ܟܬ̣ܒ̣ܐ ܕܕ݂ܢܝܼܐܝܠ
ܩܦܠܐܘܢ: ܐ.
ܐ:ܒܲܫܢܲܬ̣ ܬܠܵܬ̣ ܕܡܲܠܟ̇ܘܼܬܹܗ ܕܝܘܿܝܵܩܝܼܡ ܡܲܠܟܵܐ ܕܲܝܗܘܼܕܼܵܐ: ܐܸܬ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܕܒ̣ܵܒܲܠ ܠܐܘܿܪܸܫܠܸܡ ܘܚܲܕܼܪܵܗ̇.
ܒ:ܘܐܲܫ̱ܠ̣ܡܵܗ̇ ܡܵܪܝܵܐ ܒܐܝܼܕܹܗ: ܘܠܝܘܿܝܵܩܝܼܡ ܡܲܠܟܵܐ ܕܲܝܗܘܼܕܼܵܐ: ܘܡ̣ܢ ܡܵܐܢܹ̈ܐ ܕܒܲܝܬܹ̇ܗ ܕܡܵܪܝܵܐ: ܐܵܘܒܸ̇ܠ ܐܸܢܘܿܢ ܠܐܲܪܥܵܐ ܕܣܸܢܥܵܪ ܠܒܹܝܬ̣ ܦܬܲܟ̣ܪܹܗ: ܘܡܵܐܢܹ̈ܐ ܐܲܥܸܠ̣ ܠܒܹܝܬ̣ ܓܲܙܵܐ ܕܲܦܬܲܟ̣ܪܹܗ.
ܓ:ܘܐܸܡ̣ܲܪ ܡܲܠܟܵܐ ܠܐܸܫܦܵܙ ܪܲܒ̇ ܡܗܲܝܡܢܹ̈ܐ: ܕܢܲܝܬܸ̇ܐ ܡ̣ܢ ܒܢܲܝ̈ ܝܑܼܣܪܵܝܹܠ: ܡ̣ܢ ܙܪܲܥ ܡܲܠ̈ܟ̇ܘܼܬ̣ܵܐ: ܘܡ̣ܢ ܦܲܪ̈ܬ̇ܘܵܝܹܐ.
ܕ:ܛܠܵܝܹ̈ܐ ܕܡܘܼܡܵܐ ܠܲܝܬ̇ ܒܗܘܿܢ: ܐܲܝܠܹܝܢ ܕܫܲܦܝܼܪܝܼܢ ܒܚܸܙ̱ܘܗܘܿܢ: ܘܣܲܟ̇ܘܼܠܬ̣ܵܢܝܼܢ ܒܚܸܟ̣ܡ̱ܬ̣ܵܐ: ܘܝܵܕܲܥܬ̣ܵܐ: ܘܡܸܬ̣ܒܲܝܢܲܝ̈ ܒܡܲܕ̇ܥܵܐ: ܐܲܝܠܹܝܢ ܕܲܡܨܹܝܢ ܒܚܲܝܠܵܐ ܠܲܡܩܵܡ ܒܗܲܝܟ̇ܠܵܐ ܕܡܲܠܟܵܐ ܠܲܡܫܲܡܵܫܘܼܬܹܗ: ܘܲܠܡܲܠܵܦܘܼ ܐܸܢܘܿܢ ܣܸܦܪܵܐ: ܘܠܸܫܵܢܵܐ ܕܟܲܠܕܼܵܝܹ̈ܐ.
ܗ:ܘܐܲܩܝܼܡ ܠܗܘܿܢ ܡܲܠܟܵܐ ܩܝܵܡܬܵܐ ܕܝܵܘܡܵܐ. ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ: ܘܡ̣ܢ ܚܲܡܪܵܐ ܕܫܵܬܹ̇ܐ: ܘܠܲܡܪܲܒܵܝܘܼ ܐܸܢܘܿܢ ܫܢܝܼ̈ܢ ܬܠܵܬ̣: ܘܗܵܝܕܹ̇ܝܢ ܢܩܘܼܡܘܿܢ ܩܕܼܵܡ ܡܲܠܟܵܐ.
ܘ:ܘܲܗܘ̤ܵܘ ܒܗܘܿܢ ܡ̣ܢ ܒܢܲܝ̈ ܝܑܼܗܘܼܕܼܵܐ: ܕܵܢܝܼܐܹܝܠ: ܘܚܲܢܲܢܝܵܐ: ܘܡܝܼܫܵܐܹܝܠ: ܘܥܲܙܲܪܝܵܐ.
ܙ:ܘܫܲܡܝܼ ܠܗܘܿܢ ܪܲܒ̇ ܡܗܲܝܡܢܹ̈ܐ ܫܡܵܗܹ̈ܐ: ܩ̣ܪܵܐ ܠܕܵܢܝܼܐܹܝܠ ܒܹܠܛܫܵܨܲܪ: ܘܲܠܚܲܢܲܢܝܵܐ ܫܸܕܼܪܵܟ: ܘܲܠܡܝܼܫܵܐܹܝܠ ܡܝܼܫܵܟ: ܘܲܠܥܲܙܲܪܝܵܐ ܥܒܸܕܼܢܵܓ̣ܘܿ.
ܚ:ܘܣܵܡ̣ ܕܵܢܝܼܐܹܝܠ ܒܪܸܥܝܵܢܹܗ: ܕܠܵܐ ܢܹܐܟ̣ܘܿܠ ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ: ܘܠܵܐ ܢܸܫܬܹ̇ܐ ܡ̣ܢ ܚܲܡܪܵܐ ܕܫܵܬܹ̇ܐ: ܘܲܒ̣ܥ̣ܵܐ ܡ̣ܢ ܪܲܒ̇ ܡܗܲܝܡܢܹ̈ܐ ܕܠܵܐ ܢܵܘܟ̇ܠܝܼܘܗܝ.
ܛ:ܘܝܲܗ̄ܒ̣ ܐܲܠܵܗܵܐ ܛܲܝܒ̇ܘܼܬ̣ܵܐ ܘܪ̈ܲܚܡܹܐ ܠܕܼܵܐܢܝܼܐܹܝܠ ܩܕܼܵܡ ܪܲܒ̇ ܡܗܲܝܡ̈ܢܹܐ.
ܝ:ܘܐܸܡܲܪ ܪܲܒ̇ ܡܗܲܝܡܢܹ̈ܐ ܠܕܼܵܢܝܼܐܹܝܠ: ܕܵܚܹ̇ܠ ܐ̄ܢܵܐ ܡ̣ܢ ܡܵܪܝ ܡܲܠܟܵܐ: ܕܦܲܩܸܕܼ ܥܲܠ ܡܹܐܟ̣ܘܼܠܬ̇ܟ̣ܘܿܢ ܘܥܲܠ ܡܲܫܬܲܝܟ̇ܘܿܢ: ܕܲܠܡܵܐ ܢܸܚܙܹܐ ܐܲܦܲܝ̈ܟ̇ܘܿܢ ܡܟܲܐܪ̈ܵܢ ܡ̣ܢ ܕܲܛܠܵܝܹ̈ܐ ܒܢܲܝ̈ ܫܸܢܟ̣ܘܿܢ: ܘܢܸܦܣܘܿܩ ܪܹܫܝ ܡܲܠܟܵܐ.
ܝܐ:ܝܐ:ܘܐܸܡܲܪ ܕܵܢܝܼܐܹܝܠ ܠܲܡܢܸܨܲܪ: ܕܐܲܫ̱ܠܛܹܗ ܪܲܒ̇ ܡܗܲܝܡܢܹ̈ܐ ܥܲܠ ܕܵܢܝܼܐܹܝܠ: ܘܥܲܠ ܚܲܢܲܢܝܵܐ: ܘܥܲܠ ܡܝܼܫܵܐܝܼܠ: ܘܥܲܠ ܥܲܙܲܪܝܵܐ.
ܝܒ:ܢܲܣܵܐ ܐܸܢܘܿܢ ܠܥܲܒ̣ܕܲܝ̈ܟ ܝܵܘܡܝܼ̈ܢ ܥܸܣܪܵܐ: ܘܢܸܬ̇ܠܘܼܢ ܠܲܢ ܙܲܪ̈ܥܘܿܢܹܐ ܠܡܹܐܟܲܠ: ܘܡܲـ̈ـܝܵܐ ܠܡܸܫܬܵܐ.
ܝܓ:ܘܬܸܚܙܹܐ ܫܝܼܘܼܬܲܢ ܘܫܝܼܘܼܬ̣ܵܐ ܕܲܛܠܵܝܹ̈ܐ ܕܐܵܟ̣ܠܝܼܢ ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ: ܘܐܲܝܟ ܕܚܵܙܹ̇ܐ ܐܲܢ̄ܬ̇ ܗܵܟܲܢܵܐ ܥܒܸܕܼ ܥܲܡ ܥܲܒ̣ܕܲܝ̈ܟ.
ܝܕ:ܘܐܸܫܬ̇ܡܲܥ ܡܸܠܲܬ̣ܗܘܿܢ ܗܵܕܹ݂ܐ: ܘܢܲܣܝܼ ܐܸܢܘܿܢ ܝܵܘܡܝܼ̈ܢ ܥܸܣܪܵܐ.
ܝܗ:ܘܡ̣ܢ ܒܵܬܲܪ ܥܸܣܪܵܐ ܝܵܘܡܝܼ̈ܢ: ܚܙ̣ܵܐ ܐܲܦܲܝ̈ܗܘܿܢ ܫܲܦܝܼܪ̈ܵܢ ܘܫܲܡܝܼܢ ܒܸܣ̱ܪܗܘܿܢ: ܛܵܒ̣ ܡ̣ܢ ܕܲܛܠܵܝܹ̈ܐ ܟܠܗܘܿܢ ܕܐܵܟ̣ܠܝܼܢ ܡ̣ܢ ܦܲܛܒ̣ܵܓ̣ܵܐ ܕܡܲܠܟܵܐ.
ܝܘ:ܘܲܡܢܸܨܲܪ ܢܵܣܹ̇ܒ̣ ܗ̄ܘܼܵܐ ܠܹܗ ܫܩܵܠܗܘܿܢ: ܘܚܲܡܪܵܐ ܕܡܲܫܬܲܝܗܘܿܢ: ܘܝܵܗܹ̇ܒ̣ ܗ̄ܘܼܵܐ ܠܗܘܿܢ ܙܲܪ̈ܥܘܿܢܹܐ ܠܡܹܐܟܲܠ: ܘܡܲـ̈ـܝܵܐ ܠܡܸܫܬܵܐ.
ܝܙ:ܘܠܲܛܠܵܝܹ̈ܐ ܗܵܠܹܝܢ ܐܲܪ̈ܒ̇ܥܵܬܲܝܗܘܿܢ: ܝܲܗ̄ܒ̣ ܠܗܘܿܢ ܐܲܠܵܗܵܐ ܝܑܼܕܲܥܬ̣ܵܐ ܘܣܘܼܟܵܠܵܐ ܒܟ̣ܠ ܣܦܲܪ ܘܚܸܟ̣ܡܵܐ: ܘܕܼܵܢܝܼܐܹܝܠ ܡܸܬ̣ܒܲܝܲܢ ܗ̄ܘܼܵܐ ܒܟ̣ܠ ܚܸܙܘܝܼ̈ܢ ܘܚܸܠܡܝܼ̈ܢ.
ܝܚ:ܘܡ̣ܢ ܒܵܬܲܪ ܕܲܫܠܸܡ̣ܘ ܝܵܘ̈ܡܵܬ̣ܵܐ ܕܲܦ̣ܩܲܕܼ ܡܲܠܟܵܐ: ܐܲܝܬ̇ܝ ܐܸܢܘܿܢ ܪܲܒ̇ ܡܗܲܝܡܢܹ̈ܐ ܩܕܼܵܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.
ܝܛ:ܘܡܲܠܸܠ̣ ܥܲܡܗܘܿܢ ܡܲܠܟܵܐ: ܘܠܵܐ ܐܸܫ̣ܟܲܚ ܒܟ̣ܠܗܘܿܢ ܐܲܝܟ ܕܵܢܝܼܐܹܝܠ: ܘܚܲܢܲܢܝܵܐ: ܘܡܝܼܫܵܐܝܹܠ: ܘܥܲܙ̇ܪܝܵܐ: ܘܩܵܡ̣ܘ ܩܕܼܵܡ ܡܲܠܟܵܐ.
ܟ:ܘܟ̣ܠ ܡܸܠܵܐ ܕܚܸܟ̣ܡ̱ܬ̣ܵܐ ܘܲܕܼܣܘܼܟܵܠܵܐ ܫܲܐܸܠ̣ ܐܸܢܘܿܢ ܡܲܠܟܵܐ: ܐܸܫܟܲܚ ܐܸܢܘܿܢ ܝܲܬ̇ܝܼܪܝܼܢ ܥܣܲܪ ܡ̈ܢܵܘܵܢ: ܥܲܠ ܟܠ ܚܲܪ̈ܵܫܹܐ ܘܐܵܫܘܿܦܹ̈ܐ ܕܐܝܼܬ̣ ܒܡܲܠܟ̇ܘܼܬܹܗ.
ܟܐ:ܘܲܗܘ̤ܵܐ ܕܵܢܝܼܐܹܝܠ ܥܕܲܡܵܐ ܠܲܫܢܲܬ̣ ܚܕܼܵܐ ܕܟ̣ܘܿܪܹܫ ܡܲܠܟܵܐ.
ܩܹܦܵܠܹܐܘܿܢ:ܒ.
ܐ:ܒܲܫܢܲܬ̣ ܬܲܪܬܹ̇ܝܢ ܕܡܲܠܟ̇ܘܼܬܹܗ ܕܲܢܒ̣ܘܼܟܲܕܼܢܵܨܲܪ: ܚ̣ܠܲܡ ܢܒ̣ܘܼܟܲܕܼܢܵܨܲܪ ܚܸܠܡܵܐ: ܘܐܸܫܬܲܢܝܲܬ̤ ܪܘܼܚܹܗ: ܘܫܸܢܬܹܗ ܗܘ̤ܵܬ̣ ܥܠܵܘܗܝ
ܒ:ܘܐܸܡܲܪ ܡܲܠܟܵܐ ܠܡܸܩܪܵܐ ܠܚܲܪ̈ܫܹܐ: ܘܠܵܐܫܘܿܦܹ̈ܐ: ܘܠܲܡܓ̣ܘܼܫܹ̈ܐ: ܘܲܠܟܲܠܕܵܝܹ̈ܐ: ܠܲܡܚܵܘܵܝܘܼ ܠܡܲܠܟܵܐ ܚܸܠܡܹܗ: ܘܐܸܬ̣ܵܘ ܘܩܵܡ̣ܘ ܩܕܼܵܡ ܡܲܠܟܵܐ.
ܓ:ܘܐܸܡܲܪ ܠܗܘܿܢ ܡܲܠܟܵܐ: ܚܸܠܡܵܐ ܚܙܹ̇ܝܬ̣: ܘܐܸܫܬܲܢܝܲܬ̤ ܪܘܼܚܝ ܠܡܸܕ̇ܥܹܗ ܠܚܸܠܡܵܐ.
ܕ:ܘܡܲܠܸܠ̣ܘ ܟܲܠܕܵܝܹ̈ܐ ܩܕܼܵܡ ܡܲܠܟܵܐ ܐܲܪܡܵܐܝܼܬ̣: ܘܐܵܡ̇ܪܝܼܢ: ܡܲܠܟܵܐ ܠܥܵܠܲܡ ܚܝܝܼ: ܐܸܡܲܪ ܚܸܠܡܵܐ ܠܥܲܒ̣ܕܲܝ̈ܟ: ܘܦܫܵܪܹܗ ܚܢܲܢ ܚܵܝܘܸܐ.
ܗ:ܥܢ̣ܵܐ ܡܲܠܟܵܐ ܘܐܸܡܲܪ ܠܟܲܠܕܵܝܹ̈ܐ: ܫܲܪܝܼܪܵܐ ܗ̄ܝܼ ܡܸܠܬ̣ܵܐ ܕܐܸܡ̇ܪܹܬ̣: ܕܐܸܢ ܠܵܐ ܬܚܵܘܘܿܢܵܢܝ ܚܸܠܡܵܐ ܘܲܦܫܵܪܹܗ: ܗܲܕܵܡ ܬܸܬ̣ܦܲܣܩܘܼܢ: ܘܒ̣ܵܬܲܝ̈ܟ̇ܘܿܢ ܢܸܬ̣ܒܲܙܙܘܿܢ.
ܘ:ܐܸܢ ܕܹܝܢ ܚܸܠܡܵܐ ܘܲܦܫܵܪܹܗ ܬܚܵܘܘܿܢܵܢܝ: ܡܵܘ̈ܗܒ̣ܵܬ̣ܵܐ ܘܥܘܼܬ̣ܪܵܐ ܘܐܝܼܩܵܪܵܐ ܣܲܓ̇ܝܼܵܐܐ ܬܩܲܒܠܘܼܢ ܡܹܢܝ: ܒܲܠܚܘܿܕܼ ܚܸܠܡܵܐ ܘܲܦܫܵܪܹܗ ܚܵܘܵܐܘܼܢܝ.
ܙ:ܥ̣ܢܵܘ ܬܘܼܒ̣ ܘܐܵܡ̇ܪܝܼܢ ܠܹܗ: ܡܲܠܟܵܐ ܚܸܠܡܵܐ ܢܹܐܡܲܪ ܠܥܲܒ̣ܕܵܘ̈ܗܝ: ܘܲܦܫܵܪܹܗ ܚܢܲܢ ܢܚܵܘܸܐ.
ܚ:ܥܢ̣ܵܐ ܡܲܠܟܵܐ ܘܐܸܡܲܪ: ܫܲܪܝܼܪܵܐܝܼܬ̣ ܝܵܕܲܥ̇ ܐ̄ܢܵܐ ܕܙܲܒ̣ܢܵܐ ܗ̄ܘܼ ܫܵܐ̇ܠܝܼܢ ܐ̄ܢܬ̇ܘܿܢ: ܡܸܛܠ ܕܲܚ̣ܙܲܝܬ̇ܘܿܢ ܕܫܲܪܝܼܪܵܐ ܗ̄ܝܼ ܡܸܠܲܬܝ.
ܛ:ܕܐܸܢ ܚܸܠܡܵܐ ܠܵܐ ܬܚܵܘܘܿܢܵܢܝ: ܚܕܼܵܐ ܗ̄ܝܼ ܕܵܬ̣ܟ̣ܘܿܢ: ܘܡܸܠܬ̣ܵܐ ܟܲܕܵܒ̣ܬ̣ܵܐ ܘܲܣܪܝܼܩܬܵܐ ܐܸܬ̣ܪܲܥܝܼܬ̇ܘܿܢ ܠܡܹܐܡܲܪ ܩܕܼܵܡܲܝ: ܥܲܕܼ ܙܲܒ̣ܢܵܐ ܢܸܥܒܲܪ. ܐܸܠܵܐ ܚܸܠܡܵܐ ܐܸܡܲܪܘ ܠܝܼ: ܕܐܸܕܲܥ ܕܐܵܦ ܦܫܵܪܹܗ ܡܚܵܘܹܝܢ ܐ̄ܢܬ̇ܘܿܢ ܠܝܼ.
ܝ:ܥܢ̣ܵܘ ܟܲܠܕܵܝܹ̈ܐ ܘܐܵܡ̇ܪܝܼܢ ܩܕܼܵܡ ܡܲܠܟܵܐ: ܠܲܝܬ̇ ܐ̄ܢܵܫ ܥܲܠ ܐܲܪܥܵܐ ܕܡܸܠܲܬ̣ ܡܲܠܟܵܐ ܡܸܫܟܲܚ ܠܲܡܚܵܘܵܝܘܼ: ܐܵܦܠܵܐ ܡ̣ܢ ܡܬ̣ܘܿܡ ܡܠܸܟ ܪܲܒ̇ ܘܫܲܠܝܼܛ ܡܸܠܬ̣ܵܐ ܐܲܝܟ ܗܵܕܹܐ ܫܲܐܸܠ: ܠܟ̣ܠ ܚܲܪܵܫ ܘܐܵܫܘܿܦ ܘܟܲܠܕܼܵܝ.
ܝܐ:ܘܡܸܠܬ̣ܵܐ ܕܡܲܠܟܵܐ ܫܲܐܸܠ ܝܲܩܝܼܪܵܐ ܗ̄ܝܼ: ܘܐ̄ܢܵܫ ܠܲܝܬ̇ ܕܲܢܚܵܘܹܝܗ̇ ܩܕܼܵܡ ܡܲܠܟܵܐ: ܐܸܠܵܐ ܐܸܢ ܐܲܠܵܗ̈ܝܼܢ ܕܠܲܝܬ̇ ܡܲܥܡܲܪܗܘܿܢ ܥܲܡ ܒܢܲܝ̈ ܒܸܣܪܵܐ.
ܝܒ:ܗܵܝܕܹ̇ܝܢ ܡܲܠܟܵܐ ܐܸܬ̣ܚܲܡܲܬ̣ ܪܵܘܪܒ̣ܵܐܝܼܬ̣: ܘܲܒ̣ܪܘܼܓ̣ܙܵܐ ܣܲܓ̇ܝܼܵܐܐ ܐܸܡܲܪ: ܠܡܵܘܒܵܕܼܘܼ ܠܟ̣ܠܗܘܿܢ ܚܲܟ̇ܝܼܡܹ̈ܐ ܕܒ̣ܵܒܹܠ.
ܝܓ:ܘܦܘܼܩܕܵܢܵܐ ܢܦܲܩ̣ ܘܚܲܟ̇ܝܼܡܹ̈ܐ ܡܸܬ̣ܩܲܛܠܝܼܢ: ܘܲܒ̣ܥܵܘ ܕܢܸܩܛܠܘܼܢ ܠܕܵܐܢܝܼܐܹܝܠ ܘܲܠܚܲܒ̣ܪ̈ܵܘܗܝ.
ܝܕ:ܗܵܝܕܹ̇ܝܢ ܕܵܢܝܼܐܹܝܠ ܐܸܬ̣ܪܲܥܝܼ ܘܐܸܬܡܲܠܲܡ: ܘܐܸܡܲܪ ܠܐܵܪܝܼܘܿܟ ܪܲܒ̇ ܕܲܚܫܹ̈ܐ ܕܡܲܠܟܵܐ: ܗܵܘܿ ܕܲܢܦܲܩ̣ ܠܲܡܩܲܛܵܠܘܼ ܠܚܲܟ̇ܝܼܡܹ̈ܐ ܕܒ̣ܵܒܹܠ.
ܝܗ:ܥܲܠ ܡܵܢܵܐ ܗܵܢܵܐ ܦܘܼܩܕܵܢܵܐ ܡܲܚܨܲܦ ܡ̣ܢ ܩܕܼܵܡ ܡܲܠܟܵܐ: ܘܲܓ̣ܠܵܗ̇ ܡܸܠܬ̣ܵܐ ܐܵܪܝܼܘܿܟ ܠܕܼܵܐܢܝܼܐܹܝܠ.
ܝܘ:ܘܕܵܢܝܼܐܹܝܠ ܒܥ̣ܵܐ ܡ̣ܢ ܡܲܠܟܵܐ ܕܙܲܒ̣ܢܵܐ ܢܸܬܸ̇ܠ ܠܹܗ: ܘܦܫܵܪܵܐ ܠܡܲܠܟܵܐ ܢܚܵܘܸܐ.
ܝܙ:ܗܵܝܕܹ̇ܝܢ ܕܵܢܝܼܐܹܝܠ ܠܒܲܝܬܹ̇ܗ ܐܸܙܲܠ: ܘܲܠܚܲܢܲܢܝܵܐ: ܘܲܠܡܝܼܫܵܐܝܹܠ: ܘܲܠܥܲܙܲܪܝܵܐ ܚܲܒ̣ܪ̈ܵܘܗܝ: ܡܸܠܬ̣ܵܐ ܗܵܕܹܐ ܓܠ̣ܵܐ.
ܝܚ:ܕܢܸܒ̣ܥܘܿܢ ܪ̈ܲܚܡܹܐ ܡ̣ܢ ܩܕܼܵܡ ܐܲܠܵܗܵܐ ܕܲܫܡܲܝܵܐ ܥܲܠ ܐ̄ܪܵܙܵܐ ܗܵܢܵܐ: ܕܠܵܐ ܢܹܐܒ̣ܕ̇ܘܼܢ ܕܵܢܝܼܐܹܝܠ ܘܚܲܒ̣ܪ̈ܵܘܗܝ ܥܲܡ ܫܲܪܟܵܐ ܕܚܲܟ̇ܝܼܡܹ̈ܐ ܕܒ̣ܵܒܹܠ.
ܝܛ:ܗܵܝܕܹ̇ܝܢ ܠܕܼܵܢܝܼܐܹܝܠ ܒܚܸܙܘܵܐ ܕܠܸܠܝܵܐ ܐ̄ܪܵܙܵܐ ܐܸܬ̣ܓ̇ܠܝܼ: ܘܕܼܵܢܝܼܐܹܝܠ ܒܲܪܸܟ ܠܐܲܠܵܗܵܐ ܕܲܫܡܲܝܵܐ.
ܟܟ:ܥܢ̣ܵܐ ܕܵܢܝܼܐܹܝܠ ܘܐܸܡܲܪ: ܢܸܗܘܹܐ ܫܡܹܗ ܕܡܵܪܝܵܐ ܡܒܲܪܲܟ: ܡ̣ܢ ܥܵܠܲܡ ܘܲܥܕܲܡܵܐ ܠܥܵܠܲܡ: ܕܚܸܟ̣ܡ̱ܬ̣ܵܐ ܘܓܲܢ̄ܒܵܪܘܼܬ̣ܵܐ ܕܝܼܠܹܗ ܗ̄ܝܼ.
ܟܐ:ܘܗ̤ܘ ܡܚܲܠܸܦ ܙܲܒ̣ܢܹ̈ܐ ܘܥܸܕܵܢܹ̈ܐ: ܡܲܥܒܲܪ ܡܲܠܟ̇ܝܼ̈ܢ ܘܲܡܩܝܼܡ ܡܲܠܟ̇ܝܼ̈ܢ: ܝܵܗܹ̇ܒ̣ ܚܸܟ̣ܡ̱ܬ̣ܵܐ ܠܚܲܟ̇ܝܼܡܹ̈ܐ: ܘܡܲܕ̇ܥܵܐ ܠܝܵܕܼܥܲܝ̈ ܣܘܼܟܵܠܵܐ.
ܟܒ:ܘܗ̤ܘ ܓܵܠܹ̇ܐ ܥܲܡܝܼ̈ܩܵܬ̣ܵܐ ܘܟܲܣ̈ܝܵܬ̣ܵܐ: ܘܝܵܕܲܥ̇ ܡܵܐ ܕܲܒ̣ܚܸܫܘܿܟ̣ܵܐ: ܘܢܲܗܝܼܪܵܐ ܥܲܡܹܗ ܗ̄ܘܼ.
ܟܓ:ܠܵܟ ܐܲܠܵܗܵܐ ܕܐܲܒ̣ܵܗܲܝ̈ ܡܵܘܕܹ̇ܐ ܐ̄ܢܵܐ ܘܲܡܫܲܒܲܚ ܐ̄ܢܵܐ: ܕܚܸܟ̣ܡ̱ܬ̣ܵܐ ܘܓܲܢ̄ܒܵܪܘܼܬ̣ܵܐ ܝܲܗ̄ܒ̣ܬ̇ ܠܝܼ: ܘܗܵܫܵܐ ܐܵܘܕܼܥ̣ܬܵܢܝ ܕܲܒ̣ܥܲܝܢ ܡܸܢܵܟ: ܘܡܸܠܲܬ̣ ܡܲܠܟܵܐ ܐܵܘܕܲܥ̣ܬܵܢܝ.
ܟܕ:ܘܒ̣ܵܗ̇ ܒܫܵܥܬ̣ܵܐ ܥܲܠ ܕܵܢܝܼܐܹܝܠ ܠܘܵܬ̣ ܐܵܪܝܼܘܿܟ: ܗܵܘܿ ܕܲܦܩܲܕܼ ܠܹܗ ܡܲܠܟܵܐ ܠܲܡܩܲܛܵܠܘܼ ܠܚܲܟ̇ܝܼܡܹ̈ܐ ܕܒ̣ܵܒܹܠ: ܘܐܸܙܲܠ ܘܗܵܟܲܢܵܐ ܐܸܡܲܪ ܠܹܗ: ܠܚܲܟ̇ܝܼܡܹ̈ܐ ܕܒ̣ܵܒܹܠ ܠܵܐ ܬܵܘܒܸ̇ܕܼ: ܐܸܠܵܐ ܐܲܥܸܠܲܝܢܝ ܩܕܼܵܡ ܡܲܠܟܵܐ: ܘܲܦܫܵܪܵܐ ܠܡܲܠܟܵܐ ܐܹܚܵܘܸܐ.
ܟܗ:ܗܵܝܕܹ̇ܝܢ ܐܵܪܝܼܘܿܟ ܚܦܝܼܛܵܐܝܼܬ̣ ܐܲܥ̣ܠܹܗ ܠܕܼܵܢܝܼܐܹܝܠ ܩܕܼܵܡ ܡܲܠܟܵܐ: ܘܐܸܡܲܪ ܠܹܗ: ܐܸܫܟ̇ܚܹ̇ܬ̣ ܓܲܒ̣ܪܵܐ ܡ̣ܢ ܒܢܲܝ̈ ܫܒ̣ܝܼܬ̣ܵܐ ܕܲܝܗܘܼܕܼܵܐ: ܕܲܦܫܵܪܵܐ ܠܡܲܠܟܵܐ ܢܘܕܲܥ.
ܟܘ:ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ ܕܲܫܡܹܗ ܒܹܠܛܫܵܨܲܪ: ܡܸܫܟܲܚ ܐܲܢ̄ܬ̇ ܠܲܡܚܵܘܵܝܘܼܬܲܢܝ: ܚܸܠܡܵܐ ܕܲܚܙܹ̇ܝܬ̣ ܘܲܦܫܵܪܹܗ.
ܟܙ:ܥܢ̣ܵܐ ܕܵܢܝܼܐܹܝܠ ܘܐܸܡܲܪ ܩܕܼܵܡ ܡܲܠܟܵܐ: ܐ̄ܪܵܙܵܐ ܕܡܲܠܟܵܐ ܫܵܐܹ̇ܠ: ܠܵܐ ܚܲܟ̇ܝܼܡܹ̈ܐ: ܘܠܵܐ ܡܓ̣ܘܼܫܹ̈ܐ: ܘܠܵܐ ܚܲܪ̈ܵܫܹܐ: ܘܠܵܐ ܐ̄ܫܘܿܦܹ̈ܐ: ܡܸܫܟ̇ܚܝܼܢ ܠܲܡܚܵܘܵܝܘܼ ܠܡܲܠܟܵܐ.
ܟܚ:ܐܸܠܵܐ ܐܝܼܬ̣ ܐܲܠܵܗܵܐ ܕܲܫܡܲܝܵܐ ܓܵܠܹ̇ܐ ܐ̄ܪ̈ܵܙܹܐ: ܕܢܵܘܕܲܥ ܠܡܲܠܟܵܐ ܢܒ̣ܘܼܟܲܕܼܢܲܨܲܪ ܡܵܐ ܕܢܸܗܘܹܐ ܒܝܵܘ̈ܡܵܬ̣ܵܐ ܐ̄ܚܪ̈ܵܝܹܐ: ܚܸܠܡܵܟ ܘܚܸܙܘܵܐ ܕܪܹܫܵܟ ܕܥܲܠ ܡܲܫܟ̇ܒ̣ܵܟ ܗܵܢܵܘ.
ܟܛ:ܐܲܢ̄ܬ̇ ܡܲܠܟܵܐ ܡܲܚܫ̈ܒ̣ܵܬ̣ܵܟ ܥܲܠ ܠܸܒܵܟ ܣܠܸܩ̣: ܥܲܠ ܡܵܐ ܕܢܸܗܘܹܐ ܒܲܐ̄ܚܪܵܝܬܵܐ: ܘܓܹܠܹ̇ܐ ܐ̄ܪ̈ܵܙܹܐ ܐܵܘܕ̇ܥܵܟ ܡܵܐ ܕܢܸܗܘܹܐ.
ܠ:ܘܐܸܢܵܐ ܠܵܐ ܗ̄ܘܼܵܐ ܡܸܛܠ ܕܐܝܼܬ̣ ܒܝܼ ܚܸܟ̣ܡ̱ܬ̣ܵܐ ܝܲܬ̇ܝܼܪ ܡ̣ܢ ܟܠܗܘܿܢ ܚܲܝܹ̈ܐ ܐܸܬ̣ܓ̇ܠܝܼ ܠܝܼ ܐ̄ܪܵܙܵܐ ܗܵܢܵܐ: ܐܸܠܵܐ ܡܸܛܠ ܕܲܦܫܵܪܵܐ ܢܸܬ̣̱ܝܼܕܲܥ ܠܡܲܠܟܵܐ: ܘܡܸܕܸ̇ܡ ܕܐܸܬ̣ܚܲܫܲܒ̣ܬ̇ ܒܠܸܒܵܟ ܬܸܕܲܥ.
ܠܐ:ܐܲܢ̄ܬ̇ ܡܲܠܟܵܐ ܚܵܙܹ̇ܐ ܗ̄ܘܲܝܬ̇: ܘܗܵܐ ܨܲܠܡܵܐ ܚܲܕܼ ܪܲܒܵܐ: ܕܛܵܒ̣ ܙܝܼܘܹܗ ܝܲܬܝܼܪ ܘܩܵܐܹ̇ܡ ܠܩܘܼܒ̣ܠܵܟ: ܚܸܙܘܹܗ ܕܚܝܼܠ.
ܠܒ:ܪܹܫܹܗ ܕܕܲܗܒ̣ܵܐ ܛܵܒ̣ܵܐ: ܚܲܕܼܝܹܗ ܘܲܕܼܪ̈ܵܥܵܘܗܝ ܕܣܹܐܡܵܐ: ܟܲܪܣܹܗ ܘܥܲܛܡܵܬܹ̈ܗ ܕܲܢܚܵܫܵܐ.
ܠܓ:ܫܵܩܵܘ̈ܗܝ ܕܦܲܪܙܠܵܐ: ܪܸ̈ܓ̣ܠܵܘܗܝ ܡܸܢܗܹܝܢ ܕܦܲܪܙܠܵܐ ܘܡܸܢܗܹܝܢ ܕܚܸܨܦܵܐ.
ܠܕ:ܘܲܚ̣ܙܲܝܬ̇ ܕܐܸܬ̣ܓܲܙܪܲܬ̤ ܟܹܐܦܵܐ ܕܠܵܐ ܒܐܝܼ̈ܕܝܼܢ: ܘܲܡܚܵܬܹܗ ܠܨܲܠܡܵܐ ܥܲܠ ܪܸ̈ܓ̣ܠܵܘܗܝ ܕܦܲܪܙܠܵܐ ܘܲܕܼܚܸܨܦܵܐ: ܘܕܲܩܩܲܬ̤ ܐܸܢܹܝܢ ܛܵܒ̣.
ܠܗ:ܘܐܸܬ̣ܕ̇ܩܸܩܘ ܐܲܟ̣ܚ̄ܕܼܵܐ ܕܦܲܪܙܠܵܐ: ܘܲܢܚܵܫܵܐ: ܘܚܸܨܦܵܐ: ܘܣܹܐܡܵܐ: ܘܕܲܗܒ̣ܵܐ: ܘܲܗܘ̤ܵܘ ܐܲܝܟ ܥܘܼܪܵܐ ܕܡ̣ܢ ܐܸܟ̇ܪܵܐ ܕܩܲܝܛܵܐ: ܘܢܸܣܒܲܬ̤ ܐܸܢܘܿܢ ܪܘܼܚܵܐ ܬܲܩܝܼܦܬܵܐ: ܘܐܲܬܲܪ ܠܵܐ ܐܸܫܬ̇ܟܲܚ ܠܗܘܿܢ: ܘܟܹܐܦܵܐ ܕܲܡܚܵܬܹܗ ܠܨܲܠܡܵܐ: ܗܘ̤ܵܬ̣ ܠܛܘܼܪܵܐ ܪܲܒܵܐ: ܘܲܡܠܵܬ̤ ܡܸܢܵܗ̇ ܟܠܵܗ̇ ܐܲܪܥܵܐ.
ܠܘ:ܗܵܢܵܘ ܚܸܠܡܵܐ: ܘܲܦܫܵܪܹܗ ܐܹܡܲܪ ܩܕܼܵܡ ܡܲܠܟܵܐ.
ܠܙ:ܐܲܢ̄ܬ̇ ܡܲܠܟܵܐ ܡܠܸܟ ܟܲܠ̈ܟܹ̇ܐ: ܐܲܠܵܗܵܐ ܡܪܲܝܡܵܐ: ܡܲܠܟ̇ܘܼܬ̣ܵܐ ܚܲܣܝܼܢܬܵܐ ܘܐܝܼܩܵܪܵܐ ܝܲܗ̄ܒ̣ ܠܵܟ.
ܠܚ:ܘܟ̣ܠ ܐܲܬܲܪ ܕܥܵܡܘܿܪܝܼܢ ܒܹܗ ܒܢܲܝ̈ܢܵܫܵܐ: ܘܦܵܪܲܚܬ̣ܵܐ ܕܲܫܡܲܝܵܐ ܘܚܲܝ̄ܘܬ̣ܵܐ ܕܕܲܒ̣ܪܵܐ ܝܲܗ̄ܒ̣ ܒܐܝܼܕܲܝ̈ܟ: ܘܐܲܫ̱ܠܛܵܟ ܥܲܠ ܟܠܗܘܿܢ: ܐܲܢ̄ܬ̇ܘܼ ܪܹܫܵܐ ܕܕܲܗܒ̣ܵܐ.
ܠܛ:ܘܒ̣ܵܬ̣ܪܵܟ ܬܩܘܼܡ ܡܲܠܟ̇ܘܼܬ̣ܵܐ ܐ̄ܚܪܹܬ̣ܵܐ ܕܡܲܟ̇ܝܼܟ̣ܵܐ ܡܸܢܵܟ: ܘܡܲܠܟ̇ܘܼܬ̣ܵܐ ܐ̄ܚܪܹܬܵܐ ܕܲܬ̣ܠܵܬ̣ ܕܐܝܼܬܹܝܗ̇ ܢܚܵܫܵܐ: ܬܸܫܠܲܛ ܒܟ̣ܠܵܗ̇ ܐܲܪܥܵܐ.
ܡ:ܘܡܲܠܟ̇ܘܼܬ̣ܵܐ ܪܒ̣ܝܼܥܵܝܬܵܐ ܬܸܗܘܹܐ ܚܲܣܝܼܢܵܐ ܐܲܝܟ ܦܲܪܙܠܵܐ: ܘܐܲܝܟ ܕܦܲܪܙܠܵܐ ܐܵܪܹܫ ܘܲܡܕܲܩܸܩ ܟܠ: ܗܵܟܲܢܵܐ ܐܵܦ ܗ̤ܝ ܬܸܫܚܘܿܩ ܬܸܟ̣ܒ̇ܘܿܫ ܟܠ.
ܡܐ:ܘܕܲܚ̣ܙܲܝܬ̇ ܪܸ̈ܓ̣ܠܹܐ ܘܨܸܒ̣̈ܥܵܬ̣ܵܐ: ܕܡܸܢܗܹܝܢ ܕܚܸܨܦܵܐ ܕܦܲܚܵܪܵܐ: ܘܡܸܢܗܹܝܢ ܕܦܲܪܙܠܵܐ: ܡܲܠܟ̇ܘܼܬ̣ܵܐ ܬܸܗܘܹܐ ܦܠܝܼܓ̣ܵܐ: ܘܡ̣ܢ ܥܸܩܵܪܵܐ ܕܦܲܪܙܠܵܐ ܢܸܗܘܹܐ ܒܵܗ̇: ܐܲܝܟܲܢܵܐ ܕܲܚܙܲܝܬ̇ ܦܲܪܙܠܵܐ ܕܲܡܚܲܠܲܛ ܒܚܸܨܦܵܐ ܕܛܝܼܢܵܐ.
ܡܒ:ܘܨܸܒ̣̈ܥܵܬ̣ܵܐ ܕܪܸ̈ܓ̣ܠܹܐ ܕܲܚܙܲܝܬ̇: ܕܡܸܢܗܘܿܢ ܕܦܲܪܙܠܵܐ ܘܡܸܢܗܹܝܢ ܕܚܸܨܦܵܐ: ܡܸܢܵܗ̇ ܡ̣ܢ ܡܲܠܟ̇ܘܼܬ̣ܵܐ ܬܸܗܘܹܐ ܥܲܫܝܼܢܵܐ: ܘܡܸܢܵܗ̇ ܬܸܗܘܹܐ ܬܒ̣ܝܼܪܵܐ.
ܡܓ:ܘܕܲܚܙ̣ܲܝܬ̇ ܦܲܪܙܠܵܐ ܕܲܡܚܲܠܲܛ ܒܚܸܨܦܵܐ ܕܛܝܼܢܵܐ: ܗܵܟܲܢܵܐ ܢܸܬ̣ܚܲܠܛܘܼܢ ܒܲܙܪܲܥ ܐ̄ܢܵܫܵܐ: ܘܠܵܐ ܢܸܗܘܘܿܢ ܕܵܒ̣ܩ̇ܝܼܢ ܚܲܕܼ ܠܚܲܕܼ: ܐܲܝܟ ܦܲܪܙܠܵܐ ܕܠܵܐ ܡܸܬ̣ܚܲܠܲܛ ܥܲܡ ܛܝܼܢܵܐ.
ܡܕ:ܘܲܒ̣ܝܵܘ̈ܡܵܬ̣ܗܘܿܢ ܕܡܲܠ̈ܟܹ̇ܐ ܗܵܢܘܿܢ: ܢܩܝܼܡ ܐܲܠܵܗ ܫܡܲܝܵܐ: ܡܲܠܟ̇ܘܼܬ̣ܵܐ ܕܲܠܥܵܠܡܝܼܢ: ܠܵܐ ܬܸܬ̣ܚܲܒܲܠ: ܘܡܲܠܟ̇ܘܼܬ̣ܵܐ ܠܥܲܡܵܐ ܐ̄ܚܪܹܢܵܐ ܠܵܐ ܬܸܫܒ̇ܘܿܩ: ܐܸܠܵܐ ܬܕܲܩܸܩ ܘܲܬ̣ܣܝܼܦ ܟܠܗܹܝܢ ܡܲܠܟ̇ܘܵܬ̣ܵܐ ܗܵܠܹܝܢ: ܘܗ̤ܝ ܬܩܘܼܡ ܠܥܵܠܡܝܼܢ.
ܡܗ:ܐܲܝܟܲܢܵܐ ܕܲܚܙܲܝܬ̇ ܕܡ̣ܢ ܛܘܼܪܵܐ ܐܸܬ̣ܓܲܙܪܲܬ̤ ܟܹܐܦܵܐ ܕܠܵܐ ܒܐܝܼܕܼܝܼ̈ܢ: ܘܕܲܩܩܲܬ̤ ܦܲܪܙܠܵܐ: ܘܲܢܚܵܫܵܐ: ܘܚܸܨܦܵܐ: ܘܣܹܐܡܵܐ ܘܕܲܗܒ̣ܵܐ: ܐܲܠܵܗܵܐ ܪܲܒܵܐ ܐܵܘܕ̇ܥܵܟ ܡܵܐ ܕܢܸܗܘܹܐ ܒܝܵܘ̈ܡܵܬܵܐ ܐ̄ܚܪ̈ܵܝܹܐ: ܫܲܪܝܼܪ ܚܸܠܡܵܐ ܘܲܡܗܲܝܡܲܢ ܦܫܵܪܹܗ.
ܡܘ:ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܢܦܲܠ̣ ܥܲܠ ܐܵܦܵܘ̈ܗܝ: ܠܕܼܵܐܢܝܼܐܹܝܠ ܝܓܸܕܼ: ܘܒܸܣܡ̈ܝܼܢ ܘܩܘܼܪ̈ܒܵܢܝܼܢ ܐܸܡܲܪ ܠܲܡܩܲܪܵܒ̣ܘܼ ܠܹܗ.
ܡܙ:ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ: ܒܩܘܼܫܬܵܐ ܐܲܠܵܗܟ̣ܘܿܢ ܗ̤ܘܝܘܼ ܐܲܠܵܗ ܐܲܠܵܗ̈ܝܼܢ: ܘܡܵܪܹܐ ܡܲܠܟ̇ܝܼ̈ܢ: ܘܓ̣ܵܠܹ̇ܐ ܐ̄ܪ̈ܵܙܝܼܢ: ܕܐܸܫ̣ܟܲܚܬ̇ ܠܡܸܓ̣ܠܵܐ ܐ̄ܪܵܙܵܐ ܗܵܢܵܐ.
ܡܚ:ܗܵܝܕܹ̇ܝܢ ܡܲܠܟܵܐ ܐܵܘܪܸܒ̣ ܠܕܼܵܢܝܼܐܹܝܠ: ܘܡܵܘ̈ܗܒ̣ܵܬ̣ܵܐ ܣܲܓ̇ܝܼܵܐ̈ܬ̣ܵܐ ܝܲܗ̄ܒ̣ ܠܹܗ: ܘܐܲܫ̱ܠܛܹܗ ܥܲܠ ܟܠܵܗ̇ ܐܲܪܥܵܐ ܕܒ̣ܵܒܹܠ: ܘܐܲܩܝܼܡܹܗ ܪܹܫܵܐ ܥܲܠ ܟܠܗܘܿܢ ܪ̈ܲܒܲܝ ܚܲܝ̈ܠܹܐ: ܘܥܲܠ ܟܠܗܘܿܢ ܚܲܟ̇ܝܼܡܹ̈ܐ ܕܒܵܒܹܠ.
ܡܛ:ܘܕܼܵܢܝܼܐܹܝܠ ܒܥ̣ܵܐ ܡ̣ܢ ܡܲܠܟܵܐ: ܘܐܲܫܠܸܛ ܥܲܠ ܥܒ̣ܵܕܼܵܐ ܕܲܡܕܼܝܼܢܲܬ̣ ܒܵܒܹܠ: ܠܫܸܕܼܪܵܟ: ܘܡܝܼܫܵܟ: ܘܲܥܒܸܕܼܢܵܓ̣ܘܿ: ܘܕܼܵܢܝܼܐܹܝܠ ܗܘ̤ܵܐ ܒܬ̣ܵܪܥܵܐ ܕܡܲܠܟܵܐ.
ܩܹܦܵܠܹܐܘܿܢ:ܓ.
ܐ:ܢܒ̣ܘܼܟܲܕܼܢܵܨܲܪ ܡܲܠܟܵܐ: ܥ̣ܒܲܕܼ ܨܲܠܡܵܐ ܚܲܕܼ ܕܕܲܗܒ̣ܵܐ: ܪܵܘܡܹܗ ܐܲܡ̈ܝܼܢ ܫܬ̇ܝܼܢ: ܘܲܦܬ̣ܵܝܹܗ ܐܵܡ̈ܝܼܢ ܫܸܬ̣: ܘܐܲܩܝܼܡܹܗ ܒܦܲܩܥܲܬ̣ ܕܘܿܪܵܐ ܒܐܲܪܥܵܐ ܕܒ̣ܵܒܹܠ.
ܒ:ܘܲܢܒ̣ܘܼܟܲܕܼܢܵܨܲܪ ܡܲܠܟܵܐ: ܫܲܕܲܪ ܠܲܡܟܲܢܵܫܘܼ ܠܪ̈ܲܒܲܝ ܚܲܝ̈ܠܹܐ: ܘܲܠܡܵܪ̈ܵܘܵܬ̣ܵܐ: ܘܲܠܫܲܠܝܼܛܵܢܹ̈ܐ: ܘܠܲܐܪ̈ܓ̇ܕܼܵܝܹܐ: ܘܲܠܓܲܪ̈ܒ̇ܕܼܵܝܹܐ: ܘܲܠܬܲܪ̈ܒ̇ܕܼܵܝܹܐ: ܘܲܠܬܸܒ̣ܬܵܝܹ̈ܐ: ܘܲܠܟ̣ܠ ܫܘܼܠܛܵܢ ܡܕܼܝܼ̈ܢܵܬ̣ܵܐ: ܠܡܹܐܬ̣ܵܐ ܠܥܹܐܕܼܵܐ ܕܨܲܠܡܵܐ ܚܲܕܼܬ̣ܵܐ. ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.
ܓ:ܗܵܝܕܹ̇ܝܢ ܐܸܬ̣ܟܲܢܲܫܘ ܟܠܗܘܿܢ ܪ̈ܲܒܲܝ ܚܲܝ̈ܠܹܐ ܘܡܵܪ̈ܵܘܵܬ̣ܵܐ ܘܫܲܠܝܼܛܵܢܹ̈ܐ: ܘܐܲܪ̈ܓ̇ܕܼܵܝܹܐ: ܘܓܲܪ̈ܒ̇ܕܼܵܝܹܐ: ܘܬܲܪ̈ܒ̇ܕܼܵܝܹܐ: ܘܬܸܒ̣ܬܵܝܹ̈ܐ: ܘܟ̣ܠ ܫܘܼܠܛܵܢ ܡܕܼܝܼ̈ܢܵܬ̣ܵܐ: ܘܐܸܬ̣ܵܘ ܠܥܹܐܕܼܵܐ ܕܨܲܠܡܵܐ ܚܲܕܼܬ̣ܵܐ ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܘܩܵܝ̇ܡܝܼܢ ܗ̄ܘܼܵܘ ܠܘܼܩܒܲܠ ܨܲܠܡܵܐ ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.
ܕ:ܘܟ̣ܵܪܘܿܙܵܐ ܩ̣ܪܵܐ ܒܚܹܝܠ: ܘܐܸܡ̣ܲܪ: ܠܟ̣ܘܿܢ ܐܵܡ̇ܪܝܼܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ.
ܗ:ܒܫܵܥܬ̣ܵܐ ܕܫܵܡ̇ܥܝܼܢ ܐܢ̄ܬ̇ܘܿܢ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܬܸܦܠܘܼܢ ܘܬܸܣܓ̇ܕܼܘܼܢ ܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡ ܢܒ̣ܘܼܟܲܕܼܢܵܨܲܪ ܡܲܠܟܵܐ.
ܘ:ܘܡܲܢ ܕܠܵܐ ܢܸܦܸܠ ܢܸܣܓ̇ܘܿܕܼ: ܒܵܗ̇ ܒܫܵܥܬ̣ܵܐ ܢܸܫܬ̇ܕܹܐ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.
ܙ:ܘܲܒ̣ܫܵܥܬ̣ܵܐ ܕܫܵܡ̇ܥܝܼܢ ܗ̄ܘܼܵܘ ܥܲܡܡܹ̈ܐ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ: ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܢܵܦ̇ܠܝܼܢ ܗ̄ܘܼܵܘ ܟܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ:ܘܣܵܓ̇ܕ̇ܝܼܢ ܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡ ܢܒ̣ܘܼܟܲܕ̇ܢܵܨܲܪ ܡܲܠܟܵܐ.
ܚ:ܘܒ̣ܵܗ̇ ܒܫܵܥܬ̣ܵܐ ܩ̣ܪܸܒ̣ܘ ܓܲܒ̣ܪܹ̈ܐ ܟܲܠܕܼܵܝܹ̈ܐ: ܘܐܸܟܲܠ̣ܘ ܩܲܪ̈ܨܲܝܗܘܿܢ ܕܲܝܗܘܼ̈ܕܼܵܝܹܐ.
ܛ:ܘܐܵܡ̇ܪܝܼܢ ܠܲܢܒ̣ܘܼܟܲܕܼܢܵܨܲܪ ܡܲܠܟܵܐ: ܡܲܠܟܵܐ ܠܥܵܠܲܡ ܚܝܝܼ.
ܝ:ܐܲܢ̄ܬ̇ ܡܲܠܟܵܐ ܦ̣ܩܲܕ̇ܬ̇: ܕܟ̣ܠ ܐ̄ܢܵܫ ܕܢܸܫܡܲܥ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ: ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܢܸܦܸܠ ܘܢܸܣܓ̇ܘܿܕܼ ܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܸܬ̇.
ܝܐ:ܘܡܲܢ ܕܠܵܐ ܢܸܦܸܠ ܘܢܸܣܓ̇ܘܿܕܼ: ܒܵܗ̇ ܒܫܵܥܬ̣ܵܐ ܢܸܫܬ̇ܕܸܐ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.
ܝܒ:ܐܝܼܬ̣ ܬܢܵܢ ܓܲܒ̣ܪܹ̈ܐ ܝܗ̄ܘܼ̈ܕܼܵܝܹܐ ܕܐܲܩܝܼܡܸܬ̇ ܐܸܢܘܿܢ ܥܲܠ ܨܸܒ̣̈ܘܵܬ̣ܵܐ ܕܲܡܕܼܝܼܢܲܬ̣ ܒܵܒܹܠ: ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܓܲܒ̣ܪܹ̈ܐ ܗܵܢܘܿܢ ܠܵܐ ܚܲܫܒ̇ܘܿܟ ܡܲܠܟܵܐ: ܘܠܲܐܠܵܗܵܟ ܠܵܐ ܦܵܠܚ̇ܝܼܢ: ܘܲܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܸܬ̇ ܠܵܐ ܣܵܓ̇ܕ̇ܝܼܢ.
ܝܓ:ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܒܪܘܼܓ̣ܙܵܐ ܘܲܒ̣ܚܸܡܬ̣ܵܐ ܐܸܡܲܪ: ܠܡܲܝܬܵܝܘܼ ܠܫܸܕܼܪܵܟ ܡܝܼܫܵܟ ܘܲܥ̣ܒܸܕܼܢܵܓ̣ܘܿ: ܘܐܲܝܬ̇ܝܼܘ ܐܸܢܘܿܢ ܩܕܼܵܡ ܡܲܠܟܵܐ.
ܝܕ:ܥܢ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܘܐܸܡ̣ܲܪ ܠܗܘܿܢ: ܒܩܘܼܫܬܵܐ ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܠܐܲܠܵܗܝ ܠܵܐ ܦܵܠܚܝܼܢ ܐ̄ܢܬ̇ܘܿܢ: ܘܲܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܹ̇ܬ̣ ܠܵܐ ܣܵܓܕ̇ܝܼܢ ܐ̄ܢܬ̇ܘܿܢ.
ܝܗ:ܗܵܫܵܐ ܐܸܢ ܥܬ̣ܝܼܕܼܝܼܢ ܐ̄ܢܬ̇ܘܿܢ: ܕܲܒ̣ܫܵܥܬ̣ܵܐ ܕܬܸܫ̱ܡܥܘܼܢ ܩܵܠ ܩܲܪܢܵܐ ܘܡܲܫܪܘܿܩܝܼܬ̣ܵܐ: ܘܩܝܼܬ̣ܵܪܵܐ: ܘܟܸܢܵܪܵܐ: ܘܨܸܦܘܿܢܝܵܐ: ܘܟ̣ܠ ܙܢܲܝ̈ ܙܡܵܪܵܐ: ܬܸܦܠܘܼܢ ܘܬܸܣܓ̇ܕܼܘܼܢ ܠܨܲܠܡܵܐ ܕܥܸܒ̣ܕܹ̇ܬ̣: ܘܐܸܢ ܠܵܐ ܬܸܣܓ̇ܕܼܘܼܢ: ܒܵܗ̇ ܒܫܵܥܬ̣ܵܐ ܬܸܫܬ̇ܕܼܘܿܢ ܠܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ: ܘܡܲܢ̣ܘܼ ܐܲܠܵܗܟ̣ܘܿܢ ܕܲܢܦܲܨܝܼܟ̣ܘܿܢ ܡ̣ܢ ܐܝܼܕܲܝ̈.
ܝܘ:ܥܢ̣ܵܘ ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܘܐܵܡ̇ܪܝܼܢ ܠܲܢܒ̣ܘܼܟܲܕܼܢܵܨܲܪ ܡܲܠܟܵܐ: ܠܵܐ ܚܵܫ̇ܚܝܼܢܲܢ ܥܲܠ ܗܵܕܹܐ ܡܸܠܬ̣ܵܐ: ܦܸܬ̣ܓ̣ܵܡܵܐ ܠܲܡܬ̣ܵܒ̣ܘܼܬ̣ܵܟ.
ܝܙ:ܡܸܛܠ ܕܐܝܼܬ̣ܵܘܗܝ ܐܲܠܵܗܲܢ ܕܲܚܢܲܢ ܦܵܠܚ̇ܝܼܢ ܠܹܗ: ܕܗ̤ܘ ܡܨܸܐ ܒܚܲܝܠܵܐ ܠܲܡܦܲܨܵܝܘܼܬܲܢ ܡ̣ܢ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ: ܘܡ̣ܢ ܐܝܼܕܲܝ̈ܟ ܡܲܠܟܵܐ ܢܫܵܘܙܒܲܢ.
ܝܚ:ܬܸܗܘܹܐ ܕܹܝܢ ܝܵܕܲܥ̇ ܡܲܠܟܵܐ: ܕܠܲܐܠܵܗܵܟ ܠܵܐ ܦܵܠܚ̇ܝܼܢܲܢ: ܘܲܠܨܲܠܡܵܐ ܕܕܲܗܒ̣ܵܐ ܕܐܲܩܝܼܡܸܬ̇ ܠܵܐ ܣܵܓ̣ܕ̇ܝܼܢ ܚ̄ܢܲܢ.
ܝܛ:ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ ܐܸܬ̣ܡ̱ܠܝܼ ܚܸܡܬ̣ܵܐ: ܘܙܝܼܘܵܐ ܕܐܲܦܵܘ̈ܗܝ ܐܸܫܬܲܢܝܼ: ܥܲܠ ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܘܐܸܡ̣ܲܪ ܠܡܸܫܓܲܪ ܐܲܬ̇ܘܿܢܵܐ: ܚܲܕܼ ܒܫܲܒ̣ܥܵܐ ܥܲܠ ܡܵܐ ܕܡܸܫܬ̇ܓܲܪ ܗ̄ܘܼܵܐ.
ܟܟ:ܘܲܠܓܲܒ̣ܪܹ̈ܐ ܕܥܲܫܝܼܢܝܼܢ ܒܚܲܝܠܵܐ: ܐܸܡ̣ܲܪ ܕܲܢܦܲܟ̇ܪܘܼܢ ܐܸܢܘܿܢ: ܠܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܘܲܠܡܲܪܡܵܝܘܼ ܐܸܢܘܿܢ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.
ܟܐ:ܗܵܝܕܹ̇ܝܢ ܓܲܒ̣ܪܹ̈ܐ ܗܵܢܘܿܢ: ܦܲܟܲܪܘ ܐܸܢܘܿܢ ܒܫܪ̈ܒܵܠܲܝܗܘܿܢ: ܘܲܒ̣ܦܸܛܫܲܝ̈ܗܘܿܢ: ܘܲܒ̣ܢܲܚܬܲܝ̈ܗܘܿܢ: ܘܲܒ̣ܩܘܼܒ̣ܥܲܝ̈ܗܘܿܢ: ܘܐܲܪܡܝܼܘ ܐܸܢܘܿܢ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ.
ܟܒ:ܡܸܛܠ ܕܡܸܠܲܬ̣ ܡܲܠܟܵܐ ܣܲܪܗܒܲܬ̤: ܘܐܲܬ̇ܘܿܢܵܐ ܫܓ̣ܝܼܪ ܗ̄ܘܼܵܐ ܝܲܬ̇ܝܼܪܵܐܝܼܬ̣: ܘܲܠܓܲܒ̣ܪܹ̈ܐ ܗܵܢ̇ܘܿܢ ܕܐܸܟܲܠ̣ܘ ܩܲܪ̈ܨܲܝܗܘܿܢ ܕܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܩܲܛܠܲܬ̤ ܐܸܢܘܿܢ ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܝܵܩܹܕ̇ܬܵܐ.
ܟܓ:ܘܓܲܒ̣ܪܹ̈ܐ ܗܵܢ̇ܘܿܢ ܬܠܵܬܲܝ̈ܗܘܿܢ: ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܢܦܲܠ̣ܘ ܡܸܨܥܲܬ̣ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ ܟܲܕܼ ܦܟ̣ܝܼܪܝܼܢ.
ܟܕ:ܘܩܵܡ̣ܘ ܗ̄ܘܼܵܘ ܘܲܡܗܲܠܟ̣ܝܼܢ ܒܲܦܟ̣ܵܪ̈ܲܝܗܘܿܢ ܡܸܨܥܲܬ̣ ܫܲܠܗܹܒ̣ܝܼܬ̣ܵܐ ܕܢܘܼܪܵܐ. ܘܲܡܫܲܒ̇ܚܝܼܢ ܗ̄ܘܼܵܘ ܠܐܲܠܵܗܵܐ ܘܲܡܒܲܪܟ̣ܝܼܢ ܗ̄ܘܼܵܘ ܠܡܵܪܝܵܐ.
ܨܠܘܬܐ ܕܚܢܢܝܐ ܘܕܚܒܪ̈ܘܗܝ
ܟܗ:ܘܩܵܝ̣ܡ ܥܲܙܲܪܝܵܐ ܘܲܦ̣ܬܲܚ ܦܘܼܡܹܗ ܠܲܡܒܲܪܵܟ̣ܘܼ ܡܸܨܥܲܬ̣ ܢܘܼܪܵܐ. ܘܲܦ̣ܬܲܚ ܦܘܼܡܹܗ: ܘܨܲܠܝܼ ܘܐܸܡ̣ܲܪ ܗܵܟܲܢܵܐ.
ܟܘ:ܡܒܲܪܲܟ ܐܲܢ̄ܬ̇ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ. ܘܲܡܪܲܡܪܲܡ ܘܲܡܫܲܒܲܚ ܫܡܵܟ ܠܥܵܠܲܡ.
ܟܙ:ܡܸܛܠ ܕܙܲܕ̇ܝܼܩ ܐܲܢ̄ܬ̇ ܒܟ̣ܠ ܡܵܐ ܕܲܥ̣ܒܲܕ̇ܬ̇ ܠܲܢ. ܘܟ̣ܠܗܘܿܢ ܥܒ̣ܵܕܲܝ̈ܟ ܒܩܘܼܫܬܵܐ ܘܲܬ̣ܪ̈ܝܼܨܵܢ ܐܘܼܪ̈ܚܵܬ̣ܵܟ. ܘܟ̣ܠܗܘܿܢ ܕܝܼܢܲܝ̈ܟ ܡܗܲܝܡܢܝܼܢ.
ܟܚ:ܡܸܛܠ ܕܲܒ̣ܕܼܝܼܢܵܐ ܗ̄ܘܼ ܕܩܘܼܫܬܵܐ ܥ̣ܒܲܕ̇ܬ̇ ܠܲܢ ܒܟ̣ܠܡܵܐ ܕܐܲܝܬ̇ܝܼܬ̇ ܥܠܲܝܢ: ܘܥܲܠ ܡܕܼܝܼܢ̄ܬܵܐ ܩܲܕ̇ܝܼܫܬܵܐ ܕܐܲܒ̣ܵܗܲܝ̈ܢ ܥܲܠ ܐܘܿܪܸܫܠܸܡ. ܡܸܛܠ ܕܲܒ̣ܟܹܐܢܘܼܬ̣ܵܐ ܐܲܝ̣ܬ̇ܝܼܬ̇ ܥܠܲܝܢ ܟܠܗܹܝܢ ܗܵܠܹܝܢ.
ܟܛ:ܡܸܛܠ ܚܵܘ̈ܒܲܝܢ ܕܲܚ̣ܛܲܝܢ ܘܐܲܪܫܲܥ̣ܢ ܩܕܼܵܡܲܝܟ. ܘܐܲܪܚܸܩ̣ܢ ܡܸܢܵܟ: ܘܲܥ̣ܒܲܪܢ ܥܲܠ ܡܹܐܡܪܵܟ. ܘܲܚ̣ܛܲܝܢ ܠܵܟ ܒܟ̣ܠ.
ܠ:ܘܲܠܦܘܼܩܕܵܢܲܝ̈ܟ ܠܵܐ ܫ̣ܡܲܥܢ. ܘܠܵܐ ܢ̣ܛܲܪܢ ܘܠܵܐ ܥ̣ܒܲܕܼܢ ܐܲܝܟ ܡܸܕܸ̇ܡ ܕܦܲܩܸܕ̇ܬܵܢ ܕܢܸܛܐܲܒ̣ ܠܲܢ.
ܠܐ:ܘܟ̣ܠ ܡܸܕܸ̇ܡ ܕܐܲܝܬ̇ܝܼܬ̇ ܥܠܲܝܢ ܘܟ̣ܠܡܸܕܸ̇ܡ ܕܲܥ̣ܒܲܕ̇ܬ̇ ܠܲܢ. ܒܕܼܝܼܢܵܐ ܗ̄ܘܼ ܟܹܐܢܵܐ ܥ̣ܒܲܕ̇ܬ̇ ܠܲܢ.
ܠܒ:ܘܐܲܫܠܸܡ̣ܬܵܢ ܒܐܝܼܕܼܵܐ ܕܲܒ̣ܥܸܠܕ̇ܒ̣ܵܒܲܝ̈ܢ ܥܵܘܿܠܹ̈ܐ ܕܪܲܚܝܼܩܝܼܢ ܡܸܢܵܟ. ܘܲܠܡܵܪܘܼܬ̣ܵܐ ܕܡܲܠܟ̇ܘܼܬ̣ܵܐ ܪܲܫܝܼܥܬܵܐ. ܕܒ̣ܝܼܫܵܐ ܡ̣ܢ ܟܠܗܹܝܢ ܡܲܠ̈ܟ̇ܘܵܬ̣ܵܐ ܕܐܲܪܥܵܐ.
ܠܓ:ܘܗܵܫܵܐ ܡܵܪܝܵܐ ܠܲܝܬ̇ ܠܲܢ ܡܲܦ̮ܬܲܚ ܦܘܼܡܵܐ ܩܕܼܵܡܲܝܟ. ܡܸܛܠ ܒܸܗܬ̇ܬ̣ܵܐ ܘܚܸܣܕܵܐ ܕܲܗܘ̤ܵܐ ܠܥܲܒ̣ܕܲܝ̈ܟ ܘܲܠܕܼܵܚܠܲܝ̈ܟ.
ܠܕ:ܠܵܐ ܬܲܫ̱ܠܡܲܢ ܥܕܲܡܵܐ ܠܚܲܪܬ̣ܵܐ ܡܸܛܠ ܫܡܵܟ. ܘܠܵܐ ܬܒܲܛܸܠ ܕܝܵܬܸܩܹܐ ܕܝܼܠܵܟ.
ܠܗ:ܘܠܵܐ ܬܲܪܚܸܩ ܪ̈ܲܚܡܲܝܟ ܘܛܲܝܒ̇ܘܼܬ̣ܵܟ ܡܸܢܲܢ: ܡܸܛܠ ܐܲܒ̣ܪܵܗܵܡ ܪܵܚ̇ܡܵܟ: ܘܡܸܛܠ ܐܝܼܣܚܵܩ ܥܲܒ̣ܕܵܟ: ܘܡܸܛܠ ܝܑܼܣܪܵܝܹܠ ܩܲܕ̇ܝܼܫܵܟ.
ܠܘ:ܕܲܡܠܲܟ̣ܬ̇ ܠܗܘܿܢ ܕܬܲܣܓܹ̇ܐ ܙܲܪ̱ܥܗܘܿܢ ܐܲܝܟ ܟܵܘܟ̇ܒܹ̈ܐ ܕܲܫܡܲܝܵܐ. ܘܐܲܝܟ ܚܵܠܵܐ ܕܥܲܠ ܣܸܦܬܹܗ ܕܝܲܡܵܐ.
ܠܙ:ܡܸܛܠ ܕܗܵܫܵܐ ܡܵܪܝܵܐ: ܐܸܬ̣ܡܲܟܟ̣ܢ ܡ̣ܢ ܟܠܗܘܿܢ ܥܲܡܡܹ̈ܐ. ܘܲܚܢܲܢ ܡܒܲܕ̇ܪܝܼܢܲܢ ܝܵܘܡܵܢܵܐ ܒܟ̣ܠܵܗ̇ ܐܲܪܥܵܐ. ܡܸܛܠ ܚܵܘ̈ܒܲܝܢ ܘܲܚܛܵܗܲܝ̈ܢ.
ܠܚ:ܘܠܵܐ ܐܝܼܬ̣ ܒܙܲܒ̣ܢܵܐ ܗܵܢܵܐ ܠܵܐ ܪܹܫܵܐ ܘܠܵܐ ܫܲܠܝܼܛܵܐ. ܘܠܵܐ ܢܒ̣ܝܼܵܐ ܘܠܵܐ ܡܕܲܒ̇ܪܵܢܵܐ. ܘܠܵܐ ܡܲܕܼܒ̇ܚܵܐ ܘܠܵܐ ܕܸܒ̣ܚܹ̈ܐ ܘܠܵܐ ܩܘܼܪ̈ܒܵܢܹܐ.ܘܠܵܐ ܕܘܼܟ̇ܬ̣ܵܐ ܕܢܲܣܸܩ ܒܸܣܡܹ̈ܐ ܐܵܘ ܕܸܒ̣ܚ̱ܬ̣ܵܐ. ܘܢܸܫܟܲܚ ܚܢܵܢܵܐ ܘܪ̈ܲܚܡܹܐ.
ܠܛ:ܐܸܠܵܐ ܒܠܸܒܵܐ ܫܚܝܼܩܵܐ ܘܲܒ̣ܪܘܼܚܵܐ ܡܲܟ̇ܝܼܟ̣ܬܵܐ ܗܵܐ ܐܸܬ̣ܩܲܪܲܒ̣ܢ ܠܝܲܩܕܵܢܵܐ ܕܢܘܼܪܵܐ.
ܡ:ܟܲܕܼ ܒܵܥܹ̇ܝܢܲܢ ܕܝܲܬܝܼܪ ܡ̣ܢ ܬܵܘܪܹ̈ܐ ܘܕܸܟ̣ܪܹ̈ܐ: ܘܐܸܡܪܹ̈ܐ ܫܲܡܝܼܢܹ̈ܐ ܣܲܓ̇ܝܼ̈ܐܹܐ: ܗܵܟܲܢܵܐ ܢܸܗܘܹܐ ܩܘܼܪܒܵܢܵܐ ܕܢܲܦ̮ܫܵܢ ܝܵܘܡܵܢܵܐ. ܘܠܵܐ ܢܸܒ̣ܗ̱ܬ̣ܘܼܢ ܥܲܒ̣ܕܲܝ̈ܟ. ܡܸܛܠ ܕܠܵܐ ܒܵܗ̇ܬ̇ܝܼܢ ܐܲܝܠܹܝܢ ܕܲܬ̣ܟ̣ܝܼܠܝܼܢ ܥܠܲܝܟ.
ܡܐ:ܐܵܦ ܗܵܫܵܐ ܚܢܲܢ ܐܸܬܲܝܢ ܒܵܬ̣ܪܵܟ ܒܠܸܒܵܐ ܫܲܠܡܵܐ. ܘܲܕܼܚܸܠ̣ܢ ܡܸܢܵܟ ܘܐܲܦܲܝ̈ܟ ܒܵܥܹ̇ܝܢܲܢ.
ܡܒ:ܡܵܪܝܵܐ ܠܵܐ ܬܲܒ̣ܗ̄ܬܲܢ. ܐܸܠܵܐ ܥܒܸܕܼ ܥܲܡܲܢ ܐܲܝܟ ܣܘܿܓ̣ܵܐܐ ܕܛܲܝ̈ܒܘܼܬ̣ܵܟ ܘܲܕܼܪ̈ܲܚܡܲܝܟ ܣܲܓ̇ܝܼ̈ܐܹܐ.
ܡܓ:ܘܲܦܪܘܿܩܲܝܢ ܐܲܝܟ ܣܘܿܓ̣ܵܐܐ ܕܬܸܕܼܡܪ̈ܵܬܲܟ. ܘܗܲܒ̣ ܬܸܫܒ̇ܘܿܚܬܵܐ ܠܲܫܡܵܟ ܡܵܪܝܵܐ ܡܸܛܠ ܫܡܵܟ ܪܲܒܵܐ.
ܡܕ:ܘܢܸܒ̣ܗ̱ܬ̣ܘܼܢ ܟܠܗܘܿܢ ܐܲܝܠܹܝܢ ܕܐܵܡ̇ܪܝܼܢ ܒܝܼ̈ܫܵܬ̣ܵܐ ܥܲܠ ܥܲܒ̣̈ܕܲܝܟ. ܘܢܸܒ̣ܗ̱ܬ̣ܘܼܢ ܒܟ̣ܠܵܗ̇ ܓܲܢ̄ܒܵܪܘܼܬ̣ܗܘܿܢ. ܘܚܲܝܠܗܘܿܢ ܢܸܫܬ̇ܒܸܩ.
ܡܗ:ܘܢܸܕ̇ܥܘܼܢ ܕܐܲܢ̄ܬ̇ ܗ̄ܘܼ ܚܲܕܼ ܐܲܠܵܗܵܐ ܒܲܠܚܘܿܕܲܝܟ ܘܲܡܫܲܒܲܚ ܐܲܢ̄ܬ̇ ܒܟ̣ܠܗܘܿܢ ܥܒ̣ܵܕܲܝ̈ܟ.
ܡܘ:ܘܠܵܐ ܫܵܠܹ̇ܝܢ ܗ̄ܘܼܵܘ ܗܵܢ̇ܘܿܢ ܕܡܵܘܩ̄ܕܼܝܼܢ ܗ̄ܘܼܵܘ ܐܲܬ̇ܘܿܢܵܐ ܕܢܘܼܪܵܐ. ܘܫܵܕܼܝܼܢ ܗ̄ܘܼܵܘ ܒܹܗ ܢܸܦ̮ܛܵܐ. ܘܙܸܦ̮ܬܵܐ ܘܟܸܒ̣ܪܝܼܬ̣ܵܐ. ܘܲܩܢܲـ̈ـܝܵܐ. ܘܲܫܒܸܫ̈ܬܹ̇ܐ.
ܡܙ:ܘܝܸܗ̄ܒܲܬ̤ ܩܵܠܵܐ ܫܲܠܗܹܒ̣ܝܼܬ̣ܵܐ ܕܢܘܼܪܵܐ. ܘܣܸܠܩܲܬ̤ ܠܥܸܠ ܡ̣ܢ ܐܲܬ̇ܘܿܢܵܐ ܐܲܪܒ̇ܥܝܼܢ ܘܲܬ̣ܫܲܥ ܐܲܡ̈ܝܼܢ.
ܡܚ:ܘܲܗܘ̤ܵܬ̣ ܡܵܪܩ̄ܕܼܵܐ ܘܡܵܘܒ̇ܕܼܵܐ ܢܘܼܪܵܐ. ܠܟ̣ܠܡܲܢ ܕܡܸܫܟ̇ܚܵܐ ܚܕܼܵܪܵܘܗܝ ܕܐܲܬ̇ܘܿܢܵܐ. ܡ̣ܢ ܟܲܠܕܼܵܝܹ̈ܐ ܘܐܵܟ̣ܠܲܝ̈ ܩܲܪ̈ܨܹܐ.
ܡܛ:ܡܲܠܲܐܟ̣ܵܐ ܕܹܝܢ ܕܛܲܠܵܐ ܢ̣ܚܸܬ̣ ܥܲܡ ܚܲܢܲܢܝܵܐ ܘܥܲܙܲܪܝܵܐ ܘܡܝܼܫܵܐܹܝܠ ܠܓ̣ܵܘ ܐܲܬ̇ܘܿܢܵܐ ܕܢܘܼܪܵܐ. ܘܕܲܚ̣ܩܵܗ̇ ܠܫܲܠܗܹܒ̣ܝܼܬ̣ܵܐ ܕܢܘܼܪܵܐ ܡ̣ܢ ܐܲܬ̇ܘܿܢܵܐ.
ܢܢ:ܘܲܥ̣ܒܲܕܼ ܒܲܡܨܲܥܬܹܗ ܕܐܲܬ̇ܘܿܢܵܐ ܐܲܝܟ ܪܘܼܚܵܐ ܕܛܲܠܵܐ. ܘܠܵܐ ܩܸܪܒܲܬ̤ ܠܗܘܿܢ ܢܘܼܪܵܐ ܐܵܦܠܵܐ ܩܠܝܼܠ. ܘܠܵܐ ܐܲܟ̣ܪ̱ܝܲܬ̤ ܠܗܘܿܢ. ܘܠܵܐ ܐܲܠܨܲܬ̤ ܐܸܢܘܿܢ.
ܢܐ:ܗܵܝܕܹ̇ܝܢ ܬܠܵܬ̣ܲܝ̈ܗܘܿܢ ܡ̣ܢ ܚܲܕܼ ܦܘܼܡܵܐ ܡܫܲܒ̇ܚܝܼܢ ܗ̄ܘܼܵܘ ܘܲܡܒܲܪܟ̣ܝܼܢ ܠܐܲܠܵܗܵܐ ܡ̣ܢ ܓܵܘ ܐܲܢ̄ܬ̇ܘܿܢܵܐ ܕܢܘܼܪܵܐ ܘܐܵܡ̇ܪܝܼܢ.
ܢܒ:ܡܒܲܪܲܟ ܐܲܢ̄ܬ̇ ܡܵܪܝܵܐ ܐܲܠܵܗܵܐ ܕܐܲܒ̣ܵـ̈ـܗܵܬܲܢ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ. ܡܒܲܪܲܟ ܫܡܵܐ ܕܬܸܫܒ̇ܘܿܚܬܵܟ ܩܲܕ̇ܝܼܫܵܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ
ܢܓ:ܡܒܲܪܸܟ ܐܲܢ̄ܬ̇ ܒܗܲܝܟ̇ܠܵܐ ܕܩܘܼܕܼܫܵܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.
ܢܕ:ܡܒܲܪܲܟ ܐܲܢ̄ܬ̇ ܕܚܵܙܹ̇ܐ ܐܲܢ̄ܬ̇ ܬܗܘܿܡܹ̈ܐ. ܘܝܵܬܹ̇ܒ̣ ܐܲܢ̄ܬ̇ ܥܲܠ ܟܪ̈ܘܿܒܹܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.
ܢܗ:ܡܒܲܪܲܟ ܬܲܢ̄ܬ̇ ܥܲܠ ܟܘܼܪܣܲܝ ܡܲܠܟ̇ܘܼܬ̣ܵܟ ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.
ܢܘ:ܡܒܲܪܲܟ ܐܲܢ̄ܬ̇ ܒܲܪܩܝܼܥܵܐ ܕܲܫܡܲܝܵܐ. ܡܫܲܒܲܚ ܐܲܢ̄ܬ̇ ܘܲܡܪܲܡܪܲܡ ܐܲܢ̄ܬ̇ ܠܥܵܠܲܡ.
ܢܙ:ܒܲܪܸܟ̣ܘ ܟܠܗܘܿܢ ܥܒ̣ܵܕܼܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܢܚ:ܒܲܪܸܟ̣ܘ ܫܡܲܝܵܐ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܢܛ:ܒܲܪܸܟ̣ܘ ܟܠܗܘܿܢ ܡܲܠܲܐܟ̣ܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣ:ܒܲܪܸܟ̣ܘ ܟܠܗܘܿܢ ܚܲܝ̈ܠܵܘܵܬܹܗ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܐ:ܒܲܪܸܟ̣ܘ ܡܲـ̈ـܝܵܐ ܕܲܠܥܸܠ ܡ̣ܢ ܫܡܲܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܒ:ܒܲܪܸܟ̣ܘ ܫܸܡܫܵܐ ܘܣܲܗܕܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܓ:ܒܲܪܸܟ̣ܘ ܟܵܘܟ̇ܒܹ̈ܐ ܕܒܲܫܡܲܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܕ:ܒܲܪܸܟ̣ܘ ܡܸܛܪܵܐ ܘܛܲܠܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܗ:ܒܲܪܸܟ̣ܘ ܡܲـ̈ـܝܵܐ ܘܪ̈ܘܼܚܹܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܘ:ܒܲܪܸ̈ܟܸܝܢ ܟܠ ܢܸܫ̈ܡܵܬ̣ܵܐ ܕܙܲܕ̇ܝܼܩܹܐ ܠܡܵܪܝܵܐ: ܫܲܒ̇ܚܵܝ̈ܘܗܝ ܘܪܲܡ̱ܪܡܵܝܗܝ ܠܥܵܠܲܡ.
ܣܙ:ܒܲܪܸܟ̣ܘ ܢܘܼܪܵܐ ܘܚܘܼܡܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܚ:ܒܲܪܸܟ̣ܘ ܠܲܝ̈ܠܵܘܵܬ̣ܵܐ ܘܐܝܼܡܵܡܹ̈ܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܣܛ:ܒܲܪܸܟ̣ܘ ܢܘܼܗܪܵܐ ܘܚܸܫܘܿܟ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥ:ܒܲܪܸܟ̣ܘ ܩܘܼܪܫܵܐ ܘܚܘܼܡܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܐ:ܒܲܪܸܟ̣ܘ ܩܲܝܛܵܐ ܘܣܲܬ̣ܘܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܒ:ܒܲܪܸܟ̣ܘ ܬܲܠܓܵܐ ܘܲܓ̣ܠܝܼܕܼܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܓ:ܒܲܪܸܟ̣ܘ ܒܲܪ̈ܩܹܐ ܘܲܥܢܵܢܹ̈ܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܕ:ܒܲܪܸܟ̣ܘ ܟܠܵܗ̇ ܐܲܪܥܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܗ:ܒܲܪܸܟ̣ܘ ܛܘܼܪܹ̈ܐ ܘܪ̈ܵܡܵܬ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܘ:ܒܲܪܸܟ̣ܘ ܟܠܗܘܿܢ ܥܘܼܦܝܵܢܹ̈ܐ ܕܐܲܥܪܵܐ ܠܡܵܪܝܵܐ: ܒܲܪܸܟ̣ܘ ܟܠ ܕܨܵܡܲܚ ܥܲܠ ܐܲܪܥܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܙ:ܒܲܪܸܟ̣ܘ ܝܲܡܡܹ̈ܐ ܘܢܲܗܪ̈ܵܘܵܬ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܚ:ܒܲܪܸܟ̣ܘ ܡܲܒ̇ܘܼ̈ܥܹܐ ܘܟ̣ܠܗܹܝܢ ܥܲܝ̈ܢܵܬ̣ܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܥܛ:ܒܲܪܸܟ̣ܘ ܢܘܼܢܹ̈ܐ ܘܟ̣ܠ ܕܪܵܚܹ̇ܫ ܒܡܲـ̈ـܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦ:ܒܲܪܸܟ̣ܘ ܟܠܵܗ̇ ܦܵܪܲܚܬ̣ܵܐ ܕܲܫܡܲܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦܐ:ܒܲܪܸܟ̣ܘ ܟܠܵܗ̇ ܚܲܝ̄ܘܬ̣ܵܐ ܘܲܒ̣ܥܝܼܪܵܐ ܠܡܵܪܝܵܐ: ܒܲܪܸܟ̣ܘ ܟܠ ܕܪܵܚܹ̇ܫ ܥܲܠ ܐܲܪܥܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦܒ:ܒܲܪܸܟ̣ܘ ܒܢܲܝ̈ܢܵܫܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦܓ:ܒܲܪܸܟ̣ܘ ܕܒܹܝܬ̣ ܝܑܼܣܪܵܝܹܠ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦܕ:ܒܲܪܸܟ̣ܘ ܟܵܗܢܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦܗ:ܒܲܪܸܟ̣ܘ ܥܲܒ̣ܕܵܘ̈ܗܝ ܕܡܵܪܝܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦܘ:ܒܲܪܸ̈ܟܹܝܢ ܟܠܗܹܝܢ ܪ̈ܘܼܚܵܬ̣ܵܐ ܘܢܲܦ̮ܫܵܬ̣ܵܐ ܕܙܲܕ̇ܝܼܩܹ̈ܐ ܠܡܵܪܝܵܐ: ܫܲܒ̇ܚܵܝ̈ܗܝ ܘܪܲܡ̱ܪ̈ܡܵܝܗܝ ܠܥܵܠܲܡ.
ܦܙ:ܒܲܪܸܟ̣ܘ ܬܲܡܝܼܡܹ̈ܐ ܘܡܲܟ̇ܝܼ̈ܟܲܝ ܠܸܒܵܐ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܦܚ:ܒܲܪܸܟ̣ܘ ܚܲܢܲܢܝܵܐ ܘܥܲܙܲܪܝܵܐ ܘܡܝܼܫܵܐܝܹܠ ܠܡܵܪܝܵܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ. ܡܸܛܠ ܕܫܵܘܙܒܲܢ ܡ̣ܢ ܡܵܘܬܵܐ. ܘܡ̣ܢ ܐܝܼ̈ܕܲܝ ܫܝܘܿܠ ܐܲܚܢܲܢ. ܘܦܲܨܝܲܢ ܡ̣ܢ ܫܲܠܗܹܒ̣ܝܼܬ̣ܵܐ ܕܝܵܩ̇ܕܵܐ. ܘܡ̣ܢ ܡܸܨܥܲܬ̣ ܢܘܼܪܵܐ ܐܲܦ̣ܩܲܢ.
ܦܛ:ܐܵܘܕܵܘ ܠܡܵܪܝܵܐ ܕܒܲܣܝܼܡ ܗ̄ܘܼ ܘܲܠܥܵܠܲܡ ܛܲܝܒ̇ܘܼܬܹܗ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ.
ܨ:ܒܲܪܸܟ̣ܘ ܟܠܗܘܿܢ ܕܵܚܠܵܘ̈ܗܝ ܕܐܲܠܵܗܵܐ ܠܐܲܠܵܗܵܐ ܕܐܲܠܵܗܹ̈ܐ: ܫܲܒ̇ܚܘܼܗܝ ܘܪܲܡ̱ܪܡܘܼܗܝ ܠܥܵܠܲܡ. ܐܵܘܕܵܘ ܠܡܵܪܝܵܐ ܕܛܵܒ̣ ܗ̄ܘܼ ܘܲܠܥܵܠܲܡ ܛܲܝܒ̇ܘܼܬܹܗ.
ܨܐ:ܗܵܝܕܹ̇ܝܢ ܢܒ̣ܘܼܟܲܕܼܢܵܨܲܪ ܡܲܠܟܵܐ ܬ̣ܘܲܗ ܘܩ̣ܵܡ ܒܕܸܚ̱ܠܬ̣ܵܐ ܪܲܒ̇ܬ̣ܵܐ: ܘܲܥܢ̣ܵܐ ܘܐܸܡ̣ܲܪ ܠܪܵܘܪ̈ܒ̣ܵܢܵܘܗܝ: ܠܵܐ ܓܲܒ̣ܪܹ̈ܐ ܬܠܵܬ̣ܵܐ ܐܲܪܡܝܼܢ ܒܓ̣ܵܘ ܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ ܟܲܕܼ ܦܟ̣ܝܼܪܝܼܢ: ܥܢ̣ܵܘ ܘܐܵܡ̇ܪܝܼܢ ܠܡܲܠܟܵܐ: ܐܹܝܢ ܒܩܘܼܫܬܵܐ ܡܲܠܟܵܐ.
ܨܒ:ܥܢ̣ܵܐ ܡܲܠܟܵܐ ܘܐܸܡ̣ܲܪ ܗܵܐ ܚܵܙܹ̇ܐ ܐ̄ܢܵܐ ܓܲܒ̣ܪܹ̈ܐ ܟܲܕܼ ܫܪܹܝܢ: ܘܲܡܗܲܠܟ̣ܝܼܢ ܒܓ̣ܵܘ ܢܘܼܪܵܐ: ܘܲܚܒ̣ܵܠܵܐ ܠܲܝܬ̇ ܒܗܘܿܢ: ܘܚܸܙܘܹܗ ܕܲܪܒ̣ܝܼܥܵܝܵܐ ܕܵܡܹ̇ܐ ܠܒܲܪ ܐܲܠܵܗ̈ܝܼܢ.
ܨܓ:ܗܵܝܕܹ̇ܝܢ ܩ̣ܪܸܒ̣ ܢܒ̣ܘܼܟܲܕܼܢܵܨܲܪ ܡܲܠܟܵܐ ܠܬܲܪܥܵܐ ܕܐܲܬ̇ܘܿܢܵܐ ܕܢܘܼܪܵܐ ܝܵܩܹܕ̇ܬܵܐ: ܘܲܥܢ̣ܵܐ ܘܐܸܡܲܪ: ܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ: ܥܲܒ̣ܕܵܘ̈ܗܝ ܕܐܲܠܵܗܵܐ ܡܪܲܝܡܵܐ ܦܘܿܩܘ ܬܵܘ. ܗܵܝܕܹ̇ܝܢ ܢܦܲܩ̣ܘ ܫܸܕܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ ܡ̣ܢ ܓܵܘ ܐܲܬ̇ܘܿܢܵܐ ܕܢܘܼܪܵܐ.
ܨܕ:ܘܐܸܬ̣ܟܲܢܲܫܘ ܥܲܡܡܹ̈ܐ ܟܠܗܘܿܢ: ܘܪ̈ܲܒܲܝ ܚܲܝ̈ܠܹܐ ܘܫܲܠܝܼܛܵܢܹ̈ܐ ܘܡܵܪ̈ܵܘܵܬ̣ܵܐ ܘܪܵܘܪ̈ܒܵܢܹܐ ܕܡܲܠܟܵܐ: ܘܚܵܙܹ̇ܝܢ ܗ̄ܘܼܵܘ ܠܓܲܒ̣ܪܹ̈ܐ ܗܵܢܘܿܢ: ܕܠܵܐ ܐܸܫܬܲܠܛܲܬ̤ ܢܘܼܪܵܐ ܒܒܸܣ̱ܪܗܘܿܢ: ܘܣܲܥܪܵܐ ܕܪܹܫܗܘܿܢ ܠܵܐ ܐܸܬ̣ܚܲܪܲܟ: ܘܫܲܪ̈ܒܵܠܲܝܗܘܿܢ ܠܵܐ ܝܑܼܩܸܕܼܘ: ܘܪܹܝܚܵܐ ܕܢܘܼܪܵܐ ܠܵܐ ܥܕܼܵܐ ܒܗܘܿܢ.
ܨܗ:ܥܢ̣ܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ ܘܐܸܡܲܪ: ܡܒܲܪܲܟ ܗ̄ܘܼ ܐܲܠܵܗܗܘܿܢ ܕܫܸܕܼܪܵܟ ܘܡܝܼܫܵܟ ܘܲܥܒܸܕܼܢܵܓ̣ܘܿ: ܕܫܲܕܲܪ ܡܲܠܲܐܟܹܗ ܘܦܲܨܝܼ ܠܥܲܒ̣ܕܵܘ̈ܗܝ ܕܐܸܬ̇ܬ̇ܟܸܠܘ ܥܠܵܘܗܝ: ܘܡܸܠܲܬ̣ ܡܲܠܟܵܐ ܐܲܣ̣ܓܝܼܘ: ܘܝܲܗ̄ܒ̣ܘ ܓܘܼܫ̱ܡܗܘܿܢ ܕܠܵܐ ܢܸܦܠ̱ܚܘܼܢ ܘܠܵܐ ܢܸܣܓ̇ܕܼܘܼܢ ܠܟ̣ܠ ܐܲܠܵܗ: ܐܸܠܵܐ ܐܸܢ ܠܐܲܠܵܗܗܘܿܢ.
ܨܘ:ܘܗܵܟܲܢܵܐ ܦܵܩܹ̇ܕܼ ܐ̄ܢܵܐ: ܕܟ̣ܠ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ: ܕܲܢܓܲܕܸ̇ܦ ܥܲܠ ܐܲܠܵܗܗܘܿܢ ܕܫܸܕܼܪܵܟ ܘܡܝܼܫܵܟ ܘܲܥܒܸܕܢܵܓ̣ܘܿ: ܗܲܕܵܡ ܗܲܕܵܡ ܢܸܬ̣ܦܲܣܩܘܼܢ: ܘܒ̣ܵܬܲܝ̈ܗܘܿܢ ܢܸܬ̣ܒܲܙܙܘܼܢ: ܡܸܛܠ ܕܠܲܝܬ̇ ܐܲܠܵܗ ܐ̄ܚܪܹܝܢ ܕܡܸܫܟܲܚ ܠܲܡܫܵܘܙܵܒ̣ܘܼ ܗܵܟܲܢܵܐ.
ܨܙ:ܗܵܝܕܹ̇ܝܢ ܐܵܘܪܸܒ̣ ܡܲܠܟܵܐ ܠܫܸܕܼܪܵܟ ܡܝܼܫܵܟ ܘܲܥܒܸܕܼܢܵܓ̣ܘܿ ܥܲܠ ܐܲܬ̣ܪܵܐ ܕܒ̣ܵܒܹܠ.
ܩܹܦܵܠܹܐܘܿܢ:ܕ.
ܐ:ܢܒ̣ܘܼܟܲܕܼܢܵܨܲܪ ܡܲܠܟܵܐ: ܟܬܲܒ̣ ܠܟ̣ܠ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ ܕܥܵܡ̇ܪܝܼܢ ܒܟ̣ܠܵܗ̇ ܐܲܪܥܵܐ: ܫܲܝܢܵܐ ܢܸܣܓܸ̇ܐ ܠܟ̣ܘܿܢ.
ܒ:ܐܵܬ̣̈ܘܵܬ̣ܵܐ ܘܬܸܕܼܡܪ̈ܵܬ̣ܵܐ: ܕܲܥܒܲܕܼ ܐܲܠܵܗܵܐ ܡܪܲܝܡܵܐ ܫܦܲܪ ܩܕܼܵܡܲܝ ܠܲܡܚܵܘܿܝܘܼ.
ܓ:ܐܲܬ̣̈ܘܵܬܹܗ ܟܡܵܐ ܪܵܘܪ̈ܒ̣ܵܢ: ܘܬܸܕܼܡܪ̈ܵܬܹܗ ܟܡܵܐ ܥܲܫ̈ܝܼܢܲܢ: ܡܲܠܟ̇ܘܼܬܹܗ ܡܲܠܟ̇ܘܼܬ̣ ܥܵܠܲܡ: ܘܫܘܼܠܛܵܢܹܗ ܠܕܼܵܪܕܵܪ̈ܝܼܢ.
ܕ:ܐܸܢܵܐ ܢܒ̣ܘܼܟܲܕܼܢܵܨܲܪ ܫܠܸܐ ܗ̄ܘܹ̇ܝܬ̣ ܒܒܲܝܬ̇ܝ: ܘܢܝܼܚ ܒܗܲܝܟܲܠܝ.
ܗ:ܘܚܸܠܡܵܐ ܚܙܹ̇ܝܬ̣: ܘܐܸܬ̇ܕܲܠܚܹ̇ܬ̣: ܘܚܸܙܘܹ̈ܐ ܕܪܹܫܝ ܕܲܠ̣ܚܘܼܢܝ.
ܘ:ܘܐܸܢܵܐ ܦܸܩ̇ܕܹ̇ܬ̣ ܠܡܲܥܵܠܘܼ ܩܕܼܵܡܲܝ ܠܟ̣ܠܗܘܿܢ ܚܲܟ̇ܝܼܡܹ̈ܐ ܕܒ̣ܵܒܹܠ: ܕܲܦܫܵܪܵܐ ܕܚܸܠܡܵܐ ܢܚܵܘܿܢܵܢܝ.
ܙ:ܘܥܲܠ̣ܘ ܩܕܼܵܡܲܝ ܚܲܪ̈ܵܫܹܐ: ܘܐܵܫܘܿܦܹ̈ܐ: ܘܲܡܓ̣ܘܼܫܹ̈ܐ: ܘܟܲܠܕܵܝܹ̈ܐ: ܘܐܸܡܲܪܬܹ̇ܗ ܠܚܸܠܡܵܐ ܩܕܼܵܡܲܝܗܘܿܢ: ܘܲܦܫܵܪܹܗ ܠܵܐ ܐܵܘܕ̇ܥܘܼܢܝ.
ܚ:ܥܕܲܡܵܐ ܕܥܲܠ ܩܕܼܵܡܲܝ ܕܵܢܝܼܐܹܝܠ ܗܵܢܵܐ ܕܲܫܡܹܗ ܒܹܠܛܫܵܨܲܪ ܥܲܠ ܫܸܡ ܐܲܠܵܗܝ: ܕܪܘܼܚ ܐܲܠܵܗܝܼ̈ܢ ܩܲܕ̇ܝܼܫܝܼܢ ܐܝܼܬ̣ ܒܹܗ: ܘܚܸܠܡܵܐ ܩܕܼܵܡܵܘܗܝ ܐܸܡ̇ܪܹܬ̣.
ܛ:ܒܹܠܛܫܵܨܲܪ ܪܲܒ̇ ܚܲܟ̇ܝܼܡܹ̈ܐ ܕܐܸܢܵܐ ܝܵܕܲܥ̇ ܐ̄ܢܵܐ ܕܪܘܼܚܝ ܐܲܠܵܗܝܼ̈ܢ ܩܲܕ̇ܝܼܫܝܼܢ ܐܝܼܬ̣ ܒܵܟ ܘܟ̣ܠ ܐ̄ܪܵܙ ܠܵܐ ܐܸܬ̣ܟܲܣܝܼ ܡܸܢܵܟ: ܒܚܸܙܘܵܐ ܕܚܸܠܡܝ: ܚܵܙܹ̇ܐ ܐ̄ܢܵܐ ܚܸܙܘܵܐ ܕܪܹܫܝ: ܘܲܦܫܵܪܹܗ ܐܲܢ̄ܬ̇ ܐܸܡܲܪ ܠܝܼ.
ܝ:ܚܵܙܹ̇ܐ ܗ̄ܘܹ̇ܝܬ̣ ܒܡܲܫܟܲܒ̣ܝ: ܐܝܼܠܵܢܵܐ ܡܸܨܥܲܬ̣ ܐܲܪܥܵܐ: ܪܵܘܡܹܗ ܣܲܓ̇ܝܼ.
ܝܐ:ܘܐܸܬ̇ܬ̇ܪܝܼܡ ܐܝܼܠܵܢܵܐ ܘܲܥ̣ܫܸܢ: ܘܪܵܘܡܹܗ ܡ̇ܛ̣ܵܐ ܥܕܲܡܵܐ ܠܲܫܡܲܝܵܐ: ܘܚܸܙܘܹܗ ܠܟ̣ܠ ܣܵܘܦܹ̈ܝܗ̇ ܕܐܲܪܥܵܐ.
ܝܒ:ܛܲܪ̈ܦܵܘܗܝ ܫܲܦܝܼܪܝܼܢ: ܘܐܸܒܹ̇ܗ ܣܲܓ̇ܝܼ: ܘܡܹܐܟ̣ܘܼܠܬܵܐ ܠܟ̣ܠ ܒܣܲܪ ܐܝܼܬ̣ ܒܹܗ: ܬܚܘܿܬ̣ܵܘܗܝ ܥܵܡ̇ܪ̈ܵܢ ܟܠܗܹܝܢ ܚܲܝ̈ܘܵܬ̣ܵܐ ܕܒܲܪܵܐ: ܘܲܒ̣ܣܵܘܟܵܘ̈ܗܝ ܫܲܟ̇ܝܼܢ ܟܠܹܗ ܥܵܘܦܵܐ ܕܲܫܡܲܝܵܐ: ܘܡܸܢܹܗ ܡܸܬ̣ܬܲܪܣܸܐ ܗ̄ܘܼܵܐ ܟܠ ܒܣܲܪ.
ܝܓ:ܚܵܙܹ̇ܐ ܗ̄ܘܹ̇ܝܬ̣ ܒܚܸܙܘܵܐ ܕܪܹܫܝ ܕܥܲܠ ܡܲܫܟܲܒ̣ܝ: ܥܝܼܪܵܐ ܘܩܲܕ̇ܝܼܫܵܐ ܕܲܢ̣ܚܸܬ̣ ܡ̣ܢ ܫܡܲܝܵܐ.
ܝܕ:ܘܲܩ̣ܪܵܐ ܒܚܹܝܠ ܘܗܵܟܲܢܵܐ ܐܸܡܲܪ: ܦܣܘܿܩܘ ܐܝܼܠܵܢܵܐ ܘܦܲܫܲܚܘ ܣܵܘܟܵܘ̈ܗܝ: ܘܐܲܬܲܪܘ ܛܲܪ̈ܦܵܘܗܝ: ܘܒܲܕܲܪܘ ܐܸܒܹ̇ܗ: ܢܸܦ̱ܪ̈ܩܵܢ ܚܲܝ̈ܘܵܬ̣ܵܐ ܡ̣ܢ ܬܚܘܿܬ̣ܵܘܗܝ: ܘܥܵܘܦܵܐ ܕܲܫܡܲܝܵܐ ܡ̣ܢ ܣܵܘܟܵܘ̈ܗܝ.
ܝܗ:ܥܸܩܵܪ ܫܸܪ̈ܫܵܘܗܝ ܕܹܝܢ ܒܐܲܪܥܵܐ ܫܒ̣ܘܿܩܘ: ܒܐܲܣܵܪ ܦܲܪܙܠܵܐ ܘܲܢܚܵܫܵܐ ܒܬܸܕܼܐܵܐ ܕܒܲܪܵܐ: ܘܡ̣ܢ ܛܲܠܵܐ ܕܲܫܡܲܝܵܐ ܢܸܨܛܲܒܲܥ: ܘܥܲܡ ܚܲܝܘܿܬ̣ ܒܲܪܵܐ ܡܲܥܡ̄ܪܹܗ ܒܥܸܣܒܵܐ ܕܐܲܪܥܵܐ.
ܝܘ:ܘܠܸܒܹ̇ܗ ܡ̣ܢ ܒܢܲܝ̈ܢܵܫܵܐ ܢܫܲܢܹܐ: ܘܠܸܒܵܐ ܕܚܲܝ̄ܘܬ̣ܵܐ ܢܸܬ̣̱ܝܼܗܸܒ̣ ܠܹܗ: ܘܫܲܒ̣ܥܵܐ ܥܸܕܵܢܝܼ̈ܢ ܢܸܬ̣ܚܲܠܦܘܼܢ ܥܠܵܘܗܝ.
ܝܙ:ܒܦܘܼܩܕܵܢ ܥܝܼܪܵܐ ܦܸܬ̣ܓ̣ܵܡܵܐ: ܘܲܒ̣ܡܹܐܡܲܪ ܩܲܕ̇ܝܼܫܵܐ ܫܸܐ̱ܠܬ̣ܵܐ: ܕܢܸܕ̇ܥܘܼܢ ܚܲܝܹ̈ܐ ܕܫܲܠܝܼܛ ܗ̄ܘܼ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇: ܘܠܲܫܦܲܠ ܐ̄ܢܵܫܝܼ̈ܢ ܢܩܝܼܡ ܥܠܹܝܗ̇.
ܝܚ:ܗܵܢܵܐ ܚܸܠܡܵܐ ܚܙܹ̇ܝܬ̣ ܐܸܢܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܘܐܲܢ̄ܬ̇ ܒܹܠܛܫܵܨܲܪ ܦܫܵܪܹܗ ܐܸܡܲܪ ܠܝܼ: ܡܸܛܠ ܕܟ̣ܠܗܘܿܢ ܚܲܟ̇ܝܼܡܹ̈ܐ ܕܡܲܠܟ̇ܘܼܬ̣ܝ: ܠܵܐ ܡܸܫܟ̇ܚܝܼܢ ܠܡܵܘܕܵܥܘܼܬܲܢܝ: ܘܐܲܢ̄ܬ̇ ܕܵܢܝܼܐܹܝܠ ܡܸܫܟܲܚ ܐܲܢ̄ܬ̇: ܡܸܛܠ ܕܪܘܼܚ ܐܲܠܵܗ̈ܝܼܢ ܩܲܕ̇ܝܼܫܝܼܢ ܐܝܼܬ̣ ܒܵܟ.
ܝܛ:ܗܵܝܕܹ̇ܝܢ ܕܵܢܝܼܐܹܝܠ ܕܲܫܡܹܗ ܒܹܠܛܫܵܨܲܪ: ܬܡܲܗ̣ ܐܲܝܟ ܫܵܥܵܐ ܚܕܼܵܐ: ܘܡܲܚܫ̈ܒ̣ܵܬܹܗ ܕܲܠܚܵܝ̈ܗܝ: ܥܢ̣ܵܐ ܡܲܠܟܵܐ ܘܐܸܡܲܪ: ܒܹܠܫܵܨܲܪ: ܚܸܠܡܵܐ ܘܲܦܫܵܪܹܗ ܠܵܐ ܢܕܲܠܚܘܼܢܵܟ: ܥܢ̣ܵܐ ܕܵܢܝܼܐܹܝܠ ܘܐܸܡ̣ܲܪ: ܡܵܪܝ: ܚܸܠܡܵܐ ܠܣܵܢ̈ܐܲܝܟ: ܘܲܦܫܵܪܹܗ ܠܲܒ̣ܥܸܠܕ̇ܒ̣ܵܒܲܝ̈ܟ.
ܟܟ:ܐܝܼܠܵܢܵܐ ܕܲܚ̣ܙܲܝܬ̇ ܕܲܪܒ̣ܵܐ ܘܲܥ̣ܫܸܢ: ܘܪܵܘܡܹܗ ܡ̣ܛܵܐ ܥܕܲܡܵܐ ܠܲܫܡܲܝܵܐ: ܘܚܸܙܘܹܗ ܠܟ̣ܠ ܣܵܘܦܹܝ̈ܗ̇ ܕܐܲܪܥܵܐ.
ܟܐ:ܛܲܪ̈ܦܵܘܗܝ ܫܲܦܝܼܪܝܼܢ: ܘܐܸܒܹ̇ܗ ܣܲܓ̇ܝܼ: ܘܡܹܐܟ̣ܘܼܠܬܵܐ ܠܟ̣ܠ ܒܣܲܪ ܐܝܼܬ̣ ܒܹܗ: ܘܲܬ̣ܚܘܿܬ̣ܵܘܗܝ ܥܵܡ̇ܪ̈ܵܢ ܟܠܗܹܝܢ ܚܲܝ̈ܘܵܬ̣ܵܐ ܕܕܲܒ̣ܪܵܐ: ܘܲܒ̣ܣܵܘ̈ܟܵܘܗܝ ܫܲܟ̇ܝܼܢ ܟܠܹܗ ܥܵܘܦܵܐ ܕܲܫܡܲܝܵܐ: ܘܡܸܢܹܗ ܡܸܬ̇ܬܲܪܣܸܐ ܗ̄ܘܼܵܐ ܟܠ ܒܣܲܪ.
ܟܒ:ܐܲܢ̄ܬ̇ܘܼ ܡܲܠܟܵܐ ܕܲܥܫܸܢ̣ܬ̇ ܘܝܼܪܸܒ̣ܬ̇: ܪܒܲܝ̣ܬ̇ ܘܲܡܛܲܝ̣ܬ̇ ܠܲܫܡܲܝܵܐ: ܘܫܘܼܠܛܵܢܵܟ ܠܟ̣ܠ ܣܵܘܦܹܝ̈ܗ̇ ܕܐܲܪܥܵܐ.
ܟܓ:ܘܕܲܚ̣ܙܵܐ ܡܲܠܟܵܐ ܠܥܝܼܪܵܐ ܘܩܲܕ̇ܝܼܫܵܐ: ܕܲܢܚܸܬ̣ ܡ̣ܢ ܫܡܲܝܵܐ: ܘܲܩ̣ܪܵܐ ܒܚܹܝܠ: ܘܐܸܡܲܪ: ܦܣܘܿܩܘ ܐܝܼܠܵܢܵܐ ܘܚܲܒ̇ܠܘܼܗܝ: ܥܸܩܵܪ ܫܸܪ̈ܫܵܘܗܝ ܕܹܝܢ ܒܐܲܪܥܵܐ ܫܒ̣ܘܿܩܘ: ܒܐܲܣܵܪ ܦܲܪܙܠܵܐ ܘܲܢܚܵܫܵܐ: ܒܬܸܕܼܐܵܐ ܕܒܲܪܵܐ: ܘܡ̣ܢ ܛܲܠܵܐ ܕܲܫܡܲܝܵܐ ܢܸܨܛܲܒܲܥ: ܘܥܲܡ ܚܲܝܘܲܬ̣ ܒܲܪܵܐ ܡܲܥܡ̄ܪܹܗ ܒܥܸܣܒܵܐ ܕܐܲܪܥܵܐ: ܘܠܸܒܹ̇ܗ ܡ̣ܢ ܒܢܲܝ̈ܢܵܫܵܐ ܢܫܲܢܸܐ: ܘܠܸܒܵܐ ܕܚܲܝܘ̄ܬ̣ܵܐ ܢܸܬ̣̱ܝܼܗܸܒ̣ ܠܹܗ: ܥܕܲܡܵܐ ܕܫܲܒ̣ܥܵܐ ܥܸܕܵܢ̈ܝܼܢ ܢܸܬ̣ܚܲܠܦܘܼܢ ܥܠܵܘܗܝ.
ܟܕ:ܗܵܢܵܘ ܦܫܵܪܵܐ ܡܲܠܟܵܐ: ܓܙܝܼܪܲܬ̣ ܡܪܲܝܡܵܐ ܡܛܵܬ̤ ܥܲܠ ܡܵܪܝ ܡܲܠܟܵܐ.
ܟܗ:ܘܡ̣ܢ ܐ̄ܢܵܫܵܐ ܪܵܕܼܦ̇ܝܼܢ ܠܵܟ: ܘܥܲܡ ܚܲܝܘܲܬ̣ ܒܲܪܵܐ ܢܸܗܘܹܐ ܡܲܥܡ̄ܪܵܟ: ܘܥܸܣܒܵܐ ܐܲܝܟ ܬܵܘܪܵܐ ܢܵܘܟ̇ܠܘܼܢܵܟ: ܘܡ̣ܢ ܛܲܠܵܐ ܕܲܫܡܲܝܵܐ ܬܸܨܛܲܒܲܥ: ܘܫܲܒ̣ܥܵܐ ܥܸܕܵܢ̈ܝܼܢ ܢܸܬ̣ܚܲܠܦܘܼܢ ܥܠܲܝܟ: ܥܕܲܡܵܐ ܕܬܸܕܲܥ ܕܫܲܠܝܼܛ ܗ̄ܘܼ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇.
ܟܘ:ܘܕܸܐ̣ܡܲܪ ܠܡܸܫܒܲܩ ܥܸܩܵܪ ܫܸܪ̈ܫܵܘܗܝ ܕܐܝܼܠܵܢܵܐ: ܡܲܠܟ̇ܘܼܬ̣ܵܟ ܠܵܟ ܩܲܝܵܡܵܐ: ܡܵܐ ܕܝܼܕܲܥܬ̇ ܕܫܘܼܠܛܵܢܵܐ ܡ̣ܢ ܫܡܲܝܵܐ ܗ̄ܘܼ.
ܟܙ:ܡܸܛܠ ܗܵܢܵܐ ܡܸܠܟ̇ܝ ܢܸܫܦܲܪ ܥܠܲܝܟ: ܘܲܚܛܵܗܲܝ̈ܟ ܒܙܸܕ̈ܩܵܬ̣ܵܐ ܦܪܘܿܩ: ܘܥܵܘܿܠܘܼܬ̣ܵܟ ܒܲܡܪܲܚܡܵܢܘܼܬ̣ܵܐ ܕܲܡܚ̈ܝܼܠܹܐ: ܥܕܲܡܵܐ ܕܢܲܪܚܸܩ ܡܸܢܵܟ ܣܲܟ̣̈ܠ̱ܘܵܬ̣ܵܟ.
ܟܚ:ܗܵܠܹܝܢ ܟܠܗܹܝܢ ܡܲܛܝܼ ܥܲܠ ܢܒ̣ܘܼܟܲܕܼܢܵܨܲܪ ܡܲܠܟܵܐ.
ܟܛ:ܘܡ̣ܢ ܒܵܬܲܪ ܬܪܸܥܣܲܪ ܝܲܪ̈ܚܝܼܢ: ܥܲܠ ܗܲܝܟܲܠ ܡܲܠܟ̇ܘܼܬܹܗ ܕܲܒ̣ܒ̣ܵܒܹܠ ܡܗܲܠܸܟ ܗ̄ܘܼܵܐ ܢܒ̣ܘܼܟܲܕܼܢܵܨܲܪ ܡܲܠܟܵܐ.
ܠ:ܘܲܥ̣ܢܵܐ ܘܐܸܡܲܪ: ܠܵܐ ܗܘ̤ܵܬ̣ ܗܵܕܹܐ ܒܵܒܹܠ ܪܲܒ̇ܬ̣ܵܐ ܕܐܸܢܵܐ ܒܢܹܝ̇ܬ̣ܵܗ̇ ܠܒܹܝܬ̣ ܡܲܠܟ̇ܘܼܬ̣ܝ: ܘܠܐܘܼܚܕܵܢܝ ܥܲܫܝܼܢܵܐ ܘܠܐܝܼܩܵܪܝ.
ܠܐ:ܘܥܲܕܼ ܡܸܠܬ̣ܵܐ ܒܦܘܼܡܹܗ ܕܡܲܠܟܵܐ: ܩܵܠܵܐ ܐܸܬ̣ܵܐ ܡ̣ܢ ܫܡܲܝܵܐ: ܠܵܟ ܐܵܡ̇ܪܝܼܢ ܒܒ̣ܘܼܟܲܕܼܢܵܨܲܪ ܡܲܠܟܵܐ: ܕܡܲܠܟ̇ܘܼܬ̣ܵܟ ܥܸܒ̣ܪܲܬ̣ ܡܸܢܵܟ.
ܠܒ:ܘܡ̣ܢ ܐ̄ܢܵܫܵܐ ܪܵܕܼܦܝܼܢ ܠܵܟ: ܘܥܲܡ ܚܲܝܘܲܬ̣ ܒܲܪܵܐ ܢܸܗܘܹܐ ܡܲܥܡ̄ܪܵܟ: ܘܥܸܣܒܵܐ ܐܲܝܟ ܬܵܘܪܵܐ ܢܵܘܟ̇ܠܘܼܢܵܟ: ܘܡ̣ܢ ܛܲܠܵܐ ܕܲܫܡܲܝܵܐ ܬܸܨܛܲܒܲܥ: ܘܫܲܒ̣ܥܵܐ ܥܸܕܵܢܝܼ̈ܢ ܢܸܬ̣ܚܲܠܦܘܼܢ ܥܠܲܝܟ: ܥܕܲܡܵܐ ܕܬܸܕܲܥ ܕܫܲܠܝܼܛ ܗ̄ܘܼ ܐܲܠܵܗܵܐ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇: ܘܠܲܫܦܲܠ ܐ̄ܢܵܫ̈ܝܼܢ ܢܩܝܼܡ ܥܠܹܝܗ̇.
ܠܓ:ܒܵܗ̇ ܒܫܵܥܬ̣ܵܐ ܡܸܠܬ̣ܵܐ ܫܸܠܡܲܬ̤ ܥܲܠ ܢܒ̣ܘܼܟܲܕܼܢܵܨܲܪ ܡܲܠܟܵܐ: ܘܡ̣ܢ ܒܢܲܝ̈ܢܵܫܵܐ ܐܸܬ̣ܪ̱ܕܸܦ: ܘܥܸܣܒܵܐ ܐܲܝܟ ܬܵܘܪܵܐ ܐܹܟܲܠ̣: ܘܡ̣ܢ ܛܲܠܵܐ ܕܲܫܡܲܝܵܐ ܐܸܨܛܲܒܲܥ: ܥܕܲܡܵܐ ܕܣܲܥܪܹܗ ܪܒ̣ܵܐ ܐܲܝܟ ܕܢܸܫܪܵܐ: ܘܛܸܦܪ̈ܵܘܗܝ ܐܲܝܟ ܕܥܵܘܦܵܐ.
ܠܕ:ܘܟܲܕܼ ܫܠܸܡ̣ܘ ܝܵܘ̈ܡܵܬ̣ܵܐ: ܐܸܢܵܐ ܢܒ̣ܘܼܟܲܕܼܢܵܨܲܪ ܥܲܝܢܲܝ̈ ܠܲܫܡܲܝܵܐ ܫܸܩܠܹ̇ܬ̣: ܘܡܲܕܲܥܝ ܬܵܒ̣ ܥܠܲܝ: ܘܠܲܡܪܲܝܡܵܐ ܒܲܪܟܹ̇ܬ̣: ܘܲܠܚܲܝ ܥܵܠܡܹ̈ܐ ܫܲܒ̇ܚܹ̇ܬ̣: ܘܗܲܕ̇ܪܹܬ̣: ܕܫܘܼܠܛܵܢܹܗ ܫܘܼܠܛܵܢ ܥܵܠܲܡ ܘܡܲܠܟ̇ܘܼܬܹܗ ܠܕܼܵܪܕܵܪ̈ܝܼܢ.
ܠܗ:ܘܟ̣ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܐܲܝܟ ܠܵܐ ܡܸܕܸ̇ܡ ܚܫܝܼܒ̣ܝܼܢ ܩܕܼܵܡܵܘܗܝ: ܘܟ̣ܠ ܡܵܐ ܕܨܵܒܹ̇ܐ ܥܵܒܹ̇ܕܼ: ܒܚܲܝ̈ܠܲܝ ܫܡܲܝܵܐ ܘܲܒ̣ܥܵܡܘܿܪܹ̈ܝܗ̇ ܕܐܲܪܥܵܐ: ܘܠܲܝܬ̇ ܕܢܸܪܫܸܐ ܒܐܝܼܕܹܗ ܘܢܹܐܡܲܪ ܠܹܗ ܡܵܢܵܐ ܥܵܒܹ̇ܕܼ ܐܲܢ̄ܬ̇.
ܠܘ:ܒܹܗ ܒܙܲܝܢܵܐ ܡܲܕܲܥܝ ܦ̣ܢܵܐ ܥܠܲܝ: ܘܪܵܘܪ̈ܒ̣ܵܢܲܝ ܘܪ̈ܲܒܲܝ ܚܲܝ̈ܠܲܝ ܒܥ̣ܵܐܘܼܢܝ: ܘܥܲܠ ܡܲܠܟ̇ܘܼܬ̣ܝ ܬܸܩ̇ܢܹܬ̣: ܘܪܲܒ̇ܘܼܬ̣ܵܐ ܝܲܬ̇ܝܼܪܬܵܐ ܐܸܬ̇ܬܵܘܣܦܲܬ̤ ܠܝܼ.
ܠܙ:ܡܸܟܹ̇ܝܠ ܐܸܢܵܐ ܢܒ̣ܘܼܟܲܕܼܢܵܨܲܪ: ܡܫ̣ܒܲܚ ܘܲܡܪܲܡܪܸܡ ܘܲܡܗܲܕܲܪ ܠܡܲܠܟܵܐ ܕܲܫܡܲܝܵܐ: ܕܟ̣ܠܗܘܿܢ ܥܒ̣ܵܕܼܵܘ̈ܗܝ ܒܩܘܼܫܬܵܐ: ܘܐܘܼܪ̈ܚܵܬܹܗ ܕܝܼܢܵܐ: ܘܠܲܐܝܠܹܝܢ ܕܲܡܗܲܠܟ̣ܝܼܢ ܒܓܲܐܝܘܼܬ̣ܵܐ ܡܸܫܟܲܚ ܕܲܢܡܲܟܸ̇ܟ.
ܩܹܦܵܠܹܐܘܿܢ:ܗ.
ܐ:ܒܹܠܛܫܵܨܲܪ ܡܲܠܟܵܐ: ܥ̣ܒܲܕܼ ܠܲܚܡܵܐ ܪܲܒܵܐ ܠܐܵܠܹܦ ܪܵܘܪ̈ܒ̣ܵܢܵܘܗܝ: ܘܠܘܩܒܲܠ ܐܲܠܦܵܐ ܚܲܡܪܵܐ ܫܵܬܹ̇ܐ ܗ̄ܘܼܵܐ.
ܒ:ܘܐܸܡܲܪ ܒܠܹܛܫܵܨܲܪ ܒܲܛܥܸܡ ܚܲܡܪܹܗ ܠܡܲܝܬܵܝܘܼ ܡܵܐܢܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ: ܕܐܲܦܸܩ̣ ܢܒ̣ܘܼܟܲܕܼܢܵܨܲܪ ܐܲܒ̣ܘܼܗܝ ܡ̣ܢ ܗܲܝܟܠܵܐ ܕܒ̣ܐܘܼܪܸܫܠܸܡ: ܕܢܸܫܬ̇ܘܿܢ ܒܗܘܿܢ ܡܲܠܟܵܐ ܘܪܵܪ̈ܒ̣ܵܢܵܘܗܝ: ܘܢܸܫܵܘ̈ܗܝ ܘܲܕܼܪ̈ܘܼܟ̣ܵܬܹܗ.
ܓ:ܗܵܝܕܹ̇ܝܢ ܐܲܝܬ̇ܝܘܼ ܡܵܐܢܹ̈ܐ ܕܕܲܗܒ̣ܵܐ ܕܐܲܦܸܩ ܡ̣ܢ ܗܲܝܟ̇ܠܵܐ ܕܐܲܠܵܗܵܐ ܕܒ̣ܐܘܼܪܸܫܠܸܡ: ܘܐܸܫ̣ܬ̇ܝܘܼ ܒܗܘܿܢ ܡܲܠܟܵܐ ܘܪܵܘܪ̈ܒ̣ܵܢܵܘܗܝ: ܘܢܸܫܵܘ̈ܗܝ ܘܲܕܼܪ̈ܘܼܟ̣ܵܬܹܗ.
ܕ:ܐܸܫ̣ܬ̇ܝܘܼ ܚܲܡܪܵܐ: ܘܫܲܒܲܚ̣ܘ ܠܐܲܠܵܗܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ: ܘܕܲܢܚܵܫܵܐ ܘܲܕܼܦܲܪܙܠܵܐ: ܘܲܕܼܩܲܝܣܵܐ ܘܲܕܼܟܹܐܦܵܐ.
ܗ:ܘܒ̣ܵܗ̇ ܒܫܵܥܬ̣ܵܐ: ܢܦܲܩ̣ ܨܸܒ̣̈ܥܵܬ̣ܵܐ ܕܐܝܼܕܼܵܐ ܕܐ̄ܢܵܫܵܐ: ܘܟ̣ܵܬ̣̈ܒܵܢ ܠܘܼܩܒܲܠ ܫܪܵܓ̣ܵܐ: ܥܲܠ ܟܸܠܫܵܐ ܕܐܸܣܬ̣ܵܐ ܕܲܒ̣ܗܲܝܟ̇ܠܵܐ ܕܡܲܠܟܵܐ: ܘܡܲܠܟܵܐ ܚܙ̣ܵܐ ܦܲܣܬ̣ܵܐ ܕܐܝܼܕܼܵܐ ܕܟ̣ܵܬ̣ܒܵܐ.
ܘ:ܗܵܝܕܹ̇ܝܢ ܡܲܠܟܵܐ ܙܝܼܘܹܗ ܫܢ̣ܵܐ: ܘܪܸܥܝܵܢܹܗ ܐܸܬ̇ܕܲܠܲܚ: ܘܩܸܛܪ̈ܲܝ ܚܲܨܹܗ ܐܸܫܬ̇ܪܝܼܘ: ܘܒ̣ܘܼܪ̈ܟܵܘܗܝ ܚܕܼܵܐ ܠܲܚܕܼܵܐ ܢ̣ܩܲܫ.
ܙ:ܘܲܩܪܵܐ ܡܲܠܟܵܐ ܒܚܹܝܠ: ܠܡܲܥܵܠܘܼ ܠܐܵܫܘܿܦܹ̈ܐ: ܘܲܠܟܲܠܕܵܝܹ̈ܐ: ܘܠܲܡܓ̣ܘܼܫܹ̈ܐ: ܘܲܠܚܲܟ̇ܝܼܡܹ̈ܐ: ܥܢ̣ܵܐ ܡܲܠܟܵܐ ܘܐܸܡܲܪ ܠܚܲܟ̇ܝܼܡܹ̈ܐ ܕܒ̣ܵܒܹܠ: ܟܠ ܐ̄ܢܵܫ ܕܢܸܩܪܸܐ ܟܬ̣ܵܒ̣ܵܐ ܗܵܢܵܐ ܘܲܦܫܵܪܹܗ ܢܚܵܘܹܝܢܝ: ܐܲܪ̈ܓ̇ܘܵܢܹܐ ܢܸܠܒܲܫ: ܘܗܲܝܡܢܝܼܟ̣ܵܐ ܕܕܲܗܒ̣ܵܐ ܒܨܵܘܪܹܗ: ܘܬ̣ܘܼܠܬ̣ܵܐ ܒܡܲܠܟ̇ܘܼܬ̣ܵܐ ܢܸܫܠܲܛ.
ܚ:ܗܵܝܕܹ̇ܝܢ ܥܵܐ̇ܠܝܼܢ ܗ̄ܘܼܵܘ ܚܲܟ̇ܝܼܡܹ̈ܐ ܕܡܲܠܟܵܐ: ܘܠܵܐ ܡܸܫܟ̇ܚܝܼܢ ܗ̄ܘܼܵܘ ܟܬ̣ܵܒ̣ܵܐ ܠܡܸܩܪܵܐ: ܘܲܦܫܵܪܹܗ ܠܡܵܘܕܵܥܘܼ ܠܡܲܠܟܵܐ.
ܛ:ܗܵܝܕܹ̇ܝܢ ܡܲܠܟܵܐ ܒܠܹܛܫܵܨܲܪ ܣܲܓ̇ܝܼ ܐܬ̇ܕܲܠܲܚ: ܘܙܝܼܘܹܗ ܐܸܫܬܲܢܝܼ: ܘܪܵܘܪ̈ܒ̣ܵܢܵܘܗܝ ܡܸܬ̣ܒܲܠܗܹܝܢ ܗ̄ܘܼܵܘ.
ܝ:ܘܡܲܠܟ̇ܬ̣ܵܐ ܡܸܛܠ ܡܸܠܲܝ̈ ܡܲܠܟܵܐ ܘܪܵܘܪ̈ܒ̣ܵܢܵܘܗܝ: ܠܒܹܝܬ̣ ܡܲܫܬ̇ܝܵܐ ܥܸܠܲܬ̤: ܥܢܵܬ̣ ܘܐܵܡ̇ܪܵܐ ܠܡܲܠܟܵܐ: ܡܲܠܟܵܐ ܠܥܵܠܲܡ ܚܝܝܼ: ܪܸ̈ܥܝܵܢܲܝܟ ܠܵܐ ܢܕܲܠܚܘܼܢܵܟ: ܘܙܝܼܘܲܝ̈ܟ ܠܵܐ ܢܸܫܬܲܢܘܿܢ.
ܝܐ:ܐܝܼܬ̣ ܓܲܒ̣ܪܵܐ ܒܡܲܠܟ̇ܘܼܬ̣ܵܟ: ܕܪܘܼܚ ܐܲܠܵܗ̇ܝܼܢ ܩܲܕ̇ܝܼܫܝܼܢ ܐܝܼܬ̣ ܒܹܗ: ܘܲܒ̣ܝܵܘ̈ܡܲܝ ܐܲܒ̣ܘܼܟ: ܢܲܗܝܼܪܘܼܬ̣ܵܐ ܘܣܘܼܟܵܠܵܐ ܘܚܸܟ̣ܡ̱ܬ̣ܵܐ ܣܲܓ̇ܝܼܐܬ̣ܵܐ: ܐܲܝܟ ܚܸܟ̣ܡܲܬ̣ ܐܲܠܵܗ̈ܝܼܢ ܐܸܫܬܲܟ̣ܚܲܬ̤ ܒܹܗ: ܘܡܲܠܟܵܐ ܢܒ̣ܘܼܟܲܕܼܢܵܨܲܪ ܐܲܒ̣ܘܼܟ: ܪܲܒ̇ ܚܲܪ̈ܵܫܹܐ ܘܐܵܫܘܿܦܹ̈ܐ ܘܲܡܓ̣ܘܼܫܹ̈ܐ ܘܟܲܠܕܼܵܝܹ̈ܐ ܐܲܩܝܼܡܹܗ.
ܝܒ:ܡܸܛܠ ܕܪܘܼܚܵܐ ܘܡܲܕ̇ܥܵܐ ܘܣܘܼܟܵܠܵܐ ܝܲܬ̇ܝܼܪܵܐ ܐܸܫܬ̇ܟܲܚ ܒܹܗ: ܦܵܫܲܪ ܚܸܠܡܝܼ̈ܢ: ܘܐܵܚܹ̇ܕܼ ܐܘܼܚ̈ܕܵܢ: ܘܫܵܪܹܐ ܩܸܛܪ̈ܝܼܢ: ܕܵܢܝܼܐܹܝܠ ܕܡܲܠܟܵܐ ܫܲܡܝܼ ܫܡܹܗ ܒܹܠܛܫܵܨܲܪ: ܡܸܟܹ̇ܝܠ ܕܵܢܝܼܐܹܝܠ ܢܸܬ̣ܩܪܸܐ: ܘܲܦܫܵܪܵܐ ܢܚܵܘܸܐ.
ܝܓ:ܗܵܝܕܹ̇ܝܢ ܕܵܢܝܼܐܹܝܠ ܥܲܠ̣ ܩܕܼܵܡ ܡܲܠܟܵܐ: ܥܢ̣ܵܐ ܡܲܠܟܵܐ ܘܐܸܡ̣ܲܪ ܠܕܵܢܝܼܐܹܝܠ: ܐܲܢ̄ܬ̇ ܗ̄ܘܼ ܕܵܢܝܼܐܹܝܠ ܡ̣ܢ ܒܢܲܝ̈ ܫܒ̣ܝܼܬ̣ܵܐ ܕܲܝܗܘܼܕܼ: ܕܐܲܢ̄ܬ̇ܝܼ ܐܵܒ̣ܝ ܡܲܠܟܵܐ ܡ̣ܢ ܝܑܼܗܘܼܕܼ.
ܝܕ:ܫܸܡܥܹ̇ܬ̣ ܥܠܲܝܟ ܕܪܘܼܚ ܐܲܠܵܗ̈ܝܼܢ ܩܲܕ̇ܝܼܫܝܼܢ ܐܝܼܬ̣ ܒܵܟ: ܘܢܲܗܝܼܪܘܼܬ̣ܵܐ ܘܣܘܼܟܵܠܵܐ: ܘܚܸܟ̣ܡ̱ܬ̣ܵܐ ܝܲܬ̇ܝܼܪܬܵܐ ܐܸܫܬܲܟ̣ܚܲܬ̤ ܒܵܟ.
ܝܗ:ܘܥܲܠ̣ܘ ܩܕܼܵܡܲܝ ܚܲܘܫܹܐ ܘܐܵܫ̈ܘܿܦܹܐ: ܕܲܟ̣ܬ̣ܵܒ̣ܵܐ ܗܵܢܵܐ ܢܸܩܪܘܿܢ ܘܲܦܫܵܪܹܗ ܢܚܵܘܘܿܢܵܢܝ: ܘܠܵܐ ܐܸܫ̣ܟܲܚܘ ܦܫܵܪܵܐ ܕܡܸܠܬ̣ܵܐ ܠܡܵܘܕܵܥܘܼܬܲܢܝ.
ܝܘ:ܘܐܸܢܵܐ ܫܸܡ̇ܥܹܬ̣ ܥܠܲܝܟ: ܕܡܸܫܟܲܚ ܐܲܢ̄ܬ̇ ܦܫܵܪ̈ܝܼܢ ܠܡܸܦܫܲܪ: ܘܩܸܛܪ̈ܝܼܢ ܠܡܸܫܪܵܐ: ܐܸܢ ܬܸܫܟܲܚ ܟܬ̣ܵܒ̣ܵܐ ܗܵܢܵܐ ܠܡܸܩܪܵܐ ܘܲܦܫܵܪܹܗ ܠܡܵܘܕܵܥܘܼܬܲܢܝ: ܐܲܪ̈ܓ̇ܘܵܢܹܐ ܬܸܠܒܲܫ: ܘܗܲܡܢܝܼܟ̣ܵܐ ܕܕܲܗܒ̣ܵܐ ܒܨܵܘܪܵܟ: ܘܬ̣ܘܼܠܬ̣ܵܐ ܒܡܲܠܟ̇ܘܼܬ̣ܵܐ ܬܸܫܠܲܛ.
ܝܙ:ܗܵܝܕܹ̇ܝܢ ܥܢ̣ܵܐ ܕܵܢܝܼܐܹܝܠ ܘܐܸܡܲܪ ܠܡܲܠܟܵܐ: ܡܵܘ̈ܗܒ̣ܵܬ̣ܵܟ ܠܵܟ ܢܸܗܘ̈ܝܵܢ: ܘܐܝܼܩܵܪ ܒܲܝܬܵܟ ܠܐܲܚܪ̈ܵܢܝܼܢ ܗܲܒ̣: ܒܪܲܡ ܟܬ̣ܵܒ̣ܵܐ ܐܸܢܵܐ ܐܸܩܪܸܐ ܠܡܲܠܟܵܐ: ܘܲܦܫܵܪܹܗ ܐܸܚܵܘܹܝܘܗܝ.
ܝܚ:ܐܲܢ̄ܬ̇ ܡܲܠܟܵܐ: ܐܲܠܵܗܵܐ ܡܪܲܝܡܵܐ: ܡܲܠܟ̇ܘܼܬ̣ܵܐ ܘܪܲܒ̇ܘܼܬ̣ܵܐ ܘܐܝܼܩܵܪܵܐ ܘܫܘܼܒ̣ܚܵܐ: ܝܲܗ̄ܒ̣ ܠܲܢܒ̣ܘܼܟܲܕܼܢܵܨܲܪ ܐܲܒ̣ܘܼܟ.
ܝܛ:ܘܡ̣ܢ ܪܲܒ̇ܘܼܬ̣ܵܐ ܕܝܲܗ̄ܒ̣ ܠܹܗ: ܟܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ: ܙܵܝ̇ܥܝܼܢ ܗ̄ܘܼܵܘ ܘܕܼܵܚ̇ܠܝܼܢ ܡ̣ܢ ܩܕܼܵܡܵܘܗܝ: ܐܲܝܠܹܝܢ ܕܨܵܒܹ̇ܐ ܗ̄ܘܼܵܐ ܩܵܛܹ̇ܠ: ܘܐܲܝܠܹܝܢ ܕܨܵܒܹ̇ܐ ܗ̄ܘܼܵܐ ܡܲܚܸܐ: ܘܲܕܼܨܵܒܹ̇ܐ ܡܪܝܼܡ: ܘܲܕܼܨܵܒܹ̇ܐ ܡܡܲܟܸ̇ܟ.
ܟܟ:ܘܟܲܕܼ ܐܸܬ̇ܬ̇ܪܝܼܡ ܠܸܒܹ̇ܗ: ܘܪܘܼܚܹܗ ܥܸܫܢܲܬ̤ ܠܡܲܥܠܵܝܘܼ: ܢ̣ܚܸܬ̣ ܡ̣ܢ ܟܘܼܪܣܝܵܐ ܕܡܲܠܟ̇ܘܼܬܹܗ: ܘܐܝܼܩܵܪܹܗ ܥ̣ܒܲܪ ܡܸܢܹܗ.
ܟܐ:ܘܡ̣ܢ ܒܢܲܝ̈ܢܵܫܵܐ ܐܸܬ̣ܪ̱ܕܸܦ: ܘܠܸܒܹ̇ܗ ܥܲܡ ܕܚܲܝ̈ܘܵܬ̣ܵܐ ܐܸܫܬ̇ܘܝܼ: ܘܥܲܡ ܥܪ̈ܵܕܹܐ ܡܲܥܡ̄ܪܹܗ: ܘܥܸܣܒܵܐ ܐܲܝܟ ܬܵܘܪܵܐ ܐܵܘܟ̇ܠ̣ܘܼܗܝ: ܘܡ̣ܢ ܛܲܠܵܐ ܕܲܫܡܲܝܵܐ ܓܘܼܫܡܹܗ ܐܸܨܛܲܒܲܥ: ܥܕܲܡܵܐ ܕܣܲܥܪܹܗ ܪܒ̣ܵܐ ܐܲܝܟ ܕܢܸܫܪܵܐ: ܘܛܸܦܪ̈ܵܘܗܝ ܐܲܝܟ ܕܥܵܘܦܵܐ: ܥܕܲܡܵܐ ܕܝܼܕܲܥ̣ ܕܫܲܠܝܼܛ ܗ̄ܘܼ ܐܲܠܵܗܵܐ ܡܪܲܝܡܵܐ ܒܡܲܠܟ̇ܘܼܬ̣ܵܐ ܕܐ̄ܢܵܫܵܐ: ܕܲܠܡܲܢ ܕܨܵܒܹ̇ܐ ܢܸܬ̇ܠܝܼܗ̇: ܘܠܲܫܦܲܠ ܐ̄ܢܵܫ̈ܝܼܢ ܢܩܝܼܡ ܥܠܹܝܗ̇.
ܟܒ:ܘܐܲܢ̄ܬ̇ ܒܪܹܗ ܒܹܠܛܫܵܨܲܪ: ܠܵܐ ܐܲܡܸܟ̣ܬ̇ ܠܸܒܵܟ ܟܲܕܼ ܗܵܠܹܝܢ ܟܠܗܹܝܢ ܝܑܼܕܲܥ̣ܬ̇.
ܟܓ:ܘܥܲܠ ܡܵܪܹܐ ܫܡܲܝܵܐ ܐܸܬ̇ܬ̇ܪܝܼܡܬ̇: ܘܲܠܡܵܐܢܹ̈ܐ ܕܒܲܝܬܹ̇ܗ ܐܲܝܬ̇ܝܼܘ ܩܕܼܵܡܲܝܟ: ܘܐܲܢ̄ܬ̇ ܘܪܵܘܪ̈ܒ̣ܵܢܲܝܟ ܘܢܸܫܲܝ̈ܟ ܘܲܕܼܪ̈ܘܼܟ̣ܵܬ̣ܵܟ: ܚܲܡܪܵܐ ܐܸܫܬ̇ܝܼܬ̇ܘܿܢ ܒܗܘܿܢ: ܘܠܲܐܠܵܗܹ̈ܐ ܕܕܲܗܒ̣ܵܐ ܘܲܕܼܣܹܐܡܵܐ: ܘܕܲܢܚܵܫܵܐ: ܘܲܕܼܦܲܪܙܠܵܐ: ܘܲܕܼܩܲܝܣܵܐ: ܘܲܕܼܟܹܐܦܵܐ: ܕܠܵܐ ܚܵܙܹ̇ܝܢ: ܘܠܵܐ ܫܵܡ̇ܥܝܼܢ: ܘܠܵܐ ܝܵܕܼܥ̇ܝܼܢ: ܫܲܒܲܚ̣ܬ̇: ܘܠܲܐܠܵܗܵܐ ܕܲܢܫܲܡܬ̣ܵܟ ܒܐܝܼܕܼܵܘ̈ܗܝ: ܘܟ̣ܠܗܹܝܢ ܐܘܼܪ̈ܚܵܬ̣ܵܟ: ܠܹܗ ܠܵܐ ܫܲܒܲܚ̣ܬ̇: ܘܠܵܐ ܝܲܩܲܪܬ̇.
ܟܕ:ܗܵܝܕܹ̇ܝܢ ܡ̣ܢ ܩܕܼܵܡܵܘܗܝ ܐܸܫܬܲܠܚܲܬ̤ ܦܲܣܲܬ̣ ܐܝܼܕܼܵܐ: ܘܲܟ̣ܬ̣ܵܒ̣ܵܐ ܗܵܢܵܐ ܪܸܫܡܲܬ̤.
ܟܗ:ܘܲܟ̣ܬ̣ܵܒ̣ܵܐ ܗܵܢܵܐ ܪܫܝܼܡ: ܡܢܸܐ: ܡܢܸܐ: ܬܩܲܠ ܘܦܲܪܣܝܼܢ.
ܟܘ:ܗܵܢܵܘ ܦܫܵܪܵܗ̇ ܕܡܸܠܬ̣ܵܐ: ܡܢܸܐ: ܡ̣ܢܵܗ̇ ܐܲܠܵܗܵܐ ܠܡܲܠܟ̇ܘܼܬ̣ܵܟ ܘܐܲܫ̱ܠܡܵܗ̇.
ܟܙ:ܬܩܲܠ: ܬܩܝܼܠ ܐܲܢ̄ܬ̇ ܒܡܲܣܲܐܬ̣ܵܐ: ܘܐܸܫܬ̇ܟܲܚܬ̇ ܚܲܣܝܼܪ.
ܟܚ:ܦܪܲܣ̣: ܦܪܝܼܣܵܐ ܗ̄ܝܼ ܡܲܠܟ̇ܘܼܬ̣ܵܟ ܘܝܼܗܝܼܒ̣ܵܐ ܗ̄ܝܼ ܠܡܵܕܲܥ ܘܲܠܦܵܪܹܣ.
ܟܛ:ܗܵܝܕܹ̇ܝܢ ܐܸܡܲܪ ܡܲܠܟܵܐ ܒܹܠܛܫܵܨܲܪ: ܘܐܲܠܒ̇ܫܘܼܗܝ ܠܕܼܵܢܝܼܐܹܝܠ ܐܲܪ̈ܓ̇ܘܵܢܹܐ: ܘܗܲܝܡܢܝܼܟ̣ܵܐ ܕܕܲܗܒ̣ܵܐ ܒܨܵܘܪܹܗ: ܘܐܲܟ̣ܪܸܙܘ ܥܠܵܘܗܝ ܕܢܸܗܘܹܐ ܫܲܠܝܼܛ ܬܘܼܠܬ̣ܵܐ ܒܡܲܠܟ̇ܘܼܬ̣ܵܐ.
ܠ:ܒܹܗ ܒܠܸܠܝܵܐ ܩܛܝܼܠ ܒܹܠܛܫܵܨܲܪ ܡܲܠܟܵܐ ܟܲܠܕܼܵܝܵܐ.
ܠܐ:ܘܕܲܪܝܵܘܵܫ ܡܵܕܼܵܝܵܐ ܩܲܒܸ̇ܠ ܡܲܠܟ̇ܘܼܬ̣ܵܐ: ܐܲܝܟ ܫܢܝܼ̈ܢ ܫܬ̇ܝܼܢ ܘܬܲܪܬܹ̇ܝܢ.
ܩܹܦܵܠܹܐܘܿܢ:ܘ.
ܐ:ܘܲܫ̣ܦܲܪ ܩܕܼܵܡ ܕܲܪܝܵܘܵܫ: ܘܐܲܩܝܼܡ ܒܡܲܠܟ̇ܘܼܬܹܗ ܪ̈ܲܒܲܝ ܚܲܝ̈ܠܹܐ ܡܵܐܐ ܘܥܸܣܪܝܼܢ: ܕܢܸܗܘܘܿܢ ܒܟ̣ܠܵܗ̇ ܡܲܠܟ̇ܘܼܬܹܗ.
ܒ:ܘܲܠܥܸܠ ܡܸܢܗܘܿܢ ܫܠܝܼܛܝܼܢ ܬܠܵܬ̣ܵܐ: ܘܕܼܵܢܝܼܐܹܝܠ ܚܲܕܼ ܡܸܢܗܘܿܢ: ܕܢܸܗܘܘܿܢ ܪ̈ܲܒܲܝ ܚܲܝ̈ܠܹܐ. ܗܵܠܹܝܢ ܝܵܗ̄ܒ̇ܝܼܢ ܠܗܘܿܢ ܚܘܼܫܒܵܢܵܐ: ܘܲܠܡܲܠܟܵܐ ܠܵܐ ܢܸܗܘܘܿܢ ܡܲܗܪܝܼܢ.
ܓ:ܗܵܝܕܹ̇ܝܢ ܕܵܢܝܼܐܹܝܠ ܡܝܲܬܲܪ ܗ̄ܘܼܵܐ ܡ̣ܢ ܟܠܗܘܿܢ: ܡܸܛܠ ܕܪܘܼܚܵܐ ܝܲܬ̇ܝܼܪܬܵܐ ܐܝܼܬ̣ ܗ̄ܘܼܵܬ̣ ܒܹܗ: ܘܡܲܠܟܵܐ ܐܸܬ̣ܚܲܫܲܒ̣ ܠܲܡܩܵܡܘܼܬܹܗ ܥܲܠ ܟܠܵܗ̇ ܡܲܠܟ̇ܘܼܬܹܗ.
ܕ:ܗܵܝܕܹ̇ܝܢ ܫܲܠܝܼܛܵܢܹ̈ܐ ܘܪ̈ܲܒܲܝ ܚܲܝ̈ܠܹܐ: ܒܵܥܹ̇ܝܢ ܗ̄ܘܼܵܘ ܥܸܠܬ̣ܵܐ ܕܢܸܫܟ̇ܚܘܼܢ ܥܲܠ ܕܵܢܝܼܐܹܝܠ ܡ̣ܢ ܨܒ̣ܘܼܬ̣ ܡܲܠܟ̇ܘܼܬ̣ܵܐ: ܘܟ̣ܠ ܣܲܟ̣ܠܘܼ ܘܥܸܠܵܐ ܠܵܐ ܐܸܫ̣ܟܲܚܘ ܒܵܬ̣ܪܹܗ: ܡܸܛܠ ܕܲܡܗܲܝܡܸܢ ܗ̄ܘܼܵܐ ܒܐܲܠܵܗܹܗ: ܘܣܘܼܪܚܵܢܵܐ ܘܣܲܟ̣ܠܘܼܬ̣ܵܐ ܠܵܐ ܐܸܫ̣ܟܲܚܘ ܥܠܵܘܗܝ.
ܗ:ܘܐܵܡ̇ܪܝܼܢ ܓܲܒ̣ܪܹ̈ܐ ܗܵܢ̇ܘܿܢ: ܠܵܐ ܡܸܫܟ̇ܚܝܼܢܲܢ ܥܲܠ ܕܵܢܝܼܐܹܝܠ ܗܵܢܵܐ ܥܸܠܬ̣ܵܐ: ܐܸܠܵܐ ܐܸܢ ܐܸܫ̣ܟܲܚܢ ܥܠܵܘܗܝ ܒܕܼܝܼܢܵܐ ܕܐܲܠܵܗܹܗ.
ܘ:ܗܵܝܕܹ̇ܝܢ ܩܸܪܸܒ̣ܘ ܫܲܠܝܼܛܵܢܹ̈ܐ ܘܪ̈ܲܒܲܝ ܚܲܝ̈ܠܹܐ ܠܘܵܬ̣ ܡܲܠܟܵܐ: ܘܐܵܡ̇ܪܝܼܢ ܠܹܗ: ܕܲܪܝܵܘܵܫ ܡܲܠܟܵܐ ܠܥܵܠܲܡ ܚܝܝܼ.
ܙ:ܐܸܬ̣ܚܲܫܲܒ̣ܘ ܟܠܗܘܿܢ ܫܲܠܝܼܛܲܝ̈ ܡܲܠܟ̇ܘܼܬ̣ܵܐ: ܘܪܵܘܪ̈ܒ̣ܵܢܹܐ ܘܪ̈ܲܒܲܝ ܚܲܝ̈ܠܹܐ ܘܡܵܪ̈ܵܘܵܬ̣ܵܐ: ܠܲܡܩܵܡܘܼ ܩܝܵܡܵܐ ܠܡܲܠܟܵܐ: ܘܲܠܡܲܫܵܪܘܼ ܐܲܣܵܪܵܐ: ܕܟ̣ܠ ܐ̄ܢܵܫ ܕܢܸܒ̣ܥܸܐ ܒܵܥܘܼ ܡ̣ܢ ܟܠ ܐܵܠܵܗ ܘܐ̄ܢܵܫ: ܥܕܲܡܵܐ ܠܝܵܘܡܝܼ̈ܢ ܬܠܵܬ̣ܝܼܢ: ܐܸܠܵܐ ܐܸܢ ܡܸܢܵܟ ܡܲܠܟܵܐ: ܢܸܫܬ̇ܕܸܐ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ.
ܚ:ܡܸܟܹ̇ܝܠ ܡܲܠܟܵܐ: ܬܸܦܩܘܿܕܼ ܦܘܼܩܕܵܢܵܐ ܗܵܢܵܐ: ܘܬܸܟ̣ܬ̇ܘܿܒ̣ ܟܬ̣ܵܒ̣ܵܐ: ܕܠܵܐ ܢܫܲܢܸܐ ܒܢܵܡܘܿܣ ܡܵܕܲܝ ܘܦܵܪܹܣ: ܘܠܵܐ ܢܸܬ̣ܚܲܠܲܦ.
ܛ:ܗܵܝܕܹ̇ܝܢ ܕܲܪܝܵܘܵܫ ܡܲܠܟܵܐ: ܪܫܲܡ ܟܬ̣ܵܒ̣ܵܐ: ܘܲܦܩܲܕܼ ܦܘܼܩܕܵܢܵܐ.
ܝ:ܘܟܲܕܼ ܝܑܼܕܲܥ̣ ܕܵܢܝܼܐܹܝܠ ܕܐܸܬ̣ܪ̱ܫܸܡ ܟܬ̣ܵܒ̣ܵܐ: ܥܲܠ̣ ܠܹܗ ܠܒܲܝܬܹ̇ܗ: ܘܟ̣ܵܘܹ̈ܐ ܦܬ̣ܝܼ̈ܚܵܝܵܢ ܗ̄ܘܲܝ̈ ܠܥܸܠܝܼܬܹܗ ܠܘܼܩܒܲܠ ܐܘܿܪܸܫܠܸܡ: ܘܲܬ̣ܠܵܬ̣ ܙܲܒ̣ܢܝܼ̈ܢ ܒܝܵܘܡܵܐ ܒܵܪܸܟ ܗ̄ܘܼܵܐ ܥܲܠ ܒܘܼܪ̈ܟܵܘܗܝ: ܘܲܡܨܲܠܸܐ ܘܡܵܘܕܸ̇ܐ ܩܕܼܵܡ ܐܲܠܵܗܹܗ: ܐܲܝܟܲܢܵܐ ܕܥܵܒܹ̇ܕܼ ܗ̄ܘܼܵܐ ܡ̣ܢ ܩܕܼܝܼܡ.
ܝܐ:ܗܵܝܕܹ̇ܝܢ ܓܲܒ̣ܪܹ̈ܐ ܗܵܢ̇ܘܿܢ: ܢܛܲܪܘ ܘܐܸܫ̣ܟ̇ܚܘܼܗܝ ܠܕܼܵܢܝܼܐܹܝܠ: ܟܲܕܼ ܒܵܥܹ̇ܐ ܘܡܸܬ̣ܚܲܢܲܢ ܩܕܼܵܡ ܐܲܠܵܗܹܗ.
ܝܒ:ܗܵܝܕܹ̇ܝܢ ܩ̣ܪܸܒ̣ܘ ܘܐܵܡ̇ܪܝܼܢ ܩܕܼܵܡ ܡܲܠܟܵܐ: ܠܥܵܠܲܡ ܚܝܝܼ: ܠܵܐ ܦܣܵܩܵܐ ܦ̣ܣܲܩܬ̇ ܡܲܠܟܵܐ ܘܲܪܫܲܡ̣ܬ̇: ܕܟ̣ܠ ܐ̄ܢܵܫ ܕܢܸܒ̣ܥܸܐ ܒܥܵܘܼ ܡ̣ܢ ܟܠ ܐܵܠܵܗ ܘܐ̄ܢܵܫ: ܥܕܲܡܵܐ ܠܲܬ̣ܠܵܬ̣ܝܼܢ ܝܵܘܡܝܼ̈ܢ: ܐܸܠܵܐ ܐܸܢ ܡܸܢܵܟ ܡܲܠܟܵܐ: ܢܸܫܬ̇ܕܸܐ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ: ܥܢ̣ܵܐ ܡܲܠܟܵܐ ܘܐܸܡ̣ܲܪ: ܒܩܘܼܫܬܵܐ ܗ̄ܝܼ ܡܸܠܬ̣ܵܐ: ܐܲܝܟ ܢܵܡܘܿܣ ܡܵܕܲܝ ܘܦܵܪܹܣ ܕܠܵܐ ܥܵܒܲܪ.
ܝܓ:ܗܵܝܕܹܝܢ ܥܢ̣ܵܘ ܘܐܵܡܪܝܼܢ ܩܕܼܵܡ ܡܲܠܟܵܐ: ܕܵܢܝܼܐܹܝܠ ܡ̣ܢ ܒܢܲܝ̈ ܫܒ̣ܝܼܬ̣ܵܐ ܕܲܝܗܘܼܕܼ: ܠܵܐ ܐܲܩܝܼܡ ܥܠܲܝܟ ܘܥܲܠ ܦܣܵܩܵܐ ܕܲܦܣܲܩ̣ܬ̇: ܘܙܲܒ̣ܢܝܼ̈ܢ ܬܠܵܬ̣ ܒܵܥܹ̇ܐ ܒܵܥܘܼܬܹܗ.
ܝܕ:ܗܵܝܕܹ̇ܝܢ ܡܲܠܟܵܐ ܟܲܕܼ ܡܸܠܬ̣ܵܐ ܗܵܕܹܐ ܫ̣ܡܲܥ: ܣܲܓ̇ܝܼ ܟܸܪܝܲܬ̤ ܠܹܗ: ܘܣܵܡ̣ ܒܪܸܥܝܵܢܹܗ ܕܲܢܦܲܨܹܝܘܗܝ ܠܕܼܵܢܝܼܐܹܝܠ: ܘܲܥܕܲܡܵܐ ܠܡܲܥܪ̈ܵܒܲܝ ܫܸܡܫܵܐ ܡܸܬ̣ܟܲܬܲܫ ܗ̄ܘܼܵܐ ܕܲܢܦܲܨܝܘܗܝ.
ܝܗ:ܗܵܝܕܹ̇ܝܢ ܓܲܒ̣ܪܹ̈ܐ ܗܵܢ̇ܘܿܢ: ܐܲܪܝܼܒ̣ܘ ܥܲܠ ܡܲܠܟܵܐ: ܘܐܵܡ̇ܪܝܼܢ ܠܹܗ: ܕܲܥ ܡܲܠܟܵܐ: ܕܢܵܡܘܿܣܵܐ ܐܝܼܬ̣ ܠܡܵܕܲܥ ܘܲܠܦܵܪܸܣ: ܕܟ̣ܠ ܦܣܵܩ ܘܲܩܝܵܡ ܕܲܢܩܝܼܡ ܡܲܠܟܵܐ ܠܵܐ ܢܫܲܢܸܐ.
ܝܘ:ܗܵܝܕܹ̇ܝܢ ܐܸܡܲܪ ܡܲܠܟܵܐ: ܘܐܲܝܬ̇ܝܘܼܗܝ ܠܕܼܵܢܝܼܐܹܝܠ ܘܐܲܪܡܝܘܼܗܝ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ: ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ: ܐܲܠܵܗܵܟ ܕܐܲܢ̄ܬ̇ ܦܵܠܲܚ ܐܲܢ̄ܬ̇ ܠܹܗ ܐܲܡܝܼܢܵܐܝܼܬ̣ ܗ̤ܘ ܢܫܵܘܙܒ̣ܵܟ.
ܝܙ:ܘܐܲܝܬ̇ܝܼܘ ܟܹܐܦܵܐ ܚܕܼܵܐ: ܘܣܵܡ̣ܘ ܥܲܠ ܦܘܼܡܹܗ ܕܓ̣ܘܼܒܵܐ: ܘܚܲܬ̣ܡܹܗ ܡܲܠܟܵܐ ܒܥܸܙܲܩܬܹܗ ܘܲܒ̣ܥܸܙܩܲܬ̣ ܪܵܘܪ̈ܒ̣ܵܢܵܘܗܝ: ܕܠܵܐ ܬܫܲܢܸܐ ܨܒ̣ܘܼ ܒܕܼܵܢܝܼܐܹܝܠ.
ܝܚ:ܗܵܝܕܹ̇ܝܢ ܐܸܙܲܠ̣ ܡܲܠܟܵܐ ܠܒܲܝܬܹ̇ܗ ܘܒ̣ܵܬ̣ ܛܘܵܬ̣: ܘܡܹܐܟ̣ܘܼܠܬܵܐ ܠܵܐ ܐܲܥܸܠ̣ܘ ܩܕܼܵܡܵܘܗܝ: ܘܫܸܢܬܸܗ ܦܸܪܕܲܬ̣ ܡܸܢܹܗ.
ܝܛ:ܗܵܝܕܹ̇ܝܢ ܡܲܠܟܵܐ ܒܨܲܦܪܵܐ ܩܵܡ̣ ܡܣܲܪܗܒ̣ܵܐܝܼܬ̣: ܘܒܲܥܓܲܠ ܠܓ̣ܘܼܒܵܐ ܕܐܲܪ̈ܝܵܘܵܬ̣ܵܐ ܐܸܙܲܠ̣.
ܟܟ:ܘܟܲܕܼ ܩ̣ܪܸܒ̣ ܠܓ̣ܘܼܒܵܐ: ܠܕܼܵܢܝܼܐܹܝܠ ܒܩܵܠܵܐ ܪܵܡܵܐ ܩ̣ܪܵܐ: ܥܢ̣ܵܐ ܡܲܠܟܵܐ ܘܐܸܡܲܪ ܠܕܼܵܢܝܼܐܹܝܠ: ܕܵܢܝܼܐܹܝܠ ܥܲܒ̣ܕܹ̇ܗ ܕܐܲܠܵܗܵܐ ܚܲܝܵܐ: ܐܲܠܵܗܵܟ ܕܐܲܢ̄ܬ̇ ܦܵܠܲܚ ܠܹܗ ܐܲܡܝܼܢܵܐܝܼܬ̣: ܐܸܫ̣ܟܲܚ ܦܲܨܝܵܟ ܡ̣ܢ ܐܲܪ̈ܝܵܘܵܬ̣ܵܐ.
ܟܐ:ܗܵܝܕܹ̇ܝܢ ܕܵܢܝܼܐܹܝܠ ܥܲܡ ܡܲܠܟܵܐ ܡܲܠܸܓ̣: ܘܐܸܡܲܪ: ܡܲܠܟܵܐ ܠܥܵܠܲܡ ܚܝܝܼ.
ܟܒ:ܐܲܠܵܗܝ ܫܲܕܲܪ ܡܲܠܲܐܟܹܗ: ܘܣܲܟܲܪ ܦܘܼܡܗܘܿܢ ܕܐܲܪ̈ܝܵܘܵܬ̣ܵܐ ܘܠܵܐ ܚܲܒ̇ܠ̣ܘܼܢܝ: ܡܸܛܠ ܕܙܵܟ̣ܘܼܬ̣ܵܐ ܩܕܼܵܡܵܘܗܝ ܐܸܫܬ̇ܟ̣ܚܲܬ̤ ܠܝܼ: ܘܐܵܦ ܩܕܼܵܡܲܝܟ ܡܲܠܟܵܐ ܣܲܟ̣ܠܘܼ ܠܵܐ ܥܸܒ̣ܕܹ̇ܬ̣.
ܟܓ:ܗܵܝܕܹ̇ܝܢ ܥܲܠ ܡܲܠܟܵܐ ܣܲܓ̇ܝܼ ܫܦܲܪ ܥܠܵܘܗܝ: ܘܐܸܡܲܪ ܠܡܲܣܵܩܘܼܬܹܗ ܠܕܼܵܢܝܼܐܹܝܠ ܡ̣ܢ ܓܘܼܒܵܐ: ܘܐܲܣܩ̣ܘܼܗܝ ܠܕܼܵܢܝܼܐܹܝܠ ܡ̣ܢ ܓܘܼܒܵܐ: ܘܡܸܕܸ̇ܡ ܚܒ̣ܵܠܵܐ ܠܵܐ ܐܸܫܬ̇ܟܲܚ ܒܹܗ: ܡܸܛܠ ܕܲܡܗܲܝܡܸܢ ܗ̄ܘܼܵܐ ܒܐܲܠܵܗܹܗ.
ܟܕ:ܘܐܸܡܲܪ ܡܲܠܟܵܐ: ܐܲܝܬܵܘ ܐܸܢܘܿܢ ܠܓܲܒ̣ܪܹ̈ܐ ܗܵܢ̇ܘܿܢ ܕܐܸܟܲܠܘ ܩܲܪ̈ܨܵܘܗܝ ܕܕܼܵܢܝܼܐܹܝܠ: ܘܐܲܪܡܵܘ ܐܸܢܘܿܢ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ: ܠܗܘܿܢ: ܘܲܠܢܸܫܲܝ̈ܗܘܿܢ: ܘܠܲܒ̣ܢܲܝ̈ܗܘܿܢ: ܘܐܲܪܡܝܼܘ ܐܸܢܘܿܢ ܒܓ̣ܘܼܒܵܐ: ܘܠܵܐ ܡ̣ܛܵܘ ܠܐܸܫܬܹ̇ܗ ܕܓ̣ܘܼܒܵܐ: ܘܲܫ̣ܠܲܛܘ ܒܗܘܿܢ ܐܲܪ̈ܝܵܘܵܬ̣ܵܐ ܘܟ̣ܠ ܓܲܪ̈ܡܲܝܗܘܿܢ ܕܲܩܸܩܘ.
ܟܗ:ܗܵܝܕܹ̇ܝܢ ܕܲܪܝܵܘܵܫ ܡܲܠܟܵܐ: ܟ̣ܬܲܒ̣ ܠܟ̣ܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ ܕܥܵܡ̇ܪܝܼܢ ܒܟ̣ܠܵܗ̇ ܐܲܪܥܵܐ: ܫܠܵܡܵܐ ܢܸܣܓܸ̇ܐ ܠܟ̣ܘܿܢ.
ܟܘ:ܡ̣ܢ ܩܕܼܵܡܲܝ ܐܸܬ̇ܬ̇ܣܝܼܡ ܢܵܡܘܿܣܵܐ: ܕܲܒ̣ܟ̣ܠ ܫܘܼܠܛܵܢ ܡܲܠܟ̇ܘܼܬ̣ܝ: ܢܸܗܘܘܿܢ ܙܵܝ̇ܥܝܼܢ ܘܕܼܵܚ̇ܠܝܼܢ ܡ̣ܢ ܩܕܼܵܡ ܐܲܠܵܗܹܗ ܕܕܼܵܢܝܼܐܹܝܠ: ܕܗ̤ܘܝܘܼ ܐܲܠܵܗܵܐ ܚܲܝܵܐ: ܘܩܲܝܵܡ ܠܥܵܠܡܝܼܢ: ܘܡܲܠܟ̇ܘܼܬܹܗ ܠܵܐ ܡܸܬ̣ܚܲܒ̇ܠܵܐ: ܘܫܘܼܠܛܵܢܹܗ ܥܕܲܡܵܐ ܠܣܵܘܦܵܐ.
ܟܙ:ܦܵܪܹܩ ܘܲܡܫܵܘܙܸܒ̣ ܘܲܡܦܲܨܸܐ: ܘܥܵܒܹ̇ܕܼ ܐܲܬ̣̈ܘܵܬ̣ܵܐ ܘܬܸܕܼܡܪ̈ܵܬ̣ܵܐ ܒܲܫܡܲܝܵܐ ܘܒܲܐܪܥܵܐ: ܕܫܵܘܙܸܒ̣ ܠܕܼܵܢܝܼܐܹܝܠ ܡ̣ܢ ܐܲܪ̈ܝܵܘܵܬ̣ܵܐ.
ܟܚ:ܘܕܼܵܢܝܼܐܹܝܠ ܝܑܼܪܸܒ̣ ܒܡܲܠܟ̇ܘܼܬܹܗ ܕܕܲܪܝܵܘܵܫ: ܘܲܒ̣ܡܲܠܟ̇ܘܼܬܹܗ ܕܟ̣ܘܼܪܸܫ ܦܵܪܣܵܝܵܐ.
ܩܹܦܵܠܹܐܘܿܢ:ܙ.
ܐ:ܒܲܫܢܲܬ̣ ܚܕܼܵܐ ܠܒܹܠܛܫܵܨܲܪ ܡܲܠܟܵܐ ܕܒ̣ܵܒܹܠ: ܕܵܢܝܼܐܹܝܠ ܚܸܠܡܵܐ ܚܙ̣ܵܐ: ܘܚܸܙ̈ܘܲܝ ܪܹܫܹܗ ܥܲܠ ܡܲܫܟ̇ܒܹܗ: ܗܵܝܕܹ̇ܝܢ ܚܸܠܡܵܐ ܟ̣ܬܲܒ̣ ܘܪܹܫ ܡܸܠܵܘ̈ܗܝ ܐܸܡܲܪ.
ܒ:ܥܢ̣ܵܐ ܕܵܢܝܼܐܹܝܠ ܘܐܸܡܲܪ: ܚܵܙܹ̇ܐ ܗ̄ܘܹ̇ܝܬ̣ ܒܚܸܙܘܵܐ ܕܠܸܠܝܵܐ: ܘܗܵܐ ܐܲܪܒܲܥ ܪ̈ܘܼܚܲܝ ܫܡܲܝܵܐ ܡܓ̣ܝܼ̈ܚܵܢ ܠܝܲܡܵܐ ܪܲܒܵܐ.
ܓ:ܘܐܲܪܒܲܥ ܚܲܝ̈ܘܵܢ ܪܵܘܪ̈ܒ̣ܵܢ ܣܵܠ̈ܩܵܢ ܡ̣ܢ ܝܲܡܵܐ: ܘܲܡܫܲܓ̣ܢ̱̈ܝܵܢ ܚܕܼܵܐ ܡ̣ܢ ܚܕܼܵܐ.
ܕ:ܩܲܕܼܡܵܝܬܵܐ ܐܲܝܟ ܐܲܪܝܵܐ: ܘܓܸܦܹ̈ܐ ܕܢܸܫܪܵܐ ܐܝܼܬ̣ ܠܵܗ̇: ܚܵܙܹ̇ܐ ܗ̄ܘܹ̇ܝܬ̣ ܕܐܸܬ̣ܡܲܪܲܛܘ ܓܸܦܹܝ̈ܗ̇: ܘܐܸܬ̇ܬ̇ܪܝܼܡܲܬ̤ ܡ̣ܢ ܐܲܪܥܵܐ: ܘܥܲܠ ܪܸ̈ܓ̣ܠܹܝܗ̇ ܐܲܝܟ ܐ̄ܢܵܫܵܐ ܩܵܡܲܬ̤: ܘܠܸܒܵܐ ܕܐ̄ܢܵܫܵܐ ܐܸܬ̣̱ܝܼܗܸܒ̣ ܠܵܗ̇.
ܗ:ܘܚܲܝ̄ܘܬ̣ܵܐ ܕܬܲܪܬܹ̇ܝܢ ܕܵܡ̇ܝܵܐ ܠܕܸܒܵܐ: ܘܲܠܚܲܕܼܣܛܲܪ ܩܵܡܲܬ̤: ܘܲܬ̣ܠܵܬ̣ ܐܸܠܥܝܼ̈ܢ ܒܦܘܼܡܵܗ̇ ܒܹܝܬ̣ ܫܸܢܹܝ̈ܗ̇: ܘܗܵܟܲܢܵܐ ܐܵܡ̇ܪܝܼܢ ܠܵܗ̇: ܩܘܼܡܝ ܐܲܟ̣ܘܿܠܝ ܒܸܣܪܵܐ ܣܲܓ̇ܝܼܐܵܐ.
ܘ:ܒܵܬܲܪ ܗܵܠܹܝܢ ܚܵܙܹ̇ܐ ܗܘܹ̇ܝܬ̣ ܚܲܝ̄ܘܬ̣ܵܐ ܐ̄ܚܪܹܬ̣ܵܐ ܐܲܝܟ ܢܸܡܪܵܐ: ܘܐܝܼܬ̣ ܠܵܗ̇ ܓܸܦܹ̈ܐ ܐܲܪܒ̇ܥܵܐ ܕܦܵܪܲܚܬ̣ܵܐ ܥܲܠ ܓܲܒܹ̇ܝ̈ܗ̇: ܘܐܲܪܒ̇ܥܵܐ ܪܹ̈ܫܝܼܢ ܐܝܼܬ̣ ܠܵܗ̇ ܠܚܲܝ̄ܘܬ̣ܵܐ ܗܵܝ̇: ܘܫܘܼܠܛܵܢܵܐ ܐܸܬ̣̱ܝܼܗܸܒ̣ ܠܵܗ̇.
ܙ:ܒܵܬܲܪ ܗܵܠܹܝܢ: ܚܵܙܹ̇ܐ ܗ̄ܘܹ̇ܝܬ̣ ܒܚܸܙܘܵܐ ܕܠܸܠܝܵܐ: ܚܲܝ̄ܘܼܬ̣ܵܐ ܪܒ̣ܝܼܥܬܵܐ: ܕܚܝܼܠܵܐ ܘܥܲܫܝܼܢܵܐ: ܘܬܲܩܝܼܦܵܐ ܝܲܬ̇ܝܼܪܵܐܝܼܬ̣ ܘܫܸܢܹ̈ܐ ܪܵܘܪ̈ܒ̣ܵܬ̣ܵܐ ܕܦܲܪܙܠܵܐ ܐܝܼܬ̣ ܠܵܗ̇: ܐܵܟ̣ܠܵܐ ܘܡܲܕ̇ܩܵܐ: ܘܡܸܕܹ̇ܡ ܕܡܵܘܬ̇ܪܵܐ ܒܪܸ̈ܓ̣ܠܹܝܗ̇ ܕܵܝ̇ܫܵܐ: ܘܗ̤ܝ ܡܫܲܓܢ̱ܝܵܐ ܡ̣ܢ ܟܠܗܹܝܢ ܚܲܝ̈ܘܵܬ̣ܵܐ ܕܲܩܕܼܵܡܹܝܗ̇: ܘܩܲܪ̈ܢܵܬ̣ܵܐ ܥܣܲܪܐܝܼܬ̣ ܠܵܗ̇.
ܚ:ܘܡܸܣܬܲܟܲܠ ܗ̄ܘܹ̇ܝܬ̣ ܒܩܲܪ̈ܢܵܬ̣ܵܗ̇: ܘܩܲܪܢܵܐ ܚܕܼܵܐ ܙܥܘܿܪܬܵܐ ܣܸܠܩܲܬ̤ ܡ̣ܢ ܒܲܝܢܵܬ̣ܗܹܝܢ: ܘܲܬ̣ܠܵܬ̣ ܡ̣ܢ ܩܲܪ̈ܢܵܬ̣ܵܐ ܩܲܕܼ̈ܡܵܝܵܬ̣ܵܐ ܐܸܬ̣ܥ̱ܩܲܪ ܡ̣ܢ ܩܕܼܵܡܹܝܗ̇: ܘܥܲܝܢܹ̈ܐ ܐܲܝܟ ܥܲܝܢܲܝ̈ ܒܲܪܢܵܫܵܐ ܒܩܲܪܢܵܐ ܗܵܝ̇: ܘܦܘܼܡܵܗ̇ ܡܡܲܠܸܠ ܪܵܘܪ̈ܒ̣ܵܬ̣ܵܐ.
ܛ:ܚܵܙܹ̇ܐ ܗ̄ܘܹ̇ܝܬ̣ ܟܘܼܪ̈ܣܵܘܵܬ̣ܵܐ ܐܸܬ̇ܬ̇ܣܝܼܡܘ: ܘܥܲܬ̇ܝܼܩ ܝܵܘ̈ܡܵܬ̣ܵܐ ܝܑܼܬܸܒ̣: ܠܒ̣ܘܼܫܹܗ ܐܲܝܟ ܬܲܠܓܵܐ ܚܸܘܵܪܵܐ: ܘܣܲܥܪܵܐ ܕܪܹܫܹܗ ܐܲܝܟ ܥܲܡܪܵܐ ܕܲܟ̣ܝܵܐ: ܟܘܼܪܣܝܹܗ ܫܲܠܗܹܒ̣ܝܼܬ̣ܵܐ ܕܢܘܼܪܵܐ: ܘܓ̣ܝܼܓ̣ܠܵܘ̈ܗܝ ܕܢܘܼܪܵܐ ܝܵܩܹܕ̇ܬܵܐ.
ܝ:ܢܲܗܪܵܐ ܕܢܘܼܪܵܐ ܪܵܕܹܐ ܘܢܵܦܹ̇ܩ ܡ̣ܢ ܩܕܼܵܡܵܘܗܝ: ܐܵܠܹܦ ܐܲܠܦܝܼ̈ܢ ܡܫܲܡܫܝܼܢ ܠܹܗ: ܘܪܸܒ̇ܘܿ ܪܸ̈ܒ̇ܘܵܢ ܩܵܝ̇ܡܝܼܢ ܩܕܼܵܡܵܘܗܝ: ܕܲܝܵܢܵܐ ܝܑܼܬܸܒ̣: ܘܣܸܦܪܹ̈ܐ ܐܸܬ̣ܦܬܲܚܘ.
ܝܐ:ܚܵܙܹ̇ܐ ܗ̄ܘܹ̇ܝܬ̣ ܕܐܸܬ̣ܩܲܠܠܹܬ̤ ܚܲܝ̄ܘܬ̣ܵܐ ܗܵܝ̇: ܘܐܸܒܲܕ ܓܘܼܫܡܵܗ̇: ܘܐܸܬ̣ܝܲܗ̄ܒܲܬ̤ ܠܝܲܩܕܵܢܵܐ ܕܢܘܼܪܵܐ.
ܝܒ:ܘܫܲܪܟ̇ܗܹܝܢ ܕܚܲܝ̈ܘܵܬ̣ܵܐ ܐܸܫܬ̇ܩܸܠ ܡ̣ܢ ܫܘܼܠܛܵܢܗܹܝܢ: ܘܢܘܼܓ̣ܪܵܐ ܘܚܲܝܹ̈ܐ ܐܸܬ̣ܝܼܗܸܒ̣ ܠܗܹܝܢ ܥܲܕܼ ܙܒܲܢ ܘܥܸܕܵܢ.
ܝܓ:ܚܵܙܹ̇ܐ ܗ̄ܘܹ̇ܝܬ̣ ܥܲܠ ܥܢܵܢܲܝ̈ ܫܡܲܝܵܐ ܐܲܝܟ ܒܲܪ ܐ̄ܢܵܫ̈ܝܼܢ ܐܸܬ̣ܵܐ: ܘܲܡ̣ܛܵܐ ܥܕܲܡܵܐ ܠܥܬ̇ܝܼܩ ܝܵܘ̈ܡܵܬ̣ܵܐ: ܘܲܩܕܼܵܡܵܘܗܝ ܩܲܪܒ̣ܘܼܗܝ.
ܝܕ:ܘܠܹܗ ܝܲܗ̄ܒ̣ ܫܘܼܠܛܵܢܵܐ: ܘܐܝܼܩܵܪܵܐ ܘܡܲܠܟ̇ܘܼܬ̣ܵܐ: ܕܟ̣ܠܗܘܿܢ ܥܲܡܡܹ̈ܐ ܘܐܸܡ̈ܘܵܬ̣ܵܐ ܘܠܸܫܵܢܹ̈ܐ ܠܹܗ ܢܸܦ̱ܠܚܘܼܢ: ܫܘܼܠܛܵܢܹܗ ܫܘܼܠܛܵܢ ܥܵܠܲܡ ܘܠܵܐ ܥܵܒܲܪ: ܘܡܲܠܟ̇ܘܼܬܹܗ ܠܵܐ ܡܸܬ̣ܚܲܒ̇ܠܵܐ.
ܝܗ:ܐܸܬ̣ܟܲܪܝܲܬ̤ ܪܘܼܚܝ ܐܸܢܵܐ ܕܵܢܝܼܐܹܝܠ ܒܓܼܵܘ ܡܲܫܟܲܒ̣ܝ: ܘܚܸܙ̈ܘܲܝ ܪܹܫܝ ܕܲܠܚܘܼܢܝ.
ܝܘ:ܘܩܸܪܒܹ̇ܬ̣ ܠܘܵܬ̣ ܚܲܕܼ ܡ̣ܢ ܡܫܲܡܫܵܢܹ̈ܐ: ܘܥܲܠ ܫܪܵܪܵܐ ܥܲܩܸܒ̣ܬܹ̇ܗ ܥܲܠ ܗܵܠܹܝܢ ܟܠܗܹܝܢ: ܘܐܸܡܲܪ ܠܝܼ ܒܲܫܪܵܪܵܐ: ܘܲܦܫܵܪ ܡܸܠܲܝ̈ ܐܵܘܕ̇ܥܲܢܝ.
ܝܙ:ܘܐܸܡܲܪ ܠܝܼ: ܗܵܠܹܝܢ ܚܲܝ̈ܘܵܬ̣ܵܐ ܪܵܘܪ̈ܒ̣ܵܬ̣ܵܐ ܐܲܪܒܲܥ ܕܲܚ̣ܙܲܝܬ̇: ܐܲܪܒ̇ܥܵܐ ܡܲܠܟ̇ܝܼ̈ܢ ܢܩܘܼܡܘܿܢ ܡ̣ܢ ܐܲܪܥܵܐ.
ܝܚ:ܘܲܢܩܲܒ̇ܠܘܼܢ ܡܲܠܟ̇ܘܼܬ̣ܵܐ ܩܲܕ̇ܝܼܫܹ̈ܐ ܕܲܡܪܲܝܡܵܐ: ܘܢܹܐܪܬ̇ܘܼܢܵܗ̇ ܠܡܲܠܟ̇ܘܼܬ̣ܵܐ ܠܥܵܠܲܡ ܘܲܠܥܵܠܲܡ ܥܵܠܡܝܼܢ.
ܝܛ:ܗܵܝܕܹ̇ܝܢ ܨܒܹ̇ܝܬ̣ ܠܲܡܥܲܩܵܒ̣ܘܼ ܥܲܠ ܚܲܝ̄ܘܬ̣ܵܐ ܪܒ̣ܝܼܥܵܝܬܵܐ: ܕܲܡܫܲܓܢ̱ܝܵܐ ܗ̄ܘܼܵܬ̣ ܡ̣ܢ ܟܠܗܹܝܢ: ܘܲܕܼܚܝܼܠܵܐ ܪܵܘܪܒ̣ܵܐܝܼܬ̣: ܫܸܢܹ̈ܝܗ̇ ܕܦܲܪܙܠܵܐ: ܘܛܸܦܪܹ̈ܝܗ̇ ܕܲܢܚܵܫܵܐ: ܐܵܟ̣ܠܵܐ ܘܡܲܕ̇ܩܵܐ: ܘܡܸܕܸ̇ܡ ܕܡܵܘܬ̇ܪܵܐ ܒܪܸ̈ܓ̣ܠܹܝܗ̇ ܕܵܝ̇ܫܵܐ.
ܟܟ:ܘܥܲܠ ܩܲܪ̈ܢܵܬ̣ܵܐ ܥܣܲܪ ܕܲܒ̣ܪܹܫܵܗ̇: ܘܥܲܠ ܐ̄ܚܪܹܬ̣ܵܐ ܕܣܸܠܩܲܬ̤ ܡ̣ܢ ܒܲܝܢܵܬ̣ܗܹܝܢ:ܘܲܢܦܲܠ ܡ̣ܢ ܩܕܼܵܡܹܝܗ̇ ܬܠܵܬ̣: ܘܩܲܪܢܵܐ ܗܵܝ̇ ܥܲܝܢܹ̈ܐ ܐܝܼܬ̣ ܠܵܗ̇: ܘܦܘܼܡܵܗ̇ ܡܡܲܠܸܠ ܪܵܘܪ̈ܒ̣ܵܢ: ܘܚܸܙܘܵܗ̇ ܪܲܒ̇ ܡ̣ܢ ܕܚܲܒ̣ܪ̈ܵܬ̣ܵܗ̇.
ܟܐ:ܚܵܙܹ̇ܐ ܗ̄ܘܹ̇ܝܬ̣ ܩܲܪܢܵܐ ܗܝ̇ ܥܵܒ̣ܕܵܐ ܩܪܵܒ̣ܵܐ ܥܲܡ ܩܲܕ̇ܝܼܫܹ̈ܐ: ܘܡܲܨܝܵܐ ܚܲܝܠܗܘܿܢ.
ܟܒ:ܥܕܲܡܵܐ ܕܐܸܬ̣ܵܐ ܥܲܬ̇ܝܼܩ ܝܵܘ̈ܡܵܬ̣ܵܐ: ܘܕܼܝܼܢܵܐ ܝܲܗ̄ܒ̣ ܠܩܲܕ̇ܝܼܫܹ̈ܐ ܕܲܡܪܲܝܡܵܐ: ܘܙܲܒ̣ܢܵܐ ܡ̣ܛܵܐ: ܘܡܲܠܟ̇ܘܼܬ̣ܵܐ ܝܑܼܪܸܬ̣ܘ ܩܲܕ̇ܝܼܫܹ̈ܐ.
ܟܓ:ܘܗܵܟܲܢܵܐ ܐܸܡܲܪ ܠܝܼ: ܚܲܝ̄ܘܬ̣ܵܐ ܪܒ̣ܝܼܥܵܝܬܵܐ: ܡܲܠܟ̇ܘܼܬ̣ܵܐ ܪܒ̣ܝܼܥܵܝܬܵܐ ܬܸܗܘܹܐ ܒܐܲܪܥܵܐ: ܘܬܸܬ̣ܝܲܬܲܪ ܥܲܠ ܟܠܗܹܝܢ ܡܲܠܟ̈ܘܵܬ̣ܵܐ: ܘܬܹܐܟ̣ܘܿܠ ܐܲܪܥܵܐ ܟܠܵܗ̇ ܘܲܬ̇ܕܼܘܼܫܝܼܗ̇ ܘܬܲܕ̇ܩܝܼܗ̇.
ܟܕ:ܘܩܲܪ̈ܢܵܬ̣ܵܐ ܥܣܲܪ: ܡ̣ܢ ܡܲܠܟ̇ܘܼܬ̣ܵܐ ܥܸܣܪܵܐ ܡܲܠܟ̇ܝܼ̈ܢ ܢܩܘܼܡܘܼܢ: ܘܐܲܚܪܹܢܵܐ ܢܩܘܼܡ ܒܵܬܲܪܗܘܿܢ: ܘܗ̤ܘ ܢܸܬ̣ܝܲܬܲܪ ܡ̣ܢ ܩܲܕܼܡܵܝܹ̈ܐ: ܘܲܬ̣ܠܵܬ̣ܵܐ ܡܲܠܟ̇ܝܼ̈ܢ ܢܡܲܟܸ̇ܟ.
ܟܗ:ܘܡܸܠܹ̈ܐ ܥܲܠ ܡܪܲܝܡܵܐ ܢܡܲܠܸܠ: ܘܥܲܠ ܩܲܕ̇ܝܼܫܹ̈ܐ ܕܲܡܪܲܝܡܵܐ ܢܸܟ̣ܠܵܐ: ܘܢܸܣܒܲܪ ܠܲܡܚܲܠܵܦܘܼ ܙܲܒ̣ܢܹ̈ܐ ܘܢܵܡܘܿܣܹ̈ܐ: ܘܢܸܬ̣ܝܲܗ̄ܒ̇ܘܼܢ ܒܐܝܼܕܹܗ: ܥܲܕܼ ܥܸܕܵܢ ܥܸܕܵܢܝܼ̈ܢ: ܘܦܸܠܓ̇ܘܼܬ̣ ܥܸܕܵܢ.
ܟܘ:ܘܕܲܝܵܢܵܐ ܝܑܼܬܸܒ̣ ܘܫܘܼܠܛܵܢܹܗ ܫܩܲܠ̣ܘ ܡܸܢܹܗ: ܕܲܢܚܲܒ̇ܠܘܼܢܹܗ ܘܢܵܘܒ̇ܕܼܘܼܢܹܗ ܥܕܲܡܵܐ ܠܣܵܘܦܵܐ ܕܡܲܠܟ̇ܘܼܬ̣ܵܐ.
ܟܙ:ܘܫܘܼܠܛܵܢܵܐ ܘܪܲܒ̇ܘܼܬ̣ܵܐ ܘܡܲܠܟ̇ܘܼܬ̣ܵܐ ܕܲܬ̣ܚܹܝܬ̣ ܫܡܲܝܵܐ: ܐܸܬ̣ܝܲܗ̄ܒܲܬ̤ ܠܥܲܡܵܐ ܩܲܕ̇ܝܼܫܵܐ ܕܲܡܪܲܝܡܵܐ: ܡܲܠܟ̇ܘܼܬܹܗ ܡܲܠܟ̇ܘܼܬ̣ ܥܵܠܲܡ: ܘܟ̣ܠ ܫܘܼܠܛܵܢܝܼ̈ܢ ܠܹܗ ܢܸܦ̱ܠܚܘܼܢ ܘܢܸܫܬܲܡܥܘܼܢ.
ܟܚ:ܥܕܲܡܵܐ ܠܗܵܪܟܵܐ ܣܵܘܦܵܗ̇ ܕܡܸܠܬ̣ܵܐ: ܐܸܢܵܐ ܕܵܢܝܼܐܹܝܠ ܣܲܓ̇ܝܼ ܪܸ̈ܥܝܵܢܲܝ ܕܲܠܚ̣ܘܼܢܝ: ܘܙܝܼܘܲܝ̈ ܐܸܫܬܲܢܝܼܘ ܥܠܲܝ: ܘܡܸܠܬ̣ܵܐ ܒܠܹܒ̇ܝ ܢܸܛ̇ܪܹܬ̣.
ܩܹܦܵܠܹܐܘܿܢ:ܚ.
ܐ:ܒܲܫܢܲܬ̣ ܬܠܵܬ̣ ܕܡܲܠܟ̇ܘܼܬܹܗ ܕܒܹܠܛܫܵܨܲܪ ܡܲܠܟܵܐ: ܚܸܙܘܵܐ ܐܸܬ̣ܚ̄ܙܝܼ ܠܝܼ ܐܸܢܵܐ ܕܵܢܝܼܐܹܝܠ: ܡ̣ܢ ܒܵܬܲܪ ܚܸܙܘܵܐ ܩܲܕܼܡܵܝܵܐ ܕܐܸܬ̣ܚ̄ܙܝܼ ܠܝܼ.
ܒ:ܚܙܹ̇ܝܬ̣ ܒܚܸܠܡܝ: ܕܲܒ̣ܫܘܿܫܲܢ ܗ̄ܘܹ̇ܝܬ̣ ܒܝܼܪܬܵܐ ܕܲܒ̣ܥܝܼܠܲܡ ܡܕܼܝܼܢ̄ܬܵܐ: ܘܲܚܙܹ̇ܝܬ̣ ܒܚܸܠܡܝ: ܕܩܵܐܹ̇ܡ ܐ̄ܢܵܐ ܥܲܠ ܐܵܒ̣ܘܿܠ ܐܘܿܠܲܝ.
ܓ:ܘܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣: ܘܗܵܐ ܕܸܟ̣ܪܵܐ ܚܲܕܼ ܩܵܐܹ̇ܡ ܐܵܒ̣ܘܿܠ: ܘܐܝܼܬ̣ ܠܹܗ ܩܲܪ̈ܢܵܬ̣ܵܐ: ܘܩܲܪ̈ܢܵܬܹܗ ܪ̈ܵܡܵܢ: ܘܲܚܕܼܵܐ ܪܵܡܵܐ ܡ̣ܢ ܚܒܲܪܬ̣ܵܗ̇: ܘܗܵܝ̇ ܪܵܡܬ̣ܵܐ ܐ̄ܚܪܵܝܑܬ̣ ܝܼܥܵܬ̤.
ܕ:ܚܙܹ̇ܝܬ̣ ܕܸܟ̣ܪܵܐ ܡܕܲܩܲܪ ܠܡܲܥܡ̱ܪܒ̣ܵܐ: ܘܲܠܓܲܪܒ̇ܝܵܐ: ܘܲܠܬܲܝܡܢܵܐ: ܘܟ̣ܠܗܹܝܢ ܚܲܝ̈ܘܵܬ̣ܵܐ ܠܵܐ ܩܵܝ̈ܡܵܢ ܩܕܼܵܡܵܘܗܝ: ܘܠܲܝܬ̇ ܕܡܸܫܬܵܘܙܲܒ̣ ܡ̣ܢ ܐܝܼܕܼܵܘ̈ܗܝ: ܘܲܥ̣ܒܲܕܼ ܐܲܝܟ ܕܲܨܒ̣ܵܐ ܘܐܸܬ̇ܬ̇ܪܝܼܡ.
ܗ:ܘܐܸܢܵܐ ܡܸܬ̣ܒܲܝܲܢ ܗ̄ܘܹ̇ܝܬ̣: ܘܨܸܦܪܵܝܵܐ ܕܥܸܙܹ̈ܐ ܐܸܬ̣ܵܐ ܡ̣ܢ ܡܲܥ̱ܪܒ̣ܵܐ ܥܲܠ ܐܲܦܲܝ̈ ܟܠܵܗ̇ ܐܲܪܥܵܐ: ܘܠܵܐ ܢܵܟܹ̇ܐ ܗ̄ܘܼܵܐ ܒܐܲܪܥܵܐ: ܘܨܸܦܪܵܝܵܐ ܩ̣ܪܢܵܐ ܡܸܬ̣ܚܲܙܝܵܐ ܒܹܝܬ̣ ܥܲܝܢܵܘ̈ܗܝ.
ܘ:ܘܐܸܬ̣ܵܐ ܘܲܡܛ̣ܵܐ ܥܕܲܡܵܐ ܠܕܸܟ̣ܪܵܐ ܗܵܘܿ ܕܐܝܼܬ̣ ܠܹܗ ܩܲܪ̈ܢܵܬ̣ܵܐ: ܕܲܚ̇ܙܹܝܬ̣ ܕܩܵܐܹ̇ܡ ܩܕܼܵܡ ܐܵܒ̣ܘܿܠ: ܘܲܪܗܸܛ̣ ܥܠܵܘܗܝ ܒܚܹܐܦܹܗ.
ܙ:ܘܲܡ̣ܛܵܝܗܝ ܠܕܸܟ̣ܪܵܐ ܘܐܸܬ̣ܡܪܡܲܪ ܥܠܵܘܗܝ: ܘܲܡܚܵܝܗܝ ܠܕܸܟ̣ܪܵܐ ܘܬܲܒܲܪ ܠܬܲܪ̈ܬܲܝܗܹܝܢ ܩܲܪ̈ܢܵܬܹܗ: ܘܠܵܐ ܗܘ̤ܵܐ ܒܹܗ ܚܲܝܠܵܐ ܒܕܸܟ̣ܪܵܐ ܠܲܡܩܵܡ ܩܕܼܵܡܵܘܗܝ: ܘܐܲܪܡܝܹܗ ܥܲܠ ܐܲܪܥܵܐ ܘܕܼܵܫܹܗ: ܘܠܵܐ ܗܘ̤ܵܐ ܕܲܡܦܲܨܸܐ ܠܹܗ ܠܕܸܟ̣ܪܵܐ ܡ̣ܢ ܐܝܼܕܵܘ̈ܗܝ ܕܨܸܦܪܵܝܵܐ ܕܥܸܙܹ̈ܐ.
ܚ:ܘܨܸܦܪܵܝܵܐ ܕܥܸܙܹ̈ܐ ܪܒ̣ܵܐ ܣܲܓ̇ܝܼ: ܘܟܲܕܼ ܥ̣ܫܸܢ ܐܸܬ̇ܬ̇ܒ̣ܪܲܬ̤ ܩܲܪܢܹܗ ܪܲܒ̇ܬ̣ܵܐ: ܘܲܣܠܸܩ ܕܡܸܬ̣ܚܲܙ̈ܝܵܢ ܐܲܪܒܲܥ ܡ̣ܢ ܬܚܘܿܬܹܝܗ̇: ܠܐܲܪܒܲܥ ܪ̈ܘܼܚܲܝ ܫܡܲܝܵܐ.
ܛ:ܘܡ̣ܢ ܚܕܼܵܐ ܡܸܢܗܹܝܢ ܢܸܦܩܲܬ̤ ܩܲܪܢܵܐ ܚܕܼܵܐ ܙܥܘܿܪܬܵܐ: ܘܲܪܒ̣ܵܬ̤ ܝܲܬ̇ܝܼܪܵܐܝܼܬ̣ ܠܬܲܝܡܢܵܐ: ܘܲܠܡܲܕܼܢ̱ܚܵܐ.
ܝ:ܘܲܪܒ̣ܵܬ̤ ܥܕܲܡܵܐ ܠܚܲܝ̈ܠܹܐ ܕܲܫܡܲܝܵܐ: ܘܐܲܦܠܲܬ̤ ܐܲܪܥܵܐ: ܘܡ̣ܢ ܚܲܝ̈ܠܹܐ: ܘܡ̣ܢ ܟܵܘ̈ܟ̇ܒܹ̈ܐ: ܘܕܼܵܫܲܬ̤ ܐܸܢܘܿܢ.
ܝܐ:ܘܲܥܕܲܡܵܐ ܠܪ̈ܲܒܲܝ ܚܲܝ̈ܠܹܐ ܡܛܵܬ̤: ܘܡܸܢܹܗ ܐܲܪܝܼܡ ܐܲܡܝܼܢܘܼܬ̣ܵܐ: ܘܲܫ̣ܪܵܐ ܡܲܬ̣ܩܲܢ ܡܲܩܕ̇ܫܹܗ.
ܝܒ:ܘܚܲܝܠܵܐ ܐܸܬ̣̱ܝܼܗܸܒ̣ ܥܲܠ ܐܲܡܝܼܢܘܼܬ̣ܵܐ ܒܚܵܘ̈ܒܹ̇ܐ: ܘܐܸܫܬ̇ܕܼܝܼ ܩܘܼܕܼܫܵܐ ܥܲܠ ܐܲܪܥܵܐ ܘܲܥ̣ܒܲܪ ܘܐܲܨܠܲܚ.
ܝܓ:ܘܫܸܡ̇ܥܹܬ̣ ܚܲܕܼ ܩܲܕ̇ܝܼܫܵܐ ܕܲܡܡܲܠܸܠ: ܘܐܸܡ̣ܲܪ ܚܲܕܼ ܩܲܕ̇ܝܼܫܵܐ ܠܲܦܠܘܿܡܢܝܼ ܕܲܡܡܲܠܸܠ: ܥܕܲܡܵܐ ܠܐܸܡܲܬ̣ܝ ܚܸܙܘܵܐ ܕܐܲܡܝܼܢܘܼܬ̣ܵܐ: ܘܥܵܘܼܠܵܐ ܘܲܚܒ̣ܵܠܵܐ ܢܸܫܬܲܠܲܡ: ܘܩܘܼܕܼܫܵܐ ܘܚܲܝܠܵܐ ܢܸܬ̇ܬ̇ܕ̇ܝܼܫ.
ܝܕ:ܘܐܸܡܲܪ ܠܹܗ: ܥܲܕܼ ܪܡܸܫ ܨܦܲܪ: ܬܪܹܝܢ ܐܲܠܦ̈ܝܼܢ ܘܲܬ̣ܠܵܬ̣ܡܵܐܐ ܘܢܸܙܟܹ̇ܐ ܙܸܕܼܩܵܐ.
ܝܗ:ܘܟܲܕܼ ܚܙܹܝ̇ܬ̣ ܐܸܢܵܐ ܕܵܢܝܼܐܹܝܠ ܚܸܙܘܵܐ: ܒܥܹ̇ܝܬ̣ ܠܡܸܣܬܲܟܵܠܘܼ: ܘܗܵܐ ܩܵܐܹ̇ܡ ܠܘܼܩܒܲܠܝ ܐܲܝܟ ܚܸܙܘܵܐ ܕܓܲܒ̣ܪܵܐ.
ܝܘ:ܘܫܹܡܥܹ̇ܬ̣ ܩܵܠܵܐ ܕܐ̄ܢܵܫܵܐ ܡ̣ܢ ܒܲܝܢܵܬ̣ ܐܘܿܠܲܝ: ܕܲܩܪܵܐ ܘܐܸܡ̣ܲܪ ܓܲܒ̣ܪܝܹܠ: ܣܲܟܸ̇ܠ ܠܗܵܢܵܐ ܚܸܙܘܵܐ ܗܵܢܵܐ.
ܝܙ:ܘܐܸܬ̣ܵܐ ܠܘܵܬ̣ܝ ܐܲܬܲܪ ܕܩܵܐܹ̇ܡ ܐ̄ܢܵܐ: ܘܟܲܕܼ ܐܸܬ̣ܵܐ ܕܸܚܠܹܬ̣ ܘܢܸܦܠܹ̇ܬ̣ ܥܲܠ ܐܲܦܲܝ̈: ܘܐܸܡ̣ܲܪ ܠܝܼ: ܐܸܣܬܲܟܲܠ ܒܲܪܢܵܫܵܐ: ܡܸܛܠ ܕܲܠܥܸܕܵܢ ܣܵܘܦܵܐ ܚܸܙܘܵܐ ܗܵܢܵܐ.
ܝܚ:ܘܟܲܕܼ ܡܡܲܠܸܠ ܥܲܡܝ: ܐܸܬ̣ܓܲܪܓ̇ܚܹ̇ܬ̣ ܥܲܠ ܐܲܦܲܝ̈ ܥܲܠ ܐܲܪܥܵܐ: ܘܲܩ̣ܪܸܒ̣ ܠܝܼ ܘܐܲܩܝܼܡܲܢܝ ܥܲܠ ܩܝܵܡܝ.
ܝܛ:ܘܐܸܡ̣ܲܪ ܠܝܼ: ܗܵܐ ܐܸܢܵܐ ܡܚܵܘܸܐ ܐ̄ܢܵܐ ܠܵܟ: ܡܵܐ ܕܢܸܗܘܹܐ ܒܣܘܿܦ ܪܘܼܓ̣ܙܵܐ ܒܲܙܒܲܢ ܣܵܘܦܵܐ.
ܟ:ܕܸܟ̣ܪܵܐ ܕܲܚ̣ܙܲܝܬ̇ ܕܐܝܼܬ̣ ܠܹܗ ܩܲܪ̈ܢܵܬ̣ܵܐ: ܡܠܸܟ ܡܵܕܲܝ ܘܦܵܪܹܣ.
ܟܐ:ܘܨܸܦܪܵܝܵܐ ܕܥܸܙܹ̈ܐ ܡܲܠܟܵܐ ܕܝܵܘ̈ܢܵܝܹܐ: ܘܩܲܪܢܵܐ ܪܲܒ̇ܬ̣ܵܐ ܕܐܝܼܬ̣ ܒܹܝܬ̣ ܥܲܝܢܵܘ̈ܗܝ: ܗ̤ܘܝܘܼ ܡܲܠܟܵܐ ܩܲܕܼܡܵܝܵܐ.
ܟܒ:ܘܕܸܐܬ̇ܬܲܒ̣ܪܲܬ̤ ܘܩܵܡ̣ ܐܲܪܒܲܥ ܡ̣ܢ ܬܚܘܿܬܹܝܗ̇: ܐܲܪܒ̇ܥܵܐ ܡܲܠܟ̇ܝܼ̈ܢ ܡ̣ܢ ܥܲܡܵܐ ܢܩܘܼܡܘܿܢ ܘܠܵܐ ܒܚܲܝܠܗܘܿܢ.
ܟܓ:ܘܒ̣ܣܘܿܦ ܡܲܠܟ̇ܘܼܬ̣ܗܘܿܢ ܡܵܐ ܕܲܫܠܸܡ̣ܘ ܚܵܘ̈ܒܹ̇ܐ: ܢܩܘܼܡ ܡܲܠܟܵܐ ܬܲܩܝܼܦ ܐܲܦܹ̈ܐ: ܘܡܸܣܬܲܟܲܠ ܐܘܼܚܕܵܢ.
ܟܕ:ܘܬܲܩܝܼܦ ܚܲܝܠܹܗ: ܘܠܵܐ ܒܚܲܝܠܵܐ ܕܢܲܦ̮ܫܹܗ: ܘܬܸܕܼܡܪ̈ܵܬ̣ܵܐ ܢܚܲܒܸ̇ܠ ܘܢܲܨܠܲܚ: ܘܢܸܥܒܲܪ ܘܲܢܚܲܒܸ̇ܠ ܥܲܫܝܼܢܹ̈ܐ: ܘܥܲܡܵܐ ܕܩܲܕ̇ܝܼܫܹ̈ܐ.
ܟܗ:ܘܒ̣ܐܘܼܚܕܵܢܹܗ ܢܲܨܠܲܚ ܢܸܟ̣ܠܵܐ ܒܐܝܼܕܹܗ: ܘܠܸܒܹ̇ܗ ܢܸܬ̇ܬ̇ܪܝܼܡ: ܘܲܒ̣ܫܸܠܝܵܐ ܢܚܲܒܸ̇ܠ ܣܲܓ̇ܝܼ̈ܐܹܐ: ܘܥܲܠ ܫܲܠܝܼܛ ܫܲܠܝܼܛܵܢܹ̈ܐ ܢܩܘܼܡ: ܘܲܒ̣ܡܹܐܚܲܕܼ ܐܝܼܕܼܵܐ ܢܸܬ̇ܬ̇ܒܲܪ.
ܟܘ:ܘܚܸܙܘܵܐ ܕܨܲܦܪܵܐ ܘܲܕܼܪܲܡܫܵܐ ܕܐܸܬ̣ܐ̱ܡܲܪ ܩܘܼܫܬܵܐ ܗ̄ܘܼ: ܘܐܲܢ̄ܬ̇ ܕܹܝܢ ܕܵܢܝܼܐܹܝܠ: ܟܣܝܼܘܗܝ ܠܚܸܙܘܵܐ ܗܵܢܵܐ: ܡܸܛܠ ܕܲܠܝܵܘ̈ܡܵܬ̣ܵܐ ܗ̄ܘܼ ܣܲܓ̇ܝܼ̈ܐܹܐ.
ܟܙ:ܘܐܸܢܵܐ ܕܵܢܝܼܐܹܝܠ: ܙܵܥܹ̇ܬ̣ ܘܐܸܬ̣ܕܲܠܚܹ̇ܬ̣ ܝܵܘ̈ܡܵܬ̣ܵܐ: ܘܩܵܡܹ̇ܬ̣ ܘܣܸܥ̇ܪܹܬ̣ ܥܒ̣ܝܼ̈ܕܼܵܬ̣ܵܐ ܕܡܲܠܟܵܐ: ܘܐܸܬ̇ܕܲܡ̇ܪܹܬ̣ ܒܚܸܙܘܵܐ ܘܠܲܝܬ̇ ܕܡܸܬ̣ܒܲܝܲܢ.
ܩܹܦܵܠܹܐܘܿܢ:ܛ.
ܐ:ܒܲܫܢܲܬ̣ ܚܕܼܵܐ ܕܕܲܪܝܵܘܵܫ ܒܲܪ ܐܲܚܫܝܼܪܲܫ ܡ̣ܢ ܙܲܪܥܵܐ ܕܡܵܕܼܵܝܹ̈ܐ: ܕܐܲܡ̣ܠܸܟ ܒܡܲܠܟ̇ܘܼܬ̣ܵܐ ܕܟܲܠܕܼܵܝܹ̈ܐ.
ܒ:ܒܲܫܢܲܬ̣ ܚܕܼܵܐ ܠܡܲܠܟ̇ܘܼܬܹܗ: ܐܸܢܵܐ ܕܵܢܝܼܐܹܝܠ ܐܸܬ̣ܒܲܝܢܹ̇ܬ̣ ܒܣܸܦܪܵܐ ܒܡܸܢܝܵܢ ܫ̈ܢܲܝܵܐ: ܚܙܹ̇ܝܬ̣ ܕܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܕܐܸܡܲܪ ܐܹܪܲܡܝܵܐ ܢܒ̣ܝܼܵܐ: ܟܲܕܼ ܫܠܸܡ̣ ܠܚܘܼܪܒܵܗ̇ ܕܐܘܿܪܸܫܠܸܡ ܫܲܒ̣ܥܝܼܢ ܫܢ̈ܝܼܢ.
ܓ:ܐܲܪܝܼܡܹ̇ܬ̣ ܐܲܦܲܝ̈ ܩܕܼܵܡ ܡܵܪܝܵܐ ܐܲܠܵܗܵܐ: ܠܡܸܒ̣ܥܵܐ ܒܲܨܠܘܿܬ̣ܵܐ ܘܲܒ̣ܬܲܟ̣ܫܲܦ̮ܬܵܐ: ܘܲܒ̣ܨܵܘܡܵܐ: ܘܲܒ̣ܣܲܩܵܐ: ܘܲܒ̣ܩܸܛܡܵܐ.
ܕ:ܘܨܲܠܝܼܬ̣ ܩܕܼܵܡ ܡܵܪܝܵܐ ܐܲܠܵܗܝ: ܘܐܵܘܕ̇ܝܼܬ̣ ܘܐܸܡ̇ܪܹܬ̣: ܒܒ̣ܵܥܘܼ ܡܵܪܝܵܐ ܐܲܠܵܗܵܐ ܪܲܒܵܐ ܘܲܕܼܚܝܼܠܵܐ: ܢܵܛܲܪ ܩܝܵܡܵܐ ܘܛܲܝܒ̇ܘܼܬ̣ܵܐ ܠܪ̈ܵܚܡܵܘܗܝ: ܘܠܲܐܝܠܹܝܢ ܕܢܵܛ̇ܪܝܼܢ ܦܘܼܩ̈ܕܵܢܵܘܗܝ.
ܗ:ܚ̣ܛܲܝܢ ܘܐܲܣ̣ܟܸ̇ܠܢ: ܘܐܲܪܫܲܠܸܡ ܘܲܡܪܲܕܼܢ: ܘܲܣܛܲܝܢ ܡ̣ܢ ܦܘܼܩ̈ܕܵܢܲܝܟ: ܘܡ̣ܢ ܕܝܼܢܲܝ̈ܟ.
ܘ:ܘܠܵܐ ܫ̣ܡܲܥܢ ܠܥܲܒ̣ܕܲܝ̈ܟ ܢܒ̣̈ܝܹܐ ܕܡܲܠܸܠ̣ܘ ܒܲܫܡܵܟ: ܥܲܠ ܡܲܠ̈ܟܝܼܢ ܘܪܵܘܪ̈ܒ̣ܵܢܲܝܢ: ܘܥܲܠ ܐܲܒ̣ܵܗܲܝ̈ܢ: ܘܥܲܠ ܟܠܹܗ ܥܲܡܵܐ ܕܐܲܪܥܵܐ.
ܙ:ܕܝܼܠܵܟ ܡܵܪܝܵܐ ܙܵܟ̣ܘܼܬ̣ܵܐ: ܘܕܼܝܼܠܲܢ ܒܸܗܬܲܬ̣ ܐܲܦܹ̈ܐ ܐܲܝܟ ܕܝܵܘܡܵܢܵܐ: ܠܐ̄ܢܵܫܲܝ̈ ܝܑܼܗܘܼܕܼܵܐ: ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܲܠܟ̣ܠܵܗ̇ ܝܑܼܣܪܵܝܹܠ ܕܩܲܪܝܼܒ̣ܝܼܢ ܘܲܕܼܪܲܚܝܼܩܝܼܢ: ܒܟ̣ܠ ܐܲܪ̈ܥܵܬ̣ܵܐ ܕܒܲܕܲܪܬ̇ ܐܸܢܘܿܢ ܠܬܲܡܵܢ: ܒܥܵܘܼܠܗܘܿܢ ܕܐܲܥ̣ܠܝܼܘ ܒܵܟ.
ܚ:ܡܵܪܝܵܐ ܕܝܼܠܲܢ ܒܸܗܬܲܬ̣ ܐܲܦܹ̈ܐ: ܠܡܲܠܟܲܝ̈ܢ: ܘܲܠܪܵܘܪ̈ܒ̣ܵܢܲܝܢ: ܘܠܲܐܒ̣ܵܗܲܝ̈ܢ: ܥܲܠ ܕܲܚܛܲܝܢ ܠܵܟ.
ܛ:ܕܡܵܪܝܵܐ ܐܲܠܵܗܵܐ ܪ̈ܲܚܡܹܐ ܘܫܘܼܒ̣ܩܲܢ ܚܛܵܗܹ̈ܐ ܕܲܡܪܲܕܼܢ ܒܹܗ.
ܝ:ܘܠܵܐ ܫ̣ܡܲܥܢ ܒܩܵܠܹܗ ܕܡܵܪܝܵܐ ܐܲܠܵܗܲܢ: ܠܲܡܗܲܠܵܟ̣ܘܼ ܒܢܵܡܘܿܣܵܘ̈ܗܝ ܕܝܲܗ̄ܒ̣ ܩܕܼܵܡܲܝܢ ܒܝܲܕܼ ܥܲܒ̣ܕܵܘ̈ܗܝ ܢܒ̣ܝܹ̈ܐ.
ܝܐ:ܘܟ̣ܠܹܗ ܝܑܼܣܪܵܝܹܠ ܥ̣ܒܲܪܘ ܥܲܠ ܢܵܡܘܿܣܵܟ: ܘܲܣ̣ܛܵܘ ܘܠܵܐ ܫܡܲܥܘ ܒܩܵܠܵܟ: ܘܐܲܝܬ̇ܝܼܬ̇ ܥܠܲܝܗܘܿܢ ܠܵܘ̈ܛܵܬ̣ܵܐ ܘܡܵܘ̈ܡܵܬ̣ܵܐ: ܕܲܟ̣ܬ̣ܝܼ̈ܒ̣ܵܢ ܒܢܵܡܘܿܣܹܗ ܕܡܘܼܫܹܐ ܥܲܒ̣ܕܹ̇ܗ ܕܐܲܠܵܗܵܐ: ܥܲܠ ܕܲܚܛܲܝܢ ܩܕܼܵܡܵܘܗܝ.
ܝܒ:ܘܐܲܩܝܼܡ ܡܸܠܵܘ̈ܗܝ ܕܡܲܠܸܠ ܥܠܲܝܢ: ܘܥܲܠ ܕܲܝܵܢܲܝ̈ܢ ܕܕܼܵܢܘܼܢ: ܠܡܲܝܬܵܝܘܼ ܥܠܲܝܢ ܒܝܼܫܬܵܐ ܪܲܒ̇ܬ̣ܵܐ: ܕܠܵܐ ܐܸܬ̣ܥܲܒ̣ܕܲܬ̤ ܐܲܟ̣ܘܵܬ̣ܵܗ̇ ܬܚܹܝܬ̣ ܫܡܲܝܵܐ: ܐܲܝܟ ܕܐܸܬ̣ܥܲܒ̣ܕܲܬ̤ ܒܐܘܿܪܸܫܠܸܡ.
ܝܓ:ܐܲܝܟ ܕܲܟ̣ܬ̣ܝܼܒ̣ ܒܢܵܡܘܿܣܵܐ ܕܡܘܼܫܹܐ: ܟܠܵܗ̇ ܒܝܼܫܬܵܐ ܗܵܕܹܐ ܐܸܬܲܬ̤ ܥܠܲܝܢ: ܘܠܵܐ ܨܲܠܝܼܢ ܩܕܼܵܡ ܡܵܪܝܵܐ ܐܲܠܵܗܲܢ: ܕܲܢܬ̣ܘܼܒ̣ ܡ̣ܢ ܥܵܘܼܠܲܢ: ܘܢܸܣܬܲܟܲܠ ܗܲܝܡܵܢܘܼܬ̣ܵܟ: ܘܐܲܥܝܼܪ ܡܵܪܝܵܐ ܒܝܼܫܬܵܐ ܘܐܲܝܬ̇ܝܵܗ̇ ܥܠܲܝܢ.
ܝܕ:ܡܸܛܠ ܕܙܲܕ̇ܝܼܩ ܗ̄ܘܼ ܡܵܪܝܵܐ ܐܲܠܵܗܲܢ ܒܟ̣ܠܗܘܿܢ ܥܒ̣ܵܕܼܵܘ̈ܗܝ ܕܲܥ̣ܒܲܕܼ: ܘܠܵܐ ܫܡܲܥܢ ܒܩܵܠܹܗ.
ܝܗ:ܡܸܟܹ̇ܝܠ ܡܵܪܝܵܐ ܐܲܠܵܗܲܢ: ܕܐܲܦܸܩ̣ܬ̇ ܠܥܲܡܵܟ ܡ̣ܢ ܐܲܪܥܵܐ ܕܡܸܨܪܹܝܢ ܒܐܝܼܕܼܵܐ ܥܲܫܝܼܢܬܵܐ: ܘܲܥ̣ܒܲܕ̇ܬ̇ ܠܵܟ ܫܡܵܐ ܐܲܝܟ ܕܝܵܘܡܵܢܵܐ: ܚܛܲܝܢ ܘܐܲܪܫܲܥ̣ܢ.
ܝܘ:ܡܵܪܝܵܐ: ܐܲܝܟ ܟܠܵܗ̇ ܙܲܕ̇ܝܼܩܘܼܬ̣ܵܟ ܕܲܥ̣ܒܲܕ̇ܬ̇ ܥܲܡܲܢ: ܢܸܗܦܘܿܟ ܪܘܼܓ̣ܙܵܟ ܘܚܸܡܬ̣ܵܟ ܡ̣ܢ ܡܕܼܝܼܢ̄ܬܵܐ ܐܘܿܪܸܫܠܸܡ: ܘܡ̣ܢ ܛܘܼܪܵܟ ܩܲܕ̇ܝܼܫܵܐ: ܡܸܛܠ ܕܒܲܚܛܵܗܲܝ̈ܢ ܘܲܒ̣ܥܵܘܼܠܵܐ ܕܐܲܒ̣ܵܗܲܝ̈ܢ: ܥܲܡܵܟ ܐܸܬ̣ܒܲܕܲܪ ܒܟ̣ܠ ܐܲܬܲܪ: ܘܲܗܘ̤ܵܬ̣ ܐܘܿܪܸܫܠܸܡ ܚܸܣܕܵܐ ܠܟ̣ܠܗܘܿܢ ܥܲܡܡܹ̈ܐ.
ܝܙ:ܡܸܟܹ̇ܝܠ ܫܡܲܥ ܐܲܠܵܗܵܐ ܒܲܨܠܘܿܬܹܗ ܕܥܲܒ̣ܕܵܟ ܘܲܒ̣ܬܲܟ̣ܫܲܦ̮ܬܲܢ: ܘܐܲܢܗܲܪ ܐܲܦܲܝ̈ܢ ܒܡܲܩܕ̇ܫܵܟ ܕܲܚ̣ܪܸܒ̣: ܡܸܛܠ ܫܡܵܟ ܡܵܪܝܵܐ.
ܝܚ:ܐܲܪܟܸ̇ܢ ܐܲܠܵܗܝ ܐܸܕܼܢܵܟ ܘܲܫܡܲܥ: ܘܲܦܬܲܚ ܥܲܝ̈ܢܲܝܟ ܘܲܚܙܝܼ: ܚܲܪ̈ܒ̣ܵܬܲܢ ܘܨܵܕܼܝܵـ̈ـܬܲܢ: ܘܲܡܕܼܝܼܢ̄ܬܵܐ ܕܐܸܬ̣ܩܪܝܼ ܫܡܵܟ ܥܠܹܝܗ̇: ܠܵܐ ܗ̄ܘܼܵܐ ܓܹܝܪ ܥܲܠ ܙܲܕ̇ܝܼܩܘܼܬܲܢ ܬܟ̣ܝܼܠܝܼܢܲܢ: ܘܲܡܨܲܠܹܝܢܲܢ ܩܕܼܵܡܲܝܟ: ܐܸܠܵܐ ܥܲܠ ܪ̈ܲܚܡܲܝܟ ܣܲܓ̇ܝܼ̈ܐܹܐ.
ܝܛ:ܡܵܪܝܵܐ ܫܡܲܥ: ܡܵܪܝܵܐ ܚܲܣܵܢ: ܡܵܪܝܵܐ ܨܘܼܬ̣ ܘܲܥܒܸܕܼ: ܘܠܵܐ ܬܵܘܚܲܪ ܡܸܛܠ ܫܡܵܟ ܐܲܠܵܗܝ: ܕܲܫܡܵܟ ܐܸܬ̣ܩܪܝܼ ܥܲܠ ܡܕܼܝܼܢ̄ܬܵܐ ܘܥܲܠ ܥܲܡܵܟ.
ܟܟ:ܘܥܲܕܼ ܐܸܢܵܐ ܡܨܲܠܹܐ ܘܡܵܘܕܹ̇ܐ ܚܵܘ̈ܒܲܝ: ܘܚܵܘ̈ܒܲܝ ܥܲܡܝ ܝܑܼܣܪܵܝܹܠ: ܘܪܵܡܹ̇ܐ ܐ̄ܢܵܐ ܬܲܟ̣ܫܲܦ̮ܬ̇ܝ ܩܕܼܵܡ ܡܵܪܝܵܐ ܐܲܠܵܗܵܐ: ܥܲܠ ܛܘܼܪܹܗ ܩܲܕ̇ܝܼܫܵܐ ܕܐܲܠܵܗܝ.
ܟܐ:ܘܥܲܕܼ ܐܸܢܵܐ ܡܡܲܠܸܠ ܒܲܨܠܘܿܬ̣ܵܐ: ܘܓܲܒ̣ܪܵܐ ܓܲܒ̣ܪܝܹܠ ܕܲܚܙܹ̇ܝܬ̣ ܒܚܸܙܘܵܐ ܡ̣ܢ ܩܕܼܝܼܡ: ܦܪܲܚ ܡܸܦܪܲܚ: ܘܛܲܣ ܘܐܸܬ̣ܵܐ ܡ̣ܢ ܫܡܲܝܵܐ: ܘܲܩ̣ܪܸܒ̣ ܠܘܵܬ̣ܝ ܒܙܲܒ̣ܢܵܐ ܕܩܘܼܪܒܵܢܵܐ ܕܪܲܡܫܵܐ.
ܟܒ:ܘܐܸܬ̣ܵܐ ܘܡܲܠܸܠ ܥܲܡܝ: ܘܐܸܡ̣ܲܪ ܠܝܼ: ܕܵܢܝܼܐܹܝܠ: ܗܵܫܵܐ ܕܐܲܠܦܵܟ ܕܬܸܣܬܲܟܲܠ.
ܟܓ:ܒܪܹܫ ܨܠܘܿܬ̣ܵܟ: ܢܸܦܲܩ ܦܸܬ̣ܓ̣ܵܡܵܐ: ܘܐܸܢܵܐ ܐܸܬܹ̇ܝܬ̣ ܠܲܡܚܵܘܵܝܘܼܬ̣ܵܟ: ܡܸܛܠ ܕܲܪܓ̣ܝܼܓ̣ ܐܲܢ̄ܬ̇: ܐܸܬ̣ܒܲܝܲܢ ܒܦܸܬ̣ܓ̣ܵܡܵܐ: ܘܐܸܣܬܲܟܲܠ ܒܚܸܙܘܵܐ.
ܟܕ:ܫܲܒ̣ܥܝܼܢ ܫܵܒ̣ܘܿܥܝܼ̈ܢ ܢܸܬ̇ܬ̇ܢܝܼܚܘܼܢ ܥܲܠ ܥܲܡܵܟ ܘܥܲܠ ܩܪܝܼܬ̣ܵܐ ܕܩܘܼܕܼܫܵܟ: ܠܡܸܫܠܲܡ ܚܵܘ̈ܒܹ̇ܐ ܘܲܠܡܸܓܡܲܪ ܚܛܵܗܹ̈ܐ: ܠܫܘܼܒ̣ܩܵܢ ܥܵܘܼܠܵܐ: ܘܲܠܡܲܝܬܵܝܘܼ ܙܸܕܼܩܵܐ ܕܡ̣ܢ ܥܵܠܲܡ: ܘܲܠܡܸܫܠܲܡ ܚܸܙܘܵܐ ܘܲܢܒ̣ܝܹ̈ܐ: ܘܠܲܡܫܝܼܚܵܐ ܩܕܼܘܿܫ ܩܘܼܕܼܫ̈ܝܼܢ.
ܟܗ:ܘܬܸܕܲܥ ܘܬܸܣܬܲܟܲܠ: ܡ̣ܢ ܡܲܦܩܵܢܵܗ̇ ܕܡܸܠܬ̣ܵܐ ܠܡܸܗܦܲܟ ܘܠܲܡܒܲܢܵܝܘܼ ܠܐܘܿܪܸܫܠܸܡ: ܘܲܠܡܹܐܬ̣ܵܐ ܡܫܝܼܚܵܐ ܡܲܠܟܵܐ: ܫܵܒ̣ܘܿܥܹ̈ܐ ܫܲܒ̣ܥܵܐ: ܘܫܵܒ̣ܘܿܥܹ̈ܐ ܫܬ̇ܝܼܢ ܘܲܬ̣ܪܹܝܢ: ܢܸܗܦܘܿܟ ܘܢܸܒ̣ܢܸܐ ܠܐܘܿܪܸܫܠܸܡ ܫܘܼܩܹ̈ܝܗ̇ ܘܲܦܠܵܛܵـ̈ـܘܵܬ̣ܵܗ̇: ܠܫܘܼܠܵܡ ܙܲܒ̣ܢܹ̈ܐ.
ܟܘ:ܘܒ̣ܵܬܲܪ ܫܵܒ̣ܘܿܥܹ̈ܐ ܫܬ̇ܝܼܢ ܘܲܬ̣ܪܹܝܢ: ܢܸܬ̣ܩ̄ܛܲܠ ܡܫܝܼܚܵܐ ܘܠܵܐ ܐܝܼܬ̣ ܠܵܗ̇: ܘܲܩܪܝܼܬ̣ܵܐ ܕܩܘܼܕܼܫܵܐ ܬܸܬ̣ܚܲܒܲܠ ܥܲܡ ܡܲܠܟܵܐ ܕܐܵܬܹ̇ܐ: ܘܚܲܪܬ̣ܵܗ̇ ܒܲܓ̣ܪܘܼܦܝܵܐ: ܘܲܥܕܲܡܵܐ ܠܚܲܪܬ̣ܵܐ ܕܲܩܪܵܒ̣ܵܐ ܕܦܵܣܝܼ̈ܩܵܬ̣ܵܐ ܕܲܚܒ̣ܵܠܵܐ.
ܟܙ:ܘܲܢܥܲܫܸܢ ܕܝܼܵܬܹܩܹܐ ܠܣܲܓ̇ܝܼ̈ܐܹܐ: ܫܵܒ̣ܘܿܥܵܐ ܚܲܕܼ ܘܦܸܠܓܘܼܬ̣ ܫܵܒ̣ܘܿܥܵܐ: ܘܲܢܒܲܛܸܠ ܕܸܒ̣ܚ̱ܬ̣ܵܐ ܘܩܘܼܪܒܵܢܵܐ: ܘܥܲܠ ܟܸܢܦܹܝ̈ܗ̇ ܕܛܲܢܦܘܼܬ̣ܵܐ ܚܒ̣ܵܠܵܐ: ܥܕܲܡܵܐ ܠܲܓ̣ܡܘܼܪܝܵܐ ܕܦܵܣܝܼ̈ܩܵܬ̣ܵܐ ܬܸܬ̇ܢܝܼܚ ܥܲܠ ܚܒ̣ܵܠܵܐ.
ܩܹܦܵܠܹܐܘܿܢ:ܝ.
ܐ:ܒܲܫܢܲܬ̣ ܬܠܵܬ̣ ܕܟ̣ܘܼܪܹܫ ܡܲܠܟܵܐ ܕܦܵܪܹܣ: ܦܸܬ̣ܓ̣ܵܡܵܐ ܐܸܬ̣ܓ̇ܠܝܼ ܠܕܼܵܢܝܼܐܹܝܠ ܕܐܸܬ̣ܩܪܝܼ ܫܡܹܗ ܒܹܠܛܫܵܨܲܪ: ܘܫܲܪܝܼܪ ܦܸܬ̣ܓ̣ܵܡܵܐ: ܘܲܒ̣ܚܲܝܠܵܐ ܪܲܒܵܐ ܡܸܬ̣ܒܲܝܲܢ ܦܸܬ̣ܓ̣ܵܡܵܐ: ܘܐܸܣܬܲܟܲܠ ܒܹܗ ܒܚܸܙܘܵܐ.
ܒ:ܒܝܵܘ̈ܡܵܬ̣ܵܐ ܗܵܢܘܿܢ: ܐܸܢܵܐ ܕܵܢܝܼܐܹܝܠ ܗܘܹ̇ܝܬ̣ ܝܵܬܹ̇ܒ̣ ܒܐܸܒ̣ܠܵܐ: ܬܠܵܬ̣ܵܐ ܫܵܒ̣ܘܿܥܝܼ̈ܢ ܕܝܵܘܡܝܼ̈ܢ.
ܓ:ܠܲܚܡܵܐ ܕܪܸܓ̇ܬ̣ܵܐ ܠܵܐ ܐܸܟ̣ܠܹ̇ܬ̣: ܘܚܲܡܪܵܐ ܘܒܸܣܪܵܐ ܠܵܐ ܥܲܠ ܠܦܘܼܡܝ: ܘܡܸܫܚܵܐ ܠܵܐ ܡܸܫܚܹ̇ܬ̣: ܥܕܲܡܵܐ ܕܲܫܠܸܡ̣ܘ ܬܠܵܬ̣ܵܐ ܫܵܒ̣ܘܿܥܝܼ̈ܢ ܕܝܵܘܡܝܼ̈ܢ.
ܕ:ܒܝܘܿܡ ܐܲܪܒ̇ܥܵܐ ܘܥܸܣܪܝܼܢ ܒܝܲܪܚܵܐ ܩܲܕܼܡܵܝܵܐ: ܐܸܢܵܐ ܗܘܹ̇ܝܬ̣ ܥܲܠ ܝܲܕܼ ܢܲܗܪܵܐ ܪܲܒܵܐ ܦܪܵܬ̣.
ܗ:ܘܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣: ܘܗܵܐ ܓܲܒ̣ܪܵܐ ܚܲܕܼ ܕܲܠܒ̣ܝܼܫ ܠܒ̣ܘܼܫܝܼ̈ܢ ܕܐܝܼܩܵܪ: ܘܚܲܨܵܘ̈ܗܝ ܚܙܝܼܩܝܼܢ ܒܐܝܼܩܵܪ ܬܸܫܒ̇ܘܿܚܬܵܐ.
ܘ:ܘܚܸܙܘܵܐ ܡܫܲܓ̣ܢܲܝ ܘܠܲܝܬ̇ ܠܹܗ ܕܡܘܼ: ܘܐܲܦܵܘ̈ܗܝ ܐܲܝܟ ܚܸܙܘܵܐ ܕܒܲܪܩܵܐ: ܘܥܲܝ̈ܢܵܘܗܝ ܐܲܝܟ ܠܲܡܦܹܝܼ̈ܕܹܐ ܕܢܘܼܪܵܐ: ܘܲܕܼܪ̈ܵܥܵܘܗܝ ܘܟܲܬ̣ܦܵܬܹ̈ܗ ܐܝܟ ܥܲܝܢܹ̈ܐ ܕܲܢܚܵܫܵܐ ܕܡܲܒ̣ܪܸܩ: ܘܩܵܠܵܐ ܕܦܸܬ̣ܓ̣ܵܡܵܘ̈ܗܝ ܐܲܝܟ ܩܵܠ ܚܲܝܠܝܼ̈ܢ ܣܲܓ̇ܝܼܐܝܼܢ.
ܙ:ܘܲܚܙܹ̇ܝܬ̣ ܐܸܢܵܐ ܕܵܢܝܼܐܹܝܠ ܒܲܠܚܘܿܕܲܝ ܚܸܙܘܵܐ ܗܵܢܵܐ: ܘܓܲܒ̣ܪܹ̈ܐ ܕܲܗܘ̤ܵܘ ܥܲܡܝ ܠܵܐ ܚ̣ܙܵܘ: ܐܸܠܵܐ ܕܸܚ̱ܠܬ̣ܵܐ ܪܲܒ̇ܬ̣ܵܐ ܢܸܦܠܲܬ̤ ܥܠܲܝܗܘܿܢ: ܘܲܥܪܲܩ̣ܘ ܡ̣ܢ ܕܸܚ̱ܠܬ̣ܵܐ.
ܚ:ܘܐܸܢܵܐ ܒܲܠܚܘܿܕܵܝ ܐܸܫܬܲܚ̇ܪܹܬ̣ ܘܲܚܙܹ̇ܝܬ̣ ܚܸܙܘܵܐ ܗܵܢܵܐ ܪܲܒܵܐ: ܘܠܵܐ ܐܸܫܬ̇ܚܲܪ ܒܝܼ ܚܲܝܠܵܐ: ܘܓ̣ܵܘܝ ܐܸܬ̣ܗ̱ܦܸܟ ܠܡܸܬ̣ܚܲܒܵܠܘܼ: ܘܠܵܐ ܗܘ̤ܵܐ ܒܝܼ ܚܹܝܠ.
ܛ:ܘܟܲܕܼ ܫܸܡܥܹ̇ܬ̣ ܩܵܠܵܐ ܕܡܸܠܵܘ̈ܗܝ: ܢܸܦܠܹ̇ܬ̣ ܥܲܠ ܐܲܦܲܝ̈ ܥܲܠ ܐܲܪܥܵܐ.
ܝ:ܘܗܵܐ ܐܝܼܕܼܵܐ ܩܸܪܒܲܬ̤ ܠܝܼ ܘܐܲܩܝܼܡܬܲܢܝ ܥܲܠ ܒܘܼܪ̈ܟܲܝ: ܘܥܲܠ ܦܲܣܲܬ̣ ܐܝܼ̈ܕܲܝ.
ܝܐ:ܘܐܸܡܲܪ ܠܝܼ: ܩܘܼܡ ܕܵܢܝܼܐܹܝܠ ܓܲܒ̣ܪܵܐ ܕܪܸܓ̇ܬ̣ܵܐ: ܘܐܸܣܬܲܟܲܠ ܒܦܸܬ̣ܓ̣ܵܡܵܐ ܕܲܡܡܲܠܸܠ ܐ̄ܢܵܐ ܥܲܡܵܟ: ܘܩܘܼܡ ܥܲܠ ܩܝܵܡܵܟ: ܡܸܛܠ ܕܗܵܫܵܐ ܐܸܫܬܲܕ̇ܪܹܬ̣ ܥܠܲܝܟ: ܘܟܲܕܼ ܡܡܲܠܸܠ ܥܲܡܝܼ ܡܸܠܬ̣ܵܐ ܗܵܕܹܐ: ܩܵܐܹ̇ܡ ܗ̄ܘܹ̇ܝܬ̣ ܘܪܵܐܹ̇ܬ̣.
ܝܒ:ܘܐܸܡ̣ܲܪ ܠܝܼ: ܠܵܐ ܬܸܕܼܚܲܠ ܕܵܢܝܼܐܹܝܠ: ܡܸܛܠ ܕܡ̣ܢ ܝܵܘܡܵܐ ܩܲܕܼܡܵܝܵܐ ܕܝܲܗ̄ܒ̣ܬ̇ ܠܸܒܵܟ ܠܝܼܕܲܥܬ̣ܵܐ: ܠܲܡܩܵܡ ܩܕܼܵܡ ܐܲܠܵܗܵܟ: ܐܸܫܬ̇ܡܲܥ ܡܸܠܲܝ̈ܟ: ܘܐܸܢܵܐ ܐܸܬܹܝ̇ܬ̣ ܒܡܸܠܲܝ̈ܟ.
ܝܓ:ܘܫܲܠܝܼܛܵܐ ܕܡܲܠܟ̇ܘܼܬ̣ܵܐ ܕܦܵܪܹܣ: ܩܵܡ̣ ܠܘܼܩܒܲܠܝ ܥܸܣܪܝܼܢ ܘܚܲܕܼ ܝܘܿܡ: ܘܗܵܐ ܡܝܼܟ̣ܵܐܹܝܠ ܚܲܕܼ ܡ̣ܢ ܪܵܘܪ̈ܒ̣ܵܢܹܐ ܩܲܕܼܡܵܝܹ̈ܐ: ܐܸܬ̣ܵܐ ܠܲܡܥܲܕܵܪܘܼܬܲܢܝ: ܘܐܸܫܬܵܘܚ̇ܪܹܬ̣ ܬܲܡܵܢ ܠܘܼܩܒܲܠ ܫܲܠܝܼܛܵܐ ܕܦܵܪܹܣ.
ܝܕ:ܘܐܸܢܵܐ ܐܸܬܹܝ̇ܬ̣ ܠܲܡܚܵܘܵܝܘܼܬ̣ܵܟ: ܡܸܕܹ̇ܡ ܕܓ̣ܵܕܸܫ ܠܥܲܡܵܟ ܒܚܲܪܬ̣ܵܐ ܕܝܵܘ̈ܡܵܬ̣ܵܐ: ܡܸܛܠ ܕܬ̣ܘܼܒ̣ ܚܸܙܘܵܐ ܠܣܘܿܦ ܝܵܘ̈ܡܵܬ̣ܵܐ.
ܝܗ:ܘܟܲܕܼ ܡܡܲܠܸܠ ܥܲܡܝ ܡܸܠܹ̈ܐ ܗܵܠܹܝܢ: ܣܵܡܹ̇ܬ̣ ܐܲܦܲܝ̈ ܒܐܲܪܥܵܐ ܘܫܸܬ̣ܩܹ̇ܬ̣.
ܝܘ:ܘܗܵܐ ܐܲܝܟ ܕܡܘܼܬ̣ܵܐ ܕܐ̄ܢܵܫܵܐ ܩ̣ܪܸܒ̣ ܠܣܸܦ̈ܘܵܬ̣ܝ: ܘܲܦ̣ܬܲܚ ܦܘܼܡܝ ܘܡܲܠܠܹ̇ܬ̣ ܘܐܸܡ̇ܪܹܬ̣ ܠܗܵܘܿ ܕܩܵܐܹ̇ܡ ܠܘܼܩܒܲܠ: ܡܵܪܝ: ܒܚܸܙܘܵܐ ܐܸܬ̣ܗ̱ܦܸܟ ܓܵܘܝ ܥܠܲܝ: ܘܠܵܐ ܐܸܫܟ̇ܚܹ̇ܬ̣ ܠܲܡܩܵܡ.
ܝܙ:ܘܐܲܝܟܲܢܵܐ ܡܸܫܟܲܚ ܥܲܒ̣ܕܹ̇ܗ ܕܡܵܪܝܵܐ ܗܵܢܵܐ ܠܲܡܡܲܠܵܠܘܼ ܥܲܡ ܡܵܪܝ ܗܵܢܵܐ: ܕܗܵܐ ܠܲܝܬ̇ ܒܝܼ ܚܲܝܠܵܐ: ܘܲܢܫܲܡܬ̣ܵܐ ܠܵܐ ܐܸܫܬܲܚܪܲܬ̤ ܒܝܼ.
ܝܚ:ܘܐܵܘܣܸܦ ܩ̣ܪܸܒ̣ ܠܝܼ ܐܲܝܟ ܚܸܙܘܵܐ ܕܐ̄ܢܵܫܵܐ ܘܚܲܝܠܲܢܝ.
ܝܛ:ܘܐܸܡ̣ܲܪ ܠܝܼ: ܠܵܐ ܬܸܕܼܚܲܠ ܓܲܒ̣ܪܵܐ ܕܪܸܓ̇ܬ̣ܵܐ: ܫܠܵܡ ܠܵܟ: ܐܸܬ̣ܚܲܝܲܠ ܘܐܸܬ̣ܥܲܫܲܢ: ܘܟܲܕܼ ܡܡܲܠܸܠ ܥܲܡܝ ܐܸܬ̣ܚܲܝ̇ܠܹܬ̣: ܘܐܸܡ̇ܪܹܬ̣: ܢܡܲܠܸܠ ܡܵܪܝ: ܡܸܛܠ ܕܐܸܬ̣ܚܲܝ̇ܠܹܬ̣.
ܟܟ:ܘܐܸܡ̣ܲܪ ܠܝܼ: ܝܵܕܲܥ ܐܲܢ̄ܬ̇ ܠܡܵܢܵܐ ܐܸܬܹܝ̇ܬ̣ ܠܘܵܬ̣ܵܟ: ܗܵܫܵܐ ܐܸܗܦܘܿܟ ܠܡܸܥܒܲܕܼ ܩܪܵܒ̣ܵܐ ܥܲܡ ܫܲܠܝܼܛܵܐ ܕܦܵܪܹܣ: ܘܐܸܢܵܐ ܢܸܦܩܹ̇ܬ̣: ܘܗܵܐ ܫܲܠܝܼܛܵܐ ܕܝܵܘܢܵܝܹ̈ܐ ܐܸܬ̣ܵܐ.
ܟܐ:ܒܪܲܡ ܐܹܚܵܘܹܝܟ ܡܸܕܹ̇ܡ ܕܲܪܫܝܼܡ ܒܲܟ̣ܬ̣ܵܒ̣ܵܐ ܒܩܘܼܫܬܵܐ: ܘܠܲܝܬ̇ ܕܲܡܥܲܕܲܪ ܗ̄ܘܼܵܐ ܠܝܼ ܒܗܵܠܹܝܢ ܟܠܗܹܝܢ: ܐܸܠܵܐ ܐܸܢ ܡܝܼܟ̣ܵܐܹܝܠ ܫܲܠܝܼܛܟ̣ܘܿܢ ܘܐܸܢܵܐ.
ܩܹܦܵܠܹܐܘܿܢ:ܝܐ.
ܐ:ܒܲܫܢܲܬ̣ ܚܕܼܵܐ ܕܕܲܪܝܵܘܵܫ ܡܵܕܼܵܝܵܐ: ܩܵܡ̣ ܠܲܡܚܲܝܵܠܘܼܬܲܢܝ ܘܠܲܡܥܲܫܵܢܘܼܬܲܢܝ.
ܒ:ܡܸܟܹ̇ܝܠ ܒܩܘܼܫܬܵܐ ܐܹܚܵܘܹܝܟ: ܬܘܼܒ̣ ܬܠܵܬ̣ܵܐ ܡܲܠܟ̇ܝܼ̈ܢ ܢܩܘܼܡܘܿܢ ܒܦܵܪܹܣ: ܘܲܪܒ̣ܝܼܥܵܝܵܐ ܢܸܥܬܲܪ ܥܘܼܬ̣ܪܵܐ ܪܲܒܵܐ: ܝܲܬ̇ܝܼܪ ܡ̣ܢ ܟܠܗܘܿܢ: ܘܡܵܐ ܕܲܥܫܸܢ ܒܐܲܬ̣ܪܹܗ: ܢܥܝܼܪ ܟܠ ܡܲܠܟ̇ـ̈ـܘܵܬ̣ܗܘܿܢ ܕܝܵܘܢܵܝܹ̈ܐ.
ܓ:ܘܲܢܩܘܼܡ ܡܲܠܟܵܐ ܓܲܢ̄ܒܵܪܵܐ: ܘܢܸܫܠܲܛ ܫܘܼܠܛܵܢ ܪܲܒ̇: ܘܢܸܥܒܸ̇ܕܼ ܐܲܝܟ ܨܸܒ̣ܝܵܢܹܗ.
ܕ:ܘܟܲܕܼ ܩܵܐܹ̇ܡ ܬܸܬ̇ܒܲܪ ܡܲܠܟ̇ܘܼܬܹܗ: ܘܬܸܬ̣ܒܲܕܲܪ ܠܐܲܪܒܲܥ ܪ̈ܘܼܚܲܝ ܫܡܲܝܵܐ: ܘܠܵܐ ܐܲܝܟ ܣܵܘܦܵܗ̇: ܘܠܵܐ ܐܲܝܟ ܫܘܼܠܛܵܢܹܗ ܕܐܸܫܬܲܠܲܛ: ܐܸܠܵܐ ܬܸܬ̣ܥ̱ܩܲܪ ܡܲܠܟ̇ܘܼܬܹܗ: ܘܠܲܝܬ̇ ܐ̄ܚܪܹܝܢ ܠܒܲܪ ܡ̣ܢ ܗܵܠܹܝܢ.
ܗ:ܘܢܸܥܫܲܢ ܡܲܠܟܵܐ ܕܬܲܝܡܢܵܐ: ܘܪܵܘܪ̈ܒ̣ܵܢܵܘܗܝ: ܘܢܸܬ̣ܩܲܦ ܥܠܵܘܗܝ ܘܢܸܫܠܲܛ ܫܘܼܠܛܵܢ ܪܲܒ̇.
ܘ:ܘܲܠܣܘܿܦ ܫܢܲـ̈ـܝܵܐ ܢܸܫܬ̇ܘܘܿܢ: ܘܒܲܪܬ̣ ܡܲܠܟܵܐ ܕܬܲܝܡܢܵܐ: ܬܹܐܙܲܠ ܠܘܵܬ̣ ܡܲܠܟܵܐ ܕܓܲܪܒ̇ܝܵܐ ܠܡܸܥܒܲܕܼ ܫܲܝܢܵܐ ܒܲܝܢܵܬ̣ܗܘܿܢ: ܘܠܵܐ ܢܸܗܘܹܐ ܒܵܗ̇ ܚܹܝܠ ܡ̣ܢ ܕܸܚ̱ܠܬ̣ܵܐ ܕܬܸܕܼܚܲܠ: ܘܬܸܫܬ̇ܠܸܡ ܗ̤ܝ ܘܡܲܝܬ̇ܝܵܢܹ̈ܝܗ̇: ܘܲܥܠܲܝ̈ܡܵܬ̣ܵܗ̇ ܘܲܡܬܲܩܦܵܢܹ̈ܝܗ̇ ܒܙܲܒ̣ܢܵܐ ܗܵܘܿ.
ܙ:ܘܲܢܩܘܼܡ ܡ̣ܢ ܥܸܩܵܪܵܐ ܕܙܲܪܥܹܗ: ܥܲܠ ܐܲܬ̣ܪܹܗ: ܘܢܹܐܬܹܐ ܒܚܲܝܠܵܐ ܘܢܹܐܬܹܐ ܒܬ̣ܘܼܩܦܵܐ: ܥܲܠ ܡܲܠܟܵܐ ܕܓܲܪܒ̇ܝܵܐ: ܘܢܸܥܒܲܪ ܒܗܘܿܢ ܘܢܸܬ̣ܩܲܦ.
ܚ:ܘܐܵܦ ܕܸܚ̈ܠܵܬ̣ܗܘܿܢ: ܘܡܵܐܢܲܝ̈ ܪܸܓܲܬ̣ܗܘܿܢ: ܟܸܣܦܵܐ: ܘܕܲܗܒ̣ܵܐ ܘܲܫܒ̣ܝܼܬ̣ܵܐ: ܢܲܚܸܬ̣ ܠܡܸܨܪܹܝܢ: ܘܗ̤ܘ ܚܲܕܼ ܬܪܹܝܢ ܢܩܘܼܡ ܥܲܠ ܡܲܠܟܵܐ ܕܓܲܪܒ̇ܝܵܐ.
ܛ:ܘܢܸܥܘܿܠ ܒܲܬ̣ܩܘܿܦ ܡܲܠܟܵܐ ܕܬܲܝܡܢܵܐ ܘܢܸܗܦܘܿܟ ܠܐܲܪܥܹܗ.
ܝ:ܘܲܒ̣ܢܵܘ̈ܗܝ ܢܸܬ̣ܓܲܪܘܿܢ: ܘܲܢܟܲܢܫܘܼܢ ܚܲܝ̈ܠܝܼܢ ܣܲܓܝܼܐܝܼܢ: ܘܢܸܥܠܘܼܢ ܥܠܵܘܗܝ: ܘܢܸܓܪ̱ܦܘܼܢ ܘܢܸܥܒ̇ܕܘܼܢ: ܘܢܸܗܦܟ̣ܘܿܢ ܘܢܸܬ̣ܓܲܪܘܿܢ ܥܕܲܡܵܐ ܠܥܘܼܫܢܵܐ.
ܝܐ:ܘܢܸܬ̣ܡܲܪܡܲܪ ܡܲܠܟܵܐ ܕܬܲܝܡܢܵܐ: ܘܢܸܦܘܿܩ ܢܹܐܪܥܝܼܘܗܝ ܠܡܲܠܟܵܐ ܕܓܲܪܒ̇ܝܵܐ. ܘܲܢܩܝܼܡ ܚܹܝܠ ܪܲܒ̇. ܘܢܸܫܬ̇ܠܸܡ ܚܲܝܠܵܐ ܗܵܘܿ ܒܐܝܼܕܹܗ.
ܝܒ:ܘܢܵܘܒ̇ܕܼܝܼܘܗܝ ܠܚܲܝܠܵܐ: ܘܢܸܬ̇ܬ̇ܪܝܼܡ ܠܸܒܹ̇ܗ: ܘܢܲܪܡܸܐ ܣܲܓ̇ܝܼ̈ܐܝܼܢ: ܘܠܵܐ ܢܸܬ̣ܩܲܦ.
ܝܓ:ܘܢܸܗܦܘܿܟ ܡܲܠܟܵܐ ܕܓܲܪܒ̇ܝܵܐ: ܘܲܢܩܝܼܡ ܚܲܝܠܵܐ ܕܣܲܓ̇ܝܼ ܡ̣ܢ ܩܲܕܼܡܵܝܵܐ: ܘܲܠܫܘܼܠܵܡ ܙܲܒ̣ܢܵܐ: ܚܲܕܼ ܬܪܹܝܢ ܢܹܐܬܹܐ ܒܡܹܐܬ̣ܝܹܗ ܒܚܹܝܠ ܣܲܓ̇ܝܼ: ܘܲܒ̣ܦܲܪ̈ܵܫܝܼܢ ܬܲܩܝܼܦܝܼܢ.
ܝܕ:ܘܲܒ̣ܙܲܒ̣ܢܵܐ ܗܵܘܿ: ܣܲܓ̇ܝܼ̈ܐܹܐ ܢܩܘܼܡܘܼܢ ܥܲܠ ܡܲܠܟܵܐ ܕܓܲܪܒ̇ܝܵܐ: ܘܲܒ̣ܢܲܝ̈ ܥܵܘܼܠܵܐ ܥܲܡܵܟ ܢܸܬ̇ܬ̇ܪܝܼܡܘܼܢ ܠܲܡܩܵܡܘܼ ܚܸܙܘܵܐ ܘܢܸܣܬܲܚܦܘܼܢ.
ܝܗ:ܘܢܹܐܬܹܐ ܡܲܠܟܵܐ ܕܓܲܪܒ̇ܝܵܐ: ܘܢܲܟ̣ܡܸܢ ܟܡܹܐܢܹ̈ܐ ܘܢܸܟ̣ܒ̇ܘܿܫ ܚܸܣܢܝܼ̈ܢ ܬܲܩܝܼܦܝܼܢ: ܘܲܕܼܪܵܥܵܐ ܕܬܲܝܡܢܵܐ ܠܵܐ ܢܩܘܼܡ: ܡܸܛܠ ܕܠܲܝܬ̇ ܒܗܘܿܢ ܚܲܝܠܵܐ ܠܲܡܩܵܡ: ܘܲܢܩܘܼܡܘܼܢ ܓܒܲـ̈ـܝܵܐ ܕܥܲܡܵܐ: ܘܠܵܐ ܢܸܫܟ̇ܚܘܼܢ ܡܸܛܠ ܕܠܲܝܬ̇ ܒܗܘܿܢ ܚܲܝܠܵܐ ܠܲܡܩܵܡ.
ܝܘ:ܘܢܸܥܒܸ̇ܕܼ ܗܵܘܿ ܕܐܵܬ̣ܵܐ ܥܠܵܘܗܝ: ܐܲܝܟ ܨܸܒ̣ܝܵܢܹܗ: ܘܠܲܝܬ̇ ܕܲܢܩܘܼܡ ܩܘܼܕܼܡܵܘܗܝ: ܘܲܢܩܘܼܡ ܒܐܲܪܥܵܐ ܕܝܼܣܪܵܝܹܠ: ܘܬܸܫܬ̇ܠܸܡ ܒܐܝܼܕܼܵܘ̈ܗܝ.
ܝܙ:ܘܲܢܣܝܼܡ ܐܲܦܵܘ̈ܗܝ ܠܡܸܥܲܠ ܒܲܬ̣ܩܘܿܦ ܟܠ ܡܲܠܟ̇ـ̈ـܘܵܬ̣ܵܐ: ܘܟ̣ܠ ܥܲܡܹܗ ܢܸܥܒܲܪ: ܘܒܲܪܬ̣ ܐ̄ܢܵܫܵܐ ܬܸܬ̣̱ܝܼܗܸܒ̣ ܠܹܗ ܠܲܡܚܲܒܵܠܘܼܬܹܗ: ܘܠܵܐ ܬܩܘܼܡ ܘܠܵܐ ܬܸܗܘܹܐ ܕܝܼܠܹܗ.
ܝܚ:ܘܢܲܗܦܸܟ ܐܲܦܵܘ̈ܗܝ ܥܲܠ ܓܵܙܪ̈ܵܬ̣ܵܐ ܕܝܲܡܵܐ: ܘܢܸܟ̣ܒ̇ܘܿܫ ܣܲܓ̇ܝܼ̈ܐܹܐ: ܘܲܢܒܲܛܸܠ ܫܲܠܝܼܛܵܐ ܕܲܡܚܲܣܸܕܼ ܗ̄ܘܼܵܐ ܠܹܗ: ܘܚܸܣܕܹ̇ܗ ܢܲܗܦܸܟ ܠܹܗ.
ܝܛ:ܘܲܢܣܝܼܡ ܐܲܦܵܘ̈ܗܝ ܥܲܠ ܬܘܼܩܦܵܗ̇ ܕܐܲܪܥܵܐ: ܘܢܸܣܬ̇ܚܸܦ ܘܢܸܦܸܠ ܘܠܵܐ ܢܸܫܬ̇ܟܲܚ.
ܟܟ:ܘܲܢܩܘܼܡ ܥܲܠ ܡܲܬ̣ܩܢܹܗ: ܡܲܥܒܲܪ ܫܘܼܠܛܵܢ ܘܲܗܕܲܪ ܡܲܠܟ̇ـ̈ـܘܵܢ: ܘܲܒ̣ܝܵܘ̈ܡܵܬ̣ܵܐ ܙܥܘܿܪܹ̈ܐ ܢܸܬ̇ܬ̇ܒܲܪ: ܠܵܐ ܒܪܘܼܓ̣ܙܵܐ ܘܠܵܐ ܒܩܹܐܪܣܵܐ.
ܟܐ:ܘܲܢܩܘܼܡ ܥܲܠ ܐܲܬ̣ܪܹܗ ܚܲܠܵܫܵܐ: ܘܠܵܐ ܢܸܬ̣̱ܝܼܗܸܒ̣ ܥܠܵܘܗܝ ܗܕܲܪ ܡܲܠܟ̇ـ̈ـܘܵܬ̣ܵܐ ܒܫܵܪ̈ܥܵܬ̣ܵܐ.
ܟܒ:ܘܬ̣ܘܼܩܦܗܘܿܢ ܕܟܲܪ̈ܟܹܐ ܢܸܬ̣ܒ̇ܙܸܙ: ܘܢܸܬ̇ܬܲܒ̣ܪܘܼܢ ܡ̣ܢ ܩܕܼܵܡܵܘܗܝ ܐܵܦ ܡܕܲܒ̇ܪ̈ܵܢܹܐ ܕܲܕܼܝܵܬܹܩܹܐ.
ܟܓ:ܘܡ̣ܢ ܐܲܝܠܹܝܢ ܕܡܸܫܬܵܘܬ̇ܦܝܼܢ ܠܹܗ ܢܸܥܒ̇ܕܼܘܼܢ ܥܠܵܘܗܝ ܢܸܟ̣ܠܵܐ.
ܟܕ:ܘܢܸܣܲܒ̣ ܘܢܸܬ̣ܩܲܦ ܒܥܲܡܵܐ ܙܥܘܿܪܵܐ: ܘܲܒ̣ܫܲܡ̈ܝܼܢܹܐ ܕܲܡܕܝܼ̈ܢܵܬ̣ܵܐ: ܘܢܸܥܒܸ̇ܕܼ ܡܸܕܹ̇ܡ ܕܠܵܐ ܥ̣ܒܲܕܼܘ ܐܲܒ̣ܵܗܵܘ̈ܗܝ: ܘܐܲܒ̣ܵܗܹ̈ܐ ܕܐܲܒ̣ܵܗܵܘ̈ܗܝ: ܘܒܸܙܬ̣ܵܐ ܘܲܫܒ̣ܝܼܬ̣ܵܐ ܘܩܸܢܝܵܢܗܘܿܢ ܢܸܕܼܒܲܪ: ܘܥܲܠ ܟܲܪ̈ܟܲܝܗܘܿܢ ܢܸܬ̣ܚܲܫܲܒ̣ ܡܲܚܫ̈ܒ̣ܵܢ.
ܟܗ:ܘܲܥܕܲܡܵܐ ܠܙܲܒ̣ܢܵܐ: ܢܸܬ̇ܬ̇ܥܝܼܪ ܚܲܝܠܹܗ ܘܠܸܒܹ̇ܗ ܥܲܠ ܡܲܠܟܵܐ ܕܬܲܝܡܢܵܐ: ܒܚܹܝܠ ܪܲܒ̇ ܘܬܲܩܝܼܦ: ܘܡܲܠܟܵܐ ܕܬܲܝܡܢܵܐ ܢܸܬ̣ܓܲܪܲܓ̣ ܠܲܩܪܵܒ̣ܵܐ ܒܚܲܝܠܵܐ ܪܲܒܵܐ: ܘܢܸܥܫܲܢ ܪܵܘܪܒ̣ܵܐܝܼܬ̣ ܘܠܵܐ ܢܩܘܼܡ: ܡܸܛܠ ܕܢܸܬ̣ܚܲܫܒ̣ܘܼܢ ܥܠܵܘܗܝ ܡܲܚܫ̈ܒ̣ܵܢ.
ܟܘ:ܘܐܵܟ̣ܠܲܝ̈ ܦܲܛܒ̣ܵܓܹܗ ܢܸܬ̣ܒ̇ܪܘܼܢܹܗ: ܘܚܲܝܠܹܗ ܢܸܬ̣ܒܲܕܲܪ: ܘܢܸܦܠܘܼܢ ܚܪ̈ܝܼܒܹܐ ܣܲܓ̇ܝܼ̈ܐܹܐ.
ܟܙ:ܘܲܬ̣ܪ̈ܲܝܗܘܿܢ ܡܲܠ̈ܟܹ̇ܐ ܗܵܠܹܝܢ: ܠܸܒ̇ܗܘܿܢ ܠܒ̣ܝܼܫܬܵܐ: ܘܥܲܠ ܚܲܕܼ ܦܵܬ̣ܘܿܪܵܐ ܢܸܟ̣ܠܵܐ ܢܡܲܠܠܘܼܢ: ܘܠܵܐ ܢܲܨܠܚܘܼܢ: ܡܸܛܠ ܕܡܲܛܝܼ ܩܸܨܵܐ ܠܙܲܒ̣ܢܹܗ.
ܟܚ:ܘܢܸܗܦܘܿܟ ܠܐܲܪܥܹܗ ܒܚܹܝܠ ܣܲܓ̇ܝܼ: ܘܠܸܒܹ̇ܗ ܥܲܠ ܩܝܵܡܵܐ ܩܲܕ̇ܝܼܫܵܐ.
ܟܛ:ܘܢܸܥܒܸ̇ܕܼ ܐܲܝܟ ܕܲܒ̣ܩܲܕܼܡܵܝܬܵܐ: ܘܐܵܦ ܒܲܐ̄ܚܪܵܝܬܵܐ.
ܠ:ܘܢܹܐܬ̣̈ܝܵܢ ܥܠܵܘܗܝ ܡܲܫ̱ܪ̈ܝܵܬ̣ܵܐ ܕܟܹܬ̣ܼܵܝܹ̈ܐ ܘܢܸܬ̣ܒ̇ܪܘܼܢܹܗ: ܘܢܸܗܦܘܿܟ ܘܢܸܪܓܲܙ ܥܲܠ ܩܝܵܡܵܐ ܩܲܕ̇ܝܼܫܵܐ: ܘܢܸܬ̣ܒܲܝܲܢ ܒܐܲܝܠܹܝܢ ܕܲܫܒܲܩ̣ܘ ܩܝܵܡܵܐ ܩܲܕ̇ܝܼܫܵܐ.
ܠܐ:ܘܬܘܼܩܦܗܘܿܢ ܡܸܢܗܘܿܢ ܢܩܘܼܡ: ܘܲܢܛܲܢܦܘܼܢ ܡܲܩܕ̇ܫܵܐ ܥܲܫܝܼܢܵܐ: ܘܢܲܥܒ̇ܪܘܼܢ ܩܘܼܪ̈ܒܵܢܹܐ: ܘܢܸܬ̇ܠܘܼܢ ܛܲܢܦܘܼܬ̣ܸܵܐ ܠܲܚܒ̣ܵܠܵܐ.
ܠܒ:ܘܐܲܝܠܹܝܢ ܕܡܲܥܠܹܝܢ ܥܲܠ ܩܝܵܡܵܐ: ܢܚܲܝܸܒ̣ ܐܸܢܘܿܢ.
ܠܓ:ܘܥܲܡܵܐ ܕܝܵܕܼܥܝܼܢ ܕܸܚ̱ܠܬ̣ܵܐ ܢܸܬ̣ܩ̄ܦܘܼܢ. ܘܙܲܕ̇ܝܼܩܵܘ̈ܗܝ ܕܥܲܡܵܐ ܢܲܠܦܘܼܢ ܠܣܲܓ̇ܝܼ̈ܐܹܐ: ܘܢܸܬ̇ܬܲܩܠܘܼܢ ܒܚܲܪܒܵܐ ܘܲܒ̣ܢܘܼܪܵܐ ܒܫܸܒ̣ܝܵܐ ܘܲܒ̣ܒܸܙܬ̣ܵܐ ܝܵܘܡ̈ܝܼܢ ܐܵܠܸܦ.
ܠܕ:ܘܡܵܐ ܕܐܸܣܬ̇ܚܸܦܘ: ܢܸܬ̣ܥܲܕ̇ܪܘܼܢ ܥܘܼܕܼܪܵܢܵܐ ܩܲܠܝܼܠ: ܘܢܸܬ̇ܬܵܘܣܦܘܼܢ ܥܠܲܝܗܘܿܢ ܣܲܓ̇ܝܼ ܒܦܵܠܓ̣ܘܼܬ̣ܵܐ.
ܠܗ:ܘܡ̣ܢ ܚܲܟ̇ܝܼܡܹ̈ܐ ܢܸܣܬܲܚܦܘܼܢ ܠܡܸܒ̣ܚܲܪ ܒܗܘܿܢ: ܘܲܠܡܸܬ̣ܒܲܝܵܢܘܼ ܥܲܠ ܩܸܨܵܐ: ܡܸܛܠ ܕܬ̣ܘܼܒ̣ ܐܝܼܬ̣ ܢܘܼܓ̣ܪܵܐ ܠܙܲܒ̣ܢܵܐ.
ܠܘ:ܘܢܸܥܒܸ̇ܕܼ ܡܲܠܟܵܐ ܐܲܝܟ ܨܸܒ̣ܝܵܢܹܗ: ܘܢܸܬ̇ܬ̇ܪܝܼܡ ܥܲܠ ܟܠ ܐܲܠܵܗ: ܘܥܲܠ ܐܵܠܵܗ ܐܲܠܵܗ̈ܝܼܢ ܢܡܲܠܸܠ ܪܵܘܪ̈ܒ̣ܵܢ: ܘܢܲܨܠܲܚ ܥܲܕܼ ܢܸܫܠܲܡ ܪܘܼܓ̣ܙܵܐ: ܡܸܛܠ ܕܦܵܣܝܼܩܬܵܐ ܐܸܬ̣ܥܲܒ̣ܕܲܬ̤.
ܠܙ:ܘܒܲܐܠܵܗܵܐ ܕܐܲܒ̣ܵܗܵܘ̈ܗܝ ܠܵܐ ܢܸܬ̣ܒܲܝܲܢ: ܘܥܲܠ ܪܸܓܲܬ̣ ܢܸܫܹ̈ܐ ܘܥܲܠ ܟܠ ܐܲܠܵܗ ܠܵܐ ܢܸܬ̣ܚܲܫܲܒ̣: ܐܸܠܵܐ ܥܲܠ ܟܠ ܢܸܬ̇ܬ̇ܪܝܼܡ.
ܠܚ:ܘܠܲܐܠܵܗܵܐ ܥܲܫܝܼܢܵܐ ܥܲܠ ܡܲܬ̣ܩܢܹܗ ܢܝܲܩܲܪ: ܒܕܲܗܒ̣ܵܐ ܘܲܒ̣ܟܸܣܦܵܐ: ܘܲܒ̣ܚܘܼܡܪܹ̈ܐ ܛܵـ̈ـܒ̣ܵܬ̣ܵܐ: ܘܲܒ̣ܪܸܓ̇ܬ̣ܵܐ.
ܠܛ:ܘܢܸܥܒܲܪ ܠܟܲܪ̈ܟܹܐ ܥܲܫ̈ܝܼܢܹܐ ܥܲܠ ܐܲܠܵܗܹ̈ܐ ܢܘܼܟ̣ܪ̈ܵܝܹܐ: ܕܢܸܚܙܹܐ ܘܢܸܫܠܲܛ ܒܣܲܓ̇ܝܼ̈ܐܹܐ: ܘܐܲܪܥܵܐ ܢܦܲܠܸܓ̣ ܒܲܕܼܡܲܝܵܐ.
ܡ:ܘܲܒ̣ܥܸܕܵܢ ܩܸܨܵܐ ܢܸܬ̣ܟܲܬܲܫ ܥܲܡܹܗ ܡܲܠܟܵܐ ܕܬܲܝܡܢܵܐ: ܘܢܸܬ̇ܬ̇ܙܝܼܥ ܥܠܵܘܗܝ ܡܲܠܟܵܐ ܕܓܲܪܒ̇ܝܵܐ: ܒܙܵܘ̈ܓܹ̇ܐ ܘܲܒ̣ܦܲܪ̈ܵܫܹܐ: ܘܒܸܐܠܦܹ̈ܐ ܣܲܓ̇ܝܼ̈ܐܵܬ̣ܵܐ: ܘܢܸܥܘܿܠ ܒܐܲܪܥܵܐ.
ܡܐ:ܘܢܸܡܛܸܐ ܠܐܲܪܥܵܐ ܕܝܼܣܪܵܝܹܠ: ܘܣܲܓ̇ܝܼ̈ܐܹܐ ܢܸܬ̣ܩܲܛܠܘܼܢ: ܘܗܵܠܹܝܢ ܢܸܬ̣ܦܲܨܘܿܢ ܡ̣ܢ ܐܝܼܕܼܵܘ̈ܗܝ: ܐܲܕܼܘܿܡ ܘܡܘܼܐܵܒ̣: ܘܫܲܪܟܵܐ ܕܲܒ̣ܢܲܝ̈ ܥܲܡܘܿܢ.
ܡܒ:ܘܢܵܘܫܸܛ ܐܝܼܕܹܗ ܒܐܲܬ̣ܪ̈ܵܘܵܬ̣ܵܐ: ܘܐܲܪܥܵܐ ܕܡܸܨܪܹܝܢ ܠܵܐ ܬܸܫܬܵܘܙܲܒ̣ ܡ̣ܢ ܐܝܼܕܼܵܘ̈ܗܝ.
ܡܓ:ܘܢܸܫܠܲܛ ܒܹܝܬ̣ ܓܲܙܵܐ ܕܕܲܗܒ̣ܵܐ ܘܲܕܼܣܹܐܡܵܐ ܘܲܕܼܟ̣ܠ ܪܸܓܲܬ̣ ܡܸܨܪܹܝܢ: ܘܠܹܘܒ̣ܵܝܹ̈ܐ ܘܟ̣ܘܼܫܵܝܹ̈ܐ ܢܸܗܘܘܿܢ ܒܥܘܼܕܼܪܵܢܹܗ.
ܡܕ:ܘܛܵـ̈ـܒܹ̇ܐ ܢܣܲܪܗܒ̣ܘܢܹܗ ܡ̣ܢ ܡܲܕܢ̱ܚܵܐ ܘܡ̣ܢ ܓܲܪܒ̇ܝܵܐ: ܘܢܸܦܘܿܩ ܒܚܸܡܬ̣ܵܐ ܪܲܒ̇ܬ̣ܵܐ ܠܡܸܚܪܲܒ̣ ܘܲܠܡܵܘܒܵܕܼܘܼ ܠܣܲܓ̇ܝܼ̈ܐܹܐ.
ܡܗ:ܘܢܸܩܘܿܫ ܡܲܫܟ̇ܢܹܗ ܒܐܲܬ̣ܪܵܐ ܫܲܦܝܵܐ: ܒܹܝܬ̣ ܝܲܡܵܐ ܠܛܘܼܪܵܐ: ܘܢܸܛܲܪ ܩܘܼܕܼܫܹܗ ܘܢܸܡܛܸܐ ܥܸܕܵܢ ܩܸܨܹܗ: ܘܠܵܐ ܢܸܗܘܹܐ ܠܹܗ ܡܥܲܕ̇ܪܵܢܵܐ.
ܩܹܦܵܠܹܐܘܿܢ:ܝܒ.
ܐ:ܒܹܗ ܒܙܲܒ̣ܢܵܐ ܗܵܘܿ: ܢܩܘܼܡ ܡܝܼܟ̣ܵܐܹܝܠ ܡܲܠܲܟ̣ܵܐ ܪܲܒܵܐ ܕܲܦܩܝܼܕܼ ܥܲܠ ܒܢܲܝ̈ ܥܲܡܵܟ: ܘܢܸܗܘܹܐ ܙܲܒ̣ܢܵܐ ܕܐܘܼܠܨܵܢܵܐ: ܕܠܵܐ ܗܘ̤ܵܐ ܐܲܟ̣ܘܵܬܹܗ ܡ̣ܢ ܝܵܘ̈ܡܵܬ̣ ܥܵܠܡܵܐ: ܘܒܹܗ ܒܙܲܒ̣ܢܵܐ ܗܵܘܿ: ܢܸܫܬܵܘܙܲܒ̣ ܡ̣ܢ ܒܢܲܝ̈ ܥܲܡܵܟ: ܟܠ ܕܢܸܫܬ̇ܟܲܚ ܕܲܟ̣ܬ̣ܝܼܒ̣ ܒܣܸܦܪܵܐ.
ܒ:ܘܣܲܓ̇ܝܼ̈ܐܹܐ ܐܲܝܠܹܝܢ ܕܕܲܡܟ̇ܝܼܢ ܒܥܲܦܪܵܐ ܢܸܬ̇ܬ̇ܥܝܼܪܘܼܢ: ܗܵܠܹܝܢ ܠܚܲܝܲܝ̈ ܥܵܠܡܹ̈ܐ: ܘܗܵܠܹܝܢ ܠܐܲܒ̣ܘܼܕܵܢܵܐ ܘܲܠܚܸܣܕܵܐ ܕܚܲܒ̣ܪ̈ܲܝܗܘܿܢ ܠܥܵܠܲܡ.
ܓ:ܘܥܵܒ̣̈ܕܲܝ ܛܵܒ̣ܵـ̈ـܬ̣ܵܐ ܘܣܲܟ̇ܘܼܠܬ̣ܵܢܹ̈ܐ: ܢܸܢ̱ܗܪܘܼܢ ܐܲܝܟ ܢܘܼܗܪܹܗ ܕܲܪܩܝܼܥܵܐ: ܘܐܲܝܠܹܝܢ ܕܲܡܙܲܟܹ̇ܝܢ ܠܣܲܓ̇ܝܼ̈ܐܹܐ: ܢܸܗܘܘܿܢ ܡܲܙܗ̱ܪܝܼܢ ܘܩܵܝ̇ܡܝܼܢ ܐܲܝܟ ܟܵܘܟ̇ܒܹ̈ܐ: ܠܥܵܠܲܡ ܘܲܠܥܵܠܲܡ ܥܵܠܡܝܼܢ.
ܕ:ܘܐܲܢ̄ܬ̇ ܕܹܝܢ ܕܵܢܝܼܐܹܝܠ: ܚܬ̣ܘܿܡ ܦܸܬ̣ܓ̣ܵܡܹ̈ܐ ܗܵܠܹܝܢ ܘܲܫܬ̣ܘܿܩ: ܘܲܚܬ̣ܘܿܡ ܣܸܦܪܵܐ ܗܵܢܵܐ ܥܲܕܼ ܥܸܕܵܢ ܩܸܨܵܐ: ܘܢܸܒ̣ܥܘܿܢ ܣܲܓ̇ܝܼ̈ܐܹܐ ܘܬܸܣܓܹ̇ܐ ܝܑܼܕܲܥܬ̣ܵܐ.
ܗ:ܘܲܚܙܹ̇ܝܬ̣ ܐܸܢܵܐ ܕܵܢܝܼܐܹܝܠ: ܘܗܵܐ ܬܪܹܝܢ ܐ̄ܚܪ̈ܵܢܝܼܢ ܩܵܝ̇ܡܝܼܢ ܚܲܕܼ ܒܗܵܕܹܐ ܣܸܦܬܹܗ ܕܢܲܗܪܵܐ ܘܚܲܕܼ ܒܗܵܝ̇.
ܘ:ܘܐܸܡ̣ܲܪܘ ܠܓܲܒ̣ܪܵܐ ܕܲܠܒ̣ܝܼܫ ܠܒ̣ܘܼܫ̈ܝܼܢ ܕܐܝܼܩܵܪ: ܘܩܵܐܹ̇ܡ ܠܥܸܠ ܡ̣ܢ ܡܲـ̈ـܝܵܐ ܕܢܲܗܪܵܐ: ܥܕܲܡܵܐ ܠܐܸܡܲܬ̣ܝ ܩܸܨܵܐ ܗܵܢܵܐ.
ܙ:ܘܫܸܡ̇ܥܹܬ̣ ܠܓܲܒ̣ܪܵܐ ܕܲܠܒ̣ܝܼܫ ܠܒ̣ܘܼܫ̈ܝܼܢ ܕܐܝܼܩܵܪ: ܘܩܵܐܹ̇ܡ ܠܥܸܠ ܡ̣ܢ ܡܲـ̈ـܝܵܐ ܕܢܲܗܪܵܐ: ܕܐܲܪܝܼܡ ܝܲܡܝܼܢܹܗ ܘܣܸܡܵܠܹܗ ܠܘܵܬ̣ ܫܡܲܝܵܐ: ܘܝܼܡܵܐ ܒܚܲܝ ܥܵܠܡܹ̈ܐ: ܕܲܠܥܸܕܵܢ ܥܸܕܵܢܝܼ̈ܢ ܘܦܸܠܓܘܼܬ̣ ܥܸܕܵܢ: ܘܲܒ̣ܥܸܕܵܢ ܕܢܸܬ̣ܦܲܨ̈ܝܵܢ ܐܝܼ̈ܕܲܝܵܐ ܕܟ̣ܠ ܥܲܡܵܐ ܩܲܕ̇ܝܼܫܵܐ: ܢܸܫ̈ܠ̱ܡܵܢ ܗܵܠܹܝܢ ܟܠܗܹܝܢ.
ܚ:ܘܐܸܢܵܐ ܕܵܢܝܼܐܹܝܠ ܫܸܡܥܹ̇ܬ̣ ܘܠܵܐ ܐܸܫܬܵܘܕ̇ܥܹ̇ܬ̣: ܘܐܸܡ̇ܪܹܬ̣: ܡܵܪܝ ܡܵܢܵܐ ܒܵܬܲܪ ܗܵܠܹܝܢ.
ܛ:ܘܐܸܡ̣ܲܪ ܠܝܼ: ܙܸܠ ܕܵܢܝܼܐܹܝܠ: ܡܸܛܠ ܕܲܟ̣ܣܹܝܢ ܐܸܢܘܿܢ ܘܲܚܬ̣ܝܼܡܝܼܢ ܦܸܬ̣ܓ̣ܵܡܹ̈ܐ ܥܲܕܼ ܥܸܕܵܢ ܩܸܨܵܐ.
ܝ:ܢܸܬ̣ܓܵܒ̣ܘܿܢ: ܘܢܸܬ̣ܚܵܘܪܘܼܢ: ܘܢܸܬ̣ܒܲܚܪܘܼܢ ܣܲܓ̇ܝܼ̈ܐܹܐ: ܘܢܸܚܛܘܿܢ ܚܲܛܵܝܹ̈ܐ: ܘܠܵܐ ܢܸܣܬܲܟ̇ܠܘܼܢ ܟܠܗܘܿܢ ܚܲܛܵܝܹ̈ܐ: ܥܵܒ̣ܕܲܝ̈ ܛܵܒ̣ܵܬ̣ܵܐ ܕܹܝܢ ܢܸܣܬܲܟ̇ܠܘܼܢ.
ܝܐ:ܘܡ̣ܢ ܙܲܒ̣ܢܵܐ ܕܢܸܥܒܲܪ ܩܘܼܪܒܵܢܵܐ: ܬܸܬ̣̱ܝܼܗܸܒ̣ ܛܲܢܦܘܼܬ̣ܵܐ ܠܲܚܒ̣ܵܠܵܐ ܝܵܘܡ̈ܝܼܢ ܐܵܠܹܦ ܘܡܲܐܬܹ̇ܝܢ ܘܬܸܫܥܝܼܢ.
ܝܒ:ܘܛܘܼܒ̣ܵܘܗܝ ܠܡܲܢ ܕܲܢܣܲܟܸ̇ܐ ܕܢܸܡܛܸܐ ܠܝܵܘܡ̈ܝܼܢ ܐܵܠܹܦ ܘܲܬ̣ܠܵܬ̣ܡܵܐܐ ܘܲܬ̣ܠܵܬ̣ܝܼܢ ܘܚܲܡܫܵܐ.
ܝܓ:ܘܐܲܢ̄ܬ̇ ܕܵܢܝܼܐܹܝܠ: ܙܸܠ ܠܩܸܨܵܐ ܢܘܼܚ: ܘܲܬ̣ܩܘܼܡ ܠܙܲܒ̣ܢܵܟ ܠܣܘܿܦ ܝܵܘ̈ܡܵܬ̣ܵܐ.
ܟܬ̣ܵܒ̣ܵܐ ܕܫܘܿܫܲܢ ܛܘܼܒ̣ܵܢܝܼܬ̣ܵܐ
ܩܹܦܵܠܹܐܘܿܢ:ܝܓ.
ܐ:ܐܝܼܬ̣ ܗ̄ܘܼܵܐ ܓܲܒ̣ܪܵܐ ܚܲܕܼ ܥܵܡܲܪ ܒܒ̣ܵܒܹܠ: ܫܡܹܗ ܝܘܿܝܵܩܝܼܡ.
ܒ:ܘܲܫܩܲܠ ܠܹܗ ܐܲܢ̄ܬ̇ܬ̣ܵܐ: ܘܲܫܡܵܗ̇ ܫܘܿܫܲܢ. ܒܲܪܬܹܗ ܕܗܲܠܩܵܢܵܐ: ܘܫܲܦܝܼܪܵܐ ܗ̄ܘܼܵܬ̣ ܛܵܒ̣: ܘܕܼܵܚ̇ܠܵܐ ܡ̣ܢ ܡܵܪܝܵܐ.
ܓ:ܘܐ̄ܢܵܫܹ̈ܝܗ̇. ܟܠܗܘܿܢ ܙܲܕ̇ܝܼܩܝܼܢ ܗ̄ܘܼܵܘ. ܘܐܲܠ̣ܦܘܼܗ̇ ܠܒܲܪܬ̣ܗܘܿܢ ܟܠܗܘܿܢ ܦܘܼܩܕܵܢܵܘ̈ܗܝ ܕܡܘܼܫܹܐ.
ܕ:ܘܗ̤ܘ ܝܘܿܝܵܩܝܼܡ ܒܲܥܠܵܗ̇ ܥܲܬ̇ܝܼܪ ܗ̄ܘܼܵܐ ܛܵܒ̣ ܣܘܿܓ̣ܵܐܐ. ܘܐܝܼܬ̣ ܗ̄ܘܼܵܐ ܠܹܗ ܦܲܪܕܲܝܣܵܐ ܚܕܲܪ ܒܲܝܬܹ̇ܗ. ܘܲܠܘܵܬܹܗ ܟܵܢ̇ܫܝܼܢ ܗ̄ܘܼܵܘ ܝܗ̄ܘܼ̈ܕܼܵܝܹܐ: ܡܸܛܠ ܕܲܡܝܲܬܲܪ ܗ̄ܘܼܵܐ ܡ̣ܢ ܟܠܗܘܿܢ.
ܗ:ܒܙܲܒ̣ܢܵܐ ܗܵܘܿ: ܩܵܡ̣ܘ ܬܪܹܝܢ ܩܲܫܝܼ̈ܫܹܐ ܒܥܲܡܵܐ. ܘܐܝܼܬܲܝܗܘܿܢ ܗ̄ܘܼܵܘ ܪܹ̈ܫܵܢܹܐ ܕܥܲܡܵܐ ܘܕܲܝܵܢܹ̈ܐ ܒܫܲܢ̄ܬܵܐ ܗܵܝ̇. ܕܲܥܠܲܝܗܘܿܢ ܡܲܠܸܠ̣ ܐܲܠܵܗܵܐ. ܕܡܸܢܗܘܿܢ ܢܵܦܹ̇ܩ ܪܘܼܫܥܵܐ ܡ̣ܢ ܒܵܒܹܠ. ܡܸܢܗܘܿܢ ܡ̣ܢ ܩܲܫܝܼܫܹ̈ܐ ܘܡ̣ܢ ܕܲܝܵܢܹ̈ܐ ܗܵܢ̇ܘܿܢ ܕܲܡܫܲܡܫܝܼܢ ܗ̄ܘܼܵܘ ܒܗܲܝܟ̇ܠܵܐ.
ܘ:ܗܸܢ̣ܘܿܢ ܗܵܠܹܝܢ ܐܵܬܹ̇ܝܢ ܗ̄ܘܼܵܘ ܐܲܡܝܼܢܵܐܝܼܬ̣ ܠܒܲܝܬܹ̇ܗ ܕܝܘܿܝܵܩܝܼܡ. ܘܐܵܬܹ̇ܝܢ ܗ̄ܘܼܵܘ ܟܠ ܐܲܝܠܹܝܢ ܕܐܝܼܬ̣ ܠܗܘܿܢ ܕܝܼܢܵܐ: ܘܡܸܬ̇ܬ̇ܕ̇ܝܼܢܲܢ.
ܙ:ܘܲܗܘ̤ܵܐ ܕܟܲܕܼ ܐܸܙܲܠ̣ ܟܠܹܗ ܥܲܡܵܐ ܒܦܸܠܓܹ̇ܗ ܕܝܵܘܡܵܐ: ܐܸܙܲܠ̄ܬ̣ ܗ̄ܘܼܵܬ̤ ܫܘܿܫܲܢ: ܗ̤ܝ ܘܛܲܠ̈ܝܵܬ̣ܵܗ̇ ܠܦܲܪܕܲܝܣܵܐ ܕܒܲܥܠܵܗ̇.
ܚ:ܘܚܵܙܹ̇ܝܢ ܗ̄ܘܼܵܘ ܠܵܗ̇ ܟܠ ܝܘܿܡ ܗܵܢ̇ܘܿܢ ܩܲܫܝܼܫܹ̈ܐ: ܟܲܕܼ ܡܗܲܠܟ̣ܵܐ ܗ̄ܘܼܵܬ̣ ܘܐܵܙܵܠ̄ܐ ܠܦܲܪܕܲܝܣܵܐ ܕܒܲܥܠܵܗ̇.
ܛ:ܘܪܲܓ̇ܘܼܗ̇: ܘܐܸܬ̣̱ܗܦܸܟ ܡܲܕܲܥܗܘܿܢ. ܘܐܲܪܟܸ̇ܢܘ ܥܲܝܢܲܝ̈ܗܘܿܢ: ܕܠܵܐ ܢܚܘܼܪܘܼܢ ܒܲܫܡܲܝܵܐ. ܘܠܵܐ ܢܸܬ̇ܕܲܟ̣ܪܘܼܢ ܬܘܼܒ̣ ܥܲܡ ܙܲܕ̇ܝܼܩܹ̈ܐ.
ܝ:ܘܪܲܓ̇ܘܼܗ̇ ܬܪ̈ܲܝܗܘܿܢ ܠܡܸܗܘܵܐ ܥܲܡܵܗ̇ ܐܲܝܟ ܐܘܼܪܚܵܐ ܕܢܸܫܹ̈ܐ. ܘܠܵܐ ܓܠ̣ܵܘ ܡܚܘܿܬ̣ܗܘܿܢ ܚܲܕܼ ܠܚܲܕܼ.
ܝܐ:ܡܸܛܠ ܕܨܵܒܹ̇ܝܢ ܗ̄ܘܼܵܘ ܠܡܸܗܘܵܐ ܥܲܡܵܗ̇ ܒܛܘܼܫܝܵܐ.
ܝܒ:ܘܢܵܛ̇ܪܝܼܢ ܗ̄ܘܼܵܘ ܠܵܗ̇ ܟܠܝܘܿܢ ܚܦܝܼܛܵܐܝܼܬ̣ ܠܡܸܚܙܝܵܗ̇.
ܝܓ:ܘܐܸܡ̣ܲܪܘ ܚܲܕܼ ܠܚܲܒ̣ܪܹܗ. ܢܹܐܙܲܠ ܠܲܢ ܡܸܟܵܐ. ܡܸܛܠ ܕܥܸܕܵܢܵܐ ܗܘ̤ܵܐ ܠܹܗ ܕܫܵܪܘܼܬ̣ܵܐ. ܘܲܢܦܲܩ̣ܘ ܠܡܹܐܙܲܠ ܐܲܟ̣ܚ̄ܕܼܵܐ: ܘܲܓ̣ܢܲܒ̣ܘ ܢܲܦ̮ܫܗܘܿܢ ܚܲܕܼ ܡ̣ܢ ܚܲܕܼ.
ܝܕ:ܘܲܥܛܲܦ̣ܘ ܬܪ̈ܲܝܗܘܿܢ ܟܲܕܼ ܠܵܐ ܝܵܕܼܥܝܼܢ. ܘܐܸܙܲܠ̣ܘ ܬܪ̈ܲܝܗܘܿܢ ܐܲܪܲܥܘ ܚܲܕܼ ܠܚܲܕܼ ܬܲܡܵܢ. ܘܟܲܕܼ ܒܗܸܬ̣ܘ ܠܗܘܿܢ ܒܡܸܕܸ̇ܡ ܕܲܥ̣ܒܲܕܼܘ ܚܲܕܼ ܠܚܲܕܼ ܒܢܸܟ̣ܠܵܐ: ܝܑܼܬܸܒ̣ܘ ܘܲܓ̣ܠܵܘ ܚܲܕܼ ܠܚܲܕܼ ܪܸܓܲܬ̣ܗܘܿܢ ܦܩܲܪܬܵܐ ܘܡܵܘܒ̇ܕܼܵܢܝܼܬ̣ܵܐ: ܕܐܲܝܟܲܢܵܐ ܪܲܓ̇ܘܼܗ̇ ܠܡܲܠܝܲܬ̣ ܢܲܟ̣ܦܘܼܬ̣. ܘܡ̣ܢ ܗܵܝܕܹ̇ܝܢ ܢܵܛ̇ܪܝܼܢ ܗ̄ܘܼܵܘ ܠܗܘܿܢ ܥܸܕܵܢܵܐ: ܕܢܸܫܟ̇ܚܘܼܢܵܗ̇ ܒܲܠܚܘܿܕܹܝܗ̇: ܘܲܢܨܲܥܪܘܼܢܵܗ̇ ܠܫܵܘܝܲܬ̣ ܕܘܼܟ̣ܪܵܢܵܐ ܛ̇ܒ̣ܵܐ.
ܝܗ:ܘܲܗܘ̤ܵܐ ܕܟܲܕܼ ܢܵܛ̇ܪܝܼܢ ܠܵܗ̇. ܚܙ̣ܵܐܘܼܗ̇ ܟܲܕܼ ܐܵܙܵܠ̄ܐ ܐܲܝܟ ܕܟ̣ܠܝܘܿܡ: ܐܲܝܟ ܐܸܬ̣ܡܵܠܝ ܘܐܲܝܟ ܕܲܡܢܵܬ̣ܡܵܠܝ. ܟܲܕܼ ܐܝܼܬ̣ ܗ̄ܘܼܵܐ ܥܲܡܵܗ̇ ܛܲܠ̈ܝܵܬ̣ܵܗ̇ ܬܲܪܬܹ̇ܝܢ. ܘܐܸܬ̣ܪܲܓ̣ܪ̱ܓܲܬ̤ ܠܡܸܣܚܵܐ ܬܲܡܵܢ ܒܦܲܪܕܲܝܣܵܐ: ܡܸܛܠ ܕܚܘܼܡܵܐ ܗ̄ܘܼܵܐ.
ܝܘ:ܘܬܸܙܲܠ̣ܘ ܗܵܢ̇ܘܿܢ ܩܲܫܝܼܫܹ̈ܐ. ܘܟ̣ܡܸܢ̣ܘ ܬܲܡܵܢ ܒܦܲܪܕܲܝܣܵܐ. ܘܐ̄ܢܵܫ ܐ̄ܚܪܹܝܢ ܠܲܝܬ̇ ܗ̄ܘܼܵܐ ܒܹܗ ܒܦܲܪܕܲܝܣܵܐ. ܐܸܠܵܐ ܐܸܢ ܬܪ̈ܲܝܗܘܿܢ ܗܵܢ̇ܘܿܢ ܩܲܫܝܼܫܹ̈ܐ.
ܝܙ:ܘܐܸܡܪܲܬ̤ ܫܘܿܫܲܢ ܠܛܲܠ̈ܝܵܬ̣ܵܗ̇. ܙܸܠܹ̈ܝܢ ܐܲܝܬܵܐܹܝ̈ܢ ܠܝܼ ܡܸܫܚܵܐ ܘܲܙܡܵܡܵܐ. ܘܬܲܪ̈ܥܹܐ ܕܦܲܪܕܲܝܣܵܐ ܐܲܚܘܿܕܹ̈ܝܢ ܥܕܲܡܵܐ ܕܐܸܣܚܸܐ.
ܝܚ:ܘܲܥܒܲܕܼ ܐܲܝܟ ܕܲܦܲܩܕܲܬ̤ ܐܸܢܹܝܢ ܘܐܸܚܲـ̈ـܕܼ ܬܲܪ̈ܥܹܐ ܕܦܲܪܕܲܝܣܵܐ: ܘܐܸܙܲܠ̈ ܕܢܲܝ̈ܬ̇ܝܵܢ ܡܸܕܸ̇ܡ ܕܐܸܬ̣ܦܩܸܕܼ. ܘܠܵܐ ܚܙܲܝ̈ ܐܸܢܘܿܢ ܠܗܘܿܢ ܠܗܵܢ̇ܘܿܢ ܩܲܫܝܼܫܹ̈ܐ ܕܲܛܫܹܝܢ ܗ̄ܘܼܵܘ ܬܲܡܵܢ.
ܝܛ:ܘܟܲܕܼ ܢܦܲܩ̣ ܛܲܠ̈ܝܵܬ̣ܵܗ̇ ܕܫܘܿܫܲܢ: ܪܗܸܛ̣ܘ ܥܠܹܝܗ̇ ܗܵܢ̇ܘܿܢ ܩܲܫܝܼܫܹ̈ܐ: ܘܐܸܡ̣ܲܪ ܠܵܗ̇.
ܟܟ:ܗܵܐ ܬܲܪ̈ܥܹܐ ܕܦܲܪܕܲܝܣܵܐ ܐܲܚܝܼܕܼܝܼܢ ܐܸܢܘܿܢ. ܘܐ̄ܢܵܫ ܠܲܝܬ̇ ܠܲܢ. ܐܸܠܵܐ ܡܸܛܠ ܕܡܸܪܲܓ̣ ܪܲܓ̣ܢܹܟ̣ܝ: ܕܡܲܟ̣ܝ ܥܲܡܲܢ.
ܟܐ:ܘܐܸܢ ܕܹܝܢ ܠܵܐ ܨܵܒܲܝܵܐ ܐܲܢ̄ܬ̇ܝ ܠܡܸܕܼܡܲܟ ܥܲܡܲܢ: ܡܲܣ̱ܗܕܼܝܼܢ ܚ̄ܢܲܢ ܥܠܲܝܟ̇ܝ ܫܘܼܩܪܵܐ: ܕܲܕܼܡܸܟ ܠܘܵܬܹܟ̣ܝ ܥܠܲܝܡܵܐ ܚܲܕܼ. ܡܸܛܠ ܗܵܢܵܐ ܫܲܕܲܪܬ̇ܝ ܐܸܢܹܝܢ ܠܛܲܠܝܵܬܹ̈ܟ̣ܝ ܡ̣ܢ ܠܘܵܬܹܟ̣ܝ.
ܟܒ:ܘܐܸܬ̣ܪܲܥܝܲܬ̤ ܫܘܿܫܲܢ ܘܐܸܡܪܲܬ̤. ܐܘܼܠܨܵܢܵܐ ܗ̄ܘܼ ܠܝܼ ܡ̣ܢ ܟܠ ܓܲܒ̇ܝܼ̈ܢ. ܘܐܸܢ ܓܹܝܪ ܗܵܕܹܐ ܐܸܥܒܸ̇ܕܼ: ܡܵܘܬܵܐ ܗ̄ܘܼ ܠܝܼ ܡ̣ܢ ܩܕܼܵܡ ܐܲܠܵܗܵܐ: ܥܲܠ ܕܨܲܥ̇ܪܹܬ̣ ܬܸܫܘܝܼܬܹܗ ܕܝܘܿܝܵܩܝܼܡ ܒܲܥܠܝ. ܘܐܸܢ ܠܵܐ ܐܸܥܒܸ̇ܕܼ: ܡܵܘܬܵܐ ܒܝܼܫܵܐ ܡ̣ܢ ܐܝܼܕܲܝ̈ܟ̇ܘܿܢ ܐܹܩܲܒܸ̇ܠ ܥܲܡ ܫܡܵܐ ܒܝܼܫܵܐ ܕܠܵܐ ܝܵܐܹ̇ܐ ܠܚܹܐܪܘܼܬ̣ܝ. ܘܒܸܗܬ̇ܬ̣ܵܐ ܐܸܫܒ̇ܘܿܩ ܠܟ̣ܠܵܗ̇ ܫܲܪܒܲܬ̣ܝ: ܡ̣ܢ ܣܵܗܕ̇ܘܼܬ̣ܵܐ ܕܫܘܼܩܪܵܐ ܕܓܲܒ̣ܪܹ̈ܐ ܥܵܘܵܠܹ̈ܐ. ܕܡܵܘܣ̈ܦܝܼܢ ܥܲܠ ܬܒ̣ܵܪܹܗ ܘܥܲܠ ܒܝܼܫܬܹ̇ܗ ܕܝܼܣܪܵܝܹܠ: ܒܒܸܙܚܵܐ ܒܹܝܬ̣ ܥܲܡܡܹ̈ܐ ܢܘܼܟ̣ܪ̈ܵܝܹܐ.
ܟܓ:ܐܸܠܵܐ ܦܲܩܵܚ ܠܝܼ ܕܐܹܡܘܼܬ̣ ܡ̣ܢ ܐܝܼܕܲܝ̈ܟ̇ܘܿܢ ܒܥܵܘܼܠܵܐ: ܘܠܵܐ ܐܸܚܛܸܐ ܩܘܼܕܼܡܲܬ̣ ܐܲܠܵܗܵܐ: ܗܵܘܿ ܕܡܸܕܸ̇ܡ ܠܵܐ ܛܵܥܹ̇ܐ ܠܹܗ. ܟܲܕܼ ܡܗܲܝܡܢܵܐ ܐ̄ܢܵܐ ܒܹܗ: ܕܐܵܦ ܡ̣ܢ ܐܝܼܕܲܝ̈ܟ̇ܘܿܢ ܢܦܲܨܝܢܝ.
ܟܕ:ܘܲܩܥܵܬ̤ ܒܩܵܠܵܐ ܪܵܡܵܐ ܫܘܿܫܲܢ: ܥܲܠ ܐܘܼܠܨܵܢܵܗ̇ ܕܡ̣ܢ ܐܝܼ̈ܕܲܝ ܓܲܒ̣ܪܹܐ ܦܲܩܪܹ̈ܐ. ܘܲܩ̣ܥܵܘ ܐܵܦ ܗܸܢܘܿܢ ܩܲܫܝܼܫܹ̈ܐ ܠܩܘܼܒ̣ܠܵܗ̇.
ܟܗ:ܘܲܪܗܸܛ̣ ܚܲܕܼ ܡܸܢܗܘܿܢ: ܘܲܦ̣ܬܲܚ ܬܲܪ̈ܥܹܐ ܕܦܲܪܕܲܝܣܵܐ.
ܟܘ:ܘܲܗܘ̤ܵܐ ܕܟܲܕܼ ܐܸܫܬ̇ܡܲܠ ܩܵܠܵܐ ܗܵܢܵܐ ܒܦܲܪܕܲܝܣܵܐ: ܒܢܲܝ̈ ܒܲܝܬܵܗ̇ ܕܫܘܼܫܲܢ: ܪܗܸܛ̣ܘ: ܘܥܲܠ̣ܘ ܒܲܥܓܲܠ ܕܢܸܚܙܘܿܢ ܡܵܢܵܐ ܓܲܕܼܫܵܗ̇.
ܟܙ:ܘܟܲܕܼ ܟܸܢܫܲܬ̤ ܟܠܵܗ̇ ܐ̄ܢܵܫܘܼܬ̣ܵܗ̇ ܕܫܘܿܫܲܢ: ܫܲܪܝܼܘ ܗܵܢ̇ܘܿܢ ܩܲܫܝܼܫܹ̈ܐ ܕܢܲܣܗ̱ܕܼܘܼܢ ܥܠܹܝܗ̇ ܥܵܘܼܠܵܐ. ܕܗܵܟܲܢܵܐ ܟܲܕܼ ܥܵܒ̣ܪܝܼܢ ܚ̄ܢܲܢ ܠܒܲܪ ܡ̣ܢ ܦܲܪܕܲܝܣܵܐ: ܐܲܕܼܝܼܩܢ ܕܢܸܚܙܹܐ ܦܲܪܕܲܝܣܵܐ. ܘܲܚ̣ܙܲܝܢ ܠܫܘܿܫܲܢ: ܟܲܕܼ ܕܲܡܝܼܟ ܥܲܡܵܗ̇ ܥܠܲܝܡܵܐ ܚܲܕܼ. ܘܲܪܗܸܛܢ ܠܡܹܐܚܲܕܼ ܐܸܢܘܿܢ. ܘܠܵܐ ܐܸܬ̣ܡ̱ܨܝܼܢ ܠܡܹܐܚܕܹܗ ܠܗܵܘܿ ܥܠܲܝܡܵܐ: ܡܸܛܠ ܕܥܲܫܝܼܢ ܗ̄ܘܼܵܐ ܡܸܢܲܢ. ܟܲܕܼ ܫܡܲܥ̣ܘ ܕܹܝܢ ܡܸܠܲܝ̈ܗܘܿܢ ܕܩܲܫܝܼܫܹ̈ܐ ܟܠܵܗ̇ ܐ̄ܢܵܫܘܼܬ̣ܵܗ̇ ܕܫܘܿܫܲܢ: ܒܗܸܬ̣ܘ ܥܲܠ ܡܸܕܸ̇ܡ ܕܐܸܡܲܪܘ ܕܥܸܒ̣ܕܲܬ̤.
ܟܚ:ܘܲܗܘ̤ܵܐ ܠܝܵܘܡܵܐ ܐ̄ܚܪܹܢܵܐ: ܐܸܬ̣ܟܲܢܲܫܘ ܥܲܡܵܐ ܟܠܹܗ ܠܘܵܬ̣ ܝܘܿܝܵܩܝܼܡ ܒܵܥܠܵܗ̇: ܕܲܢܥܲܩܒ̣ܘܼܢ ܥܠܹܝܗ̇ ܥܲܠ ܫܘܿܫܲܢ. ܘܐܸܢ ܫܲܪܝܼܪܵܐܝܼܬ̣ ܥܸܒ̣ܕܲܬ̤ ܛܲܢܦܘܼܬ̣ܵܐ ܗܵܕܹܐ: ܘܨܲܥܪܲܬ̤ ܬܸܫܘܝܼܬܹܗ ܕܝܘܿܝܵܩܝܼܡ ܒܲܥܠܵܗ̇: ܬܡܘܼܬ̣. ܘܐܸܬ̣ܵܘ ܐܵܦ ܩܲܫܝܼܫܹ̈ܐ ܗܵܢ̇ܘܿܢ ܬܪ̈ܲܝܗܘܿܢ: ܕܢܸܥܫ̄ܩܘܼܢܵܗ̇ ܥܵܘܵܠܵܐܝܼܬ̣.
ܟܛ:ܘܐܸܡܲܪ ܩܕܼܵܡ ܥܲܡܵܐ ܟܠܹܗ. ܫܲܕܲܪܘ ܒܵܬܲܪ ܫܘܿܫܲܢ ܒܲܪܬܹܗ ܕܗܲܠܩܵܢܵܐ: ܐܲܢ̄ܬ̇ܬܹܗ ܕܝܘܿܝܵܩܝܼܡ. ܘܫܲܕܲܪܘ ܒܵܬ̣ܪܵܗ̇.
ܠ:ܘܐܸܬܲܬ̣̤ ܗ̤ܝ ܘܟ̣ܠܵܗ̇ ܫܲܪܒ̇ܬ̣ܵܗ̇: ܘܟ̣ܠܗܘܿܢ ܝܵܕܼܘܿܥܹ̈ܝܗ̇ ܘܪ̈ܵܚܡܹܝܗ̇. ܘܩܵܡܲܬ̣ ܡܸܨܥܲܬ̣ ܟܠܹܗ ܟܸܢܫܵܐ ܕܥܲܡܵܐ.
ܠܐ:ܘܐܲܢ̄ܬ̇ܬ̣ܵܐ ܫܲܦܝܼܪܵܐ ܗ̄ܘܼܵܬ̣ ܒܚܸܙܘܵܗ̇ ܛܵܒ̣. ܘܡܲܟ̇ܝܼܟ̣ܵܐ ܝܲܬ̇ܝܼܪ ܡ̣ܢ ܟܠܗܹܝܢ ܢܸܫܹ̈ܐ. ܘܢܲܟ̣ܦܵܐ ܗ̄ܘܼܵܬ̣ ܛܵܒ̣ ܬܲܟ̣ܣܝܼܬ̣ܵܗ̇.
ܠܒ:ܘܟܲܕܼ ܚ̣ܙܵܐܘܼܗ̇ ܗܵܢ̇ܘܿܢ ܪ̈ܲܫܝܼܥܹܐ. ܦ̣ܩܲܕܼܘ ܕܢܸܓ̣ܠܘܿܢܵܗ̇ ܬܲܚܦܝܼܬ̣ܵܗ̇. ܕܐܵܦܸܢ ܒܲܚܙܵܬ̣ܵܗ̇ ܢܸܣܒ̇ܥܘܼܢܹܗ ܠܫܘܼܦܪܵܗ̇.
ܠܓ:ܒܵܟܹ̇ܝܢ ܗ̄ܘܼܵܘ ܕܹܝܢ ܟܠܗܘܿܢ ܕܚܵܙܹ̇ܝܢ ܗ̄ܘܼܵܘ ܠܵܗ̇ ܥܲܡ ܟܠܵܗ̇ ܐ̄ܢܵܫܘܼܬ̣ܵܗ̇.
ܠܕ:ܘܟܲܕܼ ܟܸܢܫܵܐ ܣܲܓ̇ܝܼܐܵܐ ܚܕܼܝܼܪ ܗ̄ܘܼܵܐ ܠܵܗ̇: ܥܲܠ̣ܘ ܗܵܢ̇ܘܿܢ ܩܲܫܝܼܫܹ̈ܐ ܬܪ̈ܲܝܗܘܿܢ. ܘܐܲܣܗܸܕܼܘ ܥܠܹܝܗ̇ ܫܘܼܩܪܵܐ. ܘܣܵܡ̣ܘ ܐܝܼܕܲܝ̈ܗܘܿܢ ܥܲܠ ܪܹܫܵܗ̇ ܕܫܘܿܫܲܢ ܘܐܵܡ̇ܪܝܼܢ: ܕܗܵܕܹܐ ܥܲܡ ܥܠܲܝܡܵܐ ܚܲܕܼ ܚ̣ܙܲܝܢܵܗ̇ ܟܲܕܼ ܕܲܡܝܼܟ̣ܵܐ.
ܠܗ:ܘܗ̤ܝ ܫܘܿܫܲܢ ܟܲܕܼ ܡܲܪܝܼܪܵܐ ܢܲܦ̮ܫܵܗ̇ ܥܲܠ ܡܸܕܸ̇ܡ ܕܓܲܕܼܫܵܗ̇: ܫܸܩܠܲܬ̤ ܥܲܝܢܹ̈ܝܗ̇ ܠܲܫܡܲܝܵܐ ܠܘܵܬ̣ ܡܵܪܝܵܐ. ܡܸܛܠ ܕܠܸܒܵܗ̇ ܣܝܼܡ ܗ̄ܘܼܵܐ ܠܘܵܬ̣ ܐܲܠܵܗܵܐ.
ܠܘ:ܘܐܸܡܲܪܘ ܗܵܢ̇ܘܿܢ ܩܲܫܝܼܫܹ̈ܐ ܬܪ̈ܲܝܗܘܿܢ. ܕܟܲܕܼ ܡܗܲܠܟ̣ܝܼܢ ܚ̄ܢܲܢ ܐܸܬ̣ܡܵܠܝ ܠܒܲܪ ܡ̣ܢ ܦܲܪܕܲܝܣܵܐ: ܐܸܬܲܬ̤ ܫܘܿܫܲܢ ܘܬܲܪܬܹ̇ܝܢ ܛܲܠ̈ܝܵܬ̣ܵܗ̇ ܥܲܡܵܗ̇. ܘܥܲܠܹ̈ܝܢ ܠܦܲܪܕܲܝܣܵܐ. ܘܫܲܕܲܪܲܬ̤ ܐܸܢܹܝܢ ܠܐܲܡ̈ܗܵܬ̣ܵܗ̇: ܘܐܸܚܕܲܬ̤ ܬܲܪ̈ܥܹܐ ܕܦܲܪܕܲܝܣܵܐ.
ܠܙ:ܘܐܸܬ̣ܵܐ ܠܘܵܬ̣ܵܗ̇ ܥܲܠܝܡܵܐ ܚܲܕܼ ܗܵܘܿ ܕܲܡܛܲܫܲܝ ܗ̄ܘܼܵܐ ܠܵܗ̇. ܘܲܕܼܡܸܟ ܥܲܡܵܗ̇.
ܠܚ:ܚܢܲܢ ܕܹܝܢ ܥܲܠ̣ܢ ܗ̄ܘܲܝܢ ܠܲܢ ܠܓ̣ܵܘ ܦܲܪܕܲܝܣܵܐ. ܘܲܚܙܲܝܢ ܫܘܼܩܪܵܐ. ܘܲܪܗܸܛ̣ܢ ܥܠܲܝܗܘܿܢ. ܘܐܸܫܟܲܚ̣ܢ ܐܸܢܘܿܢ ܟܲܕܼ ܕܲܡܟ̇ܝܼܢ.
ܠܛ:ܠܗܵܘܿ ܕܹܝܢ ܥܠܲܝܡܵܐ ܠܵܐ ܐܸܫܟܲܚܢ ܠܡܹܐܚܕܹܗ. ܡܸܛܠ ܕܥܲܫܝܼܢ ܗ̄ܘܼܵܐ ܡܸܢܲܢ. ܘܲܦܬܲܚ̣ ܬܲܪܥܵܐ ܕܦܲܪܕܲܝܣܵܐ: ܘܲܥܪܲܩ̣.
ܡ:ܠܗܵܕܹܐ ܕܹܝܢ ܐܸܚܲܕܼܢܵܗ̇: ܘܫܲܐܸܠܢܵܗ̇ ܕܡܲܢ̣ܘܼ ܗܵܘܿ ܥܠܲܝܡܵܐ ܕܕܲܡܝܼܟ ܗ̄ܘܼܵܐ ܥܲܡܹܟ̣ܝ. ܘܠܵܐ ܨܒ̣ܵܬ̤ ܕܬ̣ܵܘܕܹ̇ܐ ܠܲܢ ܥܠܵܘܗܝ ܡܲܢ̣ܘܼ. ܗܵܠܹܝܢ ܡܲܣ̱ܗܕܼܝܼܢܲܢ ܥܠܹܝܗ̇ ܩܕܼܵܡܲܝܟ̇ܘܿܢ.
ܡܐ:ܘܗܲܝܡܢܲܬ̤ ܐܸܢܘܿܢ ܟܠܵܗ̇ ܟܢܘܼܫܬܵܐ: ܐܲܝܟ ܕܲܠܩܲܫܝܼܫܹ̈ܐ ܕܥܲܡܵܐ ܘܐܲܝܟ ܕܲܠܕܲܝܵܢܹ̈ܐ. ܘܚܲܒ̣ܘܼܗ̇ ܠܫܘܿܫܲܢ ܠܡܵܘܬܵܐ. ܐܲܝܟܲܢܵܐ ܕܢܸܕܼܚ̈ܠܵܢ ܟܠܗܹܝܢ ܢܸܫܹ̈ܐ: ܘܬ̣ܘܼܒ̣ ܠܵܐ ܢܸܥ̈ܒ̇ܕܼܵܢ ܐܲܝܟ ܒܸܗܬ̇ܬ̣ܵܐ ܗܵܕܹܐ ܠܗܹܝܢ ܘܲܠܫܲܪܒܲܬ̣ܗܹܝܢ.
ܡܒ:ܘܲܓ̣ܥܵܬ̤ ܫܘܿܫܲܢ ܒܩܵܠܵܐ ܪܵܡܵܐ ܘܐܸܡܪܲܬ̤. ܐܲܠܵܗܵܐ ܕܐܝܼܬ̣ܵܘܗܝ ܝܵܕܼܘܿܥܵܐ ܕܟ̣ܠ ܡܸܕܹ̇ܡ: ܘܟܲܣ̈ܝܵܬ̣ܵܐ ܓܲܠ̈ܝܵܢ ܐܸܢܹܝܢ ܩܕܼܵܡܵܘܗܝ. ܗܵܘ̇ ܕܝܵܕܲܥ ܕܲܥܬ̣ܝܼ̈ܕܼܵܢ ܥܲܕܼܠܵܐ ܢܸܗܘ̈ܝܵܢ.
ܡܓ:ܗ̤ܘ ܢܸܚܙܹܐ ܕܲܒ̣ܕܲܓܵܠܘܼܬ̣ܵܐ ܥܲܫ̣ܩܘܼܢܝ ܗܵܠܹܝܢ. ܘܗܵܐ ܡܵܝ̇ܬܵܐ ܐ̄ܢܵܐ ܟܲܕܼ ܠܵܐ ܥܸܒ̣ܕܹ̇ܬ̣ ܡܸܕܹ̇ܡ ܕܗܵܠܹܝܢ ܐܲܣܗܸܕܼܘ ܥܠܲܝ. ܐܸܠܵܐ ܥܲܠ ܗܵܕܹܐ ܕܠܵܐ ܥܸܒ̣ܕܹ̇ܬ̣ ܠܗܘܿܢ ܨܸܒ̣ܝܵܢܵܐ ܕܡܸܕܹ̇ܡ ܕܫܲܐ̣ܠܘܼܢܝ.
ܡܕ:ܘܲܫ̣ܡܲܥ ܡܵܪܝܵܐ ܒܩܵܠܵܗ̇ ܕܫܘܿܫܲܢ.
ܡܗ:ܘܟܲܕܼ ܢܵܦ̇ܩܵܐ ܠܲܡܡܵܬ̣: ܒܲܥܓܲܠ ܫܲܕܲܪ ܐܲܠܵܗܵܐ ܪܘܼܚܹܗ ܩܲܕ̇ܝܼܫܬܵܐ: ܥܲܠ ܛܲܠܝܵܐ ܙܥܘܿܪܵܐ ܕܲܫܡܹܗ ܕܵܢܝܼܐܹܝܠ. ܕܲܗܘ̤ܵܐ ܒܲܪ ܬܲܪܬܲܥܸܣܪܹ̈ܐ ܫܢ̈ܝܼܢ.
ܡܘ:ܘܲܩܥ̣ܵܐ ܒܩܵܠܵܐ ܪܵܡܵܐ ܘܐܸܡ̣ܲܪ. ܡܚܲܣܲܝ ܐ̄ܢܵܐ ܕܡܵܐ ܕܗܵܕܹܐ. ܡܸܛܠ ܕܕܲܟ̣ܝܵܐ ܗ̄ܝܼ ܡ̣ܢ ܗܵܕܹܐ ܛܲܢܦܘܼܬ̣ܵܐ.
ܡܙ:ܘܗܸܦܟܲܬ̤ ܟܠܵܗ̇ ܟܢܘܼܫܬܵܐ ܠܘܵܬܹܗ: ܘܐܵܡ̇ܪܝܼܢ ܠܹܗ. ܡܵܢܲܐܗ̄ܝܼ ܡܸܠܬ̣ܵܐ ܗܵܕܹܐ ܕܡܲܠܸܠ̣ܬ̇.
ܡܚ:ܘܗ̤ܘ ܟܲܕܼ ܩܵܐܹ̇ܡ ܒܲܝܢܵܬ̣ܗܘܿܢ ܐܸܡܲܪ. ܗܵܟܲܢܵܐ ܣܲܟ̣ܠܝܼܢ ܐ̄ܢܬ̇ܘܿܢ ܒܢܲܝ̈ ܝܑܼܣܪܵܝܹܠ ܕܠܵܐ ܕܵܝܢܝܼܢ ܐ̄ܢܬ̇ܘܿܢ ܒܙܲܕ̇ܝܼܩܘܼܬ̣ܵܐ ܠܲܒ̣̈ܢܵܬ̣ ܝܑܼܣܪܵܝܹܠ.
ܡܛ:ܗܦܘܿܟ̣ܘ ܠܟ̣ܘܿܢ ܟܠܟ̣ܘܿܢ ܠܒܹܝܬ̣ ܕܝܼܢܵܐ. ܒܕܲܓܵܠܘܼܬ̣ܵܐ ܓܹܝܪ ܚܲܝܸܒ̣ܬ̇ܘܿܢܵܗ̇ ܠܗܵܕܹܐ.
ܢܢ:ܘܗܸܦܟܲܬ̤ ܟܠܵܗ̇ ܟܢܘܼܫܬܵܐ ܠܒܹܝܬ̣ ܕܝܼܢܵܐ.
ܢܐ:ܘܐܸܡܲܪܘ ܠܹܗ ܗܵܢܘܿܢ ܩܲܫܝܼܫܹ̈ܐ ܠܕܼܵܢܝܼܐܹܝܠ. ܬܵܐ ܬܸܒ̣ ܒܲܝܢܵܬܲܢ: ܘܐܸܡܲܪ ܠܲܢ. ܢܸܚܙܹܐ ܕܠܵܟ ܝܲܗ̄ܒ̣ ܐܲܠܵܗܵܐ ܩܲܫܝܼܫܘܼܬ̣ܵܐ. ܘܐܸܡܲܪ ܕܵܢܝܼܐܹܝܠ ܠܟ̣ܠܵܗ̇ ܟܢܘܼܫܬܵܐ. ܦܪܘܼܫܘ ܐܸܢܘܿܢ ܠܝܼ ܚܲܕܼ ܡ̣ܢ ܚܲܕܼ: ܠܗܵܠܹܝܢ ܩܲܫ̈ܝܼܫܹܐ. ܘܗܵܝܕܹ̇ܝܢ ܐܹܕ̇ܘܼܢ ܐܸܢܘܿܢ ܐܲܝܟ ܕܝܲܗ̄ܒ̣ ܠܝܼ ܐܲܠܵܗܵܐ. ܘܐܹܚܵܘܸܐ ܕܲܒ̣ܥܵܘܼܠܵܐ ܐܲܣܗܸܕܼܘ ܥܲܠ ܫܘܿܫܲܢ ܫܘܼܩܪܵܐ.
ܢܒ:ܘܦܸܪܫܲܬ̤ ܐܸܢܘܿܢ ܟܢܘܼܫܬܵܐ ܚܲܕܼ ܡ̣ܢ ܚܲܕܼ ܘܲܩ̣ܪܵܐ ܠܚܲܕܼ ܡܸܢܗܘܿܢ: ܘܐܸܡ̣ܲܪ ܠܹܗ. ܓܲܒ̣ܪܵܐ ܐܲܢ̄ܬ̇ ܕܲܥܬܸܩ̣ܬ̇ ܒܝܵܘ̈ܡܵܬ̣ܵܐ ܒܝܼ̈ܫܹܐ. ܗܵܫܵܐ ܕܹܝܢ ܩ̣ܪܸܒ̣ܘ ܚܛܵܗܲܝ̈ܟ: ܗܵܢ̇ܘܿܢ ܕܥܵܒܹ̇ܕܼ ܗ̄ܘܲܝܬ̇ ܡ̣ܢ ܩܕܼܵܡ ܙܲܒ̣ܢܵܐ.
ܢܓ:ܕܕܼܵܐܹ̇ܝܢ ܗ̄ܘܲܝܬ̇ ܕܝܼܢܹ̈ܐ ܕܥܵܘܼܠܵܐ. ܘܲܠܙܲܕ̇ܝܼܩܹ̈ܐ ܡܚܲܝܸܒ̣ ܗ̄ܘܲܝܬ̇. ܘܡܵܘܒܸ̇ܕܼ ܗ̄ܘܲܝܬ̇ ܠܡܲܟ̇ܝܼ̈ܟܹܐ. ܘܲܠܙܲܟܵܝܹ̈ܐ ܠܵܐ ܡܙܲܟܸ̇ܐ ܗ̄ܘܲܝܬ̇.
ܢܕ:ܗܵܫܵܐ ܕܹܝܢ ܐܸܡܲܪ ܠܝܼ ܗܵܕܹܐ: ܩܕܼܵܡ ܟܠܵܗ̇ ܟܢܘܼܫܬܵܐ ܗܵܕܹܐ: ܬܚܹܝܬ̣ ܐܲܝܢܵܐ ܡ̣ܢ ܐܝܼܠܵܢܹ̈ܐ ܚܙܲܝܬ̇ ܠܗܵܕܹܐ ܘܲܠܗܵܘܿ ܥܠܲܝܡܵܐ ܟܲܕܼ ܕܲܡܟ̇ܝܼܢ ܐܲܟ̣ܚ̄ܕܼܵܐ. ܐܵܡܲܪ ܠܹܗ ܗܵܘܿ ܩܲܫܝܼܫܵܐ: ܬܚܹܝܬ̣ ܦܸܣܬ̇ܩܵܐ.
ܢܗ:ܐܵܡܲܪ ܠܹܗ ܕܵܢܝܼܐܹܝܠ. ܗܵܕܹܐ ܕܹܝܢ ܕܲܥ. ܕܐܸܢ ܒܲܫܪܵܪܵܐ ܕܲܓܸ̇ܠܬ̇: ܒܪܹܫܵܟ ܣܵܠ̇ܩܵܐ. ܥܬ̣ܝܼܕܼ ܗ̄ܘܼ ܓܹܝܪ ܡܲܠܲܐܟܹܗ ܕܐܲܠܵܗܵܐ: ܕܩܲܒܸ̇ܠ ܦܘܼܩܕܵܢܵܐ ܡ̣ܢ ܩܕܼܵܡ ܐܲܠܵܗܵܐ: ܕܢܸܨܪܹܝܟ ܡ̣ܢ ܪܹܫ ܠܪܹܫ.
ܢܘ:ܘܒ̣ܵܬܲܪܟܸ̇ܢ ܩ̣ܪܵܐ ܠܗܵܘܿ ܐ̄ܚܪܹܢܵܐ ܚܲܒ̣ܪܹܗ: ܘܐܸܡܲܪ ܠܹܗ ܘܐܵܦ ܠܗܵܘܿ. ܙܲܪܥܹܗ ܕܲܟ̣ܢܲܥܢ ܘܠܵܐ ܕܲܝܗܘܿܕܼܵܐ: ܫܘܼܦܪܵܐ ܗ̄ܘܼ ܕܗܵܕܹܐ ܫܲܥ̣ܒ̇ܕܼܵܟ: ܘܪܸܓ̇ܬ̣ܵܗ̇ ܗܲܦܟܲܬ̤ ܠܸܒܵܟ.
ܢܙ:ܗܵܟܲܢܵܐ ܥܵܒ̣ܕ̇ܝܼܢ ܐܲܢ̄ܬ̇ܘܿܢ ܠܲܒ̣̈ܢܵܬ̣ ܝܑܼܣܪܵܝܹܠ: ܒܲܕܼܠܵܐ ܥܵܒ̣̈ܕܵܢ ܗ̄ܘܲܝ̈ ܨܸܒ̣ܝܵܢܲܝ̈ܟ̇ܘܿܢ ܒܝܼ̈ܫܹܐ ܡ̣ܢ ܕܸܚܠܲܬ̣ܗܹܝܢ.
ܢܚ:ܐܲܢ̄ܬ̇ ܕܹܝܢ ܐܸܡܲܪ ܠܝܼ ܩܕܼܵܡ ܟܠܵܗ̇ ܟܢܘܼܫܬܵܐ ܗܵܕܹܐ: ܬܚܹܝܬ̣ ܐܲܝܢܵܐ ܡ̣ܢ ܐܝܼܠܵܢܹ̈ܐ: ܚܙܲܝܬ̇ܘܿܢ ܐܸܢܘܿܢ ܠܗܵܕܹܐ ܘܲܠܗܵܘܿ ܥܠܲܝܡܵܐ ܕܕܲܡܟ̇ܝܼܢ ܐܲܟ̣ܚ̄ܕܼܵܐ. ܥܢ̣ܵܐ ܘܐܸܡܲܪ ܩܕܼܵܡ ܟܠܵܗ̇ ܟܢܘܼܫܬܵܐ: ܬܚܹܝܬ̣ ܪܘܼܡܵܢܵܐ.
ܢܛ:ܐܵܡܲܪ ܠܹܗ ܕܵܢܝܼܐܹܝܠ. ܒܲܫܪܵܪܵܐ ܥܵܘܼܠܵܐ ܡܲܠܸܠ̣ܬ̇ ܩܕܼܵܡ ܡܵܪܝܵܐ ܥܲܠ ܗܵܕܹܐ ܚܲܠܵܫܬܵܐ. ܘܨܵܒܹ̇ܝܢ ܐ̄ܢܬ̇ܘܿܢ ܠܡܹܐܫܲܕܼ ܕܡܵܐ ܙܲܟܵܝܵܐ ܒܥܵܘܼܠܵܐ. ܗܵܫܵܐ ܕܹܝܢ ܒܝܼܫܬܵܟ ܒܪܹܫܵܟ ܣܵܠ̇ܩܵܐ. ܐܲܝܟ ܕܲܟ̣ܬ̣ܝܼܒ̣ ܒܢܵܡܘܿܣܵܐ ܕܡܘܼܫܹܐ. ܗܵܐ ܓܹܝܪ ܡܲܠܲܐܟܹܗ ܕܐܲܠܵܗܵܐ ܐܸܫܬܲܠܲܚ ܥܠܲܝܟ. ܘܐܲܚܝܼܕܼ ܚܲܪܒܵܐ ܒܐܝܼܕܹܗ: ܕܢܸܨܪܹܝܟ ܡ̣ܢ ܪܹܫ ܠܪܹܫ. ܘܢܵܘܒܸ̇ܕܼ ܠܲܬ̣ܪ̈ܲܝܟ̇ܘܿܢ ܐܲܟ̣ܚ̄ܕܼܵܐ. ܘܲܥܢܵܬ̤ ܟܠܵܗ̇ ܟܢܘܼܫܬܵܐ ܒܩܵܠܵܐ ܪܵܡܵܐ: ܘܐܸܡܲܪܘ ܐܲܟ̣ܚ̄ܕܼܵܐ. ܫܘܼܒ̣ܚܵܐ ܠܐܲܠܵܗܵܐ ܕܐܲܚܝܼ ܠܟ̣ܠ ܕܗܲܝܡܸܢܘ ܒܲܫܡܹܗ: ܘܐܲܟܸ̇ܣ ܐܸܢܘܿܢ ܕܵܢܝܼܐܹܝܠ ܒܲܠܛܘܼܡܝܵܐ ܕܲܛܠܲܡ̣ܘ.
ܣ:ܘܲܩܥܵܬ̤ ܟܠܵܗ̇ ܟܢܘܼܫܬܵܐ ܒܩܵܠܵܐ ܪܵܡܵܐ ܐܲܟ̣ܚ̄ܕܼܵܐ. ܘܫܲܒܲܚ̣ܘ ܠܐܲܠܵܗܵܐ ܓܵܠܹ̇ܐ ܟܲܣ̈ܝܵܬ̣ܵܐ: ܕܝܵܗܹ̇ܒ̣ ܠܙܲܟܵܝܵܐ ܐܲܝܟ ܙܲܟܵܝܘܼܬܹܗ. ܘܦܵܪܲܥ ܠܥܵܘܿܠܵܐ: ܘܝܵܗܹ̇ܒ̣ ܐܘܼܪܚܹܗ ܒܪܹܫܹܗ.
ܣܐ:ܘܩܵܡܲܬ̤ ܥܠܲܝܗܘܿܢ ܟܠܵܗ̇ ܟܢܘܼܫܬܵܐ: ܘܲܥ̣ܒܲܕܼܘ ܠܗܘܿܢ ܐܲܝܟ ܦܘܼܩܕܵܢܹܗ ܕܡܘܼܫܹܐ.
ܣܒ:ܘܩܲܛܸܠ̣ܘ ܐܸܢܘܿܢ. ܘܐܲܗܦܸܟ ܠܗܘܿܢ ܡܵܪܝܵܐ ܦܘܼܪܥܵܢܘܼܬ̣ܵܐ ܒܝܼܫܬܵܐ ܐܲܝܟ ܕܫܵܘܹ̇ܝܢ ܗ̄ܘܼܵܘ. ܘܲܚܝܵܐ ܕܡܵܐ ܙܲܟܵܝܵܐ ܒܝܵܘܡܵܐ ܗܵܘܿ.
ܣܓ:ܗܲܠܩܵܢܵܐ ܕܹܝܢ ܘܐܲܢ̄ܬ̇ܬܹܗ: ܚܕܼܝܼܘ ܒܒܲܪܬ̣ܗܘܿܢ ܫܘܿܫܲܢ ܐܲܢ̄ܬ̇ܬܹܗ ܕܝܘܿܝܵܩܝܼܡ: ܕܠܵܐ ܐܸܫܬܲܟܲܚ ܒܵܗ̇ ܣܘܼܪܚܵܢܵܐ. ܘܫܲܒܲܚ̣ܘ ܠܐܲܠܵܗܵܐ ܟܠܹܗ ܥܲܡܵܐ: ܘܟ̣ܠܵܗ̇ ܫܲܪܒ̇ܬ̣ܵܗ̇ ܕܫܘܫܲܢ: ܕܐܸܫܬ̇ܩܸܠ ܫܡܵܐ ܒܝܼܫܵܐ ܕܣܘܼܪܚܵܢܵܐ ܡܸܢܗܘܿܢ.
ܣܕ:ܕܵܢܝܼܐܹܝܠ ܕܹܝܢ ܝܵܪܹܒ̣ ܗ̄ܘܼܵܐ: ܘܛܵܐܸܒ̣ ܩܕܼܵܡ ܟܠܵܗ̇ ܫܲܪܒ̇ܬ̣ܵܐ ܕܫܘܿܫܲܢ ܘܲܒ̣ܥܲܝ̈ܢܲܝ ܟܠܵܗ̇ ܟܢܘܼܫܬܵܐ ܕܝܼܣܪܵܝܹܠ. ܘܲܒ̣ܟ̣ܠܙܒܲܢ ܥܵܒܹ̇ܕܼ ܗ̄ܘܼܵܐ ܕܝܼܢܵܐ ܘܙܲܕ̇ܝܼܩܘܼܬ̣ܵܐ ܒܥܲܡܹܗ. ܘܐܸܬ̣ܡܲܠܲܠ ܫܡܵܐ ܕܬܸܫܒ̈ܚܵܬܹܗ ܒܟ̣ܠܹܗ ܥܲܡܵܐ: ܥܲܡ ܟܲܣ̈ܝܵܬ̣ܵܐ ܘܲܣܬ̇ܝܼܪ̈ܵܬ̣ܵܐ: ܕܐܸܬ̣ܒܲܕܲܩ ܠܹܗ.
ܥܠ ܒܝܠ.
ܩܹܦܵܠܹܐܘܿܢ:ܝܕ.
ܐ:ܘܡܲܠܟܵܐ ܐܸܣܛܝܼܓ̣ܘܿܣ ܐܸܬ̇ܬܵܘܣܲܦ ܥܲܠ ܐܲܒ̣ܵܗܵܬܹ̈ܗ. ܘܩܲܒܸ̇ܠ ܟܘܿܪܸܫ ܦܵܪܣܵܝܵܐ ܡܲܠܟ̇ܘܼܬܹܗ.
ܒ:ܘܕܼܵܢܝܼܐܹܝܠ ܐܝܼܬ̣ܵܘܗܝ ܗ̄ܘܼܵܐ ܐܝܼܩܵܪܹܗ ܥܲܡ ܕܡܲܠܟܵܐ. ܘܥܵܡܲܪ ܗ̄ܘܼܵܐ ܥܲܡ ܡܲܠܟܵܐ. ܘܡܫܲܒܲܚ ܗ̄ܘܼܵܐ ܡ̣ܢ ܟܠܗܘܿܢ ܪ̈ܵܚܡܵܘܗܝ ܕܡܲܠܟܵܐ.
ܓ:ܐܝܼܬ̣ ܗ̄ܘܼܵܐ ܕܹܝܢ ܦܬܲܟ̣ܪܵܐ ܠܒ̣ܵܒ̣̈ܠܵܝܹܐ. ܘܲܫܡܹܗ ܗ̄ܘܼܵܐ ܒܹܝܠ. ܘܡܲܦܩܝܼܢ ܗ̄ܘܼܵܘ ܥܠܵܘܗܝ ܢܦܲܩܬ̣ܵܐ ܟܠܝܘܿܢ ܣܡܝܼܕܼܵܐ ܬܪܸܥܣܲܪ ܐܲܪ̈ܕ̇ܒ̣ܝܼܢ. ܘܕܸܟ̣ܪܹ̈ܐ ܐܲܪܒ̇ܥܝܼܢ. ܘܚܲܡܪܵܐ ܫܸܬ̣ ܡܲܬ̣ܪ̈ܝܼܢ.
ܕ:ܘܗ̤ܘ ܡܲܠܟܵܐ ܕܵܚܹ̇ܠ ܗ̄ܘܼܵܐ ܠܹܗ. ܘܐܵܙܹ̇ܠ ܗ̄ܘܼܵܐ ܟܠ ܝܘܿܡ ܘܣܵܓܹ̇ܕܼ ܗ̄ܘܼܵܐ ܠܹܗ. ܘܕܼܵܢܝܼܐܹܝܠ ܣܵܓܹ̇ܕܼ ܗ̄ܘܼܵܐ ܠܐܲܠܵܗܵܐ. ܘܐܸܡܲܪ ܡܲܠܟܵܐ ܠܕܼܵܢܝܼܐܹܝܠ. ܡܸܛܠ ܡܵܢܵܐ ܠܵܐ ܣܵܓܹ̇ܕܼ ܐܲܢ̄ܬ̇ ܠܒܹܝܠ ܐܲܠܵܗܝ.
ܗ:ܘܐܸܡܲܪ ܠܹܗ ܕܵܢܝܼܐܹܝܠ. ܠܵܐ ܣܵܓܹ̇ܕܼ ܐ̄ܢܵܐ ܠܨܲܠܡܵܐ ܘܠܲܦܬܲܟ̣ܪܵܐ ܘܠܲܓ̣ܠܝܼܦܵܐ ܡܸܛܠ ܕܲܥܒ̣ܵܕܼ ܐܝܼ̈ܕܲܝܵܐ ܗ̄ܘܼ ܕܲܒ̣ܢܲܝ̈ܢܵܫܵܐ. ܐܸܠܵܐ ܐܸܢܵܐ ܕܵܚܹ̇ܠ ܐ̄ܢܵܐ ܠܐܲܠܵܗܵܐ ܚܲܝܵܐ. ܗܵܘܿ ܕܲܥܒܲܕܼ ܫܡܲܝܵܐ ܘܐܲܪܥܵܐ. ܘܐܝܼܬ̣ܵܘܗܝ ܡܵܪܝܵܐ ܥܲܠ ܟܠ ܒܣܲܪ. ܠܹܗ ܗ̤ܘ ܣܵܓ̇ܕܼ ܐ̄ܢܵܐ.
ܘ:ܘܐܸܡܲܪ ܡܲܠܟܵܐ ܠܕܵܢܝܼܐܹܝܠ ܠܵܐ ܡܸܬ̣ܚ̄ܙܹܐ ܠܵܟ ܕܒܹܝܠ ܚܲܝ ܗ̄ܘܼ. ܐܵܘ ܠܵܐ ܚܵܙܹ̇ܐ ܐܲܢ̄ܬ̇ ܕܗܵܐ ܐܵܟܹ̇ܠ ܘܫܵܬܹ̇ܐ ܟܠܝܘܿܡ.
ܙ:ܗܵܝܕܹ̇ܝܢ ܕܵܢܝܼܐܹܝܠ ܓܚܸܟ ܘܐܸܡܲܪ ܠܡܲܠܟܵܐ. ܠܵܐ ܬܸܛܥܹܐ ܡܲܠܟܵܐ. ܗܵܢܵܐ ܓܹܝܪ ܡ̣ܢ ܠܓ̣ܵܘ ܕܛܝܼܢܵܐ ܗ̄ܘܼ: ܘܡ̣ܢ ܠܒܲܪ ܕܲܢܚܵܫܵܐ. ܘܡܸܕܸ̇ܡ ܡ̣ܢ ܝܵܘܡܵܘ̈ܗܝ ܠܵܐ ܐܸܟܲܠ̣ ܘܠܵܐ ܐܸܫܬܝܼ.
ܚ:ܗܵܝܕܹ̇ܝܢ ܐܸܬ̣ܚܲܡܲܬ̣ ܡܲܠܟܵܐ. ܘܲܩ̣ܪܵܐ ܠܟ̣ܘܼܡܪ̈ܵܘܗܝ ܕܒܹܝܠ ܘܐܸܡܲܪ ܠܗܘܿܢ. ܐܸܢ ܠܵܐ ܬܹܐܡܪܘܼܢ ܠܝܼ ܕܡܲܢ̣ܘܼ ܐܵܟܸ̇ܠ ܢܦܲܩܬ̣ܵܐ ܗܵܕܹܐ ܟܠܵܗ̇. ܬܡܘܼܬ̣ܘܼܢ.
ܛ:ܐܸܢ ܕܹܝܢ ܬܚܵܘܘܿܢܵܢܝ ܕܒܹܝܠ ܗ̤ܘ ܐܵܟܹ̇ܠ: ܢܡܘܼܬ̣ ܕܵܢܝܼܐܹܝܠ: ܕܓܲܕܸ̇ܦ ܥܲܠ ܒܹܝܠ. ܘܐܸܡܲܪ ܕܵܢܝܼܐܹܝܠ ܠܡܲܠܟܵܐ. ܢܸܗܘܸܐ ܐܲܝܟ ܡܸܠܬ̣ܵܟ ܡܲܠܟܵܐ.
ܝ:ܗܵܘܹ̇ܝܢ ܗ̄ܘܼܵܘ ܕܹܝܢ ܟܘܼܡܪ̈ܵܘܗܝ ܕܒܹܝܠ ܫܲܒ̣ܥܝܼܢ: ܣܛܲܪ ܡ̣ܢ ܢܸܫܲܝ̈ܗܘܿܢ ܘܲܒ̣ܢܲܝ̈ܗܘܿܢ. ܘܐܸܬ̣ܵܐ ܡܲܠܟܵܐ ܗ̤ܘ ܘܕܼܵܢܝܼܐܹܝܠ ܠܒܲܝܬܹ̇ܗ ܕܒܹܝܠ.
ܝܐ:ܘܐܵܡܪܝܼܢ ܟܘܼܡܪܹ̈ܐ ܠܡܲܠܟܵܐ. ܗܵܐ ܚܢܲܢ ܢܵܦܩܝܼܢܲܢ ܠܒܲܪ. ܐܲܢ̄ܬ̇ ܕܹܝܢ ܡܲܠܟܵܐ ܣܝܼܡ ܡܹܐܟ̣̈ܠܵܬ̣ܵܐ ܠܒܹܝܠ. ܘܲܡܙܘܿܓ̣ ܚܲܡܪܵܐ ܘܣܝܼܡ. ܘܐܲܚܘܿܕܼ ܬܲܪܥܵܐ ܘܲܚܬ̣ܘܿܡ ܒܥܸܙܲܩܬ̣ܵܟ.
ܝܒ:ܘܩܲܕܸ̇ܡ ܘܬ̣ܵܐ ܒܨܲܦܪܵܐ. ܐܸܢ ܠܵܐ ܬܸܫܟܲܚ ܠܟ̣ܠܗܹܝܢ ܡܹܐܟ̣̈ܠܵܬ̣ܵܐ ܕܐܸܟܲܠ ܐܸܢܹܝܢ ܒܹܝܠ: ܢܡܘܼܬ̣ ܚܢܲܢ: ܘܐܸܢܗ̤ܘ ܕܐܸܟܲܠ ܐܸܢܹܝܢ ܒܹܝܠ: ܢܡܘܼܬ̣ ܕܵܢܝܼܐܹܝܠ ܗܵܘܿ ܕܓܲܕܸ̇ܦ ܥܠܲܝܢ.
ܝܓ:ܗܸܢ̣ܘܿܢ ܕܹܝܢ ܡܸܛܠ ܕܲܬ̣ܟ̣ܝܼܠܝܼܢ ܗ̄ܘܼܵܘ ܕܲܥܒ̣ܝܼܕܼ ܠܗܘܿܢ ܡܲܥܠܵܢܵܐ ܒܛܘܼܫܝܵܐ ܬܚܹܝܬ̣ ܦܵܬ̣ܘܿܪܵܐ: ܘܒܹܗ ܥܵܐ̇ܠܝܼܢ ܗ̄ܘܼܵܘ ܘܢܵܦܩܝܼܢ. ܘܐܵܟ̣ܠ̇ܝܼܢ ܗ̄ܘܼܵܘ ܟܠ ܡܸܕܸ̇ܡ ܕܡܸܬ̇ܬ̇ܣܝܼܡ ܗ̄ܘܼܵܐ ܠܹܗ ܠܒܹܝܠ. ܘܫܵܩ̇ܠܝܼܢ ܗ̄ܘܼܵܘ ܡܸܕܸ̇ܡ ܕܝܵܬܲܪ.
ܝܕ:ܟܲܕܼ ܕܹܝܢ ܢܦܲܩ̣ܘ ܟܘܼܡܪܹ̈ܐ ܕܒܹܝܠ: ܐܲܝܬ̇ܝܼ ܡܲܠܟܵܐ ܡܹܐܟ̣̈ܠܵܬ̣ܵܐ ܘܲܡ̣ܠܵܐ ܦܵܬ̣ܘܿܪܵܐ. ܘܣܵܡ̣ ܩܕܼܵܡ ܒܹܝܠ. ܘܲܡ̣ܠܵܐ ܡܵܐܢܹ̈ܐ ܚܲܡܪܵܐ ܐܲܝܟ ܥܝܵܕܼܗܘܿܢ. ܘܲܢܦܲܩ̣ ܘܐܸܡܲܪ ܕܵܢܝܼܐܹܝܠ ܠܲܛܠܵܘ̈ܗܝ. ܐܲܝܬܵܘ ܠܝܼ ܩܸܛܡܵܐ. ܘܐܲܝܬ̇ܝܼܘ ܠܹܗ ܩܸܛܡܵܐ. ܘܥܲܪܒܹ̇ܗ ܒܥܲܪܒܵܠܵܐ ܩܕܼܵܡܵܘܗܝ ܕܡܲܠܟܵܐ ܒܟ̣ܠܹܗ ܒܲܝܬܵܐ ܕܒܹܝܠ. ܘܲܚܙܵܐ ܡܲܠܟܵܐ ܘܲܢܦܲܩ̣. ܘܐܸܚܲܕܼ ܬܲܪܥܵܐ. ܘܚܲܬ̣ܡܹܗ ܡܲܠܟܵܐ ܒܥܸܙܲܩܬܹܗ ܘܲܒ̣ܥܸܙܩܲܬ̣ ܕܵܢܝܼܐܹܝܠ.
ܝܗ:ܘܟ̣ܘܼܡܪܹ̈ܐ ܐܸܙܲܠ̣ܘ ܒܠܸܠܝܵܐ ܐܲܝܟ ܕܲܡܥܵܕܼܝܼܢ ܗ̄ܘܼܵܘ ܗܸܢ̣ܘܿܢ ܘܢܸܫܲܝ̈ܗܘܿܢ ܘܲܒ̣ܢܲܝ̈ܗܘܿܢ. ܘܐܸܟܲܠ̣ܘ ܗ̄ܘܼܵܘ ܟܠܡܸܕܸ̇ܡ ܕܣܝܼܡ ܗ̄ܘܼܵܐ ܠܹܗ ܠܒܹܝܠ. ܘܐܸܫܬ̇ܝܼܘ ܚܲܡܪܵܐ.
ܝܘ:ܘܩܲܕܸ̇ܡ ܡܲܠܟܵܐ ܒܨܲܦܪܵܐ: ܘܕܼܵܢܝܼܐܹܝܠ ܥܲܡܹܗ. ܘܐܸܙܲܠ̣ܘ ܠܬܲܡܵܢ.
ܝܙ:ܘܐܸܡܲܪ ܡܲܠܟܵܐ ܠܕܼܵܢܝܼܐܹܝܠ: ܩܲܝܵܡܝܼܢ ܚܵܬ̣ܡܹ̈ܐ: ܕܵܢܝܼܐܹܝܠ. ܘܐܸܡ̣ܲܪ ܕܵܢܝܼܐܹܝܠ: ܩܲܝܵܡܝܼܢ ܡܵܪܝ ܡܲܠܟܵܐ.
ܝܚ:ܘܲܗܘ̤ܵܐ ܕܟܲܕܼ ܦ̣ܬܲܚ ܬܲܪܥܵܐ: ܐܲܕܼܝܼܩ ܡܲܠܟܵܐ ܥܲܠ ܦܵܬ̣ܘܿܪܵܐ. ܘܲܚܙ̣ܵܐ ܕܐܲܟ̣ܝܼܠ ܟܠܡܸܕܸ̇ܡ ܕܐܸܬ̇ܬ̇ܣܝܼܡ ܗ̄ܘܼܵܐ ܠܒܹܝܠ. ܘܝܲܗ̄ܒܼ ܩܵܠܵܐ ܪܵܡܵܐ ܥܲܠ ܬܲܪܥܵܐ ܡ̣ܢ ܠܒܲܪ. ܘܐܸܡܲܪ ܪܲܒ̇ ܐܲܢ̄ܬ̇ ܒܹܝܠ. ܘܠܲܝܬ̇ ܠܘܵܬ̣ܵܟ ܢܸܟ̣ܠܵܐ ܐܵܦܠܵܐ ܩܲܠܝܼܠ.
ܝܛ:ܗܵܝܕܹ̇ܝܢ ܕܵܢܝܼܐܹܝܠ ܓܚܸܟ ܘܐܲܚܕܹ̇ܗ ܠܡܲܠܟܵܐ ܕܠܵܐ ܢܸܥܘܿܠ ܠܓ̣ܵܘ ܥܲܕܼ ܫܵܥܬ̣ܵܐ. ܘܐܸܡܲܪ ܕܵܢܝܼܐܹܝܠ ܠܡܲܠܟܵܐ. ܚܘܼܪ ܡܵܪܝ ܡܲܠܟܵܐ: ܘܐܸܬ̣ܒܲܩܵܐ ܒܐܲܪܥܵܐ. ܥܸܩ̈ܒ̣ܵܬ̣ܵܐ ܗܵܠܹܝܢ ܕܡܲܢ ܐܝܼܬܲܝܗܹܝܢ.
ܟܟ:ܘܐܸܡܲܪ ܡܲܠܟܵܐ ܚܵܙܹ̇ܐ ܐ̄ܢܵܐ ܒܐܲܪܥܵܐ ܥܸܩ̈ܒ̣ܵܬ̣ܵܐ ܕܓܲܒ̣ܪܹ̈ܐ ܘܲܕܼܢܸܫܹ̈ܐ ܘܕܲܛ̈ܠܵܝܹܐ. ܗܵܝܕܹ̇ܝܢ ܐܸܬ̣ܚܲܡܲܬ̣ ܡܲܠܟܵܐ.
ܟܐ:ܘܐܸܚܲܕܼ ܐܸܢܘܿܢ ܠܟ̣ܘܼܡܪܹ̈ܐ ܘܲܠܢܸܫܲܝ̈ܗܘܿܢ ܘܠܲܒ̣ܢܲܝ̈ܗܘܿܢ. ܘܚܵܘܝܼܘܗܝ ܠܡܲܠܟܵܐ ܡܲܥܠܵܢܵܐ ܕܐܝܼܬ̣ ܗ̄ܘܼܵܐ ܠܗܘܿܢ ܒܛܘܼܫܝܵܐ: ܗܵܘܿ ܕܒܹܗ ܥܵܐ̇ܠܹܝܢ ܗ̄ܘܼܵܘ ܘܢܵܦ̇ܩܝܼܢ. ܘܐܵܟ̣ܠܝܼܢ ܗ̄ܘܼܵܘ ܟܠ ܡܸܕܸ̇ܡ ܕܡܸܬ̇ܬ̇ܣܝܼܡ ܗ̄ܘܼܵܐ ܠܒܹܝܠ ܥܲܠ ܦܵܬ̣ܘܿܪܵܐ.
ܟܒ:ܘܩܲܛܸܠ ܐܸܢܘܿܢ ܡܲܠܟܵܐ ܠܟ̣ܠܗܘܿܢ. ܘܲܠܒܹ̇ܝܠ ܝܲܗ̄ܒܹ̇ܗ ܡܵܘܗܲܒ̣ܬ̣ܵܐ ܠܕܼܵܢܝܼܐܹܝܠ. ܘܬܲܒ̣ܪܹܗ ܕܵܢܝܼܐܹܝܠ: ܘܲܣܚܲܦ̣ ܗܲܝܟ̇ܠܹܗ.
ܬܲܢܝܼܢܵܐ
ܟܓ:ܐܝܼܬ̣ ܗ̄ܘܼܵܐ ܕܹܝܢ ܬܘܼܒ̣ ܬܲܡܵܢ ܬܲܢܝܼܢܵܐ ܪܲܒܵܐ. ܘܣܵـ̇ـܓ̣ܕ̇ܝܼܢ ܗ̄ܘܼܵܘ ܠܹܗ ܒܵܒ̣̈ܠܵܝܹܐ.
ܟܕ:ܘܐܸܡ̣ܲܪ ܡܲܠܟܵܐ ܠܕܼܵܢܝܼܐܹܝܠ. ܗܵܫܵܐ ܥܲܠ ܗܵܢܵܐ ܠܵܐ ܡܸܫܟܲܚ ܐܲܢ̄ܬ̇ ܕܬܹܐܡܲܪ ܥܠܵܘܗܝ ܕܠܵܐ ܗ̄ܘܼܵܐ ܐܲܠܵܗܵܐ ܗ̄ܘܼ. ܣܓ̣ܘܿܕܼ ܠܹܗ ܡܸܛܠ ܕܐܲܠܵܗܵܐ ܗ̄ܘܼ ܚܲܝܵܐ.
ܟܗ:ܘܐܸܡ̣ܲܪ ܕܵܢܝܼܐܹܝܠ ܠܡܲܠܟܵܐ. ܐܸܢܵܐ ܠܡܵܪܝܵܐ ܗ̄ܘܼ ܐܲܠܵܗܵܐ ܣܵܓܹ̇ܕܼ ܐ̄ܢܵܐ. ܡܸܛܠ ܕܗܘ̤ܝܘܼ ܐܲܠܵܗܵܐ ܚܲܝܵܐ.
ܟܘ:ܐܲܢ̄ܬ̇ ܕܹܝܢ ܡܲܠܟܵܐ ܗܲܒ̣ܠܝܼ ܫܘܼܠܛܵܢܵܐ ܥܠܵܘܗܝ. ܘܐܸܢܵܐ ܩܵܛܹ̇ܠ ܐ̄ܢܵܐ ܠܹܗ ܠܬܲܢܝܼܢܵܐ ܗܵܢܵܐ ܕܠܵܐ ܣܲܝܦܵܐ ܘܲܕܼܠܵܐ ܚܘܼܛܪܵܐ. ܘܐܸܡܲܪ ܠܹܗ ܡܲܠܟܵܐ ܝܑܼܗܝܼܒ̣ ܠܵܟ.
ܟܙ:ܘܲܫ̣ܩܲܠ ܕܵܢܝܼܐܹܝܠ ܙܲܦ̮ܬܵܐ ܘܣܲܥܪܵܐ ܘܬܲܪܒܵܐ. ܘܒܲܫܸܠ̣ ܐܸܢܘܿܢ ܐܲܟ̣ܚ̄ܕܼܵܐ. ܘܲܥܒܲܕܼ ܡܸܢܗܘܿܢ ܐܹܣܦܹܝܪܹ̈ܐ. ܘܲܫ̣ܕܼܵܐ ܐܸܢܹܝܢ ܒܦܘܼܡܹܗ ܕܬܲܢܝܼܢܵܐ. ܘܲܒ̣ܠܲܓ̣ ܐܸܢܹܝܢ ܬܲܢܝܼܢܵܐ. ܘܐܸܬ̣ܒܲܙܲܥ ܘܡܝܼܬ̣. ܘܐܸܡ̣ܲܪ ܕܵܢܝܼܐܹܝܠ. ܗܵܐ ܚܙܵܘ ܕܸܚ̈ܠܵܬ̣̱ܟ̣ܘܿܢ ܒܵܒ̣̈ܠܵܝܹܐ.
ܟܚ:ܘܲܗܘ̤ܵܐ ܕܟܲܕܼ ܫ̣ܡܲܥܘ ܒܵܒ̣̈ܠܵܝܹܐ: ܐܸܬ̣ܒ̇ܐܸܫ ܠܗܘܿܢ ܛܵܒ̣. ܘܐܸܬ̣ܟܲܢܲܫܘ ܥܲܠ ܡܲܠܟܵܐ. ܘܐܸܬ̣̱ܗܦܸܟ̣ܘ ܥܠܵܘܗܝ ܘܐܵܡ̇ܪܝܼܢ ܚܲܕܼ ܠܚܲܕܼ: ܝܗ̄ܘܼܕܼܵܝܵܐ ܗܘ̤ܵܐ ܠܹܗ ܡܲܠܟܵܐ. ܠܒܹܝܠ ܬܲܒܲܪ: ܘܲܠܬܲܢܝܼܢܵܐ ܗܵܐ ܩ̣ܛܲܠ. ܘܲܠܟ̣ܘܼܡܪܹ̈ܐ ܩܲܛܸܠ̣ ܐܸܢܘܿܢ.
ܟܛ:ܘܐܸܬ̣ܵܘ ܠܘܵܬ̣ ܡܲܠܟܵܐ ܘܐܵܡ̇ܪܝܼܢ ܠܹܗ. ܐܵܘ ܐܲܫܠܸܡ ܠܲܢ ܠܕܼܵܢܝܼܐܹܝܠ: ܘܐܸܠܵܐ ܩܵـ̇ـܛܠܝܼܢܲܢ ܠܵܟ ܘܲܠܒܲܝܬܵܟ.
ܠ:ܘܲܚܙ̣ܵܐ ܡܲܠܟܵܐ ܕܩܵܡ̣ܘ ܠܗܘܿܢ ܥܠܵܘܗܝ ܟܠܗܘܿܢ ܐܲܟ̣ܚ̄ܕܼܵܐ: ܘܐܸܬ̣ܐ̱ܠܸܨ ܠܹܗ. ܘܐܵܠܨܵܐܝܼܬ̣ ܐܲܫ̱ܠܡܹܗ ܠܗܘܿܢ ܠܕܼܵܢܝܼܐܹܝܠ. ܘܗܸܢ̣ܘܿܢ ܕܹܝܢ ܕܲܒ̣ܪܘܼܗܝ ܠܕܼܵܢܝܼܐܹܝܠ.
ܠܐ:ܘܐܸܙܲܠܘ ܐܲܪܡܝܘܼܗܝ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ. ܘܲܗܘ̤ܵܐ ܬܲܡܵܢ ܫܬܵܐ ܝܵܘ̈ܡܝܼܢ ܕܢܸܟ̣ܦ̄ܢܘܼܢ ܐܲܪ̈ܝܵܘܵܬ̣ܵܐ ܘܢܹܐܟ̣ܠܘܼܢܹܗ.
ܠܒ:ܐܝܼܬ̣ ܗ̄ܘܼܵܐ ܕܹܝܢ ܒܹܗ ܒܓ̣ܘܼܒܵܐ ܗܵܘܿ ܐܲܪ̈ܝܵܘܵܬ̣ܵܐ ܫܲܒ̣ܥܵܐ. ܘܝܵܗ̄ܒ̇ܝܼܢ ܗ̄ܘܼܵܘ ܠܗܘܿܢ ܬܪܹܝܢ ܦܲܓ̣ܪ̈ܝܼܢ ܒܝܵܘܡܵܐ: ܘܲܬ̣ܪܹܝܢ ܕܸܟ̣ܪ̈ܝܼܢ. ܘܲܒ̣ܗܵܢ̇ܘܿܢ ܝܵܘ̈ܡܵܬ̣ܵܐ ܠܵܐ ܝܲܗ̄ܒ̣ܘ ܠܗܘܿܢ ܡܸܕܸ̇ܡ ܕܢܹܐܟ̣ܠܘܼܢ: ܕܢܸܟ̣ܦ̄ܢܘܼܢ ܘܢܹܐܟ̣ܠܘܼܢܹܗ ܠܕܼܵܢܝܼܐܹܝܠ.
ܠܓ:ܐܝܼܬ̣ ܗ̄ܘܼܵܐ ܕܹܝܢ ܚܲܒ̣ܩܘܿܩ ܢܒ̣ܝܼܵܐ ܒܲܝܗܘܼܕܼ: ܘܒܲܫܸܠ̣ ܗ̄ܘܼܵܐ ܒܘܼܫܵܠܵܐ. ܘܦܲܬ̇ ܦܸ̈ܬܹ̇ܐ ܒܥܲܪܒ̣ܵܐ ܘܐܲܪܡܝܼ ܒܵܗ̇. ܘܐܸܙܲܠ̣ ܕܢܵܘܒܸ̇ܠ ܠܚܲܩܠܵܐ ܠܚܵܨ̈ܘܿܕܹܐ.
ܠܕ:ܘܐܸܡ̣ܲܪ ܠܹܗ ܡܲܠܲܐܟܹܗ ܕܡܵܪܝܵܐ. ܙܸܠ ܐܵܘܒܸ̇ܠ ܡܹܐܟ̣ܘܼܠܬܵܐ ܗܵܕܹܐ ܕܲܥܠܲܝܟ ܠܕܼܵܢܝܼܐܹܝܠ: ܕܲܪܡܸܐ ܒܓ̣ܘܼܒܵܐ ܕܐܲܪ̈ܝܵܘܵܬ̣ܵܐ ܒܒ̣ܵܒܹܠ.
ܠܗ:ܘܐܸܡܲܪ ܚܲܒ̣ܩܘܿܩ ܡܵܪܝ ܠܵܐ ܚܲܙ̣ܝܵܐ ܠܝܼ ܒܵܒܹܠ. ܘܲܠܓ̣ܘܼܒܵܐ ܠܵܐ ܝܵܕܲܥ ܐ̄ܢܵܐ ܠܹܗ. ܘܐܲܪܡܝܼ ܡܲܠܲܐܟ̣ܵܐ ܐܝܼܕܹܗ ܥܲܠ ܪܹܫܹܗ ܕܚܲܒ̣ܩܘܿܩ.
ܠܘ:ܘܫܲܩܠܹܗ ܒܣܲܥܪܵܐ ܕܪܹܫܹܗ. ܘܣܵܡܹܗ ܒܒ̣ܵܒܹܠ ܠܥܸܠ ܡ̣ܢ ܓܘܼܒܵܐ ܒܥܘܼܙܵܐ ܕܪܘܼܚܵܐ ܕܩܘܼܕܼܫܵܐ.
ܠܙ:ܘܲܩ̣ܪܵܐ ܚܲܒ̣ܩܘܿܩ ܘܐܸܡ̣ܲܪ: ܕܵܢܝܼܐܹܝܠ ܕܵܢܝܼܐܹܝܠ ܩܘܼܡ ܫܩܘܿܠ ܫܵܪܘܼܬ̣ܵܐ ܗܵܕܹܐ ܕܫܲܕܲܪ ܠܵܟ ܐܲܠܵܗܵܐ.
ܠܚ:ܘܐܸܡ̣ܲܪ ܕܵܢܝܼܐܹܝܠ: ܐܸܬ̇ܕܲܟ̣ܪܲܢܝ ܐܲܠܵܗܵܐ. ܘܠܵܐ ܫ̣ܒܲܩ ܪ̈ܵܚܡܵܘܗܝ ܡܹܢܝ. ܝܵܕܲܥ ܐ̄ܢܵܐ ܓܹܝܪ ܕܠܵܐ ܫܵܒܹ̇ܩ ܐܲܢ̄ܬ̇ ܠܐܲܝܠܹܝܢ ܕܪܵܚ̇ܡܝܼܢ ܠܵܟ.
ܠܛ:ܘܩܵܡ̣ ܕܵܢܝܼܐܹܝܠ ܘܐܸܟܲܠ. ܘܫܲܩ̣ܠܹܗ ܡܲܠܲܐܟ̣ܵܐ ܠܚܲܒ̣ܩܘܿܩ ܒܵܗ̇ ܒܫܵܥܬ̣ܵܐ. ܘܐܲܩܝܼܡܹܗ ܒܐܲܬ̣ܪܵܐ ܕܫܲܩ̣ܠܹܗ ܗ̄ܘܼܵܐ ܡ̣ܢ ܩܕܼܝܼܡ.
ܡ:ܘܐܸܬ̣ܵܐ ܡܲܠܟܵܐ ܠܝܵܘܡܵܐ ܫܒ̣ܝܼܥܵܝܵܐ ܠܡܸܒ̣ܟܵܐ ܥܲܠ ܕܵܢܝܼܐܹܝܠ. ܡܸܛܠ ܕܟܸܪܝܲܬ̤ ܗ̄ܘ̣ܵܬ̣ ܠܹܗ ܥܲܠ ܕܵܢܝܼܐܹܝܠ. ܘܐܸܬ̣ܵܐ ܠܘܵܬ̣ ܓܘܼܒܵܐ: ܘܐܲܕܼܝܼܩ ܒܓ̣ܘܼܒܵܐ: ܘܲܚܙ̣ܵܝܗܝ ܠܕܼܵܢܝܼܐܹܝܠ ܟܲܕܼ ܝܵܬܹ̇ܒ̣.
ܡܐ:ܘܝܲܗ̄ܒ̣ ܩܵܠܵܐ ܪܵܡܵܐ. ܘܐܸܡ̣ܲܪ ܪܲܒ̇ ܗ̄ܘܼ ܐܲܠܵܗܹܗ ܕܕܼܵܢܝܼܐܹܝܠ.
ܡܒ:ܘܐܲܣܩ̣ܘܼܗܝ ܡ̣ܢ ܓܘܼܒܵܐ ܠܕܼܵܢܝܼܐܹܝܠ ܘܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܕܕܼܵܢܝܼܐܹܝܠ ܗܵܢ̇ܘܿܢ ܕܐܸܟܲܠ̣ܘ ܩܲܪ̈ܨܵܘܗܝ: ܘܒ̣ܵܥܹ̇ܝܢ ܗ̄ܘܼܵܘ ܠܡܸܩܛܠܹܗ ܐܲܪܡܝܼܘ ܐܸܢܘܿܢ ܒܓ̣ܘܼܒܵܐ. ܘܒ̣ܵܗ̇ ܒܫܵܥܬ̣ܵܐ ܐܸܟܲܠ̣ܘ ܐܸܢܘܿܢ ܐܲܪ̈ܝܵܘܵܬ̣ܵܐ ܩܕܼܵܡܵܘܗܝ ܕܡܲܠܟܵܐ ܘܲܩܕܼܵܡ ܕܵܢܝܼܐܹܝܠ.
|
|