ܟܬܒ݂ܐ ܕܢܚܘܡ

ܩܹܦܵܠܹܐܘܿܢ: ܐ.

1: ܡܚܘܿܬ̣ܵܐ ܕܢܝܼܢܘܹܐ ܕܲܒ̣ܣܸܦܪܵܐ ܕܚܸܙܘܵܢܹ̈ܐ ܕܢܵܚܘܿܡ ܐܲܠܩܘܿܫܵܝܵܐ.

2: ܐܲܠܵܗܵܐ ܛܲܢܵܢܵܐ ܘܬ̣ܵܒ̣ܘܿܥܵܐ ܡܵܪܝܵܐ: ܬܵܒ̇ܲܥ ܡܵܪܝܵܐ ܒܪܘܼܓ̣ܙܵܐ: ܬܵܒܲܥ ܡܵܪܝܵܐ ܡ̣ܢ ܣܵܢܐܵܘ̈ܗܝ: ܘܢܵܛ̇ܲܪ ܠܲܒ̣ܥܸܠܕ̇ܒ̣ܵܒ̣ܵܘ̈ܗܝ.

3: ܢܲܓܝܼܪܵܐ ܪܘܼܚܹܗ ܕܡܵܪܝܵܐ: ܘܣܲܓ̇ܝܼ ܚܲܝܠܹܗ: ܘܲܡܙܲܟܵܝܘܼ ܠܵܐ ܡܙܲܟܸ̇ܐ: ܡܵܪܝܵܐ ܒܥܲܠܥܵܠܵܐ ܘܲܒ̣ܟ݂ܘܿܟ݂ܝܼܬ̣ܵܐ ܐܘܼܪܚܹܗ: ܘܲܥܢܵܢܹ̈ܐ ܚܸܠܵܐ ܕܪܸ̈ܓ̣ܠܵܘܗܝ.

4: ܟܵܐܹ̇ܐ ܒܝܲܡܵܐ ܘܡܵܘܒܸ̇ܫ ܠܹܗ: ܘܟ݂ܠܗܘܿܢ ܢܲܗܪ̈ܵܘܵܬ̣ܵܐ ܡܲܚܪܸܒ̣: ܐܲܠܵܬ̤ ܡܲܬ̣ܢܝܼܢ ܘܟܲܪܡ̄ܠܵܐ: ܘܦܸܪܥܵܐ ܕܠܸܒ̣ܢܵܢ ܝܑܼܒܸܫ̣.

5: ܛܘܼܪܹ̈ܐ ܙܵܥ̣ܘܼ ܡ̣ܢ ܩܕ݂ܵܡܵܘܗܝ ܘܪ̈ܵܡܵܬ̣ܵܐ ܐܸܬ̣ܦܲܪܲܩ: ܙܵܥܲܬ̤ ܐܲܪܥܵܐ ܡ̣ܢ ܩܕ݂ܵܡܵܘܗܝ: ܬܹܒܹܝܠ ܘܟ݂ܠܗܘܿܢ ܥܵܡܘܿܪܹ̈ܝܗ̇.

6: ܩܕ݂ܵܡ ܪܘܼܓ̣ܙܹܗ ܡܲܢ̣ܘܼ ܩܵܐܹ̇ܡ: ܘܡܲܢ̣ܘܼ ܡܣܲܝܒܲܪ ܚܸܡܬ̣ܵܐ ܕܪܘܼܓ̣ܙܹܗ: ܚܸܡܬܹܗ ܝܵܩ̇ܕܵܐ ܐܲܝܟ݂ ܢܘܼܪܵܐ: ܘܛܘܼܪܹ̈ܐ ܐܸܬ̣ܦܲܫܲܪܘ ܡܸܢܹܗ.

7: ܛܵܒ̣ ܗ̄ܘܼ ܡܵܪܝܵܐ ܠܲܡܣܲܝܵܥܘܼ ܒܝܵܘܡܵܐ ܕܐܘܼܠܨܵܢܵܐ: ܘܝܵܕܲܥ̇ ܠܐܲܝܠܹܝܢ ܕܲܬ̣ܟ݂ܝܼܠܝܼܢ ܥܠܵܘܗܝ.

8: ܘܒܲܓ̣ܪܘܼܦܝܵܐ ܥܵܒܹ̇ܕ݂ ܓܡܘܼܪܝܵܐ. ܢܸܥܒܲܪ ܠܐܲܬ̣ܪܹܗ: ܘܠܲܒ̣ܥܸܠܕ̇ܒ̣ܵܒ̣ܵܘ̈ܗܝ ܢܸܪܕ̇ܘܿܦ ܚܸܫܘܿܟ݂ܵܐ.

9: ܡܵܢܵܐ ܡܸܬ̣ܚܲܫܒ̣ܝܼܢ ܐ̄ܢܬ̇ܘܿܢ ܥܲܠ ܡܵܪܝܵܐ: ܕܲܓ̣ܡܘܼܪܝܵܐ ܥܵܒܹ̇ܕ݂: ܘܠܵܐ ܢܩܘܼܡ ܕܬܲܪܬܹ̇ܝܢ ܙܲܒ̣ܢܝܼ̈ܢ ܐܘܼܠܨܵܢܵܐ.

10: ܡܸܛܠ ܕܲܥܕܲܡܵܐ ܠܫܲܠܝܼܛܵܢܲܝ̈ܗܘܿܢ ܡܵܪܘܿܕ݂ܝܼܢ: ܘܲܒ̣ܪܵܘܵܝܘܼܬ̣ܗܘܿܢ ܪܘܹܝܢ: ܘܐܸܟܲܠ̣ܘ ܘܐܸܬ̣ܡ̱ܠܝܼܘ ܚܲܒ̇ܬ̣ܵܐ ܝܲܒ̇ܝܼܫܬܵܐ.

11: ܡܸܢܹܟ݂ܝ ܢܸܦܘܿܩ ܕܡܸܬ̣ܚܲܫܲܒ̣ ܒܝܼܫܬܵܐ ܥܲܠ ܡܵܪܝܵܐ: ܘܡܸܬ̣ܪܲܥܸܐ ܥܵܘܼܠܵܐ.

12: ܗܵܟܲܢܵܐ ܐܵܡ̇ܲܪ ܡܵܪܝܵܐ: ܥܲܠ ܪܹ̈ܫܲܝ ܡܲـ̈ـܝܵܐ ܣܲܓ̇ܝܼ̈ܐܹܐ ܕܓܲܪܘ ܘܲܥ̣ܒܲܪܘ: ܘܕܲܥܢܹܝܬܹܟ݂ܝ ܬܘܼܒ̣ ܠܵܐ ܐܸܥܢܹܝܟ݂ܝ.

13: ܡܸܟܹ̇ܝܠ ܐܸܬ̣ܒܲܪ ܢܝܼܪܹܗ ܡܸܢܹܟ݂ܝ: ܘܲܚܢܵܩܲܝ̈ܟ̇ܝ ܐܹܦܲܣܸܩ.

14: ܘܢܸܦܩܘܿܕ݂ ܥܠܲܝܟ̇ܝ ܡܵܪܝܵܐ: ܘܠܵܐ ܢܸܙܕ̇ܪܲܥ ܬܘܼܒ̣ ܡ̣ܢ ܫܡܹܟ݂ܝ ܒܹܝܬ̣ ܐܲܠܵܗܹܟ݂ܝ: ܘܐܵܘܒܸ̇ܕ݂ ܓܠܝܼ̈ܦܹܐ ܘܲܢܣܝܼܟܹ̈ܐ: ܘܐܸܥܒ̇ܕ݂ܝܼܘܗܝ ܩܲܒ̣ܪܹܟ݂ܝ ܒܲܥܓܲܠ.

15: ܗܵܐ ܥܲܠ ܛܘܼܪܹ̈ܐ ܪܸ̈ܓ̣ܠܵܘܗܝ ܕܲܡܣܲܒ̇ܪܵܢܵܐ: ܘܲܕ݂ܡܲܫܡܲܥ ܫܠܵܡܵܐ. ܥܒܸܕ݂ ܝܑܼܗܘܼܕ݂ܵܐ ܥܹܐܕܲܝ̈ܟ ܘܫܲܠܸܡ ܢܸܕ݂ܪ̈ܲܝܟ: ܡܸܛܠ ܕܠܵܐ ܡܵܘܣܸܦ ܬܘܼܒ̣ ܠܡܸܥܒܲܕ݂ ܒܵܟ݂ ܥܵܘܼܠܵܐ: ܡܸܛܠ ܕܟ݂ܠܹܗ ܐܹܒܲܕ݂.

ܩܹܦܵܠܹܐܘܿܢ: ܒ.

1: ܣ̣ܠܸܩ ܡܕܲܒ̇ܪܵܢܵܐ ܩܕ݂ܵܡܲܝܟ: ܘܢܵܛܲܪ ܡܲܛܲܪܬܵܐ ܘܚܵܐܲܪ ܐܘܼܪܚܵܐ: ܘܐܵܚܹ̇ܕ݂ ܒܚܲܨܹ̈ܐ: ܘܛܵܒ̣ ܚܲܣܝܼܢ ܚܲܝܠܹܗ.

2: ܡܸܛܠ ܕܡܲܦܢܸܐ ܐ̄ܢܵܐ ܐܝܼܩܵܪܹܗ ܕܝܲܥܩܘܿܒ̣ ܐܲܝܟ݂ ܐܝܼܩܵܪܹܗ ܕܝܼܣܪܵܝܹܠ: ܡܸܛܠ ܕܕ݂ܵܫ̣ܘ ܐܸܢܘܿܢ ܕܵܝܘܿܫܹ̈ܐ: ܘܚܲܒܸ̇ܠܘ ܫܲܒ̇ܘܼܩܲܝ̈ܗܘܿܢ.

3: ܣܲܟ̇ܪܹ̈ܐ ܕܓܲܢ̄ܒܵܪ̈ܲܝܗܘܿܢ ܡܲܣ̱ܡ̈ܩܵܢ: ܘܓܲܒ̣ܪܹ̈ܐ ܓܲܢ̄ܒܵܪܹ̈ܐ ܡܸܫܬܲܥܹܝܢ ܒܠܲܡܦܹܝ̈ܕܹܐ ܕܢܘܼܪܵܐ: ܘܲܒ̣ܡܲܪ̈ܟ̇ܒ̣ܵܬ̣ܵܐ ܒܝܵܘܡܵܐ ܕܡܸܬ̇ܛܲܝܒ̣ܝܼܢ: ܘܦܲܪ̈ܵܫܹܐ ܕܡܸܬ̣ܒܲܠܗܹܝܢ.

4: ܘܲܒ̣ܫܘܼܩܹ̈ܐ ܡܸܫܬܲܒ̇ܚܝܼܢ ܒܡܲܪ̈ܟ̇ܒ̣ܵܬ̣ܗܘܿܢ ܘܡܸܫܬܲܒ̣ܗ̄ܪܝܼܢ: ܘܚܸܙ̱ܘܗܘܿܢ ܐܲܝܟ݂ ܠܲܡܦܹܝ̈ܕܹܐ: ܘܐܲܝܟ݂ ܒܲܪ̈ܩܹܐ ܪܵܗ̇ܛܝܼܢ.

5: ܢܹܐܚܕ̇ܘܼܢ ܠܫܲܠܝܼܛܵܢܲܝ̈ܗܘܿܢ: ܘܢܸܬ̇ܬܲܩܠܘܼܢ ܒܗܲܠܟ݂ܵـ̈ـܬ̣ܗܘܿܢ: ܘܢܸܣܬܲܪܗܒ̣ܘܼܢ ܠܫܘܼܪܵܐ: ܘܲܢܛܲܝܒ̣ܘܼܢ ܥܵܥ̈ܝܵܬ̣ܵܐ.

6: ܬܲܪ̈ܥܹܐ ܕܲܝܗܘܼܕ݂ܵܐ ܐܸܬ̣ܦܲܬܲܚܘ: ܘܗܲܝܟ̇ܠܵܐ ܙܵܥ̣.

7: ܘܐܲܩܝܼܡܲܬ̤ ܦܲܪ̈ܵܫܹܝܗ̇ ܘܣܸܠܩܲܬ̤: ܘܐܲܡ̈ܗܵܬ̣ܵܗ̇ ܡܢܲܗ̈ܡܵܢ ܗ̄ܘܲܝ̈ ܒܠܸܒܲܝ̈ܗܹܝܢ ܐܲܝܟ݂ ܝܵܘܢܹ̈ܐ.

8: ܘܢܝܼܢܘܹܐ ܐܲܝܟ݂ ܝܲܡܬ̣ܵܐ ܗ̄ܝܼ ܕܡܲـ̈ـܝܵܐ ܘܒܹܝܬ̣ ܡܲـ̈ـܝܵܐ ܗ̄ܝܼ: ܘܗܸܢ̣ܘܿܢ ܥܵܪܩܝܼܢ: ܐܲܩܝܼܡܘ: ܐܲܩܝܼܡܘ ܘܠܲܝܬ̇ ܕܡܸܬ̣ܦܢܸܐ.

9: ܒܲܙ̣ܘ ܣܹܐܡܵܐ ܘܒܲܙ̣ܘ ܕܲܗܒ̣ܵܐ: ܘܠܲܝܬ̇ ܣܵܟ݂ܵܐ ܠܨܸܒ̣ܬܵܗ̇: ܥܲܫܝܼܢܝܼܢ ܟܠܗܘܿܢ ܡܵܐܢܹ̈ܐ ܕܪܸܓ̇ܬ̣ܵܗ̇.

10: ܕܝܼܫܬܵܐ ܘܲܣܝܼܦܬܵܐ ܘܲܡܬܲܪܲܥܬܵܐ: ܘܠܸܒܵܐ ܬܒ̣ܝܼܪܵܐ ܘܦܘܼܪܵܩ ܒܘܼܪ̈ܟܹ̇ܐ: ܘܲܪܥܵܠܵܐ ܒܟ݂ܠ ܚܲܨܝܼ̈ܢ: ܘܐܲܦܲܝ̈ ܟܠܗܘܿܢ ܐܲܟ݂ܘܼܡ ܐܲܝܟ݂ ܫܘܼܚܵܪܹ̈ܐ ܕܩܸܕ݂ܪܵܐ.

11: ܐܲܝܟܵܐ ܗ̄ܝܼ ܡܲܪܒ̇ܘܿܥܝܼܬ̣ܵܗ̇ ܕܐܲܪܝܘܿܬ̣ܵܐ: ܘܒܹܝܬ̣ ܪܸܥܝܵܐ ܕܓ̣ܘܼܪܝܵܐ ܕܐܲܪܝܘܼܬ̣ܵܐ: ܕܐܸܙܲܠ ܐܲܪܝܵܐ ܠܡܸܥܲܠ ܠܬܲܡܵܢ: ܘܓ̣ܘܼܪܝܵܐ ܕܐܲܪܝܵܐ ܘܠܲܝܬ̇ ܕܡܲܗܲܪ.

12: ܐܲܪܝܵܐ ܬܒܲܪ ܡܸܣܲܬ̣ ܡܹܐܟ݂ܘܼܠܬܵܐ ܕܲܓ̣ܪ̈ܵܘܗܝ: ܘܲܦܣܲܩ̣ ܐܵܦ ܠܬܸܢܝܵܢܵܘ̈ܗܝ: ܘܲܡ̣ܠܵܐ ܢܸܩܥܵܘ̈ܗܝ ܘܡܲܪܒ̇ܘܿܥܝܼܬܹܗ ܬܒ̣ܵܪܵܐ.

13: ܗܵܐ ܐܸܢܵܐ ܥܠܲܝܟ̇ܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܐܵܘܒܸ̇ܕ݂ ܒܬܸܢܵܢܵܐ ܟܸܢܫܲܝ̈ܟ̇ܝ: ܘܲܓ̣ܪ̈ܲܝܟ̇ܝ ܬܹܐܟ݂ܘܿܠ ܚܲܪܒܵܐ: ܘܐܵܘܒܸ̇ܕ݂ ܡ̣ܢ ܐܲܪܥܵܐ ܬܒ̣ܵܪܹܟ݂ܝ: ܘܬ̣ܘܼܒ̣ ܠܵܐ ܢܸܫܬ̇ܡܲܥ ܩܵܠܵܐ ܕܲܥܒ̣ܵܕܲܝ̈ܟ̇ܝ.

ܩܹܦܵܠܹܐܘܿܢ: ܓ.

1: ܘܵܝ ܠܲܡܕ݂ܝܼܢ̄ܬܵܐ ܕܲܕ݂ܡܵܐ: ܕܟ݂ܠܵܗ̇ ܟܲܕܵܒ̣ܘܼܬ̣ܵܐ ܘܡܲܠܝܵܐ ܥܵܘܼܠܵܐ: ܘܠܵܐ ܡܸܬ̇ܬ̇ܡܝܼܫ ܒܵܗ̇ ܬܒ̣ܵܪܵܐ.

2: ܩܵܠܵܐ ܕܫܵܘܛܵܐ ܘܩܵܠܵܐ ܕܙܵܘܥܵܐ ܕܓ̣ܝܼܓ̣̈ܠܹܐ: ܘܣܘܼܣܝܵܐ ܕܢܵܦܲܪ: ܘܡܲܪܟܲܒ̣ܬ̣ܵܐ ܕܲܡܢܲܕ݂ܝܵܐ.

3: ܘܦܲܪܵܫܵܐ ܕܕ݂ܵܒܲܪ: ܘܣܲܝܦܵܐ ܕܡܲܙܗܲܪ: ܘܢܲܝܙܟ݂ܵܐ ܕܡܲܒ̣ܪܸܩ: ܘܣܘܿܓ̣ܵܐܐ ܕܲܩܛܝܼ̈ܠܹܐ: ܘܥܘܼܫܢܵܐ ܕܲܫ̈ܠܲܕܹ̇ܐ: ܘܠܲܝܬ̇ ܣܵܟ݂ܵܐ ܠܲܫ̈ܠܲܝܕܹ̇ܐ: ܢܸܬ̇ܬܲܩܠܘܼܢ ܒܗܹܝܢ ܒܲܫܠܲܕܲܝ̈ܗܘܿܢ.

4: ܡ̣ܢ ܣܘܿܓܲܐܬ̣ ܙܵܢܝܘܼܬ̣ܵܗ̇ ܕܙܵܢܝܼܬ̣ܵܐ ܫܲܦܪܲܬ̣ ܚܸܙܘܵܐ ܘܡܵܪܲܬ̤ ܚܲܪ̈ܵܫܹܐ: ܕܲܡܪܲܒ̇ܝܵܐ ܥܲܡܡܹ̈ܐ ܒܙܵܢܝܘܼܬ̣ܵܗ̇: ܘܫܲܪ̈ܒ̣ܵܬ̣ܵܐ ܒܚܲܪ̈ܫܹܝܗ̇.

5: ܗܵܐ ܐܸܢܵܐ ܥܠܲܝܟ̇ܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܐܸܣܚܘܿܦ ܫܦܘܿܠܲܝ̈ܟ̇ܝ ܥܲܠ ܐܲܦܲܝ̈ܟ̇ܝ: ܘܐܹܚܵܘܹܐ ܦܘܼܪܣܵܝܹܟ݂ܝ ܠܥܲܡܡܹ̈ܐ: ܘܨܲܥܪܹܟ݂ܝ ܠܡܲܠܟ̇ܘܵܬ̣ܵܐ.

6: ܘܐܸܫܕܸ̇ܐ ܥܠܲܝܟ̇ܝ ܛܲܢܦܘܼܬ̣ܵܐ ܘܐܹܨܲܥܪܸܟ݂ܝ: ܘܐܸܥܒ̇ܕܹܟ݂ܝ ܠܚܸܙܘܵܐ.

7: ܘܟ݂ܠ ܡܲܢ ܕܚܵܙܹ̇ܐ ܠܹܟ݂ܝ ܢܸܢܲܕ݂ ܡܸܢܹܟ݂ܝ: ܘܢܹܐܡܲܪ ܐܸܬ̣ܒܲܙܙܲܬ̤ ܢܝܼܢܘܹܐ. ܠܡܲܢ ܬܸܟ݂ܪܸܐ ܥܠܲܝܟ̇ܝ: ܘܐܲܝܡܸܟܵܐ ܐܸܒ̣ܥܸܐ ܠܹܟ݂ܝ ܡܒܲܝܐܵܢܵܐ.

8: ܕܲܠܡܵܐ ܛܵܒ̣ܵܐ ܐܲܢ̄ܬ̇ܝ ܡ̣ܢ ܝܘܿܢ ܕܐܲܡܘܿܢ: ܕܝܵܬ̣ܒܵܐ ܒܢܲܗܪ̈ܵܘܵܬ̣ܵܐ ܘܡܲـ̈ـܝܵܐ ܚܕ݂ܝܼܪܝܼܢ ܠܵܗ̇: ܕܚܲܝܠܵܗ̇ ܝܲܡܵܐ ܘܡܲـ̈ـܝܵܐ ܫܘܼܪܵܗ̇.

9: ܟܘܼܫ ܘܡܸܨܪܹܝܢ ܥܘܼܫܢܵܗ̇ ܘܠܲܝܬ̇ ܠܵܗ̇ ܣܵܟ݂: ܦܘܿܛܵܝܹ̈ܐ ܘܠܹܘܒ̣ܵܝܹ̈ܐ ܗܘ̤ܵܘ ܒܥܘܼܕ݂ܪܵܢܵܗ̇.

10: ܐܵܦ ܗܝ̤ ܒܲܫܒ̣ܝܼܬ̣ܵܐ ܐܸܙܲܠ̄ܬ̤: ܘܝܲܠܘܼܕܹܝ̈ܗ̇ ܐܸܫܬܲܩܲܦܘ ܒܪܸܫ ܟܠܗܘܿܢ ܫܘܼܩܹ̈ܝܗ̇: ܘܥܲܠ ܝܲܩܝܼܪܹܝܗ̇ ܐܲܪܡܝܼܘ ܦܸܨܹ̈ܐ: ܘܟ݂ܠܗܘܿܢ ܪܵܘܪ̈ܒ̣ܵܢܹܝܗ̇ ܐܸܬ̣ܐ̱ܣܲܪܘ ܒܫܸܫ̈ܠܵܬ̣ܵܐ.

11: ܐܵܦ ܐܲܢ̄ܬ̇ܝ ܬܸܕ݂ܘܹܝܢ ܘܬܸܗܘܹܝܢ ܫܝܼܛܬܵܐ: ܐܵܦ ܐܲܢ̄ܬ̇ܝ ܬܸܒ̣ܥܹܝܢ ܥܘܼܕ݂ܪܵܢܵܐ ܡ̣ܢ ܒܥܸܠܕ̇ܒ̣ܵܒܲܝ̈ܟ̇ܝ.

12: ܟܠܗܘܿܢ ܟܲܪ̈ܟܲܝܟ̇ܝ ܐܲܝܟ݂ ܬܹܐܢܹ̈ܐ ܐܸܢܘܿܢ ܒܲܟܵܪ̈ܵܬ̣ܵܐ: ܕܡܵܐ ܕܲܒ̣ܫܸܠ̣ ܢܵܦ̈ܠܵܢ ܒܦܘܼܡܹܗ ܕܐܵܟ݂ܘܿܠܵܐ.

13: ܘܥܲܡܹܟ݂ܝ ܐܲܝܟ݂ ܢܸܫܹ̈ܐ ܐܸܢܘܿܢ ܒܓ̣ܵܘܹܟ݂ܝ: ܢܸܬ̣ܦܲܬ̇ܚܘܼܢ ܬܲܪ̈ܥܹܐ ܕܐܲܪܥܹܟ݂ܝ ܠܲܒ̣ܥܸܠܕ̇ܒ̣ܵܒܲܝ̈ܟ̇ܝ: ܘܬܹܐܟ݂ܘܿܠ ܢܘܼܪܵܐ ܠܡܘܼܟ݂̈ܠܲܝܟ̇ܝ.

14: ܡܲـ̈ـܝܵܐ ܒܐܘܼܠܨܵܢܵܐ ܡܠܵܝ ܠܹܟ݂ܝ: ܘܐܲܥܫܸܢܝ ܟܲܪ̈ܟܲܝܟ̇ܝ: ܥܘܿܠܝ ܒܲܣܝܵܢܵܐ ܘܕ݂ܘܼܫܝ ܒܛܝܼܢܵܐ: ܘܐܲܥܫܸܢܝ ܡܘܼܠܟܵܢܵܐ.

15: ܬܲܡܵܢ ܬܹܐܟ݂ܠܹܟ݂ܝ ܢܘܼܪܵܐ: ܘܬܵܘܒ̇ܕܹܟ݂ܝ ܚܲܪܒܵܐ: ܘܬܹܐܟ݂ܠܹܟ݂ܝ ܐܲܝܟ݂ ܙܵܚܠܵܐ: ܥܲܠ ܕܲܥܫܸܢ̣ܬ̇ܝ ܐܲܝܟ݂ ܙܵܚܠܵܐ: ܘܲܣܓܲܝ̣ܬ̇ܝ ܐܲܝܟ݂ ܩܲܡܨܵܐ.

16: ܘܐܲܣܓ̇ܝܼܬ̇ܝ ܬܲܓܵܪ̈ܲܝܟ̇ܝ ܛܵܒ̣ ܡ̣ܢ ܟܵܘܟ̇ܒܲܝ̈ ܫܡܲܝܵܐ: ܙܵܚܠܵܐ ܫ̣ܠܲܚ ܘܲܦ̣ܪܲܚ.

17: ܢܙܝܼܪ̈ܲܝܟ̇ܝ ܐܲܝܟ݂ ܩܲܡܨܵܐ: ܘܲܟ݂ܬ̣ܝܼܫܲܝ̈ܟ̇ܝ ܐܲܝܟ݂ ܩܲܡܨܵܐ ܕܲܣܒ̣ܝܼܟ݂ ܒܲܣܝܵܓ̣ܵܐ ܒܝܵܘܡܵܐ ܩܲܪܝܼܪܵܐ: ܡܵܐ ܕܕܸܢܚܲܬ̤ ܫܸܡܫܵܐ: ܡܲܫܩܸܠ ܘܠܵܐ ܡܸܬ̣ܝܲܕ݂ܥܵܐ ܕܘܼܟ̇ܬܹܗ.

18: ܢܡ̣ܘ ܚܲܒ̣ܪ̈ܲܝܟ̇ܝ ܡܲܠ̈ܟܹ̇ܐ ܕܐܵܬ̣ܘܿܪ: ܘܲܫ̣ܪܵܘ ܩܲܪ̈ܝܼܒܲܝܟ̇ܝ: ܐܸܬ̣ܒܲܕܲܪ ܥܲܡܹܟ݂ܝ ܥܲܠ ܛܘܼܪܹ̈ܐ: ܘܠܲܝܬ̇ ܠܗܘܿܢ ܡܟܲܢܫܵܢܵܐ.

19: ܘܠܲܝܬ̇ ܕܟ݂ܵܐܹ̇ܒ̣ ܠܹܗ ܥܲܠ ܬܒ̣ܵܪܹܟ݂ܝ: ܟܵܝ̇ܒܵܐ ܗ̄ܝܼ ܡܚܘܿܬܹܟ݂ܝ: ܟܠ ܕܲܫܡܲܥ̣ܘ ܫܸܡܥܹܟ݂ܝ ܢܩܲܫ̣ܘ ܟܲܦܵܐ ܥܠܲܝܟ̇ܝ: ܡܸܛܠ ܕܥܲܠ ܟܠ ܐ̄ܢܵܫ ܐܲܡܝܼܢܵܐܝܼܬ̣ ܥܸܒ̣ܪܲܬ̤ ܒܝܼܫܬܹ̇ܟ݂ܝ.