ܟܬܒ݂ܐ ܕܨܦܢܝܐ
ܩܹܦܵܠܹܐܘܿܢ: ܐ.
1: ܦܸܬ̣ܓ̣ܵܡܹܗ ܕܡܵܪܝܵܐ ܕܲܗܘ̤ܵܐ ܥܲܠ ܨܦܲܢܝܵܐ ܒܲܪ ܟܘܿܫܝܼ: ܒܲܪ ܓܕܲܠܝܵܐ ܒܲܪ ܐܵܡܲܪܝܵܐ ܒܪܹܗ ܕܚܹܠܲܩܝܵܐ: ܒܝܵܘ̈ܡܵܬܹܗ ܕܝܘܿܫܝܼܵܐ ܒܲܪ ܐܲܡܘܿܢ ܡܲܠܟܵܐ ܕܲܝܗܘܼܕ݂ܵܐ.
2: ܡܲܥܒܵܪܘܼ ܡܲܥܒܲܪ ܐ̄ܢܵܐ ܟܠ ܡ̣ܢ ܐܲܦܹܝ̈ܗ̇ ܕܐܲܪܥܵܐ ܐܵܡܲܪ ܡܵܪܝܵܐ.
3: ܡܲܥܒܲܪ ܐ̄ܢܵܐ ܒܢܲܝ̈ܢܵܫܵܐ ܘܲܒ̣ܥܝܼܪܵܐ: ܡܲܥܒܲܪ ܐ̄ܢܵܐ ܦܵܪܲܚܬ̣ܵܐ ܕܲܫܡܲܝܵܐ: ܘܢܘܼܢܹ̈ܐ ܕܝܲܡܵܐ: ܘܬܘܼܩ̱ܠܬ̣ܵܐ ܐܲܝܬܸ̇ܐ ܥܲܠ ܚܲܛܵܝܹ̈ܐ: ܘܐܵܘܒܸ̇ܕ݂ ܒܢܲܝ̈ܢܵܫܵܐ ܡ̣ܢ ܐܲܦܹ̇ܝܗ̇ ܕܐܲܪܥܵܐ: ܐܵܡܲܪ ܡܵܪܝܵܐ.
4: ܘܐܲܪܝܼܡ ܐܝܼܕ݂ܝܼ ܥܲܠ ܝܑܼܗܘܼܕ݂ܵܐ: ܘܥܲܠ ܟܠܗܘܿܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܐܵܘܒܸ̇ܕ݂ ܡ̣ܢ ܐܲܬ̣ܪܵܐ ܗܵܢܵܐ ܫܲܪܟܹ̇ܗ ܕܒܲܥܠܵܐ: ܘܲܫܡܵܐ ܕܟ݂ܘܼܡܪܹ̈ܐ ܥܲܡ ܕܟ݂ܵܗܢܹ̈ܐ.
5: ܘܲܠܟ݂ܠ ܕܣܵܓ̇ܕ̇ܝܼܢ ܗ̄ܘܼܵܘ ܥܲܠ ܐܸܓܵܪܹ̈ܐ ܠܚܲܝ̈ܠܵܘܵܬ̣ܵܐ ܕܲܫܡܲܝܵܐ: ܘܲܠܟ݂ܠ ܕܣܵܓ̇ܕ̇ܝܼܢ ܗ̄ܘܼܵܘ ܘܝܵܡܹ̇ܝܢ ܒܡܵܪܝܵܐ: ܘܝܵܡܹ̇ܝܢ ܒܡܲܠܟ̇ܘܿܡ.
6: ܘܲܠܟ݂ܠ ܕܗܵܦ̇ܟ̇ܝܼܢ ܡ̣ܢ ܡܵܪܝܵܐ: ܘܲܠܟ݂ܠ ܕܠܵܐ ܒܵܥܹ̇ܝܢ ܠܡܵܪܝܵܐ: ܘܠܵܐ ܡܥܲܩܒ̣ܝܼܢ ܥܠܵܘܗܝ.
7: ܕܚܲܠܘ ܡ̣ܢ ܩܕ݂ܵܡ ܡܵܪܹܐ ܡܵܪ̈ܵܘܵܬ̣ܵܐ: ܡܸܛܠ ܕܩܲܪܝܼܒ̣ ܗ̄ܘܼ ܝܵܘܡܹܗ ܕܡܵܪܝܵܐ: ܘܛܲܝܸܒ̣ ܡܵܪܝܵܐ ܕܸܒ̣ܚܹ̈ܐ: ܘܙܲܡܸܢ ܩܪ̈ܵܘܗܝ.
8: ܘܢܸܗܘܹܐ ܒܝܵܘܡܵܐ ܕܕܸܒ̣ܚܹܗ ܕܡܵܪܝܵܐ: ܐܸܦܩܘܿܕ݂ ܥܲܠ ܪܵܘܪ̈ܒ̣ܵܢܹܐ: ܘܥܲܠ ܒܢܲܝ̈ ܡܲܠ̈ܟܹ̇ܐ: ܘܥܲܠ ܟܠ ܕܠܵܒ̣ܫܝܼܢ ܗ̄ܘܼܵܘ ܠܒ̣ܘܼܫܹ̈ܐ ܢܘܼܟ݂ܪ̈ܵܝܹܐ.
9: ܘܐܸܦܩܘܿܕ݂ ܥܲܠ ܟܠܗܘܿܢ ܚܵܛܘܿܦܹ̈ܐ ܘܒ̣ܵܙܘܿܙܹ̈ܐ ܒܝܵܘܡܵܐ ܗܵܘܿ: ܕܡܵܠܹ̇ܝܢ ܗ̄ܘܼܵܘ ܒܹܝܬ̣ ܡܲܕܵܢܲܝ̈ܗܘܿܢ ܚܛܘܼܦܝܵܐ ܘܢܸܟ݂ܠܵܐ.
10: ܘܢܸܗܘܹܐ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ: ܩܵܠܵܐ ܕܲܩܥܵܬ̣ܵܐ ܡ̣ܢ ܬܲܪܥܵܐ ܕܨܲܝܵܕܹ̈ܐ: ܘܝܼܠܲܠܬܵܐ ܡ̣ܢ ܐ̄ܚܪܹܢܵܐ: ܘܲܬ̣ܒ̣ܵܪܵܐ ܪܲܒܵܐ ܡ̣ܢ ܪ̈ܵܡܵܬ̣ܵܐ.
11: ܐܲܝܠܸܠܘ ܥܵܡܘܿܪܹ̈ܝܗ̇ ܕܡܲܟ݂ܬܲܫ: ܡܸܛܠ ܕܲܬ̣ܘܲܪܘ ܟܠܹܗ ܥܲܡܵܐ ܕܲܟ݂ܢܲܥܢ: ܘܐܸܒܲܕ݂ܘ ܟܠ ܫܵܩܠܲܝ̈ ܣܹܐܡܵܐ.
12: ܘܢܸܗܘܹܐ ܒܹܗ ܒܙܲܒ̣ܢܵܐ ܗܵܘܿ ܐܵܡܲܪ ܡܵܪܝܵܐ: ܐܸܒ̣ܨܝܗ̇ ܠܐܘܿܪܸܫܠܸܡ ܒܲܫܪܵܓ̣ܵܐ: ܘܐܸܦܩܘܿܕ݂ ܥܲܠ ܓܲܒ̣ܪܹ̈ܐ ܕܫܵܝ̇ܛܝܼܢ ܠܢܵܛܘܿܪܗܘܿܢ: ܘܐܵܡ̇ܪܝܼܢ ܒܠܸܒ̇ܗܘܿܢ: ܠܵܐ ܡܲܛܐܸܒ̣ ܡܵܪܝܵܐ ܐܵܦ ܠܵܐ ܡܲܒ̣ܐܸܫ.
13: ܢܸܗܘܹܐ ܩܸܢܝܵܢܗܘܿܢ ܠܒܸܙܬ̣ܵܐ: ܘܒ̣ܵܬܲܝ̈ܗܘܿܢ ܠܲܚܒ̣ܵܠܵܐ: ܘܢܸܒ̣ܢܘܿܢ ܒܵـ̈ـܬܹ̇ܐ ܘܠܵܐ ܢܸܬ̇ܒ̣ܘܼܢ ܒܗܘܿܢ: ܘܢܸܨܒ̣ܘܼܢ ܟܲܪ̈ܡܹܐ ܘܠܵܐ ܢܸܫܬ̇ܘܿܢ ܚܲܡ̱ܪܗܘܿܢ.
14: ܩܲܪܝܼܒ̣ ܗ̄ܘܼ ܝܵܘܡܹܗ ܪܲܒܵܐ ܕܡܵܪܝܵܐ: ܩܲܪܝܼܒ̣ ܗ̄ܘܼ ܛܵܒ̣ ܘܲܡܣܲܪܗܲܒ̣ ܩܵܠܵܐ ܕܝܵܘܡܹܗ ܕܡܵܘܝܵܐ: ܡܲܪܝܼܪ ܘܲܩܫܸܐ ܘܥܲܫܝܼܢ.
15: ܝܵܘܡܵܐ ܗ̄ܘܼ ܕܐܲܟ̇ܬ̣ܵܐ ܝܵܘܡܵܐ ܗܵܘܿ: ܝܵܘܡܵܐ ܗ̄ܘܼ ܕܐܘܼܠܨܵܢܵܐ ܘܲܕ݂ܥܵܩܬ̣ܵܐ: ܝܵܘܡܵܐ ܗ̄ܘܼ ܕܕ݂ܘܼܘܵܕ݂ܵܐ ܘܕܲܚܒ̣ܵܠܵܐ: ܝܵܘܡܵܐ ܗ̄ܘܼ ܕܚܸܫܘܿܟ݂ܵܐ ܘܲܕ݂ܥܲܡܛܵܢܵܐ: ܝܵܘܡܵܐ ܕܲܥܢܵܢܵܐ ܘܲܕ݂ܥܲܪܦܸܠܵܐ.
16: ܝܵܘܡܵܐ ܗ̄ܘܼ ܕܩܲܪܢܵܐ ܘܕܲܩܥܵܬ̣ܵܐ ܥܲܠ ܡܕ݂ܝܼ̈ܢܵܬ̣ܵܐ ܥܲܫܝܼ̈ܢܵܬ̣ܵܐ: ܘܥܲܠ ܘܵܙ̈ܝܵܬ̣ܵܐ ܪ̈ܵܡܵܬ̣ܵܐ.
17: ܘܐܵܠܹ̇ܨ ܠܲܒ̣ܢܲܝ̈ܢܵܫܵܐ ܕܲܢܗܲܠܟ݂ܘܼܢ ܐܲܝܟ݂ ܥܘܝܼܪܹ̈ܐ: ܥܲܠ ܕܲܚ̣ܛܵܘ ܠܡܵܪܝܵܐ: ܘܢܸܬ̣ܐ̱ܫܸܕ݂ ܕܸܡܗܘܿܢ ܐܲܝܟ݂ ܥܲܦܪܵܐ: ܘܒܸܣ̱ܪܗܘܿܢ ܐܲܝܟ݂ ܟܒܲـ̈ـܝܵܐ.
18: ܘܲܕ݂ܗ̱ܒ̣ܗܘܿܢ ܘܣܹܐܡܗܘܿܢ ܠܵܐ ܢܸܫܟܲܚ ܠܲܡܦܲܨܵܝܘܼ ܐܸܢܘܿܢ ܒܝܵܘܡܵܐ ܕܪܘܼܓ̣ܙܹܗ ܕܡܵܪܝܵܐ: ܘܲܒ̣ܢܘܼܪܵܐ ܕܲܛܢܵܢܹܗ ܬܸܬ̣ܐ̱ܟ݂ܠ ܟܠܵܗ̇ ܐܲܪܥܵܐ: ܡܸܛܠ ܕܲܕ݂ܠܘܼܚܝܵܐ ܘܣܵܘܦܵܢܵܐ ܥܵܒܹ̇ܕ݂ ܥܲܠ ܟܠܗܘܿܢ ܥܵܡܘܿܪܹ̈ܝܗ̇ ܕܐܲܪܥܵܐ.
ܘܥܲܕ݂ܠܵܐ ܬܹܐܬܹܐ ܥܠܲܝܟ̇ܘܿܢ ܚܸܡܬ̣ܵܐ ܕܪܘܼܓ̣ܙܹܗ ܕܡܵܪܝܵܐ: ܥܲܕ݂ܠܵܐ ܢܹܐܬܹܐ ܥܠܲܝܟ̇ܘܿܢ ܝܵܘܡܵܐ ܕܪܘܼܓ̣ܙܹܗ ܕܡܵܪܝܵܐ.
3: ܒܥܵܐܘܼܗܝ ܠܡܵܪܝܵܐ ܟܠܟ݂ܘܿܢ ܡܲܟ̇ܝܼܟܹ̈ܝܗ̇ ܕܐܲܪܥܵܐ: ܘܲܥܒܸܕ݂ܘ ܕܝܼܢܵܐ: ܘܲܒ̣ܥܵܘ ܙܲܕ̇ܝܼܩܘܼܬ̣ܵܐ ܘܡܲܟ̇ܝܼܟ݂ܘܼܬ̣ܵܐ: ܟܒܲܪ ܬܸܣܬܲܬ̇ܪܘܼܢ ܒܝܵܘܡܵܐ ܕܪܘܼܓ̣ܙܹܗ ܕܡܵܪܝܵܐ.
4: ܡܸܛܠ ܕܥܵܐܙܵܐ ܫܒ̣ܝܼܩܬܵܐ ܬܸܗܘܹܐ: ܘܐܲܫܩܵܠܘܿܢ ܠܲܚܒ̣ܵܠܵܐ: ܠܐܲܫܕ̇ܘܿܕ݂ ܒܛܲܗܪܵܐ ܢܸܕ݂ܒ̇ܪܘܼܢ: ܘܥܸܩܪܘܿܢ ܬܸܬ̣ܥ̱ܩܲܪ.
5: ܘܵܝ ܠܲܕ݂ܥܵܡ̇ܪܝܼܢ ܒܲܚܒܸܠ ܝܲܡܵܐ ܘܲܠܥܲܡܵܐ ܕܲܩܪܹܛܹܐ: ܦܸܬ̣ܓ̣ܵܡܹܗ ܕܡܵܪܝܵܐ ܥܠܲܝܟܹ̇ܝܢ ܟܢܲܥܢ ܘܐܲܪܥܵܐ ܕܲܦܠܸܫܬܵܝܹ̈ܐ: ܘܐܵܘܒܸ̇ܕ݂ܟܹܝܢ ܡ̣ܢ ܝܲܬ̣ܒܵܐ.
6: ܘܢܸܗܘܹܐ ܚܒܸܠ ܝܲܡܵܐ ܕܲܝܪܹ̈ܐ: ܘܲܩܪܹܛܹܐ ܒܹܝܬ̣ ܡܲܪܥܝܼܬ̣ܵܐ ܠܲܓ̣ܙܵܪܹ̈ܐ ܕܥܵـ̈ـܢܵܐ.
7: ܘܢܸܗܘܹܐ ܚܒܸܠ ܝܲܡܵܐ ܠܫܲܪܟܵܐ ܕܒܹܝܬ̣ ܝܑܼܗܘܼܕ݂ܵܐ: ܘܲܒ̣ܗܹܝܢ ܢܸܪܥܘܿܢ: ܘܲܒ̣ܒ̣ܵـ̈ـܬܹ̇ܐ ܕܐܲܫܩܵܠܘܿܢ ܒܪܲܡܫܵܐ ܢܸܪܒ̇ܥܘܼܢ: ܡܸܛܠ ܕܢܸܦܩܘܿܕ݂ ܐܸܢܘܿܢ ܡܵܪܝܵܐ ܐܲܠܵܗܗܘܿܢ: ܘܢܲܩܢܸܐ ܫܒ̣ܝܼܬ̣ܗܘܿܢ.
8: ܫܸܡ̇ܥܹܬ̣ ܚܸܣܕܵܐ ܕܡܘܼܐܵܒ̣: ܘܓ̣ܘܼܕܵܦܵܐ ܕܲܒ̣ܢܲܝ̈ ܥܲܡܘܿܢ: ܕܚܲܣܸܕ݂ܘ ܠܥܲܡܝ: ܘܐܸܬ̣ܪܵܘܪܲܒ̣ܘ ܥܲܠ ܬܚܘܼܡܗܘܿܢ.
9: ܡܸܛܠ ܗܵܠܹܝܢ ܚܲܝ ܐ̄ܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܕܡܘܼܐܵܒ̣ ܐܲܝܟ݂ ܣܕ݂ܘܿܡ ܬܸܗܘܹܐ: ܘܲܒ̣ܢܲܝ̈ ܥܲܡܘܿܢ ܐܲܝܟ݂ ܥܵܡܘܿܪܵܐ: ܕܐܸܬ̣ܚܲܒ̇ܠܲܬ̤ ܢܸܨܒܲܬ̣ܗܹܝܢ: ܘܐܸܒܲܕ݂ ܡܲܠܘܼܚܗܹܝܢ: ܘܲܗܸܘܲܝ̈ ܚܒ̣ܵܠܵܐ ܠܥܵܠܲܡ: ܫܲܪܟܹ̇ܗ ܕܥܲܡܝ ܒܸܒ̇ܙܘܼܢ ܐܸܢܹܝܢ: ܘܡܸܕܸ̇ܡ ܕܐܸܫܬ̇ܚܲܪ ܡ̣ܢ ܥܲܡܝ ܢܹܐܪܬ̇ܘܿܢ ܐܸܢܹܝܢ.
10: ܗܵܕܹܐ ܬܸܗܘܹܐ ܠܗܘܿܢ ܚܠܵܦ ܓܲܐܝܘܼܬ̣ܗܘܿܢ: ܥܲܠ ܕܚܲܣܸܕ݂ܘ ܘܐܸܬ̣ܪܵܘܪܲܒ̣ܘ ܥܲܠ ܥܲܡܹܗ ܕܡܵܪܝܵܐ ܚܲܝܠܬ̣ܵܢܵܐ ܥܲܠ ܝܑܼܣܪܵܝܹܠ.
11: ܐܸܬ̣ܓ̇ܠܝܼ ܡܵܪܝܵܐ ܥܠܲܝܗܘܿܢ: ܕܢܵܘܒܸ̇ܕ݂ ܠܟ݂ܠܗܘܿܢ ܡܲܠܟܹ̇ܝ̈ܗ̇ ܕܐܲܪܥܵܐ: ܘܢܸܣܓ̇ܕ݂ܘܼܢ ܠܹܗ ܐ̄ܢܵܫ ܡ̣ܢ ܐܲܬ̣ܪܹܗ: ܟܠܗܹܝܢ ܓܵܙܪ̈ܵܬ̣ܵܐ ܕܝܲܡܡܹ̈ܐ.
12: ܐܵܦ ܐܲܢ̄ܬ̇ܘܿܢ ܟܘܼܫܵܝܹ̈ܐ ܩܛܝܼܠܲܝ̈ ܚܲܪܒܵܐ.
13: ܘܲܢܪܝܼܡ ܐܝܼܕܹܗ ܥܲܠ ܓܲܪܒ̇ܝܵܝܵܐ: ܘܢܵܘܒܸ̇ܕ݂ ܠܐܵܬ̣ܘܿܪܵܝܵܐ: ܘܢܸܥܒ̇ܕܹܝܗ̇ ܠܢܝܼܢܘܐ ܠܲܚܒ̣ܵܠܵܐ ܘܲܠܨܸܕ݂ܝܵܐ ܐܲܝܟ݂ ܡܲܕ݂ܒ̇ܪܵܐ.
14: ܘܢܸܪܒ̇ܥܘܼܢ ܒܓ̣ܵܘܵܗ̇ ܓܙܵܪܹ̈ܐ: ܘܟ݂ܠܗܹܝܢ ܚܲܝ̈ܘܵܬ̣ܵܐ ܕܥܲܡܡܹ̈ܐ: ܐܵܦ ܩܵܩܹ̈ܐ ܘܩܘܼ̈ܦܕܹܐ ܒܒ̣ܵܬܹ̇ܝ̈ܗ̇ ܢܒ̣ܘܼܬ̣ܘܼܢ: ܘܚܲܝ̈ܘܵܬ̣ܵܐ ܢܸܢܗ̈ܡܵܢ ܒܓ̣ܵܘܵܗ̇: ܘܚܲܪܒܵܐ ܒܬܲܪ̈ܥܹܝܗ̇: ܡܸܛܠ ܕܥܸܩܵܪܵܗ̇ ܐܸܬ̣ܦܲܪܣܝܼ.
15: ܗܵܕܲܐ ܗ̄ܝܼ ܡܕ݂ܝܼܢ̄ܬܵܐ ܥܲܫܝܼܢܬܵܐ ܕܝܵܬ̣ܒܵܐ ܗ̄ܘܼܵܬ̣ ܒܫܸܠܝܵܐ: ܘܐܵܡܪܵܐ ܗ̄ܘܼܵܬ̣ ܒܠܸܒܵܗ̇ ܐܸܢܵܐ ܐ̄ܢܵܐ ܘܠܲܝܬ̇ ܬܘܼܒ̣ ܐܲܟ݂ܘܵܬ̣ܝ: ܐܲܝܟܲܢܵܐ ܗܘ̤ܵܬ̣ ܠܲܚܒ̣ܵܠܵܐ: ܘܒܹܝܬ̣ ܡܲܪܒ̇ܥܵܐ ܠܚܲܝ̈ܘܵܬ̣ܵܐ: ܟܠܡܲܢ ܕܢܸܥܒܲܪ ܥܠܹܝܗ̇ ܢܸܬ̣ܡܲܗ: ܘܢܲܫܪܸܩ: ܘܲܢܢܝܼܦ ܒܐܝܼܕܹܗ ܘܢܹܐܡܲܪ.
ܩܹܦܵܠܹܐܘܿܢ: ܓ.
1: ܐܘܿܝ ܡܕ݂ܝܼܢ̄ܬܵܐ ܝܑܼܕ݂ܝܼܥܬܵܐ ܘܲܦܪܝܼܩܬܵܐ: ܡܕ݂ܝܼܢ̄ܬܹ̇ܗ ܕܝܵܘܢܵܢ.
2: ܕܠܵܐ ܫܸܡܥܲܬ̤ ܒܩܵܠܵܐ: ܘܠܵܐ ܩܲܒ̇ܠܲܬ̤ ܡܲܪܕ̇ܘܼܬ̣ܵܐ: ܘܲܒ̣ܡܵܪܝܵܐ ܠܵܐ ܣܲܒ̇ܪܲܬ̤: ܘܲܠܘܵܬ̣ ܐܲܠܵܗܵܗ̇ ܠܵܐ ܩܸܪܒܲܬ̤.
3: ܪܵܘܪ̈ܒ̣ܵܢܹܝܗ̇ ܒܓ̣ܵܘܵܗ̇ ܐܲܝܟ݂ ܐܲܪ̈ܝܵܘܵܬ̣ܵܐ ܢܵܗ̇ܡܝܼܢ: ܘܕܲܝܵܢܹ̈ܝܗ̇ ܐܲܝܟ݂ ܕܐܸܒܹ̈ܐ ܕܪܲܡܫܵܐ: ܘܠܵܐ ܡܟܲܬ̇ܪܝܼܢ ܠܨܲܦܪܵܐ.
4: ܢܒ̣̈ܝܹܝܗ̇ ܦܵܚܙܝܼܢ: ܘܓܲܒ̣ܪܹ̈ܐ ܐܸܢܘܿܢ ܥܵܘܿܠܹ̈ܐ: ܟܵܗ̈ܢܹܝܗ̇ ܛܵܘܸܫ̣ܘ ܡܲܩܕ̇ܫܵܐ: ܘܲܚܛܲܦ̣ܘ ܢܵܡܘܿܣܵܐ.
5: ܘܡܵܪܝܵܐ ܙܲܕ̇ܝܼܩܵܐ ܒܓ̣ܵܘܵܗ̇ ܘܠܵܐ ܥܵܒܹ̇ܕ݂ ܥܵܘܼܠܵܐ: ܒܨܲܦܪܵܐ ܘܲܒ̣ܨܲܦܪܵܐ ܕܝܼܢܵܘ̈ܗܝ: ܝܵܗܹ̇ܒ̣ ܒܢܘܼܗܪܵܐ ܘܠܵܐ ܡܫܵܘܚܲܪ: ܘܥܵܘܿܠܵܐ ܠܵܐ ܝܵܕܲܥ̇ ܒܸܗܬ̇ܬ̣ܵܐ.
6: ܐܵܘܒ̇ܕܹܬ̣ ܥܲܡܡܹ̈ܐ: ܘܐܸܬ̣ܚܒ̇ܠܲܬ̣ ܕܵܘܝܼܬ̣ܵܐ: ܐܲܚ̱ܪܒܹ̇ܬ̣ ܫܘܼܩܲܝ̈ܗܘܿܢ ܡ̣ܢ ܒܠܲܝ ܕܥܵܒܲܪ: ܨܕܲܝ̈ ܡܕ݂ܝܼ̈ܢܵܬ̣ܗܘܿܢ ܡ̣ܢ ܒܠܲܝ ܐ̄ܢܵܫ: ܘܡ̣ܢ ܒܠܲܝ ܕܝܵܬܹ̇ܒ̣.
7: ܐܸܡ̇ܪܹܬ̣ ܕܠܝܼ ܬܸܕ݂ܚ̄ܠܘܼܢ: ܘܡܹܢܝ ܬܩܲܒ̇ܠܘܼܢ ܡܲܪܕ̇ܘܼܬ̣ܵܐ: ܘܠܵܐ ܢܹܐܒܲܕ݂ ܡ̣ܢ ܥܲܝܢܹܝ̈ܗ̇ ܟܠܡܸܕܸ̇ܡ ܕܦܲܩ̇ܕܹܬ̣ ܥܠܹܝܗ̇: ܐܸܬ̇ܛܲܝܲܒ̣ܘ ܘܲܩܪܘܿܒ̣ܘ ܘܚܲܒܸ̇ܠܘ ܟܠܗܹܝܢ ܨܸܢ̈ܥܵܬ̣ܗܘܿܢ.
8: ܡܸܟܹ̇ܝܠ ܣܲܟܵܘ ܠܝܼ ܐܵܡܲܪ ܡܵܪܝܵܐ: ܠܝܵܘܡܵܐ ܕܩܵܐܹ̇ܡ ܐ̄ܢܵܐ ܠܣܵܗܕ̇ܘܼܬ̣ܵܐ: ܡܸܛܠ ܕܡܲܛܝܼ ܕܝܼܢܝ ܠܲܡܟܲܢܵܫܘܼ ܥܲܡܡܹ̈ܐ: ܘܠܲܡܩܲܪܵܒ̣ܘܼ ܡܲܠܟ̇ـ̈ـܘܵܬ̣ܵܐ: ܠܡܹܐܫܲܕ݂ ܥܠܲܝܗܘܿܢ ܪܘܼܓ̣ܙܝܼ: ܘܟ݂ܠܵܗ̇ ܚܸܡܬ̣ܵܐ ܕܪܘܼܓ̣ܙܝ: ܡܸܛܠ ܕܲܒ̣ܢܘܼܪܵܐ ܕܲܛܢܵܢܝ ܬܸܬ̣ܐ̱ܟܸܠ ܟܠܵܗ̇ ܐܲܪܥܵܐ.
9: ܘܗܵܝܕܹ̇ܝܢ ܐܲܗܦܸܟ݂ ܥܲܠ ܥܲܡܡܹ̈ܐ ܣܸܦܬ̣ܵܐ ܓܒ̣ܝܼܬ̣ܵܐ: ܕܢܸܩܪܘܿܢ ܟܠܗܘܿܢ ܒܲܫܡܹܗ ܕܡܵܪܝܵܐ: ܘܢܸܦܠܚܘܼܢܹܗ ܒܢܝܼܪܵܐ ܚܲܕ݂.
10: ܡ̣ܢ ܥܒ̣ܵܪ ܢܲܗܪ̈ܵܘܵܬ̣ܵܐ ܕܟ݂ܘܼܫ ܢܲܝܬ̇ܘܿܢ ܠܝܼ ܕܸܒ̣ܚܹ̈ܐ: ܒܝܵܘܡܵܐ ܗܵܘܿ.
11: ܠܵܐ ܬܸܒ̣ܗ̱ܬ̣ܝܼܢ ܡ̣ܢ ܟܠܗܹܝܢ ܨܸܢ̈ܥܵܬܹܟ݂ܝ ܕܐܲܥܠܝܼܬ̇ܝ ܒܝܼ: ܘܗܵܝܕܹ̇ܝܢ ܐܲܥܒܲܪ ܡܸܢܹܟ݂ܝ ܥܘܼܫܢܵܐ ܕܓܲܐܝܘܼܬܹܟ݂ܝ: ܘܠܵܐ ܬܵܘܣܦܝܼܢ ܬܘܼܒ̣ ܠܡܸܬ̣ܪܵܘܪܵܒ̣ܘܼ ܥܲܠ ܛܘܼܪܵܐ ܕܩܘܼܕ݂ܫܝ.
12: ܘܐܵܘܬܲܪ ܒܓ̣ܵܘܹܟ݂ܝ ܥܲܡܵܐ ܡܸܣܟܹ̇ܢܵܐ ܘܡܲܟ̇ܝܼܟ݂ܵܐ: ܘܲܢܣܲܒ̇ܪܘܼܢ ܒܲܫܡܹܗ ܕܡܵܪܝܵܐ.
13: ܘܐܲܝܠܹܝܢ ܕܐܸܫܬ̇ܚܲܪܘ ܡ̣ܢ ܒܹܝܬ̣ ܝܑܼܣܪܵܝܹܠ: ܠܵܐ ܢܸܥܒ̇ܕ݂ܘܼܢ ܥܵܘܼܠܵܐ: ܘܠܵܐ ܢܡܲܠܠܘܼܢ ܕܲܓܵܠܘܼܬ̣ܵܐ: ܘܠܵܐ ܢܸܫܬ̇ܟܲܚ ܒܦܘܼܡܗܘܿܢ ܠܸܫܵܢܵܐ ܕܢܸܟ݂ܠܵܐ: ܡܸܛܠ ܕܗܸܢ̣ܘܿܢ ܢܸܪܥܘܿܢ ܘܢܸܪܒ̇ܥܘܼܢ: ܘܠܵܐ ܢܸܗܘܹܐ ܠܗܘܿܢ ܡܲܗܪܵܢܵܐ.
14: ܫܲܒܲܚܝ ܒܲܪܬ̣ ܨܸܗܝܘܿܢ: ܘܝܲܒܸ̇ܒ̣ ܝܑܼܣܪܵܝܹܠ: ܚܕ݂ܵܝ ܘܕ݂ܘܼܨܝ ܒܟ݂ܠܹܗ ܠܸܒܹ̇ܟ݂ܝ ܒܲܪܬ̣ ܐܘܿܪܸܫܠܸܡ.
15: ܐܲܥܒܲܪ ܡܵܪܝܵܐ ܕܝܼܢܲܝ̈ܟ̇ܝ: ܘܐܲܦܪܸܩ ܡܸܢܹܟ݂ܝ ܒܥܸܠܕ̇ܒ̣ܵܒܲܝ̈ܟ̇ܝ ܡܲܠܟܹ̇ܗ ܕܝܼܣܪܵܝܹܠ: ܡܵܪܝܵܐ ܒܓ̣ܵܘܹܟ݂ܝ ܬܘܼܒ̣ ܠܵܐ ܬܸܚܙܹܝܢ ܒܝܼܫܬܵܐ.
16: ܒܹܗ ܒܝܵܘܡܵܐ ܗܵܘܿ: ܢܸܬ̣ܐ̱ܡܲܪ ܠܐܘܿܪܸܫܠܸܡ ܠܵܐ ܬܸܕ݂ܚ̄ܠܝܼܢ: ܘܲܠܨܸܗܝܘܿܢ ܠܵܐ ܢܸܬ̣ܪ̈ܲܦܝܵܢ ܐܝܼܕܲܝ̈ܟ̇ܝ.
17: ܡܵܪܝܵܐ ܐܲܠܵܗܹܟ݂ܝ ܒܓ̣ܵܘܹܟ݂ܝ: ܓܲܢ̄ܒܵܪܵܐ ܘܦܵܪܘܿܩܵܐ: ܢܒܲܣܡܹܟ݂ܝ ܒܚܲܕ݂ܘܼܬ̣ܵܐ ܘܲܢܚܲܕ̇ܬܹܟ݂ܝ ܒܚܘܼܒܹ̇ܗ: ܘܲܢܕܲܝܨܹܟ݂ܝ ܒܬܸܫܒ̇ܘܿܚܬܵܐ ܐܲܝܟ݂ ܕܲܒ̣ܝܵܘܡܵܐ ܕܥܲܕ݂ܥܸܕ݂ܵܐ.
18: ܘܐܲܥܒܲܪ ܡܸܢܹܟ݂ܝ ܐܲܝܠܹܝܢ ܕܲܡܡܲܠܠܝܼܢ ܗ̄ܘܼܵܘ ܥܠܲܝܟ̇ܝ ܚܸܣܕܵܐ.
19: ܗܵܐ ܥܵܒܹ̇ܕ݂ ܐ̄ܢܵܐ ܠܟ݂ܠܗܘܿܢ: ܟܲܕ݂ ܡܡܲܟ̇ܟ݂ܝܼܢ ܒܓܵܘܹܟ݂ܝ ܒܙܲܒ̣ܢܵܐ ܗܵܘܿ: ܘܐܸܦܪܘܿܩ ܠܲܟ݂ܒ̣ܝܼܫܬܵܐ: ܘܲܠܪܲܚ̣ܝܼܩܬܵܐ ܐܹܟܲܢܸܫ: ܘܐܸܥܒܸ̇ܕ݂ ܐܸܢܘܿܢ ܠܲܫܡܵܐ ܘܲܠܬܸܫܒ̇ܘܿܚܬܵܐ ܒܟ݂ܠܵܗ̇ ܐܲܪܥܵܐ ܕܒܸܗܬܲܬ̣ܗܘܿܢ.
20: ܒܹܗ ܒܙܲܒ̣ܢܵܐ ܗܵܘܿ ܐܲܝܬܹ̇ܿܝܟ݂ܘܿܢ: ܘܒܹܗ ܒܙܲܒ̣ܢܵܐ ܗܵܘܿ ܐܹܟܲܢܸܫܟ݂ܘܿܢ: ܘܐܸܬܸ̇ܠܟ݂ܘܿܢ ܠܲܫܡܵܐ ܘܲܠܬܸܫܒ̇ܘܿܚܬܵܐ ܒܟ݂ܠܗܘܿܢ ܥܲܡܡܹ̈ܐ ܕܐܲܪܥܵܐ: ܡܵܐ ܕܡܲܗܦܸܟ݂ ܐ̄ܢܵܐ ܫܒ̣ܝܼܬ̣ܟ݂ܘܿܢ ܠܥܹܢܲܝܗܘܿܢ ܐܵܡܲܪ ܡܵܪܝܵܐ.