ܣܦܪܐ ܕܢܚܡܝܐ

ܩܦܠܐܘܢ: ܐ.

1: ܦܸܬ̣ܓ̣ܵܡܲܝ̈ ܢܚܲܡܝܵܐ ܒܲܪ ܚܹܠܲܩܝܵܐ. ܘܲܗܘ̤ܵܐ ܒܝܼܪܲܚ ܟܵܢܘܿܢ: ܒܲܫܢܲܬ̣ ܥܸܣܪܝܼܢ ܐܸܢܵܐ ܩܵܐܹ̇ܡ ܗ̄ܘܹ̇ܝܬ̣ ܒܫܘܿܫܲܢ ܒܝܼܪܬܵܐ.

2: ܘܐܸܬ̣ܵܐ ܚܲܢܲܢ ܚܲܕ݂ ܡ̣ܢ ܐܲܚܲܝ̈: ܗ̤ܘ ܘܓܲܒ̣ܪܹ̈ܐ ܝܗ̄ܘܼ̈ܕ݂ܵܝܹܐ. ܘܫܸܐܠܲܬ̣ ܐܸܢܘܿܢ ܥܲܠ ܝܗ̄ܘܼܕ݂ܵܝܹܐ ܐܲܝܠܹܝܢ ܕܝܼܬ̇ܪܘ ܡ̣ܢ ܫܸܒ̣ܝܵܐ: ܘܐܵܦ ܥܲܠ ܐܘܿܪܸܫܠܸܡ ܡܕ݂ܝܼܢ̄ܬܵܐ.

3: ܘܐܵܡ̇ܪܝܼܢ ܠܝܼ ܗܵܠܹܝܢ ܐ̄ܢܵܫܵܐ ܕܫܸܐܠܹ̇ܬ̣ ܐܸܢܘܿܢ: ܗܵܢܘܿܢ ܐ̄ܢܵܫܵܐ ܐܲܝܠܹܝܢ ܕܲܦܠܲܛ̣ܘ ܡ̣ܢ ܫܸܒ̣ܝܵܐ: ܗܵܐ ܬܲܡܵܢ ܐܸܢܘܿܢ ܒܲܡܕ݂ܝܼܢ̄ܬܵܐ: ܒܒ̣ܝܼܫܬܵܐ ܪܲܒ̇ܬ̣ܵܐ ܫܪܹܝܢ: ܘܲܒ̣ܚܸܣܕܵܐ ܣܲܓܝܼܵܐܐ. ܘܗܵܐ ܫܘܼܪܵܗ̇ ܕܐܘܿܪܸܫܠܸܡ ܬܪܝܼܥ: ܘܬܲܪ̈ܥܹܝܗ̇ ܝܲܩܝܼܕ݂ܝܼܢ ܒܢܘܿܪܵܐ.

4: ܗܵܝܕܹ̇ܝܢ ܟܲܕ݂ ܫܸܡܥܹ̇ܬ̣ ܡܸܠܹ̈ܐ ܗܵܠܹܝܢ: ܝܵܬܹܒ̣ ܗ̄ܘܹ̇ܝܬ̣ ܘܒ̣ܵܟܹ̇ܐ. ܘܡܸܬ̣̱ܐܒܸܠ ܗ̄ܘܹ̇ܝܬ̣ ܝܵܘ̈ܡܵܬ̣ܵܐ ܣܲܓ̇ܝܹ̈ܐܐ. ܘܲܗܘܹ̇ܝܬ̣ ܨܵܐܹ̇ܡ: ܘܲܡܨܲܠܸܐ ܩܕ݂ܵܡ ܐܲܠܵܗܵܐ ܕܲܫܡܲܝܵܐ.

5: ܘܐܵܡܲܪ ܗ̄ܘܹ̇ܝܬ̣: ܒܵܥܹ̇ܐ ܐ̄ܢܵܐ ܡ̣ܢ ܩܕ݂ܵܡܲܝܟ: ܡܵܪܝܵܐ ܐܲܠܵܗܵܐ ܓܲܢ̄ܒܵܪܵܐ ܪܲܒܵܐ ܘܲܕ݂ܚܝܼܠܵܐ: ܢܵܛܲܪ ܫܪܵܪܵܐ ܘܛܲܝܒ̇ܘܼܬ̣ܵܐ ܠܪ̈ܵܚܡܵܘܗܝ: ܘܲܠܢܵܛܪ̈ܲܝ ܦܘܼܩܕܵܢܵܘ̈ܗܝ.

6: ܢܸܗ̱ܘ̈ܝܵܢ ܡܸܟܹ̇ܝܠ ܥܲܝܢܲܝ̈ܟ ܦܬ̣ܝܼ̈ܚܵܢ: ܘܐܸܕ݂ܢܲܝ̈ܟ ܨܵܝ̈ܬܵܢ: ܠܡܸܫܡܲܥ ܨܠܘܿܬ̣ܵܐ: ܕܐܸܢܵܐ ܥܲܒ̣ܕܵܟ݂ ܡܨܲܠܹܐ ܩܕ݂ܵܡܲܝܟ: ܒܐܝܼܡܵܡܵܐ ܘܲܒ̣ܠܸܠܝܵܐ: ܥܲܠ ܒܢܲܝ̈ ܝܼܣܪܵܝܹܠ ܥܲܒ̣ܕܲܝ̈ܟ. ܘܐܸܢܵܐ ܡܵܘܕܹ̇ܐ ܐ̄ܢܵܐ ܥܲܠ ܚܛܵܗܹ̈ܐ ܕܲܒ̣ܢܲܝ̈ ܝܼܣܪܵܝܹܠ ܕܲܚܛܵܘ ܠܵܟ݂ ܘܐܸܢܵܐ ܘܒܹܝܬ̣ ܐܵܒ̣ܝ ܚܛܲܝܢܲܢ ܩܕ݂ܵܡܲܝܟ.

7: ܘܠܵܐ ܢ̣ܛܲܪܢ ܦܘܼܩ̈ܕܵܢܹܐ ܘܢܵܡܘܿܣܹ̈ܐ ܕܦܲܩܸܕ̇ܬ̇ ܠܡܘܼܫܹܐ ܥܲܒ̣ܕܵܟ݂.

8: ܐܸܬ̇ܕܲܟ݂ܪ ܠܟ݂ܠ ܦܘܼܩ̈ܕܵܢܹܐ ܕܦܲܩܸܕ̇ܬ̇ ܠܡܘܼܫܹܐ ܥܲܒ̣ܕܵܟ݂: ܘܐܸܡܲܪܬ̇ ܠܹܗ: ܕܐܲܢ̄ܬܘܿܢ ܬܟܲܕ̇ܒ̣ܘܼܢ ܒܝܼ: ܘܐܸܢܵܐ ܐܹܒܲܕܲܪܟ݂ܘܿܢ ܒܹܝܬ̣ ܥܲܡܡܹ̈ܐ.

9: ܘܬܸܗܦ̄ܟ݂ܘܿܢ ܠܘܵܬ̣ܝ. ܘܬܸܛܪܘܼܢ ܢܵܡܘܿܣܲܝ̈: ܘܬܸܥܒ̇ܕ݂ܘܼܢ ܐܸܢܘܿܢ. ܘܐܸܢ ܢܸܗܘܘܿܢ ܡܒܲܕ̇ܪ̈ܲܝܟ̇ܘܿܢ ܒܣܵܘ̈ܦܲܝ ܫܡܲܝܵܐ: ܡ̣ܢ ܬܲܡܵܢ ܐܹܩܲܪܸܒ̣ܟ݂ܘܿܢ ܘܐܲܝܬܹ̇ܝܟ݂ܘܿܢ ܠܐܲܬ̣ܪܵܐ ܕܲܓ̣ܒܹ̇ܝܬ̣ ܠܡܲܫܪܵܝܘܼ ܫܹܡܝ ܬܲܡܵܢ.

10: ܘܗܸܢܘܿܢ ܥܲܒ̣ܕ̇ܝ̈ܟ ܘܥܲܡܵܟ݂ ܕܲܦܪܲܩ̣ܬ̇ ܒܚܲܝܠܵܟ݂ ܪܲܒܵܐ: ܘܒ̣ܐܝܼܕ݂ܵܟ݂ ܬܲܩܝܼܦܬܵܐ.

11: ܒܒ̣ܵܥܘܼ ܡ̣ܢ ܩܕ݂ܵܡܲܝܟ ܡܵܪܝܵܐ: ܬܸܗܘܹܐ ܐܸܕ݂ܢܵܟ݂ ܨܵܝ̇ܬܵܐ ܠܲܨܠܘܿܬܹܗ ܕܥܲܒ̣ܕܵܟ݂: ܘܠܲܨܠܘܿܬ̣ܵܐ ܕܐܲܝܠܹܝܢ ܕܨܵܒܹ̇ܝܢ ܠܡܸܕ݂ܚܲܠ ܠܲܫܡܵܟ݂: ܘܲܦܪܘܿܩܲܝܗܝ ܠܥܲܒ̣ܕܵܟ݂ ܝܵܘܡܵܢܵܐ. ܘܗܲܒܲܝܗܝ ܒܪ̈ܲܚܡܹܐ ܩܕ݂ܵܡ ܓܲܒ̣ܪܵܐ ܗܵܢܵܐ.

ܩܹܦܵܠܹܐܘܿܢ: ܒ.

1: ܘܐܸܢܵܐ ܗܘܹ̇ܝܬ̣ ܫܵܩ̇ܝܵܐ ܠܡܲܠܟܵܐ. ܗܵܝܕܹ̇ܝܢ ܒܝܼܪܲܚ ܢܝܼܣܵܢ: ܒܲܫܢܲܬ̣ ܥܸܣܪܝܼܢ ܠܐܲܪܛܲܚܫܸܫܬ̇ ܡܲܠܟܵܐ: ܚܲܡܪܵܐ ܡܲܫܩܹܐ ܗ̄ܘܹ̇ܝܬ̣ ܩܕ݂ܵܡ ܡܲܠܟܵܐ. ܘܫܸܩܠܹ̇ܬ̣ ܚܲܡܪܵܐ ܘܝܸܗ̄ܒܹ̇ܬ̣ ܠܡܲܠܟܵܐ: ܘܠܵܐ ܗܘܹ̇ܝܬ̣ ܒܝܼܫ ܩܕ݂ܵܡܵܘܗܝ.

2: ܘܐܸܡܲܪ ܠܝܼ ܡܲܠܟܵܐ: ܡܸܛܠ ܡܵܢܵܐ ܐܲܦܲܝ̈ܟ ܒܝܼ̈ܫܵܢ. ܘܐܲܢ̄ܬ̇ ܠܵܐ ܗ̄ܘܲܝܬ̇ ܟܪܝܼܗ. ܠܲܝܬ̇ ܗܵܢܵܐ: ܐܸܠܵܐ ܐܸܢ ܒܝܼܫܘܼܬ̣ ܠܸܒܵܐ. ܘܕܸܚܠܹ̇ܬ̣ ܣܲܓ̇ܝܼ ܛܵܒ̣.

3: ܘܐܸܡ̇ܪܹܬ̣ ܠܡܲܠܟܵܐ: ܡܲܠܟܵܐ: ܠܥܵܠܲܡ ܚܝܝܼ. ܡܸܛܠ ܡܵܢܵܐ ܠܵܐ ܢܸܒ̣̈ܐ̱ܫܵܢ ܐܲܦܲܝ̈: ܕܲܡܕ݂ܝܼܢ̄ܬܵܐ ܕܒܹܝܬ̣ ܡܲܠܟ̇ܘܼܬ̣ ܐܒ̣ܵܗܲܝ ܚܲܪܒܵܐ. ܘܬܲܪ̈ܥܹܝܗ̇ ܡܵܘܩ̄ܕ݂ܝܼܢ ܒܢܘܼܪܵܐ.

4: ܘܐܸܡܲܪ ܠܝܼ ܡܲܠܟܵܐ: ܡܸܛܠ ܡܵܢܵܐ ܒܥܲܝܬ̇: ܘܨܲܠܝܼܬ̇ ܩܕ݂ܵܡ ܐܲܠܵܗܵܐ ܕܲܫܡܲܝܵܐ.

5: ܘܐܸܡ̇ܪܹܬ̣ ܠܡܲܠܟܵܐ: ܐܸܢ ܥܲܠ ܡܲܠܟܵܐ: ܛܵܒ̣. ܘܐܸܢ ܫܵܦܲܪ ܐ̄ܢܵܐ ܥܲܒ̣ܕܵܟ݂ ܩܕ݂ܵܡܲܝܟ: ܬܫܲܕ̇ܪܲܢܝ ܠܲܝܗܘܼܕ݂ ܡܕ݂ܝܼܢ̄ܬܵܐ: ܠܒܹܝܬ̣ ܩܒ̣ܘܼܪܵܐ ܕܐܲܒ̣ܵܗܲܝ̈: ܘܐܸܒ̣ܢܹܝܗ̇.

6: ܘܐܸܡܲܪ ܠܝܼ ܡܲܠܟܵܐ: ܫܵܛܝܵܐ: ܥܲܕ݂ ܐܸܡܲܬ̣ܝ ܐܵܙܹ̇ܠ ܘܐܵܬܹܐ. ܘܲܫ̣ܦܲܪ ܩܕ݂ܵܡ ܡܲܠܟܵܐ: ܘܫܲܕ̇ܪܲܢܝ. ܘܝܲܗ̄ܒ̣ ܠܝܼ ܙܲܒ̣ܢܵܐ.

7: ܘܐܸܡ̇ܪܹܬ̣ ܠܡܲܠܟܵܐ: ܐܸܢ ܥܲܠ ܡܲܠܟܵܐ ܫܲܦܝܼܪ: ܢܸܟ݂ܬ̇ܒ̣ܘܼܢ ܠܝܼ ܐܸܓܲܪܬܵܐ ܠܘܵܬ̣ ܫܲܠܝܼܛܵܐ ܕܒܲܥܒܲܪ ܢܲܗܪܵܐ: ܕܢܲܥܒ̇ܪܘܼܢܵܢܝ ܥܕܲܡܵܐ ܕܐܸܙܲܠ ܠܲܝܗܘܼܕ݂.

8: ܘܐܸܓܲܪܬܵܐ ܠܘܵܬ̣ ܐܵܣܵܦ ܢܵܛܲܪ ܦܲܪܕܲܝܣܵܐ ܕܡܲܠܟܵܐ: ܘܢܸܬܸ̇ܠ ܠܝܼ ܩܲܝܣܹ̈ܐ ܠܡܸܥܒܲܕ݂ ܬܲܪ̈ܥܲܝ ܒܲܝܬܵܐ ܘܲܕ݂ܒ̣ܝܼܪܬܵܐ: ܘܫܘܼܪܹ̈ܝܗ̇ ܕܲܡܕ݂ܝܼܢ̄ܬܵܐ: ܘܲܠܒܲܝܬܵܐ ܕܥܵܐܹ̇ܠ ܐ̄ܢܵܐ ܠܹܗ: ܘܝܲܗ̄ܒ̣ ܠܝܼ ܡܲܠܟܵܐ ܐܲܝܟ݂ ܐܝܼܕܹܗ ܕܐܲܠܵܗܵܐ ܕܐܲܛ̱ܐܒܲܬ̤ ܠܝܼ.

9: ܘܐܸܬܹܝܬ̣ ܠܘܵܬ̣ ܫܲܠܝܼܛܵܐ ܕܒܲܥܒܲܪ ܢܲܗܪܵܐ. ܘܝܸܗ̄ܒܹ̇ܬ̣ ܠܹܗ ܐܸܓܲܪܬܵܐ ܕܡܲܠܟܵܐ. ܘܫܲܕܲܪ ܥܲܡܝ ܡܲܠܟܵܐ ܪܲܒ̇ ܚܲܝܠܵܐ ܚܲܕ݂ ܕܦܲܪ̈ܵܫܹܐ.

10: ܘܲܫܡܲܥ̣ ܣܲܡܒ̇ܠܵܛ ܚܵܘܪܵܢܵܝܵܐ ܘܛܘܿܒ̇ܝܼܵܐ ܥܲܒ̣ܕܹ̇ܐ ܕܥܲܡ̈ܘܿܢܵܝܹܐ. ܘܐܸܬ̣ܒܲܐܫܲܬ̤ ܠܗܘܿܢ ܒܝܼܫܵܐܝܼܬ̣ ܥܲܠ ܕܐܸܬ̣ܵܐ ܒܲܪܢܵܫܵܐ ܠܡܸܒ̣ܥܵܐ ܛܵܒ̣ܬ̣ܵܐ ܥܲܠ ܒܢܲܝ̈ ܝܼܣܪܵܝܹܠ.

11: ܘܐܸܬܹܝܬ̣ ܠܐܘܿܪܸܫܠܸܡ: ܘܲܗܘܹ̇ܝܬ̣ ܬܲܡܵܢ ܝܵܘ̈ܡܵܬ̣ܵܐ ܬܠܵܬ̣ܵܐ.

12: ܘܩܵܡܹ̇ܬ̣ ܒܠܸܠܝܵܐ ܐܸܢܵܐ ܘܓܲܒ̣ܪܹ̈ܐ ܗܵܢ̇ܘܿܢ. ܕܐܸܬ̣ܵܘ ܗ̄ܘ̣ܵܘ ܥܲܡܝ. ܘܠܵܐ ܚܵܘܝܼܬ̣ ܠܐ̄ܢܵܫ ܒܡܸܕܸ̇ܡ ܕܐܲܪܡܝܼ ܐܲܠܵܗܵܐ ܒܠܹܒ̇ܝ ܠܡܸܥܒܲܕ݂ ܒܐܘܿܪܸܫܠܸܡ. ܘܲܒ̣ܥܝܼܪܵܐ ܠܲܝܬ̇ ܗ̄ܘ̣ܵܐ ܥܲܡܝ: ܐܸܠܵܐ ܐܸܢ ܒܥܝܼܪܵܐ ܕܲܪܟ݂ܝܼܒ̣ ܗ̄ܘܹ̇ܝܬ̣ ܥܠܹܝܗ̇.

13: ܘܢܸܦܩܹ̇ܬ̣ ܥܲܠ ܬܲܪܥܵܐ ܕܢܲܚܠܵܐ ܒܠܸܠܝܵܐ: ܠܐܲܦܲܝ̈ ܥܹܝܢ ܬܸܠܠܝܼܢ: ܘܲܠܬܲܪܥܵܐ ܕܐܸܣܦܘܼܬ̣ ܘܲܗܘܹ̇ܝܬ̣ ܣܵܟܲܪ ܒܫܘܼܪܹ̈ܝܗ ܕܐܘܿܪܸܫܠܸܡ ܕܡܸܬ̇ܬܲܪܥܝܼܢ ܗ̄ܘ̣ܵܘ. ܘܬܲܪ̈ܥܹܐ ܝܲܩܝܼܕ݂ܝܼܢ ܗ̄ܘ̣ܵܘ ܒܢܘܼܪܵܐ.

14: ܘܥܸܒ̣ܪܹܬ̣ ܥܲܠ ܬܲܪܥܵܐ ܕܢܲܚܠܵܐ ܘܠܵܐܓ̣ܡܵܐ ܕܡܲܠܟܵܐ. ܘܠܲܝܬ̇ ܗ̄ܘ̣ܵܐ ܐܲܬ̣ܪܵܐ ܠܲܒ̣ܥܝܼܪܵܐ: ܠܡܸܥܒܲܪ ܬܲܡܵܢ.

15: ܘܲܗܘܹ̇ܝܬ̣ ܣܵܠܹܩ ܒܢܲܚܠܵܐ ܒܠܸܠܝܵܐ. ܘܲܗܘܹ̇ܝܬ̣ ܣܵܟܲܪ ܒܠܸܠܝܵܐ ܘܐܵܬܹ̇ܐ ܘܥܸܠܹ̇ܬ̣ ܒܲܬ̣ܪܲܥ ܢܲܚܠܵܐ ܘܗܸܦܟܹ̇ܬ̣.

16: ܘܫܲܠܝܼܛܵܢܹ̈ܐ ܠܵܐ ܝܼܕܲܥܘ ܠܐܲܝܟܵܐ ܐܸܙܹ̇ܠ̄ܬ̣: ܘܡܵܢܵܐ ܥܵܒܹܕ݂ ܐ̄ܢܵܐ. ܘܠܲܝܗܘܼܕ݂ܵܝܹܐ: ܘܲܠܟ݂ܵܗ̈ܢܹܐ: ܘܲܠܫܲܠܝܼܛܵܢܹ̈ܐ: ܘܲܠܣܵܦܵܪܹ̈ܐ: ܘܲܠܫܲܪܟܵܐ ܕܥܵܒ̣ܕܲܝ̈: ܥܒ̣ܝܼܕ̇ܬܵܐ: ܥܕܲܡܵܐ ܠܗܵܫܵܐ ܠܵܐ ܚܵܘܝܼܬ̣.

17: ܘܐܸܡ̇ܪܹܬ̣ ܠܗܘܿܢ: ܐܲܢ̄ܬ̇ܘܿܢ ܚܵܙܹ̇ܝܢ ܒܝܼܫܬܵܐ ܕܲܚܢܲܢ ܒܵܗ̇. ܕܗܵܐ ܐܘܿܪܸܫܠܸܡ ܚܲܪܒܵܐ. ܘܬܲܪ̈ܥܹܝܗ̇ ܝܲܩܝܼܕ݂ܝܼܢ ܒܢܘܼܪܵܐ. ܬܵܘ ܢܸܒ̣ܢܸܐ ܫܘܼܪܵܐ ܕܐܘܿܪܸܫܠܸܡ. ܘܠܵܐ ܢܸܗܘܹܐ ܡܸܟܹ̇ܝܠ ܚܸܣܕܵܐ.

18: ܘܲܓ̣ܠܹ̇ܝܬ̣ ܠܗܘܿܢ ܐܝܼܕ݂ܵܐ ܕܐܲܠܵܗܵܐ ܕܲܗܘ̤ܵܬ̣ ܥܲܡܝ ܠܛܵܒ̣: ܘܐܵܦ ܡܸܠܲܝ ܡܲܠܟܵܐ ܕܐܸܬ̣ܐ̱ܡܲܪ ܠܝܼ: ܘܐܵܡ̇ܪܝܼܢ: ܩܵܝ̇ܡܝܼܢ ܚ̄ܢܲܢ: ܘܒ̣ܵܢܹ̇ܝܢ ܚ̄ܢܲܢ. ܘܐܲܥܫܸܢܘ ܐܝܼܕܲܝ̈ܗܘܿܢ ܠܡܸܥܒܲܕ݂ ܕܛܵܒ̣.

19: ܘܲܫܡܲܥ ܣܲܡܒ̇ܠܵܛ ܚܵܘܪܵܢܵܝܵܐ: ܘܛܘܼܒ̇ܝܼܵܐ: ܓܲܒ̣ܪܹ̈ܐ ܥܲܡܘܿܢܵܝܹ̈ܐ: ܘܲܓ̣ܫܘܿܡ ܥܲܪܒ̣ܵܝܵܐ. ܘܲܓ̣ܚܸܟ݂ܘ ܥܠܲܝܢ ܘܡܲܝܸܩܘܒܲܢ. ܘܐܵܡ̇ܪܝܼܢ: ܡܵܢܲܐ ܗ̄ܝ̣ ܡܸܠܬ̣ܵܐ ܗܵܕܹܐ ܕܥܵܒ̣ܕ̇ܝܼܢ ܐ̄ܢܬ̇ܘܿܢ. ܕܲܠܡܵܐ ܥܲܠ ܡܲܠܟܵܐ ܡܵܪܕ̇ܝܼܢ ܐ̄ܢܬ̇ܘܿܢ.

20: ܘܐܲܬ̣ܝܼܒܹ̇ܬ̣ ܐܸܢܘܿܢ ܦܸܬ̣ܓ̣ܵܡܵܐ: ܘܐܸܡ̇ܪܹܬ̣ ܠܗܘܿܢ: ܐܲܠܵܗܵܐ ܗ̄ܘ̣ ܕܲܫܡܲܝܵܐ ܦܲܪܩܲܢ. ܘܲܚܢܲܢ ܥܵܒ̣ܕ̇ܝܼܢ ܘܩܵܝ̇ܡܝܼܢ ܘܒ̣ܵܢܹܝܢ. ܘܲܠܟ݂ܘܿܢ ܠܲܝܬ̇ ܠܟ݂ܘܿܢ ܙܸܕ݂ܩܵܐ ܘܕ݂ܘܼܟ݂ܪܵܢܵܐ ܘܲܡܢܵܬ̣ܵܐ ܒܐܘܿܪܸܫܠܸܡ.

ܩܹܦܵܠܹܐܘܿܢ: ܓ.

1: ܘܩܵܡ ܐܹܠܝܼܫܵܒ̣ ܟܘܼܡܪܵܐ ܪܲܒܵܐ: ܘܐܲܚܵܘ̈ܗܝ ܟܘܼܡܪܹ̈ܐ: ܘܲܒ̣ܢܵܘ̈ܗܝ: ܥܲܠ ܬܲܪܥܵܐ ܕܥܵܢܵܐ. ܘܐܲܩܝܼܡܘ ܬܲܪ̈ܥܵܘܗܝ: ܘܩܘܼܕ݂ܫܵܘ̈ܗܝ: ܘܲܥܕܲܡܵܐ ܠܡܲܓ̣ܕܲܠ ܡܵܐܐ. ܗܸܢܘܿܢ ܩܲܕ̇ܫܘܼܗܝ ܥܕܲܡܵܐ ܠܡܲܓ̣ܕ̇ܠܵܐ ܕܲܚܢܵܢܵܐܹܝܠ.

2: ܘܲܥܕܲܡܵܐ ܠܲܬ̣ܚܘܼܡܵܐ ܕܐ̄ܢܵܫܵܐ ܕܐܝܼܪܝܼܚܘܿ: ܘܲܥܕܲܡܵܐ ܠܲܬ̣ܚܘܼܡܵܐ ܕܲܒ̣ܢܲܝ̈ ܙܲܟ̇ܘܼܪ: ܒܢܲܝ̈ ܐܲܡܪܝܼ.

3: ܘܬܲܪܥܵܐ ܕܨܲܝܵܕܹ̈ܐ: ܒܢܵܐܘܼܗܝ ܒܢܲܝ̈ ܣܵܢ̇ܐܵܐ. ܘܗܸܢܘܿܢ ܐܲܬ̣ܩ̄ܢܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘ̈ܗܝ.

4: ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܡܲܪܡܘܿܬ̣ ܒܲܪ ܐܘܿܪܝܼܵܐ: ܒܲܪ ܐܵܩܘܿܨ. ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܡܲܫܠܸܡ ܒܲܪ ܟܢܵܝܵܐ: ܒܲܪ ܡܝܼܙܟܵܠ. ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܙܵܕ݂ܘܿܩ ܒܲܪ ܒܥܢܵܐ.

5: ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦܘ ܬܩܘܿܥܵܝܹ̈ܐ ܘܫܲܠܝܼܛܵܢܲܝ̈ܗܘܿܢ. ܘܠܵܐ ܐܲܥܸܠܘ ܨܵܘܪ̈ܲܝܗܘܿܢ ܒܦܘܼܠܚܵܢܵܐ ܕܡܵܪ̈ܲܝܗܘܿܢ.

6: ܘܬܲܪܥܵܐ ܕܲܬ̣ܪܹܝܢ ܬܲܩܸܦ ܝܘܿܝܵܕ݂ܵܥ ܒܲܪ ܦܨܲܚ: ܘܡܲܫܠܲܡ ܒܲܪ ܒܣܲܪܝܵܐ. ܘܗܸܢܘܿܢ ܐܲܬ̣ܩ̄ܢܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘ̈ܗܝ.

7: ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܡܠܲܛܝܵܐ ܓܸܒ̣ܥܘܿܢܵܝܵܐ: ܘܢܹܪܘܿܢ ܡܲܪܬܵܝܵܐ. ܘܐ̄ܢܵܫܵܐ ܕܓܸܒ̣ܥܘܿܢ ܘܲܕ݂ܡܲܨܦܝܵܐ: ܥܒܲܕ݂ܘ ܟܘܼܪܣܝܵܐ ܠܫܲܠܝܼܛ ܥܒܲܪ ܢܲܗܪܵܐ.

8: ܘܲܬ̣ܚܘܼܡܵܐ ܬܲܩܸܦ: ܥܙܵܐܹܝܠ ܒܲܪ ܚܲܕܵܝܵܐ ܒܲܪ ܨܪܲܦܝܵܐ. ܘܲܬ̣ܚܘܼܡܵܐ ܬܲܩܸܦ: ܚܲܢܲܢܝܵܐ ܒܲܪ ܩܪܲܚܝܵܐ. ܘܲܫܒܲܩܘ ܐܘܿܪܸܫܠܸܡ ܟܲܕ݂ ܫܘܼܪܵܗ̇ ܪܘܝܼܚ.

9: ܘܲܬ̣ܚܘܼܡܵܐ ܬܲܩܸܦ̣: ܐܹܪܲܡܝܵܐ ܒܲܪ ܚܘܿܪ ܫܲܠܝܼܛܵܐ ܕܐܘܿܪܸܫܠܸܡ.

10: ܘܲܬ̣ܚܘܼܡܵܐ ܬܲܩܸܦ̣: ܢܝܼܪܝܼܵܐ ܒܲܪ ܚܕ݂ܘܼܡܦܝܼ: ܘܪܲܒܵܐ ܕܒܲܝܬܹ̇ܗ ܘܲܬ̣ܚܘܼܡܵܐ ܬܲܩܸܦ̣: ܚܛܘܿܫ ܒܲܪ ܚܫܲܒ̣ܢܵܝܵܐ.

11: ܘܲܡܫܘܼܚܬ̣ܵܐ ܕܬܲܪܬܹ̇ܝܢ ܬܲܩܸܦ ܡܠܲܟ݂ܝܵܐ ܒܲܪ ܚܵܪܵܡ: ܘܲܚܫܘܿܡ ܒܲܪ ܪܲܒܵܐ ܕܡܘܼܐܵܒ̣.

12: ܘܡܲܓ̣ܕ̇ܠܵܐ ܕܐܸܫܬ̇ܚܲܪ ܘܲܥܕܲܡܵܐ ܠܲܬ̣ܚܘܼܡܵܐ ܬܲܩܸܦ ܫܵܠܘܿܡ ܒܲܪ ܚܛܘܿܫ ܫܲܠܝܼܛܵܐ ܕܐܘܿܪܸܫܠܸܡ: ܗ̤ܘ ܘܲܒ̣ܢܵܘ̈ܗܝ.

13: ܘܬܲܪܥܵܐ ܕܲܦܩܲܥܬ̣ܵܐ ܬܲܩܸܦ̣: ܚܲܢܘܿܢ ܘܥܵܡܘܿܪܹ̈ܐ ܘܙܝܼܘܿܚ ܗܸܢܘܿܢ ܒܢܵܐܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘܗܝ ܘܐܵܠܹܦ ܐܲܡܝܼܢ ܗܵܘܹ̇ܐ ܒܫܘܼܪܵܐ ܥܕܲܡܵܐ ܠܬܲܪܥܵܐ ܕܐܲܣܦܘܿܬ̣.

14: ܘܬܲܪܥܵܐ ܕܐܲܣܦܘܿܬ̣ ܬܲܩܸܦ ܡܠܲܟ݂ܝܵܐ ܒܲܪ ܪܵܟ݂ܵܒ̣: ܫܲܠܝܼܛܵܐ ܕܒܹܝܬ̣ ܟܲܪܡܵܐ: ܗܸܢܘܿܢ ܒܢܵܐܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘܗܝ.

15: ܘܬܲܪܥܵܐ ܕܥܲܝܢܵܐ ܬܲܩܸܦ̣ ܫܵܠܘܿܡ ܒܲܪ ܟܸܠܚܵܙܹܐ ܫܲܠܝܼܛܵܐ ܕܡܲܨܦܝܵܐ. ܘܗܸܢܘܿܢ ܒܢܵܐܘܼܗܝ ܘܛܲܠܠܘܼܗܝ: ܘܐܲܩܝܼܡܘ ܬܲܪ̈ܥܵܘܗܝ ܘܣܘܼܟ̇ܪ̈ܵܘܗܝ ܘܡܘܼܟ݂ܠܵܘܗܝ. ܘܫܘܼܪܵܐ ܕܦܸܣܩܝܼܢ ܕܡܲܦܩܵܐ ܡܲܝܵܐ ܠܓܲܢܲܬ̣ ܡܲܠܟܵܐ: ܘܲܥܕܲܡܵܐ ܠܡܲܣܲܩܬܵܐ ܕܢܵܚܬܵܐ ܡ̣ܢ ܩܪܝܼܬܹܗ ܕܕ݂ܵܘܝܼܕ݂.

16: ܒܵܬ̣ܪܹܗ ܬܲܩܸܦ ܢܚܲܡܝܵܐ ܒܲܪ ܥܲܙܒ̇ܘܿܩ ܫܲܠܝܼܛܵܐ ܕܒܹܝܬ̣ ܨܘܿܪ: ܥܕܲܡܵܐ ܠܲܫܒ̣ܝܼܠܵܐ ܕܩܲܒ̣ܪܹܗ ܕܕ݂ܵܘܝܼܕ݂: ܘܲܥܕܲܡܵܐ ܠܦܸܣܩܝܼܢ ܕܲܥܒ̣ܝܼܕ݂ܵܐ: ܘܲܥܕܲܡܵܐ ܠܒܹܝܬ̣ ܓܲܢ̄ܒܵܪܹ̈ܐ.

17: ܒܵܬ̣ܪܹܗ ܥܲܫܸܢܘ ܠܹܘܵܝܹ̈ܐ: ܐܲܪܚܘܿܡ ܒܲܪ ܒܲܢܝܼ: ܥܕܲܡܵܐ ܠܲܬ̣ܚܘܼܡܵܐ ܕܲܚܫܲܒ̣ܝܵܐ ܫܲܠܝܼܛܵܐ ܕܲܩܥܝܼܠܵܐ.

18: ܒܵܬ̣ܪܹܗ ܐܲܥܫܸܢ̣ܘ ܐܲܚܲܝ̈ܗܘܿܢ ܒܲܢܘܝܼ ܒܲܪ ܢܲܚܕܵܪ ܫܲܠܝܼܛܵܐ ܕܲܩܠܝܼܠܵܐ.

19: ܘܥܲܫܸܢ ܥܕܲܡܵܐ ܠܲܬ̣ܚܘܼܡܵܐ ܕܥܵܙܵܪ: ܒܲܪ ܝܼܫܘܿܥ ܫܲܠܝܼܛܵܐ ܕܡܲܨܦܝܵܐ: ܡܫܘܼܚܬ̣ܵܐ ܕܬܲܪܬܹ̇ܝܢ ܡ̣ܢ ܠܘܼܩܒܲܠ ܡܣܲܩܬܵܐ ܕܐܵܙܵܠ̄ܐ ܠܩܲܡܨܘܿܥ.

20: ܡ̣ܢ ܒܵܬ̣ܪܹܗ ܐܸܚܲܕ݂ ܘܥܲܫܸܢ ܒܵܪܘܿܟ ܒܲܪ ܙܲܟ̇ܝܼ: ܡܫܘܼܚܬ̣ܵܐ ܕܬܲܪܬܹ̇ܝܢ: ܥܕܲܡܵܐ ܠܩܲܡܨܘܿܥ: ܘܲܥܕܲܡܵܐ ܠܬܲܪܥܵܐ ܕܒܹܝܬ̣ ܐܹܠܝܼܫܲܥ ܟܵܗܢܵܐ ܪܲܒܵܐ.

21: ܒܵܬ̣ܪܹܗ ܥܲܫܸܢ ܡܵܪܡܘܿܬ̣: ܒܲܪ ܐܘܿܪܝܼܵܐ: ܒܲܪ ܐܲܡܘܿܟ݂: ܡܫܘܚܬ̣ܵܐ ܕܬܲܪܬܹ̇ܝܢ: ܡ̣ܢ ܬܲܪܥܵܐ ܕܒܹܝܬ̣ ܐܹܠܝܼܫܲܥ: ܘܲܥܕܲܡܵܐ ܠܣܵܘܦܵܐ ܕܒܹܝܬ̣ ܐܹܠܝܼܫܲܥ.

22: ܒܵܬ̣ܪܹܗ ܥܲܫܸܢܘ ܟܵܗ̈ܢܹܐ ܐ̄ܢܵܫܵܐ ܕܲܦܩܲܥܬ̣ܵܐ.

23: ܒܵܬ̣ܪܹܗ ܐܲܥܫܸܢ ܒܸܢܝܵܡܹܝܢ: ܘܝܼܫܘܿܥ ܪܲܒܵܐ ܕܒܲܝܬܹ̇ܗ. ܒܵܬ̣ܪܹܗ ܐܲܥܫܸܢ ܥܘܿܙܝܼܵܐ: ܒܲܪ ܡܥܲܣܝܵܐ: ܒܲܪ ܥܢܲܢܝܵܐ ܒܸܣܬܲܪ ܒܲܝܬܹ̇ܗ.

24: ܒܵܬ̣ܪܹܗ ܐܲܥܫܸܢ ܒܲܢܘܝܼ ܒܲܪ ܢܲܚܕܵܪ: ܡܫܘܼܚܬ̣ܵܐ ܕܬܲܪܬܹ̇ܝܢ: ܡ̣ܢ ܒܹܝܬ̣ ܥܲܙܲܪܝܵܐ: ܥܕܲܡܵܐ ܠܩܲܡܨܘܿܥ: ܘܲܥܕܲܡܵܐ ܠܲܦܢܝܼܬ̣ܵܐ.

25: ܕܦܵܠܵܠ ܒܲܪ ܐܲܙܝܼ ܡ̣ܢ ܠܘܼܩܒܲܠ ܩܲܡܨܘܥ: ܘܲܥܕܲܡܵܐ ܠܡܲܓܕ̇ܠܵܐ ܕܲܦܩܲܥܬ̣ܵܐ ܕܢܵܦܹ̇ܩ ܡ̣ܢ ܒܹܝܬ̣ ܡܲܠܟܵܐ ܥܸܠܵܝܵܐ: ܘܲܥܕܲܡܵܐ ܠܕ݂ܵܪܬܵܐ ܕܒܹܝܬ̣ ܐܲܣܝܼܪܹ̈ܐ. ܒܵܬ̣ܪܹܗ ܦܵܪܝܵܐ ܒܲܪ ܦܲܪܫܵܥ.

26: ܘܢܵܬ̣̈ܢܵܝܹܐ ܕܲܗܘ̤ܵܘ ܝܵܬ̣ܒ̇ܝܼܢ ܒܦܵܥܵܠ: ܥܕܲܡܵܐ ܠܬܲܪܥܵܐ ܕܡܲـ̈ـܝܵܐ: ܠܡܲܕ݂ܢ̱ܚܵܐ: ܘܡܲܓ̣ܕ̇ܠܵܐ ܕܡܲܦܩܵܢܵܐ.

27: ܒܵܬ̣ܪܹܗ ܥܲܫܸܢܘ ܬܩܘܿܥܵܝܹ̈ܐ: ܡܫܘܼܚܬ̣ܵܐ ܕܬܲܪܬܹ̇ܝܢ ܡ̣ܢ ܠܘܼܩܒܲܠ ܡܲܓ̣ܕ̇ܠܵܐ ܪܲܒܵܐ ܕܡܲܦܩܵܢܵܐ: ܘܲܥܕܲܡܵܐ ܠܫܘܼܪܵܐ ܥܲܫܝܼܢܵܐ.

28: ܡ̣ܢ ܡܲܥܠܵܢܵܐ ܕܬܲܪܥܵܐ ܕܪ̈ܲܟ݂ܫܵܐ: ܐܲܥܫܸܢܘ ܟܵܗ̈ܢܹܐ ܐ̄ܢܵܫ ܠܘܼܩܒܲܠ ܒܲܝܬܹ̇ܗ.

29: ܒܵܬܲܪܗܘܿܢ ܐܲܥܫܸܢ ܨܵܕ݂ܘܿܩ ܒܲܪ ܐܵܡܝܼ ܠܘܼܩܒܲܠ ܒܲܝܬܹ̇ܗ ܒܵܬ̣ܪܹܗ ܐܲܥܫܸܢ ܫܡܲܥܝܵܐ ܒܲܪ ܫܟܲܢܝܵܐ ܢܵܛܲܪ ܬܲܪܥܵܐ ܡܲܕ݂ܢ̱ܚܵܝܵܐ.

30: ܒܵܬ̣ܪܹܗ ܐܲܥܫܸܢ ܚܲܢܲܢܝܵܐ ܒܲܪ ܫܠܲܡܝܵܐ: ܘܚܲܢܘܿܢ ܒܲܪ ܨܵܠܵܦ ܫܬ̇ܝܼܬ̣ܵܝܵܐ: ܡܫܘܼܚܬ̣ܵܐ ܕܬܲܪܬܹ̇ܝܢ ܒܵܬ̣ܪܹܗ ܐܲܥܫܸܢ ܡܲܫܠܘܿܡ ܒܲܪ ܒܪܲܟ݂ܝܵܐ: ܠܘܼܩܒܲܠ ܒܲܝܬܹ̇ܗ. ܒܵܬ̣ܪܹܗ ܐܲܥܫܸܢ ܒܲܢܘܼܢ ܒܲܪ ܢܲܚܕܵܪ: ܡܫܘܼܚܬ̣ܵܐ ܕܬܲܪܬܹ̇ܝܢ.

31: ܒܵܬ̣ܪܹܗ ܐܲܥܫܸܢ ܡܠܲܟ݂ܝܵܐ ܒܲܪ ܨܦܲܢܝܵܐ: ܥܕܲܡܵܐ ܠܒܹܝܬ̣ ܢܵܬ̣ܢܵܝܹ̈ܐ ܘܪܸ̈ܓ̣ܠܵܝܹܐ.

32: ܠܘܼܩܒܲܠ ܬܲܪܥܵܐ ܕܡܲܦܩܵܢܵܐ: ܘܲܥܕܲܡܵܐ ܠܡܲܣܩܵܢܵܐ: ܕܲܦܢܝܼܬ̣ܵܐ ܕܡܲܣܲܩܬܵܐ ܕܦܵܢܝܵܐ ܠܬܲܪܥܵܐ ܕܥܵـ̈ـܢܵܐ: ܥܲܫܢܘ ܨܵܪ̈ܦܵܝܹܐ ܘܪܸ̈ܟ݂ܠܵܝܹܐ.

ܩܹܦܵܠܹܐܘܿܢ: ܕ.

1: ܘܟܲܕ݂ ܫ̣ܡܲܥ ܣܲܡܒ̇ܠܵܛ ܕܒ̣ܵܥܹ̇ܝܢܲܢ ܫܘܼܪܵܐ: ܟܸܪܝܲܬ̤ ܠܹܗ: ܘܲܣܓ̣ܝܼ ܪܘܼܓ̣ܙܹܗ. ܘܡܲܝܸܩ̣ ܥܠܲܝܗܘܿܢ ܥܲܠ ܝܗ̄ܘܼ̈ܕ݂ܵܝܹܐ.

2: ܘܐܸܡܲܪ ܠܐܲܚܵܘ̈ܗܝ ܘܲܠܚܲܝܠܵܐ ܕܫܵܡܪ̈ܵܝܹܐ: ܡܵܢܵܐ ܥܵܒ̣ܕ̇ܝܼܢ ܝܗ̄ܘܼ̈ܕ݂ܵܝܹܐ: ܘܡܸܫܬܲܒ̣ܗ̱ܪܝܼܢ. ܫܒ̣ܘܿܩܘ ܠܗܘܿܢ ܡܕܲܒ̇ܚܝܼܢ ܘܐܵܟ݂ܠܝܼܢ: ܒܝܵܘܡܵܐ ܕܐܲܩܝܼܡ̣ܘ ܟܹܐܦܹ̈ܐ ܗܵܠܹܝܢ: ܡ̣ܢ ܩܸܩ̱ܠܬܵܐ ܕܥܲܦܪܵܐ: ܘܝܲܩܝܼ̈ܕ݂ܵܢ ܐܸܢܹܝܢ.

3: ܘܛܘܿܒ̇ܝܼܵܐ ܥܲܡܘܿܢܵܝܵܐ ܩܵܐܹ̇ܡ ܗ̄ܘ̣ܵܐ ܠܘܵܬܹܗ: ܘܐܵܡܲܪ: ܟܡܵܐ ܕܗܸܢܘܿܢ ܒܵܥܹ̇ܝܢ: ܝܵܕܲܥ ܐ̄ܢܵܐ ܕܣܵܠܹ̇ܩ ܬܲܥܠܵܐ: ܘܥܵܩܲܪ ܟܹܐܦܹ̈ܐ ܕܫܘܼܪܲܝܗܘܿܢ.

4: ܫܡܲܥ ܐܲܠܵܗܵܐ ܡܸܛܠ ܕܲܗ̤ܘܲܝܢ ܓܘܼܚܟܵܐ. ܘܐܲܗܦܸܟ݂ ܨܲܥ̱ܪܗܘܿܢ ܒܪܹܫܗܘܿܢ ܘܗܲܒ̣ ܐܸܢܘܿܢ ܠܒܸܙܬ̣ܵܐ ܒܐܲܪܥܵܐ ܕܲܫܒ̣ܝܼܬ̣ܗܘܿܢ.

5: ܠܵܐܬܸܫܒ̇ܘܿܩ ܚܵܘ̈ܒܲܝܗܘܿܢ. ܘܲܚܛܵܗܲܝ̈ܗܘܿܢ ܩܕ݂ܵܡܲܝܟ ܠܵܐ ܢܸܬ̣ܥ̱ܛܘܿܢ. ܡܸܛܠ ܕܲܪܓܸܙܘ ܝܘܼܩܒܲܠ ܒܸܢܝܵܢܵܐ ܕܒ̣ܵܥܹ̇ܝܢܲܢ.

6: ܘܲܚܢܲܢ ܢܸܒ̣ܢܹܝܘܗܝ ܠܫܘܼܪܵܐ. ܘܲܒ̣ܢܵܐܘܼܗܝ ܘܲܓ̣ܡܲܪ ܫܘܼܪܵܐ ܥܕܲܡܵܐ ܠܦܸܠܓܹ̇ܗ. ܗܵܝܕ̇ܝܼܢ ܐܸܬ̣ܦܬܲܚ ܦܘܼܡܹܗ ܕܟ݂ܠܹܗ ܥܲܡܵܐ: ܠܡܸܥܒܲܕ݂.

7: ܗܵܝܕܹ̇ܝܢ ܟܲܕ݂ ܫ̣ܡܲܥ ܣܲܡܒ̇ܠܵܛ: ܘܛܘܿܒܝܼܵܐ: ܘܥܲܪ̈ܒ̣ܵܝܹܐ: ܘܥܲܡܘܿܢܵܝܹ̈ܐ: ܘܐܲܫܕ̇ܘܿܕ݂ܵܝܹ̈ܐ: ܕܐܸܬ̣̱ܝܼܗܸܒ̣ ܙܲܒ̣ܢܵܐ ܠܫܘܼܪܵܐ ܕܐܘܿܪܸܫܠܸܡ ܠܡܸܬ̣ܒ̇ܢܵܝܘܼ: ܘܫܲܪ̈ܝܼ ܬܘܼܪ̈ܥܵܬ̣ܵܐ ܠܡܸܣܬܲܟܵܪܘܼ: ܟܸܪܝܲܬ̤ ܠܗܘܿܢ ܛܵܒ̣.

8: ܘܐܸܬ̣ܚܲܫܲܒ̣ܘ ܟܠܗܘܿܢ ܐܲܟ݂ܚ̄ܕ݂ܵܐ: ܠܡܹܐܬ̣ܵܐ ܠܡܸܬ̣ܟܲܬܵܫܘܼ ܒܐܘܿܪܸܫܠܸܡ: ܘܲܠܡܸܥܒܲܕ݂ ܠܗܘܿܢ ܬܘܼܩ̱ܠܬ̣ܵܐ.

9: ܘܨܲܠܝܼ ܩܕ݂ܵܡ ܐܲܠܵܗܲܢ ܕܲܢܩܝܼܡ ܥܠܲܝܢ ܢܵܛܘܿܪܹ̈ܐ ܒܐܝܼܡܵܡܵܐ ܘܲܒ̣ܠܸܠܝܵܐ ܡ̣ܢ ܩܕ݂ܵܡܲܝܗܘܿܢ.

10: ܘܐܵܡ̇ܪܝܼܢ ܝܗ̄ܘܼ̈ܕ݂ܵܝܹܐ: ܒܨܲܪ ܠܹܗ ܚܲܝܠܲܢ ܡ̣ܢ ܩܘܿܦܵܝܹ̈ܐ ܘܥܲܦܪܵܐ ܣܲܓ̇ܝܼ ܛܵܒ̣. ܘܲܚܢܲܢ ܠܵܐ ܡܸܫܟ̇ܚܝܼܢܲܢ ܠܡܸܒ̣ܢܵܐ ܒܫܘܼܪܵܐ.

11: ܘܐܵܡ̇ܪܝܼܢ ܣܵܢ̈ܐܲܝܢ: ܕܠܵܐ ܢܸܕ̇ܥܘܼܢ: ܘܠܵܐ ܢܸܚܙܘܿܢ: ܥܕܲܡܵܐ ܕܢܸܦܸܠ ܥܠܲܝܗܘܿܢ ܘܲܢܩܲܛܸܠ ܐܸܢܘܿܢ: ܘܲܢܒܲܛܸܠ ܥܒ̣ܵܕ݂ܗܘܿܢ.

12: ܘܐܸܬ̣ܵܘ ܝܼܗ̄ܘܼ̈ܕ݂ܵܝܹܐ ܕܝܵܬ̣ܒ̇ܝܼܢ ܠܘܵܬ̣ܗܘܿܢ: ܘܐܵܡ̇ܪܝܼܢ ܠܗܘܿܢ: ܗܵܐ ܡܸܟܹ̇ܝܠ ܥܣܲܪ ܙܲܒ̣ܢ̈ܝܼܢ ܐܸܬ̣ܵܘ ܠܡܸܬ̣ܟܲܬܵܫܘܼ ܥܲܡܟ݂ܘܿܢ: ܡ̣ܢ ܟܠܗܘܿܢ ܐܲܬ̣ܪ̈ܵܘܵܬ̣ܵܐ ܐܲܝܠܹܝܢ ܕܲܫܪܹܝܢ ܗ̄ܘ̣ܵܘ ܒܗܘܿܢ.

13: ܘܐܸܬ̣ܵܘ ܘܩܵܡ̣ܘ ܡ̣ܢ ܒܸܣܬܲܪ ܫܘܼܪܵܐ: ܠܡܸܬ̣ܟܲܬܵܫܘܼ ܒܓܹܐܪ̈ܲܝܗܘܿܢ. ܘܦܲܠܓ̣ܘܼܗܝ ܠܚܲܝܠܵܐ ܠܛܘܿܗ̈ܡܹܐ ܥܲܡ ܣܲܝܦܲܝ̈ܗܘܿܢ: ܘܪ̈ܘܼܡܚܹܐ ܘܩܸܫ̈ܬܵܬ̣ܵܐ.

14: ܘܕܸܚܠܹܬ̣ ܘܩܵܡܹ̇ܬ̣ ܘܐܸܡ̇ܪܹܬ̣ ܠܪܵܘ̱ܪ̈ܒ̣ܵܢܹܐ ܘܲܠܫܲܠܝܼܛܵܢܹ̈ܐ: ܘܲܠܫܲܪܟܵܐ ܕܥܲܡܵܐ: ܠܵܐ ܬܸܕ݂ܚ̄ܠܘܼܢ ܡ̣ܢ ܩܕ݂ܵܡܲܝܗܘܿܢ. ܠܡܵܪܝܵܐ ܪܲܒܵܐ ܘܲܕ݂ܚܝܼܠܵܐ ܐܸܬ̇ܕܲܟ݂ܪܘ ܘܐܸܬ̣ܟܲܬܲܫܘ ܥܲܠ ܐܲܦܲܝ̈ ܐܲܚܲܝ̈ܟ̇ܘܿܢ: ܘܥܲܠ ܐܲܦܲܝ̈ ܒܢܲܝ̈ܟ̇ܘܿܢ ܘܲܒ̣̈ܢܵܬ̣ܟ݂ܘܿܢ: ܐܵܦ ܡܸܛܠ ܢܸܫܲܝ̈ܟ̇ܘܿܢ ܘܒ̣ܵܬܲܝ̈ܟ̇ܘܿܢ.

15: ܗܵܝܕܹܷ̇ܢ ܟܲܕ݂ ܫܡܲܥ̣ܘ ܒܥܸܠܕ̇ܒ̣ܵܒܲܝ̈ܢ ܕܐܸܬ̣ܝܲܕ݂ܥܲܬ̤ ܠܲܢ ܡܸܠܬ̣ܵܐ: ܘܒܲܛܸܠ ܡܵܪܝܵܐ ܡܘܼܠܟܵܢܲܝ̈ܗܘܿܢ: ܐܸܬ̣ܗ̱ܦܸܟ݂ܢ ܟܠܲܢ ܘܲܣܠܸܩ̄ܢ ܠܫܘܼܪܵܐ. ܘܥܵܒ̣ܕ̇ܝܼܢ ܗ̄ܘܲܝܢ ܟܠܲܢ ܓܒܲܪ ܒܲܥܒ̣ܵܕܹ̇ܗ.

16: ܘܦܸܠܓܵܐ ܕܲܥܠܲܝܡܹ̈ܐ ܡ̣ܢ ܝܵܘܡܵܐ ܗܵܘܿ ܘܲܠܗܲܠ: ܦܸܠܓ̇ܗܘܿܢ ܕܥܲܡܵܐ ܥܵܒ̣ܕ̇ܝܼܢ ܥܵܒ̣ܕ݂ܵܐ. ܘܦܸܠܓ̇ܗܘܿܢ ܐܲܚܝܼܕ݂ܝܼܢ ܪ̈ܘܼܡܚܹܐ: ܘܣܲܟ̇ܪܹ̈ܐ: ܘܩܸܫ̈ܬܵܬ̣ܵܐ: ܘܫܸܪ̈ܝܵܢܹܐ. ܘܲܡܫܲܡ̈ܫܵܢܹܐ ܩܵܝ̇ܡܝܼܢ ܒܸܣܬܲܪ ܝܼܗ̄ܘܼܕܲܝܹ̈ܐ: ܘܒ̣ܵܢܹ̇ܝܢ ܫܘܼܪܹ̈ܐ.

17: ܘܕܲܫܩܝܼܠܝܼܢ: ܒܩ̈ܘܿܦܹܐ ܫܩܝܼܠܝܼܢ: ܒܲܚܕ݂ܵܐ ܐܝܼܕܹܗ ܥܵܒܹܕ݂ ܥܒ̣ܵܕ݂ܵܐ. ܘܒܲܚܕ݂ܵܐ ܐܝܼܕܹܗ ܫܩܝܼܠ ܙܲܝܢܵܐ.

18: ܘܐܲܪ̈ܕܸ̇ܟ݂ܠܹܐ: ܐܲܣܝܼܪ ܣܲܝܦܹܗ: ܘܩܵܐܹ̇ܡ ܘܒ̣ܵܢܹܐ. ܘܲܕ݂ܩܵܪܹܐ ܒܩܲܪܢܵܐ ܩܵܐܹ̇ܡ ܒܸܣܬ̇ܪܹܗ.

19: ܘܐܸܡܪܹܬ̣ ܠܪܵܘ̱ܪ̈ܒ̣ܵܢܹܐ ܘܲܠܫܲܠܝܼܛܵܢܹ̈ܐ: ܘܲܠܫܲܪܟܵܐ ܕܥܲܡܵܐ: ܥܒ̣ܝܼܕ̇ܬܵܐ: ܣܲܓ̇ܝܼܵܐܐ ܘܲܪܘܝܼܚܵܐ. ܘܲܚܢܲܢ ܦܪܝܼܫܝܼܢܲܢ ܘܩܵܝܡܝܼܢܲܢ ܥܲܠ ܫܘܼܪܵܐ: ܘܦܲܪܝܼܩܝܼܢܲܢ ܓܒܲܪ ܡ̣ܢ ܐܲܚܘܼܗܝ.

20: ܒܕ݂ܘܼܟ̇ܬ̣ܵܐ ܕܹܝܢ ܕܫܵܡ̇ܥܝܼܢ ܐ̄ܢܬ̇ܘܿܢ ܩܵܠܵܐ ܕܩܲܪܢܵܐ: ܠܬܲܡܵܢ ܬܸܬ̣ܩܲܪܒ̣ܘܼܢ ܠܘܵܬܲܢ ܘܐܲܠܵܗܲܢ ܢܸܬ̣ܟܲܬܲܫ ܥܲܠ ܐܲܦܲܝ̈ܢ.

21: ܘܲܚܢܲܢ ܢܸܗܘܹܐ ܥܵܒ̣ܕ̇ܝܼܢ ܒܲܥܒ̣ܵܕܲܢ. ܘܦܸܠܓܲܢ ܢܸܗܘܘܿܢ ܐܲܚܝܼܕ݂ܝܼܢ ܪ̈ܘܼܡܚܹܐ: ܡ̣ܢ ܡܲܣܵܩܲܝ ܫܲܦܪܵܐ: ܥܕܲܡܵܐ ܕܢܵܦܩܝܼܢ ܟܵܘ̈ܟ̇ܒܹܐ.

22: ܐܵܦ ܒܹܗ ܒܙܲܒ̣ܢܵܐ ܗܵܘ̇: ܐܸܡ̇ܪܹܬ̣ ܠܥܲܡܵܐ: ܕܓܲܒ̣ܪܵܐ ܘܛܲܠܝܹܗ ܢܸܗܘܘܿܢ ܒܵܝܬ̇ܝܼܢ ܒܓ̣ܵܘ ܫܘܼܩܹ̈ܐ ܕܐܘܿܪܸܫܠܸܡ ܘܢܸܗܘܘܿܢ ܢܵܛ̇ܪܝܼܢ ܠܵܗ̇ ܒܠܸܠܝܵܐ ܘܒ̣ܐܝܼܡܵܡܵܐ. ܘܢܸܗܘܘܿܢ ܥܵܒ̣ܕ̇ܝܼܢ ܥܒ̣ܵܕܹ̈ܐ.

23: ܘܐܸܢܵܐ ܘܐܲܚܲܝ̈ ܘܛܲܠܝܲܝ̈ ܘܐ̄ܢܵܫܵܐ ܢܵܛܘܿܪܹ̈ܐ ܕܒܲܝܬ̇ܝ: ܠܵܐ ܫܵܠܚܝܼܢܲܢ ܢܲܚ̈ܬܲܝܢ ܝܲܪܚܵܐ ܕܝܵܘ̈ܡܵܬ̣ܵܐ. ܐ̄ܢܵܫ ܕܡܵܛܹ̇ܐ ܠܹܗ.

ܩܹܦܵܠܹܐܘܿܢ: ܗ.

1: ܘܗܵܝܕܹ̇ܝܢ ܐܲܝܠܸܠ̣ܘ ܥܲܡܵܐ ܘܢܸܫܲܝ̈ܗܘܿܢ ܝܑܼܠܲܠܬܵܐ ܪܲܒ̇ܬ̣ܵܐ: ܥܲܠ ܐܲܚܲܝ̈ܗܘܿܢ ܝܗ̄ܘܼ̈ܕ݂ܵܝܹܐ.

2: ܘܐܝܼܬ̣ ܕܐܵܡ̇ܪܝܼܢ: ܒܢܲܝ̈ܢ ܘܲܒ̣̈ܢܵܬܲܢ ܘܐܲܚܲܝ̈ܢ: ܣܲܓ̇ܝܼܐܝܼܢ ܢܸܣܲܒ̣ ܥܒ̣ܘܼܪܵܐ: ܘܢܹܐܟ݂ܘܿܠ ܘܢܸܚܹܐ.

3: ܘܐܝܼܬ̣ ܕܐܵܡ̇ܪܝܼܢ: ܚܲܩ̈ܠܵܬܲܢ ܘܒ̣ܵܬܲܝ̈ܢ ܘܟܲܪ̈ܡܲܝܢ ܡܙܲܒ̇ܢܝܼܢܲܢ ܘܢܵܣܒ̇ܝܼܢܲܢ ܥܒ̣ܘܼܪܵܐ ܒܟܲܦܢܵܐ: ܘܚܵܐܹ̇ܝܢܲܢ.

4: ܘܐܝܼܬ̣ ܕܐܵܡ̇ܪܝܼܢ ܢܹܐܙܲܦ ܟܸܣܦܵܐ ܡ̣ܢ ܡܲܕܲܐܬ̣ܵܐ ܕܡܲܠܟܵܐ. ܘܢܸܦܠܘܿܚ ܚܲܩ̈ܠܵܬܲܢ ܘܟܲܪ̈ܡܲܝܢ: ܘܢܸܚܹܐ.

5: ܘܐܝܼܬ̣ ܕܐܵܡ̇ܪܝܼܢ: ܡܸܟܹ̇ܝܠ ܐܲܝܟ݂ ܒܸܣܪܵܐ ܕܐܲܚܲܝ̈ܢ: ܗܵܟܲܢܵܐ ܐܵܦ ܒܸܣܪܲܢ. ܘܐܲܝܟ݂ ܒܢܲܝ̈ܗܘܿܢ: ܗܵܟܲܢܵܐ ܐܵܦ ܒܢܲܝ̈ܢ ܗܵܐ ܡܸܟܹ̇ܝܠ ܟܵܒ̣ܫܝܼܢ ܚ̄ܢܲܢ ܒܢܲܝ̈ܢ ܘܲܒ̣̈ܢܵܬܲܢ ܠܥܲܒ̣̈ܕ̇ܝܼܢ. ܘܐܝܼܬ̣ ܡ̣ܢ ܒ̈ܢܵܬܲܢ ܕܡܸܬ̣ܟܲܒ̣̈ܫܵܢ ܠܐܲܡ̈ܗܵܬ̣ܵܐ. ܘܠܵܐ ܡܪܝܼܡܝܼܢ ܩܕ݂ܵܡ ܐܲܠܵܗܵܐ ܐܝܼܕܲܝܗܘܿܢ. ܘܚܲܩ̈ܠܵܬܲܢ ܘܟܲܪ̈ܡܲܝܢ ܘܢܸܟ݂ܣܲܝ̈ܢ ܡܸܬ̣ܝܲܗ̄ܒ̇ܝܼܢ ܠܐܲܚܪ̈ܵܢܹܐ.

6: ܘܟܸܪܝܲܬ̤ ܠܝܼ ܛܵܒ̣ ܟܲܕ݂ ܫܸܡ̇ܥܹܬ̣ ܝܑܼܠܲܠܬ̇ܗܘܿܢ ܘܡܸܠܹ̈ܐ ܗܵܠܹܝܢ.

7: ܘܐܸܬ̇ܬ̇ܒܲܪ ܠܹܒ̇ܝ ܒܓ̣ܵܘܝ. ܘܐܲܓ̇ܪܹܬ̣ ܪܘܼܚܝ: ܘܡܲܠܠܹܬ̣ ܥܲܡ ܩܲܫܝܼܫܹ̈ܐ ܘܥܲܡ ܪܵܘ̱ܪ̈ܒ̣ܵܢܹܐ.

8: ܘܐܸܡ̇ܪܹܬ̣ ܠܗܘܿܢ: ܕܲܚܢܲܢ ܩܢܲܝܢܲܢ ܠܐܲܚܲܝ̈ܢ ܝܗ̄ܘܼ̈ܕ݂ܵܝܹܐ: ܕܡܸܙܕܲܒ̇ܢܝܼܢ ܠܥܲܡܡܹ̈ܐ: ܗܸܢܘܿܢ ܘܲܒ̣ܢܲܝ̈ܗܘܿܢ ܓܲܒ̣ܪܵܐ ܠܐܲܚܘܼܗܝ ܫܵܩܠܝܼܢ ܐ̄ܢܬ̇ܘܿܢ ܡܸܛܠ ܗܵܢܵܐ ܝܸܗ̄ܒܹ̇ܬ̣ ܥܠܲܝܗܘܿܢ ܩܵܠܵܐ. ܘܐܸܡ̇ܪܹܬ̣ ܠܗܘܿܢ: ܐܵܦ ܐܲܢ̄ܬ̇ܘܿܢ ܬܙܲܒ̇ܢܘܼܢ ܠܐܲܚܲܝ̈ܟ̇ܘܿܢ ܘܲܫܬܸܩ̣ܘ: ܘܠܵܐ ܝܲܗ̄ܒ̣ܘ ܠܝܼ ܦܸܬ̣ܓ̣ܵܡ.

9: ܘܐܸܡ̇ܪܹܬ̣ ܠܗܘܿܢ: ܠܵܐ ܫܲܦܝܼܪ ܦܸܬ̣ܓ̣ܵܡܵܐ ܕܐܲܢ̄ܬ̇ܘܿܢ ܥܵܒ̣ܕ̇ܝܼܢ. ܡܸܟܹ̇ܝܠ ܒܕܸܚ̱ܠܬ̣ܵܐ ܕܐܲܠܵܗܲܢ ܠܵܐ ܡܗܲܠܟ݂ܝܼܢ ܐ̄ܢܬ̇ܘܿܢ. ܡܸܛܠ ܕܥܵܒ̣ܕ̇ܝܼܢ ܐ̄ܢܬ̇ܘܿܢ ܐܲܝܟ݂ ܥܒ̣ܵܕܹ̈ܐ ܕܥܲܡܡܹ̈ܐ ܕܒܲܚܕ݂ܵܪ̈ܲܝܢ.

10: ܘܐܵܦ ܐܸܢܵܐ ܘܲܒ̣ܢܲܝ̈ ܘܐܲܚܲܝ̈ ܢܸܣܲܒ̣ ܟܸܣܦܵܐ: ܘܢܸܙܒܲܢ ܥܒ̣ܘܼܪܵܐ: ܘܢܸܫܒ̇ܘܿܩ ܠܡܸܣܟܹ̇ܢܹ̈ܐ ܕܐܝܼܬ̣ ܒܥܲܡܲܢ.

11: ܘܢܲܦܢܸܐ ܠܗܘܿܢ ܒܝܵܘܡܵܐ ܗܵܢܵܐ: ܟܲܪ̈ܡܲܝܗܘܿܢ ܘܙܲܝܬܲܝ̈ܗܘܿܢ ܘܚܲܩ̈ܠܵܬ̣ܗܘܿܢ ܘܒ̣ܵܬܲܝ̈ܗܘܿܢ. ܘܟܸܣܦܵܐ ܘܲܥܒ̣ܘܿܪܵܐ ܘܚܲܡܪܵܐ ܘܡܸܫܚܵܐ ܢܸܫܒ̇ܘܿܩ ܠܫܲܪܟܵܐ ܕܥܲܡܵܐ.

12: ܘܐܵܡ̇ܪܝܼܢ ܠܝܼ: ܗܵܟܲܢܵܐ ܢܸܥܒܸ̇ܕ݂: ܐܲܝܟ݂ ܕܐܲܢ̄ܬ̇ ܐܸܡܲܪܬ̇ ܘܲܩܪܹܝܬ̣ ܠܟ݂ܘܼܡܪܹ̈ܐ: ܘܐܸܡ̇ܪܹܬ̣ ܠܗܘܿܢ: ܕܗܵܟܲܢܵܐ ܘܵܠܹ̇ܐ ܠܡܸܥܒܲܕ݂. ܘܐܵܘܡ̇ܝܼܬ̣ ܐܸܢܘܿܢ ܠܡܸܥܒܲܕ݂ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ. ܘܐܵܦ ܠܲܛܠܵܝܹ̈ܐ ܕܲܩܕ̇ܩܹ̈ܐ.

13: ܘܐܵܡ̇ܪܝܼܢܲܢ: ܕܗܵܟܲܢܵܐ ܢܙܝܼܥ ܐܲܠܵܗܵܐ ܠܟ݂ܠ ܓܒܲܪ ܕܠܵܐ ܢܩܝܼܡ ܥܲܠ ܡܸܠܬ̣ܵܐ ܗܵܕܹܐ: ܡ̣ܢ ܒܲܝܬܹ̇ܗ ܘܡ̣ܢ ܠܐܹܘܬܹܗ. ܗܵܟܲܢܵܐ ܢܸܗܘܹܐ ܡܙܵܥ ܘܝܲܪܩܵܢ. ܘܐܵܡ̇ܪܝܼܢ ܥܲܡܵܐ ܟܠܹܗ: ܐܵܡܹܝܢ. ܘܩܵܡ̣ܘ ܥܲܡܵܐ ܟܠܹܗ: ܘܫܲܒܲܚܘ ܠܡܵܪܝܵܐ. ܘܲܥܒܲܕ݂ܘ ܟܠܹܗ ܥܲܡܵܐ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ.

14: ܘܐܵܦ ܡ̣ܢ ܝܵܘܡܵܐ ܕܦܲܩܕܲܢܝ ܠܡܸܗܘܵܐ ܫܲܠܝܼܛܵܐ ܒܐܲܪܥܵܐ ܕܲܝܗܘܼܕ݂: ܡ̣ܢ ܫܢܲܬ̣ ܥܸܣܪܝܼܢ: ܘܲܥܕܲܡܵܐ ܠܲܫܢܲܬ̣ ܬܠܵܬ̣ܝܼܢ ܘܬܲܪܬܹ̇ܝܢ ܠܐܲܪܛܲܚܫܸܫܬ̇ ܡܲܠܟܵܐ: ܫܢ̈ܝܼܢ ܬܲܪܬܲܥܸܣܪܹ̈ܐ ܐܸܢܵܐ ܘܐܲܚܲܝ̈ ܗܘܹ̇ܝܬ̣ ܠܗܘܿܢ ܪܹܫܵܐ. ܘܠܵܐ ܚܡܵܪܵܐ ܕܚܲܕ݂ ܡܸܢܗܘܿܢ ܕܸܒ̣ܪܹܬ̣: ܘܐܵܦܠܵܐ ܐܲܗܪܹܬ̣ ܠܐܢܵܫ ܡܸܢܗܘܿܢ.

15: ܘܫܲܠܝܼܛܵܢܹ̈ܐ ܕܲܩܕ݂ܵܡܲܝ ܫܲܥܒ̇ܕ݂ܘܼܗܝ ܠܥܲܡܵܐ. ܘܲܢܣܲܒ̣ܘ ܡܸܢܗܘܿܢ ܚܲܡܪܵܐ: ܘܠܲܚܡܵܐ: ܘܟܸܣܦܵܐ ܣܲܓ̇ܝܼܵܐܐ ܠܡܲܕܲܐܬ̣ܵܐ: ܥܕܲܡܵܐ ܠܣܸܠ̈ܥܝܼܢ ܐܲܪܒ̇ܥܝܼܢ. ܐܵܦ ܥܲܒ̣ܕܲܝ̈ܗܘܿܢ ܐܲܫܠܸܛܘ ܥܲܠ ܥܲܡܵܐ. ܘܐܸܫܬܲܠܲܛܘ ܥܠܲܝ̈ܗܘܿܢ: ܘܐܸܫܬܲܢܲܕ݂ܘ ܒܗܘܿܢ. ܘܐܸܢܵܐ ܠܵܐ ܥܸܒ̣ܕܹ̇ܬ̣ ܗܵܟܲܢܵܐ: ܡ̣ܢ ܩܕ݂ܵܡ ܕܸܚ̱ܠܬܹܗ ܕܐܲܠܵܗܵܐ.

16: ܐܵܦ ܒܲܥܒ̣ܵܕ݂ܵܐ ܕܫܘܼܪܵܐ ܗܵܢܵܐ: ܛܵܒ̣ ܐܸܬ̣ܥܲܫܢܹ̇ܬ̣ ܘܚܲܩ̈ܠܵܬ̣ܵܐ ܠܵܐ ܙܲܒ̇ܢܹ̇ܬ̣ ܘܟ݂ܠܗܘܿܢ ܛܠܵܝܹ̈ܐ ܒܢܲܝ̈ ܝܗ̄ܘܼܕ݂ܵܝܹ̈ܐ ܐܸܬ̣ܟܲܢܲܫܘ: ܘܩܵܡ̣ܘ ܬܲܡܵܢ ܥܲܠ ܥܒ̣ܵܕ݂ܵܐ.

17: ܘܪܵܘ̱ܪ̈ܒ̣ܵܢܹܐ ܘܫܲܠܝܼܛܵܢܹ̈ܐ ܡܵܐܐ ܘܚܲܡܫܝܼܢ ܓܲܒ̣ܪ̈ܝܼܢ: ܘܕ݂ܵܐܬܹ̇ܝܢ ܠܘܵܬܲܢ ܡ̣ܢ ܥܲܡܡܹ̈ܐ ܕܲܚܕ݂ܵܪ̈ܲܝܢ: ܐܵܬܹ̇ܝܢ ܗ̄ܘ̣ܵܘ ܐ̄ܢܵܫ ܒܦܵܬ̣ܘܿܪܹܗ.

18: ܘܓܲܒ̣ܪܵܐ ܕܥܵܒܹܕ݂ ܗ̄ܘ̣ܵܐ ܠܲܚܡܵܐ: ܡܲܝܬܹ̇ܐ ܗ̄ܘ̣ܵܐ ܠܥܲܒ̣̈ܕܹ̇ܐ ܕܥܵܒ̣ܕ̇ܝܼܢ: ܬܵܘܪܵܐ ܚܲܕܪ: ܘܥܵـ̈ـܢܵܐ ܫܸܬ̣ ܫܲܡ̈ܝܼܢܵܬ̣ܵܐ. ܘܨܸܦܪ̈ܵܝܹܐ ܐܸܬ̣ܥ̱ܒܸܕ݂ܘ ܠܲܢ. ܘܲܚܕ݂ܵܐ ܠܥܸܣܪܵܐ ܝܵܘ̈ܡܝܼܢ: ܚܲܡܪܵܐ ܣܲܓ̇ܝܼ ܘܥܲܡ ܗܵܕܹܐ: ܠܲܚܡܵܐ ܕܫܲܠܝܼܛܘܼܬ̣ܵܐ ܠܵܐ ܒܥܹ̇ܝܬ̣: ܡܸܛܠ ܕܲܥܫܸܢ ܥܒ̣ܵܕ݂ܵܐ ܥܲܠ ܥܲܡܵܐ ܗܵܢܵܐ.

19: ܐܸܬ̇ܕܲܟ݂ܪ ܠܝܼ ܐܲܠܵܗܝ ܠܛܵܒ̣: ܟܠ ܡܸܕܸ̇ܡ ܕܥܸܒ̣ܕܹ̇ܬ̣ ܚܠܵܦ ܥܲܡܵܐ ܗܵܢܵܐ.

ܩܹܦܵܠܹܐܘܿܢ: ܘ.

1: ܗܵܝܕܹ̇ܝܢ ܐܸܫܬܲܡܥܲܬ̤ ܡܸܠܬ̣ܵܐ ܠܣܲܡܒ̇ܠܵܛ: ܘܲܠܛܘܿܒ̇ܝܼܵܐ: ܘܠܲܓ̣ܫܘܿܡ ܥܲܪܒ̣ܵܝܵܐ: ܘܲܠܫܲܪܟܵܐ ܕܲܒ̣ܥܸܠܕ̇ܒ̣ܵܒܲܝ̈ܢ: ܕܲܒ̣ܢܲܝܢܵܝܗܝ ܠܫܘܼܪܵܐ. ܘܲܥܕܲܡܵܐ ܠܹܗ ܠܙܲܒ̣ܢܵܐ ܗܵܘܿ ܦܪ̈ܘܼܣܬ̇ܕܹܐ ܕܬܲܪ̈ܥܹܐ ܥܕܲܟܹ̇ܝܠ ܠܵܐ ܐܲܩܝܼܡ̄ܢ.

2: ܘܫܲܕܲܪܘ ܠܘܵܬ̣ܝ ܣܲܡܒ̇ܠܵܛ ܘܲܓ̣ܫܘܿܡ: ܘܐܵܡ̇ܪܝܼܢ ܠܝܼ: ܬܵܐ ܢܹܐܙܲܠ ܐܲܟ݂ܚ̄ܕ݂ܵܐ: ܘܢܸܫܪܹܐ ܐܲܝܟ݂ ܓܲܝܣܹ̈ܐ ܒܲܦܩܲܥܬ̣ܵܐ ܕܐܝܼܢܘܿ ܘܗܸܢܘܿܢ ܡܸܬ̣ܪܲܥܹܝܢ ܗ̄ܘ̣ܵܘ ܠܡܸܥܒܲܕ݂ ܠܲܢ ܒܝܼܫܬܵܐ.

3: ܘܫܲܕ̇ܪܹܬ̣ ܠܘܵܬ̣ܗܘܿܢ ܡܲܠܲܐܟ݂ܵܐ: ܘܐܸܡ̇ܪܹܬ̣ ܠܗܘܿܢ: ܥܒ̣ܵܕ݂ܵܐ ܪܲܒܵܐ ܥܵܒܹ̇ܕ݂ ܐ̄ܢܵܐ. ܘܠܵܐ ܡܸܫܟܲܚ ܐ̄ܢܵܐ ܠܡܸܚܲܬ̣: ܕܲܠܡܵܐ ܢܸܒ̣ܛܲܠ ܟܲܕ݂ ܐܵܪܦܹܐ ܘܐܹܚܘܿܬ̣ ܠܘܵܬ̣ܟ݂ܘܿܢ.

4: ܘܫܲܕܲܪܘ ܠܘܵܬ̣ܝ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ: ܐܲܪܒܲܥ ܙܲܒ̣ܢ̈ܝܼܢ. ܘܐܲܬ̣ܝܼܒܹ̇ܬ̣ ܐܸܢܘܿܢ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ.

5: ܘܫܲܕܲܪ ܠܘܵܬ̣ܝ ܣܲܡܒ̇ܠܵܛ ܐܲܝܟ݂ ܦܸܬ̣ܓ̣ܵܡܵܐ ܗܵܢܵܐ: ܒܲܙܒܲܢ̄ܬܵܐ ܚܡܝܼܫܵܝܬܵܐ ܠܲܥܠܲܝܡܹܗ: ܘܐܸܓܲܪܬܵܐ ܒܐܝܼܕܹܗ.

6: ܘܲܟ݂ܬ̣ܝܼܒ̣ ܒܵܗ̇: ܒܥܲܡܡܹ̈ܐ ܐܸܫܬ̇ܡܲܥ: ܘܲܓ̣ܫܘܿܡ ܐܸܡܲܪ: ܐܲܢ̄ܬ̇ ܘܲܝܗܘܼ̈ܕ݂ܵܝܹܐ ܡܸܬ̣ܪܲܥܹܝܢ ܠܡܸܡܪܲܕ݂. ܡܸܛܠ ܗܵܢܵܐ ܐܲܢ̄ܬ̇ ܒܵܢܹ̇ܐ ܫܘܼܪܵܐ. ܘܐܲܢ̄ܬ̇ ܗܵܘܹ̇ܐ ܠܗܘܿܢ ܡܲܠܟܵܐ ܐܲܝܟ݂ ܦܸܬ̣ܓ̣ܵܡܹ̈ܐ ܗܵܠܹܝܢ.

7: ܐܵܦ ܢܒ̣ܝܹ̈ܐ ܐܲܩܝܼܡ̣ܬ̇ ܠܡܲܬ̣ܢܲܒܵܝܘܼ ܥܠܲܝܟ ܒܐܘܿܪܸܫܠܸܡ. ܘܐܵܡ̇ܪܝܼܢ ܕܗܵܐ ܐܲܡ̣ܠܸܟ݂ ܒܲܝܗܘܼܕ݂. ܘܡܸܟܹ̇ܝܠ ܐܸܫܬܲܡܲܥ ܠܡܲܠܟܵܐ ܐܲܝܟ݂ ܡܸܠܹ̈ܐ ܗܵܠܹܝܢ. ܡܸܟܹ̇ܝܠ ܬܵܘ ܢܸܬ̣ܡܲܠܲܟ݂ ܐܲܟ݂ܚ̄ܕ݂ܵܐ.

8: ܘܫܲܕ̇ܪܹܬ̣ ܠܘܵܬܹܗ ܘܐܸܡ̇ܪܹܬ̣ ܠܹܗ: ܠܵܐ ܫܲܦܝܼܪ ܕܢܸܗ̱ܘ̈ܝܵܢ ܐܲܝܟ݂ ܡܸܠܹ̈ܐ ܕܐܲܢ̄ܬ̇ ܐܵܡܲܪ ܐܲܢ̄ܬ̇. ܡܸܛܠ ܕܡ̣ܢ ܠܸܒܵܟ݂ ܐܵܡܲܪ ܐܲܢ̄ܬ̇ ܠܗܹܝܢ.

9: ܡܸܛܠ ܕܟ݂ܠܗܘܿܢ ܡܕܲܚܠܝܼܢ ܠܲܢ: ܘܐܵܡ̇ܪܝܼܢ: ܡܸܬ̣ܪ̈ܲܦܝܵܢ ܐܝܼܕܲܝ̈ܗܘܿܢ ܡ̣ܢ ܥܒ̣ܝܼܕ̇ܬܵܐ. ܘܐܵܡ̇ܪܝܼܢ ܠܲܢ ܠܵܐ ܬܸܥܒ̇ܕ݂ܘܼܢ. ܡܸܟܹ̇ܝܠ ܐܲܥܫܸܢ ܐܝܼ̈ܕܲܝ.

10: ܘܐܸܢܵܐ ܥܸܠܹ̇ܬ̣ ܠܘܵܬ̣ ܫܡܲܥܝܵܐ ܒܲܪ ܕܲܠܝܵܐ ܒܲܪ ܡܲܗܛܒ̣ܵܐܹܝܠ: ܘܗ̤ܘ ܟܵܠܹ̇ܐ ܗ̄ܘ̣ܵܐ ܠܝܼ: ܘܐܸܡܲܪ ܠܝܼ: ܬܵܐ ܢܸܬ̣ܘܲܥܲܕ݂ ܠܒܲܝܬܹ̇ܗ ܕܡܵܪܝܵܐ ܠܓ̣ܵܘ ܗܲܝܟ̇ܠܵܐ: ܘܢܹܐܚܘܿܕ݂ ܬܲܪ̈ܥܹܐ ܕܗܲܝܟ̇ܠܵܐ. ܡܸܛܠ ܕܐܵܬܹܝܢ ܠܡܸܩܛܠܵܟ݂: ܘܲܒ̣ܠܸܠܝܵܐ ܐܵܬܹ̇ܝܢ ܠܡܸܩܛܠܵܟ݂.

11: ܘܐܸܡ̇ܪܹܬ̣: ܠܓܲܒ̣ܪܵܐ ܕܐܲܟ݂ܘܵܬ̣ܵܟ݂: ܢܸܥܪܘܿܩ. ܚܵܣ ܠܝܼ ܕܐܸܥܪܘܿܩ: ܘܐܸܥܘܿܠ ܠܗܲܝܟ̇ܠܵܐ.

12: ܚܵܟܹ̇ܡ ܐ̄ܢܵܐ ܕܠܵܐ ܗ̄ܘ̣ܵܐ ܐܲܠܵܗܵܐ ܫܲܕܪܹܗ ܥܠܲܝ: ܘܐܵܦܠܵܐ ܒܝܲܕ݂ ܢܒ̣ܝܼܵܐ ܐܸܬ̣ܐ̱ܡܲܪ ܠܝܼ ܕܩܵܛܹ̇ܠ ܠܝܼ ܛܘܿܒ̇ܝܼܵܐ ܘܣܲܡܒ̇ܠܵܛ ܘܚܲܒ̣ܪ̈ܵܘܗܝ: ܐܲܓ̣ܪܘܼܗܝ ܘܫܲܕ̇ܪܘܼܗܝ ܥܠܲܝ ܠܡܸܩܛܠܲܢܝ.

13: ܡܸܛܠ ܕܐܲܓ̣ܪܵܐ ܗ̄ܘ̣: ܡܸܛܠ ܕܐܸܕ݂ܚܲܠ ܘܐܸܥܒܸ̇ܕ݂ ܗܵܟܲܢܵܐ: ܘܐܸܚܛܹܐ: ܘܲܗܘܸܐ ܠܗܘܿܢ ܠܲܫܡܵܐ ܒܝܼܫܵܐ: ܡܸܛܠ ܕܲܢܚܲܣܕ݂ܘܼܢܵܢܝ.

14: ܐܸܬ̇ܕܲܟ݂ܪ ܐܲܠܵܗܝ ܠܛܘܿܒ̇ܝܼܵܐ ܘܲܠܣܲܡܒ̇ܠܵܛ ܘܲܠܚܲܒ̣ܪ̈ܵܘܗܝ: ܐܲܝܟ݂ ܥܒ̣ܵܕܲܝ̈ܗܘܿܢ ܗܵܠܹܝܢ ܣܢܲـ̈ـܝܵܐ: ܐܵܦ ܠܝܘܿܕܲܥܝܵܐ ܢܒ̣ܝܼܵܐ: ܐܵܦ ܠܫܲܪܟܵܐ ܕܲܢܒ̣ܝܹ̈ܐ: ܕܲܗܘ̤ܵܘ ܡܕܲܚܠܝܼܢ ܠܝܼ ܡܸܢܗܘܿܢ.

15: ܘܲܫܠܸܡ ܫܘܼܪܵܐ ܒܚܲܡܫܵܐ ܘܥܸܣܪ̈ܝܼܢ ܒܐܝܼܠܘܿܠ: ܠܚܲܡܫܝܼܢ ܘܲܬ̣ܪܹܝܢ ܝܵܘ̈ܡܝܼܢ.

16: ܗܵܝܕܹ̇ܝܢ ܟܲܕ݂ ܫܡܲܥ̣ܘ ܟܠܗܘܿܢ ܒܥܸܠܕ̇ܒ̣ܵܒܲܝ̈ܢ: ܕܚܸܠ̣ܘ. ܘܟ݂ܠܗܘܿܢ ܥܲܡܡܹ̈ܐ ܕܲܚܕ݂ܵܪ̈ܲܝܢ: ܘܙܵܥ̣ܘ ܛܵܒ̣ ܡ̣ܢ ܩܕ݂ܵܡܲܝܢ ܘܝܼܕܲܥ̣ܘ ܕܡ̣ܢ ܐܲܠܵܗܵܐ ܐܸܬ̣ܥܲܒ̣ܕ̇ܬܵܐ ܗܵܕܹܐ.

17: ܐܵܦ ܒܝܵܘ̈ܡܵܬ̣ܵܐ ܗܵܢܘܿܢ: ܡܲܣܓܹ̇ܝܢ ܗ̄ܘ̣ܵܘ ܪܵܘ̱ܪ̈ܒ̣ܵܢܹܐ ܕܲܝܗܘܼܕ݂ܵܐ ܐܸܓ̇ܪ̈ܵܬ̣ܗܘܿܢ. ܘܐܵܙܵܠ̄ܢ ܗ̄ܘܲܝ̈ ܠܘܵܬ̣ ܛܘܼܒ̇ܝܼܵܐ. ܘܐܸܓ̇ܪ̈ܵܬܹܗ ܕܛܘܿܒ̇ܝܼܵܐ ܐܵܬ̣̈ܝܵܢ ܗ̄ܘܲܝ̈ ܠܘܵܬ̣ܗܘܿܢ.

18: ܡܸܛܠ ܕܣܲܓ̇ܝܼ̈ܐܐ ܗ̄ܘ̣ܵܘ ܒܲܝܗܘܼܕ݂: ܕܝܼܡܝܼܘ ܠܹܗ ܕܠܵܐ ܢܲܗܪܘܼܢܹܗ. ܡܸܛܠ ܕܚܲܬ̣ܢܵܐ ܗ̄ܘ̣ܵܐ ܕܲܫܒܲܢܝܵܐ ܒܲܪ ܐܵܪܵܚ. ܘܝܘܿܚܲܢܵܢ ܒܪܹܗ: ܢܣܲܒ̣ ܠܒܲܪܬ̣ ܡܲܫܠܘܿܡ ܒܲܪ ܒܪܲܟ݂ܝܵܐ.

19: ܐܵܦ ܡܸܠܵܘ̈ܗܝ ܛܵܒ̣ܵـ̈ـܬ̣ܵܐ ܐܵܡ̇ܪܝܼܢ ܗ̄ܘ̣ܵܘ ܩܕ݂ܵܡܲܝ. ܘܡܸܠܬ̣ܵܐ ܕܐܵܡܲܪ ܗ̄ܘܹ̇ܝܬ̣: ܐܵܡ̇ܪܝܼܢ ܗ̄ܘ̣ܵܘ ܠܹܗ. ܘܐܸܓ̇ܪ̈ܵܬ̣ܵܐ ܡܫܲܕܲܪ ܗ̄ܘ̣ܵܐ ܗ̤ܘ ܛܘܿܒ̇ܝܼܵܐ ܠܲܡܕܲܚܵܠܘܼܬܲܢܝ.

ܩܹܦܵܠܹܐܘܿܢ: ܙ.

1: ܗܵܝܕܹ̇ܝܢ ܟܲܕ݂ ܐܸܬ̣ܒ̇ܢܝܼ ܫܘܼܪܵܐ: ܘܐܸܬ̣ܩܲܝܲܡܘ ܦܪ̈ܘܼܣܬ̇ܕܹܐ: ܘܐܸܫܬܲܟ݂ܠܲܠܘ ܬܲܪ̈ܥܹܐ: ܘܲܡܫܲܡ̈ܫܵܢܹܐ ܘܠܹܘܵܝܹ̈ܐ.

2: ܦܲܩܕܹ̇ܬ̣ ܠܚܲܢܵܢܝܼ ܐܵܚܝ: ܘܲܠܚܲܢܲܢܝܵܐ ܫܲܠܝܼܛܵܐ ܕܒܝܼܪܬܵܐ ܘܕ݂ܐܘܿܪܸܫܠܸܡ ܡܸܛܠ ܕܗ̤ܘ ܗ̄ܘ̣ܵܐ ܓܲܒ̣ܪܵܐ ܬܪܝܼܨܵܐ: ܘܕ݂ܵܚܹ̇ܠ ܡ̣ܢ ܐܲܠܵܗܵܐ: ܘܣܵܛܹ̇ܐ ܡ̣ܢ ܕܒ̣ܝܼܫ.

3: ܘܐܸܡ̇ܪܹܬ̣ ܠܗܘܿܢ ܠܵܐ ܢܸܬ̣ܦܲܬ̣ܚܘܿܢ ܬܲܪ̈ܥܹܐ ܕܐܘܿܪܸܫܠܸܡ: ܥܕܲܡܵܐ ܕܣܵܠܹ̇ܩ ܝܵܘܡܵܐ. ܘܥܲܕ݂ ܝܵܘܡܵܐ ܩܵܐܹ̇ܡ: ܢܸܬ̣ܓܲܝܦܘܼܢ ܬܲܪ̈ܥܹܐ ܘܢܸܬ̇ܬܲܚܕ̇ܘܼܢ. ܘܲܢܩܘܼܡܘܼܢ ܒܡܲܛܲܪܬܵܐ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܓܒܲܪ ܒܡܲܛܲܪܬܹ̇ܗ: ܘܓܲܒ̣ܪܵܐ ܠܘܼܩܒܲܠ ܒܲܝܬܹ̇ܗ.

4: ܘܲܡܕ݂ܝܼܢ̄ܬܵܐ: ܪܲܒܵܐ ܘܦܲܬ̣ܝܵܐ. ܘܥܲܡܵܐ ܙܥܘܿܪ ܗ̄ܘ̣ܵܐ ܒܓ̣ܵܘܵܗ̇. ܘܠܲܝܬ̇ ܗ̄ܘ̣ܵܐ ܠܗܘܿܢ ܒܵـ̈ـܬܹ̇ܐ ܕܒ̣ܵܢܹܝܢ.

5: ܘܐܲܪܡܝܼ ܐܲܠܵܗܵܐ ܒܠܹܒ̇ܝ ܘܟܲܢܫܹܬ̣ ܠܚܹܐܪܹ̈ܐ ܘܲܠܪܵܘ̱ܪ̈ܒ̣ܵܢܹܐ ܕܥܲܡܵܐ ܠܫܲܪ̈ܒ̣ܵܬ̣ܗܘܿܢ ܘܐܸܫܟ̇ܚܹ̇ܬ̣ ܠܣܸܦܪܵܐ ܕܫܲܪ̈ܒ̣ܵܬ̣ܵܐ ܕܲܟ݂ܬ̣ܝܼܒ̣ ܒܹܗ.

6: ܗܵܠܹܝܢ ܒܢܲܝ̈ ܡܕ݂ܝܼܢ̄ܬܵܐ ܕܲܣܠܸܩܘ ܡ̣ܢ ܫܸܒ̣ܝܵܐ ܕܓ̣ܵܠܘܼܬ̣ܵܐ: ܕܓܲܠܝܼ ܢܒ̣ܘܼܟܲܕ݂ܢܵܨܲܪ ܡܲܠܟܵܐ ܕܒ̣ܵܒܹܠ: ܠܒ̣ܵܒܹܠ. ܘܲܗܦܲܟ݂ܘ ܠܐܘܿܪܸܫܠܸܡ: ܘܠܲܝܗܘܼܕ݂: ܓܒܲܪ ܠܲܩܪܝܼܬܹܗ.

7: ܕܲܣܠܸܩܘ ܥܲܡ ܙܘܼܪܒܵܒܹܠ: ܘܝܼܫܘܿܥ: ܘܲܢܚܲܡܝܵܐ: ܘܥܲܙܲܪܝܵܐ: ܘܲܪܥܲܡܝܵܐ: ܘܢܲܚܡܵܐܹܝܠ: ܘܡܘܼܪܕ̇ܟܲܝ: ܘܲܒ̣ܠܝܼܫܵܢ: ܘܡܲܣܦܪܘܿܬ̣: ܘܒܲܓ̣ܘܲܝ: ܘܢܵܚܘܿܡ: ܘܒܲܥܢܵܐ. ܡܸܢܝܵܢܵܐ ܕܐ̄ܢܵܫܵܐ ܕܥܲܡܵܐ ܕܝܼܣܪܵܝܹܠ.

8: ܒܢܲܝ̈ ܦܲܪܥܵܫ: ܬܪܹܝܢ ܐܲܠܦ̈ܝܼܢ: ܘܲܡܵܐܐ ܘܫܲܒ̣ܥܝܼܢ ܘܲܬ̣ܪܹܝܢ.

9: ܒܢܲܝ̈ ܫܦܲܛܝܵܐ: ܬܠܵܬ̣ܵܐ ܐܲܠܦ̈ܝܼܢ: ܘܫܲܒ̣ܥܝܼܢ ܘܲܬ̣ܪܹܝܢ.

10: ܒܢܲܝ̈ ܐܵܪܵܚ: ܫܸܬ̣ܡܵܐܐ ܘܚܲܡܫܝܼܢ ܘܲܬ̣ܪܹܝܢ.

11: ܒܢܲܝ̈ ܫܘܼܠܛܵܢ ܡܘܼܐܵܒ̣ ܠܲܒ̣ܢܲܝ̈ ܝܼܫܘܿܥ ܘܝܘܿܐܵܒ̣: ܬܪܹܝܢ ܐܲܠܦ̈ܝܼܢ ܘܲܬ̣ܡܵܢܹܡܵܐܐ ܘܲܬ̣ܡܵܢܬܲܥܣܲܪ.

12: ܒܢܲܝ̈ ܥܝܼܠܵܡ: ܐܵܠܹܦ ܘܡܲܐܬܹ̇ܝܢ ܘܚܲܡܫܝܼܢ ܘܐܲܪܒ̇ܥܵܐ.

13: ܒܢܲܝ̈ ܢܬܲܢܝܵܐ: ܬܡܵܢܹܡܵܐܐ ܘܚܲܡܫܝܼܢ ܘܐܲܪܒ̇ܥܵܐ.

14: ܒܢܲܝ̈ ܙܲܟ̇ܝܼ: ܫܒܲܥܡܵܐܐ ܘܸܫܬ̇ܝܼܢ.

15: ܒܢܲܝ̈ ܒܲܢܝܼ: ܫܸܬ̣ܡܵܐܐ ܘܐܲܪܒ̇ܥܝܼܢ ܘܐܲܪܒ̇ܥܵܐ.

16: ܒܢܲܝ̈ ܒܲܟ̇ܝܼ: ܫܸܬ̣ܡܵܐܐ ܘܥܸܣܪܝܼܢ ܘܲܬ̣ܡܵܢܝܵܐ.

17: ܒܢܲܝ̈ ܥܲܙܓܵܪ: ܬܪܹܝܢ ܐܲܠܦ̈ܝܼܢ ܘܲܬ̣ܠܵܬ̣ ܡܵܐܐ: ܘܥܸܣܪܝܼܢ ܘܲܬ̣ܪܹܝܢ.

18: ܒܢܲܝ̈ ܐܲܪܚܩܘܿܡ: ܫܸܬ̣ܡܵܐܐ ܘܸܫܬ̇ܝܼܢ ܘܫܲܒ̣ܥܵܐ.

19: ܒܢܲܝ̈ ܒܲܓ̣ܘܲܝ: ܬܪܹܝܢ ܐܲܠܦ̈ܝܼܢ: ܘܸܫܬ̇ܝܼܢ ܘܫܲܒ̣ܥܵܐ.

20: ܒܢܲܝ̈ ܥܲܕ̇ܘܿܢ: ܫܸܬ̣ܡܵܐܐ ܘܚܲܡܫܝܼܢ ܘܚܲܡܫܵܐ.

21: ܒܢܲܝ̈ ܐܵܛܵܪ: ܬܡܵܢܹܡܵܐܐ ܘܚܲܡܫܝܼܢ ܘܐܲܪܒ̇ܥܵܐ: ܠܚܹܙܲܩܝܵܐ ܬܸܫܥܝܼܢ ܘܲܬ̣ܡܵܢܝܵܐ.

22: ܒܢܲܝ̈ ܢܲܚܫܘܿܡ: ܬܠܵܬ̣ܡܵܐܐ ܘܥܸܣܪܝܼܢ ܘܲܬ̣ܡܵܢܝܵܐ.

23: ܒܢܲܝ̈ ܒܲܨܝܼ: ܬܠܵܬ̣ܡܵܐܐ ܘܥܸܣܪܝܼܢ ܘܐܲܪܒ̇ܥܵܐ.

24: ܒܢܲܝ̈ ܚܘܿܪܵܡ: ܡܵܐܐ ܘܲܬ̣ܪܸܥܣܲܪ.

25: ܒܢܲܝ̈ ܓܸܒ̣ܥܘܿܢ: ܬܸܫܥܝܼܢ ܘܚܲܡܫܵܐ.

26: ܐ̄ܢܵܫܲܝ̈ ܒܹܝܬ̣ ܠܚܸܡ ܘܢܘܼܛ̈ܦܵܝܹܐ: ܡܵܐܐ ܘܲܬ̣ܡܵܢܐܝܼܢ ܘܲܬ̣ܡܵܢܝܵܐ.

27: ܐ̄ܢܵܫܲܝ̈ ܥܢܵܬ̣ܘܿܬ̣: ܡܵܐܐ ܘܥܸܣܪܝܼܢ ܘܲܬ̣ܡܵܢܝܵܐ.

28: ܐ̄ܢܵܫܲܝ̈ ܒܹܝܬ̣ ܪܡܘܿܬ̣: ܐܲܪܒ̇ܥܝܼܢ ܘܲܬ̣ܪܹܝܢ.

29: ܐ̄ܢܵܫܲܝ̈ ܒܹܝܬ̣ ܢܲܥܪܹܝܢ ܘܲܟ݂ܦܝܼܪܵܐ ܘܒܹܐܪܘܿܬ̣: ܫܒܲܥܡܵܐܐ ܘܐܲܪܒ̇ܥܝܼܢ ܘܲܬ̣ܠܵܬ̣ܵܐ.

30: ܐ̄ܢܵܫܲܝ̈ ܓܒܲܥ ܘܪܵܡܬܵܐ: ܫܒܲܥܡܵܐܐ ܘܥܸܣܪܝܼܢ ܘܚܲܕ݂.

31: ܐ̄ܢܵܫܲܝ̈ ܡܲܟ݂ܡܲܣ: ܡܵܐܐ ܘܥܸܣܪܝܼܢ ܘܲܬ̣ܪܹܝܢ.

32: ܐ̄ܢܵܫܲܝ̈ ܒܹܝܬ̣ ܐܹܝܠ ܘܥܵܝ: ܡܵܐܐ ܘܥܸܣܪܝܼܢ ܘܲܬ̣ܠܵܬ̣ܵܐ.

33: ܐ̄ܢܵܫܲܝ̈ ܢܵܒ̣ܘܿ: ܚܲܡܫܝܼܢ ܘܲܬ̣ܪܹܝܢ.

34: ܕܒܹܝܬ̣ ܥܝܼܠܵܡ: ܐܵܠܹܦ ܘܡܵܐܬܹ̇ܝܢ: ܘܚܲܡܫܝܼܢ ܘܐܲܪܒ̇ܥܵܐ.

35: ܒܢܲܝ̈ ܚܵܪܵܡ: ܬܠܵܬ̣ܵܐ ܡܵܐܐ ܘܥܸܣܪܝܼܢ.

36: ܒܢܲܝ̈ ܐܝܼܪܝܼܚܘܿ: ܬܠܵܬ̣ܡܵܐܐ ܘܐܲܪܒ̇ܥܝܼܢ ܘܚܲܡܫܵܐ.

37: ܒܢܲܝ̈ ܠܘܿܕ݂ ܘܐܝܼܢܘܼ: ܫܒܲܥ ܡܵܐܐ ܘܥܸܣܪܝܼܢ ܘܚܲܕ݂.

38: ܒܢܲܝ̈ ܣܢܵܐܵܐ: ܬܠܵܬ̣ܵܐ ܐܲܠܦ̈ܝܼܢ ܘܲܬ̣ܫܲܥܡܵܐܐ ܘܲܬ̣ܠܵܬ̣ܝܼܢ.

39: ܟܵܗ̈ܢܹܐ ܒܢܲܝ̈ ܝܼܕܲܥܝܵܐ: ܠܒܹܝܬ̣ ܝܼܫܘܿܥ: ܬܫܲܥܡܵܐܐ ܘܫܲܒ̣ܥܝܼܢ ܘܲܬ̣ܠܵܬ̣ܵܐ.

40: ܒܢܲܝ̈ ܐܵܡܝܼܪ: ܐܵܠܹܦ ܘܚܲܡܫܝܼܢ ܘܲܬ̣ܪܹܝܢ.

41: ܒܢܲܝ̈ ܦܸܫܚܘܿܪ: ܐܵܠܹܦ ܘܡܲܐܬܹ̇ܝܢ ܘܐܲܪܒ̇ܥܝܼܢ ܘܫܲܒ̣ܥܵܐ.

42: ܒܢܲܝ̈ ܚܕ݂ܘܿܡ: ܐܵܠܹܦ ܘܲܫܒܲܬܲܥܣܲܪ.

43: ܠܹܘܵܝܹ̈ܐ ܒܢܲܝ̈ ܝܼܫܘܿܥ ܠܩܲܕ݂ܡܵܐܹܝܠ: ܠܲܒ̣ܢܲܝ̈ ܝܼܗܘܼܕ݂ܵܐ ܫܲܒ̣ܥܝܼܢ ܘܐܲܪܒ̇ܥܵܐ.

44: ܡܫܲܡ̈ܫܵܢܹܐ ܒܢܲܝ̈ ܐܵܣܵܦ: ܡܵܐܐ ܘܐܲܪܒ̇ܥܝܼܢ ܘܲܬ̣ܡܵܢܝܵܐ.

45: ܘܬ̣ܵܪ̈ܥܹܐ ܒܢܲܝ̈ ܫܵܠܘܿܡ: ܒܢܲܝ̈ ܐܵܛܲܪ: ܒܢܲܝ̈ ܐܲܛܠܡܵܢ: ܒܢܲܝ̈ ܥܩܘܿܦ: ܒܢܲܝ̈ ܚܛܘܿܛܵܐ: ܒܢܲܝ̈ ܫܲܒ̇ܝܼ: ܡܵܐܐ ܘܲܬ̣ܠܵܬ̣ܝܼܢ ܘܲܬ̣ܡܵܢܝܵܐ ܓܲܒ̣ܪܹ̈ܐ.

46: ܒܢܲܝ̈ ܐܵܨܚܵܐ: ܒܢܲܝ̈ ܚܫܘܿܦܵܐ: ܒܢܲܝ̈ ܛܲܒ̣ܥܘܿܬ̣.

47: ܒܢܲܝ̈ ܐܵܩܪܵܣ: ܒܢܲܝ̈ ܫܝܼܥܵܐ: ܒܢܲܝ̈ ܦܵܪܘܿܢ.

48: ܒܢܲܝ̈ ܠܸܒ̣ܢܵܐ: ܒܢܲܝ̈ ܚܲܓܒܵܐ: ܒܢܲܝ̈ ܫܲܠܡܝܼ.

49: ܒܢܲܝ̈ ܚܲܢܵܢܝܼ: ܒܢܲܝ̈ ܥܲܕܵܐ: ܒܢܲܝ̈ ܚܵܓܵܪ.

50: ܒܢܲܝ̈ ܐܲܢܵܐ: ܒܢܲܝ̈ ܕܝܼܨܘܿܢ: ܒܢܲܝ̈ ܕܩܘܿܪܵܐ.

51: ܒܢܲܝ̈ ܓܵܙܵܡ: ܒܢܲܝ̈ ܥܲܕܵܐ: ܒܢܲܝ̈ ܦܵܨܵܚ.

52: ܒܢܲܝ̈ ܒܲܣܝܼ: ܒܢܲܝ̈ ܡܥܲܬ̣ܢܝܼܡ: ܒܢܲܝ̈ ܢܦܘܿܣܝܼܢ.

53: ܒܢܲܝ̈ ܒܩܘܿܩ: ܒܢܲܝ̈ ܚܛܘܿܦܵܐ: ܒܢܲܝ̈ ܚܲܕ݂ܚܘܼܬ̣.

54: ܒܢܲܝ̈ ܒܲܨܠܵܐܘܼܬ̣: ܒܢܲܝ̈ ܡܚܲܕ̇ܝܵܐ: ܒܢܲܝ̈ ܚܲܪܫܵܐ.

55: ܒܢܲܝ̈ ܒܙܘܿܩ: ܒܢܲܝ̈ ܣܹܣܪܵܐ: ܒܢܲܝ̈ ܬܲܡܢܲܥ.

56: ܒܢܲܝ̈ ܢܨܝܼܚ: ܒܢܲܝ̈ ܚܛܘܿܦܵܐ.

57: ܒܢܲܝ̈ ܥܲܒ̣̈ܕܲܝ ܫܠܹܝܡܘܿܢ: ܒܢܲܝ̈ ܣܲܛܝܼ: ܒܢܲܝ̈ ܣܦܘܿܬ̣: ܒܢܲܝ̈ ܦܵܪܘܿܝܵܐ.

58: ܒܢܲܝ̈ ܥܲܠܵܐ: ܒܢܲܝ̈ ܕܲܪܥܘܿܢ: ܒܢܲܝ̈ ܓܵܙܵܠ.

59: ܒܢܲܝ̈ ܫܦܲܛܝܵܐ: ܒܢܲܝ̈ ܚܦܲܛܝܵܐ: ܒܢܲܝ̈ ܒܲܟ̇ܪܘܼܬ̣: ܒܢܲܝ̈ ܨܘܿܒ̣ܝܼܢ: ܒܢܲܝ̈ ܐܲܡܘܿܢ.

60: ܟܠܗܘܿܢ ܢܵܬ̣̈ܢܵܝܹܐ: ܘܲܒ̣ܢܲܝ̈ ܥܲܒ̣̈ܕܲܝ ܫܠܹܝܡܘܿܢ: ܬܠܵܬ̣ܡܵܐܐ ܘܬܸܫܥܝܼܢ ܘܲܬ̣ܪܹܝܢ.

61: ܗܵܠܹܝܢ ܕܲܣܠܸܩ̣ܘ ܡ̣ܢ ܬܸܠܡܸܠܚܵܐ ܠܬܸܠܚܲܪܫܵܐ. ܘܠܲܟ݂ܪܘܿܒ̣ ܗܵܠܹܝܢ ܐܸܡܲܪܘ. ܘܠܵܐ ܐܸܫܟܲܚܘ ܠܲܡܚܵܘܵܝܘܼ ܫܲܪ̈ܒ̣ܵܬ̣ܵܐ ܕܐܲܒ̣ܵܗܲܝ̈ܗܘܿܢ ܘܙܲܪ̈ܥܝܵܬ̣ܗܘܿܢ: ܐܸܠܵܐ ܕܡ̣ܢ ܝܼܣܪܵܝܹܠ ܐܸܢܘܿܢ.

62: ܒܢܲܝ̈ ܒܲܢܝܼ: ܒܢܲܝ̈ ܕܠܵܝܵܐ: ܒܢܲܝ̈ ܛܘܿܒ̇ܝܼܵܐ: ܒܢܲܝ̈ ܙܩܘܿܪܵܐ: ܫܸܬ̣ܡܵܐܐ ܘܐܲܪܒ̇ܥܝܼܢ ܘܲܬ̣ܪܹܝܢ.

63: ܘܡ̣ܢ ܟܘܼܡܪܹ̈ܐ ܒܢܲܝ̈ ܚܲܢܲܢܝܵܐ: ܒܢܲܝ̈ ܗܩܘܿܨ: ܒܢܲܝ̈ ܒܲܪܙܸܠܝܼ: ܕܲܢܣܲܒ̣ܘ ܡ̣ܢ ܒ̈ܢܵܬ̣ ܒܲܪܙܹܠܝܼ ܓܸܠܥܵܕ݂ܵܝܵܐ ܐܲܢ̄ܬ̇ܬ̣ܵܐ. ܘܐܸܬ̣ܩܪܝܼ ܥܲܠ ܫܸܡܗܘܿܢ.

64: ܘܗܵܠܹܝܢ ܒܥ̣ܵܘ ܒܲܟ݂ܬ̣ܵܒ̣ܵܐ ܠܫܲܪ̈ܒ̣ܵܬ̣ܗܘܿܢ: ܘܠܵܐ ܐܸܫܟܲܚܘ ܘܲܥܒܲܕ݂ ܠܗܘܿܢ ܡ̣ܢ ܟܘܼܡܪܘܼܬ̣ܵܐ.

65: ܘܐܸܡܲܪܘ ܠܗܘܿܢ ܩܲܫܝܼܫܹ̈ܐ ܕܟ݂ܘܼܡܪܹ̈ܐ: ܕܠܵܐ ܢܹܐܟ݂ܠܘܼܢ ܡ̣ܢ ܩܕ݂ܘܿܫ ܩܘܼܕ݂ܫܹ̈ܐ: ܥܕܲܡܵܐ ܕܲܢܩܝܼܡ ܟܵܗܢܵܐ ܪܲܒܵܐ: ܘܢܸܫܐܲܠ ܘܢܸܚܙܹܐ.

66: ܟܠܵܗ̇ ܟܢܘܼܫܬܵܐ ܐܲܟ݂ܚ̄ܕ݂ܵܐ: ܐܲܪܒܲܥ ܪܸ̈ܒ̇ܘܵܢ ܘܲܬ̣ܪܹܝܢ ܐܲܠܦܝܼ̈ܢ: ܘܐܲܪܒܲܥܡܵܐܐ ܘܫܲܒ̣ܥܝܼܢ.

67: ܠܒܲܪ ܡ̣ܢ ܥܒ̣ܕܲܝ̈ܗܘܿܢ ܘܐܲܡ̈ܗܵܬ̣ܗܘܿܢ. ܗܵܠܹܝܢ ܫܲܒ̣ܥܵܐ ܐܲܠܦ̈ܝܼܢ ܘܲܬ̣ܠܵܬ̣ܡܵܐܐ ܘܲܬ̣ܠܵܬ̣ܝܼܢ ܘܲܬ̣ܠܵܬ̣ܵܐ 68: ܟܠܗܘܿܢ ܡܫܲܡ̈ܫܵܢܹܐ ܘܲܡܫܲܡܫܵܢ̈ܝܵܬ̣ܵܐ: ܡܵܐܬܹ̇ܝܢ ܘܐܲܪܒ̇ܥܝܼܢ ܘܚܲܡܫܵܐ.

69: ܓܲܡ̈ܠܹܐ ܐܲܪܒܲܥܡܵܐܐ ܘܲܬ̣ܠܵܬ̣ܝܼܢ ܘܚܲܡܫܵܐ. ܚܸܡܪ̈ܵܐ ܫܬܵܐ ܐܲܠܦ̈ܝܼܢ ܘܲܫܒܲܥܡܵܐܐ ܘܥܸܣܪܝܼܢ.

70: ܘܡ̣ܢ ܪܹܫܹܐ ܕܐܲܒ̣ܵـ̈ـܗܵܬ̣ܵܐ: ܝܲܗ̄ܒ̣ܘ ܠܲܥܒ̣ܵܕ݂ܵܐ ܕܒܲܝܬܵܐ: ܩܲܫܝܼܫܹ̈ܐ ܕܟ݂ܘܼܡܪܹ̈ܐ: ܝܲܗ̄ܒ̣ܘ ܠܒܹܝܬ̣ ܓܲܙܵܐ: ܕܲܗܒ̣ܵܐ: ܕܪ̈ܝܼܟ݂ܘܼܢܹܐ ܐܲܠܦܵܐ ܚܲܕ݂. ܦܸܛܩܹ̈ܐ: ܚܲܡܫܝܼܢ ܟܘܿܬ̇ܝܼܢ̈ܝܵܬ̣ܵܐ ܠܟ݂ܘܼܡܪܹ̈ܐ: ܚܲܡܸܫܡܵܐܐ ܘܲܬ̣ܠܵܬ̣ܝܼܢ.

71: ܘܡ̣ܢ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ: ܝܲܗ̄ܒ̣ܘ ܠܓܲܙܵܐ ܕܲܥܒ̣ܝܼܕ̇ܬܵܐ: ܕܲܗܒ̣ܵܐ ܕܪ̈ܝܼܟ݂ܘܿܢܹܐ ܬܲܪܬܹ̇ܝܢ ܪܸ̈ܒ̇ܘܵܢ. ܘܟܸܣܦܵܐ ܡܢ̈ܝܼܢ ܬܪܹܝܢ ܐܲܠܦ̈ܝܼܢ ܘܡܲܐܬܹ̇ܝܢ.

72: ܘܝܲܗ̄ܒ̣ܘ ܫܲܪܟܵܐ ܕܥܲܡܵܐ: ܕܪ̈ܝܼܟ݂ܘܿܢܹܐ ܬܲܪܬܹ̇ܝܢ ܪܸ̈ܒ̇ܘܵܢ: ܡܢ̈ܝܼܢ ܬܪܹܝܢ ܐܲܠܦ̈ܝܼܢ: ܘܟ݂ܘܿܬ̇ܝܼܢ̈ܝܵܬ̣ܵܐ ܠܟ݂ܘܼܡܪܹ̈ܐ ܫܬ̇ܝܼܢ ܘܲܫܒܲܥ.

73: ܘܗܲܠܸܟ݂ܘ ܟܘܼܡܪܹ̈ܐ ܘܠܹܘܵܝܹ̈ܐ: ܘܬ̣ܵܪ̈ܥܹܐ ܘܲܡܫܲܡܫܵܢܹ̈ܐ: ܘܡ̣ܢ ܥܲܡܵܐ ܘܢܵܬ̣̈ܢܵܝܹܐ: ܘܟ݂ܠܹܗ ܝܼܣܪܵܝܹܠ: ܠܩܘܼܪ̈ܝܼܗܘܿܢ. ܘܟܲܕ݂ ܡ̣ܛܵܐ ܝܲܪܚܵܐ ܫܒ̣ܝܼܥܵܝܵܐ: ܘܲܒ̣ܢܲܝ̈ ܝܼܣܪܵܝܹܠ ܒܩܘܼܪ̈ܝܼܗܘܿܢ.

ܩܹܦܵܠܹܐܘܿܢ: ܚ.

1: ܘܐܸܬ̣ܟܲܢܲܫܘ ܥܲܡܵܐ ܟܠܹܗ: ܐܲܝܟ݂ ܚܲܕ݂ ܓܲܒ̣ܪܵܐ: ܠܫܘܼܩܵܐ ܕܐܝܼܬ̣ ܩܕ݂ܵܡ ܬܲܪܥܵܐ ܕܡܲـ̈ـܝܵܐ. ܘܐܵܡ̇ܪܝܼܢ ܠܥܲܙܪܵܐ ܣܵܦܪܵܐ: ܠܡܲܚܬܵܝܘܼ ܣܸܦܪܵܐ ܕܢܵܡܘܿܣܵܐ ܕܡܘܼܫܹܐ: ܕܲܦܩܲܕ݂ ܡܵܪܝܵܐ ܥܲܠ ܒܢܲܝ̈ ܝܼܣܪܵܝܹܠ.

2: ܘܐܲܝܬ̇ܝܼ ܥܲܙܪܵܐ ܣܸܦܪܵܐ ܕܢܵܡܘܿܣܵܐ ܩܕ݂ܵܡ ܥܲܡܵܐ. ܘܐܸܬ̣ܟܲܢܲܫܘ ܥܲܡܵܐ ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܟ݂ܠܡܲܢ ܕܐܸܬ̇ܛܲܝܲܒ̣ ܠܡܸܫܡܲܥ: ܒܚܲܕ݂ ܒܝܲܪܚܵܐ ܫܒ̣ܝܼܥܵܝܵܐ.

3: ܘܲܩ̣ܪܵܐ ܣܸܦܪܵܐ ܒܫܘܼܩܵܐ ܒܬܲܪܥܵܐ ܕܡܲـ̈ـܝܵܐ: ܡ̣ܢ ܨܲܦܪܵܐ ܠܦܸܠܓܹ̇ܗ ܕܝܵܘܡܵܐ: ܩܕ݂ܵܡ ܓܲܒ̣ܪܹ̈ܐ ܘܢܸܫܹ̈ܐ: ܘܲܩܕ݂ܵܡ ܐܲܝܠܹܝܢ ܕܫܵܡ̇ܥܝܼܢ ܘܐܸܕ݂ܢܲܝ̈ܗܘܿܢ ܕܥܲܡܵܐ ܨܲܠ̈ܝܵܢ ܗ̄ܘܲܝ̈: ܘܨܵܝ̈ܬܵܢ ܠܦܘܼܩܕܵܢܵܐ ܕܢܵܡܘܿܣܵܐ.

4: ܘܩܵܡ̣ ܥܲܙܪܵܐ ܣܵܦܪܵܐ ܥܲܠ ܡܲܓܕ̇ܠܵܐ ܕܩܲܝܣܵܐ ܕܲܥܒܲܕ݂: ܕܢܸܗܘܹܐ ܡܡܲܠܸܠ ܥܠܵܘܗܝ. ܘܩܵܡ̣ ܠܘܵܬܹܗ ܡܲܬ̇ܝܼܬ̣ܵܐ: ܘܲܫܡܘܿܥ: ܘܚܲܢܲܢܝܵܐ: ܘܐܘܿܪܝܼܵܐ: ܘܚܸܠܲܩܝܵܐ: ܘܲܡܥܲܣܝܵܐ: ܩܵܡ̣ܘ ܡ̣ܢ ܝܲܡܝܼܢܹܗ ܘܡ̣ܢ ܣܸܡܵܠܹܗ: ܩܵܡ̣ ܦܵܪܝܵܐ: ܘܡܝܼܫܵܐܹܝܠ: ܘܲܡܠܲܟ݂ܝܵܐ: ܘܲܚܫܘܿܡ: ܘܲܚܫܲܒ̣ܝܵܐ: ܘܲܙܟܲܪܝܵܐ: ܘܡܲܫܠܲܡ.

5: ܘܲܦܬܲܚ ܥܲܙܪܵܐ ܣܵܦܪܵܐ: ܟܬ̣ܵܒ̣ܵܐ ܕܢܵܡܘܿܣܵܐ ܠܥܹܝܢ ܟܠܹܗ ܥܲܡܵܐ. ܘܟܲܕ݂ ܦ̣ܬܲܚ: ܩܵܡ̣ ܟܠܹܗ ܥܲܡܵܐ.

6: ܘܒܲܪܸܟ݂ ܥܲܙܪܵܐ ܠܡܵܪܝܵܐ ܐܲܠܵܗܵܐ ܪܲܒܵܐ. ܘܲܥܢ̣ܵܘ ܟܠܹܗ ܥܲܡܵܐ ܘܐܵܡ̇ܪܝܼܢ: ܐܵܡܹܝܢ ܘܐܵܡܹܝܢ. ܘܟܲܕ݂ ܐܲܪܝܼܡܘ ܐܝܼܕܲܝ̈ܗܘܿܢ: ܩܥܲܕ݂ܘ ܘܲܣܓܸܕ݂ܘ ܩܕ݂ܵܡ ܡܵܪܝܵܐ ܥܲܠ ܐܲܦܲܝ̈ܗܘܿܢ ܥܕܲܡܵܐ ܠܐܲܪܥܵܐ.

7: ܘܝܼܫܘܿܥ ܘܲܒ̣ܢܵܘ̈ܗܝ: ܘܲܣܪܲܒ̣ܝܵܐ: ܘܝܲܡܝܼܢ: ܘܲܥܩܘܿܦ: ܘܫܲܒ̇ܬܲܝ: ܘܗܘܼܕ݂ܝܼܵܐ: ܘܲܡܥܲܣܝܵܐ: ܘܲܩܠܲܛܝܵܐ: ܘܥܲܙܲܪܝܵܐ: ܘܝܘܿܙܵܒ̣ܵܪ: ܘܚܲܢܵܢܝܼ. ܘܲܦܢܵܝܵܐ: ܘܠܹܘܵܝܹ̈ܐ: ܡܫܲܡܫܝܼܢ ܠܥܲܡܵܐ ܒܢܵܡܘܿܣܵܐ. ܘܥܲܡܵܐ ܩܵܝ̇ܡܝܼܢ ܥܲܠ ܕܘܼܟ̇ܬ̣ܗܘܿܢ.

8: ܘܲܩ̣ܪܵܘ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ ܕܡܵܪܝܵܐ ܟܲܕ݂ ܦܪܝܼܣ. ܘܐܸܬ̇ܛܦܝܼܣܘ ܒܹܗ: ܘܐܸܣܬܲܟܲܠܘ ܒܩܸܪܝܵܢܹܗ.

9: ܘܐܸܡܲܪ ܢܚܲܡܝܵܐ ܪܹܫܵܐ ܕܟ݂ܘܼܡܪܹ̈ܐ: ܘܥܲܙܪܵܐ ܟܘܼܡܪܹ̈ܐ ܘܣܵܦܪܵܐ: ܘܠܹܘܵܝܹ̈ܐ ܐܲܝܠܹܝܢ ܕܲܡܫܲܡܫܝܼܢ ܗ̄ܘ̣ܵܘ ܠܥܲܡܵܐ: ܐܵܡ̇ܪܝܼܢ ܠܟ݂ܠܹܗ ܥܲܡܵܐ: ܝܵܘܡܵܢܵܐ ܩܲܕ̇ܝܼܫ ܗ̄ܘ̣ ܩܕ݂ܵܡ ܡܵܪܝܵܐ ܐܲܠܵܗܟ݂ܘܿܢ. ܠܵܐ ܬܸܟ݂ܪܸܐ ܠܟ݂ܘܿܢ: ܘܠܵܐ ܬܸܒ̣ܟ̇ܘܿܢ. ܡܸܛܠ ܕܒ̣ܵܟܹ̇ܝܢ ܗ̄ܘ̣ܵܘ ܓܹܝܪ ܟܠܹܗ ܥܲܡܵܐ: ܟܲܕ݂ ܫܵܡ̇ܥܝܼܢ ܗ̄ܘ̣ܵܘ ܟܬ̣ܵܒ̣ܵܐ ܕܢܵܡܘܿܣܵܐ.

10: ܘܐܸܡܲܪܘ ܠܗܘܿܢ: ܙܸܠܘ ܐܲܟ݂ܘܿܠܘ ܘܐܸܫܬܵܘ. ܘܫܲܕܲܪܘ ܡܹܐܟ݂ܘܼܠܬܵܐ ܠܡܲܢ ܕܠܵܐ ܡܛܲܝܒ̣ܵܐ ܠܹܗ. ܡܸܛܠ ܕܩܲܕ̇ܝܼܫ ܗ̄ܘ̣ ܝܵܘܡܵܢܵܐ ܩܕ݂ܵܡ ܡܵܪܝܵܐ. ܝܵܘܡܵܢܵܐ ܠܵܐ ܬܸܟ݂ܪܹܐ ܠܟ݂ܘܿܢ: ܡܸܛܠ ܕܝܵܘܡܵܐ ܗ̄ܘ̣ ܕܚܲܕ݂ܘܼܬ̣ܵܐ ܕܡܵܪܝܵܐ. ܘܗ̤ܘ ܢܸܗܘܹܐ ܥܲܕ݂ܘܿܪܟ݂ܘܿܢ.

11: ܘܠܹܘܵܝܹ̈ܐ ܡܫܲܬ̇ܩܝܼܢ ܠܟ݂ܠܹܗ ܥܲܡܵܐ: ܘܐܵܡ̇ܪܝܼܢ: ܫܬ̣ܘܿܩܘ: ܡܸܛܠ ܕܝܵܘܡܵܢܵܐ ܡܩܲܕܲܫ ܗ̄ܘ̣: ܘܠܵܐ ܬܸܒ̣ܟ̇ܘܿܢ.

12: ܘܐܸܙܲܠ̣ܘ ܟܠܹܗ ܥܲܡܵܐ ܠܡܹܐܟܲܠ ܘܲܠܡܸܫܬܵܐ: ܘܠܲܡܫܲܕܵܪܘܼ ܡܹܐܟ݂̈ܠܵܬ̣ܵܐ ܠܐܲܝܠܹܝܢ ܕܠܲܝܬ̇ ܠܗܘܿܢ: ܘܲܠܡܸܥܒܲܕ݂ ܚܲܕ݂ܘܼܬ̣ܵܐ ܪܲܒ̇ܬ̣ܵܐ. ܘܐܸܬ̇ܛܦܝܼܣܘ ܒܡܸܠܹ̈ܐ ܐܲܝܠܹܝܢ ܕܐܵܘܕܲܥܘ ܐܸܢܘܿܢ.

13: ܘܲܒ̣ܝܵܘܡܵܐ ܕܲܬ̣ܪܹܝܢ: ܐܸܬ̣ܟܲܢܲܫܘ ܪܹ̈ܫܲܝ ܐܲܒ̣ܵܗܹ̈ܐ ܕܟ݂ܠܹܗ ܥܲܡܵܐ: ܘܟ݂ܘܼܡܪܹ̈ܐ ܘܠܹܘܵܝܹ̈ܐ ܠܘܵܬ̣ ܥܲܙܪܵܐ ܣܵܦܪܵܐ: ܠܡܸܬ̇ܛܦܵܣܘܼ ܡܸܢܹܗ ܥܲܠ ܟܬ̣ܵܒ̣ܵܐ ܕܢܵܡܘܿܣܵܐ.

14: ܘܐܸܫܟܲܚܘ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ: ܕܦܲܩܸܕ݂ ܡܵܪܝܵܐ ܠܡܘܼܫܹܐ: ܕܢܸܬ̇ܒ̣ܘܼܢ ܒܢܲܝ̈ ܝܼܣܪܵܝܹܠ ܒܲܡ̈ܛܲܠܠܹܐ: ܒܥܹܐܕ݂ܵܐ ܒܝܲܪܚܵܐ ܕܬܸܫܪܝܼܢ.

15: ܘܲܕ݂ܢܸܫ̱ܡܥܘܿܢ ܟܠܡܸܕܸ̇ܡ ܕܲܟ݂ܬܲܒ̣ ܡܘܼܫܹܐ ܒܢܵܡܘܿܣܵܐ. ܘܲܩܪܵܘ ܟܵܪ̈ܘܿܙܹܐ ܒܟ݂ܠܗܹܝܢ ܩܘܼܪ̈ܝܼܗܘܿܢ ܘܒ̣ܐܘܿܪܸܫܠܸܡ ܘܐܵܡ̇ܪܝܼܢ: ܣܲܩܘ ܠܛܘܼܪܵܐ ܐܲܝܬܵܘ ܩܲܝ̈ܣܹܐ ܕܙܲܝ̈ܬܹ̇ܐ: ܘܩܲܝ̈ܣܹܐ ܕܓ̣ܵܘ̈ܙܹܐ: ܘܛܲܪ̈ܦܹܐ ܕܐܸܛܪܘܼܓܹ̇ܐ: ܘܣܵܘ̈ܟܹ̇ܐ ܕܥܲܪ̈ܒܹܐ. ܘܲܥܒܸܕ݂ܘ ܡܛܲܠܠܹ̈ܐ: ܐܲܝܟܲܢܵܐ ܕܲܟ݂ܬ̣ܝܼܒ̣ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ ܕܡܘܼܫܹܐ.

16: ܘܲܢܦܲܩ̣ܘ ܥܲܡܵܐ: ܘܐܲܝܬ̇ܝܼܘ: ܘܲܥܒܲܕ݂ܘ ܠܗܘܿܢ ܓܒܲܪ ܓܒܲܪ ܥܲܠ ܐܸܓܵܪ̈ܲܝܗܘܿܢ ܘܲܒ̣ܕ݂ܵܪ̈ܲܝܗܘܿܢ: ܘܲܒ̣ܕ݂ܵܪܬܵܐ ܕܒܲܝܬܹ̇ܗ ܕܡܵܪܝܵܐ: ܘܲܒ̣ܫܘܼܩܵܐ ܕܬܲܪܥܵܐ ܕܡܲـ̈ـܝܵܐ: ܘܲܒ̣ܫܘܼܩܵܐ ܕܬܲܪܥܵܐ ܕܐܲܦܪܹܝܡ.

17: ܘܲܥܒܲܕ݂ܘ ܟܠܹܗ ܥܲܡܵܐ ܕܲܗܦܲܟ݂ܘ ܡ̣ܢ ܫܸܒ̣ܝܵܐ ܡܛܲܠ̈ܠܹܐ: ܘܝܼܬܸܒ̣ܘ ܒܲܡܛܲܠ̈ܠܹܐ ܡܸܛܠ ܕܠܵܐ ܥܒܲܕ݂ܘ ܒܢܲܝ̈ ܝܼܣܪܵܝܹܠ ܗܵܟܲܢܵܐ: ܡ̣ܢ ܝܵܘ̈ܡܵܬܹܗ ܕܝܼܫܘܿܥ ܒܲܪܢܘܿܢ: ܥܕܲܡܵܐ ܠܹܗ ܠܝܵܘܡܵܐ ܗܵܢܵܐ. ܘܲܗܘ̤ܵܬ̣ ܚܲܕ݂ܘܼܬ̣ܵܐ ܪܲܒ̇ܬ̣ܵܐ ܕܛܵܒ̣.

18: ܘܩܵܪܹܝܢ ܗ̄ܘ̣ܵܘ ܒܲܟ݂ܬ̣ܵܒ̣ܵܐ ܕܢܵܡܘܿܣܹܗ ܕܡܘܼܫܹܐ: ܟܠ ܝܘܿܡ ܒܝܘܿܡ: ܡ̣ܢ ܝܵܘܡܵܐ ܩܲܕ݂ܡܵܝܵܐ: ܥܕܲܡܵܐ ܠܝܵܘܡܵܐ ܐ̄ܚܪܵܝܵܐ. ܘܲܥ̣ܒܲܕ݂ܘ ܥܹܐܕ݂ܵܐ ܫܲܒ̣ܥܵܐ ܝܵܘ̈ܡܝܼܢ ܘܲܒ̣ܝܵܘܡܵܐ ܕܲܬ̣ܡܵܢܝܵܐ: ܐܸܬ̣ܟܲܢܲܫܘ ܐܲܝܟܲܢܵܐ ܕܲܟ݂ܬ̣ܝܼܒ̣ ܠܗܘܿܢ.

ܩܹܦܵܠܹܐܘܿܢ: ܛ.

1: ܘܲܒ̣ܝܵܘܡܵܐ ܕܐܲܪܒ̇ܥܵܐ ܘܥܸܣܪܝܼܢ ܒܹܗ ܒܝܲܪܚܵܐ ܗܵܢܵܐ: ܐܸܬ̣ܟܲܢܲܫܘ ܒܢܲܝ̈ ܝܼܣܪܵܝܹܠ ܒܨܵܘܡܵܐ ܘܲܒ̣ܣܲܩܹ̈ܐ. ܘܐܲܪܡܝܼܘ ܩܸܛܡܵܐ ܥܠܲܝܗܘܿܢ.

2: ܘܐܸܬ̣ܦܪܸܫ ܙܲܪܥܵܐ ܕܝܼܣܪܵܝܹܠ ܡ̣ܢ ܟܠܗܘܿܢ ܥܲܡܡܹ̈ܐ ܘܩܵܡ̣ܘ ܘܐܵܘܕ̇ܝܼܘ ܥܲܠ ܚܛܵܗܲܝ̈ܗܘܿܢ: ܘܥܲܠ ܚܛܵܗܹ̈ܐ ܕܐܲܒ̣ܵܗܲܝ̈ܗܘܿܢ.

3: ܘܩܵܡ̣ܘ ܥܲܠ ܕܘܼܟ̇ܬ̣ܗܘܿܢ ܘܩܵܪܹܝܢ ܗ̄ܘ̣ܵܘ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ ܕܡܵܪܝܵܐ ܐܲܠܵܗܗܘܿܢ ܪܘܼܒ̣ܥܹܗ ܕܝܵܘܡܵܐ ܩܵܪܹܝܢ: ܘܪܘܼܒ̣ܥܹܗ ܕܝܵܘܡܵܐ ܡܵܘܕܹ̇ܝܢ: ܘܣܵܓ̣ܕ̇ܝܼܢ ܩܕ݂ܵܡ ܡܵܪܝܵܐ ܐܲܠܵܗܗܘܿܢ.

4: ܘܩܵܡ̣ܘ ܪܹ̈ܫܵܐ ܥܲܠ ܠܹܘܵܝܹ̈ܐ: ܝܼܫܘܿܥ ܘܩܲܕ݂ܡܵܐܹܝܠ: ܒܲܢܝܼ: ܚܫܲܒ̣ܝܵܐ: ܘܲܫܪܲܒ̣ܝܵܐ: ܘܟܲܒ̣ܢܝܼ: ܘܗܘܼܕ݂ܝܼܵܐ: ܘܲܫܒܲܢܝܵܐ: ܘܲܦܬܲܚܝܵܐ. ܘܨܲܠܝܼܘ ܩܕ݂ܵܡ ܡܵܪܝܵܐ ܐܲܠܗܗܘܿܢ ܒܩܵܠܵܐ ܪܵܡܵܐ.

5: ܘܐܵܡ̇ܪܝܼܢ ܠܹܘܵܝܹ̈ܐ: ܝܼܫܘܿܥ: ܘܩܲܕ݂ܡܵܐܹܝܠ: ܒܲܢܝܼ: ܚܫܲܒ̣ܝܵܐ: ܘܲܫܪܲܒ̣ܝܵܐ: ܘܗܘܼܕ݂ܝܼܵܐ: ܘܲܫܟܲܢܝܵܐ: ܘܲܦܬܲܚܝܵܐ. ܘܩܵܡܘ ܘܒܲܪܸܟ݂ܘ ܠܡܵܪܝܵܐ ܐܲܠܵܗܗܘܿܢ: ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ: ܘܲܒ̣ܪܝܼܟ݂ ܫܡܵܐ ܕܐܝܼܩܵܪܹܗ: ܘܲܡܪܲܡܪܲܡ ܥܲܠ ܟܠ ܒܸܪ̈ܝܵܬ̣ܵܐ ܒܬܸܫܒ̇ـ̈ـܚܵܬ̣ܵܐ.

6: ܐܲܢ̄ܬ̇ ܗ̄ܘ̣ ܡܵܪܝܵܐ ܒܲܠܚܘܿܕܲܝܟ: ܐܲܢ̄ܬ̇ ܥܒܲܕ̇ܬ̇ ܫܡܲܝܵܐ ܘܲܫܡܲܝ̈ ܫܡܲܝܵܐ: ܘܟ݂ܠܗܘܿܢ ܚܲܝܠܵـ̈ـܘܵܬ̣ܗܘܿܢ: ܘܐܲܪܥܵܐ ܘܟ݂ܠ ܡܸܕܸ̇ܡ ܕܐܝܼܬ̣ ܥܠܹܝܗ̇: ܘܡܲـ̈ـܝܵܐ ܘܟ݂ܠܡܸܕܸ̇ܡ ܕܐܝܼܬ̣ ܒܗܘܿܢ. ܘܐܲܢ̄ܬ̇ܝ ܗ̄ܘ̣ ܕܡܲܚܹܐ ܠܟ݂ܠܗܘܿܢ ܘܚܲܝܠܵܘܵܬ̣ܵܐ ܕܲܫܡܲܝܵܐ ܠܵܟ݂ ܗ̄ܘ̣ ܣܵܓ̣ܕ̇ܝܼܢ.

7: ܐܲܢ̄ܬ̇ ܗ̄ܘ̣ ܡܵܪܝܵܐ ܐܲܠܵܗܵܐ ܕܲܓ̣ܒܲܝܬ̇ ܠܐܲܒ̣ܪܵܡ. ܘܐܲܦܸܩܬܵܝܗܝ ܡ̣ܢ ܐܘܿܪ ܕܟܲܠܕ݂ܵܝܹ̈ܐ. ܘܫܲܚ̣ܠܦܲܬ̇ ܫܡܹܗ ܐܲܒ̣ܪܵܗܵܡ.

8: ܘܐܸܫܟܲܚܬ̇ ܠܸܒܹ̇ܗ ܕܟܸܐ ܩܕ݂ܵܡܲܝܟ. ܘܝܼܡܲܝܬ̇ ܠܹܗ ܡܵܘ̈ܡܵܬ̣ܵܐ: ܠܡܸܬܲܠ ܠܹܗ ܐܲܪܥܵܐ ܕܲܟ݂ܢܲܥܢܵܝܹܐ: ܘܲܕ݂ܚܹ̈ܬ̣ܵܝܹܐ: ܘܕ݂ܵܐܡܘܿܪ̈ܵܝܹܐ: ܘܲܕ݂ܦܲܪ̈ܙܵܝܹܐ: ܘܲܕ݂ܚܵܘܵܝܹ̈ܐ: ܘܲܕ݂ܝܵܒ̣ܘܿܣܵܝܹ̈ܐ: ܘܲܕ݂ܓܲܪ̈ܓ̇ܘܿܣܵܝܹܐ: ܠܡܸܬ̇ܠܵܗ̇ ܠܹܗ ܘܲܠܙܲܪܥܹܗ. ܘܐܲܫܪܬ̣ ܡܸܠܲܝܟ ܥܲܡܹܗ: ܡܸܛܠ ܕܙܲܕ̇ܝܼܩ ܐܲܢ̄ܬ̇.

9: ܘܲܚܙܲܝܬ̇ ܫܘܼܥܒܵܕ݂ܵܐ ܕܐܲܒ̣ܵܗܲܝ̈ܢ ܕܲܒ̣ܡܸܨܪܹܝܢ. ܘܲܫܡܲܥܬ̇ ܝܑܼܠܠܬ̇ܗܘܿܢ ܥܲܠ ܝܲܡܵܐ ܕܣܘܿܦ.

10: ܘܲܥܒܲܕ̇ܬ̇ ܐܵܬ̣̈ܘܵܬ̣ܵܐ ܘܬܸܕ݂ܡܪ̈ܵܬ̣ܵܐ ܒܦܸܪܥܘܿܢ ܘܲܒ̣ܟ݂ܠܹܗ ܚܲܝܠܹܗ: ܘܲܒ̣ܟ݂ܠܹܗ ܥܲܡܵܐ ܕܐܲܪܥܹܗ ܡܸܛܠ ܕܝܼܕܲܥܬ̇ ܕܐܲܥܠܝܼܘ ܒܗܘܿܢ ܒܥܲܡܵܟ݂: ܘܲܥܒܲܕ̇ܬ̇ ܠܵܟ݂ ܫܡܵܐ ܐܲܝܟ݂ ܕܝܵܘܡܵܢܵܐ.

11: ܘܝܲܡܵܐ ܬܪܲܥܬ̇ ܩܕ݂ܵܡܲܝܗܘܿܢ. ܘܲܥܒܲܪܘ ܒܓ̣ܵܘ ܝܲܡܵܐ ܒܝܲܒ̣ܫܵܐ. ܘܲܠܪ̈ܵܕ݂ܘܿܦܲܝܗܘܿܢ ܛܲܒܲܥ̣ܬ̇ ܒܥܘܼܡܩܵܘ̈ܗܝ ܕܝܲܡܵܐ: ܐܲܝܟ݂ ܕܛܵܒ̣ܥܵܐ ܟܹܐܦܵܐ ܒܡܲـ̈ـܝܵܐ ܥܲܫܝܼܢܹ̈ܐ.

12: ܘܲܒ̣ܥܲܡܘܼܕ݂ܵܐ ܕܲܥܢܵܢܵܐ ܕܲܒ̇ܪܬ̇ ܐܸܢܘܿܢ ܒܐܝܼܡܵܡܵܐ: ܘܒܸܐܣܛܘܿܢܵܐ ܕܢܘܼܪܵܐ ܒܠܸܠܝܵܐ: ܠܡܲܢܗܵܪܘܼ ܠܗܘܿܢ ܐܘܼܪܚܵܐ: ܠܲܡܗܲܠܵܟ݂ܘܼ ܒܵܗ̇.

13: ܘܥܲܠ ܛܘܼܪܵܐ ܕܣܝܼܢܲܝ ܢܚܸܬ̇ܬ̇ ܘܡܲܠܠܬ̇ ܥܲܡܗܘܿܢ ܡ̣ܢ ܫܡܲܝܵܐ. ܘܝܲܗ̄ܒ̣ܬ̇ ܠܗܘܿܢ ܕܝܼܢܹ̈ܐ ܬܪ̈ܝܼܨܹܐ: ܘܢܵܡܘܿܣܹ̈ܐ ܕܲܫܪܵܪܵܐ: ܘܲܩܝܵܡܹ̈ܐ ܘܦܘܼܩ̈ܕܵܢܹܐ ܕܛܵܒ̣ܝܼܢ.

14: ܘܫܲܒ̇ܬ̣ܵܐ ܕܩܘܼܕ݂ܫܵܟ݂ ܐܘܿܕܲܥ̣ܬ̇ ܐܸܢܘܿܢ ܘܦܘܼܩ̈ܕܵܢܹܐ ܘܲܩܝܵܡܹ̈ܐ ܘܢܵܡܘܿܣܹ̈ܐ ܕܦܲܩܸܕ̇ܬ̇ ܐܸܢܘܿܢ ܒܐܝܼܕ݂ܵܐ ܕܡܘܼܫܹܐ ܥܲܒ̣ܕܵܟ݂.

15: ܘܠܲܚܡܵܐ ܡ̣ܢ ܫܡܲܝܵܐ. ܝܲܗ̄ܒ̣ܬ̇ ܠܗܘܿܢ ܠܟܲܦܢ̱ܗܘܿܢ ܘܡܲـ̈ـܝܵܐ ܡ̣ܢ ܟܹܐܦܵܐ ܝܲܗ̄ܒ̣ܬ̇ ܠܗܘܿܢ. ܠܨܲܗܝܼܗܘܿܢ ܘܐܸܡܲܪܬ̇ ܠܗܘܿܢ ܠܡܸܥܲܠ ܘܲܠܡܹܐܪܲܬ̣ ܐܲܪܥܵܐ: ܕܐܲܬ̣ܩܢܲܬ̤ ܐܝܼܕ݂ܵܟ݂ ܠܡܸܬܲܠ ܠܗܘܿܢ.

16: ܗܸܢܘܿܢ ܕܹܝܢ ܘܐܲܒ̣ܵܗܲܝ̈ܗܘܿܢ ܐܲܥܠܝܼܘ: ܘܩܲܫܝܼܘ ܩܕ݂ܵܠܗܘܿܢ: ܘܠܵܐ ܨܵܬ̣ܘ ܠܦܘܼܩ̈ܕ݂ܵܢܲܝܟ.

17: ܘܠܵܐ ܨܒ̣ܵܘ ܠܡܸܫܡܲܥ: ܘܠܵܐ ܐܸܬ̇ܕ̇ܟܲܪܘ ܬܸܕ݂ܡܪ̈ܵܬ̣ܵܟ݂ ܕܲܥܒܲܕ̇ܬ̇ ܠܗܘܿܢ. ܘܲܗܦܲܟ݂ ܠܒܸ̇ܗܘܿܢ ܠܲܥܒ̣ܵܕܲܝ̈ܗܘܿܢ ܒܝܼܫܹ̈ܐ ܘܐܲܢ̄ܬ̇ ܐܲܠܵܗܵܐ ܫܵܒ̣ܘܿܩܵܐ ܘܪܸܚ̱ܡܬ̣ܵܢܵܐ ܘܚܲܢܵܢܵܐ: ܪܲܚܝܼܩ ܪܘܼܓ̣ܙܵܐ ܘܩܲܪܝܼܒ̣ ܒܵܥܘܼܬ̣ܵܐ: ܠܵܐ ܫܒܲܩܬ̇ ܐܸܢܘܿܢ.

18: ܡܸܛܠ ܕܗܸܢܘܿܢ ܥܒܲܕ݂ܘ ܥܸܓ̣ܠܵܐ ܕܢܸܣܟ̇ܬ̣ܵܐ: ܘܐܵܡܪܝܼܢ: ܗܵܢܵܘ ܐܲܠܵܗܵܟ݂ ܝܼܣܪܵܝܹܠ: ܕܐܲܣܩܵܟ݂ ܡ̣ܢ ܐܲܪܥܵܐ ܕܡܸܨܪܹܝܢ. ܘܲܥܒܲܕ݂ܘ ܒܝܼ̈ܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ.

19: ܘܐܲܢ̄ܬ̇ ܒܪ̈ܲܚܡܲܝܟ ܣܲܓ̇ܝܼ̈ܐܹܐ ܠܵܐ ܫܒܲܩܬ̇ ܐܸܢܘܿܢ ܒܡܲܕ݂ܒ̇ܪܵܐ. ܘܥܲܡܘܼܕ݂ܵܐ ܕܲܥܢܵܢܵܐ ܠܵܐ ܥܒܲܪ ܡܸܢܗܘܿܢ ܒܐܝܼܡܵܡܵܐ: ܠܲܡܕܲܒܵܘܿܘܼ ܐܸܢܘܿܢ ܒܐܘܼܪܚܵܐ. ܘܐܸܣܛܘܿܢܵܐ ܕܢܘܼܪܵܐ ܒܠܸܠܝܵܐ: ܠܡܲܢܗܵܪܘܼ ܠܗܘܿܢ ܐܘܼܪܚܵܐ: ܕܢܹܐܙܠ̄ܘܼܢ ܒܵܗ̇.

20: ܘܪܘܼܚܵܟ݂ ܛܵܒ̣ܬ̣ܵܐ ܝܲܗ̄ܒ̣ܬ̇ ܐܸܢܘܿܢ ܠܡܲܠܵܦܘܼ ܐܸܢܘܿܢ. ܘܡܲܢ̄ܢܵܐ ܠܵܐ ܟܠܲܝܬ̇ ܡ̣ܢ ܦܘܼܡܗܘܿܢ. ܘܡܲـ̈ـܝܵܐ ܝܲܗ̄ܒ̣ܬ̇ ܠܗܘܿܢ ܠܨܲܗܝܼܗܘܿܢ.

21: ܘܐܲܪܒ̇ܥܝܼܢ ܫܢ̈ܝܼܢ ܡܸܕܸ̇ܡ ܠܵܐ ܚܣܲܪ ܠܗܘܿܢ ܒܡܲܕ݂ܒ̇ܪܵܐ. ܢܲܚܬܲܝ̈ܗܘܿܢ ܠܵܐ ܒܠܝܼܘ: ܘܲܡܣܵܢܲܝ̈ܗܘܿܢ ܠܵܐ ܐܸܬ̣ܒܲܙܲܥܘ.

22: ܘܝܲܗ̄ܒ̣ܬ̇ ܠܗܘܿܢ ܡܲܠ̈ܟ̇ܘܵܬ̣ܵܐ ܕܥܲܡܡܹ̈ܐ. ܘܦܲܠܸܓ̣ܬ̇ ܐܸܢܹܝܢ ܠܗܘܿܢ ܠܪܹܫ ܐ̄ܢܵܫ. ܘܝܼܪܸܬ̣ܘ ܐܲܪܥܵܐ ܕܣܝܼܚܘܿܢ: ܘܐܲܪܥܵܐ ܕܡܲܠܟܵܐ ܕܚܸܫܒ̇ܘܿܢ: ܘܐܲܪܥܵܐ ܕܥܘܿܓ ܡܲܠܟܵܐ ܕܒܲܝܫܵܢ.

23: ܘܲܒ̣ܢܲܝ̈ܗܘܿܢ ܐܲܣܓ̇ܝܼܬ̇ ܐܲܝܟ݂ ܟܵܘ̈ܟ̇ܒܹܐ ܕܒܲܫܡܲܝܵܐ. ܘܐܲܥܸܠ̣ܬ̇ ܐܸܢܘܿܢ ܠܐܲܪܥܵܐ ܕܐܸܡܲܪܬ̇ ܠܐܲܒ̣ܵܗܲܝ̈ܗܘܿܢ ܠܡܸܥܲܠ ܠܵܗ̇ ܘܲܠܡܹܐܪܬܵܗ̇.

24: ܘܥܲܠܘ ܒ̈ܢܲܝܵܐ: ܘܝܼܪܸܬ̣ܘ ܐܲܪܥܵܐ. ܘܬܲܒܲܪܬ̇ ܩܕ݂ܵܡܲܝܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ ܕܲܟ݂ܢܲܥ̈ܢܵܝܹܐ. ܘܐܲܫܠܸܡ̣ܬ̇ ܐܸܢܘܿܢ ܒܐܝܼܕܲܝ̈ܗܘܿܢ: ܠܗܘܿܢ ܘܲܠܡܲܠܟܲܝ̈ܗܘܿܢ: ܘܲܠܥܲܡܡܹ̈ܐ ܕܐܲܪܥܵܐ: ܠܡܸܥܒܲܕ݂ ܒܗܘܿܢ ܐܲܝܟ݂ ܨܸܒ̣ܝܵܢܗܘܿܢ.

25: ܘܐܸܚܲܕ݂ܘ ܩܘܼܪ̈ܝܵܐ ܬܲܩܝܼ̈ܦܵܬ̣ܵܐ: ܘܐܲܪܥܵܐ ܫܲܡܝܼܢܬܵܐ: ܘܒ̣ܵـ̈ـܬܹ̇ܐ ܕܲܡܠܹܝܢ ܟܠܗܹܝܢ ܛܵܒ̣ܵـ̈ـܬ̣ܵܐ: ܘܓ̣ܘܼ̈ܒܹ̇ܐ ܚܦܝܼܪܹ̈ܐ: ܘܟܲܪ̈ܡܹܐ: ܘܙܲܝ̈ܬܹ̇ܐ: ܘܐܝܼܠܵܢܹ̈ܐ: ܘܡܹܐܟ݂̈ܠܵܬ̣ܵܐ ܣܲܓ̇ܝܼܵܐ̈ܬ̣ܵܐ. ܘܐܸܟܲܠܘ: ܘܲܣܒܲܥܘ: ܘܲܫܡܸܢܘ: ܘܐܸܬ̣ܦܲܢܲܩܘ ܒܛܘܼܒ̣ܵܟ݂ ܪܲܒܵܐ.

26: ܘܲܗܦܲܟ݂ܘ ܘܕܲܓܸ̇ܠ̣ܘ ܒܵܟ݂. ܘܲܫܕ݂ܵܐܘܼܗܝ ܠܢܵܡܘܿܣܵܟ݂ ܠܒܲܪ ܡ̣ܢ ܬܲܪܥܝܼܬ̣ܗܘܿܢ ܘܠܲܒ̣ܢܲܝ̈ܟ ܩܲܛܸܠܘ: ܥܲܠ ܕܐܸܡܲܪܘ ܠܗܘܿܢ ܠܡܸܗܦܲܟ݂ ܠܘܵܬ̣ܵܟ݂. ܘܲܥܒܲܕ݂ܘ ܒܝܼ̈ܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ.

27: ܘܐܲܫܠܸܡܬ̇ ܐܸܢܘܿܢ ܒܝܲܕ݂ ܒܥܸܠܕ̇ܒ̣ܵܒܲܝ̈ܗܘܿܢ: ܘܐܲܥܝܼܩܘ ܠܗܘܿܢ. ܘܲܒ̣ܥܸܕܵܢܵܐ ܕܐܘܼܠܨܵܢܵܐ ܒܥ̣ܵܘ ܡܸܢܵܟ݂: ܘܲܫܡܲܥܬ̇ ܐܸܢܘܿܢ ܡ̣ܢ ܫܡܲܝܵܐ: ܐܲܝܟ݂ ܪ̈ܲܚܡܲܝܟ ܣܲܓ̇ܝܼ̈ܐܹܐ. ܘܐܲܩܝܼܡ̣ܬ̇ ܠܗܘܿܢ ܦܵܪܘܿܩܵܐ. ܘܲܦܪܲܩ ܐܸܢܘܿܢ ܡ̣ܢ ܐܝܼܕ݂ܵܐ ܕܐܵܠܘܿܨܲܝ̈ܗܘܿܢ.

28: ܘܟܲܕ݂ ܐܲܪܘܲܚܬ̇ ܠܗܘܿܢ: ܗ̣ܦܲܟ݂ܘ ܠܡܸܥܒܲܕ݂ ܕܲܣܢܹܐ ܩܕ݂ܵܡܲܝܟ. ܘܲܫܒܲܩܬ̇ ܐܸܢܘܿܢ ܒܝܲܕ݂ ܒܥܸܠܕ̇ܒ̣ܵܒܲܝ̈ܗܘܿܢ. ܘܫܲܥܒܸ̇ܕ݂ܘ ܐܸܢܘܿܢ. ܘܲܗܦܲܟ݂ܘ ܘܨܲܠܝܼܘ ܩܕ݂ܵܡܲܝܟ. ܘܐܲܢ̄ܬ̇ ܡ̣ܢ ܫܡܲܝܵܐ ܫ̣ܡܲܥܬ̇: ܘܲܦܪܲܩܬ̇ ܐܸܢܘܿܢ ܒܟ݂ܠܙܒܲܢ: ܐܲܝܟ݂ ܣܲܓ̇ܝܼܐܘܼܬ̣ ܪ̈ܲܚܡܲܝܟ.

29: ܘܐܲܣܗܸܕ̇ܬ̇ ܒܗܘܿܢ: ܠܡܲܗܦܵܟ݂ܘܼ ܐܸܢܘܿܢ ܠܢܵܡܘܿܣܵܟ݂. ܘܗܸܢܘܿܢ ܐܲܥܠܝܼܘ: ܘܠܵܐ ܫܡܲܥ̣ܘ ܠܦܘܼܩ̈ܕ݂ܵܢܲܝܟ ܘܲܒ̣ܕܝܼܢܲܝ̈ܟ ܚܛܵܘ ܒܗܘܿܢ. ܕܐܸܢ ܥܵܒܹ̇ܕ݂ ܠܗܘܿܢ ܒܲܪܢܵܫܵܐ: ܚܵܝܹ̇ܐ ܒܗܘܿܢ. ܘܲܥܒܲܕ݂ܘ ܠܗܘܿܢ ܟܲܬ̣ܦܵܐ ܡܵܪܘܿܕ̇ܬܵܐ. ܘܲܩܕ݂ܵܠܗܘܿܢ ܩܲܫܝܼܘ: ܘܠܵܐ ܫܡܲܥܘ.

30: ܘܐܲܟ݂ܪܸܙܬ̇ ܥܠܲܝܗܘܿܢ ܫܢܲـ̈ـܝܵܐ ܣܲܓ̇ܝܼܵܐ̈ܬ̣ܵܐ. ܘܐܸܣܗܸܕ̇ܬ̇ ܒܗܘܿܢ ܒܪܘܼܚܵܟ݂: ܒܐܝܼܕ݂ܵܐ ܕܲܢܒ̣ܝܲܝ̈ܟ. ܘܠܵܐ ܫ̣ܡܲܥܘ ܘܐܲܫܠܸܡܬ̇ ܐܸܢܘܿܢ ܒܐܝܼܕ݂ܵܐ ܕܥܲܡܡܹ̈ܐ ܕܲܡܕ݂ܝܼ̈ܢܵܬ̣ܵܐ.

31: ܘܡܸܛܠ ܪ̈ܲܚܡܲܝܟ ܣܲܓ̇ܝܼ̈ܐܹܐ: ܠܵܐ ܐܵܘܒܸ̇ܕ̇ܬ̇ ܐܸܢܘܿܢ. ܘܠܵܐ ܫܒܲܩܬ̇ ܐܸܢܘܿܢ ܡܸܛܠ ܕܐܲܠܵܗܵܐ ܐܲܢ̄ܬ̇ ܚܲܢܵܢܵܐ ܘܪܸܚ̱ܡܬ̣ܵܢܵܐ.

32: ܡܸܟܹ̇ܝܠ: ܐܲܠܵܗܲܢ ܐܲܠܵܗܵܐ ܪܲܒܵܐ ܘܓܲܢ̄ܒܵܪܵܐ ܘܲܕ݂ܚܝܼܠܵܐ: ܢܵܛܲܪ ܡܵܘ̈ܡܵܬ̣ܵܐ ܘܲܫܪܵܪܵܐ. ܠܵܐ ܢܸܬ̣ܟܲܣܸܐ ܡ̣ܢ ܩܕ݂ܵܡܲܝܟ ܟܠܹܗ ܐܘܼܠܨܵܢܵܐ ܕܐܸܬ̣ܵܐ ܥܠܲܝܢ: ܘܥܲܠ ܡܲܠܟ̇ܝܼ̈ܢ: ܘܥܲܠ ܪܵܘ̱ܪ̈ܒ̣ܵܢܲܝܢ: ܘܥܲܠ ܟܘܼܡܪ̈ܲܝܢ: ܘܥܲܠ ܢܒ̣ܝܲܝ̈ܢ: ܘܥܲܠ ܐܲܒ̣ܵܗܲܝ̈ܢ: ܘܥܲܠ ܟܠܹܗ ܥܲܡܵܐ: ܡ̣ܢ ܝܵܘܡܵܘ̈ܗܝ ܕܡܲܠܟܵܐ ܕܐܵܬ̣ܘܿܪ ܘܲܥܕܲܡܵܐ ܠܝܵܘܡܵܢܵܐ.

33: ܘܐܲܢ̄ܬ̇ ܙܲܕ̇ܝܼܩ ܥܲܠ ܟܠ ܡܸܕܸ̇ܡ ܕܐܸܬ̣ܵܐ ܥܠܲܝܢ. ܡܸܛܠ ܕܲܒ̣ܩܘܼܫܬܵܐ ܐܲܢ̄ܬ̇ ܓܹܝܪ ܥܒܲܕ̇ܬ̇. ܘܲܚܢܲܢ ܐܲܥܠܝܼܢܲܢ.

34: ܘܡܲܠܟܲܝ̈ܢ: ܘܪܵܘ̱ܪ̈ܒ̣ܵܢܲܝܢ: ܘܟ݂ܘܼܡܪ̈ܲܝܢ: ܘܐܲܒ̣ܵܗܲܝ̈ܢ: ܠܵܐ ܥ̣ܒܲܕ݂ ܢܵܡܘܿܣܵܟ݂ ܘܠܵܐ ܨܵܬ̣ܘ ܠܦܘܼܩ̈ܕ݂ܵܢܲܝܟ ܘܲܠܣܵܗ̈ܕ̇ܘܵܬ̣ܵܟ݂: ܕܐܲܣܗܸܕ̇ܬ̇ ܒܗܘܿܢ.

35: ܘܲܟ݂ܦܲܪܘ ܒܡܲܠܟ̇ܘܼܬ̣ܵܟ݂ ܘܲܒ̣ܛܘܼܒ̣ܵܟ݂ ܪܲܒܵܐ ܕܝܲܗ̄ܒ݂ܬ̇ ܠܗܘܿܢ: ܒܐܲܪܥܵܐ ܛܵܒ̣ܬ̣ܵܐ ܘܫܲܡܝܼܢܬܵܐ ܕܝܲܗ̄ܒ̣ܬ̇ ܠܗܘܿܢ. ܘܠܵܐ ܦܲܠܚܘܿܟ݂: ܘܠܵܐ ܗܦܲܟ݂ܘ ܡ̣ܢ ܥܒ̣ܵܕܲܝ̈ܗܘܿܢ ܒܝܼ̈ܫܹܐ.

36: ܡܸܛܠ ܗܵܢܵܐ ܝܵܘܡܵܢܵܐ ܥܲܒ̣̈ܕܹ̇ܐ. ܘܐܲܪܥܵܐ ܕܝܲܗ̄ܒ̣ܬ̇ ܠܐܲܒ̣ܵܗܲܝ̈ܢ ܠܡܹܐܟܲܠ ܐܸܒܵܗ̇ ܘܛܘܼܒ̣ܵܗ̇: ܗܵܐ ܚܢܲܢ ܐܲܝܟ݂ ܥܲܒ̣̈ܕܹ̇ܐ ܦܵܠܚܝܼܢ ܒܓ̣ܵܘܵܗ̇.

37: ܘܥܲܠ̈ܠܵܬ̣ܵܗ̇ ܢܵܣܒ̇ܝܼܢ ܡܲܠ̈ܟܹ̇ܐ ܕܐܲܩܝܼܡܬ̇ ܥܠܲܝܢ: ܡܸܛܠ ܚܛܵܗܲܝ̈ܢ ܘܥܲܠ ܦܲܓ̣ܪ̈ܲܝܢ ܗܸܢܘܿܢ ܫܲܠܝܼܛܝܼܢ: ܘܥܲܠ ܒܥܝܼܪܲܢ: ܐܲܝܟ݂ ܨܸܒ̣ܝܵܢܗܘܿܢ ܘܒ̣ܐܘܼܠܨܵܢܵܐ ܪܲܒܵܐ ܫܪܹܝܢܲܢ.

38: ܘܲܒ̣ܟ݂ܠܗܹܝܢ ܗܵܠܹܝܢ ܝܵܡܹ̇ܝܢ ܚ̄ܢܲܢ ܒܲܫܪܵܪܵܐ ܘܡܲܣ̱ܗܕ݂ܝܼܢ ܥܲܠ ܚܵܬ̣ܡܵܐ: ܩܲܫܝܼ̈ܫܲܝܢ: ܘܠܹܘܵܝܹ̈ܐ: ܘܟ݂ܘܼܡܪ̈ܲܝܢ: ܘܟ݂ܠ ܐܲܝܠܹܝܢ ܕܲܚܝܵܘ ܡܸܢܲܢ.

ܩܹܦܵܠܹܐܘܿܢ: ܝ.

1: ܢܚܲܡܝܵܐ ܩܲܫܝܼܫܵܐ ܒܲܪ ܚܲܢܲܢܝܵܐ ܪܹܫ ܟܘܼܡܪܹ̈ܐ: ܘܙܲܪܲܚܝܵܐ.

2: ܘܲܣܪܲܒ̣ܝܵܐ: ܘܥܲܙܲܪܝܵܐ: ܘܐܹܪܲܡܝܵܐ.

3: ܘܦܸܫܚܘܿܪ: ܘܐܵܡܲܪܝܵܐ: ܘܲܡܠܲܟ݂ܝܵܐ: ܘܲܫܦܲܛܝܵܐ.

4: ܘܲܚܛܘܿܫ: ܘܲܫܟܲܢܝܵܐ: ܘܲܡܠܘܿܟ݂.

5: ܘܲܫܟ݂ܘܿܡ: ܘܥܲܙܡܘܿܬ̣: ܥܒܲܪܝܵܐ.

6: ܕܵܢܝܼܐܹܝܠ: ܓܒ̣ܝܼܬ̣ܗܘܿܢ: ܒܵܪܘܿܟ݂.

7: ܡܲܫܠܸܡ: ܐܲܒ̣ܝܼܵܐ: ܒܸܢܝܵܡܹܝܢ.

8: ܡܥܲܣܝܵܐ: ܒܸܠܓܵܢ: ܫܡܲܥܝܵܐ. ܗܵܠܹܝܢ ܟܘܼܡܪܹ̈ܐ.

9: ܘܠܹܘܵܝܹ̈ܐ ܝܼܫܘܿܥ ܒܲܪ ܝܼܙܲܢܝܵܐ: ܒܲܢܝܼ: ܡܲܒ̣ܢܝܼ: ܚܵܕ݂ܵܪ: ܘܩܲܕ݂ܡܝܼܵܐ.

10: ܘܐܲܚܲܝ̈ܗܘܿܢ ܫܟܲܢܝܵܐ: ܘܐܘܿܪܝܼܵܐ: ܩܠܲܛܝܵܐ: ܦܠܲܛܝܵܐ: ܚܲܢܵܢܝܼ.

11: ܡܝܼܟ݂ܵܐ: ܪܟ݂ܘܿܒ̣: ܚܫܲܒ̣ܝܵܐ.

12: ܙܟ݂ܘܿܪ: ܫܪܲܒ̇ܝܵܐ: ܫܟ݂ܢܝܵܐ.

13: ܗܘܼܕ݂ܝܼܵܐ: ܒܢܲܝ̈ ܒܲܢܝܼ.

14: ܪܹ̈ܫܲܝ ܥܲܡܵܐ: ܦܲܪܥܵܫ ܫܲܠܝܼܛ ܡܘܼܐܵܒ̣: ܥܝܼܠܵܡ ܙܹܬ̣ܵܝܹ̈ܐ.

15: ܒܢܲܝ̈ ܥܲܙܓܵܪ: ܘܲܒ̣ܢܲܝ̈ ܐܲܕ݂ܘܿܢܝܼܵܐ.

16: ܒܲܓ̣ܘܲܝ: ܥܲܕ̇ܘܿܢ.

17: ܐܵܛܲܪ: ܚܹܙܲܩܝܵܐ: ܥܙܘܿܪ.

18: ܐܘܿܪܝܼܵܐ: ܚܩܘܿܡ: ܒܲܨܝܼ.

19: ܚܘܿܙܝܼܦ: ܥܢܵܬ̣ܘܿܬ̣: ܢܲܒ̇ܝܼ.

20: ܡܲܦܓ̇ܢܸܫ: ܡܲܫܠܲܡ: ܥܙܝܼܦܝܼ.

21: ܡܫܘܼܙܦܵܐܹܝܠ: ܨܵܕ݂ܘܿܩ: ܝܘܿܝܵܕ݂ܵܥ.

22: ܦܠܲܛܝܵܐ: ܚܲܢܵܢܝܼ: ܥܢܲܢܝܵܐ.

23: ܗܘܿܫܵܥ: ܚܲܢܲܢܝܵܐ: ܝܼܫܘܿܥ.

24: ܗܠܘܼܫ: ܦܥܲܢܝܵܐ: ܫܒ̣ܘܿܩ.

25: ܐܲܪܚܘܿܡ: ܚܫܲܒ̣ܝܵܐ: ܡܥܲܣܝܵܐ.

26: ܐܲܚܝܼܵܐ: ܚܲܢܵܢܝܼ: ܥܢܵܢ.

27: ܡܠܘܿܟ݂: ܚܵܪܵܡ: ܒܲܥܢܵܐ.

28: ܘܫܲܪܟܵܐ ܕܥܲܡܵܐ. ܟܘܼܡܪܹ̈ܐ ܘܠܹܘܵܝܹ̈ܐ: ܘܬ̣ܵܪ̈ܥܹܐ: ܘܲܡܫܲܡ̈ܫܵܢܹܐ: ܘܥܲܒ̣̈ܕܹ̇ܐ: ܘܟ݂ܠ ܕܐܸܬ̣ܦܪܸܫܘ ܡ̣ܢ ܥܲܡܡܹ̈ܐ ܕܲܡܕ݂ܝܼ̈ܢܵܬ̣ܵܐ ܕܢܹܐܬ̣ܘܿܢ ܠܘܵܬ̣ ܢܵܡܘܿܣܵܐ ܕܡܵܪܝܵܐ ܗܸܢܘܿܢ ܘܢܸܫܲܝ̈ܗܘܿܢ: ܘܲܒ̣ܢܲܝ̈ܗܘܿܢ: ܘܲܒ̣ܢܵܬ̣̈ܗܘܿܢ: ܘܟ݂ܠܡܲܢ ܕܝܵܕܲܥ̣ ܘܡܸܣܬܲܟܲܠ.

29: ܘܲܡܥܲܫܢܝܼܢ ܥܲܠ ܐܲܚܲܝ̈ܗܘܿܢ ܘܥܲܠ ܩܲܪ̈ܝܼܒܲܝܗܘܿܢ: ܘܥܵܐܠܝܼܢ ܒܡܵܘ̈ܡܵܬ̣ܵܐ ܘܒܲܩܝܵܡܵܐ: ܠܲܡܗܲܠܵܟ݂ܘܼ ܒܢܵܡܘܿܣܹܗ ܕܡܵܪܝܵܐ: ܕܝܲܗ̄ܒ̣ ܒܐܝܼܕ݂ܵܐ ܕܡܘܼܫܹܐ ܥܲܒ̣ܕܹ̇ܗ ܕܡܵܪܝܵܐ: ܘܲܠܡܸܛܲܪ ܘܲܠܡܸܥܒܲܕ݂ ܟܠܗܘܿܢ ܦܘܼܩܕܵܘ̈ܗܝ ܕܡܵܪܝܵܐ ܡܵܟ݂ܵܢ: ܘܕ݂ܝܼܢܵܘ̈ܗܝ ܘܢܵܡܘܿܣܵܘ̈ܗܝ.

30: ܘܲܕ݂ܠܵܐ ܢܸܬܸ̇ܠ ܒ̈ܢܵܬܲܢ ܠܥܲܡܡܹ̈ܐ ܕܐܲܪܥܵܐ: ܘܲܒ̣̈ܢܵܬ̣ܗܘܿܢ ܠܵܐ ܢܸܣܲܒ̣ ܠܲܒ̣ܢܲܝ̈ܢ.

31: ܘܡ̣ܢ ܥܲܡܡܹ̈ܐ ܕܐܲܪܥܵܐ ܕܡܲܝܬܹ̇ܝܢ: ܠܵܐ ܢܸܣܒ̣ܘܼܢ. ܘܟ݂ܠ ܕܡܵܘܓܲܪ ܒܥܝܼܪܵܐ ܒܝܵܘܡܵܐ ܕܫܲܒ̇ܬ̣ܵܐ: ܐܲܓ̣ܪܵܐ ܠܵܐ ܢܸܣܲܒ̣ ܘܛܲܥܢܵܐ ܒܝܵܘܡܵܐ ܕܫܲܒ̇ܬ̣ܵܐ ܠܵܐ ܢܸܫܩܘܿܠ: ܡܸܛܠ ܕܩܲܕ̇ܝܼܫܵܐ ܗ̄ܝ̣. ܘܢܸܫܒ̇ܘܿܩ ܟܠܡܸܕܸ̇ܡ ܕܚܲܝܵܒ̣ܝܼܢ ܠܲܢ. ܘܲܚܢܲܢ ܒܫܲܢ̄ܬܵܐ ܕܲܫܒܲܥ ܢܸܫܒ̇ܘܿܩ.

32: ܘܐܲܫܪܢ ܥܠܲܝܢ ܦܘܼܩ̈ܕܵܢܹܐ: ܕܢܸܗܘܐ ܝܵܗ̄ܒ̇ܝܼܢ ܬܘܼܠܬܹܗ ܕܐܸܣܬܹ̇ܪܵܐ ܒܫܲܒ̇ܬ̣ܵܐ: ܠܦܘܼܠܚܵܢܵܐ ܕܒܲܝܬܵܐ ܕܐܲܠܵܗܲܢ.

33: ܠܠܲܚܡܵܐ ܕܦܘܼܪܫܵܢܵܐ: ܠܩܘܼܪܒܵܢܵܐ ܐܲܡܝܼܢܵܐ: ܘܠܲܥܠܵܬ̣ܵܐ ܐܲܡܝܼܢܬܵܐ ܕܫܲـ̈ـܒܹ̇ܐ ܘܲܕ݂ܪܹ̈ܫܲܝ ܝܲܪ̈ܚܹܐ: ܘܲܕ݂ܥܲܕ݂ܠܹ̈ܕܹܐ: ܘܲܕ݂ܡܲܩܕ̇ܫܹ̈ܐ: ܘܲܕ݂ܫܘܼܒ̣ܩܵܢ ܚܛܵܗܹ̈ܐ ܕܝܼܣܪܵܝܹܠ: ܘܲܠܟ݂ܠܵܗ̇ ܥܒ̣ܝܼܕ̇ܬܵܐ ܕܒܲܝܬܵܐ ܕܐܲܠܵܗܲܢ.

34: ܘܦܸܨܹ̈ܐ ܐܲܪܡ̣ܝܼܘ ܥܲܠ ܩܘܼܪ̈ܒܵܢܹܐ ܕܩܲܝܣܹ̈ܐ: ܟܵܗ̈ܢܹܐ ܘܠܹܘܵܝܹ̈ܐ: ܘܥܲܡܵܐ: ܠܡܲܝܬܵܝܘܼ ܠܒܲܝܬܹ̇ܗ ܕܡܵܪܝܵܐ ܐܲܠܵܗܲܢ: ܐܲܝܟ݂ ܕܲܟ݂ܬ̣ܝܼܒ̣ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ.

35: ܠܡܲܝܬܵܝܘܼ ܪܹ̈ܫܝܵܬ̣ܵܐ ܕܐܲܪܒ̇ܥܝܼܢ: ܘܪܹ̈ܫܝܵܬ̣ܵܐ ܕܟ݂ܠ ܐܸܒܵܐ ܕܐܝܼܠܵܢܹ̈ܐ: ܕܟ݂ܠ ܫܢܵܐ ܒܲܫܢܵܐ.

36: ܠܡܲܝܬܵܝܘܼ ܠܒܲܝܬܹ̇ܗ ܕܡܵܪܝܵܐ: ܒܘܼܟ݂ܪܹ̈ܐ ܕܲܒ̣ܢܲܝ̈ܢ ܘܕܲܒ̣ܥܝܼܪ̈ܵܢ: ܐܲܝܟܲܢܵܐ ܕܲܟ݂ܬ̣ܝܼܒ̣ ܒܢܵܡܘܿܣܹܗ ܕܡܵܪܝܵܐ: ܘܒ̣ܘܼܟ݂ܪܹ̈ܐ ܕܬ̣ܵܘܪ̈ܲܝܢ ܘܲܕ݂ܥܵـ̈ـܢܲܢ.

37: ܠܡܲܝܬܵܝܘܼ ܠܒܲܝܬܹ̇ܗ ܕܐܲܠܵܗܲܢ: ܠܟ݂ܘܼܡܪܹ̈ܐ ܕܲܡܫܲܡܫܝܼܢ ܒܒܲܝܬܵܐ ܕܐܲܠܵܗܲܢ. ܪܹ̈ܫܝܵܬ̣ܵܐ ܕܐܵܨ̈ܘܵܬܲܢ ܘܕܸܐܕ̇ܪ̈ܲܝܢ ܘܕܹܐܒܵܐ ܕܟ݂ܠ ܐܝܼܠܵܢܝܼ̈ܢ. ܘܚܲܡܪܵܐ ܘܡܸܚܫܵܐ ܢܸܬܸ̇ܠ ܠܟ݂ܵܗ̈ܢܹܐ ܕܲܡܫܲܡܫܝܼܢ ܩܕ݂ܵܡ ܐܲܠܵܗܲܢ. ܘܚܲܕ݂ ܡ̣ܢ ܥܸܣܪܵܐ ܡ̣ܢ ܐܲܪ̈ܥܵܬܲܢ: ܢܸܬܸ̇ܠ ܠܠܹܘܵܝܹ̈ܐ. ܘܗܸܢܘܿܢ ܠܹܘܵܝܹ̈ܐ ܢܸܗܘܘܿܢ ܢܵܣܒ̇ܝܼܢ ܡܲܥܣܵܪܹ̈ܐ ܡ̣ܢ ܟܠ ܩܘܼܪ̈ܝܵܐ ܕܦܘܼܠܚܵܢܲܢ.

38: ܘܢܸܗܘܹܐ ܟܘܼܡܪܵܐ ܒܲܪ ܐܲܗܪܘܿܢ ܥܲܡ ܠܹܘܵܝܹ̈ܐ ܒܡܲܥܣܵܪ̈ܲܝܗܘܿܢ. ܘܠܹܘܵܝܹ̈ܐ ܢܲܣܩܘܼܢ ܚܲܕ݂ ܡ̣ܢ ܥܸܣܪܵܐ ܠܒܲܝܬܵܐ ܕܐܲܠܵܗܲܢ: ܠܒܹܝܬ̣ ܩܦܵܣܹ̈ܐ: ܘܲܠܒܹܝܬ̣ ܓܲܙܵܐ.

39: ܡܸܛܠ ܕܲܠܒܹܝܬ̣ ܩܦܵܣܹ̈ܐ ܢܲܝܬ̇ܘܿܢ ܒܢܲܝ̈ ܝܼܣܪܵܝܹܠ: ܘܲܒ̣ܢܲܝ̈ ܠܹܘܝܼ: ܪܹ̈ܫܝܵܬ̣ܵܐ ܕܲܥܒ̣ܘܼܪܵܐ ܘܲܕ݂ܚܲܡܪܵܐ ܘܲܕ݂ܡܸܫܚܵܐ ܬܲܡܵܢ ܡܵܐܢܲܝ̈ ܩܘܼܕ݂ܫܹ̈ܐ. ܘܟ݂ܘܼܡܪܹ̈ܐ ܘܠܹܘܵܝܹ̈ܐ: ܘܬ̣ܵܪ̈ܥܹܐ ܘܢܵܛܘܿܪܹ̈ܐ: ܠܵܐ ܢܸܫܒ̇ܩܘܼܢ ܠܒܲܝܬܵܐ ܕܐܲܠܵܗܲܢ.

ܩܹܦܵܠܹܐܘܿܢ: ܝܐ.

1: ܘܢܸܬ̇ܒ̣ܘܼܢ ܩܲܫܝܼ̈ܫܲܝ ܥܲܡܵܐ ܒܐܘܿܪܸܫܠܸܡ. ܘܫܲܪܟܵܐ ܕܥܲܡܵܐ ܢܲܪܡܘܿܢ ܦܸܨܹ̈ܐ ܠܡܲܝܬܵܝܘܼ ܚܲܕ݂ ܡ̣ܢ ܥܸܣܪܵܐ ܒܢܲܝ̈ܢܵܫܵܐ ܠܡܸܥܡܲܪ ܒܐܘܿܪܸܫܠܸܡ ܡܕ݂ܝܼܢ̄ܬܵܐ ܕܩܘܼܕ݂ܫܵܐ. ܘܲܬ̣ܫܲܥ ܡܢܵـ̈ـܘܵܢ ܢܸܗ̱ܘ̈ܝܵܢ ܒܩܘܼܪ̈ܝܵܐ.

2: ܘܒܲܪܸܟ݂ܘ ܥܲܡܵܐ ܠܟ݂ܠܗܘܿܢ ܐ̄ܢܵܫܵܐ ܐܲܝܠܹܝܢ ܕܲܨܒ̣ܵܘ ܡ̣ܢ ܪܸܥܝܵܢܗܘܿܢ ܠܡܸܬܲܒ̣ ܒܐܘܿܪܸܫܠܸܡ.

3: ܘܗܵܠܹܝܢ ܪܹ̈ܫܹܐ ܕܲܡܕ݂ܝܼܢ̄ܬܵܐ ܕܝܼܬܸܒ̣ܘ ܒܐܘܿܪܸܫܠܸܡ: ܘܲܒ̣ܩܘܼܪ̈ܝܵܐ ܕܲܝܗܘܼܕ݂ܵܐ: ܘܝܼܬܸܒ̣ܘ ܓܲܒ̣ܪܵܐ ܒܝܘܼܪܬܵܢܹܗ: ܒܩܘܼܪ̈ܝܼܗܘܿܢ ܕܝܼܣܪܵܝܹܠ: ܟܘܼܡܪܹ̈ܐ ܘܠܹܘܵܝܹ̈ܐ: ܘܥܲܡܵܐ: ܘܲܒ̣ܢܲܝ̈ ܥܲܒ̣̈ܕܲܝ ܫܠܹܝܡܘܿܢ: ܒܐܘܿܪܸܫܠܸܡ.

4: ܘܡ̣ܢ ܒܢܲܝ̈ ܝܼܗܘܼܕ݂ܵܐ ܘܡ̣ܢ ܒܢܲܝ̈ ܒܸܢܝܵܡܹܝܢ. ܡ̣ܢ ܒܢܝ̈ ܝܼܗܘܼܕ݂ܵܐ: ܢܬܲܢܝܵܐ ܒܲܪ ܥܘܿܙܝܼܵܐ: ܒܲܪ ܙܟܲܪܝܵܐ: ܒܲܪ ܐܵܡܲܪܝܵܐ: ܒܲܪ ܫܦܲܛܝܵܐ: ܒܲܪ ܡܲܗܠܵܠܵܐܹܝܠ.

5: ܡ̣ܢ ܒܢܝ̈ ܦܲܪܨ: ܡܥܲܣܝܵܐ ܒܲܪ ܒܵܪܘܿܟ݂. ܒܲܪ ܟܸܠܚܵܙܹܐ: ܒܲܪ ܢܝܼܪܝܼܵܐ: ܒܲܪ ܥܲܙܲܪܝܵܐ: ܒܲܪ ܝܘܿܢܵܕ݂ܵܒ̣: ܒܲܪ ܙܟܲܪܝܵܐ: ܒܲܪ ܫܸܠܵܐ.

6: ܟܠܗܘܢ ܒܢܲܝ̈ ܦܲܪܨ ܕܥܵܡ̇ܪܝܼܢ ܒܐܘܿܪܸܫܠܸܡ: ܐܪܒܲܥܡܵܐܐ ܘܸܫܬ̇ܝܼܢ ܘܲܬ̣ܡܵܢܝܵܐ: ܓܲܢ̄ܒܵܪ̈ܲܝ ܚܲܝܠܵܐ.

7: ܘܗܵܠܹܝܢ ܒܢܲܝ̈ ܒܸܢܝܵܡܹܝܢ: ܣܸܠܵܐ ܒܲܪ ܡܲܫܠܘܿܡ: ܒܲܪ ܝܘܿܕ݂ܵܥ: ܒܲܪ ܦܪܵܝܵܐ: ܒܲܪ ܩܠܵܝܵܐ: ܒܲܪ ܡܥܲܣܝܵܐ: ܒܲܪ ܐܲܬ̣ܢܵܐܹܝܠ: ܒܲܪ ܐܹܫܲܥܝܵܐ.

8: ܘܒ̣ܵܬ̣ܪܹܗ ܬܫܲܥܡܵܐܐ ܘܥܸܣܪܝܼܢ ܘܲܬ̣ܡܵܢܝܵܐ.

9: ܘܝܘܼܐܹܝܠ ܒܲܪ ܙܟܲܪܝܵܐ: ܫܲܠܝܼܛ ܥܠܲܝܗܘܿܢ. ܘܲܝܗܘܼܕ݂ܵܐ ܒܲܪ ܣܢܵܐܵܐ ܫܲܠܝܼܛ ܥܲܠ ܩܪܝܼܬ̣ܵܐ ܕܬܲܪܬܹ̇ܝܢ.

10: ܡ̣ܢ ܟܘܼܡܪܹ̈ܐ: ܒܪܲܟ݂ܝܵܐ ܒܲܪ ܝܘܿܝܵܕ݂ܵܥ: ܘܲܣܪܲܒ̣ܝܵܐ ܒܲܪ ܚܹܠܲܩܝܵܐ: ܒܲܪ ܡܲܫܠܘܿܡ.

11: ܒܲܪ ܨܵܕ݂ܘܿܩ: ܒܲܪ ܡܟܲܪ̱ܝܘܼܬ̣: ܒܲܪ ܐܲܚܝܼܛܘܿܒ̣: ܫܲܠܝܼܛ ܥܲܠ ܒܲܝܬܹ̇ܗ ܕܡܵܪܝܵܐ.

12: ܘܐܲܚܵܘ̈ܗܝ ܥܵܒ̣ܕ̇ܝܼܢ ܥܒ̣ܵܕ݂ܵܐ ܠܓ̣ܵܘ: ܬܡܵܢܹܡܵܐܐ ܘܥܸܣܪܝܼܢ ܘܲܬ̣ܪܹܝܢ: ܘܥܲܙܲܪܝܵܐ ܒܲܪ ܝܲܪܚܘܿܡ: ܒܲܪ ܦܵܠܝܵܐ: ܒܲܪ ܥܡܝܼܨܵܪ: ܒܲܪ ܙܟܲܪܝܵܐ: ܒܲܪ ܦܸܫܚܘܿܪ: ܒܲܪ ܡܠܲܟ݂ܝܵܐ.

13: ܘܐܲܚܲܝ̈ܗܘܿܢ ܪܹ̈ܫܹܐ ܠܒܹܝܬ̣ ܐܲܒ̣ܵܗܲܝ̈ܗܘܿܢ: ܡܲܐܬܹ̇ܝܢ ܘܐܲܪܒ̇ܥܝܼܢ ܘܲܬ̣ܪܹܝܢ: ܘܲܥܡܝܼܣܲܝ ܒܲܪ ܥܲܙܪܵܐܹܝܠ: ܒܲܪ ܐܲܚܙܲܝ: ܒܲܪ ܡܲܫ̱ܠܡܘܼܬ̣: ܒܲܪ ܐܵܡܝܼܪ.

14: ܘܐܲܚܲܝ̈ܗܘܿܢ ܓܲܢ̄ܒܵܪ̈ܲܝ ܚܲܝܠܵܐ: ܡܵܐܐ ܘܥܸܣܪܝܼܢ ܘܲܬ̣ܡܵܢܝܵܐ. ܘܫܲܠܝܼܛ ܥܠܲܝܗܘܿܢ ܙܲܒ̣ܕܵܐܹܝܠ ܒܲܪ ܪܵܘ̱ܪ̈ܒ̣ܵܢܹܐ.

15: ܘܡ̣ܢ ܠܹܘܵܝܹ̈ܐ: ܫܡܲܥܝܵܐ ܒܲܪ ܝܼܫܘܿܥ: ܒܲܪ ܥܪܝܼܩܵܡ: ܒܲܪ ܚܫܲܒ̣ܝܵܐ: ܒܲܪ ܒܲܢܝܼ: ܒܲܪ ܫܲܒ̇ܬ̇ܝܼ.

16: ܘܝܘܿܙܵܒ̣ܵܪ ܥܲܠ ܥܒ̣ܝܼ̈ܕ݂ܵܬ̣ܵܐ ܒܲܪ̈ܵܝܵܬ̣ܵܐ ܕܒܲܝܬܵܐ ܕܡܵܪܝܵܐ: ܒܲܪ ܙܲܒ̣ܕ̇ܝܼ: ܒܲܪ ܐܵܣܵܦ.

17: ܘܡ̣ܢ ܪܹ̈ܫܹܐ ܕܠܹܘܵܝܹ̈ܐ: ܡܬܲܢܝܵܐ ܒܲܪ ܡܝܼܟ݂ܵܐ: ܪܹܫ ܩܲܕ݂ܡܵܝܘܼܬ̣ܵܐ ܕܲܝܗܘܼ̈ܕ݂ܵܝܹܐ ܕܲܨܠܘܿܬ̣ܵܐ. ܘܒܲܩܒ̇ܘܼܩܵܐ ܬܸܢܝܵܢܵܐ ܕܐܲܚܵܘ̈ܗܝ: ܘܥܝܼܪܵܐ ܒܲܪ ܫܡܘܿܥ: ܒܲܪ ܓܠܵܠ: ܒܲܪ ܝܲܬ̣ܪܘܿܢ.

18: ܟܠܗܘܿܢ ܠܹܘܵܝܹ̈ܐ ܕܲܒ̣ܩܘܼܪܝܲܬ̣ ܩܘܼܕ݂ܫܵܐ: ܡܲܐܬܹ̇ܝܢ ܘܲܬ̣ܡܵܢܐܝܼܢ ܘܐܲܪܒ̇ܥܵܐ.

19: ܘܬ̣ܵܪ̈ܥܹܐ ܥܲܩܘܿܒ̣ ܘܐܲܛܠܡܵܢ. ܘܐܲܚܲܝ̈ܗܘܿܢ ܕܢܵܛ̇ܪܝܼܢ ܒܬ̣ܵܪ̈ܥܹܐ: ܡܵܐܐ ܘܫܲܒ̣ܥܝܼܢ ܘܲܬ̣ܪܹܝܢ.

20: ܘܫܲܪܟܵܐ ܕܝܼܣܪܵܝܠ: ܕܟ݂ܘܼܡܪܹ̈ܐ ܘܠܹܘܵܝܹ̈ܐ ܒܟ݂ܠ ܩܘܼܪ̈ܝܵܐ ܕܲܝܗܘܼܕ݂ܵܐ: ܓܒܲܪ ܒܝܵܪܬ̇ܘܼܬܹܗ.

21: ܘܥܲܒ̣ܕܲܝ̈ܗܘܿܢ ܝܵܬ̣ܒ̇ܝܼܢ ܓܒܲܪ ܥܲܠ ܦܘܼܠܚܵܢܹܗ ܘܥܲܠ ܦܲܕܵܢܹܗ.

22: ܘܲܕ݂ܫܲܠܝܼܛ ܥܲܠ ܠܹܘܵܝܹ̈ܐ ܕܒ̣ܐܘܿܪܸܫܠܸܡ: ܥܲܒ̣ܕܲܝ ܒܲܪ ܟܲܢܘܝܼ: ܒܲܪ ܚܫܲܒ̣ܝܵܐ: ܒܲܪ ܡܬܲܢܝܵܐ: ܒܲܪ ܡܝܼܟ݂ܵܐ: ܡ̣ܢ ܒܢܲܝ̈ ܐܵܣܵܦ ܕܲܡܫܲܡܫܝܼܢ ܠܘܼܩܒܲܠ ܥܒ̣ܝܼܕ̇ܬܵܐ ܕܒܲܝܬܹ̇ܗ ܕܡܵܪܝܵܐ.

23: ܡܸܛܠ ܕܦܘܼܩܕܵܢܵܐ ܕܡܲܠܟܵܐ ܥܠܲܝܗܘܿܢ: ܘܲܫܪܵܪܵܐ ܦܣܝܼܩ ܗ̄ܘ̣ܵܐ ܥܲܠ ܡܫܲܡ̈ܫܵܢܹܐ: ܟܠ ܝܘܿܡ ܒܝܘܿܡ.

24: ܘܲܦܬܲܚܝܵܐ ܒܲܪ ܡܫܘܿܡܵܐܹܝܠ ܡ̣ܢ ܒܢܲܝ̈ ܙܲܪܚ: ܒܲܪ ܝܼܗܘܼܕ݂ܵܐ: ܗ̤ܘ ܫܲܠܝܼܛ ܗ̄ܘ̣ܵܐ ܥܲܠ ܟܠ ܡ̇ܢ ܕܐܸܡܲܪ ܡܲܠܟܵܐ: ܥܲܠ ܟܠܢܵܫ: ܥܲܠ ܚܘܼܫܒܵܢܵܐ ܕܥܲܡܵܐ: ܥܲܠ ܪܹ̈ܫܲܝܗܘܿܢ ܘܥܲܠ ܚܲܩ̈ܠܵܬ̣ܗܘܿܢ.

25: ܘܡ̣ܢ ܒܢܲܝ̈ ܝܑܼܗܘܼܕ݂ܵܐ ܝܑܼܬܸܒ̣ ܒܩܘܼܪܝܲܬ̣ ܐܲܪܒܲܥ ܘܲܒ̣ܟܲܦܪ̈ܘܿܢܹܝܗ̇: ܘܲܒ̣ܪܝܼܒ̣ܘܿܢ ܘܲܒ̣ܟܲܦܪ̈ܘܢܹܝܗ̇: ܘܲܒ̣ܩܲܒ̣ܨܵܐܹܝܠ ܘܲܒ̣ܟܲܦܪ̈ܘܿܢܹܝܗ̇.

26: ܘܲܒ̣ܗܘܿܫܵܥ: ܘܲܒ̣ܡܵܘܠܵܕ݂ܵܐ: ܘܲܒ̣ܒܹܝܬ̣ ܦܠܵܛ.

27: ܘܒܲܚܨܵܪ ܫܘܿܥ: ܘܲܒ̣ܒܹܪ ܫܒܲܥ ܘܲܒ̣ܟܲܦܪ̈ܘܿܢܹܝܗ̇.

28: ܘܲܒ̣ܨܸܢܩܠܵܓ̣: ܘܒܲܡܟ݂ܝܼܵܐ ܘܲܒ̣ܟܲܦܪ̈ܘܿܢܹܝܗ̇.

29: ܘܲܒ̣ܥܹܝܢ ܪܲܡܘܿܢ: ܘܲܒ̣ܨܸܕ݂ܥܵܐ: ܘܲܒ̣ܝܲܪܡܘܿܬ̣.

30: ܘܲܒ̣ܙܝܼܘܿܚ ܘܒ̣ܵܐܪܵܡ ܘܲܒ̣ܟܲܦܪ̈ܘܿܢܲܝܗܹܝܢ: ܘܒܲܠܟ݂ܝܼܫ ܘܲܒ̣ܟܲܦܪ̈ܘܿܢܹܝܗ̇: ܘܲܒ̣ܥܲܙܩܵܐ ܘܲܒ̣ܟܲܦܪ̈ܘܿܢܹܝܗ̇. ܘܫܪܵܘ ܡ̣ܢ ܒܹܪ ܫܒܲܥ ܘܲܥܕܲܡܵܐ ܠܲܦܩܲܥܬ̣ܵܐ ܕܗܵܠܘܿܡ.

31: ܘܡ̣ܢ ܒܢܲܝ̈ ܒܸܢܝܵܡܹܝܢ: ܡ̣ܢ ܪܵܡܬ̣ܵܐ ܕܡܲܟ݂ܡܲܣ ܘܥܵܝ: ܘܒܹܝܬ̣ ܐܹܝܠ ܘܟܲܦܪ̈ܘܿܢܹܝܗ̇.

32: ܘܲܥܢܵܬ̣ܘܿܬ̣ ܘܐܵܘܿܝܵܒ̣: ܘܲܥܢܲܢܝܵܐ.

33: ܘܚܵܨܘܿܪ: ܘܪܵܡܬ̣ܵܐ: ܘܲܓ̣ܬ̣ܝܼܡ.

34: ܘܝܲܛܒܵܠ: ܘܠܘܿܕ݂: ܘܐܝܼܢܘܿ.

35: ܘܢܝܼܚܵܐ ܘܚܲܪܫܵܐ.

36: ܘܡ̣ܢ ܠܹܘܵܝܹ̈ܐ: ܦܵܠܓܘܼܬ̣ܵܐ ܕܲܝܗܘܼܕܵܐ: ܘܲܕ݂ܒܸܢܝܵܡܹܝܢ.

ܩܹܦܵܠܹܐܘܿܢ: ܝܒ.

1: ܘܗܵܠܹܝܢ ܟܘܼܡܪܹ̈ܐ ܘܠܹܘܵܝܹ̈ܐ ܕܲܣܠܸܩ̣ܘ ܥܲܡ ܙܘܼܒܵܒܹܠ ܒܲܪ ܫܸܠܬ̣ܐܹܝܠ: ܝܼܫܘܿܥ: ܣܪܲܒ̣ܝܵܐ: ܥܲܙܡܵܐ. ܥܲܙܪܵܐ.

2: ܐܵܡܲܪܝܵܐ: ܡܠܘܿܟ݂: ܚܛܘܿܫ.

3: ܫܟܲܢܝܵܐ: ܐܲܪܚܘܿܡ: ܡܲܪܡܘܿܬ̣.

4: ܥܲܕܵܐ: ܥܲܙܬ̇ܝܼ: ܐܲܒ̣ܝܼܵܐ.

5: ܒܸܢܝܵܡܹܝܢ: ܡܥܲܕ̇ܪܝܼܵܐ: ܒܠܲܓ̣ܝܵܐ.

6: ܫܡܲܥܝܵܐ: ܢܕ݂ܘܿܥ: ܝܘܿܕܲܥܝܵܐ.

7: ܣܠܘܿܝ: ܥܡܘܿܩ: ܚܹܠܲܩܝܵܐ: ܝܼܕܲܥܝܵܐ. ܗܵܠܹܝܢ ܪܹ̈ܫܹܐ ܕܟ݂ܘܼܡܪܹ̈ܐ ܘܐܲܚܲܝ̈ܗܘܿܢ: ܒܝܵܘ̈ܡܵܬܹܗ ܕܝܼܫܘܿܥ.

8: ܘܠܹܘܵܝܹ̈ܐ: ܝܼܫܘܿܥ ܘܲܒ̣ܢܵܘ̈ܗܝ: ܩܲܕ݂ܡܝܼܵܐ: ܫܪܲܒ̣ܝܵܐ: ܝܑܼܗܘܼܕ݂ܵܐ: ܡܬܲܢܝܵܐ: ܗܘܼܕ݂ܝܼܬ̣: ܗ̤ܘ ܘܐܲܚܲܝ̈ܗܘܿܢ.

9: ܘܒܲܩܒ̇ܘܼܩܵܐ: ܘܥܲܢܵܢܝܼ: ܘܐܲܚܲܝ̈ܗܘܿܢ ܠܘܼܩܒܲܠܗܘܿܢ ܒܡܲܛܲܪܬܵܐ.

10: ܘܝܼܫܘܿܥ ܐܵܘܠܸܕ݂ ܠܝܘܿܝܵܩܝܼܡ: ܘܝܘܿܝܵܩܝܼܡ ܐܵܘܠܸܕ݂ ܠܐܹܠܝܼܫܵܒ̣: ܘܐܹܠܝܼܫܵܒ̣ ܐܵܘܠܸܕ݂ ܠܝܘܿܝܵܕ݂ܵܥ.

11: ܘܝܘܿܝܵܕ݂ܵܥ ܐܵܘܠܸܕ݂ ܠܝܘܿܢܵܬ̣ܵܢ: ܘܝܘܿܢܵܬ̣ܵܢ ܐܵܘܠܸܕ݂ ܠܝܵܕ݂ܘܿܥܵܐ.

12: ܘܲܒ̣ܝܵܘ̈ܡܲܝ ܝܘܿܝܵܩܝܼܡ: ܗܘ̤ܵܘ ܟܘܼܡܪܹ̈ܐ ܪܹ̈ܫܲܝ ܐܲܒ̣ܵܗܹ̈ܐ: ܣܪܲܒ̣ܝܵܐ: ܐܵܡܲܪܝܵܐ: ܐܹܪܲܡܝܵܐ: ܚܲܢܲܢܝܵܐ.

13: ܥܲܙܲܪܝܵܐ: ܡܲܫܠܘܿܡ: ܐܵܡܲܪܝܵܐ: ܝܘܿܚܲܢܵܢ.

14: ܡܠܲܟ݂ܝܵܐ: ܝܘܿܢܵܬ̣ܵܢ: ܫܟܲܢܝܵܐ: ܝܵܘܣܸܦ.

15: ܚܵܪܵܡ: ܥܲܪܝܼܵܐ: ܡܲܪܡܘܿܬ̣: ܠܲܚܡܝܼ.

16: ܥܲܕ̇ܘܿ: ܙܟܲܪܝܵܐ: ܓܸܒ̣ܬ̇ܘܢ: ܡܲܫܠܲܡ.

17: ܐܲܒ̣ܝܼܵܐ: ܙܲܟ݂ܪܝܼ: ܒܸܢܝܵܡܹܝܢ: ܡܘܼܕܲܥܝܵܐ: ܦܘܼܠܛܵܐ.

18: ܒܲܠܓܵܐ: ܫܡܘܿܥ: ܫܡܲܥܝܵܐ: ܝܘܿܢܵܬ̣ܵܢ.

19: ܝܘܿܝܵܕ݂ܵܥ: ܡܲܬ̣ܢܝܼ: ܝܼܕܲܥܝܵܐ: ܥܲܙܝܼ.

20: ܣܲܠܝܼ: ܩܲܠܝܼ: ܥܡܘܿܩ: ܥܒ̣ܝܼܕ݂.

21: ܘܚܹܠܲܩܝܵܐ: ܚܫܲܒ̣ܝܵܐ: ܗܘܿܕ݂ܵܥ: ܢܲܬ̣ܢܝܼܐܹܝܠ.

22: ܠܹܘܵܝܹ̈ܐ ܒܝܵܘ̈ܡܵܬܹܗ ܕܐܹܠܝܼܫܵܒ̣: ܝܘܿܝܵܕ݂ܵܥ: ܘܝܘܿܚܲܢܵܢ: ܘܝܵܕ݂ܘܿܥ: ܟܬ̣ܝܼܒ̣ܝܼܢ ܪܹ̈ܫܲܝ ܐܲܒ̣ܵـ̈ـܗܵܬ̣ܵܐ ܘܟ݂ܘܼܡܪܹ̈ܐ: ܥܲܠ: ܡܲܠܟ̇ܘܼܬ̣ ܕܵܪܝܵܘܵܫ ܦܵܪܣܵܝܵܐ.

23: ܒܢܲܝ̈ ܠܹܘܝܼ ܪܹ̈ܫܲܝ ܐܲܒ̣ܵܗܹ̈ܐ: ܟܬ̣ܝܼܒ̣ܝܼܢ ܥܲܠ ܟܬ̣ܵܒ̣ܵܐ ܕܦܸܬ̣ܓ̣ܵܡܹ̈ܐ ܕܝܵܘ̈ܡܵܬ̣ܵܐ: ܥܕܲܡܵܐ ܠܝܵܘ̈ܡܵܬܹܗ ܕܝܘܿܚܲܢܵܢ ܒܲܪ ܐܹܠܝܼܫܵܒ̣.

24: ܘܪܹ̈ܫܲܝ ܠܹܘܵܝܹ̈ܐ: ܫܒ̣ܝܠ: ܫܪܲܒ̣ܝܵܐ: ܘܝܼܫܘܿܥ: ܘܐܲܚܵܘ̈ܗܝ ܒܢܲܝ̈ ܩܲܕ݂ܡܵܐܹܝܠ: ܠܘܼܩܒܲܠܗܘܿܢ ܡܫܲܒ̇ܚܝܼܢ ܘܡܵܘܕܹ̇ܝܢ ܐܲܝܟ݂ ܦܘܼܩܕܵܢܵܘ̈ܗܝ ܕܕ݂ܵܘܝܼܕ݂ ܢܒ̣ܝܼܵܐ ܕܡܵܪܝܵܐ: ܡܲܛܲܪܬܵܐ ܠܘܼܩܒܲܠ ܡܲܛܲܪܬܵܐ.

25: ܡܬܲܢܝܵܐ: ܘܒܲܩܝܼ: ܘܥܘܿܒܲܕ݂ܝܵܐ: ܘܫܵܠܘܿܡ: ܘܐܲܛܠܵܡ: ܘܲܥܩܘܿܦ: ܢܵܛܪ̈ܲܝ ܬܲܪ̈ܥܹܐ.

26: ܗܵܠܹܝܢ ܒܝܵܘ̈ܡܲܝ ܝܘܿܝܵܩܝܼܡ ܒܲܪ ܝܼܫܘܿܥ: ܒܲܪ ܝܘܿܙܵܕ݂ܵܩ: ܘܲܒ̣ܝܵܘ̈ܡܲܝ ܢܲܚܡܵܐܹܝܠ ܪܹܫܵܐ: ܘܥܲܙܪܵܐ ܟܵܗܢܵܐ ܘܣܵܦܪܵܐ.

27: ܘܟܲܕ݂ ܓܡܲܪ ܫܘܼܪܵܐ ܕܐܘܿܪܸܫܠܸܡ: ܟܲܢܸܫ̣ܘ ܠܹܘܵܝܹ̈ܐ ܒܟ݂ܠܹܗ ܐܲܬ̣ܪ̱ܗܘܿܢ: ܠܡܲܝܬܵܝܘܼ ܐܸܢܘܿܢ ܠܐܘܿܪܸܫܠܸܡ: ܘܲܠܡܸܥܒܲܕ݂ ܒܘܼܣܵܡܵܐ ܘܚܲܕ݂ܘܼܬ̣ܵܐ: ܒܬ̣ܵܘܕ̇ܝܼܬ̣ܵܐ ܘܬܸܫܒ̇ـ̈ـܚܵܬ̣ܵܐ ܘܨܸܨ̈ܠܹܐ ܘܟܸܢܵܪܹ̈ܐ.

28: ܘܐܸܬ̣ܟܲܢܲܫܘ ܡܫܲܡ̈ܫܵܢܹܐ ܡ̣ܢ ܦܩܲܥܬ̣ܵܐ ܕܐܝܼܬ̣ ܚܕ݂ܵܪ̈ܲܝ ܐܘܿܪܸܫܠܸܡ: ܘܡ̣ܢ ܕܵܪܲܬ̣ ܢܛܵܦܵܐ.

29: ܘܡ̣ܢ ܒܹܝܬ̣ ܓܲܠܓܵܠܵܐ: ܘܡ̣ܢ ܢܲܚܠܵܐ ܕܲܓ̣ܒܲܥ: ܘܡ̣ܢ ܥܲܪܡܘܿܬ̣: ܡܸܛܠ ܕܕ݂ܵܪܹ̈ܐ ܒܢܵܘ ܠܗܘܿܢ ܡܫܲܡܫܵܢܹ̈ܐ ܚܕ݂ܵܪ̈ܲܝ ܐܘܿܪܸܫܠܸܡ.

30: ܘܐܸܬ̇ܕܲܟ̇ܝܼܘ ܟܘܼܡܪܹ̈ܐ ܘܠܹܘܵܝܹ̈ܐ: ܘܕܲܟ̇ܝܼܘ ܠܥܲܡܵܐ ܘܲܠܬܲܪ̈ܥܹܐ ܕܫܘܼܪܵܐ.

31: ܘܐܲܣܸܩ̣ܘ ܠܪܹ̈ܫܹܐ ܕܲܝܗܘܼܕ݂ܵܐ ܠܥܸܠ ܡܢ ܫܘܼܪܵܐ. ܘܐܲܩܝܼܡ̣ܘ ܬܲܪܬܹ̇ܝܢ ܟܢ̈ܘܼܫܵܬ̣ܵܐ ܪܵܘ̱ܪ̈ܒ̣ܵܬ̣ܵܐ. ܘܗܲܠܸܟ݂ܘ ܠܥܸܠ ܡ̣ܢ ܫܘܼܪܵܐ: ܠܝܲܡܝܼܢܵܐ ܡ̣ܢ ܬܲܪܥܵܐ ܪܲܒܵܐ.

32: ܘܐܸܙܲܠ̣ܘ ܥܲܡܗܘܿܢ ܐܘܿܫܲܥܝܵܐ: ܘܦܸܠܓܵܐ ܕܪܹ̈ܫܹܐ ܕܲܝܗܘܼ̈ܕ݂ܵܝܹܐ.

33: ܘܥܲܙܪܵܐܹܝܠ: ܘܥܲܙܪܵܐ: ܘܡܲܫܠܘܿܡ.

34: ܘܲܝܗܘܼܕ݂ܵܐ: ܘܒܸܢܝܵܡܹܝܢ: ܘܲܫܡܲܥܝܵܐ: ܘܲܢܕܲܡܝܵܐ.

35: ܘܡ̣ܢ ܒܢܲܝ̈ ܟܘܼܡܪܹ̈ܐ ܒܩܲܪ̈ܢܵܬ̣ܵܐ: ܙܟܲܪܝܵܐ ܒܲܪ ܝܘܿܢܵܬ̣ܵܢ: ܒܲܪ ܫܡܲܥܝܵܐ: ܒܲܪ ܡܬܲܢܝܵܐ: ܒܲܪ ܡܲܠܟܵܐ: ܒܲܪ ܙܟ݂ܘܿܪ: ܒܲܪ ܐܵܣܵܦ.

36: ܘܐܲܚܵܘ̈ܗܝ ܫܡܲܥܝܵܐ: ܘܥܲܙܪܵܐܹܝܠ: ܡܠܵܠ: ܓܠܵܠ: ܥܛܵܪ: ܢܲܬ̣ܢܝܼܐܹܝܠ: ܚܢܵܢܝܼ: ܝܼܗܘܼܕ݂ܵܐ: ܒܡܵܐܢܹ̈ܐ ܕܬܸܫܒ̇ـ̈ـܚܵܬ̣ܵܐ ܕܕ݂ܵܘܝܼܕ݂ ܢܒ̣ܝܼܵܐ: ܥܲܒ̣ܕܵܐ ܕܡܵܪܝܵܐ. ܘܥܲܙܪܵܐ ܣܵܦܪܵܐ ܩܕ݂ܵܡܲܝܗܘܿܢ ܠܥܸܠ ܡ̣ܢ ܬܲܪܥܵܐ ܕܥܲܝܢܵܐ.

37: ܘܠܘܼܩܒܲܠܗܘܿܢ ܣܠܸܩ ܡ̣ܢ ܡܲܣܩܵܢܵܐ ܕܲܩܪܝܼܬ̣ܵܐ ܕܕ݂ܵܘܝܼܕ݂: ܒܡܲܣܩܵܢܵܐ ܕܫܘܼܪܵܐ ܡ̣ܢ ܠܥܸܠ ܠܒܹܝܬ̣ ܕܵܘܝܼܕ݂: ܥܲܠ ܬܲܪܥܵܐ ܪܲܒܵܐ ܡܲܕ݂ܢ̱ܚܵܝܵܐ.

38: ܘܐܵܘܕ̇ܝܼܘ ܘܲܣܠܸܩ ܡ̣ܢ ܠܥܸܠ ܘܐܸܢܵܐ ܒܵܬܲܪܗܘܿܢ. ܘܦܸܠܓܵܐ ܕܥܲܡܵܐ ܣܠܸܩ̣ܘ ܥܲܠ ܫܘܼܪܵܐ. ܘܩܵܡ̣ܘ ܥܲܠ ܡܲܓܕ̇ܠܵܐ ܪܲܒܵܐ: ܘܥܲܠ ܫܘܼܪܵܐ ܦܲܬ̣ܝܵܐ.

39: ܘܲܠܥܸܠ ܡ̣ܢ ܬܲܪܥܵܐ ܕܐܲܦܪܹܝܡ ܥܕܲܡܵܐ ܠܬܲܪܥܵܐ ܥܲܬ̇ܝܼܩܵܐ: ܘܲܥܕܲܡܵܐ ܠܬܲܪܥܵܐ ܕܨܲܝܵܕܹ̈ܐ: ܘܡ̣ܢ ܡܲܓܕ̇ܠܵܐ ܕܲܚܢܵܢܵܐܹܝܠ ܥܕܲܡܵܐ ܠܡܲܓܕ̇ܠܵܐ ܪܵܡܵܐ: ܘܲܥܕܲܡܵܐ ܠܬܲܪܥܵܐ ܕܥܵـ̈ـܢܵܐ. ܘܩܵܡ̣ܘ ܒܬܲܪܥܵܐ ܪܲܒܵܐ.

40: ܘܥܲܠ̣ܘ ܬܲܪܬܹ̇ܝܢ ܟܢܘܼ̈ܫܵܢ ܠܒܲܝܬܹ̇ܗ ܕܡܵܪܝܵܐ: ܘܐܸܢܵܐ ܘܦܸܠܓ̇ܗܘܿܢ ܕܪܹ̈ܫܵܢܹܐ ܕܐܝܼܬ̣ ܗ̄ܘ̣ܵܘ ܥܲܡܝܼ.

41: ܘܟ݂ܘܼܡܪܹ̈ܐ ܐܹܠܝܵܩܝܼܡ: ܘܲܡܥܲܣܝܵܐ: ܡܲܠܚܝܼܢ: ܡܝܼܟ݂ܵܐ: ܘܐܹܠܝܼܗܘܼ: ܥܢܵܢܝ: ܘܙܲܟܪܝܵܐ: ܚܲܢܲܢܝܵܐ.

42: ܘܲܒ̣ܩܲܪ̈ܢܵܬ̣ܵܐ ܡܥܲܣܝܵܐ: ܘܲܫܡܲܥܝܵܐ: ܘܠܵܥܵܙܲܪ: ܘܥܲܙܝܼ: ܘܝܘܿܚܲܢܵܢ: ܘܲܡܠܲܟ݂ܝܵܐ: ܘܥܝܼܠܵܡ: ܘܥܵܕ݂ܘܿܪ: ܘܲܫܡܘܿܥ: ܡܫܲܡ̈ܫܵܢܹܐ. ܘܲܙܪܲܚܝܵܐ ܪܹܫܵܐ.

43: ܘܕܲܒܲܚܘ ܒܝܵܘܡܵܐ ܗܵܘ̇ ܕܸܒ̣ܚܹ̈ܐ ܪܵܘ̱ܪ̈ܒܹܐ ܘܲܚܕ݂ܝܼܘ. ܡܸܛܠ ܕܡܵܪܝܵܐ ܚܲܕ̇ܝܼ ܐܸܢܘܿܢ ܚܲܕ݂ܘܼܬ̣ܵܐ ܪܲܒ̇ܬ̣ܵܐ. ܘܐܵܦ ܢܸܫܹ̈ܐ ܘܲܛܠܵܝܹ̈ܐ ܚܕ݂ܝܼܘ ܘܐܹܫܬܲܡܥܲܬ̤ ܚܲܕ݂ܘܼܬ̣ܵܐ ܕܒ̣ܐܘܿܪܸܫܠܸܡ ܠܪܘܼܚܩܵܐ.

44: ܘܐܸܫܬܲܠܲܛܘ ܒܝܵܘܡܵܐ ܗܵܘ̇: ܓܲܒ̣ܪܹ̈ܐ ܐܲܝܠܹܝܢ ܕܝܵܗ̄ܒ̣ܝܼܢ ܗ̄ܘ̣ܵܘ ܡ̣ܢ ܐܵܘܨܪܹ̈ܐ ܕܡܲܠܟܵܐ ܒܵـ̈ـܬܹ̇ܐ ܠܲܡܩܲܦܵܣܘܼ ܒܗܘܿܢ ܪܹ̈ܫܝܵܬ̣ܵܐ: ܘܡܲܥܣܵܪܹ̈ܐ ܕܪܹ̈ܫܹܐ ܕܩܘܼܪ̈ܝܵܐ: ܐܲܝܟ݂ ܕܲܟ݂ܬ̣ܝܼܒ̣ ܒܲܟ݂ܬ̣ܵܒ̣ܵܐ ܕܢܵܡܘܿܣܵܐ: ܠܟ݂ܘܼܡܪܹ̈ܐ ܘܲܠܠܹܘܵܝܹ̈ܐ: ܡܸܛܠ ܕܚܲܕ݂ܘܼܬ̣ܵܐ ܕܲܝܗ̈ܘܼܕ݂ܵܝܹܐ: ܥܲܠ ܟܘܼܡܪܹ̈ܐ ܘܠܹܘܵܝܹ̈ܐ ܐܲܝܠܹܝܢ ܕܩܵܝ̇ܡܝܼܢ ܘܢܵܛ̇ܪܝܼܢ ܡܲܛܲܪܬܵܐ ܒܒܲܝܬܵܐ ܕܐܲܠܵܗܗܘܿܢ.

45: ܘܢܵܛܪ̈ܲܝ ܢܛܘܼܪܬܵܐ ܕܲܟ݂ܝܵܐܝܼܬ̣: ܘܲܡܫܲܡ̈ܫܵܢܹܐ ܘܬ̣ܵܪ̈ܥܹܐ: ܐܲܝܟ݂ ܦܘܼܩܕܵܢܵܐ ܕܕ݂ܵܘܝܼܕ݂ ܘܕܲܫܠܹܝܡܘܿܢ ܒܪܹܗ.

46: ܡܸܛܠ ܕܲܒ̣ܝܵܘ̈ܡܵܬ̣ܵܐ ܕܕ݂ܵܘܝܼܕ݂ ܗܘ̤ܵܐ ܐܵܣܵܦ ܘܩܵܡ̣ ܒܪܹܫܵܐ ܕܲܡܫܲܡ̈ܫܵܢܹܐ ܘܲܡܫܲܒܲܚ ܗ̄ܘ̣ܵܐ ܘܡܵܘܕܹ̇ܐ ܩܕ݂ܵܡ ܡܵܪܝܵܐ ܐܲܠܵܗܵܐ.

47: ܘܟ݂ܠܹܗ ܝܼܣܪܵܝܹܠ ܒܝܵܘܡܵܘ̈ܗܝ ܕܙܘܼܪܒܵܒܹܠ: ܘܲܒ̣ܝܵܘ̈ܡܵܬܹܗ: ܕܲܢܚܲܡܝܵܐ: ܝܵܗ̄ܒ̇ܝܼܢ ܡܵܘܗ̈ܒ̣ܵܬ̣ܵܐ ܠܲܡܫܲܡ̈ܫܵܢܹܐ. ܘܬ̣ܵܪ̈ܥܹܐ ܡܲܦܩܝܼܢ ܘܝܵܗ̄ܒ̇ܝܼܢ ܝܘܿܡ ܒܝܵܘܡܹܗ: ܘܲܡܩܲܕ̇ܫܝܼܢ ܠܠܹܘܵܝܹ̈ܐ. ܘܠܹܘܵܝܹ̈ܐ ܡܩܲܕ̇ܫܝܼܢ ܠܲܒ̣ܢܲܝ̈ ܐܲܗܪܘܿܢ.

ܩܹܦܵܠܹܐܘܿܢ: ܝܓ.

1: ܒܹܗ ܒܝܵܘܡܵܐ ܗܵܘ̇ ܐܸܬ̣ܩܪܝܼ ܟܬ̣ܵܒ̣ܵܐ ܕܢܵܡܘܿܣܵܐ ܕܡܘܼܫܹܐ ܒܐܸܕ݂ܢܲܝ̈ ܥܲܡܵܐ. ܘܐܸܫܬ̇ܟܲܚ ܕܲܟ݂ܬ̣ܝܼܒ̣ ܒܹܗ. ܠܵܐ ܢܸܥܠܘܼܢ ܥܲܡܘܿܢܵܝܹ̈ܐ ܘܡܘܼܐܒ̣ܵܝܹ̈ܐ ܠܲܟ݂ܢܘܼܫܬܹ̇ܗ ܕܡܵܪܝܵܐ: ܥܕܲܡܵܐ ܠܥܵܠܲܡ.

2: ܡܸܛܠ ܕܠܵܐ ܐܲܪܲܥܘ ܠܲܒ̣ܢܲܝ̈ ܝܼܣܪܵܝܹܠ ܒܠܲܚܡܵܐ ܘܲܒ̣ܡܲـ̈ـܝܵܐ. ܘܐܲܓ̣ܪܘ ܠܗܘܿܢ ܠܒܸܠܥܵܡ ܠܲܡܠܵܛ ܐܸܢܘܿܢ. ܘܐܲܗ̣ܦܸܟ݂ ܐܲܠܵܗܵܐ ܠܵܘ̈ܛܵܬܹܗ ܠܒ̣ܘܼܪ̈ܟܵܬ̣ܵܐ.

3: ܗܵܝܕܹ̇ܝܢ ܟܲܕ݂ ܫܡܲܥ̣ܘ ܡܸܠܹ̈ܐ ܕܢܵܡܘܿܣܵܐ: ܐܸܬ̣ܦܪܸܫܘ ܟܠܗܘܿܢ ܥܲܪ̈ܘܼܒܹܐ ܡ̣ܢ ܝܼܣܪܵܝܹܠ.

4: ܘܐܸܬ̣ܵܐ ܐܹܠܝܼܫܵܒ̣ ܟܘܼܡܪܵܐ: ܘܲܒ̣ܢܵܐ ܠܹܗ ܬܲܡܵܢ ܕܵܪܬܵܐ ܚܕ݂ܵܐ ܪܲܒ̇ܬ̣ܵܐ.

5: ܘܬܲܡܵܢ ܡ̣ܢ ܠܩܘܼܕ݂ܡܝܼܢ ܣܵܝܡܝܼܢ ܗ̄ܘ̣ܵܘ ܩܘܼܪ̈ܒܵܢܹܐ ܘܲܠܒ̣ܘܼܢ̄ܬܵܐ. ܘܡܵܐܢܹ̈ܐ ܕܡܲܥܣܵܪܹ̈ܐ ܕܲܥܒ̣ܘܼܪܵܐ ܘܲܕ݂ܚܲܡܪܵܐ ܘܲܕ݂ܡܸܫܚܵܐ ܘܲܒ̣ܩܘܼܪ̈ܝܵܐ ܕܠܹܘܵܝܹ̈ܐ ܘܲܡܫܲܡ̈ܫܵܢܹܐ: ܘܲܕ̇ܬ̣ܵܪ̈ܥܹܐ: ܪܹ̈ܫܝܵܬ̣ܵܐ ܕܟ݂ܵܗ̈ܢܹܐ.

6: ܘܲܒ̣ܟ݂ܠܗܹܝܢ ܗܵܠܹܝܢ ܠܵܐ ܗܘܹ̇ܝܬ̣ ܒܐܘܿܪܸܫܠܸܡ: ܡܸܛܠ ܕܒܲܫܢܲܬ̣ ܬܠܵܬ̣ܝܼܢ ܘܬܲܪܬܹ̇ܝܢ ܠܐܲܪܛܲܚܫܸܫܬ̇ ܡܲܠܟܵܐ ܕܒ̣ܵܒܹܠ: ܐܸܬܹ̇ܝܬ̣ ܠܘܵܬ̣ ܡܲܠܟܵܐ ܒܚܲܪܬ̣ܵܐ ܕܝܵܘ̈ܡܵܬ̣ܵܐ ܐܸܫܬܲܐܠܹܬ̣ ܡ̣ܢ ܡܲܠܟܵܐ.

7: ܘܐܸܬܹܝܬ̣ ܠܐܘܿܪܸܫܠܸܡ: ܘܐܸܣܬܲܟ̇ܠܹܬ̣ ܒܝܼܫܬܵܐ ܕܲܥܒܲܕ݂ ܐܹܠܝܼܫܵܒ̣ ܠܛܘܿܒ̇ܝܼܵܐ. ܕܲܥܒܲܕ݂ ܠܹܗ ܒܲܝܬܵܐ ܒܕ݂ܵܪܬܵܐ ܕܡܵܪܝܵܐ.

8: ܘܐܸܬ̣ܒ̇ܐܸܫ ܠܝܼ ܛܵܒ̣: ܘܲܫܕܹܝܬ̣ ܟܠܗܘܿܢ ܡܵܐܢܹ̈ܐ ܕܒܲܝܬܹܗ ܕܛܘܼܒ̇ܝܼܵܐ: ܒܫܘܼܩܵܐ ܠܒܲܪ ܡ̣ܢ ܕܵܪܬܵܐ.

9: ܘܐܸܡ̇ܪܹܬ̣ ܘܕܲܟ̇ܝܼܘ ܕܵܪܬܵܐ ܘܐܲܗܦܟܹ̇ܬ̣ ܠܬܲܡܵܢ ܡܵܐܢܲܝ̈ ܒܲܝܬܹ̇ܗ ܕܡܵܪܝܵܐ: ܘܩܘܼܪ̈ܒܵܢܹܐ ܘܲܠܒ̣ܘܼܢ̄ܬܵܐ.

10: ܘܝܸܕ݂ܥܹ̇ܬ̣ ܕܲܡܢܵܬ̣ܵܐ ܕܠܹܘܵܝܹ̈ܐ ܠܵܐ ܡܸܬ̣ܝܲܗ̄ܒܵܐ. ܘܲܥܪܲܩ̣ܘ ܓܒܲܪ ܠܚܲܩܠܹܗ: ܠܹܘܵܝܹ̈ܐ ܘܲܡܫܲܡ̈ܫܵܢܹܐ ܘܥܵܒ̣ܕܲܝ̈ ܥܒ̣ܝܼ̈ܕ݂ܵܬ̣ܵܐ.

11: ܘܐܸܢܵܐ ܕܵܢܹ̇ܬ̣ ܥܲܡ ܪܹ̈ܫܹܐ: ܘܐܸܡ̇ܪܹܬ̣ ܠܗܘܿܢ: ܡܸܛܠ ܡܵܢܵܐ ܫܒ̣ܝܼܩ ܒܲܝܬܹ̇ܗ ܕܡܵܪܝܵܐ ܘܟܲܢܫܹ̇ܬ̣ ܐܸܢܘܿܢ: ܘܐܲܩܝܼܡܹ̇ܬ̣ ܐܸܢܘܿܢ ܥܲܠ ܩܝܵܡܲܝ̈ܗܘܿܢ.

12: ܘܟ݂ܠ ܝܗ̄ܘܼ̈ܕ݂ܵܝܹܐ ܐܲܝܬ̇ܝܼܘ ܡܲܥܣܵܪܹ̈ܐ ܕܲܥܒ̣ܘܼܪܵܐ: ܘܲܕ݂ܚܲܡܪܵܐ: ܘܲܕ݂ܡܸܫܚܵܐ: ܠܐܵܘܨܪܹ̈ܐ.

13: ܘܐܲܫ̱ܠܛܹ̇ܬ̣ ܥܲܠ ܐܵܘܨܪܹ̈ܐ ܠܲܫܠܲܡܝܵܐ ܟܘܼܡܪܵܐ: ܘܲܠܨܵܕ݂ܘܿܩ ܣܵܦܪܵܐ: ܘܠܲܦܪܵܝܵܐ ܒܲܪ ܠܹܘܵܝܹ̈ܐ: ܘܥܲܡܗܘܿܢ ܚܲܢܲܢ ܒܲܪ ܙܟ݂ܘܿܪ ܒܲܪ ܡܬܲܢܝܵܐ. ܡܸܛܠ ܕܫܲܪܝܼܪܹ̈ܐ ܐܸܬ̣ܚܲܫܲܒ̣ܘ: ܘܦܸܨܲܬ̣ܗܘܿܢ ܣܸܠܩܲܬ̤ ܠܡܸܗܘܵܐ ܪܹ̈ܫܹܐ ܠܐܲܚܲܝ̈ܗܘܿܢ.

14: ܐܸܬ̇ܕܲܟ݂ܪ ܠܝܼ ܐܲܠܵܗܝ ܡܸܛܠ ܗܵܕܹܐ. ܘܠܵܐ ܬܲܥܒܲܪ ܛܲܝܒ̇ܘܼܬ̣ܝ ܕܥܸܒ̣ܕܹ̇ܬ̣ ܒܒܹܝܬ̣ ܐܲܠܵܗܝ ܘܒܲܢܛܘܼܪ̈ܵܬ̣ܵܟ݂.

15: ܒܝܵܘ̈ܡܵܬ̣ܵܐ ܗܵܢܘܿܢ ܚܙܹ̇ܝܬ̣ ܒܲܝܗܘܼܕ݂ ܐܘܼܪ̈ܚܵܬ̣ܵܐ ܕܪ̈ܵܕ݂ܝܵܢ ܒܫܲܒ̇ܬ̣ܵܐ. ܘܡܲܝܬܹ̇ܝܢ ܛܲܥܢܹ̈ܐ: ܘܫܵܩܠܝܼܢ ܥܲܠ ܚܸܡܪ̈ܵܐ: ܘܐܵܦ ܚܲܡܪܵܐ: ܘܥܸܢܒܹ̈ܐ: ܘܬܹܐܢܹ̈ܐ. ܘܛܲܥܢܹ̈ܐ ܡܲܥܠܝܼܢ ܠܐܘܿܪܸܫܠܸܡ ܒܝܵܘܡܵܐ ܕܫܲܒ̇ܬ̣ܵܐ ܘܐܲܣ̱ܗ̇ܕܹܬ̣ ܒܗܘܿܢ: ܕܠܵܐ ܬܙܲܒ̇ܢܘܼܢ ܨܲܝܕܵܐ.

16: ܘܠܵܐ ܬܲܝܬ̇ܘܼܢ ܢܘܼܢܹ̈ܐ. ܘܠܵܐ ܬܙܲܒ̇ܢܘܼܢ ܒܝܵܘܡܵܐ ܕܫܲܒ̇ܬ̣ܵܐ: ܠܲܒ̣ܢܲܝ̈ ܝܑܼܗܘܼܕ݂ܵܐ ܒܐܘܿܪܸܫܠܸܡ.

17: ܘܕ݂ܵܢܹ̇ܬ̣ ܥܲܡ ܪܹ̈ܫܹܐ ܕܲܝܗܘܼܕ݂ܵܐ. ܘܐܸܡܪܹܬ̣ ܠܗܘܿܢ: ܡܸܛܠ ܡܵܢܵܐ ܦܸܬ̣ܓ̣ܵܡܵܐ ܗܵܢܵܐ ܒܝܼܫܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ ܘܡܲܚܠܝܼܢ ܐܢ̄ܬ̇ܘܿܢ ܝܵܘܡܵܐ ܕܫܲܒ̇ܬ̣ܵܐ.

18: ܗܵܟܲܢܵܐ ܥܒܲܕ݂ܘ ܐܲܒ̣ܵܗܲܝ̈ܟ̇ܘܿܢ ܘܐܲܝܬܝܼ ܐܲܠܵܗܵܐ ܥܠܲܝܢ ܟܠܵܗ̇ ܒܝܼܫܬܵܐ ܗܵܕܹܐ: ܘܥܲܠ ܩܪܝܼܬ̣ܵܐ ܗܵܕܹܐ. ܘܐܲܢ̄ܬ̇ܘܿܢ ܡܵܘܣܦܝܼܢ ܚܸܡܬ̣ܵܐ ܘܪܘܼܓ̣ܙܵܐ ܥܲܠ ܝܼܣܪܵܝܹܠ: ܕܐܲܢ̄ܬ̇ܘܿܢ ܡܲܚܠܝܼܢ ܝܵܘܡܵܐ ܕܫܲܒ̇ܬ̣ܵܐ.

19: ܗܵܝܕܹ̇ܝܢ ܟܲܕ݂ ܐܸܬ̣ܦܲܬܲܚܘ ܬܲܪ̈ܥܹܐ ܕܐܘܿܪܸܫܠܸܡ ܩܕ݂ܵܡ ܫܲܒ̇ܬ̣ܵܐ: ܐܸܡ̇ܪܹܬ̣ ܕܢܸܬ̇ܬܲܚܕ̇ܘܼܢ ܬܲܪ̈ܥܹܐ. ܘܐܸܡ̇ܪܹܬ̣ ܕܠܵܐ ܢܸܬ̣ܦܲܬ̣ܚܘܼܢ ܬܲܪ̈ܥܹܐ: ܥܕܲܡܵܐ ܠܒ̣ܵܬܲܪ ܫܲܒ̇ܬ̣ܵܐ ܘܡ̣ܢ ܛܲܠܝܲܝ̈ ܐܲܩܝܼܡܹ̇ܬ̣ ܥܲܠ ܬܲܪ̈ܥܹܐ: ܕܠܵܐ ܢܸܥܘܿܠ ܛܲܥܢܵܐ ܒܝܵܘܡܵܐ ܕܫܲܒ̇ܬ̣ܵܐ.

20: ܘܒ̣ܵܬܲܪ ܬܲܓܵܪܹ̈ܐ ܘܙܵܒ̣ܢܲܝ̈ ܙܸܒ̣ܢܵܐ ܠܒܲܪ ܡ̣ܢ ܐܘܿܪܸܫܠܸܡ: ܒܝܵܘܡܵܐ ܕܲܬ̣ܪܹܝܢ.

21: ܘܣܲܗܕܹܬ̣ ܒܗܘܿܢ: ܘܐܸܡܪܹܬ̣ ܠܗܘܿܢ: ܡܸܛܠ ܡܵܢܵܐ ܐܲܢ̄ܬ̇ܘܿܢ ܠܵܐ ܥܵܐܠܝܼܢ ܐ̄ܢܬ̇ܘܿܢ ܥܲܕ݂ ܩܲܝܵܡ ܝܵܘܡܵܐ ܒܬܲܪܥܵܐ ܕܫܘܼܪܵܐ. ܐܸܢ ܬܲܣܠܘܿܢ ܡܸܠܬ̣ܵܐ ܗܵܕܹܐ: ܐܵܘܫܸܛ ܐܝܼܕ݂ܵܐ ܥܠܲܝܟ̇ܘܿܢ ܘܡܸܢܹܗ ܡ̣ܢ ܙܲܒ̣ܢܵܐ ܗܵܘ̇ ܠܵܐ ܥܲܠ̣ܘ ܒܫܲܒ̇ܬ̣ܵܐ.

22: ܘܐܸܡ̇ܪܹܬ̣ ܠܠܹܘܵܝܹ̈ܐ ܕܢܸܗܘܘܿܢ ܡܸܬ̇ܕܲܟܹ̇ܝܢ: ܘܥܵܐܠܝܼܢ ܢܵܛܘܿܪܹ̈ܐ ܘܬ̣ܵܪ̈ܥܹܐ ܠܲܡܩܲܕܵܫܘܼ ܠܝܵܘܡܵܐ ܕܫܲܒ̇ܬ̣ܵܐ ܐܵܦ ܗܵܕܹܐ ܐܲܬ̇ܕܲܟ݂ܪ ܠܝܼ ܐܲܠܵܗܝ: ܘܚܘܼܣ ܥܠܲܝ ܐܲܝܟ݂ ܣܘܿܓܲܐܬ̣ ܪ̈ܲܚܡܲܝܟ.

23: ܐܵܦ ܒܝܵܘ̈ܡܵܬ̣ܵܐ ܗܵܢܘܿܢ ܚܙܹܝܬ̣ ܝܗ̄ܘܼ̈ܕ݂ܵܝܹܐ ܕܐܵܘܬܸ̇ܒ̣ܘ ܢܸܫܹ̈ܐ ܢܘܼܟ݂ܪ̈ܵܝܵܬ̣ܵܐ: ܘܐܲܫܕ̇ܘܿܕ݂ܵܝܵـ̈ـܬ̣ܵܐ: ܐܵܦ ܥܲܡܘܿܢܵܝܵـ̈ـܬ̣ܵܐ: ܘܡܘܼܐ̈ܒ̣ܵܝܵܬ̣ܵܐ.

24: ܘܲܒ̣ܢܲܝ̈ܗܘܿܢ ܡܡܲܠܠܝܼܢ ܒܦܸܠܓܵܐ ܐܫܕ̇ܘܼܕ݂ܵܐܝܼܬ̣: ܘܲܒ̣ܦܸܠܓܵܐ ܠܵܐ ܚܵܟ݂ܡܝܼܢ ܠܲܡܡܲܠܵܠܘܼ ܝܗ̄ܘܼܕ݂ܵܐܝܼܬ̣: ܐܸܠܵܐ ܐܲܝܟ݂ ܠܸܫܵܢܵܐ ܕܥܲܡܡܹ̈ܐ.

25: ܘܕ݂ܵܢܹ̇ܬ̣ ܥܲܡܗܘܿܢ: ܘܠܵܛܹ̇ܬ̣ ܐܸܢܘܿܢ: ܘܩܸܛܠܹ̇ܬ̣ ܡܸܢܗܘܿܢ ܓܲܒ̣ܪܹ̈ܐ: ܘܛܸܡܪܹܬ̣ ܐܸܢܘܿܢ. ܘܐܵܘܡܝܼܬ̣ ܐܸܢܘܿܢ ܒܐܲܠܵܗܵܐ: ܘܠܵܐ ܬܸܬ̇ܠܘܼܢ ܒܢܵܬ̣̈ܟ݂ܘܿܢ ܠܲܒ̣ܢܲܝ̈ܗܘܿܢ: ܕܠܵܐ ܬܸܣܒ̣ܘܼܢ ܡ̣ܢ ܒܢܵܬ̣̈ܗܘܿܢ ܠܲܒ̣ܢܲܝ̈ܟ̇ܘܿܢ: ܐܵܘ ܠܟ݂ܘܿܢ.

26: ܡܸܛܠ ܗܵܠܹܝܢ ܗ̄ܘ̣ ܚܛܵܐ ܫܠܹܝܡܘܿܢ ܡܲܠܟܵܐ ܕܝܼܣܪܵܝܹܠ ܗܵܘ̇ ܕܲܒ̣ܥܲܡܡܹ̈ܐ ܣܲܓ̇ܝܼ̈ܐܹܐ ܠܵܐ ܗ̄ܘ̣ܵܐ ܡܲܠܟܵܐ ܐܲܟ݂ܘܵܬܹܗ. ܘܲܪܚܝܼܡ ܗ̄ܘ̣ܵܐ ܥܲܠ ܐܲܠܵܗܹܗ ܘܝܲܗ̄ܒܹ̇ܗ ܐܲܠܵܗܵܐ ܡܲܠܟܵܐ ܥܲܠ ܟܠܹܗ ܝܼܣܪܵܝܹܠ ܘܐܵܦ ܠܹܗ ܐܲܚܛ̈ܝܼ ܢܸܫܹ̈ܐ ܢܘܼܟ݂ܪ̈ܵܝܵܬ̣ܵܐ.

27: ܘܲܠܟ݂ܘܿܢ ܐܸܫܬ̇ܡܲܥ ܦܸܬ̣ܓ̣ܵܡܵܐ. ܘܲܥܒܲܕ̇ܬ̇ܘܿܢ ܗܵܕܹܐ ܒܝܼܫܬܵܐ ܪܲܒ̇ܬ̣ܵܐ: ܠܲܡܟܲܕܵܒ̣ܘ ܒܐܲܠܵܗܲܢ: ܘܲܠܡܵܘܬܵܒ̣ܘܼ ܢܸܫܹ̈ܐ ܢܘܼܟ݂ܪ̈ܵܝܵܬ̣ܵܐ.

28: ܘܡ̣ܢ ܒܢܲܝ̈ ܝܘܿܝܵܕ݂ܵܥ ܒܲܪ ܐܹܠܝܼܫܵܒ̣ ܟܘܼܡܪܵܐ ܪܲܒܵܐ: ܗܘ̤ܵܐ ܚܲܬ̣ܢܵܐ ܠܣܲܡܒ̇ܠܵܛ ܚܵܘܪܵܢܝܵܐ: ܘܐܲܦܪܸܩܬܹ̇ܗ ܡ̣ܢ ܠܘܵܬ̣ܝ.

29: ܐܸܬ̇ܕܲܟ݂ܪ ܠܝܼ ܐܲܠܵܗܝ: ܥܲܠ ܫܲܪܟܵܐ ܕܟ݂ܘܼܡܪܘܼܬ̣ܵܐ: ܘܥܲܠ ܫܲܪܟܵܐ ܕܟ݂ܘܼܡܪܹ̈ܐ: ܘܲܕ݂ܠܹܘܵܝܹ̈ܐ.

30: ܘܕܲܟ̇ܝܼܬ̣ ܐܸܢܘܿܢ ܡ̣ܢ ܟܠܗܘܿܢ ܥܲܡܡܹ̈ܐ: ܘܐܲܩܝܼܡܹ̇ܬ̣ ܐܸܢܘܿܢ ܒܲܢܛܘܼܪ̈ܵܬ̣ܗܘܿܢ: ܠܟ݂ܘܼܡܪܹ̈ܐ ܘܲܠܠܹܘܵܝܹ̈ܐ: ܐ̄ܢܵܫ ܒܲܥܒ̣ܵܕܹܗ.

31: ܘܲܒ̣ܩܘܼܪ̈ܒܵܢܹܐ: ܘܲܠܩܘܼܕܫܹ̈ܐ ܒܙܲܒ̣ܢ̱ܗܘܿܢ: ܘܲܒ̣ܥܵܐܕܲܝ̈ܗܘܿܢ: ܘܲܒ̣ܒ̣ܘܼܟ݂ܪܹ̈ܐ. ܐܸܬ̣ܕܲܟ݂ܪ ܠܝܼ ܐܲܠܵܗܝ ܗܵܕܹܐ ܠܛܲܝܒ̇ܘܼܬ̣ܵܐ.