ܟܬܒ݂ܐ ܕܙܟ݂ܪܝܐ
ܩܹܦܵܠܹܐܘܿܢ: ܐ.
1: ܒܝܲܪܚܵܐ ܕܲܬ̣ܡܵܢܝܵܐ ܒܚܲܕ݂ ܒܝܲܪܚܵܐ: ܒܲܫܢܲܬ̣ ܬܲܪܬܹ̇ܝܢ ܕܕܲܪܝܵܘܵܫ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܟܲܪܝܵܐ ܒܲܪ ܒܪܲܟ݂ܝܵܐ: ܒܲܪ ܥܲܕ̇ܘܿ ܢܒ̣ܝܼܵܐ ܠܡܹܐܡܲܪ.
2: ܪܓܸܙ ܡܵܪܝܵܐ ܥܲܠ ܐܲܒ̣ܵܗܲܝ̈ܟ̇ܘܿܢ ܪܘܼܓ̣ܙܵܐ ܪܲܒܵܐ.
3: ܐܸܡܲܪ ܠܗܘܿܢ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܸܬ̣ܦܢܵܘ ܠܘܵܬ̣ܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܐܸܬ̣ܦܢܸܐ ܥܠܲܝܟ̇ܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
4: ܘܠܵܐ ܬܸܗܘܘܿܢ ܐܲܝܟ݂ ܐܲܒ̣ܵܗܲܝ̈ܟ̇ܘܿܢ: ܕܐܲܟ݂ܪܸܙܘ ܥܠܲܝܗܘܿܢ ܢܒ̣̈ܝܹܐ ܩܲܕ݂ܡܵܝܹ̈ܐ ܘܐܸܡܲܪܘ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܸܬ̣ܦܢܵܘ ܡ̣ܢ ܐܘܼܪ̈ܚܵܬ̣ܟ݂ܘܿܢ ܒܝܼ̈ܫܵܬ̣ܵܐ: ܘܡ̣ܢ ܥܒ̣ܵܕܲܝ̈ܟ̇ܘܿܢ ܒܝܼܫܹ̈ܐ: ܘܠܵܐ ܫ̣ܡܲܥܘ ܘܠܵܐ ܨܵܬ̣ܘܼܢܝ ܐܵܡܲܪ ܡܵܪܝܵܐ.
5: ܐܲܝܟܵܐ ܐܸܢܘܿܢ ܐܲܒ̣ܵܗܲܝ̈ܟ̇ܘܿܢ ܘܲܢܒ̣̈ܝܲܝ ܕܲܠܡܵܐ ܠܥܵܠܲܡ ܚܲܝܝܼܢ.
6: ܠܦܸܬ̣ܓ̣ܵܡܲܝ̈ ܕܹܝܢ ܘܲܠܦܘܼܩ̈ܕܵܢܲܝ ܕܦܲܩ̇ܕܹܬ̣ ܠܥܲܒ̣ܕܲܝ̈ ܢܒ̣̈ܝܹܐ: ܐܸܬ̇ܕܲܟܲܪܘ ܐܸܢܘܿܢ ܐܲܒ̣ܵܗܲܝ̈ܟ̇ܘܿܢ ܘܐܸܬ̣ܪܲܥܝܼܘ: ܘܐܸܡܲܪܘ: ܐܲܝܟ݂ ܕܐܸܬ̣ܪܲܥܝܼ ܡܵܪܝܵܐ ܚܲܝܠܬ̣ܵܢܵܐ ܠܡܸܥܒܲܕ݂ ܠܲܢ: ܐܲܝܟ݂ ܐܘܼܪ̈ܚܵܬܲܢ ܘܐܲܝܟ݂ ܨܸܢ̈ܥܵܬܲܢ ܗܵܟܲܢܵܐ ܥ̣ܒܲܕ݂ ܠܲܢ.
7: ܒܝܘܿܡ ܐܲܪܒ̇ܥܵܐ ܘܥܸܣܪܝܼܢ ܒܝܲܪܚܵܐ ܕܲܚܕܲܥܣܲܪ ܕܗ̤ܘ ܫܒܲܛ: ܒܲܫܢܲܬ̣ ܬܲܪܬܹ̇ܝܢ ܕܕܲܪܝܵܘܵܫ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܟܲܪܝܵܐ ܒܲܪ ܒܪܲܟ݂ܝܵܐ: ܒܲܪ ܥܲܕ̇ܘܿ ܢܒ̣ܝܼܵܐ ܠܡܹܐܡܲܪ.
8: ܚܙܹ̇ܝܬ̣ ܒܠܸܠܝܵܐ ܓܲܒ̣ܪܵܐ ܕܲܪܟ݂ܝܼܒ̣ ܥܲܠ ܣܘܼܣܝܵܐ ܣܘܼܡܵܩܵܐ: ܘܩܵܐܹ̇ܡ ܒܲܝܢܵܬ̣ ܐܝܼܠܵܢܹ̈ܐ ܕܡܲܛܠܠܝܼܢ: ܘܒ̣ܵܬ̣ܪܹܗ ܪ̈ܲܟ݂ܫܵܐ ܣܘܼܡܵܩܹ̈ܐ: ܘܦܲܝܣ̈ܟ݂ܵܝܹܐ: ܘܚܸܘܵܪܹ̈ܐ.
9: ܘܐܸܡ̇ܪܹܬ̣ ܡܵܢܵܐ ܐܸܢܘܿܢ ܗܵܠܹܝܢ ܡܵܪܝ: ܘܲܥܢ̣ܵܐ ܡܲܠܲܐܟ݂ܵܐ ܕܲܡܡܲܠܸܠ ܒܝܼ ܘܐܸܡܲܪ ܠܝܼ: ܐܸܢܵܐ ܐܹܚܵܘܹܝܟ݂ ܡܵܢܵܐ ܐܸܢܘܿܢ ܗܵܠܹܝܢ.
10: ܥܢ̣ܵܐ ܓܲܒ̣ܪܵܐ ܕܩܵܐܹ̇ܡ ܒܲܝܢܵܬ̣ ܐܝܼܠܵܢܹ̈ܐ: ܘܐܸܡܲܪ ܠܝܼ: ܗܵܠܹܝܢ ܐܸܢܘܿܢ ܕܫܲܕܲܪ ܡܵܪܝܵܐ ܠܲܡܗܲܠܵܟ݂ܘܼ ܒܐܲܪܥܵܐ.
11: ܘܲܥܢ̣ܵܘ ܘܐܸܡܲܪܘ ܠܡܲܠܲܐܟܹܗ ܕܡܵܪܝܵܐ ܕܩܵܐܹ̇ܡ ܒܲܝܢܵܬ̣ ܐܝܼܠܵܢܹ̈ܐ: ܗܲܠܸܝܼܢ ܒܐܲܪܥܵܐ: ܘܟ݂ܠܵܗ̇ ܐܲܪܥܵܐ ܝܵܬ̣ܒܵܐ ܘܫܲܠܝܵܐ.
12: ܘܲܥܢ̣ܵܐ ܡܲܠܲܐܟܹܗ ܕܡܵܪܝܵܐ: ܘܐܸܡܲܪ: ܡܵܪܝܵܐ ܚܲܝܠܬ̣ܵܢܵܐ: ܥܲܕ݂ ܐܸܡܲܬ̣ܝ ܠܵܐ ܡܪܲܚܸܡ ܐܲܢ̄ܬ̇ ܥܲܠ ܐܘܿܪܸܫܠܸܡ: ܘܥܲܠ ܡܕ݂ܝܼ̈ܢܵܬ̣ܵܐ ܕܲܝܗܘܼܕ݂ܵܐ ܕܲܪܓܸܙܬ̇ ܥܠܲܝܗܹܝܢ ܗܵܐ ܫܲܒ̣ܥܝܼܢ ܫܢ̈ܝܼܢ.
13: ܘܲܥ̣ܢܵܐ ܡܵܪܝܵܐ ܠܡܲܠܲܐܟ݂ܵܐ ܕܲܡܡܲܠܸܠ ܒܝܼ ܡܸܠܹ̈ܐ ܫܲܦܝܼܪ̈ܵܬ̣ܵܐ: ܘܦܸܬ̣ܓ̣ܵܡܹ̈ܐ ܕܒ̣ܘܼܝܵܐܵܐ.
14: ܘܐܸܡܲܪ ܠܝܼ ܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܐܲܟ݂ܪܸܙ ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܛܸܢܹ̇ܬ̣ ܒܐܘܿܪܸܫܠܸܡ ܘܲܒ̣ܨܸܗܝܘܿܢ ܛܢܵܢܵܐ ܪܲܒܵܐ.
15: ܘܪܘܼܓ̣ܙܵܐ ܪܲܒܵܐ ܪܵܓܹ̇ܙ ܐ̄ܢܵܐ ܥܲܠ ܥܲܡܡܹ̈ܐ ܕܡܸܬ̣ܪܲܓ̣ܫܝܼܢ: ܐܸܢܵܐ ܓܹܝܪ ܪܸܓ̣ܙܹ̇ܬ̣ ܩܲܠܝܼܠ: ܘܗܸܢ̣ܘܿܢ ܥܲܕܲܪܘ ܠܒ̣ܝܼܫܬܵܐ.
16: ܡܸܛܠ ܗܵܠܹܝܢ ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܸܬ̣ܦܢܝܼܬ̣ ܥܲܠ ܐܘܿܪܸܫܠܸܡ ܒܪ̈ܲܚܡܝܼܢ: ܘܒܲܝܬ̇ܝ ܝܵܗܹ̇ܒ̣ ܐ̄ܢܵܐ ܒܓ̣ܵܘܵܗ̇ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܲܫܘܵܝܬܵܐ ܬܸܬ̣ܡ̱ܬܲܚ ܥܲܠ ܐܘܿܪܸܫܠܸܡ.
17: ܬܘܼܒ̣ ܐܲܟ݂ܪܸܙ: ܘܐܸܡܲܪ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܡܸܟܹ̇ܝܠ ܢܸܣܬܲܪ̈ܩܵܢ ܡܕ݂ܝܼܢ̄ܬܵܐ ܡ̣ܢ ܛܵܒ̣ܵـ̈ـܬ̣ܵܐ: ܘܢܸܒ̣ܢܸܐ ܬܘܼܒ̣ ܡܵܪܝܵܐ ܠܨܸܗܝܘܿܢ: ܘܢܸܓ̣ܒܸ̇ܐ ܬܘܼܒ̣ ܠܐܘܿܪܸܫܠܸܡ.
18: ܘܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣ ܘܗܵܐ ܐܲܪܒܲܥ ܩܲܪ̈ܢܵܢ.
19: ܘܐܸܡ̇ܪܹܬ̣ ܠܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܡܵܢܵܐ ܐܸܢܹܝܢ ܗܵܠܹܝܢ ܡܵܪܝ: ܘܐܸܡ̣ܲܪ ܠܝܼ ܗܵܠܹܝܢ ܐܸܢܹܝܢ ܩܲܪ̈ܢܵܬ̣ܵܐ ܕܒܲܕܲܪ ܠܲܝܗܘܼܕ݂ܵܐ ܘܠܝܼܣܪܵܝܹܠ ܘܠܐܘܿܪܸܫܠܸܡ.
20: ܘܚܵܘܝܲܢܝ ܡܵܪܝܵܐ ܐܲܪܒ̇ܥܵܐ ܢܲܓ̇ܪܹ̈ܐ.
21: ܘܐܸܡ̇ܪܹܬ̣ ܡܵܢܵܐ ܐܵܬܹ̇ܝܢ ܗܵܠܹܝܢ ܠܡܸܥܒܲܕ݂: ܘܐܸܡܲܪ ܠܝܼ ܗܵܠܹܝܢ ܩܲܪ̈ܢܵܬ̣ܵܐ ܕܒܲܕܲܪ ܠܲܝܗܘܼܕ݂ܵܐ: ܐܲܝܟ݂ ܦܘܼܡܹܗ ܕܓܲܒ̣ܪܵܐ ܕܠܵܐ ܐܲܪܝܼܡ ܪܹܫܹܗ: ܘܐܸܬ̣ܵܘ ܗܵܠܹܝܢ ܕܲܢܙܝܼܥܘܼܢ ܐܸܢܹܝܢ: ܘܢܸܥ̄ܩܪܘܼܢ ܩܲܪ̈ܢܵܬ̣ܵܐ ܕܥܲܡܡܹ̈ܐ: ܕܲܡܪܝܼܡܝܼܢ ܗ̄ܘܼܵܘ ܩܲܪܢܵܐ ܥܲܠ ܐܲܪܥܵܐ ܕܲܝܗܘܼܕ݂ܵܐ ܠܲܡܒܲܕܵܪܘܼܬ̣ܵܗ̇.
ܩܹܦܵܠܹܐܘܿܢ: ܒ.
1: ܘܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣ ܓܲܒ̣ܪܵܐ: ܘܒ̣ܐܝܼܕܹܗ ܫܘܵܝܬܵܐ ܕܲܡܫܘܼܚܬ̣ܵܐ.
2: ܘܐܸܡ̇ܪܹܬ̣ ܠܹܗ ܠܐܲܝܟܵܐ ܐܵܙܸ̇ܠ ܐܲܢ̄ܬ̇: ܘܐܸܡܲܪ ܠܝܼ ܕܐܸܡܫ̄ܚܝܼܗ̇ ܠܐܘܿܪܸܫܠܸܡ: ܘܐܸܚܙܹܐ ܟܡܵܐ ܐܘܼܪܟܵܗ̇: ܘܲܟ݂ܡܵܐ ܦܬ̣ܵܝܵܗ̇.
3: ܘܲܢܦܲܩ̣ ܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܘܡܲܠܲܐܟ݂ܵܐ ܐ̄ܚܪܹܢܵܐ ܐܸܬ̣ܵܐ ܠܐܘܼܪܥܹܗ.
4: ܘܐܸܡܲܪ ܠܹܗ: ܗܲܪ̄ܛ ܘܐܸܡܲܪ ܠܲܥܠܲܝܡܵܐ ܗܵܘܿ: ܐܵܓ̣ܘܼܪ̈ܣܹܐ ܬܸܬܸ̇ܒ̣ ܐܘܼܪܸܫܠܸܡ: ܡ̣ܢ ܣܘܿܓ̣ܵܐܐ ܕܲܒ̣ܢܲܝ̈ܢܵܫܵܐ ܘܕܲܒ̣ܥܝܼܪܵܐ ܕܲܒ̣ܓܵܘܵܗ̇.
5: ܘܐܸܢܵܐ ܐܸܗܘܹܐ ܒܓ̣ܵܘܵܗ̇ ܐܵܡܲܪ ܡܵܪܝܵܐ ܐܲܝܟ݂ ܫܘܼܪܵܐ ܕܢܘܼܪܵܐ: ܘܲܠܬܸܫܒ̇ܘܿܚܬܵܐ ܐܸܗܘܹܐ ܒܓ̣ܵܘܵܗ̇.
6: ܐܘܿ ܐܘܿ ܥܪܘܿܩܘ ܡ̣ܢ ܐܲܪܥܵܐ ܕܓܲܪܒ̇ܝܵܐ ܐܵܡܲܪ ܡܵܪܝܵܐ: ܡܸܛܠ ܕܠܲܐܪܒܲܥ ܪ̈ܘܼܚܲܝ ܫܡܲܝܵܐ ܒܲܕܲܪܬ̇ܟ݂ܘܿܢ ܐܵܡܲܪ ܡܵܪܝܵܐ.
7: ܐܘܿ ܨܸܗܝܘܿܢ ܐܸܫܬܵܘܙܲܒ̣ܝ: ܥܵܡܘܿܪܬܵܐ ܕܒܲܪܬ̣ ܒܵܒܹܠ.
8: ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܒܵܬܲܪ ܐܝܼܩܵܪܵܐ ܫܲܕ̇ܪܲܢܝ ܥܲܠ ܥܲܡܡܹ̈ܐ ܕܒ̣ܵܙܝܼܢ ܠܟ݂ܘܿܢ: ܘܡܲܢ ܕܩܵܪܹܒ̣ ܠܟ݂ܘܿܢ ܠܒ̣ܵܒ̣ܬ̣ܵܐ ܗ̄ܘܼ ܕܥܲܝܢܹܗ ܩܵܪܸܒ̣.
9: ܡܸܛܠ ܕܗܵܐ ܐܸܢܵܐ ܡܪܝܼܡ ܐ̄ܢܵܐ ܐܝܼܕ݂ܝ ܥܠܲܝܗܘܿܢ: ܘܢܸܗܘܘܿܢ ܠܒܸܙܬ̣ܵܐ ܥܒ̣ܵܕܲܝ̈ܗܘܿܢ: ܘܬܸܕ̇ܥܘܼܢ ܕܡܵܪܝܵܐ ܚܲܝܠܬ̣ܵܢܵܐ ܫܲܕ̇ܪܲܢܝ.
10: ܫܲܒܲܚܝ ܘܲܚܕ݂ܵܝ ܒܲܪܬ̣ ܨܸܗܝܘܿܢ: ܡܸܛܠ ܕܗܵܐ ܐܸܢܵܐ ܐܵܬܹ̇ܐ ܐ̄ܢܵܐ: ܘܫܵܪܸܐ ܐ̄ܢܵܐ ܒܓ̣ܵܘܹܟ݂ܝ ܐܵܡܲܪ ܡܵܪܝܵܐ.
11: ܘܢܸܬ̣ܠܵܘܘܿܢ ܠܡܵܪܝܵܐ ܥܲܡܡܹ̈ܐ ܣܲܓ̇ܝܼ̈ܐܹܐ ܒܝܵܘܡܵܐ ܗܵܘܿ: ܘܢܸܗܘܘܿܢ ܠܹܗ ܥܲܡܵܐ: ܘܢܸܫܪܸܐ ܒܓ̣ܵܘܹܟ݂ܝ ܘܬܸܕ̇ܥܝܼܢ ܕܡܵܪܝܵܐ ܚܲܝܠܬ̣ܵܢܵܐ ܫܲܕ̇ܪܲܢܝ ܥܠܲܝܟ̇ܝ.
12: ܘܢܹܐܪܲܬ̣ ܡܵܪܝܵܐ ܠܲܝܗܘܼܕ݂ܵܐ ܡܢܵܬܹܗ ܥܲܠ ܐܲܪܥܵܐ ܕܩܘܼܕ݂ܫܹܗ: ܘܢܸܨܛܒܸܐ ܬܘܼܒ̣ ܒܐܘܿܪܸܫܠܸܡ.
13: ܘܢܸܕ݂ܚܲܠ ܟܠ ܒܣܲܪ ܡ̣ܢ ܩܕ݂ܵܡ ܡܵܪܝܵܐ: ܕܡܸܬ̇ܬ̇ܥܝܼܪ ܡ̣ܢ ܡܪܵܘܡܵܐ ܕܩܘܼܕ݂ܫܹܗ.
ܩܹܦܵܠܹܐܘܿܢ: ܓ.
1: ܘܚܵܘ̣ܝܲܢܝ ܠܝܼܫܘܿܥ ܟܵܗܢܵܐ ܪܲܒܵܐ: ܟܲܕ݂ ܩܵܐܹ̇ܡ ܩܕ݂ܵܡ ܡܲܠܲܐܟܹܗ ܕܡܵܪܝܵܐ: ܘܣܵܛܵܢܵܐ ܩܵܐܹ̇ܡ ܗ̄ܘܼܵܐ ܡ̣ܢ ܝܲܡܝܼܢܹܗ ܕܢܲܟܹ̇ܝܘܗܝ.
2: ܘܐܸܡ̣ܲܪ ܡܲܠܲܐܟܹܗ ܕܡܵܪܝܵܐ ܠܣܵܛܵܢܵܐ: ܣܵܛܵܢܵܐ: ܢܸܓ̣ܥܘܿܪ ܒܵܟ݂ ܡܵܪܝܵܐ: ܢܸܓ̣ܥܘܿܪ ܒܵܟ݂ ܡܵܪܝܵܐ ܕܲܓ̣ܒ̣ܵܗ̇ ܠܐܘܿܪܸܫܠܸܡ: ܗܵܢܵܘ ܐܘܼܕ݂ܵܐ ܕܐܸܬ̣ܦܲܠܲܛ ܡ̣ܢ ܢܘܼܪܵܐ.
3: ܘܝܼܫܘܿܥ ܠܒ̣ܝܼܫ ܗ̄ܘܼܵܐ ܡܵܐܢܹ̈ܐ ܨܵܐܹ̈ܐ: ܘܩܵܐܹ̇ܡ ܗ̄ܘܼܵܐ ܩܕ݂ܵܡ ܡܲܠܲܐܟܹܗ ܕܡܵܪܝܵܐ.
4: ܘܲܥ̣ܢܵܐ ܡܲܠܲܐܟ݂ܵܐ ܘܐܸܡ̣ܲܪ ܠܗܵܢ̇ܘܿܢ ܕܩܵܝܡ̇ܝܼܢ ܩܕ݂ܵܡܵܘܗܝ: ܐܲܥܒܲܪܘ ܡܸܢܹܗ ܡܵܐܢܹ̈ܐ ܨܵܐܹ̈ܐ: ܘܐܸܡܲܪ ܠܹܗ: ܚܙܝܼ ܕܐܲܥܒ̇ܪܹܬ̣ ܡܸܢܵܟ݂ ܥܵܘܼܠܵܟ݂: ܘܐܲܠܒܸ̇ܫ̇ܬܵܟ݂ ܡܵܐܢܹ̈ܐ ܛܵܒܹ̈ܐ.
5: ܘܐܸܡܲܪ ܢܣܝܼܡܘܼܢ ܟܠܝܼܠܵܐ ܕܲܟ݂ܝܵܐ ܒܪܹܫܹܗ: ܘܐܲܠܒ̇ܫܘܼܗܝ ܡܵܐܢܹ̈ܐ ܛܵܒܹ̈ܐ: ܘܡܲܠܲܐܟܹܗ ܕܡܵܪܝܵܐ ܩܵܐܹ̇ܡ.
6: ܘܐܲܣܗܸܕ݂ ܡܲܠܲܐܟܹܗ ܕܡܵܪܝܵܐ ܒܝܼܫܘܿܥ: ܘܐܸܡܲܪ.
7: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܸܢ ܒܐܘܼܪܚܝ ܬܹܐܙܲܠ ܘܦܘܼܩ̈ܕܵܢܲܝ ܬܸܛܲܪ: ܐܲܢ̄ܬ̇ ܬܕ݂ܘܼܢܝܼܘܗܝ ܠܒܲܝܬ̇ܝ ܘܬܸܛܲܪ ܕܵܟ̈ܬ̣ܝ: ܘܐܸܬܸ̇ܠ ܠܵܟ݂ ܕܲܡܗܲܠܟ݂ܝܼܢ ܒܲܝܢܵܬ̣ ܗܵܠܹܝܢ ܕܩܵܝ̇ܡܝܼܢ.
8: ܫܡܲܥ ܝܑܼܫܘܿܥ ܟܵܗܢܵܐ ܪܲܒܵܐ: ܐܲܢ̄ܬ̇ ܘܚܲܒ̣ܪ̈ܲܝܟ ܗܵܠܹܝܢ ܕܩܵܝ̇ܡܝܼܢ ܩܕ݂ܵܡܲܝܟ: ܡܸܛܠ ܕܓܲܒ̣ܪܹ̈ܐ ܐܲܢ̄ܬ̇ܘܿܢ ܕܬܸܕ݂ܡܘܼܪܬܵܐ: ܕܗܵܐ ܡܲܝܬܸ̇ܐ ܐ̄ܢܵܐ ܠܥܲܒ̣ܕ̇ܝ ܕܸܢܚܸܐ.
9: ܡܸܛܠ ܕܗܵܐ ܟܹܐܦܵܐ ܕܝܸܗ̄ܒܹ̇ܬ̣ ܩܕ݂ܵܡ ܝܑܼܫܘܿܥ: ܥܲܠ ܟܹܐܦܵܐ ܚܕ݂ܵܐ ܫܒܲܥ ܥܲܝܢܝܼ̈ܢ: ܗܵܐ ܦܵܬܲܚ ܐ̄ܢܵܐ ܬܲܪ̈ܥܹܝܗ̇ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܐܹܡܘܼܫ ܥܵܘܼܠܵܗ̇ ܕܐܲܪܥܵܐ ܗܵܝ̇ ܒܝܵܘܡܵܐ ܗܵܘܿ.
10: ܒܹܗ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܬܸܩܪܘܿܢ ܐ̄ܢܵܫ ܠܚܲܒ̣ܪܹܗ ܬܚܹܝܬ̣ ܓܦܸܬܵܐ ܘܲܬ̣ܚܹܝܬ̣ ܬܹܬܵܐ.
ܩܹܦܵܠܹܐܘܿܢ: ܕ.
1: ܘܲܗܦܲܟ݂ ܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܘܐܲܥܝܼܪܲܢܝ ܐܲܝܟ݂ ܓܲܒ̣ܪܵܐ ܕܡܸܬ̇ܬ̇ܥܝܼܪ ܡ̣ܢ ܫܸܢܬܹܗ.
2: ܘܐܸܡܲܪ ܠܝܼ ܡܵܢܵܐ ܚ̣ܙܲܝܬ̇: ܘܐܸܡ̇ܪܹܬ̣ ܚ̇ܙܹܝܬ̣ ܡܢܵܪܬܵܐ ܕܕܲܗܒ̣ܵܐ: ܘܟܲܦܬ̣ܵܐ ܥܲܠ ܪܹܫܵܗ̇: ܘܫܲܒ̣ܥܵܐ ܫܪ̈ܵܓ̣ܝܼܢ ܥܠܹܝܗ̇: ܘܫܲܒ̣ܥܵܐ ܫܲܒ̣ܥܵܐ ܦܘܼܡ̈ܝܼܢ ܠܲܫܪܵܓ̣ܵܐ ܕܐܝܼܬ̣ ܒܪܹܫܵܗ̇.
3: ܘܲܬ̣ܪܹܝܢ ܙܲܝܬ̇ܝܼ̈ܢ ܐܝܼܬ̣ ܥܠܹܝܗ̇: ܚܲܕ݂ ܡ̣ܢ ܝܲܡܝܼܢܵܗ̇ ܕܟܲܦܬ̣ܵܐ ܘܚܲܕ݂ ܡ̣ܢ ܣܸܡܵܠܵܗ̇.
4: ܘܲܥܢܹ̇ܝܬ̣ ܘܐܸܡ̇ܪܹܬ̣ ܠܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܡܵܢܵܐ ܐܸܢܘܿܢ ܗܵܠܹܝܢ ܡܵܪܝ.
5: ܥܢ̣ܵܐ ܡܲܠܲܐܟ݂ܵܐ ܕܲܡܡܲܠܸܠ ܒܝܼ ܘܐܸܡ̣ܲܪ ܠܝܼ: ܠܵܐ ܝܵܕܲܥ ܐܲܢ̄ܬ̇ ܡܵܢܵܐ ܐܸܢܘܿܢ ܗܵܠܹܝܢ: ܘܐܸܡ̇ܪܹܬ̣ ܠܵܐ ܝܵܕܲܥ ܐ̄ܢܵܐ ܡܵܪܝ.
6: ܘܐܸܡ̣ܲܪ ܠܝܼ: ܗܵܢܵܘ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܘܼܪܒܵܒܹܠ: ܠܵܐ ܒܚܲܝܠܵܐ ܘܠܵܐ ܒܥܘܼܫܢܵܐ: ܐܸܠܵܐ ܐܸܢ ܒܪܘܼܚ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
7: ܡܵܢܵܐ ܐܲܢ̄ܬ̇ ܛܘܼܪܵܐ ܪܲܒܵܐ ܩܕ݂ܵܡ ܙܘܼܪܒܵܒܹܠ: ܐܸܠܵܐ ܐܲܝܟ݂ ܦܩܲܥܬ̣ܵܐ: ܘܐܲܦܸܩ ܠܟܹܐܦܵܐ ܪܹܫܵܝܬܵܐ ܕܫܲܘܝܘܼܬ̣ܵܐ ܘܲܕ݂ܪ̈ܲܚܡܹܐ.
8: ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.
9: ܐܝܼܕ݂ܵܘ̈ܗܝ ܕܙܘܼܪܒܵܒܹܠ ܣܵܡ̣ ܫܲܬ̣ܐ̱ܣܵܘ̈ܗܝ ܕܒܲܝܬܵܐ ܗܵܢܵܐ: ܘܐܝܼܕ݂ܵܘ̈ܗܝ ܡܫܲܠ̈ܡܵܢ ܠܹܗ: ܘܬܸܕ̇ܥܘܼܢ ܕܡܵܪܝܵܐ ܚܲܝܠܬ̣ܵܢܵܐ ܫܲܕ̇ܪܲܢܝ ܠܘܵܬ̣ܟ݂ܘܿܢ.
10: ܡܸܛܠ ܕܡܲܢ̣ܘܼ ܫܵܐܹ̇ܛ ܠܝܵܘ̈ܡܵܬ̣ܵܐ ܙܥܘܿܪܹ̈ܐ: ܘܲܢܚܘܼܪܘܼܢ ܘܢܸܚܙܘܿܢ ܠܟܹܐܦܵܐ ܕܦܘܼܪܫܵܢܵܐ ܒܐܝܼܕ݂ܵܘ̈ܗܝ: ܕܙܘܼܪܒܵܒܹܠ: ܗܵܠܹܝܢ ܐܸܢܹܝܢ ܫܒܲܥ ܥܲܝܢܵܘ̈ܗܝ ܕܡܵܪܝܵܐ ܕܚܵܝܪ̈ܵܢ ܒܟ݂ܠܵܗ̇ ܐܲܪܥܵܐ.
11: ܥ̇ܢܹܝܬ̣ ܘܐܸܡ̇ܪܹܬ̣ ܠܹܗ: ܘܡܵܢܵܐ ܐܸܢܘܿܢ ܗܵܠܹܝܢ ܬܪܹܝܢ ܙܲܝܬ̇ܝܼ̈ܢ: ܕܡ̣ܢ ܝܲܡܝܼܢܵܗ̇ ܕܟܲܦܬ̣ܵܐ ܘܡ̣ܢ ܣܡܵܠܵܗ̇.
12: ܥܢܹ̇ܝܬ̣ ܕܬܲܪܬܹ̇ܝܢ ܙܲܒ̣ܢ̈ܝܼܢ ܘܐܸܡ̇ܪܹܬ̣ ܠܹܗ: ܘܡܵܢܵܐ ܐܸܢܹܝܢ ܗܵܠܹܝܢ ܬܲܧܬܹ̇ܝܢ ܣܵܘ̈ܟܹ̇ܐ ܕܙܲܝܬܵܐ: ܕܒܲܝܢܵܬ̣ ܬܪܹܝܢ ܢܚܝܼܪ̈ܝܼܢ ܕܕܲܗܒ̣ܵܐ: ܕܢܵܣܟ̇ܝܼܢ ܡܸܢܗܘܿܢ ܕܲܗܒ̣ܵܐ.
13: ܘܐܸܡܲܪ ܠܝܼ: ܝܵܕܲܥ ܐܲܢ̄ܬ̇ ܡܵܢܵܐ ܐܸܢܘܿܢ ܗܵܠܹܝܢ: ܘܐܸܡ̇ܪܹܬ̣ ܠܵܐ ܡܵܪܝ.
14: ܘܐܸܡܲܪ ܠܝܼ ܗܵܠܹܝܢ ܐܸܢܘܿܢ ܬܪܹܝܢ ܒܢܲܝ̈ ܕܘܼܗܵܢܵܐ: ܕܩܵܝ̇ܡܝܼܢ ܩܕ݂ܵܡ ܡܵܪܵܐ ܕܟ݂ܠܵܗ̇ ܐܲܪܥܵܐ.
ܩܹܦܵܠܹܐܘܿܢ: ܗ.
1: ܘܗܸܦܟܹ̇ܬ̣ ܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣ ܡܲܓܲܠܬ̣ܵܐ ܕܦܵܪܚܵܐ.
2: ܘܐܸܡܲܪ ܠܝܼ ܡܵܢܵܐ ܚ̣ܙܲܝܬ̇: ܘܐܸܡ̇ܪܹܬ̣ ܚܙܹ̇ܝܬ̣ ܡܓܲܠܬ̣ܵܐ ܕܦܵܪܚܵܐ: ܐܘܼܪܟܵܗ̇ ܥܸܣܪܝܼܢ ܐܲܡ̈ܝܼܢ: ܘܲܦܬ̣ܵܝܵܗ̇ ܥܣܲܪ ܐܵܡ̈ܝܼܢ.
3: ܘܐܸܡܲܪ ܠܝܼ: ܗܵܕܹ̇ܐ ܗ̄ܝܼ ܠܵܘܛܬ̣ܵܐ ܕܢܵܦ̇ܩܵܐ ܥܲܠ ܐܲܦܹܝ̈ܗ̇ ܕܟ݂ܠܵܗ̇ ܐܲܪܥܵܐ: ܡܸܛܠ ܕܟ݂ܠ ܕܓܵܢܹ̇ܒ̣: ܡܸܢܵܗ̇ ܐܲܟ݂ܘܵܬ̣ܵܗ̇ ܙܵܟܸ̇ܐ: ܘܟ݂ܠ ܕܝܵܡܹܐ: ܡܸܢܵܗ̇ ܐܲܟ݂ܘܵܬ̣ܵܗ̇ ܙܵܟܹ̇ܐ.
4: ܐܲܦܸܩܹܝܗ̇ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܕܬܸܥܘܿܠ ܠܒܲܝܬܹ̇ܗ ܕܓܲܢܵܒ̣ܵܐ: ܘܲܠܒܲܝܬܹ̇ܗ ܕܟ݂ܠ ܕܝܵܡܹ̇ܐ ܒܫܹܡܝ ܒܟܲܕܵܒ̣ܘܼܬ̣ܵܐ: ܘܬܸܫܪܸܐ ܒܓ̣ܵܘ ܒܲܝܬܹ̇ܗ: ܘܲܬ̣ܓܲܡܲܪ ܠܩܲܝܣܵܘ̈ܗܝ ܘܲܠܟܹܐܦܵܘ̈ܗܝ.
5: ܘܲܢܦܲܩ̣ ܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܘܐܸܡܲܪ ܠܝܼ: ܐܲܪܝܼܡ ܥܲܝܢܲܝ̈ܟ ܘܲܚܙܝܼ ܡܵܢܲܐ ܗ̄ܝܼ ܗܵܕܹܐ ܕܢܵܦ̇ܩܵܐ.
6: ܘܐܸܡ̇ܪܹܬ̣ ܡܵܢܲܐ ܗ̄ܝܼ: ܘܐܸܡܲܪ ܠܝܼ: ܗܵܕܲܐ ܗ̄ܝܼ ܟܝܵܠܬܵܐ ܕܢܵܦ̇ܩܵܐ: ܘܒ̣ܵܗ̇ ܐܸܢܘܿܢ ܚܵܘ̈ܒܹ̇ܐ ܕܟ݂ܠܵܗ̇ ܐܲܪܥܵܐ.
7: ܘܗܵܐ ܟܲܟ̇ܪܵܐ ܕܐܲܒ̣ܵܪܵܐ ܐܸܫܬܲܩܠܲܬ̤: ܘܐܲܢ̄ܬ̇ܬ̣ܵܐ ܚܕ݂ܵܐ ܝܵܬ̣ܒܵܐ ܗ̄ܘܼܵܬ̣ ܒܓ̣ܵܘ ܟܝܵܠܬܵܐ.
8: ܘܐܸܡܲܪ ܠܝܼ: ܗܵܕܲܐ ܗ̄ܝܼ ܚܛܝܼܬ̣ܵܐ: ܘܐܲܪܡܝܵܗ̇ ܒܓ̣ܵܘ ܟܝܵܠܬܵܐ: ܘܐܲܪܡܝܼ ܟܲܟ̇ܪܵܐ ܕܐܲܒ̣ܵܪܵܐ ܥܲܠ ܦܘܼܡܵܗ̇.
9: ܘܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣: ܘܗܵܐ ܬܲܪܬܹ̇ܝܢ ܢܸܫܝܼ̈ܢ ܢܵܦ̈ܩܵܢ ܘܪܘܼܚܵܐ ܒܟܸܢܦܲܝ̈ܗܹܝܢ: ܘܟܸܢܦܹ̈ܐ ܐܝܼܬ̣ ܠܗܹܝܢ ܐܲܝܟ݂ ܟܸܢܦܹ̈ܐ ܕܚܘܿܪܒ̣ܵܐ: ܘܫܲܩ̣ܠܵܗ̇ ܠܲܟ݂ܝܵܠܬܵܐ ܒܹܝܬ̣ ܐܲܪܥܵܐ ܠܲܫܡܲܝܵܐ.
10: ܘܐܸܡ̇ܪܹܬ̣ ܠܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܠܐܲܝܟܵܐ ܡܵܘ̈ܒ̇ܠܵܢ ܠܵܗ̇ ܠܲܟ݂ܝܵܠܬܵܐ.
11: ܘܐܸܡ̣ܲܪ ܠܝܼ: ܕܢܸܒ̣ܢ̈ܝܵܢ ܠܵܗ̇ ܒܲܝܬܵܐ ܒܐܲܪܥܵܐ ܕܒ̣ܵܒܹܠ: ܘܢܸܬ̣ܩ̈ܢܵܢܵܗ̇ ܘܢܲܫ̱ܪ̈ܝܵܢܵܗ̇ ܬܲܡܵܢ ܥܲܠ ܡܲܬ̣ܩܢܵܗ̇.
ܩܹܦܵܠܹܐܘܿܢ: ܘ.
1: ܘܗܸܦܟܹ̇ܬ̣ ܐܲܪܝܼܡܹ̇ܬ̣ ܥܲܝܢܲܝ̈ ܘܲܚܙܹ̇ܝܬ̣: ܘܗܵܐ ܐܲܪܒܲܥ ܡܲܪ̈ܟ̇ܒ̣ܵܢ ܢܵܦ̈ܩܵܢ ܡ̣ܢ ܒܲܝܢܵܬ̣ ܬܪܹܝܢ ܛܘܼܪ̈ܝܼܢ: ܘܛܘܼܪܹ̈ܐ ܗܵܢ̇ܘܿܢ ܛܘܼܪܹ̈ܐ ܐܸܢܘܿܢ ܕܲܢܚܵܫܵܐ.
2: ܒܡܲܪܟ݂ܒ̣ܬ̣ܵܐ ܩܲܕ݂ܡܵܝܬܵܐ ܪ̈ܲܟ݂ܫܵܐ ܣܘܼܡܵܩܹ̈ܐ: ܘܲܒ̣ܡܲܪܟܲܒ̣ܬ̣ܵܐ ܕܬܲܪܬܹ̇ܝܢ ܪ̈ܲܟ݂ܫܵܐ ܐܘܼܟܵܡܹ̈ܐ.
3: ܘܲܒ̣ܡܲܪܟܲܒ̣ܬ̣ܵܐ ܕܲܬ̣ܠܵܬ̣ ܪ̈ܲܟ݂ܫܵܐ ܚܸܘܵܪܹ̈ܐ: ܘܲܒ̣ܡܲܪܟܲܒ̣ܬ̣ܵܐ ܕܐܲܪܒܲܥ ܪ̈ܲܟ݂ܫܵܐ ܐܘܼܪ̈ܵܓܹܐ.
4: ܘܲܥܢܹ̇ܝܬ̣ ܘܐܸܡ̇ܪܹܬ̣ ܠܡܲܠܲܐܟ݂ܵܐ ܕܲܡܡܲܠܸܠ ܒܝܼ: ܡܵܢܵܐ ܐܸܢܘܿܢ ܗܵܠܹܝܢ ܡܵܪܝ.
5: ܥܢ̣ܵܐ ܡܲܠܲܐܟ݂ܵܐ ܘܐܸܡܲܪ ܠܝܼ: ܗܵܠܹܝܢ ܐܸܢܹܝܢ ܐܲܪܒܲܥ ܪ̈ܘܼܚܲܝ ܫܡܲܝܵܐ: ܕܩܵܝ̈ܡܵܢ ܗ̄ܘܲܝ̈ ܩܕ݂ܵܡ ܡܵܪܵܐ ܕܟ݂ܠܵܗ̇ ܐܲܪܥܵܐ.
6: ܕܐܝܼܬ̣ ܒܵܗ̇ ܪ̈ܲܟ݂ܫܵܐ ܐܘܼܟܵܡܹ̈ܐ: ܢܵܦ̇ܩܝܼܢ ܠܐܲܪܥܵܐ ܕܓܲܪܒ̇ܝܵܐ: ܘܚܸܘܵܪܹ̈ܐ ܢܵܦ̇ܩܝܼܢ ܒܵܬܲܪܗܘܿܢ: ܘܐܘܼܪ̈ܵܓܹܐ ܢܵܦ̇ܩܝܼܢ ܠܐܲܪܥܵܐ ܕܬܲܝܡ̄ܢܵܐ.
7: ܘܣܘܼܡܵܩܹ̈ܐ ܢܦܲܩ̣ܘ: ܘܲܒ̣ܥܵܘ ܠܡܹܐܙܲܠ ܠܲܡܗܲܠܵܟ݂ܘܼ ܒܐܲܪܥܵܐ: ܘܐܸܡܲܪ ܠܗܘܿܢ ܙܸܠܘ ܗܲܠܸܟ݂ܘ ܒܐܲܪܥܵܐ: ܘܗܲܠܸܟ݂ܘ ܒܐܲܪܥܵܐ.
8: ܘܲܩܥ̣ܵܐ ܘܐܸܡܲܪ ܠܝܼ: ܚܙܝܼ ܗܵܠܹܝܢ ܕܢܵܦ̇ܩܝܼܢ ܠܐܲܪܥܵܐ ܕܓܲܪܒ̇ܝܵܐ: ܘܲܡܢܝܼܚܝܼܢ ܪܘܼܚܝ ܒܐܲܪܥܵܐ ܕܓܲܪܒ̇ܝܵܐ.
9: ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.
10: ܣܲܒ̣ ܡ̣ܢ ܫܒ̣ܝܼܬ̣ܵܐ: ܡ̣ܢ ܚܘܼܠܕ̇ܝܼ: ܘܡ̣ܢ ܛܘܿܒ̇ܝܼܵܐ: ܘܡ̣ܢ ܝܑܼܕܲܥܝܵܐ: ܘܬ̣ܵܐ ܒܝܵܘܡܵܐ ܗܵܘܿ: ܘܥܘܿܠ ܠܒܹܝܬ̣ ܝܘܿܫܝܼܵܐ ܒܲܪ ܨܦܲܢܝܵܐ ܕܐܸܬ̣ܵܐ ܡ̣ܢ ܒܵܒܹܠ.
11: ܣܲܒ̣ ܣܹܐܡܹܗ ܘܕܲܗܒܹܗ: ܘܲܥܒܸܕ݂ ܟܠܝܼܠܵܐ: ܘܣܝܼܡ ܒܪܹܫܹܗ ܕܝܼܫܘܿܥ ܒܲܪ ܝܘܿܙܵܕ݂ܵܩ ܟܵܗܢܵܐ ܪܲܒܵܐ.
12: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܗܵܐ ܓܲܒ̣ܪܵܐ ܘܲܫܡܹܗ ܕܸܢܚܵܐ: ܘܡ̣ܢ ܠܬܲܚܬ̇ ܢܸܕ݂ܢܲܚ.
13: ܘܗ̤ܘ ܢܸܒ̣ܢܸܐ ܗܲܝܟ̇ܠܹܗ ܕܡܵܪܝܵܐ: ܘܗ̤ܘ ܢܩܲܒܸ̇ܠ ܫܘܼܒ̣ܚܵܐ: ܘܢܸܬܸ̇ܒ̣ ܘܢܸܫܬܲܠܲܛ ܥܲܠ ܟܘܼܪܣܝܹܗ: ܘܢܸܗܘܹܐ ܟܵܗܢܵܐ ܥܲܠ ܟܘܼܪܣܝܹܗ: ܘܡܸܠܟܵܐ ܕܲܫܠܵܡܵܐ ܢܸܗܘܹܐ ܒܹܝܬ̣ ܬܪ̈ܲܝܗܘܿܢ.
14: ܘܲܟ݂ܠܝܼܠܵܐ ܢܸܗܘܹܐ ܠܚܘܼܠܕ̇ܝܼ ܘܲܠܛܘܼܒ̇ܝܼܵܐ ܘܠܝܼܕܲܥܝܵܐ: ܘܲܠܝܵܘܫܝܼܵܐ ܒܲܪ ܨܦܲܢܝܵܐ ܠܕ݂ܘܼܟ݂ܪܵܢܵܐ ܒܗܲܝܟ̇ܠܹܗ ܕܡܵܪܝܵܐ.
15: ܘܢܹܐܬ̣ܘܿܢ ܪ̈ܲܚܝܼܩܹܐ ܘܢܸܒ̣ܢܘܿܢ ܗܲܝܟ̇ܠܹܗ ܕܡܵܪܝܵܐ: ܘܬܸܕ̇ܥܘܼܢ ܕܡܵܪܝܵܐ ܚܲܝܠܬ̣ܵܢܵܐ ܫܲܕ̇ܪܲܢܝ ܠܘܵܬ̣ܟ݂ܘܿܢ: ܐܸܢ ܬܸܫ̱ܡܥܘܼܢ ܒܩܵܠܹܗ ܕܡܵܪܝܵܐ ܐܲܠܵܗܟ݂ܘܿܢ.
ܩܹܦܵܠܹܐܘܿܢ: ܙ.
1: ܘܲܗܘ̤ܵܐ ܒܲܫܢܲܬ̣ ܐܲܪܒܲܥ ܕܕܲܪܝܵܘܵܫ ܡܲܠܟܵܐ: ܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܟܲܪܝܵܐ: ܒܐܲܪܒܲܥܬ̣ܵܐ ܒܝܲܪܚܵܐ ܕܬܸܫܥܵܐ ܕܗ̤ܘ ܟܵܢܘܿܢ.
2: ܘܫܲܕܲܪ ܠܒܹܝܬ̣ ܐܹܝܠ: ܠܫܵܪܵܐܨܵܪ ܘܪܲܒ̇ܡܵܓ̣: ܘܲܫܠܲܚ ܡܲܠܟܵܐ ܘܓܲܢ̄ܒܵܪ̈ܵܘܗܝ ܠܲܡܨܲܠܵܝܘܼ ܥܠܵܘܗܝ ܩܕ݂ܵܡ ܡܵܪܝܵܐ.
3: ܘܲܠܡܹܐܡܲܪ ܠܟ݂ܵܗ̈ܢܹܐ ܕܲܒ̣ܒܲܝܬܹ̇ܗ ܕܡܵܪܝܵܐ ܚܲܝܠـܬ̣ܵܢܵܐ: ܘܠܲܢܒ̣ܝܹ̈ܐ: ܐܸܒ̣ܟܸ̇ܐ ܒܝܲܪܚܵܐ ܚܡܝܼܫܵܝܵܐ ܐܵܘ ܐܸܬ̣ܢ̱ܙܲܪ: ܐܲܝܟ݂ ܡܵܐ ܕܥܵܒܹ̇ܕ݂ ܗ̄ܘܹܝܬ̣ ܗܵܐ ܟܡܵܐ ܫܢ̈ܝܼܢ.
4: ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.
5: ܐܸܡܲܪ ܠܟ݂ܠܹܗ ܥܲܡܵܐ ܕܐܲܪܥܵܐ ܘܲܠܟ݂ܵܗܢܹ̈ܐ: ܕܨܵܡ̣ܬ̇ܘܿܢ ܘܐܲܪܩܸܕ̇ܬ̇ܘܿܢ ܒܝܲܪܚܵܐ ܚܡܝܼܫܵܝܵܐ ܘܲܫܒ̣ܝܼܥܵܝܵܐ: ܗܵܐ ܫܲܒ̣ܥܝܼܢ ܫ̈ܢܝܼܢ: ܕܲܠܡܵܐ ܨܵܘܡܵܐ ܨܵܡ̣ܬ̇ܘܿܢ ܠܝܼ.
6: ܘܐܸܢ ܐܵܟ݂ܠܝܼܢ ܐ̄ܢ̇ܬ̇ܘܿܢ ܘܫܵܬܹ̇ܝܢ: ܘܠܵܐ ܗ̄ܘܼܵܐ ܐܲܢ̄ܬ̇ܘܿܢ ܐܵܟ݂ܠܝܼܢ ܘܫܵܬܹ̇ܝܢ.
7: ܗܵܠܹܝܢ ܐܸܢܹܝܢ ܡܸܠܹ̈ܐ ܕܐܲܟ݂ܪܸܙ ܡܵܪܝܵܐ ܒܐܝܼܕ݂ܵܐ ܕܲܢܒ̣ܝܹ̈ܐ ܩܲܕ݂ܡܵܝܹ̈ܐ: ܟܲܕ݂ ܝܵܬ̣ܒܵܐ ܗ̄ܘܼܵܬ̣ ܐܘܿܪܸܫܠܸܡ ܘܫܲܠܝܵܐ: ܘܩܘܼܪ̈ܝܵܐ ܚܕ݂ܝܼܪ̈ܵܢ ܠܵܗ̇: ܘܛܘܼܪܹ̈ܐ ܘܦܲܩ̈ܥܵܬ̣ܵܐ ܝܵܬ̣ܒ̇ܝܼܢ ܗ̄ܘܼܵܘ.
8: ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܙܟܲܪܝܵܐ ܠܡܹܐܡܲܪ.
9: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܕܝܼܢܵܐ ܕܩܘܼܫܬܵܐ ܕܘܼܢܝ: ܘܛܲܝܒ̇ܘܼܬ̣ܵܐ ܘܪ̈ܲܚܡܹܐ ܥܒܸܕ݂ܘ ܐ̄ܢܵܫ ܥܲܡ ܐܲܚܘܼܗܝ.
10: ܘܠܲܐܪ̈ܡܠܵܬ̣ܵܐ ܘܲܠܝܲܬ̣ܡܹ̈ܐ: ܘܲܠܡܸܣܟܹ̇ܢܹ̈ܐ: ܘܠܲܕ݂ܡܸܬ̣ܦ̄ܢܸܐ ܠܘܵܬ̣ܝ ܠܵܐ ܬܸܥܠ̱ܒ̣ܘܼܢ: ܘܠܵܐ ܬܸܛܠ̱ܡܘܼܢ: ܘܒ̣ܝܼܫܬܵܐ ܓܒܲܪ ܥܲܠ ܐܲܚܘܼܗܝ ܠܵܐ ܬܸܬ̣ܚܲܫܒ̣ܘܼܢ ܒܠܸܒ̇ܟ݂ܘܿܢ.
11: ܘܠܵܐ ܨܒ̣ܵܘ ܠܡܸܫ̱ܡܥܲܢܝ: ܘܲܥ̣ܒܲܕ݂ܘ ܟܲܬ̣ܦܗܘܿܢ ܡܵܪܘܿܕ̇ܬܵܐ: ܘܐܸܕ݂ܢܲܝ̈ܗܘܿܢ ܣܲܟܲܪܘ ܕܠܵܐ ܢܸܫ̱ܡܥܘܿܢ.
12: ܘܠܸܒ̇ܗܘܿܢ ܥ̣ܒܲܕ݂ܘ ܐܲܝܟ݂ ܫܵܡܝܼܪܵܐ: ܕܠܵܐ ܢܸܫ̱ܡܥܘܼܢ ܢܵܡܘܿܣܹ̈ܐ ܘܦܘܼܩ̈ܕܵܢܹܐ: ܕܫܲܕܲܪ ܡܵܪܝܵܐ ܚܲܝܠܬ̣ܵܢܵܐ ܒܪܘܼܚܹܗ ܒܝܲܕ݂ ܢܒ̣̈ܝܹܐ ܩܲܕ݂ܡܵܝܹ̈ܐ: ܘܲܗܘ̤ܵܐ ܪܘܼܓ̣ܙܵܐ ܪܲܒܵܐ ܡ̣ܢ ܩܕ݂ܵܡ ܡܵܪܝܵܐ ܚܲܝܠܬ̣ܵܢܵܐ.
13: ܥܲܠ ܕܲܩܪܹܝ̇ܬ̣ ܐܸܢܘܿܢ ܘܠܵܐ ܫܡܲܥ̣ܘ: ܗܵܟܲܢܵܐ ܢܸܩܪܘܿܢܵܢܝ ܘܠܵܐ ܐܸܫܡܲܥ ܐܸܢܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
14: ܘܐܹܒܲܕܲܪ ܐܸܢܘܿܢ ܒܟ݂ܠܗܘܿܢ ܥܲܡܡܹ̈ܐ ܕܠܵܐ ܝܑܼܕܲܥ̣ܘ ܐܸܢܘܿܢ: ܘܐܲܪܥܵܐ ܬܸܨܕܹ̇ܐ ܒܵܬܲܪܗܘܿܢ ܡ̣ܢ ܒܠܲܝ ܕܥܵܒܲܪ ܘܲܕ̇ܬ̣ܵܐܹܒ̣: ܥܲܠ ܕܲܥ̣ܒܲܕ݂ܘ ܐܲܪܥܵܐ ܕܪܸܓ̇ܬ̣ܵܐ ܠܚܘܼܪܒܵܐ.
ܩܹܦܵܠܹܐܘܿܢ: ܚ.
1: ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܚܲܝܠܬ̣ܵܢܵܐ ܠܡܹܐܡܲܪ.
2: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܛܸܢܹ̇ܬ̣ ܒܨܸܗܝܘܿܢ ܛܢܵܢܵܐ ܪܲܒܵܐ: ܘܲܒ̣ܚܸܡܬ̣ܵܐ ܪܲܒ̇ܬ̣ܵܐ ܛܸܢܹ̇ܬ̣ ܒܵܗ̇.
3: ܗܵܟܲܢܵܐ ܐܵܡܲܪ ܡܵܪܝܵܐ: ܡܸܬ̣ܒܲܝܲܐ ܐ̄ܢܵܐ ܒܨܸܗܝܘܿܢ: ܘܫܵܪܹܐ ܐ̄ܢܵܐ ܒܓ̣ܵܘ ܐܘܿܪܸܫܠܸܡ: ܘܬܸܬ̣ܩܪܸܐ ܐܘܿܪܸܫܠܸܡ ܡܕ݂ܝܼܢ̄ܬܵܐ ܩܲܕ̇ܝܼܫܬܵܐ: ܘܛܘܼܪܹܗ ܕܡܵܪܝܵܐ ܚܲܝܠܬ̣ܵܢܵܐ: ܛܘܼܪܵܐ ܩܲܕ̇ܝܼܫܵܐ.
4: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܡܸܟܹ̇ܝܠ ܢܸܬ̇ܒ̣ܘܼܢ ܣܵܒܹ̈ܐ ܘܣܵـ̈ـܒ̣ܵܬ̣ܵܐ ܒܫܘܼܩܹ̈ܝܗ̇ ܕܐܘܿܪܸܫܠܸܡ: ܘܲܓ̣ܒܲܪ ܚܘܼܛܪܹܗ ܢܸܗܘܸܐ ܐܲܚܝܼܕ݂ ܒܐܝܼܕܹܗ ܡ̣ܢ ܣܘܿܓ̣ܵܐܐ ܕܝܵܘ̈ܡܵܬ̣ܵܐ.
5: ܘܫܘܼܩܹ̈ܝܗ̇ ܕܲܡܕ݂ܝܼܢ̄ܬܵܐ ܢܸܬ̣ܡ̱ܠܘܿܢ ܝܲܠܘܼܕܹ̈ܐ ܘܝܲܠܘܼ̈ܕ݂ܵܬ̣ܵܐ ܕܡܸܫܬܲܥܹܝܢ ܒܫܘܼܩܹ̈ܝܗ̇.
6: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܸܢ ܪܲܒܵܐ ܗ̄ܝܼ ܗܵܕܹܐ ܒܥܲܝ̈ܢܵܘܗܝ ܕܫܲܪܟܹ̇ܗ ܕܥܲܡܵܐ ܗܵܢܵܐ ܒܝܵܘ̈ܡܵܬ̣ܵܐ ܗܵܢܘܿܢ: ܐܵܦ ܒܥܲܝܢܲܝ̈ ܕܝܼܠܝ ܪܲܒܵܐ ܗ̄ܝܼ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
7: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܗܵܐ ܦܵܪܹܩ ܐ̄ܢܵܐ ܠܥܲܡܝ ܡ̣ܢ ܐܲܪܥܵܐ ܕܡܲܕ݂ܢ̱ܚܵܐ: ܘܡ̣ܢ ܐܲܪܥܵܐ ܕܡܲܥܪ̈ܵܒܲܝ ܫܸܡܫܵܐ.
8: ܘܐܲܝܬܸ̇ܐ ܐܸܢܘܿܢ ܘܢܸܫܪܘܿܢ ܒܐܘܿܪܸܫܠܸܡ: ܘܢܸܗܘܘܿܢ ܠܝܼ ܥܲܡܵܐ: ܘܐܸܢܵܐ ܐܸܗܘܹܐ ܠܗܘܿܢ ܐܲܠܵܗܵܐ: ܒܩܘܼܫܬܵܐ ܘܲܒ̣ܙܲܕ̇ܝܼܩܘܼܬ̣ܵܐ.
9: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܢܸܬ̣ܚܲܝ̈ܠܵܢ ܐܝܼ̈ܕ݂ܝܵܐ ܕܟ݂ܠ ܕܲܫ̣ܡܲܥܘ ܒܝܵܘ̈ܡܵܬ̣ܵܐ ܗܵܢ̇ܘܿܢ: ܦܸܬ̣ܓ̣ܵܡܹ̈ܐ ܗܵܠܹܝܢ ܡ̣ܢ ܦܘܼܡܗܘܿܢ ܕܲܢܒ̣̈ܝܹܐ: ܡ̣ܢ ܝܵܘܡܵܐ ܕܐܸܬ̇ܬ̇ܣܝܼܡܲܬ̤ ܫܲܬ̣ܐ̱ܣܬ̣ܵܐ ܕܗܲܝܟ̇ܠܹܗ ܕܡܵܪܝܵܐ ܚܲܝܠܬ̣ܵܢܵܐ ܠܡܸܬ̣ܒ̇ܢܵܝܘܼ.
10: ܡܸܛܠ ܕܡ̣ܢ ܩܕ݂ܵܡ ܝܵܘ̈ܡܵܬ̣ܵܐ ܗܵܢ̇ܘܿܢ: ܘܡ̣ܢ ܩܕ݂ܵܡ ܙܲܒ̣ܢܵܐ ܗܵܘܿ: ܐܲܓ̣ܪܵܐ ܠܒܲܪܢܵܫܵܐ ܠܲܝܬ̇ ܗ̄ܘܼܵܐ: ܘܐܵܦܠܵܐ ܠܲܒ̣ܥܝܼܪܵܐ: ܘܲܠܡܲܢ ܕܢܵܦܹ̇ܩ ܘܥܵܐܹ̇ܠ: ܠܲܝܬ̇ ܗ̄ܘܼܵܐ ܫܠܵܡܵܐ ܡ̣ܢ ܩܕ݂ܵܡ ܐܵܠܘܿܨܵܐ: ܘܗܵܐ ܡܓܲܪܸܐ ܐ̄ܢܵܐ ܠܗܘܿܢ ܠܟ݂ܠܗܘܿܢ ܒܢܲܝ̈ܢܵܫܵܐ ܓܒܲܪ ܒܚܲܒ̣ܪܹܗ.
11: ܡܸܟܹ̇ܝܠ ܠܵܐ ܗܘܹ̇ܝܬ̣ ܐܲܝܟ݂ ܕܲܒ̣ܝܵܘ̈ܡܵܬ̣ܵܐ ܩܲܕ݂ܡܵܝܹ̈ܐ: ܠܫܲܪܟܹ̇ܗ ܕܥܲܡܵܐ ܗܵܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
12: ܡܸܛܠ ܕܙܲܪܥܵܐ ܢܸܗܘܹܐ ܒܲܫܠܵܡܵܐ: ܘܲܓ̣ܦܸܬܵܐ ܬܸܬܸ̇ܠ ܦܹܐܪܹ̈ܝܗ̇: ܘܐܲܪܥܵܐ ܬܸܬܸ̇ܠ ܥܲܠ̈ܠܵܬ̣ܵܗ̇: ܘܲܫܡܲܝܵܐ ܢܸܬ̇ܠܘܼܢ ܛܲܠܗܘܿܢ: ܘܐܵܘܪܸܬ̣ ܠܫܲܪܟܹ̇ܗ ܕܥܲܡܵܐ ܗܵܢܵܐ ܗܵܠܹܝܢ ܟܠܗܹܝܢ.
13: ܐܲܝܟ݂ ܕܲܗ̤ܘܲܝܬ̇ܘܿܢ ܠܠܵܘܛܬ̣ܵܐ ܒܥܲܡܡܹ̈ܐ ܕܒܹܝܬ̣ ܝܑܼܗܘܼܕ݂ܵܐ ܘܲܕ݂ܒܹܝܬ̣ ܝܑܼܣܪܵܝܹܠ: ܗܵܟܲܢܵܐ ܐܸܦܪܘܿܩܟ݂ܘܿܢ ܘܬܸܗܘܘܿܢ ܠܒ̣ܘܼܪܟ̇ܬ̣ܵܐ: ܘܢܸܬ̣ܚܲܝ̈ܠܵܢ ܐܝܼܕܲܝ̈ܟ̇ܘܿܢ ܘܠܵܐ ܬܸܕ݂ܚ̄ܠܘܼܢ.
14: ܡܸܛܠ ܕܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܲܝܟ݂ ܕܐܸܬ̣ܚܲܫܒܹ̇ܬ̣ ܠܡܲܒ̣ܐܵܫܘܼ ܠܟ݂ܘܿܢ ܟܲܕ݂ ܐܲܪܓ̇ܙܘܼܢܝ ܐܲܒ̣ܵܗܲܝ̈ܟ̇ܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܘܠܵܐ ܗܸܦܟܹ̇ܝܬ̣.
15: ܗܵܟܲܢܵܐ ܐܸܬ̣ܦ̇ܢܝܼܬ̣ ܘܐܸܬ̣ܚܲܫܒܹ̇ܬ̣ ܒܝܵܘ̈ܡܵܬ̣ܵܐ ܗܵܠܹܝܢ: ܕܐܲܛܐܸܒ̣ ܠܐܘܿܪܸܫܠܸܡ: ܘܠܲܕ݂ܒܹܝܬ̣ ܝܑܼܗܘܼܕ݂ܵܐ: ܠܵܐ ܬܸܕ݂ܚ̄ܠܘܼܢ.
16: ܗܵܠܹܝܢ ܦܸܬ̣ܓ̣ܵܡܹ̈ܐ ܥܒܸܕ݂ܘ: ܡܲܠܸܠܘ ܩܘܼܫܬܵܐ ܐ̄ܢܵܫ ܥܲܡ ܚܲܒ̣ܪܹܗ: ܘܩܘܼܫܬܵܐ ܘܕ݂ܝܼܢܵܐ ܘܲܫܠܵܡܵܐ ܕܘܼܢܝ ܒܬܲܪ̈ܥܲܝܟ̇ܘܿܢ.
17: ܘܐ̄ܢܵܫ ܥܲܠ ܚܲܒ̣ܪܹܗ ܒܝܼܫܬܵܐ ܠܵܐ ܬܸܬ̣ܚܲܫܒ̣ܘܼܢ ܒܠܸܒ̇ܟ݂ܘܿܢ: ܘܡܵܘ̈ܡܵܬ̣ܵܐ ܕܲܓܵܠܵـ̈ـܬ̣ܵܐ ܠܵܐ ܬܸܪܚ̄ܡܘܼܢ: ܡܸܛܠ ܕܗܵܠܹܝܢ ܟܠܗܹܝܢ ܣܢܹ̇ܝܬ̣ ܐܸܢܹܝܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.
18: ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܚܲܝܠܬ̣ܵܢܵܐ: ܠܡܹܐܡܲܪ.
19: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܨܵܘܡܵܐ ܪܒ̣ܝܼܥܵܝܵܐ: ܘܨܵܘܡܵܐ ܚܡܝܼܫܵܝܵܐ: ܘܨܵܘܡܵܐ ܫܒ̣ܝܼܥܵܝܵܐ: ܘܨܵܘܡܵܐ ܥܣܝܼܪܵܝܵܐ: ܢܸܗܘܘܿܢ ܠܲܕ݂ܒܹܝܬ̣ ܝܑܼܗܘܼܕ݂ܵܐ: ܠܲܕ݂ܝܵܨܵܐ: ܘܲܠܚܲܕ݂ܘܼܬ̣ܵܐ: ܘܲܠܥܲܕ݂ܥܹ̈ܕܹܐ ܛܵܒܹ̈ܐ: ܘܩܘܼܫܬܵܐ ܘܲܫܠܵܡܵܐ ܪܚܲܡܘ.
20: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܡܸܟܹ̇ܝܠ ܢܹܐܬ̣ܘܿܢ ܥܲܡܡܹ̈ܐ ܝܵܬ̣ܒܲܝ̈ ܡܕ݂ܝܼ̈ܢܵܬ̣ܵܐ ܣܲܓ̇ܝܼ̈ܐܵܬ̣ܵܐ.
21: ܘܢܹܐܙܠ̄ܘܼܢ ܝܵܬ̣ܒܲܝ̈ ܚܕ݂ܵܐ ܠܘܵܬ̣ ܚܕ݂ܵܐ: ܘܢܹܐܡܪܘܿܢ: ܬܵܘ ܢܹܐܙܲܠ ܘܲܢܨܲܠܸܐ ܩܕ݂ܵܡ ܡܵܪܝܵܐ: ܘܢܸܒ̣ܥܸܐ ܡ̣ܢ ܡܵܪܝܵܐ ܚܲܝܠܬ̣ܵܢܵܐ: ܘܐܹܙܲܠ ܐܵܦ ܐܸܢܵܐ.
22: ܘܢܹܐܬ̣ܘܿܢ ܥܲܡܡܹ̈ܐ ܣܲܓ̇ܝܼ̈ܐܹܐ: ܘܥܲܡܡܹ̈ܐ ܥܲܫܝܼܢܹ̈ܐ: ܠܡܸܒ̣ܥܵܐ ܠܡܵܪܝܵܐ ܚܲܝܠܬ̣ܵܢܵܐ ܒܐܘܿܪܸܫܠܸܡ: ܘܠܲܡܨܲܠܵܝܘܼ ܩܕ݂ܵܡ ܡܵܪܝܵܐ.
23: ܗܵܟܲܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܒܝܵܘ̈ܡܵܬ̣ܵܐ ܗܵܢ̇ܘܿܢ ܢܹܐܚܕ̇ܘܼܢ ܥܸܣܪܵܐ ܓܲܒ̣ܪ̈ܝܼܢ ܡ̣ܢ ܟܠ ܠܸܫܵܢܲܝ̈ ܥܲܡܡܹ̈ܐ: ܒܟܸܢܦܹܗ ܕܓܲܒ̣ܪܵܐ ܝܗ̄ܘܼܕ݂ܵܝܵܐ: ܘܢܹܐܡܪܘܼܢ ܠܹܗ: ܢܹܐܙܲܠ ܥܲܡܵܟ݂: ܡܸܛܠ ܕܲܫ̣ܡܲܥܢ ܕܐܲܠܵܗܵܐ ܥܲܡܟ݂ܘܿܢ.
ܩܹܦܵܠܹܐܘܿܢ: ܛ.
1: ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܐܲܪܥܵܐ ܕܚܸܕ݂ܪܵܟ݂. ܘܲܕ̇ܕܲܪܡܣܘܿܩ ܩܘܼܪܒܵܢܹܗ: ܡܸܛܠ ܕܲܠܡܵܪܝܵܐ ܓܠܹܝܢ ܒܢܲܝ̈ܢܵܫܵܐ: ܘܟ݂ܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ.
2: ܐܵܦ ܚܡܵܬ̣ ܬܸܬܲܚܲܡ ܒܵܗ̇: ܘܨܘܿܪ ܘܨܲܝܕܵܢ ܕܛܵܒ̣ ܐܸܬ̣ܚܲܟܲܡ.
3: ܘܲܒ̣ܢܵܬ̤ ܠܵܗ̇ ܨܘܿܪ ܚܸܣܢܵܐ: ܘܟܲܢܫܲܬ̤ ܣܹܐܡܵܐ ܐܲܝܟ݂ ܥܲܦܪܵܐ: ܘܕܲܗܒ̣ܵܐ ܐܲܝܟ݂ ܣܝܵܢܵܐ ܕܫܘܼܩܹ̈ܐ.
4: ܡܸܛܠ ܗܵܢܵܐ ܡܵܪܝܵܐ ܢܵܘܒ̇ܕ݂ܝܼܗ̇: ܘܢܲܪܡܸܐ ܒܝܲܡܵܐ ܥܘܼܬ̣ܪܵܗ̇: ܘܗ̤ܝ ܒܢܘܼܪܵܐ ܬܸܬ̣ܐ̱ܟ݂ܠ.
5: ܘܬܸܚܙܹܐ ܐܲܫܩܵܠܘܿܢ ܘܬܸܕ݂ܚܲܠ: ܘܥܵܐܙܵܐ ܬܸܬ̣ܟ̇ܪܲܗ ܛܵܒ̣: ܘܥܸܩܪܘܿܢ ܕܲܒ̣ܗܸܬ̣ ܠܹܗ ܣܲܒ̣ܪܵܗ̇: ܘܢܹܐܒܲܕ݂ ܡܲܠܟܵܐ ܡ̣ܢ ܥܵܐܙܵܐ: ܘܐܲܫܩܵܠܘܿܢ ܠܵܐ ܬܸܬܸ̇ܒ̣.
6: ܘܢܸܬ̇ܒ̣ܘܼܢ ܢܘܼܟ݂ܪ̈ܵܝܹܐ ܒܐܲܫܕ̇ܘܿܕ݂: ܘܐܵܘܒܸ̇ܕ݂ ܓܲܐܝܘܼܬ̣ܗܘܿܢ ܕܲܦܠܸܫܬܵܝܹ̈ܐ.
7: ܘܐܲܥܒܲܪ ܕܸܡܗܘܿܢ ܡ̣ܢ ܦܘܼܡܗܘܿܢ: ܘܛܲܢܦܘܼܬ̣ܗܘܿܢ ܡ̣ܢ ܒܹܝܬ̣ ܫܸܢܲܝ̈ܗܘܿܢ: ܘܢܸܫܬܲܚܪܘܿܢ ܐܵܦ ܗܸܢܘܿܢ ܠܐܲܠܵܗܵܐ: ܘܢܸܗܘܘܿܢ ܐܲܝܟ݂ ܪܵܘܪ̈ܒ̣ܵܢܹܐ ܕܲܝܗܘܼܕ݂ܵܐ: ܘܥܸܩܪܘܿܢ ܬܸܗܘܹܐ ܐܲܝܟ݂ ܥܸܒ̣ܪܘܿܢ.
8: ܘܐܲܫܪܸܐ ܥܲܠ ܒܲܝܬ̇ܝ ܩܲܝܘܼܡܵܐ ܡ̣ܢ ܡܲܢ ܕܥܵܒܲܪ: ܘܡ̣ܢ ܕܬ̣ܵܐܹ̇ܒ̣: ܘܠܵܐ ܢܸܥܒܲܪ ܬܘܼܒ̣ ܥܠܲܝܗܘܿܢ ܡܫܲܥܒ̇ܕ݂ܵܢܵܐ: ܡܸܛܠ ܕܗܵܫܵܐ ܚܙܹ̇ܝܬ̣ ܒܥܲܝܢܲܝ̈.
9: ܕܘܼܨܝ ܛܵܒ̣ ܒܲܪܬ̣ ܨܸܗܝܘܿܢ: ܘܲܩܥܵܝ ܒܲܪܬ̣ ܐܘܿܪܸܫܠܸܡ: ܗܵܐ ܡܲܠܟܹ̇ܟ݂ܝ ܐܵܬܹ̇ܐ ܠܹܟ݂ܝ: ܙܲܕ̇ܝܼܩܵܐ: ܘܦܵܪܘܿܩܵܐ: ܘܡܲܟ̇ܝܼܟ݂ܵܐ: ܘܲܪܟ݂ܝܼܒ̣ ܥܲܠ ܚܡܵܪܵܐ: ܘܥܲܠ ܥܝܼܠܵܐ ܒܲܪ ܐܲܬܵܢܵܐ.
10: ܘܢܵܘܒܸ̇ܕ݂ ܡܲܪܟܲܒ̣ܬ̣ܵܐ ܡ̣̤ܢ ܐܲܦܪܹܝܡ: ܘܣܘܼܣܝܵܐ ܡ̣ܢ ܐܘܿܪܸܫܠܸܡ: ܢܸܬ̣ܒܲܪ ܩܸܫܬܵܐ ܒܲܩܪܵܒ̣ܵܐ: ܘܲܢܡܲܠܸܠ ܫܠܵܡܵܐ ܥܲܡ ܥܲܡܡܹ̈ܐ: ܘܢܸܫܠܲܛ ܡ̣ܢ ܝܲܡܵܐ ܠܝܲܡܵܐ: ܘܡ̣ܢ ܢܲܗܪܵܐ ܥܕܲܡܵܐ ܠܣܵܘ̈ܦܹܝܗ̇ ܕܐܲܪܥܵܐ.
11: ܘܐܵܦ ܐܲܢ̄ܬ̇ ܒܲܕ݂ܡܵܐ ܕܲܕ݂ܝܵܬܹܩܹܐ ܕܝܼܠܵܟ݂: ܫ̣ܪܲܝܬ̇ ܐܲܣܝܼܪܹ̈ܐ ܡ̣ܢ ܓܘܼܒܵܐ ܕܠܲܝܬ̇ ܒܹܗ ܡܲـ̈ـܝܵܐ.
12: ܬܸܒ̣ܘ ܒܚܸܣܢܵܐ ܐܲܣܝܼܪܹ̈ܐ ܕܲܟ݂ܢܘܼܫܬܵܐ: ܘܲܚܠܵܦ ܚܲܕ݂ ܢܘܿܡ ܬܪܹܝܢ ܦܵܪܲܥ ܐ̄ܢܵܐ ܠܟ݂ܘܿܢ.
13: ܡܸܛܠ ܕܡܸܬ̣ܚܹ̇ܬ̣ ܩܸܫܬ̇ܝ ܥܲܠ ܝܑܼܗܘܼܕ݂ܵܐ: ܘܲܡܠܹܝܬ̣ ܥܲܠ ܐܲܦܪܹܝܡ: ܘܲܫܕܹܝ̇ܬ̣ ܒܢܲܝ̈ܟ̇ܝ ܨܸܗܝܘܿܢ ܥܲܠ ܒܢܲܝ̈ܟ̇ܝ ܝܵܘܵܢ: ܘܲܥܒܲܕ̇ܬܵܟ݂ ܐܲܝܟ݂ ܣܲܝܦܵܐ ܕܓܲܢ̄ܒܵܪܵܐ.
14: ܘܡܵܪܝܵܐ ܥܠܲܝܗܘܿܢ ܢܸܬ̣ܓ̇ܠܹܐ: ܘܢܸܦܘܿܩ ܓܹܐܪܹܗ ܐܲܝܟ݂ ܒܲܪܩܵܐ: ܘܡܵܪܹܐ ܡܵܪ̈ܵܘܵܬ̣ܵܐ ܢܸܩܪܸܐ ܒܩܲܪܢܵܐ: ܘܢܹܐܙܲܠ ܒܥܲܠܥܵܠܵܐ ܠܬܲܝܡ̄ܢܵܐ.
15: ܘܡܵܪܝܵܐ ܚܲܝܠܬ̣ܵܢܵܐ ܢܲܓܸ̇ܢ ܥܠܲܝܗܘܿܢ: ܘܢܹܐܟ݂ܠܘܼܢ ܘܢܸܟ݂ܒ̇ܫܘܼܢ ܟܹܐܦܹ̈ܐ ܒܩܸܠܥܵܐ: ܘܢܸܫܬ̇ܘܿܢ ܕܠܘܼܚܝܵܐ ܐܲܝܟ݂ ܚܲܡܪܵܐ: ܘܢܸܬ̣ܡ̱ܠܘܿܢ ܐܲܝܟ݂ ܡܙܵܓ̣ܵܐ ܘܐܲܝܟ݂ ܙܵܘܝܼܬ̣ܵܐ ܕܡܲܕ݂ܒ̇ܚܵܐ.
16: ܘܢܸܦܪܘܿܩ ܐܸܢܘܿܢ ܡܲܪܝܵܐ ܐܲܠܵܗܗܘܿܢ ܒܝܵܘܡܵܐ ܗܵܘܿ ܠܥܲܡܹܗ ܐܲܝܟ݂ ܥܵـ̈ـܢܵܐ: ܡܸܛܠ ܕܟܹܐܦܹ̈ܐ ܗ̄ܘܲܝ̈ ܩܲܕ̇ܝܼ̈ܫܵܬ̣ܵܐ ܕܫܲܕ݂̈ܝܵܢ ܗ̄ܘܲܝ̈ ܒܐܲܪܥܹܗ.
17: ܡܵܐ ܛܵܒ̣ ܘܡܵܐ ܫܲܦܝܼܪ ܥܒ̣ܘܼܪܵܐ ܠܓܕ̇ܘܼ̈ܕܹܐ ܘܚܲܡܪܵܐ ܡܒܲܣܸܡ ܒܬ̣ܘܼ̈ܠܵܬ̣ܵܐ.
ܩܹܦܵܠܹܐܘܿܢ: ܝ.
1: ܫܐܲܠܘ ܡܸܛܪܵܐ ܡ̣ܢ ܡܵܪܝܵܐ ܒܙܲܒ̣ܢܵܐ ܠܩܝܼܫܵܝܵܐ: ܘܡܵܪܝܵܐ ܥܵܒܹ̇ܕ݂ ܪ̈ܣܝܼܣܹܐ: ܘܡܸܛܪܵܐ ܒܟ݂ܝܼܪܵܝܵܐ ܢܸܬܸ̇ܠ ܠܟ݂ܘܿܢ ܕܲܢܪܲܒܸ̇ܐ ܥܸܣܒܵܐ ܒܕܲܒ̣ܪܵܐ.
2: ܡܸܛܠ ܕܝܲܕ̇ܘܼ̈ܥܹܐ ܡܲܠܸܠ̣ܘ ܥܵܘܼܠܵܐ: ܘܩܵܨܘܿܡܹ̈ܐ ܚ̣ܙܵܘ ܕܲܓܵܠܘܼܬ̣ܵܐ: ܘܚܸܠܡܹ̈ܐ ܕܲܓܵܠܹ̈ܐ ܡܲܠܸܠ̣ܘ: ܘܒܲܝܲܐܘ ܒܲܣܪܝܼܩܘܼܬ̣ܵܐ: ܡܸܛܠ ܗܵܢܵܐ ܫܩܲܠ̣ܘ ܐܲܝܟ݂ ܥܵـ̈ـܢܵܐ: ܘܐܸܬ̣ܡܲܟܲܟ݂ܘ ܕܠܲܝܬ̇ ܠܗܘܿܢ ܪܵܥܝܵܐ.
3: ܥܲܠ ܪ̈ܵܥܵܘܵܬ̣ܵܐ ܐܸܬ̣ܚܲܡܲܬ̣ ܪܙܼܓ̣ܙܝܼ: ܘܠܲܓ̣ܙܵܪܹ̈ܐ ܐܸܦܩܘܿܕ݂: ܡܸܛܠ ܕܦܵܩܹ̇ܕ݂ ܡܵܪܝܵܐ ܚܲܝܠܬ̣ܵܢܵܐ ܠܲܓ̣ܙܵܪܹܗ ܠܲܕ݂ܒܹܝܬ̣ ܝܑܼܗܘܼܕ݂ܵܐ: ܘܲܥ̣ܒܲܕ݂ ܐܸܢܘܿܢ ܐܲܝܟ݂ ܣܘܼܣܝܵܐ ܕܲܙܗܸܐ ܒܲܩܪܵܒ̣ܵܐ.
4: ܡܸܢܗܘܿܢ ܙܵܘܝܼܬ̣ܵܐ: ܘܡܸܢܗܘܿܢ ܣܸܟ̇ܬ̣ܵܐ: ܘܡܸܢܗܘܿܢ ܩܸܫܬܵܐ ܒܲܩܪܵܒ̣ܵܐ: ܘܡܸܢܗܘܿܢ ܢܸܦܩܘܼܢ ܟܠܗܘܿܢ ܫܲܠܝܼܛܵܢܲܝ̈ܗܘܿܢ ܐܲܟ݂ܚ̄ܕ݂ܵܐ.
5: ܘܢܸܗܘܘܿܢ ܐܲܝܟ݂ ܓܲܒ̣ܪܹ̈ܐ ܕܕ݂ܵܝ̇ܫܝܼܢ ܣܝܵܢܵܐ ܒܫܘܼܩܹ̈ܐ: ܒܲܩܪܵܒ̣ܵܐ ܢܸܬ̣ܟܲܬ̇ܫܘܼܢ ܡܸܛܠ ܕܡܵܪܝܵܐ ܥܲܡܗܘܿܢ: ܘܢܸܒ̣ܗ̱ܬ̣ܘܼܢ ܪ̈ܵܟ݂ܒܲܝ ܪ̈ܲܟ݂ܫܵܐ.
6: ܘܐܹܚܲܝܸܠ ܠܲܕ݂ܒܹܝܬ̣ ܝܑܼܗܘܼܕ݂ܵܐ: ܘܐܸܦܪܘܿܩ ܠܲܕ݂ܒܹܝܬ̣ ܝܵܘܣܸܦ: ܘܐܲܦܢܸܐ ܐܸܢܘܿܢ: ܡܸܛܠ ܕܲܡܪܲܚܸܡ ܐ̄ܢܵܐ ܥܠܲܝܗܘܿܢ: ܘܢܸܗܘܘܿܢ ܐܲܝܟ݂ ܕܠܵܐ ܛܥܹ̇ܝܬ̣ ܐܸܢܘܿܢ: ܡܸܛܠ ܕܐܸܢܵܐ ܡܵܪܝܵܐ ܐܲܠܵܗܵܐ ܐܸܥܢܸܐ ܐܸܢܘܿܢ.
7: ܘܢܸܗܘܘܿܢ ܐܲܝܟ݂ ܓܲܢ̄ܒܵܪܹ̈ܐ ܕܐܲܦܪܹܝܡ: ܘܢܸܚܕܸ̇ܐ ܠܸܒ̇ܗܘܿܢ ܐܲܝܟ݂ ܕܡ̣ܢ ܚܲܡܪܵܐ: ܘܲܒ̣ܢܲܝ̈ܗܘܿܢ ܢܸܚܙܘܿܢ ܘܢܸܚܕ̇ܘܿܢ: ܘܢܸܪܘܲܙ ܠܸܒ̇ܗܘܿܢ ܒܡܵܪܝܵܐ.
8: ܐܲܫܪܸܩ ܠܗܘܿܢ ܘܐܹܟܲܢܸܫ ܐܸܢܘܿܢ: ܡܸܛܠ ܕܦܵܪܹܩ ܐ̄ܢܵܐ ܠܗܘܿܢ: ܘܢܸܣܓ̇ܘܿܢ ܐܲܝܟ݂ ܕܣܲܓ̇ܝܼܐܝܼܢ ܗ̄ܘܼܵܘ.
9: ܘܐܸܙܪܘܿܥ ܐܸܢܘܿܢ ܒܥܲܡܡܹ̈ܐ: ܘܒܲܐܬ̣ܪ̈ܵܘܵܬ̣ܵܐ ܪ̈ܲܚܝܼܩܹܐ ܢܫܲܒ̇ܚܘܼܢܵܢܝ: ܘܲܢܬܲܪܣܘܿܢ ܠܲܒ̣ܢܲܝ̈ܗܘܿܢ ܘܢܸܗܦܟ݂ܘܿܢ.
10: ܘܐܲܗܦܸܟ݂ ܐܸܢܘܿܢ ܡ̣ܢ ܐܲܪܥܵܐ ܕܡܸܨܪܹܝܢ: ܘܡ̣ܢ ܐܵܬ̣ܘܿܪ ܐܸܟܲܢܸܫ ܐܸܢܘܿܢ: ܘܠܲܐܪܥܵܐ ܕܓܸܠܥܵܕ݂ ܘܲܠܠܸܒ̣ܢܵܢ ܐܲܝܬܸ̇ܐ ܐܸܢܘܿܢ: ܘܠܵܐ ܢܸܡ̱ܠ̈ܝܵܢ ܠܗܘܿܢ.
11: ܘܢܸܥܒܲܪ ܒܝܲܡܵܐ ܐܘܼܠܨܵܢܵܐ: ܘܢܲܗܦܸܟ݂ ܒܝܲܡܵܐ ܓܲܠܠܹ̈ܐ: ܘܢܸܒ̣ܗ̱ܬ̣ܘܼܢ ܟܠܗܘܿܢ ܥܘܼܡܩܵܘ̈ܗܝ ܕܢܲܗܪܵܐ: ܘܬܸܒ̣ܛܲܠ ܓܲܐܝܘܼܬܹܗ ܕܐܵܬ̣ܘܿܪܵܝܵܐ: ܘܫܘܼܠܛܵܢܹܗ ܕܡܸܨܪܵܝܵܐ ܢܸܥܒܲܪ.
12: ܘܐܹܚܲܝܸܠ ܐܸܢܘܿܢ ܒܡܵܪܝܵܐ: ܘܠܲܫܡܹܗ ܢܣܲܒ̇ܪܘܼܢ ܐܵܡܲܪ ܡܵܪܝܵܐ.
ܩܹܦܵܠܹܐܘܿܢ: ܝܐ.
1: ܦܬܲܚ ܠܸܒ̣ܢܵܢ ܬܲܪ̈ܥܲܝܟ ܘܬܹܐܟ݂ܘܿܠ ܢܘܼܪܵܐ ܠܐܲܪ̈ܙܲܝܟ.
2: ܢܲܝܠܸܠ ܫܲܪܘܲܝܢܵܐ ܡܸܛܠ ܕܲܢܦܲܠ̣ ܐܲܪܙܵܐ: ܘܥܲܫܝܼ̈ܢܹܐ ܐܸܬ̣ܒܲܙܸܙܘ: ܢܲܝܠܠܘܼܢ ܒܲܠܘܼܛܹ̈ܐ ܕܒܲܝܫܵܢ: ܕܲܢܦܲܠ̣ ܥܵܒ̣ܵܐ ܥܲܫܝܼܢܵܐ.
3: ܩܵܠܵܐ ܕܝܼܠܲܠܬܵܐ ܕܪ̈ܵܥܵܘܵܬ̣ܵܐ ܕܐܸܬ̣ܒܲܙܙܲܬ̤ ܪܲܒ̇ܘܼܬ̣ܗܘܿܢ: ܩܵܠܵܐ ܕܐܲܪ̈ܝܵܘܵܬ̣ܵܐ ܕܢܵܗ̇ܡܝܼܢ: ܕܐܸܬ̣ܒܲܙܸܙ ܥܘܼܫܢܹܗ ܕܝܘܿܪܕ̇ܢܵܢ.
4: ܗܵܟܲܢܵܐ ܐܸܡܲܪ ܠܝܼ ܡܵܪܝܵܐ ܐܲܠܵܗܝ: ܪܥܝܼ ܠܥܵـ̈ـܢܵܐ ܩܲܛܝܼܢܬܵܐ.
5: ܕܙܵܒ̣ܘܿܢܲܝ̈ܗܹܝܢ ܩܵܛ̇ܠܝܼܢ ܠܗܹܝܢ: ܘܠܵܐ ܡܸܬ̣ܚܲܒ̣ܝܼܢ: ܘܲܡܙܲܒ̇ܢܵܢܲܝ̈ܗܹܝܢ ܐܵܡ̇ܪܝܼܢ: ܒܪܝܼܟ݂ ܡܵܪܝܵܐ ܕܐܲܥܬ̇ܪܲܢ: ܘܪ̈ܵܥܵܘܵܬ̣ܗܹܝܢ ܠܵܐ ܚܵܝ̇ܣܝܼܢ ܥܠܲܝܗܹܝܢ.
6: ܡܸܛܠ ܕܠܵܐ ܚܵܐܹ̇ܣ ܐ̄ܢܵܐ ܬܘܼܒ̣ ܥܲܠ ܥܵܡܘܿܪܹ̈ܝܗ̇ ܕܐܲܪܥܵܐ ܐܵܡܲܪ ܡܵܪܝܵܐ: ܘܗܵܐ ܡܲܫܠܸܡ ܐ̄ܢܵܐ ܠܗܘܿܢ ܠܲܒ̣ܢܲܝ̈ ܐ̄ܢܵܫܵܐ: ܐ̄ܢܵܫ ܒܝܲܕ݂ ܚܲܒ̣ܪܹܗ ܘܲܒ̣ܝܲܕ݂ ܡܲܠܟܹ̇ܗ: ܘܲܢܦܲܠܓ̣ܘܼܢܵܗ̇ ܠܐܲܪܥܵܐ: ܘܠܵܐ ܐܸܦܲܨܸܝܗ̇ ܡ̣ܢ ܐܝܼܕܲܝ̈ܗܘܿܢ.
7: ܘܲܪܥܹܝ̇ܬ̣ ܠܥܵـ̈ـܢܵܐ ܩܲܛܝܼܢܬܵܐ ܡܸܛܠ ܟܸܢܫܵܐ ܕܥܵـ̈ـܢܵܐ: ܘܢܸܣ̇ܒܹ̇ܬ̣ ܠܝܼ ܬܪܹܝܢ ܚܘܼܛܪ̈ܝܼܢ: ܠܚܲܕ݂ ܩܪܹܝ̇ܬ̣ ܒܲܣܝܼܡܵܐ: ܘܠܲܐܚܪܹܢܵܐ ܚܲܒ̣ܠܵܐ: ܘܲܪܥܹ̇ܝܬ̣ ܠܥܵـ̈ـܢܵܐ.
8: ܘܐܵܘܒ̇ܕܹܬ̣ ܬܠܵܬ̣ܵܐ ܪ̈ܵܥܵܘܵܬ̣ܵܐ ܒܝܲܪܚܵܐ ܚܲܕ݂: ܘܡܸܐܢܲܬ̤ ܢܲܦ̮ܫܝ ܒܗܘܿܢ: ܘܐܵܦ ܢܲܦ̮ـ̈ـܫܵܬ̣ܗܘܿܢ ܥܘܲܝ̈ ܥܠܲܝ.
9: ܘܐܸܡܪܹܬ̣ ܕܠܵܐ ܐܸܪܥܹܝܟ݂ܘܿܢ: ܕܡܵܝ̇ܬܵܐ ܬܡܘܼܬ̣: ܘܕ݂ܵܐܒ̣ܕܵܐ ܬܹܐܒܲܕ݂: ܘܐܲܝܕܵܐ ܕܡܸܫܬܲܚܪܵܐ ܬܹܐܟ݂ܘܿܠ ܒܸܣܪܵܐ ܕܚܲܒ̣ܪ̈ܵܬ̣ܵܗ̇.
10: ܘܢܸܣܒܹ̇ܬ̣ ܚܘܼܛܪܝ ܒܲܣܝܼܡܵܐ ܘܲܬ̣ܒܲܪܬܹ̇ܗ: ܕܢܸܒ̣ܛܲܠ ܩܝܵܡܵܐ ܕܐܲܩܝܼܡܹ̇ܬ̣ ܥܲܡ ܟܠܗܘܿܢ ܥܲܡܡܹ̈ܐ.
11: ܘܲܒ̣ܛܸܠ ܒܹܗ ܒܝܵܘܡܵܐ ܗܵܘܿ: ܘܝܼܕܲܥ̣ܘ ܡܲܟ̇ܝܼ̈ܟܹܐ ܕܥܵـ̈ـܢܵܐ ܕܢܵܛ̇ܪܝܼܢ ܗ̄ܘܼܵܘ ܠܝܼ: ܕܦܸܬ̣ܓ̣ܵܡܹܗ ܗ̄ܘܼ ܕܡܵܪܝܵܐ.
12: ܘܐܸܡ̇ܪܹܬ̣ ܠܗܘܿܢ: ܐܸܢ ܫܲܦܝܼܪ ܒܥܲܝ̈ܢܲܝܟ̇ܘܿܢ ܗܲܒ̣ܘ ܠܝܼ ܐܲܓ̣ܪܝ: ܐܵܘ ܛܵܠ̇ܡܝܼܢ ܐ̄ܢܬ̇ܘܿܢ ܠܝܼ: ܘܬܲܩ̣ܠܘܼܗܝ ܠܐܲܓ̣ܪܝ ܬܠܵܬ̣ܝܼܢ ܕܟܸܣܦܵܐ.
13: ܘܐܸܡܲܪ ܠܝܼ ܡܵܪܝܵܐ ܐܲܪܡܵܝܗܝ ܒܹܝܬ̣ ܓܲܙܵܐ: ܫܘܼܒ̣ܚܵܐ ܕܐܝܼܩܵܪܵܐ ܕܐܵܘܩ̇ܪܹܬ̣ ܡܸܢܗܘܿܢ: ܘܢܸܣܒܹ̇ܬ̣ ܬܠܵܬ̣ܝܼܢ ܕܟܸܣܦܵܐ ܘܐܲܪܡܝܼܬ̣ ܐܸܢܘܿܢ ܒܹܝܬ̣ ܓܲܙܵܐ ܒܒܲܝܬܹ̇ܗ ܕܡܵܪܝܵܐ.
14: ܘܬܸܒ̣ܪܹܬ̣ ܠܚܲܒ̣ܠܵܐ ܚܘܼܛܪܝ ܐ̄ܚܪܹܢܵܐ: ܕܐܹܒܲܛܸܠ ܐܵܘܝܘܼܬ̣ܵܐ ܕܐܝܼܬ̣ ܗ̄ܘܼܵܬ̣ ܒܹܝܬ̣ ܝܑܼܗܘܼܕ݂ܵܐ ܠܝܼܣܪܵܝܹܠ.
15: ܘܐܸܡܲܪ ܠܝܼ ܡܵܪܝܵܐ: ܬܘܼܒ̣ ܣܲܒ̣ ܠܵܟ݂ ܡܵܐܢܹ̈ܐ ܕܪܵܥܝܵܐ ܒܘܿܪܵܐ.
16: ܡܸܛܠ ܕܗܵܐ ܐܸܢܵܐ ܡܩܝܼܡ ܐ̄ܢܵܐ ܪܵܥܝܵܐ ܒܐܲܪܥܵܐ: ܕܐܵܒ̣̈ܕܵܢ ܠܵܐ ܢܸܦܩܘܿܕ݂: ܘܲܕ݂ܛܵـ̈ـܥܝܵܢ ܠܵܐ ܢܸܒ̣ܥܸܐ: ܘܕܲܬ̣ܒ̣ܝܼܪ̈ܵܢ ܠܵܐ ܢܸܥܨܘܿܒ̣: ܘܕܲܟ݂ܪ̈ܝܼܗܵܢ ܠܵܐ ܢܲܐܣܸܐ: ܘܲܕ݂ܩܵܝ̈ܡܵܢ ܠܵܐ ܢܬܲܪܣܸܐ: ܘܒܸܣܪܵܐ ܕܫܲܡܝܼ̈ܢܵܬ̣ܵܐ ܢܹܐܟ݂ܘܿܠ: ܘܲܟ݂ܪ̈ܵܥܲܝܗܹܝܢ ܢܥܲܪܸܩ.
17: ܐܘܿ ܪܵܥܝܵܐ ܒܘܿܪܵܐ: ܕܫܸܒ̣ܩܹ̇ܬ̣ ܥܵـ̈ـܢܵܐ ܥܲܠ ܕܪܵܥܵܟ݂: ܘܥܲܠ ܥܲܝܢܵܟ݂ ܕܝܲܡܝܼܢܵܐ: ܕܪܵܥܵܟ݂ ܕܝܲܡܝܼܢܵܐ ܢܹܐܒܲܫ: ܘܥܲܝܢܵܟ݂ ܕܝܲܡܝܼܢܵܐ ܬܸܣܡܸܐ.
ܩܹܦܵܠܹܐܘܿܢ: ܝܒ.
1: ܚܸܙܘܵܐ ܕܦܸܬ̣ܓ̣ܵܡܵܘ̈ܗܝ ܕܡܵܪܝܵܐ ܥܲܠ ܝܑܼܣܪܵܝܹܠ: ܐܵܡܲܪ ܡܵܪܝܵܐ ܕܲܡ̣ܬܲܚ ܫܡܲܝܵܐ ܘܐܲܬ̣ܩܸܢ ܫܲܬ̣ܐ̱ܣܹܝ̈ܗ̇ ܕܐܲܪܥܵܐ: ܘܲܒ̣ܪܵܐ ܪܘܼܚܹܗ ܕܒܲܪܢܵܫܵܐ ܒܓ̣ܵܘܹܗ.
2: ܗܵܢܵܐ ܐܸܢܵܐ ܥܵܒܹ̇ܕ݂ ܐ̄ܢܵܐ ܠܵܗ̇ ܠܐܘܿܪܸܫܠܸܡ: ܬܲܪܥܵܐ ܕܲܪܥܵܠܵܐ ܠܟ݂ܠܗܘܿܢ ܥܲܡܡܹ̈ܐ ܕܲܚܕ݂ܝܼܪܝܼܢ ܠܵܗ̇: ܐܵܦ ܥܲܠ ܝܑܼܗܘܼܕ݂ܵܐ ܢܸܗܘܸܐ ܐܘܼܠܨܵܢܵܐ ܥܲܡ ܐܘܿܪܸܫܠܸܡ.
3: ܘܢܸܗܘܹܐ ܒܹܗ ܒܝܵܘܡܵܐ ܗܵܘܿ: ܐܸܥܒ̇ܕ݂ܝܼܗ̇ ܠܐܘܿܪܸܫܠܸܡ ܟܹܐܦܵܐ ܕܲܕ݂ܝܵܫܵܐ ܠܟ݂ܠܗܘܿܢ ܥܲܡܡܹ̈ܐ: ܘܟ݂ܠܗܘܿܢ ܕܵܝܘܿܫܹ̈ܝܗ̇ ܡܸܣܬܲܪܵܛܘܼ ܢܸܣܬܲܪܛܘܼܢ: ܘܢܸܬ̣ܟܲܢܫܘܼܢ ܥܠܹܝܗ̇ ܟܠܗܘܿܢ ܥܲܡܡܹ̈ܐ ܕܐܲܪܥܵܐ.
4: ܒܹܗ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ: ܐܸܡܚܸܐ ܠܟ݂ܠܗܘܿܢ ܪ̈ܲܟ݂ܫܵܗ̇ ܒܬܸܡܗܵܐ: ܘܪ̈ܵܟ݂ܒܲܝܗܘܿܢ ܒܲܬ̣ܘܵܪܵܐ: ܘܥܲܠ ܕܒܹܝܬ̣ ܝܑܼܗܘܼܕ݂ܵܐ ܐܸܦ̮ܬܲܚ ܥܲܝ̈ܢܲܝ: ܘܟ݂ܠܗܘܿܢ ܪ̈ܲܟ݂ܫܵܐ ܕܥܲܡܡܹ̈ܐ ܐܸܡܚܸܐ ܒܲܥܘܵܪܵܐ.
5: ܘܢܹܐܡܪܘܼܢ ܪܵܘܪ̈ܒ̣ܵܢܹܐ ܕܲܝܗܘܼܕ݂ܵܐ ܒܠܸܒ̇ܗܘܿܢ: ܥܫܸܢ̣ܘ ܡܸܢܲܢ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܒܡܵܪܝܵܐ ܚܲܝܠܬ̣ܵܢܵܐ ܐܲܠܵܗܗܘܿܢ.
6: ܒܹܗ ܒܝܵܘܡܵܐ ܗܵܘ̇: ܐܸܥܒܸ̇ܕ݂ ܠܪܵܘܪ̈ܒ̣ܵܢܹܐ ܕܲܝܗܘܼܕ݂ܵܐ: ܐܲܝܟ݂ ܓܡܘܼܪܬܵܐ ܕܢܘܼܪܵܐ ܒܩܲܝ̈ܣܹܐ: ܘܐܲܝܟ݂ ܠܲܡܦܹܝܕ݂ܵܐ ܕܢܘܼܪܵܐ ܒܚܲܒ̇ܬ̣ܵܐ: ܘܢܹܐܟ݂ܠܘܼܢ ܠܝܲܡܝܼܢܵܐ ܘܲܠܣܸܡܵܠܵܐ: ܠܟ݂ܠܗܘܿܢ ܥܲܡܡܹ̈ܐ ܕܲܚܕ݂ܝܼܪܝܼܢ ܠܗܘܿܢ: ܘܬܸܬܸ̇ܒ̣ ܐܘܿܪܸܫܠܸܡ ܬܘܼܒ̣ ܒܕ݂ܘܼܟ̇ܬ̣ܵܗ̇ ܒܐܘܿܪܸܫܠܸܡ.
7: ܘܢܸܦܩܘܿܕ݂ ܡܵܪܝܵܐ ܠܡܲܫܟ̇ܢܵܐ ܕܲܝܗܘܼܕ݂ܵܐ ܐܲܝܟ݂ ܕܡ̣ܢ ܠܘܼܩܕܲܡ: ܡܸܛܠ ܕܠܵܐ ܬܸܣܓܸ̇ܐ ܬܸܫܒ̇ܘܿܚܬܵܐ ܕܒܹܝܬ̣ ܕܵܘܝܼܕ݂: ܘܬܸܫܒ̇ܘܿܚܬܵܐ ܕܥܵܡܘܿܪܹ̈ܝܗ̇ ܕܐܘܿܪܸܫܠܸܡ ܥܲܠ ܕܒܹܝܬ̣ ܝܑܼܗܘܼܕ݂ܵܐ.
8: ܒܹܗ ܒܝܵܘܡܵܐ ܗܵܘ̇ ܢܲܓܸ̇ܢ ܡܵܪܝܵܐ ܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܘܢܸܗܘܹܐ ܟܪܝܼܗܵܐ ܕܲܒ̣ܗܘܿܢ ܒܝܵܘܡܵܐ ܗܵܘܿ ܐܲܝܟ݂ ܕܵܘܝܼܕ݂: ܘܒܹܝܬ̣ ܕܵܘܝܼܕ݂ ܐܲܝܟ݂ ܐܲܠܵܗܵܐ: ܐܲܝܟ݂ ܡܲܠܲܐܟܹܗ ܕܡܵܪܝܵܐ ܕܲܩܕ݂ܵܡܲܝܗܘܿܢ.
9: ܘܢܸܗܘܹܐ ܒܹܗ ܒܝܵܘܡܵܐ ܗܵܘܿ: ܐܸܒ̣ܥܸܐ ܠܡܵܘܒܵܕ݂ܘܼ ܠܟ݂ܠܗܘܿܢ ܥܲܡܡܹ̈ܐ ܕܐܵܬܹ̇ܝܢ ܥܲܠ ܐܘܿܪܸܫܠܸܡ.
10: ܘܐܹܫܘܼܕ݂ ܥܲܠ ܕܒܹܝܬ̣ ܕܵܘܝܼܕ݂ ܘܥܲܠ ܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܪܘܼܚܵܐ ܕܪܘܼܚܵܦܵܐ ܘܲܕ݂ܪܵܚܡܹܐ: ܘܲܢܚܘܼܪܘܼܢ ܠܘܵܬ̣ܝ ܒܡܲܢ ܕܲܕ݂ܩܲܪܘ: ܘܢܲܪܩ̄ܕ݂ܘܼܢ ܥܠܵܘܗܝ ܐܲܝܟ݂ ܕܡܲܪܩܕ݂ܝܼܢ ܥܲܠ ܝܑܼܚܝܼܕ݂ܵܐ: ܘܢܸܬ̇ܬܲܒ̣ܪܘܼܢ ܥܠܵܘܗܝ ܐܲܝܟ݂ ܕܡܸܬ̇ܬܲܒ̣ܪܝܼܢ ܥܲܠ ܒܘܼܟ݂ܪܵܐ.
11: ܒܹܗ ܒܝܵܘܡܵܐ ܗܵܘܿ: ܬܸܣܓܸ̇ܐ ܡܲܪܩܘܼܕ̇ܬܵܐ ܒܐܘܿܪܸܫܠܸܡ: ܐܲܝܟ݂ ܡܲܪܩܘܼܕ̇ܬܵܐ ܕܒܲܪ ܐܲܡܘܿܢ ܕܲܒ̣ܦܲܩܥܲܬ̣ ܡܲܓܕ̇ܘܿ.
12: ܘܬܲܪܩܸܕ݂ ܐܲܪܥܵܐ ܫܲܪ̈ܒ̣ܵܢ ܫܲܪ̈ܒ̣ܵܢ ܐܲܟ݂ܚ̄ܕ݂ܵܐ: ܫܲܪܒ̇ܬ̣ܵܐ ܕܒܹܝܬ̣ ܕܵܘܝܼܕ݂ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ: ܫܲܪܒ̇ܬ̣ܵܐ ܕܒܹܝܬ̣ ܢܵܬ݂ܵܢ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ.
13: ܫܲܪܒ̇ܬ̣ܵܐ ܕܒܹܝܬ̣ ܠܹܘܝܼ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ: ܘܫܲܪܒ̇ܬ̣ܵܐ ܕܒܹܝܬ̣ ܫܸܡܥܘܿܢ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ.
14: ܟܠܗܹܝܢ ܫܲܪ̈ܒ̣ܵܬ̣ܵܐ ܕܐܸܫܬ̇ܚܲܪ: ܢܲܪ̈ܩ̄ܕ݂ܵܢ ܫܲܪ̈ܒ̣ܵܢ ܫܲܪ̈ܒ̣ܵܢ ܐܲܟ݂ܚ̄ܕ݂ܵܐ: ܘܢܸܫܲܝ̈ܗܘܿܢ ܐܲܟ݂ܚ̄ܕ݂ܵܐ.
ܩܹܦܵܠܹܐܘܿܢ: ܝܓ.
1: ܒܹܗ ܒܝܵܘܡܵܐ ܗܵܘܿ: ܢܸܗܘܹܐ ܡܲܒ̇ܘܼܥܵܐ ܕܡܸܬ̣ܦܬܲܚ ܠܲܕ݂ܒܹܝܬ̣ ܕܵܘܝܼܕ݂: ܘܲܠܥܵܡܘܿܪܹ̈ܝܗ̇ ܕܐܘܿܪܸܫܠܸܡ: ܠܲܪܣܵܣܵܐ ܘܲܠܬܲܕ݂ܟ̇ܝܼܬ̣ܵܐ.
2: ܒܹܗ ܒܝܵܘܡܵܐ ܗܵܘܿ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܵܘܒܸ̇ܕ݂ ܫܡܵܐ ܕܲܦܬܲܟ݂ܪܹ̈ܐ ܡ̣ܢ ܐܲܪܥܵܐ: ܘܬܘܼܒ̣ ܠܵܐ ܢܸܬ̇ܕܲܟ݂ܪܘܼܢ: ܘܐܲܥܒܲܪ ܡ̣ܢ ܐܲܪܥܵܐ ܢܒ̣ܝܹ̈ܐ ܕܲܓܵܠܹ̈ܐ ܘܪ̈ܘܼܚܹܐ ܛܲܢ̈ܦܵܬ̣ܵܐ.
3: ܘܐܸܢ ܬܘܼܒ̣ ܢܸܬ̣ܢܲܒܸ̇ܐ ܓܲܒ̣ܪܵܐ: ܢܹܐܡܪܘܼܢ ܠܹܗ ܐܲܒ̣ܘܼܗܝ ܘܐܸܡܹܗ ܠܵܐ ܬܸܚܸܐ: ܡܸܛܠ ܕܕܲܓܵܠܘܼܬ̣ܵܐ ܡܲܠܸܠ̣ܬ̇ ܒܲܫܡܹܗ ܕܡܵܪܝܵܐ: ܘܢܹܐܣܪܘܼܢܹܗ ܐܲܒ̣ܘܼܗܝ ܘܐܸܡܹܗ ܕܝܲܠܕ̇ܘܼܗܝ ܡܵܐ ܕܐܸܬ̣ܢܲܒ̇ܝܼ.
4: ܒܹܗ ܒܝܵܘܡܵܐ ܗܵܘܿ: ܢܸܒ̣ܗ̱ܬ̣ܘܼܢ ܢܒ̣ܝܹ̈ܐ ܕܲܓܵܠܹ̈ܐ ܐ̄ܢܵܫ ܡ̣ܢ ܚܸܙܘܵܐ ܕܲܢܒ̣ܝܼܘܼܬܹܗ: ܘܠܵܐ ܢܸܬ̣ܟܲܒ̣ܢܘܼܢ ܡܸܫܟܹ̇ܐ ܕܣܲܥܪܵܐ ܡܸܛܠ ܕܟܲܕܸ̇ܒ̣ܘ.
5: ܘܢܹܐܡܲܪ ܠܵܐ ܗܘܹ̇ܝܬ̣ ܢܒ̣ܝܼܵܐ: ܐܸܠܵܐ ܓܲܒ̣ܪܵܐ ܐ̄ܢܵܐ ܕܦܵܠܲܚ ܒܐܲܪܥܵܐ: ܘܒܲܪܢܵܫܵܐ ܐܲܛܢܲܢܝ ܡ̣ܢ ܛܲܠܝܘܼܬ̣ܝ.
6: ܘܢܹܐܡܪܘܼܢ ܠܹܗ: ܡܵܢܵܐ ܐܸܢܹܝܢ ܗܵܠܹܝܢ ܡܲܚ̈ܘܵܬ̣ܵܐ ܕܒ̣ܐܝܼܕܲܝ̈ܟ: ܘܢܹܐܡܲܪ ܗܵܠܹܝܢ ܡܲܚ̈ܘܵܬ̣ܵܐ ܕܒܸܠ̇ܥܹܬ̣ ܒܹܝܬ̣ ܪ̈ܵܚܡܲܝ.
7: ܣܲܝܦܵܐ ܐܸܬ̇ܬ̇ܥܝܼܪ ܥܲܠ ܪܵܥܝܵܐ ܕܝܼܠܝ: ܘܥܲܠ ܓܲܒ̣ܪܵܐ ܪܵܚܹܡ̇ܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܡܚܝܼ ܠܪܵܥܝܵܐ ܘܬܸܬ̣ܒܲܕܲܪ ܥܵܢܹ̈ܗ: ܘܐܲܗܦܸܟ݂ ܐܝܼܕ݂ܝ ܥܲܠ ܥܲܠܠܵܢܹ̈ܐ.
8: ܘܢܸܗܘܹܐ ܒܟ݂ܠܵܗ̇ ܐܲܪܥܵܐ ܐܵܡܲܪ ܡܵܪܝܵܐ: ܘܬܲܪܬܹ̇ܝܢ ܡ̈ܢܵܘܵܢ ܕܒ̣ܵܗ̇ ܢܣܘܼܦܘܼܢ: ܘܢܹܐܒ̣ܕ̇ܘܼܢ: ܘܬ̣ܘܼܠܬ̣ܵܐ ܢܸܫܬ̇ܚܲܪ ܒܵܗ̇.
9: ܘܐܲܥܠܝܼܘܗܝ ܠܬ̣ܘܼܠܬ̣ܵܐ ܕܢܸܫܬ̇ܚܲܪ ܒܢܘܼܪܵܐ: ܘܐܸܨܪܘܿܦ ܐܸܢܘܿܢ ܐܲܝܟ݂ ܕܨܵܪܦܝܼܢ ܠܣܹܐܡܵܐ: ܘܐܸܒ̣ܚܘܿܪ ܐܸܢܘܿܢ ܐܲܝܟ݂ ܕܒ̣ܵܚܪܝܼܢ ܠܕܲܗܒ̣ܵܐ: ܗ̤ܘ ܢܸܩܪܸܐ ܒܫܹܡܝ ܘܐܸܢܵܐ ܐܸܥܢܹܝܘܗܝ: ܘܐܹܡܲܪ ܕܗܵܢܵܘ ܥܲܡܝ: ܘܗ̤ܘ ܢܹܐܡܲܪ ܡܵܪܝܵܐ ܐܲܠܵܗܝ.
ܩܹܦܵܠܹܐܘܿܢ: ܝܕ.
1: ܗܵܐ ܝܵܘܡܹܗ ܕܡܵܪܝܵܐ ܐܵܬܹ̇ܐ: ܘܬܸܬ̣ܦܲܠܲܓ̣ ܒܸܙܬܹܟ݂ܝ ܒܹܟ݂ܝ.
2: ܘܐܸܟܲܢܸܫ ܠܟ݂ܠܗܘܿܢ ܥܲܡܡܹ̈ܐ ܠܐܘܿܪܸܫܠܸܡ ܠܲܩܪܵܒ̣ܵܐ: ܘܬܸܬ̇ܚܸܕ݂ ܡܕ݂ܝܼܢ̄ܬܵܐ: ܘܢܸܬ̣ܒܲܙܙܘܼܢ ܒܵـ̈ـܬܹ̇ܐ: ܘܢܸܫܹ̈ܐ ܢܸܨܛܲܥܪ̈ܵܢ: ܘܢܸܦܘܿܩ ܦܸܠܓܵܗ̇ ܕܲܡܕ݂ܝܼܢ̄ܬܵܐ ܒܫܸܒ̣ܝܵܐ: ܘܦܸܠܓܹ̇ܗ ܕܥܲܡܵܐ ܠܵܐ ܢܹܐܒܲܕ݂ ܡ̣ܢ ܡܕ݂ܝܼܢ̄ܬܵܐ.
3: ܘܢܸܩܘܿܩ ܡܵܪܝܵܐ ܘܢܸܬ̣ܟܲܬܲܫ ܥܲܡ ܥܲܡܡܹ̈ܐ ܗܵܢ̇ܘܿܢ ܐܲܝܟ݂ ܝܵܘܡܵܐ ܕܐܸܬ̣ܟܲܬܲܫ ܒܝܵܘܡܵܐ ܕܲܩܪܵܒ̣ܵܐ.
4: ܘܲܢܩܘܼ̈ܡܵܢ ܪܸ̈ܓ̣ܠܵܘܗܝ ܥܲܠ ܛܘܼܪܵܐ ܕܙܲܝ̈ܬܹ̇ܐ: ܕܠܘܼܩܒܲܠ ܐܘܿܪܸܫܠܸܡ ܒܡܲܕ݂ܢ̱ܚܵܝܵܗ̇: ܘܢܸܬ̣ܦܠܸܓ̣ ܛܘܼܪܵܐ ܕܙܲܝ̈ܬܹ̇ܐ ܦܸܠܓܹ̇ܗ ܠܡܲܕ݂ܢ̱ܚܵܐ ܘܦܸܠܓܹ̇ܗ ܠܡܲܥ̱ܪܒ̣ܵܐ: ܘܢܸܗܘܹܐ ܒܹܗ ܢܲܚܠܵܐ ܕܛܵܒ̣ ܪܲܒ̇: ܘܢܸܫܬ̇ܒܸܩ ܦܸܠܓܹ̇ܗ ܕܛܘܼܪܵܐ ܠܓܲܪܒ̇ܝܵܐ: ܘܦܸܠܓܹ̇ܗ ܠܬܲܝܡ̄ܢܵܐ.
5: ܘܬܸܥ̱ܪܩܘܼܢ ܠܢܲܚܠܵܐ ܕܛܘܼܪܹ̈ܐ: ܡܸܛܠ ܕܢܸܡܛܸܐ ܢܲܚܠ̱ܗܘܿܢ ܕܛܘܼܪܹ̈ܐ ܠܐܘܼܠܨܵܢܵܐ: ܘܬܸܥ̱ܪܩܘܼܢ ܐܲܝܟ݂ ܕܲܥܪܲܩ̣ܬ̇ܘܿܢ ܡ̣ܢ ܩܕ݂ܵܡ ܙܵܘܥܵܐ ܕܲܗܘ̤ܵܐ ܒܝܵܘܡܵܘ̈ܗܝ ܕܥܘܿܙܝܼܵܐ ܡܲܠܟܵܐ ܕܲܝܗܘܼܕ݂ܵܐ: ܘܢܸܥܘܿܠ ܡܵܪܝܵܐ ܐܲܠܵܗܝ ܘܟ݂ܠܗܘܿܢ ܩܲܕ̇ܝܼܫܵܘ̈ܗܝ ܥܲܡܹܗ.
6: ܒܹܗ ܒܝܵܘܡܵܐ ܗܵܘܿ: ܠܵܐ ܢܸܗܘܹܐ ܢܘܼܗܪܵܐ: ܐܸܠܵܐ ܥܲܪܝܵܐ ܘܲܓ̣ܠܝܼܕ݂ܵܐ.
7: ܘܢܸܗܘܹܐ ܝܵܘܡܵܐ ܚܲܕ݂: ܘܝܵܘܡܵܐ ܗܵܘܿ ܢܸܬ̣̱ܝܼܕܲܥ ܠܡܵܪܝܵܐ: ܠܵܐ ܠܸܠܝܵܐ ܘܠܵܐ ܐܝܼܡܵܡܵܐ: ܘܲܠܥܸܕܵܢ ܪܲܡܫܵܐ ܢܸܗܘܹܐ ܢܘܼܗܪܵܐ.
8: ܒܹܗ ܒܝܵܘܡܵܐ ܗܵܘܿ: ܢܸܦܩܘܼܢ ܡܲـ̈ـܝܵܐ ܚܲܝܹ̈ܐ ܡ̣ܢ ܐܘܿܪܸܫܠܸܡ: ܦܸܠܓ̇ܗܘܿܢ ܠܝܲܡܵܐ ܡܲܕ݂ܢ̱ܚܵܝܵܐ: ܘܦܸܠܓܗܘܿܢ ܠܝܲܡܵܐ ܡܲܥ̱ܪܒ̣ܵܝܵܐ: ܩܲܝܛܵܐ ܘܣܲܬ̣ܘܵܐ.
9: ܘܢܸܗܘܹܐ ܡܵܪܝܵܐ ܡܲܠܟܵܐ ܥܲܠ ܟܠܵܗ̇ ܐܲܪܥܵܐ ܒܝܵܘܡܵܐ ܗܵܘܿ: ܢܸܗܘܸܐ ܡܵܪܝܵܐ ܚܲܕ݂: ܘܲܫܡܹܗ ܚܲܕ݂.
10: ܘܢܸܚܕ̇ܪܝܼܗ̇ ܠܟ݂ܠܵܗ̇ ܐܲܪܥܵܐ ܐܲܝܟ݂ ܦܩܲܥܬ̣ܵܐ: ܡ̣ܢ ܓܒܲܥ ܘܲܥܕܲܡܵܐ ܠܪܲܡܘܿܢ ܕܲܒ̣ܬܲܝܡܢܵܝܵܗ̇ ܕܐܘܿܪܸܫܠܸܡ: ܘܬܸܬ̇ܪܝܼܡ ܘܬܸܬܸ̇ܒ̣ ܒܕ݂ܘܼܟ̇ܬ̣ܵܗ̇: ܡ̣ܢ ܬܲܪܥܵܐ ܕܒܸܢܝܵܡܹܝܢ: ܘܲܥܕܲܡܵܐ ܠܐܲܬ̣ܪܵܐ ܕܬܲܪܥܵܐ ܩܲܕ݂ܡܵܝܵܐ: ܘܲܥܕܲܡܵܐ ܠܬܲܪܥܵܐ ܕܙܵܘܝܼܬ̣ܵܐ: ܘܡ̣ܢ ܡܲܓܕ̇ܠܵܐ ܕܲܚܢܵܢܵܐܹܝܠ: ܘܲܥܕܲܡܵܐ ܠܡܲܥܨܲܪܬܵܐ ܕܡܲܠܟܵܐ.
11: ܘܢܸܬ̇ܒ̣ܘܼܢ ܒܵܗ̇: ܘܬ̣ܘܼܒ̣ ܚܸܪܡܵܐ ܠܵܐ ܢܸܗܘܹܐ: ܘܬܸܬܸ̇ܒ̣ ܐܘܿܪܸܫܠܸܡ ܒܫܸܠܝܵܐ.
12: ܘܗܵܕܹܐ ܬܸܗܘܹܐ ܡܚܘܿܬ̣ܵܐ ܕܢܸܡܚܸܐ ܡܵܪܝܵܐ ܠܟ݂ܠܗܘܿܢ ܥܲܡܡܹ̈ܐ ܕܡܸܬ̣ܚܲܝܠܝܼܢ ܥܲܠ ܐܘܿܪܸܫܠܸܡ: ܢܸܬ̣ܡ̱ܣܸܐ ܒܸܣ̱ܪܗܘܿܢ ܟܲܕ݂ ܩܵܝ̇ܡܝܼܢ ܥܲܠ ܪܸ̈ܓ̣ܠܲܝܗܘܿܢ: ܘܥܲܝܢܲܝ̈ܗܘܿܢ ܢܸܬ̣ܡܲܣ̈ܝܵܢ ܒܕ݂ܘܼܟ̇ܝܵܬ̣ܗܹܝܢ: ܘܠܸܫܵܢܗܘܿܢ ܢܸܬ̣ܡ̱ܣܸܐ ܒܦܘܼܡܗܘܿܢ.
13: ܒܹܗ ܒܝܵܘܡܵܐ ܗܵܘܿ: ܬܸܗܘܹܐ ܒܗܘܿܢ ܬܵܘܹܗܬ̣ܵܐ ܪܲܒ̇ܬ̣ܵܐ ܕܡܵܪܝܵܐ: ܘܢܹܐܚܕ̇ܘܼܢ ܐ̄ܢܵܫ ܠܚܲܒ̣ܪܹܗ: ܘܬܸܕ݂ܒܲܩ ܐܝܼܕܹܗ ܒܐܝܼܕ݂ܵܐ ܕܚܲܒ̣ܪܹܗ.
14: ܘܐܵܦ ܝܑܼܗܘܼܕ݂ܵܐ ܢܸܬ̣ܟܲܬܲܫ ܒܐܘܿܪܸܫܠܸܡ: ܘܲܢܟܲܢܸܫ ܩܸܢܝܵܢܵܐ ܕܟ݂ܠܗܘܿܢ ܥܲܡܡܹ̈ܐ ܕܲܚܕ̇ܝܼܪܝܼܢ ܠܵܗ̇: ܕܲܗܒ̣ܵܐ ܘܣܹܐܡܵܐ ܘܢܲܚ̈ܬܹ̇ܐ ܕܛܵܒ̣ ܣܲܓ̇ܝܼܐܝܼܢ.
15: ܘܗܵܟܲܢܵܐ ܬܸܗܘܹܐ ܡܚܘܿܬ̣ܵܐ ܕܣܘܼܣܝܵܐ ܘܲܕ݂ܟ݂ܘܿܕܲܢܝܵܐ: ܘܲܕ݂ܓܲܡܠܵܐ ܘܕܲܚܡܵܪܵܐ: ܘܲܕ݂ܟ݂ܠܵܗ̇ ܒܥܝܼܪܵܐ ܕܬܸܗܘܹܐ ܒܡܲܫ̱ܪ̈ܝܵܬ̣ܵܐ ܗܵܠܹܝܢ: ܐܲܝܟ݂ ܡܚܘܿܬ̣ܵܐ ܗܵܕܹܐ.
16: ܘܢܸܗܘܹܐ ܟܠ ܕܡܸܫܬ̇ܚܲܪ ܡ̣ܢ ܟܠܗܘܿܢ ܥܲܡܡܹ̈ܐ ܕܐܵܬܹ̇ܝܢ ܥܲܠ ܐܘܿܪܸܫܠܸܡ: ܢܸܣܩܘܼܢ ܡ̣ܢ ܫܢܵܐ ܠܲܫܢܵܐ: ܠܡܸܣܓܸ̇ܕ݂ ܠܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ: ܘܲܠܡܸܥܒܲܕ݂ ܥܲܕ݂ܥܹܕ݂ܵܐ ܕܲܡܛܲܠ̈ܠܹܐ.
17: ܘܢܸܗܘܸܐ ܡܲܢ ܕܠܵܐ ܢܸܣܲܒ̣ ܡ̣ܢ ܟܠܗܹܝܢ ܫܲܪ̈ܒ̣ܵܬ̣ܵܐ ܕܐܲܪܥܵܐ ܠܐܘܿܪܸܫܠܸܡ: ܠܡܸܣܓܲܕ݂ ܠܡܲܠܟܵܐ ܡܵܪܝܵܐ ܚܲܝܠܬ̣ܵܢܵܐ: ܠܵܐ ܢܸܚܘܿܬ̣ ܥܠܲܝܗܘܿܢ ܡܸܛܪܵܐ.
18: ܘܐܸܢ ܫܲܪܒ̇ܬ̣ܵܐ ܕܡܸܨܪܹܝܢ ܠܵܐ ܬܣܲܩ ܘܠܵܐ ܬܹܐܬܹܐ: ܘܐܵܦ ܥܠܲܝܗܘܿܢ ܬܸܗܘܹܐ ܡܚܘܿܬ̣ܵܐ ܕܢܸܡܚܸܐ ܡܵܪܝܵܐ ܠܥܲܡܡܹ̈ܐ: ܐܲܝܠܹܝܢ ܕܠܵܐ ܣܵܠܩܝܼܢ ܠܡܸܥܒܲܕ݂ ܥܲܕ݂ܥܹܕ݂ܵܐ ܕܲܡܛܲܠܵܠܹ̈ܐ.
19: ܘܗܵܕܹܐ ܬܸܗܘܹܐ ܚܛܝܼܬ̣ܵܗ̇ ܕܡܸܨܪܹܝܢ: ܘܲܚܛܝܼܬ̣ܵܐ ܕܟ݂ܠܗܘܿܢ ܥܲܡܡܹ̈ܐ: ܐܲܝܠܹܝܢ ܕܠܵܐ ܣܵܠ̇ܩܝܼܢ ܠܡܸܥܒܲܕ݂ ܥܲܕ݂ܥܹܕ݂ܵܐ ܕܲܡܛܲܠ̈ܠܹܐ.
20: ܒܹܗ ܒܝܵܘܡܵܐ ܗܵܘܿ: ܢܸܗܘܸܐ ܥܲܠ ܦܓ̣ܘܼܕ̇ܬܹ̇ܗ ܕܣܘܼܣܝܵܐ ܩܘܼܕ݂ܫܵܐ ܠܡܵܪܝܵܐ: ܘܢܸܗܘܘܿܢ ܩܲܕ݂ܣܹ̈ܐ ܕܲܒ̣ܒܲܝܬܹ̇ܗ ܕܡܵܪܝܵܐ: ܐܲܝܟ݂ ܦܝܼܠܵܣܹ̈ܐ ܕܲܩܕ݂ܵܡ ܡܲܕ݂ܒ̇ܚܵܐ.
21: ܘܢܸܗܘܹܐ ܟܠ ܩܲܕ݂ܣܵܐ ܕܒ̣ܐܘܿܪܸܫܠܸܡ ܘܒܲܝܗܘܼܕ݂ܵܐ: ܩܘܼܕ݂ܫܵܐ ܠܡܵܪܝܵܐ ܚܲܝܠܬ̣ܵܢܵܐ: ܘܢܹܐܬ̣ܘܿܢ ܟܠ ܕܲܡܕܲܒ̇ܚܝܼܢ: ܘܢܸܣܒ̣ܘܼܢ ܡܸܢܗܘܿܢ ܘܲܢܒܲܫܠܘܼܢ ܒܗܘܿܢ: ܘܠܵܐ ܢܸܗܘܹܐ ܬܘܼܒ̣ ܟܢܲܥܢܵܝܵܐ ܒܒܲܝܬܹ̇ܗ ܕܡܵܪܝܵܐ ܚܲܝܠܬ̣ܵܢܵܐ ܒܝܵܘܡܵܐ ܗܵܘܿ.