܲܦܝܼܪ ܗ̄ܘ̣ܵܐ ܒܚܸܙܘܹܗ ܛܵܒ̣: ܘܠܹܗ ܝܼܠܕܲܬ̤ ܒܵܬܲܪ ܐܲܒ̣ܫܵܠܘܿܡ. 7: ܘܲܗܘ̤ܵܘ ܦܸܬ̣ܓ̣ܵܡܵܘ̈ܗܝ ܥܲܡ ܝܘܿܐܵܒ̣ ܒܲܪ ܨܘܿܪܝܼܵܐ: ܘܥܲܡ ܐܲܒ̣ܝܼܬܲܪ ܟܵܗܢܵܐ. ܘܲܡܥܲܕ̇ܪܝܼܢ ܒܵܬܲܪ ܐܲܕ݂ܘܿܢܝܼܵܐ. 8: ܘܨܵܕ݂ܘܿܩ ܟܵܗܢܵܐ: ܘܲܒ̣ܢܲܝܵܐ ܒܲܪ ܝܘܿܝܵܕ݂ܵܥ: ܘܢܵܬ̣ܵܢ ܢܒ̣ܝܼܵܐ: ܘܫܲܡܥܝܼ: ܘܕܲܥܝܼ: ܘܓܲܢ̄ܒܵܪܹ̈ܐ: ܕܕ݂ܵܘܝܼܕ݂: ܠܵܐ ܗ̄ܘ̣ܵܐ ܒܵܬܲܪ ܐܲܕ݂ܘܿܢܝܼܵܐ. 9: ܘܕܲܒܲܚ ܐܲܕ݂ܘܿܢܝܼܵܐ ܥܵـ̈ـܢܵܐ ܘܬ̣ܵܘܪܹ̈ܐ ܘܲܡܦܲܛܡܹ̈ܐ ܥܲܠ ܟܹܐܦܵܐ ܕܙܲܚܠܬ̣ ܕܥܲܠ ܓܹܢ̄ܒ̣ ܥܹܝܢ ܩܵܨܪܵܐ. ܘܲܩܪܵܐ ܠܟ݂ܠܗܘܿܢ ܐܲܚܵܘ̈ܗܝ ܒ̈ܢܲܝ ܡܲܠܟܵܐ: ܘܲܠܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܲܠܥܲܒ̣̈ܕܲܝ ܡܲܠܟܵܐ. 10: ܘܲܠܢܵܬ̣ܵܢ ܢܒ̣ܝܼܵܐ ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܠܓܲܢ̄ܒܵܪܹ̈ܐ ܕܕ݂ܵܘܝܼܕ݂. ܘܠܲܫܠܹܝܡܘܿܢ ܐܲܚܘܼܗܝ ܠܵܐ ܩ̣ܪܵܐ. 11: ܘܐܸܡܲܪ ܢܵܬ̣ܵܢ ܢܒ̣ܝܼܵܐ ܠܒܲܪܬ̣ ܫܒܲܥ ܐܸܡܹܗ ܕܲܫܠܹܝܡܘܿܢ: ܠܵܐ ܫܡܲܥܬ̇ܝ ܕܐܲܡܠܸܟ݂ ܐܲܕ݂ܘܿܢܝܼܵܐ: ܘܡܵܪܲܢ ܡܲܠܟܵܐ ܠܵܐ ܝܼܕܲܥ̣. 12: ܗܵܫܵܐ ܬܵܝ ܐܸܡ̱ܠܟܹܟ݂ܝ ܡܸܠܟܵܐ: ܘܦܲܠܸܛܝ ܢܲܦ̮ܫܹܟ݂ܝ ܘܢܲܦ̮ܫܵܐ ܕܲܒ̣ܪܹܟ݂ܝ ܫܠܹܝܡܘܿܢ. 13: ܙܸܠܝ ܥܘܿܠܝ ܠܘܵܬ̣ ܡܲܠܟܵܐ ܕܵܘܝܼܕ݂: ܘܐܸܡ̇ܪܝ ܠܹܗ: ܠܵܐ ܐܲܢ̄ܬ̇ ܡܵܪܝ ܡܲܠܟܵܐ ܝܼܡܲܝܬ̇ ܠܐܲܡܬ̣ܵܟ݂: ܕܲܫܠܹܝܡܘܿܢ ܒܪܹܟ݂ܝ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ. ܡܸܛܠ ܡܵܐܐ ܐܲܡ̣ܠܸܟ݂ ܐܲܕ݂ܘܿܢܝܼܵܐ. 14: ܘܥܲܕ݂ ܐܲܢ̄ܬ̇ܝ ܡܡܲܠܠܵܐ ܬܲܡܵܢ ܩܕ݂ܵܡ ܡܲܠܟܵܐ: ܐܸܢܵܐ ܐܹܬܹܐ ܒܵܬ̣ܪܹܟ݂ܝ: ܘܐܸܫܲܡܠܸܐ ܡܸܠܲܝ̈ܟ̇ܝ. 15: ܘܥܸܠܲܬ̤ ܒܲܪܬ̣ ܫܒܲܥ ܠܘܵܬ̣ ܡܲܠܟܵܐ ܠܩܲܝܛܘܿܢܵܐ. ܘܡܲܠܟܵܐ ܣܐܸܒ̣ ܛܵܒ̣: ܘܐܲܒ̣ܝܼܫܲܓ̣ ܫܝܼܠܘܼܡܵܝܬܵܐ ܡܫܲܡܫܵܐ ܗ̄ܘ̣ܵܬ̣ ܠܡܲܠܟܵܐ. ܘܒܸܪܟܲܬ̤ ܒܲܪܬ̣ ܫܒܲܥ ܘܣܸܓ̣ܕܸ̇ܬ̣ ܠܡܲܠܟܵܐ. 16: ܐܵܡܲܪ ܠܵܗ̇ ܡܲܠܟܵܐ: ܡܵܠ ܠܹܟ݂ܝ ܒܲܪܬ̣ ܫܒܲܥ. 17: ܐܵܡܪܵܐ ܠܹܗ: ܡܵܪܝ ܡܲܠܟܵܐ: ܝܼܡܲܝܬ̇ ܒܡܵܪܝܵܐ ܐܲܠܵܗܵܟ݂ ܠܐܲܡܬ̣ܵܟ݂: ܕܲܫܠܹܝܡܘܿܢ ܒܪܹܟ݂ܝ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ. 18: ܘܗܵܫܵܐ ܗܵܐ ܐܲܕ݂ܘܿܢܝܼܵܐ ܐܲܡ̣ܠܸܟ݂: ܘܐܲܢ̄ܬ̇ ܡܵܪܝ ܡܲܠܟܵܐ ܠܵܐ ܝܼܕܲܥ̣ܬ̇. 19: ܘܕܲܒܲܚ ܬܵܘܪܹ̈ܐ ܘܲܡܦܲܛܡܹ̈ܐ ܘܥܵـ̈ـܢܵܐ ܣܘܿܓ̣ܵܐܐ. ܘܲܩ̣ܪܵܐ ܠܟ݂ܠܗܘܿܢ ܒ̈ܢܲܝ ܡܲܠܟܵܐ: ܘܠܲܐܒ̣ܝܼܬܲܪ ܟܵܗܢܵܐ: ܘܲܠܝܘܿܐܵܒ̣ ܪܲܒ̇ ܚܲܝܠܵܐ: ܘܲܠܢܵܬ̣ܵܢ ܢܒ̣ܝܼܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ. ܘܠܲܫܠܹܝܡܘܿܢ ܥܲܒ̣ܕܵܟ݂ ܠܵܐ ܩ̣ܪܵܐ. 20: ܘܐܲܢ̄ܬ̇ ܡܵܪܝ ܡܲܠܟܵܐ: ܥܲܝܢܵܘ̈ܗܝ ܕܟ݂ܠܹܗ ܝܼܣܪܵܝܹܠ ܥܠܲܝܟ ܗ̄ܘ̣: ܕܲܬ̣ܚܵܘܸܐ ܐܸܢܘܿܢ ܡ̇ܢ ܢܸܬܸ̇ܒ̣ ܥܲܠ ܟܘܼܪܣܝܹܗ ܕܡܵܪܝ ܡܲܠܟܵܐ ܡ̣ܢ ܒܵܬ̣ܪܹܗ. 21: ܘܡܵܐ ܕܲܫܟܸܒ̣ ܡܵܪܝ ܡܲܠܟܵܐ ܠܘܵܬ̣ ܐܲܒ̣ܵܗܵܘ̈ܗܝ ܒܲܫܠܵܡܵܐ: ܐܸܗܘܹܐ ܐܸܢܵܐ ܘܒܹܪܝ ܫܠܹܝܡܘܿܢ ܚܲܛܵܝܑܝܼ̈ܢ. 22: ܘܥܲܕ݂ ܗ̤ܝ ܡܡܲܠܠܵܐ ܬܲܡܵܢ ܩܕ݂ܵܡ ܡܲܠܟܵܐ: ܘܢܵܬ̣ܵܢ ܢܒ̣ܝܼܵܐ ܐܸܬ̣ܵܐ. 23: ܘܚܵܘܝܼܘ ܠܡܲܠܟܵܐ ܘܐܸܡܲܪܘ ܠܹܗ: ܕܗܵܐ ܢܵܬ̣ܵܢ ܢܒ̣ܝܼܵܐ ܐܸܬ̣ܵܐ. ܘܥܲܠ ܩܕ݂ܵܡ ܡܲܠܟܵܐ: ܘܲܢܦܲܠ̣ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓܸܕ݂. 24: ܘܐܸܡܲܪ ܢܵܬ̣ܵܢ: ܡܵܪܝ ܡܲܠܟܵܐ ܐܲܢ̄ܬ̇ ܐܸܡܲܪܬ̇ ܕܐܲܕ݂ܘܿܢܝܼܵܐ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ. 25: ܕܲܢܚܬ̣ ܝܵܘܡܵܢܵܐ: ܘܕܲܒܲܚ ܬܵܘܪܹ̈ܐ ܘܲܡܦܲܛܡܹ̈ܐ ܘܥܵـ̈ـܢܵܐ ܣܘܿܓ̣ܵܐܐ. ܘܲܩ̣ܪܵܐ ܠܟ݂ܠܗܘܿܢ ܒ̈ܢܲܝ ܡܲܠܟܵܐ: ܘܲܠܪ̈ܲܒܲܝ ܚܲܝܠܵܐ: ܘܠܲܐܒ̣ܝܼܬܲܪ ܟܵܗܢܵܐ. ܘܗܵܐ ܐܲܟ݂ܠܝܼܢ ܘܫܵܬܹ̇ܝܢ ܩܕ݂ܵܡܵܘܗܝ: ܘܐܵܡ̇ܪܝܼܢ ܢܸܚܹܐ ܡܲܠܟܵܐ ܐܲܕ݂ܘܿܢܵܝܵܐ. 26: ܘܠܝܼ ܕܐܸܢܵܐ ܥܲܒ̣ܕܵܟ݂: ܘܲܠܨܵܕ݂ܘܿܩ ܟܵܗܢܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܠܲܫܠܹܝܡܘܿܢ ܥܲܒ̣ܕܵܟ݂ ܠܵܐ ܩ̣ܪܵܐ. 27: ܐܹܝܢ ܡ̣ܢ ܩܕ݂ܵܡܲܝܟ ܡܵܪܝ ܡܲܠܟܵܐ ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ: ܘܠܵܐ ܚܵܘܝܼܬ̇ ܠܥܲܒ̣̈ܕܲܝܟ ܡ̇ܢ ܢܸܬܸ̇ܒ̣ ܥܲܠ ܟܘܼܪܣܝܹܗ ܕܡܵܪܝ ܡܲܠܟܵܐ ܡ̣ܢ ܒܵܬ̣ܪܹܗ. 28: ܘܲܥ̣ܢܵܐ ܡܲܠܟܵܐ ܕܵܘܝܼܕ݂ ܘܐܸܡܲܪ: ܩܪܵܘ ܠܝܼ ܠܒܲܪܬ̣ ܫܒܲܥ. ܘܥܸܠܲܬ̤ ܩܕ݂ܵܡܵܘܗܝ: ܘܩܵܡܲܬ̤ ܩܕ݂ܵܡ ܡܲܠܟܵܐ. 29: ܘܝܼܡܵܐ ܠܵܗ̇ ܡܲܠܟܵܐ ܘܐܸܡܲܪ: ܚܲܝ ܗ̄ܘ̣ ܡܵܪܝܵܐ ܕܲܦܪܲܩ̣ ܢܲܦ̮ܫܝ ܡ̣ܢ ܟܠ ܥܵܩܵܐ. 30: ܐܸܠܵܐ ܐܲܝܟܲܢܵܐ ܕܝܼܡܝܼܬ̣ ܠܹܟ݂ܝ ܒܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܐܸܡ̇ܪܹܬ̣ ܕܲܫܠܹܝܡܘܿܢ ܒܪܹܟ݂ܝ ܢܲܡܠܸܟ݂ ܒܵܬܲܪܝ: ܘܗ̤ܘ ܢܸܬܸ̇ܒ̣ ܥܲܠ ܟܘܼܪܣܲܝ: ܗܵܟܲܢܵܐ ܐܸܥܒܸ̇ܕ݂ ܝܵܘܡܵܢܵܐ. 31: ܘܒܸܪܟܲܬ̣ ܒܲܪܬ̣ ܫܒܲܥ ܥܲܠ ܐܲܦܹ̈ܝܗ̇ ܥܲܠ ܐܲܪܥܵܐ: ܘܣܸܓ̣ܕܲܬ̣ ܠܡܲܠܟܵܐ: ܘܐܸܡܪܲܬ̤ ܢܸܚܹܐ ܡܵܪܝ ܡܲܠܟܵܐ ܕܵܘܝܼܕ݂ ܠܥܵܠܲܡ. 32: ܘܐܸܡܲܪ ܡܲܠܟܵܐ ܩܪܵܘ ܠܝܼ ܠܨܵܕ݂ܘܿܩ ܟܵܗܢܵܐ: ܘܲܠܢܵܬ̣ܵܢ ܢܒ̣ܝܼܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ. ܘܐܸܬ̣ܵܘ ܩܕ݂ܵܡ ܡܲܠܟܵܐ. 33: ܘܐܸܡܲܪ ܠܗܘܿܢ ܡܲܠܟܵܐ: ܩܘܼܡܘ ܕܒܲܪܘ ܥܲܡܟ݂ܘܿܢ ܠܥܲܒ̣̈ܕܹ̇ܐ ܕܡܵܪܟ݂ܘܿܢ: ܘܐܲܪܟܸ̇ܒ̣ܘ ܠܲܫܠܹܝܡܘܿܢ ܒܹܪܝ ܥܲܠ ܟܘܿܕܲܢܬܵܐ ܕܝܼܾܠܝ: ܘܐܵܘܒ̇ܠܘܼܗܝ ܠܫܝܼܠܘܿܚܵܐ. 34: ܘܢܸܡܫ̄ܚܘܼܢܹܗ ܬܲܡܵܢ ܨܵܕ݂ܘܿܩ ܟܵܗܢܵܐ ܘܢܵܬ̣ܵܢ ܢܒ̣ܝܼܵܐ: ܕܢܲܡܠܸܟ݂ ܥܲܠ ܝܼܣܪܵܝܹܠ. ܘܲܩܪܵܘ ܒܫܝܼܦܘܿܪܵܐ: ܘܐܸܡܲܪܘ: ܢܸܚܹܐ ܡܲܠܟܵܐ ܫܠܹܝܡܘܿܢ. 35: ܘܣܲܩܘ ܒܵܬ̣ܪܹܗ: ܘܢܹܐܬܹܐ ܘܢܸܬܸ̇ܒ̣ ܥܲܠ ܟܘܼܪܣܲܝ: ܘܗ̤ܘ ܢܲܡܠܸܟ݂ ܒܵܬ̣ܪܝ. ܠܹܗ ܦܩܲܕܹ̇ܬ̣ ܕܢܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ ܘܥܲܠ ܝܼܗܘܼܕ݂ܵܐ. 36: ܘܲܥܢ̣ܵܐ ܒܢܵܝܵܐ ܒܲܪ ܝܘܿܝܵܕ݂ܵܥ: ܘܐܸܡܲܪ ܩܕ݂ܵܡ ܡܲܠܟܵܐ: ܐܵܡܹܝܢ: ܗܵܟܲܢܵܐ ܢܸܥܒܸ̇ܕ݂ ܡܵܪܝܵܐ ܐܲܠܵܗܵܐ. 37: ܘܐܲܝܟ݂ ܕܲܗܘ̤ܵܐ ܡܵܪܝܵܐ ܥܲܡ ܡܵܪܝܼ ܡܲܠܟܵܐ: ܗܵܟܲܢܵܐ ܢܸܗܘܹܐ ܐܵܦ ܥܲܡ ܫܠܹܝܡܘܿܢ: ܘܢܵܘܪܸܒ̣ ܟܘܼܪܣܝܹܗ ܡ̣ܢ ܟܘܼܪܣܝܹܗ ܕܡܵܪܝ ܡܲܠܟܵܐ ܕܵܘܝܼܕ݂. 38: ܘܲܢܚܸܬ̣ ܨܵܕ݂ܘܿܩ ܟܵܗܢܵܐ: ܘܢܵܬ̣ܵܢ ܢܒ̣ܝܼܵܐ: ܘܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܩܲܫܵـ̈ـܬܹܐ: ܘܲܕ݂ܫܵܕܹ̇ܝܢ ܒܩܸܠ̈ܥܹܐ ܘܐܲܪܟ̇ܒ̣ܘܼܗܝ ܠܲܫܠܹܝܡܘܿܢ ܥܲܠ ܟܘܿܕܲܢܬܵܐ ܕܡܲܠܟܵܐ ܕܵܘܝܼܕ݂: ܘܐܵܘܒ̇ܠܘܼܗܝ ܠܫܝܼܠܘܿܚܵܐ. 39: ܘܲܢܣܲܒ̣ ܨܵܕ݂ܘܿܩ ܟܵܗܢܵܐ: ܘܢܵܬ̣ܵܢ ܢܒ̣ܝܼܵܐ ܩܲܪܢܵܐ ܕܡܸܫܚܵܐ ܡ̣ܢ ܡܲܫܟ̇ܢܵܐ ܘܡܲܫܚܘܼܗܝ ܠܲܫܠܹܝܡܘܿܢ. ܘܲܩܪܵܘ ܒܫܝܼܦܘܿܪܵܐ: ܘܐܸܡܲܪܘ ܟܠܹܗ ܥܲܡܵܐ ܢܸܚܹܐ ܡܲܠܟܵܐ ܫܠܹܝܡܘܿܢ. 40: ܘܲܣܠܸܩܘ ܟܠܹܗ ܥܲܡܵܐ ܒܵܬ̣ܪܹܗ. ܘܥܲܡܵܐ ܪܵܒ̣ܥܝܼܢ ܒܲܪ̈ܒ̣ܝܼܥܵܐ: ܘܚܵܕܹܝܢ ܚܲܕ݂ܘܼܬ̣ܵܐ ܪܲܒ̇ܬ̣ܵܐ. ܘܐܸܨܛܲܪܝܲܬ̤ ܐܲܪܥܵܐ ܒܩܵܠܗܘܿܢ. 41: ܘܲܫܡܲܥ ܐܲܕ݂ܘܿܢܝܵܐ ܘܟ݂ܠ ܕܲܡܙܲܡܢܝܼܢ ܗ̄ܘ̣ܵܘ ܠܹܗ ܟܲܕ݂ ܓܲܡܲܪܘ ܠܡܹܐܟܲܠ. ܘܟܲܕ݂ ܫ̣ܡܲܥ ܝܘܿܐܵܒ̣ ܩܵܠܵܐ ܕܫܝܼܦܘܿܪܵܐ. ܐܸܡܲܪ ܡܵܢܵܘ ܩܵܠܵܐ ܗܵܢܵܐ: ܕܲܩܪܝܼܬ̣ܵܐ ܐܸܫܬܲܓ̣ܫܲܬ̤. 42: ܘܥܲܕ݂ ܗ̤ܘ ܡܡܲܠܸܠ: ܘܗܵܐ ܢܵܬ̣ܵܢ ܒܲܪ ܐܲܒ̣ܝܼܬܲܪ ܟܵܗܢܵܐ ܐܸܬ̣ܵܐ. ܘܐܸܡܲܪ ܠܹܗ ܐܲܕ݂ܘܿܢܝܼܵܐ: ܥܘܿܠ ܡܸܛܠ ܕܓܲܢ̄ܒܵܪ ܚܲܝܠܵܐ ܐܲܢ̄ܬ̇: ܘܛܵܒ̣ܬ̣ܵܐ ܡܣܲܒܲܪ ܐܲܢ̄ܬ̇. 43: ܘܲܥܢ̣ܵܐ ܢܵܬ̣ܵܢ ܘܐܸܡܲܪ ܠܐܲܕ݂ܘܿܢܝܼܵܐ: ܫܲܪܝܼܪܵܐܝܼܬ̣ ܡܵܪܲܢ ܡܲܠܟܵܐ ܕܵܘܝܼܕ݂ ܐܲܡ̣ܠܸܟ݂ ܠܲܫܠܹܝܡܘܿܢ. 44: ܘܫܲܕܲܪ ܥܲܡܹܗ ܡܲܠܟܵܐ: ܠܨܵܕ݂ܘܿܩ ܟܵܗܢܵܐ: ܘܲܠܢܵܬ̣ܵܢ ܢܒ̣ܝܼܵܐ: ܘܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܠܩܲـ̈ـܫܵܬܹܐ: ܘܠܲܕ݂ܫܵܕܹ̇ܝܢ ܒܩܸܠܥܹ̈ܐ. ܘܐܲܪܟ̇ܒ̣ܘܼܗܝ ܠܲܫܠܹܝܡܘܿܢ ܥܲܠ ܟܘܿܕܲܢܬ̣ܵܐ ܕܡܲܠܟܵܐ. 45: ܘܡܲܫܚܘܼܗܝ ܬܲܡܵܢ ܨܵܕ݂ܘܿܩ ܟܵܗܢܵܐ: ܘܢܵܬ̣ܵܢ ܢܒ̣ܝܼܵܐ: ܕܢܸܗܘܹܐ ܡܲܠܟܵܐ ܒܫܝܼܠܘܿܚܵܐ. ܘܲܣܠܸܩܘ ܡ̣ܢ ܬܲܡܵܢ ܟܲܕ݂ ܚܵܕܹܝܢ: ܘܚܸܕ݂ܝܲܬ̤ ܟܠܵܗ̇ ܩܪܝܼܬ̣ܵܐ. ܗ̤ܘ ܗ̤ܘ ܩܵܠܵܐ ܕܲܫܡܲܥܬ̇ܘܿܢ. 46: ܘܐܵܦ ܝܼܬܸ̇ܒ̣ ܫܠܹܝܡܘܿܢ ܥܲܠ ܟܘܼܪܣܝܵܐ ܕܡܲܠܟ̇ܘܼܬ̣ܵܐ. 47: ܐܵܦ ܐܸܬ̣ܵܘ ܥܲܒ̣ܕܵܘ̈ܗܝ ܕܡܲܠܟܵܐ ܠܲܡܒܲܪܵܟ݂ܘܼܬܹܗ ܠܡܵܪܲܢ ܡܲܠܟܵܐ ܕܵܘܝܼܕ݂: ܘܐܸܡܲܪܘ: ܢܲܛܐܸܒ̣ ܡܵܪܝܵܐ ܐܲܠܵܗܵܟ݂ ܫܡܹܗ ܕܲܫܠܹܝܡܘܿܢ ܡ̣ܢ ܫܡܵܟ݂: ܘܢܵܘܪܸܒ̣ ܟܘܼܪܣܝܹܗ ܡ̣ܢ ܟܘܼܪܣܝܵܟ݂. ܘܲܣܓܸܕ݂ ܡܲܠܟܵܐ ܥܲܠ ܡܲܫܟ̇ܒܹܗ. 48: ܘܐܵܦ ܡܲܠܟܵܐ ܗܵܟܲܢܵܐ ܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܝܲܗ̄ܒ̣ ܠܝܼ ܒܪܵܐ ܝܵܘܡܵܢܵܐ ܕܢܸܬܸ̇ܒ̣ ܥܲܠ ܟܘܼܪܣܲܝ: ܘܥܲܝܢܲܝ̈ ܚܵܙ̈ܝܵܢ. 49: ܘܲܕ݂ܚܸܠ̣ܘ ܟܠܗܘܿܢ ܓܲܒ̣ܪܹ̈ܐ ܕܲܡܙܲܡܢܝܼܢ ܗ̄ܘ̣ܵܘ ܠܐܲܕ݂ܘܿܢܝܼܵܐ: ܘܩܵܡ̣ܘ ܘܐܸܙܲܠ̣ܘ ܓܒܲܪ ܠܐܘܼܪܚܹܗ. 50: ܘܐܲܕ݂ܘܿܢܝܼܵܐ ܕܚܸܠ̣ ܡ̣ܢ ܩܕ݂ܵܡ ܫܠܹܝܡܘܿܢ: ܘܩܵܡ̣ ܘܐܸܙܲܠ̣: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬ̣ܵܐ ܕܡܲܕ݂ܒ̇ܚܵܐ. 51: ܘܐܸܬ̣ܚܵܘܝܼ ܠܡܲܠܟܵܐ ܫܠܹܝܡܘܿܢ ܕܗܵܐ ܕܚܸܠ̣ ܐܲܕ݂ܘܿܢܝܼܵܐ ܡ̣ܢ ܩܕ݂ܵܡܲܝܟ: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬ̣ܵܐ ܕܡܲܕ݂ܒ̇ܚܵܐ. ܘܐܸܡܲܪ: ܢܹܐܡܸܐ ܠܝܼ ܝܵܘܡܵܢܵܐ ܡܲܠܟܵܐ ܫܠܹܝܡܘܿܢ: ܕܠܵܐ ܢܸܩܛܘܿܠ ܠܥܲܒ̣ܕܹ̇ܗ ܒܚܲܪܒܵܐ. 52: ܘܐܸܡܲܪ ܫܠܹܝܡܘܿܢ: ܐܸܢ ܢܸܗܘܹܐ ܒܲܪ ܚܲܝܠܵܐ: ܠܵܐ ܢܸܦܸܠ ܡ̣ܢ ܣܲܥܪܵܐ ܕܪܹܫܹܗ ܥܲܠ ܐܲܪܥܵܐ. ܘܐܸܢ ܒܝܼܫܬܵܐ ܬܸܫܬ̇ܟܲܚ ܒܵܬ̣ܪܹܗ ܢܡܘܼܬ̣. 53: ܘܫܲܕܲܪ ܡܲܠܟܵܐ ܫܠܹܝܡܘܿܢ: ܘܐܲܝܬ̇ܝܹܗ ܡ̣ܢ ܡܲܕ݂ܒ̇ܚܵܐ. ܘܐܸܬ̣ܵܐ ܘܲܣܓܸܕ݂ ܠܡܲܠܟܵܐ ܫܠܹܝܡܘܿܢ. ܘܐܸܡܲܪ ܠܹܗ ܫܠܹܝܡܘܿܢ: ܙܸܠ ܠܒܲܝܬܵܟ݂.

ܩܹܦܵܠܹܐܘܿܢ: ܒ.

1: ܘܲܩܪܲܒ̣ܘ ܝܵܘܡܵܘ̈ܗܝ ܕܕ݂ܵܘܝܼܕ݂ ܠܲܡܡܵܬ̣. ܘܦܲܩܸܕ݂ ܠܲܫܠܹܝܡܘܿܢ ܒܪܹܗ: ܘܐܸܡܲܪ ܠܹܗ. 2: ܐܸܢܵܐ ܐܵܙܹ̇ܠ ܐ̄ܢܵܐ ܒܐܘܼܪܚܵܐ ܕܟ݂ܠܵܗ̇ ܐܲܪܥܵܐ: ܐܸܬ̣ܚܲܝܲܠ ܘܲܗ̤ܘܝܼ ܓܲܒ̣ܪܵܐ. 3: ܘܛܲܪ ܢܛܘܼܪ̈ܵܬܹܗ ܕܡܵܪܝܵܐ ܐܲܠܵܗܵܟ݂: ܘܗܲܠܸܟ݂ ܒܐܘܼܪ̈ܚܵܬܹܗ: ܘܛܲܪ ܩܝܵܡܵܘ̈ܗܝ ܘܦܘܼܩܕܵܢܵܘ̈ܗܝ ܘܕ݂ܝܼܢܵܘ̈ܗܝ ܘܣܵܗ̈ܕ̇ܘܵܬܹܗ: ܐܲܝܟ݂ ܕܲܟ݂ܬ̣ܝܼܒ̣ ܒܢܵܡܘܿܣܵܐ ܕܡܘܼܫܹܐ: ܡܸܛܠ ܕܬܲܨܠܲܚ ܒܟ݂ܠ ܕܬܸܥܒܸ̇ܕ݂: ܘܠܲܐܝܟܵܐ ܕܬܹܐܙܲܠ ܬܲܟ݂ܫܲܪ. 4: ܡܸܛܠ ܕܲܢܩܝܼܡ ܡܵܪܝܵܐ ܦܸܬ̣ܓ̣ܵܡܵܘ̈ܗܝ ܕܐܸܡܲܪ ܥܠܲܝ: ܕܐܸܢ ܢܸܛܪܘܼܢ ܒܢܲܝ̈ܟ ܐܘܼܪ̈ܚܵܬ̣ܗܘܿܢ: ܠܲܡܗܲܠܵܟ݂ܘܼ ܩܕ݂ܵܡܲܝ ܒܩܘܼܫܬܵܐ: ܡ̣ܢ ܟܠܹܗ ܠܸܒ̇ܗܘܿܢ ܘܡ̣ܢ ܟܠܵܗ̇ ܢܲܦ̮ܫܗܘܿܢ: ܠܡܹܐܡܲܪ: ܠܵܐ ܢܸܥܢܲܕ݂ ܠܵܟ݂ ܓܲܒ̣ܪܵܐ ܕܝܵܬܹܒ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ. 5: ܘܗܵܫܵܐ ܐܲܢ̄ܬ̇ ܝܵܕܲܥ ܐܲܢ̄ܬ̇ ܡܸܕܸ̇ܡ ܕܲܥܒܲܕ݂ ܠܝܼ ܝܘܿܐܵܒ̣ ܒܲܪ ܨܘܿܪܝܼܵܐ: ܘܡܸܕܸ̇ܡ ܕܲܥܒܲܕ݂ ܠܲܬ̣ܪܹܝܢ ܪ̈ܲܒܲܝ ܚܲܝܠܵـ̈ـܘܵܬ̣ܵܐ ܕܝܼܣܪܵܝܹܠ: ܠܐܲܒ̣ܢܹܝܪ ܒܲܪ ܢܹܝܪ ܘܲܠܥܲܡܣܵܐ ܒܲܪ ܝܵܬ̣ܵܪ: ܕܲܩܛܲܠ̣ ܐܸܢܘܿܢ: ܘܲܚ̣ܫܲܒ̣ ܐܸܢܘܿܢ ܐܲܝܟ݂ ܕܒܲܩܪܵܒ̣ܵܐ: ܘܐܸܫܲܕ݂ ܕܸܡܗܘܿܢ ܒܣܲܝܦܵܐ ܕܲܒ̣ܚܲܨܵܘ̈ܗܝ: ܘܕ݂ܵܫ̣ ܒܲܡܣܵܢܹ̈ܐ ܕܪܸ̈ܓ̣ܠܵܘܗܝ. 6: ܘܲܥܒܸܕ݂ ܠܹܗ ܐܲܝܟ݂ ܚܲܟ̇ܝܼܡܘܼܬ̣ܵܟ݂: ܘܠܵܐ ܬܲܚܸܬ̣ ܣܲܝܒ̇ܘܼܬܹܗ ܒܲܫܠܵܡܵܐ ܠܲܫܝܘܿܠ. 7: ܘܥܲܡ ܒ̈ܢܲܝ ܒܲܪܙܸܠܝܼ ܓܸܠܥܵܕ݂ܵܝܵܐ ܥܒܸܕ݂ ܛܲܝܒ̇ܘܼܬ̣ܵܐ. ܘܢܸܗܘܘܿܢ ܡ̣ܢ ܐܵܟ݂ܠܲܝ̈ ܦܵܬ̣ܘܿܪܵܟ݂. ܡܸܛܠ ܕܗܸܢܘܿܢ ܫܲܡܫܘܼܢܝ ܒܟ݂ܠܡܸܕܸ̇ܡ: ܟܲܕ݂ ܥܸܪܩܹ̇ܬ̣ ܡ̣ܢ ܩܕ݂ܵܡ ܐܲܒ̣ܫܵܠܘܿܡ ܐܲܚܘܼܟ݂. 8: ܘܗܵܐ ܫܲܡܥܝܼ ܒܲܪ ܓܹܐܪܵܐ ܥܲܡܵܟ݂: ܡ̣ܢ ܫܲܒ̣ܛܵܐ ܕܒܸܢܝܵܡܹܝܢ ܡ̣ܢ ܒܹܝܬ̣ ܚܘܿܪܝܼܡ ܘܗ̤ܘ ܨܲܚܝܲܢܝ ܨܘܿܚ̈ܝܵܬ̣ܵܐ ܡܲܪܝܼܪ̈ܵܬ̣ܵܐ: ܒܝܵܘܡܵܐ ܕܐܸܙܲܠ̄ܬ̣ ܠܡܲܚܢܝܼܡ. ܘܗ̤ܘ ܢܚܸܬ̣ ܠܐܘܼܪܥܝ ܠܝܘܿܪܕ̇ܢܵܢ. ܘܝܼܡܝܼܬ̣ ܠܹܗ ܒܡܵܪܝܵܐ ܐܲܠܵܗܵܐ ܘܐܸܡ̇ܪܹܬ̣ ܠܹܗ: ܕܐܸܢܵܐ ܠܵܐ ܐܸܩܛܠܵܟ݂ ܒܚܲܪܒܵܐ. 9: ܗܵܫܵܐ ܠܵܐ ܬܙܲܟܹ̇ܝܘܗܝ: ܕܓܲܒ̣ܪܵܐ ܐܲܢ̄ܬ̇ ܚܲܟ̇ܝܼܡܵܐ ܘܕܲܥ ܡܸܕܸ̇ܡ ܕܬܸܥܒܸ̇ܕ݂ ܠܹܗ. ܘܐܲܗܦܸܟ݂ ܣܲܟ݂ܠܘܼܬܹܗ ܥܲܠ ܪܹܫܹܗ: ܘܐܲܚܸܬ̣ ܣܲܝܒ̇ܘܼܬܹܗ ܒܲܕ݂ܡܵܐ ܠܲܫܝܘܿܠ. 10: ܘܲܫܟܸܒ̣ ܕܵܘܝܼܕ݂ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂. 11: ܘܝܵܘ̈ܡܵܬ̣ܵܐ ܕܐܲܡ̣ܠܸܟ݂ ܕܵܘܝܼܕ݂ ܥܲܠ ܝܼܣܪܵܝܹܠ ܐܲܪܒ̇ܥܝܼܢ ܫܢ̈ܝܼܢ: ܒܚܸܒ̣ܪܘܿܢ ܐܲܡ̣ܠܸܟ݂ ܫܒܲܥ ܫܢ̈ܝܼܢ: ܘܒ̣ܐܘܿܪܸܫܠܸܡ ܐܲܡ̣ܠܸܟ݂ ܬܠܵܬ̣ܝܼܢ ܘܲܬ̣ܠܵܬ̣ ܫܢ̈ܝܼܢ. 12: ܘܲܫܠܹܝܡܘܿܢ ܝܼܬܸܒ̣ ܥܲܠ ܟܘܼܪܣܝܹܗ ܕܕ݂ܵܘܝܼܕ݂ ܐܲܒ̣ܘܼܗܝ. ܘܬܸܩܢܲܬ̤ ܡܲܠܟ̇ܘܼܬܹܗ ܛܵܒ̣. 13: ܘܐܸܬ̣ܵܐ ܐܲܕ݂ܘܿܢܝܼܵܐ ܒܲܪ ܚܲܓܝܼܬ̣ ܠܘܵܬ̣ ܒܲܪܬ̣ ܫܒܲܥ ܐܸܡܹܗ ܕܲܫܠܹܝܡܘܿܢ: ܘܐܵܡܪܵܐ ܠܹܗ: ܫܠܵܡ ܡܹܐܬ̣ܝܵܟ݂: ܘܐܸܡܲܪ ܫܠܵܡ. 14: ܘܐܸܡܲܪ ܠܵܗ̇: ܡܸܠܬ̣ܵܐ ܐܝܼܬ̣ ܠܝܼ ܕܐܸܡܲܪ ܠܹܟ݂ܝ ܐܵܡܪܵܐ ܠܹܗ ܐܸܡܲܪ. 15: ܐܵܡܲܪ ܠܵܗ̇: ܐܲܢ̄ܬ̇ ܝܵܕܥܵܐ ܐܲܢ̄ܬ̇ܝ ܕܠܝܼ ܙܵܕ݂ܩܵܐ ܗ̄ܘ̣ܵܬ̣ ܡܲܠܟ̇ܘܼܬ̣ܵܐ: ܘܲܥܠܲܝ ܣܵܡ̣ܘ ܟܠܹܗ ܝܼܣܪܵܝܹܠ ܐܲܦܲܝ̈ܗܘܿܢ ܕܐܗܘܸܐ ܠܗܘܿܢ ܡܲܠܟܵܐ. ܘܲܐܹܬ̣ܢܲܣܒܲܬ̤ ܡܲܠܟ̇ܘܼܬ̣ܵܐ ܡܹܢܝ: ܘܲܗܘ̤ܵܬ̣ ܕܐܵܚ: ܡܸܛܠ ܕܡ̣ܢ ܡܵܪܝܵܐ ܗܘ̤ܵܬ̣ ܠܹܗ. 16: ܘܗܵܫܵܐ ܫܸܐܠ̱ܬ̣ܵܐ ܚܕ݂ܵܐ ܫܵܐܹ̇ܠ ܐ̄ܢܵܐ ܠܹܟ݂ܝ: ܠܵܐ ܬܲܗܦ̄ܟ݂ܝܼܢ ܐܲܦܲܝ̈. ܘܐܵܡܪܵܐ ܠܹܗ ܐܸܡܲܪ. 17: ܐܵܡܲܪ ܠܵܗ̇: ܐܸܡܲܪܝ ܠܡܲܠܟܵܐ ܫܠܹܝܡܘܿܢ ܕܠܵܐ ܢܲܗܦܲܟ݂ ܐܲܦܲܝ̈ܟ̇ܝ: ܘܢܸܬܸ̇ܠ ܠܝܼ ܠܐܒ̣ܝܼܫܵܓ̣ ܫܝܼܠܘܿܡܵܝܬܵܐ ܐܲܢ̄ܬ̇ܬ̣ܵܐ. 18: ܘܐܸܡܪܲܬ̤ ܒܲܪܬ̣ ܫܒܲܥ: ܫܲܦܝܼܪ: ܐܸܢܵܐ ܐܹܡܲܪ ܥܠܲܝܟ ܠܡܲܠܟܵܐ. 19: ܘܥܸܠܲܬ̤ ܒܲܪܬ̣ ܫܒܲܥ ܠܘܵܬ̣ ܡܲܠܟܵܐ ܫܠܹܝܡܘܿܢ ܕܬܹܐܡܲܪ ܠܹܗ ܥܲܠ ܐܲܕ݂ܘܿܢܝܼܵܐ. ܘܩܵܡ̣ ܡܲܠܟܵܐ ܠܐܘܼܪܥܵܗ̇ ܘܲܣܓܸܕ݂ ܠܵܗ̇: ܘܝܼܬܸܒ̣ ܥܲܠ ܟܘܼܪܣܝܹܗ. ܘܐܲܪܡܝܼܘ ܟܘܼܪܣܝܵܐ ܠܐܸܡܹܗ ܕܡܲܠܟܵܐ: ܘܝܼܬ̣ܒܲܬ̤ ܡ̣ܢ ܝܲܡܝܼܢܹܗ. 20: ܘܐܸܡܲܪܬ̤: ܫܸܐ̱ܠܬ̣ܵܐ ܚܕ݂ܵܐ ܙܥܘܿܪܬܵܐ ܫܵܐܠܵܐ ܐ̄ܢܵܐ ܡܸܢܵܟ݂: ܠܵܐ ܬܲܗܦܲܟ݂ ܐܲܦܲܝ̈ ܘܐܸܡܲܪ ܠܵܗ̇ ܡܲܠܟܵܐ: ܫܐܲܠܝ ܐܹܡܝ: ܡܸܛܠ ܕܠܵܐ ܡܲܗܦܸܟ݂ ܐ̄ܢܵܐ ܐܲܦܲܝ̈ܟ̇ܝ. 21: ܘܐܸܡܪܲܬ̤: ܬܸܬ̣̱ܝܼܗܸܒ̣ ܐܲܒ̣ܝܼܫܵܓ̣ ܫܝܼܠܘܿܡܵܝܬܵܐ ܠܐܲܕ݂ܘܿܢܝܼܵܐ ܐܲܚܘܼܟ݂ ܐܲܢ̄ܬ̇ܬ̣ܵܐ. 22: ܘܲܥ̣ܢܵܐ ܡܲܠܟܵܐ ܫܠܹܝܡܘܿܢ ܘܐܸܡܲܪ ܠܐܸܡܹܗ: ܠܡܵܢܵܐ ܫܐܸܠܬ̇ܝ ܠܹܗ ܐܲܒ̣ܝܼܫܵܓ̣ ܫܝܼܠܘܿܡܵܝܬܵܐ ܠܐܲܕ݂ܘܿܢܝܼܵܐ: ܐܸܠܵܐ ܫܐܲܠܝ ܠܹܗ ܡܲܠܟ̇ܘܼܬ̣ܵܐ. ܡܸܛܠ ܕܗ̤ܘܝܘܼ ܐܵܚܝ ܕܩܲܫܝܼܫ ܡܹܢܝ: ܘܠܹܗ ܐܲܒ̣ܝܼܬܲܪ ܟܵܗܢܵܐ: ܘܝܘܿܐܵܒ̣ ܒܲܪ ܨܘܿܪܝܼܵܐ. 23: ܘܝܼܡܵܐ ܡܲܠܟܵܐ ܫܠܹܝܡܘܿܢ ܒܡܵܪܝܵܐ ܘܐܸܡܲܪ: ܗܵܟܲܢܵܐ ܢܸܥܒܸ̇ܕ݂ ܠܝܼ ܐܲܠܵܗܵܐ ܘܗܵܟܲܢܵܐ ܢܵܘܣܸܦ ܠܝܼ: ܐܸܢ ܠܵܐ ܒܢܲܦ̮ܫܹܗ ܡܲܠܸܠ̣ ܐܲܕ݂ܘܿܢܝܼܵܐ ܦܸܬ̣ܓ̣ܵܡܵܐ ܗܵܢܵܐ.

24: ܘܗܵܫܵܐ ܚܲܝ ܗ̄ܘ̣ ܡܵܪܝܵܐ ܕܐܲܬ̣ܩܢܲܢܝ ܘܐܵܘܬ̇ܒܲܢܝ ܥܲܠ ܟܘܼܪܣܝܹܗ ܕܕ݂ܵܘܝܼܕ݂ ܐܵܒ̣ܝ: ܘܲܥ̣ܒܲܕ݂ ܠܝܼ ܒܲܝܬܵܐ ܐܲܝܟ݂ ܕܐܸܡܲܪ ܐܸܠܵܐ ܝܵܘܡܵܢܵܐ ܢܸܬ̣ܩ̱ܛܸܠ ܐܲܕ݂ܘܿܢܝܼܵܐ. 25: ܘܫܲܕܲܪ ܡܲܠܟܵܐ ܫܠܹܝܡܘܿܢ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܦܓܲܥ̣ ܒܹܗ ܘܩܲܛܠܹܗ. 26: ܘܠܲܐܒ̣ܝܬܲܪ ܟܵܗܢܵܐ ܐܸܡܲܪ ܠܹܗ ܡܲܠܟܵܐ: ܠܲܥܢܵܬ̣ܘܿܬ̣ ܙܸܠ ܠܵܟ݂ ܠܚܲܩܠܵܟ݂: ܡܸܛܠ ܕܓܲܒ̣ܪܵܐ ܐܲܢ̄ܬ̇ ܚܲܝܵܒ̣ ܡܵܘܬܵܐ. ܘܝܵܘܡܵܢܵܐ ܠܵܐ ܐܸܩܛܠܵܟ݂: ܡܸܛܠ ܕܲܫܩܲܠܬ̇ ܐܪܘܿܢܹܗ ܕܡܵܪܝܵܐ ܩܕ݂ܵܡ ܕܵܘܝܼܕ݂ ܐܵܒ̣ܝ: ܘܐܸܨܛܲܥܲܪܬ̇ ܒܟ݂ܠ ܐܲܬܲܪ ܕܐܸܨܛܲܥܲܪ ܒܹܗ ܐܵܒ̣ܝ. 27: ܘܐܲܦܩܹܗ ܫܠܹܝܡܘܿܢ ܠܐܲܒ̣ܝܼܬܲܪ ܕܠܵܐ ܢܸܗܘܹܐ ܟܵܗܢܵܐ ܠܡܵܪܝܵܐ: ܕܢܸܫܬܲܡܠܸܐ ܦܸܬ̣ܓ̣ܵܡܸܗ ܕܡܵܪܝܵܐ ܕܡܲܠܸܠ̣ ܥܲܠ ܒܹܝܬ̣ ܥܹܠܝܼ ܒܫܝܼܠܘܿ. 28: ܘܛܸܒܵܐ ܡܲܛܝܼ ܠܝܘܿܐܵܒ̣ ܕܐܸܬ̣ܩܛܸܠ ܐܲܕ݂ܘܿܢܝܼܵܐ: ܡܸܛܠ ܕܝܘܿܐܵܒ̣ ܨܠܸܐ ܗ̄ܘ̣ܵܐ ܒܵܬܲܪ ܐܲܕ݂ܘܿܢܝܼܵܐ. ܘܒ̣ܵܬܲܪ ܫܠܹܝܡܘܿܢ ܠܵܐ ܨܠܵܐ ܘܲܥܪܲܩ̣ ܝܘܿܐܵܒ̣ ܠܡܲܫܟ̇ܢܹܗ ܕܡܵܪܝܵܐ: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬܹܗ ܕܡܲܕ݂ܒ̇ܚܵܐ. 29: ܘܚܵܘܝܼܘ ܠܡܲܠܟܵܐ ܫܠܹܝܡܘܿܢ ܕܲܥܪܲܩ̣ ܝܘܿܐܵܒ̣ ܠܡܲܫܟ̇ܢܹܗ ܕܡܵܪܝܵܐ: ܘܐܸܚܲܕ݂ ܓܵܘܣܵܐ ܒܩܲܪ̈ܢܵܬܹܗ ܕܡܲܕ݂ܒ̇ܚܵܐ. ܘܫܲܕܲܪ ܡܲܠܟܵܐ ܫܠܹܝܡܘܿܢ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܐܸܡܲܪ ܠܹܗ: ܙܸܠ ܦܓܲܥ ܒܹܗ. 30: ܘܥܲܠ̣ ܒܢܵܝܵܐ ܠܡܲܫܟ̇ܢܹܗ ܕܡܵܪܝܵܐ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܲܠܟܵܐ: ܦܘܿܩ. ܘܐܸܡܲܪ ܠܵܐ ܢܵܦܹ̇ܩ ܐ̄ܢܵܐ: ܗܵܪܟܵܐ ܡܵܐܹ̇ܬ̣ ܐ̄ܢܵܐ. ܘܦܲܢܝܼ ܒܢܵܝܵܐ ܦܸܬ̣ܓ̣ܵܡܵܐ ܠܡܲܠܟܵܐ: ܘܐܸܡܲܪ: ܗܵܟܲܢܵܐ ܡܲܠܸܠ̣ ܝܘܿܐܵܒ̣: ܘܗܵܟܲܢܵܐ ܥܢܵܢܝ. 31: ܘܐܸܡܲܪ ܡܲܠܟܵܐ: ܥܒܸܕ݂ ܠܹܗ ܐܲܝܟ݂ ܡܸܕܸ̇ܡ ܕܐܸܡܲܪ: ܘܲܦܓ̣ܥ ܒܹܗ ܘܲܩܛܘܿܠܲܝܗܝ: ܘܐܲܥܒܲܪ ܕܡܵܐ ܙܲܟܝܵܐ ܕܐܸܫܲܕ݂ ܝܘܿܐܵܒ̣ ܡܹܢܝ ܘܡ̣ܢ ܒܹܝܬ̣ ܐܵܒ̣ܝ. 32: ܘܢܲܗܦܸܟ݂ ܡܵܪܝܵܐ ܕܡܹܗ ܒܪܹܫܹܗ: ܕܲܦܓܲܥ̣ ܒܲܬ̣ܪܹܝܢ ܓܲܒ̣ܪ̈ܝܼܢ ܕܙܲܕ̇ܝܼܩܝܼܢ ܘܛܵܒ̣ܝܼܢ ܡܸܢܹܗ: ܘܩܲܛܸܠ ܐܸܢܘܿܢ ܒܚܲܪܒܵܐ: ܘܐܵܒ̣ܝ ܕܵܘܝܼܕ݂ ܠܵܐ ܝܼܕܲܥ̣: ܠܐܲܒ̣ܢܹܝܪ ܒܲܪ ܢܹܝܪ ܪܲܒ̇ ܚܲܝܠܵܐ ܕܝܼܣܪܵܝܹܠ: ܘܲܠܥܲܡܣܵܐ ܒܲܪ ܝܵܬ̣ܵܪ ܪܲܒ̇ ܚܲܝܠܵܐ ܕܲܝܗܘܼܕ݂ܵܐ. 33: ܘܢܸܗܦܘܿܟ݂ ܕܡܸܗܘܿܢ ܒܪܹܫܹܗ ܕܝܘܿܐܵܒ̣: ܘܲܒ̣ܪܹܫܵܐ ܕܙܲܪܥܹܗ ܠܥܵܠܲܡ. ܘܲܠܕ݂ܵܘܝܼܕ݂: ܘܲܠܙܲܪܥܹܗ: ܘܲܠܒܲܝܬܹ̇ܗ: ܘܲܠܟ݂ܘܼܪܣܝܹܗ: ܢܸܗܘܹܐ ܫܠܵܡܵܐ ܠܥܵܠܲܡ ܡ̣ܢ ܩܕ݂ܵܡ ܡܵܪܝܵܐ. 34: ܘܲܣܠܸܩ̣ ܒܢܵܝܵܐ ܒܲܪ ܝܘܿܝܵܕ݂ܵܥ: ܘܲܦܓܲܥ ܒܹܗ ܘܩܲܛܠܹܗ. ܘܐܸܬ̣ܩܒܲܪ ܒܩܲܒ̣ܪܹܗ ܒܡܲܕ݂ܒ̇ܪܵܐ. 35: ܘܐܲܩܝܼܡ ܡܲܠܟܵܐ ܫܠܹܝܡܘܿܢ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ ܚܠܵܦܵܘܗܝ: ܥܲܠ ܚܲܝܠܵܐ. ܘܲܠܨܵܕ݂ܘܿܩ ܟܵܗܢܵܐ ܐܲܩܝܼܡ ܡܲܠܟܵܐ ܚܠܵܦ ܐܲܒ̣ܝܼܬܲܪ. 36: ܘܫܲܕܲܪ ܡܲܠܟܵܐ ܩ̣ܪܵܐ ܠܫܲܡܥܝܼ ܘܐܸܡܲܪ ܠܹܗ: ܒܢܝܼ ܠܵܟ݂ ܒܲܝܬܵܐ ܒܐܘܿܪܸܫܠܸܡ: ܘܬܸܒ̣ ܬܲܡܵܢ. ܘܠܵܐ ܬܸܦܘܿܩ ܡ̣ܢ ܬܲܡܵܢ ܠܟ݂ܵܐ ܘܲܠܟ݂ܵܐ. 37: ܘܲܒ̣ܝܵܘܡܵܐ ܕܢܵܦܹ̇ܩ ܐܲܢ̄ܬ̇ ܘܥܵܒܲܪ ܐܲܢ̄ܬ̇ ܢܲܚܠܵܐ ܕܩܸܕ݂ܪܘܿܢ: ܕܲܥ ܡܸܕܲܥ ܕܲܡܡܵܬ̣ ܬܡܘܼܬ̣: ܘܲܕ݂ܡܵܟ݂ ܢܸܗܘܹܐ ܒܪܹܫܵܟ݂. 38: ܘܐܸܡܲܪ ܫܲܡܥܝܼ ܠܡܲܠܟܵܐ: ܫܲܦܝܼܪ ܦܸܬ̣ܓ̣ܵܡܵܐ ܕܐܸܡܲܪܬ̇ ܡܵܪܝ ܡܲܠܟܵܐ: ܗܵܟܲܢܵܐ ܢܸܥܒܸ̇ܕ݂ ܥܲܒ̣ܕܵܟ݂ ܘܝܼܬܸܒ̣ ܫܲܡܥܝܼ ܒܐܘܿܪܸܫܠܸܡ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ. 39: ܘܡ̣ܢ ܒܵܬܲܪ ܬܠܵܬ̣ ܫܢ̈ܝܢ: ܥܪܲܩ̣ܘ ܬܪܹܝܢ ܥܲܒ̣ܕܵܘ̈ܗܝ ܕܫܲܡܥܝܼ: ܠܘܵܬ̣ ܐܲܟ݂ܝܼܫ ܒܲܪ ܡܲܥܟܵܐ ܡܲܠܟܵܐ ܕܓ̣ܵܬ̣ ܘܚܵܘܝܼܘ ܠܫܲܡܥܝܼ: ܘܐܸܡܲܪܘ ܠܹܗ: ܗܵܐ ܥܲܒ̣ܕܲܝ̈ܟ ܒܓ̣ܵܬ̣. 40: ܘܩܵܡ̣ ܫܲܡܥܝܼ ܐܲܪܡܝܼ ܥܲܠ ܚܡܵܪܹܗ: ܘܐܸܙܲܠ̣ ܠܓ̣ܵܬ̣ ܠܘܵܬ̣ ܐܲܟ݂ܝܼܫ ܠܡܸܒ̣ܥܵܐ ܠܥܲܒ̣ܕܵܘ̈ܗܝ. ܘܐܸܙܲܠ̣ ܫܲܡܥܝܼ ܘܐܲܝܬܝܼ ܠܥܲܒ̣ܕܵܘ̈ܗܝ ܡ̣ܢ ܓܵܬ̣. 41: ܘܚܵܘܝܼܘ ܠܡܲܠܟܵܐ ܫܠܹܝܡܘܿܢ ܕܐܸܙܲܠ̣ ܫܲܡܥܝܼ ܡ̣ܢ ܐܘܿܪܸܫܠܸܡ ܠܓ̣ܵܬ̣ ܘܲܗܦܲܟ݂. 42: ܘܫܲܕܲܪ ܡܲܠܟܵܐ ܩ̣ܪܵܐ ܠܫܲܡܥܝܼ: ܘܐܸܡܲܪ ܠܹܗ: ܠܵܐ ܐܘܿܡܝܼܬ̣ܵܟ݂ ܒܡܵܪܝܵܐ: ܘܣܲܗܕܹܬ̣ ܒܵܟ݂ ܘܐܸܡܪܹܬ̣: ܕܲܒ̣ܝܵܘܡܵܐ ܕܬܸܦܘܿܩ ܡ̣ܢ ܐܘܿܪܸܫܠܸܡ ܘܬܸܥܒܲܪ ܢܲܚܠܵܐ ܕܩܸܕ݂ܪܘܿܢ: ܡܸܕܲܥ ܬܸܕܲܥ ܕܲܡܡܵܬ̣ ܬܡܘܼܬ̣: ܘܐܸܡܲܪܬ̇ ܫܲܦܝܼܪ ܦܸܬ̣ܓ̣ܵܡܵܐ: ܗܵܟܲܢܵܐ ܐܸܥܒܸܕ݂. 43: ܡܸܛܠ ܡܵܢܵܐ ܠܵܐ ܢܛܲܪܬ̇ ܡܵܘܡܵܬܹܗ ܕܡܵܪܝܵܐ ܘܩܘܼܩܕܵܢܵܐ ܕܦܲܩܕ̇ܬܵܟ݂. 44: ܘܐܸܡܲܪ ܡܲܠܟܵܐ ܠܫܲܡܥܝܼ: ܐܲܢ̄ܬ̇ ܝܵܕܲܥ ܐܲܢ̄ܬ̇ ܟܠܵܗ̇ ܒܝܼܫܬܵܐ ܕܝܵܕܲܥ ܠܸܒܵܟ݂: ܕܲܥܒܲܕ̇ܬ̇ ܠܕ݂ܵܘܝܼܕ݂ ܐܵܒ̣ܝ: ܘܐܲܗܦܸܟ݂ ܡܵܪܝܵܐ ܒܝܼܫܬܵܟ݂ ܒܪܹܫܵܟ݂. 45: ܘܡܲܠܟܵܐ ܫܠܹܝܡܘܿܢ ܢܸܗܘܹܐ ܒܪܝܼܟ݂: ܘܟ݂ܘܼܪܣܝܹܗ ܕܕ݂ܵܘܝܼܕ݂ ܢܸܗܘܹܐ ܡܲܬ̣ܩܲܢ ܩܕ݂ܵܡ ܡܵܪܝܵܐ ܥܕܲܡܵܐ ܠܥܵܠܲܡ. 46: ܘܲܦܩܲܕ݂ ܡܲܠܟܵܐ ܠܲܒ̣ܢܵܝܵܐ ܒܲܪ ܝܘܿܝܵܕ݂ܵܥ: ܘܲܢܦܲܩ̣ ܦܓܲܥ̣ ܒܹܗ ܘܡܝܼܬ̣.

ܩܹܦܵܠܹܐܘܿܢ: ܓ .

1: ܘܡܲܠܟ̇ܘܼܬ̣ܵܐ ܬܸܩܢܲܬ̤ ܒܐܝܼܕܹܗ ܕܲܫܠܹܝܡܘܿܢ: ܘܲܗܘ̤ܵܐ ܫܠܹܝܡܘܿܢ ܚܲܬ̣ܢܵܐ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ ܘܲܢܣܲܒ̣ ܠܒܲܪܬܹܗ ܕܦܲܪܥܘܿܢ: ܘܐܲܥ̣ܠܵܗ̇ ܠܲܩܪܝܼܬܹܗ ܕܕ݂ܵܘܝܼܕ݂: ܥܲܕ݂ܠܵܐ ܢܫܲܠܸܡ ܠܡܸܒ̣ܢܵܐ ܒܲܝܬܹ̇ܗ: ܘܒܲܝܬܹ̇ܗ ܕܡܵܪܝܵܐ: ܘܫܘܼܪܵܐ ܕܐܘܿܪܸܫܠܸܡ ܟܲܕ݂ ܚܵܕ݂ܪܵܐ. 2: ܒܲܠܚܘܿܕ݂ ܥܲܡܵܐ ܡܕܲܒ̇ܚܝܼܢ ܗ̄ܘ̣ܵܘ ܥܲܠ ܥܠܵـ̈ـܘܵܬ̣ܵܐ: ܡܸܛܠ ܕܲܥܕܲܟܸ̇ܝܠ ܠܵܐ ܐܸܬ̣ܒ̇ܢܝܼ ܗ̄ܘ̣ܵܐ ܒܲܝܬܵܐ ܠܲܫܡܹܗ ܕܡܵܪܝܵܐ: ܥܕܲܡܵܐ ܠܝܵܘ̈ܡܵܬ̣ܵܐ ܗܵܢܘܿܢ. 3: ܘܲܪܚܸܡ ܫܠܹܝܡܘܿܢ ܠܡܵܪܝܵܐ: ܠܲܡܗܲܠܵܟ݂ܘܼ ܒܦܘܼܩܕܵܢܵܘ̈ܗܝ ܕܕ݂ܵܘܝܼܕ݂ ܐܲܒ̣ܘܼܗܝ: ܒܲܠܚܘܿܕ݂ ܥܲܠ ܥܠܵـ̈ـܘܵܬ̣ܵܐ ܡܕܲܒܲܚ ܗ̄ܘ̣ܵܐ: ܘܣܵܐܹ̇ܡ ܒܸܣܡܹ̈ܐ. 4: ܘܐܸܙܲܠ̣ ܡܲܠܟܵܐ ܠܓܸܒ̣ܥܘܿܢ ܠܲܡܕܲܒܵܚܘܼ ܬܲܡܵܢ: ܡܸܛܠ ܕܗ̤ܝ ܗ̄ܝ̣ ܥܠܵܬ̣ܵܐ ܪܲܒ̇ܬ̣ܵܐ ܐܵܠܹܦ ܥ̈ܠܵܘܵܢ ܡܕܲܒܲܚ ܗ̄ܘ̣ܵܐ ܫܠܹܝܡܘܿܢ ܥܲܠ ܡܲܕ݂ܒ̇ܚܵܐ ܗܵܘ̇ ܕܲܒ̣ܓ̣ܒ̣ܥܘܿܢ. 5: ܗܵܝܕܹ̇ܝܢ ܐܸܬ̣ܓ̇ܠܝܼ ܡܵܪܝܵܐ ܥܲܠ ܫܠܹܝܡܘܿܢ ܒܚܸܙܘܵܐ ܕܠܸܠܝܵܐ: ܘܐܸܡܲܪ ܠܹܗ ܐܲܠܵܗܵܐ: ܫܐܲܠ ܡܵܢܵܐ ܐܸܬܸ̇ܠ ܠܵܟ݂. 6: ܘܐܸܡܲܪ ܫܠܹܝܡܘܿܢ: ܐܲܢ̄ܬ̇ ܥ̣ܒܲܕ̇ܬ̇ ܥܲܡ ܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ ܛܲܝܒ̇ܘܼܬ̣ܵܐ ܪܲܒ̇ܬ̣ܵܐ: ܐܲܝܟ݂ ܕܗܲܠܸܟ݂ ܩܕ݂ܵܡܲܝܟ ܒܩܘܼܫܬܵܐ ܘܲܒ̣ܗܲܝܡܵܢܘܼܬ̣ܵܐ: ܘܒܲܬ̣ܪܝܼܨܘܼܬ̣ܵܐ ܕܠܸܒܵܐ: ܗܲܠܸܟ݂ ܩܕ݂ܵܡܲܝܟ ܘܲܢܛܲܪܬ̇ ܠܹܗ ܗܵܕܹܐ ܛܲܝܒ̇ܘܼܬ̣ܵܐ ܪܲܒ̇ܬ̣ܵܐ: ܘܝܲܗ̄ܒ̣ܬ̇ ܠܹܗ ܒܪܵܐ. ܕܢܸܬܸ̇ܒ̣ ܥܲܠ ܟܘܼܪܣܝܹܗ ܐܲܝܟ݂ ܕܝܵܘܡܵܢܵܐ. 7: ܘܗܵܫܵܐ ܡܵܪܝܵܐ ܐܲܠܵܗܵܐ: ܐܲܢ̄ܬ̇ ܐܲܡܠܸܟ݂ܬ̇ ܠܥܲܒ̣ܕܵܟ݂ ܚܠܵܦ ܕܵܘܝܼܕ݂ ܐܵܒ̣ܝ ܘܐܸܢܵܐ ܛܲܠܝܵܐ ܐ̄ܢܵܐ ܙܥܘܿܪܵܐ ܘܠܵܐ ܝܵܕܲܥ ܐ̄ܢܵܐ ܠܡܸܦܲܩ ܘܲܠܡܸܥܲܠ: ܒܓ̣ܵܘ ܥܲܡܵܟ݂ ܕܲܓ̣ܒܲܝܬ̇. 8: ܥܲܡܵܐ ܣܲܓ̇ܝܼܵܐܐ ܕܠܵܐ ܡܸܬ̣ܡ̱ܢܸܐ: ܘܠܵܐ ܡܸܬ̣ܚܫܸܒ̣ ܡ̣ܢ ܣܘܿܓܹܐܗ. 9: ܗܲܒ̣ ܠܥܲܒ̣ܕܵܟ݂ ܠܸܒܵܐ ܫܵܡܘܿܥܵܐ ܠܲܡܕ݂ܵܢ ܠܥܲܡܵܟ݂: ܘܲܠܡܸܣܬܲܟܵܠܘܼ ܒܹܝܬ̣ ܛܵܒ̣ܬ̣ܵܐ ܠܒ̣ܝܼܫܬܵܐ. ܡܲܢܘܼ ܓܹܝܪ ܡܸܫܟܲܚ ܠܲܡܕ݂ܵܢܹܗ ܠܥܲܡܵܟ݂ ܗܵܢܵܐ ܪܲܒܵܐ. 10: ܘܲܫܦܲܪ ܦܸܬ̣ܓ̣ܵܡܵܐ ܗܵܢܵܐ ܩܕ݂ܵܡ ܡܵܪܝܵܐ: ܟܲܕ݂ ܫܐܸܠ̣ ܫܠܹܝܡܘܿܢ ܦܸܬ̣ܓ̣ܵܡܵܐ ܗܵܢܵܐ. 11: ܘܐܸܡܲܪ ܡܵܪܝܵܐ ܠܲܫܠܹܝܡܘܿܢ: ܚܠܵܦ ܕܲܫܐܸܠܬ̇ ܦܸܬ̣ܓ̣ܵܡܵܐ ܗܵܢܵܐ: ܘܠܵܐ ܫܲܐܸܠܬ̇ ܠܵܟ݂ ܥܘܼܬ̣ܪܵܐ: ܘܠܵܐ ܫܐܸܠܬ̇ ܠܵܟ݂ ܢܲܦ̮ـ̈ـܫܵܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܟ: ܘܠܵܐ ܫܐܸܠܬ̇ ܠܵܟ݂ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܘܲܫܐܸܠܬ̇ ܠܵܟ݂ ܚܸܟ݂ܡ̱ܬ̣ܵܐ ܠܡܸܫܡܲܥ ܕܝܼܢܵܐ. 12: ܗܵܐ ܥܒܲܕܹ̇ܬ̣ ܠܵܟ݂ ܐܲܝܟ݂ ܦܸܬ̣ܓ̣ܵܡܵܟ݂: ܗܵܐ ܝܼܗ̄ܒܹ̇ܬ̣ ܠܵܟ݂ ܠܸܒܵܐ ܚܲܟ̇ܝܼܡܵܐ ܘܣܲܟ̇ܘܼܠܬ̣ܵܢܵܐ: ܕܐܲܟ݂ܘܵܬ̣ܵܟ݂ ܠܵܐ ܗܘ̤ܵܐ ܩܕ݂ܵܡܲܝܟ: ܘܒ̣ܵܬ̣ܪܵܟ݂ ܠܵܐ ܢܩܘܼܡ ܐܲܟ݂ܘܵܬ̣ܵܟ݂. 13: ܘܐܵܦ ܡܸܕܸ̇ܡ ܕܠܵܐ ܫܐܸܠܬ̣ ܝܼܗ̄ܒܹ̇ܬ̣ ܠܵܟ݂: ܐܵܦ ܥܘܼܬ̣ܪܵܐ: ܐܵܦ ܐܝܼܩܵܪܵܐ. ܕܠܵܐ ܗܘ̤ܵܐ ܐܲܟ݂ܘܵܬ̣ܵܟ݂: ܐ̄ܢܵܫ ܒܡܲܠ̈ܟܹ̇ܐ: ܟܠܗܘܿܢ ܝܵܘܡܲܝ̈ܟ. 14: ܘܐܸܢ ܬܗܲܠܸܟ݂ ܒܐܘܼܪ̈ܚܵܬ̣ܝ ܠܡܸܛܲܪ ܩܝܵܡܲܝ̈ ܘܦܘܼܩ̈ܕܵܢܲܝ ܐܲܝܟ݂ ܕܗܲܠܸܟ݂ ܕܵܘܝܼܕ݂ ܐܲܒ̣ܘܼܟ݂: ܐܲܣܓܹ̇ܐ ܝܵܘ̈ܡܲܝܟ. 15: ܘܐܸܬ̇ܬ̇ܥܝܼܪ ܫܠܹܝܡܘܿܢ: ܘܚܵܙܹ̇ܐ ܚܸܠܡܵܐ ܗ̄ܘ̣ ܘܐܸܬ̣ܵܐ ܫܠܹܝܡܘܿܢ ܠܐܘܿܪܸܫܠܸܡ: ܘܩܵܡ̣ ܩܕ݂ܵܡ ܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ: ܘܐܲܣܸܩ̣ ܥܠܵـ̈ـܘܵܬ̣ܵܐ: ܘܲܥܒܲܕ݂ ܫܲܠܡܹ̈ܐ. ܘܲܥܒܲܕ݂ ܡܲܫܬ̇ܝܵܐ ܠܟ݂ܠܗܘܿܢ ܥܲܒ̣ܕܵܘ̈ܗܝ. 16: ܗܵܝܕܹ̇ܝܢ ܐܸܬܲܝ̈ ܬܲܪܬܹ̇ܝܢ ܢܸܫ̈ܝܼܢ ܙܵܢ̈ܝܵܬ̣ܵܐ ܠܲܡܕ݂ܵܢ ܩܕ݂ܵܡ ܡܲܠܟܵܐ ܫܠܹܝܡܘܿܢ. 17: ܘܐܸܡܪܲܬ̤ ܐܲܢ̄ܬ̇ܬ̣ܵܐ ܚܕ݂ܵܐ ܡܸܢܗܹܝܢ: ܒܵܥ̇ܝܵܐ ܐ̄ܢܵܐ ܡܸܢܵܟ݂ ܡܵܪܝ: ܐܸܢܵܐ ܘܗܵܕܹܐ ܐܲܢ̄ܬ̇ܬ̣ܵܐ ܥܵܡ̇ܪܵܢ ܗ̄ܘܲܝܢ ܒܒܲܝܬܵܐ ܚܲܕ݂: ܘܝܼܠܕܹ̇ܬ̣ ܥܲܡܵܗ̇ ܒܒܲܝܬܵܐ. 18: ܘܡ̣ܢ ܒܵܬܲܪ ܬܠܵܬ̣ܵܐ ܝܵܘ̈ܡܝܼܢ ܟܲܕ݂ ܝܼܠܕܹ̇ܬ̣: ܝܸܠܕܲܬ̤ ܐܵܦ ܗܵܕܹܐ ܐܲܢ̄ܬ̇ܬ̣ܵܐ ܘܲܚܢܲܢ ܚܢܲܢ ܐܲܟ݂ܚ̄ܕ݂ܵܐ: ܘܠܲܝܬ̇ ܐ̄ܢܵܫ ܢܘܼܟ݂ܪܵܝܵܐ ܥܲܡܲܢ: ܐܸܠܵܐ ܐܸܢ ܬܲܪܬܹ̇ܝܢ ܚܢܲܢ ܒܒܲܝܬܵܐ. 19: ܘܡܝܼܬ̣ ܒܪܵܗ̇ ܕܗܵܕܹܐ ܐܲܢ̄ܬ̇ܬ̣ܵܐ ܒܠܸܠܝܵܐ: ܕܕܸܡܥܲܬ̤ ܥܠܵܘܗܝ.

20: ܘܩܵܡܲܬ̤ ܒܦܠܓܹ̇ܗ ܕܠܸܠܝܵܐ: ܘܢܸܣܒܲܬ̤ ܒܹܪܝ ܡ̣ܢ ܠܘܵܬ̣ܝ: ܘܐܲܡܬ̣ܵܟ݂ ܕܵܡ̇ܟܵܐ ܗ̄ܘ̣ܵܬ̣. ܘܐܲܪܡܝܵܬܹܗ ܒܥܘܼܒܵܗ̇. ܘܠܲܒ̣ܪܵܗ̇ ܡܝܼܬ̣ܵܐ ܐܲܪܡܝܲܬ̣ ܒܥܘܼܒ̇ܝ. 21: ܘܩܵܡܹ̇ܬ̣ ܒܨܲܦܪܵܐ ܕܐܲܝܢܸܩ ܒܹܪܝ: ܘܚܵܙܝܵܐ ܐ̄ܢܵܐ ܡܝܼܬ̣ܵܐ ܗ̄ܘ̣. ܘܐܸܬ̣ܒܲܩܝܼܬ̣ ܒܹܗ ܒܨܲܦܪܵܐ: ܘܠܵܐ ܗܘ̤ܵܐ ܗܵܘ̇ ܒܹܪܝ ܕܝܸܠܕܹ̇ܬ̣. 22: ܘܐܸܡܪܲܬ̤ ܐܲܢ̄ܬ̇ܬ̣ܵܐ ܗܵܝ̇ ܐ̄ܚܪܹܬ̣ܵܐ: ܠܵܐ ܗ̄ܘ̣ܵܐ ܗܵܟܲܢܵܐ: ܒܹܪܝ ܗ̄ܘ̣ ܚܲܝܵܐ: ܘܲܒ̣ܪܹܟ݂ܝ ܗ̄ܘ̣ ܡܝܼܬ̣ܵܐ. 23: ܘܗܵܝ̇ ܐܵܡܪܵܐ: ܠܵܐ ܗ̄ܘ̣ܵܐ ܗܵܟܲܢܵܐ: ܒܪܹܟ݂ܝ ܗ̄ܘ̣ ܡܝܼܬ̣ܵܐ: ܘܒܹܪܝ ܗ̄ܘ̣ ܚܲܝܵܐ. ܘܢܵܨ̈ܝܵܢ ܗ̄ܘܲܝ̈ ܩܕ݂ܵܡ ܡܲܠܟܵܐ. 24: ܘܐܸܡܲܪ ܡܲܠܟܵܐ: ܐܲܝܬܵܘ ܠܝܼ ܣܲܝܦܵܐ ܘܐܲܝܬ̇ܝܼܘ ܣܲܝܦܵܐ ܩܕ݂ܵܡ ܡܲܠܟܵܐ. 25: ܘܐܸܡܲܪ ܡܲܠܟܵܐ: ܦܘܼܣܩܘܼܗܝ ܠܗܵܘ̇ ܛܲܠܝܵܐ ܕܚܲܝ ܠܲܬ̣ܪܹܝܢ: ܘܗܲܒ̣ܘ ܦܸܠܓܹܗ ܠܲܚܕ݂ܵܐ: ܘܦܸܠܓܹ̇ܗ ܠܲܚܕ݂ܵܐ. 26: ܘܐܸܡܪܲܬ̤ ܗܵܝ̇ ܐܲܢ̄ܬ̇ܬ̣ܵܐ ܕܲܒ̣ܪܵܗ̇ ܚܲܝ ܠܡܲܠܟܵܐ: ܡܸܛܠ ܕܐܸܬ̣ܗ̱ܦܸܟ݂ܘ ܪ̈ܲܚܡܹܝܗ̇ ܥܲܠ ܒܪܵܐ. ܒܵܥ̇ܝܵܐ ܐ̄ܢܵܐ ܡܸܢܵܟ݂ ܡܵܪܝ: ܗܲܒ̣ܘܗܝ ܠܵܗ̇ ܠܛܲܠܝܵܐ ܟܲܕ݂ ܚܲܝ: ܡܸܩܛܲܠ ܠܵܐ ܬܸܩܛܠܘܼܢܹܗ ܘܗܵܝ̇ ܐܵܡܪܵܐ: ܠܵܐ ܠܝܼ ܐܵܦܠܵܐ ܠܹܟ݂ܝ ܢܸܗܘܹܐ: ܦܘܼܣܩܘܼܗܝ. 27: ܥܢ̣ܵܐ ܡܲܠܟܵܐ ܘܐܸܡܲܪ: ܗܲܒ̣ܘܼܗܝ ܠܵܗ̇ ܠܛܲܠܝܵܐ ܟܲܕ݂ ܚܲܝ: ܘܡܸܩܛܲܠ ܠܵܐ ܬܸܩܛܠܘܼܢܹܗ. ܗܵܝ̇ ܗ̄ܝ̣ ܐܸܡܹܗ. 28: ܘܲܫܡܲܥܘ ܟܠܹܗ ܝܼܣܪܵܝܹܠ ܕܝܼܢܵܐ ܕܵܕ݂ܵܢ ܡܲܠܟܵܐ: ܘܲܕ݂ܚܸܠܘ ܡ̣ܢ ܩܕ݂ܵܡ ܡܲܠܟܵܐ. ܡܸܛܠ ܕܲܚܙܵܘ ܕܚܸܟ݂ܡ̱ܬ̣ܵܐ ܕܐܲܠܵܗܵܐ ܐܝܼܬ̣ ܒܹܗ ܠܡܸܥܒܲܕ݂ ܕܝܼܢܵܐ.

ܩܹܦܵܠܹܐܘܿܢ: ܕ.

1: ܘܲܗܘ̤ܵܐ ܫܠܹܝܡܘܿܢ ܡܲܠܟܵܐ ܥܲܠ ܟܠܹܗ ܝܼܣܪܵܝܹܠ. 2: ܘܗܵܠܹܝܢ ܪܵܘ̱ܪ̈ܒ̣ܵܢܹܐ ܕܝܼܠܹܗ: ܥܲܙܲܪܝܵܐ ܒܲܪ ܨܵܕ݂ܘܿܩ ܟܵܗܢܵܐ. 3: ܐܹܠܝܼܚܪܲܦ ܘܐܲܚܝܼܵܐ ܒ̈ܢܲܝ ܫܝܼܫܵܐ ܣܵܦܪܹ̈ܐ: ܘܝܘܿܫܵܦܵܛ ܒܲܪ ܐܲܚܝܼܠܘܿܕ݂ ܡܥܲܗܕ݂ܵܢܵܐ.

4: ܘܲܒ̣ܢܵܝܵܐ ܒܲܪ ܝܘܿܝܵܕ݂ܵܥ ܥܲܠ ܚܲܝܠܵܐ: ܘܨܵܕ݂ܘܿܩ ܘܐܲܒ̣ܝܼܬܲܪ ܟܵܗ̈ܢܹܐ. 5: ܘܥܲܙܲܪܝܵܐ ܒܲܪ ܢܵܬ̣ܵܢ ܥܲܠ ܩܲܝܘܼܡܹ̈ܐ: ܘܙܵܒ̣ܘܼܪ ܒܲܪ ܢܵܬ̣ܵܢ ܟܵܗܢܵܐ ܪܲܚܡܵܐ ܕܡܲܠܟܵܐ. 6: ܘܐܲܒ̣ܝܼܥܫܵܪ ܪܲܒ̇ ܒܲܝܬܵܐ: ܘܐܲܕ݂ܘܿܢܝܼܪܵܡ ܒܲܪ ܥܲܒ̣ܕܵܐ ܥܲܠ ܡܲܕ̇ܐܬ̣ܵܐ. 7: ܘܠܲܫܠܹܝܡܘܿܢ ܬܪܸܥܣܲܪ ܩܲܝܘܼ̈ܡܹܐ ܗܵܠܹܝܢ ܥܲܠ ܟܠܹܗ ܝܼܣܪܵܝܹܠ ܘܲܡܬܲܪܣܹܝܢ ܠܡܲܠܟܵܐ ܘܲܠܒܲܝܬܹ̇ܗ ܘܲܠܚܲܝܠܵܐ. ܝܲܪܚܵܐ ܒܫܲܢ̄ܬܵܐ ܐܵܚܹܕ݂ ܥܲܠ ܚܲܕ݂ ܠܲܡܬܲܪܣܵܝܘܼ. 8: ܘܲܗܵܠܹܝܢ ܫܡܵܗܲܝ̈ܗܘܿܢ: ܒܲܪ ܚܘܿܪ ܒܛܘܼܪܵܐ ܕܐܲܦܪܹܝܡ. 9: ܒܲܪ ܕܩܲܪ ܒܡܲܩܲܨ ܘܲܒ̣ܫܲܥ̱ܠܒ̣ܝܼܡ: ܘܲܒ̣ܒܹܝܬ̣ ܫܡܸܫ: ܘܒ̣ܐܝܼܠܘܿܢ ܕܒܹܝܬ̣ ܚܲܢܵܢ. 10: ܒܲܪ ܚܲܣܲܕ݂ ܒܪܲܒ̇ܘܼܬ̣: ܕܝܼܠܹܗ ܣܵܟ݂ܘܼܬ̣ ܘܟ݂ܠܵܗ̇ ܐܲܪܥܵܐ ܕܚܵܦܵܪ. 11: ܒܲܪ ܐܲܒ̣ܝܼܥܵܕ݂ܵܒ̣ ܒܲܢܦܬ̇ܕ̇ܘܿܪ: ܛܵܦܲܬ̣ ܒܵܪܬ̣ ܫܠܹܝܡܘܿܢ ܗܘ̤ܵܬ̣ ܠܹܗ ܐܲܢ̄ܬ̇ܬ̣ܵܐ. 12: ܒܲܥܢܵܐ ܒܲܪ ܐܲܚܠܘܿܕ݂ ܒܬܲܥܢܵܟ݂ ܘܲܒ̣ܡܲܓܕܘܿ: ܘܲܒ̣ܟ݂ܠ ܒܹܝܬ̣ ܝܵܫܵܢ ܕܥܲܠ ܓܹܢ̄ܒ̣ ܨܲܪܬܵܢ: ܡ̣ܢ ܬܚܹܝܬ̣ ܠܐܝܼܙܲܪܥܹܝܠ: ܡ̣ܢ ܒܹܝܬ̣ ܝܵܫܵܢ ܘܲܥܕܲܡܵܐ ܠܐܲܒܸܠ ܡܚܘܿܠܵܐ: ܘܲܥܕܲܡܵܐ ܠܥܸܒ̣ܪܵܐ ܕܲܢܩܸܡܥܲܡ. 13: ܒܲܪ ܓܲܒܲܪ ܒܪܵܡܲܬ̣ ܓܸܠܥܵܕ݂: ܕܝܼܠܹܗ ܚܒܸܠ ܝܵܐܝܼܪ ܒܲܪ ܡܢܲܫܹܐ: ܕܝܼܠܹܗ ܚܒܸܠ ܐܲܪܓ̇ܘܿܒ̣ ܕܲܒ̣ܒܲܝܫܵܢ ܫܬ̇ܝܼܢ ܩܘܼܪ̈ܝܵܐ ܪܵܘ̱ܪ̈ܒ̣ܵܬ̣ܵܐ: ܕܐܝܼܬ̣ ܠܗܹܝܢ ܫܘܼܪܹ̈ܐ ܘܣܘܼܟ̇ܪܹ̈ܐ ܘܬܲܪ̈ܥܹܐ ܕܲܢܚܵܫܵܐ. 14: ܐܲܚܝܼܢܵܕ݂ܵܒ̣ ܒܲܪ ܓܲܕ̇ܘܼ ܒܡܸ̇ܚܢܝܼܡ. 15: ܐܲܚܝܼܡܥܨ ܒܢܲܦ̮ܬܵܠܝܼ: ܐܵܦ ܗ̤ܘ ܢܣܲܒ̣ ܠܒܸܣܡܲܬ̣ ܒܲܪܬܹܗ ܕܲܫܠܹܝܡܘܿܢ ܐܲܢ̄ܬ̇ܬ̣ܵܐ. 16: ܒܲܥܢܵܐ ܒܲܪ ܚܘܿܫܝܼ ܒܐܵܫܹܝܪ ܘܲܒ̣ܥܵܠܘܼܬ̣. 17: ܝܘܿܫܵܦܵܛ ܒܲܪ ܦܵܪܘܿܚ ܒܐܝܼܣܵܟ݂ܵܪ. 18: ܫܲܡܥܝܼ ܒܲܪ ܐܲܠܵܐ ܒܒܸܢܝܵܡܹܝܢ. 19: ܓܲܒܲܪ ܒܲܪ ܐܘܿܪܝܼ ܒܐܲܪܥܵܐ ܕܓܸܠܥܵܕ݂: ܐܲܪܥܵܐ ܕܣܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ: ܘܥܘܿܓ̣ ܡܲܠܟܵܐ ܕܒܲܝܫܵܢ: ܘܩܲܝܘܼܡܵܐ ܚܲܕ݂ ܕܒܲܐܪܥܵܐ. 20: ܘܲܝܗܘܼܕ݂ܐ ܘܝܼܣܪܵܝܹܠ: ܣܲܓ̇ܝܼܐܝܼܢ ܐܲܝܟ݂ ܚܵܠܵܐ ܕܥܲܠ ܣܦܲܬ̣ ܝܲܡܵܐ: ܣܘܿܓ̣ܵܐܐ: ܐܵܟ݂ܠܝܼܢ ܘܫܵܬܹܝܢ ܘܚܵܕ݂ܝܼܢ. 21: ܘܲܫܠܹܝܡܘܿܢ ܫܲܠܝܼܛ ܗ̄ܘ̣̱ܵܐ ܒܟ݂ܠܗܹܝܢ ܡܲܠܟ̇ـ̈ـܘܵܬ̣ܵܐ: ܡ̣ܢ ܢܲܗܪܵܐ ܕܐܲܪܥܵܐ ܕܲܦܠܸܫ̈ܬܵܝܹܐ: ܘܲܥܕܲܡܵܐ ܠܲܬ̣ܚܘܼܡܵܐ ܕܡܸܨܪܹܝܢ ܘܲܡܩܲܪܒ̣ܝܼܢ ܩܘܼܪ̈ܒܵܢܹܐ: ܘܦܵܠܚܝܼܢ ܠܡܲܠܟܵܐ ܫܠܹܝܡܘܿܢ ܟܠ ܝܵܘ̈ܡܲܝ ܚܲܝܵܘ̈ܗܝ. 22: ܘܲܗܘ̤ܵܐ ܠܲܚܡܹܗ ܕܲܫܠܹܝܡܘܿܢ ܒܝܵܘܡܵܐ ܚܲܕ݂ ܬܠܵܬ̣ܝܼܢ ܟܘܿܪ̈ܝܼܢ ܣܡܝܼܕ݂ܵܐ: ܘܸܫܬ̇ܝܼܢ ܟܘܿܪ̈ܝܼܢ ܩܲܡܚܵܐ. 23: ܘܥܸܣܪܵܐ ܬܵܘܪ̈ܝܼܢ ܕܦܸܛܡܵܐ: ܘܥܸܣܪܝܼܢ ܬܵܘܪ̈ܝܼܢ ܕܪܸܥܝܵܐ: ܘܲܡܵܐܐ ܥܵـ̈ـܢܵܐ: ܣܛܲܪ ܡ̣ܢ ܐܲܝ̈ܠܹܐ: ܘܲܛܒܲـ̈ـܝܵܐ: ܘܝܲܚܡܘܼܪܹ̈ܐ: ܘܥܵܘܦܵܐ ܡܦܲܛܡܵܐ. 24: ܡܸܛܠ ܕܗ̤ܘ ܫܲܠܝܼܛ ܗ̄ܘ̣ܵܐ ܒܟ݂ܠ ܥܒ̣ܵܪ ܢܲܗܪܵܐ: ܡ̣ܢ ܬܲܚܦܝܼܣ ܘܲܥܕܲܡܵܐ ܠܥܵܐܙܵܐ: ܘܲܒ̣ܟ݂ܠܗܘܿܢ ܡܲܠ̈ܟܹ̇ܐ ܕܒܲܥܒ̣ܵܪ ܢܲܗܪܵܐ ܘܲܫܠܵܡܵܐ ܗܘ̤ܵܐ ܠܹܗ ܡ̣ܢ ܟܠܗܘܿܢ ܣܸܛܪ̈ܵܘܗܝ ܘܡ̣ܢ ܟܠܗܘܿܢ ܚܕ݂ܵܪ̈ܵܘܗܝ. 25: ܘܝܼܬܸܒ̣ ܝܼܗܘܼܕ݂ܵܐ ܘܝܼܣܪܵܝܹܠ ܒܫܸܠܝܵܐ: ܐ̄ܢܵܫ ܬܚܹܝܬ̣ ܓܘܼܦܢܵܘ̈ܗܝ: ܘܲܬ̣ܚܹܝܬ̣ ܬܹܐܢܵܘ̈ܗܝ: ܡ̣ܢ ܕܵܢ ܘܲܥܕܲܡܵܐ ܠܒܲܪ ܫܒܲܥ: ܟܠܗܘܿܢ ܝܵܘ̈ܡܵܬܹܗ ܕܲܫܠܹܝܡܘܿܢ. 26: ܘܲܗܘ̤ܵܘ ܠܲܫܠܹܝܡܘܿܢ: ܐܲܪܒ̇ܥܝܼܢ ܐܲܠܦ̈ܝܼܢ ܐܘܿܪ̈ܵܘܵܢ ܕܪ̈ܲܟ݂ܫܵܐ ܠܲܪܟ݂ܘܿܒܹܗ: ܘܲܬ̣ܪܸܥܣܲܪ ܐܲܠܦ̈ܝܼܢ ܦܲܪ̈ܵܫܝܼܢ. 27: ܘܲܡܬܲܪܣܹܝܢ ܩܲܝܘܼܡܹ̈ܐ ܗܵܠܹܝܢ ܠܡܲܠܟܵܐ ܫܠܹܝܡܘܿܢ. ܘܲܠܟ݂ܠ ܕܩܵܪܸܒ̣ ܠܦܵܬ̣ܘܿܪܹܗ ܕܡܲܠܟܵܐ ܫܠܹܝܡܘܿܢ: ܓܒܲܪ ܒܝܲܪܚܹܗ: ܘܠܵܐ ܡܒܲܨܪܝܼܢ ܡܸܕܸ̇ܡ. 28: ܘܲܣܥܵܪܹ̈ܐ ܘܬܸܒ̣ܢܵܐ ܠܪ̈ܲܟ݂ܫܵܐ ܘܲܠܣܘܼܣܵـ̈ـܘܵܬ̣ܵܐ: ܡܲܝܬܹ̇ܝܢ ܠܐܲܬ̣ܪܵܐ ܕܗܵܘܹ̇ܐ ܬܲܡܵܢ ܐ̄ܢܵܫ ܐܲܝܟ݂ ܙܸܕ݂ܩܹܗ. 29: ܘܝܲܗ̄ܒ̣ ܐܲܠܵܗܵܐ ܠܲܫܠܹܝܡܘܿܢ ܚܸܟ݂ܡ̱ܬ̣ܵܐ ܘܣܲܟ̇ܘܼܠܬ̣ܵܢܘܼܬ̣ܵܐ ܘܪܲܒ̇ܘܼܬ̣ ܠܸܒܵܐ: ܣܘܿܓ̣ܵܐܐ ܕܛܵܒ̣. 30: ܘܣܸܓܝܲܬ̤ ܚܸܟ݂ܡ̱ܬܹܗ ܕܲܫܠܹܝܡܘܿܢ ܡ̣ܢ ܚܸܟ݂ܡܲܬ̣ ܟܠ ܒ̈ܢܲܝ ܡܲܕ݂ܢ̱ܚܵܐ: ܘܡ̣ܢ ܚܸܟ݂ܡܲܬ̣ܗܘܿܢ ܕܡܸܨܪ̈ܵܝܹܐ. 31: ܘܲܗܘ̤ܵܐ ܚܲܟ̇ܝܼܡ ܡ̣ܢ ܟܠ ܐ̄ܢܵܫ: ܡ̣ܢ ܐܵܬ̣ܵܢ ܡܲܕ݂ܢ̱ܚܵܝܵܐ: ܘܗܵܡܵܢ ܘܟܲܠܟܵܠ ܘܕܲܪܕܲܥ ܒ̈ܢܲܝ ܡܵܚܘܿܠ. ܘܲܗܘ̤ܵܐ ܫܡܹܗ ܒܟ݂ܠܗܘܿܢ ܥܲܡܡܹ̈ܐ: ܕܒܲܚܕ݂ܵܪ̈ܵܘܗܝ. 32: ܘܡܲܠܸܠ̣ ܬܠܵܬ̣ܵܐ ܐܲܠܦ̈ܝܼܢ ܡܲܬ̣̈ܠܝܼܢ. ܘܲܗ̤ܘܲܝ̈ ܬܸܫܒ̇ـ̈ـܚܵܬܹܗ ܐܵܠܹܦ ܘܚܲܡܸܫ. 33: ܘܡܲܠܸܠ̣ ܥܲܠ ܐܝܼܠܵܢܹ̈ܐ: ܡ̣ܢ ܐܲܪ̈ܙܹܐ ܕܠܸܒ̣ܢܵܢ: ܘܲܥܕܲܡܵܐ ܠܠܵܘܦܵܐ ܕܢܵܦܹ̇ܩ ܒܐܸܣܬ̣ܵܐ. ܘܡܲܠܸܠ. ܥܲܠ ܒܥܝܼܪܵܐ ܘܥܲܠ ܦܵܪܲܚܬ̣ܵܐ: ܘܥܲܠ ܪ̈ܲܚܫܵܐ ܘܥܲܠ ܢܘܼܢܹ̈ܐ. 34: ܘܐܵܬܹ̇ܝܢ ܡ̣ܢ ܟܠܗܘܿܢ ܥܲܡܡܹ̈ܐ ܠܡܸܫܡܲܥ ܚܸܟ݂ܡ̱ܬܹܗ ܕܲܫܠܹܝܡܘܿܢ: ܡܟ̤!!!! ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ. ܘܲܡܩܲܒܸ̇ܠ ܗ̄ܘ̣ܵܐ ܩܘܼܪ̈ܒܵܢܹܐ: ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ ܕܲܫܡܲܥܘ ܚܸܟ݂ܡ̱ܬܹܗ.

 ܩܹܦܵܠܹܐܘܿܢ: ܗ.

1: ܘܫܲܕܲܪ ܚܝܼܪܵܡ ܡܲܠܟܵܐ ܕܨܘܿܪ ܥܲܒ̣ܕܵܘ̈ܗܝ ܠܘܵܬ̣ ܫܠܹܝܡܘܿܢ: ܡܸܛܠ ܕܲܫ̣ܡܲܥ ܕܠܹܗ ܡܫܲܚ̣ܘ ܕܢܲܡܠܸܟ݂ ܚܠܵܦ ܐܲܒ̣ܘܼܗܝ: ܡܸܛܠ ܕܲܪܚܸܡ ܗ̄ܘ̣ܵܐ ܚܝܼܪܵܡ ܠܕ݂ܵܘܝܼܕ݂ ܟܠܗܘܿܢ ܝܵܘ̈ܡܵܬ̣ܵܐ. 2: ܘܲܫܠܲܚ ܚܝܼܪܵܡ ܠܲܫܠܹܝܡܘܿܢ ܘܒܲܪܟܹܗ. ܘܲܫܠܲܚ ܫܠܹܝܡܘܿܢ ܠܚܝܼܪܵܡ ܘܐܸܡܲܪ. 3: ܐܲܢ̄ܬ̇ ܝܵܕܲܥ ܐܲܢ̄ܬ̇ ܠܕ݂ܵܘܝܼܕ݂ ܐܵܒ̣ܝ: ܕܠܵܐ ܐܸܫܟܲܚ ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܐ ܐܲܠܵܗܹܗ: ܡܸܛܠ ܩܪ̈ܵܒܹܐ ܣܲܓ̇ܝܼ̈ܐܹܐ ܕܚܲܕ݂ܪܘܼܗܝ: ܥܕܲܡܵܐ ܕܐܲܫܠܸܡ ܐܸܢܘܿܢ ܡܵܪܝܵܐ ܬܚܹܝܬ̣ ܦܲܣܬ̣ܵܐ ܕܪܸܓ̣ܠܹܗ. 4: ܘܗܵܫܵܐ ܐܲܢܝܼܚ ܠܝܼ ܡܵܪܝܵܐ ܐܲܠܵܗܝ ܡ̣ܢ ܟܠܗܘܿܢ ܚܕ݂ܵܪ̈ܲܝ ܠܲܝܬ̇ ܣܵܛܵܢܵܐ ܐܵܦܠܵܐ ܦܓ̣ܥܵܐ ܒܝܼܫܵܐ. 5: ܘܗܵܐ ܐܵܡܲܪ ܐ̄ܢܵܐ ܕܐܸܒ̣ܢܸܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܝ: ܐܲܝܟ݂ ܕܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܐܵܒ̣ܝ ܕܲܒ̣ܪܵܟ݂ ܕܐܲܩܝܼܡܹ̇ܬ̣ ܚܠܵܦܲܝܟ ܥܲܠ ܟܘܼܪܣܝܵܟ݂: ܗ̤ܘ ܢܸܒ̣ܢܸܐ ܒܲܝܬܵܐ ܠܫܹܡܝ. 6: ܘܗܵܫܵܐ ܦܩܘܿܕ݂: ܘܢܸܦܣܩܘܼܢ ܠܝܼ ܡ̣ܢ ܠܸܒ̣ܢܵܢ ܩܲܝܣܹ̈ܐ ܕܐܲܪܙܵܐ. ܘܥܲܒ̣ܕܲܝ̈ ܢܸܗܘܘܿܢ ܥܲܡ ܥܲܒ̣ܕܲܝ̈ܟ ܘܐܲܓ̣ܪܵܐ ܕܥܲܒ̣ܕܲܝ̈ܟ ܐܸܬܸ̇ܠ ܠܵܟ݂: ܟܠ ܡܸܕܸ̇ܡ ܕܐܵܡܲܪ ܐܲܢ̄ܬ̇. ܡܸܛܠ ܕܐܲܢ̄ܬ̇ ܝܵܕܲܥ ܐܲܢ̄ܬ̇: ܕܠܲܝܬ̇ ܒܲܢ ܐ̄ܢܵܫ ܕܝܵܕܲܥ ܠܡܸܦܣܲܩ ܩܲܝܣܹ̈ܐ ܐܲܝܟ݂ ܨܲܝܕ̇ܢܵܝܹ̈ܐ. 7: ܘܟܲܕ݂ ܫ̣ܡܲܥ ܚܝܼܪܵܡ ܡܸܠܵܘ̈ܗܝ ܕܲܫܠܹܝܡܘܿܢ: ܚܕ݂ܝܼ ܛܵܒ̣: ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܝܵܘܡܵܢܵܐ: ܕܝܲܗ̄ܒ̣ ܠܕ݂ܵܘܝܼܕ݂ ܒܪܵܐ ܚܲܟ̇ܝܼܡܵܐ ܥܲܠ ܥܲܡܵܐ ܗܵܢܵܐ ܪܲܒܵܐ. 8: ܘܲܫܠܲܚ ܚܝܼܪܵܡ ܠܲܫܠܹܝܡܘܿܢ: ܘܐܸܡܲܪ ܠܹܗ: ܫܸܡ̇ܥܹܬ̣ ܡܸܕܸ̇ܡ ܕܲܫܠܲܚܬ̇ ܠܝܼ. ܐܸܢܵܐ ܐܸܥܒܸ̇ܕ݂ ܟܠܹܗ ܨܸܒ̣ܝܵܢܵܟ݂: ܒܩܲܝܣܹ̈ܐ ܕܐܲܪ̈ܙܹܐ ܘܲܒ̣ܩܲܝܣܹ̈ܐ ܕܫܲܪ̈ܘܼܝܢܹܐ. 9: ܥܲܒ̣̈ܕܲܝ ܢܸܚܬ̣ܘܼܢ ܡ̣ܢ ܠܸܒ̣ܢܵܢ ܠܝܲܡܵܐ: ܘܐܸܢܵܐ ܐܸܥܒܹ̇ܕ݂ ܐܸܢܘܿܢ ܛܵܘܦܵܐ ܒܝܲܡܵܐ: ܥܕܲܡܵܐ ܠܐܲܬ̣ܪܵܐ ܕܬܸܫܠܘܿܚ ܠܝܼ. ܘܐܲܪܡܸܐ ܐܸܢܘܿܢ ܬܲܡܵܢ. ܘܐܲܢ̄ܬ̇ ܬܸܣܒ̇ܘܿܠ ܐܸܢܘܿܢ ܡ̣̤ܢ ܬܲܡܵܢ ܘܬܸܥܒܸ̇ܕ݂ ܐܵܦ ܐܲܢ̄ܬ̇ ܨܸܒ̣ܝܵܢܝ: ܘܬܸܬܸ̇ܠ ܠܲܚܡܵܐ ܠܒܲܝܬܝ.

10: ܘܲܗܘ̤ܵܐ ܚܝܼܪܵܡ ܝܵܗܹܒ̣ ܠܲܫܠܹܝܡܘܿܢ ܩܲܝܣܹ̈ܐ ܕܐܲܪ̈ܙܹܐ ܘܩܲܝܣܹ̈ܐ ܕܫܲܪ̈ܘܲܝܢܹܐ ܐܲܝܟ݂ ܕܲܨܒ̣ܵܐ. 11: ܘܲܫܠܹܝܡܘܿܢ ܝܲܗ̄ܒ̣ ܠܚܝܼܪܵܡ: ܥܸܣܪܝܼܢ ܐܲܠܦ̈ܝܼܢ ܟܘܿܪ̈ܝܼܢ ܕܚܸܛܹ̈ܐ ܡܹܐܟ݂ܘܼܠܬܵܐ ܠܒܲܝܬܹ̇ܗ: ܘܥܸܣܪܝܼܢ ܐܲܠܦ̈ܝܼܢ ܟܘܿܪ̈ܝܵܐ ܕܡܸܫܚܵܐ ܥܨܝܼܪܵܐ. ܗܵܟܲܢܵܐ ܝܵܗܹܒ̣ ܗ̄ܘ̣ܵܐ ܫܠܹܝܡܘܿܢ ܠܚܝܼܪܵܡ ܒܟ݂ܠ ܫܢܵܐ. 12: ܘܡܵܪܝܵܐ ܝܲܗ̄ܒ̣ ܠܲܫܠܹܝܡܘܿܢ ܚܸܟ݂ܡ̱ܬ̣ܵܐ ܐܲܝܟ݂ ܕܐܸܡܲܪ ܠܹܗ. ܘܲܗܘ̤ܵܐ ܫܠܵܡܵܐ ܒܹܝܬ̣ ܚܝܼܪܵܡ ܠܒܹܝܬ̣ ܫܠܹܝܡܘܿܢ: ܟܠܗܘܿܢ ܝܵܘ̈ܡܵܬ̣ܵܐ: ܘܐܲܩܝܼܡܘ ܬܪ̈ܲܝܗܘܿܢ ܩܝܵܡܵܐ. 13: ܘܐܲܣܸܩ ܡܲܠܟܵܐ ܫܠܹܝܡܘܿܢ ܡܲܕܲܐܬ̣ܵܐ ܡ̣ܢ ܟܠܹܗ ܝܼܣܪܵܝܹܠ ܘܲܗܘ̤ܵܬ̣ ܡܲܕܲܐܬ̣ܵܐ ܬܠܵܬ̣ܝܼܢ ܐܲܠܦ̈ܝܼܢ ܓܲܒ̣ܪ̈ܝܼܢ. 14: ܘܫܲܕܲܪ ܐܸܢܘܿܢ ܠܠܸܒ̣ܢܵܢ: ܥܸܣܪܵܐ ܐܲܠܦ̈ܝܼܢ ܒܝܲܪܚܵܐ ܡܸܬ̣ܚܲܠܦܝܼܢ ܝܲܪܚܵܐ ܗܵܘܹ̇ܝܢ ܒܠܸܒ̣ܢܵܢ: ܘܲܬ̣ܪܹܝܢ ܝܲܪ̈ܚܝܼܢ ܒܒܲܝܬܹ̇ܗ. ܘܐܲܕ݂ܘܿܢܝܼܪܵܡ ܫܲܠܝܼܛ ܗ̄ܘ̣ܵܐ ܥܲܠ ܡܲܕܲܐܬ̣ܵܐ. 15: ܘܲܗܘ̤ܵܘ ܠܲܫܠܹܝܡܘܿܢ ܫܲܒ̣ܥܝܼܢ ܐܲܠܦ̈ܝܼܢ ܩܘܿܦܝܹ̈ܐ: ܘܲܬ̣ܡܵܢܐܝܼܢ ܐܲܠܦ̈ܝܼܢ ܕܦܵܣܥܝܼܢ ܒܛܘܼܪܵܐ. 16: ܣܛܲܪ ܡ̣ܢ ܪܵܘ̱ܪ̈ܒ̣ܵܢܹܐ ܕܩܵܝܡܝܼܢ ܠܲܫܠܹܝܡܘܿܢ ܥܲܠ ܥܒ̣ܵܕ݂ܵܐ: ܬܠܵܬ̣ܵܐ ܐܲܠܦ̈ܝܼܢ ܘܲܬ̣ܠܵܬ̣ܡܵܐܐ: ܕܲܡܫܲܠܛܝܼܢ ܥܲܠ ܥܲܡܵܐ ܕܥܵܒ̣ܕ̇ܝܼܢ ܥܒ̣ܵܕ݂ܵܐ. 17: ܘܲܦܩܲܕ݂ ܡܲܠܟܵܐ: ܘܲܫܩܲܠܘ ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܠܲܡܫܲܟ݂ܠܵܠܘܼܬܹܗ ܠܒܲܝܬܵܐ ܒܟܹܐܦܹ̈ܐ ܦܣ̈ܝܼܥܵܬ̣ܵܐ. 18: ܘܲܦܣܲܥܘ ܒܲܢܵܝܹ̈ܐ ܕܲܫܠܹܝܡܘܿܢ ܘܒܲܢܵܝܹ̈ܐ ܕܚܝܼܪܵܡ: ܘܐܲܪ̈ܓ̇ܘܼܒ̣ܠܹܐ: ܘܬܲܩܸܢܘ ܟܹܐܦܹ̈ܐ ܘܩܲܝܣܹ̈ܐ ܠܒܸܢܝܵܢܵܐ ܕܒܲܝܬܵܐ.

ܩܹܦܵܠܹܐܘܿܢ: ܘ.

1: ܘܲܗܘ̤ܵܐ ܒܲܫܢܲܬ̣ ܐܲܪܒܲܥ ܡܵܐܐ ܘܲܬ̣ܡܵܢܐܝܼܢ ܫܢ̈ܝܼܢ: ܠܡܲܦܲܩܬܵܐ ܕܲܒ̣̈ܢܲܝ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܝܼܢ: ܒܫܲܢ̄ܬܵܐ ܪܒ̣ܝܼܥܵܝܬܵܐ ܒܝܲܪܚܵܐ ܐܝܼܵܪ ܕܗ̤ܘܝܘܼ ܝܲܪܚܵܐ ܬܸܢܝܵܢܵܐ: ܕܐܲܡ̣ܠܸܟ݂ ܫܠܹܝܡܘܿܢ ܥܲܠ ܝܼܣܪܵܝܹܠ: ܫܲܪܝܼ ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ. 2: ܘܒܲܝܬܵܐ ܕܲܒ̣ܢܵܐ ܫܠܹܝܡܘܿܢ ܠܡܵܪܝܵܐ: ܫܬ̇ܝܼܢ ܐܲܡ̈ܝܼܢ ܐܘܼܪܟܹ̇ܗ: ܘܥܸܣܪܝܼܢ ܐܲܡ̈ܝܼܢ ܦܬ̣ܵܝܹܗ: ܘܲܬ̣ܠܵܬ̣ܵܐ ܐܲܡ̈ܝܼܢ ܪܵܘܡܹܗ. 3: ܘܐܸܣܛܘܵܐ ܕܲܩܕ݂ܵܡ ܬܲܪܥܵܐ ܕܒܲܝܬܵܐ: ܥܸܣܪܝܼܢ ܐܲܡ̈ܝܼܢ ܐܘܼܪܟܹ̇ܗ ܠܘܼܩܒܲܠ ܦܬ̣ܵܝܹܗ ܕܒܲܝܬܵܐ: ܘܲܥܣܲܪ ܐܲܡ̈ܝܼܢ ܦܬ̣ܵܝܹܗ ܠܘܼܩܒܲܠ ܐܘܼܪܟܹ̇ܗ ܕܒܲܝܬܵܐ. 4: ܘܲܥܒܲܕ݂ ܠܒܲܝܬܵܐ ܟܵܘܹ̈ܐ ܫܲܛܝܼ̈ܦܵܬ̣ܵܐ ܘܐܲܛܝܼ̈ܡܵܬ̣ܵܐ. 5: ܘܲܒ̣ܢܵܐ ܥܲܠ ܐܸܣܵܘ̈ܗܝ ܕܒܲܝܬܵܐ ܚܵܕ݂ܪ̈ܵܬ̣ܵܐ ܟܲܕ݂ ܚܵܕܲܪ. ܐܸܣܹ̈ܐ ܕܒܲܝܬܵܐ ܐܲܚܕܲܪ ܠܗܲܝܟ̇ܠܵܐ ܘܲܠܒܹܝܬ̣ ܚܘܼܣܵܝܵܐ. 6: ܘܲܥ̣ܒܲܕ݂ ܚܵܕ݂ܪܬܵܐ ܬܲܚܬܲܝܬܵܐ ܚܲܡܸܫ ܐܲܡ̈ܝܼܢ ܦܬ̣ܵܝܵܗ̇: ܘܡܸܨܥܵܝܬܵܐ ܫܸܬ̣ ܐܲܡ̈ܝܼܢ ܦܬ̣ܵܝܵܗ̇: ܘܲܬ̣ܠܝܼܬ̣ܵܝܬܵܐ ܫܒܲܥ ܐܲܡ̈ܝܼܢ ܦܬ̣ܵܝܵܗ̇: ܡܸܛܠ ܕܲܓ̣ܕ݂ܵܢܦܹ̈ܐ ܥ̣ܒܲܕ݂ ܠܒܲܝܬܵܐ ܟܲܕ݂ ܚܵܕܲܪ ܡ̣ܢ ܠܒܲܪ: ܕܢܸܗܘܹܐ ܐܲܚܝܼܕ݂ ܐܸܣܹ̈ܐ ܒܐܸܣܹ̈ܐ. 7: ܘܒܲܝܬܵܐ ܟܲܕ݂ ܡܸܬ̣ܒ̇ܢܹܐ: ܒܟܹܐܦܹ̈ܐ ܫܠܲܡ̱ܠ̈ܡܵܬ̣ܵܐ ܕܲܫܩܘܼܠܬܵܐ ܐܸܬ̣ܒ̇ܢܝܼ ܘܐܲܪܙܲܦܬ̣ܵܐ ܘܡܲܓܸܙܪܵܐ ܘܟ݂ܠ ܡܵܐܢ ܕܦܲܪܙܠܵܐ: ܠܵܐ ܐܸܫܬ̇ܡܲܥ ܒܒܲܝܬܵܐ ܟܲܕ݂ ܡܸܬ̣ܒ̇ܢܹܐ.

8: ܘܬܲܪܥܵܐ ܕܚܵܕ݂ܲܪܬܵܐ ܡܸܨܥܵܝܬܵܐ: ܠܣܸܛܪܹܗ ܕܒܲܝܬܵܐ ܬܲܝ̱ܡܢܵܝܵܐ. ܘܲܒ̣ܩܲܛܲܪܩܛܵܐ ܣܵܠܩܝܼܢ ܠܡܸܨܥܵܝܬܵܐ: ܘܡ̣ܢ ܡܸܨܥܵܝܬܵܐ ܣܵܠܩܝܼܢ ܠܲܬ̣ܠܝܼܬ̣ܵܝܬܵܐ. 9: ܘܲܒ̣ܢܵܝܗܝ ܠܒܲܝܬܵܐ ܘܫܲܠܡܹܗ: ܘܛܲܠܠܹܗ ܠܒܲܝܬܵܐ ܒܓ̣ܘܿܒܹ̈ܐ ܢܣܝܼܪܵܬ̣ܵܐ ܕܐܲܪܙܵܐ. 10: ܘܲܒ̣ܢܵܐ ܚܵܕ݂ܪ̈ܵܬ̣ܵܐ ܥܲܠ ܟܠܹܗ ܒܲܝܬܵܐ: ܚܲܡܸܫ ܐܲܡ̈ܝܼܢ ܪܵܘܡܗܹܝܢ: ܘܐܵܘܚܕܹܗ ܠܒܲܝܬܵܐ ܒܩܲܝܣܹ̈ܐ ܕܐܲܪܙܵܐ. 11: ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܫܠܹܝܡܘܿܢ ܠܡܹܐܡܲܪ. 12: ܒܲܝܬܵܐ ܗܵܢܵܐ ܕܲܒ̣ܢܲܝܬ̇: ܐܸܢ ܬܗܲܠܸܟ݂ ܒܲܩܝܵܡܲܝ̈: ܘܕ݂ܝܼܢܲܝ̈ ܬܸܛܲܪ: ܘܬܸܥܒܸ̇ܕ݂ ܟܠܗܘܿܢ ܦܘܼܩ̈ܕܵܢܲܝ: ܘܲܬ̣ܗܲܠܸܟ݂ ܒܗܘܿܢ: ܐܲܩܝܼܡ ܦܸܬ̣ܓ̣ܵܡܲܝ̈ ܥܲܡܵܟ݂ ܕܐܸܡ̇ܪܹܬ̣ ܠܕ݂ܵܘܝܼܕ݂ ܐܒ̣ܘܼܟ݂. 13: ܘܐܸܫܪܹܐ ܒܓ̣ܵܘ ܒ̈ܢܲܝ ܝܼܣܪܵܝܹܠ: ܘܠܵܐ ܐܸܫܒ̇ܘܿܩ ܠܥܲܡܝ ܝܼܣܪܵܝܹܠ. 14: ܘܲܒ̣ܢܵܝܗܝ ܫܠܹܝܡܘܿܢ ܠܒܲܝܬܵܐ ܘܫܲܟ݂ܠ̱ܠܹܗ. 15: ܘܲܒ̣ܢ̣ܵܐ ܐܸܣܵܘ̈ܗܝ ܕܒܲܝܬܵܐ ܡ̣ܢ ܠܓ̣ܵܘ ܒܲܢܣܵܪܹ̈ܐ ܕܐܲܪܙܵܐ. ܡ̣ܢ ܫܲܬ̣̱ܐܣܵܘ̈ܗܝ ܘܲܥܕܲܡܵܐ ܠܲܫܡܵܘ̈ܗܝ: ܩܲܪܡܹܗ ܩܲܝܣܵܐ ܡ̣ܢ ܠܓ̣ܵܘ. ܘܩܵܡ̣ ܫܲܬ̣̱ܐܣܵܘ̈ܗܝ ܕܒܲܝܬܵܐ ܒܲܢܣܵܪܹ̈ܐ ܕܫܲܪ̈ܘܲܝܢܹܐ. 16: ܘܲܒ̣ܢܵܐ ܫܠܹܝܡܘܿܢ ܥܸܣܪܝܼܢ ܐܲܡ̈ܝܼܢ ܡ̣ܢ ܫܦܘܿܠܵܘ̈ܗܝ ܕܒܲܝܬܵܐ ܒܲܢܣܵܪܹ̈ܐ ܕܐܲܪܙܹܐ: ܘܡ̣ܢ ܫܲܬ̣̱ܐܣܵܘ̈ܗܝ ܘܲܥܕܲܡܵܐ ܠܲܫܡܵܘ̈ܗܝ: ܘܲܒ̣ܢܵܝܗܝ ܡ̣ܢ ܠܓ̣ܵܘ ܠܲܩܕ݂ܘܿܫ ܩܘܼܕ݂ܫܹ̈ܐ. 17: ܥܸܣܪܝܼܢ ܐܲܡ̈ܝܼܢ ܗܵܘܹ̇ܐ ܒܲܝܬܵܐ: ܗܲܝܟ̇ܠܵܐ ܗܵܘ̇ ܓܵܘܵܝܵܐ. 18: ܘܐܲܪܙܵܐ ܩܪܝܼܡ ܗ̄ܘ̣ܵܐ ܒܲܝܬܵܐ: ܡ̣ܢ ܠܓ̣ܵܘ ܘܲܓ̣ܠܝܼܦ ܗ̄ܘ̣ܵܐ ܗܸܠܩܹ̈ܐ ܘܒ̣ܵܛܠܹ̈ܐ ܘܫܘܿܫܲܢܹ̈ܐ. ܘܟ݂ܠܹܗ: ܕܐܲܪܙܵܐ ܗ̄ܘ̣ܵܐ. ܘܟܹܐܦܵܐ ܠܵܐ ܡܸܬ̣ܚܲܙܝܵܐ ܗ̄ܘ̣ܵܬ̣ ܒܹܗ. 19: ܘܒܹܝܬ̣ ܩܘܼܕ݂ܫܵܐ ܒܓ̣ܵܘ ܒܲܝܬܵܐ ܡ̣ܢ ܠܓ̣ܵܘ ܬܲܩܸܢ: ܠܲܡܩܵܡ ܬܲܡܵܢ ܩܹܒ̣ܘܿܬ̣ܵܐ ܕܲܩܝܵܡܹܗ ܕܡܵܪܝܵܐ. 20: ܘܲܩܕ݂ܵܡ ܒܹܝܬ̣ ܩܘܼܕ݂ܫܵܐ: ܐܲܡ̈ܝܼܢ ܐܘܼܪܟܹ̇ܗ: ܘܥܸܣܪܝܼܢ ܦܬ̣ܵܝܹܗ: ܘܥܸܣܪܝܼܢ ܐܲܡ̈ܝܼܢ ܪܵܘܡܹܗ ܘܩܲܪܡܹܗ ܕܲܗܒ̣ܵܐ ܣܢܝܼܢܵܐ. ܘܲܩ̣ܪܲܡ ܠܡܲܕ݂ܒ̇ܚܵܐ ܒܐܲܪܙܵܐ. 21: ܘܩܪܡܹܗ ܫܠܹܝܡܘܿܢ ܠܒܲܝܬܵܐ ܡ̣ܢ ܠܓ̣ܵܘ ܒܕܲܗܒ̣ܵܐ ܣܢܝܼܢܵܐ. ܘܲܥܒܲܕ݂ ܦܪܘܼܣܬ̇ܕ݂ܵܐ ܩܕ݂ܵܡ ܒܹܝܬ̣ ܡܲܩܕ̇ܫܵܐ: ܘܩܲܪܡܹܗ ܕܲܗܒ̣ܵܐ. 22: ܘܲܠܟ݂ܠܹܗ ܒܲܝܬܵܐ ܩ̣ܪܲܡ ܕܲܗܒ̣ܵܐ: ܥܕܲܡܵܐ ܕܲܫܠܸܡ ܟܠܹܗ ܒܲܝܬܵܐ. ܘܟ݂ܠܹܗ ܡܲܕ݂ܒ̇ܚܵܐ ܕܒܹܝܬ̣ ܡܲܩܕ̇ܫܵܐ ܩܲܪܡܹܗ ܕܲܗܒ̣ܵܐ.

23: ܘܲܥ̣ܒܲܕ݂ ܒܹܝܬ̣ ܩܘܼܕ݂ܫܵܐ ܬܪܹܝܢ ܟܪ̈ܘܿܒ̣ܝܼܢ ܕܩܲܝܣܵܐ. ܡܫܘܼܚܬ̣ܵܐ ܥܣܲܪ ܐܲܡ̈ܝܼܢ ܐܘܼܪܟܹ̇ܗ: ܘܚܲܡܸܫ ܐܲܡ̈ܝܼܢ ܦܬ̣ܵܝܹܗ: ܕܲܟ݂ܪܘܿܒ̣ܵܐ ܚܲܕ݂. 24: ܘܚܲܡܸܫ ܐܲܡ̈ܝܼܢ ܟܸܢܦܹܗ ܕܲܟ݂ܪܘܿܒ̣ܵܐ ܚܲܕ݂: ܘܚܲܡܸܫ ܐܲܡ̈ܝܼܢ ܟܸܢܦܹܗ ܕܲܟ݂ܪܘܿܒ̣ܵܐ ܐ̄ܚܪܹܢܵܐ. ܘܲܥܣܲܪ ܐܲܡ̈ܝܼܢ ܡ̣ܢ ܪܸܫ ܓܸܦܵܘ̈ܗܝ ܘܲܥܕܲܡܵܐ ܠܪܹܫ ܓܸܦܵܘ̈ܗܝ. 25: ܘܲܥܣܲܪ ܐܲܡ̈ܝܼܢ ܟܪܘܿܒ̣ܵܐ ܐ̄ܚܪܹܢܵܐ: ܡܫܘܼܚܬܵܐ ܚܕ݂ܵܐ ܘܩܵܘܡܬ̣ܵܐ ܚܕ݂ܵܐ ܠܲܬ̣ܪ̈ܲܝܗܘܿܢ ܟܪ̈ܘܿܒܹܐ. 26: ܘܪܵܘܡܹܗ ܕܲܟ݂ܪܘܿܒ̣ܵܐ ܚܲܕ݂: ܥܣܲܪ ܐܲܡ̈ܝܼܢ. ܘܗܵܟܲܢܵܐ ܟܪܘܿܒ̣ܵܐ ܐ̄ܚܪܹܢܵܐ. 27: ܘܲܥ̣ܒܲܕ݂ ܟܪ̈ܘܿܒܹܐ ܒܓ̣ܵܘ ܒܲܝܬܵܐ ܓܵܘܵܝܵܐ: ܘܲܦ̣ܪܲܣ ܓܸܦܲܝ̈ܗܘܿܢ ܕܲܟ݂ܪ̈ܘܿܒܹܐ. ܘܕܸܒ̣ܩܲܬ̤ ܟܸܢܦܹܗ ܕܚܲܕ݂ ܒܐܸܣܬ̣ܵܐ: ܘܟܸܢܦܹܗ ܕܲܟ݂ܪܘܿܒ̣ܵܐ ܐ̄ܚܪܹܢܵܐ ܕܸܒ̣ܩܲܬ̤ ܒܐܸܣܬ̣ܵܐ ܐ̄ܚܪܹܬ̣ܵܐ. ܘܓܸܦܲܝ̈ܗܘܿܢ ܕܲܒ̣ܡܸܨܥܲܬ̣ ܒܲܝܬܵܐ ܢܲܩܝܼܦܝܼܢ ܚܲܕ݂ ܠܚܲܕ݂. 28: ܘܲܩ̣ܪܲܡ ܐܸܢܘܿܢ ܠܲܟ݂ܪ̈ܘܿܒܹܐ ܕܲܗܒ̣ܵܐ ܣܢܝܼܢܵܐ. 29: ܘܲܠܟ݂ܠܗܹܝܢ ܐܸܣܵܘ̈ܗܝ ܕܒܲܝܬܵܐ ܐܲܟ݂ܪܸܟ݂ ܗܸܠܩܹ̈ܐ. ܘܲܓ̣ܠܲܦ ܒܵܛ̈ܠܹܐ: ܘܲܟ݂ܪ̈ܘܿܒܹܐ: ܘܕܸܩ̈ܠܹܐ: ܘܫܘܿܫܲܢܹ̈ܐ: ܡ̣ܢ ܠܓ̣ܵܘ ܘܡ̣ܢ ܠܒܲܪ. 30: ܘܲܠܫܲܬ̣ܐ̱ܣܵܘ̈ܗܝ ܕܒܲܝܬܵܐ ܩܪܲܡ ܕܲܗܒ̣ܵܐ: ܡ̣ܢ ܠܓ̣ܵܘ ܘܡ̣ܢ ܠܒܲܪ. 31: ܘܲܠܬܲܪܥܵܐ ܕܒܹܝܬ̣ ܡܲܩܕ̇ܫܵܐ: ܥ̣ܒܲܕ݂ ܬܪܥܵܐ ܕܩܲܝܣܵܐ ܕܲܡܫܘܼܚܬܵܐ: ܡܫܲܪܪܝܼܢ ܦܪ̈ܘܼܣܬ̇ܕ݂ܵܘܗܝ ܘܲܡܥܲܫܢܝܼܢ. 32: ܘܲܬ̣ܪܹܝܢ ܬܲܪ̈ܥܝܼܢ ܕܩܲܝܣܵܐ ܕܲܡܫܘܼܚܬ̣ܵܐ. ܘܲܓ̣ܠܲܦ ܥܠܲܝܗܘܿܢ ܓܠܵܦܹ̈ܐ: ܟܪ̈ܘܿܒܹܐ: ܘܒ̣ܵܛ̈ܠܹܐ: ܘܕܸܩ̈ܠܹܐ: ܘܫܘܿܫܲܢܹ̈ܐ. ܘܲܩ̣ܪܲܡ ܐܸܢܘܿܢ ܕܲܗܒ̣ܵܐ: ܘܐܲܣܓ̇ܝܼ ܥܲܠ ܟܪ̈ܘܿܒܹܐ ܘܥܲܠ ܕܸܩ̈ܠܹܐ ܕܲܗܒ̣ܵܐ.

33: ܘܗܵܟܲܢܵܐ ܥ̣ܒܲܕ݂ ܠܬܲܪܥܵܐ ܕܗܲܝܟ̇ܠܵܐ: ܦܪ̈ܘܼܣܬ̇ܕ݂ܵܘܗܝ ܕܩܲܝܣܵܐ ܕܲܡܫܘܼܚܬܵܐ: ܫܚܝܼ̈ܡܹܐ ܘܲܡܪܲܒ̇ܥܝܼܢ.

34: ܘܲܬ̣ܪܹܝܢ ܬܲܪ̈ܥܝܼܢ ܕܩܲܝܣܵܐ ܕܫܲܪ̈ܘܲܝܢܹܐ: ܬܪܹܝܢ ܣܸܛܪ̈ܵܘܗܝ ܕܚܲܕ݂ ܬܲܪܥܵܐ ܓܠܝܼܦܝܼܢ ܘܲܬ̣ܪܹܝܢ ܣܸܛܪܵܘܗܝ ܕܬܲܪܥܵܐ ܐ̄ܚܪܹܢܵܐ ܓܠܝܼܦܝܼܢ. 35: ܘܲܓ̣ܠܲܦ ܟܪ̈ܘܿܒܹܐ: ܘܒܲܛ̈ܠܹܐ: ܘܕܸܩ̈ܠܹܐ: ܘܫܘܿܫܲܢܹ̈ܐ. ܘܲܩܪܲܡ ܒܕܲܗܒ݂ܵܐ ܫܲܦܝܼܪ ܓܠܵܦܹ̈ܐ. 36: ܘܲܒ̣ܢܵܐ ܠܕ݂ܵܪܬܵܐ ܓܵܘܵܝܬܵܐ: ܬܠܵܬ̣ܵܐ ܣܚܵܦ̈ܝܼܢ ܕܲܦ̮ܣܝܼܠܬܵܐ: ܘܲܣܚܵܦܵܐ ܕܲܟ݂ܪ̈ܵܡܵܬ̣ܵܐ ܕܐܲܪܙܵܐ. 37: ܘܲܒ̣ܫܲܢ̄ܬܵܐ ܪܒ̣ܝܼܥܵܝܬܵܐ ܐܸܫܬܲܐܣܲܬ̣ ܒܲܝܬܹ̇ܗ ܕܡܵܪܝܵܐ ܒܐܝܼܪܲܚ ܐܝܼܵܪ. 38: ܘܒܲܫܢܲܬ̣ ܚܕܲܥܸܣܪܹ̈ܐ ܒܐܝܼܪܲܚ ܬܸܫܪܝܼ ܐ̄ܚܪܵܝ: ܘܗ̤ܘܝܘܼ ܝܲܪܚܵܐ ܬܡܝܼܢܵܝܵܐ: ܫܠܸܡ ܒܲܝܬܵܐ ܒܟ݂ܠܗܹܝܢ ܨܸܒ̣̈ܘܵܬܹܗ ܘܲܒ̣ܟ݂ܠܗܘܿܢ ܥܒ̣ܸܵܕ݂ܵܘ̈ܗܝ ܘܲܒ̣ܢܵܝܗܝ ܠܲܫܒܲܥ ܫܢ̈ܝܼܢ.

ܩܹܦܵܠܹܐܘܿܢ: ܙ.

1: ܘܲܠܒܲܝܬܹ̇ܗ ܒܢ̣ܵܐ ܫܠܹܝܡܘܿܢ ܠܲܬ̣ܠܵܬܲܥܸܣܪܹ̈ܐ ܫܢ̈ܝܼܢ: ܘܐܸܫܬܲܟ݂ܠܲܠ ܟܠܹܗ ܒܲܝܬܵܐ. 2: ܘܲܒ̣ܢܵܐ ܒܹܝܬ̣ ܥܵܒ̣ܵܐ ܕܠܸܒ̣ܢܵܢ: ܡܵܐܐ ܐܲܡ̈ܝܼܢ ܐܘܼܪܟܹ̇ܗ: ܘܚܲܡܫܝܼܢ ܐܲܡ̈ܝܼܢ ܦܬ̣ܵܝܹܗ: ܘܲܬ̣ܠܵܬ̣ܝܼܢ ܐܲܡ̈ܝܼܢ ܪܵܘܡܹܗ: ܥܲܠ ܐܲܪܒ̇ܥܵܐ ܣܕ݂ܪ̈ܝܼܢ ܕܥܲܡܘܼ̈ܕܹܐ: ܕܐܲܪܙܵܐ: ܘܲܟ݂ܪ̈ܵܡܵܬ̣ܵܐ ܕܐܲܪܙܵܐ ܥܲܠ ܥܲܡܘܼ̈ܕܹܐ. 3: ܘܲܡܛܲܠܲܠ ܒܐܲܪ̈ܙܹܐ ܡ̣ܢ ܠܥܸܠ. ܥܲܠ ܚܹـ̈ـܬܹܐ ܕܥܲܠ ܥܲܡܘܼ̈ܕܹܐ ܐܲܪܒ̇ܥܝܼܢ ܘܚܲܡܸܫ: ܚܲܡܫܲܥܸܣܪܹ̈ܐ ܠܣܸܕ݂ܪܵܐ. 4: ܘܐܲܟ݂ܣܸܕ݂ܪܹ̈ܐ ܬܠܵܬ̣ܵܐ ܣܸܕ݂ܪ̈ܝܼܢ: ܘܡܲܩ̈ܒ̇ܠܵܢ ܚܕ݂ܵܐ ܠܲܚܕ݂ܵܐ ܬܠܵܬ̣ ܙܲܒ̣ܢ̈ܝܼܢ. 5: ܘܟ݂ܠܗܘܿܢ ܬܲܪ̈ܥܹܐ ܘܣܸܦܹ̈ܐ ܡܪܲܒ̇ܥܝܼܢ: ܘܡܲܩܒ̇ܠܝܼܢ ܚܲܕ݂ ܠܚܲܕ݂: ܬܠܵܬ̣ ܙܲܒ̣ܢ̈ܝܼܢ. 6: ܘܐܸܣܛܘܵܐ ܕܥܲܡܘܼ̈ܕܹܐ ܥ̣ܒܲܕ݂: ܚܲܡܫܝܼܢ ܐܲܡ̈ܝܼܢ ܐܘܼܪܟܹ̇ܗ: ܘܲܬ̣ܠܵܬ̣ܝܼܢ ܐܲܡ̈ܝܼܢ ܦܬ̣ܵܝܹܗ: ܘܐܸܣܛܘܵܐ ܥܲܠ ܐܲܦܲܝ̈ܗܘܿܢ ܕܥܲܡܘܼ̈ܕܹܐ ܘܕ݂ܵܪܬܵܐ ܩܕ݂ܵܡܲܝܗܘܿܢ. 7: ܘܐܸܣܛܘܵܐ ܕܟ݂ܘܼܪܣܝܵܐ ܕܕ݂ܵܐܹ̇ܢ ܗ̄ܘ̣ܵܐ ܬܲܡܵܢ: ܐܸܣܛܘܵܐ ܠܕ݂ܝܼܢܵܐ ܥ̣ܒܲܕ݂. ܘܩܲܪܡܹܗ ܒܐܲܪܙܵܐ: ܡ̣ܢ ܫܲܬ̣ܐ̱ܣܵܘ̈ܗܝ ܘܲܥܕܲܡܵܐ ܠܲܫܡܵܘ̈ܗܝ. 8: ܘܒܲܝܬܵܐ ܕܝܵܬܹܒ̣ ܗ̄ܘ̣ܵܐ ܬܲܡܵܢ ܒܕ݂ܵܪܬܵܐ ܐ̄ܚܪܹܬܵܐ ܠܓ̣ܵܘ ܡ̣ܢ ܐܸܣܛܘܵܐ: ܐܲܝܟ݂ ܥܒ̣ܵܕ݂ܵܐ ܗܵܢܵܐ ܥ̣ܒܲܕ݂. ܘܒܲܝܬܵܐ ܥ̣ܒܲܕ݂ ܠܒܲܪܬ̣ ܦܸܪܥܘܿܢ ܕܲܢܣܲܒ̣ ܫܠܹܝܡܘܿܢ ܐܲܝܟ݂ ܥܒ̣ܵܕ݂ܵܐ ܗܵܢܵܐ. 9: ܟܠܗܹܝܢ ܗܵܠܹܝܢ ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܐܲܝܟ݂ ܡܫܘܼܚܬ̣ܵܐ ܕܲܦ̮ܣܝܼܠܬܵܐ ܕܲܢܓ̣ܝܼܕ݂ܵܐ ܒܛܘܼܪܢܘܿܣ. 10: ܡ̣ܢ ܠܒܲܪ ܘܡ̣ܢ ܠܓ̣ܵܘ: ܘܡ̣ܢ ܫܲܬ̣ܐ̱ܣܵܘ̈ܗܝ ܘܲܥܕܲܡܵܐ ܠܥܸܠ: ܘܡ̣ܢ ܠܒܲܪ ܘܲܥܕܲܡܵܐ ܠܕ݂ܵܪܬܵܐ ܕܒܲܝܬܵܐ: ܕܡܲܬ̣ܩܲܢ ܒܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܘܲܒ̣ܟܹܐܦܹ̈ܐ ܪܵܘ̱ܪ̈ܒ̣ܵܬ̣ܵܐ: ܟܹܐܦܹ̈ܐ ܕܲܥܣܲܪ ܐܲܡ̈ܝܼܢ: ܘܟܹܐܦܹ̈ܐ ܕܲܬ̣ܡܵܢܹܐ ܐܲܡ̈ܝܼܢ. 11: ܡ̣ܢ ܠܥܸܠ: ܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܐܲܝܟ݂ ܡܫܘܼܚܬ̣ܵܐ ܕܲܦ̮ܣܝܼܠܬܵܐ: ܘܐܲܪ̈ܙܹܐ. 12: ܘܕ݂ܵܪܬܵܐ ܪܲܒ̇ܬ̣ܵܐ ܟܲܕ݂ ܚܵܕ݂ܪܵܐ: ܬܠܵܬ̣ܵܐ ܣܚܵܦ̈ܝܼܢ ܕܲܦ̮ܣܝܼܠܬܵܐ: ܘܲܣܚܵܦܵܐ ܕܲܟ݂ܪ̈ܵܡܵܬ̣ܵܐ ܕܐܲܪ̈ܙܹܐ: ܘܲܠܕ݂ܵܪܬܵܐ ܕܒܲܝܬܹܗ ܕܡܵܪܝܵܐ ܓܵܘܵܝܬܵܐ: ܘܠܐܸܣܛܘܵܐ ܕܒܲܝܬܵܐ.

13: ܘܫܲܕܲܪ ܡܲܠܟܵܐ ܫܠܹܝܡܘܿܢ: ܘܐܲܝܬ̇ܝܼ ܠܚܝܼܪܵܡ ܡ̣ܢ ܨܘܿܪ. 14: ܘܗ̤ܘ ܒܲܪ ܐܲܢ̄ܬ̇ܬ̣ܵܐ ܗ̄ܘ̣ܵܐ ܐܲܪܡܲܠܬܵܐ ܡ̣ܢ ܫܲܒ̣ܛܵܐ ܕܢܲܦ̮ܬܵܠܝܼ: ܘܐܲܒ̣ܘܼܗܝ ܓܒܲܪ ܨܲܝܵܪ ܘܐܘܼܡܵܢ ܒܲܢܚܵܫܵܐ. ܘܐܸܬ̣ܡ̱ܠܝܼ ܚܸܟ݂ܡ̱ܬ̣ܵܐ ܘܒ̣ܘܼܝܵܢܵܐ ܘܝܼܕܲܥܬ̣ܵܐ: ܠܡܸܥܒܲܕ݂ ܟܠ ܥܒ̣ܵܕ݂ ܕܲܢܚܵܫܵܐ ܘܐܸܬ̣ܵܐ ܠܘܵܬ̣ ܡܲܠܟܵܐ ܫܠܹܝܡܘܿܢ: ܘܲܥܒܲܕ݂ ܟܠܹܗ ܥܒ̣ܵܕ݂ܵܐ. 15: ܘܨܵܪ ܬܪܹܝܢ ܥܲܡܘܼ̈ܕܹܐ ܕܲܢܚܵܫܵܐ ܪܵܘܡܹܗ ܕܥܲܡܘܼܕ݂ܵܐ ܚܲܕ݂: ܬܡܵܢܬܲܥܸܣܪܹ̈ܐ ܐܲܡ̈ܝܼܢ ܘܚܘܼܛܵܐ ܕܬܲܪܬܲܥܸܣܪܹ̈ܐ ܐܲܡ̈ܝܼܢ ܟܵܪܹܟ݂ ܠܹܗ. ܘܗܵܟܲܢܵܐ ܠܥܲܡܘܼܕ݂ܵܐ ܐ̄ܚܪܹܢܵܐ. 16: ܘܬܲܪܬܹ̇ܝܢ ܟܪܵܡܵܬ̣ܵܐ ܥ̣ܒܲܕ݂ ܠܲܡܣܵܡ ܥܲܠ ܪܹܫܵܐ ܕܥܲܡܘܼ̈ܕܹܐ: ܕܢܸܣܟ̇ܬ̣ܵܐ ܕܲܢܚܵܫܵܐ. ܘܚܲܡܸܫ ܐܲܡ̈ܝܼܢ ܪܵܘܡܵܗ̇ ܕܲܟ݂ܪܵܡܬ̣ܵܐ ܚܕ݂ܵܐ: ܘܚܲܡܸܫ ܐܲܡ̈ܝܼܢ ܪܵܘܡܵܗ̇ ܕܲܟ݂ܪܵܡܬ̣ܵܐ ܐ̄ܚܪܹܬܵܐ. 17: ܘܗܸܠܩܵܐ ܥ̣ܒܲܕ݂: ܗܸܠܩܵܐ ܓܕ݂ܝܼܠܵܐ. ܘܲܥܒܲܕ݂ ܫܸܫ̈ܠܵܬ̣ܵܐ ܠܲܟ݂ܪ̈ܵܡܵܬ̣ܵܐ ܕܥܲܠ ܪܹܫ ܥܲܡܘܼ̈ܕܹܐ: ܫܒܲܥ ܠܲܟ݂ܪܵܡܬ̣ܵܐ ܚܕ݂ܵܐ: ܘܲܫܒܲܥ ܠܲܟ݂ܪܵܡܬ̣ܵܐ ܐ̄ܚܪܹܬ̣ܵܐ. 18: ܘܲܥܒܲܕ݂ ܥܲܡܘܼ̈ܕܹܐ ܬܪܹܝܢ ܣܸܕ݂ܪ̈ܝܼܢ ܟܲܕ݂ ܚܵܕ݂ܪܵܐ ܥܲܠ ܗܸܠܩܵܐ ܚܲܕ݂: ܠܲܡܟܲܣܵܝܘܼ ܟܪ̈ܵܡܵܬ̣ܵܐ ܕܥܲܠ ܪܹܫ ܥܲܡܘܼ̈ܕܹܐ. ܘܗܵܟܲܢܵܐ ܐܵܦ ܠܥܲܡܘܼܕ݂ܵܐ ܐ̄ܚܪܹܢܵܐ. 19: ܘܲܟ݂ܪ̈ܵܡܵܬ̣ܵܐ ܕܥܲܠ ܪܹܫ ܥܲܡܘܼ̈ܕܹܐ ܥܒ̣ܵܕ݂ܵܐ ܕܫܘܿܫܲܢܬܵܐ: ܘܲܥܒܲܕ݂ ܒܐܸܣܛܘܵܐ ܐܲܪܒܲܥ ܐܲܡ̈ܝܼܢ. 20: ܘܲܟ݂ܪ̈ܵܡܵܬ̣ܵܐ ܕܥܲܠ ܬܪܹܝܢ ܥܲܡܘܼ̈ܕܹܐ: ܐܵܦ ܡ̣ܢ ܠܥܸܠ ܡ̣ܢ ܠܘܼܩܒܲܠ ܓܲܒܵܐ ܕܠܘܼܩܒܲܠ ܗܸܠܩܵܐ: ܘܪ̈ܘܼܡܵܢܹܐ ܡܲܐܬܹ̇ܝܢ. ܬܪܹܝܢ ܣܸܕ݂ܪ̈ܝܼܢ ܟܲܕ݂ ܚܵܕ݂ܪܵܐ ܟܪܵܡܬ̣ܵܐ ܚܕ݂ܵܐ. ܘܗܵܟܲܢܵܐ ܟܪܵܡܬ̣ܵܐ ܐ̄ܚܪܹܬܵܐ. 21: ܘܲܥܒܲܕ݂ ܥܲܡܘܼ̈ܕܹܐ ܕܐܸܣܛܘܵܐ ܕܗܲܝܟ̇ܠܵܐ: ܘܐܲܩܝܼܡ ܠܥܲܡܘܼܕ݂ܵܐ ܕܡ̣ܢ ܝܲܡܝܼܢܵܐ: ܘܲܩ̣ܪܵܐ ܫܡܹܗ ܝܵܟ݂ܝܼܢ. ܘܐܲܩܝܼܡ ܠܥܲܡܘܼܕ݂ܵܐ ܕܡ̣ܢ ܣܸܡܵܠܵܐ: ܘܲܩ̣ܪܵܐ ܫܡܹܗ ܒܵܥܵܙ. 22: ܘܥܲܠ ܪܹܫܵܐ ܕܥܲܡܘܼ̈ܕܹܐ ܥܒ̣ܵܕ݂ܵܐ ܕܫܘܿܫܲܢܬܵܐ. ܘܲܫܠܸܡ̣ ܥܒ̣ܵܕ݂ܗܘܿܢ ܕܥܲܡܘܼ̈ܕܹܐ. 23: ܘܲܥ̣ܒܲܕ݂ ܝܲܡܵܐ ܕܢܸܣܟ̇ܬ̣ܵܐ: ܥܣܲܪ ܐܲܡ̈ܝܼܢ: ܡ̣ܢ ܣܸܦܬܹܗ: ܘܲܥܕܲܡܵܐ ܠܣܸܦܬܹܗ: ܓܠܝܼܠ ܟܲܕ݂ ܚܵܕܲܪ ܘܚܲܡܸܫ ܐܲܡ̈ܝܼܢ ܪܵܘܡܹܗ ܘܚܘܼܛܵܐ ܕܲܬ̣ܠܵܬ̣ܝܼܢ ܐܲܡ̈ܝܼܢ ܟܵܪܸܟ݂ ܠܹܗ ܟܲܕ݂ ܚܵܕܲܪ. 24: ܘܲܦܩܝܼ̈ܥܹܐ ܠܬܲܚܬ̇ ܡ̣ܢ ܣܸܦܬܹܗ ܟܲܕ݂ ܚܵܕܲܪ ܟܪܝܼܟ݂ܝܼܢ ܠܹܗ: ܥܣܲܪ ܐܲܡ̈ܝܼܢ ܟܪܝܼܟ݂ܝܼܢ ܠܝܲܡܵܐ ܟܲܕ݂ ܚܵܕܲܪ: ܬܪܹܝܢ ܣܸܕ݂ܪ̈ܝܼܢ ܕܲܦܩܝܼܥܹ̈ܐ ܕܲܢܣܝܼܟ݂ܝܼܢ ܒܢܸܣܟ̇ܬ̣ܵܐ. 25: ܘܩܵܐܹ̇ܡ ܥܲܠ ܬܪܸܥܣܲܪ ܬܵܘܪ̈ܝܼܢ. ܬܠܵܬ̣ܵܐ ܦܵܢܹ̇ܝܢ ܠܓܲܪܒ̇ܝܵܐ: ܘܲܬ̣ܠܵܬ̣ܵܐ ܦܵܢܹ̇ܝܢ ܠܡܲܥ̱ܪܒ̣ܵܐ: ܘܲܬ̣ܠܵܬ̣ܵܐ ܦܵܢܹ̇ܝܢ ܠܬܲܝܡ̣ܢܵܐ: ܘܲܬ̣ܠܵܬ̣ܵܐ ܦܵܢܹ̇ܝܢ ܠܡܲܕ݂ܢ̱ܚܵܐ ܘܝܲܡܵܐ ܥܠܲܝܗܘܿܢ ܠܥܸܠ ܡܸܢܗܘܿܢ ܡ̣ܢ ܠܥܸܠ: ܘܐܲܚܪܵܝܬ̇ܗܘܿܢ ܠܓ̣ܵܘ ܒܲܝܬܵܐ. 26: ܘܲܥܒ̣ܵܝܹܗ ܦܫܸܟ݂: ܘܣܸܦܬܹܗ ܐܲܝܟ݂ ܣܸܦܬܹܗ ܕܟ݂ܵܣܵܐ: ܘܦܸܪܥܵܐ ܕܫܘܿܫܲܢܬܵܐ ܬܪܹܝܢ ܐܲܠܦ̈ܝܼܢ ܡܲܬ̣ܪ̱̈ܝܵܢ ܐܵܚܹ̇ܕ݂. 27: ܘܲܥ̣ܒܲܕ݂ ܐܲܓܵܢܹ̈ܐ ܥܣܲܪ ܕܲܢܚܵܫܵܐ. ܐܲܪܒܲܥ ܐܲܡ̈ܝܼܢ ܐܘܼܪܟܵܗ̇ ܕܐܲܓܵܢܵܐ ܚܕ݂ܵܐ: ܘܐܲܪܒܲܥ ܐܲܡ̈ܝܼܢ ܦܬ̣ܵܝܵܗ̇: ܘܲܬ̣ܠܵܬ̣ ܐܲܡ̈ܝܼܢ ܪܵܘܡܵܗ̇. 28: ܘܲܥܒ̣ܵܕ݂ܗܹܝܢ ܕܐܲܓܵܢܹ̈ܐ: ܓܕ݂ܵܢܦܹ̈ܐ ܐܝܼܬ̣ ܠܗܹܝܢ. 29: ܘܥܲܠ ܓܕ݂ܵܢܦܹ̈ܐ ܕܒܹܝܬ̣ ܚܢܵܩܹ̈ܐ: ܐܲܪ̈ܝܵܘܵܬ̣ܵܐ: ܘܬ̣ܵܘܪܹ̈ܐ: ܘܲܟ݂ܪ̈ܘܿܒܹܐ. ܘܥܲܠ ܟܣܵܝܹ̈ܐ ܗܵܟܲܢܵܐ: ܡ̣ܢ ܠܥܸܠ ܘܡ̣ܢ ܠܬܲܚܬ̇ ܐܲܪ̈ܝܵܘܵܬ̣ܵܐ ܘܬ̣ܵܘܪܹ̈ܐ: ܚܸܙܘܵܐ ܥܒ̣ܵܕ݂ܵܐ ܫܲܦܝܼܪܵܐ. 30: ܘܐܲܪܒܲܥ ܓܝܼ̈ܓ̣ܠܹܐ ܕܲܢܚܵܫܵܐ: ܠܐܲܓܵܢܵܐ ܚܕ݂ܵܐ: ܘܣܲܪܢܵܐ ܕܲܢܚܵܫܵܐ ܘܐܲܪܒܲܥ ܙܵܘ̈ܝܵܬ̣ܵܐ ܡܕܲܒ̇ـ̈ـܩܵܢ ܠܗܹܝܢ. ܘܟܲܬ̣̈ܦܵܬ̣ܵܐ ܐܝܼܬ̣ ܠܗܹܝܢ: ܠܬܲܚܬ̇ ܡܸܢܗܹܝܢ: ܟܲܬ̣̈ܦܵܬ̣ܵܐ ܕܢܸܣܟ̇ܬ̣ܵܐ ܥܒ̣ܵܕ݂ܵܐ ܫܲܦܝܼܪܵܐ. 31: ܘܦܘܼܡܵܗ̇ ܕܐܲܓܵܢܵܐ ܡ̣ܢ ܠܓ̣ܵܘ ܐܲܡܵܐ. ܘܦܘܼܡܵܗ̇ ܓܠܝܼܠ ܐܲܡܵܐ: ܘܦܲܠܓ̇ܘܼܬ̣ ܐܲܡܵܐ. ܘܐܵܦ ܥܲܠ ܦܘܼܡܵܗ̇ ܩܥ̈ܝܼܠܵܬ̣ܵܐ ܘܲܓ̣ܕ݂ܵܢܦܹ̈ܐ. ܡܪܲܒ̇ܥܝܼܢ ܘܠܵܐ ܓܠܝܼܠܝܼܢ. 32: ܘܐܲܪܒܲܥ ܓܝܼ̈ܓ̣ܠܝܼܢ ܡ̣ܢ ܠܬܲܚܬ̇ ܠܲܓ̣ܕ݂ܵܢܦܹ̈ܐ: ܘܐܝܼ̈ܕ݂ܵܗܵܬ̣ܵܐ ܕܓ̣ܝܼ̈ܓ̣ܠܹܐ ܒܐܲܓܵܢܵܐ ܚܕ݂ܵܐ ܘܪܵܘܡܵܗ̇ ܕܓ̣ܝܼܓ̣ܠܵܐ ܚܕ݂ܵܐ ܐܲܡܵܐ ܘܦܸܠܓ̇ܘܼܬ̣ ܐܲܡܵܐ. 33: ܘܲܥܒ̣ܵܕ݂ܵܐ ܕܓ̣ܝܼ̈ܓ̣ܠܹܐ ܐܲܝܟ݂ ܥܒ̣ܵܕ݂ܵܐ ܕܓ̣ܝܼ̈ܓ̣ܠܹܐ ܕܡܲܪܟܲܒ̣ܬܵܐ. ܘܐܝܼ̈ܕ݂ܵܗܵܬ̣ܗܹܝܢ: ܘܲܓ̣ܒܲܝ̈ܗܹܝܢ: ܘܨܸܒ̣ܬ̇ܗܹܝܢ: ܘܫܘܼܦ̱ܪܗܹܝܢ: ܥܒ̣ܵܕ݂ܵܐ ܕܢܸܣܟ̇ܬ̣ܵܐ. 34: ܘܐܲܪܒܲܥ ܟܲܬ̣̈ܦܵܢ ܥܲܠ ܐܲܪܒܲܥ ܙܵܘ̈ܝܵܬ̣ܵܗ̇ ܕܐܲܓܵܢܵܐ ܚܕ݂ܵܐ ܡ̣ܢ ܐܲܓܵܢܹ̈ܐ. 35: ܟܲܬ̣̈ܦܵܬ̣ܵܗ̇ ܘܟܲܪܣܵܗ̇ ܕܐܲܓܵܢܵܐ ܦܸܠܓܘܼܬ̣ ܐܲܡܵܐ: ܘܪܵܘܡܵܗ̇ ܓܠܝܼܠ ܟܲܕ݂ ܚܵܕ݂ܪܵܐ: ܥܲܠ ܪܹܫܵܗ̇ ܕܐܲܓܵܢܵܐ. ܘܐܝܼ̈ܕ݂ܵܗܵܬ̣ܵܗ̇ ܘܲܓ̣ܕ݂ܵܢܦܹ̈ܝܗ̇ ܡܸܢܵܗ̇. 36: ܘܲܪܫܲܡ ܥܲܠ ܠܘܼܚܹ̈ܐ ܐܝܼ̈ܕ݂ܵܗܵܬ̣ܵܗ̇: ܘܥܲܠ ܓܕ݂ܵܢܦܹ̈ܝܗ̇ ܟܪ̈ܘ̇ܒܹܐ: ܘܐܲܪ̈ܝܵܘܵܬ̣ܵܐ: ܘܕܸܩ̈ܠܹܐ: ܟܲܕ݂ ܚܵܕ݂ܪܵܐ. 37: ܗܵܟܲܢܵܐ ܥ̣ܒܲܕ݂ ܐܸܢܹܝܢ ܠܲܥܣܲܪ ܐܲܓܵܢ̈ܝܼܢ: ܢܸܣܟ̇ܬ̣ܵܐ ܚܕ݂ܵܐ: ܘܲܡܫܘܼܚܬ̣ܵܐ ܚܕ݂ܵܐ: ܘܩܵܘܡܬ̣ܵܐ ܚܕ݂ܵܐ ܠܟ݂ܠܗܹܝܢ. 38: ܘܲܥ̣ܒܲܕ݂ ܥܣܲܪ ܠܲܩܢ̈ܝܼܢ ܕܲܢܚܵܫܵܐ. ܐܲܪܒ̇ܥܝܼܢ ܡܲܬ̣ܪ̱̈ܝܵܢ ܐܲܚܕ݂ܵܐ ܠܲܩܢܵܐ ܚܕ݂ܵܐ: ܐܲܪܒܲܥ ܐܲܡ̈ܝܼܢ ܠܲܩܢܵܐ ܚܕ݂ܵܐ ܥܲܠ ܐܲܓܵܢܵܐ ܚܕ݂ܵܐ. ܗܵܟܲܢܵܐ ܠܲܥܣܲܪ ܐܲܓܵܢ̈ܝܼܢ. 39: ܘܲܥܒܲܕ݂ ܐܸܢܹܝܢ ܠܐܲܓܵܢܹ̈ܐ: ܚܲܡܸܫ ܡ̣ܢ ܣܸܛܪܹܗ ܕܒܲܝܬܵܐ ܡ̣ܢ ܝܲܡܝܼܢܵܐ: ܘܚܲܡܸܫ ܡ̣ܢ ܣܸܛܪܹܗ ܕܒܲܝܬܵܐ ܡ̣ܢ ܣܸܡܵܠܵܐ. ܘܝܲܡܵܐ ܥܒܲܕ݂ ܡ̣ܢ ܣܸܛܪܹܗ ܕܒܲܝܬܵܐ: ܡ̣ܢ ܬܲܝܡܲܢ ܡܲܕ݂ܢܲܚ ܠܘܼܩܒܲܠ ܬܲܝ̱ܡܢܵܐ. 40: ܘܲܥ̣ܒܲܕ݂ ܚܝܼܪܵܡ ܠܲܩܢܹ̈ܐ: ܘܩܲܕ݂ܣܸܐ: ܘܐܝܼܪܹ̈ܐ: ܘܩܲܪ̈ܕ݂ܵܠܹܐ ܘܫܲܠܸܡ ܚܝܼܪܵܡ ܠܡܸܥܒܲܕ݂ ܟܠܹܗ ܥܒ̣ܵܕ݂ܵܐ ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܒܒܲܝܬܹ̇ܗ ܕܡܵܪܝܵܐ. 41: ܥܲܡܘܼ̈ܕܹܐ ܬܪܹܝܢ: ܘܐܲܓܵܢܹ̈ܐ ܕܥܲܠ ܪܹܫ ܥܲܡܘܼ̈ܕܹܐ ܬܲܪܬܹ̇ܝܢ: ܘܲܟ݂ܣܵܝܹ̈ܐ ܬܪܝܼܢ: ܠܲܡܟܲܣܵܝܘܼ ܬܲܪܬܹ̇ܝܢ ܐܲܓܵܢܹ̈ܐ ܕܥܲܠ ܪܹܫ ܥܲܡܘܼ̈ܕܹܐ. 42: ܘܪ̈ܘܼܡܵܢܹܐ ܐܲܪܒܲܥܡܵܐܐ ܠܲܬ̣ܪܹܝܢ ܟܣܵܝܹ̈ܐ: ܬܪܹܝܢ ܣܸܕ݂ܪ̈ܝܼܢ ܕܪ̈ܘܼܡܵܢܹܐ ܠܲܟ݂ܣܵܝܵܐ ܚܲܕ݂: ܠܲܡܟܲܣܵܝܘܼ ܬܪܹܝܢ ܦܘܼܡܹ̈ܐ ܕܐܲܓܵܢܹ̈ܐ ܕܥܲܠ ܪܹܫ ܥܲܡܘܼ̈ܕܹܐ. 43: ܘܐܲܓܵܢܹ̈ܐ ܥܣܲܪ: ܘܠܲܩܢܹ̈ܐ ܥܣܲܪ ܕܥܲܠ ܐܲܓܵܢܹ̈ܐ. 44: ܘܝܲܡܵܐ ܚܲܕ݂: ܘܬ̣ܵܘܪܹ̈ܐ ܬܪܸܥܣܲܪ ܕܲܬ̣ܚܹܝܬ̣ ܝܲܡܵܐ. 45: ܘܩܲܕ݂ܣܹ̈ܐ ܘܐܝܼܪܹ̈ܐ: ܘܩܲܪ̈ܕ݂ܵܠܹܐ: ܘܟ݂ܠܗܘܿܢ ܡܵܐܢܹ̈ܐ ܕܬܸܫܡܸܫܬܵܐ: ܕܲܥܒܲܕ݂ ܚܝܼܪܵܡ ܠܡܲܠܟܵܐ ܫܠܹܝܡܘܿܢ ܠܒܲܝܬܹ̇ܗ ܕܡܵܪܝܵܐ: ܕܲܢܚܵܫܵܐ ܩܘܿܪܲܢܬ̣ܵܝܵܐ. 46: ܒܟ݂ܵܟ݂ܵܪ ܕܒܲܦܩܲܥܬ̣ܵܐ ܕܐܝܼܪܝܼܚܘܿ: ܥܲܠ ܓܹܢ̄ܒ̣ ܝܘܿܪܕ̇ܢܵܢ ܢܣܲܟ݂ ܐܸܢܘܿܢ ܡܲܠܟܵܐ: ܒܫܘܼܦܪܵܗ̇ ܕܐܲܪܥܵܐ: ܒܹܝܬ̣ ܣܵܟ݂ܘܼܬ̣ ܘܒܹܝܬ̣ ܨܲܪܬܵܢ. 47: ܘܲܥ̣ܒܲܕ݂ ܫܠܹܝܡܘܿܢ ܟܠܗܘܿܢ ܡܵܐܢܹ̈ܐ ܕܣܘܿܓ̣ܵܐܐ ܕܛܵܒ̣. ܠܵܐ ܗܘ̤ܵܐ ܣܵܟ݂ܵܐ ܠܡܲܬ̣ܩܵܠܵܐ ܕܲܢܚܵܫܵܐ ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܠܒܲܝܬܹ̇ܗ ܕܡܵܪܝܵܐ. 48: ܟܠܗܘܿܢ ܡܵܐܢܹ̈ܐ ܕܒܲܝܬܹ̇ܗ ܕܡܵܪܝܵܐ: ܡܲܕ݂ܒ̇ܚܵܐ ܕܕܲܗܒ̣ܵܐ: ܘܦܵܬ̣ܘܿܪ̈ܵܐ ܕܕܲܗܒ̣ܵܐ: ܕܲܥܠܵܘܗܝ ܠܲܚܡܵܐ ܕܐܲܦܹ̈ܐ.

49: ܘܲܡܢܵܪ̈ܵܬ̣ܵܐ ܕܕܲܗܒ̣ܵܐ ܣܢܝܼܢܵܐ. ܚܲܡܸܫ ܡ̣ܢ ܝܲܡܝܼܢܵܐ: ܘܚܲܡܸܫ ܡ̣ܢ ܣܸܡܵܠܵܐ ܩܕ݂ܵܡ ܗܲܝܟ̇ܠܵܐ. ܘܟܲܦܹ̈ܐ: ܘܲܫܪ̈ܵܓܹܐ: ܘܡܲܠܩܛܹ̈ܐ ܕܕܲܗܒ̣ܵܐ. 50: ܘܡܲܙ̱ܡܟܹ̈ܐ: ܘܢܲܦ̮ܛܹܪܹ̈ܐ: ܘܫܵܚ̈ܠܹܐ: ܘܟܲܦܹ̈ܐ: ܘܦܝܼܪ̈ܡܹܐ ܕܕܲܗܒ̣ܵܐ ܣܢܝܼܢܵܐ: ܘܲܩܪ̈ܵܡܹܐ ܕܬܲܪܥܵܐ ܓܵܘܵܝܵܐ ܕܲܩܕ݂ܘܿܫ ܩܘܼܕ݂ܫܹ̈ܐ: ܘܲܕ̇ܬܲܪܥܵܐ ܒܲܝܬܵܐ ܕܗܲܝܟ̇ܠܵܐ: ܕܕܲܗܒ̣ܵܐ ܣܢܝܼܢܵܐ. 51: ܘܲܫܠܸܡ ܟܠܹܗ ܥܒ̣ܵܕ݂ܵܐ ܕܲܥܒܲܕ݂ ܡܲܠܟܵܐ ܫܠܹܝܡܘܿܢ ܒܒܲܝܬܹ̇ܗ ܕܡܵܪܝܵܐ. ܘܐܲܝܬ̇ܝܼ ܫܠܹܝܡܘܿܢ ܩܘܼܕ݂ܫܵܐ ܕܕ݂ܵܘܝܼܕ݂ ܐܲܒ̣ܘܼܗܝ: ܟܸܣܦܵܐ: ܘܕܲܗܒ̣ܵܐ: ܘܡܵܐܢܹ̈ܐ: ܐܲܥܲܠ ܠܓܲܙܵܐ ܕܒܲܝܬܹ̇ܗ ܕܡܵܪܝܵܐ.

ܩܹܦܵܠܹܐܘܿܢ: ܚ.

1: ܗܵܝܕܹ̇ܝܢ ܟܲܢܸܫ ܫܠܹܝܡܘܿܢ ܠܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܘܲܠܟ݂ܠܗܘܿܢ ܪܹ̈ܫܹܐ ܕܫܲܒ̣̈ܛܹܐ: ܘܪܵܘ̱ܪ̈ܒ̣ܵܢܹܐ ܕܐܲܒ̣ܵـ̈ـܗܵܬ̣ܵܐ. ܘܐܸܬ̣ܟܲܢܲܫܘ ܠܘܵܬ̣ ܡܲܠܟܵܐ ܫܠܹܝܡܘܿܢ ܠܐܘܿܪܸܫܠܸܡ: ܠܡܲܣܵܩܘܼ ܠܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ ܡ̣ܢ ܩܪܝܼܬܹܗ: ܕܗ̤ܝ ܗ̄ܝ̣ ܨܸܗܝܘܿܢ. 2: ܘܐܸܬ̣ܟܲܢܲܫܘ ܠܘܵܬ̣ ܡܲܠܟܵܐ ܫܠܹܝܡܘܿܢ: ܟܠܗܘܿܢ ܕܒܹܝܬ̣ ܝܼܣܪܵܝܹܾܠ: ܒܝܲܪܚܵܐ ܕܥܲܠܠܵـ̈ـܬ̣ܵܐ ܒܓܚܲܓܵܐ: ܗ̤ܘܝܘܼ ܝܲܪܚܵܐ ܫܒ̣ܝܼܥܵܝܵܐ. 3: ܘܐܸܬ̣ܵܘ ܟܠܗܘܿܢ ܫܲܒ̣ܛܹܐ ܕܝܼܣܪܵܝܹܠ: ܘܫܲܩܠܘܼܗܝ ܟܵܗ̈ܢܹܐ ܠܐܲܪܘܿܢܹܗ ܕܡܵܪܝܵܐ. 4: ܘܐܲܣܩܘܼܗܝ ܠܗܲܝܟ̇ܠܹܗ ܕܡܵܪܝܵܐ: ܘܲܠܡܲܫܟܲܢܙܲܒ̣ܢܵܐ: ܘܲܠܡܵܐܢܲܝ̈ ܩܘܼܕ݂ܫܵܐ ܕܡܲܫܟܢܵܐ: ܘܲܣܠܸܩܘ ܥܲܡܗܘܿܢ ܟܵܗ̈ܢܹܐ ܘܠܹܘܵܝܹ̈ܐ ܕܝܼܣܪܵܝܹܠ. 5: ܘܡܲܠܟܵܐ ܫܠܹܝܡܘܿܢ ܘܟ݂ܠܵܗ̇ ܟܢܘܼܫܬܵܐ ܕܝܼܣܪܵܝܹܠ ܕܐܸܬ̣ܘܲܥܕ݂ܘ ܠܘܵܬܹ̈: ܩܵܝ̇ܡܝܼܢ ܥܲܡܹܗ ܩܕ݂ܵܡ ܐܵܪܘܿܢܵܐ: ܘܲܡܕܲܒ̇ܚܝܼܢ ܥܵـ̈ـܢܵܐ ܘܬ̣ܵܘܪܹ̈ܐ ܕܠܵܐ ܡܸܬ̣ܡ̱ܢܹܝܢ: ܘܠܵܐ ܡܸܬ̣ܚܲܫܒܲܢ ܡ̣ܢ ܣܘܿܓ̣ܐܗܘܿܢ. 6: ܘܐܲܝܬ̇ܝܼܘ ܟܵܗܢܹ̈ܐ ܠܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ ܠܐܲܬ̣ܪܹܗ ܠܗܲܝܟ̇ܠܵܐ: ܠܒܲܝܬܵܐ ܕܲܩܕ݂ܘܿܫ ܩܘܼܕ݂ܫܹ̈ܐ: ܠܲܬ̣ܚܹܝܬ̣ ܓܸܦܲܝ̈ܗܘܿܢ ܕܲܟ݂ܪ̈ܘܿܒܹܐ. 7: ܡܸܛܠ ܕܲܟ݂ܪ̈ܘܿܒܹܐ ܦܪܝܼܣܝܼܢ ܓܸܦܲܝ̈ܗܘܿܢ ܒܐܲܬ̣ܪܵܐ ܩܲܕ̇ܝܼܫܵܐ: ܘܡܲܛܠܠܝܼܢ ܒܓܸܦܲܝ̈ܗܘܿܢ ܥܲܠ ܐܵܪܘܿܢܵܐ: ܘܥܲܠ ܩܘܿܦܵܘ̈ܗܝ ܡ̣ܢ ܠܥܸܠ. 8: ܘܐܲܪܝܼܟ݂ܝܼܢ ܗ̄ܘ̣ܵܘ ܩ̈ܘܿܦܹܐ: ܘܡܸܬ̣ܚܙܹܝܢ ܗ̄ܘ̣ܵܘ ܪܹ̈ܫܲܝܗܘܿܢ ܕܩ̈ܘܿܦܹܐ ܡ̣ܢ ܩܘܼܕ݂ܫܵܐ ܠܲܩܕ݂ܵܡ ܗܲܝܟ̇ܠܵܐ: ܘܲܠܒܲܪ ܠܵܐ ܡܸܬ̣ܚܙܹܝܢ ܗ̄ܘ̣ܵܘ. ܘܲܗܘ̤ܵܘ ܬܲܡܵܢ ܥܕܲܡܵܐ ܠܝܵܘܡܵܢܵܐ. 9: ܠܲܝܬ̇ ܒܐܵܪܘܿܢܵܐ: ܐܸܠܵܐ ܐܸܢ ܬܲܪܬܹ̇ܝܢ ܠܘܼܚܹ̈ܐ ܕܟܹܐܦܵܐ: ܕܣܵܡ̣ ܬܲܡܵܢ ܡܘܼܫܹܐ ܒܚܘܿܪܝܼܒ̣: ܟܲܕ݂ ܐܲܩܝܼܡ ܡܵܪܝܵܐ ܩܝܵܡܵܐ ܥܲܡ ܒ̈ܢܲܝ ܝܼܣܪܵܝܹܠ: ܟܲܕ݂ ܢܦܲܩ̣ܘ ܡ̣ܢ ܡܸܨܪܹܝܢ. 10: ܘܟܲܕ݂ ܢܦܲܩ̣ܘ ܟܵܗ̈ܢܹܐ ܡ̣ܢ ܩܘܼܕ݂ܫܵܐ: ܥܢܵܢܵܐ ܐܸܬ̣̱ܡܠܝܼ ܒܲܝܬܹ̇ܗ ܕܡܵܪܝܵܐ. 11: ܘܠܵܐ ܐܸܫܟܲܚܲܘ ܟܵܗ̈ܢܹܐ ܠܲܡܩܵܡ ܘܠܲܡܫܲܡܵܫܘܼ ܡ̣ܢ ܩܕ݂ܵܡ ܥܢܵܢܵܐ: ܡܸܛܠ ܕܐܸܬ̣̱ܡܠܝܼ ܐܝܼܩܵܪܹܗ ܕܡܵܪܝܵܐ ܒܲܝܬܹ̇ܗ ܕܡܵܪܝܵܐ. 12: ܗܵܝܕܹ̇ܝܢ ܐܸܡܲܪ ܫܠܹܝܡܘܿܢ: ܡܵܪܝܵܐ ܐܲܢ̄ܬ̇ ܐܸܡܲܪܬ̇ ܠܡܸܫܪܵܐ ܒܥܲܪܦܠܵܐ. 13: ܘܐܸܢܵܐ ܡܸܒ̣ܢܵܐ ܒܢܹ̇ܝܬ̣ ܒܹܝܬ̣ ܡܲܥ̱ܡܪܵܐ ܠܵܟ݂: ܡܲܬ̣ܩܢܵܐ ܠܡܵܘܬܵܒ̣ܵܟ݂ ܠܥܵܠܡ̈ܝܼܢ. 14: ܘܐܲܦܢܝܼ ܡܲܠܟܵܐ ܐܲܦܵܘ̈ܗܝ: ܘܒܲܪܸܟ݂ ܠܟ݂ܠܹܗ ܟܸܢܫܵܐ ܕܝܼܣܪܵܝܹܠ: ܘܟ݂ܠܹܗ ܟܸܢܫܵܐ ܕܝܼܣܪܵܝܹܠ ܩܵܝ̇ܡܝܼܢ. 15: ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܡܲܠܸܠ ܒܦܘܼܡܹܗ ܥܲܡ ܕܵܘܝܼܕ݂ ܐܵܒ̣ܝ ܘܒ̣ܐܝܼܕ݂ܵܘ̈ܗܝ ܫܲܠܸܡ: ܘܐܸܡܲܪ. 16: ܡ̣ܢ ܝܵܘܡܵܐ ܕܐܲܦܩܹܬ̣ ܠܥܲܡܝ ܒ̈ܢܲܝ ܝܼܣܪܵܝܹܠ: ܡ̣ܢ ܡܸܨܪܹܝܢ: ܠܵܐ ܨܒܹܝܬ̣ ܒܲܩܪܝܼܬ̣ܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܠܡܸܒ̣ܢܵܐ ܒܲܝܬܵܐ ܕܢܸܗܘܹܐ ܫܹܡܝ ܬܲܡܵܢ. ܘܲܨܒܹ̇ܝܬ̣ ܒܕ݂ܵܘܝܼܕ݂ ܕܢܸܗܘܹܐ ܥܲܠ ܥܲܡܝ ܝܼܣܪܵܝܹܠ. 17: ܘܲܗܘ̤ܵܐ ܒܠܸܒܹ̇ܗ ܕܕ݂ܵܘܝܼܕ݂ ܐܲܒ̣ܝ: ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. 18: ܘܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܐܵܒ̣ܝ: ܚܠܵܦ ܕܲܗܘ̤ܵܬ̣ ܒܠܸܒܵܟ݂ ܠܡܸܒ̣ܢܵܐ ܒܲܝܬܵܐ ܠܫܹܡܝ: ܫܲܦܝܼܪ ܥ̣ܒܲܕ̇ܬ̇ ܕܲܗܘ̤ܵܬ̣ ܒܠܸܒܵܟ݂.

19: ܒܪܲܡ ܐܲܢ̄ܬ̇ ܠܵܐ ܬܸܒ̣ܢܸܐ ܒܲܝܬܵܐ ܠܫܹܡܝ: ܐܸܠܵܐ ܐܸܢ ܒܪܵܟ݂ ܕܢܵܦܹܩ ܡ̣ܢ ܚܲܨܵܟ݂: ܗ̤ܘ ܢܸܒ̣ܢܸܐ ܒܲܝܬܵܐ ܠܫܹܡܝ. 20: ܘܐܲܩܝܼܡ ܡܵܪܝܵܐ ܦܸܬ̣ܓ̣ܵܡܵܐ ܕܐܸܡܲܪ: ܘܩܵܡܹ̇ܬ̣ ܚܠܵܦ ܕܵܘܝܼܕ݂ ܐܵܒ̣ܝ: ܘܝܼܬܸܒܹ̇ܬ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ ܐܲܝܟ݂ ܕܐܸܡܲܪ ܡܵܪܝܵܐ: ܘܲܒ̣ܢܹ̇ܝܬ̣ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. 21: ܘܣܵܡܹܬ̣ ܬܲܡܵܢ ܐܵܪܘܿܢܵܐ ܕܲܩܝܵܡܹܗ ܕܡܵܪܝܵܐ: ܕܐܲܩܝܼܡ ܥܲܡ ܐܲܒ̣ܵܗܲܝ̈ܢ ܟܲܕ݂ ܐܲܦܸܩ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ. 22: ܘܩܵܡ̣ ܫܠܹܝܡܘܿܢ ܩܕ݂ܵܡ ܡܲܕ݂ܒ̇ܚܹܗ ܕܡܵܪܝܵܐ ܠܘܼܩܒܲܠ ܟܠܹܗ ܟܸܢܫܵܐ ܕܝܼܣܪܵܝܹܠ. ܘܲܦܪܲܣ ܐܝܼܕ݂ܵܘ̈ܗܝ ܠܲܫܡܲܝܵܐ. ܘܨܲܠܝܼ: ܘܐܸܡܲܪ. 23: ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܠܲܝܬ̇ ܐܲܟ݂ܘܵܬ̣ܵܟ݂ ܒܲܫܡܲܝܵܐ ܡ̣ܢ ܠܥܸܠ: ܘܥܲܠ ܐܲܪܥܵܐ ܡ̣ܢ ܠܬܲܚܬ̇. ܕܢܵܛܲܪ ܐܲܢ̄ܬ̇ ܩܝܵܡܵܐ ܘܛܲܝܒ̇ܘܼܬ̣ܵܐ ܠܥܲܒ̣ܕܲܝ̈ܟ ܕܲܡܗܲܠܟ݂ܝܼܢ ܩܕ݂ܵܡܲܝܟ ܒܩܘܼܫܬܵܐ: ܒܟ݂ܠܹܗ ܠܸܒ̇ܗܘܿܢ ܘܲܒ̣ܟ݂ܠܹܗ ܢܲܦ̮ܫܗܘܿܢ. 24: ܕܲܢܛܲܪܬ̇ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ ܡܸܕܸ̇ܡ ܕܐܸܡܲܪܬ̇ ܠܹܗ. ܕܡܲܠܠܬ̇ ܒܦܘܼܡܵܟ݂: ܘܒ̣ܐܝܼܕܲܝ̈ܟ ܫܲܡ̣ܠܝܼܬ̇ ܐܲܝܟ݂ ܕܝܵܘܡܵܢܵܐ. 25: ܘܗܵܫܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܛܲܪ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ ܡܸܕܸ̇ܡ ܕܐܸܡܲܪܬ̇ ܠܹܗ: ܕܠܵܐ ܢܸܥܢܲܕ݂ ܠܵܟ݂ ܒܪܵܐ ܡ̣ܢ ܩܕ݂ܵܡܲܝ ܕܝܵܬܹܒ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ: ܒܲܠܚܘܿܕ݂ ܐܸܢ ܢܸܛܪܘܿܢ ܒܢܲܝ̈ܟ ܐܘܼܪ̈ܚܵܬ̣ܗܘܿܢ ܠܲܡܗܲܠܵܟ݂ܘܼ ܩܕ݂ܵܡܲܝ ܒܩܘܼܫܬܵܐ: ܐܲܝܟ݂ ܩܕ݂ܵܡܲܝ. 26: ܘܗܵܫܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܢܸܬ̣ܗܲܝܡܲܢ ܦܸܬ̣ܓ̣ܵܡܵܟ݂ ܕܝܼܡܲܝܬ̇ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ. 27: ܡܸܛܠ ܕܫܲܪܝܼܪܵܐܝܼܬ̣ ܝܼܬܸܒ̣ ܐܲܠܵܗܵܐ ܥܲܠ ܐܲܪܥܵܐ. ܗܵܐ ܫܡܲܝܵܐ ܘܲܫܡܲܝ̈ ܫܡܲܝܵܐ ܠܵܐ ܡܣܲܒ̇ܪܝܼܢ ܠܵܟ݂: ܠܵܐ ܟ݂ܢ ܒܲܝܬܵܐ ܗܵܢܵܐ ܕܲܒ̣ܢܹܝܬ̣. 28: ܘܐܸܬ̣ܦܲܢ ܥܲܠ ܨܠܘܿܬܹܗ ܕܥܲܒ̣ܕܵܟ݂ ܘܥܲܠ ܒܵܥܘܼܬܹܗ: ܡܵܪܝܵܐ ܐܲܠܵܗܝ: ܠܡܸܫܡܲܥ ܒܵܥܘܼܬ̣ܵܐ ܘܲܨܠܘܿܬ̣ܵܐ: ܕܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ ܝܵܘܡܵܢܵܐ. 29: ܕܢܸܗ̱ܘ̈ܝܵܢ ܥܲܝܢܝ̈ܟ ܦܬ̣ܝܼ̈ܚܵܢ ܥܲܠ ܒܲܝܬܵܐ ܗܵܢܵܐ ܒܐܝܼܡܵܡܵܐ ܘܲܒ̣ܠܸܠܝܵܐ: ܒܐܲܬ̣ܪܵܐ ܕܐܸܡܲܪܬ̇ ܕܢܸܗܘܹܐ ܫܹܡܝ ܬܲܡܵܢ ܠܡܸܫܡܲܥ ܨܠܘܿܬ̣ܵܐ: ܕܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ ܥܲܠ ܐܲܬ̣ܪܵܐ ܗܵܢܵܐ. 30: ܘܲܫܡܲܥ ܒܵܥܘܼܬܹܗ ܕܥܲܒ̣ܕܵܟ݂ ܘܲܕ݂ܥܲܡܵܟ݂ ܝܼܣܪܵܝܹܠ: ܕܲܡܨܲܠܹܝܢ ܩܕ݂ܵܡܲܝܟ ܒܐܲܬ̣ܪܵܐ ܗܵܢܵܐ. ܘܐܲܢ̄ܬ̇ ܬܸܫܡܲܥ ܡ̣ܢ ܡܲܥ̱ܡܪܵܟ݂ ܡ̣ܢ ܫܡܲܝܵܐ: ܘܬܸܫܒ̇ܘܿܩ. 31: ܢܸܚܛܹܐ ܓܲܒ̣ܪܵܐ ܒܚܲܒ̣ܪܹܗ: ܘܲܢܚܲܝܒ̣ܝܼܘܗܝ ܡܵܘܡܵܬ̣ܵܐ ܠܡܵܘܡܵܝܘܼܬܹܗ: ܘܢܹܐܬܹܐ ܘܢܹܐܡܹܐ ܩܕ݂ܵܡ ܡܲܕ݂ܒ̇ܚܵܟ݂ ܒܒܲܝܬܵܐ ܗܵܢܵܐ. 32: ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܘܬܸܥܒܸ̇ܕ݂ ܘܲܬ̇ܕ݂ܘܼܢ ܠܥܲܒ̣ܕܲܝ̈ܟ ܠܲܡܚܲܝܵܒ̣ܘܼ ܠܚܲܝܵܒ̣ܵܐ: ܘܲܠܡܸܬܲܠ ܐܘܼܪܚܹܗ ܒܪܹܫܹܗ: ܘܠܲܡܙܲܟܵܝܘܼ ܠܙܲܟܵܝܵܐ: ܘܲܠܡܸܬܲܠ ܠܹܗ ܐܲܝܟ݂ ܙܲܟܵܝܘܼܬܹܗ. 33: ܘܟܲܕ݂ ܢܸܬ̇ܬ̇ܒܲܪ ܥܲܡܵܟ݂ ܝܼܣܪܵܝܹܠ ܒܲܩܪܵܒ̣ܵܐ ܕܲܒ̣ܥܸܠܕ̇ܒ̣ܵܒܹ̈ܐ: ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܘܲܢܬ̣ܘܼܒ̣ܘܼܢ ܠܘܵܬ̣ܵܟ݂ ܘܢܵܘܕ̇ܘܿܢ ܠܲܫܡܵܟ݂: ܘܲܢܨܲܠܘܿܢ ܘܢܸܒ̣ܥܘܿܢ ܡܸܢܵܟ݂ ܒܐܲܬ̣ܪܵܐ ܗܵܢܵܐ. 34: ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܘܬܸܫܒ̇ܘܿܩ ܠܲܚܛܵܗܹ̈ܐ ܕܥܲܒ̣ܕܲܝ̈ܟ ܘܲܕ݂ܥܲܡܵܟ݂. ܝܼܣܪܵܝܹܠ: ܘܬܲܗܦܲܟ݂ ܐܸܢܘܿܢ ܠܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ. 35: ܘܟܲܕ݂ ܢܸܬ̣ܟ̇ܠܘܿܢ ܫܡܲܝܵܐ: ܘܠܵܐ ܢܸܗܘܹܐ ܡܸܛܪܵܐ ܥܲܠ ܕܲܚܛܵܘ ܠܵܟ݂: ܘܢܹܐܬ̣ܘܿܢ ܘܲܢܨܲܠܘܿܢ ܒܐܲܬ̣ܪܵܐ ܗܵܢܵܐ ܘܢܵܘܕ̇ܘܿܢ ܠܲܫܡܵܟ݂: ܘܡ̣ܢ ܚܛܵܗܲܝ̈ܗܘܿܢ ܢܸܬ̣ܦܢܘܿܢ. 36: ܟܲܕ݂ ܬܸܥܢܸܐ ܐܸܢܘܿܢ: ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ. ܘܬܸܫܒ̇ܘܿܩ ܠܲܚܛܵܗܹ̈ܐ ܕܥܲܒ̣ܕܲܝ̈ܟ ܘܲܕ݂ܥܲܡܵܟ݂ ܝܼܣܪܵܝܹܠ: ܟܲܕ݂ ܬܲܠܸܦ ܐܸܢܘܿܢ ܐܘܼܪܚܵܐ ܛܵܒ̣ܬ̣ܵܐ ܕܢܹܐܙܠ̄ܘܿܢ ܒܵܗ̇. ܘܬܸܬܸ̇ܠ ܡܸܛܪܵܐ ܥܲܠ ܐܲܪܥܵܐ ܕܝܲܗ̄ܒ̣ܬ̇ ܠܥܲܡܵܟ݂ ܠܝܘܼܪܬܵܢܵܐ. 37: ܘܟܲܦܢܵܐ ܟܲܕ݂ ܢܸܗܘܹܐ ܒܐܲܪܥܵܐ: ܘܡܵܘܬܵܢܵܐ ܘܫܘܼܩܵܦܵܐ ܘܝܲܪܩܵܢܵܐ: ܘܩܲܡܨܵܐ ܘܙܵܚܠܵܐ ܟܲܕ݂ ܢܸܗܘܹܐ: ܘܟܲܕ݂ ܢܥܝܼܩܘܼܢ ܠܗܘܿܢ ܒܥܸܠܕ̇ܒ̣ܵܒܹ̈ܐ ܒܲܚܕ݂ܵܐ ܡ̣ܢ ܡܕ݂ܝܼ̈ܢܵܬ̣ܗܘܿܢ: ܘܟ݂ܠ ܟܘܼܪܗܵܢ: ܘܟ݂ܠ ܡܲܚܘܵܐ. 38: ܘܟ݂ܠ ܨܠܘܿܬ̣ܵܐ ܘܟ݂ܠ ܒܵܥܘܼܬ̣ܵܐ ܕܬܸܗܘܹܐ ܠܟ݂ܠ ܐ̄ܢܵܫ ܠܟܠܹܗ ܥܲܡܵܟ݂ ܝܼܣܪܵܝܹܠ: ܕܢܸܕ̇ܥܘܼܢ ܓܒܲܪ ܡܲܟ݂ܬܵܫܵܐ ܕܠܸܒܹ̇ܗ: ܘܢܸܦܫܘܿܛ ܐܝܼܕ݂ܵܘ̈ܗܝ ܩܕ݂ܵܡܲܝܟ ܒܒܲܝܬܵܐ ܗܵܢܵܐ. 39: ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܡ̣ܢ ܡܲܬ̣ܩܢܵܐ ܕܡܵܘܬ̇ܒ̣ܵܟ݂: ܘܬܸܫܒ̇ܘܿܩ ܘܬܸܥܒܸ̇ܕ݂: ܘܬܸܬܸ̇ܠ ܠܓܲܒ̣ܪܵܐ ܐܲܝܟ݂ ܐܘܼܪ̈ܚܵܬܹܗ: ܕܬܸܕܲܥ ܠܸܒܹ̇ܗ. ܡܸܛܠ ܕܐܲܢ̄ܬ̇ܘܼ ܒܲܠܚܘܿܕܲܝܟ ܝܵܕܲܥ ܐܲܢ̄ܬ̇ ܠܸܒܵܐ ܕܟ݂ܠܗܘܿܢ ܒܢܲܝ̈ܢܵܫܵܐ. 40: ܡܸܛܠ ܕܢܸܕ݂ܚ̄ܠܘܿܢ ܠܵܟ݂ ܟܠܗܘܿܢ ܝܵܘ̈ܡܵܬ̣ܵܐ ܕܗܸܢܘܿܢ ܚܲܝܝܼܢ: ܥܲܠ ܐܲܦܲܝ̈ ܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ. 41: ܘܐܵܦ ܥܲܠ ܢܘܼܟ݂ܪܵܝܵܐ ܕܠܵܐ ܗܘ̤ܵܐ ܡ̣ܢ ܥܲܡܵܟ݂ ܝܼܣܪܵܝܹܠ: ܘܢܹܐܬܹܐ ܡ̣ܢ ܐܲܪܥܵܐ ܪܲܚܝܼܩܬܵܐ ܡܸܛܠ ܫܡܵܟ݂. 42: ܟܲܕ݂ ܢܸܫܡ̱ܥܘܿܢ ܫܡܵܟ݂ ܪܲܒܵܐ: ܘܐܝܼܕ݂ܵܟ݂ ܬܲܩܝܼܦܬܵܐ: ܘܲܕ݂ܪܵܥܵܟ݂ ܪܵܡܵܐ: ܘܢܹܐܬܹܐ ܘܲܢܨܲܠܹܐ ܩܕ݂ܵܡܲܝܟ ܒܒܲܝܬܵܐ ܗܵܢܵܐ. 43: ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ ܡ̣ܢ ܡܲܬ̣ܩܢܵܐ ܕܡܵܘܬ̇ܒ̣ܵܟ݂: ܘܬܸܥܒܸ̇ܕ݂ ܐܲܝܟ݂ ܕܩܵܪܹܐ ܠܵܟ݂ ܢܘܼܟ݂ܪܵܝܵܐ: ܡܸܛܠ ܕܢܸܕ̇ܥܘܿܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ ܫܡܵܟ݂: ܠܡܸܕ݂ܚܲܠ ܐܲܝܟ݂ ܥܲܡܵܟ݂ ܝܼܣܪܵܝܹܠ: ܘܲܠܡܸܕܲܥ ܕܲܫܡܵܟ݂ ܐܸܬ̣ܩܪܝܼ ܥܲܠ ܒܲܝܬܵܐ ܗܵܢܵܐ ܕܲܒ̣ܢܹ̇ܝܬ̣. 44: ܘܟܲܕ݂ ܢܸܦܘܿܩ ܥܲܡܵܟ݂ ܠܲܩܪܵܒ̣ܵܐ ܥܲܠ ܒܥܸܠܕ̇ܒ̣ܵܒܲܝ̈ܗܘܿܢ ܒܐܘܼܪܚܵܐ ܕܲܬ̣ܫܲܕܲܪ ܐܸܢܘܿܢ: ܘܲܢܨܲܠܘܿܢ ܩܕ݂ܵܡܲܝܟ ܡܵܪܝܵܐ ܒܐܘܼܪܚܵܐ ܕܲܩܪܝܼܬ̣ܵܐ ܕܲܨܒ̇ܝܼܬ̇ ܒܵܗ̇: ܘܒܲܝܬܵܐ ܗܵܢܵܐ ܕܲܒ̣ܢܹ̇ܝܬ̣ ܠܲܫܡܵܟ݂. 45: ܘܬܸܫܡܲܥ ܡ̣ܢ ܫܡܲܝܵܐ ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ: ܘܬܸܥܒܸ̇ܕ݂ ܕܝܼܢܗܘܿܢ ܟܲܕ݂ ܢܸܚܛܘܿܢ ܠܵܟ݂. 46: ܡܸܛܠ ܕܠܲܝܬ̇ ܐ̄ܢܵܫ ܕܠܵܐ ܚܵܛܹ̇ܐ: ܘܪܵܓܹܙ̣ ܐܲܢ̄ܬ̇ ܥܠܲܝܗܘܿܢ: ܘܡܲܫܠܸܡ ܐܲܢ̄ܬ̇ ܠܗܘܿܢ ܩܕ݂ܵܡ ܒܥܸܠܕ̇ܒ̣ܵܒܹ̈ܐ: ܘܫܵܒܹ̇ܝܢ ܠܗܘܿܢ ܫܵܒܲܝ̈ܗܘܿܢ: ܠܐܲܪܥܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ ܕܪܲܚܝܼܩܵܐ ܐܵܘ ܕܩܲܪܝܼܒ̣ܵܐ. 47: ܘܢܸܬ̣ܚܲܫܒ̣ܘܿܢ ܒܠܸܒ̇ܗܘܿܢ ܒܐܲܪܥܵܐ ܕܐܸܫܬ̇ܒ̣ܝܼܘ ܠܬܲܡܵܢ: ܘܲܢܬ̣ܘܼܒ̣ܘܼܢ: ܘܢܸܒ̣ܥܘܿܢ ܡܸܢܵܟ݂ ܒܐܲܪܥܵܐ ܕܫܵܒܲܝ̈ܗܘܿܢ: ܘܢܹܐܡܪܘܿܢ: ܚܛܲܝܢ ܘܐܲܣܟܸ̇ܠܢ ܘܐܲܥܠܝܼܢ. 48: ܘܢܸܬ̣ܦܢܘܿܢ ܠܘܵܬ̣ܵܟ݂ ܡ̣ܢ ܟܠܹܗ ܠܸܒ̇ܗܘܿܢ: ܘܡ̣ܢ ܟܠܵܗ̇ ܢܲܦ̮ܫܗܘܿܢ: ܒܐܲܪܥܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ ܕܲܫܒ̣ܵܘ ܐܸܢܘܿܢ. ܘܲܢܨܲܠܘܿܢ ܩܕ݂ܵܡܲܝܟ ܒܐܘܼܪܚܵܐ ܕܐܲܪܥ̱ܗܘܿܢ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ: ܩܪܝܼܬ̣ܵܐ ܕܲܓ̣ܒܝܼܬ̇: ܘܒܲܝܬܵܐ ܕܲܒ̣ܢܹ̇ܝܬ̣ ܠܲܫܡܵܟ݂. 49: ܘܬܸܫܡܲܥ ܡ̣ܢ ܫܡܲܝܵܐ ܡ̣ܢ ܡܲܬ̣ܩܢܵܐ ܕܡܵܘܬ̇ܒ̣ܵܟ݂: ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ ܘܬܸܥܒܸ̇ܕ݂ ܕܝܼܢܗܘܿܢ. 50: ܘܬܸܫܒ̇ܘܿܩ ܠܥܲܡܵܟ݂ ܥܲܠ ܕܲܚܛܵܘ ܠܵܟ݂: ܘܥܲܠ ܟܠܗܹܝܢ ܣܲܟ݂̈ܠ̱ܘܵܬ̣ܗܘܿܢ ܕܐܲܣܟܸ̇ܠܘ ܒܵܟ݂: ܘܬܸܬܸ̇ܠ ܐܸܢܘܿܢ ܠܪ̈ܲܚܡܹܐ ܩܕ݂ܵܡ ܫܲܒܲܝ̈ܗܘܿܢ: ܘܢܸܪܚ̄ܡܘܼܢ ܐܸܢܘܿܢ. 51: ܡܸܛܠ ܕܥܲܡܵܟ݂ ܐܸܢܘܿܢ ܘܝܵܪܬ̇ܘܼܬ̣ܵܟ݂: ܕܐܲܦܸܩܬ̇ ܐܸܢܘܿܢ ܡ̣ܢ ܡܸܨܪܝܼܢ ܡ̣ܢ ܟܘܼܪܵܐ ܕܦܲܪܙܠܵܐ. 52: ܘܢܸܗ̱ܘ̈ܝܵܢ ܥܲܝܢܲܝ̈ܟ ܦܬ̣ܝܼ̈ܚܵܢ ܥܲܠ ܒܵܥܘܼܬ̣ܵܐ ܕܥܲܒ̣ܕܲܝ̈ܟ ܘܲܕ݂ܥܲܡܵܟ݂ ܝܼܣܪܵܝܹܠ: ܘܬܸܫܡܲܥ ܐܸܢܘܿܢ ܒܟ݂ܠ ܕܩܵܪܹܝܢ ܠܵܟ݂. 53: ܡܸܛܠ ܐܲܢ̄ܬ̇ ܦܪܲܫܬ̇ ܐܸܢܘܿܢ ܠܵܟ݂ ܠܝܵܪܬ̇ܘܼܬ̣ܵܐ: ܡ̣ܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܐܲܝܟ݂ ܕܐܸܡܲܪܬ̇ ܒܐܝܼܕ݂ܵܐ ܕܡܘܼܫܹܐ ܥܲܒ̣ܕܵܟ݂: ܟܲܕ݂ ܐܲܦܸܩܬ̇ ܠܐܲܒ̣ܵܗܲܝ̈ܗܘܿܢ: ܡ̣ܢ ܡܸܨܪܹܝܢ ܡܵܪܝܵܐ ܐܲܠܵܗܵܐ. 54: ܘܟܲܕ݂ ܫܲܠܸܡ ܫܠܹܝܡܘܿܢ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܐܲܠܵܗܵܐ: ܟܠܵܗ̇ ܨܠܘܿܬ̣ܵܐ ܘܒ̣ܵܥܘܼܬ̣ܵܐ ܗܵܕܹܐ: ܩܵܡ ܡ̣ܢ ܩܕ݂ܵܡ ܡܲܕ݂ܒ̇ܚܹܗ ܕܡܵܪܝܵܐ: ܕܲܗܘ̤ܵܐ ܒܲܪܝܼܟ݂ ܥܲܠ ܒܘܼܪ̈ܟܵܘܗܝ: ܘܐܝܼܕ݂ܵܘ̈ܗܝ ܦܪ̈ܝܼܣܵܢ ܠܲܫܡܲܝܵܐ. 55: ܘܩܵܡ ܘܒܲܪܸܟ݂ ܠܟ݂ܠܹܗ ܟܸܢܫܵܐ ܕܝܼܣܪܵܝܹܠ ܒܩܵܠܵܐ ܪܵܡܵܐ: ܘܐܸܡܲܪ.

56: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ: ܕܝܲܗ̄ܒ̣ ܢܝܵܚܵܐ ܠܝܼܣܪܵܝܹܠ ܥܲܡܹܗ ܐܲܝܟ݂ ܕܐܸܡܲܪ: ܘܠܵܐ ܢܦܲܠ ܚܲܕ݂ ܦܸܬ̣ܓ̣ܵܡܵܐ ܡ̣ܢ ܟܠܗܘܿܢ ܦܸܬ̣ܓ̣ܵܡܹ̈ܐ ܛܵܒܹ̈ܐ ܕܐܸܡܲܪ ܡܵܪܝܵܐ ܒܐܝܼܕ݂ܵܐ ܕܡܘܼܫܹܐ ܥܲܒ̣ܕܹ̇ܗ. 57: ܘܢܸܗܘܹܐ ܡܵܪܝܵܐ ܐܲܠܵܗܲܢ ܥܲܡܲܢ: ܐܲܝܟ݂ ܕܲܗܘ̤ܵܐ ܥܲܡ ܐܲܒ̣ܵܗܲܝ̈ܢ: ܠܵܐ ܢܲܪܦܹܝܢ ܘܠܵܐ ܢܸܫܒ̇ܩܲܢ. 58: ܠܡܲܦܢܵܝܘܼ ܠܸܒܲܢ ܠܘܵܬܹܗ: ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܠܡܸܛܲܪ ܦܘܼܩܕܵܢܵܘ̈ܗܝ: ܘܲܩܝܵܡܵܘ̈ܗܝ: ܘܕ݂ܝܼܢܵܘ̈ܗܝ: ܘܢܵܡܘܿܣܵܘ̈ܗܝ: ܕܦܲܩܸܕ݂ ܠܐܲܒ̣ܵܗܲܝ̈ܢ. 59: ܘܢܸܗܘܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ ܕܲܒ̣ܥܹܝܬ̣ ܡ̣ܢ ܩܕ݂ܵܡ ܡܵܪܝܵܐ: ܩܲܪܝܼܒ̣ܝܼܢ ܠܡܵܪܝܵܐ ܐܲܠܵܗܵܐ ܒܠܸܠܝܵܐ ܘܒ̣ܐܝܼܡܵܡܵܐ: ܠܡܸܥܒܲܕ݂ ܕܝܼܢܵܐ ܕܥܲܒ̣ܕܹ̇ܗ: ܘܕ݂ܝܼܢܵܐ ܕܥܲܡܹܗ ܝܼܣܪܵܝܹܠ ܟܠܝܘܿܡ ܒܝܘܿܡ.

60: ܡܸܛܠ ܕܢܸܕ̇ܥܘܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ ܕܡܵܪܝܵܐ ܗ̄ܘ̣ ܐܲܠܵܗܵܐ: ܘܠܲܝܬ̇ ܬܘܼܒ̣ ܠܒܲܪ ܡܸܢܹܗ.

61: ܘܢܸܗܘܹܐ ܠܸܒ̇ܟ݂ܘܿܢ ܫܠܸܡ ܥܲܡ ܡܵܪܝܵܐ ܐܲܠܵܗܲܢ: ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܘܲܠܡܸܛܲܪ ܦܘܼܩܕܵܢܵܘ̈ܗܝ: ܘܲܩܝܵܡܵܘ̈ܗܝ: ܘܕ݂ܝܼܢܵܘ̈ܗܝ: ܘܢܵܡܘܿܣܵܘ̈ܗܝ ܐܲܝܟ݂ ܕܝܵܘܡܵܢܵܐ. 62: ܘܡܲܠܟܵܐ ܫܠܹܝܡܘܿܢ ܘܟ݂ܠܹܗ ܝܼܣܪܵܝܹܠ ܥܲܡܹܗ: ܡܕܲܒ̇ܚܝܼܢ ܗ̄ܘ̣ܵܘ ܕܸܒ̣ܚܬ̣ܵܐ ܪܲܒ̇ܬ̣ܵܐ ܩܕ݂ܵܡ ܡܵܪܝܵܐ. 63: ܘܕܲܒܲܚ ܫܠܹܝܡܘܿܢ ܕܸܒ̣ܚܹ̈ܐ ܫܲܠܡܹ̈ܐ ܩܕ݂ܵܡ ܡܵܪܝܵܐ: ܬܵܘܪܹ̈ܐ ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ: ܘܥܵـ̈ـܢܵܐ ܡܵܐܐ ܘܥܸܣܪܝܼܢ ܐܲܠܦ̈ܝܼܢ. 64: ܘܚܲܕܸ̇ܬ̣ܘ ܠܒܲܝܬܹ̇ܗ ܕܡܵܪܝܵܐ: ܡܲܠܟܵܐ ܘܟܠܗܘܿܢ ܒ̈ܢܲܝ ܝܼܣܪܵܝܹܠ ܒܝܵܘܡܵܐ ܗܵܘ̇: ܩܲܕܸ̇ܫ ܡܲܠܟܵܐ ܠܓ̣ܵܘܵܗ̇ ܕܕ݂ܵܪܬܵܐ ܕܲܩܕ݂ܵܡ ܒܲܝܬܹ̇ܗ ܕܡܵܪܝܵܐ. ܡܸܛܠ ܕܲܥܒܲܕ݂ ܬܲܡܵܢ ܥܠܵـ̈ـܘܵܬ̣ܵܐ ܘܩܘܼܪ̈ܒܵܢܹܐ: ܘܬܲܪܒܵܐ ܕܫܲܠܡܹ̈ܐ. ܡܸܛܠ ܕܡܲܕ݂ܒ̇ܚܵܐ ܕܲܢܚܵܫܵܐ ܕܲܩܕ݂ܵܡ ܡܵܪܝܵܐ: ܙܥܘܿܪ ܗ̄ܘ̣ܵܐ ܠܲܡܣܲܝܒܵܪܘܼ ܥܠܵـ̈ـܘܵܬ̣ܵܐ: ܘܩܘܼܪ̈ܒܵܢܹܐ ܘܬܲܪܒܵܐ ܕܫܲܠܡܹ̈ܐ. 65: ܘܲܥܒܲܕ݂ ܫܠܹܝܡܘܿܢ ܒܝܵܘܡܵܐ ܗܵܘ̇ ܚܲܓܵܐ: ܘܟ݂ܠܹܗ ܝܼܣܪܵܝܹܠ ܥܲܡܹܗ ܟܢܝܼܫܝܼܢ: ܡ̣ܢ ܡܲܥܠܵܢܵܐ ܕܲܚܡܵܬ̣: ܘܲܥܕܲܡܵܐ ܠܡܲܥܠܵܢܵܐ ܕܢܲܚܠܵܐ ܕܡܸܨܪܹܝܢ ܩܕ݂ܵܡ ܡܵܪܝܵܐ ܐܲܠܵܗܲܢ: ܫܲܒ̣ܥܵܐ ܝܵܘ̈ܡܝܼܢ ܘܫܲܒ̣ܥܵܐ ܝܵܘ̈ܡܝܼܢ: ܐܲܪܒܲܬܲܥܣܲܪ ܝܵܘ̈ܡܝܼܢ. 66: ܘܲܒ̣ܝܵܘܡܵܐ ܕܲܬ̣ܡܵܢܝܵܐ: ܫܲܕܲܪܘ ܥܲܡܵܐ ܘܒܲܪܸܟ݂ܘ ܠܡܲܠܟܵܐ. ܘܐܸܙܲܠ̣ܘ ܠܡܲܫܟ̇ܢܲܝ̈ܗܘܿܢ ܟܲܕ݂ ܚܵܕܹܝܢ ܘܫܲܦܝܼܪ ܠܸܒ̇ܗܘܿܢ ܥܲܠ ܟܠܗܹܝܢ ܛܵܒ̣ܵـ̈ـܬ̣ܵܐ ܕܲܥܒܲܕ݂ ܡܵܪܝܵܐ ܠܕ݂ܵܘܝܼܕ݂ ܥܲܒ̣ܕܹ̇ܗ ܘܠܥܲܡܹܗ ܝܼܣܪܵܝܹܠ.

ܩܹܦܵܠܹܐܘܿܢ: ܛ.

1: ܘܟܲܕ݂ ܫܲܠܸܡ ܫܠܹܝܡܘܿܢ ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ: ܘܒܲܝܬܹ̇ܗ ܕܡܲܠܟܵܐ: ܘܟ݂ܠܹܗ ܨܸܒ̣ܝܵܢܹܗ ܕܲܫܠܹܝܡܘܿܢ ܕܲܨܒ̣ܵܐ ܠܡܸܥܒܲܕ݂. 2: ܗܵܝܕܹ̇ܝܢ ܐܸܬ̣ܓ̇ܠܝܼ ܡܵܪܝܵܐ ܥܲܠ ܫܠܹܝܡܘܿܢ ܕܬܲܪܬܹ̇ܝܢ ܙܲܒ̣ܢ̈ܝܼܢ: ܐܲܝܟ݂ ܕܐܸܬ̣ܓ̇ܠܝܼ ܥܠܵܘܗܝ ܒܓܸܒ̣ܥܘܿܢ. 3: ܘܐܸܡܲܪ ܠܹܗ ܡܵܪܝܵܐ: ܫܸܡ̇ܥܹܬ̣ ܨܠܘܿܬ̣ܵܟ݂ ܘܒ̣ܵܥܘܼܬ̣ܵܟ݂ ܕܲܒ̣ܥܲܝܬ̇ ܡ̣ܢ ܩܕ݂ܵܡܲܝ: ܘܩܲܕ̇ܫܹ̇ܬ̣ ܠܝܼ ܒܲܝܬܵܐ ܗܵܢܵܐ ܕܲܒ̣ܢܲܝܬ̇: ܠܲܡܣܵܡ ܫܹܡܝ ܬܲܡܵܢ ܥܕܲܡܵܐ ܠܥܵܠܲܡ. ܘܢܸܗ̱ܘ̈ܝܵܢ ܥܲܝܢܲܝ̈ ܘܠܹܒ̇ܝ ܬܲܡܵܢ ܟܠܗܘܿܢ ܝܵܘ̈ܡܵܬ̣ܵܐ. 4: ܘܐܲܢ̄ܬ̇ ܬܗܲܠܸܟ݂ ܩܕ݂ܵܡܲܝ ܐܲܝܟ݂ ܕܗܲܠܸܟ݂ ܕܵܘܝܼܕ݂ ܐܲܒ̣ܘܼܟ݂: ܒܬܲܡܝܼܡܘܼܬ̣ ܠܸܒܵܐ ܘܒܲܬ̣ܪܝܼܨܘܼܬ̣ܵܐ ܠܡܸܥܒܲܕ݂ ܐܲܝܟ݂ ܕܦܲܩܕ̇ܬܵܟ݂: ܘܲܩܝܵܡܝ̈ ܘܕ݂ܝܼܢܲܝ̈ ܬܸܛܲܪ. 5: ܐܲܩܝܼܡ ܟܘܼܪܣܝܵܐ ܕܡܲܠܟ̇ܘܼܬ̣ܵܟ݂ ܥܲܠ ܝܼܣܪܵܝܹܠ ܠܥܵܠܲܡ: ܐܲܝܟ݂ ܕܐܸܡ̇ܪܹܬ̣ ܠܕ݂ܵܘܝܼܕ݂ ܐܲܒ̣ܘܼܟ݂: ܕܠܵܐ ܢܸܥܢܲܕ݂ ܠܵܟ݂ ܓܲܒ̣ܪܵܐ ܡ̣ܢ ܟܘܼܪܣܝܵܐ ܕܝܼܣܪܵܝܹܠ. 6: ܘܐܸܢ ܡܸܗܦܲܟ݂ ܬܸܗܦܟ݂ܘܿܢ ܡ̣ܢ ܒܵܬܲܪܝ ܐܲܢ̄ܬ̇ܘܿܢ ܘܲܒ̣ܢܲܝ̈ܟ̇ܘܿܢ: ܘܠܵܐ ܬܸܛܪܘܿܢ ܦܘܼܩ̈ܕܵܢܲܝ ܘܲܩܝܵܡܲܝ̈ ܕܝܸܗ̄ܒܹ̇ܬ̣ ܩܕ݂ܵܡܲܝܟ̇ܘܿܢ: ܘܬܹܐܙܠ̄ܘܿܢ ܘܬܸܦ̱ܠܚܘܼܢ ܠܐܲܠܵܗܹ̈ܐ ܐ̄ܚܪ̈ܵܢܹܐ: ܘܬܸܣܓܕ݂ܘܿܢ ܠܗܘܿܢ. 7: ܐܵܘܒܸ̇ܕ݂ ܠܝܼܣܪܵܝܹܠ ܡ̣ܢ ܐܲܦܲܝ̈ ܐܲܪܥܵܐ ܕܝܸܗ̄ܒܹ̇ܬ̣ ܠܗܘܿܢ. ܘܒܲܝܬܵܐ ܕܩܲܕܫܹܬ̣ ܠܫܹܡܝ ܐܸܥܩ̄ܪܝܼܘܗܝ ܡ̣ܢ ܩܕ݂ܵܡܲܝ. ܘܢܸܗܘܹܐ ܝܼܣܪܵܝܹܠ ܠܡܲܬ̣ܠܵܐ ܘܲܠܬ̣ܘܼܢܵܝܵܐ ܒܟ݂ܠܗܘܿܢ ܥܲܡܡܹ̈ܐ. 8: ܘܒܲܝܬܵܐ ܗܵܢܵܐ ܢܸܗܘܹܐ ܚܪܸܒ̣. ܘܟ݂ܠ ܕܢܸܥܒܲܪ ܥܠܵܘܗܝ: ܢܸܬ̣ܡܲܗ ܘܢܲܫܪܸܩ ܘܢܹܐܡܪܘܿܢ ܥܲܠ ܡܵܢܵܐ ܥܒܲܕ݂ ܡܵܪܝܵܐ ܗܵܟܲܢܵܐ ܠܐܲܪܥܵܐ ܗܵܕܹܐ ܘܲܠܒܲܝܬܵܐ ܗܵܢܵܐ. 9: ܘܢܹܐܡܪܘܿܢ ܥܲܠ ܕܲܫܒܲܩ̣ܘ ܠܡܵܪܝܵܐ ܐܲܠܗܗܘܿܢ ܕܐܲܦܸܩ̣ ܠܐܲܒ̣ܵܗܲܝ̈ܗܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܐܸܚܲܕ݂ܘ ܒܐܲܠܵܗܹ̈ܐ ܕܥܲܡܡܹ̈ܐ ܐ̄ܚܪܸ̈ܵܢܹܐ: ܘܲܦܠܲܚ̣ܘ ܐܸܢܘܿܢ: ܘܲܣܓܲܕ݂ܘ ܠܗܘܿܢ: ܡܸܛܠ ܗܵܢܵܐ ܐܲܝܬ̇ܝܼ ܡܵܪܝܵܐ ܥܠܲܝܗܘܿܢ ܒܝܼܫܬܵܐ ܗܵܕܹܐ ܟܠܵܗ̇. 10: ܘܲܗܘ̤ܵܐ ܡ̣ܢ ܒܵܬܲܪ ܥܸܣܪܝܼܢ ܫܢ̈ܝܼܢ: ܕܲܒ̣ܢܵܐ ܫܠܹܝܡܘܿܢ ܬܪܹܝܢ ܒܵܬܲܝܼ̈ܢ: ܒܲܝܬܹ̇ܗ ܕܡܵܪܝܵܐ ܘܒܲܝܬܹ̇ܗ ܕܡܲܠܟܵܐ. 11: ܘܚܝܼܪܵܡ ܡܲܠܟܵܐ ܕܨܘܿܪ ܬܲܪܣܝܼ ܠܲܫܠܹܝܡܘܿܢ: ܒܩܲܝܣܹ̈ܐ ܕܐܲܪ̈ܙܹܐ: ܘܲܒ̣ܩܲܝܣܹ̈ܐ ܕܫܲܪ̈ܘܲܝܢܹܐ: ܘܲܒ̣ܕܲܗܒ̣ܵܐ ܐܲܝܟ݂ ܕܲܨܒ̣ܵܐ: ܗܵܝܕܹ̇ܝܢ ܝܲܗ̄ܒ̣ ܡܲܠܟܵܐ ܫܠܹܝܡܘܿܢ ܠܚܝܼܪܵܡ ܥܸܣܪܝܼܢ ܩܘܼܪ̈ܝܵܐ ܒܐܲܪܥܵܐ ܕܲܓ̣ܠܝܼܠܵܐ. 12: ܘܲܢܦܲܩ ܚܝܼܪܵܡ ܡ̣ܢ ܨܘܿܪ ܠܡܸܚܙܵܐ ܩܘܼܪ̈ܝܵܐ ܕܝܲܗ̄ܒ̣ ܠܹܗ ܫܠܹܝܡܘܿܢ: ܘܠܵܐ ܫܦܲܪ ܒܥܲܝܢܵܘ̈ܗܝ. 13: ܘܐܸܡܲܪ: ܡܵܢܵܐ ܐܸܢܹܝܢ ܗܵܠܹܝܢ ܩܘܼܪ̈ܝܵܐ ܕܝܲܗ̄ܒ̣ܬ̇ ܠܝܼ: ܐܵܚܝ. ܘܲܩ̣ܪܵܐ ܐܸܢܹܝܢ ܐܲܪܥܵܐ ܕܟܲܒ̇ܘܿܠܝܼ: ܥܕܲܡܵܐ ܠܝܵܘܡܵܢܵܐ. 14: ܘܫܲܕܲܪ ܡܲܠܟܵܐ ܚܝܼܪܵܡ ܠܡܲܠܟܵܐ ܫܠܹܝܡܘܿܢ: ܡܵܐܐ ܘܥܸܣܪܝܼܢ ܟܲܟ̇ܪܹ̈ܐ ܕܕܲܗܒ̣ܵܐ. 15: ܘܗܵܢܵܐ ܦܘܼܣܩܵܢܵܐ ܕܡܲܕܲܐܬ̣ܵܐ ܕܐܲܣܸܩ̣ ܡܲܠܟܵܐ ܫܠܹܝܡܘܿܢ: ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ ܘܒܲܝܬܹ̇ܗ. ܘܲܒ̣ܢܵܐ ܫܘܼܪܵܐ ܕܐܘܿܪܸܫܠܸܡ: ܘܡܲܠܘܿ: ܘܚܵܨܘܿܪ: ܘܡܲܓܕ̇ܘܿ: ܘܓ̣ܵܙܵܪ. 16: ܘܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܣܠܸܩ ܗ̄ܘ̣ܵܐ ܘܟܲܒ̣ܫܵܗ̇ ܠܓ̣ܵܙܵܪ: ܘܐܵܘܩܕ݂ܵܗ̇ ܒܢܘܼܪܵܐ. ܘܠܲܟ݂ܢܲܥܢܵܝܹ̈ܐ ܕܝܵܬ̣ܒ̇ܝܼܢ ܒܲܩܪܝܼܬ̣ܵܐ ܩܲܛܸܠ. ܘܝܲܗ̄ܒܵܗ̇ ܡܵܘܗܲܒ̣ܬ̣ܵܐ ܠܒܲܪܬܹܗ ܐܲܢ̄ܬܲܬ̣ ܫܠܹܝܡܘܿܢ. 17: ܘܲܒ̣ܢܵܐ ܫܠܹܝܡܘܿܢ ܠܓ̣ܵܙܵܪ ܘܲܠܒܹܝܬ̣ ܚܵܘܪܵܢ ܬܲܚܬܵܝܬܵܐ. 18: ܘܲܠܒܲܥܠܘܼܬ̣: ܘܲܠܬ̣ܕ݂ܡܘܿܪ ܕܒܲܐܪܥܵܐ ܕܡܲܕ݂ܒ̇ܪܵܐ. 19: ܘܲܠܟ݂ܠܗܹܝܢ ܩܘܼܪ̈ܝܵܐ ܕܒܹܝܬ̣ ܓܲܙܵܐ: ܕܲܗ̤̈ܘܲܝ ܠܲܫܠܹܝܡܘܿܢ: ܘܲܠܩܘܼܪ̈ܝܵܐ ܕܡܲܪ̈ܟ̇ܒ̣ܵܬ̣ܵܐ: ܘܲܠܩܘܼܪ̈ܝܵܐ ܕܦܲܪ̈ܵܫܹܐ: ܘܨܸܒ̣ܝܵܢܹܗ ܕܲܫܠܹܝܡܘܿܢ ܕܲܨܒ̣ܵܐ ܠܡܸܒ̣ܢܵܐ ܒܐܘܿܪܸܫܠܸܡ: ܘܲܒ̣ܠܸܒ̣ܢܵܢ: ܘܲܒ̣ܟ݂ܠܵܗ̇ ܐܲܪܥܵܐ ܕܫܘܼܠܛܵܢܹܗ. 20: ܘܟ݂ܠܹܗ ܥܲܡܵܐ ܕܐܸܫܬ̇ܚܲܕ݂ܘ ܡ̣ܢ ܐܵܡܘܿܪ̈ܵܝܹܐ: ܘܚܹܬ̣ܵܝܹ̈ܐ: ܘܦܲܪ̈ܙܵܝܹܐ: ܘܚܵـ̈ـܘܵܝܹܐ: ܘܝܵܒ̣ܘܿܣܵܝܹ̈ܐ: ܕܠܵܐ ܗܘ̤ܵܘ ܡ̣ܢ ܒܢܲܝ̈ ܝܼܣܪܵܝܹܠ. 21: ܒܢܲܝ̈ܗܘܿܢ ܕܐܸܫܬ̇ܚܲܪܘ ܡ̣ܢ ܒܵܬܲܪܗܘܿܢ: ܘܠܵܐ ܐܸܫܟܲܚ̣ܘ ܒܢܲܝ̈ ܝܼܣܪܵܝܹܠ ܠܡܵܘܒܵܕ݂ܘܼ ܐܸܢܘܿܢ: ܥ̣ܒܲܕ݂ ܐܸܢܘܿܢ ܫܠܹܝܡܘܿܢ ܥܲܒ̣̈ܕܹ̇ܐ ܡܲܣܩܲܝ̈ ܡܲܕܲܐܬ̣ܵܐ: ܥܕܲܡܵܐ ܠܝܵܘܡܵܢܵܐ. 22: ܘܡ̣ܢ ܒܢܲܝ̈ ܝܼܣܪܵܝܹܠ ܠܵܐ ܝܲܗ̄ܒ̣ ܫܠܹܝܡܘܿܢ ܥܲܒ̣̈ܕܹ̇ܐ: ܡܸܛܠ ܕܗܸܢܘܿܢ ܐܸܢܘܿܢ ܓܲܒ̣ܪܹ̈ܐ ܩܪ̈ܲܒ̣ܬ݂ܵܢܹܐ: ܘܥܲܒ̣ܕܵܘ̈ܗܝ ܘܪܵܘ̱ܪ̈ܒ̣ܵܢܵܘܗܝ ܘܓܲܢ̄ܒܵܪ̈ܵܘܗܝ ܘܪܵܘ̱ܪ̈ܒ̣ܵܢܲܝ ܡܲܪ̈ܟ̇ܒ̣ܵܬܹܗ ܘܦܲܪ̈ܵܫܵܘܗܝ. 23: ܗܵܠܹܝܢ ܐܸܢܘܿܢ ܩܲܝܘܼܡܹ̈ܐ ܕܥܲܠ ܥܒ̣ܵܕ݂ܵܐ ܕܲܫܠܹܝܡܘܿܢ: ܚܲܡܸܫܡܵܐܐ ܘܚܲܡܫܝܼܢ ܕܫܲܠܝܼܛܝܼܢ ܥܲܠ ܥܲܡܵܐ ܘܡܲܥܒ̇ܕ݂ܝܼܢ ܒܲܥܒ̣ܵܕ݂ܵܐ. 24: ܘܒܲܪܬ ܦܸܪܥܘܿܢ ܣܸܠܩܲܬ̤ ܡ̣ܢ ܩܪܝܼܬܹܗ ܕܕ݂ܵܘܝܼܕ݂: ܠܒܲܝܬܵܐ ܕܲܒ̣ܢܵܐ ܠܵܗ̇ ܫܠܹܝܡܘܿܢ: ܗܵܝܕܹ̇ܝܢ ܒܢܵܐ ܠܡܲܠܘܿ. 25: ܘܡܲܣܸܩ ܗ̄ܘ̣ܵܐ ܫܠܹܝܡܘܿܢ: ܬܠܵܬ̣ ܙܲܒ̣ܢ̈ܝܼܢ ܒܫܲܢ̄ܬܵܐ: ܥܠܵـ̈ـܘܵܬ̣ܵܐ ܘܫܲܠܡܹ̈ܐ: ܥܲܠ ܡܲܕ݂ܒ̇ܚܵܐ: ܘܣܵܐܹ̇ܡ ܗ̄ܘ̣ܵܐ ܥܠܵܘܗܝ ܒܸܣܡܹ̈ܐ ܩܕ݂ܵܡ ܡܵܪܝܵܐ.

26: ܘܫܲܠܡܹܗ ܠܒܲܝܬܵܐ: ܘܲܥ̣ܒܲܕ݂ ܣܦ̈ܝܼܢܵܬ̣ܵܐ ܡܲܠܟܵܐ ܫܠܹܝܡܘܿܢ ܒܥܹܨܝܼܢܘܿ ܓܒܲܪ ܕܥܲܡ ܐܲܠܘܿܬ̣: ܥܲܠ ܣܦܲܬ̣ ܝܲܡܵܐ ܕܣܘܿܦ ܒܐܲܪܥܵܐ ܕܐܲܪܘܲܕ݂. 27: ܘܫܲܕܲܪ ܡܲܠܟܵܐ ܚܝܼܪܵܡ ܠܥܲܒ̣ܕܵܘ̈ܗܝ ܒܲܣܦ̈ܝܼܢܵܬ̣ܵܐ: ܓܲܒ̣ܪܹ̈ܐ ܣܲܦܵܢܹ̈ܐ ܕܝܵܕ݂ܥܝܼܢ ܝܲܡܵܐ ܥܲܡ ܥܲܒ̣ܕܵܘ̈ܗܝ ܕܲܫܠܹܝܡܘܿܢ. 28: ܘܐܸܬ̣ܵܘ ܠܐܵܘܦܹܝܪ: ܘܲܢܣܲܒ̣ܘ ܡ̣ܢ ܬܲܡܵܢ ܕܲܗܒ̣ܵܐ: ܐܲܪܒܲܥܡܵܐܐ ܘܥܸܣܪܝܼܢ ܟܲܟ̇ܪ̈ܝܼܢ: ܘܐܲܝܬ̇ܝܼܘ ܠܡܲܠܟܵܐ ܫܠܹܝܡܘܿܢ.

ܩܹܦܵܠܹܐܘܿܢ: ܝ.

1: ܘܡܲܠܟܲܬ̣ ܫܒ̣ܵܐ ܫܸܡܥܲܬ̤ ܫܸܡܥܹܗ ܕܲܫܠܹܝܡܘܿܢ ܘܲܫܡܹܗ ܕܡܵܪܝܵܐ. 2: ܘܐܸܬܲܬ̤ ܠܲܡܢܲܣܵܝܘܼܬܹܗ ܒܐܘܼܚ̈ܕܵܬ̣ܵܐ: ܘܐܸܬ̣ܵܬ̤ ܠܐܘܿܪܸܫܠܸܡ ܒܚܲܝܠܵܐ ܣܲܓ̇ܝܼܐܵܐ ܕܛܵܒ̣: ܘܓܲܡ̈ܠܹܐ ܕܲܛܥܝܼܢܝܼܢ ܒܸܣܡܹ̈ܐ ܘܕܲܗܒ̣ܵܐ ܣܘܿܓ̣ܵܐܐ ܕܛܵܒ̣: ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ. ܘܐܸܬ̣ܵܬ̣ ܠܘܵܬ̣ ܡܲܠܟܵܐ ܫܠܹܝܡܘܿܢ: ܘܢܲܣܝܵܬܹܗ ܒܟ݂ܠ ܡܸܕܸ̇ܡ ܕܐܝܼܬ̣ ܗ̄ܘ̣ܵܐ ܒܠܸܒܹ̇ܗ. 3: ܘܚܵܘܝܵܗ̇ ܫܠܹܝܡܘܿܢ ܟܠܗܹܝܢ ܡܸܠܹ̈ܐ: ܘܡܸܕܸ̇ܡ ܠܵܐ ܐܸܬ̣ܟܲܣܝܼ ܡ̣ܢ ܡܲܠܟܵܐ ܕܠܵܐ ܚܵܘܝܵܗ̇. 4: ܘܲܚܙܵܬ̤ ܡܲܠܟܲܬ̣ ܫܒ̣ܵܐ ܟܠܵܗ̇ ܚܸܟ݂ܡ̱ܬܹܗ ܕܲܫܠܹܝܡܘܿܢ: ܘܒܲܝܬܵܐ ܕܲܒ̣ܢܵܐ. 5: ܘܡܹܐܟܲܠ ܦܵܬ̣ܘܿܪܹܗ: ܘܡܵܘܬܲܒ̣ ܥܲܒ̣ܕܵܘ̈ܗܝ: ܘܲܩܝܵܡ ܡܫܲܡܫܵܢܵܘ̈ܗܝ: ܘܲܠܒ̣ܘܼܫܲܝ̈ܗܘܿܢ: ܘܫܵܩܵـ̈ـܘܵܬܹܗ: ܘܲܠܒ̣ܘܼܫܲܝ̈ܗܘܿܢ: ܘܲܥ̈ܠܵܘܵܬܹܗ ܕܡܲܣܸܩ ܗ̄ܘ̣ܵܐ ܒܒܲܝܬܹ̇ܗ ܕܡܵܪܝܵܐ. ܘܠܵܐ ܐܸܫܬܲܚܪܲܬ̤ ܒܵܗ̇ ܬܘܼܒ̣ ܪܘܼܚܵܐ.

6: ܘܐܸܡܪܲܬ̤ ܠܡܲܠܟܵܐ: ܫܲܪܝܼܪܵܐܝܼܬ̣ ܗܘ̤ܵܐ ܦܸܬ̣ܓ̣ܵܡܵܐ ܕܫܸܡܥܹ̇ܬ̣ ܒܐܲܪܥܝ: ܥܲܠ ܦܸܬ̣ܓ̣ܵܡܲܝ̈ܟ ܘܥܲܠ ܚܸܟ݂ܡ̱ܬ̣ܵܟ݂. 7: ܘܠܵܐ ܗܲܝܡܢܹܬ̣ ܠܦܸܬ̣ܓ̣ܵܡܹ̈ܐ ܥܕܲܡܵܐ ܕܐܸܬܹܝܬ̣ ܘܲܚܙܲܝ̈ ܥܲܝܢܲܝ̈ ܘܗܵܐ ܠܵܐ ܚܵܘܝܼܘ ܠܝܼ ܦܸܠܓܵܐ. ܐܵܘܣܸܦܬ̇ ܚܸܟ݂ܡ̱ܬ̣ܵܐ ܘܛܵܒ̣ܬ̣ܵܐ ܥܲܠ ܛܸܒܵܐ ܕܫܸܡܥܹ̇ܬ̣. 8: ܛܘܼܒܲܝܗܹܝܢ ܠܢܸܫܲܝ̈ܟ: ܛܘܼܒܲܝܗܘܿܢ ܠܥܲܒ̣ܕܲܝ̈ܟ ܗܵܠܹܝܢ ܕܩܵܝ̇ܡܝܼܢ ܩܕ݂ܵܡܲܝܢ ܐܲܡܝܼܢܵܐܝܼܬ̣: ܘܫܵܡ̇ܥܝܼܢ ܚܸܟ݂ܡ̱ܬ̣ܵܟ݂. 9: ܢܸܗܘܹܐ ܡܵܪܝܵܐ ܐܲܠܵܗܵܟ݂ ܒܪܝܼܟ݂: ܕܲܨܒ̣ܵܐ ܒܵܟ݂ ܘܐܵܘܬ̇ܒ̣ܵܟ݂ ܥܲܠ ܟܘܼܪܣܝܵܐ ܕܝܼܣܪܵܝܹܠ. ܡܸܛܠ ܕܲܪܚܸܡ ܡܵܪܝܵܐ ܠܝܼܣܪܵܝܹܠ ܠܥܵܠܲܡ: ܘܥܲܒ̣ܕܵܟ݂ ܡܲܠܟܵܐ: ܕܬܸܥܒܸ̇ܕ݂ ܕܝܼܢܵܐ ܘܙܲܕ̇ܝܼܩܘܼܬ̣ܵܐ. 10: ܘܝܸܗ̄ܒ̇ܬ̤ ܠܡܲܠܟܵܐ ܫܠܹܝܡܘܿܢ: ܡܵܐܐ ܘܥܸܣܪܝܼܢ ܟܲܟ̇ܪܹ̈ܐ ܕܕܲܗܒ̣ܵܐ: ܘܒܸܣܡܹ̈ܐ ܣܘܿܓ̣ܵܐܐ ܕܛܵܒ̣: ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܘܠܵܐ ܐܸܬ̣ܵܘ ܐܲܝܟ݂ ܒܸܣܡܹ̈ܐ ܗܵܢܘܿܢ ܬܘܼܒ̣ ܕܝܸܗ̄ܒܲܬ̤ ܡܲܠܟܲܬ̣ ܫܒ̣ܵܐ ܠܲܫܠܹܝܡܘܿܢ. 11: ܘܐܵܦ ܣܦܝܼܢܹ̈ܐ ܕܚܝܼܪܵܡ ܛܥܲܢ ܕܲܗܒ̣ܵܐ ܡ̣ܢ ܐܵܘܦܹܝܪ: ܘܐܲܝܬ̇ܝܼ ܡ̣ܢ ܐܵܘܦܹܝܪ ܩܲܝܣܹ̈ܐ ܕܩܹܣܘܼܬ̣ܵܐ ܣܘܿܓ̣ܵܐܐ ܕܛܵܒ̣: ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ. 12: ܘܲܥܒܲܕ݂ ܡܲܠܟܵܐ ܫܠܹܝܡܘܿܢ ܩܲܝܣܹ̈ܐ ܕܩܹܣܘܼܬ̣ܵܐ ܬܲܨܒ̇ܝܼܬ̣ܵܐ ܠܒܲܝܬܹ̇ܗ ܕܡܵܪܝܵܐ: ܘܲܠܒܹܝܬ̣ ܡܲܠܟܵܐ: ܘܟܲܢܵܪܹ̈ܐ: ܘܩܝܼܬ̣ܵܪܹ̈ܐ: ܠܲܡܫܲܒ̇ܚܵܢܹ̈ܐ. ܠܵܐ ܐܸܬ̣ܵܘ ܐܲܝܟ݂ ܗܵܢܘܿܢ ܩܲܝܣܹ̈ܐ ܕܩܹܣܘܿܬ̣ܵܐ: ܘܠܵܐ ܐܸܬ̣ܚ̄ܙܝܼܘ ܥܕܲܡܵܐ ܠܝܵܘܡܵܢܵܐ. 13: ܘܡܲܠܟܵܐ ܫܠܹܝܡܘܿܢ ܝܲܗ̄ܒ̣ ܠܡܲܠܟܲܬ̣ ܫܒ̣ܵܐ ܟܠ ܡܸܕܸ̇ܡ ܕܲܨܒܵܬ̤ ܘܫܸܐܠܲܬ̤: ܣܛܲܪ ܡ̣ܢ ܡܸܕܸ̇ܡ ܕܝܲܗ̄ܒ̣ ܠܵܗ̇: ܐܲܝܟ݂ ܐܝܼܕ݂ܵܐ ܕܡܲܠܟܵܐ. ܘܐܸܬ̣ܦܲܢܝܲܬ̤ ܘܐܸܙܲܠ̄ܬ̤ ܠܐܲܪܥܵܐ ܗ̤ܝ ܘܥܲܒ̣ܕܹ̇ܝ̈ܗ̇. 14: ܘܲܗܘ̤ܵܐ ܡܲܬ̣ܩܵܠ ܕܲܗܒ̣ܵܐ ܕܥܵܐܹ̇ܠ ܗ̄ܘ̣ܵܐ ܠܲܫܠܹܝܡܘܿܢ ܒܫܲܢ̄ܬܵܐ ܚܕ݂ܵܐ: ܫܸܬ̣ܡܵܐܐ ܘܸܫܬ̇ܝܼܢ ܘܫܸܬ̣ ܟܲܟ̇ܪܹ̈ܐ ܕܕܲܗܒ̣ܵܐ. 15: ܣܛܲܪ ܡ̣ܢ ܐ̄ܢܵܫܵܐ ܐܘܼܡܵܢܹ̈ܐ: ܘܬܹܐܓ̣ܪ̈ܵܬ̣ܵܐ ܕܬܲܓܵܪܹ̈ܐ: ܘܟ݂ܠܗܘܿܢ ܡܲܠ̈ܟܹ̇ܐ ܕܥܲܪ̈ܒ̣ܵܝܹܐ ܘܫܲܠܝܼܛܵܢܹ̈ܐ ܕܐܲܪܥܵܐ. 16: ܘܲܥܒܲܕ݂ ܡܲܠܟܵܐ ܫܠܹܝܡܘܿܢ ܡܲܐܬܹ̇ܝܢ ܣܲܟ̇ܪ̈ܝܼܢ ܕܕܲܗܒ̣ܵܐ ܣܢܝܼܢܵܐ: ܘܫܸܬ̣ ܡܵܐܐ ܡܢ̈ܝܼܢ ܕܕܲܗܒ̣ܵܐ ܐܲܣܸܩ ܥܲܠ ܣܲܟ̇ܪܹ̈ܐ ܚܕ݂ܵܐ. 17: ܘܲܬ̣ܠܵܬ̣ܡܵܐܐ ܡܓܲܢ̈ܝܼܢ ܕܕܲܗܒ̣ܵܐ ܣܢܝܼܢܵܐ: ܘܲܬ̣ܠܵܬ̣ܡܵܐܐ ܡܸܢ̈ܝܼܢ ܕܕܲܗܒ̣ܵܐ ܐܲܣܸܩ ܥܲܠ ܡܓܲܢܵܐ ܚܕ݂ܵܐ. ܘܣܵܡ̣ ܐܸܢܹܝܢ ܡܲܠܟܵܐ ܒܹܝܬ̣ ܥܵܒ̣ܵܐ ܕܠܸܒ̣ܢܵܢ. 18: ܘܲܥ̣ܒܲܕ݂ ܡܲܠܟܵܐ ܟܘܼܪܣܝܵܐ ܕܫܸܢܵܐ ܪܲܒܵܐ: ܘܩܲܪܡܹܗ ܕܲܗܒ̣ܵܐ ܡ̣ܢ ܐܵܘܦܹܝܪ. 19: ܘܲܥܒܲܕ݂ ܠܟ݂ܘܼܪܣܝܵܐ ܫܬܵܐ ܕܲܪ̈ܓ̣ܝܼܢ: ܘܪܹܫܹܗ ܕܟ݂ܘܼܪܣܝܵܐ ܓܠܝܼܠ ܡ̣ܢ ܒܸܣܬ̇ܪܹܗ: ܘܐܝܼ̈ܕ݂ܵܗܵܬ̣ܵܐ ܡܸܟܵܐ ܘܡܸܟܵܐ ܒܕ݂ܘܼܟ̇ܬ̣ܵܐ ܕܡܵܘܬ̇ܒ̣ܵܐ: ܘܲܬ̣ܪܹܝܢ ܐܲܪ̈ܝܵܘܵܢ ܩܵܝ̇ܡܝܼܢ ܡܸܟܵܐ ܘܡܸܟܵܐ.

20: ܘܲܬ̣ܪܸܥܣܲܪ ܐܲܪ̈ܝܵܘܵܢ ܩܵܝ̇ܡܝܼܢ ܥܲܠ ܓܹܢ̄ܒ̣ ܫܬܵܐ ܕܲܪ̈ܓ̣ܝܼܢ ܡܸܟܵܐ ܘܡܸܟܵܐ: ܠܵܐ ܐܸܬ̣ܥ̱ܒܸܕ݂ ܗܵܟܲܢܵܐ ܠܟ݂ܠܗܹܝܢ ܡܲܠܟ̇ـ̈ـܘܵܬ̣ܵܐ. 21: ܘܟ݂ܠܗܘܿܢ ܡܵܐܢܹ̈ܐ ܕܬܸܫܡܸܫܬܹ̇ܗ ܕܡܲܠܟܵܐ ܫܠܹܝܡܘܿܢ ܕܕܲܗܒ̣ܵܐ: ܘܟ݂ܠܗܘܿܢ ܡܵܐܢܹ̈ܐ ܕܒܹܝܬ̣ ܥܵܒ̣ܵܐ ܕܠܸܒ̣ܢܵܢ ܕܕܲܗܒ̣ܵܐ ܣܢܝܼܢܵܐ. ܘܟܸܣܦܵܐ ܠܵܐ ܚܫܝܼܒ̣ ܗ̄ܘ̣ܵܐ ܒܝܵܘܡܵܘ̈ܗܝ ܕܲܫܠܹܝܡܘܿܢ ܡܸܕܸ̇ܡ. 22: ܡܸܛܠ ܕܲܣܦܝܼܢܹ̈ܐ ܕܬܲܪܫܝܼܫ ܐܝܼܬ̣ ܗ̄ܘܲܝ̈ ܠܡܲܠܟܵܐ ܒܝܲܡܵܐ ܥܲܡ ܣܦܝܼܢܹ̈ܐ ܕܚܝܼܪܵܡ. ܚܕ݂ܵܐ ܠܲܬ̣ܠܵܬ̣ ܫܢ̈ܝܼܢ ܐܵܬ̣ܝܵܐ ܣܦܝܼܢ̄ܬܵܐ: ܡ̣ܢ ܬܲܪܫܝܼܫ: ܘܲܛܥܝܼܢܵܐ ܟܸܣܦܵܐ: ܘܕܲܗܒ̣ܵܐ: ܘܦܝܼܠܹ̈ܐ: ܘܩܘܿܦܹ̈ܐ: ܘܛܵܘܣܹ̈ܐ. 23: ܘܝܼܕܒ̣ ܡܲܠܟܵܐ ܫܠܹܝܡܘܿܢ ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ: ܒܥܘܼܬ̣ܪܵܐ ܘܲܒ̣ܚܸܟ݂ܡ̱ܬ̣ܵܐ. 24: ܘܟ݂ܠܗܘܿܢ ܡܲܠ̈ܟܹ̇ܐ ܕܐܲܪܥܵܐ: ܒܵܥܹ̇ܝܢ ܠܡܸܚܙܵܐ ܐܲܦܵܘ̈ܗܝ ܕܲܫܠܹܝܡܘܿܢ: ܘܲܠܡܸܫܡܲܥ ܚܸܟ݂ܡ̱ܬ̣ܵܐ ܕܝܲܗ̄ܒ̣ ܐܲܠܵܗܵܐ ܒܠܸܒܹ̇ܗ. 25: ܘܡܲܝܬܹ̇ܝܢ ܓܒܲܪ ܩܘܼܪܒܵܢܹܗ: ܡܵܐܢܹ̈ܐ ܕܕܲܗܒ̣ܵܐ: ܘܡܵܐܢܹ̈ܐ ܕܟܸܣܦܵܐ: ܘܲܠܒ̣ܘܼܫܹ̈ܐ: ܘܙܲܝܢܵܐ: ܘܒܸܣܡܹ̈ܐ: ܘܪ̈ܲܟ݂ܫܵܐ: ܘܩܵܪ̈ܘܿܟܹܐ: ܘܟ݂ܘܼܕܲܢ̈ܘܵܬ̣ܵܐ ܟܠ ܫܢܵܐ ܒܲܫܢܵܐ.

26: ܘܟܲܢܸܫ ܡܲܠܟܵܐ ܫܠܹܝܡܘܿܢ ܡܲܪ̈ܟ̇ܒ̣ܵܬ̣ܵܐ ܘܲܦܪ̈ܵܫܹܐ: ܘܲܗ̤ܘܲܝ ܠܹܗ ܐܵܠܹܦ ܘܐܲܪܒܲܥܡܵܐܐ ܡܲܪ̈ܟ̇ܒ̣ܵܬ̣ܵܐ: ܘܲܬ̣ܪܸܥܣܲܪ ܐܲܠܦ̈ܝܼܢ ܦܲܪ̈ܵܫܝܼܢ. ܘܲܫܒܲܩ ܐܸܢܹܝܢ ܠܡܲܪ̈ܟ̇ܒ̣ܵܬ̣ܵܐ ܒܩܘܼܪ̈ܝܵܐ: ܘܡܸܢܗܹܝܢ ܥܲܡ ܡܲܠܟܵܐ ܒܐܘܿܪܸܫܠܸܡ. 27: ܘܝܲܗ̄ܒ̣ ܡܲܠܟܵܐ ܫܠܹܝܡܘܿܢ ܟܸܣܦܵܐ ܒܐܘܿܪܸܫܠܸܡ ܐܲܝܟ݂ ܟܹܐܦܹ̈ܐ: ܘܐܲܪ̈ܙܹܐ ܝܲܗ̄ܒ̣ ܐܲܝܟ݂ ܫܲܩܡܹ̈ܐ ܕܒܲܦܩܲܥܬ̣ܵܐ ܣܘܿܓ̣ܵܐܐ. ܘܡܲܦܩܵܢܵܐ ܕܪ̈ܲܟ݂ܫܵܐ ܕܲܫܠܹܝܡܘܿܢ ܡ̣ܢ ܡܸܨܪܹܝܢ: ܘܐܲܓ̣ܪܵܐ ܕܬܲܓܵܪܹ̈ܐ ܕܡܲܠܟܵܐ ܢܵܣܒܝܼܢ ܙܸܒ̣ܢܵܐ ܒܲܕ݂ܡܲـ̈ـܝܵܐ. 28: ܘܣܵܠܩܵܐ ܗ̄ܘ̣ܵܬ̣ ܡܲܪܟܲܒ̣ܬ̣ܵܐ ܡ̣ܢ ܡܸܨܪܹܝܢ ܒܫܸܬ̣ܡܵܐܐ ܕܟܸܣܦܵܐ ܘܣܘܼܣܝܵܐ ܒܲܡܵܐܐ ܘܚܲܡܫܝܼܢ. ܘܗܵܟܲܢܵܐ ܟܠܗܘܿܢ ܡܲܠ̈ܟܹ̇ܐ ܕܚܹܬ̣ܵܝܹ̈ܐ: ܘܡܲܠ̈ܟܹ̇ܐ ܕܐܲܕ݂ܘܿܡ ܒܐܝܼܕܲܝ̈ܗܘܿܢ ܐܲܝܬܝܼܘ ܣܘܿܓ̣ܵܐܐ.

ܩܹܦܵܠܹܐܘܿܢ: ܝܐ.

1: ܘܡܲܠܟܵܐ ܫܠܹܝܡܘܿܢ ܪܚܸܡ̣ ܢܸܫܹ̈ܐ ܣܲܓ̇ܝܼ̈ܐܵܬ̣ܵܐ: ܢܘܼܟ݂ܪ̈ܵܝܵܬ̣ܵܐ: ܘܲܠܒܲܪܬ̣ ܦܸܪܥܘܿܢ: ܘܥܲܡ̈ܘܿܢܵܝܵܬ̣ܵܐ: ܘܡܘܼܐܒ̣ܵـ̈ـܝܵܬ̣ܵܐ: ܘܐܲܕ݂ܘܿܡܵـ̈ـܝܵܬ̣ܵܐ: ܘܨܲܝܵܕ̇ܢܵܝܵܬ̣ܵܐ: ܘܚܹܬ̣ܵܝܵـ̈ـܬ̣ܵܐ. 2: ܡ̣ܢ ܥܲܡܡܹ̈ܐ ܕܐܸܡܲܪ ܡܵܪܝܵܐ ܠܲܒ̣ܢܲܝ̈ ܝܼܣܪܵܝܹܠ: ܠܵܐ ܬܸܬ̣ܚܲܠܛܘܼܢ ܒܗܘܿܢ: ܘܗܸܢܘܿܢ ܠܵܐ ܢܸܬ̣ܚܲܠܛܘܼܢ ܒܟ݂ܘܢ: ܕܲܠܡܵܐ ܢܲܣܛ̈ܝܵܢ ܠܸܒ̇ܟ݂ܘܿܢ ܒܵܬܲܪ ܐܲܠܵܗܲܝܗܹ̈ܝܢ. ܒܗܹܝܢ ܐܸܬ̇ܕܲܒܲܩ ܫܠܹܝܡܘܿܢ ܘܐܸܚܲܕ݂ ܘܲܪܚܸܡ. 3: ܘܲܗ̤̈ܘܲܝ ܠܹܗ ܢܸܫܹ̈ܐ ܚܹܐܪ̈ܵܬ̣ܵܐ ܫܒܲܥ ܡܵܐܐ: ܘܲܕ݂ܪ̈ܘܼܟ݂ܵܬ̣ܵܐ ܬܠܵܬ̣ܡܵܐܐ: ܘܐܲܣܛܝܼ ܢܸܫܵܘ̈ܗܝ ܠܸܒܹ̇ܗ. 4: ܘܲܗܘ̤ܵܐ ܠܙܲܒ̣ܢܵܐ ܕܣܲܝܒ̇ܘܼܬܹܗ ܕܲܫܠܹܝܡܘܿܢ: ܢܸܫܵܘ̈ܗܝ ܐܲܣܛܝܼ ܠܸܒܹ̇ܗ ܒܵܬܲܪ ܐܲܠܵܗܹ̈ܐ ܐ̄ܚܪ̈ܵܢܹܐ. ܘܠܵܐ ܗ̄ܘ̣ܵܐ ܠܸܒܹ̇ܗ ܫܠܸܡ ܥܲܡ ܡܵܪܝܵܐ ܐܲܠܵܗܹܗ ܐܲܝܟ݂ ܠܸܒܵܐ ܕܕ݂ܵܘܝܼܕ݂ ܐܲܒ̣ܘܼܗܝ. 5: ܘܐܸܙܲܠ ܫܠܹܝܡܘܿܢ ܒܵܬܲܪ ܥܸܣܬ̇ܪܘܼܬ̣ ܐܲܠܵܗܬܵܐ ܕܨܲܝܕ̇ܢܵܝܹ̈ܐ: ܘܒ̣ܵܬܲܪ ܟܵܡܘܿܫ ܕܸܚ̱ܠܬ̣ܵܐ ܕܡܘܼܐܒ̣ܵܝܹ̈ܐ: ܘܒ̣ܵܬܲܪ ܡܲܠܟ̇ܘܿܡ ܐܲܠܵܗܵܐ ܕܲܒ̣ܢܲܝ̈ ܥܲܡܘܿܢ. 6: ܘܲܥܒܲܕ݂ ܫܠܹܝܡܘܿܢ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܠܵܐ ܫܲܡܠܝܼ ܒܵܬܲܪ ܡܵܪܝܵܐ ܐܲܝܟ݂ ܕܵܘܝܼܕ݂ ܐܲܒ̣ܘܼܗܝ. 7: ܗܵܝܕܹ̇ܝܢ ܒܢܵܐ ܫܠܹܝܡܘܿܢ ܥܠܵܬ̣ܵܐ ܠܟ݂ܵܡܘܿܫ ܕܸܚ̱ܠܬ̣ܵܐ ܕܡܘܼܐܵܒ̣: ܒܛܘܼܪܵܐ ܕܲܩܕ݂ܵܡ ܐܘܿܪܸܫܠܸܡ: ܘܲܠܡܲܠܟ̇ܘܿܡ ܕܸܚ̱ܠܬ̣ܵܐ ܕܲܒ̣ܢܲܝ̈ ܥܲܡܘܿܢ. 8: ܘܗܵܟܲܢܵܐ ܥ̣ܒܲܕ݂ ܠܟ݂ܠܗܹܝܢ ܢܸܫܵܘ̈ܗܝ ܢܘܼܟ݂ܪ̈ܵܝܵܬ̣ܵܐ: ܕܣܵܝ̈ܡܵܢ ܗ̄ܘܲܝ̈ ܒܸܣܡܹ̈ܐ ܘܲܡܕܲܒ̇ـ̈ـܚܵܢ ܠܐܲܠܵܗܲܝܗܹ̈ܝܢ. 9: ܘܲܪܓܸܙ ܡܵܪܝܵܐ ܥܲܠ ܫܠܹܝܡܘܿܢ: ܥܲܠ ܕܲܣܛܵܐ ܠܸܒܹ̇ܗ ܡ̣ܢ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܐܸܬ̣ܓ̇ܠܝܼ ܥܠܵܘܗܝ ܕܬܲܪܬܹ̇ܝܢ ܙܲܒ̣ܢ̈ܝܼܢ. 10: ܘܦܲܩܕܹܗ ܥܲܠ ܦܸܬ̣ܓ̣ܵܡܵܐ: ܗܵܢܵܐ: ܕܠܵܐ ܢܹܐܙܲܠ ܒܵܬܲܪ ܐܲܠܵܗܹ̈ܐ ܕܥܲܡܡܹ̈ܐ. ܘܠܵܐ ܢܛܲܪ ܡܸܕܸ̇ܡ ܕܦܲܩܕܹܗ ܡܵܪܝܵܐ. 11: ܘܐܸܡܲܪ ܡܵܪܝܵܐ ܠܲܫܠܹܝܡܘܿܢ: ܥܲܠ ܕܲܗܘ̤ܵܬ̣ ܗܵܕܹܐ ܥܲܡܵܟ݂: ܘܠܵܐ ܢܛܲܪܬ̇ ܩܝܵܡܝ ܘܕ݂ܝܼܢܲܝ̈ ܘܦܘܼܩ̈ܕܵܢܲܝ ܕܦܲܩܸܕ̇ܬܵܟ݂: ܡܸܨܪܵܐ ܐܸܨܪܹܝܗ̇ ܠܡܲܠܟ̇ܘܼܬ̣ܵܐ ܡ̣ܢ ܐܝܼܕ݂ܵܟ݂ ܘܐܸܬ̇ܠܝܼܗ̇ ܠܥܲܒ̣ܕܵܟ݂. 12: ܒܪܲܡ ܒܝܵܘ̈ܡܲܝܟ ܠܵܐ ܐܸܥܒ̇ܕ݂ܝܼܗ̇: ܡܸܛܠ ܕܵܘܝܼܕ݂ ܥܲܒ̣ܕ̇ܝ. ܡ̣ܢ ܐܝܼܕ݂ܵܐ ܕܲܒ̣ܪܵܟ݂ ܐܸܨܪܹܝܗ̇. 13: ܒܪܲܡ ܟܠܵܗ̇ ܡܲܠܟ̇ܘܼܬ̣ܵܐ ܠܵܐ ܐܸܨܪܸܐ: ܫܲܒ̣ܛܵܐ ܚܲܕ݂ ܐܸܬܸ̇ܠ ܠܲܒ̣ܪܵܟ݂: ܡܸܛܠ ܕܵܘܝܼܕ݂ ܥܲܒ̣ܕ̇ܝ: ܘܡܸܛܠ ܐܘܿܪܸܫܠܸܡ ܩܪܝܼܬ̣ܵܐ ܕܲܓ̣ܒܹ̇ܝܬ̣. 14: ܘܐܲܩܝܼܡ ܡܵܪܝܵܐ ܣܵܛܵܢܵܐ ܠܲܫܠܹܝܡܘܿܢ: ܠܲܗܕܵܕ݂ ܐܲܕ݂ܘܿܡܵܝܵܐ: ܡ̣ܢ ܙܲܪܥܵܐ ܗ̄ܘ̣ܵܐ ܓܹܝܪ ܕܡܲܠ̈ܟܹ̇ܐ ܒܐܲܕ݂ܘܿܡ. 15: ܘܟܲܕ݂ ܚܪܲܒ̣ ܕܵܘܝܼܕ݂ ܠܐܲܕ݂ܘܿܡ: ܟܲܕ݂ ܣܠܸܩ ܝܘܿܐܵܒ̣ ܪܲܒ̇ ܚܲܝܠܵܐ ܠܲܡܩܲܒܵܪܘܼ ܩܛܝܼܠܹ̈ܐ: ܘܩܲܛܸܠ ܟܠ ܕܸܟ݂ܪܵܐ ܒܐܲܕ݂ܘܿܡ. 16: ܡܸܛܠ ܕܸܫܬܵܐ ܝܲܪ̈ܚܝܼܢ ܝܼܬܸܒ̣ ܬܲܡܵܢ ܝܘܿܐܵܒ̣ ܘܟ݂ܠܹܗ ܝܼܣܪܵܝܹܠ ܥܲܡܹܗ: ܥܕܲܡܵܐ ܕܩܲܛܸܠ ܟܠ ܕܸܟ݂ܪܵܐ ܒܐܲܕ݂ܘܿܡ. 17: ܘܲܥܪܲܩ̣ ܗܕܵܕ݂ ܗ̤ܘ ܘܐ̄ܢܵܫܵܐ ܐܲܕ݂ܘܿܡܵܝܹ̈ܐ: ܡ̣ܢ ܥܲܒ̣ܕܵܘܗܝ ܕܐܲܒ̣ܘܼܗܝ ܠܡܸܥܲܠ ܠܡܸܨܪܝܼܢ. ܘܲܗܕ݂ܵܕ݂ ܛܲܠܝܵܐ ܗ̄ܘ̣ܵܐ ܙܥܘܿܪܵܐ. 18: ܘܩܵܡ̣ܘ ܡ̣ܢ ܡܸܕ݂ܝܲܢ ܘܥܲܠܘ ܠܦܵܪܵܢ: ܘܲܕ݂ܒܲܪܘ ܓܲܒ̣ܪܹ̈ܐ ܥܲܡܗܘܿܢ ܡ̣ܢ ܦܵܪܲܢ: ܘܥܲܠ̣ܘ ܠܡܸܨܪܝܼܢ: ܠܘܵܬ̣ ܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܝܲܗ̄ܒ̣ ܠܹܗ ܒܲܝܬܵܐ ܘܠܲܚܡܵܐ: ܘܐܸܡܲܪ ܠܹܗ ܬܸܒ̣ ܠܘܵܬ̣ܝ. ܘܐܲܪܥܵܐ ܝܲܗ̄ܒ̣ ܠܹܗ. 19: ܘܐܸܫܟܲܚ ܗܕ݂ܵܕ݂ ܪ̈ܲܚܡܹܐ ܒܥܲܝܢܲܝ̈ ܦܸܪܥܘܿܢ. ܘܝܲܗ̄ܒ̣ ܠܹܗ ܐܲܢ̄ܬ̇ܬ̣ܵܐ ܚܵܬ̣ܵܗ̇ ܕܐܲܢ̄ܬ̇ܬܹܗ: ܚܵܬ̣ܵܗ̇ ܕܬܲܚܦܝܼܣ ܪܲܒ̇ܬ̣ܵܐ. 20: ܘܝܸܠܕܲܬ̤ ܠܹܗ ܚܵܬ̣ܵܗ̇ ܕܬܲܚܦܝܼܣ ܠܲܓ̣ܒ̣ܘܿܬ̣ ܒܪܹܗ: ܘܲܚܣܲܠܬܹܗ ܬܲܚܦܝܼܣ ܒܓ̣ܵܘ ܒܹܝܬ̣ ܦܲܪܥܘܿܢ. ܘܲܗܘ̤ܵܐ ܓܒ̣ܘܿܬ̣ ܒܹܝܬ̣ ܦܸܪܥܘܿܢ: ܒܲܝܢܵܬ̣ ܒܢܵܘ̈ܗܝ ܕܦܸܪܥܘܿܢ. 21: ܘܲܗܕ݂ܵܕ݂ ܫ̣ܡܲܥ ܒܡܸܨܪܹܝܢ ܕܲܫܟ݂ܒ̣ ܕܵܘܝܼܕ݂ ܥܲܡ ܐܲܒ̣ܵܗܵܘ̈ܗܝ: ܘܲܕ݂ܡܝܼܬ̣ ܝܘܿܐܵܒ̣ ܪܲܒ̇ ܚܲܝܠܵܐ: ܘܲܗܕ݂ܵܕ݂ ܐܸܡܲܪ ܠܦܲܪܥܘܿܢ: ܫܲܕܲܪܲܝܢܝ ܐܸܙܲܠ ܠܐܲܪܥܝ. 22: ܐܵܡܲܪ ܠܹܗ ܦܸܪܥܘܿܢ: ܡܵܢܵܐ ܓܹܝܪ ܚܣܲܪܬ̇ ܠܘܵܬ̣ܝ: ܕܗܵܐ ܒܵܥܹ̇ܐ ܐܲܢ̄ܬ̇ ܕܬܹܐܙܲܠ ܠܵܟ݂ ܠܐܲܪܥܵܟ݂. ܐܵܡܲܪ ܠܹܗ: ܠܵܐ: ܐܸܠܵܐ ܡܫܲܕܵܪܘܼ ܫܲܕ̇ܪܲܝܢܝ. 23: ܘܐܲܩܝܼܡ ܠܹܗ ܡܵܪܝܵܐ ܣܵܛܵܢܵܐ ܠܗܸܕ݂ܪܘܿܢ ܒܲܪ ܐܹܠܝܼܕܲܥ: ܕܲܥܪܲܩ ܡ̣ܢ ܠܘܵܬ̣ ܗܕܲܪܥܙܲܪ ܡܲܠܟܵܐ ܕܨܘܿܒ̣ܵܐ ܡܵܪܹܗ. 24: ܘܲܟ݂ܢܲܫܘ ܥܠܵܘܗܝ ܓܲܒ̣ܪܹ̈ܐ. ܘܲܗܘ̤ܵܐ ܪܲܒ̇ ܓܲܝܵܣܵܐ. ܘܟܲܕ݂ ܩܲܛܸܠ ܐܸܢܘܿܢ ܕܵܘܝܼܕ݂: ܐܸܙܲܠ̣ܘ ܠܕܲܪܡܣܘܿܩ ܘܝܼܬܸܒ̣ܘ ܒܵܗ̇. ܘܐܲܡ̣ܠܸܟ݂ ܗܸܕ݂ܪܘܿܢ ܒܕܲܪܡܣܘܿܩ. 25: ܘܲܗܘ̤ܵܐ ܣܵܛܵܢܵܐ ܠܝܼܣܪܵܝܹܠ: ܟܠܗܘܿܢ ܝܵܘ̈ܡܵܬܹܗ ܕܲܫܠܹܝܡܘܿܢ: ܥܲܠ ܒܝܼܫܬܵܐ ܕܲܥܒܲܕ݂. ܘܲܗܕܵܕ ܐܲܥܝܼܩ ܠܲܒ̣ܢܲܝ̈ ܝܼܣܪܵܝܹܠ: ܘܐܲܡ̣ܠܸܟ݂ ܥܲܠ ܐܲܕ݂ܘܿܡ. 26: ܘܝܘܿܪܲܒ̣ܥܲܡ ܒܲܪ ܢܵܒ̣ܵܛ ܐܵܦܲܪܬ̣ܵܝܵܐ ܡ̣ܢ ܨܸܕ݂ܪܵܐ: ܘܲܫܡܵܗ̇ ܕܐܸܡܹܗ ܨܪܘܿܥܵܐ: ܐܲܢ̄ܬ̇ܬ̣ܵܐ ܐܲܪܡܲܠܬܵܐ: ܥܲܒ̣ܕܵܐ ܕܲܫܠܹܝܡܘܿܢ. ܘܐܲܪܝܼܡ ܐܝܼܕ݂ܵܐ ܥܲܠ ܡܲܠܟܵܐ ܫܠܹܝܡܘܿܢ. 27: ܘܗܵܢܵܐ ܦܸܬ̣ܓ̣ܵܡܵܐ ܕܐܲܪܝܼܡ ܐܝܼܕ݂ܵܐ ܒܡܲܠܟܵܐ ܫܠܹܝܡܘܿܢ: ܟܲܕ݂ ܒܢ̣ܵܐ ܠܡܲܠܘܿ: ܘܣܲܟܲܪ ܬܘܼܪ̱ܥܬ̣ܵܐ ܕܲܩܪܝܼܬܹܗ ܕܕ݂ܵܘܝܼܕ݂. 28: ܘܓܲܒ̣ܪܵܐ ܝܘܿܪܲܒ̣ܥܲܡ ܓܲܢ̄ܒܪ ܚܲܝܠܵܐ ܗ̄ܘ̣ܵܐ. ܘܲܚܙܵܝܗܝ ܡܲܠܟܵܐ ܫܠܹܝܡܘܿܢ ܠܛܲܠܝܵܐ ܕܓܲܢ̄ܒܵܪ ܚܲܝܠܵܐ ܗ̄ܘ̣. ܘܐܲܫ̱ܠܛܹܗ ܥܲܠ ܟܠܹܗ ܥܒ̣ܵܕ݂ܵܐ ܕܒܹܝܬ̣ ܝܵܘܣܸܦ. 29: ܘܲܗܘ̤ܵܐ ܒܙܲܒ̣ܢܵܐ ܗܵܘ̇: ܘܝܘܿܪܲܒ̣ܥܲܡ ܢܦܲܩ̣ ܡ̣ܢ ܐܘܿܪܸܫܠܸܡ: ܘܐܸܫܟ̇ܚܹܗ ܐܲܚܝܼܵܐ ܢܒ̣ܝܼܵܐ ܫܝܼܠܘܿܢܵܝܵܐ ܒܐܘܼܪܚܵܐ. ܘܐܲܚܝܼܵܐ ܡܟܲܣܲܝ ܗ̄ܘ̣ܵܐ ܒܲܠܒ̣ܘܼܫܵܐ ܚܲܕ݂ܬ̣ܵܐ: ܘܲܬ̣ܪ̈ܲܝܗܘܿܢ ܗ̄ܘ̣ܵܘ ܒܲܠܚܘܿܕ݂ ܒܚܲܩܠܵܐ. 30: ܘܐܸܚܲܕ݂ ܐܲܚܝܼܵܐ ܒܲܠܒ̣ܘܼܫܵܐ ܚܲܕ݂ܬ̣ܵܐ ܕܲܥܠܵܘܗܝ: ܘܲܨܪܵܝܗܝ ܠܲܬ̣ܪܸܥܣܲܪ ܨܪ̈ܵܘܵܢ. 31: ܘܐܸܡܲܪ ܠܝܘܿܪܲܒ̣ܥܲܡ: ܣܲܒ̣ ܠܵܟ݂ ܥܸܣܪܵܐ ܨܪ̈ܵܘܵܢ: ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܨܵܪܹܐ ܐ̄ܢܵܐ ܡܲܠܟ̇ܘܼܬ̣ܵܐ ܡ̣ܢ ܐܝܼܕܹܗ ܕܲܫܠܹܝܡܘܿܢ: ܘܐܸܬܸ̇ܠ ܠܵܟ݂ ܥܸܣܪܵܐ ܫܲܒ̣̈ܛܝܼܢ. 32: ܘܫܲܒ̣ܛܵܐ ܚܲܕ݂ ܢܸܗܘܹܐ ܠܹܗ ܡܸܛܠ ܕܵܘܝܼܕ݂ ܥܲܒ̣ܕ̇ܝܼ: ܡܸܛܠ ܐܘܿܪܸܫܠܸܡ ܩܪܝܼܬ̣ܵܐ ܕܲܨܒܹ̇ܝܬ̣ ܒܵܗ̇ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ. 33: ܥܲܠ ܕܫܲܒ̣ܩܲܢܝ ܘܲܣܓܸܕ݂ ܠܥܸܣܬ̇ܪܘܼܬ̣ ܐܲܠܵܗܬܵܐ ܕܨܲܝܕ̇ܢܵܝܹ̈ܐ: ܘܲܠܟ݂ܵܡܘܿܫ ܐܲܠܵܗܵܐ ܕܡܘܼܐܒ̣ܵܝܹ̈ܐ: ܘܲܠܡܲܠܟ̇ܘܿܡ ܐܲܠܵܗܵܐ ܕܲܒ̣ܢܲܝ̈ ܥܲܡܘܿܢ. ܘܠܵܐ ܗܲܠܸܟ݂ ܒܐܘܼܪ̈ܚܵܬ̣ܝ: ܘܠܵܐ ܥ̣ܒܲܕ݂ ܕܫܲܦܝܼܪ ܩܕ݂ܵܡܲܝ: ܘܠܵܐ ܢ̣ܛܲܪ ܩܝܵܡܲܝ̈ ܘܕ݂ܝܼܢܲܝ̈ ܐܲܝܟ݂ ܕܵܘܝܼܕ݂ ܐܲܒ̣ܘܼܗܝ. 34: ܘܠܵܐ ܐܸܣܲܒ̣ ܟܠܵܗ̇ ܡܲܠܟ̇ܘܼܬ̣ܵܐ ܡ̣ܢ ܐܝܼܕ݂ܵܘ̈ܗܝ: ܐܸܠܵܐ ܪܒܵܐ ܐܸܥܒ̇ܕ݂ܝܼܘܗܝ ܟܠ ܝܵܘ̈ܡܲܝ ܚܲܝܵܘ̈ܗܝ. ܡܸܛܠ ܕܵܘܝܼܕ݂ ܥܲܒ̣ܕ̇ܝܼ ܕܲܓ̣ܒܹ̇ܝܬܹܗ: ܕܲܢܛܲܪ ܦܘܼܩ̈ܕܵܢܲܝ ܘܲܩܝܵܡܲܝ̈. 35: ܘܐܸܣܲܒ̣ ܡܲܠܟ̇ܘܼܬ̣ܵܐ ܡ̣ܢ ܐܝܼܕܲܝ̈ ܒܪܹܗ: ܘܐܸܬܸ̇ܠ ܠܵܟ݂ ܥܸܣܪܵܐ ܫܲܒ̣ܛ̈ܝܼܢ. 36: ܘܠܲܒ̣ܪܹܗ ܐܸܬܸ̇ܠ ܫܲܒ̣ܛܵܐ ܚܲܕ݂. ܡܸܛܠ ܕܢܸܗܘܹܐ ܫܪܵܓ̣ܵܐ ܠܥܲܒ̣ܕ̇ܝ ܕܵܘܝܼܕ݂ ܟܠܗܘܿܢ ܝܵܘ̈ܡܵܬ̣ܵܐ ܩܕ݂ܵܡܲܝ: ܒܐܘܿܪܸܫܠܸܡ ܩܪܝܼܬ̣ܵܐ ܕܲܓ̣ܒܹܝܬ̣ ܠܝܼ ܠܲܡܣܵܡ ܫܹܡܝ ܬܲܡܵܢ. 37: ܘܠܵܟ݂ ܐܸܬܸ̇ܠ: ܘܬܲܡܠܸܟ݂ ܐܲܝܟ݂ ܕܨܵܒ̣ܝܵܐ ܢܲܦ̮ܫܵܟ݂. ܘܬܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ.

38: ܘܐܸܢ ܬܸܫܡܲܥ ܟܠ ܕܦܲܩܸܕ̇ܬܵܟ݂: ܘܲܬ̣ܗܲܠܸܟ݂ ܒܐܘܼܪ̈ܚܵܬ̣ܝ: ܘܬܸܥܒܸ̇ܕ݂ ܕܫܲܦܝܼܪ ܩܕ݂ܵܡܲܝ: ܘܬܸܛܲܪ ܩܝܵܡܲܝ̈ ܘܦܘܼܩ̈ܕܵܢܲܝ: ܐܲܝܟ݂ ܕܲܥܒܲܕ݂ ܕܵܘܝܼܕ݂ ܥܲܒ̣ܕ̇ܝ: ܐܸܗܘܹܐ ܥܲܡܵܟ݂: ܘܐܸܒܢܹܐ ܠܵܟ݂ ܒܲܝܬܵܐ ܡܗܲܝܡܢܵܐ: ܐܲܝܟ݂ ܕܲܒ̣ܢܹ̇ܝܬ̣ ܠܕ݂ܵܘܝܼܕ݂ ܥܲܒ̣ܕ̇ܝ ܘܐܸܬܸ̇ܠ ܠܵܟ݂ ܠܝܼܣܪܵܝܹܠ. 39: ܘܐܹܡܲܟܸ̇ܟ݂ ܙܲܪܥܹܗ ܕܕ݂ܵܘܝܼܕ݂ ܡܸܛܠ ܗܵܕܹܐ: ܒܪܲܡ ܠܵܐ ܟܠܗܘܿܢ ܝܵܘ̈ܡܵܬ̣ܵܐ. 40: ܘܲܒ̣ܥܵܐ ܫܠܹܝܡܘܿܢ ܠܡܸܩܛܠܹܗ ܠܝܘܿܪܲܒ̣ܥܲܡ: ܘܩܵܡ̣ ܝܘܿܪܲܒ̣ܥܲܡ ܘܲܥܪܲܩ̣ ܠܡܸܨܪܹܝܢ: ܠܘܵܬ̣ ܫܝܼܫܵܩ ܡܲܠܟܵܐ ܕܡܸܨܪܹܝܢ: ܘܲܗܘ̤ܵܐ ܒܡܸܨܪܹܝܢ ܥܕܲܡܵܐ ܕܡܝܼܬ̣ ܫܠܹܝܡܘܿܢ. 41: ܘܫܲܪܟܵܐ ܕܦܲܬ̣ܓ̣ܵܡܵܘ̈ܗܝ ܕܲܫܠܹܝܡܘܿܢ ܘܟ݂ܠ ܡܸܕܸ̇ܡ ܕܲܥܒܲܕ݂ ܘܚܸܟ݂ܡ̱ܬܹܗ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܦܸܬ̣ܓ̣ܵܡܵܘ̈ܗܝ ܕܲܫܠܹܝܡܘܿܢ. 42: ܘܝܵܘ̈ܡܵܬ̣ܵܐ ܕܐܲܡܠܸܟ݂ ܫܠܹܝܡܘܿܢ ܒܐܘܿܪܸܫܠܸܡ ܥܲܠ ܟܠܹܗ ܝܼܣܪܵܝܹܠ ܐܲܪܒ̇ܥܝܼܢ ܫܢ̈ܝܼܢ. 43: ܘܲܫܟ݂ܝܼܒ̣ ܫܠܹܝܡܘܿܢ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܐܲܒ̣ܘܼܗܝ. ܘܐܲܡ̣ܠܸܟ݂ ܪܚܸܒ̣ܥܲܡ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܝܒ.

1: ܘܐܸܙܲܠ̣ ܪܚܸܒ̣ܥܲܡ ܠܲܫܟܹܝܡ: ܡܸܛܲܠ ܕܠܲܫܟܹܝܡ ܐܸܬ̣ܵܘ ܟܠܹܗ ܝܼܣܪܵܝܹܠ ܠܡܲܡܠܵܟ݂ܘܼܬܹܗ. 2: ܘܟܲܕ݂ ܫ̣ܡܲܥ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܗ̤ܘ ܥܕܲܟܹ̇ܝܠ ܒܡܸܨܪܹܝܢ ܗ̄ܘ̣ܵܐ: ܕܲܥܪܲܩ̣ ܡ̣ܢ ܩܕ݂ܵܡ ܡܲܠܟܵܐ ܫܠܹܝܡܘܿܢ: ܘܝܼܬܸܒ̣ ܝܘܿܪܲܒ̣ܥܲܡ ܒܡܸܨܪܹܝܢ. 3: ܘܫܲܕܲܪܘ ܘܲܩܪܵܐܘܼܗܝ: ܘܐܸܬ̣ܵܐ ܝܘܿܪܲܒ̣ܥܲܡ ܘܟ݂ܠܹܗ ܥܲܡܵܐ ܕܝܼܣܪܵܝܹܠ. ܘܐܸܡܲܪܘ ܠܲܪܚܸܒ̣ܥܲܡ. 4: ܐܲܒ̣ܘܼܟ݂ ܐܲܩܫܝܼ ܢܝܼܪܲܢ: ܐܲܢ̄ܬ̇ ܗܵܫܵܐ ܐܲܩܸܠ ܡ̣ܢ ܫܘܼܥܒܵܕܹܗ ܕܐܲܒ̣ܘܼܟ݂ ܩܲܫܝܵܐ: ܘܡ̣ܢ ܢܝܼܪܹܗ ܬܲܩܝܼܦܵܐ ܕܣܵܡ̣ ܥܠܲܝܢ ܘܢܸܦ̱ܠܚܵܟ݂. 5: ܘܐܸܡܲܪ ܠܗܘܿܢ: ܙܸܠܘ. ܘܡܸܟܵܐ ܠܲܬ̣ܠܵܬ̣ܵܐ ܝܵܘ̈ܡܝܼܢ ܬܵܘ ܠܘܵܬ̣ܝ. ܘܐܸܙܲܠܘ ܟܠܹܗ ܥܲܡܵܐ. 6: ܘܐܸܬ̣ܡܲܠܲܟ݂ ܡܲܠܟܵܐ ܪܚܸܒ̣ܥܲܡ ܒܣܵܒܹ̈ܐ ܕܩܵܝܡܝܼܢ ܗ̄ܘ̣ܵܘ ܩܕ݂ܵܡ ܐܲܒ̣ܘܼܗܝ ܟܲܕ݂ ܚܲܝ ܗ̄ܘ̣ܵܐ. ܘܐܸܡܲܪ ܠܗܘܿܢ: ܐܲܝܟܲܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܠܝܼ ܕܐܲܬ̣ܝܼܒ̣ܝܼܘܗܝ ܠܥܲܡܵܐ ܦܸܬ̣ܓ̣ܵܡܵܐ. 7: ܘܐܸܡܲܪܘ ܠܹܗ: ܐܸܢ ܝܵܘܡܵܢܵܐ ܬܸܗܘܹܐ ܥܲܒ̣ܕܵܐ ܠܥܲܡܵܐ ܗܵܢܵܐ ܘܬܸܦܠܘܿܚ ܐܸܢܘܿܢ: ܘܬܸܥܢܸܐ ܐܸܢܘܿܢ: ܘܬܹܐܡܲܪ ܠܗܘܿܢ ܡܸܠ̈ܝܼܢ ܛܵܒ̣ܵـ̈ـܢ: ܢܸܗܘܘܿܢ ܠܵܟ݂ ܥܲܒ̣̈ܕܹ̇ܐ ܟܠܗܘܿܢ ܝܵܘ̈ܡܵܬ̣ܵܐ. 8: ܘܲܫܒܲܩ ܡܸܠܟܵܐ ܕܣܵܒܹ̈ܐ ܕܡܲܠܟ̇ܘܼܗܝ: ܘܐܸܬ̣ܡܲܠܲܟ݂ ܒܲܛܠܵܝܹ̈ܐ ܕܲܪܒ̣ܵܘ ܥܲܡܹܗ: ܕܩܵܝ̇ܡܝܼܢ ܩܕ݂ܵܡܵܘܗܝ. 9: ܘܐܸܡܲܪ ܠܗܘܿܢ: ܡܵܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܕܐܸܬܸ̇ܠ ܠܥܲܡܵܐ ܦܸܬ̣ܓ̣ܵܡܵܐ: ܕܐܵܡܪܝܼܢ ܠܝܼ ܕܐܲܩܸܠ ܡ̣ܢ ܢܝܼܪܵܐ ܕܣܵܡ̣ ܥܠܲܝܢ ܐܲܒ̣ܘܼܟ݂: ܘܢܸܦ̱ܠܚܵܟ݂. 10: ܘܐܸܡܲܪܘ ܠܹܗ ܛܠܵܝܹ̈ܐ ܕܲܪܒ̣ܵܘ ܥܲܡܹܗ: ܗܵܟܲܢܵܐ ܐܸܡܲܪ ܠܥܲܡܵܐ: ܕܐܸܡܲܪ ܠܵܟ݂: ܕܐܲܒ̣ܘܼܟ݂ ܐܲܩܫܝܼ ܢܝܼܪܲܢ: ܐܲܢ̄ܬ̇ ܐܲܩܸܠ ܥܠܲܝܢ ܐܸܡܲܪ ܠܗܘܿܢ: ܚܸܨܪܝ ܥܲܒ̣ܝܵܐ ܗ̄ܝ̣ ܡ̣ܢ ܟܪܵܬܹܗ ܕܐܵܒ̣ܝ. 11: ܐܵܒ̣ܝܼ ܐܲܥܫܸܢ ܥܠܲܝܟ̇ܘܿܢ ܢܝܼܪܵܐ ܥܲܫܝܼܢܵܐ: ܐܸܢܵܐ ܐܵܘܣܸܦ ܥܲܠ ܢܝܼܪܟ݂ܘܿܢ. ܐܵܒ̣ܝ ܪܕ݂ܵܟ݂ܘܿܢ ܒܫܵܘ̈ܛܹܐ: ܘܐܸܢܵܐ ܐܸܪܕܸ̇ܝܼܟ݂ܘܿܢ ܒܡܵܪ̈ܲܓ̣ܢܹܐ. 12: ܘܐܸܬ̣ܵܐ ܝܘܿܪܲܒ̣ܥܲܡ ܘܟ݂ܠܹܗ ܝܼܣܪܵܝܹܠ ܠܘܵܬ̣ ܪܚܸܒ̣ܥܲܡ ܒܝܵܘܡܵܐ ܬܠܝܼܬ̣ܵܝܵܐ: ܐܲܝܟܲܢܵܐ ܕܐܸܡܲܪ ܠܗܘܿܢ ܡܲܠܟܵܐ ܕܬ̣ܵܘ ܠܘܵܬ̣ܝ ܒܝܵܘܡܵܐ ܬܠܝܼܬ̣ܵܝܵܐ. 13: ܘܲܥ̣ܢܵܐ ܡܲܠܟܵܐ ܠܥܲܡܵܐ ܩܲܫܝܵܐܝܼܬ̣: ܘܲܫܒܲܩ ܡܸܠܟܵܐ ܕܣܵܒܹ̈ܐ ܕܡܲܠܟ̇ܘܼܗܝ. 14: ܘܐܸܡܲܪ ܠܗܘܿܢ ܐܲܝܟ݂ ܡܸܠܟܵܐ ܕܲܛܠܵܝܹ̈ܐ: ܐܵܒ̣ܝ ܐܲܥܫܸܢ ܢܝܼܪܟ݂ܘܿܢ: ܐܸܢܵܐ ܐܵܘܣܸܦ ܥܲܠ ܢܝܼܪܟ݂ܘܿܢ: ܐܵܒ̣ܝ ܪܕ݂ܵܟ݂ܘܿܢ ܒܫܵܘܛܹ̈ܐ: ܘܐܸܢܵܐ ܐܸܪܕܸ̇ܝܼܟ݂ܘܿܢ ܒܡܵܪ̈ܲܓ̣ܢܹܐ. 15: ܘܠܵܐ ܫ̣ܡܲܥ ܡܲܠܟܵܐ ܡ̣ܢ ܥܲܡܵܐ: ܡܸܛܠ ܕܲܗܘ̤ܵܬ̣ ܡܓܲܪܝܵܢܘܼܬ̣ܵܐ ܡ̣ܢ ܩܕ݂ܵܡ ܡܵܪܝܵܐ: ܡܸܛܠ ܕܲܢܩܝܼܡ ܡܵܪܝܵܐ ܦܸܬ̣ܓ̣ܵܡܵܘ̈ܗܝ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܹ̇ܗ ܐܲܚܝܼܵܐ ܢܒ̣ܝܼܵܐ ܫܝܼܠܘܿܢܵܝܵܐ: ܝܘܿܪܲܒ̣ܥܲܡ ܒܲܪ ܢܵܒ̣ܵܛ. 16: ܘܲܚ̣ܙܵܐ ܟܠܹܗ ܝܼܣܪܵܝܹܠ ܕܠܵܐ ܫܵܡܲܥ ܠܗܘܿܢ ܡܲܠܟܵܐ: ܘܐܲܬ̣ܝܼܒ̣ܘ ܥܲܡܵܐ ܦܸܬ̣ܓ̣ܵܡܵܐ ܠܡܲܠܟܵܐ. ܘܐܸܡܲܪܘ ܠܹܗ: ܠܵܐ ܦܵܠܓܘܼܬ̣ܵܐ ܐܝܼܬ̣ ܠܲܢ ܥܲܡ ܕܵܘܝܼܕ݂: ܐܵܦܠܵܐ ܝܵܪܬ̇ܘܼܬ̣ܵܐ ܥܲܡ ܒܪܹܗ ܕܐܝܼܫܲܝ. ܠܡܲܫܟ̇ܢܲܝ̈ܟ ܝܼܣܪܵܝܹܠ. ܡܸܟܹ̇ܝܠ ܚܙܝܼ ܒܲܝܬܵܟ݂ ܕܵܘܝܼܕ݂. ܘܐܸܙܲܠ̣ܘ ܒܢܲܝ̈ ܝܼܣܪܵܝܹܠ ܟܠ ܐ̄ܢܵܫ ܠܲܩܪܝܼܬܹܗ. 17: ܘܲܒ̣ܢܲܝ̈ ܝܼܣܪܵܝܹܠ ܝܵܬ̣ܒ̇ܝܼܢ ܒܩܘܼܪ̈ܝܼܗܘܿܢ. ܘܲܝܗܘܼܕ݂ܵܐ ܐܲܡ̣ܠܸܟ݂ ܥܠܲܝܗܘܿܢ ܠܲܪܚܹܒ̣ܥܲܡ ܒܲܪ ܫܠܹܝܡܘܿܢ. 18: ܘܫܲܕܲܪ ܡܲܠܟܵܐ ܪܚܸܒ̣ܥܲܡ ܠܘܵܬ̣ ܟܠܹܗ ܝܼܣܪܵܝܹܠ: ܠܐܲܕ݂ܘܿܢܝܼܪܵܡ ܕܥܲܠ ܡܲܕܲܐܬ̣ܵܐ: ܘܪܲܓ̣ܡܘܼܗܝ ܟܠܗܘܿܢ ܕܒܹܝܬ̣ ܝܼܣܪܵܝܹܠ ܒܟܹܐܦܹ̈ܐ ܘܡܝܼܬ̣. ܘܡܲܠܟܵܐ ܪܚܸܒ̣ܥܲܡ ܐܸܬ̣ܥܲܫܲܢ ܕܢܸܣܲܩ ܒܡܲܪܟܲܒ̣ܬ̣ܵܐ: ܘܢܸܥܪܘܿܩ ܠܐܘܿܪܸܫܠܸܡ. 19: ܘܲܡܪܲܕ݂ܘ ܕܒܹܝܬ̣ ܝܼܣܪܵܝܹܠ ܥܲܠ ܕܒܹܝܬ̣ ܕܵܘܝܼܕ݂: ܥܕܲܡܵܐ ܠܝܵܘܡܵܢܵܐ. 20: ܘܟܲܕ݂ ܫ̣ܡܲܥܘ ܟܠܹܗ ܝܼܣܪܵܝܹܠ: ܕܲܗܦܲܟ݂ ܝܘܿܪܲܒ̣ܥܲܡ: ܫܲܕܲܪ ܘܲܩܪܵܐܘܼܗܝ ܠܲܟ݂ܢܘܼܫܬܵܐ. ܘܐܲܡ̱ܠܟ݂ܘܼܗܝ ܥܲܠ ܟܠܹܗ ܝܼܣܪܵܝܹܠ. ܘܠܵܐ ܗ̄ܘ̣ܵܐ ܒܵܬܲܪ ܕܒܹܝܬ̣ ܕܵܘܝܼܕ݂: ܐܸܠܵܐ ܐܸܢ ܫܲܒ̣ܛܵܐ ܕܲܝܗܘܼܕ݂ܵܐ ܒܲܠܚܘܿܕܲܝܗܘܿܢ. 21: ܘܐܸܬ̣ܵܐ ܪܚܸܒ̣ܥܲܡ ܠܐܘܿܪܸܫܠܸܡ: ܘܲܟ݂ܢܲܫܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܫܲܒ̣ܛܵܐ ܕܒܹܝܬ̣ ܒܸܢܝܵܡܹܝܢ: ܡܵܐܐ ܘܲܬ̣ܡܵܢܐܝܼܢ ܐܲܠܦ̈ܝܼܢ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ: ܠܡܸܬ̣ܟܲܬܵܫܘܼ ܥܲܡ ܕܒܹܝܬ̣ ܝܼܣܪܵܝܹܠ: ܠܡܲܗܦܵܟ݂ܘܼ ܡܲܠܟ̇ܘܼܬ̣ܵܐ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ. 22: ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܫܡܲܥܝܵܐ ܢܒ̣ܝܹܗ ܕܐܲܠܵܗܵܐ ܠܡܹܐܡܲܪ. 23: ܐܸܡܲܪ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ ܡܲܠܟܵܐ ܕܲܝܗܘܼܕ݂ܵܐ: ܘܲܠܟ݂ܠܹܗ ܒܹܝܬ̣ ܝܼܗܘܼܕ݂ܵܐ ܘܒܸܢܝܵܡܹܝܢ: ܘܲܠܫܲܪܟܹ̇ܗ ܕܥܲܡܵܐ ܠܡܹܐܡܲܪ. 24: ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܣܩܘܼܢ: ܘܠܵܐ ܬܸܬ̣ܟܲܬ̇ܫܘܼܢ ܥܲܡ ܐܲܚܲܝ̈ܟ̇ܘܿܢ ܒܢܲܝ̈ ܝܼܣܪܵܝܹܠ. ܗܦܘܿܟ݂ܘ ܐ̄ܢܵܫ ܠܒܲܝܬܹ̇ܗ: ܡܸܛܠ ܕܡ̣ܢ ܩܕ݂ܵܡܲܝ ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ. ܘܲܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ: ܘܲܗܦܲܟ݂ܘ ܠܡܹܐܙܲܠ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ. 25: ܘܲܒ̣ܢܵܐ ܝܘܿܪܲܒ̣ܥܲܡ ܠܲܫܟܹܝܡ ܕܲܒ̣ܛܘܼܪܵܐ ܕܐܲܦܪܹܝܡ: ܘܝܸܬܸܒ̣ ܒܵܗ̇. ܘܲܢܦܲܩ ܡ̣ܢ ܬܲܡܵܢ: ܘܲܒ̣ܢܵܐ ܠܲܦܢܘܼܐܹܝܠ. 26: ܘܐܸܡܲܪ ܝܘܿܪܲܒ̣ܥܲܡ ܒܠܸܒܹ̇ܗ: ܡܸܟܹ̇ܝܠ ܗܵܦ̇ܟܵܐ ܠܵܗ̇ ܡܲܠܟ̇ܘܼܬ̣ܵܐ ܠܒܹܝܬ̣ ܕܵܘܝܼܕ݂. 27: ܐܸܢ ܣܵܠܹܩ ܥܲܡܵܐ ܗܵܢܵܐ ܠܡܸܥܒܲܕ݂ ܕܸܒ̣ܚ̱ܬ̣ܵܐ ܒܒܲܝܬܹ̇ܗ ܕܡܵܪܝܵܐ ܒܐܘܿܪܸܫܠܸܡ: ܡܸܬ̣ܦܢܸܐ ܠܸܒܹ̇ܗ ܕܥܲܡܵܐ ܗܵܢܵܐ ܥܲܠ ܪܚܸܒ̣ܥܲܡ ܡܵܪܗܘܿܢ ܡܠܟܵܐ ܕܲܝܗܘܼܕ݂ܵܐ. ܘܩܵܛܠܝܼܢ ܠܝܼ: ܘܗܵܦܟ̇ܝܼܢ ܠܘܵܬ̣ ܪܚܸܒ̣ܥܲܡ ܡܲܠܟܵܐ ܕܲܝܗܘܼܕ݂ܵܐ. 28: ܘܐܸܬ̣ܡܲܠܲܟ݂ ܡܲܠܟܵܐ: ܘܲܥܒܲܕ݂ ܬܪܹܝܢ ܥܸܓ̣ܠܹ̈ܐ ܕܕܲܗܒ̣ܵܐ. ܘܐܸܡܲܪ ܠܟ݂ܠܹܗ ܝܼܣܪܵܝܹܠ: ܣܲܓ̇ܝܼ ܗ̄ܘ̣ ܠܟ݂ܘܿܢ ܠܡܸܣܲܩ ܠܐܘܿܪܸܫܠܸܡ. ܘܐܸܡܲܪ: ܗܵܐ ܐܲܠܵܗܲܝ̈ܟ ܝܼܣܪܵܝܹܠ: ܕܐܲܣܩܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ. 29: ܘܣܵܡ ܚܲܕ݂ ܒܒܹܝܬ̣ ܐܹܝܠ: ܘܚܲܕ݂ ܣܵܡ̣ ܒܕ݂ܵܢ. 30: ܘܲܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܠܲܚܛܵܗܵܐ. ܘܐܸܙܲܠ̣ܘ ܥܲܡܵܐ ܩܕ݂ܵܡ ܚܲܕ݂ ܥܕܲܡܵܐ ܠܕ݂ܵܢ. 31: ܘܲܥܒܲܕ݂ ܒܹܝܬ̣ ܥ̈ܠܵܘܵܬ̣ܵܐ. ܘܲܥܒܲܕ݂ ܟܘܼܡܪܹ̈ܐ ܡ̣ܢ ܥܲܡܵܐ: ܐܲܝܠܹܝܢ ܕܠܵܐ ܗ̄ܘ̣ܵܘ ܡ̣ܢ ܒܢܲܝ̈ ܠܹܘܝܼ. 32: ܘܲܥܒܲܕ݂ ܝܘܿܪܲܒ̣ܥܲܡ ܚܲܓܵܐ ܒܝܲܪܚܵܐ ܬܡܝܼܢܵܝܵܐ: ܒܟܸܣܐܵܐ ܒܹܗ ܒܝܲܪܚܵܐ: ܐܲܝܟ݂ ܚܲܓܵܐ ܕܒܲܝܗܘܼܕ݂ܵܐ. ܘܲܣܠܸܩ ܥܲܠ ܡܲܕ݂ܒ̇ܚܵܐ. ܘܗܵܟܲܢܵܐ ܥ̣ܒܲܕ݂ ܐܵܦ ܒܒܹܝܬ̣ ܐܹܝܠ: ܠܲܡܕܲܒܵܚܘܼ ܠܥܸܓ̣ܠܹ̈ܐ ܕܲܥ̣ܒܲܕ݂. ܘܐܲܩܝܼܡ ܒܒܹܝܬ̣ ܐܹܝܠ ܟܘܼܡܪܹ̈ܐ ܕܲܥـ̈ـܠܵܘܵܬ̣ܵܐ ܕܲܥܒܲܕ݂. 33: ܘܲܣܠܸܩ ܥܲܠ ܡܲܕ݂ܒ̇ܚܵܐ ܕܲܥܒܲܕ݂ ܒܒܹܝܬ̣ ܐܹܝܠ: ܒܟܸܣܐܵܐ ܒܹܗ ܒܝܲܪܚܵܐ ܬܡܝܼܢܵܝܵܐ: ܒܝܲܪܚܵܐ ܕܲܒ̣ܕ݂ܵܐ ܡ̣ܢ ܠܸܒܹ̇ܗ. ܘܲܥ̣ܒܲܕ݂ ܚܲܓܵܐ ܠܲܒ̣ܢܲܝ̈ ܝܼܣܪܵܝܹܠ. ܘܲܣܠܸܩ ܥܲܠ ܡܲܕ݂ܒ̇ܚܵܐ ܠܲܡܣܵܡ ܒܸܣܡܹ̈ܐ.

 ܩܹܦܵܠܹܐܘܿܢ: ܝܓ.

1: ܘܗܵܐ ܢܒ̣ܝܼܵܐ ܕܐܲܠܵܗܵܐ ܐܸܬ̣ܵܐ ܡ̣ܢ ܝܼܗܘܼܕ݂ܵܐ: ܒܦܸܬ̣ܓ̣ܵܡܹܗ ܕܡܵܪܝܵܐ ܠܒܹܝܬ̣ ܐܹܝܠ. ܘܝܘܿܪܲܒ̣ܥܲܡ ܩܵܐܹ̇ܡ ܗ̄ܘ̣ܵܐ ܥܲܠ ܡܲܕ݂ܒ̇ܚܵܐ ܠܲܡܣܵܡ ܒܸܣܡܹ̈ܐ. 2: ܘܲܩ̣ܪܵܐ ܥܲܠ ܡܲܕ݂ܒ̇ܚܵܐ ܦܸܬ̣ܓ̣ܵܡܹܗ ܕܡܵܪܝܵܐ ܘܐܸܡܲܪ: ܡܲܕ݂ܒ̇ܚܵܐ ܡܲܕ݂ܒ̇ܚܵܐ ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ. ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܒܪܵܐ ܡܸܬ̣̤ܝܼܠܸܕ݂ ܠܒܹܝܬ̣ ܕܵܘܝܼܕ݂: ܝܘܿܫܝܼܵܐ ܫܡܹܗ. ܘܲܢܕܲܒܲܚ ܥܠܲܝܟ ܟܘܼܡܪܹ̈ܐ ܕܲܥ̈ܠܵܘܵܬ̣ܵܐ ܕܣܵܝܡܝܼܢ ܥܠܲܝܟ ܒܸܣܡܹ̈ܐ. ܘܓܲܪ̈ܡܹܐ ܕܐ̄ܢܵܫܵܐ ܢܵܘܩܸܕ݂ ܥܠܲܝܟ. 3: ܘܝܲܗ̄ܒ̣ ܒܝܵܘܡܵܐ ܗܵܘ̇ ܐܵܬ̤ܵܐ ܘܐܸܡܲܪ: ܗܵܕܹܐ ܐܵܬ̤ܵܐ ܕܡܵܪܝܵܐ ܫܲܕ̇ܪܲܢܝ. ܗܵܐ ܡܲܕ݂ܒ̇ܚܵܐ ܡܸܨܛ̄ܪܸܐ: ܘܡܸܬ̣ܐ̱ܫܸܕ݂ ܩܸܛܡܵܐ ܕܲܥܠܵܘܗܝ. 4: ܘܟܲܕ݂ ܫ̣ܡܲܥ ܡܲܠܟܵܐ ܡܸܠܵܘ̈ܗܝ ܕܲܢܒ̣ܝܹܗ ܕܐܲܠܵܗܵܐ: ܕܲܩ̣ܪܵܐ ܥܲܠ ܡܲܕ݂ܒ̇ܚܵܐ ܕܲܒ̣ܒܹܝܬ̣ ܐܹܝܠ: ܐܵܘܫܸܛ ܡܲܠܟܵܐ ܐܝܼܕܹܗ ܡ̣ܢ ܡܲܕ݂ܒ̇ܚܵܐ: ܘܐܸܡܲܪ ܐܘܼܚܕܵܘܼܗܝ. ܘܝܼܒ̣ܫܲܬ̤ ܐܝܼܕܹܗ ܕܐܵܘܫܸܛ ܥܠܵܘܗܝ. ܘܠܵܐ ܐܸܫܟܲܚ ܕܢܲܗܦܟ݂ܝܼܗ̇ ܠܘܵܬ̣ܗ. 5: ܘܡܲܕ݂ܒ̇ܚܵܐ ܐܸܨܛ̄ܪܝܼ: ܘܐܸܬ̣ܐܫܸܕ݂ ܩܸܛܡܵܐ ܕܲܥܠܵܘܗܝ: ܐܲܝܟ݂ ܐܵܬ̤ܵܐ ܕܝܲܗ̄ܒ̣ ܢܒ̣ܝܹܗ ܕܐܲܠܵܗܵܐ ܒܦܸܬ̣ܓ̣ܵܡܹܗ ܕܡܵܪܝܵܐ. 6: ܘܲܥ̣ܢܵܐ ܡܲܠܟܵܐ ܘܐܸܡܲܪ ܠܲܢܒ̣ܝܹܗ ܕܐܲܠܵܗܵܐ: ܨܲܠܵܐ ܥܠܲܝ ܩܕ݂ܵܡ ܡܵܪܝܵܐ ܐܲܠܵܗܵܟ݂: ܘܲܒ̣ܥܝܼ ܥܠܲܝ ܕܬܸܗܦܘܿܟ݂ ܐܝܼܕ݂ܝ ܠܘܵܬ̣ܝ. ܘܨܱܲܠܝܼ ܢܒ̣ܝܹܗ ܕܐܲܠܵܗܵܐ ܩܕ݂ܵܡ ܡܵܪܝܵܐ. ܘܗܸܦܟܲܬ̤ ܐܝܼܕܹܗ ܕܡܲܠܟܵܐ ܠܘܵܬܹܗ: ܘܲܗܘ̤ܵܬ̣ ܐܲܝܟ݂ ܕܡ̣ܢ ܩܕ݂ܝܼܡ. 7: ܘܐܸܡܲܪ ܡܲܠܟܵܐ ܠܲܢܒ̣ܝܹܗ ܕܐܲܠܵܗܵܐ: ܬܵܐ ܥܲܡܝ ܠܒܲܝܬܵܐ ܘܲܠܥܲܣ: ܘܐܸܬܸ̇ܠ ܠܵܟ݂ ܡܵܘܗܲܒ̣ܬ̣ܵܐ. 8: ܘܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ: ܐܸܢ ܬܸܬܸ̇ܠ ܠܝܼ ܦܸܠܓܹ̇ܗ ܕܒܲܝܬܵܟ݂: ܠܵܐ ܐܸܥܘܿܠ ܥܲܡܵܟ݂ ܠܒܲܝܬܵܐ: ܘܠܵܐ ܐܲܟ݂ܘܿܠ ܠܲܚܡܵܐ: ܘܠܵܐ ܐܸܫܬܸ̇ܐ ܡܲـ̈ـܝܵܐ. 9: ܡܸܛܠ ܕܗܵܟܲܢܵܐ ܦܲܩܕܲܢܝ ܒܦܸܬ̣ܓ̣ܵܡܵܐ ܡܵܪܝܵܐ ܘܐܸܡܲܪ ܠܝܼ: ܠܵܐ ܬܹܐܟ݂ܘܿܠ ܠܲܚܡܵܐ: ܘܠܵܐ ܬܸܫܬܹ̇ܐ ܡܲـ̈ـܝܵܐ: ܘܠܵܐ ܬܸܗܦܘܿܟ݂ ܒܐܘܼܪܚܵܐ ܕܐܸܬܲܝܬ̇ ܒܵܗ̇. 10: ܘܐܸܙܲܠ ܠܹܗ ܒܐܘܼܪܚܵܐ ܐ̄ܚܪܹܬ̣ܵܐ: ܘܠܵܐ ܗܸܦܲܟ݂ ܒܐܘܼܪܚܵܐ ܕܐܸܬ̣ܵܐ ܒܵܗ̇: ܠܒܹܝܬ̣ ܐܹܝܠ.

11: ܘܲܢܒ̣ܝܼܵܐ ܚܲܕ݂ ܣܵܒ̣ܵܐ ܝܵܬܹܒ̣ ܗ̄ܘ̣ܵܐ ܒܒܹܝܬ̣ ܐܹܝܠ: ܘܐܸܬ̣ܵܘ ܒܢܵܘ̈ܗܝ ܘܐܸܫܬܲܥܝܼܘ ܠܹܗ ܟܠ ܥܒ̣ܵܕ݂ܵܐ ܕܲܥܒܲܕ݂ ܢܒ̣ܝܹܗ ܕܐܲܠܵܗܵܐ ܒܝܵܘܡܵܐ ܗܵܘ̇ ܒܒܹܝܬ̣ ܐܹܝܠ. ܘܦܸܬ̣ܓ̣ܵܡܵܐ ܕܐܸܡܲܪ ܠܡܲܠܟܵܐ: ܐܸܫܬܲܥܝܼܘ ܒܢܵܘ̈ܗܝ ܠܐܲܒ̣ܘܼܗܘܿܢ. 12: ܘܐܸܡܲܪ ܠܗܘܿܢ ܐܲܒ̣ܘܼܗܘܿܢ: ܒܐܲܝܕܵܐ ܐܘܼܪܚܵܐ ܐܸܙܲܠ̣: ܘܚܵܘܝܼܘܗܝ ܒܢܵܘ̈ܗܝ ܐܘܼܪܚܵܐ ܕܐܸܙܲܠ̣ ܒܵܗ̇ ܢܒ̣ܝܹܗ ܕܐܲܠܵܗܵܐ ܕܐܸܬ̤ܵܐ ܡ̣ܢ ܝܼܗܘܼܕ݂ܵܐ. 13: ܘܐܸܡܲܪ ܠܲܒ̣ܢܵܘ̈ܗܝ: ܐܲܪܡܵܘ ܠܝܼ ܥܲܠ ܚܡܵܪܵܐ. ܘܐܲܪܡ̣ܝܼܘ ܠܹܗ ܥܲܠ ܚܡܵܪܵܐ: ܘܲܪܟܸܒ̣ ܥܠܵܘܗܝ. 14: ܘܐܸܙܲܠ̣ ܒܵܬܲܪ ܢܒ̣ܝܹܗ ܕܐܲܠܵܗܵܐ: ܘܐܸܫܟ̇ܚܹܗ ܟܲܕ݂ ܝܵܬܹܒ̣ ܬܚܹܝܬ̣ ܒܸܛܡ̱ܬ̣ܵܐ. ܘܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܢܒ̣ܝܹܗ ܕܐܲܠܵܗܵܐ ܕܐܸܬܲܝܬ̇ ܡ̣ܢ ܝܼܗܘܼܕ݂ܵܐ. ܐܵܡܲܪ ܠܹܗ: ܐܸܢܵܐ ܗ̄ܘ̣. 15: ܐܵܡܲܪ ܠܹܗ: ܬܵܐ ܥܲܡܝ ܠܒܲܝܬܵܐ: ܘܐܲܟ݂ܘܿܠ ܠܲܚܡܵܐ. 16: ܘܐܸܡܲܪ ܠܹܗ: ܠܵܐ ܡܸܫܟܲܚ ܐ̄ܢܵܐ ܕܐܸܗܦܘܿܟ݂ ܥܲܡܵܟ݂: ܘܐܹܬܹܐ ܠܒܲܝܬܵܟ݂: ܘܠܵܐ ܐܹܟܘܿܠ ܥܲܡܵܟ݂ ܠܲܚܡܵܐ: ܘܠܵܐ ܐܸܫܬܹ̇ܐ ܡܲـ̈ـܝܵܐ ܒܐܲܬ̣ܪܵܐ ܗܵܢܵܐ. 17: ܡܸܛܠ ܕܗܵܟܲܢܵܐ ܐܸܬ̣ܐ̱ܡܲܪ ܠܝܼ ܒܦܸܬ̣ܓ̣ܵܡܹܗ ܕܡܵܪܝܵܐ: ܠܵܐ ܬܹܐܟ݂ܘܿܠ ܬܲܡܵܢ ܠܲܚܡܵܐ: ܘܠܵܐ ܬܸܫܬܹ̇ܐ ܡܲـ̈ـܝܵܐ: ܘܠܵܐ ܬܸܗܦܘܿܟ݂ ܒܐܘܼܪܚܵܐ ܕܐܸܬܲܝܬ̇ ܒܵܗ̇. 18: ܘܐܸܡܲܪ ܠܹܗ. ܐܵܦ ܐܸܢܵܐ ܢܒ̣ܝܼܵܐ ܐ̄ܢܵܐ ܐܲܟ݂ܘܵܬ̣ܵܟ݂: ܘܡܲܠܲܐܟ݂ܵܐ ܐܸܡܲܪ ܠܝܼ ܒܦܸܬ̣ܓ̣ܵܡܹܗ ܕܡܵܪܝܵܐ: ܕܐܲܗܦܟܲܝܗܝ ܥܲܡܵܟ݂ ܠܒܲܝܬܵܐ: ܢܹܐܟ݂ܘܿܠ ܠܲܚܡܵܐ ܘܢܸܫܬܸ̇ܐ ܡܲـ̈ـܝܵܐ. ܘܟܲܕܸ̇ܒ̣ ܒܹܗ. 19: ܘܲܗܦܲܟ݂ ܥܲܡܹܗ: ܘܐܸܟܲܠ ܠܲܚܡܵܐ ܒܒܲܝܬܹ̇ܗ: ܘܐܸܫܬ̇ܝܼ ܡܲـ̈ـܝܵܐ. 20: ܘܟܲܕ݂ ܗܸܢܘܿܢ ܝܵܬ̣ܒ̇ܝܼܢ ܥܲܠ ܦܵܬ̣ܘܿܪܵܐ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܢܒ̣ܝܼܵܐ ܕܐܲܗܦܟܹܗ. 21: ܘܲܩ̣ܪܵܐ ܠܲܢܒ̣ܝܹܗ ܕܐܲܠܵܗܵܐ ܕܐܸܬ̣ܵܐ ܡܢ ܝܼܗܘܼܕ݂ܵܐ: ܘܗܵܟܲܢܵܐ ܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܕܡܲܪܡܲܪܬ̇ ܡܠܲܬ̣ ܦܘܼܡܹܗ ܕܡܵܪܝܵܐ: ܘܠܵܐ ܢܛܲܪܬ̇ ܦܘܼܩܕܵܢܵܐ ܕܦܲܩܕܵܟ݂ ܡܵܪܝܵܐ ܐܲܠܵܗܵܟ݂. 22: ܘܲܗܦܲܟ݂ܬ̇ ܘܐܸܟܲܠܬ̇ ܠܲܚܡܵܐ: ܘܐܸܫܬ̇ܝܬ̇ ܡܲـ̈ـܝܵܐ: ܒܐܲܬ̣ܪܵܐ ܕܐܸܡܲܪ ܠܵܟ݂ ܠܵܐ ܬܹܐܟ݂ܘܿܠ ܠܲܚܡܵܐ: ܘܠܵܐ ܬܸܫܬܹ̇ܐ ܡܲـ̈ـܝܵܐ. ܡܸܛܠ ܗܵܢܵܐ ܠܵܐ ܬܸܥܘܿܠ ܫܠܲܕܵܟ݂ ܠܩܲܒ̣ܪܵܐ ܕܐܲܒ̣ܵܗܲܝ̈ܟ. 23: ܘܡ̣ܢ ܒܵܬܲܪ ܕܐܸܟܲܠܘ ܠܲܚܡܵܐ: ܘܡ̣ܢ ܒܵܬܲܪ ܕܐܸܫܬ̇ܝܼܘ ܡܲـ̈ـܝܵܐ: ܐܲܪܡܝܼܘ ܠܹܗ ܥܲܠ ܚܡܵܪܵܐ ܠܲܢܒ̣ܝܹܗ ܕܐܲܠܵܗܵܐ. 24: ܘܲܗܦܲܟ݂ ܘܐܸܙܲܠ ܘܐܸܫܟ̇ܚܹܗ ܐܲܪܝܵܐ ܒܐܘܼܪܚܵܐ ܘܩܲܛܠܹܗ ܘܲܗܘ̤ܵܬ̣ ܫܠܲܕܹ̇ܗ ܪܲܡܝܵܐ ܒܐܘܼܪܚܵܐ: ܘܲܚܡܵܪܵܐ ܩܵܐܹ̇ܡ ܥܲܠ ܓܲܒܵܗ̇: ܘܐܲܪܝܵܐ ܩܵܐܹ̇ܡ ܥܲܠ ܓܹܢ̄ܒ̣ ܫܠܲܕܵܐ. 25: ܘܗܵܐ ܐ̄ܢܵܫܵܐ ܥܵܒ̣ܪܝܼܢ ܘܲܚܙܵܘ ܫܠܲܕܵܐ ܟܲܕ݂ ܪܲܡܝܵܐ ܒܐܘܼܪܚܵܐ: ܘܲܚܡܵܪܵܐ ܩܵܐܹ̇ܡ ܥܲܠ ܓܲܒܵܗ̇: ܘܐܲܪܝܵܐ ܩܵܐܹ̇ܡ ܥܲܠ ܓܹܢ̄ܒ̣ ܫܠܲܕܵܐ. ܘܐܸܬ̣ܵܘ ܘܐܸܡܲܪܘ ܒܲܩܪܝܼܬ̣ܵܐ ܕܲܢܒ̣ܝܼܵܐ ܣܵܒ̣ܵܐ ܝܵܬܹܒ̣ ܒܵܗ̇. 26: ܘܲܫܡܲܥ ܢܒ̣ܝܵܐ ܕܐܲܗܦܟܹܗ ܡ̣ܢ ܐܘܼܪܚܵܐ: ܘܐܸܡܲܪ ܢܒ̣ܝܹܗ ܗ̄ܘ̣ ܕܐܲܠܵܗܵܐ. ܥܲܠ ܕܫܲܚܠܸܦ ܡܸܠܲܬ̣ ܦܘܼܡܹܗ ܕܡܵܪܝܵܐ: ܝܲܗ̄ܒܹ̇ܗ ܡܵܪܝܵܐ ܠܐܲܪܝܵܐ: ܘܬܲܒ̣ܪܹܗ ܘܩܲܛܠܹܗ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪ ܠܹܗ. 27: ܘܐܸܡܲܪ ܠܲܒ̣ܢܵܘ̈ܗܝ: ܐܲܪܡܵܘ ܠܝܼ ܥܲܠ ܚܡܵܪܵܐ. ܘܐܲܪܡܝܼܘ ܠܹܗ. 28: ܘܐܸܙܲܠ ܘܐܸܫܟܲܚ ܫܠܲܕܵܐ ܟܲܕ݂ ܪܲܡܝܵܐ ܒܐܘܼܪܚܵܐ: ܘܲܚܡܵܪܵܐ ܘܐܲܪܝܵܐ ܩܵܝ̇ܡܝܼܢ ܥܲܠ ܓܹܢ̄ܒ̣ ܫܠܲܕܵܐ. ܠܵܐ ܐܸܟܲܠ ܐܲܪܝܵܐ ܠܫܲܠܕܵܐ: ܘܠܵܐ ܬܒܲܪ ܠܲܚܡܵܪܵܐ. 29: ܘܲܫܩܲܠ ܢܒ̣ܝܼܵܐ ܠܲܫܠܲܕܵܐ ܕܲܢܒ̣ܝܼܵܐ ܕܐܲܠܵܗܵܐ: ܘܣܵܡܵܗ̇ ܥܲܠ ܚܡܵܪܵܐ: ܘܐܲܝܬ̇ܝܵܗ̇ ܠܲܩܪܝܼܬ̣ܵܐ ܕܗ̤ܘ ܗܵܘ̇ ܢܒ̣ܝܼܵܐ ܣܵܒ̣ܵܐ ܝܵܬܹܒ̣ ܒܵܗ̇: ܠܡܲܪܩܵܕ݂ܘܼ ܥܠܵܘܗܝ ܘܲܠܡܸܩܒ̇ܪܹܗ. 30: ܘܣܵܡ̣ ܫܠܲܕܹ̇ܗ ܒܩܲܒ̣ܪܵܐ: ܘܐܲܪܩܸܕ݂ ܥܠܵܘܗܝ. ܘܐܸܡܲܪ: ܘܵܝ ܐܵܚܝ: ܘܵܝ ܐܵܚܝ. 31: ܘܡ̣ܢ ܒܵܬܲܪ ܕܩܲܒ̣ܪܘܼܗܝ: ܐܸܡܲܪ ܠܲܒ̣ܢܵܘ̈ܗܝ: ܡܵܐ ܕܡܝܼܬܹ̇ܬ̣: ܩܘܼܒ̣ܪܘܼܢܝ ܒܩܲܒ̣ܪܵܐ: ܕܲܢܒ̣ܝܹܗ ܕܐܲܠܵܗܵܐ ܩܒ̣ܝܼܪ ܒܹܗ. ܘܥܲܠ ܓܹܢ̄ܒ̣ ܓܲܪ̈ܡܵܘܗܝ ܣܝܼܡܘ ܓܲܪ̈ܡܲܝ. 32: ܡܸܛܠ ܕܡܗܘܵܐ ܢܸܗܘܹܐ ܦܸܬ̣ܓ̣ܵܡܵܐ ܕܲܩ̣ܪܵܐ ܒܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܡܲܕ݂ܒ̇ܚܵܐ ܕܒܹܝܬ̣ ܐܹܝܠ: ܘܥܲܠ ܟܠܗܘܿܢ ܒܵـ̈ـܬܹܐ ܕܲܥ̈ܠܵܘܵܬ̣ܵܐ ܕܲܒ̣ܟܲܪ̈ܟܹܐ ܕܫܵܡܪܹܝܢ. 33: ܘܒ̣ܵܬܲܪ ܦܸܬ̣ܓ̣ܵܡܵܐ ܗܵܢܵܐ: ܠܵܐ ܗܦܲܟ݂ ܝܘܿܪܲܒ̣ܥܲܡ ܡ̣ܢ ܐܘܼܪܚܹܗ ܒܝܼܫܬܵܐ. ܘܲܗܦܲܟ݂ ܬܘܼܒ̣ ܘܲܥܒܲܕ݂ ܡ̣ܢ ܥܲܡܵܐ ܟܘܼܡܪܹ̈ܐ ܕܲܥ̈ܠܵܘܵܬ̣ܵܐ. ܡ̇ܢ ܕܲܨܒ̣ܵܐ ܕܢܸܗܘܹܐ ܟܘܼܡܪܵܐ: ܩܲܪܸܒ̣ ܩܘܼܪܒܵܢܵܐ: ܘܲܗܘ̤ܵܐ ܟܘܼܡܪܵܐ ܠܲܥܠܵܬ̣ܵܐ. 34: ܘܲܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܠܲܚܛܵܗܵܐ ܠܒܹܝܬ̣ ܝܘܿܪܲܒ̣ܥܲܡ: ܠܡܸܥܩܲܪ ܘܲܠܡܵܘܒܵܕ݂ܘܼ ܡ̣ܢ ܐܲܦܲܝ̈ ܐܲܪܥܵܐ.

 ܩܹܦܵܠܹܐܘܿܢ: ܝܕ.

1: ܒܹܗ ܒܙܲܒ̣ܢܵܐ ܗܵܘ̇: ܐܸܬ̣ܟ̇ܪܲܗ ܐܲܒ̣ܝܼܵܐ ܒܪܹܗ ܕܝܘܿܪܲܒ̣ܥܲܡ. 2: ܘܐܸܡܲܪ ܝܘܿܪܲܒ̣ܥܲܡ ܠܐܲܢ̄ܬ̇ܬܹܗ: ܩܘܼܡܝ ܐܸܫܬܲܓ̣ܢܵܝ. ܘܠܵܐ ܢܸܕ̇ܥܘܼܢ ܕܐܲܢ̄ܬ̇ܝ ܗ̄ܝ̣ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ ܘܙܸܠܝ ܠܹܟ݂ܝ ܠܫܝܼܠܘܿ ܗܵܐ ܐܝܼܬ̣ ܬܲܡܵܢ ܐܲܚܝܼܵܐ ܢܒ̣ܝܼܵܐ: ܕܗ̤ܘ ܐܸܡܲܪ ܠܝܼ ܕܐܲܡ̣ܠܸܟ݂ ܥܲܠ ܥܲܡܵܐ ܗܵܢܵܐ. 3: ܘܣܲܒ̣ܝ ܒܐܝܼܕܲܝ̈ܟ̇ܝ ܥܣܲܪ ܕܠܲܚܡܵܐ: ܘܲܟ݂ܣܵܢܹ̈ܐ: ܘܒܲܓ̣ܒ̇ܘܼܓ̣ܵܐ ܕܕܸܒ̣ܫܵܐ. ܘܙܸܠܝ ܠܘܵܬܹܗ: ܘܗ̤ܘ ܡܚܵܘܹܐ ܠܹܟ݂ܝ ܡܵܢܵܐ ܗܵܘܹ̇ܐ ܠܹܗ ܠܛܲܠܝܵܐ. 4: ܘܥܸܒ̣ܕܲܬ̤ ܗܵܟܲܢܵܐ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ. ܘܩܵܡܲܬ̤ ܘܐܸܙܲܠ̄ܬ̤ ܠܫܝܼܠܘܿ: ܘܥܸܠܲܬ̤ ܠܒܹܝܬ̣ ܐܲܚܝܼܵܐ: ܘܐܲܚܝܼܵܐ ܠܵܐ ܡܸܫܟܲܚ ܗ̄ܘ̣ܵܐ ܕܢܸܚܙܹܐ ܡܸܕܸ̇ܡ: ܡܸܛܠ ܕܝܼܩܲܪ ܥܲܝܢܵܘ̈ܗܝ ܡ̣ܢ ܣܲܝܒ̇ܘܼܬܹܗ. 5: ܘܡܵܪܝܵܐ ܐܸܡܲܪ ܠܐܲܚܝܼܵܐ: ܗܵܐ ܐܸܢ̄ܬܲܬܹܗ ܕܝܘܿܪܲܒ̣ܥܲܡ ܐܵܬܝܵܐ ܠܘܵܬ̣ܵܟ݂: ܠܡܸܫܐܲܠ ܡܸܢܵܟ݂ ܡܸܠܬ̣ܵܐ ܥܲܠ ܒܪܵܗ̇ ܕܲܟ݂ܪܝܼܗ: ܗܵܟܲܢܵܐ ܘܗܵܟܲܢܵܐ ܐܸܡܲܪ ܠܵܗ̇. ܡܵܐ ܕܥܵܐܠܵܐ: ܗܵܐ ܡܸܫܬܲܓ̣ܢ̱ܝܵܐ. 6: ܘܟܲܕ݂ ܫ̣ܡܲܥ ܐܲܚܝܼܵܐ ܩܵܠ ܪܸ̈ܓ̣ܠܹܝܗ̇ ܕܥܵܐܠܵܐ ܒܬܲܪܥܵܐ: ܐܸܡܲܪ ܠܵܗ̇: ܥܘܿܠܝ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ: ܠܡܵܢܵܐ ܡܸܫܬܲܓ̣ܢ̱ܝܵܐ ܐܲܢ̄ܬ̇ܝ. ܘܐܸܢܵܐ ܫܠܝܼܚ ܐ̄ܢܵܐ ܥܠܲܝܟ̇ܝ ܩܲܫ̈ܝܵܬ̣ܵܐ. 7: ܙܸܠܝ ܐܸܡܲܪܝ ܠܝܘܿܪܲܒ̣ܥܲܡ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢܵܐ ܐܲܪܝܼܡܬܵܟ݂ ܡ̣ܢ ܥܲܡܵܐ: ܘܲܥܒܲܕ̇ܬܵܟ݂ ܡܕ݂ܒ̇ܪܵܢܵܐ ܥܲܠ ܥܲܡܝ ܝܼܣܪܵܝܹܠ. 8: ܘܲܨܪܹܝܬ̣ ܡܲܠܟ̇ܘܼܬ̣ܵܐ ܡ̣ܢ ܕܒܹܝܬ̣ ܕܵܘܝܼܕ݂: ܘܝܲܗ̄ܒ̣ܬܵܗ̇ ܠܵܟ݂. ܘܠܵܐ ܗ̤ܘܲܝܬ̇ ܐܲܝܟ݂ ܕܵܘܝܼܕ݂ ܥܲܒ̣ܕ̇ܝ: ܕܲܢܛܲܪ ܦܘܼܩ̈ܕܵܢܲܝ: ܘܗܲܠܸܟ݂ ܒܵܬܲܪܝ ܒܟ݂ܠܹܗ ܠܸܒܹ̇ܗ: ܠܡܸܥܒܲܕ݂ ܕܫܲܦܝܼܪ ܩܕ݂ܵܡܲܝ. 9: ܘܐܲܢ̄ܬ̇ ܐܲܒ̣ܐܸܫܬ̇ ܠܡܸܥܒܲܕ݂ ܡ̣ܢ ܟܠ ܕܲܗܘ̤ܵܘ ܩܕ݂ܵܡܲܝܟ. ܘܐܸܙܲܠܬ̇ ܘܲܥܒܲܕ̇ܬ̇ ܠܵܟ݂ ܐܲܠܵܗܹ̈ܐ ܢܣܝܼܟܹ̈ܐ ܠܡܲܪܓܵܙܘܼܬܲܢܝ: ܘܠܝܼ ܫܕܲܝܬ̇ ܠܒܸܣܬܲܪ ܓܘܼܫܡܵܟ݂. 10: ܡܸܛܠ ܗܵܢܵܐ ܗܵܐ ܡܲܝܬܹ̇ܐ ܐ̄ܢܵܐ ܒܝܼܫܬܵܐ ܥܲܠ ܒܹܝܬ̣ ܝܘܿܪܲܒ̣ܥܲܡ. ܘܐܵܘܒܸ̇ܕ݂ ܠܝܘܿܪܲܒ̣ܥܲܡ ܟܠ ܕܬ̣ܵܐܹ̇ܢ ܒܐܸܣܬ̣ܵܐ: ܘܕ݂ܵܐܣܲܪ ܘܫܵܪܹܐ ܒܝܼܣܪܵܝܹܠ ܘܐܹܒܲܥܲܪ ܒܵܬܲܪ ܒܹܝܬ̣ ܝܘܿܪܲܒ̣ܥܲܡ: ܐܲܝܟ݂ ܕܡܸܬ̣ܒܲܥܪ̈ܵܢ ܓܘܼ̈ܦܢܲܝ ܟܲܪܡܵܐ ܡܵܐ ܕܲܓ̣ܡܲܪ ܩܛܵܦܵܐ. 11: ܕܲܢܡܘܼܬ̣ ܠܝܘܿܪܲܒ̣ܥܲܡ ܒܲܩܪܝܼܬ̣ܵܐ: ܢܹܐܟ݂ܠܘܼܢ ܟܲܠ̈ܒܹ̇ܐ ܘܕܲܢܡܘܼܬ̣ ܠܹܗ ܒܕܲܒ̣ܪܵܐ: ܬܹܐܟ݂ܘܿܠ ܦܵܪܲܚܬ̣ܵܐ ܕܲܫܡܲܝܵܐ: ܡܸܛܠ ܕܡܵܪܝܵܐ ܡܲܠܸܠ̣. 12: ܘܐܲܢ̄ܬ̇ܝ ܩܘܼܡܝ ܘܙܸܠܝ ܠܒܲܝܬܹ̇ܟ݂ܝ. ܘܡܵܐ ܕܥܲܠ̣ ܪܸ̈ܓ̣ܠܲܝܟ̇ܝ ܠܲܩܪܝܼܬ̣ܵܐ: ܢܡܘܼܬ̣ ܛܲܠܝܵܐ. 13: ܘܢܲܪܩܕ݂ܘܼܢ ܥܠܵܘܗܝ ܟܠܹܗ ܝܼܣܪܵܝܹܠ: ܘܢܸܩܒ̇ܪܘܼܢܹܗ. ܡܸܛܠ ܒܲܠܚܘܿܕ݂ܵܘܗܝ ܢܸܥܘܿܠ ܠܝܘܿܪܲܒ̣ܥܲܡ ܠܩܲܒ̣ܪܵܐ: ܚܠܵܦ ܕܐܸܫܬ̇ܟܲܚ ܒܹܗ ܦܸܬ̣ܓ̣ܵܡܵܐ ܛܵܒ̣ܵܐ: ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܒܒܲܝܬܹ̇ܗ ܕܝܘܿܪܲܒ̣ܥܲܡ. 14: ܘܲܢܩܝܼܡ ܠܹܗ ܡܵܪܝܵܐ ܡܲܠܟܵܐ ܥܲܠ ܝܼܣܪܵܝܹܠ: ܘܢܵܘܒܸ̇ܕ݂ ܠܲܕ݂ܒܹܝܬ̣ ܝܘܿܪܲܒ̣ܥܲܡ ܡ̣ܢ ܝܵܘܡܵܢܵܐ. ܘܡܵܢܵܐ ܡܸܟܹ̇ܝܠ. 15: ܘܢܸܡܚܸܐ ܡܵܪܝܵܐ ܠܝܼܣܪܵܝܹܠ: ܐܲܝܟ݂ ܕܢܵܐܹ̇ܕ݂ ܩܲܢܝܵܐ ܒܪܘܼܚܵܐ: ܘܢܸܥܩ̄ܪܝܼܘܗܝ ܠܝܼܣܪܵܝܹܠ ܡ̣ܢ ܐܲܪܥܵܐ ܛܵܒ̣ܬ̣ܵܐ: ܕܝܲܗ̄ܒ̣ ܠܐܲܒ̣ܵܗܲܝ̈ܗܘܿܢ: ܘܢܸܕ݂ܪܸܐ ܐܸܢܘܿܢ ܒܵܥܒ̣ܵܪ ܢܲܗܪܵܐ: ܚܠܵܦ ܕܲܥܒܲܕ݂ܘ ܠܗܘܿܢ ܕܸܚ̈ܠܵܬ̣ܵܐ: ܘܡܲܪܓ̇ܙܝܼܢ ܠܡܵܪܝܵܐ. 16: ܘܢܲܫ̱ܠܡܝܼܘܗܝ ܠܝܼܣܪܵܝܹܠ: ܡܸܛܠ ܚܛܵܗܵܘ̈ܗܝ ܕܝܘܿܪܲܒ̣ܥܲܡ ܕܲܚܛܵܐ ܘܐܲܚܛܝܼ ܠܝܼܣܪܵܝܹܠ. 17: ܘܩܵܡܲܬ̤ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ: ܘܐܸܙܲܠ̄ܬ̇ ܘܥܸܠܲܬ̤ ܠܬܲܪܨܵܐ. ܗ̤ܝ ܥܵܐܠܵܐ ܒܬܲܪܥܵܐ ܕܒܲܝܬܵܗ̇: ܘܛܲܠܝܵܐ ܡܝܼܬ̣. 18: ܘܐܲܪܩܸܕ݂ܘ ܥܠܵܘܗܝ ܟܠܹܗ ܝܼܣܪܵܝܹܠ: ܘܩܲܒ̣ܪܘܼܗܝ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܹ̇ܗ ܐܲܚܝܼܵܐ ܢܒ̣ܝܼܵܐ ܫܝܼܠܘܿܢܵܝܵܐ. 19: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܪܲܒ̣ܥܲܡ ܘܕܸܐܬ̣ܟܲܬܲܫ ܘܕܲܐܡܠܸܟ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. 20: ܘܝܵܘ̈ܡܵܬ̣ܵܐ ܕܐܲܡܠܸܟ݂ ܝܘܿܪܲܒ̣ܥܲܡ ܥܲܠ ܝܼܣܪܵܝܹܠ: ܥܸܣܪܝܼܢ ܘܬܲܪܬܹ̇ܝܢ ܫܢ̈ܝܼܢ ܘܲܫܟܸܒ̣ ܝܘܿܪܲܒ̣ܥܲܡ ܥܲܡ ܐܲܒ̣ܵܗܵܘ̈ܗܝ: ܘܐܲܡ̣ܠܸܟ݂ ܢܵܕ݂ܵܒ̣ ܒܪܹܗ ܒܵܬ̣ܪܹܗ. 21: ܘܲܪܚܸܒ̣ܥܲܡ ܒܲܪ ܫܠܹܝܡܘܿܢ ܐܲܡ̣ܠܸܟ݂ ܥܲܠ ܝܼܗܘܼܕ݂ܵܐ. ܒܲܪ ܐܲܪܒ̇ܥܝܼܢ ܗ̄ܘ̣ܵܐ ܘܲܚܕ݂ܵܐ ܫܢ̈ܝܼܢ ܪܚܸܒ̣ܥܲܡ ܟܲܕ݂ ܐܲܡܠܸܟ݂. ܘܲܫܒܲܥܣܪܹ̈ܐ ܫܢ̈ܝܼܢ ܐܲܡܠܸܟ݂ ܒܐܘܿܪܸܫܠܸܡ ܩܪܝܼܬ̣ܵܐ: ܕܲܓ̣ܒ̣ܵܐ ܡܵܪܝܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܠܲܡܣܵܡ ܫܡܹܗ ܬܲܡܵܢ ܘܲܫܡܵܐ ܕܐܸܡܹܗ ܢܲܥܡܵܐ ܥܲܡܘܿܢܵܝܬܵܐ. 22: ܘܲܥ̣ܒܲܕ݂ ܝܼܗܘܼܕ݂ܵܐ ܕܒ̣ܝܼܫ ܩܕ݂ܵܡ ܡܵܪܝܵܐ. ܘܐܲܛܢܘܼܗܝ ܒܟ݂ܠ ܡܸܕܸ̇ܡ ܕܲܥܒܲܕ݂ܘ ܐܲܒ̣ܵܗܲܝ̈ܗܘܿܢ: ܘܒܲܚܛܵܗܲܝ̈ܗܘܿܢ ܕܲܚܛܵܘ. 23: ܘܲܒ̣ܢܵܘ ܠܗܘܿܢ ܐܵܦ ܗܸܢܘܿܢ ܥܠܵـ̈ـܘܵܬ̣ܵܐ ܘܩܵܝ̈ܡܵܬ̣ܵܐ ܘܕܸܚ̈ܠܵܬ̣ܵܐ: ܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܬ̣ܚܹܝܬ̣ ܟܠ ܐܝܼܠܵܢ ܕܥܲܒ̇ܝܼܛ. 24: ܘܐܵܦ ܙܵܢܝܘܼܬ̣ܵܐ ܗܘ̤ܵܬ̣ ܒܐܲܪܥܵܐ: ܘܲܥ̣ܒܲܕ݂ܘ ܐܲܝܟ݂ ܟܠܵܗ̇ ܛܲܢܦܘܼܬ̣ܵܐ ܕܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ. 25: ܘܲܗܘ̤ܵܐ ܒܫܲܢ̄ܬܵܐ ܚܡܝܼܫܵܝܬܵܐ ܕܡܲܠܟܵܐ ܪܚܸܒ̣ܥܲܡ: ܣܠܸܩ ܫܝܼܫܲܩ ܡܲܠܟܵܐ ܕܡܸܨܪܹܝܢ ܥܲܠ ܐܘܿܪܸܫܠܸܡ. 26: ܘܲܢܣܲܒ̣ ܓܙܵܐ ܕܒܲܝܬܹ̇ܗ ܕܡܵܪܝܵܐ: ܘܓܲܙܵܐ ܕܒܹܝܬ̣ ܡܲܠܟܵܐ. ܘܲܢܣܲܒ̣ ܟܠܗܹܝܢ ܣܲܟ̇ܪܹ̈ܐ ܕܕܲܗܒ̣ܵܐ ܕܲܥ̣ܒܲܕ݂ ܫܠܹܝܡܘܿܢ. 27: ܘܲܥ̣ܒܲܕ݂ ܡܲܠܟܵܐ ܪܚܸܒ̣ܥܲܡ ܚܠܵܦܲܝܗܹܝܢ ܣܲܟ̇ܪܹ̈ܐ ܕܲܢܚܵܫܵܐ: ܘܐܲܫܠܸܡ ܐܸܢܹܝܢ ܒܐܝܼܕ݂ܵܐ ܕܪܵܘ̱ܪ̈ܒ̣ܵܢܹܐ ܘܲܕ݂ܪ̈ܲܗܵܛܹܐ ܕܢܵܛܪܝܼܢ ܒܬܲܪܥܵܐ ܕܒܹܝܬ̣ ܡܲܠܟܵܐ. 28: ܘܲܒ̣ܙܲܒ̣ܢܵܐ ܕܥܵܐܹ̇ܠ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ: ܫܵܩܠܝܼܢ ܠܗܹܝܢ ܪ̈ܲܗܵܛܹܐ: ܘܡܲܝܬܹ̇ܝܢ ܠܗܹܝܢ ܠܒܹܝܬ̣ ܪ̈ܲܗܵܛܹܐ. 29: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܪܚܸܒ̣ܥܲܡ ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. 30: ܘܲܩܪܵܒ̣ܵܐ ܗܘ̤ܵܐ ܒܹܝܬ̣ ܪܚܸܒ̣ܥܲܡ ܠܒܹܝܬ̣ ܝܘܿܪܲܒ̣ܥܲܡ ܟܠܗܘܿܢ ܝܵܘ̈ܡܵܬ̣ܵܐ. 31: ܘܲܫܟ݂ܝܼܒ̣ ܪܚܸܒ̣ܥܲܡ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܐܲܡܠܸܟ݂ ܐܲܒ̣ܝܼܵܐ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܝܗ.

1: ܘܒܲܫܢܲܬ̣ ܬܡܵܢܲܥܸܣܪܹ̈ܐ ܕܡܲܠܟܵܐ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܐܲܡ̣ܠܸܟ݂ ܐܲܒ̣ܝܼܵܐ ܥܲܠ ܝܼܗܘܼܕ݂ܵܐ ܬܠܵܬ̣ ܫܢ̈ܝܼܢ: ܒܐܘܿܪܸܫܠܸܡ. 2: ܘܲܫܡܵܐ ܕܐܸܡܹܗ ܡܲܠܟܵܐ ܒܲܪܬ̣ ܥܒܸܕ݂ ܫܵܠܘܿܡ. 3: ܘܗܲܠܸܟ݂ ܒܟ݂ܠܗܘܿܢ ܚܛܵܗܵܘ̈ܗܝ ܕܐܲܒ̣ܘܼܗܝ ܕܲܥ̣ܒܲܕ݂ ܩܕ݂ܵܡܵܘܗܝ. ܘܠܵܐ ܗܘ̤ܵܐ ܠܸܒܹ̇ܗ ܫܠܸܡ ܥܲܡ ܡܵܪܝܵܐ ܐܲܠܵܗܹܗ: ܐܲܝܟ݂ ܠܸܒܵܐ ܕܕ݂ܵܘܝܼܕ݂ ܐܲܒ̣ܘܼܗܝ. 4: ܘܡܸܛܠ ܕܵܘܝܼܕ݂ ܐܲܒ̣ܘܼܗܝ: ܝܲܗ̄ܒ̣ ܠܹܗ ܡܵܪܝܵܐ ܐܲܠܵܗܵܐ ܫܪܵܓ̣ܵܐ ܒܐܘܿܪܸܫܠܸܡ ܕܲܢܩܝܼܡ ܒܪܹܗ ܒܵܬ̣ܪܹܗ: ܘܲܢܩܝܼܡܝܼܘܗܝ ܒܐܘܿܪܸܫܠܸܡ. 5: ܡܸܛܠ ܕܲܥܒܲܕ݂ ܕܵܘܝܼܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ ܐܲܠܵܗܹܗ. ܘܠܵܐ ܣܛܵܐ ܡ̣ܢ ܟܠ ܡܸܕܸ̇ܡ ܕܦܲܩܕܹܗ ܟܠ ܝܵܘ̈ܡܲܝ ܚܲܝܵܘ̈ܗܝ: ܒܲܠܚܘܿܕ݂ ܐܸܠܵܐ ܐܸܢ ܒܲܨܒ̣ܘܼܬ̣ܵܐ ܕܐܘܿܪܝܼܵܐ ܚܹܬ̣ܵܝܵܐ. 6: ܘܲܩܪܵܒ̣ܵܐ ܗܘ̤ܵܬ̣ ܒܹܝܬ̣ ܐܲܒ̣ܝܼܵܐ ܒܲܪ ܪܚܸܒ̣ܥܲܡ. ܘܒܹܝܬ̣ ܝܘܿܪܲܒ̣ܥܲܡ ܟܠ ܝܵܘ̈ܡܲܝ ܚܲܝܲܝ̈ܗܘܿܢ.

7: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܲܒ̣ܝܼܵܐ. ܘܟ݂ܠ ܡܸܕܸ̇ܡ ܕܲܥ̣ܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. 8: ܘܲܫܟܸܒ̣ ܐܲܒ̣ܝܼܵܐ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܐܲܡܠܸܟ݂ ܐܵܣܵܐ ܒܪܹܗ ܒܵܬ̣ܪܹܗ. 9: ܘܒܲܫܢܲܬ̣ ܥܸܣܪܝܼܢ ܠܝܘܿܪܲܒ̣ܥܲܡ ܡܲܠܟܵܐ ܕܝܼܣܪܵܝܹܠ: ܐܲܡܠܸܟ݂ ܐܵܣܵܐ ܡܲܠܟܵܐ ܕܲܝܗܘܼܕ݂ܵܐ. 10: ܘܐܲܪܒ̇ܥܝܼܢ ܘܲܚܕ݂ܵܐ ܫܢ̈ܝܼܢ ܐܲܡܠܸܟ݂ ܒܐܘܿܪܸܫܠܸܡ. ܘܲܫܡܵܐ ܕܐܸܡܹܗ ܡܲܥܟܵܐ ܒܲܪܬ̣ ܥܒܸܕ݂ ܫܵܠܘܿܡ. 11: ܘܲܥ̣ܒܲܕ݂ ܐܵܣܵܐ ܕܫܲܦܝܼܪ ܩܕ݂ܵܡ ܡܵܪܝܵܐ ܐܲܝܟ݂ ܕܵܘܝܼܕ݂ ܐܲܒ̣ܘܼܗܝ. 12: ܘܐܲܥܒܲܪ ܙܲܢܵܝܹ̈ܐ ܡ̣ܢ ܐܲܪܥܵܐ. ܘܐܲܥܒܲܪ ܟܠܗܘܿܢ ܦܬܲܟ݂ܪܹ̈ܐ ܕܲܥ̣ܒܲܕ݂ܘ ܐܲܒ̣ܵܗܵܘ̈ܗܝ. 13: ܘܐܵܦ ܠܡܲܥܟܵܐ ܐܸܡܹܗ ܐܲܥܒ̇ܪܵܗ̇ ܡ̣ܢ ܪܲܒ̇ܘܼܬ̣ܵܗ̇: ܥܲܠ ܕܥܵܒ̣ܵܕ݂ܵܐ ܗ̄ܘ̣ܵܬ̣ ܥܹܐܕ݂ܵܐ ܠܕܸܚ̱ܠܬ̣ܵܗ̇. ܘܦܲܣܩܵܗ̇ ܐܵܣܵܐ ܠܲܦܬ̣ܵܟ݂ܪܬ̣ܵܗ̇: ܘܐܵܘܩܕ݂ܵܗ̇ ܒܢܲܚܠܵܐ ܕܩܸܕ݂ܪܘܿܢ. 14: ܘܲܥ̈ܠܵܘܵܬ̣ܵܐ ܠܵܐ ܐܲܥܒܲܪ: ܒܪܲܡ ܠܸܒܹ̇ܗ ܕܐܵܣܵܐ ܫܠܸܡ ܗ̄ܘ̣ܵܐ ܥܲܡ ܡܵܪܝܵܐ ܐܲܠܵܗܹܗ ܟܠܗܘܿܢ ܝܵܘ̈ܡܵܬܹܗ. 15: ܘܐܲܝܬ̇ܝܼ ܩܘܼܕ݂ܫܹ̈ܐ ܕܐܲܒ̣ܵܗܵܘ̈ܗܝ ܘܩܘܼܕ݂ܫܵܘ̈ܗܝ ܠܒܲܝܬܹ̇ܗ ܕܡܵܪܝܵܐ: ܟܸܣܦܵܐ ܘܕܲܗܒ̣ܵܐ ܘܡܵܐܢܹ̈ܐ. 16: ܘܲܩܪܵܒ̣ܵܐ ܗܘ̤ܵܐ ܒܹܝܬ̣ ܐܵܣܵܐ ܠܒܹܝܬ̣ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܟܠܗܘܿܢ ܝܵܘ̈ܡܵܬ̣ܗܘܿܢ. 17: ܗܵܝܕܹ̇ܝܢ ܣܠܸܩ̣ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܥܲܠ ܝܼܗܘܼܕ݂ܵܐ: ܘܲܒ̣ܢܵܐ ܠܪܵܡܬ̣ܵܐ. ܘܠܵܐ ܫܒܲܩ ܕܢܵܦܹ̇ܩ ܘܲܕ݂ܥܵܐܹ̇ܠ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ. 18: ܘܲܢܣܲܒ̣ ܐܵܣܵܐ ܟܠܹܗ ܟܸܣܦܵܐ ܘܕܲܗܒ̣ܵܐ ܕܐܸܫܬ̇ܚܲܕ݂ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܓܲܙܵܐ ܕܒܹܝܬ̣ ܡܲܠܟܵܐ. ܘܝܲܗ̄ܒ̣ ܒܐܝܼܕ݂ܵܐ ܕܥܲܒ̣ܕܵܘ̈ܗܝ. ܘܫܲܕܲܪ ܐܸܢܘܿܢ ܐܵܣܵܐ ܡܠܟܵܐ ܕܲܝܗܘܼܕ݂ܵܐ: ܠܘܵܬ̣ ܒܲܪ ܗܕ݂ܵܕ݂ ܒܲܪ ܛܒܲܪ ܐܲܡܘܿܢ: ܒܲܪ ܚܸܙܝܘܿܢ ܡܲܠܟܵܐ ܕܐܲܕ݂ܘܿܡ: ܕܝܵܬܹܒ̣ ܒܕܲܪܡܣܘܿܩ ܠܡܹܐܡܲܪ. 19: ܩܝܵܡܵܐ ܒܲܝܢܲܝ ܘܠܵܟ݂ ܘܒܹܝܬ̣ ܐܵܒ̣ܝ ܠܐܲܒ̣ܘܿܟ݂: ܗܵܐ ܫܲܕ̇ܪܹܬ̣ ܠܵܟ݂ ܫܘܼܚܕܵܐ ܟܸܣܦܵܐ ܘܕܲܗܒ̣ܵܐ ܙܸܠ ܒܲܛܸܠ ܩܝܵܡܵܟ݂ ܕܥܲܡ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܘܢܸܫܩܘܿܠ ܡܹܢܝ. 20: ܘܲܫܡܲܥ̣ ܒܲܪ ܗܕܵܕ݂ ܡ̣ܢ ܐܵܣܵܐ: ܘܫܲܕܲܪ ܠܪ̈ܲܒܲܝ ܚܲܝ̈ܠܹܐ ܕܝܼܠܹܗ ܥܲܠ ܩܘܼܪ̈ܝܵܐ ܕܝܼܣܪܵܝܹܠ. ܘܲܚܪܲܒ̣ ܠܥܝܼܘܿܢ ܘܲܠܕ݂ܵܢ: ܘܠܲܐܒܹܠ ܒܹܝܬ̣ ܡܲܥܟܵܐ: ܘܲܠܟ݂ܠܗܹܝܢ ܩܘܼܪ̈ܝܵܐ ܕܲܒ̣ܟ݂ܠܵܗ̇ ܐܲܪܥܵܐ ܕܢܲܦ̮ܬܵܠܝܼ. 21: ܘܟܲܕ݂ ܫ̣ܡܲܥ ܒܲܥܫܵܐ: ܦܵܫ ܡ̣ܢ ܕܢܸܒ̣ܢܹܝܗ̇ ܠܪܵܡܬ̣ܵܐ. ܘܝܼܬܸܒ̣ ܒܬܲܪܨܵܐ. 22: ܘܡܲܠܟܵܐ ܐܵܣܵܐ ܐܲܫܡܲܥ ܠܟ݂ܠܹܗ ܝܼܗܘܼܕ݂ܵܐ ܘܠܲܝܬ̇ ܕܲܚܣܝܼܟ݂. ܘܲܫܩܲܠܘ ܟܹܐܦܹ̈ܐ ܕܪܵܡܬ̣ܵܐ: ܘܩܲܝܣܹ̈ܐ ܕܲܒ̣ܢܵܐ ܒܲܥܫܵܐ: ܘܲܒ̣ܢܵܐ ܒܗܘܿܢ ܡܲܠܟܵܐ ܐܵܣܵܐ ܠܲܓܒܲܥ ܕܒܸܢܝܵܡܹܝܢ ܘܲܠܡܲܨܦܝܵܐ. 23: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܵܣܵܐ ܘܟ݂ܠܵܗ̇ ܓܲܢ̄ܒܵܪܘܼܬܹܗ ܘܟ݂ܠ ܡܸܕܸ̇ܡ ܕܲܥܒܲܕ݂: ܘܩܘܼܪ̈ܝܵܐ ܕܲܒ̣ܢܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. ܘܲܒ̣ܙܲܒ̣ܢܵܐ ܕܣܲܝܒ̇ܘܼܬܹܗ ܕܐܵܣܵܐ: ܐܸܬ̣ܟ̇ܪܲܗ ܡ̣ܢ ܪܸ̈ܓ̣ܠܵܘܗܝ. 24: ܘܲܫܟܸܒ̣ ܐܵܣܵܐ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܐܲܒ̣ܘܼܗܝ. ܘܐܲܡܠܸܟ݂ ܝܘܿܫܵܦܵܛ ܒܪܹܗ ܒܵܬ̣ܪܹܗ. 25: ܘܢܵܕ݂ܵܒ̣ ܒܲܪ ܝܘܿܪܲܒ̣ܥܲܡ ܐܲܡ̣ܠܸܟ݂ ܥܲܠ ܝܼܣܪܵܝܹܠ: ܒܲܫܢܲܬ̣ ܬܲܪܬܹ̇ܝܢ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܲܡ̣ܠܸܟ݂ ܥܲܠ ܝܼܣܪܵܝܹܠ ܬܲܪܬܹ̇ܝܢ ܫܢ̈ܝܼܢ. 26: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. ܘܗܲܠܸܟ݂ ܒܐܘܼܪܚܵܐ ܕܐܲܒ̣ܘܼܗܝ: ܘܒܲܚܛܵܗܵܘ̈ܗܝ ܕܐܲܚܛܝܼ ܠܝܼܣܪܵܝܹܠ. 27: ܘܲܡܪܲܕ݂ ܥܠܵܘܗܝ ܒܲܥܫܵܐ ܒܲܪ ܐܲܚܝܼܵܐ ܡ̣ܢ ܒܹܝܬ̣ ܐܝܼܣܵܟ݂ܵܪ: ܘܩܲܛܠܹܗ ܒܓ̣ܵܬ̣ ܕܲܦܠܸܫܬܵܝܹ̈ܐ. ܘܢܵܕ݂ܵܒ̣ ܘܟ݂ܠܹܗ ܝܼܣܪܵܝܹܠ ܟܪܝܼܟ݂ܝܼܢ ܥܲܠ ܓܵܬ̣. 28: ܘܩܲܛܠܹܗ ܒܲܥܫܵܐ: ܒܲܫܢܲܬ̣ ܬܠܵܬ̣ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܲܡܠܸܟ݂ ܒܵܬ̣ܪܹܗ. 29: ܘܟܲܕ݂ ܐܲܡܠܸܟ݂: ܡܚ̣ܵܐ ܠܟ݂ܠܹܗ ܒܹܝܬ̣ ܝܘܿܪܲܒ̣ܥܲܡ: ܘܠܵܐ ܫܒܲܩ ܟܠ ܢܸܫܡܵܐ ܠܒܹܝܬ̣ ܝܘܿܪܲܒ̣ܥܲܡ: ܥܕܲܡܵܐ ܕܐܵܘܒ̇ܕܹܗ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܥܲܒ̣ܕܹ̇ܗ ܐܲܚܝܼܵܐ ܢܒ̣ܝܼܵܐ ܫܝܼܠܘܿܢܵܝܵܐ. 30: ܥܲܠ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܥܲܠ ܚܛܵܗܵܘ̈ܗܝ ܕܲܚܛܵܐ ܘܐܲܚܛܝܼ ܠܝܼܣܪܵܝܹܠ: ܒܪܘܼܓ̣ܙܵܐ ܪܲܒܵܐ ܕܐܲܪܓܸ̇ܙ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. 31: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܢܵܕ݂ܵܒ̣ ܘܟ݂ܠ ܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. 32: ܘܲܩܪܵܒ̣ܵܐ ܗܘ̤ܵܐ ܒܹܝܬ̣ ܒܲܥܫܵܐ ܘܒܹܝܬ̣ ܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܟܠܗܘܿܢ ܝܵܘ̈ܡܵܬ̣ܗܘܿܢ. 33: ܘܒܲܫܢܲܬ̣ ܬܠܵܬ̣ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡܠܸܟ݂ ܒܲܥܫܵܐ ܒܲܪ ܐܲܚܝܼܵܐ ܥܲܠ ܟܠܹܗ ܝܼܣܪܵܝܹܠ: ܒܬܲܪܨܵܐ ܥܸܣܪܝܼܢ ܘܐܲܪܒܲܥ ܫܢ̈ܝܼܢ. 34: ܘܲܥ̣ܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܗܲܠܸܟ݂ ܒܐܘܼܪ̈ܚܵܬܹܗ ܕܝܘܿܪܲܒ̣ܥܲܡ ܒܲܪܢܵܒ̣ܵܛ: ܘܒܲܚܛܵܗܵܘ̈ܗܝ ܕܐܲܚܛܝܼ ܠܝܼܣܪܵܝܹܠ.

ܩܹܦܵܠܹܐܘܿܢ: ܝܘ.

1: ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܝܵܗܘܿ ܒܲܪ ܚܲܢܵܢ ܥܲܠ ܒܲܥܫܵܐ: ܠܡܹܐܡܲܪ. 2: ܗܵܟܲܢܵܐ ܐܵܡܲܪ ܡܵܪܝܵܐ: ܚܠܵܦ ܕܐܲܪܝܼܡܬ̣ܵܟ݂ ܡ̣ܢ ܥܲܦܪܵܐ: ܘܲܥܒܲܕ̇ܬܵܟ݂ ܡܕܲܒ̇ܪܵܢܵܐ ܥܲܠ ܥܲܡܝ ܝܼܣܪܵܝܹܠ: ܘܗܲܠܸܟ݂ܬ̇ ܒܐܘܼܪ̈ܚܵܬܹܗ ܕܝܘܿܪܲܒ̣ܥܲܡ. ܘܐܲܚܛܝܼܬ̇ ܠܥܲܡܝ ܝܼܣܪܵܝܹܠ: ܕܢܲܪܓܙܘܼܢܵܢܝ ܒܲܥܒ̣ܵܕ݂ ܐܝܼܕܲܝ̈ܗܘܿܢ. 3: ܗܵܐ ܡܒܲܥܲܪ ܐ̄ܢܵܐ ܒܵܬܲܪ ܒܲܥܫܵܐ ܘܒ̣ܵܬܲܪ ܒܲܝܬܹ̇ܗ. ܘܐܸܥܒ̇ܕ݂ܝܼܘܗܝ ܠܒܲܝܬܹ̇ܗ ܐܲܝܟ݂ ܒܲܝܬܹܗ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ. 4: ܕܲܢܡܘܼܬ̣ ܠܒܲܥܫܵܐ ܒܲܩܪܝܼܬ̣ܵܐ: ܢܹܐܟ݂ܠܘܼܢ ܟܲܠ̈ܒܹ̇ܐ. ܘܕܲܢܡܘܼܬ̣ ܠܹܗ ܒܕܲܒ̣ܪܵܐ: ܬܹܐܟ݂ܘܿܠ ܦܵܪܲܚܬ̣ܵܐ ܕܲܫܡܲܝܵܐ. 5: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܒܲܥܫܵܐ: ܘܟ݂ܠ ܡܸܕܸ̇ܡ ܕܲܥܒܲܕ݂: ܘܟ݂ܠܵܗ̇ ܓܲܢ̄ܒܵܪܘܼܬܹܗ: ܗܵܐ ܟܬ̣ܝܼܒ̣ܝܼܢ ܒܲܣܒܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. 6: ܘܲܫܟ݂ܒ̣ ܒܲܥܫܵܐ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܬܲܪܨܵܐ. ܘܐܲܡܠܸܟ݂ ܐܲܠܵܐ ܒܪܹܗ ܒܵܬ̣ܪܹܗ. 7: ܘܐܵܦ ܒܝܲܕ݂ ܝܵܗܘܿ ܒܲܪ ܚܢܲܢ ܢܒ̣ܝܼܵܐ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܒܲܥܫܵܐ ܘܥܲܠ ܟܠܹܗ ܒܲܝܬܹ̇ܗ: ܥܲܠ ܟܠܵܗ̇ ܒܝܼܫܬܵܐ ܕܲܥܒܲܕ݂ ܩܕ݂ܵܡ ܡܵܪܝܵܐ ܕܢܲܪܓ̇ܙܝܼܘܗܝ ܒܲܥܒ̣ܵܕ݂ ܐܝܼܕ݂ܵܘ̈ܗܝ: ܕܢܸܗܘܹܐ ܐܲܝܟ݂ ܒܲܝܬܹ̇ܗ ܕܝܘܿܪܲܒ̣ܥܲܡ ܥܲܠ ܕܩܲܛܠܹܗ. 8: ܒܲܫܢܲܬ̣ ܥܸܣܪܝܼܢ ܘܫܸܬ̣ ܫܢ̈ܝܼܢ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡܠܸܟ݂ ܐܲܠܵܐ ܒܲܪ ܒܲܥܫܵܐ ܥܲܠ ܝܼܣܪܵܝܹܠ: ܒܬܲܪܨܵܐ ܬܲܪܬܹ̇ܝܢ ܫܢ̈ܝܼܢ. 9: ܘܲܡܪܲܕ݂ ܥܠܵܘܗܝ ܙܲܡܪܝܼ ܥܲܒ̣ܕܹ̇ܗ ܪܲܒ̇ ܦܸܠܓܘܼܬ̣ ܪ̈ܵܟ݂ܒܹ̇ܐ. ܘܗ̤ܘ ܒܬܲܪܨܵܐ ܫܵܬܹ̇ܐ ܗ̄ܘ̣ܵܐ ܥܲܬ̇ܝܼܩܵܐ: ܒܹܝܬ̣ ܐܲܪܥܵܐ ܕܲܒ̣ܢܵܐ ܒܬܲܪܨܵܐ. 10: ܘܥܲܠ ܙܲܡܪܝܼ ܘܲܡܚܵܝܗܝ: ܘܩܲܛܠܹܗ: ܒܲܫܢܵܬ̣ ܥܸܣܪܝܼܢ ܘܲܫܒܲܥ ܫܢ̈ܝܼܢ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ ܘܐܲܡܠܸܟ݂ ܒܵܬ̣ܪܹܗ. 11: ܘܟܲܕ݂ ܐܲܡܠܸܟ݂ ܘܝܼܬܸܒ̣ ܥܲܠ ܟܘܼܪܣܝܹܗ: ܡܚ̣ܵܐ ܠܟ݂ܠܹܗ ܒܹܝܬ̣ ܒܲܥܫܵܐ: ܘܠܵܐ ܫܒܲܩ̣ ܠܹܗ ܕܬ̣ܵܐܹ̇ܢ ܒܐܸܣܬ̣ܵܐ: ܘܟ݂ܠ ܩܲܪ̈ܝܼܒ̣ܵܘܗܝ ܘܪ̈ܵܚܡܵܘܗܝ. 12: ܘܐܵܘܒܸ̇ܕ݂ ܙܲܡܪܝܼ ܠܟ݂ܠܹܗ ܒܹܝܬ̣ ܒܲܥܫܵܐ: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ ܥܲܠ ܒܲܥܫܵܐ ܒܐܝܼܕ݂ܵܐ ܕܝܵܗܘܿ ܢܒ̣ܝܼܵܐ. 13: ܥܲܠ ܟܠܗܘܿܢ ܚܛܵܗܵܘ̈ܗܝ ܕܒܲܥܫܵܐ. ܘܲܚܛܵܗܵܘ̈ܗܝ ܕܐܲܠܵܐ ܒܪܹܗ: ܕܲܚܛܵܘ ܘܐܲܚܛܝܼ ܠܝܼܣܪܵܝܹܠ: ܠܡܲܪܓܵܙܘܼ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܒܕܸܚ̈ܠܵܬ̣ܗܘܿܢ. 14: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܲܠܵܐ: ܘܟ݂ܠܡܸܕܸ̇ܡ ܕܲܥܒܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. 15: ܒܲܫܢܲܬ̣ ܥܸܣܪܝܼܢ ܘܲܫܒܲܥ ܫܢ̈ܝܼܢ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡܠܸܟ݂ ܙܲܡܪܝܼ ܫܲܒ̣ܥܵܐ ܝܵܘ̈ܡܝܼܢ ܒܬܲܪܨܵܐ: ܘܥܲܡܵܐ ܫܪܹܝܢ ܥܲܠ ܓܵܬ̣ ܕܲܦܠܸܫܬܵܝܹ̈ܐ. 16: ܘܲܫܡܲܥܘ ܥܲܡܵܐ ܕܲܫܪܹܝܢ ܘܐܵܡ̇ܪܝܼܢ: ܡܪܲܕ݂ ܙܲܡܪܝܼ: ܘܐܵܦ ܩ̣ܛܲܠ ܠܡܲܠܟܵܐ. ܘܐܲܡܠܸܟ݂ܘ ܟܠܹܗ ܝܼܣܪܵܝܹܠ ܥܠܲܝܗܘܿܢ ܠܥܲܡܪܝܼ ܪܲܒ̇ ܚܲܝܠܵܐ ܥܲܠ ܝܼܣܪܵܝܹܠ ܒܝܵܘܡܵܐ ܗܵܘ̇ ܒܡܲܫܪܝܼܬ̣ܵܐ. 17: ܘܲܣܠܸܩ ܥܲܡܪܝܼ ܘܟ݂ܠܹܗ ܝܼܣܪܵܝܹܠ ܥܲܡܹܗ ܡ̣ܢ ܓܵܬ̣. ܘܲܫܪܵܘ ܥܲܠ ܬܲܪܨܵܐ. 18: ܘܟܲܕ݂ ܚ̣ܙܵܐ ܙܲܡܪܝܼ ܕܐܸܬ̣ܟܲܒ̣ܫܲܬ̣ ܬܲܪܨܵܐ: ܥܲܠ ܠܹܗ ܠܢܵܘܣܵܐ ܕܒܹܝܬ̣ ܡܲܠܟܵܐ. ܘܐܵܘܩܸܕ݂ܘ ܥܠܵܘܗܝ ܒܹܝܬ̣ ܡܲܠܟܵܐ ܒܢܘܼܪܵܐ: ܘܡܝܼܬ̣. 19: ܥܲܠ ܚܛܵܗܵܘ̈ܗܝ ܕܲܚܛܵܐ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܒܲܚܛܵܗܵܘ̈ܗܝ ܕܐܲܚܛܝܼ ܠܝܼܣܪܵܝܹܠ. 20: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܙܲܡܪܝܼ ܘܡܸܪܕܵܐ ܕܲܡܪܲܕ݂: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. 21: ܗܵܝܕܹ̇ܝܢ ܐܸܬ̣ܦܲܠܲܓ̣ܘ ܥܲܡܵܐ ܕܝܼܣܪܵܝܹܠ: ܦܵܠ̈ܓ̇ܘܵܬ̣ܵܐ. ܦܲܠܓܹ̇ܗ ܕܥܲܡܵܐ ܗܘ̤ܵܐ ܒܵܬܲܪ ܬܲܒ̣ܢܝܼ ܒܲܪ ܓܲܢܝܲܬ̣ ܠܡܲܡܠܵܟ݂ܘܼܬܹܗ: ܘܦܸܠܓܹ̇ܗ ܒܵܬܲܪ ܥܲܡܪܝܼ. 22: ܘܲܥܫܲܢ ܥܲܡܵܐ ܕܒ̣ܵܬܲܪ ܥܲܡܪܝܼ ܡ̣ܢ ܥܲܡܵܐ ܕܒ̣ܵܬܲܪ ܬܲܒ̣ܢܝܼ. ܘܡܝܼܬ̣ ܬܲܒ̣ܢܝܼ: ܘܐܲܡܠܸܟ݂ ܥܲܡܪܝܼ. 23: ܒܲܫܢܲܬ̣ ܬܠܵܬ̣ܝܼܢ ܘܲܚܕ݂ܵܐ ܫܢ̈ܝܼܢ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܡܠܸܟ݂ ܥܲܡܪܝܼ ܥܲܠ ܝܼܣܪܵܝܹܠ ܬܲܪܬܲܥܸܣܪܹ̈ܐ ܫܢ̈ܝܼܢ. ܒܬܲܪܨܵܐ ܐܲܡ̣ܠܸܟ݂ ܫܸܬ̣ ܫܢ̈ܝܼܢ. 24: ܘܙܲܒ̣ܢܹܗ ܠܛܘܼܪܵܐ ܕܫܵܡܪܹܝܢ ܡ̣ܢ ܫܵܡܝܼܪ: ܒܟܲܟ̇ܪܵܐ ܕܟܸܣܦܵܐ ܘܲܒ̣ܢܵܝܗܝ ܠܛܘܼܪܵܐ ܘܲܩ̣ܪܵܐ ܫܡܵܗ̇ ܕܲܩܪܝܼܬ̣ܵܐ ܕܲܒ̣ܢܵܐ ܥܲܠ ܫܹܡ ܫܵܡܝܼܪ ܡܵܪܹܗ ܕܛܘܼܪܵܐ ܫܵܡܪܹܝܢ. 25: ܘܲܥܒܲܕ݂ ܥܲܡܪܝܼ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܐܲܒ̣ܐܸܫ̣ ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܲܗܘ̤ܵܘ ܩܕ݂ܵܡܵܘܗܝ. 26: ܘܗܲܠܸܟ݂ ܒܟ݂ܠܵܗ̇ ܐܘܼܪܚܹܗ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܒܲܚܛܵܗܵܘ̈ܗܝ ܕܐܲܚܛܝܼ ܠܝܼܣܪܵܝܹܠ: ܠܡܲܪܓܵܙܘܼ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܒܕܸܚ̈ܠܵܬ̣ܗܘܿܢ.

27: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܥܲܡܪܝܼ ܘܟ݂ܠܡܸܕܸ̇ܡ ܕܲܥܒܲܕ݂: ܘܟ݂ܠܵܗ̇ ܓܲܢ̄ܒܵܪܘܼܬܹܗ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ. 28: ܘܲܫܟܸܒ̣ ܥܲܡܪܝܼ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܒܫܵܡܪܹܝܢ. ܘܐܲܡܠܸܟ݂ ܐܵܚܵܒ̣ ܒܪܹܗ ܒܵܬ̣̱ܪܹܗ. 29: ܘܐܵܚܵܒ̣ ܒܲܪ ܥܲܡܪܝܼ ܐܲܡ̣ܠܸܟ݂ ܥܲܠ ܝܼܣܪܵܝܹܠ: ܒܲܫܢܲܬ̣ ܬܠܵܬ̣ܝܼܢ ܘܲܬ̇ܡܵܢܹܐ ܫܢ̈ܝܼܢ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ ܐܲܡܠܸܟ݂ ܐܵܚܵܒ̣ ܒܲܪ ܥܲܡܪܝܼ ܥܲܠ ܝܼܣܪܵܝܹܠ: ܒܫܵܡܪܹܝܢ ܥܸܣܪܝܼܢ ܘܬܲܪܬܹ̇ܝܢ ܫܢ̈ܝܼܢ. 30: ܘܲܥܒܲܕ݂ ܐܵܚܵܒ̣ ܒܲܪ ܥܲܡܪܝܼ ܕܒ̣ܝܼܫ ܩܕ݂ܵܡ ܡܵܪܝܵܐ: ܡ̣ܢ ܟܠ ܕܲܗܘ̤ܵܘ ܩܕ݂ܵܡܵܘܗܝ. 31: ܘܡܸܛܠ ܕܩܲܠܝܼܠ ܗ̄ܘ̣ܵܐ ܒܥܲܝܢܵܘ̈ܗܝ ܕܲܢܗܲܠܸܟ݂ ܒܲܚܛܵܗܵܘ̈ܗܝ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܐܸܙܲܠ̣ ܘܲܢܣܲܒ̣ ܐܲܢ̄ܬ̇ܬ̣ܵܐ ܠܐܝܼܙܒܸܠ ܒܲܪܬ̣ ܐܝܼܬ̣ ܒܥܸܠ ܡܲܠܟܵܐ ܕܨܲܝ̈ܕ̇ܢܵܝܹܐ. ܘܐܸܙܲܠ ܘܲܦܠܲܚ̣ ܠܒܲܥܠܵܐ: ܘܲܣܓܸܕ݂ ܠܹܗ. 32: ܘܐܲܩܝܼܡ ܡܲܕ݂ܒ̇ܚܵܐ ܠܒܲܥܠܵܐ: ܒܹܝܬ̣ ܒܲܥܠܵܐ ܕܲܒ̣ܢܵܐ ܒܫܵܡܪܹܝܢ. 33: ܘܲܦܠܲܚ̣ ܐܵܚܵܒ̣ ܠܕܸܚ̈ܠܵܬ̣ܵܐ. ܘܐܵܘܣܸܦ ܐܵܚܵܒ̣ ܠܡܸܦܠܲܚ ܘܲܠܡܲܪܓܵܙܘܼ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܝܼܣܪܵܝܹܠ ܕܲܗܘ̤ܵܘ ܩܕ݂ܵܡܵܘܗܝ. 34: ܘܲܒ̣ܝܵܘܡܵܘ̈ܗܝ ܒܢܵܐ ܐܵܚܵܒ̣ ܒܹܝܬ̣ ܠܵܘܛܬ̣ܵܐ ܠܐܝܼܪܝܼܚܘܿ: ܒܐܲܒ̣ܝܼܪܲܡ ܒܘܼܟ݂ܪܹܗ ܫܲܟ݂ܠ̱ܠܵܗ̇. ܘܲܒ̣ܫܵܟ݂ܘܿܒ̣ ܙܥܘܿܪܹܗ ܐܲܩܝܼܡ ܬܲܪ̈ܥܹܝܗ̇: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ ܒܐܝܼܕ݂ܵܐ ܕܝܼܫܘܿܥ ܒܲܪܢܘܿܢ.

ܩܹܦܵܠܹܐܘܿܢ: ܝܙ.

1: ܘܐܸܡܲܪ ܐܹܠܝܼܵܐ ܕܡ̣ܢ ܬܲܫܒܝܼ: ܡ̣ܢ ܬܵܘ̈ܬܵܒܹܐ ܕܓ̣ܠܥܵܕ݂ ܠܐܵܚܵܒ̣ ܡܲܠܟܵܐ: ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܩܵܡܹ̇ܬ̣ ܩܕ݂ܵܡܵܘܗܝ ܐܸܢ ܢܸܗܘܹܐ ܒܲܫܢܲـ̈ـܝܵܐ ܗܵܠܹܝܢ ܛܲܠܵܐ: ܐܵܘ ܡܸܛܪܵܐ: ܐܸܠܵܐ ܐܸܡܲܬ̣ܝ ܕܐܹܡܲܪ.

2: ܘܲܗܘ̤ܵܐ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ ܘܐܸܡܲܪ ܠܹܗ. 3: ܙܸܠ ܡܸܟܵܐ ܘܐܸܬ̣ܦܲܢ̄ܝܼ ܠܵܟ݂ ܠܡܲܕ݂ܢ̱ܚܵܐ: ܘܐܸܬ̇ܛܲܫܵܐ ܒܢܲܚܠܵܐ ܕܟܲܪܝܲܬ̣ ܕܲܩܕ݂ܵܡ ܝܘܿܪܕ̇ܢܵܢ. 4: ܘܡ̣ܢ ܢܲܚܠܵܐ ܗ̤ܘܲܝܬ̇ ܫܵܬܹ̇ܐ: ܘܲܠܥܘܼܪ̈ܒܹܐ ܦܩܕܹ̇ܬ̣ ܕܲܢܬܲܪܣܘܿܢܵܟ݂ ܬܲܡܵܢ. 5: ܘܐܸܙܲܠ ܘܲܥܒܲܕ݂ ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ: ܘܐܸܙܲܠ̣ ܘܝܼܬܸܒ̣ ܒܢܲܚܠܵܐ ܕܟܲܪܝܲܬ̣ ܕܲܩܕ݂ܵܡ ܝܘܿܪܕ̇ܢܵܢ. 6: ܘܥܘܼܪ̈ܒܹܐ ܡܲܝܬܹ̇ܝܢ ܠܹܗ ܠܲܚܡܵܐ ܘܒܸܣܪܵܐ ܒܨܲܦܪܵܐ: ܘܠܲܚܡܵܐ ܘܒܸܣܪܵܐ ܒܪܲܡܫܵܐ: ܘܡ̣ܢ ܢܲܚܠܵܐ ܫܵܬܹ̇ܐ ܗ̄ܘ̣ܵܐ. 7: ܘܡ̣ܢ ܒܵܬܲܪ ܝܵܘ̈ܡܵܬ̣ܵܐ ܝܼܒܸܫܘ ܢܲܚ̈ܠܹܐ: ܡܸܛܠ ܕܠܵܐ ܢܚܸܬ̣ ܡܸܛܪܵܐ ܒܐܲܪܥܵܐ. 8: ܘܲܗܘ̤ܵܐ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ. 9: ܩܘܼܡ ܙܸܠ ܠܨܵܪܦܲܬ̣ ܨܲܝܕܵܢ: ܘܬܸܒ̣ ܬܲܡܵܢ. ܗܵܐ ܦܩܕܹ̇ܬ̣ ܬܲܡܵܢ ܠܐܲܢ̄ܬ̇ܬ̣ܵܐ ܐܲܪܡܲܠܬܵܐ ܕܲܬ̇ܬܲܪܣܹܝܟ݂. 10: ܘܩܵܡ̣ ܙܐܸܙܲܠ̣ ܠܨܵܪܦܲܬ̣: ܘܥܲܠ ܒܬܲܪܥܵܐ ܕܲܩܪܝܼܬ̣ܵܐ. ܘܲܚܙܵܐ ܬܲܡܵܢ ܐܲܢ̄ܬ̇ܬ̣ܵܐ ܐܲܪܡܲܠܬܵܐ ܕܩܵܫܵܐ ܩܲܝܣܹ̈ܐ ܘܲܩܪܵܗ̇ ܘܐܸܡܲܪ ܠܵܗ̇: ܐܲܝܬܵܝ ܠܝܼ ܩܲܠܝܼܠ ܡܲـ̈ـܝܵܐ ܒܡܵܐܢܵܐ: ܐܸܫܬܹ̇ܐ. 11: ܘܐܸܙܲܠ̄ܬ̇ ܠܡܲܝܬܵܝܘܼ ܠܹܗ ܘܲܩܪܵܗ̇ ܘܐܸܡܲܪ ܠܵܗ̇: ܐܲܝܬ̇ܝ ܠܝܼ ܦܬ̇ܬ̣ܵܐ ܕܠܲܚܡܵܐ ܒܐܝܼܕܲܝ̈ܟܝ. 12: ܘܐܸܡܪܲܬ̤: ܚܲܝ ܗ̄ܘ̣ ܡܵܪܝܵܐ ܐܲܠܵܗܵܟ݂: ܐܸܢ ܐܝܼܬ̣ ܠܝܼ ܡܸܕܸ̇ܡ: ܐܸܠܵܐ ܐܸܢ ܡܠܸܐ ܟܲܦܵܐ ܩܲܡܚܵܐ ܒܩܘܼܠܬ̣ܵܐ: ܘܩܲܠܝܼܠ ܡܸܫܚܵܐ ܒܩܲܪܢܵܐ. ܘܗܵܐ ܩܵܫܵܐ ܐ̄ܢܵܐ ܬܪܹܝܢ ܩܲܝܣ̈ܝܼܢ: ܕܐܹܙܲܠ ܐܸܥܒܸ̇ܕ݂ ܠܝܼ ܘܲܠܒܹܪܝ. ܘܢܹܐܟ݂ܘܿܠ ܘܲܢܡܘܼܬ̣. 13: ܘܐܸܡܲܪ ܠܵܗ̇ ܐܹܠܝܼܵܐ. ܠܵܐ ܬܸܕ݂ܚ̄ܠܝܼܢ ܙܸܠܝ ܘܲܥܒܸܕ݂ܝ ܐܲܝܟ݂ ܕܐܸܡܲܪܬ̇ܝ ܒܲܠܚܘܿܕ݂ ܥܒܸܕܝ ܠܝܼ ܟܵܟ݂ܘܿܠܬܵܐ ܙܥܘܿܪܬܵܐ ܩܲܕ݂ܡܵܝܑܬ̣: ܘܐܲܦܩܝ ܠܝܼ. ܘܠܹܟ݂ܝ ܘܠܲܒ̣ܪܹܟ݂ܝ ܥܒܸܕ݂ܝ ܒܚܲܪܬ̣ܵܐ. 14: ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܩܘܼܠܬ̣ܵܐ ܕܩܲܡܚܵܐ ܠܵܐ ܬܸܓ̣ܡܲܪ: ܘܩܲܪܢܵܐ ܕܡܸܫܚܵܐ ܠܵܐ ܬܸܚܣܲܪ: ܥܕܲܡܵܐ ܠܝܵܘܡܵܐ ܕܢܲܬܸ̇ܠ ܡܵܪܝܵܐ ܡܸܛܪܵܐ ܥܲܠ ܐܲܦܲܝ̈ ܐܲܪܥܵܐ. 15: ܘܐܸܙܲܠ̄ܬ̤ ܘܥܸܒ̣ܕܲܬ̤ ܐܲܝܟ݂ ܦܸܬ̣ܓ̣ܵܡܹܗ ܕܐܹܠܝܼܵܐ. ܘܐܸܟ݂ܠܲܬ̤ ܗ̤ܝ ܘܗ̤ܘ ܘܲܒ̣ܢܲܝ̈ ܒܲܝܬܵܗ̇. 16: ܒܝܵܘ̈ܡܵܬ̣ܵܐ ܗܵܢܘܿܢ: ܠܵܐ ܩܘܼܠܬܵܐ ܕܩܲܡܚܵܐ ܓܸܡܪܲܬ̤: ܘܠܵܐ ܩܲܪܢܵܐ ܕܡܸܫܚܵܐ ܚܸܣܪܲܬ̤: ܐܲܝܟ݂ ܦܸܬ̣ܓ̣ܵܡܹܗ ܕܡܵܪܝܵܐ ܕܡܲܠܸܠ̣ ܒܐܝܼܕ݂ܵܐ ܕܐܹܠܝܼܵܐ. 17: ܘܡ̣ܢ ܒܵܬܲܪ ܦܸܬ̣ܓ̣ܵܡܹ̈ܐ ܗܵܠܹܝܢ: ܐܸܬ̣ܟ̇ܪܲܗ ܒܪܵܗ̇ ܕܐܲܢ̄ܬ̇ܬ̣ܵܐ ܡܵܪܲܬ̣ ܒܲܝܬܵܐ. ܘܲܗܘ̤ܵܐ ܟܘܼܪܗܵܢܹܗ ܥܲܫܝܼܢ ܛܵܒ̣: ܥܕܲܡܵܐ ܕܠܵܐ ܐܸܫܬܲܚܪܲܬ̤ ܒܹܗ ܢܫܲܡܬ̣ܵܐ. 18: ܘܐܸܡܪܲܬ̤ ܠܐܹܠܝܼܵܐ: ܡܵܐ ܠܝܼ ܘܠܵܟ݂ ܢܒ̣ܝܹܗ: ܕܐܲܠܵܗܵܐ. ܐܸܬܲܝܬ̇ ܥܠܲܝ ܠܡܲܕ݂ܟ݂ܵܪܘܼ ܚܵܘܒܲܝ̈ ܘܲܠܡܸܩܛܲܠ ܒܹܪܝ. 19: ܘܐܸܡܲܪ ܠܵܗ̇ ܐܹܠܝܼܵܐ. ܗܲܒ̣ܝ ܠܝܼ ܒܪܹܟ݂ܝ. ܘܢܲܣܒܹ̇ܗ ܡ̣ܢ ܥܘܼܒܵܗ̇: ܘܐܲܣܩܹܗ ܠܥܠܝܼܬ̣ܵܐ: ܐܲܝܟܵܐ ܕܥܵܡܲܪ ܗ̄ܘ̣ܵܐ: ܘܐܲܪܡܝܹܗ ܒܥܲܪܣܵܐ. 20: ܘܲܩ̣ܪܵܐ ܠܡܵܪܝܵܐ: ܘܐܸܡܲܪ: ܡܵܪܝܵܐ ܐܲܠܵܗܵܐ: ܐܵܦ ܥܲܠ ܐܲܪܡܲܠܬܵܐ ܗܵܕܹܐ ܕܥܵܡܲܪ ܐ̄ܢܵܐ ܥܲܡܵܗ̇: ܐܲܒ̣ܐܸܫܬ̇ ܠܡܸܩܛܲܠ ܒܪܵܗ̇. 21: ܘܐܬ̣ܡ̱ܫܲܚ ܥܲܠ ܛܲܠܝܵܐ ܬܠܵܬ̣ ܙܲܒ̣ܢ̈ܝܼܢ ܘܲܩܪܵܐ ܠܡܵܪܝܵܐ ܘܐܸܡܲܪ: ܡܵܪܝܵܐ ܐܲܠܵܗܝ: ܬܸܗܦܘܿܟ݂ ܢܲܦ̮ܫܹܗ ܕܛܲܠܝܵܐ ܗܵܢܵܐ ܠܓ̣ܵܘܹܗ. 22: ܘܲܫ̣ܡܲܥ ܡܵܪܝܵܐ ܒܩܵܠܹܗ ܕܐܹܠܝܼܵܐ. ܘܗܸܦܟܲܬ̤ ܢܲܦ̮ܫܹܗ ܕܛܲܠܝܵܐ ܠܓ̣ܵܘܹܗ ܘܲܚܝܵܐ. 23: ܘܢܲܣܒܹ̇ܗ ܐܹܠܝܼܵܐ ܠܛܲܠܝܵܐ: ܘܐܲܚܬܹܗ ܡ̣ܢ ܥܸܠܝܼܬ̣ܵܐ ܠܒܲܝܬܵܐ: ܘܝܲܗ̄ܒܹ̇ܗ ܠܐܸܡܹܗ. ܘܐܸܡܲܪ ܠܵܗ̇ ܐܹܠܝܼܵܐ: ܚܙܵܝ ܕܲܚܝܵܐ ܒܪܹܟ݂ܝ. 24: ܘܐܸܡܪܲܬ̤: ܗܵܫܵܐ ܝܼܕ݂ܥܹ̇ܬ̣ ܕܲܢܒ̣ܝܹܗ ܐܲܢ̄ܬ̇ ܕܐܲܠܵܗܵܐ: ܘܡܸܠܬܹܗ ܕܡܵܪܝܵܐ ܒܦܘܼܡܵܟ݂ ܒܩܘܼܫܬܵܐ.

ܩܹܦܵܠܹܐܘܿܢ: ܝܚ.

1: ܘܲܗܘ̤ܵܐ ܠܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ ܗܵܢܘܿܢ: ܘܦܸܬ̣ܓ̣ܵܡܹܗ ܕܡܵܪܝܵܐ ܗܘ̤ܵܐ ܥܲܠ ܐܹܠܝܼܵܐ: ܒܫܲܢ̄ܬܵܐ ܬܠܝܼܬ̣ܵܝܬܵܐ: ܠܡܹܐܡܲܪ: ܙܸܠ ܐܸܬ̣ܚܲܙܚ ܠܐܵܚܵܒ̣: ܘܐܸܬܸ̇ܠ ܡܸܛܪܵܐ ܥܲܠ ܐܲܦܲܝ̈ ܐܲܪܥܵܐ. 2: ܘܐܸܙܲܠ ܐܹܠܝܼܵܐ ܠܡܸܬ̣ܚܙܵܝܘܼ ܠܐܵܚܵܒ̣. ܘܟܲܦܢܵܐ ܥܫܸܢ ܒܫܵܡܪܹܝܢ. 3: ܘܲܩ̣ܪܵܐ ܐܵܚܵܒ̣ ܠܥܘܿܒܲܕ݂ܝܵܐ ܪܲܒ̇ ܒܲܝܬܹ̇ܗ. ܘܥܘܿܒܲܕ݂ܝܵܐ ܕܵܚܹ̇ܠ ܗ̄ܘ̣ܵܐ ܡ̣ܢ ܩܕ݂ܵܡ ܡܵܪܝܵܐ ܛܵܒ̣. 4: ܘܟܲܕ݂ ܩܲܛܠܲܬ̤ ܐܝܼܙܒܸܠ ܠܲܢܒ̣ܝܼܵܘ̈ܗܝ ܕܐܲܠܵܗܵܐ: ܕܒܲܪ ܥܘܿܒܲܕ݂ܝܵܐ ܡܵܐܐ ܢܒ̣ܝܼܝܼ̈ܢ: ܘܛܵܫܝܼ ܐܸܢܘܿܢ ܚܲܡܫܝܼܢ ܚܲܡܫܝܼܢ ܓܲܒ̣ܪ̈ܝܼܢ ܒܲܡܥܲܪܬܵܐ: ܘܬܲܪܣܝܼ ܐܸܢܘܿܢ ܒܠܲܚܡܵܐ ܘܲܒ̣ܡܲـ̈ـܝܵܐ. 5: ܘܐܸܡܲܪ ܐܵܚܵܒ̣ ܠܥܘܿܒܲܕ݂ܝܵܐ: ܙܸܠ ܗܲܠܸܟ݂ ܒܐܲܪܥܵܐ: ܥܲܠ ܟܠ ܡܲܒ̇ܘܼܥܲܝ ܡܲـ̈ـܝܵܐ: ܘܥܲܠ ܟܠܗܘܿܢ ܢܲܚ̈ܠܹܐ. ܛܵܟ݂ ܢܸܫܟܲܚ ܥܡܝܼܪܵܐ: ܘܢܲܚܸܐ ܪ̈ܲܟ݂ܫܵܐ ܘܟ݂ܘܼܕܲܢ̈ܘܵܬ̣ܵܐ: ܘܠܵܐ ܢܓܲܪܕܹ̇ܐ ܡ̣ܢ ܒܥܝܼܪܵܐ. 6: ܘܲܦܠܲܓ̣ ܠܗܘܿܢ ܐܘܼܪܚܵܐ ܠܡܸܥܒܲܪ ܒܵܗ̇. ܐܵܚܵܒ̣ ܐܸܙܲܠ ܒܐܘܼܪܚܵܐ ܚܕ݂ܵܐ ܒܲܠܚܘܿܕ݂ܵܘܗܝ: ܘܥܘܿܒܲܕ݂ܝܵܐ ܐܸܙܲܠ̣ ܒܐܘܼܪܚܵܐ ܐ̄ܚܪܹܬ̣ܵܐ ܒܲܠܚܘܿܕ݂ܵܘܗܝ. 7: ܘܲܗܘ̤ܵܐ ܥܘܿܒܲܕ݂ܝܵܐ ܒܐܘܼܪܚܵܐ ܘܗܵܐ ܐܹܠܝܼܵܐ ܐܲܪܥܹܗ: ܘܐܸܫܬܵܘܕ̇ܥܹܗ. ܘܲܢܦܲܠ̣ ܥܲܠ ܐܲܦܵܘ̈ܗܝ ܘܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܡܵܪܝ ܐܹܠܝܼܵܐ. 8: ܐܵܡܲܪ ܠܹܗ ܐܸܢܵܐ ܗ̄ܘ̣. ܘܐܸܡܲܪ ܠܹܗ: ܙܸܠ ܐܸܡܲܪ ܠܡܵܪܵܟ݂ ܕܗܵܐ ܐܹܠܝܼܵܐ. 9: ܘܐܸܡܲܪ ܥܘܿܒܲܕ݂ܝܵܐ: ܡܵܢܵܐ ܚܛܹ̇ܝܬ̣: ܕܡܲܫܠܸܡ ܐܲܢ̄ܬ̇ ܠܹܗ ܠܥܲܒ̣ܕܵܟ݂ ܒܐܝܼܕܹܗ ܕܐܵܚܵܒ̣ ܠܡܸܩܛܠܲܢܝ. 10: ܚܲܝ ܗ̄ܘ̣ ܡܵܪܝܵܐ ܐܲܠܵܗܵܟ݂: ܐܸܢ ܐܝܼܬ̣ ܥܲܡܵܐ ܐܵܘ ܡܲܠܟ̇ܘܼܬ̣ܵܐ: ܕܠܵܐ ܫܲܕܲܪ ܡܵܪܝ ܠܡܸܒ̣ܥܝܵܟ݂ ܬܲܡܵܢ. ܘܐܵܡ̇ܪܝܼܢ ܠܲܝܬ̇. ܘܐܵܘܡܝܼ ܠܡܲܠ̈ܟ̇ܘܵܬ̣ܵܐ ܘܲܠܥܲܡܡܹ̈ܐ ܕܐܸܢ ܠܵܐ ܐܸܫܟ̇ܚܘܼܟ݂. 11: ܘܗܵܫܵܐ ܐܵܡܲܪ ܐܲܢ̄ܬ̇ ܠܝܼ: ܙܸܠ ܐܸܡܲܪ ܠܡܵܪܵܟ݂ ܕܗܵܐ ܐܹܠܝܼܵܐ. 12: ܘܥܲܕ݂ ܐܸܢܵܐ ܐܸܙܲܠ ܡ̣ܢ ܠܘܵܬ̣ܵܟ݂: ܪܘܼܚܹܗ ܕܡܵܪܝܵܐ ܬܸܫܩ̄ܠܵܟ݂: ܘܬܲܘܒ̇ܠܵܟ݂ ܠܐܲܝܟܵܐ ܕܠܵܐ ܐܸܕܲܥ. ܘܐܸܙܲܠ ܠܲܡܚܵܘܝܵܘ ܠܐܵܚܵܒ̣: ܘܠܵܐ ܢܸܫܟ̇ܚܵܟ݂ ܘܢܸܩܛܠܲܢܝ. ܘܥܲܒ̣ܕܵܟ݂ ܕܵܚܹ̇ܠ ܡ̣ܢ ܡܵܪܝܵܐ ܡ̣ܢ ܛܲܠܝܘܼܬܹܗ. 13: ܘܠܵܐ ܚܵܘܝܼܬ̣ ܠܡܵܪܝ ܡܸܕܸ̇ܡ ܕܥܸܒ̣ܕܹ̇ܬ̣. ܟܲܕ݂ ܩܲܛܠܲܬ̤ ܐܝܼܙܒܸܠ ܠܲܢܒ̣ܝܵܘ̈ܗܝ ܕܐܲܠܵܗܵܐ: ܕܸܒ̣ܪܹܬ̣ ܡ̣ܢ ܢܒ̣ܝܼܵܘ̈ܗܝ ܕܡܵܪܝܵܐ ܡܵܐܐ ܓܲܒ̣ܪ̈ܝܼܢ: ܘܛܲܫܝܼܬ̣ ܐܸܢܘܿܢ ܚܲܡܫܝܼܢ ܓܲܒ̣ܪ̈ܝܼܢ ܒܲܡܥܲܪܬܵܐ: ܘܬܲܪܣܝܼܬ̇ ܐܸܢܘܿܢ ܒܠܲܚܡܵܐ ܘܲܒ̣ܡܲـ̈ـܝܵܐ. 14: ܘܗܵܫܵܐ ܐܵܡܲܪ ܐܲܢ̄ܬ̇ ܠܝܼ: ܙܸܠ ܐܸܡܲܪ ܠܡܵܪܵܟ݂: ܕܗܵܐ ܐܹܠܝܼܵܐ: ܘܢܸܩܛܠܲܢܝ. 15: ܘܐܸܡܲܪ ܐܹܠܝܼܵܐ: ܚܲܝ ܗ̄ܘ̣ ܡܵܪܝܵܐ ܚܲܝܠܬ̣ܵܢܵܐ ܕܩܵܡܹ̇ܬ̣ ܩܕ݂ܵܡܵܘܗܝ: ܐܸܠܵܐ ܝܵܘܡܵܢܵܐ ܐܸܬ̣ܚܙܸܐ ܠܹܗ. 16: ܘܐܸܙܲܠ ܥܘܿܒܲܕ݂ܝܵܐ ܠܐܘܼܪܥܹܗ ܕܐܵܚܵܒ̣: ܘܚܵܘܼܝܹܗ ܠܐܵܚܵܒ̣. ܘܐܸܬ̣ܵܐ ܐܵܚܵܒ̣ ܠܐܘܼܪܥܹܗ ܕܐܹܠܝܼܵܐ. 17: ܘܟܲܕ݂ ܚܙܵܝܗܝ ܐܵܚܵܒ̣ ܠܐܹܠܝܼܵܐ: ܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܗܵܢܵܐ ܕܵܠܘܿܚܹܗ ܕܝܼܣܪܵܝܹܠ. 18: ܐܵܡܲܪ ܠܹܗ ܐܹܠܝܼܵܐ: ܠܵܐ ܕܲܠܚܹ̇ܬ̣ ܐܸܢܵܐ ܠܝܼܣܪܵܝܹܠ. ܐܸܠܵܐ ܐܲܢ̄ܬ̇ ܘܒܹܝܬ̣ ܐܲܒ̣ܘܼܟ݂: ܕܲܫܒܲܩܬ̇ܘܿܢ ܦܘܼܩܕܵܢܵܘ̈ܗܝ ܕܡܵܪܝܵܐ: ܘܐܸܙܲܠܬ̇ܘܿܢ ܒܵܬܲܪ ܒܲܥܠܵܐ. 19: ܘܗܵܫܵܐ ܫܲܕܲܪ ܟܲܢܸܫ ܠܝܼ ܠܟ݂ܠܹܗ ܝܼܣܪܵܝܹܠ ܠܛܘܼܪܵܐ ܕܟܲܪܡ̄ܠܵܐ: ܘܠܲܢܒ̣̈ܝܲܝ ܒܲܥܠܵܐ: ܐܲܪܒܲܥܡܵܐܐ ܘܚܲܡܫܝܼܢ ܘܠܲܢܒ̣̈ܝܲܝ ܕܸܚ̈ܠܵܬ̣ܵܐ ܐܲܪܒܲܥܡܵܐܐ ܘܚܲܡܫܝܼܢ: ܕܐܵܟ݂ܠܝܼܢ ܦܵܬ̣ܘܿܪܵܗ̇ ܕܐܝܼܙܒܸܠ. 20: ܘܫܲܕܲܪ ܐܵܚܵܒ̣ ܥܲܠ ܟܠܗܘܿܢ ܒܢܲܝ̈ ܝܼܣܪܵܝܹܠ: ܘܟܢܸܫ ܐܸܢܘܿܢ ܠܓܲܒ̣ܪܹ̈ܐ ܠܛܘܼܪܵܐ ܕܟܲܪܡ̄ܠܹܐ. 21: ܘܲܩܪܸܒ̣ ܐܹܠܝܼܵܐ ܠܘܵܬ̣ ܟܠܹܗ ܥܲܡܵܐ: ܘܐܸܡܲܪ: ܥܕܲܡܵܐ ܠܐܸܡܲܬ̣ܝ ܦܠܝܼܓ̣ܝܼܢ ܐ̄ܢܬ̇ܘܿܢ ܠܬܲܪܬܹ̇ܝܢ ܦܵܠ̈ܓܘܵܢ. ܐܸܢ ܡܵܪܝܵܐ ܗ̄ܘ̣ ܐܲܠܵܗܵܐ: ܙܸܠܘ ܒܵܬ̣ܪܹܗ. ܘܐܸܢ ܒܲܥܠܵܐ ܗ̄ܘ̣: ܙܸܠܘ ܒܵܬ̣ܪܹܗ. ܘܠܵܐ ܝܲܗ̄ܒ̣ܘ ܠܹܗ ܥܲܡܵܐ ܦܸܬ̣ܓ̣ܵܡܵܐ. 22: ܘܐܸܡܲܪ ܐܹܠܝܼܵܐ: ܐܸܢܵܐ ܗ̄ܘ̣ ܒܲܠܚܘܿܕ݂ܝ ܐܸܫܬܲܚܪܹܬ̣ ܢܒ̣ܝܼܵܐ ܠܡܵܪܝܵܐ: ܘܲܢܒ̣ܝܲܝ̈ ܒܲܥܠܵܐ ܐܲܪܒܲܥܡܵܐܐ ܘܚܲܡܫܝܼܢ ܓܲܒ̣ܪ̈ܝܼܢ. 23: ܢܸܬ̇ܠܘܼܢ ܠܲܢ ܬܪܹܝܢ ܬܵܘܪ̈ܝܼܢ. ܘܢܸܓ̣ܒ̇ܘܿܢ ܠܗܘܿܢ ܚܲܕ݂ ܬܵܘܪܵܐ. ܘܲܢܦܲܫܚܘܼܢ ܘܲܢܣܝܼܡܘܼܢ ܥܲܠ ܩܲܝ̈ܣܹܐ. ܘܢܘܼܪܵܐ ܠܵܐ ܢܣܝܼܡܘܼܢ. ܘܐܸܢܵܐ ܐܸܥܒܸ̇ܕ݂ ܚܲܕ݂ ܬܵܘܪܵܐ: ܘܐܹܦܲܫܲܚ ܘܐܹܣܝܼܡ ܥܲܠ ܩܲܝ̈ܣܹܐ: ܘܢܘܼܪܵܐ ܠܵܐ ܐܹܣܝܼܡ. 24: ܘܲܩܪܵܘ ܒܫܸܡ ܐܲܠܵܗܲܝ̈ܟ̇ܘܿܢ. ܘܐܸܢܵܐ ܐܸܩܪܸܐ ܒܲܫܡܹܗ ܕܡܵܪܝܵܐ ܐܲܠܵܗܝ. ܘܐܲܝܢܵܐ ܐܲܠܵܗܵܐ ܕܥܵܢܹ̈ܐ ܒܢܘܼܪܵܐ: ܗܵܘ̇ ܗ̄ܘ̣ ܐܲܠܵܗܵܐ. ܘܲܥܢ̣ܵܘ ܟܠܹܗ ܥܲܡܵܐ: ܘܐܸܡܲܪܘ: ܫܲܦܝܼܪ ܐܸܡܲܪܬ̇. 25: ܘܐܸܡܲܪ ܐܹܠܝܼܵܐ ܠܲܢܒ̣ܝܲܝ̈ ܒܲܥܠܵܐ: ܓܒ̣ܵܘ ܠܟ݂ܘܿܢ ܚܲܕ݂ ܬܵܘܪܵܐ: ܘܲܥܒܸܕ݂ܘ ܩܲܕ݂ܡܵܝܑܬ̣: ܡܸܛܠ ܕܐܲܢ̄ܬ̇ܘܿܢ ܣܲܓ̇ܝܼܐܝܼܢ.

26: ܘܢܲܣܒ̇ܘܼܗܝ ܠܬ̣ܵܘܪܵܐ ܕܐܸܬ̣̱ܝܼܗܸܒ̣ ܠܗܘܿܢ ܘܥܲܒ̣ܕ̇ܘܼܗܝ. ܘܲܗܘ̤ܵܘ ܩܵܪܹܝܢ ܒܲܫܡܹܗ ܕܒܲܥܠܵܐ: ܡ̣ܢ ܨܲܦܪܵܐ ܘܲܥܕܲܡܵܐ ܠܛܲܗܪܵܐ: ܒܲܥܠܵܐ ܥܢܝܼܢ. ܘܠܲܝܬ̇ ܩܵܠ ܘܐܵܦܠܵܐ ܕܥܵܢܹ̇ܐ. ܘܐܸܬ̣ܟܲܬܲܫܘ ܥܲܠ ܡܲܕ݂ܒ̇ܚܵܐ ܕܲܥܒܲܕ݂ܘ. 27: ܘܟܲܕ݂ ܗܘ̤ܵܐ ܛܲܗܪܵܐ: ܡܓܚܸܟ݂ ܗ̄ܘ̣ܵܐ ܒܗܘܿܢ ܐܹܠܝܼܵܐ ܘܐܵܡܲܪ: ܩܪܵܘ ܒܩܵܠܵܐ ܪܵܡܵܐ: ܡܸܛܠ ܕܐܲܠܵܗܵܐ ܗ̄ܘ̣: ܕܲܠܡܵܐ ܪܸܢܝܵܐ ܐܝܼܬ̣ ܠܹܗ: ܐܵܘ ܕܲܠܡܵܐ ܨܒ̣ܘܼ ܣܵܥܲܪ: ܐܵܘ ܕܲܠܡܵܐ ܐܘܼܪܚܵܐ ܐܝܼܬ̣ ܠܹܗ: ܐܵܘ ܕܲܠܡܵܐ ܕܡܸܟ݂ ܗ̄ܘ̣ ܘܢܸܬ̇ܬ̇ܥܝܼܪ. 28: ܘܲܩܪܵܘ ܒܩܵܠܵܐ ܪܵܡܵܐ. ܘܐܸܬ̣ܟܲܬܲܫܘ ܐܲܝܟ݂ ܢܵܡܘܿܣܗܘܿܢ: ܒܚܲܪܒܵܐ ܘܲܒ̣ܪ̈ܘܼܡܚܹܐ: ܥܕܲܡܵܐ ܕܐܸܬ̣ܐ̱ܫܸܕ݂ ܕܸܡܗܘܿܢ ܥܠܲܝܗܘܿܢ. 29: ܘܟܲܕ݂ ܥܒܲܪ ܛܲܗܪܵܐ: ܗܘ̤ܵܘ ܡܸܬ̣ܢܲܒܹ̇ܝܢ ܥܕܲܡܵܐ ܠܙܲܒ̣ܢܵܐ ܕܣܵܠܹܩ ܩܘܼܪܒܵܢܵܐ. ܘܠܲܝܬ̇ ܩܵܠ: ܐܵܦܠܵܐ ܕܥܵܢܹ̇ܐ: ܐܵܦܠܵܐ ܕܨܵܐܹ̇ܬ̣. ܘܐܸܡܲܪ ܐܹܠܝܼܵܐ ܠܲܢܒ̣ܝܲܝ̈ ܕܸܚ̈ܠܵܬ̣ܵܐ: ܫܲܢܵܘ ܡ̣ܢ ܗܵܫܵܐ. ܘܐܵܦ ܐܹܢܵܐ ܐܸܥܒܸ̇ܕ݂ ܝܲܩܕܲܝ̈ ܫܲܠܡܹ̈ܐ. ܘܫܲܢܝܼܘ ܘܐܸܙܲܠ̣ܘ. 30: ܘܐܸܡܲܪ ܐܹܠܝܼܵܐ ܠܟ݂ܠܹܗ ܥܲܡܵܐ: ܩܪܘܿܒ̣ܘ ܠܘܵܬ̣ ܘܲܩܪܸܒ̣ܘ ܟܠܹܗ ܥܲܡܵܐ ܠܘܵܬܹܗ. ܘܬܲܪܣܝܼ ܡܲܕ݂ܒ̇ܚܹܗ ܕܡܵܪܝܵܐ: ܕܲܡܣܲܚܲܦ ܗ̄ܘ̣ܵܐ. 31: ܘܲܢܣܲܒ̣ ܐܹܠܝܼܵܐ ܬܲܪܬܲܥܸܣܪܹ̈ܐ ܟܹܐܦ̈ܝܼܢ: ܐܲܝܟ݂ ܡܸܢܝܵܢܵܐ ܕܫܲܒ̣ܛܹ̈ܐ ܕܲܒ̣ܢܲܝ̈ ܝܲܥܩܘܿܒ̣: ܗܵܘ̇ ܕܲܗܘ̤ܵܐ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ ܘܐܸܡܲܪ ܠܹܗ: ܝܼܣܪܵܝܹܠ ܢܸܗܘܹܐ ܫܡܵܟ݂. 32: ܘܲܒ̣ܢܵܐ ܐܸܢܹܝܢ ܠܟܹܐܦܹ̈ܐ: ܡܲܕ݂ܒ̇ܚܵܐ ܒܲܫܡܹܗ ܕܡܵܪܝܵܐ. ܘܲܥܒܲܕ݂ ܚܹܐܪܝܼܬ̣ܵܐ ܐܲܝܟ݂ ܒܹܝܬ̣ ܣܲܐܬ̣̈ܝܼܢ ܕܙܲܪܥܵܐ: ܘܐܲܟ݂ܪ̱ܟܹܗ ܠܡܲܕ݂ܒ̇ܚܵܐ. 33: ܘܲܟ݂ܫܵܐ ܩܲܝܣܹ̈ܐ: ܘܦܲܫܚܹܗ ܠܬ̣ܵܘܪܵܐ: ܘܣܵܡܹܗ ܠܥܸܠ ܡ̣ܢ ܩܲܝܣܹ̈ܐ. 34: ܘܐܸܡܲܪ: ܡܠܵܘ ܐܲܪܒܲܥ ܩܘܼ̈ܠܝܼܢ ܡܲـ̈ـܝܵܐ: ܘܣܘܿܟ݂ܘ ܥܲܠ ܥܠܵܬ̣ܵܐ ܘܥܲܠ ܩܝܣܹ̈ܐ. ܘܐܸܡܲܪ ܬܢܵܘ: ܘܲܬ̣ܢܵܘ ܘܐܸܡܲܪ ܬܲܠܸܬ̣ܘ: ܘܬܲܠܸܬ̣ܘ. 35: ܘܗܲܠܸܟ݂ܘ ܡܲـ̈ـܝܵܐ ܚܕ݂ܵܪ̈ܵܘܗܝ ܕܡܲܕ݂ܒ̇ܚܵܐ: ܘܐܵܦ ܠܵܗ̇ ܠܚܹܐܪܝܼܬ̣ܵܐ ܡ̣ܠܵܐܘܼܗ̇ ܡܲـ̈ـܝܵܐ. 36: ܘܟܲܕ݂ ܣܠܸܩ ܩܘܼܪܒܵܢܵܐ: ܩܪܲܒ̣ ܐܹܠܝܼܵܐ ܢܒ̣ܝܼܵܐ ܘܐܸܡܲܪ: ܡܵܪܝܵܐ ܐܲܠܵܗܹܗ ܕܐܲܒ̣ܪܵܗܵܡ ܘܕ݂ܐܝܼܣܚܵܩ ܘܕ݂ܝܼܣܪܵܝܹܠ: ܝܵܘܡܵܢܵܐ ܢܸܬ̣̱ܝܼܕܲܥ ܕܐܲܢ̄ܬ̇ ܗ̄ܘ̣ ܐܲܠܵܗܵܐ ܒܝܼܣܪܵܝܹܠ: ܘܐܸܢܵܐ ܥܲܒ̣ܕܵܟ݂: ܘܲܒ̣ܦܸܬ̣ܓ̣ܵܡܵܟ݂ ܥܸܒ̣ܕܹ̇ܬ̣ ܟܠܗܘܿܢ ܦܸܬ̣ܓ̣ܵܡܹ̈ܐ ܗܵܠܹܝܢ. 37: ܥܢܲܝܢܝ ܡܵܪܝܵܐ: ܥܢܝܼܢܝ: ܘܢܸܕ̇ܥܘܼܢ ܟܠܹܗ ܥܲܡܵܐ ܗܵܢܵܐ: ܕܐܲܢ̄ܬ̇ ܗ̄ܘ̣ ܡܵܪܝܵܐ ܐܲܠܵܗܵܐ: ܘܐܲܢ̄ܬ̇ ܐܲܦܢܝܼܬ̇ ܠܸܒ̇ܗܘܿܢ ܗܦܝܼܟ݂ܵܐ. 38: ܘܢܸܦܠܲܬ̤ ܢܘܼܪܹܗ ܕܡܵܪܝܵܐ: ܘܐܸܟ݂ܠܲܬ̤ ܥܠܵܬ̣ܵܐ: ܘܩܲܝܣܹ̈ܐ: ܘܟܹܐܦܹ̈ܐ: ܘܥܲܦܪܵܐ ܘܡܲـ̈ـܝܵܐ ܕܲܒ̣ܚܹܐܪܝܼܬ̣ܵܐ ܠܸܚܟܲܬ̤. 39: ܘܲܚܙܵܘ ܟܠܹܗ ܥܲܡܵܐ: ܘܲܢܦܲܠ̣ܘ ܥܲܠ ܐܲܦܲܝ̈ܗܘܿܢ ܘܐܸܡܲܪܘ: ܡܵܪܝܵܐ ܗ̄ܘ̣ ܐܲܠܵܗܵܐ: ܡܵܪܝܵܐ ܗ̄ܘ̣ ܐܲܠܵܗܵܐ. 40: ܘܐܸܡܲܪ ܠܗܘܿܢ ܐܹܠܝܼܵܐ ܐܲܚܘܿܕ݂ܘ ܐܸܢܘܿܢ ܠܲܢܒ̣ܝܲܝ̈ ܒܲܥܠܵܐ: ܘܐ̄ܢܵܫ ܠܵܐ ܢܸܬ̣ܦܲܠܲܛ ܡܸܢܗܘܿܢ. ܘܐܸܚܲܕ݂ܘ ܐܸܢܘܿܢ. ܘܐܲܚܸܬ̣ ܐܸܢܘܿܢ ܐܹܠܝܼܵܐ ܠܢܲܚܠܵܐ ܕܩܝܼܫܘܿܢ: ܘܲܢܟܲܣ ܐܸܢܘܿܢ ܬܲܡܵܢ. 41: ܘܐܸܡܲܪ ܐܹܠܝܼܵܐ ܠܐܵܚܵܒ̣: ܣܲܩ ܠܥܲܣ ܘܐܸܫܬܲܝ: ܡܸܛܠ ܕܩܵܠܵܐ ܕܲܪܓ̣ܘܼܫܝܵܐ ܕܡܸܛܪܵܐ. 42: ܘܲܣܠܸܩ ܐܵܚܵܒ̣ ܠܡܸܠܥܲܣ ܘܲܠܡܸܫܬܵܐ. ܘܐܹܠܝܼܵܐ ܣܠܸܩ ܠܪܹܫ ܟܲܪܡܠܵܐ: ܘܐܸܬ̣ܓ̇ܗܸܢ ܥܲܠ ܐܲܪܥܵܐ: ܘܣܵܡ̣ ܐܲܦܵܘ̈ܗܝ ܒܹܝܬ̣ ܒܘܼܪ̈ܟܵܘܗܝ. 43: ܘܐܸܡܲܪ ܠܬܲܠܡܝܼܕܹܗ: ܣܲܩ ܚܘܼܪ ܠܐܘܼܪܚܵܐ ܕܝܲܡܵܐ. ܘܲܣܠܸܩ: ܘܚܵܪ. ܘܐܸܡܲܪ ܠܲܝܬ̇ ܡܸܕܸ̇ܡ. ܘܐܸܡܲܪ ܠܹܗ ܗܦܘܿܟ݂ ܫܒܲܥ ܙܲܒ̣ܢ̈ܝܼܢ. 44: ܘܒܲܙܒܲܢ̄ܬܵܐ ܫܒ̣ܝܼܥܵܝܬܵܐ ܐܸܡܲܪ ܚܙܹ̇ܝܬ̣: ܘܗܵܐ ܥܢܵܢܵܐ ܙܥܘܿܪܬܵܐ ܐܲܝܟ݂ ܦܲܣܬ̣ܵܐ ܕܐܝܼܕ݂ܵܐ ܣܵܠܩܵܐ ܡ̣ܢ ܝܲܡܵܐ. ܘܐܸܡܲܪ ܠܹܗ: ܣܲܩ ܐܸܡܲܪ ܠܐܵܚܵܒ̣. ܪܟܲܒ̣ ܘܚܘܿܬ̣: ܥܲܕ݂ܠܵܐ ܢܸܟ݂ܠܸܝܟ݂ ܡܸܛܪܵܐ. 45: ܘܥܲܕ݂ ܗ̤ܘ ܡܸܬ̣ܦܢܸܐ ܠܟ݂ܵܐ ܘܲܠܟ݂ܵܐ: ܫܡܲܝܵܐ ܐܸܬ̣ܟ̇ܒܸܢܘ ܥܢܵܢܹ̈ܐ ܘܪܘܼܚܵܐ. ܘܲܗܘ̤ܵܐ ܡܸܛܪܵܐ ܪܲܒܵܐ. ܘܲܪܟܸܒ̣ ܐܵܚܵܒ̣ ܘܐܸܙܲܠ̣ ܠܐܝܼܙܲܪܥܹܝܠ. 46: ܘܐܝܼܕܹܗ ܕܡܵܪܝܵܐ ܗܘ̤ܵܬ̣ ܥܲܠ ܐܹܠܝܼܵܐ. ܘܐܸܣܲܪ ܚܲܨܵܘ̈ܗܝ: ܘܲܪܗܸܛ̣ ܩܕ݂ܵܡ ܐܵܚܵܒ̣: ܥܕܲܡܵܐ ܕܥܲܠ̣ ܠܐܝܼܙܲܪܥܹܝܠ.

ܩܹܦܵܠܹܐܘܿܢ: ܝܛ.

1: ܘܚܵܘܝܼ ܐܵܚܵܒ̣ ܠܐܝܼܙܒܸܠ ܟܠ ܡܸܕܸ̇ܡ ܕܲܥܒܲܕ݂ ܐܹܠܝܼܵܐ: ܘܲܕ݂ܩܲܛܸܠ ܐܸܢܘܿܢ ܠܟ݂ܠܗܘܿܢ ܢܒ̣̈ܝܲܝ ܒܲܥܠܵܐ ܘܲܕ݂ܚܘܼܓ̣̈ܒܹ̇ܐ ܒܚܲܪܒܵܐ. 2: ܘܫܸܠܚܲܬ̤ ܐܝܼܙܒܸܠ ܒܝܲܕ݂ ܡܲܠܲܐܟ݂ܵܐ ܠܐܹܠܝܼܵܐ ܘܐܸܡܪܲܬ̤: ܗܵܟܲܢܵܐ ܢܸܥܒ̇ܕ݂ܘܼܢ ܠܝܼ ܐܲܠܵܗܹ̈ܐ: ܘܗܵܟܲܢܵܐ ܢܵܘܣܦܘܼܢ ܠܝܼ: ܐܸܢ ܠܵܐ ܡܚܵܪ ܒܗܵܢܵܐ ܙܲܒ̣ܢܵܐ ܐܸܥܒ̇ܕ݂ܝܼܗ̇ ܠܢܲܦ̮ܫܵܟ݂ ܐܲܝܟ݂ ܢܲܦ̮ܫܵܐ ܕܚܲܕ݂ ܡܸܢܗܘܿܢ. 3: ܘܲܕ݂ܚܸܠ̣ ܐܹܠܝܼܵܐ: ܘܩܵܡ̣ ܐܸܙܲܠ̣ ܕܲܢܦܲܠܸܛ ܢܲܦ̮ܫܹܗ. ܘܐܸܬ̣ܵܐ ܠܒܹܪ ܫܒܲܥ ܕܲܝܗܘܼܕ݂ܵܐ: ܘܲܫܒܲܩ ܬܲܡܵܢ ܬܲܠܡܝܼܕܹܗ. 4: ܘܗ̤ܘ ܗܲܠܸܟ݂ ܒܡܲܕ݂ܒ̇ܪܵܐ ܡܲܪܕܹ̇ܐ ܝܵܘܡܵܐ ܚܲܕ݂. ܘܝܼܬܸܒ̣ ܬܚܹܝܬ̣ ܒܸܛܡ̱ܬ̣ܵܐ ܚܕ݂ܵܐ: ܘܲܫܐܸܠ̣ ܡܵܘܬܵܐ ܠܢܲܦ̮ܫܹܗ: ܘܐܸܡܲܪ: ܣܲܓ̇ܝܼ ܠܝܼ ܗܵܫܵܐ ܡܵܪܝܵܐ. ܣܲܒ̣ ܢܲܦ̮ܫܝ ܡܹܢܝ: ܡܸܛܠ ܕܠܵܐ ܗܘܹ̇ܝܬ̣ ܛܵܒ̣ ܐܸܢܵܐ ܡ̣ܢ ܐܲܒ̣ܵܗܲܝ̈. 5: ܘܲܫܟܸܒ̣ ܘܲܛܒܲܥ ܬܚܹܝܬ̣ ܒܸܛܡ̱ܬ̣ܵܐ. ܘܗܵܐ ܡܲܠܲܐܟ݂ܵܐ ܩܪܸܒ̣ ܠܹܗ: ܘܐܸܡܲܪ ܠܹܗ: ܩܘܼܡ ܐܲܟ݂ܘܿܠ. 6: ܘܐܸܬ̣ܦܢܝܼ ܘܲܚܙܵܐ ܐܸܣܕ݂ܵܘ̈ܗܝ: ܚܵܝܘܿܪܬܵܐ ܕܪܲܥܦܵܐ: ܘܩܘܼܩܬ̣ܵܐ ܕܡܲـ̈ـܝܵܐ. ܘܲܠܥܸܣ ܘܐܸܫܬ̇ܝܼ: ܘܲܗܦܲܟ݂ ܕܡܸܟ݂. 7: ܘܲܗܦܲܟ݂ ܡܲܠܲܐܟܹܗ ܕܡܵܪܝܵܐ ܕܬܲܪܬܹ̇ܝܢ ܙܲܒ̣̈ܢܝܼܢ ܩܪܸܒ̣ ܠܹܗ: ܘܐܸܡܲܪ: ܩܘܼܡ ܐܲܟ݂ܘܿܠ ܘܐܸܫܬ̇ܝܼ: ܡܸܛܠ ܕܣܲܓ̇ܝܼܵܐܐ. ܗ̄ܝ̣ ܡܸܢܵܟ݂ ܐܘܼܪܚܵܐ. 8: ܘܩܵܡ̣ ܐܸܟܲܠ ܘܐܸܫܬ̇ܝܼ: ܘܗܲܠܸܟ݂ ܒܚܲܝܠܵܐ ܕܡܹܐܟ݂ܘܼܠܬܵܐ ܗܵܝ̇: ܐܲܪܒ̇ܥܝܼܢ ܐܝܼܡܵܡ̈ܝܼܢ: ܘܐܲܪܒ̇ܥܝܼܢ ܠܲܝ̈ܠܵܘܵܢ: ܥܕܲܡܵܐ ܠܛܘܼܪܹܗ ܕܐܲܠܵܗܵܐ ܠܚܘܿܪܝܼܒ̣. 9: ܘܥܲܠ ܠܬܲܡܵܢ ܠܡܥܲܪܬ̣ܵܐ: ܘܒ̣ܵܬ̣ ܬܲܡܵܢ. ܘܲܗܘ̤ܵܐ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ. ܘܐܸܡܲܪ ܠܹܗ: ܡܵܢܵܐ ܥܵܒܹ̇ܕ݂ ܐܲܢ̄ܬ̇ ܗܵܪܟܵܐ ܐܹܠܝܼܵܐ. 10: ܘܐܸܡܲܪ: ܡܸܛܲܢ ܛܹܢܹ̇ܬ̣ ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܕܲܫܒܲܩܘ ܩܝܵܡܵܟ݂ ܒ̈ܢܲܝ ܝܼܣܪܵܝܹܠ ܡܲܕ݂ܒ̇ܚܲܝ̈ܟ ܣܲܚܸܦܘ: ܘܲܢܒ̣ܝܼܲܝ̈ܟ ܩܲܛܸܠܘ ܒܚܲܪܒܵܐ. ܘܐܸܫܬܲܚܪܹܬ̣ ܐܸܢܵܐ ܒܲܠܚܘܿܕܲܝ: ܘܗܵܐ ܒܵܥܹ̇ܝܢ ܠܡܸܣܲܒ̣ ܠܢܲܦ̮ܫܝ. 11: ܘܐܸܡܲܪ ܠܹܗ: ܦܘܿܩ ܘܩܘܼܡ ܒܛܘܼܪܵܐ ܩܕ݂ܵܡ ܡܵܪܝܵܐ. ܘܗܵܐ ܡܵܪܝܵܐ ܥܵܒܲܪ. ܘܪܘܼܚܵܐ ܪܲܒܬ̣ܵܐ ܘܬܲܩܝܼܦܬܵܐ: ܡܦܲܪܩܵܐ ܛܘܼܪܹ̈ܐ ܘܲܡܬܲܒ̇ܪܵܐ ܫܘܿܥܹ̈ܐ ܩܕ݂ܵܡ ܡܵܪܝܵܐ. ܠܵܐ ܗ̄ܘ̣ܵܐ ܒܪܘܼܚܵܐ ܡܵܪܝܵܐ. ܘܒ̣ܵܬܲܪ ܪܘܼܚܵܐ ܙܵܘܥܵܐ: ܠܵܐ ܗ̄ܘ̣ܵܐ ܒܙܵܘܥܵܐ ܡܵܪܝܵܐ. 12: ܘܒ̣ܵܬܲܪ ܙܵܘܥܵܐ ܢܘܼܪܵܐ: ܠܵܐ ܗ̄ܘ̣ܵܐ ܒܢܘܼܪܵܐ ܡܵܪܝܵܐ. ܘܒ̣ܵܬܲܪ ܢܘܼܪܵܐ ܩܵܠܵܐ ܕܡܲܡܠܠܵܐ ܪܲܟ̇ܝܟ݂ܵܐ. 13: ܘܟܲܕ݂ ܫ̣ܡܲܥ ܐܹܠܝܼܵܐ: ܟܪܲܟ݂ ܐܲܦܵܘ̈ܗܝ ܒܡܲܥܦܪܹܗ. ܘܲܢܦܲܩ ܘܩܵܡ ܠܹܗ ܒܦܘܼܡܵܗ̇ ܕܲܡܥܲܪܬ̣ܵܐ. ܘܲܗܘ̤ܵܐ ܥܠܵܘܗܝ ܩܵܠܵܐ: ܘܐܸܡܲܪ ܠܹܗ: ܡܵܢܵܐ ܥܵܒܹ̇ܕ݂ ܐܲܢ̄ܬ̇ ܗܵܪܟܵܐ ܐܹܠܝܼܵܐ. 14: ܘܐܸܡܲܪ: ܡܸܛܲܢ ܛܸܢܹ̇ܬ̣ ܠܡܵܪܝܵܐ ܐܲܠܵܗܵܐ ܚܲܝܠܬ̣ܵܢܵܐ: ܕܲܫܒܲܩܘ ܩܝܵܡܵܟ݂ ܒ̈ܢܲܝ ܝܼܣܪܵܝܹܠ. ܡܲܕ݂ܒ̇ܚܲܝ̈ܟ ܣܲܚܸܦܘ: ܘܲܢܒ̣ܝܼܲܝ̈ܟ ܩܲܛܸܠ̣ܘ ܒܚܲܪܒܵܐ. ܘܐܫܬܲܚܪܹܬ̣ ܐܸܢܵܐ ܒܲܠܚܘܿܕܲܝ: ܘܗܵܐ ܒܵܥܹ̇ܝܢ ܠܡܸܣܲܒ̣ ܠܢܲܦ̮ܫܝ. 15: ܘܐܸܡܲܪ ܠܹܗ ܡܵܪܝܵܐ: ܗܦܘܿܟ݂ ܙܸܠ ܠܐܘܼܪܚܵܟ݂ ܠܡܲܕ݂ܒ̇ܪܵܐ ܕܕܲܪܡܣܘܿܩ: ܘܙܸܠ ܡܫܘܿܚ ܠܲܝܙܵܐܹܝܠ: ܕܢܲܡܠܸܟ݂ ܥܲܠ ܐܲܕ݂ܘܿܡ. 16: ܘܲܠܝܵܗܘܿ ܒܲܪ ܝܲܡܫܝܼ ܕܢܲܡܠܸܟ݂ ܥܲܠ ܝܼܣܪܵܝܹܠ: ܘܠܹܐܠܝܼܫܲܥ ܒܲܪ ܫܵܦܵܛ ܕܡ̣ܢ ܐܲܒ̣ܠ ܡܚܘܿܠܵܐ: ܡܫܘܿܚ ܕܢܸܗܘܹܐ ܢܒ̣ܝܼܵܐ ܚܠܵܦܲܝܟ. 17: ܘܡ̇ܢ ܕܢܸܬ̣ܦܲܠܲܛ ܡ̣̤ ܚܲܪܒܵܐ ܕܲܚܙܵܐܹܝܠ: ܢܸܩܛܠܝܼܘܗܝ ܝܵܗܘ̇. ܘܡܢ ܕܢܸܬ̣ܦܲܠܲܛ ܡ̣ܢ ܚܲܪܒܵܐ. ܕܝܵܗܘ̇: ܢܸܩܛܠܝܼܘܗܝ ܐܹܠܝܼܫܲܥ. 18: ܘܐܵܘܬܲܪ ܡ̣ܢ ܝܼܣܪܵܝܹܠ ܫܲܒ̣ܥܵܐ: ܐܲܠܦ̈ܝܼܢ: ܟܠ ܒܘܼܪܟܵܐ ܕܠܵܐ ܒܪܲܟ݂ ܠܒܲܥܠܵܐ: ܘܟ݂ܠ ܦܘܼܡ ܕܠܵܐ ܢܲܫܩܹܗ. 19: ܘܐܸܙܲܠ ܡ̣ܢ ܬܲܡܵܢ: ܘܐܸܫܟܲܚ ܠܐܹܠܝܼܫܲܥ ܒܲܪ ܫܵܦܵܛ: ܕܕ݂ܵܒܲܪ ܗ̄ܘ̣ܵܐ ܦܲܕܵܢܵܐ: ܘܬܲܪܬܲܥܸܣܪܹܐ ܦܲܕܵܢܝܼ̈ܢ ܩܕ݂ܵܡܵܘܗܝ. ܘܗ̤ܘ ܚܲܕ݂ ܡ̣ܢ ܬܪܸܥܣܲܪ ܗ̄ܘ̣ܵܐ. ܘܲܥܒܲܪ ܐܹܠܝܼܵܐ ܥܠܵܘܗܝ: ܘܲܫܕ݂ܵܐ ܡܲܥܦܪܹܗ ܥܠܵܘܗܝ. 20: ܘܫܲܒ̣ܩܵܗ̇ ܠܦܲܕܵܢܵܐ ܕܬ̣ܵܘܪܹ̈ܐ: ܘܐܸܙܲܠ ܒܵܬܲܪ ܐܹܠܝܼܵܐ. ܘܐܸܡܲܪ ܠܹܗ: ܐܸܙܲܠ ܐܹܫܘܿܩ ܠܐܵܒ̣ܝ ܘܠܐܹܡܝ: ܘܐܹܬܹܐ ܒܵܬ̣ܪܵܟ݂ ܐܵܡܲܪ ܠܹܗ: ܗܦܘܿܟ݂ ܙܸܠ ܠܵܟ݂: ܡܵܢܵܐ ܓܹܝܪ ܥܸܒ̣ܕܹ̇ܬ̣ ܠܵܟ݂. 21: ܘܲܗܦܲܟ݂ ܡ̣ܢ ܒܵܬ̣ܪܹܗ: ܘܢܲܣܒܵܗ̇ ܠܦܲܕܵܢܵܐ ܕܬ̣ܵܘܪܹ̈ܐ: ܘܕܲܒܲܚ ܐܸܢܘܿܢ: ܘܲܒ̣ܡܵܐܢܹ̈ܐ ܕܬ̣ܵܘܪܹ̈ܐ ܒܲܫܸܠ̣ ܒܸܣܪܵܐ. ܘܝܲܗ̄ܒ̣ ܠܥܲܡܵܐ ܘܐܸܟܲܠܘ. ܘܩܵܡ̣ ܐܸܙܲܠ ܒܵܬܲܪ ܐܹܠܝܼܵܐ: ܘܫܲܡܫܹܗ.

ܩܹܦܵܠܹܐܘܿܢ: ܟ.

1: ܘܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܟܲܢܸܫ̣ ܟܠܹܗ ܚܲܝܠܹܗ: ܘܲܬ̣ܠܵܬ̣ܝܼܢ ܘܲܬ̣ܪܹܝܢ ܡܲܠܟ̇ܝܼ̈ܢ ܕܥܲܡܹܗ: ܘܪ̈ܲܟ݂ܫܵܐ ܘܡܲܪ̈ܟ̇ܒ̣ܵܬ̣ܵܐ. ܘܲܣܠܸܩ̣: ܘܲܫ̣ܪܵܐ ܥܲܠ ܫܵܡܪܹܝܢ: ܘܐܸܬ̣ܟܲܬܲܫ ܥܲܡܵܗ̇. 2: ܘܫܲܕܲܪ ܐܝܼܙ̈ܓܲܕܹ̇ܐ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ. 3: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܒܲܪ ܗܕ݂ܵܕ݂: ܟܸܣܦܵܟ݂ ܘܕܲܗܒܵܟ݂: ܕܝܼܠܝ ܗ̄ܘ̣. ܘܢܸܫܲܝ̈ܟ ܘܲܒ̣ܢܲܝ̈ܟ ܕܫܲܦܝܼܪܝܼܢ: ܕܝܼܠܝ ܐܸܢܘܿܢ. 4: ܘܲܥܢ̣ܵܐ ܡܲܠܟܵܐ ܕܝܼܣܪܵܝܹܠ ܘܐܸܡܲܪ: ܐܲܝܟ݂ ܦܸܬ̣ܓ̣ܵܡܵܟ݂ ܡܵܪܝ ܡܲܠܟܵܐ: ܕܝܼܠܵܟ݂ ܐ̄ܢܵܐ ܘܟ݂ܠ ܕܐܝܼܬ̣ ܠܝܼ. 5: ܘܲܥܦܲܟ݂ܘ ܐܝܼܙܓܲܕܹ̇ܐ ܘܐܸܡܲܪܘ: ܗܵܟܲܢܵܐ ܐܵܡܲܪ ܒܲܪ ܗܕ݂ܵܕ݂: ܕܫܸܠܚܹܬ̣ ܠܵܟ݂ ܒܩܲܕ݂ܡܵܝܬܵܐ: ܕܟܸܣܦܵܟ݂ ܘܕܲܗܒ̣ܵܟ݂ ܘܢܸܫܲܝ̈ܟ ܘܲܒ̣ܢܲܝ̈ܟ ܬܸܬܸ̇ܠ ܠܝܼ. 6: ܡܚܵܪ ܠܗܵܢܵܐ ܥܕܵܢܵܐ: ܐܹܫܲܕܲܪ ܥܲܒ̣̈ܕܲܝ ܠܘܵܬ̣ܵܟ݂ ܘܢܸܒ̣ܨܘܿܢ ܒܵܬܲܝ̈ܟ ܘܒ̣ܵـ̈ـܬܹ̇ܐ ܕܥܲܒ̣ܕܲܝ̈ܟ. ܘܟ݂ܠ ܪܸܓ̇ܬ̣ܵܐ ܕܥܲܝܢܲܝ̈ܗܘܿܢ ܢܸܣܒ̣ܘܼܢ ܒܐܝܼܕܲܝ̈ܗܘܿܢ ܘܢܹܐܬ̣ܘܼܢ. 7: ܘܲܩܪܵܐ ܡܲܠܟܵܐ ܕܝܼܣܪܵܝܹܠ ܠܟܠܗܘܿܢ ܣܵܒܹ̈ܐ ܕܐܲܪܥܵܐ: ܘܐܸܡܲܪ ܠܗܘܿܢ: ܕܲܥܘ ܘܲܚܙܵܘ ܕܒ̣ܝܼܫܬܵܐ ܗ̄ܘ̣ ܒܵܥܹ̇ܐ ܗܵܢܵܐ. ܕܲܫܠܲܚ̣ ܠܝܼ ܥܲܠ ܢܸܫܲܝ̈: ܘܥܲܠ ܒ̈ܢܲܝ: ܘܥܲܠ ܟܸܣܦܝ: ܘܥܲܠ ܕܲܗܒ̣ܝ ܘܠܵܐ ܟܠܹܝܬ̣ ܡܢܹܗ. 8: ܘܐܸܡܲܪܘ ܠܹܗ ܟܠܗܘܿܢ ܣܵܒܹ̈ܐ ܘܟ݂ܠܹܗ ܥܲܡܵܐ: ܠܵܐ ܬܸܫܡܲܥ: ܘܠܵܐ ܬܸܬ̇ܛܦܝܼܣ. 9: ܘܐܸܡܲܪ ܠܐܝܼܙܓܲـ̈ـܕܹ̇ܐ ܕܒܲܪ ܗܕ݂ܵܕ݂: ܐܸܡܲܪܘ ܠܡܵܪܝ ܡܲܠܟܵܐ: ܟܠ ܕܲܫܠܲܚܬ̇ ܠܥܲܒ̣ܕܵܟ݂ ܒܩܲܕܡܵܝܬܵܐ ܐܸܥܒܸ̇ܕ݂. ܘܦܸܬ̣ܓ̣ܵܡܵܐ ܗܵܢܵܐ ܠܵܐ ܡܸܫܟܲܚ ܐ̄ܢܵܐ ܕܐܸܥܒܸ̇ܕ݂. ܘܐܸܙܲܠ̣ܘ ܐܝܼܙܓܲـ̈ـܕܹ̇ܐ ܘܐܲܬ̣ܝܼܒ̣ܘܼܗܝ ܦܸܬ̣ܓ̣ܵܡܵܐ. 10: ܘܲܫܠܲܚ̣ ܠܹܗ ܒܲܪ ܗܕ݂ܵܕ݂ ܘܐܸܡܲܪ: ܗܵܟܲܢܵܐ ܢܸܥܒ̇ܕ݂ܘܼܢ ܠܝܼ ܐܲܠܵܗܹ̈ܐ: ܘܗܵܟܲܢܵܐ ܢܵܘܣܦܘܼܢ ܠܝܼ: ܐܸܢ ܢܸܣܦܲܩ ܥܲܦܪܵܗ̇ ܕܫܵܡܪܹܝܢ ܫܘܼܥܠܵܐ ܫܘܼܥܠܵܐ ܠܥܲܡܵܐ ܕܥܲܡܝ. 11: ܘܲܥܢܵܐ ܡܲܠܟܵܐ ܕܝܼܣܪܵܝܹܠ ܘܐܸܡܲܪ: ܡܲܠܸܠ: ܠܵܐ ܢܸܫܬ̇ܟܲܚ ܡ̇ܢ ܕܐܵܣܲܪ ܐܲܝܟ݂ ܡ̇ܢ ܕܫܵܪܹܐ. 12: ܘܟܲܕ݂ ܫ̣ܡܲܥ ܦܸܬ̣ܓ̣ܵܡܵܐ ܗܵܢܵܐ: ܘܗ̤ܘ ܫܵܬܹ̇ܐ ܗ̄ܘ̣ܵܐ: ܘܡܲܠ̈ܟܹ̇ܐ ܒܲܡܛܲܠ̈ܠܹܐ ܘܐܸܡܲܪ ܠܥܲܒ̣ܕܵܘ̈ܗܝ: ܣܝܼܡܘ ܡܣܵܡ ܥܲܠ ܩܪܝܼܬ̣ܵܐ. 13: ܘܗܵܐ ܢܒ̣ܝܼܵܐ ܚܲܕ݂ ܩܪܸܒ̣ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܚܵܙܹ̇ܐ ܐܲܢ̄ܬ̇ ܠܹܗ ܠܗܵܢܵܐ ܟܠܹܗ ܚܲܝܠܵܐ ܪܲܒܵܐ. ܗܵܐ ܡܲܫܠܸܡ ܐ̄ܢܵܐ ܠܹܗ ܒܐܝܼܕܲܝ̈ܟ ܝܵܘܡܵܢܵܐ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ. 14: ܘܐܸܡܲܪ ܐܵܚܵܒ̣ ܒܡ̇ܢ. ܘܐܸܡܲܪ ܠܹܗ: ܒܲܥܠܲܝܡܹ̈ܐ ܘܲܒ̣ܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ ܘܐܸܡܲܪ ܠܹܗ: ܡܲܢܘܼ ܢܸܣܕ̇ܘܿܪ ܩܪܵܒ̣ܵܐ ܠܘܼܩܕܲܡ ܐܵܡܲܪ ܠܹܗ ܐܲܢ̄ܬ̇. 15: ܘܲܡܢܵܐ ܠܲܥܠܲܝܡܹ̈ܐ ܘܲܠܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ: ܘܲܗܘ̤ܵܘ ܡܲܐܬܹ̇ܝܢ ܘܲܬ̣ܠܵܬ̣ܝܼܢ ܘܲܬ̣ܪܹܝܢ. ܘܒ̣ܵܬܲܪܗܘܿܢ ܡܢܵܐ ܠܟ݂ܠܹܗ ܥܲܡܵܐ ܘܲܠܟ݂ܠܗܘܿܢ ܒܢܲܝ̈ ܝܼܣܪܵܝܹܠ ܫܲܒ̣ܥܵܐ ܐܲܠܦ̈ܝܼܢ. 16: ܘܲܢܦܲܩ̣ܘ ܒܛܲܗܪܵܐ. ܘܒܲܪ ܗܕ݂ܵܕ݂ܫܵܬܹ̇ܐ ܗ̄ܘ̣ܵܐ ܥܲܬܝܼܩܵܐ ܒܲܡܛܲܠ̈ܠܹܐ: ܗ̤ܘ ܘܡܲܠ̈ܟܹ̇ܐ ܬܠܵܬ̣ܝܼܢ ܘܲܬ̣ܪܹܝܢ ܕܐܸܬ̣ܵܘ ܠܲܡܥܲܕܵܪܘܼܬܹܗ. 17: ܘܲܢܦܲܩܘ ܥܠܲܝܡܹ̈ܐ ܘܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ ܒܩܲܕ݂ܡܵܝܬܵܐ. ܘܫܲܕܲܪ ܒܲܪ ܗܕ݂ܵܕ݂. ܘܚܵܘܝܼܘܗܝ ܘܐܸܡܲܪܘ ܠܹܗ: ܗܵܐ ܓܲܒ̣ܪܹ̈ܐ ܢܦܲܩ̣ܘ ܡ̣ܢ ܫܵܡܪܹܝܢ. 18: ܘܐܸܡܲܪ: ܐܸܢ ܠܲܫܠܵܡܵܐ ܢܦܩܘ: ܐܲܚܘܿܕ݂ܘ ܐܸܢܘܿܢ ܟܲܕ݂ ܚܲܝܝܼܢ. ܘܐܸܢ ܠܲܩܪܵܒ̣ܵܐ ܢܦܲܩ̣ܘ: ܟܲܕ݂ ܚܲܝܝܼܢ ܐܲܚܘܿܕ݂ܘ ܐܸܢܘܿܢ. 19: ܘܗܵܠܹܝܢ ܢܦܲܩ̣ܘ ܡ̣ܢ ܡܕ݂ܝܼܢ̄ܬܵܐ: ܥܠܲܝܡܹ̈ܐ ܘܪܵܘ̱ܪ̈ܒ̣ܵܢܹܐ ܕܲܡܕ݂ܝܼܢ̄ܬܵܐ ܘܚܲܝܠܵܐ ܒܵܬܲܪܗܘܿܢ. 20: ܘܩܲܛܸܠ ܓܒܲܪ ܓܲܒ̣ܪܹܗ: ܘܲܥܪܲܩ̣ ܐܲܕ݂ܘܿܡ. ܘܲܪܕܲܦ ܐܸܢܘܿܢ ܝܼܣܪܵܝܹܠ. ܘܐܸܬ̣ܦܲܠܲܛ ܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ ܥܲܠ ܡܲܪ̈ܟ̇ܒ̣ܵܬ̣ܵܐ ܘܦܲܪ̈ܵܫܹܐ. 21: ܘܲܢܦܲܩ̣ ܡܲܠܟܵܐ ܕܝܼܣܪܵܝܹܠ: ܘܲܚܪܲܒ̣ ܪ̈ܲܟ݂ܫܵܐ ܘܡܲܪ̈ܟ̇ܒ̣ܵܬ̣ܵܐ. ܘܲܡܚ̣ܵܐ ܒܐܲܕ݂ܘܿܡ ܡܚܘܿܬ̣ܵܐ ܪܲܒ̇ܬ̣ܵܐ ܕܛܵܒ̣. 22: ܘܗܵܐ ܢܒ̣ܝܼܵܐ ܕܐܲܠܵܗܵܐ ܩ̣ܪܲܒ̣ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܙܸܠ ܐܬ̣ܚܲܝܲܠ: ܘܕܲܥ ܘܲܚܙܝܼ ܡܸܕܸ̇ܡ ܕܥܵܒܹܕ݂ ܐܲܢ̄ܬ̇ ܡܸܛܠ ܕܲܠܗܸܦܟ̇ܬ̣ܵܗ̇ ܕܫܲܢ̄ܬܵܐ: ܡܲܠܟܵܐ ܕܐܲܕ݂ܘܿܡ ܣܵܠܹ̇ܩ ܥܠܲܝܟ. 23: ܘܥܲܒ̣ܕܵܘ̈ܗܝ ܕܡܲܠܟܵܐ ܕܐܲܕ݂ܘܿܡ ܐܵܡ̇ܪܝܼܢ ܠܹܗ: ܐܲܠܵܗܵܐ ܗ̄ܘ̣ ܕܛܘܼܪܹ̈ܐ ܐܲܠܵܗܗܘܿܢ: ܡܸܛܠ ܗܵܢܵܐ ܗ̄ܘ̣ ܙܟ݂ܵܐܘܼܢ. ܒܪܲܡ ܢܸܬ̣ܟܲܬܲܫ ܥܲܡܗܘܿܢ ܒܲܦܩܲܥܬ̣ܵܐ: ܐܸܠܵܐ ܢܸܙܟܸ̇ܐ ܐܸܢܘܿܢ. 24: ܘܦܸܬ̣ܓ̣ܵܡܵܐ ܗܵܢܵܐ ܥܒܸܕ݂: ܐܲܥܒܲܪ ܡܲܠ̈ܟܹ̇ܐ ܓܒܲܪ ܡ̣ܢ ܐܲܬ̣ܪܹܗ: ܘܐܲܩܝܼܡ ܫܲܠܝܼܛܵܢܹ̈ܐ ܚܠܵܦܲܝܗܘܿܢ. 25: ܘܐܲܢ̄ܬ̇ ܡܸܢܝܼ ܠܵܟ݂ ܚܲܝܠܵܐ ܐܲܝܟ݂ ܚܲܝܠܵܐ ܕܲܢܦܲܠ ܡܸܢܵܟ݂: ܪ̈ܲܟ݂ܫܵܐ ܐܲܝܟ݂ ܪ̈ܲܟ݂ܫܵܐ: ܘܪ̈ܲܟܵܒܹܐ ܐܲܝܟ݂ ܪ̈ܲܟܵܒܹܐ. ܘܢܸܬ̣ܟܲܬܲܫ ܥܲܡܗܘܿܢ ܒܲܦܩܲܥܬ̣ܵܐ: ܐܸܠܵܐ ܢܸܥܫܲܢ ܡܸܢܗܘܿܢ. ܘܲܫܡܲܥ ܠܩܵܠܗܘܿܢ: ܘܲܥܒܲܕ݂ ܗܵܟܲܢܵܐ. 26: ܘܲܗܘ̤ܵܐ ܠܗܸܦܟ̇ܬ̣ܵܐ ܕܫܲܢ̄ܬܵܐ: ܘܲܦܩܲܕ݂ ܒܲܪ ܗܕ݂ܵܕ݂ ܠܐܲܕ݂ܘܿܡ: ܘܲܣܠܸܩ ܐܵܦܵܩ ܠܡܸܬ̣ܟܲܬܵܫܘܼ ܥܲܡ ܝܼܣܪܵܝܹܠ. 27: ܘܲܒ̣ܢܲܝ̈ ܝܼܣܪܵܝܹܠ ܐܸܬ̣ܡ̱ܢܝܼܘ: ܘܐܸܣܬ̇ܕܲܕܘ ܘܩܵܡ̣ܘ ܠܘܼܩܒܲܠܗܘܿܢ: ܐܲܝܟ݂ ܬܪܹܝܢ ܓܙܵܪ̈ܝܼܢ ܕܨܸܦܪ̈ܵܝܹܐ ܕܥܸܙܹ̈ܐ: ܘܐܲܕ݂ܘܿܡܵܝܹ̈ܐ ܡܠܵܐܘܼܗ̇ ܠܐܲܪܥܵܐ. 28: ܘܲܩܪܸܒ̣ ܢܒ̣ܝܼܵܐ ܕܐܲܠܵܗܵܐ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܕܐܸܡܲܪܘ ܐܲܕ݂ܘܿܡܵܝܹ̈ܐ ܕܐܲܠܵܗܵܐ ܗ̄ܘ̣ ܕܛܘܼܪܹ̈ܐ ܡܲܪܝܵܐ: ܘܠܵܐ ܗ̄ܘ̣ܵܐ ܐܲܠܵܗܵܐ ܕܥܘܼܡܩܹ̈ܐ: ܐܲܫ̱ܠܡܝܼܘܗܝ ܠܗܵܢܵܐ ܟܠܹܗ ܚܲܝܠܵܐ ܪܲܒܵܐ ܒܐܝܼܕܲܝ̈ܟ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ. 29: ܘܲܫܪܵܘ ܗܵܠܹܝܢ ܠܘܼܩܒܲܠ ܗܵܠܹܝܢ ܫܲܒ̣ܥܵܐ ܝܵܘ̈ܡܝܼܢ. ܘܲܗܘ̤ܵܐ ܒܝܵܘܡܵܐ ܫܒ̣ܝܼܥܵܝܵܐ: ܘܐܲܩܪܸܒ̣ܘ ܩܪܵܒ̣ܵܐ. ܘܩܲܛܸܠܘ ܒܢܲܝ̈ ܝܼܣܪܵܝܹܠ ܡ̣ܢ ܐܲܕ݂ܘܿܡ: ܡܵܐܐ ܐܲܠܦ̈ܝܼܢ ܓܲܒ̣ܪ̈ܝܼܢ ܪܸ̈ܓ̣ܠܵܝܹܐ ܒܝܵܘܡܵܐ ܚܲܕ݂. 30: ܘܲܥܪܲܩ̣ܘ ܕܐܸܫܬ̇ܚܲܪܘ ܠܐܵܦܵܩ ܡܕ݂ܝܼܢ̄ܬܵܐ ܘܲܢܦܲܠ̣ ܫܘܼܪܵܐ ܥܲܠ ܥܸܣܪܝܼܢ ܘܫܲܒ̣ܥܵܐ ܐܲܠܦܝܼܢ ܓܲܒ̣ܪ̈ܝܼܢ ܕܐܸܫܬ̇ܚܲܪܘ. ܘܒܲܪ ܗܕ݂ܵܕ݂ ܥܪܲܩ̣: ܘܥܲܠ ܒܓ̣ܵܘ ܩܪܝܼܬ̣ܵܐ: ܬܵܘܵܢ ܒܓ̣ܵܘ ܬܵܘܵܢ. 31: ܘܲܩܪܸܒ̣ܘ ܥܲܒ̣ܕܵܘ̈ܗܝ: ܘܐܵܡ̇ܪܝܼܢ ܠܹܗ: ܗܵܐ ܫܡܲܥ̄ܢ ܕܡܲܠ̈ܟܹ̇ܐ ܕܝܼܣܪܵܝܹܠ: ܡܲܠ̈ܟܹ̇ܐ ܐܸܢܘܿܢ ܛܵܒܹ̈ܐ. ܢܸܐܣܘܿܪ ܣܲܩܹ̈ܐ ܒܪܹ̈ܫܲܝܢ: ܘܚܲܒ̣̈ܠܹܐ ܒܚܲܨܲܝ̈ܢ. ܘܢܸܦܘܿܩ ܠܘܵܬ̣ ܡܲܠܟܵܐ ܕܝܼܣܪܵܝܹܠ: ܛܵܟ݂ ܢܲܚܸܐ ܢܲܦ̮ܫܲܢ. 32: ܘܐܸܣܲܪܘ ܣܲܩܹ̈ܐ ܒܪܹ̈ܫܲܝܗܘܿܢ: ܘܚܲܒ̣̈ܠܹܐ ܒܚܲܨܲܝ̈ܗܘܿܢ. ܘܐܸܬ̣ܵܘ ܠܘܵܬ̣ ܡܲܠܟܵܐ ܕܝܼܣܪܵܝܹܠ: ܘܐܸܡܲܪܘ ܠܹܗ: ܥܲܒ̣ܕܵܟ݂ ܒܲܪ ܗܕ݂ܵܕ݂ ܐܵܡܲܪ: ܬܸܚܹܐ ܢܲܦ̮ܫܝ. ܘܐܸܡܲܪ: ܥܕܲܟܹ̇ܝܠ ܩܲܝܵܡ ܗ̄ܘ̣ ܐܵܚܝ ܗ̄ܘ̣. 33: ܘܓܲܒ̣ܪܵܐ ܢܵܚܫܵܐ ܗ̄ܘ̣ܵܐ ܒܲܪ ܗܕ݂ܵܕ݂ ܘܓܲܒ̣ܪ̈ܝܼܢ ܢܲܚܸܫܘ: ܘܐܸܣܬܵܪܗܲܒ̣ܘ ܘܦܲܠܛܘܼܗ̄ܝ ܡܸܢܹܗ. ܘܐܸܡܲܪܘ ܐܲܚܘܼܟ݂ ܒܲܪ ܗܕ݂ܵܕ݂: ܘܐܸܡܲܪ ܙܸܠܘ ܕܘܼܒ̣ܪܘܼܗܝ ܘܲܢܦܲܩ ܠܘܵܬܹܗ ܒܲܪ ܗܕ݂ܵܕ݂: ܘܐܵܘܬ̇ܒܹܗ ܥܲܡܹܗ ܒܩܵܪܘܿܟ݂ܵܐ. 34: ܘܐܸܡܲܪ ܠܹܗ: ܩܘܼܪ̈ܝܵܐ ܕܲܢܣܲܒ̣ ܐܵܒ̣ܝ ܡ̣ܢ ܐܲܒ̣ܘܼܟ݂: ܐܹܦܲܢܸܐ ܠܵܟ݂. ܘܫܘܼܩܵܐ ܐܸܥܒܸܕ݂ ܠܵܟ݂ ܒܕܲܪܡܣܘܿܩ: ܐܲܝܟ݂ ܕܲܥܒܲܕ݂ ܐܵܒ̣ܝ ܒܫܵܡ̇ܪܹܝܢ: ܘܐܸܢܵܐ ܒܲܩܝܵܡܵܐ ܐܹܫܲܕܪܵܟ݂. ܘܐܲܩܝܼܡ ܠܹܗ ܩܝܵܡܵܐ ܘܫܲܕ̇ܪܹܗ.

35: ܘܓܲܒ̣ܪܵܐ ܚܲܕ݂ ܡ̣ܢ ܒ̈ܢܲܝ ܢܒ̣ܝܹ̈ܐ ܐܸܡܲܪ ܠܚܲܒ̣ܪܹܗ. ܒܦܸܬ̣ܓ̣ܵܡܹܗ ܕܡܵܪܝܵܐ ܡܚܝܼܢܝ. ܘܠܵܐ ܨܒ̣ܵܐ ܓܲܒ̣ܪܵܐ ܕܢܸܡܚܹܝܘܗܝ. 36: ܐܵܡܲܪ ܠܹܗ: ܥܲܠ ܕܠܵܐ ܫ̣ܡܲܥܬ̇ ܒܩܵܠܹܗ ܕܡܵܪܝܵܐ ܐܲܠܵܗܵܟ݂: ܗܵܐ ܐܵܙܹ̇ܠ ܐܲܢ̄ܬ̇ ܡ̣ܢ ܠܘܵܬ̣ܝ: ܘܩܵܛܹ̇ܠ ܠܵܟ݂ ܐܲܪܝܼܵܐ. ܘܐܸܙܲܠ ܡ̣ܢ ܠܘܵܬܹܗ: ܘܐܸܫܟ̇ܚܹܗ ܐܲܪܝܵܐ: ܘܩܲܛܠܹܗ. 37: ܘܐܲܫܟܲܚ ܓܲܒ̣ܪܵܐ ܐ̄ܚܪܹܢܵܐ: ܘܐܸܡܲܪ ܠܹܗ ܡܚܝܼܢܝ ܘܲܡܚܵܝܗܝ ܓܲܒ̣ܪܵܐ ܗܵܘ̇: ܘܨܲܠܦܹܗ. 38: ܘܐܸܙܲܠ ܢܒ̣ܝܼܵܐ ܘܩܵܡ ܩܕ݂ܵܡ ܡܲܠܟܵܐ ܥܲܠ ܝܲܕ݂ ܐܘܼܪܚܵܐ: ܘܚܲܦܝܼ ܒܩܸܛܡܵܐ ܐܲܦܵܘ̈ܗܝ. 39: ܘܗܵܐ ܡܲܠܟܵܐ ܥܵܒܲܪ. ܘܗ̤ܘ ܡܲܙܥܸܩ ܩܕ݂ܵܡ ܡܲܠܟܵܐ: ܘܐܵܡܲܪ: ܥܲܒ̣ܕܵܟ݂ ܢܦܲܩ̣ ܒܓ̣ܵܘ ܩܪܵܒ̣ܵܐ: ܘܗܵܐ ܓܲܒ̣ܪܵܐ ܣܛ̣ܵܐ ܘܐܲܝܬ̇ܝܼ ܠܝܼ ܓܲܒ̣ܪܵܐ. ܘܐܸܡܲܪ ܠܝܼ ܛܲܪܲܝܗܝ ܠܓܲܒ̣ܪܵܐ ܗܵܢܵܐ. ܘܐܸܢ ܡܸܛܥܵܐ ܢܸܛܥܹܐ: ܬܸܗܘܹܐ ܢܲܦ̮ܫܵܟ݂ ܚܠܵܦ ܢܲܦ̮ܫܹܗ: ܐܵܘ ܟܲܟ̇ܪܵܐ ܕܟܸܣܦܵܐ ܬܸܬ̣ܩܘܿܠ. 40: ܘܥܲܒ̣ܕܵܟ݂ ܥܲܕ݂ ܡܸܬ̣ܦܢܹܐ ܠܟ݂ܵܐ ܘܲܠܟ݂ܵܐ ܘܗ̤ܘ ܠܲܝܬܵܘܗܝ: ܐܵܡܲܪ ܠܹܗ ܡܲܠܟܵܐ ܕܝܼܣܪܵܝܹܠ: ܗܵܟܲܢܵܐ ܗ̄ܘ̣: ܕܝܼܢܵܟ݂ ܐܲܢ̄ܬ̇ ܦܣܲܩܬ̇. 41: ܘܐܸܣܬܲܪܗܲܒ̣ ܘܐܲܥܒܲܪ ܩܸܛܡܵܐ ܡ̣ܢ ܐܲܦܵܘ̈ܗܝ. ܘܐܸܫܬܵܘܕ̇ܥܹܗ ܡܲܠܟܵܐ ܕܝܼܣܪܵܝܹܠ ܕܡ̣ܢ ܢܒ̣ܝܹ̈ܐ ܗ̄ܘ̣. 42: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܥܲܠ ܕܫܲܕܲܪܬ̇ ܠܓܲܒ̣ܪܵܐ ܚܲܪܡܵܐ ܡ̣ܢ ܐܝܼܕ݂ܵܐ: ܬܸܗܘܹܐ ܢܲܦܫܵܟ݂ ܚܠܵܦ ܢܲܦ̮ܫܹܗ: ܘܥܲܡܵܟ݂ ܚܠܵܦ ܥܲܡܹܗ.

43: ܘܐܸܙܲܠ̣ ܡܲܠܟܵܐ ܕܝܼܣܪܵܝܹܠ ܠܒܲܝܬܹ̇ܗ: ܟܲܕ݂ ܟܲܪܝܵܐ ܠܹܗ ܘܲܙܥܝܼܦ ܘܥܲܠ̣ ܠܫܵܡ̇ܪܹܝܢ.

ܩܹܦܵܠܹܐܘܿܢ: ܟܐ.

1: ܘܲܗܘ̤ܵܐ ܡ̣ܢ ܒܵܬܲܪ ܦܸܬ̣ܓ̣ܵܡܹ̈ܐ ܗܵܠܹܝܢ: ܟܲܪܡܵܐ ܐܝܼܬ̣ ܗ̄ܘ̣ܵܐ ܠܢܵܒ̣ܘܿܬ̣ ܐܝܼܙܲܪ ܥܠܵܝܵܐ ܒܐܝܼܙܲܪܥܹܝܠ: ܥܲܠ ܓܹܢ̄ܒ̣ ܗܲܝܟ̇ܠܵܐ ܕܐܲܚܵܒ̣ ܡܲܠܟܵܐ ܕܫܵܡ̇ܪܹܝܢ. 2: ܘܐܸܡܲܪ ܐܵܚܵܒ̣ ܠܢܵܒ̣ܘܿܬ̣: ܗܲܒ̣ܠܝܼ ܟܲܪܡܵܟ݂: ܘܢܸܗܘܹܐ ܠܝܼ ܠܓܲܢܲܬ̣ ܝܲܪܩܵܐ: ܡܸܛܠ ܕܗ̤ܘ ܩܲܪܝܼܒ̣ ܥܲܠ ܓܹܢ̄ܒ̣ ܒܲܝܬܝ. ܘܐܸܬܸ̇ܠ ܠܵܟ݂ ܟܲܪܡܵܐ ܚܠܵܦܵܘܗܝ ܕܛܵܒ̣ ܡܸܢܹܗ. ܐܵܘ ܐܸܢ ܫܲܦܝܼܪ ܒܥܲܝܢܲܝ̈ܟ: ܐܸܬܸ̇ܠ ܠܵܟ݂ ܟܸܣܦܵܐ ܕܡܵܘ̈ܗܝ. 3: ܘܐܸܡܲܪ ܢܵܒ̣ܘܿܬ̣ ܠܐܵܚܵܒ̣: ܚܵܣ ܠܝܼ ܡ̣ܢ ܡܵܪܝܵܐ: ܕܐܸܬܸ̇ܠ ܠܵܟ݂ ܝܵܪܬ̇ܘܼܬ̣ܵܐ ܕܐܵܒ̣ܵܗܲܝ̈. 4: ܘܐܸܙܲܠ ܐܵܚܵܒ̣ ܠܒܲܝܬܹ̇ܗ ܟܲܕ݂ ܟܲܪܝܵܐ ܠܹܗ ܘܲܙܥܝܼܦ: ܥܲܠ ܦܸܬ̣ܓ̣ܵܡܵܐ ܕܐܸܡܲܪ ܠܹܗ ܢܵܒ̣ܘܿܬ̣ ܐܝܼܙܲܪܥܠܵܝܵܐ. ܕܠܵܐ ܝܵܗܹ̇ܒ̣ ܐ̄ܢܵܐ ܠܵܟ݂ ܝܵܪܬ̇ܘܼܬ̣ܵܐ ܕܐܲܒ̣ܵܗܲܝ̈. ܘܲܫܟܸܒ̣ ܥܲܠ ܥܲܪܣܹܗ: ܘܐܲܦܢܝܼ ܐܲܦܵܘ̈ܗܝ: ܘܠܵܐ ܐܸܟܲܠ̣ ܠܲܚܡܵܐ. 5: ܘܐܸܬܲܬ̤ ܠܘܵܬܹܗ ܐܝܼܙܒܸܠ ܐܲܢ̄ܬ̇ܬܹܗ: ܘܐܵܡ̇ܪܵܐ ܠܹܗ: ܡܵܢܵܘ ܟܲܪܝܵܐ ܠܵܗ̇ ܠܪܘܼܚܵܟ݂: ܘܠܵܐ ܨܵܒܹ̇ܐ ܐܲܢ̄ܬ̇ ܠܡܹܐܟܲܠ ܠܲܚܡܵܐ. 6: ܐܵܡܲܪ ܠܵܗ̇: ܥܲܠ ܕܐܸܡ̇ܪܹܬ̣ ܠܢܵܒ̣ܘܿܬ̣ ܐܝܼܙܲܪܥܠܵܝܵܐ: ܗܲܒ̣ܠܝܼ ܟܲܪܡܵܟ݂ ܒܟܸܣܦܵܐ. ܘܐܸܢ ܨܵܒܹ̇ܐ ܐܲܢ̄ܬ̇: ܐܸܬܸ̇ܠ ܠܵܟ݂ ܟܲܪܡܵܐ ܚܠܵܘܗܝ ܕܛܵܒ̣ ܡܸܢܹܗ. ܘܐܸܡܲܪ ܠܝܼ ܠܵܐ ܝܵܗܹ̇ܒ̣ ܐ̄ܢܵܐ ܠܵܟ݂ ܟܲܪܡܝ. 7: ܐܵܡܪܵܐ ܠܹܗ ܐܝܼܙܒܸܠ ܐܲܢ̄ܬ̇ܬܹܗ: ܐܲܢ̄ܬ̇ ܬܲܟ݂ܫܲܪ ܕܬܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ. ܩܘܼܡ ܐܲܟ݂ܘܿܠ ܠܲܚܡܵܐ: ܘܢܸܛܐܲܒ̣ ܠܵܟ݂. ܐܸܢܵܐ ܐܸܬܸ̇ܠ ܠܵܟ݂ ܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ. 8: ܘܟܸܬ̣ܒܲܬ̤ ܐܸܓܲܪܬܵܐ ܒܲܫܡܹܗ ܕܐܵܚܵܒ̣: ܘܲܚܬܲܡܬ̣ܵܗ̇ ܒܥܲܙܩܬܹܗ. ܘܫܲܕ̇ܪܲܬ̤ ܐܸܓܲܪܬܵܐ ܠܣܵܒܹ̈ܐ ܘܲܠܚܹܐܪܹ̈ܐ ܕܝܵܬ̣ܒ̇ܝܼܢ ܒܲܩܪܝܼܬ̣ܵܐ ܥܲܡ ܢܵܒ̣ܘܿܬ̣. 9: ܘܟܸܬ̣ܒܲܬ̤ ܒܐܸܓܲܪܬܵܐ: ܕܲܓ̣ܙܘܿܪܘ ܨܵܘܡܵܐ: ܘܐܵܘܬܸ̇ܒ̣ܘ ܠܢܵܒ̣ܘܿܬ̣ ܒܪܹܫ ܥܲܡܵܐ. 10: ܘܐܲܝܬܵܘ ܬܪܹܝܢ ܓܲܒ̣ܪ̈ܝܼܢ ܒܢܲܝ̈ ܥܵܘܼܠܵܐ: ܘܐܵܘܬܸ̇ܒ̣ܘ ܠܩܘܼܒ̣ܠܹܗ. ܘܢܲܣ̱ܗܕ݂ܘܼܢ ܒܹܗ ܘܢܹܐܡܪܘܿܢ: ܕܨܲܚܝܼ ܢܵܒ̣ܘܿܬ̣ ܠܐܲܠܵܗܵܐ ܘܲܠܡܲܠܟܵܐ. ܘܐܲܦܩܘܼܗܝ ܘܪܘܼܓ̣ܡܘܼܗܝ. ܘܲܢܡܘܼܬ̣. 11: ܘܲܥܒܲܕ݂ܘ ܐ̄ܢܵܫܵܐ ܕܲܩܪܝܼܬܹܗ ܣܵܒܹ̈ܐ ܘܚܹܐܪܹ̈ܐ ܕܝܵܬ̣ܒ̇ܝܼܢ ܒܲܩܪܝܼܬ̣ܵܐ ܥܲܡ ܢܵܒ̣ܘܿܬ̣: ܐܲܝܟ݂ ܕܫܸܠܚܲܬ̤ ܠܗܘܿܢ ܐܝܼܙܒܸܠ: ܐܲܝܟ݂ ܕܲܟ݂ܬ̣ܝܼܒ̣ ܒܐܸܓܲܪܬܵܐ ܕܫܸܠܚܲܬ̤ ܠܗܘܿܢ. 12: ܓܙܲܪܘ ܨܵܘܡܵܐ: ܘܐܵܘܬ̇ܒ̣ܘܼܗܝ ܠܢܵܒ̣ܘܿܬ̣ ܒܪܹܫ ܥܲܡܵܐ. 13: ܘܐܲܝܬ̇ܝܼܘ ܬܪܹܝܢ ܓܲܒ̣ܪ̈ܝܼܢ ܒܢܲܝ̈ ܥܵܘܼܠܵܐ. ܘܐܵܘܬܸ̇ܒ̣ܘ ܠܩܘܼܒ̣ܠܹܗ. ܘܐܲܣܗܸܕ݂ܘ ܓܲܒ̣ܪܹ̈ܐ ܗܵܢܘܿܢ ܥܲܠ ܢܵܒ̣ܘܿܬ̣ ܘܐܸܡܲܪܘ: ܕܨܲܚܝܼ ܢܵܒ̣ܘܿܬ̣ ܠܐܲܠܵܗܵܐ ܘܲܠܡܲܠܟܵܐ. ܘܐܲܦܩܘܼܗܝ ܠܒܲܪ ܡ̣ܢ ܩܪܝܼܬ̣ܵܐ. ܘܪܲܓ̣ܡܘܼܗܝ ܒܟܹܐܦܹ̈ܐ: ܘܡܝܼܬ̣. 14: ܘܲܫܠܲܚܘ ܠܐܝܼܙܒܸܠ ܕܐܸܬ̣ܪܓܸܡ ܢܵܒ̣ܘܿܬ̣ ܘܡܝܼܬ̣. 15: ܘܟܲܕ݂ ܫܸܡܥܲܬ̤ ܐܝܼܙܒܸܠ ܕܡܝܼܬ̣ ܝܵܒ̣ܘܿܬ̣: ܐܸܡܪܲܬ̤ ܐܝܼܙܒܸܠ ܠܐܵܚܵܒ̣: ܩܘܼܡ ܝܼܪܲܬ̣ ܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ ܕܠܵܐ ܨܒ̣ܵܐ ܕܲܢܙܲܒ̇ܢܝܼܘܗܝ ܠܵܟ݂ ܒܟܸܣܦܵܐ. ܡܸܛܠ ܕܢܵܒ̣ܘܿܬ̣ ܡܝܼܬ̣ ܠܹܗ: ܘܠܵܐ ܗ̄ܘ̣ܵܐ ܚܲܝ. 16: ܘܟܲܕ݂ ܫ̣ܡܲܥ ܐܵܚܵܒ̣ ܕܡܝܼܬ̣ ܢܵܒ̣ܘܿܬ̣: ܩܵܡ ܐܵܚܵܒ̣ ܠܡܸܚܲܬ̣ ܠܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ ܠܡܹܐܪܬܹ̇ܗ. 17: ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܠܝܼܵܐ ܕܡ̣ܢ ܬܲܫܒ̇ܝܼ: ܠܡܹܐܡܲܪ. 18: ܩܘܼܡ ܚܘܿܬ̣ ܠܐܘܼܪܥܹܗ ܕܐܵܚܵܒ̣ ܡܲܠܟܵܐ ܕܝܼܣܪܵܝܹܠ ܕܲܒ̣ܫܵܡܪܹܝܢ: ܗܵܐ ܒܟܲܪܡܹܗ ܕܢܵܒ̣ܘܿܬ̣ ܐܝܼܙܲܪܥܠܵܝܵܐ ܕܲܢܚܸܬ̣ ܠܬܲܡܵܢ ܠܡܹܐܪܬܹ̇ܗ. 19: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܗܵܐ ܩܛܲܠܬ̇: ܘܗܵܐ ܝܼܕܬ̇ܬ. ܗܵܟܲܢܵܐ ܐܵܡܲܪ ܡܵܪܝܵܐ: ܒܕ݂ܘܼܟ̇ܬ̣ܵܐ ܕܠܲܥܘ ܟܲܠ̈ܒܹ̇ܐ ܕܡܹܗ ܕܢܵܒ̣ܘܿܬ̣: ܢܸܠܥܘܼܢ ܟܲܠ̈ܒܹ̇ܐ ܐܵܦ ܕܡܵܟ݂ ܕܝܼܠܵܟ݂. 20: ܐܵܡܲܪ ܠܹܗ ܐܵܚܵܒ̣ ܠܐܹܠܝܼܵܐ: ܐܸܫܟܲܚܬܵܢܝ ܒܥܸܠܕ̇ܒ̣ܵܒ̣ܝ ܐܵܡܲܪ ܠܹܗ ܐܸܫܟܲܚܬܵܟ݂: ܥܲܠ ܕܐܸܬ̣ܪܵܘܪܵܒ̣ܬ̇ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. 21: ܗܵܐ ܡܲܝܬܹ̇ܐ ܐ̄ܢܵܐ ܥܠܲܝܟ ܒܝܼܫܬܵܐ: ܘܐܹܒܲܥܲܪ ܒܵܬ̣ܪܵܟ݂: ܘܐܵܘܒܸ̇ܕ݂ ܠܐܵܚܵܒ̣ ܕܬ̣ܵܐܵܢ ܒܐܸܣܬ̣ܵܐ: ܘܕ݂ܵܐܣܲܪ ܘܫܵܪܹܐ ܒܝܼܣܪܵܝܹܠ. 22: ܘܐܸܥܒ̇ܕ݂ܝܼܘܗܝ ܠܒܲܝܬܵܟ݂ ܐܲܝܟ݂ ܒܹܝܬ̣ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܘܐܲܝܟ݂ ܒܹܝܬ̣ ܒܲܥܫܵܐ ܒܲܪ ܐܲܚܝܼܵܐ. ܥܲܠ ܪܘܼܓ̣ܙܵܐ ܕܐܲܪܓܸ̇ܙܬ̇ ܘܐܲܚܛܝܼܬ̇ ܠܝܼܣܪܵܝܹܠ. 23: ܘܐܵܦ ܠܐܝܼܙܒܸܠ ܐܵܡܲܪ ܡܵܪܝܵܐ: ܟܲܠ̈ܒܹ̇ܐ ܢܹܐܟ݂ܠܘܼܢܵܗ̇ ܠܐܝܼܙܒܸܠ ܒܝܵܪܬ̇ܘܼܬ̣ܵܐ ܕܐܝܼܙܲܪܥܹܝܠ. 24: ܕܲܢܡܘܼܬ̣ ܠܐܵܚܵܒ̣ ܒܲܩܪܝܼܬ̣ܵܐ: ܢܹܐܟ݂ܠܘܼܢ ܟܲܠ̈ܒܹ̇ܐ. ܘܕܲܢܡܘܼܬ̣ ܠܹܗ ܒܕܲܒ̣ܪܵܐ: ܬܹܐܟ݂ܘܿܠ ܦܵܪܲܚܬ̣ܵܐ ܕܲܫܡܲܝܵܐ. 25: ܘܒܲܠܚܘܿܕ݂ ܠܵܐ ܗܘ̤ܵܐ ܐܵܚܵܒ̣: ܕܐܸܬ̣ܚܲܫܲܒ̣ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܕܓܲܪܓܬܹܗ ܐܝܼܙܒܸܠ ܐܲܢ̄ܬ̇ܬܹܗ. 26: ܘܐܸܬ̣ܛܲܢܲܦ ܛܵܒ̣: ܘܐܸܙܲܠ ܒܵܬܲܪ ܦܬܲܟ݂ܪܹ̈ܐ: ܐܲܝܟ݂ ܕܲܥ̣ܒܲܕ݂ܘ ܐܵܡܘܿܪ̈ܵܝܹܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒ̈ܢܲܝ ܝܼܣܪܵܝܹܠ. 27: ܘܟܲܕ݂ ܫܡܲܥ ܐܵܚܵܒ̣ ܦܸܬ̣ܓ̣ܵܡܵܐ ܗܵܢܵܐ: ܨܲܪܝܼ ܠܒ̣ܘܼܫܵܘ̈ܗܝ: ܘܐܸܬ̣ܟܲܣܝܼ ܣܲܩܵܐ ܥܲܠ ܒܸܣܪܹܗ. ܘܨܵܡ: ܘܫܟ݂ܒ̣ ܒܣܲܩܵܐ: ܘܗܲܠܸܟ݂ ܚܸܦܝܵܝ ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܹܠܝܼܵܐ ܕܡ̣ܢ ܬܲܫܒ̇ܝܼ ܠܡܹܐܡܲܪ. 28: ܚܙܲܝܬ̇ ܕܲܒ̣ܗܸܬ̣ ܐܵܚܵܒ̣ ܡ̣ܢ ܩܕ݂ܵܡܲܝ. ܚܠܵܦ ܕܲܒ̣ܗܸܬ̣ ܡ̣ܢ ܩܕ݂ܵܡܲܝ: ܠܵܐ ܐܲܝܬܹ̇ܐ ܒܝܼܫܬܵܐ ܒܝܵܘܡܵܘ̈ܗܝ. ܒܝܵܘ̈ܡܲܝ ܒܪܹܗ ܐܲܝܬܹ̇ܐ ܒܝܫܬܵܐ ܥܲܠ ܒܲܝܬܹ̇ܗ.

ܩܹܦܵܠܹܐܘܿܢ: ܟܒ.

1: ܘܝܼܬܸܒ̣ܘ ܬܠܵܬ̣ ܫܢ̈ܝܼܢ. ܘܠܵܐ ܗܘ̤ܵܐ ܩܪܵܒ̣ܵܐ ܒܲܝܢܲܝ̈ ܐܲܕ݂ܘܿܡ ܠܝܼܣܪܵܝܹܠ. 2: ܘܲܗܘ̤ܵܐ ܒܫܲܢ̄ܬܵܐ ܬܠܝܼܬ̣ܵܝܬܵܐ: ܘܲܢܚܸܬ̣ ܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ ܠܘܵܬ̣ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ. 3: ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܥܲܒ̣ܕܵܘ̈ܗܝ: ܝܵܕ݂ܥܝܼܢ ܐܲܢ̄ܬܘܿܢ ܕܕ݂ܝܼܠܲܢ ܗ̄ܝ̣ ܪܵܡܲܬ̣ ܓܸܠܥܵܕ݂. ܘܲܥܕܲܡܵܐ ܠܐܸܡܲܬ̣ܝ ܫܲܬ̇ܝܼܩܝܼܢ ܚ̄ܢܲܢ: ܕܢܸܣܒ̣ܝܗ̇ ܡ̣ܢ ܐܝܼܕ݂ܵܐ ܕܡܲܠܟܵܐ ܕܐܲܕ݂ܘܿܡ. 4: ܘܐܸܡܲܪ ܠܝܘܿܫܵܦܵܛ: ܐܵܙܹ̇ܠ ܐܲܢ̄ܬ̇ ܥܲܡܝ ܠܲܩܪܵܒ̣ܵܐ ܠܪܵܡܲܬ̣ ܓܸܠܥܵܕ݂ ܘܐܸܡܲܪ ܝܘܿܫܵܦܵܛ: ܐܵܙܹ̇ܠ ܐ̄ܢܵܐ ܐܲܟ݂ܘܵܬ̣ܵܟ݂: ܘܥܲܡܝ ܐܲܝܟ݂ ܥܲܡܵܟ݂: ܘܪ̈ܲܟ݂ܫܝ ܐܲܝܟ݂ ܪ̈ܲܟ݂ܫܵܟ݂.

5: ܘܐܸܡܲܪ ܝܘܿܫܵܦܵܛ ܠܡܲܠܟܵܐ ܕܝܼܣܪܵܝܹܠ: ܫܐܲܠ ܢܹܐ ܝܵܘܡܵܢܵܐ ܦܸܬ̣ܓ̣ܵܡܹܗ ܕܡܵܪܝܵܐ. 6: ܘܟܲܢܸܫ ܡܲܠܟܵܐ ܕܝܼܣܪܵܝܹܠ ܢܒ̣ܝܹ̈ܐ ܐܲܝܟ݂ ܐܲܪܒܲܥܡܵܐܐ ܓܲܒ̣ܪ̈ܝܼܢ. ܘܐܸܡܲܪ ܠܗܘܿܢ: ܐܹܙܲܠ ܠܪܵܡܲܬ̣ ܓܸܠܥܵܕ݂ ܠܲܩܪܵܒ̣ܵܐ: ܐܵܘ ܐܹܦܘܼܫ. ܐܵܡܪܝܼܢ ܠܹܗ ܣܲܩ: ܘܡܲܫܠܸܡ ܠܗܘܿܢ ܡܵܪܝܵܐ ܒܐܝܼܕܲܝ̈ܟ ܡܲܠܟܵܐ. 7: ܘܐܸܡܲܪ ܝܘܿܫܵܦܵܛ: ܠܲܝܬ̇ ܗܵܪܟܵܐ ܢܒ̣ܝܼܵܐ ܕܐܲܠܵܗܵܐ: ܕܢܸܫܐܲܠ ܡܸܢܹܗ. 8: ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܘܿܫܵܦܵܛ: ܬܘܼܒ̣ ܐܝܼܬ̣ ܓܲܒ̣ܪܵܐ ܚܲܕ݂ ܕܢܸܫܐܲܠ ܦܸܬ̣ܓ̣ܵܡܹܗ ܕܡܵܪܝܵܐ ܡܸܢܹܗ. ܘܐܸܢܵܐ ܣܢܹ̇ܝܬܹܗ: ܡܸܛܠ ܕܠܵܐ ܡܸܬ̣ܢܲܒܹ̇ܐ ܥܠܲܝ ܛܵܒ̣ܬ̣ܵܐ: ܐܸܠܵܐ ܐܸܢ ܒܝܼܫܬܵܐ. ܡܝܼܟ݂ܵܐ ܫܡܹܗ ܒܲܪ ܝܲܡܠܵܐ. ܘܐܸܡܲܪ ܝܘܿܫܵܦܵܛ: ܠܵܐ ܢܹܐܡܲܪ ܡܲܠܟܵܐ ܗܵܟܲܢܵܐ.

9: ܘܲܩܪܵܐ ܡܲܠܟܵܐ ܕܝܼܣܪܵܝܹܠ ܠܲܡܗܲܝܡܢܵܐ ܚܲܕ݂: ܘܐܸܡܲܪ ܠܹܗ: ܒܲܥܓܲܠ ܠܡܝܼܟ݂ܵܐ ܒܲܪ ܝܲܡܠܵܐ. 10: ܘܡܲܠܟܵܐ ܕܝܼܣܪܵܝܹܠ ܘܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ ܝܵܬ̣ܒ̇ܝܼܢ ܓܒܲܪ ܥܲܠ ܟܘܼܪܣܝܹܗ̇: ܘܲܠܒ̣ܝܼܫܝܼܢ ܠܒ̣ܘܼܫܵܐ ܒܵܪܕܵܐ: ܒܡܲܥܠܵܢܵܐ ܕܬܲܪܥܵܐ ܕܫܵܡܪܹܝܢ: ܘܟܠܗܘܿܢ ܢܒ̣ܝܹ̈ܐ ܡܸܬ̣ܢܲܒܹ̇ܝܢ ܩܕ݂ܵܡܲܝܗܘܿܢ. 11: ܘܲܥܒܲܕ݂ ܠܹܗ ܨܹܕܲܩܝܵܐ ܒܲܪ ܟܢܲܥܢܵܝܬܵܐ ܩܲܪ̈ܢܵܬ̣ܵܐ ܕܦܲܪܙܠܵܐ: ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ: ܒܗܵܠܹܝܢ ܬܕܲܩܲܪ ܐܸܢܘܿܢ ܠܐܲܕ݂ܘܿܡܵܝܹ̈ܐ: ܥܕܲܡܵܐ ܕܲܬ̣ܓܲܡܲܪ ܐܸܢܘܿܢ. 12: ܘܟ݂ܠܗܘܿܢ ܢܒ̣ܝܹ̈ܐ ܡܸܬ̣ܢܲܒܹ̇ܝܢ ܗܵܟܲܢܵܐ ܘܐܵܡ̇ܪܝܼܢ: ܣܲܩ ܠܪܵܡܲܬ̣ ܓܸܠܥܵܕ݂: ܘܙܵܟܹ̇ܐ ܐܲܢ̄ܬ̇: ܘܡܲܫܠܸܡ ܠܗܘܿܢ ܡܵܪܝܵܐ ܒܐܝܼܕܲܝ̈ܟ ܡܲܠܟܵܐ. 13: ܘܡܲܠܲܐܟ݂ܵܐ ܕܐܸܙܲܠ̣ ܠܡܸܩܪܵܐ ܠܡܝܼܟ݂ܵܐ: ܐܸܡܲܪ ܠܹܗ: ܗܵܐ ܡܸܠܲܝܗܘܿܢ ܕܲܢܒ̣ܝܹ̈ܐ ܕܵܓܵܠܹ̈ܐ: ܡ̣ܢ ܚܲܕ݂ ܦܘܼܡ ܐܸܡܲܪܘ ܛܵܒ̣ܬ̣ܵܐ ܥܲܠ ܡܲܠܟܵܐ. ܬܸܗܘܹܐ ܡܸܠܬ̣ܵܟ݂ ܐܲܝܟ݂ ܡܸܠܬ̣ܵܐ ܕܚܲܕ݂ ܡܸܢܗܘܿܢ: ܘܐܸܡܲܪ ܐܵܦ ܐܲܢ̄ܬ̇ ܛܵܒ̣ܬ̣ܵܐ. 14: ܘܐܸܡܲܪ ܡܝܼܟ݂ܵܐ ܚܲܝ ܗ̄ܘ̣ ܡܵܪܝܵܐ. ܐܸܠܵܐ ܡܸܕܸ̇ܡ ܕܐܵܡܲܪ ܠܝܼ ܡܵܪܝܵܐ: ܗܵܘ̇ ܐܹܡܲܪ. 15: ܘܐܸܬ̣ܵܐ ܠܘܵܬ̣ ܡܲܠܟܵܐ: ܘܐܸܡܲܪ ܠܹܗ ܡܲܠܟܵܐ: ܡܝܼܟ݂ܵܐ: ܢܹܐܙܲܠ ܠܪܵܡܲܬ̣ ܓܸܠܥܵܕ݂ ܠܲܩܪܵܒ̣ܵܐ: ܐܵܘ ܢܦܘܼܫ. ܐܵܡܲܪ ܠܹܗ: ܣܲܩ ܘܲܙܟ݂ܝܼ: ܘܢܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܲܝ̈ܟ: ܡܲܠܟܵܐ. 16: ܐܵܡܲܪ ܠܹܗ ܡܲܠܟܵܐ: ܥܕܲܡܵܐ ܠܲܟ݂ܡܵܐ ܙܲܒ̣ܢ̈ܝܼܢ ܡܵܘܡܹܐ ܐ̄ܢܵܐ ܠܵܟ݂: ܕܠܵܐ ܬܹܐܡܲܪ ܠܝܼ ܐܸܠܵܐ ܐܸܢ ܫܲܪܝܼܪܬܵܐ ܒܲܫܡܹܗ ܕܡܵܪܝܵܐ. 17: ܘܐܸܡܲܪ ܡܝܼܟ݂ܵܐ: ܚܙܹܝܬ̣ ܠܝܼܣܪܵܝܹܠ ܡܒܲܕܲܪ ܥܲܠ ܛܘܼܪܹ̈ܐ: ܐܲܝܟ݂ ܥܵـ̈ـܢܵܐ ܕܠܲܝܬ̇ ܠܵܗ̇ ܪܵܥܝܵܐ. ܘܐܸܡܲܪ ܡܵܪܝܵܐ: ܠܲܝܬ̇ ܠܗܘܿܢ ܡܵܪܵܐ ܠܗܵܠܹܝܢ: ܢܸܗܦܟ݂ܘܿܢ ܐ̄ܢܵܫ ܠܒܲܝܬܹ̇ܗ ܒܲܫܠܵܡܵܐ. 18: ܘܐܸܡܲܪ ܡܲܠܟܵܐ ܕܝܼܣܪܝܹܠ ܠܝܘܿܫܵܦܵܛ: ܠܵܐ ܐܸܡܪܹܬ̣ ܠܵܟ݂ ܕܠܵܐ ܡܸܬ̣ܢܲܒܹ̇ܐ ܥܠܲܝ ܛܵܒ̣ܬ̣ܵܐ: ܐܸܠܵܐ ܐܸܢ ܒܝܼܫܬܵܐ. 19: ܘܐܸܡܲܪ ܡܝܼܟ݂ܵܐ: ܡܸܛܠ ܗܵܢܵܐ ܫܡܲܥ ܦܸܬ̣ܓ̣ܵܡܹܗ: ܕܡܵܪܝܵܐ: ܚܙܹ̇ܝܬ̣ ܠܡܵܪܝܵܐ ܝܬܹܒ̣ ܥܲܠ ܟܘܼܪܣܝܹܗ: ܘܟ݂ܠܹܗ ܚܲܝܠܵܐ ܕܲܫܡܲܝܵܐ ܩܵܐܹ̇ܡ ܠܥܸܠ ܡܸܢܹܗ: ܡܟܢ ܝܲܡܝܼܢܹܗ ܘܡ̣ܢ ܣܸܡܵܠܹܗ. 20: ܘܐܸܡܲܪ ܡܵܪܝܵܐ: ܡܲܢܘܼ ܢܫܲܕ̇ܠܝܼܘܗܝ ܠܐܵܚܵܒ̣: ܕܢܸܣܲܩ ܘܢܸܦܸܠ ܒܪܵܡܲܬ̣ ܓܸܠܥܵܕ݂. ܗܵܢܵܐ ܐܵܡܲܪ ܗܵܟܲܢܵܐ: ܘܗܵܢܵܐ ܐܵܡܲܪ ܗܵܟܲܢܵܐ. 21: ܘܲܢܦܲܩ ܪܘܼܚܵܐ: ܘܩܵܡ̣ ܩܕ݂ܵܡ ܡܵܪܝܵܐ: ܘܐܸܡܲܪ: ܐܸܢܵܐ ܡܫܲܕܸ̇ܠ ܐ̄ܢܵܐ ܠܹܗ. 22: ܐܵܡܲܪ ܠܹܗ ܡܵܪܝܵܐ ܒܡܵܢܵܐ. ܘܐܸܡܲܪ ܐܸܢܵܐ ܐܸܦܘܿܩ ܘܐܸܗܘܹܐ ܪܘܼܚܵܐ ܕܫܘܼܩܪܵܐ ܒܦܘܼܡܵܐ ܕܟܠܗܘܿܢ ܢܒ̣ܝܵܘ̈ܗܝ. ܐܵܡܲܪ ܠܹܗ: ܡܫܲܕܸ̇ܠ ܐܲܢ̄ܬ̇ ܘܡܸܫܟܲܚ ܐܲܢ̄ܬ̇: ܦܘܿܩ ܘܲܥܒܸܕ݂ ܗܵܟܲܢܵܐ. 23: ܘܗܵܫܵܐ ܗܵܐ ܝܲܗ̄ܒ̣ ܡܵܪܝܵܐ ܪܘܼܚܵܐ ܕܫܘܼܩܪܵܐ ܒܦܘܼܡܵܐ ܕܟ݂ܠܗܘܿܢ ܢܒ̣ܝܼܲܝ̈ܟ ܗܵܠܹܝܢ: ܘܡܵܪܝܵܐ ܐܸܡܲܪ ܥܠܲܝܟ ܒܝܼܫܬܵܐ. 24: ܘܲܩܪܸܒ̣ ܨܹܕܲܩܝܵܐ ܒܲܪ ܟܢܲܥܢܵܝܬܵܐ: ܘܲܡܚܵܝܗܝ ܠܡܝܼܟ݂ܵܐ ܥܲܠ ܦܲܟܹ̇ܗ: ܘܐܸܡܲܪ ܠܹܗ: ܐܲܝܟܵܐ ܥܸܒ̣ܪܲܬ̤ ܡܹܢܝ ܪܘܼܚܹܗ ܕܡܵܪܝܵܐ ܘܡܲܠܠܲܬ̤ ܒܵܟ݂. 25: ܐܵܡܲܪ ܠܹܗ ܡܝܼܟ݂ܵܐ: ܗܵܐ ܚܵܙܹ̇ܐ ܐܲܢ̄ܬ̇ ܒܗܵܘ̇ ܝܵܘܡܵܐ: ܕܲܗ̤ܘܲܝܬ̇ ܥܵܐܹ̇ܠ ܬܵܘܵܢ ܒܓ̣ܵܘ ܬܵܘܵܢ ܠܡܸܬ̇ܛܲܫܵܝܘܼ. 26: ܘܐܸܡܲܪ ܡܲܠܟܵܐ ܕܝܼܣܪܵܝܹܠ: ܕܘܼܒ̣ܪܘܼܗܝ ܠܡܝܼܟ݂ܵܐ: ܘܐܲܫܠ̱ܡܘܼܗܝ ܠܐܲܡܘܿܢ ܫܲܠܝܼܛܵܐ ܕܲܩܪܝܼܬ̣ܵܐ: ܘܲܠܝܘܿܐܵܫ ܒܲܪ ܡܲܠܟܵܐ.

27: ܘܐܸܡܲܪܘ: ܗܵܟܲܢܵܐ ܐܵܡܲܪ ܡܲܠܟܵܐ: ܐܲܪܡܵܘ ܠܗܵܢܵܐ ܒܹܝܬ̣ ܐܲܣܝܼܪܹ̈ܐ: ܘܐܵܘܟ̇ܠܘܼܗܝ ܠܲܚܡܵܐ ܡܸܛܲܪ ܢܦܸܫ: ܘܐܲܫܩܵܐܘܼܗܝ ܡܲـ̈ـܝܵܐ ܡܸܛܲܪ ܢܦܸܫ: ܥܕܲܡܵܐ ܕܐܹܬܹܐ ܒܲܫܠܵܡܵܐ. 28: ܘܐܸܡܲܪ ܡܝܼܟ݂ܵܐ: ܐܸܢ ܡܸܗܦܲܟ݂ ܬܸܗܦܘܿܟ݂ ܒܲܫܠܵܡܵܐ: ܐܵܦ ܠܵܐ ܡܲܠܸܠ̣ ܒܝܼ ܡܵܪܝܵܐ. ܘܐܸܡܲܪ ܫܡܲܥܘ ܥܲܡܡܹ̈ܐ ܟܠܟ݂ܘܿܢ. 29: ܘܲܣܠܩ ܡܲܠܟܵܐ ܕܝܼܣܪܵܝܹܠ ܘܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ ܠܪܵܡܲܬ̣ ܓܸܠܥܵܕ݂. 30: ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܘܿܫܵܦܵܛ: ܐܸܫܬܲܓ̣ܢܹܐ ܘܐܸܥܘܿܠ ܒܲܩܪܵܒ̣ܵܐ: ܘܐܲܢ̄ܬ̇ ܠܒܲܫ ܠܒ̣ܘܼܫܲܝ̈ܟ. ܘܐܸܫܬܲܓ̣ܢܝܼ ܡܲܠܟܵܐ ܕܝܼܣܪܵܝܹܠ: ܘܥܲܠ ܒܲܩܪܵܒ̣ܵܐ. 31: ܘܡܲܠܟܵܐ ܕܐܲܕ݂ܘܿܡ ܦܲܩܸܕ݂ ܠܪܵܘ̱ܪ̈ܒ̣ܵܢܲܝ ܡܲܪ̈ܟ̇ܒ̣ܵܬ̣ܵܐ ܕܝܼܠܹܗ ܬܠܵܬ̣ܝܼܢ ܘܲܬ̣ܪܹܝܢ: ܘܐܸܡܲܪ ܠܵܐ ܬܸܬ̣ܟܲܬ̇ܫܘܼܢ: ܠܵܐ ܥܲܡ ܙܥܘܿܪܵܐ ܘܠܵܐ ܥܲܡ ܪܲܒܵܐ: ܐܸܠܵܐ ܥܲܡ ܡܲܠܟܵܐ ܕܝܼܣܪܵܝܹܠ ܒܲܠܚܘܼܕ݂. 32: ܘܟܲܕ݂ ܚܙܵܘ ܪܵܘ̱ܪ̈ܒ̣ܵܢܲܝ ܡܲܪ̈ܟ̇ܒ̣ܵܬ̣ܵܐ ܠܝܘܿܫܵܦܵܛ: ܣܒܲܪܘ ܕܡܲܠܟܵܐ ܗ̄ܘ̣ ܕܝܼܣܪܵܝܹܠ. ܘܲܣܛܵܘ ܥܠܵܘܗܝ ܕܢܸܬ̣ܟܲܬܫܘܼܢ ܥܲܡܹܗ ܘܐܲܝܠܸܠ ܝܘܿܫܵܦܵܛ. 33: ܘܟܲܕ݂ ܚܙܵܘ ܪܵܘ̱ܪ̈ܒ̣ܵܢܲܝ ܡܲܪ̈ܟ̇ܒ̣ܵܬ̣ܵܐ ܕܠܵܐ ܗ̄ܘ̣ܵܐ ܡܲܠܟܵܐ ܕܝܼܣܪܵܝܹܠ: ܗܦܲܟ݂ܘ ܠܗܘܿܢ ܡܸܢܹܗ. 34: ܘܓܲܒ̣ܪܵܐ ܚܲܕ݂ ܫܵܕܹ̇ܐ ܗ̄ܘ̣ܵܐ ܒܩܸܫܬܵܐ ܠܩܘܼܒ̣ܠܹܗ ܬܲܡܝܼܡܵܐܝܼܬ̣. ܘܲܡܚܵܝܗܝ ܠܡܲܠܟܵܐ ܕܝܼܣܪܵܝܹܠ ܒܹܝܬ̣ ܕܸܒ̣ܩܵܐ ܕܫܸܪܝܵܢܵܐ. ܘܐܸܡܲܪ ܠܡܲܪܟ̇ܒ̣ܵܢܹܗ: ܐܲܗܦܸܟ݂ ܐܝܼܕ݂ܵܟ݂: ܘܐܲܦܩܲܝܢܝ ܡ̣ܢ ܡܲܫܪܝܼܬ̣ܵܐ: ܡܸܛܠ ܕܡܲܛܝܘܼܢܝ ܚܸܒ̣ܠܹ̈ܐ ܕܡܵܘܬܵܐ. 35: ܘܲܥܫܲܢ ܩܪܵܒ̣ܵܐ ܒܝܵܘܡܵܐ ܗܵܘ̇ ܘܡܲܠܟܵܐ ܩܵܐܹ̇ܡ ܗ̄ܘ̣ܵܐ ܒܡܲܪܟܲܒ̣ܬܵܐ ܠܘܼܩܒܲܠ ܐܲܕ݂ܘܿܡ. ܘܡܝܼܬ̣ ܒܪܲܡܫܵܐ: ܘܲܪܕ݂ܵܐ ܕܡܵܐ ܕܲܡܚܘܿܬܹܗ ܒܚܲܢܵܗ̇ ܕܡܲܪܟܲܒ̣ܬܹܗ. 36: ܘܟ݂ܵܪܘܿܙܵܐ ܩܪܵܐ ܒܡܲܫܪܝܼܬ̣ܵܐ ܟܲܕ݂ ܥܸܪܒܲܬ̤ ܫܸܡܫܵܐ: ܘܐܸܡܲܪ ܙܸܠܘ ܐ̄ܢܵܫ ܠܲܩܪܝܼܬܹܗ: ܘܐ̄ܢܵܫ ܠܐܲܪܥܹܗ. 37: ܘܡܝܼܬ̣ ܡܲܠܟܵܐ ܘܥܲܠ̣ ܠܫܵܡܪܹܝܢ: ܘܩܲܒ̣ܪܘܼܗܝ ܠܡܲܠܟܵܐ ܒܫܵܡܪܹܝܢ. 38: ܘܐܲܫܝܼܓ̣ܘܼܗ̇ ܠܡܲܪܟܲܒ̣ܬ̣ܵܐ ܒܪܵܡܬ̣ܵܐ ܕܫܵܡܪܹܝܢ. ܘܙܲܝܢܹܗ ܐܲܫܝܼܓ̣ܘ ܘܠܲܥܘ ܟܲܠ̈ܒܹ̇ܐ ܕܡܹܗ: ܐܲܝܟ݂ ܡܸܠܬܹܗ ܕܡܵܪܝܵܐ: ܕܐܸܡܲܪ. 39: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܵܚܵܒ̣ ܘܟ݂ܠܡܸܕܸ̇ܡ ܕܲܥܒܲܕ݂: ܘܒܲܝܬܵܐ ܕܫܸܢܵܐ ܕܲܒ̣ܢܵܐ: ܘܟ݂ܠܗܹܝܢ ܩܘܼܪ̈ܝܵܐ ܕܲܒ̣ܢܵܐ: ܗܵܐ ܟܬ̣ܝܼܒ̣ܝܼܢ ܒܲܣܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܝܼܣܪܵܝܹܠ.

40: ܘܲܫܟܸܒ̣ ܐܵܚܵܒ̣ ܥܲܡ ܐܲܒ̣ܵܗܵܘ̈ܗܝ. ܘܐܲܡܠܸܟ݂ ܐܹܚܲܙܝܵܐ ܒܪܹܗ ܒܵܬ̣ܪܹܗ. 41: ܘܝܘܿܫܵܦܵܛ ܒܲܪ ܐܵܣܵܐ ܐܲܡ̣ܠܸܟ݂ ܥܲܠ ܝܼܗܘܼܕ݂ܵܐ: ܒܲܫܢܲܬ̣ ܐܲܪܒܲܥ ܠܐܵܚܵܒ̣ ܡܲܠܟܵܐ ܕܝܼܣܪܵܝܹܠ. 42: ܘܝܘܿܫܵܦܵܛ ܒܲܪ ܬܠܵܬ̣ܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܟܲܕ݂ ܐܲܡ̣ܠܸܟ݂. ܘܥܸܣܪܝܼܢ ܘܚܲܡܸܫ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ ܥܪܘܿܒ̣ܵܐ ܒܲܪܬ̣ ܫܲܠܚܝܼ. 43: ܘܗܲܠܸܟ݂ ܒܟ݂ܠܗܹܝܢ ܐܘܼܪ̈ܚܵܬܹܗ ܕܐܵܣܵܐ ܐܲܒ̣ܘܼܗܝ: ܘܠܵܐ ܣܛ̣ܵܐ ܡܸܢܗܹܝܢ ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ. 44: ܒܪܲܡ ܥܠܵـ̈ـܘܵܬ̣ܵܐ ܠܵܐ ܐܲܥܒܲܪ ܘܬ̣ܘܼܒ̣ ܥܲܡܵܐ ܡܕܲܒ̇ܚܝܼܢ: ܘܣܵܡܝܼܢ ܒܸܣܡܹ̈ܐ ܥܲܠ ܥܠܵـ̈ـܘܵܬ̣ܵܐ. 45: ܘܲܫܠܸܡ̣ ܝܘܿܫܵܦܵܛ ܥܲܡ ܡܲܠ̈ܟܹ̇ܐ ܕܝܼܣܪܵܝܹܠ. 46: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܫܵܦܵܛ ܘܟ݂ܠܵܗ̇ ܓܲܢ̄ܒܵܪܘܼܬܹܗ ܕܲܥܒܲܕ݂ ܘܐܸܬ̣ܟܲܬܲܫ: ܗܵܐ ܟܬ̣ܝܼܒ̣ܝܼܢ ܒܴܲܦܲܪ ܕܒܸܪܝܵܡܹܝܢ ܕܡܲܠ̈ܟܹ̇ܐ ܕܲܝܗܘܼܕ݂ܵܐ. 47: ܘܫܲܪܟܵܐ ܕܙܵܢܝܘܼܬ̣ܵܐ ܕܐܸܫܬܲܚܪܲܬ̤ ܒܝܵܘܡܵܘ̈ܗܝ ܕܐܵܣܵܐ ܐܲܒ̣ܘܼܗܝ ܐܲܥܒܲܪ ܡ̣ܢ ܐܲܪܥܵܐ. 48: ܘܡܲܠܟܵܐ ܠܲܝܬ̇ ܒܐܲܕ݂ܘܿܡ ܕܩܵܐܹܡ. 49: ܘܝܘܿܫܵܦܵܛ ܥܒܲܕ ܐܸܠܦܹ̈ܐ ܠܬܲܪܫܝܼܫ ܠܡܹܐܙܲܠ ܠܐܵܘܦܹܝܪ ܥܲܠ ܕܲܗܒ̣ܵܐ: ܘܠܵܐ ܐܸܙܲܠ̣: ܡܸܛܠ ܕܐܸܬ̇ܬܒܲܪ ܐܸܠܦܹ̈ܐ ܒܥܸܨܝܼܢܘܿ ܓܒܲܪ. 50: ܗܵܝܕܹ̇ܝܢ ܐܸܡܲܪ ܐܹܚܲܙܝܵܐ ܒܲܪ ܐܵܚܵܒ̣ ܠܝܘܿܫܵܦܵܛ: ܢܹܐܙܠ̄ܘܼܢ ܥܲܒ̣̈ܕܲܝ ܥܲܡ ܥܲܒ̣ܕܲܝ̈ܟ ܒܐܸܠܦܹ̈ܐ. ܘܠܵܐ ܨܒ̣ܵܐ ܝܘܿܫܵܦܵܛ. 51: ܘܲܫܟܸܒ̣ ܝܘܿܫܵܦܵܛ ܥܲܡ ܐܲܒ̣ܵܗܵܘ̈ܗܝ: ܘܐܸܬ̣ܩܒܲܪ ܥܲܡ ܐܲܒ̣ܵܗܵܘ̈ܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܐܲܒ̣ܘܼܗܝ. ܘܐܲܡ̣ܠܸܟ݂ ܝܘܿܪܵܡ ܒܪܹܗ ܒܵܬ̣ܪܹܗ. 52: ܘܐܹܚܲܙܝܵܐ ܒܲܪ ܐܵܚܵܒ̣ ܐܲܡܠܸܟ݂ ܥܲܠ ܝܼܣܪܵܝܹܠ ܒܫܵܡܪܹܝܢ: ܒܲܫܢܲܬ̣ ܫܒܲܥܸܣܪܹ̈ܐ ܠܝܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ. ܘܐܲܡܠܸܟ݂ ܥܲܠ ܝܼܣܪܵܝܹܠ ܬܲܪܬܹ̇ܝܢ ܫܢ̈ܝܼܢ. 53: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܗܲܠܸܟ݂ ܒܐܘܼܪ̈ܚܵܬܹܗ ܕܐܲܒ̣ܘܼܗܝ ܘܒ̣ܐܘܼܪ̈ܚܵܬ̣ܵܗ̇ ܕܐܸܡܹܗ: ܘܒ̣ܐܘܼܪ̈ܚܵܬܹܗ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ ܕܐܲܚܛܝܼ ܠܝܼܣܪܵܝܹܠ. 54: ܘܲܦܠܲܚ ܠܒܲܥܠܵܐ: ܘܣܓܸܕ݂ ܠܹܗ. ܘܐܸܪܓܸ̇ܙ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܲܝܟ݂ ܕܲܥܒܲܕ݂ ܐܲܒ̣ܘܼܗܝ.