ܣܦܪܐ ܕܩܘܗܠܬ̣
ܩܹܦܵܠܹܐܘܿܢ: ܐ.
ܐ: ܦܸܬ̣ܓ̣ܵܡܵܘ̈ܗܝ ܕܩܘܿܗܠܲܬ̣ ܒܲܪ ܕܵܘܝܼܕܼ ܡܲܠܟܵܐ ܕܐܘܿܪܸܫܠܸܡ.
ܒ:ܗܒܸܠ ܗܸܒ̣̈ܠܝܼܢ: ܐܵܡ̇ܲܪ ܩܘܿܗܠܲܬ̣: ܗܒܸܠ ܗܸܒ̣̈ܠܝܼܢ. ܟܠܡܸܕܸ̇ܡ ܗܸܒ̣ܠܵܐ.
ܓ:ܡܵܢܵܐ ܝܘܼܬ̣ܪܵܢܵܐ ܠܒܲܪܢܵܫܵܐ ܒܟ̣ܠ ܥܲܡܠܵܐ ܕܗ̤ܘ ܥܵܡܹ̇ܠ ܬܚܹܝܬ̣ ܫܸܡܫܵܐ.
ܕ:ܕܵܪܵܐ ܐܵܙܹ̇ܠ: ܘܕܼܵܪܵܐ ܐܵܬܹ̇ܐ. ܘܐܲܪܥܵܐ ܠܥܵܠܲܡ ܩܲܝܵܡܵܐ.
ܗ:ܕܵܢܲܚ̇ ܫܸܡܫܵܐ: ܘܥܵܪܹܒ̣ ܫܸܡܫܵܐ. ܘܠܲܐܬܲܪ ܕܕܼܵܢܲܚ̇ ܗ̤ܘ ܬܵܐܹ̇ܒ̣: ܕܡ̣ܢ ܬܲܡܵܢ ܬܘܼܒ̣ ܢܸܕܼܢܲܚ.
ܘ:ܐܵܙܹ̇ܠ ܠܬܲܝܡܢܵܐ: ܘܡܸܬ̣ܟܲܪܸܟ ܠܓܲܪܒ̇ܝܵܐ. ܡܸܬ̣ܟ̇ܪܵܟܼܵܘܼ ܡܸܬ̣ܟ̇ܪܸܟ: ܘܐܵܙܹ̇ܠ ܪܘܼܚܵܐ. ܘܲܠܚܵܕܼܪ̈ܵܬܹܗ ܬܵܐܹ̇ܒ̣ ܪܘܼܚܵܐ.
ܙ:ܟܠ ܢܲܚܠܹ̈ܐ ܪܵܡܹ̇ܝܢ ܒܝܲܡܵܐ. ܘܝܲܡܵܐ ܠܵܐ ܡܸܬ̣̱ܡܠܸܐ: ܠܐܲܬܲܪ ܕܐܵܙ̇ܠ̄ܝܼܢ ܢܲܚܠܹ̈ܐ: ܠܬܲܡܵܢ ܗܸܢ̣ܘܿܢ ܬܵܝܒ̇ܝܼܢ ܠܡܹܐܙܲܠ.
ܚ:ܟܠܗܘܿܢ ܦܸܬ̣ܓ̣ܵܡܹ̈ܐ ܠܐܹܝܢ. ܠܵܐ ܢܸܣܒܲܥ ܓܲܒ̣ܪܵܐ ܠܲܡܡܲܠܵܠܘܼ. ܘܠܵܐ ܣܵܒ̣ܥܵܐ ܥܲܝܢܵܐ ܠܡܸܚܙܵܐ. ܘܠܵܐ ܡܵܠ̇ܝܵܐ ܐܸܕܼܢܵܐ ܠܡܸܫܡܲܥ.
ܛ:ܡܵܐ ܕܲܗܘ̤ܵܐ: ܗ̤ܘ ܗܵܘܹ̇ܐ. ܘܡܵܐ ܕܐܸܬ̣ܥ̱ܒ̣ܕܼ: ܗ̤ܘ ܡܸܬ̣ܥ̱ܒܸܕܼ. ܘܠܲܝܬ̇ ܡܸܕܸ̇ܡ ܚܕܸܬ̣ ܬܚܹܝܬ̣ ܫܸܡܫܵܐ.
ܝ:ܟܠ ܕܲܢܡܲܠܸܠ ܘܢܹܐܡܲܪ: ܚܙܝܼ ܗܵܢܵܐ: ܚܕܸܬ̣ ܗ̄ܘܼ. ܟܒܲܪ ܗܘ̤ܵܐ ܡ̣ܢ ܠܥܵܠܡܝܼܢ ܕܡ̣ܢ ܠܩܘܼܕܼܡܝܼܢ.
ܝܐ:ܠܲܝܬ̇ ܕܘܼܟ̣ܪܵܢ ܠܩܲܕܼܡܵܝܹ̈ܐ: ܘܐܵܦ ܠܵܐ ܠܐܲܚܪ̈ܵܝܹܐ ܕܗܵܘܹ̇ܝܢ: ܠܲܝܬ̇ ܠܗܘܿܢ ܕܘܼܟ̣ܪܵܢ ܥܲܡ ܐܲܝܠܹܝܢ ܕܗܵܘܹ̇ܝܢ ܒܐܲܚܪܵܝܬܵܐ.
ܝܒ:ܐܸܢܵܐ ܩܘܿܗܠ̣ܵܬ̣ ܗܘܹ̇ܝܬ̣ ܡܲܠܟܵܐ ܥܲܠ ܝܼܣܪܵܝܹܠ ܒܐܘܿܪܸܫܠܸܡ.
ܝܓ:ܘܝܼܗ̄ܒܹ̇ܬ̣ ܠܹܒ̇ܝ ܠܡܸܒ̣ܥܵܐ ܘܲܠܡܸܬ̣ܒܲܝܵܢܘܼ ܒܚܸܟ̣ܡ̱ܬ̣ܵܐ: ܥܲܠ ܟܠ ܕܐܸܬ̣ܥ̱ܒܲܕܼ ܬܚܹܝܬ̣ ܫܸܡܫܵܐ. ܥܸܢܝܵܢܵܐ ܒܝܼܫܵܐ ܝܲܗ̄ܒ̣ ܡܵܪܝܵܐ ܠܲܒ̣ܢܲܝ̈ܢܵܫܵܐ ܕܢܸܬ̣ܥ̱ܢܘܿܢ ܒܹܗ.
ܝܕ:ܚܙܹ̇ܝܬ̣ ܟܠ ܥܒ̣ܵܕܼܵܐ ܕܐܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ. ܘܗܵܐ ܟܠܡܸܕܸ̇ܡ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ.
ܝܗ:ܡܕܼܵܘܕܼܵܐ ܠܵܐ ܡܸܫܟܲܚ ܠܡܸܬ̣ܩܲܢ. ܘܚܲܣܝܼܪܵܐ ܠܵܐ ܡܸܫܟܲܚ ܠܡܸܬ̣ܡ̱ܢܵܝܘܼ.
ܝܘ:ܡܲܠܥܹ̇ܬ̣ ܐܸܢܵܐ ܥܲܡ ܠܹܒ̇ܝ ܠܡܹܐܡܲܪ: ܐܸܢܵܐ ܗܵܐ ܝܸܪܒܹ̇ܬ̣ ܘܐܵܘܣܦܹ̇ܬ̣ ܚܸܟ̣ܡ̱ܬ̣ܵܐ: ܥܲܠ ܟܠ ܕܲܗܘ̤ܵܘ ܩܕܼܵܡܲܝ ܒܐܘܿܪܸܫܠܸܡ. ܘܠܹܒ̇ܝ ܚܙ̣ܵܐ ܣܘܿܓ̣ܵܐܐ ܕܚܸܟ̣ܡ̱ܬ̣ܵܐ ܘܕܼܝܼܕܲܥܬ̣ܵܐ.
ܝܙ:ܘܝܸܗ̄ܒܹ̇ܬ̣ ܠܹܒ̇ܝ ܠܡܸܕܲܥ ܚܸܟ̣ܡ̱ܬ̣ܵܐ: ܘܝܼܕܲܥܬ̣ܵܐ: ܘܡܲܬ̣̈ܠܹܐ: ܘܣܲܟ̇ܘܼܠܬ̣ܵܢܘܼܬ̣ܵܐ. ܘܝܼܕܼܥܹ̇ܬ̣ ܕܐܵܦ ܗܵܢܵܐ ܛܘܼܪܵܦܵܐ ܕܪܘܼܚܵܐ.
ܝܚ:ܡܸܛܠ ܕܲܒ̣ܣܘܿܓܲܐܬ̣ ܚܸܟ̣ܡ̱ܬ̣ܵܐ ܣܘܿܓܲܐܬ̣ ܪܘܼܓ̣ܙܵܐ. ܘܲܕܼܡܵܘܣܸܦ ܠܡܸܕܲܥ: ܡܵܘܣܸܦ ܟܹܐܒ̣ܵܐ.
ܩܹܦܵܠܹܐܘܿܢ:ܒ.
ܐ:ܐܸܡ̇ܪܹܬ̣ ܐܸܢܵܐ ܠܠܹܒ̇ܝ: ܬܵܐ ܐܹܒ̣ܩܹܝܟ ܒܚܲܕܼܘܼܬ̣ܵܐ: ܘܲܚܙܝܼ ܛܵܒ̣ܬ̣ܵܐ. ܘܗܵܐ ܐܵܦ ܗܵܢܵܐ ܗܸܒ̣ܠܵܐ.
ܒ:ܠܓ̣ܘܼܚܟܵܐ ܐܸܡ̇ܪܹܬ̣ ܡܵܢܵܐ ܗܸܢܝܵܢ. ܘܲܠܚܲܕܼܘܼܬ̣ܵܐ ܡܵܢܵܐ ܗ̄ܘܼ ܥܵܒ̣ܕܲܬ̇ܝ.
ܓ:ܪܢܹܝ̇ܬ̣ ܒܠܹܒ̇ܝ ܠܲܡܒܲܣܵܡܘܼ ܒܚܲܡܪܵܐ ܒܸܣܪܝ. ܘܠܹܒ̇ܝ ܪܢ̣ܵܐ ܒܚܸܟ̣ܡ̱ܬ̣ܵܐ: ܘܐܹܚܝܼܕܼ ܒܣܲܟ̇ܘܼܠܬ̣ܵܢܘܼܬ̣ܵܐ. ܥܕܲܡܵܐ ܕܐܸܚܙܹܐ ܐܲܝܢܵܐ ܛܵܒ̣ ܠܲܒ̣ܢܲܝ̈ܢܵܫܵܐ ܕܢܸܥܒ̇ܕܼܘܼܢ ܬܚܹܝܬ̣ ܫܸܡܫܵܐ: ܡܸܢܝܵܢ ܝܵܘ̈ܡܲܝ ܚܲܝܲܝ̈ܗܘܿܢ.
ܕ:ܐܲܣܓ̇ܝܼܬ̣ ܠܝܼ ܥܲܒ̣̈ܕܹ̇ܐ: ܒܢܹ̇ܝܬ̣ ܠܝܼ ܒܵـ̈ـܬܹܐ. ܢܸܨܒܹ̇ܬ̣ ܠܝܼ ܟܲܪ̈ܡܹܐ.
ܗ:ܥܸܒ̣ܕܹ̇ܬ̣ ܠܝܼ ܓܲܢܹ̈ܐ ܘܦܲܪ̈ܕܲܝܣܹܐ. ܘܢܸܨܒܹ̇ܬ̣ ܒܗܘܿܢ ܐܝܼܠܵܢܝܼ̈ܢ ܕܟ̣ܠ ܦܹܐܪ̈ܝܼܢ.
ܘ:ܥܸܒ̣ܕܹ̇ܬ̣ ܠܝܼ ܝܲܡ̈ܡܵܬ̣ܵܐ ܕܡܲـ̈ـܝܵܐ: ܠܡܲܫܩܵܝܘܼ ܡܸܢܗܹܝܢ ܥܵܒ̣ܵܐ ܕܡܲܦܪܲܥ ܐܝܼܠܵܢܹ̈ܐ.
ܙ:ܩܢܹ̇ܝܬ̣ ܠܝܼ ܥܲܒ̣̈ܕܹ̇ܐ ܘܐܲܡ̈ܗܵܬ̣ܵܐ. ܘܲܒ̣ܢܲܝ̈ ܒܲܝܬܵܐ ܗܘ̤ܵܘ ܠܝܼ ܣܘܿܓ̣ܵܐܐ. ܘܐܵܦ ܩܸܢܝܵܢܵܐ ܕܬ̣ܵܘܪܹ̈ܐ ܘܲܕܼܥܵܢܹ̈ܐ: ܣܲܓ̇ܝܼ ܗܘ̤ܵܐ ܠܝܼ ܡ̣ܢ ܟܠ ܕܲܗܘ̤ܵܘ ܩܕܼܵܡܲܝ ܒܐܘܿܪܸܫܠܸܡ.
ܚ:ܟܲܢܫܹ̇ܬ̣ ܠܝܼ ܐܵܦ ܟܸܣܦܵܐ ܘܕܲܗܒ̣ܵܐ: ܘܩܸܢܝܵܢܵܐ ܕܡܲܠ̈ܟܹ̇ܐ ܕܲܡܕܼܝܼ̈ܢܵܬ̣ܵܐ. ܥܸܒ̣ܕܹ̇ܬ̣ ܠܝܼ ܡܫܲܒ̇ܚܵܢܹ̈ܐ ܘܲܡܫܲܒ̇ܚܵܢ̈ܝܵܬ̣ܵܐ: ܘܒܲܣܝܼܡܘܼܬ̣ܵܐ ܒܲܒ̣ܢܲܝ̈ܢܵܫܵܐ ܥܸܒ̣ܕܹ̇ܬ̣ ܠܝܼ ܫܵܩܵـ̈ـܘܵܬ̣ܵܐ ܘܫܵܩ̈ܝܵܬ̣ܵܐ.
ܛ:ܝܸܪܒܹ̇ܬ̣ ܘܐܵܘܣܦܹ̇ܬ̣: ܝܲܬ̇ܝܼܪ ܡ̣ܢ ܟܠ ܕܲܗܘ̤ܵܘ ܩܕܼܵܡܲܝ ܒܐܘܿܪܸܫܠܸܡ. ܘܐܵܦ ܚܸܟ̣ܡܲܬ̣ܝ ܩܵܡܲܬ̤ ܠܵܗ̇.
ܝ:ܘܟ̣ܠ ܕܲܫ̣ܐܸܠ ܥܲܝܢܲܝ̈ ܠܵܐ ܟܠܹ̇ܝܬ̣ ܡܸܢܗܹܝܢ. ܘܠܵܐ ܟܠܹܝܬ̣ ܠܹܒ̇ܝ ܡ̣ܢ ܟܠ ܚܲܕܼܘܵܐ. ܡܸܛܠ ܕܠܹܒ̇ܝ ܚܕܼܝܼ ܒܟ̣ܠ ܥܲܡ̄ܠܝ. ܘܗܵܕܹܐ ܗܘ̤ܵܬ̣ ܡܢܵܬ̣ܝ ܡ̣ܢ ܟܠܹܗ ܥܲܡ̄ܠܝ.
ܝܐ:ܘܚܵܪܹܬ̣ ܐܸܢܵܐ ܒܟ̣ܠ ܥܒ̣ܵܕܼܵܐ ܕܲܥ̣ܒܲܕܼ ܐܝܼ̈ܕܲܝ: ܘܲܒ̣ܟ̣ܠ ܥܲܡܠܵܐ ܕܥܸܡܠܹ̇ܬ̣ ܠܡܸܥܒܲܕܼ. ܘܗܵܐ ܟܠܡܸܕܹ̇ܡ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ. ܘܠܲܝܬ̇ ܝܘܼܬ̣ܪܵܢ ܬܚܹܝܬ̣ ܫܸܡܫܵܐ.
ܝܒ:ܘܚܵܪܹܬ̣ ܐܸܢܵܐ ܠܡܸܚܙܵܐ ܚܸܟ̣ܡ̱ܬ̣ܵܐ: ܘܲܠܡܸܬ̣ܥܲܒ̣ܪܵܢܘܼܬ̣ܵܐ ܘܣܲܟ̣ܠܘܼܬ̣ܵܐ. ܡܸܛܠ ܕܡܲܢܘܼ ܓܲܒ̣ܪܵܐ ܕܢܸܥܘܿܠ ܒܵܬܲܪ ܡܲܠܟܵܐ ܒܕܼܝܼܢܵܐ: ܟܸܢ ܥܲܡ ܡ̇ܢ ܕܥܲܒ̣ܕܹ̇ܗ.
ܝܓ:ܘܲܚܙܹ̇ܝܬ̣ ܕܐܝܼܬ̣ ܝܘܼܬ̣ܪܵܢ ܒܚܸܟ̣ܡ̱ܬ̣ܵܐ ܝܲܬ̇ܝܼܪ ܡ̣ܢ ܣܲܟ̣ܠܘܼܬ̣ܵܐ: ܐܲܝܟ ܕܝܲܬ̇ܝܼܪ ܢܘܼܗܪܵܐ ܡ̣ܢ ܚܸܫܘܿܟ̣ܵܐ.
ܝܕ:ܚܲܟ̇ܝܼܡܵܐ ܥܲܝܢܵܘ̈ܗܝ ܒܪܹܫܹܗ. ܘܣܲܟ̣ܠܵܐ ܒܚܸܫܘܿܟ̣ܵܐ ܐܵܙܹ̇ܠ. ܘܝܼܕܼܥܹ̇ܬ̣ ܐܸܢܵܐ ܕܓܸܕܼܫܵܐ ܚܲܕܼ ܓܵܕܹ̇ܫ ܠܟ̣ܠܗܘܿܢ.
ܝܗ:ܘܐܸܡ̇ܪܹܬ̣ ܐܸܢܵܐ ܒܠܹܒ̇ܝ: ܐܸܢ ܓܸܕܼܫܵܐ ܕܣܲܟ̣ܠܵܐ ܐܵܦ ܠܝܼ ܢܸܓ̣ܕܲܫ: ܘܲܠܡܵܢܵܐ ܐܸܬ̣ܚܲܟ̇ܡܹ̇ܬ̣ ܐܸܢܵܐ ܝܲܬ̇ܝܼܪܵܐܝܼܬ̣. ܘܡܲܠܠܹ̇ܬ̣ ܒܠܹܒ̇ܝ ܕܐܵܦ ܗܵܢܵܐ ܗܸܒ̣ܠܵܐ ܗ̄ܘܼ.
ܝܘ:ܡܸܛܠ ܕܣܲܟ̣ܠܵܐ ܡ̣ܢ ܝܲܬ̇ܝܼܪ ܡܡܲܠܸܠ. ܡܸܛܠ ܕܠܲܝܬ̇ ܕܘܼܟ̣ܪܵܢܵܐ ܠܚܲܟ̇ܝܼܡܵܐ ܥܲܡ ܣܲܟ̣ܠܵܐ ܠܥܵܠܲܡ. ܐܲܝܟ ܕܡ̣ܢ ܟܲܕ̇ܘܼ ܐܵܬ̣ܝܢ. ܘܟ̣ܠ ܡܸܬ̇ܛܥܹܐ. ܘܐܲܝܟܲܢܵܐ ܢܡܘܼܬ̣ ܚܲܟ̇ܝܼܡܵܐ ܥܲܡ ܣܲܟ̣ܠܵܐ.
ܝܙ:ܘܲܣܢܹ̇ܝܬ̣ ܐܸܢܵܐ ܠܚܲܝܹ̈ܐ. ܡܸܛܠ ܕܒ̣ܝܼܫ ܥܠܲܝ ܥܒ̣ܵܕܼܵܐ ܕܐܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ ܡܸܛܠ ܕܟ̣ܠܡܸܕܹ̇ܡ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ.
ܝܚ:ܘܲܣܢܹ̇ܝܬ̣ ܐܸܢܵܐ ܟܠ ܥܲܡ̄ܠܝ ܕܐܸܢܵܐ ܥܸܡܠܹ̇ܬ̣ ܬܚܹܝܬ̣ ܫܸܡܫܵܐ. ܡܸܛܠ ܕܫܵܒܹ̇ܩ ܐ̄ܢܵܐ ܠܹܗ ܠܓܲܒ̣ܪܵܐ ܕܗܵܘܹ̇ܐ ܒܵܬܲܪܝ.
ܝܛ:ܘܡ̇ܢ ܝܵܕܲܥ ܐܸܢ ܚܲܟ̇ܝܼܢ ܢܸܗܘܹܐ: ܘܐܸܢ ܣܟܲܠ. ܘܢܸܫܬܲܠܲܛ ܒܟ̣ܠ ܥܲܡ̄ܠܝ ܕܐܸܢܵܐ ܥܸܡܠܹ̇ܬ̣: ܘܐܸܬ̣ܚܲܟ̇ܡܹ̇ܬ̣ ܬܚܹܝܬ̣ ܫܸܡܫܵܐ. ܘܐܵܦ ܗܵܢܵܐ ܗܸܒ̣ܠܵܐ.
ܟ:ܘܗܸܦܟܹ̇ܬ̣ ܐܸܢܵܐ ܕܐܹܫܲܝܸܫ ܝܵܬ̣ ܠܹܒ̇ܝ: ܥܲܠ ܟܠ ܥܲܡܠܵܐ ܕܥܸܡܠܹ̇ܬ̣ ܬܚܹܝܬ̣ ܫܸܡܫܵܐ.
ܟܐ:ܡܸܛܠ ܕܐܝܼܬ̣ ܓܲܒ̣ܪܵܐ ܕܥܲܡܠܹܗ ܒܚܸܟ̣ܡ̱ܬ̣ܵܐ ܘܒ̣ܝܼܕܲܥܬ̣ܵܐ ܘܲܒ̣ܟ̣ܫܝܼܪܘܼܬ̣ܵܐ. ܘܲܠܐ̄ܢܵܫܵܐ ܕܠܵܐ ܥܵܡܹ̇ܠ ܒܵܗ̇: ܝܵܗܹ̇ܒ̣ ܠܵܗ̇ ܡܢܵܬܹܗ. ܘܐܵܦ ܗܵܢܵܐ ܗܸܒ̣ܠܵܐ ܘܒ̣ܝܼܫܬܵܐ ܪܲܒ̇ܬ̣ܵܐ.
ܟܒ:ܕܡܵܢܵܐ ܗܵܘܹ̇ܐ ܠܒܲܪܢܵܫܵܐ ܒܟ̣ܠ ܥܲܡܠܹܗ: ܘܲܒ̣ܨܸܒ̣ܝܵܢܵܐ ܕܠܸܒܹ̇ܗ ܕܗ̤ܘ ܥܵܡܹ̇ܠ ܬܚܹܝܬ̣ ܫܸܡܫܵܐ.
ܟܓ:ܡܸܛܠ ܕܟ̣ܠ ܝܵܘܡܵܘ̈ܗܝ ܟܹܐܒ̣ܵܐ ܘܪܘܼܓ̣ܙܵܐ ܥܸܢܝܵܢܹܗ. ܘܐܵܦ ܒܠܸܠܝܵܐ ܠܵܐ ܫܵܟܹ̇ܒ̣ ܠܸܒܹ̇ܗ. ܘܐܵܦ ܗܵܢܵܐ ܗܸܒ̣ܠܵܐ.
ܟܕ:ܠܲܝܬ̇ ܕܛܵܒ̣ ܠܓܲܒ̣ܪܵܐ ܐܸܠܵܐ ܕܢܹܐܟ̣ܘܿܠ ܘܲܕܼܢܸܫܬܸ̇ܐ: ܘܕܲܢܚܵܘܸܐ ܛܵܒ̣ܬ̣ܵܐ ܠܢܲܦ̮ܫܹܗ ܒܥܲܡܠܹܗ. ܘܐܵܦ ܗܵܕܹܐ ܚܙܹ̇ܝܬ̣ ܕܡ̣ܢ ܐܝܼܕܼܵܐ ܗ̄ܝܼ ܕܡܵܪܝܵܐ.
ܟܗ:ܡܸܛܠ ܕܡܲܢ̣ܘܼ ܢܹܐܟ̣ܘܿܠ: ܘܡܲܢ̣ܘܼ ܢܸܫܬܹ̇ܐ: ܠܒܲܪ ܡܸܢܹܗ.
ܟܘ:ܡܸܛܠ ܕܲܠܓܲܒ̣ܪܵܐ ܕܛܵܒ̣ ܩܕܼܵܡܵܘܗܝ: ܝܵܗܹ̇ܒ̣ ܚܸܟ̣ܡ̱ܬ̣ܵܐ ܘܝܼܕܲܥܬ̣ܵܐ ܘܚܲܕܼܘܼܬ̣ܵܐ. ܘܲܠܚܲܛܵܝܹ̈ܐ ܝܵܗܹ̇ܒ̣ ܥܸܢܝܵܢܵܐ ܠܡܵܘܣܵܦܘܼ ܘܠܲܡܟܲܢܵܫܘܼ: ܘܲܠܡܸܬܲܠ ܠܕܼܛܵܒ̣ ܡܵܪܝܵܐ. ܘܐܵܦ ܗܵܢܵܐ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ.
ܩܹܦܵܠܹܐܘܿܢ:ܓ.
ܐ:ܠܟ̣ܠܡܸܕܹ̇ܡ ܙܲܒ̣ܢܵܐ. ܘܙܲܒ̣ܢܵܐ ܠܟ̣ܠ ܨܒ̣ܘܼ ܬܚܹܝܬ̣ ܫܸܡܫܵܐ.
ܒ:ܙܲܒ̣ܢܵܐ ܠܡܹܐܠܲܕܼ: ܘܙܲܒ̣ܢܵܐ ܠܲܡܡܵܬ̣. ܙܲܒ̣ܢܵܐ ܠܡܸܨܒ̣: ܘܙܲܒ̣ܢܵܐ ܠܡܸܥܩܲܪ ܢܨܝܼܒ̣ܵܐ.
ܓ:ܙܲܒ̣ܢܵܐ ܠܡܸܩܛܲܠ: ܘܙܲܒ̣ܢܵܐ ܠܡܲܚܵܝܘܼ ܙܲܒ̣ܢܵܐ ܠܡܸܣܬܲܪ: ܘܙܲܒ̣ܢܵܐ ܠܡܸܒ̣ܢܵܐ.
ܕ:ܙܲܒ̣ܢܵܐ ܠܡܸܒ̣ܟܵܐ: ܘܙܲܒ̣ܢܵܐ ܠܡܸܓܚܲܟ. ܙܲܒ̣ܢܵܐ ܠܡܲܪܩܵܕܼܘ: ܘܙܲܒ̣ܢܵܐ ܠܲܡܪܲܩܵܕܼܘܼ.
ܗ:ܙܲܒ̣ܢܵܐ ܠܡܲܪܡܵܝܘܼ ܟܹܐܦܹ̈ܐ: ܘܙܲܒ̣ܢܵܐ ܠܲܡܟܲܢܵܫܘܼ ܟܹܐܦܹ̈ܐ. ܙܲܒ̣ܢܵܐ ܠܡܸܥܦܲܩ: ܘܙܲܒ̣ܢܵܐ ܠܡܸܬ̣ܪܲܚܵܩܘܼ ܡ̣ܢ ܥܦܘܼܩܝܵܐ.
ܘ:ܙܲܒ̣ܢܵܐ ܠܡܵܘܒܵܕܼܘܼ: ܘܙܲܒ̣ܢܵܐ ܠܡܸܒ̣ܥܵܐ. ܙܲܒ̣ܢܵܐ ܠܡܸܩܛܲܪ: ܘܙܲܒ̣ܢܵܐ ܠܡܸܫܪܵܐ.
ܙ:ܙܲܒ̣ܢܵܐ ܠܡܸܨܪܵܐ: ܘܙܲܒ̣ܢܵܐ ܠܲܡܚܵܛ. ܙܲܒ̣ܢܵܐ ܠܡܸܫܬܲܩ: ܘܙܲܒ̣ܢܵܐ ܠܲܡܡܲܠܵܠܘܼ.
ܚ:ܙܲܒ̣ܢܵܐ ܠܡܸܪܚܲܡ: ܘܙܲܒ̣ܢܵܐ ܠܡܸܣܢܵܐ. ܙܲܒ̣ܢܵܐ ܕܲܩܪܵܒ̣ܵܐ: ܘܙܲܒ̣ܢܵܐ ܕܲܫܠܵܡܵܐ.
ܛ:ܘܡܵܢܵܐ ܝܘܼܬ̣ܪܵܢ ܒܲܥܒ̣ܵܕܼܵܐ ܕܗ̤ܘ ܥܵܡܹ̇ܠ.
ܝ:ܚܙܹ̇ܝܬ̣ ܥܸܢܝܵܢܵܐ ܕܝܲܗ̄ܒ̣ ܡܵܪܝܵܐ ܠܲܒ̣ܢܲܝ̈ܢܵܫܵܐ ܠܡܸܬ̣ܥ̱ܢܵܝܘܼ ܒܹܗ.
ܝܐ:ܟܠ ܕܥܵܒܹ̇ܕܼ ܕܫܲܦܝܼܪ ܒܙܲܒ̣ܢܹܗ. ܘܝܵܬ̣ ܥܵܠܡܵܐ ܝܲܗ̄ܒ̣ ܒܠܸܒ̇ܗܘܿܢ: ܐܲܝܟ ܕܠܵܐ ܢܸܫܟ̇ܚ ܐ̄ܢܵܫܵܐ ܥܒ̣ܵܕܼܵܐ ܕܲܥ̣ܒܲܕܼ ܡܵܪܝܵܐ ܪܹܫܝܼܬ̣ܵܐ ܥܕܲܡܵܐ ܠܐܲܚܪܵܝܬܵܐ.
ܝܒ:ܘܝܸܕܼܥܹ̇ܬ̣ ܕܠܲܝܬ̇ ܛܵܒ̣ ܒܗܘܿܢ: ܐܸܠܵܐ ܠܡܸܚܕܵܐ ܘܲܠܡܸܥܒܲܕܼ ܕܛܵܒ̣ ܒܚܲܝܲܝ̈ܗܘܿܢ.
ܝܓ:ܘܐܵܦ ܟܠ ܐ̄ܢܵܫ ܕܢܹܐܟ̣ܘܿܠ ܘܢܸܫܬܸ̇ܐ: ܘܢܸܚܙܹܐ ܛܵܒ̣ܬ̣ܵܐ ܒܟ̣ܠ ܥܲܡܠܹܗ: ܡܵܘܗܲܒ̣ܬ̣ܵܐ ܗ̄ܝܼ ܕܡܵܪܝܵܐ.
ܝܕ:ܝܼܕܼܥܹ̇ܬ̣ ܕܟ̣ܠ ܕܲܥܒܲܕܼ ܡܵܪܝܵܐ: ܗ̤ܘ ܢܸܗܘܹܐ ܠܥܵܠܲܡ. ܥܠܵܘܗܝ ܠܲܝܬ̇ ܠܡܵܘܣܵܦܘܼ: ܘܡܸܢܹܗ ܠܲܝܬ̇ ܠܡܸܒ̣ܨܲܪ. ܘܡܵܪܝܵܐ ܥ̣ܒܲܕܼ ܕܢܸܕܼܚ̄ܠܘܼܢ ܡܸܢܹܗ.
ܝܗ:ܡܵܐ ܕܲܗܘ̤ܵܐ ܡ̣ܢ ܟܲܕ̇ܘܼ: ܐܝܼܬ̣ܵܘܗܝ. ܘܟ̣ܠ ܡܵܐ ܕܢܸܗܘܹܐ: ܡ̣ܢ ܣܲܓ̇ܝܼ ܗܘ̤ܵܐ. ܘܐܲܠܵܗܵܐ ܢܸܒ̣ܥܸܐ ܠܲܪܕܼܝܼܦܵܐ ܕܡܸܬ̣ܪܕܸܦ.
ܝܘ:ܘܬ̣ܘܼܒ̣ ܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܐܲܬܲܪ ܕܕܼܝܼܢܵܐ: ܬܲܡܵܢ ܪܘܼܫܥܵܐ. ܘܐܲܬܲܪ ܕܙܸܕܼܩܵܐ: ܬܲܡܵܢ ܥܵܘܼܠܵܐ.
ܝܙ:ܘܐܸܡ̇ܪܹܬ̣ ܐܸܢܵܐ ܒܠܹܒ̇ܝ: ܝܵܬ̣ ܙܲܕ̇ܝܼܩܵܐ ܘܝܵܬ̣ ܪܲܫܝܼܥܵܐ ܐܲܠܵܗܵܐ ܕܐܹ̇ܝܢ. ܡܸܛܠ ܕܙܲܒ̣ܢܵܐ ܠܟ̣ܠ ܨܒ̣ܘܼ. ܘܲܠܟ̣ܠ ܥܒ̣ܵܕܼ ܬܲܡܵܢ.
ܝܚ:ܐܸܡ̇ܪܹܬ̣ ܐܸܢܵܐ ܒܠܹܒ̇ܝ ܥܲܠ ܡܲܡܠܠܵܐ ܕܲܒ̣ܢܲܝ̈ܢܵܫܵܐ ܕܲܒ̣ܪܵܐ ܐܸܢܘܿܢ ܐܲܠܵܗܵܐ: ܘܠܲܡܚܵܘܵܝܘܼ ܕܗܸܢܘܿܢ ܐܲܝܟ ܒܥܝܼܪܵܐ ܐܸܢܘܿܢ
ܝܛ:ܠܗܘܿܢ ܡܵܛܹ̇ܐ ܓܸܕܼܫܵܐ ܕܲܒ̣ܢܲܝ̈ܢܵܫܵܐ ܘܓܸܕܼܫܵܐ ܕܲܒ̣ܥܝܼܪܵܐ. ܘܓܸܕܼܫܵܐ ܚܲܕܼ ܓܵܕܹ̇ܫ ܠܟ̣ܠܗܘܿܢ. ܐܲܝܟ ܡܵܘܬܹ̇ܗ ܕܗܵܢܵܐ: ܗܵܟܲܢܵܐ ܡܵܐܹ̇ܬ̣ ܗܵܢܵܐ. ܘܲܚܕܼܵܐ ܪܘܼܚܵܐ ܠܟ̣ܠܗܘܿܢ. ܘܲܡܝܲܬ̇ܪܘܼܬܹܗ ܕܒܲܪܢܵܫܵܐ ܡ̣ܢ ܒܥܝܼܪܵܐ ܠܲܝܬ̇. ܡܸܛܠ ܕܟ̣ܠ ܡܸܕܹ̇ܡ ܗܸܒ̣ܠܵܐ.
ܟ:ܟܠ ܐܵܙܹ̇ܠ ܠܐܲܬ̣ܪܵܐ ܚܲܕܼ. ܟܠ ܗܘ̤ܵܐ ܡ̣ܢ ܥܲܦܪܵܐ. ܘܟ̣ܠ ܗܵܦܹ̇ܝܟ ܠܥܲܦܪܵܐ.
ܟܐ:ܘܡܲܢ̣ܘܼ ܝܵܕܲܥ ܐܸܢ ܪܘܼܚ ܒܢܲܝ̈ܢܵܫܵܐ ܣܵܠܩܵܐ ܠܥܸܠ: ܘܪܘܼܚ ܒܥܝܼܪܵܐ ܢܵܚ̇ܬܵܐ ܗ̤ܝ ܠܬܲܚܬ̇ ܠܐܲܪܥܵܐ.
ܟܒ:ܘܲܚܙܹ̇ܝܬ̣ ܕܠܲܝܬ̇ ܕܛܵܒ̣ ܒܗܘܿܢ: ܐܸܠܵܐ ܕܢܸܚܕܹ̇ܐ ܐ̄ܢܵܫ ܒܲܥܒ̣ܵܕܼܵܘ̈ܗܝ. ܡܸܛܠ ܕܗ̤ܝ ܗ̄ܝܼ ܡܢܵܬܹܗ. ܡܸܛܠ ܕܡܲܢ̣ܘܼ ܢܲܝܬܹ̇ܝܘܗܝ ܠܡܸܚܙܵܐ ܒܟ̣ܠ ܕܢܸܗܘܸܐ ܡ̣ܢ ܒܵܬ̣ܪܹܗ.
ܩܹܦܵܠܹܐܘܿܢ:ܕ.
ܐ:ܘܗܸܦܟܹ̇ܬ̣ ܐܸܢܵܐ ܘܲܚܙܹܝܬ̣ ܝܵܬ̣ ܟܠ ܛܠܘܼܡܝܹ̈ܐ ܕܡܸܬ̣ܥܲܒ̣ܕ̇ܝܼܢ ܬܚܹܝܬ̣ ܫܸܡܫܵܐ. ܘܗܵܐ ܕܸܡܥܹ̈ܐ ܕܲܛܠܝܼܡܹ̈ܐ. ܘܠܲܝܬ̇ ܠܗܘܿܢ ܡܒܲܝܐܵܢܵܐ ܡ̣ܢ ܐܝܼܕܼܵܐ ܕܛܵܠܘܿܡܲܝ̈ܗܘܿܢ ܚܲܝܠܵܐ. ܘܠܲܝܬ̇ ܠܗܘܿܢ ܡܥܲܕ̇ܪܵܢܵܐ.
ܒ:ܘܫܲܒ̇ܚܹ̇ܬ̣ ܐܸܢܵܐ ܠܡܝܼ̈ܬܹܐ ܕܲܟ̣ܒܲܪ ܡ̣ܝܼܬ̣ܘ: ܡ̣ܢ ܚܲܝܹ̈ܐ ܕܗܸܢܘܿܢ ܚܲܝܝܼܢ ܥܕܲܡܵܐ ܠܗܵܫܵܐ.
ܓ:ܛܵܒ̣ ܕܹܝܢ ܡ̣ܢ ܬܪ̈ܲܝܗܘܿܢ ܗܵܠܹܝܢ: ܡ̇ܢ ܕܲܥܕܲܟܹ̇ܝܠ ܠܵܐ ܗܘ̤ܵܐ: ܡܸܛܠ ܕܠܵܐ ܚܙ̣ܵܐ ܥܒ̣ܵܕܼܵܐ ܒܝܼܫܵܐ ܕܐܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ.
ܕ:ܘܲܚܙܹ̇ܝܬ̣ ܐܸܢܵܐ ܟܠ ܥܲܡ̈ܠܹܐ ܘܟ̣ܠ ܟܫܵܪܹ̈ܐ ܕܲܥܒ̣ܵܕܼܵܐ. ܡܸܛܠ ܕܲܛܢܵܢܹܗ ܕܓܲܒ̣ܪܵܐ ܡ̣ܢ ܚܲܒ̣ܪܹܗ. ܘܐܵܦ ܗܵܢܵܐ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ.
ܗ:ܣܲܟ̣ܠܵܐ ܡܥܲܦܸܩ ܐܝܼܕܼܵܘ̈ܗܝ: ܘܐܵܟܹ̇ܠ ܒܸܣܪܹܗ.
ܘ:ܛܵܒ̣ ܡܠܹܐ ܫܘܼܥܠܵܐ ܢܝܵܚܵܐ: ܡ̣ܢ ܡܠܸܐ ܚܘܼܦܢܹ̈ܐ ܥܲܡܠܵܐ ܘܛܘܼܪܵܦܵܐ ܕܪܘܼܚܵܐ.
ܙ:ܘܗܸܦ̇ܟܹ̇ܬ̣ ܐܸܢܵܐ: ܘܲܚܙܹ̇ܝܬ̣ ܗܸܒ̣ܠܵܐ ܬܚܹܝܬ̣ ܫܸܡܫܵܐ.
ܚ:ܐܝܼܬ̣ ܚܲܕܼ ܘܠܲܝܬ̇ ܬܪܹܝܢ. ܘܲܒ̣ܪܵܐ ܘܐܲܚܵܐ ܠܲܝܬ̇ ܠܹܗ. ܘܠܲܝܬ̇ ܣܘܿܦ ܠܟ̣ܠ ܥܲܡܠܹܗ. ܘܐܵܦ ܥܲܝܢܹܗ ܠܵܐ ܣܵܒ̣̇ܥܵܐ ܥܘܼܬ̣ܪܵܐ. ܘܲܠܡ̇ܢ ܐܸܢܵܐ ܥܵܡܹ̇ܠ ܘܡܲܚܣܲܪ ܢܲܦ̮ܫܝ ܡ̣ܢ ܛܵܒ̣ܬ̣ܵܐ. ܘܐܵܦ ܗܵܢܵܐ ܗܸܒ̣ܠܵܐ ܗ̄ܘܼ: ܘܥܸܢܝܵܢܵܐ ܒܝܼܫܵܐ.
ܛ:ܛܵܒ̣ܝܼܢ ܬܪܹܝܢ ܡ̣ܢ ܚܲܕܼ. ܕܐܝܼܬ̣ ܠܗܘܿܢ ܐܲܓ̣ܪܵܐ ܛܵܒ̣ܵܐ ܒܥܲܡ̱ܠܗܘܿܢ.
ܝ:ܕܐܸܢ ܢܸܦܠܘܼܢ: ܚܲܕܼ ܡܩܝܼܡ ܠܚܲܒ̣ܪܹܗ. ܕܘܵܝ ܠܹܗ ܕܐܸܢ ܢܵܦܹ̇ܠ: ܠܲܝܬ̇ ܡ̇ܢ ܕܲܢܩܝܼܡܝܼܘܗܝ.
ܝܐ:ܘܐܸܢ ܢܸܫܟ̇ܒ̣ܘܼܢ ܬܪܹܝܢ: ܢܸܫܚ̄ܢܘܼܢ. ܘܚܲܕܼ ܐܲܝܟܲܢܵܐ ܢܸܫܚܲܢ.
ܝܒ:ܘܐܸܢ ܢܸܥܫܲܢ ܚܲܕܼ: ܬܪ̈ܲܝܗܘܿܢ ܢܩܘܼܡܘܼܢ ܠܩܘܼܒ̣ܠܹܗ. ܘܚܘܼܛܵܐ ܕܲܬ̣ܠܵܬ̣ܵܐ ܠܵܐ ܥܓܲܠ ܡܸܬ̣ܦܣܸܩ.
ܝܓ:ܛܵܒ̣ ܛܲܠܝܵܐ ܕܡܸܣܟܹ̇ܝܢ ܘܚܲܟ̇ܝܼܡ: ܡ̣ܢ ܡܲܠܟܵܐ ܣܵܒ̣ܵܐ ܕܲܣܟܲܠ: ܕܠܵܐ ܝܵܕܲܥ ܠܡܸܙܕ̇ܗܵܪܘܼ ܬܘܼܒ̣.
ܝܕ:ܡܸܛܠ ܕܡ̣ܢ ܒܹܝܬ̣ ܐܲܣܝܼܪܹ̈ܐ ܢܦܲܩ̣ ܠܡܲܡܠܵܟ̣ܘܼ. ܡܸܛܠ ܕܐܵܦ ܒܡܲܠܟ̇ܘܼܬܹܗ ܐܸܬ̣̱ܝܼܠܸܕܼ ܡܸܣܟܹ̇ܝܢ.
ܝܗ:ܚܙܹ̇ܝܬ̣ ܐܸܢܵܐ ܟܠ ܚܲܝܹ̈ܐ ܕܲܡܗܲܠܟ̣ܝܼܢ ܬܚܹܝܬ̣ ܫܸܡܫܵܐ: ܥܲܡ ܥܠܲܝܡܵܐ ܬܸܢܝܵܢܵܐ ܕܲܢܩܘܼܡ ܚܠܵܦܘܗܝ.
ܝܘ:ܘܠܲܝܬ̇ ܣܘܿܦ ܠܟ̣ܠ ܥܲܡܵܐ ܠܟ̣ܠܗܘܿܢ ܕܲܗܘ̤ܵܘ ܩܕܼܵܡܵܘܗܝ. ܘܐܵܦ ܐ̄ܚܪ̈ܵܝܹܐ ܠܵܐ ܢܸܚܕ̇ܘܢ ܒܹܗ. ܡܸܛܠ ܕܐܵܦ ܗܵܢܵܐ ܗܸܒ̣ܠܵܐ ܘܛܘܼܪܵܦܵܐ ܕܪܘܼܚܵܐ.
ܝܙ:ܛܲܪ ܪܸܓ̣ܠܵܟ ܡܵܐ ܕܐܵܙܹ̇ܠ ܠܒܹܝܬ̣ ܐܲܠܵܗܵܐ. ܘܲܩܪܘܿܒ̣ ܠܡܸܫܡܲܥ: ܛܵܒ̣ ܡ̣ܢ ܡܵܘܗܲܒ̣ܬ̣ܵܐ ܕܕܸܒ̣ܚܹ̈ܐ ܕܣܲܟ̣̈ܠܹܐ. ܡܸܛܠ ܕܠܵܐ ܝܵܕ̇ܥܝܼܢ ܠܡܸܥܒܲܕܼ ܕܛܵܒ̣.
ܩܹܦܵܠܹܐܘܿܢ:ܗ.
ܐ:ܠܵܐ ܬܸܣܬܲܪܗܲܒ̣ ܒܦܘܼܡܵܟ. ܘܠܸܒܵܟ ܠܵܐ ܢܸܣܬܲܪܗܲܒ̣ ܠܡܲܦܵܩܘܼ ܡܸܠܬ̣ܵܐ ܩܕܼܵܡ ܐܲܠܵܗܵܐ. ܡܸܛܠ ܕܐܲܠܵܗܵܐ ܒܲܫܡܲܝܵܐ: ܘܐܲܢ̄ܬ̇ ܒܐܲܪܥܵܐ. ܡܸܛܠ ܗܵܢܵܐ ܢܸܗܘܘܿܢ ܦܸܬ̣ܓ̣ܵܡܲܝ̈ܟ ܙܥܘܿܪܝܼܢ.
ܒ:ܡܸܛܠ ܕܐܵܬܹ̇ܐ ܚܸܠܡܵܐ ܒܣܘܿܓܲܐܬ̣ ܥܸܢܝܵܢܵܐ. ܘܩܵܠܹܗ ܕܣܲܟ̣ܠܵܐ ܒܣܘܿܓܲܐܬ̣ ܦܸܬ̣ܓ̣ܵܡܹ̈ܐ.
ܓ:ܐܸܡܲܬ̣ܝ ܕܢܵܕܲܪ ܐܲܢ̄ܬ̇ ܢܸܕܼܪܵܐ ܠܐܲܠܵܗܵܐ: ܠܵܐ ܬܸܫܬܵܘܚܲܪ ܠܲܡܫܲܠܵܡܘܼܬܹܗ. ܡܸܛܠ ܕܠܲܝܬ̇ ܨܸܒ̣ܝܵܢܵܐ ܒܣܲܟ̣̈ܠܹܐ. ܐܲܢ̄ܬ̇ ܕܹܝܢ ܡܸܕܹ̇ܡ ܕܢܵܕܲܪ ܐܲܢ̄ܬ̇ ܦܪܘܿܥ.
ܕ:ܛܵܒ̣ ܗ̄ܘܼ ܕܠܵܐ ܬܸܕ̇ܘܿܪ: ܡ̣ܢ ܕܬܸܕ̇ܘܪ ܘܠܵܐ ܬܫܲܠܸܡ.
ܗ:ܘܠܵܐ ܬܸܬܸ̇ܠ ܦܘܼܡܵܟ ܠܡܲܚܛܵܝܘܼ ܒܸܣܪܵܟ. ܘܠܵܐ ܬܹܐܡܲܪ ܩܕܼܵܡ ܐܲܠܗܵܐ ܕܛܘܼܥܝܲܝ ܗ̄ܝܼ. ܕܲܠܡܵܐ ܒܸܪܓܲܙ ܐܲܠܵܗܵܐ ܥܲܠ ܩܵܠܵܟ: ܘܲܢܚܲܒܸ̇ܠ ܥܒ̣ܵܕܼܵܐ ܕܐܝܼܕܲܝ̈ܟ.
ܘ:ܡܸܛܠ ܕܲܒ̣ܣܘܿܓܲܐܬ̣ ܚܸܠܡܹ̈ܐ ܘܗܸܒ̣ܠܹ̈ܐ ܘܦܸܬ̣ܓ̣ܵܡܹ̈ܐ ܣܲܓ̇ܝܼ̈ܐܹܐ ܕܛܘܼܥܝܲܝ. ܐܲܢ̄ܬ̇ ܠܐܲܠܵܗܵܐ ܕܚܲܠ.
ܙ:ܘܐܸܢ ܥܘܼܠܒܵܢܵܐ ܕܡܸܣܟܹ̇ܢܹ̈ܐ ܘܲܚܛܘܼܦܝܵܐ ܘܕܼܝܼܢܵܐ ܬܸܚܙܹܐ ܒܲܡܕܼܝܼܢ̄ܬܵܐ: ܠܵܐ ܬܸܬ̣ܡܲܗ ܒܵܗ̇ ܒܲܨܒ̣ܘܼܬ̣ܵܐ. ܡܸܛܠ ܕܪܵܡܵܐ ܠܥܸܠ ܡ̣ܢ ܪܵܡܵܐ ܢܵܛܲܪ. ܘܪܵܡܝܼܢ ܥܠܲܝܗܘܿܢ.
ܚ:ܝܘܼܪܬܵܢܵܐ ܕܐܲܪܥܵܐ ܒܟ̣ܠ ܗ̄ܘܼ: ܡܲܠܟܵܐ ܠܚܲܩܠܵܐ ܡܲܦܠܲܚ.
ܛ:ܕܪܵܚܹ̇ܡ ܟܸܣܦܵܐ: ܠܵܐ ܢܸܣܒܲܥ ܟܸܣܦܵܐ. ܘܲܕܼܪܵܚܹ̇ܡ ܡܵܡܘܿܢܵܐ: ܠܵܐ ܢܩܲܕܹ̇ܝܘܗܝ. ܘܐܵܦ ܗܵܢܵܐ ܗܸܒ̣ܠܵܐ.
ܝ:ܒܣܘܿܓ̣ܵܐܐ ܕܛܵܒ̣ܬ̣ܵܐ ܣܓ̣ܝܼܘ ܐܵܟ̣ܘܿܠܹ̈ܝܗ̇. ܘܡܵܢܵܐ ܗܘ̤ܵܬ̣ ܟܲܫܝܼܪܵܐ ܠܩܲܢܵܝܹܗ̇: ܐܸܠܵܐ ܐܸܢ ܚܙܵܬ̣ܵܐ ܕܥܲܝܢܵܘ̈ܗܝ.
ܝܐ:ܚܲܠܝܵܐ ܫܸܢܬ̣ܵܐ ܠܦܲܠܵܚܵܐ. ܐܸܢ ܙܥܘܿܪ ܘܐܸܢ ܣܲܓ̇ܝܼ ܐܵܟܹ̇ܠ. ܘܣܲܒ̣ܥܵܐ ܠܥܲܬܝܼܪܵܐ ܠܵܐ ܫܵܒܹ̇ܩ ܠܹܗ ܠܡܸܕܼܡܲܟ.
ܝܒ:ܐܝܼܬ̣ ܟܘܼܪܗܵܢܵܐ ܕܒ̣ܝܼܫܬܵܐ ܕܲܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܥܘܼܬ̣ܪܵܐ ܕܡܸܬ̣ܢ̱ܛܲܪ ܠܡܵܪܹܗ ܠܒ̣ܝܼܫܬܹ̇ܗ.
ܝܓ:ܘܐܵܒܹ̇ܕܼ ܥܘܼܬ̣ܪܵܐ ܗܵܘܿ ܒܥܸܢܝܵܢܵܐ ܒܝܼܫܵܐ. ܕܐܵܘܠܸܕܼ ܒܪܵܐ: ܘܠܵܐ ܐܝܼܬ̣ ܒܐܝܼܕܹܗ ܡܸܕܹ̇ܡ.
ܝܕ:ܐܲܝܟܲܢܵܐ ܕܲܢܦܲܩ̣ ܡ̣ܢ ܟܲܪܣܵܗ̇ ܕܐܸܡܹܗ: ܥܲܪܛܸܠ ܢܸܗܦܘܿܟ ܠܡܹܐܙܲܠ ܐܲܝܟ ܕܐܸܬ̣ܵܐ. ܘܡܸܕܹ̇ܡ ܠܵܐ ܢܵܣܹ̇ܒ̣ ܒܥܲܡܠܹܗ ܕܢܹܐܙܲܠ ܒܐܝܼܕܹܗ.
ܝܗ:ܘܐܵܦ ܗܵܢܵܐ ܟܘܼܪܗܵܢܵܐ ܒܝܼܫܵܐ. ܐܲܝܟܲܢܵܐ ܓܹܝܪ ܕܐܸܬ̣ܵܐ: ܗܵܟܲܢܵܐ ܐܸܙܲܠ. ܘܡܵܢܵܐ ܝܘܼܬ̣ܪܵܢܵܐ ܒܟ̣ܠ ܕܲܥ̣ܡܲܠ ܠܪܘܼܚܵܐ.
ܝܘ:ܘܐܵܦ ܟܠ ܝܵܘܡܵܘ̈ܗܝ ܒܚܸܫܘܿܟ̣ܵܐ ܐܵܟܹ̇ܠ: ܘܲܒ̣ܪܘܼܓ̣ܙܵܐ ܣܲܓ̇ܝܼܐܵܐ: ܘܲܒ̣ܚܸܡܬ̣ܵܐ: ܘܒ̣ܐܒ̣ܠܵܐ: ܘܲܒ̣ܟ̣ܘܼܪܗܵܢܵܐ.
ܝܙ:ܗܵܢܵܐ ܡܸܕܹ̇ܡ ܕܲܚܙܹ̇ܝܬ̣ ܐܸܢܵܐ ܩܘܿܗܠܲܬ̣. ܛܵܒ̣ ܗ̄ܘܼ ܘܫܲܦܝܼܪ ܠܡܹܐܟܲܠ ܘܲܠܡܸܫܬܵܐ: ܘܲܠܡܸܚܙܵܐ ܛܵܒ̣ܬ̣ܵܐ ܒܟ̣ܠ ܥܲܡܠܹܗ ܕܥܵܡܹ̇ܠ ܬܚܹܝܬ̣ ܫܸܡܫܵܐ: ܡܸܢܝܵܢ ܝܵܘ̈ܡܵܬ̣ܵܐ ܕܚܲܝܵܘ̈ܗܝ ܕܝܲܗ̄ܒ̣ ܠܹܗ ܡܵܪܝܵܐ. ܡܸܛܠ ܕܗ̤ܘܝܘܼ ܡܢܵܬܹܗ.
ܝܚ:ܘܐܵܦ ܟܠ ܐ̄ܢܵܫ ܕܝܲܗ̄ܒ̣ ܠܹܗ ܡܵܪܝܵܐ ܥܘܼܬ̣ܪܵܐ ܘܢܸܟ̣ܣܹ̈ܐ. ܘܐܲܫ̱ܠܛܹܗ ܠܡܹܐܟܲܠ ܡܸܢܗܘܿܢ: ܘܲܠܡܸܣܲܒ̣ ܡܢܵܬܹܗ: ܘܲܠܡܸܚܕܵܐ ܒܥܲܡܠܹܗ. ܗܵܕܹܐ ܡܵܘܗܲܒ̣ܬ̣ܵܐ ܗ̄ܝܼ ܕܐܲܠܵܗܵܐ.
ܝܛ:ܡܸܛܠ ܕܠܵܘ ܣܲܓ̇ܝܼ ܢܸܥܗܲܕܼ ܝܵܘ̈ܡܵܬ̣ܵܐ ܕܚܲܝܵܘ̈ܗܝ ܡܸܛܠ ܕܐܲܠܵܗܵܐ ܡܲܥܢܹܐ ܠܹܗ ܒܚܲܕܼܘܼܬ̣ܵܐ ܕܠܸܒܹ̇ܗ.
ܩܹܦܵܠܹܐܘܿܢ:ܘ.
ܐ:ܐܝܼܬ̣ ܒܝܼܫܬܵܐ ܕܲܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܘܣܲܓ̇ܝܼܐܵܐ ܗ̄ܝܼ ܥܲܠ ܒܢܲܝ̈ܢܵܫܵܐ.
ܒ:ܓܲܒ̣ܪܵܐ ܕܢܸܬܸ̇ܠ ܠܹܗ ܐܲܠܵܗܵܐ ܥܘܼܬ̣ܪܵܐ ܘܢܸܟ̣ܣܹ̈ܐ ܘܐܝܼܩܵܪܵܐ. ܘܠܵܐ ܚܲܣܝܼܪ ܠܢܲܦ̮ܫܹܗ ܡܸܕܹ̇ܡ ܡ̣ܢ ܟܠ ܡܵܐ ܕܪܵܐܹ̇ܓ̣. ܘܠܵܐ ܐܲܫ̣ܠܛܹܗ ܐܲܠܵܗܵܐ ܠܡܹܐܟܲܠ ܡܸܢܹܗ. ܐܸܠܵܐ ܓܒܲܪ ܢܘܼܟ̣ܪܵܝ ܢܹܐܟ̣ܠܝܼܘܗܝ ܡ̣ܢ ܒܵܬ̣ܪܹܗ. ܗܵܢܵܐ ܗܸܒ̣ܠܵܐ ܘܲܟܼܪܝܼܗܘܼܬ̣ܵܐ ܗ̄ܝܼ.
ܓ:ܐܸܢ ܢܵܘܠܸܕܼ ܓܲܒ̣ܪܵܐ ܡܵܐܐ: ܘܲܫܢ̈ܝܼܢ ܣܲܓ̇ܝܼ̈ܐܵܢ ܢܸܚܸܐ: ܘܢܸܣܓ̇ܘܿܢ ܝܵܘ̈ܡܵܬ̣ܵܐ ܕܲܫܢܵܘ̈ܗܝ: ܘܢܲܦ̮ܫܹܗ ܠܵܐ ܬܸܣܒܲܥ ܡ̣ܢ ܛܵܒ̣ܵـ̈ـܬ̣ܵܐ: ܘܐܵܦ ܩܒ̣ܘܼܪܬܵܐ ܠܵܐ ܬܸܗܘܹܐ ܠܹܗ. ܐܸܡ̇ܪܹܬ̣ ܕܛܵܒ̣ ܗ̄ܘܼ ܡܸܢܹܗ ܚܲܝܛܵܐ.
ܕ:ܡܸܛܠ ܕܲܒ̣ܗܸܒ̣ܠܵܐ ܐܸܬ̣ܵܐ. ܘܲܒ̣ܚܸܫܘܿܟ̣ܵܐ ܢܹܐܙܲܠ. ܘܲܒ̣ܚܸܫܘܿܟ̣ܵܐ ܫܡܹܗ ܢܸܬ̣ܟܲܣܸܐ.
ܗ:ܐܵܦ ܫܸܡܫܵܐ ܠܵܐ ܚܙ̣ܵܐ: ܘܠܵܐ ܝܼܕܲܥ. ܢܚܝܼ ܠܗܵܢܵܐ ܛܵܒ̣ ܡ̣ܢ ܕܲܠܗܵܢܵܐ.
ܘ:ܘܐܸܠܘܼ ܚܝ̣ܵܐ ܐܵܠܹܦ ܫܢ̈ܝܼܢ ܕܬܲܪܬܹ̇ܝܢ ܙܲܒ̣ܢ̈ܝܼܢ: ܘܛܵܒ̣ܬ̣ܵܐ ܠܵܐ ܚܙ̣ܵܐ. ܕܲܠܡܵܐ ܠܵܐ ܗ̄ܘܼܵܐ ܠܚܲܕܼ ܐܲܬ̣ܪܵܐ ܐܵܙܹ̇ܠ ܟܠ.
ܙ:ܟܠ ܕܥܵܡܹ̇ܠ ܐ̄ܢܵܫܵܐ ܒܦܘܼܡܹܗ: ܘܢܲܦ̮ܫܹܗ ܠܵܐ ܡܲܠܝܵܐ.
ܚ:ܡܸܛܠ ܕܐܝܼܬ̣ ܝܘܼܬ̣ܪܵܢܵܐ ܠܚܲܟ̇ܝܼܡܵܐ ܡ̣ܢ ܕܲܠܣܲܟ̣ܠܵܐ. ܠܡܵܢܵܐ: ܕܡܸܣܟܹ̇ܢܵܐ ܝܵܕܲܥ ܠܡܹܐܙܲܠ ܠܚܲܝܹ̈ܐ.
ܛ:ܛܵܒ̣ ܚܸܙܘܵܐ ܕܥܲܝܢܹ̈ܐ ܡ̣ܢ ܗܠܲܟ̣ܬ̣ܵܐ ܕܢܲܦ̮ܫܵܐ.
ܝ:ܡܸܕܹ̇ܡ ܕܲܗܘ̤ܵܐ ܡ̣ܢ ܩܕܼܝܼܡ: ܐܸܬ̣ܩܪܝܼ ܫܡܹܗ. ܘܐܸܬ̣̱ܝܼܕܲܥ ܕܗ̤ܘ ܒܲܪܢܵܫܵܐ. ܘܠܵܐ ܡܸܫܟܲܚ ܠܲܡܕܼܵܢ ܥܲܡ ܡ̇ܢ ܕܬܲܩܝܼܦ ܡܸܢܹܗ.
ܝܐ:ܡܸܛܠ ܕܐܝܼܬ̣ ܦܸܬ̣ܓ̣ܵܡܹ̈ܐ ܣܲܓ̇ܝܼ̈ܐܹܐ ܕܡܲܣܓܹ̇ܝܢ ܗܸܒ̣ܠܵܐ. ܡܵܢܵܐ ܝܘܼܬ̣ܪܵܢܵܐ ܐܝܼܬ̣ ܠܒܲܪܢܵܫܵܐ.
ܩܹܦܵܠܹܐܘܿܢ:ܙ.
ܐ:ܡܸܛܠ ܕܡܲܢ̣ܘܼ ܝܵـ̇ـܕܲܥ ܡܵܢܵܐ ܛܵܒ̣ ܠܒܲܪܢܵܫܵܐ ܒܚܲܝܵܘ̈ܗܝ: ܡܸܢܝܵܢ ܝܵܘ̈ܡܲܝ ܚܲܝܲܝ̈ ܗܸܒ̣ܠܹܗ. ܘܲܥ̣ܒܲܪ ܐܸܢܘܿܢ ܐܲܝܟ ܛܸܠܵܠܵܐ. ܡܲܢ̣ܘܼ ܢܚܵܘܸܐ ܠܒܲܪܢܵܫܵܐ ܡܵܢܵܐ ܢܸܗܘܹܐ ܡ̣ܢ ܒܵܬ̣ܪܹܗ ܬܚܹܝܬ̣ ܫܸܡܫܵܐ.
ܒ:ܛܵܒ̣ ܫܡܵܐ ܡ̣ܢ ܡܸܫܚܵܐ ܛܵܒ̣ܵܐ. ܘܝܵܘܡܵܐ ܕܡܵܘܬܵܐ ܛܵܒ̣ ܡ̣ܢ ܝܵܘܡܵܐ ܕܝܼܠܝܼܕܼܘܼܬ̣ܵܐ.
ܓ:ܛܵܒ̣ ܠܡܹܐܙܲܠ ܠܒܹܝܬ̣ ܒܵܟܹ̇ܐ: ܡ̣ܢ ܕܲܠܡܸܐܙܲܠ ܠܒܹܝܬ̣ ܡܸܫܬ̇ܘܼܬ̣ܵܐ. ܡܸܛܠ ܕܗܵܕܲܐ ܗ̄ܝܼ ܚܲܪܬ̣ܵܐ ܕܟ̣ܠܗܘܿܢ ܒܢܲܝ̈ܢܵܫܵܐ. ܘܲܕܼܚܲܝ ܝܵܗܹ̇ܒ̣ ܛܵܒ̣ܬ̣ܵܐ ܠܠܸܒܹ̇ܗ.
ܕ:ܛܵܒ̣ ܪܘܼܓ̣ܙܵܐ ܡ̣ܢ ܓܘܼܚܟܵܐ. ܡܸܛܠ ܕܲܒ̣ܒ̣ܝܼܫܘܼܬ̣ ܐܵܦܹ̈ܐ ܢܸܛܐܲܒ̣ ܠܸܒܵܐ.
ܗ:ܠܸܒܵܐ ܕܚܲܟ̇ܝܼܡܹ̈ܐ ܒܒܹܝܬ̣ ܐܸܒ̣ܠܵܐ. ܘܠܸܒܵܐ ܕܣܲܟ̣̈ܠܹܐ ܒܹܝܬ̣ ܚܲܕܼܘܼܬ̣ܵܐ.
ܘ:ܛܵܒ̣ ܠܡܸܫܡܲܥ ܟܐܵܬ̣ܵܐ ܕܚܲܟ̇ܝܼܡܹ̈ܐ: ܡ̣ܢ ܓܲܒ̣ܪܵܐ ܕܫܵܡܲܥ ܙܡܵܪܵܐ ܕܣܲܟ̣̈ܠܹܐ.
ܙ:ܐܲܝܟ ܩܵܠܵܐ ܕܟ̣ܘܼ̈ܒܹ̇ܐ ܬܚܹܝܬ̣ ܩܲܕܼܣܵܐ: ܗܵܟܲܢܵܐ ܓܘܼܚܟ̇ܗܘܿܢ ܕܣܲܟ̣̈ܠܹܐ. ܘܐܵܦ ܗܵܢܵܐ ܗܸܒ̣ܠܵܐ.
ܚ:ܡܸܛܠ ܕܲܥܫܘܼܩܝܵܐ ܡܵܘܒܸ̇ܕܼ ܠܚܲܟ̇ܝܼܡܵܐ. ܘܡܵܘܒ̇ܕܼܵܐ ܠܠܸܒܵܐ ܡܵܘܗܲܒ̣ܬ̣ܵܐ.
ܛ:ܛܵܒ̣ܵܐ ܗ̄ܝܼ ܐ̄ܚܪܵܝܬܹܗ ܕܦܸܬ̣ܓ̣ܵܡܵܐ ܡ̣ܢ ܩܲܕܼܡܵܝܬܹ̇ܗ. ܘܛܵܒ̣ܵܐ ܢܲܓ̇ܝܼܪܘܼܬ̣ ܪܘܼܚܵܐ ܡ̣ܢ ܪܲܡܘܼܬ̣ ܪܘܼܚܵܐ.
ܝ:ܠܵܐ ܬܸܣܬܲܪܗܲܒ̣ ܒܪܘܼܚܵܟ ܠܡܸܪܓܲܙ. ܡܸܛܠ ܕܪܘܼܓ̣ܙܵܐ ܒܥܘܼܒܵܐ ܕܣܲܟ̣̈ܠܹܐ ܢܸܬ̇ܬ̇ܢܝܼܚ.
ܝܐ:ܠܵܐ ܬܸܐܡܲܪ ܡܵܢܵܐ ܗܘ̤ܵܐ: ܕܝܵܘ̈ܡܵܬ̣ܵܐ ܩܲܕܼܡܵܝܹ̈ܐ ܛܵܒ̣ܝܼܢ ܗ̄ܘܼܵܘ ܡ̣ܢ ܗܵܠܹܝܢ. ܡܸܛܠ ܕܠܵܐ ܗ̄ܘܼܵܐ ܒܚܸܟ̣ܡ̱ܬ̣ܵܐ ܫܵܐܹ̇ܠ ܥܲܠ ܗܵܠܹܝܢ.
ܝܒ:ܛܵܒܲܐ ܗ̄ܝܼ ܚܸܟ̣ܡ̱ܬ̣ܵܐ ܡ̣ܢ ܡܵܐܢܲܝ̈ ܙܲܝܢܵܐ: ܘܝܲܬ̇ܝܼܪ ܠܚܵܙ̇ܝܲܝ̈ ܫܸܡܫܵܐ.
ܝܓ:ܡܸܛܠ ܕܛܸܠܵܠܵܐ ܕܚܸܟ̣ܡ̱ܬ̣ܵܐ ܐܲܝܟ ܛܸܠܵܠܵܐ ܕܟܸܣܦܵܐ. ܘܝܲܬ̇ܝܼܪܘܼܬ̣ܵܐ ܕܝܼܕܲܥܬ̣ܵܐ ܕܚܸܟ̣ܡ̱ܬ̣ܵܐ ܬܲܚܸܐ ܡܵܪܵܗ̇.
ܝܕ:ܚܙܝܼ ܥܒ̣ܵܕܼܵܐ ܕܐܲܠܵܗܵܐ. ܡܸܛܠ ܕܡܲܢ̣ܘܼ ܡܸܫܟܲܚ ܠܡܲܬ̣ܩܵܢܘܼ ܠܡ̇ܢ ܕܲܡܕܼܵܘܲܕܼ ܗ̄ܘܼ.
ܝܗ:ܒܝܵܘܡܵܐ ܕܛܵܒ̣ܬ̣ܵܐ ܗ̤ܘܝܼ ܒܛܵܒ̣. ܘܲܒ̣ܝܵܘܡܵܐ ܕܒ̣ܝܼܫܬܵܐ ܚܙܝܼ ܢܲܦ̮ܫܵܟ. ܐܵܦ ܗܵܢܵܐ ܠܘܼܩܒܲܠ ܗܵܢܵܐ ܥ̣ܒܲܕܼ ܐܲܠܵܗܵܐ: ܥܲܠ ܡܲܡܠܠܵܐ ܕܠܵܐ ܡܸܫܟܲܚ ܒܲܪܢܵܫܵܐ ܡܸܕܹ̇ܡ ܒܵܬ̣ܪܹܗ.
ܝܘ:ܟܠ ܡܸܕܹ̇ܡ ܚܙܹ̇ܝܬ̣ ܒܝܵܘ̈ܡܲܝ ܗܸܒ̣ܠܝ.ܐܝܼܬ̣ ܙܲܕ̇ܝܼܩܵܐ ܕܐܸܒܲܕܼ ܒܙܲܕ̇ܝܼܩܘܼܬܹܗ. ܘܐܝܼܬ̣ ܪܲܫܝܼܥܵܐ ܕܐܲܓܲܪ ܒܒ̣ܝܼܫܘܼܬܹܗ.
ܝܙ:ܠܵܐ ܬܸܗܘܹܐ ܙܲܕ̇ܝܼܩ ܣܲܓ̇ܝܼ ܘܠܵܐ ܬܸܬ̣ܚܲܟܲܡ ܝܲܬܝܼܪ ܕܠܵܐ ܬܸܬ̣ܡܲܗ.
ܝܚ:ܠܵܐ ܬܲܪܫܲܥ ܣܲܓ̇ܝܼ ܕܠܵܐ ܬܸܣܬ̇ܢܹܐ ܣܲܓ̇ܝܼ. ܠܵܐ ܬܸܗܘܹܐ ܣܟܲܠ. ܕܲܠܡܵܐ ܬܡܘܼܬ̣ ܕܠܵܐ ܒܙܲܒ̣ܢܵܟ.
ܝܛ:ܛܵܒ̣ ܕܬܹܐܚܘܿܕܼ ܒܗܵܢܵܐ. ܘܐܵܦ ܡ̣ܢ ܗܵܘܿ ܠܵܐ ܬܲܪܦܸܐ ܐܝܼܕܼܵܟ. ܡܸܛܠ ܕܡ̇ܢ ܕܕܼܵܚܹ̇ܠ ܠܐܲܠܵܗܵܐ: ܢܵܩܹ̇ܦ ܠܟ̣ܠܗܹܝܢ.
ܟ:ܚܸܟ̣ܡ̱ܬ̣ܵܐ ܡܲܥܫ̄ܢܵܐ ܠܚܲܟ̇ܝܼܡܵܐ: ܛܵܒ̣ ܡ̣ܢ ܥܸܣܪܵܐ ܫܲܠܝܼܛܵܢ̈ܝܼܢ ܕܐܝܼܬ̣ ܒܲܡܕܼܝܼܢ̄ܬܵܐ.
ܟܐ:ܡܸܛܠ ܕܠܲܝܬ̇ ܐ̄ܢܵܫ ܕܙܲܕ̇ܝܼܩ ܒܐܲܪܥܵܐ: ܕܢܸܥܒܸ̇ܕܼ ܕܛܵܒ̣ ܘܠܵܐ ܢܸܚܛܹܐ.
ܟܒ:ܘܐܵܦ ܠܟ̣ܠ ܦܸܬ̣ܓ̣ܵܡܹ̈ܐ ܕܲܢܡܲܠܠܘܼܢ ܪ̈ܲܫܝܼܥܹܐ ܠܵܐ ܬܸܬܸ̇ܠ ܠܸܒܵܟ. ܠܵܐ ܬܸܫܡܲܥ ܠܥܲܒ̣ܕܵܟ ܕܲܡܨܲܚܸܐ ܠܵܟ.
ܟܓ:ܡܸܛܠ ܕܙܲܒ̣ܢ̈ܝܼܢ ܣܲܓ̇ܝܼ̈ܐܵܢ ܝܵܕܲܥ ܠܸܒܵܟ: ܕܐܵܦ ܐܲܢ̄ܬ̇ ܨܲܚܝܲܬ̇ ܠܐܲܚܪ̈ܵܢܝܼܢ.
ܟܕ:ܟܠܗܹܝܢ ܗܵܠܹܝܢ ܢܲܣ̇ܝܼܬ̣ ܒܚܸܟ̣ܡ̱ܬ̣ܵܐ ܐܸܡ̇ܪܹܬ̣ ܕܐܸܬ̣ܚܲܟܲܡ. ܘܗ̤ܝ ܪܲܚܝܼܩܵܐ ܡܹܢܝ.
ܟܗ:ܝܲܬ̇ܝܼܪ ܡ̣ܢ ܕܲܗܘ̤ܵܐ ܪܘܼܚܩܵܐ. ܘܥܘܼܡܩܵܐ ܕܥܘܼܡܩܹ̈ܐ ܡ̇ܢ ܢܸܫܟ̇ܚܝܼܘܗܝ.
ܟܘ:ܐܸܬ̣ܟܲܪܟܹ̇ܬ̣ ܐܸܢܵܐ ܘܠܹܒ̇ܝ ܠܡܸܕܲܥ ܘܲܠܡܸܣܥܲܪ: ܘܲܠܡܸܒ̣ܥܵܐ ܚܸܟ̣ܡ̱ܬ̣ܵܐ ܘܚܘܼܫܒܵܢܵܐ: ܘܲܠܡܸܕܲܥ ܪܲܫܝܼܥܘܼܬܹܗ ܕܣܲܟ̣ܠܵܐ: ܘܣܲܟ̣ܠܘܼܬ̣ܵܐ ܘܡܸܬ̣ܥܲܒ̣ܪܵܢܘܼܬ̣ܵܐ.
ܟܙ:ܘܐܸܫܟ̇ܚܹ̇ܬ̣ ܕܡܲܪܝܼܪܵܐ ܡ̣ܢ ܡܵܘܬܵܐ: ܐܲܢ̄ܬ̇ܬ̣ܵܐ. ܕܗ̤ܝ ܐܝܼܬܹܝܗ̇ ܦܲܚܵܐ: ܘܲܡܨܝܼܕ̇ܬܵܐ ܠܸܒܵܗ̇. ܐܲܣܵܪܹ̈ܐ ܐܝܼܕܹܝ̈ܗ̇. ܡ̇ܢ ܕܛܵܒ̣ ܩܕܼܵܡ ܐܲܠܵܗܵܐ: ܡܸܫܬܵܘܙܲܒ̣ ܡܸܢܵܗ̇. ܘܡ̇ܢ ܕܚܵܛܹ̈ܐ: ܡܸܬ̇ܬܲܚܸܕܼ ܒܵܗ̇.
ܟܚ:ܚܙܝܼ ܗܵܢܵܐ ܕܐܸܫܟ̇ܚܹ̇ܬ̣: ܐܵܡܲܪ ܩܘܿܗܠܲܬ̣. ܚܕܼܵܐ ܠܲܚܕܼܵܐ ܠܡܸܫܟܵܚܘܼ ܡܲܚܫ̈ܒ̣ܵܬ̣ܵܐ.
ܟܛ:ܘܬ̣ܘܼܒ̣ ܒܥܵܬ̤ ܢܲܦ̮ܫܝ: ܘܠܵܐ ܐܸܫܟ̇ܚܹ̇ܬ̣. ܐ̄ܢܵܫܵܐ ܚܲܕܼ ܡ̣ܢ ܐܲܠܦܵܐ ܐܸܫܟ̇ܚܹ̇ܬ̣. ܘܐܲܢ̄ܬ̇ܬ̣ܵܐ ܒܟ̣ܠܗܹܝܢ ܠܵܐ ܐܸܫܟ̇ܚܹ̇ܬ̣.
ܠ:ܒܪܲܡ ܚܙܝܼ ܗܵܢܵܐ ܕܐܸܫܟ̇ܚܹ̇ܬ̣: ܕܲܥܒܲܕܼ ܐܲܠܵܗܵܐ ܠܐ̄ܢܵܫܵܐ ܬܪ̈ܝܼܨܐ. ܘܗܸܢ̣ܘܿܢ ܒܥ̣ܵܘ ܡܲܚܫ̈ܒ̣ܵܬ̣ܵܐ ܣܲܓܝܼ̈ܐܵܬ̣ܵܐ.
ܩܹܦܵܠܹܐܘܿܢ:ܚ.
ܐ:ܡܲܢ̣ܘܼ ܐܲܝܟ ܚܲܟ̇ܝܼܡܵܐ: ܘܡ̇ܢ ܝܵܕܲܥ ܦܫܵܪܵܗ̇ ܕܡܸܠܬ̣ܵܐ. ܚܸܟ̣ܡ̱ܬܹܗ ܕܓܲܒ̣ܪܵܐ ܬܲܢܗܲܪ ܐܲܦܵܘ̈ܗܝ. ܘܲܕܼܚܲܨ̈ܝܼܦܵܢ ܐܲܦܵܘ̈ܗܝ ܢܸܣܬ̇ܢܸܐ.
ܒ:ܦܘܼܡܹܗ ܕܡܲܠܟܵܐ ܛܲܪ. ܘܥܲܠ ܡܸܠܲܬ̣ ܡܵܘܡܵܬ̣ܵܐ ܕܐܲܠܵܗܵܐ ܠܵܐ ܬܸܣܬܲܪܗܲܒ̣.
ܓ:ܡ̣ܢ ܩܕܼܵܡܵܘܗܝ ܙܸܠ. ܘܠܵܐ ܬܩܘܼܡ ܒܦܸܬ̣ܓ̣ܵܡ ܒܝܼܫ. ܡܸܛܠ ܕܟ̣ܠ ܕܢܸܨܒܸ̇ܐ ܢܸܥܒܸ̇ܕܼ.
ܕ:ܐܲܝܟܲܢܵܐ ܕܲܢܡܲܠܸܠ ܡܲܠܟܵܐ ܫܲܠܝܼܛ. ܘܡܲܢ̣ܘܼ ܕܢܹܐܡܲܪ ܠܹܗ: ܡܵܢܵܐ ܥܵܒܹ̇ܕܼ ܐܲܢ̄ܬ̇.
ܗ:ܕܢܵܛܲܪ ܦܘܼܩܕܵܢܵܐ ܠܵܐ ܝܵܕܲܥ ܡܸܠܬ̣ܵܐ ܒܝܼܫܬܵܐ. ܘܙܲܒ̣ܢܵܐ ܘܕܼܝܼܢܵܐ ܝܵܕܲܥ ܕܚܲܟ̇ܝܼܡܵܐ.
ܘ:ܡܸܛܠ ܕܲܠܟ̣ܠ ܨܒ̣ܘܼ ܐܝܼܬ̣ ܙܲܒ̣ܢܵܐ ܘܕܼܝܼܢܵܐ. ܡܸܛܠ ܕܒ̣ܝܼܫܬܹ̇ܗ ܕܒܲܪܢܵܫܵܐ ܣܲܓ̇ܝܼܐܵܐ ܥܠܵܘܗܝ.
ܙ:ܡܸܛܠ ܕܠܲܝܬ̇ ܕܝܵܕܲܥ ܠܡܵܐ ܕܲܗܘ̤ܵܐ. ܘܡܵܢܵܐ ܢܸܗܘܹܐ ܡ̣ܢ ܒܵܬ̣ܪܹܗ ܡܲܢ̣ܘܼ ܡܚܵܘܸܐ ܠܹܗ.
ܚ:ܠܲܝܬ̇ ܐܢܵܫ ܕܫܲܠܝܼܛ ܒܪܘܼܚܵܐ ܠܡܸܟ̣ܠܵܐ ܪܘܼܚܵܐ. ܘܠܲܝܬ ܫܘܼܠܛܵܢܵܐ ܒܝܵܘܡܵܐ ܕܡܵܘܬܵܐ. ܘܠܲܝܬ̇ ܦܘܼܠܵܛܵܐ ܒܝܵܘܡܵܐ ܕܲܩܪܵܒ̣ܵܐ. ܘܠܵܐ ܡܫܵܘܙܸܒ̣ ܪܘܼܫܥܵܐ ܠܡܵܪ̈ܵܘܗܝ.
ܛ:ܘܝܵܬ̣ ܟܠ ܗܵܢܵܐ ܚܙܹ̇ܝܬ̣. ܘܝܸܗ̄ܒܹ̇ܬ̣ ܠܹܒ̇ܝ ܠܡܸܕܲܥ ܟܠ ܥܒ̣ܵܕܼ ܕܡܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ: ܘܙܲܒ̣ܢܵܐ ܕܐܸܫܬܲܠܲܛ ܒܲܪܢܵܫܵܐ ܒܒܲܪܢܵܫܵܐ ܠܡܲܒ̣ܐܵܫܘܼ ܠܹܗ.
ܝ:ܘܗܵܝܕܹ̇ܝܢ ܚܙܹ̇ܝܬ̣ ܪ̈ܲܫܝܼܥܹܐ ܕܲܩܒ̣ܝܼܪܝܼܢ ܘܐܵܬܹ̇ܝܢ. ܘܡ̣ܢ ܐܲܬ̣ܪܵܐ ܕܩܘܼܕܼܫܵܐ ܐܸܙܲܠ̣ܘ. ܘܐܸܬ̇ܛܥܝܼܘ ܒܲܡܕܼܝܼܢ̄ܬܵܐ ܕܗܵܟܲܢܵܐ ܥ̣ܒܲܕܼܘ. ܘܐܵܦ ܗܵܢܵܐ ܗܸܒ̣ܠܵܐ.
ܝܐ:ܡܸܛܠ ܕܠܵܐ ܡܸܬ̣ܥܲܒ̣ܕܵܐ ܬܒܲܥܬ̣ܵܐ ܡ̣ܢ ܥܵܒ̣ܕܲܝ̈ ܒܝܼ̈ܫܵܬ̣ܵܐ ܒܲܥܓܲܠ. ܡܸܛܠ ܗܵܢܵܐ ܐܸܬ̣ܡ̱ܠܝܼ ܠܸܒܵܐ ܕܲܒ̣ܢܲܝ̈ܢܵܫܵܐ ܒܗܘܿܢ ܠܡܸܥܒܲܕܼ ܕܒ̣ܝܼܫ.
ܝܒ:ܡ̇ܢ ܕܚܵܛܹ̇ܐ ܥܵܒܹ̇ܕܼ ܒܝܼ̈ܫܵܬ̣ܵܐ ܡܵܐܐ: ܘܡܲܓܲܪ ܠܹܗ. ܘܝܵܕܲܥ ܐ̄ܢܵܐ ܕܢܸܗܘܹܐ ܛܵܒ̣ ܠܕܼܵܚ̇ܠܵܘ̈ܗܝ ܕܡܵܪܝܵܐ: ܕܢܸܕܼܚ̄ܠܘܼܢ ܡ̣ܢ ܩܕܼܵܡܵܘܗܝ.
ܝܓ:ܘܛܵܒ̣ܬ̣ܵܐ ܠܵܐ ܬܸܗܘܹܐ ܠܪܲܫܝܼܥܵܐ ܘܠܵܐ ܢܲܓ̇ܝܼܪ ܝܵܘ̈ܡܵܬ̣ܵܐ ܐܲܝܟ ܛܸܠܵܠܵܐ. ܡܸܛܠ ܕܠܵܐ ܐܝܼܬ̣ܵܘܗܝ ܕܵܚܹ̇ܠ ܡ̣ܢ ܩܕܼܵܡ ܐܲܠܵܗܵܐ.
ܝܕ:ܐܝܼܬ̣ ܗܸܒ̣ܠܵܐ ܕܲܥܒ̣ܝܼܕܼ ܥܲܠ ܐܲܪܥܵܐ. ܡܸܛܠ ܕܐܝܼܬ̣ ܙܲܕ̇ܝܼܩܹ̈ܐ ܕܡܵܛܹ̇ܐ ܠܘܵܬ̣ܗܘܿܢ ܐܲܝܟ ܥܒ̣ܵܕܼܵܐ ܕܪ̈ܲܫܝܼܥܹܐ. ܘܐܝܼܬ̣ ܪܲܫܝܼܥܹܐ ܕܡܵܛܹ̇ܐ ܠܘܵܬ̣ܗܘܿܢ ܐܲܝܟ ܥܒ̣ܵܕܼܵܐ ܕܙܲܕ̇ܝܼܩܹ̈ܐ. ܘܐܸܡ̇ܪܹܬ̣ ܕܐܵܦ ܗܵܢܵܐ ܗܸܒ̣ܠܵܐ.
ܝܗ:ܘܫܲܒ̇ܚܹ̇ܬ̣ ܐܸܢܵܐ ܝܵܬ̣ ܚܲܕܼܘܼܬ̣ܵܐ. ܕܠܲܝܬ̇ ܕܛܵܒ̣ ܠܒܲܪܢܵܫܵܐ ܬܚܹܝܬ̣ ܫܸܡܫܵܐ: ܐܸܠܵܐ ܠܡܹܐܟܲܠ ܘܲܠܡܸܫܬܵܐ ܘܲܠܡܸܚܕܵܐ: ܘܗ̤ܘ ܠܵܘܹ̇ܐ ܠܹܗ ܒܥܲܡܠܹܗ: ܟܠ ܝܵܘ̈ܡܲܝ ܚܲܝܵܘ̈ܗܝ ܕܝܲܗ̄ܒ̣ ܠܹܗ ܐܲܠܵܗܵܐ ܬܚܹܝܬ̣ ܫܸܡܫܵܐ.
ܝܘ:ܡܸܛܠ ܗܵܢܵܐ ܝܸܗ̄ܒܹ̇ܬ̣ ܠܹܒ̇ܝ ܠܡܸܕܲܥ ܚܸܟ̣ܡ̱ܬ̣ܵܐ: ܘܲܠܡܸܚܙܵܐ ܥܸܢܝܵܢܵܐ ܕܐܸܬ̣ܥ̱ܒܸܕܼ ܥܲܠ ܐܲܪܥܵܐ. ܡܸܛܠ ܕܒ̣ܐܝܼܡܵܡܵܐ ܘܲܒ̣ܠܸܠܝܵܐ ܫܸܢܬ̣ܵܐ ܒܥܲܝܢܵܘ̈ܗܝ ܠܵܐ ܚܵܙܹ̇ܐ.
ܝܙ:ܘܲܚܙܹ̇ܝܬ̣ ܐܸܢܵܐ ܟܠ ܥܒ̣ܵܕܼܵܐ ܕܐܲܠܵܗܵܐ. ܡܸܛܠ ܕܠܵܐ ܢܸܬ̣̱ܡܨܹܐ ܒܲܪܢܵܫܵܐܝܵܬ̣ ܥܒ̣ܵܕܼܵܐ ܕܲܥܒ̣ܝܼܕܼ ܬܚܹܝܬ̣ ܫܸܡܫܵܐ. ܟܠ ܕܥܵܡܹ̇ܠ ܒܲܪܢܵܫܵܐ ܕܢܸܒ̣ܥܸܐ: ܠܵܐ ܢܸܫܟܲܚ. ܘܟ̣ܠ ܕܢܹܐܡܲܪ ܚܲܟ̇ܝܼܡܵܐ ܠܡܸܕܲܥ: ܠܵܐ ܢܸܬ̣ܡ̱ܨܹܐ ܠܡܸܫܟܵܚܘܼ.
ܩܹܦܵܠܹܐܘܿܢ:ܛ.
ܐ:ܡܸܛܠ ܕܝܵܬ̣ ܟܠܗܹܝܢ ܗܵܠܹܝܢ ܝܸܗ̄ܒܹ̇ܬ̣ ܒܠܹܒ̇ܝ. ܘܠܹܒ̇ܝ ܚܙ̣ܵܐ ܝܵܬ̣ ܟܠ ܗܵܢܵܐ. ܕܙܲܕ̇ܝܼܩܹ̈ܐ ܘܚܲܟ̇ܝܼܡܹ̈ܐ ܘܲܥܒ̣ܵܕܲܝ̈ܗܘܿܢ ܒܐܝܼܕܼܵܐ ܕܐܲܠܵܗܵܐ. ܐܵܦ ܪܸܚ̱ܡܬ̣ܵܐ ܐܵܦ ܣܸܢܐ̱ܬ̣ܵܐ ܠܵܐ ܝܵܕܲܥ ܒܲܪܢܵܫܵܐ. ܟܠ ܕܲܩܕܼܵܡܵܘܗܝ ܗܸܒ̣ܠܵܐ.
ܒ:ܟܠ ܐܲܝܟ ܕܲܠܟ̣ܠ. ܓܸܕܼܫܵܐ ܚܲܕܼ ܠܙܲܕ̇ܝܼܩܹ̈ܐ ܘܲܠܪ̈ܲܫܝܼܥܹܐ: ܠܛܵܒܹ̈ܐ ܘܲܠܒ̣ܝܼܫܹ̈ܐ: ܠܲܕܼܟܲـ̈ـܝܵܐ ܘܲܠܛܲܡܹ̈ܐܐ: ܠܕܲܡܕܲܒܲܚ ܘܠܲܕܼܠܵܐ ܡܕܲܒܲܚ. ܐܲܝܟ ܛܵܒ̣ܵܐ: ܐܵܦ ܚܲܛܵܝܵܐ. ܐܲܝܟ ܝܲܡܵܝܵܐ: ܐܵܦ ܗܵܘܿ ܕܡ̣ܢ ܡܵܘ̈ܡܵܬ̣ܵܐ ܕܵܚܹ̇ܠ.
ܓ:ܗܵܕܹܐ ܒܝܼܫܵܐ ܒܟ̣ܠ ܡܵܐ ܕܐܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ. ܡܸܛܠ ܕܓܸܕܼܫܵܐ ܚܲܕܼ ܠܟ̣ܠܗܘܿܢ. ܘܐܵܦ ܠܸܒܵܐ ܕܒܲܪܢܵܫܵܐ ܐܸܬ̣ܡ̱ܠܝܼ ܒܝܼܫܬܵܐ: ܘܦܵܗܝܘܼܬ̣ܵܐ ܒܝܼܫܬܵܐ ܒܠܸܒ̇ܗܘܿܢ ܘܲܒ̣ܚܲܝܲܝ̈ܗܘܿܢ. ܘܚܲܪܬ̣ܗܘܿܢ ܠܘܵܬ̣ ܡܝܼ̈ܬܹܐ.
ܕ:ܟܠ ܕܢܸܫܬܵܘܬܲܦ ܠܟ̣ܠ ܚܲܝܹ̈ܐ ܐܝܼܬ̣ ܬܘܼܟ̣ܠܵܢܵܐ. ܡܸܛܠ ܕܟܲܠܒܵܐ ܕܚܲܝ ܛܵܒ̣ ܗ̄ܘܼ ܡ̣ܢ ܐܲܪܝܵܐ ܕܡܲܝܝܼܬ̣.
ܗ:ܡܸܛܠ ܕܚܲܝܹ̈ܐ ܝܵܕ̇ܥܝܼܢ ܕܡܵܝ̇ܬ̇ܝܼܢ. ܘܡܝܼܬܹ̈ܐ ܠܵܐ ܝܵܕ̇ܥܝܼܢ ܡܸܕܹ̇ܡ. ܘܠܲܝܬ̇ ܠܗܘܿܢ ܬܘܼܒ̣ ܐܲܓ̣ܪܵܐ. ܡܸܛܠ ܕܐܸܬ̣ܥ̱ܛܝܼ ܕܘܼܟ̣ܪܵܢܗܘܿܢ.
ܘ:ܐܵܦ ܪܸܚܡܲܬ̣ܗܘܿܢ ܐܵܦ ܣܸܢܲܐܬ̣ܗܘܿܢ: ܐܵܦ ܩܸܢܲܐܬ̣ܗܘܿܢ ܡ̣ܢ ܟܲܕ̇ܘܼ ܐܸܒ̣ܕܲܬ̤. ܘܲܡܢܵܬ̣ܵܐ ܠܲܝܬ̇ ܠܗܘܿܢ ܬܘܼܒ̣ ܠܥܵܠܲܡ: ܒܟ̣ܠܡܵܐ ܕܡܸܬ̣ܥ̱ܒܸܕܼ ܬܚܹܝܬ̣ ܫܸܡܫܵܐ.
ܙ:ܬܵܐ ܐܲܟ̣ܘܿܠ ܠܲܚܡܵܟ. ܘܐܸܫܬܲܝ ܒܠܸܒܵܐ ܛܵܒ̣ܵܐ ܚܲܡܪܵܟ ܡܸܛܠ ܕܐܸܨܛܒ̣ܝܼ ܐܲܠܵܗܵܐ ܒܲܥܒ̣ܵܕܲܝ̈ܟ.
ܚ:ܒܟ̣ܠ ܥܸܕܵܢ ܢܲܚ̈ܬܲܝܟ ܢܸܗܘܘܿܢ ܚܸܘܵܪ̈ܝܼܢ: ܘܡܸܫܚܵܐ ܡ̣ܢ ܪܹܫܵܟ ܠܵܐ ܢܸܚܣܲܪ.
ܛ:ܘܲܚܙܝܼ ܚܲܝܹ̈ܐ ܥܲܡ ܐܲܢ̄ܬ̇ܬ̣ܵܐ ܕܲܪܚܸܡܬ̇ ܟܠ ܝܵܘܡܲܝ ܚܲܝܲܝ̈ ܗܸܒ̣ܠܵܟ. ܡܸܛܠ ܕܗ̤ܝ ܗ̄ܝܼ ܡܢܵܬ̣ܵܟ ܒܚܲܝܹ̈ܐ ܘܲܒ̣ܥܲܡܠܵܟ ܕܐܲܢ̄ܬ̇ ܥܵܡܹ̇ܠ ܬܚܹܝܬ̣ ܫܸܡܫܵܐ.
ܝ:ܟܠ ܕܬܸܫܟܲܚ ܐܝܼܕܼܵܟ ܠܡܸܥܒܲܕܼ ܒܚܲܝܠܵܟ: ܥܒܸܕܼ. ܡܸܛܠ ܕܠܲܝܬ̇ ܥܒ̣ܵܕܼܵܐ ܘܡܲܚܫܲܒ̣ܬ̣ܵܐ ܘܝܼܕܲܥܬ̣ܵܐ ܘܚܸܟ̣ܡ̱ܬ̣ܵܐ: ܒܲܫܝܘܿܠ ܕܐܲܢ̄ܬ̇ ܐܵܙܹ̇ܠ ܐܲܢ̄ܬ̇ ܠܬܲܡܵܢ.
ܝܐ:ܘܗܸܦ̇ܟܹ̇ܬ̣ ܘܲܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܕܠܵܐ ܠܩܲܠܝܼܠܹ̈ܐ ܪܲܗܛܵܐ: ܘܠܵܐ ܠܓܲܢ̄ܒܵܪܹ̈ܐ ܩܪܵܒ̣ܵܐ: ܘܠܵܐ ܠܚܲܟ̇ܝܼܡܹ̈ܐ ܠܲܚܡܵܐ: ܘܠܵܐ ܠܣܲܟ̇ܘܼܠܬ̣ܵܢܹ̈ܐ ܥܘܼܬ̣ܪܵܐ: ܘܠܵܐ ܠܝܲܕ̇ܘܼܥܬ̣ܵܢܹ̈ܐ ܫܘܼܒ̣ܚܵܐ. ܡܸܛܠ ܕܙܲܒ̣ܢܵܐ ܘܦܸܓܥܵܐ ܓܵܕܹ̇ܫ ܠܟ̣ܠܗܘܿܢ.
ܝܒ:ܡܸܛܠ ܕܠܵܐ ܝܵܕܲܥ ܒܲܪܢܵܫܵܐ ܙܲܒ̣ܢܹܗ: ܐܲܝܟ ܢܘܼܢܹ̈ܐ ܕܡܸܬ̇ܬܲܚܕ̇ܝܼܢ ܒܲܡܨܝܼܕ̇ܬܵܐ ܒܝܼܫܬܵܐ: ܘܐܲܝܟ ܨܸܦܪܹ̈ܐ ܕܡܸܬ̇ܬܲܚ̈ܕܵܢ ܒܦܲܚܵܐ. ܗܵܟܲܢܵܐ ܡܸܬ̇ܬܲܚܕ̇ܝܼܢ ܒܢܲܝ̈ܢܵܫܵܐ ܒܙܲܒ̣ܢܵܐ ܒܝܼܫܵܐ ܕܢܵܦܹ̇ܠ ܥܠܲܝܗܘܿܢ ܡ̣ܢ ܫܹܠܝ.
ܝܓ:ܘܐܵܦ ܗܵܕܹܐ ܚܙܹ̇ܝܬ̣ ܚܸܟ̣ܡ̱ܬ̣ܵܐ ܬܚܹܝܬ̣ ܫܸܡܫܵܐ. ܘܪܲܒܵܐ ܗ̄ܝܼ ܠܘܵܬ̣ܝ.
ܝܕ:ܡܕܼܝܼܢ̄ܬܵܐ ܙܥܘܿܪܬܵܐ: ܘܲܒ̣ܢܲܝ̈ܢܵܫܵܐ ܕܒ̣ܵܗ̇ ܙܥܘܿܪܝܼܢ. ܘܐܸܬ̣ܵܐ ܥܠܹܝܗ̇ ܡܲܠܟܵܐ ܪܲܒܵܐ ܘܚܲܕܼܪܵܗ̇. ܘܲܒ̣ܢܵܐ ܥܠܹܝܗ̇ ܩܲܠܩܘܼܡܹ̈ܐ.
ܝܗ:ܘܐܸܫܬ̇ܟܲܚ ܒܵܗ̇ ܓܲܒ̣ܪܵܐ ܡܸܣܟܹ̇ܢܵܐ ܚܲܟ̇ܝܼܡܵܐ. ܘܫܵܘܙܸܒ̣ ܗܵܘܿ ܡܸܣܟܹ̇ܢܵܐ ܡܕܼܝܼܢ̄ܬܵܐ ܒܚܲܟ̇ܝܼܡܘܼܬܹܗ. ܘܐ̄ܢܵܫ ܠܵܐ ܥܗܲܕܼ ܠܓܲܒ̣ܪܵܐ ܗܵܘܿ ܡܸܣܟܹ̇ܢܵܐ.
ܝܘ:ܘܐܸܡ̇ܪܹܬ̣ ܐܸܢܵܐ. ܛܵܒܲܐ ܗ̄ܝܼ ܚܸܟ̣ܡ̱ܬ̣ܵܐ ܡ̣ܢ ܓܲܢ̄ܒܵܪܘܼܬ̣ܵܐ. ܘܚܸܟ̣ܡ̱ܬܹܗ ܕܡܸܣܟܹ̇ܢܵܐ ܡܲܣ̱ܠܝܵܐ ܗ̄ܝܼ. ܘܦܸܬ̣ܓ̣ܵܡܵܘ̈ܗܝ ܠܵܐ ܡܸܫܬܲܡܠܹܝܢ.
ܝܙ:ܘܡܸܠܲܝ̈ ܚܲܟ̇ܝܼܡܹܐ ܒܲܢܝܵܚܵܐ ܡܸܫܬܲܡ̈ܥܵܢ: ܡ̣ܢ ܙܥܵܩܬ̣ܵܐ ܕܫܲܠܝܼܛܵܐ ܣܲܟ̣ܠܵܐ.
ܝܚ:ܛܵܒ̣ܵܐ ܗ̄ܝܼ ܚܸܟ̣ܡ̱ܬ̣ܵܐ ܡ̣ܢ ܡܵܐܢܲܝ̈ ܩܪܵܒ̣ܵܐ. ܘܲܚܛܝܼܬ̣ܵܐ ܚܕܼܵܐ ܡܵܘܒ̇ܕܼܵܐ ܛܵـ̈ـܒ̣ܵܬ̣ܵܐ ܣܲܓ̇ܝܼ̈ܐܵܬ̣ܵܐ.
ܩܹܦܵܠܹܐܘܿܢ:ܝ.
ܐ:ܐܲܝܟ ܕܲܒܵܒܹ̈ܐ ܕܡܵܝ̇ܬ̇ܝܼܢ ܡܲܣܪܹܝܢ ܠܡܵܐܢܵܐ ܕܡܸܫܚܵܐ ܒܲܣܝܼܡܵܐ. ܝܲܩܝܼܪܵܐ ܗ̄ܝܼ ܡ̣ܢ ܚܸܟ̣ܡ̱ܬ̣ܵܐ ܘܡ̣ܢ ܣܘܿܓܲܐܬ̣ ܬܸܫܒ̇ܘܿܚܬܵܐ: ܣܲܟ̣ܠܘܼܬ̣ܵܐ ܩܲܠܝܼܠ.
ܒ:ܠܸܒܹ̇ܗ ܕܚܲܟ̇ܝܼܡܵܐ ܒܝܲܡܝܼܢܹܗ. ܘܠܸܒܹ̇ܗ ܕܣܲܟ̣ܠܵܐ ܒܣܸܡܵܠܹܗ.
ܓ:ܘܐܵܦ ܣܲܟ̣ܠܵܐ ܡܵܐ ܕܐܵܙܲܠ ܒܐܘܼܪܚܵܐ ܠܸܒܹ̇ܗ ܚܲܣܝܼܪ. ܘܟ̣ܠ ܕܡܸܬ̣ܚܲܫܲܒ̣: ܣܲܟ̣ܠܘܼܬ̣ܵܐ ܗ̄ܝܼ
ܕ:ܐܸܢ ܪܘܼܚܵܐ ܕܫܲܠܝܼܛܵܐ ܬܸܣܲܩ ܥܠܲܝܟ: ܐܲܬ̣ܪܵܟ ܠܵܐ ܬܸܫܒ̇ܘܿܩ. ܡܸܛܠ ܕܐܵܣܝܘܼܬ̣ܵܐ ܫܵܒ̣ܩܵܐ ܚܛܵܗܹ̈ܐ ܣܲܓ̇ܝܼ̈ܐܹܐ.
ܗ:ܐܝܼܬ̣ ܒܝܼܫܬܵܐ ܕܲܚܙܹ̇ܝܬ̣ ܬܚܹܝܬ̣ ܫܸܡܫܵܐ: ܐܲܝܟ ܛܘܼܥܝܲܝ ܕܢܸܦܩܲܬ̤ ܩܕܼܵܡ ܫܲܠܝܼܛܵܐ.
ܘ:ܕܝܵܬܹ̇ܒ̣ ܣܲܟ̣ܠܵܐ ܒܪ̈ܵܘܡܹܐ ܥܲܫܝܼܢܹ̈ܐ. ܘܥܲܬ̇ܝܼܪܹ̈ܐ ܒܡܘܼܟܵܟ̣ܵܐ ܢܸܬ̇ܒ̣ܘܼܢ.
ܙ:ܚܙܹ̇ܝܬ̣ ܥܲܒ̣̈ܕܹ̇ܐ ܥܲܠ ܪ̈ܲܟ̣ܫܵܐ. ܘܫܲܠܝܼܛܵܢܹ̈ܐ ܕܲܡܗܲܠܟ̣ܝܼܢ ܐܲܝܟ ܥܲܒ̣̈ܕܹ̇ܐ ܥܲܠ ܐܲܪܥܵܐ.
ܚ:ܕܚܵܦܲܪ ܓܘܼܡܵܨܵܐ: ܒܹܗ ܢܵܦܹ̇ܠ. ܘܲܕܼܬ̣ܵܪܲܥ ܣܝܵܓ̣ܵܐ: ܢܲܟ̇ܬ̣ܝܼܘܗܝ ܚܸܘܝܵܐ.
ܛ:ܕܲܡܫܲܢܸܐ ܟܹܐܦܹ̈ܐ: ܢܸܬ̣ܟܲܐܲܒ̣ ܒܗܹܝܢ. ܘܕܲܡܨܲܠܲܚ ܩܲܝܣܹ̈ܐ: ܠܵܐܹ̇ܐ ܒܗܘܿܢ.
ܝ:ܐܸܢ ܩܗܵܐ ܦܲܪܙܠܵܐ: ܘܗ̤ܘ ܐܲܦܹ̈ܐ ܕܵܠܲܚ ܘܲܩܛܝܼܠܹ̈ܐ ܡܲܣܓܹ̇ܐ. ܘܝܘܼܬ̣ܪܵܢܵܐ ܠܟܲܫܝܼܪܹ̈ܐ ܚܸܟ̣ܡ̱ܬ̣ܵܐ.
ܝܐ:ܐܸܢ ܢܵܟܹ̇ܬ̣ ܚܸܘܝܵܐ ܕܠܵܐ ܠܘܼܚܫܬ̣ܵܐ: ܠܲܝܬ̇ ܝܘܼܬ̣ܪܵܢ ܒܠܵܚܘܿܫܵܐ.
ܝܒ:ܡܸܠܲܝ̈ ܦܘܼܡܹܗ ܕܚܲܟ̇ܝܼܡܵܐ ܬܸܫܒ̇ܘܿܚܬܵܐ. ܘܣܸܦ̈ܘܵܬܹܗ ܕܣܲܟ̣ܠܵܐ ܡܛܲܒ̇ܥܵܢ ܠܹܗ.
ܝܓ:ܪܹܫ ܡܸܠܲܝ̈ ܦܘܼܡܹܗ ܣܲܟ̣ܠܘܼܬ̣ܵܐ. ܘܚܲܪܬ̣ܵܐ ܕܦܘܼܡܹܗ ܦܘܼܪܣܵܝܵܐ ܒܝܼܫܵܐ.
ܝܕ:ܘܣܲܟ̣ܠܵܐ ܡܲܣܓܸ̇ܐ ܡܸܠ̈ܝܼܢ. ܠܵܐ ܝܵܕܲܥ ܒܲܪܢܵܫܵܐ ܡܵܐ ܕܲܗܘ̤ܵܐ. ܘܡܵܐ ܕܢܸܗܘܹܐ ܡ̣ܢ ܒܵܬ̣ܪܹܗ ܡܲܢ̣ܘܼ ܡܚܵܘܸܐ ܠܹܗ.
ܝܗ:ܥܲܡ̱ܠܗܘܿܢ ܕܣܲܟ̣̈ܠܹܐ ܡܲܠܐܸܐ ܠܗܘܿܢ. ܡܸܛܠ ܕܠܵܐ ܝܼܕܲܥ̣ܘ ܠܡܹܐܙܲܠ ܠܲܡܕܼܝܼܢ̄ܬܵܐ.
ܝܘ:ܘܵܝ ܠܹܟ̣ܝ ܡܕܼܝܼܢ̄ܬܵܐ ܕܡܲܠܟܹ̇ܟ̣ܝ ܛܠܸܐ. ܘܪܵܘ̱ܪ̈ܒ̣ܵܢܲܝܟ̇ܝ ܒܨܲܦܪܵܐ ܐܲܟ̣ܠܝܼܢ.
ܝܙ:ܛܘܼܒܲܝܟ̇ܝ ܡܕܼܝܼܢ̄ܬܵܐ ܕܡܲܠܟܹ̇ܟ̣ܝ ܒܲܪ ܚܹܐܪ̈ܝܼܢ. ܘܪܵܘ̱ܪ̈ܒ̣ܵܢܲܝܟ̇ܝ ܒܥܸܕܵܢܗܘܿܢ ܐܲܟ̣ܠܝܼܢ: ܒܟܲܫܝܼܪܘܼܬ̣ܵܐ ܘܠܵܐ ܒܡܲܫܬ̇ܝܵܐ.
ܝܚ:ܒܫܲܦܠܘܼܬ̣ܵܐ ܢܸܬ̣ܡܲܟܲܟ ܬܲܛܠܝܼܠܵܐ. ܘܲܒ̣ܫܲܦܠܘܼܬ̣ܵܐ ܕܐܝܼܕܲܝܵܐ ܢܸܕܼܠܲܦ ܒܲܝܬܵܐ.
ܝܛ:ܠܚܲܕܼܘܼܬ̣ܵܐ ܥܒ̣ܝܼܕܼܝܼܢ ܠܲܚܡܵܐ ܘܚܲܡܪܵܐ ܘܡܸܫܚܵܐ ܕܲܢܚܲܕ̇ܘܿܢ ܠܚܲܝܹ̈ܐ. ܘܟܸܣܦܵܐ ܡܡܲܟܸ̇ܟ: ܘܡܲܛܥܸܐ ܠܗܘܿܢ ܒܟ̣ܠ.
ܟ:ܐܵܦ ܒܡܲܕ̇ܥܵܟ ܠܡܲܠܟܵܐ ܠܵܐ ܬܨܲܚܸܐ. ܘܲܒ̣ܩܲܝܛܘܿܢ ܡܲܫܟ̇ܒ̣ܵܟ ܠܵܐ ܬܨܲܚܸܐ ܠܥܲܬ̇ܝܼܪܵܐ. ܡܸܛܠ ܕܥܵܘܦܵܐ ܕܲܫܡܲܝܵܐ ܢܵܘܒܸ̇ܠ ܩܵܠܵܟܘ ܘܡܵܪܹܐ ܥܵܘܦܵܐ ܢܚܵܘܸܐ ܦܸܬ̣ܓ̣ܵܡܲܝ̈ܟ.
ܩܹܦܵܠܹܐܘܿܢ:ܝܐ.
ܐ:ܫܲܕܲܪ ܠܲܚܡܵܟ ܥܲܠ ܐܲܦܲܝ̈ ܡܲـ̈ـܝܵܐ: ܡܸܛܠ ܕܲܠܣܘܿܓܲܐܬ̣ ܝܵܘ̈ܡܵܬ̣ܵܐ ܬܸܫܟ̇ܚܝܼܘܗܝ.
ܒ:ܗܲܒ̣ ܡܢܵܬ̣ܵܐ ܠܫܲܒ̣ܥܵܐ ܐܵܦ ܠܲܬ̣ܡܵܢܝܵܐ: ܡܸܛܠ ܕܠܵܐ ܬܸܕܲܥ ܡܵܢܵܐ ܒܝܼܫܬܵܐ ܬܸܗܘܹܐ ܥܲܠ ܐܲܪܥܵܐ.
ܓ:ܐܸܢ ܢܸܡ̱ܠ̈ܝܵܢ ܥܢܵܢܲܝ̈ ܡܸܛܪܵܐ: ܥܲܠ ܐܲܪܥܵܐ ܢܹܐܫ̈ܕܵܢ. ܘܐܸܢ ܢܸܦܠ ܩܷܲܣܵܐ ܒܬܲܝܡܢܵܐ ܐܵܘ ܒܐܲܬ̣ܪܵܐ ܕܓܲܪܒ̇ܝܵܐ: ܐܲܬܲܪ ܕܢܵܦܹ̇ܠ ܩܲܝܣܵܐ: ܬܲܡܵܢ ܢܸܗܘܸܐ.
ܕ:ܕܢܵܛܲܪ ܠܪܘܼܚܵܐ: ܠܵܐ ܙܵܪܲܥ. ܘܲܕܼܚܵܐܲܪ ܠܲܥܢܵܢܹ̈ܐ: ܠܵܐ ܚܵܝܨܹ̇ܕܼ.
ܗ:ܡܸܛܠ ܕܠܵܐ ܝܵܕܲܥ ܐܲܢ̄ܬ̇ ܡܵܢܲܐ ܗ̄ܝܼ ܐܘܼܪܚܵܐ ܕܪܘܼܚܵܐ. ܐܲܝܟ ܙܢܵܐ ܓܹܝܪ ܕܒܲܛܢܬ̣ܵܐ ܕܒ̣ܵܛܢܵܐ: ܗܵܟܲܢܵܐ ܠܵܐ ܬܸܕܲܥ ܥܒ̣ܵܕܼܵܘ̈ܗܝ ܕܡܵܪܝܵܐ ܟܠ ܕܢܸܥܒܸ̇ܕܼ.
ܘ:ܟܠ ܨܲܦܪܵܐ ܙܪܘܿܥ ܙܲܪܥܵܟ. ܘܲܒ̣ܪܲܡܫܵܐ ܠܵܐ ܬܸܫܒ̇ܘܿܩ ܐܝܼܕܼܵܟ. ܡܸܛܠ ܝܵܕܲܥ ܐܲܢ̄ܬ̇ ܐܲܝܢܵܐ ܡܲܟ̣ܫܲܪ: ܐܵܘ ܗܵܢܵܐ ܐܵܘ ܗܵܢܵܐ: ܘܐܸܢ ܬܪ̈ܲܝܗܘܿܢ ܐܲܟ̣ܚ̄ܕܼ ܛܵܒ̣ܝܼܢ.
ܙ:ܚܠܸܐ ܢܘܼܗܪܵܐ: ܘܛܵܒ̣ ܠܥܲܝܢܹ̈ܐ. ܘܝܲܬ̇ܝܼܪ ܠܚܵܙ̇ܝܲܝ̈ ܫܸܡܫܵܐ.
ܚ:ܡܸܛܠ ܕܐܸܢ ܫܢܝܼ̈ܢ ܣܲܓ̇ܝܼ̈ܐܵܢ ܢܸܚܹܐ ܒܲܪܢܵܫܵܐ: ܒܟ̣ܠܗܹܝܢ ܢܸܚܕܹ̇ܐ. ܘܢܸܬ̇ܕ̇ܟܲܪ ܝܵܘ̈ܡܲܝ ܚܸܫܘܿܟ̣ܵܐ. ܡܸܛܠ ܕܣܲܓ̇ܝܼ̈ܐܝܼܢ ܢܸܗܘܘܿܢ. ܟܠ ܕܐܵܬܹ̇ܐ: ܗܸܒ̣ܠܵܐ.
ܛ:ܒܝܵܘ̈ܡܲܝ ܥܠܲܝܡܘܼܬ̣ܵܟ ܚܕܼܝܼ ܥܠܲܝܡܵܐ: ܘܢܸܛܐܲܒ̣ ܠܵܟ. ܘܗܲܠܸܟ ܒܐܘܼܪ̈ܚܵܬ̣ܵܐ ܕܠܸܒܵܟ ܘܲܒ̣ܚܸܙܘܵܐ ܕܥܲܝܢܲܝ̈ܟ. ܘܕܲܥ ܕܲܒ̣ܗܵܠܹܝܢ ܟܠܗܹܝܢ ܡܲܥܸܠ ܠܵܟ ܡܵܪܝܵܐ ܒܕܼܝܼܢܵܐ.
ܝ:ܐܲܥܒܲܪ ܪܘܼܓ̣ܙܵܐ ܡ̣ܢ ܠܸܒܵܟ. ܘܐܲܦܪܸܩ ܒܝܼܫܬܵܐ ܡ̣ܢ ܒܸܣܪܵܟ. ܡܸܛܠ ܕܛܲܠܝܘܼܬ̣ܵܐ ܘܠܵܐ ܝܼܕܲܥܬ̣ܵܐ ܗܸܒ̣ܠܵܐ.
ܩܹܦܵܠܹܐܘܿܢ:ܝܒ.
ܐ:ܘܲܥܗܲܕܼ ܠܒ̣ܵܪܝܵܟ ܒܝܵܘ̈ܡܲܝ ܥܠܲܝܡܘܼܬ̣ܵܟ. ܥܲܕܼܠܵܐ ܢܹܐܬ̣ܘܼܢ ܝܵܘ̈ܡܲܝ ܒܝܼ̈ܫܵܬ̣ܵܐ: ܘܢܸܩ̱ܪ̈ܒ̣ܵܢ ܫܢܲـ̈ـܝܵܐ ܕܬܹܐܡܲܪ ܕܠܲܝܬ̇ ܒܗܹܝܢ ܨܸܒ̣ܝܵܢܝ.
ܒ:ܥܲܕܼܠܵܐ ܢܸܚܫܲܟ ܫܸܡܫܵܐ: ܘܢܘܼܗܪܵܐ ܕܣܲܗܪܵܐ ܘܲܕܼܟܵܘܟ̇ܒܹ̈ܐ. ܘܢܸܬ̣ܦ̈ܟܵܢ ܥܢܵܢܹ̈ܐ ܒܵܬܲܪ ܡܸܛܪܵܐ.
ܓ:ܒܝܵܘܡܵܐ ܕܢܸܬ̇ܬ̇ܙܝܼܥܘܼܢ ܢܵܛ̇ܘܿܪ̈ܲܝ ܒܷܲܬܵܐ. ܘܢܸܬ̇ܕܵܘܕܼܘܼܢ ܡܵܪ̈ܲܝ ܚܲܝܠܵܐ. ܘܢܸܬ̣ܒܲܛ̈ܠܵܢ ܛܲܚܵܢܵـ̈ـܬ̣ܵܐ ܡܸܛܠ ܕܲܙܥܲܪ. ܘܢܸܚ̈ܫܟ̣ܵܢ ܚܵܙ̈ܝܵܬ̣ܵܐ ܒܟ̣ܵܘܹ̈ܐ.
ܕ:ܘܢܸܬ̇ܬܲܚܕ̇ܘܼܢ ܬܲܪ̈ܥܹܐ ܒܫܘܼ̈ܩܹܐ: ܒܫܲܦܠܘܼܬ̣ܵܐ ܕܩܵܠܵܐ ܕܛܲܚܵـ̈ـܢܵܬ̣ܵܐ. ܘܲܢܩܘܼܡ ܠܩܵܠܵܐ ܕܨܸܦܪܹ̈ܐ. ܘܢܸܬ̣ܡܲـ̈ـܟ̇ܟ̣ܵܢ ܟܠ ܒ̈ܢܵܬ̣ ܫܘܼܒ̣ܚܵܐ.
ܗ:ܘܐܵܦ ܡ̣ܢ ܪܵܘܡܵܐ ܢܸܕܼܚܲܠ ܘܢܸܬ̇ܬܙܝܼܥ ܒܐܘܼܪ̈ܚܵܬܹܗ. ܘܢܸܒܲܥ ܥܠܵܘܗܝ ܫܲܗܪܵܐ. ܘܢܲܦܪܲܥ ܫܵܪܕܵܐ. ܘܢܸܣܓܸ̇ܐ ܩܲܡܨܵܐ: ܘܬܸܬ̣ܒܲܕܲܪ ܩܲܦܵܪ. ܘܬܸܒ̣ܛܲܠ ܒܵܝܫܵܢܘܼܬ̣ܵܐ. ܡܸܛܠ ܕܐܵܙܹ̇ܠ ܒܲܪܢܵܫܵܐ ܠܒܹܝܬ̣ ܥܲܡܠܹܗ. ܘܐܸܬ̣ܟ̇ܪܸܟ̣ܘ ܒܫܘܼܩܹ̈ܐ ܡܲܪ̈ܩܕܼܵܢܹܐ.
ܘ:ܥܲܕܼܠܵܐ ܢܸܬ̣ܦ̱ܣܸܩ ܒܚܸܠ ܟܸܣܦܵܐ. ܘܢܸܫܬ̇ܚܸܩ ܚܲܙܘܼܪ ܕܲܗܒ̣ܵܐ. ܘܬܸܬ̇ܒܲܪ ܩܘܼܠܬ̣ܵܐ ܥܲܠ ܡܲܒ̇ܘܼܥܵܐ. ܘܬܸܪܗܲܛ ܓܝܼܓ̣ܠܵܐ ܥܲܠ ܒܹܪܵܐ.
ܙ:ܘܢܸܗܦܘܿܟ ܥܲܦܪܵܐ ܠܐܲܪܥܵܐ ܐܲܝܟ ܕܲܗܘ̤ܵܐ. ܘܪܘܼܚܵܐ ܬܸܗܦܘܿܟ ܠܘܵܬ̣ ܡܵܪܝܵܐ ܕܝܲܗ̄ܒ̣ܵܗ̇.
ܚ:ܗܒܸܠ ܗܸܒ̣̈ܠܝܼܢ: ܐܵܡܲܪ ܩܘܿܗܠܲܬ̣. ܗܒܸܠ ܗܒ̣̈ܠܝܼܢ: ܟܠ ܡܸܕܹ̇ܡ ܗܸܒ̣ܠܵܐ.
ܛ:ܘܝܲܬ̇ܝܼܪ ܕܲܗܘ̤ܵܐ ܩܘܿܗܠܲܬ̣ ܚܲܟ̇ܝܼܡܵܐ. ܕܡܲܠܸܦ ܗ̄ܘܼܵܐ ܝܼܕܲܥܬ̣ܵܐ ܠܥܲܡܵܐ. ܘܨܵܬ̣ ܘܒܲܕܸ̇ܩ̣: ܘܐܲܬ̣ܩܸܢ ܡܲܬ̣̈ܠܹܐ ܣܲܓ̇ܝܼ̈ܐܹܐ.
ܝ:ܣܲܓ̇ܝܼ ܒܥ̣ܵܐ ܩܘܿܗܠܲܬ̣ ܠܡܸܫܟܵܚܘܼ ܦܸܬ̣ܓ̣ܵܡܹ̈ܐ ܕܨܸܒ̣ܝܵܢܵܐ. ܘܲܟ̣ܬܲܒ̣ ܒܩܘܼܫܬܵܐ ܦܸܬ̣ܓ̣ܵܡܲܝ̈ ܩܘܼܫܬܵܐ.
ܝܐ:ܡܸܠܲܝ̈ ܚܲܟ̇ܝܼܡܹ̈ܐ ܐܲܝܟ ܙܵܩܘܿܬܹ̈ܐ: ܘܐܲܝܟ ܣܸ̈ܟܹ̇ܐ ܕܲܩܒ̣̈ܝܼܥܵܢ. ܡܵܪ̈ܲܝ ܐܸܣܟ̇ܦܵܬ̣ܵܐ ܐܸܬ̣̱ܝܼܗܸܒ̣. ܡ̣ܢ ܪܵܥܝܵܐ ܚܲܕܼ.
ܝܒ:ܘܝܲܬ̇ܝܼܪܵܐܝܼܬ̣ ܡܸܢܗܘܿܢ ܒܹܪܝ ܐܸܙܕܲܗ̄ܪ: ܠܡܸܟ̣ܬܲܒ̣ ܣܸܦܪܹ̈ܐ ܣܲܓ̇ܝܼ̈ܐܹܐ ܠܲܝܬ̇ ܣܘܿܦ. ܘܡܲܡܠܠܵܐ ܣܲܓ̇ܝܼܐܵܐ: ܠܹܐܘܬ̣ܵܐ ܗ̄ܝܼ ܕܒܸܣܪܵܐ.
ܝܓ:ܐ̄ܚܪܹܝܬܹ̇ܗ ܕܦܸܬ̣ܓ̣ܵܡܵܐ ܒܣܵܟܹܗ ܟܠ ܫܡܲܥ. ܘܡ̣ܢ ܩܕܼܵܡ ܡܵܪܝܵܐ ܕܚܲܠ. ܘܦܘܼܩܕܵܢܵܘ̈ܗܝ ܛܲܪ. ܡܸܛܠ ܕܗܵܢܵܘ ܕܡ̣ܢ ܐܘܼܡܵܢܵܐ ܚܲܕܼ ܐܸܬ̣̱ܝܼܗܸܒ̣ ܟܠ ܐ̄ܢܵܫ.
ܝܕ:ܡܸܛܠ ܕܟ̣ܠ ܥܒ̣ܵܕܼܵܐ ܡܵܪܝܵܐ ܡܲܥܸܠ ܒܕܼܝܼܢܵܐ: ܥܲܠ ܟܠ ܕܲܟ̣ܣܸܐ ܘܲܓ̣ܠܸܐ: ܐܸܢ ܛܵܒ̣ ܘܐܸܢ ܒܝܼܫ.
|
|