ܣܦܪܐ ܕܒܪܝܡܝܢ : ܒ :

ܩܹܦܵܠܹܐܘܿܢ: ܐ.

1: ܘܐܸܬ̣ܥܲܫܲܢ ܫܠܹܝܡܘܿܢ ܒܪܹܗ ܕܕ݂ܵܘܝܼܕ݂ ܒܡܲܠܟ̇ܘܼܬܹܗ. ܘܡܵܪܝܵܐ ܐܲܠܵܗܹܗ ܥܲܡܹܗ. ܘܐܵܘ̱ܪܒܹܗ ܠܥܸܠ ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ.

2: ܘܐܸܡܲܪ ܫܠܹܝܡܘܿܢ ܠܟ݂ܠܹܗ ܝܼܣܪܵܝܹܠ: ܠܪܵܘ̱ܪ̈ܒ̣ܵܢܹܐ ܕܐܲܠܦܹ̈ܐ ܘܲܕ݂ܡܲܐ̈ܘܵܬ̣ܵܐ: ܘܲܠܕܲܝܵܢܹ̈ܐ: ܘܲܠܟ݂ܠܗܘܿܢ ܪܵܘ̱ܪ̈ܒ̣ܵܢܹܐ: ܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ.

3: ܘܐܸܙܲܠ̣ ܫܠܹܝܡܘܿܢ ܘܟ݂ܠ ܥܲܡܵܐ ܕܐܝܼܬ̣ ܥܲܡܹܗ: ܠܒ̣ܘܼܣܵܡܵܐ ܪܲܒܵܐ ܕܲܗܘ̤ܵܐ ܒܓܸܒ̣ܥܘܿܢ ܩܪܝܼܬ̣ܵܐ. ܡܸܛܠ ܕܬܲܡܵܢ ܗ̄ܘ̣ܵܐ ܡܲܫܟ̇ܢܵܐ ܕܥܹܐܕ݂ܵܐ ܕܡܵܪܝܵܐ: ܕܲܥܒܲܕ̣ ܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ ܒܡܲܕ݂ܒ̇ܪܵܐ ܠܘܼܩܒܲܠ ܩܹܒ̣ܘܿܬܹ̇ܗ ܕܡܵܪܝܵܐ.

4: ܘܐܲܣܩܵܗ̇ ܗ̄ܘ̣ܵܐ ܕܵܘܝܼܕ݂ ܡ̣ܢ ܩܪܝܼܬ̣ܵܐ ܕܟܲܦܪ̈ܘܿܢܹܐ: ܐܲܝܟܵܐ ܕܐܲܬ̣ܩܸܢ ܗ̄ܘ̣ܵܐ ܠܵܗ̇ ܕܵܘܝܼܕ݂ ܕܘܼܟ̇ܬ̣ܵܐ. ܡܸܛܠ ܕܲܢܩܲܫ ܗ̄ܘ̣ܵܐ ܠܵܗ̇ ܡܲܫܟ̇ܢܵܐ ܒܐܘܿܪܸܫܠܸܡ.

5: ܘܡܲܕ݂ܒ̇ܚܵܐ ܕܲܢܚܵܫܵܐ ܕܲܥܒܲܕ݂ ܗ̄ܘ̣ܵܐ ܒܲܨܠܵܝܐܹܝܠ ܒܲܪ ܐܘܿܪܝܼ: ܒܲܪ ܚܘܿܪ: ܣܝܼܡ ܗ̄ܘ̣ܵܐ ܩܕ݂ܵܡ ܡܲܫܟ̇ܢܵܐ ܕܡܵܪܝܵܐ: ܘܬܲܒ̣ܥܹܗ ܗ̄ܘ̣ܵܐ ܫܠܹܝܡܘܿܢ ܘܟ݂ܠܵܗ̇ ܟܢܘܼܫܬܵܐ ܕܝܼܣܪܵܝܹܠ.

6: ܘܐܲܣܸܩ̣ ܗ̄ܘ̣ܵܐ ܫܠܹܝܡܘܿܢ ܬܲܡܵܢ ܥܲܠ ܡܲܕ݂ܒ̇ܚܵܐ ܕܲܢܚܵܫܵܐ: ܩܕ݂ܵܡ ܡܵܪܝܵܐ: ܕܐܝܼܬ̣ ܗ̄ܘ̣ܵܐ ܒܡܲܫܟ̇ܢܵܐ ܕܥܹܐܕ݂ܵܐ. ܘܩܲܪܸܒ̣ ܥܠܵܘܗܝ ܥܠܵـ̈ـܘܵܬ̣ܵܐ ܐܵܠܹܦ.

7: ܒܠܸܠܝܵܐ ܗܵܘ̇ ܐܸܬ̣ܓ̇ܠܝܼ ܡܵܪܝܵܐ ܥܲܠ ܫܠܹܝܡܘܿܢ ܒܚܸܠܡܵܐ ܕܠܸܠܝܵܐ. ܘܐܸܡܲܪ ܠܹܗ ܡܵܪܝܵܐ: ܫܐܲܠ ܡܸܕܸ̇ܡ: ܘܐܸܬܸ̇ܠ ܠܵܟ݂.

8: ܘܐܸܡܲܪ ܫܠܹܝܡܘܿܢ ܠܡܵܪܝܵܐ: ܐܲܢ̄ܬ̇ ܥܒܲܕ̇ܬ̇ ܥܲܡ ܕܵܘܝܼܕ݂ ܐܲܒ̣ܝ ܚܸܣܕ݂ܵܐ ܪܲܒܵܐ: ܘܐܲܩܝܼܡ̣ܬܵܢܝ ܠܝܼ ܒܡܲܠܟ̇ܘܼܬ̣ܵܐ ܡ̣ܢ ܒܵܬ̣ܪܹܗ.

9: ܘܐܵܦ ܗܵܫܵܐ ܡܵܪܝܵܐ ܐܲܠܵܗܝ: ܢܸܫܪ̈ܵܢ ܡܸܟܹ̇ܝܠ ܡܸܠܲܝ̈ܟ ܕܡܲܠܠܸܬ̇ ܥܲܡ ܕܵܘܝܼܕ݂ ܐܲܒ̣ܝ. ܡܸܛܠ ܕܐܲܢ̄ܬ̇ ܐܲܩܝܼܡ̣ܬܵܢܝ ܥܲܠ ܥܲܡܵܐ ܗܵܢܵܐ: ܘܣܲܓ̇ܝܼܵܐܐ ܗ̄ܘ̣ ܐܲܝܟ݂ ܥܲܦܪܵܐ ܕܐܲܪܥܵܐ.

10: ܘܐܵܦ ܗܵܫܵܐ ܚܸܟ݂ܡ̱ܬ̣ܵܐ ܘܝܼܕܲܥܬ̣ܵܐ ܗܲܒ̣ܠܝܼ: ܕܐܸܗܘܹܐ ܥܵܐܹ̇ܠ ܘܢܵܦܹ̇ܩ ܒܪܹܫܹܗ ܕܥܲܡܵܐ ܡܸܛܠ ܕܡܲܢܘܼ ܡܸܫܟܲܚ ܠܲܡܕ݂ܵܢܹܗ ܠܥܲܡܵܟ݂ ܗܵܢܵܐ ܪܲܒܵܐ.

11: ܘܐܸܡܲܪ ܡܵܪܝܵܐ ܠܲܫܠܹܝܡܘܿܢ: ܚܠܵܦ ܕܲܗܘ̤ܵܬ̣ ܗܵܕܹܐ ܒܪܸܥܝܵܢܵܟ݂: ܘܠܵܐ ܫܐܸܠܬ̇ ܠܵܟ݂ ܢܸܟ݂ܣܹ̈ܐ ܘܐܝܼܩܵܪܵܐ: ܘܠܵܐ ܢܲܦ̮̈ܫܵܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܟ. ܘܠܵܐ ܫܐܸܠܬ̇ ܠܵܟ݂ ܝܵܘ̈ܡܵܬ̣ܸܵܐ ܣܲܓ̇ܝܼ̈ܐܹܐ ܕܬܸܚܸܐ ܒܗܘܿܢ. ܘܲܫܐܸܠܬ̇ ܠܵܟ݂ ܚܸܟ݂ܡ̱ܬ̣ܵܐ ܘܝܼܕܲܥܬ̣ܵܐ. ܕܲܬ̇ܕ݂ܘܼܢ ܠܥܲܡܝ ܕܐܲܩܝܼܡ̇ܬܵܟ݂ ܒܡܲܠܟ̇ܘܼܬ̣ܵܐ ܥܠܵܘܗܝ.

12: ܘܐܵܦ ܡܸܕܸ̇ܡ ܕܠܵܐ ܫܐܸܠܬ̇: ܝܵܗܹ̇ܒ̣ ܐ̄ܢܵܐ ܠܵܟ݂: ܚܸܟ݂ܡ̱ܬ̣ܵܐ ܘܝܼܕܲܥܬ̣ܵܐ: ܘܥܘܼܬ̣ܪܵܐ: ܘܢܸܟ݂ܣܹ̈ܐ: ܘܐܝܼܩܵܪܵܐ. ܕܠܵܐ ܗܘ̤ܵܐ ܐܲܟ݂ܘܵܬ̣ܵܟ݂: ܒܡܲܠ̈ܟܹ̇ܐ ܟܠܗܘܿܢ ܕܩܵܡ̣ܘ ܩܕ݂ܵܡܲܝܟ: ܘܒ̣ܵܬ̣ܪܵܟ݂ ܠܵܐ ܢܩܘܼܡ ܐܲܟ݂ܘܵܬ̣ܵܟ݂.

13: ܘܐܸܬ̣ܵܐ ܫܠܹܝܡܘܿܢ ܠܒ̣ܘܼܣܵܡܵܐ ܪܲܒܵܐ ܕܐܝܼܬ̣ ܒܓܸܒ̣ܥܘܿܢ ܩܪܝܼܬ̣ܵܐ ܕܡ̣ܢ ܡܲܕ݂ܢ̱ܚܵܐ ܕܐܘܿܪܸܫܠܸܡ: ܡ̣ܢ ܩܕ݂ܵܡ ܡܲܫܟ̇ܢܵܐ ܕܥܹܐܕ݂ܵܐ: ܘܐܲܡ̣ܠܸܟ݂ ܥܲܠ ܟܠܹܗ ܝܼܣܪܵܝܹܠ.

14: ܘܟܲܢܸܫ ܫܠܹܝܡܘܿܢ ܙܵܘ̈ܓܹ̇ܐ ܘܦܲܪ̈ܵܫܹܐ. ܘܲܗܘ̤ܵܘ ܠܹܗ ܐܵܠܹܦ ܘܐܲܪܒܲܥܡܵܐܐ ܙܵܘܓ̇ܝܼ̈ܢ: ܘܲܬ̣ܪܸܥܣܲܪ ܐܲܠܦ̈ܝܼܢ ܦܲܪ̈ܵܫܝܼܢ ܘܐܲܩܝܼܡ ܐܸܢܘܿܢ ܠܙܵܘ̈ܓܹ̇ܐ ܒܩܘܼܪ̈ܝܵܐ. ܘܡܸܢܗܘܿܢ ܗܘ̤ܵܘ ܥܲܡ ܡܲܠܟܵܐ ܒܐܘܿܪܸܫܠܸܡ.

15: ܘܝܲܗ̄ܒ̣ ܡܲܠܟܵܐ ܟܸܣܦܵܐ ܒܐܘܿܪܸܫܠܸܡ ܐܲܝܟ݂ ܟܹܐܦܹ̈ܐ: ܘܐܲܪ̈ܙܹܐ ܝܲܗ̄ܒ̣ ܐܲܝܟ݂ ܚܵܠܵܐ ܕܥܲܠ ܣܸܦܲܬ̣ ܝܲܡܵܐ ܣܘܿܓ̣ܵܐܐ.

16: ܘܙܵܒ̣ܢܝܼܢ ܗ̄ܘ̣ܵܘ ܪ̈ܲܟ݂ܫܵܐ ܠܲܫܠܹܝܡܘܿܢ ܡ̣ܢ ܡܸܨܪܹܝܢ: ܘܡ̣ܢ ܡܕ݂ܝܼܢܲܬ̣ ܐܲܦܠܵܝܹ̈ܐ: ܬܲܓܵܪ̈ܵܘܗܝ ܕܡܲܠܟܵܐ: ܡ̣ܢ ܡܕ݂ܝܼܢܲܬ̣ ܐܲܦܠܵܝܹ̈ܐ ܒܲܕ݂ܡܲـ̈ـܝܵܐ.

17: ܘܣܵܠܩܝܼܢ ܘܙܵܒ̣ܢܝܼܢ ܙܵܘܓܵܐ ܡ̣ܢ ܡܸܨܪܹܝܢ ܒܫܸܬ̣ܡܵܐܐ ܕܟܸܣܦܵܐ: ܘܣܘܼܣܝܵܐ ܒܲܡܵܐܐ ܘܚܲܡܫܝܼܢ ܘܗܵܟܲܢܵܐ ܠܟ݂ܠ ܡܲܠ̈ܟܹ̇ܐ ܚܹܬ̣ܵܝܹ̈ܐ: ܘܡܲܠܟܲܝ̈ ܐܲܕ݂ܘܿܡ. ܘܒ̣ܐܝܼܕܲܝ̈ܗܘܿܢ ܡܲܦܩܝܼܢ.

ܩܹܦܵܠܹܐܘܿܢ : ܒ.

1: ܘܐܸܡܲܪ ܫܠܹܝܡܘܿܢ ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ: ܘܒܲܝܬܵܐ ܕܡܲܠܟ̇ܘܼܬܹܗ.

2: ܘܲܡܢ̣ܵܐ ܐܸܢܘܿܢ ܫܠܹܝܡܘܿܢ ܫܲܒ̣ܥܝܼܢ ܐܲܠܦ̈ܝܼܢ ܓܲܒ̣ܪ̈ܝܼܢ ܫܩ̈ܝܼܠܲܝ ܩܘܿܦܹ̈ܐ: ܘܲܬ̣ܡܵܢܐܝܼܢ ܐܲܠܦ̈ܝܼܢ ܓܲܒ̣ܪܹ̈ܐ ܦܵܣܘܿܠܹ̈ܐ ܒܛܘܼܪܵܐ: ܘܫܲܠܝܼܛܝܼܢ ܥܠܲܝܗܘܿܢ ܬܠܵܬ̣ܵܐ ܐܲܠܦ̈ܝܼܢ ܘܫܸܬ̣ܡܵܐܐ.

3: ܘܫܲܕܲܪ ܫܠܹܝܡܘܿܢ ܠܘܵܬ̣ ܚܝܼܪܵܡ ܡܲܠܟܵܐ ܕܨܘܿܪ: ܘܐܸܡܲܪ ܠܹܗ: ܐܲܝܟܲܢܵܐ ܕܲܥܒܲܕ̇ܬ̇ ܥܲܡ ܕܵܘܝܼܕ݂ ܐܲܒ̣ܝ ܚܸܣܕ݂ܵܐ ܪܲܒܵܐ: ܘܫܲܕܲܪܬ̇ ܠܹܗ ܐܲܪ̈ܙܹܐ: ܠܡܸܒ̣ܢܵܐ ܠܹܗ ܒܲܝܬܵܐ: ܠܡܸܬܲܒ̣ ܒܹܗ.

4: ܘܗܵܐ ܐܸܢܵܐ ܒܵܢܹ̇ܐ ܐ̄ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܝ: ܠܲܡܩܲܕܵܫܘܼ ܠܹܗ ܘܠܲܡܩܲܪܵܒ̣ܘܼ ܩܕ݂ܵܡܵܘܗܝ ܩܲܛܪ̈ܘܼܩܹܐ ܕܒܸܣܡܹ̈ܐ. ܠܡܲܢܗܵܪܘܼ ܫܪ̈ܵܓܹܐ ܐܲܡܝܼܢܵܐܝܼܬ̣: ܘܕܸܒ̣ܚܹ̈ܐ ܠܲܡܩܲܪܵܒ̣ܘܼ ܒܨܲܦܪܵܐ ܘܲܒ̣ܪܲܡܫܵܐ: ܒܫܲـ̈ـܒܹ̇ܐ ܘܲܒ̣ܪܸܫ ܝܲܪ̈ܚܹܐ: ܘܲܒ̣ܥܹܐܕܹ̈ܐ ܕܡܵܪܝܵܐ ܐܲܠܵܗܲܢ. ܗܵܕܹܐ ܓܙܲܪܘ ܥܲܠ ܟܠܹܗ ܝܼܣܪܵܝܹܠ.

5: ܘܒܲܝܬܵܐ ܕܐܸܢܵܐ ܒܵܢܹ̇ܐ ܐ̄ܢܵܐ: ܪܲܒ̇ ܗ̄ܘ̣ ܛܵܒ̣. ܡܸܛܠ ܕܪܲܒ̇ ܗ̄ܘ̣ ܓܹܝܪ ܡܵܪܝܵܐ ܐܲܠܵܗܲܢ ܡ̣ܢ ܟܠܗܘܿܢ ܡܲܠ̈ܟܹ̇ܐ.

6: ܘܡܲܢܘܼ ܐܝܼܬ̣ ܒܹܗ ܚܲܝܠܵܐ ܠܡܸܒ̣ܢܵܐ ܠܹܗ ܒܲܝܬܵܐ. ܡܸܛܠ ܕܲܫܡܲܝܵܐ ܘܲܫܡܲܝ̈ ܫܡܲܝܵܐ ܠܵܐ ܡܣܲܝܒ̇ܪܝܼܢ ܠܹܗ. ܘܡܵܢ̣ܵܐ ܚܫܝܼܒ̣ ܐ̄ܢܵܐ ܕܐܸܒ̣ܢܹܐ ܠܹܗ ܒܲܝܬܵܐ: ܐܵܘ ܕܐܲܣܸܩ ܠܹܗ ܩܲܛܪ̈ܘܼܩܹܐ ܕܒܸܣܡܹ̈ܐ.

7: ܡܸܟܹ̇ܝܠ ܫܲܕܲܪ ܠܝܼ ܓܲܒ̣ܪܵܐ ܚܲܕ݂ ܚܲܟ̇ܝܼܡܵܐ. ܕܢܸܥܒܸ̇ܕ݂ ܒܕܲܗܒ̣ܵܐ ܘܲܒ̣ܟܸܣܦܵܐ: ܘܲܢܚܵܫܵܐ ܘܦܲܪܙܠܵܐ: ܘܐܲܪܓ̇ܘܵܢܵܐ ܘܣܵܣܓܵܘܢܵܐ: ܘܲܒ̣ܬܸܟ݂ܠ̱ܬ̣ܵܐ: ܘܲܒ̣ܒ̣ܘܼܨܵܐ: ܘܝܵܕܲܥ ܠܡܲܪܡܵܝܘܼ ܩܠܝܼ̈ܕܹܐ ܥܲܡ ܚܲܟ̇ܝܼܡܹ̈ܐ ܕܐܝܼܬ̣ ܒܲܝܗܘܼܕ݂ܵܐ: ܘܒ̣ܐܘܿܪܸܫܠܸܡ: ܕܐܲܬ̣ܩܸܢ ܕܵܘܝܼܕ݂ ܐܵܒ̣ܝ.

8: ܘܫܲܕܲܪ ܠܝܼ ܩܲܝܣܹ̈ܐ ܕܐܲܪܙܵܐ ܘܲܕ݂ܩܲܛܪ̈ܘܼܩܹܐ ܘܕܸܐܫܟܵܪܥܵܐ ܡ̣ܢ ܠܸܒ̣ܢܵܢ. ܡܸܛܠ ܕܐܸܢܵܐ ܝܵܕܲܥ ܐ̄ܢܵܐ ܕܥܲܒ̣ܕܲܝ̈ܟ ܝܵܕ݂ܥܝܼܢ ܠܡܸܦܣܲܩ ܐܲܪ̈ܙܹܐ ܡ̣ܢ ܠܸܒ̣ܢܵܢ. ܘܗܵܐ ܥܲܒ̣̈ܕܲܝ ܥܲܡ ܥܲܒ̣̈ܕܲܝܟ.

9: ܢܸܗܘܘܿܢ ܡܲܝܬܹ̇ܝܢ ܠܝܼ ܩܝܣܹ̈ܐ ܣܲܓ̇ܝܼ. ܡܸܛܠ ܕܒܲܝܬܵܐ ܕܒ̣ܵܢܹܐ ܐ̄ܢܵܐ: ܪܲܒ̇ ܗ̄ܘ̣ ܛܵܒ̣: ܘܲܕ̇ܬܸܡܗܵܐ ܗ̄ܘ̣.

10: ܘܐܸܢܵܐ ܡܲܝܬܹ̇ܐ ܐ̄ܢܵܐ ܢܲܓܵܪܹ̈ܐ ܕܐܘܼܡܵܢ̈ܝܼܢ ܘܐܸܢܵܐ ܝܵܗܹ̇ܒ̣ ܐ̄ܢܵܐ ܚܸܛܹ̈ܐ ܣܲܝܒܵܪܬܵܐ ܠܥܲܒ̣ܕܲܝ̈ܟ: ܟܘܿܪܹ̈ܐ ܥܸܣܪܝܼܢ ܐܲܠܦ̈ܝܼܢ: ܘܲܣܥܵܪܹ̈ܐ ܥܸܣܪܝܼܢ ܐܲܠܦ̈ܝܼܢ: ܘܚܲܡܪܵܐ ܪܸ̈ܒ̣ܥܹܐ ܥܸܣܪܝܼܢ ܐܲܠܦ̈ܝܼܢ: ܘܡܸܫܚܵܐ ܪܸ̈ܒ̣ܥܹܐ ܥܸܣܪܝܼܢ ܐܲܠܦ̈ܝܼܢ.

11: ܘܐܸܡܲܪ ܚܝܼܪܵܡ ܡܲܠܟܵܐ ܕܨܘܿܪ: ܒܲܟ݂ܬ̣ܵܒ̣ܵܐ. ܘܫܲܕܲܪ ܠܘܵܬ̣ ܫܠܹܝܡܘܿܢ ܘܐܸܡܲܪ ܠܹܗ: ܡܸܛܠ ܕܲܪܚܸܡ ܡܵܪܝܵܐ ܠܥܲܡܹܗ: ܐܲܩܝܼܡܵܟ݂ ܥܠܲܝܗܘܿܢ ܡܲܠܟܵܐ.

12: ܘܐܸܡܲܪ ܚܝܼܪܵܡ: ܒܪܝܼܟ݂ ܗ̄ܘ̣ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܕܲܒ̣ܪܵܐ ܫܡܲܝܵܐ ܘܐܲܪܥܵܐ: ܘܝܲܗ̄ܒ̣ ܠܕ݂ܵܘܝܼܕ݂ ܒܪܵܐ ܚܲܟ̇ܝܼܡܵܐ: ܡܸܫܬܵܘܕܲܥ ܘܡܸܬ̣ܒܲܝܲܢ: ܘܲܗܘ̤ܵܬ̣ ܡ̣ܢ ܪܸܥܝܵܢܹܗ ܠܡܸܒ̣ܢܵܐ ܒܲܝܬܵܐ ܠܡܵܪܝܵܐ: ܘܒܲܝܬܵܐ ܠܡܲܠܟ̇ܘܼܬܹܗ.

13: ܘܐܵܦ ܗܵܫܵܐ ܫܲܕ̇ܪܹܬ̣ ܠܵܟ݂ ܓܲܒ̣ܪܵܐ ܚܲܟ̇ܝܼܡܵܐ ܝܵܕܲܥ ܡܒܲܝܢܵܢܘܼܬ̣ܵܐ: ܠܚܝܼܪܵܡ.

14: ܒܲܪ ܐܲܢ̄ܬ̇ܬ̣ܵܐ ܗ̄ܘ̣ ܐܲܪܡܲܠܬܵܐ ܡ̣ܢ ܒܹܝܬ̣ ܕܵܢ. ܘܐܲܒ̣ܘܼܗܝ ܓܲܒ̣ܪܵܐ ܗ̄ܘ̣ܵܐ ܐܘܼܡܵܢܵܐ: ܝܵܕܲܥ ܠܡܸܥܒܲܕ݂ ܒܕܲܗܒ̣ܵܐ ܘܲܒ̣ܟܸܣܦܵܐ: ܘܒܲܢܚܵܫܵܐ: ܘܲܒ̣ܦܲܪܙܠܵܐ: ܘܲܒ̣ܟܹܐܦܹ̈ܐ: ܘܲܒ̣ܩܲܝܣܹ̈ܐ: ܘܒܲܐܪܓ̇ܘܵܢܵܐ: ܘܲܒ̣ܬܸܟ݂ܠ̱ܬ̣ܵܐ: ܘܲܒ̣ܒ̣ܘܼܨܵܐ: ܘܲܒ̣ܣܵܣܓܵܘܢܵܐ: ܘܒܸܐܣܦܝܼܢܝܼܩܵܐ: ܠܡܸܥܒܲܕ݂ ܩܠܝܼ̈ܕܹܐ ܠܬܲܪ̈ܥܹܐ: ܘܲܠܡܸܥܒܲܕ݂ ܟܠ ܐܘܼܡܵܢܘܼ: ܕܐܸܬ̣̱ܝܼܗܸܒ̣ ܠܹܗ ܡ̣ܢ ܩܕ݂ܵܡ ܡܵܪܝܵܐ: ܡ̣ܢ ܚܲܟ̇ܝܼܡܲܝ̈ܟ ܘܚܲܟ̇ܝܼܡܵܘ̈ܗܝ ܕܡܵܪܲܢ ܕܵܘܝܼܕ݂ ܐܲܒ̣ܘܼܟ݂.

15: ܘܐܵܦ ܗܵܫܵܐ ܚܸܛܹ̈ܐ: ܘܲܣܥܵܪܹ̈ܐ: ܘܡܸܫܚܵܐ: ܘܚܲܡܪܵܐ: ܕܐܸܡܲܪ ܡܵܪܝ ܠܲܡܫܲܕܵܪܘܼ ܠܥܲܒ̣ܕܵܘ̈ܗܝ: ܢܫܲܕܲܪ.

16: ܘܲܚܢܲܢ ܢܸܦܣܘܿܩ ܐܲܪ̈ܙܹܐ ܡ̣ܢ ܠܸܒ̣ܢܵܢ ܐܲܝܟ݂ ܨܸܒ̣ܝܵܢܵܟ݂: ܘܐܲܝܟ݂ ܡܘܼܫ̈ܚܵܬ̣ܵܟ݂. ܘܢܲܝܬܹ̇ܐ ܐܸܢܘܿܢ ܠܵܟ݂. ܘܢܲܪܡܹܐ ܐܸܢܘܿܢ ܒܝܲܡܵܐ ܕܝܘܿܦܹܐ. ܘܐܲܢ̄ܬ̇ ܬܲܣܸܩ ܐܸܢܘܿܢ ܠܐܘܿܪܸܫܠܸܡ.

17: ܘܟܲܢܸܫ ܫܠܹܝܡܘܿܢ ܟܠ ܓܲܒ̣ܪܹ̈ܐ ܓܝܼܘܿܪܹ̈ܐ ܕܲܗܘ̤ܵܘ ܒܐܲܪܥܵܐ ܕܝܼܣܪܵܝܹܠ: ܒܵܬܲܪ ܡܸܢܝܵܢܵܐ ܕܲܡܢ̣ܵܐ ܐܸܢܘܿܢ ܕܵܘܝܼܕ݂ ܐܲܒ̣ܘܼܗܝ.

18: ܘܐܸܫܟܲܚ ܡܵܐܐ ܘܚܲܡܫܝܼܢ ܐܲܠܦ̈ܝܼܢ ܘܲܬ̣ܠܵܬ̣ܵܐ ܐܲܠܦ̈ܝܼܢ: ܘܫܸܬ̣ܡܵܐܐ. ܘܲܥܒܲܕ݂ܘ ܡܸܢܗܘܿܢ ܫܠܹܝܡܘܿܢ ܡܠܟܵܐ: ܫܲܒ̣ܥܝܼܢ ܐܲܠܦ̈ܝܼܢ ܫܵܩܠܲܝ̈ ܩܘܿܦܹ̈ܐ: ܘܲܬ̣ܡܵܢܐܝܼܢ ܐܲܠܦ̈ܝܼܢ ܦܵܣܘܿܠܹ̈ܐ ܒܛܘܼܪܵܐ: ܘܲܬ̣ܠܵܬ̣ܵܐ ܐܲܠܦ̈ܝܼܢ ܘܫܸܬ̣ܡܵܐܐ ܩܲܝܘܼ̈ܡܹܐ ܕܡܲܥܒ̇ܕ݂ܝܼܢ ܠܥܲܡܵܐ.

ܩܹܦܵܠܹܐܘܿܢ: ܓ.

1: ܘܫܲܪܝܼ ܫܠܹܝܡܘܿܢ ܠܡܸܒ̣ܢܵܐ ܒܲܝܬܵܐ ܕܡܵܪܝܵܐ ܒܐܘܿܪܸܫܠܸܡ: ܒܛܘܼܪܵܐ ܕܐܵܡܘܿܪ̈ܵܝܹܐ: ܒܕ݂ܘܼܟ̇ܬ̣ܵܐ ܕܐܲܬ̣ܩܸܢ ܕܵܘܝܼܕ݂ ܐܲܒ̣ܘܼܗܝ ܒܐܸܕ̇ܪܵܐ ܕܲܙܒܲܢ ܡ̣ܢ ܐܵܪܵܢ ܝܵܒ̣ܘܿܣܵܝܵܐ.

2: ܘܫܲܪܝܼ ܠܡܸܒ̣ܢܵܐ ܒܹܗ ܒܒܸܢܝܵܢܵܐ: ܒܝܲܪܚܵܐ ܬܸܢܝܵܢܵܐ: ܒܲܫܢܲܬ̣ ܐܲܪܒܲܥ ܠܡܲܠܟ̇ܘܼܬܹܗ.

3: ܘܗܵܠܹܝܢ ܡܘܼܫ̈ܚܵܬ̣ܵܐ ܕܲܡܫܲܚ̣ ܫܠܹܝܡܘܿܢ ܠܡܸܒ̣ܢܵܐ ܒܲܝܬܵܐ ܕܡܵܪܝܵܐ ܐܘܼܪܟܹ̇ܗ ܕܒܲܝܬܵܐ ܫܬ̇ܝܼܢ ܐܲܡ̈ܝܼܢ ܒܲܡܫܘܼܚܬ̣ܵܐ ܕܩܘܼܕ݂ܫܵܐ. ܘܪܵܘܡܹܗ ܬܠܵܬ̣ܝܼܢ ܐܲܡ̈ܝܼܢ. ܘܲܦܬ̣ܵܝܹܗ ܥܸܣܪܝܼܢ ܐܲܡ̈ܝܼܢ.

4: ܘܐܸܣܛܘܵܐ ܥ̣ܒܲܕ݂ ܥܲܠ ܐܲܦܵܘ̈ܗܝ ܐܘܼܪܟܹ̇ܗ ܥܲܠ ܐܲܦܲܝ̈ ܦܬ̣ܵܝܹܗ ܕܒܲܝܬܵܐ: ܐܲܡܝܼ̈ܢ ܥܸܣܪܝܼܢ. ܘܪܵܘܡܹܗ ܥܸܣܪܝܼܢ ܐܲܡܝܼ̈ܢ ܘܩܲܪܡܹܗ ܡ̣ܢ ܠܓ̣ܵܘ ܕܲܗܒ̣ܵܐ ܕܲܟ݂ܝܵܐ.

5: ܘܒܲܝܬܵܐ ܪܲܒܵܐ: ܛܲܠܸܠ ܒܐܲܪ̈ܙܹܐ ܕܩܵܛܲܪ̈ܩܹܐ. ܘܩܲܪܡܹܗ ܠܲܫܡܲܝ̈ ܒܲܝܬܵܐ ܕܲܗܒ̣ܵܐ ܛܵܒ̣ܵܐ. ܘܨܵܪ ܥܠܵܘܗܝ ܕܡܘܼܬ̣ܵܐ ܕܕܸܩ̈ܠܹܐ ܘܲܕ݂ܫܘܼܫܲܢܹ̈ܐ.

6: ܘܲܩܒܲܥ ܒܹܗ ܒܒܲܝܬܵܐ: ܛܲܒ̣̈ܥܹܐ ܛܵܒܹ̈ܐ ܠܬܸܫܒ̇ܘܿܚܬܵܐ. ܘܩܲܪܡܹܗ ܠܟ݂ܠܹܗ ܕܲܗܒ̣ܵܐ ܛܵܒ̣ܵܐ.

7: ܘܩܲܪܡܹܗ ܠܒܲܝܬܵܐ ܡ̣ܢ ܐܲܦܵܘ̈ܗܝ ܕܐܸܣܛܘܵܐ: ܐܸܣܵܘ̈ܗܝ ܘܲܦܪ̈ܘܼܣܬ̇ܕ݂ܵܘܗܝ ܕܲܗܒ̣ܵܐ ܛܵܒ̣ܵܐ. ܘܨܵܪ ܥܠܵܘܗܝ ܕܡܘܼܬ̣ܵܐ ܕܕܸܩ̈ܠܹܐ ܘܲܕ݂ܫܘܼܫܲܢܹ̈ܐ.

8: ܘܲܥܒܲܕ݂ ܒܹܝܬ̣ ܩܕ݂ܘܿܫ ܩܘܼܕ݂ܫܹ̈ܐ: ܐܘܼܪܟܹ̇ܗ ܥܲܠ ܐܲܦܲܝ̈ ܦܬ̣ܵܝܹܗ ܕܒܲܝܬܵܐ: ܐܲܡ̈ܝܼܢ ܥܸܣܪܝܼܢ. ܘܲܦܬ̣ܵܝܹܗ ܐܲܡܝܼ̈ܢ ܥܸܣܪܝܼܢ. ܘܩܲܪܡܹܗ ܕܲܗܒ̣ܵܐ ܛܵܒ̣ܵܐ: ܡ̣ܢ ܫܸܬ̣ܡܵܐܐ ܟܲܟ̇ܪ̈ܝܼܢ. ܘܐܵܦ ܠܡܲܕ݂ܒ̇ܚܵܐ ܩ̣ܪܲܡ ܕܲܗܒ̣ܵܐ.

10: ܘܲܥܒܲܕ݂ ܒܒܹܝܬ̣ ܩܘܼܕ݂ܫܵܐ ܟܪ̈ܘܿܒܹܐ ܬܪܹܝܢ: ܥܒ̣ܵܕ݂ܵܐ ܡܫܲܪܪܵܐ. ܘܲܩܪܲܡ ܐܸܢܘܿܢ ܕܲܗܒ̣ܵܐ.

11: ܘܟܸܢ̈ܦܹܐ ܕܲܟ݂ܪ̈ܘܿܒܹܐ ܐܘܼܪܟ̇ܗܹܝܢ ܐܲܡܹ̈ܐ ܥܸܣܪܝܼܢ ܟܸܢܦܵܐ ܚܕ݂ܵܐ: ܐܲܡܹ̈ܐ ܚܲܡܸܫ: ܢܵܩ̇ܦܵܐ ܠܐܸܣܬܹܗ ܕܒܲܝܬܵܐ ܘܟܸܢܦܵܐ ܐ̄ܚܪܹܬ̣ܵܐ: ܐܲܡܹ̈ܐ ܚܲܡܸܫ: ܢܵܩܦܵܐ ܠܟܸܢܦܹܗ ܕܲܟ݂ܪܘܿܒ̣ܵܐ ܐ̄ܚܪܹܢܵܐ.

12: ܘܟܸܢܦܵܐ ܕܲܟ݂ܪܘܿܒ̣ܵܐ ܐ̄ܚܪܹܢܵܐ ܐܲܡܹ̈ܐ ܚܲܡܸܫ: ܢܵܩܦܵܐ ܠܐܸܣܬܹܗ ܕܒܲܝܬܵܐ. ܘܟܸܢܦܵܐ ܐ̄ܚܪܹܬܵܐ ܐܲܡܹ̈ܐ ܚܲܡܸܫ: ܘܕܲܒ̇ܝܼܩܵܐ ܠܟܸܢܦܹܗ ܕܲܟ݂ܪܘܿܒ̣ܵܐ ܐ̄ܚܪܹܢܵܐ.

13: ܟܸܢܦܲܝ̈ܗܘܿܢ ܕܲܟ݂ܪ̈ܘܿܒܹܐ ܗܵܠܹܝܢ: ܦܪ̈ܝܼܣܵܢ ܐܲܡܹ̈ܐ ܥܸܣܪܝܼܢ. ܘܗܸܢܘܿܢ ܩܵܝ̇ܡܝܼܢ ܥܲܠ ܪܸ̈ܓ̣ܠܲܝܗܘܿܢ: ܘܐܲܦܲܝ̈ܗܘܿܢ ܠܓ̣ܵܘ.

14: ܘܲܥܒܲܕ݂ ܦܪܘܼܟ݂ܬܵܐ: ܬܸܟ݂ܠ̱ܬ̣ܵܐ: ܘܐܲܪܓ̇ܘܵܢܵܐ: ܘܲܙܚܘܿܪܝܼܬ̣ܵܐ ܘܒ̣ܘܼܨܵܐ. ܘܐܲܣܸܩ ܥܠܹܝܗ̇ ܟܪ̈ܘܿܒܹܐ. ܘܣܵܡ̣ ܒܓ̣ܵܘܵܗ̇ ܩܹܒ̣ܘܿܬ̣ܵܐ.

15: ܘܲܥܒܲܕ݂ ܩܕ݂ܵܡܵܘܗܝ ܕܒܲܝܬܵܐ ܪܲܒܵܐ ܐܸܣܛܘܿܢܹ̈ܐ ܬܪܹܝܢ. ܐܘܼܪܟ̇ܗܘܿܢ ܐܲܡ̈ܝܼܢ ܬܡܵܢܲܥܸܣܪܹ̈ܐ. ܘܚܸـ̈ـܬܹ̇ܐ ܕܥܲܠ ܪܹ̈ܫܲܝܗܘܿܢ: ܚܲܡܸܫ ܐܲܡ̈ܝܼܢ ܪܵܘܡܗܹܝܢ.

16: ܘܲܥܒܲܕ݂ ܫܸܫ̈ܠܵܬ̣ܵܐ: ܐܲܡܹ̈ܐ ܚܲܡܫܝܼܢ. ܘܝܲܗ̄ܒ̣ ܥܲܠ ܪܹܫܵܐ ܕܐܸܣܛܘܿܢܹ̈ܐ. ܘܲܥܒܲܕ݂ ܪ̈ܘܼܡܵܢܹܐ: ܡܵܐܐ. ܘܲܩܛܲܪ ܒܗܹܝܢ ܒܫܸܫ̈ܠܵܬ̣ܵܐ.

17: ܘܐܲܩܝܼܡ ܐܸܣܛܘܿܢܹ̈ܐ ܬܪܹܝܢ ܩܕ݂ܵܡ ܗܲܝܟ̇ܠܵܐ: ܚܲܕ݂ ܡ̣ܢ ܝܲܡܝܼܢܵܐ: ܘܚܲܕ݂ ܡ̣ܢ ܣܸܡܵܠܵܐ. ܘܲܩܪܵܐ ܫܡܹܗ ܕܗܵܘ̇ ܕܐܲܩܝܼܡ ܡ̣ܢ ܝܲܡܝܼܢܵܐ: ܝܵܟ݂ܝܼܢ. ܘܲܫܡܹܗ ܕܗܵܘ̇ ܕܡ̣ܢ ܣܸܡܵܠܵܐ: ܒܵܥܵܙ.

ܩܹܦܵܠܹܐܘܿܢ: ܕ.

1: ܘܲܥܒܲܕ݂ ܡܲܕ݂ܒ̇ܚܵܐ ܕܲܢܚܵܫܵܐ. ܥܣܲܪ ܐܲܡ̈ܝܼܢ ܐܘܼܪܟܹ̇ܗ. ܘܲܥܣܲܪ ܐܲܡ̈ܝܼܢ ܦܬ̣ܵܝܹܗ. ܘܲܥܣܲܪ ܐܲܡ̈ܝܼܢ ܪܵܘܡܹܗ.

2: ܘܲܥܒܲܕ݂ ܝܲܡܵܐ ܕܢܸܣܟ̇ܬ̣ܵܐ: ܥܣܲܪ ܐܲܡ̈ܝܼܢ ܡ̣ܢ ܣܸܦܬܹܗ ܠܣܸܦܬܹܗ: ܡܪܲܒܲܥ ܟܲܕ݂ ܚܵܕܲܪ. ܘܚܲܡܸܫ ܐܲܡ̈ܝܼܢ ܪܵܘܡܹܗ. ܘܚܘܼܛܵܐ ܕܲܬ̣ܠܵܬ̣ܝܼܢ ܐܲܡ̈ܝܼܢ ܚܵܕܲܪ ܠܹܗ ܡ̣ܢ ܟܠܗܘܿܢ ܓܲܒܵܘ̈ܗܝ.

4: ܘܗ̤ܘ ܩܵܐܹ̇ܡ ܥܲܠ ܬܪܸܥܣܲܪ ܬܵܘܪ̈ܝܼܢ. ܬܠܵܬ̣ܵܐ ܦܵܢܹ̇ܝܢ ܠܓܲܪܒ̇ܝܵܐ. ܘܲܬ̣ܠܵܬ̣ܵܐ ܦܵܢܹ̇ܝܢ ܠܡܲܥ̱ܪܒ̣ܵܐ. ܘܲܬ̣ܠܵܬ̣ܵܐ ܦܵܢܹ̇ܝܢ ܠܬܲܝܡܢܵܐ. ܘܲܬ̣ܠܵܬ̣ܵܐ ܦܵܢܹ̇ܝܢ ܠܡܲܕ݂ܢ̱ܚܵܐ ܘܝܲܡܵܐ ܠܥܸܠ ܡܸܢܗܘܿܢ ܡ̣ܢ ܠܥܸܠ: ܘܟ݂ܠܗܹܝܢ ܐ̄ܚܪ̈ܵܝܵܬ̣ܗܘܿܢ ܡ̣ܢ ܠܓ̣ܵܘ.

5: ܘܲܥܒ̣ܵܝܹܗ ܦܫܸܟ݂. ܘܣܸܦܬܹܗ ܕܝܲܡܵܐ: ܐܲܝܟ݂ ܣܸܦܬܵܐ ܕܟ݂ܵܣܵܐ ܓܠܝܼܠܵܐ. ܘܗ̤ܘ ܫܲܦܝܼܪ ܛܵܒ̣. ܘܲܥܒܲܕ݂ ܩܘܿܦܹ̈ܐ ܥܸܣܪܵܐ. ܘܝܲܗ̄ܒ̣ ܚܲܡܫܵܐ ܡ̣ܢ ܝܲܡܝܼܢܵܐ: ܘܚܲܡܫܵܐ ܡ̣ܢ ܣܸܡܵܠܵܐ. ܠܡܸܫܩܲܠ ܒܗܘܿܢ ܡܲܕ݂ܒ̇ܚܵܐ ܕܲܥܠܵܬ̣ܵܐ.

6: ܘܲܥܒܲܕ݂ ܠܲܩܢܹ̈ܐ ܥܣܲܪ. ܘܝܲܗ̄ܒ̣ ܚܲܡܸܫ ܡ̣ܢ ܝܲܡܝܼܢܵܐ: ܘܚܲܡܸܫ ܡ̣ܢ ܣܸܡܵܠܵܐ: ܠܲܡܫܵܓ̣ܘܼ ܒܗܹܝܢ ܟܵܗ̈ܢܹܐ ܐܝܼܕܲܝ̈ܗܘܿܢ ܘܪܸ̈ܓ̣ܠܲܝܗܘܿܢ.

7: ܘܲܥܒܲܕ݂ ܡܢܵܪ̈ܵܬ̣ܵܐ ܕܕܲܗܒ̣ܵܐ ܥܣܲܪ: ܐܲܝܟ݂ ܢܵܡܘܿܣܲܝ̈ܗܘܿܢ. ܘܝܲܗ̄ܒ̣ ܐܸܢܹܝܢ ܒܗܲܝܟ̇ܠܵܐ: ܚܲܡܸܫ ܡ̣ܢ ܝܲܡܝܼܢܵܐ: ܘܚܲܡܸܫ ܡ̣ܢ ܣܸܡܵܠܵܐ.

8: ܘܬ̣ܘܼܒ̣ ܥܒܲܕ݂ ܦܵܬ̣ܘܿܪܹ̈ܐ ܥܸܣܪܵܐ: ܘܣܵܡ̣ ܐܸܢܘܿܢ ܒܗܲܝܟ̇ܠܵܐ. ܚܲܡܫܵܐ ܡ̣ܢ ܝܲܡܝܼܢܵܐ: ܘܚܲܡܫܵܐ ܡ̣ܢ ܣܸܡܵܠܵܐ. ܘܲܥܒܲܕ݂ ܫܵܚ̈ܠܹܐ ܕܕܲܗܒ̣ܵܐ ܕܲܟ݂ܝܵܐ: ܡܵܐܐ ܘܥܸܣܪܝܼܢ.

9: ܘܲܥܒܲܕ݂ ܕܵܪܬܵܐ ܚܕ݂ܵܐ ܪܲܒ̇ܬ̣ܵܐ ܠܟ݂ܵܗ̈ܢܹܐ ܘܲܠܠܹܘܵܝܹ̈ܐ. ܘܲܩ̣ܪܲܡ ܬܲܪ̈ܥܹܐ ܘܣܘܼܟ̇ܪܹ̈ܐ: ܢܚܵܫܵܐ.

10: ܘܝܲܡܵܐ ܣܵܡ̣ ܡ̣ܢ ܕܓܲܒܵܐ ܓܲܪܒ̇ܝܵܝܵܐ: ܘܚܵܐܲܪ ܠܪܘܼܚ ܬܲܝܡܢܵܐ.

11: ܘܲܥܒܲܕ݂ ܫܠܹܝܡܘܿܢ ܟܠܗܘܿܢ ܡܵܐܢܹ̈ܐ ܗܵܠܹܝܢ ܕܣܲܓ̇ܝܼܐܝܼܢ ܛܵܒ̣. ܘܠܵܐ ܗܘ̤ܵܐ ܡܸܢܝܵܢܵܐ ܠܡܲܬ̣ܩܵܠܵܐ ܕܲܢܚܵܫܵܐ ܕܡܵܐܢܹ̈ܐ ܗܵܠܹܝܢ ܕܲܥܒܲܕ݂ ܫܠܹܝܡܘܿܢ.

ܩܹܦܵܠܹܐܘܿܢ : ܗ.

1: ܘܫܸܠܡܲܬ̤ ܟܠܵܗ̇ ܥܒ̣ܝܼܕ̇ܬܵܐ ܕܲܥܒܲܕ݂ ܫܠܹܝܡܘܿܢ ܒܒܲܝܬܹ̇ܗ ܕܡܵܪܝܵܐ. ܘܐܲܝܬ̇ܝܼ ܫܠܹܝܡܘܿܢ ܩܘܼܕ݂ܫܹ̈ܐ ܕܕ݂ܵܘܝܼܕ݂ ܐܲܒ̣ܘܗܝ: ܟܸܣܦܵܐ ܘܕܲܗܒ̣ܵܐ ܘܡܵܐܢܹ̈ܐ. ܘܟܲܢܸܫ ܐܸܢܘܿܢ. ܘܐܲܥܸܠ ܦܣܲܩ ܐܸܢܘܿܢ ܒܒܹܝܬ̣ ܓܲܙܵܐ ܕܡܵܪܝܵܐ.

2: ܗܵܝܕܹ̇ܝܢ ܟܲܢܸܫ̣ ܗ̄ܘ̣ܵܐ ܫܠܹܝܡܘܿܢ ܟܠܗܘܿܢ ܩܲܫܝܼܫܹ̈ܐ ܕܝܼܣܪܵܝܹܠ: ܪܹ̈ܫܲܝ ܫܲܒ̣̈ܛܹܐ: ܘܪܵܘ̱ܪ̈ܒ̣ܵܢܲܝ ܐܲܒ̣ܵـ̈ـܗܵܬ̣ܵܐ ܕܲܒ̣ܢܲܝ̈ ܝܼܣܪܵܝܹܠ. ܘܐܸܬ̣ܵܘ ܠܘܵܬ̣ ܡܲܠܟܵܐ ܫܠܹܝܡܘܿܢ ܠܐܘܿܪܸܫܠܸܡ: ܠܡܲܣܵܩܘܼ ܠܩܹܒ̣ܘܿܬ̣ܵܐ ܕܐܝܼܬ̣ ܒܵܗ̇ ܕܝܵܬ̣ܩܹܐ ܕܡܵܪܝܵܐ: ܡ̣ܢ ܩܪܝܼܬܹܗ ܕܕ݂ܵܘܝܼܕ݂: ܕܗ̤ܝ ܗ̄ܝ̣ ܨܸܗܝܘܿܢ.

3: ܘܐܸܬ̣ܟܲܢܲܫܘ ܘܐܸܬ̣ܵܘ ܠܘܵܬ̣ ܡܲܠܟܵܐ ܫܠܹܝܡܘܿܢ ܠܐܘܿܪܸܫܠܸܡ: ܒܝܲܪܚܵܐ ܕܐܸܒܵܐ ܕܥܹܐܕ݂ܵܐ ܕܲܡܛܲܠ̈ܠܹܐ: ܗ̤ܘ ܝܲܪܚܵܐ ܫܒ̣ܝܼܥܵܝܵܐ.

4: ܘܐܸܬ̣ܵܘ ܟܠܗܘܿܢ ܩܲܫܝܼܫܹ̈ܐ ܕܝܼܣܪܵܝܹܠ. ܘܲܫܩܲܠܘ ܟܵܗ̈ܢܹܐ ܠܩܹܒ̣ܘܿܬ̣ܵܐ.

5: ܘܐܲܣܩܘܼܗ̇ ܠܩܹܒ̣ܘܿܬܹܗ ܕܡܵܪܝܵܐ: ܘܲܠܡܲܫܟ̇ܢܵܐ ܕܥܹܐܕ݂ܵܐ: ܘܲܠܟ݂ܠܗܘܿܢ ܡܵܐܢܲܝ̈ ܩܘܼܕ݂ܫܵܐ ܕܲܗܘ̤ܵܘ ܒܡܲܫܟ̇ܢܵܐ. ܘܐܲܣܸܩܘ ܐܸܢܘܿܢ ܟܵܗ̈ܢܹܐ ܘܠܹܘܵܝܹܐ.

6: ܘܡܲܠܟܵܐ ܫܠܹܝܡܘܿܢ ܘܟ݂ܠܹܗ ܥܲܡܵܐ ܕܝܼܣܪܵܝܹܠ ܕܐܹܬ̇ܛܲܝܲܒ̣ܘ: ܩܵܝ̇ܡܝܼܢ ܩܕ݂ܵܡ ܩܹܒ̣ܘܿܬ̣ܵܐ ܘܲܡܕܲܒ̇ܚܝܼܢ ܥܵـ̈ـܢܵܐ ܕܠܵܐ ܡܸܬ̣ܡܲܢ̈ܝܵܢ ܘܬ̣ܵܘܪܹ̈ܐ ܕܠܵܐ ܡܸܬ̣ܚܲܫܒ̇ܝܼܢ ܡ̣ܢ ܣܘܿܓ̣ܐܗܘܿܢ.

7: ܘܐܲܝܬ̇ܝܼܘ ܟܵܗ̈ܢܹܐ ܠܩܹܒ̣ܘܿܬ̣ܵܐ ܕܡܵܪܝܵܐ. ܘܣܵܡܘܼܗ̇ ܠܩܹܒ̣ܘܿܬ̣ܵܐ ܒܕ݂ܘܿܟ̇ܬ̣ܵܗ̇ ܒܹܝܬ̣ ܩܕ݂ܘܿܫ ܩܘܼܕ݂ܫܹ̈ܐ: ܬܚܹܝܬ̣ ܟܸܢܦܲܝ̈ܗܘܿܢ ܕܲܟ݂ܪ̈ܘܿܒܹܐ.

8: ܘܲܗܘ̤ܵܘ ܟܪ̈ܘܿܒܹܐ ܦܪܝܼܣܝܼܢ ܥܲܠ ܕܘܼܟ̇ܬ̣ܵܗ̇ ܕܩܹܒ̣ܘܿܬ̣ܵܐ. ܘܲܡܟܲܣܹܝܢ ܗ̄ܘ̣ܵܘ ܟܪ̈ܘܿܒܹܐ ܥܲܠ ܩܹܒ̣ܘܿܬ̣ܵܐ ܘܥܲܠ ܩܘܿܦܹܝ̈ܗ̇ ܡ̣ܢ ܠܥܸܠ.

9: ܘܲܗܘ̤ܵܘ ܐܲܪܝܼܟ݂ܝܼܢ ܩܘܿܦܹ̈ܐ. ܘܡܸܬ̣ܚ̄ܙܹܝܢ ܗ̄ܘ̣ܵܘ ܪܹ̈ܫܲܝܗܘܿܢ ܡ̣ܢ ܬܚܹܝܬ̣ ܩܹܒ̣ܘܿܬ̣ܵܐ ܠܓ̣ܵܘܹܗ ܕܒܲܝܬܵܐ. ܘܠܵܐ ܡܸܬ̣ܚ̄ܙܹܝܢ ܗ̄ܘ̣ܵܘ ܠܒܲܪ. ܘܲܗܘ̤ܵܘ ܬܲܡܵܢ: ܥܕܲܡܵܐ ܠܝܵܘܡܵܢܵܐ.

10: ܠܵܐ ܐܝܼܬ̣ ܒܩܹܒ̣ܘܿܬ̣ܵܐ: ܐܸܠܵܐ ܬܲܪܬܹ̇ܝܢ ܠܘܼܚܹ̈ܐ ܕܟܹܐܦܵܐ: ܕܣܵܡ̣ ܬܲܡܵܢ ܡܘܼܫܹܐ: ܕܐܲܚܸܬ̣ ܡ̣ܢ ܛܘܼܪܵܐ ܕܣܝܼܢܲܝ. ܗ̤ܝ ܗ̄ܝ̣ ܕܝܵܬܹܩܹܐ ܕܝܲܗ̄ܒ̣ ܡܵܪܝܵܐ ܠܲܒ̣ܢܲܝ̈ ܝܼܣܪܵܝܹܠ ܟܲܕ݂ ܢܦܲܩ̣ܘ ܡ̣ܢ ܐܲܪܥܵܐ ܕܡܸܨܪܹܝܢ.

11: ܘܲܗܘ̤ܵܐ ܕܟܲܕ݂ ܢܦܲܩ̣ܘ ܟܵܗ̈ܢܹܐ ܡ̣ܢ ܒܹܝܬ̣ ܬܸܫܡܸܫܬܵܐ: ܡܸܛܠ ܕܟ݂ܠܗܘܿܢ ܟܵܗ̈ܢܹܐ ܕܐܸܫܬ̇ܟܲܚܘ ܬܲܡܵܢ: ܥܲܠ̣ܘ ܠܒܹܝܬ̣ ܬܸܫܡܸܫܬܵܐ.

12: ܘܠܵܐ ܐܸܫܟܲܚܘ ܟܵܗ̈ܢܹܐ ܠܲܡܩܵܡ ܠܲܡܫܲܡܵܫܘܼ ܡ̣ܢ ܩܕ݂ܵܡ ܥܢܵܢܵܐ. ܡܸܛܠ ܕܐܸܬ̣ܡ̱ܠܝܼ ܒܲܝܬܹ̇ܗ ܕܡܵܪܝܵܐ ܡ̣ܢ ܙܝܼܘܵܐ ܕܲܫܟ݂ܝܼܢܬܹ̇ܗ.

ܩܹܦܵܠܹܐܘܿܢ : ܘ.

1: ܗܵܝܕܹ̇ܝܢ ܐܸܡܲܪ ܫܠܹܝܡܘܿܢ: ܡܵܪܝܵܐ ܐܲܢ̄ܬ̇ ܐܸܡܲܪܬ̇ ܠܡܸܫܪܵܐ ܒܥܲܪܦܸܠܵܐ.

2: ܘܐܸܢܵܐ ܡܸܒ̣ܢܵܐ ܒܢܹ̇ܝܬ̣ ܒܲܝܬܵܐ ܠܵܟ݂: ܕܘܼܟ̇ܬ̣ܵܐ ܠܲܫܟ݂ܝܼܢܬܵܟ݂ ܠܥܵܠܡܝܼܢ.

3: ܘܐܲܦܢܝܼ ܡܲܠܟܵܐ ܐܲܦܵܘ̈ܗܝ. ܘܒܲܪܸܟ݂ ܠܟ݂ܠܗܹܝܢ ܟܢܘܼ̈ܫܵܬ̣ܵܐ ܕܝܼܣܪܵܝܹܠ ܘܟ݂ܠܗܹܝܢ ܟܢܘܼ̈ܫܵܬ̣ܵܐ ܕܝܼܣܪܵܝܹܠ ܩܵܝ̈ܡܵܢ.

4: ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܡܲܠܸܠ̣ ܒܦܘܼܡܹܗ ܥܲܡ ܕܵܘܝܼܕ݂ ܐܵܒ̣ܝ: ܘܲܒ̣ܡܸܠܬܹܗ ܐܲܫܲܪ ܡܸܕܸ̇ܡ ܕܐܸܡܲܪ.

5: ܕܡ̣ܢ ܝܵܘܡܵܐ ܕܐܲܦܩܹ̇ܬ̣ ܠܥܲܡܝ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ: ܠܵܐ ܓܒܹܝܬ̣ ܠܝܼ ܩܪܝܼܬ̣ܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܠܡܸܒ̣ܢܵܐ ܒܲܝܬܵܐ ܕܢܸܗܘܹܐ ܫܹܡܝ ܬܲܡܵܢ.

6: ܘܲܓ̣ܒܹܝܬ̣ ܠܕ݂ܵܘܝܼܕ݂ ܕܢܸܗܘܹܐ ܡܲܠܟܵܐ ܥܲܠ ܥܲܡܝ ܝܼܣܪܵܝܹܠ.

7: ܘܲܗܘ̤ܵܐ ܒܠܸܒܹ̇ܗ ܕܕ݂ܵܘܝܼܕ݂ ܐܵܒ̣ܝ: ܠܡܸܒ̣ܢܵܐ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

8: ܘܐܸܡܲܪ ܡܵܪܝܵܐ ܠܕ݂ܵܘܝܼܕ݂ ܐܵܒ̣ܝ: ܡܸܟܹ̇ܝܠ ܕܲܗܘ̤ܵܐ ܒܠܸܒܵܟ݂ ܠܡܸܒ̣ܢܵܐ ܒܲܝܬܵܐ ܠܫܹܡܝ: ܐܲܛܐܸܒ̣ܬ̇ ܡܸܛܠ ܕܲܗܘ̤ܵܐ ܒܠܸܒܵܟ݂.

9: ܐܲܢ̄ܬ̇ ܕܹܝܢ ܠܵܐ ܬܸܒ̣ܢܸܐ ܒܲܝܬܵܐ: ܐܸܠܵܐ ܒܪܵܟ݂ ܕܢܵܦܹ̇ܩ ܡ̣ܢ ܚܲܨܵܟ݂: ܗ̤ܘ ܢܸܒ̣ܢܸܐ ܒܲܝܬܵܐ ܠܫܹܡܝ.

10: ܘܐܲܩܝܼܡ ܡܵܪܝܵܐ ܦܸܬ̣ܓ̣ܵܡܵܘ̈ܗܝ ܕܐܸܡܲܪ. ܘܩܵܡܹ̇ܬ̣ ܡ̣ܢ ܒܵܬܲܪ ܕܵܘܝܼܕ݂ ܐܵܒ̣ܝ: ܘܝܸܬ̣ܒܹ̇ܬ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ ܐܲܝܟܲܢܵܐ ܕܐܸܡܲܪ ܠܝܼ ܡܵܪܝܵܐ: ܘܲܒ̣ܢܹ̇ܝܬ̣ ܒܲܝܬܵܐ ܠܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

11: ܘܐܲܬ̣ܩܢܹ̇ܬ̣ ܕܘܼܟ̇ܬ̣ܵܐ ܠܩܹܒ̣ܘܿܬ̣ܵܐ ܕܒ̣ܵܗ̇ ܣܝܼܡܵܐ ܕܝܵܬܹܩܹܐ ܕܡܵܪܝܵܐ: ܕܝܲܗ̄ܒ̣ ܠܐܲܒ̣ܵـ̈ـܗܵܬܲܢ ܟܲܕ݂ ܐܲܦܸܩ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ.

12: ܘܩܵܡ̣ ܫܠܹܝܡܘܿܢ ܩܕ݂ܵܡ ܡܲܕ݂ܒ̇ܚܵܐ ܕܡܵܪܝܵܐ: ܩܕ݂ܵܡ ܟܠܗܹܝܢ ܟܢܘܼ̈ܫܵܬ̣ܵܐ ܕܝܼܣܪܵܝܹܠ. ܘܲܦܪܲܣ ܐܝܼܕ݂ܵܘ̈ܗܝ ܠܲܫܡܲܝܵܐ.

13: ܘܲܥܒܲܕ݂ ܫܠܹܝܡܘܿܢ ܐܲܣܛܘܿܢܵܐ ܚܲܕ݂ ܕܲܢܚܵܫܵܐ. ܘܐܲܩܝܼܡܹܗ ܗ̄ܘ̣ܵܐ ܡܸܨܥܲܬ̣ ܕܵܪܬܵܐ. ܪܵܘܡܹܗ ܚܲܡܸܫ ܐܲܡ̈ܝܼܢ. ܘܲܦܬ̣ܵܝܹܗ ܬܲܪܬܹ̇ܝܢ ܐܲܡܝܼ̈ܢ. ܘܲܣܠܸܩ ܗ̄ܘ̣ܵܐ ܘܩܵܡ̣ ܥܠܵܘܗܝ: ܘܲܒ̣ܪܲܟ݂ ܥܲܠ ܒܘܼܪ̈ܟܵܘܗܝ ܘܚܵܙܹ̇ܝܢ ܗ̄ܘ̣ܵܘ ܠܹܗ ܟܠܹܗ ܥܲܡܵܐ ܕܝܼܣܪܵܝܹܠ ܘܲܦܪܲܣ ܐܝܼܕ݂ܵܘ̈ܗܝ ܒܲܨܠܘܿܬ̣ܵܐ: ܠܥܹܝܢ ܥܲܡܵܐ ܕܝܼܣܪܵܝܹܠ: ܠܘܵܬ̣ ܫܡܲܝܵܐ.

14: ܘܨܲܠܝܼ ܘܐܸܡܲܪ: ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܠܲܝܬ̇ ܐܲܟ݂ܘܵܬ̣ܵܟ݂ ܐܲܢ̄ܬ̇ ܗ̄ܘ̣ ܡܵܪܝܵܐ ܕܝܵܬܹܒ̣ ܐܲܢ̄ܬ̇ ܒܲܫܡܲܝܵܐ ܡ̣ܢ ܠܥܸܠ: ܘܨܸܒ̣ܝܵܢܲܝ̈ܟ ܡܸܬ̣ܥܲܒ̣ܕ̇ܝܼܢ ܥܲܠ ܐܲܪܥܵܐ ܡܟܢ ܠܬܲܚܬ̇ ܕܢܵܛܲܪ ܐܲܢ̄ܬ̇ ܕܝܵܬܹܩܹܐ ܘܚܸܣܕ݂ܵܐ ܠܥܲܒ̣ܕܲܝ̈ܟ: ܕܲܡܗܲܠܟ݂ܝܼܢ ܩܕ݂ܵܡܲܝܟ ܬܪܝܼܨܵܐܝܼܬ̣ ܒܟ݂ܠܹܗ ܠܸܒ̇ܗܘܿܢ.

15: ܕܲܢܛܲܪܬ̇ ܠܕ݂ܵܘܝܼܕ݂ ܥܲܒ̣ܕܵܟ݂ ܐܵܒ̣ܝ ܡܸܕܸ̇ܡ ܕܐܸܡܲܪܬ̇ ܠܹܗ. ܘܡܲܠܸܠ̣ܬ̇ ܒܦܘܼܡܵܟ݂ ܘܲܒ̣ܨܸܒ̣ܝܵܢܵܟ݂ ܫܲܠܸܡ̣ܬ̇ ܐܲܝܟ݂ ܕܝܵܘܡܵܢܵܐ.

16: ܘܐܵܦ ܗܵܫܵܐ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܛܲܪ ܠܥܲܒ̣ܕܵܟ݂ ܕܵܘܝܼܕ݂ ܐܵܒ̣ܝ: ܡܸܕܸ̇ܡ ܕܐܸܡܲܪܬ̇ ܠܹܗ: ܕܠܵܐ ܢܸܥܢܲܕ݂ ܠܵܟ݂ ܒܪܵܐ ܡ̣ܢ ܩܕ݂ܵܡܲܝ: ܕܝܵܬܹܒ̣ ܥܲܠ ܟܘܼܪܣܝܵܐ ܕܝܼܣܪܵܝܹܠ. ܒܲܠܚܘܿܕ݂ ܐܸܢܗ̤ܘ ܕܢܸܛܪܘܼܢ ܒܢܲܝ̈ܟ ܐܘܼܪ̈ܚܵܬ̣ܗܘܿܢ ܠܲܡܗܲܠܵܟ݂ܘܼ ܩܕ݂ܵܡܲܝ ܒܢܵܡܘܿܣܵܐ: ܐܲܝܟܲܢܵܐ ܕܗܲܠܸܟ݂ܬ̇ ܐܲܢ̄ܬ̇ ܩܕ݂ܵܡܲܝ.

17: ܘܡܸܟܹ̇ܝܠ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܢܸܬ̣ܗܲܝܡܢܘܿܢ ܡܸܟܹ̇ܝܠ ܦܸܬ̣ܓ̣ܵܡܲܝ̈ܟ: ܕܡܲܠܸܠ̣ܬ̇ ܠܕ݂ܵܘܝܼܕ݂ ܐܵܒ̣ܝ ܥܲܒ̣ܕܵܟ݂.

18: ܡܸܛܠ ܕܲܒ̣ܗܲܝܡܵܢܘܼܬ̣ܵܐ ܐܲܫܪܝܼ ܡܵܪܝܵܐ ܫܟ݂ܝܼܢܬܹ̇ܗ ܥܲܠ ܥܲܡܹܗ ܝܼܣܪܵܝܹܠ ܥܲܠ ܐܲܪܥܵܐ. ܗܵܐ ܫܡܲܝܵܐ ܘܲܫܡܲܝ̈ ܫܡܲܝܵܐ ܠܵܐ ܡܣܲܝܒ̇ܪܝܼܢ ܠܵܟ݂: ܠܵܐ ܟܸܢ ܗܵܢܵܐ ܒܲܝܬܵܐ ܕܲܒ̣ܢܹ̇ܝܬ̣.

19: ܘܬܸܬ̣ܦܢܸܐ ܥܲܠ ܨܠܘܿܬ̣ܵܐ ܕܥܲܒ̣ܕܵܟ݂ ܘܥܲܠ ܒܵܥܘܼܬܹܗ: ܡܵܪܝܵܐ ܐܲܠܵܗܵܐ: ܠܡܸܫܡܲܥ ܠܲܨܠܘܿܬ̣ܵܐ ܘܲܠܒ̣ܵܥܘܼܬ̣ܵܐ: ܕܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ ܝܵܘܡܵܢܵܐ.

20: ܗܵܐ ܠܡܸܗܘܵܐ ܩܕ݂ܵܡܲܝܟ ܝܼܕ݂ܝܼܥ: ܘܲܠܡܸܫܡܲܥ ܠܩܵܠ ܨܠܘܿܬ̣ܵܐ ܕܡܲܢ ܕܢܹܐܬܹܐ ܘܲܢܨܲܠܹܐ ܩܕ݂ܵܡܲܝܟ ܒܒܲܝܬܵܐ ܗܵܢܵܐ: ܒܠܸܠܝܵܐ ܘܒ̣ܐܝܼܡܵܡܵܐ: ܗܵܝ̇ ܕܘܼܟ̇ܬ̣ܵܐ ܕܐܸܡܲܪܬ̇ ܠܡܲܫܪܵܝܘܼ ܫܟ݂ܝܼܢܬܵܟ݂ ܬܲܡܵܢ.

21: ܠܡܸܫܡܲܥ ܒܲܨܠܘܿܬ̣ܵܐ ܕܥܲܒ̣ܕܵܟ݂ ܘܲܕ݂ܥܲܡܵܟ݂ ܝܼܣܪܵܝܹܠ: ܕܲܡܨܲܠܹܐ ܩܕ݂ܵܡܲܝܟ ܒܕܘܼܟ̇ܬ̣ܵܐ ܗܵܕܹܐ. ܘܐܲܢ̄ܬ̇ ܬܸܫܡܲܥ ܡ̣ܢ ܕܘܼܟ̇ܬ̣ܵܐ ܕܡܵܘܬ̇ܒ̣ܵܟ݂ ܡ̣ܢ ܫܡܲܝܵܐ: ܘܬܸܫܡܲܥ ܘܬܸܫܒ̇ܘܿܩ.

22: ܐܸܢܗ̤ܘ ܕܢܲܣܟܸ̇ܠ ܒܲܪܢܵܫܵܐ ܒܚܲܒ̣ܪܹܗ: ܘܢܸܦܣܘܿܩ ܥܠܵܘܗܝ ܡܵܘܡܵܬ̣ܵܐ ܠܡܵܘܡܵܝܘܼܬܹܗ: ܘܢܹܐܬܹܐ ܘܢܹܐܡܹܐ ܩܕ݂ܵܡ ܡܲܕ݂ܒ̇ܚܵܟ݂ ܒܒܲܝܬܵܐ ܗܵܢܵܐ.

23: ܘܐܲܢ̄ܬ̇ ܬܸܫܡܲܥ ܒܩܵܠ ܨܠܘܿܬܹܗ: ܡ̣ܢ ܕܘܼܟ̇ܬ̣ܵܟ݂ ܡ̣ܢ ܫܡܲܝܵܐ. ܘܬܸܥܒܸ̇ܕ݂ ܘܲܬ̇ܕ݂ܘܼܢ ܠܥܲܒ̣ܕܲܝ̈ܟ. ܠܲܡܚܲܝܵܒ̣ܘܼ ܠܚܲܝܵܒ̣ܘܼ: ܘܲܠܡܸܬܲܠ ܐܘܼܪܚܹܗ ܒܪܹܫܹܗ: ܘܠܲܡܙܲܕܵܩܘܼ ܠܙܲܕ̇ܝܼܩܵܐ: ܘܲܠܡܸܬܲܠ ܠܹܗ ܐܲܝܟ݂ ܙܲܕ̇ܝܼܩܘܼܬܹܗ.

24: ܘܐܸܢܗ̤ܘ ܕܢܸܬ̇ܬ̇ܒܲܪ ܥܲܡܵܟ݂ ܝܼܣܪܵܝܹܠ: ܩܕ݂ܵܡ ܒܥܸܠܕ̇ܒ̣ܵܒܹܗ ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܘܢܸܗܦ̄ܟ݂ܘܿܢ ܠܘܵܬ̣ܵܟ݂: ܘܢܵܘܕ̇ܘܿܢ ܠܲܫܡܵܟ݂ ܪܲܒܵܐ: ܘܲܢܨܲܠܘܿܢ: ܘܢܸܒ̣ܥܘܿܢ ܡ̣ܢ ܩܕ݂ܵܡܲܝܟ ܒܒܲܝܬܵܐ ܗܵܢܵܐ.

25: ܘܐܲܢ̄ܬ̇ ܬܸܫܡܲܥ ܡ̣ܢ ܫܡܲܝܵܐ: ܘܬܸܫܒ̇ܘܿܩ ܠܲܚܛܵܗܵܘ̈ܗܝ ܕܥܲܡܵܟ݂ ܝܼܣܪܵܝܹܠ. ܘܬܲܗܦܸܟ݂ ܐܸܢܘܿܢ ܠܐܲܪܥܵܐ ܕܝܲܗ̄ܒ̣ܬ̇ ܠܗܘܿܢ ܘܠܲܐܒ̣ܵܗܲܝ̈ܗܘܿܢ.

26: ܘܟܲܕ݂ ܢܸܬ̣ܟ̇ܠܘܿܢ ܫܡܲܝܵܐ: ܘܠܵܐ ܢܸܗܘܹܐ ܡܸܛܪܵܐ: ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܘܲܢܨܲܠܘܿܢ ܩܕ݂ܵܡܲܝܟ ܒܕ݂ܘܼܟ̇ܬ̣ܵܐ ܗܵܕܹܐ: ܘܢܵܘܕ̇ܘܿܢ ܠܲܫܡܵܟ݂ ܪܲܒܵܐ: ܘܡ̣ܢ ܚܛܵܗܲܝ̈ܗܘܿܢ ܢܸܗܦ̄ܟ݂ܘܿܢ: ܡܸܛܠ ܕܬܸܥܢܸܐ ܐܸܢܘܿܢ.

27: ܘܐܲܢ̄ܬ̇ ܬܸܫܡܲܥ ܒܩܵܠ ܨܠܘܿܬ̣ܗܘܿܢ ܡ̣ܢ ܫܡܲܝܵܐ ܘܬܸܫܒ̇ܘܿܩ ܠܲܚܛܵܗܵܘ̈ܗܝ ܕܥܲܒ̣ܕܵܟ݂ ܘܲܕ݂ܥܲܡܵܟ݂ ܝܼܣܪܵܝܹܠ ܡܸܛܠ ܕܬܲܠܸܦ ܐܸܢܘܿܢ ܐܘܼܪܚܵܟ݂ ܫܲܦܝܼܪܬܵܐ ܕܢܹܐܙ̄ܠܘܼܢ ܒܵܗ̇: ܘܬܸܬܸ̇ܠ ܡܸܛܪܵܐ ܕܒ̣ܘܼܪܟ̇ܬ̣ܵܐ ܥܲܠ ܐܲܪܥܵܐ ܕܝܲܗ̄ܒ̣ܬ̇ ܒܝܵܪܬ̇ܘܼܬܹܗ ܕܥܲܡܵܟ݂.

28: ܘܟܲܦܢܵܐ ܟܲܕ݂ ܢܸܗܘܹܐ ܒܐܲܪܥܵܐ: ܘܡܵܘܬܵܢܵܐ ܟܲܕ݂ ܢܸܗܘܹܐ: ܘܫܘܼܚܢܵܐ ܘܫܘܼܢܵܩܵܐ: ܘܩܲܡܨܵܐ ܦܵܪܚܵܐ: ܘܙܵܚܠܵܐ ܟܲܕ݂ ܢܸܗܘܹܐ: ܘܟܲܕ݂ ܢܥܝܼܩܘܼܢ ܠܗܘܿܢ ܒܥܠܕ̇ܒ̣ܵܒܹ̈ܐ ܒܐܲܪ̱ܥܗܘܿܢ ܘܲܒ̣ܩܘܼܪ̈ܝܼܗܘܿܢ: ܟܠ ܡܲܟ݂ܬܵܫܵܐ ܘܟ݂ܠ ܟܹܐܒ̣̈ܝܼܢ.

29: ܟܠ ܨܠܘܿܬ̣ܵܐ ܘܒ̣ܵܥܘܼܬ̣ܵܐ ܕܬܸܗܘܹܐ ܠܟ݂ܠܗܘܿܢ ܒܢܲܝ̈ܢܵܫܵܐ: ܠܟ݂ܠܹܗ ܥܲܡܵܟ݂ ܝܼܣܪܵܝܹܠ: ܕܲܢܣܲܝܒ̇ܪܘܼܢ ܓܒܲܪ ܟܹܐܒ̣ܵܐ ܕܠܸܒܹ̇ܗ. ܘܢܹܐܬܹܐ ܘܢܸܦܪܘܿܣ ܐܝܼܕ݂ܵܘ̈ܗܝ ܒܒܲܝܬܵܐ ܗܵܢܵܐ.

30: ܘܐܲܢ̄ܬ̇ ܬܸܫܡܲܥ ܒܩܵܠܵܐ ܕܲܨܠܘܿܬ̣ܗܘܿܢ ܡ̣ܢ ܫܡܲܝܵܐ. ܘܬܸܫܒ̇ܘܿܩ ܠܚܵܘ̈ܒܲܝܗܘܿܢ ܘܬܸܦܪܘܿܥ ܠܓܲܒ̣ܪܵܐ ܐܲܝܟ݂ ܟܠܗܹܝܢ ܐܘܼܪ̈ܚܵܬܹܗ: ܕܝܵܕܲܥ ܐܲܢ̄ܬ̇ ܠܸܒܹ̇ܗ: ܡܸܛܠ ܕܐܲܢ̄ܬ̇ ܗ̄ܘ̣ ܝܵܕܲܥ ܐܲܢ̄ܬ̇ ܒܲܠܚܘܿܕܲܝܟ ܠܸܒ̇ܗܘܿܢ ܕܟ݂ܠܗܘܿܢ ܒܢܲܝ̈ܢܵܫܵܐ.

31: ܡܸܛܠ ܗܵܢܵܐ ܢܸܕ݂ܚ̄ܠܘܼܢ ܠܲܡܗܲܠܵܟ݂ܘܼ ܩܕ݂ܵܡܲܝܟ ܒܐܘܼܪ̈ܚܵܬ̣ܵܟ݂: ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܝܼܢ ܥܲܠ ܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܗܘܿܢ.

32: ܐܵܦ ܥܲܠ ܢܘܼܟ݂ܪܵܝܵܐ ܕܠܵܐ ܗ̄ܘ̣ܵܐ ܡ̣ܢ ܥܲܡܵܟ݂ ܝܼܣܪܵܝܹܠ: ܘܢܹܐܬܹܐ ܡ̣ܢ ܡܕ݂ܝܼ̈ܢܵܬ̣ܵܐ ܪ̈ܲܚܝܼܩܵܬ̣ܵܐ ܡܸܛܠ ܫܡܵܟ݂. ܡܸܛܠ ܕܢܸܫ̱ܡܥܘܼܢ ܛܸܒܹ̇ܗ ܕܲܫܡܵܟ݂ ܪܲܒܵܐ. ܘܢܹܐܬ̣ܘܿܢ ܘܲܢܨܲܠܘܿܢ ܩܕ݂ܵܡܲܝܟ ܒܝܵܘܡܵܐ ܗܵܘ̇ ܒܒܲܝܬܵܐ ܗܵܢܵܐ.

33: ܘܐܲܢ̄ܬ̇ ܬܸܫܡܲܥ ܡ̣ܢ ܕܘܼܟ̇ܬ̣ܵܟ݂ ܡ̣ܢ ܫܡܲܝܵܐ. ܘܬܸܥܒܸ̇ܕ݂ ܐܲܝܟܲܢܵܐ ܕܲܢܨܲܠܹܐ ܩܕ݂ܵܡܲܝܟ ܢܘܼܟ݂ܪܵܝܵܐ: ܡܸܛܠ ܕܢܸܕ̇ܥܘܼܢ ܟܠܗܘܿܢ ܥܲܡܡܹ̈ܐ ܕܐܲܪܥܵܐ ܫܡܵܟ݂. ܠܡܸܕܚܲܠ ܩܕ݂ܵܡܲܝܟ ܐܲܝܟ݂ ܥܲܡܵܟ݂ ܝܼܣܪܵܝܹܠ: ܘܲܠܡܸܕܲܥ ܕܲܫܡܵܟ݂ ܐܸܬ̣ܩܪܝܼ ܥܲܠ ܒܲܝܬܑܵ ܗܵܢܵܐ ܕܲܒ̣ܢܹ̇ܝܬ̣.

34: ܘܟܲܕ݂ ܢܸܦܘܿܩ ܥܲܡܵܟ݂ ܠܲܩܪܵܒ̣ܵܐ ܥܲܠ ܒܥܸܠܕ̇ܒ̣ܵܒ̣ܵܘ̈ܗܝ ܒܐܘܼܪܚܵܐ ܕܲܬ̣ܫܲܕܲܪ ܐܸܢܘܿܢ: ܘܲܢܨܲܠܘܿܢ ܩܕ݂ܵܡܲܝܟ ܒܐܘܼܪܚܵܐ ܕܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܵܬ̣̈ܗܘܿܢ: ܒܲܩܪܝܼܬ̣ܵܐ ܕܲܓܒܲܝܬ̇ ܠܵܟ݂: ܘܒܲܝܬܵܐ ܕܲܒ̣ܢܹ̇ܝܬ̣ ܠܲܫܡܵܟ݂.

35: ܘܬܸܫܡܲܥ ܡ̣ܢ ܫܡܲܝܵܐ ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ: ܘܬܸܥܒܸ̇ܕ݂ ܕܝܼܢܗܘܿܢ.

36: ܟܲܕ݂ ܢܸܚܛܘܿܢ ܩܕ݂ܵܡܲܝܟ: ܡܸܛܠ ܕܠܵܐ ܐܝܼܬ̣ ܒܲܪܢܵܫܵܐ ܕܠܵܐ ܚܵܛܹ̇ܐ ܘܪܵܓܹ̇ܙ ܐܲܢ̄ܬ̇ ܥܠܲܝܗܘܿܢ: ܘܡܲܫܠܸܡ ܐܲܢ̄ܬ̇ ܠܗܘܿܢ ܩܕ݂ܵܡ ܒܥܸܠܕ̇ܒ̣ܵܒܲܝ̈ܗܘܿܢ. ܘܢܸܫܒ̇ܘܿܢ ܐܸܢܘܿܢ ܫܵܒܲܝ̈ܗܘܿܢ: ܠܐܲܪܥܵܐ ܪܚܝܼܩܬ̣ܵܐ ܐܵܘ ܩܲܪܝܼܒ̣ܬܵܐ.

37: ܘܲܢܨܲܠܘܿܢ ܩܕ݂ܵܡܲܝܟ: ܘܢܸܗܦ̄ܟ݂ܘܿܢ. ܘܒܲܡܕ݂ܝܼ̈ܢܵܬ̣ܵܐ ܕܫܵܒܲܝ̈ܗܘܿܢ: ܢܹܐܡܪܘܿܢ ܕܲܚܛܲܝܢ ܘܐܲܪܓܸ̇ܙ̄ܢ ܘܐܲܥܘܸܠ̄ܢ.

38: ܘܢܸܗܦ̄ܟ݂ܘܿܢ ܠܘܵܬ̣ܵܟ݂: ܒܟ݂ܠܹܗ ܠܸܒ̇ܗܘܿܢ: ܘܲܒ̣ܟ݂ܠܵܗ̇ ܢܲܦ̮ܫܗܘܿܢ: ܒܲܡܕ݂ܝܼ̈ܢܵܬ̣ܵܐ ܕܫܵܒܲܝ̈ܗܘܿܢ ܕܲܫܒ̣ܵܘ ܐܸܢܘܿܢ. ܘܲܢܨܲܠܘܿܢ ܒܐܘܼܪܚܵܐ ܕܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵـ̈ـܗܵܬ̣ܗܘܿܢ: ܩܪܝܼܬ̣ܵܐ ܕܲܓ̣ܒܲܝܬ̇ ܠܵܟ݂: ܘܒܲܝܬܵܐ ܕܲܒ̣ܢܹ̇ܝܬ̣ ܠܲܫܡܵܟ݂.

39: ܘܬܸܫܡܲܥ ܡ̣ܢ ܫܡܲܝܵܐ ܡ̣ܢ ܕܘܼܟ̇ܬ̣ܵܟ݂ ܨܠܘܿܬ̣ܗܘܿܢ ܘܒ̣ܵܥܘܼܬ̣ܗܘܿܢ: ܘܬܸܥܒܸ̇ܕ݂ ܕܝܼܢܗܘܿܢ. ܘܬܸܫܒ̇ܘܿܩ ܠܥܲܡܵܟ݂ ܕܲܚܛܵܘ ܩܕ݂ܵܡܲܝܟ.

40: ܘܡܸܟܹ̇ܝܠ ܐܲܠܵܗܝ: ܢܸܗ̱ܘ̈ܝܵܢ ܥܲܝܢܲܝ̈ܟ ܦܬ̣ܝܼ̈ܚܝܼܢ: ܘܐܸܕ݂ܢܲܝ̈ܟ ܨܵܝ̈ܬܵܢ ܠܲܨܠܘܿܬ̣ܵܐ ܕܕ݂ܘܼܟ̇ܬ̣ܵܐ ܗܵܕܹܐ.

41: ܘܡܸܟܹ̇ܝܠ ܩܘܼܡ ܡܵܪܹܐ ܡܵܪ̈ܵܘܵܬ̣ܵܐ ܠܲܢܝܵܚܬܵܟ݂: ܐܲܢ̄ܬ̇ ܘܐܵܪܘܿܢ ܥܘܼܫܢܵܟ݂. ܟܵܗ̈ܢܲܝܟ ܡܵܪܹܐ ܡܵܪ̈ܵܘܵܬ̣ܵܐ ܦܘܼܪܩܵܢܵܐ ܬܲܠܒܸ̇ܫ: ܘܙܲܕ̇ܝܼܩܲܝ̈ܟ ܢܸܚܕ̇ܘܿܢ ܒܛܵܒ̣ܵـ̈ـܬ̣ܵܟ݂.

42: ܡܵܪܹܐ ܡܵܪ̈ܵܘܵܬ̣ܵܐ ܠܵܐ ܬܲܗܦܸܟ݂ ܐܲܦܵܘ̈ܗܝ ܕܲܡܫܝܼܚܵܟ݂. ܐܸܬ̇ܕܲܟ݂ܪ ܛܲܝ̈ܒ̇ܘܵܬܹܗ ܕܥܲܒ̣ܕܵܟ݂ ܕܵܘܝܼܕ݂.

ܩܹܦܵܠܹܐܘܿܢ : ܙ.

1: ܘܟܲܕ݂ ܓܡܲܪ ܫܠܹܝܡܘܿܢ ܠܲܡܨܲܠܵܝܘܼ: ܢܘܼܪܵܐ ܢܸܚܬܲܬ̤ ܡ̣ܢ ܫܡܲܝܵܐ: ܘܐܸܟ݂ܠܲܬ̤ ܥܠܵـ̈ـܘܵܬ̣ܵܐ ܘܕܸܒ̣ܚܹ̈ܐ. ܘܐܝܼܩܵܪܵܐ ܕܲܫܟ݂ܝܼܢܬܹܗ ܕܡܵܪܝܵܐ ܐܸܬ̣ܡ̱ܠܝܼ ܒܲܝܬܵܐ.

2: ܘܠܵܐ ܡܸܫܟ̇ܚܝܼܢ ܗ̄ܘ̣ܵܘ ܟܗ̈ܢܹܐ ܠܡܸܥܲܠ ܠܒܲܝܬܹ̇ܗ ܕܡܵܪܝܵܐ: ܡܸܛܠ ܕܐܸܬ̣ܡ̱ܠܝܼ ܠܹܗ ܒܲܝܬܵܐ ܐܝܼܩܵܪ ܫܟ݂ܝܼܢܬܹ̇ܗ ܕܡܵܪܝܵܐ.

3: ܘܟ݂ܠ ܒܢܲܝ̈ ܝܼܣܪܵܝܹܠ ܚܵܙܹ̇ܝܢ ܗ̄ܘ̣ܵܘ: ܟܲܕ݂ ܢܸܚܬܲܬ̤ ܢܘܼܪܵܐ: ܘܐܝܼܩܵܪ ܫܟ݂ܝܼܢܬܹ̇ܗ ܕܡܵܪܝܵܐ ܐܸܬ̣ܡ̱ܠܝܼ ܒܲܝܬܵܐ. ܘܲܢܦܲܠܘ ܥܲܠ ܐܲܦܲܝ̈ܗܘܿܢ ܥܲܠ ܐܲܪܥܵܐ ܪ̈ܨܝܼܦܵܬ̣ܵܐ: ܘܲܣܓܸܕ݂ܘ ܘܐܵܡ̇ܪܝܼܢ ܓܒܲܪ ܠܚܲܒ̣ܪܹܗ: ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘ̣ ܘܲܠܥܵܠܡ ܛܲܝܒ̇ܘܼܬܹܗ.

4: ܘܡܲܠܟܵܐ ܘܟ݂ܠܹܗ ܥܲܡܵܐ ܡܕܲܒ̇ܚܝܼܢ ܕܸܒ̣ܚܹ̈ܐ ܠܡܵܪܝܵܐ.

5: ܘܕܲܒܲܚ ܡܲܠܟܵܐ ܫܠܹܝܡܘܿܢ ܕܸܒ̣̈ܚܵܬ̣ܵܐ: ܬܵܘܪܹ̈ܐ ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ: ܘܥܵـ̈ـܢܵܐ ܡܵܐܐ ܘܥܸܣܪܝܼܢ ܐܲܠܦ̈ܝܼܢ. ܘܚܲܕܸ̇ܬ̣ ܒܲܝܬܹ̇ܗ ܕܡܵܪܝܵܐ ܡܲܠܟܵܐ ܫܠܹܝܡܘܿܢ: ܘܟ݂ܠܹܗ ܥܲܡܵܐ.

6: ܘܟ݂ܵܗ̈ܢܹܐ ܩܵܝ̇ܡܝܼܢ ܗ̄ܘ̣ܵܘ ܥܲܠ ܬܸܫܡ̈ܫܵܬ̣ܗܘܿܢ ܘܠܹܘܵܝܹ̈ܐ ܒܡܵܐ̈ܢܹܐ ܕܬܸܫ̈ܒ̇ܚܵܬ̣ܵܐ ܡܫܲܒ̇ܚܝܼܢ ܗ̄ܘ̣ܵܘ ܩܕ݂ܵܡ ܡܵܪܝܵܐ. ܘܗܵܟܲܢܵܐ ܐܵܡ̇ܪܝܼܢ ܗ̄ܘ̣ܵܘ ܒܬܸܫ̈ܒ̇ܚܵܬ̣ܗܘܿܢ: ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘ̣ ܘܲܠܥܵܠܲܡ ܛܲܝܒ̇ܘܼܬܹܗ: ܒܬܸܫ̈ܒ̇ܚܵܬ̣ܵܐ ܕܕ݂ܵܘܝܼܕ݂. ܘܟ݂ܵܗܢܹ̈ܐ ܡܫܲܒ̇ܚܝܼܢ ܗ̄ܘ̣ܵܘ ܒܩܲܪ̈ܢܵܬ̣ܵܐ ܟܦ̈ܝܼܦܵܬ̣ܵܐ ܘܲܦܫܝܼ̈ܛܵܬ̣ܵܐ. ܘܟ݂ܠܹܗ ܥܲܡܵܐ ܕܝܼܣܪܵܝܹܠ ܩܵܐܹ̇ܡ.

7: ܘܩܲܕܸ̇ܫ̣ ܫܠܹܝܡܘܿܢ ܓܵܘܵܗ̇ ܕܕ݂ܵܪܬܵܐ ܕܲܩܕ݂ܵܡ ܒܲܝܬܹ̇ܗ ܕܡܵܪܝܵܐ. ܡܸܛܠ ܕܐܲܣܸܩ̣ ܠܬܲܡܵܢ ܕܸܒ̣ܚܹ̈ܐ: ܘܬܲܪܒܵܐ ܕܫܲܠܡܹ̈ܐ ܡܸܛܠ ܕܡܲܕ݂ܒ̇ܚܵܐ ܕܲܢܚܵܫܵܐ ܕܲܥܒܲܕ݂ ܫܠܹܝܡܘܿܢ: ܙܥܘܿܪ ܗ̄ܘ̣ܵܐ: ܘܠܵܐ ܡܸܫܟܲܚ ܗ̄ܘ̣ܵܐ ܠܲܡܣܲܝܒܵܪܘܼ ܕܸܒ̣ܚܹ̈ܐ: ܘܲܢܫܝܼܦܵܐ: ܘܬܲܪܒܵܐ ܕܫܲܠܡܹ̈ܐ.

8: ܘܲܥܒܲܕ݂ ܫܠܹܝܡܘܿܢ ܒܹܗ ܒܙܲܒ̣ܢܵܐ ܗܵܘ̇: ܥܹܐܕ݂ܵܐ ܫܲܒ̣ܥܵܐ ܝܵܘ̈ܡܝܼܢ: ܘܟ݂ܠܹܗ ܝܼܣܪܵܝܹܠ ܥܲܡܹܗ: ܟܢܘܼ̈ܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ: ܡ̣ܢ ܐܲܢܛܝܘܿܟ݂ܝ̄ ܘܲܥܕܲܡܵܐ ܠܢܲܚܠܵܐ ܕܡܸܨܪܹܝܢ: ܩܕ݂ܵܡ ܡܵܪܝܵܐ ܐܲܠܵܗܲܢ.

9: ܫܲܒ̣ܥܵܐ ܝܵܘ̈ܡܝܼܢ ܕܥܹܐܕ݂ܵܐ: ܘܫܲܒ̣ܥܵܐ ܝܵܘ̈ܡܝܼܢ ܕܚܘܼܕܵܬܹܗ ܕܒܲܝܬܵܐ. ܗܵܠܹܝܢ ܘܗܵܠܹܝܢ ܗܘ̤ܵܐ ܚܘܼܫܒܵܢܗܘܿܢ ܐܲܪܒܲܬܲܥܣܲܪ ܝܵܘ̈ܡܝܼܢ.

10: ܘܲܒ̣ܝܵܘܡܵܐ ܕܟܸܣܐܵܐ ܒܹܗ ܒܝܲܪܚܵܐ ܕܬܸܫܪܝܼ: ܫܲܕܲܪ ܡܲܠܟܵܐ ܠܥܲܡܵܐ: ܘܒܲܪܟܹܗ ܠܡܲܠܟܵܐ ܥܲܡܵܐ. ܘܐܸܙܲܠ̣ܘ ܠܩܘܼܪ̈ܝܼܗܘܿܢ: ܟܲܕ݂ ܚܵܕܹܝܢ ܘܛܵܒ̣ ܠܸܒ̇ܗܘܿܢ: ܘܡܵܘܕܹ̇ܝܢ ܘܲܡܫܲܒ̇ܚܝܼܢ ܥܲܠ ܟܠܗܹܝܢ ܛܵܒ̣ܵـ̈ـܬ̣ܵܐ ܕܲܥܒܲܕ݂ ܡܵܪܝܵܐ ܠܕ݂ܵܘܝܼܕ݂ ܥܲܒ̣ܕܹ̇ܗ: ܘܠܲܫܠܹܝܡܘܿܢ ܒܪܹܗ: ܘܠܝܼܣܪܵܝܹܠ ܥܲܡܹܗ.

11: ܘܲܗܘ̤ܵܐ ܕܟܲܕ݂ ܫܲܠܸܡ ܡܲܠܟܵܐ ܫܠܹܝܡܘܿܢ ܠܡܸܒ̣ܢܵܐ ܒܲܝܬܹ̇ܗ ܕܡܵܪܝܵܐ: ܘܲܠܒܲܝܬܵܐ ܕܡܲܠܟܵܐ: ܘܟ݂ܠܡܸܕܸ̇ܡ ܕܡܸܬ̣ܪܲܥܹܐ ܗ̄ܘ̣ܵܐ ܫܠܹܝܡܘܿܢ ܠܡܸܥܒܲܕ݂ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܒܲܝܬܹ̇ܗ ܕܡܲܠܟܵܐ: ܡܲܟ݂ܫܲܪ ܗ̄ܘ̣ܵܐ.

12: ܘܐܸܬ̣ܓ̇ܠܝܼ ܡܵܪܝܵܐ ܥܲܠ ܫܠܹܝܡܘܿܢ ܒܠܸܠܝܵܐ ܗܵܘ̇: ܘܐܸܡܲܪ ܠܹܗ: ܫܸܡ̇ܥܹܬ̣ ܨܠܘܿܬ̣ܵܟ݂ ܘܲܓ̣ܒܹ̇ܝܬ̣ ܕܘܼܟ̇ܬ̣ܵܐ ܗܵܕܹܐ ܠܝܼ: ܠܒܲܝܬܵܐ ܕܕܸܒ̣̈ܚܵܬ̣ܵܐ.

13: ܐܸܢ ܐܸܨܒܹ̇ܐ ܐܸܟ݂ܠܹܐ ܫܡܲܝܵܐ: ܘܠܵܐ ܢܸܚܘܿܬ̣ ܡܸܛܪܵܐ: ܘܐܸܢ ܐܸܨܒܹ̇ܐ ܐܸܦܩܘܿܕ݂ ܥܲܠ ܩܲܡܨܵܐ: ܘܢܹܐܟ݂ܠܝܼܗ̇ ܠܐܲܪܥܵܐ: ܘܐܸܢ ܐܸܨܒܹ̇ܐ ܐܸܓܲܪܸܐ ܡܵܘܬܵܢܵܐ ܒܥܲܡܝ.

14: ܘܢܸܬ̇ܕܲܟ݂ܪܘܼܢ ܥܲܡܝ ܕܐܸܬ̣ܩܪܝܼ ܫܹܡܝ ܥܠܲܝܗܘܿܢ: ܢܨܲܠܘܿܢ ܘܢܸܒ̣ܥܘܿܢ ܡ̣ܢ ܩܕ݂ܵܡܲܝ: ܘܢܸܗܦ̄ܟ݂ܘܼܢ ܡ̣ܢ ܐܘܼܪ̈ܚܵܬ̣ܗܘܿܢ ܒܝܼ̈ܫܵܬ̣ܵܐ. ܘܐܸܢܵܐ ܐܸܫܡܲܥ ܡ̣ܢ ܫܡܲܝܵܐ: ܘܐܸܫܒ̇ܘܿܩ ܠܲܚܛܵܗܲܝ̈ܗܘܿܢ: ܘܐܲܣܹܐ ܐܲܪܥ̱ܗܘܿܢ.

15: ܘܐܵܦ ܗܵܫܵܐ ܥܲܝܢܲܝ̈ ܢܸܗ̱ܘ̈ܝܵܢ ܦܬ̣ܝܼ̈ܚܵܢ: ܘܐܸܕ݂ܢܲܝ̈ ܨܵܝ̈ܬܵܢ ܠܲܨܠܘܿܬ̣ܵܐ ܕܕ݂ܘܼܟ̇ܬ̣ܵܐ ܗܵܕܹܐ.

16: ܘܐܵܦ ܗܵܫܵܐ ܓܒܹܝܬ̣ ܠܝܼ ܒܲܝܬܵܐ ܗܵܢܵܐ: ܕܬܸܗܘܹܐ ܒܹܗ ܫܟ݂ܝܼܢܲܬ̣ܝ ܠܥܵܠܲܡ ܘܢܸܗܘܘܿܢ ܥܒ̣ܵܕܲܝ ܫܲܦܝܼܪܹ̈ܐ ܘܨܸܒ̣ܝܵܢܲܝ̈ ܡܸܬ̣ܥܲܒ̣ܕ̇ܝܼܢ ܒܓ̣ܵܘܹܗ ܟܠܗܘܿܢ ܝܵܘ̈ܡܵܬ̣ܵܐ.

17: ܘܐܲܢ̄ܬ̇ ܐܸܢ ܬܗܲܠܸܟ݂ ܩܕ݂ܵܡܲܝ: ܐܲܝܟܲܢܵܐ ܕܗܲܠܸܟ݂ ܕܵܘܝܼܕ݂ ܐܲܒ̣ܘܼܟ݂: ܒܬܲܡܝܼܡܘܼܬ̣ܵܐ ܕܠܸܒܵܐ ܘܒܲܬ̣ܪܝܼܨܘܼܬ̣ܵܐ: ܠܡܸܥܒܲܕ݂ ܟܠ ܡܸܕܸ̇ܡ ܕܦܲܩܸܕ̇ܬܵܟ݂: ܘܦܘܼܩ̈ܕܵܢܲܝ ܘܢܵܡܘܿܣܲܝ̈ ܬܸܛܲܪ.

18: ܐܹܫܲܪܪܝܼܘܗܝ ܠܟ݂ܘܼܪܣܝܵܐ ܕܡܲܠܟ̇ܘܼܬ̣ܵܟ݂ ܠܥܵܠܲܡ: ܐܲܝܟ݂ ܕܝܼܡܝܼܬ̣ ܠܕ݂ܵܘܝܼܕ݂ ܐܲܒ̣ܘܼܟ݂: ܘܐܸܡ̇ܪܹܬ̣ ܠܹܗ: ܕܠܵܐ ܢܸܥܢܲܕ݂ ܠܵܟ݂ ܒܪܵܐ ܡ̣ܢ ܩܕ݂ܵܡܲܝ: ܕܩܵܐܹ̇ܡ ܥܲܠ ܟܘܼܪܣܝܵܐ ܕܝܼܣܪܵܝܹܠ.

19: ܘܐܸܢ ܡܸܗܦܲܟ݂ ܬܸܗܦ̄ܟ݂ܘܿܢ ܐܲܢ̄ܬ̇ܘܿܢ ܘܲܒ̣ܢܲܝ̈ܟ̇ܘܿܢ ܡ̣ܢ ܐܘܼܪ̈ܚܵܬ̣ܝ: ܘܠܵܐ ܬܸܛܪܘܼܢ ܦܘܼܩ̈ܕܵܢܲܝ ܘܢܵܡܘܿܣܲܝ̈ ܕܝܸܗ̄ܒܹ̇ܬ̣ ܩܕ݂ܵܡܲܝܟ̇ܘܿܢ: ܘܬܸܦ̱ܠܚܘܼܢ ܠܲܦܬܲܟ݂ܪܹ̈ܐ ܕܥܲܡܡܹ̈ܐ: ܘܬܸܣܓܕ݂ܘܼܢ ܠܗܘܿܢ.

20: ܐܹܒܲܕܲܪܟ݂ܘܿܢ ܡ̣ܢ ܐܲܪܥܵܐ ܗܵܕܹܐ ܕܝܸܗ̄ܒܹ̇ܬ̣ ܠܟ݂ܘܿܢ. ܘܒܲܝܬܵܐ ܗܵܢܵܐ ܕܩܲܕ̇ܫܹ̇ܬ̣ ܠܫܹܡܝ: ܐܸܥܩ̄ܪܝܼܘܗܝ ܡ̣ܢ ܩܕ݂ܵܡܲܝ ܘܢܸܗܘܹܐ ܝܼܣܪܵܝܹܠ ܠܡܲܬ̣ܠܵܐ ܘܲܠܬܲܫܥܝܼܬ̣ܵܐ: ܒܹܝܬ̣ ܟܠܗܘܿܢ ܥܲܡܡܹ̈ܐ.

21: ܘܒܲܝܬܵܐ ܗܵܢܵܐ ܢܸܗܘܹܐ ܚܪܸܒ̣. ܘܟ݂ܠ ܡܲܢ ܕܢܸܥܒܲܪ ܥܠܵܘܗܝ: ܢܩܘܼܡ ܘܲܢܢܝܼܕ݂ ܪܹܫܹܗ: ܘܲܢܢܝܼܦ ܒܐܝܼܕܹܗ. ܘܢܹܐܡܪܘܼܢ: ܡܸܛܠ ܡܵܢܵܐ ܥܒܲܕ݂ ܡܵܪܝܵܐ ܗܵܟܲܢܵܐ ܠܲܩܪܝܼܬ̣ܵܐ ܗܵܕܹܐ ܪܲܒ̇ܬ̣ܵܐ: ܘܲܠܒܲܝܬܵܐ ܗܵܢܵܐ.

22: ܘܢܹܐܡܪܘܿܢ: ܥܲܠ ܕܲܫܒܲܩܘ ܕܝܵܬܹܩܹܐ ܕܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ: ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ ܘܐܸܙܲܠܘ ܕܚܸܠ̣ܘ ܠܐܲܠܵܗܹ̈ܐ ܕܥܲܡܡܹ̈ܐ: ܘܲܦܠܲܚܘ ܠܗܘܿܢ: ܘܲܣܓܸܕ݂ܘ ܠܗܘܿܢ. ܡܸܛܠ ܗܵܢܵܐ ܐܲܝܬ̇ܝܼ ܥܠܲܝܗܘܿܢ ܡܵܪܝܵܐ ܒܝܼ̈ܫܵܬ̣ܵܐ ܗܵܠܹܝܢ.

ܩܹܦܵܠܹܐܘܿܢ : ܚ.

1: ܘܲܗܘ̤ܵܐ ܠܣܘܿܦ ܥܸܣܪܝܼܢ ܫܢ̈ܝܼܢ ܕܲܒ̣ܢܵܐ ܫܠܹܝܡܘܿܢ ܠܒܲܝܬܹ̇ܗ ܕܡܵܪܝܵܐ: ܘܲܠܒܲܝܬܵܐ ܕܡܲܠܟ̇ܘܼܬܹܗ.

2: ܘܩܘܼܪ̈ܝܵܐ ܕܝܲܗ̄ܒ̣ ܚܝܼܪܵܡ ܠܲܫܠܹܝܡܘܿܢ: ܒܢ̣ܵܐ ܐܸܢܹܝܢ ܫܠܹܝܡܘܿܢ: ܘܐܵܘܬܸ̇ܒ̣ ܒܗܹܝܢ ܠܲܒ̣ܢܲܝ̈ ܝܼܣܪܵܝܹܠ.

3: ܘܐܸܙܲܠ̣ ܫܠܹܝܡܘܿܢ ܠܐܲܢܛܝܘܿܟ݂ܝ: ܘܲܫܪܵܐ ܥܠܹܝܗ̇ ܘܥܲܩܪܵܗ̇.

4: ܘܲܒ̣ܢܵܐ ܠܬܸܕ݂ܡܘܼܪ ܕܚܲܪܒܵܐ ܗ̄ܘ̣ܵܬ̣ ܐܲܝܟ݂ ܡܲܕ݂ܒ̇ܪܵܐ: ܘܲܠܟ݂ܠܗܹܝܢ ܩܘܼܪ̈ܝܵܐ ܕܐܵܘܨܪܹ̈ܐ.

5: ܘܲܒ̣ܢܵܐ ܒܹܝܬ̣ ܚܵܘܪܵܢ ܥܸܠܵܝܬܵܐ: ܘܒܹܝܬ̣ ܚܵܘܪܵܢ ܬܲܚܬܵܝܬܵܐ.

6: ܘܲܠܟ݂ܠܗܹܝܢ ܩܘܼܪ̈ܝܵܐ ܕܐܵܘܨܪܹ̈ܐ: ܕܲܗ̤ܘܲܝ̈ ܠܲܫܠܹܝܡܘܿܢ: ܘܩܘܼܪ̈ܝܵܐ ܕܙܵܘ̈ܓܹ̇ܐ: ܘܩܘܼܪ̈ܝܵܐ ܕܦܲܪ̈ܵܫܹܐ: ܘܟ݂ܠܵܗ̇ ܪܸܓ̇ܬܹܗ ܕܲܫܠܹܝܡܘܿܢ: ܕܪܵܐܹ̇ܓ̣ ܗ̄ܘ̣ܵܐ ܠܡܸܒ̣ܢܵܐ ܒܐܘܿܪܸܫܠܸܡ ܘܲܒ̣ܠܸܒ̣ܢܵܢ: ܘܲܒ̣ܟ݂ܠ ܐܲܪܥܵܐ ܕܫܘܼܠܛܵܢܹܗ.

7: ܘܟ݂ܠ ܥܲܡܵܐ ܕܝܼܬܲܪܘ ܡ̣ܢ ܐܵܡܘܿܪ̈ܵܝܹܐ: ܘܚܹܬ̣ܵܝܹ̈ܐ: ܘܦܲܪ̈ܙܵܝܹܐ: ܘܚܵܘܵܝܹ̈ܐ: ܘܝܵܒ̣ܘܿܣܵܝܹ̈ܐ: ܕܠܵܐ ܗ̄ܘ̣ܵܘ ܡ̣ܢ ܒܢܲܝ̈ ܝܼܣܪܵܝܹܠ.

8: ܒܢܲܝ̈ܗܘܿܢ ܕܝܼܬܲܪܘ ܡ̣ܢ ܒܵܬܲܪܗܘܿܢ ܒܐܲܪܥܵܐ: ܕܠܵܐ ܐܸܫܟܲܚܘ ܒܢܲܝ̈ ܝܼܣܪܵܝܹܠ ܠܡܵܘܒܵܕ݂ܘܼ ܐܸܢܘܿܢ: ܥܒܲܕ݂ ܐܸܢܘܿܢ ܫܠܹܝܡܘܿܢ ܕܢܸܗܘܘܿܢ ܠܹܗ ܥܲܒ̣̈ܕܹ̇ܐ: ܘܦܲܠܵܚܹ̈ܐ ܘܡܲܣ̈ܩܲܝ ܡܲܕܲܐܬ̣ܵܐ ܥܕܲܡܵܐ ܠܝܵܘܡܵܢܵܐ.

9: ܘܡ̣ܢ ܒܢܲܝ̈ ܝܼܣܪܵܝܹܠ ܠܵܐ ܥ̣ܒܲܕ݂ ܫܠܹܝܡܘܿܢ ܥܲܒ̣̈ܕܹܐ ܒܡܲܠܟ̇ܘܼܬܹܗ: ܡܸܛܠ ܕܗܸܢܘܿܢ ܗܘ̤ܵܘ ܓܲܒ̣ܪܹ̈ܐ: ܥܵܒ̣̈ܕܲܝ ܩܪܵܒ̣ܵܐ: ܘܪܵܘ̱ܪ̈ܒ̣ܵܢܹܐ ܒܙܵܘܓܵܘ̈ܗܝ: ܘܦܲܪ̈ܵܫܵܘܗܝ.

10: ܘܗܵܠܹܝܢ ܫܲܠܝܼ̈ܛܹܐ ܘܩܲܝܘܼܡܹ̈ܐ ܕܩܵܝܡܝܼܢ ܗ̄ܘ̣ܵܘ ܠܹܗ ܠܲܫܠܹܝܡܘܿܢ ܡܲܠܟܵܐ: ܡܲܐܬܹ̇ܝܢ ܘܚܲܡܫܝܼܢ ܕܡܲܥܒ̇ܕ݂ܝܼܢ ܗ̄ܘ̣ܵܘ ܠܥܲܡܵܐ: ܕܥܵܒ̣ܕ̇ܝܼܢ ܗ̄ܘ̣ܵܘ ܥܒ̣ܝܼ̈ܕ݂ܵܬ̣ܵܐ.

11: ܒܪܲܡ ܒܲܪܬܹܗ ܕܦܸܪܥܘܿܢ: ܐܲܣܩܵܗ̇ ܫܠܹܝܡܘܿܢ ܡ̣ܢ ܩܪܝܼܬܹܗ ܕܕ݂ܵܘܝܼܕ݂: ܠܒܲܝܬܵܐ ܕܲܒ̣ܢܵܐ ܠܵܗ̇. ܡܸܛܠ ܕܐܸܡܲܪ ܗ̄ܘ̣ܵܐ ܕܠܵܐ ܬܸܬܸ̇ܒ̣ ܐܲܢ̄ܬ̇ܬ̣ܵܐ ܥܲܡܝ ܒܒܲܝܬܹ̇ܗ ܕܕ݂ܵܘܝܼܕ݂: ܡܲܠܟܵܐ ܕܝܼܣܪܵܝܹܠ. ܡܸܛܠ ܕܩܲܕܝܼܫ ܗ̄ܘ̣: ܕܥܸܠܲܬ̤ ܠܹܗ ܩܹܒ̣ܘܿܬܹܗ ܕܡܵܪܝܵܐ.

12: ܗܵܝܕܹ̇ܝܢ ܡܩܲܪܸܒ̣ ܗ̄ܘ̣ܵܐ ܫܠܹܝܡܘܿܢ ܥܠܵـ̈ـܘܵܬ̣ܵܐ ܠܡܵܪܝܵܐ ܘܫܲܠܡܹ̈ܐ: ܥܲܠ ܡܲܕ݂ܒ̇ܚܵܐ ܕܡܵܪܝܵܐ ܕܲܒ̣ܢ̣ܵܐ ܩܕ݂ܵܡ ܣܪܘܿܓ̣ܵܐ.

13: ܘܚܘܼܫܒܵܢܵܐ ܕܟ݂ܠ ܝܘܿܡ ܡܲܣܸܩ ܗ̄ܘ̣ܵܐ: ܐܲܝܟ݂ ܦܘܼܩܕܵܢܵܐ ܕܡܘܼܫܹܐ: ܒܫܲܒܹ̈ܐ: ܘܲܒ̣ܥܹܐܕܹ̈ܐ: ܬܠܵܬ̣ ܙܲܒ̣ܢ̈ܝܼܢ ܒܫܲܢ̄ܬܵܐ: ܒܥܹܐܕ݂ܵܐ ܕܦܲܛܝܼܪܹ̈ܐ: ܘܲܒ̣ܥܹܐܕ݂ܵܐ ܕܨܵܘܡܵܐ: ܘܲܒ̣ܥܹܐܕ݂ܵܐ ܕܲܡܛܲܠܠܹ̈ܐ.

14: ܘܐܲܩܝܼܡ ܐܲܝܟ݂ ܢܵܡܘܿܣܵܐ ܕܕ݂ܵܘܝܼܕ݂ ܐܲܒ̣ܘܼܗܝ: ܟܵܗܢܹ̈ܐ ܥܲܠ ܥܒ̣ܝܼ̈ܕ݂ܵܬ̣ܗܘܿܢ: ܘܠܹܘܵܝܹ̈ܐ ܥܲܠ ܡܲܛܪ̈ܵܬ̣ܗܘܿܢ: ܠܲܡܫܲܒܵܚܘܼ ܘܠܲܡܫܲܡܵܫܘܼ ܩܕ݂ܵܡ ܟܵܗܢܹ̈ܐ: ܚܘܼܫܒܵܢ ܝܘܿܡ ܒܝܵܘܡܹܗ. ܘܬ̣ܵܪ̈ܥܹܐ ܐܲܝܟ݂ ܙܸܕ݂ܩܗܘܿܢ ܕܢܸܗܘܘܿܢ ܢܵܛ̇ܪܝܼܢ ܬܲܪ̈ܥܹܐ: ܟܠ ܝܘܿܡ ܡܸܛܠ ܕܗܵܟܲܢܵܐ ܦܲܩܸܕ݂ ܕܵܘܝܼܕ݂ ܡܲܠܟܵܐ ܕܝܼܣܪܵܝܹܠ: ܕܩܵܡ̣ ܒܡܲܠܟ̇ܘܼܬ̣ܵܐ: ܡ̣ܢ ܩܕ݂ܵܡ ܡܵܪܝܵܐ.

15: ܘܠܵܐ ܣ̣ܛܵܐ ܡ̣ܢ ܟܠ ܡܸܕܸ̇ܡ ܕܦܲܩܕܹܗ ܡܲܠܟܵܐ: ܥܲܠ ܟܵܗ̈ܢܹܐ ܘܥܲܠ ܠܹܘܵܝܹ̈ܐ: ܘܥܲܠ ܟܠܵܗ̇ ܬܸܫܡܸܫܬܵܐ ܕܒܲܝܬܵܐ.

16: ܘܲܬ̣ܩܸܢ ܗ̄ܘܲܝ̈ ܟܠܗܹܝܢ ܥܒ̣ܝܼ̈ܕ݂ܵܬܹܗ ܕܲܫܠܹܝܡܘܿܢ: ܡ̣ܢ ܝܵܘܡܵܐ ܕܲܢܦܲܠ̣ ܫܲܬ̣ܐ̱ܣܹ̈ܐ ܕܒܲܝܬܹ̇ܗ ܕܡܵܪܝܵܐ: ܥܕܲܡܵܐ ܠܝܵܘܡܵܐ ܕܲܓ̣ܡܲܪ ܟܠܹܗ ܥܒ̣ܵܕܹ̇ܗ.

17: ܗܵܝܕܹ̇ܝܢ ܐܸܙܲܠ̣ ܗ̄ܘ̣ܵܐ ܫܠܹܝܡܘܿܢ ܠܥܸܨܝܼܢܘܿ ܓܒܲܪ: ܩܪܝܼܬ̣ܵܐ ܕܐܝܼܬ̣ ܗ̄ܘ̣ܵܐ ܠܘܼܩܒܲܠ ܐܲܠܘܼܬ̣: ܥܲܠ ܣܸܦܬ̣ܵܐ ܕܝܲܡܵܐ ܒܐܲܪܥܵܐ ܕܐܲܕ݂ܘܿܡ.

18: ܘܫܲܕܲܪ ܚܝܼܪܵܡ ܒܲܣܦܝܼܢܹ̈ܐ ܠܥܲܒ̣ܕܵܘ̈ܗܝ: ܓܲܒ̣ܪܹ̈ܐ ܣܲܦܵܢܹ̈ܐ ܕܝܵܕ݂ܥܝܼܢ ܠܲܡܕܲܒܵܪܘܼ ܐܸܠܦܹ̈ܐ ܕܝܲܡܵܐ: ܥܲܡ ܥܲܒ̣ܕܵܘ̈ܗܝ ܕܲܫܠܹܝܡܘܿܢ. ܘܐܸܙܲܠܘ ܠܐܵܘܦܹܝܪ ܡܕ݂ܝܼܢ̄ܬܵܐ. ܘܲܢܣܲܒ̣ܘ ܡ̣ܢ ܬܲܡܵܢ ܐܲܪܒܲܥܡܵܐܐ ܟܲܟ̇ܪ̈ܝܼܢ ܕܕܲܗܒ̣ܵܐ. ܘܐܲܝܬ̇ܝܼܘ ܠܡܲܠܟܵܐ ܫܠܹܝܡܘܿܢ.

ܩܹܦܵܠܹܐܘܿܢ : ܛ.

1: ܘܡܲܠܟܲܬ̣ ܫܒ̣ܵܐ ܫܸܡܥܲܬ̤ ܛܸܒܹ̇ܗ ܕܲܫܠܹܝܡܘܿܢ. ܘܐܸܬ̣ܵܬ̤ ܠܲܡܢܲܣܵܝܘܼܬܹܗ ܕܲܫܠܹܝܡܘܿܢ ܒܐܘܼܚ̈ܕܵܬ̣ܵܐ. ܘܐܸܬ̣ܵܬ̤ ܠܐܘܿܪܸܫܠܸܡ: ܒܚܲܝܠܵܐ ܕܣܲܓ̇ܝܼ ܛܵܒ̣: ܘܓܲܡ̈ܠܹܐ ܕܲܛܥܝܼܢܝܼܢ ܒܸܣܡܹ̈ܐ: ܘܕܲܗܒ̣ܵܐ ܕܣܲܓ̇ܝܼ ܛܵܒ̣: ܘܛܲܒ̣̈ܥܹܐ ܛܵܒܹ̈ܐ. ܘܐܸܬ̣ܵܬ̤ ܠܘܵܬ̣ ܡܲܠܟܵܐ ܫܠܹܝܡܘܿܢ: ܘܲܓ̣ܠܵܬ̤ ܠܹܗ ܟܠ ܕܲܒ̣ܠܸܒܵܗ̇.

2: ܘܲܓ̣ܠ̣ܵܐ ܠܵܗ̇ ܡܲܠܟܵܐ ܫܠܹܝܡܘܿܢ ܟܠܡܸܕܸ̇ܡ: ܘܐ̄ܪܵܙ ܠܸܒܹ̇ܗ. ܘܠܵܐ ܡܸܕܸ̇ܡ ܟܣܵܐ ܡܲܠܟܵܐ ܕܠܵܐ ܓܠ̣ܵܐ ܠܵܗ̇.

3: ܘܲܚܙܵܬ̤ ܡܲܠܟܲܬ̣ ܫܒ̣ܵܐ ܚܸܟ݂ܡ̱ܬܹܗ ܕܲܫܠܹܝܡܘܿܢ: ܘܒܲܝܬܵܐ ܕܲܒ̣ܢܵܐ.

4: ܘܡܵܘܟܲܠ ܦܵܬ̣ܘܿܪܹܗ: ܘܡܵܘܬܲܒ̣ ܥܲܒ̣ܕܵܘ̈ܗܝ: ܘܲܩܝܵܡ ܡܫܲܡܫܵܢܵܘ̈ܗܝ: ܘܲܠܒ̣ܘܼܫܲܝ̈ܗܘܿܢ: ܘܫܵܩܵـ̈ـܘܵܬܹܗ ܘܲܠܒ̣ܘܿܫܲܝ̈ܗܘܿܢ: ܘܕܸܒ̣ܚܹ̈ܐ ܕܲܡܕܲܒܲܚ ܗ̄ܘ̣ܵܐ ܒܒܲܝܬܹ̇ܗ ܕܡܵܪܝܵܐ. ܘܠܵܐ ܗܘ̤ܵܬ̣ ܒܵܗ̇ ܪܘܼܚܵܐ ܬܘܼܒ̣ ܠܡܸܚܙܵܐ.

5: ܘܐܵܡ̇ܪܵܐ ܠܡܲܠܟܵܐ ܫܠܹܝܡܘܿܢ: ܫܪܝܼܪܵܐ ܗ̄ܘ̣ܵܬ̣ ܡܸܠܬ̣ܵܐ ܕܫܵܡܥܵܐ ܗ̄ܘܹ̇ܝܬ̣ ܒܲܡܕ݂ܝܢܲܬ̣ܝ: ܥܲܠ ܦܸܬ̣ܓ̣ܵܡܲܝ̈ܟ: ܘܥܲܠ ܚܸܟ݂ܡ̱ܬ̣ܵܟ݂.

6: ܘܠܵܐ ܡܗܲܝܡܢܵܐ ܗ̄ܘܹ̇ܝܬ̣: ܥܕܲܡܵܐ ܠܐܲܝܟܵܐ ܕܐܸܬܹ̇ܝܬ̣ ܘܲܚܙܲܝ̈ ܥܲܝܢܲܝ̈ ܘܗܵܐ ܠܵܐ ܚܵܘܝܘܼܢܝ ܦܸܠܓܵܐ. ܐܲܣܓܝܼܬ̇ ܚܸܟ݂ܡ̱ܬ̣ܵܟ݂: ܘܐܵܘܣܸܦܬ̇ ܥܲܠ ܛܸܒܵܐ ܕܫܸܡܥܹ̇ܬ̣.

7: ܛܘܼܒܲܝܗܘܿܢ ܠܥܲܒ̣ܕܲܝ̈ܟ ܗܵܢ̇ܘܿܢ ܕܩܵܝ̇ܡܝܼܢ ܩܕ݂ܵܡܲܝܟ ܐܲܡܝܼܢܵܐܝܼܬ̣: ܘܫܵܡ̇ܥܝܼܢ ܚܸܟ݂ܡ̱ܬ̣ܵܟ݂.

8: ܘܢܸܗܘܹܐ ܡܵܪܝܵܐ ܐܲܠܵܗܵܟ݂ ܒܪܝܼܟ݂ ܗܵܘ̇ ܡܲܢ ܕܲܓ̣ܒ̣ܵܟ݂: ܘܐܵܘܬ̇ܒ̣ܵܟ݂ ܥܲܠ ܟܘܼܪܣܝܵܐ ܕܡܲܠܟ̇ܘܼܬ̣ܵܐ ܕܝܼܣܪܵܝܹܠ. ܘܡܸܛܠ ܕܲܪܚܸܡ ܡܵܪܝܵܐ ܠܝܼܣܪܵܝܹܠ: ܐܲܩܝܼܡܵܟ݂ ܡܲܠܟܵܐ ܥܠܲܝܗܘܿܢ ܠܥܵܠܲܡ: ܠܡܸܥܒܲܕ݂ ܕܝܼܢܵܐ ܘܙܲܕ̇ܝܼܩܘܼܬ̣ܵܐ.

9: ܘܝܸܗ̄ܒܲܬ̤ ܠܡܲܠܟܵܐ ܡܵܐܐ ܘܥܸܣܪܝܼܢ ܟܲܟ̇ܪܹ̈ܐ ܕܕܲܗܒ̣ܵܐ: ܘܒܸܣܡܹ̈ܐ ܣܲܓ̇ܝܼ̈ܐܹܐ ܕܛܵܒ̣: ܘܛܲܒ̣̈ܥܹܐ ܛܵܒܹ̈ܐ: ܘܠܵܐ ܐܸܬ̣ܚ̄ܙܝܼܘ ܐܲܝܟ݂ ܒܸܣܡܹ̈ܐ ܗܵܠܹܝܢ ܒܥܵܠܡܵܐ: ܕܝܸܗ̄ܒܲܬ̤ ܡܲܠܟܲܬ̣ ܫܒ̣ܵܐ ܠܡܲܠܟܵܐ ܫܠܹܝܡܘܿܢ.

10: ܘܐܵܦ ܥܲܒ̣ܕܵܘ̈ܗܝ ܕܚܝܼܪܵܡ: ܘܥܲܒ̣ܕܵܘ̈ܗܝ ܕܡܲܠܟܵܐ ܫܠܹܝܡܘܿܢ: ܐܲܝܬ̇ܝܼܘ ܕܲܗܒ̣ܵܐ ܡ̣ܢ ܐܵܘܦܹܝܪ.

11: ܘܐܲܝܬ̇ܝܼܘ ܩܲܝܣܹ̈ܐ ܕܐܸܫܟܵܪܥܵܐ: ܠܣܦ̮ܣܹ̈ܠܹܐ ܠܒܲܝܬܹ̇ܗ ܕܡܵܪܝܵܐ: ܘܲܠܒܲܝܬܹ̇ܗ ܕܡܲܠܟܵܐ ܫܠܹܝܡܘܿܢ: ܘܟܸܢܵܪܹ̈ܐ ܠܲܡܫܲܒ̇ܚܵܢܹ̈ܐ ܘܠܵܐ ܐܸܬ̣ܚ̄ܙܝܼܘ ܐܲܟ݂ܘܵܬ̣ܗܘܿܢ ܒܐܲܪܥܵܐ ܕܲܝܗܘܼܕ݂ܵܐ.

12: ܘܡܲܠܟܵܐ ܫܠܹܝܡܘܿܢ ܝܲܗ̄ܒ̣ ܠܡܲܠܟܲܬ̣ ܫܒ̣ܵܐ: ܟܠܡܸܕܸ̇ܡ ܕܲܫܐܸܠܬܹܗ: ܠܒܲܪ ܡ̣ܢ ܕܝܲܗ̄ܒ̣ ܠܵܗ̇. ܘܲܓ̣ܠܵܐ ܠܵܗ̇ ܟܠ ܡܸܕܸ̇ܡ ܕܐܝܼܬ̣ ܗ̄ܘ̣ܵܐ ܒܠܸܒܵܗ̇. ܘܩܵܡܲܬ̤ ܐܸܙܲܠ̄ܬ̤ ܠܲܡܕ݂ܝܼܢ̄ܬܵܗ̇ ܗ̤ܝ ܘܥܲܒ̣ܕܹ̇ܝ̈ܗ̇.

13: ܘܲܗܘ̤ܵܐ ܡܸܢܝܵܢܵܐ ܕܕܲܗܒ̣ܵܐ ܕܥܵܐܹ̇ܠ ܗ̄ܘ̣ܵܐ ܠܲܫܠܹܝܡܘܿܢ ܒܫܲܢ̄ܬܵܐ: ܫܸܬ̣ܡܵܐܐ ܘܸܫܬ̇ܝܼܢ ܘܫܸܬ̣ ܟܲܟ̇ܪ̈ܝܼܢ ܕܕܲܗܒ̣ܵܐ.

14: ܠܒܲܪ ܡ̣ܢ ܡܲܟ݂ܣܹ̈ܐ ܕܲܡܕ݂ܝܼ̈ܢܵܬ̣ܵܐ: ܘܡܵܘ̈ܒ̇ܠܹܐ ܕܬܲܓܵܪܹ̈ܐ ܘܟ݂ܠ ܡܲܠ̈ܟܹ̇ܐ ܕܥܲܪ̈ܒ̣ܵܝܹܐ. ܘܫܲܠܝܼܛܵܢܹ̈ܐ ܕܐܲܪܥܵܐ: ܡܲܝܬܹ̇ܝܢ ܗ̄ܘ̣ܵܘ ܟܸܣܦܵܐ ܘܕܲܗܒ̣ܵܐ ܠܲܫܠܹܝܡܘܿܢ.

15: ܘܲܥܒܲܕ݂ ܡܲܠܟܵܐ ܫܠܹܝܡܘܿܢ ܡܲܐܬܹ̇ܝܢ ܣܲܟ̇ܪ̈ܝܼܢ ܕܕܲܗܒ̣ܵܐ ܛܵܒ̣ܵܐ. ܘܫܸܬ̣ܡܵܐܐ ܕܪ̈ܝܼܟ݂ܘܿܢܹܐ ܕܕܲܗܒ̣ܵܐ ܛܵܒ̣ܵܐ: ܩܪܲܡ ܠܣܲܟ̇ܪܵܐ ܚܕ݂ܵܐ.

16: ܘܲܬ̣ܠܵܬ̣ܡܵܐܐ ܡܓܲܢܝܼ̈ܢ ܕܕܲܗܒ̣ܵܐ ܛܵܒ̣ܵܐ: ܘܲܬ̣ܠܵܬ̣ܵܐ ܡܢ̈ܝܼܢ ܕܕܲܗܒ̣ܵܐ: ܥܒ̣ܝܼܕ݂ ܒܹܝܬ̣ ܡܵܘܚܲܕ݂ ܐܝܼܕ݂ܵܐ ܕܲܡܓܲܢܵܐ ܚܕ݂ܵܐ. ܘܝܲܗ̄ܒ̣ ܐܸܢܹܝܢ ܡܲܠܟܵܐ ܒܹܝܬ̣ ܥܵܒ̣ܵܐ ܕܠܸܒ̣ܢܵܢ.

17: ܘܲܥܒܲܕ݂ ܡܲܠܟܵܐ ܟܘܼܪܣܝܵܐ ܕܫܸܢܵܐ ܪܲܒܵܐ: ܘܩܲܪܡܹܗ ܕܲܗܒ̣ܵܐ ܕܲܟ݂ܝܵܐ.

18: ܫܬܵܐ ܕܲܪ̈ܓ̣ܝܼܢ ܠܟ݂ܘܼܪܣܝܵܐ. ܘܣܸܦܬܹܗ ܕܟ݂ܘܼܪܣܝܵܐ ܟܪܝܼܟ݂ܵܐ ܡ̣ܢ ܒܸܣܬ̇ܪܹܗ. ܘܐܝܼ̈ܕ݂ܵܗܵܬ̣ܵܐ ܡܸܟܵܐ ܘܡܸܟܵܐ ܥܲܠ ܐܲܬ̣ܪܵܐ ܕܡܵܘܬ̇ܒ̣ܵܐ. ܘܲܬ̣ܪܹܝܢ ܐܲܪ̈ܝܵܘܵܬ̣ܵܐ ܩܵܝ̇ܡܝܼܢ ܒܸܣܬܲܪ ܐܝܼ̈ܕ݂ܵܗܵܬ̣ܵܐ.

19: ܘܲܬ̣ܪܸܥܣܲܪ ܐܲܪ̈ܝܵܘܵܬ̣ܵܐ ܩܵܝܡܝܼܢ ܬܲܡܵܢ: ܥܲܠ ܫܬܵܐ ܕܲܪ̈ܓ̣ܝܼܢ: ܡܸܟܵܐ ܘܡܸܟܵܐ. ܘܠܵܐ ܐܸܬ̣ܥ̱ܒܸܕ݂ ܗܵܟܲܢܵܐ ܒܟ݂ܠܗܹܝܢ ܡܲܠ̈ܟ̇ܘܵܬ̣ܵܐ.

20: ܘܟ݂ܠܗܘܿܢ ܡܵܐܢܹ̈ܐ ܕܬܸܫܡܸܫܬܹ̇ܗ ܕܡܲܠܟܵܐ ܫܠܹܝܡܘܿܢ ܕܕܲܗܒ̣ܵܐ: ܘܟ݂ܠ ܡܵܐܢܹ̈ܐ ܕܒܹܝܬ̣ ܓܲܙܹܗ ܕܡܲܠܟܵܐ ܕܕܲܗܒ̣ܵܐ ܣܢܝܼܢܵܐ. ܘܟܸܣܦܵܐ ܠܵܐ ܚܫܝܼܒ̣ ܗ̄ܘ̣ܵܐ ܒܝܵܘ̈ܡܵܬܹܗ ܕܲܫܠܹܝܡܘܿܢ ܐܲܝܟ݂ ܡܸܕܸ̇ܡ.

21: ܡܸܛܠ ܕܲܣܦܝܼܢܹ̈ܐ ܓܹܝܪ ܐܝܼܬ̣ ܗ̄ܘܲܝ̈ ܠܲܫܠܹܝܡܘܿܢ ܡܲܠܟܵܐ: ܕܐܵܙܵܠ̄ـ̈ـܢ ܗ̄ܘܲܝ̈ ܠܬܲܪܫܝܼܫ ܥܲܡ ܥܲܒ̣ܕܵܘ̈ܗܝ ܕܚܝܼܪܵܡ ܚܕ݂ܵܐ ܠܲܬ̣ܠܵܬ̣ ܫܢ̈ܝܼܢ ܐܵܬ̣̈ܝܵܢ ܗ̄ܘܲܝ̈. ܘܲܣܦܝܼܢܹ̈ܐ ܕܐܵܙܵܠ̄ـ̈ـܢ ܗ̄ܘܲܝ̈ ܠܬܲܪܫܝܼܫ: ܛܥܝܼ̈ܢܵܢ ܟܸܣܦܵܐ: ܘܕܲܗܒ̣ܵܐ: ܘܦܝܼܠܹ̈ܐ: ܘܩܘܿܦܹ̈ܐ: ܘܛܵܘ̈ܣܹܐ.

22: ܘܝܼܪܸܒ̣ ܡܲܠܟܵܐ ܫܠܹܝܡܘܿܢ: ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܐܲܪܥܵܐ ܒܥܘܼܬ̣ܪܵܐ ܘܲܒ̣ܚܸܟ݂ܡ̱ܬ̣ܵܐ.

23: ܘܟ݂ܠܗܘܿܢ ܡܲܠ̈ܟܹ̇ܐ ܕܐܲܪܥܵܐ ܒܵܥܹ̇ܝܢ ܠܡܸܚܙܵܐ ܐܲܦܵܘ̈ܗܝ ܕܲܫܠܹܝܡܘܿܢ: ܘܲܠܡܸܫܡܲܥ ܚܸܟ݂ܡ̱ܬ̣ܵܐ ܕܝܲܗ̄ܒ̣ ܡܵܪܝܵܐ ܒܠܸܒܹ̇ܗ.

24: ܘܗܸܢܘܿܢ ܡܲܝܬܹ̇ܝܢ ܗ̄ܘ̣ܵܘ ܠܹܗ ܓܒܲܪ ܩܘܼܪܒܵܢܹܗ: ܡܵܐܢܲܝ̈ ܣܹܐܡܵܐ ܘܕܲܗܒ̣ܵܐ: ܘܢܲܚ̈ܬܹ̇ܐ: ܘܡܘܼܪܵܐ: ܘܒܸܣܡܹ̈ܐ: ܘܪ̈ܲܚܫܵܐ: ܘܟ݂ܘܿܕܲܢ̈ܘܵܬ̣ܵܐ: ܒܚܘܼܫܒܵܢܵܐ ܕܟ݂ܠ ܫܢܵܐ ܒܲܫܢܵܐ.

26: ܘܲܗܘ̤ܵܐ ܫܠܹܝܡܘܿܢ ܫܲܠܝܼܛܵܐ ܒܟ݂ܠܗܹܝܢ ܡܲܠ̈ܟ̇ܘܵܬ̣ܵܐ: ܡ̣ܢ ܢܲܗܪܵܐ ܦܪܵܬ̣ ܘܲܥܕܲܡܵܐ ܠܐܲܪܥܵܐ ܕܲܦܠܸܫܬܵܝܹ̈ܐ: ܘܲܥܕܲܡܵܐ ܠܲܬ̣ܚܘܼܡܵܐ ܕܡܸܨܪ̈ܵܝܹܐ.

27: ܘܝܲܗ̄ܒ̣ ܡܲܠܟܵܐ ܫܠܹܝܡܘܿܢ ܒܐܘܿܪܸܫܠܸܡ ܟܸܣܦܵܐ ܐܲܝܟ݂ ܟܹܐܦܹ̈ܐ. ܘܐܲܪ̈ܙܹܐ ܝܲܗ̄ܒ̣ ܐܲܝܟ݂ ܚܵܠܵܐ ܕܐܝܼܬ̣ ܥܲܠ ܣܦܲܬ̣ ܝܲܡܵܐ ܣܘܿܓ̣ܵܐܐ.

28: ܘܙܵܒ̣ܢܝܼܢ ܗ̄ܘ̣ܵܘ ܪ̈ܲܟ݂ܫܵܐ ܠܲܫܠܹܝܡܘܿܢ: ܡ̣ܢ ܡܸܨܪܹܝܢ ܘܡ̣ܢ ܟܠܗܹܝܢ ܡܕ݂ܝܼ̈ܢܵܬ̣ܵܐ.

30: ܘܐܲܡ̣ܠܸܟ݂ ܫܠܹܝܡܘܿܢ ܥܲܠ ܐܘܿܪܸܫܠܸܡ ܘܥܲܠ ܝܼܣܪܵܝܹܠ ܐܲܪܒ̇ܥܝܼܢ ܫܢ̈ܝܼܢ.

31: ܘܲܫܟܸܒ̣ ܫܠܹܝܡܘܿܢ ܥܲܡ ܐܲܒ̣ܵـ̈ـܗܵܬܹܗ. ܘܩܲܒ̣ܪܘܼܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܐܲܒ̣ܘܼܗܝ ܘܐܲܡ̣ܠܸܟ݂ ܪܚܸܒ̣ܥܲܡ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ : ܝ .

1: ܘܐܸܙܲܠ̣ ܪܚܸܒ̣ܥܲܡ ܠܲܫܟܹܝܡ: ܡܸܛܠ ܕܠܲܫܟܹܝܡ ܐܸܙܲܠ ܟܠܹܗ ܝܼܣܪܵܝܹܠ: ܠܲܡܩܵܡܘܼܬܹܗ ܡܲܠܟܵܐ.

2: ܘܲܗܘ̤ܵܐ ܕܟܲܕ݂ ܫ̣ܡܲܥ ܝܘܿܪܲܒ̣ܥܲܡ ܘܟ݂ܠܹܗ ܝܼܣܪܵܝܹܠ.

3: ܐܸܬ̣ܵܘ ܘܐܵܡ̇ܪܝܼܢ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ.

4: ܐܲܒ̣ܘܼܟ݂ ܐܲܣܓ̇ܝܼ ܫܘܼܥܒܵܕܲܢ. ܘܐܲܢ̄ܬ̇ ܗܵܫܵܐ ܐܲܩܸܠ ܡ̣ܢ ܫܘܼܥܒܵܕܹܗ ܕܐܲܒ̣ܘܼܟ݂ ܩܲܫܝܵܐ: ܘܡ̣ܢ ܡܵܪܘܼܬܹܗ ܥܲܫܝܼܢܬܵܐ ܘܢܸܦ̱ܠܚܵܟ݂.

5: ܘܐܸܡܲܪ ܠܗܘܿܢ: ܙܸܠܘ: ܘܡܸܟܵܐ ܠܲܬ̣ܠܵܬ̣ܵܐ ܝܵܘ̈ܡܝܼܢ ܬܵܘ ܠܘܵܬ̣ܝ ܘܐܸܬ̣ܵܐ ܥܲܡܵܐ ܠܘܵܬܹܗ.

6: ܘܐܸܬ̣ܡܲܠܲܟ݂ ܡܲܠܟܵܐ ܪܚܸܒ̣ܥܲܡ: ܒܩܲܫܝܼ̈ܫܹܐ ܕܦܵܠܚܝܼܢ ܗ̄ܘ̣ܵܘ ܠܲܫܠܹܝܡܘܿܢ ܐܲܒ̣ܘܗܝ ܟܲܕ݂ ܚܲܝ ܗ̄ܘ̣ܵܐ. ܘܐܸܡܲܪ ܗ̄ܘ̣ܵܐ: ܡܵܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܠܝܼ: ܕܢܲܗܦܸܟ݂ ܦܸܬ̣ܓ̣ܵܡܵܐ ܠܥܲܡܵܐ ܗܵܢܵܐ.

7: ܘܡܲܠܸܠ̣ܘ ܥܲܡܹܗ ܘܐܸܡܲܪܘ ܠܹܗ: ܐܸܢܗ̤ܘ ܕܛܵܒ̣ܵـ̈ـܬ̣ܵܐ ܬܸܥܢܹܐ ܠܥܲܡܵܐ ܗܵܢܵܐ ܘܬܸܚܕܹ̇ܐ ܠܘܼܩܒܲܠ ܐܲܦܲܝ̈ܗܘܿܢ: ܘܲܬ̣ܡܲܠܸܠ ܥܲܡܗܘܿܢ ܡܸܠܹ̈ܐ ܛܵܒ̣ܵـ̈ـܬ̣ܵܐ: ܢܸܗܘܘܿܢ ܠܵܟ݂ ܥܲܒ̣̈ܕܹ̇ܐ ܛܵܒܹ̈ܐ: ܘܦܲܠܵܚܹ̈ܐ ܟܠ ܝܵܘ̈ܡܵܬ̣ܵܐ ܕܚܲܝܲܝ̈ܟ.

8: ܘܲܫܒܲܩ ܡܸܠܟܵܐ ܕܩܲܫܝܼܫܹ̈ܐ ܕܡܲܠܟ̇ܘܼܗܝ. ܘܐܸܙܲܠ̣ ܐܸܬ̣ܡܲܠܲܟ݂ ܒܲܛܠܵܝܹ̈ܐ ܕܲܪܒ̣ܵܘ ܥܲܡܹܗ ܕܩܵܝ̇ܡܝܼܢ ܩܕ݂ܵܡܵܘܗܝ.

9: ܘܐܸܡܲܪ ܠܗܘܿܢ: ܡܵܢܵܐ ܡܵܠܟ̇ܝܼܢ ܐ̄ܢܬ̇ܘܿܢ ܠܝܼ: ܕܢܲܗܦܸܟ݂ ܦܸܬ̣ܓ̣ܵܡܵܐ ܠܥܲܡܵܐ ܗܵܢܵܐ ܕܡܲܠܸܠ̣ܘ ܥܲܡܝ: ܘܐܵܡ̇ܪܝܼܢ ܠܝܼ: ܕܐܲܩܸܠ ܡܸܢܲܢ ܫܘܼܥܒܵܕ݂ܵܐ ܕܫܲܥܒ̇ܕܲܢ ܐܲܒ̣ܘܼܟ݂: ܘܢܸܦܠ̱ܚܵܟ݂.

10: ܘܡܲܠܸܠܘ ܥܲܡܹܗ ܛܠܵܝܹ̈ܐ ܕܲܪܒ̣ܵܘ ܥܲܡܹܗ ܒܫܘܼܩܹ̈ܐ: ܘܐܵܡ̇ܪܝܼܢ ܠܹܗ: ܗܵܟܲܢܵܐ ܬܹܐܡܲܪ ܠܥܲܡܵܐ ܕܡܲܠܸܠ ܥܲܡܵܟ݂: ܘܐܵܡ̇ܪܝܼܢ ܠܵܟ݂: ܕܐܲܒ̣ܘܼܟ݂ ܐܲܥܫܸܢ ܫܘܼܥܒܵܕܲܢ: ܘܐܲܢ̄ܬ̇ ܐܲܩܸܠ ܡ̣ܢ ܫܘܼܥܒܵܕܲܢ. ܗܵܟܲܢܵܐ ܬܹܐܡܲܪ ܠܗܘܿܢ: ܕܚܸܨܪܝ ܥܲܒ̣ܝܵܐ ܗ̄ܝܼ ܡ̣ܢ ܟܪܵܬܹܗ ܕܐܵܒ̣ܝ.

11: ܘܐܵܦ ܗܵܫܵܐ ܐܵܒ̣ܝ ܫܲܥܒܸ̇ܕ݂ܟ݂ܘܿܢ ܫܘܼܥܒܵܕ݂ܵܐ ܩܲܫܝܵܐ. ܘܐܸܢܵܐ ܡܵܘܣܸܦ ܐ̄ܢܵܐ ܥܲܠ ܫܘܼܥܒܵܕ݂ܟ݂ܘܿܢ. ܐܵܒ̣ܝ ܪܕ݂ܵܟ݂ܘܿܢ ܒܫܵܘ̈ܛܹܐ: ܘܐܸܢܵܐ ܪܵܕܹܐ ܐ̄ܢܵܐ ܠܟ݂ܘܿܢ ܒܡܵܪ̈ܲܓ̣ܢܹܐ.

12: ܘܐܸܬ̣ܵܐ ܝܘܿܪܲܒ̣ܥܲܡ: ܘܟ݂ܠܹܗ ܥܲܡܵܐ ܒܝܵܘܡܵܐ ܕܲܬ̣ܠܵܬ̣ܵܐ: ܐܲܝܟܲܢܵܐ ܕܲܫܐܸܠ̣ ܡܸܢܗܘܿܢ ܙܲܒ̣ܢܵܐ: ܘܐܸܡܲܪ ܠܗܘܿܢ ܕܬ̣ܵܘ ܠܘܵܬ̣ܝ ܒܝܵܘܡܵܐ ܕܲܬ̣ܠܵܬ̣ܵܐ.

13: ܘܲܥܢ̣ܵܐ ܐܸܢܘܿܢ ܡܲܠܟܵܐ ܡܸܠܹ̈ܐ ܩܲܫ̈ܝܵܬ̣ܵܐ. ܘܲܫܒܲܩ ܡܲܠܟܵܐ ܪܚܸܒ̣ܥܲܡ: ܡܸܠܟܵܐ ܕܩܲܫܝܼܫܹ̈ܐ ܕܡܲܠܟ̇ܘܼܗܝ.

14: ܘܡܲܠܸܠ̣ ܥܲܡܗܘܿܢ ܐܲܝܟ݂ ܡܸܠܹ̈ܐ ܕܲܛܠܵܝܹ̈ܐ: ܘܐܸܡܲܪ ܠܗܘܿܢ: ܐܵܒ̣ܝܼ ܐܲܣܓ̇ܝܼ ܫܘܼܥܒܵܕ݂ܟ݂ܘܿܢ. ܘܐܸܢܵܐ ܡܵܘܣܸܦ ܐ̄ܢܵܐ ܥܲܠ ܫܘܼܥܒܵܕ݂ܟ݂ܘܿܢ ܐܵܒ̣ܝ ܪܕ݂ܵܟ݂ܘܿܢ ܒܫܵܘ̈ܛܹܐ: ܐܸܢܵܐ ܪܵܕܹܐ ܐ̄ܢܵܐ ܠܟ݂ܘܿܢ ܒܡܵܪ̈ܲܓ̣ܢܹܐ.

15: ܘܠܵܐ ܫ̣ܡܲܥܘ ܥܲܡܵܐ ܡ̣ܢ ܡܲܠܟܵܐ. ܡܸܛܠ ܕܲܗܘ̤ܵܬ̣ ܗܦܝܼܟ݂ܬܵܐ ܡ̣ܢ ܩܕ݂ܵܡ ܡܵܪܝܵܐ. ܕܬܸܫܲܪ ܡܸܠܬܹܗ ܕܐܲܚܝܼܵܐ ܢܒ̣ܝܼܵܐ ܕܡ̣ܢ ܫܝܼܠܘܿ: ܥܲܠ ܝܘܿܪܲܒ̣ܥܲܡ ܒܲܪ ܢܵܒ̣ܵܛ.

16: ܘܲܚܙ̣ܵܘ ܟܠܹܗ ܝܼܣܪܵܝܹܠ: ܕܠܵܐ ܫ̣ܡܲܥ ܠܗܘܿܢ ܡܲܠܟܵܐ. ܘܐܲܬ̣ܝܼܒ̣ܘܼܗܝ ܥܲܡܵܐ ܦܸܬ̣ܓ̣ܵܡܵܐ ܠܡܲܠܟܵܐ: ܘܐܵܡ̇ܪܝܼܢ: ܠܲܝܬ̇ ܠܲܢ ܡܢܵܬ̣ܵܐ ܒܕ݂ܵܘܝܼܕ݂. ܐܵܦܠܵܐ ܝܵܪܬ̇ܘܼܬ̣ܵܐ ܒܲܒ̣ܪܹܗ ܕܐܝܼܫܲܝ ܐ̄ܢܵܫ ܠܒܲܝܬܹ̇ܗ. ܙܸܠܘ ܝܼܣܪܵܝܹܠ. ܡܸܟܹ̇ܝܠ ܚܙܝܼ ܒܲܝܬܵܟ݂ ܕܵܘܝܼܕ݂. ܘܐܸܙܲܠ̣ܘ ܝܼܣܪܵܝܹܠ ܠܒ̣ܵܬܲܝ̈ܗܘܿܢ.

17: ܘܲܕ݂ܝܵܬ̣ܒ̇ܝܼܢ ܒܩܘܼܪ̈ܝܵܐ ܕܲܝܗܘܼܕ݂ܵܐ: ܐܲܡ̣ܠܸܟ݂ܘ ܥܠܲܝܗܘܿܢ ܠܲܪܚܸܒ̣ܥܲܡ.

18: ܘܫܲܕܲܪ ܥܠܲܝܗܘܿܢ ܡܲܠܟܵܐ ܪܚܸܒ̣ܥܲܡ ܠܐܲܕ݂ܘܿܢܝܼܪܲܡ ܕܫܲܠܝܼܛ ܗ̄ܘ̣ܵܐ ܥܲܠ ܡܲܣܩܲܝ̈ ܡܲܕܲܐܬ̣ܵܐ. ܘܪܲܓ̣ܡܘܼܗܝ ܟܠܹܗ ܝܼܣܪܵܝܹܠ ܒܟܹܐܦܹ̈ܐ: ܘܡܝܼܬ. ܘܡܲܠܟܵܐ ܪܚܸܒ̣ܥܲܡ ܣܠܸܩ̣ ܘܝܼܬܸܒ̣ ܠܹܗ ܒܙܵܘܓܵܐ: ܠܡܸܥܪܲܩ ܠܐܘܿܪܸܫܠܸܡ.

19: ܘܲܡܪܲܕ݂ܘ ܒܢܲܝ̈ ܝܼܣܪܵܝܹܠ ܥܲܠ ܒܲܝܬܹ̇ܗ ܕܕ݂ܵܘܝܼܕ݂: ܥܕܲܡܵܐ ܠܝܵܘܡܵܢܵܐ.

ܩܹܦܵܠܹܐܘܿܢ : ܝܐ .

1: ܘܐܸܬ̣ܵܐ ܪܚܸܒ̣ܥܲܡ ܠܐܘܿܪܸܫܠܸܡ. ܘܟܲܢܸܫ̣ ܠܲܕ݂ܒܹܝܬ̣ ܝܼܗܘܼܕ݂ܵܐ: ܘܲܠܫܲܒ̣ܛܵܐ ܕܒܸܢܝܵܡܹܝܢ: ܡܵܐܐ ܘܲܬ̣ܡܵܢܐܝܼܢ ܐܲܠܦ̈ܝܼܢ: ܓܲܒ̣ܪܹ̈ܐ ܫܵܡܛܲܝ̈ ܣܲܝܦܵܐ: ܘܥܵܒ̣ܕܲܝ̈ ܩܪܵܒ̣ܵܐ: ܠܡܸܬ̣ܟܲܬܵܫܘܼ ܥܲܡ ܝܼܣܪܵܝܹܠ: ܠܡܲܗܦܵܟ݂ܘܼ ܡܲܠܟ̇ܘܼܬ̣ܵܐ ܠܲܪܚܸܒ̣ܥܲܡ ܒܪܹܗ ܕܲܫܠܹܝܡܘܿܢ.

2: ܘܲܗܘ̤ܵܐ ܦܸܬ̣ܓ̣ܵܡܵܐ ܕܡܵܪܝܵܐ ܥܲܠ ܫܡܲܥܝܵܐ: ܘܐܸܡܲܪ ܠܹܗ.

3: ܐܸܡܲܪ ܠܲܪܚܸܒ̣ܥܲܡ ܒܪܹܗ ܕܲܫܠܹܝܡܘܿܢ ܡܲܠܟܵܐ ܕܲܝܗܘܼܕ݂ܵܐ: ܘܥܲܠ ܒܹܝܬ̣ ܒܸܢܝܵܡܹܝܢ: ܘܥܲܠ ܟܠܹܗ ܝܼܣܪܵܝܹܠ: ܘܥܲܠ ܟܠܹܗ ܝܼܣܪܵܝܹܠ: ܘܥܲܠ ܫܲܪܟܵܐ ܕܥܲܡܵܐ: ܐܸܡܲܪ ܠܗܘܿܢ.

4: ܗܵܟܲܢܵܐ ܐܵܡܲܪ ܡܵܪܝܵܐ: ܠܵܐ ܬܸܣܩܘܼܢ: ܘܠܵܐ ܬܸܬ̣ܟܲܬ̇ܫܘܼܢ. ܗܦܘܿܟ݂ܘ ܓܒܲܪ ܠܒܲܝܬܹ̇ܗ. ܡܸܛܠ ܕܡ̣ܢ ܩܕ݂ܵܡܲܝ ܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ. ܘܲܫܡܲܥ̣ܘ ܡܸܠܬܹܗ ܕܡܵܪܝܵܐ: ܘܲܗܦܲܟ݂ܘ ܠܡܹܐܙܲܠ ܐ̄ܢܵܫ ܠܒܲܝܬܹ̇ܗ.

5: ܘܲܒ̣ܢܵܐ ܝܘܿܪܲܒ̣ܥܲܡ ܠܲܫܟܹܝܡ: ܒܛܘܼܪܵܐ ܕܫܲܒ̣ܛܵܐ ܕܒܹܝܬ̣ ܐܲܦܪܹܝܡ: ܘܝܼܬܸܒ̣ ܒܵܗ̇. ܘܲܢܦܲܩ̣ ܡ̣ܢ ܬܲܡܵܢ: ܘܲܒ̣ܢܵܐ ܠܲܦܢܘܼܐܹܝܠ.

6: ܘܐܸܡܲܪ ܝܘܿܪܲܒ̣ܥܲܡ ܒܠܸܒܹ̇ܗ: ܗܵܦܟܵܐ ܠܵܗ̇ ܡܲܠܟ̇ܘܼܬ̣ܵܐ ܠܒܹܝܬ̣ ܕܵܘܝܼܕ݂.

7: ܐܸܢܗ̤ܘ ܕܣܵܠ̇ܩܝܼܢ ܥܲܡܵܐ ܗܵܢܵܐ: ܠܡܸܥܒܲܕ݂ ܕܸܒ̣ܚܹ̈ܐ ܒܒܲܝܬܹ̇ܗ ܕܡܵܪܝܵܐ: ܒܐܘܿܪܸܫܠܸܡ ܘܗܵܦܸܟ݂ ܠܸܒܹ̇ܗ ܕܥܲܡܵܐ ܗܵܢܵܐ ܠܘܵܬ̣ ܡܵܪܗܘܿܢ. ܘܩܵܛ̇ܠܝܼܢ ܠܝܼ: ܘܡܲܗ̄ܦܟ݂ܝܼܢ ܠܵܗ̇ ܡܲܠܟ̇ܘܼܬ̣ܵܐ ܠܲܪܚܸܒ̣ܥܲܡ ܒܲܪ ܫܠܹܝܡܘܿܢ.

8: ܘܐܸܬ̣ܪܲܥܝܼ ܡܲܠܟܵܐ: ܘܲܥܒܲܕ݂ ܬܪܹܝܢ ܥܸܓ̣̈ܠܝܼܢ ܕܕܲܗܒ̣ܵܐ. ܘܐܸܡܲܪ ܠܗܘܿܢ: ܣܲܓ̇ܝܼ ܠܟ݂ܘܿܢ ܠܡܸܣܲܩ: ܡܵܢܵܐ ܣܵܠܩܝܼܢ ܐܢ̄ܬ̇ܘܿܢ: ܘܢܵܚܬ̇ܝܼܢ ܠܐܘܿܪܸܫܠܸܡ. ܗܵܠܹܝܢ ܐܸܢܘܿܢ ܐܲܠܵܗܲܝ̈ܟ ܝܼܣܪܵܝܹܠ: ܕܐܲܣܩܘܼܟ݂ ܡ̣ܢ ܐܲܪܥܵܐ ܕܡܸܨܪܹܝܢ.

9: ܘܣܵܡ̣ ܚܲܕ݂ ܒܹܝܬ̣ ܐܹܝܠ: ܘܐ̄ܚܪܹܢܵܐ ܣܵܡ̣ ܒܕ݂ܵܢ.

10: ܘܲܗܘ̤ܵܬ̣ ܡܸܠܬ̣ܵܐ ܗܵܕܹܐ ܠܲܚܛܝܼܬ̣ܵܐ. ܘܐܸܙܲܠ̣ܘ ܥܲܡܵܐ ܩܕ݂ܵܡ ܥܸܓܠܵܐ ܥܕܲܡܵܐ ܠܕ݂ܵܢ. ܘܲܗܘ̤ܵܐ ܦܸܬ̣ܓ̣ܵܡܵܐ ܗܵܢܵܐ ܠܲܚܛܝܼܬ̣ܵܐ: ܠܟ݂ܠ ܒܹܝܬ̣ ܝܘܿܪܲܒ̣ܥܲܡ: ܠܡܸܥܩܲܪ ܘܲܠܡܵܘܒܵܕ݂ܘܼ ܡ̣ܢ ܐܲܪܥܵܐ.

11: ܒܹܗ ܒܙܲܒ̣ܢܵܐ ܗܵܢܵܐ: ܐܸܬ̣ܟ̇ܪܲܗ ܐܲܒ̣ܝܲܡ ܒܪܹܗ ܕܝܘܿܪܲܒ̣ܥܲܡ: ܘܐܸܡܲܪ ܝܘܿܪܲܒ̣ܥܲܡ ܠܐܲܢ̄ܬ̇ܬܹܗ: ܩܘܼܡܝ ܢܹܐ ܘܐܸܫܬܲܓ̣ܢܵܝ ܐܲܝܟ݂ ܐܲܢ̄ܬ̇ܬ̣ܵܐ ܗܸܕ݂ܝܘܿܛܬܵܐ. ܘܠܵܐ ܢܸܕ̇ܥܘܼܢ ܕܐܲܢ̄ܬ̇ܝ ܗ̄ܝܼ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ. ܘܬܹܐܙܠ̄ܝܼܢ ܠܫܝܼܠܘܿ. ܘܗܵܐ ܐܝܼܬ̣ ܬܲܡܵܢ ܐܲܚܝܼܵܐ ܢܒ̣ܝܼܵܐ: ܕܗ̤ܘ ܐܸܡܲܪ ܠܝܼ ܟܲܕ݂ ܩܵܐܹ̇ܡ ܗ̄ܘܹ̇ܝܬ̣ ܥܲܠ ܥܲܡܵܐ ܗܵܢܵܐ.

12: ܘܬܹܐܙܠ̄ܝܼܢ ܠܘܵܬܹܗ: ܓܵܠܹ̇ܐ ܠܹܟ݂ܝ ܡܸܕܸ̇ܡ ܕܗܵܘܹ̇ܐ ܠܹܗ ܠܛܲܠܝܵܐ ܗܵܢܵܐ.

13: ܘܡ̣ܢ ܩܕ݂ܵܡ ܡܵܪܝܵܐ ܐܸܬ̣̱ܐܡܲܪ ܠܐܲܚܝܼܵܐ: ܕܗܵܐ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ ܐܵܬ̣ܝܵܐ ܠܡܸܫܐܲܠ ܦܸܬ̣ܓ̣ܵܡܵܐ ܡܸܢܵܟ݂ ܥܲܠ ܒܪܵܗ̇ ܕܲܟ݂ܪܝܼܗ ܗ̄ܘ̣: ܗܵܟܲܢܵܐ ܘܗܵܟܲܢܵܐ ܬܹܐܡܲܪ ܠܵܗ̇. ܘܢܸܗܘܹܐ ܒܡܲܥܠܵܗ̇: ܘܗ̤ܝ ܡܸܫܬܲܓ̣ܢܝܵܐ.

14: ܘܲܗܘ̤ܵܐ ܕܟܲܕ݂ ܫܡܲܥ̣ ܐܲܚܝܼܵܐ ܩܵܠܵܐ ܕܪܸ̈ܓ̣ܠܹܝܗ̇ ܟܲܕ݂ ܥܵܐܠܵܐ ܒܬܲܪܥܵܐ: ܘܐܸܡܲܪ ܠܵܗ̇: ܥܘܿܠܝ ܐܲܢ̄ܬ̇ܬܹܗ ܕܝܘܿܪܲܒ̣ܥܲܡ ܠܡܵܢܵܐ ܡܸܫܬ̇ܓ̣ܢܝܲܬ̇ܝ. ܘܐܸܢܵܐ ܡܫܲܕܲܪ ܐ̄ܢܵܐ ܕܐܹܡܲܪ ܥܠܲܝܟ̇ܝ ܡܸܠܹ̈ܐ ܩܲܫ̈ܝܵܬ̣ܵܐ.

15: ܙܸܠܝ ܐܸܡܲܪܝ ܠܝܘܿܪܲܒ̣ܥܲܡ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܐܸܢܵܐ ܐܲܪܝܼܡܬܵܟ݂ ܡ̣ܢ ܥܲܡܵܐ: ܘܝܲܗ̄ܒ̣ܬܵܟ݂ ܡܲܠܟܵܐ ܥܲܠ ܥܲܡܝ ܝܼܣܪܵܝܹܠ.

16: ܘܲܢܣܲܒ̣ܬܵܗ̇ ܡܲܠܟ̇ܘܼܬ̣ܵܐ ܡ̣ܢ ܒܹܝܬ̣ ܕܵܘܝܼܕ݂: ܘܝܸܗ̄ܒܹ̇ܬ̣ ܠܵܟ݂. ܘܠܵܐ ܗ̤ܘܲܝܬ̇ ܐܲܝܟ݂ ܕܵܘܝܼܕ݂ ܥܲܒ̣ܕ̇ܝܼ: ܕܲܢܛܲܪ ܦܘܼܩ̈ܕܵܢܲܝ: ܘܗܲܠܸܟ݂ ܒܢܵܡܘܿܣܲܝ̈ ܒܟ݂ܠܹܗ ܠܸܒܹ̇ܗ: ܠܡܸܥܒܲܕ݂ ܕܫܲܦܝܼܪ ܩܕ݂ܵܡܲܝ.

17: ܘܐܲܢ̄ܬ̇ ܐܲܒ̣ܐܸܫܬ̇ ܠܡܸܥܒܲܕ݂ ܡ̣ܢ ܟܠ ܡܲܠ̈ܟܹ̇ܐ ܕܲܗܘ̤ܵܘ ܩܕ݂ܵܡܲܝܟ. ܘܐܸܙܲܠܬ̇ ܥܒܲܕ̇ܬ̇ ܠܵܟ݂ ܦܬܲܟ݂ܪܹ̈ܐ ܕܥܲܡܡܹ̈ܐ: ܘܨܲܠܡܹ̈ܐ ܠܲܡܓܲܕܵܦܘܼ ܩܕ݂ܵܡܲܝ. ܘܕܸܚܠܲܬ̣ܝ ܫܕܲܝܬ̇ ܒܸܣܬܲܪ ܨܵܘܪܵܟ݂.

ܩܹܦܵܠܹܐܘܿܢ: ܝܒ .

ܝܓ: ܘܐܸܬ̣ܥܲܫܲܢ ܪܚܸܒ̣ܥܲܡ ܡܲܠܟܵܐ ܒܲܪ ܫܠܹܝܡܘܿܢ ܒܐܘܿܪܸܫܠܸܡ: ܘܐܲܡܠܸܟ݂ ܒܲܪ ܐܲܪܒ̇ܥܝܼܢ ܘܲܚܕ݂ܵܐ ܫܢ̈ܝܼܢ ܪܚܸܒ̣ܥܲܡ ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܫܒܲܬܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ: ܩܪܝܼܬ̣ܵܐ ܕܲܓ̣ܒ̣ܵܐ ܠܹܗ ܡܵܪܝܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ: ܠܡܲܫܪܵܝܘܼ ܫܟ݂ܝܼܢܬܹ̇ܗ ܬܲܡܵܢ. ܘܲܫܡܵܐ ܕܐܸܡܹܗ ܢܲܥܡܵܐ ܕܡ̣ܢ ܥܲܡܘܿܢ.

ܝܕ: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ. ܘܠܵܐ ܐܲܬ̣ܩܸܢ ܠܸܒܹ̇ܗ ܠܕܸܚ̱ܠܬܹܗ ܕܡܵܪܝܵܐ: ܠܡܸܒ̣ܥܝܹܗ ܒܟ݂ܠܹܗ ܠܸܒܹ̇ܗ.

ܝܗ: ܘܗܵܠܹܝܢ ܦܸܬ̣ܓ̣ܵܡܵܘ̈ܗܝ ܕܲܪܚܸܒ̣ܥܲܡ ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ: ܠܡܸܥܒܲܕ݂ ܒܝܼܫܬܵܐ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܘܲܩܪܵܒ̣ܵܐ ܗܘ̤ܵܐ ܒܹܝܬ̣ ܪܚܸܒ̣ܥܲܡ ܒܪܹܗ ܕܲܫܠܹܝܡܘܿܢ: ܘܒܹܝܬ̣ ܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܟܠ ܝܵܘ̈ܡܲܝ ܚܲܝܵܘ̈ܗܝ.

ܝܘ: ܘܲܫܟܸܒ̣ ܪܚܸܒ̣ܥܲܡ ܥܲܡ ܐܲܒ̣ܵـ̈ـܗܵܬܹܗ. ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܩܵܡ̣ ܒܡܲܠܟ̇ܘܼܬ̣ܵܐ ܐܲܒ̣ܝܵܐ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܝܓ .

1: ܒܲܫܢܲܬ̣ ܬܡܵܢܲܥܸܣܪܹ̈ܐ ܠܡܲܠܟ̇ܘܼܬܹܗ ܕܝܘܿܪܲܒ̣ܥܲܡ ܒܲܪ ܢܵܒ̣ܵܛ: ܩܵܡ̣ ܒܡܲܠܟ̇ܘܼܬ̣ܵܐ ܐܲܒ̣ܝܼܵܐ ܥܲܠ ܫܲܒ̣ܛܵܐ ܕܒܹܝܬ̣ ܝܼܗܘܼܕ݂ܵܐ.

2: ܘܲܬ̣ܠܵܬ̣ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܐ ܕܐܸܡܹܗ ܡܲܥܟܵܐ ܒܲܪܬ̣ ܐܘܿܪܝܹܠ ܡ̣ܢ ܪܵܡܬ̣ܵܐ.

3: ܘܐܸܣܲܪ ܐܲܒ̣ܝܼܵܐ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ: ܐܲܪܒܲܥ ܡܵܐܐ ܐܲܠܦ̈ܝܼܢ ܓܲܒ̣ܪܹ̈ܐ ܥܠܲܝܡܹ̈ܐ: ܥܕܲܡܵܐ ܕܩܲܒܸ̇ܠܘ ܥܠܲܝܗܘܿܢ ܕܢܹܐܙܠ̄ܘܿܢ ܘܢܸܥܒ̇ܕ݂ܘܼܢ ܩܪܵܒ̣ܵܐ ܥܲܡ ܝܘܿܪܲܒ̣ܥܲܡ ܒܲܪ ܢܵܒ̣ܵܛ. ܘܝܘܿܪܲܒ̣ܥܲܡ ܒܲܪ ܢܵܒ̣ܵܛ ܟܲܢܸܫ ܠܹܗ ܚܲܝܠܵܐ: ܘܐܸܬ̣ܵܐ ܕܢܸܥܒܸ̇ܕ݂ ܩܪܵܒ̣ܵܐ ܒܲܬ̣ܡܵܢܹܝܡܵܐܐ ܐܲܠܦ̈ܝܼܢ ܥܠܲܝܡܹ̈ܐ ܓܲܢ̄ܒܵܪ̈ܲܝ ܚܲܝܠܵܐ.

4: ܘܩܵܡ̣ ܐܲܒ̣ܝܼܵܐ ܡ̣ܢ ܛܘܼܪܵܐ ܕܲܨܡܲܪܝܲܡ: ܕܐܝܼܬ̣ ܒܲܬ̣ܚܘܼܡܵܐ ܕܛܘܼܪܵܐ ܕܐܲܦܪܹܝܡ ܘܐܸܡܲܪ: ܫ̣ܡܲܥ ܝܘܿܪܲܒ̣ܥܲܡ ܒܲܪ ܢܵܒ̣ܵܛ ܘܟ݂ܠܹܗ ܝܼܣܪܵܝܹܠ.

5: ܟܒܲܪ ܝܵܕ݂ܥܝܼܢ ܗ̄ܘܲܝܬ̇ܘܿܢ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܝܲܗ̄ܒ̣ ܡܲܠܟ̇ܘܼܬ̣ܵܐ ܠܕ݂ܵܘܝܼܕ݂ ܥܲܠ ܝܼܣܪܵܝܹܠ ܠܥܵܠܲܡ: ܠܹܗ ܘܠܲܒ̣ܢܵܘ̈ܗܝ ܩܝܵܡܵܐ ܕܡܸܠܚܵܐ.

6: ܘܩܵܡ̣ ܝܘܿܪܲܒ̣ܥܲܡ ܒܲܪ ܢܵܒ̣ܵܛ ܥܲܒ̣ܕܹ̇ܗ ܕܲܫܠܹܝܡܘܿܢ ܒܪܹܗ ܕܕ݂ܵܘܝܼܕ݂. ܘܲܡܪܲܕ݂ ܥܲܠ ܡܵܪܹܗ.

7: ܘܟܲܢܸܫ ܠܘܵܬܹܗ ܓܲܒ̣ܪܹ̈ܐ ܪ̈ܲܫܝܼܥܹܐ ܒܢܲܝ̈ ܥܵܘܼܠܵܐ. ܘܐܸܬ̣ܥܲܫܲܢ ܥܲܠ ܪܚܸܒ̣ܥܲܡ ܒܪܹܗ ܕܲܫܠܹܝܡܘܿܢ. ܘܲܪܚܸܒ̣ܥܲܡ ܛܲܠܝܵܐ ܗ̄ܘ̣ܵܐ ܘܲܛܠܹܐ ܝܵܘ̈ܡܝܼܢ. ܘܠܵܐ ܝܵܕܲܥ ܗ̄ܘ̣ܵܐ ܡܸܕܸ̇ܡ ܠܡܹܐܡܲܪ. ܘܠܵܐ ܒܲܝܐܹܗ ܠܥܲܡܵܐ ܥܲܠ ܫܘܼܥܒܵܕ݂ܵܐ ܕܫܲܥܒܸ̇ܕ݂ ܐܸܢܘܿܢ ܫܠܹܝܡܘܿܢ ܐܲܒ̣ܘܼܗܝ.

8: ܘܐܵܦ ܗܵܫܵܐ ܡܵܢܵܐ ܐܵܡ̇ܪܝܼܢ ܐ̄ܢܬ̇ܘܿܢ: ܐܸܙܲܠܬ̇ܘܿܢ ܐܲܦܪܸܩܬ̇ܘܿܢ ܡܸܢܟ݂ܘܿܢ ܡܲܠܟ̇ܘܼܬ̣ܵܐ ܕܒܹܝܬ̣ ܕܵܘܝܼܕ݂. ܘܐܸܙܲܠܬ̇ܘܿܢ ܘܲܦܠܲܚܬ̇ܘܿܢ ܠܐܲܠܵܗܹ̈ܐ ܡܝܼ̈ܬܹܐ. ܘܐܸܢܵܐ ܥܲܠ ܫܲܒ̣ܛܵܐ ܚܲܕ݂ ܩܵܐܹ̇ܡ ܐ̄ܢܵܐ ܒܡܲܠܟ̇ܘܼܬ̣ܵܐ: ܘܐܲܢ̄ܬ̇ܘܿܢ ܫܲܒ̣ܛܹ̈ܐ ܣܲܓ̇ܝܼܐܹ̈ܐ. ܘܒܲܝܢܵܬ̣ܟ݂ܘܿܢ ܐܝܼܬ̣ ܥܸܓ̣ܠܵܐ ܕܕܲܗܒ̣ܵܐ: ܕܲܥܒܲܕ݂ ܠܟ݂ܘܿܢ ܝܘܿܪܲܒ̣ܥܲܡ ܒܲܪ ܢܵܒ̣ܵܛ.

9: ܘܐܲܢ̄ܬ̇ܘܿܢ ܐܲܦܪܸܩܬ̇ܘܿܢ ܠܟ݂ܵܗܢܹ̈ܐ ܒܢܵܘ̈ܗܝ ܕܐܲܗܪܘܿܢ ܘܲܠܠܹܘܵܝܹ̈ܐ. ܘܲܥܒܲܕ̇ܬ̇ܘܿܢ ܠܟ݂ܘܿܢ ܟܘܼܡܪܹ̈ܐ ܡ̣ܢ ܥܲܡܵܐ ܕܐܲܪܥܵܐ. ܘܟ݂ܠ ܡܲܢ ܕܥܵܐܹ̇ܠ ܠܲܡܩܲܪܵܒ̣ܘܼ ܩܘܼܪܒܵܢܵܐ: ܫܵܩܠܝܼܢ ܗ̄ܘܲܝܬ̇ܘܿܢ ܡܸܢܹܗ ܬܵܘܪܵܐ ܒܲܪ ܒܲܩܪܵܐ: ܘܕܸܟ݂ܪܹ̈ܐ ܫܲܒ̣ܥܵܐ. ܘܗܵܘܹ̇ܐ ܗ̄ܘ̣ܵܐ ܟܘܼܡܪܵܐ ܠܲܕ݂ܠܵܐ ܐܲܠܵܗ̈ܝܼܢ.

10: ܘܲܚܢܲܢ ܠܡܵܪܝܵܐ ܐܲܠܵܗܲܢ ܠܵܐ ܫܒܲܩ̄ܢ. ܘܟ݂ܵܗ̈ܢܹܐ ܕܲܡܫܲܡܫܝܼܢ ܠܡܵܪܝܵܐ: ܒܢܵܘ̈ܗܝ ܐܸܢܘܿܢ ܕܐܲܗܪܘܿܢ: ܘܠܹܘܵܝܹ̈ܐ ܒܲܥܒ̣ܝܼ̈ܕ݂ܵܬ̣ܗܘܿܢ.

11: ܘܡܲܣܩܝܼܢ ܗ̄ܘ̣ܵܘ ܠܡܵܪܝܵܐ ܕܸܒ̣ܚܹ̈ܐ: ܒܟ݂ܠ ܨܦܲܪ ܘܲܨܦܲܪ: ܘܲܒ̣ܟ݂ܠ ܪܡܸܫ ܘܲܪܡܸܫ: ܘܩܲܛܪ̈ܘܼܩܹܐ ܕܒܸܣܡܹ̈ܐ: ܘܣܸܕ݂ܪܹ̈ܐ ܕܠܲܚܡܵܐ ܥܲܠ ܦܵܬ̣ܘܿܪܹ̈ܐ ܕܟܲـ̈ـܝܵܐ. ܘܲܡܢܵܪ̈ܵܬ̣ܵܐ ܕܕܲܗܒ̣ܵܐ: ܘܲܫܪ̈ܵܓܲܝܗܹܝܢ. ܘܛܲܠܝܵܐ ܫܪܲܓ̣ܬ̣ܵܢܵܐ ܡܲܢܗܲܪ ܠܗܹܝܢ: ܒܟ݂ܠ ܪܡܸܫ ܘܲܪܡܸܫ. ܘܲܚܢܲܢ ܢܵܛܪܝܼܢ ܢܛܘܼܪ̈ܵܬܹܗ ܕܡܵܪܝܵܐ ܐܲܠܵܗܲܢ.

12: ܘܐܲܢ̄ܬ̇ܘܿܢ ܕܹܝܢ ܫܒܲܩܬ̇ܘܿܢܵܝܗܝ. ܘܐܸܙܲܠܬ̇ܘܿܢ ܒܵܬܲܪ ܐܲܠܵܗܹ̈ܐ ܡܝܼ̈ܬܹܐ. ܘܲܦܠܲܚܬ̇ܘܿܢ ܐܸܢܘܿܢ: ܘܲܣܓܸܕ̇ܬ̇ܘܿܢ ܠܗܘܿܢ. ܘܲܫܒܲܩܬ̇ܘܿܢ ܠܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܟ̇ܘܿܢ ܘܐܵܦ ܐܲܢ̄ܬ̇ܘܿܢ ܠܵܐ ܬܲܟ݂ܫ̄ܪܘܼܢ ܒܥܵܠܡܵܐ.

15: ܘܲܗܘ̤ܵܐ ܕܟܲܕ݂ ܐܲܪܝܼܡ̣ܘ ܩܵܠܗܘܿܢ ܓܲܒ̣ܪܹ̈ܐ ܕܒܹܝܬ̣ ܝܼܗܘܼܕ݂ܵܐ: ܘܡܵܪܝܵܐ ܬܒܲܪ ܠܝܘܿܪܲܒ̣ܥܲܡ ܒܲܪ ܢܵܒ̣ܵܛ ܘܠܝܼܣܪܵܝܹܠ: ܩܕ݂ܵܡ ܝܼܗܘܼܕ݂ܵܐ: ܘܲܩܕ݂ܵܡ ܐܲܒ̣ܝܼܵܐ.

16: ܘܲܥܪܲܩ̣ܘ ܒܢܲܝ̈ ܝܼܣܪܵܝܹܠ: ܡ̣ܢ ܩܕ݂ܵܡ ܒܢܲܝ̈ ܝܼܗܘܼܕ݂ܵܐ.

17: ܘܲܚܪܲܒ̣ ܐܸܢܘܿܢ ܐܲܒ̣ܝܼܵܐ ܚܲܪܒܵܐ ܪܲܒܵܐ. ܘܲܢܦܲܠܘ ܓܲܒ̣ܪܹ̈ܐ ܡ̣ܢ ܝܼܣܪܵܝܹܠ: ܚܲܡܸܫܡܵܐܐ ܐܲܠܦ̈ܝܼܢ ܓܲܒ̣ܪܹ̈ܐ ܥܠܲܝܡܹ̈ܐ.

18: ܘܐܸܬ̇ܬ̇ܒܲܪܘ ܒܢܲܝ̈ ܝܼܣܪܵܝܹܠ ܒܙܲܒ̣ܢܵܐ ܗܵܘ̇ ܘܐܸܬ̣ܓܲܢ̄ܒܲܪ ܒܢܲܝ̈ ܝܼܗܘܼܕ݂ܵܐ. ܡܸܛܠ ܕܐܵܡ̇ܪܝܼܢ: ܣܘܼܡܟܵܢܲܢ ܥܲܠ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ.

19: ܘܲܪܕܲܦ ܐܲܒ̣ܝܼܵܐ ܒܵܬܲܪ ܝܘܿܪܲܒ̣ܥܲܡ ܘܲܟ݂ܒܲܫ ܡܸܢܹܗ ܩܘܼܪ̈ܝܵܐ ܪܵܘ̱ܪ̈ܒ̣ܵܬ̣ܵܐ: ܒܹܝܬ̣ܐܹܝܠ ܘܡܹܐܟ݂̈ܠܵܬ̣ܵܗ̇: ܫܸܠܵܐ ܘܡܹܐܟ݂̈ܠܵܬ̣ܵܗ̇: ܥܸܦܪܘܿܢ ܘܡܹܐܟ݂̈ܠܵܬ̣ܵܗ̇.

20: ܘܲܙܥܸ̇ܪ ܠܹܗ ܚܲܝܠܵܐ ܠܝܘܿܪܲܒ̣ܥܲܡ: ܬܘܼܒ̣ ܒܝܵܘ̈ܡܵܬܹܗ ܕܐܲܒ̣ܝܼܵܐ. ܘܲܡܚܵܝܗܝ ܡܵܪܝܵܐ ܠܝܘܿܪܲܒ̣ܥܲܡ: ܘܡܝܼܬ̣.

21: ܘܐܸܬ̣ܓܲܢ̄ܒܲܪ ܐܲܒ̣ܝܼܵܐ. ܘܲܢܣܲܒ̣ ܠܹܗ ܢܸܫܹ̈ܐ ܐܲܪܒܲܥܸܣܪܹ̈ܐ: ܘܐܸܬ̣̤ܝܼܠܸܕ݂ܘ ܠܹܗ ܒܢܲـ̈ـܝܐ ܕܸܟ݂ܪܹ̈ܐ ܥܸܣܪܝܼܢ ܘܸܫܬܵܐ: ܘܲܒ̣̈ܢܵܬ̣ܵܐ ܢܸܩ̈ܒ̣ܵܬ̣ܵܐ ܫܸܬ̇ܬܲܥܸܣܪܹ̈ܐ.

22: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܘܐܘܼܪ̈ܚܵܬܹܗ ܗܵܐ ܟܬ̣ܝܼܒ̣ܝܼܢ ܒܡܲܕ݂ܪ̈ܵܫܹܐ ܕܥܲܕ݂ܘ ܢܒ̣ܝܼܵܐ.

ܩܹܦܵܠܹܐܘܿܢ : ܝܕ .

1: ܘܲܫܟܸܒ̣ ܐܲܒ̣ܝܼܵܐ ܥܲܡ ܐܲܒ̣ܵـ̈ـܗܵܬܹܗ. ܘܩܲܒ̣ܪܘܼܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܘܩܵܡ ܒܡܲܠܟ̇ܘܼܬܹܗ ܐܵܣܵܐ ܒܪܹܗ ܒܵܬ̣ܪܹܗ. ܒܝܵܘܡܵܘ̈ܗܝ ܐܸܬ̇ܬ̇ܢܝܼܚܲܬ̣ ܐܲܪܥܵܐ ܡ̣ܢ ܩܹܐܪ̈ܣܹܐ ܥܸܣܪܝܼܢ ܫܢ̈ܝܼܢ.

2: ܘܲܥܒܲܕ݂ ܐܵܣܵܐ ܕܛܵܒ̣ ܘܫܲܦܝܼܪ ܩܕ݂ܵܡ ܡܵܪܝܵܐ ܐܲܠܵܗܹܗ.

3: ܘܲܥܩܲܪ ܡܲܕ݂ܒ̇ܚܹ̈ܐ ܕܐܲܠܵܗܹ̈ܐ ܢܘܼܟ݂ܪ̈ܵܝܹܐ: ܘܒ̣ܘܼܡ̈ܣܹܐ. ܘܬܲܒܲܪ ܩܵܝ̈ܡܵܬ̣ܵܐ ܘܦܲܣܸܩ̣ ܐܵܕܲܪ̈ܝܵܢܛܹܐ.

4: ܘܐܸܡܲܪ ܠܲܝܗܘܼܕ݂ܵܐ: ܬܵܘ ܢܨܲܠܹܐ ܩܕ݂ܵܡ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ.

5: ܘܲܥܩܲܪ ܡ̣ܢ ܟܠܗܹܝܢ ܩܘܼܪ̈ܝܵܐ ܕܒܹܝܬ̣ ܝܼܗܘܼܕ݂ܵܐ: ܥܠܵـ̈ـܘܵܬ̣ܵܐ: ܘܲܦܬܲܟ݂ܪܹ̈ܐ. ܘܐܸܬ̇ܬ̇ܢܝܼܚܲܬ̤ ܡܲܠܟ̇ܘܼܬܹܗ ܒܝܵܘ̈ܡܵܬܹܗ. ܘܲܒ̣ܥܸܠܕ̇ܒ̣ܵܒ̣ܵܐ ܠܵܐ ܗܘ̤ܵܐ ܠܹܗ: ܡ̣ܢ ܟܠܗܘܿܢ ܒܲܥ̈ܠܲܝ ܬܚܘܼܡܹܗ.

6: ܘܲܒ̣ܢܵܐ ܩܘܼܪ̈ܝܵܐ ܥܲܫܝܼ̈ܢܵܬ̣ܵܐ: ܒܐܲܪܥܵܐ ܕܲܝܗܘܼܕ݂ܵܐ. ܡܸܛܠ ܕܐܸܬ̇ܬ̇ܢܝܼܚܲܬ̣ ܐܲܪܥܵܐ. ܘܠܵܐ ܐܝܼܬ̣ ܗ̄ܘ̣ܵܐ ܐ̄ܢܵܫ ܕܥܵܒܹܕ݂ ܥܲܡܹܗ ܩܪܵܒ̣ܵܐ ܫܢܲـ̈ـܝܵܐ ܗܵܠܹܝܢ. ܡܸܛܠ ܕܐܲܢܝܼܚܹܗ ܗ̄ܘ̣ܵܐ ܡܵܪܝܵܐ.

7: ܘܐܸܡܲܪ ܠܲܕ݂ܒܹܝܬ̣ ܝܼܗܘܼܕ݂ܵܐ: ܬܵܘ ܢܸܒ̣ܢܹܐ ܩܘܼܪ̈ܝܵܐ ܗܵܠܹܝܢ. ܘܢܲܟ݂ܪܸܟ݂ ܐܸܢܹܝܢ ܫܘܼܪܹ̈ܐ ܘܡܲܓܕ̇ܠܹ̈ܐ: ܘܬܲܪ̈ܥܹܐ ܘܣܘܼܟ̇ܪܹ̈ܐ: ܥܲܕ݂ ܫܵܠܝܵܐ ܐܲܪܥܵܐ ܡ̣ܢ ܩܹܐܪܣܵܐ. ܡܸܛܠ ܕܲܒ̣ܥܲܝܢ ܠܡܵܪܝܵܐ ܐܲܠܵܗܲܢ: ܐܵܦ ܗ̤ܘ ܒܥ̣ܵܢ: ܘܐܲܢܝܼܚܲܢ ܡ̣ܢ ܟܠܗܘܿܢ ܕܲܚܕ݂ܵܪ̈ܲܝܢ. ܘܒܲܝܐܲܢ ܘܦܲܨܝܲܢ.

8: ܘܲܗܘ̤ܵܘ ܠܐܵܣܵܐ ܓܲܒ̣ܪܹ̈ܐ ܓܲܢ̄ܒܵܪ̈ܲܝ ܚܲܝܠܵܐ: ܫܵܩ̈ܠܲܝ ܣܲܝܦܹ̈ܐ ܘܪ̈ܘܼܡܚܹܐ ܡ̣̤ ܕܒܹܝܬ̣ ܝܼܗܘܼܕ݂ܵܐ: ܬܠܵܬ̣ܡܵܐܐ ܐܲܠܦ̈ܝܼܢ: ܘܡ̣ܢ ܕܒܹܝܬ̣ ܒܸܢܝܵܡܹܝܢ: ܠܒ̣ܝܼ̈ܫܲܝ ܫܸܪܝܵܢܵܐ: ܘܡܵܬ̣ܚܲܝ̈ ܩܸܫܬܵܐ: ܡܲܐܬܹ̇ܝܢ ܘܲܬ̣ܡܵܢܐܝܼܢ ܐܲܠܦ̈ܝܼܢ ܟܠܗܘܿܢ ܗܵܠܹܝܢ ܓܲܢ̄ܒܵܪ̈ܲܝ ܚܲܝܠܵܐ.

9: ܘܲܢܦܲܩ ܠܘܵܬ̣ܗܘܿܢ ܙܵܪܵܚ ܗܸܢܕ̇ܘܵܝܵܐ: ܒܚܲܝܠܵܐ ܣܲܓ̇ܝܼܵܐܐ: ܐܵܠܹܦ ܐܲܠܦ̈ܝܼܢ: ܘܲܒ̣ܙܵܘ̈ܓܹ̇ܐ ܬܠܵܬ̣ܝܼܢ ܐܲܠܦ̈ܝܼܢ. ܘܐܸܬ̣ܵܘ ܘܲܡܛܵܘ ܥܕܲܡܵܐ ܠܡܹܐܪܫܵܐ.

10: ܘܲܢܦܲܩ ܐܵܣܵܐ ܠܩܘܼܒ̣ܠܹܗ. ܘܲܥܒܲܕ݂ ܥܲܡܹܗ ܩܪܵܒ̣ܵܐ ܒܢܲܚܠܵܐ ܕܡܹܐܪܫܵܐ.

11: ܘܨܲܠܝܼ ܐܵܣܵܐ ܩܕ݂ܵܡ ܡܵܪܝܵܐ ܐܲܠܵܗܹܗ: ܘܐܸܡܲܪ: ܐܲܢ̄ܬ̇ ܗ̄ܘ̣ ܡܵܪܲܢ ܥܵܕ݂ܘܿܪܹܗ ܕܥܲܡܵܟ݂: ܟܲܕ݂ ܬܲܫܠܸܡ ܚܲܝܠܵܐ ܣܲܓ̇ܝܼܵܐܐ ܒܐܝܼ̈ܕܲܝ ܙܥܘܿܪܹ̈ܐ. ܗܵܝܕܹ̇ܝܢ ܢܸܕ̇ܥܘܼܢ ܟܠܗܘܿܢ ܥܵܡܘܿܪ̈ܵܘܗܝ ܕܥܵܠܡܵܐ ܕܫܲܦܝܼܪ ܡܸܬ̇ܬܲܟ݂ܠܝܼܢܲܢ ܥܠܲܝܟ. ܥܲܕܲܪܲܝܢ ܡܵܪܝܵܐ ܐܲܠܵܗܲܢ: ܥܲܕܲܪܲܝܢ. ܡܸܛܠ ܕܒܲܫܡܵܟ݂ ܐܸܬܲܝܢ ܥܲܠ ܚܲܝܠܵܐ ܗܵܢܵܐ ܪܲܒܵܐ. ܡܵܪܝܵܐ ܐܲܠܵܗܲܢ: ܠܵܐ ܬܸܫܬܵܘܚܲܪ ܓܲܢ̄ܒܵܪܘܼܬ̣ܵܟ݂ ܡܸܢܲܢ.

12: ܘܗܵܝܕܹ̇ܝܢ ܟܲܕ݂ ܓܡܲܪ ܐܵܣܵܐ ܠܲܡܨܲܠܵܝܘܼ ܨܠܘܿܬܹܗ: ܬܒܲܪ ܡܲܠܲܐܟܹܗ ܕܡܵܪܝܵܐ ܠܗܸܢܕ̇ܘܵܝܹ̈ܐ. ܩܕ݂ܵܡ ܐܵܣܵܐ ܘܲܩܕ݂ܵܡ ܝܼܗܘܼܕ݂ܵܐ. ܘܲܥܪܲܩ̣ܘ ܗܸܢܕ̇ܘܵܝܹ̈ܐ.

13: ܘܲܪܕܲܦ̣ ܐܸܢܘܿܢ ܐܵܣܵܐ ܘܥܲܡܵܐ ܕܥܲܡܹܗ ܥܕܲܡܵܐ ܠܓܵܕ݂ܵܪ. ܘܲܢܦܲܠܘ ܡ̣ܢ ܗܸܢܕ̇ܘܵܝܹ̈ܐ ܕܠܵܐ ܡܸܢܝܵܢܵܐ: ܡܸܛܠ ܕܐܸܬ̇ܬ̇ܒܲܪܘ ܩܕ݂ܵܡ ܡܵܪܝܵܐ: ܘܲܩܕ݂ܵܡ ܚܲܝܠܵـ̈ـܘܵܬܹܗ. ܘܲܢܣܲܒ̣ܘ: ܘܲܫܒ̣ܵܘ ܫܒ̣ܝܼܬ̣ܵܐ ܣܘܼܓ̣ܵܐܐ.

14: ܘܲܚܪܲܒ̣ܘ ܟܠܗܹܝܢ ܩܘܼܪ̈ܝܵܐ ܕܐܝܼܬ̣ ܚܕ݂ܵܪ̈ܲܝ ܓܵܕ݂ܵܪ. ܡܸܛܠ ܕܲܗܘ̤ܵܬ̣ ܕܸܚ̱ܠܬܹܗ ܕܡܵܪܝܵܐ ܥܠܲܝܗܘܿܢ ܘܒܲܙܘ ܟܠܗܹܝܢ ܩܘܼܪ̈ܝܵܐ. ܡܸܛܠ ܕܒܸܙܬ̣ܵܐ ܣܲܓ̇ܝܼܐܬ̣ܵܐ ܗܘ̤ܵܬ̣ ܒܗܹܝܢ.

15: ܘܐܵܦ ܡܲܫܟ̇ܢܹ̈ܐ ܕܥܲܪ̈ܒ̣ܵܝܹܐ ܐܲܝܬ̇ܝܼܘ. ܘܲܫܒ̣ܵܘ ܥܵـ̈ـܢܵܐ ܣܘܿܓ̣ܵܐܐ ܕܛܵܒ̣: ܘܓܲܡ̈ܠܹܐ ܘܐܵܘܒܲܠܘ ܠܐܘܿܪܸܫܠܸܡ.

ܩܹܦܵܠܹܐܘܿܢ : ܝܗ .

1: ܘܥܲܙܲܪܝܵܐ ܒܲܪ ܥܵܙܘܿܪ: ܫܪܵܬ̤ ܥܠܵܘܗܝ ܪܘܼܚܵܐ ܡ̣ܢ ܩܕ݂ܵܡ ܡܵܪܝܵܐ.

2: ܘܲܢܦܲܩ ܩܕ݂ܵܡ ܐܵܣܵܐ: ܘܐܸܡܲܪ ܠܹܗ: ܫܡܲܥܲܝܢܝ ܐܵܣܵܐ ܘܟ݂ܠܹܗ ܝܼܗܘܼܕ݂ܵܐ: ܘܒܸܢܝܵܡܹܝܢ. ܡܵܪܝܵܐ ܥܲܡܟ݂ܘܿܢ ܗ̄ܘ̣ ܠܥܵܠܲܡ ܥܵܠܡܝܼܢ. ܐܸܢ ܬܸܒ̣ܥܘܿܢܵܝܗܝ: ܢܸܫܬ̇ܟܲܚ ܠܟ݂ܘܿܢ ܘܐܸܢ ܬܸܫܒ̇ܩܘܼܢܹܗ: ܢܸܫܒ̇ܘܿܩܟ݂ܘܿܢ.

3: ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ ܠܝܼܣܪܵܝܹܠ: ܕܠܵܐ ܦܠܲܚܘ ܠܐܲܠܵܗܗܘܿܢ ܒܩܘܼܫܬܵܐ. ܘܠܵܐ ܩܲܒܸ̇ܠܘ ܡ̣ܢ ܟܵܗܢܲܝ̈ܗܘܿܢ ܘܠܵܐ ܫܡܲܥ̣ܘ ܢܵܡܘܿܣܲܝ̈ܗܘܿܢ. ܘܐܸܫܬ̇ܠܸܡܘ ܠܐܝܼܕ݂ܵܐ ܕܲܒ̣ܥܸܠܕ̇ܒ̣ܵܒܹ̈ܐ.

4: ܘܟܲܕ݂ ܥܵܩܲܬ̤ ܠܗܘܿܢ: ܨܲܠܝܼܘ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܘܲܒ̣ܥܵܐܘܼܗܝ: ܘܐܸܫܬ̇ܟܲܚ ܠܗܘܿܢ.

5: ܘܲܒ̣ܙܲܒ̣ـ̈ـܢܵܬ̣ܵܐ ܗܵܠܹܝܢ ܩܲܕ݂ܡܵـ̈ـܝܵܬ̣ܵܐ: ܟܲܕ݂ ܠܐܲܠܵܗܲܢ ܠܵܐ ܕܵܚܠܝܼܢ ܗ̄ܘܲܝܢ: ܠܵܐ ܐܝܼܬ̣ ܗ̄ܘ̣ܵܐ ܫܠܵܡ: ܠܵܐ ܠܡܲܢ ܕܢܵܦܹ̇ܩ: ܘܠܵܐ ܠܡܲܢ ܕܥܵܐܹ̇ܠ. ܡܸܛܠ ܕܒ̣ܝܼܫܬܵܐ ܪܲܒ̇ܬ̣ܵܐ ܐܸܬ̣ܵܬ̤ ܗ̄ܘ̣ܵܬ̣ ܥܲܠ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ.

6: ܘܐܸܬ̣ܒܲܕܲܪܢ ܒܟ݂ܠ ܥܲܡ ܘܥܲܡ: ܘܒܲܝܢܵܬ̣ ܩܘܼܪ̈ܝܵܐ: ܘܒܲܝܢܵܬ̣ ܡܕ݂ܝܼ̈ܢܵܬ̣ܵܐ.

7: ܡܸܛܠ ܕܲܫܒܲܩܢ ܗ̄ܘܲܝܢ ܠܡܵܪܝܵܐ ܐܲܠܵܗܲܢ. ܘܠܵܐ ܨܒ̇ܝܼܢ ܗ̄ܘܲܝܢ ܠܡܸܫܡܲܥ ܒܩܵܠܵܐ ܕܥܲܒ̣ܕܵܘ̈ܗܝ ܢܒ̣ܝܹ̈ܐ. ܘܐܵܦ ܗ̤ܘ ܦܲܪܥܲܢ ܐܲܓ̣ܪܵܐ ܕܲܥܒܲܕܲܝ̈ܢ.

8: ܘܟܲܕ݂ ܫܡܲܥ̣ ܐܵܣܵܐ ܦܸܬ̣ܓ̣ܵܡܹ̈ܐ ܗܵܠܹܝܢ ܕܥܲܙܲܪܝܵܐ ܒܲܪ ܥܵܙܘܿܪ ܢܒ̣ܝܼܵܐ: ܐܸܬ̣ܥܲܫܲܢ: ܘܐܲܥܒܲܪ ܨܲܠܡܹ̈ܐ ܡ̣̤ ܟܠܵܗ̇ ܐܲܪܥܵܐ ܕܲܝܗܘܼܕ݂ܵܐ ܘܲܕ݂ܒܸܢܝܵܡܹܝܢ: ܘܡ̣ܢ ܩܘܼܪ̈ܝܵܐ ܕܐܸܚܲܕ݂ ܒܐܲܪܥܵܐ ܕܐܲܦܪܹܝܡ: ܘܚܲܕܸ̇ܬ̣ ܡܲܕ݂ܒ̇ܚܵܐ ܕܡܵܪܝܵܐ ܕܲܗܘ̤ܵܐ ܩܕ݂ܵܡ ܣܪܘܿܓ̣ܵܐ.

9: ܘܟܲܢܸܫ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܲܒ̣ܢܲܝ̈ ܒܸܢܝܵܡܹܝܢ. ܘܡ̣ܢ ܩܘܼܪ̈ܝܵܐ ܕܐܹܚܲܕ݂ ܒܐܲܪܥܵܐ ܕܐܲܦܪܹܝܡ: ܘܓ̣ܝܼܘܿܪܹ̈ܐ ܕܲܒ̣ܗܘܿܢ ܡ̣ܢ ܕܒܹܝܬ̣ ܐܲܦܪܹܝܡ: ܘܡ̣ܢ ܕܒܹܝܬ̣ ܡܢܲܫܹܐ: ܘܡ̣ܢ ܕܒܹܝܬ̣ ܫܸܡܥܘܿܢ. ܡܸܛܠ ܕܐܸܬ̣ܟܲܢܲܫܘ ܘܐܸܬ̣ܵܘ ܠܘܵܬܹܗ ܡ̣ܢ ܒܹܝܬ̣ ܝܼܣܪܵܝܹܠ: ܣܘܿܓ̣ܵܐܐ: ܟܲܕ݂ ܚ̣ܙܵܘ ܕܡܵܪܝܵܐ ܐܲܠܵܗܹܗ ܥܲܡܹܗ.

10: ܘܐܸܬ̣ܟܲܢܲܫܘ ܒܐܘܿܪܸܫܠܸܡ ܒܝܲܪܚܵܐ ܬܠܝܼܬ̣ܵܝܵܐ ܒܲܫܢܲܬ̣ ܚܲܡܫܲܥܸܣܪܹ̈ܐ ܕܡܲܠܟ̇ܘܼܬܹܗ ܕܐܵܣܵܐ.

11: ܘܕܲܒܲܚܘ ܕܸܒ̣ܚܹ̈ܐ ܠܡܵܪܝܵܐ ܒܝܵܘܡܵܐ ܗܵܘ̇: ܡ̣ܢ ܒܸܙܬ̣ܵܐ ܕܐܲܝܬ̇ܝܼܘ: ܬܵܘܪܹ̈ܐ ܫܒܲܥܡܵܐܐ. ܘܥܵـ̈ـܢܵܐ ܫܬܵܐ ܐܲܠܦ̈ܝܼܢ.

12: ܘܝܼܡܝܼܘ ܡܵܘ̈ܡܵܬ̣ܵܐ: ܕܲܢܨܱܲܠܘܿܢ ܩܕ݂ܵܡ ܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܗܘܿܢ: ܒܟ݂ܠܹܗ ܠܸܒ̇ܗܘܿܢ: ܘܲܒ̣ܟ݂ܠܵܗ̇ ܢܲܦ̮ܫܗܘܿܢ.

13: ܘܟ݂ܠܡܲܢ ܕܠܵܐ ܢܨܲܠܹܐ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܢܡܘܼܬ̣: ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ: ܘܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ.

14: ܘܝܼܡܝܼܘ ܠܡܵܪܝܵܐ ܒܩܵܠܵܐ ܪܵܡܵܐ: ܘܲܒ̣ܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ ܘܲܦܫ̈ܝܼܛܵܬ̣ܵܐ.

15: ܘܲܚܕ݂ܝܼܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܥܲܠ ܛܸܒܵܐ ܗܵܢܵܐ ܕܲܫܡܲܥܘ: ܡܸܛܠ ܕܡ̣ܢ ܟܠܹܗ ܠܸܒ̇ܗܘܿܢ ܒܥܵܐܘܼܗܝ. ܘܡ̣̤ ܟܠܵܗ̇ ܢܲܦ̮ܫܗܘܿܢ ܨܠܝܼܘ ܩܕ݂ܵܡܵܘܗܝ. ܘܐܸܫܬ̇ܟܲܚ ܠܗܘܿܢ: ܘܦܲܨܝܼ ܐܸܢܘܿܢ ܡ̣ܢ ܟܠܗܘܿܢ ܒܲܥܠܲܝ̈ ܬܚܘܼܡܗܘܿܢ.

16: ܘܐܵܦ ܠܡܲܠܟܵܐ ܐܸܡܹܗ ܕܐܵܣܵܐ: ܐܲܥܒ̇ܪܵܗ̇ ܡ̣ܢ ܡܲܠܟ̇ܘܼܬ̣ܵܗ̇: ܥܲܠ ܕܥܸܒ̣ܕܲܬ̣ ܥܹܐܕ݂ܵܐ ܠܨܲܠܡܹ̈ܝܗ̇ ܘܦܲܣܸܩ ܐܵܣܵܐ ܠܨܲܠܡܹ̈ܝܗ ܘܐܵܘܩܸܕ݂ ܐܸܢܘܿܢ ܒܢܲܚܠܵܐ ܕܩܸܕ݂ܪܘܿܢ.

17: ܘܡܲܕ݂ܒ̇ܚܵܐ ܠܵܐ ܦܪܲܩ̣ܘ ܡ̣ܢ ܝܼܣܪܵܝܹܠ. ܒܪܲܡ ܠܸܒܹ̇ܗ ܕܐܵܣܵܐ: ܫܠܸܡ ܗ̄ܘ̣ܵܐ ܠܕܸܚ̱ܠܬܹܗ ܕܡܵܪܝܵܐ ܐܲܠܵܗܹܗ: ܟܠܗܘܿܢ ܝܵܘ̈ܡܵܬ̣ܵܐ ܕܚܲܝܵܘ̈ܗܝ.

18: ܘܐܲܝܬܝܼ ܩܘܼܕ݂ܫܹ̈ܐ ܕܐܲܒ̣ܘܼܗܝ: ܘܩܘܼܕ݂ܫܹ̈ܐ ܕܝܼܠܹܗ ܠܒܲܝܬܹ̇ܗ ܕܡܵܪܝܵܐ: ܟܸܣܦܵܐ ܘܕܲܗܒ̣ܵܐ ܘܡܵܐܢܹ̈ܐ.

ܩܹܦܵܠܹܐܘܿܢ: ܝܘ .

1: ܘܲܩܪܵܒ̣ܵܐ ܗܘ̤ܵܐ ܒܲܫܢܲܬ̣ ܬܠܵܬ̣ܝܼܢ ܘܚܲܡܸܫ ܕܡܲܠܟ̇ܘܼܬܹܗ ܕܐܵܣܵܐ. ܘܒܲܫܢܲܬ̣ ܬܠܵܬ̣ܝܼܢ ܘܫܸܬ̣ ܠܡܲܠܟ̇ܘܼܬܹܗ ܕܐܵܣܵܐ: ܣܠܸܩ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܥܲܠ ܕܒܹܝܬ̣ ܝܼܗܘܼܕ݂ܵܐ. ܘܲܒ̣ܢܵܐ ܠܪܵܡܬ̣ܵܐ: ܡܸܛܠ ܫܵܒ̣ܩܝܼܢ ܗ̄ܘ̣ܵܘ ܠܡܸܦܲܩ ܘܲܠܡܸܥܲܠ ܠܐܵܣܵܐ ܡܲܠܟܵܐ ܕܲܝܗܘܼܕ݂ܵܐ.

2: ܘܐܲܦܸܩ ܐܵܣܵܐ ܟܸܣܦܵܐ ܘܕܲܗܒ̣ܵܐ ܡ̣ܢ ܒܹܝܬ̣ ܓܲܙܵܐ ܕܡܵܪܝܵܐ: ܘܡ̣ܢ ܒܹܝܬ̣ ܡܲܠܟܵܐ ܘܫܲܕܲܪ ܠܒܲܪ ܗܕ݂ܵܕ݂ ܡܲܠܟܵܐ ܕܐܲܕ݂ܘܿܡ: ܕܝܵܬܹܒ̣ ܒܕܲܪܡܣܘܿܩ: ܘܐܸܡܲܪ ܠܹܗ.

3: ܡܵܘ̈ܡܵܬ̣ܵܐ ܐܝܼܬ̣ ܒܲܝܢܲܝ ܘܠܵܟ݂: ܘܒܹܝܬ̣ ܐܵܒ̣ܝ ܘܒܹܝܬ̣ ܐܲܒ̣ܘܼܟ݂ ܗܵܐ ܫܲܕ̇ܪܹܬ̣ ܠܵܟ݂ ܟܸܣܦܵܐ ܘܕܲܗܒ̣ܵܐ. ܙܸܠ ܒܲܛܸܠ ܡܵܘ̈ܡܵܬ̣ܵܐ ܕܝܼܡܲܝܬ̇ ܥܲܡ ܒܲܥܫܵܐ ܡܲܠܟܵܐ ܕܝܼܣܪܵܝܹܠ: ܡܸܬ̣ܥܲܠܹܐ ܡܹܢܝ.

4: ܘܲܫܡܲܥ ܒܲܪ ܗܕ݂ܵܕ݂ ܠܡܲܠܟܵܐ ܐܵܣܵܐ. ܘܫܲܕܲܪ ܠܪ̈ܲܒܲܝ ܚܲܝ̈ܠܹܐ ܕܐܝܼܬ̣ ܠܹܗ. ܘܐܸܬ̣ܵܘ: ܘܲܫܪܵܘ ܥܲܠ ܩܘܼܪ̈ܝܵܐ ܕܝܼܣܪܵܝܹܠ: ܘܐܸܚܲܕ݂ܘ ܠܥܹܝܢܘܿܢ ܘܠܵܐܒܹܝܠ ܒܹܝܬ̣ ܡܲܥܟܵܐ: ܘܲܠܟ݂ܠܗܘܿܢ ܐܵܘܨܪܹ̈ܐ ܕܩܘܼܪ̈ܝܵܐ ܕܒܹܝܬ̣ ܢܲܦ̮ܬܵܠܝܼ.

5: ܗܵܝܕܹ̇ܝܢ ܟܲܕ݂ ܫܡܲܥ ܒܲܥܫܵܐ: ܦܪܲܩ̣ ܗ̄ܘ̣ܵܐ ܡ̣ܢ ܕܲܠܡܸܒ̣ܢܵܐ ܠܪܵܡܬ̣ܵܐ: ܘܒܲܛܠܹܗ ܗ̄ܘ̣ܵܐ ܟܠܹܗ ܒܸܢܝܵܢܹܗ.

6: ܘܐܵܣܵܐ ܡܲܠܟܵܐ ܟܲܢܸܫ ܗ̄ܘ̣ܵܐ ܠܟ݂ܠܗܘܿܢ ܒܹܝܬ̣ ܝܼܗܘܼܕ݂ܵܐ. ܘܲܢܣܲܒ̣ ܠܟܹܐܦܹ̈ܝܗ̇ ܕܪܵܡܬ̣ܵܐ: ܘܲܠܩܲܝܣܹ̈ܐ ܕܲܡܛܲܝܒ̣ܝܼܢ ܗ̄ܘ̣ܵܘ ܕܢܸܒ̣ܢܘܿܢܵܗ̇ ܠܒܲܥܫܵܐ. ܘܲܒ̣ܢܵܐ ܒܗܘܿܢ ܡܲܠܟܵܐ ܐܵܣܵܐ ܪܵܡܬ̣ܵܐ ܕܒܸܢܝܵܡܹܝܢ: ܘܡܲܨܦܝܵܐ ܩܪܝܼܬ̣ܵܐ.

7: ܘܒܹܗ ܒܙܲܒ̣ܢܵܐ ܗܵܘ̇: ܐܸܬ̣ܵܐ ܚܲܢܲܢ ܢܒ̣ܝܼܵܐ ܠܘܵܬ̣ ܐܵܣܵܐ ܡܲܠܟܵܐ ܕܲܝܗܘܼܕ݂ܵܐ: ܘܐܸܡܲܪ ܠܹܗ: ܚܠܵܦ ܕܐܸܬ̇ܬ̇ܟܸܠܬ̇ ܥܲܠ ܡܲܠܟܵܐ ܕܐܲܕ݂ܘܿܡ: ܘܠܵܐ ܐܸܬ̇ܬ̇ܟܸܠܬ̇ ܥܲܠ ܡܵܪܝܵܐ ܐܲܠܗܵܟ݂: ܡܸܛܠ ܗܵܢܵܐ ܢܸܥܪܘܿܩ ܚܲܝܠܵܐ ܕܐܲܕ݂ܘܿܡ ܡܸܢܵܟ݂.

8: ܘܢܹܐܙܠ̄ܘܿܢ ܘܢܸܬ̣ܚܲܝܠܘܼܢ ܗܸܢܘܿܢ ܘܗܸܢܕ̇ܘܵܝܹ̈ܐ: ܘܡܲܠ̈ܟܹ̇ܐ ܕܐܝܼܬ̣ ܥܲܡܗܘܿܢ. ܘܢܸܗܘܘܿܢ ܠܚܲܝ̈ܠܹܐ: ܘܲܠܙܵܘ̈ܓܹ̇ܐ ܘܲܠܦܲܪ̈ܵܫܹܐ: ܣܘܿܓ̣ܵܐܐ ܕܛܵܒ̣ ܘܟܲܕ݂ ܬܸܒ̣ܥܸܐ ܡ̣ܢ ܡܵܪܝܵܐ ܐܲܠܵܗܵܐ: ܢܲܫܠܸܡ ܐܸܢܘܿܢ ܒܐܝܼܕܲܝ̈ܟ.

9: ܡܸܛܠ ܕܥܲܝܢܵܘ̈ܗܝ ܕܡܵܪܝܵܐ ܚܵܝܪܵܢ ܒܟ݂ܠܵܗ̇ ܐܲܪܥܵܐ. ܘܐܸܬ̣ܥܲܫܲܢܘ: ܘܢܸܗܘܹܐ ܠܸܒܟ݂ܘܿܢ ܫܠܸܡ ܠܕܸܚ̱ܠܬܹܗ ܘܐܸܣܬܲܟܲܠܘ ܒܟ݂ܠܗܹܝܢ ܬܸܕ݂ܡܪ̈ܵܬܹܗ. ܡܸܛܠ ܕܡܵܪܝܵܐ ܐܲܠܵܗܟ݂ܘܿܢ ܥܵܒܹܕ݂ ܠܟ݂ܘܿܢ ܩܪܵܒ̣ܵܐ.

10: ܘܲܪܓܸܙ ܐܵܣܵܐ ܥܲܠ ܕܵܘܩܵܐ: ܘܝܲܗ̄ܒܹ̇ܗ ܒܹܝܬ̣ ܐܲܣܝܼܪܹ̈ܐ ܡܸܛܠ ܕܡܸܕܸ̇ܡ ܕܠܵܐ ܚܵܙܹ̇ܐ ܗ̄ܘ̣ܵܐ: ܡܸܫܬܲܥܹܐ ܗ̄ܘ̣ܵܐ: ܘܲܡܙܝܼܥ ܗ̄ܘ̣ܵܐ ܠܸܒܹ̇ܗ ܕܥܲܡܵܐ. ܘܡܸܛܠ ܗܵܢܵܐ ܪܗܸܛ ܐܵܣܵܐ ܒܙܲܒ̣ܢܵܐ ܗܵܘ̇ ܡ̣ܢ ܥܲܡܵܐ.

11: ܘܗܵܐ ܦܸܬ̣ܓ̣ܵܡܵܘ̈ܗܝ ܕܐܵܣܵܐ ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ: ܗܵܐ ܟܬ̣ܝܼܒ̣ܝܼܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ ܘܕ݂ܝܼܣܪܵܝܹܠ.

12: ܘܐܸܬ̣ܟܲܬܲܫ ܐܵܣܵܐ ܒܲܫܢܲܬ̣ ܬܠܵܬ̣ܝܼܢ ܘܲܬ̣ܫܲܥ ܠܡܲܠܟ̇ܘܼܬܹܗ. ܘܐܸܬ̣ܟ̇ܪܲܗ: ܘܲܢܦܲܠ̣ ܒܓ̣ܵܘ ܒܲܝܬܹ̇ܗ.

13: ܘܲܫܟܸܒ̣ ܐܵܣܵܐ ܥܲܡ ܐܲܒ̣ܵـ̈ـܗܵܬܹܗ. ܘܐܸܬ̣ܩܒܲܪ ܒܲܩܪܝܼܬܹܗ. ܘܡܝܼܬ̣ ܒܲܫܢܲܬ̣ ܐܲܪܒ̇ܥܝܼܢ ܘܲܚܕ݂ܵܐ ܠܡܲܠܟ̇ܘܼܬܹܗ.

14: ܘܐܸܬ̣ܩܒܲܪ ܒܩܲܒ̣ܪܹܗ ܕܕ݂ܵܘܝܼܕ݂: ܘܐܲܪܡܝܼܘܗܝ ܒܥܲܪܣܹܐ ܕܡܲܠܝܵܐ ܒܸܣܡܹ̈ܐ. ܘܐܵܘܩܸܕ݂ܘ ܝܲܩܕܵܐ ܪܲܒܵܐ ܕܛܵܒ̣.

ܩܹܦܵܠܹܐܘܿܢ : ܝܙ.

1: ܘܩܵܡ ܒܡܲܠܟܘܼܬܹܗ ܝܵܗܘܿܫܵܦܵܛ ܒܪܹܗ ܒܵܬ̣ܪܹܗ. ܘܐܸܬ̣ܥܲܫܲܢ ܥܲܠ ܝܼܣܪܵܝܹܠ.

2: ܘܐܲܫܠܸܛ ܓܲܒ̣ܪܹ̈ܐ ܓܲܢ̄ܒܵܪ̈ܲܝ ܚܲܝܠܵܐ: ܒܟ݂ܠܗܹܝܢ ܩܘܼܪ̈ܝܵܐ ܕܒܹܝܬ̣ ܝܼܗܘܼܕ݂ܵܐ ܥܲܫܝܼ̈ܢܵܬ̣ܵܐ. ܘܐܲܩܝܼܡ ܫܲܠܝܼܛܹ̈ܐ ܒܐܲܪܥܵܐ ܕܲܝܗܘܼܕ݂ܵܐ: ܘܒܲܐܪܥܵܐ ܕܐܲܦܪܹܝܡ ܕܐܸܚܲܕ݂ ܐܵܣܵܐ ܐܲܒ̣ܘܼܗܝ.

3: ܘܲܗܘ̤ܵܐ ܡܵܪܝܵܐ ܥܲܡ ܝܵܗܘܿܫܵܦܵܛ. ܡܸܛܠ ܕܗܲܠܸܟ݂ ܒܐܘܼܪ̈ܚܵܬܹܗ ܕܕ݂ܵܘܝܼܕ݂ ܐܲܒ̣ܘܼܗܝ ܩܲܕ݂ܡܵܝܵـ̈ـܬ̣ܵܐ: ܘܠܵܐ ܨܲܠܝܼ ܠܨܲܠܡܹ̈ܐ.

4: ܡܸܛܠ ܕܲܠܡܵܪܝܵܐ ܐܲܠܵܗܵܐ ܕܐܲܒ̣ܘܼܗܝ ܨܲܠܝܼ: ܘܲܒ̣ܦܘܼܩܕܵܢܵܘ̈ܗܝ ܗܲܠܸܟ݂: ܘܢܵܡܘܿܣܵܘ̈ܗܝ ܢܛܲܪ. ܘܠܵܐ ܥܒܲܕ ܐܲܝܟ݂ ܥܒ̣ܵܕܹ̈ܐ ܕܝܼܣܪܵܝܹܠ.

5: ܘܐܲܬ̣ܩܸܢ ܡܵܪܝܵܐ ܡܲܠܟ̇ܘܼܬ̣ܵܐ ܒܐܝܼܕܹܗ. ܘܝܲܗ̄ܒ̣ܘ ܠܹܗ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܩܘܼܪ̈ܒܵܢܹܐ ܠܝܵܗܘܿܫܵܦܵܛ. ܘܲܗܘ̤ܵܐ ܠܹܗ ܥܘܼܬ̣ܪܵܐ ܘܐܝܼܩܵܪܵܐ: ܣܘܿܓ̣ܵܐܐ ܕܛܵܒ̣

6: ܘܐܸܬ̣ܚܲܝܲܠ ܠܸܒܹ̇ܗ ܒܐܘܼܪ̈ܚܵܬܹܗ ܕܡܵܪܝܵܐ: ܘܬ̣ܘܼܒ̣ ܥܩܲܪ ܡܲܕ݂ܒ̇ܚܹ̈ܐ ܘܲܥܠܵـ̈ـܘܵܬ̣ܵܐ ܕܲܗܘ̤ܵܘ ܒܲܬ̣ܚܘܼܡܵܐ ܕܒܹܝܬ̣ ܝܼܗܘܼܕ݂ܵܐ.

7: ܒܲܫܢܲܬ̣ ܬܠܵܬ̣ ܠܡܲܠܟ̇ܘܼܬܹܗ: ܫܲܕܲܪ ܩܪܵܐ ܠܪܵܘ̱ܪ̈ܒ̣ܵܢܵܘܗܝ: ܘܪ̈ܲܒܲܝ ܚܲܝ̈ܠܹܐ: ܠܥܘܿܒܲܕ݂ܝܵܐ: ܘܠܲܙܟܲܪܝܵܐ: ܘܲܠܢܲܬ̣ܢܵܐܹܝܠ: ܘܠܲܡܠܲܟ݂ܝܵܐ: ܠܡܲܠܵܦܘܼ ܒܩܘܼܪ̈ܝܵܐ ܕܲܝܗܘܼܕ݂ܵܐ.

8: ܘܥܲܡܗܘܿܢ ܗܘ̤ܵܘ ܠܹܘܵܝܹ̈ܐ: ܫܡܲܥܝܵܐ: ܢܬܲܢܝܵܐ: ܙܟܲܪܝܵܐ: ܥܫܵܐܝܹܠ: ܢܵܛܘܿܪܵܐ: ܝܘܿܢܵܬ̣ܵܢ: ܐܲܕ݂ܘܿܢܝܼܵܐ: ܛܘܿܒ̇ܝܼܵܐ. ܗܵܠܹܝܢ ܟܠܗܘܿܢ ܠܹܘܵܝܹ̈ܐ. ܘܥܲܡܗܘܿܢ ܗ̄ܘ̣ܵܘ ܐܹܠܝܼܫܡܲܥ: ܘܝܵܗܘܿܪܵܡ ܟܵܗܢܹ̈ܐ.

9: ܘܡܲܠܦܝܼܢ ܗ̄ܘ̣ܵܘ ܒܐܲܪܥܵܐ ܕܲܝܗܘܼܕ݂ܵܐ ܟܠܵܗ̇. ܘܥܲܡܗܘܿܢ ܗܘ̤ܵܐ ܣܸܦܪܵܐ ܕܢܵܡܘܿܣܹܗ ܕܡܵܪܝܵܐ. ܘܡܸܬ̣ܟܲܪܟ̇ܝܼܢ ܗ̄ܘ̣ܵܘ ܒܟ݂ܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ: ܘܡܲܠܦܝܼܢ ܗ̄ܘ̣ܵܘ ܠܥܲܡܵܐ.

10: ܘܲܗܘ̤ܵܬ̣ ܕܸܚ̱ܠܬܹܗ ܕܡܵܪܝܵܐ ܥܲܠ ܟܠܗܹܝܢ ܡܲܠ̈ܟ̇ܘܵܬ̣ܵܐ ܘܲܡܕ݂ܝܼ̈ܢܵܬ̣ܵܐ ܕܲܗ̤ܘܲܝ̈ ܚܕ݂ܵܪ̈ܲܝ ܝܼܗܘܼܕ݂ܵܐ ܘܠܵܐ ܐܸܬ̣ܟܲܬܲܫܘ ܥܲܡ ܝܵܗܘܿܫܵܦܵܛ.

11: ܘܡ̣ܢ ܡܕ݂ܝܼ̈ܢܵܬ̣ܵܐ ܕܲܦܠܸܫ̈ܬܵܝܹܐ ܡܲܝܬܹ̇ܝܢ ܗ̄ܘ̣ܵܘ ܠܝܵܗܘܿܫܵܦܵܛ: ܟܸܣܦܵܐ ܘܩܘܼܪ̈ܒܵܢܹܐ ܘܲܟ݂ܣܸܦ ܪܹܫܵܐ. ܘܐܵܦ ܥܲܪ̈ܒ̣ܵܝܹܐ ܡܲܝܬܹ̇ܝܢ ܗ̄ܘ̣ܵܘ ܥܵـ̈ـܢܵܐ: ܕܸܟ݂ܪܹ̈ܐ ܫܲܒ̣ܥܵܐ ܐܲܠܦ̈ܝܼܢ ܘܲܫܒܲܥܡܵܐܐ: ܘܬܲܝܫܹ̈ܐ ܫܲܒ̣ܥܵܐ ܐܲܠܦ̈ܝܼܢ ܘܲܫܒܲܥܡܵܐܐ ܒܫܲܢ̄ܬܵܐ ܚܕ݂ܵܐ.

12: ܘܲܗܘ̤ܵܐ ܝܵܗܘܿܫܵܦܵܛ ܐܵܙܹ̇ܠ ܘܥܵܬܲܪ: ܥܕܲܡܵܐ ܕܲܥܬܲܪ ܛܵܒ̣. ܘܲܒ̣ܢܵܐ ܒܲܝܗܘܼܕ݂ܵܐ ܒܝܼܪ̈ܵܬ̣ܵܐ ܘܩܘܼܪ̈ܝܵܐ ܕܲܩܦܵܣܹ̈ܐ.

13: ܘܲܥܒ̣ܝܼܕ̇ܬܵܐ ܪܲܒ̇ܬ̣ܵܐ ܗܘ̤ܵܬ̣ ܠܹܗ ܒܐܲܪܥܵܐ ܕܲܝܗܘܼܕ݂ܵܐ. ܘܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ ܓܲܢ̄ܒܵܪ̈ܲܝ ܚܲܝܠܵܐ ܒܐܘܿܪܸܫܠܸܡ.

14: ܘܗܵܢܵܐ ܡܸܢܝܵܢܗܘܿܢ ܠܒܹܝܬ̣ ܐܲܒ̣ܵܗܲܝ̈ܗܘܿܢ ܕܒܹܝܬ̣ ܝܼܗܘܼܕ݂ܵܐ ܪܵܘ̱ܪ̈ܵܒ̣ܵܢܹܐ ܕܐܲܠܦܹ̈ܐ: ܥܕ݂ܝܼܢܘܿ ܓܲܢ̄ܒܵܪܵܐ: ܘܠܹܗ ܡܫܲܡܫܝܼܢ ܗ̄ܘ̣ܵܘ ܓܲܢ̄ܒܵܪ̈ܲܝ ܚܲܝܠܵܐ: ܬܠܵܬ̣ ܡܵܐܐ ܐܲܠܦ̈ܝܼܢ.

15: ܘܝܘܿܚܲܢܵܢ ܪܲܒܵܐ: ܘܠܹܗ ܡܫܲܡܫܝܼܢ ܗ̄ܘ̣ܵܘ ܓܲܢ̄ܒܵܪ̈ܲܝ ܚܲܝܠܵܐ: ܡܲܐܬܹ̇ܝܢ ܘܲܬ̣ܡܵܢܐܝܼܢ ܐܲܠܦ̈ܝܼܢ.

16: ܘܡ̣ܢ ܒܵܬ̣ܪܹܗ ܫܲܡܥܝܼ ܒܲܪ ܙܵܪܵܚ ܕܲܫܦܲܪ ܠܡܵܪܝܵܐ. ܘܥܲܡܹܗ ܡܵܐܬܹ̇ܝܢ ܐܲܠܦ̈ܝܼܢ ܓܲܢ̄ܒܵܪ̈ܲܝ ܚܲܝܠܵܐ.

17: ܘܡ̣ܢ ܒܹܝܬ̣ ܒܸܢܝܵܡܹܝܢ ܓܲܢ̄ܒܵܪ̈ܲܝ ܚܲܝܠܵܐ: ܐܹܠܝܼܕܲܥ ܫܡܹܗ. ܘܠܹܗ ܡܫܲܡܫܝܼܢ ܗ̄ܘ̣ܵܘ ܓܲܒ̣ܪܹ̈ܐ ܫܵܕ݂ܘܿܝܲܝ̈ ܒܩܸܫܬܵܐ: ܘܐܲܚܝܼ̈ܕܲܝ ܣܲܟ̇ܪܹ̈ܐ: ܡܲܐܬܹ̇ܝܢ ܐܲܠܦ̈ܝܼܢ.

18: ܘܝܵܗܘܿ ܙܵܒ̣ܵܪ ܓܲܢ̄ܒܵܪܵܐ. ܘܠܹܗ ܡܫܲܡܫܝܼܢ ܗ̄ܘ̣ܵܘ ܡܵܐܐ ܘܲܬ̣ܡܵܢܐܝܼܢ ܐܲܠܦ̈ܝܼܢ: ܥܵܒ̣ܕܲܝ̈ ܩܪܵܒ̣ܵܐ.

19: ܗܵܠܹܝܢ ܟܠܗܘܿܢ ܕܲܡܫܲܡܫܝܼܢ ܠܡܲܠܟܵܐ ܝܵܗܘܿܫܵܦܵܛ: ܣܛܲܪ ܡ̣ܢ ܡܲܢ ܕܫܲܠܸܛ̣ ܡܲܠܟܵܐ ܒܩܘܼܪ̈ܝܵܐ ܕܬ̣ܘܼܩܦܵܐ: ܒܟ݂ܠܵܗ̇ ܐܲܪܥܵܐ ܕܲܝܗܘܼܕ݂ܵܐ.

ܩܹܦܵܠܹܐܘܿܢ: ܝܚ .

1: ܘܲܗܘ̤ܵܐ ܠܝܵܗܘܿܫܵܦܵܛ ܥܘܼܬ̣ܪܵܐ ܘܐܝܼܩܵܪܵܐ ܣܲܓ̇ܝܼ ܛܵܒ̣. ܘܐܸܬ̣ܩܲܪܲܒ̣ ܠܘܵܬ̣ ܐܵܚܵܒ̣.

2: ܘܲܢܚܸܬ̣ ܒܵܬܲܪ ܬܲܪܬܹ̇ܝܢ ܫܢ̈ܝܼܢ: ܠܘܵܬ̣ ܐܵܚܵܒ̣ ܠܫܵܡ̇ܪܹܝܢ. ܘܕܲܒܲܚ ܠܹܗ ܐܵܚܵܒ̣ ܥܵـ̈ـܢܵܐ ܘܬ̣ܵܘܪܹ̈ܐ ܣܘܿܓ̣ܵܐܐ ܕܛܵܒ̣: ܘܲܠܚܲܝ̈ܠܵܘܵܬ̣ܵܐ ܕܥܲܡܹܗ ܘܡܲܠܟܹ̇ܗ ܕܢܸܣܲܩ ܠܪܵܡܲܬ̣ ܓܸܠܥܵܕ݂.

3: ܘܐܸܡܲܪ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܠܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܬܸܣܲܩ ܥܲܡܝ ܠܪܵܡܲܬ̣ ܓܸܠܥܵܕ݂. ܘܐܸܡܲܪ ܠܹܗ: ܣܵܠܹܩ ܐ̄ܢܵܐ ܐܲܟ݂ܘܵܬ̣ܵܟ݂ ܘܥܲܡܝ ܐܲܝܟ݂ ܥܲܡܵܟ݂: ܘܪ̈ܲܟ݂ܫ̄ܝ ܐܲܝܟ݂ ܪ̈ܲܟ݂ܫܵܟ݂. ܘܥܲܡܵܟ݂ ܐܵܙܹ̇ܠ ܐ̄ܢܵܐ ܠܲܩܪܵܒ̣ܵܐ.

4: ܘܐܸܡܲܪ ܝܵܗܘܿܫܵܦܵܛ ܠܡܲܠܟܵܐ ܕܝܼܣܪܵܝܹܠ: ܫܐܲܠ ܢܹܐ ܐܲܝܟ݂ ܝܵܘܡܵܢܵܐ: ܦܸܬ̣ܓ̣ܵܡܹܗ ܕܡܵܪܝܵܐ.

5: ܘܟܲܢܸܫ ܡܲܠܟܵܐ ܕܝܼܣܪܵܝܹܠ: ܢܒ̣ܝܹ̈ܐ ܐܲܝܟ݂ ܐܲܪܒܲܥܡܵܐܐ ܓܲܒ̣ܪ̈ܝܼܢ: ܘܐܸܡܲܪ ܠܗܘܿܢ: ܢܹܐܙܲܠ ܠܲܩܪܵܒ̣ܵܐ ܠܪܵܡܲܬ̣ ܓܸܠܥܵܕ݂: ܐܵܘ ܠܵܐ ܘܐܵܡ̇ܪܝܼܢ ܠܹܗ: ܣܲܩ: ܘܡܵܪܝܵܐ ܢܲܫܠܸܡ ܒܥܸܠܕ̇ܒ̣ܵܒܲܝ̈ܟ ܒܐܝܼܕܲܝ̈ܟ.

6: ܘܐܸܡܲܪ ܡܲܠܟܵܐ ܝܵܗܘܿܫܵܦܵܛ: ܕܲܠܡܵܐ ܐܝܼܬ̣ ܗܵܪܟܵܐ ܕܩܘܼܫܬܵܐ ܕܡܵܪܝܵܐ: ܘܢܸܫܐܲܠ ܡܸܢܹܗ.

7: ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܵܗܘܿܫܵܦܵܛ: ܬܘܼܒ̣ ܐܝܼܬ̣ ܓܲܒ̣ܪܵܐ ܚܲܕ݂ ܠܡܸܫܐܲܠ ܡܸܠܬܹܗ ܕܡܵܪܝܵܐ ܡܸܢܹܗ. ܘܐܸܢܵܐ ܣܵܢܹ̇ܐ ܐ̄ܢܵܐ ܠܹܗ: ܕܠܵܐ ܡܸܬ̣ܢܲܒܹ̇ܐ ܥܠܲܝ ܛܵܒ̣ܬ̣ܵܐ: ܐܸܠܵܐ ܒܝܼܫܬܵܐ ܡܝܼܟ݂ܵܐ ܒܲܪ ܝܲܡܠܵܐ ܫܡܹܗ. ܘܐܸܡܲܪ ܝܵܗܘܿܫܵܦܵܛ: ܠܵܐ ܢܹܐܡܲܪ ܡܲܠܟܵܐ ܗܵܟܲܢܵܐ.

8: ܘܲܩܪܵܐ ܡܲܠܟܵܐ ܕܝܼܣܪܵܝܹܠ ܠܲܡܗܲܝܡܢܵܐ ܚܲܕ݂: ܘܐܸܡܲܪ ܠܹܗ: ܣܲܪܗܸܒ̣ ܐܲܝܬܵܐ ܠܝܼ ܠܡܝܼܟ݂ܵܐ ܒܲܪ ܝܲܡܠܵܐ.

9: ܘܡܲܠܟܵܐ ܕܝܼܣܪܵܝܹܠ: ܘܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܝܵܬ̣ܒ̇ܝܼܢ ܓܒܲܪ ܥܲܠ ܟܘܼܪܣܝܹܗ. ܘܲܠܒ̣ܝܼܫܝܼܢ ܠܒ̣ܘܼܫܵܐ ܒܵܪܕܵܐ. ܘܝܵܬ̣ܒ̇ܝܼܢ ܒܬܲܪܥܵܐ ܕܫܵܡܪܝܼܢ ܘܟ݂ܠܗܘܿܢ ܢܒ̣ܝܹ̈ܐ ܕܲܓܵܠܹ̈ܐ ܡܸܬ̣ܢܲܒܹ̇ܝܢ ܗ̄ܘ̣ܵܘ ܩܕ݂ܵܡܲܝܗܘܿܢ.

10: ܘܲܥܒܲܕ݂ ܠܹܗ ܨܸܕ݂ܩܝܵܐ ܒܲܪ ܟܢܲܥܢܵܝܬܵܐ: ܩܲܪ̈ܢܵܬ̣ܵܐ ܕܦܲܪܙܠܵܐ: ܘܐܸܡܲܪ ܠܵܗ̇: ܗܵܟܲܢܵܐ ܐܵܡܲܪ ܡܵܪܝܵܐ: ܒܗܵܠܹܝܢ ܬܕܲܩܲܪ ܐܸܢܘܿܢ ܠܐܲܕ݂ܘܿܡܵܝܹ̈ܐ: ܥܕܲܡܵܐ ܕܲܬ̣ܓܲܡܲܪ ܐܸܢܘܿܢ: ܘܲܥܕܲܡܵܐ ܠܐܲܝܟܵܐ ܕܬ̣ܵܘܒܸ̇ܕ݂ ܐܸܢܘܿܢ.

11: ܘܟ݂ܠܗܘܿܢ ܢܒ̣ܝܹ̈ܐ ܕܲܓܵܠܹ̈ܐ ܡܸܬ̣ܢܲܒܹ̇ܝܢ ܗܵܟܲܢܵܐ. ܘܐܵܡ̇ܪܝܼܢ: ܣܲܩ ܠܪܵܡܲܬ̣ ܓܸܠܥܵܕ݂: ܘܲܙܟ݂ܝܼܗ̇ ܘܢܲܫܠܸܡ ܡܵܪܝܵܐ ܒܥܸܠܕ̇ܒ̣ܵܒܲܝ̈ܟ ܒܐܝܼܕܲܝ̈ܟ: ܡܲܠܟܵܐ.

12: ܘܐܝܼܙܓܲܕܵܐ ܕܐܸܙܲܠ̣ ܠܡܸܩܪܵܐ ܠܡܝܼܟ݂ܵܐ: ܡܲܠܸܠ̣ ܥܲܡܹܗ: ܘܐܸܡܲܪ ܠܹܗ: ܗܵܐ ܡܸܠܲܝ̈ܗܘܿܢ ܕܲܢܒ̣ܝܹ̈ܐ ܕܲܓܵܠܹ̈ܐ: ܫܲܘ̈ܝܵܢ ܐܸܢܹܝܢ ܠܲܡܡܲܠܵܠܘܼ ܐܲܟܲܚ̄ܕ݂ ܛܵܒ̣ܬ̣ܸܵܐ ܩܕ݂ܵܡ ܡܲܠܟܵܐ. ܢܸܗܘܘܿܢ ܦܸܬ̣ܓ̣ܵܡܲܝ̈ܟ ܒܲܣܝܼܡܝܼܢ ܐܲܝܟ݂ ܕܚܲܕ݂ ܡܸܢܗܘܿܢ ܘܬܸܬ̣ܢܲܒܹ̇ܐ ܐܵܦ ܐܲܢ̄ܬ̇ ܛܵܒ̣ܬ̣ܵܐ.

13: ܘܐܸܡܲܪ ܡܝܼܟ݂ܵܐ: ܚܲܝ ܗ̄ܘܼ ܡܵܪܝܵܐ ܐܲܠܵܗܵܐ: ܐܸܠܵܐ ܡܸܕܸ̇ܡ ܕܢܲܪܡܹܐ ܐܲܠܵܗܵܐ ܒܠܹܒ̇ܝ: ܗܵܘ̇ ܐܹܡܲܠܸܠ.

14: ܘܐܸܙܲܠ̣ ܠܘܵܬ̣ ܡܲܠܟܵܐ. ܘܐܸܡܲܪ ܠܹܗ ܡܲܠܟܵܐ: ܡܝܼܟ݂ܵܐ: ܢܹܙܲܠ ܠܪܵܡܲܬ̣ ܓܸܠܥܵܕ݂: ܐܵܘ ܠܵܐ ܘܐܸܡܲܪ ܠܹܗ: ܣܲܩ ܘܲܙܟ݂ܝܼܗ̇: ܘܢܸܫܬܲܠܡܘܼܢ ܒܐܝܼܕܲܝ̈ܟ.

15: ܘܐܸܡܲܪ ܠܹܗ ܡܲܠܟܵܐ: ܥܲܠ ܟܡܵܐ ܙܲܒ̣̈ܢܝܼܢ ܐܸܢܵܐ ܡܵܘܡܸܐ ܐ̄ܢܵܐ ܠܵܟ݂: ܕܠܵܐ ܬܡܲܠܸܠ ܥܲܡܝ: ܐܸܠܵܐ ܐܸܢ ܬܪ̈ܝܼܨܵܬ̣ܵܐ: ܒܲܫܡܹܗ ܕܡܵܪܝܵܐ.

16: ܘܐܸܡܲܪ ܚܵܙܹ̇ܐ ܗ̄ܘܹ̇ܝܬ̣ ܠܹܗ ܠܟ݂ܠܹܗ ܝܼܣܪܵܝܹܠ: ܕܲܡܒܲܕ̇ܪܝܼܢ ܒܹܝܬ̣ ܛܘܼܪܹ̈ܐ: ܘܕ݂ܵܡܹ̇ܝܢ ܠܥܵـ̈ـܢܵܐ ܕܠܲܝܬ̇ ܠܵܗ̇ ܪܵܥܝܵܐ ܘܐܸܡܲܪ ܡܵܪܝܵܐ: ܠܲܝܬ̇ ܡܲܠܟܵܐ ܠܗܵܠܹܝܢ: ܢܸܗܦܘܿܟ݂ ܓܒܲܪ ܠܒܲܝܬܹ̇ܗ ܒܲܫܠܵܡܵܐ.

17: ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܵܗܘܿܫܵܦܵܛ: ܠܵܐ ܐܸܡ̇ܪܹܬ̣ ܠܵܟ݂ ܕܠܵܐ ܡܸܬ̣ܢܲܒܸܐ ܥܠܲܝ ܗܵܢܵܐ ܛܵܒ̣ܬ̣ܵܐ: ܐܸܠܵܐ ܐܸܢ ܒܝܼܫܬܵܐ.

18: ܘܐܸܡܲܪ ܡܝܼܟ݂ܵܐ: ܡܸܛܠ ܗܵܢܵܐ ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ: ܚܙܹ̇ܝܬ̣ ܠܡܵܪܝܵܐ ܝܵܬܹܒ̣ ܥܲܠ ܟܘܼܪܣܝܹܗ: ܘܟ݂ܠ ܚܲܝ̈ܠܵܘܵܬ̣ܵܐ ܕܲܫܡܲܝܵܐ ܩܵܝ̇ܡܝܼܢ ܡ̣ܢ ܝܲܡܝܼܢܹܗ ܘܡ̣ܢ ܣܸܡܵܠܹܗ.

19: ܘܐܸܡܲܪ ܡܵܪܝܵܐ ܡܲܢܘܼ ܢܫܲܕ̇ܠܝܼܘܗܝ ܠܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܕܢܸܣܲܩ ܘܢܸܬ̣ܩܛܸܠ ܒܪܵܡܲܬ̣ ܓܸܠܥܵܕ݂. ܚܲܕ݂ ܐܵܡܲܪ ܡܫܲܕܸ̇ܠ ܐ̄ܢܵܐ ܠܹܗ: ܘܐܲܚ̄ܪܹܢܵܐ ܐܵܡܲܪ ܡܫܲܕܸ̇ܠ ܐ̄ܢܵܐ ܠܹܗ.

20: ܘܲܢܦܲܩ̣ ܪܘܼܚܵܐ: ܘܩܵܡ̣ ܩܕ݂ܵܡ ܡܵܪܝܵܐ ܘܐܸܡܲܪ: ܐܸܢܵܐ ܡܫܲܕܸ̇ܠ ܐ̄ܢܵܐ ܠܹܗ. ܘܐܸܡܲܪ ܠܹܗ ܡܵܪܝܵܐ: ܒܡܵܢܵܐ.

21: ܘܐܸܡܲܪ ܐ̄ܢܵܐ ܐܸܦܘܿܩ: ܘܐܸܗܘܹܐ ܪܘܼܚܵܐ ܟܲܕܵܒ̣ܵܐ ܒܦܘܼܡܵܐ ܕܟ݂ܠܗܘܿܢ ܢܒ̣ܝܼܵܘ̈ܗܝ ܘܐܸܡܲܪ ܠܹܗ: ܡܫܲܕܸ̇ܠ ܐܲܢ̄ܬ̇ ܠܹܗ: ܐܵܦ ܡܸܫܟܲܚ ܐܲܢ̄ܬ̇ ܠܹܗ. ܦܘܿܩ ܘܲܥܒܸܕ݂ ܐܲܝܟܲܢܵܐ ܕܐܸܡܲܪܬ̇.

22: ܘܐܵܦ ܗܵܫܵܐ ܗܵܐ ܝܲܗ̄ܒ̣ ܡܵܪܝܵܐ ܪܘܼܚܵܐ ܟܲܕܵܒ̣ܵܐ ܒܦܘܼܡܵܐ ܕܟ݂ܠܗܘܿܢ ܢܒ̣ܝܼܲܝ̈ܟ ܗܵܠܹܝܢ. ܘܡܵܪܝܵܐ ܦܣܲܩ̣ ܥܠܲܝܟ ܒܝܼܫܬܵܐ.

23: ܘܲܩܪܸܒ̣ ܨܸܕܲܩܝܵܐ ܒܲܪ ܟܢܲܥܢܵܝܬܵܐ: ܘܲܡܚܵܝܗܝ ܠܡܝܼܟ݂ܵܐ ܥܲܠ ܦܲܟܹ̇ܗ: ܘܐܸܡܲܪ ܠܹܗ. ܡ̣̤ ܐܸܡܲܬ̣ܝ ܘܲܠܟ݂ܵܐ: ܥܸܒ̣ܪܲܬ̣ ܪܘܼܚܹܗ ܕܡܵܪܝܵܐ ܡܹܢܝ: ܠܲܡܡܲܠܵܠܘܼ ܥܲܡܵܟ݂.

24: ܘܐܸܡܲܪ ܡܝܼܟ݂ܵܐ: ܗܵܐ ܚܵܙܹ̇ܝܬ̇ ܒܝܵܘܡܵܐ ܗܵܘ̇: ܟܲܕ݂ ܬܸܥܘܿܠ ܬܵܘܵܢ ܒܓ̣ܵܘ ܬܵܘܵܢ ܠܡܸܬ̇ܛܲܫܵܝܘܼ.

25: ܘܐܸܡܲܪ ܡܲܠܟܵܐ ܕܝܼܣܪܵܝܹܠ: ܕܒܲܪܘ ܠܡܝܼܟ݂ܵܐ. ܘܙܸܠܘ ܟܠܵܐܘܼܗܝ ܒܹܝܬ̣ ܐܲܡܘܿܢ ܫܲܠܝܼܛܵܐ ܕܲܩܪܝܼܬ̣ܵܐ: ܘܲܒ̣ܒܲܝܬܹ̇ܗ ܕܝܘܿܐܵܫ ܒܲܪ ܡܲܠܟܵܐ.

26: ܘܬܹܐܡܪܘܿܢ: ܗܵܟܲܢܵܐ ܐܵܡܲܪ ܡܲܠܟܵܐ: ܐܲܪܡܵܐܘܼܗܝ ܠܗܵܢܵܐ ܒܹܝܬ̣ ܐܲܣܝܼܪܹ̈ܐ. ܘܐܵܘܟ̇ܠܘܼܗܝ ܠܲܚܡܵܐ ܠܡܸܛܲܪ ܢܦܸܫ. ܘܐܲܫܩܵܐܘܼܗܝ ܡܲـ̈ـܝܵܐ ܠܡܸܛܲܪܢܦܸܫ: ܥܕܲܡܵܐ ܠܐܲܝܟܵܐ ܕܐܸܗܦܘܿܟ݂ ܒܲܫܠܵܡܵܐ.

27: ܘܐܸܡܲܪ ܡܝܼܟ݂ܵܐ: ܐܸܢ ܡܸܗܦܲܟ݂ ܗܵܦܹ̇ܟ݂ ܐܲܢ̄ܬ̇: ܘܐܵܬܹ̇ܐ ܐܲܢ̄ܬ̇ ܒܲܫܠܵܡܵܐ: ܠܵܐ ܡܲܠܸܠ̣ ܡܵܪܝܵܐ ܥܲܡܝ. ܘܐܸܡܲܪ: ܫܡܲܥܘ ܥܲܡܡܹ̈ܐ ܟܠܟ݂ܘܿܢ.

28: ܘܲܣܠܸܩ ܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܘܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܠܪܵܡܲܬ̣ ܓܸܠܥܵܕ݂.

29: ܘܐܸܡܲܪ ܡܲܠܟܵܐ ܕܝܼܣܪܵܝܹܠ ܠܝܵܗܘܿܫܵܦܵܛ ܐܸܙܕܲܝܲܢ: ܘܐܹܬܹܐ: ܘܐܹܩܘܿܡ ܒܣܸܕ݂ܪܵܐ ܕܲܩܪܵܒ̣ܵܐ. ܘܐܲܢ̄ܬ̇ ܠܒܲܫ ܡܵܐܢܲܝ̈ ܙܲܝܢܵܟ݂. ܘܐܸܙܕܲܝܲܢ ܡܲܠܟܵܐ ܕܝܼܣܪܵܝܹܠ: ܘܥܲܠ ܘܩܵܡ ܒܣܸܕ݂ܪܵܐ ܕܲܩܪܵܒ̣ܵܐ.

30: ܘܡܲܠܟܵܐ ܕܐܲܕ݂ܘܿܡܵܝܹ̈ܐ: ܦ̣ܩܲܕ݂ ܠܫܲܠܝܼܛܵܢܹ̈ܐ ܕܙܵܘ̈ܓܹ̇ܐ ܕܐܝܼܬ̣ ܠܹܗ: ܬܠܵܬ̣ܝܼܢ ܘܲܬ̣ܪܹܝܢ. ܘܐܸܡܲܪ ܠܗܘܿܢ: ܠܵܐ ܬܸܬ̣ܟܲܬ̇ܫܘܼܢ ܠܵܐ ܥܲܡ ܙܥܘܿܪܵܐ: ܘܠܵܐ ܥܲܡ ܪܲܒܵܐ: ܐܸܠܵܐ ܥܲܡ ܡܲܠܟܵܐ ܕܝܼܣܪܵܝܹܠ ܒܲܠܚܘܿܕ݂.

31: ܘܲܗܘ̤ܵܐ ܕܟܲܕ݂ ܚ̣ܙܵܘ ܫܲܠܝܼܛܵܢܹ̈ܐ ܕܙܵܘ̈ܓܹ̇ܐ: ܠܝܵܗܘܿܫܵܦܵܛ: ܐܵܡ̇ܪܝܼܢ: ܡܲܠܟܵܐ ܕܝܼܣܪܵܝܹܠ ܗܵܢܵܘ ܘܐܸܬ̣ܵܘ ܥܠܵܘܗܝ: ܠܡܸܬ̣ܟܲܬܵܫܘܼ ܥܲܡܹܗ. ܘܐܲܝܠܸܠ ܝܵܗܘܿܫܵܦܵܛ ܘܡܵܪܝܵܐ ܥܲܕ̇ܪܹܗ: ܘܐܲܦܪܸܩ̣ ܐܸܢܘܿܢ ܡܸܢܹܗ.

32: ܘܲܗܘ̤ܵܐ ܕܟܲܕ݂ ܚܙ̣ܵܘ ܫܲܠܝܼܛܵܢܹ̈ܐ ܕܙܵܘ̈ܓܹ̇ܐ: ܕܠܵܐ ܗܘ̤ܵܐ ܡܲܠܟܵܐ ܕܝܼܣܪܵܝܹܠ: ܗܦܲܟ݂ܘ ܠܗܘܿܢ ܡ̣ܢ ܒܸܣܬ̇ܪܹܗ.

33: ܘܓܲܒ̣ܪܵܐ ܫܵܕܹ̇ܐ ܗ̄ܘ̣ܵܐ ܒܩܸܫܬܵܐ ܬܲܡܝܼܡܵܐܝܼܬ̣ ܠܩܘܼܒ̣ܠܹܗ ܘܲܡܚܵܝܗܝ ܠܡܲܠܟܵܐ ܕܝܼܣܪܵܝܹܠ: ܒܹܝܬ̣ ܦܪܵܩܵܐ ܕܫܸܪܝܵܢܹܗ. ܘܐܸܡܲܪ ܠܡܲܪܟ̇ܒ̣ܵܢܹܗ: ܐܲܗܦܸܟ݂ ܐܝܼܕ݂ܵܟ݂: ܘܐܲܦܸܩܲܝܢܝ ܠܒܲܪ ܡ̣ܢ ܡܲܫܪܝܼܬ̣ܵܐ: ܡܸܛܠ ܕܲܡܚܘܿܬ̣ܵܐ ܕܡܵܘܬܵܐ ܡܚܸܐ ܗ̄ܘ̣ܵܐ.

34: ܘܲܥܫܸܢ ܩܹܐܪܣܵܐ ܒܝܵܘܡܵܐ ܗܵܘ̇. ܘܡܲܠܟܵܐ ܕܝܼܣܪܵܝܹܠ ܝܵܬܹ̇ܒ̣ ܗ̄ܘ̣ܵܐ ܒܙܵܘܓ̣ܵܐ. ܘܡܸܬ̣ܟܲܬܲܫ ܗ̄ܘ̣ܵܐ ܥܲܡ ܐܲܕ݂ܘܿܡܵܝܹ̈ܐ: ܥܕܲܡܵܐ ܠܪܲܡܫܵܐ ܘܡܝܼܬ̣ ܥܸܕܵܢ ܡܲܥܪ̈ܵܒܲܝ ܫܸܡܫܵܐ.

ܩܹܦܵܠܹܐܘܿܢ: ܝܛ .

1: ܘܲܗ̣ܦܲܟ݂ ܝܵܗܘܿܫܵܦܵܛ ܠܐܲܦܲܝ̈ ܪܲܡܫܵܐ ܠܒܲܝܬܹ̇ܗ ܒܲܫܠܵܡܵܐ ܠܐܘܿܪܸܫܠܸܡ. ܘܲܢܦܲܩ̣ ܠܐܘܼܪܥܹܗ ܒܲܪ ܚܲܢܲܢ ܚܲܙܵܝܵܐ ܘܐܸܡܲܪ ܠܡܲܠܟܵܐ ܝܵܗܘܿܫܵܦܵܛ: ܠܲܡܥܲܕܵܪܘܼ ܠܪܲܫܝܼܥܵܐ ܐܸܙܲܠ̣ܬ̇: ܘܲܠܣܵܢܐܵܘ̈ܗܝ ܕܡܵܪܝܵܐ ܪܚܸܡܬ̇ ܡܸܛܠ ܗܵܢܵܐ ܪܓܸܙ ܡܵܪܝܵܐ ܥܠܲܝܟ.

3: ܐܸܠܵܐ ܡܗܲܝܡܸܢ ܐ̄ܢܵܐ: ܕܦܸܬ̣ܓ̣ܵܡܹ̈ܐ ܛܵܒܹ̈ܐ ܐܸܫܬܲܡܲܥܘ ܡܸܢܵܟ݂. ܡܸܛܠ ܕܲܕ݂ܡܵܐ ܙܲܟܵܝܵܐ ܠܵܐ ܐܹܫܲܕ̇ܬ̇ ܒܐܲܪܥܵܐ. ܘܐܲܬ̣ܩܸܢܬ̇ ܠܸܒܵܟ݂ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܒܩܘܼܫܬܵܐ.

4: ܘܝܼܬܸܒ̣ ܝܵܗܘܿܫܵܦܵܛ ܒܐܘܿܪܸܫܠܸܡ ܘܲܗܦܲܟ݂ ܘܲܢܦܲܩ̣ ܡ̣ܢ ܒܹܪ ܫܒܲܥ ܡܕ݂ܝܼܢ̄ܬܵܐ. ܘܡܲܛܝܼ ܠܛܘܼܪܵܐ ܕܐܲܦܪܹܝܡ ܘܐܲܗܦܸܟ݂ ܐܸܢܘܿܢ ܠܡܸܕ݂ܚܲܠ ܩܕ݂ܵܡ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ.

5: ܘܐܲܩܝܼܡ ܕܲܝܵܢܹ̈ܐ ܒܐܲܪܥܵܐ: ܒܟ݂ܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ ܥܲܫܝܼ̈ܢܵܬ̣ܵܐ: ܘܩܘܼܪ̈ܝܵܐ ܓܲܢ̄ܒܵܪ̈ܵܬ̣ܵܐ.

6: ܘܐܸܡܲܪ ܠܕܲܝܵܢܹ̈ܐ: ܚܙܵܘ ܡܵܢܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ. ܕܠܵܐ ܗ̄ܘ̣ܵܐ ܠܲܒ̣ܢܲܝ̈ܢܵܫܵܐ ܕܵܝܢܝܼܢ ܐ̄ܢܬ̇ܘܿܢ: ܐܸܠܵܐ ܠܡܵܪܝܵܐ ܐܲܠܵܗܲܢ.

7: ܐܸܬ̣ܥܲܫܲܢܘ: ܘܕ݂ܘܢܘ ܕܝܼܢܵܐ ܕܩܘܼܫܬܵܐ ܘܢܸܗܘܹܐ ܡܵܪܝܵܐ ܥܲܡܟ݂ܘܿܢ ܠܥܵܠܲܡ. ܘܛܲܪܘ ܘܲܥܒܸܕ݂ܘ. ܡܸܛܠ ܕܠܲܝܬ̇ ܩܕ݂ܵܡ ܡܵܪܝܵܐ ܐܲܠܵܗܲܢ ܥܵܘܼܠܵܐ: ܘܡܲܣܲܒ̣ ܒܐܲܦܹ̈ܐ: ܘܩܘܼܒܵܠܵܐ ܕܫܘܼܚܕܵܐ.

8: ܘܐܵܦ ܒܐܘܿܪܸܫܠܸܡ ܐܲܩܝܼܡ ܝܵܗܘܿܫܵܦܵܛ ܡ̣ܢ ܠܹܘܵܝܹ̈ܐ: ܘܡ̣ܢ ܟܵܗ̈ܢܹܐ: ܘܡ̣ܢ ܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ ܕܲܒ̣ܢܲܝ̈ ܝܼܣܪܵܝܹܠ: ܠܕ݂ܝܼܢܵܐ ܕܡܵܪܝܵܐ.

9: ܘܲܗܦܲܟ݂ ܠܐܘܿܪܸܫܠܸܡ ܦܩܲܕ݂ ܐܸܢܘܿܢ ܘܐܸܡܲܪ ܠܗܘܿܢ: ܗܵܟܲܢܵܐ ܬܸܥܒ̇ܕ݂ܘܼܢ ܠܕܸܚ̱ܠܬܹܗ ܕܡܵܪܝܵܐ: ܒܗܲܝܡܵܢܘܼܬ̣ܵܐ ܘܲܒ̣ܠܸܒܵܐ ܫܲܠܡܵܐ.

10: ܘܟ݂ܠ ܕܝܼܢܵܐ ܕܐܵܬܹ̇ܐ ܠܘܵܬ̣ܟ݂ܘܿܢ ܡ̣ܢ ܐܲܚܲܝ̈ܟ̇ܘܿܢ: ܕܝܵܬ̣ܒ̇ܝܼܢ ܒܩܘܼܪ̈ܝܼܟ݂ܘܿܢ: ܒܹܝܬ̣ ܕܡܵܐ ܠܲܕ݂ܡܵܐ: ܘܒܹܝܬ̣ ܢܵܡܘܿܣܵܐ ܠܦܘܼܩܕܵܢܵܐ: ܘܲܠܕ݂ܝܼܢܵܐ. ܘܲܬ̣ܙܲܗܪܘܿܢ ܐܸܢܘܿܢ: ܕܠܵܐ ܢܚܘܼܒ̣ܘܼܢ ܩܕ݂ܵܡ ܡܵܪܝܵܐ: ܘܢܸܪܓܲܙ ܥܠܲܝܗܘܿܢ ܘܥܲܠ ܐܲܚܲܝ̈ܗܘܿܢ. ܘܗܵܟܲܢܵܐ ܬܸܥܒ̇ܕ݂ܘܼܢ: ܘܠܵܐ ܬܚܘܼܒ̣ܘܼܢ.

11: ܗܵܐ ܐܲܩܝܼܡܹ̇ـܬ̣ ܥܠܲܝܟ̇ܘܿܢ ܟܵܗ̈ܢܹܐ: ܕܲܢܕ݂ܘܼܢܘܼܢ ܕܝܼܢܵܐ ܕܩܘܼܫܬܵܐ: ܘܕ݂ܝܼܢܵܐ ܕܗܲܝܡܵܢܘܼܬ̣ܵܐ: ܐܲܝܟ݂ ܦܘܼܩܕܵܢܹܗ ܕܡܵܪܝܵܐ. ܘܲܙܟܲܪܝܵܐ ܒܲܪ ܫܡܲܥܝܵܐ: ܚܵܘܝܼ ܠܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܟܠܗܘܿܢ ܦܘܼܩܕܵܢܵܘ̈ܗܝ ܕܡܲܠܟܵܐ ܘܚܵܘܝܼ ܠܣܵܦܪܹ̈ܐ ܘܲܠܠܹܘܵܝܹ̈ܐ: ܟܠ ܡܸܕܸ̇ܡ ܩܕ݂ܵܡܲܝܗܘܿܢ ܬܲܢܝܼ: ܘܐܸܡܲܪ ܠܗܘܿܢ. ܐܸܬ̣ܥܲܫܲܢܘ: ܘܲܥܒܸܕ݂ܘ. ܘܢܸܗܘܹܐ ܡܵܪܝܵܐ ܒܥܸܕ݂ܪ̱ܟ݂ܘܿܢ ܠܥܵܠܲܡ.

ܩܹܦܵܠܹܐܘܿܢ: ܟ .

1: ܘܲܗܘ̤ܵܐ ܡ̣ܢ ܒܵܬܲܪ ܗܵܠܹܝܢ: ܐܸܬ̣ܵܘ ܒܢܲܝ̈ ܡܘܼܐܵܒ̣: ܘܲܒ̣ܢܲܝ̈ ܥܲܡܘܿܢ: ܘܥܲܡܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ: ܠܡܸܥܒܲܕ݂ ܩܪܵܒ̣ܵܐ ܥܲܡ ܝܵܗܘܿܫܵܦܵܛ.

2: ܘܐܸܬ̣ܵܘ: ܘܚܵܘܝܼܘ ܠܝܵܗܘܿܫܵܦܵܛ: ܘܐܵܡ̇ܪܝܼܢ ܠܹܗ: ܐܸܬ̣ܵܐ ܥܠܲܝܟ ܚܲܝܠܵܐ ܣܲܓ̇ܝܼ: ܡ̣ܢ ܥܸܒ̣ܪܵܐ ܕܝܲܡܵܐ ܣܘܼܡܵܩܵܐ. ܗܵܐ ܗܸܢܘܿܢ ܫܪܹܝܢ ܒܐܝܼܪܝܼܚܘܿ: ܗ̤ܝ ܗ̄ܝ̣ ܥܹܝܢ ܓܵܕ݂.

3: ܘܲܕ݂ܚܸܠ ܘܐܲܪܝܼܡ ܝܵܗܘܿܫܵܦܵܛ ܐܲܦܵܘ̈ܗܝ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ. ܘܲܓ̣ܙܲܪ ܨܵܘܡܵܐ ܥܲܠ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܐܸܡܲܪ ܠܗܘܿܢ: ܐܸܬ̣ܟܲܢܲܫܘ: ܘܬ̣ܵܘ ܢܸܒ̣ܥܸܐ ܡ̣ܢ ܡܵܪܝܵܐ ܐܲܠܵܗܲܢ.

4: ܘܐܸܬ̣ܟܲܢܲܫܘ: ܘܐܸܬ̣ܵܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܘܐܵܦ ܡ̣ܢ ܩܘܼܪ̈ܝܵܐ ܪ̈ܲܚܝܼܩܵܬ̣ܵܐ ܘܐܸܬ̣ܵܘ ܠܡܸܒ̣ܥܵܐ ܡ̣ܢ ܡܵܪܝܵܐ.

5: ܘܩܵܡ̣ ܝܵܗܘܿܫܵܦܵܛ ܒܓ̣ܵܘ ܥܲܡܵܐ ܕܲܝܗܘܼܕ݂ܵܐ: ܒܓ̣ܵܘ ܒܲܝܬܹ̇ܗ ܕܡܵܪܝܵܐ ܕܐܝܼܬ̣ ܒܐܘܿܪܸܫܠܸܡ: ܩܕ݂ܵܡ ܬܲܪܥܵܐ ܚܲܕ݂ܬ̣ܵܐ.

6: ܘܨܲܠܝܼ: ܘܗܵܟܲܢܵܐ ܐܸܡܲܪ: ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ: ܐܲܢ̄ܬ̇ ܗ̄ܘ̣ ܐܲܠܵܗܵܐ ܒܲܫܡܲܝܵܐ ܘܐܲܢ̄ܬ̇ ܫܲܠܝܼܛ ܐܲܢ̄ܬ̇ ܒܟ݂ܠܗܹܝܢ ܡܲܠ̈ܟ̇ܘܵܬ̣ܵܐ ܕܥܵܠܡܵܐ. ܘܕ݂ܝܼܠܵܟ݂ ܗ̄ܘ̣ ܚܲܝܠܵܐ ܘܓܲܢ̄ܒܵܪܘܼܬ̣ܵܐ. ܘܐܸܢܵܐ ܩܵܐܹ̇ܡ ܐ̄ܢܵܐ ܩܕ݂ܵܡܲܝܟ ܡܨܲܠܹܐ ܐ̄ܢܵܐ.

7: ܘܐܲܢ̄ܬ̇ ܗ̄ܘ̣ ܐܲܠܵܗܲܢ ܐܵܘܒ̇ܕ̇ܬ ܥܵܡܘܿܪܹ̈ܝܗ̇ ܕܐܲܪܥܵܐ ܗܵܕܹܐ: ܩܕ݂ܵܡ ܝܼܣܪܵܝܹܠ. ܘܝܲܗ̄ܒ̣ܬܵܗ̇ ܠܙܲܪܥܹܗ ܕܐܲܒ̣ܪܗܵܡ ܪܵܚܡܵܟ݂: ܠܥܵܠܲܡ.

8: ܘܝܼܬܸܒ̣ܘ ܒܵܗ̇. ܘܲܒ̣ܢܵܘ ܒܵܗ̇ ܡܲܩܕ̇ܫܵܐ ܠܲܫܡܵܟ݂: ܘܐܵܡ̇ܪܝܼܢ.

9: ܡܸܟܹ̇ܝܠ ܕܡܲܩܕ̇ܫܵܐ ܐܝܼܬ̣ ܒܲܝܢܵܬܲܢ: ܠܵܐ ܐܵܬ̣ܝܵܐ ܥܠܲܝܢ ܒܝܼܫܬܵܐ: ܘܐܵܦܠܵܐ ܚܲܪܒܵܐ: ܘܐܵܦ ܠܵܐ ܕܝܼܢܵܐ: ܘܐܵܦܠܵܐ ܡܵܘܬܵܢܵܐ: ܘܐܵܦܠܵܐ ܟܲܦܢܵܐ. ܘܢܹܐܬܹܐ ܘܲܢܩܘܼܡ ܩܕ݂ܵܡ ܒܲܝܬܵܐ ܗܵܢܵܐ: ܘܲܩܕ݂ܵܡܲܝܟ. ܡܸܛܠ ܕܲܫܡܵܟ݂ ܐܸܬ̣ܩܪܝܼ ܒܒܲܝܬܵܐ ܗܵܢܵܐ. ܘܢܹܐܬܹܐ ܘܲܢܨܲܠܹܐ ܩܕ݂ܵܡܲܝܟ ܒܒܲܝܬܵܐ ܗܵܢܵܐ. ܘܬܸܫܡܲܥ ܒܩܵܠܵܐ ܕܲܨܠܘܿܬܲܢ: ܘܬܸܦ̱ܪܩܲܢ.

10: ܘܐܵܦ ܗܵܫܵܐ ܗܵܐ ܒܢܲܝ̈ ܥܲܡܘܿܢ: ܘܛܘܼܪܵܐ ܪܲܓ̣ܒܸܠ: ܘܡܘܼܐܵܒ̣: ܕܠܵܐ ܝܲܗ̄ܒ̣ܬ̇ ܐܸܢܘܿܢ ܠܝܼܣܪܵܝܹܠ ܠܡܸܬ̣ܚܲܠܵܛܘܼ ܥܲܡܗܘܿܢ. ܡܸܛܠ ܕܡ̣ܢ ܐܲܪܥܵܐ ܕܡܸܨܪܹܝܢ ܐܲܦܸܩܬ̇ ܐܸܢܘܿܢ. ܘܐܲܦܪܸܩ̣ܬ̇ ܫܘܼܥܒܵܕ݂ܵܐ ܕܡܸܨܪ̈ܵܝܹܐ ܡܸܢܗܘܿܢ.

11: ܘܗܵܐ ܗܸܢܘܿܢ ܦܵܪܥܝܼܢ ܠܲܢ ܚܘܼܒ̣ܠܲܢ ܘܐܵܬܹ̇ܝܢ ܕܢܲܦܩܘܼܢܵܢ ܡ̣ܢ ܝܵܪܬ̇ܘܼܬ̣ܵܟ݂ ܕܐܵܘܪܸܬ̇ܬ̣ܵܢ.

12: ܡܵܪܝܵܐ ܐܲܠܵܗܲܢ ܐܸܬ̣ܓܲܠܚ ܘܕ݂ܘܼܢ ܐܸܢܘܿܢ: ܡܸܛܠ ܕܠܲܝܬ̇ ܒܲܢ ܚܲܝܠܵܐ ܠܲܡܩܵܡ ܩܕ݂ܵܡܲܝܗܘܿܢ. ܐܲܝܬܵܐ ܥܠܲܝܗܘܿܢ ܚܲܪܒܵܐ ܕܕ݂ܝܼܢܵܟ݂. ܘܲܚܢܲܢ ܠܵܐ ܝܵܕ݂ܥܝܼܢܲܢ ܡܵܢܵܐ ܢܸܥܒܸ̇ܕ݂ ܡܸܛܠ ܕܥܲܝܢܲܝ̈ܟ ܥܠܲܝܟ ܫܩ̈ܝܼܠܵܢ.

13: ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܩܵܝ̇ܡܝܼܢ ܗ̄ܘ̣ܵܘ ܩܕ݂ܵܡ ܡܵܪܝܵܐ: ܘܐܵܦ ܛܠܵܝܲܝ̈ܗܘܿܢ: ܘܢܸܫܲܝ̈ܗܘܿܢ: ܘܲܒ̣ܢܲܝ̈ܗܘܿܢ: ܘܲܒ̣̈ܢܵܬ̣ܗܘܿܢ.

14: ܘܲܚܙܵܐܹܝܠ ܒܲܪ ܙܟܲܪܝܵܐ: ܒܲܪ ܒܢܵܝܵܐ: ܒܲܪ ܝܘܿܝܵܕ݂ܵܥ: ܒܲܪ ܡܬܲܢܝܵܐ. ܠܹܘܵܝܹ̈ܐ: ܡ̣ܢ ܒܢܵܘ̈ܗܝ ܕܐܵܣܵܦ: ܫܪܵܬ̤ ܥܠܵܘܗܝ ܪܘܼܚܵܐ ܕܓܲܢ̄ܒܵܪܘܼܬ̣ܵܐ: ܡ̣ܢ ܩܕ݂ܵܡ ܡܵܪܝܵܐ. ܘܗ̤ܘ ܩܵܐܹ̇ܡ ܗ̄ܘ̣ܵܐ ܩܕ݂ܵܡ ܥܲܡܵܐ ܕܝܼܣܪܵܝܹܠ.

15: ܘܐܸܡܲܪ: ܫܡܲܥ ܟܠܹܗ ܝܼܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܡܲܠ̈ܟܵܐ ܝܵܗܘܿܫܵܦܵܛ ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܟ݂ܘܿܢ. ܐܲܢ̄ܬ̇ܘܿܢ ܠܵܐ ܬܸܕ݂ܚ̄ܠܘܼܢ: ܘܠܵܐ ܬܙܘܼܥܘܼܢ: ܡ̣ܢ ܩܕ݂ܵܡ ܚܲܝܠܵܐ ܗܵܢܵܐ ܣܲܓ̇ܝܼܵܐܐ. ܡܸܛܠ ܕܠܵܐ ܗ̄ܘ̣ܵܐ ܕܝܼܠܟ݂ܘܿܢ ܩܪܵܒ̣ܵܐ. ܕܡܵܪܝܵܐ ܗ̄ܘ̣ ܓܹܝܪ ܩܪܵܒ̣ܵܐ.

16: ܐܸܣܬܲܪܗܲܒ̣ܘ: ܘܚܘܿܬ̣ܘ ܥܠܲܝܗܘܿܢ ܗܵܐ ܗܸܢܘܿܢ ܣܵܠܩܝܼܢ ܒܡܲܣܩܵܢܵܐ ܕܨܲܦܪܵܐ. ܘܬܸܫܟ̇ܚܘܼܢ ܐܸܢܘܿܢ ܒܲܫܩܝܼܦܵܐ ܕܢܲܚܠܵܐ: ܩܕ݂ܵܡ ܡܲܕ݂ܒ̇ܪܵܐ. ܘܗܸܢܘܿܢ ܣܵܠܩܝܼܢ ܠܡܸܬ̣ܟܲܬܵܫܘܼ ܥܲܡܟ݂ܘܿܢ.

17: ܘܲܒ̣ܗܵܝ ܫܵܥܬ̣ܵܐ ܩܘܼܡܝ ܘܲܚܙܵܘ ܦܘܼܪܩܵܢܵܐ ܕܥܵܒܹܕ݂ ܡܵܪܝܵܐ ܥܲܡܟ݂ܘܿܢ: ܕܒܹܝܬ̣ ܝܼܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܠܵܐ ܬܸܕ݂ܚ̄ܠܘܼܢ: ܐܵܦܠܵܐ ܬܙܘܼܥܘܼܢ ܡܚܵܪ ܦܘܿܩܘ ܩܕ݂ܵܡܲܝܗܘܿܢ. ܘܐܲܕ݂ܘܿܢܲܝ ܡܵܪܹܐ ܡܵܪ̈ܵܘܵܬ̣ܵܐ ܢܸܗܘܹܐ ܒܥܸܕ݂ܪ̱ܟ݂ܘܿܢ.

18: ܘܲܢܦܲܠ ܝܵܗܘܿܫܵܦܵܛ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓܸܕ݂. ܘܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܢܦܲܠ̣ܘ ܣܓܸܕ݂ܘ ܩܕ݂ܵܡ ܡܵܪܝܵܐ.

19: ܘܩܵܡ̣ܘ ܠܹܘܵܝܹ̈ܐ ܡ̣ܢ ܒܢܲܝ̈ ܩܵܗܵܬ̣: ܘܡ̣ܢ ܒܢܲܝ̈ ܩܘܿܪܚ: ܠܲܡܫܲܒܵܚܘܼ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒܩܵܠܵܐ ܪܵܡܵܐ.

20: ܘܩܲܕܸ̇ܡ̣ܘ ܒܨܲܦܪܵܐ: ܘܲܢܦܲܩܘ ܠܡܲܕ݂ܒ̇ܪܵܐ ܕܲܬ̣ܩܘܿܥ ܘܟܲܕ݂ ܢܦܲܩܘ: ܩܵܡ̣ ܝܵܗܘܿܫܵܦܵܛ: ܘܐܸܡܲܪ: ܫܘܼܡܥܘܼܢܝ ܕܒܹܝܬ̣ ܝܼܗܘܼܕ݂ܵܐ: ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܘܗܲܝܡܸܢܘ ܒܡܵܪܝܵܐ ܐܲܠܵܗܟ݂ܘܿܢ: ܘܬܸܬ̣ܗܲܝܡܢܘܿܢ ܗܲܝܡܸܢܘ ܒܲܢܒ̣ܝܼܘ̈ܗܝ: ܘܬܸܬ̣ܦܲܪܩܘܿܢ.

21: ܘܩܵܡ̣ ܒܡܸܨܥܲܬ̣ ܥܲܡܵܐ: ܘܐܸܡܲܪ: ܬܵܘ ܢܵܘܕܹ̇ܐ ܠܡܵܪܝܵܐ: ܘܲܢܫܲܒܲܚ ܠܗܸܕ݂ܪܵܐ ܕܩܲܕ̇ܝܼܫܘܼܬܹܗ: ܟܲܕ݂ ܢܵܦܹ̇ܩ ܩܕ݂ܵܡ ܚܲܝܠܵـ̈ـܘܵܬܲܢ: ܘܥܵܒܹ̇ܕ݂ ܠܲܢ ܩܪܵܒ̣ܵܐ ܥܲܡ ܒܥܸܠܕ̇ܒ̣ܵܒܲܝ̈ܢ. ܘܐܵܡ̇ܪܝܼܢ: ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘ̣: ܘܲܠܥܵܠܲܡ ܛܲܝܒ̇ܘܼܬܹܗ. ܪ̈ܵܡܵܬ̣ܵܐ ܫܲܪܝܼ ܡܫܲܒ̇ـ̈ـܚܵܢ: ܘܛܘܼܪܹ̈ܐ ܫܲܪܝܼܘ ܕܵܝܨܝܼܢ.

24: ܘܲܝܗܘܼܕ݂ܵܐ ܐܸܬ̣ܵܐ ܠܹܗ ܠܛܘܼܪܵܐ ܕܕ݂ܵܘܩܹ̈ܐ ܕܡܲܕ݂ܒ̇ܪܵܐ ܘܲܚܙܵܘ ܘܗܵܐ ܟܠܗܘܿܢ ܦܲܓ̣ܪ̈ܲܝܗܘܿܢ ܡܝܼܬ̣ܝܼܢ: ܘܲܪܡܹܝܢ ܥܲܠ ܐܲܪܥܵܐ ܘܠܵܐ ܐܝܼܬ̣ ܐ̄ܢܵܫ ܕܲܦܠܲܛ ܡܸܢܗܘܿܢ.

25: ܘܐܸܬ̣ܵܐ ܝܵܗܘܿܫܵܦܵܛ ܘܥܲܡܵܐ ܕܝܼܣܪܵܝܹܠ: ܠܡܸܒܲܙ ܒܸܙܲܬ̣ܗܘܿܢ ܘܐܸܫܟܲܚܘ ܒܗܘܿܢ ܒܸܙܬ̣ܵܐ ܣܘܿܓ̣ܵܐܐ ܕܛܵܒ̣: ܘܩܸܢܝܵܢܵܐ ܘܲܦܓ̣ܘܼ̈ܕܹܐ: ܘܪ̈ܲܟ݂ܫܵܐ: ܘܡܵܐܢܹ̈ܐ ܕܪܸܓ̇ܬ̣ܵܐ. ܘܲܫܩܲܠܘ ܠܗܘܿܢ ܡܸܕܸ̇ܡ ܕܲܨܒ̣ܵܘ.

26: ܘܲܗܘ̤ܵܐ ܒܵܬܲܪ ܬܠܵܬ̣ܵܐ ܝܵܘ̈ܡܝܼܢ: ܟܲܕ݂ ܒܲܙܘ ܒܸܙܬ̣ܵܐ: ܡܸܛܠ ܕܣܲܓ̇ܝܼܵܐܐ ܗ̄ܘ̣ܵܬ̣ ܛܵܒ̣: ܘܲܒ̣ܝܵܘܡܵܐ ܕܐܲܪܒ̇ܥܵܐ ܐܸܬ̣ܟܲܢܲܫܘ ܠܲܦܩܲܥܬ̣ܵܐ ܕܒ̣ܘܼܪܟ̇ܬ̣ܵܐ ܡܸܛܠ ܕܬܲܡܵܢ ܒܲܪܸܟ݂ܘ ܠܡܵܪܝܵܐ ܐܲܠܵܗܵܐ. ܡܸܛܠ ܗܵܢܵܐ ܐܸܬ̣ܩܪܝܼ ܫܡܵܗ̇ ܕܕ݂ܘܼܟ̇ܬ̣ܵܐ ܗܵܝ̇ ܒܘܼܪܟ̇ܬ̣ܵܐ ܥܕܲܡܵܐ ܠܝܵܘܡܵܢܵܐ.

27: ܘܲܗܦܲܟ݂ܘ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܠܐܘܿܪܸܫܠܸܡ: ܘܝܵܗܘܿܫܵܦܵܛ ܒܪܹܫܲܝܗܘܿܢ ܡܸܛܠ ܕܐܵܬܹ̇ܝܢ ܗ̄ܘ̣ܵܘ ܓܹܝܪ ܠܐܘܿܪܸܫܠܸܡ ܒܚܲܕ݂ܘܼܬ̣ܵܐ. ܡܸܛܠ ܕܚܲܕ̇ܝܼ ܐܸܢܘܿܢ ܡܵܪܝܵܐ ܡ̣ܢ ܒܥܸܠܕ̇ܒ̣ܵܒܲܝ̈ܗܘܿܢ.

28: ܘܐܸܬ̣ܵܘ ܠܐܘܿܪܸܫܠܸܡ: ܒܬܸܫܒ̇ـ̈ـܚܵܬ̣ܵܐ: ܘܲܒ̣ܟܸܢܵܪܹ̈ܐ: ܘܲܒ̣ܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ ܘܲܦܫ̈ܝܼܛܵܬ̣ܵܐ. ܘܐܸܬ̣ܵܘ ܠܒܲܝܬܹ̇ܗ ܕܡܵܪܝܵܐ.

29: ܘܢܸܦܠܲܬ̤ ܕܸܚ̱ܠܬܹܗ ܕܡܵܪܝܵܐ ܥܲܠ ܟܠܗܹܝܢ ܡܕ݂ܝܼ̈ܢܵܬ̣ܵܐ: ܘܥܲܠ ܡܲܠ̈ܟ̇ܘܵܬ̣ܗܹܝܢ: ܟܲܕ݂ ܫ̣ܡܲܥ ܕܡܵܪܝܵܐ ܡܸܬ̣ܟܲܬܲܫ ܥܲܡ ܒܥܸܠܕ̇ܒ̣ܵܒ̣ܵܘ̈ܗܝ ܕܝܼܣܪܵܝܹܠ.

30: ܘܐܸܬ̇ܬ̇ܢܝܼܚܲܬ̤ ܡܲܠܟ̇ܘܼܬܹܗ ܕܝܵܗܘܿܫܵܦܵܛ ܘܐܲܢܝܼܚܹܗ ܡܵܪܝܵܐ ܡ̣ܢ ܚܕ݂ܵܪ̈ܵܘܗܝ.

31: ܘܐܲܡ̣ܠܸܟ݂ ܝܵܗܘܿܫܵܦܵܛ ܥܲܠ ܝܼܗܘܼܕ݂ܵܐ. ܒܲܪ ܬܠܵܬ̣ܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܝܵܗܘܿܫܵܦܵܛ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܥܸܣܪܝܼܢ ܘܚܲܡܸܫ ܫܢ̈ܝܼܢ: ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ ܥܪܘܿܒ̣ܵܐ ܒܲܪܬ̣ ܫܲܠܚܝܼ.

32: ܘܗܲܠܸܟ݂ ܒܟ݂ܠܗܹܝܢ ܐܘܼܪ̈ܚܵܬܹܗ ܕܐܵܣܵܐ ܐܲܒ̣ܘܼܗܝ. ܘܠܵܐ ܗ̣ܦܲܟ݂ ܡܸܢܗܹܝܢ ܠܡܸܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ.

33: ܒܲܠܚܘܿܕ݂ ܥܠܵـ̈ـܘܵܬ̣ܵܐ ܠܵܐ ܐܲܥܒܲܪ: ܥܕܲܡܵܐ ܠܗܵܫܵܐ. ܘܥܲܡܵܐ ܠܵܐ ܐܸܬ̣ܩܸܢܘ ܠܸܒ̇ܗܘܿܢ ܠܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ.

34: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܵܗܘܿܫܵܦܵܛ ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܦܸܬ̣ܓ̣ܵܡܵܘܗܝ ܕܝܵܗܘܿ ܒܲܪ ܚܢܲܢ: ܕܲܟ݂ܬ̣ܝܼܒ̣ ܒܲܣܦܲܪ ܡܲܠܟܲܝ̈ ܝܼܣܪܵܝܹܠ.

35: ܘܒ̣ܵܬܲܪ ܗܵܠܹܝܢ ܐܸܬ̣ܩܲܪܲܒ̣ ܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ: ܠܘܵܬ̣ ܐܸܚܲܙܝܵܐ ܡܲܠܟܵܐ ܕܝܼܣܪܵܝܹܠ: ܗܵܘ̇ ܪܲܫܝܼܥܵܐ: ܕܐܲܣܓ̇ܝܼ ܠܡܸܥܒܲܕ݂ ܒܝܼܫܵܬ̣ܵܐ ܡ̣ܢ ܟܠܗܘܿܢ ܡܲܠ̈ܟܹ̇ܐ ܕܝܼܣܪܵܝܹܠ.

36: ܘܐܸܬ̣ܩܲܪܲܒ̣ ܠܘܵܬܹܗ ܠܡܸܥܒܲܕ݂ ܣܦܝܼܢܹ̈ܐ ܕܐܵܙܵܠ̄ـ̈ـܢ ܠܬܲܪܫܝܼܫ ܘܲܥܒܲܕ݂ܘ ܣܦܝܼܢܹ̈ܐ ܒܥܹܨܝܼܢܘܿ ܓܒܲܪ ܡܕ݂ܝܼܢ̄ܬܵܐ.

37: ܘܐܸܬ̣ܢܲܒ̇ܝܼ ܐܹܠܝܼܥܵܙܲܪ ܒܲܪܕܵܕܹܗ ܒܡܹܐܪܫܵܐ ܡܕ݂ܝܼܢ̄ܬܵܐ: ܥܲܠ ܝܵܗܘܿܫܵܦܵܛ: ܘܐܸܡܲܪ ܠܹܗ. ܒܫܵܘܬܵܦܘܼܬ̣ܵܟ݂ ܕܥܲܡ ܐܹܚܲܙܝܵܐ: ܩܲܠܩܸܠ ܡܵܪܝܵܐ ܟܠܗܘܿܢ ܥܒ̣ܵܕܲܝ̈ܟ ܘܐܸܬ̇ܬܲܒܲܪ ܣܦܝܼܢܹ̈ܐ: ܘܠܵܐ ܐܸܫܟܲܚ ܠܡܹܐܙܲܠ ܠܬܲܪܫܝܼܫ.

ܩܹܦܵܠܹܐܘܿܢ: ܟܐ .

1: ܘܲܫܟܸܒ̣ ܝܵܗܘܿܫܵܦܵܛ ܥܲܡ ܐܲܒ̣ܵـ̈ـܗܵܬܹܗ: ܘܐܸܬ̣ܩܒܲܪ ܠܘܵܬ̣ ܐܲܒ̣ܵـ̈ـܗܵܬܹܗ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܩܵܡ ܒܡܲܠܟ̇ܘܼܬ̣ܵܐ ܝܵܗܘܿܪܵܡ ܒܪܹܗ ܒܵܬ̣ܪܹܗ.

2: ܘܠܹܗ ܐܝܼܬ̣ ܗ̄ܘ̣ܵܐ ܐܲܚܹ̈ܐ ܒܢܲܝ̈ ܝܵܗܘܿܫܵܦܵܛ ܘܗܵܠܹܝܢ ܫܡܵܗܲܝ̈ܗܘܿܢ: ܥܲܙܲܪܝܵܐ: ܢܲܚܝܵܐܹܝܠ: ܙܟܲܪܝܵܐ ܥܲܙܲܪܝܵܐ: ܡܲܠܟܵܐܹܝܠ: ܫܦܲܛܝܵܐ. ܗܵܠܹܝܢ ܟܠܗܘܿܢ ܒܢܵܘ̈ܗܝ ܕܝܵܗܘܿܫܵܦܵܛ ܡܲܠܟܵܐ ܕܲܝܗܘܼܕ݂ܵܐ.

3: ܘܝܲܗ̄ܒ̣ ܠܗܘܿܢ ܐܲܒ̣ܘܼܗܘܿܢ ܡܵܘ̈ܗܒ̣ܵܬ̣ܵܐ ܣܲܓ̇ܝܼ: ܟܸܣܦܵܐ ܘܕܲܗܒ̣ܵܐ: ܘܡܵܘ̈ܗܒ̣ܵܬ̣ܵܐ ܣܲܓ̇ܝܼ̈ܐܵܬ̣ܵܐ: ܘܩܘܼܪ̈ܝܵܐ ܥܲܫ̈ܝܼܢܵܬ̣ܵܐ ܕܲܝܗܘܼܕ݂ܵܐ ܘܡܲܠܟ̇ܘܼܬ̣ܵܐ ܐܸܬ̣ܝܲܗ̄ܒܲܬ̤ ܠܝܵܗܘܿܪܵܡ ܡܸܛܠ ܕܗ̤ܘܝܘܼ ܗܘ̤ܵܐ ܒܪܹܗ ܩܲܫܝܼܫܵܐ.

4: ܘܩܵܡ̣ ܝܵܗܘܿܪܵܡ ܥܲܠ ܡܲܠܟ̇ܘܼܬ̣ܵܐ ܕܐܲܒ̣ܘܗܝ. ܘܐܸܬ̣ܓܲܢ̄ܒܲܪ: ܘܩܲܛܸܠ ܠܟ݂ܠܗܘܿܢ ܐܲܚܵܘ̈ܗܝ ܒܲܩܪܵܒ̣ܵܐ: ܘܐܵܦ ܡ̣ܢ ܩܲܫܝܼ̈ܫܹܐ ܕܝܼܣܪܵܝܹܠ ܩܲܛܸܠ.

5: ܘܒܲܪ ܬܠܵܬ̣ܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢܝܼ̈ܢ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܡܵܢܹܐ ܫܢܝܼ̈ܢ ܐܲܡ̣ܠܸܟ݂ ܒܐܘܿܪܸܫܠܸܡ.

6: ܘܗܲܠܸܟ݂ ܒܐܘܼܪ̈ܚܵܬ̣ܵܐ ܕܡܲܠ̈ܟܹ̇ܐ ܕܝܼܣܪܵܝܹܠ: ܐܲܝܟܲܢܵܐ ܕܲܥܒܲܕ݂ܘ ܕܒܹܝܬ̣ ܐܵܚܵܒ̣ ܡܸܛܠ ܕܚܵܬܹܗ ܕܐܵܚܵܒ̣ ܗܘ̤ܵܬ̣ ܠܹܗ ܐܲܢܬ̇ܬ̣ܵܐ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ.

7: ܘܠܵܐ ܨܒ̣ܵܐ ܡܵܪܝܵܐ ܠܲܡܚܲܒܵܠܘܼ ܒܲܝܬܹ̇ܗ ܕܕ݂ܵܘܝܼܕ݂: ܡܸܛܠ ܡܵܘܡܵܬ̣ܵܐ ܕܝܼܡܵܐ ܠܕ݂ܵܘܝܼܕ݂: ܠܡܸܬܲܠ ܠܹܗ ܫܪܵܓ̣ܵܐ ܢܲܗܝܼܪܵܐ: ܘܠܲܒ̣ܢܵܘ̈ܗܝ ܟܠܗܘܿܢ ܝܵܘ̈ܡܵܬ̣ܵܐ.

8: ܒܝܵܘ̈ܡܵܬܹܗ ܡܪܲܕ݂ܘ ܐܲܕ݂ܘܿܡܵܝܹ̈ܐ: ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ. ܘܐܲܩܝܼܡܘ ܥܠܲܝܗܘܿܢ ܡܲܠܟܵܐ.

9: ܘܲܥܒܲܪ ܝܵܗܘܿܪܵܡ ܥܲܡ ܪܵܘ̱ܪ̈ܒ̣ܵܢܵܘܗܝ: ܘܟ݂ܠܗܘܿܢ ܙܵܘܓܵܘ̈ܗܝ ܥܲܡܹܗ. ܘܲܗܘ̤ܵܐ ܕܟܲܕ݂ ܩܵܡ̣ ܒܠܸܠܝܵܐ: ܚܪܲܒ̣ ܠܐܲܕ݂ܘܿܡܵܝܹ̈ܐ. ܘܐܸܬ̣ܵܘ ܠܘܵܬܹܗ ܪܵܘ̱ܪ̈ܒ̣ܵܢܹܐ ܕܙܵܘ̈ܓܹ̇ܐ.

10: ܘܲܡ̣ܪܲܕ݂ܘ ܐܲܕ݂ܘܿܡܵܝܹ̈ܐ ܡ̣ܢ ܬܚܹܝܬ̣ ܐܝܼܕ݂ܵܐ ܕܲܝܗܘܼܕ݂ܵܐ: ܠܝܵܘܡܵܢܵܐ ܗܵܝܕܹ̇ܝܢ ܡܪܲܕ݂ܘ ܐܲܕ݂ܘܿܡܵܝܹ̈ܐ ܕܝܵܬ̣ܒ̇ܝܼܢ ܒܠܸܒ̣ܢܵܐ: ܒܙܲܒ̣ܢܵܐ ܗܵܘ̇ ܡ̣ܢ ܬܚܹܝܬ̣ ܐܝܼܕܹܗ. ܡܸܛܠ ܕܲܫܒܲܩ ܠܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܹܗ.

11: ܘܐܵܦ ܗ̤ܘ ܥܒܲܕ݂ ܥܠܵـ̈ـܘܵܬ̣ܵܐ ܒܛܘܼܪܵܐ ܕܲܝܗܘܼܕ݂ܵܐ. ܘܚܲܡܪܵܐ ܐܲܫܩܝܼ ܠܲܢܙܝܼܪܹ̈ܝܗ̇ ܕܐܘܿܪܸܫܠܸܡ ܘܒܲܕܲܪ ܠܲܕ݂ܒܹܝܬ̣ ܝܼܗܘܼܕ݂ܵܐ.

12: ܘܐܲܝܬ̇ܝܼ ܠܘܵܬܹܗ ܡ̣ܢ ܦܸܬ̣ܓ̣ܵܡܹ̈ܐ ܕܐܹܠܝܼܵܐ ܢܒ̣ܝܼܵܐ: ܕܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܹܗ ܕܕ݂ܵܘܝܼܕ݂ ܐܲܒ̣ܘܼܟ݂: ܚܠܵܦ ܕܠܵܐ ܗܲܠܸܟ݂ܬ̇ ܒܐܘܼܪ̈ܚܵܬܹܗ ܕܝܵܗܘܿܫܵܦܵܛ ܐܲܒ̣ܘܼܟ݂: ܘܒ̣ܐܪ̈ܚܵܬܹܗ ܕܐܵܣܵܐ ܡܲܠܟܵܐ ܕܲܝܗܘܼܕ݂ܵܐ.

13: ܘܗܲܠܸܟ݂ܬ̇ ܠܵܟ݂ ܒܐܘܼܪ̈ܚܵܬ̣ܵܐ ܕܡܲܠ̈ܟܹ̇ܐ ܕܝܼܣܪܵܝܹܠ: ܘܐܲܛܥܝܼܬ̇ ܠܲܝܗܘܼܕ݂ܵܐ ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܒܙܵܢܝܘܼܬ̣ܵܐ ܕܒܹܝܬ̣ ܐܵܚܵܒ̣ ܘܐܵܦ ܠܐܲܚܲܝ̈ܟ ܒܢܲܝ̈ ܐܲܒ̣ܘܼܟ݂ ܕܛܵܒ̣ܝܼܢ ܡܸܢܵܟ݂ ܩܲܛܸܠܬ̇.

14: ܗܵܐ ܡܵܪܝܵܐ ܡܵܚܹ̇ܐ ܠܵܟ݂ ܡܚܘܿܬ̣ܵܐ ܪܲܒ̇ܬ̣ܵܐ: ܘܲܠܥܲܡܵܟ݂: ܘܠܲܒ̣ܢܲܝ̈ܟ ܘܢܸܫܲܝ̈ܟ: ܘܲܠܟ݂ܠܗܘܿܢ ܢܸܟ݂ܣܲܝ̈ܟ.

15: ܘܐܲܢ̄ܬ̇ ܒܟ݂ܘܼܪܗܵܢܵܐ ܣܲܓ̇ܝܼܵܐܐ ܬܡܘܼܬ̣. ܘܲܒ̣ܬܲܫܢܝܼܩܵܐ ܪܲܒܵܐ ܬܹܐܒܲܕ݂: ܥܕܲܡܵܐ ܠܐܲܝܟܵܐ ܕܢܸܦܩܘܼܢ ܡܥܲܝ̈ܟ ܡ̣ܢ ܟܘܼܪܗܵܢܵܟ݂ ܘܲܫܢ̈ܝܼܢ ܣܲܓ̇ܝܼܵܐ̈ܢ ܒܬܲܫܢܝܼܩܵܐ ܬܸܦܸܠ.

16: ܘܲܢܥܝܼܪ ܡܵܪܝܵܐ ܥܲܠ ܝܵܗܘܿܪܵܡ ܪܘܼܚܵܐ ܕܲܦܠܸܫܬܵܝܹ̈ܐ: ܘܲܕ݂ܥܲܪ̈ܒ̣ܵܝܹܐ ܕܲܫܪܹܝܢ ܒܹܝܬ̣ ܗܸܢ̈ܕ̇ܘܵܝܹܐ.

17: ܘܢܸܣܩܘܼܢ ܥܲܠ ܝܼܗܘܼܕ݂ܵܐ: ܘܢܸܚܪܒ̣ܘܼܢ ܐܸܢܘܿܢ. ܘܢܲܗܦ̄ܟ݂ܘܼܢ ܟܠܵܗ̇ ܫܒ̣ܝܼܬ̣ܵܐ ܕܐܸܫܬܲܟ݂ܚܲܬ̤ ܠܒܹܝܬ̣ ܡܲܠܟܵܐ: ܘܐܵܦ ܒܢܵܘ̈ܗܝ ܘܢܸܫܵܘ̈ܗܝ ܘܠܵܐ ܢܸܫܬ̇ܒܸܩ ܠܹܗ ܒܪܵܐ ܕܸܟ݂ܪܹ̈ܐ: ܐܸܠܵܐ ܐܸܢ ܐܹܚܲܙܝܵܐ ܒܪܹܗ ܙܥܘܿܪܵܐ.

18: ܡ̣ܢ ܒܵܬܲܪ ܟܠܗܹܝܢ ܗܵܠܹܝܢ: ܡܚܘܿܬ̣ܵܐ ܬܸܗܘܹܐ ܒܲܡܥܵܘ̈ܗܝ ܘܲܒ̣ܟ݂ܘܼܪܗܵܢܵܐ ܣܲܓ̇ܝܼܵܐܐ ܢܡܘܼܬ̣ ܘܐܵܣܝܘܼܬ̣ܵܐ ܠܵܐ ܬܸܗܘܹܐ ܠܹܗ.

19: ܘܲܗܘ̤ܵܐ ܡ̣ܢ ܒܵܬܲܪ ܝܵܘ̈ܡܵܬ̣ܵܐ ܣܲܓ̇ܝܼ̈ܐܹܐ: ܟܲܕ݂ ܫܸܠܡܲܬ̤ ܡܸܠܬܹܗ ܕܲܢܒ̣ܝܼܵܐ: ܠܲܫܢ̈ܝܼܢ ܬܲܪܬܹ̇ܝܢ: ܢܦܲܩ̣ܘ ܡܥܵܘ̈ܗܝ ܡ̣ܢ ܟܘܼܪܗܵܢܹܗ. ܘܡܝܼܬ̣ ܒܟ݂ܘܼܪܗܵܢܵܐ ܒܝܼܫܵܐ: ܘܠܵܐ ܥܒܲܕ݂ ܠܹܗ ܐܝܼܩܵܪܵܐ ܥܲܡܵܐ: ܐܲܝܟܲܢܵܐ ܕܲܥܒܲܕ݂ܘ ܠܐܲܒ̣ܵـ̈ـܗܵܬܹܗ.

20: ܒܲܪ ܬܠܵܬ̣ܝܼܢ ܗ̄ܘ̣ܵܐ ܘܬܲܪܬܹ̇ܝܢ ܫܢ̈ܝܼܢ. ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܡܵܢܹܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܐܸܙܲܠ ܕܠܵܐ ܪܸܓ̇ܬ̣ܵܐ. ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܐܲܒ̣ܘܼܗܝ: ܘܠܵܐ ܒܲܩܒ̣ܘܼܪܬܵܐ ܕܡܲܠ̈ܟܹ̇ܐ.

ܩܹܦܵܠܹܐܘܿܢ: ܟܒ .

: 1ܘܐܲܡܠܸܟ݂ܘ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܠܐܹܚܙܝܵܐ ܒܪܹܗ ܙܥܘܿܪܵܐ ܒܵܬ̣ܪܹܗ. ܡܸܛܠ ܕܟ݂ܠܗܘܿܢ ܩܲܕ݂ܡܵܝܹ̈ܐ ܚܪܲܒ̣ ܐܸܢܘܿܢ ܓܲܝܣܵܐ ܡܸܛܠ ܕܐܸܬ̣ܵܘ ܥܲܪ̈ܒ̣ܵܝܹܐ: ܘܲܚܪܲܒ̣ܘ ܡܲܫܪܝܼܬ̣ܵܐ ܕܝܼܣܪܵܝܹܠ. ܘܐܲܡ̣ܠܸܟ݂ ܐܹܚܲܙܝܵܐ ܒܲܪ ܝܵܗܘܿܪܵܡ ܡܲܠܟܵܐ ܕܲܝܗܘܼܕ݂ܵܐ.

2: ܒܲܪ ܥܸܣܪܝܼܢ ܘܬܲܪܬܹ̇ܝܢ ܫܢ̈ܝܼܢ ܗ̄ܘ̣ܵܐ ܐܹܚܲܙܝܵܐ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ ܘܫܲܢ̄ܬܵܐ ܚܕ݂ܵܐ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ ܥܬܲܠܝܵܐ ܒܲܪܬ̣ ܥܲܡܪܝܼ.

3: ܘܗܲܠܸܟ݂ ܒܐܘܼܪ̈ܚܵܬ̣ܵܐ ܕܒܹܝܬ̣ ܐܵܚܵܒ̣: ܡܸܛܠ ܕܒܲܪ ܚܵܬܹܗ ܗ̄ܘ̣ܵܐ ܕܐܵܚܵܒ̣.

4: ܘܐܵܦ ܗ̤ܘ ܐܲܣܓ̇ܝܼ ܠܡܸܚܛܵܐ ܘܲܥܒܲܕ݂ ܒܝܼ̈ܫܵܬ̣ܵܐ ܩܕ݂ܵܡ ܡܵܪܝܵܐ: ܐܲܝܟ݂ ܒܲܝܬܹ̇ܗ ܕܐܵܚܵܒ̣. ܡܸܛܠ ܕܗܸܢܘܿܢ ܗܘ̤ܵܘ ܠܹܗ ܡܲܠܘܿܟܹ̈ܐ ܡ̣ܢ ܒܵܬܲܪ ܕܡܝܼܬ̣ ܐܲܒ̣ܘܼܗܝ: ܠܲܡܚܲܒܵܠܘܼܬܹܗ. ܡܸܛܠ ܕܲܒ̣ܡܸܠܟ̇ܗܘܿܢ ܡܗܲܠܸܟ݂ ܗ̄ܘ̣ܵܐ.

5: ܘܐܸܙܲܠ ܥܲܡ ܝܘܿܪܵܡ ܒܲܪ ܐܵܚܵܒ̣ ܡܲܠܟܵܐ ܕܝܼܣܪܵܝܹܠ: ܠܡܸܥܒܲܕ݂ ܩܪܵܒ̣ܵܐ ܥܲܡ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ ܒܪܵܡܲܬ̣ ܓܸܠܥܵܕ݂ ܘܲܡܚܵܘ ܐܲܕ݂ܘܿܡܵܝܹ̈ܐ ܠܝܘܿܪܵܡ.

6: ܘܲܗܦܲܟ݂ ܠܡܸܬ̣ܐܲܣܵܝܘܼ ܒܐܝܼܙܲܪܥܹܝܠ ܡ̣ܢ ܡܚܘܿܬ̣ܵܐ ܕܲܡܚܵܐܘܼܗܝ ܒܪܵܡܬ̣ܵܐ: ܟܲܕ݂ ܡܸܬ̣ܟܲܬܲܫ ܥܲܡ ܚܙܵܐܹܝܠ ܡܲܠܟܵܐ ܕܐܲܕ݂ܘܿܡ. ܘܐܹܚܲܙܝܵܐ ܢܚܸܬ̣ ܠܡܸܚܙܵܐ ܠܝܘܿܪܵܡ ܒܪܹܗ ܕܐܵܚܵܒ̣ ܒܐܝܼܙܲܪܥܹܝܠ.

7: ܘܡ̣ܢ ܩܕ݂ܵܡ ܡܵܪܝܵܐ ܗܘ̤ܵܬ̣ ܗܦܝܼܟ݂ܬܵܐ ܕܐܹܚܲܙܝܵܐ: ܠܡܹܐܬ̣ܵܐ ܠܘܵܬ̣ ܝܘܿܪܵܡ ܘܟܲܕ݂ ܐܸܬ̣ܵܐ: ܢܦܲܩ̣ ܥܲܡ ܝܘܿܪܵܡ ܠܘܵܬ̣ ܝܵܗܘܿ ܒܲܪ ܝܲܡܫܝܼ: ܕܐܸܬ̣ܡ̱ܫܲܚ ܡ̣ܢ ܩܕ݂ܵܡ ܡܵܪܝܵܐ: ܠܡܵܘܒܵܕ݂ܘܼ ܒܲܝܬܹ̇ܗ ܕܐܵܚܵܒ̣.

8: ܗܵܝܕܹ̇ܝܢ ܟܲܕ݂ ܕܵܢ ܝܵܗܘܿ ܥܲܡ ܕܒܹܝܬ̣ ܐܵܚܵܒ̣: ܐܸܫܟܲܚ ܠܪܵܘ̱ܪ̈ܒ̣ܵܢܹܐ ܕܲܝܗܘܼܕ݂ܵܐ: ܘܲܒ̣ܢܲܝ̈ ܐܲܚܵܘ̈ܗܝ ܕܐܹܚܲܙܝܵܐ: ܕܲܡܫܲܡܫܝܼܢ ܗ̄ܘ̣ܵܘ ܠܐܹܚܲܙܝܵܐ ܘܩܲܛܸܠ ܐܸܢܘܿܢ.

9: ܘܲܒ̣ܥܵܐ ܠܐܹܚܲܙܝܵܐ: ܘܐܲܚܕܹ̇ܗ ܘܗ̤ܘ ܛܫܸܐ ܗ̄ܘ̣ܵܐ ܒܫܵܡܪܹܝܢ. ܘܐܲܝܬ̇ܝܹܗ ܠܘܵܬܹܗ ܘܩܲܛܠܹܗ ܘܩܲܒ̣ܪܹܗ. ܡܸܛܠ ܕܐܸܡܲܪ ܕܒܲܪ ܝܵܗܘܿܫܵܦܵܛ ܗ̄ܘ̣: ܗܵܘ̇ ܕܨܲܠܝܼ ܠܡܵܪܝܵܐ ܒܟ݂ܠܹܗ ܠܸܒܹ̇ܗ. ܘܠܵܐ ܐܝܼܬ̣ ܗ̄ܘ̣ܵܐ ܠܒܹܝܬ̣ ܐܹܚܲܙܝܵܐ: ܠܲܡܥܲܕܵܪܘܼ ܚܲܝܠܵܐ ܕܡܲܠܟ̇ܘܼܬ̣ܵܐ.

10: ܘܲܥܬܲܠܝܵܐ ܐܸܡܹܗ ܕܐܹܚܲܙܝܵܐ: ܚܙܵܬ̤ ܕܡܝܼܬ̣ ܒܪܵܗ̇. ܘܩܵܡܲܬ̤ ܘܐܵܘܒ̇ܕܲܬ̤ ܠܟ݂ܠܗܘܿܢ ܒܢܲܝ̈ ܡܲܠܟܵܐ ܕܒܹܝܬ̣ ܝܼܗܘܼܕ݂ܵܐ.

11: ܘܕܸܒ̣ܪܲܬ̤ ܝܵܗܘܿܫܒܲܥ ܒܲܪܬܹܗ ܕܡܲܠܟܵܐ: ܠܝܘܿܐܵܫ ܒܲܪ ܐܹܚܲܙܝܵܐ. ܘܲܓ̣ܢܲܒ̣ܬܹܗ ܡ̣ܢ ܓܵܘ ܒܢܲܝ̈ ܡܲܠܟܵܐ: ܕܡܸܬ̣ܩܲܛܠܝܼܢ ܗ̄ܘ̣ܵܘ. ܘܛܲܫܝܵܬܹܗ ܘܲܠܡܲܝܢܲܩܬܹܗ ܒܩܲܚܛܘܿܢܵܐ ܕܡܲܫܟ̇ܒ̣ܵܗ̇. ܘܛܲܫܝܵܬܹܗ ܝܵܗܘܿܫܒܲܥ ܒܲܪܬ̣ ܡܲܠܟܵܐ ܝܘܿܪܵܡ: ܐܲܢ̄ܬ̇ܬܹܗ ܕܝܘܿܝܵܕ݂ܵܥ ܟܵܗܢܵܐ. ܡܸܛܠ ܕܗ̤ܝ ܗܘ̤ܵܬ̣ ܚܵܬܹܗ ܕܐܹܚܲܙܝܵܐ: ܡ̣ܢ ܩܕ݂ܵܡ ܥܬܲܠܝܵܐ: ܘܠܵܐ ܩܲܛܠܘܼܗܝ.

12: ܘܲܗܘ̤ܵܐ ܛܫܸܐ ܥܲܡܵܗ̇ ܒܒܲܝܬܹ̇ܗ ܕܡܵܪܝܵܐ: ܫܸܬ̣ ܫܢ̈ܝܼܢ ܘܲܥܬܲܠܝܵܐ ܐܲܡ̱ܠܟܲܬ̤ ܥܲܠ ܐܲܪܥܵܐ.

ܩܹܦܵܠܹܐܘܿܢ: ܟܓ .

1: ܒܫܲܢ̄ܬܵܐ ܫܒ̣ܝܼܥܵܝܬܵܐ: ܐܸܬ̣ܓܲܢ̄ܒܲܪ ܝܘܿܝܵܕ݂ܵܥ. ܘܲܕ݂ܒܲܪ ܠܪܵܘ̱ܪ̈ܒ̣ܵܢܹܐ ܕܡܲܐ̈ܘܵܬ̣ܵܐ: ܠܥܲܙܪܝܵܐ ܒܲܪ ܝܲܪܚܘܿܡ: ܘܠܐܝܼܫܡܵܥܹܝܠ ܒܲܪ ܝܘܿܚܲܢܵܢ: ܘܲܠܥܲܙܲܪܝܵܐ ܒܲܪ ܥܘܿܒ̣ܝܼܕ݂: ܘܠܲܫܡܲܥܝܵܐ ܒܲܪ ܥܲܕ̇ܘܿ: ܘܠܹܐܠܝܼܫܵܦܵܛ ܒܲܪ ܙܲܟ݂ܪܝܼ.

2: ܘܥܲܠ̣ܘ ܟܠܗܘܿܢ ܗܵܠܹܝܢ ܒܡܵܘ̈ܡܵܬ̣ܵܐ: ܕܢܸܬ̣ܟܲܪܟ̇ܘܿܢ ܒܲܝܗܘܼܕ݂ܵܐ. ܘܟܲܢܸܫܘ ܐܸܢܘܿܢ ܠܠܹܘܵܝܹ̈ܐ: ܡ̣ܢ ܟܠܗܹܝܢ ܩܘܼܪ̈ܝܵܐ ܕܲܝܗܘܼܕ݂ܵܐ: ܘܪܹ̈ܫܹܐ ܕܐܲܒ̣ܵـ̈ـܗܵܬ̣ܵܐ ܕܝܼܣܪܵܝܹܠ. ܘܐܸܬ̣ܵܘ ܠܐܘܿܪܸܫܠܸܡ.

3: ܘܝܼܡܵܘ ܟܠܹܗ ܥܲܡܵܐ ܒܡܵܘ̈ܡܵܬ̣ܵܐ: ܒܒܲܝܬܹ̇ܗ ܕܡܵܪܝܵܐ ܩܕ݂ܵܡ ܡܲܠܟܵܐ. ܘܐܸܡܲܪ ܠܗܘܿܢ: ܗܵܐ ܒܲܪ ܡܲܠܟܵܐ: ܗ̤ܘ ܢܩܘܼܡ ܥܠܲܝܟ̇ܘܿܢ: ܐܲܝܟܲܢܵܐ ܕܡܲܠܸܠ ܡܵܪܝܵܐ ܥܲܡ ܕܵܘܝܼܕ݂ ܥܲܒ̣ܕܹ̇ܗ.

4: ܗܵܢܵܐ ܦܸܬ̣ܓ̣ܵܡܵܐ ܬܸܥܒ̇ܕ݂ܘܼܢ. ܦܸܠܓܵܐ ܡܸܢܟ݂ܘܿܢ ܒܡܲܥܵܠܲܝ̈ ܫܲܒ̇ܬ̣ܵܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ: ܘܲܕ݂ܢܵܛܪ̈ܲܝ ܬܲܪ̈ܥܹܐ.

5: ܘܬ̣ܘܼܠܬܵܐ ܒܹܝܬ̣ ܡܲܠܟܵܐ: ܘܬ̣ܘܼܠܬܵܐ ܒܬܲܪܥܵܐ ܕܛܲܒܵܚܹ̈ܐ ܘܟ݂ܠܹܗ ܥܲܡܵܐ ܢܵܛ̇ܪܝܼܢ ܒܕ݂ܵܪܬܵܐ ܕܒܹܝܬ̣ ܡܵܪܝܵܐ.

6: ܘܠܵܐ ܢܸܗܘܹܐ ܐ̄ܢܵܫ ܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ: ܐܸܢܵܐ ܟܵܗܢܹ̈ܐ ܘܠܹܘܵܝܹ̈ܐ ܗܸܢܘܿܢ ܢܸܥܠܘܼܢ: ܡܸܛܠ ܕܩܲܕ̇ܝܼܫܝܼܢ ܐܸܢܘܿܢ. ܘܟ݂ܠܹܗ ܥܲܡܵܐ ܢܵܛ̇ܪܝܼܢ ܡܲܛܲܪܬܵܐ ܕܒܲܝܬܹ̇ܗ ܕܡܵܪܝܵܐ.

7: ܘܢܸܩܦܘܼܢ ܠܹܘܵܝܹ̈ܐ ܠܡܲܠܟܵܐ: ܟܲܕ݂ ܚܕ݂ܝܼܪܝܼܢ ܠܹܗ: ܓܒܲܪ ܘܡܵܐܢܲܝ̈ ܙܲܝܢܹܗ ܒܐܝܼܕܹܗ. ܘܲܕ݂ܢܸܥܘܿܠ ܠܒܲܝܬܵܐ ܓܵܘܵܝܵܐ: ܢܡܘܼܬ̣ ܘܲܗܘ̤ܵܘ ܠܘܵܬ̣ ܡܲܠܟܵܐ ܒܡܲܥܠܹܗ ܘܲܒ̣ܡܲܦܩܹܗ.

8: ܘܲܥܒܲܕ݂ ܠܹܘܵܝܹ̈ܐ ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܐܲܝܟܲܢܵܐ ܕܦܲܩܸܕ݂ ܐܸܢܘܿܢ ܝܘܿܝܵܕ݂ܵܥ ܟܵܗܢܵܐ. ܘܲܕ݂ܒܲܪ ܓܲܒ̣ܪܵܐ ܠܚܲܒ̣ܪܹܗ: ܐܲܝܠܹܝܢ ܕܢܵܛ̇ܪܝܼܢ ܗ̄ܘ̣ܵܘ ܒܡܲܥܵܠܲܝ̈ ܫܒ̇ܬ̣ܵܐ: ܥܲܡ ܐܲܝܠܹܝܢ ܕܢܵܛ̇ܪܝܼܢ ܗ̄ܘ̣ܵܘ ܒܡܲܦܵܩܲܝ̈ ܫܲܒ̇ܬ̣ܵܐ ܡܸܛܠ ܕܫܵܪܹܐ ܗ̄ܘ̣ܵܐ ܐܸܢܘܿܢ ܝܘܿܝܵܕ݂ܵܥ ܟܵܗܢܵܐ ܡ̣ܢ ܡܲܛܪ̈ܵܬ̣ܗܘܿܢ.

9: ܘܝܲܗ̄ܒ̣ ܝܘܿܝܵܕ݂ܵܥ ܟܵܗܢܵܐ ܠܪܵܘ̱ܪ̈ܒ̣ܵܢܹܐ ܕܡܲܐ̈ܘܵܬ̣ܵܐ: ܪ̈ܘܼܡܚܹܐ ܘܣܲܟ̇ܪܹ̈ܐ: ܘܫܲܠܛܹ̈ܐ ܕܡܲܠܟܵܐ ܕܵܘܝܼܕ݂: ܕܐܝܼܬ̣ ܗ̄ܘ̣ܵܐ ܒܒܲܝܬܹ̇ܗ ܕܡܵܪܝܵܐ.

10: ܘܩܵܡ̣ ܟܠܹܗ ܥܲܡܵܐ: ܓܒܲܪ ܠܓܲܒܹ̇ܗ ܕܒܲܝܬܵܐ ܕܣܸܡܵܠܵܐ ܠܡܲܕ݂ܒ̇ܚܵܐ ܘܲܠܒܲܝܬܵܐ: ܘܚܲܕ݂ܪܘܼܗܝ ܠܡܲܠܟܵܐ.

11: ܘܐܲܦܸܩ̣ܘ ܠܒܲܪ ܡܲܠܟܵܐ: ܘܝܲܗ̄ܒ̣ܘ ܒܪܹܫܹܗ ܬܵܓ̣ܵܐ ܘܚܘܼܕ݂ܪܵܐ. ܘܐܲܩܝܼܡܘܼܗܝ ܒܡܲܠܟ̇ܘܼܬ̣ܵܐ. ܘܡܲܫܚܘܼܗܝ ܝܘܿܝܵܕ݂ܵܥ ܘܲܒ̣ܢܵܘ̈ܗܝ: ܘܐܵܡ̇ܪܝܼܢ ܢܸܚܹܐ ܡܲܠܟܵܐ.

12: ܘܫܸܡܥܲܬ̤ ܥܬ̣ܵܠܝܵܐ ܩܵܠܵܐ ܕܥܲܡܵܐ ܕܚܵܕܹ̇ܐ: ܘܲܡܫܲܒ̇ܚܝܼܢ ܠܡܲܠܟܵܐ. ܘܐܸܬ̣ܵܬ̤ ܠܘܵܬ̣ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ.

13: ܘܚܵܙܝܵܐ: ܘܗܵܐ ܡܲܠܟܵܐ ܩܵܐܹ̇ܡ ܥܲܠ ܐܸܣܛܘܿܪܵܐ: ܐܲܝܟ݂ ܢܵܡܘܿܣܵܐ ܕܡܲܠ̈ܟܹ̇ܐ: ܘܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ ܘܲܦܫܝܼ̈ܛܵܬ̣ܵܐ: ܩܵܪ̈ܝܵܢ ܩܕ݂ܵܡ ܡܲܠܟܵܐ. ܘܟ݂ܠܹܗ ܥܲܡܵܐ ܚܵܕܹܝܢ: ܘܲܡܝܲܒ̇ܒ̣ܝܼܢ ܒܩܲܪ̈ܢܵܬ̣ܵܐ: ܘܲܡܫܲܒ̇ܚܝܼܢ ܒܬܸܫ̈ܒ̇ܚܵܬ̣ܵܐ ܘܣܲܕ̇ܩܲܬ̤ ܥܬܲܠܝܵܐ ܢܲܚ̈ܬܹ̇ܝܗ̇: ܘܐܵܡܪܵܐ: ܟܲܕܵܒ̣ܘܼܬ̣ܵܐ: ܟܲܕܵܒ̣ܘܼܬ̣ܵܐ.

14: ܘܲܦܩܲܕ݂ ܝܘܿܝܵܕ݂ܵܥ ܟܵܗܢܵܐ ܠܪ̈ܲܒܲܝ ܡܵܐ̈ܘܵܬ̣ܵܐ: ܕܫܲܠܝܼܛܝܼܢ ܥܲܠ ܚܲܝܠܵܐ: ܘܐܸܡܲܪ ܠܗܘܿܢ: ܐܲܦܩܘܼܗ̇ ܠܒܲܪ ܡ̣ܢ ܣܸܕ݂ܪܹ̈ܐ. ܘܡܲܢ ܕܥܵܐܹ̇ܠ ܒܵܬ̣ܪܵܗ̇: ܢܸܬ̣ܩܛܸܠ ܒܚܲܪܒܵܐ. ܡܸܛܠ ܕܐܸܡܲܪ ܟܵܗܢܵܐ: ܠܵܐ ܒܒܲܝܬܹ̇ܗ ܕܡܵܪܝܵܐ.

15: ܘܲܥܒܲܕ݂ܘ ܠܵܗ̇ ܕܘܼܟ̇ܬ̣ܵܐ: ܘܥܸܠܲܬ̤ ܒܐܘܼܪܚܵܐ ܕܡܲܥܠܵܢܵܐ ܕܪ̈ܲܟ݂ܫܵܐ: ܘܡܝܼܬܲܬ̤ ܬܲܡܵܢ.

16: ܘܝܼܡܵܐ ܝܘܿܝܵܕ݂ܵܥ ܒܡܵܘܡܵܬ̣ܵܐ ܒܲܝܢܵܘ̈ܗܝ ܠܒܹܝܬ̣ ܟܠܹܗ ܥܲܡܵܐ: ܘܒܹܝܬ̣ ܡܲܠܟܵܐ: ܠܡܸܗܘܵܐ ܥܲܡܵܐ ܠܡܵܪܝܵܐ.

17: ܘܥܲܠ̣ܘ ܟܠܹܗ ܥܲܡܵܐ ܕܝܼܣܪܵܝܹܠ: ܠܒܹܝܬ̣ ܒܲܥܠܵܐ. ܘܥܲܩܪܘܼܗܝ ܘܲܥܠܵـ̈ـܘܵܬܹܗ ܬܲܒܲܪܘ ܫܲܦܝܼܪ ܘܨܲܠܡܵܘ̈ܗܝ ܕܲܩܸܩܘ ܘܟ݂ܘܼܡܪܵܐ ܕܒܲܥܠܵܐ ܩܲܛܠܘܼܗܝ ܩܕ݂ܵܡ ܡܲܕ݂ܒ̇ܚܵܐ.

18: ܘܲܥܒܲܕ݂ ܝܘܿܝܵܕ݂ܵܥ ܫܲܠܝܼܛܵܢܹ̈ܐ ܒܒܲܝܬܹ̇ܗ ܕܡܵܪܝܵܐ: ܘܟ݂ܵܗܢܹ̈ܐ ܘܠܹܘܵܝܹ̈ܐ ܕܦܲܠܸܓ̣ ܕܵܘܝܼܕ݂: ܕܢܸܗܘܘܿܢ ܢܵܛܘܿܪܹ̈ܐ ܥܲܠ ܒܲܝܬܹ̇ܗ ܕܡܵܪܝܵܐ: ܠܡܲܣܵܩܘܼ ܥܠܵـ̈ـܘܵܬ̣ܵܐ: ܐܲܝܟ݂ ܕܲܟ݂ܬ̣ܝܼܒ̣ ܒܐܘܿܪܵܝܬܹ̇ܗ ܕܡܘܼܫܹܐ: ܒܚܲܕ݂ܘܼܬ̣ܵܐ ܘܲܒ̣ܬܸܫܒ̇ـ̈ـܚܵܬ̣ܵܐ ܥܲܠ ܐܝܼܕ݂ܵܘ̈ܗܝ ܕܕ݂ܵܘܝܼܕ݂.

19: ܘܲܢܩܘܼܡܘܼܢ ܢܵܛܪ̈ܲܝ ܬܲܪ̈ܥܹܐ ܥܲܠ ܬܲܪ̈ܥܹܐ ܕܒܲܝܬܹ̇ܗ ܕܡܵܪܝܵܐ: ܕܠܵܐ ܢܸܥܠܘܼܢ ܠܬܲܡܵܢ ܡܣܲܝܒܹ̈ܐ.

20: ܘܲܢܣܲܒ̣ܘ ܪܹ̈ܫܲܝ ܡܲܐ̈ܘܵܬ̣ܵܐ: ܫܲܠܝܼܛܹ̈ܐ ܕܥܲܡܵܐ: ܘܟ݂ܠܹܗ ܥܲܡܵܐ ܕܐܲܪܥܵܐ. ܘܐܸܬ̣ܵܘ ܒܓ̣ܵܘ ܬܲܪܥܵܐ ܥܲܠ ܟܘܼܪܣܝܵܐ ܕܡܲܠܟ̇ܘܼܬ̣ܵܐ.

21: ܘܚܵܕܹܝܢ ܟܠܹܗ ܥܲܡܵܐ ܕܐܲܪܥܵܐ. ܘܲܒ̣ܩܲܪ̈ܢܵܬ̣ܵܐ ܡܫܲܒ̇ܚܝܼܢ: ܘܠܲܥܬܲܠܝܵܐ ܩܛܲܠܘ ܒܚܲܪܒܵܐ.

ܩܹܦܵܠܹܐܘܿܢ: ܟܕ.

1: ܒܲܪ ܫܒܲܥ ܫܢ̈ܝܼܢ ܝܘܿܐܵܫ ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ: ܘܐܲܪܒ̇ܥܝܼܢ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܗ̇ ܕܐܸܡܹܗ ܨܘܼܒ̣ܵܐ: ܡ̣ܢ ܒܹܪ ܫܒܲܥ ܡܕ݂ܝܼܢ̄ܬܵܐ.

2: ܘܲܥܒܲܕ݂ ܝܘܿܐܵܫ ܕܫܲܦܝܼܪ ܩܕ݂ܵܡ ܡܵܪܝܵܐ: ܟܠ ܝܵܘ̈ܡܵܬ̣ܵܐ ܕܚܲܝܵܘ̈ܗܝ ܕܝܘܿܝܵܕ݂ܵܥ ܟܵܗܢܵܐ.

3: ܘܲܢܣܲܒ̣ ܠܹܗ ܝܘܿܝܵܕ݂ܵܥ ܢܸܫܹ̈ܐ ܬܲܪܬ̇ܝܼܢ: ܘܐܵܘܠܸܕ݂ ܠܹܗ ܒܢܲـ̈ـܝܵܐ ܘܲܒ̣ـ̈ـܢܵܬ̣ܵܐ.

4: ܘܲܗܘ̤ܵܐ ܡ̣ܢ ܒܵܬܲܪ ܗܵܠܹܝܢ: ܗܘ̤ܵܐ ܠܸܒܹ̇ܗ ܥܲܡ ܝܘܿܐܵܫ ܒܐ̄ܪܵܙܵܐ: ܠܲܡܚܲܕܵܬ̣ܘ ܒܲܝܬܹ̇ܗ ܕܡܵܪܝܵܐ: ܘܲܠܡܸܒ̣ܕܲܩ ܒܹܗ ܟܠ ܡܸܕܸ̇ܡ ܕܡܸܬ̣ܒ̇ܥܹܐ.

5: ܘܟܲܢܸܫ ܝܘܿܝܵܕ݂ܵܥ ܟܵܗܢܵܐ: ܠܟ݂ܵܗܢܹ̈ܐ: ܘܲܠܠܹܘܵܝܹ̈ܐ. ܘܐܸܡܲܪ ܠܗܘܿܢ: ܦܘܿܩܘ ܠܩܘܼܪ̈ܝܵܐ ܕܒܹܝܬ̣ ܝܼܗܘܼܕ݂ܵܐ. ܘܟܲܢܸܫܘ ܡ̣ܢ ܟܠܗܹܝܢ ܩܘܼܪ̈ܝܵܐ ܕܝܼܣܪܵܝܹܠ: ܟܸܣܦܵܐ ܘܕܲܗܒ̣ܵܐ ܘܲܒ̣ܕ݂ܘܿܩܘ ܒܲܝܬܹ̇ܗ ܕܐܲܠܵܗܟ݂ܘܿܢ: ܐܲܝܟ݂ ܕܟ݂ܠ ܫܢܵܐ ܒܲܫܢܵܐ ܘܐܲܢ̄ܬ̇ܘܿܢ ܬܸܣܬܲܪܗܒ̣ܘܼܢ ܠܲܡܡܲܠܵܝܘܼ.

6: ܘܲܩ̣ܪܵܐ ܡܲܠܟܵܐ ܠܝܘܿܝܵܕ݂ܵܥ ܩܲܫܝܼܫܵܐ: ܘܐܸܡܲܪ ܠܹܗ: ܡܸܛܠ ܡܵܢܵܐ ܠܵܐ ܬܵܒܲܥ ܐܲܢ̄ܬ̇ ܠܠܹܘܵܝܹ̈ܐ: ܕܢܹܐܙܠ̄ܘܿܢ ܘܢܲܝܬ̇ܘܿܢ ܡ̣ܢ ܝܼܗܘܼܕ݂ܵܐ: ܘܡ̣ܢ ܐܘܿܪܸܫܠܸܡ: ܡܵܘܗ̈ܒ̣ܵܬ̣ܵܐ ܕܡܘܼܫܹܐ ܥܲܒ̣ܕܹܗ ܕܡܵܪܝܵܐ. ܘܟܲܢܸܫܘ ܠܝܼܣܪܵܝܹܠ ܠܡܲܫܟ̇ܢܵܐ ܕܥܹܐܕ݂ܵܐ.

7: ܘܲܥܬܲܠܝܵܐ ܡܲܠܦܵܐ ܗ̄ܘ̣ܵܬ̣ ܒܥܹܝܢ ܥܵܘܼܠܵܐ ܘܬܸܪܥܲܬ̤ ܠܒܲܝܬܹ̇ܗ ܕܡܵܪܝܵܐ. ܘܐܵܦ ܠܟ݂ܠ ܩܲܕ̇ܝܼܫܹ̈ܐ ܕܐܝܼܬ̣ ܗ̄ܘ̣ܵܘ ܒܒܲܝܬܹ̇ܗ ܕܡܵܪܝܵܐ: ܥܸܒ̣ܕܲܬ̤ ܐܸܢܘܿܢ ܕܵܚܠܲܝ̈ ܦܬܲܟ݂ܪܹ̈ܐ.

8: ܘܐܸܡܲܪ ܡܲܠܟܵܐ: ܘܲܥܒܲܕ݂ܘ ܩܹܒ̣ܘܿܬ̣ܵܐ ܚܕ݂ܵܐ: ܘܣܵܡܘܼܗ̇ ܒܬܲܪܥܵܐ ܕܒܲܝܬܹ̇ܗ ܕܡܵܪܝܵܐ ܡ̣ܢ ܠܒܲܪ.

9: ܘܝܲܗ̄ܒ̣ܘ ܩܵܠܵܐ ܒܲܝܗܘܼܕ݂ܵܐ: ܘܒ̣ܐܘܿܪܸܫܠܸܡ: ܕܢܲܝܬ̇ܘܿܢ ܠܡܵܪܝܵܐ ܡܢܵܬ̣ܵܐ ܕܡܘܼܫܹܐ ܥܲܒ̣ܕܹܗ ܕܡܵܪܝܵܐ: ܕܦܲܩܸܕ݂ ܒܡܲܕ݂ܒ̇ܪܵܐ.

10: ܘܲܚܕ݂ܝܼܘ ܟܠܗܘܿܢ ܪܵܘ̱ܪ̈ܒ̣ܵܢܹܐ: ܘܟ݂ܠܹܗ ܥܲܡܵܐ. ܘܐܲܝܬ̇ܝܼܘ ܘܲܥܒܲܕ݂ܘ ܩܹܒ̣ܘܿܬ̣ܵܐ ܚܕ݂ܵܐ: ܘܣܵܡܘܼܗ̇ ܘܐܲܪܡ̣ܝܼܘ ܥܕܲܡܵܐ ܕܲܡܠܵܬ̤.

11: ܘܟܲܕ݂ ܚ̣ܙܵܘ ܕܲܣܓ̣ܝܼ ܟܸܣܦܵܐ ܒܵܗ̇ ܒܩܹܒ̣ܘܿܬ̣ܵܐ ܥܲܠ ܣܵܦܪܵܐ ܕܡܲܠܟܵܐ: ܘܪܲܒ̇ ܒܲܝܬܹ̇ܗ ܕܟ݂ܵܗܢܵܐ ܪܲܒܵܐ. ܘܲܡܢܵܘ: ܘܨܲܪܘ: ܟܸܣܦܵܐ.

12: ܘܝܲܗ̄ܒ̇ܘܼܗܝ ܠܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ. ܘܲܗܘ̤ܵܘ ܐܲܓ̣ܪܝܼܢ ܠܗܘܿܢ ܦܵܣ̈ܘܿܠܹܐ ܘܢܲܓܵܪܹ̈ܐ: ܘܒ̣ܵܕ݂ܩܝܼܢ ܒܲܝܬܹ̇ܗ ܕܡܵܪܝܵܐ: ܘܐܵܦ ܥܵܒ̣ܕܲܝ̈ ܦܲܪܙܠܵܐ ܘܲܢܚܵܫܵܐ: ܠܡܸܒ̣ܕܲܩ ܒܲܝܬܹ̇ܗ ܕܡܵܪܝܵܐ.

15: ܘܫܲܩ̣ ܝܘܿܝܵܕ݂ܵܥ ܘܲܣܒܲܥ ܝܵܘ̈ܡܵܬܹܗ. ܘܡ̣ܝܼܬ̣ ܒܲܪ ܡܵܐܐ ܘܲܬ̣ܠܵܬ̣ܝܼܢ ܫܢ̈ܝܼܢ.

16: ܘܩܲܒ̣ܪܘܼܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܒܲܩܒ̣ܘܼܪܬܵܐ ܕܡܲܠ̈ܟܹ̇ܐ ܘܐܸܡܲܪ: ܗܵܟܲܢܵܐ ܢܸܬ̣ܦܪܲܥ ܡܲܢ ܕܥܵܒܹ̇ܕ݂ ܛܵܒ̣ܵـ̈ـܬ̣ܵܐ ܒܝܼܣܪܵܝܹܠ ܘܐܵܦ ܥܲܡ ܒܝܬܹ̇ܗ ܕܡܵܪܝܵܐ ܡܲܪ̈ܗܵܛܹܐ ܪܵܘ̱ܪ̈ܒܹܐ ܪܗܸܛ.

17: ܘܡ̣ܢ ܒܵܬܲܪ ܕܡ̣ܝܼܬ̣ ܝܘܿܝܵܕ݂ܵܥ: ܐܸܬ̣ܵܘ ܪܵܘܪ̈ܒ̣ܵܢܹܐ ܕܲܝܗܘܼܕ݂ܵܐ: ܘܲܣܓܸܕ݂ܘ ܠܡܲܠܟܵܐ: ܡܸܛܠ ܕܲܫ̣ܡܲܥ ܐܸܢܘܿܢ.

18: ܘܲܫܒܲܩܘ ܠܒܲܝܬܹ̇ܗ ܕܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܗܘܿܢ. ܘܐܸܙܲܠܘ ܦܠܲܚܘ ܠܨܲܠܡܹ̈ܐ ܘܠܲܦܬܲܟ݂ܪܹ̈ܐ. ܘܲܗܘ̤ܵܐ ܪܘܼܓ̣ܙܵܐ ܥܲܠ ܝܼܗܘܼܕ݂ܵܐ ܥܲܠ ܐܘܿܪܸܫܠܸܡ: ܥܲܠ ܕܲܚܛܵܘ ܚܛܝܼܬ̣ܵܐ ܗܵܕܹܐ.

19: ܘܫܲܕܲܪ ܠܘܵܬ̣ܗܘܿܢ ܒܝܲܕ݂ ܢܒ̣ܝܹ̈ܐ: ܠܡܲܗܦܵܟ݂ܘܼ ܐܸܢܘܿܢ ܡ̣ܢ ܐܘܼܪ̈ܚܵܬ̣ܗܘܿܢ: ܘܠܵܐ ܫܡܲܥܘ ܘܐܲܣܗܸܕ݂ ܒܗܘܿܢ: ܘܠܵܐ ܩܲܒܸ̇ܠܘ.

20: ܘܪܘܼܚܹܗ ܕܡܵܪܝܵܐ ܠܸܒ̣ܫܲܬ̤ ܠܲܙܟܲܪܝܵܐ ܒܲܪ ܝܘܿܝܵܕ݂ܵܥ ܟܵܗܢܵܐ. ܘܲܣܠܸܩ̣ ܘܩܵܡ̣ ܠܥܸܠ ܡ̣ܢ ܥܲܡܵܐ: ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ: ܠܡܵܢܵܐ ܥܒܲܪܬ̇ܘܿܢ ܥܲܠ ܦܘܼܩܕܵܢܵܘ̈ܗܝ ܕܡܵܪܝܵܐ. ܠܵܐ ܬܲܟ݂ܫ̄ܪܘܼܢ. ܡܸܛܠ ܕܲܫܒܲܩܬ̇ܘܿܢ ܐܘܼܪܚ̄ܝܼ: ܘܐܵܦ ܐܸܢܵܐ ܫܵܒܹ̇ܩ ܐ̄ܢܵܐ ܠܟ݂ܘܿܢ.

21: ܘܲܡ̣ܪܲܕ݂ܘ ܥܠܵܘܗܝ ܘܪܲܓ̣ܡ̣ܘܼܗܝ ܒܟܹܐܦܹ̈ܐ ܒܦܘܼܩܕܵܢܵܐ ܕܡܲܠܟܵܐ: ܒܕ݂ܵܪܬܵܐ ܕܒܲܝܬܹ̇ܗ ܕܡܵܪܝܵܐ.

22: ܘܠܵܐ ܐܲܪܓܸ̇ܫ ܝܘܿܐܵܫ ܡܲܠܟܵܐ: ܛܲܝܒ̇ـ̈ـܘܵܬ̣ܵܐ ܕܲܥܒܲܕ݂ ܒܹܗ ܝܘܿܝܵܕ݂ܵܥ ܟܵܗܢܵܐ ܐܲܒ̣ܘܼܗܝ. ܘܩܲܛܸܠ ܠܲܒ̣ܢܵܘ̈ܗܝ ܡ̣ܢ ܒܵܬ̣ܪܹܗ. ܘܲܒ̣ܢܵܘ̈ܗܝ ܟܲܕ݂ ܡܸܬ̣ܩܲܛܠܝܼܢ ܗ̄ܘ̣ܵܘ: ܐܵܡ̇ܪܝܼܢ: ܢܸܚܙܹܐ ܡܵܪܝܵܐ: ܘܢܸܬ̣ܒܲܥ.

23: ܘܲܗܘ̤ܵܐ ܠܚܲܪܬ̣ܵܗ̇ ܕܫܲܢ̄ܬܵܐ: ܣܠܸܩ̣ ܥܠܵܘܗܝ ܚܲܝܠܵܐ ܕܐܲܕ݂ܘܿܡ. ܘܐܸܬ̣ܵܐ ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ: ܘܚܲܒܸ̇ܠ̣ܘ ܟܠܗܘܿܢ ܪܵܘ̱ܪ̈ܒ̣ܵܢܵܘܗܝ ܕܥܲܡܵܐ. ܘܟ݂ܠ ܫܒ̣ܝܼܬ̣ܗܘܿܢ ܫܲܕܲܪܘ ܠܡܲܠܟܵܐ ܕܕܲܪܡܣܘܿܩ.

24: ܡܸܛܠ ܕܲܙܥܘܿܪܝܼܢ ܗ̄ܘ̣ܵܘ ܓܲܒ̣ܪܹ̈ܐ ܕܐܸܬ̣ܵܘ ܥܲܡ ܚܲܝܠܵܐ ܕܐܲܕ݂ܘܿܡ. ܘܡܵܪܝܵܐ ܐܲܫܠܸܡ ܠܗܘܿܢ ܚܲܝܠܵܐ ܕܣܲܓܝܼ ܛܵܒ̣. ܡܸܛܠ ܕܲܫܒܲܩܘ ܠܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬ̣ܗܘܿܢ ܘܲܠܡܸܕܸ̇ܡ ܕܲܥܒܲܕ݂ ܝܘܿܐܵܫ: ܐܲܣ̱ܠܝܘܼܗܝ ܕܲܝܵܢܹ̈ܐ: ܟܲܕ݂ ܐܸܙܲܠ̣ܘ ܠܗܘܿܢ ܡ̣ܢ ܠܘܵܬܹܗ.

25: ܡܸܛܠ ܕܫܲܒ̣ܩܘܼܗܝ ܗ̄ܘ̣ܵܘ ܒܟ݂ܘܼܪ̈ܗܵܢܹܐ ܣܲܓ̇ܝܼ̈ܐܹܐ. ܘܐܸܬ̣̱ܢܟܸܠܘ ܥܠܵܘܗܝ ܥܲܒ̣ܕܵܘ̈ܗܝ: ܒܲܕ݂ܡܵܐ ܕܲܒ̣ܢܵܘ̈ܗܝ ܕܝܘܿܝܵܕ݂ܵܥ ܟܵܗܢܵܐ. ܘܩܲܛܠܘܼܗܝ ܥܲܠ ܥܲܪܣܹܗ. ܘܡ̣ܝܼܬ̣ ܘܩܲܒ̣ܪܘܼܗܝ ܒܲܩܪܝܼܬ̣ܵܐ ܕܕ݂ܵܘܝܼܕ݂ ܐܲܒ̣ܘܼܗܝ. ܘܠܵܐ ܩܲܒ̣ܪܘܼܗܝ ܒܲܩܒ̣ܘܿܪܬܵܐ ܕܡܲܠ̈ܟܹ̇ܐ.

26: ܘܗܵܠܹܝܢ ܫܡܵܗܹ̈ܐ ܕܐ̄ܢܵܫܵܐ ܕܐܸܬ̣ܢ̱ܟܸܠܘ ܥܠܵܘܗܝ: ܙܲܟ̇ܘܼܪ ܒܲܪ ܫܸܡܥܲܬ̣ ܥܲܡܘܿܢܵܝܬܵܐ: ܘܝܵܗܘܿܙܵܒ̣ܵܪ ܒܲܪ ܢܛܘܼܪܘܼܬ̣ ܡܘܼܐܵܒ̣ܵܝܬܵܐ: ܘܲܒ̣ܢܵܘ̈ܗܝ: ܘܣܘܿܓ̣ܵܐܐ ܕܐ̄ܢܵܫܵܐ ܕܐܸܬ̣ܢ̱ܟܸܠܘ ܥܠܵܘܗܝ.

27: ܘܫܲܪܟܵܐ ܕܲܚܛܵܗܹ̈ܐ ܕܲܥܒܲܕ݂ ܒܒܲܝܬܹ̇ܗ ܕܡܵܪܝܵܐ: ܗܵܐ ܐܸܢܘܿܢ ܟܬ̣ܝܼܒ̣ܝܼܢ ܥܲܠ ܡܲܕ݂ܪܵܫܵܐ ܕܲܣܦܲܪ ܡܲܠ̈ܟܹ̇ܐ. ܘܐܲܡ̣ܠܸܟ݂ ܐܵܡܘܿܨܝܵܐ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܟܗ .

1: ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܐܵܡܘܿܨܝܼܵܐ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܥܸܣܪܝܼܢ ܘܲܬ̣ܫܲܥ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ ܝܵܗܘܿܥܲܕܵܢ ܡ̣ܢ ܐܘܿܪܸܫܠܸܡ.

2: ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܒܲܠܚܘܿܕ݂ ܠܵܐ ܒܠܸܒܵܐ ܫܲܠܡܵܐ.

3: ܘܲܗܘ̤ܵܐ ܕܟܲܕ݂ ܥܸܫܢܲܬ̤ ܡܲܠܟ̇ܘܼܬ̣ܵܐ ܒܐܝܼܕܹܗ: ܩܲܛܸܠ ܠܥܲܒ̣ܕܵܘ̈ܗܝ ܕܲܩܛܲܠ̣ܘ ܠܡܲܠܟܵܐ ܐܲܒ̣ܘܼܗܝ.

4: ܘܠܲܒ̣ܢܲܝ̈ܗܘܿܢ ܕܩܵܛܘܿܠܹ̈ܐ ܠܵܐ ܩܲܛܸܠ ܡܸܛܠ ܕܗܵܟܲܢܵܐ ܟܬ̣ܝܼܒ̣ ܒܣܸܦܪܵܐ ܕܢܵܡܘܿܣܹܗ ܕܡܘܼܫܹܐ: ܕܦܲܩܸܕ݂ ܡܵܪܝܵܐ: ܘܐܸܡܲܪ: ܕܠܵܐ ܢܡܘܼܬ̣ܘܼܢ ܐܲܒ̣ܵܗܹ̈ܐ ܥܲܠ ܐܲܦܲܝ̈ ܒܢܲـ̈ـܝܵܐ ܘܲܒ̣̈ܢܲܝܵܐ ܠܵܐ ܢܡܘܼܬ̣ܘܼܢ ܥܲܠ ܐܲܦܲܝ̈ ܐܲܒ̣ܵܗܹ̈ܐ. ܐ̄ܢܵܫ ܒܲܚܛܵܗܵܘ̈ܗܝ ܢܡܘܼܬ̣.

5: ܘܟܲܢܸܫ ܐܵܡܘܿܨܝܼܵܐ ܠܲܕ݂ܒܹܝܬ̣ ܝܼܗܘܼܕ݂ܵܐ. ܘܐܲܩܝܼܡ ܐܸܢܘܿܢ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܠܪܵܘ̱ܪ̈ܒ̣ܵܢܲܝ ܐܲܠܦܹ̈ܐ: ܘܲܠܪܵܘ̱ܪ̈ܒ̣ܵܢܲܝ ܡܲܐ̈ܘܵܬ̣ܵܐ: ܘܲܠܟ݂ܠܹܗ ܝܼܗܘܼܕ݂ܵܐ ܘܒܸܢܝܵܡܹܝܢ: ܘܲܡ̣ܢܵܐ ܐܸܢܘܿܢ ܡ̣ܢ ܒܲܪ ܥܸܣܪܝܼܢ ܫܢ̈ܝܼܢ ܘܲܠܥܸܠ. ܘܐܸܫܟܲܚ ܐܸܢܘܿܢ ܬܠܵܬ̣ܡܵܐܐ ܐܲܠܦ̈ܝܼܢ ܓܲܒ̣ܪܹ̈ܐ: ܥܠܲܝܡܹ̈ܐ ܢܵܦܩܲܝ̈ ܠܲܩܪܵܒ̣ܵܐ: ܫܵܡܛܲܝ̈ ܣܲܝܦܹ̈ܐ: ܘܐܲܚܝܼ̈ܕܲܝ ܣܲܟ̇ܪܹ̈ܐ.

6: ܘܐܸܓܲܪ ܡ̣ܢ ܝܼܣܪܵܝܹܠ: ܡܵܐܐ ܐܲܠܦ̈ܝܼܢ ܓܲܒ̣ܪܹ̈ܐ ܓܲܢ̄ܒܵܪ̈ܲܝ ܚܲܝܠܵܐ: ܒܲܡܵܐܐ ܟܲܟ̇ܪ̈ܝܼܢ ܟܸܣܦܵܐ.

7: ܘܲܢܒ̣ܝܹܗ ܕܡܵܪܝܵܐ ܐܸܬ̣ܵܐ ܠܘܵܬܹܗ: ܘܐܸܡܲܪ ܠܹܗ ܡܲܠܟܵܐ: ܠܵܐ ܢܸܥܘܿܠ ܥܲܡܵܟ݂ ܟܠܹܗ ܚܲܝܠܵܐ ܕܝܼܣܪܵܝܹܠ. ܡܸܛܠ ܕܠܵܐ ܐܝܼܬ̣ ܡܵܪܝܵܐ ܥܲܡ ܟܠܹܗ ܝܼܣܪܵܝܹܠ: ܘܠܵܐ ܥܲܡ ܟܠܗܘܿܢ ܕܒܹܝܬ̣ ܐܲܦܪܹܝܡ.

8: ܡܸܛܠ ܕܐܲܢ̄ܬ̇ ܥܵܐܹ̇ܠ ܠܡܸܥܒܲܕ݂ ܩܪܵܒ̣ܵܐ: ܪܵܡܹ̇ܐ ܠܵܟ݂ ܡܵܪܝܵܐ ܩܕ݂ܵܡ ܒܥܸܠܕ̇ܒ̣ܵܒܲܝ̈ܟ. ܡܸܛܠ ܕܠܵܐ ܫܲܒܲܚܬ̇ ܠܡܵܪܝܵܐ: ܕܗܘ̤ܝܘܼ ܥܵܕ݂ܘܿܪܵܐ ܘܲܡܪܝܼܡܵܢܵܐ.

9: ܘܐܸܡܲܪ ܐܵܡܘܿܨܝܼܵܐ ܠܲܢܒ̣ܝܹܗ ܕܡܵܪܝܵܐ: ܡܵܢܵܐ ܥܸܒ̣ܕܹ̇ܬ̣ ܣܲܟ݂ܠܘܼܬ̣ܵܐ: ܕܗܵܠܹܝܢ ܡܵܐܐ ܟܲܟ̇ܪ̈ܝܼܢ ܝܸܗ̄ܒܹ̇ܬ̣ ܠܓܲܒ̣ܪܹ̈ܐ ܕܝܼܣܪܵܝܹܠ. ܘܐܸܡܲܪ ܠܹܗ ܢܒ̣ܝܹܗ ܕܐܲܠܵܗܵܐ: ܐܝܼܬ̣ ܠܡܵܪܵܟ݂ ܐܲܠܵܗܵܐ: ܠܡܸܬܲܠ ܠܵܟ݂ ܣܲܓ̇ܝܼ ܡ̣ܢ ܟܵܗܢܵܐ: ܐܲܥܦܵܐ ܥܲܠ ܡܸܕܸ̇ܡ ܕܝܲܗ̄ܒ̣ܬ̇.

10: ܘܲܦܪܲܫ ܐܸܢܘܿܢ ܐܵܡܘܿܨܝܼܵܐ ܠܓܲܒ̣ܪܹ̈ܐ ܕܐܸܬ̣ܵܘ ܠܘܵܬܹܗ ܡ̣ܢ ܒܹܝܬ̣ ܐܲܦܪܹܝܡ: ܠܡܹܐܙܲܠ ܠܕ݂ܘܼܟܲܬ̣ܗܘܿܢ. ܘܐܸܬ̇ܬܲܩܦܲܬ̤ ܚܸܡܬܹܗ ܛܵܒ̣: ܒܲܕ݂ܒܹܝܬ̣ ܝܼܣܪܵܝܹܠ. ܘܐܲܗ̣ܦܲܟ݂ ܐܸܢܘܿܢ ܠܕ݂ܘܼܟܲܬ̣ܗܘܿܢ ܒܚܸܡܬ̣ܵܐ ܕܪܘܼܓ̣ܙܹܗ.

11: ܐܵܡܘܿܨܝܼܵܐ ܐܸܬ̣ܓܲܢ̄ܒܲܪ: ܘܲܕ݂ܒܲܪ ܥܲܡܹܗ. ܘܐܸܙܲܠ ܠܢܲܚܠܵܐ ܕܡܸܠܚܵܐ. ܘܩܲܛܸܠ ܘܲܚܪܲܒ̣ ܠܲܒ̣ܢܲܝ̈ ܛܘܼܪܵܐ ܕܲܓ̣ܒܸܠ: ܥܸܣܪܵܐ ܐܲܠܦ̈ܝܼܢ.

12: ܘܥܸܣܪܵܐ ܐܲܠܦ̈ܝܼܢ ܟܲܕ݂ ܚܲܝܝܼܢ: ܐܸܚܲܕ݂ܘ ܐܸܢܘܿܢ ܒܢܲܝ̈ ܝܼܗܘܼܕ݂ܵܐ. ܘܐܲܝܬ̇ܝܼܘ ܐܸܢܘܿܢ ܠܪܸܫ ܟܹܐܦܹ̈ܐ. ܘܟ݂ܠܗܘܿܢ ܐܸܬ̣ܵܘ ܟܲܕ݂ ܐܲܣܝܼܪܝܼܢ ܒܫܸܫ̈ܠܵܬ̣ܵܐ.

13: ܘܲܒ̣ܢܲܝ̈ ܓܲܢ̄ܒܵܪܹ̈ܐ ܕܲܫܒ̣ܵܐ ܐܵܡܘܿܨܝܼܵܐ: ܟܲܕ݂ ܐܸܙܲܠ̣ ܠܲܩܪܵܒ̣ܵܐ: ܐܲܫܠܸܛ̣ ܐܸܢܘܿܢ ܒܩܘܼܪ̈ܝܵܐ ܕܲܝܗܘܼܕ݂ܵܐ: ܘܲܒ̣ܫܵܡܪ̈ܵܝܹܐ ܕܥܲܡܡܹ̈ܐ. ܘܲܚܪܲܒ̣ܘ ܡܸܢܗܹܝܢ ܡ̣ܢ ܩܘܼܪ̈ܝܵܐ ܬܠܵܬ̣ܵܐ ܐܲܠܦ̈ܝܼܢ ܘܒܲܙܘ ܒܸܙܬ̣ܵܐ ܣܲܓ̇ܝܼܐܬ̣ܵܐ.

14: ܘܲܗܘ̤ܵܐ ܡ̣ܢ ܒܵܬܲܪ ܕܐܸܬ̣ܵܐ ܐܵܡܘܿܨܝܼܵܐ ܟܲܕ݂ ܗ̣ܦܲܟ݂ ܠܡܸܚܪܲܒ̣ ܠܐܲܕ݂ܘܿܡܵܝܹ̈ܐ. ܐܲܝܬ̇ܝܼܘ ܠܹܗ ܐܲܠܵܗܹ̈ܐ ܕܲܒ̣ܢܲܝ̈ ܛܘܼܪܵܐ ܪܓ̣ܒܸܠ. ܘܐܲܩܝܼܡ ܐܸܢܘܿܢ ܩܕ݂ܵܡܵܘܗܝ: ܘܲܩܕ݂ܵܡܲܝܗܘܿܢ ܣܓܸܕ݂ ܘܲܠܗܘܿܢ ܐܲܣܸܩ̣ ܩܲܛܪ̈ܘܼܩܹܐ ܕܒܸܣܡܹ̈ܐ.

15: ܘܐܸܬ̣ܚܲܡܲܬ̣ ܡܵܪܝܵܐ ܥܲܠ ܐܵܡܘܿܨܝܼܵܐ: ܘܫܲܕܲܪ ܠܘܵܬܹܗ ܢܒ̣ܝܼܵܐ: ܘܐܸܡܲܪ ܠܹܗ: ܠܡܵܢܵܐ ܨܲܠܝܼܬ̇ ܩܕ݂ܵܡ ܐܲܠܵܗܹ̈ܐ ܕܥܲܡܡܹ̈ܐ: ܕܠܵܐ ܐܸܫܟܲܚܘ ܠܲܡܦܲܨܵܝܘܼ ܕܵܚܠܲܝ̈ܗܘܿܢ ܡ̣ܢ ܐܝܼܕܲܝ̈ܟ.

16: ܘܲܗܘ̤ܵܐ ܕܟܲܕ݂ ܡܲܠܸܠ̣ ܥܲܡܹܗ ܢܒ̣ܝܼܵܐ: ܐܸܡܲܪ ܠܹܗ: ܣܸܓ̣ܕ̇ܬ̣ܵܐ ܕܩܲܝܣܹ̈ܐ ܠܡܲܠ̈ܟܹ̇ܐ ܐܸܬ̣ܝܲܗ̄ܒܲܬ̤ ܘܲܦܪܲܩ ܠܹܗ ܢܒ̣ܝܼܵܐ ܡܸܢܹܗ ܘܐܸܡܲܪ ܠܹܗ: ܘܵܝ ܠܵܟ݂. ܕܗܵܐ ܐܸܬ̣ܡܲܠܲܟ݂ ܥܠܲܝܟ ܡܵܪܝܵܐ ܡܸܠܟܵܐ ܒܝܼܫܵܐ ܠܡܵܘܒܵܕ݂ܘܼܬ̣ܵܟ݂: ܘܠܵܐ ܫܡܲܥ̣ܬ̇ ܒܩܵܠܝ.

17: ܘܐܸܬ̣ܡܲܠܲܟ݂ ܐܵܡܘܿܨܝܼܵܐ ܡܲܠܟܵܐ ܕܒܹܝܬ̣ ܝܼܗܘܕ݂ܵܐ. ܘܫܲܕܲܪ ܠܘܵܬ̣ ܝܘܿܐܵܫ ܒܲܪ ܝܵܗܘܿܐܵܚܵܙ ܒܲܪ ܝܵܗܘ̇ ܡܲܠܟܵܐ ܕܝܼܣܪܵܝܹܠ. ܘܐܸܡܲܪ ܠܹܗ: ܬܵܐ ܢܸܚܙܹܐ ܐܲܦܹ̈ܐ ܚܲܕ݂ ܕܚܲܕ݂.

18: ܘܫܲܕܲܪ ܝܘܿܐܵܫ ܡܲܠܟܵܐ ܕܝܼܣܪܵܝܹܠ: ܠܘܵܬ̣ ܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ ܘܐܸܡܲܪ ܠܹܗ: ܚܵܘܚܵܐ ܕܐܝܼܬ̣ ܒܠܸܒ̣ܢܵܢ ܫܲܕܲܪ ܠܘܵܬ̣ ܐܲܪܙܵܐ ܕܐܝܼܬ̣ ܒܠܸܒ̣ܢܵܢ: ܘܐܸܡܲܪ ܠܹܗ: ܗܲܒ̣ ܒܲܪܬ̣ܵܟ݂ ܠܒܹܪܝ ܐܲܢ̄ܬ̇ܬ̣ܵܐ. ܘܥܸܒ̣ܪܲܬ̣ ܚܲܝ̄ܘܬ̣ܵܐ ܕܐܝܼܬ̣ ܒܠܸܒ̣ܢܵܢ. ܘܕ݂ܵܫܬܹܗ ܠܚܵܘܚܵܐ.

19: ܡܸܚܪܲܒ̣ ܚܪܲܒ̣ܬ̇ ܠܐܲܕ݂ܘܿܡܵܝܹ̈ܐ. ܡܸܛܠ ܗܵܢܵܐ ܝܼܪܸܒ̣ ܠܸܒܵܟ݂. ܐܸܬ̣ܝܲܩܲܪ: ܘܬܸܒ̣ ܒܒܲܝܬܵܟ݂. ܘܲܠܡܵܢܵܐ ܡܸܬ̣ܓܲܪܲܓ̣ ܐܲܢ̄ܬ̇ ܥܲܠ ܒܝܼܫܬܵܐ: ܕܬܸܦܸܠ ܐܲܢ̄ܬ̇ ܘܟ݂ܠܹܗ ܝܼܗܘܼܕ݂ܵܐ ܥܲܡܵܟ݂.

20: ܘܠܵܐ ܫ̣ܡܲܥ ܐܵܡܘܿܨܝܼܵܐ. ܘܲܣܠܸܩ̣ ܝܘܿܐܵܫ ܡܲܠܟܵܐ ܕܝܼܣܪܵܝܹܠ: ܘܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ.

21: ܘܲܣܠܸܩܘ: ܘܲܚܙܵܘ ܐܲܦܹ̈ܐ ܚܲܕ݂ ܕܚܲܕ݂: ܒܒܹܝܬ̣ ܫܡܸܫ ܩܪܝܼܬ̣ܵܐ: ܕܐܝܼܬ̣ ܒܲܬ̣ܚܘܼܡ ܐܲܪܥܵܐ ܕܒܹܝܬ̣ ܝܼܗܘܼܕ݂ܵܐ.

23: ܘܐܹܚܲܕ݂ ܝܘܿܐܵܫ ܡܲܠܟܵܐ ܕܝܼܣܪܵܝܹܠ: ܠܐܵܡܘܿܨܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܒܒܹܝܬ̣ ܫܡܸܫ ܩܪܝܼܬ̣ܵܐ. ܘܐܲܝܬ̇ܝܘܼܗܝ ܠܐܘܿܪܸܫܠܸܡ. ܘܲܬ̣ܪܲܥ̣ ܒܫܘܼܪܵܐ ܕܐܘܿܪܸܫܠܸܡ: ܡ̣ܢ ܬܲܪܥܵܐ ܕܐܲܦܪܹܝܡ: ܘܲܥܕܲܡܵܐ ܠܬܲܪܥܵܐ ܕܙܵܘܝܼܬ̣ܵܐ: ܐܲܪܒ̇ܥܡܵܐܐ ܐܲܡ̈ܝܼܢ.

24: ܘܲܢܣܲܒ̣ ܟܸܣܦܵܐ ܘܕܲܗܒ̣ܵܐ. ܘܡܵܐܢܹ̈ܐ ܕܐܸܫܬ̇ܟܲܚܘ ܒܒܲܝܬܹ̇ܗ ܕܡܵܪܝܵܐ: ܥܲܡ ܡܵܐܢܵܘ̈ܗܝ ܕܥܘܼܒ̣ܵܪ ܐܲܕ݂ܘܿܡ: ܘܠܵܐܘܨܪܹ̈ܐ ܕܒܹܝܬ̣ ܡܲܠܟܵܐ: ܘܲܠܡܵܐܢܹ̈ܐ ܕܒܹܝܬ̣ ܡܲܠܟܵܐ: ܘܲܠܡܵܐܢܹ̈ܐ ܕܕܲܗܒ̣ܵܐ. ܘܲܗܦܲܟ݂ ܠܫܵܡܪܹܝܢ.

25: ܘܲܚ̣ܝܵܐ ܐܵܡܘܿܨܝܼܵܐ ܒܲܪ ܝܘܿܐܵܫ ܡܲܠܟܵܐ ܕܲܝܗܘܼܕ݂ܵܐ: ܡ̣ܢ ܒܵܬܲܪ ܕܡ̣ܝܼܬ̣ ܝܘܿܐܵܫ ܒܲܪ ܝܵܗܘܐܵܚܵܙ ܡܲܠܟܵܐ ܕܝܼܣܪܵܝܹܠ: ܚܲܡܫܲܥܸܣܪܹ̈ܐ ܫܢ̈ܝܼܢ.

26: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܵܡܘܿܨܝ̣ܵܐ ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ: ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ ܘܕ݂ܝܼܣܪܵܝܹܠ.

27: ܘܡ̣ܢ ܒܵܬܲܪ ܕܲܥܒܲܪ ܐܵܡܘܿܨܝܼܵܐ ܡ̣ܢ ܕܸܚ̱ܠܬܹܗ ܕܡܵܪܝܵܐ: ܐܸܬ̣̱ܢܟܸܠܘ ܥܠܵܘܗܝ ܥܲܒ̣ܕܵܘ̈ܗܝ ܢܸܟ݂ܠܵܐ ܒܐܘܿܪܸܫܠܸܡ ܘܲܥܪܲܩ ܠܲܠܟ݂ܝܼܫ ܘܫܲܕܲܪܘ ܒܵܬ̣ܪܹܗ ܠܲܠܟ݂ܝܼܫ: ܘܩܲܛܠܘܼܗܝ ܬܲܡܵܢ.

28: ܘܫܲܩܠܘܼܗܝ ܥܲܠ ܪ̈ܲܟ݂ܫܵܐ. ܘܩܲܒ̣ܪܘܼܗܝ ܥܲܡ ܐܲܒ̣ܵـ̈ـܗܵܬܹܗ ܒܲܩܪܝܼܬ̣ܵܐ ܕܕ݂ܵܘܝܼܕ݂.

ܩܹܦܵܠܹܐܘܿܢ: ܟܘ .

1: ܘܲܕ݂ܒܲܪܘ ܟܠܹܗ ܥܲܡܵܐ ܕܲܝܗܘܼܕ݂ܵܐ ܠܥܘܿܙܝܼܵܐ ܒܪܹܗ. ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ. ܘܐܲܩܝܼܡܘܼܗܝ ܒܡܲܠܟ̇ܘܼܬ̣ܵܐ: ܒܵܬܲܪ ܐܲܒ̣ܘܼܗܝ ܐܵܡܘܿܨܝܼܵܐ.

2: ܗ̤ܘ ܒܢ̣ܵܐ ܠܐܲܝܠܲܬ̣: ܘܦܲܢܝܵܗ̇ ܠܲܕ݂ܒܹܝܬ̣ ܝܼܗܘܼܕ݂ܵܐ: ܡ̣ܢ ܒܵܬܲܪ ܕܲܫܟܸܒ̣ ܡܲܠܟܵܐ ܥܲܡ ܐܲܒ̣ܵـ̈ـܗܵܬܹܗ.

3: ܥܘܿܙܝܼܵܐ ܒܲܪ ܫܸܬ̇ܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܚܲܡܫܝܼܢ ܘܬܲܪܬܹ̇ܝܢ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ. ܘܲܫܡܵܐ ܕܐܸܡܹܗ ܐܹܠܥܵܣܵܐ ܡ̣ܢ ܐܘܿܪܸܫܠܸܡ.

4: ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟܲܢܵܐ ܕܲܥܒܲܕ݂ ܕܵܘܝܼܕ݂ ܐܲܒ̣ܘܼܗܝ.

5: ܘܲܗܘ̤ܵܐ ܡܨܲܠܹܐ ܩܕ݂ܵܡܵܘܗܝ: ܒܝܵܘ̈ܡܲܝ ܙܟܲܪܝܵܐ: ܕܲܗܘ̤ܵܐ ܡܦܝܼܣ ܠܹܗ ܒܕܸܚ̱ܠܬܹܗ ܕܡܵܪܝܵܐ. ܘܲܗܘ̤ܵܐ ܡܵܪܝܵܐ ܡܲܬ̣ܩܸܢ ܟܠܗܹܝܢ ܐܘܼܪ̈ܚܵܬܹܗ.

6: ܘܲܢܦܲܩ ܘܐܸܬ̣ܟܲܬܲܫ ܥܲܡ ܦܠܸܫܬܵܝܹ̈ܐ. ܘܲܬ̣ܪܲܥ ܫܘܼܪܵܐ ܕܓ̣ܵܬ̣ ܘܲܕ݂ܥܵܐܙܵܐ ܘܕܲܐܫܕ̇ܘܿܕ݂.

7: ܘܲܗܘ̤ܵܐ ܐܵܙܹ̇ܠ ܫܡܹܗ: ܥܕܲܡܵܐ ܠܐܲܪܥܵܐ ܕܡܸܨܪܹܝܢ. ܡܸܛܠ ܕܡܲܣܓܹ̇ܐ ܗ̄ܘ̣ܵܐ ܠܡܸܥܒܲܕ݂ ܩܪܵܒ̣ܵܐ.

8: ܘܲܒ̣ܢܵܐ ܠܹܗ ܥܘܿܙܝܼܵܐ ܡܲܓ̣̈ܕ̇ܠܹܐ ܒܐܘܿܪܸܫܠܸܡ: ܥܲܠ ܬܲܪܥܵܐ ܕܙܵܘܝܼܬ̣ܵܐ: ܘܥܲܠ ܬܲܪܥܵܐ ܡܲܥ̱ܪܒ̣ܵܝܵܐ. ܘܲܚܙܲܩ̣ ܐܸܢܘܿܢ ܒܩܲܪ̈ܢܵܬ̣ܗܘܿܢ ܒܲܩܠܝܼܕܹ̈ܐ ܕܦܲܪܙܠܵܐ.

9: ܘܲܒ̣ܢܵܐ ܡܲܓ̣ܕ̇ܠܹܐ ܣܲܓ̇ܝܼ̈ܐܹܐ ܒܩܘܼܪ̈ܝܵܐ ܕܲܗ̤ܘܲܝ̈ ܠܹܗ. ܘܲܥܒܲܕ݂ ܠܹܗ ܒܝܼܪ̈ܵܬ̣ܵܐ ܣܲܓ̇ܝܼ ܡܸܛܠ ܕܢܸܟ݂ܣܹ̈ܐ ܣܲܓ̇ܝܼ̈ܐܹܐ ܐܝܼܬ̣ ܗ̄ܘ̣ܵܘ ܠܹܗ. ܘܲܒ̣ܦܲܩ̈ܥܵܬ̣ܵܐ ܘܲܒ̣ܛܘܼܪܹ̈ܐ. ܐܲܟܵܪܹ̈ܐ ܘܦܲܠܵܚܹ̈ܐ ܗܘ̤ܵܘ ܠܹܗ. ܡܸܛܠ ܕܩܸܢܝܵܢܵܐ ܣܲܓ̇ܝܼ ܗ̄ܘ̣ܵܐ ܠܹܗ.

11: ܘܲܗܘ̤ܵܘ ܠܥܘܿܙܝܼܵܐ: ܓܲܒ̣ܪܹ̈ܐ ܓܲܢ̄ܒܵܪ̈ܲܝ ܚܲܝܠܵܐ ܥܵܒ̣ܕܲܝ̈ ܩܪܵܒ̣ܵܐ.

12: ܒܡܸܢܝܵܢܵܐ ܬܠܵܬ̣ܝܼܢ ܘܲܬ̣ܪܹܝܢ ܐܲܠܦ̈ܝܼܢ ܘܫܸܬ̣ܡܵܐܐ.

13: ܘܐܲܚܪ̈ܵܢܹܐ ܥܲܡܪ̈ܲܝ ܕܲܒ̣ܪܵܐ ܗܘ̤ܵܘ ܠܹܗ ܬܠܵܬ̣ܡܵܐܐ ܐܲܠܦ̈ܝܼܢ. ܘܓܲܒ̣ܪܹ̈ܐ ܐܵܣܪ̈ܲܝ ܣܲܝܦܵܐ: ܗܘ̤ܵܘ ܠܹܗ ܫܲܒ̣ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ.

14: ܕܲܗܘ̤ܵܘ ܩܵܝ̇ܡܝܼܢ ܟܠ ܝܘܿܡ: ܘܢܵܛ̇ܪܝܼܢ ܠܡܲܠܟܵܐ.

15: ܘܲܢܦܲܩ̣ ܫܡܹܗ ܒܟ݂ܠܗܹܝܢ ܡܕ݂ܝܼ̈ܢܵܬ̣ܵܐ: ܥܕܲܡܵܐ ܕܐܲܣܓ̇ܝܼ ܗ̄ܘ̣ܵܐ ܠܡܸܥܬܲܪ.

16: ܘܟܲܕ݂ ܥܬܲܪ ܗ̄ܘ̣ܵܐ ܒܢܸܟ݂ܣܹ̈ܐ: ܐܸܬ̇ܬ̇ܪܝܼܡܲܬ̣ ܪܘܼܚܹܗ ܛܵܒ̣. ܘܟܲܕܸ̇ܒ̣ ܒܡܵܪܝܵܐ ܐܲܠܵܗܹܗ. ܘܥܲܠ ܗ̄ܘ̣ܵܐ ܠܗܲܝܟ̇ܠܵܐ ܕܡܵܪܝܵܐ ܠܡܲܣܵܩܘܼ ܩܲܛܪ̈ܘܿܩܹܐ ܕܒܸܣܡܹ̈ܐ.

17: ܘܥܲܠ ܗ̄ܘ̣ܵܐ ܒܵܬ̣ܪܹܗ ܥܘܿܙܝܼܵܐ ܟܵܗܢܵܐ: ܘܐܸܡܲܪ ܠܹܗ.

18: ܠܵܐ ܗ̄ܘ̣ܵܬ̣ ܕܝܼܠܵܟ݂ ܡܲܠܟܵܐ ܕܘܼܟ̇ܬ̣ܵܐ. ܘܐܵܦܠܵܐ ܘܵܠܹܐ ܠܵܟ݂ ܕܬܲܣܸܩ ܒܸܣܡܹ̈ܐ ܥܲܠ ܡܲܕ݂ܒ̇ܚܵܐ.

19: ܘܒ̣ܵܗ̇ ܒܫܵܥܬ̣ܵܐ ܐܸܙܕ̇ܥܸܦ ܥܘܿܙܝܼܵܐ ܡܲܠܟܵܐ ܥܲܠ ܟܵܗܢܹ̈ܐ. ܘܲܦܩܲܕ݂ ܕܢܲܦܩܘܼܢ ܐܸܢܘܿܢ ܡ̣ܢ ܒܹܝܬ̣ ܡܲܩܕ̇ܫܵܐ. ܘܒ̣ܵܗ̇ ܒܫܵܥܬ̣ܵܐ ܗܵܝ̇: ܓܲܪܒܵܐ ܢܦܲܩ̣ ܡ̣ܢ ܒܹܝܬ̣ ܡܲܩܕ̇ܫܵܐ. ܘܲܢܦܲܠ ܥܲܠ ܒܹܝܬ̣ ܥܲܝܢܵܘ̈ܗܝ ܕܡܲܠܟܵܐ ܥܘܿܙܝܼܵܐ: ܟܲܕ݂ ܥܲܠ ܠܲܡܩܲܪܵܒ̣ܘܼ ܒܸܣܡܹ̈ܐ ܒܒܲܝܬܹ̇ܗ ܕܡܵܪܝܵܐ.

20: ܘܐܸܬ̣ܦܢܝܼ ܠܘܵܬܹܗ ܥܘܿܙܝܼܵܐ ܟܵܗܢܵܐ ܘܫܲܪܟܵܐ ܕܟ݂ܵܗܢܹ̈ܐ. ܘܲܚܙ̣ܵܘ ܕܡܸܣܬܲܪܗܲܒ̣ ܗ̄ܘ̣ܵܐ ܠܡܸܦܲܩ: ܡܸܛܠ ܕܝܼܕܲܥ̣ ܕܲܡܚܵܝܗܝ ܡܵܪܝܵܐ.

21: ܘܲܗܘ̤ܵܐ ܥܘܿܙܝܼܵܐ ܡܲܠܟܵܐ ܝܵܬܹܒ̣ ܒܓܲܪܒܹ̇ܗ ܥܕܲܡܵܐ ܠܡܵܘܬܹ̇ܗ. ܘܝܵܬܹܒ̣ ܗ̄ܘ̣ܵܐ ܒܒܲܝܬܵܐ ܕܲܚܕ݂ܵܝܘܼܬ̣ܵܐ ܟܲܕ݂ ܓܪܸܫ. ܡܸܛܠ ܕܓܲܕܸ̇ܦ ܗ̄ܘ̣ܵܐ ܥܲܠ ܒܲܝܬܹ̇ܗ ܕܡܵܪܝܵܐ. ܘܝܘܿܬ̣ܵܡ ܒܪܹܗ ܫܲܠܝܼܛ ܗ̄ܘ̣ܵܐ ܥܲܠ ܒܲܝܬܹ̇ܗ ܕܡܲܠܟܵܐ: ܘܕ݂ܵܐܹ̇ܢ ܗ̄ܘ̣ܵܐ ܠܥܲܡܵܐ ܕܐܲܪܥܵܐ.

22: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܥܘܿܙܝܼܵܐ: ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ: ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܐܹܫܲܥܝܵܐ ܒܪܹܗ ܕܐܵܡܘܿܨ ܢܒ̣ܝܼܵܐ.

23: ܘܲܫܟܸܒ̣ ܥܘܿܙܝܼܵܐ ܥܲܡ ܐܲܒ̣ܵـ̈ـܗܵܬܹܗ. ܘܩܲܒ̣ܪܘܼܗܝ ܒܹܝܬ̣ ܩܒ̣ܘܼܪܹ̈ܐ: ܠܵܐ ܒܲܩܒ̣ܘܼܪܬܵܐ ܕܡܲܠ̈ܟܹ̇ܐ. ܡܸܛܠ ܕܐܵܡ̇ܪܝܼܢ ܕܓܲܪܒܵܐ ܗ̄ܘ̣. ܘܐܲܡ̣ܠܸܟ݂ ܝܘܿܬ̣ܵܡ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܟܙ .

1: ܒܲܪ ܥܸܣܪܝܼܢ ܘܚܲܡܸܫ ܫܢ̈ܝܼܢ ܝܘܿܬ̣ܵܡ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܫܸܬ̇ܬܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ: ܝܹܪܘܿܫܵܐ ܒܲܪܬ̣ ܨܵܕ݂ܘܿܩ.

2: ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟܲܢܵܐ ܕܲܥܒܲܕ݂ ܥܘܿܙܝܼܵܐ ܐܲܒ̣ܘܼܗܝ ܒܲܠܚܘܿܕ݂ ܠܵܐ ܥܲܠ ܠܒܲܝܬܹ̇ܗ ܕܡܵܪܝܵܐ. ܘܲܥܕܲܡܵܐ ܠܗܵܫܵܐ ܥܲܡܵܐ ܡܚܲܒ̇ܠܝܼܢ ܗ̄ܘ̣ܵܘ.

3: ܘܗ̤ܘ ܒܢ̣ܵܐ ܬܲܪܥܵܐ ܕܒܲܝܬܹ̇ܗ ܕܡܵܪܝܵܐ ܥܸܠܵܝܵܐ. ܘܐܵܦ ܒܫܘܼܪܵܐ ܕܐܸܬ̣ܓ̇ܡܲܪ: ܒܢ̣ܵܐ ܣܲܓ̇ܝܼ ܛܵܒ̣.

4: ܘܩܘܼܪ̈ܝܵܐ ܒܢ̣ܵܐ ܒܐܲܪܥܵܐ ܕܲܝܗܘܼܕ݂ܵܐ ܘܲܒ̣ܚܲܪܫܲܬ̣ ܒܢ̣ܵܐ ܒܝܼܪ̈ܵܬ̣ܵܐ ܘܡܲܓܕ̇ܠܹ̈ܐ.

5: ܘܗ̤ܘ ܐܸܬ̣ܟܲܬܲܫ ܗ̄ܘ̣ܵܐ ܥܲܡ ܥܲܡܵܐ ܕܲܒ̣ܢܲܝ̈ ܥܲܡܘܿܢ: ܘܐܸܬ̇ܬܲܩܲܦ ܥܠܲܝܗܘܿܢ. ܘܝܲܗ̄ܒ̣ܘ ܠܹܗ ܒܢܲܝ̈ ܥܲܡܘܿܢ ܒܫܲܢ̄ܬܵܐ ܗܵܝ̇: ܡܵܐܐ ܟܲܟ̇ܪ̈ܝܼܢ ܕܟܸܣܦܵܐ: ܘܥܸܣܪܵܐ ܐܲܠܦ̈ܝܼܢ ܟܘܿܪܹ̈ܐ ܕܚܸܛܹ̈ܐ: ܘܥܸܣܪܵܐ ܐܲܠܦ̈ܝܼܢ ܟܘܿܪܹ̈ܐ ܕܲܣܥܵܪܹ̈ܐ. ܗܵܢܵܐ ܟܠܹܗ ܩܘܼܪܒܵܢܵܐ: ܚܫܲܒ̣ܘ ܘܩܲܪܸܒ̣ܘ ܠܹܗ ܒܢܲܝ̈ ܥܲܡܘܿܢ.

6: ܘܲܒ̣ܫܲܢ̄ܬܵܐ ܕܬܲܪܬܹ̇ܝܢ ܘܕܲܬ̣ܠܵܬ̣: ܐܸܬ̣ܥܲܫܲܢ ܝܘܿܬ̣ܵܡ: ܡܸܛܠ ܕܐܲܬ̣ܩܸܢ ܐܘܼܪ̈ܚܵܬܹܗ ܩܕ݂ܵܡ ܡܵܪܝܵܐ ܐܲܠܵܗܹܗ.

7: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܬ̣ܵܡ: ܘܟ݂ܠܗܘܿܢ ܩܪ̈ܵܒ̣ܵܘܗܝ ܘܐܘܼܪ̈ܚܵܬܹܗ: ܗܸܢܘܿܢ ܟܬ̣ܝܼܒ̣ܝܼܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܝܼܣܪܵܝܹܠ ܘܕܲܝܗܘܼܕ݂ܵܐ.

8: ܘܲܫܟܸܒ̣ ܝܘܿܬ̣ܵܡ ܥܲܡ ܐܲܒ̣ܸܵܗܵܘ̈ܗܝ. ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܕ݂ܵܘܝܼܕ݂. ܘܐܲܡ̣ܠܸܟ݂ ܐܵܚܵܙ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܟܚ .

1: ܒܲܪ ܥܸܣܪܝܼܢ ܗ̄ܘ̣ܵܐ ܘܚܲܡܸܫ ܫܢ̈ܝܼܢ ܐܵܚܵܙ ܟܲܕ݂ ܐܲܡ̣ܠܸܟ݂. ܘܫܸܬ̇ܬܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܠܵܐ ܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ ܐܲܠܵܗܹܗ: ܐܲܝܟ݂ ܕܵܘܝܼܕ݂ ܐܲܒ̣ܘܼܗܝ.

2: ܘܗܲܠܸܟ݂ ܒܐܘܼܪ̈ܚܵܬ̣ܵܐ ܕܡܲܠ̈ܟܹ̇ܐ ܕܝܼܣܪܵܝܹܠ. ܘܐܵܦ ܡܲܕ݂ܒ̇ܚܹ̈ܐ ܥ̣ܒܲܕ݂ ܠܲܦܬܲܟ݂ܪܹ̈ܐ.

3: ܘܐܲܣܸܩ ܩܲܛܪ̈ܘܿܩܹܐ ܕܒܸܣܡܹ̈ܐ ܒܢܲܚ̈ܠܹܐ ܪܵܘ̱ܪ̈ܒܹܐ. ܘܐܲܥܒܲܪ ܒܪܹܗ ܒܢܘܼܪܵܐ: ܐܲܝܟ݂ ܢܵܡܘܿܣܵܐ ܕܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ.

4: ܘܕܲܒܲܚ̣: ܘܐܲܣܸܩ̣ ܩܲܛܪ̈ܘܿܩܹܐ ܕܒܸܣܡܹ̈ܐ ܥܲܠ ܡܲܕ݂ܒ̇ܚܹ̈ܐ ܘܥܲܠ ܥ̈ܠܵܘܵܬ̣ܵܐ: ܘܲܬ̣ܚܹܬ̣ ܟܠ ܐܝܠܵܢܹ̈ܐ ܫܲܦܝܼܪܹ̈ܐ.

5: ܘܐܲܫ̱ܠܡܹܗ ܡܵܪܝܵܐ ܐܲܠܵܗܵܐ ܒܐܝܼܕ݂ܵܐ ܕܡܲܠܟܵܐ ܕܐܲܕ݂ܘܿܡ ܘܲܚܪܲܒ̣ ܡܸܢܹܗ ܚܲܪܒܵܐ ܣܲܓ̇ܝܼ ܘܲܫܒ̣ܵܐ ܡܸܢܹܗ ܫܒ̣ܝܼܬ̣ܵܐ ܪܲܒ̇ܬ̣ܵܐ: ܘܐܸܬ̣ܵܘ ܠܕܲܪܡܣܘܿܩ. ܘܐܵܦ ܒܐܝܼ̈ܕܲܝ ܡܲܠܟܵܐ ܕܝܼܣܪܵܝܹܠ ܐܸܫܬ̇ܠܸܡ. ܘܲܚܪܲܒ̣ ܡܸܢܹܗ ܚܲܪܒܵܐ ܪܲܒ̇ܬ̣ܵܐ.

6: ܘܩܲܛܸܠ̣ ܦܩܲܚ ܒܲܪ ܪܘܿܡܲܠܝܵܐ: ܡ̣ܢ ܡܲܠܟܵܐ ܕܒܹܝܬ̣ ܝܼܗܘܼܕ݂ܵܐ: ܡܵܐܐ ܘܥܸܣܪܝܼܢ ܐܲܠܦ̈ܝܼܢ ܒܝܵܘܡܵܐ ܚܲܕ݂: ܟܠܗܘܿܢ ܓܲܒ̣ܪܹ̈ܐ ܓܲܢ̄ܒܵܪ̈ܲܝ ܚܲܝܠܵܐ. ܥܲܠ ܕܲܫܒܲܩ̣ܘ ܠܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܗܘܿܢ.

7: ܘܲܩܛܲܠ ܠܙܲܟ݂ܪܝܼ ܓܲܢ̄ܒܵܪܵܐ ܕܒܹܝܬ̣ ܐܲܦܪܹܝܡ: ܘܠܲܡܥܲܣܝܵܐ ܒܲܪ ܡܲܠܟܵܐ: ܘܠܲܥܙܲܪܩܝܼ ܪܲܒ̇ ܒܲܝܬܵܐ: ܘܠܲܐܠܩܵܢܵܐ ܬܸܢܝܵܢܵܐ ܕܡܲܠܟܵܐ.

8: ܘܲܫܒܵܘ ܒܢܲܝ̈ ܝܼܣܪܵܝܹܠ ܡ̣ܢ ܐܲܚܲܝ̈ܗܘܿܢ: ܐ̄ܢܵܫܵܐ ܡܲܐܬܹ̇ܝܢ ܐܲܠܦ̈ܝܼܢ: ܘܲܒ̣ܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ. ܘܐܵܦ ܫܒ̣ܝܼܬ̣ܵܐ ܣܲܓ̇ܝܼ ܒܲܙܘ ܡܸܢܗܘܿܢ. ܘܐܲܝܬ̇ܝܘܼܗ̇ ܠܲܫܒ̣ܝܼܬ̣ܵܐ ܠܫܵܡܪܹܝܢ.

9: ܘܬܲܡܵܢ ܗ̄ܘ̣ܵܐ ܢܒ̣ܝܹܗ ܕܡܵܪܝܵܐ: ܥܲܕ̇ܘܿ ܫܡܹܗ. ܘܲܢܦܲܩ ܩܕ݂ܵܡ ܚܲܝܠܵܐ ܕܐܸܬ̣ܵܐ ܠܫܵܡܪܹܝܢ: ܘܐܸܡܲܪ: ܡܸܛܠ ܕܲܪܓܸܙ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ ܥܲܠ ܕܒܹܝܬ̣ ܝܼܗܘܼܕ݂ܵܐ: ܘܐܲܫܠܸܡ ܐܸܢܘܿܢ ܒܐܝܼܕܲܝ̈ܟ̇ܘܿܢ: ܚ̣ܪܲܒ̣ܬ̇ܘܿܢ ܐܸܢܘܿܢ: ܘܠܵܐ ܚܵܣܬ̇ܘܿܢ ܥܠܲܝܗܘܿܢ.

10: ܘܐܵܦ ܗܵܫܵܐ ܟܵܬ̣ܫܝܼܢ ܐ̄ܢܬ̇ܘܿܢ ܕܢܸܗܘܘܿܢ ܠܟ݂ܘܿܢ ܥܲܒ̣̈ܕܹ̇ܐ ܘܐܲܡ̈ܗܵܬ̣ܵܐ. ܘܐܵܦ ܗܵܫܵܐ ܐܲܢ̄ܬ̇ܘܿܢ ܝܵܕ݂ܥܝܼܢ ܐ̄ܢܬ̇ܘܿܢ ܕܲܚܛܝܼܬ̣ܵܐ ܗܵܕܹܐ: ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ ܚܛܲܝܬ̇ܘܿܢ.

11: ܘܐܵܦ ܗܵܫܵܐ ܫܘܼܡܥܘܼܢܝ: ܘܐܲܗܦܸܟ݂ܘ ܫܒ̣ܝܼܬ̣ܵܐ ܕܲܫܒܲܝܬ̇ܘܿܢ ܡ̣ܢ ܐܲܚܲܝ̈ܟ̇ܘܿܢ ܕܲܠܡܵܐ ܕܹܝܢ ܬܸܣܲܩ ܚܸܡܬܹܗ ܕܡܵܪܝܵܐ ܥܠܲܝܟ̇ܘܿܢ.

12: ܘܩܵܡ̣ܘ ܓܲܒ̣ܪܹ̈ܐ ܡ̣ܢ ܪܹ̈ܫܹܐ ܕܒܹܝܬ̣ ܐܲܦܪܹܝܡ: ܥܲܙܲܪܝܵܐ: ܘܝܘܿܚܲܢܵܐ: ܘܲܒ̣ܪܲܟ݂ܝܵܐ ܒܲܪ ܡܩܲܪܝܵܐ.

13: ܘܐܵܡ̇ܪܝܼܢ ܠܗܘܿܢ: ܕܠܵܐ ܬܲܥܠܘܼܢ ܫܒ̣ܝܼܬ̣ܵܐ ܗܵܕܹܐ ܠܗܵܪܟܵܐ. ܡܸܛܠ ܕܠܵܐ ܢܸܚܛܹܐ ܬܘܼܒ̣ ܩܕ݂ܵܡ ܡܵܪܝܵܐ ܐܲܠܵܗܲܢ. ܘܐܲܢ̄ܬ̇ܘܿܢ ܐܵܡ̇ܪܝܼܢ ܐ̄ܢܬ̇ܘܿܢ: ܢܵܘܣܸܦ ܚܵܘ̈ܒܲܝܢ ܘܥܲܠ ܚܛܵܗܲܝ̈ܢ: ܡܸܛܠ ܕܣܲܓ̇ܝܼܐܝܼܢ ܐܸܢܘܿܢ ܛܵܒ̣.

14: ܘܐܲܗܦܟ݂ܘܼܗ̇ ܠܲܫܒ̣ܝܼܬ̣ܵܐ ܟܠܵܗ̇ ܠܐܘܿܪܸܫܠܸܡ.

15: ܘܐܵܘܣܸܦ ܠܲܡܟܲܕܵܝܘܼ ܒܡܵܪܝܵܐ ܟܲܕܵܒ̣ܘܼܬ̣ܵܐ.

ܟܓ: ܗ̤ܘ ܡܲܠܟܵܐ ܐܵܚܵܙ. ܘܕܲܒܲܚ ܠܐܲܠܵܗܲܝ̈ ܕܲܪܡܣܘܿܩ ܘܐܸܡܲܪ ܠܗܘܿܢ: ܐܲܢ̄ܬ̇ܘܿܢ ܐܸܢܘܿܢ ܐܲܠܵܗܲܝ̈ ܘܡܵܪ̈ܲܝ. ܠܟ݂ܘܿܢ ܕܵܚܹ̇ܠ ܐ̄ܢܵܐ: ܘܲܠܟ݂ܘܿܢ ܡܕܲܒܲܚ ܐ̄ܢܵܐ. ܘܗ̤ܘ ܗܘ̤ܵܐ ܬܘܼܩ̱ܠܬ̣ܵܐ ܠܲܝܗܘܼܕ݂ܵܐ. ܘܐܲܚܛܝܼ ܠܟ݂ܠܹܗ ܥܲܡܵܐ ܕܲܝܗܘܼܕ݂ܵܐ.

ܟܕ: ܘܟܲܢܸܫ ܐܵܚܵܙ ܠܟ݂ܠܗܘܿܢ ܡܵܐܢܹ̈ܐ ܕܐܝܼܬ̣ ܗ̄ܘ̣ܵܘ ܒܒܷܲܬܹ̇ܗ ܕܡܵܪܝܵܐ. ܘܩܲܨܸܨ ܡܵܐܢܹ̈ܐ ܕܐܝܼܬ̣ ܗ̄ܘ̣ܵܘ ܒܒܲܝܬܹ̇ܗ ܕܡܵܪܝܵܐ. ܘܐܸܚܲܕ݂ ܬܲܪ̈ܥܹܐ ܓܵܘܵܝܹ̈ܐ ܘܒܲܪ̈ܵܝܹܐ ܕܐܝܼܬ̣ ܗ̄ܘ̣ܵܘ ܒܒܲܝܬܹ̇ܗ ܕܡܵܪܝܵܐ.

ܟܗ: ܘܲܥܒܲܕ݂ ܠܹܗ ܡܲܕ݂ܒ̇ܚܵܐ ܒܟ݂ܠ ܙܵܘ̈ܝܵܬ̣ܵܐ ܕܐܝܼܬ̣ ܒܐܘܿܪܸܫܠܸܡ: ܘܲܒ̣ܟ݂ܠ ܩܪܸܐ ܘܲܩܪܸܐ ܕܐܝܼܬ̣ ܝܼܗܘܼܕ݂ܵܐ ܘܲܥܒܲܕ݂ ܗ̄ܘ̣ܵܐ ܕܸܒ̣ܚܹ̈ܐ ܠܲܡܕܲܒܵܚܘܼ ܠܐܲܠܵܗܹ̈ܐ ܐ̄ܚܪ̈ܵܢܹܐ.

ܝܘ: ܒܹܗ ܒܙܲܒ̣ܢܵܐ ܗܵܘ̇ ܫܲܕܲܪ ܗ̄ܘ̣ܵܐ ܡܲܠܟܵܐ ܐܵܚܵܙ: ܠܘܵܬ̣ ܡܲܠܟܵܐ ܕܐܵܬ̣ܘܿܪ ܠܲܡܥܲܕ̇ܪܘܼܬܹܗ.

ܝܙ: ܘܲܥܕܲܡܵܐ ܠܗܵܫܵܐ ܐܲܕ݂ܘܿܡܵܝܹ̈ܐ ܐܸܬ̣ܵܘ: ܘܲܚܪܲܒ̣ܘ ܒܒܹܝܬ̣ ܝܼܗܘܼܕ݂ܵܐ: ܘܲܫܒܵܘ ܡܸܢܗܘܿܢ ܫܒ̣ܝܼܬ̣ܵܐ.

ܝܚ: ܘܲܦܠܸܫܬܵܝܹ̈ܐ ܐܸܬ̣ܵܘ ܘܲܫܪܵܘ ܥܲܠ ܩܘܼܪ̈ܝܵܐ ܕܲܦܩܲܥܬ̣ܵܐ: ܘܥܲܠ ܩܘܼܪ̈ܝܵܐ ܬܲܝܡ̈ܢܵܝܬ̣ܵܐ ܕܒܹܝܬ̣ ܝܼܗܘܼܕ݂ܵܐ. ܘܐܸܚܲܕ݂ܘ ܠܒܹܝܬ̣ ܫܡܸܫ ܩܪܝܼܬ̣ܵܐ: ܘܠܐܝܼܠܘܿܢ ܩܪܝܼܬ̣ܵܐ: ܘܠܲܙܥܘܿܪܲܬ̣ ܩܪܝܼܬ̣ܵܐ: ܘܠܲܫܘܿܒ̣ ܘܲܠܡܹ̈ܐܟ݂ܠܵܬ̣ܵܗ̇: ܘܠܲܓܪܵܡ ܘܲܠܡܹ̈ܐܟ݂ܠܵܬ̣ܵܗ̇.

ܝܛ: ܡܸܛܠ ܕܲܬ̣ܒܲܪ ܡܵܪܝܵܐ ܠܲܕ݂ܒܹܝܬ̣ ܝܼܗܘܼܕ݂ܵܐ: ܡܸܛܠ ܚܛܵܗܵܘ̈ܗܝ ܕܐܵܚܵܙ ܡܲܠܟܵܐ ܕܲܝܗܘܼܕ݂ܵܐ: ܕܐܲܣܓܝܼ ܒܒܹܝܬ̣ ܝܼܗܘܼܕ݂ܵܐ: ܘܟܲܕܸ̇ܒ̣ ܟܲܕܵܒ̣ܘܼܬ̣ܵܐ ܒܡܵܪܝܵܐ ܐܲܠܵܗܹܗ.

ܟ: ܘܐܸܬ̣ܵܐ ܥܠܵܘܗܝ ܬܲܓ̣ܠܲܬ̣ ܦܲܠܣܲܪ ܡܲܠܟܵܐ ܕܐܵܬ̣ܘܿܪ. ܘܲܫܪܵܐ ܥܠܵܘܗܝ. ܘܐܲܠܨܹܗ ܐܘܼܠܨܵܢܵܐ ܪܲܒܵܐ.

ܟܐ: ܘܲܫܩܲܠ ܡܲܠܟܵܐ ܐܵܚܵܙ ܡܵܐܢܹ̈ܐ ܕܐܝܼܬ̣ ܒܒܲܝܬܹ̇ܗ ܕܡܵܪܝܵܐ: ܘܡܵܐܢܹ̈ܐ ܕܲܗܘ̤ܵܘ ܒܒܹܝܬ̣ ܡܲܠ̈ܟܹ̇ܐ ܩܲܕ݂ܡܵܝܹ̈ܐ: ܘܲܒ̣̈ܒ̣ܵܬܹ̇ܐ ܥܲܬ̇ܝܼܪܹ̈ܐ. ܘܝܲܗ̄ܒ̣ ܠܡܲܠܟܵܐ ܕܐܵܬ̣ܘܿܪ: ܕܠܵܐ ܢܲܗܪܝܼܘܗܝ ܒܙܲܒ̣ܢܵܐ ܕܐܘܼܠܨܵܢܹܗ.

ܟܘ: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܐܵܚܵܙ: ܘܟ݂ܠܗܹܝܢ ܐܘܼܪ̈ܚܵܬܹܗ ܩܲܕ݂ܡܵـ̈ـܝܵܬ̣ܵܐ: ܘܐܲܚܪ̈ܵܝܵܬ̣ܵܐ ܗܵܐ ܟܬ̣ܝܼܒ̣ܝܼܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ ܘܕ݂ܝܼܣܪܵܝܹܠ.

ܟܙ: ܘܲܫܟܸܒ̣ ܐܵܚܵܙ ܥܲܡ ܐܲܒ̣ܵـ̈ـܗܵܬܹܗ. ܘܩܲܒ̣ܪܘܼܗܝ ܒܐܘܿܪܸܫܠܸܡ: ܡܸܛܠ ܕܠܵܐ ܐܵܘܒ̇ܠܘܼܗܝ ܠܩܲܒ̣ܪܹ̈ܐ ܕܡܲܠ̈ܟܹ̇ܐ ܕܝܼܣܪܵܝܹܠ ܘܐܲܡ̣ܠܸܟ݂ ܚܹܙܲܩܝܵܐ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܟܛ .

1: ܚܹܙܲܩܝܵܐ ܩܵܡ̣ ܒܡܲܠܟ̇ܘܼܬ̣ܵܐ. ܒܲܪ ܥܸܣܪܝܼܢ ܘܚܲܡܸܫ ܫܢ̈ܝܼܢ: ܐܝܼܬ̣ܵܘܗܝ ܗ̄ܘ̣ܵܐ: ܟܲܕ݂ ܩܵܡ ܒܡܲܠܟ̇ܘܼܬ̣ܵܐ ܘܥܸܣܪܝܼܢ ܘܲܬ̣ܫܲܥ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܫܡܵܐ ܕܐܸܡܹܗ ܐܲܢܝܼ ܒܲܪܬ̣ ܙܟܲܪܝܵܐ.

2: ܘܲܥܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ: ܐܲܝܟܲܢܵܐ ܕܲܥܒܲܕ݂ ܕܵܘܝܼܕ݂ ܐܲܒ̣ܘܼܗܝ.

3: ܒܫܲܢ̄ܬܵܐ ܩܲܕ݂ܡܵܝܬܵܐ ܕܡܲܠܟ̇ܘܼܬܹܗ: ܒܝܲܪܚܵܐ ܩܲܕ݂ܡܵܝܵܐ: ܦܬܲܚ̣ ܬܲܪ̈ܥܲܝ ܒܲܝܬܹ̇ܗ ܕܡܵܪܝܵܐ. ܘܲܒ̣ܕܲܩ̣ ܐܸܢܘܿܢ.

4: ܘܐܲܝܬ̇ܝܼ ܟܵܗ̈ܢܹܐ ܘܠܹܘܵܝܹ̈ܐ. ܘܟܲܢܸܫ ܐܸܢܘܿܢ ܠܓ̣ܵܘܵܗ̇ ܕܕ݂ܵܪܬܵܐ ܕܡܲܩܕ̇ܫܵܐ.

5: ܘܐܸܡܲܪ ܠܗܘܿܢ: ܫܘܼܡܥܘܼܢܝ ܠܹܘܵܝܹ̈ܐ: ܘܐܵܦ ܗܵܫܵܐ ܐܸܬ̣ܩܲܕܲܫܘ: ܘܩܲܕܸ̇ܫܘ ܒܲܝܬܹ̇ܗ ܕܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ. ܘܐܲܦܪܸܩܘ ܥܒ̣ܵܕܲܝ̈ܟ̇ܘܿܢ ܒܝܼ̈ܫܹܐ ܡ̣ܢ ܪܸ̈ܥܝܵܢܲܝܟ̇ܘܿܢ.

6: ܘܠܵܐ ܢܸܥܒܸ̇ܕ݂ ܐܲܝܟܲܢܵܐ ܕܲܥܒܲܕ݂ܘ ܐܲܒ̣ܵـ̈ـܗܵܬܲܢ: ܕܲܥܒܲܕ݂ܘ ܕܒ̣ܝܼܫ ܩܕ݂ܵܡ ܡܵܪܝܵܐ ܐܲܠܵܗܲܢ: ܘܫܲܒ̣ܩܘܼܗܝ ܘܐܲܦܢܝܼܘ ܐܲܦܲܝ̈ܗܘܿܢ ܡ̣ܢ ܡܲܫܟ̇ܢܹܗ ܕܡܵܪܝܵܐ. ܘܐܲܟ݂ܪܸܒ̣ܘ ܩܕ݂ܵܠܲܝ̈ܗܘܿܢ: ܘܚܵܘܝܘܼܗܝ.

7: ܘܐܵܦ ܐܸܚܲܕ݂ ܬܲܪ̈ܥܹܐ ܕܲܣܪܘܿܓ̣ܵܐ: ܘܐܲܕ݂ܥܸܟ݂ܘ ܫܪ̈ܵܓܹܐ. ܘܩܲܛܪ̈ܘܿܩܹܐ ܠܵܐ ܐܲܣܸܩ̣ܘ ܠܡܲܕ݂ܒ̇ܚܵܐ ܕܐܲܠܵܗܵܐ ܕܝܼܣܪܵܝܹܠ.

8: ܘܲܗܘ̤ܵܐ ܪܘܼܓ̣ܙܹܗ ܕܡܵܪܝܵܐ ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ ܘܝܲܗ̄ܒ̣ ܐܸܢܘܿܢ ܠܠܵܘܛܬ̣ܵܐ: ܘܲܠܨܲܕ݂ܝܘܼܬ̣ܵܐ: ܘܲܠܚܲܪܒܵܐ: ܐܲܝܟܲܢܵܐ ܕܚܵܙܹ̇ܝܢ ܐ̄ܢܬ̇ܘܿܢ ܒܥܲܝܢܲܝ̈ܟ̇ܘܿܢ.

9: ܘܗܵܐ ܢܦܲܠܘ ܐܲܒ̣ܵـ̈ـܗܵܬܲܢ ܒܚܲܪܒܵܐ. ܘܲܒ̣ܢܲܝ̈ܢ ܘܲܒ̣ـ̈ـܢܵܬܲܢ ܒܫܸܒ̣ܝܵܐ. ܘܐܵܦ ܗܵܫܵܐ ܕܲܛܥܲܝܢ ܡ̣ܢ ܒܵܬܲܪ ܡܵܪܝܵܐ ܐܲܠܵܗܲܢ: ܘܲܫܒܲܩ̄ܢ ܕܝܵܬܹܩܹܐ ܕܝܲܗ̄ܒ̣ ܠܐܲܒ̣ܵـ̈ـܗܵܬܲܢ: ܐܵܦ ܗ̤ܘ ܫܲܒ̣ܩܲܢ.

20: ܘܩܲܕܸ̇ܡ ܚܹܙܲܩܝܵܐ ܡܲܠܟܵܐ. ܘܟܲܢܸܫ ܠܩܲܫܝܼܫܹ̈ܐ ܕܐܘܿܪܸܫܠܸܡ: ܘܥܲܠ ܠܒܲܝܬܹ̇ܗ ܕܡܵܪܝܵܐ.

21: ܘܐܲܝܬ̇ܝܼܘ ܠܹܗ ܬܵܘܪܹ̈ܐ ܫܲܒ̣ܥܵܐ: ܘܕܸܟ݂ܪܹ̈ܐ ܫܲܒ̣ܥܵܐ: ܘܐܸܡܪܹ̈ܐ ܫܲܒ̣ܥܵܐ: ܘܨܸܦܪ̈ܵܝܹܐ ܕܥܸܙܹ̈ܐ ܫܲܒ̣ܥܵܐ: ܠܲܡܚܲܣܵܝܘܼ ܥܲܠ ܡܲܠܟ̇ܘܼܬ̣ܵܐ: ܘܥܲܠ ܝܼܗܘܼܕ݂ܵܐ: ܘܥܲܠ ܡܲܩܕ̇ܫܵܐ. ܘܐܸܡܲܪ ܠܲܒ̣ܢܵܘ̈ܗܝ ܕܐܲܗܪܘܿܢ ܟܵܗ̈ܢܹܐ: ܕܢܲܣܩܘܼܢ ܥܠܵـ̈ـܘܵܬ̣ܵܐ ܥܲܠ ܡܲܕ݂ܒ̇ܚܹܗ ܕܡܵܪܝܵܐ.

22: ܘܢܸܟ̇ܣܘܼܢ ܬܵܘܪܹ̈ܐ: ܘܲܢܩܲܒ̇ܠܘܼܢ ܟܵܗ̈ܢܹܐ ܠܕܸܡܗܘܿܢ: ܘܢܸܪܣܘܼܢ ܥܲܠ ܩܲܪ̈ܢܵܬ̣ܵܐ ܕܡܲܕ݂ܒ̇ܚܵܐ.

23: ܘܲܢܩܲܪܒ̣ܘܼܢ ܨܸܦܪ̈ܵܝܹܐ ܩܕ݂ܵܡ ܡܵܪܝܵܐ: ܘܲܩܕ݂ܵܡ ܡܲܠܟܵܐ: ܘܲܩܕ݂ܵܡ ܥܲܡܵܐ ܕܝܼܣܪܵܝܹܠ. ܘܢܸܣܡ̱ܟ݂ܘܼܢ ܐܝܼܕܲܝ̈ܗܘܿܢ ܥܠܲܝܗܘܿܢ.

24: ܘܢܸܟ̇ܣܘܼܢ ܐܸܢܘܿܢ ܟܵܗ̈ܢܹܐ: ܘܢܸܪܙܦܘܼܢ ܕܸܡܗܘܿܢ ܥܲܠ ܩܲܪ̈ܢܵܬ̣ܵܐ ܕܡܲܕ݂ܒ̇ܚܵܐ. ܘܲܢܚܲܣܘܿܢ ܥܲܠ ܟܠܹܗ ܝܼܣܪܵܝܹܠ ܡܸܛܠ ܕܲܠܟ݂ܠܹܗ ܝܼܣܪܵܝܹܠ ܦ̣ܩܲܕ݂ ܡܲܠܟܵܐ: ܕܢܲܝܬ̇ܘܿܢ ܥܠܵـ̈ـܘܵܬ̣ܵܐ ܘܕܸܒ̣ܚܹ̈ܐ.

25: ܘܐܲܩܝܼܡ ܐܸܢܘܿܢ ܠܠܹܘܵܝܹ̈ܐ ܒܒܲܝܬܹ̇ܗ ܕܡܵܪܝܵܐ: ܒܬܸܫܒ̇ـ̈ـܚܵܬ̣ܵܐ ܒܩܵܠܵܐ ܕܟܸܢܵܪܹ̈ܐ: ܘܲܒ̣ܬܸܫܒ̇ـ̈ـܚܵܬܹܗ ܕܕ݂ܵܘܝܼܕ݂: ܘܲܒ̣ܬܸܫܒ̇ـ̈ـܚܵܬܹܗ ܕܓ̣ܵܕ݂ ܢܒ̣ܝܼܵܐ ܕܡܲܠܟܵܐ ܕܵܘܝܼܕ݂: ܘܲܕ݂ܢܵܬ̣ܵܢ ܢܒ̣ܝܼܵܐ ܕܡܲܠܟܵܐ ܕܵܘܝܼܕ݂: ܡܸܛܠ ܕܲܗܘ̤ܵܐ ܕܵܘܝܼܕ݂ ܡܫܲܒܲܚ ܬܸܫܒ̇ـ̈ـܚܵܬܹܗ ܕܡܵܪܝܵܐ ܐܲܠܵܗܹܗ: ܐܲܝܟ݂ ܕܡ̣ܢ ܦܘܼܡܵܐ ܕܲܢܒ̣ܝܹ̈ܐ.

26: ܘܩܵܡ̣ܘ ܠܹܘܵܝܹ̈ܐ ܒܬܸܫܒ̇ـ̈ـܚܵܬܹܗ ܕܕ݂ܵܘܝܼܕ݂. ܘܟ݂ܵܗ̈ܢܹܐ ܡܝܲܒ̇ܒ̣ܝܼܢ ܗ̄ܘ̣ܵܘ ܒܩܲܪ̈ܢܵܬ̣ܵܐ ܟܦܝܼܦܵܬ̣ܵܐ ܘܲܦܫܝܼ̈ܛܵܬ̣ܵܐ.

27: ܘܐܸܡܲܪ ܚܹܙܲܩܝܵܐ ܠܡܲܣܵܩܘܼ ܥܠܵـ̈ـܘܵܬ̣ܵܐ ܠܡܲܕ݂ܒ̇ܚܵܐ. ܘܟܲܕ݂ ܫܲܪܝܼ ܥܠܵـ̈ـܘܵܬ̣ܵܐ ܠܡܸܣܲܩ: ܫܲܪܝܼ ܚܹܙܲܩܝܵܐ ܠܲܡܫܲܒܵܚܘܼ ܬܸܫܒ̇ܚܵܬܹ̈ܗ ܕܡܵܪܝܵܐ: ܐܲܝܟ݂ ܕܡ̣ܢ ܦܘܼܡܵܐ ܕܕ݂ܵܘܝܼܕ݂ ܡܲܠܟܵܐ ܕܝܼܣܪܵܝܹܠ.

28: ܘܟ݂ܠܹܗ ܥܲܡܵܐ ܕܝܼܣܪܵܝܹܠ: ܣܵܓ̣ܕ̇ܝܼܢ ܗ̄ܘ̣ܵܘ: ܘܲܡܫܲܒ̇ܚܝܼܢ ܒܬܸܫܒ̇ـ̈ـܚܵܬ̣ܵܐ: ܘܩܵܪܹܝܢ ܗ̄ܘ̣ܵܘ ܒܩܲܪ̈ܢܵܬ̣ܵܐ ܟܦܝܼ̈ܦܵܬ̣ܵܐ ܘܲܦܫ̈ܝܼܛܵܬ̣ܵܐ: ܥܕܲܡܵܐ ܕܫܲܠܸܡ̣ܘ ܠܡܲܣܵܩܘܼ ܥܠܵـ̈ـܘܵܬ̣ܵܐ.

29: ܘܟܲܕ݂ ܫܲܠܸܡ̣ܘ ܠܡܲܣܵܩܘܼ ܥ̈ܠܵܘܵܬ̣ܵܐ: ܒܪܲܟ ܡܲܠܟܵܐ ܥܲܠ ܒܘܼܪ̈ܟܵܘܗܝ. ܘܟ݂ܠ ܐ̄ܢܵܫ ܕܐܸܫܬ̇ܟܲܚ ܠܘܵܬܹܗ: ܢܦܲܠ̣ܘ ܘܲܣܓܸܕ݂ܘ.

30: ܘܐܸܡܲܪ ܚܹܙܲܩܝܵܐ ܡܲܠܟܵܐ ܘܪܵܘ̱ܪ̈ܒ̣ܵܢܹܐ ܠܠܹܘܵܝܹ̈ܐ: ܠܲܡܫܲܒܵܚܘܼ ܠܡܵܪܝܵܐ: ܒܦܸܬ̣ܓ̣ܵܡܵܘ̈ܗܝ ܕܕ݂ܵܘܝܼܕ݂: ܘܕ݂ܵܐܣܵܦ ܢܒ̣ܝܼܵܐ. ܘܫܲܒܲܚܘ ܛܵܒ̣ ܒܚܲܕ݂ܘܼܬ̣ܵܐ: ܘܲܢܦܲܠܘ ܘܲܣܓܸܕ݂ܘ.

31: ܘܲܥܢܵܐ ܚܹܙܲܩܝܵܐ ܘܐܸܡܲܪ: ܡܸܟܹ̇ܝܠ ܐܸܬ̣ܩܲܪܲܒ̣ܬ̇ܘܿܢ ܠܐܘܼܪܚܹܗ ܕܡܵܪܝܵܐ: ܩܪܘܿܒ̣ܘ ܐܲܝܬܵܘ ܠܝܼ ܕܸܒ̣ܚܹ̈ܐ ܘܬܲܘܕ̇ܝܼܬ̣ܵܐ: ܠܒܲܝܬܹ̇ܗ ܕܡܵܪܝܵܐ. ܘܐܲܝܬ̇ܝܼܘ ܥܲܡܵܐ ܕܸܒ̣ܚܹ̈ܐ ܘܬ̣ܵܘܕ̇ܝܼܬ̣ܵܐ. ܘܟ݂ܠ ܡܸܕܸ̇ܡ ܕܨܵܒܹ̇ܐ ܗ̄ܘ̣ܵܐ ܠܸܒ̇ܗܘܿܢ: ܡܲܝܬܹ̇ܝܢ ܗ̄ܘ̣ܵܘ.

32: ܘܲܗܘ̤ܵܐ ܡܸܢܝܵܢܵܐ ܕܲܥܠܵـ̈ـܘܵܬ̣ܵܐ ܕܐܲܝܬ̇ܝܼܘ ܥܲܡܵܐ: ܬܵܘܪܹ̈ܐ ܫܲܒ̣ܥܝܼܢ: ܘܕܸܟ݂ܪܹ̈ܐ ܡܵܐܐ: ܘܐܸܡܪܹ̈ܐ ܡܲܐܬܹ̇ܝܢ: ܠܲܥܠܵܬ̣ܵܐ ܕܡܵܪܝܵܐ.

33: ܟܠܗܘܿܢ ܗܵܠܹܝܢ ܕܐܸܬ̣ܩܲܕܲܫܘ: ܬܵܘܪܹ̈ܐ ܫܸܬ̣ܡܵܐܐ: ܘܥܵـ̈ـܢܵܐ ܐܲܠܦܹ̈ܐ ܬܠܵܬ̣ܵܐ.

34: ܒܲܠܚܘܿܕ݂ ܟܵܗܢܹ̈ܐ ܙܥܘܿܪܝܼܢ ܗ̄ܘ̣ܵܘ. ܘܠܵܐ ܡܸܫܟ̇ܚܝܼܢ ܗ̄ܘ̣ܵܘ ܠܲܡܫܲܡܵܫܘܼ ܠܟ݂ܠܗܹܝܢ ܥܠܵـ̈ـܘܵܬ̣ܵܐ. ܘܥܲܕܲܪܘ ܐܸܢܘܿܢ ܐܲܚܲܝ̈ܗܘܿܢ ܠܹܘܵܝܹ̈ܐ: ܥܕܲܡܵܐ ܠܐܲܝܟܵܐ ܕܫܸܠܡܲܬ̤ ܟܠܵܗ̇ ܥܒ̣ܝܼܕ̇ܬܵܐ. ܘܡ̣ܢ ܒܵܬܲܪ ܗܵܠܹܝܢ: ܐܸܬ̣ܩܲܕܲܫܘ ܟܵܗ̈ܢܹܐ. ܡܸܛܠ ܕܠܹܘܵܝܹ̈ܐ ܡܲܟ̇ܝܼܟ݂ܝܼܢ ܗ̄ܘ̣ܵܘ ܒܠܸܒ̇ܗܘܿܢ: ܠܡܸܬ̣ܩܲܕܵܫܘܼ ܡ̣ܢ ܟܵܗ̈ܢܹܐ.

35: ܘܐܵܦ ܥ̈ܠܵܘܵܬ̣ܵܐ ܠܣܘܿܓ̣ܵܐܐ: ܐܲܝܟ݂ ܬܲܪܒܵܐ ܕܫܲܠܡܹ̈ܐ: ܘܕܸܐܡܪܹ̈ܐ ܠܲܥܠܵـ̈ـܘܵܬ̣ܵܐ ܘܫܸܠܡܲܬ̣ ܥܒ̣ܝܼܕ̇ܬܵܐ ܕܒܲܝܬܹ̇ܗ ܕܡܵܪܝܵܐ.

36: ܘܚܕ݂ܝܼ ܚܹܙܲܩܝܵܐ ܘܟ݂ܠܹܗ ܥܲܡܵܐ ܕܝܼܣܪܵܝܹܠ: ܥܲܠ ܕܫܸܠܡܲܬ̤ ܥܒ̣ܝܼܕ̇ܬܵܐ ܕܒܲܝܬܵܐ: ܕܡ̣ܢ ܫܹܠܝ ܗܘ̤ܵܐ ܦܸܬ̣ܓ̣ܵܡܵܐ.

ܩܹܦܵܠܹܐܘܿܢ: ܠ .

1: ܘܫܲܕܲܪ ܚܹܙܲܩܝܵܐ ܠܘܵܬ̣ ܟܠܹܗ ܝܼܣܪܵܝܹܠ: ܘܲܕ݂ܒܹܝܬ̣ ܝܼܗܘܼܕ݂ܵܐ. ܘܐܵܦ ܐܸܓ̇ܪ̈ܵܬ̣ܵܐ ܟܬܲܒ̣ ܠܲܕ݂ܒܹܝܬ̣ ܐܲܦܪܹܝܡ: ܘܠܲܕ݂ܒܹܝܬ̣ ܡܢܲܫܹܐ: ܠܡܹܐܬ̣ܵܐ ܠܒܲܝܬܹ̇ܗ ܕܡܵܪܝܵܐ ܕܒ̣ܐܘܿܪܸܫܠܸܡ: ܠܡܸܥܒܲܕ݂ ܥܹܐܕ݂ܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

2: ܘܐܸܬ̣ܡܲܠܲܟ݂ ܡܲܠܟܵܐ ܘܪܵܘ̱ܪ̈ܒ̣ܵܢܵܘܗܝ: ܘܟ݂ܠܵܗ̇ ܟܢܘܼܫܬܵܐ ܕܒ̣ܐܘܿܪܸܫܠܸܡ: ܠܡܸܥܒܲܕ݂ ܥܹܐܕ݂ܵܐ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܒܝܲܪܚܵܐ ܬܸܢܝܵܢܵܐ.

3: ܡܸܛܠ ܕܠܵܐ ܡܸܫܟ̇ܚܝܼܢ ܗ̄ܘ̣ܵܘ ܠܡܸܥܒ̇ܕܹܗ ܒܹܗ ܒܙܲܒ̣ܢܵܐ ܗܵܘ̇. ܡܸܛܠ ܕܟ݂ܵܗ̈ܢܹܐ ܠܵܐ ܐܸܬ̣ܩܲܕܲܫܘ ܗ̄ܘ̣ܵܘ: ܘܡܲܠܦܵܢܵܘ̈ܗܝ ܕܥܲܡܵܐ ܠܵܐ ܐܸܬ̣ܩܦܸܣܘ ܠܐܘܿܪܸܫܠܸܡ.

4: ܘܲܫܦܲܪ ܦܸܬ̣ܓ̣ܵܡܵܐ ܒܥܲܝܢܵܘ̈ܗܝ ܕܡܲܠܟܵܐ: ܘܲܒ̣ܥܲܝܢܵܘ̈ܗܝ ܕܟ݂ܠܹܗ ܥܲܡܵܐ ܕܝܼܣܪܵܝܹܠ.

5: ܘܩܵܡ̣ܘ ܘܐܲܫܲܪܘ ܦܸܬ̣ܓ̣ܵܡܵܐ ܠܡܸܥܒ̇ܕܹܗ: ܘܐܲܥܒܲܪܘ ܩܵܠܵܐ ܒܟ݂ܠܹܗ ܝܼܣܪܵܝܹܠ: ܡ̣ܢ ܒܪܹܫܒܲܥ ܘܲܥܕܲܡܵܐ ܠܕ݂ܵܢ: ܠܡܹܐܬ̣ܵܐ ܘܲܠܡܸܥܒܲܕ݂ ܥܹܐܕ݂ܵܐ ܠܡܵܪܝܵܐ: ܐܲܠܵܗܵܐ ܕܝܼܣܪܵܝܹܠ: ܒܐܘܿܪܸܫܠܸܡ ܡܸܛܠ ܕܲܣܓ̣ܝܼ ܗ̄ܘ̣ܵܐ ܠܹܗ ܥܘܼܬ̣ܪ̱ܗܘܿܢ ܛܵܒ̣.

6: ܘܐܸܙܲܠܘ ܛܒܸܠܵܘܹ̈ܐ ܒܐܸܓ̇ܪ̈ܵܬ̣ܵܐ ܕܡܲܠܟܵܐ ܘܲܕ݂ܪܵܘ̱ܪ̈ܒ̣ܵܢܵܘܗܝ: ܒܟ݂ܠܹܗ ܝܼܣܪܵܝܹܠ ܘܲܝܗܘܼܕ݂ܵܐ: ܘܲܒ̣ܦܘܼܩܕܵܢܵܐ ܕܡܲܠܟܵܐ ܘܐܵܡ̇ܪܝܼܢ: ܒܢܲܝ̈ ܝܼܣܪܵܝܹܠ: ܬܘܼܒ̣ܘ ܠܘܵܬ̣ ܡܵܪܝܵܐ ܐܲܠܵܗܹܗ ܕܐܲܒ̣ܪܵܗܵܡ ܘܕ݂ܐܝܼܣܚܵܩ ܘܕ݂ܝܼܣܪܵܝܹܠ ܘܢܸܗܦܘܿܟ݂ ܫܲܪܟܵܢܵܐ ܕܐܸܫܬ̇ܟܲܚ ܡܸܢܟ݂ܘܿܢ: ܡ̣ܢ ܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.

7: ܠܵܐ ܬܸܗܘܘܿܢ ܐܲܝܟ݂ ܐܲܒ̣ܵܗܲܝ̈ܟ̇ܘܿܢ: ܘܐܲܝܟ݂ ܐܲܚܲܝ̈ܟ̇ܘܿܢ: ܕܟܲܕܸ̇ܒ̣ܘ ܒܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ. ܘܝܲܗ̄ܒ̣ ܐܸܢܘܿܢ ܠܠܵܘܛܬ̣ܵܐ: ܐܲܝܟܲܢܵܐ ܕܐܲܢ̄ܬ̇ܘܿܢ ܚܵܙܹ̇ܝܢ.

8: ܘܐܵܦ ܗܵܫܵܐ ܠܵܐ ܬܩܲܫܘܿܢ ܩܕ݂ܵܠܟ݂ܘܿܢ ܐܲܝܟ݂ ܐܲܒ̣ܵܗܲܝ̈ܟ̇ܘܿܢ ܘܥܘܿܠܘ ܠܡܲܩܕ̇ܫܵܐ ܕܐܸܬ̣ܩܲܕܲܫ ܠܥܵܠܲܡ. ܘܲܦܠܘܿܚܘ ܠܡܵܪܝܵܐ ܐܲܠܵܗܟ݂ܘܿܢ: ܕܢܲܗܦܸܟ݂ ܡܸܢܟ݂ܘܿܢ ܚܸܡܬ̣ܵܐ ܕܪܘܼܓ̣ܙܹܗ.

9: ܡܸܛܠ ܕܐܸܬ̣ܓ̇ܠܝܼ ܥܠܲܝܟ̇ܘܿܢ: ܘܥܲܠ ܐܲܚܲܝ̈ܟ̇ܘܿܢ: ܘܥܲܠ ܒܢܲܝ̈ܟ̇ܘܿܢ ܘܗ̤ܘ ܢܸܬܸ̇ܠܟ݂ܘܿܢ ܠܪ̈ܲܚܡܹܐ ܩܕ݂ܵܡ ܫܵܒܲܝ̈ܟ̇ܘܿܢ. ܘܢܲܗܦܸܟ݂ܟ݂ܘܿܢ ܠܐܲܪܥܵܐ ܗܵܕܹܐ. ܡܸܛܠ ܕܚܲܢܵܢ ܗ̄ܘ̣ ܘܪܸܚ̱ܡܬ̣ܵܢ ܗ̄ܘ̣ ܡܵܪܝܵܐ ܐܲܠܵܗܟ݂ܘܿܢ. ܘܠܵܐ ܢܲܗܦܸܟ݂ ܐܵܦܵܘ̈ܗܝ ܡܸܢܟ݂ܘܿܢ: ܟܲܕ݂ ܬܸܬ̣ܦ̄ܢܘܿܢ ܠܘܵܬܹܗ.

10: ܘܲܗܘ̤ܵܐ ܛܒܸܠܵܪ̈ܵܘܗܝ ܕܡܲܠܟܵܐ ܚܹܙܲܩܝܵܐ: ܥܵܒܪܝܼܢ ܗ̄ܘ̣ܵܘ ܡ̣ܢ ܩܪܸܐ ܠܲܩܪܸܐ: ܒܐܲܪܥܵܐ ܕܐܲܦܪܹܝܡ ܘܕܲܡܢܲܫܹܐ: ܘܲܥܕܲܡܵܐ ܠܲܙܒ̣ܘܿܠܘܿܢ.

11: ܘܲܗܘ̤ܵܐ ܓܵܚܟ̇ܝܼܢ ܥܠܲܝܗܘܿܢ: ܘܡܲܡܣܪܝܼܢ ܥܠܲܝܗܘܿܢ: ܓܲܒ̣ܪܹ̈ܐ ܪ̈ܲܫܝܼܥܹܐ: ܕܐܝܼܬ̣ ܒܫܲܒ̣ܛܵܐ ܕܒܹܝܬ̣ ܐܵܫܹܝܪ: ܘܲܒ̣ܫܲܒ̣ܛܵܐ ܕܒܹܝܬ̣ ܐܲܦܪܹܝܡ: ܘܲܒ̣ܫܲܒ̣ܛܵܐ ܕܒܹܝܬ̣ ܡܢܲܫܹܐ: ܘܲܒ̣ܫܲܒ̣ܛܵܐ ܕܒܹܝܬ̣ ܙܒ̣ܘܿܠܘܿܢ.

12: ܘܫܲܪܟܵܐ ܕܫܲܒ̣ܛܹ̈ܐ ܗܵܠܹܝܢ: ܐܸܬ̇ܬ̇ܒܲܪܘ ܒܠܸܒ̇ܗܘܿܢ. ܘܐܸܬ̣ܵܘ ܠܐܘܿܪܸܫܠܸܡ: ܥܲܡ ܫܲܒ̣ܛܵܐ ܕܒܹܝܬ̣ ܝܼܗܘܼܕ݂ܵܐ. ܘܲܗܘ̤ܵܬ̣ ܐܝܼܕܹܗ ܕܡܵܪܝܵܐ ܥܠܲܝܗܘܿܢ: ܠܡܸܬܲܠ ܠܗܘܿܢ ܠܸܒܵܐ ܚܲܕ݂: ܠܡܸܥܒܲܕ݂ ܦܘܼܩܕܵܢܵܐ ܕܡܲܠܟܵܐ ܘܲܕ݂ܪܵܘ̱ܪ̈ܒ̣ܵܢܵܘܗܝ: ܐܲܝܟ݂ ܡܸܠܬܹܗ ܕܡܵܪܝܵܐ.

13: ܘܐܸܬ̣ܟܲܢܲܫܘ ܠܐܘܿܪܸܫܠܸܡ ܥܲܡܵܐ ܣܲܓ̇ܝܼܵܐܐ: ܠܡܸܥܒܲܕ݂ ܥܹܐܕ݂ܵܐ ܕܦܲܛܝܼܪܹ̈ܐ: ܒܝܼܲܚܵܐ ܬܸܢܝܵܢܵܐ: ܥܲܡܵܐ ܣܲܓ̇ܝܼܵܐܐ ܕܛܵܒ̣.

14: ܘܩܵܡ̣ܘ ܘܲܥܩܲܪܘ ܡܲܕ݂ܒ̇ܚܹ̈ܐ ܕܐܝܼܬ̣ ܒܐܘܿܪܸܫܠܸܡ. ܘܟ݂ܠܗܹܝܢ ܥܠܵـ̈ـܘܵܬ̣ܵܐ ܚܪܲܒ̣ܘ: ܘܲܫܕ݂ܵܘ ܐܸܢܹܝܢ ܒܢܲܚܠܵܐ ܕܩܸܕ݂ܪܘܿܢ.

15: ܘܲܥܒܲܕ݂ܘ ܦܸܨܚܵܐ ܒܐܲܪܒܲܥܸܣܪܵܐ: ܫܲܒ̣ܥܵܐ ܝܵܘ̈ܡܝܼܢ ܒܝܲܪܚܵܐ ܬܸܢܝܵܢܵܐ. ܘܟ݂ܵܗ̈ܢܹܐ ܘܠܹܘܵܝܹ̈ܐ ܐܸܬ̣ܩܲܕܲܫܘ ܘܐܲܝܬܝܼܘ ܥ̈ܠܵܘܵܬ̣ܵܐ ܠܒܲܝܬܹ̇ܗ ܕܡܵܪܝܵܐ.

16: ܘܩܵܡ̣ܘ ܥܲܠ ܐܲܬ̣ܪ̱ܗܘܿܢ: ܐܲܝܟܲܢܵܐ ܕܡܸܬ̣ܚܙܹܐ: ܐܲܝܟܲܢܵܐ ܕܲܟ݂ܬ̣ܝܼܒ̣ ܒܢܵܡܘܿܣܵܐ ܕܡܘܼܫܹܐ ܢܒ̣ܝܼܵܐ ܕܡܵܪܝܵܐ. ܟܵܗ̈ܢܹܐ ܡܩܲܒ̇ܠܝܼܢ ܗ̄ܘ̣ܵܘ ܕܡܵܐ ܡ̣ܢ ܐܝܼܕ݂ܵܐ ܕܠܹܘܵܝܹ̈ܐ.

17: ܡܸܛܠ ܕܣܲܓ̇ܝܼܐܝܼܢ ܗ̄ܘ̣ܵܘ ܓܹܝܪ ܒܥܲܡܵܐ ܕܝܼܣܪܵܝܹܠ ܕܠܵܐ ܐܸܬ̣ܩܲܕܲܫܘ. ܘܠܹܘܵܝܹ̈ܐ ܩܵܡ̣ܘ ܠܗܘܿܢ ܥܲܠ ܢܸܟ݂ܣܬ̣ܵܐ ܕܐܸܡܪܹ̈ܐ: ܘܚܵܙܹ̇ܝܢ ܟܠ ܐܲܝܢܵܐ ܕܲܕ݂ܟܸܐ: ܠܡܸܬ̣ܩܲܕܵܫܘܼ ܠܡܵܪܝܵܐ.

18: ܡܸܛܠ ܕܣܲܓ̇ܝܼܐܝܼܢ ܗ̄ܘ̣ܵܘ ܒܥܲܡܵܐ ܕܝܼܣܪܵܝܹܠ ܡ̤ܢ ܕܒܹܝܬ̣ ܐܲܦܪܹܝܡ: ܘܲܡܢܲܫܹܐ: ܘܐܝܼܣܵܟ݂ܵܪ: ܘܲܙܒ̣ܘܿܠܘܿܢ. ܗܵܠܹܝܢ ܐܲܪܒ̇ܥܵܐ ܫܲܒ̣ܛ̈ܝܼܢ ܕܠܵܐ ܐܸܬ̇ܕܲܟ̇ܝܼܘ ܡܸܛܠ ܕܐܲܟ݂ܠܘܼܗܝ ܦܸܨܚܵܐ ܕܠܵܐ ܒܢܵܡܘܿܣ. ܡܸܛܠ ܕܨܲܠܝܼ ܚܹܙܲܩܝܵܐ ܥܠܲܝܗܘܿܢ: ܘܐܸܡܲܪ ܠܗܘܿܢ: ܐܲܠܵܗܵܐ ܛܵܒ̣ܵܐ ܢܚܣܸܐ ܚܠܵܦ ܥܲܡܵܐ ܟܠܹܗ ܕܝܼܣܪܵܝܹܠ.

19: ܡܸܛܠ ܕܐܲܬ̣ܩܸܢ̄ܢ ܠܸܒܲܢ ܠܲܡܨܲܠܵܝܘܼ ܠܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ: ܩܘܼܕ݂ܫܵܐ ܠܵܐ ܗ̄ܘ̣ܵܐ ܕܟܸܐ ܡܸܢܲܢ.

20: ܘܲܫܡܲܥ ܡܵܪܝܵܐ ܒܩܵܠܹܗ ܕܚܹܙܲܩܝܵܐ: ܘܐܲܣܝܹܗ ܠܥܲܡܵܐ.

21: ܘܲܥܒܲܕ݂ܘ ܒܢܝ̈ ܝܼܣܪܵܝܹܠ: ܘܟ݂ܠ ܕܐܸܫܬ̇ܟܲܚܘ ܒܐܘܿܪܸܫܠܸܡ: ܥܹܐܕ݂ܵܐ ܕܦܲܛܝܼܪܹ̈ܐ ܫܲܒ̣ܥܵܐ ܝܵܘ̈ܡܝܼܢ ܒܚܲܕ݂ܘܼܬ̣ܵܐ ܪܲܒ̇ܬ̣ܵܐ ܡܫܲܒ̇ܚܝܼܢ ܗ̄ܘ̣ܵܘ ܠܡܵܪܝܵܐ: ܟܠ ܝܘܿܡ ܒܝܘܿܡ: ܠܹܘܵܝܹ̈ܐ ܒܬܸܫܒ̇ـ̈ـܚܵܬ̣ܵܐ ܕܦܘܼܡܗܘܿܢ: ܘܟ݂ܵܗ̈ܢܹܐ ܒܬܸܫܒ̇ـ̈ـܚܵܬ̣ܵܐ.

22: ܘܡܲܠܸܠ̣ ܚܹܙܲܩܝܵܐ ܥܲܡ ܟܠܗܘܿܢ ܠܹܘܵܝܹ̈ܐ: ܕܲܡܫܲܒ̇ܚܝܼܢ ܗ̄ܘ̣ܵܘ ܒܬܸܫܒ̇ـ̈ـܚܵܬ̣ܵܐ ܛܵـ̈ـܒ̣ܵܬ̣ܵܐ ܩܕ݂ܵܡ ܡܵܪܝܵܐ. ܘܐܸܟܲܠ̣ܘ ܗ̄ܘ̣ܵܘ ܓܲܒ̣ܪܹ̈ܐ ܫܲܒ̣ܥܵܐ ܝܵܘ̈ܡܝܼܢ. ܘܲܡܕܲܒ̇ܚܝܼܢ ܗ̄ܘ̣ܵܘ ܕܸܒ̣ܚܹ̈ܐ ܫܲܠܡܹ̈ܐ ܠܡܵܪܝܵܐ: ܘܡܵܘܕܹ̇ܝܢ ܗ̄ܘ̣ܵܘ ܠܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ.

23: ܘܐܸܬ̣ܟ̇ܠܝܼ ܟܠܹܗ ܥܲܡܵܐ. ܕܝܼܣܪܵܝܹܠ: ܠܡܸܥܒܲܕ݂ ܫܲܒ̣ܥܵܐ ܝܵܘ̈ܡܝܼܢ ܐ̄ܚܪ̈ܵܢܝܼܢ: ܘܫܲܒ̣ܥܵܐ ܝܵܘ̈ܡܝܼܢ ܒܚܲܕ݂ܘܼܬ̣ܵܐ.

24: ܡܸܛܠ ܕܚܹܙܲܩܝܵܐ ܡܲܠܟܵܐ ܕܲܝܗܘܼܕ݂ܵܐ: ܐܲܦܪܸܫ ܘܝܲܗ̄ܒ̣ ܠܥܲܡܵܐ: ܫܲܒ̣ܥܵܐ ܐܲܠܦ̈ܝܼܢ ܚܲܝ̈ܘܵܬ̣ܵܐ ܪܵܘ̱ܪ̈ܒ̣ܵܬ̣ܵܐ ܘܕܲܩܕ̇ܩܵـ̈ـܬ̣ܵܐ. ܘܲܦܪܲܫ ܘܝܲܗ̄ܒ̣ ܠܥܲܡܵܐ ܕܝܼܣܪܵܝܹܠ: ܬܵܘܪܹ̈ܐ ܐܵܠܹܦ: ܘܥܵـ̈ـܢܵܐ ܥܸܣܪܵܐ ܐܲܠܦ̈ܝܼܢ ܘܐܸܬ̣ܩܲܕܲܫܘ ܟܵܗ̈ܢܹܐ ܣܲܓ̇ܝܼ̈ܐܹܐ.

25: ܘܲܚܕ݂ܝܼ ܟܠܹܗ ܥܲܡܵܐ ܕܲܝܗܘܼܕ݂ܵܐ: ܘܟ݂ܵܗ̈ܢܹܐ ܘܠܹܘܵܝܹ̈ܐ: ܘܟ݂ܠ ܥܲܡܵܐ ܕܐܵܬܹܝܢ ܡ̣ܢ ܥܲܡܵܐ ܕܝܼܣܪܵܝܹܠ: ܘܓ̣ܝܼܘܿܪܹ̈ܐ ܕܐܵܬܹܝܢ ܡ̣ܢ ܐܲܪܥܵܐ ܕܝܼܣܪܵܝܹܠ: ܘܲܕ݂ܝܵܬ̣ܒ̇ܝܼܢ ܒܲܝܗܘܼܕ݂ܵܐ.

26: ܘܲܗܘ̤ܵܬ̣ ܚܲܕ݂ܘܼܬ̣ܵܐ ܪܲܒ̇ܬ̣ܵܐ ܒܐܘܿܪܸܫܠܸܡ. ܡܸܛܠ ܕܡ̣ܢ ܝܵܘܡܵܘ̈ܗܝ ܕܲܫܠܹܝܡܘܿܢ ܒܲܪ ܕܵܘܝܼܕ݂ ܡܲܠܟܵܐ ܕܝܼܣܪܵܝܹܠ: ܠܵܐ ܗܘ̤ܵܬ̣ ܐܲܝܟ݂ ܗܵܕܹܐ ܒܐܘܿܪܸܫܠܸܡ.

27: ܘܩܵܡ̣ܘ ܟܵܗ̈ܢܹܐ ܘܠܹܘܵܝܹ̈ܐ: ܘܒܲܪܸܟ݂ܘ ܠܥܲܡܵܐ ܕܝܼܣܪܵܝܹܠ. ܘܲܫܡܲܥ̣ ܡܵܪܝܵܐ ܒܩܵܠܗܘܿܢ ܘܥܸܠܲܬ̤ ܨܠܘܿܬ̣ܗܘܿܢ ܠܡܵܘܬ̇ܒ̣ܵܐ ܕܩܘܼܕ݂ܫܹܗ ܠܲܫܡܲܝܵܐ.

ܩܹܦܵܠܹܐܘܿܢ: ܠܐ.

1: ܘܟܲܕ݂ ܫܲܠܸܡ̣ ܗܵܠܹܝܢ ܟܠܗܹܝܢ: ܢܦܲܩ̣ܘ ܟܠܹܗ ܥܲܡܵܐ ܕܝܼܣܪܵܝܹܠ ܕܐܸܫܬ̇ܟܲܚܘ: ܠܩܘܼܪ̈ܝܵܐ ܕܒܹܝܬ̣ ܝܼܗܘܼܕ݂ܵܐ ܘܬܲܒܲܪܘ ܩܵܝ̈ܡܵܬ̣ܵܐ: ܘܬܲܒܲܪܘ ܢܸܡܪܹ̈ܐ. ܘܲܥܩܲܪܘ ܥܠܵـ̈ـܘܵܬ̣ܵܐ ܕܐܝܼܬ̣ ܒܲܝܗܘܼܕ݂ܵܐ ܘܲܒ̣ܒܸܢܝܵܡܹܝܢ: ܘܒܲܐܦܪܹܝܡ: ܘܒܲܡܢܲܫܹܐ: ܥܕܲܡܵܐ ܠܐܲܝܟܵܐ ܕܲܗܦܲܟ݂ܘ ܝܼܣܪܵܝܹܠ ܘܐܸܬ̣ܵܘ ܟܠܗܘܿܢ ܠܝܵܪܬ̇ܘܼܬ̣ܗܘܿܢ. ܘܥܲܠ̣ܘ ܒܲܫܠܵܡܵܐ ܠܩܘܼܪ̈ܝܼܗܘܿܢ.

2: ܘܐܲܩܝܼܡ ܚܹܙܲܩܝܵܐ ܡܲܛܪ̈ܵܬ̣ܵܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ: ܥܲܠ ܡܲܛܪ̈ܵܬ̣ܗܘܿܢ: ܓܲܒ̣ܪܵܐ ܐܲܝܟ݂ ܦܘܼܠܚܵܢܹܗ: ܠܟ݂ܵܗ̈ܢܹܐ ܘܲܠܠܹܘܵܝܹ̈ܐ: ܘܠܲܥܠܵـ̈ـܘܵܬ̣ܵܐ ܘܲܠܫܲܠܡܹ̈ܐ: ܠܲܡܫܲܡܵܫܘܼ ܘܲܠܡܵܘܕܵܝܘܼ ܘܠܲܡܫܲܒܵܚܘܼ ܒܬܲܪܥܵܐ ܕܡܵܪܝܵܐ.

3: ܘܝܲܗ̄ܒ̣ ܡܲܠܟܵܐ ܡ̣ܢ ܢܸܟ݂ܣܵܘ̈ܗܝ: ܥܠܵـ̈ـܘܵܬ̣ܵܐ ܕܬ̣ܵܘܪܹ̈ܐ: ܕܨܲܦܪܵܐ ܘܲܕ݂ܪܲܡܫܵܐ: ܘܲܥܠܵـ̈ـܘܵܬ̣ܵܐ ܕܫܲܒܹ̇ܐ: ܘܲܕ݂ܪܹܫ ܝܲܪ̈ܚܹܐ ܘܲܕ݂ܥܹܐܕܹ̈ܐ.

4: ܘܐܸܡܲܪ ܠܥܲܡܵܐ ܐܲܝܟܲܢܵܐ ܕܲܟ݂ܬ̣ܝܼܒ̣ ܒܢܵܡܘܿܣܹܗ ܕܡܵܪܝܵܐ. ܘܐܸܡܲܪ ܠܝܼܣܪܵܝܹܠ ܕܥܵܡ̇ܪܝܼܢ ܒܐܘܿܪܸܫܠܸܡ: ܠܡܸܬܲܠ ܙܸܕ݂ܩܵܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ: ܡܸܛܠ ܕܚܲܝܸܠ ܐܸܢܘܿܢ ܒܢܵܡܘܿܣܹܗ ܕܡܵܪܝܵܐ.

5: ܘܟܲܕ݂ ܐܲܣܓ̇ܝܼ ܦܸܬ̣ܓ̣ܵܡܵܐ ܥܲܠ ܝܼܣܪܵܝܹܠ: ܡܲܝܬܹ̇ܝܢ ܗ̄ܘ̣ܵܘ ܪܹ̈ܫܝܵܬ̣ܵܐ ܕܲܥܒ̣ܘܼܪܵܐ: ܘܲܕ݂ܚܲܡܪܵܐ: ܘܲܕ݂ܡܸܫܚܵܐ: ܘܡ̣ܢ ܚܲܝ̈ܘܵܬ̣ܗܘܿܢ: ܘܡ̣ܢ ܥܲܠ̈ܠܵܬ̣ܵܐ ܕܚܲܩܠܵܐ ܘܚܲܕ݂ ܡ̣ܢ ܥܸܣܪܵܐ ܡܲܝܬܹ̇ܝܢ ܗ̄ܘ̣ܵܘ ܣܲܓ̇ܝܼ.

6: ܘܲܒ̣ܢܲܝ̈ ܝܼܣܪܵܝܹܠ ܘܲܝܗܘܼܕ݂ܵܐ ܕܝܵܬ̣ܒ̇ܝܼܢ ܗ̄ܘ̣ܵܘ ܒܩܘܼܪ̈ܝܵܐ ܕܲܝܗܘܼܕ݂ܵܐ: ܘܐܵܦ ܗܸܢܘܿܢ ܡܲܝܬܹ̇ܝܢ ܗ̄ܘ̣ܵܘ ܚܲܕ݂ ܡ̣ܢ ܥܸܣܪܵܐ: ܡܲܥܣܵܪܹ̈ܐ. ܘܡܲܝܬܹ̇ܝܢ ܗ̄ܘ̣ܵܘ: ܘܲܡܩܲܪܒ̣ܝܼܢ ܗ̄ܘ̣ܵܘ ܠܡܵܪܝܵܐ ܐܲܠܵܗܗܘܿܢ ܡܲܝܬܹ̇ܝܢ ܗ̄ܘ̣ܵܘ ܪܹ̈ܫܝܵܬ̣ܵܐ ܥܲܠ ܪܹ̈ܫܝܵܬ̣ܵܐ: ܕܲܥܒ̣ܘܼܪܵܐ: ܘܲܕ݂ܚܲܡܪܵܐ: ܘܲܕ݂ܡܸܫܚܵܐ: ܘܡ̣ܢ ܚܲܝ̈ܘܵܬ̣ܗܘܿܢ: ܘܡ̣ܢ ܥܲܠ̈ܠܵܬ̣ܵܐ ܕܚܲܩܠܵܐ. ܘܚܲܕ݂ ܡ̣ܢ ܥܸܣܪܵܐ ܡܲܝܬܹ̇ܝܢ ܗ̄ܘ̣ܵܘ: ܘܲܡܩܲܕ̇ܫܝܼܢ ܗ̄ܘ̣ܵܘ ܠܡܵܪܝܵܐ ܐܲܠܵܗܗܘܿܢ.

7: ܘܲܒ̣ܝܲܪܚܵܐ ܕܲܬ̣ܠܵܬ̣ܵܐ: ܐܸܫܬܲܟ݂ܚܲܬ̣ ܪܹܫܝܼܬ̣ܵܐ ܣܘܿܓ̣ܵܐܐ ܕܛܵܒ̣. ܘܲܒ̣ܝܲܪܚܵܐ ܕܫܲܒ̣ܥܵܐ: ܢܣܲܒ̣ ܚܹܙܲܩܝܵܐ: ܘܦܲܠܓܵܗ̇ ܠܟ݂ܵܗ̈ܢܹܐ ܘܲܠܠܹܘܵܝܹ̈ܐ.

8: ܘܲܚܙܵܐ ܚܹܙܲܩܝܵܐ ܘܪܵܘ̱ܪ̈ܒ̣ܵܢܹܐ ܠܪܹܫܝܼܬ̣ܵܐ ܗܵܝ̇ ܕܟܵܗ̈ܢܹܐ ܕܣܸܓܝܲܬ̤̱ ܛܵܒ̣: ܘܒܲܪܸܟ݂ܘ ܠܡܵܪܝܵܐ: ܘܨܲܠܝܼܘ ܥܲܠ ܝܼܣܪܵܝܹܠ.

9: ܘܨܲܠܝܼ ܚܹܙܲܩܝܵܐ ܥܲܠ ܟܵܗܢܹ̈ܐ ܘܥܲܠ ܠܹܘܵܝܹ̈ܐ: ܥܲܠ ܪܹܫܝܼܬ̣ܵܐ ܕܣܸܓ̣ܝܲܬ̤.

10: ܘܲܩ̣ܪܵܐ ܠܹܗ ܠܥܲܙܲܪܝܵܐ ܟܵܗܢܵܐ ܪܲܒܵܐ ܡ̣ܢ ܕܒܹܝܬ̣ ܨܵܕ݂ܘܿܩ. ܘܐܸܡܲܪ ܠܗܘܿܢ: ܫܲܪܝܵܐ ܗ̄ܝ̣ ܠܟ݂ܘܿܢ ܪܹܫܝܼܬ̣ܵܐ ܗܵܕܹܐ ܠܡܸܐܟܲܠ ܡܸܛܠ ܕܲܠܒܲܝܬܹ̇ܗ ܕܡܵܪܝܵܐ ܥܸܠܲܬ̤. ܐܲܟ݂ܘܿܠܘ ܘܣܒܲܥ̣ܘ. ܘܲܕ݂ܝܵܬܲܪ ܡܸܢܵܗ̇: ܗܲܒ̣ܘ ܠܡܸܣܟܹ̇ܢܹ̈ܐ ܘܲܠܒ̣ܵܝܫܹ̈ܐ. ܡܸܛܠ ܕܡܵܪܝܵܐ ܒܲܪܸܟ݂ ܠܥܲܡܹܗ: ܘܝܲܗ̄ܒ̣ ܠܗܘܿܢ ܗܵܢܵܐ ܣܘܿܓ̣ܵܐܐ ܘܕ݂ܝܼܬܲܪ: ܝܲܗ̄ܒ̣ܘ ܠܥܲܡܵܐ ܕܝܼܣܪܵܝܹܠ ܟܠܹܗ.

11: ܘܐܸܡܲܪ ܚܹܙܲܩܝܵܐ ܠܲܡܛܲܝܵܒ̣ܘܼ ܕܵܪܹ̈ܐ ܒܒܲܝܬܹ̇ܗ ܕܡܵܪܝܵܐ. ܘܛܲܝܸܒ̣ܘ.

12: ܘܐܲܝܬ̇ܝܼܘ ܪܹܫܝܼܬ̣ܵܐ: ܚܲܕ݂ ܡ̣ܢ ܥܸܣܪܵܐ: ܘܩܘܼܕ݂ܫܹ̈ܐ ܒܗܲܝܡܵܢܘܼܬ̣ܵܐ. ܘܲܥܠܲܝܗܘܿܢ ܐܝܼܬ̣ ܗ̄ܘ̣ܵܘ ܫܲܠܝܼܛܹ̈ܐ: ܟܢܲܥܢܝܼܵܐ ܠܹܘܵܝܵܐ: ܘܫܲܡܥܝܼ ܐܲܚܘܼܗܝ.

13: ܘܲܢܚܵܐܹܝܠ: ܘܥܘܿܙܝܼܵܐ: ܘܢܵܚܵܬ̣: ܘܲܥܫܵܐܹܝܠ: ܘܝܲܪܡܘܿܬ̣: ܘܝܘܿܙܵܒ̣ܵܪ: ܘܐܲܠܝܼܠ: ܘܲܣܡܲܟ݂ܝܵܐ: ܘܡܵܬ̣ܵܚ: ܘܲܒ̣ܢܵܝܵܐ: ܘܲܫܡܲܥܝܵܐ ܐܲܚܘܼܗܝ. ܗܵܠܹܝܢ ܟܠܗܘܿܢ ܫܲܠܝܼܛܝܼܢ ܗ̄ܘ̣ܵܘ ܥܲܠ ܐܝܼܕ݂ܵܐ ܕܲܟ݂ܢܲܥܢܝܵܐ: ܐܲܝܟ݂ ܫܘܼܠܛܵܢܵܐ ܕܚܹܙܲܩܝܵܐ ܡܲܠܟܵܐ: ܘܥܲܙܲܪܝܵܐ ܪܲܒ̇ܒܲܝܬܹ̇ܗ ܕܡܲܠܟܵܐ.

14: ܘܩܲܪܝܵܐ ܒܲܪ ܝܲܡܝܼܢܵܐ ܠܹܘܵܝܹ̈ܐ: ܢܵܛܲܪ ܬܲܪܥܵܐ ܡܲܕ݂ܢ̱ܚܵܝܵܐ: ܫܲܠܝܼܛ ܗ̄ܘ̣ܵܐ ܥܲܠ ܩܘܼܪ̈ܒܵܢܹܐ ܕܡܵܪܝܵܐ: ܘܥܲܠ ܩܕ݂ܘܿܫ ܩܘܼܕ݂ܫܹܐ.

15: ܘܠܹܗ ܡܫܲܠܡܝܼܢ ܗ̄ܘ̣ܵܘ ܥܲܕ̇ܘܿܢ ܘܒܸܢܝܵܡܹܝܢ: ܘܝܼܫܘܿܥ: ܘܲܫܡܲܥܝܵܐ: ܘܐܵܡܘܿܪܝܵܐ: ܘܲܫܟܲܢܝܵܐ: ܒܩܘܼܪ̈ܝܵܐ ܕܟ݂ܵܗ̈ܢܹܐ: ܒܗܲܝܡܵܢܘܼܬ̣ܵܐ: ܠܡܸܬܲܠ ܠܐܲܚܲܝ̈ܗܘܿܢ ܦܵܠܓـ̈ـܘܵܬ̣ܵܐ: ܠܪܲܒܵܐ ܐܲܝܟ݂ ܙܥܘܿܪܵܐ.

16: ܠܒܲܪ ܡ̣ܢ ܕܙܵܕܸܩ: ܠܕܸܟ݂ܪܵܐ ܡ̣ܢ ܒܲܪ ܬܠܵܬ̣ ܫܢ̈ܝܼܢ ܘܲܠܥܸܠ: ܠܟ݂ܠ ܡ̣ܢ ܕܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ.

17: ܘܚܘܼܫܒܵܢ ܝܘܿܡ ܒܝܵܘܡܹܗ: ܠܦܘܼܠܚܵܢܗܘܿܢ ܒܡܲܛܪ̈ܵܬ̣ܗܘܿܢ: ܒܦܵܠܓـ̈ـܘܵܬ̣ܗܘܿܢ ܘܡܸܫܚܵܐ ܘܚܲܡܪܵܐ ܡܸܬ̣̱ܝܼܗܸܒ̣ ܠܟ݂ܵܗܢܹ̈ܐ ܘܲܠܠܹܘܵܝܹ̈ܐ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܡ̣ܢ ܒܲܪ ܥܸܣܪܝܼܢ ܫܢ̈ܝܼܢ ܘܲܠܥܸܠ: ܒܡܲܛܪ̈ܵܬ̣ܗܘܿܢ ܒܦܵܠܓ̇ـ̈ـܘܵܬ̣ܗܘܿܢ.

18: ܘܡܸܫܚܵܐ ܡܸܬ̣̱ܝܼܗܸܒ̣ ܠܢܲܦ̮ܛܹܝܪ̈ܲܝܗܘܿܢ: ܘܲܠܢܸܫܲܝ̈ܗܘܿܢ: ܘܠܲܒ̣ܢܲܝ̈ܗܘܿܢ: ܘܠܲܒ̣ܢܵܬ̣̈ܗܘܿܢ: ܘܲܠܟ݂ܠܹܗ ܥܲܡܵܐ ܕܝܼܣܪܵܝܹܠ ܕܲܒ̣ܗܲܝܡܵܢܘܼܬ̣ܵܐ ܡܸܬ̣ܩܲܕ̇ܫܝܼܢ ܗ̄ܘ̣ܵܘ.

19: ܡܸܛܠ ܕܩܲܕ̇ܝܼܫܝܼܢ ܗ̄ܘ̣ܵܘ ܒܢܵܘ̈ܗܝ ܕܐܲܗܪܘܿܢ ܟܵܗܢܵܐ. ܩܲܕ̇ܝܼܫ ܗ̄ܘ̣ܵܐ ܒܸܣ̱ܪܗܘܿܢ. ܘܲܠܘܵܬ̣ ܢܸܫܹ̈ܐ ܠܵܐ ܡܸܬ̣ܩܲܪܒ̣ܝܼܢ ܗ̄ܘ̣ܵܘ. ܘܡܸܬ̣ܟܲܪܟ̇ܝܼܢ ܗ̄ܘ̣ܵܘ ܒܟ݂ܠ ܩܪܸܐ ܘܲܩܪܸܐ: ܓܲܒ̣ܪܹ̈ܐ ܐܲܝܠܹܝܢ ܕܝܼܕ݂ܥܝܼܢ ܫܡܵܗܲܝ̈ܗܘܿܢ: ܕܢܸܬ̇ܠܘܼܢ ܙܸܕ݂ܩܵܐ: ܠܟ݂ܠ ܕܸܟ݂ܪܵܐ ܕܐܝܼܬ̣ ܒܟ݂ܵܗ̈ܢܹܐ: ܘܲܠܟ݂ܠܗܹܝܢ ܫܲܪ̈ܒ̣ܵܬ̣ܵܐ ܕܠܹܘܵܝܹ̈ܐ.

20: ܘܲܥܒܲܕ݂ ܗܵܟܲܢܵܐ ܚܹܙܲܩܝܵܐ: ܒܟ݂ܠܹܗ ܝܼܗܘܼܕ݂ܵܐ. ܘܲܥ̣ܒܲܕ݂ ܕܛܵܒ̣ ܘܫܲܦܝܼܪ. ܘܗܲܠܸܟ݂ ܒܩܘܼܫܬܵܐ ܩܕ݂ܵܡ ܡܵܪܝܵܐ.

21: ܒܟ݂ܠܗܘܿܢ ܥܒ̣ܵܕ݂ܵܘ̈ܗܝ ܕܫܼܲܝܼ ܗ̄ܘ̣ܵܐ ܠܡܸܥܒܲܕ݂ ܒܒܲܝܬܹ̇ܗ ܕܡܵܪܝܵܐ: ܘܲܒ̣ܢܵܡܘܿܣܵܐ ܘܲܒ̣ܦܘܼܩܕܵܢܵܐ: ܠܡܸܬ̣ܒܲܥ ܠܐܲܠܵܗܹܗ ܒܟ݂ܠܹܗ ܠܸܒܹ̇ܗ. ܘܲܥ̣ܒܲܕ݂ ܘܐܲܟ݂ܫܲܪ.

ܩܹܦܵܠܹܐܘܿܢ: ܠܒ.

1: ܒܵܬܲܪ ܡܸܠܹ̈ܐ ܗܵܠܹܝܢ: ܘܩܘܼܫܬܵܐ ܕܲܥܒܲܕ݂ ܚܹܙܲܩܝܵܐ: ܐܸܬ̣ܵܐ ܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ. ܘܲܫ̣ܪܵܐ ܥܲܠ ܝܼܗܘܼܕ݂ܵܐ: ܥܲܠ ܚܸܣܢܹ̈ܐ ܥܲܫܝܼ̈ܢܹܐ. ܘܐܸܡܲܪ ܠܥܵܡܘܿܪ̈ܲܝܗܘܿܢ: ܩܲܒܸ̇ܠܘ ܝܲܡܝܼܢܵܐ: ܘܬ̣ܵܘ ܠܘܵܬ̣.

2: ܘܲܚ̣ܙܵܐ ܚܹܙܲܩܝܵܐ ܕܐܸܬ̣ܵܐ ܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ: ܘܚܲܝܠܵـ̈ـܘܵܬ̣ܵܐ ܠܲܩܪܵܒ̣ܵܐ ܠܐܘܿܪܸܫܠܸܡ.

3: ܘܐܸܬ̣ܡܲܠܲܟ݂ ܗ̤ܘ ܘܫܲܠܝܼܛܵܢܵܘ̈ܗܝ ܘܓܲܢ̄ܒܵܪ̈ܵܘܗܝ ܠܲܡܟܲܣܵܝܘܼ ܡܲـ̈ـܝܵܐ ܕܥܲܝ̈ܢܵܬ̣ܵܐ ܕܐܝܼܬ̣ ܠܒܲܪ ܡ̣ܢ ܡܕ݂ܝܼܢ̄ܬܵܐ. ܘܥܲܕ̇ܪܘܼܗܝ ܫܲܠܝܼܛܵܢܵܘ̈ܗܝ.

4: ܘܐܸܬ̣ܟܲܢܲܫܘ ܥܲܡܵܐ ܕܝܼܣܪܵܝܹܠ ܣܘܿܓ̣ܵܐܐ ܕܛܵܒ̣. ܘܟܲܣܝܼܘ ܟܠܗܹܝܢ ܥܲܝ̈ܢܵܬ̣ܵܐ ܘܢܲܚܠܹ̈ܐ ܪܵܘ̱ܪ̈ܒܹܐ: ܕܐܝܼܬ̣ ܒܓ̣ܵܘ ܐܲܪܥܵܐ: ܡܸܛܠ ܕܐܵܡ̇ܪܝܼܢ: ܕܲܠܡܵܐ ܢܹܐܬܹܐ ܡܲܠܟܵܐ ܕܐܵܬ̣ܘܿܪ: ܘܢܸܫܟ̇ܚܘܼܢ ܡܲـ̈ـܝܵܐ ܣܲܓ̇ܝܼ̈ܐܹܐ.

5: ܘܢܸܬ̣ܓܲܢ̄ܒ̇ܪܘܿܢ ܘܢܸܒ̣ܢܘܿܢ ܫܘܼܪܹ̈ܐ ܠܘܼܩܒܲܠ ܫܘܼܪܵܐ ܐ̄ܚܪܹܢܵܐ. ܘܲܢܛܲܡܡܘܼܢ ܚܹܐܪܝܼܬ̣ܵܐ ܕܲܥܒܲܕ݂ ܕܵܘܝܼܕ݂. ܘܲܥܒܲܕ݂ ܚܹܙܲܩܝܵܐ ܙܲܝܢܵܐ ܣܲܓ̇ܝܼܵܐܐ: ܘܣܲܟ̇ܪܹ̈ܐ ܘܪ̈ܘܼܡܚܹܐ.

6: ܘܐܲܩܝܼܡ ܓܲܒ̣ܪܹ̈ܐ ܥܵܒ̣ܕܲܝ̈ ܩܪܵܒ̣ܵܐ ܥܲܠ ܥܲܡܵܐ: ܚܲܕ݂ ܥܲܠ ܥܸܣܪܵܐ. ܘܟܲܢܸܫ ܐܸܢܘܿܢ ܠܘܵܬܹܗ: ܠܘܵܬ̣ ܫܘܼܩܵܐ ܕܲܩܪܝܼܬ̣ܵܐ. ܘܡܲܠܸܠ̣ ܥܲܡ ܟܠܗܘܿܢ: ܘܐܸܡܲܪ ܠܗܘܿܢ.

7: ܐܸܬ̣ܓܲܢ̄ܒܲܪܘ ܘܐܸܬ̣ܟܲܬܲܫܘ ܘܠܵܐ ܬܸܕ݂ܚ̄ܠܘܼܢ ܘܠܵܐ ܬܙܘܼܥܘܼܢ: ܡ̣ܢ ܩܕ݂ܵܡ ܡܲܠܟܵܐ ܕܐܵܬ̣ܘܿܪ: ܘܡ̣ܢ ܩܕ݂ܵܡ ܚܲܝ̈ܠܵܘܵܬ̣ܵܐ ܕܐܸܬ̣ܵܘ ܥܲܡܹܗ. ܥܲܡܲܢ ܕܝܼܠܲܢ ܣܲܓ̇ܝܼ ܡ̣ܢ ܕܥܲܡܹܗ.

8: ܥܲܡܹܗ ܚܲܝܠܵܐ ܕܒܸܣܪܵܐ: ܘܥܲܡܲܢ ܡܵܪܝܵܐ ܐܲܠܵܗܲܢ: ܕܲܢܥܲܕ̇ܪܲܢ ܘܢܸܬ̣ܟܲܬܲܫ ܒܬܲܟ݂ܬ̇ܘܼܫܲܢ. ܘܐܸܬ̣ܡ̱ܠܝܼ ܒܠܸܒܹ̇ܗ ܕܥܲܡܵܐ: ܥܲܠ ܦܸܬ̣ܓ̣ܵܡܵܘ̈ܗܝ ܕܚܹܙܲܩܝܵܐ ܡܲܠܟܵܐ ܕܒܹܝܬ̣ ܝܼܗܘܼܕ݂ܵܐ.

9: ܡܟ̤!!!! ܒܵܬܲܪ ܗܵܠܹܝܢ: ܫܲܕܲܪ ܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ: ܠܪܲܒ̇ܫܵܩܹ̈ܐ. ܘܐܸܬ̣ܵܐ ܠܐܘܿܪܸܫܠܸܡ ܘܥܲܒ̣ܕܵܘ̈ܗܝ ܥܲܡܹܗ: ܘܗ̤ܘ ܫܪܸܐ ܗ̄ܘ̣ܵܐ ܥܲܠ ܠܟ݂ܝܼܫ: ܘܫܲܠܝܼܛܵܢܵܘ̈ܗܝ ܥܲܡܹܗ: ܥܲܠ ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ: ܕܐܝܼܬ̣ ܒܐܘܿܪܸܫܠܸܡ: ܘܐܸܡܲܪ ܠܗܘܿܢ.

10: ܗܵܟܲܢܵܐ ܐܵܡܲܪ ܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ. ܥܲܠ ܡܲܢ ܬܟ݂ܝܼܠܝܼܢ ܐ̄ܢܬ̇ܘܿܢ: ܕܝܵܬ̣ܒ̇ܝܼܢ ܐ̄ܢܬ̇ܘܿܢ ܒܲܚܒ̣ܘܼܫܝܵܐ ܒܐܘܿܪܸܫܠܸܡ.

11: ܗ̤ܘ ܚܹܙܲܩܝܵܐ ܡܲܛܥܹܐ ܠܟ݂ܘܿܢ ܠܡܲܫܠܵܡܘܼܬ̣ܟ݂ܘܿܢ ܕܲܬ̣ܡܘܼܬ̣ܘܼܢ ܒܟܲܦܢܵܐ ܘܲܒ̣ܨܲܗܝܵܐ: ܘܡܲܛܥܸܐ ܠܟ݂ܘܿܢ ܘܐܵܡܲܪ: ܕܡܵܪܝܵܐ ܐܲܠܵܗܲܢ ܢܦܲܨܹܝܢ ܡ̣ܢ ܐܝܼܕ݂ܵܘ̈ܗܝ ܕܡܲܠܟܵܐ ܕܐܵܬ̣ܘܿܪ.

12: ܐܲܝܟܵܘ ܚܹܙܲܩܝܵܐ: ܕܐܲܥܒܲܪ ܥܠܵـ̈ـܘܵܬ̣ܵܐ ܘܡܲܕ݂ܒ̇ܚܹ̈ܐ: ܘܐܸܡܲܪ ܠܲܕ݂ܒܹܝܬ̣ ܝܼܗܘܼܕ݂ܵܐ ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܕܲܩܕ݂ܵܡ ܡܲܕ݂ܒ̇ܚܵܐ ܚܲܕ݂ ܬܸܣܓ̇ܕ݂ܘܼܢ. ܘܲܥܠܵܘܗܝ ܬܲܣܩܘܼܢ ܒܸܣܡܹ̈ܐ.

13: ܘܲܟ݂ܒܲܪ ܬܸܕ̇ܥܘܼܢ ܡܸܕܸ̇ܡ ܕܥܸܒ̣ܕܹܬ̣ ܐܸܢܵܐ ܘܐܲܒ̣ܵܗܲܝ̈: ܠܟ݂ܠܗܘܿܢ ܥܲܡܡܹ̈ܐ ܕܒܲܡܕ݂ܝܼ̈ܢܵܬ̣ܵܐ. ܘܠܵܐ ܐܸܫܟܲܚܘ ܐܲܠܵܗܹ̈ܐ ܕܥܲܡܡܹ̈ܐ ܗܵܠܹܝܢ: ܠܲܡܦܲܨܵܝܘܼ ܡܕ݂ܝܼ̈ܢܵܬ̣ܗܘܿܢ ܡ̣ܢ ܐܝܼ̈ܕܲܝ.

14: ܘܡܲܢܘܼ ܐܝܼܬ̣ ܒܟ݂ܠܗܘܿܢ ܐܲܠܵܗܲܝ̈ܗܘܿܢ ܕܥܲܡܡܹ̈ܐ ܗܵܠܹܝܢ ܕܲܚܪܲܒ̣ܘ ܐܲܒ̣ܵܗܲܝ̈: ܕܐܸܫܟܲܚܘ ܠܲܡܦܲܨܵܝܘܼ ܡܕ݂ܝܼ̈ܢܵܬ̣ܗܘܿܢ ܡ̣ܢ ܐܝܼܕܲܝ̈.

15: ܘܐܵܦ ܗܵܫܵܐ ܠܵܐ ܢܲܛܥܹܝܟ݂ܘܿܢ ܚܹܙܲܩܝܵܐ: ܘܠܵܐ ܢܲܬ̣ܟܸ̇ܠܟ݂ܘܿܢ ܥܲܠ ܗܵܕܹܐ. ܘܠܵܐ ܬܗܲܝܡܢܘܼܢܹܗ. ܡܸܛܠ ܕܠܵܐ ܡܸܫܟܲܚ ܐܲܠܵܗܟ݂ܘܿܢ ܠܲܡܦܲܨܵܝܘܼܬ̣ܟ݂ܘܿܢ ܡ̣ܢ ܐܝܼܕܲܝ̈ ܟܠ ܥܲܡܡܹ̈ܐ ܘܡܲܠ̈ܟ̇ܘܵܬ̣ܵܐ ܠܵܐ ܐܸܫܟܲܚܘ ܠܲܡܦܲܨܵܝܘܼ ܡܕ݂ܝܼ̈ܢܵܬ̣ܗܘܿܢ ܡ̣ܢ ܐܝܼܕܲܝ̈. ܘܡ̣ܢ ܐܝܼܕ݂ܵܐ ܕܐܲܒ̣ܵܗܲܝ̈. ܘܐܵܦ ܐܲܠܵܗܟ݂ܘܿܢ ܠܵܐ ܡܸܫܟܲܚ ܠܲܡܦܲܨܵܝܘܼܬ̣ܟ݂ܘܿܢ ܡ̣ܢ ܐܝܼ̈ܕܲܝ.

16: ܗܵܠܹܝܢ ܡܲܠܸܠ̣ܘ ܗ̄ܘ̣ܵܘ ܥܲܒ̣ܕܵܘ̈ܗܝ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܲܩܕ݂ܵܡ ܚܹܙܲܩܝܵܐ ܥܲܒ̣ܕܹ̇ܗ.

17: ܘܲܟ݂ܬܲܒ̣ ܐܸܓ̇ܪ̈ܵܬ̣ܵܐ ܠܲܡܨܲܥܵܪܘܼ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܲܠܡܹܐܡܲܪ ܠܹܗ ܠܥܲܡܵܐ ܕܝܼܣܪܵܝܹܠ: ܕܐܲܠܵܗܹ̈ܐ ܕܲܡܕ݂ܝܼ̈ܢܵܬ̣ܵܐ ܗܵܠܹܝܢ: ܠܵܐ ܐܸܫܟܲܚܘ ܠܲܡܦܲܨܵܝܘܼ ܡܕ݂ܝܼ̈ܢܵܬ̣ܗܘܿܢ ܡ̣ܢ ܐܝܼܕܲܝ̈.

18: ܘܲܩ̣ܪܵܘ ܒܩܵܠܵܐ ܪܵܡܵܐ ܒܠܸܫܵܢܵܐ ܝܼܗܘܼܕ݂ܵܐ: ܠܥܲܡܵܐ ܕܝܵܬ̣ܒ̇ܝܼܢ ܥܲܠ ܫܘܼܪܵܐ ܕܐܘܿܪܸܫܠܸܡ. ܕܲܢܕܲܚܠܘܼܢ ܐܸܢܘܿܢ: ܘܲܢܙܘܼܥܘܼܢ ܐܸܢܘܿܢ: ܡܸܛܠ ܕܢܹܐܚܕ̇ܘܼܢ ܫܘܼܪܵܐ ܕܲܡܕ݂ܝܼܢ̄ܬܵܐ.

19: ܘܡܲܠܸܠܘ ܒܐܲܠܵܗܹ̈ܐ ܕܥܲܡܡܹ̈ܐ ܕܐܲܪܥܵܐ: ܘܐܵܦ ܒܐܲܠܵܗܵܐ ܕܫܲܠܝܼܛ ܒܐܘܿܪܸܫܠܸܡ. ܕܗ̤ܘ ܢܸܦܪܘܿܥ ܐܸܢܘܿܢ ܥܒ̣ܵܕܹ̈ܐ ܕܐܝܼܕܲܝ̈ܗܘܿܢ.

20: ܘܨܲܠܝܼ ܚܹܙܲܩܝܵܐ ܘܐܹܫܲܥܝܵܐ ܒܲܪ ܐܵܡܘܿܨ ܢܒ̣ܝܼܵܐ ܡܸܛܠ ܗܵܕܹܐ. ܘܲܫܡܲܥ̣ ܒܩܵܠܵܐ ܕܲܨܠܘܿܬ̣ܗܘܿܢ ܡܵܪܝܵܐ.

21: ܘܫܲܕܲܪ ܡܵܪܝܵܐ ܡܲܠܲܐܟ݂ܵܐ ܡ̣ܢ ܩܕ݂ܵܡܵܘܗܝ. ܘܲܚܪܲܒ̣ ܟܠܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܘܡܲܠ̈ܟܹ̇ܐ ܘܫܲܠܝܼܛܵܢܹ̈ܐ ܕܲܗܘ̤ܵܘ ܒܡܲܫܪܝܼܬܹܗ ܕܡܲܠܟܵܐ ܕܐܵܬ̣ܘܿܪ. ܘܲܗܦܲܟ݂ ܡܲܠܟܵܐ ܕܐܵܬ̣ܘܿܪ ܟܲܕ݂ ܒܲܗܝܼ̈ܬ̣ܵܢ ܐܲܦܵܘ̈ܗܝ ܠܲܡܕ݂ܝܼܢ̄ܬܹ̇ܗ. ܘܐܸܬ̣ܵܐ ܠܒܹܝܬ̣ ܐܲܠܵܗܵܘ̈ܗܝ. ܘܲܒ̣ܢܵܘ̈ܗܝ ܕܲܢܦܲܩ̣ܘ ܡ̣ܢ ܡܥܵܘ̈ܗܝ: ܬܲܡܵܢ ܩܲܛܠܘܼܗܝ ܒܚܲܪܒܵܐ.

22: ܘܲܦܪܲܩ ܡܵܪܝܵܐ ܠܚܹܙܲܩܝܵܐ: ܘܲܠܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܡ̣̤ ܐܝܼܕ݂ܵܘܗܝ ܕܣܲܢܚܹܪܝܼܒ̣ ܡܲܠܟܵܐ ܕܐܵܬ̣ܘܿܪ: ܘܡ̣ܢ ܐܝܼܕ݂ܵܐ ܕܟ݂ܠ ܒܲܥܠܲܝ̈ ܬܚܘܼܡܹܗ.

23: ܘܣܲܓ̇ܝܼ̈ܐܹܐ ܡ̣ܢ ܒܢܲܝ̈ ܝܼܣܪܵܝܹܠ: ܡܲܝܬܹ̇ܝܢ ܗ̄ܘ̣ܵܘ ܩܘܼܪ̈ܒܵܢܹܐ ܠܡܵܪܝܵܐ ܠܐܘܿܪܸܫܠܸܡ ܘܝܵܗ̄ܒ̇ܝܼܢ ܗ̄ܘ̣ܵܘ ܡܵܘ̈ܗܒ̣ܵܬ̣ܵܐ ܠܚܹܙܲܩܝܵܐ ܡܲܠܟܵܐ ܕܒܹܝܬ̣ ܝܼܗܘܼܕ݂ܵܐ. ܘܐܸܬ̇ܬ̇ܪܝܼܡ ܠܥܸܠ ܡ̣ܢ ܥܲܡܡܹ̈ܐ ܟܠܗܘܿܢ.

24: ܘܡ̣̤ܢ ܒܵܬܲܪ ܗܵܠܹܝܢ: ܒܝܵܘ̈ܡܵܬ̣ܵܐ ܗܵܢܘܿܢ: ܐܸܬ̣ܟ̇ܪܲܗ ܚܹܙܲܩܝܵܐ ܥܕܲܡܵܐ ܠܡܵܘܬܵܐ. ܘܨܲܠܝܼ ܩܕ݂ܵܡ ܡܵܪܝܵܐ ܘܐܸܡܲܪ: ܓܒܲܪ̈ܘܵܬ̣ܵܐ ܣܲܓ̇ܝܼܵܐ̈ܬ̣ܵܐ ܥ̣ܒܲܕ̇ܬ̇ ܠܝܼ. ܘܠܵܐ ܐܲܝܟ݂ ܥܒ̣ܵܕܹܐ ܐܝܼܕܲܝ̈ ܐܲܗܦܸܟ݂ܬ̇ ܠܝܼ.

25: ܘܗܵܟܲܢܵܐ ܟܘܼܪܗܵܢܵܐ ܕܐܸܬ̣ܟ̇ܪܲܗ ܚܹܙܲܩܝܵܐ: ܡܸܛܠ ܕܐܸܬ̇ܬ̇ܪܝܼܡ ܠܸܒܹ̇ܗ. ܘܲܗܘ̤ܵܐ ܥܠܵܘܗܝ ܪܘܼܓ̣ܙܵܐ ܕܡܵܪܝܵܐ: ܘܥܲܠ ܒܹܝܬ̣ ܝܼܗܘܼܕ݂ܵܐ: ܘܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ.

26: ܘܐܸܬ̣ܟ̇ܪܲܗ ܚܹܙܲܩܝܵܐ ܡܸܛܠ ܕܐܸܬ̇ܬ̇ܪܝܼܡ ܠܸܒܹ̇ܗ ܗ̤ܘ ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܘܠܵܐ ܐܸܬ̣ܵܐ ܥܠܲܝܗܘܿܢ ܪܘܼܓ̣ܙܵܐ ܕܡܵܪܝܵܐ ܒܝܵܘܡܵܘ̈ܗܝ ܕܚܹܙܲܩܝܵܐ.

27: ܘܲܗܘ̤ܵܐ ܠܚܹܙܲܩܝܵܐ ܥܘܼܬ̣ܪܵܐ ܘܐܝܼܩܵܪܵܐ ܣܘܿܓ̣ܵܐܐ ܕܛܵܒ̣: ܘܐܵܘܨܪܹ̈ܐ ܥ̣ܒܲܕ݂ ܠܹܗ: ܠܟܸܣܦܵܐ ܘܲܠܕܲܗܒ̣ܵܐ: ܘܲܠܟܹܐܦܹ̈ܐ ܛܵܒ̣ܵـ̈ـܬ̣ܵܐ: ܘܲܠܒܸܣܡܹ̈ܐ: ܘܠܲܡܓܲܢܹ̈ܐ: ܘܲܠܡܵܐܢܲܝ̈ ܪ̈ܵܓܲܝ ܪܸܓ̇ܬ̣ܵܐ.

28: ܘܐܵܘܨܪܹ̈ܐ ܠܥܲܠ̈ܠܵܬ̣ܵܐ ܕܲܥܒ̣ܘܼܪܵܐ ܘܲܕ݂ܚܲܡܪܵܐ ܘܲܕ݂ܡܸܫܚܵܐ: ܘܐܘܿܪ̈ܵܘܵܬ̣ܵܐ ܠܟ݂ܠܵܗ̇ ܒܥܝܼܪܵܐ.

29: ܘܩܘܼܪ̈ܝܵܐ ܠܲܒ̣ܥܝܼܪܵܐ: ܘܲܠܥܵـ̈ـܢܵܐ: ܘܲܠܬ̣ܵܘܪܹ̈ܐ: ܘܲܠܚܲܝ̈ܘܵܬ̣ܵܐ: ܡܸܛܠ ܕܝܲܗ̄ܒ̣ ܠܹܗ ܡܵܪܝܵܐ ܩܸܢܝܵܢܵܐ ܣܘܿܓ̣ܵܐܐ ܕܛܵܒ̣.

30: ܘܗ̤ܘ ܚܹܙܲܩܝܵܐ ܛ̣ܡܲܪ ܡܲܦܩܵܢܵܐ ܕܡܲـ̈ـܝܵܐ ܕܥܲܝܢܵܐ ܥܸܠܵܝܬܵܐ. ܘܲܫܪܵܐ ܐܸܢܘܿܢ ܠܓ̣ܘܼܒܵܐ ܡܲܥ̱ܪܒ̣ܵܝܵܐ ܕܲܩܪܝܼܬܹܗ ܕܕ݂ܵܘܝܼܕ݂. ܘܐܲܨܠܲܚ ܚܹܙܲܩܝܵܐ ܒܟ݂ܠܗܘܿܢ ܥܒ̣ܵܕ݂ܵܘ̈ܗܝ.

31: ܘܲܬ̣ܒܲܥ̣ ܗ̄ܘ̣ܵܐ ܢܵܡܘܿܣܵܐ ܕܡܵܪܝܵܐ ܐܲܝܟܲܢܵܐ ܕܠܹܗ ܝܼܗܝܼܒ̣ ܗ̄ܘ̣ܵܐ ܒܐܲܪܥܵܐ. ܘܝܼܕܲܥ̣ ܟܠܡܸܕܸ̇ܡ ܕܐܝܼܬ̣ ܒܠܸܒܹ̇ܗ.

32: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܚܹܙܲܩܝܵܐ: ܘܛܲܝܒ̇ܘܼܬܹ̈ܗ: ܘܐܘܼܪ̈ܚܵܬܹܗ ܫܲܦܝܼܪ̈ܵܬ̣ܵܐ: ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܲܢܒ̣ܝܼܘܼܬܹܗ ܕܐܹܫܲܥܝܵܐ ܒܲܪ ܐܵܡܘܿܨ ܢܒ̣ܝܼܵܐ: ܘܲܒ̣ܣܸܦܪܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ ܘܕ݂ܝܼܣܪܵܝܹܠ.

33: ܘܲܫܟܸܒ̣ ܚܹܙܲܩܝܵܐ ܥܲܡ ܐܲܒ̣ܵܗܵܬܹ̈ܗ: ܘܩܲܒ̣ܪܘܼܗܝ ܒܲܩܪܝܼܬܹܗ ܕܕ݂ܵܘܝܼܕ݂. ܘܐܝܼܩܵܪܵܐ ܪܲܒܵܐ ܥ̣ܒܲܕ݂ܘ ܠܹܗ ܒܡܵܘܬܹ̇ܗ: ܟܠܗܘܿܢ ܕܒܹܝܬ̣ ܝܼܗܘܼܕ݂ܵܐ. ܘܲܗ̣ܦܲܟ݂ܘ ܠܐܘܿܪܸܫܠܸܡ. ܘܐܲܡ̣ܠܸܟ݂ ܡܢܲܫܹܐ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܠܓ.

1: ܒܲܪ ܬܲܪܬܲܥܸܣܪܹ̈ܐ ܗ̄ܘ̣ܵܐ ܫܢ̈ܝܼܢ ܡܢܲܫܹܐ: ܟܲܕ݂ ܩܵܡ̣ ܒܡܲܠܟ̇ܘܼܬܹܗ. ܘܚܲܡܫܝܼܢ ܘܚܲܡܸܫ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ.

2: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟ݂ ܥܒ̣ܵܕܹ̈ܐ ܕܥܲܡܡܹ̈ܐ: ܕܐܵܘܒܸ̇ܕ݂ ܐܸܢܘܿܢ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ.

3: ܘܲܗܦܲܟ݂ ܘܲܒ̣ܢܵܐ ܡܲܕ݂ܒ̇ܚܹ̈ܐ ܕܲܥܩܲܪ ܚܹܙܲܩܝܵܐ ܐܲܒ̣ܘܼܗܝ ܘܐܲܩܝܼܡ ܥ̈ܠܵܘܵܬ̣ܵܐ ܠܲܦܬܲܟ݂ܪܹ̈ܐ. ܘܲܥ̣ܒܲܕ݂ ܢܸܡܪܹ̈ܐ: ܘܲܣܓܸܕ݂ ܠܗܘܿܢ: ܘܲܣܓܸܕ݂ ܠܟ݂ܠܗܘܿܢ ܚܲܝ̈ܠܵܘܵܬ̣ܵܐ ܕܲܫܡܲܝܵܐ: ܒܬܲܪܬܹ̇ܝܢ ܕܵܪ̈ܝܼܢ ܕܒܲܝܬܹ̇ܗ ܕܡܵܪܝܵܐ.

6: ܘܐܵܦ ܗ̤ܘ ܐܲܥܒܲܪ ܒܪܹܗ ܒܢܘܼܪܵܐ: ܒܢܲܚܠܵܐ ܪܲܒܵܐ. ܘܐܸܚܲܕ݂ ܥܲܝܢܹ̈ܐ. ܘܲܢܚܲܫ ܢܸܚܫܹ̈ܐ. ܘܲܥܒܲܕ݂ ܚܲܪ̈ܵܫܹܐ ܘܫܲܐܸܠ ܒܟܲܠܕ݂ܵܝܹ̈ܐ: ܘܲܒ̣ܙܲܟ̇ܘܼܪܹ̈ܐ. ܘܐܲܣܓ̇ܝܼ ܠܡܸܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܘܲܠܡܲܪܓܵܙܘܼ ܩܕ݂ܵܡܵܘܗܝ.

7: ܘܣܵܡܹܗ ܠܨܲܠܡܵܐ ܕܐܼܲܒܲܥ ܐܲܦ̈ܝܼܢ ܕܲܥ̣ܒܲܕ݂ ܒܒܲܝܬܹ̇ܗ ܕܡܵܪܝܵܐ: ܕܐܸܡܲܪ ܡܵܪܝܵܐ ܠܕ݂ܵܘܝܼܕ݂: ܘܠܲܫܠܹܝܡܘܿܢ ܒܪܹܗ: ܒܒܲܝܬܵܐ ܗܵܢܵܐ ܕܒ̣ܐܘܿܪܸܫܠܸܡ: ܕܲܓ̣ܒܹܝܬ̣ ܠܝܼ ܡ̣ܢ ܟܠܗܘܿܢ ܫܲܒ̣ܛܹ̈ܐ ܕܝܼܣܪܵܝܹܠ: ܐܲܫܪܸܐ ܫܟ݂ܝܼܢܲܬ̣ܝ ܠܥܵܠܲܡ.

8: ܘܠܵܐ ܐܵܘܣܸܦ ܬܘܼܒ̣ ܠܡܲܦܵܩܘܼ ܠܝܼܣܪܵܝܹܠ ܡ̣ܢ ܐܲܪܥܵܐ ܗܵܕܹܐ: ܕܝܸܗ̄ܒܹ̇ܬ̣ ܠܐܲܒ̣ܵܗܲܝ̈ܗܘܿܢ. ܒܲܠܚܘܼܕ݂ ܐܸܢܗ̤ܘ ܕܢܸܛܪܘܼܢ ܠܡܸܥܒܲܕ݂ ܟܠ ܡܸܕܸ̇ܡ ܕܦܲܩܕܹ̇ܬ̣ ܐܸܢܘܿܢ: ܘܲܠܟ݂ܠܹܗ ܢܵܡܘܿܣܵܐ: ܘܠܲܩܝܵܡܲܝ̈ ܘܲܠܕ݂ܝܼ̈ܢܲܝ: ܕܦܲܩܸܕ݂ ܐܸܢܘܿܢ ܥܲܒ̣ܕ̇ܝ ܡܘܼܫܹܐ.

9: ܘܐܲܛܥܝܼ ܡܢܲܫܹܐ ܠܲܝܗܘܼܕ݂ܵܐ: ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܠܡܸܥܒܲܕ݂ ܥܒ̣ܵܕܹ̈ܐ ܒܝܼܫܹ̈ܐ: ܐܲܝܟ݂ ܥܲܡܡܹ̈ܐ ܕܐܵܘܒܸ̇ܕ݂ ܡܵܪܝܵܐ ܡܢ ܩܕ݂ܵܡ ܒܢܲܝ̈ ܝܼܣܪܵܝܹܠ.

10: ܘܡܲܠܸܠ̣ ܡܵܪܝܵܐ ܥܲܡ ܡܢܲܫܹܐ ܘܥܲܡ ܥܲܡܹܗ: ܘܠܵܐ ܩܲܒܸ̇ܠܘ.

11: ܘܐܲܝܬ̇ܝܼ ܡܵܪܝܵܐ ܥܠܲܝܗܘܿܢ ܪܵܘ̱ܪ̈ܒ̣ܵܢܲܝ ܚܲܝܠܵܐ ܕܡܲܠܟܵܐ ܕܐܵܬ̣ܘܿܪ. ܘܐܸܚܲܕ݂ܘ ܠܲܡܢܲܫܹܐ ܒܚܲܝܵܘ̈ܗܝ ܘܐܲܣܪܘܼܗܝ ܒܫܸܫ̈ܠܵܬ̣ܵܐ: ܘܐܵܘܒ̇ܠܘܼܗܝ ܠܒ̣ܵܒܹܠ.

12: ܘܟܲܕ݂ ܥܵܩܲܬ̤ ܠܹܗ: ܨܲܠܝܼ ܩܕ݂ܵܡ ܡܵܪܝܵܐ ܐܲܠܵܗܹܗ. ܘܲܕ݂ܚܸܠ̣ ܛܵܒ̣ ܡ̣ܢ ܩܕ݂ܵܡ ܡܵܪܝܵܐ ܐܲܠܵܗܵܐ ܕܐܲܒ̣ܵܗܵܘ̈ܗܝ.

13: ܘܨܠܝܼ ܩܕ݂ܵܡ ܡܵܪܝܵܐ: ܘܲܫܡܲܥ ܒܩܵܠܹܗ: ܘܩܲܒܸ̇ܠ ܨܠܘܿܬܹܗ ܘܐܲܗܦܟܹܗ ܠܐܘܿܪܸܫܠܸܡ ܒܡܲܠܟ̇ܘܼܬܹܗ. ܘܝܼܕܲܥ̣ ܡܢܲܫܹܐ ܕܡܵܪܝܵܐ ܗ̄ܘ̣ ܐܲܠܵܗܵܐ.

14: ܘܡ̣ܢ ܒܵܬܲܪ ܗܵܠܹܝܢ ܒܢ̣ܵܐ ܫܘܼܪܵܐ ܒܲܪܵܝܵܐ ܠܲܩܪܝܼܬܹܗ ܕܕ݂ܵܘܝܼܕ݂: ܡ̣ܢ ܡܲܥ̱ܪܒ̣ܵܝܵܐ ܕܓ̣ܚܘܿܢ ܢܲܗܪܵܐ: ܘܲܠܡܲܥܠܵܢܵܐ ܕܬܲܪܥܵܐ ܕܨܲܝܵܕܹ̈ܐ. ܘܐܲܟ݂ܪ̱ܟ݂ܵܗ̇ ܠܟ݂ܠܵܗ̇ ܐܘܿܪܸܫܠܸܡ ܫܘܼܪܵܐ ܒܲܪܵܝܵܐ. ܘܐܲܪܝܼܡܹܗ ܛܵܒ̣. ܘܐܲܩܝܼܡ ܪܵܘ̱ܪ̈ܒ̣ܵܢܲܝ ܚܲܝܠܵܐ: ܒܟ݂ܠܗܹܝܢ ܩܘܼܪ̈ܝܵܐ ܪ̈ܵܡܵܬ̣ܵܐ ܕܒܹܝܬ̣ ܝܼܗܘܼܕ݂ܵܐ.

15: ܘܐܲܥܒܲܪ ܐܲܠܵܗܹ̈ܐ ܢܘܼܟ݂ܪ̈ܵܝܹܐ: ܘܨܲܠܡܹ̈ܐ ܓܠܝܼܦܹ̈ܐ ܕܐܝܼܬ̣ ܒܒܲܝܬܹ̇ܗ ܕܡܵܪܝܵܐ: ܘܟ݂ܠܗܹܝܢ ܥܠܵـ̈ـܘܵܬ̣ܵܐ ܕܲܒ̣ܢܵܐ ܗ̄ܘ̣ܵܐ ܒܛܘܼܪ ܒܲܝܬܵܐ ܕܡܵܪܝܵܐ ܘܒ̣ܐܘܿܪܸܫܠܸܡ. ܘܲܫܕ݂ܵܐ ܐܸܢܘܿܢ ܠܒܲܪ ܡ̣ܢ ܩܪܝܼܬ̣ܵܐ.

16: ܘܲܒ̣ܢ̣ܵܐ ܡܲܕ݂ܒ̇ܚܵܐ ܠܡܵܪܝܵܐ. ܘܕܲܒܲܚ̣ ܥܠܵـ̈ـܘܵܬ̣ܵܐ ܘܕܸܒ̣ܚܹ̈ܐ ܫܲܠܡܹ̈ܐ ܘܬ̣ܵܘܪܹ̈ܐ. ܘܐܸܡܲܪ ܠܲܝܗܘܼܕ݂ܵܐ ܠܡܸܥܒܲܕ݂ ܠܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܬܘܼܒ̣ ܥܹܐܕ݂ܵܐ.

17: ܘܕܸܒ̣ܚܹ̈ܐ ܐ̄ܚܪ̈ܵܢܹܐ ܘܲܥ̈ܠܵܘܵܬ̣ܵܐ ܠܵܐ ܬܲܣܩܘܼܢ: ܐܸܠܵܐ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ.

18: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܲܡܢܲܫܹܐ: ܘܲܨܠܘܿܬܹܗ ܕܲܩܕ݂ܵܡ ܐܲܠܵܗܵܐ: ܘܦܸܬ̣ܓ̣ܵܡܹ̈ܐ ܕܲܢܒ̣ܝܹ̈ܐ ܕܐܸܬ̣ܢܲܒ̇ܝܼܘ ܥܠܵܘܗܝ ܒܲܫܡܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܦܸܬ̣ܓ̣ܵܡܹ̈ܐ ܕܡܲܠ̈ܟܹ̇ܐ ܕܝܼܣܪܵܝܹܠ ܘܕܲܝܗܘܼܕ݂ܵܐ.

19: ܘܲܨܠܘܿܬܹܗ ܕܐܸܫܬܲܡܥܲܬ̤ ܒܩܵܠܹܗ: ܘܟ݂ܠܗܘܿܢ ܚܛܵܗܵܘ̈ܗܝ ܘܥܵܘܼܠܹܗ: ܘܕ݂ܘܼܟ̇ـ̈ـܝܵܬ̣ܵܐ ܕܲܒ̣ܢܵܐ ܒܗܹܝܢ ܡܲܕ݂ܒ̇ܚܹ̈ܐ: ܘܐܲܩܝܼܡ ܟܘܼܡܪܹ̈ܐ. ܘܲܥܒܲܕ݂ ܚܘܼܓ̣̈ܒܹ̇ܐ ܠܲܦܬܲܟ݂ܪܹ̈ܐ. ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܦܸܬ̣ܓ̣ܵܡܵܘ̈ܗܝ ܕܚܲܢܲܢ ܢܒ̣ܝܼܵܐ.

20: ܘܲܫܟܸܒ̣ ܡܢܲܫܹܐ ܥܲܡ ܐܲܒ̣ܵـ̈ـܗܵܬܹܗ. ܘܩܲܒ̣ܪܘܼܗܝ ܒܒܲܝܬܹ̇ܗ ܒܓܲܢܲܬ̣ ܓܲܙܵܐ. ܘܐܲܡ̣ܠܸܟ݂ ܐܲܡܘܿܢ ܒܪܹܗ ܒܵܬ̣ܪܹܗ.

21: ܒܲܪ ܥܸܣܪܝܼܢ ܘܬܲܪܬܹ̇ܝܢ ܫܢ̈ܝܼܢ ܐܲܡܘܿܢ ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܬܲܪܬܹ̇ܝܢ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ.

22: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ: ܐܲܝܟܲܢܵܐ ܕܲܥܒܲܕ݂ ܡܢܲܫܹܐ ܐܲܒ̣ܘܼܗܝ ܘܲܠܟ݂ܠܗܘܿܢ ܨܲܠܡܹ̈ܐ ܘܲܦܬܲܟ݂ܪܹ̈ܐ ܕܲܥܒܲܕ݂ ܡܢܲܫܹܐ ܐܲܒ̣ܘܼܗܝ: ܕܲܒܲܚ̣ ܐܲܡܘܿܢ ܘܲܣܓܸܕ݂.

23: ܘܠܵܐ ܙܵܥ̣ ܡ̣ܢ ܩܕ݂ܵܡ ܡܵܪܝܵܐ ܐܲܠܵܗܹܗ: ܡܸܛܠ ܕܗ̤ܘ ܡܢܲܫܹܐ ܙܵܥ̣ ܗ̄ܘ̣ܵܐ ܡ̣ܢ ܩܕ݂ܵܡ ܡܵܪܝܵܐ ܐܲܠܵܗܹܗ. ܡܸܛܠ ܕܗ̤ܘ ܐܲܡܘܿܢ ܐܲܣܓ̇ܝܼ ܗ̄ܘ̣ܵܐ ܠܡܸܚܛܵܐ.

24: ܘܐܸܬ̣ܢ̱ܟܸܠܘ ܥܠܵܘܗܝ ܥܲܒ̣ܕܵܘ̈ܗܝ: ܘܩܲܛܠܘܼܗܝ ܒܒܲܝܬܹ̇ܗ.

25: ܘܲܩܛܲܠܘ ܥܲܡܵܐ ܕܐܲܪܥܵܐ ܠܟ݂ܠ ܡܲܢ ܕܐܸܬ̣ܢ̱ܟܸܠ ܥܲܠ ܡܲܠܟܵܐ ܐܲܡܘܿܢ. ܘܐܲܡ̣ܠܸܟ݂ܘ ܥܲܡܵܐ ܕܐܲܪܥܵܐ: ܠܝܘܿܫܝܼܵܐ ܒܪܹܗ ܒܵܬ̣ܪܹܗ.

ܩܹܦܵܠܹܐܘܿܢ: ܠܕ.

1: ܒܲܪ ܬܡܵܢܹܐ ܫܢ̈ܝܼܢ ܝܘܿܫܝܼܵܐ ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܠܵܬ̣ܝܼܢ ܘܲܚܕ݂ܵܐ ܫܲܢ̄ܬܵܐ ܐܲܡ̣ܠܸܟ݂ ܒܐܘܿܪܸܫܠܸܡ.

2: ܘܲܥ̣ܒܲܕ݂ ܕܫܲܦܝܼܪ ܩܕ݂ܵܡ ܡܵܪܝܵܐ. ܘܗܲܠܸܟ݂ ܒܐܘܼܪ̈ܚܵܬܹܗ ܕܕ݂ܵܘܝܼܕ݂ ܐܲܒ̣ܘܼܗܝ ܘܠܵܐ ܣܛ̣ܵܐ ܡܸܢܗܹܝܢ ܠܵܐ ܠܝܲܡܝܼܢܵܐ ܘܠܵܐ ܠܣܸܡܵܠܵܐ.

3: ܘܒܲܬ̣ܡܵܢܹܐ ܫܢ̈ܝܼܢ ܠܡܲܠܟ̇ܘܼܬܹܗ: ܥܕܲܡܵܐ ܠܗܵܫܵܐ ܗ̄ܘ̣ ܛܲܠܝܵܐ ܗ̄ܘ̣ܵܐ ܙܥܘܿܪܵܐ. ܘܫܲܪܝܼ ܗ̄ܘ̣ܵܐ ܠܲܡܨܲܠܵܝܘܼ ܠܐܲܠܵܗܹܗ ܕܕ݂ܵܘܝܼܕ݂ ܐܲܒ̣ܘܼܗܝ ܘܒܲܫܢܲܬ̣ ܬܲܪܬܲܥܸܣܪܹ̈ܐ ܫܢ̈ܝܼܢ: ܫܲܪܝܼ ܗ̄ܘ̣ܵܐ ܠܲܡܕܲܟܵܝܘܼ ܠܲܝܗܘܼܕ݂ܵܐ: ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܘܫܲܪܝܼ ܗ̄ܘ̣ܵܐ ܠܡܸܥܩܲܪ ܥܠܵـ̈ـܘܵܬ̣ܵܐ ܘܲܦܬܲܟ݂ܪܹ̈ܐ: ܘܢܸܡܪܹ̈ܐ ܘܚܘܼ̈ܓ̣ܒܹ̇ܐ.

4: ܘܥܸܩܹ̈ܐ: ܘܙܲܓܹ̈ܐ: ܘܟ݂ܠ ܐܝܼܠܵܢܝܼܢ ܕܥܵܒ̣ܕ̇ܝܼܢ ܗ̄ܘ̣ܵܘ ܠܲܦܬܲܟ݂ܪܹ̈ܐ: ܬܲܒܲܪ: ܘܐܲܕܸ̇ܩ: ܘܲܕ݂ܪܵܐ ܩܸܛܡ̱ܗܘܿܢ ܒܹܝܬ̣ ܩܲܒ̣ܪܹ̈ܐ ܕܲܒ̣ܢܲܝ̈ ܐ̄ܢܵܫܵܐ: ܕܲܡܕܲܒ̇ܚܝܼܢ ܗ̄ܘ̣ܵܘ ܠܗܘܿܢ.

5: ܘܓܲܪ̈ܡܹܐ ܕܟ݂ܘܼܡܪܹ̈ܐ ܕܦܵܠܚܝܼܢ ܗ̄ܘ̣ܵܘ ܠܗܘܿܢ: ܚܲܛܘ ܐܸܢܘܿܢ ܡ̣ܢ ܩܲܒ̣ܪ̈ܲܝܗܘܿܢ. ܘܐܲܝܬ̇ܝܼܘ ܘܐܵܘܩܸܕ݂ܘ ܐܸܢܘܿܢ. ܘܕܲܟ̇ܝܼ ܠܲܝܗܘܼܕ݂ܵܐ ܘܠܐܘܿܪܸܫܠܸܡ.

6: ܘܲܠܩܘܼܪ̈ܝܵܐ ܕܒܹܝܬ̣ ܡܢܲܫܹܐ ܘܒܹܝܬ̣ ܐܲܦܪܹܝܡ: ܘܲܕ݂ܫܸܡܥܘܿܢ: ܘܲܕ݂ܢܲܦ̮ܬܵܠܝܼ: ܒܫܘܼܩܲܝ̈ܗܘܿܢ ܟܲܕ݂ ܚܵܕ݂ܪܝܼܢ.

7: ܘܲܥܩܲܪ ܡܲܕ݂ܒ̇ܚܹ̈ܐ: ܘܬܲܒܲܪ ܨܲܠܡܹ̈ܐ: ܥܕܲܡܵܐ ܕܐܲܕܸ̇ܩ ܐܸܢܘܿܢ ܐܲܝܟ݂ ܥܲܦܪܵܐ ܘܲܕ݂ܪܵܐ ܐܸܢܘܿܢ ܒܟ݂ܠܵܗ̇ ܐܲܪܥܵܐ ܕܝܼܣܪܵܝܹܠ ܘܲܗܦܲܟ݂ ܘܐܸܬ̣ܵܐ ܠܐܘܿܪܸܫܠܸܡ.

8: ܘܒܲܫܢܲܬ̣ ܬܡܵܢܲܥܸܣܪܹ̈ܐ ܫܢܝܼ̈ܢ ܠܡܲܠܟ̇ܘܼܬܹܗ: ܕܲܟ̇ܝܼ ܐܲܪܥܵܐ ܕܝܼܣܪܵܝܹܠ: ܘܒܲܝܬܹ̇ܗ. ܘܫܲܕܲܪ ܠܫܵܦܵܢ ܒܲܪ ܐܲܠܨܝܵܐ: ܘܠܲܡܥܲܣܝܵܐ ܣܵܦܪܵܐ ܕܲܩܪܝܼܬ̣ܵܐ. ܘܐܸܡܲܪ ܠܗܘܿܢ: ܙܸܠܘ ܘܲܒ̣ܕ݂ܘܿܩܘ ܒܲܝܬܹ̇ܗ ܕܡܵܪܝܵܐ ܐܲܠܵܗܟ݂ܘܿܢ.

9: ܘܐܸܬ̣ܵܘ ܠܘܵܬ̣ ܚܹܠܲܩܝܵܐ ܟܵܗܢܵܐ ܪܲܒܵܐ. ܘܝܲܗ̄ܒ̣ܘ ܟܸܣܦܵܐ ܕܥܲܠ ܠܒܲܝܬܹ̇ܗ ܕܡܵܪܝܵܐ: ܕܟܲܢܸܫܘ ܠܹܘܵܝܹ̈ܐ ܢܵܛܪ̈ܲܝ ܬܲܪ̈ܥܹܐ: ܡ̣ܢ ܐܝܼܕ݂ܵܐ ܕܲܡܢܲܫܹܐ ܘܕܲܐܦܪܹܝܡ: ܘܡ̣ܢ ܐܝܼܕ݂ܵܐ ܕܟ݂ܠܹܗ ܝܼܣܪܵܝܹܠ: ܘܡ̣ܢ ܟܠܹܗ ܝܼܗܘܼܕ݂ܵܐ ܘܒܸܢܝܵܡܹܝܢ: ܘܡܢ ܟܠܗܘܿܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ.

10: ܘܝܲܗ̄ܒ̣ܘ ܥܲܠ ܐܝܼܕ݂ܵܐ ܕܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ: ܕܲܡܫܲܠܛܝܼܢ ܒܒܲܝܬܹ̇ܗ ܕܡܵܪܝܵܐ: ܘܝܵܗ̄ܒ̇ܝܼܢ ܟܸܣܦܵܐ ܠܥܵܒ̣ܕܲܝ̈ ܥܒ̣̈ܝܼܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ: ܠܲܒ̣ܕ݂ܵܩܵܐ ܘܠܲܛܪܵܝܵܐ ܕܒܲܝܬܵܐ.

11: ܘܝܵܗ̄ܒ̇ܝܼܢ ܠܢܲܓܵܪܹ̈ܐ ܘܲܠܒܲܢܵܝܹ̈ܐ ܘܲܠܙܵܒ̣ܢܲܝ̈ ܛܵܒ̣̈ܥܹܐ ܛܵܒܹ̈ܐ: ܘܩܲܝܣܹ̈ܐ ܠܲܒ̣ܕ݂ܵܩܵܐ ܘܲܠܛܪܵܝܵܐ ܕܒܲܝܬܵܐ: ܕܲܩܦܲܠܘ ܡܲܠ̈ܟܹ̇ܐ ܕܲܝܗܘܼܕ݂ܵܐ.

12: ܘܓܲܒ̣ܪܹ̈ܐ ܥܵܒ̣ܕ̇ܝܼܢ ܗ̄ܘ̣ܵܘ ܒܗܲܝܡܵܢܘܼܬ̣ܵܐ: ܒܲܥܒ̣ܝܼ̈ܕ݂ܵܬ̣ܵܐ ܕܡܲܩܕ̇ܫܵܐ. ܘܲܥܠܲܝܗܘܿܢ ܫܲܠܝܼܛܝܼܢ ܗ̄ܘ̣ܵܘ: ܢܵܚܵܬ̣ ܘܥܘܿܒܲܕ݂ܝܵܐ ܒܢܲܝ̈ ܡܪܵܪܝܼ: ܘܲܙܟܲܪܝܵܐ ܘܫܵܠܘܿܡ ܒܢܲܝ̈ ܩܵܗܵܬ̣: ܘܲܡܫܲܒ̇ܚܵܢܹ̈ܐ ܘܠܹܘܵܝܹ̈ܐ ܐܲܝܠܹܝܢ ܕܲܡܫܲܒ̇ܚܝܼܢ ܗ̄ܘ̣ܵܘ ܒܡܵܐܢܲܝ̈ ܬܸܫ̈ܒ̇ܚܵܬ̣ܵܐ.

13: ܘܟ݂ܠ ܥܵܒ̣ܕܲܝ̈ ܥܒ̣ܝ̣̈ܕ݂ܵܬ̣ܵܐ ܠܲܥܒ̣ܝܼ̈ܕ݂ܵܬ̣ܵܐ: ܘܡ̣ܢ ܠܹܘܵܝܹ̈ܐ: ܣܵܦܪܹ̈ܐ ܘܪܵܘ̱ܪ̈ܒ̣ܵܢܹܐ ܘܬ̣ܵܪ̈ܥܹܐ.

14: ܘܟܲܕ݂ ܡܲܦܩܝܼܢ ܗ̄ܘ̣ܵܘ ܟܸܣܦܵܐ ܕܥܵܐܹ̇ܠ ܠܒܲܝܬܹ̇ܗ ܕܡܵܪܝܵܐ: ܐܸܫܟܲܚ ܗ̄ܘ̣ܵܐ ܚܹܠܲܩܝܵܐ ܟܵܗܢܵܐ: ܣܸܦܪܵܐ ܕܐܘܿܪܵܝܬܵܐ ܕܡܵܪܝܵܐ: ܕܐܸܬ̣̱ܝܼܗܸܒ̣ ܗ̄ܘ̣ܵܐ ܥܲܠ ܐܝܼܕ݂ܵܐ ܕܡܘܼܫܹܐ.

15: ܘܲܥܢ̣ܵܐ ܚܹܠܲܩܝܵܐ ܟܵܗܢܵܐ: ܘܐܸܡܲܪ ܠܫܵܦܵܢ ܣܵܦܪܵܐ: ܣܸܦܪܵܐ ܕܐܘܿܪܵܝܬܵܐ ܐܸܫܟ̇ܚܹܬ̣ ܒܒܲܝܬܹ̇ܗ ܕܡܵܪܝܵܐ. ܘܝܲܗ̄ܒ̣ ܚܹܠܲܩܝܵܐ ܣܸܦܪܵܐ ܠܫܵܦܵܢ.

16: ܘܐܸܡܲܪ ܫܵܦܵܢ ܣܵܦܪܵܐ ܠܡܲܠܟܵܐ: ܟܠ ܡܸܕܸ̇ܡ ܕܐܸܡܲܪ ܠܹܗ ܚܹܠܲܩܝܵܐ ܘܐܲܬ̣ܝܼܒܹܗ ܦܸܬ̣ܓ̣ܵܡܵܐ: ܘܐܸܡܲܪ ܠܹܗ: ܟܠܡܸܕܸ̇ܡ ܕܝܲܗ̄ܒ̣ܬ̇ ܒܐܝܼܕ݂ܵܐ ܕܥܲܒ̣ܕܲܝ̈ܟ: ܗܸܢܘܿܢ ܥܵܒ̣ܕ̇ܝܼܢ.

17: ܘܡܲܦܩܝܼܢ ܟܸܣܦܵܐ ܠܲܒ̣ܕ݂ܵܩܵܐ ܕܒܲܝܬܵܐ ܕܡܵܪܝܵܐ: ܘܝܵܗ̄ܒ̇ܝܼܢ ܚܘܼܫܒܵܢܵܐ ܠܩܲܝܘܼܡܹ̈ܐ ܘܲܠܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ.

18: ܘܚܵܘܝܼ ܫܵܦܵܢ ܣܵܦܪܵܐ ܠܡܲܠܟܵܐ: ܘܐܸܡܲܪ: ܣܸܦܪܵܐ ܝܲܗ̄ܒ̣ ܠܝܼ ܚܹܠܲܩܝܵܐ ܟܵܗܢܵܐ: ܘܲܩܪܵܐ ܒܹܗ ܫܵܦܵܢ ܩܕ݂ܵܡ ܡܲܠܟܵܐ.

19: ܘܲܗܘ̤ܵܐ ܕܟܲܕ݂ ܫ̣ܡܲܥ ܡܲܠܟܵܐ ܦܸܬ̣ܓ̣ܵܡܵܘ̈ܗܝ ܕܢܵܡܘܿܣܵܐ: ܣܲܕܸ̇ܩ ܢܲܚܬܵܘ̈ܗܝ.

20: ܘܲܦܩܲܕ݂ ܡܲܠܟܵܐ ܠܚܹܠܲܩܝܵܐ: ܘܠܲܐܚܩܘܼܡ ܒܲܪ ܫܵܦܵܢ: ܘܠܲܥܒܲܟ̇ܘܿܪ ܒܲܪ ܡܝܼܟ݂ܵܐ: ܘܲܠܫܵܦܵܢ ܣܵܦܪܵܐ: ܘܠܵܐܣܵܝܵܐ ܪܲܒ̇ ܒܲܝܬܹ̇ܗ ܕܡܲܠܟܵܐ: ܘܐܸܡܲܪ ܠܗܘܿܢ.

21: ܙܸܠܘ ܨܲܠܵܘ ܩܕ݂ܵܡ ܡܵܪܝܵܐ ܥܠܲܝ: ܘܥܲܠ ܥܲܡܵܐ ܕܝܼܣܪܵܝܹܠ: ܘܥܲܠ ܝܼܗܘܼܕ݂ܵܐ: ܥܲܠ ܦܸܬ̣ܓ̣ܵܡܵܘ̈ܗܝ ܕܣܸܦܪܵܐ ܗܵܢܵܐ ܕܐܸܫܬ̇ܟܲܚ ܡܸܛܠ ܕܣܲܓܝܼܵܐܐ ܗ̄ܝ̣ ܚܸܡܬܹܗ ܕܡܵܪܝܵܐ: ܕܗ̤ܝ ܐܵܬ̣ܝܵܐ ܥܠܲܝܢ. ܥܲܠ ܕܠܵܐ ܫܡܲܥ̣ܘ ܐܲܒ̣ܵܗܲܝ̈ܢ ܦܸܬ̣ܓ̣ܵܡܵܘ̈ܗܝ ܕܡܼܵܝܵܐ: ܠܡܸܥܒܲܕ݂ ܟܠܡܵܐ ܕܲܟ݂ܬ̣ܝܼܒ̣ ܥܠܲܝܢ ܒܣܸܦܪܵܐ ܗܵܢܵܐ.

22: ܘܐܸܙܲܠ̣ ܚܹܠܲܩܝܵܐ: ܘܗܵܠܹܝܢ ܟܠܗܘܿܢ ܕܫܲܕܲܪ ܡܲܠܟܵܐ ܠܘܵܬ̣ ܚܘܼܠܕ̇ܝܼ ܢܒ̣ܝܼܬ̣ܵܐ ܐܲܢ̄ܬܲܬ̣ ܫܵܠܘܿܡ ܒܲܪ ܬܲܩܘܵܐ: ܒܲܪ ܚܸܣܪܵܐ ܢܵܛܲܪ ܡܵܐܢܹ̈ܐ: ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܒܓ̣ܵܘ ܐܘܿܪܸܫܠܸܡ: ܒܝܘܼܠܦܵܢܵܐ. ܘܡܲܠܸܠ̣ܘ ܥܲܡܵܗ̇ ܐܲܝܟ݂ ܦܘܼܩܕܵܢܵܐ ܕܡܲܠܟܵܐ.

23: ܘܐܵܡܪܵܐ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܕܝܼܣܪܵܝܹܠ: ܐܸܡܲܪܘ ܠܓܲܒ̣ܪܵܐ ܕܫܲܕܲܪܟ݂ܘܿܢ ܠܘܵܬ̣ܝ.

24: ܗܵܟܲܢܵܐ. ܐܵܡܲܪ ܡܵܪܝܵܐ: ܗܵܐ ܡܲܝܬܸ̇ܐ ܐ̄ܢܵܐ ܒܝܼܫܬܵܐ ܥܲܠ ܐܲܬ̣ܪܵܐ ܗܵܢܵܐ: ܘܥܲܠ ܥܵܡܘܿܪ̈ܵܘܗܝ: ܟܠܗܹܝܢ ܠܵܘ̈ܛܵܬ̣ܵܐ ܕܲܟ݂ܬ̣ܝܼ̈ܒ̣ܵܢ ܥܲܠ ܣܸܦܪܵܐ ܕܲܩܪܵܘ ܩܕ݂ܵܡ ܡܲܠܟܵܐ ܕܲܝܗܘܼܕ݂ܵܐ.

25: ܡܸܛܠ ܕܫܲܒ̣ܩܘܼܢܝ: ܘܲܕ݂ܚܸܠ̣ܘ ܠܐܲܠܵܗܹ̈ܐ ܐ̄ܚܪ̈ܵܢܹܐ. ܘܐܲܪܓ̇ܙܘܼܢܝ ܒܲܥܒ̣ܵܕ݂ ܐܝܼܕܲܝ̈ܗܘܿܢ. ܘܬܹܐܬܹܐ ܚܸܡܬ̣ܝ ܥܲܠ ܐܲܬ̣ܪܵܐ ܗܵܢܵܐ: ܘܠܵܐ ܬܸܕ݂ܥܲܟ݂.

26: ܘܥܲܠ ܡܲܠܟܵܐ ܕܲܝܗܘܼܕ݂ܵܐ ܕܫܲܕܲܪܟ݂ܘܿܢ ܠܡܸܫܐܲܠ ܡ̣ܢ ܡܵܪܝܵܐ: ܗܵܟܲܢܵܐ ܬܹܐܡܪܘܿܢ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܦܸܬ̣ܓ̣ܵܡܹ̈ܐ ܕܲܫܡܲܥܬ̇.

27: ܚܠܵܦ ܕܐܸܬ̇ܬ̇ܒܲܪ ܠܸܒܵܟ݂: ܘܙܵܥܬ̇ ܡ̣ܢ ܩܕ݂ܵܡ ܡܵܪܝܵܐ: ܟܲܕ݂ ܫ̣ܡܲܥܬ̇ ܦܸܬ̣ܓ̣ܵܡܹ̈ܐ ܗܵܠܹܝܢ ܕܡܲܝܬܸ̇ܐ ܐ̄ܢܵܐ ܥܲܠ ܐܲܬ̣ܪܵܐ ܗܵܢܵܐ: ܘܥܲܠ ܥܵܡܘܿܪ̈ܵܘܗܝ. ܘܐܸܬ̇ܬ̇ܒܲܪܬ̇ ܩܕ݂ܵܡܲܝ: ܘܣܲܕܸ̇ܩܬ̇ ܢܲܚܬܲܝ̈ܟ: ܘܲܒ̣ܟܲܝܬ̇ ܩܕ݂ܵܡܲܝ ܘܐܵܦ ܐܸܢܵܐ ܫܸܡܥܹ̇ܬ̣: ܐܵܡܲܪ ܡܵܪܝܵܐ.

28: ܡܸܛܠ ܗܵܢܵܐ ܩܵܦܹܣ ܐ̄ܢܵܐ ܠܵܟ݂ ܠܘܵܬ̣ ܐܲܒ̣ܵܗܲܝ̈ܟ ܘܬܸܬ̣ܩܦܸܣ ܠܒܹܝܬ̣ ܩܒ̣ܘܼܪܝܵܟ݂ ܒܲܫܠܵܡ. ܘܠܵܐ ܢܸܚܙ̈ܝܵܢ ܥܲܝܢܲܝ̈ܟ ܒܟ݂ܠܵܗ̇ ܒܝܼܫܬܵܐ ܕܡܲܝܬܸ̇ܐ ܐ̄ܢܵܐ ܥܲܠ ܐܲܬ̣ܪܵܐ ܗܵܢܵܐ ܘܥܲܠ ܥܵܡܘܿܪ̈ܵܘܗܝ. ܘܐܲܗܦܸܟ݂ܘ ܠܡܲܠܟܵܐ ܦܸܬ̣ܓ̣ܵܡܵܐ.

29: ܘܫܲܕܲܪ ܡܲܠܟܵܐ: ܘܐܸܬ̣ܟܲܢܲܫܘ ܠܘܵܬܹܗ ܟܠܗܘܿܢ ܩܲܫܝܼܫܹ̈ܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ.

30: ܘܲܣܠܸܦ ܡܲܠܟܵܐ ܠܒܲܝܬܹ̇ܗ ܕܡܵܪܝܵܐ: ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܟ݂ܵܗ̈ܢܹܐ ܘܠܹܘܵܝܹ̈ܐ ܘܟ݂ܠܹܗ ܥܲܡܵܐ ܡ̣ܢ ܙܥܘܼܪܵܐ ܘܲܥܕܲܡܵܐ ܠܪܲܒܵܐ. ܘܲܩܪܵܐ ܩܕ݂ܵܡܲܝܗܘܿܢ ܟܠܗܘܿܢ ܦܸܬ̣ܓ̣ܵܡܹ̈ܐ ܕܣܸܦܪܵܐ ܕܲܕ݂ܝܵܬܹܩܹܐ ܗܵܕܹܐ ܕܐܸܫܬ̇ܟܲܚ ܒܒܲܝܬܹ̇ܗ ܕܡܵܪܝܵܐ.

31: ܘܩܵܡ ܡܲܠܟܵܐ ܥܲܠ ܕܘܼܟ̇ܬܹܗ. ܘܝܼܡܵܐ ܡܵܘ̈ܡܵܬ̣ܵܐ ܩܕ݂ܵܡ ܡܵܪܝܵܐ: ܠܡܹܐܙܲܠ ܒܵܬܲܪ ܡܵܪܝܵܐ ܠܲܡܗܲܠܵܟ݂ܘܼ ܒܐܘܼܪ̈ܚܵܬܹܗ: ܘܲܠܡܸܛܲܪ ܦܘܼܩܕܵܢܵܘ̈ܗܝ ܘܢܵܡܘܿܣܵܘ̈ܗܝ ܘܣܵܗ̈ܕ̇ܘܵܬܹܗ: ܒܟ݂ܠ ܠܸܒܵܐ ܘܲܒ̣ܟ݂ܠ ܢܲܦ̮ܫܵܐ: ܠܡܸܥܒܲܕ݂ ܦܸܬ̣ܓ̣ܵܡܹ̈ܐ ܕܲܕ݂ܝܵܬܹܩܹܐ ܕܲܟ݂ܬ̣ܝܼܒ̣ܝܼܢ ܒܣܸܦܪܵܐ ܗܵܢܵܐ.

32: ܘܩܵܡ̣ ܟܠ ܕܐܸܫܬ̇ܟܲܚ ܒܐܘܿܪܸܫܠܸܡ: ܘܲܒ̣ܒܸܢܝܵܡܹܝܢ ܘܲܥܒܲܪܘ ܥܵܡܘܿܪܹ̈ܐ ܕܐܘܿܪܸܫܠܸܡ ܒܲܩܝܵܡܵܐ ܕܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ.

33: ܘܐܲܥ̣ܒܲܪ ܝܘܿܫܝܼܵܐ ܥܒ̣ܵܕܹ̈ܐ ܣܢܲـ̈ـܝܵܐ ܕܐܵܘܒܸ̇ܕ݂ ܡܵܪܝܵܐ ܡ̣ܢ ܩܕ݂ܵܡ ܒܢܲܝ̈ ܝܼܣܪܵܝܹܠ. ܘܲܥܒܲܕ݂ ܟܠܹܗ ܥܲܡܵܐ ܕܐܸܫܬ̇ܟܲܚ ܒܝܼܣܪܵܝܹܠ. ܘܲܦܠܲܚ̣ܘ ܠܡܵܪܝܵܐ ܐܲܠܗܗܘܿܢ. ܘܠܵܐ ܣܛܵܘ ܡ̣ܢ ܒܵܬܲܪ ܡܵܪܝܵܐ ܐܲܠܵܗܵܐ ܕܐܲܒ̣ܵܗܵܬ̣̈ܗܘܿܢ.

ܩܹܦܵܠܹܐܘܿܢ: ܠܗ.

1: ܘܲܥܒܲܕ݂ ܝܘܿܫܝܼܵܐ ܒܐܘܿܪܸܫܠܸܡ ܥܹܐܕ݂ܵܐ ܠܡܵܪܝܵܐ. ܘܲܥܒܲܕ݂ ܥܹܐܕ݂ܵܐ ܒܐܲܪܒܲܥܸܣܪܵܐ ܒܝܲܪܚܵܐ ܩܲܕ݂ܡܵܝܵܐ.

2: ܘܐܲܩܝܼܡ ܟܵܗ̈ܢܹܐ ܥܲܠ ܡܲܛܪ̈ܵܬ̣ܗܘܿܢ. ܘܐܲܩܝܼܡ ܐܸܢܘܿܢ ܥܲܠ ܥܒ̣ܝܼ̈ܕ݂ܵܬ̣ܵܐ ܕܒܲܝܬܹ̇ܗ ܕܡܵܪܝܵܐ.

3: ܘܐܸܡܲܪ ܠܠܹܘܵܝܹ̈ܐ ܕܩܵܝܡܝܼܢ ܒܟ݂ܠ ܒܢܲܝ̈ ܝܼܣܪܵܝܹܠ: ܐܸܬ̣ܩܲܕܲܫܘ ܠܡܵܪܝܵܐ. ܘܗܲܒ̣ܘ ܩܹܒ̣ܘܿܬ̣ܵܐ ܕܩܘܼܕ݂ܫܵܐ ܒܒܲܝܬܵܐ ܕܲܒ̣ܢܵܐ ܫܠܹܝܡܘܿܢ ܒܲܪ ܕܵܘܝܼܕ݂ ܡܲܠܟܵܐ ܕܝܼܣܪܵܝܹܠ. ܠܵܐ ܐܝܼܬ̣ ܠܟ݂ܘܿܢ ܬܲܡܵܢ ܠܡܸܫܩܲܠ ܒܟܲܬ̣ܦܵـ̈ـܬ̣ܟ݂ܘܿܢ ܡܸܟܹ̇ܝܠ ܦܠܘܿܚܘ ܠܡܵܪܝܵܐ ܐܲܠܵܗܟ݂ܘܿܢ: ܘܲܠܥܲܡܹܗ ܝܼܣܪܵܝܹܠ.

4: ܘܐܲܬ̣ܩܸܢܘ ܠܸܒ̇ܟ݂ܘܿܢ: ܘܠܸܒܵܐ ܕܐܲܒ̣ܵܗܵܬ̣̈ܟ݂ܘܿܢ: ܐܲܝܟܲܢܵܐ ܕܲܟ݂ܬܲܒ̣ ܕܵܘܝܼܕ݂ ܡܲܠܟܵܐ ܕܝܼܣܪܵܝܹܠ: ܘܐܲܝܟܲܢܵܐ ܕܲܟ݂ܬܲܒ̣ ܫܠܹܝܡܘܿܢ ܒܪܹܗ.

5: ܘܩܘܼܡܝ ܒܩܘܼܕ݂ܫܵܐ ܒܦܵܠܓܘܼܬ̣ܵܐ ܕܒܹܝܬ̣ ܐܲܒ̣ܵܗܲܝ̈ܟ̇ܘܿܢ: ܘܐܲܚܲܝ̈ܟ̇ܘܿܢ ܒܢܲܝ̈ ܥܲܡܵܐ ܒܦܵܠܓ̇ܘܼܬ̣ܵܐ ܕܒܹܝܬ̣ ܐܲܒ̣ܵܐ ܕܠܹܘܵܝܹ̈ܐ.

6: ܟܘܿܣܘ ܦܸܨܚܵܐ ܘܐܸܬ̣ܩܲܕܲܫܘ ܘܐܲܬ̣ܩܸܢܘ ܠܸܒܵܐ ܕܐܲܚܲܝ̈ܟ̇ܘܿܢ ܘܢܸܥܒ̇ܕ݂ܘܼܢ ܐܲܝܟܲܢܵܐ ܕܡܲܠܸܠ̣ ܡܵܪܝܵܐ ܥܲܡ ܡܘܼܫܹܐ.

7: ܘܲܦܪܲܫ̣ ܝܘܿܫܝܼܵܐ ܠܲܒ̣ܢܲܝ̈ ܥܲܡܵܐ: ܥܵـ̈ـܢܵܐ ܘܐܸܡܪܹ̈ܐ: ܘܨܸܦܪ̈ܵܝܹܐ ܕܥܸܙܹ̈ܐ. ܗܵܠܹܝܢ ܟܠܗܘܿܢ ܠܦܸܨܚܵܐ: ܠܟ݂ܠ ܕܐܸܫܬ̇ܟܲܚ: ܒܡܸܢܝܵܢܵܐ ܬܠܵܬ̣ܝܼܢ ܐܲܠܦ̈ܝܼܢ: ܘܬ̣ܵܘܪܹ̈ܐ ܬܠܵܬ̣ܵܐ ܐܲܠܦ̈ܝܼܢ. ܗܵܠܹܝܢ ܡ̣ܢ ܩܸܢܝܵܢܵܐ ܕܡܲܠܟܵܐ.

8: ܘܪܵܘ̱ܪ̈ܒ̣ܵܢܵܘܗܝ ܦܪܲܫܘ ܠܥܲܡܵܐ ܠܟ݂ܵܗܢܹ̈ܐ ܘܲܠܠܹܘܵܝܹ̈ܐ. ܘܲܦܪܲܫܘ ܚܹܠܲܩܝܵܐ: ܘܲܙܟܲܪܝܵܐ: ܘܲܢܚܵܐܹܝܠ: ܪܵܘ̱ܪ̈ܒ̣ܵܢܲܝ ܒܲܝܬܹ̇ܗ ܕܡܵܪܝܵܐ ܠܟ݂ܵܗܢܹ̈ܐ. ܘܝܲܗ̄ܒ̣ܘ ܠܦܸܨܚܵܐ: ܥܵـ̈ـܢܵܐ ܐܲܠܦܹ̈ܐ ܬܪܹܝܢ ܘܫܸܬ̣ ܡܵܐܐ: ܘܬ̣ܵܘܪܹ̈ܐ ܬܠܵܬ̣ܡܵܐܐ.

9: ܘܲܟ݂ܢܲܢܝܵܐ ܘܲܫܡܲܥܝܵܐ ܒܲܪ ܐܲܚܘܼܗܝ: ܘܲܚܫܲܒ̣ܝܵܐ ܘܝܲܕ݂ܥܝܹܠ ܐܲܦܪܸܫܘ ܠܠܹܘܵܝܹ̈ܐ ܠܦܸܨܚܵܐ: ܥܵـ̈ـܢܵܐ ܚܲܡܫܵܐ ܐܲܠܦ̈ܝܼܢ: ܘܬ̣ܵܘܪܹ̈ܐ ܚܲܡܫܡܵܐܐ.

10: ܘܬܸܩܢܲܬ̤ ܥܒ̣ܝܼܕ̇ܬܵܐ ܘܩܵܡ̣ܘ ܟܵܗܢܹ̈ܐ ܥܲܠ ܕܘܼܟ̇ܝܵܬ̣̈ܗܘܿܢ: ܘܠܹܘܵܝܹ̈ܐ ܥܲܠ ܕܘܼܟ̇ܝܵܬ̣̈ܗܘܿܢ.

11: ܘܲܢܟܲܣܘ ܦܸܨܚܵܐ ܐܲܝܟ݂ ܦܘܼܩܕܵܢܵܐ ܕܡܲܠܟܵܐ. ܘܲܪܙܲܦܲܘ ܟܵܗ̈ܢܹܐ ܡ̣ܢ ܕܡܵܐ.

12: ܘܠܹܘܵܝܹ̈ܐ ܢܵܫܛܝܼܢ ܘܝܵܗ̄ܒ̇ܝܼܢ ܥܠܵـ̈ـܘܵܬ̣ܵܐ ܠܦܵܠ̈ܓܘܵܬ̣ܵܐ ܕܐܲܒ̣ܵܗܲܝ̈ܗܘܿܢ ܕܲܒ̣ܢܲܝ̈ ܥܲܡܵܐ: ܠܲܡܩܲܪܵܒ̣ܘܼ ܠܡܵܪܝܵܐ: ܐܲܝܟ݂ ܕܲܟ݂ܬ̣ܝܼܒ̣ ܒܣܸܦܪܵܐ ܕܢܵܡܘܿܣܵܐ ܕܡܘܼܫܹܐ ܘܗܵܟܲܢܵܐ ܡܩܲܪܒ̣ܝܼܢ ܗ̄ܘ̣ܵܘ ܒܟ݂ܠ ܨܦܲܪ ܘܲܨܦܲܪ.

13: ܘܒܲܫܠܸܘ ܦܸܨܚܵܐ ܒܢܘܼܪܵܐ: ܐܲܝܟ݂ ܕܡܸܬ̣ܒ̇ܥܹܐ ܠܹܗ. ܘܩܘܼܕ݂ܫܹܗ ܒܲܫܠܸܘ ܒܢܘܼܪܵܐ: ܒܩܲܕ݂ܣܹ̈ܐ ܘܒ̣ܐܝܼܪܹ̈ܐ. ܘܲܒ̣ܩܲܪ̈ܕܵܠܹܐ. ܘܲܪܗܸܛ̣ܘ ܟܠ ܒܢܲܝ̈ ܥܲܡܵܐ.

14: ܘܡ̣ܢ ܒܵܬܲܪ ܗܵܠܹܝܢ: ܛܲܝܸܒ̣ܘ ܟܵܗ̈ܢܹܐ ܠܗܘܿܢ ܕܝܼܠܗܘܿܢ. ܡܸܛܠ ܕܟ݂ܵܗ̈ܢܹܐ ܒܢܵܘ̈ܗܝ ܕܐܲܗܪܘܿܢ ܡܲܣܩܝܼܢ ܗ̄ܘ̣ܵܘ ܥܠܵـ̈ـܘܵܬ̣ܵܐ ܘܬܲܪܒܵܐ ܥܕܲܡܵܐ ܠܠܹܘܵܝܹ̈ܐ. ܘܠܹܘܵܝܹ̈ܐ ܛܲܝܸܒ̣ܘ ܠܗܘܿܢ ܘܲܠܟ݂ܗܢܹ̈ܐ ܒܢܵܘ̈ܗܝ ܕܐܲܗܪܘܿܢ ܕܲܡܫܲܡܫܝܼܢ.

15: ܒܢܵܘ̈ܗܝ ܕܐܵܣܵܦ ܥܲܠ ܕܘܼܟܲܬ̣ܗܘܿܢ: ܐܲܝܟ݂ ܦܘܼܩܕܵܢܵܐ ܕܕ݂ܵܘܝܼܕ݂ ܘܟܲܢܸܫ ܗܵܡܵܢ ܘܝܼܪܸܬ̣ܘܿܢ ܚܵܙܘܿܝܹ̈ܐ ܕܡܲܠܟܵܐ: ܘܢܵܛܪ̈ܲܝ ܬܲܪܥܵܐ ܕܲܒ̣ܟ݂ܠ ܬܪܲܥ ܘܲܬ̣ܪܲܥ: ܕܠܲܝܬ̇ ܠܗܘܿܢ ܡܸܕܸ̇ܡ ܠܲܡܒܲܛܵܠܘܼ ܡ̣ܢ ܟܠ ܥܒ̣ܝܼ̈ܕ݂ܵܬ̣ܗܘܿܢ ܡܸܛܠ ܕܐܲܚܲܝ̈ܗܘܿܢ ܛܲܝܸܒ̣ܘ ܠܗܘܿܢ.

16: ܘܐܸܬ̣ܛܲܝܒܲܬ̤ ܟܠܵܗ̇ ܥܒ̣ܝܼܕ̇ܬܵܐ ܕܡܵܪܝܵܐ ܒܝܵܘܡܵܐ ܗܵܘ̇: ܠܡܸܥܒܲܕ݂ ܦܸܨܚܵܐ: ܘܲܥܠܵـ̈ـܘܵܬ̣ܵܐ ܩܲܪܸܒ̣ܘ ܥܲܠ ܡܲܕ݂ܒ̇ܚܹܗ ܕܡܵܪܝܵܐ: ܐܲܝܟ݂ ܦܘܼܩܕܵܢܵܐ ܕܡܲܠܟܵܐ ܝܘܿܫܝܼܵܐ.

17: ܘܲܥܒܲܕ݂ܘ ܒܢܲܝ̈ ܝܼܣܪܵܝܹܠ ܕܐܸܫܬ̇ܟܲܚܘ: ܦܸܨܚܵܐ: ܒܹܗ ܒܙܲܒ̣ܢܵܐ ܗܵܘ̇: ܘܥܹܐܕ݂ܵܐ ܕܦܲܛܝܼܪܹ̈ܐ ܫܲܒ̣ܥܵܐ ܝܵܘ̈ܡܝܼܢ.

18: ܘܠܵܐ ܐܸܬ̣̱ܥܒܸܕ݂ ܥܹܐܕ݂ܵܐ ܒܝܼܣܪܵܝܹܠ ܐܲܝܟ݂ ܗܵܘ̇: ܡ̣ܢ ܝܵܘܡܵܘ̈ܗܝ ܕܲܫܡܘܼܐܹܝܠ ܢܒ̣ܝܼܵܐ: ܘܟ݂ܠ ܡܲܠ̈ܟܹ̇ܐ ܕܝܼܣܪܵܝܹܠ ܠܵܐ ܥܒܲܕ݂ܘ ܐܲܝܟ݂ ܗܵܘ̇ ܦܸܨܚܵܐ: ܕܲܥܒܲܕ݂ ܝܘܿܫܝܼܵܐ: ܘܟ݂ܵܗܢܹ̈ܐ ܘܠܹܘܵܝܹ̈ܐ: ܘܟ݂ܠܹܗ ܝܼܗܘܼܕ݂ܵܐ ܘܝܼܣܪܵܝܹܠ: ܕܐܸܫܬ̇ܟܲܚܘ ܗ̄ܘ̣ܵܘ ܒܐܘܿܪܸܫܠܸܡ.

19: ܘܒܲܬ̣ܡܵܢܲܥܸܣܪܹ̈ܐ ܫܢ̈ܝܼܢ ܠܡܲܠܟ̇ܘܼܬܹܗ ܕܝܘܿܫܝܼܵܐ: ܐܸܬ̣ܥ̱ܒܸܕ݂ ܥܹܐܕ݂ܵܐ ܗܵܢܵܐ.

20: ܒܵܬܲܪ ܟܠܗܹܝܢ ܗܵܠܹܝܢ: ܕܐܲܬ̣ܩܸܢ ܝܘܿܫܝܼܵܐ ܨܸܒ̣̈ܘܵܬܹܗ ܕܒܲܝܬܵܐ: ܣܠܸܩ̣ ܦܸܪܥܘܿܢ ܚܓ̣ܝܼܪܵܐ ܡܲܠܟܵܐ ܕܡܸܨܪܹܝܢ: ܠܡܸܬ̣ܟܲܬܵܫܘܼ ܥܲܠ ܡܲܒ̇ܘܼܓ̣ ܕܥܲܠ ܦܪܵܬ̣ ܘܲܢܦܲܩ ܝܘܿܫܝܼܵܐ ܠܐܘܼܪܥܹܗ.

21: ܘܫܲܕܲܪ ܐܝܼܙ̈ܓܲܕܹ̇ܐ ܠܘܵܬܹܗ: ܘܐܸܡܲܪ ܠܹܗ: ܡܵܢܵܐ ܐܝܼܬ̣ ܠܝܼ ܥܲܡܵܟ݂ ܡܲܠܟܵܐ ܕܲܝܗܘܼܕ݂ܵܐ. ܠܵܐ ܗ̄ܘ̣ܵܐ ܥܠܲܝܟ ܐܵܬܹܐ ܐ̄ܢܵܐ ܝܵܘܡܵܢܵܐ: ܡܲܠܟܵܐ ܕܲܝܗܘܼܕ݂ܵܐ. ܡܸܛܠ ܕܠܵܐ ܗ̄ܘ̣ܵܐ ܥܠܲܝܟ ܐܵܬܹܐ ܐ̄ܢܵܐ ܠܡܸܬ̣ܟܲܬܵܫܘܼ. ܡܵܪܝܵܐ ܐܸܡܲܪ ܠܵܟ݂ ܠܲܡܕܲܚܵܠܘܼܬܲܢܝ ܦܪܘܿܩ ܠܵܟ݂ ܡ̣ܢ ܐܲܠܵܗܵܐ ܕܥܲܡܝ: ܕܠܵܐ ܢܚܲܒ̇ܠܵܟ݂.

22: ܘܠܵܐ ܐܲܦܢܝܼ ܐܲܦܵܘ̈ܗܝ ܡܸܢܹܗ ܝܘܿܫܝܼܵܐ. ܡܸܛܠ ܕܲܠܡܸܬ̣ܟܲܬܵܫܘܼ ܘܲܠܡܸܥܒܲܕ݂ ܩܪܵܒ̣ܵܐ ܐܵܙܹ̇ܠ ܗ̄ܘ̣ܵܐ. ܘܠܵܐ ܫ̣ܡܲܥ ܦܸܬ̣ܓ̣ܵܡܵܘ̈ܗܝ ܕܦܸܪܥܘܿܢ. ܚܓ̣ܝܼܪܵܐ. ܘܠܵܐ ܝܵܕܲܥ̇ ܗ̄ܘ̣ܵܐ ܝܘܿܫܝܼܵܐ ܡ̣ܢ ܩܕ݂ܵܡ ܡܵܪܝܵܐ ܗܘ̤ܵܬ̣. ܘܲܢܦܲܩ ܠܡܸܬ̣ܟܲܬܵܫܘܼ ܥܲܡܹܗ: ܒܲܦܩܲܥܬ̣ܵܐ ܕܡܲܓܕ̇ܘܿ.

23: ܘܲܡ̣ܚܵܐ ܦܸܪܥܘܿܢ ܚܓ̣ܝܼܪܵܐ ܠܝܘܿܫܝܼܵܐ ܬܪܹܝܢ ܓܹܐܪ̈ܝܼܢ ܘܐܸܡܲܪ ܡܲܠܟܵܐ: ܐܲܥܒ̇ܪܘܼܢܝ: ܡܸܛܠ ܕܲܡܚܘܿܬ̣ܵܐ ܕܡܵܘܬܵܐ ܡܚܹܐ ܐ̄ܢܵܐ.

24: ܘܐܲܥܒܲܪܘܼܗܝ ܥܲܒ̣ܕܵܘ̈ܗܝ ܡ̣ܢ ܡܲܪܟܲܒ̣ܬ̣ܵܐ. ܘܐܵܘܬ̇ܒ̣ܘܼܗܝ ܒܩܵܪܘܿܟ݂ܵܐ ܕܡܲܠܟ̇ܘܼܬ̣ܵܐ ܕܝܼܠܹܗ. ܘܐܵܘܒ̇ܠܘܼܗܝ ܠܐܘܿܪܸܫܠܸܡ: ܘܡܝܼܬ̣ ܘܩܲܒ̣ܪܘܼܗܝ ܒܩܲܒ̣ܪܵܐ ܕܐܲܒ̣ܵـ̈ـܗܵܬܹܗ. ܘܟ݂ܠܗܘܿܢ ܕܒܹܝܬ̣ ܝܼܗܘܼܕ݂ܵܐ ܘܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܢܵܛܪܝܼܢ ܗ̄ܘ̣ܵܘ ܐܸܒ̣ܠܵܐ ܥܲܠ ܝܘܿܫܝܼܵܐ.

25: ܘܐܲܠܵܐ ܐܹܪܲܡܝܵܐ ܥܲܠ ܝܘܿܫܝܼܵܐ: ܘܐܸܡܲܪ: ܟܠ ܙܲܕ̇ܝܼܩܹ̈ܐ ܘܙܲܕ̇ܝܼܩܵܬ̣ܵܐ ܒܐܘܿܠܝܵܬ̣ܟܹ̈ܝܢ ܥܲܠ ܝܘܿܫܝܼܵܐ ܒܟ݂ܵܝܹܝ̈ܢ. ܘܲܥܕܲܡܵܐ ܠܝܵܘܡܵܢܵܐ ܝܲܗ̄ܒ̣ ܐܸܢܹܝܢ ܠܲܩܝܵܡܵܐ ܕܝܼܣܪܵܝܹܠ. ܘܗܸܢܹܝܢ ܟܬ̣ܝܼ̈ܒ̣ܵܢ ܒܲܣܦܲܪ ܐܘܿܠ̈ܝܵܬ̣ܵܐ.

26: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܫܝܼܵܐ: ܘܛܲܝܒ̇ـ̈ـܘܵܬܹܗ ܐܲܝܟ݂ ܕܲܟ݂ܬ̣ܝܼܒ̣ ܒܢܵܡܘܿܣܹܗ ܕܡܵܪܝܵܐ.

27: ܘܦܸܬ̣ܓ̣ܵܡܵܘ̈ܗܝ ܩܲܕ݂ܡܵܝܹ̈ܐ ܘܐܲܚܪ̈ܵܝܹܐ: ܗܵܐ ܗܸܢܘܿܢ ܟܬ̣ܝܼܒ̣ܝܼܢ ܒܲܣܦܲܪ ܡܲܠ̈ܟܹ̇ܐ ܕܝܼܣܪܵܝܹܠ ܘܕܲܝܗܘܼܕ݂ܵܐ.

ܩܹܦܵܠܹܐܘܿܢ: ܠܘ.

1: ܘܲܕ݂ܒܲܪܘ ܥܲܡܵܐ ܠܝܵܗܘܿܐܵܚܵܙ ܒܲܪ ܝܘܿܫܝܼܵܐ. ܘܐܲܩܝܼܡܘܼܗܝ ܒܡܲܠܟ̇ܘܼܬܹܗ ܒܵܬܲܪ ܐܲܒ̣ܘܼܗܝ ܒܐܘܿܪܸܫܠܸܡ.

2: ܒܲܪ ܥܸܣܪܝܼܢ ܘܲܬ̣ܠܵܬ̣ ܫܢ̈ܝܼܢ ܝܵܗܘܿܐܵܚܵܙ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܬ̣ܠܵܬ̣ܵܐ ܝܲܪ̈ܚܝܼܢ ܐܲܡ̣ܠܸܟ݂ ܗ̄ܘ̣ܵܐ ܒܐܘܿܪܸܫܠܸܡ.

3: ܘܐܲܥ̣ܒ̇ܪܹܗ ܡܲܠܟܵܐ ܕܡܸܨܪܹܝܢ.

4: ܘܐܲܩܝܼܡ ܠܐܹܠܝܵܩܝܼܡ ܐܲܚܘܼܗܝ: ܥܲܠ ܕܒܹܝܬ̣ ܝܼܗܘܼܕ݂ܵܐ: ܘܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ. ܘܫܲܡܝܼ ܫܡܹܗ ܝܘܿܝܵܩܝܼܡ: ܘܲܠܝܵܗܘܿܐܵܚܵܙ ܐܲܚܘܼܗܝ: ܕܒܲܪ ܦܸܪܥܘܿܢ ܚܓ̣ܝܼܪܵܐ. ܘܐܵܘܒ̇ܠܹܗ ܠܡܸܨܪܹܝܢ. ܘܡܝܼܬ̣ ܬܲܡܵܢ.

5: ܒܲܪ ܥܸܣܪܝܼܢ ܘܚܲܡܸܫ ܫܢ̈ܝܼܢ ܝܘܿܝܵܩܝܼܡ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܚܕܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܐܲܠܵܗܹܗ.

6: ܥܠܵܘܗܝ ܣܠܸܩ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ. ܘܐܲܣܪܹܗ ܒܫܸܫ̈ܠܵܬ̣ܵܐ: ܠܡܵܘܒܵܠܘܼܬܹܗ ܠܒ̣ܵܒܹܠ.

7: ܘܡ̣ܢ ܟܠܗܘܿܢ ܡܵܐܢܲܝ̈ ܒܲܝܬܵܐ: ܐܲܝܬ̇ܝܼ ܢܒ̣ܘܼܟܲܕ݂ܢܵܨܲܪ ܠܒ̣ܵܒܹܠ. ܘܝܲܗ̄ܒ̣ ܐܸܢܘܿܢ ܒܗܲܝܟ̇ܠܹܗ ܒܒ̣ܵܒܹܠ.

8: ܘܫܲܪܟܵܐ ܕܦܸܬ̣ܓ̣ܵܡܵܘ̈ܗܝ ܕܝܘܿܝܵܩܝܼܡ: ܘܣܲܢ̈ܝܵܬ̣ܵܐ ܕܲܥܒܲܕ݂: ܗܵܐ ܗܸܢܹܝܢ ܟܬ̣ܝܼ̈ܒ̣ܵܢ ܥܲܠ ܣܸܦܪܵܐ ܕܡܲܠ̈ܟܹ̇ܐ ܕܲܝܗܘܼܕ݂ܵܐ ܘܕ݂ܝܼܣܪܵܝܹܠ ܘܐܲܡ̣ܠܸܟ݂ ܝܘܿܝܵܟ݂ܝܼܢ ܒܪܹܗ ܒܵܬ̣ܪܹܗ.

9: ܒܲܪ ܬܡܵܢܲܥܸܣܪܹ̈ܐ ܫܢ̈ܝܼܢ ܝܘܿܝܵܟ݂ܝܼܢ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܡܵܐܐ ܝܵܘ̈ܡܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ.

10: ܘܲܠܚܲܪܬ̣ܵܗ̇ ܕܫܲܢ̄ܬܵܐ: ܫܲܕܲܪ ܥܠܵܘܗܝ ܢܒ̣ܘܼܟܲܕ݂ܢܵܨܲܪ ܡܲܠܟܵܐ: ܘܐܲܝܬ̇ܝܹܗ ܠܒܵܒܹܠ: ܠܹܗ ܘܲܠܡܵܐܢܲܝ̈ ܪܸܓ̇ܬ̣ܵܐ ܕܲܗܘ̤ܵܘ ܒܒܲܝܬܹ̇ܗ ܕܡܵܪܝܵܐ ܘܐܲܡ̣ܠܸܟ݂ ܠܨܸܕܲܩܝܵܐ ܕܵܕܹܗ ܒܡܲܠܟ̇ܘܼܬ̣ܵܐ: ܥܲܠ ܝܼܗܘܼܕ݂ܵܐ ܘܥܲܠ ܐܘܿܪܸܫܠܸܡ.

11: ܒܲܪ ܥܸܣܪܝܼܢ ܘܲܚܕ݂ܵܐ ܫܢ̈ܝܼܢ ܨܹܕܲܩܝܵܐ: ܟܲܕ݂ ܩܵܡ̣ ܒܡܲܠܟ̇ܘܼܬ̣ܵܐ. ܘܲܚܕܲܥܸܣܪܹ̈ܐ ܫܢ̈ܝܼܢ ܐܲܡ̣ܠܸܟ݂ ܒܐܘܿܪܸܫܠܸܡ.

12: ܘܲܥܒܲܕ݂ ܕܒ̣ܝܼܫ ܩܕ݂ܵܡ ܡܵܪܝܵܐ ܐܲܠܵܗܹܗ. ܘܠܵܐ ܕܚܸܠ̣ ܡ̣ܢ ܐܹܪܲܡܝܵܐ ܢܒ̣ܝܼܵܐ: ܕܡܸܬ̣ܢܲܒܹ̇ܐ ܗ̄ܘ̣ܵܐ ܐܲܝܟ݂ ܕܡ̣ܢ ܦܘܼܡܹܗ ܕܡܵܪܝܵܐ.

13: ܘܐܵܦ ܥܲܠ ܢܒ̣ܘܼܟܲܕ݂ܢܵܨܲܪ ܡܪܲܕ݂: ܕܝܼܡ̣ܵܐ ܗ̄ܘ̣ܵܐ ܠܹܗ ܒܲܫܡܹܗ ܕܡܵܪܝܵܐ ܘܩܲܫܝܼ ܩܕ݂ܵܠܹܗ: ܘܩܲܫܝܼ ܠܸܒܹ̇ܗ. ܘܠܵܐ ܨܒ̣ܵܐ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

14: ܘܐܵܦ ܟܠ ܩܲܫܝܼܫܹ̈ܐ ܕܟ݂ܵܗ̈ܢܹܐ ܘܲܕ݂ܠܹܘܵܝܹ̈ܐ ܘܲܕ݂ܥܲܡܵܐ: ܐܲܣܓܝܼܘ ܠܲܡܟܲܕܵܒ̣ܘܼ ܟܲܕܵܒ̣ܘܼܬ̣ܵܐ: ܐܲܝܟ݂ ܟܠܗܘܿܢ ܥܒ̣ܵܕܹ̈ܐ ܕܥܲܡܡܹ̈ܐ: ܘܛܲܡܲܐܘܼ ܒܲܝܬܹ̇ܗ ܕܡܵܪܝܵܐ ܩܲܕ̇ܝܼܫܵܐ ܒܐܘܿܪܸܫܠܸܡ.

15: ܘܫܲܕܲܪ ܡܵܪܝܵܐ ܐܲܠܵܗܵܐ ܕܐܲܒ̣ܵܗܲܝ̈ܗܘܿܢ ܥܠܲܝܗܘܿܢ ܒܐܝܼܕ݂ܵܐ ܕܡܲܠܲܐܟ݂ܵܘ̈ܗܝ: ܡܩܲܕ̇ܡܝܼܢ ܘܡܲܚ̄ܫܟ݂ܝܼܢ. ܡܸܛܠ ܕܚܵܣ ܥܲܠ ܥܲܡܹܗ ܘܥܲܠ ܥܵـ̈ـܢܵܐ ܕܡܵܪܝܵܐ.

16: ܘܲܗܘ̤ܵܐ ܓܵܚܟ̇ܝܼܢ ܥܲܠ ܡܲܠܲܐܟ݂ܵܘ̈ܗܝ ܕܡܵܪܝܵܐ: ܘܲܡܒܲܣܪܝܼܢ ܥܲܠ ܡܸܠܲܝ̈ܗܘܿܢ. ܘܓ̣ܵܚܟ̇ܝܼܢ ܥܲܠ ܢܒ̣ܝܼܵܘ̈ܗܝ ܥܕܲܡܵܐ ܕܣܸܠܩܲܬ̤ ܚܸܡܬܹܗ ܕܡܵܪܝܵܐ ܒܥܲܡܹܗ: ܥܕܲܡܵܐ ܠܐܲܝܟܵܐ ܕܠܵܐ ܗܘ̤ܵܬ̣ ܠܗܘܿܢ ܐܵܣܝܘܼ.

17: ܘܐܲܣܸܩ ܥܠܲܝܗܘܿܢ ܠܡܲܠܟܵܐ ܕܟܲܠܕ݂ܵܝܹ̈ܐ: ܘܩܲܛܸܠ ܥܠܲܝܡܲܝ̈ܗܘܿܢ ܒܚܲܪܒܵܐ ܒܹܝܬ̣ ܡܲܩܕܲܫܗܘܿܢ. ܘܠܵܐ ܚܵܣ ܥܲܠ ܓܲܕ̇ܘܼܕܹܐ ܘܥܲܠ ܒܬ̣ܘܼ̈ܠܵܬ̣ܵܐ: ܘܥܲܠ ܩܲܫܝܼܫܹ̈ܐ: ܘܐܵܦܠܵܐ ܥܲܠ ܝܵܢܩܲܝ̈ ܚܲܠܒ̣ܵܐ. ܟܠܗܘܿܢ ܐܲܫܠܸܡ ܒܐܝܼܕܹܗ.

18: ܘܟ݂ܠ ܡܵܐܢܲܝ̈ ܒܲܝܬܹ̇ܗ ܕܡܵܪܝܵܐ: ܪܵܘ̱ܪ̈ܒܹܐ ܘܕܲܩܕ̇ܩܹ̈ܐ: ܘܓܲܙܵܐ ܕܒܲܝܬܹ̇ܗ ܕܡܵܪܝܵܐ: ܘܓܲܙܵܐ ܕܡܲܠܟܵܐ ܘܲܕ݂ܫܲܠܝܼܛܵܢܵܘ̈ܗܝ: ܟܠܹܗ ܐܵܘܒ̇ܠܹܗ ܠܒ̣ܵܒܹܠ.

19: ܘܐܵܘܩܕܹܗ ܠܒܲܝܬܹ̇ܗ ܕܡܵܪܝܵܐ ܘܲܥܩܲܪ ܠܫܘܼܪܹ̈ܝܗ̇ ܕܐܘܿܪܸܫܠܸܡ: ܘܟ݂ܠܗܹܝܢ ܣܵܚܪ̈ܵܬ̣ܵܗ̇ ܐܵܘܩܸܕ݂ ܒܢܘܼܪܵܐ. ܘܟ݂ܠ ܡܵܐܢܹ̈ܐ ܕܪܸܓ̇ܬ̣ܵܐ ܚܲܒܸ̇ܠܘ.

20: ܘܐܲܦܸܩܘ ܒܫܸܒ̣ܝܵܐ ܠܐܲܝܠܹܝܢ ܕܲܦܠܲܛܘ ܡ̣ܢ ܚܲܪܒܵܐ ܠܒ̣ܵܒܹܠ ܘܲܗܘ̤ܵܘ ܠܹܗ ܥܲܒ̣ܕ̇ܝܼ̈ܢ ܘܠܲܒ̣ܢܵܘ̈ܗܝ: ܥܕܲܡܵܐ ܠܐܲܝܟܵܐ ܕܐܲܫܠܸܡ ܡܲܠܟ̇ܘܼܬ̣ܵܐ ܠܦܵܪ̈ܣܵܝܹܐ.

21: ܕܬܸܫܠܲܡ ܡܸܠܬܹܗ ܕܡܵܪܝܵܐ ܕܡܲܠܸܠ̣ ܗ̄ܘ̣ܵܐ ܐܹܪܲܡܝܵܐ ܢܒ̣ܝܼܵܐ: ܥܕܲܡܵܐ ܕܬܸܬ̇ܢܝܼܚ ܐܲܪܥܵܐ ܒܫܲܒܹ̇ܝ̈ܗ̇ ܟܠ ܝܵܘ̈ܡܵܬ̣ܵܐ ܕܬܸܨܕܸ̇ܐ: ܠܡܸܫܠܲܡ ܫܲܒ̣ܥܝܼܢ ܫܢ̈ܝܼܢ.

22: ܒܲܫܢܲܬ̣ ܚܕ݂ܵܐ ܠܟ݂ܘܼܪܸܫ ܡܲܠܟܵܐ ܦܵܪܣܵܝܵܐ: ܕܬܸܫܠܲܡ ܡܸܠܬܹܗ ܕܡܵܪܝܵܐ ܒܦܘܼܡܹܗ ܕܐܲܪܲܡܝܵܐ ܢܒ̣ܝܼܵܐ: ܐܲܥܝܼܪ ܡܵܪܝܵܐ ܪܘܼܚܹܗ ܕܟ݂ܘܼܪܸܫ ܡܲܠܟܵܐ ܦܲܪܣܵܝܵܐ. ܘܐܲܥܒܲܪ ܩܵܠܵܐ ܒܟ݂ܠܵܗ̇ ܡܲܠܟ̇ܘܼܬܹܗ. ܘܐܵܦ ܒܲܟ݂ܬ̣ܵܒ̣ܵܐ ܐܲܡܝܼܪ ܗ̄ܘ̣ܵܐ ܫܡܹܗ.

23: ܗܵܟܲܢܵܐ ܐܵܡܲܪ ܟܘܼܪܸܫ ܡܲܠܟܵܐ ܦܵܪܣܵܝܵܐ: ܟܠ ܡܲܠܟ̇ـ̈ـܘܵܬ̣ܵܐ ܕܐܲܪܥܵܐ ܝܲܗ̄ܒ̣ ܠܝܼ ܡܵܪܝܵܐ ܐܲܠܵܗܵܐ ܕܲܫܡܲܝܵܐ ܘܗ̤ܘ ܦܩܲܕ݂ ܥܠܲܝ ܕܐܸܒ̣ܢܸܐ ܠܹܗ ܒܲܝܬܵܐ ܒܐܘܿܪܸܫܠܸܡ ܕܒܲܝܗܘܼܕ݂ܵܐ ܡܲܢܘܼ ܐܝܼܬ̣ ܒܟ݂ܘܿܢ ܡ̣ܢ ܟܠܹܗ ܥܲܡܵܐ ܕܡܵܪܝܵܐ ܐܲܠܹܗܹܗ ܨܵܒܹ̇ܐ ܒܹܗ: ܢܸܣܲܩ ܢܹܐܬܹܐ ܠܘܵܬ̣ܝ.