ܟܬܒ̣ܐ ܕܚܙܩܝܼܐܝܠ

ܩܹܦܵܠܹܐܘܿܢ: ܐ.

ܐ: ܘܲܗ̤ܘܵܐ ܒܲܫܢܲܬ̣ ܬܠܵܬ̣ܝܼܢ ܒܚܲܡܸܫܬܵܐ ܒܝܲܪܚܵܐ ܪܒ̣ܝܼܥܵܝܵܐ: ܘܐܸܢܵܐ ܒܓ̣ܵܘ ܫܒ̣ܝܼܬ̣ܵܐ ܗ̄ܘܹ̇ܝܬ̣: ܥܲܠ ܢܗܲܪ ܟܒܲܪ: ܘܐܸܬ̣ܦܬܲܚܘ ܫܡܲܝܵܐ: ܘܲܚܙܹ̇ܝܬ̣ ܚܸܙܘܵܐ ܕܐܲܠܵܗܵܐ.

ܒ:ܒܚܲܡܸܫܬܵܐ ܒܝܲܪܚܵܐ: ܒܲܫܢܲܬ̣ ܚܲܡܸܫ ܕܲܫܒ̣ܝܼܬܹܗ ܕܝܘܿܝܵܟ̣ܝܼܢ ܡܲܠܟܵܐ ܕܲܝܗܘܼܕܼܵܐ.

ܓ:ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܚܲܙܩܝܼܐܹܝܠ ܒܲܪ ܒܘܿܙܝܼ ܟܵܗܢܵܐ: ܒܐܲܪܥܵܐ ܕܟܲܠܕܼܵܝܹ̈ܐ ܥܲܠ ܢܗܲܪ ܟܒܲܪ: ܘܲܗܘ̤ܵܬ̣ ܥܠܲܝ ܬܲܡܵܢ ܐܝܼܕܹܗ ܕܡܵܪܝܵܐ.

ܕ:ܘܲܚܙܹ̇ܝܬ̣ ܘܗܵܐ ܪܘܼܚܵܐ ܕܥܲܠܥܵܠܵܐ ܐܵܬ̣ܝܵܐ ܡ̣ܢ ܓܲܪܒ̇ܝܵܐ: ܥܢܵܢܵܐ ܪܲܒ̇ܬ̣ܵܐ: ܘܢܘܼܪܵܐ ܕܡܸܬ̣ܓܵܘܙܠܵܐ ܘܡܲܙ̱ܗܪܵܐ ܚܕܼܵܪܹܝܗ̇: ܘܡ̣ܢ ܓܵܘܵܗ̇ ܐܲܝܟ ܚܸܙܘܵܐ ܡ̣ܢ ܓܵܘ ܢܘܼܪܵܐ.

ܗ:ܘܡ̣ܢ ܓܵܘܵܗ̇ ܕܡܘܼܬ̣ܵܐ ܕܐܲܪܒܲܥ ܚܲܝ̈ܘܵܢ: ܘܗܵܢܵܘ ܚܸܙ̱ܘܗܹܝܢ: ܐܲܝܟ ܕܡܘܼܬ̣ܵܐ ܕܲܒ̣ܢܲܝ̈ܢܵܫܵܐ.

ܘ:ܘܐܲܪܒܲܥ ܐܲܦܝܼ̈ܢ ܠܲܚܕܼܵܐ: ܘܐܲܪܒ̇ܥܵܐ ܓܸܦܝܼ̈ܢ.

ܙ:ܘܪܸ̈ܓ̣ܠܲܝܗܹܝܢ ܦܫ̈ܝܼܛܵܢ: ܘܦܲܪ̈ܣܵܬ̣ܵܐ ܕܪܸ̈ܓ̣ܠܲܝܗܹܝܢ: ܐܲܝܟ ܦܲܪ̈ܣܵܬ̣ܵܐ ܕܥܸܓ̣ܠܹ̈ܐ: ܘܡܲܒ̣ܪ̈ܩܵܢ ܐܲܝܟ ܢܚܵܫܵܐ ܕܡܲܒ̣ܪܸܩ.

ܚ:ܘܐܝܼܕܼܵܐ ܕܒܲܪܢܵܫܵܐ ܬܚܹܝܬ̣ ܓܸܦܲܝ̈ܗܹܝܢ ܡ̣ܢ ܐܲܪܒ̇ܥܵܐ ܓܲܒܲܝ̈ܗܹܝܢ: ܘܐܲܦܲܝ̈ܗܹܝܢ ܘܓܸܦܲܝ̈ܗܹܝܢ ܒܓܲܒܲܝ̈ܗܹܝܢ.

ܛ:ܘܓܸܦܲܝ̈ܗܹܝܢ ܢܲܩܝܼܦܝܼܢ ܗ̄ܘܼܵܘ ܚܲܕܼ ܠܚܲܕܼ: ܘܡܵܐ ܕܐܵܙܵܠ̄ـ̈ـܢ ܗ̄ܘܲܝ̈ ܠܘܼܩܒܲܠܗܹܝܢ ܐܵܙܵܠ̄ـ̈ـܢ ܗ̄ܘܲܝ̈: ܘܠܵܐ ܡܸܬ̣ܗܲܦ̈ܟܵܢ ܗ̄ܘܲܝ̈.

ܝ:ܘܲܕܼܡܘܼܬ̣ܵܐ ܕܐܲܦܲܝ̈ܗܹܝܢ: ܐܲܦܹ̈ܐ ܕܒܲܪܢܵܫܵܐ: ܘܐܲܦܹ̈ܐ ܕܐܲܪܝܵܐ ܒܓܲܒܲܝ̈ܗܹܝܢ: ܕܝܲܡܝܼܢܵܐ: ܘܐܲܦܹ̈ܐ ܕܬ̣ܵܘܪܵܐ: ܘܐܲܦܹ̈ܐ ܕܢܸܫܪܵܐ: ܒܓܲܒܲܝ̈ܗܹܝܢ ܕܣܸܡܵܠܵܐ.

ܝܐ:ܘܐܲܦܲܝ̈ܗܹܝܢ ܘܓܸܦܲܝ̈ܗܹܝܢ ܦܪܝܼܣܝܼܢ ܗ̄ܘܼܵܘ ܡ̣ܢ ܠܥܸܠ: ܬܪܹܝܢ ܢܲܩܝܼܦܝܼܢ ܚܲܕܼ ܠܚܲܕܼ: ܘܲܬ̣ܪܹܝܢ ܡܟܲܣܹܝܢ ܓܘܼܫ̱ܡܗܹܝܢ.

ܝܒ:ܘܠܘܩܒܲܠܗܹܝܢ ܐܵܙܵܠ̄ـ̈ـܢ ܗ̄ܘܲܝ̈ ܠܐܲܬ̣ܪܵܐ ܕܐܵܙ̇ܠ̄ܐ ܗ̄ܘܼܵܬ̣ ܪܘܼܚܵܐ: ܘܠܵܐ ܡܸܬ̣ܗܲܦ̈ܟܵܢ ܗ̄ܘܲܝ̈.

ܝܓ:ܘܲܕܼܡܘܼܬ̣ ܕܚܲܝ̈ܘܵܬ̣ܵܐ: ܐܲܝܟ ܚܸܙܘܵܐ ܕܓ̣ܘܼܡܪܹ̈ܐ ܕܢܘܼܪܵܐ ܕܝܵܩ̈ܕܵܢ: ܘܐܲܝܟ ܚܸܙܘܵܐ ܕܠܲܡܦܹܝܕܼܵܐ ܡܗܲܠܟ̣ܵܐ ܗ̄ܘܼܵܬ̣ ܒܹܝܬ̣ ܚܲܝ̈ܘܵܬ̣ܵܐ: ܘܡܲܙ̱ܗܪܵܐ ܗ̄ܘܼܵܬ̣ ܢܘܼܪܵܐ: ܘܒܲܪܩܵܐ ܢܵܦܹ̇ܩ ܗ̄ܘܼܵܐ ܡܸܢܵܗ̇.

ܝܕ:ܘܚܲܝ̈ܘܵܬ̣ܵܐ ܪܵܗܛܵܢ ܗ̄ܘܲܝ̈ ܘܠܵܐ ܡܸܬ̣ܦܲܢ̈ܝܵܢ ܗ̄ܘܲܝ̈: ܐܲܝܟ ܚܸܙܘܵܐ ܕܙܝܼܩܬܵܐ.

ܝܗ:ܘܲܚܙܹ̇ܝܬ̣ ܚܲܝ̈ܘܵܬ̣ܵܐ: ܘܗܵܐ ܓܝܼ̈ܓ̣ܠܵܐ ܒܐܲܪܥܵܐ ܥܲܠ ܓܸܢ̄ܒ̣ ܐܲܪ̈ܒ̇ܥܵܬܲܝܗܹܝܢ ܚܲܝ̈ܘܵܬ̣ܵܐ.

ܝܘ:ܘܚܸܙܘܵܐ ܕܓ̣ܝܼ̈ܓ̣ܠܹܐ ܘܲܥܒ̣ܵܕܼܗܹܝܢ: ܐܲܝܟ ܚܸܙܘܵܐ ܕܬ̣ܵܪܫܝܼܫ: ܘܲܕܼܡܘܼܬ̣ܵܐ ܚܕܼܵܐ ܠܐܲܪ̈ܒ̇ܥܵܬܲܝܗܹܝܢ: ܘܚܸܙ̱ܘܗܹܝܢ ܘܲܥܒ̣ܵܕܗܹܝܢ ܐܲܝܟ ܓܝܼܓ̣ܠܵܐ ܒܓ̣ܵܘ ܓܝܼܓ̣ܠܵܐ.

ܝܙ:ܥܲܠ ܐܲܪܒ̇ܥܵܐ ܓܲܒܲܝ̈ܗܹܝܢ ܐܵܙܵܠ̄ـ̈ـܢ ܗ̄ܘܲܝ̈ ܘܠܵܐ ܡܸܬ̣ܗܲܦ̈ܟܵܢ ܗ̄ܘܲܝ̈: ܘܠܲܐܬ̣ܪܐ ܕܦܵܢ̇ܝܵܐ ܗ̄ܘܼܵܬ̣ ܪܹܫܵܝܬ̇ܗܹܝܢ ܠܡܹܐܙܲܠ ܒܵܬ̣ܪܵܗ̇ ܐܵܙܵܠ̄ܢ ܗ̄ܘܲܝ̈ ܘܠܵܐ ܡܸܬ̣ܗܲܦ̈ܟܵܢ ܗ̄ܘܲܝ̈.

ܝܚ:ܘܪܵܘܡܵܐ ܐܝܼܬ̣ ܠܚܲܨܲܝ̈ܗܹܝܢ ܘܚܵܙ̈ܝܵܢ ܗ̄ܘܲܝ̈: ܘܚܲܨܲܝ̈ܗܹܝܢ ܡܠܸܐ ܥܲܝܢܹ̈ܐ ܗ̄ܘܼܵܐ: ܕܐܲܪ̈ܒ̇ܥܵܬܲܝܗܹܝܢ ܟܲܕܼ ܡܸܬ̣ܟܲܪ̈ܟܵܢ.

ܝܛ:ܘܟܲܕܼ ܐܵܙܵܠ̄ـ̈ـܢ ܗ̄ܘܲܝ̈ ܚܲܝ̈ܘܵܬ̣ܵܐ: ܐܵܙܵܠ̄ـ̈ـܢ ܗ̄ܘܲܝ̈ ܓܝܼ̈ܓ̣ܠܹܐ ܥܲܡܗܹܝܢ: ܘܡܵܐ ܕܫܵܩ̈ܠܵܢ ܗ̄ܘܲܝ ܚܲܝ̈ܘܵܬ̣ܵܐ ܡ̣ܢ ܐܲܪܥܵܐ: ܫܵܩ̈ܠܵܢ ܗ̄ܘܲܝ̈ ܓܝܼ̈ܓ̣ܠܹܐ ܥܲܡܗܹܝܢ.

ܟܟ:ܘܠܲܐܬܲܪ ܕܐܵܙܵܠ̄ܐ ܗ̄ܘܼܵܬ̣ ܪܘܼܚܵܐ ܐܵܙܵܠ̄ـ̈ـܢ ܗ̄ܘܲܝ̈: ܘܓ̣ܝܼ̈ܓ̣ܠܹܐ ܫܵܩ̈ܠܵܢ ܗ̄ܘܲܝ̈ ܥܲܡܗܹܝܢ: ܡܸܛܠ ܕܪܘܼܚܵܐ ܚܲܝܬ̣ܵܐ ܐܝܼܬ̣ ܗ̄ܘܼܵܬ̣ ܒܓ̣ܝܼ̈ܓ̣ܠܹܐ.

ܟܐ:ܘܡܵܐ ܕܐܵܙܵܠ̄ܢ ܗ̄ܘܲܝ̈ ܐܵܙܵܠ̄ـ̈ـܢ ܗ̄ܘܲܝ̈: ܘܡܵܐ ܕܩܵܝ̈ܡܵܢ ܗ̄ܘܲܝ̈ ܩܵܝ̈ܡܵܢ ܗ̄ܘܲܝ̈: ܘܡܵܐ ܕܫܵܩ̈ܠܵܢ ܗ̄ܘܲܝ̈ ܡ̣ܢ ܐܲܪܥܵܐ: ܫܵܩ̈ܠܵܢ ܗ̄ܘܲܝ̈ ܓܝܼ̈ܓ̣ܠܹܐ ܥܲܡܗܹܝܢ. ܡܸܛܠ ܕܪܘܼܚܵܐ ܚܲܝܬ̣ܵܐ ܐܝܼܬ̣ ܗ̄ܘܼܵܬ̣ ܒܓ̣ܝܼ̈ܓ̣ܠܹܐ.

ܟܒ:ܘܲܡܬܝܼܚ ܠܥܸܠ ܡ̣ܢ ܪܹܫܵܐ ܕܚܲܝ̈ܘܵܬ̣ܵܐ: ܐܲܝܟ ܕܡܘܼܬ̣ܵܐ ܕܚܸܙܘܵܐ ܕܲܩܪܘܿܣܛܸܠܘܿܣ ܕܚܝܠܵܐ.

ܟܓ:ܘܲܬ̣ܚܘܿܬ̣ܵܘܗܝ ܓܸܦܲܝܗܹ̈ܝܢ ܬܪܝܼܨܝܼܢ ܗ̄ܘܼܵܘ ܚܲܕܼ ܠܘܼܩܒܲܠ ܚܲܕܼ: ܡ̣ܢ ܠܥܸܠ ܘܡ̣ܢ ܠܬܲܚܬ̇: ܬܪܹܝܢ ܡܟܲܣܹܝܢ ܠܗܹܝܢ: ܘܲܬ̣ܪܹܝܢ ܡܟܲܣܹܝܢ ܓܘܼܫ̱ܡܗܹܝܢ.

ܟܕ:ܘܫܸܡܥܹ̇ܬ̣ ܩܵܠܵܐ ܕܓܸܦܲܝ̈ܗܹܝܢ: ܐܲܝܟ ܩܵܠܵܐ ܕܡܲـ̈ـܝܵܐ ܣܲܓ̇ܝܼ̈ܐܹܐ: ܘܐܲܝܟ ܩܵܠܵܐ ܕܐܲܠܵܗܵܐ ܡܵܐ ܕܐܵܙܵܠ̄ـ̈ـܢ ܗ̄ܘܲܝ̈: ܘܐܲܝܟ ܩܵܠܵܐ ܕܡܲܡܠܠܵܐ ܒܓ̣ܵܘ ܡܲܫܪܝܼܬ̣ܵܐ: ܘܡܵܐ ܕܩܵܝ̈ܡܵܢ ܗ̄ܘܲܝ̈ ܡܲܫ̱̈ܠܝܵܢ ܗ̄ܘܲܝ̈ ܓܸܦܲܝܗܹ̈ܝܢ.

ܟܗ:ܘܗܵܘܹ̇ܐ ܩܵܠܵܐ ܥܲܠ ܡܲܛܠܠܵܐ ܕܲܠܥܸܠ ܡ̣ܢ ܪܹ̈ܫܲܝܗܹܝܢ: ܘܡܵܐ ܕܩܵܝ̈ܡܵܢ ܗ̄ܘܲܝ̈ ܡܲܫ̱̈ܠܝܵܢ ܗ̄ܘܲܝ̈ ܓܸܦܲܝܗܹ̈ܝܢ.

ܟܘ:ܘܲܠܥܸܠ ܡ̣ܢ ܡܲܛܠܠܵܐ ܕܲܠܥܸܠ ܡ̣ܢ ܪܹ̈ܫܲܝܗܹܝܢ: ܐܲܝܟ ܚܸܙܘܵܐ ܕܟܹܐܦܵܐ ܕܣܲܦܝܼܠܵܐ: ܘܐܲܝܟ ܕܡܘܼܬ̣ܵܐ ܕܟ̣ܘܼܪܣܝܵܐ: ܘܥܲܠ ܕܡܘܼܬ̣ܵܐ ܕܟ̣ܘܼܪܣܝܵܐ: ܐܲܝܟ ܕܡܘܼܬ̣ܵܐ ܘܐܲܝܟ ܚܸܙܘܵܐ ܕܒܲܪܢܵܫܵܐ ܐܝܼܬ̣ ܥܠܵܘܗܝ ܡ̣ܢ ܠܥܸܠ.

ܟܙ:ܘܲܚܙܹ̇ܝܬ̣ ܐܲܝܟ ܚܸܙܘܵܐ ܕܐܲܠܵܗܵܐ: ܘܐܲܝܟ ܚܸܙܘܵܐ ܕܢܘܼܪܵܐ ܡ̣ܢ ܠܓ̣ܵܘ ܚܵܕܲܪ ܠܹܗ: ܡ̣ܢ ܚܸܙܘܵܐ ܕܚܲܨܵܘ̈ܗܝ ܘܲܠܥܸܠ: ܘܡ̣ܢ ܚܲܨܵܘ̈ܗܝ ܘܲܠܬܲܚܬ̇: ܚܙܹ̇ܝܬ̣ ܐܲܝܟ ܚܸܙܘܵܐ ܕܢܘܼܪܵܐ: ܘܙܲܗܪܵܐ ܟܵܪܹܟ ܠܹܗ.

ܟܚ:ܐܲܝܟ ܚܸܙܘܵܐ ܕܩܸܫܬܵܐ ܕܗܵܘ̇ܝܵܐ ܒܲܥܢܵܢܹ̈ܐ ܒܝܵܘܡܵܐ ܕܡܸܛܪܵܐ: ܗܵܟܲܢܵܐ ܗ̄ܘܼܵܐ ܚܸܙܘܵܐ ܕܙܲܗܪܵܐ ܕܟ̣ܵܪܹܟ ܠܹܗ. ܘܗܵܟܲܢܵܐ ܗ̄ܘܼܵܐ ܕܲܕܼܡܘܼܬ̣ܵܐ ܕܐܝܼܩܵܪܹܗ ܕܡܵܪܝܵܐ.

ܟܛ:ܘܲܚܙܹ̇ܝܬܹܗ ܘܢܸܦܠܹ̇ܬ̣ ܥܲܠ ܐܲܦܲܝ̈: ܘܫܸܡܥܹ̇ܬ̣ ܩܵܠܵܐ ܕܲܡܡܲܠܸܠ.

ܩܹܦܵܠܹܐܘܿܢ:ܒ.

ܐ:ܘܐܸܡܲܪ ܠܝܼ: ܒܲܪܢܵܫܵܐ: ܩܘܼܡ ܥܲܠ ܪܸ̈ܓ̣ܠܲܝܟ ܐܹܡܲܠܸܠ ܥܲܡܵܟ.

ܒ:ܘܥܸܠܲܬ̤ ܒܝܼ ܪܘܼܚܵܐ ܟܲܕܼ ܡܡܲܠܸܠ ܥܲܡܝ: ܘܐܲܩܝܼܡܬܲܢܝ ܥܲܠ ܪܸ̈ܓ̣ܠܲܝ: ܘܫܸܡ̇ܥܹܬ̣ ܕܲܡܡܲܠܸܠ ܥܲܡܝ.

ܓ:ܘܐܸܡܲܪ ܠܝܼ: ܒܲܪܢܵܫܵܐ: ܡܫܲܕܲܪ ܐ̄ܢܵܐ ܠܵܟ ܥܲܠ ܒܢܲܝ̈ ܝܑܼܣܪܵܝܹܠ: ܥܲܠ ܥܲܡܵܐ ܡܵܪܘܿܕܼܵܐ ܕܲܡ̣ܪܲܕܼܘ ܥܠܲܝ ܗܸܢܘܿܢ ܘܐܲܒ̣ܵܗܲܝ̈ܗܘܿܢ: ܘܐܲܥܠܝܼܘ ܒܝܼ ܥܕܲܡܵܐ ܠܝܵܘܡܵܢܵܐ.

ܕ:ܘܥܲܠ ܒܢܲـ̈ـܝܵܐ ܕܩܲܫ̈ܝܵܢ ܐܲܦܲܝ̈ܗܘܿܢ: ܘܥܲܫܝܼܢ ܠܸܒ̇ܗܘܿܢ ܡܫܲܕܲܪ ܐ̄ܢܵܐ ܠܵܟ: ܐܹܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܗ:ܟܒܲܪ ܢܸܫ̱ܡܥܘܼܢ ܘܲܢܙܘܼܥܘܼܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ: ܘܢܸܕ̇ܥܘܼܢ ܕܲܢܒ̣ܝܼܵܐ ܐܲܢ̄ܬ̇ ܒܲܝܢܵܬ̣ܗܘܿܢ.

ܘ:ܘܐܲܢ̄ܬ̇ ܒܲܪܢܵܫܵܐ ܬܸܕܼܚܲܠ ܡܸܢܗܘܿܢ: ܘܡ̣ܢ ܡܸܠܲܝ̈ܗܘܿܢ ܠܵܐ ܬܙܘܼܥ: ܕܣܵܪܒ̇ܝܼܢ ܘܡܲܣܠܹܝܢ ܠܵܟ: ܡܸܛܠ ܕܒܲܝܢܵܬ̣ ܥܩܲܪ̈ܒܹܐ ܥܵܡܲܪ ܐܲܢ̄ܬ̇: ܠܵܐ ܬܸܕܼܚܲܠ ܡ̣ܢ ܡܸܠܲܝ̈ܗܘܿܢ: ܘܡ̣ܢ ܐܲܦܲܝ̈ܗܘܿܢ ܠܵܐ ܬܙܘܼܥ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

ܙ:ܐܸܠܵܐ ܐܸܡܲܪ ܠܗܘܿܢ ܦܸܬ̣ܓ̣ܵܡܲܝ̈: ܟܒܲܪ ܢܸܫ̱ܡܥܘܼܢ ܘܲܢܙܘܼܥܘܼܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

ܚ:ܐܲܢ̄ܬ̇ ܕܹܝܢ ܒܵܪܢܵܫܵܐ: ܫܡܲܥ ܡܸܕܸ̇ܡ ܕܐܵܡܲܪ ܐ̄ܢܵܐ ܠܵܟ: ܠܵܐ ܬܸܗܘܹܐ ܡܲܪܡܪܵܢ ܐܲܝܟ ܒܲܝܬܵܐ ܡܡܲܪܡܪܵܢܵܐ: ܐܸܠܵܐ ܦܬܲܚ ܦܘܼܡܵܟ: ܘܐܲܟ̣ܘܿܠ ܡܸܕܸ̇ܡ ܕܝܵܗܹ̇ܒ̣ ܐ̄ܢܵܐ ܠܵܟ.

ܛ:ܘܲܚܙܹ̇ܝܬ̣ ܘܗܵܐ ܐܝܼܕܼܵܐ ܐܸܬ̣ܦܲܫܛܲܬ̤ ܠܘܵܬ̣: ܘܐܝܼܬ̣ ܒܵܗ̇ ܟܸܪܟܵܐ ܕܣܸܦܪܵܐ.

ܝ:ܘܦܲܫܛܹܗ ܩܕܼܵܡܲܝ: ܘܲܟ̣ܬܝܼܒ̣ ܡ̣ܢ ܩܕܼܵܡܵܘܗܝ ܘܡ̣ܢ ܒܸܣܬ̇ܪܹܗ: ܘܲܟ̣ܬ̣ܵܝܼ̈ܒ̣ܵܢ ܒܹܗ ܩܝܼ̈ܢܵܬ̣ܵܐ: ܘܚܸܫ̈ܒܵܬ̣ܵܐ: ܘܐܘܿܠܝܵـ̈ـܬ̣ܵܐ.

ܩܹܦܵܠܹܐܘܿܢ:ܓ.

ܐ:ܘܐܸܡܲܪ ܠܝܼ: ܒܲܪܢܵܫܵܐ: ܡܸܕܸ̇ܡ ܕܡܸܫܟܲܚ ܐܲܢ̄ܬ̇ ܐܲܟ̣ܘܿܠ: ܐܲܟ̣ܘܿܠܲܝܗܝ ܠܟܸܪܟܵܐ ܗܵܢܵܐ: ܘܙܸܠ ܡܲܠܸܠ ܥܲܡ ܒܢܲܝ̈ ܝܑܼܣܪܵܝܹܠ.

ܒ:ܘܦܸܬ̣ܚܹ̇ܿܬ̣ ܦܘܼܡܝ ܘܐܵܘܟ̇ܠܲܢܝ ܟܸܪܟܵܐ ܗܵܘܿ.

ܓ:ܘܐܸܡܲܪ ܠܝܼ: ܒܲܪܢܵܫܵܐ: ܡܠܝܼ ܟܲܪܣܵܟ ܘܲܡܥܲܝ̈ܟ ܡ̣ܢ ܟܸܪܝܵܐ ܗܵܢܵܐ ܕܝܵܗܹ̇ܒ̣ ܐ̄ܢܵܐ ܠܵܟ: ܘܐܸܟܲܠܬܹ̇ܗ ܘܲܗܘ̤ܵܐ ܒܦܘܼܡܝ ܐܲܝܟ ܕܸܒ̣ܫܵܐ ܚܲܠܝܵܐ.

ܕ:ܘܐܸܡܲܪ ܠܝܼ: ܒܲܪܢܵܫܵܐ: ܙܸܠ ܥܘܿܠ ܠܲܫܒ̣ܝܼܬ̣ܵܐ ܠܘܵܬ̣ ܒܢܲܝ̈ ܝܑܼܣܪܵܝܹܠ: ܘܐܸܡܲܪ ܠܗܘܿܢ ܦܸܬ̣ܓ̣ܵܡܲܝ̈.

ܗ:ܡܸܛܠ ܕܠܵܐ ܗ̄ܘܼܵܐ ܥܲܠ ܥܲܡܵܐ ܥܲܡܝܼܩ ܡܲܡܠܠܵܐ ܘܲܠܥܸܠ ܠܸܫܵܢܵܐ ܫܲܕܲܪܬܵܟ: ܥܲܠ ܕܒܹܝܬ̣ ܝܑܼܣܪܵܝܹܠ.

ܘ:ܘܐܵܦܠܵܐ ܥܲܠ ܥܲܡܡܹ̈ܐ ܣܲܓ̇ܝܼ̈ܐܹܐ ܕܠܵܐ ܫܵܡܲܥ ܐܲܢ̄ܬ̇ ܡܲܡܠܲܠܗܘܿܢ: ܘܐܸܠܘܼ ܥܠܲܝܗܘܿܢ ܫܲܕܲܪܬܵܟ ܫܵܡ̇ܥܝܼܢ ܗ̄ܘܼܵܘ ܠܵܟ.

ܙ:ܕܒܹܝܬ̣ ܝܑܼܣܪܵܝܹܠ ܕܹܝܢ ܠܵܐ ܫܵܡ̇ܥܝܼܢ ܠܵܟ: ܡܸܛܠ ܕܠܵܐ ܨܵܒܹ̇ܝܢ ܠܡܸܫ̱ܡܥܲܢܝ ܕܟ̣ܠܹܗ ܓܹܝܪ ܒܹܝܬ̣ ܝܑܼܣܪܵܝܹܠ: ܥܲܫܝܼܢ ܒܹܝܬ̣ ܥܲܝܢܲܝ̈ܗܘܿܢ ܘܲܩܫܸܐ ܠܸܒ̇ܗܘܿܢ.

ܚ:ܗܵܐ ܐܲܥܫܢܹ̇ܬ̣ ܐܲܦܲܝ̈ܟ ܠܘܼܩܒܲܠ ܐܲܦܲܝ̈ܗܘܿܢ: ܘܒܹܝܬ̣ ܥܲܝܢܲܝ̈ܟ ܐܲܫ̇ܪܹܬ̣ ܠܘܼܩܒܲܠ ܒܹܝܬ̣ ܥܲܝܢܲܝ̈ܗܘܿܢ.

ܛ:ܐܲܝܟ ܫܵܡܝܼܪܵܐ ܕܥܲܫܝܼܢ ܡ̣ܢ ܛܲܪܵܢܵܐ ܥܸܒ̣ܕܹ̇ܬ̣ ܒܹܝܬ̣ ܥܲܝܢܲܝ̈ܟ: ܠܵܐ ܬܸܕܼܚܲܠ ܡܸܢܗܘܿܢ: ܘܠܵܐ ܬܙܘܼܥ ܡ̣ܢ ܩܕܼܵܡܲܝܗܘܿܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

ܝ:ܘܐܸܡܲܪ ܠܝܼ: ܒܲܪܢܵܫܵܐ: ܟܠ ܦܸܬ̣ܓ̣ܵܡܲܝ̈ ܕܐܵܡܲܪ ܐ̄ܢܵܐ ܠܵܟ ܩܲܒܸ̇ܠ ܒܠܸܒܵܟ ܘܲܫܡܲܥ ܒܐܸܕܼܢܲܝ̈ܟ.

ܝܐ:ܘܙܸܠ ܥܘܿܠ ܠܲܫܒ̣ܝܼܬ̣ܵܐ ܠܘܵܬ̣ ܒܢܲܝ̈ ܥܲܡܵܟ: ܘܡܲܠܸܠ ܥܲܡܗܘܿܢ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܒܲܪ ܢܸܫ̱ܡܥܘܼܢ ܘܲܢܙܘܼܥܘܼܢ.

ܝܒ:ܘܲܫܩܲܠܬܲܢܝ ܪܘܼܚܵܐ: ܘܫܸܡ̇ܥܹܬ̣ ܒܵܬܲܪܝ ܩܵܠܵܐ ܕܙܵܘܥܵܐ ܪܲܒܵܐ ܕܐܵܡܲܪ: ܒܪܝܼܟ̣ܘܼ ܐܝܼܩܵܪܹܗ ܕܡܵܪܝܵܐ ܡ̣ܢ ܐܲܬ̣ܪܹܗ.

ܝܓ:ܘܩܵܠܵܐ ܕܓܸܦܹ̈ܐ ܕܚܲܝ̈ܘܵܬ̣ܵܐ ܕܛܵܪܦܝܼܢ ܚܲܕܼ ܠܚܲܕܼ: ܘܩܵܠܵܐ ܕܓ̣ܝܼ̈ܓ̣ܠܹܐ ܥܲܡܗܘܿܢ: ܘܩܵܠܵܐ ܕܙܵܘܥܵܐ ܪܲܒܵܐ.

ܝܕ:ܘܲܫܩܲܠܬܲܢܝ ܪܘܼܚܵܐ ܘܐܵܘܒܸ̇ܠܬܲܢܝ: ܘܐܸܙܹ̇ܠ̄ܬ̣ ܒܚܹܐܦܵܐ ܕܪܘܼܚܝ: ܘܐܝܼܕܹܗ ܕܡܵܪܝܵܐ ܥܸܫܢܲܬ̤ ܥܠܲܝ.

ܝܗ:ܘܥܸܠܹ̇ܬ̣ ܠܲܫܒ̣ܝܼܬ̣ܵܐ ܠܬܸܠܐܟ̣ܝܼܒ̣ ܕܝܵܬܹ̇ܒ̣ ܥܲܠ ܢܗܲܪ ܟܒܲܪ: ܘܝܸܬ̣ܒܹ̇ܬ̣ ܬܲܡܵܢ ܫܲܒ̣ܥܵܐ ܝܵܘ̈ܡܝܼܢ: ܟܲܕܼ ܬܲܡܝܼܗ ܐ̄ܢܵܐ ܒܲܝܢܵܬ̣ܗܘܿܢ.

ܝܘ:ܘܡ̣ܢ ܒܵܬܲܪ ܫܲܒ̣ܥܵܐ ܝܵܘ̈ܡܝܼܢ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܙ:ܒܲܪܢܵܫܵܐ: ܕܵܘܩܵܐ ܝܲܗ̄ܒ̣ܬܵܟ ܠܲܕܼܒܹܝܬ̣ ܝܑܼܣܪܵܝܹܠ: ܕܬܸܗܘܹܐ ܫܵܡܲܥ ܡ̣ܢ ܦܘܼܡܝ ܦܸܬ̣ܓ̣ܵܡܹ̈ܐ: ܘܲܬ̣ܙܲܗܲܪ ܐܸܢܘܿܢ ܡܹܢܝ.

ܝܚ:ܡܵܐ ܕܐܵܡܲܪ ܐ̄ܢܵܐ ܠܚܲܛܵܝܵܐ ܕܲܡܡܵܬ̣ ܬܡܘܼܬ̣: ܘܠܵܐ ܙܲܗܲܪܬܵܝܗܝ ܘܠܵܐ ܐܸܡܲܪܬ̇ ܠܹܗ ܠܚܲܛܵܝܵܐ ܕܢܸܙܕ̇ܗܲܪ ܡ̣ܢ ܐܘܼܪܚܹܗ ܘܢܸܚܹܐ: ܗܵܘܿ ܚܲܛܵܝܵܐ ܒܥܵܘܼܠܹܗ ܢܡܘܼܬ̣: ܘܲܕܼܡܹܗ ܡ̣ܢ ܐܝܼܕܼܵܟ ܐܸܬ̣ܒܲܥ.

ܝܛ:ܐܸܢ ܬܙܲܗܲܪ ܕܹܝܢ ܠܚܲܛܵܝܵܐ: ܘܠܵܐ ܢܸܗܦܘܿܟ ܡ̣ܢ ܚܛܝܼܬܹܗ ܘܡ̣ܢ ܐܘܼܪܚܹܗ ܒܫܝܼܬܵܐ: ܗ̤ܘ ܒܲܚܛܵܗܵܘ̈ܗܝ ܢܡܘܼܬ̣: ܘܐܲܢ̄ܬ̇ ܢܲܦ̮ܫܵܟ ܬܦܲܨܹܐ.

ܟܟ:ܘܟܲܕܼ ܙܲܕ̇ܝܼܩܵܐ ܢܸܗܦܘܿܟ ܡ̣ܢ ܙܲܕ̇ܝܼܩܘܼܬܹܗ ܘܢܸܥܒܸ̇ܕܼ ܥܵܘܼܠܵܐ: ܐܸܬܸ̇ܠ ܬܘܼܩ̱ܠܬ̣ܵܐ ܩܕܼܵܡܵܘܗܝ ܘܲܢܡܘܼܬ̣: ܥܲܠ ܕܠܵܐ ܙܲܗܲܪܬܵܝܗܝ ܒܲܚܛܵܗܵܘ̈ܗܝ ܢܡܘܼܬ̣: ܘܠܵܐ ܬܸܬ̇ܕ̇ܟܲܪ ܠܹܗ ܙܲܕ̇ܝܼܩܘܼܬܹܗ ܕܲܥܒܲܕܼ: ܘܲܕܼܡܹܗ ܡ̣ܢ ܐܝܼܕܲܝ̈ܟ ܐܸܬ̣ܒܲܥ.

ܟܐ:ܐܸܢ ܕܹܝܢ ܬܙܲܗܪ ܠܙܲܕ̇ܝܼܩܵܐ: ܕܠܵܐ ܢܸܚܛܹܐ ܘܠܵܐ ܚ̣ܛܵܐ: ܙܲܕ̇ܝܼܩܵܐ ܢܸܚܹܐ ܕܐܸܙܕ̇ܗܲܪ: ܘܐܲܢ̄ܬ̇ ܢܲܦ̮ܫܵܟ ܬܦܲܨܹܐ.

ܟܒ:ܘܲܗܘ̤ܵܬ̣ ܥܠܲܝ ܬܲܡܵܢ ܐܝܼܕܹܗ ܕܡܵܪܝܵܐ: ܘܐܸܡܲܪ ܠܝܼ: ܩܘܼܡ ܦܘܿܩ ܠܲܦܩܲܥܬ̣ܵܐ: ܘܬܲܡܵܢ ܐܹܡܲܠܸܠ ܥܲܡܵܟ.

ܟܓ:ܘܩܵܡܹ̇ܬ̣ ܢܸܦܩܹ̇ܬ̣ ܠܲܦܩܲܥܬ̣ܵܐ: ܘܬܲܡܵܢ ܩܵܐܹ̇ܡ ܗ̄ܘܼܵܐ ܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ: ܐܲܝܟ ܫܘܼܒ̣ܚܵܐ ܕܲܚܙܹ̇ܝܬ̣ ܥܲܠ ܢܗܲܪ ܟܒܲܪ: ܘܢܸܦܠܹ̇ܬ̣ ܥܲܠ ܐܲܦܲܝ̈.

ܟܕ:ܘܥܸܠܲܬ̤ ܒܝܼ ܪܘܼܚܵܐ: ܘܐܲܩܝܼܡܬܲܢܝ ܥܲܠ ܪܸ̈ܓ̣ܠܲܝ: ܘܡܲܠܸܠ ܥܲܡܝ ܘܐܸܡܲܪ ܠܝܼ: ܥܘܿܠ ܐܸܬ̣ܚܲܒ̣ܫ ܒܒܲܝܬܵܟ.

ܟܗ:ܘܐܲܢ̄ܬ̇ ܒܲܪܢܵܫܵܐ: ܗܵܐ ܪܵܡܹ̇ܝܢ ܥܠܲܝܟ ܫܸܫ̈ܠܵܬ̣ܵܐ: ܘܐܵܣܪܝܼܢ ܠܵܟ ܒܗܹܝܢ: ܕܠܵܐ ܬܸܦܘܿܩ ܒܲܝܢܵܬ̣ܗܘܿܢ.

ܟܘ:ܘܠܸܫܵܢܵܟ ܐܸܕܼܒܸ̇ܩ ܠܲܫܡܲܝ̈ ܚܸܟܵܟ: ܘܬܸܚܪܲܫ ܘܠܵܐ ܬܸܗܘܹܐ ܠܗܘܿܢ ܓܲܒ̣ܪܵܐ ܡܲܟ̇ܣܵܢܵܐ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

ܟܙ:ܘܡܵܐ ܕܲܡܡܲܠܸܠ ܐ̄ܢܵܐ ܥܲܡܵܟ: ܦܵܬܲܚ ܐ̄ܢܵܐ ܦܘܼܡܵܟ ܕܬܹܐܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܫܵܡܲܥ ܢܸܫܡܲܥ: ܘܲܕܼܙܵܐܲܥ̇: ܢܙܘܼܥ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

ܩܹܦܵܠܹܐܘܿܢ:ܕ.

ܐ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܣܲܒ̣ ܠܵܟ ܠܒܸܬܵܐ ܘܣܝܼܡܹܝܗ̇ ܩܕܼܵܡܲܝܟ: ܘܲܪܫܘܿܡ ܥܠܹܝܗ̇ ܡܕܼܝܼܢ̄ܬܵܐ ܐܘܿܪܸܫܠܸܡ.

ܒ:ܘܲܥܒܸܕܼ ܥܠܹܝܗ̇ ܐܘܼܠܨܵܢܵܐ: ܘܲܒ̣ܢܝܼ ܥܠܹܝܗ̇ ܩܲܠܩܘܼܡܹ̈ܐ: ܘܐܲܟ̣ܡܸܢ ܥܠܹܝܗ̇ ܟܡܹܐܢܹ̈ܐ: ܘܐܲܫܪܵܐ ܥܠܹܝܗ̇ ܡܲܫ̱ܪ̈ܝܵܬ̣ܵܐ: ܘܲܥܒܸܕܼ ܠܵܗ̇ ܙܘܹܝܕܢܹ̈ܐ ܟܲܕܼ ܚܵܕܼܪܵܐ.

ܓ:ܘܐܲܢ̄ܬ̇ ܣܲܒ̣ ܠܵܟ ܛܸܓܢܵܐ ܕܦܲܪܙܠܵܐ: ܘܲܥܒܸܕܲܝܗܝ ܐܸܣܬ̣ܵܐ ܕܦܲܪܙܠܵܐ ܒܲܝܢܲܝܟ ܠܲܡܕܼܝܼܢ̄ܬܵܐ: ܘܛܲܝܸܒ̣ ܐܲܦܲܝ̈ܟ ܥܠܹܝܗ̇: ܘܬܸܗܘܹܐ ܒܲܚܒ̣ܘܼܫܝܵܐ ܘܬܹܐܠܨܝܼܗ̇: ܗܵܕܹܐ ܐܵܬܹܐ ܗ̄ܝܼ ܠܲܕܼܒܹܝܬ̣ ܝܑܼܣܪܵܝܹܠ.

ܕ:ܘܐܲܢ̄ܬ̇ ܕܡܲܟ ܥܲܠ ܣܸܛܪܵܐ ܕܣܸܡܵܠܵܐ: ܘܣܝܼܡ ܥܵܘܼܠܵܐ ܕܒܹܝܬ̣ ܝܑܼܣܪܵܝܹܠ ܥܠܘܗܝ: ܡܸܢܝܵܢ ܝܵܘ̈ܡܵܬ̣ܵܐ ܕܕܼܵܡܹ̇ܟ ܐܲܢ̄ܬ̇ ܥܠܵܘܗܝ ܬܸܫܩܘܿܠ ܥܵܘܼܠܗܘܿܢ.

ܗ:ܘܐܸܢܵܐ ܝܸܗ̄ܒܹ̇ܬ̣ ܠܵܟ ܬܪܹܝܢ ܥܵܘ̈ܠܝܼܢ ܠܡܸܢܝܵܢܵܐ ܕܝܵܘ̈ܡܵܬ̣ܵܐ: ܬܠܵܬ̣ܡܵܐܐ ܘܬܸܫܥܝܼܢ ܝܵܘ̈ܡܝܼܢ: ܘܬܸܫܩܘܿܠ ܥܵܘܼܠܵܐ ܕܒܹܝܬ̣ ܝܑܼܣܪܵܝܹܠ.

ܘ:ܘܲܬ̣ܫܲܡܠܹܐ ܗܵܠܹܝܢ: ܘܬܸܕܼܡܲܟ ܥܲܠ ܣܸܛܪܵܟ ܕܝܲܡܝܼܢܵܐ: ܘܬܸܫܩܘܿܠ ܥܵܘܼܠܵܐ ܕܒܹܝܬ̣ ܝܑܼܗܘܼܕܼܵܐ ܐܲܪܒ̇ܥܝܼܢ ܝܵܘ̈ܡܝܼܢ: ܝܵܘܡܵܐ ܠܫܲܢ̄ܬܵܐ ܝܸܗ̄ܒܹ̇ܬ̣ ܠܵܟ.

ܙ:ܘܥܲܠ ܐܘܼܠܨܵܢܵܗ̇ ܕܐܘܿܪܸܫܠܸܡ ܬܛܲܝܸܒ̣ ܐܲܦܲܝ̈ܟ: ܘܲܕܼܪܵܥܵܟ ܬܲܥܫܸܢ: ܘܬܸܬ̣ܢܲܒܹ̇ܐ ܥܠܹܝܗ̇.

ܚ:ܗܵܐ ܐܲܪܡܝܼܬ̣ ܥܠܲܝܟ ܫܸܫ̈ܠܵܬ̣ܵܐ: ܘܠܵܐ ܬܸܬ̣ܗ̱ܦܲܟ ܡ̣ܢ ܣܸܛܪܵܟ ܠܣܸܛܪܵܟ: ܥܕܲܡܵܐ ܕܢܸܫ̱ܠܡܘܼܢ ܝܵܘ̈ܡܵܬ̣ܵܐ ܕܲܚܒ̣ܘܼܫܝܵܟ.

ܛ:ܘܣܲܒ̣ ܠܵܟ ܚܸܛܹ̈ܐ ܘܲܣܥܵܪܹ̈ܐ: ܘܓ̣ܘܼܡܹ̈ܐ ܘܲܛܠܵܦ̮̈ܚܹܐ: ܘܕܼܘܼܚܢܵܐ ܘܟ̣ܘܼ̈ܢܵܬ̣ܵܐ: ܘܐܲܪܡܵܐ ܐܸܢܘܿܢ ܒܡܵܐܢܵܐ ܚܲܕܼ: ܘܲܥܒܸܕܼ ܐܸܢܘܿܢ ܠܵܟ ܠܲܚܡܵܐ: ܠܡܸܢܝܵܢܵܐ ܕܝܵܘ̈ܡܵܬ̣ܵܐ ܕܕܼܵܡܹ̇ܟ ܐܲܢ̄ܬ̇ ܥܲܠ ܣܸܛܪܵܟ: ܬܠܵܬ̣ܡܵܐܐ ܘܬܸܫܥܝܼܢ ܝܵܘ̈ܡܝܼܢ ܬܹܐܟ̣ܠܝܼܘܗܝ.

ܝ:ܘܡܹܐܟ̣ܘܼܠܬܵܟ ܬܸܗܘܹܐ ܥܸܣܪܝܼܢ ܡܲܬ̣ܩܵܠܝܼ̈ܢ ܒܝܵܘܡܵܐ: ܡ̣ܢ ܥܸܕܵܢܵܐ ܠܥܸܕܵܢܵܐ.

ܝܐ:ܘܡܲـ̈ـܝܵܐ ܒܲܟ̣ܝܵܠܬܵܐ ܬܸܫܬܸ̇ܐ. ܚܕܼܵܐ ܡ̣ܢ ܫܸܬ̣ ܡ̈ܢܵܘܵܬܹܗ ܕܗܸܡܝܼܢܵܐ: ܡ̣ܢ ܥܸܕܵܢܵܐ ܠܥܸܕܵܢܵܐ ܬܸܫܬܹ̇ܐ.

ܝܒ:ܘܪܲܥܦܵܐ ܕܲܣܥܵܪܹ̈ܐ ܬܹܐܟ̣ܘܿܠ: ܕܲܡܛܵܘܝ ܥܲܠ ܟܒܲـ̈ـܝܵܐ ܕܒܲܪܢܵܫܵܐ ܠܥܹܢܲܝܗܘܿܢ.

ܝܓ:ܐܵܡܲܪ ܡܵܪܝܵܐ: ܗܵܟܲܢܵܐ ܢܹܐܟ̣ܠܘܼܢ ܒܢܲܝ̈ ܝܑܼܣܪܵܝܹܠ ܠܲܚ̱ܡܗܘܿܢ ܒܛܲܢܦܘܼܬ̣ܵܐ: ܒܹܝܬ̣ ܥܲܡܡܹ̈ܐ ܕܐܸܕܼܚܘܿܩ ܐܸܢܘܿܢ ܠܬܲܡܵܢ.

ܝܕ:ܘܐܸܡ̇ܪܹܬ̣ ܐܲܠܵܗܵܐ ܡܵܪܹܐ ܡܵܪ̈ܵܘܵܬ̣ܵܐ: ܢܲܦ̮ܫܝ ܠܵܐ ܗܘ̤ܵܬ̣ ܡܛܲܢܦܵܐ: ܘܲܕܼܡܲܪܥܵܐ ܘܕܲܬ̣ܒ̣ܝܼܪܵܐ ܠܚܝ̄ܘܬ̣ܵܐ ܠܵܐ ܐܸܟ̣ܠܹ̇ܬ̣ ܡ̣ܢ ܛܲܠܝܘܼܬ̣ܝ ܘܲܥܕܲܡܵܐ ܠܝܵܘܡܵܐ: ܘܠܵܐ ܥܲܠ ܠܦܘܼܡܝ ܒܸܣܪܵܐ ܛܲܢܦܵܐ.

ܝܗ:ܘܐܸܡܲܪ ܠܝܼ: ܗܵܐ ܝܸܗ̄ܒܹ̇ܬ̣ ܠܵܟ ܟܒܲـ̈ـܝܵܐ ܕܬ̣ܵܘܪܹ̈ܐ ܚܠܵܦ ܟܒܲـ̈ـܝܵܐ ܕܲܒ̣ܢܲܝ̈ܢܵܫܵܐ: ܕܬܸܥܒܸ̇ܕܼ ܠܲܚܡܵܟ ܥܠܲܝܗܹܝܢ.

ܝܘ:ܘܐܸܡܲܪ ܠܝܼ ܒܲܪܢܵܫܵܐ: ܗܵܐ ܬܵܒܲܪ ܐ̄ܢܵܐ ܩܲܢܝܵܐ ܕܲܥܒ̣ܘܼܪܵܐ ܒܐܘܿܪܸܫܠܸܡ: ܘܢܹܐܟ̣ܠܘܼܢ ܠܲܚܡܵܐ ܒܡܲܬ̣ܩܵܠܵܐ: ܘܡܲـ̈ـܝܵܐ ܒܨܲܗ̈ܘܵܢܹܐ ܒܲܟ̣ܝܵܠܬ̣ܵܐ ܢܸܫܬ̇ܘܿܢ.

ܝܙ:ܘܢܸܗܘܘܿܢ ܨܪܝܼܟ̣ܝܼܢ ܠܠܲܚܡܵܐ ܘܲܠܡܲـ̈ـܝܵܐ: ܘܲܢܣܘܼܦܘܼܢ ܓܒܲܪ ܘܐܲܚܘܼܗܝ: ܘܢܸܬ̣ܡ̱ܣܘܿܢ ܒܥܵܘܼܠܗܘܿܢ.

ܩܹܦܵܠܹܐܘܿܢ:ܗ.

ܐ:ܐܲܢ̄ܬ̇ ܕܹܝܢ ܒܲܪܢܵܫܵܐ ܠܵܟ ܣܲܒ̣: ܣܲܝܦܵܐ ܕܚܲܪܝܼܦ ܐܲܝܟ ܡܕܲܟ̇ܝܵܐ ܕܓܲܪܵܥܵܐ: ܘܐܲܥܒܲܪܲܝܗܝ ܥܲܠ ܪܹܫܵܟ ܘܥܲܠ ܕܲܩܢܵܟ: ܘܣܲܒ̣ ܠܵܟ ܡܲܣܲܐܬ̣ܵܐ ܕܡܲܬ̣ܩܵܠܹ̈ܐ: ܘܦܲܠܸܓ̣ ܐܸܢܘܿܢ ܠܲܬ̣ܠܵܬ̣ ܡ̈ܢܵܘܵܢ.

ܒ:ܘܲܚܕܼܵܐ ܡ̣ܢ ܬܠܵܬ̣ ܡ̈ܢܵܘܵܢ: ܐܵܘܩܸܕܼ ܒܢܘܼܪܵܐ ܒܓ̣ܵܘ ܡܕܼܝܼܢ̄ܬܵܐ: ܡܵܐ ܕܲܫܠܸܡ̣ܘ ܝܵܘ̈ܡܵܬ̣ܵܐ ܕܲܚܒ̣ܘܼܫܝܵܟ: ܘܬܸܣܲܒ̣ ܡܢܵܬ̣ܵܐ ܐ̄ܚܪܹܬ̣ܵܐ: ܘܬܸܦܣܘܿܩ ܒܣܲܝܦܵܐ ܚܕܼܵܪܹܝܗ̇ ܕܲܡܕܼܝܼܢ̄ܬܵܐ: ܘܲܡܢܵܬ̣ܵܐ ܕܲܬ̣ܠܵܬ̣ ܬܸܕܼܪܸܐ ܒܪܘܼܚܵܐ: ܘܣܲܝܦܵܐ ܢܸܚܪܘܿܒ̣ ܒܵܬܲܪܗܘܿܢ.

ܓ:ܘܬܸܣܲܒ̣ ܡ̣ܢ ܬܲܡܵܢ ܙܥܘܿܪܹ̈ܐ ܒܡܸܢܝܵܢܵܐ: ܘܬܸܨܘܿܪ ܐܸܢܘܿܢ ܒܟܼܢܦܵܟ.

ܕ:ܘܡܸܢܗܘܿܢ ܬܘܒ̣ ܬܸܣܲܒ̣: ܘܬܲܪܡܸܐ ܐܸܢܘܿܢ ܒܓ̣ܵܘ ܢܘܼܪܵܐ: ܘܬ̣ܵܘܩܸܕܼ ܐܸܢܘܿܢ ܒܢܘܼܪܵܐ: ܘܡܸܢܗܘܿܢ ܬܸܦܘܿܩ ܢܘܼܪܵܐ ܥܲܠ ܟܠܗܘܿܢ ܕܒܹܝܬ̣ ܝܑܼܣܪܵܝܹܠ.

ܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܕܹܐ ܐܘܿܪܸܫܠܸܡ ܒܲܝܢܵܬ̣ ܥܲܡܡܹ̈ܐ ܣܵܡ̇ܬܵܗ̇: ܘܟ̣ܠܗܹܝܢ ܡܕܼܝܼ̈ܢܵܬ̣ܵܐ ܚܕܼܝܼܪ̈ܵܢ ܠܵܗ̇.

ܘ:ܘܚܲܠܦܲܬ̤ ܕܝܼܢܲܝ̈ ܒܲܚܛܝܼܬ̣ܵܐ ܡ̣ܢ ܥܲܡܡܹ̈ܐ: ܘܦܘܼܩܕܵܢܲܝ̈ ܡ̣ܢ ܡܕܼܝܼ̈ܢܵܬ̣ܵܐ ܕܲܚܕܼܝܼܪ̈ܵܢ ܠܵܗ̇: ܡܸܛܠ ܕܕܼܝܼܢܲܝ̈ ܐܲܣܠܝܼܘ: ܘܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܘ.

ܙ:ܡܸܛܠ ܗܵܠܹܝܢ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܬ̣ܚܫܸܒ̣ܬ̇ܘܿܢ ܡ̣ܢ ܥܲܡܡܹ̈ܐ ܕܲܚܕܼܝܼܪܝܼܢ ܠܟ̣ܘܿܢ: ܘܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܬ̇ܘܿܢ: ܘܕܼܝܼܢܲܝ̈ ܠܵܐ ܥܒܲܕ̇ܬܘܼܢ ܕܝܼܢܹ̈ܐ ܕܥܲܡܡܹ̈ܐ ܕܲܚܕܼܝܼܪܝܼܢ ܠܟ̣ܘܿܢ.

ܚ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ̇ܝ: ܘܐܸܥܒܸ̇ܕܼ ܒܓ̣ܵܘܹܟ̣ܝ ܕܝܼܢܹ̈ܐ ܠܥܹܝܢ ܟܠܗܘܿܢ ܥܲܡܡܹ̈ܐ.

ܛ:ܘܐܸܥܒܸ̇ܕܼ ܒܹܟ̣ܝ ܡܸܕܸ̇ܡ ܕܠܵܐ ܥܸܒ̣ܕܹ̇ܬ̣: ܘܡܸܕܸ̇ܡ ܕܠܵܐ ܐܸܥܒܸ̇ܕܼ ܬܘܼܒ̣ ܐܲܟ̣ܘܵܬܹܗ: ܡܸܛܠ ܟܠܵܗ̇ ܛܲܢܦܘܼܬܹܟ̣ܝ.

ܝ:ܡܸܛܠ ܗܵܢܵܐ ܐܲܒ̣ܵܗܹ̈ܐ ܢܹܐܟ̣ܠܘܼܢ ܒܢܲܝ̈ܗܘܿܢ ܒܓܵܘܹܟ̣ܝ: ܘܲܒ̣ܢܲـ̈ـܝܵܐ ܢܹܐܟ̣ܠܘܼܢ ܠܐܲܒ̣ܵܗܲܝ̈ܗܘܿܢ: ܘܐܸܥܒܸ̇ܕܼ ܒܹܟ̣ܝ ܕܝܼܢܹ̈ܐ: ܘܐܸܕܪܸܐ ܠܐܲܝܠܹܝܢ ܕܡܸܫܬܲܚܪܝܼܢ ܒܓ̣ܵܘܟ̣ܝ ܠܟ̣ܠ ܪܘܼܚ.

ܝܐ:ܡܸܛܠ ܗܵܢܵܐ ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܛܲܢܸܦܬ̇ܝ ܡܩܕܲܫܝ ܒܟ̣ܠ ܛܲܢܦ̈ܘܵܬܹܟ̣ܝ: ܘܲܒ̣ܟ̣ܠܵܗ̇ ܛܲܡܐܘܬܹܟ̣ܝ: ܐܵܦ ܐܸܢܵܐ ܐܸܕܼܚ̄ܩܹܟ̣ܝ: ܘܠܵܐ ܬܚܘܼܣ ܥܲܝܢܝ ܥܠܲܝܟ̇ܝ ܘܠܵܐ ܐܹܪܲܚܸܡ.

ܝܒ:ܚܕܼܵܐ ܡܢܵܬܹܟ̣ܝ ܒܡܵܘܬܵܐ ܢܡܘܼܬ̣ܘܼܢ. ܘܲܒ̣ܟܲܦܢܵܐ ܢܣܘܼܦܘܼܢ ܒܓ̣ܵܘܹܟ̣ܝ: ܘܲܐ̄ܚܪܹܬ̣ܵܐ ܒܚܲܪܒܵܐ ܢܸܦܠܘܼܢ ܚܕܼܵܪܲܝܟ̇ܝ: ܘܕܲܬ̣ܠܵܬ̣ ܠܟ̣ܠ ܪܘܼܚ ܐܸܕܼܪܸܐ: ܘܣܲܝܦܵܐ ܢܸܚܪܘܿܒ̣ ܒܵܬܲܪܗܘܿܢ.

ܝܓ:ܘܐܹܫܲܡܠܸܐ ܪܘܼܓ̣ܙܝ: ܘܐܲܢܝܼܚ ܚܸܡܬ̣ܝ ܒܗܘܿܢ ܘܐܸܬ̣ܒܲܝܲܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܕܡܲܠܠܹ̇ܬ̣ ܒܲܛܢܵܢܝ: ܡܵܐ ܕܫܲܡܠܝܼܬ̣ ܒܗܘܿܢ ܪܘܼܓ̣ܙܝ.

ܝܕ:ܘܐܸܬ̇ܠܹܟ̣ܝ ܠܚܲܪܒܵܐ: ܘܲܠܚܸܣܕܵܐ ܒܥܲܡܡܹ̈ܐ ܕܲܚܕܼܝܼܪܝܼܢ ܠܹܟ̣ܝ ܩܕܼܵܡ ܟܠ ܕܥܵܒܲܪ.

ܝܗ:ܘܬܸܗܘܹܝܢ ܠܚܸܣܕܵܐ ܘܲܠܓܘܼܕܵܦܵܐ: ܘܲܠܡܲܪܕ̇ܘܼܬ̣ܵܐ ܘܲܠܬܸܡܗܵܐ ܠܥܲܡܡܹ̈ܐ ܕܲܚܕܝܼܪܝܼܢ ܠܹܟܝ: ܡܵܐ ܕܥܸܒ̇ܕܹ̇ܬ̣ ܒܹܟ̣ܝ ܕܝܼܢܹ̈ܐ: ܒܪܘܼܓ̣ܙܵܐ ܘܲܒ̣ܚܸܡܬ̣ܵܐ ܘܲܒ̣ܡܲܟ̇ܣܵܢܘܼܬ̣ܵܐ ܕܪܘܼܓ̣ܙܝ: ܐܸܢܵܐ ܡܵܪܝܵܐ ܐܸܡ̇ܪܹܬ̣.

ܝܘ:ܡܵܐ ܕܫܲܕ̇ܪܹܬ̣ ܥܠܲܝܟ̇ܘܿܢ ܓܹܐܪ̈ܲܝ ܒܝܼܫܹ̈ܐ ܕܟܲܦܢܵܐ ܕܲܗܘ̤ܵܘ ܠܲܚܒ̣ܵܠܵܐ: ܕܐܹܫܲܕܲܪ ܐܸܢܘܿܢ ܠܲܡܚܲܒܵܠܘܼܬ̣ܟ̣ܘܿܢ: ܘܟܲܦܢܵܐ ܐܵܘܣܸܦ ܥܠܲܝܟ̇ܘܿܢ: ܘܐܸܬ̣ܒܲܪ ܩܲܢܝܵܐ ܕܲܥܒ̣ܘܼܪܟ̣ܘܿܢ.

ܝܙ:ܘܐܹܫܲܕܲܪ ܥܠܲܝܟ̇ܘܿܢ ܟܲܦܢܵܐ ܘܚܲܝ̄ܘܬ̣ܵܐ ܒܝܼܫܬܵܐ ܘܐܵܘܒܸ̇ܕܼܟ̣ܘܼܢ: ܘܡܵܘܬܵܐ ܘܲܕܼܡܵܐ ܢܸܥܒܲܪ ܒܟ̣ܘܿܢ: ܘܚܲܪܒܵܐ ܐܲܝܬܹ̇ܐ ܥܠܲܝܟ̇ܘܢ: ܐܸܢܵܐ ܡܵܪܝܵܐ ܐܸܡ̇ܪܹܬ̣.

ܩܹܦܵܠܹܐܘܿܢ:ܘ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܛܘܼܪܹ̈ܐ ܕܝܼܣܪܵܝܹܠ: ܘܐܸܬ̣ܢܲܒܵܐ ܥܠܲܝܗܘܿܢ.

ܓ:ܘܐܸܡܲܪ: ܛܘܼܪܹ̈ܐ ܕܝܼܣܪܵܝܹܠ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܛܘܼܪܹ̈ܐ ܘܲܠܪ̈ܵܡܵܬ̣ܵܐ: ܘܲܠܢܲܚ̈ܠܹܐ ܘܠܲܦܨܝܼ̈ܕܹܐ: ܗܵܐ ܡܲܝܬܹ̇ܐ ܐ̄ܢܵܐ ܥܠܲܝܟ̇ܘܿܢ ܚܲܪܒܵܐ: ܘܐܵܘܒܸ̇ܕܼ ܦܪ̈ܲܟܲܝܟ̇ܘܿܢ.

ܕ:ܘܢܸܨܕ̇ܘܿܢ ܡܲܕܼܒ̇ܚܲܝ̈ܟ̇ܘܿܢ: ܘܢܸܬ̇ܬܲܒ̇ܪܘܼܢ ܦܬܲܟ̣ܪ̈ܲܝܟ̇ܘܿܢ: ܘܐܲܪܡܐ ܚܪ̈ܝܼܒܲܝܟ̇ܘܿܢ ܩܕܼܵܡ ܕܸܚ̈ܠܵܬ̣ܟ̣ܘܿܢ.

ܗ:ܘܐܲܪܡܸܐ ܫ̈ܠܲܕܹܐ ܕܒܹܝܬ̣ ܝܑܼܣܪܵܝܹܠ ܩܕܼܵܡ ܦܬܲܟ̣ܪ̈ܲܝܗܘܿܢ: ܘܐܸܕܼܪܸܐ ܓܲܪ̈ܡܲܝܟ̇ܘܿܢ ܚܕܼܵܪ ܡܲܕܼܒ̇ܚܲܝ̈ܟ̇ܘܿܢ.

ܘ:ܘܲܡܕܼܝܼ̈ܢܵܬ̣ܵܐ ܕܟܠܹܗ ܝܲܬ̣ܒ̇ܟ̣ܘܿܢ ܢܸܚ̱ܪ̈ܒ̣ܵܢ: ܘܲܦܪ̈ܲܟܹ̇ܐ ܢܸܨ̈ܕ̇ܝܵܢ: ܡܸܛܠ ܕܢܸܚ̱ܪܒ̣ܘܼܢ ܘܢܸܨܕ̇ܘܼܢ ܡܲܕܼܒ̇ܚܲܝ̈ܟ̇ܘܿܢ: ܘܢܸܬ̇ܬܲܒ̇ܪܘܼܢ ܘܢܸܬ̣ܒܲܛܠܘܼܢ ܦܬܲܟ̣ܪ̈ܲܝܟ̇ܘܿܢ: ܘܢܸܬ̣ܓܲܕ̇ܡܘܼܢ ܓܠܝܼܦܲܝ̈ܟ̇ܘܿܢ: ܘܢܸܬ̣ܥ̱ܛܘܿܢ ܥܒ̣ܵܕܲܝ̈ܟ̇ܘܿܢ.

ܙ:ܘܢܸܦܠܘܿܢ ܚܪ̈ܝܼܒܹܐ ܒܲܝܢܵܬ̣ܟ̣ܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܚ:ܐܵܘܬܲܪ ܡܸܢܟ̣ܘܿܢ ܒܹܝܬ̣ ܥܲܡܡܹ̈ܐ: ܐܲܝܠܹܝܢ ܕܐܸܬ̣ܦܲܨܝܼܘ ܡ̣ܢ ܚܲܪܒܵܐ: ܘܐܸܬ̣ܒܲܕܲܪܘ ܒܲܡܕܼܝܼ̈ܢܵܬ̣ܵܐ.

ܛ:ܘܢܸܬ̇ܕܲܟ̣ܪܘܼܢܵܢܝ ܐܲܝܠܹܝܢ ܕܐܸܬ̣ܦܲܨܝܼܘ ܡܸܢܟ̣ܘܿܢ: ܒܹܝܬ̣ ܥܲܡܡܹ̈ܐ ܕܐܹܫܬ̇ܒ̣ܝܼܘ ܠܬܲܡܵܢ: ܡܵܐ ܕܬܸܒ̣ܟܹ̇ܬ̣ ܠܠܸܒ̇ܗܘܿܢ ܙܲܢܵܝܵܐ ܕܲܣܛܵܘ ܡܹܢܝ: ܘܥܲܝ̈ܢܲܝܗܘܿܢ ܕܲܛܥܲܝ̈ ܒܵܬܲܪ ܦܬܲܟ̣ܪ̈ܲܝܗܘܿܢ: ܘܢܸܬ̣ܩܲܡ̈ܛܵܢ ܐܲܦܲܝ̈ܗܘܿܢ ܒܒ̣ܝܼܫܬܵܐ ܕܲܥܒܲܕܼܘ: ܘܲܒ̣ܟ̣ܠܵܗ̇ ܛܲܢܦܘܼܬܗܘܿܢ.

ܝ:ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܘܠܵܐ ܗ̄ܘܼܵܐ ܣܪܝܼܩܵܐܝܼܬ̣ ܐܸܡ̇ܪܹܬ̣ ܕܐܸܥܒܸ̇ܕܼ ܠܗܘܿܢ ܒܝܼܫܬܵܐ ܗܵܕܹܐ.

ܝܐ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܩܘܿܫ ܒܟܲܦܵܟ ܘܲܪܦܘܿܣ ܒܪܸܓ̣ܠܵܟ: ܘܐܹܡܲܪ ܐܲܚܵܢ. ܥܲܠ ܟܠܵܗ̇ ܛܲܢܦܘܼܬ̣ܵܐ ܘܒ̣ܝܼܫܬܵܐ ܕܒܹܝܬ̣ ܝܑܼܣܪܵܝܹܠ: ܕܲܒ̣ܚܲܪܒܵܐ ܘܲܒ̣ܟܲܦܢܵܐ ܘܲܒ̣ܡܵܘܬܵܢܵܐ ܢܸܦܠܘܼܢ.

ܝܒ:ܕܪܲܚܝܼܩ ܢܡܘܼܬ̣ ܒܡܵܘܬܵܢܵܐ: ܘܲܕܩܲܪܝܼܒ̣ ܒܚܲܪܒܵܐ ܢܸܦܸܠ: ܘܲܕܼܡܸܫܬܲܚܲܪ ܘܲܕܼܡܸܬ̣ܦܲܨܹܐ ܒܟܲܦܢܵܐ ܢܡܘܼܬ̣: ܘܐܹܫܲܡܠܸܐ ܪܘܼܓ̣ܙܝ ܒܗܘܿܢ.

ܝܓ:ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܲܗܘ̤ܵܘ ܩܛܝܼܠܲܝ̈ܗܘܿܢ ܒܲܝܢܵܬ̣ ܦܬܲܟ̣ܪ̈ܲܝܗܘܿܢ ܚܕܼܵܪ ܡܲܕܼܒ̇ܚܲܝ̈ܗܘܿܢ: ܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܬ̣ܚܹܝܬ̣ ܟܠ ܪܹ̈ܫܲܝ ܛܘܼܪܹ̈ܐ: ܘܲܬ̣ܚܹܝܬ̣ ܟܠ ܐܝܼܠܵܢ ܕܡܲܛܲܠ: ܘܲܬ̣ܚܹܝܬ̣ ܟܠ ܒܸܛܡ̱ܬ̣ܵܐ ܥܲܒ̇ܝܼܛܬܵܐ: ܒܐܲܬ̣ܪܵܐ ܕܣܵܡ̣ܘ ܬܲܡܵܢ ܒܸܣܡܹ̈ܐ ܠܟ̣ܠܗܘܿܢ ܦܬܲܟ̣ܪ̈ܲܝܗܘܿܢ.

ܝܕ:ܘܐܲܪܝܼܡ ܐܝܼܕܼܝ ܥܠܲܝܗܘܿܢ: ܘܐܸܥܒ̇ܕܼܝܼܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ ܡ̣ܢ ܡܲܕܼܒ̇ܪܵܐ ܕܕܸܒ̣ܠܲܬ̣: ܘܟ̣ܠܹܗ ܒܹܝܬ̣ ܡܲܥܡܲܪܗܘܿܢ: ܘܢܸܕ̇ܥܘܼܢ ܕܐܸܢܵܐܐ̄ܢܵܐ ܡܵܪܝܵܐ.

ܩܹܦܵܠܹܐܘܿܢ:ܙ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܲܛܝܼ ܩܸܨܵܐ ܥܲܠ ܐܲܪܥܵܐ ܕܝܼܣܪܵܝܹܠ: ܘܡܲܛܝܼ ܣܵܘܦܵܐ ܥܲܠ ܐܲܪܒܲܥ ܟܸܢ̈ܦܹܝܗ̇ ܕܐܲܪܥܵܐ.

ܓ:ܡܸܟܹ̇ܝܠ ܩܸܨܵܐ ܥܠܲܝܟ̇ܝ: ܕܐܹܫܘܿܕܼ ܥܠܲܝܟ̇ܝ ܪܘܼܓ̣ܙܝ: ܘܐܸܕܼܘܿܢܹܟ̣ܝ ܐܲܝܟ ܐܘܼܪ̈ܚܵܬܹܟ̣ܝ: ܘܐܲܝܬܹܐ ܥܠܲܝܟ̇ܝ ܟܠܵܗ̇ ܛܲܢܦܘܼܬܹܟ̣ܝ.

ܕ:ܘܠܵܐ ܬܚܘܼܣ ܥܲܝܢܝ ܥܠܲܝܟ̇ܝ ܘܠܵܐ ܐܹܪܲܚܸܡ: ܡܸܛܠ ܕܐܘܼܪ̈ܚܵܬܹܟ̣ܝ ܥܠܲܝܟ̇ܝ ܐܸܬܸ̇ܠ: ܘܛܲܢܦܘܼܬܹܟ̣ܝ ܒܓ̣ܵܘܹܟ̣ܝ ܬܸܗܘܹܐ: ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܵܬ̣ܝܵܐ ܒܝܼܫܬܵܐ ܚܠܵܦ ܒܝܼܫܬܵܐ.

ܘ:ܩܸܨܵܐ ܐܵܬܹ̇ܐ ܘܐܲܥܝܼܩ ܥܠܲܝܟ̇ܝ.

ܙ:ܘܐܵܬܹ̇ܐ ܨܸܦܪܵܝܵܐ ܥܵܡܘܿܪܵܐ ܕܐܲܪܥܵܐ ܥܠܲܝܟ̇ܝ: ܡܲܛܝܼ ܙܲܒ̣ܢܵܐ ܘܲܩ̣ܪܸܒ̣ ܝܵܘܡܵܐ ܕܲܕܼܠܘܼܚܝܵܐ.

ܚ:ܡܸܟܹ̇ܝܠ ܡ̣ܢ ܩܘܼܪܒܵܐ ܐܹܫܘܿܕܼ ܚܸܡ̄ܬ̣ܝ ܥܠܲܝܟ̇ܝ: ܘܐܹܫܘܿܕܼ ܪܘܼܓ̣ܙܝ ܥܠܲܝܟ̇ܝ: ܘܐܹܕ̇ܢܹܟ̣ܝ ܐܲܝܟ ܐܘܼܪ̈ܚܵܬܹܟ̣ܝ: ܘܐܸܬܸ̇ܠ ܥܠܲܝܟ̇ܝ ܟܠܵܗ̇ ܛܲܢܦܘܼܬܹܟ̣ܝ.

ܛ:ܘܠܵܐ ܬܚܘܼܣ ܥܲܝܢܝ ܥܠܲܝܟ̇ܝ ܘܠܵܐ ܐܹܪܲܚܸܡ: ܐܸܠܵܐ ܐܲܝܟ ܐܘܼܪ̈ܚܵܬܹܟ̣ܝ ܐܸܦ̱ܪܥܹܟ̣ܝ: ܘܛܲܢܦܘܼܬܹܟ̣ܝ ܒܓ̣ܵܘܹܟ̣ܝ ܬܸܗܘܹܐ: ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ ܕܲܡܚܟ̣ܝ.

ܝ:ܗܵܐ ܝܵܘܡܵܐ ܐܸܬ̣ܵܐ: ܢܦܲܩ̣ ܨܸܦܪܵܝܵܐ ܘܲܒ̣ܠܲܨ ܚܘܼܛܪܵܐ: ܘܲܦܪܲܥ̣ ܨܲܥܪܵܐ.

ܝܐ:ܘܥܵܘܼܠܵܐ ܩܵܡ̣ ܥܲܠ ܚܘܼܛܪܹܗ ܕܥܵܘܿܠܵܐ: ܠܵܐ ܡܸܢܗܘܿܢ ܘܠܵܐ ܡ̣ܢ ܕܠܘܼܚܝܼܗܘܿܢ: ܘܠܵܐ ܡ̣ܢ ܡܲܥܒ̇ܕܼܵܢܘܼܬ̣ܗܘܿܢ: ܘܠܵܐ ܐܸܬ̇ܬ̇ܢܝܼܚ ܒܗܘܿܢ.

ܝܒ:ܡܲܛܝܼ ܙܲܒ̣ܢܵܐ ܘܲܩ̣ܪܸܒ̣ ܝܵܘܡܵܐ: ܕܩܵܢܹ̇ܐ ܠܵܐ ܢܸܚܕܹ̇ܐ: ܘܕܲܡܙܲܒܸ̇ܢ ܠܵܐ ܬܸܟ̣ܪܸܐ ܠܹܗ: ܡܸܛܠ ܕܪܘܼܓ̣ܙܵܐ ܥܲܠ ܟܠܹܗ ܩܸܢܝܵܢܗܘܿܢ.

ܝܓ:ܘܙܵܒ̣ܘܿܢܵܐ ܠܵܐ ܗܵܦܲܟ ܥܲܠ ܡܙܲܒ̇ܢܵܢܵܐ: ܘܬ̣ܘܼܒ̣ ܠܲܝܬ̇ ܚܲܝܹ̈ܐ ܒܚܲܝܲܝ̈ܗܘܿܢ: ܡܸܛܠ ܕܚܸܙܘܵܐ ܠܵܐ ܢܸܗܦܘܿܟ ܥܲܠ ܟܠܹܗ ܩܸܢܝܵܢܗܘܿܢ: ܘܓܲܒ̣ܪܵܐ ܒܥܵܘܼܠܹܗ ܠܵܐ ܢܚܲܡܣܸܢ ܚܲܝܵܘ̈ܗܝ.

ܝܕ:ܩ̣ܪܵܘ ܒܩܲܪܢܵܐ ܘܛܲܝܸܒ̣ ܟܠ: ܘܠܲܝܬ̇ ܕܐܵܙܹ̇ܠ ܠܲܩܪܵܒ̣ܵܐ: ܡܸܛܠ ܕܪܘܼܓ̣ܙܝ ܥܲܠ ܟܠܹܗ ܩܸܢܝܵܢܗܘܿܢ.

ܝܗ:ܚܲܪܒܵܐ ܒܫܘܼܩܹ̈ܐ: ܘܡܵܘܬܵܢܵܐ ܘܟܲܦܢܵܐ ܒܒ̣ܵـ̈ـܬܹ̇ܐ: ܐܲܝܢܵܐ ܕܲܒ̣ܕܲܒ̣ܪܵܐ ܗ̄ܘܼ ܢܡܘܼܬ̣ ܒܚܲܪܒܵܐ: ܘܐܲܝܢܵܐ ܕܒܲܡܕܼܝܼܢ̄ܬܵܐ ܗ̄ܘܼ ܟܲܦܢܵܐ ܘܡܵܘܬܵܢܵܐ ܢܹܐܟ̣ܠܝܼܘܗܝ.

ܝܘ:ܘܢܸܬ̣ܦܲܨܘܿܢ ܐܲܝܠܹܝܢ ܕܡܸܬ̣ܦܲܨܹܝܢ ܡܸܢܗܘܿܢ ܒܛܘܼܪܹ̈ܐ: ܐܲܝܟ ܝܵܘ̈ܢܹܐ ܒܲܓܕܼܵܢܦܹ̈ܐ: ܟܠܗܘܿܢ ܢܡܘܼܬ̣ܘܼܢ ܐ̄ܢܵܫ ܒܲܚܛܵܗܵܘ̈ܗܝ.

ܝܙ:ܟܠܗܹܝܢ ܐܝܼܕܲܝܵܐ ܢܸܬ̣ܪ̈ܲܫܠܵܢ: ܘܟ̣ܠܗܹܝܢ ܒܘܼܪ̈ܟܹ̇ܐ ܢܲܪ̈ܕ̇ܝܵܢ ܡܲـ̈ـܝܵܐ.

ܝܚ:ܘܢܸܬ̣ܟܲܒ̣ܢܘܼܢ ܣܲܩܹ̈ܐ: ܘܲܢܟܲܣܘܿܢ ܐܸܢܘܿܢ ܨܵܘܪ̈ܵܢܹܐ: ܒܸܗܬ̇ܬ̣ܵܐ ܒܟ̣ܠ ܐܲܦܲܝ̈ܗܘܿܢ: ܘܩܘܼܕܼܚܵـ̈ـܬ̣ܵܐ ܒܟ̣ܠ ܪܹ̈ܫܲܝܗܘܿܢ.

ܝܛ:ܣܹܐܡܗܘܿܢ ܒܫܘܼܩܹ̈ܐ ܢܸܫܕ̇ܘܿܢ: ܘܕܲܗܒ̣ܗܘܿܢ ܡܲܣ̱ܠܝܵܐ ܢܸܗܘܹܐ: ܣܹܐܡܗܘܿܢ. ܘܕܲܗܒ̣ܗܘܿܢ ܠܵܐ ܢܸܫܟܲܚ ܠܲܡܦܲܨܵܝܘܼ ܐܸܢܘܿܢ ܒܝܵܘܡܵܐ ܕܪܘܼܓ̣ܙܹܗ ܕܡܵܪܝܵܐ: ܢܲܦ̮̈ܫܵܬ̣ܗܘܿܢ ܠܵܐ ܢܣܲܒ̇ܥܘܼܢ: ܘܟܲܪ̈ܣܵܬ̣ܗܘܿܢ ܠܵܐ ܢܸܡܠܘܿܢ ܗܵܢܵܐ ܫܘܼܢܵܩܵܐ: ܦܘܼܪܥܵܢܵܐ ܕܥܵܘܼܠܗܘܿܢ.

ܟܟ:ܘܫܘܼܒ̣ܚܵܐ ܕܨܸܒ̣ܬ̇ܗܘܿܢ ܕܲܥܒܲܕܼܘ ܒܓܲܐܝܘܼܬ̣ܵܐ: ܠܨܲܠܡܹ̈ܐ ܕܛܲܢܦ̈ܘܵܬ̣ܗܘܿܢ ܘܲܕ̇ܕܸܚ̈ܠܵܬ̣ܗܘܿܢ: ܡܸܛܠ ܗܵܢܵܐ ܥܒܲܕ̇ܬܹ̇ܗ ܡܲܣ̱ܠܝܵܐ.

ܟܐ:ܘܐܸܬ̇ܠܝܼܘܗܝ ܒܐܝܼܕܼܵܐ ܕܢܘܼܟ̣ܪ̈ܵܝܹܐ ܠܒܸܙܬ̣ܵܐ: ܘܲܠܚܲܛܵܝܹܝ̈ܗ̇ ܕܐܲܪܥܵܐ ܠܲܫܒ̣ܝܼܬ̣ܵܐ ܘܲܢܛܵܘܫܘܼܢܹܗ.

ܟܒ:ܘܐܲܦܢܸܐ ܐܲܦܲܝ̈ ܡܸܢܗܘܿܢ ܘܲܢܛܵܘܫܘܼܢ ܕܵܘ̈ܩܲܝ: ܘܢܸܥܠܘܿܢ ܒܵܗ̇ ܬܲܪ̈ܘܿܥܹܐ ܘܲܢܛܵܘܫܘܼܢܵܗ̇.

ܟܓ:ܘܢܸܥܒ̇ܪܘܼܢ ܒܠܸܒ̣̈ܢܹܐ: ܡܸܛܠ ܕܐܲܪܥܵܐ ܐܸܬ̣ܡܲܠܝܲܬ̤ ܕܝܼܢܵܐ ܕܲܕܼܡܵܐ: ܘܲܡܕܼܝܼܢ̄ܬܵܐ ܐܸܬ̣ܡܲܠܝܲܬ̤ ܥܵܘܼܠܵܐ.

ܟܕ:ܘܐܲܝܬܹ̇ܐ ܪ̈ܵܥܵܘܵܬ̣ܵܐ ܕܥܲܡܡܹ̈ܐ ܘܢܹܐܪܬ̇ܘܿܢ ܒܵܬܲܝ̈ܗܘܿܢ: ܘܐܲܗܦܸܟ ܓܲܐܝܘܼܬ̣ܵܐ ܕܥܲܫܝܼ̈ܢܹܐ: ܘܢܹܐܪܬ̇ܘܿܢ ܡܲܩܕܲܫܗܘܿܢ.

ܟܗ:ܪܘܼܓ̣ܙܵܐ ܐܵܬܹ̇ܐ: ܘܢܸܒ̣ܥܘܿܢ ܫܠܵܡܵܐ ܘܠܵܐ ܢܸܫܬܲܟܲܚ.

ܟܘ:ܘܵܝܵܐ ܥܲܠ ܘܵܝܵܐ ܢܹܐܬܹܐ: ܘܲܫܡܘܼܥܬܵܐ ܥܲܠ ܫܡܘܼܥܬܵܐ ܬܸܫܬ̇ܡܲܥ: ܘܢܸܒ̣ܥܘܿܢ ܚܸܙܘܵܐ ܡ̣ܢ ܢܒ̣ܝܹ̈ܐ: ܘܢܵܡܘܿܣܵܐ ܢܹܐܒܲܕܼ ܡ̣ܢ ܟܵܗܢܹ̈ܐ: ܘܡܸܠܟܵܐ ܡ̣ܢ ܣܵܒܹ̈ܐ.

ܟܙ:ܡܲܠܟܵܐ ܢܸܬܸ̇ܒ̣ ܒܐܸܒ̣ܠܵܐ: ܘܪܲܒܵܐ ܢܸܠܒܲܫ ܚܒ̣ܵܠܵܐ: ܘܐܝܼܕܼܵܘ̈ܗܝ ܕܥܲܡܵܐ ܕܐܲܪܥܵܐ ܢܸܬ̣ܪ̈ܲܫܠܵܢ: ܐܲܝܟ ܐܘܼܪ̈ܚܵܬ̣ܗܘܿܢ ܐܸܥܒܸ̇ܕܼ ܠܗܘܿܢ: ܘܲܒ̣ܕܼܝܼ̈ܢܲܝܗܘܿܢ ܐܹܕ̇ܘܼܢ ܐܸܢܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

 ܩܹܦܵܠܹܐܘܿܢ:ܚ.

ܐ:ܘܲܗܘ̤ܵܐ ܒܫܲܢ̄ܬܵܐ ܫܬ̇ܝܼܬ̣ܵܝܬܵܐ: ܒܚܲܡܸܫܬܵܐ ܒܝܲܪܚܵܐ ܫܬ̇ܝܼܬ̣ܵܝܵܐ: ܐܸܢܵܐ ܝܵܬܹܒ̣ ܗ̄ܘܹ̇ܝܬ̣ ܒܒܲܝܬ̇ܝ: ܘܣܵܒܹ̈ܐ ܕܲܝܗܘܼܕܼܵܐ ܝܵܬ̣ܒ̇ܝܼܢ ܗ̄ܘܼܵܘ ܩܕܼܵܡܲܝ: ܘܢܸܦܠܲܬ̤ ܥܠܲܝ ܬܲܡܵܢ ܐܝܼܕܹܗ ܕܡܵܪܹܐ ܡܵܪ̈ܵܘܵܬ̣ܵܐ.

ܒ:ܘܲܚܙܹ̇ܝܬ̣ ܘܗܵܐ ܕܡܘܼܬ̣ܵܐ ܐܲܝܟ ܚܸܙܘܵܐ ܕܢܘܼܪܵܐ: ܡܢ ܚܸܙܘܵܐ ܕܚܲܨܵܘ̈ܗܝ ܘܲܠܬܲܚܬ̇ ܢܘܼܪܵܐ: ܘܡ̣ܢ ܚܲܨܵܘ̈ܗܝ ܘܲܠܥܸܠ: ܚܙܹܝܬ̣ ܐܲܝܟ ܚܸܙܘܵܐ ܕܙܲܗܪܵܐ: ܘܐܲܝܟ ܚܸܙܘܵܐ ܕܐܲܠܵܗܵܐ.

ܓ:ܘܐܵܘܫܸܛ̣ ܒܲܕܼܡܘܼܬ̣ܵܐ ܕܐܝܼܕܼܵܐ ܘܐܲܚܕܲܢܝ ܒܥܸܕܼܩܹ̈ܐ ܕܪܹܫܝ: ܘܲܫܩܲܠܬܲܢܝ ܪܘܼܚܵܐ ܒܹܝܬ̣ ܐܲܪܥܵܐ ܠܲܫܡܲܝܵܐ: ܘܐܲܝܬ̇ܝܵܬܲܢܝ ܠܐܘܿܪܸܫܠܸܡ ܒܚܸܙܘܵܐ ܕܐܲܠܵܗܵܐ: ܠܡܲܥܠܵܢܵܐ ܕܬܲܪܥܵܐ ܕܙܵܘܝܼܬ̣ܵܐ ܕܚܵܐܲܪ ܠܓܲܪܒ̇ܝܵܐ: ܘܬܲܡܵܢ ܩܵܝ̇ܡܵܐ ܩܵܝܹܡܬ̣ܵܐ ܕܲܛܢܵܢܵܐ.

ܕ:ܘܗܵܐ ܬܲܡܵܢ ܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ: ܐܲܝܟ ܚܸܙܘܵܐ ܕܵܚܙܹ̇ܝܬ̣ ܒܲܦܩܲܥܬ̣ܵܐ.

ܗ:ܘܐܸܡܲܪ ܠܝܼ: ܒܲܪܢܵܫܵܐ: ܐܲܪܝܼܡ ܥܲܝ̈ܢܲܝܟ ܠܐܘܼܪܚܵܐ ܕܓܲܪܒ̇ܝܵܐ ܘܐܲܪܝܼܡܹ̇ܬ̣ ܥܲܝܢܲܝ̈ ܠܐܘܼܪܚܵܐ ܕܓܲܪܒ̇ܝܵܐ: ܘܗܵܐ ܡ̣ܢ ܓܲܪܒ̇ܝܵܝܹܗ ܕܬܲܪܥܵܐ ܡܲܕܼܢ̱ܚܵܝܵܐ: ܩܵܝ̇ܡܵܐ ܩܵܝܹܡܬ̣ܵܐ ܕܲܛܢܵܢܵܐ ܒܡܲܥܠܵܢܹܗ.

ܘ:ܘܐܸܡܲܪ ܠܝܼ: ܒܲܪܢܵܫܵܐ: ܚܙܲܝܬ̇ ܡܵܢܵܐ ܥܵܒ̣ܕ̇ܝܼܢ: ܛܲܢܦ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܕܥܵܒ̣ܕ̇ܝܼܢ ܕܒܹܝܬ̣ ܝܑܼܣܪܵܝܹܠ: ܕܐܸܬ̣ܪܲܚܲܩܘ ܡ̣ܢ ܡܲܩܕ̇ܫܝ: ܬܘܼܒ̣ ܬܸܗܦܘܿܟ ܬܸܚܙܹܐ ܛܲܢܦ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܕܥܵܒ̣ܕ̇ܝܼܢ.

ܕܥܲܠ ܦܘܼܪܣܝ ܥܘܠܗܘܢ.

ܙ:ܘܐܲܥܠܲܢܝ ܒܬܲܪܥܵܐ ܕܕܼܵܪܬܵܐ: ܘܲܚܙܹ̇ܝܬ̣ ܢܸܩܒܵܐ ܚܲܕܼ ܒܐܸܣܬ̣ܵܐ.

ܚ:ܘܐܸܡܲܪ ܠܝܼ: ܒܲܪܢܵܫܵܐ: ܚܦܘܿܪ ܒܐܸܣܬ̣ܵܐ: ܘܚܸܦ̇ܪܹܬ̣ ܒܐܸܣܬ̣ܵܐ: ܘܐܸܫܟ̇ܚܹܬ̣ ܬܲܪܥܵܐ ܚܲܕܼ.

ܛ:ܘܐܸܡܲܪ ܠܝܼ: ܥܘܿܠ: ܘܲܚܙܝܼ ܛܲܢܦ̈ܘܵܬ̣ܵܐ ܘܒ̣ܝܼ̈ܫܵܬ̣ܵܐ ܕܥܵܒ̣ܕ̇ܝܼܢ ܗܵܪܟܵܐ.

ܝ:ܘܥܸܠܲܬ̣ ܘܲܚܙܹ̇ܝܬ̣ ܟܠ ܕܼܡ̈ܘܵܬ̣ܵܐ ܕܪ̈ܲܚܫܵܐ ܘܕܲܒ̣ܥܝܼܪܵܐ ܘܲܕܼܛܲܢܦ̈ܘܵܬ̣ܵܐ. ܘܟ̣ܠܗܹܝܢ ܕܸܚ̈ܠܵܬ̣ܵܐ ܕܒܹܝܬ̣ ܝܑܼܣܪܵܝܹܠ: ܕܨܝܼܪ̈ܵܢ ܥܲܠ ܐܸܣܬ̣ܵܐ ܟܲܕܼ ܚܵܕܼܪܵܐ.

ܝܐ:ܘܫܲܒ̣ܥܝܼܢ ܓܲܒ̣ܪ̈ܝܼܢ ܡ̣ܢ ܣܵܒܹ̈ܐ ܕܒܹܝܬ̣ ܝܑܼܣܪܵܝܹܠ: ܘܝܲܥܙܲܢܝܵܐ ܒܲܪ ܫܵܦܵܢ ܩܵܐܹ̇ܡ ܗ̄ܘܼܵܐ ܒܲܝܢܵܬ̣ܗܘܿܢ ܘܗܸܢܘܿܢ ܩܵܝܡܝܼܢ ܗ̄ܘܼܵܘ ܩܕܼܵܡܵܘܗܝ: ܘܐ̄ܢܵܫ ܦܝܼܪܡܹܗ ܒܐܝܼܕܹܗ: ܘܥܸܛܪܵܐ ܕܬܸܢܵܢܵܐ ܕܒܸܣܡܹ̈ܐ ܣܵܠܹ̇ܩ.

ܝܒ:ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ: ܡܸܕܸ̇ܡ ܕܥܵܒ̣ܕ̇ܝܼܢ ܣܵܒܹ̈ܐ ܕܒܹܝܬ̣ ܝܑܼܣܪܵܝܹܠ ܒܚܸܫܘܿܟ̣ܵܐ: ܐ̄ܢܵܫ ܒܬ̣ܵܘܵܢܹܗ ܟܲܣܝܵܐ: ܘܐܵܡ̇ܪܝܼܢ ܠܵܐ ܚܵܙܹ̇ܐ ܠܲܢ ܡܵܪܝܵܐ: ܡܸܛܠ ܕܫܲܒ̣ܩܵܗ̇ ܡܵܪܝܵܐ ܠܐܲܪܥܵܐ.

ܝܓ:ܘܐܸܡܲܪ ܠܝܼ: ܬܘܼܒ̣ ܬܸܗܦܘܿܟ ܬܸܚܙܹܐ ܛܲܢܦ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܕܥܵܒ̣ܕܝܼܢ.

ܝܕ:ܘܐܲܝܬ̇ܝܲܢܝ ܠܡܲܥܠܵܢܵܐ ܕܬܲܪܥܵܐ ܕܒܲܝܬܹ̇ܗ ܕܡܵܪܝܵܐ ܕܲܒ̣ܓܲܪܒ̇ܝܵܐ: ܘܲܚܙܹ̇ܝܬ̣ ܬܲܡܵܢ ܢܸܫܹ̈ܐ ܟܕܼ ܝܵܬ̣̈ܒܵܢ ܘܲܡܒܲـ̈ـܟ̇ܝܵܢ ܠܬܲܡܘܼܙܵܐ.

ܝܗ:ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ: ܬܘܼܒ̣ ܬܸܗܦܘܿܟ ܬܸܚܙܹܐ ܛܲܢܦ̈ܘܵܬ̣ܵܐ ܕܪܵܘܪ̈ܒ̣ܵܢ ܡ̣ܢ ܗܵܠܹܝܢ.

ܝܘ:ܘܐܲܥܠܲܢܝ ܠܕܼܵܪܲܬ̣ ܒܲܝܬܹ̇ܗ ܕܡܵܪܝܵܐ ܓܵܘܵܝܬܵܐ: ܘܲܚܙܹ̇ܝܬ̣ ܒܬܲܪܥܵܐ ܕܗܲܝܟ̇ܠܹܗ ܕܡܵܪܝܵܐ ܒܹܝܬ̣ ܩܸܣܛܪܘܿܡܵܐ ܠܡܲܕܼܒ̇ܚܵܐ: ܐܲܝܟ ܥܸܣܪܝܼܢ ܘܚܲܡܫܵܐ ܓܲܒ̣ܪ̈ܝܼܢ ܩܵܝ̇ܡܝܼܢ: ܘܚܲܨܲܝ̈ܗܘܿܢ ܠܘܼܩܒܲܠ ܗܲܝܟ̇ܠܹܗ ܕܡܵܪܝܵܐ: ܘܐܲܦܲܝ̈ܗܘܿܢ ܠܡܲܕܼܢ̱ܚܵܐ: ܘܲܡܩܲܕ̇ܡܝܼܢ ܘܣܵܓ̣ܕܝܼܢ ܠܫܸܡܫܵܐ.

ܝܙ:ܝܙ:ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ: ܕܲܠܡܵܐ ܙܥܘܿܪܝܵܐ ܗ̄ܝܼ ܠܲܕܼܒܹܝܬ̣ ܝܑܼܗܘܼܕܼܵܐ ܛܲܢܦܘܼܬ̣ܵܐ ܗܵܕܹܐ ܕܥܵܒ̣ܕ̇ܝܼܢ ܗܵܪܟܵܐ: ܕܲܡܠܵܐܘܼܗ̇ ܠܐܲܪܥܵܐ ܥܵܘܼܠܵܐ ܘܲܗܦܲܟ̣ܘ ܠܡܲܪܓܵܙܘܼܬܲܢܝ. ܘܗܸܢܘܿܢ ܡܲܦܩ̄ܥܝܼܢ ܒܲܢܚܝܼܪ̈ܲܝܗܘܿܢ.

ܝܚ:ܐܵܦ ܐܸܢܵܐ ܐܸܥܒܸ̇ܕܼ ܒܚܸܡܬ̣ܵܐ: ܘܠܵܐ ܬܚܘܼܣ ܥܲܝܢܝ ܘܠܵܐ ܐܹܪܲܚܸܡ: ܘܢܸܩܪܘܿܢ ܒܐܸܕܼܢܲܝ̈ ܒܩܵܠܵܐ ܪܵܡܵܐ ܘܠܵܐ ܐܸܫܡܲܥ ܐܸܢܘܿܢ.

ܩܹܦܵܠܹܐܘܿܢ:ܛ.

ܐ:ܘܲܩ̣ܪܵܐ ܒܐܸܕܼܢܲܝ̈ ܒܩܵܠܵܐ ܪܵܡܵܐ ܘܐܸܡܲܪ. ܩܪܘܿܒ̣ܘ ܦܵܪ̈ܘܿܥܹܝܗ̇ ܕܲܡܕܼܝܼܢ̄ܬܵܐ: ܘܐ̄ܢܵܫ ܡܵܐܢܹ̈ܐ ܕܦܘܼܪܥܵܢܹܗ ܒܐܝܼܕܹܗ.

ܒ:ܘܲܚܙܹ̇ܝܬ̣ ܫܬܵܐ ܓܲܒ̣ܪ̈ܝܼܢ ܐܵܬܹ̇ܝܢ ܡ̣ܢ ܐܘܼܪܚܵܐ ܕܬܲܪܥܵܐ ܥܸܠܝܵܐ ܕܚܵܐܲܪ ܠܓܲܪܒ̇ܝܵܐ: ܘܐ̄ܢܵܫ ܡܵܐܢܲܝ̈ ܦܘܼܪܥܵܢܹܗ ܒܐܝܼܕܹܗ: ܘܓܲܒ̣ܪܵܐ ܚܲܕܼ ܒܲܝܢܵܬ̣ܗܘܿܢ ܘܲܠܒ̣ܝܼܫ ܒܘܼܨܵܐ: ܘܐܲܣܵܪ ܚܲܨܹ̈ܐ ܕܣܲܦܝܼܠܵܐ ܒܚܲܨܵܘ̈ܗܝ: ܘܐܸܬ̣ܵܘ ܘܩܵܡ̣ܘ ܥܲܠ ܓܸܢ̄ܒ̣ ܡܲܕܼܒ̇ܚܵܐ ܕܲܢܚܵܫܵܐ.

ܓ:ܘܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ: ܣܠܸܩ̣ ܡ̣ܢ ܟܪܘܿܒ̣ܵܐ ܕܩܵܐܹ̇ܡ ܗ̄ܘܼܵܐ ܥܲܠ ܙܵܘܝܼܬ̣ܵܐ ܕܒܲܝܬܵܐ: ܘܲܩ̣ܪܵܐ ܠܓܲܒ̣ܪܵܐ ܕܲܠܒ̣ܝܼܫ ܒܘܼܨܵܐ: ܘܐܲܣܵܪ ܚܲܨܹ̈ܐ ܕܣܲܦܝܼܠܵܐ ܒܚܲܨܵܘ̈ܗܝ.

ܕ:ܘܐܸܡܲܪ ܠܹܗ ܡܵܪܝܵܐ: ܥܒܲܪ ܒܓ̣ܵܘ ܡܕܼܝܼܢ̄ܬܵܐ ܒܓ̣ܵܘ ܐܘܿܪܸܫܠܸܡ: ܘܲܪܫܘܿܡ ܪܘܼܫܡܵܐ ܥܲܠ ܒܹܝܬ̣ ܥܲܝ̈ܢܲܝܗܘܿܢ ܕܓܲܒ̣ܪܹ̈ܐ ܕܡܸܬ̇ܬܲܢܚܝܼܢ ܘܡܸܬ̇ܕܲܢܩܝܼܢ: ܥܲܠ ܟܠܗܹܝܢ ܛܲܢܦ̈ܘܵܬ̣ܵܐ ܘܒ̣ܝܼ̈ܫܵܬ̣ܵܐ ܕܡܸܬ̣ܥܲܒ̣̈ܕܵܢ ܒܓ̣ܵܘܵܗ̇.

ܗ:ܘܲܠܗܵܢܘܿܢ ܕܥܲܡܹܗ ܐܸܢܘܿܢ: ܐܸܡܲܪ ܠܗܘܿܢ ܠܥܹܢܲܝ: ܥܒܪܘ ܒܓ̣ܵܘ ܡܕܼܝܼܢ̄ܬܵܐ ܒܵܬܲܪܝ: ܘܲܚܪܘܿܒ̣ܘ. ܘܠܵܐ ܢܚܘܼ̈ܣܵܢ ܥܲܝܢܲܝ̈ܟ̇ܘܿܢ ܘܠܵܐ ܬܪܲܚܡܘܼܢ.

ܘ:ܘܲܠܣܵܒܹ̈ܐ ܘܲܠܓܲܕ̇ܘܼ̈ܕܹܐ ܘܠܲܒ̣ܬ̣ܘܼ̈ܠܵܬ̣ܵܐ: ܘܠܲܛܠܵܝܹ̈ܐ ܘܲܠܢܸܫܹ̈ܐ ܩܲܛܸܠܘ ܠܲܚܒ̣ܵܠܵܐ: ܘܲܠܟ̣ܠ ܐ̄ܢܵܫ ܕܐܝܼܬ̣ ܥܠܵܘܗܝ ܪܘܼܫܡܵܐ ܠܵܐ ܬܸܩ̱ܪܒ̣ܘܼܢ: ܘܡ̣ܢ ܡܲܩܕܲܫܝ ܫܲܪܵܘ. ܘܫܲܪܝܼܘ ܒܓܲܒ̣ܪܹ̈ܐ ܣܵܒܹ̈ܐ ܕܩܵܝ̇ܡܝܼܢ ܗ̄ܘܼܵܘ ܩܕܼܵܡ ܒܲܝܬܵܐ.

ܙ:ܘܐܸܡܲܪ ܠܗܘܿܢ ܛܲܡܐܘܼܗܝ ܠܒܲܝܬܵܐ: ܘܲܡܠܵܘ ܕܵܪܹ̈ܐ ܚܪ̈ܝܼܒܹܐ: ܦܘܿܩܘ ܩܲܛܸܠܘ ܒܲܡܕܼܝܼܢ̄ܬܵܐ.

ܚ:ܘܟܲܕܼ ܚܪܲܒ̣ܘ ܐܸܢܘܿܢ: ܐܸܫܬܲܚ̇ܪܹܬ̣ ܐܸܢܵܐ ܘܢܸܦ̇ܠܹܬ̣ ܥܲܠ ܐܲܦܲܝ̈: ܘܐܲܝܠܠܹܬ̣ ܒܩܵܠܵܐ ܪܵܡܵܐ ܘܐܸܡ̇ܪܹܬ̣: ܐܘܿܗ ܡܵܪܹܐ ܡܵܪ̈ܵܘܬ̣ܵܐ: ܡܚܲܒܸ̇ܠ ܐܲܢ̄ܬ̇ ܠܟ̣ܠ ܕܐܸܫܬܲܚܲܪ ܡ̣ܢ ܝܑܼܣܪܵܝܹܠ: ܘܐܵܫܹ̇ܕܼ ܐܲܢ̄ܬ̇ ܪܘܼܓ̣ܙܵܟ ܥܲܠ ܐܘܿܪܸܫܠܸܡ.

ܛ:ܘܐܸܡܲܪ ܠܝܼ: ܥܵܘܼܠܵܐ ܕܒܹܝܬ̣ ܝܑܼܣܪܵܝܹܠ ܘܕܲܝܗܘܼܕܼܵܐ ܣܓ̇ܝܼ ܛܵܒ̣: ܘܐܸܬ̣ܡܲܠܝܲܬ̤ ܐܲܪܥܵܐ ܕܡܵܐ: ܘܲܡܕܼܝܼܢ̄ܬܵܐ ܐܸܬ̣ܡܲܠܝܲܬ̤ ܢܸܟ̣ܠܵܐ: ܘܐܸܡܲܪܘ ܫܲܒ̣ܩܵܗ̇ ܡܵܪܝܵܐ ܠܐܲܪܥܵܐ: ܘܠܵܐ ܚܵܙܹ̇ܐ ܠܲܢ ܡܵܪܝܵܐ.

ܝ:ܘܐܸܢܵܐ ܠܵܐ ܐܹܚܘܼܣ ܥܠܲܝܗܘܿܢ ܘܠܵܐ ܐܹܪܲܚܸܡ: ܐܘܼܪ̈ܚܵܬ̣ܗܘܿܢ ܒܪܹܫܗܘܿܢ ܐܸܦܪܘܿܥ.

ܝܐ:ܘܲܚܙܹ̇ܝܬ̣ ܠܓܲܒ̣ܪܵܐ ܕܲܠܒ̣ܝܼܫ ܒܘܼܨܵܐ ܕܲܥܢ̣ܵܐ ܘܐܸܡܲܪ: ܥܸܒ̣ܕܹ̇ܬ̣ ܐܲܝܟܲܢܵܐ ܕܦܲܩܸܕ̇ܬܵܢܝ.

ܩܹܦܵܠܹܐܘܿܢ:ܝ.

ܐ:ܘܲܚܙܹ̇ܝܬ̣ ܡܲܛܠܠܵܐ ܕܲܠܥܸܠ ܡ̣ܢ ܪܹܫ ܟܪ̈ܘܼܒܹܐ: ܐܲܝܟ ܚܸܙܘܵܐ ܕܟܹܐܦܵܐ ܕܣܲܦܝܼܠܵܐ: ܘܐܲܝܟ ܚܸܙܘܵܐ ܕܲܕܼܡܘܼܬ̣ܵܐ ܕܟ̣ܘܼܪܣܝܵܐ ܠܥܸܠ ܡܸܢܗܘܿܢ.

ܒ:ܘܲܩ̣ܪܵܐ ܠܓܲܒ̣ܪܵܐ ܕܲܐܠܒ̣ܝܼܫ ܒܘܼܨܵܐ: ܘܐܸܡܲܪ ܠܹܗ: ܥܘܿܠ ܠܒܲܝܢܵܬ̣ ܓܝܼ̈ܓ̣ܠܹܐ ܠܲܬ̣ܚܹܝܬ̣ ܟܪ̈ܘܿܒܹܐ: ܘܲܡܠܝܼ ܚܘܼܦܢܲܝ̈ܟ ܓܘܼܡܪܹ̈ܐ ܕܢܘܼܪܵܐ ܡ̣ܢ ܒܲܝܢܵܬ̣ ܟܪ̈ܘܿܒܹܐ: ܘܲܕܼܪܝܼ ܥܲܠ ܡܕܼܝܼܢ̄ܬܵܐ: ܘܥܲܠ ܠܥܹܢܲܝ.

ܓ:ܘܲܟ̣ܪ̈ܘܿܒܹܐ ܩܵܝ̇ܡܝܼܢ ܗ̄ܘܼܵܘ ܡ̣ܢ ܝܲܡܝܼܢܹܗ ܕܒܲܝܬܵܐ: ܟܲܕܼ ܥܵܐܹ̇ܠ ܓܲܒ̣ܪܵܐ ܗܵܘܿ: ܘܕܼܵܪܬܵܐ ܓܵܘܵܝܬܵܐ ܐܸܬ̣ܡܲܠܝܲܬ̣ ܗ̄ܘܼܵܬ̣ ܥܢܵܢܵܐ.

ܕ:ܘܐܸܬܲܬ̇ܪܝܼܡ ܫܘܼܒ̣ܚܹܗ ܕܐܲܠܵܗܵܐ ܡ̣ܢ ܟܪܘܿܒ̣ܵܐ ܕܲܠܥܸܠ ܡ̣ܢ ܙܵܘܝܼܬ̣ܵܐ ܕܒܲܝܬܵܐ: ܘܐܸܬ̣ܡ̱ܠܝܼ ܒܲܝܬܵܐ ܥܢܵܢܵܐ: ܘܕܼܵܪܬܵܐ ܓܵܘܵܝܬܵܐ ܐܸܬ̣ܡܲܠܝܲܬ̤ ܗ̄ܘܼܵܬ̣ ܙܲܗܪܵܐ ܕܫܘܼܒ̣ܚܹܗ ܕܡܵܪܝܵܐ.

ܗ:ܘܩܵܠܵܐ ܕܓܸܦܲܝ̈ܗܘܿܢ ܕܲܟ̣ܪ̈ܘܿܒܹܐ ܡܸܫܬ̇ܡܲܥ ܗ̄ܘܼܵܐ: ܥܕܲܡܵܐ ܠܕܼܵܪܬܵܐ ܒܲܪܵܝܬܵܐ: ܐܲܝܟ ܩܵܠܹܗ ܕܐܲܠܵܗܵܐ ܡܵܐ ܕܲܡܡܲܠܸܠ.

ܘ:ܘܟܲܕܼ ܦ̣ܩܲܕܼ ܠܓܲܒ̣ܪܵܐ ܕܲܠܒ̣ܝܼܫ ܒܘܼܨܵܐ: ܐܸܡܲܪ ܠܹܗ: ܣܲܒ̣ ܢܘܼܪܵܐ ܡ̣ܢ ܒܹܝܬ̣ ܓܝܼ̈ܓ̣ܠܹܐ ܡ̣ܢ ܒܲܝܢܵܬ̣ ܟܪ̈ܘܿܒܹܐ: ܘܐܸܬ̣ܵܐ ܘܩܵܡ̣ ܥܲܠ ܓܸܢ̄ܒ̣ ܓܝܼ̈ܓ̣ܠܹܐ.

ܙ:ܘܐܵܘܫܸܛ ܟܪܘܿܒ̣ܵܐ ܐܝܼܕܹܗ ܡ̣ܢ ܒܲܝܢܵܬ̣ ܟܪ̈ܘܿܒܹܐ ܠܢܘܼܪܵܐ ܕܒܲܝܢܵܬ̣ ܟܪ̈ܘܿܒܹܐ: ܘܲܫ̣ܩܲܠ ܐܲܪܡܝܼ ܒܚܘܼܦܢܵܘ̈ܗܝ ܕܓܲܒ̣ܪܵܐ ܕܲܠܒ̣ܝܼܫ ܒܘܼܨܵܐ: ܘܲܢܣܲܒ̣ ܘܲܢܦܲܩ̣.

ܚ:ܘܲܚܙܹ̇ܝܬ̣ ܠܲܟ̣ܪ̈ܘܿܒܹܐ: ܕܡܘܼܬ̣ܵܐ ܕܐܝܼܕܼܵܐ ܕܒܲܪܢܵܫܵܐ ܬܚܹܝܬ̣ ܓܸܦܲܝ̈ܗܘܿܢ.

ܛ:ܘܲܚܙܹ̇ܝܬ̣ ܐܲܪܒܲܥ ܓܝܼ̈ܓ̣ܠܝܼܢ ܥܲܠ ܓܸܢ̄ܒ̣ ܟܪ̈ܘܿܒܹܐ: ܚܕܼܵܐ ܚܕܼܵܐ ܓܝܼܓ̣ܠܵܐ ܥܲܠ ܓܸܢ̄ܒ̣ ܟܪܘܿܒ̣ܵܐ ܚܲܕܼ: ܘܚܸܙ̱ܘܗܹܝܢ ܕܓ̣ܝܼ̈ܓ̣ܠܹܐ: ܐܲܝܟ ܚܸܙܘܵܐ ܕܟܹܐܦܵܐ ܕܬ̣ܵܪܫܝܼܫ.

ܝ:ܘܚܲܕܼ ܗ̄ܘܼܵܐ ܚܸܙ̱ܘܗܹܝܢ ܘܲܕܼܡܘܼܬ̣ܗܹܝܢ ܕܐܲܪ̈ܒ̇ܥܵܬܲܝܗܹܝܢ: ܐܲܝܟ ܓܝܼܓ̣ܠܵܐ ܒܓ̣ܵܘ ܓܝܼܓ̣ܠܵܐ.

ܝܐ:ܘܡܵܐ ܕܐܵܙܵܠ̄ـ̈ـܢ ܗ̄ܘܲܝ̈ ܥܲܠ ܐܲܪܒ̇ܥܵܐ ܓܲܒܲܝܗܹ̈ܝܢ ܐܵܙܵܠ̄ـ̈ـܢ ܗ̄ܘܲܝ̈: ܘܠܵܐ ܗܵܦ̈ܟܵܢ ܗ̄ܘܲܝ̈: ܐܸܠܵܐ ܠܐܲܬ̣ܪܵܐ ܕܐܵܙܵܠ̄ܐ ܗ̄ܘܼܵܬ̣ ܪܹܫܵܝܬ̇ܗܹܝܢ: ܒܵܬ̣ܪܵܗ̇ ܐܵܙܵܠ̄ܢ ܗ̄ܘܲܝ̈ ܘܠܵܐ ܡܸܬ̣ܗܲܦ̈ܟܵܢ ܗ̄ܘܲܝ̈.

ܝܒ:ܘܟ̣ܠܹܗ ܒܸܣ̱ܪܗܹܝܢ ܘܚܲܨܲܝ̈ܗܹܝܢ ܘܐܝܼܕܲܝ̈ܗܹܝܢ ܘܓܸܦܲܝ̈ܗܹܝܢ ܕܓ̣ܝܼ̈ܓ̣ܠܹܐ: ܡܠܸܐ ܥܲܝܢܹ̈ܐ ܗ̄ܘܲܝ̈ ܟܲܕܼ ܚܵܕܼܪ̈ܵܢ ܗ̄ܘܲܝ̈ ܠܓܲܒܲܝ̈ܗܹܝܢ.

ܝܓ:ܘܲܠܐܘܼܦܢܹ̈ܐ ܩ̣ܪܵܐ ܐܸܢܘܿܢ ܓܝܼ̈ܓ̣ܠܹܐ ܩܕܼܵܡܲܝ.

ܝܕ:ܘܐܲܪܒܲܥ ܐܲܦ̈ܝܼܢ ܠܚܲܕܼ ܚܲܕܼ ܡܸܢܗܘܿܢ: ܚܕܼܵܐ ܐܲܦܲܝ̈ ܟܪܘܿܒ̣ܵܐ: ܘܐ̄ܚܪܹܬ̣ܵܐ ܐܲܦܹ̈ܐ ܕܒܲܪܢܵܫܵܐ: ܘܐ̄ܚܪܹܬ̣ܵܐ ܐܲܦܹ̈ܐ ܕܐܲܪܝܵܐ: ܘܐ̄ܚܪܹܬ̣ܵܐ ܐܲܦܹ̈ܐ ܕܢܸܫܪܵܐ.

ܝܗ:ܘܐܸܬ̇ܬ̇ܪܝܼܡܘ ܟܪ̈ܘܿܒܹܐ: ܗܵܝ̇ ܚܲܝ̄ܘܬ̣ܵܐ ܕܲܚܙܹ̇ܝܬ̣ ܒܲܢܗܲܪ ܟܒܲܪ.

ܝܘ:ܘܡܵܐ ܕܐܵܙܠ̄ܝܼܢ ܗ̄ܘܼܵܘ ܟܪ̈ܘܿܒܹܐ: ܐܵܙܵܠ̄ـ̈ـܢ ܗ̄ܘܲܝ̈ ܓܝܼ̈ܓ̣ܠܹܐ ܥܲܡܗܘܿܢ: ܘܡܵܐ ܕܫܵܩ̇ܠܝܼܢ ܗ̄ܘܼܵܘ ܟܪ̈ܘܿܒܹܐ ܓܸܦܲܝ̈ܗܘܿܢ ܠܡܸܬ̇ܬ̇ܪܵܡܘܼ ܡ̣ܢ ܐܲܪܥܵܐ: ܠܵܐ ܗܵܦ̈ܟܵܢ ܗ̄ܘܝ̈ ܓܝܼ̈ܓ̣ܠܹܐ ܡܸܢܗܘܿܢ.

ܝܙ:ܘܡܵܐ ܕܩܵܝ̇ܡܝܼܢ ܗ̄ܘܼܵܘ ܩܵܝ̈ܡܵܢ ܗ̄ܘܲܝ̈: ܘܡܵܐ ܕܡܸܬ̇ܬ̇ܪܝܼܡܝܼܢ ܗ̄ܘܼܵܘ ܡܸܬ̇ܬ̇ܪ̈ܝܼܡܵܢ ܗ̄ܘܲܝ̈: ܘܡܵܐ ܕܫܵܩܠܝܼܢ ܗ̄ܘܼܵܘ ܟܪ̈ܘܿܒܹܐ ܓܸܦܲܝ̈ܗܘܿܢ: ܫܵܩ̈ܠܝܼܢ ܗ̄ܘܲܝ̈ ܓܝܼ̈ܓ̣ܠܹܐ ܥܲܡܗܘܿܢ: ܡܸܛܠ ܕܪܘܼܚܵܐ ܕܚܲܝܹ̈ܐ ܐܝܼܬ̣ ܗ̄ܘܼܵܬ̣ ܒܗܹܝܢ.

ܝܚ:ܘܲܢܦܲܩ̣ ܫܘܼܒ̣ܚܹܗ ܕܡܵܪܝܵܐ ܡ̣ܢ ܙܵܘܝܼܬ̣ܵܐ ܕܒܲܝܬܵܐ: ܘܩܵܡ̣ ܥܲܠ ܟܪ̈ܘܿܒܹܐ.

ܝܛ:ܘܲܫܩܲܠܘ ܟܪ̈ܘܿܒܹܐ ܓܸܦܲܝ̈ܗܘܿܢ: ܘܐܸܬ̇ܬ̇ܪܝܼܡܘ ܡ̣ܢ ܐܲܪܥܵܐ ܠܥܹܢܲܝ: ܘܟܲܕܼ ܢܦܲܩ̣ܘ ܓܝܼ̈ܓ̣ܠܹܐ ܥܲܡܗܘܿܢ ܗ̄ܘܲܝ̈: ܘܩܵܡܘ ܒܡܲܥܠܵܢܵܐ ܕܬܲܪܥܵܐ ܡܲܕܼܢ̱ܚܵܝܵܐ ܕܒܲܝܬܹ̇ܗ ܕܡܵܪܝܵܐ: ܘܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ: ܠܥܸܠ ܡܸܢܗܘܿܢ.

ܟܟ:ܗܵܕܲܐ ܗ̄ܝܼ ܚܲܝ̄ܘܼܬ̣ܵܐ ܕܲܚܙܹ̇ܝܬ̣ ܬܚܹܝܬ̣ ܐܲܠܵܗܵܐ ܕܝܼܣܪܵܝܹܠ ܥܲܠ ܢܗܲܪ ܟܒܲܪ: ܘܝܼܕܼܥܹ̇ܬ̣ ܕܲܟ̣ܪ̈ܘܿܒܹܐ ܐܸܢܘܿܢ.

ܟܐ:ܐܲܪܒܲܥ ܐܲܪܒܲܥ ܐܲܦ̈ܝܼܢ ܠܚܲܕܼ ܚܲܕܼ ܡܸܢܗܘܿܢ: ܘܐܲܪܒ̇ܥܵܐ ܓܸܦ̈ܝܼܢ ܠܚܲܕܼ ܡܸܢܗܘܿܢ: ܘܲܕܼܡܘܼܬ̣ܵܐ ܕܐܝܼܕܼܵܐ ܕܒܲܪܢܵܫܵܐ ܬܚܹܝܬ̣ ܓܸܦܲܝ̈ܗܘܿܢ.

ܟܒ:ܘܲܕܼܡܘܼܬ̣ܵܐ ܕܐܲܦܲܝ̈ܗܘܿܢ: ܐܲܝܟ ܗܵܠܹܝܢ ܐܲܦܹ̈ܐ ܕܲܚܙܹ̇ܝܬ̣ ܥܲܠ ܢܗܲܪ ܟܒܲܪ: ܘܗܵܟ̣ܘܵܬ̣ ܚܸܙ̱ܘܗܘܿܢ. ܘܚܲܕܼ ܚܲܕܼ ܠܓܲܒܹ̇ܗ ܐܵܙ̇ܠ̄ܝܼܢ ܗ̄ܘܼܵܘ.

ܩܹܦܵܠܹܐܘܿܢ:ܝܐ.

ܐ:ܘܲܫܩܲܠܬܲܢܝ ܪܘܼܚܵܐ: ܘܐܲܝܬ̇ܝܵܬܲܢܝ ܠܬܲܪܥܵܐ ܡܲܕܼܢ̱ܚܵܝܵܐ ܕܒܲܝܬܹ̇ܗ ܕܡܵܪܝܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܚܙܹ̇ܝܬ̣ ܒܡܲܥܠܵܢܵܐ ܕܬܲܪܥܵܐ ܥܸܣܪܝܼܢ ܘܚܲܡܫܵܐ ܓܲܒ̣ܪ̈ܝܼܢ: ܘܲܚܙܹ̇ܝܬ̣ ܒܲܝܢܵܬ̣ܗܘܿܢ ܠܝܲܥܙܲܢܝܵܐ ܒܲܪ ܥܵܙܘܿܪ: ܘܠܲܦܠܲܛܝܵܐ ܒܲܪ ܒܢܵܝܵܐ ܪܵܘܪ̈ܒ̣ܵܢܹܐ ܕܥܲܡܵܐ.

ܒ:ܘܐܸܡܲܪ ܠܝܼ ܡܵܪܝܵܐ: ܒܲܪܢܵܫܵܐ: ܗܵܠܹܝܢ ܐܸܢܘܿܢ ܓܲܒ̣ܪܹ̈ܐ ܕܡܸܬ̣ܚܲܫܒ̣ܝܼܢ ܥܸܬܵܐ: ܘܡܵܠܟ̇ܝܼܢ ܡܸܠ̈ܟܹ̇ܐ ܒܝܼܫܹ̈ܐ ܒܲܡܕܼܝܼܢ̄ܬܵܐ ܗܵܕܹܐ.

ܓ:ܘܐܵܡ̇ܪܝܼܢ: ܠܵܐ ܗ̄ܘܼܵܐ ܒܓ̣ܵܘܵܗ̇ ܒܢܲܝܢ ܒܵـ̈ـܬܹ̇ܐ: ܗ̤ܝ ܩܲܕܼܣܵܐ ܘܲܚܢܲܢ ܒܸܣܪܵܐ.

ܕ:ܡܸܟܹ̇ܝܠ ܐܸܬ̣ܢܲܒܵܐ ܥܠܲܝܗܘܿܢ: ܐܸܬ̣ܢܲܒܵܐ ܒܲܪܢܵܫܵܐ.

ܗ:ܘܢܸܦܠܲܬ̤ ܥܠܲܝ ܪܘܼܚܹܗ ܕܡܵܪܝܵܐ: ܘܐܸܡܲܪ ܠܝܼ: ܐܸܡܲܪ ܗܵܟܲܢܵܐ ܐܵܡܲܪ ܡܵܪܐ ܡܵܪ̈ܵܘܵܬ̣ܵܐ: ܗܵܟܲܢܵܐ ܪܚܸܡ̣ܬ̇ܘܿܢ ܒܢܲܝ̈ ܝܑܼܣܪܵܝܹܠ: ܘܬܲܪ̈ܥܝܵܬ̣ܵܐ ܕܪܘܼܚܟ̣ܘܿܢ ܐܸܢܵܐ ܝܵܕܲܥ ܐ̄ܢܵܐ ܠܗܹܝܢ.

ܘ:ܐܲܣܓ̇ܝܼܬ̇ܘܿܢ ܩܛܝܼܠܲܝ̈ܟ̇ܘܿܢ ܒܲܡܕܼܝܼܢ̄ܬܵܐ ܗܵܕܹܐ: ܘܲܡܠܲܝܬ̇ܘܿܢ ܫܘܼܩܹ̈ܝܗ̇ ܚܪ̈ܝܼܒܹܐ.

ܙ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܚܪ̈ܝܼܒܲܝܟ̇ܘܿܢ ܕܐܲܪܡܝܼܬ̇ܘܿܢ ܒܓ̣ܵܘܵܗ̇: ܗܸܢܘܿܢ ܐܸܢܘܿܢ ܒܸܣܪܵܐ ܘܗ̤ܝ ܩܲܕܼܣܵܐ: ܘܲܠܟ̣ܘܿܢ ܡܲܦܸܩ ܐ̄ܢܵܐ ܡ̣ܢ ܓܵܘܵܗ̇.

ܚ:ܡ̣ܢ ܚܲܪܒܵܐ ܕܚܸܠܬ̇ܘܿܢ: ܘܚܲܪܒܵܐ ܐܲܝܬܸ̇ܐ ܥܠܲܝܟ̇ܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܛ:ܘܐܲܦܸܩܟ̣ܘܿܢ ܡ̣ܢ ܓܵܘܵܗ̇: ܘܐܲܫܠܸܡܟ̣ܘܿܢ ܒܐܝܼܕܼܵܐ ܕܢܘܼܟ̣ܪ̈ܵܝܹܐ: ܘܐܸܥܒܸ̇ܕܼ ܡܸܢܟ̣ܘܿܢ ܕܝܼܢܹ̈ܐ.

ܝ:ܒܚܲܪܒܵܐ ܬܸܦܠܘܿܢ: ܘܥܲܠ ܬܚܘܼܡܵܐ ܕܝܼܣܪܵܝܹܠ ܐܹܕ̇ܘܼܢܟ̣ܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܝܐ:ܘܗ̤ܝ ܠܵܐ ܬܸܗܘܹܐ ܠܟ̣ܘܿܢ ܩܲܕܼܣܵܐ: ܘܐܲܢ̄ܬ̇ܘܿܢ ܠܵܐ ܬܸܗܘܘܿܢ ܒܓ̣ܵܘܵܗ̇ ܒܸܣܪܵܐ: ܥܲܠ ܬܚܘܼܡܵܐ ܕܝܼܣܪܵܝܹܠ ܐܹܕ̇ܢܟ̣ܘܿܢ.

ܝܒ:ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܕܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܬ̇ܘܿܢ: ܘܕܼܝܼܢܲܝ̈ ܠܵܐ ܥܒܲܕ̇ܬ̇ܘܿܢ: ܘܐܲܝܟ ܕܝܼܢܹ̈ܐ ܕܥܲܡܡܹ̈ܐ ܕܲܚܕܼܵܪ̈ܲܝܟ̇ܘܿܢ ܥܒܲܕ̇ܬ̇ܘܿܢ.

ܝܓ:ܘܟܲܕܼ ܐܸܬ̣ܢܲܒ̇ܝܼܬ̇: ܡܝܼܬ̣ ܦܠܲܛܝܵܐ ܒܲܪ ܒܢܵܝܵܐ: ܘܢܸܦܠܹ̇ܬ̣ ܥܲܠ ܐܲܦܲܝ̈: ܘܐܲܝܠܠܹܬ̣ ܒܩܵܠܵܐ ܪܵܡܵܐ: ܘܐܸܡ̇ܪܹܬ̣: ܐܘܿܗ ܡܵܪܹܐ ܡܵܪ̈ܵܘܵܬ̣ܵܐ: ܣܵܘܦܵܢܵܐ ܥܵܒܹ̇ܕܼ ܐܲܢ̄ܬ̇ ܠܫܲܪܟܹ̇ܗ ܕܝܼܣܪܵܝܹܠ.

ܝܕ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܗ:ܒܲܪܢܵܫܵܐ: ܐܲܚܲܝ̈ܟ ܐܲܚܲܝ̈ܟ ܐ̄ܢܵܫܵܐ ܕܲܫܒ̣ܝܼܬ̣ܵܟ: ܘܟ̣ܠܗܘܿܢ ܕܒܹܝܬ̣ ܝܑܼܣܪܵܝܹܠ ܢܣܘܼܦܘܼܢ: ܕܐܸܡܲܪܘ ܠܗܘܿܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܐܸܬ̣ܪܲܚܲܩܘ ܡ̣ܢ ܡܵܪܝܵܐ: ܠܲܢ ܗ̄ܘܼ ܓܹܝܪ ܐܸܬ̣ܝܲܗܒܲܬ̤ ܐܲܪܥܵܐ ܠܝܵܪܬ̇ܘܼܬ̣ܵܐ.

ܝܘ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܕܼܚܘܿܩ ܐܸܢܘܿܢ ܒܥܲܡܡܹ̈ܐ: ܘܐܹܒܲܕܲܪ ܐܸܢܘܿܢ ܒܐܲܪ̈ܥܵܬ̣ܵܐ: ܘܐܸܗܘܹܐ ܠܗܘܿܢ ܠܡܲܩܕ̇ܫܵܐ ܙܥܘܿܪܵܐ ܒܐܲܪ̈ܥܵܬ̣ܵܐ ܕܐܸܙܲܠ̣ܘ ܠܗܹܝܢ.

ܝܙ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܹܟܲܢܫܟ̣ܘܿܢ ܡ̣ܢ ܥܲܡܡܹ̈ܐ: ܘܐܹܩܲܪܸܒ̣ܟ̣ܘܿܢ ܡ̣ܢ ܐܲܪ̈ܥܵܬ̣ܵܐ ܕܐܸܬ̣ܒܲܕܲܪܬ̇ܘܿܢ ܒܗܹܝܢ: ܘܐܸܬܸ̇ܠ ܠܟ̣ܘܿܢ ܐܲܪܥܵܐ ܕܝܼܣܪܵܝܹܠ.

ܝܚ:ܘܢܸܥܠܘܿܢ ܠܵܗ̇: ܘܢܸܥܒ̇ܪܘܿܢ ܟܠܗܹܝܢ ܕܸܚ̈ܠܵܬ̣ܵܗ̇: ܘܟ̣ܠܗܹܝܢ ܛܲܢܦ̈ܘܵܬ̣ܵܗ̇ ܡܸܢܵܗ̇.

ܝܛ:ܘܐܸܬܸ̇ܠ ܠܗܘܿܢ ܠܸܒܵܐ ܚܲܕܼܬ̣ܵܐ: ܘܪܘܼܚܵܐ ܚܕܲܬܵܐ ܐܸܬܸ̇ܠ ܒܗܘܿܢ: ܘܐܲܥܒܲܪ ܠܸܒܵܐ ܕܟܹܐܦܵܐ ܡ̣ܢ ܒܸܣ̱ܪܗܘܿܢ: ܘܐܸܬܸ̇ܠ ܠܗܘܿܢ ܠܸܒܵܐ ܕܒܸܣܪܵܐ.

ܟܟ:ܘܲܢܗܲܠܟ̣ܘܿܢ ܒܦܘܼܩ̈ܕܵܢܲܝ: ܘܢܸܛܪܘܼܢ ܕܝܼܢܲܝ̈ ܘܢܸܥܒ̇ܕܼܘܼܢ ܐܸܢܘܿܢ: ܘܢܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܗܘܿܢ ܐܲܠܵܗܵܐ.

ܟܐ:ܒܪܸܥܝܵܢܵܐ ܓܹܝܪ ܕܲܦܬܲܟ̣ܪ̈ܲܝܗܘܿܢ ܘܲܕܼܛܲܢܦ̈ܘܵܬ̣ܗܘܿܢ ܐܵܙܹ̇ܠ ܗ̄ܘܼܵܐ ܠܸܒ̇ܗܘܿܢ: ܐܘܼܪ̈ܚܵܬ̣ܗܘܿܢ ܐܹܦܪܘܿܥ ܒܪܹܫܗܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܟܒ:ܘܐܲܪܝܼܡܘ ܟܪ̈ܘܿܒܹܐ ܓܸܦܲܝ̈ܗܘܿܢ: ܘܓ̣ܝܼ̈ܓ̣ܠܹܐ ܥܲܡܗܘܿܢ: ܘܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ ܠܥܸܠ ܡܸܢܗܘܿܢ.

ܟܓ:ܘܐܸܬ̇ܬ̇ܪܝܼܡ ܫܘܼܒ̣ܹܚܹܗ ܕܡܵܪܝܵܐ ܡ̣ܢ ܓܵܘ ܡܕܼܝܼܢ̄ܬܵܐ: ܘܩܵܡ̣ ܥܲܠ ܛܘܼܪܵܐ ܕܲܒ̣ܡܲܕܼܢ̱ܚܵܝܵܗ̇ ܕܲܡܕܼܝܼܢ̄ܬܵܐ.

ܟܕ:ܘܪܘܼܚܵܐ ܫܩܲܠܬܲܢܝ: ܘܐܲܝܬ̇ܝܵܬܲܢܝ ܠܐܲܪܥܵܐ ܕܟܲܠܕܵܝܹ̈ܐ ܠܲܫܒ̣ܝܼܬ̣ܵܐ: ܒܚܸܙܘܵܐ ܘܲܒ̣ܪܘܼܚܵܐ ܕܐܲܠܵܗܵܐ: ܘܲܦܪܲܩ̣ ܠܹܗ ܡܹܢܝ ܚܸܙܘܵܐ ܕܲܚܙܹ̇ܝܬ̣.

ܟܗ:ܘܡܲܠܠܹ̇ܬ̣ ܥܲܡ ܫܒ̣ܝܼܬ̣ܵܐ: ܟܠܗܘܿܢ ܦܸܬ̣ܓ̣ܵܡܵܘ̈ܗܝ ܕܡܵܪܝܵܐ ܕܚܵܘܝܲܢܝ.

ܩܹܦܵܠܹܐܘܿܢ:ܝܒ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܒܓ̣ܵܘ ܒܲܝܬܵܐ ܡܡܲܪܡܪܵܢܵܐ ܝܵܬܹ̇ܒ̣ ܐܲܢ̄ܬ̇: ܕܥܲܝܢܹ̈ܐ ܐܝܼܬ̣ ܠܗܘܿܢ ܘܠܵܐ ܚܵܙܹ̇ܝܢ: ܘܐܸܕܼܢܹ̈ܐ ܐܝܼܬ̣ ܠܗܘܿܢ ܘܠܵܐ ܫܵܡ̇ܥܝܼܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

ܓ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܥܒܸܕܼ ܠܵܟ ܡܵܐܢܹ̈ܐ ܕܲܫܒ̣ܝܼܬ̣ܵܐ: ܘܐܸܫܬܲܒ̣ܚ̄ ܒܐܝܼܡܵܡܵܐ ܠܥܹܢܲܝܗܘܿܢ: ܡ̣ܢ ܐܲܬ̣ܪܵܟ ܠܐܲܬ̣ܪܵܐ ܐ̄ܚܪܹܢܵܐ ܕܢܸܚܙܘܿܢ: ܡܸܛܠ ܕܒܲܝܬܵܐ ܐܸܢܘܿܢ ܡܡܲܪܡܪܵܢܵܐ.

ܕ:ܘܐܲܦܸܩ ܡܵܐܢܲܝ̈ܟ ܐܲܝܟ ܡܵܐܢܹ̈ܐ ܕܲܫܒ̣ܝܼܬ̣ܵܐ ܒܐܝܼܡܵܡܵܐ ܠܥܹܢܲܝܗܘܿܢ: ܘܐܲܢ̄ܬ̇ ܦܘܿܩ ܒܪܲܡܫܵܐ ܐܲܝܟ ܕܲܒ̣ܫܸܒ̣ܝܵܐ.

ܗ:ܘܲܬ̣ܪܘܿܥ ܐܸܣܬ̣ܵܐ ܠܥܹܢܲܝܗܘܿܢ ܘܦܘܿܩ ܒܵܗ̇.

ܘ:ܘܲܫܩܘܿܠ ܫܩܘܼܠܬܵܐ ܥܲܠ ܟܲܬܦܵܟ: ܘܦܘܿܩ ܒܥܲܡܛܵܢܵܐ: ܘܟܲܣܵܐ ܐܲܦܲܝ̈ܟ ܘܠܵܐ ܬܸܚܙܹܐ ܠܐܲܪܥܵܐ: ܡܸܛܠ ܕܐܵܬ̤ܵܐ ܝܲܗ̄ܒ̣ܬܵܟ ܠܲܕܼܒܹܝܬ̣ ܝܑܼܣܪܵܝܹܠ.

ܙ:ܘܥܸܒ̣ܕܹ̇ܬ̣ ܗܵܟܲܢܵܐ ܐܲܝܟ ܕܦܲܩ̣ܕܲܢܝ: ܡܵܐܢܲܝ̈ ܐܲܦܩܹ̇ܬ̣ ܒܐܝܼܡܵܡܵܐ: ܐܲܝܟ ܡܵܐܢܹ̈ܐ ܕܲܫܒ̣ܝܼܬ̣ܵܐ: ܘܐܸܣܬ̣ܵܐ ܬܸܪܥܹܬ̣ ܒܪܲܡܫܵܐ: ܘܲܒ̣ܥܲܡܛܵܢܵܐ ܢܸܦܩܹ̇ܬ̣: ܘܥܲܠ ܟܲܬ̣ܦܝ ܫܸܩܠܹ̇ܬ̣ ܠܥܹܢܲܝܗܘܿܢ.

ܚ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܒܨܲܦܪܵܐ ܠܡܹܐܡܲܪ.

ܛ:ܒܲܪܢܵܫܵܐ: ܐܸܢ ܐܵܡ̇ܪܝܼܢ ܠܵܟ ܕܒܹܝܬ̣ ܝܑܼܣܪܵܝܹܠ ܒܲܝܬܵܐ ܡܡܲܪܡܪܵܢܵܐ: ܡܵܢܵܐ ܥܵܒܹ̇ܕܼ ܐܲܢ̄ܬ̇.

ܝ:ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܪܲܒܵܐ ܢܸܫܩܘܿܠ ܫܩܘܼܠܬܵܐ ܗܵܕܹܐ ܒܐܘܿܪܸܫܠܸܡ: ܘܟ̣ܠܗܘܿܢ ܕܒܹܝܬ̣ ܝܑܼܣܪܵܝܹܠ ܥܲܡܹܗ.

ܝܐ:ܘܐܸܡܲܪ ܠܗܘܿܢ: ܐܸܢܵܐ ܐ̄ܢܵܐ ܐܵܬ̤ܟ̣ܘܿܢ: ܐܲܝܟ ܕܥܸܒ̣ܕܹ̇ܬ̣ ܗܵܟܲܢܵܐ ܢܸܬ̣ܥ̱ܒܸܕܼ ܠܟ̣ܘܿܢ: ܘܒܲܫܒ̣ܝܼܬ̣ܵܐ ܬܹܐܙܠ̄ܘܼܢ.

ܝܒ:ܘܪܲܒܵܐ ܕܲܒ̣ܟ̣ܘܿܢ ܥܲܠ ܟܲܬ̣ܦܹܗ ܢܸܫܩܘܿܠ: ܘܲܒ̣ܥܲܡܛܵܢܵܐ ܢܸܦܘܿܩ: ܘܢܸܬ̣ܪܘܿܥ ܐܸܣܬ̣ܵܐ ܕܢܸܦܘܿܩ ܒܵܗ̇: ܘܲܢܚܲܦܸܐ ܐܲܦܵܘ̈ܗܝ ܕܠܵܐ ܢܸܚܙܹܝܗ̇ ܠܐܲܪܥܵܐ.

ܝܓ:ܘܐܸܦܪܘܿܣ ܡܨܝܼܕ̇ܬ̇ܝ ܥܠܵܘܗܝ ܘܢܸܬ̇ܬ̇ܨܝܼܕܼ ܒܵܗ̇: ܘܐܲܝܬܹ̇ܝܘܗܝ ܠܒ̣ܵܒܹܠ ܠܐܲܪܥܵܐ ܕܟܲܠܕܼܵܝܹ̈ܐ: ܘܠܵܐ ܢܸܚܙܹܝܗ̇: ܘܬܲܡܵܢ ܢܡܘܼܬ̣.

ܝܕ:ܘܟ̣ܠܗܘܿܢ ܕܲܚܕܼܝܼܪܝܼܢ ܠܹܗ ܘܲܡܥܲܕ̇ܪܝܼܢ ܠܹܗ ܘܲܡܥܲܫܢܝܼܢ ܠܹܗ: ܐܸܕܼܪܸܐ ܠܟܠ ܪܘܼܚ: ܘܚܲܪܒܵܐ ܐܹܫܲܕܲܪ ܒܵܬܲܪܗܘܿܢ.

ܝܗ:ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܕܒܲܕ̇ܪܹܬ̣ ܐܸܢܘܿܢ ܒܹܝܬ̣ ܥܲܡܡܹ̈ܐ: ܘܲܕܼܪܹܝܬ̣ ܐܸܢܘܿܢ ܒܐܲܪ̈ܥܵܬ̣ܵܐ.

ܝܘ:ܘܐܵܘܬܲܪ ܡܸܢܗܘܿܢ ܓܲܒ̣ܪܹ̈ܐ ܒܡܸܢܝܵܢܵܐ: ܡ̣ܢ ܚܲܪܒܵܐ ܘܡ̣ܢ ܟܲܦܢܵܐ ܘܡ̣ܢ ܡܵܘܬܵܐ: ܕܢܸܫܬܲܥܘܿܢ ܟܠܵܗ̇ ܛܲܢܦܘܼܬ̣ܗܘܿܢ ܒܹܝܬ̣ ܥܲܡܡܹ̈ܐ ܕܐܸܙܲܠܘ ܠܘܵܬ̣ܗܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܝܙܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܚ:ܒܲܪܢܵܫܵܐ: ܠܲܚܡܵܟ ܒܙܵܘܸܥܬ̣ܵܐ ܬܹܐܟ̣ܘܿܠ: ܘܡܲܝ̈ܟ ܒܙܵܘܸܥܬ̣ܵܐ ܘܲܒ̣ܕܸܚ̱ܠܬ̣ܵܐ ܬܸܫܬܸ̇ܐ.

ܝܛ:ܘܐܸܡܲܪ ܠܥܲܡܵܐ ܕܐܲܪܥܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܠܲܐܪܥܵܐ ܕܝܼܣܪܵܝܹܠ: ܠܲܚ̱ܡܗܘܿܢ ܒܕܸܚ̱ܠܬ̣ܵܐ ܢܹܐܟ̣ܠܘܼܢ: ܘܡܲܝ̈ܗܘܿܢ ܒܬܸܡܗܵܐ ܢܸܫܬ̇ܘܿܢ: ܡܸܛܠ ܕܚܵܪܒܵܐ ܐܲܪܥܵܐ ܒܲܡܠܹܐܵܗ̇: ܡ̣ܢ ܥܵܘܼܠܵܐ ܕܟ̣ܠܗܘܿܢ ܥܲܡܘܿܪܹ̈ܝܗ̇.

ܟܟ:ܘܲܡܕܼܝܼ̈ܢܵܬ̣ܵܐ ܕܝܵܬ̣̈ܒܵܢ ܢܸܚ̱ܪ̈ܒ̣ܵܢ: ܘܐܲܪܥܵܐ ܠܲܚܒ̣ܵܠܵܐ ܬܸܗܘܹܐ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܟܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܟܒ:ܒܲܪܢܵܫܵܐ: ܡܵܢܵܘ ܡܲܬ̣ܠܵܐ ܗܵܢܵܐ ܕܡܲܡܬ̇ܠܝܼܢ ܥܠܲܝܟ̇ܘܿܢ ܒܐܲܪܥܵܐ ܕܝܼܣܪܵܝܹܠ: ܘܐܵܡ̇ܪܝܼܢ ܢܸܓ̇ܪܘܼܢ ܝܵܘ̈ܡܵܬ̣ܵܐ: ܘܢܹܐܒܲܕܼ ܟܠܹܗ ܚܸܙܘܵܐ.

ܟܓ:ܡܸܛܠ ܗܵܢܵܐ ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܒܲܛܸܠ ܐ̄ܢܵܐ ܠܹܗ ܠܡܲܬ̣ܠܵܐ ܗܵܢܵܐ: ܘܠܵܐ ܢܲܡܬ̇ܠܘܼܢܹܗ ܬܘܼܒ̣ ܒܝܼܣܪܵܝܹܠ: ܐܸܠܵܐ ܐܸܡܲܪ ܠܗܘܿܢ: ܢܸܩ̱ܪܒ̣ܘܼܢ ܝܵܘ̈ܡܵܬ̣ܵܐ ܘܢܸܗܘܹܐ ܟܠܹܗ ܚܸܙܘܵܐ.

ܟܕ:ܘܬ̣ܘܼܒ̣ ܠܵܐ ܢܸܗܘܹܐ ܟܠ ܚܸܙܘܵܐ ܕܲܓܵܠܵܐ: ܘܩܸܨܡܵܐ ܕܦܵܠܓܘܼܬ̣ܵܐ ܒܲܝܢܵܬ̣ ܒܢܲܝ̈ ܝܼܣܪܵܝܹܠ.

ܟܗ:ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܐܹܡ̇ܪܹܬ̣: ܘܐܵܡܲܪ ܐ̄ܢܵܐ ܡܸܠܬ̣ܵܐ ܘܥܵܒܹ̇ܕܼ ܐ̄ܢܵܐ ܠܵܗ̇: ܘܠܵܐ ܡܫܵܘܚܲܪ ܐ̄ܢܵܐ: ܘܲܒ̣ܝܵܘ̈ܡܵܬ̣ܟ̣ܘܿܢ ܒܲܝܬܵܐ ܡܡܲܪܡܪܵܢܵܐ: ܐܹܡܲܪ ܡܸܠܬ̣ܵܐ ܘܐܸܥܒ̇ܕܼܝܼܗ̇ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܟܘ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܟܙ:ܒܲܪܢܵܫܵܐ: ܗܵܐ ܕܒܹܝܬ̣ ܝܑܼܣܪܵܝܹܠ ܐܵܡ̇ܪܝܼܢ: ܚܸܙܘܵܐ ܕܚܵܙܹ̇ܐ ܗܵܢܵܐ: ܠܝܵܘ̈ܡܵܬ̣ܵܐ ܗ̄ܘܼ ܣܲܓ̇ܝܼ̈ܐܹܐ ܘܲܠܙܲܒ̣ܢܹ̈ܐ ܪ̈ܲܚܝܼܩܹܐ ܡܸܬ̣ܢܲܒܸ̇ܐ.

ܟܚ:ܡܸܛܠ ܗܵܢܵܐ ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܘܼܒ̣ ܠܵܐ ܢܸܗܘܹܐ ܦܵܘܫܵܐ ܠܡܸܠܲܝ̈: ܡܸܠܬ̣ܵܐ ܕܐܵܡܲܪ ܐ̄ܢܵܐ ܥܵܒܹ̇ܕܼ ܐ̄ܢܵܐ ܠܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܝܓ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܸܬ̣ܢܲܒܵܐ ܥܲܠ ܢܒ̣ܝܹ̈ܐ ܕܝܼܣܪܵܝܹܠ ܕܡܸܬ̣ܢܲܒܹ̇ܝܢ ܠܗܘܿܢ: ܘܐܸܡܲܪ ܠܐܲܝܠܹܝܢ ܕܡܸܬ̣ܢܲܒܹ̇ܝܢ ܡ̣ܢ ܠܸܒ̇ܗܘܿܢ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ.

ܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܵܝ ܠܲܢܒ̣ܝܹ̈ܐ ܫܵܛܲـ̈ـܝܵܐ: ܕܐܵܙܠ̄ܝܼܢ ܒܵܬܲܪ ܪܘܼܚܗܘܿܢ ܕܠܵܐ ܚ̣ܙܵܘ ܚܸܙܘܵܐ.

ܕ:ܐܲܝܟ ܬܲܥ̈ܠܹܐ ܒܚܲܪ̈ܒ̣ܵܬ̣ܵܐ ܗܘ̤ܵܘ ܢܒ̣ܝܲܝ̈ܟ ܝܑܼܣܪܵܝܹܠ.

ܗ:ܠܵܐ ܣܠܸܩܬ̇ܘܿܢ ܒܬ̣ܘܼܪ̱ܥܬ̣ܵܐ: ܐܵܦ ܠܵܐ ܣܵܓ̣ܬ̇ܘܿܢ ܣܝܵܓ̣ܵܐ ܥܲܠ ܕܒܹܝܬ̣ ܝܑܼܣܪܵܝܹܠ: ܠܲܡܩܵܡ ܒܲܩܪܵܒ̣ܵܐ ܒܝܵܘܡܹܗ ܕܡܵܪܝܵܐ.

ܘ:ܕܐܵܡ̇ܪܝܼܢ ܗܵܟܲܢܵܐ ܐܵܡܲܪ ܡܵܪܝܵܐ: ܘܡܵܪܝܵܐ ܠܵܐ ܫܲܕܲܪ ܐܸܢܘܿܢ: ܘܫܲܪܝܿܘ ܠܲܡܩܵܡܘܼ ܡܸܠܬ̣ܵܐ ܕܲܓܵܠܬܵܐ.

ܙ:ܚܸܙܘܵܐ ܣܪܝܼܩܵܐ ܚܙܲܝܬ̇ܘܿܢ: ܘܩܸܨܡܵܐ ܕܲܓܵܠܵܐ ܐܸܡܲܪܬ̇ܘܿܢ: ܘܐܵܡ̇ܪܝܼܢ ܐ̄ܢܬ̇ܘܿܢ ܐܸܡܲܪ ܡܵܪܝܵܐ: ܘܐܸܢܵܐ ܠܵܐ ܐܸܡ̇ܪܹܬ̣.

ܚ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܚܙܲܝܬ̇ܘܿܢ ܣܪܝܼܩܘܼܬ̣ܵܐ ܘܡܲܠܠܬ̇ܘܿܢ ܕܲܓܵܠܘܼܬ̣ܵܐ: ܗܵܐ ܐܸܢܵܐ ܥܠܲܝܟ̇ܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܛ:ܘܬܸܗܘܹܐ ܐܝܼܕܼܝ ܥܲܠ ܢܒ̣ܝܹ̈ܐ ܕܚܵܙܹ̇ܝܢ ܣܪܝܼܩܘܼܬ̣ܵܐ ܘܩܵܨ̇ܡܝܼܢ ܕܲܓܵܠܘܼܬ̣ܵܐ: ܒܓ̣ܵܘ ܥܲܡܝ ܠܵܐ ܢܸܗܘܘܿܢ: ܘܒܲܟ̣ܬ̣ܵܒ̣ܵܐ ܕܒܹܝܬ̣ ܝܑܼܣܪܵܝܹܠ ܠܵܐ ܢܸܬ̣ܟܲܬ̣ܒ̇ܘܼܢ: ܘܠܲܐܪܥܵܐ ܕܝܼܣܪܵܝܹܠ ܠܵܐ ܢܸܥܠܘܼܢ: ܘܬܸܕܼܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܹܐ ܡܵܪ̈ܵܘܵܬ̣ܵܐ.

ܝ:ܥܲܠ ܕܐܲܛܥܝܼܘ ܠܥܲܡܝ: ܘܐܸܡܲܪܘ ܫܠܵܡܵܐ ܘܠܲܝܬ̇ ܫܠܵܡܵܐ: ܘܗ̤ܘ ܒܵܢܹ̇ܐ ܗ̄ܘܼܵܐ ܐܸܣܬ̣ܵܐ ܘܗܸܢܘܿܢ ܛܵܪܹܝܢ ܗ̄ܘܼܵܘ ܠܵܗ̇ ܕܬܸܦܸܠ.

ܝܐ:ܐܸܡܲܪ ܠܗܵܢܘܿܢ ܕܛܵܪܹܝܢ ܠܵܗ̇ ܕܬܸܦܸܠ: ܗܵܐ ܐܸܢܵܐ ܝܵܗܹ̇ܒ̣ ܐ̄ܢܵܐ ܡܸܛܪܵܐ ܕܓ̣ܵܪܹܦ: ܘܟܹܐܦܹ̈ܐ ܕܕܲܚܪܵܐ ܢܸܦ̈ܠܵܢ: ܘܪܘܼܚܵܐ ܕܥܲܠܥܵܠܵܐ.

ܝܒ:ܘܬܸܬ̇ܪܲܥ ܘܬܸܦܸܠ ܐܸܣܬ̣ܵܐ: ܘܢܸܬ̣ܐ̱ܡܲܪ ܠܟ̣ܘܿܢ: ܐܲܝܟܵܘ ܛܪܵܝܵܐ ܕܲܛܪܲܝܬ̇ܘܿܢ.

ܝܓ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܫܸܒ̣ ܪܘܼܚܵܐ ܕܥܲܠܥܵܠܵܐ ܒܚܸܡܬ̣ܝ: ܘܡܸܛܪܵܐ ܕܓ̣ܵܪܹܦ ܢܸܗܘܹܐ ܒܪܘܼܓ̣ܙܝ: ܘܟܹܐܦܹ̈ܐ ܕܕܲܚܪܵܐ ܒܚܸܡܬ̣ܝ ܢܵܘ̈ܒ̇ܕܼܵܢ.

ܝܕ:ܘܐܸܣܚ̄ܦܝܼܗ̇ ܠܐܸܣܬ̣ܵܐ ܕܲܛܪܲܝܬ̇ܘܿܢ ܘܬܸܦܸܠ: ܘܐܲܪܡܹܝܗ̇ ܒܐܲܪܥܵܐ ܘܢܸܬ̣ܓܲܠ̈ܝܵܢ ܫܲܬ̣ܐ̱ܣܹ̈ܝܗ̇: ܘܬܸܦܠܘܼܢ ܘܬܸܣܬܲܚܦܘܼܢ ܒܓ̣ܵܘܵܗ̇: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܝܗ:ܘܐܹܫܲܡܠܵܐ ܪܘܼܓ̣ܙܝ ܒܐܸܣܬ̣ܵܐ: ܘܒܲܐܝܠܹܝܢ ܕܛܵܪܹܝܢ ܗ̄ܘܼܵܘ ܠܵܗ̇ ܟܲܕܼ ܬܸܦܸܠ. ܘܢܸܬ̣̱ܐܡܲܪ ܠܟ̣ܘܿܢ ܐܲܝܟܵܐ ܗ̄ܝܼ ܐܸܣܬ̣ܵܐ: ܘܐܲܝܟܵܐ ܐܸܢܘܿܢ ܗܵܢܘܿܢ ܕܛܵܪܹܝܢ ܗ̄ܘܼܵܘ ܠܵܗ̇.

ܝܘ:ܗܵܠܹܝܢ ܐܸܢܘܿܢ ܢܒ̣ܝܹ̈ܐ ܕܝܼܣܪܵܝܹܠ ܕܡܸܬ̣ܢܲܒܹ̇ܝܢ ܥܲܠ ܐܘܿܪܸܫܠܸܡ: ܘܚܵܙܹ̇ܝܢ ܠܵܗ̇ ܚܸܙ̈ܘܹܐ ܕܲܫܠܵܡܵܐ: ܘܠܲܝܬ̇ ܫܠܵܡܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܙ:ܘܐܲܢ̄ܬ̇ ܒܲܪܢܵܫܵܐ: ܣܝܼܡ ܐܲܦܲܝ̈ܟ ܥܲܠ ܒ̈ܢܵܬ̣ ܥܲܡܵܟ ܕܡܸܬ̣ܢܲܒ̇ـ̈ـܝܵܢ ܡ̣ܢ ܠܸܒ̇ܗܹܝܢ: ܐܸܬ̣ܢܲܒܵܐ ܥܠܲܝܗܹܝܢ ܘܐܸܡܲܪ ܠܗܹܝܢ.

ܝܚ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܵܝ ܠܲܕܼܚܵܝ̈ܛܵܢ ܒܸܣܵـ̈ـܕܼܘܵܬ̣ܵܐ ܠܝܲܨܝܼ̈ܠܹܐ ܕܐܝܼ̈ܕܲܝܵܐ: ܘܥܵܒ̣̈ܕܵܢ ܬܲܟ̣ܣ̈ܝܵܬ̣ܵܐ ܠܟ̣ܠ ܪܹܫ ܘܲܠܟ̣ܠ ܩܵܘܡܵܐ: ܠܲܡܨܵܕܼ ܢܲܦ̮̈ܫܵܬ̣ܵܐ. ܢܲܦ̮̈ܫܵܬܹܗ ܕܥܲܡܝ ܨܵܝ̈ܕܵܢ ܐ̄ܢܬܹ̇ܝܢ: ܘܢܲܦ̮ܫܵܬ̣ܟܹܝܢ ܕܝܼܠܟܹܝܢ ܡܲܚ̈ܝܵܢ ܐ̄ܢܬܹ̇ܝܢ.

ܝܛ:ܘܛܵܘܸܫ̈ܬܹ̇ܢܵܝܗܝ ܠܥܲܡܝ ܒܚܘܼܦܢܹ̈ܐ ܕܲܣܥܵܪܹ̈ܐ: ܘܒܲܩܨܵܝܹ̈ܐ ܕܠܲܚܡܵܐ: ܠܡܸܩܛܲܠ ܢܲܦ̮̈ܫܵܬ̣ܵܐ ܐܲܝܠܹܝܢ ܕܠܵܐ ܚܲܝܵـ̈ـܒ̣ܵܢ ܗ̄ܘܲܝ̈ ܠܲܡܡܵܬ̣ ܘܲܠܡܲܚܵܝܘܼ ܢܲܦ̮̈ܫܵܬ̣ܵܐ ܕܐܲܝܠܹܝܢ ܕܠܵܐ ܚܲܝܵـ̈ـܒ̣ܵܢ ܗ̄ܘܲܝ̈ ܠܡܸܚܵܐ: ܘܟܲܕܸ̇ܒ̣̈ܬܹ̇ܝܢ ܠܥܲܡܵܐ ܕܲܫܡܲܥ ܟܲܕܵܒ̣ܘܼܬ̣ܵܐ.

ܟܟ:ܡܸܛܠ ܗܵܢܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܲܠ ܒܸܣܵـ̈ـܕܼܘܵܬ̣ܟܹܝܢ ܕܨܵܝ̈ܕܵܢ ܐ̄ܢܬܹ̇ܝܢ ܒܗܘܿܢ ܢܲܦ̮̈ܫܵܬ̣ܵܐ: ܘܐܸܨܪܸܐ ܐܸܢܘܿܢ ܡ̣ܢ ܕܪ̈ܵܥܲܝܟܹ̇ܝܢ: ܘܐܸܫܪܹܐ ܢܲܦ̮̈ܫܵܬ̣ܵܐ ܐܲܝܠܹܝܢ ܕܨܵܝ̈ܕܵܢ ܐ̄ܢܬܹ̇ܝܢ: ܘܐܲܦܪܲܚ ܐܸܢܹܝܢ.

ܟܐ:ܘܐܸܨܪܸܐ ܡܵܐܢܲܝ̈ܟܹ̇ܝܢ: ܘܐܹܦܲܨܹܐ ܠܥܲܡܝ ܡ̣ܢ ܐܝܼܕܲܝ̈ܟܹ̇ܝܢ: ܘܬ̣ܘܼܒ̣ ܠܵܐ ܢܸܫܬܲܠܡܘܼܢ ܒܲܡܨܝܼܕ̇ܬܵܐ ܒܐܝܼܕܲܝ̈ܟܹ̇ܝܢ: ܘܬܸܕ̇ܥܵـ̈ـܢ ܕܐܸܢܵܐ ܐ̄ܢܵܐ ܡܵܪܝܵܐ.

ܟܒ:ܥܲܠ ܕܲܡܚܲܝ̈ܬܹ̇ܝܢ ܠܸܒܹ̇ܗ ܕܙܲܕ̇ܝܼܩܵܐ ܒܕܲܓܵܠܘܼܬ̣ܵܐ: ܘܐܸܢܵܐ ܠܵܐ ܐܲܟ̣ܐܸܒ̣ܬܹ̇ܗ: ܘܚܲܡܣܸܢܬܹ̇ܝ̈ܢ ܐܝܼ̈ܕܲܝܵܐ ܕܥܵܘܿܠܹܐ: ܕܠܵܐ ܢܸܗܦ̄ܟ̣ܘܿܢ ܡ̣ܢ ܐܘܼܪ̈ܚܵܬ̣ܗܘܿܢ ܒܝܼ̈ܫܵܬ̣ܵܐ ܘܢܸܚܘܿܢ.

ܟܓ:ܡܸܟܹ̇ܝܠ ܣܪܝܼܩܘܼܬ̣ܵܐ ܠܵܐ ܬܸܚ̈ܙܝܵܢ: ܘܬ̣ܘܼܒ̣ ܩܸܨܡܵܐ ܠܵܐ ܬܸܩܨ̈ܡܵܢ: ܘܐܹܦܲܨܹܐ ܠܥܲܡܝ ܡ̣ܢ ܐܝܼܕܲܝ̈ܟܹ̇ܝܢ: ܘܬܸܕ̇ܥܵـ̈ـܢ ܕܐܸܢܵܐ ܐ̄ܢܵܐ ܡܵܪܝܵܐ.

ܩܹܦܵܠܹܐܘܿܢ:ܝܕ.

ܐ:ܘܐܸܬ̣ܵܘ ܠܘܵܬ̣ ܓܲܒ̣ܪܹ̈ܐ ܡ̣ܢ ܣܵܒܹ̈ܐ ܕܝܼܣܪܵܝܹܠ ܠܡܸܫܐܲܠ ܡ̣ܢ ܡܵܪܝܵܐ: ܘܝܼܬܸܒ̣ܘ ܩܕܼܵܡܲܝ.

ܒ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܓ:ܒܲܪܢܵܫܵܐ: ܓܒ̣ܪ̈ܝܼܢ ܗܵܠܹܝܢ ܐܲܣܸܩ̣ܘ ܕܸܚܠܲܬ̣ܗܘܿܢ ܥܲܠ ܠܸܒ̇ܗܘܿܢ: ܘܬ̣ܘܼܩ̱ܠܬ̣ܵܐ ܕܥܵܘܼܠܗܘܿܢ ܣܵܡ̣ܘ ܠܘܼܩܒܲܠ ܐܲܦܲܝ̈ܗܘܿܢ: ܐܸܥܒܸ̇ܕܼ ܦܘܼܪܥܵܢܵܐ ܡܸܢܗܘܿܢ.

ܕ:ܡܸܟܹ̇ܝܠ ܡܲܠܸܠ ܥܲܡܗܘܿܢ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. ܓܒܲܪ ܓܒܲܪ ܡ̣ܢ ܒܹܝܬ̣ ܝܑܼܣܪܵܝܹܠ: ܕܢܲܣܸܩ ܕܸܚ̱ܠܬܹܗ ܥܲܠ ܠܸܒܹ̇ܗ: ܘܬ̣ܘܼܩ̱ܠܬ̣ܵܐ ܕܥܵܘܼܠܹܗ ܢܣܝܼܡ ܠܘܼܩܒܲܠ ܐܲܦܵܘ̈ܗܝ: ܘܢܹܐܬܹܐ ܠܘܵܬ̣ ܢܒ̣ܝܼܵܐ: ܐܸܢܵܐ ܡܵܪܝܵܐ ܐܸܗܘܹܐ ܠܹܗ ܣܵܗܕܵܐ ܒܗܹܝܢ ܒܣܘܿܓ̣ܵܐܐ ܕܕܸܚ̈ܠܵܬܹܗ.

ܗ:ܡܸܛܠ ܕܐܹܚܘܿܕܼ ܠܲܕܼܒܹܝܬ̣ ܝܑܼܣܪܵܝܹܠ ܒܠܸܒ̇ܗܘܿܢ: ܕܲܦܪܲܩ̣ܘ ܡܹܢܝ ܒܟ̣ܠܗܹܝܢ ܕܸܚ̈ܠܵܬ̣ܗܘܿܢ.

ܘ:ܡܸܟܹ̇ܝܠ ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܘܼܒ̣ܘ ܘܐܸܬ̣ܦܢܵܘ ܡ̣ܢ ܟܠܗܹܝܢ ܕܸܚ̈ܠܵܬ̣ܟ̣ܘܿܢ: ܘܡ̣ܢ ܟܠܵܗ̇ ܛܲܢܦܘܼܬ̣ܟ̣ܘܿܢ ܐܵܦܢܵܘ ܐܲܦܲܝ̈ܟ̇ܘܿܢ.

ܙ:ܡܸܛܠ ܕܓܲܒ̣ܪܵܐ ܡ̣ܢ ܝܑܼܣܪܵܝܹܠ: ܘܡ̣ܢ ܐܲܝܠܹܝܢ ܕܡܸܬ̣ܦܢܹܝܢ ܠܘܵܬ̣ܝ ܕܥܵܡ̇ܪܝܼܢ ܒܝܼܣܪܵܝܹܠ: ܕܢܸܗܦܘܿܟ ܡܹܢܝ ܘܢܲܣܸܩ ܕܸܚ̱ܠܬܹܗ ܥܲܠ ܠܸܒܹ̇ܗ: ܘܬ̣ܘܼܩ̱ܠܬ̣ܵܐ ܕܥܵܘܼܠܹܗ ܢܣܝܼܡ ܠܘܼܩܒܲܠ ܐܲܦܵܘ̈ܗܝ: ܘܢܹܐܬܹܐ ܠܘܵܬ̣ ܢܒ̣ܝܼܵܐ ܠܲܡܫܲܐܵܠܘܼܬܹܗ: ܐܸܢܵܐ ܡܵܪܝܵܐ ܐܸܗܘܹܐ ܠܹܗ ܣܵܗܕܵܐ.

ܚ:ܘܐܸܬܸ̇ܠ ܪܘܼܓ̣ܙܝ ܥܲܠ ܓܒ̣ܪܵܐ ܗܵܘܿ: ܘܐܸܥܒ̇ܕܼܝܼܘܗܝ ܠܐܵܬ̤ܵܐ ܘܲܠܡܲܬ̣ܠܵܐ: ܘܐܵܘܒ̇ܕܼܝܼܘܗܝ ܡ̣ܢ ܓܵܘ ܥܲܡܝ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܛ:ܘܲܢܒ̣ܝܼܵܐ ܟܲܕܼ ܢܸܛܥܹܐ ܘܲܢܡܲܠܸܠ ܡܸܠܬ̣ܵܐ: ܐܸܢܵܐ ܡܵܪܝܵܐ ܐܲܛܥ̇ܝܼܬܹ̇ܗ ܠܲܢܒ̣ܝܼܵܐ ܗܵܘܿ: ܘܐܲܪܝܼܡ ܐܝܼܕܼܝ ܥܠܵܘܗܝ: ܘܐܵܘܒ̇ܕܼܝܼܘܗܝ ܡ̣ܢ ܓܵܘ ܥܲܡܝ ܝܑܼܣܪܵܝܹܠ.

ܝ:ܘܢܸܫܩ̄ܠܘܼܢ ܥܵܘܼܠܗܘܿܢ: ܥܵܘܼܠܹܗ ܕܗܵܘܿ ܕܲܡܫܲܐܸܠ: ܐܲܝܟ ܥܵܘܼܠܹܗ ܕܲܢܒ̣ܝܼܵܐ ܢܸܗܘܹܐ.

ܝܐ:ܘܬ̣ܘܼܒ̣ ܠܵܐ ܢܸܛܥܘܿܢ ܕܒܹܝܬ̣ ܝܑܼܣܪܵܝܹܠ ܡܹܢܝ: ܘܬ̣ܘܼܒ̣ ܠܵܐ ܢܸܬ̇ܛܲܢܦܘܼܢ ܒܟ̣ܠܹܗ ܥܵܘܼܠܗܘܿܢ: ܐܸܠܵܐ ܢܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܗܘܿܢ ܐܲܠܵܗܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܒ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܓ:ܒܲܪܢܵܫܵܐ: ܐܲܪܥܵܐ ܐܸܢ ܬܸܚܛܹܐ ܠܝܼ ܘܬܸܥܒܸ̇ܕܼ ܥܵܘܼܠܵܐ ܩܕܼܵܡܲܝ: ܐܲܪܝܼܡ ܐܝܼܕܼܝ ܥܠܹܝܗ̇: ܘܐܸܬ̣ܒܲܪ ܒܵܗ̇ ܩܲܢܝܵܐ ܕܲܥܒ̣ܘܼܪܵܐ: ܘܐܹܫܲܕܲܪ ܥܠܹܝܗ̇ ܟܲܦܢܵܐ: ܘܐܵܘܒܸ̇ܕܼ ܡܸܢܵܗ̇ ܒܢܲܝ̈ܢܵܫܵܐ ܘܲܒ̣ܥܝܼܪܵܐ.

ܝܕ:ܘܐܸܢ ܢܸܗܘܘܿܢ ܒܵܗ̇ ܗܵܠܹܝܢ ܬܠܵܬ̣ܵܐ ܓܲܒ̣ܪ̈ܝܼܢ: ܢܘܿܚ ܘܕܼܵܢܝܼܐܹܝܠ: ܘܐܝܼܘܿܒ̣: ܗܸܢܘܿܢ ܒܙܲܕ̇ܝܼܩܘܼܬ̣ܗܘܿܢ ܢܦܲܨܘܿܢ ܢܲܦ̮ܫܗܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܗ:ܘܐܸܢ ܐܲܝܬܸ̇ܐ ܚܲܝ̄ܘܬ̣ܵܐ ܒܝܼܫܬܵܐ ܥܲܠ ܐܲܪܥܵܐ ܘܬ̣ܵܘܒ̇ܕܼܝܼܗ̇: ܘܬܸܗܘܹܐ ܠܲܚܒ̣ܵܠܵܐ ܡ̣ܢ ܒܠܲܝ ܕܥܵܒܲܪ ܡ̣ܢ ܚܲܝ̄ܘܬ̣ܵܐ.

ܝܘ:ܘܗܵܠܹܝܢ ܬܠܵܬ̣ܵܐ ܓܲܒ̣ܪ̈ܝܼܢ ܐܝܼܬ̣ ܒܵܗ̇: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܢܦܲܨܘܿܢ ܠܵܐ ܠܲܒ̣̈ܢܲܝܵܐ ܘܠܵܐ ܠܲܒ̣̈ܢܵܬ̣ܵܐ: ܐܸܠܵܐ ܗܸܢܘܿܢ ܒܲܠܚܘܿܕܲܝܗܘܿܢ ܢܸܬ̣ܦܲܨܘܿܢ: ܘܐܲܪܥܵܐ ܬܸܗܘܹܐ ܠܲܚܒ̣ܵܠܵܐ.

ܝܙ:ܘܐܸܢ ܐܲܝܬܸ̇ܐ ܚܲܪܒܵܐ ܥܲܠ ܐܲܪܥܵܐ ܗܵܝ̇: ܘܐܹܡܲܪ ܕܬܸܥܒܲܪ ܚܲܪܒܵܐ ܒܐܲܪܥܵܐ ܗܵܝ̇: ܘܐܵܘܒܸ̇ܕܼ ܡܸܢܵܗ̇ ܒܢܲܝ̈ܢܵܫܵܐ ܘܲܒ̣ܥܝܼܪܵܐ.

ܝܚ:ܘܗܵܠܹܝܢ ܬܠܵܬ̣ܵܐ ܓܲܒ̣ܪ̈ܝܼܢ ܐܝܼܬ̣ ܒܵܗ̇: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܢܦܲܨܘܿܢ ܠܵܐ ܠܲܒ̣̈ܢܲܝܵܐ ܘܠܵܐ ܠܲܒ̣̈ܢܵܬ̣ܵܐ: ܐܸܠܵܐ ܗܸܢܘܿܢ ܒܲܠܚܘܿܕܲܝܗܘܿܢ ܢܸܬ̣ܦܲܨܘܿܢ.

ܝܛ:ܘܐܸܢ ܐܹܫܲܕܲܪ ܡܵܘܬܵܢܵܐ ܥܲܠ ܐܲܪܥܵܐ ܗܵܝ̇: ܘܐܹܫܘܿܕܼ ܚܸܡܬ̣ܝ ܥܠܹܝܗ̇ ܒܲܕܼܡܵܐ: ܘܐܵܘܒܸ̇ܕܼ ܡܸܢܵܗ̇ ܒܢܲܝ̈ܢܵܫܵܐ ܘܲܒ̣ܥܝܼܪܵܐ.

ܟܟ:ܘܢܘܿܚ ܘܕܼܵܢܝܼܐܹܝܠ ܘܐܝܼܘܿܒ̣ ܐܝܼܬ̣ ܒܓ̣ܵܘܵܗ̇: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܒܪܵܐ ܘܠܵܐ ܒܲܪܬ̣ܵܐ ܢܦܲܨܘܿܢ: ܐܸܠܵܐ ܗܸܢܘܿܢ ܒܙܲܕ̇ܝܼܩܘܼܬ̣ܗܘܿܢ ܢܦܲܨܘܿܢ ܢܲܦ̮ܫܗܘܿܢ.

ܟܐ:ܡܸܛܠ ܕܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܪܒ̇ܥܵܐ ܕܝܼܢ̈ܝܼܢ ܒܝܼܫ̈ܝܼܢ ܫܲܕ̇ܪܹܬ̣ ܥܲܠ ܐܘܿܪܸܫܠܸܡ: ܚܲܪܒܵܐ: ܘܟܲܦܢܵܐ: ܘܚܲܝ̄ܘܬ̣ܵܐ ܒܝܼܫܬܵܐ: ܘܡܵܘܬܵܢܵܐ: ܘܐܵܘܒܸ̇ܕܼ ܡܸܢܵܗ̇ ܒܢܲܝ̈ܢܵܫܵܐ ܘܲܒ̣ܥܝܼܪܵܐ.

ܟܒ:ܘܢܸܫܬܲܚܪܘܼܢ ܒܵܗ̇ ܐܲܝܠܹܝܢ ܕܡܸܬ̣ܦܲܨܹܝܢ ܕܡܲܦܩܝܼܢ ܒ̈ܢܲܝܵܐ ܘܲܒ̣̈ܢܵܬ̣ܵܐ: ܘܗܸܢܘܿܢ ܢܸܦܩܘܼܢ ܠܘܵܬ̣ܟ̣ܘܿܢ: ܘܬܸܚܙܘܿܢ ܐܘܼܪ̈ܚܵܬ̣ܗܘܿܢ ܘܨܸܢ̈ܥܵܬ̣ܗܘܢ: ܘܬܸܬ̣ܒܲܝܐܘܼܢ ܡ̣ܢ ܒܝܼܫܬܵܐ ܕܐܲܝܬ̇ܝܼܬ̣ ܥܲܠ ܐܘܿܪܸܫܠܸܡ: ܘܟ̣ܠܡܸܕܸ̇ܡ ܕܐܲܝܬ̇ܝܼܬ̇ ܥܠܹܝܗ̇.

ܟܓ:ܘܲܢܒܲܝܐܘܼܢܵܟ̣ܘܿܢ ܟܲܕܼ ܬܸܚܙܘܿܢ ܐܘܼܪ̈ܚܵܬ̣ܗܘܿܢ ܘܨܸܢ̈ܥܵܬ̣ܗܘܿܢ: ܘܬܸܕ̇ܥܘܼܢ ܕܠܵܐ ܗ̄ܘܵܐ ܡܲܓܵܢ ܥܸܒ̣ܕܹܬ̣ ܟܠ ܕܥܸܒ̣ܕܹ̇ܬ̣ ܒܵܗ̇: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܝܗ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܡܵܢܵܐ ܢܸܗܘܹܐ ܠܩܲܝܣܵܐ ܕܲܓ̣ܦܸܬ̣ܵܐ ܡ̣ܢ ܟܠ ܩܹܝܣ: ܫܒܸܫܬܵܐ ܕܲܗܘ̤ܵܬ̣ ܒܩܲܝ̈ܣܹܐ ܕܥܵܒ̣ܵܐ.

ܓ:ܕܲܠܡܵܐ ܡܸܬ̣ܢ̱ܣܸܒ̣ ܡܸܢܵܗ̇ ܩܲܝܣܵܐ ܠܡܸܥܒܲܪ ܡܸܢܹܗ ܥܒ̣ܵܕܼܵܐ: ܐܵܘ ܢܵܣܒ̇ܝܼܢ ܡܸܢܵܗ̇ ܣܸܟ̇ܬ̣ܵܐ ܠܡܸܬ̣ܠܵܐ ܒܵܗ̇ ܡܵܐܢܹ̈ܐ.

ܕ:ܐܸܠܵܐ ܐܸܬ̣ܝܲܗܒܲܬ̤ ܡܹܐܟ̣ܘܼܠܬܵܐ ܠܢܘܼܪܵܐ: ܘܬܲܪܬܹ̇ܝܢ ܣܵܘ̈ܟܹ̇ܝܗ̇ ܐܸܟ̣ܠܲܬ̤ ܢܘܼܪܵܐ: ܘܓ̣ܵܘܵܗ̇ ܚܪܸܒ̣: ܕܲܠܡܵܐ ܐܵܙܵܠ̄ܐ ܠܲܥܒ̣ܵܕܼܵܐ.

ܗ:ܘܟܲܕܼ ܕܲܕܼܠܵܐ ܡܘܼܡ ܗ̄ܘܼܵܬ̣ ܠܵܐ ܐܵܙܵܠ̄ܐ ܗ̄ܘܼܵܬ̣ ܠܲܥܒ̣ܵܕܼܵܐ: ܗܵܫܵܐ ܕܐܸܟܲܠܬ̣ܵܗ̇ ܢܘܼܪܵܐ ܘܚܸܪܒܲܬ̤: ܐܲܝܟܲܢܵܐ ܐܵܙܵܠ̄ܐ ܠܲܥܒ̣ܵܕܼܵܐ.

ܘ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܝܟ ܕܝܸܗ̄ܒܹ̇ܬ̣ ܩܲܝܣܵܐ ܕܲܓ̣ܦܸܬ̣ܵܐ ܡ̣ܢ ܟܠܗܘܿܢ ܩܲܝܣܹ̈ܐ ܕܥܵܒ̣ܵܐ ܡܹܐܟ̣ܘܼܠܬܵܐ ܠܢܘܼܪܵܐ: ܗܵܟܲܢܵܐ ܝܸܗ̄ܒܹ̇ܬ̣ ܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ.

ܙ:ܘܐܸܬܸ̇ܠ ܪܘܼܓ̣ܙܝ ܒܗܘܿܢ: ܡ̣ܢ ܢܘܼܪܵܐ ܢܦܲܩ̣ܘ ܘܢܘܼܪܵܐ ܬܹܐܟ̣ܘܿܠ ܐܸܢܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܣܵܡܹ̇ܬ̣ ܪܘܼܓ̣ܙܝ ܥܠܲܝܗܘܿܢ.

ܚ:ܘܐܸܬ̇ܠܝܼܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ: ܥܲܠ ܕܲܥܒܲܕܼܘ ܥܵܘܼܠܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܝܘ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܵܘܕܲܥܹܝܗ̇ ܠܐܘܿܪܸܫܠܸܡ ܛܲܢܦܘܼܬ̣ܵܗ̇.

ܓ:ܘܐܸܡܲܪ: ܗܵܟܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܐܘܿܪܸܫܠܸܡ: ܥܸܩܵܪܹܟ̣ܝ ܘܡܵܘܠܵܕܹܟ̣ܝ ܡ̣ܢ ܐܲܪܥܵܐ ܕܲܟ̣ܢܵܥܢ: ܐܲܒ̣ܘܼܟ̣ܝ ܐܵܡܘܿܪܵܝܵܐ ܘܐܸܡܹܟ̣ܝ ܚܹܝܬ̣ܵܝܬܵܐ.

ܕ:ܘܡܵܘܠܕܼܵܢܝܼܬܹܟ̣ܝ ܒܝܵܘܡܵܐ ܕܝܼܠܸܕܼܬܹܟ̣ܝ: ܠܵܐ ܦܸܣܩܲܬ̤ ܫܸܪܹܟ̣ܝ: ܘܲܒ̣ܡܲـ̈ـܝܵܐ ܠܵܐ ܐܲܣܚܝܵܬܹܟ̣ܝ: ܘܲܒ̣ܡܸܠܚܵܐ ܠܵܐ ܡܠܲܚܬܹܟ̣ܝ ܘܲܒ̣ܥܲܙܪܘܼܪܹ̈ܐ ܠܵܐ ܟܪܲܟ̣ܬܹܟ̣ܝ.

ܗ:ܘܠܵܐ ܚܵܣܲܬ̤ ܥܠܲܝܟ̇ܝ ܥܲܝܢܵܗ̇: ܕܬܸܥܒܸ̇ܕܼ ܠܹܟ̣ܝ ܚܕܼܵܐ ܡ̣ܢ ܗܵܠܹܝܢ: ܘܲܬ̣ܪܲܚܸܡ ܥܠܲܝܟ̇ܝ: ܐܸܠܵܐ ܐܸܫܬ̇ܕܼܝܼܬ̇ܝ ܒܕܲܒ̣ܪܵܐ ܒܲܥܫܝܼܩܘܼܬ̣ܵܗ̇ ܕܢܲܦ̮ܫܹܟ̣ܝ: ܒܝܵܘܡܵܐ ܕܝܠܸܕܼܬܹܟ̣ܝ.

ܘ:ܘܥܸܒ̣ܪܹܬ̣ ܥܠܲܝܟ̇ܝ: ܘܲܚܙܹܝܬܹ̇ܟ̣ܝ ܕܲܡܦܲܠܦܲܠܬ̇ܝ ܒܲܕܼܡܹܟ̣ܝ: ܘܐܸܡ̇ܪܹܬ̣ ܠܹܟ̣ܝ ܒܲܕܼܡܹܟ̣ܝ ܚܝܵܝ.

ܙ:ܘܲܣܓܵܝ ܐܲܝܟ ܡܵܘܥܝܼܬ̣ܵܐ ܕܚܲܩܠܵܐ: ܘܲܣܓܲܝܬ̇ܝ ܘܲܪܒܲܝܬ̇ܝ ܘܥܲܠܬ̇ܝ ܠܲܡܕܼܝܼ̈ܢܵܬ̣ܵܐ: ܬܕܲܝ̈ܟ̇ܝ ܩܵܡ̣ܘ ܘܣܲܥܪܹܟ̣ܝ ܝܼܥ̣ܵܐ: ܘܲܗ̤ܘܲܝܬ̇ܝ ܥܲܪܛܸܠ ܘܥܲܪܝܲܬ̣.

ܚ:ܘܥܸܒ̣ܪܹܬ̣ ܥܠܲܝܟ̇ܝ ܘܲܚܙܹ̇ܝܬܹܟ̣ܝ ܘܲܚܙܹ̇ܝܬ̣ ܙܲܒ̣ܢܹܟ̣ܝ ܙܲܒ̣ܢܵܐ ܕܥܲܙܪܵܪܬܵܐ: ܘܦܸܪܣܹܬ̣ ܐܝܼܕܼܝ ܥܠܲܝܟ̇ܝ: ܘܟܲܣܝܼܬ̣ ܦܘܼܪܣܵܝܹܟ̣ܝ: ܘܝܼܡ̇ܝܼܬ̣ ܠܹܟ̣ܝ: ܘܥܸܠܹ̇ܬ̣ ܥܲܡܹܟ̣ܝ ܒܲܩܝܵܡܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܲܗ̤ܘܲܝܬ̇ܝ ܠܝܼ.

ܛ:ܘܐܲܣܚܝܼܬܹܟ̣ܝ ܒܡܲـ̈ـܝܵܐ: ܘܐܲܫܝܼܓܹ̇ܬ̣ ܕܡܹܟ̣ܝ ܡܸܢܹܟ̣ܝ: ܘܡܫܲܚܬܹ̇ܟ̣ܝ ܒܡܸܫܚܵܐ.

ܝ:ܘܐܲܠܒܸ̇ܫܬܹ̇ܟ̣ܝ ܦܸܬ̣ܟܵܐ: ܘܐܲܣܐܸܢܬܹ̇ܟ̣ܝ ܡܣܵܢܹ̈ܐ ܘܐܸܣܪܹܬ̣ ܒܚܲܨܲܝ̈ܟ̇ܝ ܒܘܼܨܵܐ: ܘܟܲܣܝܼܬܹ̇ܟ̣ܝ: ܚܸܠܵܐ.

ܝܐ:ܘܨܲܒܸ̇ܬ̇ܬܹ̇ܟ̣ܝ ܨܸܒ̣ܬܵܐ: ܘܐܲܪܡ̇ܝܼܬ̣ ܫܹܐܪܹ̈ܐ ܒܐܝܼܕܲܝ̈ܟ̇ܝ ܘܗܲܡܢܝܼܟ̣ܵܐ ܒܨܵܘܪܹܟ̣ܝ.

ܝܒ:ܘܒܹܪ̈ܘܼܠܹܐ ܒܹܝܬ̣ ܥܲܝܢܲܝ̈ܟ̇ܝ: ܘܲܩܕܼܵܫܹ̈ܐ  ܒܐܸܕܼܢܲܝ̈ܟ̇ܝ: ܘܲܟ̣ܠܝܼܠܵܐ ܕܫܘܼܒ̣ܚܵܐ ܒܪܹܫܹܟ̣ܝ.

ܝܓ:ܘܐܸܨܛܲܒܲܬ̇ܬ̇ܝ ܒܕܲܗܒ̣ܵܐ ܘܒܲܚܡܘܼܪܬܵܐ: ܘܐܸܬ̣ܠ̱ܒܸ̇ܫܬ̇ܝ ܒܘܼܨܵܐ: ܘܬܸܟ̣ܠ̱ܬ̣ܵܐ ܘܦܸܬ̣ܟܵܐ: ܘܲܢܫܝܼܦܵܐ ܘܕܸܒ̣ܫܵܐ ܘܡܸܫܚܵܐ ܐܸܟܲܠܬ̇ܝ: ܘܲܫ̣ܦܲܪܬ̇ܝ ܛܵܒ̣ ܛܵܒ̣: ܘܐܲܨܠܲܚܬ̇ܝ ܒܡܲܠ̈ܟ̇ܘܵܬ̣ܵܐ.

ܝܕ:ܘܲܢܦܲܩ̣ ܫܡܵܐ ܠܫܘܼܦܪܹܟ̣ܝ ܒܥܲܡܡܹ̈ܐ: ܡܸܛܠ ܟܠܝܼܠܵܐ ܕܫܘܼܒ̣ܚܝ ܕܣܵܡܹ̇ܬ̣ ܥܠܲܝܟ̇ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܗ:ܘܐܸܬ̇ܬ̇ܟܸܠܬ̇ܝ ܥܲܠ ܫܘܼܦܪܹܟ̣ܝ: ܘܙܲܢܝܼܬ̇ܝ ܥܲܠ ܫܡܹܟ̣ܝ: ܘܐܸܫܲܕ̇ܬܝ ܙܵܢܝܘܼܬܹܟ̣ܝ ܥܲܠ ܟܠ ܕܥܵܒܲܪ.

ܝܘ:ܘܲܢܣܲܒ̣ܬ̇ܝ ܡ̣ܢ ܠܒ̣ܘܼܫܲܝ̈: ܘܲܥܒܲܕ̇ܬ̇ܝ ܠܹܟ̣ܝ ܩ̈ܢܵܝܵܬ̣ܵܐ ܘܙܲܢܝܼܬ̇ܝ ܒܗܹܝܢ: ܠܵܐ ܬܲܥܠܹܝܢ ܘܠܵܐ ܢܸܗܘ̈ܝܵܢ ܕܝܼܠܹܟ̣ܝ.

ܝܙ:ܘܲܢܣܲܒ̣ܬ̇ܝ ܡܵܐܢܹ̈ܐ ܕܫܘܼܒ̣ܚܹܟ̣ܝ: ܡ̣ܢ ܕܲܗܒ̣ܵܐ ܘܡ̣ܢ ܣܹܐܡܵܐ ܕܝܸܗ̄ܒܹ̇ܬ̣ ܠܹܟ̣ܝ: ܘܲܥ̣ܒܲܕ̇ܬ̇ܝ ܠܹܟ̣ܝ ܨܲܠܡܹ̈ܐ ܕܸܟ̣ܪܹ̈ܐ: ܘܙܲܢܝܼܬ̇ܝ ܒܗܘܿܢ.

ܝܚ:ܘܲܢܣܲܒ̣ܬ̇ܝ ܡܵܐܢܹ̈ܐ ܕܨܸܒ̣ܬܹ̇ܟ̣ܝ ܘܟܲܣܝܬ̇ܝ ܐܸܢܘܿܢ: ܘܡܸܫܚܝ ܘܒܸܣܡܲܝ̈ ܣܵܡ̣ܬ̇ܝ ܩܕܼܵܡܲܝܗܘܿܢ.

ܝܛ:ܘܠܲܚܡܵܐ ܕܝܸܗ̄ܒܹ̇ܬ̣ ܠܹܟ̣ܝ ܢܫܝܦܵܐ ܘܕܸܒ̣ܫܵܐ ܘܡܸܫܚܵܐ ܠܡܹܐܟ̣ܘܼܠܬܵܐ: ܣܵܡ̣ܬ̇ܝܼܘܗܝ ܩܕܼܵܡܲܝܗܘܿܢ ܠܪܹܝܚܵܐ ܕܲܣܘܵܬ̣ܵܐ ܐܵܡܲܪ ܡܵܪܐ ܡܵܪ̈ܵܘܵܬ̣ܵܐ.

ܟܟ:ܘܲܢܣܲܒ̣ܬ̇ܝ ܒܢܲܝ̈ܟ̇ܝ ܘܲܒ̣ـ̈ـܢܵܬܹܟ̣ܝ ܕܝܼܠܸܕ̇ܬ̇ܝ ܠܝܼ: ܘܕܲܒܲܚܬ̇ܝ ܠܗܘܿܢ ܠܡܹܐܟ̣ܘܼܠܬܵܐ: ܣܛܲܪ ܡ̣ܢ ܙܵܢܝܘܼܬܹܟ̣ܝ.

ܟܐ:ܘܲܢܟܲܣܬ̇ܝ ܒܢܲܝ̈ ܝܲܗ̄ܒ̣ܬ̇ܝ ܠܗܘܿܢ: ܟܲܕܼ ܐܸܫܬܲܪܲܚܬ̇ܝ ܒܗܘܿܢ.

ܟܒ:ܘܲܒ̣ܟ̣ܠܵܗ̇ ܛܲܢܦܘܼܬܹܟ̣ܝ ܘܙܵܢܝܘܼܬܹܟ̣ܝ: ܠܵܐ ܐܸܬ̇ܕ̇ܟܲܪܬ̇ܝ ܝܵܘ̈ܡܵܬ̣ܵܐ ܕܛܲܠܝܘܼܬܹܟ̣ܝ: ܟܲܕܼ ܥܲܪܛܸܠܵܝܵܐ ܗ̄ܘܲܝܬ̇ܝ ܘܥܲܪܝܵܐ ܘܲܡܦܲܠܦܠܵܐ ܒܲܕܼܡܵܐ.

ܟܓ:ܘܡ̣ܢ ܒܵܬܲܪ ܗܵܠܹܝܢ ܟܠܗܹܝܢ ܒܝܼ̈ܫܵܬܹܟ̣ܝ: ܘܵܝ ܠܹܟ̣ܝ ܘܵܝ ܠܹܟ̣ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܟܕ:ܒܢܲܝܬ̇ܝ ܠܹܟ̣ܝ ܒܲܝܬܵܐ ܕܓܲܝ̈ܒܹܐ: ܘܲܥܒܲܕ̇ܬܝ ܠܹܟ̣ܝ ܥܠܵـ̈ـܘܵܬ̣ܵܐ ܒܟ̣ܠ ܫܘܼܩ.

ܟܗ:ܘܲܒ̣ܟ̣ܠ ܪܹܫ ܐܘܼܪ̈ܚܵܬ̣ܵܐ ܒܢܲܝܬ̇ܝ ܦܪ̈ܲܟܲܝܟ̇ܝ: ܘܛܲܢܸܦܬ̇ܝ ܫܘܼܦܪܹܟ̣ܝ: ܘܲܦܫܲܛܬ̇ܝ ܪܸ̈ܓ̣ܠܲܝܟ̇ܝ: ܥܲܠ ܟܠ ܕܥܵܒܲܪ: ܘܐܲܣܓ̇ܝܼܬ̇ܝ ܙܵܢܝܘܼܬܹܟ̣ܝ.

ܟܘ:ܘܙܲܢܝܼܬ̇ܝ ܒܲܒ̣ܢܲܝ̈ ܡܸܨܪܹܝܢ ܫܒ̣ܵܒܲܝ̈ܟ̇ܝ ܪܵܘܪ̈ܒܲܝ ܒܸܣܪܵܐ: ܘܐܲܣܓ̇ܝܼܬ̇ܝ ܙܵܢܝܘܼܬܹܟ̣ܝ ܘܐܲܪܓܸ̇ܙܬ̇ܝܼܢܝ.

ܟܙ:ܘܐܲܪܝܼܡܹ̇ܬ̣ ܐܝܼܕܼܝ ܥܠܲܝܟ̇ܝ ܘܐܘܒ̇ܕܹܬ̣ ܦܘܼܩܕܵܢܲܝ̈ܟ̇ܝ: ܘܐܲܫܠܸܡ̇ܬܹܟ̣ܝ ܒܝܼܕܼ ܣܵܢ̈ܐܬܹܟ̣ܝ ܒ̈ܢܵܬ̣ ܦܠܸܫܬܵܝܹ̈ܐ: ܕܬ̣ܵܟ̣̈ܣܵܢ ܗ̄ܘܲܝ̈ ܠܹܟ̣ܝ ܡ̣ܢ ܐܘܼܪ̈ܚܵܬܹܟ̣ܝ ܕܙܵܢܝܘܼܬ̣ܵܐ.

ܟܚ:ܘܙܲܢܝܘܼܬ̇ܝ ܒܲܒ̣ܢܲܝ̈ ܐܵܬ̣ܘܿܪ: ܘܠܵܐ ܣܒܲܥܬ̇ܝ.

ܟܛ:ܘܐܲܣܓ̇ܝܼܬ̇ܝ ܙܵܢܝܘܼܬܹܟ̣ܝ ܥܲܠ ܐܲܪܥܵܐ ܕܲܟ̣ܢܲܥܢ ܘܲܕܼܟܲܠܕܼܵܝܹ̈ܐ: ܘܐܵܦ ܒܗܵܠܹܝܢ ܠܵܐ ܣܒܲܥܬ̇ܝ.

ܠ:ܡܵܢܵܐ ܐܸܕ̇ܘܼܢ ܠܒܲܪܬܹܟ̣ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܲܥܒܲܕ̇ܬ̇ܝ ܗܵܠܹܝܢ ܟܠܗܘܿܢ ܥܒ̣ܵܕܹ̈ܐ ܕܐܲܢ̄ܬ̇ܬ̣ܵܐ ܙܵܢܝܼܬ̣ܵܐ ܘܡܲܪܵܚܬܵܐ.

ܠܐ:ܟܲܕܼ ܒܢܲܝܬ̇ܝ ܓܲܝܒܲܝ̈ܟ̇ܝ ܒܟ̣ܠ ܪܹܫ ܐܘܼܪ̈ܚܵܬ̣ܵܐ: ܘܲܥܠܵـ̈ـܘܵܬܹܟ̣ܝ ܒܟ̣ܠ ܫܘܼܩ. ܘܠܵܐ ܗ̤ܘܲܝܬ̇ܝ ܐܵܦܠܵܐ ܐܲܝܟ ܙܵܢܝܼܬ̣ܵܐ ܕܲܡܟܲܢܫܵܐ ܐܲܓ̣ܪܵܐ.

ܠܒ:ܐܵܦܠܵܐ ܐܲܝܟ ܐܲܢ̄ܬܲܬ̣ ܓܲܒ̣ܪܵܐ ܓܲܝܵܪܬܵܐ ܕܢܵܣܒܵܐ ܡ̣ܢ ܢܘܼܟ̣ܪ̈ܵܝܹܐ.

ܠܓ:ܠܟ̣ܠܗܹܝܢ ܙܵܢ̈ܝܵܬ̣ܵܐ ܝܵܗ̄ܒ̇ܝܼܢ ܐܲܓ̣ܪܵܐ: ܘܐܲܢ̄ܬ̇ܝ ܝܲܗ̄ܒ̣ܬ̇ܝ ܐܲܓ̣ܪܵܐ ܠܟ̣ܠܗܘܿܢ ܪ̈ܵܚܡܲܝܟ̇ܝ: ܘܲܫܚܲܕ̇ܬ̇ܝ ܐܸܢܘܿܢ ܒܙܵܢܝܘܼܬܹܟ̣ܝ: ܕܢܹܐܬ̣ܘܿܢ ܠܘܵܬܹܟ̣ܝ ܡ̣ܢ ܟܠܗܘܿܢ ܚܕܼܵܪܲܝܟ̇ܝ.

ܠܕ:ܘܐܸܬ̣ܦܪܸܫܬ̇ܝ ܡ̣ܢ ܢܸܫܹ̈ܐ ܒܙܵܢܝܘܼܬܹܟ̣ܝ: ܒܗܵܝ̇ ܕܝܵܗ̄ܒܵܐ ܗ̄ܘܲܝܬ̇ܝ ܐܲܓ̣ܪܵܐ: ܘܐܲܓ̣ܪܵܐ ܠܵܐ ܝܲܗ̄ܒ̣ܘ ܠܹܟ̣ܝ.

ܠܗ:ܡܸܛܠ ܗܵܢܵܐ ܙܵܢܝܼܬ̣ܵܐ ܫܡܲܥܝ ܦܸܬ̣ܓ̣ܵܡܹܗ ܕܡܵܪܝܵܐ.

ܠܘ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܝܲܗ̄ܒ̣ܬ̇ܝ ܢܚܵܫܹܟ̣ܝ: ܘܲܓܠܲܝܬ̇ܝ ܦܘܼܪܣܵܝܹܟ̣ܝ ܒܙܵܢܝܘܼܬܹܟ̣ܝ ܥܲܠ ܪ̈ܵܚܡܲܝܟ̇ܝ: ܘܥܲܠ ܟܠܗܘܿܢ ܦܬܲܟ̣ܪܹ̈ܐ ܛܲܢܦܘܼܬܹܟ̣ܝ: ܘܲܕܼܡܵܐ ܕܲܒ̣ܢܲܝ̈ܟ̇ܝ ܝܲܗ̄ܒ̣ܬ̇ܝ ܠܗܘܿܢ.

ܠܙ:ܡܸܛܠ ܗܵܢܵܐ ܗܵܐ ܡܟܲܢܸܫ ܐ̄ܢܵܐ ܠܟ̣ܠܗܘܿܢ ܪ̈ܵܚܡܲܝܟ̇ܝ ܕܲܨܒܲܝܬ̇ܝ ܒܗܘܿܢ: ܘܲܠܟ̣ܠ ܕܲܪܚܸܡ̣ܬ̇ܝ ܥܲܡ ܕܲܣܢܲܝܬ̇ܝ: ܘܐܹܟܲܢܸܫ ܐܸܢܘܿܢ ܥܠܲܝܟ̇ܝ ܡ̣ܢ ܚܕܼܵܪܲܝܟ̇ܝ: ܘܐܸܓ̣ܠܹܐ ܦܘܼܪܣܵܝܹܟ̣ܝ ܠܥܹܢܲܝܗܘܿܢ: ܘܢܸܚܙܘܿܢ ܟܠܹܗ ܦܘܼܪܣܵܝܹܟ̣ܝ.

ܠܚ:ܘܐܹܕ̇ܘܿܢܹܟ̣ܝ ܕܝܼܢܵܐ ܕܓܲܝܵܪ̈ܵܬ̣ܵܐ: ܘܕܼܝܼܢܵܐ ܕܐܲܝܠܹܝܢ ܕܐܵܫ̈ܕܵܢ ܕܡܵܐ: ܘܐܸܬ̇ܠܹܟ̣ܝ ܠܲܕܼܡܵܐ: ܘܲܠܚܸܡܬ̣ܵܐ ܘܠܲܛܢܵܢܵܐ.

ܠܛ:ܘܐܲܫ̱ܠܡܹܟ̣ܝ ܒܐܝܼܕܲܝ̈ܗܘܿܢ: ܘܢܸܣܚ̄ܦܘܼܢ ܒܹܝܬ̣ ܓܲܝܒܲܝ̈ܟ̇ܝ: ܘܢܸܥܩ̄ܪܘܼܢ ܦܪ̈ܲܟܲܝܟ̇ܝ: ܘܢܲܫ̱ܠܚܘܼܢ ܠܒ̣ܘܼܫܲܝ̈ܟ̇ܝ: ܘܢܸܣܒ̣ܘܼܢ ܡܵܐܢܹ̈ܐ ܕܫܘܼܒ̣ܚܹܟ̣ܝ: ܘܢܸܫܒ̇ܩܘܼܢܹܟ̣ܝ ܥܲܪܛܸܠ.

ܡ:ܘܢܸܣܩܘܼܢ ܥܠܲܝܟ̇ܝ ܟܸܢܫܹ̈ܐ ܘܢܸܪܓܡܘܼܢܹܟ̣ܝ ܒܟܹܐܦܹ̈ܐ: ܘܢܸܡܚܘܿܢܹܟ̣ܝ ܒܣܲܝܦܲܝ̈ܗܘܿܢ.

ܡܐ:ܘܢܵܘܩ̄ܕܼܘܼܢܹܟ̣ܝ ܒܓ̣ܵܘ ܢܘܼܪܵܐ: ܘܢܸܥܒ̇ܕܼܘܼܢ ܡܸܢܹܟ̣ܝ ܕܝܼܢܹ̈ܐ ܠܥܹܝܢ ܢܸܫܹ̈ܐ ܣܲܓ̇ܝܼ̈ܐܵܬ̣ܵܐ: ܘܐܹܒܲܛܠܹܟ̣ܝ ܡ̣ܢ ܙܵܢܝܘܼܬ̣ܵܐ: ܘܬ̣ܘܼܒ̣ ܠܵܐ ܬܸܬ̇ܠܝܼܢ ܐܲܓ̣ܪܵܐ.

ܡܒ:ܘܐܲܢܝܼܚ ܚܸܡܬ̣ܝ ܥܠܲܝܟ̇ܝ: ܘܢܸܥܒܲܪ ܛܢܵܢܝ ܡܸܢܹܟ̣ܝ: ܘܐܸܬ̇ܬ̇ܢܝܼܚ ܘܠܵܐ ܐܸܪܓܲܙ ܬܘܼܒ̣.

ܡܓ:ܥܲܠ ܕܠܵܐ ܐܸܬ̇ܕ̇ܟܲܪܬ̇ܝ ܝܵܘ̈ܡܵܬ̣ܵܐ ܕܛܲܠܝܘܼܬܹܟ̣ܝ: ܘܐܲܪܓܸ̇ܙܬ̇ܝܼܢܝ ܒܗܵܠܹܝܢ ܟܠܗܹܝܢ: ܐܵܦ ܐܸܢܵܐ ܗܵܐ ܦܸܪܥܹ̇ܬ̣ ܐܘܼܪ̈ܚܵܬܹܟ̣ܝ ܒܪܹܫܹܟ̣ܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܥܒܲܕܬ̇ܝ ܛܲܢܦܘܼܬ̣ܵܐ ܘܙܵܢܝܼܬ̣ܵܐ.

ܡܕ:ܘܟ̣ܠ ܡܲܢ ܕܡܲܡܬܲܠ ܡܲܬ̣ܠܵܐ ܥܠܲܝܟ̇ܝ ܢܲܡܬܸ̇ܠ: ܘܢܹܐܡܲܪ ܒܲܪܬ̣ܵܐ ܐܲܝܟ ܐܸܡܵܐ.

ܡܗ:ܒܲܪܬ̣ ܐܸܡܹܟ̣ܝ ܐܲܢ̄ܬ̇ܝ: ܫܵܒ̣ܩܲܬ̣ ܒܲܥܠܵܗ̇ ܘܲܒ̣ܢܹ̈ܝܗ̇: ܘܚܵܬ̣ܵܐ ܐܲܢ̄ܬ̇ܝ ܕܐܲܚ̈ܘܵܬ̣ܵܐ ܕܲܫܒܲܩ ܓܲܒ̣ܪ̈ܲܝܗܹܝܢ ܘܲܒ̣ܢܲܝ̈ܗܹܝܢ: ܐܸܡܟܹܝܢ ܚܹܝܬ̣ܵܝܬ̣ܵܐ ܘܐܲܒ̣ܘܼܟܹܝܢ ܐܵܡܘܿܪܵܝܵܐ.

ܡܘ:ܘܚܵܬܹܟ̣ܝ ܩܲܫܝܼܫܬܵܐ ܫܵܡܪܹܝܢ: ܗ̤ܝ ܘܲܒ̣ܢܵـ̈ـܬ̣ܵܗ̇ ܕܝܵܬ̣ܒܵܐ ܡ̣ܢ ܣܸܡܵܠܹܟ̣ܝ: ܘܚܵܬܹܟ̣ܝ ܙܥܘܿܪܬܵܐ ܕܝܵܬ̣ܒܵܐ ܡ̣ܢ ܝܲܡܝܼܢܹܟ̣ܝ: ܣܕܼܘܿܡ ܘܲܒ̣ܢܵـ̈ـܬ̣ܵܗ̇.

ܡܙ:ܘܠܵܐ ܗ̄ܘܼܵܐ ܐܲܝܟ ܐܘܼܪ̈ܚܵܬ̣ܗܹܝܢ ܗܲܠܸܟ̣ܬ̇ܝ: ܘܠܵܐ ܗ̄ܘܼܵܐ ܐܲܝܟ ܛܲܢܦ̈ܘܵܬ̣ܗܹܝܢ ܥ̣ܒܲܕ̇ܬ̇ܝ: ܥܲܕܼ ܩܲܠܝܼܠ ܘܝܲܬ̇ܝܼܪ ܡܸܢܗܹܝܢ ܚܲܒܸ̇ܠܬ̇ܝ: ܒܟ̣ܠܗܹܝܢ ܐܘܼܪ̈ܚܵܬܹܟ̣ܝ.

ܡܚ:ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܥܸܒ̣ܕܲܬ̤ ܣܕܼܘܼܡ ܚܵܬܹܟ̣ܝ ܗ̤ܝ ܘܲܒ̣̈ܢܵܬ̣ܵܗ̇: ܐܲܝܟ ܕܲܥܒܲܕ̇ܬ̇ܝ ܐܲܢ̄ܬ̇ܝ ܘܲܒ̣̈ܢܵܬܹܟ̣ܝ.

ܡܛ:ܗܵܢܵܘ ܥܵܘܼܠܵܐ ܕܲܣܕܼܘܿܡ ܚܵܬܹܟ̣ܝ ܓܵܐܝܼܬ̣ܵܐ: ܕܣܵܒ̣ܥܵܐ ܗ̄ܘܼܵܬ̣ ܠܲܚܡܵܐ: ܘܝܵܬ̣ܒܵܐ ܗ̄ܘܼܵܬ̣ ܒܫܸܠܝܵܐ ܗ̤ܝ ܘܲܒ̣̈ܢܵܬ̣ܵܗ̇: ܘܒ̣ܐܝܼܕܼܵܐ ܕܒܲܝܫܹ̈ܐ ܘܲܕܼܡܸܣܟܹ̇ܢܹ̈ܐ ܠܵܐ ܐܸܚܲܕܼ.

ܢܢ:ܐܸܠܵܐ ܐܸܬ̇ܬ̇ܪܝܼܡ ܘܲܥܒܲܕܼ ܒܝܼܫܬܵܐ ܩܕܼܵܡܲܝ: ܘܟܲܕܼ ܗܵܠܹܝܢ ܚܙܹ̇ܝܬ̣ ܒܗܹܝܢ ܗܸܦܟܹ̇ܬ̣ ܐܸܢܹܝܢ.

ܢܐ:ܫܵܡܪܹܝܢ ܐܲܝܟ ܦܸܠܓ̣ܵܐ ܕܲܚܛܵܗܲܝ̈ܟ̇ܝ ܠܵܐ ܚܛܵܬ̤: ܐܲܣܓ̇ܝܼܬ̇ܝ ܛܲܢܦܘܼܬܹܟ̣ܝ ܡܸܢܗܹܝܢ: ܘܲܙܟܲܝܬ̇ܝ ܠܐܲܚ̈ܘܵܬܹܟ̣ܝ ܒܟ̣ܠܵܗ̇ ܛܲܢܦܘܼܬܹܟ̣ܝ ܕܲܥ̣ܒܲܕ̇ܬ̇ܝ.

ܢܒ:ܘܐܵܦ ܐܲܢ̄ܬ̇ܝ ܩܲܒܸ̇ܠܝ ܒܸܗܬ̇ܬܹܟ̣ܝ: ܕܲܙܟܲܝܬ̇ܝ ܚ̈ܘܵܬܹܟ̣ܝ ܒܲܚܛܵܗܲܝ̈ܟ̇ܝ: ܘܐܸܬ̇ܛܲܢܦܬ̇ܝ ܝܲܬ̇ܝܼܪ ܡܸܢܗܹܝܢ: ܘܗܸܢܹܝܢ ܐܸܙܕ̇ܕܲܩ ܝܲܬ̇ܝܼܪ ܡܸܢܹܟ̣ܝ: ܘܐܵܦ ܐܲܢ̄ܬ̇ܝ ܒܗܲܬ̣ܝ: ܘܩܲܒܸ̇ܠܝ ܚܸܦܪܹܟ̣ܝ: ܕܐܸܙܕܲܕܲܩ ܐܲܚ̈ܘܵܬܹܟ̣ܝ ܝܲܬ̇ܝܼܪ ܡܸܢܹܟ̣ܝ.

ܢܓ:ܘܐܲܗܦܸܟ ܫܒ̣ܝܼܬ̣ܗܹܝܢ: ܫܒ̣ܝܼܬ̣ܵܐ ܕܲܣܕܼܘܿܡ ܘܕܲܒ̣̈ܢܵܬ̣ܵܗ̇: ܘܲܫܒ̣ܝܼܬ̣ܵܐ ܕܫܵܡ̇ܪܹܝܢ ܘܕܲܒ̣̈ܢܵܬ̣ܵܗ̇: ܘܐܲܫܒܸ̇ܐ ܫܒ̣ܝܼܬܹܟ̣ܝ ܒܲܝܢܵܬ̣ܗܹܝܢ.

ܢܕ:ܕܲܬ̣ܩܲܒ̇ܠܝܼܢ ܒܸܗܬ̇ܬ̣ܵܐ: ܘܬܸܚ̄ܦܪܝܼܢ ܒܟ̣ܠ ܡܸܕܸ̇ܡ ܕܲܥܒܲܕ̇ܬ̇ܝ ܕܬܲܪܓ̇ܙܝܼܢܵܢܝ.

ܢܗ:ܘܚܵܬܹܟ̣ܝ ܣܕܼܘܿܡ ܘܲܒ̣̈ܢܵܬ̣ܵܗ̇ ܢܸܬ̣ܩ̈ܢܵܢ ܐܲܝܟ ܕܡ̣ܢ ܩܕܼܝܼܡ: ܘܫܵܡܪܹܝܢ ܘܲܒ̣̈ܢܵܬ̣ܵܗ̇ ܢܸܬ̣ܩـ̈ـܢܵܢ ܐܲܝܟ ܕܡ̣ܢ ܩܕܼܝܼܡ: ܘܐܲܢ̄ܬ̇ܝ ܘܲܒ̣̈ܢܵܬܹܟ̣ܝ ܬܸܗܘܹܝܢ ܐܲܝܟ ܕܡ̣ܢ ܩܕܼܝܼܡ.

ܢܘ:ܘܠܵܐ ܗܘ̤ܵܬ̣ ܣܕܼܘܿܡ ܚܵܬܹܟ̣ܝ ܠܛܸܒܵܐ ܒܦܘܼܡܹܟ̣ܝ ܒܝܵܘܡܵܐ ܕܓܲܐܝܘܼܬܹܟ̣ܝ.

ܢܙ:ܡ̣ܢ ܩܕܼܵܡ ܕܬܸܬܓ̇ܠܹܐ ܒܝܼܫܬܹ̇ܟ̣ܝ: ܐܲܝܟ ܚܸܣܕܵܐ ܕܲܒ̣̈ܢܵܬ̣ ܐܲܕܘܿܡ: ܘܟ̣ܠܗܹܝܢ ܒ̈ܢܵܬ̣ ܦܠܸܫܬܵܝܹ̈ܐ ܕܲܚܕܼܝܼܪ̈ܵܢ ܗ̄ܘܲܝ̈ ܠܵܗ̇: ܘܫܵܝ̈ܛܵܢ ܗ̄ܘܲܝ̈ ܠܵܗ̇.

ܢܚ:ܘܲܚܛܵܗܲܝ̈ܟ̇ܝ ܘܛܲܢܦ̈ܘܵܬܹܟ̣ܝ ܐܲܢ̄ܬ̇ܝ ܫ̣ܩܲܠܬ̇ܝ ܐܸܢܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܢܛ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܵܒܹ̇ܕܼ ܐ̄ܢܵܐ ܠܹܟ̣ܝ ܐܲܝܟ ܕܲܥܒܲܕ̇ܬ̇ܝ: ܥܲܠ ܕܫܵܛ̣ܬ̇ܝ ܡܵܘ̈ܡܵܬ̣ܝ ܘܒܲܛܠܸܬ̇ܝ ܩܝܵܡܝ.

ܣ:ܐܸܢܵܐ ܕܹܝܢ ܐܸܬ̇ܕ̇ܟܲܪ ܩܝܵܡܝ ܕܥܲܡܹܟ̣ܝ ܕܲܒ̣ܝܵܘ̈ܡܵܬ̣ܵܐ ܕܛܲܠܝܘܼܬܹܟ̣ܝ: ܘܐܲܩܝܼܡ ܠܹܟ̣ܝ ܩܝܵܡܵܐ ܕܥܵܠܲܡ.

ܣܐ:ܘܬܸܥ̱ܗܕܼܝܼܢ ܐܘܼܪ̈ܚܵܬܹܟ̣ܝ ܘܬܸܒ̣ܗ̱ܬ̣ܝܼܢ: ܕܢܸܣܒܹ̇ܬ̣ ܠܐܲܚ̈ܘܵܬܹܟ̣ܝ ܠܩܲܫܝܼܫܬܵܐ ܘܠܲܙܥܘܿܪܬܵܐ: ܘܝܸܗ̄ܒܹ̇ܬ̣ ܐܸܢܹܝܢ ܠܹܟ̣ܝ ܒ̈ܢܵܬ̣ܵܐ ܠܵܐ ܡ̣ܢ ܩܝܵܡܹܟ̣ܝ.

ܣܒ:ܘܐܲܩܝܼܡ ܐܸܢܵܐ ܩܝܵܡܝ ܥܲܡܹܟ̣ܝ: ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܣܓ:ܡܸܛܠ ܕܬܸܬ̇ܕܲܟ̣ܪܝܼܢ ܘܬܸܒ̣ܗ̱ܬ̣ܝܼܢ: ܘܬ̣ܘܼܒ̣ ܠܵܐ ܬܸܦ̮ܬ̇ܚܝܼܢ ܦܘܼܡܹܟ̣ܝ ܡ̣ܢ ܒܹܗܬ̇ܬܹܟ̣ܝ: ܡܵܐ ܕܫܸܒ̣ܩܹ̇ܬ̣ ܠܹܟ̣ܝ ܟܠܡܸܕܸ̇ܡ ܕܲܥܒܲܕ̇ܬ̇ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܝܙ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܲܚܘܿܕܼ ܐܘܼܚܕ̇ܬ̣ܵܐ: ܘܐܲܡܬܸ̇ܠ ܡܲܬ̣ܠܵܐ ܥܲܠ ܕܒܹܝܬ̣ ܝܑܼܣܪܵܝܹܠ.

ܓ:ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܢܸܫܪܵܐ ܪܲܒܵܐ ܕܪܵܘܪܒ̣ܝܼܢ ܓܸܦܵܘ̈ܗܝ: ܘܐܲܪܝܼܟ̣ܝܼܢ ܓܸܠܦܵܢܵܘ̈ܗܝ: ܘܡܲܠ̈ܝܵܢ ܛܸܦܪ̈ܵܘܗܝ: ܘܥܲܒ̇ܝܼܛ ܡܸܠܓܹ̇ܗ: ܐܸܬ̣ܵܐ ܠܠܸܒ̣ܢܵܢ: ܘܲܢܣܲܒ̣ ܡ̣ܢ ܓܒܲـ̈ـܝܵܐ ܕܥܲܪ̈ܩܹܐ.

ܕ:ܘܲܩ̣ܛܲܡ ܪܹܫ ܡܲܪܒ̇ܝܼܬܹܗ: ܘܐܲܝܬ̇ܝܹܗ ܠܐܲܪܥܵܐ ܕܲܟ̣ܢܲܥܢ: ܘܣܵܡܹܗ ܒܲܡܕܼܝܼܢ̄ܬܵܐ ܕܬܲܓܵܪܹ̈ܐ.

ܗ:ܘܲܢܣܲܒ̣ ܡ̣ܢ ܙܲܪܥܵܐ ܕܐܲܪܥܵܐ: ܘܐܲܪܡܝܼ ܒܡܲܕܼܒ̇ܪܵܐ: ܢܸܨܒ̇ܬ̣ܵܐ ܥܲܠ ܡܲـ̈ـܝܵܐ ܣܲܓ̇ܝܼ̈ܐܹܐ: ܘܣܵܡܵܗ̇ ܠܕܼܵܘܩܵܐ.

ܘ:ܘܝܼܥܵܬ̤ ܘܲܗܘ̤ܵܬ̣ ܓܦܸܬܵܐ ܡܪܲܥܲܕ̇ܬ̣ܵܐ ܘܡܲܟ̇ܝܼܟܲܬ̣ ܩܵܘܡܬ̣ܵܐ: ܕܢܸܬ̣ܚܙܘܿܢ ܫܲܒ̇ܘܼܩܹ̈ܝܗ̇ ܥܠܵܘܗܝ: ܘܥܸܩܵܪܹ̈ܝܗ̇ ܢܸܗܘܘܿܢ ܬܚܘܿܬ̣ܵܘܗܝ: ܘܲܗܘ̤ܵܬ̣ ܓܦܸܬܵܐ ܘܥܸܒܲܕܲܬ̤ ܫܲܒ̇ܘܼܩܹ̈ܐ: ܘܦܸܫܛܲܬ̤ ܥܢܵܩܹ̈ܝܗ̇.

ܙ:ܗܵܐ ܢܸܫܪܵܐ ܐ̄ܚܪܹܢܵܐ ܪܲܒܵܐ ܕܪܵܘܪܒ̣ܝܼܢ ܓܸܦܵܘ̈ܗܝ: ܘܣܲܓ̇ܝܼܵܐ̈ܢ ܛܸܦܪ̈ܵܘܗܝ: ܘܲܓ̣ܦܸܬܵܐ ܗܵܕܹܐ ܐܲܟ̣ܪ̱ܟܲܬ̤ ܥܸܩܵܪܹ̈ܝܗ̇ ܥܠܵܘܗܝ: ܘܕܼܵܠܝܵـ̈ـܬ̣ܵܗ̇ ܠܲܪܡܝܲܬ̤ ܥܠܵܘܗܝ: ܕܢܲܫܩܹܝܗ̇ ܡ̣ܢ ܡܸܕܼܪܵܐ ܕܢܸܨܒ̇ܬ̣ܵܗ̇.

ܚ:ܒܚܲܩܠܵܐ ܫܲܦܝܼܪܵܬܵܐ ܘܲܒ̣ܡܲـ̈ـܝܵܐ ܣܲܓ̇ܝܼ̈ܐܹܐ ܢܨܝܼܒ̣ܵܐ: ܕܬܸܥܒܸ̇ܕܼ ܛܲܪ̈ܦܹܐ ܘܬܸܛܥܲܢ ܦܹܐܪܹ̈ܐ: ܘܬܸܗܘܹܐ ܓܦܸܬܵܐ ܫܒ̣ܝܼܚܬܵܐ.

ܛ:ܐܸܡܲܪ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܵܐ ܬܲܟ̣ܫܲܪ. ܐܸܠܵܐ ܥܸܩܵܪܹ̈ܝܗ̇ ܢܸܬ̣ܦܲܣܩܘܼܢ: ܘܦܹܐܪܹ̈ܝܗ̇ ܢܸܬ̣ܡ̱ܣܘܿܢ ܘܢܹܐܒ̣ܫܘܼܢ: ܘܟ̣ܠܗܘܿܢ ܛܲܪ̈ܦܹܐ ܕܡܵܘܥܝܼܬ̣ܵܗ̇ ܢܹܐܒ̣ܫܘܼܢ: ܘܠܵܐ ܒܲܕܼܪܵܥܵܐ ܪܵܡܵܐ ܘܠܵܐ ܒܥܲܡܡܹ̈ܐ ܣܲܓ̇ܝܼ̈ܐܹܐ: ܢܸܥܩ̄ܪܝܼܗ̇ ܡ̣ܢ ܥܸܩܵܪܵܗ̇.

ܝ:ܗܵܐ ܢܨܝܼܒ̣ܵܐ ܐܸܠܵܐ ܠܵܐ ܬܲܟ̣ܫܲܪ: ܘܡܵܐ ܕܢܸܫܒܲܬ̤ ܒܵܗ̇ ܪܘܼܚܵܐ ܕܫܵܘܒܵܐ: ܝܵܒ̣ܫܵܐ ܒܡܸܕܼܪܵܐ ܕܡܵܘܥܝܼܬ̣ܵܗ̇.

ܝܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܒ:ܒܲܪܢܵܫܵܐ: ܐܸܡܲܪ ܠܒܲܝܬܵܐ ܡܡܲܪܡܪܵܢܵܐ: ܠܵܐ ܝܵܕܼܥܝܼܬ̇ܘܿܢ ܡܵܢܵܐ ܐܸܢܹܝܢ ܗܵܠܹܝܢ: ܐܸܡܲܪ ܠܗܘܿܢ: ܗܵܐ ܐܵܬܹ̇ܐ ܡܲܠܟܵܐ ܕܒ̣ܵܒܹܠ ܠܐܘܿܪܸܫܠܸܡ: ܘܕܼܵܒܲܪ ܠܡܲܠܟܵܗ̇ ܘܲܠܪܵܘܪ̈ܒ̣ܵܢܹܝܗ̇ ܘܡܵܘܒܸ̇ܠ ܠܗܘܿܢ ܠܒ̣ܵܒܹܠ.

ܝܓ:ܘܢܵܣܹ̇ܒ̣ ܡ̣ܢ ܙܲܪܥܵܐ ܕܡܲܠܟ̇ܘܼܬ̣ܵܐ: ܘܲܡܩܝܼܡ ܥܲܡܹܗ ܩܝܵܡܵܐ: ܘܥܵܐܹ̇ܠ ܥܲܡܹܗ ܒܡܵܘ̈ܡܵܬ̣ܵܐ: ܘܕܼܵܒܲܪ ܠܫܲܠܝܼ̈ܛܹܐ ܕܐܲܪܥܵܐ ܕܠܵܐ ܢܸܬ̇ܬ̇ܪܝܼܡܘܼܢ.

ܝܕ:ܐܸܠܵܐ ܬܸܗܘܹܐ ܡܲܠܟ̇ܘܼܬ̣ܗܘܿܢ ܡܲܟ̇ܝܼܟ̣ܵܐ: ܘܢܸܛܪܘܼܢ ܩܝܵܡܹܗ: ܘܲܢܩܝܼܡܘܼܢ ܥܲܡܹܗ.

ܝܗ:ܘܢܸܡܪܲܕܼ ܥܠܵܘܗܝ: ܘܲܢܫܲܕܲܪ ܐܝܼܙܓܲܕܵܘ̈ܗܝ ܠܡܸܨܪܹܝܢ: ܕܢܸܬ̇ܠܘܼܢ ܠܹܗ ܪ̈ܲܟ̣ܫܵܐ ܘܥܲܡܵܐ ܣܲܓ̇ܝܼܵܐܐ: ܠܵܐ ܢܲܟ̣ܫܲܪ ܘܠܵܐ ܢܸܬ̣ܦܲܨܹܐ ܡܲܢ ܕܗܵܟܲܢܵܐ ܥ̣ܒܲܕܼ.

ܝܘ:ܚܲܝ ܐ̄ܢܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܒܲܐܬ̣ܪܵܐ ܕܐܲܩܝܼܡܝܼܘܗܝ ܡܲܠܟܵܐ: ܘܫܵܛ̣ ܡܵܘ̈ܡܵܬ̣ܝ ܘܒܲܛܸܠ ܩܝܵܡܝ: ܒܓ̣ܵܘ ܒܵܒܹܠ ܢܡܘܼܬ̣.

ܝܙ:ܘܠܵܐ ܒܚܲܝܠܵܐ ܪܲܒܵܐ: ܘܐܵܦܠܵܐ ܒܪ̈ܲܟ̣ܫܵܐ ܣܲܓ̇ܝܼܵܐܐ: ܢܸܥܒܸ̇ܕܼ ܥܲܡܹܗ ܦܸܪܥܘܿܢ ܩܪܵܒ̣ܵܐ: ܐܸܠܵܐ ܒܲܟ̣ܡܹܐܢܹ̈ܐ ܘܲܒ̣ܕܼܵܘ̈ܩܹܐ ܢܵܘܒܸ̇ܕܼ ܢܲܦ̮̈ܫܵܬ̣ܵܐ ܣܲܓ̇ܝܼܵܐ̈ܬ̣ܵܐ.

ܝܚ:ܥܲܠ ܕܫܵܛ̣ ܡܵܘ̈ܡܵܬ̣ܵܐ ܘܒܲܛܸܠ ܩܝܵܡܵܐ: ܢܲܫܠܸܡ ܐܝܼܕܹܗ ܘܠܵܐ ܢܸܬ̣ܦܲܨܹܐ: ܥܲܠ ܕܲܥ̣ܒܲܕܼ ܗܵܠܹܝܢ ܟܠܗܹܝܢ.

ܝܛ:ܡܸܛܠ ܗܵܠܹܝܢ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. ܚܲܝ ܐ̄ܢܵܐ: ܥܲܠ ܕܫܵܛ̣ ܡܵܘ̈ܡܵܬ̣ܝ: ܘܒܲܛܸܠ̣ ܩܝܵܡܝ: ܐܲܣܩܝܼܗ̇ ܒܪܹܫܹܗ.

ܟܟ:ܘܐܸܦܪܘܿܣ ܡܨܝܼܕ̇ܬ̇ܝ ܥܠܵܘܗܝ ܘܢܸܬ̇ܬ̇ܚܸܕܼ ܒܵܗ̇: ܘܐܵܘܒ̇ܠܝܼܘܗܝ ܠܒ̣ܵܒܹܠ ܠܐܲܪܥܵܐ ܕܟܲܠܕܼܵܝܹ̈ܐ: ܘܐܸܕ̇ܘܢܝܼܘܗܝ ܬܲܡܵܢ ܥܲܠ ܥܵܘܼܠܵܐ ܕܐܲܥܠܝܼ ܒܝܼ.

ܟܐ:ܘܟ̣ܠܗܘܿܢ ܚܹܐܪ̈ܵܘܗܝ ܘܟ̣ܠܗܘܿܢ ܩܲܪ̈ܝܼܒ̣ܵܘܗܝ ܢܸܦܠܘܿܢ ܒܚܲܪܒܵܐ: ܘܐܲܝܠܹܝܢ ܕܡܸܫܬܲܚܪܝܼܢ ܢܸܬ̇ܕܪܘܿܢ ܠܟ̣ܠ ܪܘܼܚ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܡܲܠܠܹ̇ܬ̣.

ܟܒ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܹܣܲܒ̣ ܡ̣ܢ ܓܒܲـ̈ـܝܵܐ ܕܥܲܪ̈ܩܹܐ ܪܵܡܵܐ: ܘܡ̣ܢ ܪܹܫܹܗ ܐܸܩܛܘܿܡ ܠܸܒܹ̇ܗ: ܘܐܸܨܘܿܒ̣ ܥܲܠ ܛܘܼܪܹ̈ܐ ܪ̈ܵܡܹܐ ܘܲܡܥܲܠܲܝܵـ̈ـܐ.

ܟܓ:ܒܛܘܼܪܹ̈ܐ ܕܝܼܣܪܵܝܹܠ ܐܸܨܒ̣ܝܼܘܗܝ: ܘܢܸܛܥܲܢ ܛܲܪ̈ܦܹܐ ܘܢܸܥܒܸ̇ܕܼ ܦܹܐܪܹ̈ܐ: ܘܢܸܗܘܸܐ ܐܲܪܙܵܐ ܫܒ̣ܝܼܚܵܐ: ܘܬܸܫܟܲܢ ܒܹܗ ܟܠܵܗ̇ ܦܵܪܲܚܬ̣ܵܐ ܕܓܸܦܵܐ: ܘܲܒ̣ܛܸܠܵܠܵܐ ܕܣܵܘ̈ܟܵܘܗܝ ܢܸܫܟ̇ܢܘܼܢ.

ܟܕ:ܘܢܸܕ̇ܥܘܼܢ ܟܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ: ܕܐܸܢܵܐ ܡܵܪܝܵܐ ܐܲܡ̇ܟܹܬ̣ ܩܲܝܣܵܐ ܪܵܡܵܐ: ܘܐܲܪܝܼܡܹ̇ܬ̣ ܩܲܝܣܵܐ ܡܲܟ̇ܝܼܟ̣ܵܐ: ܘܐܵܘܒ̇ܫܹܬ̣ ܩܲܝܣܵܐ ܪܲܛܝܼܒ̣ܵܐ: ܘܐܵܘܥ̇ܝܼܬ̣ ܩܲܝܣܵܐ ܝܲܒ̇ܝܼܫܵܐ: ܐܸܢܵܐ ܡܵܪܝܵܐ ܡܲܠܠܹ̇ܬ̣ ܘܥܸܒ̣ܕܹ̇ܬ̣.

ܩܹܦܵܠܹܐܘܿܢ:ܝܚ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ: ܒܲܪܢܵܫܵܐ.

ܒ:ܠܡܵܢܵܐ ܡܲܡܬ̇ܠܝܼܢ ܐ̄ܢܬ̇ܘܿܢ ܡܲܬ̣ܠܵܐ ܗܵܢܵܐ ܒܐܲܪܥܵܐ ܕܝܼܣܪܵܝܹܠ: ܘܐܵܡ̇ܪܝܼܢ ܐ̄ܢܬ̇ܘܿܢ: ܐܲܒ̣ܵܗܹ̈ܐ ܐܸܟܲܠ̣ܘ ܒܣܪܹ̈ܐ: ܘܫܸܢܹ̈ܐ ܕܲܒ̣ܢܲـ̈ـܝܵܐ ܩܗ̈ܝܵܢ.

ܓ:ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܢ ܢܸܗܘܹܐ ܬܘܼܒ̣ ܕܡܲܡܬܸ̇ܠ ܡܲܬ̣ܠܵܐ ܗܵܢܵܐ ܒܝܼܣܪܵܝܹܠ.

ܕ:ܡܸܛܠ ܕܟ̣ܠܗܹܝܢ ܢܲܦ̮̈ܫܵܬ̣ܵܐ ܕܝܼܠܝ ܐܸܢܹܝܢ: ܢܲܦ̮ܫܵܐ ܕܐܲܒ̣ܵܐ ܘܢܲܦ̮ܫܵܐ ܕܲܒ̣ܪܵܐ ܕܝܼܠܝ ܐܸܢܹܝܢ: ܢܲܦ̮ܫܵܐ ܕܚܵܛ̇ܝܵܐ ܗ̤ܝ ܬܡܘܼܬ̣.

ܗ:ܘܓܲܒ̣ܪܵܐ ܐܸܢ ܢܸܗܘܹܐ ܙܲܕ̇ܝܼܩ: ܘܢܸܥܒܸ̇ܕܼ ܕܝܼܢܵܐ ܘܙܲܕ̇ܝܼܩܘܼܬ̣ܵܐ.

ܘ:ܘܥܲܠ ܛܘܼܪܹ̈ܐ ܠܵܐ ܐܸܟܲܠ: ܘܠܵܐ ܐܲܪܝܼܡ ܥܲܝܢܵܘ̈ܗܝ ܠܲܦܬܲܟ̣ܪܹ̈ܐ ܘܲܠܕܼܚ̈ܠܵܬ̣ܵܐ ܕܲܒ̣ܢܲܝ̈ ܝܑܼܣܪܵܝܹܠ: ܘܠܲܐ̄ܢܬܲܬ̣ ܚܲܒ̣ܪܹܗ ܠܵܐ ܛܲܢܸܦ̣: ܘܠܲܐܢ̄ܬ̇ܬ̣ܵܐ ܒܟܸܦ̮ܣܵܗ̇ ܠܵܐ ܐܸܬ̣ܩܲܪܲܒ̣.

ܙ:ܘܲܠܐ̄ܢܵܫ ܠܵܐ ܛܠܲܡ̣ ܘܲܠܐ̄ܢܵܫ ܠܵܐ ܬܲܟ: ܘܦܲܢܝܼ ܡܸܫܟܵܢܵܐ ܕܲܢܣܲܒ̣: ܘܝܲܗ̄ܒ̣ ܠܲܚܡܹܗ ܠܟܲܦܢܵܐ: ܘܲܠܥܲܪܛܸܠܵܝܵܐ ܐܲܠܒܸ̇ܫ ܬܲܟ̣ܣܝܼܬ̣ܵܐ.

ܚ:ܘܲܒ̣ܪܸܒ̇ܝܼܬ̣ܵܐ ܠܵܐ ܐܵܘܙܸܦ: ܘܒܲܩܨܵܨܵܐ ܠܵܐ ܝܲܗ̄ܒ̣: ܘܡ̣ܢ ܥܵܘܼܠܵܐ ܐܲܗܦܸܟ ܐܝܼܕܹܗ: ܘܕܼܵܢ ܕܝܼܢܵܐ ܕܩܘܼܫܬܵܐ ܒܹܝܬ̣ ܓܲܒ̣ܪܵܐ ܠܚܲܒ̣ܪܹܗ.

ܛ:ܘܲܒ̣ܦܘܼܩ̈ܕܵܢܲܝ ܗܲܠܸܟ: ܘܕܼܝܼܢܲܝ̈ ܢ̣ܛܲܪ ܘܲܥܒܲܕܼ ܩܘܼܫܬܵܐ: ܡܲܢ ܕܗܵܟܲܢܵܐ ܥ̣ܒܲܕܼ ܙܲܕ̇ܝܼܩܵܐ ܗ̄ܘܼ: ܘܡܸܚܵܐ  ܢܸܚܹܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝ:ܘܐܸܢ ܢܵܘܠܸܕܼ ܒܪܵܐ ܥܵܘܵܠܵܐ ܐܵܫܹ̇ܕܼ ܕܡܵܐ: ܘܢܸܥܒܸ̇ܕܼ ܚܕܼܵܐ ܡ̣ܢ ܗܵܠܹܝܢ.

ܝܐ:ܘܢܹܐܟ̣ܘܿܠ ܥܲܠ ܛܘܼܪܹ̈ܐ: ܘܲܢܛܲܢܸܦ ܐܲܢ̄ܬܲܬ̣ ܚܲܒ̣ܪܹܗ.

ܝܒ:ܘܢܸܛܠܘܿܡ ܠܡܸܣܟܹ̇ܢܵܐ ܘܲܠܒ̣ܵܝܫܵܐ: ܘܢܸܬ̇ܘܿܟ ܠܚܲܒ̣ܪܹܗ: ܘܠܵܐ ܢܦܲܢܹܐ ܡܸܫܟܵܢܵܐ ܠܡܵܪ̈ܵܘܗܝ: ܘܠܲܦܬܲܟ̣ܪܹ̈ܐ ܢܪܝܼܡ ܥܲܝܢܵܘ̈ܗܝ ܘܢܸܥܒܸ̇ܕܼ ܛܲܢܦܘܼܬ̣ܵܐ.

ܝܓ:ܘܲܒ̣ܪܸܒ̇ܝܼܬ̣ܵܐ ܢܵܘܙܸܦ: ܘܒܲܩܨܵܨܵܐ ܢܸܣܲܒ̣: ܕܲܠܡܵܐ ܚܵܝܹ̇ܐ ܠܵܐ ܢܸܚܹܐ: ܡܸܛܠ ܕܗܵܠܹܝܢ ܟܠܗܹܝܢ ܒܝܼ̈ܫܵܬ̣ܵܐ ܥ̣ܒܲܕܼ: ܐܸܠܵܐ ܡܡܵܬ̣ ܢܡܘܼܬ̣: ܘܲܕܼܡܹܗ ܥܠܵܘܗܝ ܢܸܗܘܹܐ.

ܝܕ:ܘܐܸܢ ܢܵܘܠܸܕܼ ܒܪܵܐ: ܘܢܸܚܙܹܐ ܟܠܗܘܿܢ ܚܛܵܗܹ̈ܐ ܕܲܥ̣ܒܲܕܼ ܐܲܒ̣ܘܼܗܝ: ܘܠܵܐ ܢܸܥܒܸ̇ܕ ܐܲܟ̣ܘܵܬ̣ܗܘܿܢ.

ܝܗ:ܘܥܲܠ ܛܘܼܪܹ̈ܐ ܠܵܐ ܢܹܐܟ̣ܘܿܠ: ܘܠܵܐ ܢܪܝܼܡ ܥܲܝ̈ܢܵܘܗܝ ܠܲܦܬܲܟ̣ܪܹ̈ܐ ܕܲܒ̣ܝܝ̈ ܝܑܼܣܪܵܝܹܠ: ܘܠܲܐܢ̄ܬܲܬ̣ ܚܲܒ̣ܪܹܗ ܠܵܐ ܢܛܲܢܸܦ.

ܝܘ:ܘܲܠܐ̄ܢܵܫ ܠܵܐ ܢܸܛܠܘܡ: ܘܡܸܫܟܵܢܵܐ ܠܐ̄ܢܵܫ ܠܵܐ ܢܸܫܩܘܿܠ: ܘܬ̣ܘܼܟܵܐ ܠܵܐ ܢܸܬ̇ܘܿܟ. ܘܠܲܚܡܹܗ ܢܸܬܸ̇ܠ ܠܟܲܦܢܵܐ: ܘܲܠܥܲܪܛܠܵܝܵܐ ܢܲܠܒܸ̇ܫ.

ܝܙ:ܘܡ̣ܢ ܡܸܣܟܹ̇ܢܵܐ ܠܵܐ ܢܲܗܦܸܟ ܐܝܼܕܹܗ: ܘܪܸܒ̇ܝܼܬ̣ܵܐ ܠܵܐ ܢܸܫܩܘܿܠ: ܘܝܲܬ̇ܝܼܪܵܐ ܠܵܐ ܢܸܣܲܒ̣: ܘܕܼܝܼܢܲܝ̈ ܢܸܥܒܸ̇ܕܼ: ܘܲܒ̣ܦܘܼܩ̈ܕܵܢܲܝ ܢܗܲܠܸܟ: ܠܵܐ ܢܡܘܼܬ̣ ܒܥܵܘܼܠܹܗ ܕܐܲܒ̣ܘܼܗܝ: ܐܸܠܵܐ ܡܸܚܵܐ ܢܸܚܹܐ.

ܝܚ:ܐܲܒ̣ܘܗܝ ܕܹܝܢ ܥܲܠ ܕܲܛܠܲܡ̣ ܛܠܘܼܡܝܵܐ: ܘܬܲܟ ܬܘܼܟܵܐ ܠܐܲܚܘܼܗܝ: ܘܡܸܕܸ̇ܡ ܕܫܲܦܝܪ ܠܵܐ ܥ̣ܒܲܕܼ ܒܥܲܡܹܗ: ܡܝܼܬ̣ ܒܲܚܛܵܗܵܘ̈ܗܝ.

ܝܛ:ܘܐܸܢ ܐܵܡ̇ܪܝܼܢ ܐܲܝܟܵܘ ܠܵܐ ܡܸܬ̣ܦܪܲܥ ܒܪܵܐ ܚܛܵܗܹ̈ܐ ܕܐܲܒ̣ܘܼܗܝ: ܐܸܡܲܪ ܠܗܘܿܢ: ܡܸܛܠ ܕܲܥܒܲܕܼ ܒܪܵܐ ܕܝܼܢܵܐ ܘܙܲܕ̇ܝܼܩܘܼܬ̣ܵܐ: ܘܲܢܛܲܪ ܟܠܗܘܿܢ ܦܘܼܩ̈ܕܵܢܲܝ̈: ܡܸܚܵܐ ܢܸܚܹܐ.

ܟܟ:ܢܲܦ̮ܫܵܐ ܕܚܵܛ̇ܝܵܐ ܗ̤ܝ ܬܡܘܼܬ̣. ܠܵܐ ܢܸܬ̣ܦܪܲܥ ܒܪܵܐ ܚܛܵܗܹ̈ܐ ܕܐܲܒ̣ܘܼܗܝ: ܐܵܦܠܵܐ ܐܲܒ̣ܵܐ ܢܸܬ̣ܦܪܲܥ ܚܛܵܗܹ̈ܐ ܕܲܒ̣ܪܹܗ: ܙܵܟ̣ܘܼܬܹܗ ܕܙܲܟܵܝܵܐ ܥܠܵܘܗܝ ܬܸܗܘܹܐ: ܘܲܚܛܝܼܬܹܗ ܕܚܲܛܵܝܵܐ ܥܠܵܘܗܝ ܬܸܗܘܹܐ.

ܟܐ:ܥܵܘܿܠܵܐ ܕܹܝܢ ܐܸܢ ܢܸܗܦܘܿܟ ܡ̣ܢ ܟܠܗܘܿܢ ܚܛܵܗܵܘ̈ܗܝ ܕܲܥܒܲܕܼ: ܘܢܸܛܲܪ ܦܘܼܩ̈ܕܵܢܲܝ: ܘܢܸܥܒܸ̇ܕܼ ܕܝܼܢܵܐ ܘܙܲܕ̇ܝܼܩܘܼܬ̣ܵܐ: ܡܸܚܐ ܢܸܚܹܐ ܘܠܵܐ ܢܡܘܼܬ̣.

ܟܒ:ܘܟ̣ܠܗܘܿܢ ܚܛܵܗܵܘ̈ܗܝ ܕܲܥܒܲܕܼ ܠܵܐ ܢܸܬ̇ܕܲܟ̣ܪܘܿܢ ܠܹܗ: ܐܸܠܵܐ ܒܙܲܕ̇ܝܼܩܘܼܬ̣ܵܐ ܕܲܥ̣ܒܲܕܼ ܢܸܚܹܐ.

ܟܓ:ܠܵܐ ܨܵܒܹ̇ܐ ܐ̄ܢܵܐ ܒܡܵܘ̱ܬܹ̇ܗ ܕܚܲܛܵܝܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܠܵܐ ܕܢܸܗܦܘܿܟ ܡ̣ܢ ܐܘܼܪܚܹܗ ܒܝܼܫܬܵܐ ܘܢܸܚܹܐ.

ܟܕ:ܘܐܸܢ ܢܸܗܦܘܿܟ ܙܲܕ̇ܝܼܩܵܐ ܡ̣ܢ ܙܲܕ̇ܝܼܩܘܼܬܹܗ: ܘܢܸܥܒܸ̇ܕܼ ܥܵܘܼܠܵܐ ܘܛܲܢܦܘܼܬ̣ܵܐ ܐܲܝܟ ܗܵܠܹܝܢ ܕܲܥ̣ܒܲܕܼ ܚܲܛܵܝܵܐ: ܟܠܵܗ̇ ܙܲܕ̇ܝܼܩܘܼܬܹܗ ܕܲܥܒܲܕܼ ܠܵܐ ܬܸܬ̇ܕ̇ܟܲܪ ܠܹܗ: ܐܸܠܵܐ ܒܥܵܘܼܠܵܐ ܕܲܥܒܲܕܼ: ܘܒܲܚܛܵܗܹ̈ܐ ܕܲܚܛܵܐ: ܒܗܘܿܢ ܢܡܘܼܬ̣.

ܟܗ:ܘܐܸܡܲܪܬ̇ܘܿܢ ܠܵܐ ܫܲܦܝܼܪ̈ܵܢ ܐܘܼܪ̈ܚܵܬܹܗ ܕܡܵܪܝܵܐ: ܫܡܲܥܘ ܗܵܟܹܝܠ ܕܒܹܝܬ̣ ܝܑܼܣܪܵܝܹܠ: ܐܘܼܪ̈ܚܵܬ̣ܝ ܕܝܼܠܝ ܫܲܦܝܼܪ̈ܵܢ ܐܸܢܹܝܢ: ܐܸܠܵܐ ܐܘܼܪ̈ܚܵܬ̣ܟ̣ܘܿܢ ܗ̄ܘܼ ܕܝܼܠܟ̣ܘܿܢ ܠܵܐ ܫܲܦܝܼܪ̈ܵܢ.

ܟܘ:ܘܐܸܢ ܢܸܗܦܘܿܟ ܙܲܕ̇ܝܼܩܵܐ ܡ̣ܢ ܙܲܕ̇ܝܼܩܘܼܬܹܗ ܘܢܸܥܒܸ̇ܕܼ ܥܵܘܼܠܵܐ: ܒܹܗ ܒܥܵܘܼܠܵܐ ܕܲܥܒܲܕܼ ܢܡܘܼܬ̣.

ܟܙ:ܘܐܸܢ ܢܸܗܦܘܿܟ ܥܵܘܠܵܐ ܡ̣ܢ ܥܵܘܵܠܘܼܬܹܗ: ܘܢܸܥܒܸ̇ܕܼ ܕܝܼܢܵܐ ܘܙܲܕ̇ܝܼܩܘܼܬ̣ܵܐ: ܢܲܚܸܐ ܢܲܦ̮ܫܹܗ.

ܟܚ:ܘܐܸܢ ܢܸܚܙܹܐ ܘܢܸܗܦܘܿܟ ܡ̣ܢ ܟܠܗܘܿܢ ܚܛܵܗܵܘ̈ܗܝ ܕܲܥܒܲܕܼ: ܡܸܚܵܐ ܢܸܚܸܐ ܘܠܵܐ ܢܡܘܼܬ̣.

ܟܛ:ܘܐܵܡ̇ܪܝܼܢ ܕܒܹܝܬ̣ ܝܑܼܣܪܵܝܹܠ ܠܵܐ ܫܲܦܝܼܪ̈ܵܢ ܐܘܼܪ̈ܚܵܬܹܗ ܕܡܵܪܝܵܐ: ܐܘܼܪ̈ܚܵܬ̣ܝ ܕܝܼܠܝ ܫܲܦܝܼܪ̈ܵܢ ܐܸܢܹܝܢ ܕܒܹܝܬ̣ ܝܑܼܣܪܵܝܹܠ: ܐܸܠܵܐ ܐܘܼܪ̈ܚܵܬ̣ܟ̣ܘܿܢ ܗ̄ܘܼ ܕܝܼܠܟ̣ܘܿܢ ܠܵܐ ܫܲܦܝܼܪ̈ܵܢ.

ܠ:ܡܸܛܠ ܗܵܢܵܐ ܐ̄ܢܵܫ ܐܲܝܟ ܐܘܼܪ̈ܚܵܬܹܗ ܐܹܕ̇ܢܟ̣ܘܿܢ ܒܹܝܬ̣ ܝܑܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ. ܬܘܼܒ̣ܘ ܘܐܸܬ̣ܦܢܵܘ ܡ̣ܢ ܟܠܹܗ ܥܵܘܼܠܟ̣ܘܿܢ: ܘܠܵܐ ܬܸܗܘܹܐ ܠܟ̣ܘܿܢ ܬܘܼܩ̱ܠܬ̣ܵܐ ܠܲܚܛܵܗܲܝ̈ܟ̇ܘܿܢ.

ܠܐ:ܘܲܫܕܼܵܘ ܡܸܢܟ̣ܘܿܢ ܟܠܹܗ ܥܵܘܼܠܵܐ ܕܲܥ̣ܕ̇ܬ̇ܘܿܢ: ܘܲܥܒܸܕܼܘ ܠܟ̣ܘܿܢ ܠܸܒܵܐ ܚܲܕܬܵܐ: ܘܪܘܼܚܵܐ ܚܕܲܬܵܐ: ܘܠܵܐ ܬܡܘܼܬ̣ܘܼܢ ܕܒܹܝܬ̣ ܝܑܼܣܪܵܝܹܠ.

ܠܒ:ܡܸܛܠ ܕܠܵܐ ܨܵܒܹ̇ܐ ܐ̄ܢܵܐ ܒܡܵܘܬܹ̇ܗ ܕܡܝܼܬ̣ܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܠܵܐ ܬܘܼܒ̣ܘ ܘܲܚܝܵܘ.

ܩܹܦܵܠܹܐܘܿܢ:ܝܛ.

ܐ:ܐܲܢ̄ܬ̇ ܕܹܝܢ ܒܲܪܢܵܫܵܐ ܫܩܘܿܠ ܐܘܿܠܝܼܬܵܐ ܥܲܠ ܪܵܘܪ̈ܒ̣ܵܢܹܐ ܕܝܼܣܪܵܝܹܠ.

ܒ:ܘܐܸܡܲܪ: ܡܵܢܲܐ ܗ̄ܝܼ ܐܸܡܵܟ ܓܘܼܪܝܵܐ ܕܐܲܪܝܵܐ: ܕܒܲܝܢܵܬ̣ ܐܲܪ̈ܝܵܘܵܬ̣ܵܐ ܪܲܒ̇ܝܼܥܵܐ: ܘܒܲܝܢܵܬ̣ ܐܲܪ̈ܝܵܘܵܬ̣ܵܐ ܪܲܒ̇ܝܲܬ̤ ܓܪܹ̈ܝܗ̇.

ܓ:ܘܲܪܒ̣ܵܐ ܚܲܕܼ ܡ̣ܢ ܓܪܹ̈ܝܗ̇ ܘܲܗܘ̤ܵܐ ܐܲܪܝܵܐ: ܘܝܼܠܸܦ ܠܡܸܬ̣ܒܲܪ ܬܒ̣ܵܪܵܐ: ܘܐܸܟܲܠ ܒܲܪܢܵܫܵܐ.

ܕ:ܘܲܫ̣ܡܲܥܘ ܛܸܒܹ̇ܗ ܥܲܡܡܹ̈ܐ: ܘܒܲܡܨܝܼܕ̇ܬ̇ܗܘܿܢ ܐܸܬ̇ܬ̇ܚܸܕܼ: ܘܐܲܝܬ̇ܝܼܘܗܝ ܒܲܒ̣ܠܵܡܵܐ ܠܐܲܪܥܵܐ ܕܡܸܨܪܹܝܢ.

ܗ:ܘܟܲܕܼ ܚܙܵܬ̤ ܐܸܡܹܗ ܕܐܸܬ̣ܟܲܪܗܲܬ̣ ܘܐܸܒܲܕܼ ܠܹܗ ܣܲܒ̣ܪܵܗ̇: ܢܸܣܒܲܬ̤ ܡ̣ܢ ܓܪܹ̈ܝܗ̇ ܘܲܥܒܲܕܼܬܹܗ ܐܲܪܝܵܐ.

ܘ:ܘܗܲܠܸܟ ܒܲܝܢܵܬ̣ ܐܲܪ̈ܝܵܘܵܬ̣ܵܐ: ܘܲܗܘ̤ܵܐ ܐܲܪܝܵܐ: ܘܝܼܠܸܦ ܠܡܸܬ̣ܒܲܪ ܬܒ̣ܵܪܵܐ: ܘܐܸܟܲܠ̣ ܒܲܪܢܵܫܵܐ.

ܙ:ܘܗܲܠܸܟ ܒܥܘܼܫܢܹܗ: ܘܲܡܕܼܝܼ̈ܢܵܬܵܐ ܐܲܚܪܸܒ̣: ܘܚܒܸ̇ܠ ܐܲܪܥܵܐ ܒܲܡܠܹܐܵܗ̇ ܒܩܵܠܵܐ ܕܢܸܗ̱ܡܬܹܗ.

ܚ:ܘܐܸܬ̣ܟܲܢܲܫܘ ܥܠܵܘܗܝ ܥܲܡܡܹ̈ܐ ܡ̣ܢ ܡܕܼܝܼ̈ܢܵܬ̣ܵܐ ܕܲܚܕܼܵܪ̈ܵܘܗܝ: ܘܲܦܪܲܣܘ ܥܠܵܘܗܝ ܡܨܝܼܕ̇ܬ̇ܗܘܿܢ: ܘܒ̣ܵܗ̇ ܐܸܬ̇ܬ̇ܚܸܕܼ.

ܛ:ܘܚܲܒ̣ܫܘܼܗܝ ܒܢܵܡܲܪܬܵܐ: ܘܐܵܘܒ̇ܠܘܼܗܝ ܠܡܲܠܟܵܐ ܕܒ̣ܵܒܹܠ: ܘܐܲܥܠܹܗ ܠܒܹܝܬ̣ ܚܒ̣ܘܼܫܝܵܐ: ܕܬ̣ܘܼܒ̣ ܠܵܐ ܢܸܫܬ̇ܡܲܥ ܩܵܠܹܗ ܒܛܘܼܪܹ̈ܐ ܕܝܼܣܪܵܝܹܠ.

ܝ:ܐܸܡܵܟ ܐܲܝܟ ܓܦܸܬܵܐ ܒܲܕܼܡܵܟ: ܥܲܠ ܡܲـ̈ـܝܵܐ ܢܨܝܼܒ̣ܵܐ. ܦܹܐܪܹ̈ܝܗ̇ ܘܥܵܘܦܹ̈ܝܗ̇ ܗܘ̤ܵܘ ܒ̈ܡܲܝܵܐ ܣܲܓ̇ܝܼ̈ܐܹܐ.

ܝܐ:ܘܲܗܘ̤ܵܘ ܠܵܗ̇ ܚܘܼܛܪܹ̈ܐ ܥܲܫܝܼܢܹ̈ܐ ܥܲܠ ܫܲܒ̣̈ܛܹܐ ܕܪܵܘܪ̈ܒ̣ܵܢܹܐ: ܘܬܸܬ̇ܬ̇ܪܝܼܡܲܬ̤ ܩܵܘܡܲܬ̣ܗܘܿܢ ܡ̣ܢ ܒܲܝܢܵܬ̣ ܢܘܼܪ̈ܒܹ̇ܝܗ̇: ܘܐܸܬ̣ܚܙܝܼܘ ܒܪܵܘܡܗܘܿܢ ܘܲܒ̣ܣܘܿܓ̣ܵܐܐ ܕܕܼܵܠܝܵـ̈ـܬ̣ܗܘܿܢ.

ܝܒ:ܘܐܸܬ̣ܥ̱ܩܲܪܘ ܒܚܸܡܬ̣ܵܐ ܘܒܲܐܪܥܵܐ ܐܸܫܬ̇ܕܼܝܼܘ: ܘܪܘܼܚܵܐ ܕܫܵܘܒܵܐ ܐܵܘܒ̇ܫܲܬ̤ ܦܹܐܪܹ̈ܝܗ̇: ܘܐܸܬ̣ܦܲܪܲܩܘ ܘܝܼܒܸܫܘ ܚܘܼܛܪܹ̈ܐ ܕܥܘܼܫܢܵܗ̇: ܘܢܘܼܪܵܐ ܐܸܟܲܠܬ̣ܵܗ̇.

ܝܓ:ܡܸܟܹ̇ܝܠ ܐܸܬ̣ܢܲܨܒܲܬ̤ ܒܡܲܕܼܒ̇ܪܵܐ: ܒܐܲܪܥܵܐ ܨܗܝܼܬ̣ܵܐ ܘܨܵܕܼܝܼܬ̣ܵܐ.

ܝܕ:ܘܢܸܦܩܲܬ̤ ܢܘܼܪܵܐ ܡ̣ܢ ܚܘܼܛܪܹ̈ܝܗ̇ ܓܒܲـ̈ـܝܵܐ ܘܐܸܟܲܠܬ̤ ܦܹܐܪܹ̈ܝܗ̇: ܘܠܵܐ ܐܸܫܬ̇ܟܲܚ ܒܵܗ̇ ܬܘܼܒ̣ ܚܘܼܛܪܵܐ ܥܲܫܝܼܢܵܐ: ܐܵܘ ܫܲܒ̣ܛܵܐ ܕܢܸܗܘܹܐ ܫܲܠܝܼܛܵܐ. ܐܘܿܠܝܼܬ̣ܵܐ ܗ̄ܝܼ ܬܸܗܘܹܐ ܠܐܘܿܠܝܼܬ̣ܵܐ.

ܩܹܦܵܠܹܐܘܿܢ:ܟ.

ܐ:ܘܲܗܘ̤ܵܐ ܒܫܲܢ̄ܬܵܐ ܫܒ̣ܝܼܥܵܝܬܵܐ ܒܲܥܣܲܪܬܵܐ ܒܝܲܪܚܵܐ ܚܡܝܼܫܵܝܵܐ: ܐܸܬ̣ܵܘ ܓܲܒ̣ܪܹ̈ܐ ܡ̣ܢ ܣܵܒܹ̈ܐ ܕܝܼܣܪܵܝܹܠ: ܠܡܸܫܐܲܠ ܡ̣ܢ ܡܵܪܝܵܐ: ܘܝܼܬܸܒ̣ܘ ܩܕܼܵܡܲܝ.

ܒ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܓ:ܒܲܪܢܵܫܵܐ: ܡܲܠܸܠ ܥܲܡ ܣܵܒܹ̈ܐ ܕܲܒ̣ܢܲܝ̈ ܝܑܼܣܪܵܝܹܠ: ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܲܡܫܲܐܵܠܘܼܬܲܢܝ ܐܵܬܹ̇ܝܢ ܐ̄ܢܬ̇ܘܿܢ: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܐܸܬܸ̇ܠ ܠܟ̣ܘܿܢ ܦܸܬ̣ܓ̣ܵܡܵܐ.

ܕ:ܕܘܼܢ ܐܸܢܘܿܢ: ܕܘܼܢ ܐܸܢܘܿܢ ܒܲܪܢܵܫܵܐ: ܘܚܵܘܵܐ ܐܸܢܘܿܢ ܛܲܢܦܘܼܬ̣ܵܐ ܕܐܲܒ̣ܵܗܲܝ̈ܗܘܿܢ: ܘܐܸܡܲܪ ܠܗܘܿܢ.

ܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܝܵܘܡܵܐ ܕܲܓ̣ܒܹܝܬ̣ ܠܝܼܣܪܵܝܹܠ ܐܲܪܝܡܹ̇ܬ̣ ܐܝܼܕܼܝ ܥܲܠ ܙܲܪܥܵܐ ܕܒܹܝܬ̣ ܝܲܥܩܘܿܒ̣: ܘܐܸܬ̣ܓ̇ܠܝܼܬ̣ ܠܗܘܿܢ ܒܐܲܪܥܵܐ ܕܡܸܨܪܹܝܢ: ܘܐܲܪܝܼܡܹ̇ܬ̣ ܐܝܼܕܼܝ ܘܐܸܡ̇ܪܹܬ̣ ܠܗܘܿܢ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ.

ܘ:ܒܹܗ ܒܝܵܘܡܵܐ ܗܵܘܿ: ܐܲܪܝܼܡܹ̇ܬ̣ ܠܗܘܿܢ ܐܝܼܕܼܝ ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܠܐܲܪܥܵܐ ܕܝܸܗ̄ܒܹ̇ܬ̣ ܠܗܘܿܢ: ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ: ܫܘܼܒ̣ܚܵܐ ܗ̄ܝܼ ܕܟ̣ܠܗܹܝܢ ܡܕܼܝܼ̈ܢܵܬ̣ܵܐ.

ܙ:ܘܐܸܡ̇ܪܹܬ̣ ܠܗܘܿܢ: ܐܲܥܒܲܪܘ ܐ̄ܢܵܫ ܦܬܲܟ̣ܪܹܗ ܡ̣ܢ ܥܲܝܢܵܘ̈ܗܝ: ܘܲܒ̣ܕܸܚ̈ܠܵܬ̣ܵܐ ܕܡܸܨܪܹܝܢ ܠܵܐ ܬܸܬ̇ܛܲܢܦܘܿܢ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ.

ܚ:ܘܡܲܪܡܪܘܼܢܝ ܘܠܵܐ ܨܒ̣ܵܘ ܠܡܸܫܡܲܥ: ܘܠܵܐ ܐܲܥܒܲܪܘ ܦܬܲܟ̣ܪܹ̈ܐ ܡ̣ܢ ܥܲܝܢܲܝ̈ܗܘܿܢ: ܘܠܵܐ ܫܒܲܩ̣ܘ ܕܸܚ̈ܠܵܬ̣ܵܐ ܕܡܸܨܪܹܝܢ: ܘܐܸܡ̇ܪܹܬ̣ ܕܐܹܫܘܿܕܼ ܚܸܡܬ̣ܝ ܥܠܲܝܗܘܿܢ: ܘܐܹܫܲܡܠܸܐ ܪܘܼܓ̣ܙܝ ܒܗܘܿܢ ܒܓ̣ܵܘ ܐܲܪܥܵܐ ܕܡܸܨܪܹܝܢ.

ܛ:ܘܚܵܣܹ̇ܬ̣ ܡܸܛܠ ܫܹܡܝ ܕܠܵܐ ܢܸܬ̇ܛܵܘܲܫ ܒܹܝܬ̣ ܥܲܡܡܹ̈ܐ: ܕܐܸܬ̣ܓ̇ܠܝܼܬ̣ ܥܠܲܝܗܘܿܢ ܠܥܹܢܲܝܗܘܿܢ: ܕܐܲܦܸܩ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ.

ܝ:ܘܐܲܦܩܹ̇ܬ̣ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܐܲܝܬ̇ܝܼܬ̣ ܐܸܢܘܿܢ ܠܡܲܕܼܒ̇ܪܵܐ.

ܝܐ:ܘܝܸܗ̄ܒܹ̇ܬ̣ ܠܗܘܿܢ ܦܘܼܩ̈ܕܵܢܲܝ: ܘܕܼܝܼܢܲܝ̈ ܐܵܘܕ̇ܥܹ̇ܬ̣ ܐܸܢܘܿܢ: ܕܐܸܢ ܥܵܒܹ̇ܕܼ ܠܗܘܿܢ ܒܲܪܢܵܫܵܐ ܚܵܝܹ̇ܐ ܒܗܘܿܢ.

ܝܒ:ܘܐܵܦ ܫܲܒܲܝ̈ ܝܸܗ̄ܒܹ̇ܬ̣ ܠܗܘܿܢ: ܕܢܸܗܘ̈ܝܵܢ ܐܵܬ̤ܵܐ ܒܲܝܢܲܝ ܘܲܠܗܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܕܲܡܩܲܕܸ̇ܫ ܠܗܘܿܢ.

ܝܓ:ܘܡܲܪܡܪܘܼܢܝ ܕܒܹܝܬ̣ ܝܑܼܣܪܵܝܹܠ ܒܡܲܕܼܒ̇ܪܵܐ: ܘܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܘ. .ܕܼܝܼܢܲܝ̈ ܐܲܣܠܝܼܘ: ܕܐܸܢ ܥܵܒܹ̇ܕܼ ܠܗܘܿܢ ܒܲܪܢܵܫܵܐ ܚܵܝܹ̇ܐ ܒܗܘܿܢ: ܘܫܲܒܲܝ̈ ܛܵܘܸܫܘ: ܘܐܸܡ̇ܪܹܬ̣ ܕܐܹܫܘܿܕܼ ܪܘܼܓ̣ܙܝ ܥܠܲܝܗܘܿܢ ܒܡܲܕܼܒ̇ܪܵܐ ܘܐܵܘܒܸ̇ܕܼ ܐܸܢܘܿܢ.

ܝܕ:ܘܚܵܣܹ̇ܬ̣ ܡܸܛܠ ܫܹܡܝ: ܕܠܵܐ ܢܸܬ̇ܛܵܘܲܫ ܠܥܹܝܢ ܥܲܡܡܹ̈ܐ ܕܐܲܦܩܹ̇ܬ̣ ܐܸܢܘܿܢ ܠܥܹܢܲܝܗܘܿܢ.

ܝܗ:ܐܵܦ ܐܸܢܵܐ ܐܲܪܝܼܡܹ̇ܬ̣ ܠܗܘܿܢ ܐܝܼܕܼܝ ܒܡܲܕܼܒ̇ܪܵܐ: ܕܠܵܐ ܐܲܥܸܠ ܐܸܢܘܿܢ ܠܐܲܪܥܵܐ ܕܝܸܗ̄ܒܹ̇ܬ̣ ܠܗܘܿܢ: ܕܡܲܪܕ̇ܝܵܐ ܚܲܠܒ̣ܵܐ ܘܕܸܒ̣ܫܵܐ: ܫܘܼܒ̣ܚܵܐ ܗ̄ܝܼ ܕܟ̣ܠܗܹܝܢ ܡܕܼܝܼ̈ܢܵܬ̣ܵܐ.

ܝܘ:ܥܲܠ ܕܐܲܣܠܝܼܘ ܕܝܼܢܲܝ̈: ܘܫܲܒܲܝ̈ ܛܵܒ̣ ܛܵܘܸܫܘ: ܘܒ̣ܵܬܲܪ ܦܬܲܟ̣ܪ̈ܲܝܗܘܿܢ ܐܸܙܲܠ̣ ܠܸܒ̇ܗܘܿܢ.

ܝܙ:ܘܚܵܣܲܬ̤ ܥܲܝܢܝ ܥܠܲܝܗܘܿܢ: ܕܠܵܐ ܐܹܚܲܒܲܠ ܐܸܢܘܿܢ: ܘܠܵܐ ܐܲܣܝܼܦ ܐܸܢܘܿܢ ܒܡܲܕܼܒ̇ܪܵܐ.

ܝܚ:ܘܐܸܡ̇ܪܹܬ̣ ܠܲܒ̣ܢܲܝ̈ܗܘܿܢ ܒܡܲܕܼܒ̇ܪܵܐ: ܒܦܘܼܩ̈ܕܵܢܹܐ ܕܐܲܒ̣ܵܗܲܝ̈ܟ̇ܘܿܢ ܠܵܐ ܬܗܲܠܟ̣ܘܿܢ: ܘܕܼܝܼܢܲܝ̈ܗܘܿܢ ܠܵܐ ܬܸܛܪܘܼܢ: ܘܒܲܦܬܲܟ̣ܪ̈ܲܝܗܘܿܢ ܠܵܐ ܬܸܬ̇ܛܲܢܦܘܼܢ.

ܝܛ:ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ: ܒܦܘܼܩ̈ܕܵܢܲܝ ܗܲܠܸܟ̣ܘ: ܘܕܼܝܼܢܲܝ̈ ܛܲܪܘ ܘܲܥܒܸܕܼܘ ܐܸܢܘܿܢ.

ܟܟ:ܘܩܲܕܸ̇ܫܘ ܫܲܒܲܝ̈ ܘܢܸܗܘ̈ܝܵܢ ܐܵܬ̤ܵܐ ܒܲܝܢܲܝ ܘܲܠܟ̣ܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ̣ܘܿܢ.

ܟܐ:ܘܡܲܪܡܪܘܼܢܝ ܒܢܲـ̈ـܝܵܐ ܘܲܒ̣ܦܘܼܩ̈ܕܵܢܲܝ ܠܵܐ ܗܲܠܸܟ̣ܘ: ܘܕܼܝܼܢܲܝ̈ ܠܵܐ ܢ̣ܛܲܪܘ: ܘܠܵܐ ܥܒܲܕܼܘ ܐܸܢܘܿܢ: ܕܐܸܢ ܥܵܒܹ̇ܕܼ ܠܗܘܿܢ ܒܲܪܢܵܫܵܐ ܚܵܝܹ̇ܐ ܒܗܘܿܢ: ܘܫܲܒܲܝ̈ ܛܵܘܸܫܘ: ܘܐܸܡ̇ܟܹ̇ܬ̣ ܕܐܹܫܘܿܕܼ ܚܸܡܬ̣ܝ: ܘܐܹܫܲܡܠܹܐ ܥܠܲܝܗܘܿܢ ܪܘܼܓ̣ܙܝ ܒܡܲܕܼܒ̇ܪܵܐ.

ܟܒ:ܘܚܵܣܹ̇ܬ̣ ܡܸܛܠ ܫܹܡܝ: ܕܠܵܐ ܢܸܬ̇ܛܵܘܲܫ ܒܹܝܬ̣ ܥܲܡܡܹ̈ܐ ܕܐܲܦܩܹ̇ܬ̣ ܐܸܢܘܿܢ ܠܥܹܢܲܝܗܘܿܢ.

ܟܓ:ܐܸܠܵܐ ܐܲܪܝܼܡܹ̇ܬ̣ ܠܗܘܿܢ ܐܝܼܕܼܝ ܒܡܲܕܼܒ̇ܪܵܐ: ܕܐܹܒܲܕܲܪ ܐܸܢܘܿܢ ܒܥܲܡܡܹ̈ܐ: ܘܐܸܕܼܪܸܐ ܐܸܢܘܿܢ ܒܐܲܪ̈ܥܵܬ̣ܵܐ.

ܟܕ:ܥܲܠ ܕܠܵܐ ܥ̣ܒܲܕܼܘ ܕܝܼܢܲܝ̈: ܘܐܲܣܠܝܼܘ ܦܘܼܩ̈ܕܵܢܲܝ ܘܛܵܘܸܫ̣ܘ ܫܲܒܲܝ̈: ܘܒ̣ܵܬܲܪ ܦܬܲܟ̣ܪܹ̈ܐ ܕܐܲܒ̣ܵܗܲܝ̈ܗܘܿܢ ܐܸܙܲܠ̣ ܥܲܝܢܲܝ̈ܗܘܿܢ.

ܟܗ:ܘܐܸܢܵܐ ܝܸܗ̄ܒܹ̇ܬ̣ ܠܗܘܿܢ ܦܘܼܩܕܵܢܹ̈ܐ ܕܠܵܐ ܫܲܦܝܼܪܝܼܢ: ܘܕܼܝܼܢܹ̈ܐ ܕܠܵܐ ܢܸܚܘܿܢ ܒܗܘܿܢ.

ܟܘ:ܘܛܲܢܦܹ̇ܬ̣ ܐܸܢܘܿܢ ܒܡܵܘ̈ܗܒ̣ܵܬ̣ܗܘܿܢ: ܡܵܐ ܕܲܡܩܲܪܒ̣ܝܼܢ ܒܘܼܟ̣ܪܹ̈ܐ: ܘܐܵܘܒܸ̇ܕܼ ܐܸܢܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܟܙ:ܡܸܛܠ ܗܵܢܵܐ ܒܲܪܢܵܫܵܐ: ܡܲܠܸܠ ܥܲܡ ܕܒܹܝܬ̣ ܝܑܼܣܪܵܝܹܠ ܘܐܸܡܲܪ ܠܗܘܿܢ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܘܼܒ̣ ܒܗܵܕܹܐ ܓܲܕܸ̇ܦܘ ܩܕܼܵܡܲܝ ܐܲܒ̣ܵܗܲܝ̈ܟ̇ܘܿܢ: ܒܥܵܘܼܠܗܘܿܢ ܕܐܲܥ̣ܠܝܼܘ ܒܝܼ.

ܟܚ:ܘܐܲܝܬ̇ܝܼܬ̣ ܐܸܢܘܿܢ ܠܐܲܪܥܵܐ ܕܐܲܪܝܼܡܹ̇ܬ̣ ܐܝܼܕܼܝ ܠܡܸܬ̇ܠܵܗ̇ ܠܗܘܿܢ: ܘܲܚܙܵܘ ܟܠ ܪܵܡܬ̣ܵܐ ܕܪܵܡܵܐ: ܘܟ̣ܠ ܐܝܼܠܵܢ ܕܡܲܛܲܠ: ܘܕܲܒܲܚ̣ܘ ܬܲܡܵܢ ܕܸܒ̣ܚܲܝ̈ܗܘܿܢ: ܘܩܲܪܸܒ̣ܘ ܬܲܡܵܢ ܩܘܼܪ̈ܒܵܢܲܝܗܘܿܢ: ܘܣܵܡ̣ܘ ܬܲܡܵܢ ܪܹܝܚܵܐ ܕܲܣܘܵܬ̣ܗܘܿܢ: ܘܢܲܩܝܼܘ ܬܲܡܵܢ ܢܘܼܩܵܝܗܘܿܢ.

ܟܛ:ܘܐܸܡܪܹܬ̣ ܠܗܘܿܢ: ܡܵܢܲܐ ܗ̄ܝܼ ܦܪܲܟܵܐ ܕܐܵܬܹ̇ܝܢ ܐ̄ܢܬ̇ܘܿܢ ܠܬܲܡܵܢ: ܘܐܸܬ̣ܩܪܝܼ ܫܡܵܗ̇ ܦܪܲܟܵܐ ܥܕܲܡܵܐ ܠܝܵܘܡܵܢܵܐ.

ܠ:ܡܸܛܠ ܗܵܢܵܐ: ܒܲܪܢܵܫܵܐ: ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܢ ܒܐܘܼܪܚܵܐ ܕܐܲܒ̣ܵܗܲܝ̈ܟ̇ܘܿܢ ܡܸܬ̇ܛܲܢܦܝܼܢ ܐ̄ܢܬ̇ܘܿܢ: ܘܒ̣ܵܬܲܪ ܦܬܲܟ̣ܪ̈ܲܝܗܘܿܢ ܛܵܥܹ̇ܝܢ ܐ̄ܢܬ̇ܘܿܢ.

ܠܐ:ܘܲܡܩܲܪܒ̣ܝܼܢ ܐ̄ܢܬ̇ܘܿܢ ܡܵܘܗ̈ܒ̣ܵܬ̣ܟ̣ܘܿܢ: ܘܡܲܥܒ̇ܪܝܼܢ ܐ̄ܢܬ̇ܘܿܢ ܒܢܲܝ̈ܟ̇ܘܿܢ ܒܢܘܼܪܵܐ: ܘܡܸܬ̇ܛܲܢܦܝܼܢ ܐ̄ܢܬ̇ܘܿܢ ܒܲܦܬܲܟ̣ܪ̈ܲܝܟ̇ܘܿܢ ܥܕܲܡܵܐ ܠܝܵܘܡܵܢܵܐ: ܘܨܵܒܹ̇ܝܢ ܐ̄ܢܬ̇ܘܿܢ ܕܬܸܫ̱ܐܠܘܼܢ ܡܹܢܝ ܒܹܝܬ̣ ܝܑܼܣܪܵܝܹܠ: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܐܸܬܸ̇ܠ ܠܟ̣ܘܿܢ ܦܸܬ̣ܓ̣ܵܡܵܐ.

ܠܒ:ܘܗܵܝ ܕܲܒ̣ܪܸܥܝܵܢܟ̣ܘܿܢ ܠܵܐ ܬܸܗܘܹܐ: ܕܐܵܡ̇ܪܝܼܬ̇ܘܿܢ ܢܸܗܘܹܐ ܐܲܝܟ ܥܲܡܡܹ̈ܐ ܘܐܲܝܟ ܫܲܪ̈ܒ̣ܵܬ̣ܵܐ ܕܐܲܪܥܵܐ: ܘܲܢܫܲܡܸܫ ܠܩܲܝܣܹ̈ܐ ܘܲܠܟܹܐܦܹ̈ܐ.

ܠܓ:ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܒ̣ܐܝܼܕܼܵܐ ܬܲܩܝܼܦܬܵܐ ܘܒܲܕܼܪܵܥܵܐ ܪܵܡܵܐ: ܘܲܒ̣ܪܘܼܓ̣ܙܵܐ ܐܲܫܝܼܕܼܵܐ ܐܲܡܠܸܟ ܥܠܲܝܟ̇ܘܿܢ.

ܠܕ:ܘܐܲܦܸܩܟ̣ܘܿܢ ܡ̣ܢ ܥܲܡܡܹ̈ܐ: ܘܐܹܟܲܢܸܫܟ̣ܘܿܢ ܡ̣ܢ ܐܲܪ̈ܥܵܬ̣ܵܐ ܕܐܸܬ̣ܒܲܕܲܪܬ̇ܘܿܢ ܒܗܹܝܢ: ܘܒ̣ܐܝܼܕܼܵܐ ܥܲܫܝܼܢܬܵܐ ܘܒܲܕܼܪܵܥܵܐ ܪܵܡܵܐ: ܘܲܒ̣ܪܘܼܓ̣ܙܵܐ ܐܲܫܝܼܕܼܵܐ.

ܠܗ:ܐܲܝܬܹ̇ܝܟ̣ܘܿܢ ܠܡܲܕܼܒ̇ܪܵܐ ܕܥܲܡܡܹ̈ܐ: ܘܐܹܕ̇ܢܟ̣ܘܿܢ ܬܲܡܵܢ ܐܲܦ̈ܝܼܢ ܠܘܼܩܒܲܠ ܐܲܦܝܼ̈ܢ.

ܠܘ:ܐܲܝܟ ܕܕܵܢܹ̇ܬ̣ ܥܲܡ ܐܲܒ̣ܵܗܲܝ̈ܟ̇ܘܿܢ ܒܡܲܕܼܒ̇ܪܵܐ ܕܐܲܪܥܵܐ ܕܡܸܨܪܹܝܢ: ܗܵܟܲܢܵܐ ܐܸܕ̇ܘܼܢ ܥܲܡܟ̣ܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܠܙ:ܘܐܲܥܒܲܪܟ̣ܘܿܢ ܬܚܹܝܬ̣ ܫܲܒ̣ܛܵܐ: ܘܐܲܥܸܠܟ̣ܘܿܢ ܒܡܲܪܕ̇ܘܼܬ̣ܵܐ ܕܲܕܼܝܵܬܹܩܹܐ.

ܠܚ:ܘܐܸܓ̣ܒܹ̇ܐ ܡܸܢܟ̣ܘܿܢ ܐܲܝܠܹܝܢ ܕܡܵܪܕ̇ܝܼܢ ܘܡܲܥܠܹܝܢ ܒܝܼ: ܡ̣ܢ ܐܲܪܥܵܐ ܕܒܹܝܬ̣ ܡܲܥܡܲܪܗܘܿܢ ܐܲܦܸܩ ܐܸܢܘܿܢ: ܘܠܲܐܪܥܵܐ ܕܝܑܼܣܪܵܝܹܠ ܠܵܐ ܢܸܥܠܘܼܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܠܛ:ܐܲܢ̄ܬ̇ܘܿܢ ܕܹܝܢ ܕܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܢ ܠܵܐ ܫܵܡ̇ܥܝܼܢ ܐ̄ܢܬ̇ܘܿܢ ܠܝܼ: ܙܸܠܘ ܦܠܘܿܚܘ ܐ̄ܢܵܫ ܦܬܲܟ̣ܪ̈ܵܘܗܝ: ܘܬ̣ܘܼܒ̣ ܠܵܐ ܬܛܵܘܫܘܼܢ ܫܡܵܐ ܕܩܘܼܕܼܫܝ: ܒܡܵܘ̈ܗܒ̣ܵܬ̣ܟ̣ܘܿܢ ܘܒܲܦܬܲܟ̣ܪ̈ܲܝܟ̇ܘܿܢ.

ܡ:ܡܸܛܠ ܕܲܒ̣ܛܘܼܪܵܐ ܕܩܘܼܕܼܫܝ: ܒܛܘܼܪܹ̈ܐ ܪ̈ܵܡܹܐ ܕܝܼܣܪܵܝܹܠ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܲܡܵܢ ܢܸܦ̱ܠܚܘܼܢܵܢܝ ܟܠܗܘܿܢ ܕܒܹܝܬ̣ ܝܑܼܣܪܵܝܹܠ ܓܡܝܼܪܵܐܝܼܬ̣: ܬܲܡܵܢ ܐܸܨܛܒܸܐ ܒܗܘܿܢ: ܘܬܲܡܵܢ ܐܸܦܩܘܿܕܼ ܪܹ̈ܫܝܵܬ̣ܗܘܿܢ ܘܪܹܫ ܥܲܠ̈ܠܵܬ̣ܗܘܿܢ: ܘܪܹܫ ܡܵܘ̈ܗܒ̣ܵܬ̣ܗܘܿܢ ܒܟ̣ܠ ܩܘܼܕܼܫܲܝ̈ܗܘܿܢ.

ܡܐ:ܒܪܹܝܚܵܐ ܒܲܣܝܼܡܵܐ ܐܹܩܲܒܸ̇ܠܟ̣ܘܿܢ: ܡܵܐ ܕܐܲܦܸܩ̇ܬ̇ܟ̣ܘܿܢ ܡ̣ܢ ܥܲܡܡܹ̈ܐ: ܘܟܲܢܸܫ̇ܬ̇ܟ̣ܘܿܢ ܡ̣ܢ ܡܕܼܝܼ̈ܢܵܬ̣ܵܐ ܕܐܸܬ̣ܒܲܕܲܪܬ̇ܘܿܢ ܒܗܹܝܢ: ܘܐܸܬ̣ܩܲܕ̇ܫܹ̇ܬ̣ ܒܟ̣ܘܿܢ ܠܥܹܝܢ ܥܲܡܡܹ̈ܐ.

ܡܒ:ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܐܲܥܸܠܬ̇ܟ̣ܘܿܢ ܠܐܲܪܥܵܐ ܕܝܼܣܪܵܝܹܠ: ܠܐܲܪܥܵܐ ܕܐܲܪܝܼܡܹ̇ܬ̣ ܐܝܼܕܼܝ ܠܡܸܬ̇ܠܵܗ̇ ܠܐܲܒ̣ܗܲܝ̈ܟ̇ܘܿܢ.

ܡܓ:ܘܬܸܬ̇ܕܲܟ̣ܪܘܼܢ ܬܲܡܵܢ ܐܘܼܪ̈ܚܵܬ̣ܟ̣ܘܿܢ: ܘܟ̣ܠܗܹܝܢ ܨܸܢ̈ܥܵܬ̣ܟ̣ܘܿܢ ܕܐܹܬܛܲܢܲܦܬ̇ܘܿܢ ܒܗܹܝܢ: ܘܢܸܬ̣ܩܲܡ̈ܛܵܢ ܐܲܦܲܝ̈ܟ̇ܘܿܢ ܒܟ̣ܠܗܹܝܢ ܒܝܼ̈ܫܵܬ̣ܵܐ ܕܲܥ̣ܒܲܕ̇ܬ̇ܘܿܢ.

ܡܕ:ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܕܚܵܣܹ̇ܬ̣ ܥܠܲܝܟ̇ܘܿܢ ܡܸܛܠ ܫܹܡܝ: ܘܠܵܐ ܐܲܝܟ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܠܵܐ ܐܲܝܟ ܨܸܢ̈ܥܵܬ̣ܟ̣ܘܿܢ ܫܵܛ̈ܝܵܬ̣ܵܐ ܥܸܒ̣ܕܹ̇ܬ̣ ܠܟ̣ܘܿܢ ܒܹܝܬ̣ ܝܑܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܡܗ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܡܘ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܐܘܼܪܚܵܐ ܕܬܲܝܡ̄ܢܵܐ: ܘܚܘܼܪ ܠܬܲܝܡ̄ܢܵܐ: ܘܐܲܬ̣ܢܲܒܵܐ ܥܲܠ ܥܵܒ̣ܵܐ ܕܲܒ̣ܬܲܝܡ̄ܢܵܐ.

ܡܙ:ܘܐܸܡܲܪ ܠܥܵܒ̣ܵܐ ܕܲܒ̣ܬܲܝܡ̄ܢܵܐ: ܫܡܲܥ ܦܸܬ̣ܓ̣ܵܡܹܗ ܕܡܵܪܝܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܫܵܒܹ̇ܩ ܐ̄ܢܵܐ ܒܵܟ ܢܘܼܪܵܐ: ܘܬܹܐܟ̣ܘܿܠ ܟܠܗܘܿܢ ܩܲܝܣܲܝ̈ܟ ܪ̈ܓܲܝܵܐ ܘܝܲܒ̇ܝܼܫܹ̈ܐ: ܘܠܵܐ ܬܸܕܼܥܲܟ ܫܲܠܗܹܒ̣ܝܼܬ̣ܵܐ ܕܡܸܬ̣ܓܵܘܙܠܵܐ: ܘܢܹܐܩ̈ܕܵܢ ܒܵܗ̇ ܟܠ ܐܲܦ̈ܝܼܢ: ܡ̣ܢ ܬܲܝܡ̄ܢܵܐ ܘܲܥܕܲܡܵܐ ܠܓܲܪܒ̇ܝܵܐ.

ܡܚ:ܘܢܸܚܙܘܿܢܵܗ̇ ܟܠ ܒܣܲܪ: ܕܐܸܢܵܐ ܡܵܪܝܵܐ ܐܵܘܚܸܕ̇ܬܵܗ̇ ܘܠܵܐ ܬܸܕܼܥܹ̇ܟ.

ܡܛ:ܘܐܸܡ̇ܪܹܬ̣ ܐܘܿ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܗܸܢܘܿܢ ܐܵܡ̇ܪܝܼܢ ܠܝܼ ܡܲܡܬܸ̇ܠ ܡܲܬ̣̈ܠܹܐ ܐܲܢ̄ܬ̇.

ܩܹܦܵܠܹܐܘܿܢ:ܟܐ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܐܘܿܪܸܫܠܸܡ: ܘܚܘܼܪ ܒܡܲܩܕܲܫܗܘܿܢ: ܘܐܸܬ̣ܢܲܒܵܐ ܥܲܠ ܐܲܪܥܵܐ ܕܝܼܣܪܵܝܹܠ.

ܓ:ܘܐܸܡܲܪ ܠܐܲܪܥܵܐ ܕܝܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܐ ܥܠܲܝܟ̇ܝ: ܘܐܲܦܸܩ ܝܲܦ̮ܣܹܪܝ ܡ̣ܢ ܚܸܠܬ̣ܵܗ̇: ܘܐܵܘܒܸ̇ܕܼ ܡܸܢܹܟ̣ܝ ܙܲܕ̇ܝܼܩܵܐ ܘܚܲܛܵܝܵܐ.

ܕ:ܘܥܲܠ ܕܐܵܘܒ̇ܕܹܬ̣ ܡܸܢܹܟ̣ܝ ܙܲܕܝܼܩܵܐ ܘܚܲܛܵܝܵܐ: ܡܸܛܠܗܵܢܵܐ ܬܸܦܘܿܩ ܣܲܦ̮ܣܹܪܝ ܡ̣ܢ ܚܸܠܬ̣ܵܗ̇ ܥܲܠ ܟܠ ܒܣܲܪ: ܡ̣ܢ ܬܲܝܡ̄ܢܵܐ ܘܲܥܕܲܡܵܐ ܠܓܲܪܒ̇ܝܵܐ.

ܗ:ܘܢܸܕ̇ܥܘܼܢ ܟܠ ܒܣܲܪ: ܕܐܸܢܵܐ ܡܵܪܝܵܐ ܐܲܦܩܹ̇ܬ̣ ܣܲܦ̮ܣ݂ܹܪܝ ܡ̣ܢ ܚܸܠܬ̣ܵܗ̇: ܘܬ̣ܘܼܒ̣ ܠܵܐ ܬܸܗܦܘܿܟ.

ܘ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܬ̇ܬܲܢܲܚ ܒܲܬ̣ܒ̣ܵܪܵܐ ܕܚܲܨܵܐ: ܘܲܒ̣ܡܲܪܝܼܪܘܼܬ̣ܵܐ ܐܸܬ̇ܬܲܢܲܚ ܠܥܹܢܲܝܗܘܿܢ.

ܙ:ܘܐܸܢ ܐܵܡܪܝܼܢ ܠܵܟ ܠܡܵܢܵܐ ܡܸܬ̇ܬܲܢܲܚ ܐܲܢ̄ܬ̇: ܐܸܡܲܪ ܠܗܘܿܢ: ܥܲܠ ܛܸܒܵܐ ܕܐܵܬܹ̇ܐ: ܘܡܸܬ̣ܡ̱ܣܹܝܢ ܟܠܗܘܿܢ ܠܸܒܵـ̈ـܘܵܬ̣ܵܐ: ܘܡܸܬ̣ܪ̈ܲܫܥܵܢ ܟܠܗܹܝܢ ܐܝܼ̈ܕܲܝܵܐ: ܘܟ̣ܵܝ̈ܒܵܢ ܟܠܗܹܝܢ ܪ̈ܘܼܚܵܬ̣ܵܐ: ܘܟ̣ܠܗܹܝܢ ܒܘܼܪ̈ܟܹ̇ܐ ܡܲܪ̈ܕ̇ܝܵܢ ܡܲـ̈ـܝܵܐ: ܗܵܐ ܐܸܬܲܬ̤ ܘܗܵܘܝܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܚ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܛ:ܒܲܪܢܵܫܵܐ: ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܝܦܵܐ ܣܲܝܦܵܐ ܐܸܬ̣ܠܲܛ̄ܫ.

ܝ:ܘܐܸܬ̇ܛܲܝܲܒ̣ ܕܬܸܩܛܘܿܠ ܩܸܛܠܵܐ: ܕܬܲܒ̣ܪܸܩ ܘܐܸܬ̇ܛܲܝܲܒ̣ ܠܡܲܪܬܵܥܘܼ ܠܫܲܪܒ̇ܬܹܗ ܕܒܹܪܝ: ܘܐܲܣܠܵܐ ܟܠ ܩܹܝܣ.

ܝܐ:ܘܝܲܗ̄ܒܹ̇ܗ ܠܛܘܼܝܵܒ̣ܵܐ: ܘܲܠܡܹܐܚܲܕܼ ܐܝܼܕܼܵܐ ܕܣܲܝܦܵܐ ܠܛܝܼܫܵܐ ܘܲܡܛܲܝܒ̣ܵܐ: ܕܢܲܫ̱ܠܡܝܼܘܗܝ ܒܐܝܼܕܼܵܐ ܕܩܵܛܘܿܠܹ̈ܐ.

ܝܒ:ܓܠܝܼ ܘܐܲܝܠܸܠ ܒܲܪܢܵܫܵܐ: ܡܸܛܠ ܕܗ̤ܘ ܗܘ̤ܵܐ ܥܲܠ ܥܲܡܝ: ܘܥܲܠ ܟܠܗܘܿܢ ܪܵܘܪ̈ܒ̣ܵܢܹܐ ܕܝܼܣܪܵܝܹܠ.

ܝܓ:ܩܘܿܫ ܟܲܦܵܐ ܡܸܛܠ ܕܐܸܙܕܲܕ̇ܩܲܬ̤ ܗܵܕܹܐ: ܘܐܸܢ ܫܲܪܒ̇ܬ̣ܵܐ ܐܸܣܬܲܠܝܲܬ̤: ܠܵܐ ܬܸܗܘܹܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܕ:ܐܲܢ̄ܬ̇ ܕܹܝܢ ܒܲܪܢܵܫܵܐ ܐܸܬ̣ܢܲܩܵܐ: ܘܩܘܿܫ ܟܲܦܵܐ ܐܝܼܕܼܵܐ ܥܲܠ ܐܝܼܕܼܵܐ: ܘܢܸܬ̣ܐ̱ܥܸܦ ܣܲܝܦܵܐ: ܘܣܲܝܦܵܐ ܕܲܬ̣ܠܵܬ̣ܵܐ ܕܲܩܛܝܼ̈ܠܹܐ ܗ̄ܘܼ: ܘܣܲܝܦܵܐ ܕܲܩܛܝܼ̈ܠܹܐ ܕܪܲܒܵܐ ܗ̄ܘܼ ܕܲܡܙܝܼܥ ܠܗܘܿܢ.

ܝܗ:ܕܢܸܬ̇ܬ̇ܒܲܪ ܠܸܒ̇ܗܘܢ: ܘܢܸܣܓ̇ܘܿܢ ܟܪ̈ܝܼܗܹܐ ܒܟ̣ܠ ܬܲܪ̈ܥܲܝܗܘܿܢ: ܐܲܫ̱ܠܡܹ̇ܬ̣ ܐܸܢܘܿܢ ܠܣܲܝܦܵܐ ܕܲܠܛܝܼܫ ܘܡܲܒ̣ܪܸܩ: ܘܲܡܛܲܝܲܒ̣ ܠܩܸܛܠܵܐ.

ܝܘ:ܚܲܡܣܸܢܝ ܝܲܡܝܼܢܝ ܘܚܲܡܣܸܢܝ ܣܸܡܵܠܝ: ܠܐܲܬܲܪ ܕܲܡܛܲܝ̈ܒ̣ܵܢ ܐܲܦܲܝ̈.

ܝܙ:ܐܵܦ ܐܸܢܵܐ ܐܸܩܘܿܫ ܟܲܦܵܐ ܐܝܼܕܼܝ ܥܲܠ ܐܝܼܕܼܝ: ܚܸܡܬ̣ܝ: ܐܸܢܵܐ ܡܵܪܝܵܐ ܐܸܡ̇ܪܹܬ̣.

ܝܚ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܛ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܥܒܸܕܼ ܠܵܟ ܬܲܪܬܹ̇ܝܢ ܐܘܼܪ̈ܚܵܢ: ܕܢܹܐܬܹܐ ܣܲܝܦܹܗ ܕܡܲܠܟܵܐ ܕܒ̣ܵܒܹܠ: ܘܡ̣ܢ ܐܲܪܥܵܐ ܚܕܼܵܐ ܢܸܦܩܘܼܢ ܬܪ̈ܲܝܗܘܿܢ: ܘܐܝܼܕܼܵܐ ܓܒ̣ܝܼܬ̣ܵܐ ܥܲܠ ܪܹܫ ܐܘܼܪܚܵܐ ܕܲܡܕܼܝܼܢ̄ܬܵܐ ܓܒ̣ܝܼܬ̣ܵܐ.

ܟܟ:ܘܲܥܒܸܕܼ ܐܘܼܪܚܵܐ ܕܢܹܐܬܹܐ ܣܲܝܦܵܐ ܥܲܠ ܪܲܒ̇ܬ̣ ܕܲܒ̣ܢܲܝ̈ ܥܲܡܘܿܢ: ܘܥܲܠ ܝܑܼܗܘܼܕܼܵܐ ܘܥܲܠ ܐܘܿܪܸܫܠܸܡ ܥܲܫܝܼܢܬܵܐ.

ܟܐ:ܡܸܛܠ ܕܩܵܡ ܡܲܠܟܵܐ ܕܒ̣ܵܒܹܠ: ܥܲܠ ܪܹܫ ܐܘܼܪܚܵܐ ܕܦܵܠܫܲܬ̣ ܐܘܼܪ̈ܚܵܬ̣ܵܐ ܠܡܸܩܨܲܡ ܩܸܨܡܵܐ: ܫܕܼܵܐ ܓܹܐܪܵܐ: ܘܲܫܐܸܠ ܒܲܦܬܲܟ̣ܪܹܗ: ܚܙ̣ܵܘ ܒܫܘܼܒ̣ܚܹܗ.

ܟܒ:ܘܲܒ̣ܝܲܡܝܼܢܹܗ ܗܘ̤ܵܐ ܩܸܨܡܵܐ ܥܲܠ ܐܘܿܪܸܫܠܸܡ: ܕܢܲܟ̣ܡܸܢ ܥܠܹܝܗ̇ ܟܡܹܐܢܹ̈ܐ: ܘܢܸܦ̮ܬ̣ܚ ܦܘܼܡܹܗ ܒܥܘܼܫܢܹܗ: ܘܲܢܪܝܼܡ ܩܵܠܹܗ ܒܲܩܥܵܬ̣ܵܐ: ܘܲܢܩܝܼܡ ܬܸܠܹ̈ܐ ܠܘܼܩܒܲܠ ܬܲܪ̈ܥܹܝܗ̇: ܘܢܲܟ̣ܡܸܢ ܟܡܹܐܢܹ̈ܐ ܘܢܸܒ̣ܢܸܐ ܕܵܘܩܹ̈ܐ.

ܟܓ:ܘܢܸܗܘܹܐ ܠܗܘܿܢ ܐܲܝܟ ܩܸܨܡܵܐ ܣܪܝܼܩܵܐ ܠܘܼܩܒܲܠ ܥܲܝܢܲܝ̈ܗܘܿܢ: ܘܗ̤ܘ ܢܸܬ̇ܕ̇ܟܲܪ ܥܵܘܼܠܵܐ ܘܢܸܬ̇ܬ̇ܚܸܕܼ.

ܟܕ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̇ܕ̇ܟ̣ܪܬ̇ܘܿܢ ܥܵܘܼܠܟ̣ܘܿܢ ܒܲܫܒ̣ܝܼܬ̣ܵܐ ܕܲܚܛܵܗܲܝ̈ܟ̇ܘܿܢ: ܘܲܚܙܲܝܬ̇ܘܿܢ ܚܛܵܗܲܝ̈ܟ̇ܘܿܢ ܘܟ̣ܠܗܹܝܢ ܨܸܢ̈ܥܵܬ̣ܟ̣ܘܿܢ: ܒܐܝܼܕܼܵܐ ܬܸܬܲܚܕ̇ܘܼܢ.

ܟܗ:ܐܲܢ̄ܬ̇ ܕܹܝܢ ܛܲܢܦܵܐ ܚܲܛܵܝܵܐ ܪܲܒܵܐ ܕܝܼܣܪܵܝܹܠ: ܕܲܡ̣ܛܵܐ ܝܵܘܡܵܟ ܘܙܲܒ̣ܢܵܐ ܕܥܵܘܼܠܵܟ ܘܚܲܪܬ̣ܵܟ.

ܟܘ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܒ̣ ܡܸܢܵܟ ܡܲܨܢܲܦܬ̣ܵܐ: ܘܐܲܢܝܼܚ ܡܸܢܵܟ ܟܠܝܼܠܵܐ: ܡܲܟ̇ܝܼܟ̣ܵܐ ܐܲܪܝܼܡ: ܘܪܵܡܵܐ ܐܲܡܸܟ.

ܟܙ:ܐܵܦ ܗܵܕܹܐ ܠܥܵܘܼܠܵܐ ܘܲܠܥܸܬܵܐ ܐܸܥܒ̇ܕܼܝܼܗ̇: ܥܕܲܡܵܐ ܕܢܹܐܬܹܐ ܡ̣ܢ ܕܕܼܝܼܠܹܗ ܗ̤ܘ ܕܝܼܢܵܐ ܘܐܲܫ̱ܠܡܝܼܘܗܝ ܠܹܗ.

ܟܚ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܒܢܲܝ̈ ܥܲܡܘܿܢ ܘܥܲܠ ܚܸܣܕ̇ܗܘܿܢ: ܘܐܸܡܲܪ: ܣܲܝܦܵܐ ܣܲܝܦܵܐ: ܕܲܡܛܲܝܲܒ̣ ܠܩܸܛܠܵܐ: ܘܲܠܛܝܼܫ ܘܡܲܒ̣ܪܸܩ.

ܟܛ:ܥܲܠ ܚܸܙ̱ܘܟ̣ܘܿܢ ܣܪܝܼܩܵܐ: ܘܥܲܠ ܩܸܨܡܟ̣ܘܿܢ ܕܲܓܵܠܵܐ: ܠܡܸܬ̇ܠܵܟ ܥܲܠ ܨܵܘܪ̈ܲܝܗܘܿܢ ܕܚܲܛܵܝܹ̈ܐ ܥܵܘܿܠܹܐ: ܕܲܡ̣ܛܵܐ ܝܵܘܡܗܘܿܢ ܘܙܲܒ̣ܢܵܐ ܕܥܵܘܼܠܗܘܿܢ ܘܩܸܨܗܘܿܢ.

ܠ:ܐܸܬ̣ܚܲܡ̄ܠ ܒܚܸܠܬ̣ܵܟ ܒܐܲܬ̣ܪܵܐ ܕܐܸܬ̣̱ܝܼܠܸܕ̇ܬ̇ ܒܹܗ: ܘܬܲܡܵܢ ܐܸܕ̇ܘܢܲܟ.

ܠܐ:ܘܐܹܫܘܿܕܼ ܥܠܲܝܟ ܪܘܼܓ̣ܙܝ: ܘܲܒ̣ܢܘܼܪܵܐ ܕܚܸܡܬ̣ܝ ܐܸܦܘܿܚ ܒܵܟ: ܘܐܲܫ̱ܠܡܵܟ ܒܐܝܼܕܼܵܐ ܕܓܲܒ̣ܪܹ̈ܐ ܒܲܥܪܝܼܪ̈ܵܝܹܐ ܕܣܵܥ̇ܪܝܼܢ ܚܒ̣ܵܠܵܐ.

ܠܒ:ܘܬܸܗܘܹܐ ܡܹܐܟ̣ܘܼܠܬܵܐ ܠܢܘܼܪܵܐ: ܘܲܕܼܡܵܟ ܢܸܗܘܹܐ ܒܓ̣ܵܘ ܐܲܪܥܵܐ: ܘܠܵܐ ܬܸܬ̇ܕ̇ܟܲܪ. ܡܸܛܠ ܕܐܸܢܵܐ ܡܵܪܝܵܐ ܡܲܠܠܹܬ̣.

ܩܹܦܵܠܹܐܘܿܢ:ܟܒ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ: ܠܡܹܐܡܲܪ.

ܒ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܕܘܼܢ ܠܲܡܕܼܝܼܢ̄ܬܵܐ ܕܲܕܼܡܵܐ: ܘܐܵܘܕ̇ܥܹܝܗ̇ ܟܠܵܗ̇ ܛܲܢܦܘܼܬ̣ܵܗ̇.

ܓ:ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܕܼܝܼܢ̄ܬܵܐ ܕܐܸܬ̣ܐ̱ܫܸܕܼ ܕܡܵܐ ܒܓ̣ܵܘܵܗ̇: ܡܲܛܝܼ ܙܲܒ̣ܢܵܗ̇: ܘܥܸܒ̣ܕܲܬ̣ ܦܬܲܟ̣ܪܹ̈ܐ ܒܓ̣ܵܘܵܗ̇ ܘܐܸܬ̇ܛܲܢܦܲܬ̤.

ܕ:ܒܲܕܼܡܵܐ ܕܐܹܫܲܕ̇ܬ̇ܝ ܐܸܬ̣ܚܲܝܲܒ̣ܬ̇ܝ: ܘܒܲܦܬܲܟ̣ܪܹ̈ܐ ܕܲܥܒܲܕ̇ܬ̇ܝ ܐܸܬ̇ܛܲܡܲܐܬ̇ܝ: ܩ̣ܪܸܒ̣ܘ ܝܵܘܡܲܝ̈ܟ̇ܝ ܘܡܲܛܝܼ ܙܲܒ̣ܢܵܐ ܕܲܫܢܲܝ̈ܟ̇ܝ: ܡܸܛܠ ܗܵܢܵܐ ܝܲܗ̄ܒ̣ܬܹ̇ܟ̣ܝ ܚܸܣܕܵܐ ܠܥܲܡܡܹ̈ܐ: ܘܡܘܼܝܵܩܵܐ ܠܟ̣ܠܗܹܝܢ ܡܕܼܝܼ̈ܢܵܬ̣ܵܐ.

ܗ:ܐܲܝܠܹܝܢ ܕܪ̈ܲܚܝܼܩܵܢ ܡܸܢܹܟ̣ܝ: ܘܐܲܝܠܹܝܢ ܕܩܲܪ̈ܝܼܒ̣ܵܢ ܠܹܟ̣ܝ: ܢܡܲܝ̈ܩܵܢ ܒܹܟ̣ܝ ܘܢܹܐܡܪ̈ܵܢ: ܛܲܢܦܬ̣ܵܐ ܕܲܫ̈ܡܵܗܵܬ̣ܵܗ̇: ܘܣܲܓ̇ܝܼܐܲܬ̣ ܒܥܵܘ̈ܠܹܝܗ̇.

ܘ:ܗܵܐ ܪܵܘܪ̈ܒ̣ܵܢܹܐ ܕܝܼܣܪܵܝܹܠ: ܐ̄ܢܵܫ ܠܫܲܪܒ̇ܬܹܗ ܗܘ̤ܵܘ ܒܹܟ̣ܝ ܕܢܹܐܫܕ̇ܘܼܢ ܕܡܵܐ.

ܙ:ܠܐܲܒ̣ܵܐ ܘܠܐܸܡܵܐ ܨܲܚܝܼܘ ܒܹܟ̣ܝ: ܘܠܲܐܝܢܵܐ ܕܡܸܬ̣ܦܢܸܐ ܠܘܵܬ̣ܝ ܛܠܲܡ̣ܘ ܒܓ̣ܵܘܹܟ̣ܝ: ܘܲܠܝܲܬ̣ܡܹ̈ܐ ܘܠܲܐܪ̈ܡܠܵܬ̣ܵܐ ܥ̣ܠܲܒ̣ܘ ܒܹܟ̣ܝ.

ܚ:ܘܩܘܼܕܼܫܲܝ̈ ܐܲܣ̣ܠܝܼܬ̇ܝ: ܘܫܲܒܲܝ̈ ܛܵܘܸܫܬ̇ܝ.

ܛ:ܘܓܲܒ̣ܪܹ̈ܐ ܬܲܓܵܪܹ̈ܐ ܗܘ̤ܵܘ ܒܹܟ̣ܝ: ܕܢܹܐܫܕ̇ܘܼܢ ܕܡܵܐ: ܘܥܲܠ ܛܘܼܪܹ̈ܐ ܐܸܟܲܠܘ ܒܹܟ̣ܝ: ܘܲܚܛܝܼܬ̣ܵܐ ܥ̣ܒܲܕܼܘ ܒܓ̣ܵܘܹܟ̣ܝ.

ܝ:ܘܦܘܼܪܣܵܝܵܐ ܕܐܲܒ̣ܵܐ ܓܠܵܘ ܒܹܟ̣ܝ: ܘܛܲܢܦܘܼܬ̣ܵܐ ܕܟܸܦ̮ܣܵܢܝܼܬ̣ܵܐ ܥ̣ܒܲܕܼܘ ܒܓܵܘܹܟ̣ܝ.

ܝܐ:ܘܲܓ̣ܒܲܪ ܠܐܲܢ̄ܬ̇ܬ̣ ܚܲܒ̣ܪܹܗ ܛܵܢܸܦ̣ܘ: ܘܲܓ̣ܒܲܪ ܠܟܲܠܬܹܗ ܛܲܢܸܦ̣ܘ ܒܙܵܢܝܘܼܬ̣ܵܐ: ܘܲܓ̣ܒܲܪ ܠܚܵܬܹܗ ܒܲܪܬ̣ ܐܲܒ̣ܘܼܗܝ ܨܲܥܪܘ ܒܹܟ̣ܝ.

ܝܒ:ܘܫܘܼܚܕܵܐ ܢܣܲܒ̣ܘ ܒܹܟ̣ܝ ܕܢܹܐܫܕ̇ܘܼܢ ܕܡܵܐ: ܘܪܸܒ̇ܝܼܬ̣ܵܐ ܢܣܲܒ̣ܘ ܒܹܟ̣ܝ: ܘܝܲܬ̇ܝܼܪܵܐ ܫܩܲܠ̣ܘ ܒܹܟ̣ܝ: ܘܲܢܟܲܠܘ ܠܪ̈ܵܚܡܲܝܗܘܿܢ ܒܲܛܠܘܼܡܝܵܐ: ܘܠܝܼ ܛܥܲܝܬ̇ܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܓ:ܐܵܦ ܐܸܢܵܐ ܐܸܛܲܪܸܦ ܐܝܼܕܼܝ ܥܲܠ ܐܝܼܕܼܝ: ܥܲܠ ܥܵܘܼܠܵܐ ܕܲܥܒܲܕ̇ܬܝ: ܘܥܲܠ ܕܡܵܐ ܕܐܸܬ̣ܐ̱ܫܸܕܼ ܒܓ̣ܵܘܹܟ̣ܝ.

ܝܕ:ܐܸܢ ܩܵܐܹ̇ܡ ܠܸܒܹ̇ܟ̣ܝ: ܘܐܸܢ ܡܚܲܡܣ̈ܢܵܢ ܐܝܼܕܲܝ̈ܟ̇ܝ ܠܝܵܘ̈ܡܵܬ̣ܵܐ ܕܥܵܒܹ̇ܕܼ ܐ̄ܢܵܐ: ܐܸܢܵܐ ܡܵܪܝܵܐ ܡܲܠܠܹ̇ܬ̣ ܘܥܸܒ̣ܕܹ̇ܬ̣.

ܝܗ:ܘܐܹܒܲܕ̇ܪܹܟ̣ܝ ܒܥܲܡܡܹ̈ܐ ܘܐܸܕܼܪܹܝܟ̣ܝ ܒܲܡܕܼܝܼ̈ܢܵܬ̣ܵܐ.

ܝܘ:ܘܐܲܪܬܹܟ̣ܝ ܠܥܹܝܢ ܥܲܡܡܹ̈ܐ: ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܝܙ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܚ:ܒܲܪܢܵܫܵܐ ܗܘ̤ܵܘܠܝܼ ܕܒܹܝܬ̣ ܝܑܼܣܪܵܝܹܠ ܡܲܣ̈ܠܲܝܵܐ ܟܠܗܘܿܢ: ܐܲܝܟ ܢܚܵܫܵܐ ܘܐܲܝܟ ܐܵܢܟ̣ܵܐ: ܘܐܲܝܟ ܦܲܪܙܠܵܐ: ܘܐܲܝܟ ܐܲܒ̣ܵܪܵܐ ܒܓ̣ܵܘ ܟܘܼܪܵܐ ܕܲܚܠܝܼܛܝܼܢ ܒܣܹܐܡܵܐ.

ܝܛ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̣ܚܠܸܛܬ̇ܘܿܢ ܟܠܟ̣ܘܿܢ: ܗܵܐ ܡܟܲܢܸܫ ܐ̄ܢܵܐ ܠܟ̣ܘܿܢ ܠܓ̣ܵܘ ܐܘܿܪܸܫܠܸܡ.

ܟܟ:ܐܲܝܟ ܕܡܸܬ̣ܟܲܢܲܫ ܣܹܐܡܵܐ: ܘܲܢܚܵܫܵܐ: ܘܦܲܪܙܠܵܐ: ܘܐܲܢܟ̣ܵܐ: ܘܐܲܒ̣ܵܪܵܐ: ܒܓ̣ܵܘ ܟܘܼܪܵܐ: ܘܢܵܦܚܝܼܢ ܒܗܘܿܢ ܢܘܼܪܵܐ ܕܢܸܬ̣ܦܲܫܪܘܿܢ: ܗܵܟܲܢܵܐ ܐܹܟܲܢܸܫܟ̣ܘܿܢ ܒܪܘܼܓ̣ܙܝ: ܘܲܒ̣ܚܸܡܬ̣ܝ ܐܹܦܲܫܲܪܟ̣ܘܿܢ.

ܟܐ:ܘܐܹܦܘܿܚ ܥܠܲܝܟ̇ܘܿܢ ܢܘܼܪܵܐ ܕܪܘܼܓ̣ܙܝ: ܘܐܹܦܲܫܲܪܟ̣ܘܿܢ ܒܓ̣ܵܘܵܗ̇.

ܟܒ:ܐܲܝܟ ܕܡܸܬ̣ܦܲܫܲܪ ܣܹܐܡܵܐ ܒܓ̣ܵܘ ܟܘܼܪܵܐ: ܗܵܟܲܢܵܐ ܬܸܬ̣ܦܲܫܪܘܿܢ ܒܓ̣ܵܘܵܗ̇: ܘܬܸܕ̇ܥܘܼܢ ܕܐܸܢܵܐ ܡܵܪܝܵܐ ܐܹܫ̇ܕܹ̇ܬ̣ ܚܸܡܬ̣ܝ ܥܠܲܝܟ̇ܘܿܢ.

ܟܓ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܟܕ:ܒܲܪܢܵܫܵܐ: ܐܸܡܲܪ ܠܵܗ̇ ܐܲܢ̄ܬ̇ܝ ܐܲܪܥܵܐ ܠܵܐ ܗ̤ܘܲܝܬ̇ܝ ܕܲܟ̣ܝܵܐ: ܘܠܵܐ ܐܸܨܛܲܒܲܥܬ̇ܝ ܘܠܵܐ ܢܚܸܬ̣ ܥܠܲܝܟ̇ܝ ܡܸܛܪܵܐ.

ܟܗ:ܡܸܪܲܕܼܘ ܢܒ̣ܝܹܝܗ̇ ܒܓ̣ܵܘܵܗ̇: ܐܲܝܟ ܐܲܪܝܵܐ ܕܢܵܗܹ̇ܡ ܘܬ̣ܵܒܲܪ ܬܒ̣ܵܪܵܐ: ܐܸܟܲܠܘ ܢܲܦ̮̈ܫܵܬ̣ܵܐ ܒܥܲܫܝܼܢܘܼܬ̣ܗܘܿܢ: ܘܐܝܼܩܵܪܵܐ ܕܣܵܚܪ̈ܵܬ̣ܗܘܿܢ ܢ̣ܣܲܒ̣ܘ.

ܟܘ:ܟܵܗܢܹ̈ܝܗ̇ ܐܲܥܠܝܼܘ ܒܢܵܡܘܿܣܝ ܘܛܲܘܫܘ ܩܘܼܕܼܫܝ: ܘܒܹܝܬ̣ ܩܘܼܕܼܫܵܐ ܠܛܲܢܦܵܐ ܠܵܐ ܦܪܲܫ̣ܘ: ܘܒܹܝܬ̣ ܡܣܲܝܒ̣ܵܐ ܠܕܲܟ̣ܝܵܐ ܠܵܐ ܝܼܕܲܥ̣ܘ: ܘܡ̣ܢ ܫܲܒܲܝ̈ ܐܲܡܸܟ̣ܝ ܥܲܝܢܲܝ̈ܗܘܿܢ: ܘܐܸܬ̇ܛܵܘܫܹܬ̣ ܒܲܝܢܵܬ̣ܗܘܿܢ.

ܟܙ:ܪܵܘܪ̈ܒ̣ܵܢܹܝܗ̇ ܒܓ̣ܵܘܵܗ̇ ܐܲܝܟ ܕܐܒܹ̈ܐ ܚܵܛ̇ܦܝܼܢ ܠܡܹܐܫܲܕܼ ܕܡܵܐ: ܘܲܠܡܵܘܒܵܕܼܘ ܢܲܦ̮̈ܫܵܬ̣ܵܐ ܕܢܸܩܢܘܿܢ ܩܸܢܝܵܢܵܐ.

ܟܚ:ܘܲܢܒ̣̈ܝܹܝܗ̇ ܛܪܵܘ ܠܵܗ̇ ܛܪܵܝܵܐ ܕܬܸܦܸܠ: ܚܙ̣ܵܘ ܠܗܘܿܢ ܣܪܝܼܩܘܼܬ̣ܵܐ: ܘܲܩܨܲܡ̣ܘ ܠܗܘܿܢ ܕܲܓܵܠܘܼܬ̣ܵܐ: ܘܐܵܡ̇ܪܝܼܢ: ܗܵܟܲܢܵܐ ܐܵܡܲܪ ܡܵܪܝܵܐ: ܘܡܵܪܝܵܐ ܠܵܐ ܐܸܡܲܪ.

ܟܛ:ܠܥܲܡܵܐ ܕܐܲܪܥܵܐ ܛܠܲܡ̣ܘ ܘܬܲܟ̣ܘ: ܘܲܓܠܲܒ̣ܘ ܠܡܸܣܟܹ̇ܢܹ̈ܐ ܘܲܠܒ̣ܵܝܫܹ̈ܐ: ܘܠܲܕܼܡܸܬ̣ܦܢܸܐ ܠܘܵܬ̣ܝ ܛܠܲܡ̣ܘ ܕܠܵܐ ܒܕܼܝܼܢܵܐ.

ܠ:ܘܲܒ̣ܥܹ̇ܝܬ̣ ܒܗܘܿܢ ܓܲܒ̣ܪܵܐ ܕܣܵܐܹ̇ܓ̣ ܣܝܵܓ̣ܵܐ: ܘܩܵܐܹ̇ܡ ܒܬ̣ܘܼܪ̱ܥܬ̣ܵܐ ܩܕܼܵܡܲܝ ܥܲܠ ܐܲܦܹ̈ܝܗ̇ ܕܐܲܪܥܵܐ ܕܠܵܐ ܐܹܚܲܒ̇ܠܝܼܗ̇: ܘܠܵܐ ܐܸܫܟ̇ܚܹܬ̣.

ܠܐ:ܘܐܹܫܕܹ̇ܬ̣ ܥܠܲܝܗܘܿܢ ܪܘܼܓ̣ܙܝ: ܘܲܒ̣ܢܘܼܪܵܐ ܕܚܸܡܬ̣ܝ ܐܲܣܝܼܦܹ̇ܬ̣ ܐܸܢܘܿܢ: ܐܘܼܪ̈ܚܵܬ̣ܗܘܿܢ ܦܸܪܥܹ̇ܬ̣ ܒܪܹܫܗܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܟܓ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܬܲܪܬܹ̇ܝܢ ܢܸܫ̈ܝܼܢ ܐܝܼܬ̣ ܗ̄ܘܲܝ̈ ܒ̈ܢܵܬ̣ ܚܕܼܵܐ ܐܸܡܵܐ.

ܓ:ܘܙܲܢܝܼ ܒܡܸܨܪܹܝܢ ܒܛܲܠܝܘܼܬ̣ܗܹܝܢ: ܬܲܡܵܢ ܡܲܪܸܣ̣ܘ ܬܕܲܝ̈ܗܹܝܢ: ܘܬܲܡܵܢ ܐܸܬ̣ܒܲܬܲܠ.

ܕ:ܫܡܵܗ̇ ܕܩܲܫܝܼܫܬܵܐ ܐܲܗܠܵܐ: ܘܲܫܡܵܗ̇ ܕܲܐ̄ܚܪܹܬ̣ܵܐ ܐܲܗܠܝܼܒ̣ܵܐ: ܘܲܗ̤ܘܲܝ̈ ܠܝܼ: ܘܝܼܠܸܕܼ ܒ̈ܢܲܝܵܐ ܘܲܒ̣̈ܢܵܬ̣ܵܐ: ܫܡܵܗ̇ ܕܫܵܡܪܹܝܢ ܐܲܗܠܵܐ: ܘܕܼܐܘܿܪܸܫܠܸܡ ܐܲܗܠܝܼܒ̣ܵܐ.

ܗ:ܘܙܲܢܝܲܬ̤ ܐܲܗܠܵܐ ܡܹܢܝ: ܘܢܸܩܦܲܬ̤ ܠܪ̈ܵܚܡܹܝܗ̇: ܠܐܵܬ̣ܘܿܪ̈ܵܝܹܐ ܕܩܲܪܝܼܒ̣ܝܼܢ ܠܵܗ̇.

ܘ:ܕܲܠܒ̣ܝܼܫܝܼܢ ܬܸܟ̣ܠ̱ܬ̣ܵܐ ܡܵܪ̈ܵܘܵܬ̣ܵܐ ܘܫܲܠܝܼܛܵܢܹ̈ܐ: ܓܲܕ̇ܘܼ̈ܕܹܐ ܕܪܸܓ̇ܬ̣ܵܐ: ܟܠܗܘܿܢ ܦܲܪ̈ܵܫܹܐ ܪ̈ܵܟ̣ܒܲܝ ܪ̈ܲܟ̣ܫܵܐ.

ܙ:ܘܐܲܪܡܝܲܬ̤ ܙܵܢܝܘܼܬ̣ܵܗ̇ ܥܠܲܝܗܘܿܢ: ܥܲܠ ܟܠܗܘܿܢ ܓܒܲـ̈ـܝܵܐ ܕܲܒ̣ܢܲܝ̈ ܐܵܬ̣ܘܿܪ: ܘܥܲܠ ܟܠ ܕܐܸܬ̣ܢܲܩܦܲܬ̤ ܒܲܦܬܲܟ̣ܪ̈ܲܝܗܘܿܢ ܘܐܸܬ̇ܛܵܘܫܲܬ̤.

ܚ:ܘܙܵܢܝܘܼܬ̣ܵܗ̇ ܕܲܒ̣ܡܸܨܪܹܝܢ ܠܵܐ ܫܸܒ̣ܩܲܬ̤: ܡܸܛܠ ܕܠܵܗ̇ ܨܲܥܲܪܘ ܒܛܲܠܝܘܼܬ̣ܵܗ̇: ܘܗܸܢܘܿܢ ܒܲܬ̇ܠܘܼܗ̇: ܘܐܲܪܡܝܼܘ ܥܠܹܝܗ̇ ܙܵܢܝܘܼܬ̣ܗܘܿܢ.

ܛ:ܡܸܛܠ ܗܵܢܵܐ ܗܵܐ ܐܲܫܠܸܡ̇ܬܵܗ̇ ܒܐܝܼܕܼܵܐ ܕܪ̈ܵܚܡܹܝܗ̇: ܒܐܝܼܕܼܵܐ ܕܲܒ̣̈ܢܲܝ ܐܵܬ̣ܘܿܪ ܕܐܸܬ̣ܢܲܩܦܲܬ̤ ܠܗܘܿܢ.

ܝ:ܘܗܸܢܘܿܢ ܓ̣ܠܵܘ ܦܘܼܪܣܵܝܵܗ̇: ܘܲܕܼܒܲܪܘ ܒܢܹ̈ܝܗ̇ ܘܲܒ̣̈ܢܵܬ̣ܵܗ̇: ܘܠܵܗ̇ ܩܛܲܠ̣ܘ ܒܚܲܪܒܵܐ: ܘܲܗܘ̤ܵܬ̣ ܬܲܡܵܢ ܡܡܲܠܠܵܐ ܠܢܸܫܹ̈ܐ: ܘܕܼܝܼܢܹ̈ܐ ܥ̣ܒܲܕܼܘ ܒܵܗ̇.

ܝܐ:ܘܲܚܙܵܬ̤ ܚܵܬ̣ܵܗ̇ ܐܲܗܠܝ̣ܒ̣ܵܐ: ܘܚܲܒ̇ܠܲܬ̤ ܢܸܩܦܵܗ̇ ܝܲܬ̇ܝܼܪ ܡܸܢܵܗ̇: ܘܙܵܢܝܘܼܬ̣ܵܗ̇ ܝܲܬ̇ܝܼܪ ܡ̣ܢ ܙܵܢܝܘܼܬ̣ܵܐ ܕܚܵܬ̣ܵܗ̇.

ܝܒ:ܠܲܒ̣ܢܲܝ̈ ܐܵܬ̣ܘܿܪ ܢܸܩܦܲܬ̤: ܠܡܵܪ̈ܵܘܵܬ̣ܵܐ ܘܲܠܫܲܠܝܼܛܵܢܹ̈ܐ ܕܩܲܪܝܼܒ̣ܝܼܢ ܠܵܗ̇: ܦܲܪ̈ܵܫܹܐ ܠܒ̣ܝܼܫܲܝ̈ ܬܸܟ̣ܠ̱ܬܵܐ ܘܪ̈ܵܘܟ̣ܒܲܝ ܪ̈ܲܟ̣ܫܵܐ: ܟܠܗܘܿܢ ܓܲܕ̇ܘܼ̈ܕܹܐ ܐܸܢܘܿܢ ܕܪܸܓ̇ܬ̣ܵܐ.

ܝܓ:ܘܲܚܙܹ̇ܝܬ̣ ܕܐܸܬ̇ܛܲܢܦܲܬ̤ ܐܘܼܪܚܵܐ ܕܬܲܪ̈ܬܲܝܗܹܝܢ.

ܝܕ:ܘܐܸܬ̇ܬܵܘܣܲܦ ܥܲܠ ܙܵܢܝܘܼܬ̣ܗܹܝܢ: ܘܲܚܙܲܝ̈ ܓܲܒ̣ܪܹ̈ܐ ܕܨܝܼܪܝܼܢ ܒܐܸܣܬ̣ܵܐ: ܨܲܠܡܹ̈ܐ ܕܟܲܠܕܼܵܝܹ̈ܐ ܕܨܝܼܪܝܼܢ ܒܣܲܡܡܵܢܹ̈ܐ.

ܝܗ:ܘܲܚܙܝܼܩܝܼܢ ܡܲܚ̈ܙ̄ܩܵܬ̣ܵܐ ܒܚܲܨܲܝ̈ܗܘܿܢ: ܘܥܲܪ̈ܩܹܐ ܩܛܝܼܪ̈ܵܢ ܒܪܹ̈ܫܲܝܗܘܿܢ: ܚܸܙܘܵܐ ܐܸܢܘܿܢ ܕܓܲܒ̣ܪܹ̈ܐ ܟܠܗܘܿܢ: ܕܡܘܼܬ̣ܵܐ ܐܸܢܘܿܢ ܕܲܒ̣ܢܲܝ̈ ܒܵܒܹܠ ܟܠܗܘܿܢ: ܕܡܘܼܬ̣ܵܐ ܐܸܢܘܿܢ ܕܲܒ̣ܢܲܝ̈ ܒܵܒܹܠ ܘܲܕܼܟܲܠܕܼܵܝܹ̈ܐ: ܐܲܪܥܵܐ ܕܐܸܬ̣̱ܝܼܠܸܕܼܘ ܒܵܗ̇.

ܝܘ:ܘܐܸܬ̣ܢܲܩܦܲܬ̤ ܠܗܘܿܢ ܒܚܸܙܘܵܐ ܕܥܲܝ̈ܢܹܝܗ̇: ܘܫܲܕܲܪܲܬ̤ ܥܠܲܝܗܘܿܢ ܡܲܠܲܐܟܹ̈ܐ ܠܐܲܪܥܵܐ ܕܟܲܠܕܼܵܝܹ̈ܐ.

ܝܙ:ܘܐܸܬ̣ܵܘ ܠܘܵܬ̣ܵܗ̇ ܒܢܲܝ̈ ܒܵܒܹܠ ܠܡܸܕܼܡܲܝܟ ܥܲܡܵܗ̇: ܘܛܲܢܦ̣ܘܼܗ̇ ܒܙܵܢܝܘܼܬ̣ܗܘܢ: ܘܐܸܬ̇ܛܲܢܦܲܬ̤ ܒܗܘܿܢ: ܘܢܸܕ̇ܲܬ̤ ܢܲܦ̮ܫܵܗ̇ ܡܸܢܗܘܿܢ.

ܝܚ:ܘܲܓ̣ܠܵܬ̤ ܙܵܢܝܘܼܬ̣ܵܗ̇: ܘܲܓ̣ܠܵܬ̤ ܦܘܼܪܣܵܝܵܗ̇: ܘܢܸܕܲܬ̣ ܢܲܦ̮ܫܝ ܡܵܢܵܗ̇: ܐܲܝܟ ܕܢܸܕܲܬ̤ ܢܲܦ̮ܫܝ ܡ̣ܢ ܚܵܬ̣ܵܗ̇.

ܝܛ:ܘܐܲܣܓܝܼܬ̇ ܙܵܢܝܘܼܬ̣ܵܗ̇: ܘܐܸܬ̇ܕܲܟ̣ܪܲܬ̤ ܝܵܘ̈ܡܵܬ̣ܵܐ ܕܛܲܠܝܘܼܬ̣ܵܗ̇: ܕܙܲܢܝܲܬ̤ ܒܐܲܪܥܵܐ ܕܡܸܨܪܹܝܢ.

ܟ:ܘܐܸܬ̣ܢܲܩܦܲܬ̤ ܠܥܲܒ̣ܕܲܝ̈ܗܘܿܢ: ܕܒܸܣ̱ܪܗܘܿܢ ܐܲܝܟ ܒܸܣܪܵܐ ܗ̄ܘܼ ܕܲܚܡܵܪܵܐ. ܘܚܲܢܲܝ̈ܗܘܿܢ ܐܲܝܟ ܚܲܢܹ̈ܐ ܕܪ̈ܲܟ̣ܫܵܐ.

ܟܐ:ܘܲܦܩܲܕ̇ܬ̇ܝ ܗܵܘܼܠܵܐ ܕܛܲܠܝܘܼܬܹܟ̣ܝ: ܟܲܕܼ ܐܸܬ̣ܒܲܬܲܠ̣ܬ̇ܝ ܒܡܸܨܪܹܝܢ: ܘܐܸܬ̣ܡܲܪܲܣܘ ܬܕܲܝ̈ ܛܲܠܝܘܼܬܹܟ̣ܝ.

ܟܒ:ܡܸܛܠ ܗܵܢܵܐ ܐܲܗܠܝܼܒ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܡܥܝܼܪ ܐ̄ܢܵܐ ܥܠܲܝܟ̇ܝ ܠܟ̣ܠܗܘܿܢ ܪ̈ܵܚܡܲܝܟ̇ܝ ܕܢܸܕܸ̇ܬ̤ ܢܲܦ̮ܫܹܟ̣ܝ ܡܸܢܗܘܿܢ: ܘܐܲܝܬܸ̇ܐ ܐܸܢܘܿܢ ܥܠܲܝܟ̇ܝ.

ܟܓ:ܘܢܸܚܕ̇ܪܘܼܢܹܟ̣ܝ ܒܢܲܝ̈ ܒܵܒܹܠ: ܘܟ̣ܠܗܘܿܢ ܟܲܠܕܼܵܝܹ̈ܐ: ܘܦܘܿܛ: ܘܠܘܿܕܼ: ܘܩܘܿܥ: ܘܟ̣ܠܗܘܿܢ ܒܢܲܝ̈ ܐܵܬ̣ܘܿܪ ܥܲܡܗܘܿܢ: ܓܲܕ̇ܘܼ̈ܕܹܐ ܕܪܸܓ̇ܬ̣ܵܐ: ܡܵܪ̈ܵܘܵܬ̣ܵܐ ܘܫܲܠܝܼܛܵܢܹ̈ܐ: ܟܠܗܘܿܢ ܓܲܒ̣ܪܹ̈ܐ ܕܩܹܕܼܵܪ ܪ̈ܵܟ̣ܒܲܝ ܪ̈ܲܟ̣ܫܵܐ.

ܟܕ:ܢܹܐܬ̣ܘܿܢ ܥܠܲܝܟ̇ܝ ܟܲܕܼ ܡܙܲܝܢܝܼܢ: ܒܡܲܪ̈ܟ̇ܒ̣ܵܬ̣ܵܐ ܘܲܒ̣ܓ̣ܝܼ̈ܓ̣ܠܹܐ: ܘܲܒ̣ܟܸܢܫܹ̈ܐ ܕܥܲܡܡܹ̈ܐ: ܒܢܝܙܟܹ̈ܐ ܘܲܒ̣ܣܲܟ̇ܪܹ̈ܐ ܘܲܒ̣ܣܲܢ̱ܘܪ̈ܵܬ̣ܵܐ ܢܸܟ̣ܪ̱ܟ̣ܘܼܢܹܟ̣ܝ: ܘܐܸܬܸ̇ܠ ܩܕܼܵܡܲܝܗܘܿܢ ܕܝܼܢܹ̈ܐ: ܘܲܢܕܼܘܼܢܘܼܢܹܟ̣ܝ ܒܕܼܝܼܢܲܝ̈ܗܘܿܢ.

ܟܗ:ܘܐܸܬܸ̇ܠ ܒܹܟ̣ܝ ܛܢܵܢܝ: ܘܲܢܬܲܒ̇ܪܘܼܢ ܢܚܝܼܪ̈ܲܝܟ̇ܝ ܒܚܸܡܬ̣ܵܐ: ܘܐܸܕܼܢܲܝ̈ܟ̇ܝ ܢܥܲܩܪܘܼܢ: ܘܚܲܪܬܹܟ̣ܝ ܒܚܲܪܒܵܐ ܬܸܦܸܠ: ܗܸܢܘܿܢ ܢܸܕܼܒ̇ܪܘܿܢ ܒܢܲܝ̈ܟ̇ܝ ܘܲܒ̣̈ܢܵܬܹܟ̣ܝ: ܘܚܲܪܬܹܟ̣ܝ ܬܸܬ̣ܐ̱ܟ̣ܠ ܒܢܘܼܪܵܐ.

ܟܘ:ܘܢܸܣܒ̣ܘܼܢ ܡܵܐܢܹ̈ܐ ܕܫܘܼܒ̣ܚܹܟ̣ܝ: ܘܢܲܫܠ̱ܚܘܼܢܹܟ̣ܝ ܠܒ̣ܘܼܫܲܝ̈ܟ̇ܝ.

ܟܙ:ܘܐܹܒܲܛܸܠ ܬܲܪܥܝܼܬܹܟ̣ܝ ܡܸܢܹܟ̣ܝ: ܘܙܵܢܝܘܼܬܹܟ̣ܝ ܡ̣ܢ ܐܲܪܥܵܐ ܕܡܸܨܪܹܝܢ: ܘܠܵܐ ܬܪܝܼܡܝܼܢ ܥܲܝܢܲܝ̈ܟ̇ܝ ܥܠܲܝܗܘܿܢ: ܘܲܠܡܸܨܪܹܝܢ ܬܘܼܒ̣ ܠܵܐ ܬܸܬ̇ܕܲܟ̣ܪܝܼܢ.

ܟܚ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܡܲܫܠܸܡ ܐ̄ܢܵܐ ܠܹܟ̣ܝ ܒܝܲܕܼ ܐܲܝܠܹܝܢ ܕܲܣܢܲܝܬ̇ܝ: ܒܝܲܕܼ ܐܵܬ̣ܘܼܪ̈ܵܝܹܐ ܕܢܸܕܲܬ̤ ܢܲܦ̮ܫܹܟ̣ܝ ܡܸܢܗܘܿܢ.

ܟܛ:ܘܢܸܡܚܘܿܢܹܟ̣ܝ ܒܣܢܲܐ̱ܬ̣ܗܘܿܢ: ܘܢܸܣܒ̣ܘܼܢ ܟܠܵܗ̇ ܠܐܹܘܬܹܟܝ: ܘܢܸܫܒ̇ܩܘܼܢܹܟ̣ܝ ܥܲܪܛܸܠ ܘܥܲܪܝܲܬ̣: ܘܢܸܬ̣ܓ̇ܠܹܐ ܦܘܼܪܣܵܝܵܐ ܕܙܵܢܝܘܼܬܹܟ̣ܝ ܘܲܕܼܥܵܘܼܠܹܟ̣ܝ.

ܠ:ܘܲܒ̣ܙܵܢܝܘܼܬܹܟ̣ܝ ܐܸܬ̣ܥ̱ܒܸܕܼ ܠܹܟ̣ܝ ܗܵܠܹܝܢ: ܕܙܲܢܝܼܬ̇ܝ ܒܵܬܲܪ ܥܲܡܡܹ̈ܐ: ܘܐܸܬ̇ܛܲܢܦܬ̇ܝ ܒܲܦܬܲܟ̣ܪ̈ܲܝܗܘܿܢ.

ܠܐ:ܘܥܲܠ ܕܗܲܠܸܟ̣ܬ̇ܝ ܒܐܘܼܪ̈ܚܵܬ̣ܵܗ̇ ܕܚܵܬܹܟܝ: ܐܸܬܸ̇ܠ ܟܵܣܵܗ̇ ܒܐܝܼܕܲܝ̈ܟ̇ܝ.

ܠܒ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܵܣܵܐ ܕܚܵܬܹܟ̣ܝ ܬܸܫܬܹ̇ܝܢ: ܥܲܡܝܼܩܵܐ ܘܲܪܘܝܼܚܵܐ: ܘܬܸܗܘܹܝܢ ܠܓ̣ܘܼܚܟܵܐ ܘܲܠܡܘܼܝܵܩܵܐ ܪܲܒܵܐ ܘܲܓ̣ܡܝܼܪܵܐ.

ܠܓ:ܪܵܘܵܝܘܼܬ̣ܵܐ ܘܕܼܵܘܘܿܢܵܐ ܬܸܬ̣ܡ̱ܠܹܝܢ: ܟܵܣܵܐ ܕܬܸܡܗܵܐ ܘܕܲܚܒ̣ܵܠܵܐ: ܟܵܣܵܐ ܕܚܵܬܹܟ̣ܝ ܫܵܡ̇ܪܹܝܢ.

ܠܕ:ܬܸܫܬܹ̇ܝܢܹܗ ܘܬܲܡܨܹܝܢܹܗ. ܘܣܲܥܪܹܟ̣ܝ ܬܸܓ̇ܙܝܼܢ: ܘܲܬ̇ܕܲܝ̈ܟ̇ܝ ܬܩܲܛܥܝܼܢ: ܡܸܛܠ ܕܐܸܢܵܐ ܡܲܠܠܹ̇ܬ̣ ܐܵܡܲܪ  ܡܵܪܹܐ ܡܵܪ̈ܵܘܵܬ̣ܵܐ.

ܠܗ:ܥܲܠ ܕܛܥܲܝܬ̇ܝܼܢܝ ܘܐܸܫܬ̇ܕܼܝܼܬ̇ܝ ܒܵܬܲܪ ܕܸܚ̈ܠܵܬܹܟ̣ܝ: ܘܐܵܦ ܐܲܢ̄ܬ̇ܝ ܩܲܒܸ̇ܠܘ ܥܵܘܼܠܹܟ̣ܝ ܘܙܵܢܝܘܼܬܹܟ̣ܝ.

ܠܘ:ܘܐܸܡܲܪ ܠܝܼ ܡܵܪܝܵܐ: ܒܲܪܢܵܫܵܐ: ܕܘܼܢ ܠܐܲܗܠܵܐ ܘܠܲܐܠܝܼܒ̣ܵܐ: ܘܚܵܘܵܐ ܐܸܢܹܝܢ ܛܲܢܦܘܼܬ̣ܗܹܝܢ.

ܠܙ:ܕܓ̣ܵܪ ܘܲܕܼܡܵܐ ܐܝܼܬ̣ ܒܐܝܼܕܲܝ̈ܗܹܝܢ: ܘܒܲܦܬܲܟ̣ܪ̈ܲܝܗܹܝܢ ܓܵܪ: ܘܲܒ̣ܢܲܝ̈ܗܹܝܢ ܕܝܼܠܸܕܼ ܠܝܼ: ܐܵܘܩܸ̈ܕܹܝܢ ܠܗܘܿܢ ܒܢܘܼܪܵܐ.

ܠܚ:ܘܗܵܕܹܐ ܐ̄ܚܪܹܬܵܐ ܕܲܥܒܲܕܼ ܠܝܼ: ܛܲܢܸܦ ܡܲܩܕܲܫܝ ܒܹܗ ܒܝܵܘܡܵܐ ܗܵܘܿ: ܘܫܲܒܲܝ̈ ܛܵܘܸܫ.

ܠܛ:ܘܟܲܕܼ ܢܟܲܣ ܗ̄ܘܲܝ̈ ܒܢܲܝ̈ܗܹܝܢ ܠܲܦܬܲܟ̣ܪ̈ܲܝܗܹܝܢ: ܥܲܠ ܠܡܲܩܕܲܫܝ ܒܹܗ ܒܝܵܘܡܵܐ ܗܵܘܿ ܘܛܵܘܫܵܝ̈ܗ̇: ܗܵܟܲܢܵܐ ܥܒܲܕܼ ܒܓ̣ܵܘ ܒܲܝܬ̇ܝ.

ܡ:ܘܐܵܦ ܫܠܲܚ ܥܲܠ ܓܲܒ̣ܪܹ̈ܐ ܕܐܵܬܹ̇ܝܢ ܠܘܵܬ̣ܗܹܝܢ ܡ̣ܢ ܪܘܼܚܩܵܐ: ܗܵܢ̇ܘܢ ܕܫܲܕܲܪ ܥܠܲܝܗܘܿܢ ܡܲܠܲܐܟܹ̈ܐ: ܘܟܲܕܼ ܐܸܬ̣ܵܘ ܒܲܪ ܫܵܥܬܹܗ ܣܚܲܝ̈ ܘܲܟ̣ܚܲܠ ܥܲܝܢܲܝ̈ܗܹܝܢ: ܘܐܸܨܛܲܒܲܬ̣ ܨܸܒ̣ܬ̇ܗܹܝܢ.

ܡܐ:ܘܝܼܬܸܒ̣ܘ ܥܲܠ ܥܲܪ̈ܣܵܬ̣ܵܐ ܕܲܩܪ̈ܝܼܡܵܢ: ܘܦܵܬ̣ܘܿܪܹ̈ܐ ܐܸܣܬ̇ܕܲܪܘ ܩܕܼܵܡܲܝܗܹܝܢ: ܘܡܸܫܚ̄ܝ ܘܒܸܣܡܲܝ̈ ܫܩܲܠ ܥܠܲܝܗܹܝܢ.

ܡܒ:ܘܩܵܠܵܐ ܕܚܲܕܼܘܼܬ̣ܗܹܝܢ ܐܵܙܹ̇ܠ ܗ̄ܘܼܵܐ: ܘܐܵܦ ܕܓܲܒ̣ܪܹ̈ܐ ܕܐܸܬ̣ܵܘ ܡ̣ܢ ܫܒ̣ܵܐ ܘܡ̣ܢ ܡܲܕܼܒ̇ܪܵܐ: ܘܐܲܪܡܝܼܘ ܫܹܐܪܹ̈ܐ ܒܐܝܼܕܲܝ̈ܗܹܝܢ: ܘܲܟ̣ܠܝܼܠܵܐ ܕܫܘܼܒ̣ܚܵܐ ܒܪܹ̈ܫܲܝܗܹܝܢ.

ܡܓ:ܘܐܸܡ̇ܪܹܬ̣ ܒܗܵܠܹܝܢ ܓܵܪ: ܘܒܲܥܒ̣ܵܕܹ̈ܐ ܕܙܵܢ̈ܝܵܬ̣ܵܐ ܙܲܢܝܼ̈.

ܡܕ:ܘܥܵܐܠܝܼܢ ܗ̄ܘܼܵܘ ܠܘܵܬ̣ܗܹܝܢ: ܐܲܝܟ ܕܥܵܐ̇ܠܝܼܢ ܠܘܵܬ̣ ܐܲܢ̄ܬ̇ܬ̣ܵܐ ܙܵܢܝܼܬ̣ܵܐ: ܗܵܟܲܢܵܐ ܥܵܐ̇ܠܝܼܢ ܗ̄ܘܼܵܘ ܥܲܠ ܐܲܗܠܵܐ ܘܥܲܠ ܐܲܗܠܝܼܒ̣ܵܐ: ܢܸܫܹ̈ܐ ܙܵܢ̈ܝܵܬ̣ܵܐ.

ܡܗ:ܘܓܲܒ̣ܪܹ̈ܐ ܙܲܕ̇ܝܩܹ̈ܐ ܢܕܼܘܼܢܘܼܢ ܐܸܢܹܝܢ: ܕܝܼܢܵܐ ܕܓܲܝܵܪ̈ܵܬ̣ܵܐ: ܘܕܼܝܼܢܵܐ ܕܐܲܝܠܹܝܢ ܕܐܵܫ̈ܕܵܢ ܕܡܵܐ: ܡܸܛܠ ܕܓܲܝܵܪ̈ܵܬ̣ܵܐ ܐܸܢܹܝܢ: ܘܲܕܼܡܵܐ ܐܝܼܬ̣ ܒܐܝܼܕܲܝ̈ܗܹܝܢ.

ܡܘ:ܡܸܛܠ ܕܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܣܸܩ ܥܠܲܝܗܹܝܢ ܟܢܘܼܫܝܵܐ: ܘܗܲܒ̣ ܐܸܢܹܝܢ ܠܙܵܘܸܥܬ̣ܵܐ ܘܲܠܒܸܙܬ̣ܵܐ.

ܡܙ:ܘܢܸܪܓ̇ܘܿܡ ܐܸܢܹܝܢ ܟܸܢܫܵܐ ܒܟܹܐܦܹ̈ܐ: ܘܢܸܡܚܘܿܢ ܐܸܢܹܝܢ ܒܣܲܝܦܲܝ̈ܗܘܿܢ: ܘܠܲܒ̣̈ܢܲܝܗܹܝܢ ܘܠܲܒ̣̈ܢܵܬ̣ܗܹܝܢ ܢܩܲܛܠܘܼܢ: ܘܒ̣ܵܬܲܝ̈ܗܹܝܢ ܢܘܩ̄ܕܼܘܼܢ ܒܢܘܼܪܵܐ.

ܡܚ:ܘܐܹܒܲܛܸܠ ܥܵܘܿܠܵܐ ܡ̣ܢ ܐܲܪܥܵܐ: ܘܢܸܬ̣ܪ̈ܲܕܼܝܵܢ ܟܠܗܹܝܢ ܢܸܫܹ̈ܐ: ܘܠܵܐ ܢܸܥ̈ܒ̇ܕܵܢ ܐܲܝܟ ܙܵܢܝܘܼܬ̣ܟܹܝܢ.

ܡܛ:ܘܐܸܬܸ̇ܠ ܙܵܢܝܘܼܬ̣ܟܹܝܢ ܥܠܲܝܟܹ̇ܝܢ: ܘܲܚܛܵܗܹ̈ܐ ܕܲܦܬܲܟ̣ܪܲܝܟܹ̇ܝܢ ܬܩܲـ̈ـܒ̇ܠܵܢ: ܘܬܸܕ̇ܥܵـ̈ـܢ ܕܐܸܢܵܐ ܐ̄ܢܵܐ ܡܵܪܝܵܐ.

ܩܹܦܵܠܹܐܘܿܢ:ܟܕ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܒܫܲܢ̄ܬܵܐ ܬܫܝܼܥܵܝܬܵܐ: ܒܲܥܣܲܪܬܵܐ ܒܝܲܪܚܵܐ ܕܥܸܣܪܵܐ ܠܡܹܐܡܲܪ.

ܒ:ܒܲܪܢܵܫܵܐ: ܟܬ̣ܘܿܒ̣ ܠܵܟ ܫܡܹܗ ܕܝܵܘܡܵܐ ܗܵܢܵܐ: ܕܣܵܡܹ̇ܟ ܡܲܠܟܵܐ ܕܒ̣ܵܒܹܠ ܠܐܘܿܪܸܫܠܸܡ ܒܹܗ ܒܝܵܘܡܵܐ ܗܵܢܵܐ.

ܓ:ܘܐܲܡܬܸ̇ܠ ܡܲܬ̣ܠܵܐ ܥܲܠ ܒܲܝܬܵܐ ܡܡܲܪܡܪܵܢܵܐ: ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܦܝܼ ܩܲܕܼܣܵܐ ܘܣܘܿܟ ܒܹܗ ܡܲـ̈ـܝܵܐ.

ܕ:ܘܐܲܪܡܵܐ ܒܹܗ ܢܸܩܣܹ̈ܐ ܕܛܵܒ̣ܝܼܢ ܘܫܲܡܝܼܢܝܼܢ: ܟܲܬ̣ܦܵܐ ܕܲܫܡܝܼܛ ܓܲܪܡܵܗ̇ ܡ̣ܢ ܓܒܲـ̈ـܝܵܐ ܕܥܵـ̈ـܢܵܐ.

ܗ:ܘܓܲܪ̈ܡܹܐ ܬܚܹܝܬ̣ ܩܲܕܼܣܵܐ ܫܓ̣ܘܿܪ ܐܸܢܘܿܢ: ܘܐܵܘܩܸܕܼ ܐܸܢܘܿܢ ܬܚܘܿܬ̣ܵܘܗܝ.

ܘ:ܡܸܛܠ ܕܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܘܿ ܡܕܼܝܼܢ̄ܬܵܐ ܕܲܕܼܡܵܐ ܕܩܲܕܼܣܵܐ ܬܦܸܐ ܒܵܗ̇: ܘܥܵܘܼܠܵܗ̇ ܠܵܐ ܢܦܲܩ̣ ܡܸܢܵܗ̇: ܗܲܕܵܡ ܗܲܕܵܡ ܦܘܼܣܩܘܼܗ̇: ܘܦܸܣܵܐ ܠܵܐ ܢܸܦܸܠ ܥܠܹܝܗ̇.

ܙ:ܡܸܛܠ ܕܲܕܼܡܵܗ̇ ܒܓ̣ܵܘܵܗ̇ ܗܘ̤ܵܐ: ܘܥܲܠ ܟܹܐܦܵܐ ܣܵܡ̇ܬܹ̇ܗ: ܘܠܵܐ ܐܹܫܲܕ̇ܬܹ̇ܗ ܒܐܲܪܥܵܐ ܕܠܵܐ ܢܸܬ̣ܟܲܣܸܐ ܥܠܵܘܗܝ ܥܲܦܪܵܐ.

ܚ:ܕܬܸܣܲܩ ܚܸܡܬ̣ܵܐ ܠܦܘܼܪܥܵܢܘܼܬ̣ܵܐ: ܝܸܗ̄ܒܹ̇ܬ̣ ܕܡܵܗ̇ ܥܲܠ ܟܹܐܦܵܐ ܫܲܥܝܼܥܬܵܐ ܕܠܵܐ ܢܸܬ̣ܟܲܣܸܐ.

ܛ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܘܿ ܡܕܼܝܼܢ̄ܬܵܐ ܕܲܕܼܡܵܐ: ܐܸܢܵܐ ܐܵܘܪܸܒ̣ ܡܲܥܡ̄ܪܵܐ: ܘܐܲܣܓܹ̇ܐ ܩܲܝܣܹ̈ܐ.

ܝ:ܘܐܸܫܒ̇ܘܿܩ ܢܘܼܪܵܐ: ܘܢܸܒ̣ܫܲܠ ܒܸܣܪܵܐ: ܘܐܲܪܬܲܚ ܪܸܬ̣ܚܵܐ ܘܓܲܪ̈ܡܹܐ ܢܹܐܩܕ̇ܘܼܢ.

ܝܐ:ܘܐܲܩܝܼܡܝܼܘܗܝ ܪܸܬ̣ܚܵܐ ܥܲܠ ܓܘܼܡܪܹ̈ܐ: ܕܢܸܚܲܡ ܘܢܸܬ̣ܦܲܫܲܪ ܢܚܵܫܵܗ̇: ܘܬܸܬ̣ܡ̱ܣܸܐ ܒܓ̣ܵܘܵܗ̇ ܛܲܢܦܘܼܬ̣ܵܗ̇: ܘܢܸܫܠܲܡ ܦܘܼܪܥܵܢܵܗ̇.

ܝܒ:ܐܲܝܟ ܬܹܐܢܹ̈ܐ ܟܪ̈ܝܼܗܵܬ̣ܵܐ: ܘܠܵܐ ܢܸܦܘܿܩ ܡܸܢܵܗ̇ ܣܘܿܓ̣ܵܐܐ ܕܥܵܘܼܠܵܗ̇: ܐܸܠܵܐ ܒܢܘܼܪܵܐ ܢܸܗܘܹܐ ܦܘܼܪܥܵܢܵܗ̇.

ܝܓ:ܥܲܠ ܕܐܹܬ̇ܛܲܢܲܦܬ̇ܝ ܒܙܵܢܝܘܼܬ̣ܵܐ: ܘܥܲܠ ܕܕܲܟ̇ܝܼܬܹ̇ܟ̣ܝ ܘܠܵܐ ܐܸܬ̇ܕܲܟ̇ܝܼܬ̇ܝ ܡ̣ܢ ܛܲܢܦܘܼܬܹܟ̣ܝ: ܬܘܼܒ̣ ܠܵܐ ܬܸܬ̇ܕܲܟܹ̇ܝܢ: ܥܕܲܡܵܐ ܕܐܲܢܝܼܚ ܒܹܟ̣ܝ ܚܸܡܬ̣ܝ.

ܝܕ:ܐܸܢܵܐ ܡܵܪܝܵܐ ܐܸܡ̇ܪܹܬ̣: ܘܡܲܝܬܸ̇ܐ ܐ̄ܢܵܐ ܘܥܵܒܹ̇ܕܼ ܐ̄ܢܵܐ: ܘܠܵܐ ܐܹܪܲܚܸܦ: ܘܠܵܐ ܐܹܚܘܼܣ ܘܠܵܐ ܐܹܪܲܚܸܡ: ܘܐܲܝܟ ܐܘܼܪ̈ܚܵܬܹܟ̣ܝ ܘܐܲܝܟ ܨܸܢ̈ܥܵܬܹܟ̣ܝ ܐܹܕ̇ܘܼܢܹܟ̣ܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܗ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܪܝܵܐ ܠܡܹܐܡܲܪ.

ܝܘ:ܒܲܪܢܵܫܵܐ: ܗܵܐ ܢܵܣܹ̇ܒ̣ ܐ̄ܢܵܐ ܡܸܢܵܟ ܪܸܓ̇ܬ̣ܵܐ ܕܥܲܝ̈ܢܲܝܟ ܒܲܡܚܘܿܬ̣ܵܐ ܕܡܸܢܫܹܠܝ: ܘܠܵܐ ܬܲܪܩܸܕܼ ܘܠܵܐ ܬܸܒ̣ܟܹ̇ܐ: ܘܠܵܐ ܬܲܫܚܸܠ ܕܸܡ̱ܥܬ̣ܵܟ.

ܝܙ:ܐܸܠܵܐ ܐܸܫܬܲܢܲܩ ܒܲܕܼܡܵܐ ܕܡܝܼ̈ܬܹܐ: ܘܒܹܝܬ̣ ܒܵܟܹ̇ܐ ܠܵܐ ܬܸܥܒܸ̇ܕܼ: ܘܡܵܐܢܲܝ̈ܟ ܚܙܘܿܩ ܥܠܲܝܟ: ܘܲܡܣܵܢܲܝ̈ܟ ܣܝܼܡ ܒܪܸ̈ܓ̣ܠܲܝܟ: ܘܠܵܐ ܬܸܬ̣ܥܲܛܲܦ ܥܲܠ ܣܸܦ̈ܘܵܬ̣ܵܟ: ܘܠܲܚܡܵܐ ܕܲܒ̣ܢܲܝ̈ܢܵܫܵܐ ܠܵܐ ܬܹܐܟ̣ܘܿܠ.

ܝܚ:ܘܐܸܡ̇ܪܹܬ̣ ܒܨܲܦܪܵܐ ܠܥܲܡܵܐ: ܘܡܝܼܬܲܬ̤ ܐܲܢ̄ܬܲܬ̣ܝ ܒܪܲܡܫܵܐ: ܘܲܠܨܲܦܪܹܗ ܕܝܵܘܡܵܐ ܐ̄̇ܪܹܢܵܐ: ܥܸܒ̣ܕܲܬ̣ ܐܲܝܟ ܕܐܸܬ̣ܦܲܩ̇ܕܹ̇ܬ̣.

ܝܛ:ܘܐܸܡܲܪܘ ܠܝܼ ܥܲܡܵܐ: ܠܵܐ ܡܚܵܘܹܐ ܐܲܢ̄ܬ̇ ܠܲܢ ܡܵܢܵܘ ܗܵܢܵܐ ܕܥܵܒܹ̇ܕܼ ܐܲܢ̄ܬ̇.

ܟܟ:ܘܐܸܡ̇ܪܹܬ̣ ܠܗܘܿܢ: ܕܦܸܬ̣ܓ̣ܵܡܹܗ ܗ̄ܘܼ ܕܡܵܪܝܵܐ ܗܘ̤ܵܐ ܥܠܲܝ ܠܡܹܐܡܲܪ.

ܟܐ:ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܸܵܐ: ܗܵܐ ܡܛܵܘܸܫ ܐ̄ܢܵܐ ܡܲܩܕܲܫܝ ܫܘܼܒ̣ܚܵܐ ܕܥܘܼܫ̱ܢܟ̣ܘܿܢ: ܘܪܸܓ̇ܬ̣ܵܐ ܕܥܲܝܢܲܝ̈ܟ̇ܘܿܢ: ܘܚܘܼܣܵܝܵܐ ܕܢܲܦ̮̈ܫܵܬ̣ܟ̣ܘܿܢ: ܘܲܒ̣ܢܲܝ̈ܟ̇ܘܿܢ ܘܲܒ̣̈ܢܵܬ̣ܟ̣ܘܿܢ ܕܫܵܒ̣ܩܝܼܢ ܐ̄ܢܬ̇ܘܿܢ: ܒܚܲܪܒܵܐ ܢܸܦܠܘܿܢ.

ܟܒ:ܘܬܸܥܒ̇ܕܼܘܼܢ ܐܲܝܟ ܕܥܸܒ̣ܕܹ̇ܬ̣: ܘܥܲܠ ܣܸܦ̈ܘܵܬ̣ܟ̣ܘܿܢ ܠܵܐ ܬܸܬ̣ܥܲܛܦܘܼܢ: ܘܠܲܚܡܵܐ ܕܲܒ̣ܢܲܝ̈ܢܵܫܵܐ ܠܵܐ ܬܹܐܟ̣ܠܘܼܢ.

ܟܓ:ܘܣܲܥܪܟ̣ܘܿܢ ܠܵܐ ܢܸܣܬܲܦܲܪ: ܘܲܡܣܵܢܲܝ̈ܟ̇ܘܿܢ ܢܸܗܘܘܿܢ ܒܪܸ̈ܓ̣ܠܲܝܟ̇ܘܿܢ: ܘܠܵܐ ܬܸܒ̣ܟ̇ܘܿܢ ܘܠܵܐ ܬܲܪܩ̄ܕܼܘܼܢ: ܘܬܸܬ̣ܡ̱ܣܘܿܢ ܒܥܵܘܼܠܟ̣ܘܿܢ: ܘܬܸܬ̣ܒܲܝܐܘܼܢ ܐ̄ܢܵܫ ܥܲܠ ܐܲܚܘܼܗܝ.

ܟܕ:ܘܢܸܗܘܹܐ ܠܟ̣ܘܿܢ ܚܲܙܩܝܼܐܹܝܠ ܐܵܬ̤ܵܐ: ܘܐܲܝܟ ܕܲܥܒܲܕܼ ܗܵܟܲܢܵܐ ܬܸܥܒ̇ܕܼܘܼܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܹܐ ܡܵܪ̈ܵܘܵܬ̣ܵܐ.

ܟܗ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܒܝܵܘܡܵܐ ܕܢܵܣܹ̇ܒ̣ ܐ̄ܢܵܐ ܡܸܢܗܘܿܢ ܥܘܼܫܢܵܐ ܕܚܲܕܼܘܼܬ̣ܵܐ ܕܫܘܼܒ̣ܚܗܘܿܢ: ܘܪܸܓ̇ܬ̣ܵܐ ܕܥܲܝܢܲܝ̈ܗܘܿܢ: ܘܚܘܼܣܵܝܵܐ ܕܢܲܦ̮̈ܫܵܬ̣ܗܘܿܢ: ܘܲܒ̣ܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ.

ܟܘ:ܒܹܗ ܒܝܵܘܡܵܐ ܗܵܘܿ: ܢܹܐܬܹܐ ܠܘܵܬ̣ܵܟ ܡܸܬ̣ܦܲܨܝܵܢܵܐ: ܘܢܲܫ̱ܡܥܵܟ ܒܐܸܕܼܢܲܝ̈ܟ.

ܟܙ:ܘܢܸܦ̮ܬܲܚ ܦܘܼܡܵܟ ܡܸܬ̣ܦܲܨܝܵܢܵܐ ܒܹܗ ܒܝܵܘܡܵܐ ܗܵܘܿ: ܘܲܬ̣ܡܲܠܸܠ ܘܬ̣ܘܼܒ̣ ܠܵܐ ܬܸܚܪܲܫ: ܘܬܸܗܘܹܐ ܠܗܘܿܢ ܐܵܬ̤ܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܥܲܠ ܒܢܝ̈ ܥܡܘܢ.

ܩܹܦܵܠܹܐܘܿܢ:ܟܗ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܥܲܠ ܒܢܲܝ̈ ܥܲܡܘܿܢ: ܘܐܸܬ̣ܢܲܒܵܐ ܥܠܲܝܗܘܿܢ.

ܓ:ܘܐܸܡܲܪ ܠܲܒ̣ܢܲܝ̈ ܥܲܡܘܿܢ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܡܲܪܬ̇ܘܿܢ ܐܲܚܵܢ ܥܲܠ ܡܲܩܕܲܫܝ ܕܐܸܬ̇ܛܵܘܲܫ: ܘܥܲܠ ܐܲܪܥܵܐ ܕܝܼܣܪܵܝܹܠ ܕܚܸܪܒܲܬ̤: ܘܥܲܠ ܕܒܹܝܬ̣ ܝܑܼܗܘܼܕܼܵܐ ܕܐܸܙܲܠܘ ܒܲܫܒ̣ܝܼܬ̣ܵܐ.

ܕ:ܡܸܛܠ ܗܵܢܵܐ ܗܵܐ ܝܵܗܹ̇ܒ̣ ܐ̄ܢܵܐ ܠܹܟ̣ܝ ܠܲܒ̣ܢܲܝ̈ ܡܲܕܼܢ̱ܚܵܐ ܠܝܘܼܪܬܵܢܵܐ: ܘܢܸܥܡܲܪ ܒܹܟ̣ܝ ܚܲܝܠܗܘܿܢ: ܘܢܸܩܫܘܼܢ ܒܹܟ̣ܝ ܡܲܫܟ̇ܢܲܝ̈ܗܘܿܢ: ܗܸܢܘܿܢ ܢܹܐܟ̣ܠܘܼܢ ܦܹܐܪ̈ܲܝܟ̇ܝ: ܘܗܸܢܘܿܢ ܢܸܫܬ̇ܘܿܢ ܚܲܠܒܹܟ̣ܝ.

ܗ:ܘܐܸܬ̇ܠܝܼܗ̇ ܠܪܲܒܲܬ̣ ܠܲܪܒ̣ܵܥܵܐ ܕܓܲܡ̈ܠܹܐ: ܘܠܲܒ̣ܢܲܝ̈ ܥܲܡܘܿܢ ܠܡܲܪܒ̇ܥܵܐ ܕܥܵܢܵـ̈ـܐ: ܘܬܸܕ̇ܥܘܼܢ ܕܐܸܢܐ ܐ̄ܢܵܐ ܡܵܪܝܵܐ.

ܘ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܢܩܲܫܬܝ ܒܐܝܼܕܲܝ̈ܟ̇ܝ: ܘܲܪܦܲܣ̣ܬ̇ܝ ܒܪܸ̈ܓ̣ܠܲܝܟ̇ܝ: ܘܲܚܕܼܝܼܬ̇ܝ ܒܢܲܦ̮ܫܹܟ̣ܝ ܥܲܠ ܐܲܪܥܵܐ ܕܝܼܣܪܵܝܹܠ.

ܙ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܡܪܝܼܡ ܐ̄ܢܵܐ ܐܝܼܕܼܝ ܥܠܲܝܟ̇ܝ: ܘܐܸܬ̇ܠܹܟ̣ܝ ܒܸܙܬ̣ܵܐ ܠܥܲܡܡܹ̈ܐ ܘܐܲܣܝܼܦܹܟ̣ܝ ܡ̣ܢ ܥܲܡܡܹ̈ܐ: ܘܐܵܘܒ̇ܕܹܟ̣ܝ ܡ̣ܢ ܡܕܼܝܼ̈ܢܵܬ̣ܵܐ: ܘܐܲܚ̱ܪܒܹܟ̣ܝ ܘܬܸܕ̇ܥܝܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܥܠ ܡܘܐܒ.

ܚ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܡܲܪ ܡܘܼܐܵܒ̣ ܘܣܵܥܝܼܪ: ܗܵܐ ܒܟ̣ܠܗܘܿܢ ܥܲܡܡܹ̈ܐ ܕܒܹܝܬ̣ ܝܑܼܗܘܼܕܼܵܐ.

ܛ:ܡܸܛܠ ܗܵܢܵܐ ܗܵܐ ܡܲܪܬܲܥ ܐ̄ܢܵܐ ܟܲܬ̣ܦܹܗ ܕܡܘܼܐܵܒ̣ ܡ̣ܢ ܡܕܼܝܼ̈ܢܵܬ̣ܵܐ: ܡ̣ܢ ܡܕܼܝܼ̈ܢܵܬܹܗ ܘܡ̣ܢ ܚܕܼܵܪܵܘܗܝ: ܫܘܼܒ̣ܚܵܐ ܕܐܲܪܥܵܐ ܕܒܹܝܬ̣ ܐܲܫܝܼܡܘܿܢ ܘܕܲܒ̣ܥܸܠܡܘܿܢ ܘܲܕܼܩܘܼܪܝܲܬ̇ܝܼܡ.

ܝ:ܕܲܒ̣ܢܲܝ̈ ܡܲܕܼܢ̱ܚܵܐ: ܘܕܲܒ̣ܢܲܝ̈ ܥܲܡܘܿܢ: ܐܸܬ̇ܠܝܼܗ̇ ܠܝܘܼܪܬܵܢܵܐ: ܕܠܵܐ ܬܸܬ̇ܕ̇ܟܲܪ ܪܲܒܲܬ̣ ܕܲܒ̣ܢܲܝ̈ ܥܲܡܘܿܢ ܒܥܲܡܡܹ̈ܐ.

ܝܐ:ܘܲܒ̣ܡܘܼܐܵܒ̣ ܐܸܥܒܸ̇ܕܼ ܕܝܼܢܵܐ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܥܠ ܐܕܘܡ.

ܝܒ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܥܒܲܕܼ ܐܲܕܼܘܿܡ ܦܘܼܪܥܵܢܵܐ ܠܲܕܼܒܹܝܬ̣ ܝܑܼܗܘܼܕܼܵܐ: ܘܐܲܠܲܡ ܐܸܠܡܵܐ ܘܛܲܢ ܒܗܘܿܢ.

ܝܓ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܡܪܝܼܡ ܐ̄ܢܵܐ ܐܝܼܕܼܝ ܥܲܠ ܐܲܕܼܘܿܡ: ܘܡܵܘܒܸ̇ܕܼ ܐ̄ܢܵܐ ܡܸܢܵܗ̇ ܒܢܲܝ̈ܢܵܫܵܐ ܘܲܒ̣ܥܝܼܪܵܐ: ܘܐܸܥܒ̇ܕܼܝܼܗ̇ ܠܚܘܼܪܒܵܐ ܡ̣ܢ ܬܲܝܡܲܢ ܘܕܼܵܪܵܢ: ܘܲܒ̣ܚܲܪܒܵܐ ܬܸܦܸܠ.

ܝܕ:ܘܐܸܥܒܸ̇ܕܼ ܦܘܼܪܥܵܢܝ ܒܐܲܕܼܘܿܡ: ܒܝܲܕܼ ܥܲܡܝ ܝܑܼܣܪܵܝܹܠ: ܘܢܸܬ̣ܦܲܪܥܘܿܢ ܡ̣ܢ ܐܲܕܼܘܿܡ ܐܲܝܟ ܪܘܼܓ̣ܙܝ ܘܐܲܝܟ ܚܸܡܬ̣ܝ: ܘܢܸܕ̇ܥܘܼܢܹܗ ܠܦܘܼܪܥܵܢܝ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܥܲܠ ܦܠܸܫܬ.

ܝܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܥܒܲܕܼܘ ܦܠܸܫܬܵܝܹ̈ܐ ܦܘܼܪܥܵܢܵܐ: ܘܐܸܬ̣ܦܪܲܥܘ ܦܘܼܪܥܵܢܵܐ ܒܪܸܓ̇ܬ̣ܵܐ ܕܢܲܦ̮ܫܗܘܿܢ: ܕܲܢܚܲܒ̇ܠܘܼܢ ܪܵܚܡܘܼܬ̣ܵܐ ܕܥܵܠܲܡ.

ܝܘ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܡܪܝܼܡ ܐ̄ܢܵܐ ܐܝܼܕܼܝ ܥܲܠ ܦܸܠܫܬܵܝܹ̈ܐ: ܘܡܵܘܒܸ̇ܕܼ ܐ̄ܢܵܐ ܠܲܩܪܹܛܹܐ: ܘܡܵܘܒܸ̇ܕܼ ܐ̄ܢܵܐ ܫܲܪܟܵܐ ܕܲܣܦܵܪ̈ܲܝ ܝܲܡܵܐ.

ܝܙ:ܘܐܸܥܒܸ̇ܕܼ ܡܸܢܗܘܿܢ ܦܘܼܪ̈ܥܵܢܲܝ ܪܵܘܪ̈ܒܐ ܒܡܲܟ̇ܝܼܣܵܢܘܼܬ̣ܵܐ ܘܲܒ̣ܪܘܼܓ̣ܙܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܥܸܒ̣ܕܹ̇ܬ̣ ܡܸܢܗܘܿܢ ܦܘܼܪ̈ܥܵܢܲܝ.

ܥܠ ܨܘܪ.

ܩܹܦܵܠܹܐܘܿܢ:ܟܘ.

ܐ:ܒܲܫܢܲܬ̣ ܚܕܲܥܸܣܪܹ̈ܐ ܒܚܲܕܼ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܥܲܠ ܕܐܸܡܪܲܬ̤ ܨܘܿܪ ܥܲܠ ܐܘܿܪܸܫܠܸܡ ܐܲܚܵܢ: ܐܸܬ̇ܬܲܒܲܪܘ ܬܲܪ̈ܥܹܐ ܕܥܲܡܡܹ̈ܐ ܘܲܦܢ̣ܵܘ ܠܘܵܬ̣ܝ: ܘܚܸܪܒܲܬ̤ ܘܲܨܕܼܵܬ̤.

ܓ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ̇ܝ ܨܘܿܪ: ܘܐܲܣܸܩ ܥܠܲܝܟ̇ܝ ܥܲܡܡܹ̈ܐ ܣܲܓ̇ܝܼ̈ܐܐ: ܐܲܝܟ ܕܣܵܠܹ̇ܩ ܝܲܡܵܐ ܒܓܲܠܠܵܘ̈ܗܝ.

ܕ:ܘܲܢܚܲܒ̇ܠܘܼܢ ܫܘܼܪܹ̈ܝܗ̇ ܕܨܘܿܪ: ܘܢܸܣܚ̄ܦܘܼܢ ܡܲܓܕ̇ܠܹܝ̈ܗ̇: ܘܢܸܥܩ̄ܪܘܼܢ ܥܲܦܪܵܗ̇ ܡܸܢܵܗ̇: ܘܐܸܥܒ̇ܕܼܝܼܗ̇ ܐܲܝܟ ܟܹܐܦܵܐ ܫܲܥܝܼܥܬܵܐ.

ܗ:ܘܒܹܝܬ̣ ܡܲܫܛܵܚܹ̈ܐ ܬܸܗܘܹܐ ܠܲܡܨܝܼ̈ܕܼܵܬ̣ܵܐ ܒܓ̣ܵܘ ܝܲܡܵܐ: ܡܸܛܠ ܕܐܸܢܵܐ ܡܲܠܠܹ̇ܬ̣ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܬܸܗܘܹܐ ܒܸܙܬ̣ܵܐ ܠܥܲܡܡܹ̈ܐ.

ܘ:ܘܲܒ̣̈ܢܵܬ̣ܵܗ̇ ܕܲܒ̣ܕܲܒ̣ܪܵܐ ܒܚܲܪܒܵܐ ܢܸܬ̣ܩܲܛ̈ܠܵܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܙ:ܡܸܛܠ ܕܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܡܲܝܬܹ̇ܐ ܐ̄ܢܵܐ ܥܲܠ ܨܘܿܪ: ܠܲܢܒ̣ܘܼܟܲܕܼܢܵܨܲܪ ܡܲܠܟܵܐ ܕܒ̣ܵܒܹܠ ܡ̣ܢ ܓܲܪܒ̇ܝܵܐ: ܡܠܸܟ ܡܲܠ̈ܟܹ̇ܐ: ܒܪ̈ܲܟ̣ܫܵܐ: ܘܲܒ̣ܡܲܪ̈ܟ̇ܒ̣ܵܬ̣ܵܐ: ܘܲܒ̣ܦܲܪ̈ܵܫܹܐ: ܘܲܒ̣ܟ̣ܢܘܼܫܝܵܐ: ܘܲܒ̣ܥܲܡܵܐ ܣܲܓܝܼܵܐܐ.

ܚ:ܒ̈ܢܵܬܹܟ̣ܝ ܕܲܒ̣ܚܲܩܠܵܐ ܒܚܲܪܒܵܐ ܢܩܲܛܸܠ: ܘܲܢܩܝܼܡ ܥܠܲܝܟ̇ܝ ܕܵܘܩܹ̈ܐ: ܘܢܲܟ̣ܡܸܢ ܥܠܲܝܟ̇ܝ ܟܡܹܐܢܹ̈ܐ: ܘܲܢܩܝܼܡ ܥܠܲܝܟ̇ܝ ܣܲܟ̇ܪܵܐ.

ܛ:ܘܲܫܢܵܢܹ̈ܐ ܕܢܲܝܙܟ̣ܵܘ̈ܗܝ ܢܸܬܸ̇ܠ ܒܫܘܼܪ̈ܲܝܟ̇ܝ: ܘܡܲܓܕ̇ܠܲܝ̈ܟ̇ܝ ܢܸܥܩ̄ܪܘܼܢ ܒܣܲܝܦܲܝ̈ܗܘܿܢ.

ܝ:ܡ̣ܢ ܗܠܲܟ̣ܬ̣ܵܐ ܕܪ̈ܲܟ̣ܫܹܗ ܢܟܲܣܹܟ̣ܝ ܚܸܠܵܐ: ܘܡ̣ܢ ܩܵܠܵܐ ܕܦܲܪ̈ܵܫܵܘܗܝ ܘܲܕܼܓ̣ܝܼ̈ܓ̣ܠܹܐ ܕܡܲܪ̈ܟ̇ܒ̣ܵܬܹܗ ܢܙܘܼܥܘܼܢ ܫܘܼܪ̈ܲܝܟ̇ܝ: ܘܡܵܐ ܕܥܵܐܹ̇ܠ ܒܬܲܪ̈ܥܲܝܟ̇ܝ: ܐܲܝܟ ܗܵܘܿ ܕܥܵܐܹ̇ܠ ܠܲܡܕܼܝܼܢ̄ܬܵܐ ܡܬܲܪܲܥܬܵܐ.

ܝܐ:ܘܲܒ̣ܦܲܪ̈ܣܵܬ̣ܵܐ ܕܪ̈ܲܟ̣ܫܹܗ ܢܕܼܘܼܫ ܟܠܗܘܿܢ ܫܘܼܩܲܝ̈ܟ̇ܝ: ܘܲܢܩܲܛܸܠ ܥܲܡܹܟ̣ܝ ܒܚܲܪܒܵܐ: ܘܲܥ̈ܠܵܘܵܬ̣ܵܐ ܕܥܘܼܫܢܹܟ̣ܝ ܒܐܲܪܥܵܐ ܢܸܣܚܘܿܦ.

ܝܒ:ܘܢܸܒ̇ܙܘܼܢ ܢܸܟ̣ܣܲܝ̈ܟ̇ܝ ܘܢܸܫܒ̇ܘܿܢ ܩܸܢܝܵܢܹܟ̣ܝ: ܘܢܸܣܚ̄ܦܘܼܢ ܫܘܼܪ̈ܲܝܟ̇ܝ: ܘܢܸܥܩ̄ܪܘܼܢ ܒܵـ̈ـܬܹ̇ܐ ܕܪܸܓ̇ܬܹܟ̣ܝ: ܘܟܹܐܦܲܝ̈ܟ̇ܝ ܘܩܲܝܣܲܝ̈ܟ̇ܝ ܘܥܘܼܬ̣ܪܹܟ̣ܝ ܢܸܫܕ̇ܘܿܢ ܒܝܲܡܵܐ.

ܝܓ:ܘܐܹܒܲܛܸܠ ܣܘܿܓ̣ܵܐܐ ܕܲܙܡܵܪܹܟ̣ܝ: ܘܬ̣ܘܼܒ̣ ܠܵܐ ܢܸܫܬ̇ܡܲܥ ܩܵܠܵܐ ܕܟܸܢܵܪܹܟ̣ܝ.

ܝܕ:ܘܐܸܥܒ̇ܕܹܟ̣ܝ ܟܹܐܦܵܐ ܫܲܥܝܼܥܬܵܐ: ܘܡܲܫܛܵܚܹ̈ܐ ܕܲܡܨܝܼ̈ܕܼܵܬ̣ܵܐ: ܘܬ̣ܘܼܒ̣ ܠܵܐ ܬܸܬ̣ܒ̇ܢܹܝܢ: ܡܸܛܠ ܕܐܸܢܵܐ ܡܲܠܠܹ̇ܬ̣: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܨܘܿܪ: ܡ̣ܢ ܩܵܠܵܐ ܕܡܲܦܘܼܠܬܹ̇ܟ̣ܝ ܘܡ̣ܢ ܫܘܼܢܵܩܵܐ ܕܲܩܛܝܼܠܲܝ̈ܟ̇ܝ: ܘܩܸܛ̈ܠܹܐ ܕܡܸܬ̣ܩܲܛܠܝܼܢ ܒܓ̣ܵܘܹܟ̣ܝ: ܢܙܘܼ̈ܥܵܢ ܓܵܙܪ̈ܵܬ̣ܵܐ.

ܝܘ:ܘܢܸܚܬ̣ܘܼܢ ܡ̣ܢ ܟܘܼܪ̈ܣܵܘܵܬ̣ܗܘܿܢ ܟܠܗܘܿܢ ܪܵܘܪ̈ܒ̣ܵܢܹܐ ܕܝܲܡܵܐ: ܘܢܸܫܩ̄ܠܘܼܢ ܡܸܢܗܘܿܢ ܐܸܣܛܠܲܝ̈ܗܘܿܢ: ܘܢܸܫ̱ܠܚܘܼܢ ܡܵܐܢܹ̈ܐ ܕܨܸܒ̣ܬ̇ܗܘܿܢ: ܘܢܸܠܒ̇ܫܘܼܢ ܙܵܘܸܥܬ̣ܵܐ: ܘܢܸܬ̇ܒ̣ܘܼܢ ܒܐܲܪܥܵܐ ܘܢܸܬ̣ܘ̱ܪܘܼܢ ܘܠܵܐ ܢܸܬ̇ܬ̇ܢܝܼܚܘܼܢ: ܘܢܸܬ̣ܡ̱ܗܘܿܢ ܥܠܲܝܟ̇ܝ.

ܝܙ:ܘܢܹܐܠܘܿܢ ܥܠܲܝܟ̇ܝ ܐܘܿܠ̈ܝܵܬ̣ܵܐ: ܘܢܹܐܡܪܘܼܢ ܠܹܟ̣ܝ: ܐܲܝܟܲܢܵܐ ܐܸܒܲܕ̇ܬܝ ܥܵܡܘܿܪܬܵܐ ܕܝܲܡܡܹ̈ܐ: ܡܕܼܝܼܢ̄ܬܵܐ ܥܲܫܝܼܢܬܵܐ ܕܥܲܫܝܼܢܵܐ ܗ̄ܘܼܵܬ̣ ܒܝܲܡܵܐ ܗ̤ܝ ܘܥܵܡܘܿܪܹ̈ܝܗ̇: ܕܝܲܗ̄ܒ̣ܘ ܕܸܚܠܲܬ̣ܗܘܿܢ ܒܟ̣ܠܗܘܿܢ ܥܵܡܘܿܪܹ̈ܝܗ̇.

ܝܚ:ܡܸܟܹ̇ܝܠ ܢܙܘܼ̈ܥܵܢ ܓܵܙܪ̈ܵܬ̣ܵܐ ܒܝܵܘܡܵܐ ܕܡܲܦܘܼܠܬܹ̇ܟ̣ܝ: ܘܢܸܬ̇ܕܲܠ̈ܚܵܢ ܓܵܙܪ̈ܵܬ̣ܵܐ ܒܝܵܘܡܵܐ ܕܡܲܦܘܼܠܬܹ̇ܟ̣ܝ.

ܝܛ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܨܘܿܪ: ܡܵܐ ܕܲܥܒܲܕ̇ܬܹܟ̣ܝ ܡܕܼܝܼܢ̄ܬܵܐ ܚܲܪܒ̇ܬ̣ܵܐ ܐܲܝܟ ܡܕܼܝܼ̈ܢܵܬ̣ܵܐ ܕܠܵܐ ܐܸܬ̣ܝܲܬܲܒ̣: ܡܲܣܸܩ ܐ̄ܢܵܐ ܥܠܲܝܟ̇ܝ ܬܗܘܿܡܵܐ: ܘܲܢܟܲܣܘܿܢܹܟ̣ܝ ܡܲـ̈ـܝܵܐ ܣܲܓ̇ܝܼ̈ܐܹܐ.

ܟܟ:ܘܐܲܚܬܹܟ̣ܝ ܥܲܡ ܢܵܚ̈ܬܲܝ ܓܘܼܒܵܐ ܠܘܵܬ̣ ܥܲܡܵܐ ܕܥܵܠܲܡ: ܘܐܵܘܬ̇ܒܹܟ̣ܝ ܒܐܲܪܥܵܐ ܬܲܚܬܵܝܬܵܐ: ܒܚܲܪ̈ܒ̣ܵܬ̣ܵܐ ܕܡ̣ܢ ܥܵܠܲܡ ܥܲܡ ܢܵܚ̈ܬܲܝ ܓܘܼܒܐ: ܘܠܵܐ ܬܸܬ̣ܝܲܬ̇ܒ̣ܝܼܢ: ܘܠܵܐ ܐܸܥܒܸ̇ܕܼ ܩܝܵܡܹܟ̣ܝ ܒܐܲܪܥܵܐ ܕܚܲܝܹ̈ܐ.

ܟܐ:ܠܐܲܒ̣ܕܵܢܵܐ ܐܸܬ̇ܠܹܟ̣ܝ: ܘܬܸܬ̣ܒ̇ܥܹܝܢ ܘܠܵܐ ܬܸܫܬܲܟ̣ܚܝܼܢ ܬܘܼܒ̣ ܠܥܵܠܲܡ: ܐܵܡܲܪ ܡܵܪܹܐ ܡܵܪܵܘܵܬ̣ܵܐ.

ܩܹܦܵܠܹܐܘܿܢ:ܟܙ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܲܠܝܼ ܐܘܿܠܝܼܬ̣ܵܐ ܥܲܠ ܨܘܿܪ.

ܓ:ܘܐܸܡܲܪ ܠܨܘܿܪ ܕܝܵܬ̣ܒܵܐ ܒܡܲܥܠܵܢܵܐ ܕܝܲܡܵܐ: ܬܹܐܓ̣ܘܼܪܬܵܐ ܕܥܲܡܡܹ̈ܐ ܘܲܕܼܓ̣ܵܙܪ̈ܵܬ̣ܵܐ ܣܲܓ̇ܝܼ̈ܐܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܨܘܿܪ: ܐܲܢ̄ܬ̇ܝ ܐܸܡܲܪܬ̇ܝ ܕܐܸܢܵܐ ܐ̄ܢܵܐ ܟܠܝܼܠܵܐ ܕܫܘܼܒ̣ܚܵܐ.

ܕ:ܬܚܘܼܡܲܝ̈ܟ̇ܝ ܒܠܸܒܵܐ ܕܝܲܡܡܹ̈ܐ: ܘܲܒ̣ܢܲܝ̈ܟ̇ܝ ܫܲܟ̣ܠܸܠܘ ܫܘܼܦܪܹܟ̣ܝ.

ܗ:ܥܲܪ̈ܩܹܐ ܘܕܲܦܹ̈ܐ ܐܲܝܬ̇ܝܼܘ ܠܹܟ̣ܝ ܡ̣ܢ ܣܵܢܝܼܪ: ܘܐܲܪ̈ܙܹܐ ܡ̣ܢ ܠܸܒ̣ܢܵܢ ܢܣܲܒ̣ܘ: ܕܢܸܥܒ̇ܕܼܘܼܢ ܠܹܟ̣ܝ ܥܵܕܼܪܹ̈ܐ.

ܘ:ܘܡ̣ܢ ܒܲܠܘܼܛܹ̈ܐ ܕܒܲܝܫܵܢ ܥ̣ܒܲܕܼܘ ܠܹܩܲܝ̈ܟ̇ܝ: ܘܕܲܦܲܝ̈ܟ̇ܝ ܥ̣ܒܲܕܼܘ ܕܫܸܢܵܐ ܕܦܝܼܠܵܐ: ܡ̣ܢ ܓܵܙܪ̈ܵܬ̣ܵܐ ܕܟܹܬ̣ܵܝܹ̈ܐ.

ܙ:ܘܲܩܪ̈ܵܡܹܐ ܕܒ̣ܘܼܨܵܐ ܕܨܸܒ̣ܬܹ̇ܟ̣ܝ ܐܲܝܬ̇ܝܼܘ ܡ̣ܢ ܡܸܨܪܹܝܢ: ܕܢܸܗܘܹܐ ܠܹܟ̣ܝ ܐܵܬ̤ܵܐ: ܘܬܸܟ̣ܠ̱ܬ̣ܵܐ ܘܐܲܪܓ̇ܘܵܢܵܐ: ܐܲܝܬ̇ܝܼܘ ܠܹܟ̣ܝ ܡ̣ܢ ܓܵܙܪܵܬ̣ܵܐ ܕܐܲܠܸܣ ܠܬܲܟ̣ܣܝܼܬܹܟ̣ܝ.

ܚ:ܥܲܡܘܿܪܹ̈ܐ ܕܨܲܝܕܵܢ ܘܕܲܐܪܘܲܕܼ ܗܘ̤ܵܘ ܕܵܒ̣ܪ̈ܲܝ ܠܹܩܲܝ̈ܟ̇ܝ: ܚܲܟ̇ܝܼܡܲܝ̈ܟ̇ܝ ܨܘܿܪ ܗܘ̤ܵܘ ܡܲܠܵܚܲܝ̈ܟ̇ܝ.

ܛ:ܣܵܒܹ̈ܐ ܕܲܓ̣ܒܸܠ ܘܚܲܟ̇ܝܼܡܹܝ̈ܗ̇: ܗܘ̤ܵܘ ܒܵܕܼܩܲܝ̈ ܒܕܼܵܩܲܝܟ̇ܝ̈: ܣܦܝܼܢܹ̈ܐ ܟܠܗܹܝܢ ܕܝܲܡܵܐ: ܘܡܲܠܵܚܲܝ̈ܗܹܝܢ ܗܘ̤ܵܘ ܡ̣ܢ ܡܲܥܪ̈ܵܒܲܝܟ̇ܝ.

ܝ:ܦܵܪ̈ܣܵܝܹܐ: ܘܠܘܼ̈ܕܼܵܝܹܐ: ܘܦܘܿܛܵܝܹ̈ܐ: ܓܲܒ̣ܪܹ̈ܐ ܩܪܲܒ̣ܬ̣ܵܢܹ̈ܐ ܗܘ̤ܵܘ ܒܚܲܝ̈ܠܲܝܟ̇ܝ: ܣܲܟ̇ܪܹ̈ܐ ܘܣܲܢ̱ܘܪ̈ܵܬ̣ܵܐ ܬܠܵܘ ܒܹܟ̣ܝ: ܘܲܗܘ̤ܵܘ ܠܹܟ̣ܝ: ܫܘܒ̣ܚܵܐ.

ܝܐ:ܒܢܲܝ̈ ܐܵܪܘܲܕܼ ܘܚܲܝܠܲܝܟ̇ܝ̈ ܩܵܝ̇ܡܝܼܢ ܗ̄ܘܼܵܘ ܥܲܠ ܫܘܼܪ̈ܲܝܟ̇ܝ: ܘܢܵܛܪܝܼܢ ܡܲܓܕܲܠܲܝܟ̇ܝ̈: ܫܵܠܛܲܝ̈ܗܘܿܢ ܬܠܵܘ ܥܲܠ ܫܘܼܪ̈ܲܝܟ̇ܝ ܟܲܕܼ ܚܵܕܼܪܝܼܢ: ܘܫܲܡ̣ܠܝܼܘ ܫܘܼܦܪܹܟ̣ܝ.

ܝܒ:ܬܲܪܫܝܼܫ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ ܘܣܘܿܓ̣ܵܐܐ ܕܥܘܼܬ̣ܪܹܟ̣ܝ: ܣܹܐܡܵܐ ܘܦܲܪܙܠܵܐ: ܘܐܵܢܟ̣ܵܐ ܘܐܲܒ̣ܵܪܵܐ: ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

ܝܓ:ܝܵܘܵܢ ܘܬ̣ܘܼܒܹܝܠ ܘܡܵܫܵܟ ܬܲܓܵܪ̈ܲܝܟ̇ܝ: ܒܢܲܦ̮̈ܫܵܬ̣ܵܐ ܕܲܒ̣ܢܲܝ̈ܢܵܫܵܐ ܘܡܵܐܢܹ̈ܐ ܕܲܢܚܵܫܵܐ.

ܝܕ:ܡ̣ܢ ܒܹܝܬ̣ ܬܘܼܓܲܪܡܵܐ: ܪ̈ܲܟ̣ܫܵܐ ܘܦܲܪ̈ܵܫܹܐ ܘܟ̣ܘܿܕܲܢ̈ܘܵܬ̣ܵܐ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

ܝܗ:ܒܢܲܝ̈ ܕܵܪܵܢ ܬܲܓܵܪ̈ܲܝܟ̇ܝ: ܘܓ̣ܵܙܪ̈ܵܬ̣ܵܐ ܣܲܓ̇ܝܼܵܐ̈ܬ̣ܵܐ: ܒܹܝܬ̣ ܬܹܐܓ̣ܘܼܪܬܵܐ ܕܐܝܼܕܲܝ̈ܟ̇ܝ: ܩܲܪ̈ܢܵܬ̣ܵܐ ܕܡܸܫܚܵܐ ܘܲܠܒ̣ܘܿܢ̄ܬܵܐ ܐܲܝܬ̇ܝܼܘ ܠܹܟ̣ܝ ܩܘܼܪ̈ܒܵܢܹܐ.

ܝܘ:ܐܲܕܼܘܿܡ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ ܘܣܘܿܓ̣ܵܐܐ ܕܲܥܒ̣ܵܕܲܝ̈ܟ̇ܝ: ܐܲܪܓ̇ܘܵܢܵܐ ܘܒ̣ܘܼܨܵܐ ܘܦܸܬ̣ܟܵܐ ܘܬܸܟ̣ܠ̱ܬܵܐ ܘܫܹܐܪ̈ܵܝܹܐ ܦܬܲܘܬܟ̣ܐ ܐܲܝܬ̇ܝܘ ܠܹܟ̣ܝ ܠܙܸܒ̣ܢܵܐ.

ܝܗ:ܝܑܼܗܘܼܕܼܵܐ ܘܐܲܪܥܵܐ ܕܝܼܣܪܵܝܹܠ: ܗܸܢܘܿܢ ܐܸܢܘܿܢ ܬܲܓܵܪ̈ܲܝܟ̇ܝ: ܚܸܛܹ̈ܐ: ܘܪܘܼܙܵܐ: ܘܕܼܘܼܚܢܵܐ: ܘܕܸܒ̣ܫܵܐ: ܘܡܸܫܚܵܐ: ܘܲܪ̈ܗܸܛܢܸܐ: ܐܲܝܬ̇ܝܼܘ ܠܹܟܝ ܠܙܸܒ̣ܢܵܐ.

ܝܚ:ܕܲܪܡܣܘܿܩ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ ܘܣܘܿܓ̣ܵܐܐ ܕܲܥܒ̣ܵܕܲܝ̈ܟ̇ܝ ܘܣܘܿܓ̣ܵܐܐ ܕܥܘܼܬ̣ܪܹܟ̣ܝ: ܒܚܲܡܪܵܐ ܫܲܡܝܼܢܵܐ ܘܥܲܡܪܵܐ ܚܸܘܵܪܵܐ.

ܝܛ:ܘܕܼܵܢ ܘܝܵܘܵܢ: ܡ̣ܢ ܐܘܼܙܸܠ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ: ܦܲܪܙܠܵܐ ܕܬܸܦܠ̱ܚܝܼܢ. ܘܲܩ̈ܣܲܝܵܐ ܘܲܩ̈ܢܲܝܵܐ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

ܟܟ:ܕܵܪܵܢ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ: ܐܲܝܬ̇ܝܼܘ ܠܹܟ̣ܝ ܣܘܿܓ̣ܵܐܐ ܕܲܒ̣ܥܝܼܪܵܐ ܛܲܪܩܬ̣ܵܐ.

ܟܐ:ܘܕܸܟ̣ܪܹ̈ܐ ܘܐܸܡܪܹ̈ܐ ܘܲܓ̣̈ܕܲܝܵܐ ܐܲܝܬ̇ܝܼܘ ܠܹܟ̣ܝ.

ܟܒ:ܬܲܓܵܪܹ̈ܐ ܕܲܫܒ̣ܵܐ ܘܲܕܼܪܲܥܡܵܐ: ܒܸܣܡܵܢܹ̈ܐ ܛܲܪ̈ܩܹܐ ܘܟܹܐܦܹ̈ܐ ܛܵܒ̣ܵـ̈ـܬ̣ܵܐ ܘܕܲܗܒ̣ܵܐ ܐܲܝܬ̇ܝܼܘ ܠܹܟ̣ܝ ܠܙܸܒ̣ܢܵܐ.

ܟܓ:ܚܵܪܵܢ ܘܟܲܢܵܐ ܘܥܲܕܲܢ ܬܲܓܵܪ̈ܲܝ ܫܒ̣ܵܐ: ܘܐܵܬ̣ܘܿܪ ܒܹܝܬ̣ ܬܹܐܓ̣ܘܼܪܬܹ̇ܟ̣ܝ.

ܟܕ:ܗܵܠܹܝܢ ܐܸܢܘܿܢ ܬܲܓܵܪܲܝܟ̇ܝ: ܕܡܲܝܬܹ̇ܝܢ ܠܹܟ̣ܝ ܡܵܐܢܹ̈ܐ ܕܬܸܟ̣ܠ̱ܬܵܐ ܘܲܕܼܦܸܬ̣ܟܵܐ: ܘܣܝܼ̈ܡܵܬ̣ܵܐ ܛܵܒ̣ܵـ̈ـܬ̣ܵܐ ܟܕ ܚܙ̈ܝܼܩܵܢ ܒܚܲܒ̣̈ܠܹܐ ܘܒܸܐܠܦܹ̈ܐ ܕܥܲܪܩܵܐ.

ܟܗ:ܒܢܲܝ̈ ܬܲܪܫܝܼܫ ܕܲܒ̣ܡܲܥܪ̈ܵܒܲܝܟ̇ܝ ܐܲܝܬ̇ܝܼܘ ܠܹܟ̣ܝ ܡܵܘ̈ܒ̇ܠܹܐ: ܘܐܸܬ̣ܡ̱ܠܝܼܬ̇ܝ ܘܲܥܫܸܢ̣ܬܝ ܛܵܒ̣ ܛܵܒ̣.

ܟܘ:ܘܲܒ̣ܠܸܒܵܐ ܕܝܲܡܡܹ̈ܐ: ܘܲܒ̣̈ܡܲܝܵܐ ܣܲܓ̇ܝܼ̈ܐܹܐ ܐܲܥܠܘܼܟ̣ܝ ܕܵܒ̣ܪ̈ܲܝ ܠܹܩܲܝܟ̇ܝ݁: ܪܘܼܚܵܐ ܕܫܵܘܒܵܐ ܬܒܲܪܬܹܟ̣ܝ ܒܠܸܒܵܐ ܕܝܲܡܡܹ̈ܐ.

ܟܙ:ܘܥܘܼܬ̣ܪܹܟ̣ܝ ܘܐܲܓ̣ܪܹܟ̣ܝ ܕܡ̣ܢ ܡܲܥܪ̈ܵܒܲܝܟ̇ܝ: ܟܠܗܘܿܢ ܓܒܲـ̈ـܝܵܐ ܩܪ̈ܲܒ̣ܬ̣ܵܢܲܝܟ̇ܝ ܘܡܲܠܵܚܲܝ̈ܟ̇ܝ ܘܒ̣ܵܕܼܩܲܝ̈ ܒܕܼܵܩܲܝ̈ܟ̇ܝ ܕܡ̣ܢ ܡܲܥܪ̈ܵܒܲܝܟ̇ܝ: ܟܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܲܝܟ̇ܝ: ܘܟ̣ܠܹܗ ܟܸܢܫܵܐ ܕܲܒ̣ܓ̣ܵܘܹܟ̣ܝ: ܢܸܦܠܘܿܢ ܒܠܒܵܐ ܕܝܲܡܡܹ̈ܐ ܒܝܵܘܡܵܐ ܕܡܲܦܘܼܠܬܹ̇ܟ̣ܝ.

ܟܚ:ܠܩܵܠܵܐ ܕܝܼܠܠܲܬܵܐ ܕܣܲܦܵܢܲܝ̈ܟ̇ܝ ܢܙܘܼܥܘܼܢ ܕܲܚܕܼܵܪ̈ܲܝܟ̇ܝ.

ܟܛ:ܘܢܸܚܬ̣ܘܼܢ ܡ̣ܢ ܣܦ̈ܝܼܢܲܝܗܘܿܢ ܟܠܗܘܿܢ ܕܵܒ̣ܪ̈ܲܝ ܠܹܩܹ̈ܐ: ܘܡܲܠܵܚܹ̈ܐ ܘܟ̣ܠܗܘܿܢ ܣܲܦܵܢܹ̈ܐ ܕܝܲܡܵܐ ܒܐܲܪܥܵܐ ܢܩܘܼܡܘܼܢ.

ܠ:ܘܢܲܝܠܠܘܼܢ ܥܠܲܝܟ̇ܝ ܝܑܼܠܠܬܵܐ ܪܲܒ̇ܬ̣ܵܐ ܘܡܲܪܝܼܪܬܵܐ: ܘܢܲܪܡܘܿܢ ܥܲܦܪܵܐ ܒܪܸ̈ܫܲܝܗܘܿܢ: ܘܢܸܬ̣ܦܲܠܦܠܘܼܢ ܒܩܸܛܡܵܐ.

ܠܐ:ܘܢܸܓ̇ܙܘܼܢ ܥܠܲܝܟ̇ܝ ܪܹ̈ܫܲܝܗܘܿܢ: ܘܢܸܬ̣ܟܲܒ̣ܢܘܼܢ ܣܲܩܹ̈ܐ: ܘܢܸܒ̣ܟ̇ܘܿܢ ܥܠܲܝܟ̇ܝ ܡܲܪܝܼܪܵܐܝܼܬ̣ ܒܡܲܪ̈ܩܕܼܵܬ̣ܵܐ.

ܠܒ:ܘܢܹܐܠܘܿܢ ܥܠܲܝܟ̇ܝ ܒܢܲܝ̈ܗܘܿܢ ܐܘܼܠ̈ܝܵܬܵܬ̣ܵܐ: ܘܢܹܐܡܪܘܼܢ: ܡܲܢ ܗ̄ܝܼ ܐܝܼܬ̣ ܗ̄ܘܼܵܬ̣ ܐܲܝܟ ܨܘܿܪ ܕܝܵܬ̣ܒܵܐ ܗ̄ܘܼܵܬ̣ ܒܓ̣ܵܘ ܝܲܡܵܐ.

ܠܓ:ܟܲܕܼ ܢܦܲܩ̣ ܩܸܢܝܵܢܹܟ̣ܝ ܡ̣ܢ ܝܲܡܵܐ: ܐܲܣܒܲܥܬ̇ܝ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܡ̣ܢ ܣܘܿܓ̣ܵܐܐ ܕܥܘܼܬ̣ܪܹܟ̣ܝ ܘܲܕ̇ܬܹܐܓ̣ܘܼܪܬܹ̇ܟ̣ܝ: ܐܲܥܬܲܪܬ̇ܝ ܡܲܠ̈ܟܹ̇ܐ ܕܐܲܪܥܵܐ.

ܠܕ:ܒܙܲܒ̣ܢܵܐ ܕܐܸܬ̇ܬ̇ܒܲܪܬ̇ܝ ܘܲܢܦܲܠܬ̇ܝ ܒܥܘܼܡܩܵܘ̈ܗܝ ܕܝܲܡܵܐ: ܬܹܐܓ̣ܘܿܪܬܹ̇ܟ̣ܝ ܘܟ̣ܠܹܗ ܟܸܢܫܹܟ̣ܝ ܢܦܲܠ̣ܘ ܒܓ̣ܵܘܹܟ̣ܝ.

ܠܗ:ܟܠܗܘܿܢ ܥܵܡܪ̈ܲܝ ܓܵܙܪ̈ܵܬ̣ܵܐ ܬܡܲܗܘ ܥܠܲܝܟ̇ܝ: ܘܡܲܠܟܲܝ̈ܗܘܿܢ ܬܘܲܪܘ ܘܕܲܡܲܥ ܐܲܦܲܝ̈ܗܘܿܢ.

ܠܘ:ܬܲܓܵܪܹ̈ܐ ܕܥܲܡܡܹ̈ܐ ܐܲܫܪܸܩ̣ܘ ܥܠܲܝܟ̇ܝ: ܠܐܲܒ̣ܕܵܢܵܐ ܗ̤ܘܲܝܬ̇ܝ ܘܠܲܝܬ̇ ܐܲܢ̄ܬ̇ܝ ܠܥܵܠܲܡ.

ܥܠ ܡܠܟܐ ܕܨܘܪ.

ܩܹܦܵܠܹܐܘܿܢ:ܟܚ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܸܡܲܪ ܠܪܲܒܵܐ ܕܨܘܿܪ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̇ܬ̇ܪܝܼܡ ܠܸܒܵܟ ܘܐܸܡܪܬ̇ ܕܐܲܠܵܗܵܐ ܐ̄ܢܵܐ: ܘܡܵܘܬ̇ܒ̣ܵܐ ܕܐܲܠܵܗܵܐ ܝܸܬ̣ܒܹ̇ܬ̣ ܒܠܸܒܵܐ ܕܝܲܡܡܹ̈ܐ: ܘܒܲܪܢܵܫܵܐ ܐܲܢ̄ܬ̇ ܘܠܵܐ ܗ̤ܘܲܝܬ̇ ܐܲܠܵܗܵܐ: ܘܲܚܫܲܒ̣ܬ̇ ܠܸܒܵܟ ܐܲܝܟ ܠܸܒܵܐ ܕܐܲܠܵܗܵܐ.

ܓ:ܕܲܠܡܵܐ ܚܲܟ̇ܝܼܡ ܐܲܢ̄ܬ̇ ܡ̣ܢ ܕܵܢܝܼܐܹܝܠ: ܐܵܘ ܟܲܣ̈ܝܵܬ̣ܵܐ ܚܙܲܝܬ̇ ܒܚܲܟ̇ܝܼܡܘܼܬ̣ܵܟ.

ܕ:ܘܲܒ̣ܣܘܼܟܵܠܵܟ ܥܒܲܕ̇ܬ̇ ܠܵܟ ܚܲܝܠܵܐ: ܘܲܚܡܲܠܬ̇ ܣܹܐܡܵܐ ܘܕܲܗܒ̣ܵܐ ܒܹܝܬ̣ ܓܲܙܲܝ̈ܟ.

ܗ:ܒܣܘܿܓ̣ܵܐܐ ܕܚܸܟ̣ܡ̱ܬ̣ܵܟ ܘܲܕ̇ܬܹܐܓ̣ܘܼܪܬܵܟ ܐܲܣܓܝܼܬ̇ ܥܘܼܬ̣ܪܵܟ: ܘܐܸܬ̇ܬ̇ܪܝܼܡ ܠܸܒܵܟ ܒܥܘܼܬ̣ܪܵܟ.

ܘ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܚܫܲܒ̣ܬ̇ ܠܸܒܵܟ ܐܲܝܟ ܠܸܒܵܐ ܕܐܲܠܵܗܵܐ.

ܙ:ܗܵܐ ܡܲܝܬܹ̇ܐ ܐ̄ܢܵܐ ܥܠܲܝܟ ܢܘܼܟ̣ܪ̈ܵܝܹܐ ܥܲܫܝܼܢܹ̈ܐ ܕܥܲܡܡܹ̈ܐ: ܘܢܸܫ̱ܡܛܘܼܢ ܣܲܝܦܲܝ̈ܗܘܿܢ ܥܲܠ ܫܘܼܦܪܵܗ̇ ܕܚܸܟ̣ܡ̱ܬ̣ܵܟ: ܘܲܢܛܲܢܦܘܼܢ ܫܘܼܒ̣ܚܵܟ.

ܚ:ܘܢܲܚܬ̣ܘܼܢܵܟ ܠܲܚܒ̣ܵܠܵܐ: ܘܲܬ̣ܡܘܼܬ̣ ܡܵܘܬܵܐ ܕܲܩܛܝܼ̈ܠܹܐ ܒܠܸܒܵܐ ܕܝܲܡܡܹ̈ܐ.

ܛ:ܕܲܠܡܵܐ ܐܵܡܲܪ ܐܲܢ̄ܬ̇ ܩܕܼܵܡ ܩܵܛܘܿܠܲܝ̈ܟ ܕܐܲܠܵܗܵܐ ܐ̄ܢܵܐ: ܡܸܛܠ ܕܒܲܪܢܵܫܵܐ ܐܲܢ̄ܬ̇ ܒܐܝܼܕܼܵܐ ܕܩܵܛܘܿܠܲܝ̈ܟ: ܘܠܵܐ ܗ̤ܘܲܝܬ̇ ܐܲܠܵܗܵܐ.

ܝ:ܒܐܝܼܕܼܵܐ ܕܥܘܼܪ̈ܠܹܐ ܢܘܼܟ̣ܪ̈ܵܝܹܐ ܬܡܘܼܬ̣: ܡܸܛܠ ܕܐܸܢܵܐ ܡܲܠܠܹ̇ܬ̣ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܒ:ܒܲܪܢܵܫܵܐ: ܐܲܠܝܼ ܐܘܿܠܝܼܬ̣ܵܐ ܥܲܠ ܡܲܠܟܵܐ ܕܨܘܿܪ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܢ̄ܬ̇ ܛܲܒ̣ܥܵܐ ܐܲܢ̄ܬ̇ ܕܲܕܼܡܘܼܬ̣ܵܐ ܕܲܡܠܹܐ ܚܸܟ̣ܡ̱ܬ̣ܵܐ: ܘܲܟ̣ܠܝܼܠܵܐ ܕܫܘܼܒ̣ܚܵܐ.

ܝܓ:ܒܲܥܕܸܢ ܦܲܪܕܲܝܣܹܗ ܕܐܲܠܵܗܵܐ ܗ̤ܘܲܝܬ̇: ܘܟ̣ܠܗܹܝܢ ܟܹܐܦܹ̈ܐ ܛܵـ̈ـܒ̣ܵܬ̣ܵܐ ܐܸܬ̣ܚܲܙܲܩܬ̇: ܣܲܪܕ̇ܘܿܢ: ܘܩܲܪܟܸܕܼܢܵܐ: ܘܲܙܡܲܪܓ̇ܕܼܵܐ: ܘܒܹܪܘܿܠܵܐ: ܘܣܲܦܝܼܠܵܐ: ܘܐܝܼܵܣܦܘܿܢ: ܘܲܩܪܘܼܣܛܸܠܘܿܣ: ܘܡܲܪ̈ܓܵܢܝܵܬ̣ܵܐ ܘܕܲܗܒ̣ܵܐ ܡ̣ܠܲܝܬ̇ ܒܹܝܬ̣ ܒܹܝܬ̣ ܓܲܙܲܝ̈ܟ: ܘܟܹܐܦܹ̈ܐ ܛܵـ̈ـܒ̣ܵܬ̣ܵܐ ܒܹܝܬ̣ ܚܡܵܠܲܝ̈ܟ: ܡ̣ܢ ܝܵܘܡܵܐ ܕܐܸܬ̣ܒ̇ܪܝܼܬ̇.

ܝܕ:ܘܲܗ̤ܘܲܝܬ̇ ܥܲܡ ܟܪܘܿܒ̣ܵܐ ܕܲܡܫܝܼܚ .ܡܲܛܲܠ: ܘܝܲܗ̄ܒ̣ܬܵܟ ܒܛܘܼܪܵܐ ܕܩܘܼܕܼܫܹܗ ܕܐܲܠܵܗܵܐ: ܘܲܗ̤ܘܲܝܬ̇ ܒܲܝܢܵܬ̣ ܟܹܐܦܹ̈ܐ ܕܢܘܼܪܵܐ.

ܝܗ:ܘܗܲܠܸܟ̣ܬ̇ ܕܠܵܐ ܡܘܼܡ ܒܐܘܼܪ̈ܚܵܬ̣ܵܟ: ܡ̣ܢ ܝܵܘܡܵܐ ܕܐܸܬ̣ܒ̇ܪܝܼܬ̇ ܥܕܲܡܵܐ ܕܐܹܫܬ̇ܟܲܚ ܒܵܟ ܥܵܘܼܠܵܐ.

ܝܘ:ܒܣܘܿܓ̣ܵܐܐ ܕܬܹܐܓ̣ܘܿܪܬܵܟ ܡ̣ܠܲܝܬ̇ ܓܵܘܵܟ ܥܵܘܼܠܵܐ: ܘܲܚܛܲܝܬ̇ ܘܲܩܛܲܠܬܵܟ ܡ̣ܢ ܛܘܼܪܹܗ ܕܐܲܠܵܗܵܐ: ܘܐܵܘܒ̇ܕܼܵܟ ܟܪܘܿܒ̣ܵܐ ܕܡܲܛܲܠ ܡ̣ܢ ܓܵܘ ܟܹܐܦܹ̈ܐ ܕܢܘܼܪܵܐ.

ܝܙ:ܥܲܠ ܕܐܸܬ̇ܬ̇ܪܝܼܡ ܠܸܒܵܟ ܒܫܘܼܦܪܵܟ: ܐܸܬ̣ܚܲܒ̇ܠܲܬ̤ ܚܸܟ̣ܡ̱ܬ̣ܵܟ ܥܲܡ ܫܘܼܦܪܵܟ: ܘܒܲܐܪܥܵܐ ܫܕܼܝ̇ܬ̣ܵܟ ܩܕܼܵܡ ܡܲܠ̈ܟܹ̇ܐ: ܘܝܲܗ̄ܒ̣ܬܵܟ ܠܗܘܿܢ ܠܚܸܙܘܵܐ.

ܝܚ:ܒܣܘܿܓ̣ܵܐܐ ܕܥܸܬܵܟ ܘܲܒ̣ܥܵܘܼܠܵܐ ܕܬܹܐܓ̣ܘܼܪܬܵܟ ܛܲܢܸܦ̣ܬ̇ ܡܲܩܕ̇ܫܵܟ: ܐܲܦܸܩ ܢܘܼܪܵܐ ܡ̣ܢ ܓܵܘܵܟ ܘܗ̤ܝ ܬܹܐܟ̣ܠܵܟ: ܘܐܸܥܒ̇ܕܼܵܟ ܩܸܛܡܵܐ ܒܐܲܪܥܵܐ: ܠܥܹܝܢ ܟܠ ܕܚܵܙܹ̇ܝܢ ܠܵܟ.

ܝܛ:ܘܟ̣ܠ ܕܝܵܕܼܥܝܼܢ ܠܵܟ ܒܹܝܬ̣ ܥܲܡܡܹ̈ܐ: ܢܸܬ̣ܡ̱ܗܘܿܢ ܥܠܲܝܟ: ܘܗܵܘܹ̇ܐ ܐܲܢ̄ܬ̇ ܠܐܲܒ̣ܕܵܢܵܐ: ܘܠܲܝܬ̇ ܐܲܢ̄ܬ̇ ܠܥܵܠܲܡ.

ܥܠ ܨܝܕܢ.

ܟܟ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܟܐ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܥܲܠ ܨܲܝܕܵܢ: ܘܐܸܬ̣ܢܲܒܵܐ ܥܠܹܝܗ̇.

ܟܒ:ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ̇ܝ ܨܲܝܕܵܢ: ܘܐܸܫܬܲܒܲܚ ܒܹܟ̣ܝ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܥܸܒ̣ܕܹ̇ܬ̣ ܒܵܗ̇ ܕܝܼܢܲܝ̈ ܘܐܸܬ̣ܩܲܕ̇ܫܹ̇ܬ̣ ܒܵܗ̇.

ܟܓ:ܘܫܲܕ̇ܪܹܬ̣ ܥܠܹܝܗ̇ ܡܵܘܬܵܢܵܐ ܘܲܕܼܡܵܐ ܒܫܘܼܩܹ̈ܝܗ̇: ܘܢܸܦܠܘܿܢ ܚܪ̈ܝܼܒܹܝܗ̇ ܒܓ̣ܵܘܵܗ̇ ܒܚܲܪܒܵܐ ܕܬܸܚܕ̇ܪܝܼܗ̇: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܟܕ:ܘܬ̣ܘܼܒ̣ ܠܵܐ ܢܸܗܘܹܐ ܠܲܕܼܒܹܝܬ̣ ܝܑܼܣܪܵܝܹܠ: ܓܸܕ̇ܕܹ̈ܐ ܡܲܪܝܼܪ̈ܵܬ̣ܵܐ ܘܟܹܐܒ̣ܵܐ ܕܲܡܢܲܘܸܠ: ܡ̣ܢ ܟܠܗܘܿܢ ܕܲܚܕܼܝܼܪܝܼܢ ܠܗܘܿܢ: ܘܲܡܨܲܥܪܝܼܢ ܠܗܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܹܐ ܡܵܪ̈ܵܘܵܬ̣ܵܐ.

ܟܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܵܐ ܕܟܲܢܫܹ̇ܬ̣ ܠܲܕܼܒܹܝܬ̣ ܝܑܼܣܪܵܝܹܠ ܡ̣ܢ ܥܲܡܡܹ̈ܐ ܕܐܸܬ̣ܒܲܕܲܪܘ ܒܲܝܢܵܬ̣ܗܘܿܢ: ܘܐܸܬ̣ܩܲܕ̇ܫܹ̇ܬ̣ ܒܗܘܿܢ ܠܥܹܝܢ ܥܲܡܡܹ̈ܐ: ܘܢܸܬ̇ܒ̣ܘܼܢ ܒܐܲܪܥܵܐ ܕܝܸܗ̄ܒܹ̇ܬ̣ ܠܥܲܒ̣ܕ̇ܝ ܝܲܥܩܘܿܒ̣.

ܟܘ:ܘܢܸܬ̇ܒ̣ܘܼܢ ܒܵܗ̇ ܒܫܸܠܝܵܐ: ܘܢܸܒ̣ܢܘܿܢ ܒܵـ̈ـܬܹ̇ܐ ܘܢܸܨܒ̣ܘܼܢ ܟܲܪ̈ܡܹܐ: ܘܢܸܬ̇ܒ̣ܘܼܢ ܒܣܲܒ̣ܪܵܐ: ܡܵܐ ܕܥܸܒ̣ܕܹ̇ܬ̣ ܕܝܼܢܹ̈ܐ ܡ̣ܢ ܟܠܗܘܿܢ ܥܲܡܡܹ̈ܐ ܕܲܚܕܼܵܪ̈ܲܝܗܘܿܢ: ܕܡܲܗܪܝܼܢ ܠܗܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܗܘܿܢ.

ܥܠ ܡܨܪܝܢ.

ܩܹܦܵܠܹܐܘܿܢ:ܟܛ.

ܐ:ܒܫܲܢ̄ܬܵܐ ܥܣܝܼܪܵܝܬܵܐ ܒܝܲܪܚܵܐ ܕܥܸܣܪܵܐ ܒܬܲܪܬܲܥܸܣܪܹ̈ܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܥܲܠ ܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܐܸܬ̣ܢܲܒܵܐ ܥܠܵܘܗܝ: ܘܥܲܠ ܟܠܵܗ̇ ܡܸܨܪܹܝܢ.

ܓ:ܡܲܠܸܠ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ ܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܬܲܢܝܼܢܵܐ ܪܲܒܵܐ ܕܪܲܒ̇ܝܼܥ ܒܓ̣ܵܘ ܢܲܗܪ̈ܵܘܵܬ̣ܵܐ: ܘܐܵܡܲܪ ܕܕܼܝܼܠܝ ܗ̄ܘܼ ܢܲܗܪܵܐ  ܘܐܸܢܵܐ ܥܒܲܕ̇ܬܹ̇ܗ.

ܕ:ܐܸܢܵܐ ܐܲܪܡܸܐ ܒܠܵܡܵܐ ܒܦܲܟܲܝ̈ܟ: ܘܐܲܕܼܒܸ̇ܩ ܒܓܸܦܲܝ̈ܟ ܢܘܼܢܹ̈ܐ ܕܢܲܗܪܵܟ: ܘܐܲܣܩܵܟ ܡܟܢ ܓܵܘ ܢܲܗܪܵܟ: ܘܟ̣ܠܗܘܿܢ ܢܘܼܢܹ̈ܐ ܕܢܲܗܪܵܟ: ܒܓܸܦܲܝ̈ܟ ܢܸܕܼܒ̇ܩܘܼܢ.

ܗ:ܘܐܲܪܡܹܝܟ ܒܡܲܕܼܒ̇ܪܵܐ ܠܵܟ ܘܲܠܟ̣ܠܗܘܿܢ ܢܘܼܢܹ̈ܐ ܕܢܲܗܪܵܟ: ܘܥܲܠ ܐܲܦܲܝ̈ ܚܲܩܠܵܐ ܬܸܦܸܠ: ܘܠܵܐ ܬܸܬ̣ܟܲܢܸܫ ܘܠܵܐ ܬܸܬ̣ܚܡܸܠ ܠܚܲܝ̄ܘܬ̣ܵܐ ܕܕܲܒ̣ܪܵܐ ܘܲܠܦܵܪܲܚܬ̣ܵܐ ܕܲܫܡܲܝܵܐ ܝܲܗ̄ܒ̣ܬܵܟ ܠܡܹܐܟ̣ܘܼܠܬܵܐ.

ܘ:ܕܢܸܕ̇ܥܘܼܢ ܟܠܗܘܿܢ ܥܵܡܘܿܪܹ̈ܝܗ̇ ܕܡܸܨܪܹܝܢ ܕܐܸܢܵܐ ܐ̄ܢܵܐ ܡܵܪܝܵܐ: ܥܲܠ ܕܲܗ̤ܘܲܝܬ̇ ܐܲܝܟ ܚܘܼܛܪܵܐ ܕܩܲܢܝܵܐ ܠܲܕܼܒܹܝܬ̣ ܝܑܼܣܪܵܝܹܠ.

ܙ:ܟܲܕܼ ܐܲܚܕ̇ܘܼܟ ܒܐܝܼܕܲܝ̈ܗܘܿܢ ܒܙܲܥ̣ܬ̇ ܐܝܼܕܲܝ̈ܗܘܿܢ: ܘܟܲܕܼ ܐܸܣܬ̇ܡܸܟ̣ܘ ܥܠܲܝܟ: ܐܸܬ̇ܬ̇ܒܲܪܬ̇ ܘܐܲܪܥܸܠ̣ܬ̇ ܚܲܨܲܝ̈ܗܘܿܢ.

ܚ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܡܲܝܬܸ̇ܐ ܐ̄ܢܵܐ ܥܠܲܝܟ ܚܲܪܒܵܐ: ܘܐܵܘܒܸ̇ܕܼ ܡܸܢܵܟ ܒܢܲܝ̈ܢܵܫܵܐ ܘܲܒ̣ܥܝܼܪܵܐ.

ܛ:ܘܬܸܗܘܹܐ ܐܲܪܥܵܐ ܕܡܸܨܪܹܝܢ ܠܲܚܒ̣ܵܠܵܐ ܘܲܠܚܘܼܪܒܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܥܲܠ ܕܐܸܡܲܪܬ̇ ܕܕܼܝܼܠܝ ܗ̄ܘܼ ܢܲܗܪܵܐ: ܘܐܸܢܵܐ ܥܒܲܕ̇ܬܹ̇ܗ.

ܝ:ܡܸܛܠ ܗܵܢܵܐ ܐܸܢܵܐ ܥܠܲܝܟ ܘܥܲܠ ܢܲܗܪܵܟ: ܘܐܸܬ̇ܠܝܼܗ̇ ܠܐܲܪܥܵܐ ܕܡܸܨܪܹܝܢ ܠܲܚܒ̣ܵܠܵܐ ܘܲܠܚܘܼܪܒܵܐ: ܡ̣ܢ ܡܲܓܕ̇ܠܵܐ ܕܣܘܿܢܵܐ ܘܲܥܕܲܡܵܐ ܠܲܬ̣ܚܘܼܡܵܐ ܕܟ̣ܘܼܫ.

ܝܐ:ܠܵܐ ܬܸܥܒܲܪ ܒܵܗ̇ ܪܸܓ̣ܠܵܐ ܕܒܲܪܢܵܫܵܐ: ܐܵܦܠܵܐ ܦܲܪܣܬ̣ܵܐ ܕܲܒ̣ܥܝܼܪܵܐ: ܘܠܵܐ ܬܸܬܹ̇ܒ̣ ܐܲܪܒ̇ܥܝܼܢ ܫܢܝܼ̈ܢ.

ܝܒ:ܘܐܸܬ̇ܠܝܼܗ̇ ܠܐܲܪܥܵܐ ܕܡܸܨܪܹܝܢ ܠܲܚܒ̣ܵܠܵܐ: ܒܲܝܢܵܬ̣ ܡܕܼܝܼ̈ܢܵܬ̣ܵܐ ܕܨܲܕܼܝܵـ̈ـܢ: ܘܢܸܗܘ̈ܝܵܢ ܡܕܼܝܼ̈ܢܵܬ̣ܵܗ̇ ܠܲܚܒ̣ܵܠܵܐ ܐܲܪܒ̇ܥܝܼܢ ܫܢܝܼ̈ܢ: ܒܲܝܢܵܬ̣ ܡܕܼܝܼ̈ܢܵܬ̣ܵܐ ܕܚܲܪ̈ܒ̣ܵܢ: ܘܐܹܒܲܕ̇ܪܝܼܗ̇ ܠܡܸܨܪܹܝܢ ܒܥܲܡܡܹ̈ܐ: ܘܐܸܕܼܪܸܐ ܐܸܢܘܿܢ ܒܲܡܕܼܝܼ̈ܢܵܬ̣ܵܐ.

ܝܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܵܬܲܪ ܐܪܒ̇ܥܝܼܢ ܫܢ̈ܝܼܢ: ܐܹܟܲܢܸܫ ܐܸܢܘܿܢ ܠܡܸܨܪ̈ܵܝܹܐ ܡ̣ܢ ܥܲܡܡܹ̈ܐ ܕܐܸܬ̣ܒܲܕܲܪܘ ܒܲܝܢܵܬ̣ܗܘܿܢ.

ܝܕ:ܘܐܲܗܦܸܟ ܫܒ̣ܝܼܬ̣ܵܗ̇ ܕܡܸܨܪܹܝܢ: ܘܐܵܘܬܸ̇ܒ̣ ܐܸܢܘܿܢ ܒܐܲܪܥܵܐ ܕܦܲܬ̣ܪܘܿܣ: ܒܐܲܪܥܵܐ ܕܐܸܙܕܲܒ̣ܵܢܘ ܡܸܢܵܗ̇: ܘܢܸܗܘܘܿܢ ܬܲܡܵܢ ܡܲܠܟ̇ܘܼܬ̣ܵܐ ܡܲܟ̇ܝܼܟ̣ܬܵܐ.

ܝܗ:ܘܬܸܗܘܹܐ ܡܲܟ̇ܝܼܟ̣ܵܐ ܡ̣ܢ ܟܠܗܹܝܢ ܡܲܠܟ̇ـ̈ـܘܵܬ̣ܵܐ: ܘܬ̣ܘܼܒ̣ ܠܵܐ ܬܸܫܬܲܩܲܠ ܥܲܠ ܥܲܡܡܹ̈ܐ: ܘܐܲܙܥܲܪ ܐܸܢܘܿܢ ܕܠܵܐ ܢܫܲܥܒ̇ܕܼܘܼܢ ܠܥܲܡܡܹ̈ܐ.

ܝܘ:ܘܬ̣ܘܼܒ̣ ܠܵܐ ܢܸܗܘܘܿܢ ܠܲܕܼܒܹܝܬ̣ ܝܑܼܣܪܵܝܹܠ ܠܣܲܒ̣ܪܵܐ ܘܲܠܥܘܼܗܕܵܢܵܐ ܕܥܵܘܼܠܵܐ: ܥܲܠ ܕܐܸܙܲܠܘ ܒܵܬܲܪܗܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܹܐ ܡܵܪ̈ܵܘܵܬ̣ܵܐ.

ܝܙ:ܒܥܸܣܪܝܼܢ ܘܲܫܒܲܥ ܫܢܝܼ̈ܢ: ܒܝܲܪܚܵܐ ܩܲܕܼܡܵܝܵܐ ܒܚܲܕܼ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܚ:ܒܲܪܢܵܫܵܐ: ܢܒ̣ܘܼܟܲܕܼܢܵܨܲܪ ܡܲܠܟܵܐ ܕܒ̣ܵܒܹܠ: ܫܲܥ̣ܒܸ̇ܕܼ ܠܟ̣ܠܹܗ ܚܲܝܠܹܗ ܫܘܼܥܒܵܕܼܵܐ ܪܲܒܵܐ ܥܲܠ ܨܘܿܪ: ܒܟ̣ܠ ܪܹܫ ܩܘܼܕܼܚܵـ̈ـܬ̣ܵܐ: ܘܟ̣ܠ ܟܬܸܦ ܚܠܝܼܨܵܐ: ܘܐܲܓ̣ܪܵܐ ܠܵܐ ܐܸܬ̣̱ܝܼܗܸܒ̣ ܠܹܗ ܘܲܠܚܲܝܠܹܗ ܡ̣ܢ ܨܘܿܪ: ܥܲܠ ܫܘܼܥܒܵܕܼܵܐ ܕܫܲܥ̣ܒ̇ܕܼܵܗ̇.

ܝܛ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܝܵܗܹ̇ܒ̣ ܐ̄ܢܵܐ ܠܲܢܒ̣ܘܼܟܲܕܼܢܵܨܲܪ ܡܲܠܟܵܐ ܕܒ̣ܵܒܹܠ: ܐܲܪܥܵܐ ܕܡܸܨܪܹܝܢ: ܘܢܸܫܩܘܿܠ ܩܸܢܝܵܢܵܗ̇ ܘܢܸܫܒܹ̇ܐ ܫܒ̣ܝܼܬܵܗ̇ ܘܢܸܒ̇ܘܿܙ ܒܸܙܬ̣ܵܗ̇: ܘܬܸܗܘܹܐ ܐܲܓ̣ܪܵܐ ܠܚܲܝܠܹܗ.

ܟܟ:ܘܲܚܠܵܦ ܦܵܥܠܘܼܬ̣ܵܐ ܕܲܥܒܲܕܼ ܒܨܘܿܪ: ܝܸܗ̄ܒܹ̇ܬ̣ ܠܹܗ ܠܐܲܪܥܵܐ ܕܡܸܨܪܹܝܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܟܐ:ܒܹܗ ܒܝܵܘܡܵܐ ܗܵܘܿ: ܐܲܕܼܢܲܚ ܩܲܪܢܵܐ ܠܲܕܼܒܹܝܬ̣ ܝܑܼܣܪܵܝܹܠ: ܘܐܸܦ̮ܬܲܚ ܦܘܼܡܵܟ ܒܲܝܢܵܬ̣ܗܘܿܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܠ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܝܠܸܠܘ ܘܐܸܡܲܪܘ ܐܘܿܗ̇ ܠܝܵܘܡܵܐ.

ܓ:ܕܩܲܪܝܼܒ̣ ܗ̄ܘܼ ܝܵܘܡܵܐ ܩܲܪܝܼܒ̣ ܗ̄ܘܼ ܝܵܘܡܹܗ: ܕܡܵܪܝܵܐ: ܝܵܘܡܵܐ ܕܲܥܢܵܢܵܐ ܘܙܲܒ̣ܢܵܐ ܕܥܲܡܡܹ̈ܐ.

ܕ:ܘܬܹܐܬܹܐ ܚܲܪܒܵܐ ܥܲܠ ܡܸܨܪܹܝܢ: ܘܢܸܗܘܸܐ ܒܘܼܠܗܵܝܵܐ ܒܟ̣ܘܼܫ: ܡܵܐ ܕܲܢܦܲܠ̣ܘ ܚܪ̈ܝܼܒܹܐ ܒܡܸܨܪܹܝܢ: ܘܢܸܣܒ̣ܘܼܢ ܥܘܼܬ̣ܪܵܗ̇ ܘܢܸܥܩ̄ܪܘܼܢ ܫܲܬ̣ܐ̱ܣܹ̈ܝܗ̇.

ܗ:ܘܟ̣ܘܼܫܵܝܹ̈ܐ: ܘܦܘܿܛܵܝܹ̈ܐ: ܘܠܹܘܒ̣ܵܝܹ̈ܐ: ܘܟ̣ܠܵܗ̇ ܥܵܪܵܒ̣ܝܼܵܐ ܘܟ̣ܘܿܒ̣: ܘܲܒ̣ܢܲܝ̈ ܐܲܪܥܵܐ ܕܲܩܝܵܡܵܐ ܥܲܡܗܘܿܢ ܒܚܲܪܒܵܐ ܢܸܦܠܘܼܢ.

ܘ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܢܸܦܠܘܼܢ ܣܵܡܟܹ̇ܝ̈ܗ̇ ܕܡܸܨܪܹܝܢ: ܘܢܸܬ̇ܬ̇ܒܲܪ ܚܲܝܠܵܐ ܕܥܘܼܫܢܵܗ̇: ܡ̣ܢ ܡܲܓܕ̇ܠܵܐ ܕܣܘܿܢܵܐ ܒܚܲܪܒܵܐ ܢܸܦܠܘܼܢ ܒܵܗ̇: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܙ:ܘܢܸܚ̱ܪ̈ܒ̣ܵܢ ܒܲܝܢܵܬ̣ ܐܲܪ̈ܥܵܬ̣ܵܐ ܕܚܲܪ̈ܒ̣ܵܢ: ܘܲܡܕܼܝܼ̈ܢܵܬ̣ܗܹܝܢ ܒܲܝܢܵܬ̣ ܡܕܼܝܼ̈ܢܵܬ̣ܵܐ ܚܲܪ̈ܒ̣ܵܬ̣ܵܐ ܢܸܗܘ̈ܝܵܢ.

ܚ:ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܕܫܹܒ̣ܩܹ̇ܬ̣ ܢܘܼܪܵܐ ܒܡܸܨܪܹܝܢ: ܘܐܸܬ̇ܬ̇ܒܲܪܘ ܟܠܗܘܿܢ ܡܥܲܕ̇ܪ̈ܵܢܹܝܗ̇.

ܛ:ܒܹܗ ܒܝܵܘܡܵܐ ܗܵܘܿ: ܢܸܦܩܘܼܢ ܡܲܠܲܐܟܹ̈ܐ ܡ̣ܢ ܩܕܼܵܡܲܝ̈ ܡܣܲܪܗܒ̣ܵܐܝܼܬ̣: ܠܲܡܚܲܒܵܠܘܼ ܠܟ̣ܘܼܫ ܕܝܵܬ̣ܒܵܐ ܒܫܸܠܝܵܐ: ܘܢܸܗܘܹܐ ܒܗܘܿܢ ܕܠܘܼܚܝܵܐ ܒܝܵܘܡܵܗ̇ ܕܡܸܨܪܹܝܢ: ܘܗܵܐ ܡܲܛܝܼ.

ܝ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܲܫܠܸܡ ܐ̄ܢܵܐ ܥܘܼܬ̣ܪܵܗ̇ ܕܡܸܨܪܹܝܢ: ܒܝܲܕܼ ܢܒ̣ܘܼܟܲܕ̇ܢܵܨܲܪ ܡܲܠܟܵܐ ܕܒ̣ܵܒܹܠ.

ܝܐ:ܠܹܗ ܘܲܠܥܲܫܝܼ̈ܢܹܐ ܕܥܲܡܹܗ ܕܐܵܬܹ̇ܝܢ ܠܲܡܚܲܒܵܠܘܼ ܠܐܲܪܥܵܐ: ܘܢܸܫ̱ܡܛܘܼܢ ܣܲܝܦܲܝ̈ܗܘܿܢ ܥܲܠ ܡܸܨܪܹܝܢ: ܘܢܸܡܠܘܿܢܵܗ̇ ܠܐܲܪܥܵܐ ܚܪ̈ܝܼܒܹܐ.

ܝܒ:ܘܐܸܥܒܸ̇ܕܼ ܢܲܗܪ̈ܵܘܵܬ̣ܵܐ ܠܲܚܒ̣ܵܠܵܐ: ܘܐܲܫ̱ܠܡܝܼܗ̇ ܠܐܲܪܥܵܐ ܒܐܝܼܕܼܵܐ ܕܒ̣ܝܼܫܹ̈ܐ: ܘܐܲܚ̱ܪܒ̣ܝܼܗ̇ ܠܐܲܪܥܵܐ ܒܲܡܠܹܐܵܗ̇ ܒܐܝܼܕܼܵܐ ܕܢܘܼܟ̣ܪ̈ܵܝܹܐ: ܐܸܢܵܐ ܡܵܪܝܵܐ ܡܲܠܠܹ̇ܬ̣.

ܝܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܵܘܒܸ̇ܕܼ ܐ̄ܢܵܐ ܦܬܲܟ̣ܪܹ̈ܐ: ܘܲܡܒܲܛܸܠ ܐ̄ܢܵܐ ܕܸܚ̈ܠܵܬ̣ܵܐ ܡ̣ܢ ܡܲܦܲܣ: ܘܬ̣ܘܼܒ̣ ܠܵܐ ܢܸܗܘܸܐ ܪܲܒܵܐ ܒܐܲܪܥܵܐ ܕܡܸܨܪܹܝܢ.

ܝܕ:ܘܐܹܒܲܛܠܝܼܗ̇ ܠܐܲܪܥܵܐ ܕܦܲܬ̣ܪܘܿܣ: ܘܐܸܫܒ̇ܘܿܩ ܢܘܼܪܵܐ ܒܨܵܥܵܢ: ܘܐܸܥܒܸ̇ܕܼ ܕܝܼܢܵܐ ܒܢܘܿ.

ܝܗ:ܘܐܹܫܘܿܕܼ ܪܘܼܓ̣ܙܝ ܥܲܠ ܣܝܼܢ ܥܘܼܫܢܵܗ̇ ܕܡܸܨܪܹܝܢ: ܘܐܵܘܒܸ̇ܕܼ ܥܘܼܬ̣ܪܵܗ̇ ܕܢܘܿ.

ܝܘ:ܘܐܸܫܒ̇ܘܿܩ ܢܘܼܪܵܐ ܒܡܸܨܪܹܝܢ: ܘܢܸܬ̇ܕܲܠܲܚ ܣܝܼܢ: ܘܢܘܿ ܬܸܬ̇ܪܲܥ: ܘܡܲܦܲܣ ܬܸܗܘܹܐ ܠܡܲܦܘܼܠܬܵܐ.

ܝܙ:ܘܐܲܝܟ ܡܲـ̈ـܝܵܐ ܢܸܗܘܘܿܢ ܓܲܕ̇ܘܼ̈ܕܹܐ ܕܡܲܦܝܼܒܲܣܬ̇: ܘܲܒ̣ܚܲܪܒܵܐ ܢܸܦܠܘܿܢ: ܘܲܒ̣ܫܸܒ̣ܝܵܐ ܢܹܐܙܠ̄ܘܼܢ.

ܝܚ:ܘܲܒ̣ܬܲܚܦܝܼܣ ܢܸܥܪܲܒ̣ ܝܵܘܡܵܐ: ܡܵܐ ܕܬܸܒ̣ܪܹܬ̣ ܬܲܡܵܢ ܚܘܼܛܪܵܗ̇ ܕܡܸܨܪܹܝܢ: ܘܲܒ̣ܛܸܠ ܡܸܢܵܗ̇ ܫܘܼܒ̣ܚܵܐ ܕܥܘܼܫܢܵܗ̇: ܘܲܬ̣ܟܲܣܹܝܗ̇ ܥܢܵܢܵܐ: ܘܲܒ̣̈ܢܵܬ̣ܵܗ̇ ܢܹܐ̈ܙܵܠ̄ܢ ܒܫܸܒ̣ܝܵܐ.

ܝܛ:ܘܐܸܥܒܸ̇ܕܼ ܕܝܼܢܵܐ ܒܡܸܨܪܹܝܢ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܟܟ:ܒܲܫܢܲܬ̣ ܚܕܲܥܣܲܪܹ̈ܐ: ܒܲܫܒܲܥܬ̣ܵܐ ܒܝܲܪܚܵܐ ܩܲܕܼܡܵܝܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܟܐ:ܒܲܪܢܵܫܵܐ: ܕܪܵܥܹܗ ܕܦܸܪܥܘܿܢ ܡܲܠܟܵܐ ܕܡܸܨܪܹܝܢ ܬܸܒ̣ܪܹܬ̣: ܘܠܵܐ ܡܸܬ̣ܥ̱ܨܸܒ̣ ܕܬܸܗܘܹܐ ܠܹܗ ܐܵܣܝܘܼܬ̣ܵܐ: ܘܠܵܐ ܢܸܬ̇ܬ̇ܣܝܼܡ ܥܠܵܘܗܝ ܡܲܠܲܓ̣ܡܵܐ: ܘܠܵܐ ܢܸܬ̣ܥ̱ܨܸܒ̣ ܘܠܵܐ ܢܸܬ̣ܚ̄ܠܸܡ: ܕܢܹܐܚܘܿܕܼ ܣܲܝܦܵܐ.

ܟܒ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܲܒ ܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܐܹܬܲܒܲܪ ܕܪ̈ܵܥܵܘܗܝ ܥܲܫܝܼ̈ܢܹܐ: ܘܐܲܪܡܸܐ ܣܲܝܦܵܐ ܡ̣ܢ ܐܝܼܕܼܵܘ̈ܗܝ.

ܟܓ:ܘܐܹܒܲܕܪܝܼܗ̇ ܠܡܸܨܪܹܝܢ ܒܥܲܡܡܹ̈ܐ: ܘܐܸܕܼܪܸܐ ܐܸܢܘܿܢ ܒܲܡܕܼܝܼ̈ܢܵܬ̣ܵܐ.

ܟܕ:ܘܐܹܚܲܝܸܠ ܕܪ̈ܵܥܵܘܗܝ ܕܡܲܠܟܵܐ ܕܒ̣ܵܒܹܠ: ܘܐܸܬܸ̇ܠ ܣܲܝܦܝ ܒܐܝܼܕܼܵܘ̈ܗܝ: ܘܢܸܦܣܘܿܩ ܕܪ̈ܵܥܘܗܝ ܕܦܸܪܥܘܿܢ: ܘܢܸܬ̇ܬܲܢܲܚ ܬܸܢ̈ܚܵܬ̣ܵܐ ܕܲܩܛܝܼ̈ܠܹܐ ܩܕܼܵܡܵܘܗܝ.

ܟܗ:ܘܐܹܥܲܫܸܢ ܕܪ̈ܵܥܵܘܗܝ ܕܡܲܠܟܵܐ ܕܒ̣ܵܒܹܠ: ܘܲܕܼܪ̈ܵܥܵܘܗܝ ܕܦܸܪܥܘܿܢ ܢܸܦܠܘܿܢ: ܘܢܸܕ̇ܥܘܼܢ ܕܐܸܢܵܐ ܡܵܪܝܵܐ: ܡܵܐ ܕܝܸܗ̄ܒܹ̇ܬ̣ ܣܲܝܦܝ ܒܐܝܼܕܼܵܘ̈ܗܝ ܕܡܲܠܟܵܐ ܕܒ̣ܵܒܹܠ: ܘܫܲܡ̣ܛܹܗ ܥܲܠ ܐܲܪܥܵܐ ܕܡܸܨܪܹܝܢ.

ܟܘ:ܘܐܹܒܲܕ̇ܪܝܼܗ̇ ܠܡܸܨܪܹܝܢ ܒܥܲܡܡܹ̈ܐ: ܘܐܸܕܼܪܸܐ ܐܸܢܘܿܢ ܒܲܡܕܼܝܼ̈ܢܵܬ̣ܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܩܹܦܵܠܹܐܘܢ:ܠܐ.

ܐ:ܒܲܫܢܲܬ̤ ܚܕܲܥܸܣܪܹ̈ܐ ܒܝܲܪܚܵܐ ܬܠܝܼܬܵܝܵܐ ܒܚܲܕܼ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܸܡܲܪ ܠܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܲܠܥܘܼܫܢܹܗ: ܠܡܲܢ ܕܡܲܝܬ̇ ܒܪܲܒ̇ܘܼܬ̣ܵܟ.

ܓ:ܗܵܐ ܐܵܬ̣ܘܿܪܵܝܵܐ ܐܲܪܙܵܐ ܕܠܸܒ̣ܢܵܢ: ܕܫܲܦܝܼܪ̈ܵܢ ܣܵܘ̈ܟܵܘܗܝ: ܘܥܲܒ̇ܝܼܛ ܛܸܠܵܠܹܗ: ܘܪܵܡܵܐ ܩܵܘܡܬܹܗ: ܘܒܲܝܢܵܬ̣ ܥܲܒ̇ܝܼ̈ܛܹܐ ܗܘ̤ܵܬ̣ ܡܵܘܥܝܼܬܹܗ.

ܕ:ܡܲـ̈ـܝܵܐ ܪܲܒ̇ܝܘܼܗܝ: ܘܲܬ̣ܗܘܿܡܵܐ ܐܲܪܝܼܡܹܗ: ܘܥܲܠ ܢܲܗܪ̈ܵܘܵܬ̣ܵܐ ܚܸܕܼܪܲܬ̤ ܢܸܨܒ̇ܬܹܗ: ܘܣܵܘܟܵܘ̈ܗܝ ܐܲܪܡܝܼ ܥܲܠ ܟܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ.

ܗ:ܡܸܛܠ ܗܵܢܵܐ ܐܸܬ̇ܬ̇ܪܝܼܡܲܬ̤ ܩܵܘܡܬܹܗ ܛܵܒ̣ ܡ̣ܢ ܟܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ: ܘܲܣܓܝܼ̈ ܣܲܪ̈ܥܸܦܝܵܬܹܗ ܘܝܼܪܸܟ ܣܵܘ̈ܟܵܘܗܝ: ܡ̣ܢ ܣܘܿܓ̣ܵܐܐ ܕܡܲـ̈ـܝܵܐ ܕܪܲܒ̇ܝܼܘܗܝ.

ܘ:ܒܣܵܘ̈ܟܵܘܗܝ ܐܲܩܢܲܬ̤ ܟܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ: ܘܲܬ̣ܚܹܝܬ̣ ܥܵܘܦܵܘ̈ܗܝ ܝܸܠܕܲܬ̤ ܟܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܘܲܒ̣ܛܸܠܵܠܹܗ ܝܼܬܸܒ̣ܘ ܥܲܡܡܹ̈ܐ ܣܲܓ̇ܝܼ̈ܐܹܐ.

ܙ:ܘܫܲܦܝܼܪ ܗ̄ܘܼܵܐ ܒܪܲܒ̇ܘܼܬܹܗ ܘܲܒ̣ܣܘܿܓ̣ܵܐܐ ܕܣܵܘ̈ܟܵܘܗܝ: ܡܸܛܠ ܕܲܗܘ̤ܵܘ ܥܸܩܵܪ̈ܵܘܗܝ ܒܡܲـ̈ـܝܵܐ ܣܲܓ̇ܝܼ̈ܐܹܐ.

ܚ:ܐܲܪ̈ܙܹܐ ܠܵܐ ܥܲܒ̣ܪܘܼܗܝ ܒܦܲܪܕܲܝܣܹܗ ܕܐܲܠܵܗܵܐ: ܘܥܲܪ̈ܩܹܐ ܠܵܐ ܕܡܵܘ ܠܣܵܘ̈ܟܵܘܗܝ: ܘܕܼܘܼ̈ܠܒܹ̇ܐ ܠܵܐ ܗܘ̤ܵܘ ܐܲܝܟ ܥܵܘܦܵܘ̈ܗܝ: ܘܟ̣ܠ ܐܝܼܠܵܢ ܒܦܲܪܕܲܝܣܹܗ ܕܐܲܠܵܗܵܐ ܠܵܐ ܕܵܡܹ̇ܐ ܠܹܗ ܒܫܘܼܦܪܹܗ.

ܛ:ܫܲܦܝܼܪܵܐ ܥܒܲܕ̇ܬܹ̇ܗ ܒܣܘܿܓ̣ܵܐܐ ܕܣܵܘܟܵܘ̈ܗܝ: ܘܛܲܢܵܘ ܒܹܗ ܟܠܗܘܿܢ ܐܝܼܠܵܢܹ̈ܐ ܕܲܥܕܸܢ ܦܲܪܕܲܝܣܹܗ ܕܐܲܠܵܗܵܐ.

ܝ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܬ̇ܬ̇ܪܝܼܡ ܒܩܵܘܡܬܹܗ: ܘܫܸܘܚܲܬ̤ ܡܵܘܥܝܼܬܹܗ ܒܲܝܢܵܬ̣ ܥܲܒ̇ܝܼܛܹ̈ܐ: ܘܐܸܬ̇ܬ̇ܪܝܼܡ ܠܸܒܹ̇ܗ ܒܪܵܡܘܼܬܹܗ.

ܝܐ:ܐܲܫ̱ܠܡܝܼܘܗܝ ܒܝܲܕܼ ܬܲܩܝܼܦܵܐ ܕܥܲܡܡܹ̈ܐ: ܘܢܸܥܒܸ̇ܕܼ ܠܹܗ ܐܲܝܟ ܚܛܝܼܬܹܗ ܘܢܵܘܒ̇ܕܼܝܼܘܗܝ.

ܝܒ:ܘܢܵܘܒ̇ܕܼܘܼܢܹܗ ܢܘܼܟ̣ܪ̈ܵܝܹܐ ܥܲܫܝܼܢܹ̈ܐ ܕܥܲܡܡܹ̈ܐ: ܘܢܲܪܡܘܿܢܹܗ ܒܛܘܼܪܹ̈ܐ: ܘܲܒ̣ܟ̣ܠܗܘܿܢ ܢܲܚ̈ܠܹܐ ܢܸܦ̈ܠܵܢ ܣܵܘ̈ܟܵܘܗܝ: ܘܢܸܬ̇ܬܲܒ̇ܪ̈ܵܢ ܣܲܪ̈ܥܸܦܝܵܬܹܗ ܒܟ̣ܠܗܘܿܢ ܢܲܚ̈ܠܹܐ ܕܐܲܪܥܵܐ: ܘܢܸܚܬܘܼܢ ܡ̣ܢ ܛܸܠܵܠܹܗ ܟܠܗܘܿܢ ܥܲܡܡܹ̈ܐ ܕܐܲܪܥܵܐ: ܘܢܸܫܒ̇ܩܘܼܢܹܗ.

ܝܓ:ܘܡܵܐ ܕܲܢܦܲܠ̣: ܬܸܫܟܲܢ ܥܠܵܘܗܝ ܟܠܵܗ̇ ܦܵܪܲܚܬܵܐ ܕܲܫܡܵܝܵܐ: ܘܲܬ̣ܚܹܝܬ̣ ܣܲܪ̈ܥܸܦܝܵܬܹܗ ܬܸܗܘܹܐ ܟܠܵܗ̇ ܚܲܝ̄ܘܬ̣ܵܐ ܕܕܲܒ̣ܪܵܐ.

ܝܕ:ܕܠܵܐ ܢܸܬ̇ܬ̇ܪܝܼܡܘܼܢ ܒܩܵܘ̈ܡܵܬ̣ܗܘܿܢ ܟܠܗܘܿܢ ܐܝܼܠܵܢܹ̈ܐ ܕܡܲـ̈ـܝܵܐ: ܘܠܵܐ ܢܸܫ̱ܘ̈ܚܵܢ ܡܵܘ̈ܥܝܵܬ̣ܗܘܿܢ ܒܲܝܢܵܬ̣ ܥܲܒ̇ܝܼܛܹ̈ܐ: ܘܠܵܐ ܢܩܘܼܡܘܼܢ ܘܠܵܐ ܢܸܗܘܘܿܢ ܐܲܟ̣ܘܵܬ̣ܗܘܿܢ ܟܠ ܕܫܵܬܹ̇ܝܢ ܡܲـ̈ـܝܵܐ: ܡܸܛܠ ܕܟ̣ܠܗܘܿܢ ܠܡܵܘܬܵܐ ܐܸܣܬ̇ܠܸܡܘ: ܒܐܲܪܥܵܐ ܬܲܚܬܵܝܬܵܐ: ܒܲܝܢܵܬ̣ ܒܢܲܝ̈ܢܵܫܵܐ ܕܢܵܚܬ̇ܝܼܢ ܠܓ̣ܘܼܒܵܐ.

ܝܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܝܵܘܡܵܐ ܕܲܢ̣ܚܸܬ̣ ܠܲܫܝܘܿܠ: ܥܸܒ̣ܕܹ̇ܬ̣ ܐܸܒ̣ܠܵܐ: ܘܟܲܣܝܼܬ̣ ܥܠܵܘܗܝ ܬܗܘܿܡܵܐ: ܘܲܟ̣ܠܹ̇ܝܬ̣ ܢܲܗܪ̈ܵܘܵܬܹܗ: ܘܐܸܬ̣ܟ̇ܠܝܼܘ ܡܲـ̈ـܝܵܐ ܣܲܓ̇ܝܼ̈ܐܹܐ: ܘܐܲܟ̣ܡ̇ܪܹܬ̣ ܥܠܵܘܗܝ ܠܠܸܒ̣ܢܵܢ: ܘܟ̣ܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ ܐܸܬ̣ܥܲܝܲܦܘ.

ܝܘ:ܡ̣ܢ ܩܵܠܵܐ ܕܡܲܦܘܼܠܬܹ̇ܗ ܐܸܬ̇ܬ̇ܙܝܼܥܲܬ̤ ܐܲܪܥܵܐ: ܘܟܲܕܼ ܐܲܚܸܬ̇ܬܹ̇ܗ ܠܲܫܝܘܿܠ ܥܲܡ ܢܵܚ̈ܬܲܝ ܓܘܼܒܵܐ: ܐܸܬ̣ܒܲܝܲܐܘܼ ܒܐܲܪܥܵܐ ܬܲܚܬܵܝܬܵܐ: ܟܠܗܘܿܢ ܐܝܼܠܵܢܹ̈ܐ ܕܲܥܕܸܢ: ܘܲܓ̣ܒܲـ̈ـܝܵܐ ܫܲܦܝܼܪܹ̈ܐ ܕܠܸܒ̣ܢܵܢ ܕܫܵܬܹ̇ܝܢ ܡܲـ̈ـܝܵܐ.

ܝܙ:ܐܵܦ ܗܸܢܘܿܢ ܢܚܸܬ̣ܘ ܥܲܡܹܗ ܠܲܫܝܘܿܠ ܠܘܵܬ̣ ܩܛܝܼܠܲܝ̈ ܣܲܝܦܵܐ: ܘܙܲܪܥܹܗ ܝܼܬܸܒ̣ ܒܛܸܠܵܠܹܗ ܒܲܝܢܵܬ̣ ܥܲܡܡܹ̈ܐ.

ܝܚ:ܠܐܲܝܢܵܐ ܡ̣ܢ ܐܝܼܠܵܢܹ̈ܐ ܕܲܥܕܸܢ ܐܸܬ̇ܕܲܡܝܼܬ̇ ܒܫܘܼܒ̣ܚܵܐ ܘܲܒ̣ܪܲܒ̇ܘܼܬ̣ܵܐ: ܘܲܢ̣ܚܸܬ̇ܬ̇ ܥܲܡ ܐܝܼܠܵܢܹ̈ܐ ܕܲܥܕܸܢ ܠܐܲܪܥܵܐ ܬܲܚܬܵܝܬܵܐ: ܒܲܝܢܵܬ̣ ܥܘܼܪ̈ܠܹܐ ܬܸܫܟܲܒ̣: ܥܲܡ ܐܲܝܠܹܝܢ ܕܲܩܛܝܼܠܝܼܢ ܒܣܲܝܦܵܐ: ܗܵܢܵܘ ܦܸܪܥܘܿܢ ܘܟܠܹܗ ܚܲܝܠܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܠܒ.

ܐ:ܒܲܫܢܲܬ̣ ܚܕܲܥܸܣܪܹ̈ܐ ܒܝܲܪܚܵܐ ܕܲܬ̣ܪܸܥܣܲܪ: ܒܚܲܕܼ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܲܠܝܼ ܐܘܿܠܝܼܬ̣ܵܐ ܥܲܠ ܦܸܪܥܘܿܢ ܡܲܠܟܵܐ ܕܡܸܨܪܹܝܢ: ܘܐܸܡܲܪ ܠܹܗ: ܠܐܲܪܥܵܐ ܕܥܲܡܡܹ̈ܐ ܐܸܬ̇ܕܲܡ̣ܝܼܬ̇: ܘܐܲܢ̄ܬ̇ ܐܲܝܟ ܬܲܢܝܼܢܵܐ ܐܲܢ̄ܬ̇ ܕܝܲܡܡܹ̈ܐ: ܕܲܩܲܪܬ̇ ܒܢܲܗܪ̈ܵܘܵܬ̣ܵܟ: ܘܕܲܠܲܚ̣ܬ̇ ܡܲـ̈ـܝܵܐ ܒܪܸ̈ܓ̣ܠܝܟ: ܘܕܼܵܫܬ̇ ܢܲܗܪ̈ܵܘܵܬ̣ܗܘܿܢ.

ܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܦܵܪܹܣ ܐ̄ܢܵܐ ܥܠܲܝܟ ܡܨܝܼܕܬ̇ܝ: ܒܲܟ̣ܢܘܼܫܝܵܐ ܕܥܲܡܡܹ̈ܐ ܣܲܓ̇ܝܼ̈ܐܹܐ: ܘܲܢܲܣܩܘܼܢܵܟ ܒܲܡܨܝܼܕ̇ܬ̇ܝ.

ܕ:ܘܐܸܫܕܹ̇ܝܟ ܒܐܲܪܥܵܐ: ܘܥܲܠ ܐܲܦܲܝ̈ ܚܲܩܠܵܐ ܐܸܣܚ̄ܦܵܟ: ܘܐܲܫܟܸ̇ܢ ܥܠܲܝܟ ܟܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ: ܘܐܹܣܲܒܲܥ ܡܸܢܵܟ ܟܠܵܗ̇ ܚܲܝ̄ܘܼܬ̣ܵܐ ܕܐܲܪܥܵܐ.

ܗ:ܘܐܲܪܡܹܐ ܒܸܣܪܵܟ ܥܲܠ ܛܘܼܪܹ̈ܐ: ܘܢܸܬ̣ܡ̱ܠܘܼܢ ܢܲܚ̈ܠܹܐ ܡ̣ܢ ܪܸܡܬ̣ܵܟ.

ܘ:ܘܐܲܫܩܸܐ ܐܲܪܥܵܐ ܕܕܼܵܘܩܲܝ̈ܟ ܡ̣ܢ ܕܡܵܟ: ܘܛܘܼܪܹ̈ܐ ܘܢܲܚ̈ܠܹܐ ܢܸܬ̣ܡ̱ܠܘܼܢ ܡܸܢܵܟ.

ܙ:ܘܐܹܟܲܣܸܐ ܒܲܕܼܥܵܟ̣ܵܟ ܫܡܲܝܵܐ: ܘܐܲܥܡܸܛ ܟܵܘܟ̇ܒܲܝ̈ܗܘܿܢ: ܘܫܸܡܫܵܐ ܒܲܥܢܵܢܹ̈ܐ ܢܸܬ̣ܟܲܣܸܐ: ܘܣܲܗܪܵܐ ܠܵܐ ܢܲܢܗܲܪ ܢܘܼܗܪܹܗ.

ܚ:ܘܟ̣ܠܗܘܿܢ ܢܲܗܝܼܪܹ̈ܐ ܕܡܲܢ̱ܗܪܝܼܢ ܒܲܫܡܲܝܵܐ ܐܲܥܡܸܛ ܐܸܢܘܿܢ ܥܠܲܝܟ: ܘܐܸܥܒܸ̇ܕܼ ܚܸܫܘܿܟ̣ܵܐ ܒܐܲܪܥܵܟ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܛ:ܘܐܲܚܡܸܬ̣ ܠܸܒܵܐ ܕܥܲܡܡܹ̈ܐ ܣܲܓ̇ܝܼ̈ܐܹܐ: ܡܵܐ ܕܐܲܝܬ̇ܝܼܬ̇ ܬܒ̣ܵܪܵܟ ܒܹܝܬ̣ ܥܲܡܡܹ̈ܐ: ܘܒܲܡܕܼܝܼܢܵܬ̣ܵܐ ܕܠܵܐ ܝܵܕܲܥ ܐܲܢ̄ܬ̇ ܠܗܹܝܢ.

ܝ:ܘܐܲܬ̣ܡܲܗ ܥܠܲܝܟ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܡܲܠܟܲܝ̈ܗܘܿܢ ܢܸܕܼܚ̄ܠܘܼܢ: ܡܵܐ ܕܐܲܒ̣ܪ̱ܩܹ̇ܬ̣ ܣܲܝܦܝ ܥܲܠ ܐܲܦܲܝ̈ܗܘܿܢ: ܘܢܸܕܼܚ̄ܠܘܼܢ ܘܢܸܬ̣ܪܲܗܒ̣ܘܼܢ ܐ̄ܢܵܫ ܒܢܲܦ̮ܫܹܗ: ܒܝܵܘܡܵܐ ܕܡܲܦܘܼܠܬܵܟ.

ܝܐ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܚܲܪܒܹ̇ܗ ܕܡܲܠܟܵܐ ܕܒ̣ܵܒܹܠ ܬܹܐܬܹܐ ܥܠܲܝܟ.

ܝܒ:ܒܚܲܪܒܵܐ ܕܓܲܢ̄ܒܵܪܹ̈ܐ ܐܲܪܡܸܐ ܥܘܼܫܢܵܟ: ܘܲܕܼܟ̣ܠܗܘܿܢ ܥܲܫܝܼܢܹ̈ܐ ܕܥܲܡܡܹ̈ܐ: ܘܢܸܒ̇ܙܘܼܢ ܥܘܼܫܢܵܗ̇ ܕܡܸܨܪܹܝܢ: ܘܢܸܬ̣ܒ̇ܙܸܙ ܟܠܹܗ ܥܘܼܬ̣ܪܵܗ̇.

ܝܓ:ܘܐܵܘܒܸ̇ܕܼ ܒܥܝܼܪܵܗ̇ ܡ̣ܢ ܡܲـ̈ـܝܵܐ ܣܲܓ̇ܝܼ̈ܐܹܐ: ܘܬ̣ܘܼܒ̣ ܪܸܓ̣ܠܹܐ ܕܒܲܪܢܵܫܵܐ ܠܵܐ ܬܕܲܠܲܚ ܐܸܢܘܿܢ: ܐܵܦܠܵܐ ܦܲܪܣܬ̣ܵܐ ܕܲܒ̣ܥܝܼܪܵܐ.

ܝܕ:ܗܵܝܕܹ̇ܝܢ ܐܲܬ̣ܩܸܢ ܡܲܝܲܝ̈ܗܘܿܢ: ܘܢܲܗܪ̈ܵܘܵܬ̣ܗܘܿܢ ܐܲܪܕܹ̇ܐ ܐܲܝܟ ܡܸܫܚܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܗ:ܡܵܐ ܕܲܥܒܲܕ̇ܬܵܗ̇ ܠܐܲܪܥܵܐ ܕܡܸܨܪܹܝܢ ܠܲܚܒ̣ܵܠܵܐ: ܘܬܸܚܪܲܒ̣ ܐܲܪܥܵܐ ܒܲܡܠܹܐܵܗ̇. ܡܵܐ ܕܲܡܚܹ̇ܝܬ̣ ܠܟ̣ܠܗܘܿܢ ܥܵܡܘܿܪܹ̈ܝܗ̇: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܝܘ:ܐܘܿܠܝܼܬ̣ܵܐ ܗ̄ܝܼ ܘܲܒ̣̈ܢܵܬ̣ܗܘܿܢ ܕܥܲܡܡܹ̈ܐ ܐܵܠ̈ܝܼܢ ܠܵܗ̇: ܥܲܠ ܡܸܨܪܹܝܢ ܘܥܲܠ ܟܠܹܗ ܥܘܼܬ̣ܪܵܗ̇ ܢܹܐ̈ܠܝܵܢܵܗ̇: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܙ:ܒܲܫܢܲܬ̣ ܚܕܲܥܸܣܪܹ̈ܐ ܒܚܲܡܸܫܲܥܸܣܪܵܐ ܒܝܲܪܚܵܐ: ܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܚ:ܒܲܪܢܵܫܵܐ: ܐܲܠܝܼ ܐܘܿܠܝܼܬ̣ܵܐ ܥܲܠ ܚܲܝܠܵܗ̇ ܕܡܸܨܪܹܝܢ: ܘܐܲܚܸܬܲܝܗܝ ܥܲܡܵܗ̇ ܠܒܹܝܬ̣ ܥܲܡܡܹ̈ܐ ܥܲܫܝܼܢܹ̈ܐ: ܠܐܪܥܵܐ ܬܲܚܬܵܝܬܐ ܥܲܡ ܢܵܚܬܲܝ̈ ܓܘܼܒܵܐ.

ܝܛ:ܡ̣ܢ ܡܲـ̈ـܝܵܐ ܒܲܣܝܼܡܹ̈ܐ ܚܘܿܬ̣ ܘܲܕܼܡܵܟ ܥܲܡ ܥܘܼܪ̈ܠܹܐ.

ܟܟ:ܘܥܲܡ ܩܛܝܼܠܲܝ̈ ܣܲܝܦܵܐ ܢܸܦܠܘܼܢ: ܘܲܢܢܲܓܘܼܢܹܗ ܘܲܠܟ̣ܠܹܗ ܚܲܝܠܹܗ.

ܟܐ:ܘܲܢܡܲܠܠܘܼܢ ܥܲܡ ܓܲܕ̇ܘܕܲܝ̈ܗܘܿܢ ܫܲܠܝܼܛܵܢܹ̈ܐ ܕܥܲܡܡܹ̈ܐ ܡܢ ܓܵܘ ܫܝܘܿܠ: ܘܢܸܚܬܘܼܢ ܘܢܸܫܟ̇ܒ̣ܘܼܢ ܥܘܼܪ̈ܠܹܐ ܥܲܡ ܩܛܝܼܠܲܝ̈ ܣܲܝܦܵܐ.

ܟܒ:ܬܲܡܵܢ ܐܵܬ̣ܘܿܪ ܘܟ̣ܠܹܗ ܟܸܢܫܵܗ̇ ܚܕܼܵܪ ܩܲܒ̣ܪܹܗ: ܟܠܗܘܿܢ ܩܛܝܼ̈ܠܹܐ ܕܲܢܦܲܠܘ ܒܣܲܝܦܵܐ.

ܟܓ:ܕܲܥ̣ܒܲܕܼܘ ܩܲܒ̣ܪܹܗ ܒܲܫܦ̈ܘܿܠܲܝ ܓܘܼܒܵܐ: ܘܲܗܘ̤ܵܐ ܟܸܢܫܹܗ ܚܕܼܵܪ ܩܲܒ̣ܪܹܗ: ܟܠܗܘܿܢ ܩܛܝܼ̈ܠܹܐ ܕܲܢܦܲܠ̣ܘ ܒܣܲܝܦܵܐ: ܥܲܠ ܕܲܥܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ.

ܟܕ:ܬܲܡܵܢ ܥܝܼܠܲܡ ܘܟ̣ܠܹܗ ܚܲܝܠܵܗ̇ ܚܕܼܵܪ ܫܲܒ̣ܪܹܗ ܟܠܗܘܿܢ ܩܛܝܼ̈ܠܹܐ ܕܲܢܦܲܠܘ ܒܣܲܝܦܵܐ: ܘܲܢ̣ܚܸܬ̣ܘ ܥܘܼܪ̈ܠܹܐ ܠܐܲܪܥܵܐ ܬܲܚܬܵܝܬܵܐ: ܥܲܠ ܕܲܥ̣ܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ: ܘܩܲܒܸ̇ܠܘ ܨܲܥܪܗܘܿܢ ܥܲܡ ܢܵܚܬܲܝ̈ ܓܘܼܒܵܐ.

ܟܗ:ܘܒܲܝܢܵܬ̣ ܩܛܝܼ̈ܠܹܐ ܥ̣ܒܲܕܼܘ ܠܹܗ ܡܲܫܟ̇ܒ̣ܵܐ ܡܸܨܥܲܬ̣ ܚܲܝܠܹܗ: ܘܲܚܕܼܝܼܪܝܼܢ ܠܩܲܒ̣ܪܹܗ ܟܠܗܘܿܢ ܥܘܼܪ̈ܠܹܐ ܕܲܩܛܝܼܠܝܼܢ ܒܣܲܝܦܵܐ: ܥܲܠ ܕܲܥ̣ܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ: ܘܩܲܒܸ̇ܠܘ ܨܲܥܪܗܘܿܢ ܥܲܡ ܢܵܚܬܲܝ̈ ܓܘܼܒܵܐ: ܘܒܲܝܢܵܬ̣ ܩܛܝܼܠܹܐ ܐܸܬ̣ܚ̄ܫܸܒ̣ܘ.

ܟܘ:ܬܲܡܵܢ ܡܵܫܵܟ: ܘܬ̣ܘܼܒܹܝܠ ܘܟ̣ܠܹܗ ܚܲܝܠܵܗ̇ ܚܕܼܵܪ ܩܲܒ̣ܪܹܗ: ܟܠܗܘܿܢ ܥܘܼܪ̈ܠܹܐ ܕܲܩܛܝܼܠܝܼܢ ܒܣܲܝܦܵܐ: ܥܲܠ ܕܲܥܒܲܕܼܘ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ.

ܟܙ:ܠܵܐ ܢܸܫܟ̇ܒ̣ܘܼܢ ܥܲܡ ܓܲܢ̄ܒܵܪܹ̈ܐ ܕܢܵܦܠܝܼܢ ܡ̣ܢ ܥܘܼܪ̈ܠܹܐ: ܕܲܢ̣ܚܸܬ̣ܘ ܠܲܫܝܘܿܠ ܒܡܵܐܢܲܝ̈ ܩܪܵܒ̣ܗܘܿܢ: ܘܣܵܡ̣ܘ ܣܲܝܦܲܝ̈ܗܘܿܢ ܬܚܹܝܬ̣ ܪܹܫܲܝܗܘܿܢ: ܘܲܗܘ̤ܵܐ ܥܵܘܼܠܗܘܿܢ ܥܲܠ ܓܲܪ̈ܡܲܝܗܘܿܢ: ܥܲܠ ܕܲܥܒܲܕܼܘ ܒܓܲܢ̄ܒܵܪܘܼܬ̣ܗܘܿܢ ܬܒ̣ܵܪܵܐ ܒܐܲܪܥܵܐ ܕܚܲܝܹ̈ܐ.

ܟܚ:ܐܲܢ̄ܬ̇ ܕܹܝܢ ܒܲܝܢܵܬ̣ ܥܘܼܪ̈ܠܹܐ ܬܸܫܟܲܒ̣: ܘܬܸܕܼܡܲܟ ܥܲܡ ܩܛܝܼ̈ܠܲܝ ܣܲܝܦܵܐ.

ܟܛ:ܬܲܡܵܢ ܐܲܕܼܘܿܡ ܘܡܲܠܟܹ̇ܝ̈ܗ̇ ܘܟ̣ܠܗܘܿܢ ܪܵܘܪ̈ܒ̣ܵܢܹܝܗ̇: ܕܐܸܬ̣ܚ̄ܫܸܒ̣ܘ ܒܓܲܢ̄ܒܵܪܘܼܬ̣ܗܘܿܢ ܥܲܡ ܩܛܝܼ̈ܠܲܝ ܣܲܝܦܵܐ: ܥܲܡ ܥܘܼܪ̈ܠܹܐ ܢܸܕܼܡ̱ܟ̣ܘܼܢ ܘܥܲܡ ܢܵܚܬܲܝ̈ ܓܘܼܒܵܐ.

ܠ:ܬܲܡܵܢ ܫܲܠܝܼܛܵܢܹ̈ܐ ܕܓܲܪܒ̇ܝܵܐ ܘܟ̣ܠܗܘܿܢ ܨܲܝ̈ܕ̇ܢܵܝܹܐ: ܕܲܢܚܸܬ̣ܘ ܥܲܡ ܩܛܝܼܠܲܝ̈ ܣܲܝܦܵܐ: ܟܲܕܼ ܒܗܸܬ̣ܘ ܘܐܸܬ̇ܬ̇ܒܲܪܘ ܡ̣ܢ ܓܲܢ̄ܒܵܪܘܼܬ̣ܗܘܿܢ: ܘܲܕܼܡܸܟ̣ܘ ܥܘܼܪ̈ܠܹܐ ܥܲܡ ܩܛܝܼܠܲܝ̈ ܣܲܝܦܵܐ: ܘܩܲܒܸ̇ܠ̣ܘ ܒܸܗܬܲܬ̣ܗܘܿܢ ܥܲܡ ܢܵܚܬܲܝ̈ ܓܘܼܒܵܐ.

ܠܐ:ܠܗܵܠܹܝܢ ܢܸܚܙܹܐ ܦܸܪܥܘܿܢ ܘܢܸܬ̣ܒܲܝܲܐ ܥܲܠ ܟܠܹܗ ܚܲܝܠܹܗ ܩܛܝܼܠܲܝ̈ ܣܲܝܦܵܐ: ܦܸܪܥܘܿܢ ܗ̤ܘ ܘܟ̣ܠܹܗ ܚܲܝܠܹܗ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܠܒ:ܥܸܒ̣ܕܹ̇ܬ̣ ܓܹܝܪ ܬܒ̣ܵܪܹܗ ܒܐܲܪܥܵܐ ܕܚܲܝܹ̈ܐ: ܘܐܲܕܼܡܸܟ̣ܬܹ̇ܗ ܒܲܝܢܵܬ̣ ܥܘܼܪ̈ܠܹܐ ܥܲܡ ܩܛܝܼܠܲܝ̈ ܣܲܝܦܵܐ: ܦܸܪܥܘܿܢ ܗ̤ܘ ܘܟ̣ܠܹܗ ܚܲܝܠܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܙܘܗܪܐ ܘܠܘܒܒܐ.

ܩܹܦܵܠܹܐܘܿܢ:ܠܓ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܡܲܠܸܠ ܥܲܡ ܒܢܲܝ̈ ܥܲܡܵܟ: ܘܐܸܡܲܪ ܠܗܘܿܢ: ܐܲܪܥܵܐ ܡܵܐ ܕܡܲܝܬܸ̇ܐ ܐ̄ܢܵܐ ܥܠܹܝܗ̇ ܚܲܪܒܵܐ: ܢܸܕܼܒ̇ܪܘܼܢ ܥܲܡܵܐ ܕܐܲܪܥܵܐ ܓܲܒ̣ܪܵܐ ܚܲܕܼ ܡܸܢܗܘܿܢ: ܘܢܸܥܒ̇ܕܼܘܼܢܹܗ ܠܗܘܿܢ ܕܵܘܩܵܐ.

ܓ:ܘܡܵܐ ܕܲܚܙ̣ܵܐ ܚܲܪܒܵܐ ܕܐܵܬ̣ܝܵܐ ܥܠܲܝܗܘܿܢ: ܢܸܩܪܹܐ ܒܩܲܪܢܵܐ ܘܲܢܙܲܗܲܪ ܠܥܲܡܵܐ.

ܕ:ܘܡܲܢ ܕܫܵܡܲܥ ܩܵܠܵܐ ܕܩܲܪܢܵܐ ܘܠܵܐ ܡܸܙܕ̇ܗܲܪ: ܘܐܵܬ̣ܝܵܐ ܚܲܪܒܵܐ ܘܢܵܣܒܵܐ ܠܹܗ: ܕܡܹܗ ܒܪܹܫܹܗ.

ܗ:ܘܐܸܢ ܢܸܙܕ̇ܗܲܪ: ܢܲܦ̮ܫܹܗ ܡܦܲܨܹܐ.

ܘ:ܕܵܘܩܵܐ ܕܹܝܢ ܡܵܐ ܕܲܚܙ̣ܵܐ ܚܲܪܒܵܐ ܕܐܵܬ̣ܝܵܐ: ܘܠܵܐ ܩ̣ܪܵܐ ܒܩܲܪܢܵܐ: ܘܲܠܥܲܡܵܐ ܠܵܐ ܙܲܗܲܪ: ܘܐܸܬܲܬ̤ ܚܲܪܒܵܐ ܘܢܸܣܒܲܬ̤ ܡܸܢܗܘܿܢ ܢܲܦ̮ܫܵܐ: ܗܵܝ̇ ܢܲܦ̮ܫܵܐ ܒܲܚܛܵܗܹ̈ܝܗ̇ ܐܸܬ̣ܢܲܣܒܲܬ̤: ܘܲܕܼܡܵܗ̇ ܡ̣ܢ ܐܝܼܕܼܵܘ̈ܗܝ ܕܕܼܵܘܩܵܐ ܐܸܬ̣ܒܲܥ.

ܙ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܕܵܘܩܵܐ ܝܲܗ̄ܒ̣ܬܵܟ ܠܲܕܼܒܹܝܬ̣ ܝܑܼܣܪܵܝܹܠ: ܕܬܸܗܘܹܐ ܫܵܡܲܥ ܡ̣ܢ ܦܘܼܡܝ ܡܸܠܬ̣ܵܐ ܘܲܬ̣ܙܲܗܲܪ ܐܸܢܘܿܢ ܡܹܢܝ.

ܚ:ܡܵܐ ܕܐܸܡ̇ܪܹܬ̣ ܠܥܵܘܿܠܵܐ ܕܲܡܡܵܬ̣ ܬܡܘܼܬ̣: ܘܠܵܐ ܐܸܡܲܪܬ̇ ܠܹܗ ܠܥܵܘܿܠܵܐ ܕܢܸܙܕ̇ܗܲܪ ܡ̣ܢ ܐܘܼܪܚܹܗ: ܗܵܘܿ ܥܵܘܿܠܵܐ ܒܥܵܘܼܠܹܗ ܢܡܘܼܬ̣: ܘܲܕܼܡܹܗ ܡ̣ܢ ܐܝܼܕܲܝ̈ܟ ܐܸܬ̣ܒܲܥ.

ܛ:ܐܲܢ̄ܬ̇ ܕܹܝܢ ܐܸܢ ܙܲܗܪܬܵܝܗܝ ܠܥܵܘܿܠܵܐ ܕܢܸܗܦܘܿܟ ܡ̣ܢ ܐܘܼܪܚܹܗ ܘܠܵܐ ܗܦܲܟ: ܗ̤ܘ ܒܥܵܘܼܠܹܗ ܢܡܘܼܬ̣: ܘܐܲܢ̄ܬ̇ ܢܲܦ̮ܫܵܟ ܦܲܨܝܼܬ̇.

ܝ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܸܡܲܪܬ̇ܘܿܢ: ܕܥܵܘܼܠܲܢ ܘܲܚܛܵܗܲܝ̈ܢ ܥܠܲܝܢ ܐܸܢܘܿܢ: ܘܲܒ̣ܗܘܿܢ ܡܸܬ̣ܡ̱ܣܹܝܢ ܚ̄ܢܲܢ ܐܲܝܟܲܢܵܐ ܚܵܐܹ̇ܝܢ ܚ̄ܢܲܢ.

ܝܐ:ܐܸܡܲܪ ܠܗܘܿܢ: ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܵܐ ܨܵܒܹ̇ܐ ܐ̄ܢܵܐ ܒܡܵܘܬܹ̇ܗ ܕܥܵܘܿܠܵܐ: ܐܸܠܵܐ ܕܲܢܬ̣ܘܼܒ̣ ܥܵܘܿܠܵܐ ܡ̣ܢ ܥܘܼܠܹܗ ܘܢܸܚܹܐ: ܬܘܼܒ̣ܘ ܘܐܸܬ̣ܦܢܵܘ ܡ̣ܢ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܠܵܐ ܬܡܘܼܬ̣ܘܼܢ ܕܒܹܝܬ̣ ܝܑܼܣܪܵܝܹܠ.

ܝܒ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܡܲܪ ܠܲܒ̣ܢܲܝ̈ ܥܲܡܵܟ: ܙܲܕ̇ܝܩܘܼܬܹܗ ܕܙܲܕ̇ܝܼܩܵܐ ܠܵܐ ܡܦܲܨܝܵܐ ܠܹܗ ܒܝܵܘܡܵܐ ܕܚܵܛܹ̇ܐ: ܘܥܵܘܿܠܵܐ ܠܵܐ ܡܸܬ̇ܬ̇ܩܸܠ ܒܥܵܘܼܠܹܗ ܒܝܵܘܡܵܐ ܕܡܸܬ̣ܦ̄ܢܸܐ ܡ̣ܢ ܥܵܘܼܠܹܗ: ܘܙܲܕ̇ܝܼܩܵܐ ܠܵܐ ܚܵܝܹ̇ܐ ܒܝܵܘܡܵܐ ܕܚܵܛܹ̇ܐ.

ܝܓ:ܡܵܐ ܕܐܸܡ̇ܪܹܬ̣ ܠܙܲܕ̇ܝܼܩܵܐ ܕܡܸܚܵܐ ܢܸܚܹܐ: ܘܐܸܬ̇ܬ̇ܟܸܠ ܥܲܠ ܙܲܕ̇ܝܼܩܘܼܬܹܗ ܘܒ̣ܵܬܲܪܟܸ̇ܢ ܥ̣ܒܲܕܼ ܥܵܘܼܠܵܐ: ܟܠܵܗ̇ ܙܲܕ̇ܝܼܩܘܼܬܹܗ ܕܲܥܒܲܕܼ ܠܵܐ ܬܸܬ̇ܕ̇ܟܲܪ ܠܹܗ: ܐܸܠܵܐ ܒܥܵܘܼܠܵܐ ܕܲܥܒܲܕܼ ܢܡܘܼܬ̣.

ܝܕ:ܘܡܵܐ ܕܐܸܡ̇ܪܹܬ̣ ܠܥܵܘܿܠܵܐ ܕܲܡܡܵܬ̣ ܬܡܘܼܬ̣: ܘܢܸܗܦܘܿܟ ܡ̣ܢ ܚܛܵܗܵܘ̈ܗܝ ܘܢܸܥܒܸ̇ܕܼ ܕܝܼܢܵܐ ܘܙܲܕ̇ܝܼܩܘܼܬ̣ܵܐ.

ܝܗ:ܘܡܸܫܟܵܢܵܐ ܕܲܢܣܲܒ̣ ܢܦܲܢܹܐ: ܘܡܸܕܸ̇ܡ ܕܲܛܠܲܡ ܢܸܦܪܘܿܥ: ܘܲܒ̣ܦܘܼܩ̈ܕܵܢܹܐ ܕܚܲܝܹ̈ܐ ܢܗܲܠܸܟ: ܘܠܵܐ ܢܸܥܒܸ̇ܕܼ ܥܵܘܼܠܵܐ: ܡܸܚܵܐ ܢܸܚܹܐ ܘܠܵܐ ܢܡܘܼܬ̣.

ܝܘ:ܘܲܚܛܵܗܹ̈ܐ ܟܠܗܘܿܢ ܕܲܥܒܲܕܼ ܠܵܐ ܢܸܬ̇ܕܲܟ̣ܪܘܼܢ ܠܹܗ: ܐܸܠܵܐ ܒܕܼܝܼܢܵܐ ܘܲܒ̣ܙܲܕ̇ܝܼܩܘܼܬ̣ܵܐ ܕܲܥܒܲܕܼ ܢܸܚܹܐ.

ܝܙ:ܘܐܵܡ̇ܪܝܼܢ ܒܢܲܝ̈ ܥܲܡܵܟ: ܠܵܐ ܫܲܦܝܼܪܵܐ ܐܘܼܪܚܹܗ ܕܡܵܪܝܵܐ: ܐܘܼܪ̈ܚܵܬ̣ܗܘܿܢ ܗ̄ܘܼ ܕܝܼܠܗܘܿܢ ܠܵܐ ܫܲܦܝܼܪ̈ܵܢ.

ܝܚ:ܘܟܲܕܼ ܢܸܗܦܘܿܟ ܙܲܕ̇ܝܼܩܵܐ ܡ̣ܢ ܙܲܕ̇ܝܼܩܘܼܬܹܗ ܘܢܸܥܒܸ̇ܕܼ ܥܵܘܼܠܵܐ ܒܥܵܘܼܠܹܗ ܢܡܘܼܬ̣.

ܝܛ:ܘܟܲܕܼ ܢܸܗܦܘܿܟ ܥܵܘܿܠܐ ܡ̣ܢ ܥܵܘܵܠܘܼܬܹܗ: ܘܢܸܥܒܸ̇ܕܼ ܕܝܼܢܵܐ ܘܙܲܕ̇ܝܩܘܼܬ̣ܵܐ ܒܗܘܿܢ ܢܸܚܹܐ.

ܟܟ:ܘܐܵܡ̇ܪܝܼܢ ܐ̄ܢܬ̇ܘܿܢ ܠܵܐ ܫܲܦܝܼܪܵܐ ܐܘܼܪܚܹܗ ܕܡܵܪܝܵܐ: ܐ̄ܢܵܫ ܐܲܝܟ ܐܘܼܪ̈ܚܵܬܹܗ ܐܹܕ̇ܢܟ̣ܘܿܢ ܒܹܝܬ̣ ܝܑܼܣܪܵܝܹܠ.

ܟܐ:ܒܲܫܢܲܬ̣ ܚܕܲܥܸܣܪܹ̈ܐ ܒܚܲܡܸܫܬܵܐ ܒܝܲܪܚܵܐ ܕܥܸܣܪܵܐ ܕܲܫܒ̣ܝܼܬ̇ܘܿܢ: ܐܸܬ̣ܵܐ ܠܘܵܬ̣ܝ ܕܐܸܬ̣ܦܲܨܝܼ ܡ̣ܢ ܐܘܿܪܸܫܠܸܡ: ܘܐܸܡܲܪ ܠܝܼ: ܐܸܬ̣ܚܲܪܒܲܬ̤ ܡܕܼܝܼܢ̄ܬܵܐ.

ܟܒ:ܘܥܲܕܼܠܵܐ ܢܹܐܬܹܐ ܠܘܵܬ̣ܝ ܗܵܘܿ ܕܐܸܬ̣ܦܲܨܝܼ: ܗܘ̤ܵܬ̣ ܐܝܼܕܹܗ ܕܡܵܪܝܵܐ ܥܠܲܝ ܒܪܲܡܫܵܐ: ܘܲܦܬܲܚ ܦܘܼܡܝ ܥܕܲܡܵܐ ܕܐܸܬ̣ܵܐ ܠܘܵܬ̣ܝ ܗܵܘܿ ܕܐܸܬ̣ܦܲܨܝܼ ܒܨܲܦܪܵܐ: ܘܟܲܕܼ ܐܸܬ̣ܦܬܲܚ ܦܘܼܡܝ ܬܘܼܒ̣ ܠܵܐ ܐܸܬ̇ܬ̇ܚܸܕܼ.

ܟܓ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܟܕ:ܒܲܪܢܵܫܵܐ: ܐܲܝܠܹܝܢ ܕܥܵܡ̇ܪܝܼܢ ܒܚܲܪ̈ܒ̣ܵܬ̣ܵܐ ܗܵܠܹܝܢ ܕܐܲܪܥܵܐ ܕܝܼܣܪܵܝܹܠ ܐܵܡ̇ܪܝܼܢ: ܐܲܒ̣ܪܵܗܵܡ ܕܚܲܕܼ ܗ̄ܘܼܵܬ̣ ܝܼܪܸܬ̣ ܐܲܪܥܵܐ: ܚܢܲܢ ܕܣܲܓ̇ܝܼ̈ܐܹܐ ܚ̄ܢܲܢ ܠܵܐ ܝܵܪܬ̇ܝܼܢܲܢ ܠܵܗ̇.

ܟܗ:ܡܸܛܠ ܗܵܢܵܐ ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܡܵܐ ܐܵܟ̣ܠܝܼܢ ܐ̄ܢܬ̇ܘܿܢ: ܘܥܲܝ̈ܢܲܝܟ̇ܘܿܢ ܠܲܦܬܲܟ̣ܪ̈ܲܝܟ̇ܘܿܢ ܡܪܝܼܡܝܼܢ ܐ̄ܢܬ̇ܘܿܢ: ܘܲܕܼܡܵܐ ܫܵܬܹ̇ܝܢ ܐ̄ܢܬܘܿܢ: ܘܨܵܒܹ̇ܝܢ ܐ̄ܢܬ̇ܘܿܢ ܠܡܹܐܪܲܬ̣ ܐܲܪܥܵܐ.

ܟܘ:ܩܵܝܡ̇ܝܼܢ ܐ̄ܢܬ̇ܘܿܢ ܥܲܠ ܣܲܝܦܲܝ̈ܟ̇ܘܿܢ: ܘܥܵܒ̣ܕ̇ܝܼܢ ܐ̄ܢܬ̇ܘܿܢ ܛܲܢܦܘܼܬ̣ܵܐ: ܘܐ̄ܢܵܫ ܐܲܢ̄ܬܲܬ̣ ܚܲܒ̣ܪܹܗ ܡܛܲܢܦܝܼܢ ܐ̄ܢܬ̇ܘܿܢ: ܘܨܵܒܹ̇ܝܢ ܐ̄ܢܬ̇ܘܿܢ ܠܡܹܐܪܲܬ̣ ܐܲܪܥܵܐ.

ܟܙ:ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܚܲܝ ܐ̄ܢܵܐ: ܕܟ̣ܠ ܕܲܒ̣ܚܲܪ̈ܒ̣ܵܬ̣ܵܐ ܐܸܢܘܿܢ ܒܚܲܪܒܵܐ ܢܸܦܠܘܿܢ: ܘܟ̣ܠ ܕܲܒ̣ܚܲܩܠܵܐ ܡܹܐܟ̣ܘܼܠܬܵܐ ܠܚܲܝ̄ܘܼܬ̣ܵܐ ܐܸܬܸ̇ܠ ܐܸܢܘܿܢ: ܘܟ̣ܠ ܕܲܒ̣ܦܲܥܪܹ̈ܐ ܘܒܲܡܥܲܪܹ̈ܐ ܒܡܵܘܬܵܢܵܐ ܢܡܘܼܬ̣ܘܼܢ.

ܟܚ:ܘܐܸܥܒ̇ܕܼܝܼܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ: ܘܢܸܒ̣ܛܲܠ ܡܸܢܵܗ̇ ܫܘܼܒ̣ܚܵܐ ܕܥܘܼܫܢܵܗ̇: ܘܢܸܨܕ̇ܘܼܢ ܛܘܼܪܹ̈ܐ ܕܝܼܣܪܵܝܹܠ ܡ̣ܢ ܒܠܲܝ ܕܥܵܒܲܪ.

ܟܛ:ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܲܥܒܲܕ̇ܬܵܗ̇ ܠܐܲܪܥܵܐ ܠܲܚܒ̣ܵܠܵܐ ܘܲܠܬܸܡܗܵܐ: ܡܸܛܠ ܟܠܵܗ̇ ܛܲܢܦܘܼܬ̣ܵܐ ܕܲܥܒܲܕܼܘ.

ܠ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܒܢܲܝ̈ ܥܲܡܵܟ ܕܪܵܢܹ̇ܝܢ ܒܵܟ ܥܲܠ ܓܸܢ̄ܒ̣ ܐܸܣܹ̈ܐ: ܘܲܒ̣ܬܲܪ̈ܥܹܐ ܕܒ̣ܵـ̈ـܬܹ̇ܐ: ܘܲܡܡܲܠܠܝܼܢ ܚܲܕܼ ܥܲܡ ܚܲܕܼ: ܓܲܒ̣ܪܵܐ ܥܲܡ ܐܲܚܘܼܗܝ: ܘܐܵܡ̇ܪܝܼܢ: ܬܵܘ ܫܡܲܥܘ ܡܵܢܵܐ ܦܸܬ̣ܓ̣ܵܡܵܐ ܢܦܲܩ̣ ܡ̣ܢ ܩܕܼܵܡ ܡܵܪܝܵܐ.

ܠܐ:ܘܐܵܬܹ̇ܝܢ ܠܘܵܬ̣ܵܟ ܥܲܡܵܐ ܘܝܵܬ̣ܒ̇ܝܼܢ ܩܕܼܵܡܲܝܟ: ܘܫܡ̇ܥܝܼܢ ܦܸܬ̣ܓ̣ܵܡܲܝ̈ܟ: ܘܠܵܐ ܥܵܒ̣ܕ̇ܝܼܢ ܠܗܘܿܢ: ܡܸܛܠ ܕܕܲܓܵܠܘܼܬ̣ܵܐ ܒܦܘܼܡܗܘܿܢ: ܘܒ̣ܵܬܲܪ ܬܲܪ̈ܥܝܵܬ̣ܵܐ ܗ̄ܘܼ ܕܠܸܒ̇ܗܘܿܢ ܐܵܙ̇ܠ̄ܝܼܢ.

ܠܒ:ܘܲܚܫܝܼܒ̣ ܐܲܢ̄ܬ̇ ܠܗܘܿܢ ܐܲܝܟ ܙܡܝܼܪܬܵܐ: ܘܐܲܝܟ ܩܵܠܵܐ ܫܲܦܝܼܪܵܐ: ܘܐܲܝܟ ܟܸܢܵܪܵܐ ܚܲܠܝܵܐ: ܘܫܵܡ̇ܥܝܼܢ ܦܸܬ̣ܓ̣ܵܡܲܝ̈ܟ ܘܠܵܐ ܥܵܒ̣ܕ̇ܝܼܢ ܠܗܘܿܢ.

ܠܓ:ܡܵܐ ܕܲܗܘ̤ܵܘ ܕܹܝܢ ܦܸܬ̣ܓ̣ܵܡܲܝ̈ܟ: ܗܵܝܕܹ̇ܝܢ ܢܸܕ̇ܥܘܼܢ ܕܲܢܒ̣ܝܵܐ ܐܲܢ̄ܬ̇ ܒܲܝܢܵܬ̣ܗܘܿܢ.

ܩܹܦܵܠܹܐܘܿܢ:ܠܕ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܐܸܬ̣ܢܲܒܵܐ ܥܲܠ ܪ̈ܵܥܘܵܬ̣ܵܐ ܕܝܼܣܪܵܝܹܠ: ܐܸܬ̣ܢܲܒܵܐ ܘܐܸܡܲܪ ܠܗܘܿܢ: ܪ̈ܵܥܵܘܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܘܿ ܪ̈ܵܥܵܘܵܬ̣ܵܐ ܕܝܼܣܪܵܝܹܠ ܕܪܵܥܹ̇ܝܢ ܠܗܘܿܢ: ܠܵܐ ܗ̄ܘܼܵܐ ܠܥܵـ̈ـܢܵܐ ܪܵܥܹ̇ܝܢ ܪ̈ܵܥܵܘܵܬ̣ܵܐ.

ܓ:ܫܲܡܝܼܢܹ̈ܐ ܐܵܟ̣ܠܝܼܢ ܐ̄ܢܬ̇ܘܿܢ: ܘܥܲܡ̱ܪܗܘܿܢ ܠܵܒ̣ܫܝܼܢ ܐ̄ܢܬ̇ܘܿܢ: ܘܡܦܲܛܡܹ̈ܐ ܕܵܒ̣ܚܝܼܢ ܐ̄ܢܬ̇ܘܿܢ: ܘܥܵܢܵܐ ܠܵܐ ܪܵܥܹ̇ܝܢ ܐ̄ܢܬ̇ܘܿܢ.

ܕ:ܠܕܲܟ̣ܪܝܼܗܵܐ ܠܵܐ ܚܲܝܸܠܬ̇ܘܿܢ: ܘܲܕܼܡܲܪܥܵܐ ܠܵܐ ܐܲܣܝܼܬ̇ܘܿܢ: ܘܕܲܬ̣ܒ̣ܝܼܪܵܐ ܠܵܐ ܥܨܲܒ̣ܬ̇ܘܿܢ: ܘܲܕܼܛܵܥܝܵܐ ܠܵܐ ܐܲܗܦܸܟ̣ܬ̇ܘܿܢ: ܘܕܲܐܒ̇ܝܼܕܼܵܐ ܠܵܐ ܒܥܲܝܬ̇ܘܿܢ: ܐܸܠܵܐ ܒܲܩܛܝܼܪܵܐ ܫܲܥܒܸ̇ܕ̇ܬ̇ܘܿܢ ܐܸܢܹܝܢ.

ܗ:ܘܐܸܬ̣ܒܲܕ̇ܪܲܬ̤ ܥܵܢ̈ܝ ܡ̣ܢ ܒܠܲܝ ܪܵܥܝܵܐ: ܘܲܗ̤ܘܲܝ̈ ܡܹܐܟ̣ܘܼܠܬܵܐ ܠܟ̣ܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ.

ܘ:ܘܲܛܥܵܬ̤ ܥܵܢܝ̈ ܒܟ̣ܠܗܘܿܢ ܛܘܼܪܹ̈ܐ: ܘܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܒ̣ܟ̣ܠܵܗ̇ ܐܲܪܥܵܐ ܐܸܬ̣ܒܲܕ̇ܪܲܬ̤ ܥܵܢ̈ܝ: ܘܠܲܝܬ̇ ܕܬ̣ܵܒܲܥ ܐܵܦܠܵܐ ܕܲܡܟܲܢܸܫ.

ܙ:ܡܸܛܠ ܗܵܢܵܐ ܫܡܲܥܘ ܪ̈ܵܥܵܘܵܬ̣ܵܐ ܦܸܬ̣ܓ̣ܵܡܹܗ ܕܡܵܪܝܵܐ.

ܚ:ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܗܘ̤ܵܬ̣ ܥܵܢ̈ܝ ܠܒܸܙܬ̣ܵܐ: ܘܲܗܘ̤ܵܬ̣ ܥܵܢ̈ܝ ܡܹܐܟ̣ܘܼܠܬܵܐ ܠܟ̣ܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ ܡ̣ܢ ܒܠܲܝ ܪܵܥܝܵܐ: ܘܠܵܐ ܪܥܵܘ ܪ̈ܵܥܵܘܵܬ̣ܵܐ ܠܥܵܢ̈ܝ: ܐܸܠܵܐ ܪܥܵܘ ܪ̈ܵܥܵܘܵܬ̣ܵܐ ܠܢܲܦ̮ܫܗܘܿܢ: ܘܲܠܥܵܢ̈ܝ ܠܵܐ ܪܥܵܘ.

ܛ:ܡܸܛܠ ܗܵܢܵܐ ܪ̈ܵܥܵܘܵܬ̣ܵܐ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ.

ܝ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܲܠ ܪ̈ܵܥܵܘܵܬ̣ܵܐ: ܘܐܸܬ̣ܒܲܥ ܥܵܢ̈ܝ ܒܐܝܼܕܲܝ̈ܗܘܿܢ: ܘܐܹܒܲܛܸܠ ܐܸܢܘܿܢ ܕܠܵܐ ܢܸܪܥܘܿܢ ܬܘܼܒ̣ ܠܥܵܢ̈ܝ: ܘܐܹܦܲܨܹܐ ܠܥܵܢ̈ܝ ܡ̣ܢ ܦܘܼܡܗܘܿܢ: ܘܬ̣ܘܼܒ̣ ܠܵܐ ܢܸܗܘ̈ܝܵܢ ܠܗܘܿܢ ܠܡܹܐܟ̣ܘܼܠܬܵܐ.

ܝܐ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܬܵܒܲܥ ܐ̄ܢܵܐ ܠܥܵܢ̈ܝ: ܘܣܵܥܲܪ ܐ̄ܢܵܐ ܠܗܹܝܢ.

ܝܒ:ܐܲܝܟ ܕܣܵܥܲܪ ܪܵܥܝܵܐ ܠܲܓ̣ܙܵܪܹܗ ܒܝܵܘܡܵܐ ܕܙܝܼܩܵܐ: ܗܵܟܲܢܵܐ ܐܸܣ̱ܥܪܝܼܗ̇ ܠܥܵܢ̈ܝ: ܘܐܹܟܲܢܸܫ ܐܸܢܹܝܢ ܡ̣ܢ ܟܠ ܐܲܬ̣ܪ̈ܵܘܵܬ̣ܵܐ ܕܐܸܬ̣ܒܲܕܲܪ ܒܗܘܿܢ: ܒܝܵܘܡܵܐ ܕܲܥܢܵܢܵܐ ܘܲܕܼܥܲܪܦܸܠܵܐ.

ܝܓ:ܘܐܲܦܸܩ ܐܸܢܹܝܢ ܡ̣ܢ ܥܲܡܡܹ̈ܐ: ܘܐܹܟܲܢܸܫ ܐܸܢܹܝܢ ܡ̣ܢ ܡܕܼܝܼ̈ܢܵܬ̣ܵܐ: ܘܐܲܝܬܹ̇ܐ ܐܸܢܹܝܢ ܠܐܲܪ̱ܥܗܹܝܢ: ܘܐܸܪܥܸܐ ܐܸܢܹܝܢ ܒܛܘܼܪܹ̈ܐ ܕܝܼܣܪܵܝܹܠ: ܘܲܒ̣ܢܲܚ̈ܠܹܐ ܘܲܒ̣ܟ̣ܠܹܗ ܝܲܬ̣ܒܵܐ ܕܐܲܪܥܵܐ.

ܝܕ:ܒܹܝܬ̣ ܪܸܥܝܵܐ ܛܵܒ̣ܵܐ ܐܸܪܥܸܐ ܐܸܢܹܝܢ: ܘܲܒ̣ܛܘܼܪܹ̈ܐ ܪ̈ܵܡܹܐ ܕܝܼܣܪܵܝܹܠ ܢܸܗܘܹܐ ܕܲܝܪܗܹܝܢ: ܬܲܡܵܢ ܢܸܪ̈ܒ̇ܥܵܢ ܒܕܲܝܪܵܐ ܛܵܒ̣ܵܐ: ܘܪܸܥܝܵܐ ܫܲܡܝܼܢܵܐ ܢܸܪ̈ܥܝܵܢ ܒܛܘܼܪܹ̈ܐ ܕܝܼܣܪܵܝܹܠ.

ܝܗ:ܐܸܢܵܐ ܪܸܥܝܵܐ ܠܥܵܢ̈ܝ: ܘܐܸܢܵܐ ܐܲܪܒܲܥ ܐܸܢܹܝܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܘ:ܕܐܲܒ̇ܝܼܕܼܵܐ ܐܸܒ̣ܥܸܐ: ܘܲܕܼܛܵܥܝܵܐ ܐܲܗܦܸܟ: ܘܕܲܬ̣ܒ̣ܝܼܪܵܐ ܐܸܥܨܘܿܒ̣: ܘܕܲܟ̣ܪܝܼܗܵܐ ܐܹܚܲܝܸܠ: ܘܲܕܼܫܲܡܝܼܢܵܐ ܘܲܕܼܥܲܫܝܼܢܵܐ ܐܸܛܲܪ: ܘܐܸܪܥܸܐ ܐܸܢܹܝܢ ܒܕܼܝܼܢܵܐ.

ܝܙ:ܠܟܹܝܢ ܕܹܝܢ ܥܵܢ̈ܝ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܕܵܐܹ̇ܢ ܐ̄ܢܵܐ ܒܹܝܬ̣ ܢܸܩܝܵܐ ܠܢܸܩܝܵܐ ܘܒܹܝܬ̣ ܕܸܟ̣ܪܵܐ ܠܕܸܟ̣ܪܵܐ.

ܝܚ:ܠܵܐ ܣܵܦܹ̇ܩ ܠܟ̣ܘܿܢ ܪ̈ܵܥܵܘܵܬ̣ܵܐ: ܪܸܥܝܵܐ ܛܵܒ̣ܵܐ ܕܪܵܥܹ̇ܝܢ ܐ̄ܢܬ̇ܘܿܢ: ܘܫܲܪܟܵܐ ܕܪܸܥܝܼܟ̣ܘܿܢ ܕܵܝܫܝܼܢ ܐ̄ܢܬ̇ܘܿܢ ܒܪܸ̈ܓ̣ܠܲܝܟ̇ܘܿܢ: ܘܡܲـ̈ـܝܵܐ ܫܵܬܹܝܢ ܐ̄ܢܬ̇ܘܿܢ. ܘܫܲܪܟܵܐ ܕܡܵܘܬ̇ܪܝܼܢ ܐ̄ܢܬ̇ܘܿܢ ܕܵܠܚܝܼܢ ܐ̄ܢܬ̇ܘܿܢ ܒܪܸ̈ܓ̣ܠܲܝܟ̇ܘܿܢ.

ܝܛ:ܘܥܵܢ̈ܝ ܪ̈ܥܲܝ ܕܵܘܫܵܐ ܕܪܸ̈ܓ̣ܠܲܝܟ̇ܘܿܢ: ܘܐܸܫܬ̇ܝ ܡܲـ̈ـܝܵܐ ܕܕܲܠܲܚ ܪܸ̈ܓ̣ܠܲܝܟ̇ܘܿܢ.

ܟܟ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܕܵܐܹ̇ܢ ܒܹܝܬ̣ ܢܸܩܝܵܐ ܫܲܡܝܼܢܬܵܐ ܠܢܸܩܝܵܐ ܡܚܝܼܠܬܵܐ.

ܟܐ:ܥܲܠ ܕܣܵܚ̈ܦܵܢ ܗ̄ܘܲܝ̈ ܒܓܲܒܲܝ̈ܗܹܝܢ ܘܲܒ̣ܟܲܬ̣ܦܵـ̈ـܬ̣ܗܹܝܢ: ܘܲܒ̣ܩܲܪ̈ܢܵܬ̣ܗܹܝܢ ܡܕܲܩܪ̈ܵܢ ܗ̄ܘܲܝ̈ ܠܟ̣ܠܗܹܝܢ ܟܪ̈ܝܼܗܵܬ̣ܵܐ: ܥܕܲܡܵܐ ܕܒܲܕܲܪ ܐܸܢܹܝܢ ܠܒܲܪ.

ܟܒ:ܘܐܸܦ̣ܪܩܝܼܗ̇ ܠܥܵܢ̈ܝ: ܘܬ̣ܘܼܒ̣ ܠܵܐ ܬܸܗܘܹܐ ܠܗܘܿܢ ܠܒܸܙܬ̣ܵܐ: ܘܐܸܕ̇ܘܼܢ ܒܹܝܬ̣ ܢܸܩܝܵܐ ܠܢܸܩܝܵܐ: ܘܒܹܝܬ̣ ܕܸܟ̣ܪܵܐ ܠܕܸܟ̣ܪܵܐ.

ܟܓ:ܘܐܲܩܝܼܡ ܥܠܲܝܗܹܝܢ ܪܵܥܝܵܐ: ܘܢܸܪܥܹܐ ܐܸܢܹܝܢ: ܕܵܘܝܼܕܼ ܥܲܒ̣ܕ̇ܝ ܗ̤ܘ ܢܸܪܥܹܐ ܐܸܢܹܝܢ: ܘܗ̤ܘ ܢܸܗܘܹܐ ܠܗܹܝܢ ܪܵܥܝܵܐ.

ܟܕ:ܘܐܸܢܵܐ ܡܵܪܝܵܐ ܐܸܗܘܹܐ ܠܗܘܿܢ ܐܲܠܵܗܵܐ: ܘܕܼܵܘܝܼܕܼ ܥܲܒ̣ܕ̇ܝ ܢܸܗܘܹܐ ܫܲܠܝܼܛܵܐ ܒܲܝܢܵܬ̣ܗܘܿܢ.

ܟܗ:ܘܐܲܩܝܼܡ ܠܗܘܿܢ ܩܝܵܡܵܐ ܕܲܫܠܵܡܵܐ: ܘܐܹܒܲܛܸܠ ܚܲܝ̄ܘܼܬ̣ܵܐ ܒܝܼܫܬܵܐ ܡ̣ܢ ܐܲܪܥܵܐ: ܘܢܸܥܡ̄ܪܘܼܢ ܒܡܲܕܼܒ̇ܪܵܐ ܒܫܸܠܝܵܐ: ܘܢܸܕܼܡ̱ܟ̣ܘܿܢ ܒܥܵܒ̣ܵܐ.

ܟܘ:ܘܐܸܬܸ̇ܠ ܠܗܘܿܢ ܒܘܼܪܟܲܬ̣ܝ ܚܕܼܵܪ ܪܵܡܲܬ̣ܝ: ܘܐܲܚܸܬ̣ ܡܸܛܪܵܐ ܒܙܲܒ̣ܢܹܗ: ܘܢܸܗܘܹܐ ܡܸܛܠ ܕܒ̣ܘܼܪܟ̇ܬ̣ܵܐ.

ܟܙ:ܘܐܝܼܠܵܢܹ̈ܐ ܕܐܲܪܥܵܐ ܢܸܥܒ̇ܕܼܘܼܢ ܦܹܐܪܹ̈ܐ: ܘܐܲܪܥܵܐ ܬܸܬܸ̇ܠ ܥܲܠ̈ܠܵܬ̣ܵܗ̇: ܘܢܸܬ̇ܒ̣ܘܼܢ ܒܐܲܪܥ̱ܗܘܿܢ ܒܣܲܒ̣ܪܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܬܸܒ̣̇ܪܹܬ̣ ܢܝܼܪܗܘܿܢ: ܘܦܲܨܝܼܬ̇ ܐܸܢܘܿܢ ܡ̣ܢ ܐܝܼܕܼܵܐ ܕܲܡܫܲܥܒ̇ܕܼܵܢܲܝ̈ܗܘܿܢ.

ܟܚ:ܘܬ̣ܘܼܒ̣ ܠܵܐ ܢܸܗܘܘܿܢ ܒܸܙܬ̣ܵܐ ܠܥܲܡܡܹ̈ܐ: ܐܵܦܠܵܐ ܬܹܐܟ̣ܘܿܠ ܐܸܢܘܿܢ ܚܲܝܘܲܬ̣ ܒܲܪܵܐ: ܘܢܸܬ̇ܒ̣ܘܼܢ ܒܣܲܒ̣ܪܵܐ: ܘܠܵܐ ܢܸܗܘܹܐ ܠܗܘܿܢ ܡܲܗܪܵܢܵܐ.

ܟܛ:ܘܐܲܩܝܼܡ ܠܗܘܿܢ ܢܸܨܒ̇ܬ̣ܵܐ ܕܲܫܠܵܡܵܐ: ܘܬ̣ܘܼܒ̣ ܠܵܐ ܢܸܫܬܲܢܩܘܼܢ ܒܟܲܦܢܵܐ ܒܐܲܪܥܵܐ: ܘܬ̣ܘܼܒ̣ ܠܵܐ ܢܩܲܒ̇ܠܘܼܢ ܚܸܣܕܵܐ ܕܥܲܡܡܹ̈ܐ.

ܠ:ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܗܘܿܢ: ܘܗܸܢܘܿܢ ܐܸܢܘܿܢ ܥܲܡܝ ܕܒܹܝܬ̣ ܝܑܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܠܐ:ܐܲܢ̄ܬܹ̇ܝܢ ܕܹܝܢ ܥܵܢ̈ܝ ܥܵـ̈ـܢܵܐ ܕܡܲܪܥܝܼܬ̣ܝ: ܒܢܲܝ̈ܢܵܫܵܐ ܐܲܢ̄ܬܹ̇ܝܢ: ܘܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟܹܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܠܗ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܸܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܠܛܘܼܪܵܐ ܕܣܵܥܝܼܪ: ܘܐܸܬ̣ܢܲܒܵܐ ܥܠܵܘܗܝ.

ܓ:ܘܐܸܡܲܪ ܠܹܗ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ ܛܘܼܪܵܐ ܕܣܵܥܝܼܪ: ܘܐܲܪܝܼܡ ܐܝܼܕܼܝ ܥܠܲܝܟ: ܘܐܸܥܒ̇ܕܼܵܟ ܠܲܚܒ̣ܵܠܵܐ ܘܲܠܬܸܡܗܵܐ.

ܕ:ܘܲܡܕܼܝܼ̈ܢܵܬ̣ܵܟ ܐܸܥܒܸ̇ܕܼ ܠܚܘܼܪܒܵܐ: ܘܐܲܢ̄ܬ̇ ܬܸܗܘܹܐ ܠܲܚܒ̣ܵܠܵܐ: ܘܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ.

ܗ:ܥܲܠ ܕܲܗܘ̤ܵܬ̣ ܠܵܟ ܒܥܸܠܕ̇ܒ̣ܵܒ̣ܘܼܬ̣ܵܐ ܠܥܵܠܲܡ: ܘܐܲܫܠܸܡ̣ܬ̇ ܠܲܒ̣ܢܲܝ̈ ܝܑܼܣܪܵܝܹܠ ܠܐܝܼܕܼܵܐ ܕܣܲܝܦܵܐ ܒܙܲܒ̣ܢܵܐ ܕܥܵܩܲܬ̣ܗܘܿܢ: ܘܲܒ̣ܙܲܒ̣ܢܵܐ ܕܥܵܘܼܠܵܐ ܕܩܸܨܗܘܿܢ.

ܘ:ܡܸܛܠ ܗܵܢܵܐ ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܠܲܕܼܡܵܐ ܐܸܥܒ̇ܕܼܵܟ: ܘܲܕܼܡܵܐ ܢܸܪܕ̇ܦܵܟ: ܕܡܵܐ ܕܲܣܢܲܝܬ̇: ܗ̤ܘ ܕܡܵܐ ܢܸܪܕ̇ܦܵܟ.

ܙ:ܘܐܸܥܒ̇ܕܼܝܼܘܗܝ ܠܛܘܼܪܵܐ ܕܣܵܥܝܼܪ ܠܲܚܒ̣ܵܠܵܐ ܘܲܠܬܸܡܗܵܐ: ܘܐܵܘܒܸ̇ܕܼ ܡܸܢܹܗ ܕܥܵܒܲܪ ܘܲܕ̇ܬ̣ܵܐܹܒ̣.

ܚ:ܘܐܸܡܠܹܐ ܛܘܼܪ̈ܵܘܗܝ ܡ̣ܢ ܚܪ̈ܝܼܒ̣ܵܘܗܝ: ܫܩܝܼܦܲܝ̈ܟ ܘܪ̈ܵܡܵܬ̣ܵܟ ܘܢܲܚܠܲܝ̈ܟ: ܚܪ̈ܝܼܒܹܐ ܕܣܲܝܦܵܐ ܢܸܦܠܘܼܢ ܒܗܘܿܢ.

ܛ:ܘܐܸܥܒ̇ܕܵܟ ܚܘܼܪܒܵܐ ܠܥܵܠܲܡ: ܘܲܡܕܼܝܼ̈ܢܵܬ̣ܵܟ ܠܵܐ ܢܸܬ̣̈ܝܲܬ̇ܒ̣ܵܢ: ܘܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ.

ܝ:ܥܲܠ ܕܐܸܡܪܬ̇ ܕܲܬ̣ܪܹܝܢ ܥܲܡܡ̈ܝܼܢ ܘܬܲܪܬܹ̇ܝܢ ܡܲܠ̈ܟ̇ܘܵܢ ܕܝܼܠܝ ܐܸܢܹܝܢ: ܘܐܸܢܵܐ ܐܹܪܲܬ̣ ܐܸܢܹܝܢ: ܘܡܵܪܝܵܐ ܬܲܡܵܢ ܗ̄ܘܼܵܐ.

ܝܐ:ܡܸܛܠ ܗܵܢܵܐ ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܕܐܸܥܒܲܕܼ ܠܵܟ ܐܲܝܟ ܪܘܼܓ̣ܙܵܟ: ܘܐܲܝܟ ܒܥܸܠܕ̇ܒ̣ܵܒ̣ܘܼܬ̣ܵܟ ܕܲܥܒܲܕ̇ܬ̇ ܘܲܣܢܲܝܬ̇ ܐܸܢܘܿܢ: ܘܐܸܬ̣ܓ̇ܠܹܐ ܒܗܘܿܢ ܡܵܐ ܕܕܼܵܐܹ̇ܢ ܐ̄ܢܵܐ ܠܵܟ.

ܝܒ:ܘܬܸܕܲܥ ܕܐܸܢܵܐ ܐ̄ܢܵܐ ܡܵܪܝܵܐ: ܫܸܡ̇ܥܹܬ̣ ܟܠܹܗ ܓܘܼܕܵܦܵܟ: ܕܐܸܡܲܪܬ̇ ܥܲܠ ܛܘܼܪܹ̈ܐ ܕܝܼܣܪܵܝܹܠ: ܕܚܲܪܒ̇ܝܼܢ ܐܸܢܘܿܢ: ܘܡܹܐܟ̣ܘܼܠܬܵܐ ܐܸܢܘܿܢ ܕܝܼܠܲܢ.

ܝܓ:ܘܐܵܘܪܸܟ̣ܬ̇ܘܼܢ ܥܠܲܝ ܦܘܼܡܟ̣ܘܿܢ: ܘܐܲܣܓ̇ܝܼܬ̇ܘܼܢ ܥܠܲܝ ܡܸܠܲܝ̈ܟ̇ܘܿܢ: ܘܐܸܢܵܐ ܫܸܡ̇ܥܹܬ̣.

ܝܕ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܛܘܼܪܵܐ ܕܣܵܥܲܪ ܕܲܫܪܸܐ ܒܚܲܕܼܘܼܬ̣ܵܐ ܕܟ̣ܠܵܗ̇ ܐܲܪܥܵܐ: ܠܲܚܒ̣ܵܠܵܐ ܐܸܥܒ̇ܕܼܵܟ.

ܝܗ:ܥܲܠ ܕܲܚ̣ܕܼܝܼܬ̇ ܠܝܵܪܬܘܼܬ̣ܵܐ ܕܒܹܝܬ̣ ܝܑܼܣܪܵܝܹܠ ܕܚܸܪܒܲܬ̤: ܗܵܟܲܢܵܐ ܐܸܥܒܸ̇ܕܼ ܠܵܟ: ܠܲܚܒ̣ܵܠܵܐ ܬܸܗܘܹܐ ܛܘܼܪܵܐ ܕܣܵܥܝܼܪ: ܘܐܲܕܼܘܿܡ ܟܠܵܗ̇: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܩܹܦܵܠܹܐܘܿܢ:ܠܘ.

ܐ:ܘܐܲܢ̄ܬ̇ ܒܲܪܢܵܫܵܐ: ܐܸܬ̣ܢܲܒܵܐ ܥܲܠ ܛܘܼܪܹ̈ܐ ܕܝܼܣܪܵܝܹܠ: ܘܐܸܡܲܪ ܠܛܘܼܪܹ̈ܐ ܕܝܼܣܪܵܝܹܠ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ.

ܒ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܡܲܪ ܥܠܲܝܟ̇ܘܿܢ ܒܥܸܠܕܒ̣ܵܒ̣ܵܐ ܐܲܚܵܢ: ܘܐܸܡܲܪ ܕܪ̈ܵܡܵܬ̣ܵܐ ܕܡ̣ܢ ܥܵܠܲܡ ܕܝܼܠܲܢ ܐܸܢܹܝܢ ܝܘܼܪܬܵܢܵܐ.

ܓ:ܡܸܛܠ ܗܵܢܵܐ ܐܸܬ̣ܢܲܒܵܐ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܸܨܛܲܥܲܪܬ̇ܘܿܢ ܘܐܸܬ̣ܚܪܸܒ̣ܬ̇ܘܿܢ: ܘܐܸܬ̣ܓܲܕܲܦܬ̇ܘܿܢ ܡ̣ܢ ܐܲܝܠܹܝܢ ܕܲܚܕܼܝܼܪܝܼܢ ܠܟ̣ܘܿܢ: ܘܲܗ̤ܘܲܝܬ̇ܘܿܢ ܝܘܼܪܬܵܢܵܐ ܠܫܲܪܟܵܐ ܕܥܲܡܡܹ̈ܐ: ܘܲܢܦܲܠܬ̇ܘܿܢ ܒܡܲܡܠܠܵܐ ܕܠܸܫܵܢܹ̈ܐ ܘܲܒ̣ܪܸܢܵܝܵܐ ܕܥܲܡܡܹ̈ܐ.

ܕ:ܡܸܛܠ ܗܵܢܵܐ ܫܡܲܥܘ ܦܸܬ̣ܓ̣ܵܡܹܗ ܕܡܵܪܹܐ ܡܵܪ̈ܵܘܵܬ̣ܵܐ: ܛܘܼܪܹ̈ܐ ܕܝܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܛܘܼܪܹ̈ܐ ܘܲܠܪ̈ܵܡܵܬ̣ܵܐ ܘܲܠܢܲܚ̈ܠܹܐ: ܘܲܠܥܘܼܡܩܹ̈ܐ ܘܲܠܚܲܪ̈ܒ̣ܵܬ̣ܵܐ ܕܨܲܕܼܝܵـ̈ـܢ: ܘܠܲܡܕܼܝܼ̈ܢܵܬ̣ܵܐ ܕܐܸܫܬ̇ܒܸܩ: ܘܲܗ̤ܘܲܝ̈ ܠܒܸܙܬ̣ܵܐ ܘܲܠܡܘܼܝܵܩܵܐ ܠܫܲܪܟܵܐ ܕܥܲܡܡܹ̈ܐ ܕܲܚܕܼܝܼܪܝܼܢ ܠܗܘܿܢ.

ܗ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܢܘܼܪܵܐ ܕܲܛܢܵܢܝ ܡܲܠܠܹ̇ܬ̣ ܥܲܠ ܫܲܪܟܵܐ ܕܥܲܡܡܹ̈ܐ ܘܥܲܠ ܟܠܵܗ̇ ܐܲܕܼܘܿܡ: ܥܲܠ ܕܲܥܒܲܕܼܘ ܠܗܘܿܢ ܐܲܪܥܝ ܝܘܼܪܬܵܢܵܐ: ܒܚܲܕܼܘܼܬ̣ܵܐ ܕܠܸܒ̇ܗܘܿܢ ܨܲܥܲܪܘ ܢܲܦ̮̈ܫܵܬ̣ܵܐ: ܕܢܸܫܒ̇ܘܿܢ ܐܸܢܹܝܢ ܘܢܸܒ̇ܙܘܼܢ ܐܸܢܹܝܢ.

 ܘ:ܡܸܛܠ ܗܵܢܵܐ ܐܸܬ̣ܢܲܒܵܐ ܥܲܠ ܐܲܪܥܵܐ ܕܝܼܣܪܵܝܹܠ: ܘܐܸܡܲܪ ܠܛܘܼܪܹ̈ܐ ܘܲܠܪ̈ܵܡܵܬ̣ܵܐ ܘܲܠܢܲܚ̈ܠܹܐ ܘܲܠܥܘܼܡܩܹ̈ܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܡܲܠܠܹ̇ܬ̣ ܒܲܛܢܵܢܝ ܘܲܒ̣ܚܸܡܬ̣ܝ: ܥܲܠ ܕܩܲܒܸ̇ܠܬ̇ܘܿܢ ܚܸܣܕܵܐ ܕܥܲܡܡܹ̈ܐ.

ܙ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܐܲܪܝܼܡܹ̇ܬ̣ ܐܝܼܕܼܝ ܥܲܠ ܥܲܡܡܹ̈ܐ ܕܲܚܕܼܝܼܪܝܼܢ ܠܟ̣ܘܿܢ: ܕܲܢܩܲܒ̇ܠܘܼܢ ܚܸܣܕ̇ܗܘܿܢ.

ܚ:ܐܲܢ̄ܬ̇ܘܿܢ ܕܹܝܢ ܛܘܼܪܹ̈ܐ ܕܝܼܣܪܵܝܹܠ: ܥܘܼܦܝܼܟ̣ܘܼܢ ܬܸܬ̇ܠܘܼܢ: ܘܦܹܐܪ̈ܲܝܟ̇ܘܿܢ ܬܪܲܒ̇ܘܿܢ ܠܥܲܡܝ ܝܑܼܣܪܵܝܹܠ: ܡܸܛܠ ܕܲܩ̣ܪܸܒ̣ܘ ܠܡܹܐܬ̣ܵܐ.

ܛ:ܘܗܵܐ ܡܸܬ̣ܦܢܸܐ ܐ̄ܢܵܐ ܥܠܲܝܟ̇ܘܿܢ: ܘܬܸܬ̣ܦܲܠܚܘܿܢ ܘܬܸܙܕܲܪܥܘܼܢ.

ܝ:ܘܐܲܣܓܹ̇ܐ ܥܠܲܝܟ̇ܘܿܢ ܒܢܲܝ̈ܢܵܫܵܐ ܕܟ̣ܠܹܗ ܒܹܝܬ̣ ܝܑܼܣܪܵܝܹܠ: ܘܢܸܬ̣ܝܲܬ̇ܒ̣ܵـ̈ـܢ ܡܕܼܝܼ̈ܢܵܬ̣ܵܐ ܘܚܲܪ̈ܒ̣ܵܬ̣ܵܐ ܢܸܬ̣ܒܲܢܝܵܢ.

ܝܐ:ܘܐܲܣܓܹ̇ܐ ܥܠܲܝܟ̇ܘܿܢ ܒܢܲܝ̈ܢܵܫܵܐ ܘܲܒ̣ܥܝܼܪܵܐ: ܘܢܸܟ̣ܒ̇ܪܘܼܢ ܘܢܸܣܓ̇ܘܿܢ: ܘܐܵܘܬܸ̇ܒ̣ܟ̣ܘܼܢ ܐܲܝܟ ܕܡ̣ܢ ܩܕܼܝܼܡ: ܘܐܲܛܐܸܒ̣ ܠܟ̣ܘܿܢ ܐܲܝܟ ܕܡ̣ܢ ܪܹܫܝܼܬ̣ܵܐ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܝܒ:ܘܐܹܗܲܠܸܟ ܒܟ̣ܘܿܢ ܒܢܲܝ̈ܢܵܫܵܐ ܠܥܲܡܝ ܝܑܼܣܪܵܝܹܠ: ܘܢܹܐܪܬ̇ܘܼܢܵܟ̣ܘܿܢ ܘܬܸܗܘܘܿܢ ܠܗܘܿܢ ܠܝܘܼܪܬܵܢܵܐ: ܘܬ̣ܘܼܒ̣ ܠܵܐ ܬܵܘܣܦܘܼܢ ܠܡܸܬ̣ܓܲܙܵܝܘܼ.

ܝܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܐܵܡ̇ܪܝܼܢ ܠܹܟ̣ܝ ܐܵܟ̣ܠܲܬ̣ ܒܢܲܝ̈ܢܵܫܵܐ ܐܲܢ̄ܬ̇ܝ: ܘܲܡܓܲܙܝܲܬ̣ ܥܲܡܵܗ̇.

ܝܕ:ܡܸܟܹ̇ܝܠ ܒܢܲܝ̈ܢܵܫܵܐ ܠܵܐ ܬܹܐܟ̣ܠܝܼܢ: ܘܥܲܡܹܟ̣ܝ ܬܘܼܒ̣ ܠܵܐ ܬܸܓܹ̇ܙܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܗ:ܘܬ̣ܘܼܒ̣ ܠܵܐ ܐܲܫܡܲܥ ܥܠܲܝܟ̇ܝ ܚܸܣܕܵܐ ܕܥܲܡܡܹ̈ܐ: ܘܨܲܥ̱ܪܗܘܿܢ ܬܘܼܒ̣ ܠܵܐ ܬܩܲܒ̇ܠܝܼܢ: ܘܥܲܡܹܟ̣ܝ ܬܘܼܒ̣ ܠܵܐ ܬܓܸ̇ܙܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܘ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܙ:ܒܲܪܢܵܫܵܐ: ܕܒܹܝܬ̣ ܝܑܼܣܪܵܝܹܠ ܝܵܬ̣ܒ̇ܝܼܢ ܒܐܲܪ̱ܥܗܘܿܢ: ܘܛܲܢܦܘܼܗ̇ ܒܐܘܼܪ̈ܚܵܬ̣ܗܘܿܢ ܘܲܒ̣ܨܸܢ̈ܥܵܬ̣ܗܘܿܢ: ܘܐܲܝܟ ܛܵܡܐܘܼܬ̣ܵܐ ܕܟܸܦ̮ܣܵܢܝܼܬ̣ܵܐ: ܗܵܟܲܢܵܐ ܗܘ̤ܵܬ̣ ܩܕܼܵܡܲܝ ܐܘܼܪܚ̄ܗܘܿܢ.

ܝܚ:ܘܐܹܫ̇ܕܹܬ̣ ܪܘܼܓ̣ܙܝ ܥܠܲܝܗܘܿܢ: ܡܸܛܠ ܕܡܵܐ ܕܐܹܫܲܕܼܘ ܒܐܲܪܥܵܐ: ܘܛܲܢܦܘܼܗ̇ ܒܲܦܬܲܟ̣ܪ̈ܲܝܗܘܿܢ.

ܝܛ:ܘܒܲܕ̇ܪܹܬ̣ ܐܸܢܘܿܢ ܒܥܲܡܡܹ̈ܐ: ܘܲܕܼܪܹܝܬ̣ ܐܸܢܘܿܢ ܒܲܡܕܼܝܼ̈ܢܵܬ̣ܵܐ: ܘܐܲܝܟ ܐܘܼܪ̈ܚܵܬ̣ܗܘܿܢ ܘܐܲܝܟ ܨܸܢ̈ܥܵܬ̣ܗܘܿܢ ܕܵܢܹ̇ܬ̣ ܐܸܢܘܿܢ.

ܟܟ:ܘܐܸܙܲܠ̣ܘ ܠܒܹܝܬ̣ ܥܲܡܡܹ̈ܐ: ܘܛܵܘܫ̣ܘ ܫܡܵܐ ܕܩܘܼܕܼܫܝ: ܘܐܵܡ̇ܪܝܼܢ ܗ̄ܘܼܵܘ ܠܗܘܿܢ ܥܲܡܡܹ̈ܐ: ܗܵܠܹܝܢ ܥܲܡܹܗ ܐܸܢܘܿܢ ܕܐܲܠܵܗܵܐ ܘܡ̣ܢ ܐܲܪܥܹܗ ܢܦܲܩ̣ܘ.

ܟܐ:ܘܚܵܣܹ̇ܬ̣ ܥܲܠ ܫܡܵܐ ܕܩܘܼܕܼܫܝ: ܕܛܵܘܫܘܼܗܝ ܕܒܹܝܬ̣ ܝܑܼܣܪܵܝܹܠ ܒܹܝܬ̣ ܥܲܡܡܹ̈ܐ ܕܐܸܙܲܠ̣ܘ ܠܘܵܬ̣ܗܘܿܢ.

ܟܒ:ܡܸܛܠ ܗܵܢܵܐ ܐܸܡܲܪ ܠܲܕܼܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܵܐ ܗ̄ܘܼܵܐ ܡܸܛܠܵܬ̣ܟ̣ܘܿܢ ܥܵܒܹ̇ܕܼ ܐ̄ܢܵܐ ܒܹܝܬ̣ ܝܑܼܣܪܵܝܹܠ: ܐܸܠܵܐ ܡܸܛܠ ܫܡܵܐ ܕܩܘܼܕܼܫܝ: ܕܛܵܘܫܬ̇ܘܿܢ ܒܹܝܬ̣ ܥܲܡܡܹ̈ܐ ܕܐܸܙܲܠܬ̇ܘܿܢ ܠܘܵܬ̣ܗܘܿܢ.

ܟܓ:ܕܐܹܩܲܕܸ̇ܫ ܫܹܡܝ ܪܲܒܵܐ: ܕܐܸܬ̇ܛܵܘܲܫ ܒܹܝܬ̣ ܥܲܡܡܹ̈ܐ ܕܛܵܘܫܬ̇ܘܿܢܵܝܗܝ ܒܲܝܢܵܬ̣ܗܘܿܢ: ܘܢܸܕ̇ܥܘܼܢ ܥܲܡܡܹ̈ܐ ܕܐܸܢܵܐ ܐ̄ܢܵܐ ܡܵܪܝܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܵܐ ܕܐܸܬ̣ܩܲܕ̇ܫܹ̇ܬ̣ ܒܟ̣ܘܿܢ ܠܥܹܢܲܝܗܘܿܢ.

ܟܕ:ܘܐܸܕܼܒܲܪܟ̣ܘܿܢ ܡ̣ܢ ܥܲܡܡܹ̈ܐ: ܘܐܹܟܲܢܸܫܟ̣ܘܿܢ ܡ̣ܢ ܡܕܼܝܼ̈ܢܵܬ̣ܵܐ: ܘܐܲܝܬ̇ܝܟ̣ܘܿܢ ܠܐܲܪ̱ܥܟ̣ܘܿܢ.

ܟܗ:ܘܐܸܪܘܿܣ ܥܠܲܝܟ̇ܘܿܢ ܡܲـ̈ـܝܵܐ ܕܟܲـ̈ـܝܵܐ: ܘܐܹܕܲܟܹ̇ܝܟ̣ܘܿܢ ܡ̣ܢ ܟܠܵܗ̇ ܛܲܢܦܘܼܬ̣ܟ̣ܘܿܢ: ܘܡ̣ܢ ܟܠܗܘܿܢ ܦܬܲܟ̣ܪ̈ܲܝܟ̇ܘܿܢ.

ܟܘ:ܘܐܸܬܸ̇ܠ ܠܟ̣ܘܿܢ ܠܸܒܵܐ ܚܲܕܼܬ̣ܵܐ: ܘܪܘܼܚܵܐ ܚܕܲܬܵܐ ܐܸܬܸ̇ܠ ܒܓ̣ܵܘܟ̣ܘܿܢ: ܘܐܲܥܒܲܪ ܠܸܒܵܐ ܕܟܹܐܦܵܐ ܡ̣ܢ ܒܸܣ̱ܪܟ̣ܘܿܢ: ܘܐܸܬܸ̇ܠ ܠܟ̣ܘܿܢ ܠܸܒܵܐ ܕܒܸܣܪܹ̈ܐ.

ܟܙ:ܘܐܸܬܸ̇ܠ ܪܘܼܚܝ ܒܓ̣ܵܘܟ̣ܘܿܢ: ܘܐܸܥܒܸ̇ܕܼ ܕܲܒ̣ܦܘܼܩ̈ܕܵܢܲܝ ܬܗܲܠܟ̣ܘܿܢ: ܘܕܼܝܼ̈ܢܲܝ ܬܸܛܪܘܼܢ ܘܬܸܥܒ̇ܕܼܘܼܢ ܐܸܢܘܿܢ.

ܟܚ:ܘܬܸܬ̇ܒ̣ܘܼܢ ܒܐܲܪܥܵܐ ܕܝܸܗ̄ܒܹ̇ܬ̣ ܠܐܲܒ̣ܵܗܲܝ̈ܟ̇ܘܿܢ: ܘܬܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܟ̣ܘܿܢ ܐܲܠܵܗܵܐ.

ܟܛ:ܘܐܸܦܪܘܿܩܟ̣ܘܿܢ ܡ̣ܢ ܟܠܵܗ̇ ܛܲܢܦܘܼܬ̣ܟ̣ܘܿܢ: ܘܐܸܩܪܹܐ ܠܲܥܒ̣ܘܼܪܵܐ ܘܐܲܣܓܹ̇ܝܘܗܝ: ܘܠܵܐ ܐܲܝܬܸ̇ܐ ܥܠܲܝܟ̇ܘܿܢ ܟܲܦܢܵܐ.

ܠ:ܘܐܲܣܓܹ̇ܐ ܦܹܐܪܹ̈ܐ ܕܐܝܼܠܵܢܹ̈ܐ: ܘܥܲܠ̈ܠܵܬ̣ܵܐ ܕܐܲܪܥܵܐ: ܘܬ̣ܘܼܒ̣ ܠܵܐ ܬܩܲܒ̇ܠܘܼܢ ܚܸܣܕܵܐ ܕܟܲܦܢܵܐ ܒܹܝܬ̣ ܥܲܡܡܹ̈ܐ.

ܠܐ:ܘܬܸܬ̇ܕܲܟ̣ܪܘܿܢ ܬܲܡܵܢ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܨܸܢ̈ܥܵܬ̣ܟ̣ܘܿܢ ܫܵܛ̈ܝܵܬ̣ܵܐ: ܘܢܸܬ̣ܩܲܡ̈ܛܵܢ ܐܲܦܲܝ̈ܟ̇ܘܿܢ ܒܥܵܘܼܠܟ̣ܘܿܢ ܘܲܒ̣ܛܲܢܦ̈ܘܵܬ̣ܟ̣ܘܿܢ.

ܠܒ:ܘܕܲܥܘ ܕܠܵܐ ܗ̄ܘܼܵܐ ܡܸܛܠܵܬ̣ܟ̣ܘܿܢ ܥܵܒܹܕܼ ܐ̄ܢܵܐ ܗܵܠܹܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܗܲܬ̣ܘ ܘܐܸܬ̇ܬܲܟ̣̄ܣܘ ܡ̣ܢ ܐܘܼܪ̈ܚܵܬ̣ܟ̣ܘܿܢ ܒܝܼ̈ܫܵܬ̣ܵܐ: ܘܠܵܐ ܬܡܘܼܬ̣ܘܼܢ ܕܒܹܝܬ̣ ܝܑܼܣܪܵܝܹܠ.

ܠܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܝܵܘܡܵܐ ܕܲܡܕ̇ܟܸ̇ܐ ܐ̄ܢܵܐ ܠܟ̣ܘܿܢ ܡܢ ܟܠܹܗ ܥܵܘܼܠܟ̣ܘܿܢ: ܡܵܘܬܸ̇ܒ̣ ܐ̄ܢܵܐ ܡܕܼܝܼ̈ܢܵܬ̣ܵܐ ܘܒ̣ܵܢܹ̇ܐ ܚܲܪ̈ܒ̣ܵܬ̣ܵܐ.

ܠܕ:ܘܐܲܪܥܵܐ ܕܚܲܪܒܵܐ ܗ̄ܘܼܵܬ̣ ܬܸܬ̣ܦܠܲܚ: ܕܨܲܕܼܝܵܐ ܗ̄ܘܼܵܬ̣ ܒܥܲܝ̈ܢܲܝ ܟܠ ܕܥܵܒܲܪ.

ܠܗ:ܘܢܹܐܡܪܘܼܢ ܐܲܪܥܵܐ ܗܵܝ ܚܲܪܒ̇ܬ̣ܵܐ: ܗܘ̤ܵܬ̣ ܐܲܝܟ ܦܲܪܕܲܝܣܵܐ ܕܲܥܕܸܢ: ܘܲܡܕܼܝܼ̈ܢܵܬ̣ܵܐ ܕܚܲܪ̈ܒܵܢ ܗ̄ܘܲܝ̈ ܘܲܡܣܲܚ̈ܦܵܢ: ܗ̤ܘܲܝ̈ ܟܲܪ̈ܟܹܐ ܥܲܫܝܼ̈ܢܹܐ.

ܠܘ:ܘܢܸܕ̇ܥܘܿܢ ܥܲܡܡܹ̈ܐ ܕܡܸܫܬܲܚܪܝܼܢ ܚܕܼܵܪܲܝܟ̇ܘܿܢ: ܕܐܸܢܵܐ ܡܵܪܝܵܐ ܒܵܢܹ̇ܐ ܐ̄ܢܵܐ ܡܣܲܚ̈ܦܵܬ̣ܵܐ: ܘܢܵܨܹ̇ܒ̣ ܐ̄ܢܵܐ ܚܲܪ̈ܒ̣ܵܬ̣ܵܐ: ܐܸܢܵܐ ܡܵܪܝܵܐ ܐܸܡ̇ܪܹܬ̣ ܘܥܵܒܹ̇ܕܼ ܐ̄ܢܵܐ.

ܠܙ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܘܼܒ̣ ܒܗܵܕܹܐ ܬܵܒܲܥ ܐ̄ܢܵܐ ܠܲܕܼܒܹܝܬ̣ ܝܑܼܣܪܵܝܹܠ: ܕܐܸܥܒܸ̇ܕܼ ܠܗܘܿܢ ܘܐܲܣܓܹ̇ܐ ܐܸܢܘܿܢ: ܐܲܝܟ ܥܵـ̈ـܢܵܐ ܕܲܒ̣ܢܲܝ̈ܢܵܫܵܐ.

ܠܚ:ܐܲܝܟ ܥܵـ̈ـܢܵܐ ܩܲܕ̇ܝܼ̈ܫܵܬ̣ܵܐ: ܘܐܲܝܟ ܥܵـ̈ـܢܵܐ ܕܐܘܿܪܸܫܠܸܡ ܒܙܲܒ̣ܢܵܐ ܕܥܲܕܼܥܹ̈ܕܹܝܗ̇: ܗܵܟܲܢܵܐ ܢܸܗܘ̈ܝܵܢ ܡܕܼܝܼ̈ܢܵܬ̣ܵܐ ܕܚܲܪ̈ܒܵܢ ܗ̄ܘܲܝ̈: ܘܢܸܬ̣ܡܲܠ̈ܝܵܢ ܥܵـ̈ـܢܵܐ ܕܲܒ̣ܢܲܝ̈ܢܵܫܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܥܠ ܚܝܬ ܡܝ̈ܬܐ.

ܩܹܦܵܠܹܐܘܿܢ:ܠܙ.

ܐ:ܘܲܗܘ̤ܵܬ̣ ܥܠܲܝ ܐܝܼܕܹܗ ܕܡܵܪܝܵܐ: ܘܐܲܦܩܲܢܝ ܒܪܘܼܚܹܗ ܡܵܪܝܵܐ: ܘܐܲܫ̱ܪܝܲܢܝ ܒܲܦܩܲܥܬ̣ܵܐ: ܘܡܲܠܝܵܐ ܗ̄ܘܼܵܬ̣ ܓܲܪ̈ܡܹܐ.

ܒ:ܘܐܲܥ̣ܒܲܪܲܢܝ ܥܠܲܝܗܘܿܢ ܚܕܼܵܪܲܝܗܘܿܢ: ܘܲܚܙܹ̇ܝܬ̣ ܕܣܲܓ̇ܝܼܐܝܼܢ ܛܵܒ̣ ܒܲܦܩܲܥܬ̣ܵܐ: ܘܛܵܒ̣ ܝܲܒ̇ܝܼܫܝܼܢ.

ܓ:ܘܐܸܡܲܪ ܠܝܼ: ܒܲܪܢܵܫܵܐ: ܚܵܐܹ̇ܝܢ ܓܲܪ̈ܡܹܐ ܗܵܠܹܝܢ: ܘܐܸܡ̇ܪܹܬ̣ ܐ̄ܢ̇ܬܘܼ ܝܵܕܲܥ ܡܵܪܹܐ ܡܵܪ̈ܵܘܵܬ̣ܵܐ.

ܕ:ܘܐܸܡܲܪ ܠܝܼ ܐܸܬ̣ܢܲܒܵܐ ܥܲܠ ܓܲܪ̈ܡܹܐ ܗܵܠܹܝܢ ܘܐܸܡܲܪ ܠܗܘܿܢ ܓܲܪ̈ܡܹܐ ܝܲܒ̇ܝܼܫܹ̈ܐ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ.

ܗ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ ܠܓܲܪ̈ܡܹܐ ܗܵܠܹܝܢ: ܗܵܐ ܐܸܢܵܐ ܡܲܥܸܠ ܐ̄ܢܵܐ ܒܟ̣ܘܿܢ ܪܘܼܚܵܐ ܘܬܸܚܘܿܢ.

ܘ:ܘܐܸܬܸ̇ܠ ܥܠܲܝܟ̇ܘܿܢ ܓܝܵܕܹ̈ܐ: ܘܐܲܣܸܩ ܥܠܲܝܟ̇ܘܿܢ ܒܸܣܪܵܐ: ܘܐܹܩܪܘܿܡ ܥܠܲܝܟ̇ܘܿܢ ܡܸܫܟܵܐ: ܘܐܸܬܸ̇ܠ ܒܟ̣ܘܿܢ ܪܘܼܚܵܐ ܘܬܸܚܘܿܢ: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܙ:ܘܐܸܬ̣ܢܲܒ̇ܝܼܬ̣ ܐܲܝܟ ܕܦܲܩ̣ܕܲܢܝ: ܘܟܲܕܼ ܐܸܬ̣ܢܲܒ̇ܝܼܬ̣: ܗܘ̤ܵܐ ܩܵܠܵܐ ܘܙܵܘܥܵܐ: ܘܲܩ̣ܪܸܒ̣ܘ ܓܲܪ̈ܡܹܐ ܓܲܪܡܵܐ ܠܘܵܬ̣ ܫܪܝܼܬܹܗ.

ܚ:ܘܲܚܙܹ̇ܝܬ̣ ܕܲܣܠܸܩ̣ ܥܠܲܝܗܘܿܢ ܓܝܵܕܹ̈ܐ ܘܒܸܣܪܵܐ: ܘܐܸܬ̣ܩܪܸܡ ܥܠܲܝܗܘܿܢ ܡܸܫܟܵܐ ܡ̣ܢ ܠܥܸܠ: ܘܪܘܼܚܵܐ ܠܲܝܬ̇ ܗ̄ܘܼܵܬ̣ ܒܗܘܿܢ.

ܛ:ܘܐܸܡܲܪ ܠܝܼ: ܐܸܬ̣ܢܲܒܵܐ ܥܲܠ ܪܘܼܚܵܐ: ܐܸܬ̣ܢܲܒܵܐ ܒܲܪܢܵܫܵܐ: ܘܐܸܡܲܪ ܠܪܘܼܚܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܵܝ ܪܘܼܚܵܐ ܡ̣ܢ ܐܲܪܒܲܥ ܪ̈ܘܼܚܹܐ: ܘܦܘܿܚܝ ܒܗܵܠܹܝܢ ܩܛܝܼ̈ܠܹܐ ܘܢܸܚܘܿܢ.

ܝ:ܘܐܸܬ̣ܢܲܒ̇ܝܼܬ̣ ܐܲܝܟ ܕܦܲܩ̣ܕܲܢܝ: ܘܥܸܠܲܬ̤ ܒܗܘܿܢ ܪܘܼܚܵܐ ܘܲܚܝܵܘ: ܘܩܵܡ̣ܘ ܥܲܠ ܪܸ̈ܓ̣ܠܲܝܗܘܿܢ: ܚܲܝܠܵܐ ܕܛܵܒ̣ ܣܲܓ̇ܝܼ.

ܝܐ:ܘܐܸܡܲܪ ܠܝܼ: ܒܲܪܢܵܫܵܐ: ܗܵܠܹܝܢ ܓܲܪ̈ܡܹܐ ܟܠܗܘܿܢ ܕܲܒ̣ܢܲܝ̈ ܝܑܼܣܪܵܝܹܠ ܐܸܢܘܿܢ: ܕܐܵܡ̇ܪܝܼܢ ܗ̄ܘܼܵܘ ܝܑܼܒܸܫ̣ܘ ܓܲܪ̈ܡܲܝܢ: ܘܐܸܒܲܕܼ ܣܲܒ̣ܪܵܢ: ܘܲܒ̣ܛܸܠܢ ܠܲܢ.

ܝܒ:ܡܸܛܠ ܗܵܢܵܐ ܐܸܬ̣ܢܲܒܵܐ ܘܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܦܬܲܚ ܐ̄ܢܵܐ ܩܲܒ̣ܪ̈ܲܝܟ̇ܘܿܢ: ܘܡܲܝܬܸ̇ܐ ܐ̄ܢܵܐ ܠܟܘܿܢ ܠܐܲܪܥܵܐ ܕܝܼܣܪܵܝܹܠ.

ܝܓ:ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܦܸܬ̣ܚܹ̇ܬ̣ ܩܲܒ̣ܪ̈ܲܝܟ̇ܘܿܢ: ܘܡܵܐ ܕܐܲܣܸܩܬ̇ܟ̣ܘܿܢ ܡ̣ܢ ܩܲܒ̣ܪ̈ܲܝܟ̇ܘܿܢ.

ܝܕ:ܐܸܬܸ̇ܠ ܪܘܼܚܝ ܒܟ̣ܘܿܢ ܘܬܸܚܘܿܢ: ܘܐܸܫܒ̇ܘܿܩܟ̣ܘܿܢ ܒܐܲܪ̱ܥܟ̣ܘܿܢ: ܘܬܸܕ̇ܥܘܿܢ ܕܐܸܢܵܐ ܐ̄ܢܵܐ ܡܵܪܝܵܐ: ܐܸܡ̇ܪܹܬ̣ ܘܥܵܒܹ̇ܕܼ ܐ̄ܢܵܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܥܠ ܕܣܠܩܝܢ ܘܗܘܝܢ ܚܕ ܥܡܐ ܘܚܕܐ ܡܠܟܘܬܐ

ܝܗ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܝܘ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܣܲܒ̣ ܠܵܟ ܩܲܝܣܵܐ ܚܲܕܼ: ܘܲܟ̣ܬ̇ܘܼܒ̣ ܥܠܵܘܗܝ ܝܑܼܗܘܼܕܼܵܐ ܘܲܒ̣ܢܲܝ̈ ܝܑܼܣܪܵܝܹܠ ܚܲܒ̣ܪ̈ܵܘܗܝ: ܘܣܲܒ̣ ܩܲܝܣܵܐ ܐ̄ܚܪܹܢܵܐ: ܘܲܟ̣ܬ̣ܘܿܒ̣ ܥܠܵܘܗܝ ܝܵܘܣܸܦ ܒܩܲܝܣܵܐ ܕܐܲܦܪܹܝܡ: ܘܟ̣ܠܗܘܿܢ ܒܢܲܝ̈ ܝܼܣܪܵܝܹܠ ܚܲܒ̣ܪ̈ܵܘܗܝ.

ܝܙ:ܘܩܲܪܸܒ̣ܘ ܐܸܢܘܿܢ ܚܲܕܼ ܠܘܵܬ̣ ܚܲܕܼ: ܘܢܸܗܘܘܿܢ ܚܲܕܼ ܩܹܝܣ ܒܐܝܼܕܼܵܟ.

ܝܚ:ܘܐܸܢ ܐܸܡܲܪܘ ܠܵܟ ܒܢܲܝ̈ ܥܲܡܵܟ ܚܵܘܵܢ ܡܵܢܵܐ ܐܸܢܹܝܢ ܗܵܠܹܝܢ.

ܝܛ:ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܢܵܣܹ̇ܒ̣ ܐ̄ܢܵܐ ܩܲܝܣܵܐ ܕܝܵܘܣܸܦ ܕܒ̣ܐܝܼܕܹܗ ܕܐܲܦܪܹܝܡ: ܘܫܲܒ̣̈ܛܹܐ ܕܝܼܣܪܵܝܹܠ ܚܲܒ̣ܪ̈ܵܘܗܝ: ܘܐܸܬܸ̇ܠ ܐܸܢܘܿܢ ܥܲܡ ܩܲܝܣܵܐ ܕܲܝܗܘܼܕܼܵܐ: ܘܐܸܥܒܸ̇ܕܼ ܐܸܢܘܿܢ ܚܲܕܼ ܩܹܝܣ: ܘܢܸܗܘܘܿܢ ܚܲܕܼ ܒܐܝܼܕܼܝ.

ܟܟ:ܘܩܲܝܣܹ̈ܐ ܕܟ̣ܵܬܹ̇ܒ̣ ܐܲܢ̄ܬ̇ ܥܠܲܝܗܘܿܢ: ܐܲܚܘܿܕܼ ܐܸܢܘܿܢ ܒܐܝܼܕܼܵܟ ܠܥܹܢܲܝܗܘܿܢ.

ܟܐ:ܘܐܸܡܲܪ ܠܗܘܿܢ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܢܵܣܹ̇ܒ̣ ܐ̄ܢܵܐ ܠܲܒ̣ܢܲܝ̈ ܝܑܼܣܪܵܝܹܠ: ܡ̣ܢ ܒܲܝܢܵܬ̣ ܥܲܡܡܹ̈ܐ ܕܐܸܙܲܠ̣ܘ ܠܘܵܬ̣ܗܘܿܢ: ܘܐܹܟܲܢܸܫ ܐܸܢܘܿܢ ܘܐܲܝܬܹ̇ܐ ܐܸܢܘܿܢ ܠܐܲܪ̱ܥܗܘܿܢ.

ܟܒ:ܘܐܸܥܒܸ̇ܕܼ ܐܸܢܘܿܢ ܥܲܡܵܐ ܚܲܕܼ ܒܐܲܪܥܵܐ ܒܛܘܼܪܹ̈ܐ ܕܝܼܣܪܵܝܹܠ: ܘܚܲܕܼ ܡܲܠܟܵܐ ܢܸܗܘܹܐ ܠܟ̣ܠܗܘܿܢ: ܘܬ̣ܘܼܒ̣ ܠܵܐ ܢܸܗܘܘܿܢ ܬܪܹܝܢ ܥܲܡܡ̈ܝܼܢ: ܘܬ̣ܘܼܒ̣ ܠܵܐ ܢܸܬ̣ܦܲܠܓܘܼܢ ܠܬܲܪܬܹ̇ܝܢ ܡܲܠ̈ܟ̇ܘܿܢ.

ܟܓ:ܘܬ̣ܘܼܒ̣ ܠܵܐ ܢܸܬ̇ܛܲܢܦܘܿܢ ܒܲܦܬܲܟ̣ܪ̈ܲܝܗܘܿܢ: ܘܲܒ̣ܛܲܢ̈ܦܘܵܬ̣ܗܘܿܢ ܘܲܒ̣ܟ̣ܠܹܗ ܥܵܘܼܠܗܘܿܢ: ܘܐܸܦܪܘܿܩ ܐܸܢܘܿܢ ܡ̣ܢ ܟܠܹܗ ܒܹܝܬ̣ ܡܲܥܡܲܪܗܘܿܢ ܕܲܚܛܵܘ ܒܹܗ: ܘܐܸܕܲܟܸ̇ܐ ܐܸܢܘܿܢ ܘܢܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܗܘܿܢ ܐܲܠܵܗܵܐ.

ܟܕ:ܘܥܲܒ̣ܕ̇ܝ ܕܵܘܝܼܕܼ ܢܲܡܠܸܟ ܥܠܲܝܗܘܿܢ: ܘܪܵܥܝܵܐ ܚܲܕܼ ܢܸܗܘܹܐ ܠܟ̣ܠܗܘܿܢ: ܘܲܒ̣ܕܼܝܼ̈ܢܲܝ ܢܗܲܠܟ̣ܘܼܢ: ܘܦܘܼܩܕܵܢܲܝ̈ ܢܸܛܪܘܿܢ ܘܢܸܥܒ̇ܕܼܘܼܢ ܐܸܢܘܿܢ.

ܟܗ:ܘܢܸܬ̇ܒ̣ܘܼܢ ܒܐܲܪܥܵܐ ܕܝܸܗ̄ܒܹ̇ܬ̣ ܠܥܲܒ̣ܕ̇ܝ ܝܲܥܩܘܿܒ̣: ܕܝܼܬܸܒ̣ܘ ܒܵܗ̇ ܐܲܒ̣ܵܗܲܝ̈ܗܘܿܢ: ܘܢܸܬܸ̇ܒ̣ܘܼܢ ܒܵܗ̇ ܗܸܢܘܿܢ ܘܲܒ̣ܢܲܝ̈ܗܘܿܢ: ܘܲܒ̣ܢܲܝ̈ ܒܢܲܝ̈ܗܘܿܢ ܠܥܵܠܲܡ: ܘܕܼܵܘܝܼܕܼ ܥܲܒ̣ܕ̇ܝ ܢܸܗܘܹܐ ܠܗܘܿܢ ܡܕܲܒ̇ܪܵܢܵܐ ܠܥܵܠܲܡ.

ܟܘ:ܘܐܲܩܝܼܡ ܠܗܘܿܢ ܩܝܵܡܵܐ ܕܲܫܠܵܡܵܐ ܘܲܩܝܵܡܵܐ ܕܥܵܠܲܡ ܢܸܗܘܹܐ ܥܲܡܗܘܿܢ: ܘܐܲܣܓܹ̇ܐ ܐܸܢܘܿܢ: ܘܐܸܬܸ̇ܠ ܡܲܩܕܲܫܝ ܒܲܝܢܵܬ̣ܗܘܿܢ ܠܥܵܠܲܡ.

ܟܙ:ܘܢܸܗܘܹܐ ܒܹܝܬ̣ ܡܲܫܪܲܝ ܒܗܘܿܢ: ܘܐܸܗܘܹܐ ܠܗܘܿܢ ܐܲܠܵܗܵܐ: ܘܗܸܢܘܿܢ ܢܸܗܘܘܿܢ ܠܝܼ ܥܲܡܵܐ.

ܟܚ:ܘܢܸܕ̇ܥܘܿܢ ܥܲܡܡܹ̈ܐ ܕܐܸܢܵܐ ܐ̄ܢܵܐ ܡܵܪܝܵܐ ܕܲܡܩܲܕܸ̇ܫ ܐ̄ܢܵܐ ܠܝܼܣܪܵܝܹܠ: ܡܵܐ ܕܲܗܘ̤ܵܐ ܒܗܘܿܢ ܡܲܩܕܲܫܝ ܠܥܵܠܲܡ.

ܥܲܠ ܕܒܝܬ ܓܘܓ ܘܡܓܘܓ ܕܣܠܩܝܢ ܥܠܝܗܘܢ ܡܐ ܕܣܠܩܘ ܡܢ ܒܒܠ.

ܩܹܦܵܠܹܐܘܿܢ:ܠܚ.

ܐ:ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.

ܒ:ܒܲܪܢܵܫܵܐ: ܣܝܼܡ ܐܲܦܲܝ̈ܟ ܥܲܠ ܓܘܿܓ̣: ܘܥܲܠ ܐܲܪܥܵܐ ܕܡܵܓ̣ܘܿܓ̣: ܡܕܲܒ̇ܪܵܢܵܐ ܘܪܹܫܵܐ ܕܡܵܫܵܟ ܘܲܕ̇ܬ̣ܘܼܒܹܝܠ: ܘܐܸܬ̣ܢܲܒܵܐ ܥܠܵܘܗܝ ܘܐܸܡܲܪ.

ܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܢܵܐ ܥܠܲܝܟ ܓܘܿܓ̣: ܡܕܲܒ̇ܪܵܢܵܐ ܘܪܹܫܵܐ ܕܡܵܫܵܟ ܘܲܕ̇ܬ̣ܘܼܒܹܝܠ.

ܕ:ܘܐܹܟܲܢܫܵܟ ܘܐܲܪܡܸܐ ܒܠܵܡܵܐ ܒܦܲܟܲܝ̈ܟ: ܘܐܲܦܩܵܟ ܡ̣ܢ ܐܲܬ̣ܪܵܟ ܠܵܟ ܘܲܠܟ̣ܠܹܗ ܚܲܝܠܵܟ: ܘܪ̈ܲܟ̣ܫܵܐ ܘܦܲܪ̈ܵܫܹܐ ܕܲܠܒ̣ܝܼܫܝܼܢ ܙܲܝܢܵܐ: ܟܠܗܘܿܢ ܟܸܢܫܵܐ ܪܲܒܵܐ: ܒܢܲܝ̈ܙܟܹܐ ܘܲܒ̣ܣܲܟ̇ܪܹ̈ܐ ܘܐܲܚܝܼܕܲܝ̈ ܣܲܝ̈ܦܹܐ.

ܗ:ܟܠܗܘܿܢ ܦܵܪ̈ܣܵܝܹܐ: ܘܟ̣ܘܼ̈ܫܵܝܹܐ: ܘܦܘܿܛܵܝܹ̈ܐ: ܥܲܡܗܘܿܢ ܒܣܲܟ̇ܪܹ̈ܐ: ܘܲܒ̣ܣܲܢ̱ܘܼܪ̈ܵܬ̣ܵܐ.

ܘ:ܓܵܡܵܪ ܘܟ̣ܠܹܗ ܚܲܝܠܵܗ̇: ܘܒܹܝܬ̣ ܬܘܿܓܸܪܡܵܐ: ܘܲܫܦܘܿܠܲܝ̈ ܓܲܪܒ̇ܝܵܐ ܘܟ̣ܠܹܗ ܚܲܝܠܗܘܿܢ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ.

ܙ:ܐܸܬ̇ܛܲܝܲܒ̣ ܐܲܢ̄ܬ̇ ܘܟ̣ܠܹܗ ܟܸܢܫܵܟ ܕܲܟ̣ܢܝܼܫ ܥܲܡܵܟ: ܘܲܗܘ̤ܝܼ ܠܗܘܿܢ ܡܲܛܲܪܬܵܐ.

ܚ:ܡ̣ܢ ܝܵܘ̈ܡܵܬ̣ܵܐ ܩܲܕܼܡܵܝܹ̈ܐ ܐܸܬ̣ܦܩܸܕ̇ܬ̇: ܘܲܒ̣ܚܲܪܬ̣ܵܐ ܕܲܫܢܲـ̈ـܝܵܐ ܬܹܐܬܹܐ ܥܲܠ ܛܘܼܪܹ̈ܐ ܕܝܼܣܪܵܝܹܠ: ܘܥܲܠ ܐܲܪܥܵܐ ܕܐܸܫܬܲܝܢܲܬ̤ ܡ̣ܢ ܚܲܪܒܵܐ: ܘܐܸܬ̣ܟܲܢܫܲܬ̤ ܡ̣ܢ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܝܼܬܸܒ̣ܘ ܒܵܗ̇ ܟܠܗܘܿܢ ܒܫܸܠܝܵܐ.

ܛ:ܘܬܸܣܲܩ ܐܲܝܟ ܕܠܘܼܚܝܵܐ: ܘܐܲܝܟ ܥܢܵܢܵܐ ܕܲܡܟܲܣܝܵܐ ܠܐܲܪܥܵܐ: ܐܲܢ̄ܬ̇ ܘܟ̣ܠܹܗ ܚܲܝܠܵܟ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ.

ܝ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܹܗ ܒܝܵܘܡܵܐ ܗܵܘܿ: ܢܸܣ̈ܩܵܢ ܡܸܠܹ̈ܐ ܥܲܠ ܠܸܒܵܟ: ܘܬܸܬ̣ܚܲܫܲܒ̣ ܡܲܚܫܲܒ̣ܬ̣ܵܐ ܒܝܼܫܬܵܐ: ܘܬܹܐܡܲܪ.

ܝܐ:ܐܸܣܲܩ ܥܲܠ ܐܲܪܥܵܐ ܟܲܗܝܼܢܬܵܐ: ܘܐܹܙܲܠ ܥܲܠ ܐܲܝܠܹܝܢ ܕܝܵܬ̣ܒ̇ܝܼܢ ܒܫܸܠܝܵܐ: ܕܠܵܐ ܫܘܼܪܹ̈ܐ: ܘܠܵܐ ܣܘܼܟ̇ܪܹ̈ܐ: ܘܠܵܐ ܬܲܪ̈ܥܹܐ ܐܝܼܬ̣ ܠܗܘܿܢ.

ܝܒ:ܕܬܸܫܒܸ̇ܐ ܫܒ̣ܝܼܬ̣ܵܐ: ܘܬܸܒ̇ܘܙ ܒܸܙܬ̣ܵܐ: ܘܬܲܗܦܸܟ ܐܝܼܕܼܵܟ ܥܲܠ ܚܲܪ̈ܒ̣ܵܬ̣ܵܐ ܕܐܸܬ̣ܝܲܬܲܒ̣: ܘܥܲܠ ܥܲܡܵܐ ܕܐܸܬ̣ܟܲܢܲܫ ܡ̣ܢ ܥܲܡܡܹ̈ܐ: ܕܲܩ̣ܢܵܘ ܒܥܝܼܪܵܐ ܘܩܸܢܝܵܢܵܐ: ܘܝܵܬ̣ܒ̇ܝܼܢ ܥܲܠ ܫܘܼܦܪܵܗ̇ ܕܐܲܪܥܵܐ.

ܝܓ:ܫܒ̣ܵܐ ܘܕܼܵܪܵܢ ܘܬܲܓܵܪܹ̈ܐ ܕܬܲܪܫܝܼܫ: ܘܟܠܗܹܝܢ ܩܘܼܪ̈ܝܵܐ ܢܹܐܡܪ̈ܵܢ ܠܵܟ: ܐܸܬܲܝܬ̇ ܠܡܸܫܒܵܐ ܫܒ̣ܝܼܬ̣ܵܐ: ܘܲܠܡܸܒܲܙ ܒܸܙܬ̣ܵܐ: ܘܟܲܢܸܫ̣ܬ̇ ܟܢܘܼܫܝܵܟ ܕܬܸܫܩܘܿܠ ܣܹܐܡܵܐ ܘܕܲܗܒ̣ܵܐ: ܘܬܸܣܲܒ̣ ܒܥܝܼܪܵܐ ܘܩܸܢܝܵܢܵܐ: ܘܬܸܕܼܒܲܪ ܕܒ̣ܵܪܬܵܐ ܪܲܒ̇ܬ̣ܵܐ.

ܝܕ:ܡܸܛܠ ܗܵܢܵܐ ܐܸܬ̣ܢܲܒܵܐ ܒܲܪܢܵܫܵܐ: ܘܐܸܡܲܪ ܠܓ̣ܘܿܓ̣: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܹܗ ܒܝܵܘܡܵܐ ܕܢܸܬܸ̇ܒ̣ ܥܲܡܝ ܝܑܼܣܪܵܝܹܠ ܒܫܸܠܝܵܐ: ܬܸܕܲܥ.

ܝܗ:ܘܬܹܐܬܹܐ ܡ̣ܢ ܐܲܬ̣ܪܵܟ ܡ̣ܢ ܫܦܘܿܠܲܝ̈ ܓܲܪܒ̇ܝܵܐ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ: ܟܠܗܘܿܢ ܪ̈ܵܟ̣ܒܲܝ ܪ̈ܲܟ̣ܫܵܐ: ܟܢܘܼܫܝܵܐ ܪܲܒܵܐ ܘܚܲܝܠܵܐ ܣܲܓ̇ܝܼܵܐܐ.

ܝܘ:ܘܬܸܣܲܩ ܥܲܠ ܥܲܡܝ ܝܑܼܣܪܵܝܹܠ: ܐܲܝܟ ܥܢܵܢܵܐ ܕܲܡܟܲܣܝܵܐ ܠܐܲܪܥܵܐ: ܠܚܲܪܬ̣ܵܐ ܕܝܵܘ̈ܡܵܬ̣ܵܐ ܬܹܐܬܹܐ: ܘܐܲܝܬܹ̇ܝܟ ܠܐܲܪܥܝ: ܘܢܸܕ̇ܥܘܼܢܵܢܝ ܥܲܡܡܹ̈ܐ ܡܵܐ ܕܐܸܬ̣ܩܲܕ̇ܫܹ̇ܬ̣ ܒܵܟ ܠܥܹܢܲܝܗܘܿܢ.

ܝܙ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܲܢ̄ܬ̇ܘܼ ܕܐܸܡ̇ܪܹܬ̣ ܥܠܲܝܟ ܒܝܵܘ̈ܡܵܬ̣ܵܐ ܩܲܕܼܡܵܝܹ̈ܐ: ܒܐܝܼܕܼܵܐ ܕܥܲܒ̣̈ܕܲܝ ܢܒ̣ܝܹ̈ܐ ܕܝܼܣܪܵܝܹܠ: ܕܡܸܬ̣ܢܲܒܹ̇ܝܢ ܗ̄ܘܼܵܘ ܒܝܵܘ̈ܡܵܬ̣ܵܐ ܗܵܢ̇ܘܿܢ: ܘܒܲܫܢܲـ̈ـܝܵܐ ܗܵܠܹܝܢ: ܕܐܲܝܬܹ̇ܝܟ ܥܠܲܝܗܘܿܢ.

ܝܚ:ܒܹܗ ܒܝܵܘܡܵܐ ܗܵܘܿ ܕܢܹܐܬܹܐ ܓܘܿܓ̣: ܥܲܠ ܐܲܪܥܵܐ ܕܝܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܢܹܐܩܲܕܼ ܪܘܼܓ̣ܙܝ ܒܚܸܡܬ̣ܝ ܘܒܲܛܢܵܢܝ.

ܝܛ:ܒܢܘܼܪܵܐ ܕܪܘܼܓ̣ܙܝ ܡܲܠܠܹ̇ܬ̣: ܕܒܹܗ ܒܝܵܘܡܵܐ ܗܵܘܿ: ܢܸܗܘܹܐ ܙܵܘܥܵܐ ܪܲܒܵܐ ܒܐܲܪܥܵܐ ܕܝܼܣܪܵܝܹܠ.

ܟܟ:ܘܲܢܙܘܼܥܘܼܢ ܩܕܼܵܡܵܘܗܝ ܢܘܼܢܹ̈ܐ ܕܝܲܡܵܐ: ܘܦܵܪܲܚܬ̣ܵܐ ܕܲܫܡܲܝܵܐ: ܘܚܲܝ̄ܘܼܬ̣ܵܐ ܕܕܲܒ̣ܪܵܐ: ܘܟ̣ܠ ܪ̈ܲܚܫܵܐ ܕܪܵܚܹ̇ܫ ܒܐܲܪܥܵܐ: ܘܟ̣ܠܗܘܿܢ ܒܢܲܝ̈ܢܵܫܵܐ ܕܥܲܠ ܐܲܦܲܝ̈ ܐܲܪܥܵܐ: ܘܢܸܣܬܲܚܦܘܼܢ ܛܘܼܪܹ̈ܐ: ܘܢܸܦܠܘܿܢ ܡܲܓܕ̇ܠܹ̈ܐ.

ܟܐ:ܘܟ̣ܠܗܘܿܢ ܫܘܼܪܹ̈ܐ ܒܐܲܪܥܵܐ ܢܸܦܠܘܿܢ: ܘܐܸܩܪܹܐ ܥܠܵܘܗܝ ܚܲܪܒܵܐ ܒܟ̣ܠܗܘܿܢ ܛܘܼܪ̈ܲܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܣܲܝܦܹܗ ܕܓܲܒ̣ܪܵܐ ܒܐܲܚܘܼܗܝ ܢܸܗܘܹܐ.

ܟܒ:ܘܐܹܕ̇ܢܝܼܘܗܝ ܒܡܵܘܬܵܐ ܘܒܲܕܼܡܵܐ: ܘܡܸܛܪܵܐ ܕܓ̣ܵܪܹܦ ܘܟܹܐܦܹ̈ܐ ܕܕܲܚܪܵܐ: ܘܢܘܼܪܵܐ ܘܟܸܒ̣ܪܝܼܬ̣ܵܐ ܐܲܚܸܬ̣ ܥܠܵܘܗܝ ܘܥܲܠ ܪܵܘܪ̈ܒ̣ܵܢܵܘܗܝ: ܘܥܲܠ ܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܹܗ.

ܟܓ:ܘܐܹܪܲܒ̣ ܘܐܸܬ̣ܩܲܕܲܫ ܠܥܹܝܢ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܩܹܦܵܠܹܐܘܿܢ:ܠܛ.

ܐ:ܘܐܲܢ̄ܬ̇ ܒܲܪܢܵܫܵܐ: ܐܸܬ̣ܢܲܒܵܐ ܥܲܠ ܓܘܿܓ̣ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܠܲܝܟ ܓܘܿܓ̣: ܡܕܲܒ̇ܪܵܢܵܐ ܘܪܹܫܵܐ ܕܡܵܫܵܟ ܘܲܕ̇ܬ̣ܘܼܒܹܝܠ.

ܒ:ܘܐܹܫܲܝܢܵܟ ܘܐܹܟܲܢܫܵܟ: ܘܐܲܣܩܵܟ ܡ̣ܢ ܫܦܘܿܠܲܝ̈ ܓܲܪܒ̇ܝܵܐ: ܘܐܲܝܬܹ̇ܝܟ ܠܛܘܼܪܹ̈ܐ ܕܝܼܣܪܵܝܹܠ.

ܓ:ܘܐܲܦܸܕܼ ܩܸܫܬܵܟ ܡ̣ܢ ܣܸܡܵܠܵܟ: ܘܓܹܐܪ̈ܲܝܟ ܡ̣ܢ ܝܲܡܝܼܢܵܟ.

ܕ:ܘܲܒ̣ܛܘܼܪܹ̈ܐ ܕܝܼܣܪܵܝܹܠ ܬܸܦܸܠ: ܐܲܢ̄ܬ̇ ܘܟ̣ܠܹܗ ܚܲܝܠܵܟ: ܘܥܲܡܡܹ̈ܐ ܣܲܓ̇ܝܼ̈ܐܹܐ ܕܥܲܡܵܟ: ܠܦܵܪܲܚܬ̣ܵܐ ܕܲܫܡܲܝܵܐ ܘܲܠܚܲܝ̄ܘܼܬ̣ܵܐ ܕܐܲܪܥܵܐ: ܝܲܗ̄ܒܲܬܵܟ ܠܡܹܐܟ̣ܘܼܠܬܵܐ.

ܗ:ܘܥܲܠ ܐܲܦܲܝ̈ ܕܲܒ̣ܪܵܐ ܬܸܦܸܠ: ܡܸܛܠ ܕܐܸܢܵܐ ܡܲܠܠܹ̇ܬ̣ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܘ:ܘܐܹܫܲܕܲܪ ܢܘܼܪܵܐ ܥܲܠ ܡܵܓ̣ܘܿܓ̣: ܘܥܲܠ ܝܵܬ̣ܒܲܝ̈ ܓܵܙܪ̈ܵܬ̣ܵܐ ܕܲܒ̣ܫܸܠܝܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ.

ܙ:ܘܲܫܡܵܐ ܕܩܘܼܕܼܫܝ ܐܵܘܕܲܥ ܒܓ̣ܵܘ ܥܲܡܝ ܝܑܼܣܪܵܝܹܠ: ܘܬ̣ܘܼܒ̣ ܠܵܐ ܐܹܛܵܘܸܫ ܫܡܵܐ ܕܩܘܼܕܼܫܝ: ܘܢܸܕ̇ܥܘܼܢ ܥܲܡܡܹ̈ܐ ܕܐܸܢܵܐ ܐ̄ܢܵܐ ܡܵܪܝܵܐ ܩܲܕ̇ܝܼܫܵܐ ܕܝܼܣܪܵܝܹܠ.

ܚ:ܗܵܐ ܡܛ̣ܵܐ ܠܡܹܐܬ̣ܵܐ ܝܵܘܡܵܐ ܕܐܸܡ̇ܪܹܬ̣: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܛ:ܘܢܸܦܩܘܼܢ ܥܵܡܘܿܪܹ̈ܐ ܕܩܘܼܪ̈ܝܵܐ ܕܝܼܣܪܵܝܹܠ: ܘܢܸܫܒ̇ܩܘܼܢ ܢܘܼܪܵܐ ܒܙܲܝܢܵܐ ܘܲܒ̣ܣܲܟ̇ܪܹ̈ܐ ܘܲܒ̣ܢܲܝ̈ܙܟܹܐ: ܘܲܒ̣ܩܸܫ̈ܬܵܬ̣ܵܐ ܘܲܒ̣ܓܹܐܪܹ̈ܐ: ܘܲܒ̣ܚܘܼܛܪܹ̈ܐ ܕܐܝܼ̈ܕܲܝܵܐ: ܘܲܒ̣ܪ̈ܘܼܡܚܹܐ: ܘܢܵܘܩ̄ܕܼܘܼܢ ܡܸܢܗܘܿܢ ܒܢܘܼܪܵܐ: ܫܒܲܥ ܫܢ̈ܝܼܢ.

ܝ:ܘܠܵܐ ܢܸܣܬܲܢܩܘܼܢ ܥܲܠ ܩܲܝ̈ܣܹܐ ܕܚܲܩܠܵܐ ܘܲܕܼܥܵܒ̣ܵܐ: ܐܸܠܵܐ ܡ̣ܢ ܙܲܝܢܗܘܿܢ ܢܵܘܩ̄ܕܼܘܼܢ ܒܢܘܼܪܵܐ ܘܢܸܫܒ̇ܘܿܢ ܠܐܲܝܠܹܝܢ ܕܲܫܒ̣ܵܘ ܐܸܢܘܿܢ: ܘܢܸܒ̇ܙܘܼܢ ܠܐܲܝܠܹܝܢ ܕܒܲܙܘ ܐܸܢܘܿܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܐ:ܒܹܗ ܒܝܵܘܡܵܐ ܗܵܘܿ: ܐܸܬܸ̇ܠ ܬܲܡܵܢ ܕܘܼܟ̇ܬ̣ܵܐ ܠܓ̣ܘܿܓ̣ ܠܩܲܒ̣ܪܵܐ ܒܝܼܣܪܵܝܹܠ: ܢܲܚܠܵܐ ܪܲܒܵܐ ܕܲܒ̣ܡܲܕܼܢ̱ܚܵܝܹܗ ܕܝܲܡܵܐ: ܘܢܸܣܟ̇ܪܘܼܢܹܗ ܠܢܲܚܠܵܐ: ܘܢܸܩܒ̇ܪܘܼܢܹܗ ܬܲܡܵܢ ܠܓ̣ܘܿܓ̣: ܘܲܠܟܠܹܗ ܚܲܝܠܹܗ: ܘܢܸܬ̣ܩܪܸܐ ܢܲܚܠܵܐ ܕܣܵܘܦܵܢܹܗ ܕܓ̣ܘܿܓ̣.

ܝܒ:ܘܲܠܫܲܒ̣ܥܵܐ ܝܲܪ̈ܚܝܼܢ: ܢܸܩܒ̇ܪܘܼܢ ܐܸܢܘܿܢ ܕܒܹܝܬ̣ ܝܑܼܣܪܵܝܹܠ: ܘܬܸܬ̇ܕܲܟ̣ܵܐ ܐܲܪܥܵܐ.

ܝܓ:ܘܢܸܩܒ̇ܪܘܼܢ ܐܸܢܘܿܢ ܟܠܹܗ ܥܲܡܵܐ ܕܐܲܪܥܵܐ: ܘܢܸܗܘܸܐ ܠܗܘܿܢ ܫܡܵܐ ܒܝܵܘܡܵܐ ܕܡܸܫܬܲܒܲܚ ܐ̄ܢܵܐ ܐܵܡܲܪ ܡܵܪܝܵܐ.

ܝܕ:ܘܡ̣ܢ ܒܵܬܲܪ ܫܲܒ̣ܥܵܐ ܝܲܪ̈ܚܝܼܢ: ܢܸܗܘܘܿܢ ܓܲܒ̣ܪܹ̈ܐ ܡܗܲܠܟ̣ܝܼܢ ܐܲܡܝܼܢܵܐܝܼܬ̣ ܒܐܲܪܥܵܐ: ܘܩܵܒ̣ܪܝܼܢ ܠܐܲܝܠܹܝܢ ܕܐܸܫܬ̇ܚܲܪܘ ܒܐܲܪܥܵܐ: ܕܬܸܬ̇ܕܲܟܸ̇ܐ.

ܝܗ:ܘܟ̣ܠ ܕܥܵܒܲܪ ܒܐܲܪܥܵܐ: ܘܚܵܙܹ̇ܐ ܓܲܪܡܵܐ ܕܒܲܪܢܵܫܵܐ: ܢܲܨܘܸܐ ܥܲܠ ܓܲܒܹܗ ܨܘܵܝܵܐ: ܥܕܲܡܵܐ ܕܐܵܬܹ̇ܝܢ ܫܵܩ̇ܠܝܼܢ ܠܹܗ ܗܵܢܘܿܢ ܕܩܵܒ̣ܪܝܼܢ ܒܢܲܚܠܵܐ ܕܓ̣ܘܿܓ̣.

ܝܘ:ܘܢܸܫܬܲܡܲܗ ܫܡܵܗ̇ ܕܲܡܕܼܝܼܢ̄ܬܵܐ ܥܲܫܝܼܢܬܵܐ: ܘܲܢܕܲܟ̇ܘܿܢܵܗ̇ ܠܐܲܪܥܵܐ.

ܝܙ:ܐܲܢ̄ܬ̇ ܕܹܝܢ ܒܲܪܢܵܫܵܐ: ܐܸܡܲܪ ܠܟ̣ܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ: ܘܲܠܟ̣ܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܸܬ̣ܟܲܢܲܫܘ ܘܬ̣ܵܘ ܡ̣ܢ ܟܠ ܕܘܼܟܵܐ: ܠܕܸܒ̣ܚ̱ܬ̣ܵܐ ܪܲܒ̇ܬ̣ܵܐ ܕܕܼܵܒܲܚ̇ ܐ̄ܢܵܐ ܠܟ̣ܘܿܢ ܒܛܘܼܪܹ̈ܐ ܕܝܼܣܪܵܝܹܠ: ܘܬܹܐܟ̣ܠܘܼܢ ܒܸܣܪܵܐ ܘܬܸܫܬ̇ܘܿܢ ܕܡܵܐ.

ܝܚ:ܒܸܣܪܵܐ ܕܓܲܢ̄ܒܵܪܹ̈ܐ ܬܹܐܟ̣ܠܘܼܢ: ܘܲܕܼܡܵܐ ܕܪܵܘܪ̈ܒ̣ܵܢܹܐ ܕܐܲܪܥܵܐ ܬܸܫܬ̇ܘܿܢ: ܕܕܸܟ̣ܪܹ̈ܐ ܘܕܲܡܦܲܛܡܹ̈ܐ. ܘܲܕ̇ܬܲܝܫܹ̈ܐ ܘܲܕ̇ܬ̣ܵܘܪܹ̈ܐ: ܘܕܲܐܪ̈ܘܵܢܹܐ ܕܒܲܝܫܵܢ ܟܠܗܘܿܢ.

ܝܛ:ܘܬܹܐܟ̣ܠܘܿܢ ܒܸܣܪܵܐ ܘܬܸܣܒ̇ܥܘܿܢ: ܘܬܸܫܬ̇ܘܿܢ ܕܡܵܐ ܘܬܸܪܘܘܿܢ: ܡ̣ܢ ܕܸܒ̣ܚ̱ܬ̣ܵܐ ܪܲܒ̇ܬ̣ܵܐ ܕܕܼܵܒܲܚ ܐ̄ܢܵܐ ܠܟ̣ܘܿܢ.

ܟܟ:ܘܬܸܣܒ̇ܥܘܼܢ ܡ̣ܢ ܦܵܬ̣ܘܿܪܝ: ܒܸܣܪܵܐ ܕܪ̈ܲܟ̣ܫܵܐ ܘܲܕܼܪ̈ܵܟ̣ܒܲܝܗܘܿܢ: ܘܲܕܼܓܲܢ̄ܒܵܪܹ̈ܐ: ܘܲܕܼܟ̣ܠܗܘܿܢ ܓܲܒ̣ܪܹ̈ܐ ܩܪܲܒ̣ܬ̣ܸܵܢܹܐ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܟܐ:ܘܐܸܥܒܸ̇ܕܼ ܫܘܼܒ̣ܚܝ ܒܥܲܡܡܹ̈ܐ: ܘܢܸܚܙܘܿܢ ܟܠܗܘܿܢ ܥܲܡܡܹ̈ܐ ܕܝܼܢܵܐ ܕܥܸܒ̣ܕܹ̇ܬ̣: ܘܐܝܼܕܼܝ ܕܣܵܡܹ̇ܬ̣ ܒܗܘܿܢ.

ܟܒ:ܘܢܸܕ̇ܥܘܼܢ ܕܒܹܝܬ̣ ܝܑܼܣܪܵܝܹܠ: ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܗܘܿܢ: ܡ̣ܢ ܝܵܘܡܵܐ ܗܵܘܿ ܘܲܠܗܲܠ.

ܟܓ:ܘܢܸܕ̇ܥܘܼܢ ܥܲܡܡܹ̈ܐ: ܕܡܸܛܠ ܥܵܘܼܠܗܘܿܢ ܐܸܫܬ̇ܒ̣ܝܼܘ ܒܢܲܝ̈ ܝܑܼܣܪܵܝܹܠ: ܕܐܲܥ̣ܥܝܼܘ ܒܝܼ: ܘܐܲܗܦܟܹ̇ܬ̣ ܐܲܦܲܝ̈ ܡܸܢܗܘܿܢ: ܘܐܲܫ̱ܠܡܹ̇ܬ̣ ܐܸܢܘܿܢ ܒܐܝܼܕܼܵܐ ܕܣܵܢܐܲܝ̈ܗܘܿܢ: ܘܲܢܦܲܠ̣ܘ ܟܠܗܘܿܢ ܒܚܲܪܒܵܐ.

ܟܕ:ܘܐܲܝܟ ܛܲܢܦܘܼܬ̣ܗܘܿܢ ܘܐܲܝܟ ܥܵܘܼܠܗܘܿܢ ܦܸܪܥܹ̇ܬ̣ ܐܸܢܘܿܢ: ܘܐܲܗܦܟܹ̇ܬ̣ ܐܲܦܲܝ̈ ܡܸܢܗܘܿܢ.

ܟܗ:ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܸܟܹ̇ܝܠ ܡܲܦܢܹܐ ܐ̄ܢܵܐ ܫܒ̣ܝܼܬܹܗ ܕܝܲܥܩܘܿܒ̣: ܘܲܡܪܲܚܸܡ ܐ̄ܢܵܐ ܥܲܠ ܟܠܹܗ ܒܹܝܬ̣ ܝܑܼܣܪܵܝܹܠ: ܘܛܵܐܹ̇ܢ ܐ̄ܢܵܐ ܡܸܛܠ ܫܡܵܐ ܕܩܘܼܕܼܫܝ.

ܟܘ:ܘܲܢܩܲܒ̇ܠܘܼܢ ܟܠܵܗ̇ ܒܸܗܬܲܬ̣ܗܘܿܢ ܘܥܵܘܼܠܗܘܿܢ ܕܐܲܥܠܝܼܘ ܒܝܼ: ܡܵܐ ܕܝܼܬܸܒ̣ܘ ܒܐܲܪ̱ܥܗܘܿܢ ܒܫܸܠܝܵܐ: ܘܠܲܝܬ̇ ܠܗܘܿܢ ܡܲܗܪܵܢܵܐ.

ܟܙ:ܡܵܐ ܕܟܲܢܫܹ̇ܬ̣ ܐܸܢܘܿܢ ܡ̣ܢ ܥܲܡܡܹ̈ܐ: ܘܩܲܪܒܹ̇ܬ̣ ܐܸܢܘܿܢ ܡ̣ܢ ܡܕܼܝܼ̈ܢܵܬ̣ܵܐ ܕܲܒ̣ܥܸܠܕ̇ܒ̣ܵܒܲܝ̈ܗܘܿܢ: ܘܐܸܬ̣ܩܲܕ̇ܫܹ̇ܬ̣ ܒܗܘܿܢ ܠܥܹܝܢ ܥܲܡܡܹ̈ܐ ܣܲܓ̇ܝܼ̈ܐܹܐ.

ܟܚ:ܘܢܸܕ̇ܥܘܼܢ ܕܐܸܢܵܐ ܡܵܪܝܵܐ ܐܲܠܵܗܗܘܿܢ: ܐܫܒ̇ܝܼܬ̣ ܐܸܢܘܿܢ ܠܒܹܝܬ̣ ܥܲܡܡܹ̈ܐ: ܘܐܸܢܵܐ ܐܹܟܲܢܸܫ ܐܸܢܘܿܢ ܠܐܲܪ̱ܥܘܿܢ: ܘܠܵܐ ܐܵܘܬܲܪ ܡܸܢܗܘܿܢ ܬܲܡܵܢ.

ܟܛ:ܘܠܵܐ ܐܲܗܦܸܟ ܐܲܦܲܝ̈ ܡܸܢܗܘܿܢ: ܐܸܠܵܐ ܐܹܫܘܿܕܼ ܪܘܼܚܝ ܥܲܠ ܟܠܹܗ ܒܹܝܬ̣ ܝܑܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܥܠ ܒܢܝܢܐ ܕܒܝܬܐ.

ܩܹܦܵܠܹܐܘܿܢ:ܡ.

ܐ:ܒܲܫܢܲܬ̣ ܥܸܣܪܝܼܢ ܘܚܲܡܸܫ ܕܲܫܒ̣ܝܼܬܲܢ: ܒܪܹܫ ܫܲܢ̄ܬܵܐ ܒܲܥܣܲܪܬܵܐ ܒܝܲܪܚܵܐ: ܒܲܫܢܲܬ̣ ܐܲܪܒܲܥܸܣܪܹ̈ܐ ܒܵܬܲܪ ܕܐܸܬ̣ܚܲܪܒܲܬ̤ ܡܕܼܝܼܢ̄ܬܵܐ: ܒܹܗ ܒܝܵܘܡܵܐ ܗܵܢܵܐ: ܗܘ̤ܵܬ̣ ܥܠܲܝ ܐܝܼܕܹܗ ܕܡܵܪܝܵܐ.

ܒ:ܘܐܲܝܬܝܼܢܲܝ ܠܐܲܪܥܵܐ ܕܝܼܣܪܵܝܹܠ: ܒܚܸܙܘܵܐ ܕܐܲܠܵܗܵܐ: ܘܐܲܫ̱ܪܝܲܢܝ ܥܲܠ ܛܘܼܪܵܐ ܕܛܵܒ̣ ܪܵܡ: ܘܐܝܼܬ̣ ܗ̄ܘܼܵܐ ܥܠܵܘܗܝ ܒܬܲܝܡܢܵܝܹܗ ܐܲܝܟ ܒܸܢܝܵܢܵܐ ܕܲܡܕܼܝܼܢ̄ܬܵܐ.

ܓ:ܘܐܲܝܬ̇ܝܲܢܝ ܠܬܲܡܵܢ: ܘܲܚܙܹ̇ܝܬ̣ ܓܲܒ̣ܪܵܐ: ܘܚܸܙܘܹܗ ܐܲܝܟ ܚܸܙܘܵܐ ܕܲܢܚܵܫܵܐ: ܘܲܫܘܵܝܬܵܐ ܕܟܸܬܵܢܵܐ ܒܐܝܼܕܹܗ ܘܩܲܢܝܵܐ ܕܲܡܫܘܼܚܬ̣ܵܐ: ܘܩܵܐܹ̇ܡ ܗ̄ܘܼܵܐ ܒܬܲܪܥܵܐ.

ܕ:ܘܐܸܡܲܪ ܠܝܼ ܓܲܒ̣ܪܵܐ ܗܵܘܿ: ܒܲܪܢܵܫܵܐ: ܚܙܝܼ ܒܥܲܝ̈ܢܲܝܟ: ܘܲܫܡܲܥ ܒܐܸܕܼܢܲܝ̈ܟ: ܘܣܝܼܡ ܒܠܸܒܵܟ ܟܠ ܡܸܕܸ̇ܡ ܕܲܡܚܵܘܸܐ ܐ̄ܢܵܐ ܠܵܟ: ܡܸܛܠ ܕܠܲܡܚܵܘܵܝܘܼܬ̣ܵܟ ܗ̄ܘܼ ܐܸܬܹܝܬ̣ ܠܗܵܪܟܵܐ: ܘܟ̣ܠ ܡܸܕܸ̇ܡ ܕܚܵܙܹ̇ܐ ܐܲܢ̄ܬ̇ ܚܵܘܵܐ ܠܲܒ̣ܢܲܝ̈ ܝܑܼܣܪܵܝܹܠ.

ܗ:ܘܲܚܙܹ̇ܝܬ̣ ܫܘܼܪܵܐ ܕܟ̣ܵܪܹܟ ܠܹܗ ܠܒܲܝܬܵܐ ܗܵܘܿ: ܘܩܲܢܝܵܐ ܕܲܡܫܘܼܚܬ̣ܵܐ ܒܐܝܼܕܹܗ ܕܓܲܒ̣ܪܵܐ ܗܵܘܿ: ܘܫܸܬ̣ ܐܲܡ̈ܝܼܢ ܗܵܘܹ̇ܐ ܗ̄ܘܼܵܐ ܘܲܦܫܸܟ: ܘܲܡܫܲܚ ܦܬ̣ܵܝܹܗ ܕܒܸܢܝܵܢܵܐ ܩܲܢܝܵܐ ܚܲܕܼ: ܘܪܵܘܡܹܗ ܩܲܢܝܵܐ ܚܲܕܼ.

ܘ:ܘܐܸܬ̣ܵܐ ܠܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܣܠܸܩ ܒܕܲܪ̈ܓ̣ܵܘܗܝ: ܘܲܡܫܲܚ ܣܸܦܵܐ ܕܬܲܪܥܵܐ ܩܲܢܝܵܐ ܚܲܕܼ ܠܲܦܬ̣ܵܝܹܗ: ܘܣܸܦܵܐ ܐ̄ܚܪܹܢܵܐ: ܩܲܢܝܵܐ ܚܲܕܼ ܠܲܦܬܼܵܝܹܗ.

ܙ:ܘܲܦܪܘܼܣܬ̇ܕܼܵܐ ܩܸܢܝܵܐ ܚܲܕܼ ܠܐܘܼܪܟܹ̇ܗ: ܘܩܲܢܝܵܐ ܚܲܕܼ ܠܲܦܬ̣ܵܝܹܗ: ܘܒܹܝܬ̣ ܦܪ̈ܘܼܣܬ̇ܕܹܐ ܚܲܡܸܫ ܐܲܡ̈ܝܼܢ.

ܚ:ܘܣܸܦܹܗ ܕܬܲܪܥܵܐ ܡ̣ܢ ܠܓ̣ܵܘ ܡ̣ܢ ܦܪ̈ܘܼܣܬ̇ܕܹܐ ܕܬܲܪܥܵܐ: ܩܲܢܝܵܐ ܚܲܕܼ.

ܛ:ܘܡܲܫܚܹܗ ܠܲܦܪܘܼܣܬ̇ܕܼܵܐ ܕܬܲܪܥܵܐ: ܬܡܵܢܹܐ ܐܲܡ̈ܝܼܢ: ܘܐܸܣܟ̇ܘܼܦܬܹܗ ܕܬܲܪܥܵܐ ܡ̣ܢ ܠܓ̣ܵܘ ܬܲܪܬܹ̇ܝܢ ܐܲܡ̈ܝܼܢ.

ܝ:ܘܓ̣ܵܘܹܗ ܕܬܲܪܥܵܐ ܡܲܕܼܢ̱ܚܵܝܵܐ: ܬܠܵܬ̣ܵܐ ܡܸܟܵܐ ܘܲܬ̣ܠܵܬ̣ܵܐ ܡܸܟܵܐ: ܘܲܡܫܘܼܚܬ̣ܵܐ ܚܕܼܵܐ ܠܲܬ̣ܠܵܬܲܝ̈ܗܘܿܢ: ܘܲܡܫܘܼܚܬ̣ܵܐ ܚܕܼܵܐ ܠܲܦܪ̈ܘܼܣܬ̇ܕܹܐ: ܕܡܸܟܵܐ ܘܡܸܟܵܐ.

ܝܐ:ܘܲܡܫܲܚ ܦܬ̣ܵܝܹܗ ܕܡܲܥܠܵܢܵܐ ܕܬܲܪܥܵܐ ܥܣܲܪ ܐܲܡ̈ܝܼܢ: ܐܘܼܪܟܹ̇ܗ ܕܬܲܪܥܵܐ ܬܠܬܲܥܸܣܪܹ̈ܐ ܐܲܡ̈ܝܼܢ.

ܝܒ:ܘܲܬ̣ܚܘܼܡܵܐ ܕܲܩܕܼܵܡ ܐܸܣܟ̇ܘܼܦܬ̣ܵܐ: ܐܲܡܵܐ ܐܲܡܵܐ ܡܸܟܵܐ ܘܡܸܟܵܐ: ܘܓ̣ܵܘܵܗ̇ ܫܸܬ̣ ܐܲܡ̈ܝܼܢ ܡܸܟܵܐ: ܘܫܸܬ̣ ܐܲܡ̈ܝܼܢ ܡܸܟܵܐ.

ܝܓ:ܘܡܲܫܚܹܗ ܠܬܲܪܥܵܐ ܡ̣ܢ ܐܸܓܵܪܹܗ ܠܐܸܓܵܪܹܗ: ܦܬ̣ܵܝܵܐ ܥܸܣܪܝܼܢ ܘܚܲܡܸܫ ܐܲܡ̈ܝܼܢ: ܘܬܲܪܥܵܐ ܠܘܼܩܒܲܠ ܬܲܪܥܵܐ.

ܝܕ:ܘܲܥܒܲܕܼ ܩܕܼܵܡ ܐܲܦܲܝ̈ ܬܲܪܗܵܐ ܫܬ̇ܝܼܢ ܐܲܡ̈ܝܼܢ: ܘܲܩܕܼܵܡ ܐܲܦܲܝ̈ ܬܲܪܥܵܐ ܐ̄ܚܪܹܢܵܐ ܒܲܪܵܝܵܐ ܫܬ̇ܝܼܢ ܐܲܡ̈ܝܼܢ.

ܝܗ:ܘܲܩܕܼܵܡ ܬܲܪܥܵܐ ܓܵܘܵܝܵܐ ܚܲܡܫܝܼܢ ܐܲܡ̈ܝܼܢ.

ܝܘ:ܘܟ̣ܵܘܹ̈ܐ ܕܲܫ̈ܛܝܼܦܵܢ ܡ̣ܢ ܠܓ̣ܵܘ ܘܩܲܛܝܼ̈ܢܵܢ ܡ̣ܢ ܠܒܲܪ: ܥܲܠ ܚܸـ̈ـܬܹ̇ܐ ܘܥܲܠ ܦܪ̈ܘܿܣܬ̇ܕܹܐ ܕܬܲܪܥܵܐ: ܘܟ̣ܵܘܹ̈ܐ ܚܵܕܼܪ̈ܵܢ ܗ̄ܘܲܝ̈ ܠܗܘܿܢ ܡ̣ܢ ܠܓ̣ܵܘ.

ܝܙ:ܘܐܲܥܠܲܢܝ ܠܕܼܵܪܬܵܐ ܒܲܪܵܝܬܵܐ: ܘܲܚܙܹ̇ܝܬ̣ ܕܲܪ̈ܓܹܐ ܟܲܕܼ ܚܵܕܼܪܵܐ: ܬܠܵܬ̣ܝܼܢ ܕܲܪ̈ܓ̇ܝܼܢ ܚܲܕܼ ܠܥܸܠ ܡ̣ܢ ܚܲܕܼ.

ܝܚ:ܘܕܲܪ̈ܓܹܐ ܕܥܲܠ ܓܸܢ̄ܒ̣ ܬܲܪܥܵܐ ܕܠܘܼܩܒܲܠ ܐܘܼܪܟ̇ܗܘܿܢ ܕܕܲܪ̈ܓܹܐ.

ܝܛ:ܘܲܡܫܲܚ ܦܬ̣ܵܝܹܗ ܡ̣ܢ ܩܕܼܵܡ ܬܲܪܥܵܐ ܕܕܼܵܪܬܵܐ: ܡܵܐܐ ܐܲܡ̈ܝܼܢ ܠܡܲܕܼܢ̱ܚܵܐ ܘܲܠܓܲܪܒ̇ܝܵܐ.

ܟܟ:ܘܬܲܪܥܵܐ ܕܲܩܕܼܵܡܵܘܗܝ ܡ̣ܢ ܓܲܪܒ̇ܝܵܝܵܗ̇ ܕܕܼܵܪܬܵܐ: ܡܫܲܚ ܐܘܼܪܟܹ̇ܗ ܘܲܦܬ̣ܵܝܹܗ.

ܟܐ:ܘܲܡܫܘܼܚܬܹܗ ܬܠܵܬ̣ܵܐ ܡܸܟܵܐ ܘܲܬ̣ܠܵܬ̣ܵܐ ܡܸܟܵܐ. ܐܲܝܟ ܡܫܘܼܚܬܹܗ ܕܬܲܪܥܵܐ ܩܲܕܼܡܵܝܵܐ: ܚܲܡܫܝܼܢ ܐܲܡ̈ܝܼܢ ܐܘܼܪܟܹ̇ܗ: ܘܲܦܬ̣ܵܝܹܗ ܥܸܣܪܝܼܢ ܐܲܡ̈ܝܼܢ ܘܚܲܡܸܫ.

ܟܒ:ܘܟ̣ܵܘܵܘ̈ܗܝ ܘܲܦܪ̈ܘܼܣܬ̇ܕܼܵܘܗܝ: ܐܲܝܟ ܡܫܘܼܚܬܵܐ ܕܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܒ̣ܫܲܒ̣ܥܵܐ ܕܲܪ̈ܓܝܼܢ ܣܵܠܩܝܼܢ ܠܹܗ: ܘܐܸܣܟ̇ܘܼܦܬ̣ܵܐ ܐܝܼܬ̣ ܩܕܼܵܡܲܝܗܘܿܢ.

ܟܓ:ܘܬܲܪ̈ܥܹܐ ܕܕܼܵܪܬܵܐ ܓܵܘܵܝܬܵܐ ܕܠܘܼܩܒܲܠ ܬܲܪܥܵܐ ܕܓܲܪܒܲܝ ܡܲܕܼܢܲܚ: ܡ̣ܫܲܚ ܡ̣ܢ ܬܲܪܥܵܐ ܠܬܲܪܥܵܐ: ܡܵܐܐ ܐܲܡ̈ܝܼܢ.

ܟܕ:ܘܐܵܘܒ̇ܠܲܢܝ ܠܐܘܼܪܚܵܐ ܕܬܲܝܡܢܵܐ: ܘܲܚܙܹ̇ܝܬܹܗ ܠܬܲܪܥܵܐ ܕܬܲܝܡܢܵܐ: ܘܲܡܫܲܚ ܦܪ̈ܘܼܣܬ̇ܕܼܵܘܗܝ ܘܩܵܝ̈ܡܵܬܹܗ: ܐܲܝܟ ܗܵܠܹܝܢ ܡܘܼܫ̈ܚܵܬ̣ܵܐ.

ܟܗ:ܘܟ̣ܵܘܹ̈ܐ ܐܝܼܬ̣ ܠܹܗ ܘܠܲܦܪ̈ܘܼܣܬ̇ܕܼܵܘܗܝ ܟܲܕܼ ܚܵܕܼܪܝܼܢ: ܐܲܝܟ ܗܵܠܹܝܢ ܟܵܘܹ̈ܐ: ܘܚܲܡܫܝܼܢ ܐܲܡ̈ܝܼܢ ܐܘܼܪܟܹ̇ܗ: ܥܸܣܪܝܼܢ ܘܚܲܡܸܫ ܦܬ̣ܵܝܹܗ.

ܟܘ:ܘܲܒ̣ܫܲܒ̣ܥܵܐ ܕܲܪ̈ܓ̣ܝܼܢ ܣܵܠܩܝܼܢ ܠܹܗ. ܘܐܸܣܟ̇ܘܼܦܬ̣ܵܐ ܐܝܼܬ̣ ܩܕܼܵܡܵܘܗܝ: ܘܕܸܩ̈ܠܹܐ ܐܝܼܬ̣ ܠܹܗ ܚܲܕܼ ܡܸܟܵܐ ܘܚܲܕܼ ܡܸܟܵܐ ܥܲܠ ܦܪ̈ܘܼܣܬ̇ܕܼܵܘܗܝ.

ܟܙ:ܘܬܲܪ̈ܥܹܐ ܕܕܼܵܪܬܵܐ ܓܵܘܵܝܬܵܐ ܕܒ̣ܐܘܼܪܚܵܐ ܕܬܲܝܡܢܵܐ: ܡܫܲܚ ܡ̣ܢ ܬܲܪܥܵܐ ܠܬܲܪܥܵܐ ܡܵܐܐ ܐܲܡ̈ܝܼܢ.

ܟܚ:ܘܐܲܥܠܲܢܝ ܠܕܼܵܪܬܵܐ ܓܵܘܵܝܬܵܐ ܒܬܲܪܥܵܐ ܕܬܲܝܡܢܵܐ: ܘܡܲܫܚܹܗ ܠܬܲܪܥܵܐ ܬܲܝܡܢܵܝܵܐ: ܐܲܝܟ ܗܵܠܹܝܢ ܡܘܼܫ̈ܚܵܬ̣ܵܐ.

ܟܛ:ܘܓ̣ܵܘܹܗ ܘܲܦܪ̈ܘܼܣܬ̇ܕܼܵܘܗܝ ܘܐܸܣ̈ܟ̇ܦܵܬܹܗ: ܐܲܝܟ ܗܵܠܹܝܢ ܐܸܢܹܝܢ ܡܘܼܫ̈ܚܵܬ̣ܵܐ: ܘܟ̣ܵܘܹ̈ܐ ܐܝܼܬ̣ ܠܹܗ ܘܠܲܦܪ̈ܘܼܣܬ̇ܕܼܵܗܝ ܟܲܕܼ ܚܵܕܲܪ: ܚܲܡܫܝܼܢ ܐܲܡ̈ܝܼܢ ܐܘܼܪܟܹ̇ܗ: ܘܥܸܣܪܝܼܢ ܘܚܲܡܸܫ ܦܬ̣ܵܝܹܗ.

ܠ:ܘܲܬ̣ܝܵܟ̣ܵܘ̈ܗܝ ܚܵܕܼܪܝܼܢ ܠܹܗ: ܐܘܼܪܟ̇ܗܘܿܢ ܥܸܣܪܝܼܢ ܘܚܲܡܸܫ ܐܲܡܝܼ̈ܢ: ܘܲܦܬ̣ܵܝܗܘܿܢ ܚܲܡܸܫ ܐܲܡܝܼ̈ܢ.

ܠܐ:ܘܲܦܪ̈ܘܼܣܬ̇ܕܹܐ ܕܕܼܵܪܬܵܐ ܒܲܪܵܝܬܵܐ: ܕܸܩ̈ܠܹܐ ܐܝܼܬ̣ ܒܗܘܿܢ: ܘܕܼܵܪ̈ܓܲܝܗܘܿܢ ܬܡܵܢܝܵܐ.

ܠܒ:ܘܐܲܥܠܲܢܝ ܠܕܼܵܪܬܵܐ ܓܵܘܵܝܬܵܐ ܒܐܘܼܪܚܵܐ ܕܡܲܕܼܢ̱ܚܵܐ: ܘܡܲܫܚܹܗ ܠܬܲܪܥܵܐ ܐܲܝܟ ܗܵܠܹܝܢ ܡܘܼܫ̈ܚܵܬ̣ܵܐ.

ܠܓ:ܘܓ̣ܵܘܹܗ ܘܲܦܪ̈ܘܼܣܬ̇ܕܼܵܘܗܝ ܘܐܸܣ̈ܟ̇ܦܵܬܹܗ: ܘܟ̣ܵܘܹ̈ܐ ܐܝܼܬ̣ ܠܹܗ ܘܠܲܦܪ̈ܘܼ ܣܬ̇ܕܼܵܘܗܝ ܟܲܕܼ ܚܵܕܲܪ: ܐܘܼܪܟܵܐ ܚܡܫܝܼܢ ܐܲܡܝܼ̈ܢ: ܘܲܦܬ̣ܵܝܵܐ ܥܸܣܪܝܼܢ ܘܚܲܡܸܫ.

ܠܕ:ܘܐܸܣܟ̇ܘܼܦܬ̣ܵܐ ܕܕܼܵܪܬܵܐ ܒܲܪܵܝܬܵܐ: ܘܕܸܩ̈ܠܹܐ ܐܝܼܬ̣ ܒܲܦܪ̈ܘܼܣܬ̇ܕܹܐ ܡܸܟܵܐ ܘܡܸܟܵܐ: ܘܲܬ̣ܡܵܢܝܵܐ ܠܹܗ ܕܲܪ̈ܓ̣ܝܼܢ.

ܠܗ:ܘܐܲܥܠܲܢܝ ܠܬܲܪܥܵܐ ܕܓܲܪܒ̇ܝܵܐ: ܘܲܡ̣ܫܲܚ ܐܲܝܟ ܗܵܠܹܝܢ ܡܘܼܫ̈ܚܵܬ̣ܵܐ.

ܠܘ:ܘܓ̣ܵܘܹܗ ܘܲܦܪ̈ܘܼܣܬ̇ܕܼܵܘܗܝ ܘܐܸܣ̈ܟ̇ܦܵܬܹܗ: ܘܟ̣ܵܘܹ̈ܐ ܚܵܕܼܪ̈ܵܢ ܠܹܗ: ܐܘܼܪܟܹ̇ܗ ܚܲܡܫܝܼܢ ܐܲܡܝܼ̈ܢ: ܘܲܦܬ̣ܵܝܹܗ ܥܸܣܪܝܼܢ ܘܚܲܡܸܫ.

ܠܙ:ܘܲܦܪ̈ܘܼܣܬ̇ܕܹܐ ܕܕܼܵܪܬܵܐ ܒܲܪܵܝܬܵܐ: ܘܕܸܩ̈ܠܹܐ ܐܝܼܬ̣ ܒܲܦܪ̈ܘܼܣܬ̇ܕܹܐ ܡܸܟܵܐ ܘܡܸܟܵܐ: ܘܲܬ̣ܡܵܢܝܵܐ ܠܹܗ ܕܲܪ̈ܓ̣ܝܼܢ.

ܠܚ:ܘܐܲܟ̣ܣܸܕܼܪܵܐ ܬܲܪܥܹܗ ܒܲܦܪ̈ܘܼܣܬ̇ܕܹܐ ܕܬܲܪܥܵܐ: ܘܬܲܡܵܢ ܣܵܝܡܝܼܢ ܝܲܩ̈ܕܹ̇ܐ ܫܲܠܡܹ̈ܐ.

ܠܛ:ܘܒܲܦܪ̈ܘܼܣܬ̇ܕܹܐ ܕܬܲܪܥܵܐ: ܬܪܹܝܢ ܦܵܬ̣ܘܿܪ̈ܝܼܢ ܡܸܟܵܐ: ܘܲܬ̣ܪܹܝܢ ܦܵܬ̣ܘܿܪ̈ܝܼܢ ܡܸܟܵܐ: ܠܡܸܟܲܣ ܥܠܲܝܗܘܿܢ ܝܲܩ̈ܕܹ̇ܐ ܫܲܠܡܹ̈ܐ: ܘܩܘܼܪ̈ܒܵܢܹܐ ܘܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ.

ܡ:ܘܲܒ̣ܣܸܛܪܹܗ ܕܬܲܪܥܵܐ ܓܲܪܒ̇ܝܵܝܵܐ: ܕܲܠܒܲܪ ܡ̣ܢ ܝܲܩ̈ܕܹ̇ܐ ܫܲܠܡܹ̈ܐ: ܬܪܹܝܢ ܦܵܬ̣ܘܿܪ̈ܝܼܢ: ܘܲܒ̣ܣܸܛܪܵܐ ܐ̄ܚܪܹܢܵܐ ܕܲܦܪܘܿܣܬ̇ܕܹܐ ܬܪܹܝܢ ܦܵܬ̣ܘܿܪ̈ܝܼܢ.

ܡܐ:ܐܲܪܒ̇ܥܵܐ ܦܵܬ̣ܘܿܪ̈ܝܼܢ ܡܸܟܵܐ: ܘܐܲܪܒ̇ܥܵܐ ܦܵܬ̣ܘܿܪ̈ܝܼܢ ܡܸܟܵܐ: ܒܲܦܪ̈ܘܼܣܬ̇ܕܼܵܘܗܝ ܕܬܲܪܥܵܐ: ܘܲܬ̣ܡܵܢܝܵܐ ܐܸܢܘܿܢ ܦܵܬ̣ܘܿܪ̈ܝܼܢ ܕܢܵܟ̣ܣܝܼܢ ܥܠܲܝܗܘܿܢ.

ܡܒ:ܘܐܲܪܒ̇ܥܵܐ ܦܵܬ̣ܘܿܪ̈ܝܼܢ ܕܲܦ̮ܣܝܼܠܬܵܐ ܠܝܲܩ̈ܕܹ̇ܐ ܫܲܠܡܹ̈ܐ: ܐܘܼܪܟ̇ܗܘܿܢ ܐܲܡܵܐ ܘܲܦܠܸܓ̣: ܘܲܦܬ̣ܵܝܗܘܿܢ ܐܲܡܵܐ ܘܲܦܠܸܓ̣: ܘܲܥܠܲܝܗܘܿܢ ܣܵܝܡ̇ܝܼܢ ܡܵܐܢܹ̈ܐ ܕܢܵܟ̣ܣܝܼܢ ܗ̄ܘܼܵܘ ܒܗܘܿܢ ܝܲܩ̈ܕܹ̇ܐ ܫܲܠܡܹ̈ܐ ܘܕܸܒ̣ܚ̱ܬ̣ܵܐ.

ܡܓ:ܣܸܦ̈ܘܵܬ̣ܗܘܿܢ ܦܫܸܟ ܦܫܸܟ ܟܲܕܼ ܚܵܕܼܪܝܼܢ: ܘܥܲܠ ܦܵܬ̣ܘܿܪܹ̈ܐ ܣܵܝܡܝܼܢ ܗ̄ܘܼܵܘ ܒܸܣܪܵܐ ܕܩܘܼܪ̈ܒܵܢܹܐ.

ܡܕ:ܘܲܠܒܲܪ ܡ̣ܢ ܬܲܪܥܵܐ ܓܵܘܵܝܵܐ ܚܵܢ̈ܘܵܬ̣ܵܐ ܕܪܵܘܪ̈ܒ̣ܵܢܹܐ: ܒܕܼܵܪܬܵܐ ܓܵܘܵܝܬܵܐ ܕܲܒ̣ܣܸܛܪܵܐ ܕܬܲܪܥܵܐ ܓܲܪܒ̇ܝܵܝܵܐ: ܘܐܲܦܲܝ̈ܗܘܿܢ ܠܬܲܝܡܢܵܐ: ܡ̣ܢ ܣܸܛܪܵܐ ܕܬܲܪܥܵܐ ܡܕܢ̱ܚܵܝܵܐ ܕܠܘܼܩܒܲܠ ܪܘܼܚܵܐ ܕܓܲܪܒ̇ܝܵܐ.

ܡܗ:ܘܐܸܡܲܪ ܠܝܼ: ܗܵܕܹܐ ܐܲܟ̣ܣܸܕܼܪܵܐ ܕܚܵܝܪܵܐ ܠܬܲܝܡܢܵܐ: ܠܟ̣ܵܗܢܹ̈ܐ ܕܢܵܛ̇ܪܝܼܢ ܡܲܛܲܪܬܵܐ ܕܒܲܝܬܵܐ.

ܡܘ:ܘܐܲܟ̣ܣܸܕܼܪܵܐ ܕܚܵܝܪܵܐ ܠܓܲܪܒ̇ܝܵܐ: ܠܟ̣ܵܗܢܹ̈ܐ ܒܢܲܝ̈ ܨܵܕܼܘܿܩ ܕܢܵܛ̇ܪܝܼܢ ܡܲܛܲܪܬܵܐ ܕܡܲܕܼܒ̇ܚܵܐ: ܕܡܸܬ̣ܩܲܪܒ̣ܝܼܢ ܡ̣ܢ ܒܢܲܝ̈ ܠܹܘܝܼ: ܠܲܡܫܲܡܵܫܘܼ ܬܸܫܡܸܫܬܹ̇ܗ ܕܡܵܪܝܵܐ.

ܡܙ:ܘܲܡܫܲܚ ܠܕܼܵܪܬܵܐ ܐܘܼܪܟܵܐ ܡܵܐܐ ܐܲܡܝܼ̈ܢ: ܘܲܦܬ̣ܵܝܵܗ̇ ܡܵܐܐ ܐܲܡܝܼ̈ܢ ܡܪܲܒ̇ܥܵܐܝܼܬ̣: ܘܡܲܕܼܒ̇ܚܵܐ ܐܝܼܬ̣ ܗ̄ܘܼܵܐ ܩܕܼܵܡ ܒܲܝܬܵܐ.

ܡܚ:ܘܐܲܝܬ̇ܝܲܢܝ ܠܐܸܣܟ̇ܘܼܦܬܹܗ ܕܒܲܝܬܵܐ: ܘܡܲܫܚܵܗ̇ ܠܐܸܣܟ̇ܘܼܦܬ̣ܵܐ: ܚܲܡܸܫ ܐܲܡܝܼ̈ܢ ܡܸܟܵܐ: ܘܚܲܡܸܫ ܐܲܡܝܼ̈ܢ ܡܸܟܵܐ: ܘܲܦܬ̣ܵܝܹܗ ܕܬܲܪܥܵܐ: ܬܠܵܬ̣ ܐܲܡܝܼ̈ܢ ܡܸܟܵܐ ܘܲܬ̣ܠܵܬ̣ ܐܲܡܝܼ̈ܢ ܡܸܟܵܐ.

ܡܛ:ܘܐܘܼܪܟܵܗ̇ ܕܐܸܣܟ̇ܘܼܦܬ̣ܵܐ ܥܸܣܪܝܼܢ ܐܲܡܝܼ̈ܢ: ܘܲܦܬ̣ܵܝܵܗ̇ ܚܕܲܥܸܣܪܹ̈ܐ ܐܲܡܝܼ̈ܢ: ܘܲܒ̣ܕܪ̈ܓܹܐ ܣܵܠܩܝܼܢ ܠܵܗ̇: ܘܥܲܡܘܼ̈ܕܹܐ ܩܵܝܡܝܼܢ ܥܲܠ ܦܪ̈ܘܼܣܬ̇ܕܹܝܗ̇: ܚܲܕܼ ܡܸܟܵܐ ܘܚܲܕܼ ܡܸܟܵܐ.

ܩܹܦܵܠܹܐܘܿܢ:ܡܐ.

ܐ:ܘܐܲܥܠܲܢܝ ܠܗܲܝܟ̇ܠܵܐ: ܘܡܲܫܚܹܗ ܠܲܦܪܘܼܣܬ̇ܕܼܵܐ: ܫܸܬ̣ ܐܲܡܝܼ̈ܢ ܦܬ̣ܵܝܹܗ ܡܸܟܵܐ: ܘܫܸܬ̣ ܐܲܡܝܼ̈ܢ ܦܬ̣ܵܝܹܗ ܡܸܟܵܐ.

ܒ:ܘܲܦܬ̣ܵܝܹܗ ܕܡܲܫܟ̇ܢܵܐ ܘܲܦܬ̣ܵܝܹܗ ܕܬܲܪܥܵܐ ܥܣܲܪ ܐܲܡ̈ܝܼܢ: ܘܣܸܛܪ̈ܵܘܗܝ ܕܬܲܪܥܵܐ: ܚܲܡܸܫ ܐܲܡܝܼ̈ܢ ܡܸܟܵܐ: ܘܲܡܫܲܚ ܐܘܼܪܟܹ̇ܗ ܐܲܪܒ̇ܥܝܼܢ ܐܲܡ̈ܝܼܢ: ܘܲܦܬ̣ܵܝܹܗ ܥܸܣܪܝܼܢ ܐܲܡ̈ܝܼܢ.

ܓ:ܘܥܲܠ ܠܓ̣ܵܘ: ܘܡܲܫ̣ܚܹܗ ܠܲܦܪܘܼܣܬ̇ܕܹܐ ܕܬܲܪܥܵܐ: ܬܲܪܬܹ̇ܝܢ ܐܲܡܝܼ̈ܢ: ܘܬܲܪܥܵܐ ܫܸܬ̣ ܐܲܡܝܼ̈ܢ: ܘܲܦܬ̣ܵܝܹܗ ܫܒܲܥ ܐܲܡܝܼ̈ܢ.

ܕ:ܘܲܡܫܲܚ ܐܘܼܪܟܹ̇ܗ ܥܸܣܪܝܼܢ ܐܲܡܝܼ̈ܢ: ܘܲܦܬ̣ܵܝܹܗ ܥܸܣܪܝܼܢ ܐܲܡܝܼ̈ܢ ܠܘܼܩܒܲܠ ܗܲܝܟ̇ܠܵܐ: ܘܐܸܡܲܪ ܠܝܼ ܗܵܢܵܘ ܩܕܼܘܿܫ ܩܘܼܕܼܫܹ̈ܐ.

ܗ:ܘܲܡܫܲܚ ܐܸܣܬܹܗ ܕܒܲܝܬܵܐ ܫܸܬ̣ ܐܲܡܝܼ̈ܢ: ܘܲܦܬ̣ܵܝܵܗ̇ ܕܕܲܦܢܵܐ ܫܒܲܥ ܐܲܡܝܼ̈ܢ ܟܲܕܼ ܚܵܕܲܪ ܒܲܝܬܵܐ.

ܘ:ܘܕܲܦܢܵـ̈ـܬ̣ܵܐ ܕܲܦܢܵܐ ܥܲܠ ܕܲܦܢܵܐ: ܬܠܵܬ̣ܝܼܢ ܘܲܬ̣ܠܵܬ̣ ܙܲܒ̣̈ܢܝܼܢ: ܘܥܵܐ̈ܠܵܢ ܒܐܸܣܬܹܗ ܕܒܲܝܬܵܐ ܕܲܦ̈ܢܵܬ̣ܵܐ ܟܲܕܼ ܚܵܕܼܪ̈ܵܢ: ܕܢܸܗܘ̈ܝܵܢ ܐܲܚܝܼ̈ܕܼܵܢ ܘܡܲܦ̱ܪ̈ܩܵܢ ܡ̣ܢ ܐܸܣܬ̣ܵܐ.

ܙ:ܘܢܵܩـ̈ـܦܵܢ ܠܥܸܠ ܗܸܢܹܝܢ ܕܲܦ̈ܢܵܬ̣ܵܐ: ܕܢܸܬ̣ܟܲܪ̈ܟܵܢ ܡ̣ܢ ܠܥܸܠ ܠܒܲܝܬܵܐ: ܕܢܸܪܘܲܚ ܒܲܝܬܵܐ ܡ̣ܢ ܠܥܸܠ: ܘܡ̣ܢ ܠܬܲܚܬ̇ ܢܸܗܘܘܿܢ ܣܵܠܩܝܼܢ ܠܡܸܨܥܵـ̈ـܝܵܬ̣ܵܐ: ܘܡ̣ܢ ܡܸܨܥܵܝܵـ̈ـܬ̣ܵܐ ܠܥܸܠܵܝܵـ̈ـܬ̣ܵܐ.

ܚ:ܘܲܚܙܹ̇ܝܬ̣ ܪܵܘܡܹܗ ܕܒܲܝܬܵܐ ܟܲܕܼ ܚܵܕܲܪ: ܘܦܲܪ̈ܝܼܩܵܢ ܗ̄ܘܲܝ̈ ܕܲܦܢܵܬ̣ܵܐ ܚܕܼܵܐ ܡ̣ܢ ܚܕܼܵܐ: ܡܠܹܐ ܩܲܢܝܵܐ ܫܸܬ̣ ܐܲܡܝܼ̈ܢ.

ܛ:ܘܲܦܬ̣ܵܝܵܗ̇ ܕܐܸܣܬ̣ܵܐ ܕܕܲܦܢܵܐ ܕܲܠܒܲܪ ܚܲܡܸܫ ܐܲܡܝܼ̈ܢ: ܘܲܕܼܡܸܢ ܠܓ̣ܵܘ ܚܲܡܸܫ ܐܲܡܝܼ̈ܢ.

ܝ:ܘܒܹܝܬ̣ ܐܲܟ̣ܣܸܕܼܪܹ̈ܐ ܦܬܵܝܵܐ ܥܸܣܪܝܼܢ ܐܲܡܝܼ̈ܢ ܟܲܕܼ ܚܵܕܼܪ̈ܵܢ ܠܒܲܝܬܵܐ.

ܝܐ:ܘܬܲܪܥܵܐ ܕܕܲܦܢܵܐ ܕܲܫܒ̣ܝܼܩ: ܚܲܕܼ ܠܬܲܝܡܢܵܐ: ܘܚܲܕܼ ܠܓܲܪܒ̇ܝܵܐ: ܘܲܦܬ̣ܵܝܹܗ ܕܬܲܪܥܵܐ ܕܲܫܒ̣ܝܼܩ ܚܲܡܸܫ ܐܲܡܝܼ̈ܢ.

ܝܒ:ܘܒܸܢܝܵܢܵܐ ܕܲܩܕܼܵܡ ܓܙܝܼܪܬܵܐ: ܕܲܒ̣ܬܲܪܥܵܐ ܡܲܥ̱ܪܒ̣ܵܝܵܐ: ܦܬ̣ܵܝܹܗ ܫܲܒ̣ܥܝܼܢ ܐܲܡܝܼ̈ܢ: ܘܐܸܣܬܹܗ ܕܒܸܢܝܵܢܵܐ ܚܲܡܸܫ ܐܲܡܝܼ̈ܢ ܦܬ̣ܵܝܵܐ ܟܲܕܼ ܚܵܕܲܪ: ܘܐܘܼܪܟܹ̇ܗ ܬܸܫܥܝܼܢ ܐܲܡܝܼ̈ܢ.

ܝܓ:ܘܡܲܫܚܹܗ ܠܒܲܝܬܵܐ: ܡܵܐܐ ܐܲܡܝܼ̈ܢ ܐܘܼܪܟܹ̇ܗ: ܘܲܓ̣ܙܝܼܪܬܵܐ ܕܒܸܢܝܵܢܵܐ ܕܐܸܣܹ̈ܐ: ܐܘܼܪܟܵܐ ܡܵܐܐ ܐܲܡܝܼ̈ܢ.

ܝܕ:ܘܲܦܬܼܵܝܵܐ ܠܘܼܩܒܲܠ ܒܲܝܬܵܐ: ܘܲܓ̣ܙܝܼܪܬܵܐ ܡܲܕܼܢ̱ܚܵܝܬܵܐ ܡܵܐܐ ܐܲܡܝܼ̈ܢ.

ܝܗ:ܘܲܡܫܲܚ ܐܘܼܪܟܹ̇ܗ ܕܒܸܢܝܵܢܵܐ ܕܲܩܕܼܵܡ ܓܙܝܼܪܬܵܐ: ܘܒܸܣܬ̇ܪܹܗ ܘܲܬ̣ܝܵܟ̣ܵܘ̈ܗܝ ܡܸܟܵܐ ܘܡܸܟܵܐ: ܡܵܐܐ ܐܲܡܝܼ̈ܢ: ܘܗܲܝܟ̇ܠܵܐ ܓܵܘܵܝܵܐ: ܘܲܦܪ̈ܘܼܣܬ̇ܕܹܐ ܕܬܲܪܥܵܐ ܕܕܼܵܪܬܵܐ.

ܝܘ:ܘܣܸܦܹ̈ܐ ܘܟ̣ܵܘܹ̈ܐ ܘܲܬ̣ܝܵܟܹ̈ܐ ܟܲܕܼ ܚܵܕܪܝܼܢ: ܘܠܲܬ̣ܠܵܬܲܝ̈ܗܘܿܢ ܬܲܪ̈ܥܹܐ ܩܪܲܡ ܩܲܝܣܵܐ: ܟܲܕܼ ܚܵܕܼܪܝܼܢ: ܘܐܘܼܪܟܹ̇ܗ ܥܕܲܡܵܐ ܠܟ̣ܵܘܹ̈ܐ.

ܝܙ:ܘܟ̣ܵܘܹ̈ܐ ܡܟܲܣ̈ܝܵܢ ܠܥܸܠ ܡ̣ܢ ܬܲܪܥܵܐ ܕܒܲܝܬܵܐ ܓܵܘܵܝܵܐ: ܘܲܠܒܲܪ ܠܟ̣ܠܗܹܝܢ ܐܸܣܹ̈ܐ ܟܲܕܼ ܚܵܕܲܪ: ܡܸܫܲܚ ܡ̣ܢ ܠܒܲܪ ܘܡ̣ܢ ܠܓ̣ܵܘ.

ܝܚ:ܘܲܥܒܲܕܼ ܟܪ̈ܘܼܒܹܐ ܘܕܸܩ̈ܠܹܐ: ܘܕܸܩܠܵܐ ܒܹܝܬ̣ ܟܪܘܿܒ̣ܵܐ ܠܲܟ̣ܪܘܿܒ̣ܵܐ: ܘܬܲܪܬܹ̇ܝܢ ܐܲܦ̈ܝܼܢ ܠܲܟ̣ܪܘܿܒ̣ܵܐ.

ܝܛ:ܘܐܲܦܹ̈ܐ ܕܒܲܪܢܵܫܵܐ ܥܲܠ ܕܸܩ̈ܠܹܐ ܡܸܟܵܐ ܘܡܸܟܵܐ: ܥܒ̣ܝܼܕܼ ܠܟ̣ܠܹܗ ܒܲܝܬܵܐ ܟܲܕܼ ܚܵܕܲܪ.

ܟܟ:ܡ̣ܢ ܐܲܪܥܵܐ ܘܲܥܕܲܡܵܐ ܠܥܸܠ ܡ̣ܢ ܬܲܪ̈ܥܹܐ: ܟܪ̈ܘܿܒܹܐ ܘܕܸܩ̈ܠܹܐ ܥܒ̣ܝܼܕܼܝܼܢ.

ܟܐ:ܘܐܸܣܬܹܗ ܕܗܲܝܟ̇ܠܵܐ ܡܪܲܒ̇ܥܵܐ ܗ̄ܘܼܵܬ̣: ܘܐܲܦܲܝ̈ ܩܘܼܕܼܫܵܐ ܕܚܸܙܘܵܐ: ܐܲܝܟ ܚܸܙܘܹܗ ܕܡܲܕܼܒ̇ܚܵܐ ܕܩܲܝܣܵܐ.

ܟܒ:ܬܠܵܬ̣ ܐܲܡܝܼ̈ܢ ܪܵܘܡܹܗ: ܘܐܘܼܪܟܹ̇ܗ ܬܲܪܬܹ̇ܝܢ ܐܲܡܝܼ̈ܢ: ܘܩܲܪ̈ܢܵܬ̣ܵܐ ܐܝܼܬ̣ ܠܹܗ: ܘܐܘܼܪܟܹ̇ܗ ܘܲܬ̣ܝܵܟ̣ܵܘ̈ܗܝ ܕܩܲܝܣܵܐ: ܘܐܸܡܲܪ ܠܝܼ: ܗܵܢܵܘ ܦܵܬ̣ܘܿܪܵܐ ܕܲܩܕܼܵܡ ܡܵܪܝܵܐ.

ܟܓ:ܘܲܬ̣ܪܹܝܢ ܬܪܹܝܢ ܬܲܪ̈ܥܝܼܢ ܠܡܲܪܒ̇ܒ̣ܵܐ.

ܟܕ:ܬܪܹܝܢ ܠܡܲܪܒ̇ܒ̣ܵܐ ܚܲܕܪ: ܘܲܬ̣ܪܹܝܢ ܠܡܲܪܒܵܒ̣ܵܐ ܐ̄ܚܪܹܢܵܐ.

ܟܗ:ܘܲܥܒ̣ܝܼܕܼ ܥܠܲܝܗܘܿܢ ܥܲܠ ܬܲܪ̈ܥܹܐ ܕܗܲܝܟ̇ܠܵܐ: ܟܪ̈ܘܿܒܹܐ ܘܕܸܩ̈ܠܹܐ ܐܲܝܟ ܕܲܥܒ̣ܝܼܕܼܝܼܢ ܒܐܸܣܹ̈ܐ.

ܟܘ:ܘܐܲܦܵܘ̈ܗܝ ܕܲܦܪܘܼܣܬ̇ܕܼܵܐ ܩܪ̈ܝܼܡܵܢ ܩܲܝܣܵܐ ܡ̣ܢ ܠܒܲܪ: ܘܟ̣ܵܘܹ̈ܐ ܫܛ̈ܝܼܦܵܢ: ܘܕܸܩ̈ܠܹܐ ܐܝܼܬ̣ ܡܸܟܵܐ ܘܡܸܟܵܐ ܥܲܠ ܣܸܛܪ̈ܵܘܗܝ ܕܲܦܪܘܼܣܬ̇ܕܼܵܐ: ܘܕܲܦ̈ܢܵܬܹܗ ܕܒܲܝܬܵܐ ܩܪ̈ܝܼܡܵܢ ܕܲܦܹ̈ܐ.

ܩܹܦܵܠܹܐܘܿܢ:ܡܒ.

ܐ:ܘܐܲܦ̣ܩܲܢܝ ܠܕܼܵܪܬܵܐ ܒܲܪܵܝܬܵܐ ܠܐܘܼܪܚܵܐ ܕܓܲܪܒ̇ܝܵܐ: ܘܐܲܥܠܲܢܝ ܠܐܲܟ̣ܣܸܕܼܪܵܐ ܕܠܘܼܩܒܲܠ ܓܙܝܼܪܬܵܐ ܘܠܘܼܩܒܲܠ ܒܸܢܝܵܢܵܐ ܓܲܪܒ̇ܝܵܝܵܐ.

ܒ:ܠܘܼܩܒܲܠ ܐܘܼܪܟܵܐ ܕܐܲܡܹ̈ܐ ܕܬܲܪܥܵܐ ܓܲܪܒ̇ܝܵܝܵܐ: ܘܲܦܬ̣ܵܝܵܐ ܚܲܡܫܝܼܢ ܐܲܡ̈ܝܼܢ.

ܓ:ܠܘܼܩܒܲܠ ܬܲܪܥܵܐ ܕܕܼܵܪܬܵܐ ܓܵܘܵܝܬܵܐ: ܘܠܘܼܩܒܲܠ ܕܲܪ̈ܓܹܐ ܕܕܼܵܪܬܵܐ ܒܲܪܵܝܬܵܐ: ܕܲܒ̣ܢܹܝܢ ܚܲܕܼ ܥܲܠ ܚܼܲܕܼ ܥܲܠ ܬܠܵܬ̣ܵܐ ܣܸܕܼܪ̈ܝܼܢ.

ܕ:ܘܲܩܕܼܵܡ ܐܲܟ̣ܣܸܕܼܪܹ̈ܐ ܒܹܝܬ̣ ܗܠܲܟ̣ܬ̣ܵܐ: ܥܣܲܪ ܐܲܡ̈ܝܼܢ ܦܬ̣ܵܝܵܐ: ܘܐܘܼܪܟܵܐ ܡܵܐܐ ܐܲܡܝܼ̈ܢ: ܘܬܲܪܥܵܐ ܕܒܹܝܬ̣ ܗܲܠܲܟ̣ܬ̣ܵܐ ܠܓܲܪܒ̇ܝܵܐ.

ܗ:ܘܐܲܟ̣ܣܸܕܼܪܹ̈ܐ ܥܸܠܵܝܵـ̈ـܬ̣ܵܐ ܙܥܘܿܪ̈ܝܵܢ ܗ̄ܘܲܝ̈: ܡܸܛܠ ܕܥܵܐ̇ܠܝܼܢ ܗ̄ܘܼܵܘ ܒܗܹܝܢ ܕܲܪ̈ܓܹܐ.

ܘ:ܡܬܲܠ̈ܬ̣ܵܢ ܗ̄ܘܲܝ̈ ܓܹܝܪ: ܘܠܲܝܬ̇ ܗ̄ܘܼܵܘ ܠܗܹܝܢ ܥܲܡܘܼ̈ܕܹܐ ܐܲܝܟ ܥܲܡܘܼ̈ܕܹܐ ܕܕܲܪܬܵܐ: ܡܸܛܠ ܗܵܢܵܐ ܙܥܘܿܪ̈ܝܵܢ ܗ̄ܘܲܝ̈ ܡ̣ܢ ܬܲܚ̈ܬܵܝܬܵܐ ܘܡ̣ܢ ܡܸܨ̈ܥܵܝܵܬ̣ܵܐ.

ܙ:ܘܒܸܐܣܬ̣ܵܐ ܕܲܠܒܲܪ ܕܠܘܼܩܒܲܠ ܐܲܟ̣ܣܸܕܼܪܹ̈ܐ: ܐܘܼܪܟܵܐ ܚܲܡܫܝܼܢ ܐܲܡܝܼ̤̈ܢ.

ܚ:ܡܸܛܠ ܕܐܘܼܪܟܵܐ ܕܐܲܟ̣ܣܕܼܪܵܐ ܕܕܼܵܪܬܵܐ ܒܲܪܵܝܬܵܐ ܚܲܡܫܝܼܢ ܐܲܡܝܼ̈ܢ: ܘܠܘܼܩܒܲܠ ܗܲܝܟ̇ܠܵܐ ܡܵܐܐ ܐܲܡ̈ܝܼܢ.

ܛ:ܘܬܲܪܥܵܐ ܕܐܲܟ̣ܣܸܕܼܪܵܐ ܕܡܲܥܠܵܢܵܐ ܡܲܕܼܢ̱ܚܵܝܵܐ: ܕܥܵܐܹ̇ܠ ܠܕܼܵܪܬܵܐ ܒܲܪܵܝܬܵܐ.

ܝ:ܒܲܦܬ̣ܵܝܵܗ̇ ܕܐܸܣܬ̣ܵܐ ܕܕܼܵܪܬܵܐ: ܒܡܲܥܠܵܢܵܐ ܡܲܕܼܢ̱ܚܵܝܵܐ ܩܕܼܵܡ ܓܙܝܼܪܬܵܐ: ܘܲܩܕܼܵܡ ܒܸܢܝܵܢܵܐ ܕܐܲܟ̣ܣܸܕܼܪܹ̈ܐ.

ܝܐ:ܘܐܘܼܪܚܵܐ ܩܕܼܵܡܲܝܗܹܝܢ: ܘܚܸܙܘܵܐ ܕܐܲܟ̣ܣܸܕܼܪܹ̈ܐ ܕܒ̣ܐܘܼܪܚܵܐ ܕܓܲܪܒ̇ܝܵܐ: ܐܘܼܪܟ̇ܗܹܝܢ ܐܲܝܟ ܦܬ̣ܵܝܗܹܝܢ: ܘܟ̣ܠܗܘܿܢ ܡܲܦܩܵܢܲܝ̈ܗܹܝܢ: ܘܡܲܥܠܵܢܲܝ̈ܗܹܝܢ: ܘܚܸܙ̱ܘܗܹܝܢ: ܘܬܲܪ̈ܥܲܝܗܹܝܢ.

ܝܒ:ܐܲܝܟ ܬܲܪ̈ܥܹܐ ܕܐܲܟ̣ܣܸܕܼܪܹ̈ܐ ܕܒ̣ܐܘܼܪܚܵܐ ܕܬܲܝܡܢܵܐ: ܬܲܪܥܵܐ ܒܪܸܫ ܐܘܼܪܚܵܐ: ܐܘܼܪܚܵܐ ܒܐܲܦܲܝ̈ ܐܸܣܬ̣ܵܐ: ܕܒ̣ܐܘܼܪܚܵܐ ܕܢܲܚܠܵܐ ܡܲܕܼܢ̱ܚܵܝܵܐ ܐܲܝܟ ܕܐܵܬܹ̇ܐ.

ܝܓ:ܘܐܸܡܲܪ ܠܝܼ: ܐܲܟ̣ܣܸܕܼܪܹ̈ܐ ܕܓܲܪܒ̇ܝܵܐ: ܘܐܟ̣ܣܸܕܼܪܹ̈ܐ ܕܬܲܝܡܢܵܐ ܕܲܩܕܼܵܡ ܓܙܝܼܪܬܵܐ: ܗܵܠܹܝܢ ܐܸܢܹܝܢ ܐܲܟ̣ܣܸܕܼܪܹ̈ܐ ܐܲܬܲܪ ܕܐܵܟ̣ܠܝܼܢ ܟܵܗ̈ܢܹܐ ܕܲܡܩܲܪܒ̣ܝܼܢ ܠܡܵܪܝܵܐ ܩܕܼܘܿܫ ܩܘܼܕܼܫܹ̈ܐ: ܬܲܡܵܢ ܣܵܝܡܝܼܢ ܩܕܼܘܿܫ ܩܘܼܕܼܫܹ̈ܐ: ܘܲܣܡܝܼܕܼܵܐ ܘܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܡܸܛܠ ܕܐܲܬ̣ܪܵܐ ܗ̄ܘܼ ܩܲܕ̇ܝܼܫܵܐ.

ܝܕ:ܘܡܵܐ ܕܥܵܐܠܝܼܢ ܟܵܗܢܹ̈ܐ: ܠܵܐ ܢܵܦܩܝܼܢ ܡ̣ܢ ܩܘܼܕܼܫܵܐ ܠܕܼܵܪܬܵܐ ܒܲܪܵܝܬܵܐ: ܐܸܠܵܐ ܬܲܡܵܢ ܣܵܝ̇ܡܝܼܢ ܡܲܐܢܲܝ̈ܗܘܿܢ ܗܵܢܘܿܢ ܕܲܡܫܲܡܫܝܼܢ ܒܗܘܿܢ: ܡܸܛܠ ܕܩܘܼܕܼܫܵܐ ܐܸܢܘܿܢ: ܘܠܵܒ̣ܫܝܼܢ ܡܵܐܢܹ̈ܐ ܐ̄ܚܪ̈ܵܢܹܐ: ܘܲܡܩܲܪܒ̣ܝܼܢ ܩܘܼܪ̈ܒܵܢܹܐ ܚܠܵܦ ܥܲܡܵܐ.

ܝܗ:ܘܲܫܠܸܡ ܡܘܼܫ̈ܚܵܬܹܗ ܕܒܲܝܬܵܐ ܓܵܘܵܝܵܐ. ܘܐܲܦܩܲܢܝ ܠܐܘܼܪܚܵܐ ܕܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ: ܘܡܲܫܚܹܗ ܟܲܕܼ ܚܵܕܲܪ.

ܝܘ:ܘܲܡܫܲܚ ܠܪܘܼܚܵܐ ܕܡܲܕܼܢ̱ܚܵܐ: ܒܩܲܢܝܵܐ ܕܲܡܫܘܼܚܬ̣ܵܐ ܚܲܡܸܫܡܵܐܐ ܩܢ̈ܝܼܢ.

ܝܙ:ܘܲܡ̣ܫܲܚ ܠܪܘܼܚܵܐ ܕܓܲܪܒ̇ܝܵܐ: ܒܩܲܢܝܵܐ ܕܲܡܫܘܼܚܬ̣ܵܐ: ܚܲܡܸܫܡܵܐܐ ܩܢ̈ܝܼܢ ܟܲܕܼ ܚܵܕܲܪ.

ܝܚ:ܘܲܡ̣ܫܲܚ ܠܪܘܼܚܵܐ ܕܬܲܝܡܢܵܐ: ܚܲܡܸܫܡܵܐܐ ܩܢ̈ܝܼܢ: ܒܩܲܢܝܵܐ ܕܲܡܫܘܼܚܬ̣ܵܐ.

ܝܛ:ܘܲܡ̣ܫܲܚ ܠܪܘܼܚܵܐ ܕܡܲܥ̱ܪܒ̣ܵܐ: ܚܲܡܸܫܡܵܐܐ ܩܢ̈ܝܼܢ: ܒܩܲܢܝܵܐ ܕܲܡܫܘܼܚܬ̣ܵܐ.

ܟ:ܠܐܲܪܒܲܥ ܪ̈ܘܼܚܵܘܗܝ ܡܲܫ̣ܚܹܗ: ܘܫܘܼܪܵܐ ܟܲܕܼ ܚܵܕܲܪ: ܐܘܼܪܟܹ̇ܗ ܚܲܡܸܫܡܵܐܐ ܘܲܦܬ̣ܵܝܹܗ ܚܲܡܸܫܡܵܐܐ: ܕܢܸܦܪܘܿܫ ܒܹܝܬ̣ ܩܘܼܕܼܫܵܐ ܠܚܘܼܠܵܐ.

ܩܹܦܵܠܹܐܘܿܢ:ܡܓ.

ܐ:ܘܐܵܘܒ̇ܠܲܢܝ ܠܬܲܪܥܵܐ ܕܚܵܐܲܪ ܠܡܲܕܼܢ̣ܚܵܐ.

ܒ:ܘܗܵܐ ܫܘܼܒ̣ܚܹܗ ܕܐܲܠܵܗܵܐ ܕܝܼܣܪܵܝܹܠ ܐܵܬܹ̇ܐ ܡ̣ܢ ܐܘܼܪܚܵܐ ܕܡܲܕܼܢ̱ܚܵܐ: ܘܩܵܠܹܗ ܐܲܝܟ ܩܵܠܵܐ ܕܡܲـ̈ـܝܵܐ ܣܲܓ̇ܝܼ̈ܐܹܐ: ܘܐܲܪܥܵܐ ܢܸܗܪܲܬ̤ ܡ̣ܢ ܫܘܼܒ̣ܚܹܗ.

ܓ:ܐܲܝܟ ܚܸܙܘܵܐ ܕܲܚܙܹ̇ܝܬ̣ ܟܲܕܼ ܐܸܬܹܝ̇ܬ̣ ܠܲܡܚܲܒܵܠܘܼ ܠܲܡܕܼܝܼܢ̄ܬܵܐ: ܘܐܲܝܟ ܚܸܙܘܵܐ ܕܲܚܙܹ̇ܝܬ̣ ܥܲܠ ܢܗܲܪ ܟܒܲܪ: ܘܢܸܦܠܹ̇ܬ̣ ܥܲܠ ܐܲܦܲܝ̈.

ܕ:ܘܫܘܼܒ̣ܚܹܗ ܕܡܵܪܝܵܐ ܥܲܠ ܠܒܲܝܬܵܐ: ܒܐܘܼܪܚܵܐ ܕܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ.

ܗ:ܘܲܫܩܲܠܬܲܢܝ ܪܘܼܚܵܐ ܘܐܲܥܸܠܬܲܢܝ ܠܕܼܵܪܬܵܐ ܓܵܘܵܝܬܵܐ: ܘܲܚܙܹ̇ܝܬ̣ ܕܐܸܬ̣ܡ̱ܠܝܼ ܒܲܝܬܹ̇ܗ ܕܡܵܪܝܵܐ ܫܘܼܒ̣ܚܹܗ.

ܘ:ܘܫܸܡܥܹ̇ܬ̣ ܡܸܕܸ̇ܡ ܕܐܸܡܲܪ ܠܝܼ ܡ̣ܢ ܓܵܘ ܒܲܝܬܵܐ: ܘܓܲܒ̣ܪܵܐ ܩܵܐܹ̇ܡ ܗ̄ܘܼܵܐ ܠܘܵܬ̣ܝ.

ܙ:ܘܐܸܡܲܪ ܠܝܼ: ܒܲܪܢܵܫܵܐ: ܐܲܬ̣ܪܵܐ ܕܟ̣ܘܼܪܣܲܝ ܘܐܲܬ̣ܪܵܐ ܕܦܲܪ̈ܣܵܬ̣ܵܐ ܕܪܸ̈ܓ̣ܠܲܝ: ܕܫܵܪܹܐ ܐ̄ܢܵܐ ܒܲܝܢܵܬ̣ ܒܢܲܝ̈ ܝܑܼܣܪܵܝܹܠ ܠܥܵܠܲܡ: ܘܬ̣ܘܼܒ̣ ܠܵܐ ܢܸܬ̇ܛܲܢܦܘܼܢ ܕܒܹܝܬ̣ ܝܑܼܣܪܵܝܹܠ: ܘܬ̣ܘܼܒ̣ ܠܵܐ ܢܛܲܢܦܘܼܢ ܫܡܵܐ ܕܩܘܼܕܼܫܝ: ܗܸܢܘܿܢ ܘܡܲܠܟܲܝ̈ܗܘܿܢ ܒܙܵܢܝܘܼܬ̣ܗܘܿܢ: ܘܒܲܫ̈ܠܲܕܹ̇ܐ ܕܡܲܠܟܲܝ̈ܗܘܿܢ ܘܒܲܦܬܲܟ̣ܪ̈ܲܝܗܘܿܢ.

ܚ:ܕܥܵܒ̣ܕ̇ܝܼܢ ܗ̄ܘܼܵܘ ܬܲܪ̈ܥܲܝܗܘܿܢ ܥܲܠ ܓܸܢ̄ܒ̣ ܬܲܪ̈ܥܲܝ: ܘܣܸܦܲܝ̈ܗܘܿܢ ܥܲܠ ܓܸܢ̄ܒ̣ ܣܸܦܲܝ̈: ܘܐܸܣܬ̣ܵܐ ܗܘ̤ܵܬ̣ ܒܲܝܢܲܝ ܘܲܠܗܘܿܢ: ܘܛܲܢܸܦܘ ܫܡܵܐ ܕܩܘܼܕܼܫܝ ܒܥܵܘܼܠܵܐ ܕܲܥܒܲܕܼܘ: ܘܐܲܣܝܼܦܹܬ̣ ܐܸܢܘܿܢ ܒܪܘܼܓ̣ܙܝ.

ܛ:ܡܸܟܹ̇ܝܠ ܢܲܪܚ̄ܩܘܼܢ ܙܵܢܝܘܼܬ̣ܗܘܿܢ ܘܲܫ̈ܠܲܕܹ̇ܐ ܕܡܲܠܟܲܝ̈ܗܘܿܢ ܡ̣ܢ ܩܕܼܵܡܲܝ: ܘܐܸܫܪܹܐ ܒܲܝܢܵܬ̣ܗܘܿܢ ܠܥܵܠܲܡ.

ܝ:ܘܐܲܢ̄ܬ̇ ܕܹܝܢ ܒܲܪܢܵܫܵܐ: ܚܵܘܵܝܗܝ ܠܒܲܝܬܵܐ ܗܵܢܵܐ ܠܲܕܼܒܹܝܬ̣ ܝܑܼܣܪܵܝܹܠ: ܘܢܸܬ̇ܬܲܟ̣ܣܘܼܢ ܡ̣ܢ ܥܵܘܼܠܗܘܿܢ ܕܐܲܥܠܝܼܘ ܒܝܼ: ܘܢܸܡܫܚܘܼܢܵܗ̇ ܠܲܕܼܡܘܼܬܹܗ.

ܝܐ:ܘܐܸܢ ܐܸܬ̇ܬܲܟܸܣܘ ܡ̣ܢ ܡܸܕܸ̇ܡ ܕܲܥܒܲܕܼܘ: ܨܘܼܪ̈ܵܬܹܗ ܕܒܲܝܬܵܐ ܘܛܘܼܝܵܒܹܗ: ܘܡܲܥ̈ܠܵܢܵܘܗܝ ܘܡܲܦܩܵܢܵܘ̈ܗܝ: ܘܟ̣ܠܵܗ̇ ܨܘܼܪܬܹ̇ܗ: ܘܟ̣ܠܗܘܿܢ ܢܵܡܘܿܣܵܘ̈ܗܝ ܘܟ̣ܠܗܹܝܢ ܨܘܼܪ̈ܵܬܹܗ ܚܵܘܵܐ ܐܸܢܘܿܢ: ܘܲܪܫܘܿܡ ܠܥܹܢܲܝܗܘܿܢ: ܕܢܸܛܪܘܿܢ ܟܠܗܹܝܢ ܨܘܼܪ̈ܵܬܹܗ: ܘܟ̣ܠܹܗ ܪܘܼܫܡܹܗ ܘܢܸܥܒ̇ܕܼܘܼܢ ܐܸܢܘܿܢ.

ܝܒ:ܗܵܢܵܘ ܚܸܙܘܵܐ ܕܒܲܝܬܵܐ ܥܲܠ ܪܹܫ ܛܘܼܪܵܐ: ܘܟ̣ܠܗܘܿܢ ܬܚܘܼܡܵܘ̈ܗܝ ܟܲܕܼ ܚܵܕܼܪܝܼܢ: ܩܕܼܘܿܫ ܩܘܼܕܼܫܹ̈ܐ ܐܸܢܘܿܢ.

ܝܓ:ܗܵܠܹܝܢ ܡܘܼܫ̈ܚܵܬܹܗ ܕܡܲܕܼܒ̇ܚܵܐ ܒܐܲܡܬ̣ܵܐ: ܕܐܲܡܵܐ ܘܲܦܫܸܟ: ܥܘܼܒܵܗ̇ ܕܐܲܡܬ̣ܵܐ ܐܲܡܵܐ: ܘܲܬ̣ܝܵܟ̣ܵܐ ܐܝܼܬ̣ ܠܣܸܦܬܹܗ ܙܪܸܬ̣ ܟܲܕܼ ܚܵܕܲܪ: ܘܗܵܟܲܢܵܐ ܒܓܲܒܹ̇ܗ.

ܝܕ:ܘܡ̣ܢ ܐܲܪܥܵܐ ܘܲܥܕܲܡܵܐ ܠܲܬ̣ܝܵܟ̣ܵܐ ܬܲܚܬܵܝܵܐ: ܬܲܪܬܹ̇ܝܢ ܐܲܡܝܼ̈ܢ: ܘܲܦܬ̣ܵܝܹܗ ܐܲܡܬ̣ܵܐ ܚܕܼܵܐ: ܘܡ̣ܢ ܬܝܵܟ̣ܵܐ ܬܲܚܬܵܝܵܐ: ܘܲܥܕܲܡܵܐ ܠܥܸܠܵܝܵܐ ܐܲܪܒ̇ܥܲ ܐܲܡ̈ܝܼܢ: ܘܲܦܬ̣ܵܝܵܐ ܐܲܡܵܐ.

ܝܗ:ܘܲܗܕܼܵܐܹܝܠ ܐܲܪܒܲܥ ܐܲܡ̈ܝܼܢ: ܘܡ̣ܢ ܗܕܼܵܐܹܝܠ ܘܲܠܥܸܠ ܩܲܪ̈ܢܵܬ̣ܵܐ ܐܲܪܒܲܥ.

ܝܘ:ܘܐܘܼܪܟܹ̇ܗ ܕܲܗܕܼܵܐܹܝܠ ܬܲܪܬܲܥܸܣܪܹ̈ܐ ܐܲܡ̈ܝܼܢ: ܘܲܦܬ̣ܵܝܹܗ ܬܲܪܬܲܥܸܣܪܹ̈ܐ: ܡܪܲܒܲܥ ܠܐܲܪܒ̇ܥܵܐ ܣܸܛܪ̈ܵܘܗܝ.

ܝܙ:ܘܲܬ̣ܝܵܟܹܗ ܐܲܪܒܲܥܸܣܪܹ̈ܐ ܐܲܡܝܼ̈ܢ ܐܘܼܪܟܹ̇ܗ: ܘܐܲܪܒܲܥܸܣܪܹ̈ܐ ܦܬ̣ܵܝܹܗ: ܥܲܠ ܐܲܪܒ̇ܥܵܐ ܣܸܛܪ̈ܵܘܗܝ: ܘܲܬ̣ܝܵܟܹܗ ܘܲܬ̣ܚܘܼܡܵܐ ܕܚܵܕܲܪ ܠܹܗ ܦܸܠܓܘܼܬ̣ ܐܲܡܵܐ: ܘܥܘܼܒܵܐ ܐܝܼܬ̣ ܠܹܗ ܟܲܕܼ ܚܵܕܲܪ: ܘܕܲܪ̈ܓ̣ܵܘܗܝ ܚܵܝ̇ܪܝܼܢ ܠܡܲܕܼܢ̱ܚܵܐ.

ܝܚ:ܘܐܸܡܲܪ ܠܝܼ: ܒܲܪܢܵܫܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܠܹܝܢ ܢܵܡܘܿܣܵܘ̈ܗܝ ܕܡܲܕܼܒ̇ܚܵܐ ܒܝܵܘܡܵܐ ܕܡܸܬ̣ܥ̱ܒܸܕܼ: ܢܩܲܪܒ̣ܘܼܢ ܥܠܵܘܗܝ ܥܠܵܬ̣ܵܐ: ܘܢܹܐܫܕ̇ܘܼܢ ܥܠܵܘܗܝ ܕܡܵܐ.

ܝܛ:ܘܐܸܬܸ̇ܠ ܠܟ̣ܵܗܢܹ̈ܐ ܘܲܠܠܹܘܵܝܹ̈ܐ ܕܡ̣ܢ ܙܲܪܥܹܗ ܕܨܵܕܼܘܿܩ: ܕܡܸܬ̣ܩܲܪܒ̣ܝܼܢ ܠܘܵܬ̣ܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܲܡܫܲܡܫܘܼܬܲܢܝ: ܬܵܘܪܵܐ ܒܲܪ ܒܲܩܪܵܐ ܠܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ.

ܟܟ:ܘܬܸܣܲܒ̣ ܡ̣ܢ ܕܡܹܗ: ܘܬܸܪܘܿܣ ܒܐܲܪܒܲܥ  ܩܲܪ̈ܢܵܬܹܗ ܕܡܲܕܼܒ̇ܚܵܐ: ܘܒܲܐܪܒܲܥ ܙܵܘ̈ܝܵܬ̣ܵܐ ܕܲܬ̣ܝܵܟܹܗ: ܘܒܲܬ̣ܚܘܼܡܵܐ ܕܚܵܕܲܪ ܠܹܗ: ܘܬܸܪܘܿܣ ܥܠܵܘܗܝ ܘܢܸܬ̇ܕܲܟܸ̇ܐ.

ܟܐ:ܘܬܸܣܲܒ̣ ܬܵܘܪܵܐ ܕܬܲܕܼܟ̇ܝܼܬ̣ܵܐ: ܘܢܲܣܩܘܼܢܹܗ ܥܲܠ ܓܲܒܹ̇ܗ ܕܒܲܝܬܵܐ: ܠܒܲܪ ܡ̣ܢ ܡܲܩܕ̇ܫܵܐ.

ܟܒ:ܘܲܒ̣ܝܵܘܡܵܐ ܕܲܬ̣ܪܹܝܢ: ܩܲܪܸܒ̣ ܠܬܲܕܼܟ̇ܝܼܬ̣ܵܐ: ܨܸܦܪܵܝܵܐ ܕܥܸܙܹ̈ܐ ܕܠܲܝܬ̇ ܒܹܗ ܡܘܼܡܵܐ: ܘܲܢܕܲܟ̇ܘܿܢܹܗ ܠܡܲܕܼܒ̇ܚܵܐ: ܐܲܝܟ ܕܕܲܟ̇ܝܼܘܗܝ ܒܬ̣ܵܘܪܵܐ.

ܟܓ:ܘܡܵܐ ܕܫܲܡ̣ܠܝܼܬ̇ ܠܲܡܕܲܟܵܝܘܼ: ܩܲܪܸܒ̣ ܬܵܘܪܵܐ ܒܲܪ ܒܲܩܪܵܐ ܕܠܲܝܬ ܒܹܗ ܡܘܼܡܵܐ: ܘܕܸܟ̣ܪܵܐ ܡ̣ܢ ܥܵـ̈ـܢܵܐ ܕܠܲܝܬ̇ ܒܹܗ ܡܘܼܡܵܐ.

ܟܕ:ܘܩܲܪܸܒ̣ ܐܸܢܘܿܢ ܩܕܼܵܡ ܡܵܪܝܵܐ: ܘܢܲܪܡܘܿܢ ܥܠܲܝܗܘܿܢ ܟܵܗܢܹ̈ܐ ܡܸܠܚܵܐ: ܘܲܢܩܲܪܒ̣ܘܼܢ ܐܸܢܘܿܢ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ.

ܟܗ:ܘܲܬ̣ܩܲܪܒ̣ܘܼܢ ܫܲܒ̣ܥܵܐ ܝܵܘ̈ܡܝܼܢ: ܨܸܦܪܵܝܵܐ ܚܲܕܼ ܒܝܵܘܡܵܐ ܠܬܲܕܼܟ̇ܝܼܬ̣ܵܐ: ܘܬ̣ܵܘܪܵܐ ܚܲܕܼ ܒܲܪ ܒܲܩܪܵܐ: ܘܕܸܟ̣ܪܵܐ ܡ̣ܢ ܥܵـ̈ـܢܵܐ ܕܠܲܝܬ̇ ܒܹܗ ܡܘܼܡܵܐ.

ܟܘ:ܢܸܗܘܘܿܢ ܡܩܲܪܒ̣ܝܼܢ ܫܲܒ̣ܥܵܐ ܝܵܘܡ̈ܝܼܢ: ܘܲܢܕܲܟ̇ܘܿܢܹܗ ܠܡܲܕܼܒ̇ܚܵܐ ܘܲܢܫܲܠܡܘܼܢ ܐܝܼܕܲܝ̈ܗܘܿܢ.

ܟܙ:ܘܡܵܐ ܕܲܫܠܸܡ̣ܘ ܝܵܘ̈ܡܵܬ̣ܵܐ ܡ̣ܢ ܝܵܘܡܵܐ ܕܫܲܒ̣ܥܵܐ ܘܲܠܗܲܠ: ܗܵܝܕܹ̇ܝܢ ܢܩܲܪܒ̣ܘܼܢ ܟܵܗܢܹ̈ܐ ܥܲܠ ܡܲܕܼܒ̇ܚܵܐ: ܝܲܩܕܲܝ̈ܗܘܿܢ ܫܲܠܡܹ̈ܐ ܘܩܘܼܪ̈ܒܵܢܲܝܗܘܿܢ: ܘܐܸܨܛܒܸܐ ܒܗܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܡܕ.

ܐ:ܘܐܲܗܦ̣ܟܲܢܝ ܠܐܘܼܪܚܵܐ ܕܬܲܪܥܵܐ ܒܲܪܵܝܵܐ ܕܡܲܩܕ̇ܫܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܚܙܹ̇ܝܬܹܗ ܕܐܲܚܝܼܕܼ.

ܒ:ܘܐܸܡܲܪ ܠܝܼ ܡܵܪܝܵܐ: ܬܲܪܥܵܐ ܗܵܢܵܐ ܢܸܗܘܹܐ ܐܲܚܝܼܕܼ: ܘܠܵܐ ܢܸܬ̣ܦܬܲܚ: ܘܐ̄ܢܵܫ ܠܵܐ ܢܸܥܘܿܠ ܒܹܗ: ܡܸܛܠ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܥܵܐܹ̇ܠ ܒܹܗ: ܢܸܗܘܹܐ ܐܲܚܝܼܕܼ.

ܓ:ܡܕܲܒ̇ܪܵܢܵܐ ܢܸܬܸ̇ܒ̣ ܒܹܗ: ܘܢܹܐܟ̣ܘܿܠ ܠܲܚܡܵܐ ܩܕܼܵܡ ܡܵܪܝܵܐ: ܡ̣ܢ ܐܘܼܪܚܵܐ ܕܐܸܣܟ̇ܘܼܦܬ̣ܵܐ ܕܬܲܪܥܵܐ ܢܸܥܘܿܠ ܘܡܸܢܵܗ̇ ܢܸܦܘܿܩ.

ܕ:ܘܐܲܥܠܲܢܝ ܠܐܘܼܪܚܵܐ ܕܬܲܪܥܵܐ ܓܲܪܒ̇ܝܵܝܵܐ ܕܲܩܕܼܵܡ ܒܲܝܬܵܐ: ܘܲܚܙܹ̇ܝܬ̣ ܕܐܸܬ̣ܡ̱ܠܝܼ ܒܲܝܬܵܐ ܫܘܼܒ̣ܚܹܗ ܕܡܵܪܝܵܐ: ܘܢܸܦܠܹ̇ܬ̣ ܥܲܠ ܐܲܦܝ̈.

ܗ:ܘܐܸܡܲܪ ܠܝܼ ܡܵܪܝܵܐ: ܒܲܪܢܵܫܵܐ: ܣܝܼܡ ܒܠܸܒܵܟ ܘܲܚܙܝܼ ܒܥܲܝܢܲܝ̈ܟ: ܘܲܫܡܲܥ ܒܐܸܕܼܢܲܝ̈ܟ ܟܠ ܡܸܕܸ̇ܡ ܕܲܡܡܲܠܸܠ ܐ̄ܢܵܐ ܥܲܡܵܟ: ܘܟ̣ܠܗܘܿܢ ܢܵܡܘܿܣܵܘ̈ܗܝ ܕܒܲܝܬܵܐ: ܘܟ̣ܠܗܹܝܢ ܨܘܼܪ̈ܵܬܹܗ: ܘܣܝܼܡ ܠܒ̣ܵܠܵܟ ܡܲܥܠܵܢܵܘ̈ܗܝ ܕܒܲܝܬܵܐ: ܘܡܲܦܩܵܢܵܘ̈ܗܝ ܕܡܲܩܕ̇ܫܵܐ.

ܘ:ܘܐܸܡܲܪ ܠܒܲܝܬܵܐ ܕܝܼܣܪܵܝܹܠ ܡܡܲܪܡܪܵܢܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܠܵܐ ܟܲܕ̇ܘܼ ܠܟ̣ܘܿܢ ܟܠܵܗ̇ ܛܲܢܦܘܼܬ̣ܟ̣ܘܿܢ ܕܒܹܝܬ̣ ܝܑܼܣܪܵܝܹܠ.

ܙ:ܐܸܠܵܐ ܐܵܦ ܡܲܝܬܹ̇ܝܢ ܐܲܢ̄ܬ̇ܘܿܢ ܡ̣ܢ ܒܢܲܝ̈ ܢܘܼܟ̣ܪ̈ܵܝܹܐ ܕܥܘܼܪܠܝܼܢ ܒܠܸܒ̇ܗܘܿܢ: ܘܥܘܼܪܠܝܼܢ ܒܒܸܣ̱ܪܗܘܿܢ: ܘܗܵܘܹ̇ܝܢ ܒܡܲܩܕܲܫܝ: ܘܲܡܛܲܢܦܝܼܢ ܒܲܝܬ̇ܝ: ܘܲܡܩܲܪܒ̣ܝܼܢ ܐ̄ܢܬ̇ܘܿܢ ܥܲܠ ܠܲܚܡܝ ܬܲܪܒܵܐ ܘܲܕܼܡܵܐ: ܘܲܡܒܲܛܠܝܼܢ ܐ̄ܢܬ̇ܘܿܢ ܩܝܵܡܝ ܒܟ̣ܠܵܗ̇ ܛܲܢܦܘܼܬ̣ܟ̣ܘܿܢ.

ܚ:ܘܠܵܐ ܢܵܛ̇ܪܝܼܢ ܐ̄ܢܬ̇ܘܿܢ ܢܛܘܼܪ̈ܵܬ̣ܵܐ ܕܡܲܩܕܲܫܝ: ܐܸܠܵܐ ܥܒܲܕ̇ܬ̇ܘܿܢ ܢܵܛܪ̈ܲܝ ܡܲܛܲܪܬܵܐ ܕܡܲܩܕܲܫܝ ܢܵܛܘܿܪ̈ܲܝܟ̇ܘܿܢ ܕܝܼܠܟ̣ܘܿܢ.

ܛ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܠ ܒܲܪ ܢܘܼܟ̣ܪ̈ܵܝܹܐ ܕܲܥܪܘܿܠ ܒܠܸܒܹ̇ܗ ܘܥܘܼܪܠܵܐ ܒܒܸܣܪܹܗ: ܠܵܐ ܢܸܥܘܿܠ ܠܡܲܩܕܲܫܝ: ܘܠܵܐ ܒܲܪ ܢܘܼܟ̣ܪ̈ܵܝܹܐ ܕܐܝܼܬ̣ ܒܲܝܢܵܬ̣ ܒܢܲܝ̈ ܝܑܼܣܪܵܝܹܠ.

ܝ:ܐܵܦܠܵܐ ܠܹܘܵܝܹ̈ܐ ܕܲܦܪܲܩ̣ܘ ܡܹܢܝ: ܟܲܕܼ ܛܥܵܘ ܒܢܲܝ̈ ܝܑܼܣܪܵܝܹܠ ܡܹܢܝ ܒܵܬܲܪ ܦܬܲܟ̣ܪ̈ܲܝܗܘܿܢ: ܘܩܲܒܸ̇ܠܘ ܥܵܘܼܠܗܘܿܢ.

ܝܐ:ܘܲܗܘ̤ܵܘ ܒܡܲܩܕܲܫܝ: ܘܲܡܫܲܡܫܝܼܢ ܗ̄ܘܼܵܘ ܒܬܲܪܥܵܐ ܕܒܲܝܬܵܐ: ܗܸܢܘܿܢ ܢܸܟ̇ܣܘܼܢ ܝܲܩ̈ܕܹ̇ܐ ܫܲܠܡܹ̈ܐ ܘܕܸܒ̣ܚܹ̈ܐ ܕܥܲܡܵܐ: ܘܗܸܢܘܿܢ ܢܩܘܼܡܘܿܢ ܩܕܼܵܡܲܝܗܘܿܢ ܘܲܢܫܲܡܫܘܼܢ ܐܸܢܘܿܢ.

ܝܒ:ܥܲܠ ܕܫܲܡܸܫ̣ܘ ܐܸܢܘܿܢ ܩܕܼܵܡ ܦܬܲܟ̣ܪ̈ܲܝܗܘܿܢ: ܘܲܗܘ̤ܵܘ ܠܬ̣ܘܼܩ̱ܠܵܬ̣ܵܐ ܕܥܵܘܼܠܵܐ ܠܲܒ̣ܢܲܝ̈ ܝܑܼܣܪܵܝܹܠ: ܡܸܛܠܗܵܢܵܐ ܐܲܪܝܼܡܹ̇ܬ̣ ܐܝܼܕܼܝ ܥܠܲܝܗܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܘܩܲܒܸ̇ܠܘ ܥܵܘܼܠܗܘܿܢ.

ܝܓ:ܘܠܵܐ ܢܸܩ̱ܪܒ̣ܘܼܢ ܩܕܼܵܡܲܝ ܠܲܡܫܲܡܵܫܘܼܬܲܢܝ: ܘܠܵܐ ܢܸܬ̣ܩܲܪܒ̣ܘܼܢ ܠܟ̣ܠܗܘܿܢ ܩܘܼܕܼܫܲܝ̈ ܒܹܝܬ̣ ܩܕܼܘܼܫ ܩܘܼܕܼܫܹ̈ܐ: ܘܲܢܩܲܒ̇ܠܘܼܢ ܟܠܵܗ̇ ܒܸܗܬܲܬ̣ܗܘܿܢ ܘܟ̣ܠܵܗ̇ ܛܲܢܦܘܼܬ̣ܗܘܿܢ ܕܲܥܒܲܕܼܘ.

ܝܕ:ܘܐܸܥܒܸ̇ܕܼ ܐܸܢܘܿܢ ܢܵܛܪ̈ܲܝ ܡܲܛܲܪܬܵܐ ܕܒܲܝܬܵܐ: ܘܥܵܒ̣ܕܲܝ̈ ܥܒ̣ܵܕܼܵܐ ܕܟ̣ܠܡܸܕܸ̇ܡ ܕܗܵܘܹ̇ܐ ܒܹܗ.

ܝܗ:ܘܟ̣ܵܗܢܹ̈ܐ ܘܠܹܘܿܝܹ̈ܐ ܒܢܲܝ̈ ܨܵܕܼܘܿܩ: ܕܲܢܛܲܪܘ ܡܲܛܲܪܬܵܐ ܕܡܲܩܕܲܫܝ: ܟܲܕܼ ܛܥܵܘ ܒܢܲܝ̈ ܝܑܼܣܪܵܝܹܠ ܡܹܢܝ: ܗܸܢܘܿܢ ܢܸܩ̱ܪܒ̣ܘܼܢ ܠܘܵܬ̣ܝ ܠܲܡܫܲܡܵܫܘܼܬܲܢܝ: ܘܗܸܢܘܿܢ ܢܩܘܼܡܘܼܢ ܩܕܼܵܡܲܝ: ܘܲܢܩܲܪܒ̣ܘܼܢ ܠܝܼ ܬܲܪܒܵܐ ܘܲܕܼܡܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܘ:ܗܸܢܘܿܢ ܢܸܥܠܘܼܢ ܠܡܲܩܕܲܫܝ: ܘܗܸܢܘܿܢ ܢܸܩ̱ܪܒ̣ܘܼܢ ܠܦܵܬ̣ܘܿܪܝ: ܕܲܡܫܲܡܫܘܼܢܵܢܝ: ܘܢܸܛܪܘܼܢ ܢܛܘܼܪ̈ܵܬ̣ܝ.

ܝܙ:ܘܡܵܐ ܕܥܵܐܠܝܼܢ ܒܬܲܪܥܵܐ ܕܕܼܵܪܬܵܐ ܓܵܘܵܝܬܵܐ: ܡܵܐܢܹ̈ܐ ܕܟܸܬܵܢܵܐ ܢܸܠܒܫܘܼܢ: ܘܲܕܼܥܲܡܪܵܐ ܠܵܐ ܢܸܠܒ̇ܫܘܼܢ: ܘܡܵܐ ܕܲܡܫܲܡܫܝܼܢ ܒܬܲܪܥܵܐ ܕܕܼܵܪܬܵܐ ܓܵܘܵܝܬܵܐ.

ܝܚ:ܐܵܦ ܠܓ̣ܵܘ ܡܲܨܢ̈ܦܵܬ̣ܵܐ ܕܟܸܬܵܢܵܐ ܢܣܝܼܡܘܼܢ ܒܪܹ̈ܫܲܝܗܘܿܢ: ܘܲܦܪ̈ܵܙܘܿܡܹܐ ܕܟܸܬܵܢܵܐ ܢܹܐܣܪܘܼܢ ܒܚܲܨܲܝ̈ܗܘܿܢ.

ܝܛ:ܘܡܵܐ ܕܢܵܦܩܝܼܢ ܠܕܼܵܪܬܵܐ ܒܲܪܵܝܬܵܐ ܠܘܵܬ̣ ܥܲܡܵܐ: ܢܸܫ̱ܠܚܘܼܢ ܡܵܐܢܲܝ̈ܗܘܿܢ ܕܲܡܫܲܡܫܝܼܢ ܒܗܘܿܢ: ܘܢܸܫܒ̇ܩܘܼܢ ܐܸܢܘܿܢ ܒܐܲܟ̣ܣܸܕܼܪܹ̈ܐ ܕܩܘܼܕܼܫܵܐ: ܘܢܸܠܒ̇ܫܘܼܢ ܡܵܐܢܹ̈ܐ ܐ̄ܚܪ̈ܵܢܹܐ: ܕܠܵܐ ܢܩܲܕ̇ܫܘܼܢܹܗ ܠܥܲܡܵܐ ܒܡܵܐܢܲܝ̈ܗܘܿܢ.

ܟ:ܪܹ̈ܫܲܝܗܘܿܢ ܠܵܐ ܢܸܓܪ̱ܥܘܼܢ: ܘܩܵܘ̈ܨܵܬ̣ܗܘܿܢ ܠܵܐ ܢܪܲܒ̇ܘܿܢ: ܐܸܠܵܐ ܡܣܲܦܵܪܘܼ ܢܣܲܦܪܘܿܢ ܪܹ̈ܫܲܝܗܘܿܢ.

ܟܐ:ܘܚܲܡܪܵܐ ܠܵܐ ܢܸܫܬ̇ܘܿܢ ܟܵܗܢܹ̈ܐ ܡܵܐ ܕܥܵܐܠܝܼܢ ܠܕܼܵܪܬܵܐ ܓܵܘܵܝܬܵܐ.

ܟܒ:ܘܐܲܪܡܲܠܬܵܐ ܘܲܫܒ̣ܝܼܩܬܵܐ ܠܵܐ ܢܸܣܒ̣ܘܼܢ ܠܗܘܿܢ ܢܸܫܹ̈ܐ: ܐܸܠܵܐ ܐܸܢ ܒܬ̣ܘܼܠܬܵܐ ܡ̣ܢ ܙܲܪܥܵܐ ܕܝܼܣܪܵܝܹܠ: ܐܵܘ ܐܲܪܡܲܠܬܵܐ ܕܡܲܪܡ̄ܠܵܐ ܡ̣ܢ ܟܵܗܢܵܐ ܢܸܣܒ̣ܘܼܢ.

ܟܓ:ܘܢܲܠܦܘܼܢ ܠܥܲܡܝ ܒܹܝܬ̣ ܩܘܼܕܼܫܵܐ ܠܚܘܼܠܵܐ: ܘܢܵܘܕ̇ܥܘܼܢܹܗ ܒܹܝܬ̣ ܡܣܲܝܒ̣ܵܐ ܠܕܲܟ̣ܝܵܐ.

ܟܕ:ܘܥܲܠ ܕܝܼܢܹ̈ܐ ܗܸܢܘܿܢ ܢܩܘܼܡܘܼܢ ܠܲܡܕܼܵܢ: ܘܲܒ̣ܕܼܝܼ̈ܢܲܝ ܢܕܼܘܼܢܘܼܢ: ܘܢܵܡܘܿܣܲܝ̈ ܘܦܘܼܩ̈ܕܵܢܲܝ ܢܸܛܪܘܿܢ: ܒܟ̣ܠܗܘܿܢ ܙܲܒ̣ܢܹ̈ܐ ܕܡܵܘ̈ܥܕܲܝ: ܘܫܲܒܲܝ̈ ܢܩܲܕ̇ܫܘܼܢ.

ܟܗ:ܘܥܲܠ ܡܝܼܬ̣ܵܐ ܕܒܲܪܢܵܫܵܐ ܠܵܐ ܢܸܥܠܘܿܢ ܕܠܵܐ ܢܸܣܬܲܝܒ̣ܘܼܢ: ܐܸܠܵܐ ܐܸܢ ܒܐܲܒ̣ܘܼܗܝ ܐܵܘ ܒܐܸܡܹܗ: ܐܵܘ ܒܲܒ̣ܪܹܗ: ܐܵܘ ܒܒܲܪܬܹܗ: ܐܵܘ ܒܐܲܚܘܼܗܝ: ܐܵܘ ܒܚܵܬܹܗ ܒܬ̣ܘܼܠܬܵܐ ܕܠܵܐ ܗ̄ܘܼܵܬ̣ ܠܓܲܒ̣ܪܵܐ ܢܸܣܬܲܝܒ̣ܘܼܢ.

ܟܘ:ܘܡ̣ܢ ܒܵܬܲܪ ܕܡܸܣܬܲܝܲܒ̣: ܢܸܡܢܸܐ ܠܹܗ ܫܲܒ̣ܥܵܐ ܝܵܘܡܝܼ̈ܢ: ܘܗܵܝܕܹ̇ܝܢ ܢܸܬ̇ܕܲܟܸ̇ܐ.

ܟܙ:ܘܲܒ̣ܝܵܘܡܵܐ ܕܥܵܐܹ̇ܠ ܠܡܲܩܕ̇ܫܵܐ ܠܕܼܵܪܬܵܐ ܓܵܘܵܝܬܵܐ ܠܲܡܫܲܡܵܫܘܼ ܒܩܘܼܕܼܫܵܐ: ܢܩܲܪܸܒ̣ ܬܲܕܼܟ̇ܝܼܬܹܗ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܟܚ:ܘܬܸܗܘܹܐ ܠܗܘܿܢ ܠܝܘܼܪܬܵܢܵܐ: ܐܸܢܵܐ ܐ̄ܢܵܐ ܝܘܼܪܬܵܢܗܘܿܢ: ܘܲܡܢܵܬ̣ܵܐ ܠܵܐ ܬܸܬ̇ܠܘܼܢ ܠܗܘܿܢ ܒܝܼܣܪܵܝܹܠ: ܐܸܢܵܐ ܐ̄ܢܵܐ ܡܢܵܬ̣ܗܘܿܢ.

ܟܛ:ܣܡܝܼܕܼܵܐ ܘܬܲܪܼܟ̇ܝܼܬ̣ܵܐ ܕܲܚܛܵܗܹ̈ܐ ܗܸܢܘܿܢ ܢܹܐܟ̣ܠܘܼܢ: ܘܟ̣ܠ ܚܸܪܡܵܐ ܕܒ̣ܝܼܣܪܵܝܹܠ ܕܝܼܠܗܘܿܢ ܢܸܗܘܹܐ.

ܠ:ܘܪܹܫ ܟܠ ܒܘܼܟ̣ܪܹ̈ܐ ܕܟ̣ܠܹܗ ܦܘܼܪܫܵܢܵܐ ܕܦܵܪܫܝܼܢ ܐ̄ܢܬ̇ܘܿܢ: ܕܟ̣ܵܗܢܹ̈ܐ ܢܸܗܘܹܐ. ܘܪܹܫ ܐܵܨܘܵܬ̣̈ܟ̣ܘܿܢ ܗܲܒ̣ܘ ܠܟ̣ܵܗܢܹ̈ܐ: ܕܬܸܗܘܹܐ ܒܘܼܪܟ̇ܬ̣ܵܐ ܒܒ̣ܵܬܲܝ̈ܟ̇ܘܿܢ.

ܠܐ:ܘܟ̣ܠ ܕܲܡܩܲܢܲܩ ܘܲܬ̣ܒ̣ܝܼܪ ܡ̣ܢ ܦܵܪܲܚܬܵܐ ܘܡ̣ܢ ܚܲܝ̄ܘܼܬ̣ܵܐ: ܠܵܐ ܢܹܐܟ̣ܠܘܼܢ ܟܵܗܢܹ̈ܐ.

ܩܹܦܵܠܹܐܘܿܢ:ܡܗ.

ܐ:ܘܡܵܐ ܕܲܡܦܲܠܓ̣ܝܼܢ ܐ̄ܢܬ̇ܘܿܢ ܐܲܪܥܵܐ: ܦܪܘܿܫܘ ܦܘܼܪܫܵܢܵܐ ܠܡܵܪܝܵܐ: ܘܩܲܪܸܒ̣ܘ ܡ̣ܢ ܐܲܪܥܵܐ: ܘܢܸܗܘܹܐ ܐܘܼܪܟܵܗ̇ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܗ̇ ܥܸܣܪܵܐ ܐܲܠܦܝܼ̈ܢ: ܘܢܸܗܘܘܿܢ ܩܲܕ̇ܝܼܫܝܼ̈ܢ ܟܠܗܘܿܢ ܬܚܘܼܡܹ̈ܝܗ̇ ܟܲܕܼ ܚܵܕܼܪܝܼܢ ܠܵܗ̇.

ܒ:ܘܬܸܗܘܹܐ ܠܡܲܩܕ̇ܫܵܐ ܚܲܡܸܫܡܵܐܐ ܒܚܲܡܸܫܡܵܐܐ: ܘܬܸܗܘܹܐ ܡܪܲܒ̇ܥܵܐ ܟܲܕܼ ܚܵܕܼܪܵܐ: ܘܚܲܡܫܝܼܢ ܐܲܡ̈ܝܼܢ ܫܸܛܚܵܗ̇.

ܓ:ܘܡ̣ܢ ܗܵܕܹܐ ܡܫܘܼܚܬ̣ܵܐ: ܐܘܼܪܟܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܐ ܥܸܣܪܵܐ ܐܲܠܦ̈ܝܼܢ: ܘܒ̣ܵܗ̇ ܢܸܗܘܹܐ ܩܕܼܘܿܫ ܩܘܼܕܼܫܹ̈ܐ.

ܕ:ܘܩܘܼܕܼܫܵܐ ܕܐܲܪܥܵܐ: ܢܸܗܘܹܐ ܠܟ̣ܵܗ̈ܢܹܐ ܕܲܡܫܲܡܫܝܼܢ ܡܲܩܕ̇ܫܹܗ ܕܡܵܪܝܵܐ: ܘܡܸܬ̣ܩܲܪܒ̣ܝܼܢ ܠܲܡܫܲܡܵܫܘܼܬܹܗ ܠܡܵܪܝܵܐ: ܘܢܸܗܘܹܐ ܠܗܘܿܢ ܐܲܬ̣ܪܵܐ ܠܒ̣ܵـ̈ـܬܹ̇ܐ: ܘܡܲܩܕ̇ܫܵܐ ܠܡܲܩܕ̇ܫܹ̈ܐ.

ܗ:ܘܢܸܗܘܹܐ ܥܸܣܪܝܼܢ ܘܚܲܡܫܵܐ ܐܲܠܦܝܼ̈ܢ ܐܘܼܪܟܵܐ: ܘܥܸܣܪܝܼܢ ܐܲܠܦ̈ܝܼܢ ܦܬ̣ܵܝܵܐ: ܘܢܸܗܘܹܐ ܝܘܼܪܬܵܢܵܐ ܠܠܹܘܵܝܹ̈ܐ ܕܲܡܫܲܡܫܝܼܢ ܒܒܲܝܬܵܐ: ܥܸܣܪܝܼܢ ܒܵܬܝ̈ܢ.

ܘ:ܝܘܼܪܬܵܢܵܐ ܕܲܡܕܼܝܼܢ̄ܬܵܐ ܚܲܡܫܵܐ ܐܲܠܦ̈ܝܼܢ ܦܬ̣ܵܝܵܐ: ܘܐܘܼܪܟܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܠܘܼܩܒܲܠ ܦܘܼܪܫܵܢܵܐ ܕܡܲܩܕ̇ܫܵܐ: ܢܸܗܘܹܐ ܠܟ̣ܠܗܘܿܢ ܕܒܹܝܬ̣ ܝܑܼܣܪܵܝܹܠ.

ܙ:ܘܠܲܡܕܲܒ̇ܪܵܢܵܐ ܕܥܲܡܵܐ: ܠܦܘܼܪܫܵܢܵܐ ܕܩܘܼܕܼܫܵܐ: ܘܠܝܘܼܪܬܵܢܵܐ ܕܲܡܕܼܝܼܢ̄ܬܵܐ: ܡ̣ܢ ܡܲܕܼܢ̱ܚܵܐ ܘܡ̣ܢ ܡܲܥ̱ܪܒ̣ܵܐ: ܘܐܘܼܪܟܵܐ ܢܸܗܘܹܐ ܠܘܼܩܒܲܠ ܦܵܠܓܘܼܬ̣ܵܐ: ܡ̣ܢ ܡܲܕܼܢ̱ܚܵܐ ܠܡܲܥ̱ܪܒ̣ܵܐ.

ܚ:ܢܸܗܘܹܐ ܝܘܼܪܬܵܢܵܐ ܠܲܒ̣ܢܲܝ̈ ܝܑܼܣܪܵܝܹܠ: ܘܬ̣ܘܼܒ̣ ܠܵܐ ܢܲܗܪܘܿܢ ܐܸܢܘܿܢ ܡܕܲܒ̇ܪ̈ܵܢܹܐ ܕܥܲܡܝ: ܘܐܲܪܥܵܐ ܢܸܬ̇ܠܘܼܢ ܠܲܒ̣ܢܲܝ̈ ܝܑܼܣܪܵܝܹܠ ܠܫܲܪ̈ܒ̣ܵܬ̣ܗܘܿܢ.

ܛ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܟܲܕ̇ܘܼ ܠܟ̣ܘܿܢ ܪܵܘܪ̈ܒ̣ܵܢܹܐ ܕܝܼܣܪܵܝܹܠ: ܐܲܥܒܲܪܘ ܡܸܢܟ̣ܘܿܢ ܚܛܘܼܦܝܵܐ ܘܒܸܙܬ̣ܵܐ: ܘܲܥܒܸܕܼܘ ܕܝܼܢܵܐ ܘܙܲܕ̇ܝܼܩܘܼܬܵܐ: ܘܐܲܦܪܸܩܘ ܫܘܼܥܒܵܕܼܟ̣ܘܿܢ ܡ̣ܢ ܥܲܡܝ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝ:ܡܲܣܲܐܬ̣ܵܐ ܕܩܘܼܫܬܵܐ: ܘܲܟ̣ܝܵܠܬܵܐ ܕܩܘܼܫܬܵܐ ܘܡܲܬ̣ܩܵܠܹ̈ܐ ܕܩܘܼܫܬܵܐ: ܢܸܗܘܘܿܢ ܠܟ̣ܘܿܢ.

ܝܐ:ܟܝܵܠܬܵܐ ܘܡܲܬ̣ܩܵܠܵܐ ܬܲܩܸܢܘ: ܕܬܸܗܘܘܿܢ ܫܵܩܠܝܼܢ ܡܲܥܣܵܪܹ̈ܐ ܚܲܕܼ ܡ̣ܢ ܥܸܣܪܵܐ ܫܲܘܝܵܐܝܼܬ̣.

ܝܒ:ܘܡܲܬ̣ܩܵܠܹ̈ܐ ܢܸܗܘܘܿܢ ܥܸܣܪܝܼܢ: ܡܲܬ̣ܩܵܠܵܐ ܡܸܢܗܘܿܢ ܥܸܣܪܝܼܢ ܘܚܲܡܸܫ ܡܵܥ̈ܝܵܢ: ܘܡܲܬ̣ܩܵܠܵܐ ܕܚܲܡܸܫܬܲܥܣܲܪ ܢܸܗܘܹܐ ܠܟ̣ܘܿܢ ܡܲܢܝܵܐ.

ܝܓ:ܗܵܢܵܐ ܦܘܼܪܫܵܢܵܐ ܦܪܘܿܫܘ: ܚܕܼܵܐ ܡ̣ܢ ܫܸܬ̣ ܡܢܵܘܵܬܹ̈ܗ ܕܟ̣ܘܿܪܵܐ ܕܚܸܛܹ̈ܐ: ܘܲܚܕܼܵܐ ܡ̣ܢ ܫܸܬ̣ ܡܢܵܘܵܬܹ̈ܗ ܕܟ̣ܘܿܪܵܐ ܕܲܣܥܵܪܹ̈ܐ.

ܝܕ:ܘܡܸܫܚܵܐ ܡ̣ܢ ܥܣܲܪ ܟ̈ܝܵܠܵܢ ܕܗܵܘܹ̇ܐ ܟܘܿܪܵܐ: ܢܸܣܒ̣ܘܼܢ ܡܲܥܣܵܪܹ̈ܐ ܟܝܵܠܬܵܐ ܚܕܼܵܐ.

ܝܗ:ܘܲܚܕܼܵܐ ܢܸܩܝܵܐ ܡ̣ܢ ܡܵܐܬܹ̇ܝܢ ܥܵـ̈ـܢܵܐ ܕܝܼܣܪܵܝܹܠ: ܠܲܣܡܝܼܕܼܵܐ ܘܲܠܩܘܼܪܒܵܢܵܐ ܘܲܠܝܲܩܕܵܐ ܫܲܠܡܵܐ: ܕܲܢܕܲܟܸ̇ܐ ܐܸܢܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܝܘ:ܟܠܹܗ ܥܲܡܵܐ ܕܐܲܪܥܵܐ: ܢܸܦ̱ܪܫܘܼܢ ܦܘܼܪܫܵܢܵܐ ܗܵܢܵܐ ܠܲܡܕܲܒ̇ܪܵܢܵܐ ܕܝܼܣܪܵܝܹܠ.

ܝܙ:ܘܕܲܡܕܲܒ̇ܪܵܢܵܐ ܢܸܗܘܘܿܢ ܝܲܩ̈ܕܹ̇ܐ ܫܲܠܡܹ̈ܐ: ܘܲܣܡܝܼܕܼܵܐ ܘܢܘܼܩܝܵܐ ܒܪܹܫ ܝܲܪ̈ܚܹܐ ܘܲܒ̣ܫܲܒܹ̈ܐ: ܘܲܒ̣ܟ̣ܠܗܘܿܢ ܥܲܕܼܥܹ̈ܕܹܐ ܕܒܹܝܬ̣ ܝܑܼܣܪܵܝܹܠ ܗ̤ܘ ܢܩܲܪܸܒ̣ ܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܘܲܣܡܝܼܕܼܵܐ ܘܢܘܼܩܵܝܵܐ ܘܝܲܩܕܵܐ ܫܲܠܡܵܐ: ܩܘܼܪܒܵܢܵܐ ܕܲܡܕܲܟܸ̇ܐ ܠܲܒ̣ܢܲܝ̈ ܝܑܼܣܪܵܝܹܠ.

ܝܚ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܒܚܲܕܼ ܒܝܲܪܚܵܐ ܩܲܕܼܡܵܝܵܐ: ܣܲܒ̣ ܬܵܘܪܵܐ ܚܲܕܼ ܒܲܪ ܒܲܩܪܵܐ: ܕܠܲܝܬ̇ ܒܹܗ ܡܘܼܡܵܐ: ܘܕܼܵܟܵܝܗܝ ܠܡܲܩܕ̇ܫܵܐ.

ܝܛ:ܘܢܸܣܲܒ̣ ܟܵܗܢܵܐ ܡ̣ܢ ܕܡܵܐ ܕܬܲܕܼܟ̇ܝܼܬ̣ܵܐ: ܘܢܸܪܘܿܣ ܥܲܠ ܐܸܣ̈ܟ̇ܦܵܬܹܗ ܕܒܲܝܬܵܐ: ܘܥܲܠ ܐܲܪܒܲܥ ܙܵܘ̈ܝܵܬܹܗ ܕܡܲܕܼܒ̇ܚܵܐ: ܘܥܲܠ ܐܹܣܟ̇ܘܼܦܬܹܗ ܕܬܲܪܥܵܐ ܕܕܼܵܪܬܵܐ ܓܵܘܝܬܵܐ.

ܟܟ:ܘܗܵܟܲܢܵܐ ܢܸܗܘܹܐ ܥܵܒܹܕܼ ܒܲܫܒܲܥܬ̣ܵܐ ܒܝܲܪܚܵܐ: ܓܲܒ̣ܪܵܐ ܕܫܵܛܹ̇ܐ: ܘܲܢܕܲܟ̇ܘܿܢܹܗ ܠܒܲܝܬܵܐ.

ܟܐ:ܘܒܲܐܪܒܲܥܸܣܪܵܐ ܒܝܲܪܚܵܐ: ܩܲܕܼܡܵܝܵܐ: ܢܸܗܘܹܐ ܠܟ̣ܘܿܢ ܦܸܨܚܵܐ ܘܥܲܕܼܥܹܕܼܵܐ: ܘܫܲܒ̣ܥܵܐ ܝܵܘܡ̈ܝܼܢ ܦܲܛܝܼܪܵܐ ܬܹܐܟ̣ܠܘܼܢ.

ܟܒ:ܘܲܢܩܲܪܸܒ̣ ܡܕܲܒ̇ܪܵܢܵܐ ܒܹܐ ܒܝܵܘܡܵܐ ܗܵܘܿ: ܥܲܠ ܐܲܦܲܝ̈ ܢܲܦ̮ܫܹܗ: ܘܥܲܠ ܐܲܦܲܝ̈ ܟܠܹܗ ܥܲܡܵܐ ܕܐܲܪܥܵܐ: ܬܵܘܪܵܐ ܠܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ.

ܟܓ:ܘܫܲܒ̣ܥܵܐ ܝܵܘܡܵܘ̈ܗܝ ܕܥܲܕܼܥܹܕܼܵܐ: ܢܩܲܪܸܒ̣ ܝܲܩ̈ܕܹ̇ܐ ܫܲܠܡܹ̈ܐ ܠܡܵܪܝܵܐ: ܫܲܒ̣ܥܵܐ ܬܵܘܪ̈ܝܼܢ: ܘܫܲܒ̣ܥܵܐ ܕܸܟ̣ܪ̈ܝܼܢ ܕܠܲܝܬ̇ ܒܗܘܿܢ ܡܘܼܡܵܐ: ܘܲܠܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܨܸܦܪܝܵܐ ܕܥܸܙܹ̈ܐ ܒܝܵܘܡܵܐ.

ܟܕ:ܘܲܣܡܝܼܕܼܵܐ ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܡܸܫܚܵܐ ܗܹܡܝܼܢܵܐ ܠܣܲܐܬ̣ܵܐ.

ܟܗ:ܘܲܒ̣ܚܲܡܫܲܥܸܣܪܵܐ ܒܝܲܪܚܵܐ ܕܫܲܒ̣ܥܵܐ: ܢܸܥܒܸ̇ܕܼ ܥܲܕܼܥܹܕܼܵܐ ܐܲܝܟ ܗܵܠܹܝܢ ܫܲܒ̣ܥܵܐ ܝܵܘ̈ܡܝܼܢ: ܐܲܝܟ ܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܘܐܲܝܟ ܝܲܩ̈ܕܹܐ ܫܲܠܡܹ̈ܐ: ܘܐܲܝܟ ܣܡܝܼܕܼܵܐ ܘܐܲܝܟ ܡܸܫܚܵܐ.

ܩܹܦܵܠܹܐܘܿܢ:ܡܘ.

ܐ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܬܲܪܥܵܐ ܕܕܼܵܪܬܵܐ ܓܵܘܵܝܬܵܐ ܕܚܵܐܲܪ ܠܡܲܕܼܢ̱ܚܵܐ: ܢܸܗܘܹܐ ܐܲܚܝܼܕܼ ܫܬܵܐ ܝܵܘ̈ܡܝܼܢ ܕܡܸܬ̣ܥ̱ܒܸܕܼ ܒܗܘܿܢ ܥܒ̣ܵܕܼܵܐ: ܘܲܒ̣ܝܵܘܡܵܐ ܕܫܲܒ̇ܬܵܐ ܢܸܬ̣ܦܬܲܚ: ܘܲܒ̣ܝܵܘܡܵܐ ܕܪܹܫ ܝܲܪܚܵܐ ܢܸܬ̣ܦܬܲܚ.

ܒ:ܘܢܸܥܘܿܠ ܡܕܲܒ̇ܪܵܢܵܐ ܒܡܲܥܠܵܢܵܐ ܕܐܸܣܟ̇ܘܼܦܬ̣ܵܐ ܕܬܲܪܥܵܐ ܡ̣ܢ ܠܒܲܪ: ܘܲܢܩܘܼܡ ܥܲܠ ܐܸܣܟ̇ܘܼܦܬܹܗ ܕܬܲܪܥܵܐ: ܘܲܢܩܲܪܒ̣ܘܼܢ ܟܵܗܢܹ̈ܐ ܝܲܩܕܵܘ̈ܗܝ ܫܲܠܡܹ̈ܐ ܘܩܘܼܪ̈ܒܵܢܵܘܗܝ: ܘܢܸܣܓ̇ܘܿܕܼ ܒܐܸܣܟ̇ܘܼܦܬ̣ܵܐ ܕܬܲܪܥܵܐ ܘܢܸܦܘܿܩ: ܘܬܲܪܥܵܐ ܠܵܐ ܢܸܬ̇ܬ̇ܚܸܕܼ ܥܕܲܡܵܐ ܠܪܲܡܫܵܐ.

ܓ:ܘܢܸܣܓ̇ܕܼܘܼܢ ܥܲܡܵܐ ܕܐܲܪܥܵܐ ܒܡܲܥܠܵܢܹܗ ܕܬܲܪܥܵܐ ܗܵܘܿ: ܒܫܲـ̈ـܒܹ̇ܐ ܘܲܒ̣ܪܹܫ ܝܲܪ̈ܚܹܐ ܩܕܼܵܡ ܡܵܪܝܵܐ.

ܕ:ܘܝܲܩ̈ܕܹ̇ܐ ܫܲܠܡܹ̈ܐ ܕܲܡܩܲܪܸܒ̣ ܡܕܲܒ̇ܪܵܢܵܐ ܩܕܼܵܡ ܡܵܪܝܵܐ ܒܝܵܘܡܵܐ ܕܫܲܒ̇ܬ̣ܵܐ: ܫܬܵܐ ܐܸܡܪ̈ܝܼܢ ܕܠܲܝܬ̇ ܒܗܘܿܢ ܡܘܼܡܵܐ: ܘܕܸܟ̣ܪܵܐ ܕܠܲܝܬ̇ ܒܹܗ ܡܘܼܡܵܐ.

ܗ:ܘܲܣܡܝܼܕܼܵܐ ܢܸܥܒܸ̇ܕܼ: ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܠܐܸܡܪܵܐ ܐܲܝܟ ܕܡܵܛܹܐ ܒܐܝܼܕܼܵܘ̈ܗܝ: ܡܸܫܚܵܐ ܕܹܝܢ ܗܹܡܝܼܢܵܐ ܠܣܲܐܬ̣ܵܐ.

ܘ:ܘܲܒ̣ܝܵܘܡܵܐ ܕܪܹܫ ܝܲܪܚܵܐ: ܬܵܘܪܵܐ ܕܠܲܝܬ̇ ܒܹܗ ܡܘܼܡܵܐ: ܘܸܫܬܵܐ ܐܸܡܪ̈ܝܼܢ ܕܠܲܝܬ̇ ܒܗܘܿܢ ܡܘܼܡܵܐ: ܘܕܸܟ̣ܪܵܐ ܕܠܲܝܬ̇ ܒܹܗ ܡܘܼܡܵܐ.

ܙ:ܘܲܣܡܝܼܕܼܵܐ ܢܸܥܒܸ̇ܕܼ: ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܠܐܸܡܪܵܐ ܐܲܝܟ ܕܡܵܛܹ̇ܐ ܒܐܝܼܕܼܵܘ̈ܗܝ: ܡܸܫܚܵܐ ܕܹܝܢ ܗܹܡܝܼܢܵܐ ܠܣܲܐܬ̣ܵܐ.

ܚ:ܘܡܵܐ ܕܥܵܐܹ̇ܠ ܡܕܲܒ̇ܪܵܢܵܐ: ܒܐܸܣܟ̇ܘܼܦܬܹܗ ܕܬܲܪܥܵܐ ܢܸܥܘܿܠ ܘܒ̣ܵܗ̇ ܢܸܦܘܿܩ.

ܛ:ܘܡܵܐ ܕܥܵܐܠܝܼܢ ܥܲܡܵܐ ܕܐܲܪܥܵܐ ܩܕܼܵܡ ܡܵܪܝܵܐ ܒܙܲܒ̣ܢܵܐ ܕܥܲܕܼܥܹܕܼܵܐ: ܡܲܢ ܕܥܵܐܹ̇ܠ ܒܬܲܪܥܵܐ ܓܲܪܒ̇ܝܵܝܵܐ ܠܡܸܣܓ̇ܕܼ: ܢܸܦܘܿܩ ܠܹܗ ܒܬܲܪܥܵܐ ܬܲܝܡܢܵܝܵܐ: ܘܡ̣ܢ ܕܥܵܐܹ̇ܠ ܒܬܲܪܥܵܐ ܬܲܝܡܢܵܝܵܐ: ܢܸܦܘܿܩ ܠܹܗ ܒܬܲܪܥܵܐ ܓܲܪܒ̇ܝܵܝܵܐ: ܘܠܵܐ ܢܸܗܦܘܿܟ ܒܬܲܪܥܵܐ ܕܥܵܐܹ̇ܠ: ܐܸܠܵܐ ܠܩܘܼܒ̣ܠܹܗ ܢܸܦܘܿܩ.

ܝ:ܡܕܲܒ̇ܪܵܢܵܐ ܕܹܝܢ ܕܒܲܝܢܵܬ̣ܟ̣ܘܿܢ: ܒܬܲܪܥܵܐ ܕܥܵܐܹ̇ܠ ܒܹܗ ܢܸܦܘܿܩ.

ܝܐ:ܘܲܒ̣ܙܲܒ̣ܢܵܐ ܕܥܲܕܼܥܹܕܼܵܐ: ܢܸܗܘܹܐ ܣܡܝܼܕܼܵܐ ܣܲܐܬ̣ܵܐ ܠܬ̣ܵܘܪܵܐ: ܘܣܲܐܬ̣ܵܐ ܠܕܸܟ̣ܪܵܐ: ܘܠܐܸܡܪܵܐ ܐ̄ܢܵܫ ܐܲܝܟ ܕܡܵܛܹ̇ܐ ܒܐܝܼܕܼܵܘ̈ܗܝ: ܡܸܫܚܵܐ ܕܹܝܢ ܗܹܡܝܼܢܵܐ ܠܣܲܐܬ̣ܵܐ.

ܝܒ:ܘܡܵܐ ܕܲܡܩܲܪܸܒ̣ ܡܕܲܒ̇ܪܵܢܵܐ ܝܲܩ̈ܕܹ̇ܐ ܫܲܠܡܹ̈ܐ: ܐܵܘ ܩܘܼܪ̈ܒܵܢܹܐ ܦܘܼܪܫܵܢܵܐ ܠܡܵܪܝܵܐ: ܢܸܬ̣ܦܬܲܚ ܠܹܗ ܬܲܪܥܵܐ ܕܚܵܐܲܪ ܠܡܲܕܼܢ̱ܚܵܐ ܕܐܲܚܝܼܕܼ: ܘܲܢܩܲܪܸܒ̣ ܝܲܩܕܵܘ̈ܗܝ ܫܲܠܡܹ̈ܐ ܘܩܘܼܪ̈ܒܵܢܵܘܗܝ: ܘܢܹܐܚܕ̇ܝܼܘܗܝ ܠܬܲܪܥܵܐ ܘܗܵܝܕܹ̇ܝܢ ܢܸܦܘܿܩ: ܐܲܝܟ ܕܥܵܒܹ̇ܕܼ ܒܝܵܘܡܵܐ ܕܫܲܒ̇ܬܵܐ.

ܝܓ:ܘܐܸܡܪܵܐ ܒܲܪ ܫܲܢ̄ܬܵܐ ܕܠܲܝܬ̇ ܒܗ ܡܘܼܡܵܐ: ܢܸܗܘܹܐ ܡܩܲܪܸܒ̣ ܒܝܵܘܡܵܐ: ܝܲܩܕܵܐ ܫܲܠܡܵܐ ܠܡܵܪܝܵܐ: ܡ̣ܢ ܨܦܲܪ ܠܲܨܦܲܪ.

ܝܕ:ܘܲܣܡܝܼܕܼܵܐ ܢܩܲܪܸܒ̣ ܥܠܵܘܗܝ ܡ̣ܢ ܨܦܲܪ ܠܲܨܦܲܪ: ܚܲܕܼ ܡ̣ܢ ܫܬܵܐ ܠܣܲܐܬ̣ܵܐ: ܘܡܸܫܚܵܐ ܚܕܼܵܐ ܡ̣ܢ ܬܠܵܬ̣ ܡܢܵܘܵܬܹ̈ܗ ܕܗܹܡܝܼܢܵܐ: ܠܲܡܦܵܠܹܗ ܠܲܣܡܝܼܕܼܵܐ ܠܡܵܪܝܵܐ: ܢܵܡܘܿܣܵܐ ܠܥܵܠܲܡ ܐܲܡܝܼܢܵܐܝܼܬ̣.

ܝܗ:ܘܲܢܩܲܪܒ̣ܘܼܢ ܐܸܡܪܹ̈ܐ ܘܲܣܡܝܼܕܼܵܐ ܘܡܸܫܚܵܐ ܡ̣ܢ ܠܲܨܦܲܪ: ܝܲܩܕܵܐ ܫܲܠܡܵܐ ܐܲܡܝܼܢܵܐܝܼܬ̣.

ܝܘ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܡܕܲܒ̇ܪܵܢܵܐ ܟܲܕܼ ܢܸܬܸ̇ܠ ܡܵܘܗܲܒ̣ܬ̣ܵܐ ܠܚܲܕܼ ܡ̣ܢ ܒܢܵܘ̈ܗܝ: ܝܵܪܬ̇ܘܼܬܹܗ ܠܲܒ̣ܢܵܘ̈ܗܝ ܬܸܗܘܹܐ.

ܝܙ:ܘܟܲܕܼ ܢܸܬܸ̇ܠ ܡܵܘܗܲܒ̣ܬ̣ܵܐ ܡܲܢ ܝܵܪܬ̇ܘܼܬܹܗ ܠܚܲܕܼ ܡ̣ܢ ܥܲܒ̣ܕܵܘ̈ܗܝ: ܬܸܗܘܹܐ ܠܹܗ ܥܕܲܡܵܐ ܠܫܲܢ̄ܬܵܐ ܕܡܸܬ̣ܚܲܪܲܪ: ܘܬܸܗܘܹܐ ܠܹܗ ܠܲܡܕܲܒ̇ܪܵܢܵܐ: ܝܵܪܬ̇ܘܼܬ̣ܵܐ ܕܹܝܢ ܕܲܒ̣ܢܵܘ̈ܗܝ ܠܗܘܿܢ ܬܸܗܘܹܐ.

ܝܚ:ܘܠܵܐ ܢܸܣܲܒ̣ ܡܕܲܒ̇ܪܵܢܵܐ ܡ̣ܢ ܝܵܪܬ̇ܘܼܬܹܗ ܕܥܲܡܵܐ: ܘܠܵܐ ܢܸܥܠܘܿܒ̣ ܐܸܢܘܿܢ ܡ̣ܢ ܝܘܼܪܬܵܢܗܘܿܢ: ܐܸܠܵܐ ܡ̣ܢ ܝܵܪܬ̇ܘܼܬܹܗ ܢܵܘܪܸܬ̣ ܠܲܒ̣ܢܵܘ̈ܗܝ: ܕܠܵܐ ܢܸܬ̣ܒܲܕ̇ܪܘܼܢ ܥܲܡܝ ܐ̄ܢܵܫ ܡ̣ܢ ܝܵܪܬ̇ܘܼܬܹܗ.

ܝܛ:ܘܐܲܥܠܲܢܝ ܒܡܲܥܠܵܢܵܐ ܕܥܲܠ ܓܸܢ̄ܒ̣ ܬܲܪܥܵܐ ܕܐܲܟ̣ܣܸܕܼܪܵܐ ܓܵܘܵܝܬܵܐ ܕܩܘܼܕܼܫܵܐ ܕܟ̣ܵܗܢܹ̈ܐ: ܕܚܵܝܪܵܐ ܠܓܲܪܒ̇ܝܵܐ: ܘܲܚܙܹ̇ܝܬ̣ ܕܐܝܼܬ̣ ܬܲܡܵܢ ܐܲܬ̣ܪܵܐ ܒܲܫܦܘܿܠܹܝ̈ܗ̇ ܡ̣ܢ ܡܲܥ̱ܪܒ̣ܵܐ.

ܟ:ܘܐܸܡܲܪ ܠܝܼ: ܗܵܢܵܘ ܐܲܬ̣ܪܵܐ ܕܲܡܒܲܫܠܝܼܢ ܒܹܗ ܟܵܗ̈ܢܹܐ ܬܲܕܼܟ̇ܝܼܬ̣ܵܐ ܕܲܚܛܵܗܹ̈ܐ: ܘܐܵܦܹ̇ܝܢ ܒܹܗ ܣܡܝܼܕܼܵܐ: ܕܠܵܐ ܢܸܦܩܘܼܢ ܠܕܼܵܪܬܵܐ ܒܲܪܵܝܬܵܐ ܘܲܢܩܲܕ̇ܫܘܼܢܹܗ ܠܥܲܡܵܐ.

ܟܐ:ܘܐܲܦ̣ܩܲܢܝ ܠܕܼܵܪܬܵܐ ܒܲܪܵܝܬܵܐ: ܘܐܲܥܒܲܪܲܢܝ ܥܲܠ ܐܲܪܒ̇ܥܵܐ ܣܸܛܪܹ̈ܝܗ̇ ܕܕܼܵܪܬܵܐ: ܘܲܚܙܹ̇ܝܬ̣ ܕܵܪܬܵܐ ܒܲܣܛܲܪ ܕܵܪܬܵܐ: ܘܕܼܵܪܬܵܐ ܐ̄ܚܪܹܬ̣ܵܐ ܒܣܸܛܪܵܐ ܐ̄ܚܪܹܢܵܐ ܕܕܼܵܪܬܵܐ.

ܟܒ:ܒܐܲܪܒ̇ܥܵܐ ܣܸܛܪܹ̈ܝܗ̇ ܕܕܼܵܪܬܵܐ ܕܵܪܹ̈ܐ ܕܲܩ̈ܕܩܵܬ̣ܵܐ: ܐܲܪܒ̇ܥܝܼܢ ܐܲܡܝܼ̈ܢ ܐܘܼܪܟ̇ܗܹܝܢ: ܘܲܬ̣ܠܵܬ̣ܝܼܢ ܦܬ̣ܵܝܗܹܝܢ.

ܟܓ:ܘܐܲܟ̣ܣܸܕܼܪܹ̈ܐ ܚܵܕܼܪ̈ܵܢ ܠܐܲܪ̈ܒ̇ܥܵܬܲܝܗܹܝܢ.

ܟܕ:ܘܐܸܡܲܪ ܠܝܼ: ܗܵܢܵܘ ܒܹܝܬ̣ ܛܲܒܵܚܹ̈ܐ: ܕܲܡܒܲܫܠܝܼܢ ܒܹܗ ܕܸܒ̣ܚ̱ܬ̣ܵܐ ܕܥܲܡܵܐ ܡܫܲܡܫܵܢܵܘ̈ܗܝ ܕܒܲܝܬܵܐ.

ܩܹܦܵܠܹܐܘܿܢ:ܡܙ.

ܐ:ܘܲܗ̣ܦܲܟ ܐܲܥܠܲܢܝ ܠܬܲܪܥܹܗ ܕܒܲܝܬܵܐ: ܘܲܚܙܹ̇ܝܬ̣ ܡܲـ̈ـܝܵܐ ܕܢܵܦܩܝܼܢ ܡ̣ܢ ܬܚܹܝܬ̣ ܐܸܣܟ̇ܘܼܦܬ̣ܵܐ ܡܲܕܼܢ̱ܚܵܝܬܵܐ ܕܒܲܝܬܵܐ: ܘܗܸܢܘܿܢ ܡܲـ̈ـܝܵܐ ܢܵܚܬܝܼܢ: ܡ̣ܢ ܣܸܛܪܹܗ ܕܒܲܝܬܵܐ: ܡ̣ܢ ܬܲܝܡܢܵܝܹܗ ܕܡܲܕܼܒ̇ܚܵܐ.

ܒ:ܘܐܲܦܩܲܢܝ ܒܬܲܪܥܵܐ ܓܲܪܒ̇ܝܝܵܐ: ܘܐܲܟ̣ܪ̱ܟܲܢܝ ܡ̣ܢ ܠܒܲܪ ܥܲܠ ܬܲܪܥܵܐ ܕܕܼܵܪܬܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܚܙܹ̇ܝܬ̣ ܡܲـ̈ـܝܵܐ ܕܢܵܦܩܝܼܢ ܡ̣ܢ ܣܸܛܪܹܗ ܕܝܲܡܝܼܢܵܐ.

ܓ:ܘܟܲܕܼ ܢܦܲܩ̣ ܓܲܒ̣ܪܵܐ ܡܫܲܒܲܚ: ܘܲܡܫܘܼܚܬ̣ܵܐ ܒܐܝܼܕܹܗ: ܘܲܡܫܲܚ ܐܵܠܹܦ ܐܲܡܝܼ̈ܢ: ܘܐܲܥ̣ܒ̇ܪܲܢܝ ܒܡܲـ̈ـܝܵܐ ܥܕܲܡܵܐ ܠܩܘܼܪ̈ܨܠܹܐ.

ܕ:ܘܲܡܫܲܚ ܐܵܠܹܦ ܐܲܡܝܼ̈ܢ: ܘܐܲܥܒ̇ܪܲܢܝ ܒܡܲـ̈ـܝܵܐ ܥܕܲܡܵܐ ܠܒ̣ܘܼܪ̈ܟܹ̇ܐ: ܘܲܡܫܲܚ ܐܵܠܹܦ ܐܲܡܝܼ̈ܢ: ܘܐܲܥܒ̇ܪܲܢܝ ܒܡܲـ̈ـܝܵܐ ܥܕܲܡܵܐ ܠܚܲܨܹ̈ܐ.

ܗ:ܘܲܡܫܲܚ ܐܵܠܹܦ ܐܲܡܝܼ̈ܢ: ܪܓܸܠܬܵܐ: ܕܠܵܐ ܐ̄ܢܵܫ ܡܸܫܟܲܚ ܠܡܸܥܒ̇ܪܵܗ̇: ܡܸܛܠ ܕܲܣܓ̣ܝܼܘ ܡܲـ̈ـܝܵܐ ܘܥܸܫܢܲܬ̤ ܪܓܸܠܬܵܐ: ܘܠܵܐ ܐ̄ܢܵܫ ܡܸܫܟܲܚ ܠܡܸܥܒ̇ܪܵܗ̇.

ܘ:ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ. ܘܐܵܘܒܠܲܢܝ ܘܐܵܘܬ̇ܒܲܢܝ ܥܲܠ ܣܸܦܬ̣ܵܗ̇ ܕܲܪܓܸܠܬܵܐ.

ܙ:ܘܟܲܕܼ ܝܸܬ̣ܒܹ̇ܬ̣: ܚܙܹ̇ܝܬ̣ ܥܲܠ ܣܸܦܬ̣ܵܗ̇ ܕܲܪܓܸܠܬܵܐ: ܐܝܼܠܵܢܹ̈ܐ ܕܛܵܒ̣ ܣܲܓ̇ܝܼܐܝܼܢ ܡܸܟܵܐ ܘܡܸܟܵܐ.

ܚ:ܘܐܸܡܲܪ ܠܝܼ: ܡܲـ̈ـܝܵܐ ܗܵܠܹܝܢ ܕܢܵܦ̇ܩܝܼܢ ܠܲܓܠܝܼܠܵܐ ܕܲܒ̣ܡܲܕܼܢ̱ܚܵܐ: ܘܢܵܚܬ̇ܝܼܢ ܠܓܲܪܒ̇ܝܵܐ: ܘܢܵܦܠܝܼܢ ܒܝܲܡܵܐ ܒܡܲـ̈ـܝܵܐ ܣܪ̈ܲܝܵܐ: ܘܒ̣ܵܣܡܝܼܢ ܡܲـ̈ـܝܵܐ.

ܛ:ܘܟ̣ܠ ܢܲܦ̮ܫܵܐ ܚܲܝܬ̣ܵܐ ܕܡܵܘܠܕܼܵܐ ܐܵܬܲܪ ܕܐܝܼܬ̣ ܡܲـ̈ـܝܵܐ ܕܲܪܓܸܠܬܵܐ: ܚܵܐܹ̇ܢ ܘܗܵܘܹ̇ܝܢ ܢܘܼܢܹ̈ܐ ܣܲܓ̇ܝܼ̈ܐܹܐ: ܡܸܛܠ ܡܲـ̈ـܝܵܐ ܕܢܵܦܠܝܼܢ ܬܲܡܵܢ ܘܒ̣ܵܣܡܝܼܢ ܡܲـ̈ـܝܵܐ.

ܝ:ܘܩܵܝܡܝܼܢ ܥܠܵܘܗܝ ܨܲܝ̈ܕܹܐ: ܡ̣ܢ ܥܹܝܢ ܓܵܕܼ ܘܲܥܕܲܡܵܐ ܠܥܹܝܢ ܥܸܓ̣ܠܝܼ̈ܢ: ܡܲܫܛܵܚܹ̈ܐ ܠܲܡܨܝܼ̈ܕܼܵܬ̣ܵܐ ܢܸܗܘܹܐ: ܘܢܸܗܘܘܿܢ ܒܹܗ ܢܘܼܢܹ̈ܐ ܣܲܓ̇ܝܼ̈ܐܹܐ ܐܲܝܟ ܕܝܲܡܵܐ ܪܲܒܵܐ.

ܝܐ:ܘܡܲܦܩܵܢܵܘ̈ܗܝ ܘܡܲܥܠܵܢܵܘ̈ܗܝ ܠܵܐ ܢܸܒ̣ܣ̄ܡܘܼܢ: ܐܸܠܵܐ ܢܸܗܘܘܿܢ ܡܸܠܚܵܐ.

ܝܒ:ܘܒ̣ܵܗ̇ ܒܲܪܓܸܠܬܵܐ ܢܸܫ̱ܘܚܘܼܢ ܥܲܠ ܣܦܵܪܹ̈ܝܗ̇: ܡܸܟܵܐ ܘܡܸܟܵܐ: ܟܠ ܐܝܼܠܵܢ ܕܡܹܐܟ̣ܘܼܠܬܵܐ: ܠܵܐ ܢܸܬ̇ܪܘܼܢ ܛܲܪ̈ܦܲܝܗܘܿܢ: ܘܠܵܐ ܢܸܓ̣ܡܪܘܼܢ ܦܹܐܪ̈ܲܝܗܘܿܢ: ܘܲܒ̣ܟܠ ܪܹܫ ܝܲܪܚܹܐ ܢܸܗܘܘܿܢ ܡܒܲܟ̇ܪܝܼܢ: ܡܸܛܠ ܕܡܲـ̈ـܝܵܐ ܕܫܵܬܹܝܢ ܡ̣ܢ ܡܲܩܕ̇ܫܵܐ ܢܵܦܩܝܼܢ: ܢܸܗܘܘܿܢ ܦܹܐܪ̈ܲܝܗܘܿܢ ܠܡܹܐܟܲܠ: ܘܛܲܪ̈ܦܲܝܗܘܿܢ ܠܐܵܣܝܘܼܬ̣ܵܐ.

ܝܓ:ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܢܲܚ̈ܠܹܐ ܕܲܬ̣ܚܘܼܡܹ̈ܐ ܕܝܵܪܬ̇ܝܼܢ ܠܵܗ̇ ܠܐܲܪܥܵܐ: ܠܲܬ̣ܪܸܥܣܲܪ ܫܲܒ̣̈ܛܹܐ ܕܝܼܣܪܵܝܹܠ: ܘܲܕܼܝܵܘܣܸܦ ܠܚܲܒ̣ܠܵܐ.

ܝܕ:ܕܬܹܐܪܬ̇ܘܼܢܵܗ̇ ܐ̄ܢܵܫ ܡ̣ܢ ܐܲܚܵܘ̈ܗܝ: ܕܐܲܪܝܼܡܹ̇ܬ̣ ܐܝܼܕܼܝ ܠܡܸܬ̇ܠܵܗ̇ ܠܐܲܒ̣ܵܗܲܝ̈ܟ̇ܘܿܢ: ܘܬܸܬ̣ܦܲܠܲܓ̣ ܠܟ̣ܘܿܢ ܐܲܪܥܵܐ ܠܝܘܼܪܬܵܢܵܐ.

ܝܗ:ܘܗܵܢܵܘ ܬܚܘܼܡܵܐ ܕܐܲܪܥܵܐ: ܠܓܲܪܒ̇ܝܵܐ ܡ̣ܢ ܝܲܡܵܐ ܪܲܒܵܐ: ܐܘܼܪܚܵܐ ܕܚܸܬ̣ܪܘܿܢ ܕܥܵܐܠܵܐ ܠܲܨܕܲܕܼ.

ܝܘ:ܘܲܚܡܵܬ̣ ܘܒܹܪܘܿܬ̣: ܘܲܣܦܲܪܘܹܝܡ ܕܒܲܝܢܵܬ̣ ܬܚܘܼܡܹ̈ܐ ܕܕܲܪܡܣܘܿܩ: ܘܒܲܝܢܵܬ̣ ܬܚܘܼܡܹ̈ܐ ܕܲܚܡܵܬ̣: ܘܲܚܨܲܪ ܡܸܨܥܵܝܬܵܐ ܕܒܲܬ̣ܚܘܼܡܵܐ ܕܚܵܘܪܵܢ.

ܝܙ:ܘܢܸܗܘܸܐ ܬܚܘܼܡܵܐ ܡ̣ܢ ܝܲܡܵܐ ܠܲܚܨܲܪ ܥܲܝܢܵܢ ܕܒܲܬ̣ܚܘܼܡܵܐ ܕܕܲܪܡܣܘܿܩ: ܘܨܸܦܘܿܢ ܕܲܒ̣ܓܲܪܒ̇ܝܵܐ ܕܒܲܬ̣ܚܘܼܡܵܐ ܕܲܚܡܵܬ̣: ܗܵܕܲܐ ܗ̄ܝܼ ܪܘܼܚܵܐ ܕܓܲܪܒ̇ܝܵܐ.

ܝܚ:ܘܡ̣ܢ ܪܘܼܚܵܐ ܕܡܲܕܼܢ̱ܚܵܐ: ܡ̣ܢ ܒܹܝܬ̣ ܚܵܘܪܵܢ: ܘܡ̣ܢ ܒܹܝܬ̣ ܕܲܪܡܣܘܿܩ: ܘܡ̣ܢ ܒܹܝܬ̣ ܓܹܠܥܵܕܼ: ܘܡ̣ܢ ܒܹܝܬ̣ ܐܲܪܥܵܐ ܕܝܼܣܪܵܝܹܠ: ܘܝܘܿܪܕ̇ܢܵܢ ܡܬܲܚܸܡ ܥܲܠ ܝܲܡܵܐ ܡܲܕܼܢ̱ܚܵܝܵܐ ܕܬ̣ܵܡܲܪ: ܗܵܕܲܐ ܗ̄ܝܼ ܪܘܼܚܵܐ ܕܡܲܕܼܢ̱ܚܵܐ.

ܝܛ:ܘܪܘܼܚܵܐ ܕܬܲܝܡܢܵܐ: ܡ̣ܢ ܬܵܡܵܪ ܘܲܥܕܲܡܵܐ ܠܡܲܝ̈ ܡܪܝܼܒ̣ܬ̣: ܩܲܕ̇ܝܼܫ ܝܘܼܪܬܵܢܹܗ ܕܝܲܡܵܐ ܪܲܒܵܐ.

ܟܟ:ܘܲܡܬܲܚܸܡ ܥܕܲܡܵܐ ܠܲܢܟ̣ܵܚ ܕܐܝܼܬ̣ ܒܡܲܥܠܵܢܵܐ ܕܲܚܡܵܬ̣: ܗܵܕܲܐ ܗ̄ܝܼ ܪܘܼܚܵܐ ܕܡܲܥ̱ܪܒ̣ܵܐ.

ܟܐ:ܘܲܬ̣ܦܲܠܓ̣ܘܼܢܵܗ̇ ܠܐܲܪܥܵܐ ܗܵܕܹܐ ܠܫܲܪ̈ܒ̣ܵܬ̣ܵܐ ܕܝܼܣܪܵܝܹܠ.

ܟܒ:ܘܡܵܐ ܕܦܲܠܸܓ̣ܬ̇ܘܿܢܵܗ̇ ܝܵܪܬ̇ܘܼܬ̣ܵܐ ܠܟ̣ܘܿܢ: ܘܠܲܐܝܠܹܝܢ ܕܡܸܬ̣ܦܢܹܝܢ ܠܘܵܬ̣ ܕܥܵܡ̇ܪܝܼܢ ܒܲܝܢܵܬ̣ܟ̣ܘܿܢ: ܘܐܵܘܠܸܕܼܘ ܒܢܲـ̈ـܝܵܐ ܒܲܝܢܵܬ̣ܟ̣ܘܿܢ: ܢܸܗܘܘܿܢ ܐܲܝܟ ܒܢܲܝ̈ ܝܑܼܣܪܵܝܹܠ: ܘܥܲܡܟ̣ܘܿܢ ܢܦܲܠܓ̣ܘܼܢ ܝܵܪܬ̇ܘܼܬ̣ܵܐ ܒܲܝܢܵܬ̣ ܫܲܪ̈ܒ̣ܵܬ̣ܵܐ: ܕܝܼܣܪܵܝܹܠ.

ܟܓ:ܘܫܲܪܒ̇ܬ̣ܵܐ ܕܐܝܼܬ̣ ܒܵܗ̇ ܐܲܝܢܵܐ ܕܡܸܬ̣ܦܢܸܐ ܠܘܵܬܹܝ: ܒܵܗ̇ ܢܸܬ̇ܠܘܼܢ ܠܹܗ ܝܵܪܬ̇ܘܼܬ̣ܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܩܹܦܵܠܹܐܘܿܢ:ܡܚ.

ܐ:ܗܵܠܹܝܢ ܫܡܵܗܹ̈ܐ ܕܫܲܒ̣̈ܛܹܐ: ܡ̣ܢ ܚܲܪܬ̣ܵܐ ܕܓܲܪܒ̇ܝܵܐ: ܥܲܠ ܝܲܕܼ ܐܘܼܪܚܵܐ ܕܚܸܬ̣ܪܘܿܢ ܕܲܒ̣ܡܲܥܠܵܢܵܐ ܕܲܚܡܵܬ̣ ܘܕܼܵܚܨܲܪ ܥܲܝܢܵܢ: ܘܲܬ̣ܚܘܼܡܵܐ ܕܕܲܪܡܣܘܿܩ ܕܲܒ̣ܓܲܪܒ̇ܝܵܐ ܕܥܲܠ ܝܲܕܼ ܚܡܵܬ̣: ܗܵܕܲܐ ܗ̄ܝܼ ܪܘܼܚܵܐ ܕܡܲܕܼܢܵܚܲܝ̈ ܝܲܡܵܐ ܕܕܼܵܢ.

ܒ:ܘܥܲܠ ܬܚܘܼܡܵܐ ܕܕܼܵܢ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܐܵܫܹܝܪ.

ܓ:ܘܥܲܠ ܬܚܘܼܡܵܐ ܕܐܵܫܹܝܪ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܢܲܦ̮ܬܵܠܝܼ.

ܕ:ܘܥܲܠ ܬܚܘܼܡܵܐ ܕܢܲܦ̮ܬܵܠܝܼ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܲܡܢܲܫܸܐ.

ܗ:ܘܥܲܠ ܬܚܘܼܡܵܐ ܕܲܡܢܲܫܸܐ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܪܘܼܒܹܝܠ.

ܘ:ܘܥܲܠ ܬܚܘܼܡܵܐ ܕܪܘܼܒܹܝܠ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܐܲܦܪܹܝܡ.

ܙ:ܘܥܲܠ ܬܚܘܼܡܵܐ ܕܐܲܦܪܹܝܡ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܲܝܗܘܼܕܼܵܐ.

ܚ:ܥܲܠ ܬܚܘܼܡܵܐ ܕܲܝܗܘܼܕܼܵܐ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ: ܢܸܗܘܹܐ ܦܘܼܪܫܵܢܵܐ ܕܦܵܪܫܝܼܢ ܐ̄ܢܬ̇ܘܿܢ: ܦܬ̣ܵܝܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܐܘܼܪܟܵܐ ܐܲܝܟ ܚܕܼܵܐ ܡ̣ܢ ܡ̈ܢܵܘܵܬ̣ܵܐ: ܘܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܢܸܗܘܹܐ ܡܲܩܕ̇ܫܵܐ ܒܓ̣ܵܘܹܗ.

ܛ:ܦܘܼܪܫܵܢܵܐ ܕܦܵܪܫܝܼܢ ܐ̄ܢܬ̇ܘܿܢ ܠܡܵܪܝܵܐ: ܐܘܼܪܟܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܐ ܥܸܣܪܵܐ ܐܲܠܦܝܼ̈ܢ.

ܝ:ܘܲܠܟ̣ܵܗܢܹ̈ܐ ܢܸܗܘܹܐ ܦܘܼܪܫܵܢܵܐ ܕܩܘܼܕܼܫܵܐ: ܠܓܲܪܒ̇ܝܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܐ ܥܸܣܪܵܐ ܐܲܠܦܝܼ̈ܢ: ܘܲܠܡܲܥ̱ܪܒ̣ܵܐ ܥܸܣܪܵܐ ܐܲܠܦ̈ܝܼܢ: ܘܲܠܡܲܕܼܢ̱ܚܵܐ ܥܸܣܪܵܐ ܐܲܠܦ̈ܝܼܢ: ܘܲܠܬܲܝܡܢܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܢܸܗܘܹܐ ܡܲܩܕ̇ܫܹܗ ܕܡܵܪܝܵܐ ܒܓ̣ܵܘܹܗ.

ܝܐ:ܘܢܸܗܘܹܐ ܠܟ̣ܵܗܢܹ̈ܐ ܕܡܸܬ̣ܩܲܕ̇ܫܝܼܢ ܡ̣ܢ ܒܢܲܝ̈ ܨܵܕܼܘܿܩ ܕܲܢܛܲܪܘ ܢܛܘܼܪ̈ܵܬ̣ܝ: ܘܠܵܐ ܛܥܵܘ ܐܲܝܟ ܕܲܛܥܵܘ ܒܢܲܝ̈ ܝܑܼܣܪܵܝܹܠ: ܘܐܲܝܟ ܕܲܛܥܵܘ ܠܹܘܵܝܹ̈ܐ.

ܝܒ:ܘܢܸܗܘܹܐ ܠܗܘܿܢ ܦܘܼܪܫܵܢܵܐ ܡ̣ܢ ܦܘܼܪܫܵܢܵܗ̇ ܕܐܲܪܥܵܐ: ܩܕܼܘܿܫ ܩܘܼܕܼܫܹ̈ܐ ܒܲܬ̣ܚܘܼܡܵܐ ܕܠܹܘܵܝܹ̈ܐ.

ܝܓ:ܘܠܹܘܵܝܹ̈ܐ ܠܘܼܩܒܲܠ ܬܚܘܼܡܵܐ ܕܟ̣ܵܗ̈ܢܹܐ: ܐܘܼܪܟܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܐ ܥܸܣܪܵܐ ܐܲܠܦ̈ܝܼܢ: ܟܠܹܗ ܐܲܬ̣ܪ̱ܗܘܿܢ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܬ̣ܵܝܵܐ ܥܸܣܪܵܐ ܐܲܠܦ̈ܝܼܢ.

ܝܕ:ܠܵܐ ܢܙܲܒ̇ܢܘܼܢ ܡܸܢܹܗ ܘܠܵܐ ܢܚܲܠܡܘܿܢ: ܘܠܵܐ ܢܲܥܒ̇ܪܘܼܢ ܪܹ̈ܫܝܵܬ̣ܵܐ ܕܐܲܪܥܵܐ: ܡܸܛܠ ܕܩܘܼܕܼܫܵܐ ܗ̄ܘܼ ܕܡܵܪܝܵܐ.

ܝܗ:ܘܚܲܡܫܵܐ ܐܲܠܦ̈ܝܼܢ ܕܡܸܫܬ̇ܚܲܪ ܥܲܠ ܦܘܼܡ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܕܘܼܟ̇ܬ̣ܵܐ ܗ̄ܝܼ ܠܲܡܕܼܝܼܢ̄ܬܵܐ ܠܝܲܬ̣ܒܵܐ ܘܲܠܫܸܛܚܵܐ: ܕܬܸܗܘܹܐ ܡܕܼܝܼܢ̄ܬܵܐ ܒܓ̣ܵܘܵܗ̇.

ܝܘ:ܘܗܵܠܹܝܢ ܡܘܼܫ̈ܚܵܬ̣ܵܐ: ܠܪܘܼܚܵܐ ܕܓܲܪܒ̇ܝܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ: ܘܲܠܡܲܕܼܢ̱ܚܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ: ܘܲܠܬܲܝܡܢܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ: ܘܲܠܡܲܥ̱ܪܒ̣ܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ.

ܝܙ:ܘܢܸܗܘܹܐ ܫܸܛܚܵܗ̇ ܕܲܡܕܼܝܼܢ̄ܬܵܐ: ܠܓܲܪܒ̇ܝܵܐ ܡܵܐܬܹ̇ܝܢ ܘܚܲܡܫܝܼܢ: ܘܲܠܬܲܝܡܢܵܐ ܡܲܐܬܹ̇ܝܢ ܘܚܲܡܫܝܼܢ: ܘܲܠܡܲܥ̱ܪܒ̣ܵܐ ܡܲܐܬܹ̇ܝܢ ܘܚܲܡܫܝܼܢ: ܘܲܠܡܲܕܼܢ̱ܚܵܐ ܡܲܐܬܹ̇ܝܢ ܘܚܲܡܫܝܼܢ.

ܝܚ:ܘܲܕܼܡܸܫܬ̇ܚܲܪ ܠܘܼܩܒܲܠ ܦܘܼܪܫܵܢܵܐ ܕܩܘܼܕܼܫܵܐ: ܥܸܣܪܵܐ ܐܲܠܦ̈ܝܼܢ ܠܡܲܕܼܢ̱ܚܵܐ: ܘܥܸܣܪܵܐ ܐܲܠܦ̈ܝܼܢ ܠܡܲܥ̱ܪܒ̣ܵܐ: ܘܢܸܗܘܹܐ ܠܘܼܩܒܲܠ  ܦܘܼܪܫܵܢܵܐ ܕܩܘܼܕܼܫܵܐ: ܘܬܸܗܘܹܐ ܥܠܲܠܬ̣ܵܗ̇ ܡܹܐܟ̣ܘܼܠܬܵܐ ܠܐܲܝܠܹܝܢ ܕܦܵܠܚܝܼܢ ܠܲܡܕܼܝܼܢ̄ܬܵܐ.

ܝܛ:ܘܐܲܝܢܵܐ ܕܦܵܠܲܚ ܠܲܡܕܼܝܼܢ̄ܬܵܐ: ܢܸܬ̣ܦܠܲܚ ܡ̣ܢ ܟܠܗܹܝܢ ܫܲܪ̈ܒ̣ܵܬ̣ܵܐ ܕܝܼܣܪܵܝܹܠ.

ܟܟ:ܟܠܹܗ ܦܘܼܪܫܵܢܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܒܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܦܪܘܿܫܘ ܦܘܼܪܫܵܢܵܐ ܕܩܘܼܕܼܫܵܐ ܡ̣ܢ ܝܘܼܪܬܵܢܵܐ ܕܲܡܕܼܝܼܢ̄ܬܵܐ.

ܟܐ:ܘܲܕܼܡܸܫܬܲܚܲܪ ܢܸܗܘܹܐ ܠܲܡܕܲܒ̇ܪܵܢܵܐ ܕܲܡܕܼܝܼܢ̄ܬܵܐ: ܘܡ̣ܢ ܦܘܼܪܫܵܢܵܐ ܕܩܘܼܕܼܫܵܐ ܘܡ̣ܢ ܝܘܼܪܬܵܢܵܐ ܕܲܡܕܼܝܼܢ̄ܬܵܐ: ܠܲܬ̣ܚܘܼܡܵܐ ܕܡܲܕܼܢ̱ܚܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ: ܘܲܠܡܲܥ̱ܪܒ̣ܵܐ ܥܸܣܪܝܼܢ ܘܚܲܡܫܵܐ ܐܲܠܦ̈ܝܼܢ ܒܲܬ̣ܚܘܼܡܵܐ ܕܡܲܥ̱ܪܒ̣ܵܐ: ܠܘܼܩܒܲܠ ܦܵܠܓ̇ܘܼܬܹܗ ܕܲܡܕܲܒ̇ܪܵܢܵܐ: ܘܢܸܗܘܹܐ ܦܘܼܪܫܵܢܵܐ ܕܩܘܼܕܼܫܵܐ: ܘܡܲܩܕ̇ܫܵܐ ܕܒܲܝܬܵܐ ܒܓ̣ܵܘܹܗ.

ܟܒ:ܘܡ̣ܢ ܝܵܪܬ̇ܘܼܬ̣ܵܐ ܕܠܹܘܵܝܹ̈ܐ ܘܡ̣ܢ ܝܵܪܬ̇ܘܼܬ̣ܵܐ ܕܲܡܕܼܝܼܢ̄ܬܵܐ: ܡܢܵܬܹܗ ܕܲܡܕܲܒ̇ܪܵܢܵܐ ܬܸܗܘܹܐ ܒܲܡܕܼܝܼܢ̄ܬܵܐ ܒܲܝܢܵܬ̣ ܬܚܘܼܡܵܐ ܕܲܝܗܘܼܕܼܵܐ ܠܲܬ̣ܚܘܼܡܵܐ ܕܒܸܢܝܵܡܹܝܢ.

ܟܓ:ܫܲܪܟܵܐ ܕܹܝܢ ܕܫܲܒ̣̈ܛܹܐ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܒܸܢܝܵܡܹܝܢ.

ܟܕ:ܘܥܲܠ ܬܚܘܼܡܵܐ ܕܒܸܢܝܵܡܹܝܢ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܫܸܡܥܘܿܢ.

ܟܗ:ܘܥܲܠ ܬܚܘܼܡܵܐ ܕܫܸܡܥܘܿܢ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܐܝܼܣܵܟ̣ܵܪ.

ܟܘ:ܘܥܲܠ ܬܚܘܼܡܵܐ ܕܐܝܼܣܵܟ̣ܵܪ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܲܙܒ̣ܘܿܠܘܿܢ.

ܟܙ:ܘܥܲܠ ܬܚܘܼܡܵܐ ܕܲܙܒ̣ܘܿܠܘܿܢ: ܡ̣ܢ ܪܘܼܚܵܐ ܕܡܲܕܼܢ̱ܚܵܐ ܘܲܥܕܲܡܵܐ ܠܪܘܼܚܵܐ ܕܡܲܥ̱ܪܒ̣ܵܐ ܕܓ̣ܵܪ.

ܟܚ:ܘܥܲܠ ܬܚܘܼܡܵܐ ܕܓ̣ܵܕܼ: ܡ̣ܢ ܪܘܼܚܵܐ ܕܬܲܝܡܢܵܐ: ܢܸܗܘܹܐ ܬܚܘܼܡܹܗ ܡ̣ܢ ܬܵܡܵܪ ܘܲܥܕܲܡܵܐ ܠܡܲܝ̈ ܡܪܝܼܒܲܬ̣: ܩܲܕ̇ܝܼܫ ܝܘܼܪܬܵܢܹܗ ܥܲܠ ܝܲܡܵܐ ܪܲܒܵܐ.

ܟܛ:ܗܵܕܲܐܗ̄ܝܼ ܐܲܪܥܵܐ ܕܲܬ̣ܦܲܠܓܘܼܢ ܝܵܪܬ̇ܘܼܬ̣ܵܐ ܠܫܲܒ̣̈ܛܹܐ ܕܝܼܣܪܵܝܹܠ: ܘܗܵܠܹܝܢ ܐܸܢܹܝܢ ܦܵܠܓܘܵܬ̣̈ܗܘܿܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.

ܠ:ܘܗܵܠܹܝܢ ܡܲܦܩܵܢܹ̈ܝܗ̇ ܕܲܡܕܼܝܼܢ̄ܬܵܐ: ܡ̣ܢ ܪܘܼܚܵܐ ܕܓܲܪܒܝܵܐ: ܡܫܘܼܚܬ̣ܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ.

ܠܐ:ܘܬܲܪ̈ܥܹܝܗ̇ ܕܲܡܕܼܝܼܢ̄ܬܵܐ: ܥܲܠ ܫܡܵܗܹ̈ܐ ܕܫܲܒ̣ܛܹ̈ܐ ܕܲܒ̣ܢܲܝ̈ ܝܑܼܣܪܵܝܹܠ: ܒܓܲܪܒ̇ܝܵܐ ܬܠܵܬ̣ܵܐ ܬܲܪ̈ܥܝܼܢ: ܚܲܕܼ ܕܪܘܼܒܹܝܠ: ܘܚܲܕܼ ܕܲܝܗܘܼܕܼܵܐ: ܘܚܲܕܼ ܕܠܹܘܝܼ.

ܠܒ:ܘܲܒ̣ܡܲܕܢ̱ܚܵܐ ܡܫܘܼܚܬ̣ܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ: ܘܲܬ̣ܠܵܬ̣ܵܐ ܬܲܪ̈ܥܝܼܢ: ܚܲܕܼ ܕܝܵܘܣܸܦ: ܘܚܲܕܼ ܕܒܸܢܝܵܡܹܝܢ: ܘܚܲܕܼ ܕܕܼܵܢ.

ܠܓ:ܘܲܒ̣ܬܲܝܡܢܵܐ ܡܫܘܼܚܬ̣ܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ: ܘܲܬ̣ܠܵܬ̣ܵܐ ܬܲܪ̈ܥܝܼܢ: ܚܲܕܼ ܕܫܸܡܥܘܿܢ: ܘܚܲܕܼ ܕܐܝܼܣܟ̣ܵܪ: ܘܚܲܕܼ ܕܲܙܒ̣ܘܿܠܘܿܢ.

ܠܕ:ܘܲܒ̣ܡܲܥ̱ܪܒ̣ܵܐ ܡܫܘܼܚܬ̣ܵܐ ܐܲܪܒ̇ܥܵܐ ܐܲܠܦ̈ܝܼܢ ܘܚܲܡܸܫܡܵܐܐ: ܘܲܬ̣ܠܵܬ̣ܵܐ ܬܲܪ̈ܥܝܼܢ: ܚܲܕܼ ܕܓ̣ܵܕܼ: ܘܚܲܕܼ ܕܐܵܫܹܝܪ: ܘܚܲܕܼ ܕܢܲܦ̮ܬܵܠܝܼ.

ܠܗ:ܘܲܚܕܼܵܪܹܝܗ̇ ܬܡܵܢܬܲܥܸܣܲܪ ܐܲܠܦ̈ܝܼܢ: ܘܲܫܡܵܗ̇ ܕܲܡܕܼܝܼܢ̄ܬܵܐ ܡ̣ܢ ܝܵܘ̈ܡܹܝܗ̇ ܡܵܪܝܵܐ ܫܲܡܗܵܗ̇.