ܟܬ݂ܒ݂ܐ ܕܡܠܐܟ݂ܝ

ܩܹܦܵܠܹܐܘܿܢ: ܐ.

1: ܚܸܙܘܵܐ ܕܦܸܬ̣ܓ̣ܵܡܵܘ̈ܗܝ ܕܡܵܪܝܵܐ ܥܲܠ ܝܑܼܣܪܵܝܹܠ ܒܝܲܕ݂ ܡܲܠܲܐܟ݂ܝܼ.

2: ܪܚܸܡ̇ܬ̇ܟ݂ܘܿܢ ܐܵܡܲܪ ܡܵܪܝܵܐ: ܘܐܵܡ̇ܪܝܼܢ ܐ̄ܢܬ̇ܘܿܢ ܒܡܵܢܵܐ ܪܚܸܡ̣ܬܵܢ: ܕܲܠܡܵܐ ܥܹܣܘܿ ܠܵܐ ܗܘ̤ܵܐ ܐܲܚܘܼܗܝ ܕܝܲܥܩܘܿܒ̣ ܐܵܡܲܪ ܡܵܪܝܵܐ: ܕܪܸܚܡܹ̇ܬ̣ ܠܝܲܥܩܘܿܒ̣: ܘܲܠܥܹܣܘܿ ܣܢܹ̇ܝܬ̣.

3: ܥܸܒ̣ܕܹ̇ܬ̣ ܛܘܼܪ̈ܵܘܗܝ ܠܲܚܒ̣ܵܠܵܐ: ܘܝܵܪܬ̇ܘܼܬܹܗ ܠܕܲܝܪܹ̈ܐ ܕܡܲܕ݂ܒ̇ܪܵܐ.

4: ܘܐܸܢ ܢܹܐܡܪܘܼܢ ܐܲܕ݂ܘܿܡܵܝܹ̈ܐ ܐܸܬ̣ܡܲܣܟܲܢ̄ܢ: ܢܸܗܦܘܿܟ݂ ܢܸܒ̣ܢܸܐ ܚܲܪ̈ܒ̣ܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܝܵܐ: ܗܸܢ̣ܘܿܢ ܢܸܒ̣ܢܘܿܢ ܘܐܸܢܵܐ ܐܸܣܚܘܿܦ: ܘܢܸܩܪܘܿܢ ܐܸܢܘܿܢ ܬܚܘܼܡܵܐ ܕܲܚܛܝܼܬ̣ܵܐ: ܘܥܲܡܵܐ ܕܲܪܓܸܙ ܥܠܵܘܗܝ ܡܵܪܝܵܐ ܠܥܵܠܲܡ.

5: ܘܥܲܝܢܲܝ̈ܟ̇ܘܿܢ ܢܸܚܙ̈ܝܵܢ: ܐܲܢ̄ܬ̇ܘܿܢ ܕܹܝܢ ܬܹܐܡܪܘܼܢ: ܢܹܐܪܲܒ̣ ܡܵܪܝܵܐ ܠܥܸܠ ܡ̣ܢ ܬܚܘܼܡܵܐ ܕܝܼܣܪܵܝܹܠ.

6: ܒܪܵܐ ܡܝܲܩܲܪ ܠܐܲܒ̣ܘܼܗܝ ܘܥܲܒ̣ܕܵܐ ܠܡܵܪܹܗ: ܐܸܢ ܐܲܒ̣ܵܐ ܐ̄ܢܵܐ ܐܲܝܟܵܘ ܕܲܡܝܲܩܪܝܼܢ ܐ̄ܢܬ̇ܘܿܢ ܠܝܼ: ܘܐܸܢ ܡܵܪܝܵܐ ܐ̄ܢܵܐ ܐܲܝܟܵܐ ܗ̄ܘܼ ܕܕ݂ܵܚ̇ܠܝܼܢ ܐ̄ܢܬ̇ܘܿܢ ܡܹܢܝ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܠܟ݂ܘܿܢ ܟܵܗ̈ܢܹܐ ܕܒ̣ܵܙ̇ܝܼܢ ܐ̄ܢܬ̇ܘܿܢ ܫܹܡܝ: ܘܐܸܢ ܐܵܡ̇ܪܝܼܢ ܐ̄ܢܬ̇ܘܿܢ ܒܡܵܢܵܐ ܐܲܒܸ̇ܙܢ ܫܡܵܟ݂.

7: ܥܲܠ ܕܲܡܩܲܪܒ̣ܝܼܢ ܐ̄ܢܬ̇ܘܿܢ ܥܲܠ ܡܲܕ݂ܒܲܚܝ ܠܲܚܡܵܐ ܛܲܢܦܵܐ: ܘܐܸܢ ܐܵܡ̇ܪܝܼܬ̇ܘܿܢ ܒܡܵܢܵܐ ܛܲܢܸܦܢܵܟ݂: ܒܕ݂ܵܐܡ̇ܪܝܼܢ ܐ̄ܢܬ̇ܘܿܢ ܕܫܝܼܛ ܗ̄ܘܼ ܦܵܬ̣ܘܿܪܹܗ ܕܡܵܪܝܵܐ.

8: ܘܕܲܡܩܲܪܒ̣ܝܼܢ ܐ̄ܢܬ̇ܘܿܢ ܥܘܝܼܪܵܐ ܠܡܲܕ݂ܒ̇ܚܵܐ ܕܲܠܡܵܐ ܠܵܐ ܒܝܼܫ: ܘܕܲܡܩܲܪܒ̣ܝܼܢ ܐ̄ܢܬ̇ܘܿܢ ܚܓ̣ܝܼܪܵܐ ܘܲܟ݂ܪܝܼܗܵܐ: ܕܲܠܡܵܐ ܠܵܐ ܒܝܼܫ: ܩܲܪܸܒܲܝܗܝ ܢܹܐ ܠܫܲܠܝܼܛܵܟ݂: ܕܲܠܡܵܐ ܪܵܥܹ̇ܐ ܠܵܟ݂: ܐܵܘ ܢܵܣܹ̇ܒ̣ ܒܐܲܦܲܝ̈ܟ: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

9: ܡܸܟܹ̇ܝܠ ܨܲܠܵܘ ܩܕ݂ܵܡ ܡܵܪܝܵܐ ܘܲܢܪܲܚܸܡ ܥܠܲܝܢ: ܕܒ̣ܐܝܼܕܲܝ̈ܟ̇ܘܿܢ ܗܘ̤ܵܬ̣ ܗܵܕܹܐ: ܠܵܐ ܐܸܣܲܒ̣ ܒܐܲܦܲܝ̈ܟ̇ܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

10: ܡܲܢ̣ܘܼ ܐܝܼܬ̣ ܒܟ݂ܘܿܢ ܕܢܹܐܚܘܿܕ݂ ܬܲܪܥܝܼ: ܘܠܵܐ ܬܩܲܪܒ̣ܘܼܢ ܥܲܠ ܡܲܕ݂ܒܲܚܝ ܕܡܲܓܵܢ: ܠܵܐ ܨܵܒܹ̇ܐ ܐ̄ܢܵܐ ܒܟ݂ܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܩܘܼܪܒܵܢܵܐ ܠܵܐ ܐܹܩܲܒܸ̇ܠ ܡܸܢܟ݂ܘܿܢ.

11: ܡܸܛܠ ܕܡ̣ܢ ܡܲܕ݂ܢܵܚܵܘ̈ܗܝ ܕܫܸܡܫܵܐ ܘܲܥܕܲܡܵܐ ܠܡܲܥܪ̈ܵܒ̣ܘܼܗܝ: ܪܲܒ̇ ܗ̄ܘܼ ܫܹܡܝ ܒܥܲܡܡܹ̈ܐ: ܘܲܒ̣ܟ݂ܠ ܐܲܬܲܪ ܣܵܝ̇ܡܝܼܢ ܒܸܣܡܹ̈ܐ: ܘܲܡܩܲܪܒ̣ܝܼܢ ܠܫܹܡܝ ܩܘܼܪ̈ܒܵܢܹܐ ܕܟܲـ̈ـܝܵܐ: ܡܸܛܠ ܕܪܲܒ̇ ܗ̄ܘܼ ܫܹܡܝ ܒܥܲܡܡܹ̈ܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

12: ܘܐܲܢ̄ܬ̇ܘܿܢ ܡܛܲܢܦܝܼܬ̇ܘܿܢ ܠܹܗ: ܒܕ݂ܵܐܡ̇ܪܝܼܢ ܐ̄ܢܬ̇ܘܿܢ ܕܦܵܬ̣ܘܿܪܹܗ ܕܡܵܪܝܵܐ ܡܛܲܢܲܦ ܗ̄ܘܼ: ܘܫܝܼ̈ܛܵܢ ܐܸܢܹܝܢ ܡܹܐܟ݂̈ܠܵܬܹܗ.

13: ܘܐܵܡ̇ܪܝܼܬ̇ܘܿܢ ܗܵܢܵܐ ܡ̣ܢ ܕܵܘܘܿܢܲܢ ܗ̄ܘܼ: ܘܢܸܦܚܹ̇ܬ̣ ܒܹܗ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܕܡܲܝܬܹ̇ܝܢ ܐ̄ܢܬ̇ܘܿܢ ܡ̣ܢ ܚܛܘܼܦܝܵܐ ܩܘܼܪ̈ܒܵܢܹܐ ܚܓܝܼܪܹ̈ܐ ܘܲܟ݂ܪ̈ܝܼܗܹܐ: ܠܵܐ ܡܩܲܒܸ̇ܠ ܐ̄ܢܵܐ ܠܗܘܿܢ ܡ̣ܢ ܐܝܼܕܲܝ̈ܟ̇ܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

14: ܘܠܝܼܛ ܗ̄ܘܼ ܡܲܢ ܕܐܝܼܬ̣ ܠܹܗ ܒܲܓ̣ܙܵܪܹܗ ܕܸܟ݂ܪܵܐ: ܘܢܵܕܲܪ ܘܲܡܕܲܒܲܚ ܕܲܟ݂ܪܝܼܗ ܠܡܵܪܝܵܐ: ܡܸܛܠ ܕܡܲܠܟܵܐ ܐ̄ܢܵܐ ܪܲܒܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܫܹܡܝ ܕܚܝܼܠ ܒܥܲܡܡܹ̈ܐ.

ܩܹܦܵܠܹܐܘܿܢ: ܒ.

1: ܡܸܟܹ̇ܝܠ ܦܘܼܩܕܵܢܵܐ ܗܵܢܵܐ ܥܠܲܝܟ̇ܘܿܢ ܗ̄ܘܼ ܟܵܗ̈ܢܹܐ.

2: ܐܸܢ ܠܵܐ ܬܸܫ̱ܡܥܘܼܢ ܘܐܸܢ ܠܵܐ ܬܣܝܼܡܘܼܢ ܒܠܸܒ̇ܟ݂ܘܿܢ: ܠܡܸܬܲܠ ܐܝܼܩܵܪܵܐ ܠܫܹܡܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܹܫܲܕܲܪ ܥܠܲܝܟ̇ܘܿܢ ܠܵܘ̈ܛܵܬ̣ܵܐ: ܘܐܹܠܘܼܛ ܒܘܼܪ̈ܟܵܬ̣ܟ݂ܘܿܢ: ܡܸܛܠ ܕܠܵܐ ܣܵܝܡ̇ܝܼܬ̇ܘܿܢ ܒܠܸܒ̇ܟ݂ܘܿܢ.

3: ܗܵܐ ܓܵܥܲܪ ܐ̄ܢܵܐ ܒܙܲܪܥܵܐ ܕܐܲܪܥܵܐ: ܘܐܸܕ݂ܪܸܐ ܦܸܪܬܲܐ ܥܲܠ ܐܲܦܲܝ̈ܟ̇ܘܿܢ: ܘܦܸܪܬ̣ܵܐ ܥܲܠ ܥܲܕ݂ܥܹܕܲܝ̈ܟ̇ܘܿܢ: ܘܐܸܫܩܘܿܠܟ݂ܘܿܢ ܒܵܗ̇.

4: ܘܬܸܕ̇ܥܘܼܢ ܕܫܲܕ̇ܪܹܬ̣ ܠܟ݂ܘܿܢ ܦܘܼܩܕܵܢܵܐ ܗܵܢܵܐ: ܕܬܸܗܘܹܐ ܕܝܵܬܹܩܹܐ ܥܲܡ ܠܹܘܝܼ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

5: ܩܝܵܡܝ ܗܘ̤ܵܐ ܥܲܡܹܗ: ܚܲܝܹ̈ܐ ܘܲܫܠܵܡܵܐ ܝܸܗ̄ܒܹ̇ܬ̣ ܐܸܢܘܿܢ ܠܹܗ: ܕܸܚ̱ܠܬ̣ܵܐ ܕܚܸܠ̣ ܡܹܢܝ: ܘܡ̣ܢ ܩܕ݂ܵܡ ܫܹܡܝ ܙܵܐܲܥ̇ ܗ̄ܘܼܵܐ.

6: ܢܵܡܘܿܣܵܐ ܕܩܘܼܫܬܵܐ ܗܘ̤ܵܐ ܒܦܘܼܡܹܗ: ܘܥܵܘܼܠܵܐ ܠܵܐ ܐܸܫܬ̇ܟܲܚ ܒܣܸܦ̈ܘܵܬܹܗ: ܒܲܫܠܵܡܵܐ ܘܒܲܬ̣ܪܝܼܨܘܼܬ̣ܵܐ ܗܲܠܸܟ݂ ܥܲܡܝ: ܘܣܲܓ̇ܝܼ̈ܐܹܐ ܐܲܗܦܸܟ݂ ܡ̣ܢ ܥܵܘܼܠܵܐ.

7: ܡܸܛܠ ܕܣܸܦ̈ܘܵܬܹܗ ܕܟ݂ܵܗܢܵܐ ܢܸܛܪ̈ܵܢ ܝܑܼܕܲܥܬ̣ܵܐ: ܘܢܵܡܘܿܣܵܐ ܫܵܐ̇ܠܝܼܢ ܡ̣ܢ ܦܘܼܡܹܗ: ܡܸܛܠ ܕܡܲܠܲܐܟܹܗ ܗ̄ܘܼ ܕܡܵܪܝܵܐ ܚܲܝܠܬ̣ܵܢܵܐ.

8: ܐܲܢ̄ܬ̇ܘܿܢ ܕܹܝܢ ܣܛܲܝܬ̇ܘܿܢ ܡ̣ܢ ܐܘܼܪܚܵܐ: ܘܐܲܟ݂ܫܸܠܬ̇ܘܿܢ ܠܣܲܓ̇ܝܼ̈ܐܹܐ ܡ̣ܢ ܢܵܡܘܿܣܵܐ: ܘܚܲܒܸ̇ܠ̣ܬ̇ܘܿܢ ܩܝܵܡܵܐ ܕܠܹܘܝܼ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

9: ܐܵܦ ܐܸܢܵܐ ܝܲܗ̄ܒ̣ܬ̇ܟ݂ܘܿܢ ܫܝܼܛܝܼܢ ܘܡܲܟ̇ܝܼܟ݂ܝܼܢ ܒܟ݂ܠ ܥܲܡ: ܥܲܠ ܕܠܵܐ ܢܛܲܪܬ̇ܘܿܢ ܐܘܼܪ̈ܚܵܬ̣ܝ: ܘܲܢ̣ܣܲܒ̣ܬ̇ܘܿܢ ܒܐܲܦܹ̈ܐ ܒܢܵܡܘܿܣܵܐ.

10: ܕܲܠܡܵܐ ܠܵܐ ܗ̄ܘܼܵܐ ܚܲܕ݂ ܐܲܒ̣ܵܐ ܠܟ݂ܠܲܢ: ܐܵܘ ܠܵܐ ܗ̄ܘܼܵܐ ܚܲܕ݂ ܐܲܠܵܗܵܐ ܒܪܵܢ: ܠܡܵܢܵܐ ܡܕܲܓ̇ܠܝܼܢܲܢ ܓܒܲܪ ܒܐܲܚܘܼܗܝ: ܘܲܡܛܲܢܦܝܼܢܲܢ ܩܝܵܡܵܐ ܕܐܲܒ̣ܵܗܲܝ̈ܢ.

11: ܕܲܓܸ̇ܠ̣ ܝܑܼܗܘܼܕ݂ܵܐ: ܘܛܲܢܦܘܼܬ̣ܵܐ ܐܸܬ̣ܥܲܒ̣ܕܲܬ̣ ܒܝܼܣܪܵܝܹܠ: ܘܒ̣ܐܘܿܪܸܫܠܸܡ: ܡܸܛܠ ܕܛܲܢܸܦ ܝܑܼܗܘܼܕ݂ܵܐ ܩܘܼܕ݂ܫܹܗ ܕܡܵܪܝܵܐ ܚܲܝܠܬ̣ܵܢܵܐ: ܘܲܪܚܸܡ ܘܲܦ̣ܠܲܚ ܠܐܲܠܵܗܹ̈ܐ ܢܘܼܟ݂ܪ̈ܵܝܹܐ.

12: ܢܵܘܒܸ̇ܕ݂ ܡܵܪܝܵܐ ܠܓܲܒ̣ܪܵܐ ܕܢܸܥܒܸ̇ܕ݂ ܗܵܕܹܐ: ܘܠܲܒ̣ܪܹܗ ܘܲܠܒܲܪ ܒܪܹܗ ܡ̣ܢ ܡܲܫܟ̇ܢܹܗ ܕܝܲܥܩܘܿܒ̣: ܘܠܵܐ ܢܸܗܘܹܐ ܠܹܗ ܕܲܡܩܲܪܸܒ̣ ܩܘܼܪܒܵܢܵܐ ܠܡܵܪܝܵܐ ܚܝܠܬ̣ܵܢܵܐ.

13: ܘܗܵܕܹܐ ܐ̄ܚܪܹܬ̣ܵܐ ܕܲܥ̣ܒܲܕ̇ܬ̇ܘܿܢ: ܟܲܣܝܲܬ̤ ܕܸܡ̱ܥܬ̣ܵܐ ܠܒܲܝܬܹ̇ܗ ܕܡܵܪܝܵܐ: ܘܲܒ̣ܟ݂ܵܬ̣ܵܐ ܘܬܸܢ̈ܚܵܬ̣ܵܐ: ܡܸܛܠ ܕܠܵܐ ܡܸܬ̣ܦܢܸܐ ܥܲܠ ܩܘܼܪ̈ܒܵܢܲܝܟ̇ܘܿܢ: ܘܠܵܐ ܡܩܲܒܸ̇ܠ ܠܹܗ ܠܨܸܒ̣ܝܵܢܵܐ ܡ̣ܢ ܐܝܼܕܲܝ̈ܟ̇ܘܿܢ.

14: ܘܐܸܢ ܐܵܡ̇ܪܝܼܬ̇ܘܿܢ ܥܲܠ ܡܵܢܵܐ: ܥܲܠ ܕܐܲܣܗܸܕ݂ ܡܵܪܝܵܐ ܒܲܝܢܲܝܟ ܠܐܲܢ̄ܬܲܬ̣ ܛܲܠܝܘܼܬ̣ܵܟ݂ ܕܐܲܢ̄ܬ̇ ܕܲܓܸ̇ܠ̣ܬ̇ ܒܵܗ̇: ܘܗ̤ܝ ܫܵܘܬܵܦܬܵܟ݂ ܘܐܲܢ̄ܬܲܬ̣ ܩܝܵܡܵܟ݂.

15: ܕܲܠܡܵܐ ܠܵܐ ܗ̄ܘܼܵܐ ܚܲܕ݂ ܓܒܲܪ: ܘܫܲܪܟܵܐ ܕܪ̈ܘܼܚܵܬ̣ܵܐ ܕܝܼܠܹܗ ܗ̄ܘܼ: ܚܲܕ݂ ܒܥ̣ܵܐ ܙܲܪܥܵܐ ܡ̣ܢ ܐܲܠܵܗܵܐ: ܐܸܙܕܲܗ̄ܪܘ ܒܪܘܼܚܟ݂ܘܿܢ: ܘܐ̄ܢܵܫ ܒܐܲܢ̄ܬܲܬ̣ ܛܲܠܝܘܼܬܹܗ ܠܵܐ ܢܕ̇ܓܸ̇ܠ.

16: ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ ܐܲܠܵܗܵܐ ܕܝܼܣܪܵܝܹܠ: ܘܥܵܘܼܠܵܐ ܒܡܲܪܛܘܼܛܹܗ ܠܵܐ ܢܟܲܣܸܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܐܸܙܕܲܗ̄ܪܘ ܒܪܘܼܚܟ݂ܘܿܢ ܘܠܵܐ ܬܕܲܓ̇ܠܘܼܢ.

17: ܐܲܠܐܝܼܬ̇ܘܿܢ ܠܡܵܪܝܵܐ ܒܦܸܬ̣ܓ̣ܵܡܲܝ̈ܟ̇ܘܿܢ: ܘܐܸܢ ܐܵܡ̇ܪܝܼܢ ܐ̄ܢܬ̇ܘܿܢ ܒܡܵܢܵܐ ܐܲܠܐܝܼܢܵܝܗܝ: ܒܕ݂ܵܐܡ̇ܪܝܼܢ ܐ̄ܢܬ̇ܘܿܢ ܕܟ݂ܠ ܕܥܵܒܹ̇ܕ݂ ܕܒ̣ܝܼܫ ܫܲܦܝܼܪ ܒܥܲܝ̈ܢܲܝ ܡܵܪܝܵܐ: ܘܲܒ̣ܗܘܿܢ ܗ̄ܘܼ ܨܵܒܹ̇ܐ. ܘܐܸܢ ܠܵܐ: ܐܲܝܟܵܘ ܐܲܠܵܗܵܐ ܕܕ݂ܵܐܹ̇ܢ ܕܝܼܢܹ̈ܐ.

ܩܹܦܵܠܹܐܘܿܢ: ܓ.

1: ܗܵܐ ܐܸܢܵܐ ܡܫܲܕܲܪ ܐ̄ܢܵܐ ܡܲܠܲܐܟ݂ܝ: ܘܲܢܫܲܦܸܐ ܐܘܼܪܚܵܐ ܩܕ݂ܵܡܲܝ: ܘܡ̣ܢ ܫܸܠܝܵܐ ܢܹܐܬܹܐ ܠܗܲܝܟ̇ܠܹܗ ܕܡܵܪܝܵܐ ܕܲܡܣܲܟܹ̇ܝܢ ܐ̄ܢܬ̇ܘܿܢ ܠܹܗ: ܘܡܲܠܲܐܟ݂ܵܐ ܕܲܩܝܵܡܵܐ ܕܨܵܒܹ̇ܝܢ ܐ̄ܢܬ̇ܘܿܢ ܒܹܗ: ܗܵܐ ܐܵܬܹ̇ܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

2: ܡܲܢܘܼ ܡܣܲܝܒܲܪ ܝܵܘܡܵܐ ܕܐܵܬܹ̇ܐ ܒܹܗ: ܐܵܘ ܡܲܢ̣ܘܼ ܡܸܫܟܲܚ ܠܲܡܩܵܡ ܐܸܡܲܬ̣ܝ ܕܡܸܬ̣ܓ̇ܠܹܐ: ܡܸܛܠ ܕܐܲܝܟ݂ ܢܘܼܪܵܐ ܗ̄ܘܼ ܕܨܵܪܦܵܐ: ܘܐܲܝܟ݂ ܟܸܒ̣ܪܝܼܬ̣ܵܐ ܕܲܡܚܵܘܪܵܐ.

3: ܕܢܸܗܦܘܿܟ݂ ܠܡܸܨܪܲܦ ܘܠܲܡܕܲܟܵܝܘܼ ܐܲܝܟ݂ ܣܹܐܡܵܐ: ܘܲܢܕܲܟܸ̇ܐ ܠܲܒ̣ܢܵܘ̈ܗܝ ܕܠܹܘܝܼ: ܘܢܸܓ̣ܒܸ̇ܐ ܐܸܢܘܿܢ ܐܲܝܟ݂ ܕܲܗܒ̣ܵܐ ܘܐܲܝܟ݂ ܣܹܐܡܵܐ: ܘܢܸܗܘܘܿܢ ܡܩܲܪܒ̣ܝܼܢ ܩܘܼܪܒܵܢܵܐ ܠܡܵܪܝܵܐ ܒܙܲܕ̇ܝܼܩܘܼܬ̣ܵܐ.

4: ܘܢܸܒ̣ܣܲܡ ܠܡܵܪܝܵܐ ܩܘܼܪܒܵܢܵܐ ܕܲܝܗܘܼܕ݂ܵܐ ܘܕ݂ܐܘܿܪܸܫܠܸܡ: ܐܲܝܟ݂ ܝܵܘ̈ܡܵܬ̣ܵܐ ܕܡ̣ܢ ܥܵܠܲܡ: ܘܐܲܝܟ݂ ܫܢܲـ̈ـܝܵܐ ܕܡ̣ܢ ܩܕ݂ܝܼܡ.

5: ܘܐܸܩܪܘܿܒ̣ ܥܠܲܝܟ̇ܘܿܢ ܒܕ݂ܝܼܢܵܐ: ܘܐܸܗܘܹܐ ܣܵܗܕ݂ܵܐ ܡܣܲܪܗܒ̣ܵܐ ܒܚܲܪ̈ܵܫܹܐ ܘܲܒ̣ܓܲܝܵܪܹ̈ܐ: ܘܒܲܐܝܠܹܝܢ ܕܝܵܡܹ̇ܝܢ ܒܕܲܓܵܠܘܼܬ̣ܵܐ: ܘܒܲܐܝܠܹܝܢ ܕܛܵܠ̇ܡܝܼܢ ܐܲܓ̣ܪܵܐ ܕܐܲܓܝܼܪܵܐ: ܘܲܕ݂ܥܵܡܘܿܪܵܐ: ܘܲܕ݂ܝܲܬ̣ܡܵܐ: ܘܕܲܐܪܡܲܠܬܵܐ: ܘܨܵܠܹ̇ܝܢ ܥܲܠ ܐܲܝܢܵܐ ܕܡܸܬ̣ܦܢܸܐ ܠܘܵܬ̣ܝ: ܘܠܵܐ ܕܚܸܠ̣ܘ ܡܹܢܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

6: ܡܸܛܠ ܕܐܸܢܵܐ ܐ̄ܢܵܐ ܡܵܪܝܵܐ ܘܠܵܐ ܐܸܬ̣ܚܲܠܦܹ̇ܬ̣: ܘܐܲܢ̄ܬ̇ܘܿܢ ܒܢܲܝ̈ ܝܲܥܩܘܿܒ̣ ܠܵܐ ܥ̣ܒܲܪܬ̇ܘܿܢ ܡ̣ܢ ܥܵܘܼܠܟ݂ܘܿܢ.

7: ܡ̣ܢ ܝܵܘ̈ܡܲܝ ܐܲܒ̣ܵܗܲܝ̈ܟ̇ܘܿܢ ܣܛܲܝ̣ܬ̇ܘܿܢ ܡ̣ܢ ܦܘܼܩ̈ܕܵܢܲܝ: ܘܠܵܐ ܫ̣ܡܲܥܬ̇ܘܿܢ ܐܸܢܘܿܢ: ܐܸܬ̣ܦܢܵܘ ܠܘܵܬ̣ܝ ܘܐܸܬ̣ܦܢܸܐ ܥܠܲܝܟ̇ܘܿܢ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ. ܘܐܸܢ ܐܵܡ̇ܪܝܼܬ̇ܘܿܢ ܒܡܵܢܵܐ ܢܸܬ̣ܦܢܸܐ.

8: ܕܲܠܡܵܐ ܛܵܠܹ̇ܡ ܒܲܪܢܵܫܵܐ ܠܐܲܠܗܵܐ ܐܲܝܟ݂ ܕܐܲܢ̄ܬ̇ܘܿܢ ܛܵܠ̇ܡܝܼܢ ܐ̄ܢܬ̇ܘܿܢ ܠܝܼ: ܘܐܸܢ ܐܵܡ̇ܪܝܼܢ ܐ̄ܢܬ̇ܘܿܢ ܒܡܵܢܵܐ ܛܠܲܡܢܵܟ݂: ܒܡܲܥܣܵܪܹ̈ܐ: ܘܲܒ̣ܪܹ̈ܫܝܵܬ̣ܵܐ.

9: ܒܠܵܘ̈ܛܵܬ̣ܵܐ ܡܸܬ̇ܬ̇ܠܝܼܛܝܼܢ ܐ̄ܢܬ̇ܘܿܢ: ܘܠܝܼ ܛܵܠ̇ܡܝܼܢ ܐ̄ܢܬ̇ܘܿܢ.

10: ܟܠܹܗ ܥܲܡܵܐ ܐܲܝܬܵܘ ܡܲܥܣܵܪܹ̈ܐ ܠܐܵܘܨܪ̈ܲܝ: ܘܢܸܗܘܘܿܢ ܡܹܐܟ݂ܘܼܠܬܵܐ ܒܒܲܝܬ̇ܝ: ܘܢܲܣܵܐܘܼܢܝ ܒܗܵܕܹܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܐܸܦ̮ܬܲܚ ܠܟ݂ܘܿܢ ܟܵܘܲܝ̈ ܫܡܲܝܵܐ: ܘܐܸܣܘܿܟ݂ ܠܟ݂ܘܿܢ ܒܘܼܪ̈ܟܵܬ̣ܵܐ ܥܕܲܡܵܐ ܕܬܹܐܡܪܘܿܢ ܟܲܕ̇ܘܼ.

11: ܘܐܸܟܐܸܐ ܒܐܵܟ݂ܠܵܐ ܕܠܵܐ ܢܚܲܒܸ̇ܠ ܦܹܐܪܹ̈ܐ ܕܐܲܪܥܵܐ: ܘܠܵܐ ܬܸܚܪܲܒ̣ ܠܟ݂ܘܿܢ ܐܵܦܠܵܐ ܚܕ݂ܵܐ ܓܦܸܬܵܐ ܒܐܲܪܥܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

12: ܘܲܢܫܲܒ̇ܚܘܼܢܵܟ݂ܘܿܢ ܟܠܗܘܿܢ ܥܲܡܡܹ̈ܐ: ܟܲܕ݂ ܬܸܗܘܘܿܢ ܐܲܪܥܵܐ ܕܨܸܒ̣ܝܵܢܝ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

13: ܥ̣ܫܸܢ ܥܠܲܝ ܡܸܠܲܝ̈ܟ̇ܘܿܢ ܐܵܡܲܪ ܡܵܪܝܵܐ: ܘܐܸܢ ܐܵܡ̇ܪܝܼܢ ܐ̄ܢܬ̇ܘܿܢ ܡܵܢܵܐ ܐܸܡܲܪܢ ܥܠܲܝܟ.

14: ܐܸܡ̣ܪܬ̇ܘܿܢ ܕܲܣܪܝܼܩܵܐܝܼܬ̣ ܦܠܲܚ̣ܢܵܝܗܝ ܠܡܵܪܝܵܐ: ܘܡܵܢܵܐ ܐܵܘܬܲܪܢ ܕܲܢܛܲܪܢ ܢܛܘܼܪ̈ܵܬܹܗ: ܘܲܕ݂ܗܲܠܸܟ݂ܢ ܡܲܟ̇ܝܼܟ݂ܵܐܝܼܬ̣ ܩܕ݂ܵܡ ܡܵܪܝܵܐ ܚܲܝܠܬ̣ܵܢܵܐ.

15: ܘܡ̣ܢ ܗܵܫܵܐ ܛܘܼܒ̣ܵܐ ܝܵܗ̄ܒ̇ܝܼܢܲܢ ܠܥܵܘܿܠܹܐ: ܘܡܸܬ̣ܒ̇ܢܹܝܢ ܥܵܒ̣ܕܲܝ̈ ܚܛܝܼܬ̣ܵܐ: ܘܲܡܢܲܣܹܝܢ ܠܐܲܠܵܗܵܐ ܘܡܸܬ̣ܦܲܨܹܝܢ.

16: ܗܵܠܹܝܢ ܡܲܠܸܠ̣ܘ ܕܵܚܠܵܘ̈ܗܝ ܕܡܵܪܝܵܐ ܓܒܲܪ ܥܲܡ ܚܲܒ̣ܪܹܗ: ܘܨܵܬ̣ ܡܵܪܝܵܐ ܘܲܫܡܲܥ: ܘܲܟ݂ܬܲܒ̣ ܒܣܸܦܪܵܐ ܕܕ݂ܘܼܟ݂ܪܵܢܵܐ ܩܕ݂ܵܡܵܘܗܝ: ܠܕ݂ܵܚܠܵܘ̈ܗܝ ܘܠܲܐܝܠܹܝܢ ܕܲܡܫܲܒ̇ܚܝܼܢ ܠܲܫܡܹܗ.

17: ܘܢܸܗܘܘܿܢ ܠܝܼ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܠܝܵܘܡܵܐ ܕܥܵܒܹ̇ܕ݂ ܐ̄ܢܵܐ ܟܢܘܼܫܝܵܐ: ܘܐܹܚܘܼܣ ܥܠܲܝܗܘܿܢ ܐܲܝܟ݂ ܕܚܵܐܹ̇ܣ ܓܲܒ̣ܪܵܐ ܥܲܠ ܒܪܹܗ ܕܦܵܠܲܚ ܠܹܗ.

18: ܘܬܸܬ̣ܗܲܦܟ̇ܘܼܢ ܘܬܸܚܙܘܿܢ ܒܹܝܬ̣ ܙܲܕ̇ܝܼܩܹ̈ܐ ܠܥܵܘܿܠܹܐ: ܘܒܹܝܬ̣ ܕܲܦܠܲܚ̣ܘ ܠܐܲܠܵܗܵܐ ܠܐܲܝܠܹܝܢ ܕܠܵܐ ܦܲܠܚ̣ܘܼܗܝ.

ܩܹܦܵܠܹܐܘܿܢ: ܕ.

1: ܡܸܛܠ ܕܗܵܐ ܝܵܘ̈ܡܵܬ̣ܵܐ ܐܵܬܹ̇ܝܢ ܘܢܹܐܩܲܕ݂ ܐܲܝܟ݂ ܬܲܢܘܼܪܵܐ ܪܘܼܓ̣ܙܝ: ܘܢܸܗܘܘܿܢ ܟܠܗܘܿܢ ܥܵܘܿܠܹܐ ܘܟ݂ܠܗܘܿܢ ܥܵܒ̣ܕܲܝ̈ ܚܛܝܼܬ̣ܵܐ ܚܲܒ̇ܬ̣ܵܐ: ܘܢܵܘܩܸܕ݂ ܐܸܢܘܿܢ ܝܵܘܡܵܐ ܕܐܵܬܹ̇ܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ: ܘܠܵܐ ܢܸܫܒ̇ܘܿܩ ܠܗܘܿܢ ܥܸܩܵܪܵܐ ܘܥܵܘܦܵܐ.

2: ܘܬܸܕ݂ܢܲܚ ܠܟ݂ܘܿܢ ܠܕ݂ܵܚ̈ܠܲܝ ܫܹܡܝ ܫܸܡܫܵܐ ܕܙܲܕ̇ܝܼܩܘܼܬ̣ܵܐ: ܘܐܵܣܝܘܼܬ̣ܵܐ ܥܲܠ ܠܸܫܵܢܵܗ̇: ܘܬܸܦܩܘܼܢ ܘܲܬ̇ܕܲܝܨܘܼܢ ܐܲܝܟ݂ ܥܸܓ̣̈ܠܹܐ ܕܒܲܩܪܵܐ.

3: ܘܲܬ̇ܕܲܝܫܘܼܢ ܠܥܵܘܿܠܹܐ: ܡܸܛܠ ܕܢܸܗܘܘܿܢ ܩܸܛܡܵܐ ܬܚܹܝܬ̣ ܦܲܣܲܬ̣ ܪܸ̈ܓ̣ܠܲܝܟ̇ܘܿܢ: ܒܝܵܘܡܵܐ ܕܥܵܒܹ̇ܕ݂ ܐ̄ܢܵܐ ܐܵܡܲܪ ܡܵܪܝܵܐ ܚܲܝܠܬ̣ܵܢܵܐ.

4: ܐܸܬ̇ܕܲܟ݂ܪܘ ܢܵܡܘܿܣܹܗ ܕܡܘܼܫܹܐ ܥܲܒ̣ܕ̇ܝ ܕܦܲܩܸܕ̇ܬܹ̇ܗ ܒܚܘܿܪܝܼܒ̣: ܥܲܠ ܟܠܹܗ ܝܼܣܪܵܝܹܠ: ܦܘܼܩ̈ܕܵܢܹܐ ܘܕ݂ܝܼܢܹ̈ܐ.

5: ܗܵܐ ܡܫܲܕܲܪ ܐ̄ܢܵܐ ܠܟ݂ܘܿܢ ܠܐܹܠܝܼܵܐ ܢܒ̣ܝܼܵܐ: ܩܕ݂ܵܡ ܕܢܹܐܬܹܐ ܝܵܘܡܹܗ ܕܡܵܪܝܵܐ ܪܲܒܵܐ ܘܲܕ݂ܚܝܼܠܵܐ.

6: ܕܢܲܦܢܸܐ ܠܸܒܵܐ ܕܐܲܒ̣ܗܹ̈ܐ ܥܲܠ ܒܢܲـ̈ـܝܵܐ: ܘܠܸܒܵܐ ܕܲܒ̣ܢܲـ̈ـܝܵܐ ܥܲܠ ܐܲܒ̣ܵܗܲܝ̈ܗܘܿܢ: ܥܲܕ݂ܠܵܐ ܐܹܬܸܐ ܘܐܸܡܚܹܝܗ̇ ܠܐܲܪܥܵܐ ܠܐܲܒ̣ܕܵܢ.