ܟܬܒ݂ܐ ܕܝܘܐܝܠ ܢܒ݂ܝܐ
ܩܹܦܵܠܹܐܘܿܢ: ܐ.
1: ܦܸܬ̣ܓ̣ܵܡܹܗ ܕܡܵܪܝܵܐ ܕܲܗܘ̤ܵܐ ܥܲܠ ܝܘܼܐܹܝܠ ܒܲܪ ܒܬ̣ܘܼܐܹܝܠ.
2: ܫܡܲܥܘ ܗܵܕܹܐ ܩܲܫܝܼܫܹ̈ܐ: ܘܨܘܼܬ̣ܘ ܟܠ ܥܵܡܘܿܪܹ̈ܝܗ̇ ܕܐܲܪܥܵܐ: ܐܸܢ ܗܘ̤ܵܬ̣ ܐܲܝܟ݂ ܗܵܕܹܐ ܒܝܵܘ̈ܡܲܝܟ̇ܘܿܢ: ܐܵܘ ܒܝܵܘܡܲܝ ܐܲܒ̣ܵܗܲܝ̈ܟ̇ܘܿܢ.
3: ܐܸܫܬܲܥܵܘ ܥܠܹܝܗ̇ ܠܲܒ̣ܢܲܝ̈ܟ̇ܘܿܢ: ܘܲܒ̣ܢܲܝ̈ܟ̇ܘܿܢ ܠܲܒ̣ܢܲܝ̈ܗܘܿܢ: ܘܲܒ̣ܢܲܝ̈ܗܘܿܢ ܠܕ݂ܵܪܵܐ ܐ̄ܚܪܹܢܵܐ.
4: ܕܡܸܕܸ̇ܡ ܕܐܵܘܬܲܪ ܡܵܫܘܿܛܵܐ: ܐܸܟܲܠ̣ ܩܲܡܨܵܐ ܦܵܪܚܵܐ: ܘܡܸܕܸ̇ܡ ܕܐܵܘܬܲܪ ܩܲܡܨܵܐ ܦܵܪܚܵܐ: ܐܲܟܲܠ̣ ܩܲܡܨܵܐ ܙܵܚܠܵܐ: ܘܡܸܕܸ̇ܡ ܕܐܵܘܬܲܪ ܙܵܚܠܵܐ: ܐܸܟܲܠ ܨܲܪܨܘܼܪܵܐ.
5: ܐܸܬ̇ܬ̇ܥܝܼܪܘ ܪ̈ܘܲܝܵܐ ܘܲܒ̣ܟ݂ܵܘ: ܘܐܲܝܠܸܠܘ ܟܠ ܫܵܬ̣ܝܲܝ̈ ܚܲܡܪܵܐ: ܥܲܠ ܚܲܡܪܵܐ ܕܲܥ̣ܒܲܪ ܡ̣ܢ ܦܘܼܡܟ݂ܘܿܢ.
6: ܡܸܛܠ ܕܥܲܡܵܐ ܣ̣ܠܸܩ ܠܐܲܪܥܝ: ܥܲܫܝܼܢ ܘܠܲܝܬ̇ ܠܹܗ ܡܸܢܝܵܢ: ܫܸܢܵܘ̈ܗܝ ܐܲܝܟ݂ ܫܸܢܹ̈ܐ ܕܐܲܪܝܵܐ: ܘܢܝܼܒ̣ܵܘ̈ܗܝ ܐܲܝܟ݂ ܢܝܼܒܹ̈ܐ ܕܓ̣ܘܼܪܝܵܐ ܕܐܪܝܵܐ.
7: ܥ̣ܒܲܕ݂ ܓܦܸܬ̇ܝ ܠܚܘܼܪܒܵܐ: ܘܬܹܬ̇ܝ ܠܦܘܼܫܵܚܵܐ: ܦܲܫ̣ܚܵܗ̇ ܘܲܫܕ݂ܵܗ̇ ܘܚܵܘܲܪ ܣܵܘ̈ܟܹ̇ܝܗ̇.
8: ܐܲܠܵܝ ܐܲܝܟ݂ ܒܬ̣ܘܼܠܬܵܐ ܕܲܟ݂ܒ̣ܝܼܢܵܐ ܣܲܩܵܐ ܥܲܠ ܒܥܸܠ ܛܲܠܝܘܼܬ̣ܵܗ̇.
9: ܥ̣ܒܲܪ ܣܡܝܼܕ݂ܵܐ ܘܢܘܼܩܵܝܵܐ ܡ̣ܢ ܒܲܝܬܹ̇ܗ ܕܡܵܪܝܵܐ: ܝܑܼܬܸܒ̣ܘ ܡܲܠ̈ܟܹ̇ܐ ܒ̣ܐܸܒ̣ܠܵܐ: ܘܟ݂ܵܗܢܹ̈ܐ ܕܲܡܫܲܡܫܝܼܢ ܠܡܵܪܝܵܐ.
10: ܐܸܬ̣ܒܲܙܙܲܬ̤ ܚܲܩܠܵܐ: ܘܝܸܬ̣ܒܲܬ̤ ܒܐܸܒ̣ܠܵܐ ܐܲܪܥܵܐ: ܡܸܛܠ ܕܐܸܬ̣ܒ̇ܙܸܙ ܥܒ̣ܘܼܪܵܐ: ܘܝܼܒܸܫ̣ ܚܲܡܪܵܐ: ܘܲܚܪܸܒ̣ܘ ܙܲܝ̈ܬܹ̇ܐ.
11: ܒ̣ܗܸܬ̣ܘ ܐܲܟܵܪܹ̈ܐ: ܘܐܲܝܠܸܠ̣ܘ ܟܵܪ̈ܡܹܐ: ܥܲܠ ܚܸܛܹ̈ܐ ܘܥܲܠ ܣܥܵܪܹ̈ܐ: ܕܲܥ̣ܒܲܪ ܚܨܵܕ݂ܵܐ ܕܚܲܩܠܵܐ.
12: ܓܦܸܬܵܐ ܝܸܒ̣ܫܲܬ̤: ܘܬܹܐܬܵܐ ܚܸܪܒܲܬ̤: ܘܪ̈ܘܼܡܵܢܹܐ ܘܲܕ݂ܩ̈ܠܹܐ ܘܚܲܙܘܼܪܹ̈ܐ: ܘܟ݂ܠܗܘܿܢ ܐܝܼܠܵܢܹ̈ܐ ܕܚܲܩܠܵܐ ܝܑܼܒܸܫ̣ܘ: ܡܸܛܠ ܕܒܸܛܠܲܬ̤ ܚܲܕ݂ܘܼܬ̣ܵܐ ܡ̣ܢ ܒܢܲܝ̈ܢܵܫܵܐ.
13: ܟܵܗ̈ܢܹܐ ܐܸܬ̣ܟܲܒ̣̄ܢܘ ܣܲܩܹ̈ܐ: ܘܐܲܪܩܸܕ݂ܘ ܘܐܲܝܠܸܠܘ ܡܫܲܡܫܵܢܲܝ̈ ܡܲܕ݂ܒ̇ܚܵܐ: ܥܘܿܠܘ ܒܘܼܬ̣ܘ ܒܣܲܩܹ̈ܐ ܡܫܲܡܫܵܢܵܘ̈ܗܝ ܕܐܲܠܗܝ: ܡܸܛܠ ܕܐܸܬ̣ܟ̇ܠܝܼ ܡ̣ܢ ܒܲܝܬܹ̇ܗ ܕܐܲܠܵܗܟ݂ܘܿܢ ܣܡܝܼܕ݂ܵܐ ܘܢܘܼܩܵܝܵܐ.
14: ܩܲܕܸ̇ܫܘ ܨܵܘܡܵܐ: ܩܪܵܘ ܟܢܘܼܫܝܵܐ: ܐܸܬ̣ܟܲܢܲܫܘ ܩܲܫܝܼܫܹ̈ܐ: ܘܟ݂ܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܠܒܲܝܬܹ̇ܗ ܕܡܵܪܝܵܐ ܐܵܠܵܗܟ݂ܘܿܢ: ܓܥܵܘ ܠܘܵܬ̣ ܡܵܪܝܵܐ ܐܲܠܵܗܟ݂ܘܿܢ: ܘܐܸܡܲܪܘ.
15: ܐܘܿܗ: ܐܘܿܗ: ܠܝܵܘܡܵܐ ܕܩܲܪܝܼܒ̣ ܗ̄ܘܼ ܝܵܘܡܹܗ ܕܡܵܪܝܵܐ: ܘܒܸܙܬ̣ܵܐ ܡ̣ܢ ܐܲܠܵܗܵܐ ܬܹܐܬܹܐ.
16: ܘܗܵܐ ܠܘܼܩܒܲܠ ܥܲܝܢܲܝ̈ܢ ܥ̣ܒܲܪ ܡܹܐܟ݂̈ܠܵܬ̣ܵܐ ܡ̣ܢ ܒܲܝܬܹ̇ܗ ܕܐܲܠܵܗܲܢ: ܘܚܲܕ݂ܘܼܬ̣ܵܐ ܘܲܕ݂ܝܵܨܵܐ.
17: ܘܲܛܘܲܝ̈ ܡܘܼܫܚܹ̈ܐ ܥܲܠ ܐܘܿܪ̈ܵܘܵܬ̣ܗܹܝܢ: ܚ̣ܪܸܒ̣ܘ ܐܵܘܨܪܹ̈ܐ: ܘܐܸܣܬ̇ܚܸܦ ܡܲܥܨܪ̈ܵܬ̣ܵܐ: ܘܝܼܒܸܫ̣ ܥܒ̣ܘܼܪܵܐ.
18: ܠܡܵܢܵܐ ܡܸܬ̇ܬܲܢܚܵܐ ܒܥܝܼܪܵܐ ܘܒ̣ܵܟ݂̈ܝܵܢ ܒܲܩܪܹ̈ܐ ܕܬ̣ܵܘܪܹ̈ܐ: ܕܠܲܝܬ̇ ܠܗܹܝܢ ܪܸܥܝܵܐ: ܐܵܦ ܓܙܵܪܹ̈ܐ ܕܥܵـ̈ـܢܵܐ ܣܵܦ̣ܘ.
19: ܠܘܵܬ̣ܵܟ݂ ܡܵܪܝܵܐ ܐܸܩܪܸܐ: ܡܸܛܠ ܕܐܹܟ݂ܠܲܬ̤ ܢܘܼܪܵܐ ܠܕܲܝܪܹ̈ܐ ܕܡܲܕ݂ܒ̇ܪܵܐ: ܘܫܲܠܗܹܒ̣ܝܼܬ̣ܵܐ ܐܵܘܩܕܲܬ̤ ܠܟ݂ܠܗܘܿܢ ܐܝܼܠܵܢܹ̈ܐ ܕܕܲܒ̣ܪܵܐ.
20: ܐܵܦ ܚ̣ܝܘܼܬ̣ܵܐ ܕܕܲܒ̣ܪܵܐ ܓܵܥ̇ܝܵܐ ܠܘܵܬ̣ܵܟ݂: ܡܸܛܠ ܕܝܼܒܸܫ̣ܘ ܦܨܝܼ̈ܕܹܐ ܕܡܲـ̈ـܝܵܐ: ܘܐܸܟ݂ܠܲܬ̤ ܢܘܼܪܵܐ ܠܕܲܝܪܹ̈ܐ ܕܡܲܕ݂ܒ̇ܪܵܐ.
ܩܹܦܵܠܹܐܘܿܢ: ܒ.
1: ܩܪܵܘ ܫܝܼܦܘܿܪܵܐ ܒܨܸܗܝܘܿܢ: ܘܲܩܥܵܘ ܒܛܘܼܪܵܐ ܕܩܘܼܕ݂ܫܝ: ܢܙܘܼܥܘܼܢ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ: ܡܸܛܠ ܕܲܡ̣ܛܵܐ ܝܵܘܡܹܗ ܕܡܵܪܝܵܐ.
2: ܘܲܩ̣ܪܸܒ̣ ܝܵܘܡܵܐ ܕܚܸܫܘܿܟ݂ܵܐ ܘܲܕ݂ܥܲܡܛܵܢܵܐ: ܝܵܘܡܵܐ ܕܲܥܢܵܢܵܐ ܘܲܕ݂ܥܲܪܦܸܠܵܐ: ܐܲܝܟ݂ ܫܲܦܪܵܐ ܕܲܦܪܝܼܣ ܥܲܠ ܛܘܼܪܹ̈ܐ: ܥܲܡܵܐ ܣܲܓ̇ܝܼܵܐܐ ܘܥܲܫܝܼܢܵܐ ܕܐܲܟ݂ܘܵܬܹܗ ܠܵܐ ܗ̄ܘܼܵܐ ܡ̣ܢ ܥܵܠܲܡ: ܘܒ̣ܵܬܪܹܗ ܠܵܐ ܢܸܗܘܹܐ ܥܕܲܡܵܐ ܠܲܫܢܲܝ̈ ܕܵܪܕܵܪܹ̈ܝܢ.
3: ܩܕ݂ܵܡܵܘܗܝ ܐܵܟ݂ܠܵܐ ܢܘܼܪܵܐ: ܘܒ̣ܵܬ̣ܪܹܗ ܡܵܘܩ̄ܕ݂ܵܐ ܫܲܠܗܹܒ̣ܝܼܬ̣ܵܐ: ܐܲܝܟ݂ ܦܲܪܕܲܝܣܵܐ ܕܲܥܕܸܢ ܐܲܪܥܵܐ ܩܕ݂ܵܡܵܘܗܝ: ܘܒܸܣܬ̇ܪܹܗ ܡܲܕ݂ܒ̇ܪܵܐ ܚܲܪܒܵܐ: ܘܠܲܝܬ̇ ܕܡܸܫܬܵܘܙܲܒ̣ ܡܸܢܹܗ.
4: ܐܲܝܟ݂ ܚܸܙܘܵܐ ܕܪ̈ܲܟ݂ܫܵܐ ܚܸܙܘܹܗ: ܘܐܲܝܟ݂ ܦܲܪ̈ܵܫܹܐ ܗܵܟܲܢܵܐ ܪܵܗ̇ܛܝܼܢ.
5: ܐܲܝܟ݂ ܩܵܠܵܐ ܕܡܲܪ̈ܟ̇ܒ̣ܵܬ̣ܵܐ ܕܲܡܢܲܗ̈ܙܵܢ ܥܲܠ ܪܹ̈ܫܲܝ ܛܘܼܪܹ̈ܐ: ܘܐܲܝܟ݂ ܩܵܠܵܐ ܕܫܲܠܗܹܒ̣ܝܼܬ̣ܵܐ ܕܢܘܼܪܵܐ ܕܐܵܟ݂ܠܵܐ ܚܲܒ̇ܬ̣ܵܐ: ܘܐܲܝܟ݂ ܥܲܡܵܐ ܥܲܫܝܼܢܵܐ ܕܲܣܕ݂ܝܼܪ ܠܲܩܪܵܒ̣ܵܐ.
6: ܡ̣ܢ ܩܕ݂ܵܡܵܘܗܝ ܢܙܘܼܥܘܼܢ ܥܲܡܡܹ̈ܐ: ܘܟ݂ܠ ܐܲܦܝܼ̈ܢ ܢܹܐܟ݂̈ܡܵܢ ܐܲܝܟ݂ ܫܘܼܚܵܪܹ̈ܐ ܕܩܸܕ݂ܪܵܐ.
7: ܐܲܝܟ݂ ܓܲܢ̄ܒܵܪܹ̈ܐ ܢܸܪ̱ܗܛܘܼܢ: ܘܐܲܝܟ݂ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ ܢܸܣܩܘܼܢ ܒܫܘܼܪܹ̈ܐ: ܘܲܓ̣ܒܲܪ ܒܐܘܼܪܚܹܗ ܢܹܐܙ̄ܠܘܼܢ: ܘܠܵܐ ܢܸܣܛܘܿܢ ܡ̣ܢ ܐܘܼܪ̈ܚܵܬ̣ܗܘܿܢ.
8: ܘܲܓ̣ܒܲܪ ܠܐܲܚܘܼܗܝ ܠܵܐ ܢܸܕ݂ܚ̄ܩܘܼܢ: ܐܸܠܵܐ ܓܒܲܪ ܒܲܫܒ̣ܝܼܠܹܗ ܢܹܐܙ̄ܠܘܼܢ: ܡ̣ܢ ܝܘܼܩܪܵܐ ܕܙܲܝܢܗܘܿܢ ܢܸܦܠܘܼܢ: ܘܠܵܐ ܢܸܣܩܘܼܢ ܠܪܹܫ.
9: ܒܲܡܕ݂ܝܼ̈ܢܵܬ̣ܵܐ ܢܸܣܩܘܼܢ: ܘܥܲܠ ܫܘܼܪܹ̈ܐ ܢܸܪ̱ܗܛܘܼܢ: ܘܥܲܠ ܒܵـ̈ـܬܹ̇ܐ ܢܸܣܩܘܼܢ: ܘܡ̣ܢ ܟܵܘܹ̈ܐ ܢܸܥܠܘܼܢ ܐܲܝܟ݂ ܓܲܢܵܒܹ̈ܐ.
10: ܩܕ݂ܵܡܵܘܗܝ ܐܸܬ̇ܕܲܠܚܲܬ̤ ܐܲܪܥܵܐ: ܘܙܵܥ̣ܘ ܫܡܲܝܵܐ: ܫܸܡܫܵܐ ܘܣܲܗܕܵܐ ܚ̣ܫܸܟ݂ܘ: ܘܲܥ̣ܪܲܒ̣ ܢܘܼܗܪܵܐ ܕܟ݂ܵܘܟ̇ܒܹ̈ܐ.
11: ܘܡܵܪܝܵܐ ܝܲܗ̄ܒ̣ ܩܵܠܹܗ ܩܕ݂ܵܡ ܚܲܝܠܹܗ: ܡܸܛܠ ܕܣܲܓ̇ܝܼܵܐܐ ܗ̄ܝܼ ܛܵܒ̣ ܡܲܫܪܝܼܬܹܗ: ܘܥܲܫܝܼܢ ܥܒ̣ܵܕ݂ܵܐ ܕܦܸܬ̣ܓ̣ܵܡܹܗ: ܡܸܛܠ ܕܪܲܒ̇ ܗ̄ܘܼ ܝܵܘܡܹܗ ܕܡܵܪܝܵܐ ܘܲܕ݂ܚܝܼܠ ܛܵܒ̣: ܘܡܲܢ̣ܘܼ ܡܸܫܟܲܚ ܡܣܲܝܒܲܪ ܠܹܗ.
12: ܡܸܟܹ̇ܝܠ ܐܵܡܲܪ ܡܵܪܝܵܐ: ܐܸܬ̣ܦܢܵܘ ܠܘܵܬ̣ܝ ܡ̣ܢ ܟܠܹܗ ܠܸܒ̇ܟ݂ܘܿܢ: ܒܨܵܘܡܵܐ: ܘܒܲܒ̣ܟ݂ܵܬ̣ܵܐ: ܘܲܒ̣ܡܲܪ̈ܩܕ݂ܵܬ̣ܵܐ.
13: ܘܲܨܪܵܘ ܠܸܒܲܝ̈ܟ̇ܘܿܢ ܘܠܵܐ ܢܲܝ̈ܬܲܝܟ̇ܘܿܢ: ܘܐܸܬ̣ܦܢܵܘ ܠܘܵܬ̣ ܡܵܪܝܵܐ ܐܲܠܵܗܟ݂ܘܿܢ: ܡܸܛܠ ܕܲܡܪܲܚܡܵܢܵܐܗ̄ܘܼ ܘܲܡܪܲܚܦܵܢܵܐ: ܘܢܲܓ̇ܝܼܪܵܐ ܪܘܼܚܹܗ ܘܣܲܓ̇ܝܼܵܐܐ ܛܲܝܒ̇ܘܼܬܹܗ: ܘܡܲܗܦܸܟ݂ ܒܝܼܫܬܵܐ.
14: ܡܲܢ ܝܵܕܲܥ̇ ܐܸܢ ܡܸܬ̣ܦܢܸܐ ܘܲܡܪܲܚܸܡ ܥܠܲܝܢ: ܘܡܵܘܬܲܪ ܒܐܲܬ̣ܪܹܗ ܒܘܼܪܟ̇ܬ̣ܵܐ: ܘܲܣܡܝܼܕ݂ܵܐ ܘܢܘܼܩܵܝܵܐ ܠܡܵܪܝܵܐ ܐܲܠܵܗܟ݂ܘܿܢ.
15: ܩܪܵܘ ܫܝܼܦܘܿܪܵܐ ܒܨܸܗܝܘܿܢ: ܩܲܕܸ̇ܫܘ ܨܵܘܡܵܐ: ܩܪܵܘ ܟܢܘܼܫܝܵܐ.
16: ܟܢܘܿܫܝ ܥܲܡܵܐ: ܩܲܕܸ̇ܫܘ ܥܹܕ̇ܬܵܐ: ܟܢܘܿܫܘ ܣܵܒܹ̈ܐ: ܘܲܟ݂ܢܘܿܫܘ ܥܠܲܝ̈ܡܹܐ ܘܝܵܢܩܲܝ̈ ܬܕܲܝܵܐ: ܢܸܦܘܿܩ ܚܲܬ̣ܢܵܐ ܡ̣ܢ ܩܲܝܛܘܿܢܹܗ: ܘܟܲܠܬ̣ܵܐ ܡ̣ܢ ܒܹܝܬ̣ ܓܢܘܿܢܵܗ̇.
17: ܒܲܝܢܲܝ ܩܸܣܛܪܘܿܡܵܐ ܠܡܲܕ݂ܒ̇ܚܵܐ ܢܸܒ̣ܟ̇ܘܿܢ ܟܵܗ̈ܢܹܐ ܡܫܲܡܫܵܢܵܘ̈ܗܝ ܕܡܵܪܝܵܐ: ܘܢܹܐܡܪܘܼܢ: ܚܘܼܣܝ ܡܵܪܝܵܐ ܥܲܠ ܥܲܡܵܟ݂: ܘܠܵܐ ܬܸܬܸ̇ܠ ܝܵܪܬ̇ܘܼܬ̣ܵܟ݂ ܠܚܸܣܕܵܐ ܘܲܠܫܘܼܠܛܵܢܵܐ ܕܥܲܡܡܹ̈ܐ: ܕܠܵܐ ܢܹܐܡܪܘܼܢ ܥܲܡܡܹ̈ܐ ܐܲܝܟܵܘ ܐܲܠܵܗܗܘܿܢ.
18: ܘܛܲܢ ܡܵܪܝܵܐ ܒܐܲܪܥܹܗ: ܘܚܵܣ̣ ܥܲܠ ܥܲܡܹܗ.
19: ܘܲܥ̣ܢܵܐ ܡܵܪܝܵܐ ܘܐܸܡܲܪ ܠܥܲܡܹܗ: ܗܵܐ ܡܫܲܕܲܪ ܐ̄ܢܵܐ ܠܟ݂ܘܿܢ ܥܒ̣ܘܼܪܵܐ: ܘܚܲܡܪܵܐ: ܘܡܸܫܚܵܐ ܕܬܸܣܒ̇ܥܘܿܢ ܬܘܼܒ̣ ܠܚܸܣܕܵܐ ܕܥܲܡܡܹ̈ܐ.
20: ܘܲܠܓܲܪܒ̇ܝܵܐ ܐܸܕ݂ܚܘܿܩ ܡܸܢܟ݂ܘܿܢ: ܘܐܲܕ݂ܚ̄ܩܝܼܘܗܝ ܠܐܲܪܥܵܐ ܨܗܝܼܬ̣ܵܐ ܘܚܲܪܒ̇ܬ̣ܵܐ: ܐܲܦܵܘ̈ܗܝ ܠܝܲܡܵܐ ܩܲܕ݂ܡܵܝܵܐ: ܘܚܲܪܬܹܗ ܠܝܲܡܵܐ ܐ̄ܚܪܵܝܵܐ: ܘܢܸܡܚܸܐ ܪܹܝܚܹܗ ܘܬܸܣܲܩ ܣܘܵܬܹܗ: ܥܲܠ ܕܐܸܬ̇ܬ̇ܪܝܼܡ ܠܡܸܥܒܲܕ݂.
21: ܠܵܐ ܬܸܕ݂ܚ̄ܠܝܼܢ ܐܲܪܥܵܐ: ܕܘܼܨܝ ܘܲܚܕ݂ܵܝ: ܡܸܛܠ ܕܐܸܬ̇ܬ̇ܪܝܼܡ ܡܵܪܝܵܐ ܠܡܸܥܒܲܕ݂.
22: ܠܵܐ ܬܸܕ݂ܚ̄ܠܝܼܢ ܚܲܝ̄ܘܼܬ̣ܵܐ ܕܕܲܒ̣ܪܵܐ: ܡܸܛܠ ܕܝܼܥ̣ܵܐ ܬܸܕ݂ܐܵܐ ܒܕܲܝܪܹ̈ܐ ܕܡܲܕ݂ܒ̇ܪܵܐ: ܘܐܝܼܠܵܢܵܐ ܝܲܗ̄ܒ̣ ܦܹܐܪ̈ܵܘܗܝ: ܘܲܓ̣ܦܸܬܵܐ ܘܬܹܬܵܐ ܝܲܗ̄ܒ̣ ܚܲܝܠܗܹܝܢ.
23: ܒܢܲܝ̈ ܨܸܗܝܘܿܢ ܕܘܼܨܘ ܘܲܚܕ݂ܵܘ ܒܡܵܪܝܵܐ: ܐܲܠܵܗܟ݂ܘܿܢ: ܕܝܵܗܹ̇ܒ̣ ܠܟ݂ܘܿܢ ܡܹܐܟ݂ܘܼܠܬܵܐ ܕܙܲܕ̇ܝܼܩܘܼܬ̣ܵܐ: ܘܡܲܚܸܬ̣ ܠܟ݂ܘܿܢ ܡܸܛܪܵܐ ܪܒ̣ܝܼܥܵܝܵܐ ܘܲܠܩܝܼܫܵܝܵܐ ܐܲܝܟ݂ ܕܡ̣ܢ ܠܘܼܩܕܲܡ.
24: ܘܢܸܬ̣ܡ̱ܠܘܿܢ ܐܸܕ̇ܪܹ̈ܐ ܥܒ̣ܘܼܪܵܐ: ܘܢܲܫ̈ܦܥܵܢ ܡܲܥܨܪ̈ܵܬ̣ܵܐ ܚܲܡܪܵܐ ܘܡܸܫܚܵܐ.
25: ܘܐܸܦܪܘܿܥܟ݂ܘܿܢ ܫܢܲـ̈ـܝܵܐ ܕܐܸܟܲܠ ܩܲܡܨܵܐ ܦܵܪܚܵܐ: ܘܙܵܚܠܵܐ ܘܨܲܪܨܘܼܪܵܐ ܘܡܵܫܘܿܛܵܐ: ܚܲܝܠܝ ܪܲܒܵܐ ܕܫܲܕ̇ܪܹܬ̣ ܥܠܲܝܟ̇ܘܿܢ.
26: ܘܬܹܐܟ݂ܠܘܼܢ ܘܬܸܣܒ̇ܥܘܼܢ: ܘܲܬ̣ܫܲܒ̇ܚܘܼܢ ܠܲܫܡܹܗ ܕܡܵܪܝܵܐ ܐܲܠܵܗܟ݂ܘܿܢ: ܕܥܵܒܹ̇ܕ݂ ܥܲܡܟ݂ܘܿܢ ܬܸܕ݂ܡܪ̈ܵܬ̣ܵܐ: ܘܠܵܐ ܢܸܒ̣ܗܲܬ̣ ܥܲܡܝ ܠܥܵܠܲܡ.
27: ܘܬܸܕ̇ܥܘܼܢ ܕܲܒ̣ܓ̣ܵܘ ܝܑܼܣܪܵܝܹܠ ܐ̄ܢܵܐ: ܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ: ܘܠܲܝܬ̇ ܬܘܼܒ̣ ܠܒܲܪ ܡܹܢܝ: ܘܠܵܐ ܢܸܒ̣ܗܲܬ̣ ܥܲܡܝ ܠܥܵܠܲܡ.
28: ܘܡ̣ܢ ܒܵܬ̣ܪܟܸ̇ܢ ܐܹܫܘܼܕ݂ ܪܘܼܚܝ ܥܲܠ ܟܠ ܒܣܲܪ: ܘܢܸܬ̣ܢܲܒ̇ܘܿܢ ܒܢܲܝ̈ܟ̇ܘܿܢ ܘܲܒ̣̈ܢܵܬ̣ܟ݂ܘܿܢ: ܘܣܵܒܲܝ̈ܟ̇ܘܿܢ ܚܸܠܡܹ̈ܐ ܢܸܚ̱ܠܡܘܼܢ: ܘܲܥܠܲܝ̈ܡܲܝ̈ܟ̇ܘܿܢ ܚܸܙܘܵܢܹ̈ܐ ܢܸܚܙܘܿܢ.
29: ܘܐܵܦ ܥܲܠ ܥܲܒ̣̈ܕܹ̇ܐ ܘܥܲܠ ܐܲܡ̈ܗܵܬ̣ܵܐ: ܐܹܫܘܼܕ݂ ܪܘܼܚܝ ܒܝܵܘ̈ܡܵܬ̣ܵܐ ܗܵܢ̇ܘܿܢ.
30: ܘܐܸܥܒܸ̇ܕ݂ ܬܸܕ݂ܡܪ̈ܵܬ̣ܵܐ ܒܲܫܡܲܝܵܐ ܘܒܲܐܪܥܵܐ: ܕܡܵܐ: ܘܢܘܼܪܵܐ: ܘܥܸܛܪܵܐ ܕܬܸܢܵܢܵܐ.
31: ܫܸܡܫܵܐ ܢܸܬ̣ܗ̱ܦܸܟ݂ ܠܚܸܫܘܿܟ݂ܵܐ: ܘܣܲܗܪܵܐ ܠܲܕ݂ܡܵܐ: ܩܕ݂ܵܡ ܕܢܹܐܬܹܐ ܝܵܘܡܹܗ ܕܡܵܪܝܵܐ ܪܲܒܵܐ ܘܲܕ݂ܚܝܼܠܵܐ.
32: ܘܟ݂ܠ ܕܢܸܩܪܸܐ ܫܡܹܗ ܕܡܵܪܝܵܐ ܢܸܬ̣ܦܲܨܹܐ: ܡܸܛܠ ܕܲܒ̣ܛܘܼܪܵܐ ܕܨܸܗܝܘܿܢ ܘܒ̣ܐܘܿܪܸܫܠܸܡ ܬܸܗܘܹܐ ܡܫܵܘܙܒ̣ܘܼܬ̣ܵܐ: ܐܲܝܟ݂ ܕܐܸܡܲܪ ܡܵܪܝܵܐ ܠܲܡܫܵܘܙܒܹ̈ܐ ܕܲܩ̣ܪܵܐ ܡܵܪܝܵܐ.
ܩܹܦܵܠܹܐܘܿܢ: ܓ.
1: ܡܸܛܠ ܕܲܒ̣ܝܵܘ̈ܡܵܬ̣ܵܐ ܗܵܢ̇ܘܿܢ ܘܲܒ̣ܙܲܒ̣ܢܵܐ ܗܵܘܿ: ܕܡܲܗܦܸܟ݂ ܐ̄ܢܵܐ ܫܒ̣ܝܼܬ̣ܵܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ.
2: ܐܹܟܲܢܸܫ ܠܟ݂ܠܗܘܿܢ ܥܲܡܡܹ̈ܐ: ܘܐܲܚܸܬ̣ ܐܸܢܘܿܢ ܠܢܲܚܠܵܐ ܕܝܘܿܫܵܦ̇ܛ: ܘܐܸܕ̇ܘܼܢ ܥܲܡܗܘܿܢ ܬܲܡܵܢ: ܥܲܠ ܐܲܦܲܝ̈ ܝܑܼܣܪܵܝܹܠ ܝܵܪܬ̇ܘܼܬ̣ܝ: ܕܐܸܬ̣ܒܲܕܲܪܘ ܒܹܝܬ̣ ܥܲܡܡܹ̈ܐ: ܥܲܠ ܕܦܲܠܸܓ̣ܘ ܐܲܪܥܝ.
3: ܘܥܲܠ ܥܲܡܝ ܐܲܪܡܝܼܘ ܦܸܨܹ̈ܐ: ܘܝܲܗ̄ܒ̣ܘ ܛܠܵܝܹ̈ܐ ܒܐܲܓܲܪ ܙܵܢ̈ܝܵܬ̣ܵܐ: ܘܲܛ̈ܠܵܝܵܬ̣ܵܐ ܙܲܒܸ̇ܢ̣ܘ ܒܚܲܡܪܵܐ ܘܐܸܫ̣ܬ̇ܝܼܘ.
4: ܡܵܢܵܐ ܚܫ̈ܝܼܒ̣ܵܢ ܐ̄ܢܬܹ̇ܝܢ ܠܝܼ ܨܘܿܪ ܘܨܲܝܕܵܢ: ܘܟ݂ܠܹܗ ܓܠܝܼܠܵܐ ܕܲܦܠܸܫܬ̇: ܕܲܠܡܵܐ ܦܘܼܪܥܵܢܵܐ ܦܵܪܥ̇ܝܼܢ ܐ̄ܢܬ̇ܘܿܢ ܠܝܼ: ܘܐܸܢ ܚܘܼܒ̣̈ܠܹܐ ܪܵܡܹ̇ܝܢ ܐ̄ܢܬ̇ܘܿܢ ܥܠܲܝ: ܒܲܥܓܲܠ ܘܲܡܣܲܪܗܒ̣ܵܐܝܼܬ̣ ܐܲܗܦܸܟ݂ ܦܘܼܪܥܵܢܟ݂ܘܿܢ ܒܪܹܫܟ݂ܘܿܢ.
5: ܥܲܠ ܕܲܢ̣ܣܲܒ̣ܬ̇ܘܿܢ ܟܸܣܦܝ ܘܕܲܗܒ̣ܝ: ܘܡܵܐܢܲܝ̈ ܫܲܦܝܼܪܹ̈ܐ ܐܲܥܸܠ̣ܬ̇ܘܿܢ ܠܗܲܝ̈ܟ̇ܠܲܝܟ̇ܘܿܢ.
6: ܘܲܒ̣ܢܲܝ̈ ܝܑܼܗܘܼܕ݂ܵܐ ܘܲܒ̣ܢܲܝ̈ ܐܘܿܪܸܫܠܸܡ ܙܲܒܸ̇ܢ̣ܬ̇ܘܿܢ ܠܲܒ̣ܢܲܝ̈ ܝܵܘ̈ܢܵܝܹܐ: ܕܬܲܪܚ̄ܩܘܼܢ ܐܸܢܘܿܢ ܡ̣ܢ ܬܚܘܼܡܗܘܿܢ.
7: ܗܵܐ ܐܸܢܵܐ ܡܥܝܼܪ ܐ̄ܢܵܐ ܠܗܘܿܢ ܡ̣ܢ ܐܲܬ̣ܪܵܐ ܕܙܲܒܸ̇ܢ̣ܬ̇ܘܿܢ ܐܸܢܘܿܢ ܠܬܲܡܵܢ: ܘܐܲܗܦܸܟ݂ ܦܘܼܪܥܵܢܟ݂ܘܿܢ ܒܪܹܫܟ݂ܘܿܢ.
8: ܘܐܲܫܠܸܡ ܒܢܲܝ̈ܟ̇ܘܿܢ ܘܲܒ̣̈ܢܵܬ̣ܟ݂ܘܿܢ ܒܝܲܕ݂ ܒܢܲܝ̈ ܝܑܼܗܘܼܕ݂ܵܐ: ܘܲܢܙܲܒ̇ܢܘܼܢ ܐܸܢܘܿܢ ܠܲܫܒܵܐ ܠܥܲܡܵܐ ܪܲܚܝܼܩܵܐ: ܡܸܛܠ ܕܡܵܪܝܵܐ ܡܲܠܸܠ̣.
9: ܐܲܟ݂ܪܸܙܘ ܗܵܕܹܐ ܒܹܝܬ̣ ܥܲܡܡܹ̈ܐ: ܩܲܕܸ̇ܫܘ ܩܪܵܒ̣ܵܐ: ܐܲܥܝܼܪܘ ܠܓܲܢ̄ܒܵܪܹ̈ܐ: ܢܸܩ̱ܪܒ̣ܘܼܢ ܘܢܸܣܩܘܼܢ ܟܠܗܘܿܢ ܓܲܒ̣ܪܹ̈ܐ ܩܪ̈ܲܒ̣ܬ̣ܵܢܹܐ.
10: ܪܘܿܥܘ ܣܸܟܲܝ̈ ܦܲܕܵܢܲܝ̈ܟ̇ܘܿܢ ܠܣܲܝܦܹ̈ܐ: ܘܡܲܓ̇ܠܲܝ̈ܟ̇ܘܿܢ ܠܪ̈ܘܼܡܚܸܐ: ܘܡܲܢ ܕܚܲܠܵܫ ܢܹܐܡܲܪ ܕܓܲܢ̄ܒܵܪܵܐ ܐ̄ܢܵܐ.
11: ܐܸܬ̣ܟܲܢܲܫܘ ܘܬ̣ܵܘ ܟܠܟ݂ܘܿܢ ܥܲܡܡܹ̈ܐ ܕܲܚܕ݂ܝܼܪܝܼܢ: ܐܸܬ̣ܩܲܪܲܒ̣ܘ ܘܬܲܡܵܢ ܬܵܒܲܪ ܡܵܪܝܵܐ ܓܲܢ̄ܒܵܪܘܼܬ̣ܟ݂ܘܿܢ.
12: ܢܸܬ̇ܬ̇ܥܝܼܪܘܼܢ ܘܢܸܣܩܘܼܢ ܥܲܡܡܹ̈ܐ ܠܥܘܼܡܩܵܐ ܕܝܘܿܫܵܦܵܛ: ܡܸܛܠ ܕܬܲܡܵܢ ܐܸܬܸ̇ܒ̣ ܠܲܡܕ݂ܵܢ ܠܟ݂ܠܗܘܿܢ ܥܲܡܡܹ̈ܐ ܕܲܚܕ݂ܝܼܪܝܼܢ.
13: ܫܲܕܲܪܘ ܡܲܓ̇ܠܹ̈ܐ ܡܸܛܠ ܕܲܒ̣ܫܸܠ̣ ܩܛܵܦܵܐ: ܥܘܿܦܘ ܕܘܼܫܘ: ܡܸܛܠ ܕܲܡ̣ܥܵܘ ܓܘܼ̈ܒܹ̇ܐ ܘܲܫܦܲܥ̣ ܡܲܥܨܪ̈ܵܬ̣ܵܐ: ܡܸܛܠ ܕܣܸܓ̣ܝܲܬ̤ ܒܝܼܫܘܼܬ̣ܗܘܿܢ.
14: ܪܸܓ̣ܫܵܐ ܕܲܪܓ̣ܘܼܫܝܵܐ ܒܥܘܼܡܩܵܐ ܕܦܵܣܝܼ̈ܩܵܬ̣ܵܐ: ܡܸܛܠ ܕܩܲܪܝܼܒ̣ ܗ̄ܘܼ ܝܵܘܡܹܗ ܕܡܵܪܝܵܐ ܒܥܘܼܡܩܵܐ ܕܦܵܣܝܼ̈ܩܵܬ̣ܵܐ.
15: ܫܸܡܫܵܐ ܘܣܲܗܪܵܐ ܚ̣ܫܸܟ݂ܘ: ܘܲܥ̣ܪܲܒ̣ ܢܘܼܗܪܵܐ ܕܟ݂ܵܘܟ̇ܒܹ̈ܐ.
16: ܘܡܵܪܝܵܐ ܡ̣ܢ ܨܸܗܝܘܿܢ ܢܸܢܗܲܡ: ܘܡ̣ܢ ܐܘܿܪܸܫܠܸܡ ܢܸܬܸ̇ܠ ܩܵܠܹܗ: ܘܲܢܙܘܼܥܘܼܢ ܫܡܲܝܵܐ ܘܐܲܪܥܵܐ: ܘܡܵܪܝܵܐ ܢܚܘܼܣ ܥܲܠ ܥܲܡܹܗ: ܘܲܢܚܲܝܸܠ ܠܲܒ̣ܢܲܝ̈ ܝܑܼܣܪܵܝܹܠ.
17: ܘܬܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟ݂ܘܿܢ: ܕܥܵܡܲܪ ܐ̄ܢܵܐ ܒܨܸܗܝܘܿܢ ܛܘܼܪܵܐ ܕܩܘܼܕ݂ܫܝ: ܘܬܸܗܘܹܐ ܐܘܿܪܸܫܠܸܡ ܩܲܕ̇ܝܼܫܵܐ: ܘܢܘܼܟ݂ܪ̈ܵܝܹܐ ܬܘܼܒ̣ ܠܵܐ ܢܸܥܡ̄ܪܘܼܢ ܒܵܗ̇.
18: ܒܹܗ ܒܝܵܘܡܵܐ ܗܵܘܿ: ܢܲܛܦܘܼܢ ܛܘܼܪܹ̈ܐ ܚܲܠܝܘܼܬ̣ܵܐ: ܘܪ̈ܵܡܵܬ̣ܵܐ ܢܲܪ̈ܕ̇ܝܼܢ ܚܲܠܒ̣ܵܐ: ܘܟ݂ܠܗܘܿܢ ܦܨܝܼ̈ܕܹܐ ܕܲܝܗܘܼܕ݂ܵܐ ܢܲܪܕ̇ܘܼܢ ܡܲـ̈ـܝܵܐ: ܘܡܲܒ̇ܘܼܥܵܐ ܡ̣ܢ ܒܲܝܬܹ̇ܗ ܕܡܵܪܝܵܐ ܢܸܦܘܿܩ: ܘܢܲܫܩܸܐ ܠܢܲܚܠܵܐ ܕܣܵܛܝܼܡ.
19: ܡܸܨܪܹܝܢ ܠܲܚܒ̣ܵܠܵܐ ܬܸܗܘܹܐ: ܘܐܲܕ݂ܘܿܡ ܠܡܲܕ݂ܒ̇ܪܵܐ ܚܲܪܒܵܐ: ܡ̣ܢ ܚܛܘܼܦܝܵܐ ܕܲܒ̣ܢܲܝ̈ ܝܑܼܗܘܼܕ݂ܵܐ: ܕܐܸܫܲܕ݂ܘ ܕܡܵܐ ܙܲܟܵܝܵܐ ܒܐܲܪ̱ܥܗܘܿܢ.
20: ܝܑܼܗܘܼܕ݂ܵܐ ܠܥܵܠܲܡ ܬܸܬܸ̇ܒ̣: ܘܐܘܿܪܸܫܠܸܡ ܠܕ݂ܵܪܕܵܪ̈ܝܼܢ.
21: ܘܐܸܬ̣ܒܲܥ ܕܸܡܗܘܿܢ ܘܠܵܐ ܐܹܚܲܣܸܐ: ܘܡܵܪܝܵܐ ܥܵܡܲܪ ܒܨܸܗܝܘܿܢ.